МОЛИТВЫ КАЖДОДНЕВНЫЕ

БОЖЕ ВЕЧНЫЙ, Царю Святый, Творче небу и земли, Иисусе Христе, Отца безначальнаго собезначальный Сыне, неизследованною благостию призвавый мя от небытия в жизнь сию, даровавый ми благодать крещения и Свышняго пакирождения, положивый печать Духа Твоего Святаго на уды тела моего; Ты бо вложил еси в сердце мое желание взыскати Тя, Единаго истиннаго Бога, услыши и ныне молитву мою.

Ни жизни, ни света, ни радости не имам, разве Тебе, Боже. Несмь достоин воззрети на Тя, от множества грехов моих, но, якоже рекл еси учеником Твоим, яко вся елика аще воспросите в молитве, верующе, приимете и еже аще что просите во имя Мое, то сотворю, дерзая призываю Тебе: очисти мя от всякия скверны плоти и духа и научи мя како достоит молити Тя.

БЛАГОСЛОВИ день сей, егоже дал еси ми, недостойному рабу Твоему, и силою благословения Твоего сподоби мя, на всякое время и во всяком месте, сердцем чистым глаголати и делати во славу Твою, с терпением, смиренномудрием и любовию, в духе мира, кротости, великодушия и премудрости, и предзрети Тя предо мною выну.

СКАЖИ МНЕ, ГОСПОДИ, путь воли Твоея, по безмерной благости Твоей, и даруй мне непорочно ходити пред Лицем Твоим. Ты, мирный Царю, испытуяй сердца и утробы, веси всю нищету мою и безумие; Ты веси ослепление мое и неведение, но и желание сердца моего зриши, и болезни и скорби души моея не скрыты пред Тобою.

ВОНМИ убо молению моему, и Духом Твоим Святым настави мя на землю праву. Елижды аще растленная воля моя поведет мя на чуждыя стези, тогда молю Тя, не щади мене, но нуждею возврати мя паки на путь святых Твоих заповедей. Силою любве Твоея даждь ми последовати стопам Твоим аможе аще пойдеши. Сохрани мя от всякаго дела и слова душетленнаго, от всякаго движения сердца и ума моего, могущаго печалити Духа Твоего Святаго или брата моего огорчати. Научи мя, что ми подобает глаголати и како подобает глаголати. Аще же есть воля Твоя, да умолкну, вразуми мя молчати в духе мира, никакоже оскорбляющи, ниже смущающи ближняго моего.

Законоположи мя в путех оправданий Твоих и, даже до последняго моего издыхания, не попусти ми уклонитися от света Твоих повелений, яко да будут заповеди Твои единым законом всего моего бытия: и временнаго, и вечнаго.

ЕЙ, ТВОРЧЕ МОЙ БЛАГИЙ, умилосердися о мне, падшем создании Твоем, ущедри мя во смирении и скорби моей, и не скрый от мене путей спасения Твоего.

О мнозем и велицем молю Тя, Боже мой, но развращения и непотребства моего не забых. Темже помилуй мя и не отвержи мене от Лица Твоего дерзновения ради моего, наипаче умножи во мне сие святое дерзновение. И сподоби мя, сквернша паче всех человек, любити Тя, якоже заповедал еси нам: от всего сердца, от всея души, всем помышлением и всею крепостию. Всем существом моим да возлюблю Тя.

ЕЙ, ГОСПОДИ ЦАРЮ, Духом Твоим Святым научи мя благоразсуждению и разуму. Даждь ми познати истину Твою, прежде даже не сниду во гроб. Продли дни моя в мире сем, дóндеже принесу Ти плоды достойны покаяния. Не восхити мене в преполовение дней моих, или во омрачении ума моего. Егда же благоволиши положите конец окаянному житию моему, предупреди мене, да уготовится душа моя усрести Тя.

В тот великий день, в тот страшный час, пребуди со мною, Господи, и воздаждь ми неизреченную радость спасения Твоего. От тайных моих очисти мя и от всякаго беззакония таящагося во мне, и добрый ответ даруй ми принести Тебе на Страшнем Судищи Твоем.

ЕЙ, ГОСПОДИ, по велицей милости Твоей и безмерному человеколюбию Твоему, услыши молитву мою.

Аминь.

ГОСПОДИ БОЖЕ МОЙ, призри на нищету мою и падение мое. От юности осквернен есмь всякими грехами, и не смею возвести очи мои к Тебе, ниже отверсти скверная уста моя к призыванию святаго и страшнаго Имене Твоего. Но паки отнюд не призывати Тебе не могу, яко не имам иныя жизни, инаго света, иныя радости, иныя мудрости, иныя крепости разве Тебе Единаго, Боже мой. Темже, дерзая на милость Твою, молю Тя: сподоби мя призывати Тебе, яко Сам Ты заповедал еси учеником Твоим вся просити во Имя Твое. Силою святаго и страшнаго Имене Твоего, очисти мя от всякия скверны плоти и духа, и даждь ми молити Тя, якоже достоит. Но Ты зриши, Господи, яко не вем, како подобает молитися. Ты еси Бог мой от чрева матере моея, но пути, ведущаго к Тебе, не обретох; и доселе во время старости моея, пребываю в тьме неведения. Но ныне, егда приблизися кончина моя, егда готовится душа моя снити во вечный мрак ада, помилуй мя, пощади мя, и Сам Ты, Спасе мой, Духом Твоим Святым научи мя молити Тя. Подобно разслабленному, глаголавшему Ти: не имам человека, и аз призываю Тя – прииди ко мне, оставленному, заблудшему, безпомощному, и Сам Ты буди ми вся.

ГОСПОДИ, ИИСУСЕ ХРИСТЕ, помилуй мя, пощади мя, научи мя, утверди мя на пути заповедей Твоих.

