Октоих

 Глас 2Глас 3Глас 4 

Глас 3

Неделя

В суббо́ту ве́чера, на ма́лей вече́рни

на Го́споди воззва́х, стихи́ры воскре́сны 3, повторя́юще пе́рвую. Гла́с 3.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Твои́м Кресто́м, Христе́ Спа́се, сме́рти держа́ва разруши́ся, и диа́воля пре́лесть упраздни́ся: ро́д же челове́ческий ве́рою спаса́емый, пе́снь Тебе́ всегда́ прино́сит.

Просвети́шася вся́ческая Воскре́сением Твои́м, Го́споди, и ра́й па́ки отве́рзеся: вся́ же тва́рь восхваля́ющи Тя́, пе́снь Тебе́ всегда́ прино́сит.

Сла́влю Отца́ и Сы́на си́лу, и Свята́го Ду́ха пою́ вла́сть, неразде́льное несозда́нное Божество́, Тро́ицу Единосу́щную, ца́рствующую в ве́к ве́ка.

Сла́ва, и ны́не, Богоро́дичен, догма́тик. Гла́с 3:

Преве́лие чу́до: Де́ва ро́ждшая, и рожде́нное Бо́г пре́жде ве́к, предъявле́нное рожде́ние, и соверше́нное па́че естества́. О та́инства стра́шнаго! е́же и мы́слимое неизрече́нно пребыва́ет, и зри́мое не пое́млется. Блаже́нна Ты́ еси́, Пречи́стая Отрокови́це, Ада́ма земна́го Дщи́, и Бо́га Вы́шняго я́вльшаяся Ма́ти: Того́ моли́, спасти́ся душа́м на́шым.

Та́же, Све́те ти́хий: Посе́м проки́мен: Госпо́дь воцари́ся: три́жды. Сти́х: Облече́ся Госпо́дь в си́лу, и препоя́сася. Та́же, Сподо́би Го́споди в ве́чер се́й: Иере́й же ектении́ не глаго́лет, но пое́м на стихо́вне стихи́ру воскре́сну, гла́с 3:

Стра́стию Твое́ю, Христе́, омрачи́вый со́лнце, и све́том Твоего́ Воскре́сения просвети́вый вся́ческая, приими́ на́шу вече́рнюю пе́снь, Человеколю́бче.

Та́же 3 Богоро́дичны подо́бны. Гла́с 3.

Сти́х: Помяну́ и́мя твое́ во вся́ком ро́де и ро́де.

Ковче́г Тя́ у́мный, Чи́стая, ве́мы, нося́щий скрижа́ли Богопи́санныя, на́м же Законоположи́теля и Созда́теля: Ему́же моли́ся спасти́ся душа́м на́шым.

Сти́х: Слы́ши, Дщи́, и ви́ждь, и приклони́ у́хо Твое́.

На земли́ Тя не́бо, Чи́стая, показа́, И́же во утро́бе Твое́й всели́выйся Бо́г Сло́во, пло́ть прии́м, И́же естество́м незри́мый: и дожди́ши все́м безсме́ртную ро́су, Неискусобра́чная.

Сти́х: Лицу́ Твоему́ помо́лятся бога́тии лю́дстии.

Спасе́ние моли́твами Твои́ми и́мамы, и́же те́ми, Де́во, от бе́д при́сно и искуше́ний бу́ри избега́ем: и сего́ ра́ди про́сим непреста́нно о на́с е́же моли́ти, спасти́ся душа́м на́шым.

Сла́ва, и ны́не, Богоро́дичен. Гла́с 3:

Па́ки назда́ние и живо́т Тобо́ю вторы́й ве́мы, Пречи́стая Мари́е, челове́ческаго естества́, во чре́ве Твое́м смеси́вшагося Созда́теля тва́ри, и воскреси́вшаго на́с от а́да и сме́рти, и жи́знь ве́чную пода́вшаго на́м, е́же вопи́ти Тебе́, Присноде́во: ра́дуйся, совокупи́вшая до́льная небе́сным. Ра́дуйся, наде́ждо все́х конце́й земли́, и предста́тельство и заступле́ние. Ра́дуйся, я́же Воскре́сением Сы́на Твоего́ просвети́вши вся́ческая, и подаю́щи ми́рови ве́лию ми́лость.

Та́же, Ны́не отпуща́еши: Трисвято́е. И по О́тче на́ш: тропа́рь воскре́сен. Сла́ва, и ны́не, Богоро́дичен его́, и отпу́ст.

В суббо́ту на вели́цей вече́рни

на Го́споди, воззва́х поста́вим стихо́в 10, и пое́м стихи́ры воскре́сны, гла́с 3.

Сти́х: Изведи́ из темни́цы ду́шу мою́, испове́датися и́мени Твоему́.

Твои́м Кресто́м, Христе́ Спа́се, сме́рти держа́ва разруши́ся, и диа́воля пре́лесть упраздни́ся: ро́д же челове́ческий ве́рою спаса́емый: пе́снь Тебе́ всегда́ прино́сит.

Сти́х: Мене́ жду́т пра́ведницы, до́ндеже возда́си мне́.

Просвети́шася вся́ческая Воскре́сением Твои́м, Го́споди, и ра́й па́ки отве́рзеся: вся́ же тва́рь восхваля́ющи Тя́, пе́снь Тебе́ всегда́ прино́сит.

Сти́х: Из глубины́ воззва́х к Тебе́, Го́споди, Го́споди, услы́ши гла́с мо́й.

Сла́влю Отца́ и Сы́на си́лу, и Свята́го Ду́ха пою́ вла́сть, неразде́льное, несозда́нное Божество́, Тро́ицу единосу́щную, ца́рствующую в ве́к ве́ка.

И́ны стихи́ры Анато́лиевы, гла́с то́йже.

Сти́х: Да бу́дут у́ши Твои́ вне́млюще гла́су моле́ния моего́.

Кресту́ Твоему́ честно́му покланя́емся, Христе́, и Воскре́сение Твое́ пое́м и сла́вим: ра́ною бо Твое́ю мы́ вси́ исцеле́хом.

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у Тебе́ очище́ние е́сть.

Пое́м Спа́са от Де́вы вопло́щшагося: на́с бо ра́ди распя́тся, и в тре́тий де́нь воскре́се, да́руя на́м ве́лию ми́лость.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Су́щым во а́де соше́д Христо́с благовести́: дерза́йте, глаго́ля, ны́не победи́х, Аз е́смь Воскре́сение, Аз вы́ возведу́, разруши́в сме́ртная врата́.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Недосто́йно стоя́ще в пречи́стом дому́ Твое́м, вече́рнюю пе́снь возсыла́ем, из глубины́ взыва́юще, Христе́ Бо́же: просвети́вый ми́р тридне́вным воскре́сением Твои́м, изми́ лю́ди Твоя́ от руки́ враго́в Твои́х, Человеколю́бче.

И́ны стихи́ры Пресвяте́й Богоро́дице. Творе́ние Па́вла Аморре́йскаго, пое́м и́х, иде́же не́сть Мине́и. Гла́с 7.

Подо́бен: Дне́сь бди́т Иу́да:

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

Ми́лостива, благопребы́тна мне́, Де́во, и благопослу́шна яви́ся призыва́ющу Боже́ственную Твою́ благода́ть во все́х вои́стинну случа́ющих ми ся: всю́ бо наде́жду души́ моея́ возложи́х к Тебе́, и во все́х упова́ю на Боже́ственный про́мысл Тво́й, Ты́ и бу́дущия мя́ сла́вы, и живота́ Боже́ственнаго сподо́би.

Сти́х: Хвали́те Го́спода, вси́ язы́цы, похвали́те Его́, вси́ лю́дие.

У́глие во мне́, Богоро́дице, страсте́й мои́х возгоре́шася, от гне́ва же и я́рости, от пия́нства и блуда́, от сребролю́бия и же́стости се́рдца, умерщвле́ния лю́таго, от уны́ния и смуще́ния, от тщесла́вия же и попра́ния со́вестнаго, от ни́хже изба́ви ду́шу мою́, молю́ся, Влады́чице, и спаси́ мя.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Вси́ чи́стою со́вестию Богоро́дице припаде́м, вопию́ще непреста́нно от среды́ серде́чныя: Влады́чице свята́я, спаси́ все́х от гне́ва и озлобле́ния, бе́д и паде́жей: я́ко Тебе́ стяжа́хом сте́ну, и утвержде́ние, Тобо́ю спаса́еми под кро́в Тво́й притека́юще.

Сла́ва, и ны́не, Богоро́дичен: Ка́ко не диви́мся Богому́жному Рождеству́ Твоему́, Пречестна́я? Искуше́ния бо му́жескаго не прие́мши, Всенепоро́чная, родила́ еси́ без отца́ Сы́на пло́тию пре́жде ве́к от Отца́ рожде́ннаго без ма́тере, ника́коже претерпе́вшаго измене́ния, или́ смеше́ния, или́ разделе́ния, но обою́ существу́ сво́йство це́ло сохра́ншаго. Те́мже, Ма́ти Де́во Влады́чице, Того́ моли́ спасти́ся душа́м, правосла́вно Богоро́дицу испове́дающих Тя́.

Та́же вхо́д с кади́лом. Све́те ти́хий: Проки́мен и ектении́.

На стихо́вне стихи́ры воскре́сны, гла́с 3:

Стра́стию Твое́ю, Христе́, омрачи́вый со́лнце и све́том Твоего́ Воскре́сения, просвети́вый вся́ческая, приими́ на́шу вече́рнюю пе́снь, Человеколю́бче.

По алфави́ту:

Сти́х: Госпо́дь воцари́ся, в ле́поту облече́ся.

Живоприе́мное Твое́ воста́ние, Го́споди, вселе́нную всю́ просвети́, и Твое́ созда́ние истле́вшее призва́. Те́мже кля́твы Ада́мовы изме́ншеся, вопие́м: всеси́льне Го́споди, сла́ва Тебе́.

Сти́х: И́бо утверди́ вселе́нную, я́же не подви́жится.

Бо́г сы́й неизме́нен, пло́тию стражда́ измени́лся еси́, Его́же тва́рь не терпя́щи ви́сяща зре́ти, стра́хом прекланя́шеся, и стеня́щи пое́т Твое́ долготерпе́ние: соше́д же во а́д, тридне́вен воскре́сл еси́, жи́знь да́руя ми́рови, и ве́лию ми́лость.

Сти́х: До́му твоему́ подоба́ет святы́ня, Го́споди, в долготу́ дни́й.

Да ро́д на́ш от сме́рти, Христе́, изба́виши, сме́рть претерпе́л еси́: и тридне́вен из ме́ртвых воскре́с, с Собо́ю воскреси́л еси́, и́же Тя́ Бо́га позна́вших: и ми́р просвети́л еси́. Го́споди, сла́ва Тебе́.

Сла́ва, и ны́не, Богоро́дичен: Без се́мене от Боже́ственнаго Ду́ха, во́лею же Отчею зачала́ еси́ Сы́на Бо́жия, от Отца́ без ма́тере пре́жде ве́к су́ща: на́с же ра́ди, из Тебе́ без Отца́ бы́вша, пло́тию родила́ еси́, и младе́нца млеко́м пита́ла еси́. Те́мже не преста́й моли́ти, изба́витися от бе́д душа́м на́шым.

Та́же, Ны́не отпуща́еши: Трисвято́е. По О́тче на́ш:

Тропа́рь воскре́сен, гла́с 3:

Да веселя́тся небе́сная, да ра́дуются земна́я: я́ко сотвори́ держа́ву мы́шцею Свое́ю Госпо́дь, попра́ сме́ртию сме́рть, Пе́рвенец ме́ртвых бы́сть, из чре́ва а́дова изба́ви на́с, и подаде́ ми́рови ве́лию ми́лость.

Сла́ва, и ны́не, Богоро́дичен: Тя́ хода́тайствовавшую Спасе́ние ро́да на́шего, воспева́ем, Богоро́дице Де́во: пло́тию бо от Тебе́ восприя́тою Сы́н Тво́й, и Бо́г на́ш, Кресто́м восприи́м стра́сть, изба́ви на́с от тли́ я́ко Человеколю́бец.

В суббо́ту на повече́рии

кано́н Пресвяте́й Богоро́дице. Гла́с 3

Пе́снь 1

Ирмо́с: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре Изра́ильтеским лю́дем, Се́й Бо́г на́ш, препросла́влен е́сть: Тому́ Еди́ному пои́м, я́ко просла́вися.

Я́ко Ма́терь Бо́жию Тя́ Ду́хом Боже́ственным, Отца́ же благоволе́нием я́вльшуюся, ве́рнии пе́сньми чи́стыми венча́им, Пречи́стая Богоневе́сто: и целу́ем Тя́ пе́ньми со Арха́нгелом, во спасе́ние на́ше.

От ре́бр у́бо Ада́мовых созида́ется Е́ва, дре́вним богозда́нием: от утро́бы же Богоро́дицы яви́ся Христо́с, сы́й Бо́г на́ш, вочелове́чься непрело́жно, вре́менен бы́сть Преве́чный.

Сла́ва: И́же Е́вину утро́бу осу́ждь в печа́лех, роди́ти плоды́ в боле́зни, во чре́во Твое́ всели́ся, Де́во Чи́стая, сы́й Бо́г на́ш, пло́тию яви́ся па́че сло́ва, и прама́терний разреши́ до́лг.

И ны́не: В неча́яния глубину́ впа́дше тягота́ми, приле́жно зове́м, Богороди́тельнице, к Тебе́: Влады́чице, помози́ потопля́емым де́лы лука́вых прегреше́ний, Тя́ бо Еди́ну и́мамы наде́жду по Бо́зе.

Пе́снь 3

Ирмо́с: И́же от не су́щих вся́ приведы́й, Сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.

Тя́ проявля́ше же́зл Ааро́нов, без напое́ния процве́тший, Богоро́дице Пречи́стая, без се́мене ро́ждши вопло́щшагося Бо́га непреме́нно.

Боже́ственный о́гнь Тя́ нося́щу, я́ко свети́льник, Пречи́стая, прови́де проро́к Ду́хом, благоуха́ние нося́щую су́щым в ми́ре, и жи́знь ве́чную.

Сла́ва: Ко Арха́нгелу присту́пим Гаврии́лу, ра́дуйся, веща́юще Де́ве пе́сньми: Тобо́ю бо разреши́тся осужде́ния пра́дедняя кля́тва.

И ны́не: Тя́, Пресвята́я Богоро́дице, я́ко сте́ну спасе́ния иму́ще гре́шнии спаса́емся: не пре́зри, Влады́чице, и не посрами́ на́ша моле́ния.

Пе́снь 4

Ирмо́с: Положи́л еси́ к на́м тве́рдую любо́вь, Го́споди, Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й Го́споди.

Го́ру мы́сленную, доброде́телей се́нь, Ду́хом дре́вле Авваку́м богови́дно Тя́ ви́дев, пропове́даше, Пречи́стая: я́ко от ю́га прише́дша от Тебе́ Сло́во пло́ть прие́мша.

Го́ру Тя́ ве́лию несеко́мую Дании́л Ду́хом ви́де, не новосеко́му явля́я чистоту́ де́вства Твоего́, Влады́чице: от нея́же ка́мень усече́ся, Христо́с Сло́во, ле́сти низлага́я и́дольския.

Сла́ва: Го́ру Тя́ Дави́д чу́дну и ту́чну прорече́: Единоро́дный бо от Отца́ Сы́н в Тя́ благоволи́, Чи́стая, всели́тися воплоща́емь. Те́м Ти́, ра́дуйся, Ду́хом зове́м.

И ны́не: Вся́ блага́я и те́плая засту́пница су́щи гре́шником и смире́нным, Богороди́тельнице Пречи́стая Влады́чице, от бе́д, и скорбе́й, и грехо́в спаса́й рабы́ Твоя́.

Пе́снь 5

Ирмо́с: Я́ко ви́де Иса́иа обра́зно на престо́ле превознесе́на Бо́га, от а́нгел сла́вы дориноси́ма, О окая́нный, вопия́ше, а́з: прови́дех бо воплоща́ема Бо́га, Све́та Невече́рня, и ми́ром влады́чествующа.

Израсти́ же́зл Иессе́ев цве́т неувяда́емый, Де́ва Мари́а Бо́га Безнача́льнаго, без се́мене, от Ду́ха Боже́ственнаго и О́тча, ца́рства держа́вная язы́ческая облада́вшаго, на Него́же язы́цы упова́ша.

Кня́зь ми́рный прии́де на престо́л Дави́дов, ца́рствуя из Тебе́, Богоро́дице, Бо́г воплоща́емь: О чу́до! И бра́нь разре́ш, потче́ кня́зи моави́тския, и Тебе́ ро́ждшую Цари́цу показа́.

Сла́ва: Непоро́чную Твою́ добро́ту, от Нея́же Христо́с в пло́ть облече́ся без се́мене, Де́во, Иса́иа явля́я, зове́т вопия́: Госпо́дь сла́вы гряде́т на о́блаце ле́гце, и пре́лести тьму́ отгоня́я, просвети́т на́с.

И ны́не: От Ду́ха Свя́та заче́нши Сло́во Единосу́щное Отцу́, Де́во Сие́ родила́ еси́ во дву́ Естеству́ су́ща, Бо́га соверше́нна и соверше́нна Челове́ка: его́же ве́рою почита́ем плотско́е явле́ние.

Пе́снь 6

Ирмо́с: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

О́др Тя́ пе́сньми прему́дрый преднапису́ет, Всепе́тая, на Не́мже почи́ Бо́г воплоща́емь во Ипоста́си из Тебе́, и просла́ви Тя́, несме́сно ражда́емь.

Бы́сть Сло́ву я́ко избра́нная, Де́во Всепе́тая, избра́нная оде́жда: я́ко порфи́ру Боже́ственную из Тебе́ пло́ть прие́м воцари́ся, боголе́пно оде́явся.

Сла́ва: Бы́сть соедине́ния Боже́ственнаго вмести́лище, Богоневе́сто, зла́та светле́йши: Тобо́ю бо бы́сть Бо́г я́ко челове́к, и бесе́дова челове́ком Бо́г, я́ко челове́к.

И ны́не: Умертви́ нече́ствующих в Тя́, Де́во Всепе́тая, зло́бы е́ресь: я́ко за́вистию та́ют пресла́вное Твоего́ О́браза ви́дяще подо́бие.

Го́споди, поми́луй, три́жды. Сла́ва, и ны́не:

Седа́лен, гла́с 3:

От теплоты́ ве́ры вопию́ Ти, Богоро́дице, недосто́йными усты́, и скве́рным се́рдцем: спаси́ мя, погруже́ннаго греха́ми, уще́дри умерщвле́ннаго отча́янием, да зову́ Ти спаса́емь: ра́дуйся, Де́во, христиа́ном помо́щнице.

Пе́снь 7

Ирмо́с: Пре́жде о́бразу злато́му, перси́дскому чти́лищу, о́троцы не поклони́шася, трие́ пою́ще посреде́ пе́щи: отце́в Бо́же благослове́н еси́.

Купина́ и пла́мень сообра́зне совоку́пльшеся, и нетле́нна обоя́ я́вльшеся, Тя́, Де́во, я́сно проявля́ют: и́бо родила́ еси́ Бо́га, и де́вствуеши.

Руно́ и роса́ Гедео́ну во измене́нии образу́ема, рождество́ Твое́ предпи́шут: Ты́ бо Еди́на Боже́ственное Сло́во но́сиши во чре́ве, я́ко до́ждь, Де́во Ма́ти.

Сла́ва: Греха́ моего́ о́гнь па́че гее́нскаго, пла́мень мне́ содева́ет, си́й угаси́, Чи́стая, Твое́ю ми́лостию, покая́нием мя́ ко све́ту наставля́ющи.

И ны́не: Твоего́ зра́ка явле́ние, Богоро́дице Пречи́стая, чту́ще я́ко пе́рвый о́браз Тя́, засту́пницу при́сно, и покро́в благопреме́нен к Бо́гу и́мамы вси́.

Пе́снь 8

Ирмо́с: Вавило́нская пе́щь о́троки не опали́, ниже́ Божества́ о́гнь Де́ву растли́. Те́м со о́троки ве́рнии возопии́м: благослови́те дела́ Госпо́дня Го́спода.

Тя́ Оте́ц изво́ли Неве́сту Неискусобра́чную, я́ко кри́н пресве́тлый посреде́ те́рния обре́т, све́тлостию добро́ты блиста́ющую Ду́хом Боже́ственным, Сы́ну в жили́ще.

Святе́йшую вы́шних си́л Де́ву Пренепоро́чную, без разсужде́ния сла́влю я́ве: Творца́ бо си́х во чре́ве понесе́, несме́сным соедине́нием пло́ть прие́мша от Тебе́.

Сла́ва: Де́вство некра́домо Де́во сохра́нши, Ма́ти яви́лася еси́ Сы́на Бо́жия вои́стинну, Отца́ благоволе́нием Неве́ста бы́вши, и прия́телище сла́вы Ду́ха нетле́нно.

И ны́не: И́же естество́м Невеще́ственный Бо́г и Неви́димый, про́сто и неизрече́нно па́че естества́ ражда́ется Челове́к от Святы́я Де́вы, сугу́б зри́мь во Еди́ной Ипоста́си, в Не́йже ви́димь е́сть писа́ньми.

Пе́снь 9

Ирмо́с: Но́вое чу́до и боголе́пное: Деви́ческую бо две́рь затворе́ную я́ве прохо́дит Госпо́дь, на́г во вхо́де, и плотоно́сец яви́ся во исхо́де Бо́г, и пребыва́ет Две́рь затворе́на. Сию́ неизрече́нно я́ко Богома́терь велича́ем.

Свята́го ко́рене Свя́т Пло́д: непло́дныя бо, освяще́нныя зако́ном Бо́жиим О́тчиим, неувяда́емую жи́знь соверша́ющую Богоро́дица Отрокови́ца процвете́: и ра́дуется А́нна, прие́мши Отроча́ в ста́рости, Бо́жию Ма́терь, Ю́же сла́вим.

Но́во Рождество́ и богови́дно Свята́го Твоего́ и Богоно́снаго чре́ва Чи́стая: в не́м бо написа́ся о́браз в челове́ка О́тчиим пе́рстом, Сы́н вопло́щься Свя́т Ду́хом Святы́м. Его́же несме́сно я́ко Бо́га и Челове́ка велича́ем.

Сла́ва: Вопие́т вся́к су́д на мя́: дела́ бо грехо́вных дея́ний во́пль содева́ют мне́ претя́ще, и душа́ вся́ ве́сть, и́миже препре́на бу́дет, и трепе́щет пла́мене гее́нскаго: от него́же пре́жде конца́, моли́твами Твои́ми изба́ви мя́, Влады́чице.

И ны́не: По Рождестве́ яви́ся нетле́нна, Чи́стая: неизме́нно бо Зижди́теля все́х пло́тию, Богоро́дице, родила́ еси́ Челове́ка па́че естества́, О́тча Существа́ не отсту́пльша, и а́бие пребы́сть Де́ва Ду́хом Боже́ственным. Те́мже сла́вяще Тя́, пе́снь соверша́ем.

Та́же, Досто́йно е́сть: Трисвято́е. Конда́к воскре́сен, и отпу́ст.

В неде́лю у́тра, на полу́нощнице

кано́н тро́ичен, [его́же краестро́чие: Хвалю́, Тро́ице, Тя́, еди́но Богонача́лие. Митрофа́ново.] Гла́с 3

Пе́снь 1

Ирмо́с: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре изра́ильтеским лю́дем, Се́й Бо́г на́ш препросла́влен е́сть: Тому́ Еди́ному пои́м, я́ко просла́вися.

Непостижи́мое Еди́но Господонача́лие, и Еди́но Тро́ическое Богонача́лие, Трисия́ннаго Све́та Твоего́ мя сподо́би: я́ко да воспою́ Тя́, пева́емое непреста́нно трисвяты́ми пе́сньми, а́нгельскими усты́.

Свяще́нно невеще́ственнии вси́ чи́нове пою́т, я́ко твори́тельную вину́, Еди́нственную, Трисве́тлую, Нача́льнейшую я́ве: Ю́же согла́сно пое́м, и челове́ческая мно́жества, и ве́рно сла́вим бре́нными усты́.

Сла́ва: У́м, и Сло́во и Ду́х, богосло́вцы прили́чне, и знамени́тельне Тебе́ нари́чут: безстра́стно Рождество́ от Нерожде́ннаго Отца́, Сы́ну зна́менающу (от нерожде́ннаго Отца́ Сы́на, зна́менающе), Бо́же единонача́льне все́х, вку́пе и Ду́ха Боже́ственнаго исхожде́ние.

И ны́не: Я́ко Человеколю́бец естество́м, челове́ческое существо́ прие́м, Бо́жий Сло́ве, Тро́ичный возсия́л еси́, Единонача́льнейший све́т Еди́наго Божества́, Препросла́вленную все́м показа́вый, ро́ждшую Тя́ Де́ву Пречи́стую.

Пе́снь 3

Ирмо́с: И́же от не су́щих вся́ приведы́й Сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.

Утро́ити дре́вле во́ду повеле́в Илиа́ на поле́нах, обра́зно прояви́ Тро́ичную Ипоста́сь, Еди́нственнаго Бо́жия Господонача́лия.

Тле́нное естество́ пое́т Тя́ земноро́дных, Еди́наго и Трисве́тлаго Созда́теля Неизме́ннаго, и вопие́т Ти́, Влады́ко: всеразли́чнаго мя́ премене́ния изба́ви, и спаси́ мя.

Сла́ва: Ра́вно веща́юще словесе́м проро́ческим, сла́вных апо́стол же и пропове́дник ве́ры, равноде́тельную Тя́ Тро́ицу славосло́вим ве́рнии, Бо́же все́х.

И ны́не: С престо́ла высо́каго сни́де Христо́с, челове́ка возвыша́я, я́ко Человеколю́бец, Тобо́ю Пречи́стая, и Трисо́лнечный Све́т все́м возсия́.

Го́споди, поми́луй, три́жды.

По 3-й пе́сни седа́лен, гла́с 3. Подо́бен: Красоте́ де́вства:

Пресу́щественный и Еди́не Го́споди Христе́, и рожде́ние Пребезнача́льнаго Отца́, и Ду́ше Боже́ственнейший, поми́луй рабы́ Твоя́: вси́ бо согреши́хом, но от Тебе́ не отступи́хом. Те́мже мо́лим Тя́, триипоста́сне Го́споди, я́ко име́яй вла́сть, созда́ние Твое́ спаси́ от вся́каго обстоя́ния.

Сла́ва, и ны́не, Богоро́дичен: Пресу́щественный Бо́г и Госпо́дь из Тебе́ воплоти́ся за бла́гость, Е́же по на́м осуществова́выйся, и пребы́в е́же бе́. Те́мже и Богочелове́ка Сего́ почита́юще, Всечи́стая, Тя́ Неискусобра́чную Богоро́дицу пропове́дуем, сла́вяще преве́лие чу́до Твоего́ безсе́меннаго Рожде́ния.

Пе́снь 4

Ирмо́с: Положи́л еси́ к на́м Тве́рдую любо́вь, Го́споди, Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

О́трасль сугу́б от Отца́, я́ко от ко́рене прозябе́ Сы́н, и Ду́х Пра́вый, соесте́ственна прозябе́ния, и богосажде́нна, и цве́ти Собезнача́льнии: я́ко трие́м бы́ти све́том Божества́. [Два́жды.]

Сла́ва: Мно́жества у́мных суще́ств, непреста́нно пою́т Тя́, недомы́слимаго Бо́га, с ни́миже мы́ сла́вим, глаго́люще: Тро́ице Пресу́щная, Твоя́ рабы́ спаси́, я́ко Человеколю́бец.

И ны́не: Распали́л еси́ на́с в любо́вь Твою́, Многоми́лостиве Сло́ве Бо́жий, И́же на́с ра́ди вопло́щься непрело́жне, и Трисве́тлое Еди́но Божество́ та́йно научи́в: те́мже Тя́ сла́вим.

Пе́снь 5

Ирмо́с: Я́ко ви́де Иса́иа обра́зно на престо́ле превознесе́нна Бо́га, от а́нгел сла́вы дориноси́ма. О окая́нный, вопия́ше, а́з: прови́дех бо воплоща́ема Бо́га, Све́та Невече́рня, и ми́ром влады́чествующа.

Еди́наго Господонача́льника, обра́зно я́ко ви́де Иса́иа Бо́га, в Трие́х Ли́цех славосло́вима пречи́стыми гла́сы Серафи́м, по́слан бы́сть пропове́дати а́бие Трисве́тлое Существо́, и Еди́ницу Трисо́лнечную [Два́жды.]

Сла́ва: Я́же все́х неви́димых и ви́димых естество́, от не су́щих пре́жде соста́вльшая, Еди́нице Трисо́лнечная, И́же Еди́наго Тя́ Бо́га ве́рно воспева́ющих от вся́ких искуше́ний изба́вльши, Твоея́ сла́вы сподо́би.

И ны́не: Неве́стник светоно́сен и чи́ст, Де́во, бы́вший Бо́жий, воспева́ем Тя́ любо́вию, и блажи́м: из Тебе́ бо роди́ся Христо́с, в существа́х и хоте́ниих сугу́бых, И́же Еди́н от Тро́ицы и сла́вы сы́й Госпо́дь.

Пе́снь 6

Ирмо́с: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

Пресе́льник сы́й Авраа́м, сподо́бися обра́зно восприя́ти Еди́нственнаго у́бо Го́спода в Трие́х Ипоста́сех, пресу́щественна му́жескими же зра́ки. [Два́жды.]

Сла́ва: Напра́ви сердца́ Твои́х рабо́в к Све́ту Непристу́пному, О Трисо́лнечне Го́споди, и Твоея́ сла́вы сия́ние пода́ждь душа́м на́шым, во е́же облиста́емым бы́ти Твое́ю добро́тою неизрече́нною.

И ны́не: Отве́рзи мне́ две́ри Све́та ро́ждшагося от утро́бы Твоея́, Пречи́стая: да зрю́ Трисве́тлую лучу́ Божества́, и сла́влю Тя́, Всесве́тлую Влады́чицу.

Го́споди, поми́луй, три́жды.

По 6-й пе́сни седа́лен, гла́с 3.

Подо́бен: Боже́ственныя ве́ры:

Боже́ственнаго Естества́ Единосу́щнаго Трисо́лнечную пое́м держа́ву, и трисвяты́ми гла́сы возопии́м: Свя́т еси́, О́тче Пребезнача́льный, Свя́т еси́, Сы́не Собезнача́льный, и Ду́ше Святы́й, Еди́не Неразде́льный Бо́же на́ш, и все́х Тво́рче Человеколю́бче.

Сла́ва, и ны́не, Богоро́дичен. Подо́бен:

Чу́до преве́лие: ка́ко содержа́ся Невмести́мый во чре́ве Твое́м и воплоти́ся, и яви́ся, я́ко Челове́к, не претерпе́вый смеше́ния или́ разделе́ния Боже́ственнаго и Непрело́жнаго Божества́, Отрокови́це всечи́стая: те́мже Богоро́дицу тя́ ве́рно пропове́дуем при́сно и сла́вим.

Пе́снь 7

Ирмо́с: Я́коже дре́вле благочести́выя три́ о́троки ороси́л еси́ в пла́мени халде́йстем, све́тлым Божества́ огне́м и на́с озари́, благослове́н еси́ взыва́ющыя, Бо́же оте́ц на́ших.

Хра́м мя́ покажи́ Твоего́ Божества́, Влады́ко, Трисия́ннаго, Ве́сь Све́тел: грехо́внаго омраче́ния лю́таго и страсте́й вы́шша, светода́тельными Твои́ми сия́нии, Бо́же оте́ц на́ших, благослове́н еси́.

Божества́ зра́к Еди́н возвеща́ем, в Трие́х Ипоста́сных и разде́льных сво́йствах, Отца́, и Сы́на, и Ду́ха: благослове́н еси́ зову́ще, Бо́же оте́ц на́ших.

Сла́ва: Яви́ся Авраа́му Бо́г Триипоста́сный у ду́ба дре́вле мамври́йскаго, о страннолю́бии мзду́ Исаа́ка воздая́ за ми́лость: Его́же и ны́не сла́вим, я́ко Бо́га оте́ц на́ших.

И ны́не: Яви́ся на земли́, бы́в Челове́к Вседе́тель, боголе́пно от де́вственнаго и пречи́стаго Твоего́ чре́ва, и на́с обожи́, Благослове́нная Всечи́стая, Богоро́дице Пречи́стая.

Пе́снь 8

Ирмо́с: Нестерпи́мому огню́ соедини́вшеся, богоче́стия предстоя́ще ю́ноши, пла́менем же неврежде́ни, Боже́ственную пе́снь поя́ху: благослови́те вся́ дела́ Госпо́дня Го́спода, и превозноси́те во вся́ ве́ки.

Безнача́льна Отца́ я́ко от ко́рене, Сло́во, и Ду́х Собезнача́льне су́ща: я́ко о́трасли Пресу́щественнаго Богонача́лия показа́ша Тро́ицы сла́ву еди́ную и си́лу: Ю́же пое́м вси́ ве́рнии во ве́ки. [Два́жды.]

Сла́ва: Управля́еши Твои́ми светлостьми́ чи́ны небе́сныя, воспева́ти немо́лчно трисвяты́ми пе́сньми Боже́ственными, О́тче, Сло́ве сообра́зне, и Ду́ше, Трисве́тлую Держа́ву и Равномо́щную. Те́мже Тя́ пое́м во вся́ ве́ки.

И ны́не: Прорече́ния проро́ческая, Твое́ Рождество́ издале́ча ви́девше, Богоро́дице, восхваля́ху, я́ко без се́мене, и па́че естества́ ро́ждшагося, Влады́чице: и согла́сно Сего́ пое́м, я́ко Го́спода, и превозно́сим во вся́ ве́ки.

Пе́снь 9

Ирмо́с: Но́вое чу́до и боголе́пное, деви́ческую бо две́рь затворе́нную, я́ве прохо́дит Госпо́дь, на́г во вхо́де, и Плотоно́сец яви́ся во исхо́де Бо́г, и пребыва́ет Две́рь затворе́на: Сию́ неизрече́нно я́ко Богома́терь велича́ем.

Ви́дети сла́ву Трисия́нную, богови́днии безпло́тных чи́нове я́ве, восходи́ти крилы́ жела́ют горе́: но гове́ют зело́ непристу́пнаго све́та, и пе́сни непреста́нно вопию́т: с ни́ми согла́сно, Еди́нственная Тро́ице, Тя́ сла́вим. [Два́жды.]

Сла́ва: Несы́тною любо́вию и и́же на земли́, у́мную ду́шу от Тебе́ прие́мше, и слове́сную, Тебе́ пои́м, Влады́ко, Бо́же все́х, Еди́нственное Естество́ вои́стинну, и Тро́ичное Ли́цы, от всего́ се́рдца. Те́мже ще́дре я́ко многоми́лостив, на́с уще́дри.

И ны́не: Хра́м мя́ покажи́ Единонача́льнаго, и Трисве́тлаго Твоего́ Богонача́лия, Светови́ден, чи́сте служи́ти Тебе́, Зижди́телю все́х, и неизрече́нную Твою́ сла́ву у́мно зре́ти: моли́твами Еди́ныя Богоро́дицы, Ю́же досто́йно я́ко Пресла́вную велича́ем.

Та́же Тро́ичны, Григо́риа Синаи́та. Досто́йно е́сть: И про́чее полу́нощницы, пи́сано в конце́ кни́ги сея́.

В неде́лю на у́трени, по шестопса́лмии

Бо́г Госпо́дь, и яви́ся на́м: на гла́с 3. Тропа́рь воскре́сен: Да веселя́тся небе́сная: Сла́ва, и ны́не, Богоро́дичен: Тя́ хода́тайствовавшую спасе́ние ро́да на́шего: Та́же обы́чное стихосло́вие.

По 1-м стихосло́вии седа́льны воскре́сны, гла́с 3:

Христо́с от ме́ртвых воста́, нача́ток усо́пших: перворожде́н тва́ри, и Соде́тель все́х бы́вших, истле́вшее естество́ ро́да на́шего в себе́ Само́м обнови́. Не ктому́ сме́рте облада́еши: и́бо все́х Влады́ка держа́ву твою́ разруши́.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Пло́тию сме́рти вкуси́в, Го́споди, го́ресть сме́рти пресе́кл еси́ воста́нием Твои́м, и челове́ка на ню́ укрепи́л еси́, пе́рвыя кля́твы одоле́ние призыва́я: Защи́тниче жи́зни на́шея, Го́споди, сла́ва Тебе́.

Сла́ва, и ны́не, Богоро́дичен: Красоте́ де́вства Твоего́, и пресве́тлой чистоте́ Твое́й, Гаврии́л удиви́вся, вопия́ше Ти́, Богоро́дице: ку́ю Ти́ похвалу́ принесу́ досто́йную; что́ же возъимену́ю Тя́; недоумева́ю и ужаса́юся. Те́мже я́ко повеле́н бы́х, вопию́ Ти: ра́дуйся, Благода́тная.

По 2-м стихосло́вии, седа́льны воскре́сны, гла́с 3.

Подо́бен: Красоте́ де́вства:

Неизме́ннаго Божества́, и во́льныя стра́сти Твоея́, Го́споди, ужа́сся а́д, в себе́ рыда́ше: трепе́щу пло́ти Нетле́нныя Ипоста́си (плотска́го неистле́вша соста́ва), ви́жду Неви́димаго, та́йно борю́ща мя́. Те́мже и и́хже держу́, зову́т: сла́ва, Христе́, воскре́сению Твоему́.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

Непостижи́мое распя́тия, и несказа́нное воста́ния богосло́вствуем, ве́рнии, та́инство неизрече́нное: дне́сь бо сме́рть и а́д плени́ся, ро́д же челове́ческий в нетле́ние облече́ся. Те́м благодаря́ще вопие́м Ти́: сла́ва, Христе́, воста́нию Твоему́.

Сла́ва, и ны́не, Богоро́дичен: Непостижи́маго и Неопи́саннаго, Единосу́щнаго Отцу́ и Ду́хови, во утро́бу Твою́ та́йно вмести́ла еси́, Богоро́дице, Еди́но и Несме́сно от Тро́ицы Божество́: позна́хом рождество́ (Твое́ Еди́ну и Неслия́нну Тро́ицы си́лу позна́хом рождество́м Твои́м) Твое в ми́ре сла́вити. Те́мже и благода́рственно вопие́м Ти́: ра́дуйся, Благода́тная.

По непоро́чнах ипакои́, гла́с 3:

Удивля́я виде́нием, ороша́я глаго́лании, блиста́яйся а́нгел мироно́сицам глаго́лаше: что́ жива́го и́щете во гро́бе; воста́ истощи́вый гро́бы. Тли́ Премени́теля разуме́йте Непреме́ннаго. Рцы́те Бо́гови: ко́ль стра́шна дела́ Твоя́, я́ко ро́д спа́сл еси́ челове́ческий!

Степе́нна, гла́с 3. Антифо́н 1-й, повторя́юще пое́м:

Пле́н Сио́нь Ты́ изъя́л еси́ от Вавило́на: и мене́ от страсте́й к животу́ привлецы́, Сло́ве.

В ю́г се́ющии слеза́ми Боже́ственными, жну́т кла́сы ра́достию присноживо́тия.

Сла́ва: Свято́му Ду́ху вся́кое благода́рие, я́коже Отцу́ и Сы́ну сооблиста́ет, в Не́мже вся́ живу́т и дви́жутся.

И ны́не, то́йже. Антифо́н 2-й:

А́ще не Госпо́дь сози́ждет до́м доброде́телей, всу́е тружда́емся: ду́шу же покрыва́ющу, никто́же на́ш разори́т гра́д.

Плода́ чре́вна Ду́хом сынотворе́ное Тебе́, Христу́, я́коже и Отцу́, святи́и всегда́ су́ть.

Сла́ва: Святы́м Ду́хом прозри́тся вся́кая святы́ня, прему́дрость: осуществу́ет бо вся́кую тва́рь: Тому́ послу́жим, Бо́г бо, я́ко Отцу́ же и Сло́ву.

И ны́не, то́йже.

Антифо́н 3-й:

Боя́щиися Го́спода блаже́ни, в пути́ ходя́ще за́поведей: снедя́т бо живо́тное всепло́дие.

О́крест трапе́зы Твоея́ возвесели́ся, зря́ Твоя́ Пастыренача́льниче исча́дия, нося́ща ве́тви благоде́лания.

Сла́ва: Святы́м Ду́хом вся́кое бога́тство сла́вы, от Него́же благода́ть, и живо́т вся́кой тва́ри: со Отце́м бо воспева́емь е́сть, и с Сло́вом.

И ны́не, то́йже.

Проки́мен, гла́с 3: Рцы́те во язы́цех, я́ко Госпо́дь воцари́ся, не́бо испра́ви вселе́нную, я́же не подви́жится.

Сти́х: Воспо́йте Го́сподеви пе́снь но́ву. Вся́кое дыха́ние:

Сти́х: Хвали́те Бо́га во святы́х Его́: Ева́нгелие воскре́сно, и про́чее по ря́ду. Воскре́сение Христо́во: псало́м 50.

Кано́н воскре́сен. Гла́с 3.

Пе́снь 1

Ирмо́с: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре изра́ильтеским лю́дем, Се́й Бо́г на́ш, препросла́влен е́сть: Тому́ Еди́ному пои́м, я́ко просла́вися.

Припе́в: Сла́ва, Го́споди, свято́му Воскре́сению Твоему́.

И́же зе́млю осуди́в, престу́пльшему по́том изнести́ плода́ те́рние (по́та изнести́ пло́д те́рния), от те́рния вене́ц из руки́ законопресту́пныя, Се́й Бо́г на́ш, пло́тски прие́мый, кля́тву разруши́л е́сть: я́ко просла́вися.

Победи́тель и Одоле́тель сме́рти, и́же сме́рти убоя́вся, яви́ся: стра́стную бо пло́ть одушевле́нную прие́м, Се́й Бо́г на́ш, и бра́вся с мучи́телем, вся́ совоскреси́: я́ко просла́вися.

