Источник

Общие тропари, кондаки и величания Спасителю, Божией Матери, святим угодникам Божиим и бесплотным силам

Господу Богу и Спасу нашему Иисусу Христу

Тропарь, глас 2

Пречи́стому Твоему́ о́бразу покланя́емся, Благи́й,/ прося́ще проще́ния прегреше́ний на́ших, Христе́ Бо́же:/ во́лею бо благоволи́л еси́ пло́тию взы́ти на Крест,/ да изба́виши, я́же созда́л еси́, от рабо́ты вра́жия./ Тем благода́рственно вопи́ем Ти:/ ра́дости испо́лнил еси́ вся, Спа́се наш,/ прише́дый спасти́ мир.

Ин тропарь, глас 8

С вы́шних призира́я, убо́гия прие́мля,/ посети́ ны, озло́бленныя грехи́, Влады́ко Всеми́лостиве,/ моли́твами Богоро́дицы да́руй душа́м на́шим ве́лию ми́лость.

Кондак, глас 8

Возбра́нный Воево́до и Го́споди, а́да Победи́телю,/ я́ко изба́влься от ве́чныя сме́рти,/ похва́льная воспису́ю Ти, созда́ние и раб Твой,/ но я́ко име́яй милосе́рдие неизрече́нное,/ от вся́ких мя бед свободи́, зову́ща:/ Иису́се Сы́не Бо́жий, поми́луй мя.

Ин кондак, глас 2

Неизрече́ннаго и Боже́ственнаго Твоего́ к челове́ком смотре́ния,/ неопи́санное Сло́во О́тчее,/ и о́браз, непи́санный и Богопи́санный победи́телен/ ве́дуще нело́жнаго Твоего́ воплоще́ния,/ почита́ем того́ лобыза́юще.

Припевы

Изба́ви от бед и скорбе́й раб Твои́х, Влады́ко Всеми́лостиве,/ я́ко мы усе́рдно к Тебе́ прибега́ем,/ ми́лостивому Избави́телю всех Влады́це Го́споду Иису́су.

Божией Матери

Тропарь, глас 4

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи,/ Тя бо и еди́ну наде́жду и́мамы.

Ин тропарь, глас 4

Не умолчи́м никогда́, Богоро́дице,/ си́лы Твоя́ глаго́лати, недосто́йнии:/ а́ще бо Ты не бы предстоя́ла моля́щи,/ кто бы нас изба́вил от толи́ких бед?/ Кто же бы сохрани́л доны́не свобо́дны?/ Не отсту́пим, Влады́чице, от Тебе́:/ Твоя́ бо рабы́ спаса́вши при́сно от вся́ких лю́тых.

Ин тропарь, глас 2

Моле́ние те́плое и стена́ необори́мая,/ ми́лости исто́чниче, ми́рови прибе́жище,/ приле́жно вопие́м Ти:/ Богоро́дице Влады́чице, предвари́,/ и от бед изба́ви нас,/ Еди́на вско́ре предста́тельствующая.

Кондак, глас 6

Предста́тельство христиа́н непосты́дное,/ ходата́йство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти:/ уско́ри на моли́тву, и потщи́ся на умоле́ние,/ предста́тельствующи при́сно, Богоро́дице, чту́щих Тя.

Ин кондак, глас 6

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице:/ Ты нам помози́,/ на Тебе́ наде́емся,/ и Тобо́ю хва́лимся:/ Твои́ бо есмы́ раби́,/ да не постыди́мся.

Ин кондак, глас 8

Взбра́нной Воево́де победи́тельная,/ я́ко изба́вльшеся от злых,/ благода́рственная воспису́ем Ти раби́ Твои́, Богоро́дице,/ но я́ко иму́щая держа́ву непобеди́мую,/ от вся́ких нас бед свободи́, да зове́м Ти:/ ра́дуйся, Неве́сто Неневе́стная.

Припевы

Спаси́ от бед рабы́ Твоя́, Богоро́дице,/ я́ко вси по Бо́зе к Тебе́ прибега́ем,/ я́ко неруши́мей стене́ и предста́тельству.

