Октоих

Глас 1

Неделя

В суббо́ту ве́чера, на ма́лей вече́рни

на Го́споди воззва́х, поста́вим стихо́в 4: и пое́м стихи́ры воскре́сны Осмогла́сника 3, повторя́юще 1-й сти́х, гла́с 1. Творе́ние преподо́бнаго отца́ на́шего Иоа́нна Дамаски́на

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Вече́рния на́ша моли́твы, приими́, Святы́й Го́споди, и пода́ждь на́м оставле́ние грехо́в, я́ко еди́н еси́ явле́й в ми́ре Воскре́сение.

Обыди́те, лю́дие, Сио́н, и объими́те его́, и дади́те сла́ву в не́м воскре́сшему из ме́ртвых: я́ко То́й е́сть Бо́г на́ш, избавле́й на́с от беззако́ний на́ших.

Прииди́те лю́дие, воспои́м и поклони́мся Христу́, сла́вяще Его́ из ме́ртвых Воскре́сение: я́ко То́й е́сть Бо́г на́ш, от пре́лести вра́жия ми́р избавле́й.

Сла́ва, и ны́не: Богоро́дичен догма́тик:

Де́вственное торжество́ дне́сь, бра́тие, да взыгра́ется тва́рь, да ликовству́ет челове́чество: созва́ бо на́с свята́я Богоро́дица, нескве́рное сокро́вище де́вства: слове́сный втора́го Ада́ма ра́й: храни́лище соедине́ния дву́ естеству́: торжество́ спаси́тельнаго примире́ния: черто́г, в не́мже Сло́во уневе́стивый пло́ть вои́стинну: ле́гкий о́блак, Иже над херуви́мы Су́щаго, с те́лом носи́вший. Тоя́ моли́твами, Христе́ Бо́же, спаси́ ду́шы на́ша.

Та́же, Све́те ти́хий: Проки́мен: Госпо́дь воцари́ся: со стихи́ его́. И по Сподо́би, Го́споди, в ве́чер се́й: Иере́й ектении́ не глаго́лет, но пое́м на стихо́вне стихи́ру воскре́сну:

Стра́стию Твое́ю Христе́ от страсте́й свободи́хомся, и Воскре́сением Твои́м из истле́ния изба́вихомся, Го́споди, сла́ва Тебе́.

И и́ны стихи́ры Пресвяты́я Богоро́дицы. Подо́бен: Небе́сных чино́в:

Сти́х: Помяну́ и́мя Твое́ во вся́ком ро́де и ро́де.

Препросла́влена еси́ в ро́де родо́в, Де́во Ма́ти, Отрокови́це, Богоро́дице Мари́е, ми́ра предста́тельство, ро́ждши пло́тию Сы́на Безнача́льнаго Отца́, соприсносу́щна же Ду́ху вои́стинну: Его́же моли́ спасти́ся на́м.

Сти́х: Слы́ши, Дщи́, и ви́ждь, и приклони́ у́хо Твое́.

Содержи́мии скорбьми́ ненача́емыми, Чи́стая, Тя́ предста́тельство еди́но иму́ще, Де́во, вопие́м благода́рно: спаси́ ны, Всесвята́я Богоневе́стная: Ты́ бо еси́ ми́ра прибе́жище, и заступле́ние ро́да на́шего.

Сти́х: Лицу́ Твоему́ помо́лятся бога́тии лю́дстии.

Обнови́ся ми́р в Рождестве́ Твое́м, Богороди́тельнице Отрокови́це, ве́рных спасе́ние, и неусыпа́емая предста́тельнице благоче́стно моля́щих Тя́, Пречи́стая, не преста́й моля́щи приле́жно о все́х пою́щих Тя́.

Сла́ва, и ны́не: догма́тик, гла́с то́йже:

О́блак Тя́ све́та присносу́щнаго, Де́во, проро́к именова́: из Тебе́ бо я́ко до́ждь на руно́ сше́д Сло́во О́тчее, и из Тебе́ возсия́вый, ми́р просвети́, пре́лесть упраздни́ Христо́с Бо́г на́ш. Того́ моля́щи приле́жно, Пресвята́я, мо́лимся, не преста́й о на́с, и́же и́стинную Богоро́дицу испове́дающих Тя́.

Та́же: Ны́не отпуща́еши: Трисвято́е. По О́тче на́ш: тропа́рь воскре́сный. Сла́ва, и ны́не, Богоро́дичен его́. Ектениа́ ма́лая, и отпу́ст.

В суббо́ту на вели́цей вече́рни

по предначина́тельном псалме́, обы́чное стихосло́вие псалти́ря. На Го́споди воззва́х, поста́вим стихо́в 10: и пое́м стихи́ры воскре́сны осмогла́сника 3, и Анато́лиевы 4, и Мине́и 3, или́ 6. А́ще пра́зднуемый святы́й: Сла́ва, Мине́и: И ны́не, Богоро́дичен 1-й, гла́са.

Стихи́ры воскре́сны осмогла́сника, гла́с 1

Сти́х: Изведи́ из темни́цы ду́шу мою́, испове́датися и́мени Твоему́.

Вече́рния на́ша моли́твы приими́, Святы́й Го́споди, и пода́ждь на́м оставле́ние грехо́в, я́ко еди́н еси́ явле́й в ми́ре Воскре́сение.

Сти́х: Мене́ жду́т пра́ведницы, до́ндеже возда́си мне́.

Обыди́те, лю́дие, Сио́н, и объими́те его́, и дади́те сла́ву в не́м Воскре́сшему из ме́ртвых: я́ко То́й е́сть Бо́г на́ш, избавле́й на́с от беззако́ний на́ших.

Сти́х: Из глубины́ воззва́х к Тебе́, Го́споди, Го́споди, услы́ши гла́с мо́й.

Прииди́те, лю́дие, воспои́м, и поклони́мся Христу́, сла́вяще Его́ из ме́ртвых Воскре́сение: я́ко То́й е́сть Бо́г на́ш, от пре́лести вра́жия ми́р избавле́й.

И́ны стихи́ры Анато́лиевы, гла́с 1

Сти́х: Да бу́дут у́ши Твои́ вне́млюще гла́су моле́ния моего́.

Весели́теся, небеса́, воструби́те, основа́ния земли́, возопи́йте, го́ры, весе́лие: се́ бо Емману́ил грехи́ на́ша на Кресте́ пригвозди́, и живо́т дая́й, сме́рть умертви́, Ада́ма воскреси́вый, я́ко Человеколю́бец.

Сти́х: А́ще беззако́ния на́зриши, Го́споди, Го́споди, кто́ постои́т? я́ко у тебе́ очище́ние е́сть.

Пло́тию во́лею Распе́ншагося на́с ра́ди, Пострада́вша и Погребе́нна, и Воскре́сша из ме́ртвых, воспои́м глаго́люще: утверди́ правосла́вием Це́рковь Твою́, Христе́, и умири́ жи́знь на́шу, я́ко Бла́г и Человеколю́бец.

Сти́х: И́мене ра́ди Твоего́, потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Живоприе́мному Твоему́ гро́бу предстоя́ще недосто́йнии, славосло́вие прино́сим неизрече́нному Твоему́ благоутро́бию, Христе́ Бо́же на́ш: я́ко кре́ст и сме́рть прия́л еси́, Безгре́шне, да ми́рови да́руеши Воскре́сение, я́ко человеколю́бец.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

И́же Отцу́ Собезнача́льна и Соприсносу́щна Сло́ва, от Деви́ческа чре́ва Произше́дшаго неизрече́нно, и кре́ст и сме́рть на́с ра́ди Во́лею Прие́мшаго, и Воскре́сша во сла́ве, воспои́м глаго́люще: Живода́вче Го́споди, сла́ва Тебе́, Спа́се ду́ш на́ших.

И́ны стихи́ры пресвяте́й Богоро́дице, творе́ние Па́вла Аморре́йскаго, пое́мыя иде́же не́сть Мине́и, или́ на Лити́и. [Ве́домо у́бо бу́ди я́ко в гре́ческих перево́дех си́х стихи́р на ряду́ не́сть.]

Стихи́ры, гла́с 1. Подо́бен: Небе́сных чино́в.

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

Святе́йшая святы́х все́х си́л, честне́йшая вся́кия тва́ри, Богоро́дице Влады́чице Ми́ра, спаси́ на́с я́же Спа́са Ро́ждшая, от все́х прегреше́ний, и боле́зней и бе́д, моли́твами твои́ми.

Сти́х: Хвали́те Го́спода, вси́ язы́цы, похвали́те Его́, вси́ лю́дие.

Я́же благоутро́бия две́ре, смире́нную мою́ ду́шу да не пре́зриши, ве́рно молю́ Тя, Отрокови́це: но уще́дри вско́ре, и спаси́ ю́ от пучи́ны согреше́ний мои́х, и обно́вльши благода́ть Твою́ на мне́, просвети́, Де́во чи́стая.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Ты́ Бо́га челове́ком соедини́ла еси́, Влады́чице: Ты́ ме́ртвеное существо́ возвела́ еси́ еди́на, к Боже́ственному нетле́нию: Ты́ земны́м спасе́ние источи́ла еси́: ты́ Богоро́дице, свободи́ на́с от все́х муче́ний.

Сла́ва, Мине́и. И ны́не, Богоро́дичен:

Всеми́рную сла́ву, от челове́к прозя́бшую, и Влады́ку ро́ждшую, небе́сную две́рь воспои́м Мари́ю Де́ву, безпло́тных пе́снь, и ве́рных удобре́ние: Сия́ Бо яви́ся не́бо, и хра́м Божества́: Сия́ прегражде́ние вражды́ разруши́вши, ми́р введе́, и Ца́рствие отве́рзе. Сию́ у́бо иму́ще ве́ры утвержде́ние, побо́рника и́мамы из Нея́ ро́ждшагося Го́спода. Дерза́йте у́бо, дерза́йте, лю́дие Бо́жии: и́бо То́й победи́т враги́, я́ко Всеси́лен.

Вхо́д. Све́те ти́хий: По вхо́де же положи́в учине́нный мона́х обы́чный покло́н предстоя́телю, пое́т дневны́й проки́мен: Госпо́дь воцари́ся, в ле́поту облече́ся. Сти́х: Облече́ся Госпо́дь в си́лу, и препоя́сася. Сти́х: И́бо утверди́ вселе́нную, я́же не подви́жится. Сти́х: До́му твоему́ подоба́ет святы́ня, Го́споди, в долготу́ дни́й.

Та́же обы́чная ектениа́. Сподо́би, Го́споди: Испо́лним вече́рнюю. И про́чая. И по возгла́се пое́м самогла́сну стихи́ру свята́го оби́тели: лити́ю творя́ще в притво́ре, на не́йже пое́м стихи́ры Па́вла Аморре́йскаго, или́ что́ настоя́тель изво́лит.

По обы́чных же моли́твах вхо́дим во хра́м, пою́ще стихи́ру, гла́с 1:

Стра́стию Твое́ю Христе́, от страсте́й свободи́хомся, и Воскре́сением Твои́м из истле́ния изба́вихомся, Го́споди, сла́ва Тебе́.

И́ны стихи́ры, по алфави́ту

Сти́х: Госпо́дь воцари́ся, в ле́поту облече́ся.

Да ра́дуется тва́рь, небеса́ да веселя́тся, рука́ми да воспле́щут язы́цы с весе́лием: Христо́с бо Спа́с на́ш, на кресте́ пригвозди́ грехи́ на́ша: и сме́рть умертви́в живо́т на́м дарова́, па́дшаго Ада́ма всеро́днаго Воскреси́вый, я́ко Человеколю́бец.

Сти́х: И́бо утверди́ вселе́нную, я́же не подви́жится.

Ца́рь сы́й небесе́ и земли́ непостижи́ме, во́лею распя́лся еси́ за человеколю́бие. Его́же а́д сре́т до́ле, огорчи́ся, и пра́ведных ду́шы прие́мша возра́довашася: Ада́м же, ви́дев Тя́ Зижди́теля в преиспо́дних, воскре́се. О чудесе́! ка́ко сме́рти вкуси́ все́х Жи́знь? Но я́коже восхоте́ ми́р просвети́ти зову́щий, и глаго́лющий: воскресы́й из ме́ртвых, Го́споди, сла́ва Тебе́.

Сти́х: До́му Твоему́ подоба́ет святы́ня, Го́споди, в долготу́ дни́й.

Жены́ мироно́сицы, ми́ра нося́ща, со тща́нием и рыда́нием гро́ба Твоего́ достиго́ша, и не обре́тша пречи́стаго те́ла Твоего́, от а́нгела же уве́девша но́вое и пресла́вное чу́до, апо́столом глаго́лаху: воскре́се Госпо́дь подая́ ми́рови ве́лию ми́лость.

Сла́ва, Мине́и, а́ще и́мать. А́ще ли не́сть:

Сла́ва, и ны́не, Богоро́дичен:

Се́ испо́лнися Иса́иино прорече́ние, Де́ва бо родила́ еси́, и по рождестве́ я́ко пре́жде рождества́ пребыла́ еси́: Бо́г бо бе́ рожде́йся, те́мже и естества́ новопресече́1. Но, о Богома́ти, моле́ния Твои́х рабо́в, в Твое́м хра́ме приноси́мая Тебе́ не пре́зри: но я́ко Благоутро́бнаго Твои́ма рука́ма нося́щи, на Твоя́ рабы́ умилосе́рдися, и моли́ спасти́ся душа́м на́шым.

Та́же: Ны́не отпуща́еши: Трисвято́е. По О́тче на́ш:

Тропа́рь воскре́сный, гла́с 1:

Ка́мени запеча́тану от иуде́й, и во́ином стрегу́щым пречи́стое те́ло Твое́, воскре́сл еси́ тридне́вный Спа́се, да́руяй ми́рови жи́знь. Сего́ ра́ди си́лы небе́сныя вопия́ху Ти́, Жизнода́вче: сла́ва Воскре́сению Твоему́ Христе́: сла́ва Ца́рствию Твоему́: сла́ва смотре́нию Твоему́, еди́не Человеколю́бче.

Богоро́дичен: Гаврии́лу веща́вшу Тебе́, Де́во, ра́дуйся, со гласом воплоща́шеся все́х Влады́ка, в Тебе́ святе́м киво́те, я́коже рече́ пра́ведный Дави́д: яви́лася еси́ ши́ршая небе́с, поноси́вши Зижди́теля Твоего́. Сла́ва все́льшемуся в Тя́: сла́ва проше́дшему из Тебе́: сла́ва свободи́вшему на́с Рождество́м Твои́м.

То́йже тропа́рь и на Бо́г Госпо́дь: И про́чее после́дование.

В суббо́ту на повече́рии,

глаго́лет иере́й: Благослове́н Бо́г на́ш: И мы́: Сла́ва тебе́, Бо́же на́ш, сла́ва тебе́. Царю́ небе́сный: Трисвято́е. И по О́тче на́ш: Го́споди поми́луй, 12. Сла́ва, и ны́не: Прииди́те, поклони́мся: три́жды. Псало́м 50: Поми́луй мя́ Бо́же: Псало́м 69: Бо́же, в по́мощь мою́ вонми́: Псало́м 142: Го́споди, услы́ши моли́тву мою́: Посе́м: Сла́ва в вы́шних Бо́гу: Го́споди, прибе́жище бы́л еси́ на́м: Сподо́би, Го́споди, в но́щь сию́: Та́же: Ве́рую во еди́наго Бо́га: Посе́м пое́м кано́н пресвяте́й Богоро́дице, гла́с 1.

Пе́снь 1

Ирмо́с: Го́рькия рабо́ты изба́влься Изра́иль, непроходи́мое про́йде я́ко су́шу, врага́ зря́ потопля́ема, пе́снь я́ко благоде́телю пое́т Бо́гу, чудоде́ющему мы́шцею высо́кою, я́ко просла́вися.

Припе́в: Пресвята́я Богоро́дице, спаси́ на́с.

Ужасо́шася стра́хом Всецари́це а́нгельская чинонача́лия, хва́ляще Тя́: пое́т же бла́гости ра́ди вся́к у́м, я́ко Ма́терь Зижди́теля: похвалы́ бо вся́кия превозшла́ еси́ чи́н, Христа́ ро́ждши.

Лю́тыми напа́стьми томи́м, и от вра́г стужа́ем окая́нный, с пла́чем приглаша́ю: свы́ше мне́ простри́, Пребога́тая, ру́ку Твою́, избавля́ющи мя́, и безбе́дно пожи́ти сподо́би моли́твами Твои́ми.

Сла́ва: Души́ та́йная прегреше́ния, лечбо́ю милосе́рдия исцели́, и утиши́ плотско́е стремле́ние, Богоро́дице: и враго́в ко́пия и стре́лы возвра́щши, кре́пко в сердца́ и́х вонзи́.

И ны́не: Па́жить дре́внюю потреби́ человекоуби́йственную, утро́ба Деви́ча Христа́ ро́ждши: те́мже вся́ тва́рь ра́дуется ны́не, Пречи́стая, я́ко ожи́вльшися: и согла́сно воспева́ет Твоего́ Сы́на и Бо́га.

Пе́снь 3

Ирмо́с: Не му́дростию и бога́тством да хва́лится сме́ртный свои́м, но ве́рою Госпо́днею, правосла́вно взыва́я Христу́ Бо́гу, и поя́ при́сно: на ка́мени Твои́х за́поведей утверди́ мя Влады́ко.

Иа́ков вели́кий на пути́ спя́ иногда́, низходя́щыя свы́ше ле́ствицею, Де́во, на зе́млю а́нгелы ви́дя, дивля́шеся: и возбну́в, прописа́ я́ве Две́рь Тя́ Небе́сную.

Вре́менным удержа́нием, в напа́сти вве́ржен окая́нный а́з, и бу́рями напа́стными томи́м, увы́ мне́, вопию́: Я́же Бо́га ро́ждшая, и возне́сшая ро́г на́ш, спаси́ мя моли́твами Твои́ми.

Сла́ва: С небесе́ ру́ку кре́пкую просте́р, о все́х Царю́ Христе́, чу́вственных и мы́сленных, Иису́се мо́й, главы́ враго́в под но́зе положи́, Богоро́дицу Ма́терь Твою́ ве́рно пропове́дающих.

И ны́не: Иса́ия дре́вле, очи́щся у́глем Ду́ха, от Твоея́ утро́бы я́ве, Пребога́тая Де́во, сы́ну взыва́ше роди́тися: Его́же в после́дняя времена́, мене́ ра́ди, без му́жа родила́ еси.

Пе́снь 4

Ирмо́с: Слы́ша дре́вле Авваку́м, Христе́, чу́дный Тво́й слу́х, и стра́хом взыва́ше: от ю́га Бо́г прии́дет, и Святы́й от горы́ приосене́нныя ча́щи, спасти́ пома́занныя: сла́ва си́ле Твое́й, Го́споди.

Тебе́ я́ко су́щую в жена́х красну́ и прече́стну, я́ко из пусты́ни восходя́щу, и О́трасль Христа́ на руку́ нося́щу, Ма́ти Бо́жия, прообража́ше миронача́льник вопия́: сла́ва си́ле Твое́й, Го́споди.

Приклони́ ми́ у́хо Твое́, Блага́я, и ви́ждь мое́ озлобле́ние, и бе́д умноже́ние: к Тебе́ бо, Влады́чице, душе́вное о́ко просте́р, и с пла́чем коле́на прикло́нь, ны́не молю́ вопия́: уста́ви ми́ напа́стей смуще́ние.

Сла́ва: Сте́ну Тя́ необори́мую ве́дый, привлече́н мольбо́ю, Тво́й ра́б ны́не к Тебе́ прибега́ю, и стре́лы вра́жия, я́ко младе́нческия вменя́ю неде́йственны, о Пребога́тая! Те́мже и ра́дуяся вопию́: сла́ва, Богома́ти, Рождеству́ Твоему́.

И ны́не: Си́ла Вы́шняго Тя́, Де́во, осени́ наи́тием Боже́ственнаго Ду́ха: и тогда́ па́че естества́ вся́ческих Госпо́дь, пло́ть и ду́шу оживотвори́в, приедини́ Себе́, пребы́в в то́мжде естестве́.

Пе́снь 5

Ирмо́с: Све́т Тво́й незаходи́мый возсия́й, Христе́, в сердца́ ве́рно пою́щих Тя́, ми́р подава́яй на́м, па́че ума́. Те́м от но́щи неве́дения ко дню́ све́том Твои́м теку́ще, славосло́вим Тя́, Человеколю́бче.

Боже́ственную Тя́, прови́дев иногда́ Дании́л, несеко́мую го́ру, Препе́тая, вопия́ше проявле́нне, усещи́ся от Тебе́ ка́меню Богоро́дия, Христу́ Спа́су ми́ра: Его́же ве́рнии ны́не чту́ще, восхваля́ем Тя́, Богоневе́сто.

Напа́стьми окая́нный мно́гими па́дся, с боле́знию и пла́чем се́рдца моля́ся, безсту́дно служи́тель Тво́й вопию́: изба́ви, Богороди́тельнице, от бе́д одержа́щих мое́ смире́ние, и весе́лия мя́ испо́лни.

Сла́ва: Страсте́й мои́х свире́пую пучи́ну ути́ши, кре́пкою Твое́ю моли́твою, Блага́я, я́же страсте́й кроме́ ро́ждшая Христа́: я́ко да в тишине́ души́ ны́не живы́й, про́чее жи́зни моея́, в пе́снех воспева́ю Тя́.

И ны́не: Бо́га ка́ко на руку́ но́сиши, рцы́? И ка́ко дои́ши, вся́ческая руко́ю Содержа́щаго, о Де́во Всеблаже́нная, А́з, рече́, чиста́ пребыва́ю и по рождестве́, Христа́ Бо́га ро́ждши, Ада́мов до́лг, и прама́терний отъе́мши.

Пе́снь 6

Ирмо́с: Ве́сь от страсте́й безме́рных содержу́ся, и ки́том зо́л сниспадо́х: но возведи́ из истле́ния мя́, Бо́же, я́коже пре́жде Ио́ну, и ве́рою безстра́стие ми́ да́руй, я́ко да во гла́се хвале́ния, и спасе́ния ду́хом пожру́ Ти.

Седе́ния не отсту́пль не́др Роди́теля, в не́дрех Ма́терних Сы́н Предле́тный: напосле́док же, и́же пре́жде ве́к Сы́й со Отце́м, из утро́бы Де́вы произы́де, вся́ к жи́зни безсме́ртней возводя́, неизрече́нною бла́гостию.

Вери́гами свя́зан вра́жиями от озлобле́ния, во а́дския вереи́, увы́ мне́, низверго́хся: но предста́ни, с Небесе́ я́вльшися, Богоотрокови́це Чи́стая, возставля́ющи мя́ Твои́ми моли́твами служи́теля Твоего́, и ру́ку по́мощи да́ждь пою́щему Боже́ственное Твое́ Рождество́.

Сла́ва: В ро́в поги́белей окая́нный впадо́х, и зве́рие мно́зи окроча́ют мя́: но Влады́чице, моли́твами Твои́ми ка́мения отврати́, и невреди́ма Твоего́ раба́ соблюди́: ка́мень бо краеуго́льный, Христа́ в ложесна́х Твои́х носи́ла еси́.

И ны́не: Дре́вле проро́к Боже́ственных ли́к провозгласи́, Де́во, Рождества́ Твоего́ о́бразы: све́тел о́блак Тя́, и све́щник, и ста́мну, и трапе́зу, и Небе́сную ро́су, хле́б, ма́нну же и две́рь, престо́л, и пала́ту, же́зл, ра́й, я́ко Христа́ ро́ждшую.

Го́споди поми́луй, три́жды. Сла́ва, и ны́не:

Седа́лен, гла́с 1: Ма́терь Тя́ Бо́жию све́мы вси́, Де́ву вои́стинну, и по Рождестве́ я́вльшуюся, любо́вию прибега́юще к Твое́й бла́гости: Тебе́ бо и́мамы гре́шнии, Предста́тельницу, и Тебе́ стяжа́хом в напа́стех спасе́ние, Еди́ну Всенепоро́чную.

Пе́снь 7

Ирмо́с: Проидо́ша я́ко черто́г пе́щный пла́мень нестерпи́мый, и́же за благоче́стие иногда́ о́троцы святи́и показа́вшеся я́ве, и согла́сно воспева́юще, пе́снь поя́ху: отце́в Бо́же благослове́н еси́.

Ше́ствуя Преве́чный две́рьми непрохо́дными Твои́ми, Всецари́це, чи́ста Твоя́ зна́мения и це́ла сохрани́, чи́ста и по Рождестве́, те́мже вопие́м: оте́ц на́ших Бо́же, благослове́н еси́.

В пе́щь вве́ржен седмочи́сленными пла́меньми опаля́юся от душеуби́йственных бе́д: но Сама́ ро́су ми́ одожди́, Влады́чице Блага́я, твои́ми мольба́ми, да вопию́: благослове́н Бо́г оте́ц на́ших.

Сла́ва: Страстьми́ престаре́вся, и неосла́бными напа́стьми и скорбьми́, и доспе́в к за́падом жития́ моего́, доброде́телем неприча́стен, ле́ностию снеде́н бы́в, вопию́ Ти, Влады́чице: утеше́ние земны́м, поми́луй мя́!

И ны́не: Тро́ице во Еди́нстве правосла́вно служа́ще, Тя́ Ма́ти Де́во Чи́стая, я́ко Бо́га пло́тию ро́ждшую пропове́дающе земни́и, Боже́ственне пое́м: оте́ц на́ших Бо́же, благослове́н еси́.

Пе́снь 8

Ирмо́с: Чу́да преесте́ственнаго показа́ о́браз, огнеро́сная пе́щь дре́вле: о́гнь бо не опали́ ю́ныя де́ти, Христо́во явля́я безсе́менное от Де́вы Боже́ственное Рождество́. Те́м воспева́юще воспои́м: да благослови́т тва́рь вся́ Го́спода, и превозно́сит во вся́ ве́ки.

Сло́во всеи́стинное свяще́нника вообрази́ Рождество́ Твое́, Де́во: вои́стинну бо родила́ еси Сло́во Бо́жие, и ложесна́ не разве́рзе Де́во, и́миже про́йде Бо́г. Те́м ра́дующеся, Богоро́дицу Тя́, по до́лгу согла́сно воспева́ем, и превозно́сим чи́стую во вся́ ве́ки.

Те́рние возра́стшее в души́ мое́й неде́йственно, Боже́ственным огне́м попали́, Пречи́стая, и Твои́ми моли́твами на доброде́тели возста́ви мя́, твори́ти плодоно́сие Христу́: из Тебе́ бо Цве́т при́сно живы́й прора́стши, тва́рь всю́ украси́. Те́м Тя́, Богороди́тельницу чи́стую, почита́ем в вся́ ве́ки.

Сла́ва: Исцеле́ние в лю́тых, Богороди́тельнице, неболе́зненно пода́ждь ми́ вско́ре: впа́д бо в ско́рби и беды́, Твою́ ско́рость в заступле́ние окая́нный призыва́ю, рыда́я. Те́мже, Пречи́стая, ускори́ изъя́ти мя́, и спаси́ от вся́кия му́ки, я́ко да благословя́ воспева́ю Твое́ Рождество́.

И ны́не: Дре́вле Тя́ прозя́бший Ааро́нов же́зл вообрази́, Де́во: Ты́ бо Еди́на родила́ еси́ прозябе́нием без му́жа, Небе́сный ны́не до́ждь прие́мши во чре́ве. Те́м веселя́щеся, Тя́, Богоро́дицу, по до́лгу согла́сно вси́ пое́м, и превозно́сим во вся́ ве́ки.

Пе́снь 9

Ирмо́с: Неизглаго́ланное Де́вы та́инство: не́бо бо Сия́, и престо́л херуви́мский, и светоно́сный черто́г показа́ся Христа́ Бо́га Вседержи́теля. Сию́ благоче́стно я́ко Богоро́дицу велича́ем.

Пресла́вно Де́вы та́инство: Его́же бо не вмести́ша вышенебе́сная вели́чия, вмести́ во чре́ве. Те́мже соше́дшеся ублажа́ем Ю, и ве́рно веселя́щеся велича́ем.

Ви́дяще Тя́ Еди́ну, я́ко вы́шшую небе́с, Бо́жию зарю́, Нескве́рная, престо́л херуви́мский, и черто́г, и о́др свя́т, земни́и восхваля́юще, Христа́ Бо́га на́шего велича́ем: Его́же от чре́сл чи́стых родила́ еси́.

Сла́ва: О́крест мене́ ско́рби мно́ги, и злы́ напа́сти ны́не напа́дающе, боле́зни же и лю́тыя грехи́ в ро́в вверго́ша. Те́мже Тя́ молю́ в го́рести души́ моея́, Пресвята́я Богоро́дице, избавле́ние обрести́ ми.

И ны́не: Умири́ ми́р, Христе́, мольба́ми Чи́стыя Богоотрокови́цы, низлага́я вра́жию си́лу и тишину́ неизглаго́ланную на́м устроя́я, во ве́ки сохрани́.

Та́же: Досто́йно е́сть: Трисвято́е. И по О́тче на́ш: конда́к гла́са. Го́споди поми́луй, 40. И моли́тва: И́же на вся́кое вре́мя: Го́споди поми́луй, три́жды. Сла́ва, и ны́не: Честне́йшую херуви́м: И́менем Госпо́дним благослови́, отче. Та́же, моли́тва: Нескве́рная, небла́зная: и про́чее обы́чно, и отпу́ст, и проще́ние.

В неде́лю у́тра, нача́ло полу́нощницы

Иере́й: Благослове́н Бо́г на́ш: И мы́ глаго́лем: Ами́нь. Сла́ва тебе́, Бо́же на́ш, сла́ва Тебе́. Царю́ небе́сный: Трисвято́е. Пресвята́я Тро́ице: О́тче на́ш: Иере́й: Я́ко твое́ е́сть Ца́рство: Го́споди поми́луй, 12. Сла́ва, и ны́не: Прииди́те поклони́мся: три́жды. Псало́м 50. Поми́луй мя́ Бо́же:

Та́же, Кано́н ко святе́й и живонача́льней тро́ице, его́же краестро́чие: Еди́но Тя́ пою́ трисо́лнечное естество́.

Творе́ние Митрофа́ново

Пе́снь 1

Ирмо́с: Твоя́ победи́тельная десни́ца боголе́пно в кре́пости просла́вися: та́ бо безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.

Припе́в: Пресвята́я Тро́ице Бо́же на́ш, сла́ва Тебе́.

Еди́но Триипоста́сное Нача́ло, Серафи́ми немо́лчно сла́вят: безнача́льное, присносу́щное, твори́тельное все́х, непостижи́мое, е́же и вся́к язы́к ве́рно почита́ет пе́сньми.

Да челове́ком еди́нственное, трисия́тельное Твое́ яви́ши Божество́, созда́вый пре́жде челове́ка, по твоему́ о́бразу вообрази́л еси́, у́м ему́, и сло́во и ду́х да́в, я́ко Человеколю́бец.

Сла́ва: Свы́ше показу́я еди́нственную богонача́льных в трие́х ипоста́сех держа́ву, Отче, ре́кл еси́ равноде́тельному Твоему́ Сы́ну, и Ду́ху: прииди́те соше́дше, язы́ки и́х слия́им.

И ны́не, Богоро́дичен: у́м у́бо е́сть Нерожде́нный Оте́ц, обра́зно прему́дрыми предрече́ся, Сло́во же Собезнача́льно, Cоесте́ственный Cы́н и Ду́х Святы́й, и́же в Де́ве Сло́ва созда́вший воплоще́ние.

Пе́снь 3

Ирмо́с: Еди́не ве́дый челове́ческаго существа́ не́мощь, и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме2 неизрече́нныя сла́вы Твоея́, Человеколю́бче.

Ты́ дре́вле я́ве Авраа́му я́ко яви́лся еси́ триипоста́сный, еди́нствен же естество́м Божества́, богосло́вия и́стиннейшее обра́зно яви́л еси́: и ве́рно пое́м Тя́, единонача́льнаго Бо́га, и трисо́лнечнаго.

Из Тебе́ роди́выйся боголе́пно нетле́нно, О́тче, возсия́ све́т от све́та, Сы́н непреме́нен, и Ду́х Боже́ственный, све́т изы́де: еди́наго Божества́ све́тлости триипоста́сней покланя́емся ве́рно, и сла́вим.

Сла́ва: Еди́ница Тро́ица преесте́ственне, неизрече́нно па́че смы́сла, у́мными существы́ сла́вится, трисвяты́ми гла́сы немо́лчную вопию́щими хвалу́: и́миже согла́сно пое́тся и на́ми триипоста́сный Госпо́дь.

Богоро́дичен: Из Тебе́ вре́менне без се́мене произы́де вышшеле́тный, уподо́бивыйся на́м неви́димый, и еди́ному естеству́ и госпо́дьству О́тчу научи́в, и Сыно́вню, и Ду́хову, Богоро́дице: те́мже Тя́ сла́вим.

Го́споди, поми́луй, три́жды

Седа́лен, гла́с 1. Подо́бен: Гро́б тво́й, Спа́се:

Отцу́ и Сы́ну поклони́мся вси́, и Ду́ху пра́вому и равноче́стну, сла́ва Тро́ице несозда́нней, и пребоже́ственней си́ле, ю́же сла́вят безпло́тных чи́нове: сию́ дне́сь и земноро́днии со стра́хом ве́рно восхва́лим.

Сла́ва, и ны́не, Богоро́дичен: Наста́ви ны́ на пу́ть покая́ния, уклоня́ющыяся при́сно к безпу́тием зо́л, и преблага́го прогне́вающыя Го́спода, неискусобра́чная благослове́нная Мари́е, прибе́жище отча́янных челове́ков, Бо́жие пребыва́ние.

Пе́снь 4

Ирмо́с: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Возсия́й ми́ Богонача́лие трисо́лнечное, сия́ньми Твои́х богоде́тельных озаре́ний, в серде́чных очесе́х добро́те мечта́тися, е́же па́че ума́ богонача́льныя Твоея́ све́тлости, и светоде́тельнаго и сла́дкаго прича́стия.

Пе́рвее небеса́ утверди́л еси́, Го́споди, и всю́ си́лу и́х сло́вом Твои́м вседе́тельным, и Ду́хом у́ст соесте́ственным, с ни́миже влады́чествуеши вся́ческими в трисия́тельне единонача́лии Божества́.

Сла́ва: Я́ко созда́л еси́ мя́ по о́бразу Твоему́ и подо́бию, Богонача́льная и вседе́тельная Тро́ице, неслия́нная Еди́нице, вразуми́, просвети́, во е́же твори́ти во́лю Твою́ святу́ю, благу́ю в кре́пости, и соверше́нную.

Богоро́дичен: Родила́ еси́ от Тро́ицы Еди́наго, Пречи́стая, Богонача́льнейша Сы́на, вопло́щшася на́с ра́ди из Тебе́, озаря́юща земноро́дных, трисо́лнечнаго Божества́ невече́рним све́том и сия́ньми.

Пе́снь 5

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ Богоразу́мия, правосла́вно пою́щих Тя́.

Я́же пе́рвой а́нгельской непосре́дственне у́твари, непристу́пными Твоея́ добро́ты луча́ми осиява́емой бы́ти благоволи́вши, Твои́ми све́тлостьми просвети́, Тро́ице единонача́льственнейшая, правосла́вно Тебе́ пою́щих.

Ны́не естество́, еди́нственное Богонача́лия трисо́лнечное, воспева́ет Тя́. Е́же осуществова́ла еси́ за бла́гость, прегреше́ний избавле́ние и напа́стей испроша́ющи, и бе́д и скорбе́й.

Сла́ва: Отца́, и Сы́на, и Ду́ха Свята́го, Еди́но Естество́ и Божество́ ве́рою сла́вим, дели́тельное, неразде́льное, еди́наго Бо́га неви́димыя и ви́димыя же тва́ри.

Богоро́дичен: Рече́ния вся́ проро́ческая преднаписа́ша, Пречи́стая, Твое́ рождество́, неизрече́нное и неудо́бь сказу́емое, е́же мы́ позна́хом, тайноводи́тельное еди́нственнаго и трисо́лнечнаго Божества́.

Пе́снь 6

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́, Бо́же на́ш: Ты́ бо кре́пость немощству́ющих и исправле́ние.

Равноста́тную си́лу я́ко иму́щи, Тро́ице пресу́щественная, в то́ждестве хоте́ния, Еди́ница еси́ проста́ и неразде́льна: Ты́ у́бо на́с си́лою Твое́ю соблюди́. [Два́жды.]

Сла́ва: Ты́ вся́ ве́ки хоте́нием Твои́м, я́ко бла́га соста́вила еси́ от не су́щих, непостижи́мая Тро́ице, та́же и челове́ка создала́ еси́: но и ны́не от вся́каго изба́ви мя́ обстоя́ния.

Богоро́дичен: Со́лнца незаходи́маго до́м была́ еси́, созда́вшаго и в чину́ поста́вльшаго свети́ла вели́кая Всеси́льне, Пречи́стая Де́во Богоневе́стная: но и ны́не страсте́й мя́ изба́ви помраче́ния.

Го́споди поми́луй, три́жды

Седа́лен, гла́с 1. Подо́бен: Гро́б Тво́й Спа́се:

Тро́ице святе́й, и неразде́льному Естеству́, в Тре́х Ли́цех секо́мей несе́чено, и пребыва́ющей неразде́льней по существу́ Божества́, поклони́мся земноро́днии со стра́хом, и сла́вим я́ко Творца́ и Влады́ку, Бо́га преблага́го.

Сла́ва, и ны́не, Богоро́дичен: Упра́ви, Чи́стая, окая́нную мою́ ду́шу, и уще́дри ю́ от мно́жества прегреше́ний, во глубину́ попо́лзшуюся поги́бели, Всенепоро́чная, и в ча́с мя́ стра́шный сме́ртный Ты́ исхити́ оглаго́лующих де́монов, и вся́кия му́ки.

Пе́снь 7

Ирмо́с: Тебе́ у́мную, Богоро́дице, пе́щь разсмотря́ем ве́рнии: я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г, и препросла́влен.

Сло́ве Бо́жий, соесте́ственное сия́ние Вседержи́теля Бо́га, я́коже обеща́л еси́ е́же у тебе́, богоде́тельное вселе́ние сотвори́, я́ко благоутро́бен, со Отце́м Твои́м и Ду́хом: и стра́шна бесо́м мя́ покажи́, и страсте́м. [Два́жды.]

Сла́ва: Да Твоего́ благоутро́бия, Влады́ко, пока́жеши пучи́ну на́м, Сы́на Твоего́ посла́в к на́шему смире́нию, па́ки вообрази́л еси́ на пе́рвую све́тлость, но и ны́не Боже́ственным мя́ вразуми́ Ду́хом.

Богоро́дичен: И́же на херуви́мстем престо́ле носи́мый, и все́х Ца́рь, во чре́ве Твое́м де́вственнем всели́ся, Пречи́стая, все́х избавля́я от истле́ния, я́ко Человеколю́бец: но и ны́не Твои́ми мя́ моли́твами сохрани́.

Пе́снь 8

Ирмо́с: Чу́да преесте́ственнаго показа́ о́браз, огнеро́сная пе́щь дре́вле: о́гнь бо не опали́ ю́ныя де́ти, Христо́во явля́я безсе́менное от Де́вы Боже́ственное Рождество́. Те́м воспева́юще воспои́м: да благослови́т тва́рь вся́ Го́спода, и превозно́сит во вся́ ве́ки.

Ма́нием богоде́тельным, Го́споди все́х, Триипоста́сне и Вседержи́телю, небеса́ просте́рл еси́ я́ко ко́жу: та́же и земли́ пове́сил еси́ глубину́, всемогу́щею Твое́ю дла́нию. Те́мже и рабы́ Твоя́ укрепи́ любо́вию и ве́рою Твое́ю, Человеколю́бче: да Тя́ сла́вим жела́нием во ве́ки.

Сла́ва: Просвети́ Богонача́льным све́том пою́щих Тя́, Трисо́лнечный Све́те Ли́цы, еди́нственный же па́ки существо́м, и к Твои́м светода́тельным луча́м взира́ти при́сно: и́миже насы́щуся сла́вы Твоея́ сла́дкия, и светода́тельныя, и пребога́тыя: и превозношу́ Тя ве́рно во ве́ки.

Богоро́дичен: Вознесе́ на небеса́, челове́ческое прие́м естество́ непрело́жне Сы́н Тво́й, Пречи́стая Богоро́дице, превосхожде́нием бла́гости изба́вль дре́вния тли́. Ему́же благода́рственно воспева́ем: да благослови́т тва́рь вся́ Го́спода, и превозно́сит во вся́ ве́ки.

Пе́снь 9

Ирмо́с: О́браз чи́стаго рождества́ Твоего́, огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́, Богоро́дице, непреста́нно велича́ем.

Спаси́, Спаси́телю тва́ри, чу́вственныя же и у́мныя рабы́ Твоя́ от вра́жия наве́та и озлобле́ния, Пресвята́я Тро́ице Единосу́щная, и соблюда́й ста́до Твое́ вы́ну ненаве́тно. [Два́жды.]

Сла́ва: Да глубину́ неизче́тную су́щественныя пока́жеши Твоея́ бла́гости, да́л еси́ на́м обе́ты: трисо́лнечный, и единонача́льный Бо́же Всеси́льный, спаси́тельныя Твои́м рабо́м, и́хже соверши́ти сподо́би.

Богоро́дичен: При́зри на на́ша моле́ния, и́же в трие́х Богонача́льных Ипоста́сех, еди́н сы́й Бо́г во и́стине ве́руемый: и пода́ждь Твои́м рабо́м утеше́ние, моли́твами Пречи́стыя и препе́тыя Богома́тере.

Посе́м припе́вы Григо́риа Синаи́та, глаго́лемы по тро́ичных кано́нех по вся́ неде́ли: Досто́йно е́сть, я́ко вои́стинну: Пи́саны в конце́ кни́ги сея́. И про́чее полу́нощницы. И отпу́ст.

На у́трени по шестопса́лмии

Бо́г Госпо́дь, на гла́с 1 и глаго́лем тропа́рь воскре́сный, два́жды, и Богоро́дичен еди́ножды, пи́саны на вели́цей вече́рни. Та́же обы́чное стихосло́вие Псалти́ря.

По 1-м стихосло́вии седа́льны воскре́сны, гла́с 1:

Гро́б Тво́й Спа́се, во́ини стрегу́щии, ме́ртвии от облиста́ния я́вльшагося а́нгела бы́ша, пропове́дающа жена́м Воскресе́ние. Тебе́ сла́вим тли́ потреби́теля, Тебе́ припа́даем воскре́сшему из гро́ба, и еди́ному Бо́гу на́шему.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Ко Кресту́ пригво́ждься во́лею Ще́дре, во гро́бе положе́н бы́в я́ко ме́ртв, Животода́вче, держа́ву сте́рл еси́, Си́льне, сме́ртию Твое́ю: Тебе́ бо вострепета́ша вра́тницы а́довы, Ты́ совоздви́гл еси́ от ве́ка уме́ршыя, я́ко еди́н Человеколю́бец.

Сла́ва, и ны́не, Богоро́дичен: Ма́терь Тя́ Бо́жию све́мы вси́ Де́ву вои́стинну, и по рождестве́ я́вльшуюся, и́же любо́вию прибега́ющии к Твое́й бла́гости: Тебе́ бо и́мамы гре́шнии предста́тельство, Тебе́ стяжа́хом в напа́стех спасе́ние, еди́ну всенепоро́чную.

По 2-м стихосло́вии, седа́лен, гла́с 1.

Подо́бен: Ка́мени запеча́тану:

Жены́ ко гро́бу приидо́ша ура́ншя, и а́нгельское явле́ние ви́девшя трепета́ху: гро́б облиста́ жи́знь, чу́до удивля́ше я́: Сего́ ра́ди ше́дшя ученико́м пропове́даху воста́ние: а́д плени́ Христо́с, я́ко еди́н кре́пок и си́лен, и истле́вшыя вся́ совоздви́же, осужде́ния стра́х разруши́в Кресто́м.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

На Кресте́ пригвозди́лся еси́ Животе́ все́х, и в ме́ртвых вмени́лся еси́ безсме́ртный Го́споди, воскре́сл еси́ тридне́вен Спа́се, совоздви́г Ада́ма от тле́ния. Сего́ ра́ди си́лы небе́сныя вопия́ху Тебе́, Жизнода́вче Христе́: сла́ва Воскре́сению Твоему́, сла́ва снизхожде́нию Твоему́, еди́не Человеколю́бче.

Сла́ва, и ны́не, Богоро́дичен: Мари́е, честно́е Влады́ки прия́телище, воскреси́ ны па́дшыя в про́пасть лю́таго отча́яния, и прегреше́ний и скорбе́й, Ты́ бо еси́ гре́шным спасе́ние и по́мощь, и кре́пкое предста́тельство, и спаса́еши рабы́ Твоя́.

Та́же, Блаже́ни непоро́чнии: Посе́м тропари́: А́нгельский собо́р: Та́же ектениа́ ма́лая, и

Ипакои́, гла́с 1:

Разбо́йничо покая́ние ра́й окра́де, пла́чь же мироно́сиц ра́дость возвести́, я́ко воскре́сл еси́, Христе́ Бо́же, подая́й ми́рови ве́лию ми́лость.

Степе́нны: антифо́н 1, гла́с 1, стихи́ повторя́юще:

Внегда́ скорбе́ти ми́, услы́ши моя́ боле́зни, Го́споди, Тебе́ зову́.

Пусты́нным непреста́нное Боже́ственное жела́ние быва́ет, ми́ра су́щым су́етнаго кроме́ 3.

Сла́ва: Свято́му Ду́ху че́сть и сла́ва, я́коже Отцу́ подоба́ет, ку́пно же и Сы́ну, сего́ ра́ди да пое́м Тро́ице единодержа́вие.

И ны́не, то́йже.

Антифо́н 2:

На го́ры Твои́х возне́сл еси́ мя́ зако́нов, доброде́тельми просвети́, Бо́же, да пою́ Тя.

Десно́ю Твое́ю руко́ю прии́м Ты́ сло́ве, сохрани́ мя, соблюди́, да не о́гнь мене́ опали́т грехо́вный.

Сла́ва: Святы́м Ду́хом вся́кая тва́рь обновля́ется, па́ки теку́щи на пе́рвое: равномо́щен бо е́сть Отцу́ и Сло́ву.

И ны́не, то́йже.

Антифо́н 3:

О ре́кших мне́, вни́дем во дворы́ Госпо́дни, возвесели́ся мо́й ду́х, сра́дуется се́рдце.

В дому́ Дави́дове стра́х вели́к: та́мо бо престо́лом поста́вленным, су́дятся вся́ племена́ земна́я, и язы́цы.

Сла́ва: Свято́му Ду́ху, че́сть, поклоне́ние, сла́ву и держа́ву, я́коже Отцу́ досто́ит, и Сы́нови подоба́ет приноси́ти: еди́ница бо е́сть Тро́ица естество́м, но не ли́цы.

И ны́не, то́йже.

Проки́мен, гла́с 1:

Ны́не воскресну́, глаго́лет Госпо́дь, положу́ся во спасе́ние, не обиню́ся о не́м.

Сти́х: Словеса́ Госпо́дня, словеса́ чи́ста.

Вся́кое дыха́ние: Ева́нглие у́треннее рядово́е.

Воскресе́ние Христо́во ви́девше, поклони́мся Свято́му Го́споду Иису́су, еди́ному безгре́шному. Кресту́ Твоему́ покланя́емся, Христе́, и свято́е Воскресе́ние Твое́ пое́м и сла́вим: Ты́ бо еси́ Бо́г на́ш, ра́зве Тебе́ ино́го не зна́ем, и́мя Твое́ имену́ем. Прииди́те вси́ ве́рнии, поклони́мся Свято́му Христо́ву Воскресе́нию: се́ бо прии́де кресто́м ра́дость всему́ ми́ру. Всегда́ благословя́ще Го́спода, пое́м Воскресе́ние Его́: распя́тие бо претерпе́в, сме́ртию сме́рть разруши́.

Псало́м 50: Поми́луй мя́ Бо́же:

Сла́ва: Моли́твами апо́столов, Ми́лостиве, очи́сти мно́жества согреше́ний на́ших.

И ны́не: Моли́твами Богоро́дицы, Ми́лостиве, очи́сти мно́жества согреше́ний на́ших.

Та́же, гла́с 6: Поми́луй мя́ Бо́же по вели́цей ми́лости Твое́й, и по мно́жеству щедро́т Твои́х очи́сти беззако́ние мое́.

Посе́м стихи́ра: Воскре́с Иису́с от гро́ба, я́коже прорече́, даде́ на́м живо́т ве́чный и ве́лию ми́лость.

Спаси́, Бо́же, лю́ди твоя́:

И возгла́с: Ми́лостию и щедро́тами и человеколю́бием:

Кано́ны: воскре́сный на 4: кре́стовоскре́сный на 3: и Богоро́дичен на 3: Мине́и на 4. А́ще же пра́зднуется святы́й, на 6: кре́стовоскре́сный на 2, и Богоро́дицы на 2.

Кано́н воскре́сный, гла́с 1.

Пе́снь 1

Ирмо́с: Твоя́ победи́тельная десни́ца Боголе́пно в кре́пости просла́вися: та́ бо Безсме́ртне, я́ко всемогу́щая, проти́вныя сотре́, Изра́ильтяном пу́ть глубины́ новосоде́лавшая.

Припе́в: Сла́ва, Го́споди, свято́му Воскре́сению Твоему́.

Тропа́рь: И́же рука́ма пречи́стыма от пе́рсти богоде́тельне испе́рва созда́в мя́; ру́це распросте́рл еси́ на кресте́, от земли́ взыва́я тле́нное мое́ те́ло, е́же от Де́вы прия́л еси́.

Умерщвле́ние подъя́л еси́ мене́ ра́ди, и ду́шу сме́рти пре́дал еси́, и́же вдохнове́нием Боже́ственным ду́шу ми́ вложи́вый, и отреши́в ве́чных у́з, и совоскреси́в нетле́нием просла́вил еси́.

Богоро́дичен: Ра́дуйся, благода́ти исто́чниче, ра́дуйся, ле́ствице, и две́ре небе́сная, ра́дуйся, све́щниче, и ру́чко злата́я, и горо́ несеко́мая, я́же Жизнода́вца Христа́ ми́рови ро́ждшая.

И́н кано́н, кре́стовоскре́сный.

Пе́снь 1, гла́с то́йже. Ирмо́с: Христо́с ражда́ется:

Христо́с обожа́ет мя́ воплоща́яся, Христо́с мя́ возно́сит смиря́яся, Христо́с безстра́стна мя́ соде́ловает, стражда́ Жизнода́вец естество́м пло́ти. Те́мже воспева́ю благода́рственную пе́снь: я́ко просла́вися.

Христо́с возно́сит мя́ распина́емь, Христо́с совоскреша́ет мя́ умерщвля́емь, Христо́с жи́знь мне́ да́рует. Те́мже с весе́лием рука́ма плеща́я, пою́ Спаси́телю побе́дную пе́снь: я́ко просла́вися.

Богоро́дичен: Бо́га Де́во зачала́ еси́, Христа́ же в де́встве родила́ еси́ из Тебе́ Вопло́щшася, Пречи́стая, Еди́наго ипоста́сию Единоро́днаго, во двою́ же существу́ познава́емаго Сы́на: я́ко просла́вися.

И́н кано́н, пресвяте́й Богоро́дице.

Пе́снь 1, гла́с то́йже. Ирмо́с: Твоя́ победи́тельная:

Ку́ю Ти́ досто́йную пе́снь на́ше принесе́т неможе́ние? то́чию обра́довательную, е́йже на́с Гаврии́л та́йно научи́л е́сть: ра́дуйся, Богоро́дице Де́во, Ма́ти Неневе́стная.

Присноде́ве и Ма́тери Царя́ вы́шних си́л, от чисте́йша се́рдца ве́рнии духо́вне возопии́м: ра́дуйся, Богоро́дице Де́во, Ма́ти Неневе́стная.

