Суббота

Па́мять соверша́ем все́х от ве́ка усо́пших благочести́вых христиа́н, оте́ц и бра́тий на́ших.

На Го́споди воззва́х: поста́вим стихо́в, 6.

Стихи́ры му́ченичны, осмогла́сника 3, гла́с 6:

Му́ченицы Твои́ Го́споди, не отверго́шася Тебе́, ни отступи́ша от за́поведей Твои́х: те́х моли́твами поми́луй на́с.

Му́чившиися тебе́ ра́ди Христе́, мно́гия му́ки претерпе́ша: моли́твами Го́споди и моле́нием и́х, все́х на́с сохрани́.

Страстоте́рпцы му́ченицы, и небе́снии гра́ждане, на земли́ пострада́вшии, мно́гия му́ки претерпе́ша, и соверше́нный прия́ша вене́ц на небесе́х, да мо́лятся о душа́х на́ших.

И усо́пших, 3. Гла́с 8. Подо́бен: И́же во Еде́ме:

От ве́ка ме́ртвых дне́сь все́х по и́мени, с ве́рою пожи́вших благоче́стно, па́мять соверша́юще ве́рнии, Спа́са и Го́спода воспои́м, прося́ще приле́жно си́м в ча́с суда́ отве́т благи́й да́ти, Тому́ Самому́ Бо́гу на́шему, все́й судя́щему земли́, десна́го Его́ предстоя́ния получи́ти в ра́дости, в ча́сти пра́ведных, и во святы́х жре́бии све́тлем, и досто́йным бы́ти Небе́снаго Ца́рствия Его́.

Свое́ю кро́вию челове́ки Спа́се искупи́вый, и сме́ртию Твое́ю от сме́рти го́рькия изба́вивый на́с, и жи́знь ве́чную подая́й на́м Воскресе́нием Твои́м, вся́ упоко́й Го́споди усо́пшыя благоче́стно, или́ в пусты́нях, или́ во граде́х, или́ в мо́ри, или́ на земли́, или́ на вся́ком ме́сте, цари́ же, свяще́нники, архиере́и, мона́хи и бельцы́, в во́зрасте вся́ком всеро́дном, и сподо́би я́ Небе́снаго Ца́рствия Твоего́.

Из ме́ртвых воста́нием Твои́м Христе́, не ктому́ сме́рть облада́ет уме́ршими благоче́стно: те́мже мо́лимся приле́жно: рабы́ Твоя́ упоко́й во дво́рех Твои́х, и в не́дрех Авраа́ма, от Ада́ма да́же до дне́сь послужи́вшыя Тебе́ чи́сто отцы́, и бра́тию на́шу, дру́ги, вку́пе и сро́дники, вся́каго челове́ка в житии́ послужи́вша ве́рно, и к Тебе́ преста́вльшася, многови́дно и многообра́зно, Бо́же, и сподо́би я́ получи́ти Небе́снаго Ца́рствия Твоего́.

Сла́ва: гла́с 8:

Пла́чу и рыда́ю, егда́ помышля́ю сме́рть, и ви́жду во гробе́х лежа́щую, по о́бразу Бо́жию созда́нную на́шу красоту́, безъобра́зну, безсла́вну, не иму́щую ви́да. О чудесе́! Что́ е́же о на́с сие́ бы́сть та́инство? Ка́ко преда́хомся тле́нию? Ка́ко сопряго́хомся сме́рти? Вои́стинну Бо́га повеле́нием, я́коже е́сть пи́сано, подаю́щаго преста́вленным поко́й.

И ны́не: Богоро́дичен, гла́с 6:

Кто́ Тебе́ не ублажи́т Пресвята́я Де́во? Кто́ ли не воспое́т Твоего́ пречи́стаго Рождества́? Безле́тно бо от Отца́ возсия́вый Сы́н Единоро́дный, То́йже от Тебе́ Чи́стыя про́йде, неизрече́нно вопло́щся: естество́м Бо́г сы́й, и естество́м бы́в челове́к на́с ра́ди, не во двою́ лицу́ разделя́емый, но во двою́ естеству́ несли́тно познава́емый, того́ моли́ Чи́стая, Всеблаже́нная, поми́ловатися душа́м на́шым.

Све́те ти́хий:

Вме́сто же проки́мна, пое́м: Аллилу́иа: на гла́с 8:

Сти́х: Блаже́ни, я́же избра́л, и прия́л еси́ Го́споди.

Сти́х: И па́мять и́х в ро́д и ро́д.

Сподо́би Го́споди:

На стихо́вне стихи́ры, гла́с 6.

Му́ченичен: Кре́ст тво́й Го́споди, му́чеником бы́сть ору́жие непобеди́мое: ви́дяху бо предлежа́щую сме́рть, и предзря́ще бу́дущую жи́знь, наде́ждею в тя́ укрепля́хуся: те́х моли́твами поми́луй на́с.

Ме́ртвым:

Сти́х: Ду́шы и́х во благи́х водворя́тся.

Ты́ мя почти́л еси́ о́бразом Твои́м, руку́ Твое́ю, Спа́се, созда́ние живописа́вый в веще́ственном зра́це у́мнаго существа́ подо́бие: его́же и о́бщника мя́ поста́вил еси́, положи́вый су́щими на земли́ облада́ти мне́ самовла́стием сло́ва. Те́мже, Спа́се, рабы́ твоя́, во стране́ живу́щих, в селе́ниих пра́ведных упоко́й.

Сти́х: Блаже́ни я́же избра́л, и прия́л еси́ Го́споди.

Да мне́ достоя́ние про́чих живота́ разсу́дится, вертогра́д во Еде́ме вся́кими укра́шен сады́, печа́ли и попече́ния свобо́дна мя́ прича́стника боже́ственныя жи́зни, равноа́нгельна на земли́, смеше́на учини́вый: те́мже Спа́се, рабы́ Твоя́ во стране́ живы́х, в селе́ниих пра́ведных упоко́й.

Сла́ва: гла́с 6:

Нача́ток ми́ и соста́в зижди́тельное Твое́ бы́сть повеле́ние: восхоте́в бо от неви́димаго же и ви́димаго жи́ва мя́ соста́вити естества́: от земли́ у́бо те́ло созда́л еси́, да́л же ми́ еси́ ду́шу Боже́ственным Твои́м и животворя́щим вдохнове́нием. Те́мже, Спа́се, рабы́ Твоя́, во стране́ живу́щих и в селе́ниих пра́ведных упоко́й.

