Вторник

В понедельник вечера

по обы́чном стихосло́вии, на Го́споди воззва́х, поста́вим стихо́в 6: и пое́м настоя́щыя подо́бны трипе́снца, творе́ние господи́на Ио́сифа. Гла́с 6:

Подо́бен: Всю́ отложи́вше:

Мно́гими прегреше́нии, и сластьми́ жития́, неду́гующую стяжа́х ду́шу окая́нный, и лежу́ на одре́ всегда́ ле́ности, Влады́ко, и вопию́ Ти: Ми́лостиве, прише́д посети́, здра́вие мне́ подая́ и ми́лость, и не оста́ви мя́, да не когда́ усну́ в сме́рть, и возра́дуется вра́г о поги́бели мое́й, иски́й всегда́, Спа́се, во а́дову глубину́ низвести́ мя.

Немилосе́рдому бога́тому в безу́мии поревнова́в, сла́достно веселю́ся, сластьми́ и страстьми́ погружа́яся. и ви́дя лежа́ща всегда́ пред две́рьми покая́ния, я́коже Ла́заря ума́ моего́, Го́споди, сего́ нечу́вственно прехожду́, гла́дом же боле́знующа, и острупля́ема страстьми́. Те́мже гее́нскому пови́нен е́смь пла́мени, от него́же изба́ви мя́ Влады́ко, Еди́не Многоми́лостиве.

И́на стихи́ра господи́на Фео́дора, гла́с 5.

Подо́бен: Го́споди при Моисе́и:

Го́споди, об ону́ страну́ Иорда́на, пло́тию проходя́, проре́кл еси́ Ла́зареву боле́знь к сме́рти не бы́ти, но о Твое́й Бо́га на́шего сла́ве быва́ти. сла́ва вели́чию де́л Твои́х, и вседержи́тельству Твоему́: я́ко низложи́л еси́ сме́рть, за мно́гую ми́лость Человеколю́бче.

И мине́и. Сла́ва: И ны́не, Богоро́дичен.

Проки́мен, псало́м 106, гла́с 4: Испове́дайтеся Го́сподеви, я́ко бла́г, я́ко в ве́к ми́лость Его́.

Сти́х: Да реку́т изба́вленнии Го́сподем:

Бытия́ чте́ние. [Быт.27:1–41.]