При́зри благосе́рдием, Всепе́тая Богоро́дице,/ на мое́ лю́тое телесе́ озлобле́ние,/ и исцели́ души́ моея́ боле́знь.

Величание

Досто́йно есть велича́ти Тя,/ Богоро́дице,/ честне́йшую Херуви́м/ и сла́вне́йшую без сравне́ния Серафи́м.

Или сие:

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Святым бесплотным силам

Тропарь, глас 4

Небе́сных во́инств архистрати́зи,/ мо́лим вас при́сно, мы недосто́йнии,/ да ва́шими моли́твами оградите́ нас/ кро́вом крил невеще́ственныя ва́шея сла́вы,/ сохраня́юще ны припа́дающия приле́жно, и вопию́щия:/ от бед изба́вите ны, я́ко чинонача́льницы вы́шних сил.

Кондак, глас 2

Архистрати́зи Бо́жии,/ служи́телие Боже́ственныя сла́вы,/ а́нгелов нача́льницы, и челове́ков наста́вницы,/ поле́зное нам проси́те и ве́лию ми́лость,/ я́ко безпло́тных архистрати́зи.

Величание

Велича́ем вас,/ арха́нгели и а́нгели, и вся во́инства,/ херуви́ми и серафи́ми,/ сла́вящия Го́спода.

Или сие:

Велича́ем вас,/ арха́нгели, а́нгели,/ нача́ла, вла́сти, престо́ли, госпо́дствия, си́лы и херуви́ми,/ стра́шныя серафи́ми,/ прославля́ющия Го́спода.

Или:

Велича́ем тя,/ святы́й арха́нгеле Христо́в Михаи́ле,/ и вас, святи́и а́нгели, арха́нгели, нача́ла, вла́сти, си́лы, госпо́дствия,/ престо́ли, херуви́ми, серафи́ми,/ прославля́ющия Го́спода. (Часослов на 8/21 ноября, издание Киево-Печерской лавры 1742 года.)

Архангелу единому

Тропарь, глас 4

Небе́сных во́инств Архистрати́же,/ мо́лим тя при́сно мы недосто́йнии,/ да твои́ми моли́твами огради́ши нас/ кро́вом крил невеще́ственныя твоея́ сла́вы,/ сохраня́я ны, припа́дающия приле́жно и вопию́щия:/ от бед изба́ви ны, я́ко чинонача́льник Вы́шних Сил.

Кондак, глас 2

Архистрати́же Бо́жий,/ служи́телю Боже́ственныя сла́вы,/ а́нгелов нача́льниче и челове́ков наста́вниче,/ поле́зное нам проси́,/ и ве́лию ми́лость,/ я́ко Безплотных Архистратиг.

Ангелу хранителю

Тропарь, глас 6

Ангеле Бо́жий,/ Храни́телю мой святы́й,/ живо́т мой соблюди́ во стра́се Христа́ Бо́га,/ ум мой утверди́ во и́стиннем пути́,/ и к любви́ го́рней уязви́ ду́шу мо́ю,/ да тобо́ю направля́ем,/ получу́ от Христа́ Бо́га ве́лию ми́лость.

Кондак, глас 4

Яви́ся мне милосерд,/ святы́й а́нгеле Господень,/ Храни́телю мой, и не отлуча́йся от мене́ скве́рнаго,/ но просвети́ мя све́том неприкоснове́нным,/ и сотвори́ мя досто́йна Ца́рствия Небе́снаго.

Ин кондак, глас 2

Божий служи́телю, и храни́телю мой преизря́дне,/ гре́шному при́сно мне спребыва́яй,/ злоде́йствия мя вся́каго де́монов избавля́яй,/ и к Боже́ственным стезя́м наставля́яй,/ жизнь хода́тайствуяй нетле́нную.

Всем святым

Тропарь, глас 4

И́же во всем ми́ре му́ченик Твои́х,/ я́ко багряни́цею и ви́ссоном,/ кровьми́ Це́рковь Твоя́ украси́вшися,/ те́ми вопие́т Ти, Христе́ Бо́же:/ лю́дем Твои́м щедро́ты Твоя́ низпосли́,/ мир жи́тельству Твоему́ да́руй,/ и душа́м на́шим ве́лию ми́лость.

