На вечерне
Кафизма 18
Кафизма 18
Пс.119-123; Слава: Пс.124-128; Слава: Пс.129-133;
Слава: Ектения малая:
Возглашение: Я́ко Твоя́ держа́ва, и Твое́ есть ца́рство, и си́ла, и сла́ва, Отца́ и Сы́на и Свята́го Ду́ха, ныне, и при́сно, и во ве́ки веко́в.
Лик: Ами́нь.
На «Господи, воззвах»
На 10, стихиры: Изведи́ из темни́цы ду́шу мою́, / испове́датися и́мени Твоему́.
Сти́х: Мене́ ждут пра́ведницы / до́ндеже возда́си Мне.
На 8, cти́х: Из глубины́ воззва́х к Тебе́ Го́споди, / Го́споди, услы́ши глас мой.
Сти́х: Да бу́дут у́ши Твои́ / вне́млюще гла́су моле́ния моего́.
На 6, cти́х: А́ще беззако́ния на́зриши, Го́споди, Го́споди, кто постои́т? / Я́ко у Тебе́ очище́ние есть.
Глас 4: Дании́л чу́дный,/ се́рдце стяжа́в чи́сто Ду́ха жили́ще/ и от Него́ просвеща́емый,/ бу́дущих явле́ние прорица́ет я́вственно:/ проро́чества све́тлостию удобря́емый/ и я́сно сказу́яй держа́вных/ пребеззако́нных царе́й сокрове́нная со́ния.
Сти́х: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.
Глас 4: Предукрепи́в те́ло твое́ посто́м неосла́бным,/ львов уста́ заткну́л еси́:/ посреде́ бо их стоя́, проро́че чу́дный,/ и к Бо́гу Благо́му взира́я,/ пребы́л еси́ не уя́звен/ несказа́нною си́лою вся де́йствующаго пресла́вно,/ Изба́вителя душ на́ших.
На 4, cти́х: От стра́жи у́тренния до но́щи, от стра́жи у́тренния, / да упова́ет Изра́иль на Го́спода.
Глас 4: На Престо́ле седя́щаго/ и А́нгелы обстои́маго,/ непости́жнаго ви́дел еси́ Судию́, су́ща Пра́веднаго,/ проро́че чу́дный./ Уди́вль же ся ужа́сному и стра́шному виде́нию,/ назна́менал еси́ су́щим пото́м всем,/ написа́в Второ́е прише́ствие/ вопло́щшагося Бо́га на́шего.
Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.
Глас 4: Зако́нов держа́щеся Богода́нных, всеблаже́ннии,/ ме́рзостными не оскверни́стеся пи́щами,/ но, нетле́нну душе́вную добро́ту сохра́нше,/ соблюдо́сте пло́ти невре́дный/ и неувяда́емый цвет чу́дный/ и кра́сную ле́поту/ Влады́це, прославля́ющу Своя́ уго́дники.
На 2, cти́х: Хвали́те Го́спода вси́ язы́цы, похвали́те Его́ вси́ лю́дие.
Глас 4: Боже́ственным распала́еми ю́ноши пла́менем/ огнь преоби́деша,/ в не́мже ороша́еми, честни́и,/ лик пресве́тел вообрази́вше,/ песнь многопе́тую, ви́дешася, пою́ще:/ и́бо непрее́мное Дании́л/ Ца́рствие Христо́во ви́дев, ра́довашеся,/ я́ко проро́к всеизря́днейший.
Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.
Глас 4: Словеси́ прему́дрости твоея́/ уди́вльшеся мучи́тели,/ Дании́ле досточу́дне,/ и отроко́в ра́зуму,/ Халде́йскою страно́ю нача́льствовати/ и владе́ти вас поста́виша, честни́и:/ доброде́тели бо весть я́вственнейше чуди́тися и супоста́т,/ и жития́ све́тлости,/ стра́сти бо удержа́вше, вла́стели бы́сте.
Сла́ва Отцу́, и Сы́ну, и Свято́му Ду́ху.
Глас 2: Духо́вно нас, ве́рнии,/ собра́ днесь проро́к Дании́л/ и трапе́зу предложи́ доброде́телей оби́льно/ бога́тым и ни́щим,/ и стра́нным, и дома́шним,/ и ча́шу у́мну, пролива́ющу во́ду благоче́стия,/ и веселя́щу сердца́ ве́рных,/ и Ду́ха Свята́го благода́ть подаю́щу./ Сей бо проро́к – светле́йший свети́льник,/ просия́вый в ми́ре,/ служе́ния вся Ассири́йская низложи́/ и звере́й неукроти́мых уста́ загради́./ С сим и трие́ о́троцы да восхва́лятся,/ не зла́ти естество́м су́ще,/ и зла́та иску́сншии показа́вшеся:/ не слия́ бо их огнь пе́щный, но сохрани́ це́лы,/ и́хже на́фта, и смола́, и ро́ждие венча́ша./ Приведы́й же нас на обхожде́ние ле́та Госпо́дь/ да сподо́бит ны дости́гнути/ и в Госпо́дский и честны́й день Рождества́ Христо́ва,/ подаю́щаго нам тех моли́твами/ очище́ние грехо́в и ве́лию ми́лость.
И ны́не, и при́сно, и во ве́ки веко́в. Ами́нь.
Богородичен, глас 2: Прииди́те вси, Христо́во Рождество́ предпра́зднуем ве́рно,/ и мы́сленне пе́ние, я́ко звезду́, предлага́юще волхво́в славосло́вия,/ с па́стырьми возопии́м:/ прии́де избавле́ние челове́ков из де́вственных ложе́сн,/ ве́рныя призыва́ющее.
Прокимен
Прокимен
В понедельник вечера, глас 4:
Диакон: Прему́дрость. Во́нмем. Проки́мен, глас 4.
Госпо́дь услы́шит мя, / внегда́ воззва́ти ми к Нему́.
Лик: Госпо́дь услы́шит мя, / внегда́ воззва́ти ми к Нему́.
Диакон: Внегда́ призва́ти ми, услы́ша мя Бог пра́вды моея́.
Лик: Госпо́дь услы́шит мя, / внегда́ воззва́ти ми к Нему́.
Диакон: Госпо́дь услы́шит мя
Лик: Внегда́ воззва́ти ми к Нему́.
Паремии
Стихиры на литии
На стиховне
Глас 4: Хоте́х слеза́ми омы́ти мои́х прегреше́ний, Го́споди, рукописа́ние, и про́чее живота́ моего́, покая́нием благоугоди́ти Тебе́: но вра́г льсти́т мя́, и бо́рет ду́шу мою́. Го́споди, пре́жде да́же до конца́ не поги́бну, спаси́ мя.
Стих: К Тебе́ возведо́х о́чи мои́, живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.
Глас 4: Кто́ обурева́ем, и притека́я ко приста́нищу сему́ не спасе́тся? Или́ кто́ неду́гуя, и припа́дая ко врачевству́ сему́, не уврачу́ется, Соде́телю вся́ческих, и Врачу́ неду́жных? Го́споди, пре́жде да́же до конца́ не поги́бну, спаси́ мя.
Стих: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.
Глас 4: И́же святы́х му́ченик прие́мый терпе́ние, и от на́с приими́ пе́ние, Человеколю́бче: и да́руй на́м те́х моли́твами ве́лию ми́лость.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Глас 6: Дании́л, муж жела́ний,/ ка́мень, без руки́ отсе́чен,/ ви́дев Тя, Го́споди, Младе́нца, без се́мене рожде́на,/ пронарече́ Тя, из Де́вы воплоще́нна Сло́ва,/ непреме́ннаго Бо́га и Спа́са душ на́ших.
Тропари по Трисвятом
Глас 2: Ве́лия ве́ры исправле́ния:/ во исто́чнице пла́мене, я́ко на воде́ упокое́ния,/ святи́и трие́ о́троцы ра́довахуся,/ и проро́к Дании́л, львом па́стырь, я́ко овца́м, явля́шеся./ Тех моли́твами, Христе́ Бо́же, спаси́ ду́ши на́ша.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 2: Боже́ственнаго бы́хом о́бщницы естества́ / Тобо́ю, Богоро́дице Присноде́во, / Бо́га бо нам воплоти́вшагося родила́ еси́. / Те́мже по до́лгу Тя вси благоче́стно велича́ем.
На утрене
на «Бог Господь»
Глас 2: Ве́лия ве́ры исправле́ния:/ во исто́чнице пла́мене, я́ко на воде́ упокое́ния,/ святи́и трие́ о́троцы ра́довахуся,/ и проро́к Дании́л, львом па́стырь, я́ко овца́м, явля́шеся./ Тех моли́твами, Христе́ Бо́же, спаси́ ду́ши на́ша. (Дважды)
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 2: Боже́ственнаго бы́хом о́бщницы естества́ / Тобо́ю, Богоро́дице Присноде́во, / Бо́га бо нам воплоти́вшагося родила́ еси́. / Те́мже по до́лгу Тя вси благоче́стно велича́ем.
Кафизмы 7,8,9
Кафизма 7
Пс.46-48; Слава: Пс.49-50; Слава: Пс.51-54;
И седален по 1-ом стихословии.
Глас 4: Смире́нную мою́ ду́шу посети́, Го́споди, во гресе́х житие́ все́ ижди́вшую: я́коже блудни́цу приими́ и мене́, и спаси́ мя.
Стих: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.
Препла́вая пучи́ну настоя́щаго жития́, помышля́ю бе́здну мно́гих мои́х зо́л, и не име́я ко́рмчия помышле́ний, Петро́в провещава́ю Ти́ гла́с: спаси́ мя, Христе́ Бо́же, спаси́ мя, я́ко Человеколю́бец.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 4: Я́коже су́щая вои́стинну Богоро́дица, моля́щися я́ко Ма́ти со дерзнове́нием Сы́ну Твоему́ и Бо́гу на́шему, сохраня́й гра́д изря́дно к покро́ву Твоему́ притека́ющий, о Тебе́ держа́ву иму́щий, и к Тебе́ прибега́ющий, приста́нищу и стене́, еди́ней предста́тельнице ро́да челове́ческаго.
Кафизма 8
Пс.55-57; Слава: Пс.58-60; Слава: Пс.61-63;
И седален по 2-ом стихословии.
Глас 4: Мгло́ю страсте́й и жите́йскими сластьми́, помрача́ем у́м окая́нныя моея́ души́, к по́мыслу умиле́ния не прихо́дит: но уще́дри, Спа́се, и мене́, окая́ннаго, и да́ждь ми́ по́мысл умиле́ния, да и а́з пре́жде конца́ вопию́ благоутро́бию Твоему́, Го́споди: Христе́ Спа́се мо́й, отча́яннаго спаси́ мя и недосто́йнаго.
Стих: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.