Бы́сть же, повнегда́ состаре́тися Исаа́кови, и притупи́шася о́чи его́ е́же ви́дети: и призва́ Иса́ва сы́на своего́ старе́йшаго, и рече́ ему́: сы́не мо́й. и рече́: се́ а́з. И рече́ Исаа́к: се́ состаре́хся, и не ве́м дне́ сконча́ния моего́. Ны́не у́бо возми́ ору́дие твое́, ту́л же и лу́к, и изы́ди на по́ле, и улови́ ми ло́в: И сотвори́ ми сне́ди, я́коже люблю́ а́з: и принеси́ ми, да я́м, я́ко да благослови́т тя́ душа́ моя́, пре́жде да́же не умру́. Реве́кка же слы́ша глаго́люща Исаа́ка ко Иса́ву сы́ну своему́: изы́де же Иса́в на по́ле улови́ти ло́в отцу́ своему́. Реве́кка же рече́ ко Иа́кову сы́ну своему́ ме́ньшему: се́, а́з слы́шах отца́ твоего́ бесе́дующа ко Иса́ву бра́ту твоему́, глаго́люща: Принеси́ ми ло́в, и сотвори́ ми сне́ди, да яды́й благословлю́ тя пред Го́сподем, пре́жде не́же умре́ти ми́. Ны́не у́бо сы́не мо́й, послу́шай мене́, я́коже а́з запове́даю ти́. И ше́д во о́вцы, пойми́ мне́ отту́ду два́ ко́злища мя́гка и добра́, и сотворю́ я́ сне́ди отцу́ твоему́, я́коже лю́бит: И внесе́ши отцу́ твоему́, и бу́дет я́сти, я́ко да благослови́т тя́ оте́ц тво́й, пре́жде да́же не у́мрет. Рече́ же Иа́ков к Реве́кце ма́тери свое́й: Иса́в бра́т мо́й е́сть му́ж косма́т, а́з же му́ж гла́дкий: Да не ка́ко ося́жет мя́ оте́ц мо́й, и бу́ду пред ни́м я́ко презира́яй, и наведу́ на себе́ кля́тву, а не благослове́ние. Рече́ же ему́ ма́ти: на мне́ кля́тва твоя́, ча́до: то́чию послу́шай гла́са моего́, и ше́д принеси́ ми. Ше́д же взя́, и принесе́ ма́тери, и сотвори́ ма́ти его́ сне́ди, я́коже любля́ше оте́ц его́. И взе́мши Реве́кка оде́жду Иса́ва сы́на своего́ старе́йшаго до́брую, я́же бы́сть у нея́ в дому́, облече́ о́ною Иа́кова сы́на своего́ ме́ньшаго. И ко́жицами козля́чиими обложи́ мы́шцы его́, и наго́е вы́и его́. И даде́ сне́ди и хле́бы, я́же сотвори́, в ру́це Иа́кову сы́ну своему́. И внесе́ отцу́ своему́, и рече́: о́тче. о́н же рече́: се́ а́з. кто́ еси́ ты́, ча́до? И рече́ Иа́ков отцу́: а́з Иса́в пе́рвенец тво́й, сотвори́х, я́коже ре́кл ми́ еси́: воста́в ся́ди, и я́ждь от ло́ва моего́, я́ко да благослови́т мя́ душа́ твоя́. Рече́ же Исаа́к сы́ну своему́: что́ сие́, е́же ско́ро обре́л еси́ о ча́до? о́н же рече́: е́же даде́ Госпо́дь Бо́г тво́й предо мно́ю. Рече́ же Исаа́к Иа́кову: прибли́жися ко мне́, и осяжу́ тя́ ча́до, а́ще ты́ еси́ сы́н мо́й Иса́в, или́ ни́? Прибли́жися же Иа́ков ко Исаа́ку отцу́ своему́, и осяза́ его́, и рече́: гла́с у́бо, гла́с Иа́ковль: ру́це же, ру́це Иса́вове. И не позна́ его́, бе́сте бо ру́це его́, я́ко ру́це Иса́ва бра́та его́ косма́те: и благослови́ его́. И рече́: ты́ ли еси́ сы́н мо́й Иса́в? о́н же рече́: а́з. И рече́: принеси́ ми, и я́м от ло́ва твоего́ ча́до, да благослови́т тя́ душа́ моя́. и принесе́ ему́, и яде́: и принесе́ ему́ вино́, и пи́. И рече́ ему́ Исаа́к оте́ц его́: прибли́жися ко мне́, и облобыза́й мя́ ча́до. И прибли́жився лобыза́ его́: и обоня́ воню́ ри́з его́, и благослови́ его́, и рече́: се́ воня́ сы́на моего́, я́ко воня́ ни́вы испо́лнены, ю́же благослови́ Госпо́дь. И да да́ст тебе́ Бо́г от росы́ небе́сныя, и от ту́ка земли́, и мно́жество пшени́цы и вина́: И да порабо́тают тебе́ язы́цы, и да покло́нятся тебе́ кня́зи, и бу́ди господи́н бра́ту твоему́, и покло́нятся тебе́ сы́нове отца́ твоего́: проклина́яй тя́, про́клят: благословля́яй же тя́, благослове́н. И бы́сть по е́же преста́ти Исаа́ку благословля́ющу Иа́кова сы́на своего́: и бы́сть егда́ изы́де Иа́ков от лица́ Исаа́ка отца́ своего́, и Иса́в бра́т его́ прии́де с лови́твы. Сотвори́ же и то́й сне́ди, и принесе́ отцу́ своему́, и рече́ отцу́: да воста́нет оте́ц мо́й, и да я́ст от ло́ва сы́на своего́, я́ко да благослови́т мя́ душа́ твоя́. И рече́ ему́ Исаа́к оте́ц его́: кто́ еси́ ты́? о́н же рече́: а́з е́смь сы́н тво́й пе́рвенец Иса́в. ужасе́ся же Исаа́к у́жасом ве́лиим зело́, и рече́: кто́ у́бо улови́вый мне́ ло́в, и принесы́й ми́, и ядо́х от все́х, пре́жде не́же приити́ тебе́? и благослови́х его́, и благослове́н бу́дет. Бы́сть же егда́ услы́ша Иса́в глаго́лы отца́ своего́ Исаа́ка, возопи́ гла́сом ве́лиим и го́рьким зело́, и рече́: благослови́ у́бо и мене́, о́тче. Рече́ же ему́: прише́д бра́т тво́й с ле́стию, взя́ благослове́ние твое́. И рече́ [Иса́в] пра́ведно нарече́ся и́мя ему́ Иа́ков: запя́ бо мя́ се́ уже́ втори́цею, и пе́рвенство мое́ взя́, и ны́не взя́ благослове́ние мое́. и рече́ иса́в отцу́ своему́: не оста́вил ли еси́ [и] мне́ благослове́ния, о́тче? Отвеща́в же Исаа́к, рече́ Иса́ву: а́ще господи́на его́ сотвори́х тебе́, и всю́ бра́тию его́ сотвори́х рабы́ ему́, пшени́цею и вино́м утверди́х его́: тебе́ же что́ сотворю́, ча́до? Рече́ же Иса́в ко отцу́ своему́: еда́ еди́но е́сть благослове́ние у тебе́ о́тче? благослови́ у́бо и мене́ о́тче. умили́вшуся же Исаа́ку, возопи́ гла́сом ве́лиим Иса́в, и воспла́кася. Отвеща́в же Исаа́к оте́ц его́, рече́ ему́: се́ от ту́ка земли́ бу́дет вселе́ние твое́, и от росы́ небе́сныя свы́ше: И мече́м твои́м жи́ти бу́деши, и бра́ту твоему́ порабо́таеши: бу́дет же [вре́мя] егда́ низложи́ши и отреши́ши яре́м его́ от вы́и твоея́. И враждова́ше Иса́в на Иа́кова о благослове́нии, и́мже благослови́ его́ оте́ц его́.