Ин тропарь, глас 2

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вший и ве́ру соблю́дший,/ дерзнове́ние и́муще ко Спа́су,/ о нас Того́, я́ко бла́га, моли́те,/ мо́лимся, спасти́ся душа́м на́шим.

Ин тропарь, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лости Твоея́ от нас,/ но моли́твами их в ми́ре упра́ви живо́т наш.

Кондак, глас 8

Я́ко нача́тки естества́ Насади́телю тва́ри/ вселе́нная прино́сит Ти, Го́споди, Богоно́сныя му́ченики,/ тех моли́твами в ми́ре глубо́це/ Це́рковь Твою́, жи́тельство Твое́ Богоро́дицею соблюди́, Многоми́лостиве.

Ин кондак, глас 8

Апо́стол пропове́дание, и оте́ц догма́ты,/ Це́ркве еди́ну ве́ру запечатле́ша,/ я́же и ри́зу нося́щи и́стины,/ истка́ну от е́же свы́ше богосло́вия,/ исправля́ет и сла́вит благоче́стия вели́кое та́инство.

Величание

Велича́ем вас,/ апо́столи, му́ченицы, проро́цы и вси святи́и,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Святым отцам (на соборы)

Тропарь, глас 8

Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый,/ и те́ми ко и́стинней ве́ре вся ны наста́вивый:/ Многоблагоутро́бне, сла́ва Тебе́.

Кондак, глас тойже

Апо́стол проповеда́ние, и оте́ц догма́ты,/ Це́ркве еди́ну ве́ру запечатле́ша,/ я́же и ри́зу нося́щи и́стины,/ истка́ну от е́же свы́ше Богосло́вия,/ исправля́ет и сла́вит благоче́стия вели́кое та́инство.

Пророку единому

Тропарь, глас 2

Проро́ка Твоего́ (имя рек) па́мять, Го́споди, пра́зднующе,/ тем Тя мо́лим:/ спаси́ ду́ши на́ша.

Кондак, глас 4

Просвети́вшееся Ду́хом чи́стое твое́ се́рдце,/ проро́чества бысть светле́йшаго прия́телище:/ зри́ши бо, я́ко настоя́щая, дале́че су́щая;/ сего́ ра́ди тя почита́ем,/ проро́че блаже́нне (имя рек), сла́вне.

Величание

Велича́ем тя,/ проро́че Бо́жий (имя рек),/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Пророкам двум и многим

Тропарь, глас 2

Проро́ков Твои́х па́мять, Го́споди, пра́зднующе,/ те́ми Тя мо́лим:/ спаси́ ду́ши на́ша.

Апостолу единому

Тропарь, глас 3

Апо́столе святы́й (имя рек),/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Кондак, глас 4

Я́ко звезду́ пресве́тлую/ Це́рковь всегда́ стяжа́ тя, апо́столе (имя рек),/ чуде́с твои́х многоподава́нием просвеща́ема./ Те́мже зове́м Христу́:/ спаси́ чту́щих ве́рою па́мять Твоего́ апо́стола, Многоми́лостиве.

Величание

Велича́ем тя,/ апо́столе Христо́в (имя рек),/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Апостолам двум и многим

Тропарь, глас 3

Апо́столи святи́и (имена),/ моли́те Ми́лостиваго Бо́га,/да прегреше́ний оставле́ние/ пода́ст душа́м на́шим.

Кондак, глас 4

Ло́зие яви́стеся Христо́ва виногра́да, му́дрии,/ гро́здие принося́ще в доброде́телех,/ вино́ нам спасе́ния источа́юще,/ его́же прие́млем, весе́лия исполня́ющеся,/ пра́зднуем честну́ю ва́шу па́мять,/ в ню́же моли́те дарова́тися нам вели́цей ми́лости/ и отпуще́нию грехо́в, Госпо́дни апо́столи.

Величание

Велича́ем вас,/ святи́и апо́столи (имена),/ весь мир уче́ньми свои́ми просвети́вшия/ и вся концы́ ко Христу́ приве́дшия.

