В 26-й день

Свята́го великомученика Дими́трия Мирото́чца и воспоминание великаго и страшнаго трясе́ния

В той же день. Преподобнаго Фео́фила, архиепископа Новгородскаго, в Дальних пещерах почивающаго

В той же день. Святителя Анто́ния Вологодскаго

Аще хощет настоятель, творит бдение

НА МА́ЛОЙ ВЕЧЕ́РНИ

Стихиры на 4, глас 1:

Подо́бен: Небесных чино́в:

Иже основания всея земли колеба́яй Бог,/ стряса́яй Един морско́е ложе,/ я́ко Создатель всех/ избави ны праведнаго гнева трясе́ния/ Твоим милосердием, Человеколюбче,/ присно умоляем.

Фессалони́ка лику́ет о памяти твое́й/ и созывает вся окре́стныя гра́ды,/ Димитрие треблаженне,/ совершити твое́ светоносное торжество./ С ни́миже, сошедшеся, и мы/ пе́сненно похваляем подвиги твоя.

Приидите, ве́рнии, сошедшеся,/ похва́лим Христова ору́жника/ и до́бляго светильника Димитрия,/ все вражие насилие поправша,/ сему вопиюще верою:/ о нас Христу, мучениче, моли́ся.

Сла́ва, глас 6:

Днесь вселенная вся страстоно́сца просвещается зарями/ и Божия Церковь, цветы́ украша́ема, Димитрие, вопие́т ти:/ угодниче Христов и предстателю тепле́йший,/ не престай моли́ти о рабе́х твоих.

И ны́не, Богоро́дичен: Богородице, Ты еси лоза́:

На стиховне стихиры, глас 2.

Подо́бен: Доме Евфрафов:

Имамы тя многих/ да́теля дарова́ний,/ угодниче Господень,/ исполняеши бо прошения,/ яже и́мамы всегда.

Стих: Праведник, я́ко финикс, процвете́т,/ я́ко кедр, иже в Лива́не, умно́жится.

Пе́ния сладкая,/ страсте́й похвале́ния,/ благодатей возда́ния,/ предложе́ния, блаженне,/ приими́, Димитрие.

Стих: Насажде́ни в дому́ Господни,/ во дво́рех Бога нашего процвету́т.

Добро́та страда́льцев,/ благолепие мучеников,/ благоверных хранителю,/ приими́ ны́не похвалу́/ любовию славящих тя.

Сла́ва, и ны́не, Богоро́дичен, глас тойже:

Де́ло Боголепно:/ Дева по рождестве,/ Рожде́нное – Бог Слово,/ челове́чо естество́ имея/ и явля́я вещественная.

Тропа́рь, глас 3:

Вели́ка обре́те в беда́х/ тя поборника вселенная, страстотерпче,/ язы́ки побеждающа./ Я́коже убо Ли́еву низложи́л еси горды́ню,/ и на по́двиг дерзновенна сотвори́в Не́стора,/ та́ко, свя́те Дими́трие,/ Христу Бо́гу молися/ даровати нам велию милость.

Сла́ва, и ны́не, трясе́ния, глас 8:

Призира́яй на землю и творяй ю трясти́ся,/ избави ны страшнаго тру́са преще́ния, Христе Боже наш,/ и низпосли́ нам богатыя милости Твоя моли́твами Богоро́дицы, и спаси́ ны.

НА ВЕЛИ́ЦЕЙ ВЕЧЕ́РНИ

Блажен муж: 1-й антифон.

На Го́споди, воззвах: стихиры на 8, глас 2:

Подо́бен: Егда́ от Дре́ва:

Све́тиши отечеству твое́му всегда, славный Димитрие мучениче,/ я́коже звезда светлая,/ покрываеши бо присно сие от па́губы врагов/ и избавляеши озлобления и бу́ри всякия;/ темже радостно приносит, летнюю память, блаженне, совершая,/ верою же и любовию поя Господа, тя прославльшаго.

Мучениче страстоте́рпче Христов,/ чудесы́ све́тиши миру,/ я́коже солнце, свя́те Димитрие./ Темже в памяти твое́й наслаждаемся вси твоих чудес, блаженне,/ изря́дная торжествующе верою./ Дерзновение убо имея,/ моли́ся ко Господу спасти от тли и скорбе́й рабы́ твоя.

Ко́пиями прободе́н в ре́бра,/ пробо́дшаго ра́ди Спаса на Кресте́ ре́бра;/ Того бо уязвле́нием/ любовию поревновал еси, страстотерпче Димитрие,/ явля́я всем непобедимое свидетельства твоего./ Темже и уя́звлен гонитель низпаде́,/ прие́м твоего иску́с испове́дания, страдальче Христов.

Ины стихиры, глас 8.

Подо́бен: О, преславнаго чудесе́:

О, преславнаго чудесе́!/ на Небеси́ и на земли́ радость/ днесь в памяти возсия Димитрия мученика./ От Ангел хвала́ми венчается/ и от человек пения приемлет./ О, ка́ко пострада́!/ Како до́бре подвиза́ся!/ Имже враг паде́ лукавый,/ Христу побе́ждшу того.

О, пресла́внаго чудесе́!/ чудес светлостьми́, солнца светле́йше,/ присно Димитрий све́тит конце́м,/ от невечерняго Света облистаемый/ и в незаходи́мем Свете красу́яся./ Eгoже сия́ньми о́блацы отгна́ни быша ва́рварстии,/ неду́зи прогна́шася/ и демони победи́шася.

О, преславнаго чудесе́!/ Христа ради прободе́н треблаженный Димитрий,/ ко враго́м всегда яви́ся оружие обоюдуо́строе,/ пожина́я врагов выше́ния/ и низлагая де́монская свере́пства./ Емуже возопи́им:/ святый Димитрие, покрый ны,/ верно почита́ющия тя от любве́ всегда.

Сла́ва, глас 6. Византи́ево:

Днесь созывает нас страстотерпца всемирное торжество./ Прииди́те убо, празднолю́бцы,/ све́тло пра́зднуим память его, глаголюще:/ радуйся, иже ризу нечестия раздра́в верою,/ мужеством же ду́ха себе обложи́в./ Радуйся, упраздни́вый козноде́йства чужда́го,/ крепостию, данною тебе́ от Единаго Бога./ Радуйся, иже прободе́нными удесы́/ блаженную стра́сть Христову духо́вне нам возживописа́в./ Eгoже моли, страдальцев удобрение Димитрие,/ избавитися нам видимых и невидимых враг/ и спастися душа́м нашим.

И ны́не, Богоро́дичен: Кто Тебе́ не ублажи́т:

Вход. Прокимен дне.

Пророчества Иса́иина чтение (главы 63, 64):

Обрати́ся от небесе́, Го́споди, и виждь от дому свята́го Твоего и славы Твоея́:/ где есть ревность Твоя и крепость Твоя?/ Где есть множество милости Твоея́ и щедрот Твоих, я́ко терпел еси нам, Го́споди?/ Ты бо еси Отец наш, я́ко Авраам не уве́де нас, и Израиль не позна́ нас,/ но Ты, Го́споди, Отец наш, избави ны, я́ко изнача́ла Имя твое́ на нас есть./ Почто́ уклонил еси нас, Го́споди, заблуди́ти от пути Твоего?/ Ожесточил еси сердца́ на́ша, еже не боятися Тебе́?/ Обрати́ся раб Твоих ра́ди, племе́н ра́ди наследия Твоего./ Да пома́ле насле́дствим го́ру святую Твою́./ Проти́вницы наши попра́ша святыню Твою́. Быхом я́ко от начала, егда не владе́л еси нами, ниже́ назва́ся Имя Твое́ на нас./ Аще отверзеши небо, тре́пет прии́мут от Тебе́ го́ры и раста́ются, я́ко воск от лица огня та́ет./ И попали́т огнь супостаты Твоя, и явле́но будет Имя Твое́ проти́вным Твоим./ От лица Твоего язы́цы возмяту́тся. Егда́ сотвори́ши славная, тре́пет прии́мут от Тебе́ го́ры./ От века не слы́шахом, ниже́ очи наши ви́деша Бога, разве Тебе́, и дела́ Твоя истинна, и сотвори́ши терпя́щым Тя милость./ Сря́щет бо милость творя́щыя правду, и пути Твои помя́нут./ И ны́не, Го́споди, Отец наш Ты еси, мы же бре́ние; и Ты Создатель наш, и дела́ рук Твоих вси мы./ Не прогне́вайся на ны, Го́споди, зело́, и да не помяне́ши во вре́мя грехов наших;/ и ны́не при́зри, Го́споди, я́ко людие Твои вси мы.