Проки́мен, псало́м 107, гла́с 7: Вознеси́ся на небеса́ Бо́же, и по все́й земли́ сла́ва Твоя́. Сти́х: Гото́во се́рдце мое́ Бо́же, гото́во се́рдце мое́.

При́тчей чте́ние. [Притч.19:16–25.]

И́же храни́т за́поведи, соблюда́ет свою́ ду́шу: а нерадя́й о свои́х путе́х, поги́бнет. Ми́луяй ни́ща, взаи́м дае́т Бо́гови: по дая́нию же его́ возда́стся ему́. Наказу́й сы́на твоего́, та́ко бо бу́дет благонаде́жен: в досажде́ние же не взе́млися душе́ю твое́ю. Злоу́мен му́ж мно́го отщети́тся: а́ще же губи́тель е́сть, и ду́шу свою́ приложи́т. Слу́шай сы́не отца́ твоего́ наказа́ния, да му́др бу́деши в после́дняя твоя́. Мно́ги мы́сли в се́рдцы му́жа: сове́т же Госпо́день во ве́к пребыва́ет. Пло́д му́жеви, ми́лостыня: лу́чше же ни́щ пра́ведный, не́жели бога́т лжи́в. Стра́х Госпо́день в живо́т му́жеви: а безстра́шный водвори́тся на ме́стех, иде́же не наблюда́ется ра́зум. Скрыва́яй в не́дрех ру́це свои́ непра́ведно, ниже́ ко усто́м свои́м принесе́т я́. Губи́телю ра́ны прие́млющу, безу́мный кова́рнее бу́дет: а́ще же облича́еши му́жа разу́мна, уразуме́ет чу́вство.