И ны́не: Богоро́дичен:

Моли́твами ро́ждшия Тя́ Христе́, и му́ченик Твои́х апо́стол, проро́к, иера́рхов, преподо́бных и пра́ведных, и все́х святы́х, усо́пшыя рабы́ Твоя́ упоко́й.

Отпусти́тельный тропа́рь, гла́с 8:

Глубино́ю му́дрости человеколю́бно вся́ стро́яй, и поле́зное все́м подава́яй, еди́не Соде́телю, упоко́й Го́споди ду́шы ра́б Твои́х: на Тя́ бо упова́ние возложи́ша, Творца́ и Зижди́теля и Бо́га на́шего.

Сла́ва, и ны́не: Богоро́дичен:

Тебе́ и сте́ну, и приста́нище и́мамы, и моли́твенницу благоприя́тну к Бо́гу, Его́же родила́ еси́, Богоро́дице Безневе́стная, ве́рных спасе́ние.

И быва́ет отпу́ст.

Та́же свяще́нник твори́т: Благослове́н Бо́г на́ш: И глаго́лем псало́м: Живы́й в по́мощи Вы́шняго: Аллилу́иа: три́жды. Сти́х: Блаже́ни я́же избра́л, и прия́л еси́ Го́споди: Та́же тропа́рь: Глубино́ю му́дрости: и Богоро́дичен: Тебе́ и сте́ну: Та́же ме́ртвеннии тропари́: Благослове́н еси́ Го́споди: И помина́ет свяще́нник все́х преждепочи́вших оте́ц и бра́тий на́ших: и моли́тву. По возгла́се же псало́м 50.

И а́бие пое́м настоя́щий ме́ртвенный кано́н во усыпа́льнице, его́же краестро́чие: Шесту́ю припева́ю отше́дшым пе́снь.

Пе́снь 1. Гла́с 6.

Ирмо́с: Я́ко по су́ху пешеше́ствовав Изра́иль:

В Небе́сных Черто́зех, всегда́ до́блии му́ченицы мо́лят Тя́ Христе́: я́же от земли́ преста́вил еси́ ве́рныя, ве́чных бла́г получи́ти сподо́би.

Украше́й вся́ческая, живо́тное смеше́ние, посреде́ мя челове́ка, смире́ния вку́пе и вели́чества созда́л еси́: те́мже ра́б Твои́х ду́шы Спа́се упоко́й.

Сла́ва:

Рая́ жи́теля и земледе́лателя в нача́ле мя́ учини́л еси́, престу́пльша же Твою́ за́поведь изгна́л еси́. Те́мже ра́б Твои́х ду́шы Спа́се упоко́й.

И ны́не: Богоро́дичен:

И́же от ребра́ созда́вый Е́ву пре́жде на́шу прама́терь, из пречи́стаго Твоего́ чре́ва в пло́ть одева́ется, е́юже сме́рти кре́пость, Чи́стая, разруши́.

Пе́снь 3.

Ирмо́с: Не́сть свя́т я́коже Ты́ Го́споди Бо́же мо́й:

Зако́нно пострада́ша Твои́ му́ченицы Жизнода́вче, и венце́м побе́ды украси́вшеся, от Тебе́ преста́вльшымся ве́рным ве́чное избавле́ние подаю́т.

Наказа́в пе́рвее мно́гими чудесы́, и зна́меньми мене́ заблу́ждшаго, напосле́док самаго́ себе́ истощи́л еси́ я́ко сострада́тель, и поиска́в, обре́л и спа́сл еси́.

Сла́ва:

От теку́щих непостоя́тельныя тли́, к Тебе́ преше́дшыя, в селе́ниих ве́чных жи́ти ра́достно сподо́би, Бла́же, оправда́в ве́рою же и благода́тию.

И ны́не: Богоро́дичен:

Не́сть непоро́чны я́коже Ты́ Пречи́стая Богома́ти, еди́на от ве́ка Бо́га и́стиннаго зачала́ еси́ во чре́ве, сме́рти разруши́вшаго си́лу.

Та́же, ирмо́с:

Не́сть свя́т я́коже Ты́ Го́споди Бо́же мо́й, вознесы́й ро́г ве́рных Твои́х Бла́же, и утверди́вый на́с на ка́мени испове́дания Твоего́.

Та́же, ектениа́. И седа́лен, гла́с 6:

Вои́стинну суета́ вся́ческая, житие́ же се́нь и со́ние: и́бо всу́е мяте́тся вся́к земноро́дный, я́коже рече́ Писа́ние: егда́ ми́р приобря́щем, тогда́ во гро́б всели́мся, иде́же вку́пе ца́рие и ни́щии. Те́мже Христе́ Бо́же преста́вльшыяся упоко́й я́ко Человеколю́бец.

Сла́ва, и ны́не: Богоро́дичен:

Всесвята́я Богоро́дице, во вре́мя живота́ моего́ не оста́ви мене́, челове́ческому предста́тельству не вве́ри мя́, но Сама́ заступи́, и поми́луй мя́.

Пе́снь 4.

Ирмо́с: Христо́с моя́ си́ла:

Прему́дрости бо́льшее явля́я позна́ние, и е́же о даре́х многосоверше́нныя Влады́ко благосты́ни, му́ченическия ли́ки а́нгелом сочета́л еси́.

Неизрече́нныя сла́вы Твоея́ получи́ти сподо́би, к Тебе́ преста́вльшыяся, иде́же Христе́ веселя́щихся е́сть жили́ще, и гла́с чи́стаго ра́дования.

Сла́ва:

Пою́щих приими́ Боже́ственную держа́ву Твою́, и́хже от земли́ прия́л еси́, ча́да све́та те́х соде́ловая, грехо́вную мглу́ очища́я Многоми́лостиве.

И ны́не:

Прия́телище пречи́стое, хра́м всенепоро́чный, ковче́г пресвяты́й, де́вственное ме́сто свяще́ния, Тебе́ добро́ту Иа́ковлю Влады́ка избра́л е́сть.

Пе́снь 5.

Ирмо́с: Бо́жиим све́том:

Я́ко всепло́дие свяще́нное, и я́ко нача́ток челове́ческаго му́ченицы естества́, просла́вленному прине́сшеся Бо́гу, на́м спасе́ние при́сно хода́тайствуют.

Небе́снаго пребыва́ния, раздая́ния дарова́ний, сподо́би Го́споди, пре́жде усо́пшыя ве́рныя рабы́ Твоя́, подая́ прегреше́ний избавле́ние.