Богоро́дичен: И́стинную Богоро́дицу вси́ язы́цы сла́вят Тя́, без се́мене ро́ждшую: соше́д бо во утро́бу освяще́нную Твою́, Се́й Бо́г на́ш, Е́же по на́м осуществова́ся, Бо́г же и Челове́к из Тебе́ роди́ся.

Други́й кано́н крестовоскре́сен. Гла́с 3.

Пе́снь 1

Ирмо́с: Пе́снь но́вую пои́м, лю́дие:

Ро́д челове́чь порабоще́н мучи́телем грехолю́бным, кро́вию Боже́ственною Христо́с искупи́, и обоготвори́в обнови́л е́сть: я́ко просла́вися.

Я́ко у́бо сме́ртен, сме́рти хотя́й, И́же животу́ сокро́вищник, Христо́с вкуси́: а я́ко безсме́ртен сы́й естество́м, ме́ртвыя оживотвори́л е́сть: я́ко просла́вися.

И́н кано́н Пресвяте́й Богоро́дице, [его́же краестро́чие: Пою́ тре́тие пе́ние тебе́, Богоро́дице.] Гла́с 3.

Пе́снь 1

Ирмо́с то́йже.

Коле́но приклоня́ет вся́ко естество́ небе́сных, Де́во, вопло́щшемуся из Тебе́, со земны́ми же достоле́пно преиспо́дняя: я́ко просла́вися.

О примире́ний Я́же в Тебе́: благи́х бо незави́стно Пода́тель, я́ко Бо́г Ду́ха Боже́ственнаго пода́вый на́м, пло́ть от Тебе́, Отрокови́це, прия́т: я́ко просла́вися.

Катава́сиа: Отве́рзу уста́ моя́:

Пе́снь 3

Ирмо́с: И́же от не су́щих вся́ приведы́й, Сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.

Кресто́м Твои́м постыде́ся нечести́вый, соде́ла бо я́му, ю́же ископа́, впаде́: смире́нных же вознесе́ся, Христе́, ро́г, во Твое́м воскре́сении.

Благоче́стия пропове́дание язы́ком, я́ко вода́ покры́ моря́, Человеколю́бче: воскре́с бо от гро́ба, Тро́ический откры́л еси́ све́т.

Богоро́дичен: Пресла́вная глаго́лана бы́ша о Тебе́, Гра́де Одушевле́нный при́сно Ца́рствующаго: Тобо́ю бо, Влады́чице, су́щым на земли́ Бо́г спожи́л е́сть.

И́н Ирмо́с: Лу́к сокруши́л еси́ вра́жий:

Очище́ние, Пречи́стый Кре́сте, и́дольских яви́лся еси́ Ты́ нечисто́т: я́ко Иису́с Пребоже́ственный на Тебе́ ру́це распросте́рл е́сть.

Да вси́ ве́рнии живоприе́мный гро́бе, тебе́ покланя́емся: погребе́ся бо в тебе́ и воста́ Христо́с вои́стинну Бо́г на́ш.

И́н Ирмо́с то́йже

Же́зл из ко́рене Иессе́ова, проро́чески прозя́бши Де́ва, цве́т Тя́ Христе́, возсия́ на́м: Свя́т еси́, Го́споди.

Да Боже́ственному прича́стию (прича́стны) земноро́дныя соде́лаеши, от Де́вы пло́ть на́шу, Ты́ обнища́л еси́, прие́м: Свя́т еси́, Го́споди.

Пе́снь 4

Ирмо́с: Положи́л еси́ к на́м Тве́рдую любо́вь, Го́споди, Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Я́звы, Христе́, и ра́ны ми́лостивно подъя́л еси́, доса́ду по лани́тома ударе́ний терпя́, и долготерпели́вне оплева́ния нося́, и́миже соде́лал еси́ мне́ спасе́ние: сла́ва си́ле Твое́й, Го́споди.

Те́лом сме́ртным животе́, сме́рти причасти́лся еси́, стра́сти ра́ди ни́щих, и воздыха́ния убо́гих Твои́х: и растли́в тле́ющаго (растли́вшаго), Препросла́вленне, все́х совоскреси́л еси́, я́ко просла́вися.

Богоро́дичен: Помяни́, Христе́, е́же стяжа́л еси́ ста́до стра́стию Твое́ю: Препросла́вленныя Твоея́ Ма́тере ми́лостивныя мольбы́ прие́м, и посети́в озло́бленное, изба́ви си́лою Твое́ю, Го́споди.

И́н Ирмо́с: Стра́нна и неизрече́нна:

Созда́вый по о́бразу Твоему́, Человеколю́бче, челове́ка, и умерщвле́на грехо́м преступле́ния ра́ди, распе́нся на ло́бнем, спа́сл еси́.

Ме́ртвыя у́бо, и́хже пожре́ сме́рть, отдаде́: разори́ся же и а́дово тлетво́рное ца́рство, воскре́сшу Ти́ из гро́ба, Го́споди.

Богоро́дичен: Мари́е Чи́стая, Злата́я Кади́льнице, неслия́нно я́ко Еди́н от Тро́ицы в Тя́ соше́д, вопло́щься Бо́г Сло́во, ми́р облагоуха́л е́сть.

И́н Ирмо́с то́йже

И́же поста́вивый го́ры, Влады́ко, ме́рилом Боже́ственнаго ра́зума, отсече́н еси́ от Де́вы Ка́мень, кроме́ ру́к: си́ле Твое́й сла́ва, Человеколю́бче.

Неду́гующее исцели́л еси́ на́ше естество́, Влады́ко, скоре́йшую из Де́вы сию́ (в Де́ве тому́) соедини́в цельбу́, Твое́ Пречи́стое Сло́ве Божество́.

Ча́сть моя́ еси́, Го́споди, и насле́дие жела́нное, соедини́вый мя́ из Де́вы, Сло́ве, Ипоста́си Твое́й, пло́тию бы́в ипоста́сь.

Пе́снь 5

Ирмо́с: К Тебе́ у́тренюю, все́х Творцу́, преиму́щему вся́к у́м ми́рови, зане́ све́т повеле́ния Твоя́: в ни́хже наста́ви мя́.

Судии́ непра́ведному, евре́йскою за́вистию пре́дан бы́в, Всеви́дче, и все́й пра́ведне судя́й земли́, Ада́ма дре́вняго изба́вил еси́ осужде́ния.

Тво́й ми́р це́рквам Твои́м, Христе́, непобеди́мою си́лою Креста́ Твоего́, из ме́ртвых воскресы́й пода́ждь, и спаси́ ду́шы на́шя.

Богоро́дичен: Ски́ниа Свята́я, и простра́ннейши небе́с, я́ко И́же во все́й тва́ри Невмести́маго Сло́ва Бо́жия прие́мши, Еди́на яви́лася еси́, Присноде́во.

И́н Ирмо́с: На земли́ Неви́димый яви́лся еси́, и челове́ком во́лею сожи́л еси́ Непостижи́мый, и к Тебе́ у́тренююще, воспева́ем Тя́, Человеколю́бче.

Копие́м в ребро́ Твое́, О Христе́ мо́й, прободе́н бы́в, от ребра́ челове́ча созда́нную, губи́тельства все́м челове́ком бы́вшую хода́таицу, кля́твы свободи́л еси́.

Ра́вен Отцу́ по Существу́ сы́й, свяще́нный хра́м Пречи́стаго Твоего́ и всечестна́го телесе́, из ме́ртвых воскреси́л еси́, Христе́ Спа́се на́ш.

И́н Ирмо́с то́йже

Сло́во Бо́жие Сы́н Тво́й, Де́во, Соде́тель Ада́ма первозда́ннаго, не созда́ние, а́ще и пло́ть одушевле́ну Себе́ из Тебе́ созда́л е́сть.

Ра́вен Отцу́ Сы́н Тво́й, Де́во, Сло́во Бо́жие, Ипоста́сь соверше́нна во двою́ естеству́, Иису́с Госпо́дь, Бо́г соверше́н и Челове́к.

Пе́снь 6

Ирмо́с: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

Бе́здна ми́лости и щедро́т обы́де мя́, благоутро́бным сни́тием Твои́м: вопло́щься бо, Влады́ко, и бы́в в ра́бии зра́це обожи́л еси́, с Собо́ю сопросла́вив.

Умерщвле́ние подъя́т умертви́тель, умерщвле́наго оживле́нно ви́дя: Твоего́ воскре́сения си́и су́ть, Христе́, о́бразы, и стра́сти Твоея́ Пречи́стыя победи́тельная.

Богоро́дичен: Пречи́стая, я́же Еди́на Созда́телю и челове́ком, па́че ума́ исхода́таившая, Сы́на Твоего́ ми́лостива прегре́шшым рабо́м Твои́м, и побо́рника бы́ти, помоли́ся.

И́н Ирмо́с: Селе́ния Ио́на, е́же в преиспо́днем а́де, есте́ственный о́браз бы́в, вопия́ше: возведи́ от тли́ живо́т мо́й, Человеколю́бче.

Ра́нами Ты́ искуси́вся, от а́да ура́неных, стра́стию Креста́ совоскреси́л еси́. Те́мже Ти́ зову́: возведи́ от тли́ живо́т мо́й, Человеколю́бче.

Отверза́ются Ти́, Христе́, стра́хом врата́ а́дова, сосу́ды же вра́жия восхища́ются: те́мже Тя́ жены́ срето́ша, вме́сто печа́ли ра́дость прии́мшя.

И́н Ирмо́с то́йже

Вообража́ется е́же по на́м, от Нетле́нныя Де́вы, И́же о́бразом неразлу́чный (о́бразу неприча́стный) о́бразом бы́в и ве́щию, не прело́жся Божество́м Челове́к.

Бе́здны грехо́в, и бу́ри страсте́й, Пречи́стая, изба́ви мя́: еси́ бо приста́нище, и бе́здна чуде́с, ве́рою притека́ющым к Тебе́.

Конда́к, гла́с 3. Подо́бен: Де́ва дне́сь:

Воскре́сл еси́ дне́сь из гро́ба, Ще́дре, и на́с возве́л еси́ от вра́т сме́ртных: дне́сь Ада́м лику́ет, и ра́дуется Е́ва, вку́пе же и проро́цы с патриа́рхи воспева́ют непреста́нно Боже́ственную держа́ву вла́сти Твоея́.

И́кос: Не́бо и земля́ дне́сь да ликовству́ют, и Христа́ Бо́га единому́дренно да воспева́ют, я́ко у́зники от гробо́в воскреси́. Сра́дуется вся́ тва́рь, принося́щи досто́йныя пе́сни Созда́телю все́х, и Изба́вителю на́шему: я́ко челове́ки из а́да дне́сь я́ко Жизнода́тель совозве́д, на небеса́ совозвыша́ет, и низлага́ет вра́жия возноше́ния, и врата́ а́дова сокруша́ет Боже́ственною держа́вою вла́сти Своея́.

Пе́снь 7

Ирмо́с: Я́коже дре́вле благочести́выя три́ о́троки ороси́л еси́ в пла́мени халде́йстем, све́тлым Божества́ огне́м и на́с озари́, Благослове́н еси́, взыва́ющыя, Бо́же оте́ц на́ших.

Раздра́ся церко́вная све́тлая катапета́сма (заве́са), в распя́тии Соде́теля, сокрове́нную в Писа́нии явля́ющи ве́рным и́стину, благослове́н еси́, зову́щым, Бо́же оте́ц на́ших.

Прободе́нным Твои́м Ре́бром, ка́плями Богото́чныя Животворя́щия Кро́ве, Христе́, смотри́тельно ка́плющия на зе́млю, су́щих от земли́ возсозда́л еси́, благослове́н еси́, зову́щих, Бо́же оте́ц на́ших.

Тро́ичен: Ду́ха Блага́го со Отце́м просла́вим, и с Сы́ном Единоро́дным, Еди́но в Трие́х ве́рнии чту́ще Нача́ло, и Еди́но Божество́: благослове́н еси́, зову́ще, Бо́же оте́ц на́ших.

И́н Ирмо́с: Го́рдый мучи́тель, но дете́й бы́сть игра́лище: я́коже бо пе́рсть попра́вше седмери́чный пла́мень, поя́ху: благослове́н еси́, Го́споди, Бо́же оте́ц на́ших.

Не про́ста со́лнце на кресте́ ви́сяща челове́ка, но Бо́га воплоще́нна зря́ помрача́ется. Ему́же и пое́м: благослове́н еси́, Го́споди, Бо́же оте́ц на́ших.

Кре́пкаго Божество́м прие́м а́д страшли́вый, нетле́ния Пода́теля, ду́шы пра́ведных вопию́щыя изблева́: благослове́н еси́, Го́споди, Бо́же оте́ц на́ших.

Богоро́дичен: Сокро́вище многоце́нное благослове́ния яви́лася еси́, Пречи́стая, чи́стым се́рдцем Тебе́ испове́дающым Богороди́тельницу: не́бо из Тебе́ воплоти́ся Бо́г оте́ц на́ших.

И́н Ирмо́с то́йже

И́же сла́вы Госпо́дь, и держа́й го́рния си́лы, И́же со Отце́м седя́й, де́вственныма рука́ма носи́мь: благослове́н еси́, Го́споди, Бо́же оте́ц на́ших.

Я́ра сме́рть, но сию́ Тебе́ бесе́довавшую (соедини́вшуся) погуби́л еси́, от Де́вы Богоипоста́сная пло́ть бы́в: благослове́н еси́, Го́споди, Бо́же оте́ц на́ших.

Богоро́дицу вси́ Тя Бо́га ро́ждшую уве́дехом, Еди́наго бо от Тро́ицы воплоти́вшагося из Тебе́ родила́ еси́: благослове́н, Пречи́стая, Пло́д Твоего́ чре́ва.

Пе́снь 8

Ирмо́с: Нестерпи́мому огню́ соедини́вшеся, богоче́стия предстоя́ше ю́ноши, пла́менем же неврежде́ни, Боже́ственную пе́снь поя́ху: благослови́те вся́ дела́ Госпо́дня Го́спода, и превозноси́те во вся́ ве́ки.

Раздра́ся церко́вная све́тлость, егда́ кре́ст Тво́й водрузи́ся на ло́бнем, и тва́рь преклоня́шеся стра́хом, воспева́ющи: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Воскре́сл еси́, Христе́, из гро́ба, и па́дшаго прельще́нием, дре́вом испра́вил еси́ Боже́ственною си́лою, зову́ща и глаго́люща: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Богоро́дичен: Хра́м Бо́жий яви́лася еси́, Вмести́лище одушевле́нное, и Ковче́г: Творца́ бо челове́ком, Богороди́тельнице Пречи́стая, примири́ла еси́, и досто́йно вся́ дела́ пое́м Тя́, и превозно́сим во вся́ ве́ки.

И́н Ирмо́с: Веще́ственнаго огня́ пла́мень невеще́ственным увяди́ша, богозри́мии о́троцы, и поя́ху: благослови́те вся́ дела́ Госпо́дня Го́спода.

Сло́во нестра́стное, безстра́стно у́бо Божество́м, стра́ждет же пло́тию Бо́г, Ему́же и пое́м: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Усну́вый у́бо я́ко сме́ртен, воскре́сен еси́ я́ко Безсме́ртен, Спа́се, и спаса́еши от сме́рти пою́щих: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Тро́ичен: Слу́жим благоче́стно Триипоста́сному Божеству́, соединя́ему неизрече́нно, и пое́м: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

И́н Ирмо́с то́йже

Чи́ны у́мныя я́ко Ма́ти превозшла́ еси́, и бли́з Бо́га бы́вши: благослови́м, Благослове́нная Де́во, рождество́ Твое́, и превозно́сим во вся́ ве́ки.

Добро́ту есте́ственную, красне́йшу показа́ла еси́, облистава́ющую пло́ть Божества́. Благослови́м, Благослове́нная Де́во, рождество́ Твое́, и превозно́сим во вся́ ве́ки.

Та́же, пе́снь Богоро́дицы: Вели́чит душа́ моя́ Го́спода: с припе́вом: Честне́йшую Херуви́м:

Пе́снь 9

Ирмо́с: Но́вое чу́до и боголе́пное, деви́ческую бо две́рь затворе́ную я́ве прохо́дит Госпо́дь, на́г во вхо́де, и Плотоно́сец яви́ся во исхо́де Бо́г, и пребыва́ет Две́рь затворе́на: Сию́ неизрече́нно, я́ко Богома́терь велича́ем.

Стра́шно е́сть зре́ти Тебе́, Творца́, на дре́ве воздви́жена, Сло́ве Бо́жий, пло́тски же стра́ждуща Бо́га за рабы́, и во гро́бе бездыха́нна лежа́ща, ме́ртвыя же из а́да разреши́вша: те́мже Тя́, Христе́, я́ко Всеси́льна велича́ем.

Из тли́ сме́ртныя спа́сл еси́, Христе́, пра́отцы, положе́н бы́в во гро́бе ме́ртв, и живо́т процве́л еси́, ме́ртвыя воскреси́в, руководи́в естество́ челове́ческое ко све́ту, и в Боже́ственное обле́к нетле́ние. Те́мже исто́чника Тя́ све́та при́сно жива́го велича́ем.

Богоро́дичен: Хра́м и Престо́л яви́лася еси́ Бо́жий, во́ньже всели́ся И́же в вы́шних сы́й, рожде́йся неискусому́жно, Всечи́стая, пло́ти Твоея́ не отве́рз вся́чески врата́. Те́мже непреста́нными, Чи́стая, моли́твами Твои́ми, язы́ки ва́рварския ско́ро до конца́ покори́.

И́н Ирмо́с: Сла́дкою Пречи́стаго Твоего́ рождества́ стрело́ю уя́звлени, Чи́стая, Твое́й достожела́нней добро́те дивя́щеся, пе́сньми а́нгельскими досто́йно Тя́, я́ко Ма́терь Бо́жию велича́ем.

Че́сть челове́ком от безче́стныя сме́рти все́м источи́л еси́: ея́же распя́тием Твои́м, Спа́се, вкуси́в, существо́м сме́ртным нетле́ние мне́ дарова́л еси́, Христе́, я́ко Человеколю́бец.

Спа́сл мя́ еси́ воскре́с из гро́ба, Христе́, воскре́сл же (и возне́сл) еси́, и Отцу́ приве́л еси́ Твоему́ Роди́телю: одесну́ю же Его́ спосади́л еси́ за благоутро́бие ми́лости Твоея́, Го́споди.

И́н Ирмо́с то́йже

Сы́тость Твои́х похва́л, Де́во, благочести́вым ве́рным отню́д не быва́ет: жела́нием бо жела́ние при́сно Боже́ственное, и Духо́вное прие́млюще, я́ко Ма́терь Бо́жию велича́ем.

Положи́л еси́ на́м непосты́дную Моли́твенницу, Тебе́ ро́ждшую, Христе́. Тоя́ мольба́ми Ми́лостива подае́ши на́м Ду́ха, Пода́теля бла́гости, от Отца́ Тобо́ю происходя́ща.

По катава́сии ектениа́. Та́же, Свя́т Госпо́дь Бо́г на́ш. И свети́лен.

На хвали́тех стихи́ры воскре́сны, гла́с 3.

Сти́х: Сотвори́ти в ни́х су́д напи́сан: сла́ва сия́ бу́дет все́м преподо́бным Его́.

Прииди́те, вси́ язы́цы, уразуме́йте стра́шныя та́йны си́лу: Христо́с бо Спа́с на́ш, Е́же в нача́ле Сло́во, распя́тся на́с ра́ди, и во́лею погребе́ся, и воскре́се из ме́ртвых, е́же спасти́ вся́ческая: Тому́ поклони́мся.

Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.

Пове́даша вся́ чудеса́ стра́жие Твои́, Го́споди: но собо́р суеты́ испо́лни мздо́ю десни́цу и́х, скры́ти мня́ше воскре́сение Твое́, е́же ми́р сла́вит: поми́луй на́с.

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

Ра́дости вся́ испо́лнишася воскре́сения иску́с прии́мша: Мари́а бо Магдали́на ко гро́бу прии́де, обре́те а́нгела на ка́мени седя́ща, ри́зами блиста́ющася и глаго́люща: что́ и́щете жива́го с ме́ртвыми: не́сть зде́, но воста́, я́коже рече́, предваря́я вы́ в Галиле́и.

Сти́х: Хвали́те Его́ во гла́се тру́бнем: хвали́те Его́ в псалти́ри и гу́слех.

Во све́те Твое́м, Влады́ко, у́зрим све́т, Человеколю́бче: воскре́сен бо еси́ из ме́ртвых, спасе́ние ро́ду челове́ческому да́руя: да Тя́ вся́ тва́рь славосло́вит Еди́наго Безгре́шнаго, поми́луй на́с.

И́ны стихи́ры Анато́лиевы, гла́с то́йже.

Сти́х: Хвали́те Его́ в тимпа́не и ли́це, хвали́те Его́ в стру́нах и орга́не.

Пе́снь у́треннюю мироно́сицы жены́ со слеза́ми приноша́ху Тебе́, Го́споди, благоуха́ния бо арома́ты иму́щя, гро́ба Твоего́ достиго́ша, пречи́стое те́ло Твое́ пома́зати тща́щяся. А́нгел седя́й на ка́мени те́м благовести́: что́ и́щете жива́го с ме́ртвыми? сме́рть бо попра́в воскре́се я́ко Бо́г, подая́ все́м ве́лию ми́лость.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.

Блиста́яся а́нгел на гро́бе Твое́м животво́рнем, мироно́сицам глаго́лаше: истощи́в гро́бы Изба́витель плени́ а́да, и воскре́се тридне́вен, я́ко Еди́н Бо́г и Всеси́лен.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Во гро́бе Тя́ иска́ше, прише́дши во еди́ну от суббо́т Мари́а Магдали́на, не обре́тши же рыда́ше с пла́чем вопию́щи: увы́ мне́, Спа́се мо́й! Укра́ден бы́л еси́ все́х Царю́. Супру́г же живоно́сных а́нгел вну́трь гро́ба вопия́ше: что́ пла́чеши, о же́но? пла́чу, глаго́лет, я́ко взя́ша Го́спода моего́ от гро́ба, и не ве́м, где́ положи́ша Его́. Сия́ же обра́щшися вспя́ть, я́ко ви́де Тя́, а́бие возопи́: Госпо́дь мо́й и Бо́г мо́й, сла́ва Тебе́.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

Евре́и затвори́ша во гро́бе Живо́т, разбо́йник же отве́рзе язы́ком наслажде́ние, зовы́й и глаго́ля: И́же со мно́ю мене́ ра́ди распны́йся: сообе́си ми ся на дре́ве, и яви́ся мне́ на престо́ле со Отце́м седя́: то́й бо е́сть Христо́с Бо́г на́ш, име́яй ве́лию ми́лость.

Сла́ва, стихи́ра ева́нгельская. И ны́не, Богоро́дичен: Преблагослове́нна еси́, Богоро́дице де́во: Славосло́вие вели́кое.

По славосло́вии тропа́рь:

Дне́сь спасе́ние ми́ру бы́сть, пое́м Воскре́сшему из гро́ба, и Нача́льнику жи́зни на́шея: разруши́в бо сме́ртию сме́рть, побе́ду даде́ на́м и ве́лию ми́лость.

И ектении́, и отпу́ст.

На литурги́и блаже́нна, гла́с 3:

Отве́ргша Христе́ за́поведь Твою́, пра́отца Ада́ма из рая́ изгна́л еси́: разбо́йника же ще́дре испове́давша Тя́ на кресте́, во́нь всели́л еси́, зову́ща: помяни́ мя, Спа́се, во Ца́рствии Твое́м.

Сти́х: Блаже́ни чи́стии се́рдцем, я́ко ти́и Бо́га у́зрят.

Согре́шших на́с сме́ртною осуди́л еси́ кля́твою, Живода́вче и Го́споди, те́лом же Твои́м, безгре́шне Влады́ко, пострада́в, сме́ртныя оживи́л еси́ зову́щыя: помяни́ и на́с во Ца́рствии Твое́м.

Сти́х: Блаже́ни миротво́рцы, я́ко ти́и сы́нове Бо́жии нареку́тся.

Воскре́с из ме́ртвых, совоскреси́л еси́ на́с от страсте́й воскресе́нием Твои́м, Го́споди: сме́ртную же всю́ си́лу погуби́л еси́, Спа́се. Сего́ ра́ди ве́рою Ти́ зове́м: помяни́ и на́с во Ца́рствии Твое́м.

Сти́х: Блаже́ни и́згнани пра́вды ра́ди, я́ко те́х е́сть Ца́рство Небе́сное.

Тридне́вным Твои́м погребе́нием, и́же во а́де умерщвле́нныя я́ко Бо́г оживотвори́вый, совоздви́гл еси́, и нетле́ние все́м я́ко Бла́г источи́л еси́ на́м, ве́рою зову́щым всегда́: помяни́ и на́с во Ца́рствии Твое́м.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Мироно́сицам жена́м пе́рвее яви́лся еси́, воскре́с из ме́ртвых, Спа́се, возопи́в: е́же ра́дуйтеся, и те́ми друго́м Твои́м возвеща́еши воста́ние Твое́, Христе́, сего́ ра́ди ве́рою Ти́ зове́м: помяни́ и на́с во Ца́рствии Твое́м.

Сти́х: Ра́дуйтеся и весели́теся, я́ко мзда́ ва́ша мно́га на небесе́х.

На горе́ Моисе́й ру́це распросте́р, прообразова́ние кре́ст, Амали́ка победи́вый: мы́ же ве́рою того́ на бе́сы ору́жие кре́пкое прие́мше, вси́ зове́м: помяни́ и на́с во Ца́рствии Твое́м.

Сла́ва: Отца́ и Сы́на, и Ду́ха Свята́го воспои́м ве́рнии, Еди́наго Бо́га, Еди́наго Го́спода, я́ко от Еди́наго бо Со́лнца Трисия́ннаго е́сть Тро́ица (я́ко от Еди́наго Со́лнца: трисия́тельна бо е́сть Тро́ица) и просвеща́ет вся́ зову́щыя: помяни́ и на́с во Ца́рствии Твое́м.

И ны́не, Богоро́дичен: Ра́дуйся, две́ре Бо́жия, Е́юже про́йде вопло́щься Созда́тель, запеча́тану сохрани́в Тя́. Ра́дуйся, о́блаче ле́гкий, Боже́ственный до́ждь нося́й Христа́, ра́дуйся, Ле́ствице и Престо́ле Небе́сный. Ра́дуйся, Горо́ Бо́жия Честна́я, Ту́чная, Несеко́мая.

Проки́мен, гла́с 3: По́йте Бо́гу на́шему, по́йте, по́йте Царе́ви на́шему, по́йте. Сти́х: Вси́ язы́цы восплещи́те рука́ми, воскли́кните Бо́гу гла́сом ра́дования. Аллилу́иа: На Тя́, Го́споди, упова́х, да не постыжу́ся во ве́к. Сти́х: Бу́ди ми́ в Бо́га Защи́тителя, и в до́м прибе́жища, е́же спасти́ мя.

Понедельник

В неде́лю ве́чера

на Го́споди воззва́х, стихи́ры умили́тельны. Гла́с 3

Подо́бен: Ве́лия му́ченик твои́х:

Сти́х: А́ще беззако́ния на́зриши, Го́споди, Го́споди, кто́ постои́т; я́ко у Тебе́ очище́ние е́сть.

Вельми́ согреша́юща мя́, и Тебе́ огорчева́юща блага́го Влады́ку, и ми́лостива естество́м, обраща́ющася, я́ко блу́днаго приими́ мя, и еди́наго от нае́мник Твои́х сотвори́ мя, небе́сный О́тче.

Сти́х: И́мене ра́ди Твоего́, потерпе́х Тя́, Го́споди, потерпе́ душа́ моя́ в Сло́во Твое́, упова́ душа́ моя́ на Го́спода.

Ле́ностию жития́ ме́ру преидо́х, и к концу́ уже́ окая́нный прибли́жихся, не помышля́ю жду́щаго мя́ суда́, и от Бо́га отпаде́ния: но обрати́в мя́, Спа́се, си́х все́х исхити́.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Гее́нны, и зубна́го скре́жета изба́ви, Го́споди, смире́нную мою́ ду́шу, и вся́каго ино́го томле́ния ве́чнаго, Преблаги́й: я́ко да ве́рою Тя́ пою́, Ми́лостиваго Бо́га и Человеколю́бца естество́м.

Та́же в мине́и стихи́ры свято́му. Сла́ва, свято́му: И ны́не. Богоро́дичен. А́ще ли не́сть мине́и: и́ны стихи́ры святы́м безпло́тным а́нгелом, гла́с то́йже.

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

Ли́ки безпло́тных, Го́споди, соста́вил еси́, бога́тство явля́я все́м Твоея́ бла́гости: и приве́л еси́ от небытия́ во е́же бы́ти, па́че ума́ сла́ву Твою́ ны́не сла́вящих гла́сы немо́лчными.

Сти́х: Хвали́те Го́спода, вси́ язы́цы, похвали́те Его́, вси́ лю́дие.

Ве́лия а́нгел Твои́х, Христе́, си́ла: безтеле́сни бо су́ще ми́р проти́чут, сохраня́юще це́ркви си́лою, я́же от Тебе́, Влады́ко, и Тебе́ мо́лятся о вселе́нней.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Добро́ту трисо́лнечную Твою́ еди́нственную, зря́ще си́лы Тебе́ служа́щыя, явля́ют вторы́я све́тлости су́щым в ми́ре: и о́бщно сия́юще, подаю́т на́м Боже́ственныя све́тлости.

Сла́ва, и ны́не, Богоро́дичен: Все́ми владя́щая тва́рьми, Пречи́стая, лю́те облада́ема страстьми́ ума́ моего́, свободи́ те́плым твои́м предста́тельством и Ма́тернею моли́твою и порабо́ти мя́ Сы́ну и Бо́гу Твоему́.

Та́же, Све́те ти́хий: Проки́мен дне́: И Сподо́би, Го́споди в ве́чер се́й:

На стихо́вне стихи́ры умили́тельны. Гла́с 3:

Вече́рнюю пе́снь прино́сим Ти́, Христе́, с кади́лом и пе́ньми духо́вными, поми́луй и спаси́ ду́шы на́шя.

Сти́х: К Тебе́ возведо́х о́чи мои́, живу́щему на небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Спаси́ мя, Го́споди Бо́же мо́й, ты́ бо все́м еси́ спасе́ние: бу́ря мя́ страсте́й смуща́ет, и бре́мя беззако́ний мои́х погружа́ет мя́. Да́ждь ми́ ру́ку по́мощи, и к све́ту возведи́ мя умиле́ния, я́ко еди́н милосе́рд и человеколю́бец.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.

Ве́лия Креста́ Твоего́, Го́споди, си́ла: водрузи́ся бо на ме́сте, и де́йствует в ми́ре, и показа́ от ры́барей апо́столы, и от язы́к му́ченики, да мо́лятся о душа́х на́ших.

Сла́ва, и ны́не: Богоро́дичен: Влады́чице, предста́тельнице все́х моля́щихся Тебе́, Тобо́ю дерза́ем, и Тобо́ю хва́лимся, и к Тебе́ все́ упова́ние на́ше е́сть: моли́ ро́ждшагося из Тебе́, за непотре́бныя рабы́ Твоя́.

Та́же: Ны́не отпуща́еши: И трисвято́е. По О́тче на́ш: тропа́рь, и отпу́ст.

В неде́лю на повече́рии

кано́н моле́бный ко Пресвяте́й Богоро́дице. Гла́с 3.

Пе́снь 1

Ирмо́с: Во́ды дре́вле, ма́нием Боже́ственным, во Еди́но со́нмище совокупи́вый, и раздели́вый мо́ре изра́ильтеским лю́дем, Се́й Бо́г на́ш, препросла́влен е́сть: Тому́ Еди́ному пои́м, я́ко просла́вися.

Великоимени́тая Еди́на, Пресвята́я Де́во Мари́е херуви́м сла́внейшая Дави́дова дщи́, и добро́та Иа́ковля, Ма́ти Бо́га на́шего: возвели́чися зело́ сла́ва Твоя́, и мы́ вси́ Тя ве́рою сла́вим.

Пропе́ншаго Сло́вом не́бо я́ко ко́жу, Твои́ма рука́ма я́ко Челове́ка носи́ла еси́: Сего́ у́бо моли́ неизме́нно, Чи́стая, страсте́й безслове́сия ду́шу мою́ изба́вити, и от вся́кия ско́рби.

Сла́ва: Я́же пре́жде все́х ве́к, пронарече́нная Де́во, Царя́ сла́вы порфи́ра Пречи́стая: в ню́же обле́клся в после́дняя времена́, покры́ ко́жныя ри́зы Ада́ма пра́отца, и мене́ ны́не покры́й.

И ны́не: Тлю́ творя́щий дре́вле гре́х ро́ду челове́ческому, Де́во Христа́ ро́ждши, нестерпи́мый о́гнь изсуши́ла еси́: те́мже страсте́й пото́ки души́ моея́ изсуши́ Твои́ми моли́твами.

Пе́снь 3

Ирмо́с: И́же от несу́щих вся́ приведы́й, Сло́вом созида́емая, соверша́емая Ду́хом, Вседержи́телю вы́шний, в любви́ Твое́й утверди́ мене́.

И́же о́гненным влады́чеством Влады́ка и Госпо́дь Тво́й Сы́н нарече́ся, Чи́стая: те́мже изба́ви мя́, Влады́чице, стра́стных рабо́т Твои́ми моли́твами.

От бу́ри плотски́х страсте́й изба́ви мя́ раба́ Твоего́ ско́ро, Пречи́стая, Тишину́ ро́ждши спасе́ния, и Исто́чник безстра́стия.

Сла́ва: Све́та незаходи́маго свети́льник светоза́рен бы́вши, Пречи́стая, ми́р просвети́ла еси́: те́мже заря́ми Твои́ми души́ моея́ разори́ о́блак.

И ны́не: Ме́ртва мя́ су́ща душе́ю, от мно́жества злы́х страсте́й, оживотвори́, Влады́чице, Я́же ро́ждшая живода́вца Христа́ несказа́нно.

Пе́снь 4

Ирмо́с: Положи́л еси́ к на́м тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Прии́де на мя́ плотска́го мудрова́ния бра́нь, и пленя́ет мою́ ду́шу: но И́же вся́к у́м преиму́щий Ми́р ро́ждшая, Тво́й ми́р, Влады́чице, пода́ждь ми́.

Ми́ро у́мное из чре́ва источи́ла еси́ ми́ру: те́мже от скве́рн страсте́й ду́шу мою́ свободи́, и да́ждь ми́, Пречи́стая, безстра́стия ми́ро Твои́ми моли́твами.

Сла́ва: Ста́мну Тя́ злату́ю, жи́зни Ма́нну носи́вшую, Богому́жнаго Христа́, я́ве ве́дый молю́: накорми́ ду́шу мою́ та́ющую гла́дом, и пото́ком напо́й Ду́ха.

И ны́не: Е́ва у́бо пре́жде неудержа́нно введе́ сме́рть: Ты́ же де́вством чи́стым и́стинную Жи́знь ввела́ еси́. Те́мже сме́рти мя́ грехо́вныя изба́ви, Твои́ми моли́твами.

Пе́снь 5

Ирмо́с: На земли́ неви́димый яви́лся еси́, и челове́ком во́лею сожи́л еси́ Непостижи́мый и к Тебе́ у́тренююще, воспева́ем Тя́, Человеколю́бче.

Избавле́ние на́м бы́в Сы́н Тво́й, Де́во, вся́ от тли́ изба́ви: те́мже изба́ви мя́ плотска́го мудрова́ния, и страсте́й настоя́ния.

Огне́м Твои́х моли́тв, Богоро́дице, стра́стных помышле́ний те́рние все́ попали́, Я́же клеща́ у́гля, челове́ка очи́стившая.

Сла́ва: Ты́ Бо́жия еси́ Ю́ница, на́с ра́ди пожре́наго человеколю́бно, Боже́ственнаго Юнца́: Его́же Боже́ственною кро́вию се́рдце мое́ очи́сти.

И ны́не: Кра́сную пре́жде стяжа́х доброде́телей оде́жду, ея́же совлеко́хся ле́ностию мое́ю: Ты́ же, Де́во, ны́не мя́ облецы́ в светле́йшу, Твои́ми моли́твами.

Пе́снь 6

Ирмо́с: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя Упра́вителю спаси́.

Поколеба́ша хра́м души́ моея́ зло́бы лю́тая кова́рства: но я́ко утверди́вшаго зе́млю на вода́х Христа́ ро́ждшая, Твои́ми моли́твами утверди́.

Разреши́ла еси́ до́лг земноро́дных, Би́сера многоце́ннаго ро́ждши. Те́мже разреши́, Пречи́стая, скоре́е плени́цы прегреше́ний мои́х, и страсте́й, и скорбе́й.

Сла́ва: Даде́ ве́рным Тя́ прибе́жище, и Боже́ственный покро́в, рожде́йся из ложе́сн Твои́х Бо́г преблаги́й. Те́мже, Пречи́стая, и мене́ покры́й Твои́ма дла́ньма, и соблюди́.

И ны́не: Волна́ми жития́ умовре́дно а́з окая́нный ча́сто погружа́емь, и рабо́тами вра́жиими всегда́ обурева́емь, ны́не зову́ Ти: Богоро́дице, помози́ ми.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 3. Подо́бен: Боже́ственныя:

Боже́ственная была́ еси́ се́нь Сло́ва, Еди́на Пречи́стая Де́во Ма́ти, чистото́ю а́нгелы превозше́дшая: па́че все́х бы́вша мя́ оскверне́на плотски́ми прегреше́нии, очи́сти моли́тв Твои́х Боже́ственными вода́ми, подаю́щи, Чи́стая, ве́лию ми́лость.

Пе́снь 7

Ирмо́с: Я́коже дре́вле благочести́выя три́ о́троки ороси́л еси́ в пла́мени халде́йстем, све́тлым Божества́ огне́м, и на́с озари́, благослове́н еси́, взыва́ющыя, Бо́же оте́ц на́ших.

Собо́ри лука́вых бесо́в обыдо́ша мя́, и плотсти́и со́нми страсте́й: но я́ко кре́пкаго во бра́нех Христа́ ро́ждшая, изба́ви мя́ ча́стых печа́лей и лю́тых напа́даний.

Еди́ный херуви́мским существо́м непристу́пный, и стра́шный а́нгельским чино́м, всели́ся в Тя́, Чи́стая, и на́с обнови́: И́мже покажи́ мя, Влады́чице, стра́шна неви́димым враго́м.

Сла́ва: Ра́й слове́сен, Де́во, Ты́ была́ еси́, прозя́бший Дре́во жи́зни: Его́же прича́щся Ада́м, сме́ртнаго плода́ изба́вися. Те́мже и мене́ ны́не услади́, и страсте́й изба́ви вкуше́ния.

И ны́не: Ка́ла мя́ страсте́й теле́снаго изба́ви, и искуше́ний бесо́вских, Я́же Изба́вителя ро́ждшая челове́ком вы́шняго Селе́ние, и Хра́м освяще́н, Бо́га оте́ц на́ших.

Пе́снь 8

Ирмо́с: Нестерпи́мому огню́ соедини́вшеся, Богоче́стия предстоя́ще ю́ноши, пла́менем же неврежде́ни, Боже́ственную пе́снь поя́ху: благослови́те вся́ дела́ Госпо́дня Го́спода, и превозноси́те во вся́ ве́ки.

О́блаче све́та, свети́ла сотво́ршаго в ми́ре ве́лия, дневно́е же и нощно́е, вся́ко помраче́ние разори́, Твои́ми заря́ми, все́х страсте́й и прегреше́ний мои́х: и покажи́ мя́ Сы́на све́та, Богороди́тельнице.

С Небесе́ соше́дшим Дожде́м во чре́во Твое́ Богоро́дице, ду́шу мою́ и се́рдце мое́ просвети́ и ороси́: и пла́мень угаси́ страсте́й и скорбе́й, да Тя́ сла́влю те́пле во вся́ ве́ки.

Сла́ва: Неизглаго́ланно, Чи́стая, Прему́дрость Бо́жию, вся́ от не су́щих Небе́сное и земно́е естество́ совоку́пльшую, Ты́ родила́ еси́, Ея́же Сло́вом да́ждь ми́ му́дрость и ра́зум, я́ко да воспою́ я́ве Боже́ственное Твое́ Рождество́.

И ны́не: Ороси́тися Влады́чице ми́ру Твои́ми моли́твами души́ мое́й и те́лу, вопию́ и молю́ся: и боле́зней грехо́вных и страсте́й зло́бы, изба́витися вско́ре: Ты́ бо еси́ все́х челове́ков исцеле́ние.

Пе́снь 9

Ирмо́с: На Сина́йстей горе́ ви́дя Тя́ в купине́ Моисе́й, неопа́льно О́гнь Божества́ заче́ншую во чре́ве: Дании́л же Тя́ ви́де го́ру несеко́мую: же́зл прозя́бший, Иса́иа взыва́ше, от ко́рене Дави́дова.

Поста́в Христу́ боготка́н яви́лася еси́, от него́же оде́жду пло́ть Богонача́льнейшу Ду́ха проугото́ва: облецы́ у́бо мене́ во оде́жду целому́дрия, Чи́стая, Твои́ми моли́твами.

Мы́сленный виногра́де, израсти́вший на́м Гро́зд Боже́ственный, от Него́же напая́емся водо́ю нетле́ния, источи́ мое́й души́ умиле́ние, и вино́ очище́ния, Твои́ми мольба́ми.

Сла́ва: Чи́стый и святы́й черто́же, и́мже естество́м Бо́г челове́ком уневе́сти естество́, молю́ Тя: совокупи́ мя Твоему́ Сы́ну, и присво́й Боже́ственною жи́знию, Твои́ми мольба́ми.

И ны́не: Па́жить тле́ния челове́ческаго существа́, нетле́ния Исто́чника Христа́ ро́ждши, Де́во, претвори́ла еси́: умертви́ ми у́бо опаля́ющее, и бу́рное стремле́ние страсте́й, Твои́ми мольба́ми.

Та́же, Досто́йно е́сть: И покло́н. Трисвято́е. И по О́тче на́ш: тропари́. И про́чее обы́чное, и отпу́ст.