Святителю единому

Тропарь, глас 4

Пра́вило ве́ры, и о́браз кро́тости,/ воздержа́ния учи́теля/ яви́ тя ста́ду твоему́/ я́же веще́й и́стина;/ сего́ ра́ди стяжа́л еси́ смире́нием высо́кая,/ нището́ю бога́тая, о́тче священнонача́льниче (имя рек),/ моли́ Христа́ Бо́га спасти́ся душа́м на́шим.

Кондак, глас 2

Боже́ственный гром, труба́ духо́вная,/ ве́ры насади́телю, и отсека́телю ересе́й,/ Тро́ицы уго́дниче, вели́кий святи́телю (имя рек),/ со а́нгелы предстоя́ при́сно,/ моли́ непреста́нно о всех нас.

Величание

Велича́ем тя,/ святи́телю о́тче (имя рек),/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Святителям двум и многим

Тропарь, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лости Твоея́ от нас,/ но моли́твами их в ми́ре упра́ви живо́т наш.

Кондак, глас 8

Я́ко доброде́телей учи́телие и иера́рхов украше́ние,/ Це́рковь пою́щи вас сла́вит./ Моли́твами ва́шими пода́йте, чту́щим вас любо́вию,/ доброде́телей исправле́ние,/ и собла́знов избавле́ние, я́ко непобеди́мии.

Величание

Велича́ем вас,/ святи́телие вели́ции (имена),/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Преподобному единому

Тропарь, глас 8

В тебе́, о́тче, изве́стно спасе́ся е́же по о́бразу:/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со а́нгелы сра́дуется, преподо́бне (имя рек), дух твой.

Ин тропарь, глас 1

Пусты́нный жи́тель, и во пло́ти а́нгел, и чудотво́рец яви́лся еси́, Богоно́се о́тче наш (имя рек),/ посто́м, бде́нием, моли́твою небе́сныя дарова́ния прии́м,/ исцеля́вши неду́жныя и ду́ши ве́рою приходя́щих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеления.

Ин тропарь, глас 8

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в у плодоноси́л еси́,/ и был еси́ свети́льник вселе́нней,/ сия́я чудесы́, (имя рек) о́тче наш,/ моли́ Христа́ Бо́га спасти́ся душа́м на́шим.

Кондак, глас 2

Чистото́ю душе́вною боже́ственно вооружи́вся,/ и непреста́нныя моли́твы,/ я́ко копие́ вручи́в кре́пко,/ пробо́л еси́ бесо́вская ополче́ния,/ (имя рек) о́тче наш,/ моли́ непреста́нно о всех нас.

Величание

Ублажа́ем тя,/ преподо́бне о́тче (имя рек),/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Преподобным двум и многим

Тропарь, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лости Твоея́ от нас,/ но моли́твами их в ми́ре упра́ви живо́т наш.

Кондак, глас 2

Волне́ний мно́жество невла́жно проходя́ще,/ безпло́тныя враги́ струя́ми слез ва́ших кре́пко погрузи́ли есте́, /Богому́дрии и преподо́бнии,/ и чуде́с дар прии́мше,/ моли́те непреста́нно о всех нас.

Величание

Ублажа́ем вас,/ преподо́бнии отцы́ (имена),/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Мученику единому

Тропарь, глас 4

Му́ченик Твой, Го́споди, (имя рек)/ во страда́нии свое́м вене́ц прия́т нетле́нный от Тебе́, Бо́га на́шего;/ име́яй бо кре́пость Твою́, мучи́телей низложи́,/ сокруши́ и де́монов немощны́я де́рзости./ Того́ моли́твами спаси́ ду́ши на́ша.

Кондак, глас 2

Звезда́ све́тлая яви́лся еси́,/ непреле́стная ми́рови56,/ Со́лнца Христа́ возвеща́ющи,/ заря́ми твои́ми, страстоте́рпче (имя рек),/ и пре́лесть погаси́л еси́ всю,/ нам же подае́ши свет, моля́ся непреста́нно о всех нас.

Величание

Велича́ем тя,/ страстоте́рпче святы́й (имя рек),/ и чтим честна́я страда́ния твоя́,/ я́же за Христа́/ претерпе́л еси́.

