На вечерне
Кафизм нет
На «Господи, воззвах»
На 10, стихиры: Изведи́ из темни́цы ду́шу мою́, / испове́датися и́мени Твоему́.
Сти́х: Мене́ ждут пра́ведницы / до́ндеже возда́си Мне.
На 8, cти́х: Из глубины́ воззва́х к Тебе́ Го́споди, / Го́споди, услы́ши глас мой.
Сти́х: Да бу́дут у́ши Твои́ / вне́млюще гла́су моле́ния моего́.
На 6, cти́х: А́ще беззако́ния на́зриши, Го́споди, Го́споди, кто постои́т? / Я́ко у Тебе́ очище́ние есть.
Глас 4: Согреши́х к Тебе́, Человеколю́бче, не по естеству́ я́ко челове́к, да испрошу́ проще́ние: но па́че челове́ка, и вы́ше естества́, и па́че проще́ния. Но и́же вы́ше есте́ственных уста́в, и па́че постиже́ния мы́сли, челове́к Спа́се мо́й бы́в, и па́че ума́ человеколю́бное имы́й, поми́луй мя́ к Тебе́ обраща́ющагося.
Сти́х: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.
Глас 4: Положи́л еси́ покая́ние согреша́ющым Христе́, а не пра́ведным: о́браз у́бо и́мам разбо́йника же и блу́днаго, Манасси́и и блудни́цы, гони́теля, мытаря́, и отме́тника, неудо́бь отчаява́юся, твое́ бо человеколю́бное, и преблаго́е ве́дый, Спа́се мо́й, обраща́юся же и слезю́, и благонаде́жден быва́ю я́ко прии́меши мя́.
На 4, cти́х: От стра́жи у́тренния до но́щи, от стра́жи у́тренния, / да упова́ет Изра́иль на Го́спода.
Глас 4: Да́ждь ми́ умиле́ние, и злы́х отчужде́ние, и соверше́нное исправле́ние, в страсте́х теле́сных ны́не погруже́ному, и удале́ному от Тебе́, Бо́же, все́х Царю́, и ника́коже наде́жду иму́ща, спаси́ мя блу́днаго, мно́гия ра́ди бла́гости, Иису́се Всеси́льне, Спа́се ду́ш на́ших.
Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.
Глас 8: Селе́ние Го́спода твоего́/ и храм одушевле́н быв/ жития́ све́тлостию и пребыва́нием,/ безду́шный воздви́гл еси́ храм,/ дре́вле па́дший, всече́стне,/ вселе́нныя Ца́рствующему,/ Того́ твои́ми моли́твами моли́/ всем дарова́ти ве́лию ми́лость.
На 2, cти́х: Хвали́те Го́спода вси́ язы́цы, похвали́те Его́ вси́ лю́дие.
Глас 8: Сосу́д яви́лся еси́ Ду́ха,/ с Небе́с тебе́ подае́мая прие́мля светоли́тия,/ и сия́ний прия́тен./ Тем прорица́еши спаси́тельное всем челове́ком избавле́ние;/ Того́ твои́ми моли́твами умоли́/ всем дарова́ти ве́лию ми́лость.
Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.
Глас 8: Заре́ю лучено́сною облия́емь,/ и виде́ния сподобля́емь,/ и чисте́йшаго и невече́рняго просвеще́ния/ я́влься, блаже́нне, испо́лнен,/ тя воспева́ющия соблюди́,/ моля́ Еди́наго Го́спода/ всем да́ти ве́лию ми́лость.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 8: Го́ре прогне́вавшему своего́ Бо́га,/ увы́ мне, в неве́дении/ и пребыва́ющу во уны́нии и ле́ности, я́коже аз./ Влады́чице Де́во! Ты помози́ ми, омраче́нному,/ и моли́ся Твоему́ Сы́ну и Соде́телю/ да́ти ми согреше́ний проще́ние.