В понеде́льник у́тра

по 1-м стихосло́вии седа́льны умили́тельны, гла́с 3:

Живу́щи на земли́, душе́ моя́, пока́йся, пе́рсть бо во гро́бе не пое́т, ни от прегреше́ний избавля́ет. Возопи́й Христу́ Бо́гу: Сердцеве́дче, согреши́х ти́, пре́жде да́же не осу́диши мя́, пощади́ мя, Бо́же, и поми́луй мя́.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Доко́ле, душе́ моя́, пребыва́еши в согреше́ниих? Доко́ле прие́млеши покая́нию отложе́ние? Приими́ во уме́ су́д гряду́щий, возопи́й Христу́ Бо́гу: сердцеве́дче, согреши́х, безгре́шне Го́споди, поми́луй мя́.

Сла́ва, и ны́не, Богоро́дичен: Красоте́ де́вства Твоего́, и пресве́тлой чистоте́ Твое́й, Гаврии́л удиви́вся, вопия́ше Ти́, Богоро́дице: ку́ю Ти́ похвалу́ принесу́ досто́йную? что́ же возъимену́ю Тя́? недоумева́ю и ужаса́юся. Те́мже, я́коже повеле́н е́смь, вопию́ Ти: ра́дуйся, Благода́тная.

По 2-м стихосло́вии, седа́лен, гла́с 3:

На стра́шном суди́щи без оглаго́льников облича́юся, без свиде́телей осужда́юся: кни́ги бо со́вестныя разгиба́ются, и дела́ сокрове́нная открыва́ются: пре́жде не́же во о́ном всенаро́дном позо́рищи и́маши испыта́ти, я́же мно́ю соде́янная, Бо́же, очи́сти мя́, и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Глубину́ согреше́ний мои́х Ты́ ве́си, Го́споди: да́ждь ми́ ру́ку по́мощи я́коже Петру́, и спаси́ мя.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Благоду́шное терпе́ния ва́шего, победи́ кова́рство злонача́льнаго врага́, страстоте́рпцы прехва́льнии, сего́ ра́ди ве́чнаго сподо́бистеся блаже́нства: но моли́теся Го́сподеви, христолюби́вых люде́й спасти́ ста́до, свиде́телие су́ще и́стины.

Сла́ва, и ны́не, Богоро́дичен: Ра́дуйся, Мари́е Де́во Ма́ти, Горо́ Свята́я, еде́мский раю́, из нея́же роди́ся Христо́с Бо́г, безсе́менное сло́во, и́мже жи́знь ми́рови прозябе́.

По 3-м стихосло́вии, седа́льны, гла́с 3.

Подо́бен: Красоте́ де́вства:

Егда́ суди́щу Твоему́ неумы́тному, и Боже́ственному суду́ предста́нем, и си́лы небе́сныя с тре́петом Тебе́ предста́нут, ка́ко тогда́ Тебе́ явлю́ся, о судие́ пра́веднейший? Дела́ осужде́нию и огню́ име́ю досто́йна: но А́нгел Твои́х моли́твами пощади́ мя тогда́ и спаси́ мя.

Небе́сная и земна́я сло́вом приве́л еси́, я́ко Всеси́лен: а́нгельския же ли́ки, с тре́петом предстоя́ще, непреста́нную хвалу́ Тебе́ прино́сят, Влады́ко, вся́ озаря́юще све́том Твои́м концы́. С ни́миже и мы́ Тебе́ вопие́м: спаси́ на́с благоутро́бием Твои́м.

Сла́ва, и ны́не, Богоро́дичен: Я́ко невозде́ланная Де́во лоза́, красне́йший гро́зд прозябла́ еси́, источа́ющ на́м вино́ спасе́ния, все́х веселя́щее ду́шы же и телеса́. Те́мже я́ко вину́ Тя до́брых блажа́ще при́сно, со а́нгелом вопие́м Ти́: ра́дуйся, Благода́тная.

Кано́н умили́тельный ко Го́споду на́шему Иису́су Христу́, и святы́м его́ му́чеником. Творе́ние Ки́р Ио́сифа. Гла́с 3.

Пе́снь 1

Ирмо́с: Фарао́ни колесни́цы глубино́ю покры́в, Го́споди, мо́ре разве́ргл еси́: и спа́сл еси́ пе́сньми пою́щыя Тя́, лю́ди изра́ильтеския.

Прегреше́ний тьмы́ изба́ви мя́ безгре́шне, я́же без ума́ соде́ях, подая́ ми сле́зы умиле́ния, я́коже иногда́ блудни́це.

Бы́вша мя́ верте́п разбо́йником безме́стными дея́нии, доброде́тельми яви́, Человеколю́бче, хра́м Тво́й, И́же во́лею рожде́йся в верте́пе.

Му́ченичен: Окормле́нием ду́ха Боже́ственнаго претеко́сте муче́ний бу́рю, богодохнове́ннии му́ченицы, и к Боже́ственному достиго́сте приста́нищу.

Му́ченичен: Просвети́вшеся благода́тию ду́ха му́ченицы, тьмы́ глубоча́йшия идолобе́сия убежа́сте, ра́дующеся прехва́льнии.

Богоро́дичен: Всесвята́я и пречи́стая, гре́шным помо́щнице, па́дающым исправле́ние, покая́ние ми́ да́ждь умиле́ния многосогреши́вшему.

Други́й кано́н святы́м безпло́тным а́нгелом, [его́же краегране́сие: Творю́ тре́тие пе́ние безпло́тным.] Феофа́ново. Гла́с 3.

Пе́снь 1

Ирмо́с: Пе́снь но́вую пои́м, лю́дие, от Де́вы Ро́ждшемуся во спасе́ние на́ше, и еди́но Сотво́ршему с Небе́сными земна́я, я́ко просла́вися.

Безнача́лен све́т, и пода́телен светоявле́ния сы́й всего́, Христе́ Бо́же, мое́ помышле́ние просвети́ предста́тельством Твои́х си́л.

Ра́дующеся ангелоле́пно, всебога́тым прича́стием а́нгельстии ли́цы, Твои́ми, Спа́се, кра́сными сия́нии та́йно облиста́ются.

Я́ко благи́й животво́рец благоде́тельный ду́х исходя́й от отца́, небе́сныя си́лы утверди́ неприкоснове́нными Боже́ственными благода́тьми.

Богоро́дичен: Чинонача́льниче Бо́жий Гаврии́ле безпло́тных лико́в, и ны́не пребога́те, гла́с ра́достен обра́дованней возопи́й: ра́дуйся, Всенепоро́чная.

Пе́снь 3

Ирмо́с: Утверди́ мене́, Го́споди, еди́не многоми́лостиве, и простри́ ми ру́ку я́ко Петро́ви, и спаси́ мя.

Я́коже Петра́ погружа́ема спа́сл еси́, Человеколю́бче: та́ко и мене́ из глубины́ прегреше́ний мои́х возведи́.

Умертви́ мя льсти́вый страстьми́ уби́в: Ты́ же мя́, Жизнода́телю, покая́ния о́бразы оживи́.

Му́ченичен: Огне́м веще́ственным му́ченицы непра́ведно опаля́еми, невеще́ственне невеще́ственнаго воспали́стеся жела́нием.

Му́ченичен: Му́ченицы растерза́еми, растерза́ния и ловле́ния погуби́ша льсти́ваго, и венце́в сподо́бишася.

Богоро́дичен: Мари́е господоимени́тая, мно́гими облада́ема мя́ страстьми́ душетле́нными, свободи́ моли́твами Твои́ми.

И́н Ирмо́с: Лу́ки сокруши́л еси́ вра́жии, и щиты́ сте́рл еси́ кре́постию Влады́ко Христе́, утвержде́ние на́ше, Свя́т еси́ Го́споди.

Струи́ теку́щыя и ре́ки бла́гости, яви́л еси́ благи́й а́нгельския ли́ки, сокрове́ннаго Твоего́ та́инства заре́ю сия́ющих.

Да пока́жеши я́ве сокро́вища бога́тства Твоего́, и кре́пости, Влады́ко Христе́, Твоея́ сла́вы прича́стники у́мныя си́лы приве́л еси́.

С тре́петом Тебе́ служе́бне а́нгельския све́тлости предстоя́ще, пою́т при́сно Твою́ си́лу, Христе́, неисчетноси́льную.

Богоро́дичен: Всего́ прия́т из Тебе́ неизме́нно челове́ка, и́же Влады́ка сего́ всего́, Богома́ти, и Тебе́ исто́чника благода́ти яви́л е́сть.

Пе́снь 4

Ирмо́с: Еда́ в река́х прогне́ваешися, Го́споди; еда́ в река́х я́рость Твоя́, или́ в мо́ри устремле́ние Твое́?

Разреши́ соу́зы страсте́й мои́х, Го́споди, покая́нием мя́ связа́в, и прича́стника яви́ благи́х Твои́х.

Возсия́й ми́ светоза́рныя покая́ния о́бразы, со́лнце сы́й Христе́, зо́л мои́х отгоня́я но́щь глубо́кую.

Му́ченичен: Яви́стеся му́дрии страда́льцы, я́коже у́глие ве́щь безбо́жия попаля́юще, и су́щыя во тьме́ просвеща́юще.

Му́ченичен: Ме́ртвости Xристо́ве уподо́бистеся му́ченицы, боле́знем примеси́вшеся разли́чным: те́мже Боже́ственную жи́знь насле́довасте.

Богоро́дичен: Да́ждь ми́, Чи́стая, и́стинное покая́ние, ути́ши страсте́й мои́х молву́, согреша́ющым предста́тельнице.

И́н Ирмо́с: Стра́нна и неизрече́нна Рождества́ Твоего́ та́йна: услы́шах слу́х Тво́й, и убоя́хся, и веселя́ся вопию́ Ти: си́ле Твое́й сла́ва, Человеколю́бче.

О́блацы и́же трисо́лнечное светозаре́ние прие́млюще, принесо́стеся Боже́ственным хоте́нием, тро́ическая украше́ния, окормля́еми си́лою ду́ха.

В ми́р посыла́ются к хотя́щым ве́ровати Тебе́, я́коже храни́телие спасе́ния благочести́вых А́нгели, соблюда́юще, Cпа́се, рабы́ Твоя́.

Просвеща́ются та́йно А́нгели, чи́стым приближе́нием, и богонача́льным Твои́м осия́нием: си́ле Твое́й сла́ва, зову́ще, Человеколю́бче.

Богоро́дичен: Ра́бски моле́бник ны́не прихожду́ в кро́в тво́й, Пренепоро́чная: изба́ви мя́, Богороди́тельнице, страсте́й смуще́ния, я́же безстра́стию вино́внаго ро́ждшая.

Пе́снь 5

Ирмо́с: Све́том Твои́м невече́рним, Христе́, озари́, Бо́же, смире́нную мою́ ду́шу, и наста́ви на стра́х тво́й: зане́ све́т повеле́ния Твоя́.

Не поста́ви мене́ на́га от де́л до́брых, на суди́щи Твое́м Человеколю́бче: но во оде́жду Боже́ственных дея́ний облецы́ покая́нием.

Уязви́хся ору́жием страсте́й, и в ро́в отча́яния впадо́х: не пре́зри, Bлады́ко, но исцели́ мя обраще́ния бы́лием.

Му́ченичен: И ногтьми́ стру́жеми лю́те, и мече́м страда́льцы убива́еми, и ра́нами изнуря́еми, не поклони́сте истука́нным коле́на.

Му́ченичен: Ми́р страда́ньми ва́шими красу́ется при́сно святи́и му́ченицы: преми́рное я́ко обрето́сте пребыва́ние со А́нгелы.

Богоро́дичен: Я́же еди́на сло́вом на земли́, пло́тию сло́во ро́ждши, и Де́ва пребы́вши, безслове́сных мя́ изба́ви дея́ния, я́ко да словесы́ честны́ми воспева́ю Тя́.

И́н Ирмо́с: На земли́ неви́димый яви́лся еси́, и челове́ком во́лею сожи́л еси́ непостижи́мый, и к Тебе́ у́тренююще, воспева́ем Тя́, Человеколю́бче.

Со Отце́м Сы́на и Ду́ха, трисия́нным све́том просве́щшеся ве́рнии, воспои́м еди́но Божество́, со а́нгельскими во́инствы.

Свещы́ сообраща́ющыяся, незаходи́мым сия́нием Божества́ пребоже́ственнаго, проявле́нне обога́щшеся, а́нгельстии чи́ни пропове́дают.

Еди́но нача́ло пребезнача́льное чести́ серафи́мы уча́т, вопию́ще гла́с трисвяты́й я́ве, ду́хом просвеща́еми а́нгели Божества́.

Богоро́дичен: Без се́мене, Отрокови́це, Тебе́ Арха́нгел Гаврии́л роди́ти Животода́вца благовести́, Богоро́дице Всечи́стая, с небесе́ соше́д.

Пе́снь 6

Ирмо́с: И́же в концы́ веко́в доше́дшыя, Человеколю́бче, и треволне́ньми напа́стей поги́бнути бе́дствующыя, вопию́щыя не пре́зри: спаси́, Спа́се, я́коже спа́сл еси́ от зве́ря проро́ка.

Превозне́сся мы́слию, я́коже дре́вний фарисе́й прегреше́нием низпадо́хся лю́те, и зря́ мя льсти́вый, весели́тся, Христе́: и́мже смири́вый сего́ Кресто́м, смири́вшася ны́не уще́дри мя́.

Грехолюби́в в житии́ бы́в, я́коже и́н никто́же, Влады́ко, ижди́х твое́ долготерпе́ние окая́нный, и еще́ е́смь нечу́вствен, но обрати́ мя Твои́м благоутро́бием.

Му́ченичен: Я́ростным произволе́нием, законопресту́пницы богому́дренных осужда́юще, огне́м и сожже́нием и прободе́ньми, зла́та светле́йше я́ко вои́стинну показа́ша, и Христу́ снасле́дники.

Му́ченичен: Суди́ще испо́лнено боре́ний, и по́двигов превели́ких, и па́че естества́ ра́ны преше́дше, победи́сте кня́зя тьмы́, и от Бо́га прия́сте страда́льцы венцы́.

Богоро́дичен: Ковче́г заве́та, святу́ю вои́стинну трапе́зу, очисти́лище на́ше, це́рковь Бо́жию одушевле́нную, всезлаты́й све́щник, и́стинную Ма́терь Зижди́теля воспева́ем.

И́н Ирмо́с: Селе́ния Ио́на, е́же в преиспо́днем а́де, есте́ственный о́браз бы́в, вопия́ше: возведи́ от тли́ живо́т мо́й, Человеколю́бче.

Пе́рвое и вседе́тельное богонача́лия сия́ние, Арха́нгели и А́нгели, си́льно пою́т зову́ще, с нача́лы и властьми́ и си́лами, гла́сы немо́лчными Го́спода. [Два́жды.]

И́же ми́р у́мный всесли́чным чи́ном по чину́ украше́й неви́димо, сему́ уподобля́тися благочи́нию, честну́ю Це́рковь благоволи́.

Богоро́дичен: Исцеле́ний Тя́ исто́чник приснотеку́щ, е́же в Тя́ все́льшееся Сло́во показа́: моея́ у́бо души́ я́звы, Богоро́дице Де́во, исцели́.

Пе́снь 7

Ирмо́с: Трие́ о́троцы в пещи́ Тро́ицу прообрази́вше, преще́ние о́гненное попра́ша, и пою́ще вопия́ху: благослове́н еси́, Го́споди, Бо́же оте́ц на́ших.

Вре́мя мое́ скончава́ется о душе́, при две́рех исхо́д, покая́ния у́бо плоды́ покажи́, пре́жде да́же две́ри не затворя́тся, возопи́й Христе́: Го́споди, спаси́ мя.

Обнови́м сердца́ ра́лом и́стиннаго позна́ния, покая́ния пшени́цу се́юще, я́ко да по́жнем кла́с пра́вды, о Христе́ возде́лателе ду́ш на́ших.

Му́ченичен: Свети́ла благоче́стия, нече́стия сопротивобо́рцы, ни́щих обогати́телие, Госпо́дни му́ченицы, преокая́нную мою́ ду́шу лише́нную, доброде́тельми обогати́те.

Му́ченичен: И́же спасы́й мытаря́ из глубины́ воздохну́вша, и мое́ ма́лое воздыха́ние приими́, и спаси́ мя Страстоте́рпец ра́ди, просла́вльших Тя́, Христе́, свои́ми у́ды.

Богоро́дичен: Исто́чниче, и́же во́ду оставле́ния источа́ющи, тече́ния мои́х прегреше́ний изсуши́, подаю́щи ми́ ту́чу сле́з, да Тя́ при́сно я́ко Богоро́дицу пою́.

И́н Ирмо́с: Го́рдый мучи́тель, но дете́й бы́сть игра́лище: я́коже бо пе́рсть попра́вше седмери́чный пла́мень, поя́ху: благослове́н еси́ Го́споди, Бо́же оте́ц на́ших.

Тве́рдым умо́м и до́блественным о́ком, зря́ще первонача́льныя све́тлости, прича́стием быва́ете све́ти втори́и, а́нгельстии ли́цы, благослове́н еси́, зову́ще, Бо́же оте́ц на́ших. [Два́жды.]

Неукло́нным жела́нием, и неизда́тельною любо́вию води́ми су́ще, добро́тами зижди́теля, положе́нием бы́сте свети́ла втора́я, ли́цы а́нгельстии, благослове́н еси́ зову́ще, Бо́же оте́ц на́ших.

Богоро́дичен: Воплоще́нное родила́ еси́, Богоро́дице, сло́во безнача́льное, е́же из отца́ без ма́тере предве́чное Боже́ственным рождество́м, благослове́н, Влады́чице, пло́д твоего́ чре́ва.

Пе́снь 8

Ирмо́с: В пла́мень ко отроко́м евре́йским снизше́дшаго Бо́жиею си́лою, и я́вльшагося Го́спода, свяще́нницы благослови́те, и превозноси́те во вся́ ве́ки.

От посме́шства хра́м оте́ческим изрече́нием ра́б бы́сть: что́ сотвори́ши душе́ моя́, поработи́вшися страсте́м и безчи́нно смею́щися, и не стыдя́щися Небе́снаго Отца́?

Враждова́в Ка́ин безу́мно братоуби́йца бы́сть: сему́ подо́бна яви́лася еси́, и не ина́го уби́вши, но себе́ са́мую душе́ моя́, сластолю́бием и пре́лестьми жития́.

Му́ченичен: Избра́нныя би́серы Госпо́дни, сосу́ды честны́я, светя́щыяся свещы́ заре́ю Боже́ственныя благода́ти, Христо́вы страстоте́рпцы, ве́рою соше́дшеся почти́м досто́йно.

Му́ченичен: И́же му́дрых Страстоте́рпец кро́вь, па́че кади́ла прие́м сло́ве, те́х мольба́ми покая́нием к тебе́ припа́дающих спаси́, я́ко еди́н ми́лостив.

Богоро́дичен: Изли́шеством блу́днаго жития́, ко а́ду ны́не прибли́жихся: премно́гое благоутро́бие, Отрокови́це, иму́щи, я́ко Бо́га благоутро́бнаго ро́ждши неизрече́нно, уще́дривши, спаси́ мя.

И́н Ирмо́с: Веще́ственнаго огня́ пла́мень невеще́ственным увяди́ша, богозри́мии о́троцы, и поя́ху: благослови́те вся́ дела́ Госпо́дня Го́спода.

Я́ко все́х соде́тель, А́нгелы умы́слил еси́, и предста́ша ти́ со стра́хом, зову́ще: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Прича́стием Боже́ственнаго огня́, я́коже пла́мень бы́вше небе́сныя умы́ зову́т: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Невеще́ственныя и у́мныя А́нгелы пре́жде соста́вил еси́ ви́димых все́х, непреста́нно Тебе́ зову́щих: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Богоро́дичен: Сло́во Отчее, па́че сло́ва воплоще́нное, Богороди́тельнице Де́во, родила́ еси́: Его́же пою́т вся́ дела́ я́ко Го́спода, и превозно́сят во вся́ ве́ки.

Та́же пое́м пе́снь Богоро́дицы: Вели́чит душа́ моя́ Го́спода:

Пе́снь 9

Ирмо́с: На Сина́йстей горе́ ви́де Тя́ в купине́ Моисе́й, неопа́льно о́гнь Божества́ заче́ншую во чре́ве: Дании́л же Тя́ ви́де го́ру несеко́мую, же́зл прозя́бший, Иса́иа взыва́ше, от ко́рене Дави́дова.

Иа́ков пе́рвенство прия́т, ра́ди воздержа́ния иногда́, Иса́в же старе́йшинство отдаде́, не удержа́в чре́во. Ко́ль зло́ невоздержа́ние, и ко́ль вели́ко воздержа́ние! бе́гай неподо́бия, возлюби́, о душе́, до́брых прибавле́ние.

Я́ко мно́гая претерпе́в непоро́чный, венча́ся И́ов: искуше́ний бо сте́кшеся пото́цы, не поколеба́ша ему́ серде́чнаго столпа́. Тому́ ревну́й всегда́, непрело́жна пребыва́ющи, о душе́, лука́ваго козньми́.

Му́ченичен: Обостри́вшеся огне́м Боже́ственнаго Ду́ха, мечи́ яви́стеся я́ве, секу́ще полки́ проти́вныя, страстоно́сцы Христо́вы, и вели́кими побе́дами прославля́еми, венча́стеся всеси́льною руко́ю все́х Царя́.

Му́ченичен: Мно́жество му́ченик непоро́чное, безме́рных мои́х зо́л мно́жество, очи́стити моли́те Влады́ку и Бо́га, ва́шя неизрече́нныя труды́ прие́мшаго, и со безпло́тных во́инствы ва́с сочета́вшаго.

Богоро́дичен: Све́тлая влады́чняя пала́та, до́м мя́ покажи́ све́та, непроходи́мая две́ре, отве́рзи ми́ покая́ния пути́, земле́ свята́я, к земли́ мя кро́тких наста́ви, Влады́чице, вся́каго мя́ влады́чества страсте́й яви́ свобо́дна.

И́н Ирмо́с: Сла́дкою пречи́стаго Твоего́ Рождества́ стрело́ю уя́звлени, Чи́стая, Твое́й достожела́нней добро́те дивя́щеся, пе́сньми а́нгельскими досто́йно Тя́, я́ко Ма́терь Бо́жию велича́ем.

И́же све́ту вели́кому и пе́рвому ны́не предстоя́ще ли́цы, моли́твенницы сильне́йшии бы́сте о все́х на́с, ва́с, я́коже мо́щно, о Боже́ственнейшии А́нгели Бо́жии, велича́ющих. [Два́жды.]

Равноси́льную Тро́ицу сла́вити сподо́бльшеся я́сно, тоя́ сия́нием пе́рвее освеща́еми, освети́тися вторы́м сия́нием сподо́бите на́с, и́же ва́с благоче́стно велича́ющих.

Богоро́дичен: Тя́ на́шего спасе́ния основа́ние вси́ ве́мы: Твое́ бо Пречи́стое Рождество́ спасло́ е́сть, кро́вию богоде́тельною, пою́щыя Тя́, Богоро́дице, и ве́рно сла́вящыя.

Та́же, Досто́йно е́сть: Ектениа́, и свети́лен, и псалмы́ обы́чныя.

На стихо́вне стихи́ры умили́тельны, гла́с 3:

Разсе́янный мо́й у́м собери́ Го́споди, и олядене́вшее се́рдце мое́ очи́сти, я́ко Петру́ дая́ ми покая́ние, я́ко мытарю́ воздыха́ние, и я́коже блудни́це сле́зы, да ве́лиим гла́сом зову́ Ти: Бо́же, спаси́ мя, я́ко Еди́н Благоутро́бен и Человеколю́бец.

Сти́х: Испо́лнихомся зау́тра ми́лости Твоея́ Го́споди, и возра́довахомся и возвесели́хомся: во вся́ дни́ на́шя возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.

Мно́жицею пе́ние соверша́я, обрето́хся гре́х скончава́я, язы́ком у́бо пе́ние веща́я, душе́ю же безме́стная помышля́я: но обое́ испра́ви, Христе́ Бо́же, покая́нием, и спаси́ мя.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Святы́х страстоте́рпец па́мять, прииди́те, лю́дие, вси́ почти́м, я́ко позо́р бы́вше а́нгелом и челове́ком, побе́ды венцы́ от Христа́ прия́ша, и мо́лятся о душа́х на́ших.

Сла́ва, и ны́не, Богоро́дичен: Святопервочи́стая похвало́ су́щи Небе́сных чино́в, апо́столов пе́ние, и проро́ков сбытие́, Влады́чице, приими́ моли́твы на́шя.

Та́же, Бла́го е́сть испове́датися: И Трисвято́е. По О́тче на́ш: тропа́рь и ектениа́: та́же ча́с 1-й, и отпу́ст.

В понеде́льник Блаже́нны, гла́с 3:

Отве́ргша Христе́ за́поведь Твою́, пра́отца Ада́ма из рая́ изгна́л еси́: разбо́йника же ще́дре испове́давша Тя́ на Кресте́, во́нь всели́л еси́, зову́ща: помяни́ мя, Спа́се, в Ца́рствии Твое́м.

Сти́х: Блаже́ни и́згнани пра́вды ра́ди, я́ко те́х е́сть Ца́рство Небе́сное.

Зо́л мои́х мно́жество, по мно́жеству ми́лости Твоея́, Христе́, презре́в спаси́ мя: и в де́нь су́дный осужде́ния изба́ви мя́ Спа́се, и ве́чнаго муче́ния, я́ко да песносло́влю Твою́ благосты́ню.

Сти́х: Блаже́ни есте́, егда́ поно́сят ва́м, и изжену́т и реку́т вся́к зо́л глаго́л, на вы́ лжу́ще Мене́ ра́ди.

Херуви́ми и Серафи́ми, Престо́ли, Арха́нгели, Си́лы, и Нача́ла, и Госпо́дьствия, А́нгели и вла́сти вся́, умоли́те соде́теля, презре́ти тогда́ моя́ согреше́ния, егда́ хо́щет суди́ти земли́, я́ко Человеколю́бец.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

От крове́й свяще́нных багряни́цу омочи́вше Христо́вы страда́льцы, Царю́ си́л сца́рствовати вои́стинну сподо́бишася боголе́пно: и на́м про́сят прегреше́ний оставле́ния, досто́йно те́х всегда́ почита́ющым.

Сла́ва: Триипоста́сное ве́рнии еди́но Божество́, пою́ще благоче́стно, Отца́, и Сло́ва, и свята́го Уте́шителя Ду́ха, а́нгельски возопии́м гла́сы немо́лчно: свя́т, свя́т, свя́т еси́, Бо́же, спаса́яй ду́шы на́шя.

И ны́не, Богоро́дичен: Я́же Све́т от све́та ро́ждшая, о́блаче све́тлый, омраче́ннаго мя́ страстьми́ и сластьми́ жития́, ко све́ту наста́вльши, испра́ви, Чи́стая, и улучи́ти сла́ву моли́ся, ю́же получи́ша ны́не, и́же до́бре пожи́вшии.

Вторник

В понеде́льник ве́чера

на Го́споди воззва́х, стихи́ры, гла́с 3,

Подо́бен: Крестообра́зно:

Сти́х: А́ще беззако́ния на́зриши, Го́споди, Го́споди, кто́ постои́т; я́ко у Тебе́ очище́ние е́сть.

Ю́же во мне́ многообра́зный зми́й, уви́дев ле́ность к поле́зным дело́м, и манове́нием ко злы́м и го́ршым преобразу́ется, показу́я греха́ сла́дость, свое́ же го́рькое де́лание, и сопроти́вное Боже́ственным за́поведем. Те́мже и порева́ет мя́ нра́вом, я́ко до́брая, зла́я приима́ти лука́вым, Христе́.

Сти́х: И́мене ра́ди Твоего́ потерпе́х Тя́ Го́споди, потерпе́ душа́ моя́ в Сло́во Твое́, упова́ душа́ моя́ на Го́спода.

Вся́к пу́ть беззако́ния и грехо́вный ше́ствовав усе́рдно, оста́вив пра́вый до конца́, ны́не ко врато́м сме́ртным прибли́жихся, утесня́емь зову́: живота́ на́шего путю́, Иису́се мо́й Преблаги́й, к широте́ покая́ния и́стиннаго обрати́в спаси́, да́ждь ми́ исправле́ние: и пре́жде сме́рти, проще́ния Боже́ственнаго сподо́би мя́.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Умертви́хся грехи́ разли́чными, и прегреше́ний мно́жествы, и безме́стием вели́ким, лежу́ ме́ртв, безпо́мощен вои́стинну. Еди́на же живе́т наде́жда моя́, я́же к Твоему́ благоутро́бию: ме́ртвым дыха́ние вку́пе и живо́т подава́я, Христе́, и умерщвля́яй стра́сти на́с умертви́вшыя, те́мже предвари́в, ве́чныя сме́рти исхити́ мя.

Та́же, стихи́ры мине́и: Сла́ва, свято́му, а́ще и́мать: И ны́не, Богоро́дичен. А́ще ли не́сть мине́и, и́ны стихи́ры свято́му и вели́кому Иоа́нну Предте́чи.

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

И́же ма́тернее безча́дие, и о́тчее безгла́сие в Рождестве́ Твое́м Предте́че разреши́вый, моего́ се́рдца безча́дие, и души́ безслове́сие, разреши́ моли́твами Твои́ми благоприя́тными, к милосе́рдому о́тчу Сы́ну, все́х Влады́це и Бо́гу, Его́же я́ко сло́ва у́м безстра́стно роди́: и любе́зная тому́ и глаго́лати и твори́ти укрепи́ мя.

Сти́х: Хвали́те Го́спода вси́ язы́цы, похвали́те Его́ вси́ лю́дие.

И́же Христу́ угото́вав стези́, и ше́ствия испра́вив, пред Его́же лице́м по́слан бы́сть, и мое́ се́рдце благоше́ственно тому́ покажи́, моли́твами Твои́ми и помощьми́ проявле́нными: и́же нога́м Его́ честны́м досто́ин яви́лся еси́, небе́сныя мя́ земли́ ходи́ти сподо́би, е́юже ше́ствуют кро́тких но́зе, да любо́вию я́ко хода́тая почита́ю Тя́.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Житию́ а́нгельскому поревнова́л еси́ на земли́, проро́ческое соверше́ние, и Но́ваго Заве́та первому́чениче, и́же су́щым под земле́ю пе́рвый пропове́дниче Боже́ственнаго сло́ва та́мо соше́ствия, от Христа́ свиде́тельствованный: дру́же а́гнца, и изба́вителя, от вся́ких собла́зн вра́жиих, и многоплете́нных искуше́ний его́, Твоего́ раба́ изба́ви, Крести́телю Иоа́нне, моли́твами Твои́ми.

Сла́ва, и ны́не, Богоро́дичен: Я́же све́та незаходи́маго о́блаче, Богора́дованная Отрокови́це, благослове́нная Мари́е, возсия́й ми́ све́т покая́ния во тьме́ грехо́вней безу́мно содержи́му: и изба́ви мольба́ми Твои́ми огня́ гее́нскаго, и тьмы́ несвети́мыя, и дне́ невече́рняго яви́ прича́стника, Де́во, прибега́ющаго под кро́в Тво́й, Пречи́стая.

Та́же, Све́те ти́хий: Проки́мен дне́:

На стихо́вне стихи́ры, гла́с 3:

Вече́рнюю пе́снь прино́сим Ти́, Христе́, с кади́лом и пе́сньми духо́вными, поми́луй, Спа́се, ду́шы на́шя.

Сти́х: К тебе́ возведо́х о́чи мои́, Живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Спаси́ мя, Го́споди Бо́же мо́й, Ты́ бо все́м еси́ спасе́ние: бу́ря мя́ страсте́й смуща́ет, и бре́мя беззако́ния погружа́ет мя́. Да́ждь ми́ ру́ку по́мощи, и возведи́ мя к све́ту покая́ния, я́ко Еди́н Благоутро́бен и Человеколю́бец.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Ве́лия му́ченик Твои́х, Христе́, си́ла: во гробе́х бо лежа́ще ду́хи прого́нят, и упраздни́ша вра́жию вла́сть, ве́рою тро́ическою подви́гшеся о благоче́стии.

Сла́ва, и ны́не, Богоро́дичен: В жена́х свята́я Богоро́дице, Ма́ти Безневе́стная, моли́, Его́же родила́ еси́, Царя́ и Бо́га, да спасе́т на́с я́ко Человеколю́бец.

Та́же, Ны́не отпуща́еши: Трисвято́е. И по О́тче на́ш: тропа́рь, и отпу́ст.

В понеде́льник на повече́рии

кано́н пресвяте́й Богоро́дице. Гла́с 3.

Пе́снь 1

Ирмо́с: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре изра́ильтеским лю́дем, Се́й Бо́г на́ш препросла́влен е́сть: Тому́ Еди́ному пои́м, я́ко просла́вися.

В ле́ности житие́ сконча́в, прибли́жихся к концу́ жития́ моего́: но Сама́ Пречи́стая, поне́ в после́днее вре́мя, да́ждь ми́ умиле́ние, молю́ся, я́ко да пла́чуся го́рько о безме́рных мои́х прегреше́ниих.

Оскверни́в безу́мно, ю́же по о́бразу, красоту́ страстьми́ пло́ти моея́, Де́во, Бо́жияго устраши́хся негодова́ния, и ужа́снаго о́гненнаго преще́ния: но Сама́ поми́луй мя́ прибега́ющаго к Тебе́.

Сла́ва: Коле́на преклони́в окая́нный, Твою́ прошу́ по́мощь, Пресвята́я Де́во: но Ты́ услы́ши боля́щую ду́шу, и належа́щий о́блак печа́ли моея́ разори́ заре́ю Твои́х моли́тв.

И ны́не: Напои́тися бога́тно слеза́ми да́ждь, бразда́м стра́стныя моея́ души́, и пло́д принести́ ми стори́чный, Влады́чице, сподо́би, и се́рдце мое́ вся́каго весе́лия испо́лни, да сла́влю Тя́.

Пе́снь 3

Ирмо́с: И́же от не су́щих вся́ приведы́й, Сло́вом созида́емая, соверша́емая Ду́хом, Вседержи́телю вы́шний, в любви́ Твое́й утверди́ мене́.

Сле́з ту́чу пода́ждь ми́, Блага́я Богоро́дице, и си́ми угаси́ страсте́й мои́х пе́щь, и вся́кия омы́й душе́вныя моя́ скве́рны.

В беззако́ниих оскверни́х благоро́дие души́, Пречи́стая, и трепе́щу истяза́ния, егда́ истя́жет мя́ о́браза достоя́ния, Сло́во.

Сла́ва: Бу́ря прегреше́ний объе́мши мя́ ны́не, во глубину́ отча́яния сведе́: но да́ждь ми́ ру́ку, Чи́стая, и на покая́ние мя́ наста́ви.

И ны́не: Изба́ви гее́нны и вся́каго ина́го преще́ния в ча́с суда́, раба́ Твоего́, Пренепоро́чная, и прича́стника сотвори́ Сы́на и Бо́га Твоего́ Ца́рствию.

Пе́снь 4

Ирмо́с: Положи́л еси́ к на́м тве́рдую любо́вь, Го́споди, Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Приидо́ша, Чи́стая, безме́стных де́л во́ды, до окая́нныя моея́ души́. Те́мже по́мыслы бре́ния одержи́мь, вопию́ с боле́знию: не пре́зри мене́, Влады́чице, раба́ Твоего́.

Зве́рие мы́сленнии, ны́не неми́лостивно обыдо́ша мя́, тща́щеся восхи́тити неща́дно смире́нную мою́ ду́шу, Всенепоро́чная: но сы́ном, Пречи́стая, сокруши́ душетле́нныя че́люсти.

Сла́ва: Ми́лостива бу́ди Твоему́ рабу́, Влады́чице, молю́ся, и ча́емаго преще́ния лю́ди Твоя́ исхити́, Всечи́стая, да зове́м Ти́ благодаря́ще: сла́ва Тебе́, все́х Цари́це.

И ны́не: Егда́ в нощи́ Жени́х прии́дет суди́ти земли́, тогда́ во сре́тение Его́ со све́тлою свеще́ю благоволи́, Пречи́стая, изы́ти ми́, и поклони́тися Того́ прише́ствию.

Пе́снь 5

Ирмо́с: На земли́ неви́димый яви́лся еси́, и челове́ком во́лею сожи́л еси́, Непостижи́мый, и к Тебе́ у́тренююще, воспева́ем Тя́, Человеколю́бче.

Пси́ мно́зи одержа́ша мя́ вои́стинну, со́нм лука́вых духо́в обы́де мя́: но си́х, Пречи́стая, сове́ты ны́не разори́.

Ро́в мне́ ны́не лука́вый изры́в, воврещи́ мя во́нь покуша́ется: но Твое́ю десни́цею, Влады́чице, да впаде́т в я́му, ю́же сотвори́.

Сла́ва: Да не я́ростию Сы́на Твоего́ обличе́н бу́ду, во вре́мя прише́ствия Его́, ни гне́вом Его́ накажу́ся, Всепе́тая: но спаси́ мя мольба́ми Твои́ми.

И ны́не: Ви́ждь, Чи́стая, не́мощь, ви́ждь смире́ние окая́нныя моея́ души́, и безпло́тных вра́г воста́ние: и си́х вре́да изба́ви мя́.

Пе́снь 6

Ирмо́с: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

Ма́нием все́х Зижди́теля, егда́ хо́щет душа́ моя́ разлучи́тися от пло́ти, Всенепоро́чная, свободи́ мя руки́ ненави́дящих мя́, Богоро́дице Всепе́тая.

Изсуши́ му́тныя ре́ки, Богороди́тельнице, лука́вых мои́х дея́ний струя́ми умиле́ния, и напра́ви к воде́ осла́бы в де́нь суда́.

Сла́ва: Ве́си мою́ не́мощь душе́вную, и ума́ моего́ некре́пость, Пречи́стая, и пло́ти неможе́ние. Те́мже спаси́ раба́ Твоего́: Тя́ бо стяжа́х засту́пницу непобеди́мую.

И ны́не: Струи́ мне́ сле́з духо́вных пода́ждь, Отрокови́це, и́миже измы́ю ти́ну прегреше́ний мои́х, и страсте́й молву́, Пренепоро́чная, и скве́рны теле́сныя.

Та́же, Го́споди, поми́луй, три́жды. Сла́ва, и ны́не:

Седа́лен: Подо́бен: Красоте́ де́вства:

Ми́лостиваго во чре́ве носи́вшая, прибега́ющаго под кро́в Тво́й, и прося́ща от души́ Боже́ственную Твою́ по́мощь, Влады́чице, уще́дри, и ми́лости сподо́би, егда́ предста́нем Влады́це тва́ри, изба́ви, Чи́стая, огня́ ве́чнаго, и вся́каго осужде́ния.

Пе́снь 7

Ирмо́с: Пре́жде о́бразу злато́му, перси́дскому чти́лищу, о́троцы не поклони́шася, трие́ пою́ще посреде́ пе́щи: отце́в Бо́же благослове́н еси́.

Излия́шася на мя́, Чи́стая, прегреше́ний во́ды до души́ моея́, бе́здна же обы́де мя́ после́дняя: но сего́ изми́ треволне́ния.

Окропи́ мя, Чи́стая, кро́вию из ре́бр Рождества́ Твоего́, мно́жеством ми́лости Твоея́: омы́й же мя́ сле́зными струя́ми, и очи́сти мя́ от вся́кия скве́рны.

Сла́ва: Сокруше́ние мое́й души́, смире́ние же се́рдцу да́ждь, Всечи́стая, я́ко да вся́каго изба́влюся кова́рства, при́сно мя́ неща́дно ловя́щих.

И ны́не: Я́ко ми́лостива Ма́ти Бо́жия, рабы́ Твоя́, Влады́чице, ми́лости сподо́би, и́же ве́рою Сы́ну Твоему́ вопию́щыя: отце́в Бо́же благослове́н еси́.

Пе́снь 8

Ирмо́с: Нестерпи́мому огню́ соедини́вшеся, богоче́стия предстоя́ще ю́ноши, пла́менем же неврежде́ни, Боже́ственную пе́снь поя́ху: благослови́те вся́ дела́ Госпо́дня Го́спода, и превозноси́те во вся́ ве́ки.

Стре́лы стрельца́ сокруши́, Чи́стая, держа́вою Сы́на Твоего́, и сего́ непра́вда ны́не да сни́дет на ве́рх его́, да воспою́: вся́ дела́ Госпо́дня Го́спода, по́йте и превозноси́те Его́ во ве́ки.

Све́том Твои́м озари́, Отрокови́це, омраче́ное мое́ се́рдце, и ору́жием све́та све́ту две́ри отве́рзи ми́ зову́щу: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Сла́ва: Усну́в в сме́рти, лежу́ во гро́бе отча́яния, но Сама́ мя возста́ви, Де́во, и бо́дренно пе́ти сподо́би: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

И ны́не: Не преста́й, Чи́стая, моля́щи о чту́щих Тя́ во умиле́нии, изба́витися сете́й диа́вольских, Сы́ну Твоему́ вопию́щих: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Пе́снь 9

Ирмо́с: В зако́не се́ни и писа́ний о́браз ви́дим ве́рнии: вся́к му́жеский по́л ложесна́ разверза́я, свя́т Бо́гу: те́м перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

Обурева́ет страсте́й волне́ние, и смуще́ние скве́рных помышле́ний ду́шу мою́, и лука́вых челове́к бу́ря при́сно мя́ смуща́ет: но я́ко человеколюби́ва Де́во, одержи́мыя ну́жды вско́ре мя́ изба́ви.

Душе́ смире́нная, отступи́ лука́вых твои́х дея́ний, и преста́ни от зло́бы, и е́же прогне́вати Бо́га, восприими́ же усе́рдно за́поведи Его́: Богоро́дицу бо и́маши пути́ твоя́ направля́ющую.

Сла́ва: Я́ко ро́ждшая все́х Го́спода, страсте́й мя́ свободи́, и лю́тых грехо́в, и всего́ мя де́лы благи́ми за мно́гое милосе́рдие Твое́ обогати́: да ра́дуяся любо́вию велича́ю Тя́, Всенепоро́чная.

