Последование во святую и великую Неделю Пасхи и во всю Светлую седмицу

Последование Пасхальной седмицы составлено с таким расчетом, чтобы максимально подробно и доступно изложить не только уставные требования Типикона, но и отобразить наиболее устойчивые традиции Русской Православной церкви (например, унесение Плащаницы на полунощнице). Некоторые формулировки устава нередко трактуются по-разному – и не только в практике современного служения, но и у таких безусловных авторитетов, как, например, Розанов и Булгаков. В качестве примера можно привести распределение припевов на 9-й песне между тропарями канона. Подобные эпизоды мы постарались изложить с наибольшей тщательностью.

Из требных чинов в нашей публикации изложен чин отпевания, поскольку именно он более всего отличается от обычного, непасхального. Серьезным нововведением нашей публикации является изложение канона Пасхи с «ритмизованным» текстом. Пение канона «поскору», на двух аккордах является самым распространенным в московской традиции. Опыт показывает, что в быстром темпе его удобнее петь не по нотам, а по наглядному изображению долгих и коротких слогов текста. Предложенные здесь обозначения долгот таковы:

Черта над слогом означает удвоение короткой длительности.¹

Вероятно, в различных храмах могут оказаться и свои традиционные варианты ритмизации текста, и в этих случаях мы рекомендуем заменить наш, неизбежно субъективный вариант, на свою трактовку.

Нотное приложение сборника рассчитано на небольшие певческие составы. В прежние времена Пасху пели, как правило, большие, пышные хоры, и именно им адресованы почти все публикации пасхальных нот. Современное же состояние клироса в России по своему количественному, а иногда и качественному составу не позволяет использовать и десятой доли этих публикаций. К тому же большинство изданных запричастных концертов совершенно неприемлемо по стилистике в тех приходах, где бережно хранят традиции музыкального обихода.

Тем не менее, некоторые авторские сочинения очень устойчиво вошли в пасхальный обиход, например ирмосы Веделя, задостойники Бортнянского, Макарова, Балакирева, поэтому мы сочли возможным их опубликовать.

Главной же нашей задачей было сделать доступным звучание известных песнопений в самом простом, «квартетном» варианте. Это заставило нас иногда несколько изменять авторскую трактовку некоторых песнопений, например, задостойника под ред. Балакирева, «Кто бог велий…» Бортнянского, «Христос воскресе» Трубачева.

В нотном приложении мы используем два типа расположения голосов. В одном из них четыре голоса попарно распределены на два нотоносца, в другом – три голоса на верхней строке и один на нижней:

Второй способ чаще используется при записи обиходной, неавторской музыки. Такой способ котировки позволяет по-разному распределить мелодию двух верхних голосов между сопрано и тенорами, и даже полностью их удвоить, отчего характер песнопения приобретает большее полнозвучие.

Продолжая традицию многих нотных изданий пасхальных песнопений, мы публикуем иноязычные версии тропаря Пасхи, и делаем это в той музыкальной стилистике, которая типична для некоторых православных народов.

В нашу публикацию не вошел традиционный раздел запричастных концертов – по причинам, упомянутым выше. Вместо этого мы рекомендуем в Божественной Литургии после запричастного стиха спеть цикл стихир Пасхи или часы Пасхи Киево-Печерского распева.

Мы надеемся, что эта публикация, подобно ее более ранним версиям, займет должное место в библиотеке церковного регента и станет надежным «рабочим инструментом» в радостный период Светлой седмицы.

Е. Кустовский

Благословившу священнику, начинаем: Трисвятое и по Отче наш:

Го́споди, поми́луй (12 раз). Слава, и ныне: Таже:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Приидите, поклони́мся и припаде́м Самому́ Христу́, Царе́ви и Бо́гу на́шему.

Псалом 50-й.

И поем канон великия субботы: ирмосы по дважды, тропари же на дванадесять, со стихами песней. Последи ирмос оба лика.

Канон, глас 6

Песнь 1

Ирмос: Волно́ю морско́ю/ Скры́вшаго дре́вле/ гони́теля мучи́теля,/ под земле́ю скры́ша спасе́нных о́троцы:/ но мы я́ко отрокови́цы// Го́сподеви пои́м, сла́вно бо просла́вися.

Сла́ва Тебе́, Бо́же наш, сла́ва Тебе́.

Го́споди Бо́же мой, исхо́дное пе́ние, и надгро́бную Тебе́ песнь воспою́, погребе́нием Твои́м жи́зни мое́я вхо́ды отве́рзшему, и сме́ртию смерть и ад умертви́вшему.

Сла́ва Тебе́, Бо́же наш, сла́ва Тебе́.

Горе́ Тя на престо́ле, и до́ле во гро́бе, преми́рная и подзе́мная помышля́ющая, Спа́се мой, зы́бляхуся умерщвле́нием Тво́им: па́че ума́ бо, ви́ден был еси́ мертв, Живонача́льниче.

Сла́ва Тебе́, Бо́же наш, сла́ва Тебе́.

Да Твоея́ сла́вы вся испо́лниши, сшел еси́ в ни́жняя земли́: от Тебе́ бо не скры́ся соста́в мой и́же во Ада́ме, и погребе́н, истле́вша мя обновля́еши, Человеколю́бче.

Слава, и ныне: тойже.

Песнь 3

Ирмос: Тебе́, на вода́х/ Пове́сившаго всю зе́млю неодержи́мо,/ тварь ви́девши на Ло́бнем ви́сима,/ у́жасом мно́гим содрога́шеся,/ несть Свят,// ра́зве Тебе́, Го́споди, взыва́ющи.

Сла́ва Тебе́, Бо́же наш, сла́ва Тебе́.

Образы погребе́ния Твоего́ показа́л еси́, виде́ния умно́жив: ны́не же сокрове́нная Тво́я Богому́жно уясни́л еси́, и су́щим во а́де Влады́ко, не́сть Свя́т, ра́зве Тебе́, Го́споди, взыва́ющим.

Сла́ва Тебе́, Бо́же наш, сла́ва Тебе́.

Просте́рл еси́ дла́ни, и соедини́л еси́ дре́вле разстоя́щаяся: одея́нием же, Спа́се, е́же в плащани́це и во гро́бе, окова́нныя разреши́л еси́, несть Свят, ра́зве Тебе́, Господи, взыва́ющия.

Сла́ва Тебе́, Бо́же наш, сла́ва Тебе́.

Гро́бом и печа́тьми, Невмести́ме, содержи́мь был еси́ хоте́нием: и́бо си́лу Твою́ де́йствы показа́л еси́, богоде́йственно пою́щим: несть Свят, ра́зве Тебе́, Го́споди Человеколю́бче.

Слава, и ныне: тойже.

Го́споди, поми́луй, (трижды).

Седален, глас 1:

Гроб Твой, Спа́се, во́ини стрегу́щии, ме́ртви от облиста́ния я́вльшагося Ангела бы́ша, пропове́дающа жена́м воскресе́ние. Тебе́ сла́вим тли Потреби́теля, Тебе́ припа́даем воскре́сшему из гро́ба, и Еди́ному Бо́гу на́шему.

Слава, и ныне: тойже.

Песнь 4

Ирмос: На Кресте́ Твое́ Боже́ственное истоща́ние,/ прови́дя Авваку́м, ужа́сся вопия́ше:/ Ты си́льных пресе́кл еси́ держа́ву, Бла́же,// приобща́яся су́щим во а́де, я́ко Всеси́лен.

Сла́ва Тебе́, Бо́же наш, сла́ва Тебе́.

Седмы́й день днесь освяти́л еси́, его́же дре́вле благослови́л еси́ упокоени́ем дел: прево́диши бо вся́ческая и обновля́еши, суббо́тствуя, Спа́се мой, и назида́я.

Сла́ва Тебе́, Бо́же наш, сла́ва Тебе́.

Си́лою лу́чшаго, победи́вшаго Тебе́, от пло́ти душа́ Твоя́ раздели́ся: растерза́ющи бо обоя́ у́зы, сме́рти и а́да, Сло́ве, держа́вою Твое́ю.

Сла́ва Тебе́, Бо́же наш, сла́ва Тебе́.

Ад, Сло́ве, срет Тя огорчи́ся, Челове́ка зря обоже́на, уя́звлена ра́нами, и Всесильноде́теля, стра́шным же зра́ком поги́бе.

Слава, й ныне: тойже.

Песнь 5

Ирмос: Богоявле́ния Твоего́, Христе́,/ к нам ми́лостивно бы́вшаго,/ Иса́иа Све́т ви́дев Невече́рний,/ из нощи у́треневав взыва́ше:/ воскре́снут ме́ртвии, и воста́нут су́щи во гробе́х,// и вси земноро́днии возра́дуются.

Сла́ва Тебе́, Бо́же наш, сла́ва Тебе́.

Новотвори́ши земны́я Созда́телю, пе́рстен быв, и плащани́ца и гро́б явля́ют е́же в Тебе́, Сло́ве, та́инство: благообра́зный бо сове́тник, Тебе́, ро́ждшаго сове́т, образу́ет, в Тебе́ велеле́пно новотворя́щаго мя.

Сла́ва Тебе́, Бо́же наш, сла́ва Тебе́.

Сме́ртию сме́ртное, погребе́нием тле́нное прелага́еши, нетле́нно твори́ши бо, боголе́пно безсме́ртно творя́ прия́тие: плоть бо Твоя́ истле́ния не ви́де, Влады́ко, ниже́ душа́ Твоя́ во а́де странноле́пно оста́влена бысть.

Сла́ва Тебе́, Бо́же наш, сла́ва Тебе́.

Из Небра́чныя проше́д, и прободе́н в ре́бра, Соде́телю мой, из Нея́ соде́лал еси́ обновле́ние Евино, Ада́м быв, усну́в па́че естества́ сном есте́ственным, и жизнь воздви́гнув от сна и тле́ния, я́ко Всеси́лен.

Слава, и ныне: тойже.

Песнь 6

Ирмос: Ят бысть,/ но не удержа́н в пе́рсех ки́товых Ио́на:/ Твой бо о́браз нося́,/ страда́вшаго, и погребе́нию да́вшагося,/ я́ко от черто́га от зве́ря изы́де,/ приглаша́ше же кустоди́и,/ храня́щии су́етная и ло́жная,// ми́лость сию́ оста́вили есте́.

Сла́ва Тебе́, Бо́же наш, сла́ва Тебе́.

Бие́н был еси́, но не раздели́лся еси́, Сло́ве, ея́же причасти́лся еси́ пло́ти: а́ще бо и разори́ся Твой храм во вре́мя стра́сти, но и та́ко един бе соста́в Божества́ и пло́ти Твоея́. Во обои́х бо еди́н еси́ Сын, Сло́во Бо́жие, Бог и Челове́к.

Сла́ва Тебе́, Бо́же наш, сла́ва Тебе́.

Человекоуби́йственно, но не богоуби́йственно бысть прегреше́ние Ада́мово: а́ще бо и пострада́ Твоея́ плоти́ пе́рстное существо́, но Божество́ безстра́стно пребы́сть: тле́нное же Твое́ на нетле́ние преложи́л еси́, и нетле́нныя жи́зни показа́л еси́ Исто́чник воскресением.

Сла́ва Тебе́, Бо́же наш, сла́ва Тебе́.

Ца́рствует ад, но не ве́чнует, над ро́дом челове́ческим: Ты бо поло́жся во гро́бе держа́вне, Живонача́льною дла́нию, сме́рти ключи́ разве́ргл еси́, и пропове́дал еси́ от ве́ка та́мо спя́щим избавле́ние нело́жное, быв Спа́се ме́ртвым Пе́рвенец.

Слава, и ныне: тойже.

Го́споди, поми́луй. (трижды)

Таже кондак, глас 6:

Бе́здну заключи́вый, мертв зри́тся,/ и сми́рною и плащани́цею обвився,/ во гро́бе полага́ется я́ко сме́ртный Безсме́ртный./ Жены́ же приидо́ша пома́зати Его ми́ром,/ пла́чущия го́рько и вопию́щия:/ сия́ суббо́та есть преблагослове́нная,// в не́йже Христо́с усну́в воскре́снет тридне́вен.

Икос:

Содержа́й вся на Кре́ст вознесе́ся, и рыда́ет вся тварь, Того́ ви́дящи на́га ви́сяща на дре́ве, со́лнце лучи́ сокры́, и зве́зды отложи́ша свет, земля́ же со мно́гим стра́хом поколеба́ся, и мо́ре побеже́, и ка́мение распаде́ся, гро́би же мно́зи отверзо́шася, и телеса́ воста́ша святы́х муже́й. Ад ни́зу ст́енет, и иуде́е сове́туют оклевета́ти Христо́во Воскресе́ние, жены́ же взыва́ют: сия́ суббо́та есть преблагослове́нная, в не́йже Христо́с усну́в воскре́снет тридне́вен.

Песнь 7

Ирмос: Неизрече́нное чу́до,/ в пещи́ Изба́вивый преподо́бныя о́троки из пла́мене,/ во гро́бе мертв бездыха́нен полага́ется,/ во спасе́ние нас пою́щих:/ Изба́вителю Бо́же,// благослове́н еси́.

Сла́ва Тебе́, Бо́же наш, сла́ва Тебе́.

Уязви́ся ад, в се́рдце прие́м Уя́звеннаго копие́м в ре́бра, и воздыха́ет огне́м Боже́ственным иждива́емь, во спасе́ние нас, пою́щих: Изба́вителю Бо́же, благослове́н еси́.

Сла́ва Тебе́, Бо́же наш, сла́ва Тебе́.

Богат гроб, в себе́ бо прии́м яко спя́ща Соде́теля жи́зни, Боже́ственное сокро́вище показа́ся, во спасе́ние нас, пою́щих: Изба́вителю Бо́же, благослове́н еси́.

Сла́ва Тебе́, Бо́же наш, сла́ва Тебе́.

Зако́ном уме́рших, е́же во гро́бе положе́ние, всех прие́млет жизнь, и сего́ Исто́чника показу́ет воста́ния, во спасе́ние нас, пою́щих: Изба́вителю Бо́же, благослове́н еси́.

Сла́ва Тебе́, Бо́же наш, сла́ва Тебе́.

Еди́но бя́ше неразлу́чное, е́же во а́де, и во гро́бе, и во Еде́ме, Божество́ Христо́во, со Отце́м и Ду́хом, во спасе́ние нас, пою́щих: Изба́вителю Бо́же, благослове́н еси́.

Слава, и ныне: тойже.

Песнь 8

Ирмос: Ужасни́ся боя́йся Не́бо,/ и да подви́жатся основа́ния земли́:/ се бо в мертвеце́х вменя́ется в Вы́шних живы́й,/ и во гро́б мал странноприе́млется./ Его́же о́троцы благослови́те, свяще́нницы воспо́йте,/ лю́дие превозноси́те во вся ве́ки.

Сла́ва Тебе́, Бо́же наш, сла́ва Тебе́.

Разруши́ся Пречи́стый Храм, па́дшую же совозставля́ет ски́нию: Ада́му бо первому Вторы́й, Иже в Вы́шних живы́й, сни́де да́же до а́довых сокро́вищ. Его́же о́троцы благослови́те, свяще́нницы воспо́йте, лю́дие превозноси́те во вся́ ве́ки.

Сла́ва Тебе́, Бо́же наш, сла́ва Тебе́.

Преста́ де́рзость ученико́в, Аримафе́й же изря́дствует Ио́сиф: ме́ртва бо и на́га зря над все́ми Бо́га, про́сит и погреба́ет, зовы́й: о́троцы благослови́те, свяще́нницы воспо́йте, лю́дие превозноси́те во вся ве́ки.

Сла́ва Тебе́, Бо́же наш, сла́ва Тебе́.

О, чуде́с но́вых! О, бл́агости! О, неизрече́ннаго терпе́ния! Во́лею бо под земле́ю печатле́ется, Иже в Вы́шних живы́й, и я́ко льстец, Бог оклевета́ется. егоже о́троцы благослови́те, свяще́нницы воспо́йте, лю́дие превозноси́те во вся ве́ки.

Слава, и ныне: тойже.

Песнь 9

Ирмос: Не рыда́й Мене́, Ма́ти,/ зря́щи во гро́бе,/ Его́же во чре́ве без се́мене зачала́ еси́ Сы́на:/ воста́ну бо и просла́влюся,/ и вознесу́ со сла́вою непреста́нно, я́ко Бог,// ве́рою и любо́вию Тя велича́ющия.

Сла́ва Тебе́, Бо́же наш, сла́ва Тебе́.

В стра́ннем Твое́м рождестве́, боле́зней избежа́вши па́че естества́, ублажи́хся Безнача́льне Сы́не: ныне же Тя, Бо́же Мой, бездыха́нна зря́щи мертва, ору́жием печа́ли растерза́юся лю́те, но воскресни́, я́ко да возвели́чуся.

Сла́ва Тебе́, Бо́же наш, сла́ва Тебе́.

Земля́ покрыва́ет Мя хотя́ща, но устраша́ются а́довы вра́тницы, оде́яна ви́дяще оде́ждею окровавле́нною Ма́ти, отмще́ния: враги́ бо Кресто́м порази́в я́ко Бог, воскре́сну па́ки, и возвели́чу Тя.

Сла́ва Тебе́, Бо́же наш, сла́ва Тебе́.

Да ра́дуется тварь, да веселя́тся вси земноро́днии, враг бо плени́ся ад: с ми́ры жены́ да срета́ют, Ада́ма со Евою избавля́ю всеро́дна, и в тре́тий день воскре́сну.

Слава, и ныне: тойже.

И паки ирмос: Не рыда́й Мене́, Ма́ти:

И исходит настоятель Царскими вратами из алтаря, и кадит Святую Плащаницу. На словах же: Воста́ну бо и просла́влюся: взем Плащаницу, уносит ю в алтарь и полагает на Престоле, где и пребысть ей до отдания Пасхи.

