Источник

Преходящие празднования

Святых отец Седьмого Вселенского собора (787) (в неделю ближайшую к 11-му октября)

Тропарь, глас 8

Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый/ и те́ми ко и́стинней ве́ре вся ны наста́вивый,/ Многоблагоутро́бне сла́ва Тебе́.

Тропарь, глас 8 (из иной службы святых отец Седьмого Вселенского Собора)

Пречи́стому о́бразу Твоему́ покланя́емся, Благи́й,/ прося́ще проще́ния прегреше́ний наши́х, Христе́ Бо́же:/ во́лею бо благоволи́л е́си пло́тию взы́ти на Крест,/да изба́виши, я́же созда́л еси́ от рабо́ты вра́жия./ Тем благода́рственно вопие́м Ти:/ ра́дости испо́лнил еси́ вся, Спа́се наш,/ прише́дый спасти́ мир.

Кондак, глас 6

И́же из Отца́ возсия́в, Сын неизрече́нно/ из Жены́ роди́ся сугу́б естество́м,/ Его́же ви́дяще, не отмета́емся зра́ка изображе́ния,/ но, сие́ благоче́стно начерта́юще,/ почита́ем ве́рно./ И сего́ ра́ди и́стинную ве́ру Це́рковь держа́щи,/ лобыза́ет ико́ну вочелове́чения Христо́ва.

Собор всех святых Безсребреников (В неделю 1-го ноября или близ 1-го)

Тропарь, глас 8

Святи́и безсре́бреницы и чудотво́рцы,/ посети́те не́мощи на́ша:/ ту́не* прия́сте, ту́не дади́те нам.

Кондак, глас 2

Благода́ть прии́мше исцеле́ний,/ простира́ете здра́вие су́щим в ну́ждах,/ вра́чеве, чудотво́рцы пресла́внии;/ но ва́шим посеще́нием ра́тников де́рзости низложи́те,/ мир исцеля́юще чудесы́.

Величание

Велича́ем вас,/ чудотво́рцы сла́внии (имена),/ и чти́м честна́я страда́ния ва́ша,/ я́же за Христа́/ претерпе́ли есте́.

Ино величание

Велича́ем вас,/ чудотво́рцы сла́внии (имена),/ и чтим святу́ю па́мять ва́шу,/ наста́вницы заблу́ждшим, исцели́тели боля́щим/ и собесе́дницы а́нгелом.

Святых праотец (В неделю с 11-го по 17 декабря)

Тропарь, глас 2

Ве́рою пра́отцы оправда́л еси́,/ от язы́к те́ми предобручи́вый Це́рковь:/ хва́лятся в сла́ве святи́и,/ я́ко от Се́мене их есть Плод благосла́вен,/ без Се́мене Ро́ждшая Тя./ Тех моли́твами, Христе́ Бо́же, поми́луй нас.

Кондак, глас 6

Рукопи́саннаго о́браза не поче́тше,/ но Неопи́санным Существо́м защити́вшеся, треблаже́ннии,/ в по́двизе огня́ просла́вистеся,/ среде́ же пла́мене нестерпи́маго стоя́ще, Бо́га призва́сте:/ ускори́, о Ще́дрый, и потщи́ся, я́ко Ми́лостив, в по́мощь на́шу,/ я́ко мо́жеши хотя́й.

Святых отец (Неделя пред Рождеством Христовым)

Тропарь, глас 2

Ве́лия ве́ры исправле́ния,/ во исто́чнице пла́мене, я́ко на воде́ упокое́ния,/ святи́и трие́, о́троцы ра́довахуся,/ и проро́к Дании́л львом па́стырь, я́ко овца́м, явля́шеся./ Тех моли́твами, Христе́ Бо́же, спаси́ ду́ши на́ша.

Аще вне 20-го числа, Кондак отцев, глас 6

Рукопи́саннаго о́браза не поче́тше,/ но Неопи́санным Существо́м защити́вшеся, треблаже́ннии,/ в по́двизе огня́ просла́вистеся;/ среде́ же пла́мене нестерпи́маго стоя́ще, Бо́га призва́сте:/ ускори́, о Ще́дрый,/ и потщи́ся, я́ко Ми́лостив, в по́мощь на́шу,/ я́ко мо́жеши хотя́й.

Аще же внутрь предпразднства, Кондак, глас 1

Весели́ся, Вифлее́ме, Евфра́фо, гото́вися:/ се бо Агница, Па́стыря вели́каго во утро́бе нося́щи,/ е́же роди́ти тщи́тся,/ Его́же зря́ще, Богоно́снии отцы́ веселя́тся,/ с па́стырьми пою́ще Де́ву доя́щую.

Праведных Иосифа Обручника, Давида царя и Иакова, брата Господня по плоти (Неделя по Рождестве Христове)

Тропарь, глас 2

Благовеству́й, Ио́сифе, Дави́ду чудеса́, Богоотцу́:/ Де́ву ви́дел еси́ ро́ждшую,/ с па́стыри славосло́вил еси́,/ с волхвы́ поклони́лся еси́,/ а́нгелом весть прие́м./ Моли́ Христа́ Бо́га спасти́ ду́ши на́ша.

Кондак, глас 3

Весе́лия днесь Дави́д исполня́ется Боже́ственный,/ Ио́сиф же хвале́ние со Иа́ковым прино́сит:/ вене́ц бо сро́дством Христо́вым прие́мше, ра́дуются,/ и неизрече́нно на земли́ Ро́ждшагося воспева́ют, и вопию́т:/ Ще́дре, спаса́й Тебе́ чту́щия.

Собор новомучеников и исповедников Российских (В неделю после 25 января)

Тропарь, глас 4

Днесь ра́достно лику́ет Це́рковь Ру́сская,/ я́ко ма́ти ча́да, прославля́ющи новому́ченики и испове́дники своя́:/ святи́тели и иере́и,/ ца́рственныя страстоте́рпцы, благове́рныя кня́зи и княги́ни,/ преподо́бныя мужи́ и же́ны и вся правосла́вныя Христиа́ны,/ во дни гоне́ния безбо́жнаго/ жизнь свою́ за ве́ру во Христа́ положи́вшия/ и кровьми́ и́стину соблю́дший./ Тех предста́тельством, Долготерпели́ве Го́споди,/ страну́ на́шу в Правосла́вии сохрани́ до сконча́ния века.

Или сей:

Цвети́ Росси́йскаго лу́га духо́внаго/ в годи́ну лю́тых гоне́ний ди́вно процве́тший/ новому́ченицы и испове́дницы безчи́сленнии:/ святи́телие и па́стырие,/ мона́си и мирсти́и, му́жие, же́ны же и де́ти,/ до́брый плод в терпе́нии Христу́ прине́сшии,/ моли́теся Ему́, я́ко насади́телю ва́шему,/да изба́вит лю́ди Своя́ от безбо́жных и злых,/ да утвержда́ется же Це́рковь Ру́сская/ кровьми́ и страда́нии ва́шими/ во спасе́ние душ на́ших.