Ско́ро совни́дем в неве́стник Христо́в, да вси́ услы́шим блаже́нный гла́с Христа́ Бо́га на́шего: прииди́те лю́бящии Небе́сную сла́ву, соприча́стницы бы́вше му́дрым де́вам, просвети́вше свещы́ на́шя ве́рою.
Стих: Ди́вен Бо́г во святы́х Свои́х, Бо́г Изра́илев.
Кресто́м вооруже́ни страстоно́сцы Твои́, Христе́ Бо́же на́ш, победи́ша кознова́ния началозло́бнаго врага́, и возсия́ша я́ко свети́ла земны́х наставля́юще, и подаю́т исцеле́ния ве́рою прося́щым: те́х моли́твами спаси́ ду́шы на́шя.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 4: Сло́во О́тчее Христа́ Бо́га на́шего, из Тебе́ воплоти́вшагося, позна́хом, Богоро́дице Де́во, Еди́на чи́стая, Еди́на благослове́нная: те́м непреста́нно Тя́ воспева́юще велича́ем.
Кафизма 9
Пс.64-66; Слава: Пс.67; Слава: Пс.68-69;
И седален по 3-ом стихословии.
Глас 4: Душе́, пока́йся пре́жде исхо́да твоего́, су́д неумы́тный согреша́ющым е́сть и непостоя́нен, возопи́й ко Го́споду умиле́нием се́рдца: согреши́х в ра́зуме и неве́дении, Ще́дре, моли́твами Крести́теля Твоего́, уще́дри и спаси́ мя.
Го́рлица пустыннолю́бная, свяще́нный Крести́тель, пропове́давый покая́ние, и показа́вый Христа́ бы́вша челове́ка, все́м согреша́ющым бы́сть предста́тель, и все́м обурева́емым помо́щник быва́я при́сный: того́ моли́твами, Христе́, спаси́ ми́р Тво́й.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 4: Обнови́ла еси́, Чи́стая, Боже́ственным Рождество́м Твои́м, истле́вшее во страсте́х земноро́дных ме́ртвенное существо́, и воздви́гла еси́ вся́ от сме́рти к животу́ нетле́ния: те́мже Тя́ по до́лгу блажи́м вси́, Де́во препросла́вленная, я́коже прорекла́ еси́.
Величание
Седален праздника / Ипакои
Прокимен
Евангелие
Стихиры по 50 псалме
Канон
Песнь 1
Кано́н покая́нный (во вто́рник у́тра). Глас 4. На 6. + Кано́н проро́ка Дании́ла. Глас 8. На 4. + Кано́н отроко́в Ана́нии, Аза́рии и Мисаи́ла. Глас 8. На 4.
Песнь 1
Ирмос, глас 4: Порази́вый Еги́пта, и фарао́на мучи́теля погрузи́вый в мо́ри, лю́ди спа́сл еси́ из рабо́ты, Моисе́йски пою́щыя пе́снь побе́дную: я́ко просла́вися.
Припев: Поми́луй мя́, Бо́же, поми́луй мя́.
Сокрове́нно де́ющаго дела́ тьмы́, Го́споди, да не я́ве обличи́ши, ни посрами́ши пред все́ми: но све́том просвети́ и́скренняго покая́ния, Спа́се, и спаси́ мя.
Припев: Поми́луй мя́, Бо́же, поми́луй мя́.
Грехи́ всегда́ на грехи́, Влады́ко, совокупля́ю блу́дный, и не чу́вствую стра́ха Твоего́ никогда́же, Го́споди: те́мже пре́жде конца́ спаси́ и уще́дри мя́.
Припев: Святи́и му́ченицы, моли́те Бо́га о нас.
Мученичен: Щито́м благоче́стия покрыва́еми святи́и, держа́ще я́ко ме́ч кре́стное ору́жие, к боре́нию врага́ сла́внии изыдо́сте, и того́ низложи́сте.
Припев: Святи́и му́ченицы, моли́те Бо́га о нас.
Мученичен: Кровопи́иц льво́в, и меча́ секу́щаго, и варе́ния коно́бнаго, строга́ния ногте́й, терза́ния же и боле́зненнаго муче́ния, му́ченицы Боже́ственнии не убоя́шася.
Припев: Пресвята́я Богоро́дице, спаси́ нас.
Богородичен: Ковче́г Боже́ственным ду́хом позлаще́нный, Пречи́стая, показа́ся: не скрижа́ли нося́щ зако́на, но Христа́ Го́спода, Его́же зако́н и проро́цы дре́вле предвозвести́ша.
Припев: Святы́й проро́че Дании́ле, моли́ Бо́га о на́с.
Спа́се Благоде́телю, всех благи́х Вино́вный,/ светоно́сным Твои́м сия́нием ум мой просвети́, Человеколю́бче,/ я́ко да Твоего́ проро́ка восхвалю́ сла́вную па́мять.
Припев: Святы́й проро́че Дании́ле, моли́ Бо́га о на́с.
У́тро я́ко, возсия́л еси́, му́дро, целому́дрия,/ целому́дренную предбе́дствовавшую спасл еси́ Соса́нну:/ Бог бо тя воздви́же, Ве́детель та́йных,/ ста́рцы лю́тыя осуди́ти.
Припев: Святы́й проро́че Дании́ле, моли́ Бо́га о на́с.
Стра́хом укрепля́еми Бо́жиим, Авраа́мовы вну́цы/ пи́щу пребеззако́нную отри́нуша до́блественне/ и, Боже́ственным пита́ющеся жела́нием благоче́стия,/ к велича́йшей взя́шася сла́ве.
Припев: Пресвята́я Богоро́дице, спаси́ нас.
Богородичен: Го́ру ви́дел еси́ мы́сленную, Дании́ле свяще́ннейше,/ еди́ну Пречи́стую Присноде́ву Отрокови́цу,/ из Нея́же отсече́ся Ка́мень краеуго́льный и лесть сокруши́ всю.
Припев: Святи́и о́троцы, моли́те Бо́га о на́с.
Безнача́льное Сло́во, из Отца́ пре́жде всех веко́в рожде́нно Боголе́пно,/ е́же в пещи́ ю́ношам обра́зно ви́денное, просла́вим.
Припев: Святи́и о́троцы, моли́те Бо́га о на́с.
Глаго́лы мучи́теля злочести́ваго благоро́днии о́троцы оплева́вше терпели́вно,/ сне́дьми пребеззако́нных оскверни́тися халде́йски не восхоте́ша.
Сла́ва Отцу́, и Сы́ну, и Свято́му Ду́ху.
Пита́стеся у́бо сло́вом душе́вне,/ сне́дьми же самора́сленными пло́тски,/ па́че пита́ющихся дебе́лыми сне́дьми,/ царю́ красне́йшии ви́ды показа́стеся.
И ны́не, и при́сно, и во ве́ки веко́в. Ами́нь.
Богородичен: Яд змии́н, в слу́хи го́рько излия́вшийся Е́вы,/ я́же из Дави́да возра́стшая, Отрокови́це,/ исцеля́еши, Изба́вителя поро́ждши.
Песнь 2
Песнь 3
Кано́н покая́нный (во вто́рник у́тра). Глас 4. На 6. + Кано́н проро́ка Дании́ла. Глас 8. На 4. + Кано́н отроко́в Ана́нии, Аза́рии и Мисаи́ла. Глас 8. На 4.
Песнь 3
Ирмос, глас 4: Утвержда́яй гро́м, и созида́яй ду́х, утверди́ мене́, Го́споди, да Тя́ пою́ и́стинно, и творю́ во́лю Твою́: я́ко не́сть свя́т, я́ко Ты́, Бо́же на́ш.
Припев: Поми́луй мя́, Бо́же, поми́луй мя́.
И́же слепце́в о́чи просвети́вый, Христе́, о́чи мои́ просвети́ омраче́ннии сластьми́, и жите́йскими печа́льми, и ника́коже к судьба́м Твои́м взира́ющии.
Припев: Поми́луй мя́, Бо́же, поми́луй мя́.
Се́ вре́мя, возни́кни душе́ моя́, от зо́л, я́же соде́яла еси́, и Влады́це изба́вителю возопи́й со стра́хом: покая́ния, Христе́, две́ри отве́рзи ми́.
Припев: Святи́и му́ченицы, моли́те Бо́га о нас.
Мученичен: Отгна́н яви́ся Велиа́р Боже́ственными по́двиги страстоте́рпец, и от ни́х попира́ем зри́тся ме́ртв и неде́йствен, и́же дре́вле хваля́йся.
Припев: Святи́и му́ченицы, моли́те Бо́га о нас.
Мученичен: Му́ченически тече́ние соверши́вше святы́х сосло́вие, и тьмы́ мы́сленных му́ринов, Боже́ственною си́лою я́ко вои́стинну посече́, и сла́ву получи́.
Припев: Пресвята́я Богоро́дице, спаси́ нас.
Богородичен: Пра́отцем разре́шила еси́ печа́ль, ра́дость на́м ро́ждши Жизнода́вца, и Изба́вителя, Пресвята́я Богоро́дице: Его́же приле́жно моли́, спасти́ ду́шы на́шя.
Припев: Святы́й проро́че Дании́ле, моли́ Бо́га о на́с.
Ра́зум и му́дрость от Бо́га прие́м,/ сказа́л еси́ светоявле́нно сено́вная царе́м со́ния.
Припев: Святы́й проро́че Дании́ле, моли́ Бо́га о на́с.
Ра́зум и му́дрость от Бо́га прие́м,/ сказа́л еси́ светоявле́нно сено́вная царе́м со́ния.
Припев: Святы́й проро́че Дании́ле, моли́ Бо́га о на́с.
Зми́я умертви́л еси́,/ пи́щу вверг, сла́вне, чу́вственнаго,/ пе́рвее бо неви́димыя победи́л еси́ де́моны.
Припев: Пресвята́я Богоро́дице, спаси́ нас.
Богородичен: Заре́ю просвеща́емь,/ явле́нную зри́ши, сла́вне, го́ру Бо́жию благослове́нную, челове́ков украше́ние.
Припев: Святи́и о́троцы, моли́те Бо́га о на́с.
Ра́зум стяжа́вше Богонауче́нный, Влады́ко, о́троцы Дави́довы/ зако́ны оте́ческия Богому́дренно соблю́доша.
Припев: Святи́и о́троцы, моли́те Бо́га о на́с.
Огнь не опали́ чисте́йшая телеса́ благочести́вых,/ посто́м бо душепита́тельным напая́хуся.
Сла́ва Отцу́, и Сы́ну, и Свято́му Ду́ху.
Хвалу́ всеми́рную и многопе́тую пою́т о́троцы трие́,/ посреде́ пещи́ чу́дно ороша́еми.
И ны́не, и при́сно, и во ве́ки веко́в. Ами́нь.
