Глас 2

на Го́споди, воззва́х: стихи́ры воскре́сны, осмогла́сника 3, повторя́юще пе́рвую. Гла́с 2.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Пре́жде ве́к от Отца́ ро́ждшемуся Бо́жию Сло́ву, вопло́щшемуся от Де́вы Мари́и, прииди́те поклони́мся: Кре́ст бо претерпе́в, погребе́нию предаде́ся, я́ко Са́м восхоте́; и воскре́с из ме́ртвых, спасе́ мя заблужда́ющаго челове́ка.

Христо́с Спа́с на́ш, е́же на ны́ рукописа́ние пригвозди́в на Кресте́ загла́ди, и сме́ртную держа́ву упраздни́: покланя́емся Его́ Тридне́вному Воскресе́нию.

Со арха́нгелы воспои́м Христо́во Воскресе́ние: То́й бо е́сть Изба́витель и Спа́с ду́ш на́ших, и в сла́ве стра́шней и кре́пцей си́ле, па́ки гряде́т суди́ти ми́ру, его́же созда́.

Сла́ва, и ны́не: Богоро́дичен, догма́тик, гла́с 2:

О преве́лия та́инства! Зря́ чудеса́, пропове́дую Божество́, Емману́ил бо естества́ у́бо врата́ отве́рзе я́ко Человеколю́бец, де́вства же ключи́ не разруши́ я́ко Бо́г; но си́це от утро́бы про́йде, я́коже слу́хом вни́де; та́ко воплоти́ся, я́коже зача́тся; безстра́стно вни́де, несказа́нно изы́де, по проро́ку глаго́лющему: сия́ врата́ заключе́на бу́дут; никто́же про́йдет и́ми, то́кмо еди́н Госпо́дь Бо́г Изра́илев, име́яй ве́лию ми́лость.

Та́же, Све́те ти́хий: Посе́м проки́мен: Госпо́дь воцари́ся, в ле́поту облече́ся. Три́жды.

Сти́х: Облече́ся Госпо́дь в си́лу, и препоя́сася. Та́же, Сподо́би, Го́споди, в ве́чер се́й: Иере́й же ектении́ не глаго́лет, но пое́м:

На стихо́вне, стихи́ру воскре́сну, гла́с 2:

Воскресе́ние Твое́, Христе́ Спа́се, всю́ просвети́ вселе́нную и призва́л еси́ Твое́ созда́ние: Всеси́льне Го́споди, сла́ва Тебе́.

И́ны стихи́ры Пресвяте́й Богоро́дице, гла́с то́йже.

Подо́бен: Егда́ от Дре́ва Тя́:

Сти́х: Помяну́ и́мя Твое́ во вся́ком ро́де и ро́де.

Все́х скорбя́щих ра́досте, и оби́димых предста́тельнице, и убо́гих пита́тельнице, стра́нных же утеше́ние, и же́зле слепы́х, немощны́х посеще́ние, тружда́ющихся покро́ве и засту́пнице, и си́рых помо́щнице, Ма́ти Бо́га Вы́шняго, Ты́ еси́, Пречи́стая, потщи́ся, мо́лимся, спасти́ся рабо́м Твои́м.

Сти́х: Слы́ши, Дщи́, и ви́ждь, и приклони́ у́хо Твое́.

Вся́кое беззако́ние неща́дно, вся́кий гре́х невозде́ржно окая́нный соде́лах; вся́каго осужде́ния досто́ин е́смь! Вины́ покая́ния мне́ пода́ждь, Де́во, я́ко да не осужде́н та́мо явлю́ся, Тя́ бо напису́ю моли́твенницу, Тя́ призыва́ю предста́тельницу, не посрами́ мене́, Богоневе́стная.

Сти́х: Лицу́ Твоему́ помо́лятся бога́тии лю́дстии.

Ино́го прибе́жища, Чи́стая, к Творцу́ и Влады́це мы́ не и́мамы, ра́зве Тебе́, Богоневе́сто: да не отри́неши на́с те́плым Твои́м предста́тельством, ниже́ посрами́ши любо́вию притека́ющих под кро́в Тво́й, Ма́ти Бо́га на́шего: потщи́ся, и Твою́ по́мощь да́ждь, и ны́нешняго гне́ва на́с спаси́.

Сла́ва, и ны́не: Богоро́дичен, гла́с 2:

Кто́ Тя по достоя́нию похва́лит и ублажи́т, Отрокови́це Богоневе́стная, о е́же Тобо́ю бы́вшем ми́рови избавле́нии: благодаря́ще у́бо зове́м Ти́, глаго́люще: ра́дуйся, Я́же Ада́ма обожи́вшая, и разстоя́щая совокупи́вшая. Ра́дуйся, просвети́вшая ро́д на́ш светоно́сным Воскресе́нием Сы́на Твоего́ и Бо́га на́шего: Тя́ бо христиа́нский ро́д непреста́нно ублажа́ем.

Та́же, Ны́не отпуща́еши: Трисвято́е и по О́тче на́ш: Тропа́рь воскре́сен. Ектения́ ма́лая, и отпу́ст.

на Го́споди, воззва́х: поста́вим стихо́в 10, и пое́м стихи́ры воскре́сны осмогла́сника, 3: и Анато́лиевы, 4: и Мине́и 3, или́ 4, или́ 6, а́ще пра́зднуется святы́й, Сла́ва: Мине́и, И ны́не: Богоро́дичен пе́рвый, гла́са.

Стихи́ры воскре́сны, гла́с 2.

Сти́х: Изведи́ из темни́цы ду́шу мою́, испове́датися и́мени Твоему́.

Пре́жде ве́к от Отца́ Ро́ждшемуся Бо́жию Сло́ву, вопло́щшемуся от Де́вы Мари́и, прииди́те поклони́мся; Кре́ст бо претерпе́в, погребе́нию предаде́ся, я́ко Са́м восхоте́; и воскре́с из ме́ртвых, спасе́ мя заблужда́ющаго челове́ка.

Сти́х: Мене́ жду́т пра́ведницы, до́ндеже возда́си мне́.

Христо́с Спа́с на́ш, е́же на ны́ рукописа́ние пригвозди́в на Кресте́ загла́ди, и сме́ртную держа́ву упраздни́: покланя́емся Его́ Тридне́вному Воскресе́нию.

Сти́х: Из глубины́ воззва́х к Тебе́, Го́споди, Го́споди, услы́ши гла́с мо́й.

Со Арха́нгелы воспои́м Христо́во Воскресе́ние: То́й бо е́сть Изба́витель и Спа́с ду́ш на́ших, и в сла́ве стра́шней и кре́пцей си́ле, па́ки гряде́т суди́ти ми́ру, его́же созда́.

И́ны стихи́ры Анато́лиевы, гла́с то́йже

Сти́х: Да бу́дут у́ши Твои́, вне́млюще гла́су моле́ния моего́.

Тебе́ Распе́ншагося и Погребе́ннаго, А́нгел пропове́да Влады́ку, и глаго́лаше жена́м: прииди́те ви́дите, иде́же лежа́ше Госпо́дь; воскре́се бо, я́коже рече́, я́ко Всеси́лен. Те́мже Тебе́ покланя́емся, Еди́ному Безсме́ртному: Жизнода́вче Христе́, поми́луй на́с.

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Кресто́м Твои́м упраздни́л еси́, ю́же от дре́ва кля́тву, погребе́нием Твои́м умертви́л еси́ сме́рти держа́ву; Воста́нием же Твои́м просвети́л еси́ ро́д челове́ческий. Сего́ ра́ди вопие́м Ти́: Благоде́телю Христе́ Бо́же на́ш, сла́ва Тебе́.

Сти́х: И́мене ра́ди Твоего́, потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Отверзо́шася Тебе́, Го́споди, стра́хом врата́ сме́ртная, вра́тницы же а́довы ви́девше Тя́, убоя́шася: врата́ бо ме́дная сокруши́л еси́, и вереи́ желе́зныя сте́рл еси́, и изве́л еси́ на́с от тьмы́ и се́ни сме́ртныя, и у́зы на́ша растерза́л еси́.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Спаси́тельную пе́снь пою́ще, от у́ст возсле́м: прииди́те вси́ в дому́ Госпо́днем припаде́м, глаго́люще: на Дре́ве Распны́йся, и из ме́ртвых Воскресы́й, и Сы́й в не́дрех О́тчих, очи́сти грехи́ на́ша.

И́ны стихи́ры Пресвяте́й Богоро́дице, пое́м и́х, иде́же не́сть Мине́и. Творе́ние Па́вла Аморре́йскаго. Гла́с 6

Подо́бен: Отча́янная жития́ ра́ди:

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

Я́же ненаде́жных упова́ние изве́стное, и согреша́ющих спасе́ние, Мари́е всепе́тая, Чи́стая Богоро́дице, приими́ моле́ние мое́ сие́, и испроси́ ми разреше́ния все́х, я́же согреши́х в житии́, ма́терними Твои́ми моли́твами, и спаси́ от бе́д и бу́дущаго суда́, Влады́чице, вели́кия ра́ди Твоея́ ми́лости.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Лука́во вре́мя живота́ моего́, лука́во и испо́лнь вся́кия зло́бы, сатане́ лука́вому лю́те мя́ смуща́ющу, Ты́ мя, Богороди́тельнице, изба́ви того́ па́кости, Ты́ мя от у́ст о́наго исто́ргни, Пресвята́я: на Тя́ бо все́ возложи́х ча́яние мое́, спаси́ мя Твои́ми бо́дрыми моли́твами.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Ра́дуйся, Непосты́дная Предста́тельнице. Ра́дуйся, Преблага́я Богоро́дице. Ра́дуйся, очисти́лище ми́ра. Ра́дуйся, ра́досте скорбя́щих, и приста́нище обурева́емым. Ра́дуйся, Я́же все́м помога́ющая су́щим в ну́ждах. Ты́ у́бо сохрани́ и мене́, Де́во, все́х ско́рбных, Пренепоро́чная Влады́чице.

Сла́ва, и ны́не: Богоро́дичен: Пре́йде се́нь зако́нная, благода́ти прише́дши: я́коже бо купина́ не сгара́ше опаля́ема, та́ко Де́во родила́ еси́, и Де́ва пребыла́ еси́. Вме́сто столпа́ о́гненнаго, Пра́ведное возсия́ Со́лнце: вме́сто Моисе́я, Христо́с, Спасе́ние ду́ш на́ших.

Та́же вхо́д с кади́лом. Све́те ти́хий: Проки́мен и ектении́.

На стихо́вне стихи́ры воскре́сны, гла́с 2:

Воскресе́ние Твое́, Христе́ Спа́се, всю́ просвети́ вселе́нную и призва́л еси́ Твое́ созда́ние: Всеси́льне Го́споди, сла́ва Тебе́.

И́ны стихи́ры по алфави́ту.

Сти́х: Госпо́дь воцари́ся, в ле́поту облече́ся.

Дре́вом, Спа́се, упраздни́л еси́, ю́же от дре́ва кля́тву, держа́ву сме́рти погребе́нием Твои́м умертви́л еси́, просвети́л же еси́ ро́д на́ш Воста́нием Твои́м. Те́мже вопие́м Тебе́: Животода́вче Христе́ Бо́же на́ш, сла́ва Тебе́.

Сти́х: И́бо утверди́ вселе́нную, я́же не подви́жится.

На Кресте́ я́влься Христе́ пригвожда́ем, измени́л еси́ добро́ту зда́ний: и безчелове́чие у́бо во́ини показу́юще, копие́м ре́бра Твоя́ прободо́ша, евре́и же печа́тати гро́ба проси́ша, Твоея́ вла́сти не ве́дуще. Но за милосе́рдие утро́б Твои́х, прие́мый погребе́ние, и тридне́вен воскресы́й, Го́споди, сла́ва Тебе́.

Сти́х: До́му Твоему́ подоба́ет святы́ня, Го́споди, в долготу́ дни́й.

Животода́вче Христе́, во́лею стра́сть претерпе́вый сме́ртных ра́ди, во а́д же снизше́д я́ко си́лен, та́мо Твоего́ прише́ствия ожида́ющия, исхи́тив я́ко из руки́ кре́пкаго, Ра́й вме́сто а́да жи́ти дарова́л еси́. Те́мже и на́м сла́вящим Тридне́вное Твое́ Воста́ние, да́руй очище́ние грехо́в, и ве́лию ми́лость.

Сла́ва, и ны́не: Богоро́дичен: О чудесе́ но́ваго все́х дре́вних чуде́с! Кто́ бо позна́ Ма́терь без му́жа ро́ждшую, и на руку́ нося́щую, всю́ тва́рь Содержа́щаго? Бо́жие е́сть изволе́ние, Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́терне дерзнове́ние к Нему́ иму́щая, не преста́й моля́щи о чту́щих Тя́, уще́дрити и спасти́ ду́ши на́ша.

Та́же: Ны́не отпуща́еши: Трисвято́е. По О́тче на́ш:

Тропа́рь воскре́сен, гла́с 2:

Егда́ снизше́л еси́ к сме́рти, Животе́ Безсме́ртный, тогда́ а́д умертви́л еси́ блиста́нием Божества́. Егда́ же и уме́ршия от преиспо́дних воскреси́л еси́, вся́ Си́лы Небе́сныя взыва́ху: Жизнода́вче Христе́ Бо́же на́ш, сла́ва Тебе́.

Богоро́дичен: Вся́ па́че смы́сла, вся́ пресла́вная Твоя́ Богоро́дице, та́инства, чистоте́ запеча́танной, и де́вству храни́му, Ма́ти позна́лася еси́ нело́жна, Бо́га ро́ждши и́стиннаго: Того́ моли́ спасти́ся душа́м на́шим.

Кано́н Пресвяте́й Богоро́дице [то́же и от оклевета́ния, в печа́лех, и напа́стех су́щии да пою́т.] Гла́с 2.

Пе́снь 1

Ирмо́с: Во глубине́ постла́ иногда́, фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть: препросла́вленный Госпо́дь сла́вно бо просла́вися.

Я́же все́м удо́бь послу́шная в ско́рби, и в печа́ли помога́ющая, Богоро́дице Блага́я, благода́ть пода́ждь пе́ти Тя́ дерза́ющим, Влады́чице, Скорбя́щих Ра́досте.

Многобога́тную благода́ть стяжа́вши, Влады́чице, дерзнове́нною Твое́ю моли́твою, пресла́вно изми́ мя от напа́стей, убо́гаго раба́ Твоего́, Скорбя́щих Ра́досте.

Сла́ва: От вра́г ви́димых и неви́димых изба́ви, мо́лимся, к Тебе́ прибега́ющих, Богоро́дице, и разори́ вся́к сове́т борю́щих на́с.

И ны́не: Отыми́ поноше́ние челове́ческое, и клеветы́ наве́тник от мене́, Богоро́дице, молю́ Тя: да усе́рдно сла́влю Го́спода, Его́же пита́ла еси́.

Пе́снь 3

Ирмо́с: Утверди́ на́с в Тебе́, Го́споди, Дре́вом умерщве́й гре́х, и стра́х Тво́й всади́ в сердца́ на́с пою́щих Тя́.

Враго́в наве́ты разори́ су́етныя, Всепе́тая Богоро́дице: не оскуде́й моли́твами Твои́ми, снабдя́щи на́с восхваля́ющих Тя́.

При́зри, Чи́стая, ми́лостивным Твои́м о́ком, и изба́ви мя́ вся́каго наве́та ви́димых и неви́димых враго́в, ослепи́вши зе́ницы оче́с и́х.

Сла́ва: Зло́е нападе́ние враго́в, я́ко о́гнь паля́щее, и́щущих всегда́ погуби́ти на́с, Де́во, росо́ю моли́тв Твои́х угаси́.

И ны́не: Неугаси́мая Лампа́до, Заре́ Присносия́тельная, но́щию мя́ скорбе́й одержи́ма, просвети́ моли́твами Твои́ми, ро́ждшая Со́лнце Сла́вы, Христа́.

Пе́снь 4

Ирмо́с: Услы́шах, Го́споди, гла́с Тво́й, его́же ре́кл еси́, гла́с вопию́щаго в пусты́ни, я́ко возгреме́л еси́ над вода́ми мно́гими, Твоему́ свиде́тельствуяй Сы́ну, ве́сь бы́в соше́дшаго Ду́ха, возопи́: Ты́ еси́ Христо́с, Бо́жия му́дрость и си́ла.

Спасе́ния Тя́ мо́ст, моли́тву неусы́пну, заступле́ние тве́рдо мо́лим: умилосе́рдися и ви́ждь на́шу нестерпи́мую печа́ль, боле́зни, ско́рби, стра́сти, и благопреме́нно посети́, Ма́ти Бо́жия, ра́дость ско́рую подаю́щи.

Не неприча́стни есмы́, Влады́чице, Твоего́ заступле́ния в ско́рбех: те́мже и ны́не на́м помози́ вско́ре, лю́те обурева́емым ру́ку простира́ющи, Чи́стая: бу́ди ми́лостива боле́знем на́шим, Ма́ти Бо́жия, ра́дость ско́рую подаю́щи.

Сла́ва: Не упова́ша, Влады́чице, на Тя́ беззако́ннующии, но упова́ша на язы́к велере́чив, на язы́к челове́ч, при́сно зави́стно излия́вшийся, непра́ведно пролия́ти кро́вь и́скренняго, рыка́юще: Ты́ же, Чи́стая, че́люсти и́х сокруши́.

И ны́не: Смири́, Влады́чице, враго́в вознесе́нную вы́ю велере́чующих, сове́ты и злонра́вия, и сердца́ поуча́ющаяся злы́м на мя́ по вся́ дни́: кре́пость же и побе́ду пода́ждь призыва́ющим Тя́, Ма́ти Бо́жия, ра́дость ско́рую подаю́щи.

Пе́снь 5

Ирмо́с: У́гль Иса́ии проявле́йся, Со́лнце из де́вственныя утро́бы возсия́, во тьме́ заблу́ждшим, богоразу́мия просвеще́ние да́руя.

Моли́твеннице нело́жная, упова́ние христиа́н, Обра́дованная, приими́ мольбы́ от на́с приле́жно призыва́ющих и моля́щихся Тебе́.

Исто́чник Тя́ жи́зни су́щи, Чи́стая, безсме́ртия источа́ющий во́ды, земноро́днии позна́вше ублажа́ем.

Сла́ва: Вооружи́ся на ны́ лука́вно вра́г, язы́ком я́коже мече́м погуби́ти хотя́: но Твое́ю, Богороди́тельнице, кре́постию предвари́.

И ны́не: Пучи́ну, Чи́стая, заступле́нию кто́ изочте́т си́лы Твоея́? Те́мже на́с су́щих в ну́жде ско́ро предвари́.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Целому́дрия су́щи Хода́таица, призыва́ющим Тя́ ны́не яви́ся, и от вся́ких изба́ви напа́стей и бе́д, Богоневе́сто.

Злоде́йства вра́жия разори́, и клеветы́ непра́ведныя уста́ви, Благослове́нная Пречи́стая, избавля́ющи непови́нныя от ско́рби.

Сла́ва: Лю́тыми грехи́ окруже́ни, и напа́стными беда́ми потопля́еми, под Боже́ственный покро́в Тво́й прибега́ем, Ма́ти Христа́ Бо́га.

И ны́не: Неискусому́жно ро́ждши Го́спода, яви́ся по Рождестве́ па́ки де́вствующи. О пресла́внаго чудесе́, в Тебе́ соде́ланнаго, Богоневе́сто!

Та́же: Го́споди, поми́луй, три́жды. Сла́ва, и ны́не:

Седа́лен, гла́с 2:

Моле́ние те́плое, и стена́ необори́мая, ми́лости исто́чниче, ми́рови прибе́жище, приле́жно вопие́м Ти́: Богоро́дице Влады́чице, предвари́, и от бе́д изба́ви на́с, Еди́на вско́ре Предста́тельствующая.

Пе́снь 7

Ирмо́с: Да пресла́вное Рождество́ Твое́, Христе́, е́же от Де́вы прообрази́ши я́ве, неопали́мы в пещи́ о́троки сохрани́л еси́, пе́сньми пою́щия Тебе́: отце́в Бо́же, благослове́н еси́.

О благоутро́бия Твоего́, Де́во Чи́стая! Реши́ши бо безме́рныя печа́ли и напа́сти, призыва́ющим в ну́жде и обстоя́нии: те́мже и ны́не помози́ Благослове́нная, Тя́ восхваля́ющим.

Покажи́ ско́рое Твое́ заступле́ние, покажи́ я́ко мо́жеши, я́ко Ма́ти Бо́гу, призыва́ем Тя́ от се́рдца со слеза́ми припа́дающе, ско́рбь укроти́ и боле́знь рабо́в Твои́х вско́ре.

Сла́ва: Уста́ челове́ком я́ко льво́м лю́тым, гро́ба тяжча́йше отверзо́шася, го́рько поглоти́ти мя́: но Ты́, Богоро́дице, яви́ся наде́жда ненаде́ющимся, и низложи́ кре́пость и́х, Благослове́нная.

И ны́не: Да у́зрят врази́ и постыдя́тся, да разуме́ют и ви́дят твою́, е́же по на́м сопроти́в борю́щую си́лу, и в про́пасть преиспо́днюю низложи́ и́х Благослове́нная, Наде́ждо ненаде́ющихся.

Пе́снь 8

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Прибе́жище на́ше, и ми́ру ра́дование, Богороди́тельнице, умилосе́рдитися потщи́ся, и спе́шно благода́ть Твою́ пода́ждь на́м оскорбле́нным, и заступи́ Блага́я, Твоя́ рабы́.

Сове́т су́етен совеща́ша лю́те на ны́ безбо́жных со́нмища, я́коже пре́жде Ахитофе́л. Но вопие́м: Твои́ми моли́твами се́й разори́, низло́жши си́х кре́пость, Богоро́дице.

Сла́ва: Призыва́ющих Тя́, Богоро́дице, от души́ нело́жно, во вся́кой ско́рби и в боле́знех разли́чных, и беда́х лю́тых, спе́шно услы́ши, Влады́чице, си́х избавля́ющи при́сно моли́твами Твои́ми.

И ны́не: Да и́мя Твое́, Богоро́дице, на земли́ славосло́вится, И́же из Тебе́ возсия́в, гре́шником держа́вную наде́жду и сте́ну Тя́ дарова́: Тобо́ю бо вся́кое дыха́ние к Бо́гу притека́ет.

Пе́снь 9

Ирмо́с: Недоуме́ет вся́к язы́к благохвали́ти по достоя́нию, изумева́ет же у́м и преми́рный пе́ти Тя́, Богоро́дице: оба́че Блага́я су́щи, ве́ру приими́, и́бо любо́вь ве́си Боже́ственную на́шу, Ты́ бо христиа́н еси́ Предста́тельница, Тя́ велича́ем.

Да загради́тся вся́к язы́к, лука́вым поуча́яйся; да молча́т устна́ льсти́вая, и уста́ непра́ведно глаго́лющая на пра́веднаго беззако́ние, горды́нею и за́вистию вражде́бною вку́пе, Богоро́дицы моли́твою, и святы́х Христо́вых.

И́же в моли́твах бо́друю, Чи́стую Богоро́дицу, призыва́ем вси́ боле́знию и ско́рбию одержи́ми, взыва́юще: Влады́чице Чи́стая, ско́ро изба́ви от одержа́щих боле́зней рабы́ Твоя́ при́сно, я́ко по Бо́зе засту́пницы ины́я не и́мамы.

Сла́ва: Отча́явшихся ве́лие прибе́жище, обурева́емых ти́хое приста́нище, Ты́ еси́, Богоро́дице. Те́мже и мы́ притека́ем, взыва́юще: да не постыди́мся, Ма́ти И́стиннаго Живота́, но да благодаря́ще усе́рдно Тя́ велича́ем.

И ны́не: Приими́, Отрокови́це Пречи́стая, Боже́ственную пе́снь, воздава́ющи благода́ть на Тя́ наде́ющимся, и ми́р испроси́ це́рквам при́сно посла́ти, да христиа́нский вся́к язы́к Тя́ велича́ет.

Та́же: Досто́йно е́сть: И про́чее обы́чно, и отпу́ст.

Кано́н тро́ичный, творе́ние Митрофа́ново, его́же краестро́чие: Тригу́бый пою́ Богонача́лия Све́т. Гла́с 2.

Пе́снь 1

Ирмо́с: Во глубине́ постла́ иногда́, фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, Препросла́вленный Госпо́дь, сла́вно бо просла́вися.

Тро́ичное и Единонача́льное Естество́ Божества́, пе́сненно воспои́м глаго́люще: ми́лости пучи́ну неизчерпа́емую, суще́ственную я́ко иму́щи, Тебе́ кла́няющихся соблюди́ и спаси́, я́ко Человеколю́бец.

И́же исто́чник, и ко́рень Оте́ц сы́й, я́ко вино́вен, И́же в Сы́не, и Святе́м Твое́м Ду́се, сра́сленнаго Божества́ Трисо́лнечный се́рдцу моему́ источи́ Све́т, и прича́стием осия́й, Богоде́тельнаго Сия́ния.

Сла́ва: Трисве́тлая Еди́нице Богонача́льная, ве́сь разори́ грехо́в и страсте́й мои́х мра́к, све́тлых луче́й Твои́х сладча́йшими причаще́ньми, и сотвори́ мя Твоея́ непристу́пныя сла́вы хра́м и се́нь пречи́стую.

Богоро́дичен: То́к дре́вний естества́ на́шего, страда́вший безме́стно, и к тли́ попо́лзшийся, Пречи́стая, вопло́щься во утро́бе Твое́й Бо́г Сло́во, человеколю́бне осия́, и Богонача́лию Трисве́тлому на́с та́йно научи́.

Пе́снь 3

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́ бо ся ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Ра́венством естества́ Богонача́лие Единоче́стное сла́влю Тя́ Ли́цы: Живо́т бо от Живота́ Ты́ произше́д нетле́нно, Еди́н сы́й Бо́г на́ш, и не́сть свя́т, па́че Тебе́, Го́споди.

Ты́ чи́ны невеще́ственныя и Небе́сныя соста́вил еси́, я́ко зерца́ла Твоея́ добро́ты, Тро́ице Неразде́льное Единонача́лие, пе́ти непреста́нно Тебе́: но и ны́не на́ше от бре́нных у́ст приими́ хвале́ние.

Сла́ва: Утверди́ на ка́мени ве́ры, и разшири́ любве́ Твоея́ пучи́ною сердца́ и мы́сль Твои́х ра́б, Еди́нице Трисо́лнечная: Ты́ бо Бо́г на́ш, на Него́же упова́юще, да не посрами́мся.

Богоро́дичен: И́же вся́к пре́жде соста́в осуществова́вый тва́ри, во утро́бе Твое́й осуществова́ся, неизче́тною бла́гостию, Богоро́дице, и Све́т Трисо́лнечный все́м возсия́ Еди́наго Божества́ и Госпо́дьства.

Седа́лен, гла́с 2.

Подо́бен: Благоутро́бия:

Егда́ в нача́ле Ада́ма созда́л еси́ Го́споди, тогда́ Сло́ву Твоему́ Ипоста́сному возопи́л еси́, Благоутро́бне: сотвори́м по На́шему подо́бию, Ду́х же Святы́й сопрису́тствоваше Соде́тель. Те́мже вопие́м Ти́: Тво́рче Бо́же на́ш, сла́ва Тебе́.

Сла́ва, и ны́не: Богоро́дичен: Егда́ к на́м Бо́г приити́ изво́ли, тогда́ в Твою́, Пречи́стая, чисте́йшую утро́бу всели́ся, и спасе́ Тобо́ю челове́ческое смеше́ние, дарова́вый все́м Ца́рство Небе́сное. Те́мже вопие́м Ти́, Богоро́дице Чи́стая, ра́дуйся, Влады́чице.

Пе́снь 4

Ирмо́с: Пою́ Тя, слу́хом бо, Го́споди, услы́шах и ужасо́хся, до мене́ бо и́деши, мене́ ища́ заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Разуме́ти Тя́ ниже́ чи́нове мо́гут невеще́ственнии а́нгельстии, Еди́нице, Тро́ице Безнача́льная: но у́бо мы́ бре́нным язы́ком Твою́ Су́щественную бла́гость воспева́ем, и ве́рою сла́вим.

Сы́й Созда́тель естества́ челове́ческаго, Вседержи́телю, все́ мое́ ви́диши ны́не, я́ко Всеви́дец неможе́ние: те́мже уще́дри раба́ Твоего́, и к жи́зни лу́чшей па́ки возведи́.

Сла́ва: Еди́ницы Нача́льныя несме́сна Три́ Ли́ца воспева́ем, я́ко сво́йственне иму́щая, и разде́льне Ипоста́си: но у́бо соедине́на и неразде́льна, в сове́те же, и сла́ве, и Божестве́.

Богоро́дичен: Хра́м Тя́ чи́ст и пренепоро́чен, Присноде́во Богоро́дице, Вседе́тель обре́те еди́ну я́ве от ве́ка, в Ню́же все́лься: вообрази́ челове́ческое естество́, я́ко Человеколю́бец.

Пе́снь 5

Ирмо́с: Просвеще́ние во тьме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ Ми́ра, просвети́ мя сия́нием Твои́м: ино́го бо ра́зве Тебе́ бо́га не зна́ю.

Я́ко вся́чески на вся́ су́щия Твоего́ про́мысла, мирода́рныя простира́яй лучи́, и спаси́тельныя, Царю́ Ми́ра, соблюди́ мя в ми́ре Твое́м: Ты́ бо Живо́т и Ми́р вся́ческому.

Моисе́ю в купине́ я́ко яви́лся еси́ в виде́нии о́гненне, А́нгел наре́клся еси́, О́тчее Сло́во, Е́же к на́м Твое́ предъявля́я прише́ствие: И́мже все́м я́ве возвести́л еси́ держа́ву Богонача́лия Еди́наго, Триипоста́сную.

Сла́ва: Я́же Есте́ственную, Соприсносу́щную сла́ву предло́жиши, Единонача́льнейшая Тро́ице Свята́я, воспева́ющих Тя́ правосла́вною ве́рою, Твоея́ сла́вы ви́дети сподо́би, Безнача́льную, и Еди́ну Зарю́ Трисо́лнечную.

Богоро́дичен: Содержи́тельный по существу́ сы́й Бо́г Сло́во, все́м веко́м, Де́во Ма́ти, во чре́ве Твое́м удержа́ся неизрече́нно, челове́ки призыва́я ко еди́нству Еди́наго Госпо́дьства.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Воли́телю ми́лости, поми́луй в Тя́ ве́рующих, Бо́же Трисо́лнечне, и прегреше́ний изба́ви, и страсте́й, и бе́д, рабы́ Твоя́. [Два́жды.]

Сла́ва: Неизрече́нною пучи́ною бла́гости, необмы́слимую Твоего́ сия́ния, и Трисия́ннаго Божества́ светода́тельную зарю́ пода́ждь ми́.

Богоро́дичен: Неизрече́нне, Де́во, Вы́шний Челове́к бы́сть из Тебе́, в челове́ка по всему́ обо́лкся, и Све́том мя́ Трисо́лнечным озари́.

Седа́лен, гла́с 2. Подо́бен: Благоутро́бия:

Благоутро́бия пучи́ну на́м простры́й, приими́ на́с, Ми́лостиве, при́зри на лю́ди Тя́ сла́вящия, приими́ пе́снь прося́щих Тя́, Тро́ице Еди́нице Безнача́льная: на Тя́ бо упова́ем все́х Бо́га, прегреше́ний да́ти проще́ние.

Сла́ва, и ны́не: Богоро́дичен: Благоутро́бия ро́ждши Исто́чник, ми́лостива Ты́ еси́, Блага́я Богоро́дице: Ты́ бо ве́рных еди́но заступле́ние, Ты́ скорбя́щих утеше́ние. Те́мже Тебе́ ны́не вси́ ве́рою припа́даем, обрести́ разреше́ние лю́тых, обогате́ющеся еди́ною Тебе́ по́мощию.

Пе́снь 7

Ирмо́с: О́бразу злато́му на по́ле деи́ре служи́му, трие́ Твои́ о́троцы небрего́ша безбо́жнаго веле́ния: посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.

Уставля́еши при́сно а́нгельская во́инства к непреложе́нию, Еди́не сы́й Неизме́нне и Триипоста́сне Го́споди: покажи́ у́бо и мое́ се́рдце непрело́жно всегда́, во е́же сла́вити Тя́ те́пле, и воспева́ти благоче́стно. [Два́жды.]

Сла́ва: Ли́цы у́мнии невеще́ственных суще́ств, Твои́ми луча́ми, Бо́же Единонача́льне, и Трисо́лнечне, озаря́еми быва́ют, положе́нием втори́и све́тове: и́хже и мене́ сия́ньми, и прича́стием покажи́ све́т, я́ко Светоде́тель Трисия́нен.

Богоро́дичен: Направля́ти на́с и возвыша́ти к Небесе́м не оскуде́й, Тебе́ лю́бящих, И́же за неизрече́нное человеколю́бие, бы́в Челове́к во утро́бе Де́вы, и обожи́в челове́ка, и на престо́ле сла́вы со Отце́м седя́й.

Пе́снь 8

Ирмо́с: О подо́бии зла́те небре́гше треблаже́ннии ю́ноши, неизме́нный и живы́й Бо́жий о́браз ви́девше, среди́ огня́ воспева́ху: осуществова́нная да пое́т Го́спода вся́ тва́рь, и превозно́сит во вся́ ве́ки.

Непристу́пная Тро́ице Соприсносу́щная, Собезнача́льная, Богонача́льная, Неизме́нная во все́х, кроме́ Светоно́сных Сво́йств, вся́кий лука́вый упраздни́ сопротиволежа́щих сове́т, и стуже́ния де́монов, невре́дна соблюда́яй мя́ при́сно, Го́споди все́х. [Два́жды.]

Сла́ва: Прему́дре и Всемо́щне, Неопи́санное, Трисо́лнечное Единонача́лие соста́вльшее ми́р, и соблюда́ющее в невреди́мом чи́не всесоверше́нном, всели́ся в мое́ се́рдце, пе́ти и сла́вити Тя́ немо́лчно с ли́ки а́нгельскими во вся́ ве́ки.

И ны́не: Прему́дросте О́тчая, Непостижи́ме, Неизрече́нне, Бо́жий Сло́ве, Непрело́жное Твое́ Естество́ не измени́в, естество́ челове́ческое ми́лостивне восприя́л еси́: и Еди́нственную Тро́ицу чести́ все́х научи́л еси́, я́ко Господонача́лие все́х веко́в.

Пе́снь 9

Ирмо́с: Я́же пре́жде со́лнца свети́льника Бо́га возсия́вшаго, пло́тски к на́м прише́дшаго, из боку́ деви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́ем.

От Све́та Безнача́льна, Собезнача́лен Сы́н Све́т возсия́, и Соесте́ственный Све́т Ду́х изы́де, неизрече́нно боголе́пно, нетле́нну Рождеству́ уверя́еми, вку́пе же и неизрече́нному Исхожде́нию.

Возсия́й в сердца́х, Трисо́лнечное Божество́, воспева́ющих Тя́, Трисия́нным Све́том Твои́м; и да́ждь ра́зум е́же во все́х разуме́ти, и де́яти Твое́ хоте́ние благо́е и соверше́нное, и велича́ти и сла́вити Тя́.

Сла́ва: Неизче́тен естество́м сы́й я́ко Бо́г, неизче́тную пучи́ну щедро́т я́ко име́я, уще́дрила еси́, Тро́ице, пре́жде: та́ко и ны́не уще́дри рабы́ Твоя́, и от прегреше́ний изба́ви, и напа́стей и обстоя́ний.

Богоро́дичен: Спаси́ мя, Бо́же мо́й, от вся́каго искуше́ния и озлобле́ния, И́же в Трие́х Ли́цех воспева́емый несказа́нно, еди́нственне Бо́г и Всеси́льный, и Твое́ ста́до сохрани́, Богоро́дицы моли́твами.

Та́же тро́ичны Григо́риа Синаи́та. Досто́йно е́сть: И про́чее полу́нощницы, пи́сано в конце́ кни́ги сея́.

на Бо́г Госпо́дь: тропа́рь: Егда́ снизше́л еси́: Сла́ва, и ны́не: Вся́ па́че смы́сла:

По 1-м стихосло́вии, седа́льны воскре́сны, гла́с 2:

Благообра́зный Ио́сиф, с Дре́ва сне́м Пречи́стое Твое́ Те́ло, плащани́цею чи́стою обви́в, и благоуха́ньми во гро́бе но́ве закры́в положи́: но тридне́вен воскре́сл еси́, Го́споди, подая́ ми́рови ве́лию ми́лость.

Стих: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Мироно́сицам жена́м при гро́бе предста́в А́нгел вопия́ше: ми́ра ме́ртвым су́ть прили́чна, Христо́с же истле́ния яви́ся чу́ждь. Но возопи́йте: воскре́се Госпо́дь, подая́ ми́рови ве́лию ми́лость.

Сла́ва, и ны́не: Богоро́дичен: Препросла́вленна еси́, Богоро́дице Де́во, пое́м Тя́: Кресто́м бо Сы́на Твоего́ низложи́ся а́д, и сме́рть умертви́ся, умерщвле́ннии воста́хом, и живота́ сподо́бихомся: Ра́й восприя́хом дре́внее наслажде́ние. Те́м благодаря́ще, славосло́вим я́ко держа́внаго Христа́ Бо́га на́шего, и Еди́наго Многоми́лостиваго.

По 2-м стихосло́вии седа́льны, гла́с 2.

Ка́мень гро́бный запеча́тати не возбрани́в, ка́мень ве́ры воскре́с по́дал еси́ все́м, Го́споди, сла́ва Тебе́.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

Ученико́в Твои́х ли́к с мироно́сицами жена́ми ра́дуется согла́сно: о́бщий бо пра́здник с ни́ми пра́зднуем, в сла́ву и че́сть Твоего́ Воскресе́ния. И те́ми вопие́м Ти́, Человеколю́бче Го́споди: лю́дем Твои́м пода́ждь ве́лию ми́лость.

Сла́ва, и ны́не: Богоро́дичен: Преблагослове́нна еси́, Богоро́дице Де́во, вопло́щшим бо ся из Тебе́ а́д плени́ся, Ада́м воззва́ся, кля́тва потреби́ся, Е́ва свободи́ся, сме́рть умертви́ся, и мы́ ожи́хом. Те́м воспева́юще вопие́м: благослове́н Христо́с Бо́г благоволи́вый та́ко, сла́ва Тебе́.

По непоро́чнах ипакои́, гла́с 2.

По стра́сти ше́дша во гро́б жены́, во е́же пома́зати Те́ло Твое́, Христе́ Бо́же, ви́деша а́нгелы во гро́бе, и ужасо́шася: гла́с бо слы́шаху от ни́х, я́ко воскре́се Госпо́дь, да́руя ми́рови ве́лию ми́лость.

Степе́нна, гла́с 2.

Антифо́н 1. И́хже стихи́ повторя́юще пое́м:

На не́бо о́чи пуща́ю моего́ се́рдца, к Тебе́, Спа́се, спаси́ мя Твои́м осия́нием.

Поми́луй на́с согреша́ющих Тебе́ мно́го, на вся́кий ча́с, о Христе́ мо́й, и да́ждь о́браз пре́жде конца́ пока́ятися Тебе́.

Сла́ва: Свято́му Ду́ху, е́же ца́рствовати подоба́ет, освяща́ти, подвиза́ти тва́рь: Бо́г бо е́сть, Единосу́щен Отцу́ и Сло́ву.

И ны́не: то́йже.

Антифо́н 2:

А́ще не Госпо́дь бы бы́л в на́с, кто́ дово́лен це́л сохране́н бы́ти от врага́, ку́пно и человекоуби́йцы?

Зубо́м и́х не преда́ждь, Спа́се, Твоего́ раба́: и́бо льво́вым о́бразом на мя́ подвиза́ются врази́ мои́.

Сла́ва: Свято́му Ду́ху живонача́лие и че́сть: вся́ бо созда́нная, я́ко Бо́г сы́й си́лою соблюда́ет во Отце́, Сы́ном же.

И ны́не: то́йже.

Антифо́н 3:

Наде́ющиися на Го́спода, уподо́бишася Горе́ Святе́й: и́же ника́коже дви́жутся прило́ги вра́жиими.

В беззако́нии ру́к свои́х да не про́струт боже́ственне живу́щии: не оставля́ет бо Христо́с жезла́ на жре́бии Свое́м.

Сла́ва: Святы́м Ду́хом то́чится вся́ка прему́дрость: отсю́ду благода́ть апо́столом, и страда́льчествы венча́ются му́ченицы, и проро́цы зря́т.

