Вознесение Господа и Бога нашего Иисуса Христа

Час 9–й трипсалмный. По возгласе глаголет чтец: Ами́нь. И абие Трисвятое. Царю Небесный не глаголем даже до Недели 8–я во всяком Церковном пении.

На Го́споди, воззва́х: поставим стихиры 4, глас 6:

Госпо́дь вознесе́ся на Небеса́: Го́споди, Твоему́ Вознесе́нию: На гора́х святы́х: Го́споди, смотре́ния соверши́в та́инство: (Зри ниже на велицей вечерни.)

Слава, и ныне, глас тойже: Го́споди, апо́столи, я́ко ви́деша Тя:

Прокимен дне.

На стиховне стихиры, глас 1:

Возше́д на Небеса́: Возше́л еси́, Христе́, к Безнача́льному Отцу́: А́нгели Твои́, Го́споди: Слава, и ныне, глас 2: Роди́лся еси́, я́ко Сам восхоте́л еси́: (Вся сия зри на велицей вечерни.)

Ны́не отпуща́еши: Трисвятое.

По О́тче на́ш: отпустительный тропарь, глас 4: Возне́слся еси́ во сла́ве:

Таже ектения малая. И отпуст.

По предначинательном псалме кафисмы не глаголем. На Го́споди, воззва́х: поставим стихов 10. И поем стихиры самогласны 5, повторяюще я.

Глас 6.

Стих: Изведи́ из темни́цы ду́шу мою́/ испове́датися и́мени Твоему́.

Госпо́дь вознесе́ся на Небеса́,/ да по́слет Уте́шителя ми́ру:/ небеса́ угото́ваша престо́л Его́,/ о́блацы восхожде́ние Его́./ А́нгели дивя́тся, Челове́ка зря́ще превы́ше себе́./ Оте́ц жде́т, Его́же в не́драх и́мать соприсносу́щна./ Ду́х же Святы́й вели́т все́м А́нгелом Его́:/ возьми́те врата́, кня́зи, ва́ша,/ вси́ язы́цы, восплещи́те рука́ми,// я́ко взы́де Христо́с, иде́же бе́ пе́рвее.

Стих: Мене́ ждут пра́ведницы,/ до́ндеже возда́си мне.

Госпо́дь вознесе́ся на Небеса́:

Стих: Из глубины́ воззва́х к Тебе́, Го́споди,/ Го́споди, услы́ши глас мой.

Го́споди, Твоему́ Вознесе́нию удиви́шася Херуви́ми,/ зря́ще Тебе́ Бо́га, на о́блацех восходя́ща,/ на них седя́щаго;// и сла́вим Тя, я́ко бла́га ми́лость Твоя́: сла́ва Тебе́.

Стих: Да бу́дут у́ши Твои́/ вне́млюще гла́су моле́ния моего́.

Го́споди, Твоему́ Вознесе́нию:

Стих: А́ще беззако́ния на́зриши, Го́споди, Го́споди, кто́ постои́т?/ Я́ко у тебе́ очище́ние е́сть.

На гора́х святы́х зря́ще Твое́ Вознесе́ние, Христе́,/ Сия́ние сла́вы О́тчи,/ воспева́ем Тво́й светообра́зный лица́ зра́к,/ кла́няемся Страсте́м Твои́м,/ почита́ем Воскресе́ние,// сла́вное Вознесе́ние сла́вяще: поми́луй на́с.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

На гора́х святы́х:

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Го́споди, апо́столи, я́ко ви́деша Тя́ на о́блацех возноси́ма,/ рыда́нием сле́з, Жизнода́вче Христе́,/ ско́рби исполня́еми, рыда́юще, глаго́лаху:/ Влады́ко, не оста́ви на́с си́рых,/ и́хже за милосе́рдие возлюби́л еси́ рабы́ Твоя́,/ я́ко Благоутро́бен,/ но посли́, я́коже обеща́л еси́ на́м,/ Пресвята́го Твоего́ Ду́ха,// просвеща́юща ду́ши на́ша.

Стих: Я́ко у Го́спода ми́лость, и мно́гое у Него́ избавле́ние,/ и Той изба́вит Изра́иля от всех беззако́ний его́.

Го́споди, апо́столи, я́ко ви́деша Тя:

Стих: Хвали́те Го́спода, вси́ язы́цы,/ похвали́те Его́, вси́ лю́дие.

Го́споди, смотре́ния соверши́в та́инство,/ пои́м Твоя́ ученики́ на го́ру Елео́нскую,/ возноси́лся еси́, и се́ тве́рдь небе́сную проше́л еси́,/ мене́ ра́ди Обнища́вый по мне́;/ и возше́д, отону́дуже не разлучи́лся еси́,/ Всесвята́го Твоего́ Ду́ха низпосли́,// просвеща́юща ду́ши на́ша.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Го́споди, смотре́ния соверши́в та́инство:

Слава, и ныне, глас тойже:

Не́др Оте́ческих не разлу́чся, сладча́йший Иису́се,/ и с земны́ми я́ко Челове́к пожи́в,/ дне́сь от горы́ Елео́нския возне́слся еси́ во сла́ве/ и па́дшее естество́ на́ше, ми́лостивно возне́с,/ Отцу́ спосади́л еси́./ Те́мже Небе́снии безпло́тных чи́нове,/ чудеси́ удивля́ющеся, ужаса́хуся у́жасом/ и, тре́петом содержи́ми,/ Твое́ человеколю́бие велича́ху./ С ни́миже и мы́, земни́и,/ е́же к на́м Твое́ снизхожде́ние/ и е́же от на́с Вознесе́ние славосло́вяще,/ мо́лимся, глаго́люще:/ ученики́ и ро́ждшую Тя́ Богоро́дицу/ ра́дости безчи́сленныя Испо́лнивый во Твое́ Вознесе́ние,/ и на́с сподо́би избра́нных Твои́х ра́дости,// моли́твами и́х, вели́кия ра́ди Твоея́ ми́лости.

Вход. Све́те ти́хий:

Прокимен, глас 5: Бо́же, во и́мя Твое́ спаси́ мя/ и в си́ле Твое́й суди́ ми.

Пророчества Исаиина чтение (глава 2):

Та́ко глаго́лет Госпо́дь: бу́дет в после́дняя дни́ явле́на гора́ Госпо́дня, и до́м Бо́жий на версе́х го́р, и вознесе́тся превы́ше холмо́в, и прии́дут на ню́ вси́ язы́цы. И по́йдут лю́дие мно́зи, и реку́т: прииди́те, взы́дем на го́ру Госпо́дню и в до́м Бо́га Иа́ковля, и возвести́т на́м пу́ть Сво́й, и по́йдем по нему́.