Трисвятое, и по Отче наш:

Тропарь, глас 2:

Егда́ снизше́л еси́ к сме́рти, Животе́ Безсме́ртный,/ тогда́ ад умертви́л еси́ блиста́нием Божества́./ Егда́ же и уме́ршия от преиспо́дних воскреси́л еси́,/ вся Си́лы Небе́сныя взыва́ху:/ Жизнода́вче Христе́ Бо́же наш, сла́ва Тебе́.

Посем, ектения: Поми́луй нас, Бо́же: и отпуст малый: Христо́с и́стинный Бог наш:

Исходит настоятель со иереи крестным ходом, со идущим пред ним диаконом со двема свещами, и народ, и оба лика, поюще стихиру, глас 6:

Воскресе́ние Твое́, Христе́ Спа́се,/ а́нгели пою́т на Небесе́х,/ и нас на земли́ сподо́би/ чи́стым се́рдцем// Тебе́ сла́вити.

Обойдя храм, останавливаются в притворе, пред затворенными западными дверьми. Трижды назнаменовав их кадилом крестообразно возглашает велегласно настоятель:

Сла́ва Святе́й, и Единосу́щней, и Животворя́щей, и Неразде́льней Тро́ице, всегда́, ны́не и при́сно и во ве́ки веко́в.

Лик: Ами́нь.

Начинает настоятель с прочими служители велегласно настоящий тропарь, во глас 5:

Христо́с воскре́се из ме́ртвых,/ сме́ртию сме́рть попра́в,/ и су́щим во гробе́х живо́т дарова́в. (Трижды)

Лик: Христо́с воскре́се из ме́ртвых,/ сме́ртию сме́рть попра́в,/ и су́щим во гробе́х живо́т дарова́в. (Трижды)

Таже настоятель глаголет стихи:

Стих 1: Да воскре́снет Бог, и расточа́тся врази́ Его́, и да бежа́т от Лица́ Его́ ненави́дящии Его́.

И на каждый стих лик поет тропарь:

Христо́с воскре́се: весь по единожды.

Стих 2: Яко исчеза́ет дым, да исче́знут, я́ко та́ет воск от лица́ огня́.

Стих 3: Та́ко да поги́бнут гре́шницы от Лица́ Бо́жия, а пра́ведницы да возвеселя́тся.

Стих 4: Сей день, его́же сотвори́ Госпо́дь, возра́дуемся и возвесели́мся в онь.

Слава: Христо́с воскре́се: единожды.

И ныне: Христо́с воскре́се: единожды.

Таже настоятель поет вышшим гласом:

Христо́с воскре́се из ме́ртвых,/ сме́ртию сме́рть попра́в.

Лик: И су́щим во гробе́х живо́т дарова́в.

Ударяют во вся кампаны, и клеплют довольно, три звоны. Вшед же настоятель со иереи во святый алтарь, и диакон глаголет ектению великую: Ми́ром Го́споду помо́лимся. Возглас: Яко подоба́ет Тебе́ вся́кая сла́ва, че́сть и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

И начинает предстоятель канон, творение господина Иоанна Дамаскина. Глас 1-й. Ирмос: Воскресе́ния день: Ирмосы на 4: и тропари на 12, с припевы: Христо́с воскре́се из ме́ртвых. И паки последи кийждо лик поет ирмос. Последи же на сходе катавасия, ирмос тойже: Воскресе́ния день: И по нем: Христо́с воскре́се: весь трижды.

Творит же начало канона на каждую песнь всегда предстоятель, десной или левой стране случившейся начати. И кадит в начале канона святыя иконы, и оба лика, и братию по чину. И по каждой песни канона бывает Ектения малая вне алтаря. Возглас внутрь алтаря от иерея. По 1-й песни поет десная страна. По 3-й же поет левая. Сице поем и по прочих песнех.

Канон, глас 1

Песнь 1

Ирмос: Воскресения день,/ просвети́мся, людие,/ Пасха, Госпо́дня Пасха:/ от сме́рти бо к Жизни/ и от земли к Небеси/ Христос Бог нас преведе// побе́дную поющия.

Припев: Христос воскресе из мертвых.

Очи́стим чу́вствия и узрим/ Непристу́пным Светом/ воскресе́ния Христа/ блистающася/ и – ра́дуйтеся! – рекуща,/ я́сно да услышим,// побе́дную поюще.

Припев: Христос воскресе из мертвых.

Небеса́ у́бо досто́йно да веселятся,/ земля́ же да радуется,/ да празднует же мир,/ ви́димый же весь и Неви́димый:/ Христос бо воста,/ весе́лие вечное.

Богородичны господина Феофана и господина Иосифа. [Поем в Слава: и Ныне: во всю седмицу Светлую, кроме перваго дне.]

Припев: Пресвятая Богородице, спаси нас.

Умерщвле́ния преде́л сломила еси,/ ве́чную Жи́знь рождшая, Христа,/ из Гро́ба везсяявшаго днесь,/ Де́во Всенепорочная,// и мир просветившаго.

Припев: Пресвятая Богородице, спаси нас.

Воскре́сшаго ви́девши Сы́на Твоего́ и Бога,/ ра́дуйся со апо́столы, Богоблагода́тная Чистая,/ и е́же – ра́дуйся – первее,/ я́ко всех ра́дости вина́, восприяла еси,// Богома́ти Всенепорочная.

Ектения малая: Па́ки и па́ки:

Возглас священника: Яко Твоя́ держа́ва и Твое́ есть Ца́рство, и си́ла, и сла́ва, Отца́ и Сы́на и Свя́таго Ду́ха, ны́не и при́сно и во ве́ки веко́в.

Песнь 3

Ирмос: Прииди́те, пи́во пие́м новое,/ не от ка́мене непло́дна чудодеемое,/ но нетле́ния источник,/ из гро́ба одождивша Христа,// в Не́мже утверждаемся.

Христо́с воскре́се из ме́ртвых.

Ны́не вся испо́лнишася Света:/ Не́бо же, и земля́, и преисподняя./ Да пра́зднует у́бо вся тварь/ воста́ние Христово,// в не́мже утверждаеся.

Христо́с воскре́се из ме́ртвых.

Вчера́ спогребохся Тебе́, Христе,/ совостаю́ днесь/ воскресшу Тебе,/ сраспинахся Тебе вчера,// Сам мя спросла́ви, Спа́се, во Царствии Твоем.

Богородичны:

Пресвята́я Богор́одице, спаси́ нас.

На нетле́нную Жи́знь прихожду днесь/ бла́гостию Ро́ждшагося из Тебе́, Чистая,// и всем конце́м Свет облиставшаго.

Пресвята́я Богор́одице, спаси́ нас.

Бо́га, Его́же родила́ еси́ плотию,/ из ме́ртвых, якоже рече,/ воста́вша ви́девши, Чистая, ликуй// и Сего́ я́ко Бо́га, Пречи́стая, возвеличай.

Ектения малая: Па́ки и па́ки:

Возглас священника: Яко Ты еси́ Бог наш, и Тебе́ сла́ву возсыла́ем, Отцу́ и Сы́ну и Свя́тому Ду́ху, ны́не и при́сно и во ве́ки веко́в.

Ипакои, глас 4:

Предвари́вшия у́тро я́же о Ма́рии/ и обре́тшия ка́мень, отвале́н от гро́ба,/ слы́шаху от Ангела:/ во Све́те Присносу́щнем Су́щаго,/ с ме́ртвыми что и́щете, я́ко челове́ка?/ Ви́дите гро́бныя пелены́,/ тецы́те и ми́ру пропове́дите,/ я́ко воста́ Госпо́дь, умертви́вый смерть,// я́ко есть Сын Бо́га, спаса́ющаго род челове́ческий.

И чтение в Григории Богослове, егоже начало: На стра́жи мое́й ста́ну:

По чтении же, паки вжигают свечи братия.

Песнь 4

Ирмос: На Боже́ственней стражи/ Богоглаголивый Аввакум/ да ста́нет с на́ми и покажет/ светоно́сна Ангела,/ я́сно глаго́люща:/ днесь спасе́ние миру,/ я́ко воскресе Христос,// я́ко всесилен.

Христо́с воскре́се из ме́ртвых.

Мужеский у́бо пол,/ я́ко разве́рзый Де́вственную утробу,/ явися Христос/ я́ко Человек же,/ Агнец наречеся./ Непорочен же,/ я́ко невку́сен скверны,/ на́ша Пасха,/ и, я́ко Бог Истинен,// соверше́н речеся.

Христо́с воскре́се из ме́ртвых.

Яко единоле́тный Агнец,/ благослове́нный нам венец – Христос,/ во́лею за всех заклан бысть,/ Па́сха Чистительная,/ и па́ки из Гро́ба красное// Пра́вды нам возсия́ Солнце.

Христо́с воскре́се из ме́ртвых.

Богооте́ц убо Давид/ пред се́нным ковче́гом скака́ше, играя;/ лю́дие же Бо́жии святии,/ образо́в сбытие́ зряще,/ весели́мся Божественне,/ я́ко воскресе Христос,// я́ко всесилен.

Богородичны:

Пресвята́я Богор́одице, спаси́ нас.

Созда́вый Ада́ма, Твоего́ пра́отца, Чистая,/ зиждется от Тебе,/ и сме́ртное жили́ще разори́ Свое́ю смертию днесь,// и озари́ вся Боже́ственными блиста́ньми Воскресения.

Пресвята́я Богор́одице, спаси́ нас.

Его́же родила́ еси, Христа,/ прекра́сно из ме́ртвых возсия́вша, Чи́стая, зрящи,/ до́брая и непоро́чная в жена́х и красная,/ днесь во спасение всех/ со апо́столы ра́дующися, Того прославляй.

Ектения малая: Па́ки и па́ки:

Возглас священника: Яко Благ и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Песнь 5

Ирмос: Утренюем утреннюю глубоку,/ и вме́сто ми́ра песнь принесем Владыце,/ и Христа узрим,/ Пра́вды Солнце,/ всем Жизнь возсияюща.

Христо́с воскре́се из ме́ртвых.

Безме́рное Твое́ благоутробие/ а́довыми у́зами содержи́мии зряще,/ к Све́ту идяху, Христе,/ весе́лыми ногами,/ Па́сху хва́ляще вечную.

Христос воскре́се из ме́ртвых.

Присту́пим, свещеноснии,/ исходя́щу Христу́ из Гро́ба, яко Жениху,/ и спра́зднуим любопра́зднственными чинми// Па́сху Бо́жию спасительную.

Богородичны:

Пресвята́я Богор́одице, спаси́ нас.

Просвещается/ Боже́ственными луча́ми и живоносными/ Воскресе́ния Сына Твоего,/ Богома́ти Пречистая,/ и ра́дости исполня́ется благочести́вых собрание.

Пресвята́я Богор́одице, спаси́ нас.

Не разве́рзл еси́ врата́ де́вства в воплощении,/ Гро́ба не разруши́л еси́ печа́тей, Царю́ создания,// отону́дуже, воскре́сшаго Тя зря́щи, Ма́ти радовашеся.

Ектения малая: Па́ки и па́ки:

Возглас священника: Яко святи́ся и просла́вися пречестно́е и великоле́пное имя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в.

Песнь 6

Ирмос: Снизше́л еси́ в преисподняя земли,/ и сокруши́л еси́ вереи́ вечныя,/ содержа́щия связанныя, Христе,/ и тридне́вен, я́ко от ки́та Иона,/ воскре́сл еси́ от Гроба.

Христо́с воскре́се из ме́ртвых.

Сохрани́в це́ла знамения, Христе,/ воскре́сл еси́ от Гроба,/ ключи́ Де́вы невреди́вый в рождестве Твоем,// и отве́рзл еси́ нам ра́йския двери.

Христо́с воскре́се из ме́ртвых.

Спасе мой,/ живо́е же и неже́ртвенное заколение,/ я́ко Бог, Сам Себе/ во́лею привед Отцу,/ совоскреси́л еси́ всеро́днаго Адама,// воскре́с от Гроба.

Богородичны:

Пресвята́я Богор́одице, спаси́ нас.

Возведе́ся дре́вле держи́мое сме́ртию и тлением/ Воплоти́вшимся от Твоего́ пречи́стаго чрева/ к нетле́нней и присносу́щней Жизни,// Богоро́дице Дево.

Пресвята́я Богор́одице, спаси́ нас.

Сни́де в преисподняя земли,/ в ложесна́ Твоя́, Чи́стая, Сшедый,/ и Всели́выйся, и Воплоти́выйся паче ума,/ и воздви́же с Собо́ю Адама,// воскре́с от Гроба.

Ектения малая: Па́ки и па́ки:

Возглас священника: Ты бо еси Царь ми́ра, и Спас душ на́ших, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Кондак, глас 8:

Аще и во Гро́б снизше́л еси́, Безсме́ртне,/ но а́дову разруши́л еси́ си́лу/ и воскре́сл еси́, я́ко Победи́тель, Христе́ Боже́,/ жена́м мироно́сицам веща́вый: ра́дуйтеся!/ и Твои́м апо́столом мир да́руяй,/ па́дшим подая́й воскре́сение.

Икос:

Еже пре́жде со́лнца Со́лнце, заше́дшее иногда́ во Гро́б,/ предвари́ша ко у́тру,/ и́щущия я́ко дне мироно́сицы де́вы,/ и друга́ ко друзе́й вопия́ху:/ о други́ни! прииди́те, воня́ми пома́жем Те́ло Живоно́сное и погребе́ное,/ плоть воскреси́вшаго па́дшаго Ада́ма, лежа́щую во Гро́бе;/ и́дем, потщи́мся, я́коже волсви́, и поклони́мся,/ и принесе́м ми́ра, я́ко да́ры,/ не в пелена́х, но в плащани́це обви́тому,/ и пла́чим, и возопии́м:// о Влады́ко, воста́ни, па́дшим подая́й воскресе́ние.

Таже, глаголем:

Воскресе́ние Христо́во ви́девше,/ поклони́мся Свято́му Го́споду Иису́су,/ Еди́ному Безгре́шному./ Кресту́ Твоему́ покланя́емся, Христе́,/ и свято́е Воскресе́ние Твое́ пое́м и сла́вим:/ Ты бо еси́ Бог наш,/ ра́зве Тебе́ ино́го не зна́ем,/ Имя Твое́ имену́ем./ Прииди́те, вси ве́рнии,/ поклони́мся свято́му Христо́ву Воскресе́нию:/ се бо прии́де Кресто́м ра́дость всему́ ми́ру./ Всегда́ благословя́ще Го́спода,/ пое́м Воскресе́ние Его́:/ распя́тие бо претерпе́в,// сме́ртию смерть разруши́. (Трижды.)

Воскре́с Иису́с от Гро́ба,/ я́коже прорече́,/ даде́ нам Живо́т ве́чный// и ве́лию ми́лость. (Трижды.)

Песнь 7

Ирмос: Отроки от пе́щи избавивый,/ быв Человек,/ стра́ждет, я́ко смертен,/ и стра́стию смертное/ в нетле́ния облачит благолепие,/ един благословен// отце́в Бо́г и препрославлен.

Христо́с воскре́се из ме́ртвых.

Жены́ с ми́ры Богому́дрыя в след Тебе́ течаху,/ Его́же, я́ко ме́ртва, со слеза́ми искаху,/ поклони́шася, ра́дующияся Живо́му Богу,/ и Па́сху тайную// Твои́м, Христе́, ученико́м благовестиша.

Христо́с воскре́се из ме́ртвых.

Сме́рти пра́зднуем умерщвление,/ а́дово разрушение,/ ино́го жития́ ве́чнаго начало,/ и, игра́юще, поем Виновнаго,/ Еди́наго Благословеннаго,// отце́в Бо́га и Препрославленнаго.

Христо́с воскре́се из ме́ртвых.

Яко вои́стинну священная/ и всепра́зднственная сия́ спасительная нощь/ и светозарная,/ светоноснаго Дне/ Воста́ния су́щи провозвестница,/ в не́йже Безле́тный Свет из Гро́ба пло́тски всем возсия.

Богородичны:

Пресвята́я Богор́одице, спаси́ нас.

Умертви́в Сын Твой смерть,/ Всенепорочная, днесь,/ всем сме́ртным пребывающий Живот/ во ве́ки веков дарова,/ Еди́н Благословенный// отце́в Бог и Препрославленный.

Пресвята́я Богор́одице, спаси́ нас.

Всем ца́рствуяй созда́нием, быв Человек,/ всели́ся во Твою́, Богоблагода́тная, утробу,/ и, распя́тие претерпев и смерть,/ воскре́се Боголепно,// совозста́вив нас, я́ко всесилен.

Ектения малая: Па́ки и па́ки:

Возглас священника: Бу́ди держа́ва Ца́рствия Твоего́:

Песнь 8

Ирмос: Се́й нарече́шный и Святый День,/еди́н суббо́т царь и господь,/ праздников праздник/ и торжество есть торжеств,/ во́ньже благослови́м Христа́ во веки.

Христо́с воскре́се из ме́ртвых.

Прииди́те, но́ваго виногра́да рождения,/ Боже́ственнаго веселия/ в наро́читом дни Воскресения,/ Ца́рствия Христо́ва приобщимся,/ поюще Его// я́ко Бо́га во веки.

Христо́с воскре́се из ме́ртвых.

Возведи́ о́крест о́чи твои́, Сионе, и виждь:/ се бо приидоша к тебе,/ я́ко Богосве́тлая светила,/ от за́пада, и се́вера, и моря,/ и восто́ка чада Твоя,// в тебе́ благословя́щая Христа́ во веки.

Троичен:

Пресвята́я Тро́ице, Бо́же наш, сла́ва Тебе́.

Отче Вседержи́телю, и Сло́ве, и Душе,/ треми́ соединя́емое во Ипостасех естество,/ Пресу́щественне и Пребожественне,/ в Тя крестехомся/ и Тя благослови́м во вся веки.