Кондак, глас 3

Днесь новому́ченицы Росси́йстии/ в ри́зах бе́лых предстоя́т А́гнцу Бо́жию/ и со а́нгелы песнь побе́дную воспева́ют Бо́гу:/ благослове́ние, и сла́ва, и прему́дрость,/ и хвала́, и че́сть, и си́ла, и кре́пость/ на́шему Бо́гу во ве́ки ве́ков. Ами́нь.

Ин кондак, глас 2

Но́вии страстоте́рпцы Росси́йстии,/ испове́днически по́прище зе́мное прете́кшии,/ страда́ньми дерзнове́ние прии́мшии,/ моли́теся Христу́, вас укрепи́вшему,/ да и мы, егда́ найде́т на ны испыта́ния час,/ му́жества дар Бо́жий восприи́мем./ О́браз бо есте́ лобыза́ющим по́двиг ваш,/ я́ко ни скорбь, ни теснота́, ни сме́рть/ от любве́ Бо́жия разлучи́ти вас не возмого́ша.

Величание

Велича́ем вас,/ святи́и новому́ченицы и испове́дницы Росси́йстии,/ и чтим честна́я страда́ния ва́ша,/ я́же за Христа́/ претерпе́ли есте́.

Преподобного Шио (Симеона) Мгвимского, Иверского (один из основателей грузинского монашества) (VI) (В четверток сырной седмицы)

Тропарь, глас 8

В тебе́, о́тче, изве́стно спасе́ся е́же по о́бразу,/ прии́м бо крест, после́довал еси́ Христу́,/ и, де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со а́нгелы сра́дуется, преподо́бне Ши́о, дух твой.

Кондак, глас 4

Житие́ твое́ служе́нием Госпо́дним испра́вил еси́/ и, взем крест, оста́вил еси́ вся жите́йская,/ красото́ пусты́ни, преподо́бне Ши́о./ Кого́ у́бо па́че тя, и по сме́рти жи́ва су́ща/ страна́ И́верская почита́ет/ и мощми́ твои́ми, от гро́ба явле́нными услажда́ется,/ те́мже не преста́й моля́ся о нас ко Го́споду.

Величание

Ублажа́ем тя,/ преподо́бне о́тче Ши́о,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Торжество православия (В неделю 1-ю Великого поста)

Тропарь Недели Торжества Православия, глас 2

Пречи́стому Твоему́ о́бразу покланя́емся, Благи́й,/ прося́ще проще́ния прегреше́ний на́ших, Христе́ Бо́же:/ во́лею бо благоволи́л еси́ пло́тию взы́ти на Крест,/ да изба́виши я́же созда́л еси́ от рабо́ты вра́жия./ Тем благода́рственно вопие́м Ти:/ ра́дости испо́лнил еси́ вся, Спа́се наш,/ прише́дый спасти́ мир.

Кондак, глас тойже

Неопи́санное Сло́во О́тчее,/ из Тебе, Богоро́дице, описа́ся воплоща́емь:/ и оскверни́вшийся о́браз в дре́внее вообрази́в,/ Боже́ственною добро́тою смеси́./ Но испове́дающе спасе́ние,/ де́лом и сло́вом си́е вообража́ем.

Собор преподобных отец Киево-Печерских и всех святых, в Малой России просиявших (Во 2-ю неделю Великого поста)

Тропарь, глас 2

Егда́ снидо́сте во гро́бы/ и саме́х себе́ заключи́сте,/ тогда́, стра́сти умертви́вше плотски́я,/ спогребо́стеся Христу́, Богоно́снии,/ и диа́вольския в подзе́мных разруши́сте огра́ды,/ сего́ ра́ди а́нгели венцы́ с Небе́с вам подаю́т.

Кондак, глас 8

Отцы́ всечестни́и, ли́че Богокра́сный,/ чуде́с мно́гих исто́чницы, ми́ро источа́ющий,/ сокро́вища краснобога́тная Госпо́дня, в земли́ сокрове́нная,/ не преста́йте, мо́лим вы, о нас моли́тися ко Го́споду, да зове́м вам:/ ра́дуйтеся, всему́ ми́ру свети́льницы.

Похвала Пресвятой Богородицы (Суббота Акафиста)

Тропарь Божией Матери, глас 8

Повеле́нное та́йно прие́м в ра́зуме,/ в кро́ве Ио́сифове, тща́нием предста́ безпло́тный,/ глаго́ля Неискусобра́чней:/ Приклони́вый схожде́нием Небеса́/ вмеща́ется неизме́нно весь в Тя,/ Его́же и ви́дя в ложесна́х Твои́х, прие́мша ра́бий зрак,/ ужаса́юся зва́ти Тебе́:/ ра́дуйся, Неве́сто Неневе́стная.

Кондак, глас тойже

Взбра́нной Воево́де победи́тельная,/ я́ко изба́вльшеся от злых,/ благода́рственная воспису́ем Ти, раби́ Твои́, Богоро́дице,/ но я́ко иму́щая держа́ву непобеди́мую,/ от вся́ких нас бед свободи́, да зове́м Ти:/ ра́дуйся, Неве́сто Неневе́стная.

Величание

Досто́йно есть велича́ти Тя,/ Богоро́дице,/ честне́йшую Херуви́м/ и сла́внейшую без сравне́ния Серафи́м.

Воскрешение праведного Лазаря (В Лазареву субботу)

Тропарь, глас 1

Общее воскресе́ние пре́жде Твоея́ Стра́сти уверя́я,/ из ме́ртвых воздви́гл еси́ Ла́заря, Христе́ Бо́же./ Те́мже и мы, я́ко о́троцы, побе́ды зна́мения нося́ще,/ Тебе́, Победи́телю сме́рти, вопие́м:/ оса́нна в вы́шних,/ благослове́н Гряды́й во и́мя Госпо́дне.

Кондак, глас 2

Всех Ра́дость Христо́с,/ И́стина, Свет, Живо́т/ и ми́ра Воскресе́ние,/ су́щим на земли́ яви́ся Свое́ю бла́гостию/ и бысть о́браз Воскресе́ния,/ всем подая́ Боже́ственное оставле́ние.

Празднество Пресвятой Владычице нашей Богородице и Приснодеве Марии ради иконы Ее, именуемой «Живоносный Источник» (V). (В пяток Светлой седмицы)

Тропарь, глас 4

Почерпе́м, челове́цы, цельбы́ душа́м и те́лом моли́твою,/ Река́ бо всем предтече́т – Пречи́стая Цари́ца Богоро́дица,/ источа́ющи нам чу́дную во́ду/ и измыва́ющи серде́ц че́рности*,/ грехо́вныя стру́пы очища́ющи,/ ду́ши же освяща́ющи ве́рных/ Боже́ственною благода́тию.