И ны́не: Приближа́ется душе́ коне́ц, при две́рех суди́ще, отступи́ де́л сту́дных, и приими́ся за благо́е житие́: и́маши бо побо́рницу Богоро́дицу, избавля́ющую тя́ от вся́каго озлобле́ния.

Та́же, Досто́йно е́сть: И покло́н. Трисвято́е. По О́тче на́ш: тропа́рь, и про́чее обы́чно, и отпу́ст.

Во вто́рник у́тра

по 1-м стихосло́вии седа́льны умили́тельны, Гла́с 3:

Прише́льствующи на земли́ душе́ моя́, пока́йся, пе́рсть бо во гро́бе не пое́т, ни от прегреше́ний избавля́ет. Возопи́й Христу́ Бо́гу: Сердцеве́дче, согреши́х ти́, пре́жде да́же не осу́диши мене́, пощади́ мя́, Бо́же, и поми́луй мя́.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Доко́ле душе́ моя́ пребыва́еши в согреше́ниих? Доко́ле прие́млеши покая́ния отложе́ние? Приими́ во уме́ су́д гряду́щий, возопи́й Христу́ Бо́гу: Сердцеве́дче, согреши́х, безгре́шне Го́споди, поми́луй мя́.

Сла́ва, и ны́не, Богоро́дичен: Прибе́жище и си́ло на́ша Богоро́дице, кре́пкая помо́щнице ми́ра, моли́твами Твои́ми покры́й рабы́ Твоя́ от вся́кия ну́жды, еди́на благослове́нная.

По 2-м стихосло́вии седа́льны, гла́с 3:

На стра́шнем суди́щи без сопе́рник облича́юся, и без свиде́телей осужда́юся: кни́ги бо со́вестныя разгиба́ются, и дела́ сокрове́нная открыва́ются. Пре́жде да́же у́бо во о́ном всенаро́дном позо́рищи хо́щеши истяза́ти, я́же мно́ю соде́янная, Бо́же, очи́сти мя́, и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Глубину́ согреше́ний мои́х Ты́ ве́си, Го́споди: да́ждь ми́ ру́ку по́мощи я́ко Петру́, и спаси́ мя.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Сия́ете ве́рою пресве́тлая свети́ла святи́и, немощству́ющих вра́чеве, страстоте́рпцы прехва́льнии: мучи́телей бо ра́н не убоя́стеся, и́дольское злоче́стие низложи́сте, побе́ду иму́ще непобеди́мую Кре́ст и́стинный.

Сла́ва, и ны́не, Богоро́дичен: Приими́, Влады́чице, ве́рою притека́ющаго под кро́в Тво́й, и не возненави́ждь мене́, ниже́ пре́зри, Блага́я, покая́нием моля́щагося. Приими́ я́же от у́ст недосто́йных мои́х мольбу́, и хода́тайством Твои́м от сете́й изба́ви мя́, да со дерзнове́нием вопию́ Ти: ра́дуйся, Обра́дованная.

По 3-м стихосло́вии седа́льны, гла́с 3:

Подо́бен: Красоте́ де́вства:

Под кро́в Тво́й прибе́гше, ве́рою зове́м из глубины́ душе́вныя: Богоблаже́нне Проро́че и Предте́че, напа́стей и бе́д смуще́ния, и неду́гов волне́ния утиши́, и су́етны сотвори́ враго́в злохи́трыя сове́ты, прося́ на́м ве́лия ми́лости.

Уны́ние твое́, душе́ окая́нная, пре́жде исхо́да твоего́ оттря́сши покая́нием, и с пла́чем обрати́ся зову́щи к незло́бивому Иису́су человеколю́бцу: согреши́х Ти́, Влады́ко, но я́ко милосе́рд спаси́ мя, моли́твами свята́го Предте́чи, и́же еди́н сы́й безгре́шен.

Сла́ва, и ны́не, Богоро́дичен: Недомы́сленно и непостижи́мо е́сть, Влады́чице Богора́дованная, е́же соде́ланное о Тебе́ стра́шное Бо́жие та́инство: и́бо необъиме́ннаго заче́нши родила́ еси́, пло́тию обложе́на от пречи́стых крове́й Твои́х: Его́же всегда́, Чи́стая, с Предте́чею моли́, спасти́ся душа́м на́шым.

Кано́н умили́телен ко Го́споду на́шему Иису́су Христу́, и святы́м его́ му́чеником, [его́же краегране́сие: Мои́м стена́нием вонми́, Бо́жий Сло́ве.] Творе́ние Ио́сифово. Гла́с 3.

Пе́снь 1

Ирмо́с: Ди́вно, сла́вно творя́й чудеса́, Ты́ еси́, Бо́же, бе́здну оземлени́вый, и колесни́цы потопи́вый, и лю́ди спасы́й пою́щыя Тебе́, я́ко Царю́ на́шему и Бо́гу.

Са́ми себе́ пре́жде конца́ ве́рнии пла́чим от всея́ души́: приближа́ется жени́х, возжже́м дея́ния я́коже све́тлыя свещы́, я́ко да Боже́ственный черто́г улучи́м вку́пе.

Пока́явся дре́вле Манасси́а от всея́ души́, спасе́ся: возопи́ бо от среды́ у́з свя́зан ко еди́ному Влады́це. Тому́ ревну́й душе́, и спасе́шися удо́бь.

Му́ченичен: Оче́с слепоту́, ру́к лише́ние, язы́ка уре́зание, но́г же отя́тие, бе́др и мы́шцей сокруше́ние, претерпе́ша Боже́ственнии страда́льцы, благодаря́ще Иису́су Христу́.

Му́ченичен: Враче́бница яви́ся на́м ра́ка моще́й ва́ших, святи́и му́ченицы все́м ве́рным: из нея́же почерпа́ем исцеле́ния, ду́ш же и теле́с, по до́лгу ва́с чту́щии при́сно.

Богоро́дичен: Безсме́ртия ма́нну Христа́ нося́щи, ста́мно слове́сная, го́рести душетле́нных страсте́й изба́ви мя́, Всепе́тая Де́во: я́ко да ве́рою Тя́ славосло́влю благоче́стно.

Други́й кано́н Предте́чи Иоа́нну.

Ирмо́с: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре Изра́ильтеским лю́дем, Се́й Бо́г на́ш, препросла́влен е́сть: тому́ Еди́ному пои́м, я́ко просла́вися.

Непло́дныя утро́бы Боже́ственное прозябе́ние, плоды́ ми доброде́телей прозяба́ти, Бо́гу моли́ся, греха́ моего́ разреша́я непло́дие, и отгоня́я мра́к от ума́ моего́, Госпо́день Предте́че.

Со́лнца сла́вы ве́лий, я́коже предтеку́щая звезда́, ве́рою на земли́ яви́лся еси́, зе́млю всю́ просве́щшаго: того́ у́бо моли́, омрачи́вшуюся ду́шу мою́ злы́ми помышле́ньми просвети́ти Предте́че.

И́же Живо́т су́щым во а́де, Ду́хом Боже́ственным приближа́ющся, предвозвести́л еси́ проро́че, мою́ умерщвле́нную ду́шу оживи́ твои́ми мольба́ми: и я́ко от гро́ба прегреше́ний возста́ви, молю́ся, сла́вный Предте́че.

Богоро́дичен: Со Арха́нгелы и А́нгелы, Де́во, и со святы́ми все́ми, из тебе́ Го́спода я́вльшагося на́м моли́, мо́лимся, и́стинную Богоро́дицу испове́дающым Тя́ от бе́д изба́витися.

Пе́снь 3

Ирмо́с: Непло́дная душе́ и безча́дная, стяжи́ пло́д благосла́вный, веселя́щися возопи́й: утверди́хся Тобо́ю, Бо́же, не́сть свя́т, не́сть пра́веден, па́че Тебе́, Го́споди.

Зако́н Бо́жий отверго́х несмы́сленно, и осужде́н бы́ти и́мам: и что́ сотворю́, не ве́м. Судие́ пра́веднейший, уще́дрив спаси́ мя милосе́рдием Твои́м.

Восто́к Человеколю́бче сы́й восто́ков, возсия́й ми́, молю́ся, пра́вды све́т, изъима́я мя́ страсте́й омраче́ния, и тьмы́ муче́ния, Многоми́лостиве.

Му́ченичен: Земли́ мы́сленныя жи́телие, древеса́ плодови́тая ра́йская, святи́и му́ченицы, исто́чницы, и́же Боже́ственную во́ду иму́щии, ча́шы пролива́ющии питие́ свято́е яви́стеся.

Му́ченичен: Еди́н во мно́гих телесе́х нра́в нося́ще, страстоте́рпцы му́ченицы, тьмы́ победи́сте врага́ мироде́ржца, Тро́ицу нераздели́мую пропове́дающе.

Богоро́дичен: Де́во Ма́ти Пречи́стая, ка́ющымся на́м и ко Христу́ притека́ющым, и прегреше́ний разреше́ние хотя́щым прия́ти, ми́лостива сего́ все́м соде́лай все́х, Влады́чице.

И́н Ирмо́с: И́же от не су́щих вся́ приведы́й, Сло́вом созида́емая, соверша́емая Ду́хом, Вседержи́телю вы́шний, в любви́ Твое́й утверди́ мене́.

Гла́с сло́ва бы́в Крести́телю, гла́сы чту́щих Тя́ к нему́ ны́не испра́ви, и прегреше́ний оставле́ние хода́тайством Твои́м на́м пода́ждь.

Согреши́х Тебе́ и беззако́нновах, и лю́те, Спа́се, прегреши́х, и ду́шу оскверни́х: сего́ ра́ди молю́ся Ти́, Твоего́ ра́ди Крести́теля уще́дри мя́.

В пусты́ни заблу́ждша сластьми́, пусты́нное воспита́ние и наста́вника но́вых люде́й молю́ Тя, Предте́че, к покая́ния пути́ наста́ви мя́.

Богоро́дичен: Со апо́столы, и проро́ки свяще́нными, с му́ченики, Пречи́стая, и с вы́шними си́лами Сы́на Твоего́ моли́, уще́дрити на́с Тебе́ пою́щих.

Пе́снь 4

Ирмо́с: Приосене́нную го́ру Авваку́м прозря́ше, пречи́стую Твою́ утро́бу, Чи́стая, те́м взыва́ше: от ю́га прии́дет Бо́г, и святы́й от горы́ приосене́нныя ча́щи.

И́же источи́вый из ка́мене дре́вле лю́дем непокори́вым, Христе́, и пререка́ющым, во́ду жа́жды исцеле́ния, от невла́жныя души́ моея́, Бо́же, умиле́ния ка́плю измыва́ющую мя́ источи́.

Врачу́ боля́щих, се́рдца моего́ стра́сти исцели́ благоутро́бным Твои́м манове́нием, покая́ния сему́, Спа́се, прилага́я пла́стырь, я́ко бла́г, Боже́ственнаго бы́лия, я́ко да ве́рою славосло́влю Тя́.

Му́ченичен: Ми́лостивно страстоно́сцы, я́же к те́лу дру́жбы, распря́гше помышле́ние, му́чити ва́с хотя́щым преда́сте са́ми себе́. Те́мже бли́жнии Зижди́телю бы́сте дру́зи.

Му́ченичен: Многоболе́зненныя стру́пы от многови́дных му́к подъя́сте страда́льцы Христо́вы, и благода́ть прия́сте от духо́вных даро́в, страсте́й на́ших прогоня́юще многоле́тныя боле́зни.

Богоро́дичен: Многоимени́тая Отрокови́це, ра́дуйся, из нея́же Бо́г Сло́во роди́ся, от безслове́сных на́с разреша́я, и безме́стных дея́ний: ра́дуйся, Облаче све́тлый, разгоня́ющий о́блаки на́шего уны́ния.

И́н Ирмо́с: Положи́л еси́ к на́м тве́рдую любо́вь, Го́споди, единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й Го́споди.

Сло́ва Тя́ гла́с пло́тию я́вльшагося су́ща, Предте́че Госпо́день, молю́, безслове́сных мя́ изба́ви дея́ний, словесы́ чту́щаго Тя́, и по до́лгу ве́рою блажа́щаго.

Воздохни́, о душе́, и Бо́гу зижди́телю Твоему́ возопи́й: согреши́х, очи́сти мя́ Христе́, и изба́ви мя́ стра́шныя му́ки, бе́д же и скорбе́й, мольба́ми Боже́ственнаго Предте́чи.

Волна́ми мно́гими лю́тых страсте́й потопля́ема, и бу́рею лю́те содержи́ма, и при́сно погружа́ема, Крести́телю исхити́, и к покая́ния приста́нищу наста́ви мя́.

Богоро́дичен: Ма́ти Бо́жия, херуви́м превы́шшая, колесни́це, с невеще́ственными служи́тели, и со святы́ми все́ми моли́ Христа́, его́же родила́ еси́, Всенепоро́чная, спасти́ мя отча́яннаго.

Пе́снь 5

Ирмо́с: У́тренююще воспева́ем Тя́, Сло́ве, сы́не Бо́жий единоро́дне: Тво́й ми́р да́ждь на́м, и поми́луй ны́ пою́щыя Тя́, и ве́рно покланя́ющыяся.

Окропи́в мя́ покая́ния иссо́пом, очи́сти от скве́рн страсте́й, да явлю́ся Тебе́ чи́ст, егда́ хо́щеши, Иису́се, суди́ти вся́ческим, пра́ведным Твои́м судо́м.

Ра́ны согни́шася, Спа́се, преокая́нныя моея́ души́: исцели́телю боля́щих, и да́телю благи́х, исцели́в спаси́ мя, мно́гия ра́ди Твоея́ ми́лости.

Му́ченичен: Сокруши́шася сосу́ди скуде́льнии страстоте́рпцев на земли́: но кре́пость душе́вная укрепи́ся мно́жае, и просвети́ся Христо́вою си́лою.

Му́ченичен: Пролива́емая святы́х кро́вь всю́ зе́млю освяти́, и напои́ ве́рных ду́шы, и изсуши́ я́ве су́етства му́тныя пото́ки.

Богоро́дичен: Рождество́м Твои́м онепло́дствила еси́, Отрокови́це, пра́деднюю кля́тву: и источи́ла еси́ на́м благослове́ния ре́ки, благосло́вящым Тя́, и сла́вящым ве́рою.

И́н Ирмо́с: На земли́ неви́димый яви́лся еси́, и челове́ком во́лею сожи́л еси́ непостижи́мый, и к Тебе́ у́тренююще, воспева́ем Тя́, Человеколю́бче.

На земли́ я́коже А́нгел блаже́нне, с пло́тию я́ве пожи́л еси́. Те́мже молю́ся Ти́: плотски́х мудрова́ний ду́шу мою́ свободи́.

Во глубину́ грехо́вную впа́дшаго, и сластьми́ ду́шу оскверни́вшаго, и бе́дствующаго, Госпо́день Предте́че, спаси́ мя к Тебе́ прибега́ющаго.

Ты́ проро́ков превы́шши яви́лся еси́, и́бо са́м ви́дел еси́, Проро́че, пропове́даннаго: его́же непреста́нно моли́, просвети́ти ду́шы на́шя.

Богоро́дичен: Небе́с простра́ннейши я́вльшися, е́же в Тя́ вселе́нием Сло́ва, Богора́дованная, утесня́ющих мя́ грехо́в свободи́.

Пе́снь 6

Ирмо́с: Глубина́ страсте́й воста́ на мя́, и бу́ря проти́вных ве́тров: но предвари́в мя́ Ты́ спаси́, Спа́се, и изба́ви от тли́ я́ко спа́сл еси́ от зве́ря проро́ка.

Отмрачи́хся греха́ мгло́ю, и лежу́ неде́йствен ве́сь: и́же уязви́выйся мене́ ра́ди копие́м иногда́, Христе́ Бо́же, уще́дри мя́ Твои́м милосе́рдием.

Стеню́, и в злы́х пребыва́ю: слезю́, и суда́ не трепе́щу, нечу́вствием болю́: Сло́ве Бо́жий, уще́дри мя́ и спаси́, благи́ми судьба́ми Твои́ми.

Му́ченичен: Я́коже а́гнцы не вопию́ще отню́д, ни сло́во, ни гла́с испуща́юще, всесла́внии страда́льцы, к заколе́нию и ра́нам приводи́ми бы́сте, Христа́ воспева́юще.

Му́ченичен: Звере́м пре́дани бы́сте на сне́дь, морски́я глубины́ причасти́стеся ра́достною душе́ю. Те́мже ва́с Христо́с, страда́льцы, венцы́ нетле́нными украси́.

Богоро́дичен: Две́ре ве́рно спаса́емых, врата́, и́миже еди́н про́йде вопло́щься за ны́, врата́ на́м пра́вды отве́рзи, ве́рою Тя́ пою́щым.

И́н Ирмо́с: Бе́здна после́дняя грехо́в обы́де мя́ и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

Вода́ми, пото́ка сла́дости, прикло́ншагося под ру́ку твою́ крести́л еси́: Того́ моли́, низпосла́ти ми́ во́ду му́дре умиле́ния, мно́го согреши́вшему.

Бе́здну милосе́рдия в реце́, Предте́че, омы́л еси́, превы́спренняя Небеса́ вода́ми покрыва́ющаго, Иису́са Человеколю́бца: Его́же моли́ источи́ти ми́ оставле́ние.

Прибли́жися Ца́рство Небе́сное, пока́йтеся, взыва́л еси́ Предте́че: его́же улучи́ти сподо́би любо́вию Тя́ чту́щих, и под кро́в честны́й прибега́ющих.

Богоро́дичен: Пречи́стая, я́же пло́ть Свою́ Созда́телю взаи́м да́вши, с вы́шними си́лами, и со проро́ки все́ми, апо́столы же и му́ченики, того́ моли́ уще́дрити и спасти́ мя.

Пе́снь 7

Ирмо́с: Пла́мень ороси́вый пе́щный, и о́троки неопали́мы спасы́й, благослове́н еси́ во ве́ки, Го́споди Бо́же оте́ц на́ших.

Обнажи́хся от ри́з нетле́ния, облеко́хся же в дела́ безче́стия. Те́мже вопию́ Ти: Бо́же ще́дрый, доброде́телей мя́ оде́ждами просвети́.

Очи́ма блу́дныма окаля́хся, и осяза́нием невоздержа́ния оскверни́хся, и ме́рзок бы́х пред Тобо́ю Иису́се, я́ко блу́днаго приими́ мя.

Му́ченичен: Вы́шнюю жи́знь возлюби́вше, мно́гия претерпе́сте боле́зни, Христо́вы ору́жницы, свети́льницы Боже́ственнии: сего́ ра́ди ве́рно ублажа́еми есте́.

Му́ченичен: Просвети́вшеся заре́ю муче́ния, облиста́ете мно́жае со́лнца, и вся́к мра́к безбо́жия отгна́сте святи́и му́ченицы.

Богоро́дичен: Я́ко ро́ждши все́х содержи́теля, от содержа́щаго мра́ка неве́дения, и от греха́ изба́ви мя́, Богоро́дице Чи́стая Присноде́во.

И́н Ирмо́с: Трие́ о́троцы в пещи́ Тро́ицу прообрази́вше, преще́ние о́гненное попра́ша, и пою́ще вопия́ху: благослове́н еси́ Бо́же оте́ц на́ших.

Свети́льник со́лнца, ду́шу мою́ ле́ностию омраче́ную озари́ и ослепле́нную, к покая́ния стезе́ направля́я мя́, Крести́телю Христо́в Предте́че.

Су́дный ча́с помышля́я, ве́сь устраша́юся, слежу́ во мно́жестве безме́стных дея́ний, Крести́телю Госпо́день, предста́в изба́ви мя́ огня́ предлежа́щаго ми́.

Предста́телю живота́ моего́, засту́пниче мо́й Предте́че, от враго́в мя́ ви́димых и неви́димых сохрани́, и покры́й, и Ца́рствия Небе́снаго прича́стника сотвори́.

Богоро́дичен: Де́во Богоро́дице, Сы́на Твоего́ моли́, со проро́ки, апо́столы же и му́ченики, бу́дущия ну́жды изба́вити ны́, Тебе́ чту́щыя при́сно.

Пе́снь 8

Ирмо́с: А́нгельми немо́лчно в вы́шних сла́вимаго Бо́га, небеса́ небе́с, земля́, и го́ры, и хо́лми, и глубина́, и ве́сь ро́д челове́ческий, пе́сньми Того́ я́ко Созда́теля и Изба́вителя благослови́те, и превозноси́те во вся́ ве́ки.

Я́ко стра́ха Твоего́ не име́х живу́щаго в се́рдце мое́м, всю́ сконча́х плотску́ю сла́сть безсо́вестный, и трепе́щу Твоего́ суда́ все́х Царю́: не возгнуша́йся мене́ ны́не ка́ющагося.

На зе́млю святу́ю мя́ прейти́, Многоми́лостиве, сподо́би, на не́йже живу́т кро́тцыи, покая́нием измы́в мя́ земна́го греха́, и́же на земли́ безгре́шно рожде́йся от Де́вы.

Му́ченичен: В свое́й ва́м кро́ви очервлени́шася но́ги ва́шя, запина́юще врагу́, и ше́ствие к небе́сным творя́ще преподо́бно, всесла́внии Христа́ все́х Бо́га страстоте́рпцы.

Му́ченичен: Совлеко́стеся ко страда́нием усе́рдно, и к вели́ким боре́нием, обнажи́сте врага́, и в сту́д облеко́сте: те́мже на Небесе́х венцено́сцы лику́ете, сла́внии страстоте́рпцы.

Богоро́дичен: Иа́ковлю Тя́ добро́ту, и́же кра́сный добро́тою Госпо́дь возлюби́в, во Твое́ чре́во, Всенепоро́чная, всели́ся, челове́ческое существо́ добро́тами просвети́в, па́че ума́ дарова́ньми.

И́н Ирмо́с: Нестерпи́мому огню́ соедини́вшеся, Богоче́стия предстоя́ще ю́ноши, пла́менем же неврежде́ни, Боже́ственную пе́снь поя́ху: благослови́те вся́ дела́ Госпо́дня Го́спода, и превозноси́те во вся́ ве́ки.

А́гнца Бо́жия пропове́дал еси́, грехи́ челове́ков взе́млющаго, Иоа́нне Боже́ственный Предте́че: того́ моли́ бре́мя разреши́ти грехо́в мои́х, и спаса́емых ча́сти сподо́бити мя́.

Пе́щи пла́мене горя́щаго, тьмы́ несвети́мыя кроме́шния изба́ви мя́, во тьме́ злы́х де́л всего́ содержи́ма, молю́ Тя, Сло́ве Бо́жий Пребезнача́льный, сла́внаго ра́ди Боже́ственнаго Крести́теля Твоего́.

Пусты́м душа́м и безпло́дным, покая́нием благопло́дие пропове́давый, Госпо́день Боже́ственный Проро́че, терноно́сную ду́шу мою́ от все́х сласте́й очи́сти: я́ко да возращу́ благи́х де́л кла́с.

Богоро́дичен: Я́ко Ма́ти Бо́жия, моли́ со святы́ми а́нгелы и проро́ки, апо́столы же и му́ченики, бе́д же и скорбе́й, и бу́дущих все́х му́к изба́вити, тебе́ Богоро́дицу при́сно испове́дающих.

Пе́снь 9

Ирмо́с: Благослове́н Госпо́дь Бо́г Изра́илев, воздви́гнувый ро́г спасе́ния на́м, в дому́ Дави́да о́трока своего́, милосе́рдия ра́ди ми́лости, в ни́хже посети́ на́с восто́к с высоты́, и напра́вил ны́ е́сть на пу́ть ми́ра.

Се́ вре́мя благоприя́тно, и де́нь очище́ния: обрати́тися восхощи́ про́чее, о душе́, твори́ти плоды́ покая́ния: да не безпло́дну Тя́ обря́щет сме́ртная секи́ра стра́шная, и я́ко смоко́вницу дре́внюю посе́кши, огню́ та́мошнему по́слет.

Я́коже иногда́ бога́тый веселю́ся в сла́достех, немилосе́рдие мно́гое имы́й к бли́жнему, и огня́ не устраша́юся неугаси́маго. Те́мже, Влады́ко, умягчи́ ми окамене́ние души́, я́ко да поне́ наконе́ц милосе́рдием просвещу́ся омраче́нный.

Му́ченичен: Зна́менавшеся му́ченицы Боже́ственною кро́вию Христо́вою, и зна́меньми ве́рою стра́ждуще кре́пко, неве́рныя враги́ низложи́сте, и от пре́лести скве́рныя мно́гия лю́ди исхити́сте, премене́нии Боже́ственными, просвети́вше све́том богоразу́мия.

Му́ченичен: Изъощре́ни яви́стеся мечи́, секу́ще вра́жия ополче́ния, Боже́ственнии Христо́вы му́ченицы: и сосу́ди вмести́вше зарю́ Святы́я Тро́ицы, и све́щницы светя́щыя ве́рным све́т благоче́стия, и Сио́на мы́сленнаго и́стиннии ору́жницы.

Богоро́дичен: Светови́дна Тя́ о́блака проро́к предзри́т, из него́же вели́кое со́лнце яви́ся на́м Христо́с Бо́г, и просвети́ я́же пе́рвее омраче́нныя: того́ умоли́, Блага́я, страсте́й мои́х о́блаки отгна́ти, и све́том Боже́ственным просвети́ти.

И́н Ирмо́с: В зако́не се́ни и писа́ний о́браз ви́дим ве́рнии, вся́к му́жеский по́л ложесна́ разверза́я, свя́т Бо́гу: те́м Перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

В зако́нную се́нь прини́к, зарю́ Боже́ственныя благода́ти бога́тно узре́л еси́, земны́я концы́ му́дре просвеща́я, и тьму́ прогоня́я неразу́мия, Проро́че: сего́ ра́ди Тя́ чти́м.

Я́ко му́ченик Христо́в, я́ко Боже́ственный Крести́тель, я́ко покая́ния свети́льник, и я́ко у́тро благоче́стия, ве́тхому хода́тай и но́вому: обетша́вшую зло́бою смире́нную мою́ ду́шу, разуме́нием Боже́ственным обнови́в, просвети́.

В ча́с ужа́сный, в ча́с стра́шный, в ча́с осужде́ния, осужда́ема мя́ изба́ви му́дре, преще́ния жду́щаго мя́ та́мо: послу́шающаго име́я Твоя́ мольбы́, я́коже дру́г Жениха́, Спаси́теля ду́ш на́ших.

Богоро́дичен: Я́ко Ма́ти Бо́жия, я́ко Ма́ти из Тебе́ пло́тию ро́ждшагося Сло́ва Бо́жия, Чи́стая, со безпло́тными, апо́столы же и проро́ки, со святи́тели и му́ченики, Того́ моли́ при́сно, умири́ти ми́р, пречи́стая Ма́ти Де́во.

Та́же, Досто́йно е́сть: Ектениа́ и свети́лен, и псалмы́ обы́чныя.

На стихо́вне стихи́ры умили́тельны, гла́с 3:

Разсе́янный мо́й у́м собери́ Го́споди, и олядене́вшее се́рдце мое́ очи́сти, я́ко Петру́ дая́ ми покая́ние, я́ко мытарю́ воздыха́ние, и я́коже блудни́це сле́зы, да ве́лиим гла́сом взыва́ю Ти́: Бо́же, спаси́ мя, я́ко еди́н Милосе́рд и Человеколю́бец.

Испо́лнихомся зау́тра ми́лости Твоея́ Го́споди, и возра́довахомся, и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.

Мно́жицею пе́ния содева́я, обрето́хся грехи́ соверша́я, язы́ком у́бо пе́ния веща́я, душе́ю же невме́стная мы́шлю: но обое́ испра́ви, Христе́ Бо́же, покая́нием, и поми́луй мя́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Царе́й и мучи́телей стра́х отри́нуша Христо́вы во́ини, и благодерзнове́нно, и му́жески того́ испове́даша, вся́ческих Го́спода Бо́га, и Царя́ на́шего, и мо́лятся о душа́х на́ших.

Сла́ва, и ны́не, Богоро́дичен: Без се́мене зачала́ еси́ от ду́ха свята́го, и славосло́вяще воспева́ем Тя́: ра́дуйся, Пресвята́я Де́во.

Та́же, Бла́го е́сть испове́датися Го́сподеви: Трисвято́е. По О́тче на́ш: тропа́рь, и ектениа́, и ча́с 1-й, и отпу́ст.

Во вто́рник блаже́нны, гла́с 3:

Отве́ргша, Христе́, за́поведь Твою́, пра́отца Ада́ма из рая́ изгна́л еси́: разбо́йника же ще́дре, испове́давша Тя́ на Кресте́, во́нь всели́л еси́, зову́ща: помяни́ мя, Спа́се, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Жите́йскими сластьми́ оскверне́ну притяжа́х ду́шу, к щедро́там Твои́м прихожду́ ненача́емь ве́сь, и приле́жно зову́ Ти Христе́, све́дущему еди́ному та́йная: очи́сти мя́ Твои́м милосе́рдием, Го́споди.

Сти́х: Блаже́ни есте́, егда́ поно́сят ва́м, и изжену́т и реку́т вся́к зо́л глаго́л, на вы́ лжу́ще мене́ ра́ди.

Я́ко хода́тай ве́тхаго и но́ваго бы́в Боже́ственный Крести́телю, обетша́вшаго мя́ прегреше́ньми обнови́в, да́ждь Твои́ми мольба́ми, всехва́льне, ходи́ти непреткнове́нно по стезя́м покая́ния, вводя́щым до́бре во Ца́рство Христо́во.

Сти́х: Ра́дуйтеся и весели́теся, я́ко мзда́ ва́ша мно́га на небесе́х.

По́двигом до́брым подвиза́вшеся до́блии страда́льцы, безчи́сленныя тьмы́ боле́зней подъя́сте, и сего́ ра́ди все́х боле́зни облегча́ете при́сно, и духо́в врежде́ния прого́ните: те́мже ве́рою ва́с святи́и сла́вим.

Сла́ва: Све́т и живо́т, и вседе́тель, триипоста́сная еди́ница, я́ко вои́стинну е́сть, ю́же сла́вим: Оте́ц бо, и Сы́н, и Ду́х, еди́ница и содержа́щая вся́, Влады́ка и Госпо́дь еди́н Бо́г в трие́х ли́цах познава́ется.

И ны́не: Согреша́ющаго при́сно, и прогне́вающаго Бо́га блага́го, Де́во Ма́ти уще́дри и покая́ния о́бразы я́ко Блага́я, утверди́ мя ны́не, я́ко да бу́дущих му́к избе́гнув, воспева́ю приле́жно, Отрокови́це, моли́тву Твою́.

Среда

Во вто́рник ве́чера

стихи́ры подо́бны, кре́стныя, гла́с 3.

Подо́бен: Ве́лия Креста́ Твоего́:

Тва́рь измени́ся, Сло́ве, распя́тием Твои́м, со́лнце лучи́ спря́та стра́хом, и хра́ма заве́са раздра́ся, и вся́к ве́рный спасе́ся. Те́мже сла́вим Твое́ безме́рное бога́тство.

И́же пло́ть на́шу за милосе́рдие восприи́м, Бо́г же и Влады́ка, на дре́ве пригвозди́ся, и вознесе́ ны низве́рженыя, возне́сся, те́лом, я́коже благоволи́, за благоутро́бие ми́лости.

Ка́плями богото́чныя кро́ве и воды́ возсозда́ся ми́р, пролия́нныя от ре́бр Твои́х, водо́ю у́бо омы́еши я́ко ще́др, все́х грехи́, Го́споди, кро́вию же проще́ние пи́шеши.

И́ны стихи́ры Богоро́дичны, подо́бны:

На одре́ слежя́ небреже́ния моего́, живота́ моего́ вре́мя ле́ностно сконча́х, и бою́ся исхо́да моего́ часа́: но Твое́ю моли́твою воздви́гнувши к покая́нию, спаси́ мя отрокови́це.

Боле́зни се́рдца моего́ Чи́стая исцели́, и уста́ви ума́ моего́ пре́лесть, и сподо́би чи́стым Тя́ воспева́ти се́рдцем, и испроси́ти благода́ть, и обрести́ ми́лость в де́нь су́дный.

Отложи́ смире́нная душе́ моя́, неудобоноси́мая бремена́ зло́бы, и приступи́ слезя́щи и вопию́щи: и́го, Чи́стая Де́во, сподо́би мя́ ле́гкое носи́ти Сы́на и Бо́га Твоего́.

Сла́ва, и ны́не, Крестобогоро́дичен: Ору́жие се́рдце Твое́ про́йде, Пречи́стая, егда́ Сы́на Твоего́ на Кресте́ ви́дела еси́, и вопия́ла еси́: не безча́дну Мя́ покажи́ Сы́не Мо́й и Бо́же Мо́й, соблюды́й Мя́ по рождестве́ Де́ву.

Та́же, Све́те ти́хий: Проки́мен.

На стихо́вне стихи́ры кре́стныя, гла́с 3:

Кресту́ Твоему́ покланя́юся, Христе́, честно́му, храни́телю ми́ра, спасе́нию на́с гре́шных, вели́кому очище́нию, похвале́ всея́ вселе́нныя.

Сти́х: К Тебе́ возведо́х о́чи мои́ живу́щему на небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Дре́во преслуша́ния ми́ру сме́рть прозябе́: дре́во же Креста́ живо́т и нетле́ние. Те́мже Ти́ покланя́емся распе́ншемуся Го́споду: да зна́менается на на́с све́т лица́ Твоего́.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Проро́цы, и апо́столи Христо́вы, и му́ченицы, научи́ша пе́ти Тро́ицу Единосу́щную, и просвети́ша язы́ки заблу́ждшыя, и о́бщники А́нгелом сотвори́ша сы́ны челове́ческия.

Сла́ва, и ны́не, Крестобогоро́дичен: Подо́бен: Ве́лия Креста́ Твоего́:

На кресте́ Тя воздви́жена, Христе́ Мо́й, я́ко ви́де А́гница ро́ждшая Тя́ и Непоро́чная, и Ма́ти Твоя́, рыда́ше с пла́чем и вопия́ше: не покажи́ Мя безча́дну, Ю́же сохрани́л еси́ чи́сту и по рождестве́.

Та́же: Ны́не отпуща́еши: Трисвято́е. По О́тче на́ш: тропари́, ектениа́, и отпу́ст.

Во вто́рник на повече́рии

кано́н пресвяте́й Богоро́дице. Гла́с 3.

Пе́снь 1

Ирмо́с: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре изра́ильтеским лю́дем, Се́й Бо́г на́ш, препросла́влен е́сть: Тому́ Еди́ному пои́м, я́ко просла́вися.

Я́ко исто́чник милосе́рдия и ми́лости, ве́дый Тя́ Бо́жию Ма́терь, присту́пль молю́ся Твое́й бла́гости, да́ти ми́ умиле́ние: я́ко да се́тую и пла́чуся прегреше́ний мои́х, Всечи́стая Влады́чице.

Душе́вных ми́ сле́з да́ждь ка́плю, омыва́ющу скве́рну всю́ мои́х дея́ний, и лука́вая помышле́ния, и очища́ющую души́ моея́ нечистоту́, и це́рковь творя́щую мя́ Бо́жия Ду́ха.

Сла́ва: Обурева́емь волно́ю, и треволне́нием мои́х прегреше́ний, и лю́те всегда́ борца́ рабо́тами потопля́емь, и во глубину́ поги́бели ны́не отпуще́н, вопию́ Ти, Пренепоро́чная: спаси́ мя.

И ны́не: Милосе́рдия ра́ди ми́лости, Влады́чице все́х, поми́луй окая́нную мою́ ду́шу, и огня́ изба́ви мя́ ве́чнующаго, и бесо́вскаго напа́дания, под кро́в Тво́й, Богоро́дице, ны́не прибега́ющаго.

Пе́снь 3

Ирмо́с: И́же от несу́щих вся́ приведы́й, Сло́вом созида́емая, соверша́емая Ду́хом, Вседержи́телю вы́шний, в любви́ Твое́й утверди́ мене́.

Све́том Боже́ственным озари́, Всепе́тая, омраче́нный у́м мо́й злы́ми по́мыслы: Ты́ бо Све́т родила́ еси́, возсия́вший от Отца́ присносу́щный.

Запе́н души́ мое́й стопы́, и́же пра́ведных вра́г к земли́ прирази́: но Твое́ю десни́цею, Влады́чице Чи́стая, возста́ви мя́.

Сла́ва: Мытаре́выми гла́сы, окая́нный а́з зову́ Ти: очи́сти мя́, Влады́чице, и прегреше́ний оставле́ние, Твое́ю моли́твою, пода́ждь рабу́ Твоему́.

И ны́не: Исцели́ я́звы душе́вныя, и многому́тное помышле́ний волне́ние, Влады́чице, утиши́: и ми́рное ми́ устрое́ние да́ждь.

Пе́снь 4

Ирмо́с: Положи́л еси́ к на́м тве́рдую любо́вь, Го́споди, Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Пло́ть сластьми́, и сладостра́стием оскверни́х, и души́ моея́ чистоту́ скве́рными мы́сльми окаля́х, и у́м помрачи́х, не пре́зри у́бо, Влады́чице, раба́ Твоего́.

Избавле́ние ми́ бу́ди, и прибе́жище и держа́ва, ро́г же спасе́ния, Чи́стая, и засту́пница, вся́кия мя́ ско́рби избавля́ющи всегда́, и враги́ моя́ вся́ посрамля́ющи.

Сла́ва: Мно́гими напа́стьми ны́не одержи́мь е́смь окая́нный, и бесо́вскими кова́рствы при́сно погружа́емь, прибега́ю Ти́ ны́не: те́плою Твое́ю моли́твою спаси́ мя, раба́ Твоего́.

И ны́не: Но́щь мя́ несветла́ страсте́й одержи́т окая́ннаго: но све́том Твои́м Блага́я, души́ моея́ о́блаки разжени́, и к све́ту наста́ви повеле́ний Бо́жиих, Всенепоро́чная.

Пе́снь 5

Ирмо́с: Я́ко ви́де Иса́иа обра́зно на престо́ле превознесе́на Бо́га, от а́нгел сла́вы дориноси́ма, о окая́нный, вопия́ше, а́з прови́дех бо воплоща́ема Бо́га, Све́та невече́рня, и ми́ром влады́чествующа.

Вре́мя живота́ моего́ я́ко ды́м исчезе́, и к сме́ртным две́рем прибли́жихся, и ужаса́юся бесо́вскаго напа́дания: дела́ бо те́х де́ях всегда́, Всенепоро́чная, уще́дри и спаси́ мя.

Изсуша́ющи, Де́во, зо́л мои́х бе́здну, пода́ждь ми́ ре́ки сле́з, и угаси́ ве́сь страсте́й мои́х пла́мень, Отрокови́це, и сподо́би изба́витися огня́, и про́чих муче́ний в де́нь су́дный.

Сла́ва: Боле́вшую ду́шу мою́ грехи́, Пречи́стая, исцели́ Твои́м ми́лованием, и сподо́би мя́ твори́ти во смире́нии Сы́на Твоего́ повеле́ния при́сно, я́ко да восприиму́ Сего́ бла́гость.

И ны́не: Овдове́вшая, Сы́не Мо́й, неве́стныя оде́жды, Боже́ственная Це́рковь Твоя́, от ре́бр Святы́я кро́ве оде́яся. Аз же боле́зную, вся́ боле́зни Твоя́ зря́щи на Кресте́, я́же Сло́ва Ма́ти рыда́ющи глаго́лаше.

Пе́снь 6

Ирмо́с: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

Вели́кое Тя́ Бо́жий Сы́н гре́шником прибе́жище показа́, вопло́щся Богоневе́сто, от чи́стых крове́й Твои́х: те́м ми́лостива Твои́м рабо́м бу́ди.

Просвети́ заре́ю Твое́ю, Блага́я, омраче́нныя се́рдца моего́ о́чи по́мыслы неподо́бными: и све́ту сы́на сотвори́, и в ме́сто све́тло мя́ всели́.

Сла́ва: Во́лны стра́стных помышле́ний всегда́ мя смуща́ют, Пречи́стая, лука́вых же духо́в бу́ря погружа́ет: но утверди́ мя на ка́мени безстра́стия.

И ны́не: Усну́х к сме́рти душе́вней, и во гро́бе лежу́ отча́яния: но да́ждь ми́ ру́ку, и воздви́гни, молю́ся, к покая́нию жи́зни наставля́ющи мя́.

Та́же: Го́споди поми́луй, три́жды. Сла́ва, и ны́не:

Седа́лен, гла́с 3: Же́зл си́лы стяжа́вшии, Кре́ст Сы́на Твоего́, Богоро́дице, те́м низлага́ем враго́в шата́ния, любо́вию Тя́ непреста́нно велича́юще.

Пе́снь 7

Ирмо́с: Пре́жде о́бразу злато́му, перси́дскому чти́лищу о́троки не поклони́шася, трие́ пою́ще посреде́ пе́щи: отце́в Бо́же благослове́н еси́.

Кре́постию препоя́ши, Чи́стая, ду́шу мою́ изнемо́гшую грехи́, и вопию́ща Сы́ну Твоему́ спаси́ мя: оте́ц на́ших Бо́же, благослове́н еси́.

Сме́ртнаго часа́ убоя́вся, безсме́ртнаго ра́ди и ве́чнаго муче́ния, Тебе́ припа́даю: спаси́ мя, Отрокови́це, от се́ти ловя́щих, Богороди́тельнице.

Сла́ва: Я́же невмести́маго Бо́га во чре́во вмести́вшая, мно́гими прегреше́нии утесня́емый у́м мо́й, Богоро́дице, свободи́ си́х осужде́ния.

И ны́не: Ро́д челове́ческий Тя́ мо́лит, Богоро́дице: Влады́чице, поми́луй рабы́ Твоя́, ве́рою Сы́ну Твоему́ вопию́щыя: оте́ц на́ших Бо́же, благослове́н еси́.

Пе́снь 8

Ирмо́с: Нестерпи́мому огню́ соедини́вшеся, Богоче́стия предстоя́ще ю́ноши, пла́менем же неврежде́ни, Боже́ственную пе́снь поя́ху: благослови́те вся́ дела́ Госпо́дня Го́спода, и превозноси́те во вся́ ве́ки.