Богородичны:

Пресвята́я Богор́одице, спаси́ нас.

Прии́де Тобо́ю в мир Господь,/ Де́во Богородице,/ и чре́во адово расторг,/ сме́ртным нам воскресение дарова./ Те́мже благослови́м Его́ во веки.

Пресвята́я Богор́одице, спаси́ нас.

Всю низложи́в сме́рти державу,/ Сын Твой, Дево,/ Свои́м Воскресением,/ я́ко Бог крепкий,/ совознесе́ нас и обожи./ Те́мже воспева́ем Его́ во веки.

Ектения малая: Па́ки и па́ки:

Возглас священника: Яко благослови́ся Имя Твое́, и просла́вися Ца́рство Твое́:

Песнь 9

Диакон: Вели́чит душа моя/ воскре́сшаго тридне́вно от Гроба/ Христа́ Жизнодавца.

И ирмос: Свети́ся, светися,/ Но́вый Иерусали́ме,/ сла́ва бо Господня/ на тебе возсия,/ ликуй ныне/ и весели́ся, Сионе,/ Ты же, Чи́стая, красу́йся, Богородице,// о воста́нии Рождества Твоего.

И вторый лик поет тойже припев и ирмос.

Таже первый лик поет вторый припев:

Вели́чит душа моя/ во́лею страда́вша, и погребена,// и воскре́сшаго тридне́вно от Гроба.

И ирмос: Свети́ся, свети́ся:

И вторый лик поет тойже припев и ирмос. Таже первый лик поет третий припев:

Христо́с – новая Пасха,/ Же́ртва живая,/ Агнец Божий,// взе́мляй грехи́ мира.

И тропарь: О, Боже́ственнаго, о, любезнаго,/ о, сладча́йшаго Твоего́ гласа!/ С на́ми бо нело́жно обеща́лся еси́ быти/ до сконча́ния века, Христе.// Его́же, ве́рнии, утвержде́ние наде́жди иму́ще, радуемся.

И вторый лик поет тойже припев и тропарь. Таже первый лик поет четвертый припев:

Ангел вопия́ше Благодатней:/ Чи́стая Де́во, радуйся,/ и па́ки реку́: радуйся!/ Твой Сын воскресе/ тридне́вен от Гроба,/ и ме́ртвыя воздвигнувый.// Лю́дие, веселитеся.

И тропарь: О, Боже́ственнаго:

И вторый лик поет тойже припев и тропарь.

И прочих осмь припевов припевают по единожды ко стихом:

Возбуди́л еси́, усну́в, ме́ртвыя от века,/ ца́рски рыкавый,/ я́ко от Иуды лев.

Магдали́на Мари́я притече́ ко Гробу/ и, Христа́ видевши,/ я́ко вертогра́даря, вопрошаше.

Ангел облиста́яй жена́м вопияше:/ престаните от слез,/ я́ко Христо́с воскресе.²

Христос воскресе, смерть поправый/ и ме́ртвыя воздвигнувый,// лю́дие, веселитеся.

Дне́сь вся́ка тварь весели́тся и радуется,/ я́ко Христо́с воскресе// и ад пленися.

Дне́сь Влады́ка плени́ ада,/ воздви́гнувый юзники,/ я́же от ве́ка имя́ше лю́те одержимыя. Вели́чит душа моя/ Триипоста́снаго и Нераздельнаго/ Божества́ державу.

Ра́дуйся, Дево, радуйся,/ ра́дуйся, Благословенная,/ ра́дуйся, Препрославленная:/ Твой бо Сын воскресе/ тридне́вен от Гроба.

Последи же первый лик поет паки первый припев и ирмос. Посем вторый лик поет вторый припев и ирмос (стр. 23) Таже оба лика, сошедшеся вкупе, поют ирмос и тропарь: Христо́с воскре́се: (Трижды.)

Песнь 9

Ирмос: Свети́ся, светися,/ Но́вый Иерусали́ме,/ сла́ва бо Госпоня/ на тебе возсия,/ ликуй ныне/ и весели́ся, Сионе,/ Ты же, Чи́стая, красу́йся, Богородице,// о воста́нии Рождества Твоего.

О, Боже́ственнаго, о, любезнаго,/ о, сладча́йшаго Твоего́ гласа!/ С на́ми бо нело́жно обеща́лся еси́ быти/ до сконча́ния века, Христе.// Его́же, ве́рнии, утвержде́ние наде́жди иму́ще, радуемся.

О, Па́сха ве́лия и священнейшая, Христе!/ О, Му́дросте, и Сло́ве Бо́жий, и Сило!/ Подава́й нам и́стее Тебе́ причащатися/ в невече́рнем дни Царствия Твоего.

Богородичны:

Согла́сно, Де́во, Тебе́ блажи́м, вернии:/ ра́дуйся, две́ре Господня,/ ра́дуйся, гра́де одушевленный,/ ра́дуйся, Ея́же ра́ди нам ны́не возсия Свет/ из Тебе́ рожде́ннаго из ме́ртвых Воскресения.

Весели́ся и ра́дуйся, Боже́ственная две́ре Света:/ заше́дый бо Иису́с во Гроб возсияя,/ просия́в со́лнца светлее,/ и ве́рныя вся озарив,/ Богора́дованная Владычице.

Ектения малая: Па́ки и па́ки:

Возглас священника: Яко Тя хва́лят вся Си́лы небе́сныя, Отца́ и Сы́на и Свята́го Ду́ха, и Тебе́ сла́ву возсыла́ют ны́не и при́сно и во ве́ки веко́в.

Ексапостиларий. Самогласен:

Пло́тию усну́в,/ я́ко мертв,/ Царю́ и Го́споди,/ тридне́вен воскре́сл еси́,/ Ада́ма воздви́г от тли/ и упраздни́в сме́рть,/ Па́сха нетле́ния,/ ми́ра Спасе́ние. (Трижды)

[Комментарий составителя:

Как правило, в приходских храмах принято петь пасхальный канон без повторения ирмосов и тропарей, поэтому распределение припевов 9-й песни канона между ирмосом и тропарями по традиции выглядит иначе. Мы рекомендуем следующий вариант пения 9-й песни канона:

Свящ.: Вели́чит душа́ моя́/ воскре́сшаго: (1 припев)

1-й хор: Свети́ся, свети́ся: (ирмос)

2-й хор: Вели́чит душа́ моя́/ во́лею страда́вша: (2-й припев)

Свети́ся, свети́ся: (ирмос)

1-й хор: Христо́с – но́вая Па́сха: (3-й припев)

О, Боже́ственнаго, о, любе́знаго: (1-й тропарь)

2-й хор: Ангел вопия́ше Благода́тней: (4-й припев)

О, Па́сха ве́лия и свяще́ннейшая, Христе́: (2-й тропарь)

Остальные припевы поются без тропарей антифонно двумя хорами. После последнего припева: Ра́дуйся, Де́во, ра́дуйся: поется опять первый припев: Вели́чит душа́ моя́: и катавасия: Свети́ся, свети́ся:

В прочие дни Светлой седмицы, когда поются Богородичны, на 9-й песне припеваем к ним два последних припева:

1-й хор: Вели́чит душа́ моя́/ Триипоста́снаго: (предпосл. припев)

Согла́сно, Де́во, Тебе́ блажи́м: (Богородичен Феофана)

2-й хор: Ра́дуйся, Де́во, ра́дуйся́: (посл. припев)

Весели́ся и ра́дуйся: (Богородичен Иосифа)³

Мы не считаем убедительным толкование Розанова петь Богородичны 9-й песни с припевом Слава: и И ныне:⁴ По содержанию два последних припева (Вели́чит душа́ моя́/ Триипоста́снаго: и Ра́дуйся, Де́во, ра́дуйся – Троичен и Богородичен, и заменяют собой Славу: и И ныне: по аналогии со всеми двунадесятыми праздниками, имеющими припевы на 9-й песне.]

Хвалитные псалмы

На Хвалитех, Вся́кое дыха́ние: на глас 1:

Лик 1: Вся́кое дыха́ние да хва́лит Го́спода./ Хвали́те Го́спода с Небе́с,/ хвали́те Его́ в вы́шних.// Тебе́ подоба́ет песнь Бо́гу.

Лик 2: Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

И поем стихиры воскресны на глас 1:

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Пое́м Твою́, Христе́, спаси́тельную страсть,// и сла́вим Твое́ воскресе́ние.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Крест претерпе́вый и смерть упраздни́вый,/ и воскресы́й из ме́ртвых,/ умири́ на́шу жизнь, Го́споди,// Яко еди́н всеси́лен.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Ада плени́вый, и челове́ка воскреси́вый,/ воскресе́нием Твои́м, Христе́,/ сподо́би ны чи́стым се́рдцем// Тебе пе́ти и сла́вити.

Стих: Хвали́те Его́ в кимва́лех доброгла́сных, хвали́те Его́ в кимва́лех восклицания:/ вся́кое дыха́ние да хва́лит Го́спода.

Боголе́пное Твое́ снизхожде́ние сла́вяще,/ пое́м Тя, Христе́:/ роди́лся еси́ от Де́вы,/ и не разлуче́н был еси́ от Отца́:/ пострада́л еси́, я́ко челове́к,/ и во́лею претерпе́л еси́ Крест,/ воскре́сл еси́ от Гро́ба,/ я́ко от черто́га произше́д,// да спасе́ши мир, Го́споди, сла́ва Тебе́.

И оба лика поют вкупе стихиры Пасхи, глас 5:

Стих: Да воскре́снет Бо́г,/ и расточа́тся врази́ Его́.

Па́сха/ свяще́нная нам днесь показа́ся,/ Па́сха но́ва свята́я,/ Па́сха та́инственная,/ Па́сха всечестна́я,/ Па́сха – Христо́с Изба́витель,/ Па́сха непоро́чная,/ Па́сха вели́кая,/ Па́сха ве́рных,/ Па́сха, две́ри ра́йския нам отверза́ющая,// Па́сха, всех освяща́ющая ве́рных.

Стих: Яко исчеза́ет дым,/ да исче́знут.

Прииди́те/ от виде́ния, жены́ благове́стницы,/ и Сио́ну рцы́те:/ приими́ от нас ра́дости благове́щения Воскресе́ния Христо́ва,/ красу́йся, лику́й/ и ра́дуйся, Иерусали́ме,/ Царя́ Христа́ узре́в, из Гроба,// я́ко Жениха́ происходя́ща.

Стих: Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.

Мироно́сицы жены́,/ у́тру глубоку́/ предста́вша Гро́бу Живода́вца,/ обрето́ша Ангела,/ на ка́мени седя́ща,/ и той провеща́в им,/ си́це глаго́лаше:/ что и́щете Жива́го с ме́ртвыми?/ Что пла́чете Нетле́ннаго во тли?// Ше́дше, пропове́дите ученико́м Его́.

Стих: Сей День, его́же сотвори́ Госпо́дь,/ возра́дуемся и возвесели́мся в онь.

Па́сха кра́сная,/ Па́сха, Госпо́дня Па́сха,/ Па́сха всечестна́я/ нам возсия́. Па́сха!/ Ра́достию друг дру́га обы́мем./ О, Па́сха!/ Избавле́ние ско́рби,/ и́бо из Гро́ба днесь,/ я́ко от черто́га,/ возсия́в Христо́с,/ жены́ ра́дости испо́лни, глаго́ля:// пропове́дите апо́столом.

Слава, и ныне:

Воскресе́ния день,/ и просвети́мся торжество́м,/ и друг дру́га обы́мем./ Рце́м, бра́тие!/ И ненави́дящим нас/ прости́м вся Воскресе́нием,/ и та́ко возопии́м:/ Христо́с воскре́се из ме́ртвых,/ сме́ртию смерть попра́в,// и су́щим во гробе́х живо́т дарова́в.

Таже: Христо́с воскре́се: (Трижды)

И поем сие, дóндеже целуют братия друг друга.

По целовании же чтется oглacитeльнoe слово святаго Иoaннa Златоустаго от настоятеля. Не сидим же на сицевом чтении, но стояще слушаем вси.

Иже во святых Отца нашего Иоанна архиепископа константинопольсокго, златоустого слово огласительное во святый и светоносный день преславнаго и спасительнаго Христа Бога нашего Воскресения.

Аще кто благочестив и боголюбив, да насладится сего добраго и светлаго торжества. Аще кто раб благоразумный, да внидет радуяся в радость Господа своего. Аще кто потрудися постяся, да восприимет ныне динарий. Аще кто от перваго часа делал есть, да приимет днесь праведный долг. Аще кто по третием часе прииде, благодаря да празднует. Аще кто по шестом часе достиже, ничтоже да сумнится: ибо ничимже отщетевается. Аще кто лишися и девятаго часа, да приступит, ничтоже сумняся, ничтоже бояся. Аще кто точию достиже и во единонадесятый час, да не устрашится замедления: любочестив бо сый Владыка, приемлет последняго якоже и перваго: упокоевает в единонадесятый час пришедшаго, якоже делавшаго от перваго часа. И последнего милует и первому угождает, – и оному дает и сему дарствует, – и дела приемлет и намерение целует, – и деяние почитает и предложение хвалит. Тем же убо внидите вси в радость Господа своего: и первии и втории, мзду приимите: богатии и убози, друг со другом ликуйте. Воздержницы и ленивии, день почтите. Постившиися и не постившиися, возвеселитеся днесь. Трапеза исполнена: насладитеся вси. Телец упитанный: никтоже да изыдет алчай, вси насладитеся пира веры: вси восприимите богатство благости. Никтоже да рыдает убожества, явися бо общее царство. Никтоже да плачет прегрешений, прощение бо от гроба возсия. Никтоже да убоится смерти, свободи бо нас Спасова смерть. Угаси ю, Иже от нея держимый. Плени ада, Сошедый во ад. Огорчи его, вкусивша плоти Его. И сие предприемый Иcaиa возопи: ад, глаголет, огорчися, срет Тя доле. Огорчися, ибо упразднися. Огорчися, ибо поруган бысть. Огорчися, ибо умертвися. Огорчися, ибо низложися. Огорчися, ибо связася. Прият тело, и Богу приразися. Прият землю, и срете небо. Прият еже видяше, и впаде во еже не видяше. Где твое, смерте, жало? где твоя, аде, победа)? Воскресе Христос, – и Ты низверглся еси. Воскресе Христос, – и падоша демони. Воскресе Христос, – и радуются ангели. Воскресе Христос, – и жизнь жительствует. Воскресе Христос, – и мертвый ни един во гробе: Христос бо востав от мертвых, начаток усопших бысть. Тому слава и держава, во веки веков! Аминь.

И поем тропарь святителя, глас 8:

Уст твои́х, я́коже светлость огня́ возсия́вши благода́ть,/ вселе́нную просвети́;/ не сребролю́бия ми́рови сокро́вища сниска́,/ высоту́ нам смиренному́дрия показа́,/ но твои́ми словесы́ наказу́я,/ о́тче Иоа́нне Златоу́сте,// моли́ Сло́ва Христа́ Бо́га спасти́ся душа́м на́шим.

Посем диакон глаголет ектению сугубую: Поми́луй нас, Бо́же:

Лик: Го́споди поми́луй. (Трижды.)

Возглас: Яко Ми́лостив и Человеколю́бец Бог еси́:

Лик: Ами́нь.

И ектению просительную: Испо́лним у́тренюю моли́тву нашу:

Возглас: Яко Бог ми́лости и щедро́т и человеколю́бия еси́, и Тебе́ сла́ву возсыла́ем: Мир всем: Главы́ на́ша Го́сподеви прикло́ним.

Иерей: Твое́ бо есть, е́же ми́ловати и спаса́ти ны, Бо́же наш, и Тебе́ славу возсыла́ем:

Лик: Аминь.

Диакон: Прему́дрость. Лик: Благослови́.

Иерей: Сый благослове́н Христо́с Бог наш, всегда́, ны́не и при́сно и во ве́ки веко́в.

Лик: Ами́нь. Утверди́, Бо́же,/ святу́ю правосла́вную ве́ру правосла́вных христиа́н/ во ве́к ве́ка.

Таже настоятель, держа крест, поет:

Христо́с воскре́се из ме́ртвых,/ сме́ртию смерть попра́в.

Лик: И су́щим во гробе́х живо́т дарова́в.

И абие настоятель глаголет отпуст:

Христо́с, воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый, и́стинный Бог наш, моли́твами Пречи́стыя своея́ Ма́тере и всех святы́х поми́лует и спасе́т нас, я́ко Благ и Человеколю́бец.

Таже, крест возвышая, глаголет:

Христо́с воскре́се. (Трижды.)

И мы отвещаем на каждое: Вои́стинну воскре́се.

Таже весь тропарь поем:

Христо́с воскре́се. (Трижды.)

И по нем пением кончим:

И нам дарова́ Живо́т ве́чный,/ покланя́емся Его́ тридне́вному Воскресе́нию.

Посем многолетны: Вели́каго Господи́на: и целуем крест, держимый в руке настоятеля. И час первый. Лития в сий день не бывает.

Подобает ведати, яко от сего дне Святыя и Великия Недели Пасхи, даже до субботы, часы и повечерне сице поются.

Наченшу иерею: Благослове́н Бог наш:

Христо́с воскре́се: (Трижды.)

Таже, глаголем трижды:

Воскресе́ние Христо́во ви́девше,/ поклони́мся Свято́му Го́споду Иису́су,/ Еди́ному Безгре́шному./ Кресту́ Твоему́ покланя́емся, Христе́,/ и свято́е Воскресе́ние Твое́ пое́м и сла́вим:/ Ты бо еси́ Бог наш,/ ра́зве Тебе́ ино́го не зна́ем,/ Имя Твое́ имену́ем. Прииди́те, вси ве́рнии,/ поклони́мся свято́му Христо́ву Воскресе́нию:/ се бо прии́де Кресто́м ра́дость всему́ ми́ру./ Всегда́ благословя́ще́ Го́спода,/ пое́м Воскресе́ние Его́:/ распя́тие бо претерпе́в,// сме́ртию смерть разруши́.