Безме́рная бе́здна Твоего́ непостижи́маго Рождества́, Всечи́стая, ве́рою несумне́нною у́бо чи́сте прино́сим Ти́ глаго́люще: ра́дуйся, Богоро́дице Де́во, Ма́ти Неневе́стная.

Та́же мине́и. Катава́сиа: Отве́рзу уста́ моя́:

Пе́снь 3

Ирмо́с: Еди́не ве́дый челове́ческаго существа́ не́мощь, и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме неизрече́нныя сла́вы Твоея́, Человеколю́бче.

Бо́г Сы́й мне́, Бла́же, па́дшаго уще́дрил еси́, и сни́ти ко мне́ благоволи́в, возне́сл мя́ еси́ распя́тием, е́же вопи́ти тебе́, Святы́й: хра́ме одушевле́нный неизрече́нныя Твоея́ сла́вы, Человеколю́бче 4.

Живо́т ипоста́сный Христе́ сы́й, в истле́вша мя́, я́ко Милосе́рдый Бо́г обо́лкся, в пе́рсть сме́ртную соше́д Влады́ко, сме́ртную держа́ву разруши́л еси́, и ме́ртв тридне́вен воскре́с, в нетле́ние мя́ обле́кл еси́.

Богоро́дичен: Бо́га заче́нши во чре́ве Де́во, Ду́хом Пресвяты́м, пребыла́ еси́ неопали́ма, поне́же Тя́ купина́ законополо́жнику Моисе́ю, пали́мую нежего́мо, я́ве предвозвести́, о́гнь нестерпи́мый прие́мшую.

И́н, Ирмо́с: Пре́жде ве́к от Отца́:

И́же на свое́ ра́мо заблужда́емое овча́ взе́мшему, и низложи́вшему дре́вом его́ гре́х, Христу́ Бо́гу возопии́м: воздви́гнувый ро́г на́ш, свя́т еси́, Го́споди.

Возве́дшему Па́стыря Вели́каго из а́да Христа́, и священнонача́лием Его́ апо́столы я́ве язы́ки упа́сшему, и́стиною и Боже́ственным ве́рнии Ду́хом да послу́жим.

И́же от Де́вы воплоти́вшемуся без се́мене во́лею Сы́ну, и ро́ждшую по Рождестве́, Боже́ственною си́лою Чи́стую Де́ву сохра́няему, и́же над все́ми Бо́гу возопии́м: свя́т еси́, Го́споди.

И́н, Ирмо́с: Еди́не ве́дый:

О́блак Тя́ ле́гкий нело́жно, Де́во, имену́ем, проро́ческим возсле́дующе рече́нием: прии́де бо на Тебе́ Госпо́дь низложи́ти еги́петския пре́лести рукотворе́ния, и просвети́ти си́м служа́щыя.

Тя́ запеча́танный вои́стинну ли́к проро́ческий исто́чник, и заключе́нную две́рь именова́, де́вства Твоего́, Всепе́тая, я́вственне зна́мения на́м пи́шуще: е́же сохрани́ла еси́ и по рождестве́.

Ума́ пресу́щественна ви́дети, я́коже мо́щно, сподо́блься Гаврии́л, Де́во Всенепоро́чная, ра́достный Тебе́ гла́с принесе́, Сло́ва зача́тие я́вственне возвеща́ющий, и неизрече́нное Рождество́ пропове́дающий.

Пе́снь 4

Ирмо́с: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во Спасе́ние на́ше и обновле́ние.

Кто́ се́й Спа́с и́же из Едо́ма исходя́, вене́ц нося́ терно́вен, очервле́нну ри́зу имы́й, на дре́ве ви́ся? Изра́илев е́сть Се́й Святы́й, во Спасе́ние на́ше и обновле́ние.

Ви́дите, лю́дие непокори́вии, и устыди́теся: Его́же бо я́ко злоде́я вы́ вознести́ на кре́ст у Пила́та испроси́сте умовре́дне, сме́рти разруши́в си́лу, боголе́пно воскре́с из гро́ба.

Богоро́дичен: Дре́во Тя́, Де́во, жи́зни ве́мы: не бо́ сне́ди пло́д смертоно́сный челове́ком из Тебе́ прозябе́, но живота́ присносу́щнаго наслажде́ние, во Спасе́ние на́с, пою́щих Тя́.

И́н Ирмо́с: Же́зл из ко́рене Иессе́ова:

Кто́ Се́й красе́н из Едо́ма, и Сего́ очервле́ние ри́зное, от виногра́да восо́рска, красе́н я́ко Бо́г, я́ко челове́к же, кро́вию пло́ти ри́зу очервле́ну нося́; Ему́же пое́м, ве́рнии: сла́ва си́ле Твое́й, Го́споди.

Христо́с бу́дущих бла́г я́влься Архиере́й, гре́х на́ш разори́л е́сть: и показа́в стра́нен пу́ть Свое́ю кро́вию, в лу́чшую и соверше́ннейшую вни́де ски́нию, Предте́ча на́ш во свята́я.

Богоро́дичен: Е́вин дре́вний до́лг испроси́ла еси́, Всепе́тая, у И́же на́с ра́ди я́вльшагося но́ваго Ада́ма. Соедини́в бо Себе́ чи́стым зача́тием пло́ть у́мную, одушевле́нную, из Тебе́ произы́де Христо́с, Еди́н во обою́ Госпо́дь.

И́н Ирмо́с: Го́ру Тя́ благода́тию:

Слы́ши чуде́с не́бо, и внуша́й земле́, я́ко Дщи́ пе́рстнаго у́бо па́дшаго Ада́ма, Бо́гу нарече́на бы́сть, и Своему́ Соде́телю Роди́тельница, на Спасе́ние на́ше и обновле́ние.

Пое́м вели́кое и стра́шное Твое́ та́инство, преме́рных бо утаи́вся чинонача́лий, на Тя́ И́же сы́й сни́де я́ко до́ждь на руно́, Всепе́тая, на Спасе́ние на́с, пою́щих Тя́.

Святы́х Свята́я Богоро́дице Всепе́тая, ча́яние язы́ков, и Спасе́ние ве́рных, из Тебе́ возсия́ Изба́витель и Жизнода́вец, и Госпо́дь: Его́же моли́ спасти́ся рабо́м Твои́м.

Пе́снь 5

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ Богоразу́мия, правосла́вно пою́щих Тя́.

Па́стыря овца́м вели́каго и Го́спода, иуде́и дре́вом кре́стным умертви́ша: но То́й я́ко о́вцы, ме́ртвыя во а́де погребе́нныя, держа́вы сме́ртныя изба́ви.

Кресто́м Твои́м ми́р благовести́в, и пропове́дав пле́нным, Спа́се мо́й, оставле́ние, держа́ву иму́щаго посрами́л еси́, Христе́, на́га, обнища́вша показа́вый Боже́ственным воста́нием Твои́м.

Богоро́дичен: Проше́ния ве́рно прося́щих, Всепе́тая, не пре́зри: но приими́, и сия́ доноша́й Сы́ну Твоему́, Пречи́стая, Бо́гу Еди́ному Благоде́телю, Тебе́ бо Предста́тельницу стяжа́хом.

И́н Ирмо́с: Бо́г сы́й ми́ра:

О бога́тство, и глубино́ прему́дрости Бо́жия! Прему́дрыя объе́мляй Госпо́дь, от си́х кова́рства изба́вил е́сть на́с: пострада́в бо во́лею не́мощию плотско́ю, Свое́ю кре́постию, животворя́й ме́ртвыя воскреси́л е́сть.

Бо́г сы́й соединя́ется пло́ти на́с ра́ди: и распина́ется, и умира́ет: погреба́ется, и па́ки воскреса́ет, и восхо́дит све́тло с пло́тию Свое́ю Христо́с ко Отцу́: с Не́юже прии́дет, и спасе́т благоче́стно Тому́ служа́щыя.

Богоро́дичен: Святы́х Свята́я Де́во Чи́стая, святы́х Свята́го родила́ еси́, все́х освяща́ющаго Христа́ Изба́вителя. Те́мже Тя́, Цари́цу и Влады́чицу все́х, я́ко Ма́терь Зижди́теля тва́рей пропове́дуем.

И́н Ирмо́с: Просвети́вый сия́нием:

Веселя́тся небе́сныя си́лы зря́ще Тя́: ра́дуются с ни́ми челове́ков собра́ния: Рождество́м бо Твои́м совокупи́шася, Де́во Богоро́дице, е́же досто́йно сла́вим.

Да дви́жатся вси́ язы́цы челове́честии и мы́сли, к похвале́ челове́ческаго вои́стинну удобре́ния, Де́ва предстои́т я́ве сла́вящи, ве́рою Тоя́ пою́щих чудеса́.

Сла́вится пе́ние всепрему́дрых и похвала́, Де́ве и Ма́тери Бо́жии приноси́мая: сла́вы бо бы́сть Сия́ Хра́м Пребоже́ственныя, Ю́же досто́йно сла́вим.

Пе́снь 6

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́, Бо́же на́ш: Ты́ бо кре́пость немощству́ющих и исправле́ние.

Согреше́нием первозда́ннаго, Го́споди, лю́те уязви́хомся, ра́ною же исцели́хомся Твое́ю, е́юже за ны́ уязви́лся еси́, Христе́: Ты́ бо кре́пость немощству́ющих и исправле́ние.

Возве́л ны́ еси́ из а́да, Го́споди, ки́та уби́в всея́дца, Всеси́льне, Твое́ю держа́вою низложи́в того́ си́лу: Ты́ бо Живо́т, и Све́т еси́, и Воскре́сение.

Богоро́дичен: Веселя́тся о Тебе́, Де́во Пречи́стая, ро́да на́шего пра́отцы, Еде́м восприе́мше Тобо́ю, его́же преступле́нием погуби́ша: Ты́ бо, Чи́стая, и пре́жде Рождества́, и по Рождестве́ еси́.

И́н Ирмо́с: Из утро́бы Ио́ну:

Ум сы́й безстра́стен и невеще́ствен, примеша́ется Христо́с Бо́г челове́ческому уму́, хода́тайствующему Боже́ственным естество́м, пло́ти же дебельство́м, и всему́ мне́ непрело́жен весьма́ соедини́ся: да Спасе́ние всему́ мне́ па́дшему пода́ст распина́емь.

Па́дает прельсти́вся Ада́м, и запя́выйся сокруша́ется5, наде́ждою обо́лган сы́й дре́вле обоже́ния: но востае́т соедине́нием Сло́ва обожа́емь, и стра́стию безстра́стие прие́млет, на престо́ле я́ко Сы́н сла́вится, седя́й со Отце́м же и Ду́хом.

Богоро́дичен: Не́др не отсту́пль Безнача́льна Роди́теля, в не́дрех Чи́стыя Отрокови́цы водворя́ется, и быва́ет, и́же пре́жде безма́терен, без отца́ воплоща́емый, и́же пра́вдою Ца́рствуяй Бо́г: Сего́ неродосло́вен стра́шный ро́д и неизрече́нен.

И́н Ирмо́с: Обы́де на́с:

Предстоя́т раболе́пне Рождеству́ Твоему́ чи́ни небе́снии, дивя́щеся досто́йно Твоему́ безсе́менному Рождеству́, Присноде́во: ты́ бо чи́стая, и пре́жде Рождества́, и по Рождестве́ еси́.

Воплоти́ся пре́жде сы́й Безпло́тен, Сло́во из Тебе́, Пречи́стая, вся́ческая во́лею творя́й, безтеле́сных во́инства приведы́й от небытия́ я́ко Всеси́лен.

Умерщвле́н бы́сть вра́г живоно́сным Твои́м плодо́м Богоблагода́тная: и попра́н бы́сть а́д проявле́нне, и и́же во у́зах свободи́хомся. Те́мже вопию́: стра́сти разруши́ се́рдца моего́.

Конда́к, гла́с 1: Подо́бен: Егда́ прии́деши:

Воскре́сл еси́ я́ко Бо́г из гро́ба во сла́ве, и ми́р совоскреси́л еси́, и естество́ челове́ческое я́ко Бо́га воспева́ет Тя́, и сме́рть исчезе́: Ада́м же лику́ет, Влады́ко, Е́ва ны́не от у́з избавля́ема ра́дуется зову́щи: Ты́ еси́, и́же все́м подая́ Христе́ воскре́сение.

И́кос: Воскре́сшаго тридне́вно воспои́м я́ко Бо́га Всеси́льна, и врата́ а́дова сте́ршаго, и я́же от ве́ка из гро́ба воздви́гшаго, мироно́сицам я́вльшагося, я́коже благоизво́лил е́сть, пре́жде си́м е́же ра́дуйтеся, реки́й: и апо́столом ра́дость возвеща́я, я́ко Еди́н Жизнода́вец. Те́мже ве́рою жены́ ученико́м зна́мения побе́ды благовеству́ют, и а́д стене́т, и сме́рть рыда́ет: ми́р же весели́тся, и вси́ с ни́м ра́дуются. Ты́ бо по́дал еси́, Христе́, все́м Воскре́сение.

Пе́снь 7

Ирмо́с: Тебе́ у́мную, Богоро́дице, пе́щь разсмотря́ем ве́рнии: я́коже бо о́троки спасе́ три́ Превозноси́мый, ми́р обнови́ во чре́ве Твое́м всеце́л, хва́льный отце́в Бо́г, и препросла́влен.

Убоя́ся земля́, сокры́ся со́лнце, и поме́рче све́т, раздра́ся церко́вная Боже́ственная заве́са, ка́мение же разсе́деся: на кресте́ бо ви́сит Пра́ведный, Хва́льный отце́в Бо́г, и препросла́влен.

Ты́ бы́в а́ки безпомо́щен, и уя́звен в ме́ртвых во́лею на́с ра́ди превозноси́мый, вся́ свободи́л еси́, и держа́вною руко́ю совоскреси́л еси́, хва́льный отце́в Бо́г, и препросла́влен.

Богоро́дичен: Ра́дуйся, исто́чниче присноживы́я воды́, ра́дуйся, раю́ пи́щный, ра́дуйся, стено́ ве́рных. Ра́дуйся Неискусобра́чная. Ра́дуйся всеми́рная Ра́досте, Е́юже на́м возсия́ Хва́льный отце́в Бо́г и препросла́влен.

И́н Ирмо́с: О́троцы благоче́стию:

Дре́вле у́бо проклята́ бы́сть земля́ А́велевою очервлени́вшися кро́вию, братоуби́йственною руко́ю: богото́чною же Твое́ю кро́вию благослови́ся окропле́на, и взыгра́ющи вопие́т: отце́в Бо́же, благослове́н еси́.

Да рыда́ют иуде́йстии богопроти́внии лю́дие, де́рзости убие́ния Христо́ва: язы́цы же да веселя́тся, и рука́ми да воспле́щут, и вопию́т: отце́в Бо́же, благослове́н еси́.

Се́ мироно́сицам облиста́яй, вопия́ше А́нгел: Воскре́сения Христо́ва прииди́те и ви́дите зна́мения, плащани́цу и гро́б, и возопи́йте: отце́в Бо́же, благослове́н еси́.

И́н Ирмо́с: Тебе́ у́мную:

Тя́, Богоро́дице, ле́ствицу Иа́ков проро́чески разумева́ет: Тобо́ю бо Превозноси́мый на земли́ яви́ся, и с челове́ки поживе́, я́ко благоволи́, Хва́льный отце́в Бо́г и Препросла́влен.

Ра́дуйся, Чи́стая, из Тебе́ про́йде Па́стырь, и́же во Ада́мову ко́жу обо́лкся вои́стинну, Превозноси́мый, во всего́ мя челове́ка, за благоутро́бие непости́жное: Хва́льный отце́в Бо́г и Препросла́влен.

Но́вый Ада́м от чи́стых крове́й Твои́х Преве́чный Бо́г бы́сть вои́стинну, Его́же ны́не моли́, обетша́вшаго мя́ обнови́ти зову́ща: Хва́льный отце́в Бо́г и Препросла́влен.

Пе́снь 8

Ирмо́с: В пещи́ о́троцы Изра́илевы, я́коже в горни́ле добро́тою благоче́стия, чисте́е зла́та блеща́хуся, глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

И́же во́лею вся́ творя́й, и претворя́яй, обраща́яй се́нь сме́ртную в ве́чную жи́знь, стра́стию Твое́ю, Сло́ве Бо́жий, Тебе́ непреста́нно вся́ дела́ Госпо́дня Го́спода пои́м, и превозно́сим во вся́ ве́ки.

Ты́ разори́л еси́ сокруше́ние, Христе́, и окая́нство, во врате́х и тверды́нях а́довых, воскре́с из гро́ба тридне́вен. Тебе́ непреста́нно вся́ дела́ я́ко Го́спода пою́т, и превозно́сят во вся́ ве́ки.

Богоро́дичен: Я́же без се́мене и преесте́ственне от облиста́ния Боже́ственнаго Ро́ждшую би́сера многоце́ннаго Христа́, воспои́м глаго́люще: благослови́те вся́ дела́ Госпо́дня Го́спода, по́йте и превозноси́те Его́ во вся́ ве́ки.

И́н Ирмо́с: Чу́да преесте́ственнаго:

Прииди́те, лю́дие, поклони́мся ме́сту, на не́мже стоя́сте пречи́стеи но́зе, и на дре́ве Боже́ственнеи Христо́ве дла́ни животворя́щии простро́стеся, на Спасе́ние все́х челове́ков, и гро́б живо́тный обстоя́ще, пои́м: да благослови́т тва́рь вся́кая Го́спода, и превозно́сит во вся́ ве́ки.

Обличи́ся богоуби́йц иуде́ов пребеззако́нное оклевета́ние: Его́же бо лестца́ нареко́ша, воста́ я́ко Си́лен, наруга́вся безу́мным печа́тем. Те́мже ра́дующеся воспои́м: да благослови́т тва́рь вся́кая Го́спода, и превозно́сит во вся́ ве́ки.

Тро́ичен: В трие́х свяще́ниих богосло́вяще и Еди́ном Госпо́дьстве сла́ву серафи́ми пречи́стии, со стра́хом раболе́пно Триипоста́сное сла́вят Божество́. С ни́миже и мы́ благоче́ствующе воспои́м: да благослови́т тва́рь вся́кая Го́спода, и превозно́сит во вся́ ве́ки.

И́н Ирмо́с: В пещи́ о́троцы Изра́илевы:

Черто́г светови́дный, из него́же все́х Влады́ка, я́ко Жени́х произы́де Христо́с, воспои́м вси́ вопию́ще: вся́ дела́ Госпо́дня Го́спода по́йте, и превозноси́те во вся́ ве́ки.

Ра́дуйся Престо́ле сла́вный Бо́жий, ра́дуйся ве́рных стено́, Е́юже су́щым во тьме́ возсия́ све́т Христо́с, Тебе́ блажа́щым, и вопию́щым: вся́ дела́ Госпо́дня Го́спода по́йте, и превозноси́те во вся́ ве́ки.

Спасе́нию вино́внаго на́м Го́спода ро́ждши, моли́ о все́х вопию́щих приле́жно, Де́во Всепе́тая: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Та́же пое́м пе́снь Богоро́дицы: Вели́чит душа́ моя́ Го́спода: С припе́вом: Честне́йшую херуви́м:

Пе́снь 9

Ирмо́с: О́браз чи́стаго рождества́ Твоего́, огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́ Богоро́дице непреста́нно велича́ем.

О ка́ко, лю́дие беззако́ннии и непокори́вии, лука́вая совеща́вше, го́рдаго и нечести́ваго оправди́ша: Пра́веднаго же на дре́ве осуди́ша Го́спода сла́вы, Его́же досто́йно велича́ем!

Спа́се А́гнче Непоро́чне, и́же ми́ра грехи́ взе́мый, тебе́ сла́вим воскре́сшаго тридне́вно, со Отце́м и Боже́ственным Твои́м Ду́хом, и Го́спода сла́вы: его́же богосло́вяще, велича́ем.

Богоро́дичен: Спаси́ лю́ди Твоя́, Го́споди, и́хже стяжа́л еси́ честно́ю Твое́ю кро́вию, це́рквам Твои́м подая́ ми́р, Человеколю́бче, Богоро́дицы моли́твами.

И́н Ирмо́с: Та́инство стра́нное:

Просла́вися неизрече́нною си́лою Твое́ю кре́ст Тво́й, Го́споди, немощно́е бо Твое́ па́че си́лы все́м яви́ся: и́мже си́льнии у́бо низложе́ни бы́ша на зе́млю, и ни́щии к небеси́ возводи́ми быва́ют.

Умертви́ся ме́рзкая на́ша сме́рть, из ме́ртвых Воскре́сением: Ты́ бо яви́вся су́щым во а́де, Христе́, живо́т дарова́л еси́ 6. Те́мже Тя́ я́ко жи́знь и воскре́сение и све́т Ипоста́сный пою́ще велича́ем.

Тро́ичен: Безнача́льное естество́ и Непреде́льное, в Трие́х познава́ется Еди́нствех, Богонача́льных Ипоста́сех Еди́но Божество́, во Отце́, и Сы́не, и Ду́хе: на Не́же богому́дрии лю́дие упова́юще, спаса́емся.

И́н Ирмо́с: О́браз чи́стаго:

Из ко́рене Дави́дова прозябла́ еси́ проро́ческаго Де́во, и богооте́ческаго: но и Дави́да я́ко вои́стинну Ты́ просла́вила еси́, я́ко ро́ждши проро́чествованнаго Го́спода сла́вы: Его́же досто́йно велича́ем.

Вся́к похва́льный, Пречи́стая, зако́н побежда́ется вели́чеством сла́вы Твоея́. Но, о Влады́чице, от ра́б Твои́х недосто́йных, от любве́ Тебе́ приноси́мое приими́, Богоро́дице, со усе́рдием пе́ние похва́льное.

О па́че ума́ чуде́с твои́х! Ты́ бо, Де́во, еди́на па́че со́лнца, все́м дала́ еси́ разуме́ти нове́йшее чу́до, Всечи́стая, Твоего́ Рождества́ непостижи́маго. Те́мже Тя́ вси́ велича́ем.

По катава́сии ектениа́ ма́лая. Та́же, Свя́т Госпо́дь Бо́г на́ш: три́жды. ексапостила́рий у́тренний.

На хвали́тех стихи́ры воскре́сны, гла́с 1:

Сти́х: Сотвори́ти в ни́х су́д напи́сан: сла́ва сия́ бу́дет все́м преподо́бным Его́.

Пое́м Твою́, Христе́, спаси́тельную стра́сть, и сла́вим Твое́ Воскре́сение.

Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.

Кре́ст претерпе́вый, и сме́рть упраздни́вый, и воскресы́й из ме́ртвых, умири́ на́шу жи́знь Го́споди, я́ко еди́н Всеси́лен.

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

А́да плени́вый, и челове́ка воскреси́вый, Воскре́сением Твои́м, Христе́, сподо́би на́с чи́стым се́рдцем Тебе́ пе́ти и сла́вити.

Сти́х: Хвали́те Его́ во гла́се тру́бнем: хвали́те Его́ во псалти́ри и гу́слех.

Боголе́пное Твое́ снисхожде́ние сла́вяще, пое́м Тя́, Христе́. Роди́лся еси́ от Де́вы, и не разлуче́н бы́л еси́ от Отца́, пострада́л еси́ я́ко челове́к, и во́лею претерпе́л еси́ Кре́ст, воскре́сл еси́ от гро́ба, я́ко от черто́га произше́д да спасе́ши ми́р, Го́споди, сла́ва Тебе́.

И́ны стихи́ры, Анато́лиевы, гла́с то́йже:

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

Егда́ пригвозди́лся ес́и на дре́ве кре́стнем, тогда́ умертви́ся держа́ва вра́жия: тва́рь поколеба́ся стра́хом Твои́м: и а́д плене́н бы́сть держа́вою Твое́ю: ме́ртвыя от гро́б воскреси́л еси́, и разбо́йнику ра́й отве́рзл еси́: Христе́ Бо́же на́ш, сла́ва Тебе́.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.

Рыдаю́щя со тща́нием гро́ба Твоего́ доше́дшя честны́я жены́, обре́тшя же гро́б отве́рст, и уве́девшя от А́нгела но́вое и пресла́вное чу́до, возвести́ша апо́столом: я́ко воскре́се Госпо́дь, да́руяй ми́рови ве́лию ми́лость.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Страсте́й Твои́х Боже́ственным я́звам покланя́емся, Христе́ Бо́же, и е́же в Сио́не влады́чнему священноде́йствию, на коне́ц веко́в богоявле́нне бы́вшему: и́бо во тьме́ спя́щыя, Со́лнце просвети́ пра́вды, к невече́рнему наставля́я сия́нию: Го́споди, сла́ва Тебе́.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

Любомяте́жный ро́де евре́йский внуши́те, где́ су́ть, и́же к Пила́ту прише́дшии: да реку́т стрегу́щии во́ини: где́ су́ть печа́ти гро́бныя? где́ преложе́н бы́сть Погребе́нный? где́ про́дан бы́сть Непрода́нный? ка́ко укра́дено бы́сть Сокро́вище? что́ оклевету́ете Спа́сово воста́ние пребеззако́нии иуде́и? Воскре́се и́же в ме́ртвых свобо́дь, и подае́т ми́рови ве́лию ми́лость.

Сла́ва, стихи́ра ева́нгельская у́тренняя

И ны́не: Преблагослове́нна еси́, Богоро́дице Де́во, Вопло́щшим бо ся из Тебе́ ад плени́ся, Ада́м воззва́ся, кля́тва потреби́ся, Е́ва свободи́ся, сме́рть умертви́ся, и мы́ ожи́хом, те́м воспева́юще вопие́м: благослове́н Христо́с Бо́г благоволи́вый та́ко, сла́ва Тебе́.

Славосло́вие вели́кое. Та́же, тропа́рь воскре́сен:

Дне́сь Спасе́ние ми́ру бы́сть, пое́м Воскре́сшему из гро́ба, и Нача́льнику жи́зни на́шея: разруши́в бо сме́ртию сме́рть, побе́ду даде́ на́м, и ве́лию ми́лость.

И отпу́ст

На литурги́и изобрази́тельная, блаже́нна, гла́с 1:

Сне́дию изведе́ из рая́ вра́г Ада́ма: Кресто́м же разбо́йника введе́ Христо́с во́нь, помяни́ мя, зову́ща, егда́ прии́деши во Ца́рствии Твое́м.

Сти́х: Блаже́ни чи́стии се́рдцем, я́ко ти́и Бо́га у́зрят.

Покла́няюся страсте́м Твои́м, славосло́влю и Воскресе́ние со Ада́мом и разбо́йником, со гла́сом све́тлым вопию́ Ти: помяни́ мя, Го́споди, егда́ прии́деши во Ца́рствии Твое́м.

Сти́х: Блаже́ни миротво́рцы, я́ко ти́и сы́нове Бо́жии нареку́тся.

Распя́лся еси́ безгре́шне, и во гро́бе положи́лся еси́ во́лею: но воскре́сл еси́ я́ко Бо́г, совоздви́гнувый себе́ Ада́ма, помяни́ мя, зову́ща, егда́ прии́деши во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Хра́м Тво́й теле́сный тридне́вным Воскреси́вый погребе́нием, со Ада́мом, и и́же о Ада́ма, воскреси́л еси́ Христе́ Бо́же: помяни́ на́с зову́щих, егда́ прии́деши во Ца́рствии Твое́м.

Сти́х: Блаже́ни есте́, егда́ поно́сят ва́м, и иждену́т, и реку́т вся́к зо́л глаго́л на вы́ лжу́ще Мене́ ра́ди.

Мироно́сицы приидо́ша пла́чущя, на гро́б Тво́й Христе́ Бо́же, зело́ ра́но: и в бе́лых ри́зах обрето́ша А́нгела седя́ща, что́ и́щете? зову́ща. Воскре́се Христо́с, не рыда́йте про́чее.

Сти́х: Ра́дуйтеся и весели́теся, я́ко мзда́ ва́ша мно́га на небесе́х.

Апо́столи Твои́, Го́споди, на го́ру, а́може повеле́л еси́ и́м, прише́дше, Спа́се, и Тя́ ви́девше поклони́шася, и́хже и посла́л еси́ во язы́ки учи́ти и крести́ти я́.

Сла́ва, тро́ичен: Отцу́ поклони́мся, и Сы́на славосло́вим и Пресвята́го Ду́ха вку́пе воспои́м, зову́ще и глаго́люще: Всесвята́я Тро́ице, спаси́ все́х на́с.

И ны́не: Ма́терь Твою́ приво́дят Ти́ в моли́тву, лю́дие Твои́, Христе́: мольба́ми Ея́ щедро́ты Твоя́ да́ждь на́м, Благи́й, да Тя́ прославля́ем, из гро́ба на́м возсия́вшаго.

Проки́мен, гла́с 1: Бу́ди, Го́споди, ми́лость Твоя́ на на́с, я́коже упова́хом на Тя́.

Сти́х: Ра́дуйтеся пра́веднии о Го́споде, пра́вым подоба́ет похвала́.

Аллилу́иа: Бо́г дая́й отмще́ние мне́, и покори́вый лю́ди под мя́.

Сти́х: Велича́яй спасе́ния царе́ва, и творя́й ми́лость Христу́ своему́ Дави́ду, и се́мени его́ до ве́ка.

В Неде́лю ве́чера

на Го́споди воззва́х, стихи́ры умили́тельны Влады́чны. Гла́с 1

Подо́бен: Прехва́льнии му́ченицы:

Сти́х: А́ще беззако́ния на́зриши, Го́споди, Го́споди, кто́ постои́т; я́ко у тебе́ очище́ние е́сть.

Вся́ приве́л еси́ Твои́м Сло́вом и Ду́хом, за бла́гость, Го́споди, та́же сотвори́л еси́ слове́сное мя́ живо́тно, да Твое́ свято́е сла́влю всеси́льное И́мя. А́з же наипа́че сту́дными мои́ми де́лы всегда́ безче́ствую: но пощади́, молю́ся.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в Сло́во Твое́, упова́ душа́ моя́ на Го́спода.

Позна́й твое́, окая́нная душе́, боже́ственное благоро́дие, и оте́чество нетле́нное, и тщи́ся всегда́ благодея́ньми сие́ достига́ти: ничто́же от тле́нных да плени́т тя́, го́рния ча́сти еси́, те́ло же земля́ и тле́ется, да не победи́т ху́ждшее лу́чшия.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Гряди́, всеокая́ная душе́ моя́, ко Преблаго́му, те́плыми слеза́ми приступи́, соде́янная тобо́ю пре́жде суда́ твоего́ вся́ испове́дуй, и ми́лостива созда́теля, окая́нная, себе́ соде́лай, и проще́ние испроси́, пре́жде да́же две́ри не заключи́т тебе́ Госпо́дь.

И́ны стихи́ры, безпло́тным, подо́бен то́йже:

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

Безпло́тнии а́нгели, Бо́жию Престо́лу предстоя́щии, и отону́дными светлостьми́ облистава́еми, и светоли́тии ве́чно сия́юще, и све́ти быва́юще втори́и, Христу́ моли́теся, дарова́ти душа́м на́шым ми́р и ве́лию ми́лость.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Безсме́ртнии а́нгели, живо́т вои́стинну неги́блемый, от Пе́рваго прие́мше Живота́ всебога́тии, присносу́щныя сла́вы, и святи́и зри́телие прему́дрости ве́чныя бы́сте, све́та исполня́еми, и свещы́ сообраща́еми прили́чно показу́еми.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Арха́нгели, а́нгели, нача́ла, престо́ли, госпо́дствия, серафи́ми шестокрила́тии, и многоочи́тии херуви́ми Боже́ственнии, прему́дрости орга́ни: си́лы, вла́сти Боже́ственнейшии, Христо́ви моли́теся, дарова́ти душа́м на́шым ми́р и ве́лию ми́лость.

Сла́ва, и ны́не, Богоро́дичен: Мари́е Непоро́чная, и ума́ вся́каго превосходя́щая, чисте́йшая колесни́це, обдержи́ма мя́ мно́гими грехми́ и стесня́ема, к широте́ покая́ния напра́ви мя́ всеси́льнейшим Твои́м предста́тельством: и́бо мо́жеши я́ко Ма́ти вся́ Могу́щаго.

Та́же, Све́те ти́хий: Посе́м проки́мен: Се́ ны́не благослови́те Го́спода вси́ раби́ Госпо́дни: Сти́х: Стоя́щии в хра́ме Госпо́дни, во дво́рех до́му Бо́га на́шего. Та́же, Сподо́би Го́споди: И ектениа́.

Та́же на стихо́вне стихи́ры умили́тельны. Гла́с 1:

Я́ко пучи́на мно́га прегреше́ний мои́х, Спа́се, и лю́те погружа́юся согреше́ньми мои́ми, да́ждь ми́ ру́ку я́ко Петро́ви, спаси́ мя, Бо́же, и поми́луй мя́.

Сти́х: К Тебе́ возведо́х о́чи мои́, живу́щему на небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Я́ко в помышле́ниих лука́вых и в де́лех осуди́хся, Спа́се, мы́сль мне́ да́руй обраще́ния, Бо́же, да зову́ Ти: спаси́ мя, Благоде́телю Благи́й, и поми́луй мя́.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.

Моли́твами, Го́споди, все́х святы́х и Богоро́дицы, ми́р тво́й да́ждь на́м, и поми́луй на́с, я́ко Еди́н Ще́др.

Сла́ва, и ны́не, Богоро́дичен: Небе́сных чино́в ра́дование, на земли́ челове́ков кре́пкое предста́тельство, Пречи́стая Де́во, спаси́ ны, и́же к Тебе́ прибега́ющыя: я́ко на Тя́ упова́ние по Бо́зе, Богоро́дице, возложи́хом.

Та́же: Ны́не отпуща́еши: Трисвято́е: По О́тче на́ш: Тропа́рь свято́му. Сла́ва: и ны́не, Богоро́дичный тропа́рь. Посе́м ектениа́. И отпу́ст.

В Неде́лю на повече́рии

глаго́лет иере́й: Благослове́н Бо́г на́ш: Мы́ же: Ами́нь. Сла́ва Тебе́ Бо́же на́ш, сла́ва Тебе́. Царю́ Небе́сный: И про́чее обы́чно.

Та́же: Кано́н моле́бный пресвяте́й Богоро́дице, гла́с 1.

Пе́снь 1

Ирмо́с: Твоя́ победи́тельная десни́ца, боголе́пно в кре́пости просла́вися: та́ бо безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.

Неизглаго́ланно зачала́ еси́ Бо́га, и па́че естества́ родила́ еси́, Влады́чице Пречи́стая, земны́я от прегреше́ний изме́ншаго. Те́мже молю́ Тя: мно́гих мя́ прегреше́ний изба́ви.

Пучи́ною погружа́емь, беда́ми грехо́в неизче́тных, и скорбе́й, но окормле́нием Твои́м си́льным, и моли́твою, Всенепоро́чная, к тишине́ Боже́ственней покая́ния напра́ви.

Сла́ва: Всея́ моея́ жи́зни Предста́тельнице, от бе́д мно́гих изба́ви мя́, да благода́рственный гла́с воспева́ю Ти́, Богоро́дице Чи́стая, и бу́дущия мя́ исхити́ му́ки.

И ны́не: Обстоя́тельная нахожде́ния, и напа́стей бу́рю утоли́, Ма́ти Всенепоро́чная, Изба́вителя и Зижди́теля и Бо́га на́шего, благода́ть спасе́ния и очище́ния ми́ подаю́щи.

Пе́снь 3

Ирмо́с: Еди́не ве́дый челове́ческаго существа́ не́мощь, и ми́лостивно в не́ вообра́жься, препоя́ши мя́ с высоты́ си́лою, е́же вопи́ти Тебе́, Святы́й: Одушевле́нный Хра́ме7 неизрече́нныя сла́вы Твоея́, Человеколю́бче.

Виде́ние зра́ка Твоего́ Чи́стаго, а́нгелом у́бо сла́достно, челове́ком же е́сть спаси́тельно, духово́м же лука́вствия стра́шно: е́же ве́рою почита́юще и целу́юще, Богоро́дице, ду́шу просвеща́ем.

Кровьми́ из Тебе́ Де́вческими, пло́ть Свою́ обложи́ Соде́тель и Госпо́дь: Его́же моли́, Всенепоро́чная, растле́вша мя́ безме́стными дея́ньми, уще́дрити за неизрече́нную ми́лость.

Сла́ва: Жи́зни стяжа́в Тя́ Храни́тельницу, и сте́ну необори́му, и по кончи́не покро́в Тя́ обрести́, и Засту́пницу непобеди́му, к Бо́гу вводя́щу, и живо́т подаю́щу ве́чный, и сла́ву, Пренепоро́чная.

И ны́не: Зача́тие безсе́менно Чи́стая, и Рождество́ нетле́нно: Бо́г бо бе́ я́ве рожде́йся, челове́ческаго естества́ паде́ние призыва́я. Те́мже Богоро́дицу Тя́ и́стинную и су́щую воспева́ем.

Пе́снь 4

Ирмо́c: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше свято́му, во спасе́ние на́ше и обновле́ние.

Неудержа́нное стремле́ние к злу́ влече́т мя́, де́йствием врага́, и обы́чаем лука́вым: помози́ ми, Влады́чице, да не до конца́ всепа́губный нападе́т на мя́, сме́ртию возбраня́я ми́ к покая́нию.

Все́ вре́мя живота́ моего́ ижди́х в блуде́х злы́х, и я́звах лю́тых, и ны́не веду́т смире́нную ду́шу мою́ си́х де́латели: Богороди́тельнице Де́во, помози́ ми.

Сла́ва: услы́ши гла́с мо́й боле́зненный Всенепоро́чная, и́же из глубины́ души́ привноша́ю стена́ньми, и разреше́ние пода́ждь ми́ долго́в, и́хже соде́ях окая́нный мы́слию, и нра́вом несмы́сленным.

И ны́не: Влады́чице ми́ра, Богоро́дице, помози́ ми, прелука́вый вра́г поглоща́ет мя́ зе́льне лю́тыми воспомина́нии и помышле́нии, я́же от Бо́га мя́ разлуча́ют. Не оста́ви у́бо мене́, ниже́ пре́зри.

Пе́снь 5

Ирмо́с: Просвети́вый сия́нием прише́ствия Твоего́, Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Се́ гото́ву ко спасе́нию по́мощь стяжа́х, сего́ ра́ди Тебе́ припа́даю, и зову́ со слеза́ми: Богоро́дице, изба́ви мя́ от стре́л чужда́го, и бу́дущаго истяза́ния.

Ты́ кре́пость моя́, Ты́ похвала́ и ра́дование, и Храни́тельница ми́ еси́, и заступле́ние, и прибе́жище, и Предста́тельница Непобеди́ма, Пресвята́я Богоро́дице Де́во. Те́мже спаси́ раба́ Твоего́.

Сла́ва: Оскве́рншуюся окая́нную мою́ ду́шу страстьми́, окропле́нием Боже́ственныя Твоея́ моли́твы очи́сти, Богоро́дице Пречи́стая, подаю́щи спасе́ния Твоего́ све́тлую оде́жду.

И ны́не: В жи́зни мое́й тве́рдое ми́ окормле́ние еси́, треволне́ния избавля́ющи мно́гих обстоя́ний, и во исхо́де мое́м, молю́ Тя, предста́ни ми́ спаса́ющи, Ма́ти Христа́ Бо́га.

Пе́снь 6

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́, Бо́же на́ш: Ты́ бо кре́пость немощству́ющих и исправле́ние.

Безневе́стная Богороди́тельнице Пречи́стая, ру́ку Твою́ простри́ ми, и исхи́ти из глубины́ зо́л, я́же безу́мием исхода́таих мое́й души́ стра́стней преокая́нный.

Воста́ни, Чи́стая, на по́мощь рабу́ Твоему́, иму́щему наде́жду свою́ с Бо́гом, к Твоему́ заступле́нию непобеди́мому: да не вра́г возмо́г, во́змет и погуби́т мя́.

Сла́ва: Боля́щих Цели́тельницу, па́дающих воста́ние, согреша́ющих очище́ние, Богоро́дице, Тебе́ молю́, со слеза́ми припа́даю, и зову́ Ти: я́ко Сильна́, Сама́ мя спаси́ погиба́ющаго.

И ны́не: Поми́луй, Чи́стая, смире́нную мою́ ду́шу, предвари́ и восхи́ти, изъе́млющи ю́ от лука́ваго: тщи́тся бо в про́пасть посла́ти ю́ злы́х ра́ди, я́же ле́ность мно́гая соде́ла.

Та́же, Го́споди, поми́луй, три́жды. Сла́ва: и ны́не:

Седа́лен, гла́с 1. Подо́бен: Гро́б тво́й, Cпа́се:

Моли́твенницу ко Го́споду стяжа́хом Тя́ вси́, Чи́стая, и притека́ем в Це́рковь Твою́ Святу́ю, прося́ще по́мощи от Тебе́, Присноде́во: изба́ви у́бо на́с от бесо́вския зло́бы и муче́ния, и осужде́ния стра́шнаго, Тя́ блажа́щыя.

Пе́снь 7

Ирмо́с: Тебе́ у́мную, Богоро́дице, пе́щь разсмотря́ем ве́рнии: я́коже бо о́троки спасе́ три́ Превозноси́мый, ми́р обнови́, во чре́ве Твое́м Всеце́л, хва́льный отце́в Бо́г, и препросла́влен.

Боже́ственная ски́ния, Влады́це, была́ еси́, я́ко заче́нши во чре́ве, и ро́ждши Сего́ пло́тию, Еди́на Непоро́чная. Те́мже на́с изба́ви страсте́й, и боле́зней, и скорбе́й, и долго́в: и́бо и́маши кре́пость и си́лу мно́гу.

Уста́ви Чи́стая, боле́знь нестерпи́мую, преокая́нныя моея́ души́, ра́дость ми́ и́стинную, Влады́чице, подаю́щи, реша́щи прегреше́ний мои́х мно́гих му́тную волну́: Ты́ бо ми́ еси́ прибе́жище и избавле́ние.

Сла́ва: Все́ на Тя́ упова́ние положи́х спасе́ния моего́: Тя́ бо стяжа́х по́мощь, и непобори́мь сто́лп, и утвержде́ние, и тве́рдости извеще́ние, и Тобо́ю Ца́рство получи́ти наде́юся, Влады́чице.

И ны́не: Восто́к Со́лнца была́ еси́ сла́вы, Влады́чице Чи́стая: Тобо́ю бо Явле́йся, вся́ свободи́ тьмы́ и неве́дения, и смра́дных прегреше́ний. Те́мже вопию́ Ти: вне́шния мя́ тьмы́ свободи́.

Пе́снь 8

Ирмо́с: В пещи́ о́троцы Изра́илевы, я́коже в горни́ле добро́тою благоче́стия, чисте́е зла́та блеща́хуся, глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Страсте́й смуще́ние лю́те оскорбля́ет ду́шу мою́, Богоро́дице: тишины́ же и ми́ра я́же Вино́вника, Чи́стая, и Пода́теля ро́ждши, в ми́рне устрое́нии соблюда́ющи, ти́хостныя мя́ испо́лни ра́дости и весе́лия.

Спасе́ния Хода́таица на́м яви́лася еси́, Богоро́дице, ро́ждшая Спа́са и Влады́ку вся́ческих. Те́мже молю́ Тя́: спасе́ния сподо́би смире́нную мою́ ду́шу, песносло́вити Тя́ ве́рно во вся́ ве́ки.

Сла́ва: Я́же Зижди́теля все́х и Бо́га неизглаго́ланно заче́нши, спаси́ мя от тли́, и вся́каго искуше́ния, и дава́й вопи́ти при́сно: благослови́те вся́ дела́ Го́спода, по́йте и превозноси́те Его́ во ве́ки.

И ны́не: Вся́ческих Зижди́теля и Бо́га родила́ еси́, Де́во, Его́же моли́, дарова́ти прегреше́ний очище́ние, и скорбе́й избавле́ние и напа́стей, и ве́чнаго огня́, и осужде́ния, славосло́вящым непреста́нно Твою́ сла́ву.

Пе́снь 9

Ирмо́с: О́браз чи́стаго Рождества́ Твоего́, огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́, Богоро́дице, непреста́нно велича́ем.

Ма́ти Бо́жия Всенепоро́чная, ми́лостивную Твою́ утро́бу мне́ отве́рзи, и от у́ст мы́сленнаго во́лка изба́ви мя́, и́щущаго погуби́ти и растли́ти мя́: поми́луй, молю́ Тя, не возврати́ мене́ посра́млена раба́ Твоего́.

Всея́ моея́ жи́зни бу́ди Предста́тельница, и тве́рдое заступле́ние. И изба́ви мя́, Всечи́стая, мно́гих напа́стей и печа́лей, и враго́в языкобо́лия, но и огня́ ве́чнаго изба́ви мя́.

Сла́ва: Еди́на боля́щих посеще́ние: Еди́на па́дших исправле́ние, Влады́чице: Еди́на к Бо́гу Руководи́тельница и вхо́д: Еди́на Хода́таица ве́чных бла́г, поми́луй мя́ еди́наго, па́че все́х согреши́вшаго.

И ны́не: Приими́ мою́ сле́зную ны́не моли́тву, и пода́ждь ми́ оставле́ние согреше́ний, и мно́гих злы́х, я́же соде́ях, Богоро́дице, Всепе́тая Влады́чице: до конца́ бо погиба́ю от безме́рнаго отча́яния.

Та́же, Досто́йно е́сть: и про́чее обы́чно, и отпу́ст

В понеде́льник у́тра,

по 1-м стихосло́вии, седа́льны умили́тельны. Гла́с 1:

В беззако́ниих зача́т е́смь а́з блу́дный, не сме́ю взира́ти на высоту́ небе́сную. но дерза́я на человеколю́бие Твое́ зову́: Бо́же, очи́сти мя́ и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

А́ще пра́ведник едва́ спаса́ется, а́з где́ явлю́ся гре́шный? тяготы́ и зно́я дневна́го не понесо́х: но с нае́мники единонадеся́таго часа́ сопричти́ мя, Бо́же, и спаси́ мя.

Сла́ва, и ны́не, Богоро́дичен: Пречи́стая Богоро́дице, я́же на Небесе́х благослове́нная, и на земли́ славосло́вимая: ра́дуйся, Неве́сто Неневе́стная.

По 2-м стихосло́вии седа́льны. Гла́с 1.

Подо́бен: Гро́б Тво́й, Спа́се:

Объя́тия О́тча отве́рсти ми́ потщи́ся, блу́дне ижди́х мое́ житие́, на бога́тство неиждива́емое взира́яй щедро́т Твои́х, Спа́се, ны́не обнища́вшее мое́ се́рдце не пре́зри. Тебе́ бо, Го́споди, во умиле́нии зову́: согреши́х Ти́, спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Суди́ще Твое́ стра́шно, и су́д пра́веден, дела́ моя́ лю́та: но Ты́, Ми́лостиве, предвари́в мя́ спаси́, и му́ки свободи́, и изба́ви, Влады́ко, шу́их ча́сти, и сподо́би одесну́ю Тебе́ ста́ти, Судие́ пра́веднейший.

Та́же му́ченичен:

Сти́х: Ди́вен Бо́г во святы́х Свои́х, Бо́г Изра́илев.

Страда́ния похвало́ю, венце́в досто́инством, сла́внии страстоте́рпцы оде́яшася Тобо́ю, Го́споди: терпе́нием бо ра́н, беззако́нных победи́ша, и си́лою Боже́ственною с небесе́ побе́ду прия́ша. Те́х моли́твами и мене́ свободи́ от неви́димаго врага́, Спа́се, и спаси́ мя.

Сла́ва, и ны́не, Богоро́дичен: Упра́ви, Чи́стая, окая́нную мою́ ду́шу, и уще́дри ю́ от мно́жества прегреше́ний, во глубину́ попо́лзшуюся поги́бели, Всенепоро́чная, и в ча́с мя́ стра́шный сме́ртный Ты́ исхити́ оглаго́лующих де́монов, и вся́кия му́ки.

И́ны седа́льны, егда́ стихосло́вится 3-я кафи́сма. Гла́с 1

Подо́бен: Гро́б Тво́й, Спа́се:

Безу́мно от Тебе́ удали́вся, Всеще́дре, блу́дно мое́ ижди́х житие́, рабо́таяй страсте́м безслове́сным всегда́: но приими́ мя А́нгелов моли́твами, О́тче благоутро́бне, я́коже блу́днаго о́трока, и спаси́ мя.

Сла́ва, и ны́не, Богоро́дичен: Невеще́ственных во́инств преиму́щая Отрокови́це, и чи́ны небе́сныя превосходя́щая еди́на, досто́йную похвалу́ от ни́х прие́млеши, Всечи́стая: но моли́ Сы́на Твоего́ со А́нгелы, е́же изба́витися мне́ от страсте́й мучи́тельства, Еди́ному осужде́нному.

Кано́н умили́тельный, его́же краестро́чие: Прегреше́ний мои́х скве́рну омы́й, Сло́ве. Творе́ние господи́на Ио́сифа. Гла́с 1.

Пе́снь 1

Ирмо́с: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Грехо́в мои́х мно́жество, по мно́жеству, Христе́, ми́лости Твоея́, молю́ся Ти́, потреби́, и помышле́ние обраще́ния ми́ да́руй: я́ко да Твою́ сла́влю я́же па́че ума́ благосты́ню.

Яви́лся еси́ за милосе́рдие щедро́т, на земли́ воплоща́емь Челове́к: те́мже па́че челове́ка, Сло́ве Бо́жий, согреши́вша приими́ мя ны́не покая́нием к щедро́там Твои́м припа́дающаго.

Та́же му́ченичны: Умерщвле́ние подража́вше, Христа́ во́лею пострада́вшаго, всехва́льнии, и сме́рть, стра́сти претерпе́сте многови́дныя и сме́рть, присносла́внии. Те́мже безсме́ртное житие́ улучи́сте, му́ченицы.

Му́ченичен: О́гнь любве́ Боже́ственныя пресла́вно вну́трь нося́ще му́ченицы, огня́ не убоя́стеся: но те́плыми боле́зней преспе́янии многобо́жия вещество́ вся́кое попали́сте.

Богоро́дичен: Чи́нове безпло́тных с на́ми воспева́ют Тя́, Де́во Всепе́тая: необъиме́ннаго бо во чре́ве Твое́м воплоще́нна родила́ еси́, пребы́вши Де́ва я́коже и пре́жде рождества́, Богоневе́сто.

Други́й кано́н безпло́тным, его́же краестро́чие: Пе́рвое А́нгелом пе́ние. Творе́ние господи́на Феофа́на. Гла́с 1.

Пе́снь 1

Ирмо́с то́йже

Престо́лу предстоя́ще све́тло Влады́чнему всесвяти́и А́нгели, Отцу́ собезнача́льна, и Того́ вели́каго сове́та А́нгела, сло́во ми́ вдохну́ти ва́с пою́щу, моли́теся. [Два́жды.]

Зерца́ла све́та богонача́льна, и трисо́лнечныя свещи́ сия́ние в себе́ прие́млющыя, по ели́ку пости́жно, а́нгельския чи́ны пе́рвее умы́слив, у́м Боже́ственный соста́ви.

Богоро́дичен: Украше́й я́ко Бо́г чинонача́лия вы́шних си́л, во утро́бу неискусобра́чную, Серафи́мов вы́шшу, всели́ся Твою́, Богоро́дице, и пло́ть непреме́нна бы́сть.

Пе́снь 3

Ирмо́с: Еди́не ве́дый челове́ческаго существа́ не́мощь, и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный Хра́ме8 неизрече́нныя сла́вы Твоея́, Человеколю́бче.

Возни́кни, гряди́, о душе́! и возопи́й Созда́телю Твоему́, та́йная твоя́ вся́ Ве́дущему, и покая́ния плоды́ покажи́: я́ко да поми́лует тя́ Ще́дрый Госпо́дь, и огня́ ве́чнаго изба́вит.