Мученикам двум и многим

Тропарь, глас 4

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего,/ и́муще бо кре́пость Твою́, мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

Ин тропарь, глас 1

Боле́зньми святы́х, и́миже о Тебе́ пострада́ша,/ умоле́н бу́ди, Го́споди,/ и вся на́ша боле́зни исцели́,/ Человеколю́бче, мо́лимся.

Кондак, глас 8

Свети́льницы све́тлии я́вльшеся,/ Боже́ственнии му́ченицы,/ тварь всю све́тлостию чуде́с озаря́ете,/ неду́ги разреша́ющей и глубо́кую тьму всегда́ отгоня́юще,/ Христу́ Бо́гу моля́щеся непреста́нно о всех нас.

Величание

Велича́ем вас,/ страстоте́рпцы святи́и (имена),/ и чтим честна́я страда́ния ва́ша,/ я́же за Христа́/ претерпе́ли есте́.

Священномученику единому

Тропарь, глас 4

И нра́вом прича́стник,/ и престо́лом наме́стник апо́столом быв,/ дея́ние обре́л еси́, Богодухнове́нне,/ в виде́ния восхо́д:/ сего́ ра́ди сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче (имя рек),/ моли́ Христа́ Бо́га спасти́ся душа́м на́шим.

Кондак, глас 4

Во святи́телях благоче́стно пожи́в,/ и муче́ния путь проше́д,/ и́дольския угаси́л еси́ же́ртвы,/ и побо́рник быв твоему́ ста́ду, богому́дре,/ те́мже тя почита́юще, та́йно вопие́м ти:/ от бед изба́ви ны при́сно твои́ми мольба́ми,/ о́тче наш (имя рек).

Величание

Велича́ем тя,/ священному́чениче (имя рек),/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Священномученикам двум и многим

Тропарь, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лости Твоея́ от нас,/ но моли́твами их в ми́ре упра́ви живо́т наш.

Кондак, глас 3

Я́ко свети́льницы незаходи́мии Разу́мнаго Со́лнца,/ соше́дшеся днесь восхва́лим пе́сньми,/ возсия́ли бо есте́ су́щим во тьме неразу́мия,/ всех созыва́юще к высоте́ благоче́стия, священному́ченицы./ Тем вопие́м вам: ра́дуйтеся, по́стников всех основа́ние.

Величание

Велича́ем вас,/ священному́ченицы Христо́вы (имена),/ и чтим святу́ю па́мять ва́шу:/ вы бо мо́лите за нас/ Христа́ Бо́га на́шего.

Преподобномученику единому

Тропарь, глас 8

В тебе́, о́тче, изве́стно спасе́ся, е́же по о́бразу:/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со а́нгелы сра́дуется, преподо́бне (имя рек), дух твой.

Кондак, глас 2

Я́ко по́стника благоче́стна и иску́сна,/ и страда́льца произволе́нием честна́,/ и пусты́ни жи́теля сообра́зна,/ в пе́снех досто́йно восхва́лим (имя рек), приснохва́льнаго:/ той бо зми́я попра́л есть.

Величание

Ублажа́ем тя,/ преподобному́чениче (имя рек),/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Преподобномученикам двум и многим

Тропарь, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лости Твоея́ от нас,/ но моли́твами их в ми́ре упра́ви живо́т наш.

Кондак, глас 2

Волне́ний мно́жество невла́жно проходя́ще,/ безпло́тныя враги́ струя́ми слез ва́ших кре́пко погрузи́ли есте́,/ Богому́дрии, преподо́бнии му́ченицы,/ и чуде́с дар прии́мше, моли́те непреста́нно о всех нас.

Величание

Ублажа́ем вас,/ преподо́бнии му́ченицы (имена),/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Мученице единой

Тропарь, глас 4

Агница Твоя́, Иису́се, (имя рек)/ зове́т ве́лиим гла́сом:/ Тебе́, Женише́ мой, люблю́,/ и Тебе́ и́щущи страда́льчествую/ и сраспина́юся и спогреба́юся креще́нию Твоему́,/ и стражду́ Тебе́ ра́ди, я́ко да ца́рствую в Тебе́/ и умира́ю за Тя, да и живу́ с Тобо́ю;/ но я́ко же́ртву непоро́чную приими́ мя, с любо́вию поже́ршуюся Тебе́./ Тоя́ моли́твами, я́ко Ми́лостив, спаси́ ду́ши на́ша.