Богородичен: Да Рождество́, Влады́ко, из де́вствующаго телесе́ пока́жеши нам,/ спаса́еши в пещи́ де́вствующая телеса́.
Катавасия
Ирмос, глас 8: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Кондаки по 3 песне
Кондаки
Глас 3: Просвети́вшееся Ду́хом чи́стое твое́ се́рдце/ проро́чества бысть светле́йшаго прия́телище:/ зри́ши бо, я́ко настоя́щая, дале́че су́щая./ Львы укроти́л еси́, вве́ржен в ров;/ сего́ ра́ди тя почита́ем, проро́че блаже́нне, Дании́ле сла́вне.
Икос: Иису́са Христа́, И́стиннаго Бо́га на́шего,/ Его́же Боже́ственное я́сно прише́ствие провозгласи́л еси́, моли́ непреста́нно/ с весе́лием Боже́ственную сию́ творя́щим па́мять твою́/ и ве́рою чту́щим тя/ искуше́ний вся́ких спасти́ся, и грехо́в, и обстоя́ний/ я́ко дерзнове́ние, Богому́дре, име́я./ И во отверзе́ние мои́м пода́ждь устна́м тя пе́ти незазо́рно сло́во./ И ника́коже мене́ гнуша́йся, проро́че блаже́нне Дании́ле сла́вне.
Седален
Глас 8: Проро́чествия благода́тию обогати́вся,/ Де́вы Рождество́ сеннопи́шеши/ и реши́ши со́ния царе́м я́вственне;/ вве́ржен же быв в ров,/ я́ко му́ченик научи́л еси́ пресла́вно, блаже́нне, пости́тися львы./ Тем разори́л еси́ безбо́жных служе́ние,/ зми́я уби́л еси́, до́бльствовав светле́йше, Дании́ле досточу́дне./ Моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.
Сла́ва Отцу́, и Сы́ну, и Свято́му Ду́ху.
Глас 8: Тро́ицы о́браз проро́чески из невеще́ственных шаро́в/ в пла́мени о́троцы написа́ша тро́стию ве́ры,/ и Сло́ва кра́йнее на зе́млю низше́ствие та́инственно ви́деша,/ и всем пропове́даша./ Те́мже и, ро́су с Небесе́ прие́мше духо́вную,/ источа́ют ве́рным дарова́ния и согла́сно вопию́щим Тебе́:/ да́руй, Христе́ Бо́же, прегреше́ний оставле́ние, я́ко благоутро́бен,/ пра́зднующим любо́вию святу́ю па́мять вашу.
И ны́не, и при́сно, и во ве́ки веко́в. Ами́нь.
Богородичен, глас 8: Ра́дуйся, престо́ле огнезра́чный Бо́жий;/ ра́дуйся, Отрокови́це, седа́лище Ца́рское,/ о́дре преиспещренноустла́нный, златопорфи́рный черто́же,/ хлами́до червленосве́тлая, укра́шенный хра́ме,/ молниено́сное ору́жие, свети́льниче многосве́тлый,/ ра́дуйся, Богоро́дице, дванадесятосте́нный гра́де,/ и две́ре златокова́нная, и черто́же светлообра́зный,/ светлопозлаще́нная трапе́зо, Богоукраше́нная ски́ние;/ ра́дуйся, сла́вная Неве́сто, Со́лнце ка́плющая;/ ра́дуйся, еди́на души́ моея́ благоле́пие.
Песнь 4
Кано́н покая́нный (во вто́рник у́тра). Глас 4. На 6. + Кано́н проро́ка Дании́ла. Глас 8. На 4. + Кано́н отроко́в Ана́нии, Аза́рии и Мисаи́ла. Глас 8. На 4.
Песнь 4
Ирмос, глас 4: Услы́шах Бо́же слу́х тво́й, и убоя́хся, разуме́х дела́ твоя́, и ужасо́хся, Го́споди: я́ко твоего́ хвале́ния испо́лнь земля́.
Припев: Поми́луй мя́, Бо́же, поми́луй мя́.
Обнаже́н бы́х доброде́телей, и зло́бою облеко́хся, и се́ студа́ испо́лнихся, Иису́се Человеколю́бче: оде́ждами мя́ Боже́ственными просвети́.
Припев: Поми́луй мя́, Бо́же, поми́луй мя́.
Препла́вая мирска́го мо́ря, Сло́ве, во́ду, ле́ностию в беду́ истопле́ния впадо́хся сласте́й теле́сных: к покая́ния приста́нищу напра́ви мя́.
Припев: Святи́и му́ченицы, моли́те Бо́га о нас.
Мученичен: Очи́стивше вои́стинну гно́й ве́сь греха́ терпе́ния Боже́ственною си́лою до́блии му́ченицы, спасе́ние все́м пода́ша.
Припев: Святи́и му́ченицы, моли́те Бо́га о нас.
Мученичен: Валя́еми по земли́ я́коже ка́мение страстоте́рпцы, пре́лести тве́рдыя до конца́ низверго́ша, и к вы́шнему гра́ду доспе́ша: те́х моли́твами, Го́споди, спаси́ на́с.
Припев: Пресвята́я Богоро́дице, спаси́ нас.
Богородичен: Спасе́ние Тя́ на вся́кое вре́мя и ме́сто призыва́ю: не пре́зри мене́, Всенепоро́чная, я́же Бо́га ро́ждшая, изба́вителя вку́пе и Спа́са моего́.
Припев: Святы́й проро́че Дании́ле, моли́ Бо́га о на́с.
Зако́н благоче́стно сохрани́в, о проро́че!/ вои́стинну му́дрости позна́л еси́ Да́теля,/ та́йным же науча́юща и глубо́ким/ и я́же во тьме тя просвеща́юща.
Припев: Святы́й проро́че Дании́ле, моли́ Бо́га о на́с.
Свяще́нну жи́знь пожи́в, Богоявле́нне,/ жела́ний муж наре́клся еси́,/ му́жественно бо стра́сти попра́в,/ к нестаре́ющейся преста́вился еси́ жи́зни.
Припев: Святы́й проро́че Дании́ле, моли́ Бо́га о на́с.
Все́льшаяся в тебе́ Уте́шителя благода́ть, Дании́ле,/ показу́ет тя светоно́сна,/ и победи́теля мучи́телей и царе́й, и прему́дрости жили́ще.
Припев: Пресвята́я Богоро́дице, спаси́ нас.
Богородичен: Ка́мень Тя, без руки́ отсе́чен, Сло́ве,/ от горы́ зрит, Де́вы Богоро́дицы, Дании́л проро́к,/ взыва́я и воспева́я Твое́ Божество́.
Припев: Святи́и о́троцы, моли́те Бо́га о на́с.
Дании́л мудре́йший, Боже́ственне умо́м просвеща́емь,/ со́ния разреши́ самоде́ржцев Боже́ственною благода́тию.
Припев: Святи́и о́троцы, моли́те Бо́га о на́с.
Облиста́ет чудесы́ е́же в пещи́ отроко́в страда́ние,/ мучи́теля бо улови́ша к позна́нию Твоему́, Всеси́льне.
Сла́ва Отцу́, и Сы́ну, и Свято́му Ду́ху.
Согла́сия орга́ны и мусики́и пе́сни всесли́чныя/ до́блественных не привлеко́ша/ и злато́му о́бразу не подклони́ша.
И ны́не, и при́сно, и во ве́ки веко́в. Ами́нь.
Богородичен: Пе́сньми, Всепе́тая, и́же в Вавило́не де́ти/ почита́ют Сы́на Твоего́ Пребоже́ственнаго,/ Его́же в пещи́ позна́ша.
Песнь 5
Кано́н покая́нный (во вто́рник у́тра). Глас 4. На 6. + Кано́н проро́ка Дании́ла. Глас 8. На 4. + Кано́н отроко́в Ана́нии, Аза́рии и Мисаи́ла. Глас 8. На 4.
Песнь 5
Ирмос, глас 4: Возсия́й ми́, Го́споди, све́т повеле́ний Твои́х, я́ко к Тебе́ ду́х мо́й у́тренюет, и пое́т Тя́: Ты́ бо еси́ Бо́г на́ш, и к Тебе́ прибега́ю, Царю́ ми́ра.
Припев: Поми́луй мя́, Бо́же, поми́луй мя́.
Уны́нием преходя́щаго житие́ тле́ющее, и пре́лестьми мя́ омрача́ема от преле́стника по вся́ дни́, Иису́се, уще́дри, и к све́ту покая́ния наста́ви и жи́зни.
Припев: Поми́луй мя́, Бо́же, поми́луй мя́.
Вознесе́ся се́рдце мое́ прило́гми зми́а, и низпаде́ся паде́нием ве́лиим: и́же низве́рженным, Иису́се, исправле́ние, возста́ви и спаси́ мя, мно́гих Твои́х ра́ди щедро́т.
Припев: Святи́и му́ченицы, моли́те Бо́га о нас.
Мученичен: Ка́плями крове́й угаси́сте многобо́жия пре́лести пе́щь, богоблаже́ннии, и ту́чами исцеле́ний пла́мень утиши́сте страсте́й всегда́, Спа́совы страда́льцы.
Припев: Святи́и му́ченицы, моли́те Бо́га о нас.
Мученичен: Стоя́ще пред суди́щем, и ногтьми́ стру́жеми, и во главы́ усека́еми му́ченицы, и мно́жеству примеша́ющеся лю́тых му́к, непрекло́нни пребы́сте манове́нием Боже́ственным.
Припев: Пресвята́я Богоро́дице, спаси́ нас.
Богородичен: Возсия́й ми́, Влады́чице, зарю́ ми́лости Твоея́, и́же во мра́це прегреше́ний мои́х су́щу, Де́во: и к све́ту покая́ния наста́ви мя́, Пречи́стая, да ве́рою Тя́ пою́.
Припев: Святы́й проро́че Дании́ле, моли́ Бо́га о на́с.
Страда́льческия по́двиги проро́чествия уясни́в пропове́данием,/ сия́еши обои́ми, Боже́ственнаго вдохнове́ния испо́лнен.
Припев: Святы́й проро́че Дании́ле, моли́ Бо́га о на́с.
Страда́льческия по́двиги проро́чествия уясни́в пропове́данием,/ сия́еши обои́ми, Боже́ственнаго вдохнове́ния испо́лнен.
Припев: Святы́й проро́че Дании́ле, моли́ Бо́га о на́с.
Прему́др показа́лся еси́, блаже́нне,/ па́че ума́ прему́дрости сия́ньми, велича́йший Богоглаго́ливе Дании́ле,/ и вся просвети́л еси́.
Припев: Пресвята́я Богоро́дице, спаси́ нас.
Богородичен: Тайновождеству́ет о́бразы неизглаго́ланнаго воплоще́ния, Чи́стая,/ и́же из Тебе́ Высоча́йшаго Дании́л проро́к сла́вный.