Таже, ипакои единощи:

Предвари́вшия у́тро я́же о Мари́и/ и обре́тшия ка́мень, отвале́н от Гро́ба,/ слы́шаху от Ангела: во Све́те Присносу́щнем Су́щаго,/ с ме́ртвыми что и́щете, я́ко челове́ка?/ Ви́дите гро́бныя пелены́, тецы́те и ми́ру пропове́дите,/ я́ко воста́ Госпо́дь, умертви́вый смерть,// я́ко есть Сын Бо́га, спаса́ющаго род челове́ческий.

Таже, кондак единощи:

Аще и во Гроб снизше́л еси́, Безсме́ртне,/ но а́дову разруши́л еси́ си́лу/ и воскре́сл еси́, я́ко Победи́тель, Христе́ Бо́же,/ жена́м мироно́сицам веща́вый: ра́дуйтеся!/ и Твоим апо́столом мир да́руяй,// па́дшим подая́й воскресе́ние.

Таже, и сей тропарь единощи:

Во Гро́бе пло́тски, во а́де же с душе́ю я́ко Бог,/ в раи́ же с разбо́йником и на Престо́ле был еси́, Христе́, со Отце́м и Ду́хом,// вся исполня́яй, Неопи́санный.

Слава:

Яко Живоно́сец, я́ко рая́ красне́йший,/ вои́стинну и черто́га вся́каго ца́рскаго показа́ся, светле́йший Христе́, Гроб Твой,// исто́чник на́шего воскресе́ния.

И ныне, Богородичен:

Вы́шняго освяще́нное Боже́ственное селе́ние, ра́дуйся!/ Тобо́ю бо даде́ся ра́дость, Богоро́дице, зову́щим:// благослове́нна Ты в жена́х еси́, Всенепоро́чная Влады́чице.

Таже: Го́споди, поми́луй. (40 раз.)

Слава, и ныне: Честне́йшую Херуви́м: Именем Госпо́дним благослови́, о́тче.

Иерей: Моли́твами святы́х оте́ц на́ших:

Мы же речем: Ами́нь. И паки глаголем подобие: Христо́с воскре́се: (Трижды.)

Слава, и ныне: Го́споди, поми́луй. (Трижды.) Благослови́.

И по возгласе иерея мы отвещаем: Ами́нь. Христо́с воскресе: трижды, поскору, без: И нам дарова́: И сице творим отпуст на каждом часе.

Бывает порану.

Диакон: Благослови́, влады́ко.

Настоятель возглашает: Благослове́но Ца́рство Отца́ и Сы́на и Свята́го Ду́ха, ны́не и при́сно и во ве́ки веко́в.

Лик: Ами́нь.

Настоятель поет с прочими служители тропарь во святом алтаре:

Христо́с воскре́се из ме́ртвых,/ сме́ртию смерть попра́в,/ и су́щим во гробе́х жи́вот дарова́в. (Трижды.)

И лики тойже тропарь.

Христо́с воскре́се из ме́ртвых,/ сме́ртию смерть попра́в,/ и су́щим во гробе́х жи́вот дарова́в. (Трижды.)

Таже настоятель глаголет стихи:

Стих 1: Да воскре́снет Бог, и расточа́тся врази́ Его́:

И на каждый стих лик поет тропарь: Христо́с воскре́се: весь по единожды.

Стих 2: Яко исчеза́ет дым, да исче́знут:

Стих 3: Та́ко да поги́бнут гре́шницы от Лица́ Бо́жия, а пра́ведницы да возвеселя́тся.

Стих 4: Сей день, его́же сотвори́ Госпо́дь, возра́дуемся и возвесели́мся в онь.

Слава: Христо́с воскре́се: единожды.

И ныне: Христо́с воскре́се: единожды.

Таже настоятель поет вышшим гласом:

Христо́с воскре́се из ме́ртвых,/ сме́ртию смерть попра́в.

Лик: И су́щим во гробе́х живо́т дарова́в.

Посем диакон глаголет ектению великую: Ми́ром Го́споду помо́лимся.

Возглас: Яко подоба́ет Тебе́ вся́кая сла́ва, честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь

Антифон 1-й, глас 2:

Стих 1: Воскли́кните Го́сподеви вся земля́.

Припев: Моли́твами Богоро́дицы, Спа́се, спаси́ нас.

И другий лик тойже стих: Воскли́кните Го́сподеви вся земля,/ по́йте же Имени Его́, дади́те сла́ву хвале́ Его́.

Припев: Моли́твами Богоро́дицы:

Стих 2: Рцы́те Бо́гу: коль стра́шна дела́ Твоя́,/ во мно́жестве си́лы Твоея́ со́лжут Тебе́ врази́ Твои́.

Припев: Моли́твами Богоро́дицы:

Стих 3: Вся земля́ да покло́нится Тебе́, и пое́т Тебе́,/ да пое́т же Имени Твоему́, Вы́шний.

Припев: Моли́твами Богоро́дицы:

Слава, и ныне: Моли́твами Богоро́дицы:

Ектения малая: Па́ки и па́ки:

Возглас священника: Яко Твоя́ держа́ва:

Антифон 2-й, глас 2:

Стих 1: Бо́же, уще́дри ны, и благослови́ ны.

Припев: Спаси́ ны, Сы́не Бо́жий, воскресы́й из ме́ртвых, пою́щия Ти: Аллилу́ия.

Стих 2: Бо́же, уще́дри ны, и благослови́ ны,/ просвети́ Лице́ Твое́ на ны, и поми́луй ны. Припев.

Стих 3: Да позна́ем на земли́ путь Твой,/ во всех язы́цех спасе́ние Твое́. Припев.

Стих 4: Да испове́дятся Тебе́ лю́дие, Бо́же,/ да испове́дятся Тебе́ лю́дие вси. Припев.

Слава, и ныне: Единоро́дный Сы́не:

Ектения малая: Па́ки и па́ки:

Возглас священника: Яко Благ и Человеколю́бец Бог еси́:

Антифон 3-й, глас 5:

Стих 1: Да воскре́снет Бог, и расточатся врази́ Его́.

Тропарь: Христо́с воскре́се:

Стих 2: Да воскре́снет Бог, и расточа́тся врази́ Его́, и да бежа́т от Лица́ Его́ ненави́дящии Его́. Тропарь.

Стих 3: Яко исчеза́ет дым, да исче́знут, я́ко та́ет воск от лица́ огня́. Тропарь.

Стих 4: Та́ко да поги́бнут гре́шницы от Лица́ Бо́жия, а пра́ведницы да возвеселя́тся, да возра́дуются пред Бо́гом. Тропарь.

И бывает вход. Возглашает диакон, аще же ни, иерей:

Прему́дрость, про́сти. Входный стих: В це́рквах благослови́те Бо́га, Го́спода от исто́чник изра́илевых.

И поем тропарь, глас 5:

Христо́с воскре́се из ме́ртвых,/ сме́ртию смерть попра́в,/ и су́щим во гробе́х жи́вот дарова́в.

Ипакои, глас 4:

Предвари́вшия у́тро я́же о Мари́и/ и обре́тшия ка́мень, отвале́н от Гро́ба,/ слы́шаху от Ангела:/ во Све́те Присносу́щнем Су́щаго, с ме́ртвыми что и́щете, я́ко челове́ка?/ Ви́дите гро́бныя пелены́,/ тецы́те и ми́ру пропове́дите,/ я́ко воста́ Госпо́дь, умертви́вый смерть,/ я́ко есть Сын Бо́га,// спаса́ющаго род челове́ческий.

Слава, и ныне, кондак, глас 8:

Аще и во Гроб снизше́л еси, Безсме́ртне,/ но а́дову разруши́л еси́ си́лу/ и воскре́сл еси́, я́ко Победи́тель, Христе́ Бо́же,/ жена́м мироно́сицам веща́вый: ра́дуйтеся!/ и Твоим апо́столом мир да́руяй,// па́дшим подая́й воскресе́ние.

Вместо же Трисвятаго:

Ели́цы во Христа́ крести́стеся, во Христа́ облеко́стеся. Аллилу́ия.

Подобает ведати, яко сие начало Литургии, и aнтифоны, и Ели́цы во Христа́ крести́стеся: поем во всю седмицу Светлую, даже до недели новыя; такожде и причастный.

Прокимен, глас 8:

Сей день, его́же сотвори́ Госпо́дь,/ возра́дуемся и возвесели́мся в онь.

Стих: Испове́дайтеся Го́сподеви, я́ко Благ, я́ко в век ми́лость Е́го.

Деяния святых Апостол, зачало 1А.

Первое убо слово сотворих о всех, о Феофиле, яже начат Иисус творити же и учити даже до дне, воньже, заповедав апостолом Духом Святым, ихже избра, вознесеся. Пред нимиже и постави Себе жива по страдании Своем во мнозех истинных знамениих, деньми четыредесятьми являяся им и глаголя яже о Царствии Божии. С нимиже и ядый, повеле им от Иерусалима не отлучатися, но ждати обетования Отча, еже слышасте от Мене: яко Иоанн убо крестил есть водою, вы же имате креститися Духом Святым, не по мнозех сих днех. Они же убо сошедшеся, вопрошаху Его, глаголюще: Господи, аще в лето сие устрояеши царствие Израилево? Рече же к ним: несть ваше разумети времена и лета, яже Отец положи во Своей власти. Но приимете силу, нашедшу Святому Духу на вы, и будете Ми свидетели во Иерусалиме же и во всей Иудеи и Самарии, и даже до последних земли.

Аллилуия, глас 4:

Ты воскрем, ущедриши Сиона.

Стих. Господь с Небесе на замлю призре.

От Иоанна святое Евангелие

зачало 1.

В начале бе Слово, и Слово бе к Богу, и Бог бе Слово. Сей бе искони к Богу. Вся Тем быша, и без Него ничтоже бысть, еже бысть. В Том живот бе, и живот бе свет человеком, и свет во тме светится, и тма его не объят. Бысть человек послан от Бога, имя ему Иоанн. Сей прииде во свидетелство, да свидетелствует о Свете, да вси веру имут ему. Не бе той свет, но да свидетелствует о Свете. Бе Свет истинный, Иже просвещает всякаго человека грядущаго в мир. В мире бе, и мир Тем бысть, и мир Его не позна. Во своя прииде, и свои Его не прияша. Елицы же прияша Его, даде им область чадом Божиим быти, верующым во имя Его, иже не от крове, ни от похоти плотския, ни от похоти мужеския, но от Бога родишася. И Слово плоть бысть и вселися в ны, и видехом славу Его, славу яко Единороднаго от Отца, исполнь благодати и истины. Иоанн свидетелствует о Нем и воззва глаголя: Сей бе, егоже рех, Иже по мне Грядый, предо мною бысть, яко первее мене бе. И от исполнения Его мы вси прияхом и благодать воз благодать. Яко закон Моисеом дан бысть, благодать же и истина Иисус Христом бысть.

И бывает по чину Божетсвенная Литургия Златоустаго.

Вместо Достойно: поем:

Ангел вопия́ше Благода́тней:/ Чи́стая Де́во, ра́дуйся,/ и па́ки реку́: ра́дуйся!/ Твой Сын воскре́се/ тридне́вен от Гро́ба,/ и ме́ртвыя воздви́гнувый.// Лю́дие, весели́теся.

Таже, ирмос: Свети́ся, свети́ся,/ Но́вый Иерусали́ме,/ сла́ва бо Госпо́дня/ на тебе́ возсия́,/ лику́й ны́не/ и весели́ся, Сио́не,/ Ты же, Чи́стая, красу́йся, Богоро́дице,// о воста́нии Рождества́ Твоего́.

Причастный: Те́ло Христо́во приими́те, исто́чника безсме́ртнаго вкуси́те. Аллилу́ия. (Трижды)

Егда же настоятель глаголет: Со стра́хом Бо́жиим и ве́рою приступи́те.

Лик, вместо: Благослове́н гряды́й во и́мя Госпо́дне: Христо́с воскре́се: единожды.

Егда настоятель глаголет: Спаси́, Бо́же, лю́ди Твоя́:

Лик: Христо́с воскре́се: единожды.

Егда же изглаголет иерей: Всегда́, ны́не и при́сно:

Лик: Ами́нь. Христо́с воскре́се: единожды. Аллилу́ия: (трижды)

Посем ектения и молитва заамвонная.

Вместо: Буди Имя Господне: и псалма 33-го:

Лик: Христо́с воскре́се: (12 раз)

Таже настоятель: Благослове́ние Госпо́дне на вас: Лик: Ами́нь.

Посем настоятель вместо возгласа: Сла́ва Тебе́, Христе́ Бо́же: поет:

Христо́с воскре́се из ме́ртвых,/ сме́ртию смерть попра́в...

Лик: ...И су́щим во гробе́х жи́вот дарова́в.

Посем настоятель глаголет отпуст со крестом по обычаю, якоже писано на утрени. (стр. 31)

По 9-м часе во светильничном, облачится настоятель во всю священную одежду. И став пред святою трапезою с кадильницею, знаменует крестовидно, и возглашает глаголя:

Настоятель: Благослове́н Бог наш всегда́, ны́не и при́сно и во ве́ки веко́в.

Лик: Ами́нь.

Настоятель поет тропарь во святом алтаре: Христо́с воскре́се из ме́ртвых,/ сме́ртию смерть попра́в,/ и су́щим во гробе́х жи́вот дарова́в. (Трижды.)

И прочее, якоже изъявися в начале утрени и Литургии. (стр.13)

Таже ектения великая от диакона: Ми́ром го́споду помо́лимся.

Возглас: Яко подоба́ет Тебе́ вся́кая сла́ва, че́сть и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Посем: Го́споди, воззва́х: поставим стихов 6,

и поем стихиры воскресны 3, глас 2:

Стих: Аще беззако́ния на́зриши Го́споди, Го́споди, кто постои́т?/ я́ко у Тебе́ очище́ние е́сть.

Пре́жде век от Отца́ ро́ждшемуся Бо́жию Сло́ву,/ вопло́щшемуся от Де́вы Мари́и,/ прииди́те поклони́мся:/ Крест бо претерпе́в,/ погребе́нию предаде́ся, я́ко сам восхоте́,/ и воскре́с из ме́ртвых,// спасе́ мя заблужда́ющаго челове́ка.

Стих: Имене ра́ди Твоего потерпе́х Тя Го́споди, потерпе́ душа́ моя́ в слово́ Твое́,/ упова́ душа́ моя́ на Го́спода.

Христо́с Спас наш,/ еже на ны рукописа́ние пригвозди́в/ на Кресте́ загла́ди,/ и сме́ртную держа́ву упраздни́.// Покланя́емся Его́ тридне́вному воскресе́нию.

Стих: От стра́жи у́тренния до но́щи, от стра́жи у́тренния,/ да упова́ет Изра́иль на Го́спода.

Со Арха́нгелы воспои́м Христо́во воскресе́ние,/ той бо есть Изба́витель и Спас душ на́ших:/ и в сла́ве стра́шной, и кре́пцей си́ле,// па́ки гряде́т суди́ти ми́ру, его́же созда́.

И восточны 3:

Стих: Яко у Го́спода ми́лость, и мно́гое у Него́ избавле́ние,/ и той изба́вит Изра́иля от всех беззако́ний его.

Тебе́ распе́ншагося и погребе́ннаго,/ Ангел пропове́да Влады́ку, и глаго́лаше жена́м:/ прииди́те, ви́дите, иде́же лежа́ше Госпо́дь,/ воскре́се бо, я́коже рече́, я́ко всеси́лен./ Те́мже Тебе́ покланя́емся, Еди́ному Безсме́ртному// Жизнода́вче Христе́, поми́луй нас.

Стих: Хвали́те Го́спода вси язы́цы,/ похвали́те Его́ вси лю́дие.

Кресто́м Твои́м упраздни́л еси́,/ ю́же от дре́ва кля́тву:/ погребе́нием Твои́м умертви́л еси́ сме́рти держа́ву:/ воста́нием же Твои́м просвети́л еси́ род челове́ческий,/ сего́ ра́ди вопие́м Ти:// благоде́телю Христе́ Бо́же наш, сла́ва Тебе́.

Стих: Яко утверди́ся ми́лость Его́ на нас,/ и и́стина Госпо́дня пребыва́ет во век.

Отверзо́шася Тебе́, Го́споди, стра́хом врата́ сме́ртная,/ вра́тницы же а́довы, ви́девше Тя, убоя́шася:/ врата́ бо ме́дная сокруши́л еси́,/ и вереи́ желе́зныя стерл еси́,/ и изве́л еси́ нас от тьмы и се́ни сме́ртныя,// и у́зы на́ша растерза́л еси́.

Слава:

Спаси́тельную песнь пою́ще от уст возсле́м:/ прииди́те вси, в дому́ Госпо́днем припаде́м, глаго́люще:/ на дре́ве распны́йся, и из ме́ртвых воскресы́й,/ и сый в не́дрех Отчих,// очи́сти грехи́ на́ша.

И ныне, Богородичен:

Пре́йде сень зако́нная,/ благода́ти прише́дши:/ я́коже бо купина́ не сгара́ше опаля́ема,/ та́ко Де́ва родила́ еси́,/ и Де́ва пребыла́ еси́./ Вме́сто столпа́ о́гненнаго,/ пра́ведное возсия́ Со́лнце:/ вме́сто Моисе́я,// Христо́с, спасе́ние душ на́ших.

Вход со Евангелием. Све́те ти́хий:

Таже, прокимен великий, глас 7:

Кто бог ве́лий, я́ко Бог наш?/ Ты еси́ Бог творя́й чудеса.