На стихо́вне самогла́сен дне́, два́жды. Гла́с 4:

Душевре́днаго лихои́мства свободи́ Спа́се, и с Ла́зарем убо́гим в не́дрех Авраа́мовых причти́ на́с: Ты́ бо в ми́лостех бога́т сы́й, во́лею на́с ра́ди обнища́л еси́, и от тли́ на нетле́ние преве́л еси́, я́ко ми́лостив Бо́г, и Человеколю́бец.

Му́ченичен: Святы́х му́ченик прие́мый терпе́ние, и от на́с приими́ пе́ние Человеколю́бче, да́руй на́м те́х моли́твами ве́лию ми́лость.

Сла́ва, и ны́не, Богоро́дичен: Изба́ви на́с от ну́жд на́ших, Ма́ти Христа́ Бо́га, ро́ждшая все́х Творца́, да вси́ зове́м Ти́: ра́дуйся Еди́но Предста́тельство ду́ш на́ших.

Последование утрени

Тро́ичны гла́са. По 1-м стихосло́вии седа́льны умили́тельны Осмогла́сника два́, с Богоро́дичным. По 2-м стихосло́вии седа́лен господи́на Ио́сифа. Гла́с 6.

Подо́бен: А́нгельския:

Грехо́вным неду́гом истаява́емь, на одре́ отча́яния низлежу́: те́мже мя́ Врачу́ боля́щих посети́ Твои́м человеколю́бием, и не оста́ви мя́ усну́ти лю́те в сме́рть, Всеще́дрый, да вопию́ Ти те́пле: Ми́лости Пода́телю, Го́споди сла́ва Тебе́.

Сла́ва, то́йже.

И ны́не, Богоро́дичен: Нача́ло спасе́ния, Гаврии́лово провеща́ние к Де́ве бы́сть: слы́ша бо, е́же ра́дуйся, не отбеже́ целова́ния: не усумне́ся я́ко Са́рра в се́ни, но си́це глаго́лаше: се́ раба́ Госпо́дня, бу́ди мне́ по глаго́лу Твоему́.

По 3-м стихосло́вии седа́лен, господи́на Фео́дора. Гла́с 5:

Подо́бен: Сия́ет дне́сь:

Вчера́ и дне́сь боле́знь Ла́зарева, сию́ бо Христу́ явля́ют сро́дницы. ра́достию Вифа́ние угото́вися, жизнода́вца угости́ти и царя́, с на́ми вопию́щи: Го́споди сла́ва Тебе́.

Сла́ва, то́йже.

И ны́не, Богоро́дичен, гла́с то́йже: Ма́ти Бо́жия всесвята́я, Стено́ христиа́н, изба́ви лю́ди Твоя́ обы́чно, зову́щыя Ти́ приле́жно: противоста́ни скве́рным и возносли́вым помысло́м, да вопие́м Ти́: ра́дуйся Присноде́во.

Кано́н мине́и, и трипе́снец господи́на Ио́сифа.

И стихосло́вится пе́снь. Гла́с 6.

Пе́снь 2.

Ирмо́с: Ви́дите, ви́дите, я́ко А́з е́смь Бо́г: ма́нну одожди́вый, и во́ду из ка́мене источи́вый дре́вле в пусты́ни лю́дем Мои́м, десни́цею еди́ною, и кре́постию Мое́ю.

Во́лею обнища́л еси́, естество́м бога́тый Христе́: взалка́л еси́ пости́вся, насыща́яй вся́кое живо́тно. Те́м мя́ насы́ти а́лчущаго Твоея́ благода́ти, и покажи́ та́мошния трапе́зы, Сло́ве, о́бщника.

Ла́заря ни́щаго мя́ покажи́ грехо́в, Христе́, и расточи́ бога́тство, е́же зле́ собра́х, и соверше́нное Твое́ любле́ние ще́дре испо́лнив, та́мошняго изба́ви мя́ муче́ния стра́шнаго.

О́троки обостри́в си́льнейшия огня́, иногда́ в Вавило́не соде́ла по́ст: те́м поревнова́вши о душе́ моя́, не уныва́й, и о́гнь сладостра́стий ду́ха угаси́ши росо́ю.