Ин тропарь, глас тойже

Днесь притеце́м, ве́рнии,/ к Боже́ственному и цельбоно́сному о́бразу Пресвяты́я Богоро́дицы,/ излия́вшия ка́пли Свои́х излия́ний,/ и лю́дем ве́рным чудесе́ показа́вший,/ я́же мы ви́дяще и слы́шаще/ духо́вно пра́зднуем и любе́зно вопие́м:/ исцели́ на́ши неду́ги и стра́сти,/ я́коже и карки́нския* и тмочи́сленныя стра́сти исцели́ла еси;/ те́мже мо́лим Тя, Де́во Пречи́стая,/ моли́ воплоще́ннаго из Тебе́ Христа́ Бо́га на́шего,/ спасти́ся душа́м на́шим.

Ин тропарь, глас 2

Исто́чник еси́ вои́стинну/ воды́ живы́я, Влады́чице,/ неду́ги бо душ и теле́с лю́тыя/ прикоснове́нием еди́ным Твои́м измыва́еши,/ Во́ду спасе́ния Христа́ излива́ющи.

Кондак, глас 8

От неистощи́мыя/ Ты, Исто́чниче Богоблагода́тный, подае́ши ми, точа́щи, во́ды/ Твоея́ благода́ти,/ приснотеку́щий па́че сло́ва,/ я́ко бо Сло́во ро́ждшая па́че смы́сла,/ молю́тися, ороси́ мя благода́тию, да зову́ Ти:/ ра́дуйся, Водо́ спаси́тельная.

Величание

Велича́ем тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Празднество Пресвятой Владычице нашей Богородице и Приснодеве Марии ради Афонской чудотворной иконы Ее, именуемой «Сладкое лобзание»52 (829–842) (В неделю антипасхи)

Тропарь, глас 7

Одержа́щей е́реси,/ о честне́й ико́не Твое́й, Де́во,/ я́ве промышля́еши:/ мореше́ствием Твое́й оби́тели,/ я́ко дар досто́ин, приноша́еши./ Сию́ же мы Сладколю́бящую пра́ве нарица́юще,/ Тя ублажа́ем.

Кондак, глас 8

И́же в хра́ме и оби́тели Твое́й приходя́щия Ти/ и богоуго́дно спаси́тельная гоня́щия/ и почита́ющия Твой святы́й о́браз/ сим да́руй, Де́во, Твоя́ ми́лости,/ от вся́ких изба́вльши сих скорбе́й, Тебе́ вопию́щия:/ра́дуйся, Еди́на Богоневе́стная.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтитм о́браз Твой святы́й,/ и́мже то́чиши исцеле́ния всем/ с ве́рою притека́ющим.

Память посещения Богоматерью преподобного Сергия Радонежского (В пяток вечера от седмицы Фоминой до седмицы 5-й по Пасхе)

Тропарь, глас 4

К Богоро́дице приле́жно ны́не притеце́м,/ гре́шнии и смире́ннии и припаде́м,/ в покая́нии зову́ще из глубины́ души́:/ Влады́чице, помози́ на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи,/ Тя бо и еди́ну наде́жду и́мамы.

Не умолчи́м никогда́, Богоро́дице,/ си́лы Твоя́ глаго́лати, недосто́йнии,/ а́ще бо Ты не бы предстоя́ла, моля́щи,/ кто бы нас изба́вил от толи́ких бед,/ кто же бы сохрани́л до ны́не свобо́дны,/ не отсту́пим, Влады́чице, от Тебе́,/ Твоя́ бо рабы́ спаса́вши при́сно от вся́ких лю́тых.

Кондак, глас 8

А́ще и во гроб снизше́л еси́, Безсме́ртне,/ но а́дову разру́шил еси́ си́лу/ и воскре́сл еси́, я́ко Победи́тель, Христе́ Бо́же,/ жена́м мироно́сицам веща́вый: ра́дуйтеся/ и Твои́м апо́столом мир да́руяй,/ па́дшим подая́й воскресе́ние.

Праведных Марфы и Марии, сестер праведнаго Лазаря (В неделю святых жен мироносиц)

Тропарь, глас 3

Пра́веднаго Ла́заря Боголюби́выя се́стры,/ Ма́рфо и Мари́е пресла́вныя,/ чи́стым се́рдцем Христа́ в житии́ ва́шем возлюби́ли есте́,/ мироно́сиц взе́мше чин,/ и Его, я́ко Сы́на Бо́жия, безбоя́зненно испове́дали есте́,/ сего́ ра́ди ны́не во оби́телех Отца́ Небе́снаго/ со а́нгелы и все́ми святы́ми сла́вно ца́рствуете./ Умоли́те, Его́же возлюби́ли есте́,/ и нам, гре́шным, в ве́ре и любви́ Христо́вой утверди́тися/ и Ца́рствия Небе́снаго сподо́битися.

Благоверной Тамары, царицы Грузинской (начало XIII) (В неделю святых жен мироносиц)

Тропарь, глас 4

Во святы́х ди́вная,/ Иве́рии свети́ло,/ благове́рная цари́це Тама́ро,/ на гора́х высо́ких хра́мы воздви́гшая,/ да в них моле́ния возсыла́ют ко Го́споду,/ мольба́ми твои́ми кре́пость дарова́вшая во́ем христолюби́вых люде́й страны́ И́верския,/ десни́цею же свое́ю по́лчища ага́рянская низпрове́ргшая,/ моли́ Христа́ Бо́га спасти́ся душа́м на́шим.

Ин тропарь, глас 8

Вы́шния красоты́ жела́я,/ ни́жния сла́сти теле́сныя дале́че от себе́ отгнала́ еси́,/ и, в черто́зе ца́рском пребыва́ющи,/ а́нгельское житие́ препровожда́ла еси́,/ цари́це Тама́ро блаже́нная,/ моли́ Бо́га спасти́ся душа́м на́шим.

Ин тропарь, глас 4

Ца́рства земна́го сла́ву презре́вши,/ Еди́наго Христа́, нас ра́ди распя́таго, возлюби́ла еси́/ и, Того́ му́жественно испове́дующи,/ венце́м му́ченическим венча́лася еси́,/ всеблаже́нная цари́це Тама́ро./ Те́мже и ны́не, престо́лу Царя́ Сла́вы на Небесе́х предстоя́щи, / моли́ся о спасе́нии душ на́ших.

Величание

Велича́ем тя,/ свята́я благове́рная цари́це Тама́ро,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Праведной Тавифы (I) (В неделю о разслабленном)

Тропарь, глас 4

Апо́столом сотаи́ннице, ми́лостивая Тави́фо,/ оби́тели же́нския нача́ло положи́ла еси́,/ и бе́дным одея́ние была́ еси́,/ послу́шнице смире́нная,/ сло́ву апо́стола Петра́ повину́вшися,/ из ме́ртвых си́лою Христо́вою возста́ла еси́,/ и ны́не на Небесе́х све́тло пра́зднуеши./ Те́мже моли́ Христа́ Бо́га/ всем, помина́ющим тя, дарова́ти живо́т ве́чный.