И ны́не: то́йже.

Проки́мен, гла́с 2: Воста́ни, Го́споди Бо́же мо́й, повеле́нием, и́мже запове́дал еси́, и со́нм люде́й обы́дет Тя́.

Сти́х: Го́споди Бо́же мо́й, на тя́ упова́х, спаси́ мя.

Вся́кое дыха́ние: Ева́нгелие воскре́сно, и про́чая по ря́ду. Воскресе́ние Христо́во: псало́м 50.

Кано́н воскре́сен. Гла́с 2.

Пе́снь 1

Ирмо́с: Во глубине́ постла́ иногда́, фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, Препросла́вленный Госпо́дь, сла́вно бо просла́вися.

Припе́в: Сла́ва, Го́споди, свято́му Воскресе́нию Твоему́.

Мирски́й кня́зь, Бла́же, ему́же написа́хомся, за́поведи Твоея́ не послу́шавше, Кресто́м Твои́м осуди́ся, прирази́ся бо Ти́ я́ко сме́ртну, отпаде́ же вла́сти Твоея́ держа́вою, и немощны́й обличи́ся.

Изба́витель ро́да челове́ческаго, и нетле́нному животу́ Нача́льник в ми́р прише́л еси́, Воскресе́нием бо Твои́м раздра́л еси́ сме́ртныя пелены́, е́же славосло́вим вси́: сла́вно бо просла́вися.

Богоро́дичен: Превы́шши яви́лася еси́, Чи́стая Присноде́во, вся́кия неви́димыя же и ви́димыя тва́ри, Зижди́теля бо родила́ еси́, я́ко благоволи́ воплоти́тися во утро́бе Твое́й, Его́же со дерзнове́нием моли́, спасти́ ду́ши на́ша.

Други́й кано́н крестовоскре́сен, [его́же краестро́чие: Пою́ хвалу́ Живоно́сному Сло́ву.] Гла́с 2.

Пе́снь 1

Ирмо́с: Нетре́ну, необы́чну, немо́кренно морску́ю ше́ствовав стезю́, избра́нный вопия́ше Изра́иль: Го́сподеви пои́м, я́ко просла́вися.

Си́ла немощны́х, воскресе́ние па́дших, и нетле́ние уме́рших бы́л еси́, Христе́, пло́ти Твоея́ стра́стию: я́ко просла́вися.

Уще́дри па́дший о́браз, и воскреси́ сокруше́нный, Соде́тель Бо́г и Обнови́тель умерщвле́н бы́в все́х оживи́: я́ко просла́вися.

И́н кано́н Пресвяте́й Богоро́дице, [его́же краестро́чие: Пою́ хвалу́ живоно́сней Отрокови́це.] Гла́с 2.

Пе́снь 1. Ирмо́с то́йже.

Невеще́ственная дре́вле ле́ствица, и стра́нно оледене́вший пу́ть мо́ря, Твое́ явля́ше Рождество́, Чи́стая, е́же пое́м вси́: я́ко просла́вися.

Си́ла Вы́шняго, Ипоста́сь Соверше́нная, Бо́жия Му́дрость, вопло́щшися, Пречи́стая, из Тебе́, к челове́ком прибли́жися я́ко просла́вися.

Про́йде сквозе́ две́рь непрохо́дную, заключе́нныя утро́бы Твоея́, Пра́вды Со́лнце, Чи́стая, и ми́рови возсия́: я́ко просла́вися.

Катава́сия: Отве́рзу уста́ моя́:

Пе́снь 3

Ирмо́с: Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Тва́рь в стра́сти Твое́й изменя́шеся, зря́щи Тя́ в нище́тне о́бразе от беззако́нных поруга́ема, основа́вшаго вся́ Боже́ственным манове́нием.

От пе́рсти по о́бразу мя́ руко́ю Твое́ю созда́л еси́, и сокруше́нна па́ки в пе́рсть сме́ртную за гре́х, Христе́, соше́д во а́д, совоскреси́л еси́.

Богоро́дичен: Чи́ни удиви́шася а́нгельстии, Пречи́стая, и челове́ческая устраши́шася сердца́ о Рождестве́ Твое́м: те́мже Тя́, Богоро́дицу, ве́рою чти́м.

И́н. Ирмо́с: Лу́к сокруши́ся си́льных держа́вою Твое́ю, Христе́, и си́лою немощству́ющии препоя́сашася.

И́же все́х вы́шши Христо́с, ума́лися ма́лым чи́м, стра́стию плотско́ю, а́нгельскаго естества́.

Ме́ртв со беззако́нными вмени́вся, сия́я жена́м венце́м сла́вы, Христе́, яви́лся еси́ от Воскресе́ния.

И́н. Ирмо́с то́йже.

И́же вре́мене превы́шший вся́каго, я́ко вре́менем Творе́ц, из Тебе́, Де́во, во́лею Младе́нец созда́ся.

Чре́во простра́ннейшее небе́с воспои́м, и́мже Ада́м на Небесе́х ра́дуяся живе́т.

Пе́снь 4

Ирмо́с: Прише́л еси́ от Де́вы, не хода́тай, ни а́нгел, но Са́м, Го́споди, вопло́щься, и спа́сл еси́ всего́ мя челове́ка. Те́м зову́ Ти: сла́ва си́ле Твое́й, Го́споди.

Предстои́ши суди́щу я́ко суди́м, Бо́же мо́й, не вопия́, Влады́ко, су́д износя́ язы́ком: и́мже Стра́стию Твое́ю, Христе́, вселе́нней соде́лал еси́ спасе́ние.

Стра́стию Твое́ю, Христе́, врагу́ оскуде́ша ору́жия, проти́вным же е́же во а́д схожде́нием Твои́м, гра́ды разруши́шася, и мучи́телева де́рзость низложе́на бы́сть.

Богоро́дичен: Тя́, приста́нище спасе́ния, и сте́ну недви́жиму, Богоро́дице Влады́чице, вси́ ве́рнии све́мы: Ты́ бо моли́твами Твои́ми избавля́еши от бе́д ду́ши на́ша.

И́н. Ирмо́с: Услы́шах, Го́споди, сла́вное Твое́ смотре́ние, и просла́вих, Человеколю́бче, непостижи́мую Твою́ си́лу.

Ви́девши на Дре́ве Тя́, Христе́, пригвожде́на Де́ва, Я́же неболе́зненно Тя́ ро́ждшая, ма́терски боле́зни претерпе́.

Побежде́на бы́сть сме́рть, Ме́ртв пленя́ет а́дова врата́, всея́дцу бо разо́ршуся, я́же па́че естества́ вся́ ми́ дарова́шася.

И́н. Ирмо́с то́йже.

Се́ превознесе́ся Боже́ственная Гора́ до́му Госпо́дня, превы́шше си́л, Богома́терь я́вственнейше.

Зако́нов есте́ственных кроме́, еди́на, Де́во, ро́ждши Влады́чествующаго тва́рию, сподо́билася еси́ Боже́ственнаго зва́ния.

Пе́снь 5

Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо, Влады́ко, к Светонача́льнику Отцу́ Твоему́, от но́щи неве́дения, приведе́ние и́мамы.

Я́ко ке́дры, Христе́, язы́ков шата́ние сокруши́л еси́ во́лею, Влады́ко, я́ко изво́лил еси́ на кипари́се, и на пе́вке, и ке́дре, пло́тию совозвыша́ем.

В ро́ве, Христе́, преиспо́днем положи́ша Тя́ бездыха́нна ме́ртва: но Твое́ю я́звою забве́нныя ме́ртвыя, и́же во гробе́х спя́щия, уя́звен с Собо́ю воскреси́л еси́.

Богоро́дичен: Моли́ Сы́на Твоего́ и Го́спода, Де́во Чи́стая, на Тя́ упова́ющим ми́р дарова́ти, плене́нным избавле́ние, от сопроти́вных настоя́ний.

И́н. Ирмо́с: У́гль Иса́ии проявле́йся, Со́лнце из де́вственныя утро́бы возсия́, во тьме́ заблу́ждшим, богоразу́мия просвеще́ние да́руя.

Пости́ти отверги́йся Ада́м, вкуша́ет смертоно́снаго дре́ва пе́рвый, но сего́ гре́х потребля́ет, распны́йся Вторы́й.

Естество́м челове́ческим стра́стен же и сме́ртен бы́л еси́, И́же Безстра́стный невеще́ственным Божество́м, обезтли́вый умерщвле́нныя, Христе́, от преиспо́дних а́довых воскреси́л еси́.

И́н. Ирмо́с то́йже.

О́блацы весе́лия сла́дость кропи́те су́щим на земли́, я́ко Отроча́ даде́ся, И́же сы́й пре́жде ве́к, от Де́вы вопло́щся Бо́г на́ш.

Житию́ и пло́ти мое́й све́т возсия́, и дря́хлость греха́ разруши́: напосле́док от Де́вы без се́мене вопло́щся Вы́шний.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Я́ко злоде́й Пра́ведник осуди́ся и со беззако́нными на Дре́ве пригвозди́ся, пови́нным оставле́ние Свое́ю да́руя Кро́вию.

Еди́нем у́бо челове́ком, пе́рвым Ада́мом дре́вле в ми́р вни́де сме́рть, и еди́нем Воскресе́ние Сы́ном Бо́жиим яви́ся.

Богоро́дичен: Неискусому́жно, Де́во, родила́ еси́, и ве́чнуеши Де́ва, явля́ющи и́стиннаго Божества́, Сы́на и Бо́га Твоего́ о́бразы.

И́н. Ирмо́с: Гла́с глаго́л моле́бных от боле́зненныя, Влады́ко, души́ услы́шав, от лю́тых мя́ изба́ви: еди́н бо еси́ на́шего спасе́ния вино́вен.

Блюсти́тели положи́л еси́ па́дшему, Херуви́мы Дре́ва Живо́тнаго, но ви́девше Тя́, две́ри отверзо́шася: яви́лся бо еси́ путетворя́ разбо́йнику в Ра́й.

Пу́ст а́д и испрове́ржен бы́сть сме́ртию Еди́наго; е́же бо мно́гое бога́тство сокро́виществова, Еди́н о все́х на́с Христо́с истощи́л е́сть.

И́н. Ирмо́с то́йже.

Естество́ челове́ческое рабо́тающее греху́, Влады́чице Чи́стая, Тобо́ю свобо́ду улучи́: Тво́й бо Сы́н, я́ко а́гнец, за все́х закала́ется.

Вопие́м Ти́ вси́ и́стинней Богома́тери, прогне́вавшия рабы́ изба́ви: еди́на бо дерзнове́ние к Сы́ну и́маши.

Конда́к, гла́с 2: Воскре́сл еси́ от гро́ба, Всеси́льне Спа́се, и а́д ви́дев чу́до, ужасе́ся, и ме́ртвии воста́ша: тва́рь же ви́дящи сра́дуется Тебе́, и Ада́м свесели́тся, и ми́р, Спа́се мо́й, воспева́ет Тя́ при́сно.

И́кос: Ты́ еси́ Све́т омраче́нным, Ты́ еси́ Воскресе́ние все́х, и Живо́т челове́ков, и все́х совоскреси́л еси́, сме́ртную держа́ву, Спа́се, разо́рь, и а́дова врата́ сокруши́вый, Сло́ве, и ме́ртвии ви́девше чу́до чудя́хуся, и вся́ка тва́рь сра́дуется о Воскресе́нии Твое́м, Человеколю́бче. Те́мже и вси́ сла́вим и пое́м Твое́ снизхожде́ние, и ми́р, Спа́се мо́й, воспева́ет Тя́ при́сно.

Пе́снь 7

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть; Христо́с же простре́ богочести́вым отроко́м ро́су духо́вную, сы́й благослове́н, и препросла́влен.

Не терпе́л еси́, Влады́ко, за благоутро́бие сме́ртию челове́ка зре́ти му́чима, но прише́л и спа́сл еси́ Твое́ю кро́вию, Челове́к бы́в: сы́й благослове́н, и препросла́влен Бо́г оте́ц на́ших.

Ви́девше Тя́, Христе́, оболче́на во оде́жду отмще́ния, ужасо́шася вра́тницы а́довы, безу́мнаго бо мучи́теля раба́, Влады́ко, прише́л еси́ уби́ти: сы́й благослове́н и препросла́вен Бо́г оте́ц на́ших.

Богоро́дичен: Святы́х Святе́йшую Тя́ разуме́ем, я́ко Еди́ну ро́ждшую Бо́га Непреме́ннаго, Де́во Нескве́рная, Ма́ти Безневе́стная: все́м бо ве́рным источи́ла еси́ нетле́ние, Боже́ственным Рождество́м Твои́м.

И́н. Ирмо́с: Вети́и яви́шася о́троцы, любому́дрейшии дре́вле, от богоприя́тныя бо души́ богосло́вяще, устна́ми поя́ху: Пребоже́ственный отце́в и на́ш Бо́же, благослове́н еси́.

Осуди́ пра́отца дре́вле во Еде́ме преслуша́ние: но во́лею суди́м бы́сть, престу́пльшему разреша́я прегреше́ния, Пребоже́ственный отце́в Бо́г, и препросла́влен.

Спа́сл еси́ уя́звеннаго язы́ком, за́вистию человекоуби́йцы, во Еде́ме во́льное бо угрызе́ние во́льною стра́стию исцели́л еси́, Пребоже́ственный отце́в Бо́г, и препросла́влен.

Богоро́дичен: Ходя́ща мя́ в се́ни сме́ртней призва́л еси́ к све́ту, темнозра́чный а́д, блиста́нием обло́ж Божества́, Пребоже́ственный отце́в Бо́г, и препросла́влен.

И́н. Ирмо́с то́йже.

Зря́ше в нощи́ у́бо Иа́ков, я́ко в гада́нии Бо́га воплоще́нна, из Тебе́ же све́тлостию яви́ся пою́щим: Пребоже́ственный отце́в Бо́г, и препросла́влен.

Зна́мения я́же в Тебе́ неизрече́ннаго проявля́я сня́тия, со Иа́ковом бо́рется, и́мже во́лею соедини́ся челове́ком, Чи́стая: Пребоже́ственный отце́в Бо́г, и препросла́влен.

Ме́рзок и́же не пропове́дует Тя́ Де́вы Сы́на, Еди́наго от Препе́тыя Тро́ицы несумне́нною мы́слию, и язы́ком вопия́: Пребоже́ственный отце́в Бо́г, и препросла́влен.

Пе́снь 8

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Кро́вию Твое́ю, Христе́, очервле́но пло́ти Твоея́ зря́ще одея́ние тре́петом ужаса́хуся мно́гому Твоему́ долготерпе́нию, а́нгельстии чи́ни, зову́ще: благослови́те вся́ дела́ Госпо́дня Го́спода.

Ты́ мое́ сме́ртное оде́ял еси́, Ще́дре, в безсме́ртие Воста́нием Твои́м. Те́мже веселя́щеся благода́рственно воспева́ют Тя́ избра́ннии лю́дие, Христе́, зову́ще Тебе́: поже́рта бы́сть вои́стинну сме́рть побе́дою.

Богоро́дичен: Ты́ И́же Отцу́ неразлу́чнаго, во утро́бе богому́жно пожи́вша безсе́менно зачала́ еси́, и неизрече́нно родила́ еси́, Богороди́тельнице Пречи́стая: те́мже Тя́ спасе́ние все́х на́с све́мы.

И́н. Ирмо́с: О подо́бии зла́те, небре́гше треблаже́ннии ю́ноши, неизме́нный и живы́й Бо́жий о́браз ви́девше, среди́ огня́ воспева́ху: осуществова́нная да пое́т Го́спода вся́ тва́рь, и превозно́сит во вся́ ве́ки.

Ви́ден бы́л еси́ на Кресте́ пригвожда́ем, И́же бога́тый в ми́лости, во́лею погре́блся еси́, и тридне́вно воскре́сл еси́, и изба́вил еси́ вся́ челове́ки, Человеколю́бче, ве́рою пою́щия: да пое́т Го́спода вся́ тва́рь, и превозно́сит во вся́ ве́ки.

Изба́вити от истле́ния, соше́д в преиспо́дняя, Сло́ве Бо́жий, его́же созда́л еси́, Христе́, си́лою Твое́ю Боже́ственною, и без истле́ния сотво́рь, сла́вы присносу́щныя Твоея́ прича́стника соде́лал еси́, да пое́т, зову́щи, вся́ тва́рь, и превозно́сит Христа́ во ве́ки.

И́н. Ирмо́с то́йже.

Ви́ден бы́сть на земли́ Тобо́ю, и с челове́ки поживе́, И́же бла́гостию Несравне́нный и си́лою, Ему́же пою́ще вси́ ве́рнии зове́м: осуществова́нная да пое́т Го́спода вся́ тва́рь, и превозно́сит во вся́ ве́ки.

Вои́стинну Тя́, Чи́стую, пропове́дающе сла́вим Богоро́дицу: Ты́ бо еди́на родила́ еси́ от Тро́ицы воплоще́нна, Ему́же со Отце́м и Ду́хом вси́ пое́м: да пое́т Го́спода вся́ тва́рь, и превозно́сит во вся́ ве́ки.

Та́же, пое́м пе́снь Богоро́дицы: Вели́чит душа́ моя́ Го́спода: с припе́вом: Честне́йшую Херуви́м:

Пе́снь 9

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы на́м яви́ся, омраче́нная просвети́ти, собра́ти расточе́нная: те́м Всепе́тую Богоро́дицу велича́ем.

Я́ко в Раи́ насажде́но на Ло́бнем, Спа́се, требога́тое Дре́во Твоего́ пречи́стаго Креста́, Кро́вию и водо́ю Боже́ственною, я́ко от исто́чника Боже́ственнаго, ребра́ Твоего́, Христе́, напоя́емо, живо́т на́м прозябло́ е́сть.

Низложи́л еси́ си́льныя, распны́йся, Всеси́льне, и е́же ни́зу лежа́щее во а́дове тверды́ни, естество́ челове́ческое возне́с, на О́тчем посади́л еси́ Престо́ле. С Ни́мже Тебе́ гряду́щу покланя́ющеся, велича́ем.

Тро́ичен: Еди́ницу Тричи́сленную, Тро́ицу Единосу́щную правосла́вно пою́ще ве́рнии, сла́вим: Непресеко́мо Пребоже́ственное Естество́, Трисве́тлую, Невече́рнюю Зарю́, Еди́ну Нетле́нную на́м Све́т Возсия́вшую.

И́н. Ирмо́с: От Бо́га Бо́га Сло́ва:

Посреде́ осужде́нных, я́ко а́гнец возвы́шен бы́л еси́, Христе́, на Кресте́, на Ло́бнем копие́м в ребро́ пробода́ем, живо́т дарова́л еси́ на́м пе́рстным я́ко Бла́г, ве́рою чту́щим Боже́ственное Твое́ Воскресе́ние.

И́же Свое́ю сме́ртию, сме́рти держа́ву си́лою упраздни́вшему Бо́гу вси́ ве́рнии поклони́мся, я́ко и́же от ве́ка ме́ртвыя совоскреси́, и все́м подае́т живо́т и Воскресе́ние.

И́н. Ирмо́с: Ве́сь еси́ жела́ние, ве́сь сла́дость, Сло́ве Бо́жий, Де́вы Сы́не, Бо́же бого́в, Го́споди, святы́х Пресвяты́й. Те́м Тя́ вси́ с Ро́ждшею велича́ем.

Же́зл кре́пости даде́ся естеству́ тле́нному, Сло́во Бо́жие во утро́бе Твое́й, Чи́стая, и сие́ воскреси́, до а́да попо́лзшееся. Те́мже тя́, Всечи́стая, я́ко Богоро́дицу велича́ем.

Ю́же изво́лил еси́, Влады́ко, приими́ ми́лостивно моли́твенницу, Ма́терь Твою́ о на́с, и Твоея́ бла́гости вся́ческая испо́лнятся: да тя́ вси́ я́ко Благоде́теля велича́ем.

По катава́сии, ектения́ ма́лая. Та́же, Свя́т Госпо́дь Бо́г на́ш. Посе́м ексапостила́рий у́тренний.

На хвали́тех стихи́ры воскре́сны, гла́с 2:

Сти́х: Сотвори́ти в ни́х су́д напи́сан: сла́ва сия́ бу́дет все́м преподо́бным Его́.

Вся́кое дыха́ние и вся́ тва́рь, Тя́ сла́вит, Го́споди, я́ко Кресто́м сме́рть упраздни́л еси́, да пока́жеши лю́дем, е́же из ме́ртвых Твое́ Воскресе́ние, я́ко Еди́н Человеколю́бец.

Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.

Да реку́т иуде́е, ка́ко во́ини погуби́ша стрегу́щии Царя́? Почто́ бо ка́мень не сохрани́ Ка́мене жи́зни? Или́ погребе́ннаго да дадя́т, или́ Воскре́сшему да покло́нятся, глаго́люще с на́ми: сла́ва мно́жеству щедро́т Твои́х, Спа́се на́ш, сла́ва Тебе́.

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

Ра́дуйтеся, лю́дие, и весели́теся, А́нгел седя́й на ка́мени гро́бнем, то́й на́м благовести́, ре́к: Христо́с воскре́се из ме́ртвых, Спа́с ми́ра, и испо́лни вся́ческая благоуха́ния: ра́дуйтеся, лю́дие, и весели́теся.

Сти́х: Хвали́те Его́ во гла́се тру́бнем: хвали́те Его́ во псалти́ри и гу́слех.

А́нгел у́бо, е́же ра́дуйся, пре́жде Твоего́ зача́тия, Го́споди, Благода́тней принесе́: А́нгел же ка́мень сла́внаго Твоего́ гро́ба в Твое́ Воскресе́ние отвали́; о́в у́бо в печа́ли ме́сто, весе́лия о́бразы возвеща́я, се́й же в сме́рти ме́сто, Влады́ку Жизнода́вца пропове́дуя на́м, те́мже вопие́м ти́: Благоде́телю все́х, Го́споди, сла́ва Тебе́.

И́ны стихи́ры Анато́лиевы, гла́с 2.

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

Возлия́ша ми́ра со слеза́ми на гро́б Тво́й жены́, и испо́лнишася ра́дости уста́ и́х, внегда́ глаго́лати: воскре́се Госпо́дь.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.

Да похва́лят язы́цы и лю́дие Христа́ Бо́га на́шего, во́лею на́с ра́ди Кре́ст претерпе́вшаго, и во а́де тридне́вновавшаго, и да покло́нятся его́ из ме́ртвых Воскресе́нию, и́мже просвети́шася всего́ ми́ра концы́.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Ра́спят и погребе́н бы́л еси́, Христе́, я́коже изво́лил еси́, испрове́ргл еси́ сме́рть, и воскре́сл еси́ во сла́ве, я́ко Бо́г и Влады́ка, да́руя ми́рови жи́знь ве́чную и ве́лию ми́лость.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

О вои́стинну, беззако́ннии, печа́тавше ка́мень, бо́льших на́с чуде́с сподо́бисте! И́мут ра́зум стра́жие, дне́сь про́йде из гро́ба, и глаго́лаху: рцы́те, я́ко на́м спя́щим, приидо́ша ученицы́, и украдо́ша Его́. И кто́ кра́дет мертвеца́, па́че же и на́га? Са́м воскре́се самовла́стно я́ко Бо́г, оста́вль во гро́бе и погреба́тельная Своя́; прииди́те ви́дите, иуде́е, ка́ко не расто́рже печа́ти, сме́рть попра́вый и ро́ду челове́ческому безконе́чную жи́знь да́руяй, и ве́лию ми́лость.

Сла́ва: стихи́ра ева́нгельская. И ны́не: Богоро́дичен: Преблагослове́нна еси́ Богоро́дице: Славосло́вие вели́кое. По славосло́вии тропа́рь:

Воскре́с из гро́ба, и у́зы растерза́л еси́ а́да, разруши́л еси́ осужде́ние сме́рти, Го́споди, вся́ от сете́й врага́ изба́вивый, яви́вый же Себе́ апо́столом Твои́м, посла́л еси́ я́ на про́поведь, и те́ми ми́р Тво́й пода́л еси́ вселе́нней, Еди́не Многоми́лостиве.

Гла́с Ти́ прино́сим разбо́йнич, и мо́лимся: помяни́ на́с, Спа́се, во Ца́рствии Твое́м.

Сти́х: Блаже́ни чи́стии се́рдцем, я́ко ти́и Бо́га у́зрят.

Кре́ст Тебе́ прино́сим в проще́ние прегреше́ний: его́же на́с ра́ди прия́л еси́, Человеколю́бче.

Сти́х: Блаже́ни миротво́рцы, я́ко ти́и сы́нове Бо́жии нареку́тся.

Покланя́емся Твоему́, Влады́ко, погребе́нию, и Воста́нию: и́миже от тле́ния изба́вил еси́ ми́р, Человеколю́бче.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Сме́ртию Твое́ю, Го́споди, поже́рта бы́сть сме́рть, и Воскресе́нием Твои́м, Спа́се, ми́р спа́сл еси́.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Мироно́сицы сре́тил еси́, воскре́с от гро́ба, и ученико́м возвести́л еси́, рещи́ Твое́ Воста́ние.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

И́же во тьме́ спя́щии Тя́ Све́т ви́девше, в преиспо́днейших а́довых, Христе́, воскресо́ша.

Сла́ва: Отца́ просла́вим, Сы́ну поклони́мся вси́, и Cвято́му Ду́ху ве́рно воспои́м.

И ны́не: Богоро́дичен: Ра́дуйся, Престо́ле Огнезра́чный. Ра́дуйся, Неве́сто Неневе́стная. Ра́дуйся, Я́же Бо́га челове́ком, Де́во, ро́ждшая.

Проки́мен, гла́с 2: Кре́пость моя́ и пе́ние мое́ – Госпо́дь, и бы́сть мне́ во спасе́ние.

Сти́х: Наказу́я наказа́ мя Госпо́дь, сме́рти же не предаде́ мя.

Аллилу́ия: Услы́шит тя́ Госпо́дь в де́нь печа́ли, защи́тит тя́ И́мя Бо́га Иа́ковля.

Сти́х: Го́споди, спаси́ царя́, и услы́ши ны́, во́ньже а́ще де́нь призове́м Тя́.

на Го́споди воззва́х: стихи́ры умили́тельны. Гла́с 2.

Подо́бен: Егда́ от дре́ва:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Име́яй благоутро́бия исто́чник, источа́яй же бе́здны ми́лостей, и пото́ки щедро́т, О́тче Преблаги́й, и Сы́не, Сло́во О́тчее, и Ду́ше Святы́й, Несозда́нное Естество́, приими́ моле́ние и моли́тву на́шу, все́м в прегреше́ниих су́щим подая́ проще́ние, я́ко Бо́г Ще́др и Человеколю́бец.

Сти́х: Имене́ ра́ди Твоего́ потерпе́х Тя́ Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

И́маши по естеству́ я́ко Бо́г, утро́бу щедро́т, и ми́лости и благосты́ни; те́мже мо́лим Тя́, Христе́ Спа́се на́ш, и припа́дающе зове́м, при́сно ти́ вопию́ще: да́руй рабо́м Твои́м прегреше́ний мно́гих разреше́ние и проще́ние все́х, и́хже согреши́хом вси́, я́ко Бо́г Ще́др и Человеколю́бец.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Спасти́ хотя́, Спа́се все́х, я́ко Бо́г, и́хже ра́ди вочелове́чився, и яви́лся еси́ Челове́к, спаси́ на́с покланя́ющихся твои́м за́поведем. Не прише́л бо еси́, Человеколю́бче, пра́ведники спасти́, но и́же в прегреше́ниих окова́нных на́с мно́гими грехи́, разреши́ти благода́тию Креще́ния Боже́ственнаго, я́ко Бо́г Ще́др и Человеколю́бец.

Та́же стихи́ры Мине́и.

А́ще не́сть Мине́и, и́ны стихи́ры святы́м Небе́сным безпло́тным а́нгелом, гла́с и подо́бен то́йже:

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Престо́ли, Херуви́ми и Серафи́ми, Госпо́дьствия же и Си́лы, и Вла́сти честны́я, А́нгели, Арха́нгели и Нача́ла с ни́ми, те́х нетле́нное естество́ Соста́вльшему: пе́снь непреста́нную согла́сно пою́т, еди́но в Тро́ице существо́ вся́ науча́юще чести́, сра́слено, единоче́стно и сопресто́льно.

Сти́х: Хвали́те Го́спода вси́ язы́цы, похвали́те его́ вси́ лю́дие.

Пе́рвии невеще́ственных ли́цы, Богонача́льствия зари́, нехода́тайственными сия́ньми подъе́млюще, по чи́ну и́х про́чим преподава́ют Боже́ственныя све́тлости, и прино́сят на́м сия́ любо́вным зако́ном, по достоя́нию та́кожде, к серде́чней кому́ждо чистоте́ с прилежа́нием.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Горе́ к высоте́, души́ горе́ серде́чное о́ко, и у́мная стремле́ния, любо́вию Боже́ственною иму́ще, в душа́х свои́х простира́ем всегда́, я́ко да и́же отту́ду луча́ми облиста́еми, убе́гнем тьмы́ страсте́й, ча́юще со а́нгелы предста́ти стра́шному Престо́лу Зижди́теля, и преобрази́тися от све́та во Све́т.

Сла́ва, и ны́не: Богоро́дичен: Мно́жество а́нгел Сы́на Твоего́, Пречи́стая, воспева́ют трисвяты́ми гла́сы, я́ко престо́л Тя́ Того́ су́щую огнезра́чен, и пала́ту одушевле́нную, мо́ст Боже́ственный, и́же от земли́ преводя́щи всегда́ к Нему́; ра́дуйся обра́дованная, вопию́ще Ти́ согла́сно со арха́нгелом Гаврии́лом, я́ко ро́ждшей Исто́чника ра́дости.

Та́же: Све́те ти́хий: Проки́мен: Се́ ны́не благослови́те Го́спода вси́ раби́ Госпо́дни: И Сподо́би Го́споди:

На стихо́вне стихи́ры умили́тельны, гла́с 2:

Согреши́х Ти́, Христе́ Спа́се, я́ко блу́дный сы́н: приими́ мя, Отче, ка́ющася и поми́луй мя́, Бо́же.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Вопию́ Ти, Христе́ Спа́се, мытаре́вым гла́сом: очи́сти мя́ я́коже о́наго, и поми́луй мя́, Бо́же.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.

И́же земны́я сла́дости не возлю́бльше страстоте́рпцы, Небе́сным благи́м сподо́бишася, и а́нгелом согра́ждане бы́ша: Го́споди, моли́твами и́х поми́луй, и спаси́ на́с.

Сла́ва, и ны́не: Богоро́дичен: Ра́дуйся, Мари́е Богоро́дице, Хра́ме Неразруши́мый, па́че же Святы́й, я́коже вопие́т проро́к: свя́т хра́м Тво́й, ди́вен в пра́вде.

Та́же, Ны́не отпуща́еши: Трисвято́е по О́тче на́ш: тропа́рь свято́му. Сла́ва, и ны́не: Богоро́дичен, по гла́су тропаря́. Ектения́ и отпу́ст.

Кано́н похва́льный Пресвяте́й Богоро́дице. Гла́с 2.

Пе́снь 1

Ирмо́с: Во глубине́ постла́ иногда́, фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Вообра́жся из Тебе́ по на́м, Со́лнце Невече́рнее, Тя́ слове́сное Не́бо, и светле́йшее, я́вственне показа́. Те́мже мя́ изба́ви стра́стнаго смра́да, я́ко да воспою́ любо́вию Тя́, Еди́ну Ма́терь Де́ву.

Клещу́ мы́сленный Угль носи́вшую, и челове́ческое естество́ очи́стившую, молю́ Тя, Влады́чице: мно́гих мои́х прегреше́ний скве́рну омы́й, и от оскверня́ющих страсте́й изба́ви мя́ моли́твами Твои́ми.

Сла́ва: И́же Исто́чник ми́лости Христа́, Пречи́стая ро́ждши, и Еде́м челове́ком отве́рзши, две́ри отве́рзи ми́ ми́лости Твоея́, Богоро́дице, и да́руй согреше́ний проще́ние, Влады́чице ми́ру.

И ны́не: Мои́х прегреше́ний плени́цы расто́ргни, Влады́чице, Твоего́ Сы́на и Бо́га моля́щи, и томя́щий мя́ гре́х низложи́, Присноде́во, я́ко да воспою́ Тя всегда́, Пренепоро́чная, спаса́емь.

Пе́снь 3

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́ бо ся ду́х мо́й внегда́ пе́ти: не́сть свя́т, я́коже Бо́г на́ш, и не́сть пра́ведн па́че Тебе́, Го́споди.

Мглу́ страсте́й мои́х и омраче́ние отжени́, заря́ми моли́тв Твои́х, и просвети́ мя, Пречи́стая Влады́чице, ро́ждшая возсия́вшаго пре́жде денни́цы Христа́, от Со́лнца Со́лнце Незаходи́мое.

Возста́вила еси́, Пречи́стая, Твои́м Рождество́м, ски́нию па́дшую и сокруше́нную, Дави́да Твоего́ пра́отца: те́мже возста́ви, Богоро́дице, и мене́ раба́ Твоего́, сокруше́наго страстьми́ и прегреше́нии.

Сла́ва: Прогоня́ющее ору́жие грехи́ и стра́сти души́ моея́ бу́ди, Де́во, и покажи́ мя я́коже други́й ра́й, безнаве́тен и соблюде́н Тобо́ю и принося́щ цве́ты Ду́ха.

И ны́не: Просте́рши ру́ку благоутро́бия, приими́ мя, Богороди́тельнице, и вся́каго исхити́ осужде́ния к Тебе́ прибега́ющаго, и Тебе́ припа́дающа, и призыва́ющаго Твою́ по́мощь.

Пе́снь 4

Ирмо́с: Пою́ Тя, слу́хом бо, Го́споди услы́шах и ужасо́хся: до мене́ бо и́деши, мене́ ища́ заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Ква́с челове́ческаго естества́, нескве́рный и святы́й, от него́же прие́м те́сто, созда́ Его́ Зижди́тель: и мне́ страсте́й скве́рну омы́й, и ка́л прегреше́ний мои́х очи́сти.

Лечбо́ю моли́тв Твои́х, Влады́чице, и пла́стырем, и ма́слом, души́ моея́ стру́пы, и я́звы грехо́вныя ны́не исцели́, Чи́стая, я́ко ро́ждши Богонача́льную Цельбу́ естества́.

Сла́ва: Плени́цу страсте́й мои́х разреши́, Влады́чице, и вери́ги грехо́в мои́х расто́ргни ору́жием моли́тв Твои́х, Христа́ ро́ждшая, подаю́щаго избавле́ние свя́занным во а́де.

И ны́не: Стра́сти души́ моея́ исцели́, омрачи́вшия мя́ преокая́нне, и по́мысл просвети́, дале́че отгоня́ющи, Чи́стая, тьмы́ бесо́в оскорбля́ющих мя́ и по вся́ дни́ се́ти простира́ющих мне́.

Пе́снь 5

Ирмо́с: Просвеще́ние во тьме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ Ми́ра, просвети́ мя сия́нием Твои́м: ино́го бо ра́зве Тебе́ бо́га не зна́ю.

От кля́твы дре́вния ми́р я́ко изба́вила еси́, Влады́чице, ми́ру благослове́ние Христа́ ро́ждшая, помышле́ний безме́стных изба́ви мя́, и вся́кия печа́ли, еди́на бо еси́ ве́рных ра́дование.

Окружа́ет души́ моея́ гра́д бесо́вский по́лк, и разплени́ти зело́ покуша́ется; Пресла́вная Влады́чице, гра́де все́х Царя́, огради́ мя сто́лпными стена́ми, Твои́ми моли́твами, и спаси́.

Сла́ва: Бу́ря люта́ развраще́ний, духо́в лука́вствия, мою́ мы́сль смуща́ет: предвари́ ско́ро, и ути́ши сию́, Ро́ждшая вся́кия тва́ри Еди́наго Ко́рмчия, Христа́ Всеси́льнаго.

И ны́не: Возсия́й ми́ све́т покая́ния, Богороди́тельнице, во тьме́ поги́бельней затворе́нному, да́руй ру́ку по́мощи лежа́щему, и Твои́ми моли́твами воздви́гни мя́, Чи́стая, твори́ти Бо́жия оправда́ния.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Я́ко Жи́знь ве́чную ро́ждши, Пречи́стая, от те́ла души́ мое́й исходя́щей, сме́рть Твои́ми моли́твами умертви́.

Ло́вит искуша́я мя́ зми́й человеконенави́стный – сего́ упраздни́, Влады́чице, я́ко ро́ждши главы́ Сокру́шшаго змие́в.

Сла́ва: Стропо́тныя стези́ ше́ствовавшаго к пра́вей стези́ наста́ви, Я́же Пу́ть Жи́зни ро́ждшая, Христа́ Бо́га на́шего.

И ны́не: Души́ моея́ стра́сти исцели́, и печа́ли недоуме́ние победи́, Я́же Бо́га ро́ждшая на спасе́ние челове́ком, Пречи́стая.

Та́же, Го́споди поми́луй, три́жды. Сла́ва, и ны́не:

Седа́лен, подо́бен. Гла́с 2:

Милосе́рдия су́щи исто́чник, ми́лости сподо́би на́с, Богоро́дице, при́зри на лю́ди согреши́вшия, яви́ я́ко при́сно си́лу Твою́: на Тя́ бо упова́юще, ра́дуйся, вопие́м Ти́, я́коже иногда́ Гаврии́л, безпло́тных архистрати́г.

Пе́снь 7

Ирмо́с: Те́лу злато́му прему́дрыя де́ти не послужи́ша, и в пла́мень са́ми поидо́ша, и бо́ги и́х обруга́ша, среди́ пла́мене возопи́ша, и ороси́ я́ А́нгел: услы́шася уже́ у́ст ва́ших моли́тва.

Смуща́ет ми́ у́м, и коле́блет ду́шу волна́ страсте́й, но ро́ждшая, мо́ре волну́ющееся повеле́нием Боже́ственным Обуздава́ющаго, Де́во, к тишине́ преложи́ безстра́стия, и плотско́е уста́ви смуще́ние.

Тя́ две́рь ве́дый мы́сленнаго Восто́ка, с Небесе́ я́вльшуюся, вни́ти в Небеса́ Тобо́ю, Де́во, ра́б Тво́й молю́ся: те́мже приими́ мя, Влады́чице, и све́том наста́ви.

Сла́ва: На Кресте́ Христо́с Сы́н Тво́й распе́нся во́лею, нача́ла тьмы́ посрами́, и сме́ртную разруши́ тлетво́рную си́лу – И́мже, Влады́чице Пречи́стая, стра́стное мое́ пло́ти мудрова́ние умертви́.

И ны́не: Не преста́й, Чи́стая, моля́щи от Тебе́ ро́ждшагося Бо́га, о и́же ве́рою притека́ющих к Тебе́, и прося́щих избавле́ния, Еди́на Засту́пнице ми́ру, отча́янным наде́жда и заступле́ние, обурева́емым в лю́тых при́сно по́мощь.

Пе́снь 8

Ирмо́с: О подо́бии зла́те небре́гше треблаже́нии ю́ноши, неизме́нный и живы́й Бо́жий о́браз ви́девше, среди́ огня́ воспева́ху: осуществова́нная да пое́т Го́спода вся́ тва́рь, и превозно́сит во вся́ ве́ки.

Богоде́ланная Ски́ние, су́щая Свята́го Святы́х, показа́вшаго дре́вния ски́нии о́браз, Архиере́а Вели́ка вну́трь иму́щи, мое́ се́рдце, Де́во, яви́ Вы́шняго, и все́х Царя́ Христа́ ски́нию свя́ту.

Боже́ственный Ковче́г носи́вши и Скрижа́ли Заве́та, Неопи́саннаго Сы́на Твоего́ Христа́, Де́во, Сло́во Бо́жие Пречи́стое, Сему́ написа́тися, я́коже на дсце́ души́ моея́ сотвори́ пе́рстом Бо́жиим, Твои́ми моли́твами.

Сла́ва: Усече́ся от Твои́х ложе́сн, Пренепоро́чная Влады́чице, я́ко от горы́ честны́й Ка́мень, и столпы́ вся́кия пре́лести, я́ко Вседержи́тель Еди́н Всеси́льный сокруши́ – И́мже ны́не о́бразы страсте́м потреби́ души́ моея́, мы́сленных вра́г сокруши́вши че́люсти.