Пророчества Иеремиина чтение (глава 2):

Сия́ глаголет Госпо́дь:/ помяну́х милость юности твоея́ и любовь совершенства твоего, еже последовати тебе́ Святому Израилеву;/ глаголет Господь Святый Израилев:/ Господу начаток рождений его, вси снеда́ющии его прегрешат, злая приидут на ты́я;/ глаголет Госпо́дь: услышите слово Господне, доме Иаковль и все отечество до́му Израилева./ Сия глаголет Госпо́дь: кое обрето́ша отцы ваши во Мне прегрешение,/ я́ко отступи́ша далече от Мене, и ходи́ша в след суе́тных и осуети́шася./ И не реко́ша; где есть Господь, возведы́й нас из земли египетския/ и путеводивый нас в пусты́ни, в земли́ сухой и нехо́дней, в земли́ безводней и непло́дней,/ и в се́ни смертней, в земли́, по нейже не про́йде когда муж, ниже́ вселися сын челове́чь та́мо./ И возведох вы на Карми́л, еже я́сти вам плоды́ его и блага́я его; и внидо́сте и оскверни́сте землю Мою и наследие Мое положи́сте в мерзость./ Иере́е не ре́ша: где есть Господь; и держащиися закона не ве́деша Мя;/ и пастырие нече́ствоваху в Мя; и пророцы проро́чествоваху Ваа́лом и в след неполе́зных ходи́ша./ Сего ра́ди еще возсужду́ся к вам, глаголет Господь, и к сыно́м сыно́в ваших возсужду́ся. Прейди́те во о́стровы Хеттии́м, и уви́дите, и в Кида́р посли́те, и уразумейте вельми́, и увидите, аще бя́ху такова́я./ Аще изменя́т язы́цы бо́ги своя, и сии не суть бо́зи. Людие же Мои премени́ша славу его, от неяже не приимут пользы./ Ужасе́ся небо о сем и вострепета́ на мно́зе зело́,/ глаголет Господь.

Прему́дрости Соломоновы чтение (глава 4):

Праведник, аще постигнет скончатися: (зри страницу 792).

На литии стихира храма и свята́го стихиры самогласны, глас 1. Георгия Сикелиота:

Веселися в Господе, граде Фессалони́ки,/ радуйся и ликуй верою светлооде́явся,/ Димитрия всеславнаго страдальца/ и свидетеля Истины в не́дрех имея, я́ко сокровище;/ наслади́ся чуде́с, исцеления зря,/ и виждь низлага́юща иноплеме́нников де́рзости,/ и благодарно Спасу возопи́й:/ Го́споди, сла́ва Тебе́.

Анатолия:

Пе́сней красото́ю настоящий уясни́м день/ и возгласи́м мученика подвиги,/ предлежи́т бо нам во благохвале́ние великий Димитрий./ Ибо де́монская нахождения му́жески погуби́в, к три́знищу усердно прии́де,/ и победительная славно отне́с,/ Спасу мо́лится спастися душа́м нашим.

Глас 2. Германово:

В премирная селения дух твой, Димитрие мучениче мудре,/ Христос Бог положи́ непоро́чно,/ ты бо Троицы был еси побо́рник/ и в три́знищи мужески пострадал еси, я́ко адама́нт тве́рдый,/ прободе́н же быв в ребра нетленная твоя, всече́стне,/ подо́бяся на Древе Прободе́нному на спасение всего мира,/ чудес приял еси действо, человеком подай исцеления оби́льно./ Темже твое́ днесь успение пра́зднуем по достоя́нию,/ сла́вяще тя просла́вльшаго Господа.

Сла́ва, глас 5:

Подо́бен: Востру́бим:

Стеце́мся верою и любовию,/ возопии́м пра́зднственная и воспле́щем руками вси/ в настоящее торжество первоначальника нашего,/ воинства Небесная да веселятся,/ и пробо́дшагося за Прободе́ннаго копие́м Царя Господа,/ и горды́ню Ли́еву низложившаго дерзостне./ Да чудя́тся земля же и море/ светлаго светильника преславным зна́мением./ По до́лгу да восхвалят ю́нии юности обузда́теля,/ в старости жезл, в беда́х предста́теля,/ ни́щии обогати́теля, во благоше́ствии строителя,/ спобо́рника во́ини/ и в пучи́не спла́вателя,/ со всеми своего тве́рдаго побо́рника, гра́де Фессалоники,/ моля́щеся си́це, рцем:/ преславне Димитрие, предвари́ и изми́ ны от всякия ну́жды/ и спаси́ рабы́ твоя моли́твами твоими.

И ны́не, Богоро́дичен, глас тойже.

Творение Германа Патриарха:

Востру́бим трубо́ю пе́сней,/ прекло́ншися бо свыше, Всецари́ца Мати Дева/ благослове́ньми венчава́ет воспева́ющия Ю./ Ве́рнии людие да стеку́тся,/ и Царице да восплещут в песнех, Царя рождшей,/ смертию одержимыя пе́рве разрешити человеколю́бно Благоволи́вшаго./ Па́стырие и учи́телие,/ добраго Пастыря, Пречистую Матерь, сошедшеся, восхва́лим:/ све́щник златоза́рный, светоно́сный о́блак,/ небе́с Простра́ннейшую,/ одушевле́нный киво́т, огнезра́чный Влады́чень Престо́л,/ манноприе́мную злату́ю ста́мну,/ заключе́нную Слова дверь,/ всех христиан прибе́жище./ Пе́сньми Богоглаго́ливыми похваля́юще, си́це рцем:/ Пала́то Слова, сподо́би смире́нныя ны Небе́снаго Царствия,/ ничто́же бо невозможно хода́тайству Твое́му.

На стиховне стихиры самогласны, трясе́ния, глас 2.

Симеона Дивногорца:

Земли́ смуща́емей гнева Твоего стра́хом,/ хо́лми и го́ры трясу́тся, Го́споди,/ но благоутро́бия о́ком на ны призре́в,/ не я́ростию Твое́ю прогне́вайся на ны,/ но умилосе́рдився на дела́ рук Твоих,/ стра́шнаго ны преще́ния тру́са свободи́,/ я́ко Благ и Человеколю́бец.

Стих, глас 6: Призира́яй на землю/ и творяй ю трясти́ся.

Стра́шен еси, Го́споди,/ и кто стерпи́т праведнаго Твоего гнева,/ или кто Тя умо́лит, или кто укроти́т, Благий,/ о лю́дех согрешивших и отча́явшихся? Небеснии чи́ни, Ангели, Нача́ла и Вла́сти,/ Престо́ли, Госпо́дства, Херувими и Серафими/ о нас Тебе́ вопию́т:/ Свят, Свят, Свят еси, Го́споди,/ дел рук Твоих не пре́зри, Блаже,/ за утробы милости спаси́ град бе́дствующий.

Стих: Стрясл еси землю/ и смути́л еси ю.

Ниневи́тяне согрешений ра́ди/ тру́сом преще́ния поги́бель слы́шаху,/ в сре́дственном же зна́мении ки́та,/ чрез воста́ние Ионы, покаяние умоляет./ Но я́ко о́ныя вопль людей Твоих со младенцы и скоты́, уще́дрив, прия́л еси,/ и нас, наказу́емыя,/ тридне́внаго ра́ди Воста́ния пощади́ и помилуй.

Сла́ва, глас 8. Анатолия:

Имеет убо Божественнейшая твоя душа́ и непоро́чная,/ приснопа́мятне Димитрие,/ Небесный Иерусалим жили́ще,/ егoже сте́ны пречистыма рука́ма Невидимаго Бога живописа́шася./ И́мать же всечестно́е, и многострада́льнейшее твое́ тело/ преизря́дный сей храм на земли,/ сокро́вище некра́домое чудес и неду́гов врачевство́,/ иде́же притека́юще, цельбы́ почерпа́ем./ Соблюди́, всехвальне, тя величающий град/ от противных прираже́ний,/ дерзнове́ние я́ко име́я ко Христу, тя прославльшему.