Пророчества Исаиина чтение (глава 62):

Та́ко глаго́лет Госпо́дь: поиди́те и вни́дите враты́ Мои́ми, угото́вите пу́ть Мо́й, и пу́ть твори́те лю́дем Мои́м, и ка́мения от пути́ размещи́те, вознеси́те зна́мение на язы́ки. Се́ бо Госпо́дь сотвори́ слы́шано да́же до после́дних земли́. Рцы́те дще́ри Сио́нове: се́ Спаси́тель тво́й прихо́дит, име́я с Собо́ю мзду́, и де́ло Его́ пред лице́м Его́. И прозове́т я́ лю́ди свя́ты, изба́влены от Го́спода: ты́ же нарече́шися взыска́нный гра́д и неоста́вленный. Кто́ Се́й, прише́дый из Едо́ма, оброще́ние ри́з Его́ от Восо́ра? Се́й красе́н во оде́жди Свое́й, вопие́т с кре́постию ве́лиею: А́з глаго́лю пра́вду и су́д спасе́ния. Почто́ Ти́ оброще́ны ри́зы, и оде́жды Твоя́ я́ко от истопта́ния точи́ла испо́лнены истопта́ния? Точи́ло истопта́х Еди́н, и от язы́к не́сть му́ж со Мно́ю. Ми́лость Госпо́дню помяну́х, доброде́тели Госпо́дни во все́х, и́миже на́м воздава́ет. Госпо́дь, Судия́ благи́й до́му Изра́илеву, нано́сит на́м по ми́лости Свое́й и по мно́жеству пра́вды Своея́. И рече́: не лю́дие ли Мои́? Ча́да не отве́ргут ли ся́? И бы́сть и́м во спасе́ние от вся́кия ско́рби и́х. Не хода́тай, ниже́ А́нгел, но Са́м Госпо́дь спасе́ и́х: за е́же люби́ти и́х и щаде́ти и́х, Са́м изба́ви и́х, и восприя́т и́х, и вознесе́ и́х во вся́ дни́ ве́ка.

Пророчества Захариина чтение (глава 14):

Та́ко глаго́лет Госпо́дь: се́ де́нь гряде́т Госпо́день, и ста́нут но́зе Его́ в де́нь о́ный на горе́ Елео́нстей, пря́мо Иерусали́ма, от восто́к со́лнца. И в де́нь о́ный изы́дет вода́ жива́ из Иерусали́ма, по́л ея́ в мо́ре пе́рвое, и по́л ея́ в мо́ре после́днее; в жа́тву и в ве́сну бу́дет та́ко. И бу́дет Госпо́дь Ца́рь по все́й земли́, в де́нь о́ный бу́дет Госпо́дь Еди́н. И́мя Его́ еди́но, окружа́ющее всю́ зе́млю и пусты́ню, от Га́вы да́же до Реммо́на, проти́ву хребту́ Иерусали́млю: и вознесе́тся, и на ме́сте пребу́дет, от вра́т Вениами́новых, да́же до ме́ста двере́й пе́рвых, да́же до вра́т уго́льных, и да́же до столпа́ Анамеи́лева, да́же до подточи́лий царе́вых, обита́ют в не́м: и ана́фема не бу́дет ктому́, и всели́тся Иерусали́м наде́яйся.

На литии стихиры самогласны. Глас 1:

Возше́д на Небеса́, отону́дуже и соше́л еси́,/ не оста́ви нас си́рых, Го́споди:/ да прии́дет Твой Дух, нося́ мир ми́рови,/ покажи́ сыно́м челове́ческим дела́ си́лы Твоея́,// Го́споди Человеколю́бче.

Возше́л еси́, Христе́, к Безнача́льному Отцу́ Твоему́,/ неопи́санных Его́ недр не разлучи́выйся,/ и прило́г си́лы хвале́ния трисвята́го не прия́ша,/ но Еди́наго Сы́на и по вочелове́чении/ позна́ша Тя, Го́споди, Единоро́дна Отцу́:// во мно́жестве щедро́т Твои́х поми́луй нас.

А́нгели Твои́, Го́споди, апо́столом глаго́лаху:/ му́жие галиле́йстии,/ что стоите́, зря́ще на не́бо?/ Сей есть Христо́с Бог, вознесы́йся от вас на Не́бо,/ Той прии́дет па́ки,/ и́мже о́бразом ви́десте Его́ иду́ща на Не́бо;// послужи́те Ему́ в преподо́бии и пра́вде.

Глас 4:

Егда́ прише́л еси́ на го́ру, Христе́, Елео́нскую/ О́тчее соверши́ти благоволе́ние,/ ужасо́шася Небе́снии А́нгели,/ и устраши́шася преиспо́днии./ Предста́ша же ученицы́ с ра́достию тре́петни,/ я́ко глаго́лал еси́ им,/ я́ко престо́л же готовля́шеся проти́в о́блак жду́щий:/ врата́ же не́бо отве́рзшее добро́ту явля́ше,/ и земля́ сокро́вища открыва́ет,/ Ада́мову схожде́нию я́ко позна́тися, и па́ки восхожде́нию./ Но стопы́ у́бо возвыша́хуся, я́коже ру́це,/ уста́ же вельми́ благословля́ху, я́коже слы́шашеся,/ о́блак подъе́мляше, и не́бо вну́трь Тебе́ прия́т./ Де́ло сие́, Го́споди, соде́лал еси́ вели́кое и пресла́вное// во спасе́ние душ на́ших.

Низше́дшее естество́ Ада́мово/ в до́льнейшия страны́ земли́,/ Бо́же, новосотвори́вый Собо́ю,/ превы́ше вся́каго Нача́ла и Вла́сти возве́л еси́ дне́сь:/ я́ко бо возлюби́в спосади́л еси́,/ я́коже поми́ловав соедини́л еси́ Себе́,/ я́ко соедини́вый спострада́л еси́,/ я́ко Безстра́стен пострада́в и спросла́вил еси́./ Но безпло́тнии, Кто́ е́сть Се́й, глаго́лаху, Кра́сный Му́ж?/ Но не челове́к то́чию,/ Бо́г же и Челове́к, совокупле́нно и явля́емо./ Те́мже удивле́ни, А́нгели,/ во оде́ждах лета́юще о́крест ученико́в,/ друзи́и же стоя́ще, вопия́ху:/ му́жие галиле́йстии,/ И́же от ва́с оты́де, Се́й е́сть Иису́с, Челове́к Бо́г./ Бо́г Челове́к па́ки прии́дет,/ Судия́ живы́х и ме́ртвых,/ ве́рным же да́руяй грехо́в проще́ние// и ве́лию ми́лость.