И ны́не: Вода́ми живо́тными, изсо́хшее мое́ се́рдце грехо́вным пла́менем, Ты́ напо́й, Де́во Богоро́дице, во умиле́нии всегда́ соблюда́ющи мя́, со стра́хом пою́ща: да пое́т Го́спода вся́ тва́рь, и превозно́сит Его́ во ве́ки.

Пе́снь 9

Ирмо́с: Я́же пре́жде со́лнца свети́льника Бо́га возсия́вшаго, пло́тски к на́м прише́дшаго, из боку́ деви́чу неизрече́нно воплоти́вшая, благослове́нная Всечи́стая, Тя́, Богоро́дице, велича́ем.

Пра́вды Со́лнце, Чи́стая, Христа́ возсия́ла еси́, и Не́бо показа́ся пресве́тло, И́мже но́щь страсте́й мои́х, Твои́ми моли́твами разори́, и ду́шу мою́ просвети́, и се́рдце мое́ озари́ и уясни́.

Суди́, Богоро́дице, и препри́ лю́таго моего́ сопоста́та, и от того́ мя оскорбле́ния изба́ви, Судию́ бо Блага́го и Пра́веднаго родила́ еси́, И́же в не́дрех Божества́ осуди́вшаго сме́рть.

Сла́ва: И́же безпло́тных существа́ я́ко Бо́г составле́й, из Тебе́, Де́во Отрокови́це, воплоти́ся. Те́мже изба́ви мя́ плотска́го страсте́й обстоя́ния и плотска́го мудрова́ния, Твоего́ раба́ Твои́ми моли́твами.

И ны́не: Разруши́ла еси́ Е́вину печа́ль, Ада́ма Но́ваго ро́ждши, пре́жде Ада́мово естество́ Созда́вшаго. Те́мже разреши́ и мои́х прегреше́ний рукописа́ние, напа́стей и скорбе́й и страсте́й мя́ свобожда́ющи.

Та́же, Досто́йно е́сть: Трисвято́е, и по О́тче на́ш: Тропари́, и про́чее обы́чно, и отпу́ст.

По 1-м стихосло́вии седа́льны умили́тельны. Гла́с 2:

Я́ко во́лны морски́я воста́ша на мя́ беззако́ния моя́, и я́ко кора́бль в пучи́не, а́з еди́н погружа́юся согреше́ньми мно́гими, но в ти́хое приста́нище покая́ния наста́ви мя́, Го́споди, и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

А́з е́смь дре́во непло́дное, Го́споди, покая́ния плода́ не творя́ отню́д, и посече́ния бою́ся, и огня́ о́наго устраша́юся негаси́маго. Те́мже Тя́ молю́: пре́жде о́ныя беды́ обрати́ и спаси́ мя.

Сла́ва, и ны́не: Богоро́дичен: Милосе́рдия су́щи исто́чник, ми́лости сподо́би на́с, Богоро́дице, при́зри на лю́ди согреши́вшия, яви́ я́ко при́сно си́лу Твою́: на Тя́ бо упова́юще, ра́дуйся, вопие́м Ти́, я́коже иногда́ Гаврии́л, безпло́тных архистрати́г.

По 2-м стихосло́вии седа́льны, гла́с 2:

Поми́луй мя́, рече́ Дави́д, и а́з Тебе́ зову́: согреши́х, Спа́се, моя́ грехи́ покая́нием очи́сти, и поми́луй мя́.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Поми́луй мя́ Бо́же, поми́луй мя́, о двою́ греху́ Дави́д пла́кашеся, а́з же о тьма́х прегреше́ний вопию́ Ти; о́н посте́лю слеза́ми омака́ше, а́з же ка́пли ни еди́ныя притяжа́х. Отчаява́юся и молю́: поми́луй мя́, Бо́же, по вели́цей ми́лости Твое́й.

Сти́х: Ди́вен Бо́г во святы́х Свои́х, Бо́г Изра́илев.

Тебе́ одева́ющаго не́бо о́блаки, иму́ще святи́и одея́ние, в ми́ре му́ки от беззако́нник претерпе́ша, и ле́сть и́дольскую упраздни́ша. Те́х моли́твами и на́с свободи́ от неви́димаго врага́, Спа́се, и спаси́ на́с.

Сла́ва, и ны́не: Богоро́дичен: Тебе́ велича́ем, Богоро́дице, вопию́ще: ра́дуйся, Незаходи́маго Све́та о́блаче, Сего́ носи́вши в не́дрех Твои́х, Сла́вы Го́спода.

По 3-м стихосло́вии, седа́льны, гла́с 2:

Подо́бен: Милосе́рдия су́щи:

В неве́дении и ра́зуме согреша́я, в нощи́ и во дни́, Тебе́, Христе́, прогне́ваю, еди́н на земли́ беззако́нии мои́ми; Еди́не Благи́й, Безгре́шне, обрати́ и спаси́ мя мольба́ми а́нгел Твои́х, прише́дый милосе́рдием гре́шныя призва́ти на покая́ние.

Безпло́тных пресвяти́и ли́цы, мо́лят Тя́, Бо́га Блага́го и Влады́ку, пощади́ти на́с в ча́с осужде́ния, и изба́вити на́с го́рькаго муче́ния, бесо́вския зло́бы, и страсте́й омраче́ния, и вся́каго преще́ния, прибега́ющих любо́вию к покро́ву ва́шему.

Сла́ва, и ны́не: Богоро́дичен: Богоро́дице Безневе́стная Чи́стая, Я́же без се́мене ро́ждшая все́х Влады́ку, Того́ со а́нгелы моли́, изба́витися на́м от вся́каго недоуме́ния, и да́ти умиле́ние и све́т душа́м на́шим, и согреше́ний очище́ние, Я́же еди́на вско́ре заступа́ющи.

Кано́н умиле́ния, ко Го́споду на́шему Иису́су Христу́, и святы́м его́ му́чеником. [Его́же краегране́сие си́це: Ту́чу да́ждь ми́ сле́з, Бо́жий Сло́ве.] Творе́ние Ио́сифово. Гла́с 2.

Пе́снь 1

Ирмо́с: Гряди́те лю́дие, пои́м пе́снь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты Еги́петския, я́ко просла́вися.

Вопло́щся, Сло́ве, и не прише́д пра́ведники, я́коже ре́кл еси́, но гре́шники призва́ти на покая́ние, мно́го согреши́вша приими́ и спаси́ мя.

Еди́н а́з грехо́м порабоще́н е́смь, еди́н а́з страсте́м две́ри отверзо́х: Благопремени́телю Еди́не, обрати́в мя́, спаси́ милосе́рдием Твои́м.

Му́ченичен: На Суди́щи Твое́м, Го́споди, венцы́ нося́ще предстоя́т страстоно́сцы, лука́ваго победи́вше де́рзость, и безсме́ртием обогати́вшеся.

Му́ченичен: Струи́ на́м исцеле́ний источа́юще страстоте́рпцы, всегда́ тече́ния пло́ти на́шея стра́сти изсуша́ют, си́лою Боже́ственнаго Ду́ха.

Богоро́дичен: Я́же Исто́чник безстра́стия ро́ждшая, уя́звенаго мя́ страстьми́, Отрокови́це, исцели́, и огня́ ве́чнаго исхити́ мя, Еди́на Богоблагода́тная.

Други́й кано́н святы́м Небе́сным безпло́тным а́нгелом, [его́же краегране́сие: Пою́ хвалу́ ли́ку а́нгельскому.] Творе́ние Феофа́ново. Гла́с 2.

Пе́снь 1

Ирмо́с: Нетре́ну, необы́чну, немо́кренно морску́ю ше́ствовав стезю́, избра́нный вопия́ше Изра́иль: Го́сподеви пои́м, я́ко просла́вися.

У́глие богоно́сное, заре́ю разже́гшееся Твоего́ существа́, безпло́тныя яви́л еси́ ли́ки, Тебе́, Христе́, сла́вящия, я́ко Всеси́льна.

Си́лу нетле́ния, и сла́ву стяжа́вше безсме́ртия дарова́нную а́нгели, Христе́, е́же к Тебе́ приближе́нием просвеща́ются.

Яви́шася светоно́сцы, и́же невеще́ственную показу́юще, и по естеству́ образми́ а́нгели, Христе́, чу́вственне вообразу́ющии чистоту́.

Богоро́дичен: Чи́ни а́нгельстии Рождеству́ Твоему́, Де́во, е́же па́че естества́, слу́жат ра́дующеся, Чи́стая: си́х бо родила́ еси́ Бо́га и Го́спода.

Пе́снь 3

Ирмо́с: Утверди́ на́с в Тебе́, Го́споди, Дре́вом умерщвле́й гре́х, и стра́х Тво́й всади́ в сердца́ на́с пою́щих Тя́.

И́же во чре́во, Христе́, вше́дый нетле́нное, истле́вшую страстьми́ ду́шу мою́ покая́нием обнови́, и Све́та Присносу́щнаго яви́ испо́лнену.

Послу́шах врага́ прогне́вающаго, и вся́к гре́х соверши́х, и безу́мно прогне́вах Тебе́, Человеколю́бче, Еди́наго Долготерпели́ваго.

Му́ченичен: Кресто́м огражде́ни непобеди́мии ору́жницы, и му́ченицы Спа́совы, я́коже сте́ны разори́ша о Бо́зе до́блественно, ле́стная утверже́ния.

Му́ченичен: Си́лою Боже́ственною, немощно́е ва́ше укре́пльше, до́блии страстоте́рпцы, кре́пость борца́ всеконе́чней па́губе преда́сте.

Богоро́дичен: Мари́е, Злата́я Кади́льнице, страсте́й мои́х воню́ отжени́, и утверди́ мя коле́блемаго прило́гми.

И́н

Ирмо́с: Лу́к сокруши́ся си́льных держа́вою Твое́ю Христе́, и си́лою немощству́ющии препоя́сашася.

И́же естество́м Безсме́ртен Бо́г, прему́дре содева́я благода́тию, во́инства безсме́ртная явля́ет.

Ны́не предстоя́ще жела́нием кра́йним Христу́ спасти́ся все́м на́м, а́нгели, моли́теся.

Богоро́дичен: Нача́ло подле́тно прие́м изве́стно из Тебе́, И́же ле́т Соде́тель, Ма́ти Присноде́во.

Пе́снь 4

Ирмо́с: Пою́ Тя, слу́хом бо, Го́споди, услы́шах, и ужасо́хся, до мене́ бо и́деши, мене́ ища́ заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

В ка́л грехо́вный впа́д, и вы́шнее благообра́зие погуби́х, Го́споди, и бою́ся муче́ния. Те́мже покая́ния красото́ю, смире́нную ду́шу мою́ просвети́.

Льсти́выми глаго́лы, льсти́вый от Тебе́ мя укра́д, сне́дь себе́ соде́ла: Бо́же все́х, сего́ зло́бы исхити́ мя, и покая́ния о́бразы призови́ мя.

Му́ченичен: Предава́еми на сне́дь звере́м, и огне́м жго́ми, му́ченицы, и одира́еми, и на у́ды раздробля́еми, Христа́ помо́щника иму́ще не отверго́стеся: Того́ приле́жно моли́те, за мя́ окая́ннаго.

Му́ченичен: Еди́ницу чту́ще существо́м, Тро́ицу же ли́цы, Божество́ несозда́нно, созда́ние ника́коже поче́тше вы́, Христо́вы му́ченицы, позна́стеся: сего́ ра́ди му́ки вся́кия претерпе́сте.

Богоро́дичен: Воплоща́ется из чи́стых крове́й Твои́х, и челове́ком соединя́ется во́лею Госпо́дь, Пречи́стая, и прие́млет ка́ющияся, и́же дре́вле погруже́нныя грехми́, Твои́ми мольба́ми, Чи́стая, при́сно прекланя́емь.

И́н

Ирмо́с: Услы́шах, Го́споди, сла́вное Твое́ смотре́ние, и просла́вих, Человеколю́бче, непостижи́мую Твою́ си́лу.

Моли́твенники привожду́ Ти безпло́тныя: и́хже, Ще́дре, прии́м я́ко Благоутро́бен, от грехо́в мя́ изба́ви.

Уму́ приближа́ющеся Всевино́вному, у́мове Боже́ственнии очища́еми, просвеща́ются превы́шними ра́зумы.

Боже́ственная украше́ния Небе́снаго чинонача́лия, Боже́ственным Ду́хом украша́еми, сохраня́еми су́ть непрело́жне.

Богоро́дичен: Разуме́в Тя́ издале́ча, Де́во, Бо́га нося́щую воплоще́нна на руку́ Свое́ю, Иса́ия предвозвести́.

Пе́снь 5

Ирмо́с: Све́та Пода́телю, и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́ ино́го бо́га не зна́ем.

И́же просвети́вый о́чи слепа́го, ослепле́нную ду́шу мою́ просвети́, и бде́ти сию́ укрепи́ в дея́ния блага́я, со́н же ле́ностный до конца́ возненави́дети.

Исцели́, Еди́не Спа́се, уя́звленную мою́ ду́шу вои́стинну, я́звою лю́тою греха́ дре́вле в разбо́йники впа́дшему я́звы исцели́вый.

Му́ченичен: Собо́р честны́х страда́лец, собо́р беззако́нных гони́телей посрами́, многови́дныя боле́зни претерпе́, и ны́не со свяще́нными собо́ры а́нгельскими при́сно ра́дуется.

Му́ченичен: Зве́зды многосве́тлыя, зари́ терпе́ния испуща́юще, и ве́рных ду́ши Ду́хом Боже́ственным просвеща́юще, пресве́тлии яви́шася му́ченицы.

Богоро́дичен: Но́во я́ко Младя́ на́м Предве́чнаго Сы́на родила́ еси́, во двою́ хоте́нию и дея́нию су́ща сугу́ба, я́ко Челове́ка вку́пе же и Бо́га, Всепе́тая.

И́н

Ирмо́с: Угль Иса́ии проявле́йся, Со́лнце из де́вственныя утро́бы возсия́, во тьме́ заблу́ждшим, богоразу́мия просвеще́ние да́руя.

Боже́ственнаго Богонача́лия бли́з сия́юще, Херуви́ми и Серафи́ми, све́тлостию, со Престо́лы превзя́тыми, богоподо́бно про́чая просвеща́ют. [Два́жды.]

Я́ко всего́ светоли́тия Пода́телю, зерца́ла светови́дная, Сло́ве Бо́жий, приве́л еси́ Твою́ зарю́ с весе́лием и ра́зумом неукло́нным прие́млющая.

Богоро́дичен: Ра́дость Тебе́, и́же пра́отцем се́тование разреша́ющую, Гаврии́л, свяще́нный арха́нгел, с Небесе́ слете́в благовествова́ше, Чи́стая Богоневе́сто.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Низпадо́хся зло́бою змии́ною, и на одре́ отча́яния лежу́: И́же разсла́бленныя глаго́лом воздви́гнувый, Христе́, и мене́ воздви́гни.

Ве́ема ве́тры змии́ными, и потопля́ема всегда́ волна́ми грехо́вными, спаси́ мя, я́коже Петра́, Человеколю́бче Го́споди.

Му́ченичен: Премину́вше преде́лы естества́, я́же па́че естества́ му́ки претерпе́сте, сего́ ра́ди па́че ума́ благи́х сподо́бистеся, му́ченицы.

Му́ченичен: Я́ко до́брии, я́ко кра́снии, я́ко честни́и, добротво́рному и кра́сному сочета́стеся, о на́с всегда́ моля́щеся, пресла́внии му́ченицы.

Богоро́дичен: От все́х родо́в Творе́ц избра́ Тебе́, Всенепоро́чная, Добро́ту Иа́ковлю, Ю́же возлюби́, и из Тебе́ возсия́в яви́ся.

И́н

Ирмо́с: Гла́с глаго́л моле́бных от боле́зненныя, Влады́ко, души́ услы́шав, от лю́тых мя́ изба́ви: Еди́н бо еси́ на́шего спасе́ния вино́вен.

Боже́ственная места́ сла́вы Твоея́, нача́льнаго све́та, Влады́ко Христе́, светоблиста́нными разже́гшеся сия́ньми, заре́ю светови́дне ве́чно пребыва́ют. [Два́жды.]

Си́лою Боже́ственною укрепля́еми, Серафи́ми зову́ще гла́сы немо́лчными, пе́ние трисвято́е, почита́ти возво́дят на́с Естество́ Триипоста́сное.

Богоро́дичен: Кля́тся, я́коже рече́ Госпо́дь, и́стиною дре́вле Дави́ду, из чре́ва Твоего́ проше́д испо́лни: родила́ бо еси́, Отрокови́це, не́бом и земле́ю Ца́рствующаго.

Пе́снь 7

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.

У́мным развраще́нием и бесо́вскими прило́ги вся́каго студа́ испо́лнихся, дале́че бы́х за́поведей Твои́х, я́коже блу́дный. Ны́не же обраща́яся зову́: согреши́х я́коже он, не возгнуша́йся мене́, Иису́се, воплоще́йся мене́ ра́ди.

Бо́же вся́ческих, ниневи́тяны запреще́ния ражда́ющаго сме́рть, пока́явшияся дре́вле спа́сл еси́; та́кожде, Еди́не Человеколю́бче, премно́гим блудо́м оскверне́нное се́рдце мое́, ны́не обраща́ющееся, лю́тых изба́ви му́к.

Му́ченичен: Уязви́ся лю́те, уязви́ти восхоте́вый ва́с злоде́й, богоблаже́ннии Боже́ственнии му́ченицы, и неисце́лен пребы́сть, все́м же ве́рным исцеле́ние я́звы ва́ша яви́шася, уя́звленым прило́гом ве́тхаго запина́теля.

Му́ченичен: Ни звере́й лю́тых, ни мучи́телей преще́ния, ни огня́, ни ра́н, ни меча́ секу́щаго, ни разжже́нных убоя́стеся сосу́д, но я́коже в чужди́х телесе́х вся́ претерпе́сте, великому́ченицы: сего́ ра́ди венча́ни бы́сте.

Богоро́дичен: Невеще́ственнаго Све́та жили́ще чре́во Твое́ бы́сть, Пречи́стая Богоневе́сто Отрокови́це, све́тлостьми Боже́ственнаго ра́зума безбо́жие отгна́вшаго, Его́же пою́ще зове́м: благослове́н Бо́г оте́ц на́ших.

И́н

Ирмо́с: Вети́и яви́шася о́троцы, любому́дрейшии дре́вле, от богоприя́тныя бо души́, богосло́вяще устна́ми поя́ху: Пребоже́ственный отце́в и на́ш Бо́же, благослове́н еси́.

О́крест престо́ла неизрече́нныя Твоея́ сла́вы, лику́юще при́сно Небе́снии у́мове, немо́лчными устна́ми воспева́ют: Пребоже́ственный отце́в и на́ш Бо́же, благослове́н еси́. [Два́жды.]

Егда́ ви́деша Тя́ а́нгельстии чи́ни на Небеса́ с пло́тию возноси́ма, врата́ Небе́сная отверзо́ша Ти́, пою́ще: Пребоже́ственный отце́в и на́ш Бо́же, благослове́н еси́.

Богоро́дичен: Зако́на Тя́ нача́ток и проро́ков, Отрокови́це, Гаврии́л показу́я вопия́ше: се́ Ты́ ражда́еши, еди́на Всепе́тая, Пребоже́ственнаго отце́м и на́м Бо́га благослове́ннаго.

Пе́снь 8

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Подпадо́х лука́вому, и козньми́ его́ порабоще́н бы́х, и зря́ мя льсти́вый в небреже́нии мно́зе, хва́лится: сего́ мя́ исхити́, и́же заблу́ждшим обраще́ние, Ще́дре.

Разреши́ мя нереши́мыми у́зами страсте́й содержи́ма теле́сными, И́же нереши́мыя разреши́вый от ве́чных у́з, и тещи́ к стезя́м напра́ви спаси́тельным, Христе́ Спа́се ми́ра.

Му́ченичен: И́же страсте́м соде́телие, на мне́ смире́ннем всю́ зло́бу созида́ша вои́стинну: но и́же страсте́м Христо́вым я́ко вои́стинну подо́бницы, блаже́ннии му́ченицы, сего́ изба́вити мя́ врежде́ния.

Му́ченичен: Коле́на не прекло́нше истука́нным, в пе́щь ра́н я́коже о́троцы вве́ржени бы́сте дре́вле, и росо́ю Боже́ственною я́вльшеся неопа́льни пребы́сте, прехва́льнии му́ченицы, пою́ще Христа́ во ве́ки.

Богоро́дичен: Изнемо́гшую мно́гими прило́гми лука́ваго, окая́нную мою́ ду́шу, Богороди́тельнице, целе́бными Твои́ми мольба́ми, Де́во, здра́ву соде́лай, да Тя́ сла́влю во вся́ ве́ки.

И́н

Ирмо́с: О подо́бии зла́те небре́гше треблаже́ннии ю́ноши, неизме́нный и живы́й Бо́жий о́браз ви́девше, среди́ огня́ воспева́ху: осуществова́нная да пое́т Го́спода вся́ тва́рь, и превозно́сит во вся́ ве́ки.

Подо́бия Твоея́ бла́гости соста́вил еси́ а́нгелы, за́поведи Твоя́ кре́постию соверша́ющия, Сло́ве, и споспешеству́ющия все́м ве́рным зва́ти: осуществова́нная да пое́т Го́спода вся́ тва́рь, и превозно́сит во вся́ ве́ки.

Боже́ственными доброде́тельми Небе́сное украси́л еси́ житие́, святы́х а́нгел священнонача́лие, просвеща́я си́х Тебе́, Христе́, вопию́щих: осуществова́нная да пое́т Го́спода вся́ тва́рь, и превозно́сит во вся́ ве́ки.

Ра́дующеся све́тло, воспои́м Боже́ственное пе́ние безпло́тных неоску́дне, и Влады́ку богосло́вяще, пе́снь с ни́ми возопии́м: осуществова́нная да пое́т Го́спода вся́ тва́рь, и превозно́сит во вся́ ве́ки.

Богоро́дичен: Пра́вость, Я́же му́дре вся́ пра́вящая, возлюби́ досто́йно Тя́ Пренепоро́чную и Пречи́стую Де́ву несказа́нно, Пресвята́я Богоро́дице, в Тя́ все́льшаяся, Ю́же славосло́вим, да пое́т Го́спода вся́ тва́рь, и превозно́сит во вся́ ве́ки.

Та́же пое́м пе́снь Богоро́дицы: Вели́чит душа́ моя́ Го́спода:

Пе́снь 9

Ирмо́с: От Бо́га Бо́га Сло́ва, неизрече́нною му́дростию, прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии единому́дренно пе́сньми велича́ем.

Се́ вре́мя де́лания, что́ спи́ши без ума́, душе́, во уны́нии глубо́це? Воста́ни, слеза́ми просвети́ свещу́ твою́. Потщи́ся, приближа́ется Жени́х душа́м: не укосни́, да не оста́нешися Боже́ственных двере́й внеу́ду.

О, ко́ль стра́шное Твое́ Суди́ще, явля́ющее вся́ко дея́ние на́го пред а́нгелы и челове́ки! О, ко́ль лю́тое изрече́ние, е́же согре́шшим хо́щеши да́ти! От него́же изба́ви мя́, Христе́, пре́жде конца́, подая́ ми обраще́ния сле́зы.

Му́ченичен: Зна́менавшеся Боже́ственною Агнца и Па́стыря Кро́вию, сла́внии Боже́ственнии страда́льцы, закала́еми ра́довахуся, я́коже незло́бивии а́гнцы, и ны́не всю́ перворо́дных Це́рковь святу́ю, вои́стинну на Небесе́х просвеща́ют.

Му́ченичен: Со́лнечных сия́ний, я́ко свети́льницы я́вльшеся, луча́ми страда́ний ва́ших вся́ку ду́шу озаря́ете, и вся́ку тьму́ пре́лести отгоня́ете, до́блии страда́льцы: сего́ ра́ди досто́йно ве́рою блажи́ми есте́.

Богоро́дичен: Пощади́ мя, Го́споди, пощади́, егда́ хо́щеши суди́ти, и не осуди́ мене́ во о́гнь, ни я́ростию Твое́ю обличи́ мене́: мо́лит Тя́ Де́ва, Я́же Тебе́, Христе́, ро́ждшая, и а́нгел мно́жество, и му́ченик сосло́вие.

И́н

Ирмо́с: Ве́сь еси́ жела́ние, ве́сь сла́дость, Сло́ве Бо́жий, Де́вы Сы́не, Бо́же бого́в, Го́споди, святы́х Пресвяты́й. Те́м Тя́ вси́ с Ро́ждшею велича́ем.

Белообразу́юще яви́шася а́нгели светообра́зно, Боже́ственным ученико́м Твои́м пове́дающе Твое́ второ́е прише́ствие, Христе́: с ни́миже Тя́ вси́ богосло́вяще велича́ем. [Два́жды.]

Я́ко Благоде́тель вся́каго естества́ слове́снаго, твори́ши пе́рвей Си́ зари́ втору́ю све́тлость, кра́йния ра́ди бла́гости: те́мже Тя́ вси́ благодаря́ще велича́ем.

Богоро́дичен: Разуме́в Твое́, Пречи́стая, светообра́зное де́вство, и уди́влься, ра́дость Тебе́ принесе́ Боже́ственный архистрати́г: те́мже Тя́ вси́ я́ко Богоро́дицу велича́ем.

Та́же, Досто́йно е́сть: И покло́н, и ектения́ и свети́лен, и про́чее обы́чно.

На стихо́вне стихи́ры умили́тельны, гла́с 2:

Соде́янных мно́ю лю́тых помышля́я безме́стная, к Твои́м прибега́ю щедро́там, мытаря́ подража́я, и блудни́цу слези́вшую и блу́днаго сы́на: те́мже и припа́даю Ти́, Ми́лостиве, пре́жде да́же не осу́диши мя́, пощади́ мя, Бо́же, и поми́луй мя́.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́ша возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Беззако́ния моя́ пре́зри, Го́споди, от Де́вы рожде́йся, и се́рдце мое́ очи́сти, хра́м сие́ творя́ свято́му Твоему́ Ду́ху. Не отри́ни мене́ от Твоего́ лица́, безме́рную име́яй ве́лию ми́лость.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

По Христе́ пострада́вше да́же до сме́рти, о страстоте́рпцы му́ченицы, ду́ши бо и́мате на Небесе́х в руце́ Бо́жией, и по ми́ру всему́ почита́еми су́ть ва́ша мо́щи. Свяще́нницы покланя́ются и лю́дие вси́, ра́дующеся, согла́сно вопие́м: со́н че́стен пред Го́сподем – сме́рть преподо́бных Его́.

Сла́ва, и ны́не: Богоро́дичен: На Тя́ упова́ние, Богоро́дице, возложи́хом, ча́яния да не отпаде́м, спаси́ на́с от бе́д, Помо́щнице недоуме́емым, и сопроти́вных сове́ты разори́: Ты́ бо еси́ на́ше спасе́ние, Благослове́нная.

Та́же, Бла́го е́сть испове́датися Го́сподеви: И Трисвято́е по О́тче на́ш: тропа́рь и ектения́. Та́же ча́с 1-й, псалмы́ обы́чныя, и отпу́ст.

Гла́с Ти́ прино́сим разбо́йнич, и мо́лимся: помяни́ на́с, Спа́се, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Спаси́ мя, Го́споди Бо́же, и о́бщника сотвори́ ча́сти от души́ возлю́бльшим Тя́.

Сти́х: Блаже́ни есте́, егда́ поно́сят ва́м, и изжену́т и реку́т вся́к зо́л глаго́л, на вы́ лжу́ще Мене́ ра́ди.

Вся́ Небе́сная во́инства со стра́хом слу́жат Ти́ я́ко Бо́гу: и́хже моли́твами спаси́ на́с.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Ору́жием ве́ры страда́льцы, победи́сте полки́ вра́жия, и принесе́ни бы́сте к Бо́гу.

Сла́ва: Почита́ют чи́ни у́мнии, с челове́ческим ро́дом, Тро́ицу Про́сту, Еди́наго же существа́ Божество́.

И ны́не: Пречи́стая Влады́чице, Я́же Бо́га без се́мене ро́ждшая, Того́ моли́ спасти́ся на́м.

на Го́споди воззва́х: стихи́ры гла́с 2.

Подо́бен: Егда́ от Дре́ва:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Еди́не Безгре́шне Христе́, Еди́не Незло́бивый, Еди́не Исто́чниче бла́гости, ви́ждь мое́ стесне́ние, ви́ждь ско́рбь мою́, и я́звы стру́п мои́х очи́сти вся́ и ми́лостию Твое́ю спаси́ раба́ Твоего́, я́ко да ле́ности о́блаки дале́че отгна́в, сла́влю Тя́ Преблага́го Спа́са моего́.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

При́зри, о душе́ моя́ смире́нная! Ви́ждь твоя́ дела́, ка́я су́ть всескве́рная; ви́ждь Твою́ наготу́, оле и еди́нство! И́бо и́маши разлучи́тися от Бо́га и а́нгелов, и к безконе́чному вмета́тися муче́нию. Воспряни́, воста́ни, потщи́ся, возопи́й: согреши́х, Спа́се, да́ждь ми́ проще́ние, и спаси́ мя.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Т́ело оскверни́х лю́те, растли́х ду́шу и се́рдце помышле́ньми скве́рными; вся́ чу́вства моя́ уязви́х, о́чи оскверни́х, окаля́х ушеса́ словесы́, язы́к оскверни́х, и вся́ име́ю сту́дна. Те́мже Ти́ припа́даяй зову́, Влады́ко Христе́: согреши́х Ти́, согреши́х, прости́, и спаси́ мя.

И́ны стихи́ры Предте́чи, гла́с 2:

Подо́бен: Егда́ от Дре́ва:

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля о все́х беззако́ний его́.

Потщи́ся, изми́ мя от искуше́ний, сла́вный Госпо́день Предте́че, молю́ся ти́: всу́е бо подвиго́шася на мя́ борю́щии мя́ го́рцыи де́мони, и́щуще восхи́тити ду́шу раба́ твоего́, я́коже пти́цу бе́дную. Не оста́ви мя́ до конца́: да разуме́ют же па́че, всеблаже́нне, я́ко ты́ мое́ еси́ прибе́жище.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Непло́ды всесвяты́й о́трасль, прозябе́ние кра́сное пусты́нное, ла́стовица кра́сная, слави́й благогла́сный, голуби́це злата́я, непло́дствующую всегда́ окая́нную ду́шу мою́ благопло́дну покажи́ благи́х де́л, я́ко да прозяба́ющи кла́с стори́чествующий, блаже́нне, Боже́ственную прино́сит ти́ похвалу́.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Изба́ви ве́чнаго мя́ огня́, тьмы́ несве́тлыя и ну́жды и вся́кия ско́рби, и вся́каго злострада́ния, вся́каго стесне́ния, молю́ Тя, Предте́че, и покажи́ ча́сти спаса́емых самоосужде́ннаго су́ща прегреше́ньми, блаже́нне, моли́твами Твои́ми, иде́же святы́х ликова́ния и ра́дость е́сть несказа́нная.

Сла́ва, и ны́не: Богоро́дичен: Ско́рби, лю́тых наведе́ния, стра́сти же разли́чныя обурева́ют смире́нную мою́ ду́шу, Отрокови́це Неискусобра́чная, Ма́ти Христа́ Бо́га, прави́тельница ми́ яви́ся в мо́ри жите́йстем, и належа́щую укроти́ бу́рю к приста́нищем ти́хим покая́ния и прохлажде́ния наставля́ющи, к Боже́ственному покро́ву Твоему́ притека́юща.

Проки́мен дне́, и Сподо́би Го́споди в ве́чер се́й:

На стихо́вне стихи́ры умили́тельны, гла́с 2:

Согреши́х Ти́, Христе́ Спа́се, я́ко блу́дный сы́н: приими́ мя, Отче, ка́ющася, и поми́луй мя́, Бо́же.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Вопию́ Ти, Христе́ Спа́се, мытаре́вым гла́сом: очи́сти мя́ я́коже о́наго, и поми́луй мя́, Бо́же.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Святы́м му́чеником моля́щимся о на́с, и Христа́ пою́щим, вся́ка пре́лесть преста́, и челове́ческий ро́д ве́рою спаса́ется.

Сла́ва, и ны́не: Богоро́дичен: Все́ упова́ние мое́ на Тя́ возлага́ю, Ма́ти Бо́жия, сохрани́ мя под кро́вом Твои́м.

Та́же: Ны́не отпуща́еши: И Трисвято́е по О́тче на́ш: тропа́рь свято́му. Сла́ва, и ны́не: Богоро́дичен, во гла́с тропаря́. И ектения́. И отпу́ст.

Кано́н Пресвяте́й Богоро́дице. Гла́с 2.

Пе́снь 1

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Похвале́ния Ти́ присноцвету́щий вене́ц, его́же прозябе́ Ду́хом Це́рковь, Чи́стая, прино́сит пе́сненно Тебе́ со арха́нгелом Гаврии́лом Богоневе́стней, ра́дуяся пою́щи, и Тя́ че́стно венча́ющи.

Возде́лавши Живоно́сный Виногра́д, Ма́ти Бо́жия Препе́тая Христа́ Бо́га, Земле́ Свята́я О́тча яви́ся, па́че смы́сла, Богоблагода́тная, и ве́сь ми́р напои́ пи́ва живоно́снаго, Чи́стая.

Сла́ва: Волну́ющагося лю́те прегреше́нии всего́ ми́ра, и потопля́емаго, родила́ еси́, Пречи́стая, Бо́га и Го́спода все́х на́с, и Окорми́теля Христа́, ко спаси́тельному приста́нищу на́с направля́юща ве́рно.

И ны́не: Прибе́жище и спасе́ния гра́де, вси́ ве́рно мо́лим Тя́, Мари́е Ма́ти Бо́жия, и ми́ли де́емся те́пле: приими́ мольбы́ на́ша, Твои́х ве́рных ра́б, и разреши́ вся́ ны́ от прегреше́ний осужде́ния.

Пе́снь 3

Ирмо́с: Утверди́ на́с в Тебе́, Го́споди, Дре́вом умерщве́й гре́х, и стра́х Тво́й всади́ в сердца́ на́с пою́щих Тя́.

Нача́ло отвраще́ния Бо́га бы́сть к челове́ком, Е́вино прельще́ние: Свята́я же Богоро́дица приведе́ па́ки Бо́га к на́м.

Жи́зни Тя́ Сокро́вище, Препе́тая, ражда́ет ми́рови, и ра́дуется благоча́дию сла́вный Иоаки́м о Тебе́, я́ко непло́дными отцы́ прише́дши наде́жда.

Сла́ва: От А́нны ра́дость ро́ду процвете́, ражда́еши де́вою Царя́: и сра́дуются Рождеству́ Твоему́ жены́, разре́шшася Тобо́ю кля́твы.

И ны́не: Купина́ в Сина́и прообража́ше Твое́, Де́во, пресла́вное Рождества́, и́бо огне́м Божества́ не опали́ся, в ложесна́х прие́мши, Чи́стая.

Пе́снь 4

Ирмо́с: Услы́шах, Го́споди, сла́вное Твое́ смотре́ние, и просла́вих, Человеколю́бче, непостижи́мую Твою́ си́лу.

Иа́ков Тя́ я́ко ле́ствицу боголе́пно прови́дяше, Де́во, на ея́же версе́ Бо́г утвержда́шеся.

А́нгельское сни́тие, е́же к на́м Сло́ва прише́ствие Тобо́ю, Пречи́стая, прояви́ся.

Сла́ва: Утро́ба Твоя́ препе́тая, и сосца́ блаже́нна, Де́во: те́х бо ра́ди жи́знь вси́ обрето́хом.

И ны́не: Та́йно воспева́ем Тя́, Ма́ти Бо́жия, гла́сы правосла́вными, и́мже Це́рковь блюдо́ма е́сть моли́твами Твои́ми.

Пе́снь 5

Ирмо́с: Просвеще́ние во тьме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ Ми́ра, просвети́ мя сия́нием Твои́м: ино́го бо ра́зве Тебе́ бо́га не зна́ю.

Зако́на и Ковче́га честне́йшу Тя́ воспева́ем, Богоро́дице Мари́е: и́бо все́х Зижди́теля и Бо́га, я́ко скрижа́ли носи́ла еси́, Препе́тая.

Престо́л Тя́ Бо́жия Сло́ва, прославля́ем, Богоро́дице, на не́мже я́ко Челове́к Бо́г седя́ яви́ся, и бы́сть Херуви́мов превы́шши.

Сла́ва: Разреши́ла еси́, Де́во, от го́рькия рабо́ты ве́сь ро́д челове́ч, и свобо́дою Христо́вою естество́ же́нское почти́ла еси́, в Боже́ственнем Твое́м Рождестве́.

И ны́не: Родила́ еси́ Сы́на Де́ва, и побежда́ют жены́ врага́ я́ве: те́мже и притека́ют, Отрокови́це, де́вство держа́ще.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Я́же ми́ру ра́дость, Богоро́дице Чи́стая, ра́дуйся, Тебе́, Де́во, зове́м со А́нгелом ве́рно, Твоея́ ра́дости сподо́би, и печа́ль на́шу разори́.

Ра́дости неоте́млемыя жили́ще Тя́ восхваля́юще ве́рно, Ма́ти Присноде́во, Твоея́ ра́дости сподо́би, и печа́ль на́шу разори́.

Сла́ва: Не́бо небе́с вы́шшее яви́лася еси́, Богоневе́стная, Боже́ственною Твое́ю сла́вою: в Тя́ Бо́г на́ш всели́вся, яви́ся ми́.

И ны́не: Ны́не естество́ же́нское возра́довася, ны́не печа́ль преста́, ра́дость процвете́: я́ко Мари́я роди́ Ра́дость, Спа́са Христа́ Бо́га.

Та́же, Го́споди поми́луй, три́жды. Сла́ва, и ны́не:

Седа́лен, гла́с 2: Подо́бен: Милосе́рдия су́щи:

Души́ моея́ ле́ность лю́тую, и се́рдца моего́ пренемога́ние, Ма́ти Бо́жия, воззре́вши, исцели́ моли́твами Твои́ми, и спасе́нных мя́ ча́сти сподо́би, избавля́ющи мя́ тьмы́ и муче́ния, я́ко Еди́на упова́ние мое́ и утеше́ние.

Пе́снь 7

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.

Руно́ иногда́ Гедео́ново, е́же на Тя́, Чи́стая, Бо́жия Сло́ва прообрази́ сни́тие: я́коже бо ро́су зача́тие прия́т, Нетле́нная Де́во. Те́мже вси́ Тебе́ зове́м: благослове́н Пло́д Твоего́ чре́ва, Чи́стая.

Но́ва и стра́шна, и ве́рна и чу́дна Твоя́ та́инства, Мари́е, Ма́ти Христа́ Бо́га на́шего: я́ко Тобо́ю примири́хомся вси́ Бо́гови и Влады́це, и со а́нгелы ны́не пое́м: благослове́н Пло́д Твоего́ чре́ва, Чи́стая.

Сла́ва: И́же пре́жде Гедео́н предвеству́ет Тебе́, Чи́стая, Боже́ственное Рождество́ я́ве: окри́н приноша́ет испо́лнен воды́ от оцыжде́ния руно́внаго; ве́сь бо в Тя́ Боже́ственно всели́ся, Пречи́стая: благослове́н Пло́д Твоего́ чре́ва, Чи́стая.

И ны́не: Ро́ждши Бо́га и Спа́са вся́ческих, Мари́е, была́ еси́ отча́янных исправле́ние, гре́шников обновле́ние, и ненаде́жных наде́жда, и пою́щих по́мощь: благослове́н Пло́д Твоего́ чре́ва, Чи́стая.

Пе́снь 8

Ирмо́с: В пе́щь о́гненную ко отроко́м евре́йским снизше́дшаго, и пла́мень на ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Но́в ра́й на́м яви́лася еси́, Пресвята́я Богоро́дице, не сме́ртное дре́во, но живо́тное, я́ко са́д без се́мене прорасти́вши Го́спода, И́мже безсме́ртною жи́знию пита́емся вси́.

Воспева́ет вся́ Христо́ва Це́рковь, Богоро́дице, Твое́ Рождество́, я́ко спаса́ются гре́шнии вси́ и ни́щии, и́же любо́вию к Тебе́ прибега́юще: прии́де бо Христо́с на зе́млю, челове́ки спасти́.

Сла́ва: Свобожда́ется осужде́ния пра́баба Тобо́ю, Богоро́дице Де́во, и се́ ны́не жены́ стра́ждут по Христе́, и ра́дуется естество́ же́нское, я́коже первому́ченица вопие́т Фе́кла.