Сла́ва:

И́же еди́н естество́м Животво́рец, и́же бла́гости вои́стинну неизсле́димая пучи́на, сконча́вшыяся Ца́рствия Твоего́ сподо́би Ще́дре, еди́не Безсме́ртне.

И ны́не: Богоро́дичен:

Кре́пость и пе́ние и́же из Тебе́ Влады́чице ми́ру Рожде́йся, и спасе́ние бы́вый поги́бшым, и́же от а́довых вра́т избавля́я, ве́рою Тебе́ блажа́щыя.

Пе́снь 6.

Ирмо́с: Жите́йское мо́ре:

На Кресте́ пригвожда́емь, му́ченическия ли́ки к Себе́ собра́л еси́, подража́ющыя стра́сть Твою́, Бла́же. Те́мже мо́лим Ти ся, к Тебе́ преста́вленныя ны́не упоко́й.

Неизрече́нною сла́вою Твое́ю, егда́ прии́деши стра́шный суди́ти ми́ру всему́, на о́блацех благоволи́ све́тло сре́сти Тебе́ Изба́вителю, я́же от земли́ прия́л еси́ ве́рныя рабы́ Твоя́.

Сла́ва:

Исто́чник жи́зни Сы́й, му́жеством Боже́ственным окова́нныя Влады́ко, изводя́й рабы́ Твоя́, я́же к Тебе́ ве́рно отше́дшыя, в сла́дости ра́йстей всели́.

И ны́не:

В зе́млю возврати́хомся, престу́пльше Бо́жию за́поведь боже́ственную: Тобо́ю же, Де́во, на не́бо от земли́ вознесо́хомся, тлю́ сме́ртную оттря́сше.

Посе́м ирмо́с:

Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Та́же, ектениа́. Конда́к: Со святы́ми упоко́й: И и́кос.

Пе́снь 7.

Ирмо́с: Росода́тельну у́бо:

Изба́вльшиися Твое́ю кро́вию му́ченицы пе́рваго преступле́ния, окропи́вшеся же свое́ю кро́вию, прообразу́ют я́ве Твое́ заколе́ние: благослове́н еси́ Бо́же оте́ц на́ших.

Свире́пеющую сме́рть умертви́л еси́, Сло́ве живонача́льнейшее, в ве́ре же усо́пшыя приими́ ны́не, воспева́ющыя и глаго́лющыя, Христе́: благослове́н еси́ Бо́же оте́ц на́ших.

Воодуши́вый мя́ челове́ка вдохнове́нием Боже́ственным, Богонача́льнейший Влады́ко, преста́вленныя Ца́рствия Твоего́ сподо́би, пе́ти Тебе́ Спа́се: благослове́н еси́ Бо́же оте́ц на́ших.

Богоро́дичен:

Превы́шши вся́кия тва́ри Пренепоро́чная была́ еси́, заче́нши Бо́га, сокруши́вшаго сме́ртная врата́, и вереи́ сте́ршаго: те́мже Тя́ Чи́стая песносло́вим ве́рнии, я́ко Богома́терь.

Пе́снь 8.

Ирмо́с: Из пла́мене преподо́бным:

Кре́пко по́двиги показу́юще, и побе́ды венце́м украси́стеся, му́ченицы Христо́вы страстоте́рпцы, зову́ще: Тя́ превозно́сим Христе́ во ве́ки.

Свяще́нне житие́ оста́вльшыя ве́рныя, и к Тебе́ Влады́це преше́дшыя приими́ кро́тце, упокоева́я, я́ко благоутро́бен, Тя́ превознося́щыя во вся́ ве́ки.

Ны́не в земли́ кро́тких вся́ водворя́тися пре́жде усо́пшыя Спа́се благоизво́ли, ве́рою я́же в Тя́ оправда́в, и благода́тию Тя́ превознося́щыя во вся́ ве́ки.

Богоро́дичен:

Вси́ Тя блажи́м Всеблаже́нная, ро́ждшую Сло́ва вои́стинну су́щаго Блаже́ннаго, пло́ть на́с ра́ди бы́вшаго: Его́же превозно́сим во вся́ ве́ки.

Пе́снь 9.

Ирмо́с: Бо́га челове́ком невозмо́жно:

Наде́жда му́чеников ли́ки укрепи́, и к Твое́й любви́ распале́нней впери́, бу́дущих си́м предвообрази́вши непоколеби́мый вои́стинну поко́й: его́же преста́вленныя Бла́же, ве́рныя сподо́би получи́ти.

Све́тлаго и Боже́ственнаго получи́ти сия́ния Твоего́ Христе́, ве́рою преста́вльшымся благоволи́, в не́дрех Авраа́мовых упокое́ние, я́ко Еди́н ми́лостив, те́м да́руя, и ве́чнаго сподобля́я блаже́нства.

И́же сы́й естество́м бла́г и благоутро́бен, и воли́тель ми́лости, и благоутро́бия бе́здна, я́же от ме́ста сего́ озлобле́ния, и се́ни сме́ртныя Спа́се преста́вил еси́, иде́же сия́ет Тво́й све́т, ты́я учини́.

Богоро́дичен:

Се́нь святу́ю Чи́стая разуме́ем, и ковче́г, и скрижа́ль Тя́ зако́на и благода́ти: Тобо́ю бо оставле́ние дарова́ся, оправда́нным же кро́вию Воплоще́ннаго из Твоего́ Чре́ва Всенепоро́чная.

Трисвято́е: Пресвята́я Тро́ице: По О́тче на́ш: Тропа́рь: Глубино́ю му́дрости: И богоро́дичен: Тебе́ и сте́ну: И помина́ет свяще́нник обы́чно. И отпу́ст.

по шестопса́лмии, Аллилу́иа: на гла́с 8, со стихи́ его́.

Тропа́рь:

Глубино́ю му́дрости человеколю́бно вся́ стро́яй, и поле́зное все́м подава́яй, Еди́не Соде́телю, упоко́й Го́споди ду́шы ра́б Твои́х: на Тя́ бо упова́ние возложи́ша, Творца́ и Зижди́теля и Бо́га на́шего.

Сла́ва, и ны́не: Богоро́дичен. Гла́с то́йже:

Тебе́ и сте́ну, и приста́нище и́мамы, и Моли́твенницу благоприя́тну к Бо́гу, Его́же родила́ еси́, Богоро́дице Безневе́стная, ве́рных спасе́ние.

Та́же обы́чное стихосло́вие: Рече́ Госпо́дь Го́сподеви моему́: седи́ одесну́ю Мене́:

На все́х же ектениа́х стихосло́вия и кано́на помина́ются вси́ преждеотше́дшии отцы́ и бра́тия на́шя.