Богоро́дичен: Ра́дуйся, Тебе́ вопие́м ро́ждшей ра́дость, Богоро́дице Де́во обра́дованная: Бо́га, Его́же родила́ еси́, умоли́, изба́витися от бе́д и тли́, воспева́ющым тя́ при́сно.

И́ный, господи́на Фео́дора. Гла́с 5.

Ирмо́с: Ви́дите, ви́дите, я́ко А́з е́смь Бо́г: ма́нну одожди́вый, и во́ду из ка́мене источи́вый дре́вле в пусты́ни лю́дем Мои́м, десни́цею еди́ною, и кре́постию Мое́ю.

Ви́дите, ви́дите, я́ко А́з е́смь Бо́г, об ону́ страну́ Иорда́на ходя́й, слы́шав я́ко Ла́зарь боли́т, и реки́й: я́ко не у́мрет, но е́сть сие́ о сла́ве Мое́й.

Рыда́нием обложи́вшеся Ла́заревы сестры́, стра́сть Тебе́ Ве́детелю все́х явля́ют: но пребыва́еши ма́ло, да воздви́гнеши чу́до, и пока́жеши ученико́м Твои́м стра́шная.

Тро́ичен: Единоца́рственная, Триипоста́сная Еди́нице, Госпо́дство и Ца́рство веко́в, Тя́ сла́вят Отца́, и Сына, и Свята́го Ду́ха, мно́жество А́нгел, и все́ естество́ челове́ческое.

Богоро́дичен: Кто́ не диви́лся бы зря́ в Тебе́ Соде́теля Де́во, назда́вшаго Ада́ма па́дшаго, несказа́нным соедине́нием, из Тебе́ пло́тию рожде́нна, неизме́нно, во спасе́ние на́ше.

Сла́ва Тебе́ Бо́же на́ш, сла́ва Тебе́.

Ны́не украси́ся о Вифа́ние ра́достию, сотвори́вши прия́телище Царя́ все́х, я́ко прии́дет к Тебе́, да Ла́заря пока́жет па́ки теку́ща от тле́ния в живо́т.

Ирмо́с: Ви́дите, ви́дите, я́ко А́з е́смь Бо́г, в пло́ть облеки́йся во́лею Свое́ю, да спасу́ Ада́ма, от ле́сти па́дшаго в преступле́ние зми́ем.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Помышля́ю мно́жество согреше́ний, и уя́звлен жа́лом со́вести, я́коже в пла́мени болю́ окая́нный: уще́дри мя́ Сло́ве Бо́жий, Твое́ю ми́лостию.

Презре́в Ла́зарева исправле́ния, неми́лостиваго бога́таго нра́вом позави́дех: благоутро́бне Бо́же, обрати́в мя́ уще́дри, да Тя́ сла́влю во ве́ки вся́.

Душе́вною боле́знию одержи́мь, и умре́ти хотя́ отча́янием, Твоего́ Иису́се посеще́ния тре́бую, оживотвори́вшаго Тебе́ призыва́ющыя.

Богоро́дичен: Пресвята́я Де́во, ты́ мя спаси́, мое́й не́мощи бу́ди по́мощь, Воли́теля Ми́лости роди́вшая, Его́же превозно́сим во вся́ ве́ки.

И́ный.

Ирмо́с: Преподо́бнии Твои́ о́троцы в пещи́ Христе́ воспева́юще глаго́лаху: благослови́те вся́ дела́ Госпо́дня Го́спода.

Ра́дуйся Вифа́ние, Ла́зарево оте́чество: в тебе́ бо Христо́с предста́в вели́чие соверши́т, оживи́в Ла́заря.

Ла́зарь боле́знует, да Ты́ просла́вишися Сы́не Бо́жий о не́м: и пою́т Тя́ непреста́нно дела́ вся́ Го́спода.

Благослови́м Отца́, и Сына, и Свята́го Ду́ха, Го́спода.