Очи́сти, Еди́не Бла́же, очи́сти и спаси́ мя, я́ко мыта́рь со стра́хом зову́ Ти: мно́жеством грехо́в влеки́йся, и преклоня́емь е́смь тягото́ю прегреше́ний, и студа́ безме́рнаго исполня́яйся.

Му́ченичен: Му́дростию и ра́зумом и́стинным му́ченицы исполня́еми, е́ллинскую му́дрость обуи́ша, му́дростную же зло́бу погуби́ша, и кре́пко пострада́вше, досто́йне восприя́ша побе́ды венцы́, ра́дующеся.

Му́ченичен: Еди́ницу у́бо естество́м, страда́льцы, Тро́ицу же ли́цы испове́дающе, пре́лесть многобо́жную Боже́ственною ве́рою потреби́сте, и свети́льницы яви́стеся, все́х озаря́юще сердца́ луча́ми благода́тными.

Богоро́дичен: Свята́я Богоневе́сто Чи́стая, свя́то породила́ еси́, во святы́х почива́ющаго, Сы́на и Сло́ва Отцу́ собезнача́льнаго, освяща́ющаго о Святе́м Ду́се, и́же того́ благоче́стно освяща́ющыя.

И́н Ирмо́с то́йже

Све́ту богоде́тельному Серафи́ми несре́дственно приближа́ющеся, и многогу́бо и́м насыща́еми, первода́тными я́ве сия́ньми перводе́льно све́тятся, и я́ко све́ти втори́и быва́ют, Божество́м обожа́еми. [Два́жды.]

А́нгельския све́тлости пе́ти усе́рдно жела́юще, я́же те́ми от Бо́га по́мощь подае́мую, ве́рнии про́сим ума́ чистото́ю, и пречи́стыми усты́, и да полу́чим си́х сия́ние.

Богоро́дичен: Ума́ пресу́щественнаго ви́дети сподобля́еми, я́ко ле́по, Гаврии́л, Де́во Всенепоро́чная, ра́дованен гла́с принесе́ Тебе́, словесе́ зача́тие я́ве возвеща́я Ти́, и неизрече́нное рождество́ пропове́дая Твое́.

Пе́снь 4

Ирмо́с: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Кому́ тя, душе́ моя́ окая́нная, уподо́блю, де́лающую лю́тая, и не творя́щую до́брых? обрати́ся, возопи́й тебе́ ра́ди Обнища́вшему во́лею: Сердцеве́дче, уще́дри, и спаси́ мя.

Определи́вый покая́ние, Спа́се, обраща́ющымся, е́же ми́ пода́ждь бла́же, пре́жде конца́ житию́ дая́ ми умиле́ние и воздыха́ние, я́ко блудни́це пе́рвее, облобыза́ющей но́зе Твои́, Влады́ко.

Му́ченичен: Во́д духо́вных испо́лншеся му́ченицы, воды́ жи́вы ре́ки яви́шася манове́нием Боже́ственным, и пре́лести изсуши́ша му́тныя Христе́ пото́ки ду́хом, и ве́рных мы́сли напои́ша.

Му́ченичен: Вельми́ подви́гшеся Боже́ственнии му́ченицы, огня́ бо и меча́, и лю́тых все́х претерпе́ша томле́ние. Те́х моле́ньми Сло́ве Бо́жий, превели́кия изба́ви му́ки ве́чныя, ве́рою пою́щыя Тя́.

Богоро́дичен: И́же дре́вле из Отца́ нерожде́нна Сы́н рожде́йся, рождество́ име́ ле́тное, из Тебе́, де́во, вопло́щься, ле́тную бра́нь земноро́дных отя́ти хотя́, Благоутро́бный, и́же дне́й и ле́т превы́ше Сы́й.

И́н Ирмо́с то́йже

Престо́ли пе́рвое исполня́юще удобре́ние, и Херуви́ми и Серафи́ми, Боже́ственными заря́ми, несре́дственно све́тятся, Богоде́тельная священнонача́лия прие́млюще, ны́не пою́т: сла́ва си́ле Твое́й, Го́споди. [Два́жды.]

Пою́т тричи́сленную Еди́ницу Божества́ тро́ическими свяще́ннии непреста́нными гла́сы, явля́юще Cерафи́ми пречи́стое богосло́вия та́инство, и правосла́вней ве́ре науча́юще.

Богоро́дичен: И́же вся́кия тва́ри превы́шши разумева́емь, па́че ума́ живонача́льным зда́нием, вои́стинну на земли́ соверша́я чудеса́, де́вственными све́тлостьми, во Твое́ чи́стое чре́во всели́ся, Пречи́стая.

Пе́снь 5

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Впадо́х в тле́ние страсте́й, и бою́ся Твоего́ пра́веднаго суди́ща, пра́ведный Го́споди. Те́мже молю́ся Ти́: укрепи́ мя твори́ти де́лания блага́я, оправда́ющая мя́.

Безве́стная и та́йная се́рдца моего́ Ты́ ве́си, Бо́же мо́й, и Зижди́телю, и Го́споди, не осуди́ у́бо мене́ в ча́с суда́, внегда́ прии́деши суди́ти вся́ческим.

Му́ченичен: Святи́и причасти́вшеся огню́, разжже́ние показа́ху Боже́ственнаго своего́ любле́ния. Те́мже ороша́еми, ча́янием бу́дущих богоно́снии веселя́хуся.

Му́ченичен: Укрепля́еми благи́х наде́ждею му́ченицы, претерпева́ху растерза́ния удо́в терпели́вейше, и многоко́зненнаго, жи́лами свои́ми неосла́бленнаго терпе́ния, удави́ша.

Богоро́дичен: Вети́йствующая уста́ не возмо́гут, рождества́ Твоего́ неизрече́нное пове́дати чу́до, Богоневе́сто: Несказа́ннаго бо ражда́еши, и на объя́тиях но́сиши руко́ю содержа́щаго вся́ческая.

И́н Ирмо́с то́йже

Любо́вию Боже́ственною распала́еми, Госпо́дьствия, Вла́сти и Си́лы, чи́нове втори́и, немо́лчными усты́ богонача́льное песносло́вят еди́но Существо́ и си́лу.

Управля́ются арха́нгельстии чи́нове Ду́хом, и А́нгелов, и Нача́лов, со безчи́сленными во́инствы: еди́но триипоста́сное просвети́тельно Существо́ почита́ти све́тло учи́ми су́ть.

Богоро́дичен: Украси́лася еси́ па́че вся́каго а́нгельскаго благоле́пия, А́нгелов бо Творца́ заче́нши и Го́спода, Богома́ти Пречи́стая, воплоти́вшагося неизрече́нно от Твои́х крове́й, родила́ еси́.

Пе́снь 6

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́, Бо́же на́ш: Ты́ бо кре́пость немощству́ющих и исправле́ние.

Сы́й вра́чь Христе́, исцели́ стра́сти се́рдца моего́, и омы́й мя́ от вся́кия скве́рны, струя́ми, Иису́се мо́й, умиле́ния, да пою́ и велича́ю благоутро́бие Твое́.

Блудя́ща мя́ на путе́х поги́бели, и в ро́в согреше́ний впа́дающа мя́ обрати́, Христе́, и к незаблу́дным стезя́м наведи́ Твои́х честны́х оправда́ний, я́ко да сла́влю Тя́.

Му́ченичен: Ка́мение вои́стинну многоце́нное, ка́мением посыпа́еми, не отверго́шася ка́мене жи́зненнаго, ниже́ истука́нному ка́мению пожро́ша, сла́внии и венцено́сцы Госпо́дни му́ченицы.

Му́ченичен: Обно́вльше ду́шы ра́лом ве́ры му́ченицы, страда́ния кла́с Ду́хом Боже́ственным стори́чный возрасти́ша, и пи́щи блаже́нныя сподо́бишася.

Богоро́дичен: О́гненных слу́г О́гнь роди́вши, яви́лася еси́ Всенепоро́чная9 и тва́ри вся́кия перводе́льне, Пречи́стая Де́во преиму́щая, в жена́х благослове́нная богора́дованная.

И́н Ирмо́с то́йже

Чи́ни безпло́тных, Го́споди, престо́лу предстоя́ще сла́вы Твоея́, Человеколю́бче, гла́сы а́нгельскими непреста́нными Тя́ почита́ют: Ты́ бо кре́пость еси́ те́х, Христе́, и пе́ние. [Два́жды.]

Лице́ Твое́ зря́ще А́нгели, добро́ту недомы́слимую, Пребоже́ственное благоле́пие Твоея́ Боже́ственныя све́тлости, просвеща́ются: Ты́ бо те́х и све́т еси́ и ра́дование.

Богоро́дичен: Воплоти́ся, и́же пре́жде сы́й безпло́тное Сло́во, из Тебе́, Пречи́стая, вся́ческая во́лею творя́й, и безпло́тных во́инства приведы́й от небытия́, я́ко Всеси́лен.

Песнь 7

Ирмо́с: Тебе́ у́мную, Богоро́дице, пе́щь разсмотря́ем ве́рнии: я́коже бо о́троки Спасе́ три́ превозноси́мый, ми́р обнови́, во чре́ве Твое́м всеце́л, хва́льный отце́в Бо́г, и препросла́влен.

Львы́ дре́вле Дании́л укроти́, сожи́тельницу име́яй доброде́тель: тому́ поревну́й, о душе́, и рыка́ющаго всегда́ я́ко льва́, и объя́ти хотя́ща тя́, е́же к Бо́гу взира́нием при́сно, безде́льна сотвори́.

Премно́жеством блуда́, Го́споди, ду́шу оскверни́х лю́те. Превосходя́щую у́бо, Христе́, имы́й благосты́ню, приими́ я́ко блу́днаго, и пою́ща мя́ уще́дри: Препе́тый отце́в Бо́г, и препросла́влен.

Му́ченичен: Зако́ном Христо́вым благомо́щно укрепля́еми, беззако́нных сове́ты погуби́ша, непобеди́мии му́ченицы, зако́нно же сконча́вшеся, воспева́ху: Препе́тый отце́в Бо́г, благослове́н еси́.

Му́ченичен: Богоза́рнии Госпо́дни му́ченицы, распала́еми све́том Тро́ическим, я́ве муче́ния тьму́, и пре́лести мглу́ разруши́сте, пою́ще: Препе́тый отце́в Бо́г, и препросла́влен.

Богоро́дичен: Зако́ни естества́ в Тебе́ обновля́ются: Законода́вца бо Христа́ кроме́ зако́н плотски́х ражда́еши, Всенепоро́чная, все́м избавле́ние законополага́юща пою́щым: Препе́тый отце́в Бо́г и препросла́влен.

И́н Ирмо́с то́йже

Безнача́льный Све́т ты́ еси́, Влады́ко, от Отца́ све́та возсия́вый, А́нгелов во́инства све́ты устро́ил еси́, зерца́ла прие́млюща, блиста́ние Твое́ незаходи́мое: Препе́тый отце́в Бо́г, и препросла́влен.

Ро́д челове́чь, и́же все́х Госпо́дь, приставле́ньми а́нгельскими я́ве спаса́еши: сия́ бо предста́вил еси́ все́м ве́рующым, и правосла́вно пою́щым Тя́, Препе́таго отце́в Бо́га, и препросла́влена.

Язы́к и у́м не мо́жет, Влады́ко, Твои́х чуде́с изрещи́, и де́л благоле́пное: Ты́ бо просвети́л еси́ вся́кое удобре́ние небе́сных си́л: Препе́тый отце́в Бо́г, и препросла́влен.

Богоро́дичен: Из Тебе́, Чи́стая, Сы́н воплоти́ся, и́же пре́жде без ма́тере из Отца́, и без отца́ е́же по на́м, на́с ра́ди бы́в. Ему́же ны́не слу́жат безпло́тных полки́, я́ко хвали́мому отце́в Бо́гу, и препросла́влену.

Пе́снь 8

Ирмо́с: В пещи́ о́троцы Изра́илевы, я́коже в горни́ле добро́тою благоче́стия, чисте́е зла́та блеща́хуся, глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Изба́вителю мо́й благоутро́бне Христе́, ны́не одержа́щия мя́ мглы́ грехо́вныя, и вся́ких искуше́ний изба́ви зову́ща: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Егда́ хо́щеши приити́, Христе́, во сла́ве, суди́ти ми́ру, стоя́нию избра́нных Твои́х сопричти́ и мене́, вопию́ща и глаго́люща: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Му́ченичен: К земли́ Христо́ве святи́и му́ченицы преидо́сте: на земли́ бо вельми́ подви́гшеся, небе́сную жи́знь восприя́сте, пою́ще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Му́ченичен: Совле́кшеся те́ла тле́ннаго, во оде́жду безсме́ртия я́ко му́ченицы победоно́снии облеко́стеся во Христа́, с высоты́ взыва́юще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Богоро́дичен: Свяще́ннии Тя́ гла́си издале́ча провозвести́ша, Пречи́стая, бы́ти Тебе́ ма́тери вся́ сотво́ршему Бо́гу. Ему́же пое́м: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

И́н Ирмо́с то́йже

Просвеще́нная и близосве́тная А́нгелов во́инства луча́ми трисо́лнечныя красоты́, ве́рнии подража́юще воспои́м: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Я́ко исто́чник все́х до́брых, богонача́льнейшая приво́дит Боже́ственная си́ла све́ты вторы́я, све́т пе́рвый прие́млющя и вопию́щя: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Ум пе́рвый и Соде́тель, преми́рныя умы́ а́нгельския, пресу́щественне соста́ви Себе́, я́ве приближа́ющыяся, и вопию́щыя: вся́ дела́ Госпо́дня Го́спода по́йте, и превозноси́те во вся́ ве́ки.

Богоро́дичен: Па́че Сло́ва из Отца́ рожде́нна пре́жде ве́к, неизрече́нно воплоще́нна родила́ еси́ на́м Де́во Всенепоро́чная. Ему́же вопие́м: вся́ дела́ Госпо́дня Го́спода по́йте, и превозноси́те во вся́ ве́ки.

Пе́снь 9

Ирмо́с: О́браз чи́стаго рождества́ Твоего́ огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́, Богоро́дице, непреста́нно велича́ем.

Я́коже ханане́а зову́ Ти: поми́луй мя́, Сло́ве: ду́шу бо и́мам де́монскими нанесе́нии бе́дствующую, и безу́мно беззако́нная де́лающую, и нечу́вствующую Боже́ственнаго Твоего́ стра́ха, Долготерпели́ве.

Поста́ви, Го́споди, на ка́мени повеле́ний Твои́х души́ моея́ но́зе, и безсту́дно запя́ти мя́ хотя́ща, запни́ зми́я, и изба́ви мя́ сего́ злоде́йства, я́ко Бла́г и Многоми́лостив.

Му́ченичен: Уже́ пре́жде му́ченицы, искуше́ний во́ду непостоя́нную, и ра́н лю́тых бу́рю, ко приста́нищу я́ве достиго́сте го́рняго Ца́рствия, Боже́ственныя тишины́ наслажда́ющеся.

Му́ченичен: Све́та невече́рняго му́ченицы светови́дни бы́ти сподо́бистеся, и в це́ркви перворожде́нных весели́теся, и со а́нгельскими ли́ки ра́дуетеся, с ни́миже Живода́вца о на́с моли́те.

Богоро́дичен: Но́сиши вся́ Нося́щаго, и дои́ши все́м пи́щу Даю́щаго, ве́лие и стра́шно е́же па́че ума́ Твое́ та́инство, Ковче́же Честны́я Святы́ни, Де́во Богоро́дице. Те́мже Тя́ ве́рою ублажа́ем.

Ин Ирмо́с то́йже

Прича́стники неизрече́нныя сла́вы Твоея́, безпло́тныя умы́, Спа́се, соста́вил еси́: и ны́не те́ми Твоя́ лю́ди сохрани́, Тебе́ ве́рою и любо́вию прибега́ющыя, да Тя́, Влады́ко, непреста́нно велича́ем.

Да посыла́еши ми́рнаго А́нгела, соблюда́юща, Вседержи́телю, ста́до Твое́: ми́ра бо и любве́ Ты́ вино́вен, и богому́дренную ве́ру соблюда́юща, и вся́ е́реси Твое́ю си́лою разруша́юща.

Ве́сь сла́дость воспева́емый, небе́сную сла́достную све́тлость насади́ в це́рквах Твои́х, Влады́ко, и благоче́стно да́ждь в состоя́ние, да Тя́ Спаси́теля непреста́нно велича́ем.

Богоро́дичен: Чи́ни а́нгельстии, Пречи́стая, ны́не немо́лчно Твое́ рождество́ почита́ют: в чину́ бо стоя́т взира́юще, весе́лия Его́ насыща́ющеся, и Тя́, Богоро́дицу, непреста́нно велича́ют.

Та́же: Досто́йно е́сть: Ектениа́ ма́лая, и свети́лен. Та́же псалмы́ обы́чныя.

На стихо́вне стихи́ры умили́тельны, гла́с 1:

И́н тя́ ми́р, душе́, ожида́ет, и Судия́ хо́щет твоя́ обличи́ти та́йная и лю́тая. Не пребу́ди у́бо в зде́шних, но предвари́ вопию́щи Судии́: Бо́же, очи́сти мя́, и спаси́ мя.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Не пренебрези́ мене́, Спа́се мо́й, ле́ностию грехо́вною одержи́ма, воздви́гни мое́ помышле́ние к покая́нию, и Твоего́ виногра́да де́лателя иску́сна покажи́ мя: да́руй ми́ единагона́десяте часа́ мзду́, и ве́лию ми́лость.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Страстоте́рпцы Христо́вы, прииди́те лю́дие вси́ почти́м, пе́ньми и пе́сньми духо́вными, свети́льники ми́ра, и пропове́дники ве́ры, исто́чник приснотеку́щий, из него́же истека́ют ве́рным исцеле́ния: те́х моли́твами, Христе́ Бо́же на́ш, ми́р да́руй ми́ру Твоему́, и душа́м на́шым ве́лию ми́лость.

Сла́ва, и ны́не, Богоро́дичен: Подо́бен: Небе́сных чино́в:

Святе́йшая святы́х все́х си́л, Честне́йшая всея́ тва́ри, Богоро́дице, Влады́чице ми́ра, спаси́ ны Спа́са ро́ждшая, от прегреше́ний тмори́чных и бе́д, я́ко блага́я, моли́твами Твои́ми.

Та́же, Бла́го е́сть: Трисвято́е. По О́тче на́ш: тропа́рь свято́му, и ектениа́, и отпу́ст. Ча́с 1-й, и коне́чный отпу́ст.

В понеде́льник блаже́нна, гла́с 1:

Сне́дию изведе́ из рая́ вра́г Ада́ма: Кресто́м же введе́ Христо́с во́нь разбо́йника, помяни́ мя, Го́споди, вопию́ща, егда́ прии́деши во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство небе́сное.

Умиле́ний исто́чник ми́ да́руй благоутро́бием Твои́м, Христе́ Бо́же, вся́кия мя́ скве́рны зо́л безме́рных очища́ющий, и Ца́рствия Твоего́ Благоде́телю прича́стника мя́ сотвори́.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

А́нгел Твои́х чи́ны в моле́ние приво́дим Ти́, Христе́, спаси́, уще́дри на́с те́ми, я́ко пребла́г, вся́ презира́яй на́ша, я́же в ве́дении и не в ве́дении, прегреше́ния.

Ра́дуйтеся и весели́теся, я́ко мзда́ ва́ша мно́га на небесе́х.

Му́ченичен: Крове́й ва́ших святи́и тече́ньми, мы́сленнаго фарао́на потопи́сте я́ве: ны́не же источа́ете чуде́с то́ки, пучи́ну изсуша́ющыя неду́гов. Те́мже блажи́ми есте́.

Сла́ва: Отцу́ поклони́мся, и Сы́на славосло́вим, и Всесвята́го Ду́ха вси́ ве́рнии воспои́м, зову́ще и глаго́люще: Всесвята́я Тро́ице, спаси́ вся́ ны́.

И ны́не, Богоро́дичен: Ро́ждшая Све́т безле́тный, омраче́нную ду́шу мою́ при́сно де́монов прило́ги, световоди́ Пренепоро́чная, и огня́ бу́дущаго хода́тайствы Твои́ми свободи́.

В пято́к ве́чера

на Го́споди воззва́х, стихи́ры святы́м му́чеником, и святи́телем, и преподо́бным. Гла́с 1.

Подо́бен: Прехва́льнии му́ченицы:

Сти́х: А́ще беззако́ния на́зриши Го́споди, Го́споди, кто́ постои́т; я́ко у тебе́ очище́ние е́сть.

Му́чеников еди́нственное торжество́, струя́ми свои́х крове́й мно́жество бесо́в удави́ша, и вся́кия уста́виша сту́дныя же́ртвы, и́дольскую разруши́ша пре́лесть, терпели́вно пострада́вше и ны́не мо́лятся Христу́ дарова́ти душа́м на́шым ми́р, и ве́лию ми́лость.

Сти́х: И́мене ра́ди твоего́ потерпе́х Тя́ Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Па́стырие всесвяще́ннии, му́дрыми словесы́ и уче́нии все́х научи́ша во Еди́нстве Божество́ Тро́ическое сла́вити, Ли́ц слия́ния и разделе́ния, Боже́ственне убега́юще. И ны́не мо́лятся, дарова́ти душа́м на́шым ми́р, и ве́лию ми́лость.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Преподо́бных сосло́вие, плотска́я хоте́ния успи́ша, и стремле́ния обузда́ша, житие́ равноа́нгельное показа́вше. Те́мже и в жили́щах Небе́сных ны́не ликовству́ют, Христу́ моля́щеся, дарова́ти душа́м на́шым ми́р, и ве́лию ми́лость.

И́ны стихи́ры му́ченичны, гла́с то́йже:

Сти́х: Я́ко у Го́спода ми́лость, и мно́гое у него́ избавле́ние: и то́й изба́вит Изра́иля от все́х беззако́ний Его́.

Моли́твами Го́споди, все́х святы́х и Богоро́дицы, тво́й ми́р да́ждь на́м, и поми́луй на́с, я́ко Еди́н Ще́др.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Е́же на суди́щи ва́ше испове́дание святи́и, де́монов оплева́ си́лу, и от пре́лести челове́ки свободи́. Те́мже и глава́м усека́емым, взыва́сте: да бу́дет Го́споди, же́ртва ду́ш на́ших благоприя́тна пред Тобо́ю, я́ко Тебе́ возлюби́вше, неради́хом о вре́менней жи́зни, Человеколю́бче.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

О до́брыя ва́шея ку́пли святи́и! Я́ ко кро́ви да́сте, и Небеса́ насле́довасте: и вре́менно искуси́вшеся, ве́чно ра́дуетеся. Вои́стинну добра́ ва́шя ку́пля: тле́нная бо оста́вльше, нетле́нная восприя́сте, и со А́нгелы ликовству́юще, пое́те непреста́нно Тро́ицу единосу́щную.

Сла́ва, и ны́не, Богоро́дичен: Всеми́рную сла́ву, от челове́к прозя́бшую, и Влады́ку ро́ждшую, Небе́сную две́рь воспои́м Мари́ю Де́ву, безпло́тных пе́снь, и ве́рных удобре́ние. Сия́ бо яви́ся Не́бо, и хра́м Божества́: Сия́ прегражде́ние вражды́ разруши́вши, ми́р введе́, и Ца́рствие отве́рзе. Сию́ у́бо иму́ще ве́ры утвержде́ние, Побо́рника и́мамы из Нея́ ро́ждшагося Го́спода, дерза́йте у́бо, дерза́йте лю́дие Бо́жии: и́бо То́й победи́т враги́, я́ко Всеси́лен.

Та́же: Све́те ти́хий;

На стихо́вне му́ченичен, гла́с 1:

Прехва́льнии му́ченицы, ва́с ни земля́ потаи́ла е́сть, но Не́бо прия́т вы́, и отверзо́шася ва́м ра́йския две́ри, и вну́трь бы́вше Дре́ва живо́тнаго наслажда́етеся: Христу́ моли́теся, дарова́ти душа́м на́шым ми́р и ве́лию ми́лость.

Поко́ин: Ка́я жите́йская сла́дость пребыва́ет печа́ли неприча́стна? ка́я ли сла́ва стои́т на земли́ непрело́жна? вся́ се́ни немощне́йша, и вся́ со́ний преле́стнейша: во еди́н ча́с вся́ сия́ сме́рть прие́млет. Но во све́те Христе́ лица́ Твоего́, и в наслажде́нии Твоея́ красоты́, я́же избра́л еси́, упоко́й я́ко Человеколю́бец.

Поко́ин: Никто́же безгре́шен, никто́же от челове́к бы́в, то́кмо Ты́ Еди́не Безсме́ртне: те́мже рабы́ Твоя́ я́ко Бо́г Ще́дрый, во све́те со А́нгельскими ликостоя́нии Твои́ми учини́, благоутро́бием Твои́м, презира́я беззако́ния, и подая́ и́м проще́ние.

Сла́ва, и ны́не, Богоро́дичен: Вои́стинну па́че ума́ чу́дная Твоя́ вели́чия, рождества́ Твоего́ Богоневе́сто, я́же пропове́даша проро́цы вси́ вся́ Пресла́вная: зача́тие и рождество́ Всепе́тая недомы́сленно и несказа́нно, и́мже ми́р спа́сл е́сть, я́ко Милосе́рд.

Та́же, Ны́не отпуща́еши: Трисвято́е, и по О́тче на́ш: Тропа́рь, и отпу́ст.

В пято́к на повече́рии

кано́н пресвяте́й Богоро́дице. Гла́с 1.

Пе́снь 1

Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою, и спа́сшему Изра́иля, я́ко просла́вися.

Спаси́тельное еси́ приста́нище и покро́в, призыва́ющым Тя́ Богоро́дице Пречи́стая. Те́мже и а́з от души́ призыва́ю Тя́ те́пле: Влады́чице спаси́ мя.

Мари́е Пречи́стая, Зижди́теля Ма́ти, истле́вшую страстьми́ и прегреше́ньми смире́нную мою́ ду́шу исцели́, я́ко Блага́я и Благопреме́нная.

Сла́ва: Безневе́стная Влады́чице, не отступа́й моля́щи всегда́ Творца́ моего́ и Бо́га, о притека́ющем при́сно к покро́ву Твоему́, улучи́ти ми́лость.

И ны́не: Пала́то одушевле́нная Царе́ва, и престо́ле огнеобра́зный, со святы́ми му́ченики и апо́столы, Христа́ при́сно моли́, от напа́стей на́с изба́вити.

Пе́снь 3

Ирмо́с: Ка́мень, Его́же небрего́ша зи́ждущии, Се́й бы́сть во главу́ у́гла: То́й е́сть Ка́мень, на Не́мже утверди́ Це́рковь Христо́с, ю́же от язы́к искупи́.

Тьма́ прегреше́ний обдержи́т мое́ се́рдце Влады́чице, и не сме́ю воззре́ти на не́бо очи́ма, те́мже зову́: просвети́ веле́ньми Христо́выми у́м и ду́шу, и се́рдце мое́.

Взира́ю на Боже́ственный Тво́й о́браз, и печа́ть Тя́ Влады́чню, и Пречи́стую Ма́терь, я́ко Первообра́зну чту́: и Сию́ лобыза́ю, и покланя́юся, и хвалю́, Еди́ну Ве́дый Твою́, и Того́ че́сть.

Сла́ва: Уста́ви лю́тая стремле́ния теле́сная, угаси́ и пла́мень страсте́й Де́во: и́миже согреше́ний плени́цу многоплете́нную ми́ соплета́ет зми́й лю́тый, хотя́ восхи́тити к поги́бели.

И ны́не: Ве́сь во Ада́ма облече́ся из Тебе́ Богоро́дице, всетелоно́сно проше́д Сло́во. Того́ у́бо моли́, страсте́й на́с изба́вити, и напа́стей разли́чных, и огня́ ве́чнующаго.

Пе́снь 4

Ирмо́с: Ду́хом прови́дя проро́че Авваку́ме, Словесе́ воплоще́ние, пропове́дал еси́ вопия́: внегда́ прибли́житися ле́том, позна́ешися, внегда́ приити́ вре́мени, пока́жешися. Сла́ва си́ле Твое́й Го́споди.

Ро́ждши Зижди́теля, и все́х Творца́, си́лу неизрече́нну, и непобеди́му кре́пость и́маши Де́во, и спаса́еши ве́рою к Тебе́ приходя́щыя. Сего́ ра́ди зову́ Ти: Влады́чице ми́ра, помози́ ми.

Бра́ни неви́димых вра́г мы́сленных низложи́ Влады́чице, всу́е на мое́ напа́дающих окая́нное се́рдце, тишину́ Боже́ственную, и ми́р да́рующи: я́ко да ве́село воспева́ю Тя́.

Сла́ва: Наде́жде ненаде́жных, помо́щнице ни́щих, пла́чущих уте́ха, согреша́ющих очище́ние, руководи́тельница заблу́ждших, боля́щих целе́бница, и исправле́ние па́дающих.

И ны́не: Чи́стая и Благослове́нная, Я́же Еди́на кля́твы все́х измени́вшая, Де́во Мари́е, со апо́столы, и му́ченики, и проро́ки моли́, из чре́ва Твоего́ Проше́дшаго, спасти́ ду́шы пою́щих Тя́.

Пе́снь 5

Ирмо́с: Тво́й ми́р да́ждь на́м Сы́не Бо́жий, ино́го бо ра́зве Тебе́ Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́.

Спаси́ мя Влады́чице, из глубины́ напа́стей, и скорбе́й, и печа́лей, и страсте́й теле́сных: и в тишине́ Боже́ственней сохрани́ ду́шу мою́.

Ты́ ми́ еси́ те́плое хране́ние и тве́рдое во все́й жи́зни, Пренепоро́чная. Те́мже молю́ Тя, и по сме́рти Твое́ мне́ милосе́рдие простри́ бога́тое.

Сла́ва: Я́же Зижди́теля ро́ждшая, и Изба́вителя все́х, изба́ви мя́ страсте́й теле́сных опаля́ющих се́рдце мое́, и привлача́ющих к дело́м неподо́бным.

И ны́не: Я́ко ме́сто свяще́ния я&##769;вльшися мы́сленнаго, всего́ мя освяти́ Влады́чице, и со святы́ми моли́ся и му́дрыми апо́столы, спасти́ мя Де́во.

Пе́снь 6

Ирмо́с: Проро́ка Ио́ну подража́я, вопию́: живо́т мо́й Бла́же свободи́ из тли́, и спаси́ мя Спа́се ми́ра, зову́ща: сла́ва Тебе́.

Ты́ жи́ва мя́ соблюда́еши избавля́ющи напа́стей: Ты́ и от земли́ отходя́ща к ве́чней жи́зни преста́ви Де́во Ма́ти, милосе́рдием Твои́м.

Ты́ еси́ стена́ неруши́ма, Ты́ еси́ покро́в тве́рд, Богоро́дице Блага́я, Ты́ предста́тельница крепка́ рабу́ Твоему́: и сего́ ра́ди Тя́ призыва́ю при́сно.

Сла́ва: Ты́ моли́тву си́льну стяжа́вши к Бо́гу, Богоро́дице Блага́я, не пре́зри мене́ те́пле к покро́ву Твоему́ притека́ющаго, и вопию́щаго: поми́луй мя́, Ма́ти все́х Бо́га.

И ны́не: Не отри́ни мене́ Христе́, не гнуша́йся мене́ Спа́се, мо́лит Тя́ А́гница ро́ждшая Тя́ пло́тию, со апо́столы, и со проро́ки, и со страстоте́рпцы Твои́ми.

Та́же, Го́споди поми́луй, три́жды. Сла́ва, и ны́не:

Седа́лен, гла́с 1: О́блак Тя́ Све́та Бо́жия присносу́щнаго, Де́во, и ковче́г, и све́щник, и ста́мну, и го́ру несеко́мую, проро́цы прорица́ху Отрокови́це Пречи́стая: из Тебе́ бо про́йде без се́мене, в после́дняя Христо́с Бо́г на́ш, я́коже Оте́ц благоизво́ли.

Пе́снь 7

Ирмо́с: Су́щым в пещи́ отроко́м Твои́м Спа́се, не прикосну́ся, ниже́ стужи́ о́гнь. Тогда́ трие́, я́ко еди́неми усты́ поя́ху, и благословля́ху, глаго́люще: благослове́н Бо́г оте́ц на́ших.

Отча́янна су́ща мя́ Чи́стая, прегреше́нии и сластьми́ плотски́ми, и ко глубине́ порева́ема поги́бели, приспе́вши изба́ви мя́ Пречи́стая Влады́чице, милосе́рдием Твои́м.

Прибе́жище и покро́в держа́вен, и избавле́ние Богоро́дице все́м ве́рным: Ты́ ми бу́ди руководи́тельница ко Творцу́, прегреше́ний избавле́ние подаю́щи ми́, благоутро́бием Твои́м.

Сла́ва: Ты́ кля́тву потреби́ла еси́ Чи́стая, ра́дость ро́ждшая Христа́: Ты́ и кля́тву, от греха́ прибы́вшую ми́, разреши́ си́лою Твое́ю Пренепоро́чная, и да́руй ми́ ра́дость.

И ны́не: Тя́, Пресвята́я Чи́стая, раби́ Твои́ мо́лим всегда́ де́нь и но́щь, моля́щеся сокруше́нною мы́слию, избавле́ние согреше́ний на́ших да́руй Твои́ми моли́твами.

Пе́снь 8

Ирмо́с: Его́же ужаса́ются а́нгели, и вся́ во́инства, я́ко Творца́ и Го́спода, по́йте свяще́нницы, просла́вите о́троцы, благослови́те лю́дие, и превозноси́те во вся́ ве́ки.

Воста́ни, предвари́, ра́туй враги́, и́же всу́е смуща́ющыя и оскорбля́ющыя на́с, Твою́ си́лу явля́ющи Свята́я Де́во, помо́щнице ми́ра.

Ми́р спасла́ еси́ от сме́рти и тли́ Боже́ственным Рождество́м Твои́м, Де́во Блага́я: и ны́не же моли́твами Твои́ми и на́с восхваля́ющих Тя́, от страсте́й исхити́, и спаси́.

Сла́ва: Мно́гая Твоя́ и неизрече́нная Де́во кре́пость, мно́ги и непобеди́мы Боже́ственныя щедро́ты, и благоутро́бие. Те́мже спаса́й на́с, вои́стинну Тя́ призыва́ющих.

И ны́не: Я́ко одушевле́н виногра́д Де́во, прорасти́ла еси́ на́м Гро́зд зре́лый, источи́вший вино́ оставле́ния, и грехо́вное изсуши́вший пия́нство.

Пе́снь 9

Ирмо́с: Светоно́сный о́блак, во́ньже все́х Влады́ка, я́ко до́ждь с небесе́ на руно́ сни́де, и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

В мо́ри жития́ обурева́емь зело́ сластьми́ плотски́ми, Тебе́ припа́даю и вопию́: поми́луй мя́ к Тебе́ притека́ющаго Влады́чице, и ру́ку ми́ спасе́ния пода́ждь, избавля́ющи поги́бельныя глубины́.

Тебе́ моя́ грехи́ испове́даю Де́во, Твоему́ лицу́ мо́й представля́ю сту́д, и вопию́ от души́: поми́луй и уще́дри, Пречи́стая, я́ко на Тя́ упова́ние с Бо́гом возложи́х тве́рдое.

Сла́ва: Тя́ без се́мене ро́ждшую Творца́ и Влады́ку, призыва́ю от души́, и зову́ приле́жно: Ты́ мя спаси́ от тли́ мно́гих прегреше́ний, и изба́ви огня́ негаси́маго, Пресвята́я Богоро́дице Блага́я.

И ны́не: Непроходи́мая две́ре, ра́йская врата́, спаса́емым пу́ть, спасе́ния стезя́, с му́ченики и проро́ки, с пра́ведными же и преподо́бными, и с Боже́ственными апо́столы, моли́ся Чи́стая, спасти́ся душа́м на́шым.

Та́же, Досто́йно е́сть: И про́чее обы́чно, и отпу́ст.

В суббо́ту на у́трени

по 1-м стихосло́вии седа́льны му́ченичны. Гла́с 1:

Страда́ния похвало́ю, и вене́чною по́честию, сла́внии страстоте́рпцы оде́явшеся Тобо́ю Го́споди, терпе́нием у́бо ра́н беззако́нных победи́ша, и си́лою Боже́ственною от небе́с побе́ду прия́ша: те́х моли́твами и на́с свободи́ от неви́димаго врага́ Спа́се, и спаси́ на́с.

Сти́х: Ди́вен Бо́г во святы́х Свои́х, Бо́г Изра́илев.

Я́ко до́брии во́ини единому́дренно ве́ровавше, преще́ния мучи́телей не убоя́стеся святи́и, приидо́сте усе́рдно ко Христу́ взе́мше честны́й кре́ст: и сконча́вше тече́ние, с небесе́ побе́ду прия́сте. Сла́ва укре́пльшему вы́: сла́ва венча́вшему вы́: сла́ва де́йствующему ва́ми все́м исцеле́ния.

Подо́бен: Гро́б Тво́й Спа́се:

Сти́х: Ду́шы и́х во благи́х водворя́тся.

В ме́сте све́тле, в ли́це пра́ведных Упоко́й Спа́се, к Тебе́ преста́вльшихся: на Тя́ бо упова́ние человеколю́бче возложи́ша: приими́ моле́ние о отце́х и ча́дех, и́мже соверша́ем па́мять: и оправди́ те́х, Я́ко Многоми́лостив.

Сла́ва, и ны́не, Богоро́дичен: Гаврии́лу веща́вшу Тебе́ Де́во, ра́дуйся: со гла́сом воплоща́шеся все́х Влады́ка, в Тебе́ святе́м киво́те, я́коже рече́ пра́ведный Дави́д, яви́лася еси́ ши́ршая небе́с, поноси́вши Зижди́теля Твоего́: Сла́ва Все́льшемуся в Тя́: сла́ва Проше́дшему из Тебе́: сла́ва Свободи́вшему на́с рождество́м Твои́м.

По 2-м стихосло́вии седа́льны. Гла́с 1:

Ра́нами святы́х, и́же по Тебе́ пострада́ша, умоле́н бу́ди Го́споди: и вся́ на́шя боле́зни и стра́сти исцели́ Человеколю́бче, мо́лимся.

Сти́х: Мно́ги ско́рби пра́ведным, и от все́х и́х изба́вит я́ Госпо́дь.

Му́ченики Христо́вы мо́лим вси́, и любо́вию прии́дем к ни́м с ве́рою: си́и бо о на́шем спасе́нии про́сят, и си́и вси́ источа́ют исцеле́ний благода́ть, си́и полки́ отгоня́ют бесо́вския, я́ко сохра́нницы ве́ры.

Сти́х: Блаже́ни, я́же избра́л и прия́л еси́ Го́споди.

Сме́ртную держа́ву Христе́ упраздни́в, и нетле́ние земны́м источи́л еси́: и и́же в Тя́ ве́рующии не умира́ют, но живу́т вы́ну о Тебе́. Те́мже упоко́й Го́споди, ду́шы ра́б Твои́х, и учини́ и́х со святы́ми Твои́ми: моли́твами Богоро́дицы, да́руя те́м проще́ние и воскре́сние.

Сла́ва, и ны́не, Богоро́дичен: Еди́на кре́пкая и те́плая Предста́тельнице ро́да челове́ческаго, Богоро́дице Де́во, непреста́нно моли́ со проро́ки и му́ченики, со святи́тели же и по́стники и преподо́бными, Его́же родила́ еси́ па́че естества́ Бо́га Сло́ва, спасти́ вся́ческая.

Кано́н святы́м му́чеником, и святи́телем, и преподо́бным и усо́пшым, [его́же краегране́сие: Бо́га возлю́бльшым Боже́ственную воспева́ю пе́снь.] Творе́ние ки́р ио́сифа. Гла́с 1.

Пе́снь 1

Ирмо́с: Столпо́м о́гненным и о́блачным Изра́иля наставле́й, я́ко Бо́г, мо́ре разве́рже, колесни́цы же фарао́новы глубино́ю покры́. пои́м пе́снь побе́дную, я́ко еди́н просла́вися.

Му́чеником: Щито́м благоче́стия огра́ждшеся Боже́ственнии страда́льцы, устреми́шася к боре́нию: погуби́ша же врага́ всю́ си́лу, пою́ще пе́снь побе́дную Христу́ укре́пльшему и́х.

Святи́телем: упасо́сте Боже́ственнии па́стырие, ста́до Бо́жие на па́жити та́йней, во́лки отгна́вше па́лицею слове́с свяще́нных: и всели́стеся ра́дующеся во огра́ду небе́сную, иде́же е́сть вели́кий па́стырь.

Преподо́бным: И́же стра́сти поще́нием и боле́зньми умертви́вше пло́ти, Боже́ственным манове́нием, живете́ по сме́рти преподо́бнии: на́с ра́ди ме́ртва бы́вшаго, Христа́ всегда́ моли́те уще́дрити на́с.

Сла́ва: Ме́ртв бы́в, и ме́ртвым дарова́л еси́ Боже́ственный Тво́й живо́т, и безсме́ртную жи́знь. И́же ве́рою преше́дшыя от жития́ тле́ннаго, Ца́рствия Твоего́ сотвори́ прича́стники, я́ко благоутро́бен, и еди́н многоми́лостив.

Богоро́дичен: И́же любо́вию Христо́вою уязвля́еми му́ченицы, и венча́вшыяся от Бо́га жены́, Тебе́ Всенепоро́чную и до́брую в жена́х вси́ преподо́бнии почита́ют, ра́дующеся ве́рно, я́ко Цари́цу Всечестну́ю.

Други́й кано́н усо́пшым,

пое́м его́ на ряду́, иде́же не́сть мине́и, или́ при возсле́довании усо́пшым над кутие́ю, [его́же краегране́сие: Ве́рою усо́пшым пе́рвую пе́снь приноша́ю.] Гла́с 1.

Пе́снь 1

Ирмо́с: Твоя́ победи́тельная десни́ца боголе́пно в кре́пости просла́вися: та́ бо Безсме́ртне, я́ко всемогу́щая проти́вныя сотре́, Изра́ильтяном пу́ть глубины́ новосоде́лавшая.

Припе́в: Ди́вен Бо́г во святы́х свои́х, Бо́г Изра́илев.

Врата́ сме́рти и вереи́, Твое́ю сме́ртию сокруши́л еси́ Безсме́ртне, врата́ отве́рзи Влады́ко, па́че ума́ безсме́ртия у́спшым, моли́твами страстоте́рпец Твои́х.

Припе́в: упоко́й Го́споди ду́шы усо́пших ра́б Твои́х.

Да Боже́ственнаго живота́ сподо́бимся, соше́л еси́ к сме́рти, тоя́ же испрове́рг сокро́вища, на́с отту́ду извле́кл еси́: ны́не же Жизнода́вче, преста́вленныя упоко́й.

Сла́ва: Ты́ мое́ тле́нное же и ме́ртвенное восприи́м, в нетле́ние обле́кл еси́, и к безконе́чному житию́ и блаже́нному возне́сл еси́, иде́же я́ко ще́др, и́хже прия́л еси́, упоко́й.

Богоро́дичен: Ро́ждшую е́же от Бо́га Бо́жие Сло́во, ве́рнии воспои́м: Та́ бо Всечи́стая пу́ть жи́зни уме́ршым бы́сть, Ю́же я́ко богоприе́мницу и Богоро́дицу просла́вим.

Пе́снь 3

Ирмо́с: Да утверди́тся се́рдце мое́ в во́ли Твое́й Христе́ Бо́же, И́же над вода́ми Не́бо утвержде́й второ́е, и основа́вый на вода́х зе́млю Всеси́льне.

Мно́гия му́ки претерпе́вше, и благи́х мно́гих сподо́бистеся, мно́жество му́ченик свяще́нное: те́мже моли́твами ва́шими зо́л мои́х безме́рное мно́жество очи́стите.

Свяще́ннии оде́явшеся пра́ведною благода́тию, и весе́лие кра́сное преподо́бных собо́р стяжа́вше, невеще́ственным служи́телем уподо́бишася.

Христо́вы проро́цы, Боже́ственнии му́ченицы, свяще́нных же́н сосло́вие, и́же пострада́вше му́жески, и в посте́ просла́вистеся: и́хже моли́твами ми́лости Твоя́ Спа́се все́м да́руй.

Сла́ва: И́же от земли́ Христе́, челове́ка руко́ю Твое́ю созда́в во́лею, и я́же от на́с вся́ ве́рою преста́вльшыяся рабы́ Твоя́ небе́сных бла́г сподо́би.

Богоро́дичен: Богороди́тельнице Неискусобра́чная, проше́ния все́х принеси́ соде́телю на́шему Бо́гу, ро́ждшемуся от утро́бы Твоея́: я́ко да обря́щем соверше́нное лю́тых избавле́ние.

И́н

Ирмо́с: Еди́не Ве́дый челове́ческаго существа́ не́мощь, и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́ Святы́й: одушевле́нный хра́ме неизрече́нныя сла́вы Твоея́ Человеколю́бче.

Я́ко Еди́н Бла́г сы́й, я́ко Еди́н Многоми́лостив, я́же благоче́стно к Тебе́ отше́дшыя, в Небе́сных селе́ниих упоко́й, иде́же неизрече́нная ра́дость и наслажде́ние, и иде́же собо́р му́ченический весели́тся.

Ты́ еди́н яви́лся еси́ на земли́, Спа́се мо́й безгре́шен, и́же грехи́ ми́ра взе́мляй я́ко милосе́рд: от ми́ра сего́ преста́вльшихся ве́рою, ду́шы упоко́й во дво́рех святы́х Твои́х, в сла́дости ра́йстей Человеколю́бче.

Сла́ва: Сме́рти держа́ву низло́ж, живо́т неконча́емый все́м ве́рным источи́л еси́ Влады́ко: в то́м у́бо учини́ благоче́стно отше́дшыя, презира́я безме́рная прегреше́ния, и проща́я грехи́ и́х Человеколю́бче.

Богоро́дичен: Без се́мене зача́т Чи́стая, Сло́во присносу́щное, пло́тски к на́м прише́дшее, и сме́рти кре́пость разори́вшее, и ме́ртвым воскре́сние и жи́знь ве́чную Свои́м милосе́рдием да́рующее.

Пе́снь 4

Ирмо́с: Услы́шах Го́споди слу́х Тво́й, и убоя́хся, разуме́х дела́ Твоя́, проро́к глаго́лаше, и просла́вих си́лу Твою́.

Претерпе́вше му́ченицы вся́кия ра́ны, нра́вом до́блественным, я́коже овча́та непоро́чная Христу́ приведо́стеся, за все́х Закла́вшемуся Животу́.

Уста́ Боже́ственная бы́вше святи́телие Бо́жиим Сло́вом науча́еми, ду́шы изба́виша от у́ст льсти́ваго: и́хже благочестному́дренне почита́ем.

Кре́пцы Боже́ственным ду́хом бы́вше отцы́ Боже́ственнии, кре́пко победи́сте духо́в лука́вствия, преподо́бнии благода́тию.

Сла́ва: Умертви́вся Животе́ на́ш во́лею на дре́ве, и́же ве́рою преше́дшыя живота́ сподо́би ве́чнаго Человеколю́бче.

Богоро́дичен: Не отверго́шася Го́спода же́нский ли́к, стра́ждуще му́жески: и не победи́шася теле́сными сластьми́ святи́и, споспе́шницу Тя́ иму́ще Пречи́стая.

И́н

Ирмо́с: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Умертви́в а́д непобеди́мою Твое́ю си́лою, вмене́н бы́л еси́ в ме́ртвых, еди́н сы́й свобо́дь Христе́, ду́шы свободи́ благочести́вых, и е́же в не́м осужде́ния, святы́х му́ченик мольба́ми.

И́же все́х сы́й я́ко Влады́ка, противодосто́йную и́же от Ада́ма Твоего́ заколе́ния, изба́ву да́л еси́ и це́ну: те́мже мо́лимся Твои́м щедро́там, преста́вльшыяся упоко́й, согреше́ний подая́ оставле́ние.

Сла́ва: Прия́л еси́ Спа́се мо́й, е́же во гро́бе положе́ние, и я́же во гробе́х жи́ти осужде́нныя мертвецы́, я́ко Бо́г воскреси́л еси́. Ны́не же жи́зни присносу́щныя сподо́би преста́вленныя, я́ко Еди́н Человеколю́бец.

Богоро́дичен: Спасе́ся ро́д челове́ческий Рождество́м Твои́м: Ты́ бо родила́ еси́ на́м ипоста́сный Живо́т, сме́рти потребле́ние, и к жи́зни соде́ловающий восхо́д, Богороди́тельнице Пренепоро́чная Влады́чице.

Пе́снь 5

Ирмо́с: Све́тлый на́м возсия́й све́т присносу́щный, у́тренюющым о судьба́х за́поведей Твои́х, Влады́ко человеколю́бче Христе́ Бо́же на́ш.

Вооружи́вшеся благоче́стием, не уя́звлени яви́стеся му́ченицы, борца́ стрела́ми, и победоно́сцы благода́тию бы́вше, венцы́ получи́сте.

Пома́за ма́стию Боже́ственною Госпо́дь свяще́нники своя́, упа́сшыя в преподо́бии ве́рных мно́жества, и наста́вльшыя ко огра́де небе́сней.

Священному́ченицы свяще́ннейшии, преподо́бнии вси́, и́же ду́ха уста́вы соблю́дше, и Ца́рствию прича́стницы бы́вше, Боже́ственно прославля́етеся.

Сла́ва: И́хже ны́не преста́вил еси́ повеле́нием Твои́м Влады́ко Го́споди, сподо́би Ца́рствия Твоего́ со святы́ми, вся́ презира́я и́м дре́вняя согреше́ния.

Богоро́дичен: И́же посто́м и страда́нием сла́ву обре́тше Небе́сную жены́, Пречи́стая, Тебе́ Предста́тельницу иму́ще, зми́еву держа́ву разруши́ша.

И́н

Ирмо́с: Просвети́вый сия́нием прише́ствия Твоего́ Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Исцеля́яй от я́да сме́ртнаго, сме́рть прия́т, и сме́рти жа́ло притупи́л еси́: но Са́м упоко́й, и́хже прия́л еси́ жизнода́вче, му́ченик мольба́ми.

Умерщвле́ния и тле́ния челове́ки свободи́вый, ду́шы ве́рно преста́вленных учини́ во дво́рех святы́х Твои́х, отню́дуже отбеже́ вся́ка ско́рбь, и весе́лие водворя́ется.

Сла́ва: Ра́й у́бо с Тобо́ю пове́шенному, я́ко отве́рзл еси́: ны́не приими́, ду́шы Влады́ко, к Тебе́ ве́рою преста́вльшыяся, подая́ и́м в Це́ркви пе́рвенец водвори́тися.

Богоро́дичен: Избавля́ющи на Тя́ наде́жды держа́ву иму́щих, к приста́нищу Боже́ственныя во́ли ти́хо наста́ви, ма́терним Твои́м дерзнове́нием к Сы́ну Твоему́, Благослове́нная Всенепоро́чная.

Пе́снь 6

Ирмо́с: Проро́ка Ио́ну подража́я вопию́: живо́т мо́й Бла́же, свободи́ из тли́, и Спаси́ мя, спа́се ми́ра, зову́ща: сла́ва Тебе́.

Умерщвле́ни бы́вше ра́н мно́гих наведе́ньми, жи́знь и́стинную насле́довасте вку́пе, моля́щеся спасти́ся все́м на́м, святи́и му́ченицы.

Денни́цы светоза́рныя позна́ни бы́сте на земли́, благоче́стия све́том озари́сте ве́рныя, пресла́внии Христо́вы ору́жницы, и святи́телие прему́дрии.

Стра́нни яви́стеся на земли́, и гра́ждане небе́снии, богоно́снии по́стницы, умертви́вше пло́ти мудрова́ния воздержа́нием и смире́нием.