И ны́не: Никто́же поги́бе, Чи́стая, и́же ве́ры наде́жду стяжа́ к Тебе́ правосла́вно, Де́во Ма́ти Бо́жия, ра́зве то́чию за́вистию отмета́яйся, Твоему́ не покланя́тися о́бразу начерта́нному.

Пе́снь 9

Ирмо́с: Я́же пре́жде со́лнца Свети́льника, Бо́га возсия́вшаго, пло́тски к на́м прише́дшаго из боку́ деви́чу, неизрече́нно воплоти́вшая, благослове́нная Всечи́стая, Тя́, Богоро́дице, велича́ем.

Приклони́ ми у́хо Твое́, Де́во Пресвята́я, воспева́ющему ве́рно похва́льными словесы́ Твое́ Рождество́, и я́ко да́ры вдови́чи, пе́снь усте́н мои́х прие́мши, проси́ грехо́в мои́х проще́ния.

Сия́ет добро́та Твоя́, блиста́ет чистоты́ све́тлость, Чи́стая, и пресия́ет па́че си́х Твое́ Рождество́; Бо́г бо, Творе́ц со́лнца и тва́ри всея́, из Тебе́ роди́ся: те́мже Тя́ вси́ велича́ем.

Сла́ва: Све́т Тя́ чистоты́, и же́зл де́вства, и Ма́терь Бо́жию, боголе́пно в пе́снех пою́ще, Богоро́дице, со гла́сом хвале́ния мо́лимся Ти́: в де́встве утверди́ на́с, и в чистоте́ сохрани́.

И ны́не: Те́ло и ду́шу нескве́рну Бо́гови соблю́дши, Чи́стая, Ца́рь восхоте́ Твоея́ добро́ты Христо́с, и Ма́терь Своего́ воплоще́ния показа́, Мари́е Пресла́вная, спасе́ние мое́ соверша́я.

Та́же, Досто́йно е́сть: И покло́н. Трисвято́е и по О́тче на́ш: тропари́. И про́чее обы́чное, и отпу́ст.

По 1-м стихосло́вии, седа́льны умили́тельны. Гла́с 2:

Помышля́ющи, душе́ моя́, Стра́шнаго Дне́ испыта́ния, трепе́щи воздая́ния ве́чныя му́ки, и покая́нием возопи́й слезя́щи: Бо́же согреши́х, поми́луй мя́.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Испыту́яй мою́ со́весть осужде́нную, бою́ся Твоего́ Стра́шнаго Суди́ща, Го́споди, я́ко не́сть ми́ от де́л спасе́ния: но я́ко име́яй бога́тство благоутро́бия, уще́дри мя́, Христе́ Бо́же, и спаси́ мя.

Сла́ва, и ны́не: Богоро́дичен: Тя́ велича́ем, Богоро́дице, вопию́ще: ра́дуйся Же́зле, от Него́же безсе́менно Бо́г прозябы́й, погуби́ на Дре́ве сме́рть.

По 2-м стихосло́вии седа́льны умили́тельны, гла́с 2:

Поми́луй мя́, рече́ Дави́д, и а́з Тебе́ зову́: согреши́х, Спа́се, моя́ грехи́ покая́нием очи́стив, поми́луй мя́.

Сти́х: Го́споди, да не я́ростию Твое́ю обличи́ши мене́, ниже́, гне́вом Твои́м нака́жеши мене́.

Поми́луй мя́, Бо́же, поми́луй мя́, о двою́ греху́ пла́каше Дави́д, о тьма́х а́з согреше́ниих вопию́ Ти. Он посте́лю слеза́ми омочава́ше, а́з же ни ка́пли еди́ныя и́мам, отча́яхся и молю́: поми́луй мя́, Бо́же, по вели́цей ми́лости Твое́й.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Просвети́вый святы́я Твоя́ па́че зла́та, и просла́вивый преподо́бныя Твоя́, я́ко Бла́г, те́ми умоля́ем быва́я, Христе́ Бо́же, живо́т на́ш упра́ви, я́ко Человеколю́бец, и моли́тву напра́ви я́ко кади́ло, Еди́не во святы́х почива́яй.

Сла́ва, и ны́не: Богоро́дичен: Богоро́дице, не пре́зри мене́ тре́бующа заступле́ния, е́же от Тебе́: на Тя́ бо упова́ душа́ моя́, поми́луй мя́.

По 3-м стихосло́вии седа́льны, гла́с 2.

Подо́бен: Благоутро́бия су́щи:

Благоутро́бия незави́стный исто́чник, во струя́х Иорда́на погрузи́л еси́ Иоа́нне. Отню́дуже приле́жно молю́ Тя: страстьми́ мно́гими потопля́ема, пучи́ною мя́ жите́йскою, на вся́кий де́нь лю́то, благоприя́тными Твои́ми моли́твами, к живота́ приста́нищу руководи́.

Благоутро́бия ра́ди ми́лости, Бла́же, спасти́ Твое́ созда́ние, Христе́, прише́л еси́, прекло́нь Небеса́ схожде́нием Твои́м. Те́мже стра́шное смотре́ние Твое́ пою́ще, вопие́м Ти́: мольба́ми Предте́чи Твоего́ очище́ние грехо́в пода́ждь на́м, я́ко Еди́н Благоутро́бен.

Сла́ва, и ны́не: Богоро́дичен: Кто́ ви́де, кто́ слы́ша Ма́терь ражда́ющую Своего́ Соде́теля неискусому́жно, доя́щую Даю́щаго пи́щу вся́кой пло́ти? Оле чудесе́! Престо́л херуви́мский яви́ся чре́во Твое́, Богоро́дице Благода́тная, моли́ о душа́х на́ших.

Кано́н умиле́ния ко Го́споду на́шему Иису́су Христу́ и святы́м му́чеником [его́же краегране́сие си́це: Мои́м рыда́нием вмеще́ние, о Спа́се, подава́еши.] Творе́ние Ио́сифово. Гла́с 2.

Пе́снь 1

Ирмо́с: Моисе́йскую пе́снь восприи́мши, возопи́й, душе́: Помо́щник и Покрови́тель бы́сть мне́ во спасе́ние, Се́й мо́й Бо́г, и просла́влю Его́.

Себе́, бра́тие, пре́жде исхо́да воспла́чим го́рько, я́ко да слеза́ми до́брыми убежи́м тогда́ сле́з муче́ния, ничто́же иму́щих поле́зно.

Тьма́ми, Христе́, завеща́х пока́ятися, и нечу́вственну ду́шу име́яй, в прегреше́ния впа́даю: уще́дри, Спа́се, не́мощь мою́.

Му́ченичен: И́же муче́ния о́гнь претерпе́вше, Боже́ственным ороше́нием, страстоте́рпцы Христо́вы, огня́ гее́нны изба́вите мя́, в страсте́х лю́тых слежа́щаго.

Му́ченичен: Кре́пцы на враги́ я́вльшеся си́лою Боже́ственною, некре́постную и́х низложи́сте си́лу, му́ченицы Христо́вы достохва́льнии.

Богоро́дичен: Пламеноно́сная Клеще́, ю́же Иса́ия ви́де иногда́, веще́ственныя се́рдца моего́ стра́сти, Богороди́тельнице, попали́, и до конца́ потреби́.

И́н кано́н, ко свято́му честне́йшему проро́ку Иоа́нну Предте́чи [его́же краегране́сие си́це: Крести́телю, мольбу́ приими́.] Творе́ние Ио́сифово. Гла́с 2.

Пе́снь 1

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Крести́телю и Предте́че Христо́в, погружа́емый всегда́ сластьми́ теле́сными, у́м мо́й упра́ви, и во́лны страсте́й укроти́, я́ко да в тишине́ Боже́ственней бы́в, песносло́влю тя́.

Недоуме́нным просвети́вся просвеще́нием, я́ко многосве́тлая звезда́, мы́сленному Восто́ку предте́кл еси́; И́мже озари́тися се́рдцу моему́, Крести́телю, моли́, омраче́нному все́ми бесо́вскими приложе́нии.

В реце́ Бе́здну иногда́, всему́дре, погрузи́л еси́, пото́п содева́ющую благода́тию, всего́ преступле́ния. Но молю́ся, пото́ки, блаже́нне, мои́х прегреше́ний изсуши́, Боже́ственным хода́тайством твои́м.

Богоро́дичен: Чи́стыя Де́вы, Бо́га воплоти́вшия, сро́дник бы́л еси́, блаже́нне Предте́че, с Не́юже Тя́ чти́м и мо́лим, и́же в Боже́ственнем хра́ме твое́м ны́не живу́ще: хра́мы и на́с сотвори́ Ду́ха Свята́го.

Пе́снь 3

Ирмо́с: Непло́дствовавший мо́й у́м, плодоно́сен, Бо́же, покажи́ ми, Де́лателю до́брых, Насади́телю благи́х, благоутро́бием Твои́м.

Ле́ностным дрема́нием отяготи́х ду́шу: воздви́гни, Христе́, ко бде́нию покая́ния, твори́ти Твоя́ повеле́ния.

Не яви́ мене́, Иису́се, в Де́нь Стра́шный отча́янна, но пре́жде конца́ обрати́в, лю́тыя изба́ви му́ки.

Му́ченичен: И́же стра́сти Христо́вы подража́вше до́бре, Боже́ственными о́бразы, страстоте́рпцы Христо́вы, души́ моея́ лю́тыя стра́сти исцели́те.

Му́ченичен: Да и́же на Небесе́х присносу́щным благи́м сподо́битеся вся́кое искуше́ние лю́тых, страстоте́рпцы, на земли́ тве́рдо претерпе́сте.

Богоро́дичен: Дои́ши матероле́пно Пита́теля все́х, и но́сиши Сего́ на объя́тиях, Чи́стая, вся́ческая руко́ю нося́щаго всегда́.

И́н

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́ бо ся ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Исцели́ стру́пы души́ моея́, у́м мо́й, омраче́нный небреже́нием, озари́ Боже́ственным твои́м хода́тайством, Госпо́день Предте́че, и вся́каго изба́ви мя́ сопроти́внаго обстоя́ния, молю́ся.

Непло́дствие разреши́л еси́ ро́ждшия, роди́вся Бо́жиим промышле́нием, прему́дре Проро́че, непло́дное у́бо се́рдце мое́, плодоно́сно ны́не соде́лай, Госпо́день Предте́че, хода́тайством твои́м, доброде́телей приноси́ти прозябе́ния.

Любо́вию твое́ю Созида́ющаго Боже́ственный до́м, вы́шняго жития́ улучи́ти моли́, и́же ве́рою хра́му твоему́ служа́щия, хра́мы Ду́ха Боже́ственнаго сотвори́, Крести́телю и Предте́че, хода́тайствы твои́ми.

Богоро́дичен: Веселя́шеся Предте́ча в ложесна́х носи́м ма́терних, и покланя́шеся Го́споду, носи́му в ложесна́х Благода́тныя, Его́же моли́, от вся́кия ско́рби изба́вити мя́.

Пе́снь 4

Ирмо́с: Е́же от Де́вы Твое́ Рождество́ проро́к предзря́, воспропове́даше вопия́: слу́х Тво́й услы́шах, и убоя́хся, я́ко от ю́га, и из горы́ святы́я приосене́нныя прише́л еси́ Христе́.

Окра́дена мя́ отвсю́ду, и обнища́вша, Сло́ве, зря́ вра́г, о поги́бели мое́й ра́дуется, льсти́вый мудре́ц. Го́споди сла́вы, Обогати́телю убо́гих, того́ мя злоде́йствия изми́.

Ру́це и о́чи оскверни́х, Го́споди, соде́яв я́же неле́по е́сть твори́ти, и в гне́в подвиго́х щедро́ты Твоя́, ижди́в Твое́ долготерпе́ние: призре́в уще́дри мя́, Бла́же.

Му́ченичен: Ко́ль ди́вен Бо́г на́ш во святы́х е́сть, послу́шавших Его́, и низлага́ющих истука́нныя поги́бели, и насле́довавших Рая́ простра́нство, от него́же дре́вле изгна́н бы́сть Ада́м.

Му́ченичен: Струя́ми крове́й, блаже́ннии, уста́висте кро́вь, приноси́мую иногда́ де́моном, все́м поги́бельную, на па́губу принося́щим челове́ком. Сего́ ра́ди ублажа́еми есте́ при́сно.

Богоро́дичен: Научи́вся ду́хом проро́ческий пресла́вный ли́к, е́же па́че ума́ Твое́й та́йне, Богоро́дице, различнообра́зно сию́ предначерта́ет свяще́нными образы́, и́хже коне́ц зри́м све́тло.

И́н

Ирмо́с: Прише́л еси́ от Де́вы, не хода́тай, ни а́нгел, но Са́м Го́споди вопло́щся, и спа́сл еси́ всего́ мя челове́ка. Те́м зову́ Ти: сла́ва си́ле Твое́й, Го́споди.

Прекло́ншему небеса́ и челове́ком бесе́довавшу, главу́ приклони́л еси́, десни́цею твое́ю, пребога́те: е́юже мя́ соблюди́, во смире́нии соблюда́я се́рдце мое́.

Пусты́ня тебе́ граждани́на непрохо́дная имя́ше, блаже́нне Предте́че. Те́мже вопию́ ти: пу́сту вся́каго Боже́ственнаго дея́ния бы́вшу ду́шу мою́ снабди́.

Зако́н Боже́ственный управля́я, беззако́нно закла́н бы́л еси́. Те́мже молю́ся Тебе́: беззако́ннующа мя́ всегда́, и прельща́ема бесо́вскими прельще́ньми, испра́ви.

Созда́в са́м себе́ хра́м Влады́це Царю́, к Боже́ственным селе́нием ны́не преше́л еси́, Предте́че, и́хже получи́ти моли́, тебе́ пресвяты́й до́м Воздви́гшаго.

Богоро́дичен: При́зри на мя́ неду́гующаго, Всенепоро́чная, и разреши́ стра́сти моя́ лю́тыя и неудобоисце́льныя, я́ко да велича́ю Тя́, возвели́чившую все́ челове́чество.

Пе́снь 5

Ирмо́с: Мглу́ души́ моея́, Спа́се мо́й, разгна́в, све́том за́поведей Твои́х озари́ мя, я́ко еди́н Ца́рь Ми́ра.

Грехи́ совокупля́ю безу́мно грехо́м, и восклоне́ния не́сть в сме́рти мое́й: увы́ мне́, ка́ко явлю́ся Христо́ви?

Беду́ прие́млю я́ко кора́бль, погуби́х мое́ бре́мя, е́же ми́ да́л еси́, Ще́дре, и ны́не обнища́в зову́: не пре́зри мене́, Христе́.

Му́ченичен: Я́ко сла́ву презре́вше до́льнюю и попира́емую, Небе́сней страстоте́рпцы сподо́бистеся сла́ве, сопребыва́юще Христу́.

Му́ченичен: Любве́ я́же к пло́ти у́м отлучи́вше, ве́рою му́ки усво́исте любе́зно, страстоте́рпцы, усвоя́еми Христу́.

Богоро́дичен: Дании́л Тя́ го́ру ве́лию ду́хом зря́ще, Богоро́дице, от нея́же Ка́мень отсе́кся, сокруша́ет де́монов истука́нная.

И́н

Ирмо́с: Просвеще́ние во тьме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ Ми́ра, просвети́ мя сия́нием Твои́м: ино́го бо ра́зве Тебе́ бо́га не зна́ю.

В тече́ниих Иорда́нских струя́ нетле́ния, Предте́че, крести́в Христа́ моли́ истека́ния страсте́й мои́х изсуши́ти, и пото́ки сла́достныя насле́довати, и пра́ведных кра́снаго ра́дования.

Уже́ рыда́ю, и содрага́юся стра́хом, и недоуме́нием всегда́ содержи́мь е́смь, помышля́я моя́ соде́ланная, и бу́дущий Су́д ужа́сный: благоутро́бне Го́споди, пощади́ мя Твоего́ Крести́теля мольба́ми.

Законополага́яй лю́дем спасе́ние, в раска́янии, Предте́че, прегреше́ний бы́вшее, посреде́ Зако́на и благода́ти ста́л еси́. Сего́ ра́ди мо́лим тя́: образми́ покая́ния на́с просвети́.

Да́ждь ми́ вре́мя покая́ния, уны́нно преше́дшее, все́ ижди́вшему, Благоде́телю, име́я на сие́ моля́щаго Тя́, Сло́ве, Иоа́нна вели́каго Предте́чу, и покая́ния всеми́рнаго пропове́дника.

Богоро́дичен: Наве́ты и ловле́нии льсти́ваго умертви́хся, Влады́чице Всенепоро́чная, оживи́ мя, Я́же ро́ждшая Живо́т все́х, Богоро́дице, ипоста́сный, да Тя́ пою́ благоче́стно Всенепоро́чную.

Пе́снь 6

Ирмо́с: Во глубине́ грехо́вней содержи́мь е́смь, Спа́се, и в пучи́не жите́йстей обурева́емь, но я́коже Ио́ну от зве́ря, и мене́ от страсте́й возведи́, и спаси́ мя.

Я́коже дре́вле ханане́я зову́ Ти, Спа́се, Сы́не Бо́жий, поми́ловав мя́ уще́дри: ду́шу бо стра́ждущу и́мам в лю́тых, и саму́ в чу́вство приити́ не хотя́щую.

Смуща́ет мя́ безме́рных страсте́й бу́ря: я́коже мо́рю иногда́ запрети́л еси́, и спа́сл еси́ святы́я ученики́ Твоя́, и мене́, Иису́се, возведи́, и спаси́, Христе́.

Му́ченичен: Удиви́шася а́нгельстии безпло́тнии ли́цы терпе́нию ва́шему, е́же в телеси́, и похвали́ша Подаю́щаго ва́м честни́и страда́льцы, и си́лу и трудо́в воздая́ния.

Му́ченичен: Окропля́еми крове́й свои́х тече́ньми, и о́чию избода́еми, му́ченицы, померза́еми сту́дению лю́тою, к теплоте́ жи́зни преидо́сте, воспева́юще Христа́.

Богоро́дичен: Я́ко трапе́за Хле́б вмеща́еши та́йный, от Него́же я́дше не ктому́ а́лчем, Всепе́тая, ве́дущии Тя́, Христа́ все́х Бо́га Роди́тельницу, и Пита́тельницу я́ко вои́стинну.

И́н

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Гла́с Сло́во пропове́давый, все́х гла́сы восприе́м, проси́ грехо́в проще́ние дарова́ти, ве́рою пою́щим тя́.

Сокруше́ние души́ моея́ исцели́, и грехо́в бре́мя разреши́, и па́че наде́жды спаси́ мя моли́твами твои́ми, блаже́нне Предте́че.

Иису́са, Его́же руко́ю твое́ю крести́л еси́, Предте́че, моли́, руки́ мя изба́вити греха́, взима́юща к Нему́ ру́це при́сно, всесла́вне.

Богоро́дичен: Дрема́нием ле́ностным одержи́мь е́смь, со́н грехо́вный тяготи́т се́рдце мое́: Твои́м, Пречи́стая, бде́нным хода́тайством воздви́гни, и спаси́ мя.

Пе́снь 7

Ирмо́с: Херуви́мы подража́юще о́троцы в пещи́, ликовствова́ху вопию́ще: благослове́н еси́, Бо́же, я́ко и́стиною и судо́м наве́л еси́ сия́ вся́ гре́х ра́ди на́ших, препе́тый и препросла́вленный во вся́ ве́ки.

Зако́нов Твои́х отверго́хся, и покори́хся безслове́сным похоте́м, де́я неле́пая, Христе́, я́ко осуети́хся в безу́мии мое́м, я́коже и́н никто́же от челове́к на земли́: не оста́ви у́бо мене́, Спа́се, поги́бнути, человеколю́бия ра́ди.

В беззако́ниих, Го́споди, се́ а́з зача́т е́смь, я́коже Дави́д зову́, и я́ко блудни́ца слезю́, и я́ко преогорчева́яй ра́б, преогорчи́х Тя́ Еди́наго су́щаго Бо́га Блага́го: не оста́ви у́бо мене́, Спа́се, поги́бнути, человеколю́бия ра́ди.

Му́ченичен: Му́ченический подвиза́ся собо́р страстоте́рпец, му́ченически венча́ся живоно́сною десни́цею, я́ко вои́стинну Бо́га возлюби́, вся́ сотво́ршаго сло́вом. И ны́не на Небесе́х ра́дуяся, наслажда́ется Боже́ственнаго насле́дия.

Му́ченичен: О́чию избода́еми, и отъе́млеми рука́ми и нога́ми, благоте́чно к Небе́сному благосла́внии посыла́хуся ше́ствию, препина́юще ше́ствия единобо́рца: те́х моли́твами спаси́ вся́, Сло́ве, Тебе́ славосло́вящия.

Богоро́дичен: Херуви́ми сла́вят, Серафи́ми воспева́ют, Престо́ли, и Вла́сти, и Госпо́дьствия при́сно, е́же па́че ума́ Твое́ Рождество́, Мари́е всепе́тая, я́ко еди́на Бо́га ражда́еши пло́тию. Его́же моли́, Чи́стая, все́м на́м спасти́ся, любо́вию почита́ющим Тя́.

И́н

Ирмо́с: Богопроти́вное веле́ние беззако́ннующаго мучи́теля, высо́к пла́мень вознесло́ е́сть: Христо́с же простре́ богочести́вым отроко́м ро́су духо́вную, Сы́й благослове́н и препросла́влен.

Из ко́рене секи́рою твоего́ покая́ния, исто́рг я́звы стра́стнаго се́рдца моего́, всади́, Предте́че, Боже́ственное безстра́стие, и стра́х чисте́йший Бо́жий, вся́кия зло́бы отчужда́ющий мя́.

Во струя́х Иорда́нских, я́ко крести́л еси́ покрыва́ющаго вода́ми превы́спренняя Го́спода: Того́ моли́ во́ду дарова́ти Боже́ственнаго умиле́ния при́сно очи́ма мои́ма, сла́вный Предте́че.

И́же ми́ру взе́млющаго гре́х А́гнца Бо́жия, Предте́че, пропове́дав, Того́ моли́ от ко́злищ ча́сти яви́ти мя́ чу́жда, и десны́м Его́ овца́м и мене́ сочета́ти, сла́вне.

Богоро́дичен: Непло́дная утро́ба нося́ше Тя́, Де́во: во чре́ве носи́вшую Сло́во воплоще́нно, Его́же Боже́ственными взыгра́нии, вели́кий Предте́ча, непло́дный всесвяты́й Пло́д позна́ ра́дуяся, и поклони́ся.

Пе́снь 8

Ирмо́с: В купине́ Моисе́ю Де́вы чу́до, на Сина́йстей горе́ прообрази́вшаго иногда́, по́йте, благослови́те, и превозноси́те во вся́ ве́ки.

Да обожи́ши на́с, воплоти́лся еси́ за ми́лость, ника́коже разуме́х, порабоще́н сластьми́: Твое́ю бла́гостию обрати́ мя, Христе́, все́х спасе́ние.

Ты́, Па́стырю до́брый, Сло́ве, заблу́ждшую на гора́х преступле́ния, окая́нную мою́ ду́шу обрати́ и спаси́: да не до конца́ мя вра́г льсти́вый пожре́т.

Му́ченичен: Ста́нем му́жески вку́пе, вопия́ху дру́г дру́гу кра́снии страда́льцы, ураня́еми лю́те: се́ Христо́с простира́ет побе́ды венцы́ во вся́ ве́ки.

Му́ченичен: Кре́пкими жи́лами, тве́рдыми ва́шими боле́зньми удави́сте зми́я, хотя́щаго ва́с злокова́рно прельсти́ти, и ра́йския пи́щи яви́стеся насле́дницы.

Богоро́дичен: Да обожи́т на́с Бо́г, воплоти́ся из чи́стых крове́й Твои́х, и бы́сть Челове́к, Де́во Богоро́дице: Его́же моли́ при́сно о чту́щих Тя́.

И́н

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня, Го́спода.

Да́ждь десни́цу мне́ на земли́ лежа́щему, Предте́че, и́же десни́цу просте́р, и омы́л еси́ вода́ми Нескве́рнаго: и изба́ви мя́ скве́рны теле́сныя, всего́ мя очища́я покая́нием, и спаси́ мя.

Иму́щи, душе́, вре́мя пока́ятися, ле́ности тяжча́йший со́н оттряси́, и спе́шно побди́ вопию́щи Влады́це твоему́: Милосе́рде, уще́дри мя́, Крести́теля Твоего́ мольба́ми.

Пото́цы страсте́й, и во́ды зло́бы до души́ моея́ внидо́ша, блаже́нне Предте́че: потщи́ся ско́ро изъя́ти мя́, и́же ре́чными струя́ми измы́в безстра́стия тиша́йшую Пучи́ну.

Увы́ мне́, мно́га зла́ сотво́ршему! Увы́ мне́, еди́ному прогне́вавшему Бо́га Преблага́го! Крести́телю Христо́в, помози́ ми, и пода́ждь прегреше́ний мои́х разреше́ние, и долго́в мои́х отсече́ние Твои́ми хода́тайствы.

Богоро́дичен: Вы́шняго Бо́га пло́тию Ро́ждшая, от гно́я мя́ возста́ви страсте́й оскорбля́ющих мя́, и лю́те всего́ обнища́вша, Боже́ственными обогати́, Пречи́стая, доброде́тельми, я́ко да воспою́ Тя спаса́емь.

Пе́снь 9

Ирмо́с: От земноро́дных кто́ слы́ша таково́е, или́ кто́ ви́де когда́? Я́ко Де́ва обре́теся во чре́ве иму́щая, и безболе́зненно Младе́нца поро́ждшая? Таково́е Твое́ чу́до, и Тя́, Чи́стая Богоро́дице, велича́ем.

О, ка́ко стра́шно е́сть Твое́ Суди́ще, на не́мже Христе́ ожида́ю суди́тися, и не чу́вствую отню́д сего́ стра́ха, в ле́ности вся́ ле́та провожда́я! Обрати́ мя, Еди́не Соде́телю, И́же Манасси́ю обраще́й согреши́вшаго.

Уста́ви, Христе́, пото́ки, вопию́ Ти, безме́рных мои́х зо́л, то́ки мне́ дая́й сле́з умыва́ющия скве́рну, я́же подъя́х безу́мием, и спаси́ мя, спасы́й блудни́цу от души́ пока́явшуюся, ми́лостию Твое́ю.

Му́ченичен: Светоза́рная Боже́ственных страстоте́рпец па́мять, я́ко со́лнце на́м возсия́вши, вся́ концы́ земны́я светово́дит, и тьму́ прогоня́ет Боже́ственным Ду́хом идолонеи́стовства, и страсте́й душетле́нных помраче́ние.

Му́ченичен: По́лк че́стен, во́инство победоно́сное, и избра́нное ополче́ние, собо́р святы́х му́ченик, ли́к блаже́нный, ликостоя́нием сочета́ся безпло́тных. Те́х моли́твами, Христе́, вся́ ны́ Ца́рствию Твоему́ прича́стники сотвори́.

Богоро́дичен: Све́тлыми заря́ми, из чре́ва Твоего́ Возсия́вшаго на́м, и безбо́жия но́щь Потре́бльшаго, Де́во Ма́ти Мари́е, просвети́ вся́ ве́рою Тебе́ чту́щия, и от несвети́мыя тьмы́ изба́ви в ча́с осужде́ния.

И́н

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Ка́ла мя́ изба́ви грехо́внаго, Го́споди, Безгре́шне, Еди́не и Многоми́лостиве, Крести́теля мольба́ми, и́же Тебе́ пропове́давый всему́ ми́ру А́гнца Бо́жия, взе́млющаго челове́ков грехи́.

Яко ши́пок благово́нен, я́ко благоуха́нный кипари́с, я́ко неувяда́емый кри́н, я́ко ми́ро че́стно име́яй тя́, Госпо́день Предте́че, мои́х де́л злосмра́дия избавля́юся моли́твами твои́ми, притека́я к покро́ву твоему́.

Непло́дствующа мя́ непло́дными де́лы, Всеблаже́нне, сотвори́, доброде́телей благопло́дие при́сно принося́ща, ча́до мя́ Госпо́дне творя́, и прича́стника Боже́ственному Ца́рствию, и святы́х собо́ру купножи́теля.

На́м лю́бящим тя́, и любо́вию почита́ющим, и в Боже́ственнем хра́ме твое́м лику́ющим, да́ждь с Небесе́ разреше́ние лю́тых, Предте́че Госпо́день, и жития́ исправле́ние, и прегреше́ний избавле́ние.

Носи́му во утро́бе Богома́терни, вся́ Нося́щему ма́нием, поклони́лся еси́, Проро́че: с Не́юже моли́ смире́нней спасти́ся души́ мое́й, во мно́гая впа́дающей по вся́ дни́ согреше́ния.

Та́же, Досто́йно е́сть: и покло́н. Ектения́, и свети́лен, и псалмы́ обы́чныя.

На стихо́вне стихи́ры умили́тельны, гла́с 2:

Все́х превосхожду́ грехо́м, кого́ научу́ покая́нию? Аще воздохну́ я́ко мыта́рь, непщу́ю отягчи́ти Небеса́; а́ще слезю́ я́коже блудни́ца, оскверня́ю слеза́ми зе́млю. Но да́ждь ми́ оставле́ние грехо́в, Бо́же, и поми́луй мя́.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся – во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Беззако́ния моя́ пре́зри, Го́споди, от Де́вы рожде́йся, и се́рдце мое́ очи́сти, хра́м сие́ творя́ Свята́го Твоего́ Ду́ха; не отве́ржи мене́ от Твоего́ лица́, безме́рную име́яй ве́лию ми́лость.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Кре́ст Христо́в взе́мше святи́и му́ченицы, ору́жие непобеди́мое, всю́ диа́волю си́лу упраздни́ша, и прие́мше венцы́ Небе́сныя, стена́ на́м бы́ша, о на́с Тому́ моля́щеся.

Сла́ва, и ны́не: Богоро́дичен: Ра́дуйся, Мари́е Богоро́дице, Хра́ме Неразруши́мый, па́че же Святы́й, я́коже вопие́т проро́к: свя́т хра́м Тво́й, ди́вен в пра́вде.

Та́же, Бла́го е́сть испове́датися Го́сподеви: Трисвято́е по О́тче на́ш: тропа́рь, и ектения́. Та́же ча́с 1-й, псалмы́ обы́чныя, и про́чее обы́чное, и отпу́ст.

Гла́с Ти́ прино́сим разбо́йнич, и вопие́м Ти́: помяни́ на́с, Го́споди, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Разбо́йника превзыдо́х, и блудни́цу страстьми́: уще́дри мя́, Спа́се, самоосужде́ннаго.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Погрузи́вый Бе́здну благоутро́бия в воде́, Предте́че, твои́ми моли́твами стра́сти моя́ ума́ли.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

И́же преле́стная тече́ния, крове́й тече́ньми изсуши́вше, Христо́вы страстоте́рпцы, досто́йно сла́вими есте́.

Сла́ва: Вети́йствуяй, я́коже пи́сано е́сть, у́м челове́ческий не мо́жет Божества́ Еди́но Нача́ло пе́ти Триипоста́сное.

И ны́не: Я́же неопа́льно Ро́ждшую Бо́га Пребезнача́льна, похва́льными вси́ пе́сньми непреста́нно воспои́м.

на Го́споди воззва́х: стихи́ры кре́стны, гла́с 2.

Подо́бен: Егда́ от Дре́ва:

Сти́х: А́ще беззако́ния на́зриши, Го́споди, Го́споди кто́ постои́т? Я́ко у тебе́ очище́ние е́сть.

Свети́ти свети́ла не терпя́ще омрачи́шася, на Кресте́ заше́дшу Тебе́, Сло́ве; земля́ же подвиза́шеся, и ка́мение разседа́шеся, церко́вное благоле́пие раздира́шеся посреде́, гро́бы отверза́хуся, ме́ртвии востая́ху, а́д издая́ше вся́ су́щия до́лу, бе́си побежда́хуся, и со́н все́м вменя́шеся сме́рть.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Егда́ Плодови́тый Тя́, Христе́, Виногра́д, разбо́йник благонра́вный ви́дев, лу́чший бы́сть разбо́йник благоиску́сен, и укра́дает проще́ние дре́вних согреше́ний, зело́ благоесте́ственне ма́лым гла́сом. Тому́ ревни́тели бы́ти потщи́мся, е́же помяни́ и на́с, Человеколю́бче, вси́ зову́ще.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Сия́ет я́ко звезда́ на небеси́, в Це́ркви Боже́ственный вои́стинну Кре́ст Тво́й, Христе́, опаля́я у́бо бе́сы, ве́рныя же просвеща́я, и посрамля́я ли́ца Тебе́ распе́нших: и́мже прароди́тели дре́вом вообража́ющим Креста́, пре́жде от рабо́ты изве́л еси́, и от ка́мене ме́д сса́ти в пусты́ни сотвори́л еси́.

Та́же стихи́ры Мине́и.

А́ще ли не́сть Мине́и, и́ны стихи́ры Пресвяте́й Богоро́дице, гла́с 8, подо́бен то́йже:

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Все́м Предста́тельницу Тя́ челове́ком, все́м прибе́жище вели́кое, все́м Засту́пницу Тя́ показа́, Влады́чице, христиа́ном, И́же из Тебе́ в на́ше смеше́ние обо́лкся благоутро́бне, и распя́тие и сме́рть на́с ра́ди подъя́т. Того́ у́бо моли́ непреста́нно, все́м очище́ние низпосла́ти прегреше́ний, Богоневе́стная.

Сти́х: Хвали́те Го́спода, вси́ язы́цы, похвали́те Его́, вси́ лю́дие.

Дре́вле Де́ва и А́гница, зря́щи из чре́ва Ея́, на Дре́ве пове́шена, я́ко осужде́на со двема́ осужде́ннома, восклица́ющи глаго́лаше: Сы́не и Бо́же мо́й, стра́нно ви́димое стра́шное та́инство, оба́че му́дрости Твоея́ бе́здну испыта́ти никто́же мо́жет – пою́ Твое́ долготерпе́ние.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Где́ Твоего́ виде́ния благоле́пие? Где́ красота́ скры́ся добро́ты твоея́, Сы́не? Ка́ко И́же добро́тою неизрече́нная сотвори́вый Бо́же, кра́сный в добро́тах, за вся́ челове́ки, безсла́вен и безче́стен на Дре́ве ви́сиши, ви́да, ни добро́ты не име́яй, Ча́до? Предо́брая Де́ва вопия́ше, стеня́щи и пла́чущи.

Сла́ва, и ны́не: Крестобогоро́дичен: За́йде свети́лов заря́, у́мным Све́том побе́ждшися, обна́жшимся на Кресте́, побежда́ется у́бо при́сно ху́ждшее бо́льшим, и лу́чшему ме́ньшее дае́т ме́сто. Ка́ко у́бо не подоба́ше светя́щу Христу́, скры́тися заре́ чу́вственней? Досто́йным глаго́лаше, Тя́ зря́щи Пречи́стая, свети́лом све́та.

Та́же, Све́те ти́хий: Проки́мен: Ми́лость Твоя́ Го́споди, пожене́т мя́ вся́ дни́ живота́ моего́. И Сподо́би, Го́споди, в ве́чер се́й:

На стихо́вне стихи́ры кре́стны. Гла́с 2:

Спаси́ мя, Христе́ Спа́се, си́лою Кре́стною, спасы́й Петра́ в мо́ри, и поми́луй мя́, Бо́же.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Да ра́спнется вопия́ху, и́же Твои́х дарова́ний при́сно наслажда́ющиися, и злоде́я во Благода́теля ме́сто проша́ху прия́ти, и́же пра́ведников уби́йцы; молча́л же еси́ Христе́, терпя́ и́х суровство́, пострада́ти хотя́, и спасти́ на́с, я́ко Человеколю́бец.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Ли́цы му́ченичестии проти́вишася мучи́телем, глаго́люще: мы́ во́инствуем Царю́ Си́л, а́ще и огню́ и му́кам преда́сте на́с, но не отмета́емся Тро́ическия Си́лы.

Сла́ва, и ны́не: Крестобогоро́дичен:

Подо́бен: Егда́ от Дре́ва Тя́:

Боле́зни претерпе́вши мно́гия в распя́тии Сы́на и Бо́га Твоего́, Пречи́стая, стеня́ше, слезя́щи и восклица́ющи: увы́ Мне́, Ча́до сла́дкое, без пра́вды ка́ко стра́ждеши, хотя́ изба́вити я́же от Ада́ма земноро́дныя? Те́мже, Пречи́стая Де́во, Тебе́ мо́лим ве́рою: ми́лостива на́м Того́ соде́лай.

Та́же: Ны́не отпуща́еши: и Трисвято́е по О́тче на́ш: тропа́рь, ектения́, и отпу́ст.

Кано́н Пресвяте́й Богоро́дице. Гла́с 2.

Пе́снь 1

Ирмо́с: Гряди́те лю́дие, пои́м пе́снь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты еги́петския, я́ко просла́вися.

Сло́во моего́ приобре́тения отню́д не́сть к песносло́вию, Всечи́стая, я́ко покрыва́ет мя́ грехо́в мои́х тьма́: но, о Богороди́тельнице, утесня́ема приими́ мя!

Под Тво́й покро́в прибега́ю, Пречи́стая, от гре́х безчи́сленных в коне́ц, и Бо́га и Влады́ку благопреме́нна сотвори́, Чи́стая, и спаси́ мя.

Сла́ва: Ты́ мне́, Влады́чице, те́плое очисти́лище, к Тебе́ прибега́я спасу́ся, и приобря́щу душе́вное спасе́ние: мо́жеши бо вся́, я́ко су́щи Ма́ти все́х Бо́га.

И ны́не: И́же душа́м льсте́ц, привлече́ мя в поги́бельный ро́в, но мне́ простри́ держа́вную Твою́ ру́ку, Богоро́дице Де́во, и ско́ро ко све́ту возведи́.

Пе́снь 3

Ирмо́с: Утверди́ на́с в Тебе́, Го́споди, Дре́вом умерщве́й гре́х, и стра́х Тво́й всади́ в сердца́ на́с пою́щих Тя́.

Во мно́гия впа́д разбо́йники окая́нный, обнаже́н бы́х, уя́звлен же и оста́влен: но ты́, Богоро́дице Чи́стая, не пре́зри мене́.

Обнажи́ Ада́ма пре́жде зми́й, прельсти́в дре́вом, ны́не же удо́бно плени́ ду́шу мою́: молю́ся Ти́, Влады́чице, уще́дри мя́.

Сла́ва: Ны́не Тебе́ моя́ приношу́ та́йная, и́стинней Предста́тельнице мое́й и покро́ву, я́ко да сия́ мне́ не обличи́т Сы́н Тво́й, на Суде́ пра́веднем Свое́м.

И ны́не: Поми́луй на́с, Чи́стая, поми́луй, и́бо от де́л спасе́ния отню́д не́сть на́м. Те́мже ве́рою те́плою к Тебе́ вопие́м: поми́луй рабы́ Твоя́.

Пе́снь 4

Ирмо́с: Пою́ Тя́, слу́хом бо, Го́споди, услы́шах и ужасо́хся, до мене́ бо и́деши, мене́ ища́ заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Боля́ща мя́ неисце́льно, Влады́чице, и обнища́вша не пре́зри, но да́ждь ми́ еле́й бла́гости Твоея́, Де́во, и Твои́ми промышле́ньми обогати́ мя, е́же от Бо́га зла́том нетле́нным.

До́брых все́х обнажи́хся, и лежу́ во злы́х, обо́лкся па́че все́х дре́вле па́дших: и ны́не пре́жними украси́ мя, и вторы́х изба́ви, Богоневе́сто.

Сла́ва: Блудни́цу превзыдо́х в блуде́х, и мытаря́ лихои́мством всегда́, сло́вом и изволе́нием, но у́бо обою́ покая́ние, пре́жде конца́ стяжа́ти ми́, Влады́чице, сподо́би.

И ны́не: Водвори́хся в пусты́ни печа́льней, удали́хся от Тебе́, Богороди́тельнице, кто́ да́ст ми́ криле́, и полещу́, и прииду́ к Тебе́, наде́жди мое́й, спаса́ющей малоду́шие мене́ окая́ннаго?

Пе́снь 5

Ирмо́с: Све́та Пода́телю, и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го бо́га не зна́ем.

Я́ко Невече́рний Све́т от чре́ва Твоего́, Влады́чице, су́щим на земли́ возсия́вший, смра́дную ду́шу мою́ озари́, Чи́стая, и отжени́ вся́ку мглу́ се́рдца моего́.