Прокимен
Прокимен
В неделю вечера, глас 8:
Диакон: Прему́дрость. Во́нмем. Проки́мен, глас 8.
Се ны́не благослови́те Го́спода, / вси раби́ Госпо́дни.
Лик: Се ны́не благослови́те Го́спода, / вси раби́ Госпо́дни.
Диакон: Стоя́щии в хра́ме Госпо́дни, во дво́рех до́му Бо́га на́шего.
Лик: Се ны́не благослови́те Го́спода, / вси раби́ Госпо́дни.
Диакон: Се ны́не благослови́те Го́спода
Лик: Вси раби́ Госпо́дни.
Паремии
Стихиры на литии
На стиховне
Глас 4: Хоте́х слеза́ми омы́ти мои́х прегреше́ний рукописа́ние, Го́споди, и про́чее живота́ моего́ покая́нием благоугоди́ти Тебе́, но вра́г льсти́т мя́, и бо́рет ду́шу мою́: Го́споди, пре́жде да́же до конца́ не поги́бну, спаси́ мя.
Стих: К Тебе́ возведо́х о́чи мои́, живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.
Глас 4: Кто́ обурева́ем, и притека́я ко приста́нищу Твоему́, Го́споди, не спасе́тся; или́ кто́ неду́гуя, и припа́дая ко врачевству́ Твоему́, не уврачу́ется, Соде́телю вся́ческих, и Врачу́ неду́жных; Го́споди, пре́жде да́же до конца́ не поги́бну, спаси́ мя.
Стих: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.
Глас 4: Прославля́яйся в па́мятех святы́х Твои́х, Христе́ Бо́же, и от ни́х умоле́н быва́я, низпосли́ на́м ве́лию ми́лость.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Глас 4: Ра́дуйся, Све́та о́блаче. Ра́дуйся, Све́щниче све́тлый. Ра́дуйся Ру́чко, в не́йже ма́нна. Ра́дуйся, Же́зле Ааро́нов. Ра́дуйся, Купино́ неопали́мая. Ра́дуйся, Черто́же. Ра́дуйся, Престо́ле. Ра́дуйся, Горо́ свята́я. Ра́дуйся, Прибе́жище. Ра́дуйся, Боже́ственная Трапе́зо. Ра́дуйся, Две́ре та́йная. Ра́дуйся, все́х Ра́досте.
Тропари по Трисвятом
Глас 2: Проро́ка Твоего́ Агге́я па́мять, Го́споди, пра́зднующе,/ те́м Тя́ мо́лим,/ спаси́ ду́ши на́ша.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 2: Благоутро́бия су́щи исто́чник, / ми́лости сподо́би нас, Богоро́дице, / при́зри на лю́ди согреши́вшия, / яви́, я́ко при́сно, си́лу Твою́, / на Тя бо упова́юще, / ра́дуйся, вопие́м Ти, / я́коже иногда́ Гаврии́л, безпло́тных Архистрати́г.
На утрене
на «Бог Господь»
Глас 2: Проро́ка Твоего́ Агге́я па́мять, Го́споди, пра́зднующе,/ те́м Тя́ мо́лим,/ спаси́ ду́ши на́ша. (Дважды)
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 2: Благоутро́бия су́щи исто́чник, / ми́лости сподо́би нас, Богоро́дице, / при́зри на лю́ди согреши́вшия, / яви́, я́ко при́сно, си́лу Твою́, / на Тя бо упова́юще, / ра́дуйся, вопие́м Ти, / я́коже иногда́ Гаврии́л, безпло́тных Архистрати́г.
Кафизмы 4,5,6
Кафизма 4
Пс.24-26; Слава: Пс.27-29; Слава: Пс.30-31;
И седален по 1-ом стихословии.
Глас 4: Смире́нную мою́ ду́шу посети́, Го́споди, во гресе́х все́ житие́ ижди́вшую: я́коже блудни́цу приими́ мене́, и спаси́ мя.