Сла́ва: Невече́рнему Твоему́ Све́ту, и сла́дости и́стинней, я́же преста́вил еси́ ве́рныя, покажи́ прича́стники Человеколю́бче, и святы́х собо́ром си́х сопричти́.

Богоро́дичен: И́же пострада́вшыя кре́пко, и пости́вшыяся те́пле, Тобо́ю псало́мски во сле́д приведо́шася Христу́, всепе́тая Богороди́тельнице, вся́ческих Царю́.

И́н

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́ Бо́же на́ш: Ты́ бо кре́пость немощству́ющих и исправле́ние.

Я́ко милосе́рд, преста́вленным да́руй прегреше́ний проще́ние, и ве́чное наслажде́ние подая́, иде́же сия́ет лица́ Твоего́ све́тлость, и озаря́ет страстоте́рпцы Твоя́.

И́же кро́вию от ре́бр Твои́х исте́кшею ми́р искупи́л еси́, ве́рою усо́пшыя у́бо Христе́ изба́ви честны́ми Страстьми́ Твои́ми: Ты́ бо це́ну за все́х Себе́ да́л еси́.

И́же созда́вый мя́ рука́ма пречи́стыми пе́рвее и ду́х дарова́вый, и к земли́ низпа́дша зле́, па́ки обнови́вый красне́йше, ны́не ду́шы преста́вльшихся Са́м упоко́й.

Сла́ва: Черто́гу Твоему́ светоно́сному Го́споди, всели́ти сподо́би, я́же в ве́ре к Тебе́ усо́пшыя, те́х презира́я прегреше́ния, я́ко бла́г и милосе́рд и многоми́лостив.

Богоро́дичен: Пое́м Тя́ Благослове́нная Си́стая, Ея́же ра́ди на́м возсия́ су́щым во тьме́ и се́ни сме́ртней, пра́вды незаходи́мое Со́лнце: Ты́ во на́шего спасе́ния хода́таица была́ еси́.

Пе́снь 7

Ирмо́с: Су́щым в пещи́ отроко́м Твои́м Спа́се, не прикосну́ся, ниже́ стужи́ о́гнь. Тогда́ трие́ я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших.

Искуси́вшеся я́ко зла́то во огни́ му́ченицы все́ми му́ками, светле́йше вся́каго зла́та в любви́ Боже́ственней яви́шася, и в сокро́вищах небе́сных сохране́ни бы́ша.

Я́ко Свяще́нницы, Я́ко Боже́ственнии слуги́ бы́вше, вси́ святи́телие свяще́ннии принесо́сте бо́гу же́ртвы безкро́вныя, и лю́ди упа́сше, иде́же вели́кий па́стырь всели́стеся.

Не покори́вшеся страсте́м пло́ти, безстра́стием я́ко в ри́зу та́йну преподо́бнии обле́кшеся, сожи́телие а́нгелом яви́шася: и́хже моли́твами Христе́, изба́ви на́с от искуше́ний.

Сла́ва: Иде́же пи́ща е́сть та́йная, иде́же сия́ет Све́т лица́ Твоего́ Христе́, я́же от на́с преста́вльшыяся в ве́ре Благода́телю всели́, сла́вити благоче́стно твою́ благосты́ню.

Богоро́дичен: Тебе́ Всесвята́я, Пречи́стая, святы́я жены́ иму́ще добро́ту, лику́ют со А́нгелы ра́достно, и Бо́га Сло́ва сла́вят ро́ждшагося Пло́тию из Тебе́, за милосе́рдие мно́гое.

И́н

Ирмо́с: Тебе́ у́мную Богоро́дице, пе́щь разсмотря́ем ве́рнии: я́коже бо о́троки спасе́ три́ Превозноси́мый, ми́р обнови́, во чре́ве Твое́м Всеце́л, хва́льный отце́в Бо́г, и препросла́влен.

Сия́нии Пречи́стыя сла́вы Твоея́, озари́тися Христе́ подава́й, от бу́ри мирски́я к Тебе́ отше́дшым, и те́х сподо́би с му́ченики взыва́ти Тебе́: хвали́мый отце́в Бо́же благослове́н еси́.

Но́в Ада́м вои́стинну бы́в, Ада́мов Соде́телю, И́же кля́тву бо Ада́мову еди́н потреби́л еси́. Те́мже мо́лимся Тебе́: преста́вленныя упоко́й в сла́дости ра́йстей Христе́, я́ко еди́н милосе́рд.

Сла́ва: И́же на́шу есте́ственную не́мощь еди́н све́дый я́ко Бо́г, бла́г же и ми́лостив, вся́ и́хже преста́вил еси́, иде́же све́т незаходи́мый присеща́ет лица́ Твоего́, учини́ Христе́, хвали́мый отце́в Бо́же и препросла́влен.

Богоро́дичен: Зако́на се́ни, и дре́вняя гада́ния Твои́м преидо́ша Рождество́м Богома́ти, Ты́ бо на́м Боже́ственныя благода́ти Све́т возсия́ла еси́: и́мже дре́вних изба́вихомся долго́в Чи́стая, воспева́юще Бо́га препросла́вленнаго.

Пе́снь 8

Ирмо́с: Его́же ужаса́ются а́нгели, и вся́ во́инства, я́ко Творца́ и Го́спода, по́йте свяще́нницы, просла́вите о́троцы, благослови́те лю́дие, и превозноси́те во вся́ ве́ки.

Льво́в зия́ния преидо́ша невре́дно, и коно́бов вре́ния претеко́ша кре́пко му́ченицы вси́, прохлажда́еми огне́м Боже́ственнаго ду́ха пресла́вно.

Дая́ проро́ком свои́м предве́дети да́льняя, и святи́тели Твоя́ умудри́л еси́ свяще́нно: те́х моли́твами Христе́ Бо́же, просвети́ сердца́ ве́рно пою́щих Тя́.

Распе́нше себе́ преподо́бнии ми́рови, живо́т преми́рный насле́довасте по́стницы, с су́щими от ве́ка все́х Бо́гу угоди́вшими преподо́бно и пра́ведно.

Сла́ва: И́же созда́вый челове́ка от земли́ богоде́льно, я́же от земли́ преста́вил еси́ ве́рныя, я́ко бла́г, пи́щи ра́йския сподо́би, вся́ презира́я я́же от ни́х соде́янная.

Богоро́дичен: До́брую и Непоро́чную Чи́стая в жена́х, жены́ пострада́вшыя зна́юще Тя́ я́ве Де́во, моли́твы творя́т с Тобо́ю к Бо́гу, спасти́ся от бе́д рабо́м Твои́м.

И́н

Ирмо́с: В пещи́ о́троцы Изра́илевы, я́коже в горни́ле добро́тою благоче́стия чисте́е зла́та блеща́хуся, глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Скве́рну всю́ Твои́х рабо́в усо́пших, Твоего́ человеколю́бия росо́ю отмы́в, Тя́ пе́сньми воспева́ти сподо́би: благослови́те вся́ дела́ Госпо́дня Го́спода, по́йте и превозноси́те Его́ во вся́ ве́ки.

Предстоя́тели Спа́се десны́я, ве́рою оправда́в моли́твами страстоте́рпец, я́же преста́вил еси́ ве́рныя, покажи́ пою́щыя: благослови́те вся́ дела́ Госпо́дня Го́спода, по́йте и превозноси́те Его́ во вся́ ве́ки.

Сла́ва: И́же сме́рти и живота́ име́яй вся́кую вла́сть, я́же ве́рою усо́пшыя Твоего́ сия́ния улучи́ти благоволи́, взыва́ющыя: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Богоро́дичен: Спасе́ния хода́таица на́м была́ еси́ Всенепоро́чная, и в непреходи́мыя ве́ки пребыва́ния же и све́тлости: Тебе́ Де́во Чи́стая, при́сно вся́ дела́ благослови́м, и превозно́сим во вся́ ве́ки.

Та́же, пе́снь Богоро́дицы: Вели́чит душа́ моя́ Го́спода: И про́чыя стихи́, с припе́вы.

Пе́снь 9

Ирмо́с: Живоприе́мный Исто́чник приснотеку́щий, светоно́сный Свети́льник благода́ти, Хра́м одушевле́нный, Се́нь пречи́стую, Небесе́ и земли́ простра́ннейшую, Богоро́дицу ве́рнии велича́ем.

Свяще́нных му́ченик почти́м свяще́нная боре́ния ра́дующеся, страда́ния же и ра́ны, пригвожде́ния и изгна́ния, и заколе́ние блаже́нное, и́мже Христу́ насле́дницы яви́шася.

Я́ко свяще́нницы Бо́жии, облеко́шася в пра́вду Боже́ственнии уго́дницы: я́ко в преподо́бии пожи́вше, и́же в посте́ я́ве сконча́вшиися, ра́дуются Христа́ велича́юще.

Уста́ Боже́ственная Госпо́дня бы́вше, проро́цы вси́, все́м его́ провозвести́ша све́т: с ни́миже ны́не веселя́тся и жены́, кре́пко подвиза́вшыяся, и посто́м Бо́гу угоди́вшыя.

Сла́ва: И́же все́ми ца́рствующая си́ло, Твоего́ Ца́рствия покажи́ прича́стники, со святы́ми Твои́ми, я́же от земли́ преста́вил еси́: и я́же соде́янная и́ми, Бо́же все́х пре́зри премно́гою бла́гостию Твое́ю.

Богоро́дичен: Я́же све́т Ро́ждшая Боже́ственный, безле́тный, вся́ моя́ разреши́ ле́тная прегреше́ния, Твои́ми мольба́ми: и у́м мо́й просвети́, омрача́емый при́сно ле́ностию, да Тя́ пою́, и ве́рно велича́ю.

И́н

Ирмо́с: О́браз чи́стаго Рождества́ Твоего́ огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́ Богоро́дице непреста́нно велича́ем.

Пощади́ я́ко Бо́г человеколюби́в, и ми́лостив, Твое́ созда́ние: и упоко́й в селе́ниих святы́х Твои́х, иде́же му́ченицы вси́ веселя́тся, ве́рою преста́вленыя от вре́менных, многоми́лостиве.

Име́яй ми́лостей бе́здну, препобежда́ющую рабо́в Твои́х прегреше́ния, и́хже прие́м избра́, упоко́й в не́дрех Авраа́млих Человеколю́бче, и с Ла́зарем во све́т Тво́й всели́.

Сла́ва: Изба́витель и Спа́с бы́в ро́ду челове́ческому, распя́тия ра́ди, я́же ны́не от на́с преста́вил еси́, я́ко Благода́тель, наслажде́ния Боже́ственнаго сподо́би, и живота́ нетле́ннаго, и весе́лия и све́тлости.

Богоро́дичен: О я́же па́че ума́ чуде́с Твои́х! Ты́ бо Де́во еди́на все́м, и́же под со́лнцем, подала́ еси́ разуме́ти нове́йшее чу́до Пречи́стая, Твоего́ рождества́ недоуме́ннаго: те́мже Тя́ вси́ велича́ем.

Та́же, Досто́йно е́сть: И ектениа́, и свети́лен, и псалмы́ обы́чныя.

На хвали́тех стихи́ры му́ченичны, гла́с 1:

Страстоте́рпцы Христо́вы, прииди́те лю́дие вси́ почти́м, пе́ньми и пе́сньми духо́вными, просве́щники ми́ра, и пропове́дники ве́ры: исто́чники приснотеку́щыя, от ни́хже истека́ют ве́рным исцеле́ния. Те́х моли́твами Ххристе́ Бо́же на́ш, ми́р ми́ру твоему́ да́руй, и душа́м на́шым ве́лию ми́лость.

Си́и во́ини Царя́ вели́каго проти́вишася повеле́нием мучи́телевым, до́блественне неради́ша о му́ках, и ле́сть всю́ попра́вше, досто́йне венча́ни бы́ша. Про́сят от спа́са ми́ра, и душа́м на́шым ве́лия ми́лости.

Ва́с прехва́льнии му́ченицы, ни ско́рбь, ни теснота́, ни гла́д, ни гоне́ние, ниже́ ра́ны, ни я́рость звере́й, ни ме́чь, ниже́ о́гнь претя́й разлучи́ти от Бо́га возмого́ша: любо́вию же па́че я́же к нему́, я́ко в чужди́х подви́гшеся телесе́х, естество́ забы́вше, и сме́рть презре́сте. те́мже и досто́йно трудо́в ва́ших мзду́ прия́ли есте́, небе́сному Ца́рствию насле́дницы бы́вше: Христу́ моли́теся о душа́х на́ших.

Весели́теся му́ченицы о Го́споде, я́ко по́двигом до́брым подвиза́стеся, и проти́вистеся царе́м, и мучи́тели победи́сте: огня́ и меча́ не устраши́стеся, и звере́й ди́виих снеда́ющих телеса́ ва́ша. Христу́ со а́нгелы пе́снь возсыла́юще, с небесе́ венцы́ прия́сте: испроси́те дарова́ти ми́р ми́ру, и душа́м на́шым ве́лию ми́лость.

Ме́ртвен: Де́лом Спа́се мо́й явля́еши, я́ко Ты́ еси́ все́х воскре́сние, сло́вом сло́ве Ла́заря от ме́ртвых возста́вил еси́. Егда́ же ме́ртвии от гробо́в воскресо́ша, и врата́ А́дова смято́шася: тогда́ челове́ком сме́рть со́н явля́шеся. Но и́же на спасе́ние своего́ созда́ния, а не на осужде́ние прише́дый, и́хже избра́л еси́, упоко́й я́ко Человеколю́бец.

Сла́ва, и ны́не, Богоро́дичен: Ра́дуйся от на́с, Свята́я Богоро́дице Де́во Чи́стый Сосу́де всея́ вселе́нныя: Свеще́ неугаси́мая, вмести́лище Невмести́маго, хра́ме необори́мый. Ра́дуйся, из нея́же роди́ся А́гнец Бо́жий, взе́мляй грехи́ всего́ ми́ра.

На стихо́вне стихи́ры поко́йны. Творе́ние ки́р феофа́на. Гла́с 1.

Подо́бен: Прехва́льнии му́ченицы:

Тебе́ Спа́се мо́лимся, Твоего́ сла́дкаго прича́стия преста́вльшихся сподо́би, и всели́ во оби́телех преподо́бных со святы́ми Твои́ми, и в небе́сная жили́ща, благоутро́бием Твои́м презря́ беззако́ния, и подая́ си́м поко́й.

Сти́х: Блаже́ни, я́же избра́л и прия́л еси́ Го́споди.

Па́че ви́димых твоя́ Спа́се Обеща́ния, я́же о́ко не ви́де, и у́хо не слы́ша, и на се́рдце челове́ка никогда́же взы́де: мо́лим Тя́ влады́ко, сла́дкаго Твоего́ прича́стия получи́ти сподо́би, к Тебе́ преста́вльшыяся, и пода́ждь и́м ве́чную жи́знь.

Сти́х: Ду́шы и́х во благи́х водворя́тся.

О Кресте́ Твое́м веселя́щеся. О Кресте́ Твое́м наде́ющеся раби́ Твои́, к Тебе́ преста́вишася Человеколю́бче: и́мже ны́не избавле́ние те́х прегреше́ний, Кре́ст Тво́й да́руй, и кро́вь пролия́нную за мирски́й живо́т, благосе́рдием Твои́м проща́я согреше́ния, и просвеща́я све́том лица́ Твоего́.

Сти́х: И па́мять и́х в ро́д и ро́д.

Никто́же безгре́шен, никто́же от челове́к бы́в, то́кмо Ты́ еди́не Безсме́ртне. Те́мже рабы́ Твоя́, я́ко Бо́г Ще́дрый, во све́те со А́нгельскими ликостоя́нии Твои́ми учини́ благоутро́бием Твои́м, презира́я беззако́ния, и подая́ и́м проще́ние.

Сла́ва, и ны́не, Богоро́дичен: Христа́ умоли́, Твое́ Рожде́ние Ма́ти Де́во, согреше́ний проще́ние дарова́ти рабо́м Твои́м, Тебе́ Богоро́дицу пропове́давшым вои́стинну, и сло́вом благочести́вым благослови́вшым, и све́тлости святы́х и весе́лия сподо́би во Ца́рствии Твое́м.

В суббо́ту, блаже́нны. Гла́с 1:

Сне́дию изведе́ из рая́ вра́г Ада́ма: Кресто́м же введе́ Христо́с во́нь разбо́йника, помяни́ мя Го́споди, вопию́ща, егда́ прии́деши во Ца́рствии Твое́м.

Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Страда́лец мно́жество безчи́сленное, святи́телей, и прему́дрых же́н, и проро́к пресла́вных, мо́лят Тя́ Иису́се Бо́же: пода́ждь на́м оставле́ние прегреше́ний, и Ве́лию Ми́лость.

Блаже́ни есте́, егда́ поно́сят ва́м, и иждену́т, и реку́т вся́к зо́л глаго́л, на вы́ лжу́ще Иене́ ра́ди.

И́же тече́ние соверши́вше свяще́ннейшии Христо́вы страда́льцы, со святи́тели свяще́нными и проро́ки, сподо́бистеся во гра́де небе́снем жи́ти, со А́нгелы веселя́щеся.

Ра́дуйтеся и весели́теся, я́ко мзда́ ва́ша мно́га на небесе́х.

Во све́те Христе́, учини́ невече́рнем, я́же преста́вил еси́, прегреше́ния и́х презре́в, я́ко ще́дрый Бо́г: да Твою́ сла́вим благода́телю, безчи́сленную ми́лость.

Сла́ва: Отцу́ поклони́мся, и Сы́на славосло́вим, и пресвята́го Ду́ха вси́ ве́рнии воспои́м: помяни́ на́с зову́щих, единосу́щная Тро́ице, еди́нице Бо́же.

И ны́не: я́ко пала́ту простра́нную, и престо́л сла́вы, и о́блак све́тел, песносло́вим Тя́ чи́стая, и мо́лим: разори́ о́блак мра́чный от ду́ш на́ших, Боже́ственными моли́твами Ивои́ми.

Коне́ц пе́рвому гла́су.

Понедельник

В неде́лю ве́чера

на Го́споди воззва́х, стихи́ры умили́тельны влады́чны. Гла́с 1

Подо́бен: Прехва́льнии му́ченицы:

Сти́х: А́ще беззако́ния на́зриши Го́споди, Го́споди, кто́ постои́т? Я́ко у тебе́ очище́ние е́сть.

Вся́ приве́л еси́ Твои́м Сло́вом и Ду́хом, за бла́гость, Го́споди, та́же сотвори́л еси́ слове́сное мя́ живо́тно, да Твое́ свято́е сла́влю всеси́льное И́мя. Аз же наипа́че сту́дными мои́ми де́лы всегда́ безче́ствую: но пощади́, молю́ся.

Сти́х: И́мене ра́ди Твоего́ потерпе́х Тя́ Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Позна́й твое́, окая́нная душе́, Боже́ственное благоро́дие, и оте́чество нетле́нное, и тщи́ся всегда́ благодея́ньми сие́ достига́ти: ничто́же от тле́нных да плени́т тя́, го́рния ча́сти еси́, те́ло же земля́ и тле́ется, да не победи́т ху́ждшее лу́чшия.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Гряди́ всеокая́ная душе́ моя́ ко Преблаго́му, те́плыми слеза́ми приступи́, соде́янная тобо́ю пре́жде суда́ твоего́ вся́ испове́дуй, и ми́лостива Созда́теля, окая́нная, себе́ соде́лай, и проще́ние испроси́, пре́жде да́же две́ри не заключи́т тебе́ Госпо́дь.

И́ны стихи́ры, безпло́тным, подо́бен то́йже:

Сти́х: Я́ко у Го́спода ми́лость, и мно́гое у Него́ избавле́ние: и то́й изба́вит Изра́иля от все́х беззако́ний его́.

Безпло́тнии А́нгели, Бо́жию престо́лу предстоя́щии, и отону́дными светлостьми́ облистава́еми, и светоли́тии ве́чно сия́юще, и све́ти быва́юще втори́и, Христу́ моли́теся, дарова́ти душа́м на́шым ми́р и ве́лию ми́лость.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Безсме́ртнии А́нгели, живо́т вои́стинну неги́блемый, от Пе́рваго прие́мше Живота́ всебога́тии, присносу́щныя сла́вы, и святи́и зри́телие прему́дрости ве́чныя бы́сте, све́та исполня́еми, и свещы́ сообраща́еми прили́чно показу́еми.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Арха́нгели, А́нгели, Нача́ла, Престо́ли, Госпо́дствия, Серафи́ми шестокрила́тии, и многоочи́тии херуви́ми Боже́ственнии, прему́дрости орга́ни: Си́лы, Вла́сти Боже́ственнейшии, христо́ви моли́теся, дарова́ти душа́м на́шым ми́р и ве́лию ми́лость.

Сла́ва, и ны́не, Богоро́дичен: Мари́е непоро́чная, и ума́ вся́каго превосходя́щая, чисте́йшая колесни́це, обдержи́ма мя́ мно́гими грехми́ и стесня́ема, к широте́ покая́ния напра́ви мя́ всеси́льнейшим Твои́м предста́тельством: и́бо мо́жеши я́ко Ма́ти вся́ могу́щаго.

Та́же, Све́те ти́хий: Посе́м, проки́мен: Се́ ны́не благослови́те Го́спода вси́ раби́ Госпо́дни: Сти́х: Стоя́щии в хра́ме Госпо́дни, во дво́рех до́му Бо́га на́шего. Та́же, Сподо́би Го́споди: И ектениа́.

Та́же, на стихо́вне стихи́ры умили́тельны. Гла́с 1:

Я́ко пучи́на мно́га прегреше́ний мои́х Спа́се, и лю́те погружа́юся согреше́ньми мои́ми, да́ждь ми́ ру́ку я́ко Петро́ви, спаси́ мя Бо́же, и поми́луй мя́.

Сти́х: К Тебе́ возведо́х о́чи мои́, живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Я́ко в помышле́ниих лука́вых и в де́лех осуди́хся, Спа́се, мы́сль мне́ да́руй обраще́ния Бо́же, да зову́ Ти: спаси́ мя Благоде́телю Благи́й, и поми́луй мя́.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.

Моли́твами, Го́споди, все́х святы́х и Богоро́дицы, ми́р Тво́й да́ждь на́м, и поми́луй на́с, я́ко еди́н ще́др.

Сла́ва, и ны́не, Богоро́дичен: Небе́сных чино́в ра́дование, на земли́ челове́ков кре́пкое предста́тельство, Пречи́стая Де́во, спаси́ ны, и́же к Тебе́ прибега́ющыя: я́ко на Тя́ упова́ние по Бо́зе, Богоро́дице, возложи́хом.

Та́же: Ны́не отпуща́еши: Трисвято́е: По О́тче на́ш: Тропа́рь свято́му. Сла́ва: и ны́не, богоро́дичный тропа́рь. Посе́м ектениа́. И отпу́ст.

В неде́лю на повече́рии

глаго́лет иере́й: Благослове́н Бо́г на́ш: Мы́ же: Ами́нь. Сла́ва тебе́ Бо́же на́ш, сла́ва Тебе́. Царю́ небе́сный: И про́чее обы́чно.

Та́же: Кано́н моле́бный пресвяте́й Богоро́дице, гла́с 1.

Пе́снь 1

Ирмо́с: Твоя́ победи́тельная десни́ца, боголе́пно в кре́пости просла́вися: та́ бо безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.

Неизглаго́ланно зачала́ еси́ Бо́га, и па́че естества́ родила́ еси́ Влады́чице Пречи́стая, земны́я от прегреше́ний изме́ншаго. Те́мже молю́ Тя: мно́гих мя́ прегреше́ний изба́ви.

Пучи́ною погружа́емь, беда́ми грехо́в неизче́тных, и скорбе́й, но окормле́нием Твои́м си́льным, и моли́твою Всенепоро́чная, к тишине́ Боже́ственней покая́ния напра́ви.

Сла́ва: Всея́ моея́ жи́зни Предста́тельнице, от бе́д мно́гих изба́ви мя́, да благода́рственный гла́с воспева́ю Ти́, Богоро́дице Чи́стая, и бу́дущия мя́ исхити́ му́ки.

И ны́не: Обстоя́тельная нахожде́ния, и напа́стей бу́рю утоли́, Ма́ти Всенепоро́чная, Изба́вителя и Зижди́теля и Бо́га на́шего, благода́ть спасе́ния и очище́ния ми́ подаю́щи.

Пе́снь 3

Ирмо́с: Еди́не ве́дый челове́ческаго существа́ не́мощь, и ми́лостивно в не́ вообра́жься, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме (свя́т одушевле́нный хра́м) неизрече́нныя сла́вы Твоея́, Человеколю́бче.

Виде́ние зра́ка Твоего́ чи́стаго, а́нгелом у́бо сла́достно, челове́ком же е́сть спаси́тельно, духово́м же лука́вствия стра́шно: е́же ве́рою почита́юще и целу́юще Богоро́дице, ду́шу просвеща́ем.

Кровьми́ из Тебе́ де́вческими, пло́ть Свою́ обложи́ Соде́тель и Госпо́дь: Его́же моли́, Всенепоро́чная, растле́вша мя́ безме́стными дея́ньми, уще́дрити за неизрече́нную ми́лость.

Сла́ва: Жи́зни стяжа́в Тя́ Храни́тельницу, и сте́ну необори́му, и по кончи́не покро́в Тя́ обрести́, и Засту́пницу непобеди́му, к Бо́гу вводя́щу, и живо́т подаю́щу ве́чный, и сла́ву, Пренепоро́чная.

И ны́не: Зача́тие безсе́менно Чи́стая, и рождество́ нетле́нно: Бо́г бо бе́ я́ве рожде́йся, челове́ческаго естества́ паде́ние призыва́я. Те́мже Богоро́дицу Тя́ и́стинную и су́щую воспева́ем.

Пе́снь 4

Ирмо́с: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше свято́му, во спасе́ние на́ше и обновле́ние.

Неудержа́нное стремле́ние к злу́ влече́т мя́, де́йствием врага́, и обы́чаем лука́вым: помози́ ми Влады́чице, да не до конца́ всепа́губный нападе́т на мя́, сме́ртию возбраня́я ми́ к покая́нию.

Все́ вре́мя живота́ моего́ ижди́х в блуде́х злы́х, и я́звах лю́тых, и ны́не веду́т смире́нную ду́шу мою́ си́х де́латели: Богороди́тельнице Де́во помози́ ми.

Сла́ва: Услы́ши гла́с мо́й боле́зненный Всенепоро́чная, и́же из глубины́ души́ привноша́ю стена́ньми, и разреше́ние пода́ждь ми́ долго́в, и́хже соде́ях окая́нный мы́слию, и нра́вом несмы́сленным.

И ны́не: Влады́чице ми́ра Богоро́дице, помози́ ми, прелука́вый вра́г поглоща́ет мя́ зе́льне лю́тыми воспомина́нии и помышле́нии, я́же от Бо́га мя́ разлуча́ют. Не оста́ви у́бо мене́, ниже́ пре́зри.

Пе́снь 5

Ирмо́с: Просвети́вый сия́нием прише́ствия Твоего́ Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Се́ гото́ву ко спасе́нию по́мощь стяжа́х, сего́ ра́ди Тебе́ припа́даю, и зову́ со слеза́ми: Богоро́дице, изба́ви мя́ от стре́л чужда́го, и бу́дущаго истяза́ния.

Ты́ кре́пость моя́, ты́ похвала́ и ра́дование, и храни́тельница ми́ еси́, и заступле́ние, и прибе́жище, и предста́тельница непобеди́ма, Пресвята́я Богоро́дице Де́во. Те́мже спаси́ раба́ Твоего́.

Сла́ва: Оскве́рншуюся окая́нную мою́ ду́шу страстьми́, окропле́нием Боже́ственныя Твоея́ моли́твы очи́сти, Богоро́дице Пречи́стая, подаю́щи спасе́ния Твоего́ све́тлую оде́жду.

И ны́не: В жи́зни мое́й тве́рдое ми́ окормле́ние еси́, треволне́ния избавля́ющи мно́гих обстоя́ний, и во исхо́де мое́м, молю́ Тя, предста́ни ми́ спаса́ющи, Ма́ти Христа́ Бо́га.

Пе́снь 6

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́ Бо́же на́ш: Ты́ бо кре́пость немощству́ющих и исправле́ние.

Безневе́стная Богороди́тельнице Пречи́стая, ру́ку Твою́ простри́ ми, и исхи́ти из глубины́ зо́л, я́же безу́мием исхода́таих мое́й души́ стра́стней преокая́нный.

Воста́ни Чи́стая на по́мощь рабу́ Твоему́, иму́щему наде́жду свою́ с Бо́гом, к Твоему́ заступле́нию непобеди́мому: да не вра́г возмо́г, во́змет и погуби́т мя́.

Сла́ва: Боля́щих цели́тельницу, па́дающих воста́ние, согреша́ющих очище́ние, Богоро́дице, Тебе́ молю́, со слеза́ми припа́даю, и зову́ Ти: я́ко сильна́, Сама́ мя спаси́ погиба́ющаго.

И ны́не: Поми́луй Чи́стая, смире́нную мою́ ду́шу, предвари́ и восхи́ти, изъе́млющи ю́ от лука́ваго: тщи́тся бо в про́пасть посла́ти ю́ злы́х ра́ди, я́же ле́ность мно́гая соде́ла.

Та́же, Го́споди поми́луй, три́жды. Сла́ва: и ны́не:

Седа́лен, гла́с 1. Подо́бен: Гро́б Тво́й Спа́се:

Моли́твенницу ко Го́споду стяжа́хом Тя́ вси́ Чи́стая, и притека́ем в це́рковь Твою́ святу́ю, прося́ще по́мощи от Тебе́ Присноде́во: изба́ви у́бо на́с от бесо́вския зло́бы и муче́ния, и осужде́ния стра́шнаго, Тя́ блажа́щыя.

Пе́снь 7

Ирмо́с: Тебе́ у́мную Богоро́дице, пе́щь разсмотря́ем ве́рнии: я́коже бо о́троки Спасе́ три́ превозноси́мый, ми́р обнови́, во чре́ве Твое́м всеце́л, хва́льный отце́в Бо́г, и препросла́влен.

Боже́ственная ски́ния Влады́це была́ еси́, я́ко заче́нши во чре́ве, и ро́ждши Сего́ пло́тию, еди́на непоро́чная. Те́мже на́с изба́ви страсте́й, и боле́зней, и скорбе́й, и долго́в: и́бо и́маши кре́пость и си́лу мно́гу.

Уста́ви Чи́стая, боле́знь нестерпи́мую, преокая́нныя моея́ души́, ра́дость ми́ и́стинную Влады́чице подаю́щи, реша́щи прегреше́ний мои́х мно́гих му́тную волну́: Ты́ бо ми́ еси́ прибе́жище и избавле́ние.

Сла́ва: Все́ на Тя́ упова́ние положи́х спасе́ния моего́: Тя́ бо стяжа́х по́мощь, и непобори́мь сто́лп, и утвержде́ние, и тве́рдости извеще́ние, и Тобо́ю Ца́рство получи́ти наде́юся Влады́чице.

И ны́не: Восто́к Со́лнца была́ еси́ сла́вы Влады́чице Чи́стая: Тобо́ю бо явле́йся, вся́ свободи́ тьмы́ и неве́дения, и смра́дных прегреше́ний. Те́мже вопию́ Ти: вне́шния мя́ тьмы́ свободи́.

Пе́снь 8

Ирмо́с: В пещи́ о́троцы изра́илевы, я́коже в горни́ле добро́тою благоче́стия, чисте́е зла́та блеща́хуся, глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Страсте́й смуще́ние лю́те оскорбля́ет ду́шу мою́ Богоро́дице: тишины́ же и ми́ра я́же вино́вника Чи́стая, и Пода́теля ро́ждши, в ми́рне устрое́нии соблюда́ющи, ти́хостныя мя́ испо́лни ра́дости и весе́лия.

Спасе́ния Хода́таица на́м яви́лася еси́ Богоро́дице, ро́ждшая Спа́са и Влады́ку вся́ческих. Те́мже молю́ Тя́: спасе́ния сподо́би смире́нную мою́ ду́шу, песносло́вити Тя́ ве́рно во вся́ ве́ки.

Сла́ва: Я́же Зижди́теля все́х и Бо́га неизглаго́ланно заче́нши, спаси́ мя от тли́, и вся́каго искуше́ния, и дава́й вопи́ти при́сно: благослови́те вся́ дела́ Го́спода, по́йте и превозноси́те Его́ во ве́ки.

И ны́не: Вся́ческих Зижди́теля и Бо́га родила́ еси́ Де́во, Его́же моли́, дарова́ти прегреше́ний очище́ние, и скорбе́й избавле́ние и напа́стей, и ве́чнаго огня́, и осужде́ния, славосло́вящым непреста́нно Твою́ сла́ву.

Пе́снь 9

Ирмо́с: О́браз чи́стаго рождества́ Твоего́, огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́ Богоро́дице непреста́нно велича́ем.

Ма́ти Бо́жия Всенепоро́чная, ми́лостивную Твою́ утро́бу мне́ отве́рзи, и от у́ст мы́сленнаго во́лка изба́ви мя́, и́щущаго погуби́ти и растли́ти мя́: поми́луй, молю́ Тя, не возврати́ мене́ посра́млена раба́ Твоего́.

Всея́ моея́ жи́зни бу́ди предста́тельница, и тве́рдое заступле́ние. И изба́ви мя́ Всечи́стая, мно́гих напа́стей и печа́лей, и враго́в языкобо́лия, но и огня́ ве́чнаго изба́ви мя́.

Сла́ва: Еди́на боля́щих посеще́ние: еди́на па́дших исправле́ние Влады́чице: еди́на к Бо́гу руководи́тельница и вхо́д: еди́на Хода́таица ве́чных бла́г, поми́луй мя́ еди́наго, па́че все́х согреши́вшаго.

И ны́не: Приими́ мою́ сле́зную ны́не моли́тву, и пода́ждь ми́ оставле́ние согреше́ний, и мно́гих злы́х, я́же соде́ях, Богоро́дице, Всепе́тая Влады́чице: до конца́ бо погиба́ю от безме́рнаго отча́яния.

Та́же, Досто́йно е́сть: и про́чее обы́чно, и отпу́ст

В понеде́льник у́тра

по 1-м стихосло́вии, седа́льны умили́тельны. Гла́с 1:

В беззако́ниих зача́т е́смь а́з блу́дный, не сме́ю взира́ти на высоту́ небе́сную. Но дерза́я на человеколю́бие Твое́ зову́: Бо́же, очи́сти мя́ и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

А́ще пра́ведник едва́ спаса́ется, а́з где́ явлю́ся гре́шный? тяготы́ и зно́я дневна́го не понесо́х: но с нае́мники единонадеся́таго часа́ сопричти́ мя Бо́же, и спаси́ мя.

Сла́ва, и ны́не, Богоро́дичен: Пречи́стая Богоро́дице, я́же на небесе́х благослове́нная, и на земли́ славосло́вимая: ра́дуйся неве́сто неневе́стная.

По 2-м стихосло́вии седа́льны. Гла́с 1.

Подо́бен: Гро́б Тво́й Спа́се:

Объя́тия О́тча отве́рсти ми́ потщи́ся, блу́дне ижди́х мое́ житие́, на бога́тство неиждива́емое взира́яй щедро́т Твои́х Спа́се, ны́не обнища́вшее мое́ се́рдце не пре́зри. Тебе́ бо го́споди во умиле́нии зову́: согреши́х Ти́, спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Суди́ще Твое́ стра́шно, и су́д пра́веден, дела́ моя́ лю́та: но Ты́ Ми́лостиве, предвари́в мя́ спаси́, и му́ки свободи́, и изба́ви Влады́ко шу́их ча́сти, и сподо́би одесну́ю Тебе́ ста́ти Судие́ Пра́веднейший.

Та́же му́ченичен:

Сти́х: Ди́вен Бо́г во святы́х Свои́х, Бо́г Изра́илев.

Страда́ния похвало́ю, венце́в досто́инством, сла́внии страстоте́рпцы оде́яшася Тобо́ю Го́споди: терпе́нием бо ра́н, беззако́нных победи́ша, и си́лою Боже́ственною с Небесе́ побе́ду прия́ша. Те́х моли́твами и мене́ свободи́ от неви́димаго врага́ Спа́се, и спаси́ мя.

Сла́ва, и ны́не, Богоро́дичен: Упра́ви Чи́стая, окая́нную мою́ ду́шу, и уще́дри ю́ от мно́жества прегреше́ний, во глубину́ попо́лзшуюся поги́бели, Всенепоро́чная, и в ча́с мя́ стра́шный сме́ртный Ты́ исхити́ оглаго́лующих де́монов, и вся́кия му́ки.

И́ны седа́льны, егда́ стихосло́вится 3-я кафи́сма. Гла́с 1

Подо́бен: Гро́б Тво́й Спа́се:

Безу́мно от Тебе́ удали́вся Всеще́дре, блу́дно мое́ ижди́х житие́, рабо́таяй страсте́м безслове́сным всегда́: но приими́ мя а́нгелов моли́твами О́тче благоутро́бне, я́коже блу́днаго о́трока, и спаси́ мя.

Сла́ва, и ны́не, Богоро́дичен: Невеще́ственных во́инств преиму́щая Отрокови́це, и чи́ны небе́сныя превосходя́щая еди́на, досто́йную похвалу́ от ни́х прие́млеши Всечи́стая: но моли́ Сы́на Твоего́ со А́нгелы, е́же изба́витися мне́ от страсте́й мучи́тельства, Еди́ному осужде́нному.

Кано́н умили́тельный, его́же краестро́чие: Прегреше́ний мои́х скве́рну омы́й сло́ве. Творе́ние господи́на Ио́сифа. Гла́с 1.

Пе́снь 1

Ирмо́с: Твоя́ победи́тельная десни́ца боголе́пно в кре́пости просла́вися: та́ бо безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Грехо́в мои́х мно́жество, по мно́жеству Христе́ ми́лости Твоея́, молю́ся Ти́, потреби́, и помышле́ние обраще́ния ми́ да́руй: я́ко да Твою́ сла́влю я́же па́че ума́ благосты́ню.

Яви́лся еси́ за милосе́рдие щедро́т, на земли́ воплоща́емь Челове́к: те́мже па́че челове́ка Сло́ве Бо́жий, согреши́вша приими́ мя ны́не покая́нием к щедро́там Твои́м припа́дающаго.

Та́же му́ченичны: Умерщвле́ние подража́вше, Христа́ во́лею пострада́вшаго, всехва́льнии, и сме́рть, стра́сти претерпе́сте многови́дныя и сме́рть, присносла́внии. Те́мже безсме́ртное житие́ улучи́сте, му́ченицы.

Му́ченичен: О́гнь любве́ Боже́ственныя пресла́вно вну́трь нося́ще му́ченицы, огня́ не убоя́стеся: но те́плыми боле́зней преспе́янии многобо́жия вещество́ вся́кое попали́сте.

Богоро́дичен: Чи́нове безпло́тных с на́ми воспева́ют Тя́ Де́во Всепе́тая: необъиме́ннаго бо во чре́ве Твое́м воплоще́нна родила́ еси́, пребы́вши де́ва я́коже и пре́жде рождества́, Богоневе́сто.

Други́й кано́н безпло́тным, его́же краестро́чие: Пе́рвое А́нгелом пе́ние. Творе́ние господи́на Феофа́на. Гла́с 1.

Пе́снь 1

Ирмо́с то́йже

Престо́лу предстоя́ще све́тло влады́чнему всесвяти́и А́нгели, Отцу́ собезнача́льна, и Того́ вели́каго сове́та А́нгела, сло́во ми́ вдохну́ти ва́с пою́щу, моли́теся. [Два́жды.]

Зерца́ла све́та богонача́льна, и трисо́лнечныя свещи́ сия́ние в себе́ прие́млющыя, по ели́ку пости́жно, а́нгельския чи́ны пе́рвее умы́слив, у́м Боже́ственный соста́ви.

Богоро́дичен: Украше́й я́ко Бо́г чинонача́лия вы́шних си́л, во утро́бу неискусобра́чную, Серафи́мов вы́шшу, всели́ся Твою́ Богоро́дице, и пло́ть непреме́нна бы́сть.

Пе́снь 3

Ирмо́с: Еди́не ве́дый челове́ческаго существа́ не́мощь, и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме (свя́т одушевле́нный хра́м) неизрече́нныя сла́вы твоея́ человеколю́бче.

Возни́кни, гряди́, о душе́! И возопи́й Созда́телю Твоему́, та́йная твоя́ вся́ Ве́дущему, и покая́ния плоды́ покажи́: я́ко да поми́лует тя́ Ще́дрый Госпо́дь, и огня́ ве́чнаго изба́вит.

Очи́сти Еди́не Бла́же, очи́сти и спаси́ мя, я́ко мыта́рь со стра́хом зову́ Ти: мно́жеством грехо́в влеки́йся, и преклоня́емь е́смь тягото́ю прегреше́ний, и студа́ безме́рнаго исполня́яйся.

Му́ченичен: Му́дростию и ра́зумом и́стинным му́ченицы исполня́еми, е́ллинскую му́дрость обуи́ша, му́дростную же зло́бу погуби́ша, и кре́пко пострада́вше, досто́йне восприя́ша побе́ды венцы́, ра́дующеся.

Му́ченичен: Еди́ницу у́бо естество́м, страда́льцы, Тро́ицу же ли́цы испове́дающе, пре́лесть многобо́жную Боже́ственною ве́рою потреби́сте, и свети́льницы яви́стеся, все́х озаря́юще сердца́ луча́ми благода́тными.

Богоро́дичен: Свята́я Богоневе́сто Чи́стая, свя́то породила́ еси́, во святы́х почива́ющаго, Сы́на и Сло́ва Отцу́ собезнача́льнаго, освяща́ющаго о святе́м ду́се, и́же Того́ благоче́стно освяща́ющыя.

И́н Ирмо́с то́йже

Све́ту богоде́тельному Серафи́ми несре́дственно приближа́ющеся, и многогу́бо и́м насыща́еми, первода́тными я́ве сия́ньми перводе́льно све́тятся, и я́ко све́ти втори́и быва́ют, Божество́м обожа́еми. [Два́жды.]

А́нгельския све́тлости пе́ти усе́рдно жела́юще, я́же те́ми от Бо́га по́мощь подае́мую, ве́рнии про́сим ума́ чистото́ю, и пречи́стыми усты́, и да полу́чим си́х сия́ние.

Богоро́дичен: Ума́ пресу́щественнаго ви́дети сподобля́еми, я́ко ле́по, Гаврии́л Де́во Всенепоро́чная, ра́дованен гла́с принесе́ Тебе́, словесе́ зача́тие я́ве возвеща́я Ти́, и неизрече́нное рождество́ пропове́дая Твое́.

Пе́снь 4

Ирмо́с: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше свято́му, во спасе́ние на́ше и обновле́ние.

Кому́ тя, душе́ моя́ окая́нная, уподо́блю, де́лающую лю́тая, и не творя́щую до́брых? обрати́ся, возопи́й тебе́ ра́ди обнища́вшему во́лею: Сердцеве́дче, уще́дри, и спаси́ мя.

Определи́вый покая́ние Спа́се обраща́ющымся, е́же ми́ пода́ждь Бла́же, пре́жде конца́ житию́ дая́ ми умиле́ние и воздыха́ние, я́ко блудни́це пе́рвее, облобыза́ющей но́зе Твои́ Влады́ко.

Му́ченичен: Во́д духо́вных испо́лншеся му́ченицы, воды́ жи́вы ре́ки яви́шася манове́нием Боже́ственным, и пре́лести изсуши́ша му́тныя Христе́ пото́ки ду́хом, и ве́рных мы́сли напои́ша.

Му́ченичен: Вельми́ подви́гшеся Боже́ственнии му́ченицы, огня́ бо и меча́, и лю́тых все́х претерпе́ша томле́ние. Те́х моле́ньми Сло́ве Бо́жий, превели́кия изба́ви му́ки ве́чныя, ве́рою пою́щыя Тя́.

Богоро́дичен: И́же дре́вле из Отца́ нерожде́нна Сы́н рожде́йся, рождество́ име́ ле́тное, из Тебе́ Де́во вопло́щься, ле́тную бра́нь земноро́дных отя́ти хотя́ Благоутро́бный, и́же дне́й и ле́т превы́ше Сы́й.

И́н Ирмо́с то́йже

Престо́ли пе́рвое исполня́юще удобре́ние, и Херуви́ми и Серафи́ми, Боже́ственными заря́ми, несре́дственно све́тятся, богоде́тельная священнонача́лия прие́млюще, ны́не пою́т: сла́ва си́ле Твое́й Го́споди. [Два́жды.]

Пою́т тричи́сленную Еди́ницу Божества́ тро́ическими свяще́ннии непреста́нными гла́сы, явля́юще Серафи́ми пречи́стое богосло́вия та́инство, и правосла́вней ве́ре науча́юще.

Богоро́дичен: И́же вся́кия тва́ри превы́шши разумева́емь, па́че ума́ живонача́льным зда́нием, вои́стинну на земли́ соверша́я чудеса́, де́вственными све́тлостьми, во Твое́ чи́стое чре́во всели́ся Пречи́стая.

Пе́снь 5

Ирмо́с: Просвети́вый сия́нием прише́ствия Твоего́ Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Впадо́х в тле́ние страсте́й, и бою́ся Твоего́ пра́веднаго суди́ща, пра́ведный Го́споди. Те́мже молю́ся Ти́: укрепи́ мя твори́ти де́лания блага́я, оправда́ющая мя́.

Безве́стная и та́йная се́рдца моего́ Ты́ ве́си, Бо́же мо́й, и Зижди́телю, и Го́споди, не осуди́ у́бо мене́ в ча́с суда́, внегда́ прии́деши суди́ти вся́ческим.

Му́ченичен: Святи́и причасти́вшеся огню́, разжже́ние показа́ху Боже́ственнаго своего́ любле́ния. Те́мже ороша́еми, ча́янием бу́дущих богоно́снии веселя́хуся.

Му́ченичен: Укрепля́еми благи́х наде́ждею му́ченицы, претерпева́ху растерза́ния удо́в терпели́вейше, и многоко́зненнаго, жи́лами свои́ми неосла́бленнаго терпе́ния, удави́ша.

Богоро́дичен: Вети́йствующая уста́ не возмо́гут, рождества́ Твоего́ неизрече́нное пове́дати чу́до, Богоневе́сто: Несказа́ннаго бо ражда́еши, и на объя́тиях но́сиши руко́ю содержа́щаго вся́ческая.

И́н Ирмо́с то́йже

Любо́вию Боже́ственною распала́еми, Госпо́дьствия, Вла́сти и Си́лы, чи́нове втори́и, немо́лчными усты́ богонача́льное песносло́вят еди́но Существо́ и си́лу.

Управля́ются арха́нгельстии чи́нове Ду́хом, и А́нгелов, и Нача́лов, со безчи́сленными во́инствы: еди́но триипоста́сное просвети́тельно Существо́ почита́ти све́тло учи́ми су́ть.

Богоро́дичен: Украси́лася еси́ па́че вся́каго а́нгельскаго благоле́пия, А́нгелов бо Творца́ заче́нши и Го́спода, Богома́ти Пречи́стая, воплоти́вшагося неизрече́нно от Твои́х крове́й, родила́ еси́.

Пе́снь 6

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́ Бо́же на́ш: Ты́ бо кре́пость немощству́ющих и исправле́ние.

Сы́й вра́чь Христе́, исцели́ стра́сти се́рдца моего́, и омы́й мя́ от вся́кия скве́рны, струя́ми Иису́се мо́й умиле́ния, да пою́ и велича́ю благоутро́бие Твое́.

Блудя́ща мя́ на путе́х поги́бели, и в ро́в согреше́ний впа́дающа мя́ обрати́ Христе́, и к незаблу́дным стезя́м наведи́ Твои́х честны́х оправда́ний, я́ко да сла́влю Тя́.

Му́ченичен: Ка́мение вои́стинну многоце́нное, ка́мением посыпа́еми, не отверго́шася ка́мене жи́зненнаго, ниже́ истука́нному ка́мению пожро́ша, сла́внии и венцено́сцы Госпо́дни му́ченицы.

Му́ченичен: Обно́вльше ду́шы ра́лом ве́ры му́ченицы, страда́ния кла́с Ду́хом Боже́ственным стори́чный возрасти́ша, и пи́щи блаже́нныя сподо́бишася.

Богоро́дичен: О́гненных слу́г О́гнь роди́вши, яви́лася еси́ Всенепоро́чная (си́х превы́ше) и тва́ри вся́кия перводе́льне, Пречи́стая Де́во преиму́щая, в жена́х благослове́нная богора́дованная.

И́н Ирмо́с то́йже

Чи́ни безпло́тных Го́споди, престо́лу предстоя́ще сла́вы Твоея́ Человеколю́бче, гла́сы а́нгельскими непреста́нными Тя́ почита́ют: ты́ бо кре́пость еси́ те́х Христе́, и пе́ние. [Два́жды.]

Лице́ Твое́ зря́ще А́нгели, добро́ту недомы́слимую, пребоже́ственное благоле́пие Твоея́ Боже́ственныя све́тлости, просвеща́ются: Ты́ бо те́х и све́т еси́ и ра́дование.

Богоро́дичен: Воплоти́ся, и́же пре́жде сы́й безпло́тное Сло́во, из Тебе́ Пречи́стая, вся́ческая во́лею творя́й, и безпло́тных во́инства приведы́й от небытия́, я́ко Всеси́лен.

Пе́снь 7

Ирмо́с: Тебе́ у́мную Богоро́дице, пе́щь разсмотря́ем ве́рнии: я́коже бо о́троки спасе́ три́ превозноси́мый, ми́р обнови́, во чре́ве Твое́м всеце́л, хва́льный отце́в Бо́г, и препросла́влен.

Львы́ дре́вле Дании́л укроти́, сожи́тельницу име́яй доброде́тель: тому́ поревну́й, о душе́, и рыка́ющаго всегда́ я́ко льва́, и объя́ти хотя́ща тя́, е́же к Бо́гу взира́нием при́сно, безде́льна сотвори́.

Премно́жеством блуда́, Го́споди, ду́шу оскверни́х лю́те. Превосходя́щую у́бо Христе́ имы́й благосты́ню, приими́ я́ко блу́днаго, и пою́ща мя́ уще́дри: Препе́тый отце́в Бо́г, и препросла́влен.

Му́ченичен: Зако́ном Христо́вым благомо́щно укрепля́еми, беззако́нных сове́ты погуби́ша, непобеди́мии му́ченицы, зако́нно же сконча́вшеся, воспева́ху: Препе́тый отце́в Бо́г благослове́н еси́.

Му́ченичен: Богоза́рнии Госпо́дни му́ченицы, распала́еми све́том Тро́ическим, я́ве муче́ния тьму́, и пре́лести мглу́ разруши́сте, пою́ще: Препе́тый отце́в Бо́г, и препросла́влен.

Богоро́дичен: Зако́ни естества́ в Тебе́ обновля́ются: Законода́вца бо Христа́ кроме́ зако́н плотски́х ражда́еши, Всенепоро́чная, все́м избавле́ние законополага́юща пою́щым: Препе́тый отце́в Бо́г и препросла́влен.

И́н Ирмо́с то́йже

Безнача́льный Све́т ты́ еси́ Влады́ко, от Отца́ све́та возсия́вый, А́нгелов во́инства све́ты устро́ил еси́, зерца́ла прие́млюща, блиста́ние Твое́ незаходи́мое: Препе́тый отце́в Бо́г, и препросла́влен.

Ро́д челове́чь, и́же все́х Госпо́дь, приставле́ньми а́нгельскими я́ве спаса́еши: сия́ бо предста́вил еси́ все́м ве́рующым, и правосла́вно пою́щым Тя́, Препе́таго отце́в Бо́га, и препросла́влена.

Язы́к и у́м не мо́жет, Влады́ко, Твои́х чуде́с изрещи́, и де́л благоле́пное: Ты́ бо просвети́л еси́ вся́кое удобре́ние небе́сных си́л: препе́тый отце́в Бо́г, и препросла́влен.