Но́щь мя́ покрыва́ет лю́тая лука́вых мои́х и злы́х дея́ний, но вопию́ Ти, Влады́чице: наста́ви мя́ к све́ту Боже́ственному Твоего́ Сы́на и Влады́ки, Всепе́тая.

Сла́ва: И мене́ прими, Чи́стая, я́коже блу́днаго сы́на прия́т Тво́й Сы́н и Зижди́тель вся́ческих, вопию́щаго с ни́м: согреши́х вои́стинну, и спаси́ мя, Влады́чице.

И ны́не: Уязви́вшееся мое́ се́рдце прило́ги лука́ваго, Пречи́стая, я́ко Ми́лостива исцели́, на Кресте́ пло́тию Уя́звленнаго, неизглаго́ланно ро́ждши.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну, от тли́, Бо́же, мя́ возведи́.

В ро́в грехо́вный впадо́х, и к незабыва́ющему не взира́ю Бо́гу, стра́хом одержи́мь: но к Тебе́ примета́юся, Богоневе́сто.

Покры́вшееся лю́те се́рдце мое́ недове́домых прегреше́ний волно́ю, всеси́льною Твое́ю моли́твою, Богоро́дице Де́во, окорми́.

Сла́ва: Красоту́ мне́ ви́дети сла́вы Твоея́ сподо́би, егда́ от пло́ти моея́ хощу́ разлучи́тися, я́ко утвержде́ние мое́, Влады́чице: да отсю́ду уве́м оставле́ние.

И ны́не: Напа́стей и бе́д и скорбе́й изба́ви рабы́ Твоя́, Свята́я Влады́чице, я́же к Бо́гу Твои́ми моли́твами, ве́рою к Тебе́ прибега́ющия.

Та́же: Го́споди поми́луй, три́жды. Сла́ва, и ны́не:

Седа́лен, гла́с 2: Тя́ велича́ем, Богоро́дице, вопию́ще: ра́дуйся Же́зле, от Него́же безсе́менно Бо́г прозябы́й, погуби́ на Дре́ве сме́рть.

Пе́снь 7

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.

Ны́не тщи́тся зия́я вра́г прия́ти мя́ во утро́бу свою́, и́бо приноша́ет ми́ отвсю́ду искуше́ния и се́ти, ве́сь пресека́я, спе́х мо́й: но предвари́вши изба́ви мя́, Де́во Ма́ти, от того́ наве́та лука́ваго.

Оскверня́ет и смуща́ет чу́вствия и у́м сопоста́т, и в ро́в отча́яния свести́ мя тщи́тся. Те́мже вопию́ Ти Еди́ней: прибе́жище мое́, Богоневе́сто, изба́ви мя́ от руки́ сего́ льсти́ваго.

Сла́ва: И́же дре́вле три́ ю́ношы от пе́щи горя́щия, Христе́ мо́й, избавле́й, Са́м, Сло́ве, и мене́ мольба́ми Неискусобра́чныя Ма́тере Твоея́ от пла́мене, его́же разжего́х безме́рными злы́ми, изба́ви и ороси́.

И ны́не: Ве́щно обре́т се́рдце мое́ тли́тель, умертви́ е́: но Ты́ мя у́бо си́лою Боже́ственною одожди́, Неискусобра́чная Ма́ти, и победи́ти ми́ сподо́би сего́, я́ко да ве́рою зову́ Ти: Благослове́нная, Я́же Бо́га пло́тию ро́ждшая.

Пе́снь 8

Ирмо́с: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте, дела́, я́ко Го́спода, и превозноси́те во вся́ ве́ки.

Мно́гими злы́ми мои́ми погорбле́н бы́в лю́те, мно́жеством тяго́т, и о́ко мое́ отню́д на небеса́ не сме́ю возвести́, но вопию́ Ти: поми́луй, Еди́на Богоро́дице, мене́ па́дшаго.

Во́ньже впадо́х гне́в Твоего́ Сы́на и Бо́га, Чи́стая, изба́ви мя́, и в ча́с, во́ньже хо́щет твори́ти испыта́ние, бу́ди ми́ по́мощь, Пречи́стая, и от шу́их ко́злищ изба́ви мя́.

Сла́ва: Умерщвле́ннаго мя́ мы́сленно, от безчи́сленных мои́х зо́л, воздви́гни, Богоневе́сто Отрокови́це: и мольбо́ю Твое́ю изба́ви мя́ от вся́кия пре́лести душетле́ннаго врага́ и уби́йцы.

И ны́не: Злонеиспра́вленная душе́, ка́ко очерни́ла еси́ зле́ пе́рвую добро́ту? Ка́ко отве́ргла еси́ вся́, я́же к Зижди́телю Твоему́ обе́ты, и прия́ла еси́ зло́бная? Но гряди́ и притецы́ благоче́стно к Богоро́дице.

Пе́снь 9

Ирмо́с: От Бо́га Бо́га Сло́ва, неизрече́нною му́дростию, прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии единому́дренно пе́сньми велича́ем.

Де́лы тя́жкими чу́вства оскверни́х вои́стинну, и всего́ студодея́ния испо́лнен е́смь: но очи́сти у́бо, Пречи́стая, вре́мя мне́ испроша́ющи благоумиле́ния, да непреста́нно Тя́ велича́ю.

Ты́ мя, Богоро́дице, оправда́й, егда́ явя́тся дела́ сокрове́нная коего́ждо я́ве, и́маши бо вои́стинну си́лу, и тьмы́ мя́ изба́ви и во стране́ учини́ све́та моли́твами Твои́ми, иде́же е́сть ра́дость неизглаго́ланная.

Сла́ва: Молю́ Тя, Сло́ве, пре́жде прише́ствия конца́ покая́ние ми́ да́руй те́плое, и умиле́ние слеза́м, целому́дрие вку́пе и смире́ние, и любо́вь Боже́ственную, и ста́ду Твоему́ устрое́ние, мольба́ми Ро́ждшия Тя́.

И ны́не: У́мных же и чу́вственных, премину́вши, Де́во, сла́вою и че́стию, ра́зве Бо́га, не омерзи́ мене́ премину́вшаго в прегреше́ниих, ве́тхих же и но́вых челове́к согре́шших на земли́: но Твое́ю моли́твою спаси́ мя.

Та́же: Досто́йно е́сть: и покло́н. Трисвято́е по О́тче на́ш: тропари́, и про́чее обы́чно, и отпу́ст.

По 1-м стихосло́вии седа́льны кре́стны, гла́с 2:

Спасе́ние соде́лал еси́ посреде́ земли́, Христе́ Бо́же, на Кресте́ пречи́стеи ру́це Твои́ просте́рл еси́, собира́я вся́ язы́ки, зову́щия: Го́споди, сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

И́мже о́бразом плени́л е́сть вра́г Ада́ма дре́вом сне́дным, та́коже, Го́споди, Са́м плени́л еси́ Ты́ врага́ Дре́вом Кре́стным, и Стра́стию Твое́ю: на се́ бо прише́л еси́ вторы́й Ада́м, взыска́ти заблу́ждшаго, и оживи́ти уме́ршаго: Бо́же, сла́ва Тебе́.

Сла́ва, и ны́не: Крестобогоро́дичен: Тя́ велича́ем, Богоро́дице, вопию́ще: ра́дуйся, Же́зле, от него́же безсе́менно Бо́г прозябы́й, погуби́ на Дре́ве сме́рть.

По 2-м стихосло́вии седа́льны, гла́с 2:

Животворя́щий Кре́ст Твоея́ бла́гости, его́же дарова́л еси́ на́м недосто́йным Го́споди, Тебе́ прино́сим в моли́тву: спаси́ гра́д Тво́й, ми́р да́руяй Богоро́дицы ра́ди, Еди́не Человеколю́бче.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Просвети́вый земна́я Кресто́м и призва́вый на покая́ние гре́шныя, не отлучи́ мене́ ста́да Твоего́, Па́стырю До́брый, но взыщи́ мене́ заблу́ждшаго, Влады́ко, и свято́му Твоему́ ста́ду сопричти́, И́же еди́н Бла́г и Человеколю́бец.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: И́же просвети́вый святы́я Твоя́ па́че зла́та, и просла́вивый преподо́бныя Твоя́, я́ко Бла́г; от ни́хже умоле́н быва́я, Христе́ Бо́же, жи́знь на́шу умири́, я́ко Человеколю́бец, и моли́тву испра́ви я́ко кади́ло, И́же Еди́не во святы́х почива́яй.

Сла́ва, и ны́не: Крестобогоро́дичен:

Подо́бен: Милосе́рдия су́щи:

Де́ва и Ма́ти Твоя́, Христе́, на Кресте́ зря́щи Тя́ ме́ртва просте́рта, пла́чущи го́рько глаго́лаше: Сы́не мо́й, что́ стра́шное сие́ та́инство? Иже все́м да́руяй живо́т ве́чный, во́лею на Кресте́ ка́ко умира́еши сме́ртию поно́сною?

По 3-м стихосло́вии седа́льны, гла́с 2:

Подо́бен: Милосе́рдия су́щи:

Распя́тися претерпе́л еси́ на́с ра́ди, и ме́ртв бы́ти, Иису́се Жизнода́вче, я́ко да руку́ твое́ю созда́ние от сме́ртнаго осужде́ния изба́виши, я́ко Благоутро́бен Бо́г и Человеколю́бец, за мно́жество щедро́т: И́же еди́н сы́й Безгре́шен.

Я́ко разбо́йник испове́дую, и вопию́ Ти Благо́му: помяни́ мя, Го́споди, во Ца́рствии Твое́м: и с ни́м мя́ сопричти́, И́же во́лею стра́сти на́с ра́ди прие́мый.

Сла́ва, и ны́не: Крестобогоро́дичен: Честны́м Кресто́м Сы́на Твоего́ сохраня́еми, Влады́чице Чи́стая Богоро́дице, вся́к прило́г бори́теля вси́ удо́бне побежда́ем, сего́ ра́ди по до́лгу Тя́ ублажа́ем, я́ко Ма́терь Бо́жию, еди́ну упова́ние душа́м на́шим.

Кано́н Честно́му и Животворя́щему Кресту́, [его́же краегране́сие си́це: Паде́ние е́сть бесо́м, кре́стное стоя́ние.] Творе́ние Ио́сифово. Гла́с 2.

Пе́снь 1

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Преступи́в пе́рвую за́поведь дре́вле первозда́нный, от сада́ сме́рть объе́м – воздви́гнувыйся же на Дре́во Безсме́ртный, и сме́рти вкуси́вый, безсме́ртие все́м челове́ком дарова́.

Кресту́ водрузи́вшуся на земли́, низпаде́ шата́ние врага́, и отню́д потреби́ся, пре́жде же отринове́нный челове́к па́ки в Ра́й вхо́дит. Сла́ва Тебе́ та́ко Еди́ному благоизво́лившему Бо́гу на́шему.

Му́ченичен: Я́ко овни́, я́ко а́гнцы слове́снии, вси́ закала́еми, и на у́ды неми́лостивно ссека́еми прехва́льнии му́ченицы, и принесе́ни бы́сте закла́ному я́ко овча́та: и ны́не Це́рковь святу́ю перворо́дных просвеща́ете.

Му́ченичен: Кре́пкое стоя́ние, му́дрии, всегда́ творя́ще, лука́выя враги́ низложи́сте, мечи́ ссека́еми, и во о́гнь и в во́ду вмета́еми: те́мже блаже́нныя кончи́ны, страстоте́рпцы, сподо́бистеся.

Богоро́дичен: Свяще́нный Тя́ проро́ческий ли́к нарица́ше две́рь непрохо́дную, зе́млю избра́нную, и го́ру несеко́мую, Пречи́стая Влады́чице: Влады́ку бо все́х родила́ еси́ во́лею распя́тие пло́тию прие́мшаго.

Други́й кано́н Пресвяте́й Богоро́дице. Гла́с 2.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты еги́петския, я́ко просла́вися.

Вси́ ве́рнии прииди́те, согла́сно воспои́м Богоро́дицу: Та́ бо Христа́ родила́ е́сть па́че ума́ челове́ча, и непреста́нно мо́лит спасти́ все́х на́с.

И́же О́браз О́тчи Ипоста́си, из Тебе́ прия́т смеше́ние, Богороди́тельнице, и истле́вший о́браз просла́ви, и сего́ но́ва сотвори́.

Херуви́м честне́йши су́щи, и Небе́сных кру́г превы́шши была́ еси́, Бо́га бо па́че ума́ во утро́бе Твое́й безстра́стно вмести́ла еси́.

Избавле́ние на́ших грехо́в родила́ еси́ Благода́теля Го́спода, измени́вши ме́ртвость пра́отца Ада́ма, возвела́ еси́ естество́ к Небе́сным.

Пе́снь 3

Ирмо́с: Процвела́ е́сть пусты́ня, я́ко кри́н Го́споди, язы́ческая неплодя́щая це́рковь, прише́ствием Твои́м в не́йже утверди́ся мое́ се́рдце.

Распина́ем поколеба́л еси́ всю́ тва́рь, Го́споди, и ве́рныя утверди́л еси́, воспева́ющия си́лу Твою́, и неизрече́нное, Сло́ве, снизхожде́ние Твое́.

Ра́й отве́рзл еси́ Кресто́м Твои́м, Влады́ко, и разбо́йника вве́л еси́ позна́вшаго Ца́рствие Твое́, и бога́тство Боже́ственнаго Твоего́ благоутро́бия.

Му́ченичен: Процвето́ша му́ченицы я́коже шипцы́ благоуха́ннии, в мы́сленных де́брех, и злосмра́дную пре́лесть отгна́ша, и ве́рных сердца́ облагоуха́ша.

Му́ченичен: Свети́льницы вселе́нныя, ве́рных спаси́телие святи́и, све́тлыми ду́ха заря́ми все́х просвети́те, ва́с по до́лгу ублажа́ющих.

Богоро́дичен: Воздвиза́ема на Дре́во Жизнода́вца ви́дящи, и во́лею умира́юща, все́м жи́знь Подаю́щаго, боля́ше утро́бою Всенепоро́чная.

И́н

Ирмо́с: Утверди́ на́с в Тебе́, Го́споди, Дре́вом умерщвле́й гре́х, и стра́х Тво́й всади́ в сердца́ на́с пою́щих Тя́.

Злату́ю я́ко вои́стинну кади́льницу, и ру́чку ма́нны, и Бо́жию го́ру, и пала́ту красну́ Боже́ственную, Тя́, Де́во, имену́ем.

Це́рковь и свяще́нное жили́ще Сло́ва су́щи, Богоро́дице: согреше́ний очисти́лище, Пречи́стая, бу́ди ми́, Присноде́во.

Ни язы́к земноро́дных, ни у́м безпло́тных возмо́жет Рождество́ Твое́ сказа́ти, вы́ше естества́ бо и смы́сла, Богоро́дице, Зижди́теля родила́ еси́.

Утвержде́ние бу́ди и прибе́жище, и покро́в, Де́во Богороди́тельнице, ве́рою к Тебе́ прибега́ющим, и Бо́жию Тя́ Ма́терь провозвеща́ющим.

Пе́снь 4

Ирмо́с: Прише́л еси́ от Де́вы, не хода́тай, ни а́нгел, но Са́м Го́споди вопло́щся, и спа́сл еси́ всего́ мя челове́ка. Те́м зову́ Ти: сла́ва си́ле Твое́й, Го́споди.

Упраздни́л еси́ нача́ло лю́таго мироде́ржца, на Дре́во возноси́м, и кля́тву потреби́л еси́. Те́мже Тя́ сла́вим, и́же тобо́ю спасе́ни, Еди́не Го́споди.

Распросте́рта на Дре́ве ви́девшее Тя́ со́лнце скры́ све́т, го́ры и ка́мение распадо́шася, и заве́са церко́вная раздра́ся, Всеси́льне.

Му́ченичен: Умерщвля́еми, врага́ до конца́ умертви́сте, желе́зом стру́жеми, ко́жнаго умерщвле́ния дебельства́ совлеко́стеся, му́ченицы Госпо́дни, и сла́вою облеко́стеся.

Му́ченичен: Усека́емыми глава́ми, му́ченицы, ужа́сно лука́вых си́л главы́ отсеко́ша, и пребыва́ющую сла́ву насле́доваша ра́дующеся.

Богоро́дичен: Возсия́ из утро́бы Твоея́, Отрокови́це Неискусобра́чная, О́тчее Заре́ние Христо́с, и просвети́ вселе́нную, распина́емь, и бесо́вскую тьму́ потреби́л е́сть.

И́н. Ирмо́с то́йже

Ка́плю ми́ умиле́ния одожди́, Влады́чице, взима́ющи вся́к се́рдца моего́ зно́й, и помышле́ния моего́ му́тныя пото́ки уставля́ющи.

Ору́жием мя́ сласте́й уя́звлена, и лежа́ща ура́нена, Пречи́стая, не пре́зри, но исцели́ копие́м и Кро́вию распя́таго Сы́на Твоего́ и Бо́га на́шего.

Обогати́вши влады́чеством всю́ тва́рь, лю́те мя́ обнища́вша благода́тию Боже́ственною уще́дри, я́ко да велича́ю Тя́, я́ко благу́ю мою́ Предста́тельницу, Всенепоро́чная.

Прохлади́ мя́, Де́во, покая́нием, и одожди́ се́рдце мое́ изсо́хшее зно́ем страсте́й, излива́ющи на мя́ еле́й и целе́ние ми́лости Твоея́.

Пе́снь 5

Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо, Влады́ко, к Светонача́льнику Отцу́ Твоему́, от но́щи неве́дения приведе́ние и́мамы.

На Кресте́ пригвозди́вся, земна́я основа́ния поколеба́л еси́, и копие́м пробода́емь, зми́я началозло́бнаго закла́л еси́, и то́ки спасе́ния все́м, Христе́, источи́л еси́.

Не терпе́л еси́ зре́ти заблужда́ема, его́же рука́ма созда́в, ру́це распросте́рл еси́, Сло́ве, на Дре́ве умерщвля́емь, и оживи́л еси́ сего́ Дре́вом дре́вле уме́ршаго.

Му́ченичен: Дру́зи Христо́вы, те́плии челове́ком засту́пницы, цве́ти честни́и, преудо́бреннии сосу́ди Ду́ха, му́дрии страстоте́рпцы, досто́йне ублажа́ются.

Му́ченичен: Зако́нно пострада́ ли́к святы́х Твои́х страда́лец, беззако́нных посрами́, Еди́не Законода́вче, си́лою Твое́ю, и сконча́в тече́ние, му́ченически венча́ся.

Богоро́дичен: Яви́лася еси́, Чи́стая, по Рождестве́ нетле́нна, Бо́г бо из Тебе́ роди́ся воплоща́емь, Его́же усмотри́вши распина́ема, не терпя́щи, утро́бною боле́знию восклица́ла еси́.

И́н

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го бо́га не зна́ем.

Воплоще́нна из Тебе́, Богороди́тельнице, ве́рнии позна́хом, без се́мене Сы́на ро́ждшася, Бо́га и́стинна, и Челове́ка естество́м. Те́мже Тя́ сла́вим.

Под кро́в Тво́й, Пречи́стая, и заступле́ние ве́рнии всегда́ прибега́юще ве́рою, Тебе́ ра́ди, Де́во, избавля́емся вся́каго лю́таго обстоя́ния.

Изба́ви на́с искуше́ний, и от бу́ри помышле́ний, Пречи́стая, вся́каго гне́ва, и вся́каго греха́, гла́да же и губи́тельства, и ве́чнаго, Де́во, муче́ния.

Предста́тельнице на́ша, спасе́ние и упова́ние, Влады́чице, христиа́н су́щи, спаса́й любо́вию Тя́ при́сно ве́рно воспева́ющих, Де́во Всепе́тая.

Пе́снь 6

Ирмо́с: Ко Го́споду от ки́та Ио́на возопи́: Ты́ мя возведи́ из глубины́ а́да, молю́ся, да я́ко Изба́вителю во гла́се хвале́ния, и́стины же ду́хом пожру́ Тебе́.

На ю́ныя главы́ поло́ж дла́ни иногда́ Иа́ков, Кре́ст прописова́ше, на не́мже, Сло́ве, распросте́рл еси́ дла́ни; и от руки́ льсти́ваго борца́ изба́вил еси́, Христе́, челове́чество.

Распе́ншуся, Христе́, Тебе́, Всецарю́, во́лею, ца́рствующий гре́х потреби́ся; Ада́м же и́же иногда́ дре́вле из Рая́ изгна́нный, в то́й вселя́ется па́ки, Тебе́ воспева́я.

Му́ченичен: Красны́ су́ще в ра́нах свяще́нныя, и́же благоле́пием украси́вшияся Небе́сным, вои́стинну возлю́бленныя Госпо́дни му́ченики, несумне́нным се́рдцем воспои́м.

Му́ченичен: Неугаси́му свещу́ свою́ соблю́дше, Боже́ственнии му́ченицы, напои́ша бога́тно кровьми́ свои́ми, и Боже́ственнаго черто́га получи́ша вхо́д ра́дующеся.

Богоро́дичен: Пое́м Тя́, Всепе́тая, я́ко Бо́га ро́ждшую Препе́таго, на Дре́ве сопротивоборца́ врага́ погу́бльша, и из тли́ изба́вльшаго воспева́ющих Того́ страда́ния.

И́н

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

И́же во́лею вся́ соде́лавый, изво́ли во чре́во Неискусобра́чныя всели́тися, и и́же тле́нием боля́щия, нетле́нием обогати́л е́сть, я́ко Милосе́рд.

Превы́шши Вы́шних Си́л, и святе́йши еси́, Пренепоро́чная, па́че естества́ вмести́вши, Невмести́мое Сло́во во чре́во твое́.

На пути́ мя жите́йстем заблужда́юща, и в безпу́тие ча́сто впа́дающа грехо́вное, к стези́ покая́ния, Влады́чице, наста́ви мя́.

Не пре́зри, Чи́стая, мольбы́ на́ша, на Тя́ возло́жших наде́жду ра́б Твои́х: прибе́жище бо, Влады́чице, и душа́м очисти́лище Ты́ еси́.

Пе́снь 7

Ирмо́с: Богопроти́вное веле́ние беззако́ннующаго мучи́теля, высо́к пла́мень вознесло́ е́сть; Христо́с же простре́ богочести́вым отроко́м ро́су духо́вную, Сы́й благослове́н и препросла́влен.

Ору́жие е́же пре́жде обраща́емое, плещи́ мне́ дае́т, отне́леже копие́м прободе́ся, на Кресте́ воздви́женый, Благоутро́бне Го́споди. Те́мже велича́ю Тя́, Твое́ю честно́ю Стра́стию обре́т безстра́стие.

Зми́й, и́же Моисе́ем возвыша́емый на дре́во, Боже́ственное возвыше́ние прообража́ше Христо́во, льсти́ваго зми́я умертви́вшаго, все́х же оживи́вшаго на́с умертви́вшихся преступле́нием.

Му́ченичен: Сы́нове быва́ете Боже́ственным приобще́нием, Безнача́льна Роди́теля Сы́ну Собезнача́льну, святи́и, Стра́сти Пречи́стей уподо́бльшеся, те́мже бра́тию ва́с нарица́ет, и насле́дники Ца́рствия Своего́.

Му́ченичен: На кре́ст возвыша́еми, я́ко Влады́ка, и копие́м пробода́еми, и мечи́ ссеца́еми, на о́гнь же и во́ду разделя́еми, и сдробля́еми колесы́ богоно́снии ра́довахуся му́ченицы.

Богоро́дичен: Гро́зд созре́вший, Его́же невозде́ланно Чи́стая возрасти́ла еси́ на Дре́ве я́ко узре́ пове́шена взыва́ше: Ча́до мое́ сла́дкое, мсто́ иска́пай, и́мже страсте́й пия́нство оты́мется.

И́н. Ирмо́с то́йже

Кре́пость моя́ и пе́ние, и спасе́ние, и изве́стное заступле́ние, и стена́ необори́мая су́щи, Влады́чице, борю́щия мя́ де́моны побори́, при́сно и́щущия умертви́ти мя́.

Бо́га вопло́щши от де́вственных Твои́х крове́й, обожи́вшаго, Де́во, челове́чество; те́мже мя́ страстьми́ оскверне́ннаго, и истле́вша вра́жиими ко́зньми, изба́ви моли́твами Твои́ми.

Пе́щь прообража́ше Твое́ Рождество́, Всенепоро́чная, о́троки бо не опали́, я́коже ни утро́бу Твою́ О́гнь Непостоя́нный. Те́мже мо́лим Тя́: рабы́ Твоя́ огня́ ве́чнаго изба́ви.

Пе́снь 8

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.

Кро́вию из твои́х ре́бр нетле́нных иска́павшею, Долготерпели́ве, тва́рь освяти́ся; ре́ки же многобо́жия изсуше́ны бы́ша; ту́чи же яви́шася благоче́стия, пре́лестей бездо́ждие потребля́ющия.

Распя́тия Твоего́ со́лнце устыде́ся, и своя́ лучи́ сокры́; ка́мение же распадо́шася, и а́д ни́зу устраши́ся; пра́ведных же ду́си взыгра́шася, ча́юще всеконе́чнаго, Сло́ве, избавле́ния.

Му́ченичен: Исцеле́ния ве́рным то́чат оста́нки моще́й страстоте́рпец, и всегда́ вре́ды неудобоисце́льных боле́зней исцелева́ют: я́ко ди́вен еси́, Го́споди, зове́м благода́рно, во святы́х Твои́х му́ченицех.

Му́ченичен: Уста́ звере́й, и вре́ния коно́бная, померза́ния же и сту́дени, тя́жесть зно́я, ногте́й истерза́ния претерпе́сте тве́рдостию, и затворе́ния, и ну́ждную сме́рть страстоте́рпцы. Те́мже со Христо́м прославля́етеся.

Богоро́дичен: Пло́ть из Твоего́ чре́ва прие́млет хотя́й, и зри́мь быва́ет Неви́димый, и распя́тие прие́млет, и кля́тва нарица́ется, от кля́твы изыма́я все́х Сы́н Тво́й, Богора́дованная Влады́чице.

И́н

Ирмо́с: Дре́вле ороси́вшаго евре́йския о́троки в пла́мени, и опали́вшаго Го́спода халде́и пресла́вно в не́м, воспое́м глаго́люще: благослови́те и превозноси́те Его́ во ве́ки.

Жи́во и незави́стно спасе́ние на́м земноро́дным, Нескве́рная А́гнице, Я́же породила́ еси А́гнца Бо́жия, не пре́зри мене́ зову́ща: благослови́те, вся́ дела́ Госпо́дня, Го́спода.

Боже́ственное Твое́, Пречи́стая, Рождество́ обнови́ на́с, и все́х ча́да показа́ и сы́ны дне́ и све́та, и спа́сшеся взыва́ем: благослови́те, вся́ дела́ Госпо́дня, Го́спода.

Живу́ю во́ду породила́ еси́, Чи́стая, от ложе́сн деви́ческих, и оставле́ние источи́ла еси́ от исто́чника исцеле́ний ве́рным. Те́мже вси́ зове́м: благослови́те, вся́ дела́ Госпо́дня, Го́спода.

Гро́зд Зре́лый жи́зни Ты́ возрасти́ла еси́, Чи́стая, Лоза́ бо еси́ услажда́ющи зе́млю благи́ми, Ю́же пою́ще зове́м: благослови́те, вся́ дела́ Госпо́дня, Го́спода.

Пе́снь 9

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы на́м яви́ся, омраче́нная просвети́ти, собра́ти расточе́нная: те́м Всепе́тую Богоро́дицу велича́ем.

:Исцели́ сокруше́ние и окая́нство мое́ Твое́ю ра́ною, Сло́ве Неизсле́дованне, и погребе́нный о́браз лука́выми страстьми́, очи́сти стра́стию Твое́ю, Го́споди Бо́же спасе́ния моего́.

:Ви́ден бы́л еси́ возноси́м, на кипари́се, Влады́ко, и на пе́вке, и ке́дре ра́ди бла́гости, Еди́н сы́й Святы́я Тро́ицы, еди́ну ипоста́сь имы́й во двою́ естеству́, да спасе́ши челове́чество.

Му́ченичен: Кресто́м я́коже щито́м обле́кшеся му́ченицы, невреди́ми яви́стеся, все́ми стрела́ми соде́лателя зло́бы. Те́мже ны́не того́ попира́ете, тому́ руга́ющеся я́ко худе́й пти́це всегда́.

Му́ченичен: Земля́ у́бо зи́нувши, кро́ви ва́ша прия́т, Не́бо же Боже́ственныя прия́т ду́хи, и со о́гненными чи́нми Боже́ственному Престо́лу предстоите́, страстоно́сны му́ченицы, церко́внии столпи́ непоколеби́мии.

Богоро́дичен: Истле́вшее обнови́ла еси́ естество́ пра́отчее, па́че естества́ ро́ждши, и де́вствующи, естеству́ всему́ Созда́теля, Его́же на Кресте́ пове́шена дре́вле ви́дящи, восклица́ла еси́, Пречи́стая Ма́ти Де́во.

И́н

Ирмо́с: От Бо́га Бо́га Сло́ва, неизрече́нною му́дростию, прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии единому́дренно пе́сньми велича́ем.

Человеколю́бия мя́ Боже́ственнаго сподо́би, Отрокови́це, Я́же еди́на Человеколю́бца Бо́га, пло́ть от Тебе́ заимова́вша, неизглаго́ланно ро́ждши, изба́ви мя́ бу́дущаго пла́мене, и му́ки вся́кия, любо́вию Тебе́ сла́вящаго.

Я́ко тве́рдую Предста́тельницу, я́ко упова́ние и сте́ну, и наде́жду, и покро́в тве́рд, и необори́мое утвержде́ние, и небу́рное приста́нище, еди́ну кре́пкое прибе́жище стяжа́вше Тя́ вси́, спаса́емся, Всепе́тая.

Све́т ро́ждшая Боже́ственный, мно́гими помрачи́вшееся страсте́й наведе́ньми, и помышле́ньми чужда́го, се́рдце мое́ просвети́, Отрокови́це, ка́плю подаю́щи ми́ при́сно, от скве́рн греха́, Де́во, очища́ющую мя́.

Та́же, Досто́йно е́сть: И покло́н. Ектения́ и свети́лен и псалмы́ обы́чныя.

На стихо́вне стихи́ры кре́стны, гла́с 2:

Креста́ Твоего́ Дре́во, Христе́ Бо́же, Дре́во Живо́тное показа́л еси́ на́м ве́рующим в Тя́, и си́м упраздни́л еси́ держа́ву иму́щаго сме́рти: оживи́л же еси́ ны́ умерщвле́нныя грехо́м. Те́мже вопие́м Ти́: Благода́телю все́х, Го́споди, сла́ва Тебе́.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся; во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́ и на дела́ Твоя́, и наста́ви сы́ны и́х.

Во́лею обнища́в обнища́ния ра́ди Ада́мова, Христе́ Бо́же, прише́л еси́ на зе́млю от Де́вы вопло́щся, и распя́тие прия́л еси́, да на́с свободи́ши от рабо́ты вра́жия: Го́споди, сла́ва Тебе́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Вся́к гра́д и страна́ чту́т мо́щи ва́ша, о страстоте́рпцы му́ченицы: вы́ бо зако́нно пострада́вше, венцы́ Небе́сныя прия́сте, и сего́ ра́ди святи́телем есте́ похвала́ и Це́рквам благоле́пие.

Сла́ва, и ны́не: Крестобогоро́дичен, гла́с 2.

Подо́бен: Егда́ от Дре́ва Тя́:

Гро́зд Всезре́лый, Чи́стая, Его́же невозде́ланно во утро́бе носи́ла еси́, на Дре́ве я́ко узре́ла еси́ Сего́ пове́шена, рыда́ющи восклица́ла еси́, и взыва́ла: Ча́до, сла́дость иска́пай, е́юже оты́мется пия́нство вся́кое страсте́й, Благода́телю, Мене́ ра́ди Тебе́ ро́ждшия, Свои́м благоутро́бием умоля́емь.

Та́же, Бла́го е́сть испове́датися Го́сподеви: Трисвято́е по О́тче на́ш, тропа́рь, ектения́, и ча́с 1-й, и про́чее, и отпу́ст.

Гла́с Ти́ прино́сим разбо́йнич, и мо́лимся: помяни́ на́с, Спа́се, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

На Кре́ст возне́сшуся Ти́, Спа́се, совозне́сл еси́ все́ челове́ческое естество́, непреста́нно пою́щее Тя́.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Ада́мово рукописа́ние копие́м Твои́м раздра́л еси́, того́ напису́я в Кни́зе Живы́х, Человеколю́бче.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Подо́бницы бы́вше распя́тие Претерпе́вшему, Того́ о́бщницы и сла́ве яви́стеся му́ченицы.

Сла́ва: Оте́ц Пребезнача́льный, Сы́н Собезнача́льный, да пое́тся во еди́ной че́сти и сла́ве ку́пно со Святы́м Ду́хом.

И ны́не: На Кресте́ я́ко ви́девши, Его́же без се́мене родила́ еси́, Того́ долготерпе́ние, Отрокови́це, воспева́ла еси́ слезя́щи.

на Го́споди воззва́х: стихи́ры святы́м апо́столом, гла́с 2.

Подо́бен: Егда́ от Дре́ва Тя́:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Всю́ напои́сте зе́млю, я́коже ре́ки разде́льшеся духо́вныя из Еде́ма, ю́же и поора́вше все́ясте спаси́тельное пропове́дание, и кла́с благопло́ден пожа́сте, му́дрии, ду́ши спасе́нных, си́х в мы́сленных сокро́вищах сокрыва́юще ученицы́ Госпо́дни, я́ко многоце́нное бога́тство.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

От тьмы́ страсте́й и сласте́й многостра́стное мое́ се́рдце свободи́те, свети́льницы су́ще Восто́ка мы́сленнаго, и просвети́телие пресве́тлии со́лнца, все́м возвеща́юще Разо́ршаго ле́сть но́щи злове́рия: Его́же умоли́те и на́ша просвети́ти смы́слы, я́ко самови́дцы Сего́.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Но́выя вои́стинну благода́ти вы́ скрижа́ли Богоначерта́нныя, таи́нницы и сви́тцы одушевле́ннии яви́стеся, Сло́во спаси́тельное нося́ще напи́санное Ду́хом, О́тчим пе́рстом: те́мже проидо́сте вся́ концы́, ве́ру правосла́вную, и к Небе́сным стезю́ веду́щую, все́м челове́ком я́ве показу́юще.

Та́же стихи́ры Мине́и свято́му, а́ще и́мать.

А́ще ли ни́, и́ны стихи́ры свято́му, и вели́кому чудотво́рцу Никола́ю, гла́с и подо́бен то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

В Ми́рех пожи́в чу́вственне, ми́ро вои́стинну яви́лся еси́; ми́ром пома́зан бы́в у́мным, свя́те Нико́лае, святи́телю Христо́в, облагоуха́еши безсме́ртную воню́ благоуха́ния, ве́рою притека́ющим под кро́в тво́й, разреша́я си́х от напа́стей и бе́д и скорбе́й, о́тче, ко Го́споду твои́ми моли́твами.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Мно́жеством искуше́ний содержи́мь, и треволне́нием жите́йским обходи́мь, волна́ми же потопля́емь обстоя́ний, и печа́льми облага́емь, на тя́ наде́жду мою́ всю́ возлага́ю о́тче Нико́лае, все́х лю́тых пода́ждь ми́ разреше́ние моли́твами твои́ми, блаже́нне, е́же ко Влады́це и Бо́гу на́шему.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Мра́ком и потемне́нием помышле́ний и бесо́вскими лестьми́ обноси́ма, и плотски́ми страстьми́ обурева́ема, и зако́ном побежда́ема грехо́вным, пости́гнув мя́ озари́ све́том благода́ти: све́т бо еси́ в ми́ре, Боже́ственною просвеща́емь Заре́ю, достоблаже́нне Нико́лае.

Сла́ва, и ны́не: Богоро́дичен: Сло́во, е́же Отцу́, и Свято́му Ду́ху равноче́стное сы́й я́ко Вели́кое Со́лнце, из Де́вы Богоотрокови́цы возсия́вшее на земли́ в после́дняя, посла́ ва́с я́ко зари́, сла́внии апо́столи, све́том ве́ры просвеща́ющих вся́ челове́ки, во мра́це пре́лести, и те́х к не́й уче́ньми Боже́ственными приводя́щих.

Та́же, Све́те ти́хий: Проки́мен дне́: Бо́же, во и́мя Твое́ спаси́ мя, и в си́ле Твое́й суди́ ми. Сти́х: Бо́же, услы́ши моли́тву мою́, внуши́ глаго́лы у́ст мои́х.

На стихо́вне стихи́ры апо́стольския, гла́с 2:

Возвели́чил еси́, Спа́се, во вселе́нней верхо́вных апо́стол имена́, навыко́ша бо Небе́сным, и неизрече́нна да́ша земны́м исцеле́ния; и се́ни и́х еди́ны неду́ги уврачева́ху, и́же от ры́барей чудотворя́ще, и и́же от иуде́й богосло́вяще благода́ти уче́ния: и́хже ра́ди, Милосе́рде, да́ждь на́м ве́лию ми́лость.

Сти́х: К Тебе́ возведо́х о́чи мои́ живу́щему на Небеси́, се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

И́же от непра́ведных дея́ний всегда́ бори́ми, и к Тебе́ прибега́юще вои́стинну су́щему Бо́гу, гла́с Твои́х учени́к прино́сим Ти́, глаго́люще: спаси́ ны, Наста́вниче, погиба́ем. Покажи́ и ны́не враго́м на́шим, мо́лимся, я́ко покрыва́еши лю́ди, и спаса́еши от бе́д, моли́твами апо́стол, презира́я грехи́, за мно́гую благосты́ню, Го́споди, сла́ва Тебе́.

Сти́х: Поми́луй на́с, Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Ве́лия сла́ва ю́же стяжа́сте, святи́и, ве́рою: не то́кмо бо во страда́ниих врага́ победи́ли есте́, но и по сме́рти ду́хи прогоня́ете, неду́жныя исцеля́ете, ду́ш и теле́с вра́чеве, моли́теся ко Го́споду, поми́ловатися душа́м на́шим.

Сла́ва, и ны́не: Богоро́дичен: Я́ко плодови́та ма́слина, Де́ва израсти́ Тебе́ Плода́ Живо́тнаго, плодоноси́ти ми́ру ве́лию и бога́тую ми́лость.

Та́же, Ны́не отпуща́еши: Трисвято́е. Тропа́рь, и отпу́ст.

Кано́н моле́бный Пресвяте́й Богоро́дице. Гла́с 2.

Пе́снь 1

Ирмо́с: Гряди́те лю́дие, пои́м пе́снь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты еги́петския, я́ко просла́вися.

И́же благоче́стно Тя́, Чи́стая, су́щую Богоро́дицу испове́дающаго душе́ю и усты́, от лю́тых бе́д, и неду́г и прегреше́ний ны́не спаси́, Пречи́стая.

Всю́ в Тебе́ благода́тей бе́здну лежа́щу уве́дехом: те́мже прибега́юще, Богоро́дице, усе́рдно к покро́ву Твоему́ Боже́ственному, спаса́емся.

Сла́ва: О на́с, Тя́ пою́щих, Пречи́стая, моли́ Воплоще́ннаго от пречи́стых Твои́х и честны́х крове́й, изба́витися от прегреше́ний, и боле́зней го́рьких.

И ны́не: Тя́ похвалу́ ве́рнии вси́ стяжа́хом, прибе́жище и утвержде́ние и ра́дование, и душа́м спасе́ние, наде́жду же и сте́ну, Богоблагода́тная.

Пе́снь 3

Ирмо́с: Утверди́ на́с в Тебе́, Го́споди, Дре́вом умерщве́й гре́х, и стра́х Тво́й всади́ в сердца́ на́с пою́щих Тя́.

Моли́твами Твои́ми, Чи́стая, Бо́га Его́же родила́ еси́, пода́ждь благопреме́нна твои́м рабо́м, притека́ющим к покро́ву Твоему́, и ве́рно кла́няющимся Твоему́ Рождеству́.

Глаго́лы моея́ моли́твы услы́ши, Де́во, из глубины́ моего́ се́рдца, я́же приношу́ Ти, Препе́тая, и от страсте́й и напа́стей спаси́ мя.

Сла́ва: Всю́ мою́ жи́знь окорми́, Де́во, упова́ние мое́ и Предста́тельнице, искуше́ний и наи́тия избавля́ющи, и ну́ждных, Богоневе́сто.