Кондак, глас 2

Храм твой всечестны́й,/ я́ко цельбу́ душе́вную обре́тше, вси ве́рнии/ велегла́сно вопие́м ти:/ де́во му́ченице (имя рек), великоимени́тая,/ Христа́ Бога моли́ непреста́нно о всех нас.

Величание

Велича́ем тя,/ страстоте́рпице Христо́ва (имя рек),/ и чтим честно́е страда́ние твое́,/ е́же за Христа́/ претерпе́ла еси́.

Мученицам двум и многим

Тропарь, глас 1

Агницы слове́сныя,/ Агнцу и Па́стырю приведо́стеся муче́нием ко Христу́/ тече́ние сконча́вше и ве́ру соблю́дше;/ те́мже днесь ра́достною душе́ю соверша́ем, досточу́днии,/ святую ва́шу па́мять,/ Христа́ велича́юще.

Кондак, глас 4

Страстоте́рпиц Христо́вых па́мять пра́зднуем,/ и ве́рою прося́ще по́мощи,/ изба́витися всем от вся́кия ско́рби, зову́ще:/ Бог наш с на́ми,/ и́же сих просла́вивый, я́коже изво́ли.

Величание

Велича́ем вас,/ страстоте́рпицы святы́я (имена),/ и чтим честна́я страда́ния ва́ша,/ я́же за Христа́/ претерпе́ли есте́.

Преподобной жене единой

Тропарь, глас 8

В тебе́, ма́ти, изве́стно спасе́ся, еже по о́бразу:/ прии́мши бо крест, после́довала еси́ Христу́,/ и де́ющи учи́ла еси́ презира́ти у́бо плоть, прехо́дит бо;/ прилежа́ти же о души́, ве́щи безсме́ртней;/ те́мже и со а́нгелы сра́дуется, преподо́бная (имя рек), дух твой.

Кондак, глас 2

За любо́вь Госпо́дню, преподо́бная,/ поко́я жела́ние возненави́дела еси́,/ поще́нием дух твой просвети́вши:/ кре́пко бо зве́ри победи́ла еси́;/ но молитвами твои́ми проти́вных шата́ние разори́.

Величание

Ублажа́ем тя,/ преподо́бная ма́ти (имя рек),/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Преподобным женам двум и многим

Тропарь, глас 2

И́стинному жела́нию уневе́стившеся, Христосла́внии,/ и вре́меннаго обру́чника отве́ргшеся совокупле́ния,/ и доброде́тельными по́двиги возра́стше,/ на высоту́ востеко́сте нетле́ния,/ красноду́шнии и многобога́тии,/ столпи́ мона́шествующих жен и пра́вило;/ те́мже о нас моли́те непреста́нно, любо́вию ва́шу па́мять пра́зднующих.

Кондак, глас 2

Телеса́ своя́ посто́м изнури́вше,/ и неусы́пными моли́твами моля́ще Зижди́теля о гресе́х свои́х,/ я́ко да прии́мете соверше́нное проще́ние,/ и прия́сте Боже́ственное оставле́ние и Ца́рствие Небе́сное,/ моли́те Христа́ Бо́га о всех нас.

Величание

Ублажа́ем вас,/ преподо́бнии ма́тери (имена),/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Преподобномученице единой

Тропарь, глас 4

Агница Твоя́, Иису́се, (имя рек)/ зове́т ве́лиим гла́сом:/ Тебе́, Женише́ мой, люблю́,/ и Тебе́ и́щущи страда́льчествую/ и сраспина́юся и спогреба́юся креще́нию Твоему́/ и стражду́ Тебе́ ра́ди,/ я́ко да ца́рствую в Тебе́, и умира́ю за Тя,/ да и живу́ с Тобо́ю;/ но я́ко же́ртву непоро́чную приими́ мя, с любо́вию поже́ршуюся Тебе́./ Тоя́ молитвами,/ я́ко Ми́лостив, спаси́ ду́ши на́ша.