Позави́дев блу́дному вои́стинну, и житие́ мое́ все́ сконча́в во гресе́х, ны́не зову́: согреши́х Ти́, сотвори́ мя, Отрокови́це, я́ко еди́наго от нае́мник Сы́на и Зижди́теля Твоего́, да Тя́ сла́влю во вся́ ве́ки.

Напо́лнися зо́л душа́ моя́, и привмене́н бы́х со все́ми в ро́в низходя́щими: но Ты́ мя, Богоро́дице Де́во, изведи́ из я́мы стра́стныя, и от бре́ния тиме́ниа зо́л мои́х.

Сла́ва: Моли́ся Христу́, ро́ждшая Сего́ от святы́х Твои́х чре́сл, Богоро́дице, мно́гих ми́ прегреше́ний да́ти проще́ние, да пою́: вся́ дела́ Госпо́дня Го́спода по́йте, и превозноси́те Его́ во ве́ки.

И ны́не: Егда́ Бо́жиим повеле́нием хо́щет душа́ моя́ от жития́ сего́ отити́, от се́ти ловя́щих исхити́, Пречи́стая, Тебе́ вопию́щих: вся́ дела́ Госпо́дня Го́спода по́йте, и превозноси́те Его́ во ве́ки.

Пе́снь 9

Ирмо́с: В зако́не се́ни и писа́ний о́браз ви́дим ве́рнии, вся́к му́жеский по́л ложесна́ разверза́я, свя́т Бо́гу: те́м перворожде́нное Сло́во Отца́ Безнача́льна, Сы́на первородя́щася Ма́терию неискусому́жно, велича́ем.

Ро́д челове́ческий, Всенепоро́чная, Твое́ю непобеди́мою моли́твою ны́не обога́щься, вопие́т де́нь и но́щь: не преста́й всегда́ моля́щися Творцу́ и Сы́ну Твоему́, уще́дрити пою́щыя Тя́.

Стре́лы страсте́й безме́стных ду́шу мою́ уязви́ша бесо́вскими прило́ги, сопроти́вными стрела́ми помышле́ний, всегда́ у́м мо́й смуща́ют: те́мже исцели́ Отрокови́це, неисце́льныя моя́ я́звы.

Отими́, Чи́стая Богоневе́сто, от мене́ борю́щих вра́г ра́ны вско́ре, воста́ния бо те́х, и мно́гаго лука́вства и на́глости ктому́ не терплю́ окая́нный: но потщи́ся изба́вити мя́.

Ты́ неможе́ние ве́си смире́ннаго моего́ телесе́, я́звы души́ моея́, се́рдца моего́ стена́ние, и ума́ моего́ заблужде́ние и пре́лести: те́мже Твои́м милосе́рдием обою́ду да́ждь исцеле́ние.

Та́же, Досто́йно е́сть: И покло́н до земли́. Трисвято́е. По О́тче на́ш: тропа́рь, и про́чее обы́чное, и отпу́ст.

В сре́ду у́тра

по 1-й кафи́сме седа́льны кре́стныя, гла́с 3:

Кре́ст водрузи́ся на земли́, и косну́ся небесе́: не я́ко дре́ву дося́гшу высоту́, но Тебе́ на не́м исполня́ющему вся́ческая: Го́споди, сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

На кипари́се, и пе́вке, и ке́дре, возне́слся еси́ а́гнче Бо́жий, да спасе́ши и́же ве́рою покланя́ющыяся во́льному Твоему́ распя́тию, Христе́ Бо́же, сла́ва Тебе́.

Сла́ва, и ны́не, Крестобогоро́дичен: Же́зл си́лы стяжа́вшии кре́ст сы́на твоего́, Богоро́дице, те́м низлага́ем враго́в шата́ния, любо́вию Тя́ непреста́нно велича́юще.

По 2-м стихосло́вии седа́льны кре́стныя, гла́с 3:

Зауши́выйся за ро́д челове́ческий, и не прогне́вавыйся, свободи́ из истле́ния живо́т на́ш, Го́споди, и спаси́ на́с.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Подо́бен: Красоте́ де́вства:

Неисче́тней вла́сти Твое́й, и во́льному распя́тию, а́нгельская во́инства дивля́хуся зря́ще: ка́ко неви́димый пло́тию ураня́шеся, хотя́ изба́вити от истле́ния челове́чество? Те́мже я́ко Жизнода́вцу вопие́м Ти́: сла́ва, Христе́, благоутро́бию Твоему́.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Вооружи́вшеся во всеору́жие Христо́во, и обо́лкшеся во ору́жие ве́ры, ополче́ния вра́жия страда́льчески низложи́сте: усе́рдно бо наде́ждею жи́зни, претерпе́сте вся́ мучи́тельская дре́вле преще́ния же и ра́ны. Те́мже и венцы́ прия́сте, му́ченицы Христо́вы терпеливоду́шнии.

Сла́ва, и ны́не, Крестобогоро́дичен: Подо́бен:

Неискусобра́чная Чи́стая и Ма́ти Твоя́, Христе́, ви́дящи Тя́ ме́ртва ви́сяща на Кресте́, ма́терски пла́чущи глаго́лаше: что́ Тебе́ воздаде́ евре́йский беззако́нный собо́р и неблагода́рный, и́же мно́гих и вели́ких Твои́х, Сы́не мо́й, даро́в наслади́выйся? Пою́ Твое́ Боже́ственное снизхожде́ние.

По 3-м стихосло́вии, седа́льны кре́стныя, гла́с 3:

Подо́бен: Красоте́ де́вства:

Распя́тие и сме́рть прие́м, живо́т безсме́ртный источи́л еси́ на́м, Христе́ Спа́се, и от тли́ ми́р свободи́л еси́. Те́мже Твоя́ сла́вим, Жизнода́вче Человеколю́бче, стра́сти спаси́тельныя, и́миже вси́ спаса́емся, Честна́го Креста́ Твоего́ ми́р и непобеди́мое ору́жие иму́ще.

Кре́ст претерпе́л еси́ безче́стно, Влады́ко, и́же превы́ше всея́ тва́ри, я́ко да почти́ши мя́ пре́жде лю́те обезче́ствована: копие́м же в ре́бра Твоя́ прободе́н бы́л еси́, Долготерпели́ве, хотя́ изба́вити из истле́ния мя́ созда́ние Твое́. Пою́ Твое́ мно́гое благоутро́бие и бла́гость, Человеколю́бче.

Сла́ва, и ны́не, Крестобогоро́дичен. Подо́бен:

Воздви́жена Тя́ я́ко ви́де на дре́ве, Влады́ко, неискусобра́чная и пренепоро́чная, Чи́стая Де́ва же и Ма́ти Твоя́, увы́ мне́ взыва́ше, о Сы́не мо́й сладча́йший! Ка́ко Тя́ беззако́ннейший собо́р на дре́ве осуди́, все́х творца́ и Влады́ку: пою́ Твою́ кра́йнюю бла́гость.

Кано́н Честно́му и Животворя́щему Кресту́, [его́же краестро́чие: Боле́зни уста́вил еси́ челове́ком боле́зньми сло́ве. Творе́ние Ио́сифово.] Гла́с 3.

Пе́снь 1

Ирмо́с: Во́ды дре́вле, ма́нием Боже́ственным, во Еди́но со́нмище совокупи́вый, и раздели́вый мо́ре изра́ильтеским лю́дем, Се́й Бо́г на́ш, препросла́влен е́сть: тому́ еди́ному пои́м, я́ко просла́вися.

Многоболе́зненныя стра́сти уста́вил еси́, Cло́ве, страстьми́ честны́я пло́ти Твоея́, и челове́ки спа́сл еси́, и́хже уязви́ дре́вле сопротивобо́рец, благоче́стно покланя́ющихся недомы́сленному смотре́нию Твоему́.

И́же связа́вый в раи́ ле́стию челове́ка, за́поведи преступле́нием, у́зами свя́зан е́сть нереши́мыми, Го́споди, и́миже воплоща́емь во́лею свя́зан бы́л еси́, разреша́я прегреше́ния на́ша, Человеколю́бче.

Му́ченичен: Бе́дствующую потопле́нием зря́ще страстоте́рпцы тва́рь, де́монов пре́лестьми, ве́рным яви́шася приста́нища благоти́шная, всю́ го́рдаго си́лу струя́ми кро́вными погрузи́вше великоимени́тии.

Му́ченичен: Ли́к му́ченический, ликостоя́нием го́рним све́тло сочета́емь, блиста́ньми всегда́ озаря́ется несозда́ннаго Божества́, и су́щыя на земли́ озаря́ет, того́ чудеса́ ве́рою сла́вящыя.

Богоро́дичен: Превы́шши го́рних яви́лася еси́ чино́в, ро́ждши на земли́ Бо́га сло́ва, Пречи́стая, на́с к небе́сным свои́ми страстьми́, и кресто́м честны́м возве́дшаго бла́гости ра́ди.

И́н кано́н пресвяте́й Богоро́дице, его́же краестро́чие: Тре́тие пе́ние Богоро́дице приношу́.

Ирмо́с то́йже.

Приосене́нную го́ру Тя́ прови́де ду́хом Авваку́м проро́к, молю́, Пречи́стая, осени́ мя стра́стию пробода́ема, и в се́ни сме́ртней от стужа́ющих мя́ страсте́й свободи́тися. [Два́жды.]

Окропле́нием Боже́ственныя струи́ источи́вшияся от Боже́ственнаго ребра́ Сы́на Твоего́, моя́ омы́й серде́чныя я́звы: я́ко да велича́ю Тя́, и по до́лгу сла́влю Присноблаже́нную и Пренепоро́чную.

Равноде́теля ро́ждшему родила́ еси́ сло́ва, обожи́вшаго челове́ческое существо́: но того́ моли́ недоумева́ема и изнемо́гша мя́ вра́жиими кова́рствы, Боже́ственнаго утеше́ния сподо́бити чи́стая.

Пе́снь 3

Ирмо́с: И́же от несу́щих вся́ приведы́й, Сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.

Тебе́ естество́м Божества́ безстра́стна, стра́стна бы́вша пло́тию бла́гости ра́ди, дре́вом умертви́л е́сть евре́йский собо́р, на́с обезсме́ртствующа.

На вода́х пове́сивый сло́ве зе́млю, на дре́ве во́лею бы́л еси́ пове́шен, возводя́ мя к небе́сным в зло́бы ро́в па́дшаго.

Му́ченичен: Преиспещре́ни ра́нами, Христо́вы всехва́льнии му́ченицы, Го́сподеви предстоите́ от него́ прие́млюще богате́йшею руко́ю воздая́ния.

Му́ченичен: Ра́достною душе́ю к ра́нам вмеща́хуся му́ченицы, после́днюю зми́еви печа́ль творя́ще, и а́нгельския ли́ки ра́дости исполня́юще.

Богоро́дичен: Воздви́жена зря́щи на Кресте́, Христа́ Неискусобра́чная пла́чущи глаго́лала еси́: заше́л еси́ сла́вы Со́лнце от о́чию Мое́ю, просвеща́яй во тьме́ су́щыя.

И́н Ирмо́с то́йже.

И́же в ми́лости Неизрече́нней, и щедро́тах су́ща Бога́таго, ми́лостива су́щи, Всесвята́я, моли́ е́же уще́дрити на́с озло́бленных.

До́м все́х су́щи Творца́, обита́ти моли́ во мне́ Уте́шителю, бы́вшем верте́пе душетле́нных разбо́йник, Чи́стая Де́во.

Ма́нием вся́ нося́щаго Боже́ственным, во объя́тиих я́ко нося́щи Богоро́дице, при́зри на мя́, и изба́ви мя́ от и́же к страсте́м ра́зума безме́стнаго.

Пе́снь 4

Ирмо́с: Положи́л еси́ к на́м тве́рдую любо́вь, Го́споди, единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Досажде́ние вои́стинну, и́же че́сти вся́кия превы́шший Влады́ко, претерпе́л еси́ Христе́, по главе́ тро́стию бие́мь: я́ко да преступле́нием мя́ обезче́ствована почти́ши, Человеколю́бче.

Венце́м терно́вым венча́н бы́л еси́ хотя́ долготерпели́ве, я́коже Ца́рь и́стинный, и терноно́сный ча́стный гре́х из ко́рене уста́вил еси́: песносло́влю Твоя́, Спа́се, страда́ния.

Му́ченичен: Не сокруше́ни томле́ньми ра́н пребы́сте му́ченицы, сокруша́юще пре́лесть вра́жию, и нога́ми ва́шими попира́юще, безме́рно хва́лящася, и безу́мием всего́ увяда́ема.

Му́ченичен: Телесы́ тле́нными нетле́ние Боже́ственно стяжа́сте, страстьми́ стра́сть честну́ю безстра́стнаго тве́рдо подража́вше всехва́льнии му́ченицы, безпло́тным все́м счи́сленнии.

Богоро́дичен: Сви́ток Тя́ иногда́ проро́к отрокови́це зря́ше, в не́мже пе́рстом о́тчим написа́ся сло́во воплоща́емо, и пра́отчее рукописа́ние копие́м раздра́, Пречи́стая.

И́н Ирмо́с то́йже.

Я́звы, Христе́, и заколе́ние во́лею я́ко претерпе́л еси́, уя́звленную мою́ ду́шу разбо́йническими де́монов озлобле́ньми, моли́твами исцели́ ро́ждшия Тя́, еди́не Многоми́лостиве.

Те́ло Твое́ю руку́ созда́телю е́смь и творе́ние, зло́бою же змии́ною, Христе́, от сласте́й жите́йских сокруши́хся. Те́мже мя́ возсозида́й ро́ждшия Тя́ Боже́ственными умоле́ньми.

Сло́во О́тчее па́че сло́ва родила́ еси́, разреши́вшее вся́каго безслове́сия челове́ки: Его́же приле́жно моли́, безслове́сными мя́ страстьми́ пленя́ема свободи́ти, Еди́на Присноде́во.

Исцеле́ние на́м из дла́ни то́чиши всегда́, вся́ святы́ни се́нь, вся́ све́та су́щи испо́лнена, вся́ ка́плющи ми́ро благоуха́ния, Пречи́стая Богоневе́сто.

Пе́снь 5

Ирмо́с: На земли́ неви́димый яви́лся еси́, и челове́ком во́лею сожи́л еси́ непостижи́мый, и к Тебе́ у́тренююще, воспева́ем Тя́, Человеколю́бче.

Я́коже а́гнец воздви́глся еси́ на дре́во, и отцу́ же́ртва прине́слся еси́ о на́с, Бла́же, и же́ртвы и́дольския уста́вил еси́, Всеси́льне.

Пробо́дся в ре́бра, Живода́вче, копие́м, два́ исто́чника спасе́ния пролива́еши, от Тро́ицы Тя́ Еди́наго возвеща́ющым, де́йства два́ нося́ща.

Му́ченичен: Утвержде́ние кре́пкое, и непоколе́блемый ка́мень, Тя́, Иису́се, кре́пцыи страстоте́рпцы ве́рою обре́тше, я́коже ка́мение честно́е себе́ назда́ша.

Му́ченичен: Си́лою Бо́жиею укрепля́еми ве́рою, всю́ лю́тую си́лу преле́стника побори́ли есте́, страстоте́рпцы му́ченицы, и све́тло венча́стеся.

Му́ченичен: Истле́вшее пре́жде преступле́нием естество́ е́же по на́м, я́ко нетле́нно ро́ждши Христа́, возсоздала́ еси́, Пресвята́я Влады́чице, предста́тельство ду́ш на́ших.

И́н Ирмо́с: Я́ко ви́де Иса́иа обра́зно на престо́ле превознесе́на Бо́га, от а́нгел сла́вы дориноси́ма, о окая́нный, вопия́ше, а́з: прови́дех бо воплоща́ема Бо́га, Све́та невече́рня, и ми́ром влады́чествующа.

Пло́ти моея́ боле́зни, и душе́вную боле́знь претвори́, и ле́ности о́блаки отгони́, Де́во, Све́та о́блаче, и здра́вие, и лю́тых премене́ние да́ждь ми́ прося́щему, и любо́вию Тя́ сла́вящему.

Хода́таицу Тя́ и моли́твенницу, из Тебе́ Ро́ждшемуся ны́не предлага́ю, вся́каго греха́ сы́й испо́лнь Де́во, пору́чница ми́ и жития́ исправле́ние бу́ди, и руковожде́ние к стезя́м Боже́ственнаго Ве́дения.

Освяти́ у́м мо́й, и ду́шу, Де́во, световоди́, и Боже́ственныя Сла́вы прича́стника сотвори́: се́ бо зо́л испо́лнихся, и вся́ким порабоще́н бы́х сласте́м, и оскверне́ну приношу́ со́весть.

Пе́снь 6

Ирмо́с: Бе́здна после́дняя грехо́в обы́де мя́, и исчеза́ет ду́х мо́й, но простры́й, Влады́ко, высо́кую Твою́ мы́шцу, я́ко Петра́ мя Упра́вителю спаси́.

Зми́й мя́ изведе́ из еде́ма, льсти́вою сне́дию прельсти́вый льсти́вый: Христо́с же на дре́во воздви́гся во́лею, дре́вний мне́ па́ки дае́т вхо́д.

Уязви́ся, и́же на́с уязви́вый, и неисце́лен пребы́сть, уязвле́ным Твои́м ре́бром, благода́телю Го́споди: ве́рнии же исцели́хомся Твои́ми я́звами, и́миже во́лею уязви́лся еси́.

Му́ченичен: Яви́стеся посреде́ огня́, прему́дрии Христо́вы ору́жницы, я́коже а́гнцы испеца́еми, и Бо́гу все́х Царю́ на трапе́зу приноси́ми, и неизрече́нное весе́лие насле́дующе.

Му́ченичен: Подава́ете исцеле́ния ре́ки, от неистощи́мых сокро́вищ почерпа́юще, и страсте́й вре́д страстоте́рпцы изсуша́ете, и напая́ете ве́рных собра́ния.

Богоро́дичен: Умерщвле́ние зря́щи, от Твои́х крове́й Сло́ва вопло́щшагося, Всенепоро́чная, ма́терски восклица́ла еси́: и жи́зни су́ща Вино́внаго возвели́чила еси́, Ма́ти Де́во Влады́чице.

И́н Ирмо́с: И́же в концы́ веко́в доше́дшыя, Человеколю́бче, и треволне́ньми напа́стей поги́бнути бе́дствующыя, вопию́щыя не пре́зри: спаси́, Спа́се, я́коже спа́сл еси́ от зве́ря проро́ка.

Фарисе́а превознесе́нною мы́слию превосходи́х, гордя́ся при́сно, и к про́пастем порева́яся безме́рных согреше́ний, Еди́на Чи́стая, смири́вшагося мя́ лю́те уще́дри. [Два́жды.]

Я́же пречу́дное Зача́тие име́вши и Рожде́ние, Твоя́ ми́лости на мне́ окая́ннем ны́не удиви́: и́бо в беззако́ниих и зача́хся и рожде́йся сласте́м порабоще́н бы́х.

Восклица́ю, пла́чу и рыда́ю, егда́ суди́ще стра́шное воспомина́ю: лука́ва бо дела́ и́мам, неискусому́жная Де́во Ма́ти Бо́жия, в ча́с стра́шный предста́ни ми́.

Пе́снь 7

Ирмо́с: Пре́жде о́бразу злато́му, перси́дскому чти́лищу, о́троки не поклони́шася, трие́ пою́ще посреде́ пе́щи: отце́в Бо́же, благослове́н еси́.

Боле́зньми Твои́ми уста́вил еси́ на́шя боле́зни, Человеколю́бче, и ны́не к жи́зни неболе́зненней приве́л еси́ и́же Твои́м честны́м страсте́м покланя́ющыяся благоче́стно, Бо́же все́х.

Егда́ Тя узре́, Христе́, тва́рь распина́ема, изменя́шеся и трепета́ше: земля́ тряса́шеся, распаде́ся же ка́мение, и сокрыва́ше све́т со́лнечное тече́ние.

Му́ченичен: Зако́ном покаря́ющеся Христо́вым, беззако́нных уклони́шася ласка́ний му́ченицы, и зако́нно посреде́ суди́ща страда́льчествующе, сла́вно венчава́хуся.

Му́ченичен: Не опали́стеся огне́м, огня́ тепле́йше произволе́ние стяжа́вше, страстоте́рпцы Госпо́дни венцено́сцы, вопию́ще: Бо́же, благослове́н еси́.

Богоро́дичен: Стоя́ла еси́ зря́щи Христа́ на Кресте́ воздви́жена, Его́же родила́ еси́, Пречи́стая, и вопия́ла еси́: не безча́дну яви́ Мя, ю́же соблю́л еси́ чи́сту и по Рождестве́.

И́н Ирмо́с: Трие́ о́троцы в пещи́ Тро́ицу прообрази́вше, преще́ние о́гненное попра́ша, и пою́ще вопия́ху: благослове́н еси́ Бо́же оте́ц на́ших.

От де́л спасе́ния не́сть ми́, Влады́чице, грехи́ бо прилага́ю ко грехо́м, и к зло́бе зло́бу: моли́твою у́бо Твое́ю, Чи́стая, уще́дри, и спаси́ мя. [Два́жды.]

Су́д при две́рех, суди́ще гото́во, угото́вися, смире́нная душе́, и возопи́й: внегда́ суди́ти ти́ Сло́ве, не осуди́ мене́, моли́твами Ро́ждшия Тя́.

Объе́м грехо́вныя плоды́ умертви́хся, и принося́ ду́шу непло́дну, зову́ Ти: плодоно́сну покажи́, я́же плодо́м Твои́м тле́ние потреби́вшая.

Пе́снь 8

Ирмо́с: Вавило́нская пе́щь о́троки не опали́, ниже́ Божества́ о́гнь де́ву растли́. Те́м со о́троки ве́рнии возопие́м: благослови́те дела́ Госпо́дня Го́спода.

Тебе́ распе́ншуся, отве́рзеся па́ки ра́й, и обраща́ющееся на ны́ ору́жие плещы́ дае́т, копия́ устыде́вся пробо́дшаго свята́я ре́бра Твоя́, Христе́ многоми́лостиве.

Копие́м Ти́ боре́ц уязви́ся, и паде́ся, пады́й же Ада́м к жи́зни возвраща́ется, вопия́ Тебе́ во́лею закла́вшемуся, Христе́: благословля́яй Тя́ сла́влю, Бо́же мо́й многоми́лостиве.

Му́ченичен: Ми́р просвеща́ется боре́ньми ва́шими, и изря́дствы страда́льцы, и неисче́тными чудесы́ и тьмы́ боле́зней избавля́ется, ве́рою вопия́: благослови́те дела́ Госпо́дня Го́спода.

Му́ченичен: Сме́х зри́тся лежя́ под нога́ми ва́шими святи́и, и́же пре́жде хваля́йся зе́млю потреби́ти и мо́ре: Христо́с же живоно́сною украша́ет десни́цею, неувяда́ющими венцы́, ва́с присносла́внии.

Богоро́дичен: В ле́то породила́ еси́ ле́т вы́шшаго, разреша́ющаго ле́тныя соу́зы, у́зами свои́ми, Пречи́стая, Ада́ма первозда́ннаго, и сосвязу́юща его́ у́зами сла́дкия своея́ любве́.

И́н Ирмо́с: Нестерпи́мому огню́ соедини́вшеся, Богоче́стия предстоя́ще ю́ноши, пла́менем же неврежде́ни, Боже́ственную пе́снь поя́ху: благослови́те вся́ дела́ Госпо́дня Го́спода, и превозноси́те во вся́ ве́ки.

Вся́ я́ко добра́ и бли́жняя все́х Царя́ бы́вшая, Богоро́дице, испо́лни мя́ благи́х де́л, зло́бе спожи́вшаго, и ле́ностно все́ житие́ сконча́вшаго: я́ко да Тя́ сла́влю во вся́ ве́ки.

От ки́това чре́ва я́ко изба́вил еси́ дре́вле проро́ка, Бо́жий Сло́ве, пресла́вно: та́ко изба́ви мою́ ду́шу во глубину́ попо́лзшуюся поги́бели, име́яй, Спа́се, моля́щуюся Тебе́ неискусобра́чно ро́ждшую Тя́ Де́ву.

В кра́сную оде́жду обле́кшагося мя́ богорожде́ния, обре́тше, Богоро́дице, и́же зло́бу соде́ловающии, тоя́ обнажи́ша: но Ты́ мя Боже́ственными оде́ждами уясни́ покая́нием, моли́твами Твои́ми, Де́во.

Та́же, пе́снь Богоро́дицы: Вели́чит душа́ моя́ Го́спода:

Пе́снь 9

Ирмо́с: Купино́ю и огне́м пропи́саную в Сина́и законополо́жнику Моисе́ю, и Бо́жий во чре́ве неопа́льно заче́ншую о́гнь, всесве́тлую и негаси́мую свещу́, су́щую Богоро́дицу пе́сньми чту́ще велича́ем.

Да обря́щеши дра́хму, ю́же погуби́л еси́, Христе́, вже́г на кресте́ Твою́ пло́ть, Бла́же, и о́бщники сотвори́ши ра́дости, си́лы Твоя́ го́рния, Живода́вче, с ни́миже Тя́ я́ко благоде́теля пою́ще, пе́сньми велича́ем.

Я́ко воздви́гл еси́, Христе́, Твои́ ру́це на кресте́, осла́бленныя мои́ пре́жде ру́це страстьми́ мно́гими, укрепи́л еси́ си́лою Твое́ю, и коле́на к тече́нию Боже́ственному, вои́стинну осла́бленая утверди́л еси́: те́мже Тя́ велича́ем.

Му́ченичен: Сгара́юще пла́менем, безме́рными ра́нами, ро́су Тя́ обрето́ша Христе́ прохлажде́ния, Твои́ тве́рдии и чу́днии страда́льцы. Те́мже ра́дующеся идя́ху путе́м, жела́нием по́честей, пе́сньми Тя́ непреста́нно велича́юще.

Му́ченичен: Мно́жество страда́лец, святы́х ли́к мо́лит Тя́, Христе́, за собо́р люде́й, мно́го преогорчева́ющих: мно́жеством Твоея́, Ще́дре, ми́лости, очи́сти мно́жество беззако́ний на́ших, я́ко Человеколю́бец.

Богоро́дичен: Нося́щее земны́х зра́к, Сия́ние О́тчее Де́во родила́ еси́, Его́же воздви́жена на Кресте́ со́лнце на терпя́щи зре́ти омрача́шеся, и мра́к умаля́шеся идолонеи́стовства: те́мже с Ни́м Тя́ велича́ем.

И́н Ирмо́с: В Зако́не се́ни и Писа́ний о́браз ви́дим ве́рнии: вся́к му́жеский по́л ложесна́ разверза́я, свя́т Бо́гу. Те́м перворожде́нное Сло́во Отца́ Безнача́льна, Сы́на первородя́щася Ма́терию неискусому́жно, велича́ем.

Растле́нна умо́м, растле́нна душе́ю и со́вестию, зло́бою оскверне́на, и на́га вся́ких бла́г явле́нна, Де́во нетле́нная, непоро́чная, не пре́зри мене́, но де́лы благоче́стия украси́.

Испо́лнихся зо́л, испо́лнихся помышле́ний отчужда́ющих мя́ от Тебе́, Человеколю́бца. Сего́ ра́ди и стеню́ и вопию́: ка́ющагося мя́ приими́, и не отри́ни мене́ ро́ждшия Тя́ моли́твами, Благоде́телю многоми́лостиве.

Да изба́влюся Твои́ми, Всенепоро́чная Отрокови́це, моли́твами, от вся́каго гне́ва, страсте́й смертоно́сных, лю́тыя гее́нны и огня́, от челове́ков непра́ведных, от враго́в лука́вых, прибе́гнувый к Твоему́ покро́ву, и призыва́яй Тя́ на по́мощь.

Я́ко Ма́ти Бо́жия, моли́ из Тебе́ ро́ждшагося Го́спода Бо́га и Царя́: е́же изба́витися вся́каго преще́ния, и лука́ваго обы́чая Твоему́ рабу́, Чи́стая, на Тя́ наде́явшемуся из чре́ва Ма́тере моея́, Влады́чице.

Та́же, Досто́йно е́сть: Ектениа́ и про́чее.

На стихо́вне стихи́ры, гла́с 3:

За́вистию сла́дости изгна́н бы́х, паде́нием па́дся лю́тым: но не презре́л еси́, Влады́ко, восприи́м мене́ ра́ди е́же по мне́, распина́ешися, и спаса́еши мя́, в сла́ву вво́диши мя́, Изба́вителю мо́й, сла́ва Тебе́.

Сти́х: Испо́лнихомся зау́тра ми́лости Твоея́ Го́споди, и возра́довахомся, и возвесели́хомся: во вся́ дни́ на́шя возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.

Крестоявле́нно Моисе́й на горе́ ру́це просте́р к высоте́, Амали́ка победи́: Ты́ же, Спа́се, дла́ни простры́й на Кресте́ честне́м, объя́л еси́ мя́, спасы́й от рабо́ты вра́жия: и да́л еси́ зна́мение жи́зни, от лу́ка бежа́ти проти́вных мои́х. Сего́ ра́ди сло́ве, покланя́юся Кресту́ Твоему́ честно́му.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Я́ко свети́ла в ми́ре сия́ете и по сме́рти святи́и му́ченицы, по́двиги до́брыми подвиза́вшеся: те́мже иму́ще дерзнове́ние, Христа́ моли́те поми́ловатися душа́м на́шым.

Сла́ва, и ны́не, Крестобогоро́дичен: Зря́щи Тя́ ви́сяща на дре́ве Всенепоро́чная, Христе́ мо́й Преблаги́й, рыда́ющи вопия́ше ма́терски: сы́не мо́й вселюбе́знейший, ка́ко собо́р беззако́нный на дре́ве Тя́ осуди́?

В сре́ду блаже́нны, гла́с 3:

Отве́ргша Христе́ за́поведь Твою́ пра́отца Ада́ма из рая́ изгна́л еси́: разбо́йника же, Ще́дре, испове́давша Тя́ на Кресте́, во́нь всели́л еси́ зову́ща: помяни́ мя, Cпа́се, во Ца́рствии Твое́м.

Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Распя́лся еси́ мене́ ра́ди, и прободе́н еси́ Иису́се мо́й в ре́бра, два́ исто́чника источи́вый мне́ спаси́тельная: те́мже спа́сся стра́стию Твое́ю, Христе́, воспева́ю и сла́влю благоутро́бие Твое́: помяни́ мя вопию́ща во Ца́рствии Твое́м.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще мене́ ра́ди.

Со беззако́нныма вмени́вся, беззако́ния все́х на́с Иису́се взя́л еси́, и те́рнием венча́вся я́ко Ца́рь все́х, греха́ те́рние пра́отца из ко́рене Христе́, изсека́еши: те́мже ве́рою Твою́ стра́сть ны́не сла́вим.

Ра́дуйтеся и весели́теся, я́ко мзда́ ва́ша мно́га на небесе́х.

И́же страда́ния Христо́ва подража́вше до́блии страда́льцы, всесла́внии му́ченицы, и вра́жию пре́лесть низложи́вше си́лою Боже́ственною, небе́сную сла́ву получи́сте, о все́х на́с святи́и моля́щеся.

Сла́ва: Триипоста́сная Еди́нице, и Неразде́льная Тро́ице вседе́тельная, существо́ еди́но, и си́ла, певцы́ Твоя́ покры́й от вся́каго вре́да вра́жия, и Ца́рствия Твоего́ сподо́би, е́же получи́ша, и́же до́бре пожи́вшии.

И ны́не: Зря́щи на Кресте́, Его́же от крове́й чи́стых воплоти́ла еси́, пла́чущи взыва́ла еси́, Богороди́тельнице Отрокови́це: что́ сия́, Ча́до, со́нм лука́вый воздаде́ Тебе́, умертви́вый Тя́, Живота́ ве́рных все́х и воскресе́ние?

Четверг

В сре́ду ве́чера

на Го́споди, воззва́х, стихи́ры святы́м апо́столом, гла́с 3

Подо́бен: Ве́лия му́ченик:

Сти́х: А́ще беззако́ния на́зриши, Го́споди, Го́споди, кто́ постои́т; я́ко у тебе́ очище́ние е́сть.

Моли́твами честны́х и Боже́ственных апо́стол Твои́х, Человеколю́бче Ще́дрый, Еди́не Ми́лостиве, смире́ние Твое́ пода́ждь рабо́м Твои́м, и спаси́ от бе́д воспева́ющих Тя́, и ве́рою покланя́ющихся.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Егда́ на престо́лех обоюна́десятих ся́дете со все́х Судие́ю, суди́ти вся́кой тва́ри: не осужде́на мя́ покажи́те, и тьмы́ и вся́каго томле́ния изба́вите благода́тели мои́, Боже́ственнии апо́столи.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

От стре́л нечести́ваго изба́вите мя́, я́ко Бо́жии самови́дцы, угаша́юще его́ кова́рства: и ороси́те мя́ духо́вною росо́ю, ва́с молю́ му́дрии благода́тели мои́, Боже́ственнии апо́столи.

Та́же в мине́и стихи́ры свято́му. А́ще не́сть мине́и, и́ны стихи́ры свято́му и вели́кому чудотво́рцу Никола́ю: гла́с и подо́бен то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Уя́звен бы́х окая́нный змии́ным угрызе́нием, и лежу́ пове́ржен ме́ртв без дыха́ния: бо́дренною Твое́ю мольбо́ю возста́ви мя́ вско́ре, всеблаже́нне святи́телю, да сла́влю Твою́ скоропослушли́вую благода́ть.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Ума́ моего́ помрачи́вшася злы́ми помышле́ньми, и лежа́ща предви́дя, ника́коже престае́т ловле́ньми на мя́ льстивому́дрый: но я́ко Бо́г уще́дри и спаси́ мя, Никола́а моли́твами.

Сти́х: Я́ко утверди́ся ми́лость Его́ на на́с и и́стина Госпо́дня пребыва́ет во ве́к.

Вели́кое спасе́ние все́м на́м яви́лся еси́, Нико́лае преблаже́нне: избавля́еши бо вся́ческих бе́д и напа́стей рабы́ Твоя́, и искуше́ний и неду́гов и обстоя́ния, и враго́в неви́димых.

Сла́ва, и ны́не, Богоро́дичен: Ве́лия чуде́с Твои́х, Чи́стая, си́ла: избавля́еши бо от бе́д, и спаса́еши от сме́рти, и восхища́еши от напа́стей ненача́емых, и ско́рби разреша́еши, и согреше́ния челове́ков оте́млеши.

Та́же, Све́те ти́хий: Проки́мен дне́.

На стихо́вне стихи́ры апо́стольския, гла́с 3:

Во всю́ зе́млю изы́де веща́ние ва́ше, святи́и апо́столи, и́дольскую пре́лесть разруши́сте, Богоразу́мие пропове́давше: се́ до́брый по́двиг ва́ш е́сть блаже́ннии. Сего́ ра́ди пое́м, и славосло́вим па́мяти ва́шя.

Сти́х: К Тебе́ возведо́х о́чи мои́, живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Живоно́снаго виногра́да су́ще ло́зие, сла́внии апо́столи, пло́д благоче́стия са́ми ся Бо́гу принесо́сте. Те́мже дерзнове́ние иму́ще к Нему́, проси́те дарова́ти ми́р, и ве́лию ми́лость душа́м на́шым.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченицы Твои́, Го́споди, ве́рою утве́рждшеся, и наде́ждею укре́пльшеся, любо́вию Креста́ Твоего́ душе́вно соедини́вшеся, вра́жие мучи́тельство разруши́ша: и улучи́вше венцы́, со Безпло́тными мо́лятся о душа́х на́ших.

Сла́ва, и ны́не, Богоро́дичен: Вельми́ согреша́юща мя́, Отрокови́це, исхити́ вели́кою Твое́ю моли́твою пла́мене ну́жднаго: и испра́ви, Чи́стая, Твои́ми мольба́ми, ко спаси́тельным стезя́м наставля́ющи мя́, Ма́терними Твои́ми моли́твами.

В сре́ду на повече́рии

кано́н моле́бный к пресвяте́й Богоро́дице, гла́с 3.

Пе́снь 1

Ирмо́с: Во́ды дре́вле ма́нием Боже́ственным во еди́но со́нмище совокупи́вый, и раздели́вый мо́ре изра́ильтеским лю́дем, Се́й Бо́г на́ш, препросла́влен е́сть: Тому́ Еди́ному пои́м, я́ко просла́вися.

Стена́ние ми́ у́бо пода́ждь, Богоро́дице, сокруше́нное, и сле́зу душе́вную, я́ко да мои́х мно́гих прегреше́ний пла́чуся, и со́вести неисправле́ния, Отрокови́це, и умолю́ милосе́рдие Твое́.

По́мыслы пополза́яся, и впа́дая в бе́здну поги́бели, Твое́, Де́во, ны́не молю́ заступле́ние: утверди́ непоколеби́мо неможе́ние ума́ моего́ на ка́мени тве́рдем Бо́жиих за́поведей.

Сла́ва: Смоко́вницу ношу́ безпло́дия, и бою́ся посече́ния и при́, да не во о́гнь по́слет мя́ Зижди́тель мо́й Бо́г. Влады́чице, предвари́вши, покая́ния мя́ де́лы плодоно́сна сотвори́, да сла́влю Тя́.

И ны́не: Я́ко непоро́чен Хра́м Царе́в, страстьми́ безме́стными оскве́рншееся се́рдце мое́, молю́ся, очи́сти, Пречи́стая, целому́дрием же и чи́стым житие́м, и де́лы обогати́, Богоблагода́тная.

Пе́снь 3

Ирмо́с: И́же от не су́щих вся́ приведы́й, Сло́вом созида́емая, соверша́емая Ду́хом, Вседержи́телю вы́шний, в любви́ Твое́й утверди́ мене́.

Борю́щии и оскорбля́ющии мя́ мно́зи су́ть, и не́сть осла́бы обрести́ избавле́ния от обыше́дших мя́: но не пре́зри Чи́стая моле́ния моего́.

Отягче́н мно́жеством злы́х, и мно́гими прегреше́нии мои́ми, к высоте́ небе́сней воззре́ти не могу́: но Ты́ оставле́ние ми́ пода́ждь, Пречи́стая.

Сла́ва: Расто́ргнути смире́нную мою́ ду́шу зми́й лука́вый по вся́ дни́ покуша́ется: но сему́ сокруши́, Богоро́дице, душетле́нныя зу́бы.

И ны́не: Изба́ви мя́, Богоро́дице, вся́кия одержа́щия беды́, и грехо́вныя бу́ри раба́ Твоего́: и к спаси́тельному мя́ приста́нищу напра́ви Твои́ми моли́твами.

Пе́снь 4

Ирмо́с: Положи́л еси́ к на́м тве́рдую любо́вь, Го́споди, Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Трепе́щу помышля́я грехо́в мои́х пучи́ну, и сопроти́вных помышле́ний лю́тое и вели́кое волне́ние: но Ты́ окорми́, и к тишине́ напра́ви мя́, Пречи́стая.

Недове́дение тя́жкое ду́шу мою́ ны́не пости́же, неразу́мие и забве́ние злы́х, я́же в житии́ соде́ях: но Ты́ у́бо, Пречи́стая, на покая́ние соде́янных мно́ю наведи́ мя.

Сла́ва: О́гнь страсте́й сле́зными струя́ми угаси́, и удавля́ющее мо́й у́м жите́йское треволне́ние, и те́рние попали́ огне́м Ду́ха, Богороди́тельнице: Ты́ бо покро́в ми́ еси́ и похвала́.

И ны́не: Молво́ю напа́стей и треволне́ний ве́сь потопля́емь е́смь лука́выми по́мыслы, и во глубину́ отча́яния при́сно низвлеко́мь, вопию́ Ти: Влады́чице, спаси́ мя раба́ Твоего́.

Пе́снь 5

Ирмо́с: Я́ко ви́де Иса́иа обра́зно на престо́ле превознесе́на Бо́га, от а́нгел сла́вы дориноси́ма, о окая́нный, вопия́ше, а́з: прови́дех бо воплоща́ема Бо́га, Све́та невече́рня, и ми́ром влады́чествующа.

Души́ моея́ боле́зни, и пло́ти неможе́ние ве́си Влады́чице, и ума́ моего́ гни́лость и непостоя́тельное. Те́мже сподо́би мя́ ми́лости и благода́ти Твоея́, да Тя́ сла́влю спаса́емь кро́вом Твои́м.

Не затвори́ ми милосе́рдия щедро́т Твои́х, Влады́чице Всенепоро́чная: но во умиле́нии приходя́щему к Тебе́ пода́ждь Твоя́ ми́лости, и лю́тых премене́ние и проще́ние, я́ко да благода́рно пою́ вели́чия Твоя́.

Сла́ва: Умно́жишася, Де́во, ненави́дящии мя́ всу́е, и оскорбля́ющии ны́не, па́че вла́с главы́ моея́, Чи́стая, и́щуще расто́ргнути, и сне́дь сотвори́ти себе́: си́х у́бо студа́ испо́лнши возврати́.

И ны́не: Я́же ми́рови ми́р, и спасе́ние все́м пода́вшая, я́ко Боже́ственный Ми́р поро́ждши, Де́во, бра́нь страсте́й души́ моея́ и те́ла, Чи́стая, умири́ стра́хом и любо́вию Спа́са Христа́.

Пе́снь 6

Ирмо́с: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя Упра́вителю спаси́.

В де́ле и сло́ве и дея́нии, не́сть зле́ пожи́вша на земли́, я́коже а́з: те́мже Твоего́ прошу́, Влады́чице, человеколю́бия, улучи́ти ми́лости.

Дея́ния злы́х прегреше́ний, печа́ли ражда́ют все́м те́мже го́рькими напа́стьми одержи́ми есмы́ ны́не: помози́ на́м, Я́же Еди́на христиа́ном спасе́ние.

Сла́ва: И ражда́еши, и чиста́ по Рождестве́ яви́лася еси́, Богоро́дице Де́во. Те́мже моли́ Твое́ рождество́ при́сно, да изба́вимся от вся́каго вре́да вра́жия Твои́ раби́.