Егда́ возне́слся еси́ во сла́ве, Христе́ Бо́же,/ ученико́м зря́щим,/ о́блацы подыма́ху Тя́ с Пло́тию,/ врата́ взя́шася Небе́сная,/ ли́к а́нгельский ра́довашеся с весе́лием,/ Го́рнейшия Си́лы зовя́ху глаго́люще:/ возьми́те врата́, кня́зи, ва́ша,/ и вни́дет Ца́рь сла́вы./ Ученицы́ же дивя́щеся глаго́лаху:/ не разлучи́ся на́с, Па́стырю до́брый,/ но посли́ на́м Ду́ха Твоего́ Пресвята́го,/ наставля́юща, и утвержда́юща, и просвеща́юща,// и освяща́юща ду́ши на́ша.

Слава, и ныне, глас тойже:

Го́споди, та́инство, е́же от веко́в сокрове́нное и от родо́в,/ испо́лнив, я́ко Бла́г,/ прише́л еси́ со ученики́ Твои́ми на го́ру Елео́нскую,/ име́я Ро́ждшую Тя́, Творца́ и все́х Соде́теля:/ То́й бо, в Стра́сти Твое́й Ма́терски па́че все́х боле́зновавшей,/ подоба́ше и сла́вою Пло́ти Твоея́/ премно́гия наслади́тися ра́дости./ Ея́же и мы́ причаща́ющеся/ е́же на Небеса́ восхо́дом Твои́м, Влады́ко,// вели́кую Твою́ ми́лость, на на́с бы́вшую, сла́вим.

На стиховне стихиры самогласны, глас 2:

Роди́лся еси́, я́ко Са́м восхоте́л еси́,/ яви́лся еси́, я́ко Са́м изво́лил еси́,/ пострада́л еси́ Пло́тию, Бо́же на́ш,/ из ме́ртвых воскре́сл еси́, попра́в сме́рть./ Возне́слся еси́ во сла́ве, вся́ческая Исполня́яй,/ и посла́л еси́ на́м Ду́ха Боже́ственнаго,// е́же воспева́ти и сла́вити Твое́ Божество́.

Стих: Вси язы́цы, восплещи́те рука́ми,/ воскли́кните Бо́гу гла́сом ра́дования.

Восприе́млему Тебе́, Христе́, от горы́ ма́сличныя,/ Си́лы, зря́ще, дру́г дру́гу вопия́ху:/ Кто есть Сей? И глаго́лет к ним:/ Сей есть Держа́вный и Си́льный,/ Сей есть Си́льный в бра́ни,/ Сей есть вои́стину Царь сла́вы./ И почто́ Ему́ червле́ны ри́зы?/ Из Восо́ра прихо́дит, е́же есть Пло́ти./ Ты же Сам, я́ко Бог, одесну́ю сед вели́чествия,/ посла́л еси́ нам Ду́ха Свята́го,// да наста́вит и спасе́т ду́ши на́ша.

Стих: Взы́де Бог в воскликнове́нии,/ Госпо́дь во гла́се тру́бне.

Возне́слся еси́ во сла́ве на горе́ ма́сличней, Христе́ Бо́же,/ пред Твои́ми ученики́,/ и сел еси́ одесну́ю Отца́,/ вся́ческая Исполня́яй Божество́м,/ и посла́л еси́ им Ду́ха Свята́го,/ просвеща́юща, и утвержда́юща,// и освяща́юща ду́ши на́ша.

Слава, и ныне, глас 6:

Взы́де Бог в воскликнове́нии,/ Госпо́дь во гла́се тру́бне,/ е́же вознести́ па́дший о́браз Ада́мов/ и посла́ти Ду́ха Уте́шителя,// е́же освяти́ти ду́ши на́ша.

Таже: Ны́не отпуща́еши: И Трисвятое.

На благословении хлебов тропарь праздника, глас 4:

Возне́слся еси́ во сла́ве, Христе́ Бо́же наш,/ ра́дость сотвори́вый ученико́м/ обетова́нием Свята́го Ду́ха,/ извеще́нным им бы́вшим благослове́нием,// я́ко Ты еси́ Сын Бо́жий, Изба́витель ми́ра. (Трижды.)

По молитве поем: Бу́ди и́мя: Таже псалом 33 и возглас на шестопсалмие.

Зри: А идеже несть всенощнаго: по Ны́не отпуща́еши: тропарь праздника единожды. На повечерии по Досто́йно: кондак праздника.

Полунощницу поем по обычаю с кафисмою. По 1–м Трисвятом, вместо Се жених: глаголем тропарь праздника. По 2–м Трисвятом, вместо Помяни, Господи, яко Благ: глаголем кондак праздника. Таже: Го́споди, поми́луй, 12. И отпуст. Молитвы Помяни, Господи, в надежди: не глаголем.

На Бог Госпо́дь: тропарь праздника: Возне́слся еси́ во сла́ве: трижды.

По 1–м стихословии седален, глас 1.

Подобен: Ка́мени запеча́тану:

А́нгелом дивя́щимся восхо́да стра́нному, и ученико́м ужаса́ющимся стра́шному взы́тия, возше́л еси́ со сла́вою, я́ко Бог, и врата́ Тебе́ взя́шася, Спа́се. Сего́ ра́ди Си́лы Небе́сныя дивля́хуся, вопию́ще: сла́ва снизхожде́нию Твоему́, Спа́се, сла́ва Ца́рствию Твоему́, сла́ва Вознесе́нию Твоему́, Еди́не Человеколю́бче.

Слава, и ныне, тойже.

По 2–м стихословии седален, глас 3.

Подобен: Красоте́ де́вства:

Преве́чный Бо́г и Безнача́льный е́же восприя́т естество́ челове́ческое, обоготвори́в та́йно, дне́сь вознесе́. А́нгели, предтеку́ще, апо́столом пока́зоваху Сего́, иду́ща на Небеса́ со сла́вою мно́гою, Тому́же поклони́вшеся глаго́лаху: сла́ва Бо́гу возне́сшемуся.

Слава, и ныне, тойже.

Таже полиелей. И величание:

Велича́ем Тя́,/ Живода́вче Христе́,/ и почита́ем е́же на Небеса́/ с пречи́стою Твое́ю Пло́тию// Боже́ственное Вознесе́ние.

Псалмы избранныя:

Вси язы́цы, восплещи́те рука́ми, воскли́кните Бо́гу гла́сом ра́дования.