Стих 1: Сказа́л еси́ в лю́дех си́лу Твою́.

Стих 2: И рех: ны́не нача́х, сия́ изме́на десни́цы Вы́шняго.

Стих 3: Помяну́х дела́ Госпо́дня, я́ко помяну́ от нача́ла чудеса́ Твоя́.

И паки: Кто бог ве́лий:

По прокимне же возглашает диакон: И о сподо́битися нам слы́шанию свята́го Ева́нгелиа, Го́спода Бо́га мо́лим.

Посем чтет Евангелие настоятель во алтаре.

Евангелие от Иоанна, зачало 65

Сущу позде в день той, во едину от суббот, и дверем затворенным, идеже бяху ученицы Его собрани страха ради иудейска, прииде Иисус, и ста посреде, и глагола им: мир вам. И сие рек, показа им руце, и нозе, и ребра своя: возрадовашася же ученицы видевше Господа. Рече же им Иисус паки: мир вам. якоже посла Мя Отец, и Аз посылаю вы. И сие рек, дуну, и глагола им: приимите Дух Свят. Имже отпустите грехи, отпустятся им: и имже держите, держатся. Фома же един от обоюнадесяте, глаголемый близнец, не бе ту с ними, егда прииде Иисус. Глаголаху же ему друзии ученицы: видехом Господа. он же рече им: аще не вижду на руку Его язвы гвоздинныя, и вложу перста моего в язвы гвоздинныя, и вложу руку мою в ребра Его, не иму веры.

Посем ектения: Рце́м вси: и Сподо́би, Го́споди, в ве́чер сей:

Таже, Испо́лним вече́рнюю моли́тву:

И по возгласе поем стихиру воскресну.

Глас 2:

Воскресе́ние Твое́, Христе́ Спа́се,/ всю просвети́ вселе́нную,/ и призва́л еси́ Твое́ созда́ние,// всеси́льне Го́споди, сла́ва Тебе́.

Таже, стихиры Пасхи, глас 5:

Да воскре́снет Бо́г: Па́сха свяще́нная: с припевы их. Сла́ва, и ны́не: Воскресе́ния день: Таже: Христо́с Воскре́се: трижды. (стр.27)

Таже, диакон: Прему́дрость.

Лик: Благослови́.

Настоятель: Сый благослове́н Христо́с Бог наш:

Лик: Ами́нь. Утверди́, Бо́же:

Таже, настоятель, вместо: Сла́ва Тебе́, Христе́ Бо́же:

Христо́с воскре́се из ме́ртвых, сме́ртию смерть попра́в...

Лик: ...И су́щим во гробе́х живо́т дарова́в.

И абие глаголет отпуст со крестом: Христо́с, воскресы́й из ме́ртвых: и прочее, якоже изъявися в конец утрени. (стр.31)

И тако творим во всю седмицу Светлую вечерни последование.

Иерей полагает поклон настоятелю, и отходит во святый олтарь, и взем кадильницу стоит перед святою трапезою, и кадит крестообразно, глаголя: Сла́ва Святе́й и Единосу́щней: И начинает тропарь: Христо́с воскре́се: трижды. И мы отвещаем такоже.

И поем тропарь со стихи его, якоже писано в неделю утра и вечера.

Таже, ектения великая.

И по возгласе абие поем канон, ирмос: Воскресе́ния день: по дважды, тропари же на 10, с припевы: Христо́с воскре́се из ме́ртвых. Глаголем богородичны господина Феофана и господина Иосифа. Катавасия, оба лика вкупе: Воскресе́ния день: И посем: Христо́с воскре́се: трижды, поскору.

По 3-й песни ипакои: Предвари́вший у́тро: И чтение от Иоанна Златоустаго.

По 6-й песни кондак: Аще и во гроб: и икос, и чтение. И по нем: Воскресе́ние Христо́во: трижды. И Воскре́с Иису́с от гро́ба: трижды.

И абие прочия песни, 9-ю поем с припевы. Поем и Богородичны на последних припевах. (см. стр. 26) Таже екзапостиларий: Пло́тию усну́в: трижды.

На хвалитех: Вся́кое дыха́ние: И поем стихиры воскресны 4.

Глас 2:

Стих: Хвали́те Его́ на си́лах Его,/ хвали́те Его́ по мно́жеству вели́чествия Его.

Вся́кое дыха́ние, и вся тварь/ Тя сла́вит Господи,/ я́ко Кресто́м смерть упраздни́л еси́;/ да пока́жеши лю́дем е́же из ме́ртвых Твое́ воскресе́ние,// я́ко Еди́н Человеколю́бец.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Да реку́т иуде́и,/ ка́ко во́ини погуби́ша стрегу́щии Царя́?/ почто́ бо ка́мень не сохрани́ Ка́меня Жи́зни?/ или́ погребе́ннаго да да́дят,/ или́ воскре́сшему да покло́нятся,/ глаго́люще с на́ми:/ сла́ва мно́жеству щедро́т Твои́х,// Спа́се наш, сла́ва Тебе.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Ра́дуйтеся лю́дие и весели́теся,/ а́нгел седя́й на ка́мени гро́бнем,/ той нам благовести́ рек:/ Христо́с воскре́се из ме́ртвых,/ Спас ми́ра, и испо́лни вся́ческая благоуха́ния./ Ра́дуйтеся лю́дие и весели́теся.

Стих: Хвали́те Его в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Ангел у́бо, е́же ра́дуйся,/ пре́жде Твоего́ зача́тия, Го́споди, благода́тней принесе́;/ Ангел же ка́мень сла́внаго Твоего́ гро́ба в Твое́м воскресе́нии отвали́./ Ов у́бо в печа́ли ме́сто весе́лия о́бразы возвеща́я;/ сей же вме́сто сме́рти Влады́ку Жизнода́вца пропове́дуя нам./ Те́мже вопие́м Ти:// Благоде́телю всех Го́споди, сла́ва Тебе́.

И стихиры Пасхи с припевы их, якоже предписася во утрени недели.

И ектении, и отпуст. И час первый.

Сице же бывает служба утрени во всю седмицу светлую.

Антифоны Пасхи, якоже указася в Неделю Пасхи.

Прокимен апостола, глас 8-й:

Во всю зе́млю изы́де веща́ние их,/ и в концы́ вселе́нныя глаго́лы их.

Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь.

Апостол в деяниих, зачало 2.

Аллилуия, глас 1-й:

Испове́дят небеса́ чудеса́ Твоя́, Го́споди.

Стих: Бог прославля́ем во сове́те святы́х.

Евангелие от Иоанна, зачало 2-е.

Причастен: Те́ло Христо́во:

Начало, якоже указуяся. На Го́споди воззва́х: поставим стихов 6. Стихиры воскресны, глас 3-й:

Стих: Аще беззако́ния на́зриши Го́споди, Го́споди, кто постои́т?/ я́ко у Тебе́ очище́ние есть.

Твои́м Кресто́м, Христе́ Спа́се,/ сме́рти держа́ва разруши́ся,/ и диа́воля пре́лесть упраздни́ся;/ род же челове́ческий, ве́рою спаса́емый,// песнь Тебе́ всегда́ прино́сит.

Стих: Имене ра́ди Твоего́ потерпе́х Тя Го́споди, потерпе́ душа́ моя в сло́во Твое́,/ упова́ душа́ моя́ на Го́спода.

Просвети́шася вся́ческая/ воскресе́нием Твои́м, Го́споди,/ и рай па́ки отве́рзеся,/ вся же тварь восхваля́ющи Тя,// песнь Тебе всегда прино́сит.

Стих: От стра́жи у́тренния до но́щи, от стра́жи у́тренния,/ да упова́ет Изра́иль на Го́спода.

Сла́влю Отца́ и Сы́на си́лу,/ и Ду́ха Свята́го пою́ власть,/ неразде́льное, несозда́нное Божество́,/ Тро́ицу Единосу́щную,// ца́рствующую во век ве́ка.

И восточны 3, глас тойже.

Стих: Яко у Го́спода ми́лость, и мно́гое у Него́ избавле́ние,/ и той изба́вит Изра́иля от всех беззако́ний его́.

Кресту́ Твоему́ честно́му покланя́емся, Христе́,/ и Воскресе́ние Твое́ пое́м и сла́вим;// Ра́ною бо Твое́ю мы вси исцеле́хом.

Стих: Хвали́те Го́спода вси язы́цы,/ похвали́те Его́ вси лю́дие.

Пое́м Спа́са от Де́вы вопло́щшагося;/ нас бо ра́ди распя́тся и в тре́тий день воскре́се// да́руя нам ве́лию ми́лость.

Стих: Яко утверди́ся ми́лость Его́ на нас,/ и и́стина Госпо́дня пребыва́ет во век.

Су́щим во а́де сшед Христо́с благовести́:/ дерза́йте, глаго́ля: ны́не победи́х,/ Аз есмь Воскресе́ние, Аз вы возведу́,// разруши́в сме́ртная врата́.

Слава, глас тойже:

Недосто́йно стоя́ще в пречи́стом дому́ Твое́м,/ вече́рнюю песнь возсыла́ем,/ из глубины взыва́юще, Христе́ Бо́же;/ просвети́вый мир тридне́вным воскресе́нием Твои́м,// изми́ лю́ди Твоя́ от руки́ враго́в Твои́х, Человеколю́бче.

И ныне, Богородичен:

Ка́ко не диви́мся/ Богому́жному рождеству́ Твоему́, Пречестна́я?/ Искуше́ния бо му́жескаго не прии́мши Всенепоро́чная,/ родила́ бо еси без Отца́ Сы́на пло́тию;/ пре́жде век от Отца́ рожде́ннаго без ма́тере,/ ника́коже претерпе́вшаго измене́ния,/ или́ смеше́ния, или́ разделе́ния;/ но обою́ существу́ свойство це́ло сохра́ньшаго./ Те́мже Мати Дево Влады́чице,/ Того́ моли́ спасти́ся душа́м,// правосла́вно Богоро́дицу испове́дающих Тя.

Вход с кадилом. Све́те ти́хий:

Прокимен великий, глас 7:

Бог наш на небеси́ и на земли́,/ вся ели́ка восхоте́, сотвори́.

Стих: Во исхо́де Изра́илеве от Еги́пта, до́му Иа́ковля, из люде́й ва́рвар, бысть Иуде́а святы́ня Его́.

Стих: Мо́ре ви́де и побеже́, Иорда́н возврати́ся вспя́ть.

Стих: Что ти есть мо́ре, яко побе́гло еси́? и тебе́, Иорда́не, я́ко возврати́лся еси́ вспять?

И паки: Бог наш на небеси́ и на земли́:

Иерей: Рцем вси: и прочее. Сподо́би Го́споди: таже, Испо́лним вече́рнюю:

На стиховне стихира воскресна, глас 3-й:

Стра́стию Твое́ю, Христе́,/ омрачи́вый со́лнце,/ и све́том Твоего́ Воскресе́ния/ просвети́вый вся́ческая,// приими́ на́шу вече́рнюю песнь, Человеколю́бче.

И стихиры Пасхи с припевы их, и Христо́с воскре́се: трижды, и отпуст.

Бывает все последование, якоже предписася.

На хвалитех стихиры воскресны, на 4, глас 3:

Стих: Хвали́те Его́ на си́лах Его,/ хвали́те Его́ по мно́жеству вели́чествия Его́.

Прииди́те вси язы́цы,/ уразуме́йте стра́шныя та́йны си́лу;/ Христо́с бо Спас наш,/ е́же в нача́ле сло́во,/ Распя́тся нас ра́ди, и во́лею погребе́ся,/ и воскре́се из ме́ртвых, е́же спасти вся́ческая;// Тому́ поклони́мся.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Пове́даша вся чудеса́ стра́жие Твои́, Го́споди;/ но со́бор суеты́, испо́лни мздо́ю десни́цу их,/ скры́ти мня́ше погребе́ние Твое́,// е́же мир сла́вит; поми́луй нас.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Ра́дости вся испо́лнишася,/ Воскресе́ния иску́с прии́мша;/ Мария бо Магдали́на ко гро́бу прии́де,/ обре́те а́нгела на ка́мени седя́ща,/ ри́зами блиста́ющася и глаго́люща:/ что и́щете Жива́го с ме́ртвыми?/ несть зде, но воста́, я́коже рече́,// предваря́я вы в Галиле́и.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Во све́те Твое́м, Влады́ко,/ у́зрим свет, Человеколю́бче;/ воскре́сл бо еси́ из ме́ртвых,/ спасе́ние ро́ду челове́ческому да́руяй, / да Тя вся тварь славосло́вит, еди́наго Безгре́шнаго;// поми́луй нас.

И стихиры Пасхи, с припевы их. Таже: Христо́с воскре́се: трижды.

Ектении, и отпуст. И час первый.

Начало, якоже предписася. Антифоны Пасхи.

Прокимен, глас 3. Песнь Богородицы:

Вели́чит душа́ моя́ Го́спода,/ и возра́довася дух мой о Бо́зе Спа́се мое́м.

Стих: Яко призре́ на смире́ние рабы́ Своея́:

Апостол в деяниих, зачало 4.

Аллилуйя, глас 8: Воскресни́, Го́споди, в поко́й Твой, Ты и киво́т святы́ни Твоея́.

Стих: Кля́тся Госпо́дь Дави́ду и́стиною, и не отве́ржется ея́.

Евангелие от Луки, зачало 113.

Причастен: Те́ло Христо́во приими́те:

На Го́споди воззва́х: поем стихиры на 6, глас 4:

Стих: Аще беззако́ния на́зриши, Го́споди, Го́споди, кто постои́т?/ Яко у Тебе́ очище́ние есть.

Животворя́щему Твоему́ Кресту́,/ непреста́нно кла́няющеся, Христе́ Бо́же,/ тридне́вное Воскресе́ние Твое́ сла́вим;/ тем бо обнови́л еси́ истле́вшее челове́ческое естество́, Всеси́льне,/ и и́же на небеса́ восхо́д обнови́л еси нам,// я́ко еди́н Благ и Человеколю́бец.

Стих: Имене ра́ди Твоего́ потере́х Тя, Го́споди. Потерпе́ душа́ моя в сло́во Твое́,/ упова́ душа́ моя́ на Го́спода.

Дре́ва преслуша́ния запреще́ние разреши́л еси́, Спа́се,/на дре́ве кре́стнем во́лею пригвозди́вся,/ и во ад соше́д Си́льне,/ сме́ртныя у́зы я́ко Бог растерза́л еси́./ Те́мже кла́няемся е́же из ме́ртвых Твоему́ воскресе́нию,/ ра́достию вопию́ще:// всеси́льне Го́споди, сла́ва Тебе́.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Врата́ а́дова сокруши́л еси́, Господи,/ и Твое́ю сме́ртию сме́ртное ца́рство разруши́л еси́;/ род же челове́ческий от тле́ния свободи́л еси́,/ живо́т и нетле́ние ми́ру дарова́в,// и ве́лию ми́лость.

И анатолиевы 3:

Стих: Яко у Го́спода ми́лость и мно́гое у Него́ избавле́ние,/ и Той изба́вит Изра́иля от всех беззако́ний его́.

Прииди́те воспои́м лю́дие/ Спа́сово тридне́вное воста́ние,/ и́мже изба́вихомся а́довых нереши́мых уз,/ и нетле́ние и жизнь вси восприя́хом, зову́ще:/ распны́йся и погребы́йся, и воскресы́й,/ спаси́ ны воскресе́нием Твои́м,// еди́не Человеколю́бче.

Стих: Хвали́те Го́спода вси язы́цы,/ похвали́те Его вси лю́дие.

Ангели и челове́цы, Спа́се,/ Твое́ пою́т тридне́вное воста́ние,/ и́мже озари́шася вселе́нныя концы́,/ и рабо́ты вра́жия вси изба́вихомся, зову́ще:/ животво́рче всеси́льне Спа́се,/ спаси́ ны воскресе́нием Твои́м,// еди́не Человеколю́бче.

Стих: Яко утверди́ся ми́лость Его́ на нас,/ и и́стина Госпо́дня пребыва́ет во век.

Врата́ ме́дныя стерл еси́,/ и вереи́ сокруши́л еси́ Христе́ Бо́же,/ и род челове́ческий па́дший воскреси́л еси́./ Сего́ ра́ди согла́сно вопие́м:// воскресы́й из ме́ртвых Го́споди, сла́ва Тебе́.

Слава:

Го́споди, е́же от Отца́ Твое́ рождество́,/ безле́тное есть и присносу́щное;/ е́же от Де́вы воплоще́ние/ неизрече́нное челове́ком и несказа́нное,/ и е́же во ад соше́ствие,/ стра́шное диа́волу и а́ггелом его́./ Смерть бо попра́в, тридне́вен воскре́сл еси́,/ нетле́ние подава́я челове́ком,// и ве́лию ми́лость.

И ныне, Богородичен:

Иже Тебе́ ра́ди Богооте́ц проро́к Дави́д/ пе́сненно о Тебе́ провозгласи́/ вели́чия Тебе́ сотво́ршему,/ предста́ Цари́ца одесну́ю Тебе́,/ Тя бо Ма́терь, Хода́таицу Живота́ показа́,/ без отца́ из Тебе́ вочелове́читися благоволи́вый Бог,/ да Свой па́ки обнови́т о́браз, истле́вший страстьми́,/ и заблу́дшее горохи́щное обре́т овча́,/ на ра́мо восприи́м, ко Отцу́ принесе́т,/ и Своему́ хоте́нию,/ с Небе́сными совокупи́т Си́лами,/ и спасе́т, Богоро́дице, мир Христо́с,// име́яй ве́лию и бога́тую ми́лость.

Вход с кадилом. Све́те ти́хий:

Прокимен великий глас 8:

Гла́сом мои́м ко Го́споду воззва́х,/ гла́сом мои́м к Бо́гу, и внят ми.