И ны́не: Прему́дрость Бо́жию ипоста́сную на руку́ я́ко носи́вши, Богома́ти, от неве́дения и заблужде́ния изба́витися на́м, моли́ся.

Пе́снь 4

Ирмо́с: Услы́шах, Го́споди, сла́вное Твое́ смотре́ние, и просла́вих, Человеколю́бче, непостижи́мую Твою́ си́лу.

Я́звам мои́м душе́вным, и плотски́м скве́рнам, Я́же Бо́га ро́ждшая, Влады́чице, разреше́ние пода́ждь.

Оскверне́ннаго мя́ страстьми́, и помышле́нии, и жития́ треволне́нии, упова́нием, Де́во, и ве́рою утверди́.

Сла́ва: От наи́тия изба́ви мя́, Ма́ти Бо́жия, и бу́ри, и бе́д Твои́ми моли́твами, Еди́на Препе́тая.

И ны́не: Обурева́ема волна́ми жите́йскими, исхити́, Де́во, к Твоему́ приста́нищу наставля́ющи мя́.

Пе́снь 5

Ирмо́с: Све́та Пода́телю, и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го бо́га не зна́ем.

Ору́жие непобеди́мое иму́ще, на разли́чная искуше́ния вра́жия, вся́каго озлобле́ния избавля́емся я́ве, и́же Тя́ Богоро́дицу Чи́стую ве́дущии.

Зако́на исполне́ние, вы́шшая Херуви́м, родила́ еси́ Бо́жия Сло́ва воплоще́нна, Сы́на Единоро́дна: Его́же о рабе́х Твои́х умоли́.

Сла́ва: Вся́ческих Творца́ на руку́ Твое́ю, Чи́стая, нося́щи, Сего́ на́м Твои́ми моли́твами благопреме́нна дава́й, ны́не все́м се́рдцем к Тебе́ прибега́ющим.

И ны́не: От утесне́ния и боле́зни души́, мольбу́ приношу́ Ти окая́нный: щедро́т Еди́на ро́ждшая вино́вное Сло́во, уще́дрив спаси́ мя.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Спасе́ния приста́нище ве́дый Тя́, пла́вая многопеча́льнаго жития́ мо́ре, призыва́ю, Влады́чице: окорми́тельница души́ мое́й бу́ди.

Обнажи́хся оде́жды целому́дрия моего́, озло́блен бы́в, но, Ма́ти Присноде́во, Бо́га ро́ждшая, ра́дости оде́жду пода́ждь ми́.

Сла́ва: Чи́стаго жития́ отпадо́х, к ле́ности жи́в стра́стный: но возведи́, Благослове́нная Влады́чице, повеле́нием Сы́на Твоего́ сочта́вши.

И ны́не: Ми́лости Твоея́, Богоро́дице, сподо́би мя́, Преми́лостиваго Сло́ва поро́ждшая, Свое́ю Кро́вию от тли́ челове́ки изба́вльшаго.

Та́же, Го́споди поми́луй, три́жды С.ла́ва, и ны́не:

Седа́лен, гла́с 2. Подо́бен: Боже́ственнаго бы́хом:

Боже́ственнаго мя́ вхо́да, Чи́стая, сподо́би, моли́твами Твои́ми, Присноде́во, и соу́зы лю́тых страсте́й расто́ргши, пла́мене бу́дущаго мя́ свободи́.

Пе́снь 7

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния; посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.

На Кресте́ пригво́ждься, И́же из Тебе́ воплоти́выйся, Богороди́тельнице, Ада́мово раздра́ рукописа́ние, Его́же ны́не, Де́во, моли́, вся́кия зло́бы изба́витися ве́рою зову́щим: Благослове́нная, Я́же Бо́га пло́тию ро́ждшая.

Наде́жда блага́я, Засту́пница же ве́рных еси́, Влады́чице: и ны́не мо́лимся Тебе́, дарова́ти ми́лости пучи́ну все́м на Тя́ наде́ющимся, и зову́щим Ти́: Благослове́нная, Я́же Бо́га пло́тию ро́ждшая.

Сла́ва: Тьмо́ю лю́тою жития́ объя́т бы́в, соскорбя́щаго и сболе́знующаго не обрето́х – Твое́ю, Де́во, све́тлостию разреши́ тьму́ прегреше́ний, и озари́ пе́ти Тебе́, Благослове́нная, Я́же Бо́га пло́тию ро́ждшая.

И ны́не: В кра́сную оде́жду спаси́тельных за́поведей Креще́нием оде́явся, очерни́х ле́ностию окая́нный, ны́не же к Тебе́ притека́ю, Де́во, во оде́жду прося́ спасе́ния Тобо́ю па́ки облещи́ся.

Пе́снь 8

Ирмо́с: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Изнемога́ет мо́й ны́не у́м, во глубину́ впа́д безче́стия, я́ко отвсю́ду разли́чными объя́т е́смь злы́ми: но Ты́, Де́во, исцели́, безстра́стия све́том оде́явши.

Сто́лп кре́пости тве́рд, и степе́нь, и Храни́тельницу, и Засту́пницу стяжа́вше Тя́ ве́рою, спаса́емся ны́не, пою́ще Рождество́ Твое́, Пречи́стая, и превознося́ще его́ во вся́ ве́ки.

Сла́ва: Безсме́ртия зарю́, и исто́чник ве́мы Тя́, Богоро́дице, я́ко ро́ждшую Сло́во Безсме́ртнаго Отца́, вся́ от сме́рти избавля́ющее, превознося́щия Его́ во вся́ ве́ки.

И ны́не: Струи́ исцеле́ний на́м всегда́ ве́рным, Чи́стая, источа́еши, Его́же незави́стную благода́ть взе́млюще, воспева́ем Рождество́ Твое́, Чи́стая, и превозно́сим во вся́ ве́ки.

Пе́снь 9

Ирмо́с: От Бо́га Бо́га Сло́ва неизрече́нною му́дростию, прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии единому́дренно пе́сньми велича́ем.

Богоблаже́нная Отрокови́це, наде́жду мою́ всю́ усе́рдно возложи́х на Тя́ – спаси́ мя, Ма́ти и́стиннаго Живота́, и пи́щи присносу́щныя насы́титися, моли́, Чи́стая, ве́рою Тя́ и любо́вию пе́сньми велича́ющему.

Я́вльшися, Де́во, Две́рь Боже́ственнаго Све́та, души́ моея́ мглу́ све́том Твои́м невеще́ственным и блиста́нии озари́, и от ве́чнаго огня́ изба́витися ми́ сподо́би, Чи́стая, хода́тайствы Твои́ми: я́ко да непреста́нно велича́ю Тя́.

Сла́ва: Боля́щия зря́щи душе́ю и те́лом, и вве́рженыя в стра́сти лю́тыя, благоутро́бием Твои́м, Влады́чице, исцели́вши разреши́, и́же ны́не стужа́емыя печа́льми: да ве́рою и любо́вию Тя́ пе́сньми велича́ют.

И ны́не: Во чре́во Твое́ всели́ся, Его́же из чре́ва Преве́чный Оте́ц роди́ Сы́на, соверше́н бы́сть Челове́к, и исто́чник благода́тей Тя́, Богома́ти, показа́ на́м, ве́рно кла́няющимся несказа́нному Твоему́ Рождеству́.

Та́же, Досто́йно е́сть: И покло́н. И про́чее обы́чно, и отпу́ст.

По 1-м стихосло́вии седа́льны апо́стольския, гла́с 2:

И́же умудри́вый ловцы́ па́че ри́торов, и посла́вый я́коже пропове́дники по все́й земли́, неизглаго́ланным человеколю́бием Твои́м, Христе́ Бо́же: те́х ра́ди утверди́ Це́рковь Твою́, и ве́рным низпосли́ благослове́ние Твое́, Еди́не во святы́х Почива́яй.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Прему́дрости Бо́жия су́ще ученицы́ и самови́дцы, прему́дрых и ри́торов я́ко нему́друю му́дрость охуди́ша, простото́ю про́поведи язы́ки умудри́вше, Боже́ственнии апо́столи, правосла́вно воспева́ти Соде́теля еди́наго и Го́спода.

Сла́ва, и ны́не: Богоро́дичен: Тебе́ велича́ем, Богоро́дице, вопию́ще: ра́дуйся Незаходи́маго Све́та о́блаче: Того́ бо носи́ла еси́ в не́дрех твои́х, сла́вы Го́спода.

По 2-м стихосло́вии, седа́лен, гла́с 2:

Улови́вше ловцы́ язы́ки мре́жею ду́ха, и научи́ша концы́ земны́я Тебе́ кла́нятися со Отце́м, и Ду́хом, Христе́ Бо́же: те́х ра́ди утверди́ Це́рковь Твою́, и ве́рным низпосли́ благослове́ние Твое́, и́же Еди́не Ми́лостиве и Человеколю́бче.

Сти́х: Испове́дят небеса́ чудеса Твоя́, Го́споди. И па́ки глаго́ли то́йже седа́лен.

Посе́м, Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Страстоно́сцы Госпо́дни, блаже́нна земля́ напи́вшаяся кро́ве ва́шея, и свя́ти хра́ми прие́мшии телеса́ ва́ша: на суди́щи бо врага́ обличи́сте, и Христа́ со дерзнове́нием пропове́дасте. Того́ я́ко Бла́га моли́те спасти́ся, мо́лимся, душа́м на́шим.

Сла́ва, и ны́не: Богоро́дичен: Боже́ственнаго естества́ о́бщницы бы́хом, Тобо́ю, Богоро́дице Присноде́во: Бо́га бо на́м воплоще́нна родила́ еси́. Те́мже Тя́ по до́лгу вси́ благоче́стно велича́ем.

По 3-м стихосло́вии, седа́льны, гла́с 2.

Подо́бен: Милосе́рдия су́щи исто́чник:

И́же свети́ла све́тлая, святы́я Твоя́ ученики́, Сло́ве, в ми́р посла́в, и просвети́л еси́ подсо́лнечную, тьмы́ неразу́мия избавля́я все́х челове́к. Те́х моли́твами при́сно умоле́н быва́я, ю́же во тьме́ ду́шу мою́ просвети́, Человеколю́бче, и спаси́ мя.

Луча́ми чуде́с, Нико́лае, просвеща́еши подсо́лнечную всю́, и разреша́еши мра́к скорбе́й, и бе́д отгоня́еши наше́ствие, предста́тель сы́й тепле́йший.

Сла́ва, и ны́не: Богоро́дичен: Неискусобра́чная пречи́стая, Свята́я Богоро́дице Безневе́стная, Сы́на Твоего́, Его́же па́че естества́ пло́тию родила́ еси́, со апо́столы при́сно моли́ согреше́ний проще́ние, и жития́ исправле́ние, и страсте́й премене́ние дарова́ти все́м пою́щим Тя́.

Кано́н святы́м апо́столом, творе́ние Феофа́ново. Гла́с 2.

Пе́снь 1

Ирмо́с: Во глубине́ постла́ иногда́, фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, Препросла́вленный Госпо́дь, сла́вно бо просла́вися.

Све́та Боже́ственнаго мо́лния ве́рою бы́вше, светови́днии Спа́совы апо́столи, всего́ мя просвети́те омрача́ема сласте́й че́рностию, и в ле́ности все́ мое́ житие́ проше́дша. [Два́жды.]

Ученицы́ и дру́зи Христо́вы, дру́га мя́ бы́вша врагу́, злы́х ра́ди присвое́ния, от сего́ мя избавля́йте сподви́жуще мою́ ду́шу к любви́, возлюби́вшаго ро́д челове́ч благосты́ни ра́ди.

Смире́нная душе́ моя́, пре́жде сме́рти потщи́ся пока́ятися, и себе́ умерщвле́нную пла́чи, да я́ко Ла́заря четверодне́внаго воскреси́вый я́ко Милосе́рд, и тебе́ воскреси́т апо́стол мольба́ми.

Богоро́дичен: Блага́го ро́ждши Бо́га, Пречи́стая, все́х благотворя́щаго, тле́нием содержи́мых, Того́ моли́, Пренепоро́чная, со проро́ки, и му́ченики, и апо́столы, все́х изба́вити от напа́стей.

И́н кано́н свято́му и вели́кому чудотво́рцу мироточи́вому Никола́ю, [его́же краегране́сие: Мольбу́ любе́зну, Нико́лае, приими́.]Творе́ние Ио́сифово. Гла́с 2.

Ирмо́с: Гряди́те лю́дие, пои́м пе́снь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты еги́петския, я́ко просла́вися.

Всегда́ Боже́ственному Престо́лу Благода́ти предстоя́, Нико́лае, благода́ть и ми́лость дарова́ти моли́ся, Тебе́ призыва́ющим ве́рою рабо́м твои́м.

На земли́ вели́ка предста́теля тя́ показа́ Бо́г бе́дствующим: те́мже ми́ предста́ни в нощи́ и во дни́, сохраня́я мя́ от собла́зн борца́.

Я́коже дневну́ю звезду́ уве́дев тя́, твои́ми светоза́рными луча́ми тьмы́ да изба́влюся искуше́ний, и бе́д и вся́каго греха́, о́тче Нико́лае.

Богоро́дичен: Теле́сных боле́зней изба́ви мя́, и души́ моея́ исцели́ недове́домыя стру́пы, и огня́ ве́чнаго исхити́ мя, Еди́на Богоблагода́тная.

Пе́снь 3

Ирмо́с: Процвела́ е́сть пусты́ня, я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Учи́теля стяжа́вше, святи́и, Прему́дрость О́тчую Ду́хом, е́ллинскую обуи́сте прему́дрость, богови́дцы досточу́днии.

Непло́дие души́ моея́ разреши́те, всехва́льнии, и благоча́дие дея́ний, в доброде́телех приноси́ти сотвори́те, я́ко Сло́ва самови́дцы достоблаже́ннии.

Лю́те мя́ уяде́на ны́не ядови́тым угрызе́нием вра́жиим, исцели́ мольба́ми апо́стол Твои́х, Благоде́телю все́х, Многоми́лостиве.

Богоро́дичен: Бо́га Преблага́го умоли́, Пречи́стая, со апо́столы все́ми, от вся́каго вре́да, и обстоя́ния, и бе́д изба́витися чту́щим Тя́.

И́н

Ирмо́с: Утверди́ на́с в Тебе́, Го́споди, Дре́вом умерщвле́й гре́х, и стра́х Тво́й всади́ в сердца́ на́с пою́щих Тя́.

Исцеле́ний исто́чник сы́й, свя́те, стра́сти уврачу́й души́ моея́, и жи́знь мою́ соблюди́, невре́дна мя́ сохраня́я раба́ Твоего́.

Ума́ моего́ побежде́ние исправля́я, от вре́да ви́димых и неви́димых борю́щих мя́ спаса́й, я́ко предста́тель мо́й, вели́кий Нико́лае.

И́же Еди́н Благи́й Тя́ бла́га засту́пника челове́ком даде́, блаже́нне, сего́ ра́ди молю́ Тя́: от вся́ких мя́ зо́л свободи́.

Богоро́дичен: Кре́пость моя́ и ра́дость и весе́лие, и стена́ тве́рдая и Предста́тельнице, Ты́ еси́, Всенепоро́чная, искуше́ний и бе́д избавля́ющи мя́.

Пе́снь 4

Ирмо́с: Прише́л еси́ от Де́вы, ни хода́тай, ни а́нгел, но Са́м Го́споди вопло́щся, и спа́сл еси́ всего́ мя челове́ка. Те́м зову́ Ти: сла́ва си́ле Твое́й, Го́споди.

А́лчуща мя́ всегда́, и гла́дом иста́ема, спасе́ния сне́дьми насы́ти, Еди́не Человеколю́бче, Боже́ственными мольба́ми апо́стол, во все́м ми́ре пропове́давших Тя́. [Два́жды.]

На мо́ре мирско́е наве́л еси́ все́х, я́ко ко́ни, Человеколю́бче, сла́вныя апо́столы Твоя́, того́ возмуща́ющия сла́ныя неве́рствия го́рькия во́ды.

Со́лнца Христа́ су́щим во тьме́ возвести́вше, во тьме́ мя лежа́ща грехо́вней просвети́те, апо́столи прехва́льнии, возбраня́юще лука́вым помысло́м се́рдца моего́.

Богоро́дичен: Всепе́тая, Я́же Бо́га Препе́таго ро́ждшая, о пою́щих Тя́ со апо́столы моли́, я́ко да изба́вимся от грехо́в, и бе́д и озлобле́ния.

И́н

Ирмо́с: Пою́ Тя, слу́хом бо, Го́споди, услы́шах, и ужасо́хся: до мене́ бо и́деши, мене́ ища́ заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Украси́в престо́л доброде́тельми, Нико́лае, украше́ние яви́лся еси́ святи́телем честно́е. Те́мже Тя́ молю́: неле́поту души́ моея́ украси́, и от мирски́х собла́зн спаси́ мя.

Стезю́ та́мо веду́щую угла́ди ми́, преблаже́нне; от жите́йских во́лн облегчи́ мя, и ко приста́нищу жи́зни возведи́, Нико́лае, от Тебе́ предста́теля вели́каго обогати́вшася.

Глаго́л Боже́ственных послу́шателю, услы́шав моя́ глаго́лы, изба́ви мя́ от бесо́вских собла́зн, и беззако́нных муже́й, и вся́ких обстоя́ний находя́щих, вели́кий Нико́лае.

Богоро́дичен: Свята́я Богоро́дице Влады́чице, в нощи́ мя и во дни́ освяти́, и сохрани́, и наста́ви ко спасе́нию мно́гими грехи́ па́дающа, и прило́гми бесо́вскими низре́ема.

Пе́снь 5

Ирмо́с: Хода́тай Бо́гу и челове́ком бы́л еси́ Христе́ Бо́же: Тобо́ю бо, Влады́ко, к светонача́льнику Отцу́ Твоему́, от но́щи неве́дения приведе́ние и́мамы.

Вели́кий Па́стырь посреде́ волко́в посла́ я́ко о́вцы, Боже́ственныя ученики́ своя́, те́х претворя́юща Бо́жиею си́лою Креще́ния, и добро́тою слове́с. [Два́жды.]

Боже́ственным све́том, я́же во тьме́ пре́лести просвети́сте, апо́столи, сердца́. Те́мже молю́ вы́, отемне́наго мя́ сластьми́ мра́чными, просвети́те, богоблаже́ннии.

Окая́нная душе́, пре́жде конца́ потщи́ся и пока́йся, Го́сподеви зову́щи: согреши́х Ти́, Влады́ко, прости́ апо́стол ра́ди, и спаси́ мя я́ко Милосе́рд.

Богоро́дичен: Све́том Твои́м озари́ во тьме́ лежа́ща мя́, Све́та Жили́ще, и со апо́столы моли́ся, Пренепоро́чная, от вся́кия ну́жды изба́вити мя́ Твои́ми моли́твами.

И́н

Ирмо́с: Све́та пода́телю, и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́ ино́го бо́га не зна́ем.

Зако́на Бо́жия испо́лнителю, моли́ Блага́го Бо́га, зако́ны Боже́ственныя ми́ соблюда́ти, и беззако́ннующих вра́г изми́ мя, и бесо́вскаго вре́да, всеблаже́нне Нико́лае.

Я́коже дре́вле предста́в, свя́те, избавля́я ю́ношы три́, си́це и мене́ от вся́каго греха́ изба́ви твои́ми к Бо́гу моли́твами, богому́дре Нико́лае.

Священноде́лателю Христо́в, гре́шником испору́чниче, вели́кий чудотво́рче, Благода́вца моли́ Бо́га, да не посрами́т мене́ в Ча́с Су́дный.

Богоро́дичен: Господороди́тельнице Чи́стая, облада́ема мя́ мно́гими страстьми́, я́ко Блага́ предста́вши изба́ви от си́х: я́ко да Тя́ воспева́ю душе́ю и се́рдцем и язы́ком, спаса́емь.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

И́же во́ду живо́тную нося́ще, та́емую ду́шу мою́ зно́ем грехо́вным молю́ся, ученицы́ Спа́совы, напо́йте.

Небеса́ мы́сленная бы́вше, богоза́рнии апо́столи, сла́ву Бо́жию испове́дасте неизрече́нную, ю́же улучи́ти на́м все́м моли́теся.

В пучи́не лю́те волну́ющийся, к Тебе́, Христе́, И́же все́х Окорми́телю прихожду́, ра́ди апо́стол Твои́х, ко спаси́тельному приста́нищу упра́ви мя́.

Богоро́дичен: Со все́ми Вы́шними Си́лами, со проро́ки, и апо́столы, и му́ченики, о на́с моли́ Сы́на Твоего́, Богоневе́сто.

И́н. Ирмо́с то́йже

И́же ми́ряном бы́в первопресто́льник, Нико́лае, и облагоуха́л еси́ ве́рных составле́ния благи́ми Твои́ми дея́нии: от злосмра́дна прегреше́ния изба́ви мя́.

Светле́йше со́лнца стяжа́в, отче, се́рдце, всего́ мя просвети́, искуше́ний и скорбе́й отгоня́я тьму́, Нико́лае.

От вся́кия изба́ви мя́ тесноты́, простра́нство я́ко име́я ми́лости, Нико́лае, те́сным ше́ствовати мя́ укрепи́ путе́м ко Го́споду.

Богоро́дичен: На вся́ко вре́мя Тебе́ призыва́ю, Пречи́стая, да обря́щу Тя́ помо́щницу, изыма́ющую мя́ от вся́каго озлобле́ния и стра́шных му́к.

Пе́снь 7

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть; Христо́с же простре́ богочести́вым отроко́м ро́су духо́вную, Сы́й благослове́н и препросла́влен.

Огне́м Боже́ственнаго Ду́ха предвозжже́ни бы́вше апо́столи, пре́лести у́глие угаси́сте, Бо́жие же раче́ние во уме́х все́х ве́рных воспали́сте: те́мже велегла́сно ва́с чти́м. [Два́жды.]

Ми́р возненави́десте, и я́же в ми́ре, Христа́ возлюби́сте, в ми́ре пло́тию челове́ком примеси́вшася, Его́же моли́те, Боже́ственнии апо́столи, я́же в житии́ мя все́х лю́тых свободи́ти.

Судие́ Пра́ведне, Сердцеве́дче, И́же еди́н сокрове́нная ве́дый моя́ согреше́ния, в Ча́с Суда́ не осуди́ мене́, ниже́ отсле́ши мя́ во о́гнь, моли́твами апо́стол Твои́х.

Богоро́дичен: Огне́м Божества́ не опали́лася еси́, неизрече́нно ро́ждши Де́во, бра́ку неиску́сна бы́вши. Те́мже со апо́столы моли́ся, Чи́стая, ве́чнаго мя́ пла́мене свободи́ти, Тебе́ сла́вящаго.

И́н

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния; посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.

Огню́ искуше́ний на вся́к де́нь примеша́юся, о́тче Нико́лае, посреде́ се́тей мимохожду́, я́коже пти́ца, под тво́й ще́дрый покро́в притека́ю: невре́дна мя́ сохрани́, Блага́го моля́ Бо́га и Го́спода.

Глаго́лы моя́ услы́шав спе́шно, о́тче Нико́лае, потщи́ся приити́ ми на по́мощь, обурева́ему скорбьми́ и ну́ждами жите́йскими и бесо́вскими озлобле́нии: я́ко да спаса́емь пою́ предста́тельство твое́.

И́же дре́вле я́влься во сне́ царю́, непови́нныя иму́щия умре́ти избавля́я, напа́стей мя́ изба́ви находя́щих всегда́, и неду́г теле́сных, и душе́вных боле́зней, о́тче Нико́лае.

Богоро́дичен: Тебе́ еди́ну, Пречи́стая, име́ю помо́щницу, Тебе́ напису́ю мне́ все́х жития́ храни́тельницу, не пре́зри мене́ раба́ Твоего́, Еди́на Предста́тельнице ми́ра, но спаси́ мя пою́ща: благослове́н Бо́г оте́ц на́ших.

Пе́снь 8

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.

Телови́дно на ва́с наше́д во о́гненном ви́де Пресвяты́й Ду́х, соде́ла я́ко свети́ла, попаля́юща у́бо безбо́жие, просвеща́юща же вся́ благоче́ствующия, Боже́ственнии Сло́ва апо́столи. [Два́жды.]

Страстьми́ лю́те обурева́емое неиспра́вленное се́рдце мое́ исцели́, Ще́дре, молю́ся; ду́шу мою́ просвети́, и у́м мо́й напра́ви прекло́ншийся в зло́бу, ученико́в Твои́х мольба́ми.

Воздохни́, душе́ моя́, и прослези́ся приле́жно, и себе́ пре́жде конца́ воспла́чи, пре́жде да́же не пости́гнет тебе́ пла́ч неуте́шимый, и возопи́й Го́сподеви: спаси́ мя, Ми́лостиве, моли́твами апо́стол Твои́х.

Богоро́дичен: Пе́щь иногда́ неопа́льшая дете́й, Твое́ Рождество́ прообража́ше, Де́во Всенепоро́чная. Сего́ ра́ди молю́ Тя: со апо́столы моли́ся, со все́ми проро́ки, огня́ гее́нны изба́вити мя́.

И́н

Ирмо́с: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Вяза́ти и реша́ти прии́м вла́сть от Бо́га, о́тче богому́дре Нико́лае, зо́л мои́х соу́зы разреши́ твои́ми моли́твами, и Боже́ственней мя́ привяжи́ любви́ вочелове́читися восхоте́вшаго Влады́ки.

Посеще́нием твои́м Боже́ственным во дни́ и в нощи́ посеща́й мя́, углажда́я стезю́ смире́нней мое́й души́, и сохраня́й мя́, свя́те Нико́лае, неуя́звлена от находя́щих лука́ваго собла́зн.

Ру́ку ми́ пода́ждь к Бо́жией по́мощи, Нико́лае, и сохрани́ от лю́таго вра́жия ча́яния, и́же ю́ношы иногда́ сме́рти го́рькия изба́вил еси́: да почита́ю тя́ я́ко блага́го предста́теля.

Егда́ ся́деши, Бо́же, на престо́ле стра́шнем суди́ти ми́ру, не вни́ди в су́д с рабо́м Твои́м, но ча́сти сподо́би спаса́емых, моли́твами Никола́я.

Богоро́дичен: Па́че естества́ Твои́м Рождество́м, Богороди́тельнице, возвели́чила еси́ на́с ума́ленных вели́кими неисче́тными злы́ми. Те́мже мо́лимся Ти́, Пречи́стая: возвели́чи в на́с бога́тыя Твоя́ ми́лости.

Пе́снь 9

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы на́м яви́ся, омраче́нная просвети́ти, собра́ти расточе́нная: те́м Всепе́тую Богоро́дицу велича́ем.

Апо́столи сла́внии, апо́столи блаже́ннии, ученицы́ Спа́совы, пропове́дницы всему́дрии, от вся́каго мя́ изба́вите вре́да, вся́каго гне́ва, вся́каго греха́, вся́каго обстоя́ния, и разли́чных напа́стей. [Два́жды.]

Мене́ осужде́ннаго, мене́ неиспра́вленнаго, Твоя́ повеле́ния небре́гшаго, и бесо́вским прельще́нием умовре́дно после́довавша, возврати́, Го́споди, моли́твами апо́стол Твои́х.

Ду́шу неиспра́влену приношу́, и со́весть погребе́ную с вещми́ прегреше́ний, и оскверне́нное се́рдце, и по́мысл окаля́н, вопию́ Ти, Человеколю́бче: апо́стол ра́ди уще́дри мя́ ми́лостию Твое́ю.

Богоро́дичен: Апо́столи, Пречи́стая, Твоего́ Сы́на пропове́даша во все́м ми́ре, Бо́га и Челове́ка. Те́мже с ни́ми моли́ся, во Стра́шном Дни́ суда́ изба́витися му́к, ве́рою Тебе́ велича́ющим.

И́н

Ирмо́с: От Бо́га Бо́га Сло́ва, неизрече́нною му́дростию, прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии единому́дренно пе́сньми велича́ем.

Свяще́нства пра́вило, и кро́тости о́браз, ве́м тя́, Нико́лае му́дре. На мя́ возстаю́щую бу́рю по вся́ дни́ страсте́й и бе́д, укроти́ моли́твами твои́ми, и соблюди́ мя неврежде́нна, свяще́ннейший о́тче.

Я́ко свяще́ннейший сосу́д прия́тен Боже́ственнаго ми́ра, ми́лостивно излия́вшагося на зе́млю, все́х на́с облагоуха́й сердца́, ми́ряном бы́в му́дре первосвяти́тель, искуше́ния злово́ние отгоня́ моли́твами твои́ми.

Ты́ мою́ уте́ши, о́тче, ду́шу, неви́димо мно́жеством озло́бленную лю́те; ты́ безме́рная ми́ укроти́ искуше́ния, я́же льсти́вый подви́жет ми́ во дни́ и в нощи́, я́ко благи́й мо́й предста́тель явля́яся, Нико́лае.

Стра́шный Влады́чний Де́нь при две́рех приближа́ется. Что́ сотвори́ши о душе́, грехо́в мно́жество иму́щи? Потщи́ся у́бо пре́жде конца́, и возопи́й Го́споду приле́жно: моли́твами Никола́я, святи́теля Твоего́, спаси́ мя.

Богоро́дичен: Пощади́ мя, Го́споди, пощади́, егда́ хо́щеши суди́ти и не осуди́ мене́ во о́гнь, ниже́ я́ростию Твое́ю обличи́ мене́: мо́лит Тя́ Де́ва ро́ждшая Тя́, Христе́, и апо́стол мно́жество, и сла́вный Никола́й.

Та́же: Досто́йно е́сть: и покло́н. Ектения́ ма́лая, и свети́лен, и псалмы́ обы́чныя.

На стихо́вне стихи́ры апо́стольския, гла́с 2:

Возвели́чил еси́, Спа́се, во вселе́нней верхо́вных апо́стол имена́, навыко́ша Небе́сным, неизрече́нна да́ша земны́м исцеле́ния, и се́ни и́х еди́ны неду́ги уврачева́ху, и́бо от ры́барей чудотворя́ще, и и́же о иуде́й богосло́вяще благода́ти уче́ния, и́хже ра́ди, Благоутро́бне, да́ждь на́м ве́лию ми́лость.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся; во вся́ дни́ на́ша возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.

И́же от непра́ведных дея́ний всегда́ бори́ми, и к Тебе́ прибега́юще вои́стинну су́щему Бо́гу, гла́с Твои́х учени́к прино́сим Ти́, глаго́люще: спаси́ ны, Наста́вниче, погиба́ем. Покажи́ и ны́не враго́м на́шим, мо́лимся, я́ко покрыва́еши лю́ди, и спаса́еши от бе́д, моли́твами апо́стол презира́я грехи́, за мно́гую благосты́ню, Го́споди, сла́ва Тебе́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Святы́х твои́х мно́жество, мо́лит Тя́, Христе́: поми́луй и спаси́ на́с я́ко Человеколю́бец.

Сла́ва, и ны́не: Богоро́дичен: Все́ упова́ние мое́ на Тя́ возлага́ю, Ма́ти Бо́жия, сохрани́ мя под кро́вом Твои́м.

Та́же, Бла́го е́сть испове́датися Го́сподеви: И Трисвято́е по О́тче на́ш: тропари́ и ектении́. Та́же ча́с 1-й, псалмы́ обы́чны, и отпу́ст.

Гла́с Ти́ прино́сим разбо́йнич, и мо́лимся: помяни́ на́с, Спа́се, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Мирски́я концы́ проше́дше, апо́столи, от тьмы́ пре́лести и злоче́стия челове́ки изба́вили есте́ прему́дрии.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Мре́жею благода́ти из глубины́ су́етства, все́х челове́к, ученицы́ Спа́совы, му́дре возвели́ есте́.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

И́же тече́ние сконча́вшия, и ве́ру соблю́дшия, страстоте́рпцы Госпо́дни, согла́сно ве́рнии воспои́м.

Сла́ва: Равноде́тельна Роди́телю Сы́на, со Ду́хом пропове́давше, воспои́м Тро́ицу Несозда́нную.

И ны́не: Апо́столов похвала́, страда́льцев удобре́ние, Ты́ еси́, Пречи́стая Де́во, и ми́ра спасе́ние.

на Го́споди воззва́х: стихи́ры кре́стны. Гла́с 2.

Подо́бен: Егда́ от Дре́ва Тя́:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Спа́се, на Кресте́ пригвозди́вся, со́лнце ви́дев помрачи́ся от стра́ха Твоего́, и заве́са церко́вная раздра́ся; земля́ же потрясе́ся, и ка́мение та́кожде тре́петом распадо́шася, зре́ти не терпя́ще Зижди́теля своего́ и Бо́га, на Дре́ве стра́ждуща непра́ведно во́лею, и от беззако́нник досажда́ема.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Ве́сь низложе́н бы́сть на зе́млю, ве́сь уязви́вся, и лежи́т паде́нием чу́дным зми́й вселука́вый, вознесе́ну бы́вшу Ти́ на Дре́во, Человеколю́бче: Ада́м же от кля́твы разреша́ется, и спаса́емь быва́ет, и́же пре́жде осужде́ный. Те́мже и мы́ мо́лимся: спаси́ на́с, Ще́дрый, все́х, и Ца́рствия Твоего́ сподо́би.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Егда́ воздви́глся на Кре́ст, и в ре́бра прободе́н бы́л еси́ копие́м, Безгре́шне, со́лнце сокрыва́шеся, зре́ти не хотя́, Спа́се, и земля́ колеба́шеся, и ка́мение стра́хом тогда́ распада́шеся, досажда́ему Тебе́. Тва́рь же вопия́ше вся́: сла́ва распя́тию Твоему́, Сло́ве, и́мже все́х спа́сл еси́, Человеколю́бче.

Та́же стихи́ры Мине́и, свято́му.

А́ще ли не́сть Мине́и, пое́м сия́ стихи́ры Крестобогоро́дичны.

Гла́с 2. Подо́бен то́йже.

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

На Дре́ве Кре́стнем Тя́, Иису́се, воздви́жена зря́щи Неискусобра́чная, пла́каше и глаго́лаше: Ча́до сла́дкое, вску́ю оста́вил еси́ Мене́ еди́ну ро́ждшую Тя́? Све́те Непристу́пный Пребезнача́льнаго Отца́, потщи́ся и просла́ви, я́ко да сла́ву получа́т Боже́ственную, и́же Боже́ственныя стра́сти Твоя́ сла́вящии.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Егда́ на Дре́ве Живо́т умира́ющ зря́ше Де́ва, и ре́бра Его́ копие́м боле́зненно пробода́ема, пла́чущи взыва́ше: Сы́не и Бо́же Мо́й, что́ Ти воздаде́ собо́р безблагода́тный? Увы́ Мне́, боле́зни не терпя́ снеда́юся утро́бою, ви́дящи сия́ стра́ждуща Тя́, Влады́ко!

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Егда́ от Дре́ва Сы́на ви́де сне́млема Отрокови́ца Неискусому́жная, про́ста же положе́на без дыха́ния на земли́ я́ко челове́ка, в не́дрех объе́мши, и облобыза́ющи устне́ же и о́чи, Тому́ взыва́ше ди́вно: ка́ко вся́ оживля́ющаго безгла́сна, не дви́жима ны́не зрю́ Тя? Вои́стинну чу́до ве́лие.

Сла́ва, и ны́не: Крестобогоро́дичен:

Подо́бен: Егда́ от дре́ва Тя́:

Егда́ Нескве́рная А́гница ви́де Своего́ А́гнца, на заколе́ние я́ко челове́ка во́лею влеко́ма, пла́чущи глаго́лаше: безча́дствовати Мя́ ны́не тщи́шися, Христе́, ро́ждшую Тя́. Что́ сие́ сотвори́л еси́, Изба́вителю вся́ческих? Оба́че воспева́ю и сла́влю Твою́, ю́же па́че ума́ и сло́ва, кра́йнюю бла́гость, Человеколю́бче.

Та́же, Све́те ти́хий: Проки́мен дне́: По́мощь моя́ от Го́спода, сотво́ршаго не́бо и зе́млю. Сти́х: Возведо́х о́чи мои́ в го́ры, отню́дуже прии́дет по́мощь моя́. И Сподо́би Го́споди:

На стихо́вне стихи́ры кре́стны, гла́с 2:

Спаси́ мя, Христе́ Спа́се, си́лою кре́стною, спасы́й Петра́ в мо́ри, и поми́луй мя́, Бо́же.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Да ра́спнется вопия́ху, и́же Твои́х дарова́ний при́сно наслажда́ющиися, и злоде́я во благоде́теля ме́сто проша́ху прия́ти, и́же пра́ведником уби́йцы; молча́ше же, Христе́, терпя́ и́х суровство́, пострада́ти хотя́, и спасти́ на́с я́ко Человеколю́бец.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: И́же земны́х наслажде́ний не возлюби́вше страстоте́рпцы, Небе́сных благи́х сподо́бишася, и а́нгелом сожи́теле бы́ша: Го́споди, моли́твами и́х поми́луй и спаси́ на́с.

Сла́ва, и ны́не: Крестобогоро́дичен:

Подо́бен: Егда́ от Дре́ва Тя́:

Егда́ Тя беззако́ннии лю́дие, Спа́се, Жи́знь все́х, на Дре́во вознесо́ша, тогда́ Чи́стая и Пренепоро́чная Ма́ти Твоя́ предстоя́щи и рыда́ющи взыва́ше: Ча́до мое́ сла́дкое, Све́те мои́ма очи́ма, увы́ мне́, ка́ко посреде́ злоде́ю на Кресте́ пригвозди́тися претерпе́л еси́, И́же зе́млю пове́шей на вода́х?

Та́же, Ны́не отпуща́еши: Трисвято́е по О́тче на́ш: тропа́рь, и отпу́ст.

Кано́н моле́бный Пресвяте́й Богоро́дице. Гла́с 2.

Пе́снь 1

Ирмо́с: Во глубине́ постла́ иногда́, фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Я́ко кра́сную, я́ко предо́брую всю́, я́ко непоро́чную в жена́х, Бо́г Тя́ избра́, и во утро́бу Твою́ всели́ся непоро́чную: Его́же моли́, Всенепоро́чная, поро́ка грехо́в изба́вити вся́ пою́щия Тя́.

Псало́мски, Чи́стая, одесну́ю я́коже Цари́ца, от Твоея́ утро́бы возсия́вшаго Царя́ предста́: Его́же моли́, Всенепоро́чная, да десна́го предста́теля пока́жет мя́ в Де́нь Воздая́ния.

Сла́ва: Пресо́хшее естество́ челове́ческое безме́стными де́лы, Ро́ждшая До́ждь Небе́сный, вся́ обнови́: те́мже молю́ся, души́ моея́ бразду́ изсо́хшую покажи́ плодоно́сну, Богоневе́сто.

И ны́не: Умертви́вшеся са́дом ра́зума, Дре́вом же Жи́зни, Чи́стая, к жи́зни ве́чней призва́ни бы́хом, от Тебе́, Богоро́дице, процве́тшим па́че смы́сла, Христо́м Бо́гом: Его́же со дерзнове́нием моли́, спасти́ся душа́м на́шим.

Пе́снь 3

Ирмо́с: Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Облече́ся в мя́ челове́ка, от чре́ва Твоего́ проше́д, Творе́ц, Пречи́стая, нетле́ния оде́жду да́руя обна́жшемуся мно́гими злоде́йствы.

Пречестно́е родила́ еси́ Бо́га Сло́во, Влады́чице: Его́же приле́жно моли́, уще́дрити смире́нную мою́ ду́шу, сла́достными безче́стии се́тующую.

Сла́ва: Я́звы исцели́ души́ моея́, Пречи́стая, и смире́нное се́рдце мое́, огорче́нное я́дом змии́ным, де́йственною Твое́ю лечбо́ю уврачу́й.

И ны́не: Я́ко Ма́ти, иму́щи дерзнове́ние, Влады́чице, к Сы́ну Твоему́, проси́ по́мощь озло́бленным лю́дем, беззако́нных же низложи́ шата́ние.

Пе́снь 4

Ирмо́с: Прише́л еси́ от Де́вы, не хода́тай, ни а́нгел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти: сла́ва си́ле Твое́й, Го́споди.

Ка́плю ми́ умиле́ния одожди́, Влады́чице, отъе́млющи ве́сь се́рдца моего́ ва́р, и печа́ль мою́, и па́костныя прило́ги отгоня́ющи.

Ору́жием мя́ сла́стным уя́звлена, и лежа́ща в ра́нах, Пречи́стая, не пре́зри, но исцели́ копие́м и Кро́вию распе́ншагося Сы́на Твоего́, и Бо́га на́шего.