Богоро́дичен: Из Тебе́, Чи́стая, Сы́н воплоти́ся, и́же пре́жде без ма́тере из отца́, и без отца́ е́же по на́м, на́с ра́ди бы́в. Ему́же ны́не слу́жат безпло́тных полки́, я́ко хвали́мому отце́в Бо́гу, и препросла́влену.

Пе́снь 8

Ирмо́с: В пещи́ о́троцы изра́илевы, я́коже в горни́ле добро́тою благоче́стия, чисте́е зла́та блеща́хуся, глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Изба́вителю мо́й благоутро́бне Христе́, ны́не одержа́щия мя́ мглы́ грехо́вныя, и вся́ких искуше́ний изба́ви зову́ща: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Егда́ хо́щеши приити́ Христе́ во сла́ве, суди́ти ми́ру, стоя́нию избра́нных Твои́х сопричти́ и мене́, вопию́ща и глаго́люща: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Му́ченичен: К земли́ Христо́ве святи́и му́ченицы преидо́сте: на земли́ бо вельми́ подви́гшеся, небе́сную жи́знь восприя́сте, пою́ще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Му́ченичен: Совле́кшеся те́ла тле́ннаго, во оде́жду безсме́ртия я́ко му́ченицы победоно́снии облеко́стеся во Христа́, с высоты́ взыва́юще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Богоро́дичен: Свяще́ннии Тя́ гла́си издале́ча провозвести́ша Пречи́стая, бы́ти Тебе́ ма́тери вся́ сотво́ршему Бо́гу. Ему́же пое́м: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

И́н Ирмо́с то́йже

Просвеще́нная и близосве́тная А́нгелов во́инства луча́ми трисо́лнечныя красоты́, ве́рнии подража́юще воспои́м: благослови́те вся́ дела́ Госпо́дня го́спода, по́йте и превозноси́те во вся́ ве́ки.

Я́ко исто́чник все́х до́брых, богонача́льнейшая приво́дит Боже́ственная си́ла све́ты вторы́я, Све́т пе́рвый прие́млющя и вопию́щя: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Ум пе́рвый и Соде́тель, преми́рныя умы́ а́нгельския, пресу́щественне соста́ви Себе́, я́ве приближа́ющыяся, и вопию́щыя: вся́ дела́ Госпо́дня Го́спода по́йте, и превозноси́те во вся́ ве́ки.

Богоро́дичен: Па́че сло́ва из Отца́ рожде́нна пре́жде ве́к, неизрече́нно воплоще́нна родила́ еси́ на́м Де́во Всенепоро́чная. Ему́же вопие́м: вся́ дела́ Госпо́дня Го́спода по́йте, и превозноси́те во вся́ ве́ки.

Пе́снь 9

Ирмо́с: О́браз чи́стаго рождества́ Твоего́ огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́ Богоро́дице непреста́нно велича́ем.

Я́коже ханане́а зову́ Ти: поми́луй мя́ Сло́ве: ду́шу бо и́мам де́монскими нанесе́нии бе́дствующую, и безу́мно беззако́нная де́лающую, и нечу́вствующую Боже́ственнаго Твоего́ стра́ха, Долготерпели́ве.

Поста́ви Го́споди, на ка́мени повеле́ний Твои́х души́ моея́ но́зе, и безсту́дно запя́ти мя́ хотя́ща, запни́ зми́я, и изба́ви мя́ сего́ злоде́йства, я́ко бла́г и многоми́лостив.

Му́ченичен: Уже́ пре́жде му́ченицы, искуше́ний во́ду непостоя́нную, и ра́н лю́тых бу́рю, ко приста́нищу я́ве достиго́сте го́рняго Ца́рствия, Боже́ственныя тишины́ наслажда́ющеся.

Му́ченичен: Све́та невече́рняго му́ченицы светови́дни бы́ти сподо́бистеся, и в це́ркви перворожде́нных весели́теся, и со а́нгельскими ли́ки ра́дуетеся, с ни́миже Живода́вца о на́с моли́те.

Богоро́дичен: Но́сиши вся́ Нося́щаго, и дои́ши все́м пи́щу даю́щаго, ве́лие и стра́шно е́же па́че ума́ Твое́ та́инство, ковче́же честны́я святы́ни Де́во Богоро́дице. Те́мже Тя́ ве́рою ублажа́ем.

И́н Ирмо́с то́йже

Прича́стники неизрече́нныя сла́вы Твоея́, безпло́тныя умы́ Спа́се соста́вил еси́: и ны́не те́ми Твоя́ лю́ди сохрани́, Тебе́ ве́рою и любо́вию прибега́ющыя, да Тя́ Влады́ко непреста́нно велича́ем.

Да посыла́еши ми́рнаго А́нгела, соблюда́юща Вседержи́телю ста́до Твое́: ми́ра бо и любве́ Ты́ вино́вен, и богому́дренную ве́ру соблюда́юща, и вся́ е́реси Твое́ю си́лою разруша́юща.

Ве́сь сла́дость воспева́емый, небе́сную сла́достную све́тлость насади́ в це́рквах Твои́х Влады́ко, и благоче́стно да́ждь в состоя́ние, да Тя́ Спаси́теля непреста́нно велича́ем.

Богоро́дичен: Чи́ни а́нгельстии Пречи́стая, ны́не немо́лчно Твое́ рождество́ почита́ют: в чину́ бо стоя́т взира́юще, весе́лия Его́ насыща́ющеся, и Тя́ Богоро́дицу непреста́нно велича́ют.

Та́же: Досто́йно е́сть: Ектениа́ ма́лая, и свети́лен. Та́же псалмы́ обы́чныя.

На стихо́вне стихи́ры умили́тельны, гла́с 1:

И́н тя́ ми́р душе́ ожида́ет, и Судия́ хо́щет твоя́ обличи́ти та́йная и лю́тая. Не пребу́ди у́бо в зде́шних, но предвари́ вопию́щи Судии́: Бо́же очи́сти мя́, и спаси́ мя.

Сти́х: Испо́лнихомся зау́тра ми́лости Твоея́ Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Не пренебрези́ мене́ Спа́се мо́й ле́ностию грехо́вною одержи́ма, воздви́гни мое́ помышле́ние к покая́нию, и Твоего́ виногра́да де́лателя иску́сна покажи́ мя: да́руй ми́ единагона́десяте часа́ мзду́, и ве́лию ми́лость.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Страстоте́рпцы Христо́вы, прииди́те лю́дие вси́ почти́м, пе́ньми и пе́сньми духо́вными, свети́льники ми́ра, и пропове́дники ве́ры, исто́чник приснотеку́щий, из него́же истека́ют ве́рным исцеле́ния: те́х моли́твами Христе́ Бо́же на́ш, ми́р да́руй ми́ру Твоему́, и душа́м на́шым ве́лию ми́лость.

Сла́ва, и ны́не, Богоро́дичен: Подо́бен: Небе́сных чино́в:

Святе́йшая святы́х все́х си́л, Честне́йшая всея́ тва́ри Богоро́дице Влады́чице ми́ра, спаси́ ны Спа́са ро́ждшая, от прегреше́ний тмори́чных и бе́д, я́ко блага́я, моли́твами Твои́ми.

Та́же, Бла́го е́сть: Трисвято́е. По О́тче на́ш: тропа́рь свято́му, и ектениа́, и отпу́ст. Ча́с 1– й, и коне́чный отпу́ст.

В понеде́льник блаже́нна, гла́с 1:

Сне́дию изведе́ из рая́ вра́г Ада́ма: Кресто́м же введе́ Христо́с во́нь разбо́йника, помяни́ мя, Го́споди, вопию́ща, егда́ прии́деши во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Умиле́ний исто́чник ми́ да́руй благоутро́бием Твои́м Христе́ Бо́же, вся́кия мя́ скве́рны зо́л безме́рных очища́ющий, и Ца́рствия Твоего́ Благоде́телю прича́стника мя́ сотвори́.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

А́нгел Твои́х чи́ны в моле́ние приво́дим Ти́ Христе́, спаси́, уще́дри на́с те́ми, я́ко пребла́г, вся́ презира́яй на́ша, я́же в ве́дении и не в ве́дении, прегреше́ния.

Ра́дуйтеся и весели́теся, я́ко мзда́ ва́ша мно́га на небесе́х.

Му́ченичен: Крове́й ва́ших святи́и тече́ньми, мы́сленнаго фарао́на потопи́сте я́ве: ны́не же источа́ете чуде́с то́ки, пучи́ну изсуша́ющыя неду́гов. Те́мже блажи́ми есте́.

Сла́ва: Отцу́ поклони́мся, и Сы́на славосло́вим, и Всесвята́го Ду́ха вси́ ве́рнии воспои́м, зову́ще и глаго́люще: Всесвята́я Тро́ице, спаси́ вся́ ны́.

И ны́не, Богоро́дичен: Ро́ждшая Све́т безле́тный, омраче́нную ду́шу мою́ при́сно де́монов прило́ги, световоди́ Пренепоро́чная, и огня́ бу́дущаго хода́тайствы Твои́ми свободи́.

Вторник

В понеде́льник ве́чера

на Го́споди воззва́х, стихи́ры, гла́с 1.

Подо́бен: Прехва́льнии му́ченицы:

Сти́х: А́ще беззако́ния на́зриши Го́споди, Го́споди кто́ постои́т? Я́ко у тебе́ очище́ние е́сть.

Все́ житие́ мое́ сра́мно изжи́х, Го́споди, со блудни́цами окая́нный, я́коже блу́дный умиле́нием зову́: О́тче Небе́сный, согреши́х, очи́сти и спаси́ мя, и не отри́ни мене́, самого́ себе́ от Тебе́ удали́вшагося, и безпло́дных ра́ди де́л ны́не обнища́вшаго.

Сти́х: И́мене ра́ди Твоего́, потерпе́х Тя́ Го́споди, потерпе́ душа́ моя́, в Сло́во Твое́, упова́ душа́ моя́ на Го́спода.

Обнища́в бога́т сы́й Христе́, челове́ки обогати́л еси́ безсме́ртием и све́тлостию. Те́мже обнища́вша мя́ сластьми́ жите́йскими, доброде́тельми обогати́, и с ни́щим Ла́зарем учини́ мя, бога́таго муче́ния изъима́я мя́ и гее́нны предлежа́щия ми́.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Зло́бою обогати́хся лю́те, и пи́щу возлюби́х, и в житии́ восприя́х блага́я Го́споди, и в гее́нну осужде́н бы́х: гла́днующий у́м мо́й, я́ко Ла́заря презре́х, пред враты́ Боже́ственных Твои́х дея́ний пове́ржен, уще́дри мя́ Го́споди.

И́ны стихи́ры предте́чи. Подо́бен: то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Проро́че чу́дный, Христо́в Крести́телю и Предте́че, изсо́хшее се́рдце мое́ безме́стием, ре́ки сле́з приснотеку́щих сотвори́ пролия́ти моли́твами твои́ми: и молю́ тя, я́ко да спаса́емь тобо́ю многоболе́зненный, велича́ю тебе́ возвели́чившаго.

Сти́х: Хвали́те Го́спода вси́ язы́цы, похвали́те его́ вси́ лю́дие.

Проро́че блаже́нне, к тебе́ наде́жду мою́ всю́, и живо́т возлага́ю ча́яния моего́, и́же Христа́ крести́в Иису́са, бе́здну взе́млющаго ми́ра прегреше́ния. Того́ моли́ Иоа́нне, молю́ся ти́, се́рдце мое́ очи́стити, и спасти́ мя.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Пропове́дниче му́дре благода́ти, и́же все́м язы́ком покая́ние предвозвести́вый, всеокая́нней мое́й и ослепле́нной души́, Боже́ственный Предте́че, пребыва́ти в покая́нии благоволи́, и во́лю Госпо́дню де́яти всегда́, да ве́рою и любо́вию сла́влю тя́.

Сла́ва, и ны́не, Богоро́дичен: А́гнца, ми́ра всего́ взе́млющаго грехи́, Его́же превели́кий Предте́ча все́м пропове́да, с ни́м Де́во моли́, ко́злищ ча́сти яви́ти мя́ чу́жда в ча́с су́дный, и овца́м десны́м Его́ сочта́ти мене́ недосто́йнаго.

Та́же: Све́те ти́хий: Проки́мен дне́: И ектениа́. Посе́м: Сподо́би Го́споди в ве́чер:

На стихо́вне стихи́ры покая́нны. Гла́с 1:

Я́ко пучи́на мно́га прегреше́ний мои́х Спа́се, и лю́те погружа́юся согреше́ньми мои́ми, да́ждь ми́ ру́ку, я́ко Петро́ви, и спаси́ мя Бо́же, и поми́луй мя́.

Сти́х: К Тебе́ возведо́х о́чи мои́, живу́щему на небеси́, се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Я́ко в помышле́ниих лука́вых и в де́лех осуди́хся Спа́се, мы́сль мне́ да́руй обраще́ния Бо́же, да зову́ Ти: спаси́ мя Благоде́телю Благи́й, и поми́луй мя́.

Сти́х: Поми́луй на́с Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Е́же на суди́щи ва́ше испове́дание святи́и, де́монов оплева́ си́лу, и от пре́лести челове́ки свободи́. Те́мже и глава́м усека́емым, взыва́сте: да бу́дет Го́споди, же́ртва ду́ш на́ших благоприя́тна пред Тобо́ю, я́ко Тебе́ возлюби́вше, неради́хом о вре́менней жи́зни, Человеколю́бче.

Сла́ва, и ны́не, Богоро́дичен: Де́во Всепе́тая, ю́же в Тебе́ та́йну Моисе́й проро́ческима ви́де очи́ма, купину́ горя́щу и неопаля́ему: Божества́ бо о́гнь утро́бу Твою́ Чи́стая, не опали́. Те́мже мо́лим Тя́ я́ко Ма́терь Бо́га на́шего, ми́р испроси́ти ми́рови, и ве́лию ми́лость.

Та́же, Ны́не отпуща́еши: Трисвято́е. По О́тче на́ш: Тропа́рь и отпу́ст.

В понеде́льник на повече́рии

кано́н пресвяте́й Богоро́дице. Гла́с 1.

Пе́снь 1

Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою, и спа́сшему Изра́иля, я́ко просла́вися.

Свяще́ние Пречи́стое ра́дуйся Де́во, а́нгелов украше́ние, и Прия́телище Ду́ха, Неве́сто Непоро́чная Отца́ Безнача́льна, и Ма́ти Сло́ва Бо́жия.

Цари́ца еси́, я́ко Царе́ва Дщи́, прозя́бши Богоро́дице Влады́чице, и Царя́ Бо́га ро́ждши пло́тию, и с Ни́м ца́рствуеши.

Сла́ва: Пое́т Рождество́ Твое́ Дави́д певе́ц, превоспева́ет же Иса́иа утро́бу Твою́ Пречи́стую, Мари́е Всечи́стая, христиа́нстии же лю́дие сла́вят рождество́ Твое́.

И ны́не: Пропове́дует Це́рковь рождество́ Твое́ Де́во Богоневе́сто, правосла́вными уче́нии, и вещьми́ Боже́ственными, образо́м бо воплоще́ния Сы́на Твоего́ покланя́ется.

Пе́снь 3

Ирмо́с: Ка́мень, его́же небрего́ша зи́ждущии, се́й бы́сть во главу́ у́гла: то́й е́сть ка́мень, на не́мже утверди́ Це́рковь Христо́с, ю́же от язы́к искупи́.

Сла́ву де́вства иму́щи, облекла́ся еси́ благода́тию Ду́ха Свята́го, Пречи́стая Мари́е, я́вльшися Богоро́дица, но́вое та́инство и сокрове́нное: ка́ко бо Бо́га пло́тию ро́ждши де́вствуеши?

Де́ло, е́же соде́лал еси́ Го́споди, кто́ ска́жет? ю́же бо прокля́т в печа́лех роди́ти ча́да, сы́н показа́лся еси́ сея́, и ра́дуется же́нское па́дшее естество́ о Тебе́ Бо́зе Богоро́дицы ра́ди.

Сла́ва: Бу́ря прегреше́ний реши́тся ми́ру, Тобо́ю Пречи́стая Мари́е Богоро́дице Еди́на. Те́м Тя́, я́ко приста́нище спасе́ния иму́ще, восхваля́ем ве́рнии, пою́ще вели́чия Твоя́.

И ны́не: Воспе́т де́вству проро́ки дре́вле, роди́ти Тя́ Безле́тнаго в ле́та, и па́че сло́ва Сло́во, Еди́наго от Тро́ицы Христа́ Бо́га на́шего: Его́же це́рковь Ма́ти Чи́стая, почита́ет о́бразы.

Пе́снь 4

Ирмо́с: Ду́хом прови́дя проро́че Авваку́ме, Словесе́ воплоще́ние, пропове́дал еси́ вопия́: внегда́ прибли́житися ле́том, позна́ешися, внегда́ приити́ вре́мени, пока́жешися, сла́ва си́ле Твое́й Го́споди.

Седмосве́тлое зерца́ло Боже́ственных проро́к многообра́зно пое́т образова́ния Твоя́: мы́ же де́лом зна́мения исхо́да Твоего́ восприе́мше, Богоро́дицу Тя́ вои́стинну, вещьми́ ви́дящи ве́руем.

Бо́жию Тя́ досто́йно Ма́терь, вои́стинну Де́во Чи́стая, чту́ще сла́вим мы́, сво́йственный принося́ще гла́с Тебе́, в зако́не и проро́цех пропове́данней: ра́дуйся Обра́дованная, Госпо́дь с Тобо́ю.

Сла́ва: Се́ Боже́ственная гора́, ю́же ви́де Авваку́м, доброде́телей се́нь су́щи я́ве, Богоро́дица просия́ в ми́ре, Е́юже дре́вле отсту́пльшии преступле́нием, а́бие Бо́гу прибли́жихомся.

И ны́не: Блаже́н язы́к, Препе́тая Чи́стая, и́же чести́ сподо́бися Рождество́ Твое́ ве́рно, правосла́вием и уче́нием и де́лы, и́стинне явля́я вся́ о́бразы воплоще́ния Сы́на Твоего́.

Пе́снь 5

Ирмо́с: От но́щи у́тренююще, воспева́ем Тя́ Христе́ Бо́же, обнища́вшаго на́с ра́ди, и Кре́ст, и сме́рть пло́тию претерпе́вшаго.

Сокрове́нно та́йне явля́ше Тя́ купину́ Моисе́й, неопали́мую Богоро́дице Влады́чице: веще́ственная бо Твоя́ ложесна́ не опали́шася Божество́м.

Словесе́ Бо́жия Тя́ Ма́терь воспева́юще, Богоро́дице Чи́стая, слове́сное прино́сим цвету́щее дарова́ние Тебе́, о не́мже ра́доватися ве́руем.

Сла́ва: От скве́рных усте́н не отврати́ похвале́ния, Богоро́дице Пречи́стая: не́сть бо на земли́, и́же Тя́ по достоя́нию воспе́ти дерза́ет.

И ны́не: Еди́н е́сть во двою́ Существу́, И́же от Де́вы рожде́йся, я́ко Бо́г Неви́димый, и я́ко Челове́к, во́лею на́с ра́ди уподо́бивыйся челове́ком.

Пе́снь 6

Ирмо́с: Проро́ка Ио́ну подража́я вопию́: живо́т мо́й Бла́же свободи́ из тли́, и спаси́ мя Спа́се ми́ра, зову́ща: сла́ва Тебе́.

Мы́сленный Тя́ све́щник Де́во, и седмосия́нный зри́т проро́к, показу́я я́ве Ду́ха де́йствия, блеща́щася в Тебе́.

Дре́во Ты́ яви́лася еси́ Де́во живоно́сное вои́стинну, плодо́м Твои́м льсти́ваго зми́я умори́вшее, челове́ком же живо́т ро́ждши Христа́ Бо́га.

Сла́ва: Не красна́ похвала́ от скве́рных усте́н Тебе́ прино́сится, Ма́ти Бо́га на́шего Чи́стая: но ви́ждь души́ моея́ жела́ние, и сие́ приими́.

И ны́не: Шата́ются беззако́ннии в молве́ го́рькаго неве́рия: егда́ то́кмо ви́дят правосла́вных собо́ры, лобыза́ющих Тво́й Де́во о́браз.

Го́споди поми́луй, три́жды. Сла́ва, и ны́не:

Седа́лен, гла́с 1. Подо́бен: Гро́б во́й:

Окорми́ Чи́стая, окая́нную мою́ жи́знь, и уще́дри Всенепоро́чная, ду́шу, попо́лзшуюся мно́гими прегреше́нии во глубину́ поги́бели, и в ча́с мя́ сме́ртный свободи́ клеве́щущих бесо́в, и стра́шнаго отве́та.

Пе́снь 7

Ирмо́с: Су́щым в пещи́ отроко́м Твои́м Спа́се, не прикосну́ся, ниже́ стужи́ о́гнь. Тогда́ трие́, я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших.

Преукраше́нна яви́ся доброде́тельми Богоневе́сто, сла́вою и че́стию де́вства: красне́йша бо благоле́пием добро́та Твоя́ вои́стинну, рачи́тель Госпо́дь Тебе́ приведе́ Ма́терь Боже́ственную Себе́.

Же́зл Чи́стая, пра́вости я́ве была́ еси́, же́зл Ца́рствия Пречестне́йший. Те́мже пло́д Бо́жия Словесе́ прозябла́ еси́, е́же и чу́до издале́ча Ааро́нов я́ве же́зл прообрази́.

Сла́ва: Теле́сными страстьми́ мно́гими оскверни́в те́ло же и сло́во и ду́шу, ка́ко Твою́ Чи́стая, доброде́телей воспою́ красоту́? недоуме́ю и устраша́юся: но Сама́ мне́ бу́ди Твои́ми моли́твами по́мощь.

И ны́не: Твоего́ Христе́ воплоще́ния чту́ соедине́ние, и сего́ о́бразу покланя́юся боголе́пно, я́ко Бо́г сы́й Предве́чный, от Де́вы бы́сть Челове́к Непреме́нен, Са́м во обою́ соверше́н.

Пе́снь 8

Ирмо́с: Его́же ужаса́ются а́нгели, и вся́ во́инства, я́ко Творца́ и Го́спода, по́йте свяще́нницы, просла́вите о́троцы, благослови́те лю́дие, и превозноси́те во вся́ ве́ки.

Боже́ственное свяще́ние, да воспое́тся Бо́жие, и́мже изба́вися ми́р от тли́. Воста́ните вси́ па́дшии иногда́: Мари́а бо роди́ Христа́ спасе́ние.

Пое́м Тя́ Пречи́стая, и Ма́ти Бо́жия: и кто́ не сла́вит Тя́ вои́стинну Благу́ю, су́щую наде́жду ду́ш на́ших; те́мже Пресвята́я, мольбу́ мою́ приими́.

Сла́ва: уясни́теся дне́сь пе́сньми ве́рнии: просла́вите а́нгели, и челове́цы вку́пе, я́ко диа́вол па́дает и отча́яние: Мари́а бо роди́ на́м наде́жду спасе́ния.

И ны́не: Не опису́йте Божества́, не лжи́те слепи́и: про́сте бо неви́димо и незри́тельно е́сть: пло́ти же о́браз вообразу́я, покланя́юся, и ве́рою сла́влю ро́ждшую Го́спода Де́ву.

Пе́снь 9

Ирмо́с: Светоно́сный о́блак, во́ньже все́х Влады́ка, я́ко до́ждь с небесе́ на руно́ сни́де, и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

Ра́дуйся мари́е, вели́кое всея́ тва́ри чу́до. Ра́дуйся дщи́ у́бо Дави́дова, Госпо́дня же Ма́ти. Ра́дуйся пе́ние аврии́лово. Ра́дуйся прибе́жище и утвержде́ние, и по́мощь все́м Пресвята́я, су́щым на земли́ гре́шником.

Пое́т Ду́хом Боже́ственным, и воспева́ет благода́рственную пе́снь, Иоаки́м чу́дный, и Боже́ственная А́нна, я́ко ви́дяше на земли́ Ма́терь Созда́теля, Ю́же роди́ша Дще́рь Мари́ю: Ея́же моли́твами все́х спаси́ на́с я́ко Бо́г.

Сла́ва: О Пресвята́я Де́во Ма́ти Бо́га Вы́шняго! Твое́ рождество́ на земли́ спасе́ние яви́ся гре́шным и смире́нным: о Тебе́ бо спасо́хомся ве́ровавше, но спаса́еши мя́ и ны́не, и во вся́ ве́ки жи́зненныя.

И ны́не: Воплоще́нна Сло́ва, но Непрело́жна ве́м. Те́мже воспева́ю Его́ ве́рно, во Двою́ у́бо Существу́, Ипоста́си же Еди́ней: Его́же вои́стинну я́ко Бо́га и Челове́ка пропове́дая, пе́снь соверша́ю.

Та́же, Досто́йно е́сть: И покло́н. Трисвято́е. И про́чее обы́чно: и отпу́ст.

Во вто́рник у́тра по ексапсалме́х

на Бо́г Госпо́дь, тропа́рь свято́му, а́ще и́мать. Сла́ва, и ны́не, Богоро́дичен, по гла́су тропаря́. А́ще ли ни́, глаго́лем тропа́рь дне́. Сла́ва, и ны́не, Богоро́дичен его́.

По 1-м стихосло́вии седа́льны покая́нны. Гла́с 1:

В беззако́ниих зача́т е́смь а́з блу́дный, не сме́ю взира́ти на высоту́ небе́сную. Но наде́яся на человеколю́бие Твое́ зову́: Бо́же, очи́сти мя́ гре́шнаго, и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

А́ще пра́ведник едва́ спаса́ется, а́з же гре́шный где́ явлю́ся, тяготы́ и ва́ра дневна́го не поне́сший? но с нае́мники единонадеся́таго часа́ сопричти́ мя, Бо́же, и спаси́ мя.

Сла́ва, и ны́не, Богоро́дичен: Без ма́тере на небеси́, па́че смы́сла и слы́шания, на земли́ без отца́ родила́ еси́. того́ Богоро́дице моли́, спасти́ся душа́м на́шым.

По 2-м стихосло́вии, седа́лен. Гла́с 1:

Объя́тия О́тча отве́рсти ми́ потщи́ся, блу́дно мое́ ижди́х житие́, на бога́тство неиждива́емое взира́я щедро́т Твои́х Спа́се, ны́не обнища́вшее мое́ да не пре́зриши се́рдце, Тебе́ бо, Го́споди, умиле́нием зову́: согреши́х, о́тче, на Не́бо и пред Тобо́ю, спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Бога́тство И́овлево зря́ доброде́телей, подкопа́ти и укра́сти ко́зньствоваше, и́же пра́ведных вра́г, и разори́ сто́лп теле́сный, сокро́вища же не укра́де духо́внаго, обре́те бо вооруже́ну непоро́чнаго ду́шу: мене́ же и обнажи́в плени́. Предвари́в у́бо пре́жде конца́, изба́ви мя́ от льсти́ваго, Спа́се, и спаси́ мя.

Сти́х: Ди́вен Бо́г во святы́х Свои́х, Бо́г Изра́илев.

Я́ко до́брии во́ини, единому́дренно ве́ровавше, преще́ния мучи́телей не убоя́стеся святи́и. приидо́сте усе́рдно ко Христу́ взе́мше честны́й кре́ст, и сконча́вше тече́ние, с небесе́ побе́ду прия́сте. Сла́ва укре́пльшему ва́с: сла́ва венча́вшему вы́: сла́ва де́йствующему ва́ми все́м исцеле́ния.

Сла́ва, и ны́не, Богоро́дичен: Отча́яние ниневи́тское предвари́л еси́, возвеще́нное запреще́ние мимоводя́, и гне́в победи́ ми́лость Твоя́ Го́споди, умилосе́рдися ны́не на лю́ди и ста́до Твое́: дла́нию держа́вною враги́ на́шя низложи́, моли́твами Богоро́дицы да́руй на́м ми́лость Твою́.

По 3-м стихосло́вии, седа́льны, гла́с 1.

Подо́бен: Гро́б Тво́й:

В разбо́йники впадо́х помышле́ньми, и окрадо́хся умо́м, и уязви́ша мою́ ду́шу грехми́, и лежу́ неисце́лен, Иису́се Многоми́лостиве: но возле́й предте́чи моли́твами Твою́ ми́лость, и лю́тыя я́звы души́ моея́ исцели́.

И́же дре́вле струя́ми иорда́нскими крести́вый, Иоа́нне, очище́ние всего́ ми́ра, мно́гими мя́ погружа́ема прегреше́ньми востягни́ и омы́й от вся́кия скве́рны, человеколю́бца всегда́ моля́, я́ко хода́тай благоприя́тен.

Сла́ва, и ны́не, Богоро́дичен: Безневе́стная чи́стая Богоро́дице Де́во, еди́на ве́рным предста́тельнице и покро́ве: бе́д и скорбе́й и лю́тых обстоя́ний все́х изба́ви, на Тя́ упова́ние отрокови́це иму́щих: и ду́шы на́шя спаси́ Боже́ственными моли́твами Твои́ми.

Кано́н покая́нен, его́же краегране́сие си́це: Приими́ христе́ моле́ние мои́х слове́с: Творе́ние Ио́сифово, Гла́с 1.

Пе́снь 1

Ирмо́с: Пе́снь побе́дную пои́м вси́ Бо́гу: сотво́ршему ди́вная чудеса́ мы́шцею высо́кою, и спа́сшему Изра́иля, я́ко просла́вися.

Порабоща́емь страстьми́ греха́, припа́даю Ти́ Го́споди, я́ко да яви́ши мя́ от си́х свобо́дна, сла́вяща приле́жно Твою́ благосты́ню.

Уязви́хся окая́нный грехо́вным копие́м, и умро́х, и зря́ мя лежа́ща вра́г весели́тся: и́же воскреша́яй ме́ртвыя, оживи́в спаси́ мя.

Му́ченичен: Ли́цы просла́вишася страда́льцев, честны́ми у́ды свои́ми Христа́ просла́вльше, пло́ть поноси́вша, и страсте́й ра́ди тле́ние потре́бльшаго.

Му́ченичен: Столпы́ и забра́ла благоче́стия сла́внии му́ченицы, прило́гми вра́жиими непрекло́нни пребы́ша. Те́х моли́твами Бо́же, уще́дри все́х на́с.

Богоро́дичен: Я́ко престо́л огнезра́чный, Де́во но́сиши зижди́теля, я́ко одушевле́н черто́г и кра́сная пала́та Царя́ вмеща́еши, бы́вша е́же есмы́, кроме́ измене́ния и смеше́ния.

И́н кано́н свято́му вели́кому проро́ку Иоа́нну Предте́чи, его́же краегране́сие: Гла́с услы́ши вопию́щих Ти́ блаже́нне.

Гла́с 1. Ирмо́с то́йже

Гла́с бы́л еси́ сло́ва блаже́нне, те́мже гла́сы на́шя, я́же тебе́ твори́м, приими́ Предте́че, свобожда́я на́с от злы́х хода́тайством твои́м.

Я́ко у́тро, я́ко со́лнце возсия́в, просвеща́еши концы́ и помрача́еши ду́хи лука́выя. Те́мже мра́к от ду́ш на́ших отжени́.

Ме́ртвым живо́т на́ш приходя́щ, пропове́дал еси́ Предте́че. Те́мже умерщвля́ющыя мя́ стра́сти умертви́, и покажи́ блаже́нне, Боже́ственныя све́тлости прича́стника.

Богоро́дичен: Еди́на безле́тнаго сы́на в ле́то ро́ждши, воплоща́ема, Пречи́стая Влады́чице, вселе́тныя преокая́нныя моея́ души́ стра́сти исцели́.

Пе́снь 3

Ирмо́с: Ка́мень, его́же небрего́ша зи́ждущии, се́й бы́сть во главу́ у́гла: то́й е́сть ка́мень, на не́мже утверди́ Це́рковь Христо́с, ю́же от язы́к искупи́.

Ви́ждь мою́ не́мощь оболки́йся в ню́, ви́ждь души́ моея́ лю́тое безъобра́зие, и вонми́ гла́су моему́, Христе́ многоми́лостиве, и претвори́ сея́ неле́поту во благообра́зие, Спа́се.

Спасы́й Иису́се блу́днаго, спаси́ мя еди́наго Твоя́ спаси́тельныя престу́пльша зако́ны, и вся́кий гре́х безслове́сно сконча́вша, и отведе́на помышле́ньми от Тебе́ бла́же, чу́жда мя́ творя́щими.

Му́ченичен: Чи́ни безпло́тных, святи́и, ва́шему му́жеству вои́стинну удиви́шася, ка́ко на суди́щи стра́ждуще пресла́вно, и па́дающе те́лом, безпло́тныя вся́ враги́ Боже́ственною си́лою низверго́сте?

Му́ченичен: Еще́ ра́н кровьми́ очервле́ни, еще́ крове́й ка́плями страстоно́сцы облива́еми, го́сподеви предста́сте ра́дующеся, безсме́ртному Царю́, я́ко победоно́сцы венчава́еми.

Богоро́дичен: Родила́ еси́, его́же оте́ц роди́ пре́жде все́х ве́к. Пита́ла еси́ пита́теля, иску́са му́жеска не све́дущи. Пресла́вно чу́до, но́вое та́инство Богоблагода́тная: те́мже вся́ка душа́ ве́рных сла́вит Тя́.

И́н Ирмо́с то́йже

От непло́дове и неражда́ющия Предте́че свяще́нно прозябы́й, яви́лся еси́ плодоно́сен де́ланий Боже́ственных. Те́мже се́рдце мое́ вся́чески непло́дствующее, благопло́дно сотвори́ до́брым: я́ко да ве́рно всегда́ прославля́ю тя́.

Хле́бом небе́сным утверди́ мое́ се́рдце блаже́нне, разсла́бленное лука́выми мы́сльми, и да́ждь ми́ усе́рдно твори́ти хоте́ния всеще́драго Бо́га: я́ко да ве́рно присносла́влю тя́.

Ми́ра грехи́ взе́млющаго А́гнца пропове́дал еси́ блаже́нне проро́че: грехо́в мои́х тя́жкое бре́мя облегчи́, молю́ся, умиле́ние ми́ подая́, скве́рны страсте́й очища́ющее.

Богоро́дичен: В всего́ Ада́ма облече́ся из Тебе́, Богоро́дице, всеплотоно́сно произше́дшее сло́во: того́ у́бо моли́ Богоро́дице, изба́вити на́с от напа́стей вся́ческих, и огня́ ве́чнующаго.

Пе́снь 4

Ирмо́с: Ду́хом прови́дя, проро́че Авваку́ме, Словесе́ воплоще́ние, пропове́дал еси́ вопия́: внегда́ прибли́житися ле́том, позна́ешися, внегда́ приити́ вре́мени, пока́жешися: сла́ва си́ле Твое́й, Го́споди.

Е́же ми́ да́л еси́ Христе́ бога́тство, расточи́х зле́ скончава́я безме́стная, и бы́х на́г, облече́н в дела́ безче́стия. Те́мже вопию́ Ти: оде́ждею мя́ украси́ пе́рвою, Боже́ственною мя́ умиля́я благода́тию.

Низведо́хся безу́мием, и падо́хся лю́те, и на земли́ лежу́ неисце́льно боля́й, воздви́гни мя́ па́дших воста́ние, и на ка́мени спаси́тельнаго покая́ния утверди́ Христе́, се́рдце мое́.

Му́ченичен: На кре́ст вознесе́нному Христу́ подо́бящеся, прие́млюще ра́ны веселя́хуся вку́пе страстоте́рпцы, и кро́вными ту́чами многобо́жия уста́виша ту́чы, струи́ исцеле́ний источа́юще.

Му́ченичен: Преплы́вше немо́кренно му́к зе́льство, и го́рькое волне́ние, Боже́ственнии страда́льцы, окормле́нием спасе́ния наде́жды, и к вы́шнему устреми́шася приста́нищу, вся́каго весе́лия исполня́еми.

Богоро́дичен: Удиви́шася зря́ще Тя́ а́нгельская во́инства, ка́ко неви́димый зра́ком, по на́м из Тебе́ ви́димь бы́сть, Де́во Богороди́тельнице: Его́же моли́ спасе́ния сподо́бити все́х, ве́рою Тя́ сла́вящих.

И́н Ирмо́с то́йже

Истка́в спасе́ния ри́зу себе́, во обнаже́нии теле́снем Госпо́день крести́телю, обнаже́ннаго от вся́каго благотворе́ния, облецы́ мя, молю́ся, пра́вды и весе́лия оде́ждею.

Ка́плю спасе́ния одожди́ мне́ Предте́че, истаява́ему разждиза́нием по́хотей, погрузи́вый во струя́х Иорда́нских сла́дости пото́ка, Иису́са Жизнода́вца: я́ко да по до́лгу тя́ сла́влю.

Ни а́нгел, ни хода́тай Спасе́ на́с, но са́м Госпо́дь прише́дый на зе́млю: ему́же пра́выя пути́ угото́вал еси́ блаже́нне. Его́же ны́не моли́, показа́ти ми́ стезю́, к Ца́рствию наставля́ющую.

Богоро́дичен: Хра́м освяще́н яви́лася еси́ Бо́жий, в Тя́ все́льшагося Де́во па́че ума́: Того́ моли́ грехо́вных скве́рн на́с очи́стити, я́ко да хра́м яви́мся и вселе́ние Боже́ственнаго Ду́ха.

Пе́снь 5

Ирмо́с: Тво́й ми́р да́ждь на́м, Сы́не Бо́жий, ино́го бо ра́зве Тебе́ Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́.

Испо́лнихся грехопаде́ний мно́гих и лю́тых, Влады́ко ще́дрый и долготерпели́вый: уще́дри мя́ осужде́ннаго, и не отве́ржи мене́ от лица́ Твоего́.

Мытаря́ оправда́л еси́ Христе́ воздохну́вша, тому́ у́бо и а́з подо́бяся, бию́ в пе́рси, и зову́ Ти: очи́сти мя́ еди́не Благоутро́бне и Ще́дрый.

Му́ченичен: Святи́и Твои́, Го́споди, свети́ла непреле́стная яви́шася, пре́лести отгоня́юще но́щь глубо́кую, и просвеща́юще вселе́нную всю́ чуде́сными светлостьми́.

Му́ченичен: Я́ко пречестно́е ка́мение, Тебе́ ка́мене живо́тнаго, Влады́ко, возлю́бльше му́ченицы му́ками валя́еми, зда́ние вся́ко низверго́ша пре́лести.

Богоро́дичен: Во двою́ во́лях еди́наго от Пресвяты́я Тро́ицы родила́ еси́ Всенепоро́чная, нося́щаго еди́ну ипоста́сь: его́же приле́жно моли́ все́м спасти́ся на́м.

И́н Ирмо́с то́йже

В пусты́ню всели́вся Предте́че Христо́в, я́коже дре́вле Илиа́: те́мже се́рдце мое́ опусте́вшее прегреше́ньми, прилежа́нием Боже́ственным утверди́ всеблаже́нне.

Я́ко сто́лп непрело́жен, и забра́ло ве́рных бы́в, вели́кий Христо́в Предте́че, помышле́ние мое́ коле́блемо козньми́ льсти́ваго непрело́жно покажи́.

Ме́ртвым благовести́ся све́т, и́же от све́та возсия́вый на земли́, гла́сом твои́м блаже́нне, и су́щии во тьме́ просвети́хомся: те́мже просвети́ мя лю́те омраче́ннаго.

Богоро́дичен: Цари́цу Де́ву Тя́ пропове́дает Дави́д, Пречи́стая, Чи́стую: те́мже молю́ Тя, Небе́снаго мя́ Ца́рствия сотвори́ насле́дника, да ублажа́ю Тя́.

Пе́снь 6

Ирмо́с: Проро́ка Ио́ну подража́я, вопию́: живо́т мо́й, Бла́же свободи́ из тли́: и спаси́ мя, Спа́се ми́ра, зову́ща: сла́ва Тебе́.

Сокруши́шася ко́сти окая́нныя моея́ души́, и тягото́ю сляко́хся мно́гих сласте́й: но помози́ ми Христе́, еди́не все́м помога́ние.

В пучи́ну лю́тых, и бу́рю страсте́й впадо́хся, вопию́ Ти всеси́льне Христе́: возведи́ мя кре́пкою Твое́ю руко́ю, и спаси́ мя.

Му́ченичен: Тьма́ми избра́нных, мно́жество святы́х страстоте́рпец, тьмы́ мы́сленных попра́ша враго́в, и совокупи́шася тьма́м небе́сных умо́в.

Му́ченичен: Изсуши́вше глубину́ безбо́жия страда́льцы, пото́к сла́достный насле́довасте. Те́мже изсуши́те разлия́ния греха́ моего́.

Богоро́дичен: Свяще́ния се́нь явле́нная Мари́е, еди́ну оскверне́нную сластьми́ окая́нную мою́ ду́шу освяти́, и Боже́ственней сла́ве прича́стника мя́ сотвори́.

И́н Ирмо́с то́йже

И́же покая́ние на земли́ пропове́давый крести́телю, покая́ния ми́ пути́ наставля́ющыя мя́ к све́ту покажи́, и от про́пасти пре́лести изба́ви.

Я́ко бе́здну во струя́х ре́чных погрузи́в, бе́здну изсуши́ мои́х страсте́й, подая́ ми сле́з исто́чник, Предте́че, пропове́дниче Христо́в.

От неду́г душе́вных, и страсте́й плотски́х, жития́ напа́стей, и вся́ких искуше́ний и скорбе́й спаси́ мя, Госпо́день Предте́че.

Богоро́дичен: Ма́терь Бо́жию и до́брую в жена́х, молю́ Тя приле́жно, не пре́зри мене́ чи́стая, но уще́дри, и от вся́каго вре́да це́ла соблюди́.

Пе́снь 7

Ирмо́с: Су́щым в пещи́ отроко́м Твои́м Спа́се, не прикосну́ся, ниже́ стужи́ о́гнь. Тогда́ трие́, я́ко еди́неми усты́ поя́ху и благословля́ху, глаго́люще: благослове́н Бо́г Оте́ц На́ших.

Терпе́нию извы́че И́ов, и пребы́сть все́ми прило́ги лука́ваго непреклони́мь, я́коже сто́лп до́блественный. Сему́ ревну́й всегда́ о душе́, и ника́коже уныва́й в лю́тых.

Теле́сными победи́хся сластьми́, и бы́х безслове́сен, сы́й слове́сен: сло́ве Бо́жий, и́же сло́вом блудни́цу спасы́й, спаси́ мя окая́ннаго, да пою́ благословя́ Твою́ благосты́ню.

Му́ченичен: Изба́влени му́ченицы му́дрии кро́вию, пло́тию пострада́вшаго на́с ра́ди, за него́же усе́рдно изво́листе излия́ти своя́ кро́ви: те́мже непреста́нно с ни́м ца́рствуете.

Му́ченичен: Назда́нием страда́льчеств свяще́нных пала́та яви́стеся му́дрии, в не́йже ра́достно Христо́с почи́л е́сть, еди́н Ца́рь и Госпо́дь, и́же ко оби́телем небе́сным приведы́й ва́с.

Богоро́дичен: От родо́в Тя́ все́х Христо́с Всепе́тая, еди́ну изво́ли Себе́, я́ко честну́ю и чи́стую в жили́ще: и из Тебе́ я́ко со́лнце возсия́в, зе́млю всю́ просвети́.

И́н Ирмо́с то́йже

Я́ко ве́тхому и но́вому бы́в преизя́щный сла́вный хода́тай Крести́телю, хода́тайствуй, обетша́вшаго грехми́ всего́ обнови́ти мя́, обнови́теля вся́ческих моля́ Иису́са.

Законополага́я покая́ние на земли́ яви́лся еси́ Предте́че Христо́в и Крести́телю, его́же соверши́ти все́х укрепи́ моли́твами твои́ми, я́ко да изба́вимся от безме́рных зо́л, я́же согреша́ем при́сно.

Ты́ те́сный проше́л еси́ пу́ть, воздержа́ние вся́ко проходя́ Му́дре, и широто́ю боговиде́ний све́тлых ве́сь озари́вся: и́хже наслади́тися и на́м да́руй, Христа́ моля́.

Еди́но естество́ Тро́ицу ве́рнии сла́вим, безнача́льнаго Отца́, и Сы́на, и Ду́ха а́бие, еди́но ца́рствующее существо́, еди́но госпо́дьство, еди́но нача́ло, и живо́т животворя́щий на́с.

Богоро́дичен: Мольбу́ Пречи́стая, Бо́гу принеси́, я́ко да пре́зрит на́ша прегреше́ния, и безчи́сленныя грехи́, и ве́чнаго свободи́т на́с огня́ му́чащаго.

Пе́снь 8

Ирмо́с: Его́же ужаса́ются А́нгели, и вся́ во́инства, я́ко Творца́ и Го́спода, по́йте свяще́нницы, просла́вите о́троцы, благослови́те лю́дие, и превозноси́те во вся́ ве́ки.

На́га мя́ соде́ла вся́ческих доброде́телей зми́й льсти́вый злы́м сове́том: ри́зою доброде́телей украси́ мя ны́не, обнажи́вый Спа́се мо́й сего́ зло́бы.

Хотя́й приити́ суди́ти ро́ду челове́ческому, судие́ пра́ведный, в ча́с стра́шный, осужде́на су́ща не посли́ мене́ во о́гнь гее́нский, но уще́дри и спаси́ мя.

Му́ченичен: Ва́с всехва́льнии Госпо́дни страда́льцы, ни ско́рбь, ни беда́, ни ме́чь, ниже́ о́гнь возмо́же разлучи́ти отню́д от любве́ Христо́вы, благоутро́бия ра́ди ва́с возлюби́вшаго.

Му́ченичен: Пло́тию соплета́еми безпло́тному врагу́, того́ низложи́сте до́блии страда́льцы и ны́не со безпло́тными сликовству́ете, исцеля́юще стра́сти ду́ш же и теле́с.

Богоро́дичен: Я́ко цве́т во удо́лиих жития́ Тя́ обре́т, в Тя́ всели́ся, и́же все́х сади́тель, воня́ми доброде́телей и чистоты́ ны́не благоуха́яй на́с, Богороди́тельнице.

И́н Ирмо́с то́йже

Еди́н па́че все́х согреши́х на земли́ ро́ждшихся, еди́н бы́х престу́пник Твои́х зако́нов Го́споди: те́мже Предте́чи ра́ди уще́дри и спаси́ мя.

А́нгел нра́вы яви́лся еси́ крести́телю Иоа́нне, сове́та вели́каго А́нгела пропове́даяй конце́м: те́мже Тя́ пе́сньми сла́вим во вся́ ве́ки.

Во главу́ усе́чен бы́л еси́ без пра́вды Блаже́нне, погрузи́вый главу́ Христо́ву в вода́х. Укрепи́ все́х на́с моли́твами Твои́ми, главу́ попира́ти льсти́ваго вои́стинну губи́тельную.

Богоро́дичен: Изба́ви мя́ безме́стных грехо́в, и пла́меннаго томле́ния, и тьмы́ му́чащия, скре́жета зу́бнаго, и че́рвия, Де́во, еди́на Предста́тельнице ро́ду челове́ческому.

Пе́снь 9

Ирмо́с: Светоно́сный о́блак, во́ньже все́х Влады́ка, я́ко до́ждь с небесе́ на руно́ сни́де, и воплоти́ся на́с ра́ди, бы́в Челове́к, Безнача́льный. Велича́ем вси́ я́ко Ма́терь Бо́га на́шего Чи́стую.

Се́ вре́мя покая́ния и чи́ста де́лания, се́ де́нь, све́тла соде́лай дела́: бежи́ тьмы́ страсте́й, отжени́ со́н зла́го уны́ния душе́ моя́, я́ко да бу́деши Боже́ственнаго све́та прича́стна.

Я́ко мыта́рь воздыха́ю, я́ко блудни́ца слезю́, и я́ко разбо́йник вопию́ Ти: помяни́ мя Ще́дре: и я́ко блу́дный сы́н взыва́ю: согреши́х, припа́даю ти́ я́ко ханане́а: ми́лостиве, не пре́зри мене́ Христе́.

Му́ченичен: Теле́сным страсте́м, и душе́вным сокруше́нием, яви́стеся вои́стинну вра́чеве: преда́вше телеса́ к ра́нам терпели́вно, и к сме́рти ну́жней, прехва́льнии страда́льцы госпо́дни: сего́ ра́ди ублажа́етеся при́сно.

Му́ченичен: Со́лнечнаго сия́ния облиста́ мно́жае терпе́ние прему́дрых Христо́вых страстоте́рпец, те́мже нача́льника тьмы́ я́ве погуби́ благода́тию, и разруши́ безбо́жия но́щь, и сердца́ просвети́ ве́рных.

Богоро́дичен: Просвети́тельными сия́ньми возсия́вшаго сло́ва, от свята́го Твоего́ чре́ва Богоро́дице Де́во, и озари́вшаго земли́ концы́, просвети́ ду́шу мою́ сласте́й че́рностию омраче́нную, и ле́ностию страсте́й, да ве́рою Тя́ воспева́ю.

И́н Ирмо́с то́йже

Се́ свети́льник сия́я су́щым во тьме́ жития́, се́ доброглаго́ливая ла́стовица, ве́сну все́м возвеща́ющая, Христо́в вели́кий Предте́ча, хода́тай ве́тхому и но́вому: его́же моли́твами да сохрани́мся при́сно.

Я́ко жениху́ тя дру́га ны́не предлага́ю моли́твенника, име́яй мно́жество грехо́в, и вопию́ ти Крести́телю: отсече́ние ми́ долго́в, преблаже́нне, пода́ждь, и возжзи́ души́ моея́ свети́льник уга́сший ле́ностию до конца́.

Со безпло́тными А́нгелы, с честны́ми Апо́столы, со страстоте́рпцы свяще́нными, и со проро́ки Предте́че, преблага́го Бо́га моли́ всегда́, улучи́ти на́м бла́г ве́чных, обога́щшымся всегда́ Тобо́ю предста́телем благи́м.

Ла́стовице кра́сная, сла́вие честны́й, го́лубе предо́брый, пустынелю́бная го́рлице, Госпо́день крести́телю, пусты́нное прозябе́ние, запусте́вшую безпло́дием ду́шу мою́ покажи́ плодоно́сну до́брым.

Богоро́дичен: Но́сиши нося́щаго вся́ческая, я́коже престо́л херуви́мский, и пита́еши пита́ющаго на́с: его́же непреста́нно моли́, богора́дованная чи́стая, тру́са, паде́жа, плене́ния, и вся́кия ну́жды, Твоему́ ста́ду изба́витися при́сно.

Та́же, Досто́йно е́сть: и покло́н. Ектениа́ ма́лая, и свети́лен, и псалмы́ обы́чныя.

На стихо́вне стихи́ры покая́нны. Гла́с 1.

И́н ве́к Тебе́ душе́ ожида́ет, и судия́ хо́щет Твоя́ обличи́ти та́йная и лю́тая. Не пребу́ди у́бо в ни́х, но предвари́ вопию́щи судии́: Бо́же, очи́сти мя́ и спаси́ мя.

Сти́х: Испо́лнихомся зау́тра ми́лости Твоея́ Го́споди, и возра́довахомся и возвесели́хомся: во вся́ дни́ на́шя возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Не искуси́ мене́, Спа́се мо́й, ле́ностию грехо́вною одержи́ма, но воздви́гни мое́ помышле́ние к покая́нию, и Твоего́ виногра́да де́лателя иску́сна яви́ мя. Да́руй ми́ единонадеся́таго часа́ мзду́, и ве́лию ми́лость.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Си́и во́ини Царя́ вели́каго проти́вишася повеле́нием мучи́телевым, до́блественне неради́ша о му́ках, и пре́лесть всю́ попра́вше, досто́йно венча́ни бы́ша про́сят у Спа́са ми́ра душа́м на́шым, и ве́лия ми́лости.