Стих: Го́споди, да не я́ростию твое́ю обличи́ши мене́, ниже́ гне́вом Твои́м нака́жеши мене́.
Препла́вая пучи́ну настоя́щаго жития́, помышля́ю бе́здну мно́гих мои́х зо́л, и не име́яй окорми́теля помышле́ний, Петро́в провещава́ю Ти́ гла́с: спаси́ мя, Христе́, спаси́ мя, Бо́же, я́ко Человеколю́бец.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 4: Стена́ непобеди́мая на́м христиа́ном еси́, Богоро́дице Де́во: к Тебе́ бо прибега́юще невреди́ми пребыва́ем, и па́ки согреша́юще, и́мамы Тя́ Моли́твенницу. Те́м благода́рственно вопие́м Ти́: ра́дуйся, Благода́тная, Госпо́дь с Тобо́ю.
Кафизма 5
Пс.32-33; Слава: Пс.34-35; Слава: Пс.36;
И седален по 2-ом стихословии.
Глас 4: Ско́ро совни́дем в неве́стник Христо́в, да вси́ услы́шим Боже́ственный гла́с Христа́ Бо́га на́шего: прииди́те лю́бящии Небе́сную сла́ву, и приими́те сию́ вку́пе с му́дрыми де́вами, просвети́вше свещы́ своя́ ве́рою.
Стих: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.
Мно́жеством прегреше́ний мои́х осужда́ем, и стра́хом муче́ния смуща́ем е́смь. Христе́ Бо́же на́ш, сле́зы покая́ния от се́рдца приношу́ Тебе́, иму́щему вла́сть живота́, и сме́рти, и зову́ Ти во умиле́нии: согреши́х, Го́споди, спаси́ мя.
Стих: Ди́вен Бо́г во святы́х Свои́х, Бо́г Изра́илев.
Дне́сь а́нгельская во́инства, в па́мять страстоте́рпец приидо́ша, ве́рных мы́сли просвети́ти, и вселе́нную благода́тию уясни́ти: те́ми, Бо́же, умоле́н быва́я, да́руй на́м ве́лию ми́лость.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 4: Е́же от а́нгела сло́во прие́мши, Де́во, во утро́бе Твое́й, и ро́ждши воплоще́нна Христа́ Бо́га Емману́ила, Богоро́дице, моли́ о душа́х на́ших.
Кафизма 6
Пс.37-39; Слава: Пс.40-42; Слава: Пс.43-45;
И седален по 3-ом стихословии.
Глас 4: Невеще́ственными усты́, Тро́ице Пребоже́ственная, непреста́нно пою́т Тя́ безпло́тных ли́цы, и со стра́хом предстоя́т, свя́т, взыва́юще, триипоста́сное естество́: поми́луй ру́к Твои́х созда́ние Твое́, те́х мольба́ми, еди́не Человеколю́бче.
А́нгельстии чи́ни со стра́хом предстоя́т престо́лу Твоему́, Влады́ко, и е́же отону́ду заря́ми при́сно просвеща́еми, пе́снь Тебе́ немо́лчно побе́дную воспева́ют, Го́споди: и́хже свяще́нными моли́твами, ми́р ми́ру, и оставле́ние прегреше́ний на́ших да́руй.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 4: Де́во Всенепоро́чная, я́же пресу́щнаго Бо́га ро́ждши, со безпло́тными того́ непреста́нно моли́, оставле́ние прегреше́ний, и исправле́ние жития́ да́ти на́м пре́жде конца́, ве́рою и любо́вию пою́щым Тя́ по до́лгу, Еди́на Всепе́тая.
Величание
Седален праздника / Ипакои
Прокимен
Евангелие
Стихиры по 50 псалме
Канон
Песнь 1
Кано́н покая́нный (в понеде́льник у́тра). Глас 4. На 6. + Кано́н безпло́тных (в понеде́льник у́тра). Глас 4. На 4. + Кано́н проро́ка Агге́я. Глас 7. На 4.