По 1-м стихосло́вии глаго́лем

седа́льны ме́ртвенны, и му́ченичны. Гла́с 6:

Страда́льческая противле́ния в по́двизе, мучи́тельныя ра́ны на му́ченики: и стоя́ху ли́цы безпло́тных, по́чести держа́ще побе́ды: удиви́ша прему́дрии мучи́телей и царе́й, низложи́ша велиа́ра испове́данием Христо́вым. Укрепи́вый и́х Го́споди, сла́ва Тебе́.

Сти́х: Ди́вен Бо́г во святы́х свои́х, Бо́г Изра́илев.

Страда́льческий по́двиг претерпе́вше святи́и, и по́чести побе́ды от Тебе́ прии́мше, упраздни́ша кова́рства беззако́нных, прия́ша венцы́ нетле́ния: те́ми Бо́же, спаси́ ду́шы на́шя.

Сти́х: Воззва́ша пра́веднии, и Госпо́дь услы́ша и́х.

Святы́х Твои́х па́мять Го́споди, показа́ся я́коже ра́й, и́же во еде́ме, в не́й бо ра́дуется вся́ тва́рь: и пода́ждь на́м те́х моли́твами, ми́р и ве́лию ми́лость.

Сла́ва: поко́ин:

В селе́ниих избра́нных, и во стране́ живу́щих, я́же прия́л еси́ Иису́се, благоче́стно усо́пшыя учини́, я́ко благоуве́тливый Бо́г, и испо́лни невече́рняго све́та, небе́сныя Твоея́ ра́дости сподо́би.

И ны́не: Богоро́дичен:

Благослове́нную нареки́й Твою́ Ма́терь, прише́л еси́ на стра́сть во́льным хоте́нием, возсия́в на Кресте́, взыска́ти хотя́ Ада́ма, глаго́ля а́нгелом: сра́дуйтеся Мне́, я́ко обре́теся поги́бшая дра́хма. Вся́ му́дре устро́ивый Бо́же на́ш, сла́ва Тебе́.

Та́же, Блаже́ни непоро́чнии: на две́ статии́.

Тропари́ ме́ртвеннии:

Благослове́н еси́ Го́споди, научи́ мя оправда́нием Твои́м.

Святы́х ли́к обре́те исто́чник жи́зни, и две́рь ра́йскую: да обря́щу и а́з пу́ть покая́нием! Поги́бшее овча́ а́з е́смь, воззови́ мя Спа́се, и спаси́ мя.

Благослове́н еси́ Го́споди, научи́ мя оправда́нием Твои́м.

А́гнца Бо́жия пропове́давше, и закла́ни бы́вше я́коже а́гнцы, и к жи́зни нестаре́емей святи́и, и присносу́щней преста́вльшеся, того́ приле́жно му́ченицы моли́те, долго́в разреше́ние на́м дарова́ти.

Благослове́н еси́ Го́споди, научи́ мя оправда́нием Твои́м.

В пу́ть у́зкий хо́ждшии приско́рбный, вси́ в житии́ Кре́ст я́ко яре́м взе́мшии, и Мне́ после́довавшии ве́рою, прииди́те наслади́теся, и́хже угото́вах ва́м по́честей и венцо́в небе́сных.

Благослове́н еси́ Го́споди, научи́ мя оправда́нием Твои́м.

О́браз е́смь неизрече́нныя Твоея́ сла́вы, а́ще и я́звы ношу́ прегреше́ний: уще́дри Твое́ созда́ние, Влады́ко, и очи́сти Твои́м благоутро́бием, и возжеле́нное оте́чество пода́ждь ми́, рая́ па́ки жи́теля мя́ сотворя́я.

Благослове́н еси́ Го́споди, научи́ мя оправда́нием Твои́м.

Дре́вле у́бо от не су́щих созда́вый мя́, и о́бразом Твои́м Боже́ственным почты́й, преступле́нием же за́поведи па́ки мя́ возврати́вый в зе́млю, от нея́же взя́т бы́х, на е́же по подо́бию возведи́, дре́внею добро́тою возъобрази́тися.

Благослове́н еси́ Го́споди, научи́ мя оправда́нием Твои́м.

Упоко́й Бо́же рабы́ Твоя́, и учини́ я́ в раи́, иде́же ли́цы святы́х Го́споди, и пра́ведницы сия́ют я́ко свети́ла: усо́пшыя рабы́ Твоя́ упоко́й, презира́я и́х вся́ согреше́ния.

Сла́ва:

Трисия́тельное еди́наго Божества́, благоче́стно пое́м вопию́ще: Свя́т еси́ О́тче Безнача́льный, Собезнача́льный Сы́не, и Боже́ственный Ду́ше, просвети́ на́с ве́рою Тебе́ служа́щих, и ве́чнаго огня́ исхити́.

И ны́не: Богоро́дичен:

Ра́дуйся Чи́стая, Бо́га пло́тию ро́ждшая во спасе́ние все́х, Е́юже ро́д челове́ческий обре́те спасе́ние: Тобо́ю да обря́щем ра́й, Богоро́дице Чи́стая благослове́нная.

Аллилу́иа, аллилу́иа, аллилу́иа, сла́ва Тебе́ Бо́же. Три́жды.

Посе́м ектениа́ о усо́пших преждерече́ная: Па́ки и па́ки: Мы́ же: Го́споди, поми́луй. 40. Иере́й моли́тву: Бо́же духо́в:

И по возгла́се седа́лен, гла́с 5, за упоко́й:

Поко́й Спа́се на́ш с пра́ведными рабы́ Твоя́, и сия́ всели́ во дворы́ Твоя́, я́коже е́сть пи́сано, презира́я я́ко бла́г прегреше́ния и́х во́льная и нево́льная, и вся́ я́же в ве́дении и не в ве́дении, Человеколю́бче.

Сла́ва, и ны́не: Богоро́дичен:

От Де́вы возсия́вый ми́ру Христе́ Бо́же, сы́ны све́та То́ю показа́вый, поми́луй на́с.

Псало́м 50. Кано́н свята́го оби́тели, со ирмосо́м на 6: и настоя́щий на 8.

Канон, гла́с 8.

Студи́та творе́ние, в тро́ичных и богоро́дичных тропаре́х краестро́чие: Недосто́йнаго Фео́дора.

Пе́снь 1.

Ирмо́с: Пе́снь возсле́м лю́дие чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще, и вопию́ще: пои́м Тебе́ еди́ному Влады́це.