И ны́не: Моли́твами Пречи́стыя Ма́тере Твоея́, и все́х проро́к и му́ченик, и свяще́нных учени́к, Сло́ве Бо́жий, пода́ждь на́м ми́р, и очище́ние прегреше́ний.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 3:

Все́ житие́ мое́ в ле́ности мно́зе преидо́х, Пречи́стая, и ны́не прибли́жихся ко исхо́ду моего́ вре́мене, и устраши́хся от враго́в мои́х, да не расто́ргнут ду́шу мою́, Всенепоро́чная, и в поги́бели мя́ глубину́ отпу́стят: но уще́дри раба́ Твоего́, Де́во, и изба́ви мя́ си́х озлобле́ния.

Пе́снь 7

Ирмо́с: Я́коже дре́вле благочести́выя три́ о́троки ороси́л еси́ в пла́мени халде́йстем, све́тлым Божества́ огне́м и на́с озари́, благослове́н еси́, взыва́ющыя, Бо́же оте́ц на́ших.

Тебе́, Ма́терь Бо́жию Чи́стую и Непоро́чную, оскверне́нный те́лом и душе́ю, и окаля́нный дея́ньми нечи́стыми, молю́, Влады́чице, наде́яся на ми́лость Твою́ уще́дри мя́, Пречи́стая.

Прегреше́ний мои́х мно́жество, и злы́х испыта́ние, недоуме́нием мя́ препира́ет зело́, и во отча́яния влече́т мя́ глубину́: но Ты́, Пречи́стая Влады́чице, спаси́ мя погиба́ющаго, и лю́те потопля́ема.

Сла́ва: Мно́жеством щедро́т Твоея́ бла́гости, грехо́в на́ших мно́жество пре́зри, Бла́же, и благопреме́нен бу́ди немо́лчно зову́щым: благослове́н еси́, Го́споди, Бо́же оте́ц на́ших.

И ны́не: От бре́ния страсте́й, и глубины́ скорбе́й, и напа́стей жите́йских, привлецы́ на́с к безстра́стию, Чи́стая, и ра́достному весе́лию, Благослове́нная, зову́щих: Ты́ еси́ Еди́на Богоблагода́тная.

Пе́снь 8

Ирмо́с: Веще́ственнаго огня́ пла́мень невеще́ственным увяди́ша, Богозри́мии о́троцы, и поя́ху: благослови́те вся́ дела́ Госпо́дня Го́спода.

Сласте́й го́ресть чу́вства вся́ теле́сная проше́дши, ду́шу мою́ безме́стно окаля́ет, и в сме́рть влече́т: Влады́чице ми́ра, бу́ди ми́ спасе́ние.

На Тя́ ду́шу, и се́рдце, и те́ло возложи́х: не и́мам бо ины́я наде́жды ра́зве Тебе́, Влады́чице, е́юже получу́ ми́лости. Те́мже ми́ пода́ждь бога́тую Твою́ ми́лость и благода́ть.

Сла́ва: Зми́й мя́ я́дом приползну́в, плотско́ю сла́стию окая́нную ду́шу мою́ лю́те умори́: но оживи́ сию́ сопроти́вными лечба́ми, Чи́стая, Твои́ми моли́твами.

И ны́не: Я́же Бо́га и Спа́са ро́ждшая, Миронача́льника, Того́ моли́, ми́р ми́рови посла́ти вско́ре, я́ко да в ми́ре Того́ славосло́вим.

Пе́снь 9

Ирмо́с: Тебе́ Неопали́мую Купину́, и Святу́ю Де́ву, Ма́терь Све́та, и Богоро́дицу, наде́жду все́х на́с велича́ем.

Скве́рну стра́стных помышле́ний моего́ ума́ очи́сти, Чи́стая, в безстра́стия ри́зу све́тлую одева́ющи мя́.

Отве́рзи ми́, Де́во, Боже́ственныя вхо́ды покая́ния, вхо́ды страсте́й и сласте́й мои́х загражда́ющи, и возбраня́ющи си́лою Твое́ю.

Сла́ва: Услы́ши гла́с стена́ния моего́, и гла́с пла́ча моего́, и пода́ждь очище́ние и спасе́ние окая́нней мое́й души́, Де́во Всенепоро́чная.

И ны́не: Ви́де Дании́л проро́к Твое́ Рождество́, Де́во, ви́де ресноти́вно вои́стинну, и́же на престо́ле ви́де, Его́же де́ньми Ве́тхаго возгласи́.

Та́же, Досто́йно е́сть: И покло́н. Трисвято́е, и по О́тче на́ш: тропари́, и про́чее обы́чное, и отпу́ст.

В четверто́к у́тра

по 1-м стихосло́вии седа́лен, гла́с 3:

Прииди́те вси́, апо́столы, восхва́лим я́ко ко́рмчыя: и́дольскую бо пре́лесть упраздни́ша, и к све́ту жи́зни возведо́ша, и в Тро́ицу ве́ровати научи́ша. Те́мже дне́сь па́мять и́х честну́ю соверша́юще, ве́рнии, сла́вим Христа́ Бо́га на́шего.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Апо́стол Твои́х па́мять уясни́л еси́, Го́споди, я́ко Всеси́лен, я́ко укрепи́л еси́ и́х, страсте́м Твои́м подо́битися, и победи́ша му́жески вра́жию си́лу. Те́мже и прия́ша исцеле́ний благода́ти: те́х моли́твами, Человеколю́бче, ми́р пода́ждь лю́дем Твои́м.

Сла́ва, и ны́не, Богоро́дичен: Непостижи́маго и неопи́саннаго, единосу́щнаго безнача́льному Oтцу́, во чре́во Твое́ та́йно вмести́ла еси́, Богоро́дице. Еди́но и несме́сно от Тро́ицы Божество́ разуме́хом, Рождество́ Твое́ в ми́ре сла́вяще. Те́мже и благода́рно вопие́м Ти́: ра́дуйся, Обра́дованная.

По 2-м стихосло́вии седа́льны, гла́с 3:

Всю́ напои́ша зе́млю струя́ми апо́столи, Бо́жия сло́ва, и возрасте́ кла́с ве́ры, и концы́ вселе́нныя напо́лни: пле́велы бо вся́ посеко́ша. те́мже все́х Христу́ Бо́гу приведо́ша, креща́юще те́х в Тро́ицу несозда́нную.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

И па́ки глаго́лем то́йже седа́лен.

Сти́х: Ди́вен Бо́г во святы́х Свои́х, Бо́г Изра́илев.

Страстоте́рпцы святи́и, моли́те ми́лостиваго Бо́га, да прегреше́ний оставле́ние пода́ст душа́м на́шым.

Сла́ва, и ны́не, Богоро́дичен: Проро́цы пропове́даша, апо́столи научи́ша, му́ченицы испове́даша, и мы́ ве́ровахом Богоро́дицу Тя́ вои́стинну су́щую: те́мже и велича́ем Рождество́ Твое́, Пречи́стая.

По 3-м стихосло́вии седа́льны, гла́с 3:

Апо́столы Твоя́, Христе́, в концы́ земны́я посла́л еси́, я́ко милосе́рд, я́ко изъощре́ныя си́льне стре́лы, закала́ющя вся́кое нече́стие и злосу́етствие, и насажда́ющя спаси́тельная уче́ния: те́х мольба́ми, Ще́дре, ми́р пода́ждь душа́м на́шым.

Тебе́ пропове́дника и́стины, и пресве́тлаго свети́льника ми́ру, хва́ляще воспева́ем, Нико́лае, и вопие́м ве́рою моля́щеся: я́коже непови́нныя от сме́рти исхи́тил еси́: та́ко свя́те, и на́с от бе́д и скорбе́й и вся́каго изба́ви лю́таго озлобле́ния.

Сла́ва, и ны́не, Богоро́дичен: Умертви́вшуюся ду́шу мою́ согреше́ньми мно́гими, всенепоро́чная Влады́чице: оживи́, я́ко дерзнове́ние ма́тернее к Сы́ну Твоему́ иму́щи: Ты́ бо еди́на родила́ еси́ па́че ума́ и смы́сла Сло́во собезнача́льное Отцу́ и Ду́ху, живо́т и нетле́ние ми́ру да́рующа при́сно, и ве́лию ми́лость.

Кано́н святы́м сла́вным и всехва́льным апо́столом. Творе́ние Феофа́ново. Гла́с 3.

Пе́снь 1

Ирмо́с: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре изра́ильтеским лю́дем: Се́й Бо́г на́ш, препросла́влен е́сть: Тому́ Еди́ному пои́м, я́ко просла́вися.

Церко́вныя столпы́, основа́ния ве́ры, благоче́стная утвержде́ния, и ве́рныя вся́ утвержда́ющая, прииди́те ублажи́м свяще́нныя апо́столы, я́ко да мольба́ми и́х спасе́мся. [Два́жды.]

Са́м себе́ пре́жде суда́ блу́дный убоя́вся осужда́ю, зла́я бо дела́ безчи́сленная стяжа́х. Те́мже молю́ся Ти́, пра́ведный Судие́: отча́яннаго мя́ спаси́ Боже́ственными мольба́ми апо́стол Твои́х.

Непревра́тнии столпы́ благоче́стия, прельще́нием мя́ вра́жиим препя́таго, и на земли́ лежа́щаго и бе́дствующаго, и недоумева́ющагося испра́вите, я́ко да обря́щу оставле́ние, о ни́хже согреши́х.

Богоро́дичен: Со святы́ми проро́ки, со апо́столы, и му́ченики, из Тебе́ вопло́щшагося Го́спода, приле́жно, Чи́стая, моли́, я́ко да плотски́я на́шя вся́ стра́сти умертви́т, и живо́т ве́чный на́м да́рует.

Други́й кано́н, свято́му и вели́кому чудотво́рцу Никола́ю. Творе́ние Ио́сифово. Гла́с 3.

Пе́снь 1

Ирмо́с: Пои́м Го́сподеви, сотво́ршему ди́вная чудеса́ в Чермне́м мо́ри: по́нтом бо покры́ проти́вныя, и спасе́ Изра́иля. Тому́ еди́ному пои́м, я́ко просла́вися.

Пресве́тлаго свети́льника неугаси́маго, на земли́ су́щаго столпа́, и к приста́нищу Боже́ственному призыва́юща, и́же волна́ми жите́йскими при́сно потопля́емии, Никола́а вси́ почти́м, и любо́вию ублажи́м.

Си́лою Бо́жиею всеблаже́нне укрепля́емь, ре́вность благоче́стия по ра́зуму стяжа́л еси́: те́мже хотя́щыя непра́ведно умре́ти изба́вил еси́. Сего́ ра́ди тя́ мо́лим: вся́каго непра́веднаго озлобле́ния изба́ви на́с, Нико́лае.

Моле́ния Го́сподеви, о́тче, неоску́дно приноси́ ты́: я́ко да грехо́в и пла́мене муче́ния ве́чнующаго, и напа́стей, и скорбе́й изба́вит на́с, я́ко еди́н Благи́й.

Богоро́дичен: Ковче́г Боже́ственный и́же вмести́вший Законода́вца на́ша беззако́ния вся́ оте́млющаго, ра́ди милосе́рдия Боже́ственнаго несказа́нныя пучи́ны, Мари́ю Пречи́стую согла́сно воспои́м.

Пе́снь 3

Ирмо́с: И́же от не су́щих вся́ приведы́й, сло́вом созида́емая, соверша́емая Ду́хом, Вседержи́телю вы́шний, в любви́ Твое́й утверди́ мене́.

И́же ми́ра концы́ уче́ния Боже́ственнаго испо́лнивше, ду́шу мою́ испо́лните доброде́тельных дея́ний, и помышле́ний благи́х, Христо́вы самови́дцы. [Два́жды.]

От собла́зн мно́гих лука́ваго, и от вся́кия ско́рби, и от вся́кия тесноты́, от вся́каго обстоя́ния, ученицы́ Христо́вы изба́вите мя́.

Увы́, душе́ моя́, окая́нная и смире́нная, ча́сто согреша́ющи, и Бо́га прогне́вающи, ка́ко испро́сиши проще́ние злы́х, и́хже не престае́ши творя́щи?

Богоро́дичен: Боже́ственная ле́ствице, ю́же ви́де Иа́ков, по не́йже сни́де Бо́г, вознося́ на́с, приле́жно моли́ со апо́столы, уще́дрити на́с.

И́н Ирмо́с: Непло́дная душе́ и безча́дная, стяжи́ пло́д благосла́вный, веселя́щися возопи́й: утверди́хся Тобо́ю Бо́же, не́сть свя́т, не́сть пра́веден, па́че Тебе́, Го́споди.

Изощре́н ме́чь духо́вный яви́лся еси́ му́дре: лука́выя пле́велы ерети́чествующих посеца́я, и доброде́телей стези́ спаси́тельныя ве́рным углажда́я, о́тче Нико́лае.

Тебе́ исто́чнику источа́ющу исцеле́ний пото́ки, мо́лимся, свя́те: скве́рны страсте́й все́х на́с моли́твами твои́ми омы́й, бе́д и скорбе́й избавля́я.

Кре́пкими твои́ми моли́твами низлага́я врага́, и ны́не на́нь укрепи́ немощству́ющая помышле́ния на́шя стра́стными прило́ги, призыва́нием святы́х твои́х моли́тв, о́тче Нико́лае.

Богоро́дичен: Ум разуме́ти не мо́жет, е́же па́че ума́ рожде́ние, чуде́снаго Рождества́ Твоего́, Богороди́тельнице всенепоро́чная, те́мже молю́ Тя: у́м мо́й облагодати́ при́сно сла́вити Тя́.

Пе́снь 4

Ирмо́с: Положи́л еси́ к на́м тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Я́коже мо́лнии, и я́ко лучы́ незаходи́маго со́лнца, апо́столы простира́я сло́ве, в мирски́я концы́, все́х просвети́в, и безбо́жия мра́к отгна́л еси́. [Два́жды.]

Мо́ре лю́таго греха́ сло́ве обурева́ет мя́, и волне́ния безчи́нных помышле́ний смире́нную ду́шу мою́ смуща́ют: окорми́телю Го́споди, ученик Твои́х мольба́ми спаси́ мя.

Ужаса́юся помышля́я стра́шное Твое́, Влады́ко, прише́ствие: и́мам бо пре́жде суда́, мою́ осужда́ющую мя́ вну́трь со́весть, и пре́жде му́чащия му́ки, нечу́вствие мое́.

Богоро́дичен: Сло́ве Бо́жий, И́же рожде́йся от Де́вы Богоотрокови́цы Тоя́ хода́тайствы свяще́нными, и прему́дрых апо́стол Твои́х, Спа́се, вся́каго обстоя́ния и вся́кия ну́жды изба́ви ду́шы на́шя.

И́н Ирмо́с: Приосене́нную го́ру Авваку́м прозря́ше пречи́стую Твою́ утро́бу, Чи́стая. Те́м взыва́ше: от ю́га прии́дет Бо́г, и Святы́й от горы́ приосене́нныя ча́щи.

К Бо́гу хода́тая вся́к ве́рный всегда́, Нико́лае, предлага́ет тя́. Те́мже тя́ мо́лим, от напа́стей лю́тых, и паде́ний грехо́вных на́с изба́ви, О́тче.

Во́ду жи́ву в се́рдцы имы́й благода́ть Госпо́дню, ороша́еши при́сно му́дре, зно́ем скорбе́й, и сухото́ю грехо́в бе́дствующих, окая́нне поги́бнути иму́щих, всеблаже́нне.

И́же изба́вил еси́ иногда́ ведо́мыя на сме́рть непра́ведно, всеблаже́нне: ны́не и на́с спаса́й от челове́к тлетво́рных стуже́ния, и от вся́кия бесо́вския ле́сти.

Богоро́дичен: Вопло́щшеся Сло́во премно́жеством благоутро́бия неизрече́нно родила́ еси́: того́ моли́, Пречи́стая, плотски́я стра́сти и скве́рны все́х изба́вити, и все́х ну́ждных жития́.

Пе́снь 5

Ирмо́с: На земли́ неви́димый яви́лся еси́, и челове́ком во́лею сожи́л еси́, Непостижи́мый: и к Тебе́ у́тренююще, воспева́ем Тя́, Человеколю́бче.

На земли́ вопло́щься, соде́лал еси́ ученики́, небеса́ веща́юща, Христе́, сла́ву Твою́: те́х ра́ди у́бо, Го́споди, ду́шы на́шя поми́луй. [Два́жды.]

От страсте́й и от вся́кия ну́жды, от лю́таго обстоя́ния, сло́ве изба́ви рабы́ Твоя́, апо́стол Твои́х благоприя́тными моли́твами.

Увы́ мне́, душе́ всестра́стная, ка́ко хо́щеши Стра́шному Суду́ предста́ти безпло́дна су́щи; потщи́ся, пока́йся, доброде́телей плоды́ возраща́ющи.

Богоро́дичен: И́же на земли́ я́вльшагося неизрече́нно с пло́тию, от чи́стых крове́й Твои́х, Чи́стая, моли́ я́ко Сы́на Твоего́ всегда́, очище́ние на́м дарова́ти.

И́н Ирмо́с: Све́том Твои́м невече́рним, Христе́, озари́, Бо́же, смире́нную мою́ ду́шу, и наста́ви на стра́х Тво́й, зане́ све́т повеле́ния Твоя́.

Све́ту чи́стому предстоя́, и отту́ду при́сно исходя́щими заря́ми просвеща́емь, о́тче, испроси́ все́м очище́ние и ми́р.

Мене́ па́че все́х челове́к Тебе́ прогне́вавша умо́м неразу́мным, Преблаги́й уще́дри, Никола́а те́плыми моли́твами.

Во уны́нии ижди́вша мою жи́знь, молю́ся ти́, о́тче Нико́лае, воздви́гни к покая́нию мы́сль мою́ оскверне́ную.

Богоро́дичен: Я́ко еди́на А́нгелов ра́дость Богора́дованная, ра́дости испо́лни мою́ мы́сль се́тующую, и ле́ностию погружа́емую.

Пе́снь 6

Ирмо́с: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

Бе́здну прему́дрости духо́вныя источи́вше, апо́стольское сосло́вие, мирска́го изсуши́ мудрова́ния тече́ние, и напо́й благочести́вых собра́ния. [Два́жды.]

Воздохни́ и прослези́ся, смире́нная душе́ моя́, и возопи́й ко Го́споду, глаго́лющи: согреши́х Ти́, Влады́ко, очи́сти мя́, Благоутро́бне, мольба́ми прему́дрых апо́стол Твои́х.

Потеко́ша пото́цы страсте́й, и потопи́ша мою́ душе́вную хра́мину: ре́ки духо́вныя бы́вше апо́столи, сокруше́ннаго мя́ к животу́ обнови́те.

Богоро́дичен: Собо́р Тя́ апо́столов, Христе́, мо́лит с ро́ждшею Тя́: очище́ние низпосла́ти и ми́р рабо́м Твои́м, я́ко Человеколю́бец и Бо́г благопремени́тель.

И́н Ирмо́с: Глубина́ страсте́й воста́ на мя́, и бу́ря проти́вных ве́тров: но предвари́в мя́ Ты́ спаси́, Спа́се, и изба́ви от тли́, я́ко спа́сл еси́ от зве́ря проро́ка.

Умертви́в воздержа́нием у́ды, стяжа́л еси́ жи́знь нестаре́емую: Е́йже и на́с о́бщники твои́ми моли́твами соде́лай му́дре, избежа́нием зла́го греха́.

Ве́трилом свяще́нных твои́х моли́тв, пучи́ну напа́стей многообра́зных, и грехо́вныя глубины́ изба́ви на́с, ко приста́нищу же живота́ приводя́, му́дре святи́телю.

Украси́в мирлики́йский престо́л, яви́лся еси́ красота́ первосвяще́нником: но моли́твами твои́ми от мирски́х напа́стей спаса́й ны́ невреди́мы, святи́телю.

Богоро́дичен: Всели́вшееся во утро́бу Твою́ Сло́во, Ма́ти чи́стая, дре́вле в челове́цех всели́вшуюся от преступле́ния тлю́, я́ко Бо́г еди́н, вне́ изгна́л е́сть, за милосе́рдие ми́лости.

Пе́снь 7

Ирмо́с: Пре́жде о́бразу злато́му, перси́дскому чти́лищу, о́троки не поклони́шася, трие́ пою́ще посреде́ пе́щи: отце́в Бо́же благослове́н еси́.

И́же све́т ми́ру Христо́с, све́т ва́с показа́, светоно́снии апо́столи, разгоня́ющих тьму́ прельще́ния, и просвеща́ющих ве́рных мы́сли. [Два́жды.]

Я́же на на́с вра́жия се́ти сокруши́те, богогла́снии апо́столи, и стези́ на́м покая́ния угла́дите, к ва́м прибега́ющым.

Объюроде́вшую ду́шу мою́ плотски́ми страстьми́ со́ль Боже́ственная су́ще богоглаго́ливии Госпо́дни апо́столи, очи́стите ве́рно оживля́юще.

Богоро́дичен: Добро́то Иа́ковля, до́брыми мя́ зра́ки просвети́, молю́ся, моля́щися ны́не со апо́столы, ро́ждшемуся от Твои́х чи́стых крове́й.

И́н Ирмо́с: Трие́ о́троцы в пещи́ Тро́ицу прообрази́вше, преще́ние о́гненное попра́ша, и пою́ще вопия́ху: благослове́н еси́ Бо́же оте́ц на́ших.

Губя́щаго дре́вле Госпо́дни лю́ди, безу́мнаго А́риа удави́л еси́ жи́лами слове́с твои́х, я́ко па́стырь нача́льный и́стинен, о́тче Нико́лае.

Свя́то преше́д пресвято́е житие́ твое́, со святы́ми живе́ши, о́тче Нико́лае, свяще́ние посыла́я и просвеще́ние благоче́стно тя́ блажа́щым.

Я́ко гото́ва тя́ изба́вителя, я́ко те́пла засту́пника призыва́ем при́сно, о́тче Нико́лае, от страсте́й на́с изба́ви и неча́емых напа́стей, находя́щих на ны́.

Богоро́дичен: Мене́ небреже́нием ду́шу омрачи́вшаго, просвети́ Чи́стая, Я́же Све́т ро́ждшая, се́рдца моего́ возжиза́ющи свети́льник, я́ко да усе́рдием благи́м сла́влю Тя́.

Пе́снь 8

Ирмо́с: Нестерпи́мому огню́ соедини́вшеся, Богоче́стия предстоя́ще ю́ноши, пла́менем же неврежде́ни, Боже́ственную пе́снь поя́ху: благослови́те вся́ дела́ Госпо́дня Го́спода, и превозноси́те во вся́ ве́ки.

Уязви́хся страсте́й ору́жием, и острупи́х се́рдце безу́мием, зло́бы соде́телем: апо́столи сла́внии исцели́те мя́ всего́ недоуме́ющася, ду́ш и теле́с вра́чеве су́ще. [Два́жды.]

Во всю́ зе́млю пропове́дников веща́ние изы́де Боже́ственное, уча́щее правосла́вно о еди́нственном существе́, еди́но естество́ почита́ти Святы́я Тро́ицы, и еди́но вои́стинну госпо́дьство, и еди́но Ца́рство во вся́ ве́ки.

Мене́ многосогреши́вшаго, и долготерпе́ние твое́ Боже́ственное ижди́вшаго. В пребыва́нии прегреше́ний, возврати́, Влады́ко, ве́дый мою́ не́мощь сло́ве, и ле́ность, и злому́дрие.

Богоро́дичен: Боже́ственная клеще́, я́же Боже́ственнаго у́гля неизрече́нно прие́мши, Богоро́дице, страсте́й мои́х разжже́нное у́глие угаси́, Пречи́стая, росо́ю Твои́х моли́тв, и всесла́вных и Боже́ственных апо́стол.

И́н Ирмо́с: А́нгельми немо́лчно в вы́шних сла́вимаго Бо́га, небеса́ небе́с, земля́, и го́ры, и хо́лми, и глубина́, и ве́сь ро́д челове́ческий, пе́сньми Того́ я́ко Созда́теля, и Изба́вителя благослови́те, и превозноси́те во вся́ ве́ки.

Зе́млю кро́тких насле́довал еси́, кро́ток преподо́бне бы́в. Те́мже молю́ся ти́ ве́рно: укроти́ моли́твами твои́ми, подвиза́ющаяся на мя́ при́сно лука́ваго треволне́ния.

Я́коже изба́вил еси́ воево́ды, и́же непра́ведно умре́ти хотя́щыя: та́ко от челове́к лука́вых озлобле́ния на́с изба́ви, и от вся́каго бесо́вскаго наве́та, Нико́лае, моля́ Спа́са.

Пу́ть показа́л еси́ челове́ком пра́вый и спаси́тельный: на него́же наста́ви на́с в житии́ преходя́щих, Нико́лае, моли́твами твои́ми, я́ко да ку́пно вни́дем в живо́тная врата́.

Богоро́дичен: Кре́пость и пе́ние мое́ е́сть, И́же из Тебе́ рожде́йся, Пречи́стая, Его́же приле́жно моли́, Де́во, разсла́бленнаго мя́ страстьми́ укрепи́ти, и твори́ти спаси́тельная Его́ повеле́ния.

Та́же, пое́м пе́снь Богоро́дице: Вели́чит душа́ моя́ Го́спода: С покло́ны.

Пе́снь 9

Ирмо́с: В зако́не се́ни и писа́ний о́браз ви́дим ве́рнии, вся́к му́жеский по́л ложесна́ разверза́я, свя́т Бо́гу: те́м перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

И́же словесы́ Твои́х ученик, утверди́л еси́ земны́я концы́ Отца́ безнача́льнаго сло́ве: те́х мольба́ми, и мене́, к страсте́м безслове́сным попо́лзшася, и бесо́вским прельще́нием потопля́ема уще́дри. [Два́жды.]

Душе́ моя́, страсте́й рабо́тающая устремле́нием, пострада́вшему на́с ра́ди принеси́ мольбы́, я́ко да изба́вит Тя́ лю́тых, моля́щымся проявле́нне свяще́нным ученико́м, и уподо́бльшымся того́ плотски́м страда́нием.

Христо́вы ученицы́, егда́ с ни́м суди́ти ся́дете суду́ пови́нных, неосужде́нну мою́ ду́шу соблюди́те, оскверне́нную безме́стными де́лы, я́ко блази́и мои́ предста́телие, и я́ко ми́ра засту́пницы.

Богоро́дичен: Де́во Чи́стая, Де́во Пречи́стая, Христо́ва пала́то, Де́во Пресвята́я, Свята́го Святы́х Бо́га, па́че вины́ и сло́ва ро́ждшая, со апо́столы святы́ми, о все́х моли́ся.

И́н Ирмо́с: На Сина́йстей горе́ ви́де Тя́ в купине́ Моисе́й, неопа́льно о́гнь Божества́ заче́ншую во чре́ве, Дании́л же Тя́ ви́де го́ру несеко́мую, же́зл прозя́бший, Иса́иа взыва́ше, от ко́рене Дави́дова.

Я́ко огражде́ние Боже́ственное и утвержде́ние, и до́брое прибе́жище, земны́й ми́р стяжа́ тя́: хода́тайствы бо твои́ми при́сно избавля́емся от вся́каго искуше́ния и тесноты́, о́тче Нико́лае. Те́мже во хвале́нии ве́рно ублажа́ем Тя́.

Утесня́емь бы́в мно́гими обстоя́нии, к простра́нству прибега́ю, всеблаже́нне, те́плых моли́тв твои́х, претвори́ души́ моея́ боле́зни, вопию́ ти: во́лны укроти́ отча́яния, и умири́ моего́ ума́ смуще́ние.

Творца́ настои́т прише́ствие суди́ти все́й земли́, и негото́в сы́й окая́нный, ве́сь устраша́юся, помышля́я зо́л мои́х мно́жество: Го́споди долготерпели́ве, уще́дри, и спаси́ мя Боже́ственными Никола́а моли́твами преподо́бнаго Твоего́.

Богоро́дичен: Просвеще́ние мое́ спаси́тельное яви́лася еси́, ро́ждшая Све́т, души́ моея́ о́блаки разгоня́ющи мра́чныя и лю́тыя: я́ко да сы́н дне́ моли́твами Твои́ми бу́ду содева́я преподо́бная, я́ко да в песнословле́нии преподо́бне ублажа́ю Тя́.

Та́же, Досто́йно е́сть: Ектениа́. И свети́лен.

На стихо́вне стихи́ры, гла́с 3:

Во всю́ зе́млю изы́де веща́ние ва́ше, святи́и апо́столи: и́дольскую пре́лесть разруши́сте, Богоразу́мие пропове́давше. Се́ до́брый по́двиг ва́ш е́сть, блаже́ннии, те́мже пое́м и славосло́вим ва́шя па́мяти.

Сти́х: Испо́лнихомся зау́тра ми́лости Твоея́ Го́споди, и возра́довахомся, и возвесели́хомся: во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.

Христо́вы за́поведи непоро́чно сохра́ньше, святи́и апо́столи, ту́не прия́сте, ту́не подава́ете, исцеля́юще стра́сти ду́ш и теле́с на́ших. Те́мже иму́ще дерзнове́ние, Того́ моли́те, поми́ловатися душа́м на́шым.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Я́ко свети́ла в ми́ре сия́ете, и по сме́рти святи́и му́ченицы, по́двигом до́брым подви́гшеся, иму́ще дерзнове́ние, Христа́ моли́те, поми́ловатися душа́м на́шым.

Сла́ва, и ны́не, Богоро́дичен: Без се́мене зачала́ еси́ от Ду́ха Свята́го, и славосло́вяще воспева́ем Тя́: ра́дуйся, Пресвята́я Де́во.

Та́же, Бла́го е́сть: И ча́с 1-й, и отпу́ст.

В четверто́к блаже́нны, гла́с 3:

Отве́ргша, Христе́, за́поведь Твою́, пра́отца Ада́ма из рая́ изгна́л еси́: разбо́йника же ще́дре, испове́даша Тя́ на кресте́, во́нь всели́л еси́, зову́ща: помяни́ мя, Спа́се, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

И́же тро́стию кре́стною из глубины́ неве́дения лю́ди изве́дше апо́столи, и е́ллинскую пре́лесть отгна́сте от земли́, неле́стнии спаси́телие бы́сте ве́рным вои́стинну. Те́мже блажи́ми есте́.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще мене́ ра́ди.

Я́ко лучы́ та́йныя, и свети́ла пра́веднаго со́лнца бы́вше, сла́внии апо́столи, злоче́стия тьму́ отгна́ли есте́, и к све́ту богоразу́мия наста́висте вся́ лю́ди: те́мже вы́ почита́ем.

Сти́х: Ра́дуйтеся и весели́теся, я́ко мзда́ ва́ша мно́га на небесе́х.

Му́к разжже́ния претерпе́сте, свы́ше страда́льцы благода́ти ро́су прия́ли есте́: и челове́ческия стра́сти, я́ко Христо́вы уго́дницы, при́сно благоче́стно му́дрии исцеля́ете. те́мже ве́рно ва́с святи́и почита́ем.

Сла́ва: Тро́ицы свяще́ннии пропове́дницы, Пе́тре, и Па́вле, Ма́рко, и Луко́, Матфе́е, Си́моне, Иа́кове, Андре́е, Иоа́нне, Фомо́, Варфоломе́е и Фили́ппе му́дре, приле́жно всегда́ сию́ моли́те, изба́витися на́м от вся́каго обстоя́ния.

И ны́не: Апо́столов добро́то, и святы́х страстоте́рпец ра́дование, богоблагода́тнейшая влады́чице, о на́с моли́ все́х Спа́са и Бо́га: я́ко да прегреше́ний прии́мем оставле́ние, и Боже́ственныя жи́зни вси́ прича́стницы бу́дем.

Пятница

В четверто́к ве́чера

на Го́споди, воззва́х, стихи́ры кре́стны, гла́с 3.

Подо́бен: Поста́виша:

Сти́х: А́ще беззако́ния на́зриши, Го́споди, Го́споди кто́ постои́т; я́ко у Тебе́ очище́ние е́сть.

Го́споди, безстра́стен сы́й Боже́ственным естество́м Твои́м, Стра́сть претерпе́л еси́, по естеству́ челове́ческому Твоему́, на Кресте́ у́бо пригвожда́емь, копие́м же ископова́емь в ре́бра, источа́я мне́ две́ реце́ от ни́х та́инств неизрече́нных.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в Сло́во Твое́, упова́ душа́ моя́ на Го́спода.

Венце́м от те́рния исплете́нным увя́злся еси́ поруга́нно Царю́ все́х, запреще́ние спа́се, терно́внаго греха́ истерза́я: рука́ма же твои́ма тро́сть прие́м, в го́рней кни́зе написа́л еси́ все́х на́с: в Тя́ ве́ровавших.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Ника́коже преста́ евре́ов за́висть непра́ведная, ниже́ распе́нших Тя́, Незло́биве, ниже́ уме́ршу Ти́, Христе́: но и та́ко оклета́ху, я́коже лестца́, у Пила́та лю́тии проси́ша стрещи́ гро́б Тво́й. О гне́ва неисце́льнаго!

И́ны стихи́ры пресвяте́й Богоро́дице. Гла́с то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Егда́ из Твоего́ чре́ва возсия́вшаго, на Кресте́ заходя́ща ви́девши со́лнца незаходи́маго, со́лнца зарю́ содержа́щаго, возопи́ла еси́ отягче́ною душе́ю тьмо́ю печа́лей, во́лею заше́д, и па́ки возсия́в, в мое́ просвеще́ние, и ми́рови.

Сти́х: Хвали́те Го́спода вси́ язы́цы, похвали́те его́ вси́ лю́дие.

Влады́чице, ро́ждшая гряду́щаго живы́м же и ме́ртвым суди́ти, умерщвле́ную мою́ ду́шу боле́знию, покая́нием оживи́, и Боже́ственною кро́вию из ре́бр сы́на Твоего́ исте́кшею: и живы́м Его́ за́поведем де́лателя яви́ мя.

Сти́х: Я́ко утверди́ся ми́лость его́ на на́с, и и́стина Госпо́дня пребыва́ет во ве́к.

Егда́ Тя Ча́до неболе́зненно ражда́х, а́гница и Ма́ти глаго́лаше: ско́рби избежа́х и печа́лей мглы́: но ны́не тя́ воздви́жена на Кресте́ зря́щи, утро́бо моя́, го́рькими стрела́ми се́рдце облага́ю, и печа́лию безме́рною погружа́юся, Влады́ко.

Сла́ва, и ны́не, Богоро́дичен: Ми́р поми́лован бы́сть, Сло́ве, распя́тием Твои́м, тва́рь просвети́ся, язы́цы спасе́ние обрето́ша, Влады́ко, вопия́ше Пречи́стая: а́з же ны́не растерза́юся, зря́щи Твою́ во́льную стра́сть.

На стихо́вне стихи́ры, гла́с 3:

Кресту́ Твоему́ покланя́емся, Христе́, честно́му, храни́телю ми́ра, спасе́нию на́с гре́шных, вели́кому очище́нию, похвале́ всея́ вселе́нныя.

Сти́х: К Тебе́ возведо́х о́чи мои́ живу́щему на небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Крестообра́зно Моисе́й на горе́ ру́це распросте́р к высоте́, Амали́ка побежда́ше. Ты́ же, Спа́се, дла́ни распросте́р на Кресте́ честне́м, объе́м мя́ спа́сл еси́ от рабо́ты вра́жия: и да́л ми́ еси́ зна́мение живота́ бежа́ти от лу́ка сопроти́вных ми́. Сего́ ра́ди сло́ве, покланя́юся Кресту́ Твоему́ Честно́му.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Ве́лия Креста́ Твоего́, Го́споди, си́ла: водрузи́ся бо на ме́сте, и де́йствует в ми́ре, и показа́ от ры́барей апо́столы, и от язы́к му́ченики, да мо́лятся о душа́х на́ших.

Сла́ва, и ны́не, Крестобогоро́дичен: Зря́щи Тя́ всенепоро́чная воздви́жена на Дре́во, Христе́ мо́й преблаги́й, пла́чущи вопия́ше ма́терски: Сы́не мо́й вселюбе́зный! Ка́ко со́нм беззако́нный на Кресте́ Тя воздви́же?

В четверто́к на повече́рии

кано́н Пресвяте́й Богоро́дице. Гла́с 3.

Пе́снь 1

Ирмо́с: Во́ды дре́вле, ма́нием Боже́ственным, во Еди́но со́нмище совокупи́вый, и раздели́вый мо́ре изра́ильтеским лю́дем, Се́й Бо́г на́ш, препросла́влен е́сть: Тому́ Еди́ному пои́м, я́ко просла́вися.

Присе́нную Тя́ го́ру, ю́же прови́де Ду́хом Авваку́м проро́к, молю́, Пречи́стая, осени́ти мя́ страстьми́ озное́наго, и от се́ни сме́ртныя лю́тых бе́д изба́витися.

Окропле́нием Боже́ственныя кро́ве, излия́нныя от Боже́ственных ре́бр Чи́стая, Сы́на Твоего́, моего́ се́рдца омы́й ра́ны, я́ко да велича́ю Тя́, и по до́лгу сла́влю Присноблаже́нную и Пренепоро́чную.

Сла́ва: Равноде́тельное Отцу́ родила́ еси́ Сло́во, обожи́вшее челове́ков существо́: Того́ моли́, недоуме́ннаго мя́ и изнемо́гшаго вра́жиими кова́рствы, Боже́ственныя уте́хи сподо́бити, Чи́стая.

И ны́не: Очище́ние ми́ пода́ждь прегреше́ний Боже́ственными Твои́ми моли́твами, Де́во, си́льную бо и́маши моли́тву Влады́чице: и Тебе́ пою́щыя изба́ви от прегреше́ний, и страсте́й, и скорбе́й, и обстоя́ния.

Пе́снь 3

Ирмо́с: И́же от не су́щих вся́ приведы́й, Сло́вом созида́емая, соверша́емая Ду́хом, Вседержи́телю вы́шний, в любви́ Твое́й утверди́ мене́.

В ми́лости Неизрече́ннаго, и в щедро́тах су́ща Бога́таго, ми́лостива су́щи, Пречи́стая, помоли́ уще́дрити ны́ озло́бленыя.

Хра́м су́щи вся́ческих Творца́, помоли́ся всели́тися в мя́ Уте́шителю, бы́вша мя́ верте́п душетле́нных разбо́йников, Чи́стая Де́во.

Сла́ва: Ма́нием вся́ нося́щаго Бо́жески, на руку́ я́ко носи́ла еси́, Богоро́дице, при́зри на мя́, и изба́ви мя́, е́же к страсте́м зре́ния неподо́бнаго.

И ны́не: Милосе́рдие ми́лости Твоея́ молю́, отве́рзи ми́, Богоро́дице Пречи́стая, и те́плая ми́ яви́ся в напа́стех помо́щница и спасе́ние.

Пе́снь 4

Ирмо́с: Положи́л еси́ к на́м тве́рдую любо́вь, Го́споди, Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Ра́ны Христе́ и заколе́ние, во́лею я́ко Бо́г претерпе́вый, ура́неную мою́ ду́шу разбо́йми бесо́вских озлобле́ний, моли́твами Тебе́ Ро́ждшия исцели́, Еди́не многоми́лостиве.

Де́ло Твое́ю руку́, Зижди́телю, е́смь и творе́ние: зло́ба же змии́на сластьми́ жития́ сокруши́ мя. Те́мже, Христе́, обнови́ мя, Тебе́ Ро́ждшия, Сло́ве, мольба́ми.

Сла́ва: Сло́во О́тчее па́че сло́ва родила́ еси́, реша́щее вся́каго безслове́сия челове́ки: Его́же приле́жно моли́, безслове́сными мя́ сластьми́ порабоще́нна свободи́ти, Еди́на Присноде́во.

И ны́не: Исцеле́ние на́м от дла́ни то́чиши всегда́, Всеосвяще́нная се́не, вся́ све́та су́щи испо́лнена, все́м источа́ющи ми́ро благово́нно, Всечи́стая Богоневе́сто.

Пе́снь 5

Ирмо́с: Я́ко ви́де Иса́иа обра́зно на престо́ле превознесе́на Бо́га, от а́нгел сла́вы дориноси́ма, о окая́нный, вопия́ше а́з: прови́дех бо воплоща́ема Бо́га, Све́та невече́рня, и ми́ром влады́чествующа.

Пло́ти моея́ боле́зни, и душе́вную ми́ печа́ль претвори́ и уны́ния о́блаки отжени́ Де́во, Све́та о́блаче, и здра́вие и боле́зней премене́ние да́ждь ми́ пою́щему, и любо́вию Тя́ сла́вящему.

Тя́ хода́таицу, и моли́твенницу, ко из Тебе́ Ро́ждшемуся ны́не предлага́ю, вся́каго греха́ испо́лнен сы́й: Де́во, бу́ди ми́ жития́ исправле́ние, и наста́вница к стези́ Боже́ственнаго Ра́зума.

Сла́ва: Освяти́ у́м мо́й, Де́во, и ду́шу просвети́, и Боже́ственныя сла́вы прича́стника сотвори́: се́ бо зо́л напо́лнихся, и вся́кими порабо́тихся сластьми́, и оскверне́ну приношу́ со́весть.

И ны́не: Виногра́д Боже́ственный, Я́же кра́сный Гро́зд возрасти́вшая, И́же душа́м даю́щий питие́ незави́стное: Де́во Свята́я Отрокови́це, Ты́ мя напо́й сла́дости Его́ и сласте́й пия́нство отими́, и спаси́ мя.

Пе́снь 6

Ирмо́с: И́же в концы́ веко́в доше́дшыя, Человеколю́бче, и треволне́ньми напа́стей поги́бнути бе́дствующыя, вопию́щыя не пре́зри: спаси́, Спа́се, я́коже спа́сл еси́ от зве́ря проро́ка.

Фарисе́а вознесе́наго умо́м превзыдо́х возноша́емь при́сно, и про́пастем соедини́хся безме́рных прегреше́ний: смири́вшагося лю́те, Еди́на Чи́стая, изба́ви и уще́дри мя́.

И́же пречу́дное Зача́тие име́вши и Рождество́, Твоя́ ми́лости на мне́ окая́ннем ны́не удиви́: и́бо в беззако́ниих зача́хся, и роди́хся, и сластьми́ поработи́хся.