И ны́не, Богоро́дичен:Безневестная Дево:

На благословении хле́бов: тропа́рь Димитрия два́жды и Богородице Дево: единожды.

НА У́ТРЕНИ

На Бог Господь: тропа́рь трясения, два́жды.

Сла́ва, Димитрия, И ны́не, трясения.

По 1-м стихословии седален, глас 4.

Подо́бен: Явился еси днесь:

Димитрия днесь страстоте́рпца/ праздник соверша́ем благочестивому́дренно,/ я́ко Христу непрестанно молящася/ всем дати мир и милость.

Сла́ва, и ны́не, Богоро́дичен:;

Теплое заступление су́щим в беда́х/ и Помощницу нашу, и к Бо́гу премене́ние,/ Еюже тли изба́вихомся,/ Богородицу ве́рнии ублажаем.

По 2-м стихословии седален, глас 4.

Подо́бен: Скоро предвари:

Па́мять твоя, сла́вне мучениче Димитрие,/ уясни́ днесь Церковь Христо́ву/ и вся собра́ пе́сньми достойно восхвали́ти тя, Богомудре,/ я́ко и́стинно во́ина и врагов потреби́теля./ Темже мольба́ми твои́ми изба́ви ны от искуше́ний.

Сла́ва, и ны́не, Богоро́дичен:

Пое́м Тя, Богоневесто, Мати Христа Бога,/ сла́вяще Рождество Твое́ непости́жное,/ и́мже изба́вихомся от ле́сти диа́воли и вся́ческих бед, Владычице Богородице,/ и ве́рно взываем:/ помилуй ста́до Твое́, Едина Всепетая.

По полиелеи седален, глас 8.

Подо́бен: Премудрости:

Сияния чуде́с, я́ко лучи, облиста́еши/ и вся просвещаеши мира концы́, я́ко звезда пресветлая,/ и ве́село благово́нствуеши, я́коже други́й рай,/ и ду́ши весели́ши, и уставля́еши неду́ги:/ темже тя, всеблаженне, по до́лгу пое́м/ и любовию почита́ем честну́ю память твою́, страстотерпче Димитрие,/ моли Христа Бога согрешений оставление/ даровати чту́щим любо́вию святую память твою́.

Сла́ва, и ны́не, Богоро́дичен:

Я́ко Деву и Едину в жена́х,/ Тя, безсе́менно рождшую Бога плотию,/ вси блажи́м ро́ди челове́честии./ Огнь бо всели́ся в Тя Божества́/ и, я́ко Младенца, дои́ши Зижди́теля и Господа./ Тем, Ангельский и человеческий род,/ достойно славим пресвято́е Рождество Твое́ и согла́сно вопием Ти:/ моли́ Христа Бога согрешений оставле́ние даровати/ покланяющимся верою пресвятому Рождеству Твое́му.

Степенна, 1-й антифон 4-го гласа. Прокимен, глас 4: Дивен Бог во святых Своих, Бог Израилев. Стих: Святым, иже суть на земли Его: Вся́кое дыхание: Евангелие Матфея, зачало 36.

По 50-м псалме стихира, глас 6:

Днесь созыва́ет нас страстотерпца всеми́рное торжество́./ Прииди́те убо, празднолю́бцы,/ све́тло пра́зднуим память его, глаголюще:/ радуйся, ри́зу нече́стия раздра́в верою,/ му́жеством же ду́ха себе́ обложи́в./ Радуйся, упраздни́вый козноде́йства чужда́го,/ крепостию да́нною тебе́ от Единаго Бога./ Радуйся, иже прободе́нными удесы́/ блаженную страсть Христову духо́вне нам возживописа́в./ Eгoже моли́, страдальцев удобре́ние Димитрие,/ изба́витися нам видимых и невидимых враг/ и спасти́ся душа́м нашим.

Канон трясения, со ирмосо́м на 6, глас 6.

Егoже краегране́сие: О Христе, земли колебание уста́ви вскоре. Иосиф.

Песнь 1

Ирмо́с:Яко по су́ху пешеше́ствовав Израиль,/ по бе́здне стопа́ми,/ гони́теля фарао́на/ ви́дя потопля́ема,/ Бо́гу победную песнь, пои́м, вопия́ше.

Я́ко страшен гнев Твой,/ от негoже нас избавил еси, Го́споди,/ не погре́б в земли́ все движе́ние наше./ Тем благодарственно Тя при́сно сла́вим.

Ра́дуяся нашему всегда всеконе́чному исправле́нию, Владыко,/ я́коже лист худ, коле́блеши всю землю,/ в страх Твой ве́рный утверждая, Го́споди.

Изба́ви тру́са тяжча́йшаго вся ны/ и не даждь, Го́споди, поги́бнути всеконе́чно насле́дию Твое́му,/ многими прогне́вавшему злы́ми Твое́ долготерпение.

Богоро́дичен:

Ра́бски Тебе́ вопие́м,/ Мати Божия, обы́чныя милости Твоя на град и люди милостивно показу́ющи,/ тру́са тяжча́йшаго и тли нас измени.

И свята́го два канона, на 8.

Первый канон, глас 4, егoже краегране́сие: Добропобе́дному приглаго́лю Дими́трию. Феофа́ново.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ древний пешеше́ствовав Изра́иль,/ крестообра́зныма Моисе́овыма рука́ма/ Амали́кову силу в пусты́ни победи́л есть.

Божественным муче́ния венце́м увязе́н,/ при Бозе лику́еши,/ блиста́нии отону́дными сияя и просвещения исполняем,/ великомучениче досточу́дне.

Я́ко су́ща Истины свидетеля,/ и да́же до кро́ве подви́гшася, блаженне, терпели́вно;/ тве́рдо же противле́ние к мучи́телем показа́вша,/ тя Владыка прия́т.

Зло́бы обрета́теля низложи́л еси на землю, Димитрие,/ мученическим твоим копие́м убив,/ Божественною бла́гостию, па́че ума́ силою, на сие, блаженне, укрепля́ем.

Богоро́дичен:

Безма́терен я́коже Бог пе́рвее Сый,/ бысть еже по нам Безотчий из Тебе́, Богородице Всепетая,/ плоть прие́м по единению,/ еже па́че сло́ва и разума.

Други́й канон, глас 8.

Егoже краегране́сие: Мира честву́ю благодать Димитрия. Георгий Ски́лица.

Песнь 1

Ирмо́с: Колесницегони́теля фараоня погрузи́,/ чудотворя́й иногда,/ Моисейский жезл, крестообра́зно порази́в/ и раздели́в море,/ Изра́иля же беглеца́, пешехо́дца, спасе́,/ песнь Богови воспева́юща.

Мира благово́нна и че́стна, Димитрие,/ отве́рзеный источниче,/ страсте́й скве́рны сердце мое омы́й/ и, добродетелей дея́нием благово́ние мя показав Христово,/ ум мой облагода́тстви,/ благодати твоя Божественныя пе́ти.

Воды́ живы́я ре́ки/ истека́ти от чрева верных,/ Слово Божие глаголет./ Темже твоего проливаются мира исто́чницы приснотеку́щии,/ ихже струи́ веселят Божий град,/ славящий мученическое дерзновение твое́.

Жезл убо дре́вле Моисеев,/ уда́рив камень в земли́ пусты́нней,/ отве́рзе струи́ рек многоте́чныя;/ тело же твое́, Димитрие, прободе́нное копие́м,/ мира источник показа́,/ новаго Израиля прохлажда́ющее.

Яже убо и́маши воздая́ния, Димитрие,/ мученических твоих язв,/ ниже́ око ви́де, ниже́ ухо слы́ша;/ ны́не же мира море, воздаяния чистоты́ проливаеши мира концем,/ страсти душ очищающее.