Вси́ помо́лимся Христу́, творя́ще па́мять дне́сь, от ве́ка ме́ртвых, да ве́чнаго огня́ изба́вит я́, в ве́ре усо́пшыя, и наде́жде жи́зни ве́чныя.

Глубино́ю суде́б твои́х Христе́, всепрему́дре ты́ предъопредели́л еси́ коего́ждо кончи́ну жи́зни, преде́л и о́браз. Те́мже я́же покры́ гро́б во вся́кой стране́, на суде́ спаси́, Всеще́дрый.

Преде́лы жи́зни на́шея да́вый, те́мже усо́пшыя от жите́йския но́щи, дне́ невече́рняго сы́ны покажи́ Го́споди, свяще́нники правосла́вныя, цари́ же и вся́ лю́ди Твоя́.

Я́же покры́ вода́, и бра́нь пожа́т, тру́с же я́же объя́т, и уби́йцы уби́ша, и о́гнь я́же попали́ ве́рныя, Ми́лостиве, в ча́сти учини́ пра́ведных.

Вся́ презира́яй плотски́я до́лги на́шя Спа́се на́ш, во вся́ком во́зрасте всего́ ро́да челове́ча, пред суди́щем Твои́м поста́ви неосужде́нны, Тебе́ Созда́телю отвеща́ющыя.

Сла́ва: Тро́ичен:

Три́ еди́наго Естества́ пою́ Ли́ца самоипоста́сная, нерожде́нна Отца́, Сы́на ро́ждшагося, и Ду́ха Свята́го, безнача́льное Ца́рство, вла́сть, Божество́ еди́но.

И ны́не: Богоро́дичен:

Вои́стинну Ты яви́лася еси́ не́бо на земли́, бо́льшее вы́шняго небесе́, Безневе́стная Де́во: из Тебе́ бо возсия́ Со́лнце в ми́ре, влады́чествуяй пра́вдою.

Катава́сиа: Пе́снь возсле́м:

Пе́снь 2.

Ирмо́с: Ви́дите ви́дите, я́ко А́з е́смь Бо́г ва́ш, пре́жде ве́к рожде́нный от Отца́, и от Де́вы в после́дняя без му́жа заче́ншийся, и разруши́вый гре́х пра́отца Ада́ма, я́ко Человеколю́бец.

Ви́дите ви́дите, я́ко А́з е́смь Бо́г ва́ш, пра́ведным судо́м водрузи́вый преде́лы жи́зни, и в нетле́ние от тли́ прие́мляй вся́, усо́пшыя в наде́жди ве́чнаго воскресе́ния.

От четыре́х коне́ц, Го́споди, прие́мляй ве́рно усо́пшыя в мо́ри, или́ на земли́, или́ в река́х, исто́чницех, или́ езе́рех, или́ в рове́нницех, сне́дь звере́м бы́вшыя, и пти́цам, и гадо́м, вся́ упоко́й.

В Твое́й дла́ни вся́ческая Го́споди, предразсуди́л еси́ разре́шшыяся в соста́вы четы́ри, в прише́ствии Твое́м собра́в воскреси́, вся́ я́же в неве́дении и ра́зуме, проща́я те́х прегреше́ния.

О стра́шнаго Твоего́ втора́го Го́споди прише́ствия! Зане́ я́ко в ви́де мо́лнии на зе́млю прише́д, воздви́гнеши все́ созда́ние Твое́ суди́тися: в ве́ре Тебе́ тогда́ пожи́вших, сре́тших Тя́, с Тобо́ю бы́ти сподо́би.

Сла́ва: Тро́ичен:

Пресоверше́нная Еди́нице, Пребоже́ственная, Триипоста́сная, нерожде́нне О́тче, и Сы́не Единоро́дне, Ду́ше от Отца́ исходя́й, Сы́ном же явля́яйся, Существо́ еди́но и Естество́, Госпо́дьство, Ца́рство, спаси́ все́х на́с.

И ны́не: Богоро́дичен:

Неизглаго́ланное чу́до Твоего́ Рождества́ Ма́ти Де́во: ка́ко бо и ражда́еши, и Чиста́ еси́ в то́мже? Ка́ко Отроча́ ражда́еши, и не ве́си иску́са му́жеска отню́д? Я́коже ве́сть па́че естества́ от Мене́ новоле́пно Сло́во Бо́жие ро́ждшееся.

Катава́сиа: Ви́дите, ви́дите:

Пе́снь 3.

Ирмо́с: Утвержде́й руко́ю Твое́ю, Сло́ве Бо́жий, небеса́, просвеще́нием твоего́ и́стиннаго позна́ния, утверди́ и на́с на Тя́ наде́ющихся сердца́.

Преше́дшыя жития́ тече́ние, в сла́ве благоче́стной, пра́ведным оде́ятися венце́м сподо́би Бо́же, и ве́чных бла́г наслади́тися.

Напра́сно восхище́нныя, попаля́емыя от мо́лний, и изме́рзшыя мра́зом, и вся́кою ра́ною, упоко́й Бо́же, егда́ огне́м вся́ иску́сиши.

Присному́тное жития́ мо́ре преплы́вшыя Христе́, в нетле́нное Твоего́ жития́ сподо́би приста́нище притещи́, правосла́вным житие́м окормле́нныя.

И́хже вся́кое естество́ морски́х, и пти́ц небе́сных прия́т снеде́ние Христе́, Твои́ми судьба́ми воскреси́ Бо́же, в после́дний де́нь со сла́вою.

Сла́ва: Тро́ичен:

У́мно Боже́ственную Еди́ницу, в три́ Ли́ца про́сто, ку́пно е́же пресещи́, совокупля́ю несеко́мая: я́коже бо ско́рость мо́лнии, трисия́ющая ви́дится во еди́нстве.

И ны́не: Богоро́дичен:

Недоуме́нное Твое́ чу́до: без му́жа бо ражда́еши, и де́вство Твое́ Чи́стая соблюда́еши ро́ждши. Те́мже а́нгел мно́жество, и челове́ческий ро́д пое́т Тя́ во ве́ки.

Катава́сиа: Утвержде́й руко́ю Твое́ю Сло́ве Бо́жий небеса́:

Седа́лен, гла́с 5. Подо́бен: Собезнача́льное Сло́во:

На́с ра́ди претерпе́вый Кре́ст и сме́рть, и умертви́вый а́да, и совоскреси́вый ме́ртвыя, преста́вльшыяся от на́с Спа́се упоко́й, я́ко Человеколю́бец Бо́г, и в тре́петное и стра́шное прише́ствие Твое́ Жизнода́вче, я́ко име́яй мно́жество ми́лости, Ца́рствия Твоего́ сподо́би.