Ин тропарь, глас тойже

Днесь ве́ра Христо́ва утвержда́ется ка́менем ве́ры,/ и ликовству́ет в весе́лии Иоппи́я,/ псало́мски славосло́вят Жизнода́вца Сы́на Бо́жия ве́рнии,/ видя́ще соверша́емое ве́лие чу́до: первоверхо́вный апо́стол глаго́лет,/ и уме́ршая востае́т от гро́ба,/ ю́же Низложи́тель сме́рти да́рует Це́ркви,/ да украша́ются во о́браз ея́ доброде́тельми лю́дие./ Прииди́те у́бо, христиа́не,/ принесе́м ко святе́й моле́ния на́ша:/ блаже́нная Тави́фо и милосе́рдная,/ вознеси́ на́ша воздыха́ния Пресвяте́й Тро́ице,/ и моли́ся со дерзнове́нием,/ да сынове́ Све́та Преве́чнаго бу́дем,/ да сподо́бимся Бо́жия ми́лости,/ да пребыва́ем в любви́ Боже́ственней,/ и да ца́рствует мир во вселе́нней.

Кондак, глас тойже

Ужаса́хуся Иоппи́йстии лю́дие, и дивля́хуся а́нгели Бо́жии, егда́ Исцели́вый Енне́я воззва́ от ме́ртвых се́рну нарица́емую53, милосе́рдием приукра́шенную,/ о не́йже к Нему́ взыва́ху вдови́цы неиму́щия./ И ны́не, Тави́фо блаже́нная, услы́ши моли́твы на́ша, к тебе́ приноси́мыя,/ и испроси́ у вся́ческих благ Пода́теля ми́лости и щедро́ты ве́рным Его́,/ да блажа́ще тя, вопие́м ти:/ ра́дуйся, доброде́тели нас науча́ющая.

Кондак, глас 8

Первонача́льная Це́рковь ликовству́ет,/ Иоппи́я тобо́ю, Тави́фо, просвеща́ется,/ из ме́ртвых твоему́ воскресе́нию ра́дующися,/ и мы, па́мять твою́ ны́не пра́зднующе,/ сла́вим Победи́теля сме́рти – Христа́ Бо́га,/ о́бщаго свята́го Воскресе́ния ча́юще.

Величание

Велича́ем тя,/ свята́я пра́ведная Тави́фо,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Перенесение мощей мученика Авраамия Болгарского, Владимирского (В неделю о разслабленном)

Тропарь, глас 4

Днесь, благове́рнии лю́дие, соше́дшеся,/ восхва́лим до́бляго сего́ му́ченика и страда́льца Авраа́мия,/ сей бо, укрепля́емь си́лою Бо́жиею,/ ду́шу свою́ положи́ за Христа́,/ мно́го пострада́в от злове́рных болга́р./ Сего́ ра́ди от Го́спода вене́ц прия́т/ и ны́не предстои́т Ему́/ и мо́лится о гра́де сем/ и о всех нас, чту́щих па́мять его́.

Кондак, глас 8

Я́ко многоце́нное сокро́вище,/ принесе́но бысть от Болга́рский страны́ во град Влади́мир/ пречестно́е те́ло твое́, му́чениче Авраа́мие,/ и́мже подае́ши всем чту́щим пресла́вную па́мять твою́ оби́лие исцеле́ний,/ предстоя́ на Небеси́ Христу́ Бо́гу/ и моля́ Его́ о спасе́нии душ на́ших.

Ин кондак, глас 3

Укрепи́вся, сла́вне, любо́вию Госпо́днею/ и Того́ честны́й Крест на ра́мо взем, и́го Госпо́дне,/ посрами́л еси́ диа́воля кова́рствия/ и пострада́л еси́ да́же до сме́рти,/ и сего́ ра́ди, досточу́дне, яви́ся страда́лец вели́к, Авраа́мие,/ и ору́жником храбротаи́нник/ и уча́стник Бо́жия благода́ти.

Величание

Велича́ем тя,/ страстоте́рпче, святы́й Авраа́мие,/ и чтим честна́я страда́ния твоя́,/ я́же за Христа́/ претерпе́л еси́.

Святых отцев Первого Вселенского собора (325) (В неделю 7-ю по Пасхе)

Тропарь, глас 8

Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый,/ и те́ми ко и́стинней ве́ре вся ны наста́вивый;/ Многоблагоутро́бне, сла́ва Тебе́.

Кондак, глас тойже

Апо́стол пропове́дание и оте́ц догма́ты/ Це́ркве еди́ну ве́ру запечатле́ша,/ я́же и ри́зу нося́щи и́стины,/ истка́ну от е́же свы́ше Богосло́вия,/ исправля́ет и сла́вит благоче́стия вели́кое та́инство.

Празднество Пресвятой Владычице нашей Богородице и Приснодеве Марии ради иконы Ее, именуемой Табынская (В 9-ю пятницу по Пасхе)

Тропарь, глас

Наста́ днесь пресве́тлый пра́здник, Пречи́стая Де́во,/ честны́я Твоея́ Табы́нския ико́ны, Влады́чице,/ я́же па́че луче́й со́лнечных возсия́,/ от Исто́чника приснотеку́щаго, Христа́, Бо́га на́шего,/ источа́вши целе́бныя да́ры/ с ве́рою к Тебе́ притека́ющим,/ Тя бо Христо́с Помо́щницу лю́дем Свои́м дарова́,/ покрыва́ти и спаса́ти от вся́кия беды́ рабы́ Своя́,/ еди́ну Благослове́нную.

Празднество Божественному и покланяемому Пресвятому Духу Параклиту (В День Святого Духа)54

Тропари:

Досто́йно есть вои́стинну велича́ти Тя, Бо́га Сло́ва,/ Его́же трепе́щут и ужаса́ются Херуви́ми/ и славосло́вят Си́лы Небе́сныя,/ от Де́вы непрело́жно вопло́щшагося/ Христа́, Жизнода́вца и Го́спода.

Досто́йно есть вои́стинну превозноси́ти Тя славосло́вии, Всеблага́го,/ и Всепресвята́го, и Храни́теля жи́зни на́шея,/ со Отце́м и Сы́ном богонача́льно ца́рствующаго ви́димыми и неви́димыми,/ от Отца́ еди́наго исходя́щаго Бо́жия Ду́ха,/ вели́ка же и стра́шна, со стра́хом сла́вити.

Слава: Пое́м Тя все боголе́пно пе́нии Боже́ственными,/ Отца́ и Сы́на и Ду́ха Боже́ственнаго,/ Трисоста́вную Держа́ву,/ Еди́но Ца́рство и Госпо́дство.

И ныне: Влады́чице, Ма́ти Изба́вителя,/ приими́ моли́твы Твои́х непотре́бных раб,/ и́мже возда́ждь избавле́ние грехо́в/ и богоуго́дныя жи́зни прия́тное исправле́ние.