Кондак, глас 4

Божественная па́мять твоя́ (имя рек),/ днесь возсия́вши яви́ся ми́рови я́ко со́лнце,/ сказу́ющи житие́ твое́:/ ты бо воздержа́нием плотска́я двиза́ния* разо́рши,/ и страда́ния кро́вию уневе́стилася еси́ Христо́ви;/ те́мже хва́ляще тя изба́ви от вся́ких зол, да зове́м ти:/ ра́дуйся, мати преподо́бная.

Величание

Велича́ем тя,/ страстоте́рпице свята́я (имя рек),/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Священноисповеднику и преподобноисповеднику

Тропарь, глас 8

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ архиере́ев богодухнове́нное удобре́ние,/ (имя рек) прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

Кондак, глас 2

Наслади́вся, Богому́дре, воздержа́ния,/ и жела́ния плотска́я ты успи́л еси́,/ яви́вся ве́рою возраща́емь,/ и я́ко живота́ дре́во ра́йское процве́л еси́,/ (имя рек) о́тче свяще́нный.

Величание священноисповеднику

Велича́ем тя,/ святи́телю о́тче (имя рек),/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Величание преподобноисповеднику

Ублажа́ем тя,/ преподо́бне о́тче (имя рек),/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Праведному единому

Тропарь, глас 2

Пра́ведного Твоего́ (имя рек), Го́споди, па́мять пра́зднующе,/ тем Тя мо́лим:/ спаси́ ду́ши на́ша.

Праведной единой

Пра́ведной Твое́й (имя рек), Го́споди, па́мять пра́зднующе,/ той Тя мо́лим:/ спаси́ ду́ши на́ша.

Праведным двум и многим

Тропарь, глас 2

Пра́ведных Твои́х (имя рек), Го́споди, па́мять пра́зднующе,/ те́ми мо́лим Тя:/ спаси́ ду́ши на́ша.

Безмездникам и чудотворцам

Тропарь, глас 8

Святи́и безсре́бреницы и чудотво́рцы,/ посети́те не́мощи на́ша:/ ту́не прия́сте, ту́не дади́те нам.

Кондак, глас 2

Благода́ть прии́мше исцеле́ний,/ простира́ете здра́вие су́щим в ну́ждах,/ вра́чеве, чудотво́рцы пресла́внии,/ но ва́шим посеще́нием ра́тников де́рзости57 низложи́те,/ мир исцеля́юще чудесы́.

Величание

Велича́ем вас,/ чудотво́рцы сла́внии (имя рек),/ и чтим честна́я страда́ния ва́ша,/ я́же за Христа́/ претерпе́ли есте́.

Ино величание

Велича́ем вас,/ чудотво́рцы сла́внии (имена),/ и чтим святу́ю па́мять ва́шу,/ наста́вницы заблу́ждшим,/ исцели́тели боля́щим/ и собесе́дницы а́нгелом.

Христа ради юродивым

Тропарь, глас 1

Глас апо́стола Твоего́ Па́вла услы́шав глаго́лющ:/ мы юро́ди Христа́ ра́ди,/ раб Твой, Христе́ Бо́же, (имя рек)/ ю́род бысть на земли́ Тебе́ ра́ди;/ те́мже па́мять его́ почита́юще,/ Тебе́ мо́лимся: Го́споди, спаси́ ду́ши на́ша.

Кондак, глас 8

Вы́шния красоты́ жела́я,/ ни́жния сла́сти теле́сныя то́щно оста́вил еси́,/ нестяжа́нием су́етнаго ми́ра,/ а́нгельское житие́ проходя́, сконча́вся, (имя рек) блаже́нне;/ с ни́миже Христа́ Бо́га моли́ непреста́нно о всех нас.

Величание

Ублажа́ем тя,/ святы́й пра́ведный (имя рек),/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

* * *

56

Непрелестная мирови – не вводящая мир в заблуждения, истинная, неподвижная.

57

Ратников дерзости – злодейства вражеские (диавольские).


Источник: Полный тропарион : Тропари, кондаки и величания на праздники Господни, Богородичны, святых угодников Божиих и икон Божией Матери на каждый день года / [Сост.: Т. С. Олейникова]. - М. : Ставрос (Тип. АО Мол. гвардия), 2003-. / Кн. 2. - 2003. - 685 с.

Комментарии для сайта Cackle