Сла́ва: то́йже.

И ны́не, Богоро́дичен:

Ско́рый Тво́й покро́в, и по́мощь и ми́лость покажи́ на рабе́х Твои́х, и во́лны Чи́стая, укроти́ су́етных помышле́ний, и па́дшую ду́шу мою́ возста́ви Богоро́дице: ве́м бо, ве́м Де́во, я́ко мо́жеши, ели́ка и хо́щеши.

Пе́снь 4.

Ирмо́с: Из горы́ приосене́нныя, сло́ве, проро́к, еди́ныя Богоро́дицы, хотя́ща воплоти́тися, богови́дно усмотри́, и со стра́хом славосло́вяше си́лу Твою́.

Отцы́ и пра́отцы, де́ды и пра́деды, от пе́рвых и да́же до после́дних, во благозако́нии уме́ршыя и благове́рии, вся́ помяни́ Спа́се на́ш.

В горе́, на пути́, на ме́стех пусты́х житие́ оста́вльшыя в ве́ре, мона́хи же и бельцы́, ю́ношы и ста́рцы, со святы́ми, Христе́, всели́.

От печа́ли и ра́дости прише́дшыя ненаде́жно, ве́рою а́бие премени́вшыя житие́, в благоде́нствии пострада́вшыя, или́ злоде́нствии, вся́ упоко́й Спа́се на́ш.

Я́же уби́ ме́чь, и ко́нь совосхити́, гра́д, сне́г и ту́ча умно́женная: я́же удави́ пли́нфа, или́ пе́рсть посы́па, Христе́ Спа́се на́ш упоко́й.

Сла́ва: Тро́ичен:

Стра́нно я́ко еди́но, и три́, Божество́, все́ по еди́ному Лицу́ неразде́льно: Оте́ц бо, Сы́н и Ду́х Святы́й е́сть, покланя́ема, я́ко еди́н Бо́г.

И ны́не: Богоро́дичен:

Напра́ви на́с Де́во моли́твами Твои́ми, окормля́ющи обурева́емыя волно́ю греха́, во спаси́тельная приста́нища Господороди́тельнице, избавля́ющи от вся́ких лю́тых.

Пе́снь 5.

Ирмо́с: У́тренюет ду́х мо́й к Тебе́, Бо́же, зане́ све́т повеле́ния прише́ствия Твоего́, и́миже у́бо озари́ у́м на́ш, Влады́ко, и наста́ви на стезю́ жи́зни.

Коего́ждо па́мять уме́рших, благоче́стно от ве́ка дне́сь творя́ще Го́споди, приле́жно ти́ вопие́м: вся́ упоко́й со святы́ми Твои́ми.

От вся́каго я́же прия́л еси́ ро́да и ро́да, в царе́х, в князе́х, или́ мона́шествующих правосла́вно Ще́дре, ве́чнаго изба́ви муче́ния.

Все́х, я́же созда́л еси́ поле́зная ве́дый, и́мже попусти́л еси́ Го́споди, внеза́пными паде́жми ненаде́жно умре́ти, изба́ви му́ки вся́кия Бо́же на́ш.

Огня́ приснопаля́щаго, и тмы́ несвети́мыя, скре́жета зубна́го, и че́рвия безконе́чно му́чащаго, и вся́каго муче́ния изба́ви Спа́се на́ш, вся́ ве́рно уме́ршыя.

Сла́ва: Тро́ичен:

Единопресто́льная, безнача́льная, Триипоста́сная Еди́нице, разделе́нием Еди́нство, и вопроти́в Ли́цы Естество́ иму́щая, во еди́но на́с совокупи́ хоте́ние Твои́х за́поведей.

И ны́не, Богоро́дичен:

Па́че огнезра́чных серафи́мов яви́лася еси́ Чи́стая Честне́йшая, поро́ждши си́м непристу́пнаго Иису́са Спа́са, воплоще́нием обожи́вшаго земноро́дных смеше́ние.

Пе́снь 6.

Ирмо́с: Содержи́ма мя́ приими́, Человеколю́бче, грехи́ мно́гими, и припа́дающа щедро́там Твои́м, я́ко проро́ка, Го́споди, и спаси́ мя.

Сме́рти разреши́в боле́зни, пострада́в Нача́льниче жи́зни Бо́же на́ш, усо́пшыя от ве́ка, рабы́ Твоя́ упоко́й.

Неизглаго́ланными Твои́ми судьба́ми, я́же уби́ша чаро́вная напое́ния, отра́вы, ко́стная удавле́ния со святы́ми Го́споди упоко́й.

Егда́ суди́ти бу́деши вся́ческим, стоя́щым наги́м открове́нным пред лице́м Твои́м, тогда́ Ще́дре, пощади́ послужи́вшыя Ти́ ве́рно, Бо́же.

После́днею у́бо трубо́ю воструби́вшу Твоему́ арха́нгелу, воскре́сние жи́зни все́х, тогда́ Христе́ рабы́ Твоя́ упоко́й.

От ве́ка я́же прия́л еси́ ве́рныя Бо́же, ро́д вся́кий челове́ческий, сподо́би во ве́ки с служа́щими Ти́ сла́вити Тя́.

Сла́ва: Тро́ичен:

Богонача́лие Трисвято́е, единопресто́льное, О́тче, Сы́не со Святы́м Ду́хом, Ты́ еси́ Бо́г мо́й, вседержи́тельством Твои́м содержа́й все́.

И ны́не, Богоро́дичен:

От ко́рене твоего́ возсия́ цве́т жи́зни, Иессе́е пра́отче взыгра́й, спаса́яй ми́р, от Чи́стыя Отрокови́цы Христо́с Бо́г.

Конда́к, гла́с 8:

Со святы́ми упоко́й Христе́ ду́шы ра́б Твои́х, иде́же не́сть боле́знь, ни печа́ль, ни воздыха́ние, но жи́знь безконе́чная.

И́кос:

Са́м еди́н еси́ безсме́ртный, сотвори́вый и созда́вый челове́ка: земни́и у́бо от земли́ созда́хомся, и в зе́млю ту́южде по́йдем, я́коже повеле́л еси́, созда́вый мя́ и реки́й ми́: я́ко земля́ еси́, и в зе́млю оти́деши, а́може вси́ челове́цы по́йдем, надгро́бное рыда́ние творя́ще пе́снь: аллилу́иа.

Пе́снь 7.

Ирмо́с: В нача́ле зе́млю основа́вый, и небеса́ сло́вом утверди́вый, благослове́н еси́ во ве́ки Го́споди Бо́же оте́ц на́ших.