Стих: В день ско́рби мое́я Бо́га взыска́х.

Стих: Отве́ржеся уте́шитися душа́ моя́.

Стих: Бо́же, во святе́м путь Твой.

И паки: Гла́сом мои́м ко Го́споду воззва́х:

На стиховне стихира воскресна, глас 4:

Го́споди, возше́д на кр́ест,/ пра́деднюю на́шу кля́тву потреби́л еси́,/ и соше́д во ад, я́же от ве́ка у́зники свободи́л еси́,/ нетле́ние да́руя челове́ческому ро́ду./ Сего́ ра́ди пою́ще, сла́вим// животворя́щее и спаси́тельное Твое́ воста́ние.

Таже стихиры Пасце с припевы их, и прочее, и отпуст.

Начало и канон Пасце, якоже предъявися.

На хвалитех поем стихиры воскресны на 4, глас 4:

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Крест претерпе́вый и смерть,/ и воскресы́й из ме́ртвых,/ Всеси́льне Го́споди,// сла́вим Твое́ Воскресе́ние.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Кресто́м Твои́м, Христе́,/ дре́вния клятвы свободи́л еси́ нас,/ и сме́ртию Твое́ю/ естество́ на́ше му́чащаго диа́вола упраздни́л еси́,/ воста́нием же Твои́м ра́дости вся испо́лнил еси́./ Тем́же вопие́м Ти:// воскресы́й из ме́ртвых Го́споди, сла́ва Тебе́.

Стих: Хвали́те Его́ в тимпа́не и лице,/ хвали́те Его́ во стру́нах и орга́не.

Твои́м Кресто́м, Христе́ Спа́се,/ наста́ви нас на и́стину Твою́,/ и избави ны от се́тей вра́жиих,/ воскресы́й из ме́ртвых,/ возста́ви ны па́дшия грехо́м,/ просте́р ру́ку твою́ Человеколю́бче Го́споди,/ моли́твами святы́х Твои́х.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Оте́ческих Твои́х недр не разлучи́вся,/ Единоро́дне Сло́ве Бо́жий,/ прише́л еси́ на зе́млю за человеколю́бие,/ Челове́к быв непрело́жен,/ й Крест и смерть претерпе́л еси́ пло́тию,/ безстра́стный Божество́м,/ воскре́с же из ме́ртвых,/ безсме́ртие по́дал еси́ челове́ческому ро́ду,// я́ко Еди́н Всеси́лен.

И стихиры Пасце, с припевы их. Таже: Христо́с воскре́се: трижды.

Ектении, и отпуст. И час первый.

Начало, якоже предписася. Антифоны Пасце.

Прокимен, глас 6:

Помяну́ Имя Твое́/ во вся́ком ро́де и ро́де.

Стих: Слы́ши, Дщи́, и виждь, и приклони́ у́хо Твое́.

Апостол в деяниих, зачало 5.

Аллилуия, глас 2: Вели́чит душа́ моя́ Го́спода, и возра́довася дух мой о Бо́зе Спа́се мое́м.

Стих: Яко призре́ на смире́ние рабы́ Своея́, се бо отны́не ублажа́т мя вси ро́ди.

Евангелие от Иоанна, зачало 4.

Причастен: Те́ло Христо́во приими́те:

На Го́споди воззва́х: поем стихиры на 6, глас 5:

Стих: Аще беззако́ния на́зриши, Го́споди, Го́споди, кто постои́т?/ Яко у Тебе́ очище́ние е́сть.

Честны́м Твои́м Кресто́м, Христе́,/ диа́вола посрами́л еси́,/ и воскресе́нием Твои́м жа́ло грехо́вное притупи́л еси́,/ и спа́сл еси́ ны от врат сме́ртных;// сла́вим Тя, Единоро́дне.

Стих: Имене ра́ди Твоего́ потере́х Тя, Го́споди. Потерпе́ душа́ моя́ в сло́во Твое́,/ упова́ душа́ моя́ на Го́спода.

Воскресе́ние Дая́й ро́ду человече́скому,/ я́ко овча́ на заколе́ние веде́ся;/ устраши́шася Сего́ кня́зи а́дстии,/ и взя́шася врата́ плаче́вная,/ вни́де бо Царь Сла́вы Христо́с,/ глаго́ля су́щим во у́зах: изыди́те;// и су́щим во тьме: откры́йтеся.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Ве́лие чу́до,/ неви́димых Соде́тель/ за человеколю́бие пло́тию пострада́в,/ воскре́се Безсме́ртный,/ прииди́те оте́чествия язы́к,/ Тому́ поклони́мся;/ благоутро́бием бо Его от пре́лести изба́вльшеся,// в трие́х ипоста́сях Еди́ного Бо́га пе́ти навыко́хом.

Стих: Яко у Го́спода ми́лость, и мно́гое у Него́ избавле́ние,/ и Той изба́вит Изра́иля от всех беззако́ний его́.

Вече́рнее поклоне́ние прино́сим Тебе́, Невече́рнему Све́ту,/ на коне́ц веко́в,/ я́ко в зерца́ле пло́тию возсия́вшему ми́рови,/ и да́же до а́да низше́дшему,/ и та́мо су́щую тьму разруши́вшему,/ и свет Воскресе́ния язы́ком показа́вшему;// Светода́вче Го́споди, сла́ва Тебе́.

Стих: Хвали́те Го́спода вси язы́цы,/ похвали́те Его́ вси лю́дие.

Нача́льника спасе́ния на́шего Христа́ славосло́вим,/ Тому́ бо из ме́ртвых воскре́сшу,/ мир от пре́лести спасе́н бысть;/ ра́дуется лик а́нгельский,/ бе́гает де́монов пре́лесть,/ Ада́м пады́й воста́, диа́вол упраздни́ся.

Стих: Яко утверди́ся ми́лость Его́ на нас,/ и и́стина Госпо́дня пребыва́ет во век.

Иже от кустоди́и науче́ни быва́ху, от беззако́нник:/ покры́йте Христо́во воста́ние,/ и приими́те сре́бренники, и рцы́те:/ я́ко нам спя́щим, из гро́ба укра́ден бысть ме́ртвый./ Кто ви́де, кто слы́ша ме́ртва укра́дена когда́?/ па́че же пома́зана и на́га,/ оста́вльша и во гро́бе погреба́льная своя́?/ не прельща́йтеся, иуде́е,/ навы́кнете рече́нием проро́ческим, и уразуме́йте,/ я́ко Той есть вои́стинну// Изба́витель ми́ра, и всеси́льный.

Слава:

Го́споди, ад плени́вый/ и смерть попра́вый, Спа́се наш,// просвети́вый мир Кресто́м честны́м, поми́луй нас.

И ныне, Богородичен:

В Чермне́м мо́ри,/ Неискусобра́чныя Неве́сты/ о́браз написа́ся иногда́:/ та́мо Моисе́й, раздели́тель воды́,/ зде же Гаврии́л, служи́тель чудесе́;/тогда́ глубину́ ше́ствова немо́кренно Изра́иль,/ ны́не же Христа́ роди́ безсе́менно Де́ва;/ мо́ре по проше́ствии Изра́илеве пребы́сть непрохо́дно,/ Непоро́чная по рождестве́ Емману́илеве пребы́сть нетле́нна./ Сый и пре́жде Сый,/явле́йся, я́ко Челове́к,// Бо́же, поми́луй нас.

Вход с кадилом. Све́те ти́хий:

Прокимен великий глас 7:

Внуши́, Бо́же, моли́тву мою́,/ и не пре́зри моле́ния моего́.

Стих: Вонми́ ми, и услы́ши мя.

Стих: Яко уклони́ша на мя беззако́ние.

Стих: Аз к Бо́гу воззва́х, и Госпо́дь услы́ша мя, ве́чер и зау́тра и полу́дне.

Таже: Внуши́, Боже, моли́тву мою́:

На стиховне стихира воскресна, глас 5:

Тебе́, воплоще́ннаго Спа́са Христа́,/ и небе́с не разлучи́вшася,/ во гла́сех пе́ний велича́ем:/ я́ко Крест и смерть прия́л еси́ за род наш,/ я́ко Человеколю́бец Госпо́дь,/ испрове́ргий а́дова врата́,/ тридне́вно воскре́сл еси́,// спаса́я ду́ши на́ша.

Таже стихиры Пасце с припевы их, и прочее, и отпуст.

Начало и канон Пасце, якоже предъявися.

На хвалитех поем стихиры воскресны на 4, глас 5:

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Го́споди, запеча́тану гро́бу от беззако́нников,/ проше́л еси́ из гро́ба,/ я́коже роди́лся еси́ от Богоро́дицы;/ не уразуме́ша, ка́ко воплоти́лся еси, безпло́тнии Твои́ Ангели,/ не чу́вствоваша, когда́ воскре́сл еси, стрегу́щии Тя во́ини./ Обоя́ бо запечатле́шася испыту́ющим./ Яви́шася же чудеса́ кла́няющимся ве́рою та́инству;/ е́же воспева́ющим// и возда́ждь нам ра́дость и ве́лию ми́лость.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Го́споди, вереи́ ве́чныя сокруши́вый, и у́зы растерза́вый,/ от гро́ба воскре́сл еси́,/ оста́вль Твоя́ погреба́льная,/ в свиде́тельство и́стиннаго тридне́внаго Твоего́ погребе́ния;/ и предвари́л еси́ в Галиле́и, в пеще́ре стрего́мый;/ вели́кая Твоя́ ми́лость,/ Непостижи́ме Спа́се,// поми́луй и спаси́ нас.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Го́споди, жены́ теко́ша на гроб ви́дети Тя, Христа́,/ нас ради пострада́вшаго,/ и прише́дше, обрето́ша Ангела на ка́мени седя́ща,/ стра́хом отва́льшемся и к ним возопи́, глаго́ля:/ воскре́се Госпо́дь, рцы́те ученико́м,/ я́ко воскре́се от ме́ртвых,// Спаса́яй ду́ши на́ша.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Го́споди, я́коже изше́л еси́ от запеча́танного гро́ба,/ та́ко вшел еси́ и две́рем заключе́нным ко ученико́м Твои́м,/ показу́я им теле́сная страда́ния,/ я́же подъя́л еси́ Спа́се Долготерпе́вый,/ я́ко от се́мене Дави́дова,/ я́звы претерпе́л еси́;/ я́ко Сын же Бо́жий, мир свободи́л еси́./ Ве́лия Твоя́ ми́лость,/ Непостижи́ме Спа́се,// поми́луй и спаси́ нас.

И стихиры Пасце, с припевы их. Таже: Христо́с воскре́се: трижды.

Ектении, и отпуст. И час первый.

Начало, якоже предписася. Антифоны Пасце.

Прокимен, глас 3: По́йте Бо́гу на́шему, по́йте,/ по́йте Царе́ви на́шему, по́йте.

Стих: Вси язы́цы восплещи́те рука́ми, воскли́кните Бо́гу гла́сом ра́дования.

Апостол в деяниих, зачало 6.

Аллилуия, глас 4: Наляцы́ и успева́й, и ца́рствуй, истины ра́ди и кро́тости и пра́вды.

Стих: Возлюби́л еси́ пра́вду, и возненави́дел еси́ беззако́ние.

Евангелие от Иоанна, зачало 8.

Причастен: Те́ло Христо́во приими́те:

Поем настоящее последование, бывшее от господина Никифора Каллиста Ксанфопула: На Пресвятую Госпожу Владычицу Богородицу, Живоприемный Источник. Не бо обретохом в Типице сицеваго последования, но положися любве ради Пресвятыя Богородицы.

На Го́споди воззва́х: поставим стихов 10, и поем стихиры воскресны осмогласника, глас 6:

Стих: Изведи́ из темни́цы ду́шу мою́/ испове́датися и́мени Твоему́.

Побе́ду име́яй Христе́ ю́же на а́да,/ на Крест возше́л еси́;/ да во тьме сме́рти седя́щия воскреси́ши с собо́ю,/ и́же в ме́ртвых свобо́дь;/ источа́яй живо́т от Своего́ света,// всеси́льне Спа́се, поми́луй нас.

Стих: Мене́ жду́т пра́ведницы,/ до́ндеже возда́си мне.

Днесь Христо́с смерть попра́в,/ я́коже рече́, воскре́се,/ и ра́дование ми́ру дарова́,/ да вси взыва́юще песнь, та́ко рцем:/ Исто́чниче Жи́зни, Непристу́пный Све́те,// Всеси́льне Спа́се, поми́луй нас.

Стих: Из глубины́ воззва́х к Тебе́, Го́споди,/ Го́споди, услы́ши глас мой.

Тебе́, Го́споди, су́щаго по всей тва́ри,/ гре́шнии ка́мо бежи́м?/ на небеси́ сам живе́ши,/ во а́де попра́л еси́ смерть;/ во глубины́ морски́я?/ та́мо рука́ Твоя́, Влады́ко./ К Тебе́ прибегае́м,/ Тебе́ припа́дающе мо́лимся:// Воскресы́й из ме́ртвых, поми́луй нас.

Ины стихиры восточны, глас тойже.

Стих: Да бу́дут у́ши Твои́/ вне́млюще гла́су моле́ния моего́.

Кресто́м Твои́м, Христе́, хва́лимся,/ и Воскресе́ние Твое́ пое́м и сла́вим;/ Ты бо еси́ Бог наш,// Ра́зве Тебе́ ино́го не ве́мы.

Стих: Аще беззако́ния на́зриши, Го́споди, Го́споди, кто постои́т?/ я́ко у Тебе́ очище́ние есть.

Сла́ва си́ле Твое́й, Го́споди,/ я́ко упраздни́л еси́ держа́ву иму́щаго сме́рти,/ обнови́л еси́ ны Кресто́м Твои́м,// да́руяй нам жизнь и нетле́ние.

Стих: Имене ра́ди Твоего́ потерпе́х Тя Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Вы́ну благословя́ще Го́спода,/ пое́м воскресе́ние Его́,/ Крест бо претерпе́в,// сме́ртию сме́рть погуби́.

Таже, стихиры Живоприемнаго Источника,

глас тойже, подобен: Все́ отложше:

Стих: От стра́жи у́тренния до но́щи, от стра́жи у́тренния,/ да упова́ет Изра́иль на Го́спода.

Стра́нная и пресла́вная,/ Небе́с Влады́ка на Тебе́ соверша́ше изнача́ла, Всенепоро́чная;/ и́бо свы́ше я́вственно ука́ну,/ я́коже дождь во утро́бе Твое́й, Богоневе́сто,/ Исто́чник Тя показу́я, все благо́е вре́ющий,/ оби́лие же исцеле́ний,/ благодея́ния источа́ющий всем незави́стно, / тре́бующим кре́пости душ, и здра́вие телесе́,// водо́ю благода́ти.

Стих: Яко у Го́спода ми́лость, и мно́гое у Него́ избавле́ние,/ и Той изба́вит Изра́иля от всех беззако́ний его́.

Ма́нну Тя небе́сную,/ и рая́, Де́во, Исто́чник Боже́ственный,/ имену́ю, Влады́чице, преи́скренне:/ земли́ бо тече́ ток,/ и благода́ть исто́чника Твоего́ четвероча́стие ея́ покрыва́ющая,/ стра́нными чудесы́ всегда́,/ и всем проси́мая быва́ет вода́ пие́мая./ Те́мже веселя́щеся христоимени́тии, притека́ем ве́рно,// святы́ню че́рплюще всегда́ сладкото́чную.

Стих: Хвали́те Го́спода вси язы́цы,/ похвали́те Его́ вси лю́дие.

Струи́ исцеле́ний источа́еши, Де́во,/ ве́рно притека́ющим исто́чнику Твоему́ всегда́, Богоневе́сто,/ ту́не бо излива́еши,/ оби́льно и бога́тно неду́гующим исцеле́ния;/ слепы́я ви́дящия явля́еши я́сно, приступа́ющия к Тебе́,/ хромы́я мно́гия испра́вила еси́,/ и разсла́бленныя стягну́ла еси́,/ умерщвле́на же оживи́ла еси́ возлия́нием трегу́бым,// неводне́нных и злоды́шущих стра́сти исцели́ла еси́.

Стих: Яко утверди́ся ми́лость Его́ на нас,/ и и́стина Госпо́дня пребыва́ет во век.

Стра́нная и пресла́вная: (повторяем 1-ю стихиру).

Слава, глас 6:

Кто возглаго́лет си́лы Твоя́, Исто́чниче,/ и́же неистоща́емыми чудесы́ изоби́луяй,/ мно́гая и па́че естества́ содева́еши исцеле́ньми?/ Оле вели́чий, я́же всем излива́еши!/ не то́кмо бо боле́зни неудо́бныя отгна́ла еси́ притека́ющих с любо́вию,/ но и душе́вныя стра́сти измыва́еши очища́ющи, Всенескве́рная,// всем подаю́щи ве́лию ми́лость.

И ныне, глас тойже:

Кто Тебе́ не ублажи́т, Пресвята́я Де́во?/ кто ли не воспое́т Твоего́ Пречи́стаго Рождества́?/ безле́тно бо от Отца́ возсия́вый Сын Единоро́дный,/ То́йже от Тебе́, Чи́стыя, про́йде,/ неизрече́нно вопло́щся./ Естество́м Бог Сый,/ и естество́м быв Челове́к нас ра́ди;/ не во двою́ лицу́ разделя́емый,/ но во двою́ естеству́/ несли́тно познава́емый./ Того моли́, Чи́стая, Всеблаже́нная,/ поми́ловатися душа́м на́шим.

Вход с кадилом. Све́те ти́хий:

Прокимен великий, глас 7:

Возлюблю́ Тя Го́споди, Кре́посте моя́,/ Госпо́дь утвержде́ние мое́.

Стих: Бог мой, помо́щник мой, и упова́ю на Него.