Припев: Святи́и о́троцы, моли́те Бо́га о на́с.
Научи́вшеся зако́ну, Спа́се,/ не отверго́шася Твои́ уго́дницы, Дании́л вели́кий с треми́ ю́ношами Богоразу́мными,/ но, кре́пость прие́мше от Тебе́, Благоде́теля,/ мучи́телей му́жески победи́ша.
Припев: Святи́и о́троцы, моли́те Бо́га о на́с.
Мы́сленно науча́шеся Дании́л, Человеколю́бче, Твои́м та́йнам:/ на о́блаце бо я́ко Сы́на Тя челове́ча гряду́ща,/ язы́ков всех я́ко Судию́ и Царя́ зря́ше ума́ чистото́ю.
Сла́ва Отцу́, и Сы́ну, и Свято́му Ду́ху.
Украси́ся, о де́ти, па́че ка́мене сапфи́ра/ ва́ше совокупле́ние, я́ко заря́ злата́я;/ благоче́стия ре́вностию распа́льшеся,/ ходя́ще ра́достно в пещи́ и пле́щуще лик всеми́рный.
И ны́не, и при́сно, и во ве́ки веко́в. Ами́нь.
Богородичен: Дании́л Тя, Де́во, го́ру прописа́ я́ве Боже́ственный,/ трие́ же о́троцы, ви́девше пла́мень ороша́ющь,/ Твое́ Боже́ственное Рождество́ пе́сненно восхваля́ют/ я́ко Спа́са, и Зижди́теля, и Го́спода.
Песнь 6
Кано́н покая́нный (во вто́рник у́тра). Глас 4. На 6. + Кано́н проро́ка Дании́ла. Глас 8. На 4. + Кано́н отроко́в Ана́нии, Аза́рии и Мисаи́ла. Глас 8. На 4.
Песнь 6
Ирмос, глас 4: Пучи́ною жите́йскою дея́ньми мои́ми снидо́х во а́д, но я́ко от ки́та Ио́на, та́ко вопию́: из глубины́ зо́л возведи́, молю́ся, Сы́не Бо́жий и Сло́ве.
Припев: Поми́луй мя́, Бо́же, поми́луй мя́.
Дрема́нием небреже́ния отяготи́х, окая́нный, ду́шу, и греха́ сно́м низложи́хся: к све́ту покая́ния воздви́гни мя́, Го́споди, и Твои́м милосе́рдием спаси́ мя.
Припев: Поми́луй мя́, Бо́же, поми́луй мя́.
Ка́ко падо́х окая́нный? Ка́ко удали́хся Бо́га преблага́го? Ка́ко не внемлю́ в чу́вствии стра́шное суди́ще о́но, на не́мже и́мам суди́тися? Тво́рче мо́й, уще́дри мя́.
Припев: Святи́и му́ченицы, моли́те Бо́га о нас.
Мученичен: Цевни́ца яви́стеся, вои́стинну возглаша́ющая пе́ние спаси́тельное при́сно, и наслажда́ющая ве́рных сердца́, и пия́нство пре́лести до конца́ огоня́ющая, страда́льцы пресве́тлии.
Припев: Святи́и му́ченицы, моли́те Бо́га о нас.
Мученичен: Превозше́дше преде́лы челове́ческия му́ченицы Христо́вы к Зижди́телю возникнове́нием Боже́ственным, муче́ния боле́зни претерпе́сте ра́дующеся, я́ко в телесе́х чужди́х.
Припев: Пресвята́я Богоро́дице, спаси́ нас.
Богородичен: Всесвята́я Де́во, Предста́тельнице и покро́ве все́х ве́рных, предста́ни и изба́ви мя́ преще́ния бу́дущаго, и стра́шнаго суди́ща в ча́с су́дный, да ве́рою при́сно пою́ Тя́.
Припев: Святы́й проро́че Дании́ле, моли́ Бо́га о на́с.
А́нгельския ты ли́ки во све́те светле́йшем зря,/ подража́тель всеизря́днейший сих был еси́,/ Всецаря́ наслажда́яся сия́ньми.
Припев: Святы́й проро́че Дании́ле, моли́ Бо́га о на́с.
А́нгельския ты ли́ки во све́те светле́йшем зря,/ подража́тель всеизря́днейший сих был еси́,/ Всецаря́ наслажда́яся сия́ньми.
Припев: Святы́й проро́че Дании́ле, моли́ Бо́га о на́с.
Спаси́тельное Сло́ва прише́ствие возвеща́я,/ предвозвести́л еси́ и хра́ма разоре́ние, зако́на же исполне́ние/ и благода́ти па́че ума́ дарова́ния.
Припев: Пресвята́я Богоро́дице, спаси́ нас.
Богородичен: Се Де́ва во утро́бе я́ве зачина́ет Христа́ Бо́га, осия́вшися Ду́хом,/ Ея́же проображе́ние прови́дяше Дании́л сла́вный.
Припев: Святи́и о́троцы, моли́те Бо́га о на́с.
Облада́вше есте́ственными страстьми́ си́лою Сло́ва,/ стране́ язы́к халде́йских вла́стели бы́сте:/ весть бо доброде́тель честь дарова́ти стяжа́вшим ю,/ о Дави́довы му́дрии вну́цы!
Припев: Святи́и о́троцы, моли́те Бо́га о на́с.
Облада́вше есте́ственными страстьми́ си́лою Сло́ва,/ стране́ язы́к халде́йских вла́стели бы́сте:/ весть бо доброде́тель честь дарова́ти стяжа́вшим ю,/ о Дави́довы му́дрии вну́цы!
Сла́ва Отцу́, и Сы́ну, и Свято́му Ду́ху.
В ме́ртвость Дании́л живоно́сную оде́явся дре́вле,/ я́ко бо́га халде́ем злочести́вно мни́маго убива́ет сне́дию зми́я зле́йшаго,/ свяще́нники же злочести́выя му́дре уби́л есть.
И ны́не, и при́сно, и во ве́ки веко́в. Ами́нь.
Богородичен: Ми́лостива ми Судию́ и Сы́на Твоего́, Богоро́дице Де́во,/ Твои́ми моли́твами бы́ти в день Суда́, Изба́вителя же лю́тых, Ма́ти, умоли́,/ на Тя бо еди́ну наде́жду мою́ возлага́ю.
Катавасия
Ирмос, глас 8: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Упра́вителю! и спаси́.
Кондаки по 6 песне
Кондак
Глас 6: Рукопи́саннаго о́браза не поче́тше,/ но неопи́санным существо́м защити́вшеся, треблаже́ннии,/ в по́двизе огня́ просла́вистеся;/ среде́ же пла́мене нестерпи́маго стоя́ще, Бо́га призва́сте:/ ускори́, о Ще́дрый!/ и потщи́ся, я́ко Ми́лостив, в по́мощь на́шу,/ я́ко мо́жеши хотя́й.
Икос: Простри́ Твою́ ру́ку,/ е́юже дре́вле прия́ша искуше́ние еги́птяне борю́щии и евре́и бори́мии,/ не оста́ви нас, да не пожре́т нас смерть, жа́ждущая нас,/ и сатана́, ненави́дяй нас,/ но прибли́жися нам и пощади́ ду́ши на́ша,/ я́коже пощади́л еси́ иногда́ о́троки Твоя́, су́щия в Вавило́не,/ непреста́нно сла́вящия Тя, и вве́рженныя Тебе́ ра́ди в пещь,/ и от сея́ вопию́щия Ти:/ ускори́, Ще́дрый, и потщи́ся, я́ко ми́лостив, на по́мощь на́шу,/ я́ко мо́жеши хотя́й.
Песнь 7
Кано́н покая́нный (во вто́рник у́тра). Глас 4. На 6. + Кано́н проро́ка Дании́ла. Глас 8. На 4. + Кано́н отроко́в Ана́нии, Аза́рии и Мисаи́ла. Глас 8. На 4.
Песнь 7
Ирмос, глас 4: О́бразу злато́му не поклони́вшеся о́троцы авраа́мстии, искуша́хуся я́ко зла́то в горни́ле в пещи́ о́гненней, я́ко в черто́зе све́тлем ликова́ху, пою́ще: благослове́н еси́ Бо́же оте́ц на́ших.
Припев: Поми́луй мя́, Бо́же, поми́луй мя́.
Ю́но Отроча́ яви́лся еси́ Христе́, ве́тхаго осужде́ния изба́вити хотя́ ми́р, я́ко Благоутро́бен. Те́мже вопию́ Ти, обетша́вшаго мя́ грехи́ мно́гими ны́не обнови́, Ще́дре, и спаси́ мя пою́ща: благослове́н Бо́г оте́ц на́ших.
Припев: Поми́луй мя́, Бо́же, поми́луй мя́.
И́же иногда́ Манасси́ю пока́явшася спасы́й, и уще́дривый блудни́цу прослези́вшуюся, и разбо́йника сло́вом оправда́вый, мно́гая и лю́тая согреши́вшаго Ти́, и мене́, Спа́се, приими́ вопию́ща: благослове́н Бо́г оте́ц на́ших.
Припев: Святи́и му́ченицы, моли́те Бо́га о нас.
Мученичен: Бу́ри лю́тей многобо́жия обдержа́щей вселе́нную, кора́бль сотво́рше благоче́стия страстоте́рпцы: окормле́нием же Христо́вым, ко приста́нищу жи́зни доплы́вше вопие́те: благослове́н Бо́г оте́ц на́ших.
Припев: Святи́и му́ченицы, моли́те Бо́га о нас.
Мученичен: Просвеще́ни бы́вше я́ве, я́коже зла́то в горни́ле, му́ками искуша́еми страда́льцы, и показа́вшеся запеча́тания честна́я страсте́й Христо́вых, в сокро́вищах небе́сных, во утвержде́нии мно́зе сокрове́ни бы́ша ны́не.
Припев: Пресвята́я Богоро́дице, спаси́ нас.
Богородичен: Спа́са и Бо́га, и изба́вителя и Влады́ку, пло́тию ро́ждши Пречи́стая Влады́чице, тому́ при́сно, Пречи́стая, моли́ся, я́ко да разреше́ние лю́тых и мно́гих грехо́в оставле́ние прии́мше, славосло́вим того́ я́же па́че ума́ щедро́ты.
Припев: Святы́й проро́че Дании́ле, моли́ Бо́га о на́с.
Зако́ном, проро́че, огражде́н,/ не прия́л еси́ оскверни́тися пребеззако́нно,/ но, Боже́ственне умо́м просвеща́емь, вопия́л еси́:/ благослове́н еси́, Го́споди Бо́же, во ве́ки.
Припев: Святы́й проро́че Дании́ле, моли́ Бо́га о на́с.