Сла́ва: Рыда́ю, и пла́чу, и стеню́, егда́ суди́ще стра́шное воспомяну́: лука́вая бо дела́ стяжа́х: но Ты́ ми, неискусому́жная Де́во Ма́ти Бо́жия, в ча́с стра́шный предста́ни.

И ны́не: Разуме́ти и глаго́лати не мо́жет вся́к у́м, Де́во Чи́стая, соде́янное на Тебе́ чу́до стра́нное и пресла́вное: ка́ко родила́ еси́, и пребыва́еши па́ки чиста́? Бо́г е́сть Рожде́йся по Существу́.

Та́же, Го́споди поми́луй, три́жды. Сла́ва, и ны́не:

Седа́лен, гла́с 3:

Неискусобра́чная Чи́стая Ма́ти Твоя́, Христе́, зря́щи Тя́ ме́ртва пове́шена на Дре́ве, ма́терски рыда́ющи, глаго́лаше: что́ Ти́ воздаде́ евре́йский беззако́нный собо́р и безблагода́тный, и́же мно́гих и вели́ких Твои́х даро́в наслади́выйся Сы́не мо́й? Пою́ Твое́ Боже́ственное сни́тие.

Пе́снь 7

Ирмо́с: Трие́ о́троцы в пещи́ Тро́ицу прообрази́вше, преще́ние о́гненное попра́ша, и пою́ще вопия́ху: благослове́н еси́ Бо́же оте́ц на́ших.

От де́л спасе́ния не́сть ми́, Влады́чице, грехи́ бо прилага́ю ко грехо́м, и к зло́бе зло́бу: моли́твою у́бо Твое́ю, Чи́стая, предвари́ и спаси́ мя.

Су́д при две́рех, и суди́ще гото́во, гото́вися смире́нная душе́, и возопи́й: егда́ су́диши ми́, Сло́ве, не осуди́ мене́, моли́твами Ро́ждшия Тя́.

Сла́ва: Объе́м грехо́вныя плоды́, умертви́хся, и приноша́ю ду́шу непло́дну, и зову́ Ти, Пречи́стая: плодоно́сна мя́ покажи́, Я́же Плодо́м Твои́м тлю́ потре́бльшая.

И ны́не: О стра́ннаго та́инства! О ужа́снаго ра́зума! Ка́ко Бо́г на земли́ яви́ся я́ко челове́к? Я́ко ве́сть, я́ко хо́щет, я́ко благоволи́т, и де́йствует, я́коже и хо́щет.

Пе́снь 8

Ирмо́с: Нестерпи́мому огню́ соедини́вшеся, Богоче́стия предстоя́ще ю́ноши, пла́менем же неврежде́ни, Боже́ственную пе́снь поя́ху: благослови́те вся́ дела́ Госпо́дня Го́спода, и превозноси́те во вся́ ве́ки.

Вся́ я́ко добра́, я́ко бли́жняя все́х Царю́ бы́вши, Богоро́дице, напо́лни мя́ благи́х де́л в зло́бе пожи́вшаго, и в ле́ности все́ житие́ сконча́вшаго, я́ко да Тя́ сла́влю во вся́ ве́ки.

Ки́товы утро́бы, я́коже изба́вил еси́ дре́вле проро́ка пресла́вно, Бо́жий Сло́ве: та́ко изба́ви, Спа́се, ны́не ду́шу мою́ попо́лзшуюся во глубину́ поги́бели, име́я моля́щую Тя́, неискусобра́чно ро́ждшую Тя́ Де́ву.

Сла́ва: Кра́сною оде́ждею облече́на, обре́тше мя́ зло́бы де́латели, и сея́ совлеко́ша мя́: но Сама́ мя, Богороди́тельнице Де́во, Боже́ственными оде́ждами уясни́ покая́нием, моли́твами Твои́ми, Богоро́дице.

И ны́не: То́же трепе́щет вся́ко созда́ние, сего́ чи́стая на руку́ име́ла еси́, за милосе́рдие на́с ра́ди младе́нца бы́вша, сего́ моли́ спасти́ вся́ ве́рою зову́щыя: Тя́ превозно́сим, Пречи́стая, во вся́ ве́ки.

Пе́снь 9

Ирмо́с: В зако́не се́ни и Писа́ний, о́браз ви́дим ве́рнии, вся́к му́жеский по́л ложесна́ разверза́я, свя́т Бо́гу: те́м перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

Истле́вша умо́м, и душе́ю, и со́весть зло́бою оскверни́вша, и на́га все́х благи́х я́вльшагося, Де́во нетле́нная, непоро́чная, не пре́зри мене́, но де́лы благоче́стия украси́.

Напо́лнихся зо́л, напо́лнихся помышле́ний отчужда́ющих мя́ от Тебе́, Человеколю́бца, сего́ ра́ди стеню́ и вопию́: ка́ющася приими́ мя, и не отри́ни мене́ Тебе́ Ро́ждшия мольба́ми, Благода́телю многоми́лостиве.

Сла́ва: Да изба́влюся Твои́ми моли́твами, Всенепоро́чная Отрокови́це, от вся́каго гне́ва, и страсте́й смертоно́сных лю́таго гее́нскаго огня́, от челове́к непра́ведных, и от вра́г злы́х, прибеги́й в кро́в Тво́й, и зовы́й Тя́ на по́мощь.

И ны́не: Красну́ душе́ю, красну́ помышле́ньми, красну́ те́лом, обре́т Тя́ Прекра́сный, от чре́сл Твои́х деви́ческих воплоти́ся, я́коже ве́сть, безъобра́зие на́ше украша́я, Де́во, Его́же моли́ спасти́ся на́м.

Та́же, Досто́йно е́сть: и покло́н. Трисвято́е. По О́тче на́ш: Иере́й, возгла́с. Тропари́, и про́чее обы́чное, и отпу́ст.

В пято́к у́тра

по 1-м стихосло́вии седа́льны кре́стны. Гла́с 3:

Кре́ст водрузи́ся на земли́, и косну́ся небесе́, не я́ко дре́ву дося́гшу высоту́, но Тебе́ на не́м, исполня́ющему вся́ческая: сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жии но́гу Его́, я́ко свя́то е́сть.

Кре́ст и сме́рть пострада́ти изво́ливый, посреде́ тва́рей сия́ претерпе́л еси́, егда́ благоизво́лил еси́, Спа́се, те́ло Твое́ пригвозди́ти, тогда́ и со́лнце лучы́ скры́: тогда́ и разбо́йник сия́ зря́, на Кресте́ Тя воспе́т, вопия́ благогове́йно: помяни́ мя, Го́споди: и ве́ровав, прия́т ра́й.

Сла́ва, и ны́не, Крестобогоро́дичен: Нескве́рная А́гница Сло́ва, Нетле́нная Де́ва Ма́ти, на Кресте́ зря́щи пове́шена из Нея́ без боле́зни прозя́бшаго, ма́терски подо́бно рыда́ющи, вопия́ше: увы́ Мне́, Ча́до Мое́, ка́ко стра́ждеши во́лею, хотя́ изба́вити от страсте́й безче́стия челове́ка?

По 2-м стихосло́вии, седа́лен, гла́с 3:

На кипари́се, и пе́вке, и ке́дре, возне́слся еси́, А́гнче Бо́жий: да спасе́ши и́же ве́рою покланя́ющыяся во́льному Твоему́ распя́тию. Христе́ Бо́же, сла́ва Тебе́.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Неизче́тней вла́сти Твое́й, и во́льному Твоему́ распя́тию, а́нгельская во́инства дивля́хуся зря́ще, ка́ко и́же неви́димый пло́тию ра́ны прия́т, хотя́ изба́вити от истле́ния челове́чество? Те́мже я́ко благода́телю вопие́м Ти́: Сла́ва, Христе́, благоутро́бию Твоему́.

Сти́х: Ди́вен Бо́г во святы́х Свои́х, Бо́г Изра́илев.

Благоду́шственное терпе́ния ва́шего победи́ ко́зни злонача́льнаго врага́, му́ченицы прехва́льнии: сего́ ра́ди ве́чнаго сподо́бистеся блаже́нства, но моли́теся Го́сподеви, христолюби́вых люде́й спасти́ ста́до, свиде́телие су́ще и́стины.

Сла́ва, и ны́не, Крестобогоро́дичен: Поно́сную, Ще́дре, сме́рть в распя́тии во́лею претерпе́л еси́: Тебе́ же, Ро́ждшая Христе́, зря́щи уязвля́шеся: ея́же мольба́ми за милосе́рдие ми́лости Твоея́, еди́не преблаги́й Человеколю́бче Го́споди, уще́дри и спаси́ ми́р, взе́мляй ми́ра грехи́.

По 3-м стихосло́вии, седа́льны, гла́с 3:

Кре́ст претерпе́л еси́ безгре́шне, кля́твы сосу́д, за милосе́рдие неизрече́нное: первозда́ннаго пе́рвыя кля́твы свободи́л еси́. Те́мже Твои́м честны́м покланя́емся страсте́м, смотре́ние Твое́ свято́е сла́вяще: е́же еди́н за милосе́рдие ми́лости испо́лнив, созда́ние Твое́ спа́сл еси́.

В лани́ту уда́рен бы́в за ро́д челове́ческий, и не разгне́вался еси́: свободи́ из истле́ния живо́т на́ш, Го́споди, и поми́луй на́с я́ко Человеколю́бец.

Сла́ва, и ны́не, Крестобогоро́дичен: Же́зл си́лы стяжа́вшии Кре́ст Сы́на Твоего́, Богоро́дице, те́м низлага́ем враго́в шата́ния, любо́вию Тя́ непреста́нно велича́юще.

Кано́н Честно́му и Животворя́щему Кресту́, [его́же краегране́сие си́це: Похвала́ ве́рным кре́ст е́сть, и сла́ва. Творе́ние Ио́сифово.] Гла́с 3.

Пе́снь 1

Ирмо́с: Су́шу глубороди́тельную зе́млю со́лнце наше́ствова иногда́, я́ко стена́ бо огусте́ обапо́лы вода́, лю́дем пешомореходя́щым, и богоуго́дно пою́щым: пои́м Го́сподеви, сла́вно бо просла́вися.

Во́лны морски́я жезло́м огусти́в, и прове́л еси́ лю́ди, прообразу́я Кре́ст Тво́й, и́мже ссе́кл еси́ во́ду ле́стную, и к земли́, Ще́дре, Богоразу́мия спа́сл еси́ все́х, ве́рою пою́щих Твою́ си́лу.

Бе́здну сотвори́вый повеле́нием, и́же вода́ми превы́спренняя си́льне покрыва́яй, и и́же на вода́х зе́млю пове́сивый, ви́сиши на дре́ве, и коле́блеши всю́ тва́рь ма́нием: все́х же сердца́ утвержда́еши в стра́се Твое́м.

Му́ченичен: Сы́нове прича́стием быва́ете Боже́ственнии му́ченицы Христо́вы, и жи́телие вы́шнаго Сио́на и насле́дницы, в не́мже и венцы́ нося́ще взыва́ете све́тло: пои́м Го́сподеви, сла́вно бо просла́вися.

Му́ченичен: Ру́к отсече́ния и но́г подъя́сте му́ченицы, и стру́жеми лю́те, и огню́ примеша́ющеся, не отверго́стеся отню́д Христа́ Бо́га су́ща все́х, но те́пле вопия́сте: пои́м Го́сподеви, сла́вно бо просла́вися.

Богоро́дичен: Предо́брая и Де́во Влады́чице, Eго́же родила́ еси́ Cы́на, зря́щи на Дре́ве воздви́жена во́лею, пла́чущи восклица́ла еси́, вопию́щи боле́зненно: Бо́же все́х благоутро́бне, Госпо́дь сы́й сла́вы, ка́ко сия́ стра́ждеши, Влады́ко?

Други́й кано́н Пресвяте́й Богоро́дице, гла́с 3.

Пе́снь 1

Ирмо́с: Во́ды дре́вле, ма́нием Боже́ственным, во Еди́но со́нмище совокупи́вый, и раздели́вый мо́ре изра́ильтеским лю́дем, Се́й Бо́г на́ш, препросла́влен е́сть: тому́ еди́ному пои́м, я́ко просла́вися.

Очище́ние ми́ пода́ждь прегреше́ний, Боже́ственными Твои́ми мольба́ми, Де́во: си́льну бо и́маши моли́тву, Пречи́стая, и Тебе́ чту́щыя избавля́еши от согреше́ний, и страсте́й, и скорбе́й, и обстоя́ний.

Вода́ми моли́тв Твои́х, Де́во, иста́явшую зно́ем безме́рных мои́х согреше́ний и страсте́й, ороси́ ду́шу мою́ смире́нную: я́ко да прохлажде́ние Боже́ственно улучи́в, пе́сньми Тя́ велича́ю, я́ко предста́тельницу те́плую.

Всего́ погружа́ема грехми́ и всего́ отча́янна мя́ су́ща, Ты́, Чи́стая Влады́чице, милосе́рдия Твоего́ ру́ку просте́рши, к покая́ния мя́ высоте́ привлецы́, подаю́щи ми́ исто́чник сле́з.

Раздери́, Пречи́стая, грехо́вное рукописа́ние мои́х прегреше́ний Твои́ми моли́твами, я́ко иму́щи к Сы́ну Твоему́ дерзнове́ние за ны́ моли́ти приле́жно: Тя́ бо еди́ну и́мамы Христиа́не засту́пницу.

Пе́снь 3

Ирмо́с: Утвержде́ние на Тя́ наде́ющихся, утверди́, Го́споди, це́рковь, и́же стяжа́л еси́ Честно́ю Твое́ю кро́вию.

Еди́н сложе́н нося́ соста́в, Сло́ве, претерпе́л еси́ распя́тие безче́стнейшее: чту́щыя Тя́ че́сти сподо́би су́щия.

Разреше́ни бы́ша земноро́днии от кля́твы, кля́тве Тебе́, Bлады́ко, бы́вшу, и Кресто́м благослове́ние источи́вшему.

Му́ченичен: Прише́льцы во всю́ зе́млю бы́вше, и небе́снии вои́стинну гра́ждане яви́стеся, и Христу́ снасле́дницы всехва́льнии.

Му́ченичен: Крепча́йшее ору́жие, Кре́ст стяжа́вше му́ченицы, всю́ си́лу губи́теля врага́ до конца́ победи́ша.

Богоро́дичен: Ты́ соблюла́ся еси́ и по рождестве́ Де́ва, я́же Бо́га чи́стая ро́ждши воплоще́на, на Кресте́ пригво́ждшася хоте́нием.

И́н Ирмо́с: И́же от не су́щих вся́ приведы́й сло́вом созида́емая, соверша́емая ду́хом, Вседержи́телю Вы́шний, в любви́ Твое́й утверди́ мене́.

Благоутро́бия милосе́рдия Твоего́, молю́ся, отве́рзи ми́ вско́ре, Богоро́дице Пречи́стая, и те́плая мне́ яви́ся во искуше́ниих помо́щница, и спасе́ние.

Изба́ви мя́ от вся́кия содержа́щия лю́тыя грехо́вныя бу́ри, раба́ Твоего́, Пречи́стая, и ко спаси́тельному мя́ приста́нищу напра́ви, моли́твами Твои́ми.

Спаси́ мя, Ма́ти Де́во Чи́стая, от страсте́й мои́х му́тных слия́ний, и обходя́щих ны́не смире́нную мою́ ду́шу, и оскорбля́ющих.

Сле́з ту́чу пода́ждь ми́, Блага́я, и си́ми угаси́ страсте́й мои́х пе́щь, и вся́кия омы́й душе́вныя моя́ скве́рны, Богоро́дице.

Пе́снь 4

Ирмо́с: Покры́ла е́сть небеса́ доброде́тель Твоя́, Христе́, из Киво́та бо проше́д Святы́ни Твоея́ нетле́нныя Ма́тере: в хра́ме сла́вы Твоея́ яви́лся еси́ я́ко Младе́нец руконоси́мь, и испо́лнишася вся́ Твоего́ хвале́ния.

Паде́ние Ада́мово еди́н воздви́гл еси́, Христе́, но́в бы́в Ада́м, на Кресте́ ру́це пригвожде́й, тро́стию же бие́н хотя́, и о́цта и же́лчи вкуша́я, превозноша́емый высото́ю Ца́рствия Твоего́.

Я́ко овча́ на заколе́ние Тя́ проро́к предзри́т, и я́ко а́гнца Cло́ве Бо́жий, не проти́вящася отню́д, ниже́ вопию́ща: и́бо хоте́нием претерпе́л еси́ распя́тися, я́ко да и́же во́лею согреши́вшыя изба́виши, и спасе́ши, милосе́рде Го́споди.

Му́ченичен: Обно́вльше ду́шы ра́лом ве́ры, му́ченицы Христо́вы, се́мя терпе́нием му́к все́яша, и кла́с муче́ния гобзу́ющий объя́ша, ве́рных составле́ния пита́ющ. Те́мже при́сно сла́вими су́ть.

Му́ченичен: Утесня́еми стуже́нием нестерпи́мых лю́т, ча́янием кра́сных, к простра́нству вы́шняго Ца́рствия я́ве му́ченицы достиго́ша, я́ко да разширя́т на́ша уста́, те́х непреста́нно пе́ти боре́ния.

Богоро́дичен: Я́же у́гль Боже́ственный прие́мши, я́коже клеща́, не опаля́ющь отню́д, ороша́ющ же па́че, Ма́ти Де́во, безсе́менную и Боже́ственную утро́бу Твою́: Его́же ви́дящи пло́тию пове́шена во́лею на дре́ве, пе́сньми сла́вляше.

И́н Ирмо́с: Положи́л еси́ к на́м тве́рдую любо́вь, Го́споди, единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Всю́ на Тя́ наде́жду возложи́х, Влады́чице, молю́ся припа́дая от души́: смертоно́сныя изба́ви боле́зни, к жи́зни спасе́ния возводя́щи мя́, я́же жи́знь ро́ждшая.

Влады́чице Чи́стая, кре́пкая ми́ру помо́щница, не отве́ржи мене́ от себе́, ниже́ посра́млена отсле́ши мя́ от лица́ Твоего́, ниже́ бесо́м покажи́ мя обра́дование.

Ве́сь обнаже́н бы́х окая́нный Боже́ственных де́л, и уязви́хся сласте́й о́стрыми стрела́ми, и острупле́н бы́х. Те́мже вопию́ Ти, Влады́чице: спаси́ мя, Пречи́стая.

Приидо́ша, Чи́стая, безме́стных дея́ний во́ды до окая́нныя моея́ души́, и по́мыслы бре́нными одержи́мь, вопию́ Ти с боле́знию: не пре́зри, Влады́чице, раба́ Твоего́.

Пе́снь 5

Ирмо́с: Я́ко ви́де Иса́иа обра́зно на Престо́ле превознесе́на Бо́га, от А́нгел Сла́вы дориноси́ма, о окая́нный, вопия́ше, а́з: прови́дех бо воплоща́ема Бо́га, Све́та Невече́рня, и ми́ром влады́чествующа.

Упоко́ил мя́ еси́ сло́ве, претружде́наго трудо́м прегреше́ний, препочива́я на дре́ве Влады́ко, и взя́т поноше́ние мое́, и́миже пострада́л еси́ Иису́се поноше́ньми. Пою́ Твою́ держа́ву и Боже́ственная страда́ния.

Возже́г я́коже све́щник на кресте́ пло́ть Твою́, и поиска́л еси́ поги́бшую дра́хму, Человеколю́бче, и вся́ призыва́еши дру́ги Твоя́ си́лы, на сея́ обре́тение: пое́м держа́ву, Христе́, Ца́рствия Твоего́.

Му́ченичен: Пове́ржен льсте́ц, при нога́х нельсти́вых страстоте́рпец Христо́вых, ме́ртв зри́мь е́сть и неде́йствен: са́ми же нельсти́вно сопричита́еми су́ть со а́нгелы, неизрече́нныя ра́дости исполня́ющеся.

Му́ченичен: Святи́и сту́дению, и лю́тыми му́ками и скорбьми́, и ра́нами вельми́ померза́еми, к теплоте́ преидо́ша Боже́ственней Небе́снаго Ца́рствия вои́стинну, и те́плии предста́тели ве́рным при́сно явля́ются.

Богоро́дичен: Распина́ема на Дре́ве, и ре́бра копие́м ископова́ема, от ре́бр дре́вле созда́вшаго Е́ву, Пречи́стая Де́во зря́щи, вопия́ше ма́терски: ка́ко умира́еши, Сы́не Мо́й, Животе́ безсме́ртный?

И́н Ирмо́с то́йже.

Виногра́де Боже́ственный, и́же кра́сный гро́зд прозя́бшая, и душа́м подаю́щ питие́ Боже́ственное, Де́во, напое́ния го́рькаго, и пия́нства страсте́й, и сласте́й изба́ви ду́шу мою́, и огня́ ве́чнаго.

Тиме́ния исто́ргни мя́ грехо́в, Пречи́стая Богоневе́сто, па́дшаго в ка́л страсте́й: и струя́ми моли́тв Твои́х омы́вши мя́ страсте́й скве́рн, ри́зою спасе́ния светови́дною одежи́.

Я́же ми́рови ми́р, и спасе́ние все́м пода́вшая, я́ко Боже́ственный ми́р поро́ждши, Де́во Чи́стая, настоя́щую бра́нь страсте́й души́ моея́ и те́ла умири́, стра́хом и любо́вию Спа́са Христа́.

Боле́вшую ду́шу мою́ грехми́, Пречи́стая, исцели́ Твои́м милосе́рдием, и сподо́би наставля́ющи мя́ твори́ти во смире́нии Сы́на Твоего́ повеле́ния при́сно, я́ко да восприиму́ Сего́ бла́гость.

Пе́снь 6

Ирмо́с: Возопи́ к Тебе́, ви́дев ста́рец очи́ма спасе́ние, е́же лю́дем прии́де от Бо́га: Христе́, Ты́ Бо́г мо́й.

Во́лею закла́лся еси́ я́ко а́гнец, сне́дию дре́ва уме́ршаго во́лею, па́ки к жи́зни Христе́ возводя́.

На Кре́ст воздви́глся еси́, и низпаде́ся бесо́вская пре́лесть: вознесе́ся же ве́рных мно́жество, воспева́юще Тя́, Живода́вче.

Му́ченичен: Багряни́цею я́же от крове́й испещре́ни му́ченицы, Царю́ все́х ны́не предстоя́т, венцы́ све́тлыми украша́еми.

Му́ченичен: Исцеле́ние все́м приступа́ющым источа́ют мо́щи святы́х му́ченик, и страсте́й мно́жество потопля́ют.

Богоро́дичен: Разуме́ти не мо́жет у́м челове́ческий, Отрокови́це, па́че естества́ Рождества́ Твоего́ та́йну: па́че бо ума́ Бо́га родила́ еси́.

И́н Ирмо́с: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя упра́вителю спаси́.

Избавле́ние прегреше́ний пода́ждь я́ко блага́я, Твоему́ рабу́, Пречи́стая, Твоего́ заступле́ния прося́щему с ве́рою, и бу́дущаго мя́ суда́ исхити́.

Влады́чице и Ма́ти Изба́вителя, Ты́ предста́ни ми́ в ча́с исхо́да моего́, истяза́ему мне́ от возду́шных духо́в, о я́же несмы́сленною мы́слию соде́ях.

Окая́нен яви́хся ве́сь а́з, нечистота́ми всегда́ объя́т: и прозря́ ны́не созади́ ногу́ мое́ю сме́рть, взыва́ю Ти́, Богоро́дице, помози́ ми.

Во́лны стра́стных помышле́ний, всегда́ мя́ смуща́ют, Пречи́стая, и лука́вых духо́в бу́ря погружа́ет мя́: но утверди́ на ка́мени безстра́стия.

Пе́снь 7

Ирмо́с: Тебе́ во огни́ ороси́вшаго о́троки богосло́вившыя, и в Де́ву нетле́нну все́льшагося, Бо́га Сло́ва пои́м, благоче́стно пою́ще: благослове́н Бо́г оте́ц на́ших.

На ке́дре возне́слся еси́, и пе́вке, и кипари́се, Влады́ко, от Тро́ицы еди́н сы́й, и возне́сл еси́ су́щыя бо глубину́ мно́гих сласте́й впа́дшыя: благослове́н Бо́г оте́ц на́ших.

Кро́вию честно́ю, Го́споди, тва́рь очи́стил еси́ от кро́ве, приноси́мыя ме́рзким бесо́м, и разруши́л еси́ же́ртвы скве́рныя, Сло́ве Бо́жий, поже́рся я́ко незло́бив а́гнец: сла́ва держа́ве Твое́й.

Му́ченичен: Стоя́ху пред мучи́тели, я́ко столпи́ неподви́жимии, поколеба́юще пре́лесть, и утвержда́юще ве́рных сердца́, страда́льцы пою́ще: благослове́н еси́ Го́споди Бо́же оте́ц на́ших.

Му́ченичен: Не опали́стеся огне́м, огня́ тепле́йшее произволе́ние стяжа́вше, страстоте́рпцы Xристо́вы венцено́сцы, вопия́ше: благослове́н еси́ Го́споди Бо́же оте́ц на́ших.

Богоро́дичен: Зача́тие несравне́но, и Рождество́ несказа́нно име́ла еси́, Чи́стая еди́на, Влады́ку вопло́щши пло́тию распе́ншагося, Eму́же пою́ще вопие́м: благослове́н еси́ Го́споди Бо́же оте́ц на́ших.

И́н Ирмо́с: Я́коже дре́вле благочести́выя три́ о́троки ороси́л еси́ в пла́мени халде́йстем, све́тлым Божества́ огне́м и на́с озари́: благослове́н еси́, взыва́ющыя, Бо́же оте́ц на́ших.

Тебе́ Ма́тери Бо́жии, чи́стей и непоро́чней молю́ся, оскверне́нный те́лом и душе́ю, и окаля́нный дея́нии нечи́стыми, и наде́юся, Влады́чице, на ми́лость Твою́, Ты́ мя уще́дри, Пречи́стая.

Прегреше́ний мои́х мно́жество, и злы́х испыта́ние, недоуме́нием мя́ препира́ет зело́, и во отча́яния влече́т глубину́: Пречи́стая Влады́чице, спаси́ мя погиба́ющаго, и лю́те потопля́ема.

Поми́луй, Блага́я, смири́вшуюся ду́шу мою́ лука́выми дея́ньми, и к покая́ния мя́ пути́ наста́ви, и твори́ти хоте́ния Твоего́ Сы́на испра́ви, и от му́ки изба́ви.

Мно́жеством щедро́т Твоея́ бла́гости, грехо́в на́ших мно́жество пре́зри, Блага́я, и благопремени́тельна бу́ди, немо́лчно зову́щым: благослове́н, Пречи́стая, Пло́д Твоего́ чре́ва.

Пе́снь 8

Ирмо́с: Нестерпи́мому огню́ соедини́вшеся, Богоче́стия предстоя́ще ю́ноши, пла́менем же неврежде́ни, Боже́ственную пе́снь поя́ху: благослови́те вся́ дела́ Госпо́дня Го́спода, и превозноси́те во вся́ ве́ки.

Лю́дие непокори́вии и неразу́мнии, Тя́ нра́вом благопоко́рным восхоте́вша распя́тися, осужда́ют умре́ти: я́ко да хоте́нием умерщвле́нныя сло́ве, оживи́ши, пою́щыя Тя́ и превознося́щыя во ве́ки.

Распросте́р на Кресте́ дла́ни, ру́це неудержа́нно просте́ртыя ко Дре́ву сне́дному первозда́ннаго исцеля́я, Влады́ко: и зря́щи Тя́ стра́хом со́лнце, лучы́ скрыва́ше, и вся́ тва́рь поколеба́ся.

Му́ченичен: Луча́ми свяще́нных боре́ний струи́ нече́стия, излия́ния безбо́жия изсуши́ша страстоте́рпцы, и исто́чники источи́ша исцеле́ний, скве́рну страсте́й омыва́ющыя, и ве́рных сердца́ напая́ющыя бога́тно.

Му́ченичен: Сообра́зно честны́х страсте́й, и Боже́ственных за́поведей исполни́телие страстоте́рпцы, согра́ждане безпло́тным: написа́тися ны́не в вы́шнем гра́де, Бо́га моли́те, ва́с чту́щым во вся́ ве́ки.

Богоро́дичен: Ру́чку Тя́ злату́ю и све́щник, трапе́зу и же́зл, Боже́ственную го́ру и о́блак, пала́ту Царе́ву и престо́л огнеобра́зен, Богоро́дицу вси́ ве́рнии имену́ем, по Рождестве́ Де́вою сохра́ншуюся.

И́н Ирмо́с: В пла́мень ко отроко́м евре́йским снизше́дшаго, Бо́жиею си́лою, и я́вльшагося Го́спода, свяще́нницы благослови́те, и превозноси́те во вся́ ве́ки.

Сласте́й го́ресть, чу́вства вся́ теле́сная проше́дши, ду́шу мою́ безме́стно окаля́ет, и в сме́рть влече́т: Влады́чице ми́ра, бу́ди ми́ спасе́ние.

На Тя́ возложи́х, Влады́чице, се́рдце, и ду́шу, и те́ло: не и́мам бо ины́я наде́жди, ра́зве Тебе́, е́юже получу́ ми́лость. Те́мже пода́ждь ми́ бога́тую Твою́ благода́ть.

Зми́й мне́ я́дом приползе́, и плотско́ю сла́достию окая́нную ду́шу мою́ лю́те умори́: но оживи́ сию́ сопроти́вными лечьба́ми, Чи́стая, Твои́ми моли́твами.

Лю́тая мя́ но́щь покрыва́ет прегреше́ний, Свята́я Влады́чице: не и́мам бо свещи́, ду́шу просвеща́ющия благодея́ния еле́ем. Те́мже из черто́га изрину́хся вы́шняго.

Та́же, пое́м пе́снь Богоро́дицы: Вели́чит душа́ моя́ Го́спода:

Пе́снь 9

Ирмо́с: В зако́не се́ни и писа́ний о́браз ви́дим ве́рнии: вся́к му́жеский по́л ложесна́ разверза́я, свя́т Бо́гу: те́м Перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

На Кресте́ пригво́ждся Иису́се, и́же основа́вый на ниче́мже всю́ зе́млю, угле́бшаго мя́ в ка́ле грехо́внем нра́вом лука́вым, я́ко бла́г уще́дрив Христе́, и извле́к, и безче́стною Твое́ю сме́ртию почти́л еси́, Многоми́лостиве.

Ви́ден бы́л еси́ Бо́г неви́димый естество́м, пло́тию возвыша́ем, я́ко да от враго́в неви́димых изба́виши ми́р ви́димый, и су́щыя ни́зу, небе́сны сотвори́ши, Христе́, славосло́вящыя держа́ву вели́кия вла́сти Твоея́.

Му́ченичен: Во́инство свяще́нное, святы́м а́нгелом подо́бно избра́нное, ра́й, посреде́ имы́й живо́тное дре́во, Христа́, богокра́сныя Це́ркве сосло́вие честно́е, всесла́внии страстоте́рпцы Спа́совы яви́стеся.

Му́ченичен: На́с на земли́ ва́с помина́ющих, помина́йте, святи́и, Престо́лу влады́чнему предстоя́ще ра́достно: и я́же отону́ду заря́ми бога́тно свяще́ннии просвеща́йте ны́, я́ко да долго́в разреше́ние прии́мем.

Богоро́дичен: Свети́ла, Твое́ зря́ще, Сы́не мо́й, распя́тие, заидо́ста: и ка́ко евре́йский со́нм не за́йде неве́рный, преда́в Тя́ на сме́рть нача́льника жи́зни? Богоро́дица вопия́ше. Ю́же непреста́нно велича́ем.

И́н Ирмо́с: Тебе́ неопали́мую купину́, и святу́ю Де́ву, Ма́терь Све́та, и Богоро́дицу, наде́жду все́х на́с, велича́ем.

Скве́рну стра́стных помышле́ний моего́ ума́ очи́стивши, Чи́стая, безстра́стия све́тлою ри́зою одежи́ мя.

Отве́рзи ми́ Боже́ственныя вхо́ды покая́ния, Де́во, вхо́ды страсте́й и сласте́й мои́х загражда́ющи, и возбраня́ющи си́лою Твое́ю.

Услы́ши гла́с стена́ния моего́, и гла́с пла́ча моего́, Де́во Всенепоро́чная, и пода́ждь очище́ние и спасе́ние окая́нней мое́й души́.

Ве́сь отча́яхся окая́нный, и недоуме́юся, помышля́я лука́вая моя́ дея́ния: ту́не уще́дри, Влады́чице. И спаси́ мя.

Та́же, Досто́йно е́сть: ектениа́, и свети́лен.

На стихо́вне стихи́ры кре́стны, гла́с 3:

Дре́во преслуша́ния ми́рови сме́рть прозябе́, дре́во же Кре́стное живо́т и нетле́ние. Те́мже Тебе́ мо́лим распе́ншагося Го́спода: да зна́менается на на́с све́т лица́ Твоего́.

Сти́х: Испо́лнихомся зау́тра ми́лости Твоея́ Го́споди, и возра́довахомся, и возвесели́хомся: во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́ и на дела́ Твоя́, и наста́ви сы́ны и́х.

За́вистию от пи́щи изгна́н бы́х, паде́нием падо́хся лю́тым: но не презре́в, Влады́ко, и восприе́м мене́ ра́ди е́же по мне́ распя́тие Твое́, и спаса́еши мя́, и в сла́ву вво́диши, изба́вителю мо́й, сла́ва Тебе́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Святы́х страстоте́рпец па́мять, прииди́те лю́дие вси́ почти́м: я́ко позо́р бы́вше а́нгелом и челове́ком, побе́ды венцы́ от Христа́ прия́ша, и мо́лятся о душа́х на́ших.

Сла́ва, и ны́не, Крестобогоро́дичен: Зря́щи из Тебе́ Рожде́ннаго, Всенепоро́чная, пове́шена на Дре́ве, восклица́ше вопию́щи: сла́дкое мое́ ча́до, где́ Твоя́ за́йде добро́та светоно́сная, добро́ сотвори́вшаго ро́ду челове́ческому?

Та́же, Бла́го е́сть: Трисвято́е. По О́тче на́ш, тропа́рь, ектениа́, и ча́с 1-й, и отпу́ст.

В пято́к блаже́нны, гла́с 3:

Отве́ргша, Христе́, за́поведь Твою́, пра́отца Ада́ма из рая́ изгна́л еси́: разбо́йника же Ще́дре, испове́даша Тя́ на Кресте́, во́нь всели́л еси́, зову́ща: помяни́ мя, Спа́се, во Ца́рствии Твое́м.

Сти́х: Блаже́ни и́згнани пра́вды ра́ди, я́ко те́х е́сть Ца́рство Небе́сное.

Зря́щи Тя́ на Кресте́ со́лнца незаходи́маго, помрачи́ све́т со́лнце: ка́мение распаде́ся, Влады́ко, земля́ поколеба́ся вся́, заве́са же церко́вная раздра́ся посреде́, непра́ведно стра́ждуща ви́дящи Тя́, Спа́се, все́ми недомы́слимаго.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

За все́х, Иису́се, веде́н бы́л еси́ на сме́рть, живы́х животе́: я́ко да Боже́ственными твои́ми страстьми́, я́же дре́внею сне́дию умерщвле́ныя спасе́ши я́ко Бо́г, и рая́ пока́жеши жи́тели. Те́мже ве́рою Твоя́ стра́сти ны́не сла́вим.

Сти́х: Ра́дуйтеся и весели́теся, я́ко мзда́ ва́ша мно́га на небесе́х.

Пострада́вшаго во́лею на́с ра́ди, и поноше́ния оте́мшаго челове́ков, страсте́м уподо́бльшеся му́ченицы, мно́гих ра́ди му́к низложи́сте врага́, и вы́шнюю сла́ву получи́сте. Те́мже боголе́пно сла́вими есте́.

Сла́ва: Отцу́, и Сы́ну, и уте́шительному Ду́ху пра́вому, вси́ ве́рнии поклони́мся: еди́но нача́ло, и сла́ву боголе́пно пою́ще, благоче́стно правосла́вным ра́зумом возопии́м: помяни́ на́с во Ца́рствии Твое́м.

И ны́не: Стра́сти терпя́ща Пло́тию хоте́нием, зря́щи на Кресте́ Своего́ Сы́на, Всенепоро́чная, смути́ся вся́, и пла́чущи взыва́ше, Чи́стая: увы́ Мне́, ча́до Мое́, ка́ко умерщвле́н еси́, и́же уме́ршыя лю́те оживи́ти хотя́?

Суббота

В пято́к ве́чера

на Го́споди, воззва́х, стихи́ры святы́м му́чеником, и святи́телем, и преподо́бным. Гла́с 3.

Подо́бен: Ве́лия му́ченик:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у Тебе́ очище́ние е́сть.

Стра́ждуще до́блии му́ченицы кре́пко, и ра́ны, и вяза́ния, и разли́чныя му́ки претерпе́вше, к неболе́зненному вои́стинну и блаже́нному насле́дию приведо́шася, по достоя́нию боле́зней.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во твое́, упова́ душа́ моя́ на Го́спода.

И́же сло́во благочести́во и Боже́ственно отры́гнувше, Госпо́дни святи́телие, и вся́ ерети́ческая сопротивосло́вия разруши́сте, и ве́рным все́м перводе́тельницы яви́стеся: сего́ ра́ди почита́еми есте́.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Невеще́ственных и безпло́тных чи́ну уподо́бистеся отцы́ богоно́снии, в телеси́ веще́ственне, те́х пресла́вно житие́ показу́юще: те́мже во оби́телех те́х живете́.

И́ны стихи́ры му́чеником, гла́с 8, подо́бен то́йже.

Сти́х: Я́ко у Го́спода ми́лость, и мно́гое у него́ избавле́ние, и то́й изба́вит Изра́иля от все́х беззако́ний его́.

Ве́лия Креста́ Твоего́, Го́споди, си́ла: водрузи́ся бо на ме́сте, и де́йствует в ми́ре, и показа́ от ры́барей апо́столы, и от язы́к му́ченики, да мо́лятся о душа́х на́ших.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Ве́лия му́ченик Твои́х, Христе́, си́ла: во гробе́х бо лежа́ще ду́хи прого́нят: и упраздни́ша вра́жию вла́сть, ве́рою тро́ическою подви́гшеся по благоче́стии.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Проро́цы, и апо́столи Христо́вы, и му́ченицы, научи́ша ны́ пе́ти Тро́ицу единосу́щную, и просвети́ша язы́ки прельще́ныя, и прича́стники, а́нгелом сотвори́ша сы́ны челове́ческия.

Сла́ва, и ны́не, Богоро́дичен: Ка́ко не диви́мся Богому́жному Рождеству́ Твоему́, Пречестна́я? Искуше́ния бо му́жескаго не прии́мши, Всенепоро́чная, родила́ еси́ без Отца́ Сы́на пло́тию, пре́жде ве́к от Отца́ рожде́ннаго без ма́тере, ника́коже претерпе́вшаго измене́ния, или́ смеше́ния, или́ разделе́ния: но обою́ существу́ сво́йство це́ло сохра́ншаго. Те́мже, Ма́ти Де́во Влады́чице, Того́ моли́ спасти́ся душа́м, правосла́вно Богоро́дицу испове́дающих Тя́.

Та́же, Све́те ти́хий: Проки́мен дне́.

На стихо́вне стихи́ры му́ченичны, гла́с 3:

Му́ченицы Твои́, Го́споди, ве́рою утверди́вшеся, и наде́ждею укре́пльшеся, любо́вию Креста́ Твоего́ душе́вне соедини́вшеся, вра́жие мучи́тельство разруши́ша, и улучи́ша венцы́: со безпло́тными мо́лятся о душа́х на́ших.

Ме́ртвен: Все́ су́етие челове́ческое, ели́ко не пребу́дет по сме́рти: не пребу́дет бога́тство, ни сни́дет сла́ва: наше́дши бо сме́рть, вся́ сия́ погуби́т. Те́мже Христу́ безсме́ртному Царю́ возопии́м: преста́вленныя от на́с упоко́й, иде́же все́х е́сть веселя́щихся жили́ще у Тебе́.

Ме́ртвен: Челове́цы, что́ всу́е мяте́мся? Пу́ть кра́ток е́сть, и́мже тече́м, ды́м е́сть житие́, па́ра и пе́рсть и пе́пел: вма́ле явля́ется, и вско́ре погиба́ет. Те́мже Христу́ безсме́ртному Царю́ возопии́м: преста́вленныя от на́с упоко́й, иде́же все́х е́сть веселя́щихся жили́ще у Тебе́.

Сла́ва, и ны́не, Богоро́дичен: В жена́х свята́я Богоро́дице Ма́ти безневе́стная, моли́ его́же родила́ еси́, Царя́ и Бо́га на́шего, да спасе́т ны́, я́ко Человеколю́бец.

Та́же, Ны́не отпуща́еши: Трисвято́е. По О́тче на́ш: тропа́рь, и отпу́ст.

В пято́к на повече́рии

Кано́н Пресвяте́й Богоро́дице. Гла́с 3.

Пе́снь 1

Ирмо́с: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре Изра́ильтеским лю́дем, се́й Бо́г на́ш, препросла́влен е́сть: Тому́ Еди́ному пои́м, я́ко просла́вися.

Спасе́нию Нача́льника и Жизнода́вца ро́ждшая па́че смы́сла всего́, соу́з разреши́ла еси́ осужде́ния Е́вы прама́тере. Те́мже тва́рь вся́ блажи́т Тя́, Богороди́тельнице Чи́стая.

Озло́бленнаго лю́тыми боле́зньми, душе́ю и те́лом, Пресвята́я Де́во, исхити́ от глубины́ неча́яния, все́х ну́ждных избавля́ющи мя́: Ты́ бо еси́, Пречи́стая, милосе́рдия исто́чник.

Сла́ва: Совлеко́хся оде́жды весе́лия, в ско́рбь впа́д и боле́знь, и лю́те уязви́хся отвсю́ду: предвари́ и изба́ви мя́ от одержа́щия пре́лести: Ты́ бо ми́ еси́, Влады́чице, прибе́жище и наде́жда.