Кондак, глас 2

Всех Животе́, Све́те и Утеше́ние,/ Наде́ждо и Наслажде́ние, Всесвяты́й Ду́ше,/ Бо́га Тя зна́ющих, Отцу́ и Сы́ну Сопристо́льна,/ даро́в Твои́х сподо́би/ и грехо́в отпуще́ние да́руй им.

Ин кондак, глас 2

Всех живота́, Исто́чника Приснотеку́щаго Боже́ственных даро́в,/ Ду́ха Всесвята́го,/ я́ко Отцу́ Единосу́щна/ и Сы́ну Соприсносу́щна,/ в пе́снех благове́рно воспои́м и велича́им/ и я́ко Бо́гу ве́рою поклони́мся.

Поклоня́юся Тебе́, Влады́ко Уте́шителю Бо́же:/ поми́луй и спаси́ поклоня́ющияся Тебе́/ и Бо́га исповеда́ющия Тя.

Всех святых (В неделю 1-ю по Пятидесятнице)

Тропарь, глас 4

И́же во всем ми́ре му́ченик Твои́х,/ я́ко багряни́цею и ви́ссоном,/ кровьми́ Це́рковь Твоя́ украси́вшися,/ те́ми вопие́т Ти, Христе́ Бо́же:/ лю́дем Твои́м щедро́ты низпосли́,/ мир жи́тельству Твоему́ да́руй,/ и душа́м на́шим ве́лию ми́лость.

Кондак, глас 8

Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики:/ тех моли́твами в ми́ре глубо́це/ Це́рковь Твою́, жи́тельство Твое́, Богоро́дицею соблюди́, Многоми́лостиве.

Величание

Велича́ем вас,/ апо́столи, му́ченицы, проро́цы и вси святи́и,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Собор всех святых, в земле Российской просиявших (В неделю 2-ю по Пятидесятнице)

Тропарь, глас 8

Я́коже плод кра́сный Твоего́ спаси́тельнаго се́яния,/ земля́ Росси́йская прино́сит Ти, Го́споди, вся святы́я, в той просия́вшия./ Тех моли́твами в ми́ре глубо́це/ Це́рковь и страну́ на́шу Богоро́дицею соблюди́, Многоми́лостиве.

Ин тропарь, глас тойже

С Вы́шних призира́я, убо́гия прие́мля,/ посети́ нас, грехо́в ра́ди на́ших ско́рби те́рпящих, Влады́ко Всеми́лостиве,/ моли́твами Богоро́дицы и всех святы́х ру́сских/ да́руй земли́ на́шей ве́лию ми́лость.

Ин тропарь, глас 4

Иерусали́ма Вы́шняго гра́жданы,/ от земли́ на́шея возсия́вшия/ и Бо́гу во вся́цем чину́/ и вся́ким по́двигом угоди́вшия,/ прииди́те, воспо́им, ве́рнии:/ о всеблаже́ннии земли́ Росси́йския засту́пницы,/ моли́теся ко Го́споду,/ да поми́лует сию́ от гне́ва Своего́,/ исцеля́я сокруше́ние ея́,/ и ве́рныя лю́ди Своя́ уте́шит.

Кондак, глас 3

Днесь лик святы́х, в земли́ на́шей Бо́гу угоди́вших, предстои́т в Це́ркви/ и неви́димо за ны мо́лится Бо́гу,/ а́нгели с ним славосло́вят,/ и вси святи́и Це́ркве Христо́вы ему́ спра́зднуют,/ о нас бо мо́лят вси ку́пно Преве́чнаго Бо́га.

Ин кондак, глас 6

Предста́телие страны́ на́шея неусы́пнии,/ хода́таи о нас ко Творцу́ непреста́ннии,/ не пре́зрите моле́ний на́ших,/ но предваря́юще на по́мощь, я́ко сро́дницы на́ши,/ ускори́те на моли́тву/ и потщи́теся на умоле́ние,/ предста́тельствующе при́сно о чту́щих вас.

Величание Пресвятой Троице

Велича́ем Тя,/ Триипоста́сный Влады́ко,/ ве́рою правосла́вною зе́млю Ру́сскую озари́вшаго/ и святы́х сро́дников на́ших/ сонм ве́лий в ней просла́вльшаго.

Величание Пресвятой Богородице

Досто́йно есть велича́ти Тя,/ Богоро́дице,/ земли́ Ру́сския Цари́цу Небе́сную/ и люде́й правосла́вных/ Влады́чицу Держа́вную.

Величание святым

Ублажа́ем вас,/ чудотво́рцы на́ши сла́внии,/ зе́млю Ру́сскую доброде́тельми ва́шими озари́вшии/ и о́браз спасе́ния нам/ светоя́вленно показа́вшии.

Ино величание святым

Велича́ем вас,/ святи́и вси, в земли́ Росси́йстей просия́вшии,/ и чтим святу́ю па́мять ва́шу,/ вы бо мо́лите о нас/ Христа́ Бо́га на́шего.

Собор преподобных отцев, на святой горе Афонской просиявших (В неделю 2-ю по Пятидесятнице)

Тропарь, глас 1

Пусты́ни Афо́нския отцы́,/ а́нгелы во пло́ти,/ испове́дники вку́пе и преподо́бныя,/ святи́тели же и му́ченики в пе́ниих почти́м,/ подража́юще доброде́телем их,/ зову́ще согла́сно и глаго́люще:/ сла́ва Просла́вльшему вы,/ сла́ва Венча́вшему вы,/ сла́ва в беда́х предста́тели нам вы Показа́вшему.

Кондак, глас 4

Онебеси́вшия Го́ру сию́,/ и показа́вшия в ней житие́ а́нгельское,/ и мно́жество мона́хов собра́вшия отцы́,/ прииди́те, благохва́лим вси, к ним взыва́юще:/ вся́кия беды́ и искуше́ния нас изба́вите,/ мно́жество преподо́бных,/ Афо́нская похвало́.

Величание

Ублажа́ем вас,/ преподо́бнии отцы́ Афо́нстии,/ в горе́ сей пости́вшиися,/ и чтим святу́ю па́мять ва́шу,/ наста́вницы мона́хов/ и собесе́дницы /Ангелов.

Собор всех святых, в Болгарии просиявших (В неделю 2-ю по Пятидесятнице)

Тропарь, глас 4

Собо́р ваш честны́й почита́юще/ и па́мять святу́ю пра́зднующе,/ святи́и, от бо́лгар просия́вшии,/ приле́жно мо́лим вы:/ Го́спода о всех моли́те,/ па́че же о при́сных,/ сохрани́тися земли́ Бо́лгарстей от вся́ких бед/ и наро́ду утверди́тися на ве́ки в ве́ре Правосла́вней,/ я́ко да, ми́рное житие́ благоче́стно пожи́вше,/ вку́пе с ва́ми улучи́м ве́чное Оте́чество/ в блаже́ннем Христа́ Бо́га Ца́рствии.