Богоро́дичен:

Пренескве́рно приятелище, Всечистая,/ Слово обре́т Тя Божие,/ в Твоя всели́ся ложесна́:/ и еже из Тебе́ прия́тие пома́зав Своим Божество́м,/ Един про́йде от двою́,/ и истоще́нное миро нарече́ся,/ Христос бо Бог же и Человек.

Катава́сия: Отве́рзу уста моя:

Песнь 3

Ирмо́с: Несть свят,/ я́коже Ты, Го́споди, Боже мой,/ вознесы́й рог верных Твоих, Блаже,/ и утверди́вый нас на ка́мени/ испове́дания Твоего.

Земля уязвля́ется, нам зле залежа́щим,/ и присно гнев Твой сподвиза́ющим на ны, Щедре Всецарю́,/ но пощади́, Владыко, рабы́ Твоя.

Стряс, Го́споди, землю, утверди́л еси па́ки,/ наказу́я и обращая не́мощь нашу,/ утвержда́тися Твоим Божественным страхом хотя́, Преблаги́й.

Рождшаго смерть горькую,/ и тру́сы тяжча́йшия, и я́звы нестерпи́мыя,/ греха́, братие, убежим/ и Бо́гу покаяния о́бразы угоди́м.

Богоро́дичен:

Еди́на су́щи Блага́я,/ Преблаго́е Слово умоли́ приле́жно,/ настоящаго тру́са всем избавитися и гнева,/ Богородице Чистая, мо́лимся.

Ин

Ирмо́с: Весели́тся о Тебе́ Церковь Твоя, Христе, зову́щи:/ Ты моя крепость, Го́споди,/ и прибе́жище, и утверждение.

Вмени́ся в ничтоже мучителей от Тебе́ повеление;/ Слово бо Божие па́че всех, страстотерпче,/ предче́ствовал еси́.

Све́щник светови́ден муче́ния в ски́нии был еси,/ Божественным Светом сия́ющ,/ мучениче страстотерпче Димитрие.

Врачева́ний тя источник священный и ди́вный,/ град твой и сокровище некра́домо стяжа́в,/ всяким веселием обогати́ся.

Богоро́дичен:

Врачу́я образ истлевший земны́х, Пречистая,/ сим из Тебе́ облачи́тся,/ пребы́в я́коже бе Человеколю́бец.

Ин

Ирмо́с: Небе́снаго кру́га Верхотво́рче Го́споди,/ и Церкве Зижди́телю,/ Ты мене утверди́ в любви Твое́й,/ желаний кра́ю, верных утверждение,/ Едине Человеколюбче.

Родився с Небес от Бога,/ был еси Боже́ственных благ насле́дник,/ сын нарица́емь, снасле́дник Христов,/ царствуеши же с Ним,/ миро бо о́браз сего, Димитрие.

Вкорени́вся, я́коже дре́во Давидски, славне,/ при исхо́дищих вод,/ вели́к воздал еси мучения плод и ны́не источник показался еси мира,/ проходя́щ, земли́ концы.

Поче́рп благодать Христову,/ ребра́ с Кровию источившаго во́ду,/ кровь излия́л еси твою́, Его ради пробо́дся;/ и ны́не, я́ко во́ду, проливаеши сердца́м благовонное миро, Димитрие.

Богоро́дичен:

Свяще́ннии Твои сосу́ди душевнии, Пречистая,/ по́лны арома́т и мира Боже́ственнаго Ду́ха, нашедшаго на Тя,/ ибо Бога рождши, верныя измени́ла еси от злово́ния страсте́й.

Конда́к трясения, глас 6.

Подо́бен: еже о нас:

Избави тру́са тяжкаго всех нас, Го́споди,/ и язвы нестерпимыя грех ра́ди наших./ Пощади́, Го́споди, Православныя люди Твоя,/ яже стяжал еси Твое́ю Кровию, Владыко;/ и град не предаждь в погибель трусом страшным,/ иного бо, ра́зве Тебе́, Бога не ве́мы./ И воззови поющим:/ Аз есмь с вами, и никтоже на вы.

Седален мученика, глас 4.

Подо́бен: Удивися Иосиф:

Я́ко до́блему страдальцу/ и воину кре́пку Всецарю́ющаго Христа,/ взываем псало́мски:/ радуйся, мучеников украшение и ле́пота;/ радуйся, светлая Це́ркве звездо́/ и стено́, и пристанище прибега́ющих к тебе́,/ великомучениче славне Димитрие,/ тя поющия спасай/ от всякаго вре́да чужда́го и озлобле́ния вся.

Сла́ва, и ны́не, трясения, глас тойже.

Подо́бен: Вознесыйся:

Согрешившия Тебе́ много не презре́л еси,/ но, наказа́в, милостивно испра́вил еси;/ Божественным призира́нием Твоим потря́с землю, Владыко Долготерпели́ве,/ никакоже повреди́в вся рабы́ Твоя за милосердие многое./ Тем благодарственными Тя гла́сы славословим/ и со страхом славим.

Песнь 4

Ирмо́с: Христос моя сила,/ Бог и Господь,/ Честна́я Церковь/ боголепно поет, взывающи,/ от смы́сла чи́ста, о Господе пра́зднующи.

Коле́блеши, Го́споди, землю,/ хотяй страхом истинным всем нам, Владыко, утвержда́тися,/ коле́блемым прило́ги льсти́ваго борца́.

Божественным манове́нием Твоим коле́блеши всяческая/ и ужасаеши сердца́ на земли́ живущих, Владыко;/ праведнаго убо Твоего гнева ослаби, Го́споди, во́лны.

Ника́коже иму́щия во уме́ страха Твоего,/ устрашаеши двиза́нием всея́ земли, Едине Милостиве,/ но обычно на нас милости Твоя удиви́.

Богоро́дичен:

Храм Тя, Владычице, Божий ве́дяще,/ во святе́м храме Твое́м ру́ки умильныя подно́сим на моление;/ виждь озлобле́ние наше и подаждь помощь.

Ин

Ирмо́с: Вознесе́на Тя ви́девши Церковь на Кресте́,/ Солнце Праведное,/ ста в чи́не своем,/ достойно взывающи:/ сла́ва силе Твое́й, Го́споди.

Победившаго лжу нечестия,/ Божие Всевысочайшее ви́дев Слово,/ славою венча́ тя, Димитрие, пою́ща:/ сла́ва силе Твое́й, Го́споди.

На лесть победу возставив,/ победительный венец правды приял еси, Димитрие,/ зовя́ Зиждителю твое́му:/ сла́ва силе Твое́й, Го́споди.

Направляем дла́нию жизноно́сною,/ к пристанищем достигл еси тиша́йшим,/ иде́же, ны́не радуяся, зовеши, Димитрие:/ сла́ва силе Твое́й, Го́споди.

Богоро́дичен:

Я́ко тва́рей всех Свяще́ннейшая,/ Мати Бога быти Едина сподо́билася еси,/ Сего бо рождши,/ мир благодатию Богозна́ния просвети́ла еси.

Ин

Ирмо́с: Ты моя крепость, Го́споди,/ Ты моя и сила,/ Ты мой Бог, Ты мое ра́дование,/ не оставль недра Отча,/ и нашу нищету́ посети́в./ Тем с пророком Авваку́мом зову́ Ти:/ силе Твое́й сла́ва, Человеколюбче.

Скве́рну всяку отверг рождения банею порожде́ния,/ чистоту, явился еси, соблюдая да́же до кончины./ Темже Христос тебе́, Димитрие,/ естественную вла́гу претворя́ет в ми́ро,/ я́коже и во́ду в вино преложи́.

Я́коже огня естество всему преподае́тся,/ це́лу спасающ силу;/ тако твое́ миро, страдальче, всеми убо почерпа́ется,/ обаче же пребывает неума́лено./ Темже ны́не благоче́ствующии, покланя́ющеся, поем Бога,/ Иже благодать тебе́ даде́.

Кто слышаны Твоя хвалы́ сотвори́т, Христе Слове,/ ви́дя Твоя благодати, яже страдальцем Твоим по́дал еси;/ Димитрия бо се миро мученика,/ я́ко источник, убо истекает,/ благово́ние же дышет и разоряет зол омраче́ние.