Благоче́стно от ве́ка преста́вльшихся па́мять творя́ще вопие́м: благослове́н еси́ во ве́ки Го́споди Бо́же оте́ц на́ших.

Внеза́пу благоче́стно уме́ршыя, и от стремни́ны вся́кия па́дшыя, дре́ва, желе́за, вся́каго ка́мене, упоко́й Бо́же усо́пшыя ве́рныя.

В стра́шное Твое́ прише́ствие, Ще́дре, одесну́ю ове́ц Твои́х поста́ви, правосла́вно Ти́ в житии́ послужи́вшыя Христе́, и преста́вльшыяся к Тебе́.

В ли́це Христе́, избра́нных Твои́х вчини́ Твоя́ рабы́, вопи́ти Тебе́: благослове́н еси́ во ве́ки Го́споди, Бо́же оте́ц на́ших.

От земли́ пе́рсть соде́тельствовавый, пло́ть Ду́хом оживотвори́вый Спа́се Ще́дрый, я́же прия́л еси́, упоко́й Бо́же в нестаре́ющем животе́.

Сла́ва: Тро́ичен:

Я́коже треми́ со́лнцы Божество́, еди́ным све́та срастворе́нием, да воспое́тся, Оте́ц, и Сы́н, и Боже́ственный Ду́х, еди́н Естество́м, но три́ Ипоста́сьми.

И ны́не: Богоро́дичен:

Дави́дское согла́сно воспева́ем Ти́ пе́ние, го́ру Тя́ Бо́жию нарица́юще Де́во, в не́йже всели́вся пло́тию Сло́во, обоготвори́ на́с духо́вно в Себе́.

Пе́снь 8.

Ирмо́с: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Сокруши́вый пе́рвее се́нь сме́ртную, возсия́в я́ко со́лнце из гро́ба, сы́ны Воскресе́ния Твоего́ сотвори́, Го́споди сла́вы, вся́ уме́ршыя в ве́ре, во ве́ки.

Безве́стных и сокрове́нных Све́детелю, егда́ и́маши откры́ти дела́ тмы́, и сове́ты серде́ц на́ших, тогда́ не истяжи́ сло́ва, со все́ми ве́рою усо́пшими.

Егда́ и́маши се́сти на престо́ле, и повели́ши на су́д предста́ти, собра́нным трубо́ю от коне́ц земли́: тогда́ пощади́ все́х Христе́ я́ко Ми́лостивый.

Уме́ршым напра́сно от слу́чаев, от кли́ча же зе́льнаго, и ско́раго тече́ния, зауше́ния, удавле́ния же и ляга́ния, Го́споди сла́вы, ве́рою усо́пшым осла́би во ве́ки.

Благослови́м Отца́ и Сы́на, и Свята́го Ду́ха, Го́спода.

Я́ко Еди́ницу Существо́м пою́ Тя, я́ко Тро́ицу Ли́цы Тя́ чту́, О́тче, и Сы́не и Ду́ше Пресвяты́й, безнача́льную держа́ву Твоего́ Ца́рствия сла́влю во ве́ки.

И ны́не: Богоро́дичен:

Струи́ живы́я исто́чник запеча́танный, показа́лася еси́ Богоро́дице Де́во: без му́жа бо Го́спода ро́ждши, безсме́ртия ве́рныя напоя́еши водо́ю во ве́ки.

Хва́лим, благослови́м:

Ирмо́с: На горе́ святе́й просла́вльшася:

Пе́снь 9.

Ирмо́с: Проявле́нное на горе́ законополо́жнику во огни́ и купине́ Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Иде́же е́сть веселя́щихся жили́ще святы́х Твои́х Го́споди, вся́ от ве́ка усо́пшыя, в ве́ре же и наде́жди ра́доватися сподо́би.

Уме́ршыя Бо́жиим преще́нием, сме́ртных громо́в вся́ких с небесе́ изнесе́нных, земли́ разсе́дшейся, мо́рю возшуме́вшуся, вся́ ве́рныя Христе́ упоко́й.

Вся́кий во́зраст, ста́рцы, и ю́ныя младе́нцы, и де́ти, и ссу́щыя млеко́, му́жеское естество́ и же́нское, упоко́й Бо́же, я́же прия́л еси́ ве́рныя.

От ядови́тых угрызе́ний уме́ршыя, от поглоще́ния змие́в, от попра́ния ко́ней, и от удавле́ния и обе́шения от и́скренняго, ве́рою Ти́ послужи́вшыя упоко́й.

Коего́ждо по и́мени в ве́ре уме́ршыя от ве́ка, и от ро́да родо́в, неосужде́нно предста́ти Тебе́ Христе́, тогда́ в прише́ствии Твое́м сподо́би.

Сла́ва: Тро́ичен:

Еди́ный в Тро́ице Бо́же, сла́ва Тебе́ непреста́нно, а́ще бо и Бо́г Ки́йждо, но еди́н Естество́м е́сть, Оте́ц, и Сы́н, и Ду́х, трисве́тлыми сво́йствы.

И ны́не: Богоро́дичен:

Па́че ума́ Рождество́ Твое́: ражда́еши бо пре́жде Су́щаго, и млеко́м пита́еши несказа́нно Пищеда́вца ми́ру. держи́ши же содержа́щаго вся́, Христа́ еди́наго Изба́вителя на́шего Всенепоро́чная.

Та́же, Досто́йно е́сть:

Ексапостила́рий. Подо́бен: Не́бо звезда́ми:

Па́мять соверша́юще все́х усо́пших во Христе́, и коне́чный де́нь воспомя́нем ве́рнии, о на́с же и о о́ных Христа́ при́сно моля́ще.

Сла́ва, и ны́не: Богоро́дичен:

Сла́досте а́нгелов, скорбя́щих ра́досте, христиа́н предста́тельнице, Де́во Ма́ти Госпо́дня, заступи́ на́с, и изба́ви ве́чных му́к.

На хвали́тех, Вся́кое дыха́ние: поста́вим стихи́ четы́ре и пое́м настоя́щыя стихи́ры во гла́с 6.

Подо́бен: Отча́янная:

Стра́шный коне́ц сме́рти, и гро́зный су́д Влады́ки: о́гнь неугаси́мый угото́вися та́мо, че́рвь неусыпа́емый му́чай, и скре́жет зубо́в, тма́ кроме́шная е́сть, и ве́чное осужде́ние. Те́мже зове́м ко Спа́су: я́же избра́л еси́ от привре́менных, упоко́й, за ве́лию Твою́ ми́лость.