Стих: Хваля́ призову́ Го́спода, и от враг мои́х спасу́ся.

Стих: Услы́ша от хра́ма свята́го своего́ глас мой.

Таже: Возлюблю́ Тя Го́споди, Кре́посте моя:

Таже: Рцем вси: Сподо́би Го́споди: и прочая.

На стиховне стихира воскресна,

глас 6, осмогласника:

Воскресе́ние Твое́, Христе́ Спасе́,/ Ангели пою́т на небесе́х,/ и нас на земли́ сподо́би/ чи́стым се́рдцем// Тя сла́вити.

Таже, настоящий стихиры Богородицы,

глас 5.

Подобен: Ра́дуйся:

Ра́дуйся, Живоно́сный Исто́чниче,/ по моря́м разлива́яй чудеса́ на всю вселе́нную,/ Океа́не у́мный,/ Ни́ловы струи́ превосходя́й излива́нием благода́ти;/ Силоа́ме вторы́й, во́ду источа́яй, а́ки от ка́мене пресла́вную,/ Иорда́ново же прие́мый де́йство,/ ма́нно спаси́тельная же, я́сно быва́емая,/ ко и́щущаго тре́бованию бога́тая вои́стинну и незави́стная,/ Христо́ва Мати Отрокови́це,// излива́ющая ми́рови ве́лию ми́лость.

Стих: Освяти́л есть/ сел́ение свое́ Вы́шний.

Пе́сньми чу́дными ве́рнии Небе́сный Облак воспои́м,/ Ка́плю Небе́сную Живода́вца Христа́ на зе́млю нетле́нно одожди́вшую,/ жи́ву ска́чущую, и источа́ющую безсме́ртная,/ во́ду Боже́ственную, амвроси́ю некта́ра,/ никогда́же по питии́ истлева́юща,/ жа́жду же та́ющую ду́ши отгоня́юща,/ от него́же пию́щим разу́мно,/ то́ки Боже́ственныя предлага́ются от Умнаго Чре́ва,// точа́ща всем благода́ть незави́стную.

Стих: Ре́чная устремле́ния/ веселя́т град Бо́жий.

Ра́дуйся, Живоприе́мный Исто́чниче,/ ве́чно источа́я благода́ти,/ лия́ние исцеле́ний,/ вс́якую неду́гов кре́пость,/ немощну́ю и злу́ю отгоня́ющее,/ слепы́х воззре́ние и прокаже́нных Боже́ственное очище́ние,/ точа́щее неду́гов вся́кое врачевство́,/ всем притека́ющим ве́рно к хра́му Твоему́;/ вели́кая о́бщая цельба́,/ безме́здная вои́стинну и гото́вая,/ Ма́ти Христа́ Сло́ва,// источа́ющаго ми́рови ве́лию ми́лость.

Слава, глас 5:

Востру́бим празднолю́бцы в пе́снех,/ воспле́щем в вода́х, и возлику́им ра́дующеся,/ ве́чными то́ками Живоно́снаго Исто́чника;/ ца́рие и кня́зи да стека́ются,/ и исто́чника благода́ти да че́рплют незави́стно;/ цари́ бо спасе́, на одре́ же содержи́мыя прикоснове́нием возста́ви./ Па́стырие же и вси дождено́сный о́блак,/ спаси́тельную во́ду сше́дшеся почерпем:/ и́же в неду́зех, свобожде́ние;/ и́же в беда́х, кре́пость;/ прохлажде́ние, иже в жа́жде;/ слепи́и о́чи, глуси́и благослы́шание,/ злостра́ждущии исцеле́ние;/ и́же в сме́ртех, живоно́сную;/ вси повсю́ду ве́рным источа́ющую во́ды спасе́ния,/ воспле́щуще си́ц воззове́м:/ присноживы́я то́ки излива́ющая от исто́чника, Чи́стая,// не преста́й Де́во всегда́ моля́щися о рабе́х Твои́х.

И ныне, глас тойже: Воскресе́ния день:

Христо́с воскре́се: трижды. И отпуст.

Канон Пасце, со ирмосы на 8.

Песнь 1

Воскресе́ния день:

Очи́стим чу́вствия:

Небеса́ у́бо досто́йно да веселя́тся:

И Богородицы на 6, егоже краестрочие:

Никифору Каллисту ту Ксанфопулу.

Стих: Пресвята́я Богоро́дице, спаси́ нас. (и к коеждому тропарю припеваем такоже)

Ны́не источи́ ми,/ Де́во Богоро́дице,/ исто́чниче, благода́ть даю́щи сло́ва,/ я́ко да воспою́ Тя исто́чник,/ вре́ющий живо́т и благода́ть ве́рным:// Ты бо ипоста́сное Сло́во источи́ла еси́.

Врачевство́ па́че естества́,/ храм Твой, Честна́я,/ явля́ется всем, Отрокови́це:/ от сме́рти бо я́вныя притека́ющия ве́рныя,/ я́ве возставля́ет,// и всем незави́стную то́чит сла́дость.

Излива́еши с Небесе́ неистощи́мо/ благода́ти вои́стинну еди́на:/ слепе́юща бо твори́ши взира́ти к све́ту, бла́том но́вым,// возгласи́вши свы́ше па́че смы́сла лео́нови.

Общее любоче́стие челове́чества, Честна́я,/ ра́дуйся, Мари́е, ра́дуйся:/ всех бо Творе́ц на Тя,/ я́коже ка́пля сни́де я́вственно,// исто́чник Тя безсме́ртен показа́в, Богоневе́стная.

Песнь 3

Ирмос: Прииди́те пи́во пие́м:

Ны́не вся испо́лнишася:

Вчера́ спогребо́хся Тебе́:

Богородицы подобны:

Све́тлый Тя святы́й храм/ Влады́ки всех, Отрокови́це, вем/ и нетле́ния исто́чник,/ во́ду излива́ющ Христа́,// от него́же напая́емся.

От Твоея́ благода́ти, Влады́чице, исто́чниче,/ самоде́ржцу дае́ши/ исхо́дов происхожде́ние содержи́мо лю́те,/ ка́мене подстоя́ние стра́шное,// водо́ю разреши́вшееся.

Тече́т благода́ть незави́стная/ от Тебе́, Богоро́дице Де́во,/ оби́льно точа́щая,/ хро́мии ска́чут о Тебе́,/ прокаже́нных очища́ется мно́жество,// и де́мони угнета́ются.

Все́м дае́ши исцел́ение ве́рным,/ царе́м, простце́м, ни́щим,/ князе́м, убо́гим, бога́тым о́бще,/ во́ду излива́яй, исто́чниче,// разли́чное исцеле́ние.

Ектения малая

Кондак Пасхи, глас 8:

Аще и во Гроб снизше́л еси́, Безсме́ртне,/ но а́дову разруши́л еси́ силу/ и воскре́сл еси́, я́ко Победитель, Христе́ Бо́же,/ жена́м мироно́сицам веща́вый: ра́дуйтеся!/ и Твои́м апо́столом мир да́руяй,// па́дшим подая́й воскре́сение.

Седален, глас 8:

Подобен: Прему́дрости сло́ва:

Приснотеку́щий исто́чник и живо́тный,/ источа́яй струя́ Боже́ственный ток,/ согла́сно восхва́лим благода́ти прося́ще:/ на ки́йждо бо день источа́ет исцеле́ния,/ я́ко рек тече́ния показу́яй мале́йшая./ Те́мже по до́лгу приступа́юще с любо́вию,/ ве́рно почерпе́м от исто́чника/ неисчерпа́емое здра́вие, вои́стинну безсме́ртное,/ ороша́ющее ве́рно благочести́вых сердца́,// устна́ми возопии́м: Ты еси́ ве́рных утеше́ние.

Песнь 4

Ирмос: На Боже́ственней стра́жи:

Му́жеский у́бо пол:

Яко единоле́тный а́гнец:

Богооте́ц убо Дави́д:

Богородицы подобны:

Па́че песка́ вои́стинну,/ и ка́плий дожде́вных/ бы́ша, Богоро́дице,/ мно́жества исто́чника дел Твои́х,/ непреста́нно теку́щая на всю зе́млю бога́тно,/ и вся́каго боля́ща лю́те// ско́ро исцеля́ющая.

На стесне́нный жены́ от карки́на сосе́ц/ вода́ возлива́ется, Де́во,/ исто́чника Твоего́, Влады́чице,/ и а́бие преста́ша/ стра́сти смертоно́сныя струе́ю,// и карки́н про́сто изы́ти позна́.

Недомы́слимое в Тебе́,/ и па́че естества́ соде́янное есть/ я́вственно, Богоро́дице:/ вода́ бо быва́ет исто́чника Твоего́/ исцеле́ние, неду́гом смертоно́сным проти́вное,// его́же естество́ я́ве никогда́же ве́дяше.

При́сно умерщвля́ет мя враг/ сла́стными прило́ги,/ Влады́чице исто́чниче Богоро́дице:/ не пре́зри, предвари́, ско́рая по́моще,/ сего́ же се́тей мя изба́ви,// да воспою́ Тя при́сно многопе́тую.

Песнь 5

Ирмос: Утренюем у́треннюю:

Безме́рное Твое́ благоутро́бие:

Присту́пим свещено́снии:

Богородицы подобны:

Глаго́ланная, Де́во Отрокови́це,/ исто́чника Твоего́ вои́стинну чудеса́/ ужаса́ют челове́ков помышле́ние:/ па́че бо естества́ суть,// вся ве́рныя освяща́ющая.

Повествова́ руно́, ма́нна, и Силоа́м,/ и ка́мень точа́щ, Соломо́нов притво́р,/ благода́ть Твою́,/ Иорда́нския во́ды,/ и исто́чник самаряны́ни.

Ка́пли Твоя́, Отрокови́це Де́во, я́же исто́чника,/ и ме́ртваго оживи́ша,/ па́че сло́ва соде́янное и смы́сла:/ вся бо Твоя́, Всечи́стая,// сло́во побежда́ют челове́ческое.

Стра́сти моя́, Отрокови́це, исцели́,/ кровотече́ния исто́чник изсуша́ющи,/ и лю́тое пла́мене возжже́ние,/ и здра́вия преложе́ние,/ исхо́дов сою́з, и чревотече́ние.

Песнь 6

Ирмос: Снизше́л еси́ в преиспо́дняя:

Сохранил це́ла зна́мения:

Спа́се мой, живо́е же и неже́ртвенное:

Богородицы подобны:

Словеса́ Сло́ва,/ я́ко вои́стинну исто́чника,/ воспева́ем Тя, Чи́стая:/ прему́дрости бо глубину́ я́ко па́че сло́ва ражда́еши,/ пове́сивша на возду́се тече́ния,// и зе́млю на во́де.

Подшла́ еси́ ле́ствиц несе́ние,/ отъе́млющее сокруше́ние/ и́же та́мо живопи́сцев./ О, Всесвяты́й Исто́чниче,/ спаса́яй лю́ди от тру́са до́му па́дшия.

Утро́бы неродя́щия непло́дством пре́жде,/ разреша́еши я́ве исто́чника Твоего́ струя́ми:/ и́бо, я́ко роди́вшая Влады́ку все́х,// и рожде́ния подае́ши.

Ни сло́во, ни ум, ниже́ язы́к/ Твое́ возмо́гут, Чи́стая, рождество́ похвали́ти,/ но немощству́ют в Тебе́,/ и облича́ется филосо́фов че́стность,// и ри́торов красота́.

Кондак, глас 8.

Подобен: Взбра́нной:

От неистощи́мыя Ты, исто́чниче Богоблагода́тный, / подае́ши ми, точа́щи во́ды Твое́я благода́ти,/ приснотеку́щий па́че сло́ва./ Яко бо Сло́во ро́ждшая па́че смы́сла,/ молю́ ти ся, ороси́ мя благода́тию, да зову́ ти:// ра́дуйся, водо́ спаси́тельная.

Икос:

Нескве́рная Богоро́дице, ро́ждшая Сло́во Отчее,/ пре́жде век нетле́нно ро́ждшееся,/ разшири́ моя́ уста́, Чи́стая,/ спривнося́щи мя к Твоему́ похвале́нию,/ я́ко да восхвалю́ Тя, зовы́й исто́чнику Твоему́ сия́:/

Ра́дуйся, исто́чниче ра́дости неприестае́мыя,/

ра́дуйся, то́че добро́ты неизрече́нныя./

Ра́дуйся, неду́гов разли́чных разреше́ние,/

ра́дуйся, страсте́й вся́ких потопле́ние./

Ра́дуйся, струе́ светови́днейшая, здра́вы творя́щая ве́рныя,/

ра́дуйся, водо́ благода́тнейшая неду́гующим многоразли́чно./

Ра́дуйся, ча́ше ма́нны живото́чныя,/

ра́дуйся, ба́не и не́ктарю Богоизлия́нный./

Ра́дуйся, водо́ прему́дрости, неве́дение отъе́млющая,/

ра́дуйся, растворе́ние се́рдца пи́щу Боже́ственную излива́ющее./

Ра́дуйся, приста́нище неможе́ния источа́ющая,/

ра́дуйся, пла́мень неду́гования угаша́ющая./

Ра́дуйся, водо́ спаси́тельная.

Таже: Воскресе́ние Христо́во ви́девше: трижды, и Воскрес Иису́с: трижды. (Зри стр. 20)

Песнь 7

Ирмос: Отроки от пе́щи изба́вивый:

Же́ны с ми́ры богому́дрые:

Сме́рти пра́зднуем умервщле́ние:

Яко вои́стинну священная:

Богородицы подобны:

Почерпи́те неду́гующии исцеле́ния:/ Всечи́стая бо то́чит/ от Боже́ственнаго исто́чника сла́дость и́стинную,/ пото́к сла́дости вои́стинну вре́ющий.// Те́мже и ве́рою то́ки незави́стныя почерпе́м вси.

Удивля́ют слы́шащия Влады́чице,/ стра́нная Твоя́ чудеса́, вся ве́рныя:/ немы́я бо и глухи́я,/ я́ко благоглаго́ливыя показу́ет вода́ Твоя́,/ стра́ждущия же люте́ врачу́ет,// и исцеле́ние да́рует.

Возво́диши от пе́щи скорбе́й,/ ороша́ющи вода́ми от стра́ннаго исто́чника,/ приступа́ющия к Тебе́, Чи́стая:/ карки́нския бо ра́ны свобожда́ется челове́к,/ прокаже́нна же исцеля́еши,// и распале́ние угаси́ла еси́.

Юноши и отрокови́цы Влады́чицу,/ и вси челове́цы ве́рою от души́ восхва́лим све́тло:/ сокруше́ния бо гное́виц,/ и вре́ды лука́вых, и ото́ки,// и разсла́бленнаго исцели́.

Песнь 8

Ирмос: Сей нарече́нный и святы́й день:

Прииди́те но́ваго виногра́да:

Возведи́ о́крест о́чи т́вои:

Отче Вседержи́телю:

Богородицы подобны:

Боже́ственную исто́чник и честну́ю во́ду излива́ет Твой, Дево:/ водны́х бо тече́ние вспяща́ет зело́,/ призыва́нием Боже́ственным благода́ти.// Те́мже Тя почита́ем, исто́чниче, во ве́ки.

Вси честну́ю живото́чную во́ду воспои́м му́дренне:/ злодыха́ния бо ток по страна́м уставля́ет,/ и свобо́дное твори́т происхожде́ние./ Оле, Твои́х чуде́с,// Чи́стая Богороди́тельнице!

Ка́я, Всепе́тая,/ восхва́лят уста́ рождества́ Твоего́ стра́нное?/ но и ум кий бы чуде́с исто́чник изсле́довал,/ и сло́во изглаго́лало?/ Несть естеству́ кре́пость, Твои́м чуди́тися.

Вся о Тебе́ сме́рти держа́ва разори́ся внеза́пу,/ о, Цари́це и Госпоже́!/ Ибо Царя́ Безсме́ртнаго живо́т Ты источи́ла еси́ воду,// ма́нну, Христа́ во ве́ки.

Песнь 9

Ирмос: Свети́ся, свети́ся:

О, Боже́ственнаго, о любе́знаго:

О, Па́сха ве́лия и свяще́ннейшая:

Богородицы подобны:

Во́ды вся превосхо́дит,/ Отрокови́це Чи́стая,/ исто́чника Твоего́ вода́,/ я́ве да́рующая свобожде́ния неду́гов лю́тых,/ и душа́м вся́кое здра́вие,// я́ко па́че естества́ излива́емая.

Реши́тель неду́гов,/ но́вый се Силоа́м,/ исто́чника Твоего́, Де́во, зрим вси:/ о́чи бо прие́млет огня́,// вси же здра́вие при́сно к животу́ прие́млем.

Здра́вия и́щущии притецы́те ко исто́чнику,/ Отрокови́ца бо Де́ва жи́тельствует при воде́./ Лику́й и весели́ся ве́рных мно́жество си́це,/ я́коже подоба́ет:/ прии́дет к хра́му,// и воздая́ние проше́ний прие́млет.

Возвы́сися исто́чника Твоего́ вода́ вы́ше Небе́с,/ и земли́ бе́здны то́ки претече́:/ сия́ есть пи́ща души́,/ питие́ ве́рных, мед из ка́мене,// и ма́нны раздая́ние.

Весели́ши, Де́во, царя́ преесте́ственне,/ источа́ющи благода́ть от исто́чника присносу́щную,/ сему́ подава́ющи на враги́ кре́пость,/ побе́ды при́сно, здра́вие и мир,// и проше́ний исполне́ние.

Ексапостиларий:

Празднику: Плотию усну́в: (единожды)

И Источнику:

Исто́чник еси́ вои́стинну воды́ живы́я, Влады́чице:/ измыва́еши у́бо неду́ги душ и теле́с лю́тыя,/ прикоснове́нием Твои́м еди́ным то́кмо,/ во́ду спасе́ния Христа́// излива́ющи.