Напая́ше убо источник, от земли восходящий,/ пе́рвее, не́же одождити все сея лице́,/ ты же сокрывся, мучениче, под зе́млю,/ источник явился еси благовонна мира, Димитрие;/ ко́пий бо множество отверзо́ша жи́лы/ и ны́не мира напоя́еши концы.

Богоро́дичен:

Невесту Божию Тя и Матерь ве́мы, Богородице,/ Тебе́ бо, я́ко миродохнове́нный ши́пок, обрет Слово Божие, цвету́щ во удо́ле смиреннем человечестве,/ возжеле́ Твоея́ добро́ты,/ из Тебе́ Плотоно́сец прошед, верныя облагово́нствоваше.

Песнь 5

Ирмо́с: Божиим светом Твоим, Блаже,/ утренюющих Ти ду́ши, любовию озари́, молюся,/ Тя ве́дети, Слове Божий,/ И́стиннаго Бога,/ от мрака греховнаго взыва́юща.

И ты, сердце, поколе́блися ны́не,/ ви́дя Божие прещение належащее, и возопий:/ пощади люди Твоя, Владыко Го́споди,/ и уста́ви праведный гнев Твой, Благоутробне.

Люди и град, яже Твое́ю кровию стяжал еси, Иисусе,/ не предаждь в погибель,/ во еже смущатися земли́ тру́сом страшным,/ лик апостол мо́лит Тя.

От путе́й Твоих, Владыко, правых/ нравом укло́ншеся развраще́нным,/ в негодова́ние преложихом Тя, Милостиваго и Непамятозло́бнаго,/ но милостив и щедр бу́ди Твоим рабо́м.

Богоро́дичен:

Ны́не по́мощи прии́де время,/ ны́не премене́нию потре́ба, Чистая,/ к Сыну Твое́му и Господу,/ я́ко да уще́дрит согре́шшия ны/ и належа́щаго гнева избавит.

Ин

Ирмо́с: Ты, Го́споди, мой/ свет в мир пришел еси,/ Свет Святый, обращаяй из мра́чна неве́дения/ верою воспева́ющия Тя.

Огнь любве́ Божественныя в се́рдцы прие́м,/ огнь угаси́л еси безбожнаго идолонеи́стовства,/ славне Димитрие.

Избавляя ны от бед, явися, Димитрие,/ моли́твами твоими покрывая/ верою и любовию восхваляющия тя.

Иже верою к твое́му усердно притекающе храму, Димитрие,/ неду́гов и страсте́й душетленных/ вскоре избавляются.

Богоро́дичен:

Слово Божие, Отцу Единосу́щное,/ Твой бывает, Богомати, па́че ума же и слова, Сын,/ Тебе́ Единосу́щен.

Ин

Ирмо́с: Вску́ю мя отри́нул еси/ от лица Твоего, Свете незаходимый,/ и покрыла мя есть чужда́я тьма, окаяннаго;/ но обрати ня и к свету заповедей Твоих/ пути моя напра́ви, молюся.

Был еси прия́телище с Небес Снизшедшаго за милость,/ я́коже дождя́ или капли, каплющия кро́тко,/ упои́л еси та́инственными даровании/ и ны́не из гроба мира источник то́чиши, Димитрие.

Страдальцем, я́коже закон, всякия мирски́я обнажи́вся любве,/ упита́лся еси, мучениче, елеем благодатей Духа./ Победив же тьмы нача́ла,/ мзду приял еси точи́ти миро сладково́нное, Димитрие.

Ши́пок явился еси, процветы́й внутрь злачника́ Господня, Димитрие,/ обагре́н кровию мучения и ранами сече́ний,/ и болезньми страда́льческими, и разжжением пе́щи,/ и ны́не миро источаеши приснотеку́щее.

Се па́ки зрится Боже́ственный ковчег храм мученика,/ идеже све́щник внутрь, гроб, нося́й миро и елей,/ егoже о́крест взыгра́им духовно,/ и, ликующе, восхва́лим великаго Димитрия.

Новый я́коже Илия, ревностию уя́звлен Христовы любве́,/ царя обличаеши и тебе́ самаго предаеши на смерть./ Обаче живе́ши, и еще мира источник показав гроб,/ я́коже скуде́льник елея неистоще́н.

Богоро́дичен:

Напису́ет Твое́, Дево, дре́вле та́инство,/ поя́ пра́отец Твой,/ Царе́вы Дще́ре Сла́ва вся внутрьу́ду,/ иже и Тя прославив, я́ко Блаженную человеком./ Радуйся, мира всего воззвание.

Песнь 6

Ирмо́с: Житейское море,/ воздвизаемое зря напа́стей бурею,/ к тихому пристанищу Твое́му прите́к, вопию́ Ти:/ возведи от тли живот мой,/ Многомилостиве.

Не иму́ще, Владыко,/ дерзновения молитися, смиреннии, высоте́ Твое́й,/ избранныя Ангелы Твоя в теплую подвиза́ем молитву./ Тех ра́ди гнева Твоего изми́ ны.

Ны́не позна́хом, Го́споди, я́ко восхотел еси нас,/ и никакоже покрыл еси под землю с согрешении лю́тыми/ многосогреши́вшия./ Тем Тя благодарно славим.

Повелеваеши колебатися основанием земли́,/ я́ко да мы престанем, смиреннни, колебатися/ добродетелей лучшаго стоя́ния/ и страхом Твоим, Слове, утвердимся.

Богоро́дичен:

Святая Богоневесто, недоуме́нныя ны́не люди уще́дри/ и ма́терними Твоими моли́твами,/ еже на ны Божие негодова́ние претвори вскоре, мо́лим Тя.

Ин

Ирмо́с: Пожру́ Ти со гласом хваления, Го́споди,/ Церковь вопие́т Ти,/ от бесо́вския крове очи́щшися,/ ради милости от ребр Твоих/ истекшею Кровию.

Согласно сошедшеся, пое́м славную и светоно́сную Твою́ память,/ и чудес полную,/ и дарований Свята́го и Честна́го, всеблаженне, Ду́ха.

Разреши́ моя плени́цы согрешений моли́твами твоими,/ я́ко бо непобедим мученик дерзновение и́маши ко Владыце,/ и буди ми прибежище и покров, Димитрие.

Богоро́дичен:

Чи́сту Тя посреде́ терния обре́т, я́ко чисте́йший крин/ и удо́льный цвет, о Богомати!/ Жених во утробу Твою́ Слово вселися.

Ин

Ирмо́с: Очисти мя, Спа́се,/ мно́га бо беззакония моя,/ и из глубины́ зол возведя́, молюся;/ к Тебе́ бо возопи́х, и услыши мя,/ Боже спасения моего.

Процвел еси духовно, я́коже ма́слина плодови́тая,/ и копиено́сными рука́ми ну́ждно изгнете́ся./ Верных же утеша́еши,/ миро ны́не точа́ из Божественнаго гро́ба твоего, Димитрие.

Пчелы́ о́бразом тебе́ сама́го/ делателя всякия показал еси Боготворныя доброде́тели,/ ду́шу, блаженне, непорочну, я́ко со́тову телеси́, соблюдая,/ и миро ны́не источаеши, услажда́ющее ду́ши.

Возлюбил еси от души́ Христа,/ и Сему́ последовал еси к миру благовония,/ и Сего причастился еси срастворением лу́чшим./ И ны́не мира струи́ то́чиши непреста́нныя, Димитрие.

Ка́пли страдальческих на землю крове́й твоих каплюще,/ благовония источник мира ту́ю соделаша./ И ны́не сие непрестанно/ почерпа́ющим источа́еши, Димитрие.

По́том твоих, мудре, крове́й облия́н,/ я́коже ин новый источник ре́чно,/ требующим богатно подаеши во исцеление твое́ миро,/ блаженне, усе́рдно приходящим.

Богоро́дичен:

Зряще златовидный света Све́щник неугаси́мый,/ множеством грехо́в ду́ши омрачи́вшии, присту́пим;/ дае́т бо просвещение/ и вся́кое отгоняет омраче́ние.

Конда́к мученика, глас 2:

Крове́й твоих струя́ми, Димитрие,/ Церковь Бог обагри́,/ да́вый тебе́ крепость непобедимую/ и соблюдая град твой невреди́м;/ того бо еси утверждение.