Аминь.

ГОСПОДИ ИИСУСЕ ХРИСТЕ, Единородный Сыне безначальнаго Твоего Отца, отверзи очи омраченной души моея, яко да и аз разумно узрю Тебя, Творца и Бога моего. Молю Тебя: не отвержи мене от Лица Твоего, но презрев все мое окаянство, всю мою низость, яви мне Свет Твой, о Свете мира; и даждь ми познати любовь Твою к человеку. О сладчайший Христе, от Отца низпославый на святыя Твоя ученики и апостолы Духа Святаго, Сего, Благий, низпосли и на мя, недостойнаго, и тем научи мя познанию Твоему, и открый ми пути спасения Твоего. Возсияй ми, Боже, Боже мой, Свет Твой истинный, яко да во Свете Твоем узрю и аз славу Твою, яко Единороднаго от Отца, и да вообразится внутрь мене Твой непостижимый образ, по немуже создал еси человека. О Боже, Спасителю мой, свет ума моего и крепость души моея, да вселится в мя доброта Твоя, да пребуду и аз непрестанно в Тебе, присно нося в себе Духа Твоего Святаго, Иже да даст ми уподобитися Тебе, Единому Господу моему, якоже быша подобнии Тебе вси от века святии Твои.

ЕЙ, ГОСПОДИ ИИСУСЕ ХРИСТЕ, по неложному Твоему обетованию, прииди со Отцем и Духом Святым, и обитель Твою сотвори внутрь мене во веки веков.

Аминь.

ГОСПОДИ БОЖЕ СПАСЕНИЯ МОЕГО, милостивым благоволением Твоим даровавый ми жизнь сию, неизреченною силою Твоею призвавый мя от небытия в бытие и в душу мою вложивый желание искати Тя, Создателя и Бога моего: услыши мя ныне в час сей, яко скорблю. Вложи в уста моя словеса благоугодная Тебе, исполни сердце мое смиренных чувств, и ум мой благих помышлений. Ты, Господи мой и Боже мой, благоволил еси открыти ми нетварный свет повелений Твоих яко путь ко спасению вечному, призри убо и ныне с небесе, и виждь печаль мою. Ты веси, Господи, тесноту сердца моего, и широка заповедь Твоя зело. Тонкая ткань сердца моего болезненно раздирается в подвизе сохранити словеса Твоя, и изнемогает душа моя во еже тещи вслед стопам Твоим. Темже молю Тя: скоро прииди и вселися в мя, и Сам Ты соверши во мне Волю Твою святую и всесовершенную, яко Ты рекл еси пречистыми усты Твоими, яко без Мене не можете творити ничесоже от повеленнаго Тобою. Ты даровал еси мне свет сей преходящий, благоволи убо излияти на мя, недостойнаго, Твой Свет невечерний; Ты ввел еси мя в жизнь сию, исполненную напастей и нетления, подаждь убо и мне, по безмерней милости Твоей, ту святую и непреложную жизнь, юже обещал еси всем возлюбльшим пришествие Твое.

Ей, ГОСПОДИ, не отвержи моления моего, но скоро услыши мя, яко отступил еси от мене, и покры мя тьма, удалился еси от мене, и сокрушися сердце мое, и несть мира в костех моих. Егда оставляеши мя, Господи мой и Спасе мой, жизнь сия бывает ми во ад. Сего ради паки взываю Ти: не закосни, яко душа моя от безмернаго страдания может возжелати смерти. Помилуй мя, и посети мя, одинока и безпомощна, и возведи душу мою от сени смертныя, потопившыя мя. Сотвори со мною, окаяннейшим всех, знамение Божественнаго благоволения Твоего, и даждь ми узрети радость спасения Твоего, прежде даже не оставлю мир сей.

Аминь.

ГОСПОДИ ИИСУСЕ ХРИСТЕ, Сыне Бога Живаго, отверзи умныя очи омраченныя души моея, яко да и аз узрю Тебе, Бога моего и Творца, и тако сподоблюся истинно служити Тебе во вся дни живота моего. Припадаю Тебе, и молю Тя, не отвержи мене от Лица Твоего, но презрев все мое окаянство, и мерзость, и низость, яви ми Свет Твой, о Свете мира, и даждь ми познати любовь Твою к человеку, и да вообразится внутрь мене образ Твой непостижимый, по немуже создал еси человека, да вселится в мя доброта Твоя и сила Твоя.

Аминь.

БОЖЕ ВЕЛИКИЙ И КРЕПКИЙ, Боже превечный и преблагий, обещавый услышати всех, во истине Тя призывающих, услыши в час сей и нашу недостойную молитву, и прииди во еже спасти ны от всех гонящих нас; запрети нечистым духам от лица безумия моего; и да отлучится от мене дух ненависти и злопомнения, дух зависти и лести, дух боязни и уныния, дух гордости и гнева, и да угаснет во мне всякое разжжение страстное, от действа диавольскаго находящее на мя. Очисти мя от всякия скверны плоти и духа, и да просветится душа моя, и тело, и дух светом Божественнаго Твоего познания, дабы и аз, по множеству благости Твоея, достиг в старости моей в мужа совершенна, в меру полноты, и тако прославлю со Ангелы и всеми святыми Твое пречестное и великолепое Имя, Отца и Сына и Святаго Духа, ныне и присно и во веки веков.

Аминь.

ГОСПОДИ, ТЫ ВЕСИ, яко аз немощен есмь. Со страхом ищу аз путей к Тебе, не удалися от мене в падении моем; предстани ми, ничтожному, но жаждущему; вселися в мя, и Сам Ты совершай во мне вся, яже заповедал еси нам; сотвори мя Твоим на веки вечныя, в любви неколеблемей.

Аминь.