Вся ужаса́ет твое́ чу́до,/ я́коже проро́ку бо проро́к тебе́ предста́, восхище́н, пи́щу нося́ тебе́ и поя́:/ благослове́н еси́, Го́споди Бо́же, во ве́ки.
Припев: Святы́й проро́че Дании́ле, моли́ Бо́га о на́с.
Внутрь ро́ва затворе́н и львом на снедь предложе́н,/ спа́слся еси́, Бо́гу, покры́вшу тя, блаже́нне,/ благослове́н еси́, зову́ща, Бо́же оте́ц на́ших.
Припев: Пресвята́я Богоро́дице, спаси́ нас.
Богородичен: Струю́ незави́стно источа́еши врачева́ний, о Де́во Богома́ти!/ Дании́л бо я́сно узре́ Тя го́ру,/ из нея́же Спас возсия́, Бог оте́ц на́ших.
Припев: Святи́и о́троцы, моли́те Бо́га о на́с.
Глас Боголюбе́зен песнопоя́шеся из среды́ огня́ Вседержи́телю:/ Аза́рия бо, Боже́ственный лик соста́вив, песнь воспева́я, глаго́лаше:/ благослове́н Бог оте́ц на́ших.
Припев: Святи́и о́троцы, моли́те Бо́га о на́с.
Цевни́ца ю́ношей Богосло́вяше всех Бо́га и Вседержи́теля,/ тем в пещи́ я́сно я́вльшагося, и песнь воспева́ху, глаго́люще:/ благослове́н Бог оте́ц на́ших.
Сла́ва Отцу́, и Сы́ну, и Свято́му Ду́ху.
Три, в пещь вве́рженныя, ви́дев царь,/ я́ко узре́ четве́ртаго вид, Сы́на пронарече́ Бо́жия и всем возопи́:/ благослове́н Бог оте́ц на́ших.
И ны́не, и при́сно, и во ве́ки веко́в. Ами́нь.
Богородичен: Име́я просвеще́н Боже́ственною заре́ю ум, Дании́ле Богоблаже́нне,/ Де́вы Рождество́ я́ве предви́дел еси́ та́инственными о́бразы образу́емо,/ благослове́н, вопия́, Бог оте́ц на́ших.
Песнь 8
Кано́н покая́нный (во вто́рник у́тра). Глас 4. На 6. + Кано́н проро́ка Дании́ла. Глас 8. На 4. + Кано́н отроко́в Ана́нии, Аза́рии и Мисаи́ла. Глас 8. На 4.
Песнь 8
Ирмос, глас 4: Во огни́ пла́меннем предстоя́т Тебе́ Херуви́ми, Серафи́ми, Го́споди, и вся́ тва́рь пе́снь Тебе́ пое́т кра́сную: по́йте, благослови́те, лю́дие превозноси́те Христа́, Еди́наго Соде́теля, во вся́ ве́ки.
Припев: Поми́луй мя́, Бо́же, поми́луй мя́.
Не пребы́х во стра́се Твое́м, не послу́шах за́поведей Твои́х, и во́лю твою́ никогда́же сотвори́х: что́ бу́ду окая́нный? Человеколюби́в сы́й, уще́дри мя́ ту́не, Спа́се, и не отве́ржи мене́.
Припев: Поми́луй мя́, Бо́же, поми́луй мя́.
Де́лателю до́брых, вопию́ Ти: стра́ха Твоего́ серпо́м, пожни́ из ко́рене вся́ терно́вная помышле́ния души́ моея́ окая́нныя: и се́менем покая́ния прозяба́ти ми́ сподо́би, Христе́, спаси́тельный кла́с.
Припев: Святи́и му́ченицы, моли́те Бо́га о нас.
Мученичен: Распространи́шася благода́тию, утесня́еми в му́ках мно́гих страстоно́сцы, и стесни́ша врагу́ пути́ про́пастей испо́лнены, и ны́не наставля́ют на́с к путе́м Бо́жиим в ве́ре и любви́.
Припев: Святи́и му́ченицы, моли́те Бо́га о нас.
Мученичен: Беду́ прия́т льсти́вый, впа́д во глубину́, му́ченицы, терпе́ния и страда́ния ва́шего, и лежи́т от все́х насмева́ем безу́мный: вы́ же побе́дными венцы́ украша́етеся.
Припев: Пресвята́я Богоро́дице, спаси́ нас.
Богородичен: Чре́во Твое́, Всенепоро́чная, сто́г честна́го гумна́ яви́ся, ми́ру нося́ пшени́цу Живота́, пита́ющу вся́ческая. Те́мже Тя́ я́ко вино́вну все́х до́брых, ве́рнии по достоя́нию ублажа́ем.
Припев: Святы́й проро́че Дании́ле, моли́ Бо́га о на́с.
Священноявле́н показа́лся еси́, о проро́че!/ и де́ятельным виде́нием со Безтеле́сными пел еси́:/ благослови́те, вся дела́ Госпо́дня, Го́спода.
Припев: Святы́й проро́че Дании́ле, моли́ Бо́га о на́с.
Священноявле́н показа́лся еси́, о проро́че!/ и де́ятельным виде́нием со Безтеле́сными пел еси́:/ благослови́те, вся дела́ Госпо́дня, Го́спода.
Припев: Святы́й проро́че Дании́ле, моли́ Бо́га о на́с.
Тя, всеблаже́нне, благохва́лим вси/ и, в честно́е торжество́ твое́ ра́дующеся, взыва́ем:/ благослови́те, вся дела́ Госпо́дня, Го́спода.
Припев: Пресвята́я Богоро́дице, спаси́ нас.
Богородичен: Пречу́дную Отрокови́цу Богоглаго́ливый/ образова́тельными о́бразы усмотри́в, взыва́л еси́:/ благослови́те, вся дела́ Госпо́дня, Го́спода.
Припев: Святи́и о́троцы, моли́те Бо́га о на́с.
Авраа́мово благоро́дие сохрани́ти тща́щеся,/ сво́йственное к нему́ стяжа́сте основа́ние ве́ры и наде́жди, преподо́бнии,/ терпе́ние и напа́стем пожда́ние, вопию́ще:/ благослови́те, свяще́нницы, Влады́ку,/ лю́дие, превозноси́те Его́ во ве́ки.
Припев: Святи́и о́троцы, моли́те Бо́га о на́с.
Я́ко свети́ла просия́вше, и зе́млю онебеси́вше,/ и благоче́стия просвеще́нием осия́вшеся,/ всеми́рное соста́вльше ликостоя́ние, пою́т и́же от напа́стей спа́сшему Влады́це:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Благослови́м Отца́ и Сы́на и Свята́го Ду́ха, Го́спода.
Ю́ношески погаси́вше распали́мую пещь/ и львов че́люсти связа́вше, Дави́довы вну́цы,/ ны́не ра́дующеся, пою́т Тя, Благоде́теля, Царя́ всех:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
И ны́не, и при́сно, и во ве́ки веко́в. Ами́нь.
Богородичен: Тайнонауча́ет, Пречи́стая, Дании́л мудре́йший,/ и предживопису́ют о́троцы трие́ Рождество́ Твое́ Богому́дреннии,/ чрез о́бразы зря́ще из утро́бы Твоея́ проше́дшаго несказа́нно,/ Его́же о́троцы благословя́т, свяще́нницы воспева́ют,/ лю́дие превознося́т во вся ве́ки.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Катавасия
Ирмос, глас 8: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Песнь Богородице
Диакон: Богоро́дицу и Мате́рь Све́та в пе́снех возвели́чим.
Песнь Пресвятыя Богородицы
Лик: Вели́чит душа́ Моя́ Го́спода, и возра́довася дух Мой о Бо́зе Спа́се Мое́м.
Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Я́ко призре́ на смире́ние Рабы́ Своея́, се бо от ны́не ублажа́т Мя вси ро́ди.
Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.
Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Сотвори́ держа́ву мы́шцею Свое́ю, расточи́ го́рдыя мы́слию се́рдца их.
Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Низложи́ си́льныя со престо́л, и вознесе́ смире́нныя; а́лчущия испо́лни благ, и богатя́щияся отпусти́ тщи.
Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.
Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Песнь 9
Кано́н покая́нный (во вто́рник у́тра). Глас 4. На 6. + Кано́н проро́ка Дании́ла. Глас 8. На 4. + Кано́н отроко́в Ана́нии, Аза́рии и Мисаи́ла. Глас 8. На 4.
Песнь 9
Ирмос, глас 4: Сотвори́ держа́ву мы́шцею свое́ю, низложи́ бо си́льныя со престо́л, и вознесе́ смире́нныя Бо́г Изра́илев: в ни́хже посети́ на́с восто́к с высоты́, и напра́вил ны́ е́сть на пу́ть ми́ра.
Припев: Поми́луй мя́, Бо́же, поми́луй мя́.
Се́ отве́рзеся черто́г та́йный, и му́дрии украси́вше свещы́ своя́ еле́ем доброде́телей, вхо́дят све́тли. Отложи́ со́н уны́ния, о душе́, я́ко да вни́деши со Христо́м свещу́ нося́щи.
Припев: Поми́луй мя́, Бо́же, поми́луй мя́.
Я́коже блудни́ца держу́ но́зе Твои́ мы́сленно, и слеза́ми омыва́ю си́х, Сло́ве. Омы́й мя́, Спа́се, от тиме́ния страсте́й: ве́ра твоя́ спасе́ тя, ны́не и мне́ пригласи́в, я́ко да Твое́ безчи́сленное пою́ милосе́рдие.
Припев: Святи́и му́ченицы, моли́те Бо́га о нас.
Мученичен: Весе́лым се́рдцем и ра́достною душе́ю му́ченицы в вы́шних живу́т, я́звы Христо́вы я́коже красоту́ благоле́пия при́сно иму́ще: и на́м ми́ра испроша́ют, и лю́тых избавле́ние, и прегреше́ний разреше́ние.
Припев: Святи́и му́ченицы, моли́те Бо́га о нас.
Мученичен: Освяти́ся вся́ко ме́сто, иму́щее Боже́ственнии страда́льцы мо́щи ва́шя, я́коже други́й ковче́г, и́же во Изра́или избавля́ющ лю́тых: ра́дуются небе́сная, с честны́ми А́нгелы, ду́шы ва́шя блаже́ннии стяжа́вша.
Припев: Пресвята́я Богоро́дице, спаси́ нас.
Богородичен: Благолюби́вая Отрокови́це, благолюби́ваго Бо́га ро́ждшая, вопию́ Ти: ублажи́ окая́нную мою́ ду́шу, озло́бленную лю́те страстьми́ и прило́гми лука́вых бесо́в, да ве́рою Тя́ пою́ наде́жду все́х.
Припев: Святы́й проро́че Дании́ле, моли́ Бо́га о на́с.