Сла́ва, и ны́не, Богоро́дичен: Блудни́цу и блу́днаго а́з, и разбо́йника победи́х, и мытаря́ прегреше́нии премину́х, и ниневи́тяны. Увы́ мне́, что́ бу́ду? Ка́ко убе́гну му́ки а́з окая́нный? Чи́стая, припа́даю Ти́, уще́дри мя́ ми́лостию Твое́ю, я́коже о́ныя сы́н Тво́й спа́сл е́сть.

Та́же: Бла́го е́сть испове́датися Го́сподеви: Тропа́рь, ектениа́, и отпу́ст. Та́же ча́с 1-й, и псалмы́ обы́чныя, и про́чее, и коне́чный отпу́ст.

Во вто́рник блаже́нны, гла́с 1:

Сне́дию изведе́ из рая́ вра́г Ада́ма: кресто́м же введе́ Христо́с во́нь разбо́йника, помяни́ мя Го́споди, вопию́ща, егда́ прии́деши во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

На вся́к де́нь согреша́юща и преступа́юща Твоя́ за́поведи, обрати́ мя Бо́же, и от муче́ния исхити́, я́ко да Твое́ неизрече́нное милосе́рдие сла́влю Человеколю́бче.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще мене́ ра́ди.

Свети́льник яви́лся еси́ Бо́жий Предте́че, предходя́ незаходи́мому све́ту, из о́блака све́тла возсия́вшему на́м неизрече́нно: при́сно того́ у́бо моли́, уще́дрити и спасти́ ду́шы на́шя.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Претерпе́вше многоплете́нныя му́ки, му́ченицы всехва́льнии, небе́сных вы́шних бла́г сподо́бистеся: те́м ублажа́етеся от все́х челове́к всегда́.

Сла́ва: В трие́х ли́цех еди́но Божество́ зна́ем вси́ непресеко́мо су́щее, со Отце́м Сы́на же и Ду́ха жива́го, безнача́льно, неслия́нно, во ве́ки при́сно пребыва́ющее.

И ны́не: По рождестве́ Присноде́во, я́коже пре́жде Рождества́ сохрани́лася еси́ Чи́стая, Бо́га ро́ждши пло́тию: его́же моли́ пречи́стая, плотски́х и душе́вных страсте́й изба́вити на́с, мо́лимся.

Среда

Во вто́рник ве́чера

на Го́споди воззва́х, стихи́ры кре́стны, гла́с 1,

Подо́бен: Прехва́льнии му́ченицы:

Сти́х: А́ще беззако́ния на́зриши Го́споди, Го́споди кто́ постои́т? Я́ко у тебе́ очище́ние е́сть.

На Кресте́ пригвожда́емь, Христе́ Бо́же, я́ко челове́к, челове́ческое естество́ обожи́л еси́, и началозло́бнаго умертви́л еси́ зми́я. На́с свободи́л еси́ кля́твы я́же от Дре́ва, я́ко благоутро́бен бы́в кля́тва: прише́л еси́, я́ко да все́м пода́си благослове́ние, и ве́лию ми́лость.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Вся́кия превы́шши че́сти сы́й Влады́ко, обезче́ститися благоволи́л еси́, поно́сную претерпе́в Ще́дре на дре́ве сме́рть, ея́же ра́ди безсме́ртие, объя́т ро́д челове́ческий, и жи́знь пе́рвую восприя́т, Тебе́ уме́ршу пло́тию Всеси́льне.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Кре́сте Всечестны́й, ве́рных все́х очисти́лище, вся́ освяти́ тебе́ покланя́ющыяся и Христа́ сла́вящыя, ру́це пречи́стеи Просте́ршаго на тебе́ неизрече́ннаго ра́ди благоутро́бия и концы́ земли́ вся́ во еди́но собра́вшаго.

И́ны стихи́ры Богоро́дице, гла́с 1.

Подо́бен: Небе́сных чино́в:

Сти́х: Я́ко у Го́спода ми́лость, и мно́гое у него́ избавле́ние, и то́й изба́вит Изра́иля от все́х беззако́ний его́.

У Креста́ предстоя́щи Сы́на и Бо́га Твоего́, и долготерпе́ние того́ смотря́ющи, глаго́лаше пла́чущи Ма́ти Чи́стая: увы́ мне́, ча́до сладча́йшее! что́ сия́ стра́ждеши непра́ведно сло́ве Бо́жий? Да спасе́ши челове́чество.

Сти́х: Хвали́те Го́спода вси́ язы́цы, похвали́те Его́ вси́ лю́дие.

У Креста́ предстоя́щи, неве́сто неискусому́жная, и я́же от боле́зней я́звы прие́млющи, вопия́ше: да не безча́дну мя́ яви́ши, ча́до мое́, ро́ждшую Тя́ сло́ве Бо́жий: не оста́ви мя́ Еди́ну Единоро́дный, Отцу́ соприсносу́щный.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Внегда́ Тя ражда́х, боле́зни ника́коже име́х: и ка́ко ны́не боле́зни подъе́млю, Тебе́ сло́ве непра́ведно распина́ему? Вопия́ше го́рько Де́ва слезя́щи. Увы́ мне́! Не терплю́ ви́дети на Кре́ст, воздви́жена Тя́, Человеколю́бче.

Сла́ва, и ны́не, Крестобогоро́дичен: Твоего́ Сы́на и Влады́ку, дре́вле я́ко ви́дела еси́, на Кресте́ ру́це распросте́рша, и копие́м ре́бра ископова́ема, Ма́ти чи́стая рыда́ющи взыва́ла еси́: Увы́ мне́! ка́ко стра́ждеши, стра́сти челове́ков оте́мляй, Человеколю́бче?

Та́же, Све́те ти́хий: Посе́м проки́мен дне́. Сподо́би Го́споди в ве́чер: И ектениа́.

На стихо́вне стихи́ры кре́стны, гла́с 1:

Кре́ст водрузи́ся на ло́бнем, и процвете́ на́м безсме́ртие, от исто́чника приснотеку́щаго ребра́ Спа́сова.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ Госпо́дий свои́х, я́ко о́чи рабы́ни в руку́ Госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Неразруше́на стена́ на́м е́сть честны́й Кре́ст Спа́сов: на него́ бо наде́ющеся, спаса́емся вси́.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: О до́брыя ку́пли ва́шея святи́и! я́ко кро́ви да́сте, и небе́сныя насле́довасте, и привре́менно искуси́вшеся, ве́чно веселите́ся: вои́стинну добра́ ва́ша ку́пля, тле́нная бо оста́вльше, нетле́нная восприя́сте, и со а́нгелы ликовству́юще, пое́те непреста́нно Тро́ицу Единосу́щную.

Сла́ва, и ны́не, Крестобогоро́дичен:

Подо́бен: Небе́сных чино́в:

Воздви́жена я́ко ви́де на кресте́ А́гнца, непоро́чная Де́ва пла́чущи вопия́ше: сла́дкое мое́ ча́до, что́ но́вое и пресла́вное виде́ние? Ка́ко содержа́й вся́ческая го́рстию, на Дре́ве пригвожда́ешися пло́тию?

Та́же, Ны́не отпуща́еши: Трисвято́е. По О́тче на́ш: тропа́рь свято́му, и отпу́ст.

Во вто́рник на повече́рии

кано́н пресвяте́й Богоро́дице. Гла́с 1.

Пе́снь 1

Ирмо́с: Твоя́ победи́тельная десни́ца Боголе́пно в кре́пости просла́вися: та́ бо Безсме́ртне, я́ко всемогу́щая проти́вныя сотре́, Изра́ильтяном пу́ть глубины́ новосоде́лавшая.

И́же во́инством Небе́сным Недове́домый, Отрокови́це Всенепоро́чная, пло́ть прия́т от пло́ти Твоея́, и обнови́ истле́вшую преступле́нием пе́рвым.

Пе́сньми ублажи́м ве́рнии, Бо́жия Сло́ва па́че словесе́ Роди́тельницу: Сия́ бо Пренепоро́чная, земны́м яви́ся украше́ние, и все́м согреша́ющым предста́тельница бы́сть.

Сла́ва: Яви́лася еси́ простра́ннейши небе́с: Творца́ бо вся́ческих вме́щши, Ма́ти Присноде́во. Те́мже вопию́ Ти: тесноты́ вся́кия мя́ смерторо́дныя изба́ви, Богора́дованная.

И ны́не: Да́ждь на́м по́мощь, Чи́стая, обурева́емым мольбо́ю скорбе́й, низложи́ враго́в на́ших лука́вая возноше́ния, и пода́ждь все́м спасе́ние, благоче́стно Тя́ сла́вящым.

Пе́снь 3

Ирмо́с: Еди́не ве́дый челове́ческаго существа́ не́мощь, и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме, неизрече́нныя сла́вы Твоея́, Человеколю́бче.

По́лный истощава́ется на́с ра́ди, и прие́млет Безнача́льный от Тебе́ нача́ло, Де́во Пренепоро́чная, и ви́дится Неви́димый, и Пита́яй вся́ческая, млеко́м пита́ется, обнови́ти челове́ки промышля́я.

Исцели́ сокруше́ние на́ше Де́во Неискусобра́чная, Исцели́теля ро́ждшая, и Го́спода, вхо́д на́м к жи́зни показа́вшаго благода́тию: Его́же непреста́нно моли́ уще́дрити и спасти́ рабы́ Твоя́.

Сла́ва: Я́же Еди́на естество́ челове́ков обожи́вшая, па́че естества́ Всенепоро́чная, Ро́ждшемуся из Тебе́ моли́ся, согреше́ний на́ших проще́ние да́ти, и ра́дование ве́чное, Пресвята́я Де́во Всепе́тая.

И ны́не: В ле́ности ижди́в жи́знь, припа́даю Ти́, Пречи́стая, я́же к Бо́гу при́сными моли́твами Твои́ми воздви́гни мо́й у́м, и просвети́ всего́ мя очерне́наго, покая́ния светлостьми́, да ве́рою и любо́вию сла́влю Тя́.

Пе́снь 4

Ирмо́с: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Боже́ственную Тя́ Пала́ту Сло́ва зна́ем, в Ню́же всели́ся пло́тию, обнови́ на́с истле́вших страстьми́. Те́мже, Чи́стая, Бо́жию Ма́терь Тя́ чти́м, и от Тебе́ Ро́ждшагося сла́вим.

Всели́ся во утро́бу Твою́ Де́во, Сло́во вопло́щшееся, и все́льшуюся пре́жде кля́тву в естество́ челове́ческое изгна́, и Свои́м Боже́ственным совокупле́нием обожи́ боголе́пно, сего́ ра́ди Тя́ воспева́ем.

Сла́ва: Ме́ртвость подъя́т Ада́м, Всенепоро́чная, отне́леже вкуси́ плода́ тле́ннаго: ны́не же Твои́м Рождество́м оживе́, и в селе́ниих ра́йских водворя́ется. Сего́ ра́ди Тя́ по до́лгу воспева́ем.

И ны́не: Уста́вила еси́ то́к сме́ртный, ро́ждши безсме́ртия Исто́чник Христа́ Бо́га, Чи́стая. Того́ у́бо моли́, Богоблагода́тная, души́ моея́ умори́вшыя исцели́ти стра́сти, и спасти́ мя.

Пе́снь 5

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ Богоразу́мия, правосла́вно пою́щих Тя́.

Возсия́ от чре́ва Твоего́ незаходи́мое Со́лнце, Пренепоро́чная, и тьму́ до конца́ потреби́, и зе́млю уясни́ ра́зумы Боже́ственными: те́мже ве́рно воспева́ем Тя́.

Ра́дуйся, а́нгельский гла́с взыва́ем Ти́, Пречи́стая: родила́ бо еси́ Вели́каго Сове́та А́нгела, и Отцу́ собезнача́льна, пло́ть бы́вшаго, Де́во, за е́же спасти́ челове́ка.

Сла́ва: Госпо́дь все́лься, Чи́стая, во чре́во Твое́, И́же благоче́стно в Него́ ве́рующыя, изба́вил е́сть от влады́чествия вра́жия: те́мже велегла́сно вси́ воспева́ем Тя́, Пречи́стая.

И ны́не: Обле́кся в мя́ Влады́ка, из Тебе́ про́йде, Всенепоро́чная, и истле́вшее естество́ обожи́: но Того́ моли́, Богороди́тельнице, на́га вся́каго греха́ сотвори́ти мя́.

Пе́снь 6

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния. спаси́ лю́ди Твоя́, Бо́же на́ш: Ты́ бо кре́пость немощству́ющих и исправле́ние.

Без се́мене Бо́га во чре́ве зачала́ еси́, и по Рождестве́ стра́ннем Де́ва пребыла́ еси́ Всенепоро́чна: те́мже хвала́ми сла́вим Тя́, и́же Тобо́ю, Пречи́стая, изба́вльшеся кля́твы.

Ле́ствица, ю́же Иа́ков ви́де: гора́ присе́нная: всесве́тлый о́блак Боже́ственнаго све́та: Две́рь, Е́юже Бо́г Еди́н про́йде: благослове́нная в жена́х, Ты́ еси́, Пренепоро́чная.

Сла́ва: Зако́нов есте́ственных кроме́ родила́ еси́, Де́во неискусобра́чная, Сло́во Бо́жие ипоста́сное, исцеля́ющее на́ше сокруше́ние: Его́же приле́жно моли́, спасти́ все́х на́с.

И ны́не: Боле́вшую мою́ ду́шу преступле́ньми прине́с, взыва́ю Ти́, Всесвята́я, Пресла́вная, Чи́стая: исцели́ и спаси́ мя хода́тайством Твои́м, я́ко да воспою́ и велича́ю заступле́ние Твое́.

Го́споди поми́луй, три́жды. Сла́ва, и ны́не:

Седа́лен, гла́с 1: Твое́ предста́тельство иму́ще, Пречи́стая, и Твои́ми моли́твами лю́тых избавля́еми, Кресто́м Сы́на Твоего́ везде́ соблюда́еми, по до́лгу Тя́ вси́ благоче́стно велича́ем.

Пе́снь 7

Ирмо́с: Тебе́ у́мную, Богоро́дице, пе́щь разсмотря́ем ве́рнии: я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г, и препросла́влен.

Зако́на се́ни, и пре́дняя гада́ния Богогла́сных проро́к, Твое́ безсе́менное Рождество́ я́ве провозвести́ша, Пречи́стая Всенепоро́чная: е́же воспева́юще зове́м, воспе́таго отце́в Бо́га и препросла́вленнаго.

Восто́к со́лнца родила́ еси́, Богоблагода́тная Чи́стая, просве́щшаго ве́рных все́х исполне́ния, но́щь же ума́льшаго злоче́стия. Те́мже чти́м воспе́таго отце́в Бо́га и препросла́вленнаго.

Сла́ва: Купина́ иногда́ неопа́льная, Всенепоро́чная, Твое́ вообража́ше чре́во, и́бо не опали́ Тя отню́д о́гнь Божества́. Те́мже молю́ Тя, огня́ негаси́маго изба́ви мя́, я́ко да пою́ немо́лчно, Чи́стая, вели́чия Твоя́.

И ны́не: Ма́ти Бо́жия, ве́рных по́моще, согреша́ющих очище́ние, благи́х все́х пода́тельнице, приими́ мя благоутро́бием Твои́м ми́лостивным припа́дающа, и приходя́ща к Тебе́ с пла́чем, и прося́щаго разреше́ния согреше́ний мои́х.

Пе́снь 8

Ирмо́с: В пещи́ о́троцы Изра́илевы, я́коже в горни́ле добро́тою благоче́стия, чисте́е зла́та блеща́хуся, глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Зако́ннии о́брази, и пре́дняя гада́ния, Де́во, Госпо́дню Тя́ Чи́стую Ма́терь предсказа́ша я́ве: мы́ же сбытие́ веще́й ны́не ви́дяще, пое́м Тя́ согла́сно, и славосло́вим во вся́ ве́ки.

Украси́ся Боже́ственными добро́тами, без разсужде́ния в добро́тах, Сло́во Бо́жие ро́ждши, Всенепоро́чная, красота́ми Боже́ственными все́х сердца́ уясня́ющее, ве́рою песносло́вящих Его́ во вся́ ве́ки.

Сла́ва: Свяще́нными гла́сы издале́ча сказа́ша проро́цы, Ма́терь Тя́ бы́ти, Всенепоро́чная Влады́це, Бо́гу, Ему́же вси́ зове́м: благослови́те вся́ дела́ Го́спода, по́йте и превозноси́те Его́ во ве́ки.

И ны́не: Я́ко красна́, я́ко предобра́, Де́во, Кра́снаго в добро́тах, па́че вины́ родила́ еси́ Христа́, Ему́же вси́ зове́м: благослови́те вся́ дела́, Го́спода, по́йте и превозноси́те Его́ во ве́ки.

Пе́снь 9

Ирмо́с: О́браз чи́стаго Рождества́ Твоего́, огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́, Богоро́дице, непреста́нно велича́ем.

Естество́ е́же пре́жде осужде́нное земны́х, Де́во, преесте́ственным Твои́м Боже́ственным Рождество́м безсме́ртие улучи́: и добро́ту пре́жнюю восприя́т, пою́ще Тя́ согла́сно ра́достными пе́сньми.

Но́сиши вся́ Нося́щаго, и млеко́м пита́еши, все́м пи́щу Даю́щаго: ве́лие и стра́шное, е́же па́че ума́, Твое́ та́инство, ковче́же честна́го свяще́нства, Де́во Богоро́дице. Те́мже Тя́ вси́ ублажа́ем.

Сла́ва: Све́т мне́ лежа́щу, Пречи́стая, в ле́ности тьмы́, ны́не возсия́й, ослепля́ющыя ми́ по́мыслы страсте́й реша́щи, и ми́р глубо́к, Всенепоро́чная, при́сно содева́ющи в души́ мое́й, сла́вити Тя́.

И ны́не: Страшу́ся суди́ща неумы́тнаго, и Судии́ незабве́ннаго, Всенепоро́чная: и́мам бо мно́жество согреше́ний безчи́сленное, в ле́ности жи́в всестра́стный: те́мже мя́ Богоро́дице, уще́дривши поми́луй.

Та́же, Досто́йно е́сть: И покло́н. Трисвято́е. И по О́тче на́ш: тропари́, и про́чее обы́чное, и отпу́ст.

В сре́ду у́тра

по 1-м стихосло́вии, седа́льны кре́стны. Гла́с 1.

Распе́ншуся Ти́, Христе́, поги́бе мучи́тельство, и попра́на бы́сть си́ла вра́жия: ниже́ бо а́нгел, ни челове́к, но Ты́ са́м, Го́споди, спа́сл еси́ на́с, сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

Креста́ Твоего́ Дре́ву покланя́емся, Человеколю́бче: я́ко на не́м пригвозди́лся еси́ животе́ все́х, и ра́й отве́рзл еси́ Спа́се, ве́рою прише́дшему к Тебе́ разбо́йнику, и пи́щи сподо́бил еси́ испове́дающаго Тя́: помяни́ мя, Го́споди. Приими́ я́коже о́наго и на́с зову́щих: согреши́хом вси́, милосе́рдием Твои́м не пре́зри на́с.

Сла́ва, и ны́не, Крестобогоро́дичен: А́гнца на Кресте́ А́гница зря́щи, с разбо́йникома распина́ема Тя́, долготерпели́ве Сло́ве, и копие́м к ре́бра пробода́ема, восклица́ше вопию́щи ма́терски: что́ стра́нное и ужа́сное, Иису́се мо́й, та́инство, несказа́нно соверша́емое? Ка́ко покрыва́ешися гро́бом неопи́санный Бо́же? Да мя́ ро́ждшую Тя́ не оста́виши, Сы́не мо́й сладча́йший.

По 2-м стихосло́вии седа́льны, гла́с 1:

Спаси́, Го́споди, лю́ди Твоя́ и благослови́ достоя́ние Твое́, побе́ды на сопроти́вныя да́руя и Твое́ сохраня́я Кресто́м Твои́м жи́тельство.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Ору́жие кре́стное во бране́х яви́ся не́когда благочести́вому царю́ Константи́ну, непобеди́мая побе́да на враги́ ве́ры ра́ди: сего́ трепе́щут сопроти́вныя си́лы: се́й бы́сть ве́рных спасе́ние, и па́влу похвала́.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Боле́зньми святы́х, и́миже о тебе́ пострада́ша, умоле́н бу́ди Го́споди: и вся́ на́шя боле́зни исцели́, Человеколю́бче, мо́лимся.

Сла́ва, и ны́не, Крестобогоро́дичен: Твое́ предста́тельство иму́ще Пречи́стая, и Твои́ми моли́твами лю́тых избавля́еми, Кресто́м Сы́на Твоего́ везде́ соблюда́еми, по до́лгу Тя́ вси́ благоче́стно велича́ем.

По 3-м стихосло́вии седа́льны, гла́с 1.

Подо́бен: Гро́б тво́й:

На Дре́ве Тя́ сло́ве кре́стнем, за милосе́рдие ми́лости, пове́шена пло́тию во́лею, я́ко ви́де со́лнце, не терпя́ дерзнове́ния помрачи́ся. Те́мже омраче́нную ду́шу мою́ просвети́ непристу́пным све́том Твои́м, и спаси́ мя, молю́ся.

Распростры́й на Кресте́ дла́ни Твоя́, Ще́дре, язы́ки бы́вшыя дале́че от Тебе́, собра́л еси́ сла́вити мно́гую Твою́ благосты́ню: но при́зри на насле́дие Твое́, и низложи́ вою́ющих на ны́, Кресто́м Твои́м честны́м.

Сла́ва, и ны́не, Крестобогоро́дичен: Нескве́рная А́гница, А́гнца и па́стыря пове́шена на Дре́ве ме́ртва зря́щи, пла́чущи веща́ше, ма́терски восклица́ющи: ка́ко претерплю́ Твое́ е́же па́че сло́ва Сы́не мо́й сни́тие, и во́льныя стра́сти, Бо́же преблаги́й?

Кано́н Честно́му и Животворя́щему Кресту́, [его́же краегране́сие: Кресто́м спаса́емь е́смь, пострада́вшаго влады́ки. Творе́ние Ио́сифово.] Гла́с 1

Пе́снь 1

Ирмо́с: Го́рькия рабо́ты изба́влься Изра́иль, непроходи́мое про́йде я́ко су́шу, врага́ зря́ потопля́ема, пе́снь я́ко благоде́телю пое́т Бо́гу, чудоде́ющему мы́шцею высо́кою, я́ко просла́вися.

На Кресте́ воздвиза́емь Христе́, совоздви́гл еси́ па́дшаго челове́ка, и всю́ вра́жию си́лу низве́ргл еси́ Сло́ве. Те́мже Твоя́ стра́сти воспева́ю пострада́вшаго, и от страсте́й изба́вльшаго мя́.

Сла́вы Госпо́дь Ты́ еси́, и́же сла́вою венча́вый челове́ка, те́рнием венча́лся еси́, я́ко да терноно́сное естество́ на́ше сотвори́ши плодоно́сно, сади́телю Боже́ственных дея́ний.

Му́ченичен: Святы́х собо́р пресвяты́й зако́нно пострада́вый, всю́ крове́й святы́х тече́ньми тва́рь освяти́л е́сть, и скве́рныя бесо́м же́ртвы приноси́мыя, о бо́зе Отце́ потреби́л е́сть.

Му́ченичен: Ва́ша всесвяти́и му́ченицы, о́блацы муче́ний не скры́ша терпели́вная боре́ния: те́мже па́че со́лнечных лу́чь сла́внии яви́стеся, облиста́юще я́ве зари́ спасе́ния.

Богоро́дичен: Ору́жием снеда́шеся Пречи́стая, страсте́й Сы́на Твоего́, я́ко зря́ше того́ копие́м пробода́ема, е́же в раи́ возбрани́тельное отрева́ющаго ору́жие, не даю́щее ве́рным Боже́ственнаго вхо́да.

Други́й кано́н пресвяте́й Богоро́дице, гла́с 1.

Пе́снь 1

Ирмо́с: Твоя́ победи́тельная десни́ца Боголе́пно в кре́пости просла́вися, та́ бо, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.

Струи́ мне́ сле́з душе́вных да́руй Всенепоро́чная, я́же исто́чник оставле́ния ро́ждши, грехо́вную скве́рну отмыва́юща, и во смире́нии жи́знь мою́ изводя́ща.

Превы́шши бы́сть Чи́стая тва́ри, Бо́га вопло́щши. Те́мже молю́ Тя́: от гно́я страсте́й возста́ви мя́, и к Боже́ственней высоте́ безстра́стия возведи́.

Ми́лостива ми́ яви́ся Чи́стая, в де́нь су́дный, молю́ся, вся́каго избавля́ющи мя́ стра́шнаго стоя́ния и лю́таго муче́ния, прибега́ющаго под кро́в Тво́й Пречи́стая Влады́чице.

Мра́ком грехо́вным одержи́ма мя́, и па́дша Пречи́стая, воздви́гни, сле́з ту́чу даю́щи ми́, и́миже омы́ю скве́рная дела́: Тя́ бо еди́ну Засту́пницу и́мамы Богоро́дице.

Пе́снь 3

Ирмо́с: Не му́дростию и бога́тством да хва́лится сме́ртный свои́м, но ве́рою Госпо́днею правосла́вно взыва́я Христу́ Бо́гу, и поя́ при́сно: на ка́мени Твои́х за́поведей утверди́ мя, Влады́ко.

Ископа́ша Ти́ беззако́ннии ру́це и но́зе Иису́се мо́й, дла́нию неизрече́нно созда́вшаго пе́рвее Христе́ Бо́же челове́ка, и стра́стию страсте́й, и тли́ все́х свобо́ждшаго.

Да ста́нет, вопия́ше Иису́с, луна́ же и со́лнце, е́же на кресте́ пропису́яй пострада́вшаго Влады́ку пло́тию, свети́лом помраче́ние. И́мже тмы́ нача́ла лука́вая посра́млена бы́ша.

Му́ченичен: Терпя́ху усе́рдно ра́ны сла́внии му́ченицы, и уязвля́еми, велиа́ра зми́я уязви́ша кре́пко: те́мже ду́ш на́ших ра́ны исцеля́ют при́сно, Боже́ственным манове́нием.

Му́ченичен: Ка́пища бесо́вская и хра́мы разори́сте му́ченицы, боле́зньми же и му́жеством са́ми себе́ пресла́вно хра́мы воздвиго́сте благода́тию, вмести́тельны Отцу́, и Сы́ну, и Свято́му Ду́ху.

Богоро́дичен: В ча́с страсте́й, кра́снаго доброто́ю зря́щи Де́во, виде́ния ниже́ добро́ты иму́ща, вопия́ла еси́ го́рько Чи́стая, восклица́ющи: увы́ Мне́, ка́ко стра́ждеши Сы́не, от страсте́й все́х хотя́й изба́вити?

И́н

Ирмо́с: Еди́не ве́дый челове́ческаго существа́ не́мощь, и ми́лостивно в не́ вообра́жся: препоя́ши мя́ с высоты́ си́лою, е́же вопи́ти Тебе́ Святы́й: одушевле́нный хра́ме неизрече́нныя сла́вы Твоея́, Человеколю́бче.

Хра́м была́ еси́ Пречи́стая, все́ми ца́рствующаго, бы́вша мя́ верте́п душетле́нных разбо́йник, исхити́ от те́х озлобле́ния, и Боже́ственнаго Ду́ха чи́сто жили́ще яви́ мя. [Два́жды.]

Сле́з ми́ посли́ ту́чу, изсуша́ющу тече́ния лука́вых мои́х дея́ний, молю́ся, я́же благоутро́бия ро́ждши ти́хую пучи́ну, Христа́ Бо́га на́шего, Богоро́дице Де́во всепе́тая.

Кре́пость на́м и сто́лп непоколеби́мь бу́ди Богора́дованная, и щи́т, и ору́жие непобеди́мое, мы́сленных вра́г полки́ от на́с возбраня́ющи, Богоро́дице Пречи́стая, ве́рою и любо́вию почита́ющих Тя́.

Пе́снь 4

Ирмо́с: Слы́ша дре́вле Авваку́м Христе́ чу́дный Тво́й слу́х, и стра́хом взыва́ше: от ю́га Бо́г прии́дет, и Святы́й от горы́ приосене́нныя ча́щи, спасти́ пома́занныя: сла́ва си́ле Твое́й Го́споди.

Ра́ны и я́звы Христе́ претерпе́л еси́, я́звы се́рдца моего́ исцеля́я, же́лчи вкуси́в го́рькия, сла́дкаго вку́са тлетво́рнаго оте́мля вре́д: на дре́ве же пригво́ждся дре́внюю кля́тву потреби́л еси́.

Дале́че отринове́нныя от Тебе́ язы́ки, воздвиза́емь на кресте́ бли́з привле́кл еси́, примири́л же еси́ на́с Отцу́ Долготерпели́ве, в среду́ вве́л еси́ я́ко хода́тай Себе́: и посреде́ земли́ стра́сть претерпе́л еси́ поно́сную.

Му́ченичен: В мо́ре крове́й ва́ших та́йно богоблаже́ннии, со все́ми свои́ми во́инствы, мы́сленный фарао́н впа́д потопи́ся. Те́мже ра́достию вы́ спа́сшеся приидо́сте ко обетова́нней земли́, и небе́снии гра́ждане бы́сте.

Му́ченичен: Возмого́ша вжиля́еми Христо́вою стра́стию блаже́ннии, стра́сти разли́чныя восприя́ти на честне́й пло́ти. Сего́ ра́ди уставля́ют стра́сти ду́ш же и теле́с, восхваля́ющих те́х, и блажа́щих всегда́.

Богоро́дичен: Непра́ведно зря́щи заколе́ние Тя Христе́ ро́ждшая, рыда́ющи вопия́ше Ти́: правосу́де Сы́не, ка́ко непра́ведно осуди́лся еси́, хотя́й оправда́ти преступле́нием осужде́ныя дре́вле, и к тле́нию попо́лзшыяся?

И́н

Ирмо́с: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Бесо́вскими лестьми́ лю́те отвлачи́маго мя́ от за́поведей Бо́жиих, не пре́зри Блага́я: но уще́дри молю́ся, и того́ пре́лести покажи́ мя вы́шша, прибега́ющаго Пречи́стая к Твое́й ми́лости. [Два́жды.]

Еди́не Сы́й ми́лостивне Христе́ Бо́же, Тебе́ ро́ждшия моли́твами, на Тя́ упова́ющих поми́луй, и уще́дри, и к све́ту за́поведей Твои́х наста́ви, и ве́чныя жи́зни сподо́би.

Усну́вша в сме́рть, и во гро́бе лежа́ща отча́яния Пречи́стая, око́вана желе́зы прегреше́ний мои́х, Твое́ю бо́дренною моли́твою воздви́гни, и к покая́нию испра́ви, молю́ся.

Пе́снь 5

Ирмо́с: Све́т Тво́й незаходи́мый возсия́й Христе́ в сердца́ ве́рно пою́щих Тя́, ми́р подава́яй на́м, па́че ума́. Те́м от но́щи неве́дения ко дню́ све́том Твои́м теку́ще, славосло́вим Тя́ Человеколю́бче.

Со́лнце Спа́се обнажи́ся све́та, на дре́ве на́га Тебе́ зря́ ви́сяща, на вода́х пове́сившаго зе́млю: ка́мени же, на ка́мени я́ко ощути́ша воздви́жена, распада́шеся стра́хом, и основа́ния поколеба́шася.

Воздви́жен на дре́во, и гвоздьми́ пригво́ждся, окровави́л еси́ персты́ Долготерпели́ве, и копие́м пробода́емь в ре́бра, исцели́л еси́ я́зву Ада́мову, ю́же прия́т ребра́ послу́шав, и преслу́шав Сотво́ршаго и́.

Му́ченичен: Ра́й яви́ся му́ченик мно́жество, живо́тное име́я посреде́ дре́во Христа́: за Него́же поно́сную до́блественным по́мыслом сме́рть претерпе́вше, сне́дию ро́ду нача́льники умертви́вшаго зми́я, Боже́ственною си́лою умертви́ша.

Му́ченичен: Кро́вными ка́плями Христо́вы страда́льцы, безбо́жия глубину́ изсуши́сте, и Боже́ственными источе́нии чуде́с свяще́нных, страсте́й тече́ния ду́ш же и теле́с загражда́ете. Те́мже достодо́лжно ублажа́еми есте́.

Богоро́дичен: Удивля́шеся непоро́чная, на дре́ве зря́щи христа́ воздви́жена во́лею, и пла́чущи вопия́ше: Сы́не Мо́й и Бо́же, боле́зни в рождестве́ избе́гши, ны́не боле́зни стражду́, непра́ведно от беззако́нных распина́ему Ти́.

И́н

Ирмо́с: Просвети́вый сия́нием прише́ствия Твоего́ Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Пото́цы мно́гих ми́ прегреше́ний приверго́шася, и хра́м души́ моея́ низложи́ша Пречи́стая: но я́же еси́ исправле́ние пра́отцем Богоро́дице, возста́ви мя́ раба́ Твоего́.

В тиме́нии мя́ страсте́й угле́бнувша окая́ннаго, и бу́рею мно́гих согреше́ний потопля́ема, ру́ку пода́вши влады́чице, возведи́ мя, и ко приста́нищу покая́ния напра́ви.

Душе́вных ми́ скве́рн очище́ние да́руй, и плотски́х мя́ боле́зней исцели́ молю́ся, и от обдержа́щаго лю́таго уны́ния премени́ моли́твами Твои́ми.

Пе́снь 6

Ирмо́с: Ве́сь от страсте́й безме́рных содержу́ся, и ки́том зо́л снизпадо́х: но возведи́ из истле́ния мя́ Бо́же, я́коже пре́жде Ио́ну, и ве́рою безстра́стие ми́ да́руй, я́ко да во гла́се хвале́ния, и спасе́ния ду́хом пожру́ Ти.

Егда́ Моисе́й ру́це возде́в на высоту́, Твою́ стра́сть вообража́ше, просте́ршаго на дре́ве дла́ни, и лука́ваго разруши́вша держа́ву па́губную, те́мже Изба́вителя ве́дуще Тя́ и Спа́са пои́м, Человеколю́бче.

Ме́ртвость претерпе́л еси́ воздвиза́емь на дре́во, и умертви́теля на́шего умертви́л еси́: и оживи́в руку́ Твое́ю Христе́ созда́ние, в ре́бра же копие́м пробода́емь, источи́л еси́ две́ реце́ оставле́ния, во двою́ во́лю воспева́емый.

Му́ченичен: Честна́ ва́ша сме́рть святи́и пред Го́сподем ны́не бы́сть, поче́тших все́х честны́ми Свои́ми страстьми́, и безче́стнаго велиа́ра посрами́вших, все́ми приложе́нии му́к низложи́ти все́х ва́с ко́знствующаго.

Му́ченичен: Все́ю душе́ю ко все́м отлучи́стеся многови́дным прему́дрии муче́нием, всю́ обрето́сте спосо́бствующую ва́м по́мощь, во все́ челове́чество обо́лкшагося. Те́мже на у́ды ссека́еми: и огню́ приближа́ющеся веселя́стеся.

Богоро́дичен: Распя́тие Твое́ зря́щи Пречи́стая, вопия́ше: Сы́не, что́ зри́мое стра́нное виде́ние? и́же стра́сти боля́щих исцеля́яй, ка́ко стра́сть Христе́ терпи́ши нове́йшую? Что́ Ти врази́ возда́ша благода́телю, за ня́же благода́ть прия́ша?

И́н

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́ Бо́же на́ш: Ты́ бо кре́пость немощству́ющих и исправле́ние.

Рукописа́ние Пречи́стая, прегреше́ний мои́х копие́м расто́ргни, ро́ждшагося ра́ди из безсе́меннаго Твоего́ чре́ва: в кни́зе мя́ написа́ти сподо́би избра́нных, прибега́ющаго к Боже́ственному покро́ву Твоему́. [Два́жды.]

Очи́сти Христе́, рабы́ Твоя́ моли́твами ро́ждшия Тя́, и низпосли́ я́ко еди́н бла́г согреше́ний проще́ние: Ты́ бо еси́ Спа́с, и Изба́витель все́м наде́ющымся на Тя́.

Умерщвле́на мя́ страстьми́ Пречи́стая Де́во, я́же Жизнода́вца ро́ждшая, оживи́ ны́не Твои́ми моли́твами, и победи́теля яви́ мя на врага́ зла́го: Тя́ бо еди́ну и́мамы к Бо́гу Помо́щницу на́шу.

Пе́снь 7

Ирмо́с: Проидо́ша я́ко черто́г пе́щный пла́мень нестерпи́мый, и́же за благоче́стие иногда́ о́троцы святи́и показа́вшеся я́ве, и согла́сно воспева́юще, пе́снь поя́ху: отце́в Бо́же благослове́н еси́.

Влады́ка Сы́й от раба́ прия́т Иису́се мо́й, ударе́ние, свободи́ти мя́ хотя́й порабоще́ннаго врагу́, на кресте́ же пригво́ждся спаса́еши мя́ пою́ща: и́же отце́в Бо́же, благослове́н еси́.

Потрясе́ся вся́ тва́рь, распина́ему Ти́ благоутро́бне Го́споди, копие́м пробода́ему Ти́, вра́г всетеле́сную прия́т я́зву, уя́звенный же Ада́м исцеле́, вопия́: благослове́н Бо́г оте́ц на́ших.

Му́ченичен: Кресто́м огражде́нное страстоте́рпец во́инство сла́вное, ополче́ния вра́жия погуби́ благода́тию, и побе́ды венцы́ прия́т, вопия́: благослове́н Бо́г оте́ц на́ших.

Му́ченичен: Огня́ си́льнейше стяжа́вше страда́льцы произволе́ние, не опа́льшеся огню́ приобща́ющеся, но попали́сте злоче́стия лука́вую ве́щь, вопию́ще: оте́ц на́ших Бо́же благослове́н еси́.

Богоро́дичен: Рождество́ Твое́ Де́во, пресла́вно ве́ки породи́: и Воздви́жен на кре́ст, па́дшыя совоздви́же, и небе́сныя жи́тели показа́ вопию́щыя: отце́в Бо́же благослове́н еси́.

И́н

Ирмо́с: Тебе́ у́мную Богоро́дице, пе́щь разсмотря́ем ве́рнии: я́коже бо о́троки спасе́ три́ Превозноси́мый, ми́р обнови́ во чре́ве Твое́м всеце́л, хва́льный отце́в Бо́г, и препросла́влен.

Я́ко исто́чника жи́зни ро́ждшая, уме́ршую мою́ ду́шу живоно́сною десни́цею, Пречи́стая, воскреси́, и вопи́ти сподо́би во умиле́нии се́рдца моего́: прехва́льный отце́в Бо́же благослове́н еси́. [Два́жды.]

Но́в Ада́м от чи́стых крове́й Твои́х бы́ти изво́лил е́сть, и́же пре́жде ве́к Бо́г. Его́же ны́не моли́, обетша́вшаго мя́ обнови́ти, зову́ща: прехва́льный оте́ц на́ших Бо́же благослове́н еси́.

Богоро́дичен: Гне́ва путе́м вра́г приходя́, восхи́тити хотя́ неща́дно ду́шу мою́ смире́нную, сего́ сове́ты, Пречи́стая, разруши́: и пою́ща мя́ уще́дри: восхваля́емый отце́в Бо́же благослове́н еси́.

Пе́снь 8

Ирмо́с: Чу́да преесте́ственнаго показа́ о́браз, огнеро́сная пе́щь дре́вле: о́гнь бо не опали́ ю́ныя де́ти, Христо́во явля́я безсе́менное от Де́вы Боже́ственное рождество́. Те́м воспева́юще воспои́м: да благослови́т тва́рь вся́ Го́спода, и превозно́сит во вся́ ве́ки

Ра́спят бы́л еси́ на кресте́ во́лею, и́же ма́нием не́бо простры́й: гвоздьми́ же пригвозди́ся, упраздни́ти хотя́ поползнове́ние стра́стное первозда́ннаго Ада́ма. Те́м воспева́юще пое́м: да благослови́т тва́рь вся́кая Го́спода: и превозно́сит Его́ во ве́ки.

Егда́ Тя ка́меня на ка́мени каменосерде́чный собо́р воздви́же, го́ры поколеба́шеся. Земля́ потрясе́ся, Сло́ве Бо́жий: и ду́шы коле́блемыя утверди́шася к Боже́ственней жи́зни, вопию́щыя всегда́, да благослови́т тва́рь вся́кая Го́спода, и превозно́сит Его́ во ве́ки.

Му́ченичен: Истка́ша оде́жду спаси́тельную себе́ я́ве святи́и страстоте́рпцы: в наготе́ теле́сней стра́ждуще терпели́вно, и посы́пание ра́нам прие́млюще. Те́м воспева́юще пою́т: да благослови́т тва́рь вся́кая Го́спода, и превозно́сит Его́ во ве́ки.

Му́ченичен: Ноготьми́ неми́лостивно страстоте́рпцы стру́жеми, и неща́дно на у́ды ссеца́еми, и ра́нам вся́ческим приобща́ющеся, истука́нным не пожро́ша, му́жества же столпи́ ве́рным яви́шася: благослови́те Христа́ дела́ вся́, зову́ще, и превозноси́те Его́ во ве́ки.

Богоро́дичен: Да Тя́ преогорчева́яй безу́мный собо́р: я́коже возмня́ше от земли́ взя́ти Тя́: безча́дна бы́х и смуща́юся, и ма́терски се́рдцем боле́зную, неискусому́жная вопия́ше иногда́: на кресте́ ви́дящи Тя́ воздви́жена: с Не́юже тва́рь сла́вит Тя́, все́х Изба́вителя Иису́се во ве́ки.

И́н

Ирмо́с: В пещи́ о́троцы изра́илевы, я́коже в горни́ле добро́тою благоче́стия, чисте́е зла́та блеща́хуся, глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Просвети́ ми о́чи серде́чныя, я́же две́рь све́та чи́стая, о́блак страсте́й, и тьму́ глубо́кую разгоня́ющи, да пою́: вся́ дела́ Госпо́дня Го́спода по́йте, и превозноси́те его́ во ве́ки. [Два́жды.]

О все́х Влады́чице чи́стая, не преста́й моля́щися Тебе́ призыва́ющих я́ко Ма́терь Бо́жию, Де́во всенепоро́чная, и вопию́щих: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Спасе́ния вину́ Христа́ неизрече́нно ро́ждшая, моли́ о все́х вопию́щих приле́жно Де́во всепе́тая: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Та́же пое́м пе́снь Богоро́дицы: Вели́чит душа́ моя́ Го́спода: И покло́ны.

Пе́снь 9

Ирмо́с: Неизглаго́ланное Де́вы та́инство: не́бо бо сия́, и престо́л херуви́мский, и светоно́сный черто́г показа́ся. Христа́ Бо́га Вседержи́теля. Сию́ благоче́стно я́ко Богоро́дицу велича́ем.

Я́коже ви́де Тя́ дре́вле на дре́ве пове́шена Спа́се, зе́млю пове́сившаго на вода́х безме́рных, разбо́йник благоразу́мный, ве́рно вопия́ше Ти́: помяни́ мя, с ни́мже благоче́стно Твоя́ страда́ния прославля́ем.

Распина́емь поколеба́л еси́ земли́ основа́ния, копие́м же пробода́емь источа́еши безсме́ртныя ка́пли, кро́вь и во́ду, и́миже челове́чество очи́стил еси́ от страсте́й Иису́се: те́мже Тя́ воспева́юще велича́ем.

Му́ченичен: Веселя́хуся в муче́ниих святи́и, са́ми себе́ поощря́юще я́коже на сла́дость, до́блии: ста́нем, вопию́ще: се́ отве́рзе по́прище Христо́с, венцы́ ны́не подае́т те́м, и́хже возлюби́.

Му́ченичен: Просвеща́ется вся́ко ве́рных еди́нственное торжество́, страда́ния почита́ющее все́х непобеди́мых му́ченик, и тьмы́ боле́зней: и́хже ра́ди неболе́зненныя сподо́бишися сла́дости и жи́зни, и присносу́щнаго наслажде́ния.

Богоро́дичен: Человеколю́бца сло́ва неизрече́нно поро́ждшая, Его́же зря́щи Отрокови́ца от челове́к во́лею стра́ждуща, что́ сие́, вопия́ше? Бо́г безстра́стен стра́сть прие́млет: я́ко да от страсте́й изба́вит ве́рою покланя́ющихся Ему́.

И́н

Ирмо́с: О́браз чи́стаго рождества́ Твоего́ огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́ Богоро́дице непреста́нно велича́ем.

Возми́ тя́жкое бре́мя мои́х согреше́ний, Богоро́дице всепе́тая, и легча́йшее и́го Сы́на и Бо́га Твоего́ сподо́би мя́ носи́ти, и по стези́ ше́ствовати к го́рнему соверше́нию возводя́щей. [Два́жды.]

Трепе́щу помышля́я, Всенепоро́чная, стра́шный де́нь прише́ствия Христо́ва: вся́ бо жи́знь моя́ во гресе́х сконча́ся, и страсте́й душа́ моя́ испо́лнися. но уще́дри мя́ и вся́каго изба́ви тогда́ осужде́ния.

Приими́ Пречи́стая Влады́чице, непотре́бнаго раба́ Твоего́ моле́ния, и души́ моея́ и те́ла смуще́ние во глубо́кую тишину́ преложи́: я́ко да Тя́ велича́ю спаса́емь.

Та́же: Досто́йно е́сть: и покло́н. Ектениа́ ма́лая, и свети́лен. Та́же псалмы́ обы́чныя.

На стихо́вне стихи́ры кре́стны. Гла́с 1:

Тебе́ на дре́ве пригво́ждшагося пло́тию, и живо́т на́м пода́вшаго, я́ко Спа́са и Влады́ку, пои́м непреста́нно.

Сти́х: Испо́лнихомся зау́тра ми́лости Твоея́ Го́споди, и возра́довахомся, и возвесели́хомся, во вся́ дни́ на́шя возвесели́хомся, за дни́ в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.

Твои́м кресто́м Христе́, еди́но ста́до бы́сть а́нгелов и челове́ков, и во еди́ном собо́ре не́бо и земля́ весели́тся, вопия́: Го́споди сла́ва Тебе́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Ва́с всехва́льнии му́ченицы, ни ско́рбь, ни теснота́, ни гла́д, ни гоне́ние, ниже́ ра́ны, ни я́рость звере́й, ни ме́чь, ниже́ о́гнь претя́щий разлучи́ти от Бо́га возмого́ша: любо́вию же па́че к Нему́, я́ко в чужди́х подви́гшеся телесе́х, естество́ забы́сте, сме́рть презре́вше. Те́мже и по достоя́нию боле́зней ва́ших мзду́ прия́сте, и небе́снаго ца́рствия насле́дницы бы́сте, непреста́нно моли́теся о душа́х на́ших.

Сла́ва, и ны́не, Крестобогоро́дичен: У креста́ Твоего́ предстоя́щи Сло́ве Бо́жий, А́гница и непоро́чная Ма́ти Твоя́, рыда́ющи вопия́ше: увы́ Мне́ Сы́не, ка́ко умира́еши на кресте́? увы́ Мне́, Све́те Мо́й сла́дкий, где́ Твоея́ добро́ты ны́не за́йде зра́к? красне́йший па́че все́х челове́к.

Та́же, Бла́го е́сть испове́датися Го́сподеви: И трисвято́е, и по О́тче на́ш: тропа́рь. Иере́й глаго́лет ектению́, и отпу́ст. Та́же ча́с 1-й и псалмы́ обы́чны, и коне́чный отпу́ст.

В сре́ду блаже́нны, гла́с 1:

Сне́дию изведе́ из рая́ вра́г Ада́ма: кресто́м же разбо́йника введе́ Христо́с во́нь, помяни́ мя зову́ща, егда́ прии́деши во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Поно́сную претерпе́л еси́ стра́сть Христе́: и поноше́ние на́ше вся́кое отя́л еси́ Бла́же, и вы́шняго Ца́рствия прича́стники на́с яви́л еси́, покланя́ющихся Твоему́ соше́ствию.

Блаже́ни есте́, егда́ поно́сят ва́м, и изжену́т и реку́т вся́к зо́л глаго́л, на вы́ лжу́ще Мене́ ра́ди.

Ада́мово Христе́ обнаже́ние ты́ покрыва́яй, обнажи́лся еси́ пло́тию: возне́сл же ся на кре́ст, возне́сл еси́ на́с от глубины́ злы́х. Те́мже Твое́ Сло́ве сла́вим свято́е схожде́ние.

Сти́х: Ра́дуйтеся и весели́теся, я́ко мзда́ ва́ша мно́га на небесе́х.

Святы́ми ва́шими стру́пы, прехва́льнии му́ченицы, мно́жество бесо́в острупи́вше, вся́ челове́ческия я́звы и стру́пы, благода́тию всегда́ вои́стинну исцеля́ете.

Сла́ва: Тро́ица просвеща́ет все́х, чи́сте Сию́ почита́ющих, и ве́дущих ю́, держа́ву иму́щу неразори́мую, Е́йже возопии́м: спаси́ любо́вию Тро́ице пою́щих Тя́.

И ны́не: Предстоя́щи Пренепоро́чная при кресте́, и зря́щи Христа́ пригвожде́на пло́тию, восклица́ющи взыва́ше: где́ Твоя́ за́йде Милосе́рде ны́не добро́та, сла́вы Го́споди?

Четверг

В сре́ду ве́чера

на Го́споди воззва́х, стихи́ры святы́м апо́столом. Гла́с 1.

Подо́бен: Прехва́льнии му́ченицы:

Сти́х: А́ще беззако́ния на́зриши Го́споди, Го́споди, кто́ постои́т? Я́ко у тебе́ очище́ние е́сть.

Апо́столи сла́внии, Христо́вы ученицы́ богозва́ннии, вселе́нныя учи́телие, обре́тше Го́спода Бо́га, и челове́ков хода́тая су́ща, тому́ боголе́пно прилепи́стеся: и я́ко бо́га того́, и я́ко челове́ка всесоверше́нна, в ми́ре я́ве пропове́дасте.

Сти́х: И́мене ра́ди Твоего́ потерпе́х Тя́ Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Апо́столи всему́дрии, Христо́вы ученицы́ богозва́ннии, вселе́нныя учи́телие, ва́шими моли́твами, Боже́ственным уче́нием внима́ти укрепи́те мя́, и стезе́ю те́сною помога́йте ходи́ти ми́ всегда́, я́ко да доспе́ю в пребыва́ние ра́йское простра́ннейшее.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Петра́ первопресто́льнаго воспева́ю, Па́вла, Иа́кова, Андре́а же и Фили́ппа, Си́мона, Варфоломе́а же и Фому́, Матфе́а же и Иоа́нна, Ма́рка же и Луку́, благове́стия списа́вших, ли́к богоизбра́нный, со ины́ми седмию́десятьми, я́ко сло́ва самови́дцы и пропове́дники.

И́ны стихи́ры вели́кому святи́телю и чудотво́рцу Никола́ю. Гла́с 1.

Подо́бен: Небе́сных чино́в:

Сти́х: Я́ко у Го́спода ми́лость, и мно́гое у него́ избавле́ние, и то́й изба́вит Изра́иля от все́х беззако́ний его́.

Церко́вныя цве́ты прелета́яй: я́коже птене́ц вы́шняго гнезда́ а́нгельскаго, Нико́лае треблаже́нне, зове́ши при́сно к Бо́гу о все́х лю́дех, и́же в ну́ждных беда́х и искуше́ниих, и избавля́еши моли́твами твои́ми.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Небе́сныя добро́ты проходя́й, стра́шную о́ну разуме́л еси́ сла́ву, святу́ю святы́х. Те́мже и на́м небе́сная словеса́, при́сно живо́тных о́нех зре́ний явля́еши, свяще́ннейший О́тче.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Свяще́нныя оде́жды украше́ние, де́лательными соде́лал еси́ доброде́тельми светле́йшо, О́тче богоно́се. Те́мже и на́м священноде́йствуеши ди́вная сла́вных чуде́с Христа́ ра́ди лю́тых на́с избавля́я.