Вси́ в житии́ оста́вльшиися, прииди́те во гробе́х ужаса́ющеся, прини́кните и ви́дите ми́ра пре́лесть: где́ ны́не те́ла добро́та, и сла́ва бога́тства? Где́ же го́рдость жития́? вои́стинну су́етная вся́. Те́мже зове́м ко Спа́су: я́же избра́л еси́ от привре́менных, Упоко́й, за ве́лию Твою́ ми́лость.

Ны́не во гро́б и́же на престо́ле, ны́не и́же в порфи́ре во тлю́ облече́ся: не ктому́ бо на престо́ле, но во гро́бе лежи́т: се́ исчезе́ ца́рская держа́ва. Се́ я́ко со́ние челове́ческое прехо́дит житие́. Те́мже зове́м ко Спа́су: я́же избра́л еси́, упоко́й, за ве́лию Твою́ ми́лость.

Вся́ отсе́ле преложи́вшыяся в наде́жду жи́зни ве́чныя, и житие́ измени́вшыя вся́ким Спа́се о́бразом, вся́кий чи́н, и ро́д, и вся́кий во́зраст, му́жы вку́пе и жены́, и новорожде́нныя младе́нцы, я́ко Человеколю́бец в не́дрех учини́ Авраа́млих, и в ме́стех осла́бы, за ве́лию Твою́ ми́лость.

Сла́ва: гла́с 2:

Я́ко цве́т увяда́ет, и я́ко се́нь мимогряде́т, разруша́ется вся́к челове́к: па́ки же глася́щей трубе́, ме́ртвии я́ко в тру́се вси́ воста́нут ко Твоему́ сре́тению Христе́ Бо́же. Тогда́ Влады́ко, и́хже преста́вил еси́ от на́с, во святы́х Твои́х учини́ кро́вех, согреше́ния и́х, Благосе́рде, презира́я.

И ны́не: гла́с 6, Богоро́дичен:

Ты́ еси́ Бо́г на́ш, и́же прему́дростию соде́лавый вся́, и́же и проро́ки посла́вый на́м проро́чествовати Твое́ прише́ствие, и апо́столы пропове́дати Твоя́ вели́чия: и о́ви у́бо проро́чествоваху прише́ствие Твое́, о́ви же креще́нием просвети́ша язы́ки, му́ченицы же пострада́вше получи́ша сла́ву от си́х, и мо́лятся приле́жно Тебе́ Влады́це с ро́ждшею Тя́ Ма́терию: упоко́й, Бо́же, ду́шы, я́же прия́л еси́, и на́с сподо́би Ца́рствия Твоего́, Кре́ст претерпе́вый мене́ ра́ди осужде́ннаго, Изба́вителю мо́й и Бо́же.

На стихо́вне стихи́ры, гла́с 6. Подо́бен: Всю́ отложи́вше:

Име́яй непости́жное к на́м благоутро́бие, и исто́чник неистоща́емый боже́ственныя бла́гости многоми́лостиве, к Тебе́ Влады́ко преше́дшыя в земли́ живы́х всели́, в селе́ниих возлю́бленных и вожделе́нных, одержа́ние да́руяй вы́ну пребыва́ющее: Ты́ бо за все́х пролия́л еси́ кро́вь Твою́ Христе́, и живоно́сною цено́ю ми́р искупи́л еси́.

Сти́х: Ду́шы и́х во благи́х водворя́тся.

Умерщвле́ние претерпе́л еси́ животво́рное во́лею, и жи́знь источи́л еси́, и сла́дость присносу́щную ве́рным да́л еси́, Боже́ственным Влады́ко благоутро́бием, еди́не Всеще́дре, безгре́шне: в ню́же мо́лимся, счини́ усо́пшыя в наде́жди воскресе́ния, разреше́ние прегреше́ний да́руяй: да все́ми пое́тся и́мя Твое́ Христе́, и спасе́ни сла́вим человеколю́бие Твое́.

Сти́х: Блаже́ни я́же избра́л, и прия́л еси́ Го́споди.

Живы́ми госпо́дьствующа богонача́льною вла́стию, и ме́ртвыми влады́чествующа, Тебе́ Христе́, ве́дуще мо́лим: ве́рныя рабы́ Твоя́, к Тебе́ еди́ному Благоде́телю отше́дшыя, Са́м упоко́й со избра́нными Твои́ми Человеколю́бче, в ме́стех прохлажде́ния, во святы́х све́тлостех: воли́тель бо ми́лости еси́, и спаса́еши я́ко Бо́г, я́же по о́бразу Твоему́ созда́л еси́, еди́не Многоми́лостиве.

Сла́ва: гла́с то́йже.

Боле́знь Ада́му бы́сть, дре́ва вкуше́нием, дре́вле во Еде́ме, егда́ зми́й я́д изблева́. Того́ бо ра́ди вни́де сме́рть всеро́дная, снеда́ющая челове́ка: но прише́д Влады́ка низложи́ зми́я, и воскресе́ние на́м дарова́. К Нему́же у́бо возопии́м: пощади́ Спа́се, и́хже прия́л еси́, и со святы́ми поко́й, я́ко Человеколю́бец.

И ны́не: Богоро́дичен:

Яви́лася еси́, пребыва́ние боголе́пное Пресвята́я, и Бо́га вмести́ла еси́, и Бо́га родила́ еси́ неискусобра́чная во двою́ существу́, во еди́ной же ипоста́си Чи́стая. Того́ моли́ Единоро́днаго и Перворожде́ннаго, Тя́ Де́во непоро́чну и по рождестве́ сохра́ншаго, ду́шы упоко́ити ве́рою усо́пшыя во све́те нетле́нныя све́тлости и блаже́нстве.

Тропа́рь: Глубино́ю му́дрости: Сла́ва, и ны́не: Тебе́ и сте́ну и приста́нище: И обы́чный отпу́ст.

На литурги́и изъобрази́тельная. Проки́мен апо́стола, гла́с 6: Ду́шы и́х во благи́х водворя́тся. Апо́стол в дея́ниих зача́ло 51. И ме́ртвенный апо́стол, зача́ло 163: Бра́тие, пе́рвый челове́к: Аллилу́иа, гла́с 4. Сти́х: Блаже́ни, я́же избра́л: Ева́нглие от Иоа́нна, зача́ло 67. И друго́е за упоко́й, зача́ло 21. Прича́стный: Блаже́ни, я́же избра́л и прия́л еси́ Го́споди. Аллилу́иа, три́жды.