Тро́ицу Всесвяту́ю во Отце́, и Сы́не, и Ду́хе, воспева́юще пое́м: благослови́те дела́ Госпо́дня Го́спода.

Богоро́дичен: Неизрече́нное Твое́ Рождество́ вси́ пое́м Чи́стая, и чту́ще Его́ я́ко Бо́га, благослови́м вся́ дела́, я́ко Соде́теля и Го́спода.

Сла́ва Тебе́ Бо́же на́ш, сла́ва Тебе́.

Доброде́телей ве́тви к Сре́тению Христо́ву гото́вяще, ны́не зове́м: благослови́те дела́ Госпо́дня Го́спода.

Хва́лим, благослови́м, покланя́емся Го́сподеви:

Ирмо́с: Преподо́бнии Твои́ о́троцы в пещи́ Христе́ воспева́юще глаго́лаху: благослови́те вся́ дела́ Госпо́дня Го́спода.

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю же, Всечи́стая, яви́ся челове́ком Сло́во Воплоще́нно, Его́же велича́юще, с небе́сными во́и Тя́ ублажа́ем.

Пре́жде вкуше́ние го́рькое челове́ка первозда́ннаго лю́те из рая́ изгна́, и сме́рти се́ти припряже́: пости́ся о душе́ моя́, бе́гай подража́ния, бе́гай наслажде́ния сла́сти многоболе́зненныя.

Во у́м прие́млю Твое́ суди́ще, и пла́мень неугаси́мый, Судие́ пра́веднейший, себе́ осужда́ю пре́жде суда́: ужасо́хся бо и трепе́щу, безме́рно прегреши́в Тебе́, я́ко и́н никто́же на земли́. Те́мже молю́ Тя, уще́дри мя́.

Страсте́й измы́емся омраче́ния, просвети́тельными моли́твами, и доброде́телей ве́тви нося́ще, сре́сти Христа́ потщи́мся, на жребя́ти ча́ема ны́не все́сти, гото́вяща же ся страда́ти, за е́же спасти́ на́с.

Богоро́дичен: Из тебе́ Де́во Богоблагода́тная, в нощи́ страсте́й одержи́мым, возсия́ све́та и ми́ра Христо́с Пода́тель, от невня́тия разреша́яй преступле́ние, и избавле́ние на́м я́ве да́руяй.

И́ный.

Ирмо́с: Иса́ие лику́й, Де́ва име́ во чре́ве, и роди́ Сына Емману́ила, Бо́га же и челове́ка, Восто́к и́мя ему́: Его́же велича́юще, Де́ву ублажа́ем.

Ны́не мертвогро́бная гото́ви Ла́заре му́дре, сконча́ешися бо от жи́зни, у́тро умре́ти имы́й, гро́б узри́, въоньже всели́шися: но тебе́ Христо́с па́ки оживи́т, воздви́г четверодне́вна.

Вифа́ние лику́й, к тебе́ бо прии́дет Христо́с, чу́до соверша́я ве́лие и стра́шное, связа́в сме́рть, воскреси́т вся́ко я́ко Бо́г Ла́заря уме́ршаго, и Зижди́теля велича́юща.

Тро́ичен: Еди́но Существо́ Тя́ воспева́ю, Безнача́льная Тро́ице, Честна́я Живонача́льная, Несеко́мая Еди́нице, О́тче нерожде́нне, и рожде́нне Сло́ве и Сы́не, и Ду́ше Святы́й, спаси́ на́с пою́щих Тя́.

Богоро́дичен: Па́че ума́ рождество́ Твое́ Богома́ти, без му́жа бо зача́тие в Тебе́, и Де́вственное Рождество́ бы́сть: и́бо Бо́г е́сть рожде́йся, Его́же велича́юще, Тя́ Де́во ублажа́ем.

Сла́ва Тебе́ Бо́же на́ш, сла́ва Тебе́.

Прииди́те угото́вим Го́сподеви к сре́тению, ве́тви доброде́телей нося́ще Ему́: та́ко бо Его́ прии́мем, я́коже во гра́де Иерусали́ме в души́ на́шей, покланя́ющеся и пою́ще Его́.