Сла́ва: Обогаще́нная Влады́чним вся́ким зда́нием, лю́те мя́ обнища́вша, благода́ти Боже́ственныя сподо́би: я́ко да велича́ю Тя́, я́ко благу́ю мою́ Засту́пницу, Всенепоро́чная.

И ны́не: Возсия́ из утро́бы Твоея́, Отрокови́це Неискусобра́чная, О́тчая Заря́, Христо́с. И просвети́ вселе́нную распина́емь, и бесо́вскую тьму́ потреби́.

Пе́снь 5

Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо, Влады́ко, к Светонача́льнику Отцу́ Твоему́, от но́щи неве́дения, приведе́ние и́мамы.

Пу́ть жи́зни ро́ждшая, Пречи́стая, наста́ви мя́ ны́не на пу́ть пра́вый, в безпу́тие и в бре́г лю́тых паде́ний безслове́сно низринове́ннаго.

Устра́нся без ума́ от ра́зума Бо́жия, блу́дно пожи́х, во стране́ да́льней страсте́й заблуди́в: но возвра́щши, Де́во Чи́стая, спаси́ Твои́м утеше́нием.

Сла́ва: Вода́ми Твои́ми живо́тными напо́й раба́ Твоего́, пла́менем разжига́емаго грехо́вным, и опаля́емаго прило́ги бесо́вскими, Де́во Ма́ти Пречи́стая.

И ны́не: Се́ во чре́ве, Богоро́дице Пречи́стая, Христа́ Бо́га па́че сло́ва име́ла еси́, я́коже Иса́ия провозгласи́, и па́че естества́ Сего́, Богороди́тельнице, родила́ еси́.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Не яви́ мене́ бесо́м в ра́дость на Суди́щи бу́дущем, Влады́чице: но благопреме́нно воззре́вши на мя́, Судию́ и Сы́на Твоего́ умоли́.

По́мыслы прогне́вав Тя́, Го́споди, и лука́выми и нечи́стыми мои́ми дея́ньми, в моли́тву привожду́ Ти Ма́терь Твою́, уще́дрив, спаси́ мя.

Сла́ва: Осужде́ния изба́ви мя́, Влады́чице, самоосужде́на су́ща прегреше́ньми, я́ко Судию́ ро́ждшая, и Бо́га вся́ческих, Препе́тая.

И ны́не: Иису́са Спа́са моли́, Его́же па́че естества́ пло́тию родила́ еси́, Де́во Ма́ти Пречи́стая, изба́витися от бе́д рабо́м Твои́м.

Та́же, Го́споди поми́луй, три́жды. Сла́ва, и ны́не:

Седа́лен, гла́с 2. Подо́бен: Милосе́рдия су́щи:

Де́ва и Ма́ти Твоя́, Христе́, на Дре́ве зря́щи Тя́ ме́ртва просте́рта пла́чущи го́рько глаго́лаше: Сы́не Мо́й, что́ стра́нное сие́ та́инство, все́м да́руяй жи́знь ве́чную, во́лею на Кресте́ ка́ко умира́еши сме́ртию поно́сною?

Пе́снь 7

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть; Христо́с же простре́ богочести́вым отроко́м ро́су духо́вную, сы́й благослове́н, и препросла́влен.

Кре́пость моя́ и пе́ние, и спасе́ние, и тве́рдое заступле́ние, и стена́ непобеди́ма су́щи, Влады́чице, борю́щия мя́ бе́сы победи́, при́сно и́щущия умертви́ти мя́.

Бо́га вопло́щши деви́ческими Твои́ми кровьми́, обожи́ла еси́, Де́во, челове́чество: те́мже молю́ся Ти́ страстьми́ оскверне́ннаго мя́, и растле́ннаго вра́жиими кова́рствы изба́ви моли́твами Твои́ми.

Сла́ва: Пе́щь прообразова́ше Рождество́ Твое́, Всенепоро́чная, о́троки бо не опали́, я́коже ни ложесна́ Твоя́ Огнь Непостоя́нный: те́мже мо́лим Тя́, изба́ви рабы́ Твоя́ огня́ ве́чнаго.

И ны́не: Пречи́стое зача́тие, и нетле́нное Рождество́, Ты́ Еди́на яви́ла еси́, Де́вою пребы́вши: Христа́ бо заче́нши, Чи́стая, над все́ми Бо́га, Челове́ка бы́вша, ве́рным на спасе́ние и избавле́ние.

Пе́снь 8

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.

Ревну́й до́брым, злы́х уда́льшися, попече́нием Боже́ственных дея́ний, душе́ моя́, моля́щуюся о Тебе́ Богороди́тельницу, и все́х непосты́дную иму́щи Засту́пницу, я́ко ми́лостиву и благолюби́ву.

Разреши́ла еси́ соу́з челове́ческий дре́вняго осужде́ния: те́мже молю́ Тя, Богороди́тельнице, разреши́ вся́к соу́з зло́бный се́рдца моего́, связа́вши мя́, Пречи́стая, Боже́ственною любо́вию Зижди́теля.

Сла́ва: Сла́вы О́тчую Зарю́ ро́ждши, Богоро́дице, безсла́вием прегреше́ний се́тующее се́рдце мое́ уясни́ и сла́вы присносу́щныя покажи́ мя прича́стника, я́ко да ве́рою сла́влю Тя́.

И ны́не: Яви́ся на́м из Тебе́, Богороди́тельнице, Пра́вды и́стинное Со́лнце, просвеща́я вся́ческая луча́ми Божества́, вопло́щся Вы́шний, Его́же песносло́вим.

Пе́снь 9

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы на́м яви́ся, омраче́нная просвети́ти, собра́ти расточе́нная: те́м всепе́тую Богоро́дицу велича́ем.

Вкуси́в Ада́м сне́дь приме́сную сме́рти, от Дре́ва го́ресть объя́т: на Дре́ве же пригво́ждся Сы́н Тво́й, Пречи́стая, сла́дость безсме́ртия источи́: сего́ ра́ди Тя́ восхваля́ем.

Цари́ца еси́, Царя́ Христа́ и Го́спода па́че сло́ва ро́ждши, разо́ршаго а́дова ца́рства: Его́же приле́жно моли́, Отрокови́це, вы́шняго Ца́рствия сподо́бити вся́ чту́щия Тя́.

Сла́ва: Ублажи́, Влады́чице, смире́нное се́рдце мое́, озло́бленое сластны́ми затво́ры, я́ко Блага́го Роди́тельница, и Блага́я су́щи вся́: и к покая́нию мя́ благи́х двере́й введи́.

И ны́не: Ме́ртв бы́в на Кре́ст возноси́мь, си́м умори́вый зми́я. Те́мже зову́ Ти: умерщвле́нную ду́шу мою́ лука́выми де́лы, поми́луй, Сло́ве, и оживи́ моли́твами Ро́ждшия Тя́.

Та́же, Досто́йно е́сть: и покло́н. Трисвято́е по О́тче на́ш: тропари́, и про́чее обы́чное, и отпу́ст.

По 1-м стихосло́вии седа́льны кре́стны. Гла́с 2:

Спасе́ние соде́лал еси́ посреде́ земли́, Христе́ Бо́же, на Кресте́ пречи́стеи ру́це Твои́ просте́рл еси́, собира́я вся́ язы́ки зову́щия: Го́споди, сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

И́мже о́бразом плени́л е́сть вра́г Ада́ма дре́вом сне́дным, та́кожде Са́м, Го́споди, плени́л еси́ Ты́ врага́ Дре́вом Кре́стным, и стра́стию Твое́ю. На се́ бо прии́де Вторы́й Ада́м, взыска́ти заблу́ждшаго, и оживи́ти уме́ршаго: Бо́же, сла́ва Тебе́.

Сла́ва, и ны́не: Крестобогоро́дичен: Де́ва и Ма́ти Твоя́, Христе́, на Дре́ве зря́щи Тя́ ме́ртва просте́рта, пла́чущи го́рько глаго́лаше: Сы́не мо́й, что́ стра́нное сие́ та́инство? И́же все́м да́руяй живо́т ве́чный, во́лею на Кресте́ ка́ко умира́еши сме́ртию поно́сною?

По 2-м стихосло́вии седа́льны. Гла́с 2:

Животворя́щий Кре́ст Твоея́ бла́гости, его́же дарова́л еси́ на́м недосто́йным, Го́споди, Тебе́ прино́сим в моли́тву: спаси́ гра́д Тво́й, ми́р да́руя Богоро́дицы ра́ди, Еди́не Человеколю́бче.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Пречи́стому о́бразу Твоему́ покланя́емся, Благи́й, прося́ще проще́ния прегреше́ний на́ших, Христе́ Бо́же: во́лею бо благоволи́л еси́ пло́тию взы́ти на Кре́ст, да изба́виши я́же созда́л еси́ от рабо́ты вра́жия. Те́м благода́рственно вопие́м Ти́: ра́дости испо́лнил еси́ вся́, Спа́се на́ш, прише́дый спасти́ ми́р.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Тебе́ одева́ющаго не́бо о́блаки, иму́ще святи́и одея́ние в ми́ре, му́ки от беззако́нных претерпе́ша, и пре́лесть и́дольскую упраздни́ша. Те́х моли́твами и на́с свободи́ от неви́димаго врага́, Спа́се, и спаси́ на́с.

Сла́ва, и ны́не: Крестобогоро́дичен: Предстоя́щи у Креста́ Твоего́, Я́же без се́мене ро́ждшая Тя́, Христе́, и не терпя́щи зре́ти непра́ведне стра́ждуща, рыда́ше с пла́чем, и вопия́ше Ти́: ка́ко стра́ждеши, И́же естество́м безстра́стен, Сладча́йший Сы́не? Пою́ Твою́ кра́йнюю бла́гость.

По 3-м стихосло́вии седа́льны. Гла́с 2:

Я́ко разбо́йник испове́дую, и вопию́ Ти Благо́му: помяни́ мя, Го́споди, во Ца́рствии Твое́м, и с ни́м мя́ сопричти́, И́же во́лею стра́сти на́с ра́ди претерпе́вый.

Просвети́вый земна́я Кресто́м Твои́м, и призва́вый на покая́ние гре́шныя, не отлучи́ мене́ ста́да Твоего́, Па́стырю До́брый, но взыщи́ мене́ заблу́ждшаго, Влады́ко, и свято́му Твоему́ ста́ду сопричти́, еди́не Ми́лостиве и Человеколю́бче.

Сла́ва, и ны́не: Крестобогоро́дичен: Честны́м Кресто́м Сы́на Твоего́ сохраня́еми, Влады́чице, Чи́стая Богоро́дице, вся́к прило́г бори́теля вси́ удо́бне побежда́ем, сего́ ра́ди по до́лгу Тя́ ублажа́ем, я́ко Бо́жию Ма́терь, и еди́ну упова́ние душа́м на́шим.

Кано́н честно́му и животворя́щему Кресту́, [его́же краегране́сие си́це: Кресту́ водрузи́вшуся, паде́ бесо́вская пре́лесть.] Творе́ние Ио́сифово. Гла́с 2.

Пе́снь 1

Ирмо́с: Нетре́ну, необы́чну, немо́кренно морску́ю ше́ствовав стезю́, избра́нный вопия́ше Изра́иль: Го́сподеви пои́м, я́ко просла́вися.

Распя́тие прии́м, и гвоздьми́ пригвожде́н бы́в безче́стно, Сло́ве, вся́ челове́ки почти́ти хотя́й, и́же Твоя́ во́льная страда́ния сла́вящия.

Просте́рл еси́ на Кресте́ дла́ни, Спа́се, И́же простры́й не́бо я́ко ко́жу, и́миже объя́т язы́ки и лю́ди, и́же Твоя́ во́льныя стра́сти сла́вящия.

Му́ченичен: Взе́мше Кре́ст на ра́мо страстоте́рпцы, распе́ншемуся после́доваша Христу́ те́пле, Того́ сообразу́ющеся Боже́ственным Страсте́м.

Му́ченичен: Воспе́ша а́нгельския Си́лы, ви́девше ва́ша страда́ния, воспла́кася же бесо́в мно́жество, победоно́сцы му́ченицы богозри́тельнейшии.

Богоро́дичен: Сло́во честна́го проро́ка испо́лнися: ору́жие бо се́рдце Твое́ про́йде, Влады́чице, егда́ на Кресте́ пригвожде́на ви́дела еси́ Твоего́ Сы́на.

Други́й кано́н Пресвяте́й Богоро́дице. Гла́с 2.

Ирмо́с: Гряди́те лю́дие, пои́м пе́снь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты еги́петския: я́ко просла́вися.

Я́же Исто́чник безстра́стия ро́ждшая, уя́звленаго мя́ страстьми́, Отрокови́це, исцели́, и огня́ ве́чнаго исхити́, Еди́на Богора́дованная.

Теле́сных неду́г изба́ви мя́, и души́ моея́ исцели́ безме́стныя стра́сти, и огня́ ве́чнаго исхити́ мя, Еди́на Богоблагода́тная.

Под Твою́ ны́не прибега́ю бла́гость, Де́во Ма́ти Пречи́стая, изба́ви раба́ Твоего́ душе́вных боле́зней, и страсте́й душетле́нных, и ве́чнаго огня́.

Ты́, Влады́чице, мое́ те́плое очисти́лище, к Тебе́ прири́щу и спаса́юся, и приобрета́ю душе́вное спасе́ние: мо́жеши бо все́х спасти́, я́ко Ма́ти су́щи Бо́га.

Пе́снь 3

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́. Возвесели́ бо ся ду́х мо́й внегда́ пе́ти: не́сть свя́т, я́коже Бо́г на́ш, и не́сть пра́веден па́че Тебе́, Го́споди.

Гро́зд Нетле́нный на дре́ве ви́сящ, иска́па Боже́ственную сла́дость, сердца́ веселя́щую челове́ков, зло́бы же погубля́ющую пия́нство благода́тию, Иису́с, Изба́витель ду́ш на́ших.

Возне́слся еси́ на Дре́во во́лею, Иису́се, и все́ диа́воле злодея́ние све́ргл еси́; па́дшия же челове́ки в па́губу умо́м развраще́нным, возне́сл еси́, Многоми́лостиве.

Му́ченичен: Огне́м Боже́ственныя любве́ распа́льшеся, огня́ не устраши́шася до́блии, и не ужасо́шася сме́рти, безсме́ртныя да́ры наде́ющеся восприя́ти, и ра́дость безконе́чную, и све́т незаходи́мый.

Му́ченичен: От крове́й свои́х страстоте́рпцы, пресве́тлую очервлени́ша багряни́цу, и то́ю оде́явшеся, десно́ю же руко́ю я́ко ски́птр нося́ще Боже́ственный Кре́ст, с Го́сподем всегда́ ца́рствуют.

Богоро́дичен: Чту́т Тя́ чи́нове безпло́тных, все́х бо Влады́ку Плотоно́сца родила́ еси́, разреши́вшаго дре́вом свя́занныя вся́, Отрокови́це Богоневе́сто, и ве́рныя привяза́вшаго к любви́ свое́й.

И́н. Ирмо́с то́йже

Родила́ еси́ безнача́льнаго Царя́, из Тебе́, Де́во Ма́ти, пло́ть прие́мша: Того́ у́бо я́ко Человеколю́бца моли́, спасти́ раба́ Твоего́ от вся́кия ско́рби, и бу́дущаго осужде́ния.

Разори́ недоуме́ние се́рдца моего́, я́звы исцели́, и гное́ния отжени́ Боже́ственною Твое́ю си́лою, и умиле́ния струю́ пода́ждь ми́, Я́же Исто́чник ро́ждши Присноживо́тный.

Боле́вшую ду́шу мою́ бесо́вскими напа́стьми и уны́нием, Богороди́тельнице, исцели́, и сле́зы покая́ния да́ждь се́рдцу моему́, и Влады́ки моего́ стра́х всади́ в не́м, Пречи́стая.

Ле́ностию жи́знь мою́ ижди́в, и страстьми́ се́рдце мое́ оскверни́в, прихожду́ к Тебе́, Влады́чице, умиле́нием души́, и молю́ся: уще́дри и спаси́ мя, покая́ния мя́ о́бразы утвержда́ющи.

Пе́снь 4

Ирмо́с: Прише́л еси́ от Де́вы, не хода́тай, ни а́нгел, но Са́м Го́споди вопло́щся, и спа́сл еси́ всего́ мя челове́ка. Те́м зову́ Ти: сла́ва си́ле Твое́й, Го́споди.

Пове́шен бы́л еси́ на Дре́ве, пове́шей зе́млю на вода́х, Всеси́льне, и копие́м в ре́бра пробода́емь, Кро́вь же с водо́ю иска́пал еси́ на избавле́ние все́х.

Прободе́ным Твои́м ре́бром, исцеле́ боле́знь моя́; руко́ю по лани́те бие́ну Ти́ свобо́ду улучи́х; же́лчи же вкуше́нием, сластна́го изба́вихомся, Христе́, бра́шна.

Му́ченичен: Струпми́ остру́пльше зми́я льсти́ваго, исцеля́ете стру́пы серде́ц на́ших, всегда́ благода́ть источа́юще от исто́чник Спа́совых, Боже́ственнии му́ченицы.

Му́ченичен: Всетеле́сную я́зву врагу́ нанесли́ есте́, всечестни́и, я́звами окровавля́еми, на кресте́ же протяза́еми, и одира́еми, богозра́чнии страстоте́рпцы.

Богоро́дичен: Воплоти́ся из пречи́стых крове́й Твои́х Вышний: Его́же ви́дящи на Дре́ве Пречи́стая, без пра́вды воздвиза́ема, стеня́ше слезя́щи, и Того́ благоутро́бие велича́ла еси́.

И́н

Ирмо́с: Пою́ Тя, слу́хом бо Го́споди услы́шах, и ужасо́хся: до мене́ бо и́деши, мене́ ища́ заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Пою́ Тя вои́стинну, Всепе́тая, препе́таго Бо́га Сло́во па́че естества́ ро́ждшую: и молю́ся, смире́нныя души́ моея́ боле́зни исцели́, и от лю́таго мя́ изба́ви осужде́ния.

Обы́чно на ны́ бога́тыя Твоея́ ми́лости, Де́во, ороша́й, неду́ги уставля́ющи, стра́сти разруша́ющи разли́чныя души́: те́мже разреши́ се́рдца моего́ плени́цы грехо́вныя, и боле́зней мно́гих.

Оскверни́х ду́шу мою́ страстьми́; чисте́йшее Ты́ бы́вши Пречи́стому жили́ще, очи́сти, Богороди́тельнице, к све́ту покая́ния наставля́ющи мя́, и огня́ бу́дущаго изыма́ющи.

Ум мо́й, Пречи́стая Влады́чице, просвети́, молю́ся Тебе́. Во́лны утиши́ стра́стнаго се́рдца моего́, плотска́я хоте́ния потребля́ющи, и ко приста́нищу Боже́ственному приводя́щи:

Пе́снь 5

Ирмо́с: Угль Иса́ии проявле́йся, Со́лнце из де́вственныя утро́бы возсия́, во тьме́ заблу́ждшим, богоразу́мия просвеще́ние да́руя.

За милосе́рдие приобщи́вся Кресту́, Влады́ко, из глубины́ мя злы́х исто́ргл еси́, и почти́л еси́ соседе́нием О́тчим, обезче́ствованный во́лею.

Те́рнием венча́вся, И́же венчава́яй цве́ты всю́ зе́млю, страсте́й мои́х те́рние из ко́рене сече́ши, Сло́ве, и насажда́еши во мне́ Тво́й ра́зум.

Му́ченичен: Кре́постию неможе́ния ва́шего, святи́и му́ченицы во́лею обло́жшеся, и укре́пльшеся, бесо́в кре́пость отню́д погуби́сте.

Му́ченичен: Вельми́ подви́гшеся, святи́и, на земли́, на Небесе́х ве́лию сла́ву обрето́сте, и вели́ких бе́д избавля́ете на́с, ва́с чту́щих.

Богоро́дичен: И́же на плещу́ херуви́мску, на Небесе́х боголе́пно Носи́мый, я́ко вои́стинну, Пречи́стая, на руку́ Твое́ю се́дый, ра́спят бы́в, все́х из тли́ изба́ви.

И́н

Ирмо́с: Просвеще́ние во тьме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ Ми́ра, просвети́ мя сия́нием Твои́м: ино́го бо ра́зве Тебе́ бо́га не зна́ю.

Наве́ты и ловле́ньми льсти́ваго, умерщвле́наго оживи́ мя, Всенепоро́чная Влады́чице Богоро́дице, Я́же ро́ждши Жи́знь все́х ипоста́сную: да Тя́ пою́ благоче́стно Всепе́тую.

Я́же А́гнца и Па́стыря, я́вльшися, Де́во, Ма́ти, упаси́ мя нра́вом заблужде́ннаго, и десны́м мя́ сочета́тися овца́м, в Де́нь Су́дный сподо́би: я́ко да Твою́ благода́ть пою́ спаси́тельную.

От страсте́й омраче́ния, от собла́зн прибыва́ющих напа́стьми чужда́го, бу́дущих же му́к ве́чных согреша́ющим, изба́ви мя́, Отрокови́це, Твои́ми мольба́ми, молю́ся.

Неве́сто Бо́жия, в Ню́же всели́ся Еди́но Боже́ственное Сло́во, всю́ просвеща́ющее вселе́нную, возсия́й ми́ зарю́ и́стиннаго покая́ния; озари́ мне́ спаси́тельныя лучи́, разоря́ющи страсте́й мои́х тьму́ Твои́ми мольба́ми, молю́ся.

Пе́снь 6

Ирмо́с: Гла́с глаго́л моле́бных от боле́зненныя, Влады́ко, души́ услы́шав, от лю́тых мя́ изба́ви: Еди́н бо еси́ на́шего спасе́ния вино́вен.

Плещи́ вда́в на ра́ны, и лани́те Твои́ на ударе́ние, лице́ же, Спа́се, на оплева́ние, спа́сл мя́ еси́ мно́го Тебе́ согреши́вшаго в ра́зуме и неве́дении.

Я́коже А́гнец, во е́же закла́тися, веде́н бы́л еси́, Христе́ Бо́же мо́й: во́лка мы́сленнаго ядови́тым угрызе́нием уме́рших па́ки возводя́ к животу́: сла́ва распя́тию Твоему́.

Му́ченичен: Зако́ны соблюда́юще му́ченицы Влады́чния, беззако́нен сове́т законопресту́пных отню́д уклони́ша, и уме́рше, жи́знь бу́дущую прия́ша.

Му́ченичен: Ополчи́вшеся, святи́и, ра́дующеся, к сопроти́вным нача́лом Боже́ственными ору́жии си́х победи́сте, и венцы́ побе́дныя прия́сте от Бо́га.

Богоро́дичен: Да обожи́т челове́ка, из Тебе́, Де́во, ражда́ется Бо́г, и распина́ется, и сме́рть вкуша́ет, убива́я Кресто́м мене́ дре́вле уби́вшаго.

И́н

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Ны́не к Тебе́ прибега́ю, Препе́тая, спаси́ мя моли́твами Твои́ми и соблюди́: ели́ка бо хо́щеши, и мо́жеши я́ко Ма́ти вся́ Укрепля́ющаго.

Обурева́ема бу́рею печа́лей, и потопля́ема настоя́ньми треволне́ния, спаси́ мя, Богоро́дице Де́во, раба́ Твоего́.

Милосе́рдия Твоего́ сподо́би мя́, немилосе́рдием и зло́бою одержи́маго, и томле́ний предлежа́щих и огня́ ве́чнаго исхити́ мя.

Грехи́ ми́ра взе́млющаго, Пречи́стаго А́гнца заче́нши родила́ еси́, Всенепоро́чная, грехо́в проще́ние дарова́ти ми́, моля́щися Ему́ не преста́й.

Пе́снь 7

Ирмо́с: Богопроти́вное веле́ние беззако́ннующаго мучи́теля, высо́к пла́мень вознесло́ е́сть: Христо́с же простре́ богочести́вым отроко́м ро́су духо́вную, Сы́й благослове́н и препросла́влен.

Па́дша мя́ преступле́нием воздви́гл еси́, на Кре́ст воздви́жен И́же все́х Воскресе́ние, и совоздвиже́ние, Сло́ве, и низве́ргл еси́ све́ргшаго бори́теля, всего́ безде́льна ме́ртва показа́л еси́. Сла́ва держа́ве Твое́й.

Гвоздьми́ пригвозди́л еси́, Христе́, грехи́ пра́отца, тро́стию же бие́мь, написа́л еси́ свобо́ду все́м челове́ком. Сла́ва страда́нию Твоему́, и́мже изба́вихомся тьмы́ страсте́й.

Му́ченичен: Секо́ми бы́ша по телесе́м скверноуби́йственными рука́ми, добропобе́днии Христо́вы великому́ченицы, и пребыва́ху ду́хом от Бо́га неразлучи́ми, секу́ще му́жества мече́м, и закала́юще льсти́ваго врага́.

Му́ченичен: Кре́пость непобори́мую распе́ншагося Христа́ име́я, во́инство непобеди́мое, губи́тельное во́инство в коне́ц погуби́: пострада́в же, вене́ц побе́ды прия́т, жи́знь блаже́нную и неги́блемую.

Богоро́дичен: Пала́та одушевле́нная Царе́ва, и престо́л огнеобра́зный, Де́во, показа́лася еси́, на не́мже седя́, воздви́же от пе́рваго паде́ния вся́ челове́ки, и соседе́нием Оте́ческим почте́.

И́н. Ирмо́с то́йже

Живо́т ипоста́сный на́м ро́ждши, сме́ртию сме́рть я́ве погу́бльший, стра́сти умертви́ се́рдца моего́, и исто́чник сле́з пода́ждь ми́, Чи́стая: я́ко да при́сно сла́влю Тя́.

Наде́жда непосты́дная, упова́ние изве́стное, и стена́ необори́мая, покро́в же и помо́щница бу́ди мне́, Всенепоро́чная, упова́ющему на Тя́: и к све́ту наста́ви, Чи́стая, покая́ния и умиле́ния.

Изба́витися рабу́ Твоему́ вся́кия зло́бы бесо́вския и печа́ли, и осужде́ния, и ве́чнаго огня́, Сы́на Твоего́ умоли́, я́ко да ве́рою при́сно сла́влю Тя́.

Пречи́стое зача́тие, и нетле́нное Рождество́, Ты́ еди́на показа́ла еси́, Де́ва пребы́вши: Христа́ бо заче́нши, Чи́стая, над все́ми Бо́га, Челове́ка бы́вша, ве́рным на спасе́ние и избавле́ние.

Пе́снь 8

Ирмо́с: О подо́бии зла́те небре́гше треблаже́ннии ю́ноши, неизме́нный и живы́й Бо́жий о́браз ви́девше, среди́ огня́ воспева́ху: осуществова́нная да пое́т Го́спода вся́ тва́рь, и превозно́сит во вся́ ве́ки.

Лю́дие непокори́вии, без стра́ха же беззако́нная вся́ творя́ще, посреде́ беззако́нною Тя́, Ще́дре, оправда́юща беззако́нныя, на Дре́ве воздви́гше распя́ша: Тебе́ же вся́ тва́рь сла́вит, я́ко Го́спода и Влады́ку, воспева́ющи Твое́ долготерпе́ние.

Окровави́л еси́, Христе́, пе́рсты Твоя́ на Дре́ве пригвожда́емь, И́же приноси́мую бесо́м кро́вь дре́вле, на па́губу принося́щим ю́, преста́вил еси́: те́мже Тя́ сла́вит вся́ тва́рь, Бо́же все́х, воспева́ющи Твое́ человеколю́бие.

Му́ченичен: Во́д живо́тных су́ще испо́лнь му́ченицы, пото́ки ле́стныя изсуши́ша Боже́ственными струя́ми крове́й, ве́рою неукло́нною зову́ще: осуществова́нная да пое́т Го́спода вся́ тва́рь, и превозно́сит Его́ во вся́ ве́ки.

Му́ченичен: Неисче́тное мно́жество крове́й ва́ших, святи́и, нече́стия о́гнь погаси́, и е́ллинскую многобо́жную разруши́ пре́лесть, все́х же ве́рных просвети́ пою́щих: да пое́т вся́ тва́рь Го́спода, и превозно́сит Его́ во вся́ ве́ки.

Богоро́дичен: Непоро́чная А́гница, проро́ков же и му́чеников украше́ние, я́коже А́гнца Тя́ воздви́жена на Дре́во узре́вши, Безнача́льное Сло́во, пла́каше го́рько, и глаго́лаше: осуществова́нная да пое́т Го́спода вся́ тва́рь, и превозно́сит Его́ во ве́ки.

И́н

Ирмо́с: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Прибе́жище христиа́ном и Помо́щнице, в лю́тых одержи́ма мя́, Пречи́стая Де́во, не пре́зри, беда́ми обходи́маго всегда́, и мно́гими устремле́нии лука́вых бесо́в.

Не забу́ди гла́са моли́твенник Твои́х, Предста́тельнице стра́шная, но от вся́кия боле́зни, и от вся́каго преще́ния мольба́ми Твои́ми исхити́: преклоня́ет бо Бо́га Твоя́ ма́терняя моли́тва.

Утоли́ страсте́й мои́х лю́тую ны́не бу́рю, Чи́стая Благослове́нная, и победи́, Отрокови́це, неща́дно на мою́ нищету́ напа́дающих, вся́ враги́ безпло́тныя, я́ко да ве́рою пою́ Тя.

От пе́щи искуше́ний, от пла́мене грехо́в и огня́ страсте́й и гее́нны, и бесо́вскаго наше́ствия, в ча́с сконча́ния исхити́ мя́ Еди́на Богороди́тельнице, Предста́тельнице ве́рных.

Пе́снь 9

Ирмо́с: Недоуме́ет вся́к язы́к благохвали́ти по достоя́нию, изумева́ет же у́м и преми́рный пе́ти Тя́, Богоро́дице, оба́че Блага́я су́щи, ве́ру приими́, и́бо любо́вь ве́си Боже́ственную на́шу, Ты́ бо христиа́н еси́ Предста́тельница, Тя́ велича́ем.

Да вообрази́т дре́вле Исаа́к Твою́ стра́сть, связу́ется, Сло́ве; разреша́ет же свя́занное овча́ в то́йже о́браз, в саде́ Саве́кове оставле́ния, и отпусти́ся нево́льная тогда́ же́ртва вои́стинну, Тебе́ бо во́лею поже́ршуся, от зо́л разреши́хомся.

Красе́н добро́тою па́че сыно́в челове́ческих, Христе́, сы́й добро́ты не имы́й, ниже́ ви́да, в стра́сти на Дре́ве Кре́стнем пове́шен, украша́я неле́поту всего́ ро́да челове́ча: сла́ва благоутро́бию Твоему́, Еди́не Милосе́рде Го́споди.

Му́ченичен: Сио́на Вы́шняго яви́стеся жи́телие Боже́ственнии, и а́нгелом равноче́стнии, му́ченицы, я́ко су́щии согра́ждане: и Це́рковь, святи́и, перворо́дных све́тло просвеща́ете, сия́юще све́том Боже́ственным, и муче́ния венцы́ украша́еми.

Му́ченичен: Возлю́бленнии дру́зи, ва́с пресла́вно возлю́бльшаго, изба́вите мя́ дру́жбы льсти́выя, я́же к пло́ти, святи́и Госпо́дни му́ченицы; освяще́ние же и просвеще́ние и разреше́ние прегреше́ний лю́тых, все́м соверша́ющим па́мять ва́шу испроси́те.

Богоро́дичен: Свети́л добро́та тече́ния обы́чнаго уступи́, егда́ Тя ви́деша Со́лнца Пра́вды вознесе́на на Кре́ст хоте́нием; Де́ва же со ученико́м де́вственным восклица́ше с пла́чем: увы́ Мне́, вопию́щи, что́ сие́ стра́нное зре́ние?

И́н

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы на́м яви́ся, омраче́нная просвети́ти, собра́ти расточе́нная. Те́м всепе́тую Богоро́дицу велича́ем.

Человеколю́бца Го́спода, Еди́наго Многоми́лостиваго, па́че ума́ же и сло́ва родила́ еси́: Того́ моли́, Де́во, в Ча́с Стра́шный суда́ изба́вити раба́ Твоего́ огня́ ве́чнаго.

На́м пою́щим Тя́, и ве́рою сла́вящим, и к Боже́ственному Твоему́ покро́ву при́сно притека́ющим, пода́ждь с Небесе́ разреше́ние лю́тых, и му́чащих страсте́й, Богоневе́сто, и му́ки и суда́ изба́ви.

Красе́н в виде́нии, во вкуше́нии же горча́йший, и́же мене́ умори́вый греха́ пло́д, его́же напита́хся в сы́тость, Стра́шнаго ча́ю Суда́, от него́же мя́ исхити́, Пресвята́я Де́во Ма́ти.

Ублажи́, Пречи́стая, смире́нное се́рдце мое́, озло́бленное сластны́ми затво́ры, я́ко Благо́му Роди́тельница, и блага́ су́щи вся́, и к покая́нию мя́ благи́х двере́й введи́.

Та́же: Досто́йно е́сть: Ектения́, и свети́лен, и псалмы́ обы́чны.

На стихо́вне стихи́ры кре́стны. Гла́с 2:

Креста́ Твоего́ Дре́во, Христе́ Бо́же, Дре́во Живо́тное показа́л еси́ на́м ве́рующим в Тя́, и си́м упраздни́в держа́ву иму́щаго сме́рти, оживи́л еси́ ны́ умерщвле́ныя грехо́м. Те́мже вопие́м Ти́: Благода́телю все́х, Го́споди, сла́ва Тебе́.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся́ дни́ на́ша возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Во́лею обнища́в, обнища́ния ра́ди Ада́мова, Христе́ Бо́же, прише́л еси́ на зе́млю от Де́вы вопло́щся, и распя́тие прия́т, да на́с свободи́ши от рабо́ты вра́жия: Го́споди, сла́ва Тебе́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: По Христе́ пострада́вше да́же до сме́рти, о страстоте́рпцы му́ченицы! Ду́ши у́бо и́мате на Небесе́х в руце́ Бо́жии, и по ми́ру всему́ почита́емы су́ть ва́ша мо́щи; свяще́нницы покланя́ются, и лю́дие вси́, ра́дующеся, согла́сно вопие́м: со́н че́стен пред Го́сподем – сме́рть преподо́бных Его́.

Сла́ва, и ны́не: Крестобогоро́дичен:

Подо́бен: Егда́ от Дре́ва Тя́:

Егда́ Нескве́рная А́гница ви́де своего́ А́гнца, на заколе́ние я́ко челове́ка во́лею влеко́ма, рыда́ющи глаго́лаше: безча́дствовати мя́ ны́не тщи́шися, Христе́, ро́ждшую Тя́. Что́ сие́ сотвори́л еси́, Изба́вителю все́х? Оба́че воспева́ю и сла́влю Твою́ кра́йнюю бла́гость па́че ума́ и сло́ва, Человеколю́бче.

Та́же, Бла́го е́сть испове́датися Го́сподеви: Трисвято́е по О́тче на́ш: тропа́рь, и ектении́. Та́же ча́с 1-й, псалмы́ обы́чны, и отпу́ст.

Гла́с Ти́ прино́сим разбо́йнич, и мо́лимся: помяни́ на́с, Го́споди, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Искорени́л еси́, Влады́ко, зло́бный те́рн, вене́ц терно́в во́лею носи́в, Долготерпели́ве.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Ра́спят бы́в, Безгре́шне, на Ло́бнем, сокруши́л еси́ главу́ лука́ваго, и вся́ челове́ки спа́сл еси́.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Сокруша́еми, му́ченицы, врага́ сокруши́ли есте́ всю́ си́лу, и побе́дныя венцы́ прия́сте.

Сла́ва: Окропле́нием Боже́ственныя Кро́ве ве́рнии просвеща́еми, Еди́но в Трие́х ли́цех Божество́ чти́м.

И ны́не: Я́ко А́гнца пове́шена на Дре́ве, Всенепоро́чная ви́дящи Христа́, рыда́ющи с пла́чем, Того́ велича́ше.

нача́ло суббо́тней слу́жбе, и все́ после́дование вече́рни и у́трени: пи́сан ука́з о то́м в пе́рвом гла́се.

На Го́споди воззва́х: стихи́ры святы́м му́чеником, и святи́телем и преподо́бным. Гла́с 2.

Подо́бен: Егда́ от дре́ва Тя́:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Пло́ть предаю́ще ра́нам и горча́йшия му́ки терпя́ще, и ну́ждную сме́рть, му́ченицы всехва́льнии, и мучи́телей посрами́сте, и че́сти и́дольския вои́стинну потреби́ли есте́, Христа́ пропове́дающе Еди́наго Бо́га и Влады́ку: Ему́же со а́нгельскими ли́ки, венцено́сцы сла́внии, предстоите́.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

И па́ки глаго́лем ту́же стихи́ру: Пло́ть предаю́ще ра́нам:

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Сло́ва я́вльшагося на земли́, пропове́дницы яви́стеся Боже́ственнии, и благоче́стию все́х научи́сте, и правосла́вное Боже́ственных слове́с изло́жше, и́миже е́ресь дале́че отгна́сте от Це́ркве Христо́вы. Те́мже во оби́тели при́сно живу́щия, я́ко священноде́йственницы Тро́ицы, все́х введи́те, блаже́ннии.

И́ны стихи́ры му́ченичны, гла́с то́йже.

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

И́же земны́я сла́сти не возлюби́вше страстоте́рпцы, Небе́сным благи́м сподо́бишася, и а́нгелом согра́ждане бы́ша: Го́споди, моли́твами и́х поми́луй, и спаси́ на́с.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Святы́м му́чеником моля́щимся о на́с, и Христа́ пою́щим, вся́ка пре́лесть преста́, и челове́ческий ро́д ве́рою спаса́ется.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Ли́цы му́ченичестии проти́вишася мучи́телем, глаго́люще: мы́ во́инствуем Царю́ Си́лам, а́ще и огню́ и му́кам предадите́ на́с, не отмета́емся Тро́ическия Си́лы.

Сла́ва, и ны́не: Богоро́дичен: Пре́йде се́нь зако́нная, благода́ти прише́дши: я́коже бо купина́ не сгара́ше опаля́ема, та́ко Де́ва родила́ еси́, и Де́ва пребыла́ еси́. Вме́сто столпа́ о́гненнаго, Пра́ведное возсия́ Со́лнце: вме́сто Моисе́я, Христо́с, спасе́ние ду́ш на́ших.

Та́же. Све́те ти́хий: Проки́мен дне́: Бо́же засту́пник мо́й еси́ Ты́, и ми́лость Твоя́ предвари́т мя́. Сти́х: Изми́ мя от вра́г мои́х, Бо́же, и от востаю́щих на мя́ изба́ви мя́. Та́же, Сподо́би Го́споди в ве́чер се́й:

На стихо́вне стихи́ры, гла́с 2:

Ве́лия сла́ва, ю́же стяжа́сте, святи́и, ве́рою: не то́кмо бо в страда́ниих врага́ победи́ли есте́, но и по сме́рти ду́хи прого́ните, неду́жныя исцеля́ете, ду́ш и теле́с вра́чеве. Моли́теся ко Го́споду, поми́ловатися душа́м на́шим.

Сти́х: Блаже́ни, я́же избра́л и прия́л еси́, Го́споди.

Ме́ртвен: Я́ко цве́т увяда́ет, и я́ко се́нь ми́мо гряде́т, и разруша́ется вся́к челове́к; па́ки же глася́щей трубе́, ме́ртвии я́ко в тру́се вси́ воста́нут ко Твоему́ сре́тению, Христе́ Бо́же. Тогда́ Влады́ко, и́хже преста́вил еси́ от на́с, во святы́х Твои́х учини́ кро́вех ду́хи ра́б Твои́х.

Сти́х: Ду́ши и́х во благи́х водворя́тся.

Ме́ртвен: Увы́ мне́, коли́к по́двиг и́мать душа́ разлуча́ющися от телесе́! Увы́ мне́, тогда́ коли́ко слези́т, и не́сть и́же поми́лует ю́! Ко а́нгелом о́чи возводя́щи, безде́льно мо́лится; к челове́ком ру́це простира́ющи, и не и́мать помога́ющаго. Те́мже, возлю́бленная моя́ бра́тие, разуме́вше кра́ткую на́шу жи́знь, преста́вленным поко́я от Христа́ про́сим, и душа́м на́шим ве́лию ми́лость.