Кондак, глас 2

В моли́твах не усыпа́юще/ и в предста́тельствах не престаю́ще,/ Го́спода ми́лостива нам твори́те,/ святи́и, от бо́лгар просия́вшии,/ я́ко да, па́мять ва́шу пра́зднующе,/ с ра́достию сию́ твори́м,/ до втора́го Судии́ прише́ствия и всех Воскресе́ния.

Величание

Велича́ем вас,/ святи́и вси, в земли́ Бо́лгарстей просия́вшии,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Собор всех новоявленных мучеников Христовых, по взятии Царяграда пострадавших (после 1453) (В неделю 3-ю по Пятидесятнице)

Тропарь, глас 3

Но́вии му́ченицы,/ дре́внюю пре́лесть тве́рдым боре́нием низложи́вшии,/ вознесо́ша ве́ру правосла́вных,/ беззако́нное бо служе́ние уничижи́вше,/ дерзнове́нно Христа́ пропове́даша,/ Бо́га соверше́нна,/ и ны́не непреста́нно моля́тся/ дарова́ти нам ве́лию ми́лость.

Кондак, глас 1

Весели́ся та́инственно, Христо́ва Це́рковь,/ ви́дящи своя́ сыны́, но́выя му́ченики,/ о́крест трапе́зы твоея́ стоя́щия в моще́х,/я́ко новонасажде́ния ма́сличная,/ и Зижди́телю всех возопи́й:/ Ты му́чеников еси́, Христе́, утвержде́ние.

Величание

Велича́ем вас,/ новоявле́нии Христо́вы му́ченицы,/ по взя́тии Царягра́да пострада́вшии,/ и чтим честна́я страда́ния ва́ша,/ я́же за Христа́/ претерпе́ли есте́.

Собор всех святых земли Новгородской (В неделю 3-ю по Пятидесятнице)

Тропарь, глас 8

Я́ко всесве́тлии свети́льницы,/ яви́стеся во стране́ се́й,/ святи́телие Новгоро́дстии, преподо́бнии, и Христа́ ра́ди юро́дивии, и вси пра́веднии,/ посто́м насажде́ннии, воздержа́нием напая́еми,/ сего́ ра́ди и сподо́бистеся бы́ти прия́телище Бо́жия Ду́ха/ и чудеса́ де́йствовати,/ моли́те Христа́ Бо́га за вся лю́ди,/ спасти́ся душа́м на́шим.

Ин тропарь, глас 4

Пусты́нное житие́ возлюби́вше, преподо́бнии отцы́,/ яви́стеся Новгоро́дстей стране́, я́ко ино́е со́лнце,/ озаря́юще сию́ мо́лниями чуде́с ва́ших,/ и просвеща́ете ве́рою воспева́ющих вам:/ ра́дуйтеся, по́стников похвало́ и пра́ведных удобре́ние.

Кондак, глас 5

Преподо́бнии отцы́ и чудотво́рцы,/ уго́дницы Христо́вы,/ Новгоро́дстии свети́льницы,/ и́же а́нгельским житие́м просия́вше,/ Боже́ственных сподо́бистеся даро́в,/ Спа́су служа́ще со а́нгелом непреста́нно,/ моли́те изба́витися нам от вся́каго прегреше́ния/ и душа́м на́шим дарова́ти ве́лию милость.

Величание

Велича́ем вас,/ святи́и вси земли́ Новгоро́дския,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Собор всех святых земли Вологодской (В неделю 3-ю по Пятидесятнице)

Тропарь, глас 8

Я́ко свети́льницы всесве́тлии,/ яви́стеся в преде́лех гра́да Во́логды,/ преподо́бнии отцы́ на́ши, Волого́дстии чудотво́рцы:/ вы бо, крест Христо́в от ю́ности своея́ на ра́мена взе́м- ше,/ усе́рдно Тому́ после́довали есте́,/ чистото́ю Бо́гови прибли́жившеся,/ от Него́же и чуде́с дарова́нием обогати́стеся;/ те́мже и мы, с ве́рою к вам притека́юще, уми́льно глаго́лем:/ отцы́ преподо́бнии, моли́те Христа́ Бо́га/ спасти́ся душа́м на́шим.

Ин тропарь, глас 2

Правосла́вия наста́вницы,/ благоче́стия и чистоты́ учи́телие,/ Це́ркве Волого́дския богодарова́нное украше́ние,/ моли́те Ми́лостиваго Бо́га,/ да ва́шим предста́тельством пода́стся благода́ть и мир стране́ на́шей/ и душа́м на́шим спасе́ние.

Кондак, глас 4

Светоно́сный о́блак свиде́телей ве́ры и благоче́стия,/ осеня́ющ преде́лы страны́ на́шея, / утверди́л еси́, Христе́ Царю́, на тве́рди Це́ркве Волого́дския,/ да взира́юще на сконча́ние жи́тельства их и вене́ц сла́вы неувяда́емый,/ терпе́нием тече́м на предлежа́щий* нам по́двиг спасе́ния.

Ин кондак, глас 2

Волне́ний мно́жество невла́жно проходя́ще,/ безпло́тныя враги́ струя́ми слез ва́ших кре́пко погрузи́ли есте́,/ Богому́дрии и преподо́бнии,/ и, чуде́с дар прии́мше,/ моли́те непреста́нно о всех нас.

Величание

Велича́ем вас,/ святи́и чудотво́рцы Волого́дстии,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Ино величание

Велича́ем вас,/ чудотво́рцы на́ши сла́внии Волого́дстии,/ страну́ се́верную луча́ми доброде́телей озари́вший/ и о́браз спасе́ния ве́рным/ светоявле́нно показа́вший.

Собор всех святых земли Белорусской (В неделю 3-ю по Пятидесятнице)

Тропарь, глас 5

Почти́ Госпо́дь Белору́сский край/ святы́ми, Ему благоугоди́вшими:/ святи́тели, му́ченики, преподо́бными и пра́ведными,/ ве́рно Го́сподеви послужи́вшими/ и мзду трудо́в прия́вшими./ К те́мже ны́не и мы вопие́м:/ о нас моли́теся ко Го́споду,/ да в ве́ре и де́лех плод добр принесе́м.

Кондак, глас 3

Бо́жии уго́дницы Белору́сския земли,/ ны́не со дерзнове́нием предятоя́т Престо́лу Святы́я Тро́ицы/ и неви́димо за ны мо́лятся Бо́гу,/ о кра́е на́шем,/ прося́ нам мир и ве́лию ми́лость.

Величание

Велича́ем вас,/ вси святи́и Белору́сския земли́,/ и чтим святу́ю па́мять ва́шу,/ вы бо мо́лите о нас/ Христа́ Бо́га на́шего.

Преподобного Мартина Туровского (1150, память 27 июня)

Тропарь, глас 1

Тяжким неду́гом стра́ждущий и людьми́ забы́тый,/ моли́л еси́ жа́жду утоли́ти, преподо́бне Марти́не,/ те́мже Христо́с посла́ с Небесе́ благове́рных Бори́са и Гле́ба/ тебе́ послужи́ти и неду́г исцели́ти,/ моли́ся ны́не ко Го́споду/ спасти́ся душа́м на́шим.