Пожа́л еси́ твои́х боле́зней припло́дия,/ на Небесе́х со проро́ки лику́я при́сно,/ о́крест высоча́йшаго престо́ла Вседержи́телева.
Припев: Святы́й проро́че Дании́ле, моли́ Бо́га о на́с.
Пожа́л еси́ твои́х боле́зней припло́дия,/ на Небесе́х со проро́ки лику́я при́сно,/ о́крест высоча́йшаго престо́ла Вседержи́телева.
Припев: Святы́й проро́че Дании́ле, моли́ Бо́га о на́с.
Све́том трисо́лнечным ны́не венцено́сец жела́ний кра́йнейшему предстои́ши,/ с Безтеле́сными ли́ки веселя́ся.
Припев: Пресвята́я Богоро́дице, спаси́ нас.
Богородичен: Красна́ сла́ва твоя́, ея́же ны́не наслажда́ешися:/ Всепе́тую бо Отрокови́цу, проро́че честны́й,/ о́бразы возвеща́ти всем сподо́бился еси́.
Припев: Святи́и о́троцы, моли́те Бо́га о на́с.
Достиго́сте кончи́ну жела́нную/ и жела́ний кра́йнейшему предстоите́ в Небе́сных черто́зех, о́троцы всебога́тии.
Припев: Святи́и о́троцы, моли́те Бо́га о на́с.
Ра́дующеся, рукоя́тие, е́же от слез, до́браго ва́шего де́лания прия́сте,/ нетле́ния клас плодоноси́вше.
Сла́ва Отцу́, и Сы́ну, и Свято́му Ду́ху.
Возсия́ све́тлость ны́не вам досто́йно, и весе́лие се́рдца процвете́:/ отону́дуже бо отбеже́ печа́ль, всели́стеся.
И ны́не, и при́сно, и во ве́ки веко́в. Ами́нь.
Богородичен: Па́жить сме́рти уста́вила еси́, Де́во,/ Жизнода́вца ро́ждши и Го́спода,/ живо́творящаго ве́рою велича́ющия Тя.
Катавасия
Ирмос, глас 8: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Достойно есть...
Досто́йно есть...
Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.
Светильны
Cветильны
Предте́чу Иоа́нна, и Крести́теля Спа́сова, во проро́цех проро́ка, и пусты́ни воспита́ние, Елисаве́тино рожде́ние восхва́лим вси́.
Сла́ва Отцу́, и Сы́ну, и Свято́му Ду́ху.
И́же во проро́цех велича́йший Дании́л ны́не да почти́тся,/ Христа́ бо Бо́га на́шего ви́де,/ ка́мень отсе́чен кроме́ рук от горы́–/ Чи́стыя Богоро́дицы./ С ним да восхва́лятся и трие́ о́троцы,/ я́же спасе́ от пе́щнаго огня́ неврежде́ны/ о́браз Де́вы Боже́ственный и неизрече́нный,/ и́мже мир спасе́ся.
И ны́не, и при́сно, и во ве́ки веко́в. Ами́нь.
Богородичен: Тайнонауча́ет, Всечи́стая, Ду́хом Боже́ственным Дании́л прему́дрейший,/ и пропису́ют ве́рою Авраа́мстии трие́ о́троцы Твое́ безсе́менное Рождество́:/ Сый бо Божество́м неопи́санное Сло́во/ из Тебе́ пло́тию хотя́ опису́ется, Богоро́дице,/ в Вифлее́ме ражда́емь на спасе́ние челове́ков.
Хвалитные стихиры
На 6: Сотвори́ти в них суд напи́сан, сла́ва сия́ бу́дет всем преподо́бным Его.
Псалом 150
Хвали́те Бо́га во святы́х Его́, хвали́те Его́ во утверже́нии си́лы Его́.
На 4: Хвали́те Его́ на силах Его, / хвали́те Его́ по мно́жеству вели́чествия Его́.
Хвали́те Его́ во гла́се тру́бнем, / хвали́те Его́ во псалти́ри и гу́слех.
Хвали́те Его́ в тимпа́не и ли́це, / хвали́те Его́ во стру́нах и орга́не.
Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Тебе́ сла́ва подоба́ет, Го́споди Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно, и во ве́ки веко́в. Ами́нь.
На стиховне
Стихиры на стиховне
Глас 4: Омы́й мя́ слеза́ми мои́ми, Спа́се, я́ко оскверни́хся мно́гими грехи́. Те́мже и припа́даю Ти́: согреши́х, Бо́же, и поми́луй мя́.
Стих: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.
Глас 4: Овча́ е́смь слове́снаго Твоего́ ста́да, и к Тебе́ прибега́ю, Па́стырю до́брому, взыщи́ мене́ заблу́ждшаго, Бо́же, и поми́луй мя́.
Стих: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.
Глас 4: А́нгелом соприча́стницы бы́сте святи́и му́ченицы, на суди́щи Христа́ му́жески пропове́давше: вся́ бо я́же в ми́ре оста́висте кра́сная, я́ко не су́ща, ве́ру же я́ко наде́жду тве́рду удержа́сте. Те́мже и ле́сть отгна́вше, источа́ете ве́рным исцеле́ний дарова́ния, непреста́нно моля́щеся, спасти́ся душа́м на́шым.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 6: Мы́сленному Со́лнцу Пра́вды/ из Деви́ческия утро́бы возсия́ти хотя́щу,/ я́коже све́тлыя зве́зды,/ предосия́ют нам от пе́щи о́гненныя равночи́сленнии Тро́ицы о́троцы,/ стра́нное та́инства собо́ю предзна́менающе./ С ни́ми у́бо и Дании́л, светле́йший проро́к,/ предозаря́ет конце́м све́том прорече́ния,/ Христа́ пропове́дуя нерукосе́чный ка́мень,/ от горы́ присе́нныя, Де́вы, происходя́щаго,/ во спасе́ние душ на́ших.
Тропари в конец утрени
Глас 2: Ве́лия ве́ры исправле́ния:/ во исто́чнице пла́мене, я́ко на воде́ упокое́ния,/ святи́и трие́ о́троцы ра́довахуся,/ и проро́к Дании́л, львом па́стырь, я́ко овца́м, явля́шеся./ Тех моли́твами, Христе́ Бо́же, спаси́ ду́ши на́ша.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 2: Тя велича́ем, Богоро́дице, вопию́ще: / ра́дуйся, незаходи́маго Све́та о́блаче, / Того́ носи́вши в не́дрех Сла́вы Го́спода.
Отпуст
Евангельская стихира
На часах
1-й Час
Сла́ва Отцу́, и Сы́ну, и Свято́му Ду́ху.
Тропа́рь проро́ка Дани́ила и трие́х отроко́в Ана́нии, Аза́рии и Мисаи́ла, глас 2
Ве́лия ве́ры исправле́ния:/ во исто́чнице пла́мене, я́ко на воде́ упокое́ния,/ святи́и трие́ о́троцы ра́довахуся,/ и проро́к Дании́л, львом па́стырь, я́ко овца́м, явля́шеся./ Тех моли́твами, Христе́ Бо́же, спаси́ ду́ши на́ша.
И ны́не, и при́сно, и во ве́ки веко́в. Ами́нь.
Кафизм нет
Паремии
Евангелие
Кондак прор. Дании́ла, глас 3
Просвети́вшееся Ду́хом чи́стое твое́ се́рдце/ проро́чества бысть светле́йшаго прия́телище:/ зри́ши бо, я́ко настоя́щая, дале́че су́щая./ Львы укроти́л еси́, вве́ржен в ров;/ сего́ ра́ди тя почита́ем, проро́че блаже́нне, Дании́ле сла́вне.
Отпуст
Христо́с И́стинный Бог наш, моли́твами Пречи́стыя Своея́ Ма́тере, честна́го сла́внаго Проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, Престольный праздник, прор. Дании́ла, трие́х отроко́в: Ана́нии, Аза́рии и Мисаи́ла, святы́х пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко Благ и Человеколю́бец.3-й Час
Сла́ва Отцу́, и Сы́ну, и Свято́му Ду́ху.
Тропа́рь проро́ка Дани́ила и трие́х отроко́в Ана́нии, Аза́рии и Мисаи́ла, глас 2
Ве́лия ве́ры исправле́ния:/ во исто́чнице пла́мене, я́ко на воде́ упокое́ния,/ святи́и трие́ о́троцы ра́довахуся,/ и проро́к Дании́л, львом па́стырь, я́ко овца́м, явля́шеся./ Тех моли́твами, Христе́ Бо́же, спаси́ ду́ши на́ша.
И ны́не, и при́сно, и во ве́ки веко́в. Ами́нь.
Кафизм нет
Паремии
Евангелие
Кондак трие́х отроко́в: Ана́нии, Аза́рии и Мисаи́ла, глас 6
Рукопи́саннаго о́браза не поче́тше,/ но неопи́санным существо́м защити́вшеся, треблаже́ннии,/ в по́двизе огня́ просла́вистеся;/ среде́ же пла́мене нестерпи́маго стоя́ще, Бо́га призва́сте:/ ускори́, о Ще́дрый!/ и потщи́ся, я́ко Ми́лостив, в по́мощь на́шу,/ я́ко мо́жеши хотя́й.
6-й Час
Сла́ва Отцу́, и Сы́ну, и Свято́му Ду́ху.
Тропа́рь проро́ка Дани́ила и трие́х отроко́в Ана́нии, Аза́рии и Мисаи́ла, глас 2
Ве́лия ве́ры исправле́ния:/ во исто́чнице пла́мене, я́ко на воде́ упокое́ния,/ святи́и трие́ о́троцы ра́довахуся,/ и проро́к Дании́л, львом па́стырь, я́ко овца́м, явля́шеся./ Тех моли́твами, Христе́ Бо́же, спаси́ ду́ши на́ша.
И ны́не, и при́сно, и во ве́ки веко́в. Ами́нь.
Кафизм нет
Паремии
Евангелие
Кондак прор. Дании́ла, глас 3
Просвети́вшееся Ду́хом чи́стое твое́ се́рдце/ проро́чества бысть светле́йшаго прия́телище:/ зри́ши бо, я́ко настоя́щая, дале́че су́щая./ Львы укроти́л еси́, вве́ржен в ров;/ сего́ ра́ди тя почита́ем, проро́че блаже́нне, Дании́ле сла́вне.
9-й Час
Сла́ва Отцу́, и Сы́ну, и Свято́му Ду́ху.
Тропа́рь проро́ка Дани́ила и трие́х отроко́в Ана́нии, Аза́рии и Мисаи́ла, глас 2
Ве́лия ве́ры исправле́ния:/ во исто́чнице пла́мене, я́ко на воде́ упокое́ния,/ святи́и трие́ о́троцы ра́довахуся,/ и проро́к Дании́л, львом па́стырь, я́ко овца́м, явля́шеся./ Тех моли́твами, Христе́ Бо́же, спаси́ ду́ши на́ша.