Я́ко Госпо́дь Вы́шний стра́шен, Царь Ве́лий по всей земли́.

Покори́ лю́ди нам и язы́ки под но́ги на́ша.

Взы́де Бог в воскликнове́нии, Госпо́дь во гла́се тру́бне.

И прочая по Ирмологиону.

По полиелеи седален, глас 5.

Подобен: Собезнача́льное Сло́во:

Соше́дый с Небесе́ на земна́я и, до́лу лежа́щий во а́дове стра́жи, совоскреси́вый, я́ко Бог, Ада́мов зрак, Вознесе́нием Твои́м, Христе́, на Небеса́ возве́д, престо́лу Оте́ческому Твоему́ соседи́теля соде́лал еси́, я́ко Ми́лостив и Человеколю́бец.

Слава, и ныне, тойже.

Степенна, 1–й антифон 4–го гласа.

Прокимен, глас 4: Взы́де Бог в воскликнове́нии,/ Госпо́дь во гла́се тру́бне.

Стих: Вси язы́цы, восплещи́те рука́ми, воскли́кните Бо́гу гла́сом ра́дования.

Вся́кое дыха́ние:

Евангелие от Марка, зачало 71: Воскре́с Иису́с зау́тра в пе́рвую суббо́ту:

Воскресе́ние Христо́во: единожды. Псалом 50.

Слава, глас 2: Моли́твами апо́столов: И ныне: Моли́твами Богоро́дицы:

Таже: Поми́луй мя, Бо́же:

И поем настоящий самогласен, глас 6:

Днесь на Небесе́х Го́рния Си́лы на́ше естество́ зря́ще,/ дивя́щеся стра́ннаго о́браза восхо́ду,/ недоумева́хуся, друг ко дру́гу глаго́люще:/ Кто Сей прише́дый?/ Ви́дяще же своего́ Влады́ку,/ Небе́сная врата́ взя́ти повелева́ху:/ с ни́миже непреста́нно воспои́м/ с Пло́тию отону́ду па́ки Гряду́щаго,// я́ко Судию́ всех и Бо́га Всеси́льна.

Канона праздника два. Первый со ирмосы на 8, вторый на 6.

Канон, творение Иоанна монаха. Глас 5.

Песнь 1

Ирмос: Спаси́телю Бо́гу,/ в мо́ри лю́ди немо́крыми нога́ми наста́вльшему/ и фарао́на со всево́инством пото́пльшему,// Тому́ Еди́ному пои́м, я́ко просла́вися.

Воспои́м, вси лю́дие, на ра́мех херуви́мских возне́сшуся со сла́вою Христу́ и спосади́вшему нас одесну́ю Отца́, песнь побе́дную, я́ко просла́вися.

Хода́тая Бо́гу и челове́ком, Христа́, ли́цы а́нгельстии ви́девше с Пло́тию в вы́шних, удивля́хуся, согла́сно же воспева́ху песнь побе́дную, я́ко просла́вися.

Я́вльшемуся Бо́гу на горе́ Сина́йстей и зако́н да́вшему Богови́дцу Моисе́ю, от горы́ Елео́нския возне́сшемуся Пло́тию, Тому́ вси воспои́м, я́ко просла́вися.

Богородичен: Пречи́стая Ма́ти Бо́жия, воплоще́ннаго от Тебе́ и от недр Роди́теля неотсту́пльшаго Бо́га непреста́нно моли́ от вся́каго обстоя́ния спасти́, я́же созда́.

Ин канон, господина Иосифа, егоже краестрочие по алфавиту.

Во осмой же и девятой песни: Оди Иосиф. Еже есть: Песнь Иосифова.

Глас 4.

Ирмос: Отве́рзу уста́ моя́:

Воскре́сл еси́ тридне́вен, по естеству́ Безсме́ртный, и яви́лся еси́ единона́десятим и всем ученико́м, и восте́кл еси́, Христе́, ко Отцу́, о́блаком носи́мь, всех Тво́рче.

Вопие́т, я́вственно поя́, Дави́д Богодохнове́нный: взы́де Госпо́дь к Небе́сным в воскликнове́нии и трубы́ шу́ме и к Началосве́тному Отцу́ доспе́.

Слава: Состаре́вшийся, Го́споди, мир мно́гими грехми́, обнови́в Стра́стию Твое́ю и воста́нием Твои́м, возше́л еси́, носи́мь о́блаком, к Пренебе́сным: сла́ва сла́ве Твое́й.

И ныне, Богородичен: Влады́ку родила́ еси́ всех, Всенепоро́чная Влады́чице, Страсть во́льную прии́мшаго и возше́дша к Своему́ Отцу́, Его́же не оста́ви, а́ще и Плоть взят.

Катавасия: Боже́ственным покрове́н/ медленоязы́чный мра́ком,/ извити́йствова Богопи́санный зако́н:/ ти́ну бо оттря́с очесе́ у́мнаго,/ ви́дит Су́щаго/ и науча́ется Ду́ха ра́зуму,// хваля́ боже́ственными пе́сньми.

Песнь 3

Ирмос: Си́лою Креста́ Твоего́, Христе́,/ утверди́ мое́ помышле́ние,/ во е́же пе́ти и сла́вити// спаси́тельное Твое́ Вознесе́ние.

Возше́л еси́, Жизнода́вче Христе́, ко Отцу́, и возне́сл еси́ род наш, Человеколю́бче, неизрече́нным благоутро́бием Твои́м.

Чи́ни а́нгельстии, Спа́се, челове́ческое естество́ ви́девше, совосходя́щее Тебе́, непреста́нно удивля́еми, воспева́ху Тя.

Ужаса́хуся а́нгельстии ли́цы, Христе́, зря́ще Тя с Телесе́м возне́сшася, и воспева́ху свято́е Твое́ Вознесе́ние.

Естество́ челове́ческое, Христе́, тле́нием па́дшее, возста́вил еси́, и восхо́дом Твои́м возне́сл еси́, и с Собо́ю нас просла́вил еси́.

Богородичен: Моли́ непреста́нно, Чи́стая, Произше́дшаго от ложе́сн Твои́х, изба́витися пре́лести диа́воли пою́щим Тя Ма́терь Бо́жию.

Ин канон. Ирмос: Твоя́ песносло́вцы, Богоро́дице:

Возьми́те врата́ Небе́сная, се прии́де Христо́с, Царь тва́ри, в Те́ло обо́лкся земно́е, Го́рнейшим глаго́лаху Си́лам до́льнейшия.

Взыска́в, Христе́, прельще́ннаго пре́лестию змие́вою Ада́ма, я́ко в сего́ оболки́йся, возше́л еси́ и сел еси́ одесну́ю, я́ко сопресто́лен Отцу́, пою́щим А́нгелом Тебе́.

