8/21 Преподобной Пелагии (457). Преподобного Трифона, архимандрита Вятского (1612). Преподобного Досифея Верхнеостровского, Псковского (1482).

Тропарь преподобной Пелагии, глас 8

В тебе́, ма́ти, изве́стно спасе́ся, е́же по о́бразу... (общий преподобной жене).

Кондак, глас 2

Те́ло твое́ поста́ми изнури́вши,/ бде́нными моли́твами Творца́ умоли́ла еси́ о дея́ниих твои́х,/ я́ко да прии́меши соверше́нное оставле́ние,/ е́же и обрела́ еси́, ма́ти, я́ве,/ пу́ть покая́ния показа́вши.

Величание

Ублажа́ем тя,/ преподо́бная ма́ти Пелаги́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Трифону, архимандриту Вятскому, глас 4

От земны́х на Небе́сная помы́слив,/ и́ноческое житие́ измла́да, преподо́бне, возлюби́в,/ и де́лом соверши́в ко Го́споду любо́вь,/ и тве́рдым умо́м Его́ Духнове́нным уче́нием озаря́я мир,/ и, возлюби́в, блаже́нне, все́нощное бде́ние/ и моли́тву непреста́нну и наставле́ния Боже́ственнаго Ра́зума,/ и́нок ста́до собра́, му́дре,/ и наста́вил еси́ ко све́ту Богоразу́мия, Три́фоне о́тче наш,/ Христа́ Бо́га моли́ дарова́ти душа́м на́шим ве́лию ми́лость.

Ин тропарь, глас тойже

Я́ко светоза́рная звезда́/ возсия́л еси́ от восто́ка до за́пада,/ оста́вль бо свое́ оте́чество,/ доше́л еси́ Вя́тския страны́ и Богоспаса́емаго гра́да Хлы́нова,/ в не́мже оби́тель во сла́ву Пресвяты́я Богоро́дицы созда́в,/ и та́мо на доброде́тель впери́вся,/ собра́л еси́ и́ночествующих мно́жество,/ и, сих наставля́я на путь спасе́ния,/ был еси́ а́нгелом собесе́дник/ и по́стником соприча́стник, Три́фоне преподо́бне,/ с ни́ми Христа́ Бо́га моли́ спасти́ся душа́м на́шим.

Кондак, глас 8

Днесь в нача́ле основа́ния доброде́телем, блаже́нне,/ положи́л еси́ в души́ свое́й страх Бо́жий,/ от ю́ности взем крест свой,/ благоче́стно Христо́ви после́довал еси́,/ а́нгельским о́бразом облече́ся и бысть мона́х преди́вен,/ в доброде́телех цветя́ше, к бу́дущим Бо́гови простира́лся./ И свое́й пло́ти, я́ко врагу́, неми́лостив, о́тче, был еси́,/ терпе́нием яви́ся, блаже́нне, я́ко зла́то искуше́но в горни́ле,/ но и ны́не не забу́ди посеща́ти чад свои́х,/ помина́й нас, чту́щих пресвяту́ю па́мять твою́,/ да вси благода́рне вопие́м ти:/ ра́дуйся, прему́дре Три́фоне, наста́вниче мона́хов.

Ин кондак, глас 2

Волне́ний мно́жество невла́жно преходя́,/ безпло́тныя враги́ струя́ми слез твои́х кре́пко погрузи́л еси́,/ Богому́дре Три́фоне,/ и чуде́с дар прие́м,/ моли́ непреста́нно о всех нас.

Величание

Ублажа́ем тя,/ преподо́бне о́тче Три́фоне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Досифею Верхнеостровскому, Псковскому, глас 4

Я́ко свети́льник всесве́тел яви́лся еси́/ во о́строве Пско́вскаго е́зера,/ преподо́бне о́тче наш Досифе́е./ Ты бо крест Христо́в от ю́ности своея́ на ра́мо взем,/ усе́рдно Тому́ после́довал еси́,/ чистото́ю Бо́гови прибли́жився,/ отону́дуже и чуде́с дарова́нием обогати́лся еси́./ Те́мже и мы, притека́юще ко святе́й ико́не твое́й, уми́льно глаго́лем:/ о́тче преподо́бне, моли́ Христа́ Бо́га/ спасти́ся душа́м на́шим.

Кондак, глас 2

Чистото́ю душе́вною Боже́ственно вооружи́вся/ и непреста́нныя моли́твы, я́ко копие́, вручи́в,/ кре́пко пробо́л еси́ бесо́вская ополче́ния,/ Досифе́е о́тче наш,/ моли́ непреста́нно о всех нас.

Величание

Ублажа́ем тя,/ преподо́бне о́тче Досифе́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.