Песнь 1
Ирмос, глас 4: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́ я́ко в тимпа́не, во умерщвле́нии телесе́ побе́дное воспою́ пе́ние.
Припев: Поми́луй мя, Бо́же, поми́луй мя.
Спа́се мо́й, Иису́се, И́же блу́днаго спасы́й, и и́же блудни́цы пла́ч прие́мый, И́же мытаря́ воздохну́вша, манове́нием свои́м оправда́вый, и мене́ без числа́ согреши́вшаго, и обраща́ющася приими́, и спаси́ мя.
Припев: Поми́луй мя, Бо́же, поми́луй мя.
Я́ко ве́щь снеда́ет ду́шу мою́ зло́бный о́гнь, и пла́меню твори́т подгнеще́ние бу́дущему: Человеколю́бче, угаси́ того́, ороше́нием Твои́х ми́лостей, Долготерпели́ве, пода́в ми́ сле́зы покая́ния.
Припев: Святи́и му́ченицы, моли́те Бо́га о нас.
Мученичен: Ра́зума мно́га испо́лнен ли́к святы́х страда́лец, неразу́мен сове́т и сопроти́вное мудрова́ние все́х законопресту́пных, целому́дренно уклони́, и Боже́ственных по́честей получи́.
Припев: Святи́и му́ченицы, моли́те Бо́га о нас.
Мученичен: И́же ми́ра презре́вше кра́сная ве́рою, и преми́рную жи́знь насле́довасте му́дрии страстоте́рпцы прехва́льнии, вся́каго мя́ у́бо изба́вите мирска́го смеше́ния, и́скренно ва́с блажа́щаго.
Припев: Пресвята́я Богоро́дице, спаси́ нас.
Богородичен: Пресве́тлая свеще́ Со́лнца сла́вы, души́ моея́ о́гнь уны́нием угаше́нный возжзи́, Пречи́стая, при́сно Боже́ственных де́л еле́ем напоя́ющи, да ве́рою и любо́вию сла́влю Тя́.
Припев: Святи́и арха́нгели и а́нгели, моли́те Бо́га о нас.
Я́ко у́ми чи́стии, А́нгели, Вели́кому и Пе́рвому предстоя́ще Уму́, и Боже́ственнаго сия́ния насыща́еми, луче́ю мя́ ва́шею озари́те, пою́ще всевино́внаго Сло́ва пресла́внии.
Припев: Святи́и арха́нгели и а́нгели, моли́те Бо́га о нас.
Я́ко у́ми чи́стии, А́нгели, Вели́кому и Пе́рвому предстоя́ще Уму́, и Боже́ственнаго сия́ния насыща́еми, луче́ю мя́ ва́шею озари́те, пою́ще всевино́внаго Сло́ва пресла́внии.
Припев: Святи́и арха́нгели и а́нгели, моли́те Бо́га о нас.
Отню́д к Бо́гу прекло́ньшеся любо́вию, и Боже́ственными добро́тами вообража́еми я́ве, о Арха́нгели сла́внии, стоя́нием приле́жным обстоите́, зову́ще побе́дную пе́снь Зижди́телю.
Припев: Пресвята́я Богоро́дице, спаси́ нас.
Богородичен: Я́же Еди́на во чре́ве прие́мши Сло́во, Его́же а́нгельская во́инства сла́вят при́сно, ду́шу мою́ озари́, реша́щи грехо́вное мра́чное зломышле́ние Всенепоро́чная, и просвеща́ющи ра́зумом Рождества́ Твоего́.
Припев: Святы́й проро́че Агге́е, моли́ Бо́га о на́с.
Богови́днейший, Бо́гу предстоя́, я́ко проро́к и́стинен,/ пою́щих честну́ю па́мять твою́, блаже́нне, помина́й.
Припев: Святы́й проро́че Агге́е, моли́ Бо́га о на́с.
На основа́нии тве́рдем доброде́телей тебе́ сама́го назда́в,/ возложи́лся еси́ храм одушевле́н, Богоблаже́нне.