Слава: Земля́ пра́зднует и лику́ет, ра́дуется и Не́бо, Вознесе́нием днесь Творца́ тва́ри, предъявле́нно соедини́вшаго разстоя́щаяся хоте́нием.

И ныне, Богородичен: Сме́рти роди́вши Разруши́теля, Еди́наго Безсме́ртнаго Бо́га, Де́во Ма́ти Всечи́стая, Того́ при́сно умоли́ умерщвля́ющия моя́ стра́сти умори́ти и спасти́ мя.

Катавасия: Разве́рзе утро́бы неча́дствовавшия у́зы,/ доса́ду же неудоботерпи́му благоча́дствующия,/ еди́на моли́тва проро́чицы дре́вле А́нны,/ нося́щия дух сокруше́н,// к Си́льному и Бо́гу ра́зумов.

Ектения малая.

Седален, глас 8.

Подобен: Прему́дрости:

Всед на о́блаки Небе́сныя, оста́вив мир су́щим на земли́, возше́л и сел еси́ одесну́ю Отца́, я́ко Единосу́щен Сему́ сый и Ду́ху. А́ще бо и во Пло́ти яви́лся еси́, но непрело́жен пребы́л еси́: те́мже ча́еши соверше́ния коне́ц, суди́ти Гряды́й на зе́млю ми́ру всему́. Правосу́де Го́споди, пощади́ ду́ши на́ша, прегреше́ний оставле́ние да́руя, я́ко Бог Ми́лостив, рабо́м Твои́м.

Слава, и ныне: тойже.

Песнь 4

Ирмос: Услы́шах слу́х си́лы Креста́,/ я́ко рай отве́рзеся им,// и возопи́х: сла́ва си́ле Твое́й, Го́споди.

Возне́слся еси́ во сла́ве, А́нгелов Царю́, Уте́шителя нам от Отца́ посла́в. Те́мже вопие́м: сла́ва, Христе́, Вознесе́нию Твоему́.

Я́ко взы́де Спас ко Отцу́ с Пло́тию, удиви́шася Ему́ а́нгельская во́инства и возопи́ша: сла́ва, Христе́, Вознесе́нию Твоему́.

А́нгельския Си́лы Го́рнейшим вопия́ху: врата́ возьми́те Христу́, на́шему Царю́, Его́же воспева́ем вку́пе со Отце́м и Ду́хом.

Богородичен: Де́ва роди́ и ма́терняя не позна́, но Ма́ти у́бо есть, Де́вою же пребы́сть, Ю́же воспева́юще: ра́дуйся, Богоро́дице, взыва́ем.

Ин канон.

Ирмос: Седя́й в сла́ве:

Иису́с Жизнода́вец, прии́м, и́хже возлюби́, на Елео́нскую го́ру восхо́дит, и сих благослови́, и, о́блаком носи́мь, О́тчая не́дра доспе́, я́же ника́коже бе оста́вил.

Мир весь пра́зднует ви́димый и неви́димый: в ра́дости А́нгели лику́ют и челове́цы, славосло́вяще непреста́нно Вознесе́ние, Пло́тию Соедини́вшагося нам бла́гостию.

Слава: Разруши́вый держа́ву сме́рти, я́ко Безсме́ртный, Го́споди, безсме́ртие всем дарова́л еси́, Человеколю́бче, и возне́слся еси́ во сла́ве, зря́щим Тя честны́м ученико́м, Иису́се Всеси́льне.

И ныне, Богородичен: Блаже́нно чре́во Твое́, Всенепоро́чная, бысть: чре́во бо а́дово пресла́вно Истощи́вшаго несказа́нно вмести́ти сподо́билася еси́, Его́же моли́ спасти́ нас, пою́щих Тя.

Катавасия: Царю́ Царе́й, Яковы́й от Якова́го/ Еди́н, Сло́ве, произше́дый/ от Отца́ Безвино́внаго,/ Равномо́щнаго Твоего́ Ду́ха/ апо́столом и́стинно посла́л еси́,/ я́ко Благоде́теля, пою́щим:// сла́ва держа́ве Твое́й, Го́споди.

Песнь 5

Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве бо Тебе́, ино́го не зна́ем.

Испо́лнив весе́лия вся́ческая, Ми́лостиве, к Го́рним Си́лам с Пло́тию прише́л еси́.

А́нгельския Си́лы, взе́млема Тебе́ ви́девше: врата́, взыва́ху, Царю́ на́шему возьми́те.

Апо́столи, ви́девше возвыша́ема Спа́са, с тре́петом взыва́ху Царю́ на́шему: сла́ва Тебе́.

Богородичен: Де́ву по Рождестве́ пое́м Тя, Богоро́дице, Ты бо Бо́га Сло́ва пло́тию ми́рови родила́ еси́.

Ин канон.

Ирмос: Ужасо́шася вся́ческая:

Умертви́в смерть Твое́ю сме́ртию, Го́споди, взем, и́хже возлюби́л еси́, возше́л еси́ на ма́сличную го́ру святу́ю и отту́ду восте́кл еси́, Христе́, к Твоему́ Роди́телю, о́блаком носи́мь.

Стра́нно Твое́ Рождество́, стра́нно Твое́ Воскресе́ние, стра́нно и стра́шно Твое́, Жизнода́вче, е́же от го́ры, Боже́ственное Вознесе́ние, е́же изобразу́я, Илия́ четвероко́нный восхожда́ше, воспева́я Тя́, Человеколю́бче.

Слава: Зря́щим апо́столом веща́ху А́нгели: му́жие галиле́йстии, что чудите́ся Вознесе́нию Жизнода́вца Христа́? Сей прии́дет па́ки на зе́млю суди́ти ми́ру всему́, я́ко Судия́ пра́веднейший.

И ныне, Богородичен: Де́ву сохрани́в Тя по Рождестве́ нетле́нну, восхо́дит Христо́с ко Отцу́, Богороди́тельнице, Его́же не оста́ви, а́ще и Плоть прия́т из Тебе́, мы́сленную же и одушевле́нную, за ми́лость неизрече́нную.

Катавасия: Реши́тельное очище́ние грехо́в,/ огнедохнове́нную приими́те Ду́ха ро́су,/ о ча́да светообра́зная церко́вная./ Ны́не от Сио́на бо изы́де зако́н,// языкоогнеобра́зная Ду́ха благода́ть.

Песнь 6

Ирмос: Обы́де мя бе́здна,/ гроб мне кит бысть,/ аз же возопи́х к Тебе́, Человеколю́бцу,// и спасе́ мя десни́ца Твоя́, Го́споди.