И ны́не: Предста́тельницу Тя́ тве́рду стяжа́в, Богоневе́сто, ко Твоему́ покро́ву притека́ю, моля́ся: не пре́зри мя́, Твоего́ раба́, мно́гими страстьми́ и боле́зньми и скорбьми́ отягче́на, но моли́твами Твои́ми исцели́, Ма́ти Бо́жия.

Пе́снь 3

Ирмо́с: И́же от не су́щих вся́ приведы́й, сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.

В недоуме́нии и ско́рби боле́зненне е́смь окая́нный, во сле́д себе́ сме́рть зря́: те́мже, Пречи́стая, Твое́ю моли́твою спаси́ мя.

Все́ житие́ растле́нно злы́ми и блу́дными дея́нии клеве́щет на мя́, и отча́янием мя́ погружа́ет: Чи́стая, спаси́ мя.

Сла́ва: Щедро́т Твои́х бе́здна, всю́ду пролива́ема, Влады́чице, Еди́ныя ра́ди бла́гости, во еле́и масти́те умаща́ет все́х при́сно Тя́ пою́щих.

И ны́не: Я́ко от нача́ла Тя́ естества́ на́шего прие́м, Богоневе́сто, Сы́н Тво́й и Госпо́дь, совокупля́ет моли́твами Твои́ми Тебе́ пою́щыя.

Пе́снь 4

Ирмо́с: Положи́л еси́ к на́м тве́рдую любо́вь, Го́споди, Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Всю́ на Тя́ наде́жду положи́х, Влады́чице, молю́ся и припа́даю от души́: смертоно́сныя изба́ви боле́зни, возводя́щи мя́ к жи́зни спасе́ния, Я́же Жи́знь ро́ждшая.

Исцели́ мя, Чи́стая, моли́твами Твои́ми отча́яннаго раба́ Твоего́, подо́бием лю́тых и растле́нных ра́н: Врача́ бо родила́ еси́, в ми́лости бога́таго Бо́га на́шего.

Сла́ва: В стра́сти лю́тыя впа́дшаго мя́ изба́ви, и весе́лия оде́жду посеще́нием Твои́м Боже́ственным пода́ждь ми́, я́же преиму́щую вся́к у́м Ра́дость, Де́во, прорасти́вшая.

И ны́не: Друго́е Не́бо Богоро́дице яви́лася еси́, Со́лнце пра́вды несказа́нно на земли́, Чи́стая, возсия́вшая: И́мже на́м возсия́ Богоразу́мия све́т присносу́щный.

Пе́снь 5

Ирмо́с: К Тебе́ у́тренюю, все́х Творцу́, преиму́щему вся́к у́м ми́рови: зане́ све́т повеле́ния Твоя́, в ни́хже наста́ви мя́.

Ме́ртвость творя́щий и стра́сти прибли́жихся, от мои́х безме́рных грехо́в: Ма́ти Бо́жия, Тя́ избавле́ние мно́гих злы́х мои́х бы́ти, молю́ приле́жно.

Душе́внии мои́ ру́це простира́ю к Тебе́, Чи́стая, плотски́ми бо разслабе́х окая́нный: но Ты́ от мно́гих ра́н изба́ви мя́, подаю́щи исцеле́ние.

Сла́ва: Совлеко́хся здра́выя оде́жды, и плаче́вную ри́зу в боле́знех обле́к: Тебе́ молю́ся, Влады́чице, облецы́ мя во здра́вие.

И ны́не: Я́ко му́чеников и апо́столов свяще́нное су́щи благоле́пие, Богоро́дице, и ве́рных заступле́ние, вси́ досто́йно Тя́ сла́вим.

Пе́снь 6

Ирмо́с: Возведи́ от тли́ мя, Го́споди Бо́же мо́й, Ио́на вопия́ше. И а́з вопию́ Ти: из глубины́ изба́ви мя́, Спа́се, мно́гих мои́х зо́л, и к све́ту Твоему́, молю́ся, наста́ви.

Напряже́ на мя́ мно́жество боле́зней, от мои́х безме́рных согреше́ний тлетво́рный, и умерщвле́нием мя́ обложи́ша: но Ты́ Сама́, Богоро́дице, от си́х мя́ изба́ви, и вся́кия ну́жды исхити́.

Вве́ржен бы́х во глубину́ прегреше́ний, и боле́зней и скорбе́й безме́рных, и в си́х ны́не отню́д подавля́юся: но Ты́, Богороди́тельнице, просте́рши ру́ку ко спасе́нию возведи́ мя.

Сла́ва: Тя́ основа́ние тве́рдое ве́м, Богоро́дице, и держа́вную по́мощь су́щым в ско́рби: те́мже к Твоему́ покро́ву прибе́г, молю́ Тя, от лю́тых бе́д изба́ви мя́ и от тя́жких боле́зней.

И ны́не: Бразду́ ю́же Боже́ственный Кла́с прора́стшую, И́мже ве́рных сердца́ пита́ются ве́рою, и мы́сленный гла́д преста́, Бо́жий Ковче́г воспои́м, я́ко Де́ву Богома́терь.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 3:

Боже́ственнаго Естества́ не отлучи́ся, пло́ть бы́в во чре́ве Твое́м: но Бо́г вочелове́чися и пребы́сть, И́же по Рождестве́ Ма́терь Тя́ Де́ву, я́ко пре́жде Рождества́ сохрани́в Всенепоро́чну Еди́н Госпо́дь: Того́ приле́жно моли́, дарова́ти на́м ве́лию ми́лость.

Пе́снь 7

Ирмо́с: Я́коже дре́вле благочести́выя три́ о́троки ороси́л еси́ в пла́мени халде́йстем, све́тлым Божества́ огне́м и на́с озари́, благослове́н еси́ взыва́ющыя, Бо́же оте́ц на́ших.

Умилосе́рдися на мя́, Де́во Богоневе́сто, во отча́яния глубину́ попо́лзшася: Тебе́ тишину́ бы́ти ми́, молю́, Пречи́стая, спасе́ний бо еси́ приста́нище су́щым в ну́ждах при́сно.

Неизглаго́ланно па́че ума́ Му́дрость и Си́лу Бо́жию родила́ еси́ Христа́: те́мже си́льна в ми́лости, и ще́дра су́щи, да́ждь ми́ спаси́тельныя цельбы́ Твоя́, Богоро́дице, наде́жде ве́рных.

Сла́ва: Обогати́вши Боже́ственным Рождество́м концы́, нетле́ния сла́достию, от тлетво́рныя мя́ боле́зни, и го́рьких страсте́й свободи́, и спасе́ние пода́ждь, Бо́жия Ма́ти пресла́вная.

И ны́не: И́же две́рь Тя́ та́йную Себе́ предложи́в, и засту́пницу ди́вную су́щым на земли́, Тобо́ю, Чи́стая, две́рь подаде́ челове́ком в ве́чную жи́знь все́х вводя́щу, я́ко ще́др, и все́х Бо́г.

Пе́снь 8

Ирмо́с: Вавило́нская пе́щь о́троки не опали́, ниже́ Божества́ о́гнь Де́ву растли́. Те́м со о́троки ве́рнии возопие́м: благослови́те дела́ Госпо́дня Го́спода.

Прегреше́ний неизче́тную пучи́ну стяжа́в, ны́не соудавля́юся, Чи́стая, в боле́знех погружа́емь. Те́мже ми́ ру́ку по́мощи просте́рши, из глубины́ боле́зней возведи́, молю́ся.

Престо́л Бо́гу земле́ный, Две́рь же Небе́сная яви́лася еси́ Присноде́во Чи́стая, Богоро́дице Всепе́тая. Те́мже ми́ спасе́ния две́рь отве́рзи, Богома́ти, и тьмы́ страсте́й свободи́.

Сла́ва: Я́ко виногра́д возрасти́ла еси́, Гро́зд невозде́лан, Чи́стая, вино́ источа́ющ душа́м, веселя́щее ве́рно пою́щих Его́, Всенепоро́чная.

И ны́не: Я́же по Рождестве́ нетле́нна пребы́вши, Всенепоро́чная, мо́лимся, Чи́стая, изба́ви от тли́ рабы́ Твоя́, ве́рно пою́щыя единомышле́нием души́: благослови́те вся́ дела́ Го́спода, и превозноси́те Его́ во ве́ки.

Пе́снь 9

Ирмо́с: На Сина́йстей горе́ ви́де Тя́ в купине́ Моисе́й, неопа́льно О́гнь Божества́ заче́ншую во чре́ве: Дании́л же Тя́ ви́де го́ру несеко́мую, же́зл прозя́бший, Иса́иа взыва́ше, от ко́рене Дави́дова.

О Де́во блага́я! О ми́ра ра́досте и прибе́жище! О храни́лище ве́рных, и избавле́ние скорбе́й! Ты́ предста́ни ми́ в ча́с сме́рти, и изба́ви от бесо́в, и́щущих растли́ти мя́.

Я́ко Зижди́теля и Бо́га заче́нши во утро́бе, Де́во Ма́ти Чи́стая, си́лою я́же в Тебе́ низложи́ бесо́в шата́ния, и вознеси́ ро́г пою́щих держа́ву Твою́ Боже́ственную, и ве́рно покланя́ющихся о́бразу Твоему́.

Сла́ва: Новосоде́лав на́ше естество́, И́же от Тебе́ воплоще́йся, Де́во Чи́стая, но́во де́лает и обновля́ет, Ма́тернею Твое́ю моли́твою, све́тлую и бо́друю засту́пницу, и су́щую Богоро́дицу в пе́снех непреста́нно Тя́ велича́ющих.

И ны́не: Ты́ а́нгелов ра́дость, Ты́ пра́ведников добро́та, Ты́ ве́рных наде́жда, Ты́ соблюде́ние на́ше: Ты́ мо́ст, и́же к жи́зни несостаре́ющейся преводя́щий, ве́рою и любо́вию Тя́ велича́ющыя.

Та́же: Досто́йно е́сть: Трисвято́е. По О́тче на́ш: Тропари́, и про́чее обы́чно, и отпу́ст.

В суббо́ту у́тра

по 1-м стихосло́вии, седа́льны му́ченичны, гла́с 3:

Благоду́шное терпе́ния ва́шего победи́ ко́зни злонача́льнаго врага́ страстоте́рпцы всехва́льнии: сего́ ра́ди ве́чнаго сподо́бистеся блаже́нства. Но моли́теся Го́сподеви, христолюби́вых люде́й спасти́ ста́до, му́ченицы су́ще и́стиннии.

Сти́х: Ди́вен Бо́г во святы́х Свои́х, Бо́г Изра́илев.

Сия́ете ве́рою Пресве́тлая свети́ла святи́и, неду́гующих вра́чеве, страстоте́рпцы прехва́льнии, мучи́телей у́бо ра́н не убоя́стеся, и́дольское злоче́стие низложи́сте, побе́ду иму́ще непобеди́мую, кре́ст и́стинный.

Сла́ва, и ны́не, Богоро́дичен: Тя́ хода́тайствовавшую спасе́ние ро́да на́шего, воспева́ем, Богоро́дице Де́во: пло́тию бо от Тебе́ восприя́тою Сы́н Тво́й и Бо́г на́ш, кресто́м восприи́м стра́сть, изба́ви на́с от тли́, я́ко Человеколю́бец.

По 2-м стихосло́вии, седа́льны, гла́с 3:

Вооружи́вшеся всеору́жеством Христо́вым, и обо́лкшеся во ору́жие ве́ры, полки́ вра́жия страда́льчески низложи́сте, усе́рдно бо упова́нием жи́зни, претерпе́сте вся́ мучи́телей преще́ния же и ра́ны. Те́мже и венцы́ прия́сте, му́ченицы Христо́вы терпеливоду́шнии.

Сти́х: Ди́вен Бо́г во святы́х свои́х, Бо́г Изра́илев.

Страстоте́рпцы святи́и, моли́те ми́лостиваго Бо́га, да прегреше́ний оставле́ние пода́ст душа́м на́шым.

Сти́х: Блаже́ни, я́же избра́л, и прия́л еси́ Го́споди.

Егда́ сло́вом Твои́м предста́нем безме́здному Твоему́ суди́щу Го́споди, не посрами́ в Тя́ ве́ровавших, Спа́се на́ш: вси́ бо согреши́хом, но Тебе́ не отступи́хом. Те́мже мо́лим Тя́, в селе́ниих пра́ведных Твои́х, Христе́, и́хже прия́л еси́, упоко́й: еди́н бо еси́ безгре́шен.

Сла́ва, и ны́не, Богоро́дичен: Проро́цы пропове́даша, апо́столи научи́ша, му́ченицы испове́даша, и мы́ ве́ровахом, Богоро́дицу Тя́ вои́стинну су́щую: те́мже и велича́ем Рождество́ Твое́, Пречи́стая.

Кано́н святы́м му́чеником, и святи́телем, и преподо́бным, и усо́пшым. Творе́ние Ио́сифово. Гла́с 3.

Пе́снь 1

Ирмо́с: Ди́вно, сла́вно творя́й чудеса́ Ты́ еси́, Бо́же, бе́здну оземлени́вый, и колесни́цы потопи́вый, и лю́ди спасы́й пою́щыя Тебе́, я́ко Царю́ на́шему и Бо́гу.

Муче́ния сла́ву, прему́дрии, обрето́сте вси́ страда́льцы, муче́ния многообра́зная до́блественне претерпе́сте, страстоте́рпцы: те́мже сла́вими есте́ при́сно.

Превы́шший иму́ще живо́т яви́стеся Боже́ственнии служи́телие, прему́дрии священнотаи́нницы вопло́щшагося сло́ва, упа́сше до́бре Госпо́дне ста́до си́лою Боже́ственною.

Распе́ншеся ми́рови преподо́бнии, плотски́х все́х сласте́й отверго́стеся, и сосу́ди ду́ха я́вльшеся, ду́хи преле́стныя Боже́ственною си́лою погуби́сте вку́пе.

Сла́ва: И́же от земли́ повеле́нием Твои́м, Го́споди, ве́рою благоче́стною ще́дре преста́вльшыяся, жи́зни безконе́чныя и све́та невече́рняго сподо́бив, упоко́й я́ко бла́г.

Богоро́дичен: Я́ко Бо́га ро́ждшую пло́тию, Пречи́стая, нра́вом благоче́стным чти́м Тя́ непреста́нно, с честны́ми жена́ми, посто́м просия́вшими, и страда́ньми врага́ низложи́вшими.

Други́й кано́н усо́пшым пое́м наряду́, иде́же не́сть мине́и. Творе́ние Феофа́ново.

Пе́снь 1

Ирмо́с: Пресека́емое мо́ре жезло́м дре́вле Изра́иль про́йде я́ко по пусты́ни, и крестообра́зно я́ве предъуготовля́ет стези́: сего́ ра́ди пои́м во хвале́нии чу́дному Бо́гу на́шему, я́ко просла́вися.

Припе́в: Ди́вен Бо́г во святы́х Свои́х, Бо́г Изра́илев.

Погребе́нием Твои́м сме́рть умертви́в, и низложи́в а́дово мучи́тельство, на небеса́ предте́ча на́м возше́дый, страстоте́рпческий ли́к совозне́сл еси́. Ны́не же ду́шы упоко́й преста́вленныя к Тебе́, Христе́.

Припе́в: Поко́й, Го́споди, ду́шы усо́пших ра́б Твои́х.

И́же Боже́ственныя му́ченики укрепля́яй, и те́ми пре́лесть потреби́вый, мольба́ми и́х, я́ко Бо́г, сконча́вшымся я́же о Тебе́, Спа́се, безсме́ртие и блаже́нное насле́дие улучи́ти благоволи́.

Сла́ва: За рабы́, Влады́ко, Твою́ кро́вь закла́вся излия́л еси́ я́ко ще́др, до́лг же за ни́х воздая́: сего́ ра́ди, Милосе́рде, Тебе́ мо́лим, преста́вленныя рабы́ Твоя́ к Тебе́ упоко́й.

И ны́не: Чи́стую воспои́м Богоро́дицу, Бо́га ро́ждшую, сме́ртию свое́ю сме́рть на́шу испрове́ргшаго, и жи́знь источи́вшаго нестаре́ющуюся, и во ве́ки пребыва́ющее блаже́нство.

Пе́снь 3

Ирмо́с: Непло́дная душе́ и безча́дная, стяжи́ пло́д благосла́вный, веселя́щися возопи́й: утверди́хся Тобо́ю, Бо́же, не́сть свя́т, не́сть пра́ведн, па́че Тебе́, Го́споди.

Си́лою Бо́жиею укрепля́еми му́ченицы сла́внии, пагуборо́дную си́лу, и́же в зло́бе си́льнаго врага́, до конца́ погуби́сте, и побе́дныя прия́сте Боже́ственныя венцы́.

И́же преподо́бныя, Влады́ко, яви́л еси́ врага́ победи́тели, и святи́тели пома́занием пресвяты́м освяти́вый Христе́, те́х мольба́ми освяти́ и просвети́ пою́щыя Тя́.

Со проро́ки все́ми восхва́лим же́н Боже́ственных ли́к, я́же в посте́ просия́вшыя, и ве́рою пострада́вшыя, и многоко́зненнаго зми́я попра́вшыя.

Сла́ва: И́хже от на́с преста́вил еси́ Боже́ственною во́лею, Христе́, со святы́ми учини́, я́же в житии́ презре́в, Ще́дре, те́х прегреше́ния, мо́лимся, моли́твами святы́х Твои́х.

Богоро́дичен: И́же спасе́ни, Пречи́стая, Твои́м святы́м Рождество́м, гла́с Гаврии́лов вопие́м Ти́ ве́рно, е́же ра́дуйся, и мо́лимся: Твои́ми моли́твами, прегреше́ний проще́ние все́м на́м испроси́.

И́н Ирмо́с: И́же от не су́щих вся́ приведы́й, Сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.

Созда́вый мя́ от земли́, и к земли́ возвраще́на окая́ннаго обнови́вый светле́е, ду́шы усо́пших упоко́й моли́твами му́ченик.

Страстоте́рпец му́ченик, бие́ньми же и вяза́ньми, ра́нами и я́звами, умоле́н быва́я, ду́шы ра́б Твои́х во святы́х селе́ниих учини́, Ще́дре.

Сла́ва: Изба́ви Человеколю́бче рабы́ Твоя́ гее́нны, огня́ же и мра́чных селе́ний а́да, и́же ве́рою, Влады́ко, усо́пшыя Твое́ю наде́ждею.

И ны́не: Свяще́ннейшая, я́ко Ма́ти Зижди́теля тва́ри су́щи, сме́рти разо́ршаго си́лу, Богоро́дице Пречи́стая, и нетле́ние на́м дарова́вшаго.

Пе́снь 4

Ирмо́с: Приосене́нную го́ру Авваку́м прозря́ше пречи́стую Твою́ утро́бу, Чи́стая. Те́м взыва́ше: от ю́га прии́дет Бо́г, и Святы́й от горы́ приосене́нныя ча́щи.

Я́коже овча́та приведо́стеся вси́ во́лею закла́вшеся я́коже а́гнцы, му́дрии страда́льцы, А́гнцу на Дре́ве Кре́стнем благоизво́лившему Бо́жию Сло́ву закла́тися за ро́д челове́ческий.

Со преподо́бными почти́м благосла́вныя первосвяще́нники, свети́льники бы́вшыя ве́рным: е́реси же разруши́вшыя, и страсте́й тьму́ глубо́кую, и к незаходи́мому све́ту ве́рою прело́жшыяся.

Красото́ю слове́с, богогла́снии проро́цы просвеща́ют ве́рных ду́шы, по́двигов же светлостьми́, и чуде́с восто́ками озаря́ют сердца́ богоно́сныя жены́.

Сла́ва: И́же житие́ оста́вльшыя, преми́рней сла́ве прича́стники покажи́, сло́ве Бо́жий, прегреше́ний избавле́ние си́м да́руяй бла́же, я́же соде́яша на земли́ в ра́зуме и не в ра́зуме.

Богоро́дичен: Му́чеников сла́ву, святи́телей и преподо́бных Боже́ственное удобре́ние, и ве́рных утвержде́ние, проро́ков оглаше́ние, Всепе́тую воспои́м Госпо́дню Ма́терь.

И́н Ирмо́с: Положи́л еси́ к на́м тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ве си́ле Твое́й, Го́споди.

Во гро́б за ны́ ми́лостивно всели́вся, Влады́ко, гро́бы истощи́л еси́ я́ко Бо́г, и победоно́сцы я́вль му́ченики, в ме́сте ослабле́ния усо́пшыя рабы́ Твоя́ учини́.

И́же страда́лец кре́пкия по́двиги, и ра́ны, и удо́в отсече́ния, я́же за Тя́ претерпе́ша, Влады́ко, ра́дуяся прие́мый, и я́же прия́л еси́, изба́ви от муче́ния.

Сла́ва: И́же манове́нием свои́м живота́ име́я уме́рение, безконе́чныя Твоея́ жи́зни и нетле́нныя сла́вы сподо́би, я́же к Тебе́ преста́вил еси́, грехо́вное разо́рь средогра́дие.

И ны́не: Ма́ти вои́стинну и Де́ва яви́лася еси́, Всенепоро́чная, зача́тие и рождество́ и́стинно, к де́вству еди́на сочета́вши: Бо́га бо родила́ еси́, сме́рти разо́ршаго си́лу.

Пе́снь 5

Ирмо́с: Све́том твои́м невече́рним, Христе́, озари́, Бо́же, смире́нную мою́ ду́шу, и наста́ви на стра́х Тво́й, зане́ све́т повеле́ния Твоя́.

Ра́ны ва́шя и я́звы, врагу́ у́бо яви́шася я́звы неисце́льныя: я́звы же ны́не исцеля́ют все́х ве́рных страда́льцы Госпо́дни.

Воспои́м преподо́бных мно́жество, и ублажи́м святи́тели Христо́вы, и почти́м проро́ки Его́, ны́не о на́с при́сно моля́щыяся.

Бо́га вопло́щшася на́с ра́ди, лю́бящя всесла́вныя жены́, нра́вом пра́вым пострада́вшя, и пости́вшяся, на небесе́х ны́не пребыва́ют.

Сла́ва: В ра́йстей, Го́споди, пи́щи, во стране́ живы́х, Христе́, иде́же сия́ет Тво́й све́т, всели́ я́же преста́вил еси́ от земли́, ве́рныя Твоя́ рабы́.

Богоро́дичен: Из Тебе́, Пречи́стая, Бо́г воплоти́ся, и вы́шшую Тя́ а́нгел показа́ ны́не, тва́рей же все́х преиму́щую, Влады́чице: те́мже Тя́ воспева́ем.

И́н Ирмо́с: К Тебе́ у́тренюю, все́х Творцу́, преиму́щему вся́к у́м ми́рови, зане́ све́т повеле́ния Твоя́, в ни́хже наста́ви мя́.

В Це́ркви пе́рвенец, Бла́же, преше́дшыя от на́с му́ченик ра́ди, и честны́х страда́лец мольба́ми: с пра́ведными причти́.

За избавле́ние мно́гих прегреше́ний, пресвяту́ю кро́вь Твою́, Христе́, излия́л еси́: и ны́не му́ченик Твои́х спа́се, мольба́ми, благоче́стно усо́пшыя упоко́й.

Сла́ва: Упра́ви Сло́ве, отше́дших ду́шы в ве́чное ме́сто сла́дости Твоея́, я́же па́че ума́, и святы́х Боже́ственныя све́тлости сподо́би.

И ны́не: Тебе́ Де́ву, Ю́же па́че сло́ва во чре́ве необъиме́нное Сло́во заче́ншую, ме́ртвым жи́знь даю́щаго, досто́йно блажи́м.

Пе́снь 6

Ирмо́с: Глубина́ страсте́й воста́ на мя́, и бу́ря проти́вных ве́тров: но предвари́в мя́ Ты́ спаси́, Спа́се, и изба́ви от тли́, я́ко спа́сл еси́ от зве́ря проро́ка.

Свети́льники честны́я це́ркве, а́гнца и па́стыря свяще́ннейшии всесла́внии Христо́вы страда́льцы да почту́тся свяще́нными пе́сньми.

Вознесе́ся преподо́бных собо́р вознесы́й Бо́га во смире́нии: и просла́вися мно́жество святи́телей в де́лех до́брых, просла́вивших Святу́ю Тро́ицу.

Чуде́с показа́нии Боже́ственных, и боле́зней терпе́нием соверше́нным, беззако́ннующих вра́г, свяще́нных же́н ли́к уязви́, му́жески до́блествовавше.

Сла́ва: В ве́ре и́хже от земли́ прия́л еси́, святы́х сопричти́ собо́ром, и в не́дрех ве́рнаго Авраа́ма учини́, Христе́, при́сно сла́вити Твое́ мно́гое благоутро́бие.

Богоро́дичен: Му́чеников, проро́ков и преподо́бных, и все́х от ве́ка пра́ведных похвала́, Ты́ еси́, Пречи́стая: те́мже гла́сы я́ве ра́достными чти́м Тя́ с ни́ми, Богоро́дице.

И́н Ирмо́с: Возведи́ от тли́ мя, Го́споди Бо́же мо́й, Ио́на вопия́ше, и а́з вопию́ Ти: из глубины́ изба́ви мя́, Спа́се, мно́гих мои́х зо́л, и к све́ту Твоему́, молю́ся, наста́ви.

Преложи́ на ра́дость в ве́ре усо́пших рыда́ние, моли́твами страстоте́рпец, препоясу́я и́х благоле́пне, Христе́, весе́лием, и к све́ту Твоему́ направля́я и наставля́я.

Упоко́й, Бо́же, мно́жеством щедро́т Твои́х у патриа́рхов в не́дре преста́вленыя, иде́же све́т сия́ет све́тлый Твоего́ лица́, Христе́, презира́я и́х вся́ прегреше́ния.

Сла́ва: Удиви́ на отше́дших отсю́ду, и лю́тых жития́ изба́вленых, чу́дную ми́лость, Христе́, человеколю́бия Твоего́, и ра́дости Твоея́ насы́ти, и кро́тости.

И ны́не: Ме́ртвости и тли́, и сме́рти изба́вихомся, пресла́вным рождество́м Твои́м, Богома́ти: Ты́ бо на́м родила́ еси́, Чи́стая, нетле́ния исто́чник, и Твои́м све́том ми́р ве́сь просвети́ла еси́.

Пе́снь 7

Ирмо́с: Трие́ о́троцы в пещи́ Тро́ицу прообрази́вше, преще́ние о́гненное попра́ша, и пою́ще вопия́ху: благослове́н еси́ Бо́же Оте́ц на́ших.

Стоя́ще посреде́ огня́, пресла́внии страстоте́рпцы Госпо́дни, Боже́ственную ро́су приима́сте с небесе́, и умертви́вшеся му́ками, многоко́зненнаго врага́ ме́ртва соде́ласте.

Боже́ственнии святи́телие, я́ко кора́бль испра́вивше Це́рковь Христо́ву, непотопля́ему ту́ соблюдо́ша, пре́лести избе́гше вои́стинну злы́х во́лн.

Умертви́вше пло́ть свяще́нными по́двиги по́стницы и́стиннии, безстра́стия насле́довасте живо́т несостаре́ющийся, пою́ще: благослове́н еси́ Го́споди Бо́же оте́ц на́ших.

Сла́ва: Не покажи́ пови́нны на суде́ рабы́ Твоя́, я́же преста́вил еси́ ве́рныя, но упоко́й сло́ве, во све́тлости святы́х Твои́х, пе́ти благоутро́бие Твое́.

Богоро́дичен: Му́чеников и преподо́бных, и проро́ков, Всенепоро́чная, и святы́х же́н, и все́х первосвяще́нников священнопожи́вших, ты́ еси́ сла́ва вои́стинну, с ни́миже чти́м тя́.

И́н Ирмо́с: Я́коже дре́вле благочести́выя три́ о́троки ороси́л еси́ в пла́мени халде́йстем, све́тлым Божества́ огне́м и на́с озари́, благослове́н еси́, взыва́ющыя, Бо́же оте́ц на́ших.

И́же все́м живонача́льная, вина́ же и си́ла твори́тельная, Сло́ве Бо́жий, обеща́нныя му́чеником пи́щи сподо́би ду́шы преста́вленных ра́б Твои́х. Благослове́н еси́ Бо́же оте́ц на́ших.

О телесе́х у́бо я́ко тле́нных, до́блественне неради́ша сла́внии му́ченицы Христе́: ны́не же со дерзнове́нием мо́лятся к Тебе́: ду́шы поко́й преста́вленных ра́б Твои́х. Оте́ц на́ших Бо́же, благослове́н еси́.

Сла́ва: Тро́стию кре́стною подписа́л еси́ оставле́ние грехо́в все́м ве́рным, ему́же ны́не ду́шы, я́же преста́вил еси́ к Тебе́, причасти́тися сподо́би, и весе́лием пе́ти Тя́: оте́ц на́ших Бо́же, благослове́н еси́.

И ны́не: Сло́во О́тчее, И́же вся́ во́лею содева́яй, естество́ челове́ческое погребе́ное страстьми́. Я́ко Бо́г обнови́: благослове́н, Пречи́стая, пло́д Твоего́ чре́ва.

Пе́снь 8

Ирмо́с: А́нгельми немо́лчно в вы́шних сла́вимаго Бо́га, небеса́ небе́с, земля́, и го́ры, и хо́лми, и глубина́, и ве́сь ро́д челове́ческий, пе́сньми Того́ я́ко Созда́теля и Изба́вителя благослови́те, и превозноси́те во вся́ ве́ки.

Нанесе́нием ра́н, и боле́зней приложе́ньми обдержи́ми зело́, не отверго́стеся и́стиннаго живота́, Госпо́дни страстоте́рпцы, ни истука́нным пода́сте по́чести, пре́лести лука́вей.

Свети́ла, я́коже на све́щницех положе́ни, честны́х доброде́телей, все́х озари́сте ду́шы, вся́ку тьму́ отгна́вше страстоте́рпцы священноде́йственнии, небе́сным умово́м сожи́телие.

Достохва́льнии проро́цы, и преподо́бных сосло́вие, и же́н все́х благогове́йных мно́жество достосла́вное, да воспое́тся досто́йно, о на́с моля́щеся Спасу́ и Бо́гу.

Сла́ва: Ты́ и́же живы́ми облада́яй, я́же от земли́ преста́вил еси́ ве́рныя, со святы́ми во све́те лица́ Твоего́ учини́, проще́ние прегреше́ний, мно́гаго ра́ди, Спа́се, милосе́рдия подая́ си́м.

Богоро́дичен: Многопе́тая Де́ва, проро́ков оглаше́ние, святи́телей и страда́льцев, и преподо́бных удобре́ние, и же́н святы́х ра́дость, да пое́тся по до́лгу во ве́ки.

И́н Ирмо́с: Служи́ти живо́му Бо́гу, в Вавило́не о́троки претерпе́вше, о мусики́йских орга́нех неради́ша, и посреде́ пла́мене стоя́ще, боголе́пную пе́снь воспева́ху глаго́люще: благослови́те вся́ дела́ Госпо́дня Го́спода.

Сы́й сокро́вище безсме́ртия, Ты́ живонача́льниче, ме́ртвым нетле́ние провозвести́л еси́, е́же твои́м му́чеником, Христе́, благоче́стно ве́рою Тебе́ пою́щым дарова́л еси́: благослови́те вся́ дела́ Госпо́дня Го́спода.

Му́дростию духо́вною, и терпе́нием де́л кре́пцыи страда́льцы о му́ках неради́ша, душа́м преста́вленным от Христа́ оставле́ния про́сят, зову́ще: благослови́те вся́ дела́ Госпо́дня Го́спода.

Сла́ва: Очи́сти, Бла́же, копие́м ре́бр Твои́х растерза́в рукописа́ние к Тебе́ преста́вленных, и средогра́дие оте́м прегреше́ний, песносло́вити Тя́ прие́м и́х, Спа́се, благоволи́: благослови́те вся́ дела́ Госпо́дня Го́спода..

И ны́не: О́блак Тя́ мы́сленный претру́ждшымся жа́ждею умерщвле́ния, Де́во Чи́стая, ве́мы, во́ду жи́ву оставле́ния источа́ющу, и ме́ртвым безсме́ртие все́м подаю́щую, ве́рою при́сно зову́щым: благослови́те вся́ дела́ Госпо́дня Го́спода.

Та́же, пе́снь Богоро́дицы: Вели́чит душа́ моя́ Го́спода.

Пе́снь 9

Ирмо́с: На Сина́йстей горе́ ви́де Тя́ в купине́ Моисе́й, неопа́льно о́гнь Божества́ заче́ншую во чре́ве: Дании́л же Тя́ ви́де го́ру несеко́мую, же́зл прозя́бший, Иса́иа взыва́ше от ко́рене Дави́дова.

Я́коже овча́та приведо́стеся закла́вшемуся на́с ра́ди, и Боже́ственныя ли́ки а́нгел испо́лнисте ра́дости, страстоте́рпцы Христо́вы. Те́мже моли́твами ва́шими все́х утверди́те, и от врага́ вре́дныя пре́лести все́х изба́вите.

Я́ко свети́льницы живо́тное сло́во иму́ще, просвети́сте ду́шы, первосвяще́нницы Христо́вы свяще́ннейшии, Боже́ственныя сла́вы прича́стницы: я́ко о́гнь прии́мше ду́ха преподо́бнии, стра́сти попали́сте, и и́дольское разжиза́ние погуби́сте.

Со проро́ки святы́ми почти́м преподо́бных мно́жество, пре́жде зако́на, и в зако́не возсия́вших житие́м чи́стым, же́н же святы́х ли́ки восхва́лим, и возопии́м: Го́споди, моли́твами и́х спаси́ все́х на́с.

Сла́ва: Погребе́ние Твое́, Христе́, и воскре́сние, все́м бы́сть живо́т. Сего́ ра́ди дерза́юще вопие́м Ти́: со все́ми избра́нными ве́рныя, я́же прия́л еси́ рабы́ Твоя́ упоко́й си́х согреше́ния вся́ проща́я, я́ко Бо́г преблаги́й.

Богоро́дичен: Стра́шно ме́сто сие́, возопи́, егда́ Иа́ков Твое́ воображе́ние в ле́ствице ви́де, Богоро́дице, нело́жне: му́чеников сла́во, и преподо́бных похвало́, а́нгелов украше́ние, и все́х проро́ков, и ве́рных спасе́ние.

И́н Ирмо́с: Купино́ю и огне́м пропи́санную в Сина́и законополо́жнику Моисе́ю, и Бо́жий во чре́ве неопа́льно заче́ншую о́гнь, всесве́тлую и негаси́мую свещу́, су́щую Богоро́дицу пе́сньми чту́ще велича́ем.

Ны́не я́ко еди́н бла́г, и человеколю́бец Бо́г, преста́вленныя к Тебе́, му́ченик мольба́ми, в стране́ кро́тких земли́ всели́, разреше́ние прегреше́ний подая́, Ми́лостиве, си́м, да непреста́нно пе́сньми Тя́ велича́ем.

Во святы́х селе́ниих, в не́дрех Авраа́ма, я́же прия́л еси́, Христе́, причти́ с пра́ведными Твои́ми: иде́же сия́ет све́т лица́ Твоего́ неизрече́нный и Боже́ственный, и пребыва́ющее во ве́ки вои́стинну присносу́щное ра́дование.

Блаже́нныя Твоея́ жи́зни, и ве́чных бла́г непреста́нныя пи́щи, весе́лия и́стиннаго сподо́би рабы́ Твоя́, я́же преста́вил еси́ во́лею, Жизнода́вче, в ме́сте зла́чне, на вода́х поко́йных.

И ны́не: Я́ко святы́й ковче́г, и свиде́ния ски́ния законода́вца Бо́га, прия́ла еси́ во утро́бе, Всенепоро́чная, Зижди́теля Твоего́, изрече́ние дре́вния кля́твы, и зако́н сме́рти свое́ю сме́ртию испрове́ргшаго.

Та́же, Досто́йно е́сть: Ектениа́, и свети́лен, и псалмы́ обы́чны.

На хвали́тех стихи́ры му́ченичны, гла́с 3:

Святы́х му́ченик па́мять, прииди́те, лю́дие, вси́ почти́м, я́ко позо́р бы́ша а́нгелом и челове́ком и побе́ды венцы́ от Христа́ прия́ша, и мо́лятся о душа́х на́ших.

Царе́й и мучи́телей стра́х отри́нуша Христо́вы во́ини, и благодерзнове́нно и му́жески Того́ испове́даша, вся́ческих Го́спода Бо́га и Царя́ на́шего, и мо́лятся о душа́х на́ших.

Си́лы святы́х А́нгел удиви́шася му́ченическим страда́нием, я́ко пло́тию сме́ртною обложе́ни, о му́ках неради́ша, подо́бницы бы́вше страсте́м Спа́са Христа́, и мо́лятся о душа́х на́ших.

Я́ко свети́ла в ми́ре сия́ете, и по сме́рти святи́и му́ченицы, по́двигом до́брым подви́гшеся: и иму́ще дерзнове́ние, Христа́ умоли́те, поми́ловатися душа́м на́шым.

Ме́ртвен: Челове́цы, что́ всу́е мяте́мся? Пу́ть кра́ток е́сть, теце́м: ды́м е́сть житие́, па́ра, пе́рсть и пе́пел: вма́ле явля́ется, и вско́ре погиба́ет. Те́мже Христу́ Безсме́ртному Царю́ возопии́м: преста́вленныя от на́с упоко́й, иде́же все́х е́сть веселя́щихся жили́ще у Тебе́.

Сла́ва, и ны́не, Богоро́дичен: Без се́мене зачала́ еси́ от Ду́ха Свята́го, и славосло́вяще воспева́ем Тя́: ра́дуйся, Пресвята́я Де́во.

На стихо́вне стихи́ры ме́ртвены. Творе́ние Феофа́ново, гла́с 3.

Подо́бен: Ве́лия Креста́ Твоего́:

Сла́влю Кре́ст Тво́й честны́й, и́мже живо́т дарова́ся, и пи́щи наслажде́ние, ве́рою и любо́вию Тя́ пою́щым, Еди́не Многоми́лостиве. Те́мже вопие́м Ти́, Христе́ Бо́же: преста́вльшыяся от на́с упоко́й, иде́же все́х е́сть веселя́щихся жили́ще у Тебе́.

Сти́х: Блаже́ни, я́же избра́л и прия́л еси́, Го́споди.

Еди́не Ми́лостиве и Благоутро́бне, име́яй непостижи́мую бла́гости пучи́ну, све́дый естество́ челове́ческое, е́же соде́лал еси́: Тя́ мо́лим, Христе́ Бо́же, преста́вленныя от на́с упоко́й, иде́же е́сть все́х веселя́щихся жили́ще у Тебе́.

Сти́х: Ду́шы и́х во благи́х водворя́тся.

Усну́в во гро́бе я́ко Челове́к, си́лою же непобеди́мою я́ко Бо́г воскреси́л еси́, я́же во гробе́х спя́щыя, немо́лчныя пе́сни Тебе́ принося́щыя. Те́мже мо́лим Тя́, Христе́ Бо́же: преста́вленныя от на́с упоко́й, иде́же е́сть все́х веселя́щихся жили́ще у Тебе́.

Сла́ва, и ны́не, Богоро́дичен: Свещу́ разу́мную Тя́, нося́щую све́т Божества́, совоку́пльшася дебельству́ челове́ческаго существа́, Богоро́дице, вси́ ве́мы: Твоего́ моли́ Сы́на и Бо́га, преста́вленныя от на́с упоко́ити, иде́же е́сть все́х веселя́щихся ра́дование.

Та́же, Бла́го е́сть испове́датися Го́сподеви: Трисвято́е. По О́тче на́ш: тропа́рь, ектениа́, и отпу́ст. Та́же ча́с пе́рвый, и отпу́ст.

В суббо́ту блаже́нны, гла́с 3:

Отве́ргша, Христе́, за́поведь Твою́ пра́отца Ада́ма, из рая́ изгна́л еси́: разбо́йника же, Ще́дре, испове́давша Тя́ на кресте́, во́нь всели́л еси́, зову́ща: помяни́ мя, Спа́се, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

О́гненным ра́нам примеша́ющеся страстоте́рпцы Христо́вы, ро́су небе́сную обрето́сте, прохлажда́ющую же и укрепля́ющую ва́с терпе́ти плотски́я го́рькия боле́зни: те́мже облегчева́ете вся́ку боле́знь при́сно от ду́ш на́ших.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Святи́телие свяще́ннии, проро́цы сла́внии, преподо́бных мно́жество, и же́н Боже́ственных собо́р, пострада́вших ве́рою, и низложи́вших пре́лесть вра́жию, небе́сную сла́ву получи́ша: и́хже моли́твами, Спа́се, уще́дри рабы́ Твоя́.

Сти́х: Ра́дуйтеся и весели́теся, я́ко мзда́ ва́ша мно́га на небесе́х.

Иде́же сия́ет Тво́й све́т, во хра́мех избра́нных твои́х, Бо́же, иде́же пи́ща присносу́щная, я́же от на́с ве́рою преста́вленныя учини́ Иису́се, презря́ и́х, Спа́се, согреше́ния: да Тя́, Влады́ко, приле́жно сла́вим.

Сла́ва: Отцу́, и Сы́ну, и Ду́ху Боже́ственному, покланя́емся ве́рнии Тро́ице несозда́нней, в трие́х ли́цех, и во еди́ном Божестве́, при́сно от безпло́тных си́л, в трие́х свяще́ниих славосло́вимей ве́рно.

И ны́не: Просвеще́ние и очище́ние, из Тебе́ яви́ся все́х изба́витель, Богора́дованная Влады́чице, его́же приле́жно моли́ в бу́дущий су́д стра́шный, осужде́ния вся́каго на́с изба́вити, Пречи́стая, ве́рно всегда́ пою́щих Тя́.

Коне́ц тре́тиему гла́су.


 Глас 2Глас 3Глас 4 

Источник: Свято-Успенский Псково-Печерский монастырь. Издательский отдел Московского Патриархата малой вечерни, великой вечерни, бденной, полиелейной, шестеричной служб, утрени без бдения. Найти можно в Типиконе. Кни́га моле́бна с Бо́гом святы́м осмогла́сника, содержа́щая в себе́ подоба́ющее возсле́дование воскре́сныя слу́жбы осми́ гласо́в с шестию́ дне́й

Комментарии для сайта Cackle