Сла́ва, и ны́не, Богоро́дичен: Прегреше́ний пучи́ною обурева́емь, к ти́хому приста́нищу прибе́г, пречи́стей моли́тве Твое́й, Богороди́тельнице, взыва́ю Ти́: спаси́ мя, кре́пкую Твою́ десни́цу просте́рши рабу́ Твоему́, Всенепоро́чная.

Та́же, Све́те ти́хий: Проки́мен дне́. Посе́м: Сподо́би Го́споди в ве́чер се́й:

На стихо́вне стихи́ры апо́столом. Гла́с 1:

Апо́стольская всесли́чная цевни́ца, Святы́м Ду́хом дви́жима, ме́рзкия бесо́в же́ртвы упраздни́ла е́сть, и еди́наго Го́спода пропове́давши, язы́ки изба́ви от пре́лести и́дольския, и покланя́тися научи́ Тро́ице Единосу́щней.

Сти́х: К Тебе́ возведо́х о́чи мои́ живу́щему на небеси́, се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Петра́ и Па́вла согла́сно похва́лим, Луку́, Матфе́а, Ма́рка, Иоа́нна, Андре́а, Фому́, Варфоломе́а, Си́мона Канани́та, Иа́кова и Фили́ппа, и ве́сь ли́к ученический досто́йно да восхва́лим.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Подо́бен, му́ченичен: Прехва́льнии му́ченицы, ва́с ни земля́ потаи́ла е́сть, но не́бо прия́т вы́, и отверзо́шася ва́м ра́йския две́ри, и вну́трь бы́вше, дре́ва живо́тнаго наслажда́етеся, Христо́ви моли́теся, дарова́ти душа́м на́шым ми́р и ве́лию ми́лость.

Сла́ва, и ны́не, Богоро́дичен: Ра́дуйся ра́досте пра́дедов, Апо́столов и Му́чеников весе́лие, и покро́в на́с Де́во, Твои́х рабо́в.

Та́же: Ны́не отпуща́еши раба́ Твоего́: Трисвято́е, и по О́тче на́ш: тропа́рь, и отпу́ст.

В сре́ду на повече́рии

кано́н пресвяте́й Богоро́дице. Гла́с 1.

Пе́снь 1

Ирмо́с: Пе́снь после́днюю пои́м вси́ Бо́гу, сотво́ршему ди́вная чудеса́ мы́шцею высо́кою, и спа́сшему Изра́иля, я́ко просла́вися.

Купина́ Тя вообража́ше, Богороди́тельнице: О́гнь бо носи́ла еси́ вои́стинну непостоя́нный, пребы́вши неопа́льна. Те́мже Тя́ ве́рными гла́сы песносло́вим при́сно.

Обо́лкся в челове́ка Бо́г Сло́во, из Тебе́ па́че смы́сла воплоти́ся, Пречи́стая. Те́м Тя́ вся́кое дыха́ние славосло́вит, и покланя́ется Тебе́, и по до́лгу чти́т.

Сла́ва: Зачала́ еси́, Пречи́стая, неизрече́нное сло́во, вся́ содержа́щее земны́я концы́, и Сие́ родила́ еси́: Его́же моли́ приле́жно, поми́ловати на́с.

И ны́не: Я́же Еди́на безле́тнаго Бо́га в ле́то ро́ждши воплоще́нна, Пречи́стая Влады́чице, стра́стныя моея́ души́ вселе́тныя стра́сти исцели́.

Пе́снь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же, И́же над вода́ми не́бо утвержде́й второ́е, и основа́вый на вода́х зе́млю, Всеси́льне.

Да обожи́т челове́чество, Бо́г бы́сть Челове́к, из Тебе́, Де́во Чи́стая, па́че сло́ва и смы́сла: сего́ ра́ди Тя́ согла́сно ве́рнии ублажа́ем.

И́же естество́м неопи́санный, вопло́щься из Тебе́ написа́ся, Богоблагода́тная Чи́стая: Его́же непреста́нно моли́, уще́дрити, и просвети́ти ду́шы блажа́щих Тя́.

Сла́ва: Непло́дствовавшия мы́сли моея́ непло́дия вся́ отжени́, и плодоно́сну доброде́тельми ду́шу мою́ покажи́, Пресвята́я Богоро́дице, ве́рных помо́щнице.

И ны́не: Изба́ви мя́ Пренепоро́чная вся́каго обстоя́ния, и мно́гих собла́зн змие́вых, ве́чнующаго огня́ и тьмы́, Я́же Све́т ро́ждшая на́м невече́рний.

Пе́снь 4

Ирмо́с: Ду́хом прови́дя, проро́че Авваку́ме, Словесе́ воплоще́ние, пропове́дал еси́ вопия́: внегда́ прибли́житися ле́том, позна́ешися, внегда́ приити́ вре́мени, пока́жешися: сла́ва си́ле Твое́й, Го́споди.

В Пречи́стое Твое́ чре́во всели́ся Христо́с, Всесвята́я Влады́чице, обожи́ на́с, пло́ть прие́м одушевле́нну. Те́м Тя́ Чи́стую Ма́терь правосла́вно воспева́ем, Влады́чице, ми́ру помо́щнице.

Свята́я Богоро́дице, освяти́ на́с, Я́же Пресвята́го ро́ждшая пло́тию, уподо́битися хоте́вша челове́ком: и Небе́снаго Ца́рствия все́х яви́, Пречи́стая, прича́стники моли́твами Твои́ми.

Сла́ва: Де́во Богоро́дице, нескве́рная се́не, оскве́рншагося прегреше́ньми очи́сти мя́ ны́не щедро́т Твои́х чи́стыми заря́ми, и да́ждь ми́ ру́ку по́мощи, да зову́: сла́ва си́ле Твое́й Го́споди.

И ны́не: Це́рковь освяще́нная Бо́гови яви́лася еси́, в Тя́ Все́льшемуся, Де́во па́че ума́: Того́ моли́, грехо́в на́ших скве́рну очи́стити: я́ко да хра́мы пока́жемся, и жили́ща Ду́ху.

Пе́снь 5

Ирмо́с: Тво́й ми́р да́ждь на́м, Сы́не Бо́жий, ино́го бо ра́зве Тебе́ Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́.

Ме́ртва мя́ соде́ла иногда́ во Еде́ме вкуше́ние лука́вое: Живо́т же ро́ждши Чи́стая, и́же дре́вом дре́вле умерщвле́ннаго оживотвори́, да Тя́ славосло́вя воспева́ю.

Спаси́ мя, Всечи́стая, от бе́д лю́тых: воздви́гни от страсте́й гно́йных, и изба́ви мя́ плене́ния и озлобле́ния лука́вых бесо́в, любо́вию чту́щаго Тя́.

Сла́ва: О́блак и ра́й, и две́рь Све́та, трапе́зу и руно́ зна́ем Тя́, и ста́мну вну́трь Ма́нну нося́щу, Сла́дость ми́ра, Чи́стая Де́во Ма́ти.

И ны́не: Ро́ждши, Пренепоро́чная, Бо́га Емману́ила, Челове́ка я́ве за милосе́рдие бы́вшаго: Сего́ моли́ я́ко Человеколю́бца, Чи́стая, уще́дрити лю́ди согре́шшыя.

Пе́снь 6

Ирмо́с: Я́ко Ио́ну проро́ка, возведи́, Христе́ Бо́же, живо́т мо́й от тли́, вопию́ Ти Человеколю́бче, я́ко жи́знь у тебе́ е́сть, и нетле́ние, и си́ла.

Оскверне́ннаго мя́ мно́гими грехи́, молю́ Тя су́щую благу́ю и нескве́рную ски́нию: омы́й от вся́кия скве́рны, хода́тайством Твои́м.

Окормле́ние ми́ бу́ди, Чи́стая, в лю́тей пучи́не жите́йских напа́стей обурева́емому, и наста́ви к спаси́тельному приста́нищу, и спаси́ мя.

Сла́ва: Треволне́ния по́мысл, и страсте́й наведе́ния, и глубина́ грехо́в, окая́нную мою́ ду́шу обурева́ют: помози́ ми Свята́я Влады́чице.

И ны́не: Свяще́ния се́нь пронарече́нная Мари́е, оскверне́нную сластьми́ окая́нную мою́ ду́шу освяти́, и Боже́ственныя сла́вы прича́стника мя́ сотвори́.

Та́же: Го́споди поми́луй, три́жды. Сла́ва, и ны́не:

Седа́лен, гла́с 1. Подо́бен: Гро́б Тво́й:

Де́во и пита́тельнице Еди́ному от Тро́ицы, раю́ кра́сный, земны́х спасе́ние, покро́вом Твои́м спаса́й благоче́стно воспева́ющих Тя́: ты́ бо родила́ еси́ во проро́цех Глаго́лавшаго, Ты́ носи́ла еси́ Содержа́щаго вся́ческая, я́ко Ма́ти Христа́ Бо́га.

Пе́снь 7

Ирмо́с: Су́щым в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́ я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших.

Безнача́льнаго Отца́ Сы́н во чре́во Твое́ всели́ся, прии́м нача́ло: я́ко да на́с изба́вит я́ко Бо́г, от лука́вых нача́л тьмы́, Богороди́тельнице Чи́стая, кла́няющихся Ему́.

Испещре́на Боже́ственными доброде́тельми, Чи́стая Де́во, родила́ еси́ Сло́во, собезнача́льное Отцу́, доброде́тельми небеса́ вои́стинну покры́вшее: Его́же моли́ при́сно уще́дрити на́с.

Сла́ва: Освяти́ на́ша помышле́ния, утверди́ все́х ду́шы, Ма́ти Бо́жия, твори́ти до́бре оправда́ния, за милосе́рдие неизрече́нное, Воплоще́ннаго из Тебе́, Де́во, Сло́ва Безнача́льнаго Отца́.

И ны́не: Умерщвле́нный страстьми́ мно́гими, Пренепоро́чная, оживи́ у́м мо́й, и Богоуго́дная твори́ти укрепи́ мя, да велича́ю Тя́ я́ко засту́пницу при́сно христиа́н и упова́ние.

Пе́снь 8

Ирмо́с: Его́же ужаса́ются а́нгели, и вся́ во́инства, я́ко Творца́ и Го́спода, по́йте свяще́нницы, просла́вите о́троцы, благослови́те лю́дие, и превозноси́те во вся́ ве́ки.

Избавля́емся, Пренепоро́чная, Твои́ми к Бо́гу бде́нными моли́твами вся́ческих искуше́ний, Тя́ Богоро́дицу зна́ющии Благослове́нную и Прера́дованную.

Воплоща́ется Безпло́тный из Тебе́ боголе́пно: Его́же моли́, Пречи́стая, стра́сти пло́ти твоея́ умертви́ти, и оживи́ти мою́ ду́шу умерщвле́ную грехи́.

Сла́ва: Исцели́вшаго сокруше́ние Ада́ма пе́рстнаго Спа́са ро́ждшая, Пречи́стая, и Бо́га: Его́же моли́, я́звы души́ моея́ исцели́ти, неисце́льно боля́щыя.

И ны́не: Возста́ви лежа́щаго во глубине́ зо́л, и я́же ны́не борю́щыя мя́ победи́ враги́, сне́дшыя безме́стными сластьми́ ду́шу мою́: не пре́зри мене́, Чи́стая, но уще́дри и спаси́ мя.

Пе́снь 9

Ирмо́с: Светоно́сный о́блак, во́ньже все́х Влады́ка, я́ко до́ждь с небесе́ на руно́ сни́де, и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

Све́т Боже́ственный ро́ждшая, Пренепоро́чная, от Отца́ возсия́вший, омраче́нную мою́ ду́шу лестьми́ жития́, и бы́вшую враго́м посме́х, уще́дри, и све́ту покая́ния спаси́тельнаго сподо́би, Чи́стая.

Светови́дный Тя́ о́блак, Пренепоро́чная, Иса́иа зря́ше, из него́же возсия́ на́м Со́лнце пра́ведное: та́йно тва́рь просвети́: сего́ ра́ди Тя́ ве́рою воспева́ем до́брую в жена́х.

Сла́ва: Грехолюби́в сы́й в ле́ности живу́, и суди́ща, Чи́стая, неумы́тнаго трепе́щу, на не́мже мя́ соблюди́, Твои́ми Святы́ми мольба́ми, Де́во Богоневе́сто, неосужде́наго: да я́ко засту́пницу ублажа́ю Тя́ при́сно.

И ны́не: Трепе́щу суди́ща, Де́во, и незабы́тнаго очесе́ Твоего́ Сы́на, соде́лав мно́ги грехи́ на земли́. и сего́ ра́ди Тебе́ вопию́: Всеми́лостивая Влады́чице, помози́ ми, и тогда́шния мя́ ну́жды изми́ неосужде́ннаго, Чи́стая.

Та́же, Досто́йно е́сть: И покло́н. Та́же Трисвято́е. И по О́тче на́ш: тропари́, и про́чее обы́чное, и отпу́ст.

В четверто́к у́тра

по 1-м стихосло́вии седа́льны апо́стольски. Гла́с 1:

Прему́дрии вселе́нныя ловцы́, от Бо́га прие́мшии ми́лостивное, моли́те и ны́не о на́с вопию́щих: Го́споди, спаси́ гра́д Тво́й, и от одержа́щих зо́л свободи́ апо́стол ра́ди ду́шы на́шя.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Трубы́ Христо́вы благогла́сныя, в пе́снех да почти́м ве́рнии прему́дрыя Апо́столы, ко́ни, возмути́вшыя безбо́жия мо́ре, и привле́кшыя я́ко из глубины́ челове́ки, к Боже́ственному спасе́ния приста́нищу, благода́тию Ду́ха.

Сла́ва, и ны́не, Богоро́дичен: Необори́мую сте́ну стяжа́вше ве́рнии Богоро́дицу Мари́ю, прииди́те поклони́мся и припаде́м к не́й: дерзнове́ние бо и́мать к ро́ждшемуся из нея́, и мо́лится, и спаса́ет от гне́ва и сме́рти ду́шы на́шя.

По 2-м стихосло́вии, седа́льны, гла́с 1:

Мре́жею слове́сною плете́ния ри́торская, ры́барие тро́стию кре́стною разве́ргше, просвети́ша язы́ки, благоче́стно сла́вити тя́ Бо́га и́стиннаго, те́мже ти́ пе́снь укре́пльшему и́х вопие́м: сла́ва Отцу́, и Сы́ну, сла́ва единосу́щному Ду́ху, сла́ва те́ми просвети́вшему ми́р.

Сти́х: Испове́дят Небеса́ чудеса́ Твоя́, Го́споди.

Све́т от све́та безле́тно просия́в, в ле́то пло́тию на земли́ яви́ся, и ми́р просвети́, ва́ми всеблаже́ннии. Те́мже вси́ уче́ньми ва́шими Боже́ственными просве́щшеся, свяще́нную ва́шу па́мять почита́ем Апо́столи.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Му́ченики Христо́вы мо́лим вси́ от любве́ прише́дше к ни́м с ве́рою: си́и бо о на́шем спасе́нии про́сят, си́и источа́ют исцеле́ний благода́ть, си́и полки́ отгоня́ют бесо́вския, я́ко сохра́нницы ве́ры.

Сла́ва, и ны́не, Богоро́дичен: Упова́ние христиа́н, Пресвята́я Де́во, его́же родила́ еси́ Бо́га, па́че ума́ и сло́ва, непреста́нно моли́ о воспева́ющих Тя́, пода́ти оставле́ние грехо́в на́ших все́х и исправле́ние жития́, ве́рою и любо́вию при́сно сла́вящым Тя́.

По 3-м стихосло́вии седа́льны. Гла́с 1:

Свети́ла мы́сленная ученицы́ спа́совы све́тлии, я́ко о́гнь озари́сте всея́ земли́ исполне́ние Боже́ственными уче́нии: те́мже молю́ся, я́же во тьме́ ду́шу мою́ просвети́те, светоза́рными луча́ми ва́шими всеблаже́ннии.

В Ми́рех живы́й чу́вственно святи́телю, я́ко ми́ром разу́мно духо́вным яви́лся еси́ пома́зан о́тче Нико́лае, и ми́ры чуде́с твои́х облагоуха́л еси́, ми́ро приснотеку́щее пролива́я, ми́рными твои́ми благоуха́еми пе́сньми, и па́мятию твое́ю.

Сла́ва, и ны́не, Богоро́дичен: Проро́цы Тя́ я́сно провозвести́ша Отрокови́це, Ма́терь Бо́жию: и апо́столи Боже́ственнии в ми́ре пропове́даша, и мы́ ве́ровахом. те́мже вси́ благочестному́дренне почита́юще воспева́ем Тя́, и Богоро́дицу вои́стинну при́сно имену́ем.

Кано́н святы́м Апо́столом. Творе́ние Феофа́ново. Гла́с 1.

Пе́снь 1

Ирмо́с: Твоя́ победи́тельная десни́ца боголе́пно в кре́пости просла́вися: та́ во, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.

Боже́ственными просвети́вшеся заря́ми трисо́лнечнаго сия́ния сла́внии, положе́нием нареко́стеся вои́стинну бо́зи, светови́днии Апо́столи: те́мже по до́лгу ва́с ве́рою почита́ем. [Два́жды.]

Сло́ва я́вльшагося на земли́ за милосе́рдие дебельство́м пло́ти, уго́днии служи́телие, и его́ все́х повеле́ний исполни́телие ве́рою бы́сте, при́сно почита́етеся Апо́столи.

Све́тлыми луча́ми Пресвята́го Ду́ха при́сно блаже́ннии, всего́ мя просвети́те, грехо́в тьмо́ю покрыва́емаго, и к покая́ния пути́ Я́ве наста́вите.

Богоро́дичен: Я́же апо́столов ра́дость, Богороди́тельнице Всенепоро́чная Влады́чице, я́ко Ма́ти бы́вши в те́х боголе́пно глаго́лавшему, с ни́миже моли́ся, огня́ гее́нны изба́вити мя́.

И́н кано́н во святы́х отцу́ на́шему Никола́ю Чудотво́рцу, его́же краегране́сие: Тебе́ Нико́лае пе́рвое изношу́ пе́ние а́з. Творе́ние Ио́сифово. Гла́с 1.

Пе́снь 1

Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою, и спа́сшему Изра́иля, я́ко просла́вися.

Венцы́ украша́емь пра́ведными, и престо́лу благода́ти предстоя́ Нико́лае, и́же пе́сньми тя́ ны́не венчава́ющыя ве́рно, при́сно спаса́й моли́твами твои́ми.

И́же благода́ть прие́м исцеле́ний всеблаже́нне Нико́лае, души́ моея́ я́звы моли́твами твои́ми исцели́, и находя́щих искуше́ний изба́ви мя́, молю́ся.

Кре́пкою Нико́лае твое́ю моли́твою, всеразсла́бленную ду́шу мою́ прегреше́ньми исцели́, и жития́ злолю́тых изба́ви мя́, молю́ся.

Богоро́дичен: Ума́ моего́ омраче́ние, всенепоро́чная, све́том Твои́м отжени́, и тьмы́ ве́чнующия изба́ви мя́, я́ко да пою́ всегда́ вели́чия Твоя́.

Пе́снь 3

Ирмо́с: Еди́не ве́дый челове́ческаго существа́ не́мощь, и ми́лостивно в не́ вообра́жься, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме неизрече́нныя сла́вы Твоея́, Человеколю́бче.

И́же еди́н неви́димый Бо́г, ви́димь бы́сть воплоща́емь, и ученики́ ва́с избра́в во все́м ми́ре, его́ и́мя и превосходя́щую сла́ву пропове́дающих, преблаже́ннии Боже́ственнии апо́столи. [Два́жды.]

Тебе́ еди́ному согреши́х Христе́, Тебе́ еди́ному беззако́нновах, и ду́шу злы́ми оскверни́х: Твое́ю ми́лостию очи́сти и спаси́ мя, име́яй моля́щыя Тя́, еди́не благопремени́телю Иису́се, прему́дрыя Апо́столы Твоя́.

Го́рестей стра́стных скве́рн, и го́рести грехо́вныя изба́вите мя́ я́ко ми́лостивии Апо́столи, и покая́нием ослажда́юще мою́ мы́сль, я́ко Боже́ственную нося́ще сла́дость в се́рдцы всехва́льнии.

Богоро́дичен: С невеще́ственными служи́тели, Де́во Неискусобра́чная, со все́ми вы́шними си́лами, с му́ченики и Апо́столы, Христа́, Его́же воплоти́ла еси́ от чи́стых крове́й Твои́х: умоли́ спасти́ся рабо́м Твои́м.

И́н

Ирмо́с: Да утверди́тся се́рдце мое́ в во́ли Твое́й, Христе́ Бо́же, и́же над вода́ми Не́бо утвержде́й второ́е, и основа́вый на вода́х зе́млю, Всеси́льне.

Первосвяще́нников удобре́ние, благоуха́ние Боже́ственнаго Ду́ха, мирово́нными твои́ми моли́твами злосмра́дныя стра́сти отжени́ се́рдца моего́, Нико́лае му́дре, любо́вию молю́ся.

В ле́ности скончава́ю мою́ жи́знь окая́нный, и бою́ся стра́шнаго Твоего́ суди́ща Христе́: на не́мже не посрами́ мене́, Никола́а хода́тайствы свяще́нными умоле́н быва́я.

Преиспещре́н Боже́ственною благода́тию, святи́телю Нико́лае о́тче, от разли́чных искуше́ний и бе́д спаси́, прибега́ющыя в кро́в тво́й при́сно всеблаже́нне.

Богоро́дичен: Изба́ви мя́ от все́х напа́стей, и от мно́гих собла́зн зми́евых, и от ве́чнаго огня́ и тьмы́, Всенепоро́чная, Я́же све́т ро́ждшая на́м невече́рний.

Пе́снь 4

Ирмо́с: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше свято́му, во спасе́ние на́ше и обновле́ние.

Мо́ре безбо́жия и неве́рства возмути́вше, яжде́нием ва́шим, ко́ни богоизбра́ннии Христо́вы Апо́столи: врага́ потопи́сте мы́сленнаго, и потопле́нныя челове́ки извлеко́сте ко спасе́нию. [Два́жды.]

Прия́телище ду́ха Боже́ственных сия́ний Апо́столи, омраче́нную мою́ ду́шу, и прия́тну вся́ческих страсте́й бы́вшую, све́том покая́ния просвети́те богоблаже́ннии Боже́ственнии Апо́столи.

О́блацы, и́же во́ду живо́тную одожди́вшии, изсо́хшую мою́ ду́шу бездо́ждием страсте́й Боже́ственне напо́йте, и доброде́телей возрасти́ти кла́сы сотвори́те спасе́ния, Апо́столи всехва́льнии.

Богоро́дичен: Проро́цы, Апо́столи прехва́льнии, му́ченицы, с ма́терию изба́вителевою моли́теся приле́жно, я́ко да изба́вимся от грехо́в, и ве́чныя му́ки, и искуше́ний, и бе́д, и скорбе́й.

И́н

Ирмо́с: Ду́хом прови́дя, проро́че Авваку́ме, Словесе́ воплоще́ние, пропове́дал еси́ вопия́: внегда́ прибли́житися ле́том, позна́ешися, внегда́ приити́ вре́мени, пока́жешися: Сла́ва си́ле Твое́й, Го́споди.

Я́ко все́х повеле́ний Бо́жиих испо́лнитель, о́тче святи́телю Нико́лае, соблюда́ти поспеши́ на́м моли́твами твои́ми, я́же на земли́ законоположе́ния ко спасе́нию веду́щая, и изба́ви все́х напа́стей находя́щих.

Тече́ние твое́ сконча́в преподо́бно о Христе́, пути́ на́шя испра́ви, я́же к Нему́ о́тче богоно́сне Нико́лае, я́ко да убежа́вше безпу́тнаго блуже́ния, ко спаси́тельному дости́гнем соверше́нию.

И́же вся́ ко́зни вра́жия успи́в, Боже́ственными бодростьми́, Нико́лае прему́дре, бдя́щих, и Бо́га воспева́ющих, и тебе́ хода́тая к Нему́ предлага́ющих, все́х на́с о́тче облагодати́.

Богоро́дичен: Разуме́в проро́к Ду́хом Бо́жиим, го́ру Тя́ приосене́нную преднаписа́в, Чи́стая, иста́явшыя зно́ем мно́гих прегреше́ний, Твои́ми благоприя́тными хода́тайствы Богоро́дице ны́не прохлади́, и благода́тию.

Пе́снь 5

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Ка́плющыя сла́дость и кра́сное весе́лие, яви́стеся го́ры всесла́внии апо́столи, го́ресть всю́ вра́жию оте́млюще, и ве́рныя наслажда́юще. [Два́жды.]

Прише́дша стра́нна Христа́ во своя́ разуме́сте, и и́скренно тому́ прилепи́стеся. Те́мже от чужда́го мя́ изба́вите вре́да, Боже́ственнии сло́ва Апо́столи.

Та́йныя души́ моея́ исцели́ я́звы, моли́твами свяще́нно в ми́ре пропове́давших Боже́ственное Твое́ прише́ствие, и стра́сти Ще́дре, и е́же из гро́ба воскре́сние.

Богоро́дичен: Со все́ми безпло́тными, Его́же воплоти́ла еси́ Бо́га сло́во, па́че сло́ва, Богоро́дице Де́во моли́, от безслове́сных дея́ний и плотски́х страсте́й свободи́тися рабо́м Твои́м.

И́н

Ирмо́с: Све́тлый на́м возсия́й све́т присносу́щный, у́тренюющым о судьба́х за́поведей Твои́х, Влады́ко Человеколю́бче, Христе́ Бо́же на́ш.

Во дворе́х Госпо́дних насажде́н святи́телю о́тче Нико́лае, и я́ко плодови́тая ма́слина, благода́тию умаща́еши ны́не все́х ли́ца, еле́ем трудо́в Твои́х.

Мольбу́ ны́не сотвори́ о́тче Нико́лае, о рабе́х твои́х: я́ко да оставле́ние согреше́ний прии́мем, и от одержа́щия ско́рби изба́вимся, и вся́кия тесноты́.

Тебе́ мо́лим нико́лае, блага́го хода́тая ко Го́споду: не оста́ви на́с свя́те без заступле́ния. но обы́чною твое́ю моли́твою спаса́й.

Богоро́дичен: Светови́дный Христо́в хра́ме, Отрокови́це Богоблагода́тная, моли́твами Твои́ми, Отцу́, и Сы́ну, и Ду́ху, и на́с хра́мы сотвори́, преподо́бная содева́ющих.

Пе́снь 6

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́, Бо́же на́ш: Ты́ бо кре́пость немощству́ющих и исправле́ние.

Мре́жами слове́сными улови́сте язы́ки, к ра́зуму явле́ннаго назда́ния челове́ков, о богоблаже́ннии апо́столи: его́же приле́жно о ми́ре моли́те. [Два́жды.]

Душе́ моя́ смире́нная, душе́ окая́нная, душе́ непока́янная, пока́йся, и возопи́й Христу́: согреши́х, очи́сти мя́ Влады́ко Человеколю́бче, моли́твами Апо́стол Твои́х, я́ко преблаги́й.

И́же дре́вле изра́илю источи́вый во́ду из ка́мене всеси́льне, разреши́ ми омраче́ние Христе́, и приноси́ти то́ки сле́з сотвори́, моли́твами апо́стол Твои́х, я́ко многоми́лостив, да воспева́ю и велича́ю Твое́ благоутро́бие.

Богоро́дичен: Де́во, из Тебе́ за бла́гость роди́тися благоизво́лившаго умоли́, я́ко Творца́ и Бо́га, спасти́ от искуше́нии и напа́стей, на Тя́ Пресвята́я, всегда́ упова́ние иму́щих.

И́н

Ирмо́с: Проро́ка Ио́ну подража́я вопию́: живо́т мо́й, Бла́же, свободи́ из тли́, и спаси́ мя, Спа́се ми́ра, зову́ща: сла́ва Тебе́.

Име́яй мно́жество щедро́т, Христе́, мно́жество мои́х зо́л отжени́ моли́твами никола́а, окормля́я мою́ жи́знь, волна́ми греха́ обурева́емую при́сно.

Кре́пко врага́ попра́л еси́ му́дре, его́же сокруша́ти и на́с твои́ми моли́твами укрепи́ Нико́лае, тобо́ю предста́телем Боже́ственным обогати́вшихся.

И́же ми́ряном бы́в первосвяти́тель и́стинный, облагоуха́й на́ша чу́вства душе́вная о́тче Нико́лае, и вражду́ющыя на ны́ злосмра́дныя стра́сти отгоня́й при́сно.

Богоро́дичен: Вели́чия Тебе́, Чи́стая, сотвори́ Христо́с: Его́же моли́ при́сно, возвели́чити в на́с бога́тыя Его́ ми́лости, богоблагода́тная.

Пе́снь 7

Ирмо́с: Тебе́ у́мную, Богоро́дице, пе́щь разсмотря́ем ве́рнии: я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г, и препросла́влен.

Исто́чник живота́ Иису́с Госпо́дь сы́й, ва́с оста́ви ученики́ я́коже ре́ки, вода́ми напая́ющыя богоразу́мия всю́ подсо́лнечную, и пою́щыя: хва́льный отце́в Бо́г и препросла́влен. [Два́жды.]

О́гнь мы́сленный в се́рдцы нося́ще, Боже́ственную благода́ть Христо́ву, пожго́сте ученицы́ ве́щь безбо́жия. Те́мже ве́щныя моя́ стра́сти попали́те вопию́щаго: хва́льный отце́в Бо́г, и препросла́влен.

О́гненнаго муче́ния изба́ви мя́ Бо́же, моли́твами сла́вных Твои́х учени́к, и не отве́ржи мене́ от лица́ Твоего́ Го́споди, в покая́нии взыва́юща: хва́льный отце́в Бо́г, и препросла́влен.

Богоро́дичен: Тлетво́рных грехо́в и страсте́й изми́ мя Го́споди, и́же нетле́нно роди́выйся от Де́вы Богома́тере, все́м же нетле́ние да́руя, пе́сненно пою́щым: хва́льный отце́в Бо́г, и препросла́влен.

И́н

Ирмо́с: Су́щым в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́, я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших.

Рачи́тельною моли́твою твое́ю му́дре, се́рдца моего́ утверди́ гле́зне изве́стно, на ка́мени Бо́жиих за́поведей пресве́тлых, спаса́я непреме́нно Нико́лае, от кова́рств па́костных злонача́льнаго врага́.

Разреше́ние на́м мно́гих грехо́в испроси́, се́тей жите́йских и ну́ждных, и искуше́ний вся́ческих находя́щих, свяще́нне Нико́лае, все́х ве́рных засту́пниче, и святи́телей основа́ние.

И́же сокры́вый ра́б лука́вый тала́нт, его́же в де́лание благовосприе́м а́з е́смь: и бою́ся та́мошняго суди́ща, на не́мже, Судие́ Бо́же все́х, не осуди́ мене́, моле́ния ра́ди свята́го Никола́а.

Богоро́дичен: Тебе́, Всесвята́я, Пречи́стая, раби́ Твои́ всегда́, во дни́ и в нощи́ мо́лим сокруше́нною мы́слию, прося́ще избавле́ния грехо́в на́ших, да́ти Твои́ми моли́твами, Чи́стая.

Пе́снь 8

Ирмо́с: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Я́ко лучы́ со́лнце вели́кое ва́с простре́ во всю́ вселе́нную, озаря́я ве́рою пою́щих апо́столи: благослови́те вся́ дела́ Госпо́дня Го́спода, по́йте и превозноси́те Его́ во ве́ки. [Два́жды.]

Я́ко па́стырие су́ще слове́снии, я́ко А́гнцы па́стыря, я́ко о́вцы а А́гнца изба́вителя на́шего Христа́, богови́дцы Апо́столи моли́те непреста́нно, от мы́сленнаго мя́ во́лка изба́вити, и спаса́емых ча́сти сподо́бити мя́.

Преокая́нная душе́, стени́ и возопи́й Го́сподеви: согреши́х па́че все́х, и беззако́нновах лю́те: очи́сти и спаси́ мя я́ко блудни́цу, я́ко мытаря́, я́коже разбо́йника ще́дре, Апо́столов моли́твами благоприя́тными.

Богоро́дичен: Со А́нгелы ма́ти Бо́жия, со Апо́столы, и Му́ченики, и со проро́ки умоли́ Христа́, спасти́ взыва́ющыя: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

И́н

Ирмо́с: Его́же ужаса́ются А́нгели, и вся́ во́инства, я́ко Творца́ и Го́спода, по́йте свяще́нницы, просла́вите о́троцы, благослови́те лю́дие, и превозноси́те во вся́ ве́ки.

На горе́ стоя́ Боже́ственных доброде́телей, конце́м зна́емь чуде́с высо́ких, нико́лае, яви́лся еси́ показа́ньми: Те́мже вся́к язы́к почита́ет тя́ во вся́ ве́ки.

Вкуси́в, преподо́бне, Боже́ственныя сла́дости, го́ресть возненави́дел еси́ страсте́й и сласте́й: от ни́хже на́с изба́ви моля́ Христа́, востаю́щыя беды́ утоли́ти.

Я́ко сто́лп непоколеби́мь, и утвержде́ние ве́рных, при́сно мя́ коле́блема жите́йскими зло́бами, и бесо́вскими дохнове́нии, укрепи́ всеблаже́нне Нико́лае, моли́твами твои́ми.

Богоро́дичен: Уврачу́й, Пречи́стая, стра́сти се́рдца моего́, ро́ждшая все́х Врача́, и пра́ведных ча́сти яви́ мя прича́стника, Де́во, Христа́ умоли́вши.

Та́же пое́м пе́снь Богоро́дице: Вели́чит душа́ моя́ Го́спода: И покло́ны.

Пе́снь 9

Ирмо́с: О́браз чи́стаго рождества́ Твоего́, огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́ Богоро́дице непреста́нно велича́ем.

Боже́ственнии Свята́го Ду́ха, и светоза́рнии свети́льницы показа́стеся, светозаре́нием честна́го и прему́драго пропове́дания блаже́ннии, просвети́сте всю́ вселе́нную, тьму́ и́дольскую отгна́вше. [Два́жды.]

Боже́ственнаго мы́сленнаго виногра́да ло́зие бы́вше, Боже́ственное гро́здие возрасти́сте, источа́юще спаси́тельное вино́ сла́внии апо́столи. Те́мже мя́ от пия́нства сласте́й изба́вите.

Трепе́щу окая́нный помышля́я стра́шное о́но Христе́ мо́й суди́ще Твое́, дея́ньми бо сту́дными и скве́рными ны́не обложе́н е́смь, и пре́жде суда́ осужде́н: те́мже мя́ Апо́стол Твои́х моли́твами уще́дри.

Богоро́дичен: Еди́на челове́ки обожи́ла еси́, воплоще́нно сло́во поро́ждши: его́же моли́ со апо́столы и му́ченики пречи́стая, Де́во Всенепоро́чная, о на́с ве́рою ублажа́ющих и чту́щих тя́.

И́н

Ирмо́с: Светоно́сный о́блак, во́ньже все́х Влады́ка, я́ко до́ждь с небесе́ на руно́ сни́де, и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего чи́стую.

Я́ко Христо́ва святи́теля, я́ко светоза́рную звезду́, я́ко чуде́с самоде́йственника, я́ко исто́чника исцеле́ний, я́ко су́щым в ско́рбех помо́щника, я́ко изба́вителя тепле́йша призыва́ющым тя́ в беда́х о́тче, восхваля́ем пе́сньми свяще́нными.

Тя́ па́стыря вели́каго, и подража́теля во все́м нача́льнаго Па́стыря Христа́, приле́жно мо́лим Нико́лае: от высо́т свяще́нных упаси́ рабы́ твоя́, и избавля́й от все́х жите́йских напа́стей всегда́.

Уже́ коне́ц приближа́ется, что́ лени́шися, о душе́ моя́? почто́ не тщи́шися бо́гови благоуго́дно пожи́ти? потщи́ся и возни́кни про́чее, и возопи́й: человеколю́бче, уще́дри мя́, никола́а моли́твами окормля́я мою́ жи́знь, я́ко бла́г.

Богоро́дичен: Я́же Све́т ро́ждшая Боже́ственный, омраче́наго мя́ все́ми прило́ги лука́ваго, и во уны́нии живу́ща, и прогне́вающа Бо́га, просвети́, Всенепоро́чная, и наста́ви к до́брым де́ланием, я́ко вина́ су́щи все́х до́брых.

Та́же, Досто́йно е́сть: И покло́н. Ектениа́ ма́лая, и свети́лен, и псалмы́ обы́чны.

На стихо́вне стихи́ры апо́стольски. Гла́с 1:

Апо́столи сла́внии, просвети́вше вселе́нную, при́сно Бо́га моли́те, спасти́ся душа́м на́шым.

Сти́х: Испо́лнихомся зау́тра ми́лости Твоея́ Го́споди, и возра́довахомся, и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Петра́ и Па́вла согла́сно похва́лим: Луку́, Матфе́а, Ма́рка, Иоа́нна, Андре́а, Фому́, Варфоломе́а, Си́мона Канани́та, Иа́кова и Фили́ппа, и ве́сь ли́к учени́ческий досто́йно да восхва́лим.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Весели́теся му́ченицы о Го́споде, я́ко по́двигом до́брым подвиза́стеся: проти́вистеся царе́м, и мучи́телей победи́сте: огня́ и меча́ не устраши́стеся, и звере́й ди́виих снеда́ющих телеса́ ва́ша: Христу́ со А́нгелы пе́снь возсыла́юще, с небесе́ венцы́ прия́сте: проси́те дарова́ти ми́ру ми́р, и душа́м на́шым ве́лию ми́лость.

Сла́ва, и ны́не, Богоро́дичен: Ра́дуйся Богоро́дице Де́во, ра́дуйся похвало́ всея́ вселе́нныя, ра́дуйся Пречи́стая Ма́ти Бо́жия благослове́нная.

Та́же, Бла́го е́сть испове́датися Го́сподеви: Трисвято́е и по О́тче на́ш: тропа́рь. Посе́м ектениа́, и отпу́ст. Та́же ча́с пе́рвый, и псалмы́ обы́чныя, и коне́чный отпу́ст.

В четверто́к блаже́нны. Гла́с 1:

Сне́дию изведе́ из рая́ вра́г Ада́ма: кресто́м же введе́ Христо́с во́нь разбо́йника, помяни́ мя Го́споди, вопию́ща, егда́ прии́деши во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Концы́ просвети́вше Боже́ственными луча́ми уче́ний ва́ших, омраче́ние лю́таго безбо́жия разори́ли есте́, и к све́ту незаходи́мому прише́дше, при́сно блажи́ми есте́.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще мене́ ра́ди.

О́тческую ипоста́сную име́вше прему́дрость, ученицы́ Христо́вы, все́х ва́с умудря́ющую, бу́йством пропове́дания ми́р умудри́ли есте́, и к ра́зуму Боже́ственному приведо́сте.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Му́ки претерпе́вше, я́коже безпло́тнии Христо́вы страда́льцы, и вся́ безпло́тныя враги́ кре́пко победи́ли есте́. Те́м блажи́ми есте́ во ве́ки досто́йно, всехва́льнии.

Сла́ва: Тро́ице поклони́мся, со Отце́м Сы́ну, и Ду́ху Пра́вому ве́рнии, неразде́льней, и неразлу́чней, и Сопресто́льней Еди́нице, вопию́ще: свя́т, свя́т, свя́т еси́, Тро́ице Всечестна́я.

И ны́не: Блажи́м Тя́, Пречи́стая, я́коже прорекла́ еси́, Бо́га во во пло́ти родила́ еси́, Его́же пропове́да ли́к апо́стольский: с ни́миже испроси́ на́м прегреше́ний разреше́ние, Всепе́тая.

Пятница

В четверто́к ве́чера

на Го́споди воззва́х, стихи́ры честно́му, и животворя́щему кресту́. Гла́с 1.

Подо́бен: Прехва́льнии му́ченицы:

Сти́х: А́ще беззако́ния на́зриши Го́споди, Го́споди, кто́ постои́т? Я́ко у тебе́ очище́ние е́сть.

На Кресте́ пречи́стеи ру́це Твои́ просте́рл еси́ Христе́, от Тебе́ дале́че бы́вшыя призыва́я, и бли́з тебе́ устроя́я. Те́мже молю́ся Ти́: плене́на мя́ бы́вша страстьми́ собери́, и покая́ние ми́ да́руй, вся́ку скве́рну страстну́ю очища́ющее.

Сти́х: И́мене ра́ди Твоего́ потерпе́х Тя́ Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Дла́ни пречи́стыя Твоя́ Христе́, на дре́ве возне́сл, и Твоя́ пе́рсты окровави́л еси́, хотя́ изба́вити Боже́ственных ру́к Твои́х де́ло, Человеколю́бче, Ада́ма, преступле́нием держи́ма в Ца́рствиих сме́ртных: его́же воздви́гл еси́ вла́стию Твое́ю всеси́льне.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Претерпе́л еси́ пострада́ти на́с ра́ди Спа́се, и́же естество́м непрело́жен, и безстра́стный Божество́м, распина́ешися безнача́льне со злоде́и, Ты́ безгре́шне Христе́: и со́лнце не терпя́ дерзнове́ния помрачи́ся, и земля́ вся́ тряса́шеся, творца́ Тя ми́ру позна́вши.

И́ны стихи́ры Крестобогоро́дичны, гла́с и подо́бен то́йже

Сти́х: Я́ко у Го́спода ми́лость, и мно́гое у него́ избавле́ние: и то́й изба́вит Изра́иля от все́х беззако́ний Его́.

Де́ва нескве́рная иногда́ на Дре́ве ви́дящи, его́же из безсе́менна роди́ чре́ва, не терпя́щи утро́бы уязвле́ния, власы́ терза́ющи глаго́лаше: и́же манове́нием содержа́й тва́рь всю́, ка́ко на Кре́ст воздви́глся еси́ я́ко осужде́н, вся́ко хотя́ спасти́ челове́чество?

Сти́х: Хвали́те Го́спода вси́ язы́цы, похвали́те Его́ вси́ лю́дие.

И па́ки глаго́ли ту́же стихи́ру.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

О Ча́до Неизрече́нное Отца́ Пребезнача́льна, глаго́лаше Пречи́стая, на Кресте́ взира́ющи Мое́ рожде́ние, ка́ко не уразуме́ю, за ка́я Тебе́ сия́ возда́ша безблагода́тнии лю́дие? Но во е́же прише́л еси́ спасти́ Твое́ созда́ние, вся́ терпи́ши долготерпели́вне, Благоутро́бне.

Сла́ва, и ны́не, Крестобогоро́дичен: Вкуше́ние дре́внее Ада́мово го́рькое, вкуси́вый же́лчи и о́цта, услади́л еси́ Ча́до Сладча́йшее, возне́сся на Дре́ве: те́мже Мя́ я́ко Судия́ Пра́ведный, враче́бною Стра́стию Твое́ю услади́, Влады́ко, воскре́с я́ко Всеси́лен, Де́ва глаго́лаше слезя́щи.

Та́же, Све́те ти́хий: Проки́мен дне́. Та́же, Сподо́би Го́споди в ве́чер се́й:

На стихо́вне стихи́ры кре́стны. Гла́с 1:

Кре́ст воздрузи́ся на ло́бнем, и процвете́ на́м безсме́ртие от исто́чника приснотеку́щаго, ребра́ Спа́сова.

Сти́х: К Тебе́ возведо́х о́чи мои́ живу́щему на Небеси́, се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ Госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Неразруше́на стена́ на́м е́сть честны́й Кре́ст Спа́сов, на него́ бо наде́ющеся спаса́емся вси́.

Сти́х: Поми́луй на́с, Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Моли́твами Го́споди все́х святы́х, и Богоро́дицы, Тво́й ми́р да́ждь на́м, и поми́луй на́с я́ко еди́н Ще́др.

Наколе́ние Твое́ непра́ведное, Христе́, Де́ва зря́щи, пла́чущи вопия́ше Ти́: Ча́до Сладча́йшее, ка́ко без пра́вды стра́ждеши? И ка́ко на Дре́ве ви́сиши, и́же всю́ зе́млю пове́сивый на вода́х? Не оста́ви мене́ еди́ну, благоде́телю многоми́лостиве, ма́терь и рабу́ Твою́, молю́ся.

Та́же, Ны́не отпуща́еши: Трисвято́е, и по О́тче на́ш: Тропа́рь свято́му, и отпу́ст.

В четверто́к на повече́рии

кано́н пресвяте́й Богоро́дице. Гла́с 1.

Пе́снь 1

Ирмо́с: Го́рькия рабо́ты изба́влься Изра́иль, непроходи́мое про́йде я́ко су́шу, врага́ зря́ потопля́ема, пе́снь я́ко Благоде́телю пое́т Бо́гу, чудоде́ющему мы́шцею высо́кою, я́ко просла́вися.

Во отча́янии одержи́мь е́смь, мно́жество помышля́ю прегреше́ний мои́х, и Судии́ отве́т, Влады́чице Богоро́дице: но Ты́ ми бу́ди Боже́ственная Хода́таица, пременя́ющи Его́ милосе́рдием Твои́м.

Христиа́нское прибе́жище, па́дающих исправле́ние, Пречи́стая, согреша́ющих очище́ние, изба́ви мя́ при́ стра́шныя, и огня́ негаси́маго, жи́знь ве́чную подаю́щи ми́.

Сла́ва: Тебе́, Де́во, Еди́ну вси́ ве́рнии стяжа́хом засту́пницу тве́рду, Ты́ бо Бо́га родила́ еси́. Те́мже хвала́ми вси́, Чи́стая Тя́ ублажа́ем, ро́ди вси́ земни́и по глаго́лу Твоему́.

И ны́не: На Кресте́ ви́девши Чи́стая Зижди́теля и Сы́на Твоего́, Всенепоро́чная, у́жаса испо́лншися глаго́лаше: что́ сие́, Ча́до я́ко злочести́вии возда́ша Ти́ зла́я воз блага́я, я́же яви́л еси́ и́м?

Пе́снь 3

Ирмо́с: Пре́жде ве́к от Отца́ рожде́нному нетле́нно Сы́ну, и в после́дняя от Де́вы воплоще́нному безсе́менно Христу́ Бо́гу возопии́м: вознесы́й ро́г на́ш, Свя́т еси́, Го́споди.

Вси́ проро́цы Тя́ Ма́терь Бо́жию пропове́даху о́бразы пресла́вными: мы́ сбытие́ я́сно ви́дяще ве́руем, и про́сим улучи́ти Тобо́ю Боже́ственныя ти́хости.

Влады́чице ми́ра, спасе́ние ве́рных и заступле́ние, я́же из глубины́ се́рдца воздыха́ния моя́, воспуща́ема, Чи́стая, и сле́з то́ки прие́мши, свя́заннаго прегреше́нии мно́гими изба́ви и спаси́ мя.

Сла́ва: Иму́щи я́ко Ма́ти дерзнове́ние, Чи́стая, ко Христу́ Бо́гу, от ага́рянских ча́д изба́витися на́м моли́ при́сно, и от вся́каго вре́да, и благода́рно сла́вити Его́, Пренепоро́чная, утверди́.

И ны́не: На Кресте́ вознесе́на Сы́на Своего́ зря́щи, Пречи́стая, восклица́ше, и в боле́зни се́рдца возглаша́ше вопию́щи. Сы́не, что́ Ии соде́яша насы́щшиися Ивои́х даро́в злочести́вии и беззако́ннии?

Пе́снь 4

Ирмо́с: Же́зл из ко́рене Иессе́ова, и Цве́т от него́, Христе́, от Де́вы прозя́бл еси́, из горы́ хва́льный, приосене́нныя ча́щи, прише́л еси́ вопло́щься от неискусому́жныя невеще́ственный и Бо́же, сла́ва си́ле Твое́й, Го́споди.

Низложи́ суровство́ лука́вых вра́г, и кова́рства я́же приноси́мая на мя́: и облецы́ мя Твое́ю кре́постию, Всенепоро́чная, невреди́ма при́сно соблюда́ющи, це́ла и непоколеби́ма, све́тло Тя́ воспева́ющаго.

Побежде́н зако́ном пло́ти, безме́стная де́лаю беззако́ния всестра́стный, и вся́чески не сме́ю возвести́ о́ко мое́, Влады́чице Чи́стая, к Тебе́: но Ты́ зако́ном милосе́рдия Твоего́ спаси́ мя окая́ннаго, спаси́ мя.

Сла́ва: Еди́ну Тя́, ве́рнии с Бо́гом, упова́ние непосты́дно и заступле́ние и́мамы, Влады́чице: Твои́ми моли́твами изба́ви на́с от вся́ких вра́г: ви́димых и неви́димых, вре́да и искуше́ний, да Тя́ непреста́нно сла́вим.

И ны́не: Без се́мене Его́же родила́ еси́ Сы́на, зря́щи, Всенепоро́чная, на Кресте́ пригвожде́на, восклица́ше ма́терски, и рыда́ющи глаго́лаше: Что́ е́же на Тебе́, Сы́не Мо́й, ви́жу но́вое и пресла́вное, и недове́домое чу́до?

Пе́снь 5

Ирмо́с: Бо́г сы́й ми́ра, Оте́ц щедро́т, Вели́каго Сове́та Твоего́ А́нгела, ми́р подава́юща посла́л еси́ на́м. Те́м Богоразу́мия к све́ту наста́вльшеся, от но́щи у́тренююще славосло́вим Тя́ Человеколю́бче.

Моли́тву неусы́пну иму́щи, и те́плое заступле́ние о рабе́х Твои́х, во вся́ких напа́ствуемых жития́ беда́х предвари́вши, Де́во, исхити́, и спаси́, да не печа́лию поже́рты бу́дем и истле́ем.

Мари́е, Бо́жие жили́ще, мене́ жили́ще бы́вша лука́вых духо́в де́лы скве́рными, и си́х исполня́ющаго во́лю безу́мно, покая́нием яви́ Бо́гу жили́ще.

Сла́ва: Боля́щыя ны́ лю́те душе́ю вку́пе и те́лом, страстьми́ грехо́вными, исцели́ я́ко милосе́рдая и Бо́га Ма́ти: Ты́ бо вели́каго вои́стинну душа́м же и те́лом Врача́ родила́ еси́ Христа́, неоску́дный Исто́чник жи́зни.

И ны́не: На Дре́ве кре́стнем зря́щи Сы́на, разлива́шеся утро́бою, и со слеза́ми взыва́ше Пренепоро́чная: ужаса́юся Твоего́ долготерпе́ния, Сы́не Мо́й, но́вое ви́дящи чу́до: ка́ко безгре́шен Сы́й непра́ведную терпи́ши сме́рть?

Пе́снь 6

Ирмо́с: Из утро́бы Ио́ну младе́нца изблева́ морски́й зве́рь, якова́ прия́т: в Де́ву же все́льшееся Сло́во, и пло́ть прие́мшее про́йде сохра́ншее нетле́нну: Его́же бо не пострада́ истле́ния, Ро́ждшую сохрани́ неврежде́нну.

Ми́ра мы́сленнаго прия́телище была́ еси́, всю́ зе́млю облагоуха́вшаго Божества́ благи́ми воня́ми, Пресвята́я Богоневе́сто. Те́мже благоуха́нием моли́твы Твоея́ вся́кое злосмра́дие потреби́ от души́ мои́х прегреше́ний.

О́гнь сласте́й зело́ опаля́ет мя́, и оскорбля́ет смире́нное мое́ се́рдце, и к безме́стному де́ланию совокупля́ет мя́ беззако́нно. Потщи́ся се́й угаси́ти, Я́же Огнь Боже́ственный ро́ждшая, спасе́ние мое́, Богоневе́стная.

Сла́ва: Изба́ви на́с, Де́во Всепе́тая, от напа́стей вра́г ви́димых и неви́димых, и соблюди́ Ма́ти Бо́жия правосла́вною ве́рою вои́стинну Богоро́дицу Тя́ испове́дающих: и́маши бо при́сно мо́щь, я́ко ро́ждши Созда́вшаго вся́ческая.