Преподобного Елиссея Лавришевского (ок. 1250, память 23 октября) и святителя Лаврентия, епископа Туровского (ок. 1194, память 29 января)

Тропарь, глас 3

Преподо́бне о́тче наш Елисее́в,/ с Лавре́нтием чу́дным подвиза́лся еси́, учи́телю своему́ подража́я,/ земну́ю сла́ву и че́сть стопа́м Христа́ пове́ргли есте́,/ те́мже Госпо́дь увенча́ вас/ нетле́нным венце́м сла́вы Своея́.

Кондак, глас 2

Ве́чная па́мять ва́ша, преподо́бнии Елисее́в и Лавре́нтие,/ те́мже помина́йте чту́щих свя́то ю́/ и испроси́те земли́ на́шей благоче́стие и душа́м спасе́ние.

Преподобной Софии, княжны Слуцкой (1612, память 19 марта)

Тропарь, глас 5

Блаже́нная ма́ти Софи́е,/ нетле́нием моще́й и чуде́с сия́нием почти́ тя Бог;/ помина́юще твое́ пра́ведное житие́,/ тя мо́лим испроси́ти/ телесе́м на́шим здра́вие и душа́м спасе́ние.

Собор святых Псково-Печерских (В неделю четвертую по Пятидесятнице)

Тропарь, глас 6

Собо́р святы́х Пско́во-Пече́рских днесь почти́м,/ в де́брех лесны́х оби́тель чу́дную основа́вших/ и я́ко кри́ны доброде́тельми процве́тших,/ лю́дем пра́вый путь богоподо́бия указа́вших,/ мо́лят бо Го́спода/ ми́ру мир дарова́ти и ве́лию ми́лость.

Ин тропарь, глас 4

Пусты́нническаго жития́ нача́льницы,/ оби́тели Богома́терния устрои́телие,/ преподо́бнии отцы́ Ма́рко, Ио́но и Корни́лие/ и сподви́жнице сла́вная Ва́ссо,/ в святе́й горе́ у пото́ка Ка́менца подвиза́вшийся/ и та́мо в глуби́нах недр земли́ храм ископа́вший;/ последи́ же и́ноки, ту собра́вшеся,/ доброде́тельми сия́юще, оби́тель украша́ху;/ ны́не же в небе́сных черто́зех лику́ете,/ моля́щеся ко Го́споду приле́жно во е́же спасти́ся нам.

Кондак, глас 2

Тебе́, Богоро́дице и Де́ве Чи́стей,/ за вся лю́ди Бо́га умоля́ющей,/ оби́тель Пско́во-Пече́рския/ святы́х свои́х, я́ко дар, днесь прино́сит:/ Твои́х же даро́в бога́тство кто испове́сть?/ Яко и в рай возвела́ еси́ отцы́ на́ша.

Ин кондак, глас 8

Днесь ве́рнии ликовству́ют,/ па́мять преподо́бных Пско́во-Пече́рских соверша́юще,/ днесь бо в черто́зех Царя́ сла́вы мо́лятся,/ помина́юще на́ша не́мощи и печа́ли,/ непреста́нно прося́т дарова́ти нам/ мир и ве́лию ми́лость.

Величание

Ублажа́ем вас,/ преподо́бнии отцы́ Пско́во-Пече́рстии,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Ино величание

Велича́ем вас,/ преподо́бнии отцы́ Ма́рко, Ио́но, Корни́лие, Вассиа́не, Ла́заре, Дорофе́е и ма́ти Ва́ссо,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Всех святых, в земле Тверской просиявших (В неделю первую после праздника святых апостол Петра и Павла)

Тропарь, глас 4

И́же в земли́ Тверско́й просла́вльшиися,/ святи́телие, му́ченицы,/ преподо́бнии, пра́веднии/ и вси святи́и,/ ве́рою, по́двиги благоче́стия,/ любо́вию, кро́тостию, сло́вом и житие́м/ Бо́гу благоугоди́вшии/ и венцы́ нетле́ния и сла́вы украси́вшиися,/ моли́те Христа́ Бо́га на́шего/ дарова́ти мир стране́ на́шей/ и душа́м на́шим в ми́ре спасти́ся.

Ин тропарь, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

Кондак, глас тойже

На земли́ благоче́стно пожи́вшии,/ святи́и, в земли́ Тверско́й просия́вшии,/ и ны́не на Небесе́х со а́нгелы ра́дуетеся/ и Тро́ицу Святу́ю – Отца́, и Сы́на, и Свята́го Ду́ха во Еди́ном Божестве́ прославля́ете./ Мы же, земноро́днии, моли́твенно ублажа́юще вас/ и святу́ю па́мять соверша́юще, мо́лим:/ принеси́те на́ша моли́твы к Небе́сному Престо́лу Го́спода Вседержи́теля,/ да ва́шим хода́тайством/ да́рует мир и спасе́ние душа́м на́шим.

Ин кондак, глас 8

Мно́гими скорбьми́ путь земны́я жи́зни преидо́сте/ и, дости́гше кра́я у́мнаго жела́ния,/ в черто́г Боже́ственныя сла́вы всели́стеся,/ и ны́не, ра́дующеся со всех Царе́м и Бо́гом,/ моли́теся, я́ко да и мы ва́шего блаже́нства прича́стницы бу́дем,/ ваш собо́р почита́ющий,/ святи́и покрови́телие Тверски́я страны́.

Величание

Велича́ем вас,/ святи́телие Христо́вы,/ му́ченицы, за ве́ру Христо́ву и оте́чество пострада́вшии, / преподо́бнии, пра́веднии и вси святи́и,/ в земли́ Тверско́й просия́вшии,/ и чтим святу́ю па́мять ва́шу,/ вы бо мо́лите о нас/ Христа́ Бо́га на́шего.

Ино величание

Велича́ем вас,/ страны́ Тверски́я покрови́тели,/ и чтим святу́ю па́мять ва́шу,/ вы бо мо́лите о нас/ Христа́ Бо́га на́шего.

Память святых отец Шести Вселенских соборов (680) (В неделю ближайшую к 16 июля)

Тропарь, глас 8

Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый/ и те́ми ко и́стинней ве́ре вся ны наста́вивый,/ Многоблагоутро́бне, сла́ва Тебе́.

Кондак, глас тойже

Апо́стол пропове́дание и оте́ц догма́ты/ Це́ркве еди́ну ве́ру запечатле́ша,/ я́же и ри́зу нося́щи и́стины, истка́ну от е́же свы́ше Богосло́вия,/ исправля́ет и сла́вит благоче́стия вели́кое та́инство.