На хвалитех, Вся́кое дыха́ние: поставим стихов 8. И поем стихиры осмогласника 4, глас 6:

Стих: Сотвори́ти в них суд напи́сан,/ сла́ва сия́ бу́дет всем преподо́бным Его́.

Крест Твой Го́споди,/жизнь и Воскресе́ние лю́дем Твои́м есть,/ и нань наде́ющеся,// Тебе́ воскре́сшаго Бо́га на́шего пое́м, поми́луй нас.

Стих: Хвали́те Бо́га во святы́х Его́,/ хвали́те Его́ во утверже́нии си́лы Его́.

Погребе́ние Твое́, Влады́ко,/ рай отве́рзе челове́ческому ро́ду;/ и от тли изба́вльшеся,// Тебе воскре́сшаго Бо́га на́шего пое́м, поми́луй нас.

Стих: Хвали́те Его́ на си́лах Его,/ хвали́те Его́ по мно́жеству вели́чествия Его́.

Со Отце́м и Ду́хом Христа́ воспои́м/ воскре́сшаго из ме́ртвых,/ и к Нему́ возопии́м:// Ты еси́ Жизнь на́ша и Воскресе́ние, поми́луй нас.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Тридне́вен воскре́сл еси́ Христе́ из гро́ба,/ я́коже есть пи́сано,/ совоздви́гнувый пра́отца на́шего:/ те́мже Тя и сла́вит род челове́ческий,// и пое́т Твое́ Воскресе́ние.

И Богородицы стихиры, глас 2.

Подобен: До́ме Евфра́фов:

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Вода́ Исто́чника,/ спаси́тельная есть/ всем немощству́ющим;/ присту́пим ве́рою,// благода́ть почерпе́м.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Кла́дязь Живото́чный/ Исто́чника безсме́ртнаго/ приступа́ющим любо́вию/ исцеле́ний подае́т// излия́ние неисчерпа́емое.

Стих: Освяти́л есть/ селе́ние Свое́ Вы́шний.

Укрепля́ет ду́ши/ вода́ Де́выя;/ и́же в скве́рнах страсте́й,/ притеце́м ко Отрокови́це,// и сия измы́ем.

Стих: Речная устремле́ния/ веселя́т град Бо́жий.

Ру́чка свяще́нная,/ и Ма́нна незави́стная,/ из Пречи́стыя утро́бы/ излива́ет Влады́ку:/ потре́бу вся́ческую почерпе́м.

И стихиры Пасхи, по обычаю их.

Ектении и отпуст. И час первый.

Антифоны Пасхи

Прокимен, глас 8:

Во всю зе́млю изы́де веща́ние их,/ и в концы́ вселе́нныя глаго́лы их.

Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь.

Ин прокимен, глас 3, песнь Богородицы:

Вели́чит душа́ Моя́ Го́спода,/ и возра́довася дух Мой о Бо́зе Спа́се Мое́м.

Апостол в деяниях, зачало 7.

И Богородицы, к Филипписием, зачало 240.

Аллилуия, глас 1: Испове́дят Небеса́ чудеса́ Твоя́, Го́споди.

Стих: Бог прославля́ем в сове́те святы́х.

Стих: Слы́ши Дщи виждь, и приклони́ ́ухо Твое́.

И чтем Евангелие от Иоанна, зачало 7.

И Богородице, от Луки, зачало 54.

Причастный: Те́ло Христо́во приими́те:

И Богородице: Ча́шу спасе́ния прииму́, и и́мя Госпо́дне призову́.

По еже Христо́с воскре́се: и ектении, на Го́споди воззва́х: поставим стихов 6 и поем

Стихиры воскресны, глас 8:

Стих: Аще беззако́ния на́зриши, Го́споди, Го́споди, кто постои́т?/ Яко у Тебе́ очище́ние есть.

Вече́рнюю песнь/ и слове́сную слу́жбу,/ Тебе́, Христе́, прино́сим,/ я́ко благоволи́л еси́// поми́ловати нас воскресе́нием.

Стих: Имене рад́и Твоего́ потерпе́х Тя, Го́споди. Потерпе́ душа́ моя́ в сло́во Твое́,/ упова́ душа́ моя́ на Го́спода.

Го́споди, Го́споди,/ не отве́ржи нас от Твоего́ лица́,// но благоволи́ поми́ловати нас воскресе́нием.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Ра́дуйся, Сио́не святы́й,/ Ма́ти церкве́й, Бо́жие Жили́ще,/ Ты бо прия́л еси́ пе́рвый,// оставле́ние грехо́в воскресе́нием.

Анатолиевы 3, глас тойже:

Стих: Яко у Го́спода ми́лость Его́ и мно́гое у Него́ избавле́ние,/ и Той изба́вит Изра́иля от всех беззако́ний его́.

Еже от Бо́га Отца́ Сло́во,/ пре́жде век ро́ждшееся,/ в после́дняя же времена́,/ то́ежде от Неискусобра́чныя вопло́щшееся во́лею,/ распя́тие сме́ртное претерпе́;/ и дре́вле умерщвле́ннаго челове́ка// спасе́ Свои́м воскресе́нием.

Стих: Хвали́те Го́спода вси язы́цы,/ похвали́те Его́ вси лю́дие.

Еже из ме́ртвых Твое́ воскресе́ние славосло́вим, Христе́,/ и́мже свободи́л еси́ ада́мский род от а́дова мучи́тельства;/ дарова́л еси́ ми́ру, я́ко Бог, жизнь ве́чную// и ве́лию ми́лость.

Стих: Яко утверди́ся ми́лость Его́ на на́с,/ и и́стина Госпо́дня пребыва́ет во век.

Сла́ва Тебе́, Христе́ Спа́се,/ Сы́не Бо́жий Единоро́дный,/ пригвозди́выйся на Кресте́,// и воскресы́й из гро́ба тридне́вен.

Слава:

Тя сла́вим, Го́споди,/ во́лею нас ра́ди Крест претерпе́вшаго,/ и Тебе́ покланя́емся, Всеси́льне Спа́се,/ не отве́ржи нас от лица́ Твоего́,/ но услы́ши и спаси́ нас// воскресе́нием Твои́м, Человеколю́бче.

И ныне:

Царь Небе́сный/ за человеколю́бие на земли́ яви́ся,/ и с челове́ки поживе́,/ от Де́вы бо Чи́стыя плоть прие́мый,/ и из нея́ проше́дый с восприя́тием,/ Еди́н есть Сын, сугу́б естество́м,/ но не Ипоста́сию./ Те́мже соверше́нна Того́ Бо́га/ и соверше́нна Челове́ка вои́стинну пропове́дающе,/ испове́даем Христа́ Бо́га на́шего;/ Его́же моли́, Ма́ти Безневе́стная,// поми́ловатися душа́м на́шим.

Вход с кадилом. Све́те ти́хий:

Прокимен великий, глас 8:

Дал еси́ достоя́ние/ боя́щимся Тебе́, Го́споди.

Стих: От коне́ц земли́ к Тебе́ воззва́х.

Сих: Покры́юся в крове́ кри́л Твои́х.

Стих: Та́ко воспою́ Имени Твоему́ во ве́ки.

И паки: Дал еси́ достоя́ние:

Также ектения; Сподо́би Го́споди: и прочая.

На стиховне стихира воскресна, глас 8:

Возше́л еси́ на Крест Иису́се,/ снизше́дый с небесе́,/ прише́л еси́ на смерть, Животе́ Безсме́ртный,/ к су́щим во тьме Свет Истинный,/ к па́дшим всех воскресе́ние,// просвеще́ние и Спа́се наш, сла́ва Тебе́.

Также стихиры Пасце с припевы их, и прочее, и отпуст.

Начало и канон Пасце, якоже предъявися.

На хвалитех поем стихиры воскресны на 4, глас 8:

Стих: Хвали́те Его́ на си́лах Его́,/ Хвали́те Его́ по мно́жеству вели́чествия Его́.

Ѓосподи, а́ще и суди́лище предста́л еси́ от Пила́та суди́мый,/ но не отсупи́л еси от престо́ла со Отце́м седя́й,/ и воскре́с из ме́ртвых,/ мир свободи́л еси́ от рабо́ты чужда́го,// я́ко Щедр и Человеколю́бец.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Го́споди, а́ще и я́ко ме́ртва во гро́бе иуде́и положи́ша,/ но я́ко Царя́ спя́ща во́ини Тя стрежа́ху,/ и я́ко живота́ сокро́вище, печа́тию печа́таша;/ но воскре́сл еси́,// и по́дал еси́ нетле́ние душа́м на́шим.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Го́споди, ору́жие на диа́вола Крест Твой дал еси́ нам;/ трепе́щет бо и трясе́тся,/ не терпя́ взира́ти на си́лу его́,/ я́ко ме́ртвыя возставля́ет, и смерть упраздни́. Сего́ ра́ди покланя́емся// погребе́нию Твоему́ и воста́нию.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. Вся́кое дыха́ние да хва́лит Го́спода.

Ангел твой, Го́споди, воскресе́ние пропове́давый,/ стра́жи у́бо устраши́,/ жена́м же возгласи́, глаго́ля:/ что и́щете Жива́го с ме́ртвыми?/ Воскре́се Бог сый,// и вселе́нней жизнь дарова́.

И стихиры Пасце, с припевы их. Также: Христо́с воскре́се: трижды.

Ектении, и отпуст. И час первый.

Начало, якоже предписася. Антифоны Пасце.

Прокимен, глас 3:

Госпо́дь Просвеще́ние мое́,/ и Спаси́тель мой, Кого́ убою́ся?

Стих: Госпо́дь Защи́титель живота́ моего́, от Кого́ устрашу́ся?

Апостол в деяниях, зачало 8.

Аллилуия, глас 5:

Госпо́дь воцари́ся, в ле́поту облече́ся.

Стих: Ибо утверди́ вселе́нную, я́же не подви́жится.

Евангелие от Иоанна, зачало 11. И прочее Литургии.

Причастен: Те́ло Христо́во приими́те. Посемъ конец светлыя седмицы и Богу Воскресшему Слава.

Творит предстоятель начало пасхальное, с крестом, свечею и кадилом возглашая: Благослове́н Бог наш: Клир же: Ами́нь!

И абие тропарь Пасце м припевы его, якоже в утрене, Литургии и вечерне указуяся (стр. 11 и др.). Посем диакон возглашает сугубую ектению усопшим: Поми́луй нас, Бо́же: и отвещаем трикраты. Священник глаголет тайно молитву: Бо́же духо́в: и возглас: Яко Ты еси́ Воскресе́ние:

И по возгласе лик понт канон Пасце: Воскресе́ния день: с припевы: Христо́с воскре́се из ме́ртвых. По третьей песне малая ектения и поминовение усопших обычное с молитвою: Бо́же духо́в: И по возгласе: Яко Ты еси́ Воскресе́ние: поем ипакои: Предвари́вшия у́тро:

По шестой же песне малая ектения и возглас тойже. Посем кондак: Со святы́ми поко́й: также, кондак Пасце: Аще и во гроб снизше́л еси, Безсме́ртие:

И абие, вместо Трисвятаго: Ели́цы во Христа́ крести́стеся:

Апостол в деяниях, в той день бывший. Аллилуия во глас вторый, без стиха. Евангелие воскресное первое, от Матфея, зачало 116.

И поем Воскресе́ние Христо́во ви́девше: (единожды), Воскре́с Иису́с от гро́ба (единожды). И прочие песни канона. На девятой песне припев: Ангел вопия́ше: и абие: Свети́ся, свети́ся: и прочее.

Ектения о усопших малая, и по возгласе екзапостиларий: Пло́тию усну́в: (дважды).

Также лик поет тропари по непорочных воскресны, во глас 5: Благослове́н еси́, Го́споди: Ангельский собо́ю: якоже на каждой воскресной утрени. И абие стихиры Пасце, со стихи их. И по сих: Христо́с воскре́се: (трижды). И поем сие многажды, дóндеже творят последнее целование усопшаго.

Посем ектения: Поми́луй нас, Бо́же: и молитва велегласная: Бо́же духо́в: и возглас: Яко ты еси́ Воскресе́ние:

Посем диакон возглашает: Прему́дрость! И мы отвещаем: Христо́с воскре́се: весь тропарь трижды. Иерей глаголет отпуст: Христо́с воскресы́й из ме́ртвых: Таже, крест возвышая, глаголет: Христо́с воскре́се! Мы же отвещаем: Вои́стину воскре́се! И поем конечное: Христо́с воскре́се: весь тропарь поскору, трижды.

И посем иерей возглашает трижды: Ве́чная твоя па́мять, достоблаже́нне и приснопа́мятие бра́те наш (достоблаже́нная и приснопа́мятная сестро́ на́ша). И мы отвещаем на каждый возглас по обыкновению: Ве́чная па́мять (трижды). И чтет иерей разрешительную молитву велегласно: Госпо́дь Иису́с Христо́с⁵

По опущению же мощей у могилы совершается лития сице:

Лик поет: Со ду́хи пра́ведных сконча́вшихся: и прочая.

Диакон глаголет ектению: Поми́луй нас, Бо́же: Иерей молитву: Бо́же духо́в: с возгласом: Яко Ты еси́ Воскресе́ние: и отпуст обычный.

Диакон возглашает: Во блаже́ннем успе́нии: и мы отвещаем: Ве́чная па́мять: трижды.

И посем лик поет тропари сия, во глас 8:

Земле́, зи́нувши, приими́ от Тебе́ созда́нного (-ную) руко́ю Бо́жиею пре́жде,/ па́ки же возвра́щшася (-шуся) к тебе́ ро́ждщей;/ е́же бо по о́бразу Созда́тель прия́т,// ты же приими́ те́ло твое́.

Якоже рекл еси, Го́споди, Ма́рфе:/ Аз есмь Воскресе́ние;/ де́лом сло́во испо́лнил еси́,/ из а́да призва́в Ла́заря;/ си́це и раба́ Твоего́ (рабу́ Твою́)// от а́да воздви́гни, Человеколю́бче.

Духо́внии мои бра́тие и спо́стницы,/ не забу́дите мене́, егда мо́литеся;/ но зря́ще мой гроб, помина́йте мою́ любо́вь,/ и моли́те Христа́,// да учини́т дух мой с пра́ведными.

Панихиды же не совершаем всю светлую седмицу даже до недели Фоминой.

а) Обиходный

б) Поскору

в) Греко-латинско-славянский

г) С. Трубачёва

д) «Колокольчик»

е) Придворного распева

ж) На грузинском языке

з) На греческом языке

и) На французском языке

к) А. Кастальского

Муз. А. Веделя

Песнь 1

Песнь 3

Песнь 4

Песнь 5

Песнь 6

Песнь 7

Песнь 8

Песнь 9

Обиходного распева в редакции Е. Кустовского

Песнь 1

Песнь 3

Песнь 4

Песнь 5

Песнь 6

Песнь 7

Песнь 8

Песнь 9

Разводка фиты в предпоследней стихире

в гармонизации С. Смоленского

в той же гармонизации

Киево-Печерского распева из рукописных нот

знаменного распева

В неделю на Литургии

Муз. Д. Бортнянского в упрощенной редакции

В неделю вечера

Той же, знаменного распева⁶

Глас 7:

В понедельник на Литургии

Глас 7:

В понедельник вечера

Глас 7:

В светлый вторник на Литургии

Глас 3:

Во вторник вечера

Глас 8:

В светлую среду на Литургии

Глас 6:

В среду вечера

Глас 7:

В Светлый четверток на Литургии

Глас 3:

В четверток вечера

Глас 7:

В светлый пяток на Литургии

Прокимен: Во всю землю: якоже и в понедельник писано.

И Богородицы, глас 3: Величит душа Моя Господа: зри во вторник.

В пяток вечера

Глас 8:

В Светлую субботу на Литургии

Глас 8:

Валаамского распева в гармонизации М. Балакирева

7-а. Задостойник Пасхи

Муз. Дм. Бортянского

Не скоро

7-б. Задостойник Пасхи

Муз. Н. Макарова

Умеренно

7-в. Задостойник Пасхи

Афонского распева

Содержание

Последование полунощницы

Последование УТРЕНИ

О ЧАСЕХ Святыя Пасхи

Последование ЛИТУРГИИ

Последование ВЕЧЕРНИ в Неделю Светлыя седмицы

В понедельник Светлыя седмицы, на утрени

На Литургии

В понедельник Светлыя седмицы вечера

Во вторник Светлыя седмицы, на утрени

На Литургии

Во вторник Светлыя седмицы вечера

В среду Светлыя седмицы, на утрени

На Литургии

В среду Светлыя седмицы вечера

В четверг Светлыя седмицы, на утрени

На Литургии

В четверг Светлыя седмицы вечера

В пяток Светлыя седмицы, на утрени

На Литургии

В пяток Светлыя седмицы вечера

В субботу Светлыя седмицы, на утрени

На Литургии

Последование отпевания усопших в Пасхальную седмицу

Пасхальные песнопения обихода московской традиции

1. Тропарь Пасхи

а) Обиходный

б) Поскору

в) Греко-латино-славянский

г) С. Трубачёва

д) «Колокольчик»

е) Придворного распева

ж) На грузинском языке

з) На греческом языке, афонского распева

и) На французском языке

к) Муз. А. Кастальского

2. Ирмосы Пасхи

– Муз. А Веделя

– Обиходного распева

3. Эксапостиларий Пасхи, обиходного распева

4. Стихиры Пасхи, обиходного распева

5. Часы Пасхи, Киево-Печерского распева

6. Прокимены Литургии и вечерни Пасхи и всея Светлыя седмицы

7. Задостойник Пасхи

– Валаамского расп., в гарм. М. Балакирева

– Музыка Дм. Бортнянского

– Музыка Н. Макарова

– Афонского распева