Икос:

Сего́ великаго вси воспои́м, сошедшеся верою,/ я́ко ору́жника Христова и мученика, Димитрия,/ в пе́снех и пениих совзыва́юще Владыце и Зиждителю вселенныя:/ избави ны тру́са и ну́жды, Человеколюбче,/ моли́твами Богоро́дицы и всех святых мучеников Твоих./ На Тя бо вси надеемся избавитися бед и скорбе́й,/ Ты бо еси наше утверждение.

Песнь 7

Ирмо́с: Росода́тельну убо пещь/ соде́ла Ангел/ преподобным отроко́м,/ халде́и же опаляющее веле́ние Божие мучителя увеща́ вопи́ти:/ благословен еси, Боже отец наших.

Препе́т еси, Го́споди Долготерпели́ве,/ я́ко не умори́л еси рабов Твоих тру́сом и колебанием страшным земли́,/ но устраши́л еси, ищай обратитися от зол, и жити всем нам.

Стенание от сердца воспу́стим и сле́зы пролием,/ я́ко да милостива Владыку обрящем Христа,/ сокрушити тру́сом вся ны за умножение грехо́в претя́ща нам.

Увы́, воззовем, и ру́це воспростре́м к Бо́гу Высочайшему,/ и престанем про́чее твори́ти злое;/ се Спас, негоду́я, колеблет всю землю, утвердити хотя ны.

Богоро́дичен:

При́зри, Чистая, и спаси́ вся поющия Тя,/ потреби́тися иму́щия во гневе Божии,/ и яростию великою и страшною ны́не нашедшаго преще́ния,/ за множества многих грехо́в наших.

Ин

Ирмо́с: В пещи́ Авраамстии о́троцы перси́дстей,/ любовию благочестия па́че,/ нежели пла́менем опаляеми, взываху:/ благословен еси в храме славы Твоея́, Го́споди.

Преукра́шен Божественною славою и благодатию,/ мучениче страстотерпче, сияеши световидно и просвещаеши зову́щия:/ благословен еси в храме славы Твоея́, Го́споди.

Я́ко багряни́цею, укра́шен твое́ю кровию, имея вместо ски́птра, славне, крест;/ со Христом царствуеши ны́не, мучениче Димитрие,/ благословен еси, зовы́й, в храме славы Твоея́, Го́споди.

Богоро́дичен:

Препросла́вленная, Просвеще́нная, Мати Дево,/ вся, чтущия Тя Всеистинную Богородицу, огради́;/ благословена Ты в жена́х, Всенепорочная Владычице.

Ин

Ирмо́с: Отроцы еврейстии в пещи́/ попра́ша пла́мень дерзновенно,/ и на ро́су огнь преложи́ша, вопиюще:/ благословен еси, Го́споди Боже, во веки.

Во́ду почерпсти́ Иса́ия жаждущим, Димитрие, предповелевает./ Аще бы видел твой гроб, возопи́л бы вся́ко:/ мира источнику приходи́те и почерпи́те спасение.

Земли́ убо поро́д был еси,/ вселился же еси в земли́ кротких,/ идеже вода сладости;/ еяже напився в сытость,/ мира источник присный ны́не, Димитрие, пролива́еши.

Возра́сл еси, я́ко розга́ в винограде,/ пребывая неотсе́чен Бо́гу и совокупле́н;/ и Сего исполнився ту́ка неизреченнаго,/ миро, я́ко струи́, всем ны́не, Димитрие, то́чиши.

О, новых твоих боре́ний! О, странных му́ченических страданий!/ твоя бо по́ты, за Него пролия́нныя, блаженне,/ Христос прии́м, источник мира тя показу́ет.

Струю́ мира твоего проливая,/ ве́лию пучи́ну простерл еси чудес,/ и душ, и телес неду́ги потопляеши,/ и напа́стей, Димитрие, всяку бурю успову́я.

Богоро́дичен:

Млеко́м питала еси, Дево,/ Плотоно́сца, Твоего Бога рожденнаго,/ я́ко да болезнь Адамову сущую во а́де облегчи́т,/ от древа сне́дша зна́ния, и заповеди преслу́шавша.

Песнь 8

Ирмо́с: Из пламене преподобным ро́су источи́л еси/ и праведнаго жертву водою попали́л еси;/ вся бо твори́ши, Христе, токмо еже хоте́ти./ Тя превозносим во вся веки.

Праведному Твое́му сему́ гневу, Человеколюбче,/ наше́дшу внезапно, смути́хомся/ и отча́янием всеконечным объя́хомся,/ негодова́вша на ны зряще Тебе́.

Возпростре́м ру́ки, ве́рнии,/ и о́чи к Единому Владыце, спасати могущему, зовуще:/ Христе, ярость Твою́ отврати от нас вскоре,/ Человеколюбец сый.

Ты́сящи Ангел, мучеников сословие,/ пророк и апостолов, преподобных, иерархов святый лик/ мо́лит Тя, Владыко:/ пощади́ люди Твоя смире́нныя.

Ве́дый, Ще́дре, не́мощь нашу,/ и удобопоползнове́нное всех и неиспра́вленное,/ ослаби гнев, и смущение ути́ши,/ Твое́ю милостию уще́дри мир.

Богоро́дичен:

Ми́лостивая Богородице,/ Ми́лостиваго рождшая Спаса,/ виждь озлобле́ние и стенание людей Твоих,/ и ускори́ умоли́ти, еже уще́дрити ны.

Ин

Ирмо́с: Ру́це распростер Дании́л,/ львов зия́ния в ро́ве затче́:/ о́гненную же силу угаси́ша, доброде́телию препоя́савшеся,/ благочестия рачи́тели/ о́троцы, взывающе:/ благословите вся дела Господня Господа.

Омрачи́л еси весь вражий гнев, славне,/ и, боре́ния неотъемлемою силою Христа облече́н/ и победоносец быв, мучениче Димитрие, вопиял еси:/ благословите вся дела Господня Господа.

Мучеников благостояние показа́в,/ мучеников благозвание, мучениче, наследовал еси;/ банею омывся святою,/ яже вторыми не оскверняется греховными прило́ги,/ копие́м пробода́ем, и зовы́й:/ благословите вся дела Господня Господа.

Чудес твоих множество, па́че ума дарова́ний,/ ихже тебе́ подаде́ Христос, всем показу́ет, славне,/ и благодать исцелений, яже па́че сло́ва,/ я́ве твою́ благодать пропове́дает нам, вопию́щим:/ благословите вся дела Господня Господа.

Богоро́дичен:

Едину во всех роде́х, Деву Матерь и Богородицу Чистую, песносло́вим:/ Та бо спасения нашего Хода́таица,/ я́ко мира Изба́вителя, Слово рождшая, Емуже вопием:/ благословите вся дела Господня Господа.

Ин

Ирмо́с: Седмери́цею пещь/ халде́йский мучи́тель,/ Богочести́вым неи́стовно разжже́,/ силою же лучшею, спасе́ны сия ви́дев,/ Творцу и Изба́вителю вопия́ше:/ о́троцы, благословите,/ священницы, воспойте,/ людие, превозносите во вся веки.

Да Бог явле́нна/ сотворит тя су́щим в мире, Димитрие,/ негаси́му свещу́ душевную сохра́нша,/ елеем дея́ний умаще́ну всегда,/ и, я́ко черто́га, тебе́ отверзо́шася две́ри,/ приснотеку́щ источник тя мира Божественнаго показу́ет,/ возме́здие чистоты́ сию́ дая́ благодать.

Не из крове́й, я́коже рече́ честно́е Евангелие,/ ниже́ из по́хоти пло́ти, Димитрие,/ Богом же родился еси,/ Воплощеннаго почита́я Бога;/ кровь же усердно Того ра́ди твою́ истощи́в,/ восприял еси свыше чудесную благодать,/ источа́еши Боже́ственное миро, ду́ши благоуха́яй.

Ты ле́ствица явился еси одушевленная,/ на земли́ убо утвержде́нная стопа́ми плоти,/ до Небес же дося́жущая;/ Богом бо обогати́лся еси, утвержденным, мучениче, в тебе́./ Столп же яви́вся,/ пома́зан елеем по́двигов мучения,/ и ны́не источаеши/ верою приступающим источник Божественнаго мира.