И ны́не, и при́сно, и во ве́ки веко́в. Ами́нь.
Кафизм нет
Паремии
Евангелие
Кондак трие́х отроко́в: Ана́нии, Аза́рии и Мисаи́ла, глас 6
Рукопи́саннаго о́браза не поче́тше,/ но неопи́санным существо́м защити́вшеся, треблаже́ннии,/ в по́двизе огня́ просла́вистеся;/ среде́ же пла́мене нестерпи́маго стоя́ще, Бо́га призва́сте:/ ускори́, о Ще́дрый!/ и потщи́ся, я́ко Ми́лостив, в по́мощь на́шу,/ я́ко мо́жеши хотя́й.
На Литургии Иоанна Златоуста
Антифоны
Антифон 1
Первый изобразительный антифон
1 Лик: Благослови́, душе́ моя́, Го́спода. / Благослове́н еси́, Го́споди. / Благослови́, душе́ моя́, Го́спода, / и вся вну́тренняя моя́ И́мя святое́ Его́.
2 Лик: Благослови́, душе́ моя́, Го́спода, / и не забыва́й всех воздая́ний Его́.
1 Лик: Очища́ющаго вся беззако́ния твоя́, / исцеля́ющаго вся неду́ги твоя́.
2 Лик: Избавля́ющаго от истле́ния живо́т твой, / венча́ющаго тя ми́лостию и щедро́тами.
1 Лик: Исполня́ющаго во благи́х жела́ние твое́: / обнови́тся, я́ко о́рля, ю́ность твоя́.
2 Лик: Творя́й ми́лостыни Госпо́дь, / и судьбу́ всем оби́димым.
1 Лик: Сказа́ пути́ Своя́ Моисе́ови, / сыново́м Изра́илевым хоте́ния Своя́.
2 Лик: Щедр и ми́лостив Госпо́дь, / долготерпели́в и многоми́лостив.
1 Лик: Не до конца́ прогне́вается, / ниже́ в век вражду́ет.
2 Лик: Не по беззако́нием на́шим сотвори́л есть нам, / ниже́ по грехо́м на́шим возда́л есть нам.
1 Лик: Я́ко по высоте́ небе́сней от земли́, / утверди́л есть Госпо́дь ми́лость Свою́ на боя́щихся Его́.
2 Лик: Ели́ко отстоя́т восто́цы от за́пад, / уда́лил есть от нас беззако́ния на́ша.
1 Лик: Я́коже ще́дрит оте́ц сы́ны, / уще́дри Госпо́дь боя́щихся Его́.
2 Лик: Я́ко Той позна́ созда́ние на́ше, / помяну́, я́ко персть есмы́.
1 Лик: Челове́к, я́ко трава́ дни́е его́, / я́ко цвет се́льный, та́ко оцвете́т.
2 Лик: Я́ко дух про́йде в нем, / и не бу́дет, / и не позна́ет ктому́ ме́ста своего́.
1 Лик: Ми́лость же Госпо́дня от ве́ка и до ве́ка / на боя́щихся Его́.
2 Лик: И пра́вда Его́ на сыне́х сыно́в, / храня́щих заве́т Его́, / и по́мнящих за́поведи Его́ / твори́ти я́.
1 Лик: Госпо́дь на небеси́ угото́ва Престо́л Свой, / и Ца́рство Его́ все́ми облада́ет.
2 Лик: Благослови́те Го́спода, вси А́нгели Его́, / си́льнии кре́постию, творя́щии сло́во Его́, / услы́шати глас слове́с Его́.
1 Лик: Благослови́те Го́спода, вся си́лы Его́, / слуги́ Его́, творя́щии во́лю Его́.
2 Лик: Благослови́те Го́спода, вся дела́ Его́, / на вся́ком ме́сте влады́чества Его́.
1 Лик: Сла́ва Отцу́ и Сы́ну и Свято́му Ду́ху.
2 Лик: И ны́не и при́сно и во ве́ки веко́в. Ами́нь.
1 Лик: Благослови́, душе́ моя́, Го́спода, / и вся вну́тренняя моя́ И́мя святое́ Его́. / Благослове́н еси́, Го́споди.
Антифон 2
Второй изобразительный антифон
1 Лик: Хвали́, душе́ моя́, Го́спода. / Восхвалю́ Го́спода в животе́ мое́м, / пою́ Бо́гу моему́, до́ндеже есмь.
2 Лик: Не наде́йтеся на кня́зи, на сы́ны челове́ческия, / в ни́хже несть спасе́ния.
1 Лик: Изы́дет дух его́, / и возврати́тся в зе́млю свою́: / в той день поги́бнут вся помышле́ния его́.
2 Лик: Блаже́н, ему́же Бог Иа́ковль помо́щник его́, / упова́ние его́ на Го́спода Бо́га своего́.
1 Лик: Сотво́ршаго не́бо и зе́млю, / мо́ре и вся, я́же в них.
2 Лик: Храня́щаго и́стину в век, / творя́щаго суд оби́димым, / даю́щаго пи́щу а́лчущим.
1 Лик: Госпо́дь реши́т окова́нныя, / Госпо́дь умудря́ет слепцы́.
2 Лик: Госпо́дь возво́дит низве́рженныя, / Госпо́дь лю́бит пра́ведники.
1 Лик: Госпо́дь храни́т прише́льцы, / си́ра и вдову́ прии́мет, / и путь гре́шных погуби́т.
2 Лик: Воцари́тся Госпо́дь во век, / Бог твой, Сио́не, в род и род.
Антифон 3 / Блаженны
Блаженны, третий изобразительный антифон (на 8)
1 Лик: Во Ца́рствии Твое́м помяни́ нас, Го́споди, / егда́ прии́деши, во Ца́рствии Твое́м.
на 12:
1 Лик: Блаже́ни ни́щии ду́хом, / я́ко тех есть Ца́рство Небе́сное.
2 Лик: Блаже́ни пла́чущии, / я́ко ти́и уте́шатся.
на 10:
1 Лик: Блаже́ни кро́тции, / я́ко ти́и насле́дят зе́млю.
2 Лик: Блаже́ни а́лчущии и жа́ждущии пра́вды, / я́ко ти́и насы́тятся.
на 8:
1 Лик: Блаже́ни ми́лостивии, / я́ко ти́и поми́ловани бу́дут.
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
2 Лик: Блаже́ни чи́стии се́рдцем, / я́ко ти́и Бо́га у́зрят.
Ра́зум и му́дрость от Бо́га прие́м,/ сказа́л еси́ светоявле́нно сено́вная царе́м со́ния.
на 6:
1 Лик: Блаже́ни миротво́рцы, / я́ко ти́и сы́нове Бо́жии нареку́тся.
Ра́зум и му́дрость от Бо́га прие́м,/ сказа́л еси́ светоявле́нно сено́вная царе́м со́ния.
2 Лик: Блаже́ни изгна́ни пра́вды ра́ди, / я́ко тех есть Ца́рство Небе́сное.
Зми́я умертви́л еси́,/ пи́щу вверг, сла́вне, чу́вственнаго,/ пе́рвее бо неви́димыя победи́л еси́ де́моны.
на 4:
1 Лик: Блаже́ни есте́, егда́ поно́сят вам, / и изжену́т, и реку́т всяк зол глаго́л на вы, лжу́ще Мене́ ра́ди.
Облада́вше есте́ственными страстьми́ си́лою Сло́ва,/ стране́ язы́к халде́йских вла́стели бы́сте:/ весть бо доброде́тель честь дарова́ти стяжа́вшим ю,/ о Дави́довы му́дрии вну́цы!
2 Лик: Ра́дуйтеся и весели́теся, / я́ко мзда ва́ша мно́га на Небесе́х.
Облада́вше есте́ственными страстьми́ си́лою Сло́ва,/ стране́ язы́к халде́йских вла́стели бы́сте:/ весть бо доброде́тель честь дарова́ти стяжа́вшим ю,/ о Дави́довы му́дрии вну́цы!
1 Лик: Сла́ва Отцу́ и Сы́ну и Свято́му Ду́ху.
В ме́ртвость Дании́л живоно́сную оде́явся дре́вле,/ я́ко бо́га халде́ем злочести́вно мни́маго убива́ет сне́дию зми́я зле́йшаго,/ свяще́нники же злочести́выя му́дре уби́л есть.
2 Лик: И ны́не и при́сно и во ве́ки веко́в. Ами́нь.
Богоро́дичен: Ми́лостива ми Судию́ и Сы́на Твоего́, Богоро́дице Де́во,/ Твои́ми моли́твами бы́ти в день Суда́, Изба́вителя же лю́тых, Ма́ти, умоли́,/ на Тя бо еди́ну наде́жду мою́ возлага́ю.
Входное
В будни: Прииди́те, поклони́мся и припаде́м ко Христу́. / Спаси́ ны, Сы́не Бо́жий, / во святы́х Ди́вен сый, пою́щия Ти, / Аллилу́иа. Единожды.
Тропари и кондаки на входе
Во вторник, Крестителя и Предтечи Иоанна, глас 2
Па́мять пра́веднаго с похвала́ми,/ тебе́ же довле́ет свиде́тельство Госпо́дне, Предте́че:/ пока́зал бо ся еси́ вои́стину и проро́ков честне́йший,/ я́ко и в струя́х крести́ти сподо́бился еси́ Пропове́даннаго./ Те́мже за и́стину пострада́в ра́дуяся,/ благовести́л еси́ и су́щим во а́де Бо́га я́вльшагося пло́тию,/ взе́млющаго грех ми́ра,// и подаю́щаго нам ве́лию ми́лость.
храма святого, глас *
... Укажите в настройках престольный праздник вашего храма ...
Тропа́рь проро́ка Дани́ила и трие́х отроко́в Ана́нии, Аза́рии и Мисаи́ла, глас 2
Ве́лия ве́ры исправле́ния:/ во исто́чнице пла́мене, я́ко на воде́ упокое́ния,/ святи́и трие́ о́троцы ра́довахуся,/ и проро́к Дании́л, львом па́стырь, я́ко овца́м, явля́шеся./ Тех моли́твами, Христе́ Бо́же, спаси́ ду́ши на́ша.
Во вторник, Крестителя и Предтечи Иоанна, глас 2
Проро́че Бо́жий и Предте́че благода́ти,/ главу́ твою́ я́ко ши́пок свяще́ннейший от земли́ обре́тше,/ исцеле́ния всегда́ прие́млем,// и́бо па́ки, я́коже пре́жде в ми́ре пропове́дуеши покая́ние.
Кондак храма святого, глас *
... Укажите в настройках престольный праздник вашего храма ...