Сла́ва Отцу́, и Сы́ну, и Свято́му Ду́ху.
Чисте́йший твой ум, при́сно зря Бо́га, я́ко мо́щно,/ та́мошними далечесия́тельно дарова́нии, блаже́нне, облиста́.
И ны́не, и при́сно, и во ве́ки веко́в. Ами́нь.
Богородичен: Тя, безма́терня пе́рвее, Сло́во Бо́жие,/ Де́ва, во утро́бе заче́нши пло́тски, родила́ есть, Сы́на безо́тча.
Песнь 2
Песнь 3
Кано́н покая́нный (в понеде́льник у́тра). Глас 4. На 6. + Кано́н безпло́тных (в понеде́льник у́тра). Глас 4. На 4. + Кано́н проро́ка Агге́я. Глас 7. На 4.
Песнь 3
Ирмос, глас 4: С высоты́ снизше́л еси́ во́лею на зе́млю, превы́ше вся́каго нача́ла, и смире́нное возне́сл еси́ из а́да преиспо́дняго естество́ челове́ческое: не́сть бо свя́т па́че Тебе́, Человеколю́бче.
Припев: Поми́луй мя, Бо́же, поми́луй мя.
Но́щию мя́ жития́ тьма́ страсте́й объя́ла е́сть, Христе́ Бо́же, све́т сы́й незаходи́мый, луча́ми покая́ния озари́в мя́ спаси́, я́ко Человеколю́бец, да сла́влю Тя́.
Припев: Поми́луй мя, Бо́же, поми́луй мя.
Ча́сти мя́ покажи́, Христе́, избра́нных насле́дника, сопроти́вныя ча́сти отлучи́в, Спа́се, слеза́ми и ми́лостынею очище́на, я́ко да во хвале́нии Тя́ сла́влю всегда́.
Припев: Святи́и му́ченицы, моли́те Бо́га о нас.
Мученичен: Очервлени́шася вои́стинну кро́вию ва́ши но́ги, и быстре́йше к небеси́ потеко́ша, со грехо́м зе́млю оста́вльше, му́ченицы, собесе́дницы Боже́ственным си́лам.
Припев: Святи́и му́ченицы, моли́те Бо́га о нас.
Мученичен: Удруча́емо те́ло ва́ше ра́нами раста́яшеся, Христо́вы страда́льцы: душе́вная же укрепля́шеся си́ла, любо́вию привязу́ема нереши́мо к созда́вшему вся́ческая хоте́нием.
Припев: Пресвята́я Богоро́дице, спаси́ нас.
Богородичен: Мари́е Госпоже́, я́ко су́щи все́м Го́спода ро́ждши, облада́ема страстьми́ ума́ моего́, и зло́бою очерне́на, свобо́дна сотвори́ и просвети́.
Припев: Святи́и арха́нгели и а́нгели, моли́те Бо́га о нас.
И́же преми́рными ли́ки воспева́емый Христе́, чи́ном те́х ве́рных составле́ния воспева́ти богому́дренно сотвори́, Cло́ве: не́сть бо свя́т па́че тебе́, Человеколю́бче.
Припев: Святи́и арха́нгели и а́нгели, моли́те Бо́га о нас.
И́же преми́рными ли́ки воспева́емый Христе́, чи́ном те́х ве́рных составле́ния воспева́ти богому́дренно сотвори́, Cло́ве: не́сть бо свя́т па́че тебе́, Человеколю́бче.
Припев: Святи́и арха́нгели и а́нгели, моли́те Бо́га о нас.
Любо́вию те́плою, привяза́нием рачи́тельным причаща́ющеся пе́рвому исто́чнику служи́тельне предстоите́, пою́ще немо́лчно, еди́но существо́ Божества́ безнача́льнаго, Боже́ственнии Арха́нгели.
Припев: Пресвята́я Богоро́дице, спаси́ нас.