Тя реку́ прописа́ Божию наводне́ну,/ поя Давид пророчески, Димитрие;/ се бо неистоща́емо прихождение мира твоего./ Тем и множество рек, наводня́ющеся,/ гла́сы своя возвышают,/ руками же пле́щут/ в славу си́ми всеми прославльшаго тя Бога.

Господь Един Трисвяты́й,/ Ты, Боже Всемо́щнейше, Eгoже Богосло́вствуяй страдалец Димитрий в темни́це заключается,/ и с скорпи́ею чу́вственною зми́я умори́в мысленнаго,/ и гордыню Лиеву низложив чрез Не́стора Божественнаго,/ копие́м пробода́ется,/ и миро ны́не из гроба то́чит.

Богоро́дичен:

За Адама – Господь, за Еву – Ты, Всечистая,/ Гавриил же – за льстивнаго зми́я,/ Крест же – за древо, вертоград гроба – вместо Еде́ма,/ радуйся – вместо печали,/ копие́ – вместо пламеннаго оружия,/ и багряни́ца – вместо смоковнаго ли́ствия:/ Тя убо поем, Отроковице, я́ко всех вино́вну.

Песнь 9

Ирмо́с: Бога/ человеком невозможно видети,/ на Негoже не сме́ют чи́ни Ангельстии взира́ти:/ Тобою бо, Всечистая, явися человеком/ Слово Воплощенно,/ Eгoже величающе,/ с Небе́сными во́и,/ Тя ублажаем.

Се вси мы согрешихом,/ и страшно убо земля, не согре́шши, мучится;/ наказуя бо нас, Человеколюбец всю ту́ю коле́блет;/ прии́мем чувство/ и о спасении своем попеце́мся.

Часо́в и лет сый Господь,/ в едином мгновении о́ка восхотев сте́рти рабы́ Твоя,/ от многаго же благоутробия Твоего, Владыко, возбрани́лся еси./ Благодарим Тебе́, безответнии мы,/ Едине Человеколюбче.

Тру́са, меча́, горькаго пленения,/ и языческаго, Христе, нашествия,/ паде́ния, и гла́да, па́губы, и озлобле́ния всякаго ина́го, Щедре,/ избави град Твой и всяку страну́,/ верно песносло́вящую Тя.

Земля́ безъязы́чне вопие́т, стеня́щи:/ почто́ мя злыми оскверняете многими, вси человецы?/ вас бо Владыка щадя́,/ едину мене́ уязвля́ет./ Приими́те чувство и покаянием Бога уми́лостивите.

Богоро́дичен:

Тли в рождестве не прии́мши,/ тления, Дево, измени́ вся ны,/ и тру́са тяжча́йшаго, и ско́рби,/ утоляющи Владычнее негодова́ние/ Твоим матерним пременением, Богора́дованная.

Ин

Ирмо́с: Ка́мень нерукосе́чный/ от несеко́мыя горы́, Тебе́, Дево,/ краеуго́льный отсече́ся,/ Христос, совокупи́вый разстоя́щаяся естества;/ тем, веселящеся, Тя, Богородице, величаем.

Раздери́ у́зы прегрешений тя поющих, страстотерпче,/ уста́ви страсте́й прило́ги,/ молву́ разори ересе́й/ и напа́стей утиши́ бу́рю моли́твами твоими.

Направи к стезя́м пра́вым Небе́снаго Царствия/ священнейшую твою́ па́ству, венценосче мучениче Димитрие,/ на па́жить спаси́тельную, на место вечное.

Да венце́в славы и Небе́снаго Царствия получения/ поющим тя сего улучи́ти моли́, мучениче Димитрие,/ Жизнодавца Господа и Царя Сил.

Богоро́дичен:

Я́ко корень, источник и вину́ нетления Тя, Дево,/ вси ве́рнии, надеющеся, хвала́ми почитаем;/ Ты бо Ипоста́сное нам Безсмертие источи́ла еси.

Ин

Ирмо́с: Ужасе́ся о сем Небо/ и земли удиви́шася концы́,/ я́ко Бог явися человеком пло́тски,/ и чрево Твое́ бысть пространнейшее Небес;/ тем Тя, Богородицу,/ Ангелов и человек чиноначалия величают.

Прие́м твой алава́стр душевный, добродетелей Божественнаго мира испо́лнен,/ имея же Христа, прекло́нша тебе́, мучениче, главу́,/ я́ко упоко́ившася жити́я твоего све́тлостию чистоты́./ Тем ублажился еси и благодати испо́лнился еси, мироточи́ти мира конце́м.

Се ожидающих тя воздая́ний неизрече́нных светлая проображе́ния,/ се источник мира приснотеку́щаго, о страдальче!/ Бо́гу убо предстоя́ со дерзновением мученическим,/ во́инству нашему испроси́ на враги победу,/и мир стране неотъе́млем.

О́бразом Креста Победотво́рца/ победил еси Лиево суровство́,/ и победителя Нестора, и сострадальца поста́вив;/ и ны́не всяк язык ва́рварский рабо́тен покори́ православным,/ соде́йствуя, сво́инствуя, укрепляя,/ велича́яй земныя концы́ Димитрие.

Те́плою от сердца любовию/ к твое́му честно́му ковчегу прибегающия, мучениче Христов,/ миро проливающему река́ми,/ твоими моли́твами избави дел душетленных/ и пото́па страсте́й злосмра́дия;/ обоняния же покажи́ сия Господу благово́ннейша.

День радости духовныя совершаем, Димитрие,/ видяще мира твоего непрестанно точа́щ источник./ Ты же страсте́й омрачение разоря́я,/ я́ко Божественнаго исполнен света,/ я́ко во дне дава́й ходи́ти благообра́зно,/ Божий же ви́дети Свет неприступный.

Богоро́дичен:

Ты, Всечистая, злата́я голуби́ца еси,/ я́ко суче́ц ма́сличный, носящая Слово Божие,/ помазавшее плоть Свою елеем Божества́./ Eгoже в се́рдцы, я́ко ковчег, прие́м страдалец,/ из гроба миро то́чит, и умащает верных ли́ца.

Светилен.

Подо́бен: Свете неизме́нный:

Крестом вооружи́л еси Нестора,/ чрез о́наго Ли́еву разорив гордыню, Димитрие,/ на три́знищи, я́коже Христос, отверзаеши копие́м ре́бра твоя,/ и́миже стадо твое́ храни.

Сла́ва, и ны́не:

Го́споди, призира́яй на землю с небесе́/ и творя́й всю трясти́ся,/ избави ны от тру́са Богоро́дицы моли́твами,/ Юже даровал еси христианом Предста́тельницу.

На хвалитех стихиры мученика, на 6, глас 4.

Подо́бен: Я́ко до́бля:

Прободе́н быв, борца́ твоими ко́пиями уязви́л еси/ и ме́ртва сотворил еси, и неде́йственна,/ егoже зло́бы, Димитрие, нас избави,/ кре́пки на стра́сти му́чащия всегда содева́я священными твоими моли́твами,/ Божественным страхом умиля́я сердца́/ и ду́ши на́ша, свя́те.

Реку́ тя, испо́лнену вод духовных, ве́дяще, свя́те,/ молим, иста́явшия ду́ши на́ша страсте́й преступле́ньми/ милостию твое́ю многою свяще́нно ороси́,/ и омый су́щия в скве́рне,/ и премногих избави бед и вечнаго мучения.

Я́ко звезда́ светле́йшая, на земли показался еси,/ чудес сияньми подсолнечную просвеща́еши всегда, Димитрие славне,/ мглы омраче́ния отгони́ моли́твами твоими душ наших,/ и неду́ги исцели от любве совершающих твою́ память,/ сла́ва мучеников и похвала.

И́ны стихиры, глас 5.

Подо́бен: Радуйся, постников:

Прииди́, мучениче Христов, к нам,/ твоего требующим милостивнаго посеще́ния,/ и избави озло́бленны мучи́тельскими преще́нии и лютаго неи́стовства ерети́ческаго./ От нихже, я́ко пле́нницы и на́зи, гони́ми есмы́,/ от места на место часто преходяще, и заблуждающе в верте́пех и гора́х./ Уще́дри убо, прехвальне, и даждь нам осла́бу,/ утоли бурю и угаси́, еже на ны, негодова́ние,/ Бога моля́, подающаго миру велию милость.