Сла́ва, и ны́не: Богоро́дичен: Спаси́ от бе́д рабы́ Твоя́, Богоро́дице Де́во, я́ко вси́ по Бо́зе к Тебе́ прибега́ем, я́ко к неруши́мей стене́ и предста́тельству.

Та́же: Ны́не отпуща́еши: Трисвято́е по О́тче на́ш: тропа́рь, и отпу́ст.

Кано́н моле́бный Пресвяте́й Богоро́дице. Гла́с 2.

Пе́снь 1

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты еги́петския: я́ко просла́вися.

Жи́зни исто́чник еси́, Де́во Ма́ти Чи́стая, Нача́льника и Го́спода ро́ждши, Жи́знь вся́ческих, ороша́ющи ве́рою славосло́вящия Тя́.

Тя́ утвержде́ние и Предста́тельницу обога́щшеся и́мамы, и́же Богоро́дицу, Пречи́стая, испове́дающии Тя́, от треволне́ния жития́, Всенепоро́чная Де́во, спаса́емся.

Сла́ва: Я́же Исто́чник безсме́ртия ро́ждши, уя́звленаго мя́ страстьми́, Отрокови́це, исцели́ и огня́ ве́чнаго исхити́, Еди́на Богоблагода́тная.

И ны́не: Я́же ве́рным прибе́жище, Присноде́во, держа́вная по́мощь притека́ющим Ти́, от вся́кия ну́жды и вре́да сопроти́внаго на́с спаси́.

Пе́снь 3

Ирмо́с: Утверди́ на́с в Тебе́, Го́споди, Дре́вом умерщвле́й гре́х, и стра́х Тво́й всади́ в сердца́ на́с пою́щих Тя́.

Злату́ю я́ко вои́стинну кади́льницу, и ста́мну ма́нны, и Боже́ственную го́ру, и пала́ту прекра́сну Бо́жию, Тя́, Де́во, имену́ем.

Це́рковь, и свяще́нное жили́ще Сло́ва су́щи, Богоро́дице, прегреше́ний очище́ние бу́ди мне́ при́сно, Пресвята́я Де́во.

Сла́ва: Ни язы́к зе́млен, ни у́м безпло́тных, возмо́жет Рождество́ Твое́ сказа́ти: па́че естества́ бо и смы́сла, Богоро́дице, Зижди́теля родила́ еси́.

И ны́не: Утвержде́ние бу́ди и прибе́жище и покро́в, Де́во Богороди́тельнице, ве́рою к Тебе́ прибега́ющим, и Бо́жию Тя́ Ма́терь испове́дающим.

Пе́снь 4

Ирмо́с: Услы́шах Го́споди, сла́вное Твое́ смотре́ние, и просла́вих, Человеколю́бче, непостижи́мую Твою́ си́лу.

Тя Богородице стяжахом христиане помощь велию, от лю́тых бе́д на́с исхити́.

Неискусобра́чная Влады́чице, Я́же Бо́га во утро́бе заче́нши, напа́стей и печа́лей все́х на́с изба́ви.

Сла́ва: Непобеди́мую сте́ну Тя́, и держа́вную наде́жду, Богоро́дице, ве́рнии стяжа́хом в напа́стех, Чи́стая.

И ны́не: Моли́тву Твою́, Влады́чице, я́ко тве́рд степе́нь стяжа́вше, разли́чных скорбе́й избавля́емся.

Пе́снь 5

Ирмо́с: Све́та Пода́телю, и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́ ино́го бо́га не зна́ем.

Воплоще́нна из Тебе́, Богороди́тельнице, ве́рнии позна́хом, без се́мене Сы́на Рожде́нна, Бо́га И́стинна, и Челове́ка естество́м: те́мже Тя́ сла́вим.

Под кро́в Тво́й и заступле́ние, Пречи́стая, ве́рнии всегда́ прибега́юще ве́рою, избавля́емся Тобо́ю, Богоро́дице, вся́каго тя́жкаго наше́ствия.

Сла́ва: Изба́ви на́с от напа́стей, и бу́ри помышле́ний, Пречи́стая, вся́каго гне́ва, вся́каго греха́, гла́да же и губи́тельства, и ве́чнаго, Де́во, муче́ния.

И ны́не: Засту́пница на́ша и спасе́ние и наде́жда, Влады́чице, христиа́н су́щи, спаси́ любо́вию Тя́ при́сно ве́рно воспева́ющих, Де́во Всепе́тая.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

И́же во́лею вся́ Содева́яй, в ложесна́ Неискусобра́чныя во́лею всели́вся, тле́ю боля́щия нетле́нием обогати́в, я́ко Милосе́рд.

Вы́шша Вы́шних Си́л, и святе́йша еси́, Всенепоро́чная, па́че естества́ вме́щши Невмести́мое Сло́во в ложесна́ Твоя́.

Сла́ва: На пути́ жития́ заблужде́ннаго мя́, и безпу́тием ча́сто па́дающа во гресе́х, Влады́чице, к покая́ния стезя́м наста́ви.

И ны́не: Не пре́зри, Чи́стая, мольбы́ на́ша, на Тя́ поло́жших наде́жду ра́б Твои́х: прибе́жище бо, Влады́чице, и душа́м очище́ние еси́.

Та́же, Го́споди поми́луй, три́жды. Сла́ва, и ны́не:

Седа́лен, гла́с 2:

Сло́во без се́мене зачала́ еси́, Сы́на же Еди́наго Христа́ родила́ еси́: Ты́ бо роди́ Но́во Отроча́ – Зижди́теля Твоего́. Те́м Тя́, Богоро́дице, велича́ем.

Пе́снь 7

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния; посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.

Отцу́ Соесте́ственна Разу́мнаго Сы́на, си́лою Ду́ха Пресвята́го воплоти́ла еси́, Богоблагода́тная Влады́чице. Сего́ у́бо непреста́нно моли́, уще́дрити пою́щия: Благослове́нная, Я́же Бо́га пло́тию ро́ждшая.

Де́во Чи́стая, Неискусобра́чная, Свята́я, Благослове́нная, па́дающих исправле́ние, согреша́ющих избавле́ние, спаси́ мя блу́днаго, спаси́, Сы́ну Твоему́ зову́ща: Благослове́нная, Я́же Бо́га пло́тию ро́ждшая.

Сла́ва: Приста́нище тве́рдо, Предста́тельница стра́шна, и стена́ необори́ма, в ну́ждах бе́дствующим, и обурева́емым в печа́ли, и я́же к Сы́ну Твоему́ моли́твами, Богоро́дице, су́щи, от многообра́зных искуше́ний спаси́ рабы́ Твоя́.

И ны́не: Я́же Еди́но упова́ние, и по́мощь ве́рных, Богороди́тельнице, потщи́ся помощи́ рабо́м Твои́м, погружа́емым скорбьми́, отвсю́ду недоуме́емым, и в боле́знех су́щим, и прибега́ющим к Тебе́ любо́вию души́.

Пе́снь 8

Ирмо́с: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте, дела́, я́ко Го́спода, и превозноси́те во вся́ ве́ки.

Живы́й су́щий Исто́чник, я́ко Во́ду Жи́зни ро́ждши, ду́шу мою́ иста́явшую греха́ пла́менем, Де́во Богоро́дице, ороси́, да Тя́ сла́влю во вся́ ве́ки.

Умерщвле́нных, и к пе́рсти сме́ртней и тле́нней сведе́нных, возста́вила еси́ еди́на, Нача́льника жи́зни ро́ждши Христа́ Бо́га на́шего, Влады́чице Де́во, Чи́стая и Благослове́нная.

Сла́ва: Изба́ви мя́, Влады́чице Чи́стая, ве́чнаго огня́ и осужде́ния, и изми́ мя от челове́к злотворя́щих, и и́щущих запя́ти мне́, я́ко да ублажа́ю Тя́ при́сно, Ю́же вся́ тва́рь боже́ственне ублажа́ет.

И ны́не: В подо́бии пло́ти Пребоже́ственный из Тебе́ ви́ден бы́сть, Чи́стая Де́во, Его́же непреста́нно моли́, поми́ловати на́с в зло́бе живу́щих, и трепе́щущих ве́чнующаго муче́ния.

Пе́снь 9

Ирмо́с: От Бо́га Бо́га Сло́ва, неизрече́нною му́дростию, прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии единому́дренно пе́сньми велича́ем.

Человеколю́бия Боже́ственнаго сподо́би мя́, Отрокови́це, Я́же еди́на Человеколю́бца Бо́га пло́ть от Тебе́ взаимова́вша, и неизглаго́ланно ро́ждшая, изба́ви мя́ бу́дущаго пла́мене, и му́ки вся́кия, любо́вию Тя́ сла́вящаго.

Я́ко кре́пкую Засту́пницу, я́ко наде́жду и сте́ну и основа́ние, и покро́в тве́рд, и непобеди́мо утвержде́ние, и небу́рно приста́нище, и единодержа́вное прибе́жище стяжа́вше Тя́ вси́ спаса́емся, Препе́тая.

Сла́ва: Светороди́тельнице Де́во, души́ моея́ о́блаки отжени́, и пода́й чи́сто узре́ти, Влады́чице, спаси́тельную Добро́ту, возсия́вшую неизглаго́ланно из Твоея́ Пресвяты́я утро́бы, во све́т язы́ков, Препе́тая.

И ны́не: Све́т ро́ждшая Боже́ственный, мно́гими страстьми́ наведе́ния помраче́нное се́рдце мое́, и по́мысл очужда́ющих, просвети́, Отрокови́це, ка́плю ми́ подаю́щи при́сно сле́з, скве́рны греха́ Де́во, очища́ющую ми́.

Та́же, Досто́йно е́сть: и покло́н. Трисвято́е по О́тче на́ш: тропа́рь, и про́чее обы́чное, и отпу́ст.

По 1-м стихосло́вии, седа́льны му́ченичны. Гла́с 2:

Тебе́ одева́ющаго не́бо о́блаки иму́ще святи́и одея́ние в ми́ре, му́ки от беззако́нник претерпе́ша, и пре́лесть и́дольскую упраздни́ша. Те́х моли́твами и на́с свободи́, Спа́се, от неви́димаго врага́, и спаси́ на́с.

Сти́х: Ди́вен Бо́г во святы́х Свои́х, Бо́г Изра́илев.

Апо́столи, му́ченицы и проро́цы, святи́телие, преподо́бнии и пра́веднии, до́бре по́двиг соверши́вшии, и ве́ру соблю́дшии, дерзнове́ние иму́ще ко Спа́су, о на́с Того́ я́ко Бла́га моли́те, спасти́ся, мо́лимся, душа́м на́шим.

Подо́бен: Милосе́рдия су́щи:

И́же ме́ртвыми и живы́ми я́ко Бо́г облада́яй все́ми, вла́стию, Животода́вче, приими́ моле́ние ра́б Твои́х: покажи́ Твое́ милосе́рдие, Человеколю́бче, и пода́ждь оставле́ние душа́м, я́же преста́вил еси́ наде́ждею в Тя́, благоутро́бия ра́ди я́ко Бла́г.

Сла́ва, и ны́не: Богоро́дичен: Вся́ па́че смы́сла, вся́ пресла́вная Твоя́, Богоро́дице, та́инства, чистоте́ запеча́танной и де́вству храни́му, Ма́ти позна́лася еси́ нело́жна, Бо́га ро́ждши И́стиннаго: Того́ моли́ спасти́ся душа́м на́шим.

По 2-м стихосло́вии седа́льны, гла́с 2.

И́же просвети́вый святы́я Твоя́ па́че зла́та, и просла́вивый преподо́бныя Твоя́ я́ко Бла́г, от ни́хже умоле́н быва́я, Христе́ Бо́же, жи́знь на́шу умири́, я́ко Человеколю́бец, и моли́тву испра́ви я́ко кади́ло, Еди́не во святы́х почива́яй.

Сти́х: Ди́вен Бо́г во святы́х Свои́х, Бо́г Изра́илев.

Страстоте́рпцы Госпо́дни, блаже́нна земля́ напи́вшаяся крове́й ва́ших, и свя́ти хра́мы прие́мшии телеса́ ва́ша: на суди́щи бо врага́ обличи́сте, и Христа́ со дерзнове́нием пропове́дасте. Того́ я́ко Бла́га моли́те спасти́, мо́лимся, ду́ши на́ша.

Сти́х: Блаже́ни, я́же избра́л и прия́л еси́ Го́споди.

Помяни́, Го́споди, я́ко Бла́г, ду́ши ра́б Твои́х, и ели́ка в житии́ согреши́ша, прости́, никто́же бо безгре́шен, то́кмо Ты́ моги́й и преста́вленным да́ти поко́й.

Сла́ва, и ны́не: Богоро́дичен: Богоро́дице Де́во Мари́е, ро́ждшая Христа́ Изба́вителя и Спа́са, моли́ся Того́ благосты́ни, со апо́столы и му́ченики, и проро́ки, с преподо́бными же и священному́ченики, очище́ние грехо́в дарова́ти на́м, и ве́лию ми́лость.

Кано́н святы́м му́чеником, святи́телем, преподо́бным и усо́пшим, [его́же краегране́сие: Рабо́м Бо́жиим бли́жним хвалу́ нося́.] Творе́ние Ио́сифово. Гла́с 2.

Пе́снь 1

Ирмо́с: Моисе́йскую пе́снь восприи́мши, возопи́й, душе́: Помо́щник и Покрови́тель бы́сть мне́ во спасе́ние, Се́й мо́й Бо́г, и просла́влю Его́.

Му́ченичен: Изгна́ния лю́тая, и уране́ния зе́льная, терпели́вно подъя́сте, страда́льцы, вся́кую пре́лесть от коне́ц си́лою Боже́ственною отгна́сте.

Святи́телем: Бо́жии служи́телие, и святи́телие, све́том мы́сленным облиста́юще я́ве, к све́ту благоче́стия наста́виша все́х благочести́вых исполне́ния.

Преподо́бным: Го́рдый у́м смири́вше, преподо́бнии, к до́брей земли́ преидо́сте: возне́сшеся же Боже́ственными о́бразы, и все́м смире́нным помога́ете при́сно.

Сла́ва: Поко́ин: Светле́йшаго све́та, и ве́чнаго весе́лия, яви́ прича́стники я́ко Бо́г, я́же преста́вил еси́ от привре́менных, рабы́ Твоя́ ве́рныя, Преблаги́й Бо́же на́ш.

Богоро́дичен: Поще́нием кре́пко подви́гшеся, и терпели́вно низложи́ша врага́ честны́я жены́, Тебе́ Богороди́тельнице предстоя́т ра́дующеся.

Други́й кано́н усо́пшим пое́тся на ряду́, иде́же не́сть Мине́и, [его́же краегране́сие: Уме́ршим второ́е соплета́ю пе́ние.] Гла́с 2.

Пе́снь 1

Ирмо́с: Непроходи́мое волня́щееся мо́ре, Бо́жиим Свои́м веле́нием изсуши́вшему, и пешеше́ствовати сквозе́ е́ Изра́ильтеския лю́ди наста́вльшему, Го́сподеви пои́м, сла́вно бо просла́вися.

Припе́в: Ди́вен Бо́г во святы́х Свои́х, Бо́г Изра́илев.

Сме́ртию Твое́ю попра́в сме́рть, Боже́ственныя жи́зни источи́л еси́ присносу́щие, е́же пода́ждь, Бла́же, душа́м усо́пших, му́ченик Твои́х мольба́ми, оставле́ние прегреше́ний да́руя.

Припе́в: Упоко́й, Го́споди, ду́ши усо́пших ра́б Твои́х.

И́же бога́тую ми́лость при́сно источа́я, благоче́стно при́сно прие́млющим Тя́, в дому́ Твое́м, Христе́, в ди́вней Твое́й Ски́нии, ме́сто ослабле́ния пода́ждь, Влады́ко, рабо́м Твои́м, я́ко Благоутро́бен.

Сла́ва: Крепча́йший на сме́рть бы́л еси́, Христе́: те́мже ту́ связа́в, на́с изба́вил еси́, и ны́не изба́ви от сея́ темни́цы усо́пшия, я́ко Бла́г, и Твоего́ сия́ния прича́стие да́руй.

И ны́не: Утве́рждши коле́блемый у́м мо́й, Ма́ти Бо́жия, укрепи́ Боже́ственными повеле́ньми, Ро́ждшагося из Твоего́ освяще́ннаго чре́ва, и упраздни́вшаго, Влады́чице, а́дово мра́чное ца́рство.

Пе́снь 3

Ирмо́с: Непло́дствовавший мо́й у́м, плодоно́сен, Бо́же, покажи́ ми́, Де́лателю до́брых, Насади́телю благи́х, благоутро́бием Твои́м.

Разже́гшеся огне́м любве́ Христо́вы, о страстоте́рпцы, му́к разжже́ния угаси́сте, ороше́нием Вседе́теля Ду́ха.

Святе́йшии Христо́вы святи́телие, и честни́и преподо́бных собо́ри, о все́х на́с Человеколю́бца Бо́га умоли́те.

Свяще́ннейший ли́к Боже́ственных проро́к возвели́чися, и же́н мно́жество пострада́вших кре́пко, сла́ву улучи́ша.

Сла́ва: Умертви́вся, Христе́, на Кресте́, дарова́л еси́ уме́ршим безсме́ртие: его́же улучи́ти сподо́би, к Тебе́ отше́дшия ве́рою.

И ны́не: Со все́ми проро́ки, и жена́ми свяще́нными, ны́не приле́жно Бо́га моли́, Де́во, Ро́ждшагося из Тебе́, уще́дрити на́с.

И́н

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́ бо ся ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Твоея́ красоты́ сия́нием озари́тися в ве́ре усо́пшим благоволи́, с му́ченики Твои́ми, И́же бога́тый в ми́лости: Ты́ бо еси́ Бо́г на́ш, и не́сть пра́веден па́че Тебе́, Го́споди.

На ме́сте прохлажде́ния, в не́дрех Авраа́мовых, избра́ннаго Твоего́, сподо́би водворя́тися рабо́м Твои́м, я́ко Ще́др, Тебе́ вопию́щим: Ты́ бо еси́ Бо́г на́ш, и не́сть пра́веден па́че Тебе́, Го́споди.

Сла́ва: В черто́зех Небе́сных водворя́тися, с му́дрыми де́вами совше́дшими, Влады́ко, приими́ рабы́ Твоя́ свещено́сцы, и́хже преста́вил еси́ Твое́ю во́лею от вре́менных, Еди́не Человеколю́бче.

И ны́не: Умерщвле́на мя́ и к земли́ возвраще́на воздви́гнула еси́, ро́ждши Жизнода́вца, и возвела́ еси́ мя из а́да преиспо́днейшаго, Богоро́дицу Тя́ ве́рою сла́вящаго, и почита́ющаго, Пречи́стая, Тебе́ Всепе́тую.

Пе́снь 4

Ирмо́с: Е́же от Де́вы Твое́ Рождество́ проро́к предзря́ возпропове́даше вопия́: слу́х Тво́й услы́шах, и убоя́хся, я́ко от ю́га, и из горы́ святы́я, приосене́нныя, прише́л еси́, Христе́.

И́же Христо́вым Страсте́м богосла́внии страстоте́рпцы уподо́бльшеся до́бре, распростира́еми ра́довахуся мно́гими му́ками, на ве́чная воздая́ния взира́юще: и́хже получи́вше ублажа́ются при́сно.

Зако́ны соблюда́юще Ду́ха, первосвяще́нницы, прему́дренно упасо́сте лю́ди, я́ко ко́рмчии преизря́днии на Боже́ственне приста́нищи, и преложи́вшеся от жите́йских мо́лв, к тишине́ преидо́сте живота́.

На земли́ прише́льцы яви́стеся, преложи́вше, отцы́, жи́знь ва́шу на Небеса́, я́коже пи́шет, благочестному́дренне, и плотски́я стра́сти обузда́вше боле́зньми воздержа́ния, си́лою Христо́вою.

И́хже преве́л еси́ Влады́ко, от вре́меннаго жития́ многочи́сленное мно́жество, в правосла́вней послужи́вшия тебе́, Сло́ве, ве́ре, все́х спаса́емых мно́жеством сочета́в, ве́чнаго сподо́би живота́.

Сла́ва: Ме́ртвости Боже́ственныя жела́юще, жи́знь безконе́чную хода́тайствующе вои́стинну, тобо́ю, Пречи́стая Влады́чице Богороди́тельнице, честны́я жены́ сподо́бишася тоя́, моля́ще Сы́на Твоего́ и Бо́га о на́с.

Богоро́дичен: Го́ру присе́нную зри́т Тя́ доброде́тельми, проро́к Авваку́м, Богоро́дице, из нея́же яви́ся Бо́г неизрече́нно, доброде́телию покры́в небеса́, и ро́д челове́ческий из истле́ния спасы́й.

И́н

Ирмо́с: Пою́ Тя, слу́хом бо, Го́споди, услы́шах и ужасо́хся, до мене́ бо и́деши, мене́ ища́ заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Упова́нием и любо́вию пожи́вшия, и умо́м правосла́вным, я́же па́че ума́ сла́вы Твоея́ сподо́би рабы́ Твоя́, Христе́, мно́гим Твои́м человеколю́бием, и избра́нных му́ченик мольба́ми.

Я́ко имы́й сла́дости приснотеку́щий пото́к, при́сно напоя́еши избра́нныя, Го́споди: с ни́миже и ны́не преста́вленныя, Христе́, к Тебе́, неизрече́нным Твои́м милосе́рдием пита́еши при вода́х оставле́ния.

Сла́ва: Ты́ живы́ми госпо́дьствуеши, Влады́ко, и ме́ртвыми владе́еши. Ты́ в земли́ пе́рсть су́щую си́лою Твое́ю воскреси́ши. Те́мже к Тебе́ преше́дшия во дво́рех Твои́х, Спа́се, всели́.

И ны́не: Исцели́ла еси́ Е́вино сокруше́ние, и дре́внее окая́нство: Зижди́теля бо родила́ еси́, могу́щаго испра́вити на́с прегреше́ньми пове́рженых, Богороди́тельнице Еди́на Ма́ти Де́во.

Пе́снь 5

Ирмо́с: Мглу́ души́ моея́, Спа́се мо́й, разгна́в, све́том за́поведей Твои́х озари́ мя, я́ко еди́н Ца́рь Ми́ра.

Тебе́ возлюби́вше, Ще́дре, возненави́деша вся́ мирска́я, до́блии страстоте́рпцы, примеси́вшеся му́кам, отверже́нием пло́ти.

Святи́телие, проро́цы, преподо́бнии богоно́сцы, духо́вными луча́ми просвеща́ете ми́р, тьму́ разоря́юще страсте́й.

Преподо́бнии отцы́, проро́цы и первосвяще́нницы, и присносла́вныя жены́, о на́с Тебе́ Влады́це все́х мо́лятся приле́жно.

Сла́ва: Мо́лим Тя́, Сло́ве, и́хже от на́с прия́л еси́, ли́ку избра́нных Твои́х сопричта́в, прича́стники покажи́ лу́чшаго живота́.

И ны́не: Пречи́стая Де́во Ма́ти, похвало́ му́чеников, и преподо́бных и пра́ведных, от вся́каго изми́ на́с мучи́тельства лука́ваго.

И́н

Ирмо́с: Све́та Пода́телю, и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́ ино́го бо́га не зна́ем.

Умерщвле́ных на́с, и положе́ных во тли́, возве́л еси́ от мра́чных а́довых сокро́вищ, и восхи́тил еси́, Бла́же, и сочета́в святы́х а́нгел во́инством.

За е́же спасти́ на́с я́ко прише́л еси́, Христе́, приими́ ны́не и́же благоче́стно к Тебе́ преста́вленныя, я́ко еди́н Бла́г, на ло́нех Авраа́ма, и с Ла́зарем те́х всели́.

Сла́ва: Разреши́л еси́, Влады́ко, ле́тную мою́ и до́лгую бра́нь, Тебе́ пре́жде Хода́таю, и Моли́твеннику примире́ния бы́вшу, и ны́не Твоя́ рабы́ уще́дрив упоко́й.

И ны́не: Под кро́вом Твои́м, Ма́ти Бо́жия, и́же наде́ющиися на Тя́ спаса́ются: Жизнода́вца бо родила́ еси́ на́м, животворя́щаго вся́ во́лею.

Пе́снь 6

Ирмо́с: Во глубине́ грехо́вней содержи́мь е́смь, Спа́се, и в пучи́не жите́йстей обурева́емь: но я́коже Ио́ну от зве́ря, и мене́ от страсте́й возведи́, и спаси́ мя.

Кре́постию се́рдца страда́льцы проти́ву врагу́ ополчи́вшеся, того́ низложи́ша, и прия́ша побе́ды венцы́ от Бо́га: и ны́не приле́жно мо́лятся о все́х земноро́дных.

Бо́жия святи́тели почти́м ве́рно, и преподо́бныя Его́ ублажи́м, спаса́еми мольба́ми и́х, от вся́каго гне́ва и ско́рби, и вра́жия наве́та.

Пострада́ же́н Боже́ственный ли́к, и в посте́ Бо́гу угоди́, и получи́ Ца́рство Небе́сное: те́х моли́твами уще́дри, Бо́же, тво́й ми́р.

Сла́ва: И́же созда́вый, Жизнода́вче Христе́, челове́ка от земли́, и́хже о на́с преста́вил еси́ упоко́й, оставле́ние подая́ и́м злы́х, я́ко Милосе́рд и Человеколю́бец.

И ны́не: Свята́я Богоро́дице, освяти́ на́ша помышле́ния, и у́м укрепи́, и спаси́ на́с от стре́л лука́ваго неуя́звленных, сла́вящих, Всепе́тая, Твоя́ вели́чия.

И́н

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Неизрече́нныя, и Боже́ственныя све́тлости, иде́же му́ченичестии ли́цы, сподо́би, я́же от земли́ преста́вил еси́, вседе́тельною Твое́ю во́лею, Человеколю́бче.

Сла́ва: Озари́тися добро́тою сла́вы Твоея́ сподо́би, оста́вльшия житие́, и к све́ту Твоему́ неизрече́нному, Влады́ко, преше́дшия упоко́й.

И ны́не: Избавля́ющи усе́рдно яви́ся призыва́ющия Тя́, Пречи́стая Влады́чице, Я́же Бо́га ро́ждшая живото́м и сме́ртию облада́юща.

Пе́снь 7

Ирмо́с: Херуви́мы подража́юще о́троцы в пещи́, ликовствова́ху вопию́ще: благослове́н еси́, Бо́же, я́ко и́стиною и судо́м наве́л еси́ сия́ вся́ гре́х ра́ди на́ших: препе́тый, и препросла́вленный во вся́ ве́ки.

Терпе́нием низложи́ша святи́и врага́, терпя́ще вся́ко искуше́ние лю́тых муче́ний, я́ко вои́стинну Бо́га возлюби́ша пострада́вшаго за грехи́ на́ша. Те́х моли́твами спаси́ все́х на́с, Сло́ве, от напа́стей и бе́д, Тебе́ сла́вящих.

Светозра́чнии святи́телие, и преподо́бнии и проро́цы и священному́ченик достосла́вное мно́жество, и же́н святы́х свяще́нное сосло́вие, во страда́нии и в посте́ возсия́вшее му́жески: при́сно о на́с моле́ния твори́те к Бо́гу, я́ко да поми́лует на́с.

Му́ченик мно́жество мо́лит Тя́, Христе́ Благода́телю, от все́х печа́лей, и скорбе́й, и лю́тых напа́стей, и все́х прегреше́ний, и от вре́да спаси́ мя, Сло́ве, поги́бшаго.

Сла́ва: Отню́дуже боле́знь отбеже́, и воздыха́ние и печа́ль, иде́же све́т сия́ет Твоего́ лица́, Христе́, и иде́же святы́х собо́ры ны́не лику́ют, учини́ все́х преста́вльшихся ду́ши к Тебе́, Человеколю́бче, прегреше́ния и́х вся́ презре́в, я́ко Еди́н Ми́лостив.

И ны́не: С му́ченики, Пречи́стая, и с преподо́бными отцы́ и проро́ки все́ми, со святы́ми жена́ми во святы́х Еди́наго Почива́ющаго умоли́, все́х освяти́ти на́с, святы́ми гла́сы Тя́ славосло́вящих, Чи́стая, во вся́ ве́ки.

И́н

Ирмо́с: Богопроти́вное веле́ние беззако́ннующаго мучи́теля, высо́к пла́мень вознесло́ е́сть; Христо́с же простре́ Богочести́вым отроко́м ро́су духо́вную, Сы́й благослове́н и препросла́влен.

И́же везде́ сы́й, низше́л еси́, Го́споди, е́же спасти́ и́же дре́вле прельща́емый челове́ч ро́д. Те́мже Тя́ му́ченицы мо́лят: си́х я́же преста́вил еси́ от земли́, в земли́ кро́тких, Спа́се, упоко́й.

Ме́ртвости умерщвле́ние оттря́сл еси́ в ме́ртвых свобо́дь бы́в, Са́м еди́н Христе́: и ны́не умерщвле́ния грехо́внаго, Влады́ко, изба́ви рабы́ Твоя́, явля́я и́х насле́дники Ца́рствия Твоего́.

Сла́ва: Мно́гим Твои́м и неизрече́нным милосе́рдием, и неизме́рною бе́здною человеколю́бия Твоего́, Христе́, прегреше́ний у́бо оставле́ние преста́вленным да́ждь, и благода́тию Твое́ю очище́ны си́х яви́.

И ны́не: Свети́льник была́ еси́ Боже́ственныя сла́вы, сия́ние нося́щи Де́во ду́хом, и пло́тию на́м Я́вльшагося, и а́дову мглу́ све́тлостию Божества́ Своего́ потре́бльша, Богора́дованная.

Пе́снь 8

Ирмо́с: В купине́ Моисе́ю Де́вы чу́до, на Сина́йстей горе́ Прообрази́вшаго иногда́, по́йте, благослови́те, и превозноси́те во вся́ ве́ки.

Тече́ние кро́ве ва́шея, страстоте́рпцы Госпо́дни, освяти́ всю́ тва́рь, и изсуши́ я́ве излия́ние пре́лести, и ве́рных ду́ши напои́ бога́тно.

Яви́ся ли́к по́стнический, святи́телей же собо́р и же́н святы́х, и проро́к сла́вных, единоче́стен а́нгелом, а́нгельски на земли́ ду́хом пожи́вше.

Изба́вите все́х на́с, страстоно́сцы Госпо́дни, первосвяще́нницы, и проро́цы, и преподо́бных мно́жество, и же́н святы́х, от стре́л вра́жиих, ва́с восхваля́ющих.

Сла́ва: И́хже от на́с, Спа́се, прия́л еси́, в не́дрех Авраа́мовых учини́, и со все́ми избра́нными упоко́й, подая́ грехо́в и́х все́м разреше́ние, я́ко Всеще́др.

И ны́не: Богороди́тельнице Чи́стая, со все́ми святы́ми проро́ки, и му́ченики, и преподо́бными, и святы́ми жена́ми, и священному́ченики, уще́дрити на́с Спа́са моли́.

И́н

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.

Показа́л еси́ на́м враго́в сме́рть, схожде́нием Твои́м я́ко Безсме́ртен: Боже́ственною же си́лою Твое́ю, вхо́ды яви́л еси́ живота́, Безсме́ртне, его́же му́ченицы Твои́ ны́не досто́йно получи́ша.

Добро́ты у́мныя Твоея́ наслади́тися преста́вленным сподо́би, сту́д греха́ злообра́знаго очища́я, я́ко Человеколю́бец: еди́н бо ты́, Влады́ко, яви́лся еси́ греха́ отчужде́н.

Сла́ва: Испра́вил еси́ на́с, Христе́, па́дшия в пе́рсть сме́ртную, сме́ртию Твое́ю живо́т да́руя, и пи́щу безконе́чную, и ра́дость присносу́щную, ея́же ны́не преста́вленныя сподо́би, я́ко Ми́лостив.

И ны́не: Ве́лия и стра́шна е́сть та́йна, Богома́ти, Твоего́ Рождества́: Бо́га бо родила́ еси́, Его́же сме́рть не претерпе́, и гро́б не растли́. Те́мже Тя́, Пречи́стая, вси́ язы́цы сла́вим.

Пе́снь 9

Ирмо́с: Преесте́ственно пло́тию заче́ншую во чре́ве, от Отца́ безле́тно предвозсия́вшее Сло́во, в пе́снех немо́лчных велича́ем ве́рнии.

Кре́пцы на стра́сти, си́льни на враги́ я́вльшеся, страстоте́рпцы: взя́сте побе́ду пострада́вше зако́нно, и венча́стеся от Бо́га.

Я́ко Бо́жии священноде́лателие, и Па́стыря До́браго подо́бницы бы́вше, упасо́сте Того́ о́вцы преподо́бне, первосвяще́нницы богосла́внии.

С преподо́бными, по́стники, и проро́ки свяще́нными, почти́м же́н пострада́вших мно́жество и посто́м низложи́вших врага́.

Сла́ва: Пресла́вное мно́жество святы́х Твои́х, Христе́, непреста́нно мо́лят Тя́: и́хже преста́вил еси́ в ве́ре, Го́споди, прича́стники яви́ ве́чнаго живота́.

И ны́не: Щедролюби́ваго Бо́га ро́ждшая пло́тию, со святы́ми все́ми моли́ Того́ при́сно, от бе́д на́с спасти́, Ма́ти Де́во Чи́стая.

И́н

Ирмо́с: Я́же пре́жде со́лнца Свети́льника Бо́га возсия́вшаго, пло́тски к на́м прише́дшаго, из боку́ деви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́ем.

Име́яй вла́сть живы́ми и ме́ртвыми, живота́ Нача́льниче, от земли́ к Тебе́ преше́дшим, насле́дие Небе́сное пода́ждь, Влады́ко, и све́тлость святы́х, и пресла́вных страстоте́рпец Твои́х.

Сло́во сы́й, е́же дре́вле бы́ти ми́ подая́ живонача́льнейшее, и е́же до́бре бы́ти па́ки да́руя, в не́дрех жела́нных Авраа́ма пра́отца, преста́вльшияся рабы́ Твоя́, я́ко Ми́лостив всели́.

Сла́ва: Ве́сь еси́, Спа́се мо́й, Сла́дость светови́днейшая, ве́сь еси́ Жела́ние ненасыща́емое: пото́ки Твоея́ пи́щи, и водо́ю оставле́ния усо́пшия напо́й, непреста́нно Тебе́ сла́вящия.

И ны́не: Тя́, Богоро́дице, досто́йно ве́рнии ны́не ублажа́ем, богодохнове́нным словесе́м Твои́м после́дующе: Ты́ бо еди́на земны́м Бо́га родила́ еси́, сме́рти разо́ршаго си́лу, Ма́ти Де́во.

Та́же, Досто́йно е́сть: Ектения́, и свети́лен дне́ и псалмы́ обы́чны.

На хвали́тех стихи́ры му́ченичны, гла́с 2:

По Христе́ пострада́вше да́же до сме́рти, о страстоте́рпцы му́ченицы, ду́ши у́бо и́мате на Небесе́х в руце́ Бо́жией, и по ми́ру всему́ почита́еми су́ть мо́щи ва́ша. Святи́телие покланя́ются, и лю́дие вси́, ра́дующеся, согла́сно вопие́м: со́н че́стен пред Го́сподем – сме́рть преподо́бных Его́.

Вся́к гра́д и страна́ чту́т мо́щи ва́ша, о страстоно́сцы му́ченицы: вы́ бо зако́нно пострада́вше, венцы́ Небе́сныя прия́сте, и сего́ ра́ди святи́телем есте́ похвала́ и це́рквам благоле́пие.

Кре́ст Христо́в взе́мше, святи́и му́ченицы, ору́жие непобеди́мое, всю́ диа́волю си́лу упраздни́ша, и прия́ша венцы́ Небе́сныя, стена́ на́м бы́ша, о на́с при́сно моля́щеся.

Ме́ртвен: Увы́ мне́, коли́к по́двиг и́мать душа́ разлуча́ющися от телесе́! Увы́ мне́, тогда́ коли́ко слези́т, и не́сть и́же поми́лует ю́! Ко а́нгелом о́чи возводя́щи, безде́льно мо́лится; к челове́ком ру́це простира́ющи, и не и́мать помога́ющаго. Те́мже возлю́бленная моя́ бра́тие, разуме́вше кра́ткую на́шу жи́знь, преста́вленым поко́я от Христа́ про́сим, и душа́м на́шим ве́лия ми́лости.

Сла́ва, и ны́не: Богоро́дичен: Прииди́те, Ма́терь Све́та пе́сньми немо́лчными вси́ просла́вим, Та́ бо роди́ Спасе́ние на́ше: и ра́дуйся принесе́м, я́ко Еди́ной ро́ждшей все́х Нача́льнейшаго, И́же пре́жде ве́к Бо́га. Ра́дуйся, я́же Е́ву падшую па́ки назда́вшая, ра́дуйся, Пречи́стая Де́во Неискусобра́чная.

На стихо́вне стихи́ры поко́йны, гла́с 2:

Подо́бен: Егда́ от Дре́ва Тя́:

Стремле́ние сме́ртное и тлю́ Твое́ю живоно́сною сме́ртию низложи́л еси́, Влады́ко: все́м же источи́л еси́ живо́т ве́чный, и земны́м уме́ршим воста́ние дарова́. Те́мже мо́лимся Тебе́, Спа́се: и́же ве́рою к Тебе́ преста́вльшияся упоко́й, и нетле́нней Твое́й сла́ве си́х сподо́би, Человеколю́бче.

Сти́х: Блаже́ни, я́же избра́л и прия́л еси́, Го́споди.

Да челове́ки о́бщники Боже́ственнаго твоего́ Ца́рствия соде́лаеши, Христе́, распя́тие претерпе́л еси́, и сме́рть во́льную прия́т. Сего́ ра́ди мо́лимся: Твои́м милосе́рдием прича́стники яви́ Ца́рствия Твоего́, ве́рою к Тебе́ преста́вльшияся, и сла́дкия добро́ты Твоея́ си́х сподо́би, Человеколю́бче.

Сти́х: Ду́ши и́х во благи́х водворя́тся.

Спасти́ Твое́ созда́ние восхоте́в, смотре́ния же вои́стинну стра́шное та́инство, ра́дуяся соверши́л еси́ я́ко Преблаги́й, и цено́ю искупи́л еси́ ве́сь ми́р честно́ю Твое́ю Кро́вию. Те́мже мо́лимся: и́же ве́рою к Тебе́ преста́вльшияся, со все́ми святы́ми избавле́ния сподо́би.

Сти́х: И па́мять и́х в ро́д и ро́д.

Гро́зному, тре́петному, и стра́шному престо́лу Твоему́, Христе́, предстоя́ще, я́же от ве́ка уме́ршии ожида́ют пра́веднаго изрече́ния Твоего́, и Боже́ственное прие́млют правосу́дие. Тогда́ у́бо упоко́й, Спа́се, рабы́ Твоя́, ве́рою к тебе́ преста́вльшияся, иде́же святы́х ли́цы, и ра́дость е́сть неизглаго́ланная.

Сла́ва, и ны́не: Богоро́дичен: Егда́ плотска́го соу́за хо́щет душа́ моя́ от жития́ разлучи́тися, тогда́ ми́ предста́ни, Влады́чице, и безпло́тных враго́в сове́ты разори́, и си́х че́люсти сокруши́, и́щущих пожре́ти мя́ неща́дно, я́ко да невозбра́нно пройду́ на возду́се стоя́щия кня́зи тьмы́, Богоневе́стная.

Та́же, Бла́го е́сть испове́датися Го́сподеви: И прочее, и ча́с 1-й, и отпу́ст.

Гла́с Ти́ прино́сим разбо́йнич, и мо́лимся: помяни́ на́с, Го́споди, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Христо́вым страсте́м уподо́бльшеся, му́ченицы, стра́сти челове́ческия разли́чныя при́сно исцеля́ете.

Сти́х: Блаже́ни есте́, егда́ поно́сят ва́м: и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Со проро́ки, апо́столы, со преподо́бными учи́тели, Соде́телю все́х до́бре угоди́ша.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Со все́ми святы́ми Твои́ми, я́ко Человеколю́бец, Го́споди, вся́ и́же ве́рою преста́вльшияся, учини́ рабы́ Твоя́, мо́лимся.

Сла́ва: О Тро́ице Пресу́щная, чту́щих Тя́ уще́дри, от пре́лести вра́жия и се́тей, все́х избавля́ющи при́сно.

И ны́не: Мольбы́ ра́б Твои́х не пре́зри, Всенепоро́чная, спаса́ющи на́с от вся́ких бе́д и скорбе́й.

Коне́ц второ́му гла́су.