Взыгра́шася апо́столи, зря́ще на высоту́ днесь Зижди́теля взе́млема, упова́нием Ду́ха, и стра́хом зовя́ху: сла́ва восхо́ду Твоему́.

Предста́ша А́нгели, вопию́ще, Христе́, ученико́м Твои́м: и́мже о́бразом ви́десте Христа́ восходя́ща с Пло́тию, па́ки прии́дет пра́ведный всех Судия́.

Я́ко ви́деша Тя, Спа́се наш, Небе́сныя Си́лы, на высоту́ взе́млема с Те́лом, взыва́ху, глаго́люще: вели́ко, Влады́ко, человеколю́бие Твое́.

Богородичен: Купину́ Тя неопали́мую, и го́ру, и ле́ствицу одушевле́нную, и дверь Небе́сную досто́йно сла́вим, Мари́е сла́вная, правосла́вных Похвало́.

Ин канон.

Ирмос: Боже́ственное сие́ и всечестно́е:

Да ка́плют нам свы́ше о́блацы весе́лие ве́чное, Христо́с бо, о́блаком, я́ко Херуви́мы, носи́мый, к Своему́ Отцу́ восхо́дит днесь.

Пло́ти яви́вся подо́бием, пре́жде разстоя́щаяся собра́л еси́ во еди́но, Человеколю́бче, и возне́слся еси́, Ще́дре, в Небе́сная, зря́щим Тя ученико́м Твои́м.

Слава: Что червле́ны ри́зы Пло́ти Соедини́вшагося дебельству́? Святи́и А́нгели, Христа́ зря́ще, веща́ху: Стра́сти честны́я Боже́ственныя нося́ща о́бразы.

И ныне, Богородичен: Пое́м, Отрокови́це, зача́тие, пое́м Твое́ неизрече́нное Рождество́, и́мже изба́вихомся, Чи́стая, тли, и озлобле́ния, и мра́чнаго а́дова затворе́ния.

Катавасия: Очище́ние нам, Христе́,/ и Спасе́ние, Влады́ко,/ возсия́л еси́ от Де́вы,/ да, я́ко проро́ка от зве́ря морска́го пе́рсей Ио́ну,// от тли исхити́ши всего́ Ада́ма, всеро́дна па́дшаго.

Ектения малая.

Кондак самогласен, глас 6:

Е́же о на́с испо́лнив смотре́ние/ и я́же на земли́ соедини́в Небе́сным,/ возне́слся еси́ во сла́ве, Христе́ Бо́же на́ш,/ ника́коже отлуча́яся,/ но пребыва́я неотсту́пный/ и вопия́ лю́бящим Тя́:// А́з е́смь с ва́ми, и никто́же на вы́.

Икос:

Я́же земли́ на земли́ оста́вившии, я́же пе́пельная пе́рсти уступа́ющии, прииди́те, воспря́нем и на высоту́ возведе́м о́чи и мы́сли, впери́м ви́ды, вку́пе и чу́вства, на Небе́сная врата́, сме́ртнии: непщу́им бы́ти в ма́сличной горе́ и взира́ти на Избавля́ющаго, на о́блацех носи́ма. Отону́ду бо Госпо́дь на Небеса́ востече́, и та́мо даролюбе́зны да́ры раздая́ апо́столом Свои́м, уте́шив я, я́ко Оте́ц, и утверди́в я, наста́вив я́ко сыно́в, и рече́ к ним: не разлуча́юся вас, Аз есмь с ва́ми, и никто́же на вы.

Песнь 7

Ирмос: В пещи́ о́гненней/ песносло́вцы спасы́й о́троки,// благослове́н Бог оте́ц на́ших.

На о́блацех све́та вознесы́йся и спасы́й мир, благослове́н Бог оте́ц на́ших.

На ра́му, Спа́се, заблу́ждшее взем естество́, возне́сся, Бо́гу и Отцу́ приве́л еси́.

Возше́дый во Пло́ти к Безпло́тному Отцу́, благослове́н Бог оте́ц на́ших.

Умерщвле́нное на́ше грехо́м естество́ взем, Твоему́ сво́йственному Отцу́, Спа́се, приве́л еси́.

Богородичен: От Де́вы ро́ждся, Ю́же Богоро́дицу соде́лал еси́, благослове́н Бог оте́ц на́ших.

Ин канон.

Ирмос: Не послужи́ша тва́ри:

Све́тлый Тя Свет су́ща, подъя́т о́блак, Го́споди, от земли́ па́че ума́ восприе́млема, и Небе́снии собо́ри восхвали́ша со апо́столы, глаго́люще: Бо́же, благослове́н еси́.

Рука́ма вси, ра́дующеся, воспле́щим, Вознесе́нием Христо́вым, и воскли́кнем: взы́де Бог во гла́се тру́бне и се́де одесну́ю, я́ко сопресто́лен Отцу́ во ве́ки.

Слава: Поя́, дре́вле Моисе́й вели́кий взыва́ше: да покло́нятся восходя́щу Христу́ Небе́снии А́нгели, я́ко всех Царю́, Ему́же зове́м: отце́в Го́споди и Бо́же, благослове́н еси́.

И ныне, Богородичен: О, чуде́с пресла́вных! Ка́ко вмести́ла еси́ Бо́га Невмести́маго, Богора́дованная, Пло́тию обнища́вшаго, со сла́вою мно́гою в Небе́сная возне́сшагося днесь и оживи́вшаго челове́ки?

Катавасия: Согла́сная возшуме́ орга́нская песнь/ почита́ти златосотворе́нный безду́шный истука́н:/ Уте́шителева же светоно́сная благода́ть почеству́ет,/ е́же вопи́ти:// Тро́ице Еди́ная, Равноси́льная, Безнача́льная, благослове́нна еси́.

Песнь 8

Ирмос: Из Отца́ пре́жде век рожде́ннаго Сы́на и Бо́га/ и в после́дняя ле́та воплоще́ннаго от Де́вы Ма́тере,/ свяще́нницы, по́йте,// лю́дие, превозноси́те во вся ве́ки.

Во двою́ существу́ возлете́вшаго Жизнода́вца Христа́ на Небеса́ со сла́вою и Отцу́ соседя́щаго, свяще́нницы, по́йте, лю́дие, превозноси́те во вся ве́ки.

От рабо́ты и́дольския тварь изба́вившаго и предста́вившаго ту свобо́дну Твоему́ Отцу́, Тебе́, Спа́се, пое́м и Тебе́ превозно́сим во вся ве́ки.