Стена́ тве́рдая нам,/ плене́ния вражия не убоявся, дан еси,/ варварская нашествия упражня́я и неду́ги утоляя,/ степе́нь неразруши́мый, и основание необори́мое,/ и градоде́ржец, насели́тель и поборник был еси твое́му граду, Димитрие;/ егoже и ны́не, всеблаженне, лю́те бедствующаго и обтяже́нна окая́нне,/ твоими моли́твами спаси́,/ Христа моля́, подающаго миру велию милость.

Вся́ку добродетель восприи́м, страстоте́рпческий лик яви́ся,/ отону́дуже нетленныя и блаженныя жизни наслаждение достойне насле́дова./ В немже досточу́дне украшаем, Димитрие,/ и подражанием Христовым почита́яся,/ и хваля́ся ра́венством копия́,/ проси́ прилежнее/ нас, почитающих тя, избавити от страсте́й и лю́тых обстояний,/ те́пле моля́ Подающаго миру велию милость.

Сла́ва, глас 4.

Самогласен. Андрея Иеросолими́та:

Ко́пиями наследовавшаго Спасовых ребр благодать,/ прободенных копие́м,/ из нихже нам источает Спас жизни и нетления во́ды,/ Димитрия почти́м, премудраго во учениих и вене́чника в мученицех,/ кровию скончавшаго страдания тече́ние/ и чудесы́ просиявша всей вселенней,/ ревни́теля Владычня и ми́лостива нищелюбца,/ во многих и мно́гащи беда́х лю́тых фессало́няном предстателя./ Eгoже и ле́тнюю память почитающе,/ славим Христа Бога,/ де́йствующа его ра́ди всем исцеления.

И ны́не, Богоро́дичен:

Избави ны от нужд наших, Мати Христа Бога,/ рождшая всех Творца,/ да вси зове́м Ти:/ радуйся, едино Предста́тельство душ наших.

Славословие великое. И отпуст.

На Литургии: Блаженны от канона трясения, песнь 3-я, на 4: и свята́го песнь 6-я, на 4. Прокимен, глас 6: Спаси́, Го́споди, люди Твоя и благослови достояние Твое́. Стих: К Тебе́, Го́споди, воззову, Боже мой: И свята́го, глас 7: Возвеселится праведник о Господе и уповает на Него. Апостол трясе́ния, к Евреем, зачало 331, от полу́. Братие, егoже любит Господь, наказует: И свята́го Апостол, к Тимофею, зачало 292. Аллилуиа, глас 4: Боже, отринул ны еси: Стих: Стрясл еси землю и смутил еси ю. И свята́го: Праведник, я́ко финикс, процветет: Евангелие трясения, Матфея зачало 27. И свята́го, Иоанна, зачало 52. Причастен: Хвалите Господа с небес: Другий: В память вечную:

ЗРИ Подобает ведати: Аще случится великомученика Димитрия Солунскаго и трясения в неделю.

В субботу вечера на малой вечерни стихиры воскресны и Богоро́дицы по обы́чаю. На велицей вечерни по обычной кафизме На Го́споди, воззвах: стихиры воскресны 3, и трясения 3 (писаны на велицей вечерни, на стиховне), и Димитрия 4. Сла́ва, Димитрия; И ны́не, Богоро́дичен 1-й, гласа. Прокимен дне. Чтения 3. На литии стихира храма и самогласны стихиры свята́го. Сла́ва, свята́го; И ны́не, Богоро́дичен. На стиховне стихиры воскресны; Сла́ва, Димитрия; И ны́не, Богоро́дичен по гласу свята́го. На благословении хле́бов тропа́рь: Богородице Дево: два́жды и Димитрия, единожды. (Аще же несть бдения. По Отче наш: тропа́рь воскресен: Сла́ва, Димитрия; И ны́не, трясения. На повечерии по Достойне и по Трисвятом, конда́к Димитрия: Сла́ва, и ны́не, трясения.)

На у́трени: На Бог Госпо́дь: тропа́рь, воскресен, два́жды; Сла́ва, Димитрия; И ны́не, трясения. По кафизмах седальны воскресны и Богородичны их. Таже полиелей. И тропари, Ангельский собор: Ипакои гласа; И седальны Димитрия, оба по единожды без Богородичнов; Сла́ва, седален, иже по полиелеи; И ны́не, Богоро́дичен его. Степенна и прокимен гласа. Евангелие воскресно. Воскресение Христово: Псалом 50, стихира воскресна. Канон воскресен со ирмо́сом на 4, и трясения на 4, и Димитрия на 6. Катавасия: Отверзу уста моя: По 3-й песни конда́к Димитрия, и икос, и седален. По 6-й песни конда́к и икос воскресен. Светилен воскресен, Сла́ва, свята́го: И ны́не, трясения. На хвалитех стихиры воскресны 4, и Димитрия со славным 4, с припевы его. Сла́ва, стихира Евангельская: И ны́не, Преблагословенна еси: Славословие великое. По Трисвятом тропа́рь воскресен то́чию. Ектении, и отпу́ст, и час 1. На 1-м часе́ тропа́рь воскресен; Сла́ва, трясения; И ны́не, Богоро́дичен часов. По Отче наш: конда́к трясения. Сице и на прочих часех тропари и конда́ки, пременяюще, глаголем точию воскресен тропа́рь непременно.

На Литургии: Блаженны гласа на 4 и трясения песнь 3, на 4, и Димитрия песнь 6, на 4. По входе тропа́рь воскресен, и трясения, и храма Богоро́дицы, аще есть, и Димитрия. Таже конда́к воскресен и трясения. Сла́ва, Димитрия; И ны́не, Богоро́дицы. Аще же несть храма Богоро́дицы, и ны́не, трясения. Прокимен трясения и свята́го. Апостол трясения и Димитрия. Аллилуиа, глас 4: Боже, отри́нул ны еси. Стих: Стря́сл еси землю: И свята́го: Праведник, я́ко финикс, процветет: Евангелие трясения и Димитрия. Причастен: Хвалите Господа с небес: И свята́го: В память вечную: Ряд же Апостол и Евангелие чтем под зачало.

Тропа́рь, глас 4:

Правило веры, и образ кротости,/ и воздержания известный учитель Христову стаду воистину был еси,/ уча е́ выну смирению,/ не мудрствовати еже высокая,/ сего ради стяжал, яже жела́ше,/ отче святителю Фео́филе,/ моли Христа Бога спастися душам нашим.

Конда́к, глас 4:

Я́ко воистинну по имени своему ты,/ Боголюбезне святителю Фео́филе и преподобне, соблюдши,/ явися тебе́ Христос Спас,/ обещая ти Живот и Царствие Свое,/ в немже, днесь ликуя, не забуди нас, рабов твоих.

Тропа́рь, глас 4:

Иже от юности, Богомудре, возследуя Христу,/ во бдениих и в пощениих пребывая,/ и паству, от Бога дарованную ти, добре пасый,/ и учений Боже́ственных исполняя, и в жизненный путь наставляя:/ отнюду же и архиерейства саном почтеся,/ Церковь и люди возвеселил еси;/ и по преставлении своем чудес лучи испущаеши,/ недугом с верою приходящим к тебе́ исцеление подая,/ и слепу младенцу свет дарова,/ угодниче Христов, святителю Антоние,/ предстоя Престолу Христову с лики Ангельскими,/ с ними же моли Его о нас, притекающих к тебе́/ получити от него оставление грехов и велию милость.

Конда́к, глас 8:

Возвеселися Христова Честна́я Церковь,/ приимши тя в недра своя пастыря и учителя;/ мы же, ве́рнии людие, прославляем Подавшаго ти благость неоскудну,/ яже твориши преславная чудеса./ Тем, святителю, не престай моля Христа, Емуже угодил еси,/ о нас хвалящих и чтущих тя, к тебе́ притекающих,/ подати милость зде и в день Судный, да зовем ти:/ радуйся, святителю Антоние, граду нашему похвала и утверждение.