Азбука верыПравославная библиотекаБогослужениеСледованная Псалтирь (современным шрифтом)


Следованная Псалтирь (современным шрифтом)

Содержание

Молитвы перед началом чтения Псалтири
Кафизма первая По 1-й кафисме Кафизма вторая По 2-й кафисме Кафизма третия По 3-й кафисме Кафизма четвертая По 4-й кафисме Кафизма пятая По 5-й кафисме Кафизма шестая По 6-й кафисме Кафизма седмая По 7-й кафисме Кафизма осмая По 8-й кафисме Кафизма девятая По 9-й кафисме Кафизма десятая По 10-й кафисме Кафизма перваянадесять По 11-й кафисме Кафизма втораянадесять По 12-й кафисме Кафизма третиянадесять По 13-й кафисме Кафизма четвертаянадесять По 14-й кафисме Кафизма пятаянадесять По 15-й кафисме Кафизма шестаянадесять По 16-й кафисме Кафизма седмаянадесять По 17-й кафисме Кафизма осмаянадесять По 18-й кафисме Кафизма девятаянадесять По 19-й кафисме Кафизма двадесятая По 20-й кафисме Молитвы по прочтении нескольких кафисм или всей Псалтири  

 
Молитвы перед началом чтения Псалтири
Разу́мно да бу́дет, ка́ко подоба́ет осо́бь пе́ти Псалти́рь:
А́ще иере́й, глаго́лет:
Благослове́н Бо́г на́ш, всегда́, ны́не и при́сно и во ве́ки веко́в.
А́ще ли ни, глаго́ли умиле́нно:
Моли́твами святы́х оте́ц на́ших, Го́споди Иису́се Христе́, Бо́же на́ш, поми́луй на́с. Ами́нь.
Царю́ Небе́сный: Трисвято́е. И по О́тче на́ш:
Тропари́, гла́с 6
Поми́луй на́с, Господи, поми́луй на́с, вся́каго бо отве́та недоуме́юще, сию́ Ти́ моли́тву я́ко Влады́це, гре́шнии прино́сим: поми́луй на́с.
Сла́ва: Честно́е проро́ка Твоего́, Го́споди, торжество́, Не́бо Це́рковь показа́, с челове́ки лику́ют А́нгели. Того́ моли́твами, Христе́ Бо́же, в ми́ре упра́ви живо́т на́ш, да пое́м Ти́: Аллилу́ия.
И ны́не: Мно́гая мно́жества мои́х, Богоро́дице, прегреше́ний, к Тебе́ прибего́х, Чи́стая, спасе́ния тре́буя: посети́ немощству́ющую мою́ ду́шу и моли́ Сы́на Твоего́ и Бо́га на́шего да́ти ми́ оставле́ние, я́же соде́ях лю́тых, еди́на благослове́нная.
Го́споди, поми́луй (40). и поклони́ся, ели́ко ти́ мо́щно.
Та́же моли́тва Cвяте́й Живонача́льней Тро́ице:
Всесвята́я Тро́ице, Бо́же и Соде́телю всего́ ми́ра, поспеши́ и напра́ви се́рдце мое́ нача́ти с ра́зумом и конча́ти де́лы благи́ми богодухнове́нныя сия́ кни́ги, я́же Святы́й Ду́х усты́ Дави́довы отры́гну, и́хже ны́не хощу́ глаго́лати а́з недосто́йный, разуме́я же свое́ неве́жество, припа́дая, молю́ся Ти́ и, е́же от Тебе́ по́мощи прося́: Го́споди, упра́ви у́м мо́й и утверди́ се́рдце мое́, не о глаго́лании усте́н стужа́ти си́, но о ра́зуме глаго́лемых весели́тися и пригото́витися на творе́ние до́брых де́л, я́же учу́ся и глаго́лю; да до́брыми де́лы просвеще́н, на суди́щи десны́я Ти́ страны́ прича́стник бу́ду со все́ми избра́нными Твои́ми. и ны́не, Влады́ко, благослови́, да, воздохну́в от се́рдца, и язы́ком воспою́, глаго́ля си́це:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Та́же посто́й ма́ло, до́ндеже утиша́тся вся́ чу́вства. Тогда́ сотвори́ нача́ло не вско́ре, без ле́ности, со умиле́нием и сокруше́нным се́рдцем. Рцы́ cиé: «Блаже́н му́ж...» ти́хо и разу́мно, со внима́нием, а не борзя́ся, я́коже и умо́м разумева́ти глаго́лемая.