Свои́м схожде́нием Низложи́вшаго супоста́та и Свои́м возше́ствием Возне́сшаго челове́ки, свяще́нницы, по́йте, лю́дие, превозноси́те во вся́ ве́ки.

Богородичен: Херуви́мов превы́шшая яви́лася еси́, Богоро́дице Чи́стая, во чре́ве Твое́м си́ми Носи́маго носи́вшая: Его́же со безпло́тными, челове́цы славосло́вим во вся ве́ки.

Ин канон.

Ирмос: О́троки благочести́выя:

Яви́шася у́мове апо́столом в Вознесе́нии и веща́ху: что взира́юще стоите́ дивя́щеся? Сей, восходя́й в Небе́сная, прии́дет и па́ки суди́ти и́же на земли́ челове́ком, Судия́ сый Еди́н.

Дади́м Бо́гу вели́чие, хвалы́ согла́сие воскли́кнем, воспои́м, лику́им, рука́ми же воспле́щим: взы́де Бог наш на Небеса́ от земли́, А́нгелом, Арха́нгелом пою́щим Сего́, я́ко Влады́ку и Творца́ всех.

Благослови́м Отца́ и Сы́на и Свята́го Ду́ха, Го́спода.

Взя́тся превы́ше А́нгел естество́ на́ше, дре́вле отпа́дшее, и на престо́ле посажде́но бысть боже́ственне па́че смы́сла: прииди́те, торжеству́им и воззове́м: Го́спода по́йте, дела́, и превозноси́те во вся ве́ки.

И ныне, Богородичен: Се Сын Твой, Богоро́дице, плени́в Кресто́м Свои́м смерть, воскре́се тридне́вен и, ученико́м Свои́м я́влься, востече́ к Небе́сным: с ни́миже Тебе́ покланя́ющеся пое́м и славосло́вим во вся ве́ки.

Таже: Хва́лим, благослови́м:

Катавасия: Разреша́ет у́зы и ороша́ет пла́мень/ трисве́тлый Богонача́лия о́браз: пою́т о́троцы,/ благослови́т же Еди́наго Спа́са и Вседе́теля,/ я́ко Благоде́теля,// сотворе́нная вся́ческая тварь.

Честнейшую: не пое́м, но пое́м припе́в:

Велича́й, душе́ моя,/ возне́сшагося от земли́ на Не́бо Христа́ Жизнода́вца.

Песнь 9

Ирмос: Тя, па́че ума́ и словесе́ Ма́терь Бо́жию,/ в ле́то Безле́тнаго/ неизрече́нно ро́ждшую,// ве́рнии единому́дренно велича́ем.

Тебе́, Изба́вителя ми́ра, Христа́ Бо́га, апо́столи, ви́дяще боже́ственно возвыша́ема, со стра́хом, игра́юще, велича́ху.

Твою́ обожи́вшуюся Плоть зря́ще, Христе́, на высоте́, А́нгели друг ко дру́гу глаго́лаху: вои́стину Сей есть Бог наш.

Тебе́ безпло́тных чи́нове, Христе́ Бо́же, на о́блацех взе́млема ви́дяще, взыва́ху: сла́вы Царю́ врата́ возьми́те.

Тебе́, соше́дшаго да́же до после́дних земли́, и челове́ка спа́сшаго, и восхожде́нием Твои́м возвы́сившаго, Сего́ велича́ем.

Богородичен: Ра́дуйся, Богоро́дице, Ма́ти Христа́ Бо́га: Его́же родила́ еси́, дне́сь от земли́ возноси́ма со апо́столы зря́щи, возвелича́ла еси́.

Вторый припев:

А́нгели, восхожде́ние Влады́ки зря́ще, ужаса́хуся,/ ка́ко со сла́вою взя́тся от земли́ на Го́рняя.

Ин канон.

Ирмос: Всяк земноро́дный:

О, даро́в па́че постиже́ния! О, та́инства стра́шнаго! Все́ми бо Влады́чествуяй, от земли́ отходя́ к Небе́сным, ученико́м посла́ Ду́ха Свята́го, просвети́вшаго сих смысл и о́гненны сотвори́вшаго благода́тию.

Полцы́ учени́честии, Госпо́дь рече́, вы седи́те во Иерусали́ме, и Аз низпослю́ вам Уте́шителя друга́го, Отцу́ сопресто́льна и Мне равноче́стна, Его́же ви́дите взима́ема и о́блаком све́тлым носи́ма.

Взя́тся я́ве великоле́пие вы́ше Небе́с Пло́тию Обнища́вшаго, и соседе́нием Отца́ почте́ся естество́ на́ше отпа́дшее: торжеству́им, и согла́сно вси воскли́кнем, и воспле́щим рука́ми, ра́дующеся.

Богородичен: Свет, от Све́та возсия́вый, Всенепоро́чная, из Тебе́ возсия́, и че́рность безбо́жия всю разруши́, и в нощи́ спя́щих просвети́. Сего́ ра́ди вси по до́лгу Тя во ве́ки при́сно ублажа́ем.

Катавасия: Ра́дуйся, Цари́це,/ Матероде́вственная Сла́во:/ вся́ка бо удобообраща́тельная благоглаго́ливая уста́/ вити́йствовати не мо́гут,/ Тебе́ пе́ти досто́йно:/ низумева́ет же ум всяк Твое́ Рождество́ разуме́ти.// Те́мже Тя согла́сно сла́вим.

Ектения малая.

Ексапостиларий самогласен:

Ученико́м зря́щим Тя, возне́слся еси́ Христе́ ко Отцу́, соседя́, А́нгели предтеку́ще зовя́ху: возьми́те врата́, возьми́те, Царь бо взы́де к Нача́льному Све́ту Сла́вы. (Трижды.)

На хвалитех: Вся́кое дыха́ние: поставим стихи 4 и поем стихиры, глас 1.

Подобен: Небе́сных чино́в:

Стих: Хвали́те Его́ на Си́лах Его́,/ хвали́те Его́ по мно́жеству вели́чествия Его́.

А́нгельски, и́же в ми́ре, торжеству́им,/ на престо́ле сла́вы Бо́гу носи́мому/ взыва́юще пе́ние:/ Свят еси́, О́тче Небе́сный,/ Соприсносу́щный Сло́ве,// Свят еси́ и Ду́ше Всесвяты́й.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Нача́льницы А́нгелов, смотря́юще, Спа́се,/ восхожде́ния стра́нное,/ недоумева́хуся друг ко дру́гу:/ что виде́ние сие́?/ Челове́к у́бо зра́ком ви́димый,// я́коже Бог, превы́ше Небе́с с Пло́тию восхо́дит.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Галиле́ане, зря́ще Тя вознесе́нна/ от ма́сличныя горы́ с Те́лом, Сло́ве,/ слы́шаху А́нгелов, вопию́щих им:/ что стоите́, зря́ще?/ Сей прии́дет па́ки с Пло́тию,// и́мже о́бразом ви́десте.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

А́нгельски и́же в ми́ре: (Повторяюще 1–ю.)