Кондак прор. Дании́ла, глас 3
Просвети́вшееся Ду́хом чи́стое твое́ се́рдце/ проро́чества бысть светле́йшаго прия́телище:/ зри́ши бо, я́ко настоя́щая, дале́че су́щая./ Львы укроти́л еси́, вве́ржен в ров;/ сего́ ра́ди тя почита́ем, проро́че блаже́нне, Дании́ле сла́вне.
Кондак трие́х отроко́в: Ана́нии, Аза́рии и Мисаи́ла, глас 6
Рукопи́саннаго о́браза не поче́тше,/ но неопи́санным существо́м защити́вшеся, треблаже́ннии,/ в по́двизе огня́ просла́вистеся;/ среде́ же пла́мене нестерпи́маго стоя́ще, Бо́га призва́сте:/ ускори́, о Ще́дрый!/ и потщи́ся, я́ко Ми́лостив, в по́мощь на́шу,/ я́ко мо́жеши хотя́й.
Сла́ва Отцу́, и Сы́ну, и Свято́му Ду́ху.
Кондaк за умерших, глас 8
Со святы́ми упоко́й,/ Христе́,/ ду́ши раб Твои́х,/ иде́же несть боле́знь, ни печа́ль,/ ни воздыха́ние,// но жизнь безконе́чная.
И ны́не, и при́сно, и во ве́ки веко́в. Ами́нь.
Кондaк Пресвятой Богородице, глас 6
Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти:/ ускори́ на моли́тву и потщи́ся на умоле́ние,// предста́тельствующи при́сно, Богоро́дице, чту́щих Тя.
Прокимен
Чтец: Прокимен, глас 7: Возвесели́тся пра́ведник о Го́споде / и упова́ет на Него́.
Лик: Возвесели́тся пра́ведник о Го́споде / и упова́ет на Него́.
Чтец: Стих: Услы́ши, Бо́же, глас мой, внегда́ моли́ти ми ся к Тебе́.
Лик: Возвесели́тся пра́ведник о Го́споде / и упова́ет на Него́.
Чтец: Прокимен, глас 4: Ди́вен Бо́г во святы́х Свои́х, / Бо́г Изра́илев.
Лик: Ди́вен Бо́г во святы́х Свои́х, / Бо́г Изра́илев.
Апостол
И чтец надписание Апостола: Ко Евре́ем посла́ния свята́го Апо́стола Па́вла чте́ние.
И паки диакон: Во́нмем.
Зачало 321А Во вторник 30-я недели. (Евр.9:8-10,15-23)
Бра́тие, се явля́ющу Ду́ху Свято́му, я́ко не у яви́ся святы́х путь, еще́ пе́рвей ски́нии иму́щей стоя́ние. Я́же при́тча во вре́мя настоя́щее утверди́ся, в не́же да́рове и же́ртвы прино́сятся, не могу́щия по со́вести соверши́ти служа́щаго, то́чию в бра́шнах и пития́х, и разли́чных омове́ниих, и оправда́ниих пло́ти, да́же до вре́мене исправле́ния надлежа́щая. И сего́ ра́ди но́вому заве́ту хода́тай есть, да я́ко сме́рти бы́вши, во искупле́ние преступле́ний бы́вших в пе́рвом заве́те, обетова́ние ве́чнаго насле́дия прии́мут зва́ннии. Иде́же бо заве́т, сме́рти ну́жно есть носи́тися завеща́ющаго, заве́т бо в ме́ртвых изве́стен есть: поне́же ничесо́же мо́жет, егда́ жив есть завещава́яй. Те́мже ни пе́рвый без кро́ве обновле́н бысть. Рече́нней бо вся́кой за́поведи по зако́ну от Моисе́я всем лю́дем, прие́м кровь ко́злию и те́льчую, с водо́ю и во́лною червле́ною и иссо́пом, са́мыя же ты́я кни́ги и вся лю́ди покропи́, глаго́ля: сия́ кровь заве́та, его́же завеща́ к вам Бог. И ски́нию же и вся сосу́ды служе́бныя кро́вию та́коже покропи́. И отню́д кро́вию вся очища́ются по зако́ну, и без кровопроли́тия не быва́ет оставле́ние. Ну́жда у́бо бя́ше образо́м небе́сных си́ми очища́тися, саме́м же небе́сным лу́чшими же́ртвами, па́че сих.
Зачало 330 Неделя всем святым. (Евр.11:33-12:2)
Бра́тие, святи́и вси ве́рою победи́ша ца́рствия, соде́яша пра́вду, получи́ша обетова́ния, загради́ша уста́ львов, угаси́ша си́лу о́гненную, избего́ша о́стрея меча́, возмого́ша от не́мощи, бы́ша кре́пцы во бране́х, обрати́ша в бе́гство полки́ чужи́х. Прия́ша жены́ от воскресе́ния ме́ртвыя своя́; ини́и же избие́ни бы́ша, не прие́мше избавле́ния, да лу́чшее воскресе́ние улуча́т; друзи́и же руга́нием и ра́нами искуше́ние прия́ша, еще́ же и уз, и темни́ц. Ка́мением побие́ни бы́ша, претре́ни бы́ша, искуше́ни бы́ша, уби́йством меча́ умро́ша, проидо́ша в ми́лотех, и в ко́зиях ко́жах, лише́ни, скорбя́ще, озло́блени. И́хже не бе досто́ин весь мир, в пусты́нях скита́ющеся, и в гора́х, и в верте́пах, и в про́пастех земны́х. И си́и вси послу́шествовани бы́вше ве́рою, не прия́ша обетова́ния, Бо́гу лу́чшее что о нас предзре́вшу, да не без нас соверше́нство прии́мут. Те́мже у́бо и мы, толи́к иму́ще облежа́щь нас о́блак свиде́телей, го́рдость вся́ку отло́жше, и удо́бь обстоя́тельный грех, терпе́нием да тече́м на предлежа́щий нам по́двиг, взира́юще на нача́льника ве́ры и соверши́теля Иису́са.
Аллилуиарий
Чтец: Аллилу́иа. Аллилу́иа. Аллилу́иа, глас 4.
Чтец: Пра́ведник я́ко фи́никс процвете́т, я́ко кедр, и́же в Лива́не, умно́жится.
Лик: Аллилу́иа. Аллилу́иа. Аллилу́иа.
Чтец: Стих: Насажде́ни в дому́ Госпо́дни, во дво́рех Бо́га на́шего процвету́т.
Лик: Аллилу́иа. Аллилу́иа. Аллилу́иа.
Чтец: Воззва́ша пра́веднии, и Госпо́дь услы́ша их, и от всех скорбе́й их изба́ви их.
Лик: Аллилу́иа. Аллилу́иа. Аллилу́иа.
Евангелие
Диакон: Благослови́, влады́ко, благовести́теля свята́го Апо́стола и Евангели́ста Ма́рка.
Священник, осеняя его крестным знамением, произносит: Бо́г, моли́твами свята́го, сла́внаго, всехва́льнаго Апо́стола и Евангели́ста Ма́рка, да да́ст тебе́ глаго́л благовеству́ющему си́лою мно́гою во исполне́ние Ева́нгелия Возлю́бленнаго Сы́на Своего́, Го́спода на́шего Иису́са Христа́.
И подает ему святое Евангелие.
Диакон: Ами́нь.
Священник: Прему́дрость, про́сти, услы́шим свята́го Ева́нгелия. Таже: Ми́р все́м.
Лик: И ду́хови твоему́.
Диакон: От Ма́рка свята́го Ева́нгелия чте́ние.
Лик: Сла́ва Тебе́, Го́споди, сла́ва Тебе́.
Священник: Во́нмем.
Евангелие от Марка, зачало 43. Вторник 31-я недели. (Мк.10:2-12)
Во вре́мя о́но, присту́пльше фарисе́е вопроси́ша Иису́са: а́ще досто́ит му́жу жену́ пусти́ти? Искуша́юще Его́. Он же отвеща́в рече́ им: что вам запове́да Моисе́й? Они́ же ре́ша: Моисе́й повеле́ кни́гу распу́стную написа́ти, и пусти́ти. И отвеща́в Иису́с рече́ им: по жестосе́рдию ва́шему написа́ вам за́поведь сию́. От нача́ла же созда́ния, му́жа и жену́ сотвори́л я́ есть Бог. Сего́ ра́ди оста́вит челове́к отца́ своего́ и ма́терь и прилепи́тся к жене́ свое́й, и бу́дета о́ба в плоть еди́ну. Те́мже уже́ не́ста два, но плоть еди́на. Е́же у́бо Бог сочета́, челове́к да не разлуча́ет. И в дому́ па́ки ученицы́ Его́ о сем вопроси́ша Его́. И глаго́ла им: и́же а́ще пу́стит жену́ свою́ и оже́нится ино́ю, прелюбы́ твори́т на ню. И а́ще жена́ пу́стит му́жа своего́ и пося́гнет за ино́го, прелюбы́ твори́т.
Евангелие от Луки, зачало 62. Четверток 24-я недели. (Лк.11:47-12:1)
Рече́ Госпо́дь ко прише́дшим к Нему́ иуде́ем: го́ре вам, кни́жницы и фарисе́е, я́ко зи́ждете гро́бы проро́к, отцы́ же ва́ши изби́ша их. У́бо свиде́тельствуете и сблаговолите́ дело́м оте́ц ва́ших, я́ко ти́и у́бо изби́ша их, вы же зи́ждете их гро́бы. Сего́ ра́ди и прему́дрость Бо́жия рече́: послю́ в них проро́ки и Апо́столы, и от них убию́т и изжену́т. Да взы́щется кровь всех проро́к, пролива́емая от сложе́ния ми́ра, от ро́да сего́, от кро́ве А́веля да́же до кро́ве Заха́рии, поги́бшаго между́ олтаре́м и хра́мом. Ей, глаго́лю вам, взы́щется от ро́да сего́. Го́ре вам зако́нником, я́ко взя́сте ключь разуме́ния, са́ми не внидо́сте, и входя́щим возбрани́сте. Глаго́лющу же Ему́ сия́ к ним, нача́ша кни́жницы и фарисе́е бе́дне гне́ватися Нань и преста́ти Его́ о мно́зе, ла́юще Его́, и́щуще улови́ти не́что от уст Его́, да Нань возглаго́лют. О ни́хже собра́вшимся тмам наро́да, я́ко попира́ти друг дру́га, нача́т глаго́лати ученико́м Свои́м пе́рвее, внемли́те себе́ от ква́са фарисе́йска, е́же есть лицеме́рие.
Задостойник
Досто́йно есть...
Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.
Причастен
В па́мять ве́чную бу́дет пра́ведник, от слу́ха зла не убои́тся.
Ра́дуйтеся, пра́веднии, о Го́споде, пра́вым подоба́ет похвала́.
Аллилу́иа. Аллилу́иа. Аллилу́иа.