И ны́не: При Кресте́ стоя́щи, и ви́дящи Своего́ Сы́на, пло́тию ви́сима, Пренепоро́чная, распала́ше печа́лию утро́бу Свою́, и слеза́ми облива́ющи взыва́ше: Ча́до, вои́стинну неизглаго́ланно на вся́ челове́ки Твое́ благоутро́бие.

Та́же, Го́споди поми́луй, три́жды. Сла́ва, и ны́не:

Седа́лен, гла́с 1. Подо́бен: Гро́б Тво́й:

Нескве́рная А́гница, А́гнца и Па́стыря ви́сяща ме́ртва на дре́ве зря́щи, рыда́ющи веща́ше, ма́терски восклица́ющи: Ка́ко претерплю́ Твое́, е́же па́че сло́ва, Сы́не мо́й, сни́тие и во́льныя стра́сти, Бо́же Преблаги́й?

Пе́снь 7

Ирмо́с: О́троцы благоче́стию совоспита́ни, злочести́ваго веле́ния небре́гше, о́гненнаго преще́ния не убоя́шася, но посреди́ пла́мене стоя́ще поя́ху: отце́в Бо́же благослове́н еси́.

Не терплю́ бесо́вскаго прило́га и молвы́, помрача́ет бо ми́ у́м пла́мень сласте́й плотски́х: но не пре́зри мене́, Свята́я Богоро́дице, упова́ние мое́ на Тя́ возложи́вшаго.

Безневе́стная Де́во, Всесвята́я Богоневе́сто Влады́чице, прегреше́ний мои́х плени́цы разреши́ моли́твами Твои́ми, и сою́з любве́ Христо́вы присовокупи́, доброде́тельныя плоды́ принести́ ми.

Сла́ва: Я́же все́м су́щым в ми́ре, засту́пница еси́ и стена́ христиа́ном, и прибе́жище непосты́дно Чи́стая Мари́е те́мже ве́рою Тя́ чту́ще вопие́м Христу́: оте́ц на́ших Бо́же благослове́н еси́.

И ны́не: Пресвята́я Де́ва зря́щи Сы́на Своего́ ви́сима на Кресте́, ужа́сно дивля́шеся, и глаго́лаше: Ка́ко претерплю́ умерщвле́на ви́дящи Тя́, Нача́льника жи́зни, и Жизнода́вца.

Пе́снь 8

Ирмо́с: Чу́да преесте́ственнаго показа́ о́браз, огнеро́сная пе́щь дре́вле: о́гнь бо не опали́ ю́ныя де́ти, Христо́во явля́я безсе́менное от Де́вы Боже́ственное Рождество́. Те́м воспева́юще воспои́м: да благослови́т тва́рь вся́ Го́спода, и превозно́сит во вся́ ве́ки.

Влады́чице ми́ра Богоро́дице, во глубине́ зо́л поги́бели мене́ погруже́ннаго злоу́мне сластьми́ плотски́ми, и пристра́стием вещьми́ жития́, возведи́ Еди́на милосе́рдием Твои́м. не и́мам бо наде́жды спасе́ния отню́д: ве́сь бо е́смь, Си́стая, во отча́янии.

Ты́ еси́ спасе́ние все́х челове́ков, Я́же Бо́га ро́ждши неизрече́нным о́бразом: Ты́ ве́рных спаси́тельница, Богоро́дице, и слепы́х наста́вница, и па́дающих исправле́ние. Те́мже Тя́ восхваля́юще Христу́ зове́м: благослови́те вся́ дела́, Го́спода, по́йте и превозноси́те Его́ во ве́ки.

Сла́ва: Сте́ну претве́рду Тя́ стяжа́вше, спасе́ния на́шего наде́жду на Тя́ возложи́хом, Богома́ти. Но Ты́ бу́ди рабо́м Твои́м приста́нище, и стена́ необори́ма, и ко е́же вопи́ти непреста́нно напра́ви: да благослови́т тва́рь вся́кая Го́спода, и превозно́сит Его́ во ве́ки.

И ны́не: Утро́бою ма́терски растерза́ема, и слеза́ми мно́гими исполня́ема, Я́же чи́сто ро́ждшая Тя́ зря́щи на Кресте́, стена́ньми неуте́шными взыва́ше: Боле́зни избе́гши в Рождестве́ Твое́м, Сы́не Мо́й, боле́знию ны́не одержи́ма е́смь, ви́дящи зра́к Тво́й безче́стен.

Пе́снь 9

Ирмо́с: Неизглаго́ланное Де́вы та́инство: Не́бо бо Сия́, и престо́л Херуви́мский, и светоно́сный черто́г показа́ся, Христа́ Бо́га Вседержи́теля, сию́ благоче́стно я́ко Богоро́дицу велича́ем.

Окаля́х безче́стия страстьми́ ду́шу мою́ окая́нный, всю́ же душетле́нными страстьми́ оскверни́х пло́ть: но я́ко Чи́стая же и нескве́рная, Ты́ мя очи́сти мно́жеством ми́лости Твоея́.

Не стяжа́х ра́зве Тебе́, Чи́стая прибе́жища, не зна́ю, Влады́чице, и́ны на земли́ засту́пницы тве́рдыя и покро́ва: те́мже к Тебе́ те́пле притеко́х, прося́ Тобо́ю прия́ти согреше́ний избавле́ние.

Сла́ва: Всепе́тая, Твоя́ рабы́ ны́не ми́лостивно зри́ши свы́ше, ве́рою благоче́стною соблюда́ющи, и Твои́ми моли́твами вся́ческих избавля́ющи на́с обстоя́ний, и́стинную Тя́ чту́щих Богоро́дицу Чи́стую.

И ны́не: Я́же безсе́менное рожде́ние позна́вшая, Тя́ Человеколю́бче, на Дре́ве кре́стнем пове́шена я́ко ви́де, вопия́ше: Сы́не и Бо́же мо́й Всеси́льне, челове́ки спасти́ хотя́й, ка́ко прия́л еси́ ны́не распя́тие?

Та́же, Досто́йно е́сть: И покло́н. Та́же Трисвято́е. И по О́тче на́ш: тропари́, и про́чее обы́чное, и отпу́ст.

В пято́к у́тра

по 1-м стихосло́вии седа́льны кре́стны. Гла́с 1:

Распе́ншуся Ти́ Христе́, поги́бе мучи́тельство, и попра́на бы́сть си́ла вра́жия: ни а́нгел бо, ни челове́к, но Ты́ Са́м Го́споди спа́сл еси́ на́с, сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу его́, я́ко свя́то е́сть.

Креста́ Твоего́ Дре́ву покланя́емся Человеколю́бче, я́ко на то́м пригвозди́лся еси́ животе́ все́х: ра́й отве́рзл еси́ Спа́се, ве́рою прише́дшему к Тебе́ разбо́йнику, и пи́щи сподо́бил еси́ испове́дующаго Тя́: помяни́ мя Го́споди. Приими́ я́коже о́наго, и на́с вопию́щих Тебе́: согреши́хом вси́, милосе́рдием Твои́м не пре́зри на́с.

Сла́ва, и ны́не, Крестобогоро́дичен: Нескве́рная А́гница, А́гнца и Па́стыря пове́шена на дре́ве ме́ртва зря́щи, пла́чущи веща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й сни́тие, и во́льныя стра́сти, Бо́же Преблаги́й?

По 2-м стихосло́вии седа́льны кре́стны, гла́с 1:

Ору́жие кре́стное во бране́х яви́ся иногда́ благочести́вому царю́ Константи́ну, непобеди́мая побе́да на враги́, ве́ры ра́ди, сего́ трепе́щут сопроти́вныя си́лы, сие́ бы́сть ве́рным спасе́ние, и Па́влу похвала́.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

И́же дре́вле Ада́ма от пе́рсти созда́вый, бре́нною руко́ю зауше́н бы́в ще́дре, и распя́тие претерпе́л еси́, поруга́ния же и ра́ны. О чудесе́! О мно́гаго долготерпе́ния твоего́! Сла́ва го́споди живоно́сным Твои́м страсте́м, и́миже на́с спа́сл еси́.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Страда́ния похвало́ю, и вене́чною по́честию, сла́внии страстоте́рпцы, оде́явшеся Тобо́ю, Го́споди, терпе́нием у́бо ра́н беззако́нных победи́ша, и си́лою Боже́ственною от небе́с побе́ду прия́ша. Те́х моли́твами и на́с свободи́ от неви́димаго врага́ Спа́се, и спаси́ на́с.

Сла́ва, и ны́не, Крестобогоро́дичен: Зря́щи Тя́ Христе́, Всенепоро́чная Ма́ти, ме́ртва на Кресте́ просте́рта, вопия́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сие́ смотре́ние, и́мже спа́сл еси́ Ще́дре, пречи́стую руку́ Твое́ю созда́ние?

По 3-м стихосло́вии седа́льны кре́стны. Гла́с 1:

На дре́ве Тя́ Сло́ве кре́стнем, со́лнца сла́вы Иису́се, за милосе́рдие ми́лости, пове́шена пло́тию во́лею, я́ко ви́де со́лнце, не терпя́щи дерзнове́ния, помрачи́ся. Те́мже омраче́нную мою́ ду́шу просвети́ неприкоснове́нным све́том Твои́м, и спаси́ мя, молю́ся.

На Кресте́ пригвозди́лся еси́ во́лею Ще́дре, обожи́л еси́ истле́вшее на́ше существо́, и человекоуби́йцу зми́я умертви́л еси́. Но утверди́ правосла́вие в ми́ре, и низложи́ ерети́чествующих воста́ния, честны́м Кресто́м Твои́м.

Сла́ва, и ны́не, Крестобогоро́дичен: И́же Твое́ заступле́ние стяжа́вше Пречи́стая, и Твои́ми моли́твами от бе́д избавля́емся: Кресто́м бо Сы́на Твоего́ всегда́ храни́ми везде́, по до́лгу Тя́ вси́ благоче́стно велича́ем.

Кано́н честно́му и животворя́щему Кресту́, [его́же краегране́сие: Стра́сть честну́ю хвалю́ влады́чню.] Творе́ние господи́на Ио́сифа. Гла́с 1.

Пе́снь 1

Ирмо́с: Помо́гшему Бо́гу во Еги́пте Моисе́ови, и те́м фарао́на со всево́инством погрузи́вшему, побе́дную пе́снь пои́м, я́ко просла́вися.

Стра́сти претерпе́в на́с ра́ди, и́же естество́м безстра́стен, и ра́спят бы́в с разбо́йникома, началозло́бнаго зми́я умертви́л еси́ Сло́ве, и спа́сл еси́ покланя́ющыяся Тебе́.

Восто́к восто́ков сы́й, к за́падом отринове́ному естеству́ на́шему Иису́се прише́л еси́: Тебе́ же со́лнца зря́ распина́ема, све́т сво́й сокры́.

Му́ченичен: Сме́ртию вре́менною жи́знь ве́чную премени́вше до́бре страда́льцы сла́внии, Ца́рствия Небе́снаго сподо́бистеся: сего́ ра́ди прославля́етеся, и блажи́ми есте́.

Му́ченичен: И́же страсте́м Христо́вым уподо́бльшеся до́блественне, стра́сти исцелева́ете земны́х, рукоде́йствием та́йным, и сло́вом прого́ните ду́хи, святи́и му́ченицы.

Богоро́дичен: Я́коже А́гница зря́щи на Кресте́ Христа́ воздви́жена, и взира́ющи А́гнца восклица́ющи вопия́ше: где́ Твоя́ за́йде добро́та, Долготерпели́ве Сы́не Пребезнача́льне?

И́н кано́н пресвяте́й Богоро́дице. Гла́с 1.

Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою, и спа́сшему Изра́иля, я́ко просла́вися.

Я́же еди́на безле́тнаго Бо́га в ле́то ро́ждши воплоще́нна, всесвята́я Пречи́стая, вселе́тныя стра́сти преокая́нныя моея́ души́ исцели́.

Стру́пы души́ моея́, и се́рдца недоуме́ние, помышле́ний омраче́ние, и у́мное побежде́ние потреби́ Пречи́стая, я́ко ми́лостивая, Твои́ми моли́твами.

Я́же све́т ро́ждшая изба́вителя моего́, тьмы́ и му́к ве́чных изба́ви мя́ пречи́стая: я́ко да спаса́емь воспева́ю благоутро́бие Твое́.

В пучи́не лю́тых, и в молве́ страсте́й потопля́емь е́смь а́з, Твою́ Пречи́стая призыва́ю тишину́: спаси́ мя, приста́нище бо еси́ ве́рных.

Пе́снь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же, И́же над вода́ми не́бо утвержде́й второ́е, и основа́вый на вода́х зе́млю, Всеси́льне.

На кресте́ дла́ни распросте́рл еси́, и пе́рсты Боже́ственныя окровави́в, де́ло руку́ Твое́ю Влады́ко, Ада́ма уби́йственныя руки́ избавля́я, я́ко еди́н бла́г и человеколю́бец.

В ре́бра прободе́н бы́л еси́ копие́м Влады́ко, исправля́я ре́бренное поползнове́ние, на Дре́во возне́слся еси́, дре́вле беду́ прие́мшаго Дре́ва плодо́м, в ра́й вводя́ с разбо́йником благоразу́мным.

Му́ченичен: Церко́вная утвержде́ния, благоче́стия пре́дния столпы́, потреби́тели вра́жия, госпо́дни му́ченики, мы́слию чи́стою пе́сненно да ублажи́м.

Му́ченичен: Я́ко Боже́ственное су́ще ло́зие мы́сленнаго виногра́да му́ченицы, гро́здие изнесо́ша на́м я́ве, терпе́ния излива́ющее вино́, и все́х ве́рных сердца́ веселя́щее.

Богоро́дичен: Благослове́н пло́д чре́ва Твоего́ Де́во всепе́тая, истле́вшая плодо́м Дре́ва, ра́ди Креста́ Своего́, нетле́ния устро́ивый прича́стники, Боже́ственною благода́тию.

И́н. Ирмо́с то́йже

Непло́дныя мы́сли моея́ безпло́дие все́ потреби́, и плодоно́сну доброде́тельми ду́шу мою́ покажи́, пречи́стая Богоро́дице, ве́рным помо́щнице.

Изба́ви мя́ Всенепоро́чная, вся́каго обстоя́ния, мно́гих собла́зн змие́вых, и ве́чнаго огня́, и тьмы́, я́же све́т ро́ждшая преве́чный.

Стра́шным суди́щем чи́стая, и огне́м о́нем неугаси́мым, и отве́том лю́тым ве́сь осужде́н е́смь: потщи́ся спасти́ мя Влады́чице Пречи́стая, раба́ Твоего́.

Да обожи́т челове́чество, Бо́г бы́сть челове́к из Тебе́ Де́во Чи́стая, па́че сло́ва и смы́сла: сего́ ра́ди Тя́ согла́сно вси́ ве́рнии ублажа́ем.

Пе́снь 4

Ирмо́с: Услы́шах Го́споди слу́х Тво́й, и убоя́хся: разуме́х дела́ Твоя́, проро́к глаго́лаше, и просла́вих си́лу Твою́.

Законода́вец пра́веден сы́й, со беззако́нники вмене́н бы́л еси́, на Дре́во возне́слся еси́ благоде́телю Го́споди, все́х оправда́ти хотя́.

Си́лы вся́ удиви́шася а́нгельския, на кресте́ Тебе́ зря́щи возноси́ма со́лнце, и тьмы́ нача́льныя си́лы побежде́ни бы́ша.

Му́ченичен: Исцеле́ний благода́ть от духо́вных дарова́ний поче́рпше му́ченицы, все́м отмыва́ют стра́сти душетле́нныя Бо́жиею благода́тию.

Му́ченичен: Дрема́ние отри́нувше нераде́ния страстоте́рпцы, бо́дростию Боже́ственною, и ве́рою звере́й успи́ша стремле́ния, и ра́дующеся пострада́ша.

Богоро́дичен: Увы́ мне́ ча́до, что́ бу́ду? Ка́ко зрю́ Тя на Дре́во воздви́жена, и без пра́вды умерщвля́ема живо́т подаю́щаго? Де́ва пла́чущи глаго́лаше.

И́н

Ирмо́с: Ду́хом прови́дя, проро́че Авваку́ме, Словесе́ воплоще́ние, пропове́дал еси́ вопия́: внегда́ прибли́житися ле́том, позна́ешися, внегда́ приити́ вре́мени, пока́жешися: сла́ва си́ле Твое́й, Го́споди.

Де́во Богоро́дице, нескве́рная се́не, оскверне́на мя́ прегреше́ньми очи́сти щедро́тами Твои́ми, чисте́йшими кропле́ньми: да́ждь ми́ ру́ку по́мощи, да зову́: сла́ва Тебе́ чи́стая Богоневе́сто.

Хра́м освяще́н яви́лся еси́ Бо́гу, в Тя́ все́льшемуся па́че ума́: того́ моли́, грехо́вных скве́рн на́с очи́стити, я́ко да хра́м позна́емся, и оби́телище духо́вное.

Поми́луй мя́ Богоро́дице, я́же еди́на ми́лостей исто́чник ро́ждшая, и разреши́ души́ моея́ лю́тую боле́знь, и недоуме́ние серде́чное: сле́з струю́ и умиле́ние пре́жде конца́ пода́ждь, и лю́тых избавле́ние.

Свята́я Богоро́дице, освяти́ на́с, пресвята́го ро́ждши пло́тию, уподо́битися хотя́щаго челове́ком, и Небе́сному Ца́рствию прича́стники все́х покажи́, пречи́стая, Твои́ми моли́твами.

Пе́снь 5

Ирмо́с: Све́тлый на́м возсия́й све́т присносу́щный, у́тренюющым о судьба́х за́поведей Твои́х, Влады́ко Человеколю́бче, Христе́ Бо́же на́ш.

На Кресте́ пло́тию воздвиза́емь, язы́ки призва́л еси́ неве́дующыя Тебе́, к Твоему́ позна́нию, судие́ все́х, еди́не ми́лостиве Христе́ Бо́же на́ш.

Тебе́ на суди́щи ста́вшу непра́веднем, пра́ведне Го́споди, оправда́ся пре́жде осужде́нный ада́м, и зове́т: сла́ва распя́тию Твоему́, Долготерпели́ве Го́споди.

Му́ченичен: Я́коже ра́й богонасажде́нный яви́стеся му́ченицы, стра́сти честны́я я́ко цве́ты благоуха́нныя иму́ще, и́миже благоуха́ется ве́рных душа́ вся́кая.

Му́ченичен: Благоцве́тная и благоплодови́тая древеса́, и́же ве́ры безсме́ртия пло́д процвето́ша, и зло́бы коре́ния исторго́ша, воспои́м му́ченики Госпо́дни.

Богоро́дичен: Же́зл честны́й, я́же прозя́бший цве́т неувяда́ющий, я́ко узре́ на Дре́во возноси́ма того́, вопия́ше: Влады́ко, не безча́дну яви́ мя.

И́н

Ирмо́с: Тво́й ми́р да́ждь на́м, Сы́не Бо́жий, ино́го бо ра́зве Тебе́ Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́.

Ме́ртва мя́ соде́ла иногда́ во Еде́ме вкуше́ние лука́вое: но я́же жи́знь ро́ждшая Пречи́стая, дре́вле Дре́вом уме́ршаго оживи́ мя ны́не, и пода́ждь умиле́ние.

Спаси́ мя Пречи́стая, от бе́д лю́тых и воздви́гни мя́ от гно́я страсте́й, и изба́ви мя́ плене́ния и озлобле́ния лука́вых бесо́в, Твоего́ непотре́бнаго раба́.

Зе́ницы души́ моея́ озари́ чи́стая, зре́ти ми́ при́сно Боже́ственную све́тлость, и Твою́ сла́ву Ввсенепоро́чная, я́ко да получу́ ми́лость и ве́чную сла́ву.

О́блак и ра́й, и две́рь Тя́ све́та, трапе́зу, и руно́ ве́мы, ру́чку вну́трь ма́нну нося́щу, сла́дость ми́ру, Чи́стая Де́во Ма́ти.

Пе́снь 6

Ирмо́с: Проро́ка спа́сл еси́ от ки́та Человеколю́бче, и мене́ из глубины́ прегреше́ний возведи́, молю́ся.

И́же че́сти вся́кия превы́шши, безче́стие претерпе́л еси́ Христе́, на Кресте́ воздви́жен, челове́ки почести́ хотя́.

Подпису́еши мне́ оставле́ние, порабоще́нному льсти́вым, тро́стию бие́мь Христе́ Бо́же на́ш преблаги́й.

Му́ченичен: Боле́зньми страда́ний к неболе́зненней преидо́сте святи́и кончи́не, и неизрече́нныя ра́дости сподо́бльшеся.

Му́ченичен: Разжего́стеся у́гльми Христо́вы любве́ прему́дрии: те́мже во о́гнь вмета́еми не опаля́еми пребы́сте.

Богоро́дичен: По рождестве́ Всенепоро́чная, я́коже и пре́жде рождества́ пребыла́ еси́: Бо́га бо родила́ еси́ дре́вом челове́ка спа́сшаго.

И́н

Ирмо́с: Проро́ка Ио́ну подража́я вопию́: живо́т мо́й бла́же свободи́ из тли́, и спаси́ мя Спа́се ми́ра, зову́ща: сла́ва Тебе́.

Оскверне́на мя́ мно́гими грехи́, молю́ся Тебе́ еди́ной благо́й, и нескве́рней се́ни: омы́й от вся́кия скве́рны, хода́тайством Твои́м.

Окорми́тельница ми́ бу́ди чи́стая, вла́ему в пучи́не лю́тых, жите́йскими ну́ждами, и испра́ви, к при́сному приста́нищу, и спаси́ мя.

Треволне́ние помышле́ний, и страсте́й нахожде́ния, и глубина́ грехо́вная, окая́нную мою́ ду́шу обурева́ют: помози́ ми свята́я Влады́чице.

Свяще́нная се́не показа́нная, Мари́е, оскверне́нную сластьми́ окая́нную мою́ ду́шу освяти́.

Пе́снь 7

Ирмо́с: Пе́щь спа́се ороша́шеся, о́троцы же лику́юще поя́ху: отце́в Бо́же благослове́н еси́.

Распина́емь тва́рь поколеба́л еси́: умерщвля́емь зми́я умертви́л еси́: благослове́н еси́ Христе́ Бо́же оте́ц на́ших.

Напоя́ется же́лчию Долготерпели́вый, источа́я ми́ сла́дость спаси́тельную, сла́достною сне́дию лише́нному ра́йския пи́щи.

Му́ченичен: Му́ченицы ноготьми́ стру́жеми, ме́ртвости дебельство́ отложи́вше, красоту́ же Боже́ственную от Бо́га прия́ша.

Му́ченичен: Страстьми́ стра́сти Христо́вей пречи́стей подо́бящеся, до́блии му́ченицы, ра́ны вра́жия удо́бь претерпе́сте.

Богоро́дичен: Распина́ема зря́щи Го́спода непоро́чная богоро́дица, глаго́лаше: увы́ мне́ сы́не мо́й, ка́ко умира́еши, животе́ и наде́ждо ве́рных?

И́н

Ирмо́с: Су́щым в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́, я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших.

Оскве́рншуюся страстьми́ ду́шу мою́ освяти́, Пречи́стая Боневе́сто, и ума́ моего́ лю́тое плене́ние, и се́рдца недоуме́ние, и бесо́вская устремле́ния вско́ре потреби́ чи́стая.

Умерщвле́нный страстьми́ плотски́ми, всенепоро́чная, оживи́ у́м мо́й, и Бо́гу уго́дная соверша́ти укрепи́ мя́: да велича́ю Тя́, и сла́влю при́сно благоутро́бие Твое́.

Де́во Ма́ти, я́же еди́на Бо́га ро́ждшая, умертви́ плотски́я моя́ сла́сти, и душе́вную мою́ скве́рну отмы́й вско́ре: и истяза́ния бесо́в лука́вых изба́ви, и спаси́ мя.

Преиспещре́на Боже́ственными доброде́тельми, родила́ еси́ Сло́во собезнача́льно Отцу́, Чи́стая Де́во, доброде́тельми небеса́ вои́стинну покры́вшаго: Его́же моли́ при́сно уще́дрити на́с.

Пе́снь 8

Ирмо́с: Песносло́вцы в пещи́ спа́сшаго де́ти, и громопла́менную прело́жшаго на ро́су, Христа́ Бо́га по́йте и превозноси́те во вся́ ве́ки.

Егда́ на Кресте́ Спасе́ пригвозди́лся еси́, колеба́шеся тва́рь: со́лнце уста́ви лучы́, и ка́мение распада́шеся, и а́д ско́ро обнажа́шеся, не терпя́ держа́вы Твоея́.

За осужде́ние отринове́ннаго осужде́ние пострада́в, за прие́мшаго наготу́, на́г на Дре́ве ви́сел еси́ Ще́дре: ве́лия Твоя́ держа́ва и долготерпе́ние.

Му́ченичен: И́же безпло́тным сожи́телие, Христо́вы во́ини, кресто́м я́ко броня́ми оболче́ни, к сопротивобо́рцу ополчи́шася, и того́ кра́сными нога́ми попра́ша.

Му́ченичен: Стоя́ху посреде́ суди́ща с закле́пми до́блии, на у́ды раздробля́еми, и зда́ние разоря́юще пре́лести, и бесо́вская тре́бища разбива́юще.

Богоро́дичен: Я́же небе́с превы́шшая, воздви́жена на Дре́ве, и низлага́ющаго воздвиже́ния вра́жия, зря́щи еди́наго вы́шняго, воспева́ше того́ велегла́сно.

И́н

Ирмо́с: Его́же ужаса́ются А́нгели, и вся́ во́инства, я́ко Творца́ и Го́спода, по́йте свяще́нницы, просла́вите о́троцы, благослови́те лю́дие и превозноси́те во вся́ ве́ки.

Воплоща́ется безпло́тный из Тебе́ боголе́пно: его́же моли́ Пречи́стая, стра́сти моя́ плотски́я умертви́ти, и оживи́ти ду́шу мою́ умерщвле́нную греха́ми.

Исцеля́ющаго сокруше́ние Ада́ма пе́рстнаго, спа́са родила́ еси́ Пречи́стая и Бо́га: того́ умоли́, я́звы души́ моея́ исцели́ти, я́же неисце́льно боля́щыя.

Воздви́гни слежа́ща мя́ во глубине́ злы́х, и ны́не борю́щаго мя́ победи́, чи́стая, и уя́звленную безме́стными сластьми́ ду́шу мою́ пречи́стая не пре́зри, но уще́дри, и спаси́ мя.

Избавля́емся вся́ческих искуше́ний, пречи́стая, Твои́ми к Бо́гу бо́дренными моли́твами, Тебе́ Богоро́дицу све́дущии благослове́нную и обра́дованную.

Та́же, пе́снь Богоро́дицы: Вели́чит душа́ моя́ Го́спода: И покло́ны.

Пе́снь 9

Ирмо́с: Тя́, Ю́же ви́де Моисе́й неопали́мую купину́, и ле́ствицу одушевле́нную, ю́же Иа́ков ви́де, и две́рь небе́сную, е́юже про́йде Христо́с Бо́г на́ш, пе́сньми Ма́ти Чи́стая велича́ем.

О ка́ко лю́дие непокори́вии преда́ша Тя́ Кресту́, Еди́наго Долготерпели́ваго во́лею обнища́вшаго, и стра́сти прие́мшаго, и безстра́стию хода́тая бы́вша, все́м от Ада́ма попо́лзшымся!

Распя́тие безче́стное прия́т Христе́ пло́тию, почести́ хотя́ обезче́ствованнаго челове́ка страстьми́ безслове́сными, и дре́внюю добро́ту погу́бльша: сла́ва па́че ума́ милосе́рдию Твоему́.

Му́ченичен: Со́лнце незаходи́мое Христе́, у́треневавшыя к Тебе́, и тьму́ страда́ний преше́дшыя ма́нием Ти́, к све́ту наста́вил еси́ Твоея́ неизрече́нныя сла́вы и све́тлости: просвети́ у́бо на́с те́х моли́твами.

Му́ченичен: По́лк му́ченик свяще́нных, тьмы́ мы́сленных враго́в победи́, и тьма́м примени́ся святы́х си́л, и тьмы́ страсте́й ду́ш на́ших, манове́нием вседе́тельным исцеля́ют при́сно.

Богоро́дичен: Све́том Де́во, из Тебе́ возсия́вшаго све́та пло́тию, у́м мо́й, озари́, и се́рдце просвети́, тьму́ отгоня́ющи грехо́вную, и уны́ния моего́ вся́ку мглу́ прогоня́ющи.

И́н

Ирмо́с: Светоно́сный о́блак, во́ньже все́х Влады́ка, я́ко до́ждь с небесе́ на руно́ сни́де, и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

Грехолюби́в сы́й в ле́ности пребыва́ю, и суди́ща, Чи́стая, неумы́тнаго трепе́щу: в не́мже мя́ соблюди́ Твои́ми святы́ми моли́твами Богоневе́сто, неосужде́нна, да я́ко Предста́тельницу мою́ ублажа́ю Тя́, Пречи́стая.

Ужаса́юся суди́ща Де́во, и незабве́ннаго о́ка Твоего́ Сы́на, соде́яв мно́гия грехи́ на земли́, и сего́ ра́ди Тебе́ вопию́: всемилосе́рдая Влады́чице помози́ ми, и тогда́шния беды́ изба́ви мя́, и спаси́, Чи́стая.

Ко́ль стра́шен де́нь испыта́ния, Отрокови́це! Ко́ль ужа́сен отве́т! Ко́ль горька́ беда́! Кто́ постои́т про́чее Пречи́стая Влады́чице? Поми́луй стра́стную мою́ ду́шу, и пре́жде конца́ да́ждь ми́ оставле́ние, Пречи́стая.

Я́же све́т ро́ждшая Боже́ственный, из Отца́ возсия́вший, омраче́нную мою́ ду́шу лестьми́ жите́йскими, и бы́вшую враго́в поруга́ние Всенепоро́чная уще́дри, и све́ту покая́ния спаси́тельнаго сподо́би, Чи́стая.

Та́же: Досто́йно е́сть: И покло́н до земли́. Та́же, ектениа́, и свети́лен, и псалмы́ обы́чны.

На стихо́вне стихи́ры кре́стны. Гла́с 1:

Тебе́ на Дре́ве пригво́ждшагося пло́тию, и живо́т на́м пода́вшаго, я́ко Спа́са и Влады́ку пои́м непреста́нно.

Сти́х: Испо́лнихомся зау́тра ми́лости Твоея́ Го́споди, и возра́довахомся, и возвесели́хомся. во вся́ дни́ на́шя возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.

Твои́м Кресто́м Христе́, еди́но ста́до бы́сть А́нгелов и челове́ков, и во еди́ном собо́ре не́бо и земля́ весели́тся: Го́споди сла́ва Тебе́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Страстоте́рпцы Христо́вы прииди́те лю́дие вси́ почти́м пе́ньми и пе́сньми духо́вными, свети́льники ми́ра, и пропове́дники ве́ры, исто́чники приснотеку́щыя, из ни́хже истека́ют ве́рным исцеле́ния. Те́х моли́твами Христе́ Бо́же на́ш, ми́р да́руй ми́ру Твоему́, и душа́м на́шым ве́лию ми́лость.

Сла́ва, и ны́не: Крестобогоро́дичен:

Подо́бен: Прехва́льнии му́ченицы:

А́гнца, А́гница и Всенепоро́чная Влады́чица, на Кресте́ я́ко ви́девши зра́ка не иму́ща, ни добро́ты, увы́ мне́, пла́чущи глаго́лаше: где́ добро́та Твоя́ за́йде сладча́йший? Где́ благоле́пие? Где́ благода́ть сия́ющая, о́браза Твоего́, Сы́не мо́й любе́знейший?

В пято́к блаже́нны, гла́с 1:

Сне́дию изведе́ из рая́ вра́г Ада́ма: Кресто́м же введе́ Христо́с во́нь разбо́йника, помяни́ мя, зову́ща, егда́ прии́деши во Ца́рствии Твое́м.

Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Распе́нся безгре́шне, грехи́ все́х взя́л еси́ Христе́, и прободе́н бы́л еси́ в ре́бра, спасе́ния пото́ки источи́л еси́, воды́ же и кро́ве, назида́я сокруше́нныя тле́ю.

Блаже́ни есте́, егда́ поно́сят ва́м, и изжену́т и реку́т вся́к зо́л глаго́л, на вы́ лжу́ще мене́ ра́ди.

На дре́ве пригвожда́емь во́лею Иису́се Бо́же, все́ отя́л еси́ Ще́дре Ада́мово стра́стное разуме́ние: я́звами же честны́ми бесо́вское мно́жество уязви́л еси́.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: И́же страсте́м уподо́бльшеся, во́лею пострада́вшему пло́тию, му́ченицы сла́внии, при́сно стра́сти исцеля́ете неисце́льныя, неду́ги же отго́ните от челове́к си́лою духо́вною.

Сла́ва: Равноси́льную, единоче́стную Тро́ицу сла́вим Тя́, Отца́ безнача́льнаго Бо́га, и Сы́на, и Ду́ха свята́го, еди́но триипоста́сное богонача́лие, ве́рою велича́ем.

И ны́не: На кресте́ Тя пригвожде́на, я́ко узре́ Христе́ Бо́же, я́же Тебе́ ро́ждшая пло́тию, пла́чущи веща́ше: что́ Ти воздаде́, о Сы́не мо́й, евре́йский собо́р законопресту́пный?

Суббота

Подоба́ет ве́дати, о е́же ка́ко быва́ти о усо́пших после́дованию.

В пято́к ве́чера: по отпуще́нии вече́рни, обле́кшуся свяще́ннику в фело́нь, диа́кону же в стиха́рь, и прие́мшу кади́льницу и фимиа́м, исхо́дит в притво́р, предыду́щу ему́ параекклисиа́рху со све́щником: после́дуем же по ни́х и мы́. И егда́ приити́ ему́ в притво́р, предъугото́ванней же бы́вшей кутии́, Свяще́нник глаго́лет: Благослове́н Бо́г на́ш: кадя́ над кутие́ю крестообра́зно. Мы́ же глаго́лем псало́м 90: Живы́й в по́мощи: [Во и́но же вре́мя кроме́ вече́рни, или́ у́трени быва́ет нача́ло по обы́чаю: глаго́лем Трисвято́е и по О́тче на́ш, иере́й возгла́с: Я́ко Твое́ е́сть Ца́рство: Та́же, Го́споди поми́луй, 12. Сла́ва и ны́не: Прииди́те поклони́мся, три́жды. и псало́м 90.]И по конце́ его́, Сла́ва, и ны́не: Аллилу́иа, три́жды.

И быва́ет ектениа́ поко́йна:

Ми́ром Го́споду помо́лимся.

Ли́к: Го́споди поми́луй.

О свы́шнем ми́ре, и о спасе́нии ду́ш на́ших: Го́споду помо́лимся.

О оставле́нии согреше́ний, во блаже́нней па́мяти преста́вльшихся: Го́споду помо́лимся.

О приснопа́мятных рабе́х Бо́жиих, и́мярек, поко́я, тишины́, блаже́нныя па́мяти и́х: Го́споду помо́лимся.

О прости́ти и́м вся́кое прегреше́ние во́льное и нево́льное: помо́лимся.

О неосужде́нным предста́ти у стра́шнаго престо́ла Го́спода сла́вы: Го́споду помо́лимся.

О пла́чущих и боле́знующих, ча́ющих Христо́ва утеше́ния: Го́споду помо́лимся.

О отпусти́тися и́м от вся́кия боле́зни, и печа́ли, и воздыха́ния, и всели́ти и́х, иде́же присеща́ет све́т лица́ Бо́жия: Го́споду помо́лимся.

О я́ко да Госпо́дь Бо́г на́ш учини́т ду́шы и́х в ме́сте све́тле, в ме́сте зла́чне, в ме́сте поко́йне, иде́же вси́ пра́веднии пребыва́ют: Го́споду помо́лимся.

О причте́нии и́х в не́дрех Авраа́ма, и Исаа́ка, и Иа́кова: Го́споду помо́лимся.

О изба́витися на́м от вся́кия ско́рби, гне́ва и ну́жды: Го́споду помо́лимся.

Заступи́, спаси́, поми́луй и сохрани́ на́с Бо́же Твое́ю благода́тию.

Ми́лости Бо́жия, Ца́рства небе́снаго, и оставле́ния грехо́в испроси́вше те́м, са́ми себе́, и дру́г дру́га, и ве́сь живо́т на́ш Христу́ Бо́гу предади́м.

Мы́ же рече́м: Тебе́ Го́споди.

Иере́й возгла́с: Я́ко Ты́ еси́ воскре́сние, и живо́т, и поко́й усо́пших ра́б Твои́х, приснопомина́емых созда́телей, Оте́ц и бра́тий на́ших, зде́ лежа́щих, и повсю́ду правосла́вных христиа́н, Христе́ Бо́же на́ш: и Тебе́ сла́ву возсыла́ем со безнача́льным Твои́м Отце́м, и со пресвяты́м и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Та́же, Аллилу́иа, три́жды, на гла́с 8.

Сти́х 1: Блаже́ни, я́же избра́л и прия́л еси́ Го́споди.

Сти́х 2: Па́мять и́х в ро́д и ро́д.

Сти́х 3: Ду́шы и́х во благи́х водворя́тся.

Та́же тропа́рь, гла́с 8:

Глубино́ю му́дрости человеколю́бно вся́ стро́яй, и поле́зное все́м подава́яй, еди́не Соде́телю, упоко́й Го́споди, ду́ши ра́б Твои́х: на Тя́ бо упова́ние возложи́ша, Творца́ и зижди́теля и Бо́га на́шего. [Два́жды.]

Сла́ва, и ны́не, Богоро́дичен: Тебе́ и сте́ну и приста́нище и́мамы, и моли́твенницу благоприя́тну к Бо́гу, Его́же родила́ еси́ Богоро́дице безневе́стная, ве́рных спасе́ние.

Посе́м кафи́сма: Блаже́ни непоро́чнии: пое́м и́х на гла́с 2-й. Припе́в. Помяни́ Го́споди ду́шы ра́б Твои́х: Други́й же ли́к вторы́й сти́х, и поря́ду про́чыя стихи́ о́ба ли́ка, разделя́ем же на две́ статии́: и по пе́рвой статии́ не глаго́лем Сла́ва, и ны́не: но а́бие се́й сти́х:

Я́ко а́ще бы не зако́н Тво́й поуче́ние мое́ бы́л, тогда́ у́бо поги́бл бы́х во смире́нии мое́м. Во ве́к не забу́ду оправда́ний Твои́х, я́ко в ни́х оживи́л мя́ еси́. [Три́жды.]

И твори́т иере́й ектению́ о преждеусо́пших:

Па́ки и па́ки ми́ром Го́споду помо́лимся.

Ли́к: Го́споди поми́луй.

Еще́ мо́лимся о упокое́нии ду́ш усо́пших рабо́в Бо́жиих, и́мярек, и о е́же прости́тися и́м вся́кому прегреше́нию, во́льному же и нево́льному.

Ли́к: Го́споди поми́луй.

Я́ко да Госпо́дь Бо́г учини́т ду́шы и́х, иде́же пра́веднии упокоя́ются.

Ли́к: Го́споди поми́луй.

Ми́лости Бо́жия, Ца́рства Небе́снаго и оставле́ния грехо́в и́х, у Христа́ безсме́ртнаго Царя́ и Бо́га на́шего про́сим.

Ли́к: Пода́й Го́споди.

Диа́кон: Го́споду помо́лимся.

Ли́к: Го́споди поми́луй, 40.

Свяще́нник глаго́лет моли́тву та́йно:

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т ми́ру Твоему́ дарова́вый, са́м Го́споди упоко́й ду́шы усо́пших рабо́в Твои́х, и́мярек, в ме́сте све́тле, в ме́сте зла́чне, в ме́сте поко́йне: отню́дуже отбеже́ боле́знь, печа́ль и воздыха́ние. вся́кое согреше́ние, соде́янное и́ми сло́вом, или́ де́лом, или́ помышле́нием, я́ко благи́й человеколю́бец Бо́г прости́, я́ко не́сть челове́к и́же жи́в бу́дет, и не согреши́т: Ты́ бо еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возгла́с: Я́ко Ты́ еси́ воскре́сние, и живо́т, и поко́й:

Припе́в: Упоко́й Го́споди, ду́шы ра́б Твои́х.

И поря́ду о́ба ли́ка, и про́чыя стихи́. На конце́ же пое́м сти́х: Жива́ бу́дет душа́ моя́: три́жды, до конца́.

Та́же тропари́ за упоко́й, пое́м на гла́с 5:

Припе́в: Благослове́н еси́ Го́споди, научи́ мя оправда́нием Твои́м.

Святы́х ли́к обре́те исто́чник жи́зни, и две́рь ра́йскую, да обря́щу и а́з пу́ть покая́нием: поги́бшее овча́ а́з е́смь, воззови́ мя Спа́се, и спаси́ мя.

Благослове́н еси́ Го́споди, научи́ мя оправда́нием Твои́м.

А́гнца Бо́жия пропове́давше, и закла́ни бы́вше я́коже а́гнцы, и к жи́зни нестаре́емей святи́и и присносу́щней преста́вльшеся, того́ приле́жно му́ченицы моли́те, долго́в разреше́ние на́м дарова́ти.

Благослове́н еси́ Го́споди, научи́ мя оправда́нием Твои́м.

В пу́ть у́зкий хо́ждшии приско́рбный, вси́ в житии́ кре́ст я́ко яре́м взе́мшии, и Мне́ после́довавшии ве́рою, прииди́те наслади́теся, и́хже угото́вах ва́м по́честей, и венце́в небе́сных.

Благослове́н еси́ Го́споди, научи́ мя оправда́нием Твои́м.

О́браз е́смь неизрече́нныя Твоея́ сла́вы, а́ще и я́звы ношу́ прегреше́ний: уще́дри Твое́ созда́ние Влады́ко, и очи́сти Твои́м благоутро́бием, и вожделе́нное оте́чество пода́ждь ми́, рая́ па́ки жи́теля мя́ сотворя́я.

Благослове́н еси́ Го́споди, научи́ мя оправда́нием Твои́м.

Дре́вле у́бо от не су́щих созда́вый мя́, и о́бразом твои́м Боже́ственным почты́й, преступле́нием же за́поведи, па́ки мя́ возврати́вый в зе́млю, от нея́же взя́т бы́х, на е́же по подо́бию возведи́, дре́внею доброто́ю возъобрази́тися.

Благослове́н еси́ Го́споди, научи́ мя оправда́нием Твои́м.

Упоко́й Бо́же рабы́ Твоя́, и учини́ я́ в раи́, иде́же ли́цы святы́х Го́споди, и пра́ведницы сия́ют я́ко свети́ла: усо́пшыя рабы́ Твоя́ упоко́й, презира́я и́х вся́ согреше́ния.

Сла́ва Отцу́, и Сы́ну, и свято́му Ду́ху:

Тро́ичен: Трисия́тельное еди́наго Божества́ благоче́стно пое́м вопию́ще: Свя́т еси́ О́тче безнача́льный, собезнача́льный Сы́не, и Боже́ственный Ду́ше: Просвети́ на́с ве́рою Тебе́ служа́щих, и ве́чнаго огня́ исхити́.

И ны́не, и при́сно, и во ве́ки веко́в, ами́нь.

Богоро́дичен: Ра́дуйся Чи́стая, Бо́га пло́тию ро́ждшая во спасе́ние все́х. Е́юже ро́д челове́ческий обре́те спасе́ние. Тобо́ю да обря́щем ра́й, Богоро́дице чи́стая благослове́нная.

Посе́м: Аллилу́иа, три́жды. Та́же, ектениа́. И помина́ет иере́й усо́пших поря́ду, я́коже пре́жде написа́ся посреде́ непоро́чных.

А́ще же не пое́м непоро́чных, тогда́ по Аллилу́иа глаго́лем тропа́рь: Глубино́ю му́дрости: и Богоро́дичен его́. И а́бие: Благослове́н еси́ Го́споди: посе́м тропари́: Святы́х ли́к обре́те: про́чая. Та́же помина́ет иере́й усо́пших, я́коже пре́жде указа́ся.

И глаго́лем седа́лен поко́ин, гла́с 5:

Поко́й Спа́се на́ш, с пра́ведными рабы́ Твоя́, и сия́ всели́ во дворы́ Твоя́, я́коже е́сть пи́сано, презира́я я́ко бла́г прегреше́ния и́х во́льная и нево́льная, и вся́ я́же в ве́дении, и не в ве́дении, Человеколю́бче.

Сла́ва, и ны́не: Богоро́дичен: От Де́вы возсия́вый ми́ру Бо́же Христе́, сы́ны све́та то́ю показа́вый, поми́луй на́с.

Та́же, псало́м 50: Поми́луй мя́ Бо́же:

Та́же кано́н во окто́ихе усо́пших по гла́су, на 4. По 3-й пе́сни, ирмо́с и ектениа́. И помина́ет иере́й преждеусо́пших поря́ду, я́коже предрече́ся, посреде́ непоро́чных.

Возгла́с: Я́ко Ты́ еси́ воскре́сние и живо́т:

Та́же седа́лен, гла́с 6:

Вои́стинну суета́ вся́ческая: житие́ же се́нь и со́ние, и́бо всу́е мяте́тся вся́к земноро́дный, я́коже рече́ Писа́ние: егда́ ми́р приобря́щем, тогда́ во гро́б всели́мся, иде́же вку́пе ца́рие и ни́щии. Те́мже Христе́ Бо́же, преста́вльшыяся упоко́й, я́ко Человеколю́бец.

Сла́ва, и ны́не, Богоро́дичен: Всесвята́я Богоро́дице, во вре́мя живота́ моего́ не оста́ви мене́, челове́ческому предста́тельству не вве́ри мя́, но Сама́ заступи́, и поми́луй мя́.

По 6-й пе́сни ирмо́с, и ектениа́.И помина́ет иере́й преждеусо́пших, я́коже пре́жде указа́хом. Возгла́с: Я́ко Ты́ еси́ воскре́сние и живо́т:

Та́же конда́к, гла́с 8:

Со святы́ми упоко́й Христе́, ду́шы ра́б Твои́х, иде́же не́сть боле́знь, ни печа́ль, ни воздыха́ние, но жи́знь безконе́чная.

И́кос: Са́м Еди́н еси́ Безсме́ртный, сотвори́вый и созда́вый челове́ка, земни́и у́бо от земли́ созда́хомся, и в зе́млю ту́южде по́йдем, я́коже повеле́л еси́ созда́вый мя́ и реки́й ми́: я́ко земля́ еси́, и в зе́млю оти́деши, а́може вси́ челове́цы по́йдем, надгро́бное рыда́ние творя́ще пе́снь, аллилу́иа. [Три́жды.]

По 9-й пе́сни глаго́лет иере́й: Богоро́дицу и Ма́терь Све́та в пе́снех возвели́чим: Ли́к: Ду́си и ду́шы пра́ведных восхва́лят Тя́ Го́споди. И пое́м ирмо́с 9-й пе́сни, Та́же, Трисвято́е, и по О́тче на́ш: глаго́лем тропари́ сия́. Гла́с 4:

Со ду́хи пра́ведных сконча́вшихся ду́шы ра́б Твои́х Спа́се упоко́й, сохраня́я и́х во блаже́нной жи́зни, я́же у тебе́ Человеколю́бче.

Тропа́рь, гла́с то́йже:

В поко́ищи Твое́м Го́споди, иде́же вси́ святи́и Твои́ упокоева́ются, упоко́й и ду́шы ра́б Твои́х, я́ко еди́н еси́ Человеколю́бец.

Сла́ва: Ты́ еси́ Бо́г соше́дый во а́д, и у́зы окова́нных разреши́вый, са́м и ду́шы ра́б Твои́х упоко́й.

И ны́не: Богоро́дичен: Еди́на Чи́стая, и Непоро́чная Де́во, Бо́га без се́мене ро́ждшая, моли́ спасти́ся душа́м и́х.

Та́же иере́й ектению́ глаго́лет:

Поми́луй на́с Бо́же, по вели́цей ми́лости Твое́й, мо́лим Ти ся, услы́ши и поми́луй.

Ли́к: Го́споди поми́луй, три́жды.

Еще́ мо́лимся о упокое́нии ду́ш усо́пших рабо́в Бо́жиих, и́мярек, и о е́же прости́тися и́м вся́кому прегреше́нию, во́льному же и нево́льному.

Ли́к: Го́споди поми́луй, три́жды.

Я́ко да Госпо́дь Бо́г учини́т ду́шы и́х, иде́же пра́веднии упокоя́ются.

Ли́к: Го́споди поми́луй, три́жды.

Ми́лости Бо́жия, Ца́рства Небе́снаго и оставле́ния грехо́в и́х у христа́ Безсме́ртнаго Царя́ и Бо́га на́шего про́сим.

Ли́к: Пода́й Го́споди.

Диа́кон: Го́споду помо́лимся.

Свяще́нник: Бо́же духо́в:

И помина́ет я́же от ве́ка уме́ршыя отцы́ и бра́тию на́шу, зде́ лежа́щыя, и повсю́ду правосла́вныя христиа́ны.

Та́же возгла́с: Я́ко Ты́ еси́ воскре́сние и живо́т:

Глаго́лет иере́й, или́ диа́кон: Прему́дрость: Мы́ же: Честне́йшую херуви́м: Иере́й: Сла́ва Тебе́ Христе́ Бо́же, упова́ние на́ше, сла́ва Тебе́. Мы́ же: Сла́ва, и ны́не: Го́споди поми́луй, три́жды. Благослови́.

Иере́й отпу́ст:

Воскресы́й из ме́ртвых Христо́с и́стинный Бо́г на́ш, моли́твами Пречи́стыя Своея́ Ма́тере, святы́х сла́вных и всехва́льных Апо́стол, преподо́бных и богоно́сных оте́ц на́ших, и все́х святы́х, ду́шы о на́с преста́вльшихся ра́б Свои́х в селе́ниих пра́ведных учини́т, в не́дрех Авраа́ма упоко́ит, и с пра́ведными причте́т, и на́с поми́лует, я́ко Бла́г и Человеколю́бец.

И по отпу́сте глаша́ет диа́кон си́це:

Во блаже́нном успе́нии ве́чный поко́й пода́ждь Го́споди у́спшым рабо́м Твои́м, и́мярек, и сотвори́ и́м ве́чную па́мять.

И певцы́ пою́т: Ве́чная па́мять, три́жды. А иде́же не́сть диа́кона, пою́т певцы́: Рабо́м Бо́жиим, и́мярек, у́сопшым ве́чная па́мять.

Си́й же чи́н и уста́в подоба́ет твори́ти во вся́ пятки́, я́ве, я́ко в ни́хже твори́м па́мять над ко́ливом у́спшым отце́м и бра́тиям на́шым.

* * *

1

естество́ новопремени́ся

2

свя́т одушевле́нный хра́м

3

су́щым вне́ су́етнаго ми́ра

4

свя́т и́же сла́вы Госпо́дь неизме́нный бла́гостию

5

запя́вся ада́м и сокруша́ется

6

из ме́ртвых бо воскре́сние ты́, яви́вся су́щым во а́де, христе́, дарова́л еси́

7

свя́т Одушевле́нный Хра́м

8

свя́т одушевле́нный Хра́м

9

си́х превы́ше



Источник: Свято-Успенский Псково-Печерский монастырь. Издательский отдел Московского Патриархата малой вечерни, великой вечерни, бденной, полиелейной, шестеричной служб, утрени без бдения. Найти можно в Типиконе. Кни́га моле́бна с Бо́гом святы́м осмогла́сника, содержа́щая в себе́ подоба́ющее возсле́дование воскре́сныя слу́жбы осми́ гласо́в с шестию́ дне́й

Комментарии для сайта Cackle