Слава, и ныне, глас 2:

Роди́лся еси́, я́ко Сам восхоте́л еси́,/ яви́лся еси́, я́ко Сам изво́лил еси́:/ пострада́л еси́, Пло́тию, Бо́же наш,/ из ме́ртвых воскре́сл еси́, попра́в смерть./ Возне́слся еси́ во сла́ве, вся́ческая Исполня́яй,/ и посла́л еси́ нам Ду́ха Боже́ственнаго,// е́же воспева́ти и сла́вити Твое́ Божество́.

Славословие великое, по немже тропарь праздника:

Возне́слся еси́ во сла́ве, Христе́ Бо́же наш,/ ра́дость сотвори́вый ученико́м/ обетова́нием Свята́го Ду́ха,/ извеще́нным им бы́вшим благослове́нием,// я́ко Ты еси́ Сын Бо́жий, Изба́витель ми́ра.

И ектении, и совершенный отпуст. И час первый.

Поем антифоны праздника.

Антифон 1–й, псалом 46, глас 2.

Стих 1: Вси язы́цы, восплещи́те рука́ми,/ воскли́кните Бо́гу гла́сом ра́дования.

Припев: Моли́твами Богоро́дицы, Спа́се, спаси́ нас.

Стих 2: Я́ко Госпо́дь вы́шний стра́шен,/ Царь ве́лий по всей земли́.

Моли́твами Богоро́дицы:

Стих 3: Покори́ лю́ди нам/ и язы́ки под но́ги на́ша.

Моли́твами Богоро́дицы:

Стих 4: Взы́де Бог в воскликнове́нии,/ Госпо́дь во гла́се тру́бне.

Моли́твами Богоро́дицы:

Слава, и ныне: Моли́твами Богоро́дицы:

Ектения малая.

Антифон 2–й, псалом 47, глас 2.

Стих 1: Ве́лий Госпо́дь и хва́лен зело́/ во гра́де Бо́га на́шего в горе́ святе́й Его́.

Припев: Спаси́ ны, Сы́не Бо́жий, вознесы́йся во сла́ве, пою́щия Ти: Аллилу́ия.

Стих 2: Го́ры Сио́нския, ре́бра се́верова,/ град Царя́ вели́каго.

Спаси́ ны, Сы́не Бо́жий, вознесы́йся во сла́ве, пою́щия Ти: Аллилу́ия.

Стих 3: Бог в тя́жестех Его́ зна́емь есть,/ егда́ заступа́ет и.

Спаси́ ны, Сы́не Бо́жий, вознесы́йся во сла́ве, пою́щия Ти: Аллилу́ия.

Стих 4: Я́ко се ца́рие зе́мстии собра́шася,/ снидо́шася вку́пе.

Спаси́ ны, Сы́не Бо́жий, вознесы́йся во сла́ве, пою́щия Ти: Аллилу́ия.

Слава, и ныне: Единоро́дный Сы́не:

Ектения малая.

Антифон 3–й, псалом 48, глас 4.

Стих 1. Услы́шите сия́, вси язы́цы,/ внуши́те, вси живу́щии по вселе́нней.

Тропарь, глас 4: Возне́слся еси́ во сла́ве, Христе́ Бо́же наш:

Стих 2: Земноро́днии же и сы́нове челове́честии,/ вку́пе бога́т и убо́г. Тропарь.

Стих 3: Уста́ моя́ возглаго́лют прему́дрость,/ и поуче́ние се́рдца моего́ ра́зум. Тропарь.

Стих 4: Приклоню́ в при́тчу у́хо мое́,/ отве́рзу во псалти́ри гана́ние мое́. Тропарь.

Вход с Евангелием.

Входный стих, от диакона глаголемый:

Прему́дрость, про́сти. Взы́де Бог в воскликнове́нии, Госпо́дь во гла́се тру́бне.

Тропарь, глас 4:

Возне́слся еси́ во сла́ве, Христе́ Бо́же наш,/ ра́дость сотвори́вый ученико́м/ обетова́нием Свята́го Ду́ха,/ извеще́нным им бы́вшим благослове́нием,// я́ко Ты еси́ Сын Бо́жий, Изба́витель ми́ра.

Слава, и ныне, кондак, глас 6:

Е́же о нас испо́лнив смотре́ние/ и я́же на земли́ соедини́в Небе́сным,/ возне́слся еси́ во сла́ве, Христе́ Бо́же наш,/ ника́коже отлуча́яся,/ но пребыва́я неотсту́пный/ и вопия́ лю́бящим Тя:// Аз есмь с ва́ми, и никто́же на вы.

Таже Трисвятое.

Прокимен, глас 7: Вознеси́ся на Небеса́, Бо́же,/ и по всей земли́ сла́ва Твоя́.

Стих: Гото́во се́рдце мое́, Бо́же, гото́во се́рдце мое́: воспою́ и пою́ во сла́ве мое́й.

Апостол в Деяниих, зачало 1: Пе́рвое у́бо сло́во сотвори́х:

Аллилуия, глас 2: Взы́де Бог в воскликнове́нии, Госпо́дь во гла́се тру́бне.

Стих: Вси язы́цы, восплещи́те рука́ми, воскли́кните Бо́гу гла́сом ра́дования.

Евангелие от Луки, зачало 114: Воскре́с Иису́с от ме́ртвых и ста посреде́ учени́к Свои́х:

И бывает Литургия Иоанна Златоустаго.

За Достойно: поем и до отдания припев и ирмос 1–го канона во глас 5:

Велича́й, душе́ моя́,/ возне́сшагося от земли́ на Не́бо Христа́ Жизнода́вца.

Тя, па́че ума́ и словесе́ Ма́терь Бо́жию,/ в ле́то Безле́тнаго/ неизрече́нно ро́ждшую,// ве́рнии единому́дренно велича́ем.

Причастный стих:

Взы́де Бог в воскликнове́нии, Госпо́дь во гла́се тру́бне. Аллилу́ия. (Трижды.)

Вместо Видехом: поем тропарь праздника. По возгласе: Всегда́, ны́не и при́сно: поем: Ами́нь. Да испо́лнятся уста́: И до отдания.

На трапезе велие утешение братии.