Ирмо́с: Иса́ие лику́й, Де́ва име́ во чре́ве, и роди́ Сына Емману́ила, Бо́га же и челове́ка, Восто́к и́мя ему́: Его́же велича́юще, Де́ву ублажа́ем.

Свети́лен.

На стихо́вне самогла́сен дне́, два́жды. Гла́с 5:

Поползну́вшися прегреше́ньми, и плени́цами согреше́ний свя́зана, о душе́, что́ уныва́еши? что́ лени́шися? бе́гай при́сно я́коже Ло́т Содо́ма и Гомо́рры, нечистоты́ запале́ния. Не возвраща́йся вспя́ть, и бу́деши я́ко сто́лп со́льный, на горе́ спаса́йся доброде́телей, бе́гай при́сно немилосе́рднаго бога́таго, безутро́бия горе́ния. В не́дра прейди́ Авраа́мова я́ко Ла́зарь, смиренному́дрием возопи́й: упова́ние мое́, и прибе́жище мое́, Го́споди сла́ва Тебе́.

Му́ченичен: Страстоте́рпцы Твои́ Го́споди, чи́ны А́нгельския подража́вше, я́ко безпло́тни му́ки претерпе́ша, единомы́сленное упова́ние иму́ще, обеща́нных благи́х наслажде́ние. Те́х моли́твами Христе́ Бо́же на́ш, ми́р да́руй ми́рови Твоему́, и душа́м на́шым ве́лию ми́лость.

Сла́ва, и ны́не, Богоро́дичен: Тебе́ мо́лимся, я́ко Бо́жии Ма́тери, благослове́нная, моли́ о спасе́нии ду́ш на́ших.

На 6-м часе́ тропа́рь проро́чества, гла́с 5:

Необори́мую сте́ну да́л еси́ гра́ду на́шему, ро́ждшую Тя́ Де́ву: То́ю Спа́се от окружа́ющих злы́х изми́, мо́лимся, ду́шы на́шя.

Проки́мен, псало́м 108, гла́с 4: Помози́ ми Го́споди Бо́же мо́й, и спаси́ мя по ми́лости Твое́й.

Сти́х: Бо́же, хвалы́ моея́ не премолчи́.

Проро́чества Иса́иина чте́ние. [Ис.49:6–10.]

Та́ко глаго́лет Госпо́дь: се́ да́х тя́ в заве́т ро́да, во све́т язы́ком, е́же бы́ти тебе́ во спасе́ние, да́же до после́дних земли́. Та́ко глаго́лет Госпо́дь, изба́вивый тя́ Бо́г Изра́илев: освяти́те уничижа́ющаго ду́шу свою́, гнуша́емаго от язы́к рабо́в кня́жеских: ца́рие у́зрят его́, и воста́нут кня́зи, и покло́нятся ему́, Го́спода ра́ди: я́ко ве́рен е́сть Святы́й Изра́илев, и избра́х тя́. Та́ко глаго́лет Госпо́дь: во вре́мя прия́тно послу́шах тебе́, и в де́нь спасе́ния помого́х ти́, и сотвори́х тя́, и да́х тя́ в заве́т ве́чный язы́ков, е́же устро́ити зе́млю, и насле́дити насле́дия пусты́ни, Глаго́люща су́щым во у́зах изыди́те, и су́щым во тьме́, откры́йтеся: на все́х путе́х пасти́ся бу́дут, и на все́х стезя́х па́жить и́х. Не вза́лчут, ниже́ вжа́ждут, ниже́ порази́т и́х зно́й, ниже́ со́лнце: но ми́луяй и́х уте́шит и́х.

Проки́мен, псало́м 109, гла́с 4: Ты́ иере́й во ве́к, по чи́ну Мелхиседе́кову.

Сти́х: Рече́ Госпо́дь Го́сподеви моему́: седи́ одесну́ю Мене́.

Комментарии для сайта Cackle