Собор всех святых земли Смоленской (В неделю пред 28-м июля)

Тропарь, глас 4

Собо́ре святы́х земли́ Смоле́нския,/ вода́ми свяще́ннаго Днепра́ омовенны́я,/ святи́телие, преподо́бнии, страстоте́рпцы и благове́рнии,/ апо́стольскую ве́ру соблю́дшии,/ се ны́не, Святе́й Тро́ице с Богоро́дицею и ли́ки Безпло́тных предстоя́ще,/ вода́ми благоче́стия зе́млю Ру́сскую напая́ете,/ да́рующе правосла́вным по́мощь Небе́сную/ во утвержде́ние ве́ры/ и спасе́ние душ на́ших.

Кондак, глас 3

Небе́сныя Цари́цы путеводи́тельством,/ подвигополо́жницы земли́ Смоле́нския,/ земны́й путь в Правосла́вней ве́ре проше́дшии/ и святы́х оте́ц преда́ния сохра́ншии,/ моли́те путь ве́ры и нам соблю́сти,/ смире́нно смири́вшагося до сме́рти кре́стныя Сы́на Бо́жия подража́юще,/ моли́твами Богоро́дицы,/ и спасти́ся душа́м на́шим.

Величание

Велича́ем вас,/ вси святи́и земли́ Смоле́нския,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Всех преподобных отцев, в подвиге просиявших (В субботу сырной седмицы)

Тропарь, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою от нас,/ но моли́твами их в ми́ре упра́ви живо́т наш.

Кондак, глас 8

Я́ко благоче́стия пропове́дники, и нече́стия обузда́тели/ богоно́сных собо́р уясни́л еси́,/ подсо́лнечную осиява́ющия;/ в ми́ре соверше́нном тех моли́твами, Тебе́ сла́вящия и велича́ющия сохрани́,/ пою́щия Ти, Го́споди:/ Аллилу́иа.

Величание

Ублажа́ем вас,/ вси́ преподо́бнии отцы́, в по́двиге просия́вшии,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Преподобных Сергия и Никона, Радонежских и всея России чудотворцев (На 3-й день праздника преподобного Сергия)55

Тропарь общий преподобным Сергию и Никону Радонежским, глас 8

Я́ко трисве́тлаго со́лнца светоза́рныя зве́зды,/ Тро́йческим све́том озаря́ете сердца́ ве́рных,/ сосу́ди Све́та Пресвяты́я Тро́ицы я́вльшеся,/ и преди́вным ва́шим житие́м и́ноком бы́сте тве́рдии законоположи́телие/ и церквам благоле́пие, и благове́рным, и святи́телем, и всем лю́дем,/ вся бо де́монския скве́рны отгна́вше отсю́ду/ ва́шими чи́стыми уче́нии и де́лы,/ до́бре упасо́сте ста́до, со́бранное ва́ми,/ но и ны́не мо́лим вас:/ посеща́йте чад свои́х, я́ко иму́щии дерзнове́ние ко Святе́й Тро́ице,/ Богому́дре Се́ргие с чу́дным ученико́м свои́м Ни́коном,/ и моли́те Христа́ Бо́га, да спасе́т ду́ши на́ша.

Тропарь преподобному Сергию Радонежскому, глас тойже

От ю́ности восприя́л еси́ Христа́ в души́ твое́й, преподо́бне,/ и па́че всего́ вожделе́л еси́ мирска́го мяте́жа уклони́тися,/ му́жески в пусты́ню всели́лся еси́/ и ча́да послуша́ния в ней, плоды́ смире́ния, возрасти́л еси́./ Тем быв Тро́ице вселе́ние,/ чудесы́ твои́ми всех просвети́л еси́, приходя́щих к тебе́ ве́рою,/ и исцеле́ния всем подая́ оби́льно./ О́тче наш Се́ргие, моли́ Христа́ Бо́га, да спасе́т ду́ши на́ша.

Тропарь преподобному Никону Радонежскому, глас 1

Послуша́ния до́брый рачи́тель быв,/ преподо́бне Ни́коне приснопа́мятне,/ Це́рковь бо прекра́сну Святы́я Тро́ицы/ в похвалу́ отцу́ твоему́ воздви́гл еси́./ Те́мже и мы, ча́да твоя́, любо́вию вопие́м ти:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак общий преподобным Сергию и Никону Радонежским, глас 8

В по́стницех приобщи́вшеся Вели́кому Анто́нию/ и Евфи́мию Иерусали́мскому поревнова́вше в по́двизех,/ я́ко а́нгели, на земли́ яви́стеся,/ просвеща́юще, преподо́бнии, ве́рных сердца́/ Боже́ственными зна́мении и чудесы повсегда́,/ сего́ ра́ди ра́достно вас почита́ем и любо́вию вопие́м вам:/ ра́дуйтеся, преподо́бнии отцы́ Се́ргие и Ни́коне,/ по́стником удобре́ние и всея́ Росси́йския земли́ вели́кое утвержде́ние.

Величание

Ублажа́ем вас,/ преподо́бнии отцы́ Се́ргие и Ни́коне,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Преподобного Варлаама Хутынского (В первую пятницу Петрова поста)

Тропарь преподобному Варлааму Хутынскому, глас 3

И́же на земли́ лега́нием,/ поще́нием же и бде́нием/ те́ло твое́ изнуря́я, преподо́бне,/ вся плотска́я мудрова́ния умертви́л еси́/ и исцеле́ний струя́ незави́стная яви́лся еси́,/ ве́рою притека́ющим к тебе́, Варлаа́ме о́тче наш,/ моли́ Христа́ Бо́га спасти́ся душа́м на́шим.

Кондак, глас 8

Я́коже други́й Илия́, о́тче, до́ждь с небесе́ свел еси́:/ он у́бо огнь сведе́ и царя́ удиви́,/ ты же лю́ди твоя́ возвесели́л еси́/ и торжествова́ти устро́ил еси́./ Вели́кий бо Новгра́д вельми́ тобо́ю хва́лится,/ име́я мо́щи твоя́ в себе́,/ его́же сохраня́й от враг непоколеби́ма, да зове́м ти:/ ра́дуйся, преподо́бне Варлаа́ме, о́тче наш.

Величание

Ублажа́ем тя,/ преподо́бне о́тче Варлаа́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

* * *

52

По-гречески – Гликофилусса.

53

Называемую серна – имя Тавифа (по-евр.) означает серна.

54

Тропари и кондаки взяты из канона Пресвятому Духу Параклиту (греч. – Утешитель). Сей канон был написан преподобным Максимом Греком углем на стене в месте заключения, принят для церковного употребления и в некоторых обителях читается в День Святого Духа.

55

Общая служба прпп. Сергию и Никону Радонежским на 3-й день после 5 июля и 25 сентября ст. ст.


Источник: Полный тропарион : Тропари, кондаки и величания на праздники Господни, Богородичны, святых угодников Божиих и икон Божией Матери на каждый день года / [Сост.: Т. С. Олейникова]. - М. : Ставрос (Тип. АО Мол. гвардия), 2003-. / Кн. 2. - 2003. - 685 с.

Комментарии для сайта Cackle