Богородичен: Е́вину дре́внюю кля́тву, Христа́ ро́ждши, Ма́ти Чи́стая, пресве́тло разреши́ла еси́, все́х венча́ющаго благослове́ньми: не́сть бо, Пречи́стая, ра́зве Тебе́ Помо́щницы.
Припев: Святы́й проро́че Агге́е, моли́ Бо́га о на́с.
Си́лою Боже́ственною де́монскаго лю́таго плене́ния нас разреши́в,/ хра́мы твоя́ че́стны, Спа́се, покажи́,/ Свят еси́,– зову́щия,– спаса́яй ду́ши на́ша.
Припев: Святы́й проро́че Агге́е, моли́ Бо́га о на́с.
В Высоча́йших обита́яй и исполня́я вселе́нную святы́ни, проро́че,/ храм тя показу́ет,/ Свят еси́,– зову́ща,– спаса́яй ду́ши на́ша.
Сла́ва Отцу́, и Сы́ну, и Свято́му Ду́ху.
Боже́ственный Дух, всем благода́ть раздава́яй,/ в твое́ се́рдце всели́вся, вопи́ти тя науча́ет:/ Свят еси́, Го́споди, спаса́яй ду́ши на́ша.
И ны́не, и при́сно, и во ве́ки веко́в. Ами́нь.
Богородичен: Сло́вом всю тварь му́дре соде́тельствовавый,/ соде́тельствуется из Тебе́ по нам, Богоро́дице,/ Челове́к быв за милосе́рдие, Человеколю́бец.
Катавасия
Ирмос, глас 7: Утверди́ся ве́рою Христо́ва Це́рковь,/ и́бо непреста́нно пе́сньми вопие́т, пою́щи:/ Свят еси́, Го́споди,/ и Тя пое́т дух мой.
Кондаки по 3 песне
Седален
Глас 3: Боже́ственным Ду́хом просвеще́ну мысль име́я, проро́че,/ Бо́жия прорица́еши та́инства, открыва́я бу́дущих явле́ние/ и сказу́я веще́й сбытие́, Агге́е всеблаже́нне,/ Христа́ Бо́га моли́ дарова́ти нам ве́лию ми́лость.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 3: Боже́ственнаго естества́ не отлу́чся, плоть быв во чре́ве Твое́м,/ но Бог вочелове́чся и пребы́сть,/ И́же по рождестве́ Ма́терь Тя Де́ву,/ я́ко пре́жде рождества́, сохрани́в Всенепоро́чну, Еди́н Госпо́дь;/ Того́ приле́жно моли́ дарова́ти нам ве́лию ми́лость.
Песнь 4
Кано́н покая́нный (в понеде́льник у́тра). Глас 4. На 6. + Кано́н безпло́тных (в понеде́льник у́тра). Глас 4. На 4. + Кано́н проро́ка Агге́я. Глас 7. На 4.
Песнь 4
Ирмос, глас 4: Седя́й в сла́ве на престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спасе́ зову́щыя: сла́ва, Христе́, си́ле Твое́й.
Припев: Поми́луй мя, Бо́же, поми́луй мя.
Я́ко судии́ пра́веднейшему ны́не припа́даю Ти́, Го́споди, осужде́нна и отча́яннаго мя́ уще́дри, и пра́веднаго Твоего́ изба́ви изрече́ния, и стоя́ния избра́нных сподо́би.
Припев: Поми́луй мя, Бо́же, поми́луй мя.
В разбо́йники впа́дша неукроти́мыя, Человеколю́бче, и уя́звлена бы́вша исцели́, Христе́, возлива́я на мя́ покая́ния вино́ и еле́й и одева́я мя́ оде́ждою спасе́ния моего́.
Припев: Святи́и му́ченицы, моли́те Бо́га о нас.
Мученичен: Облеко́стеся свы́ше ри́зою спасе́ния, в совлече́нии теле́снем всехва́льнии му́ченицы, и совле́кшаго пре́жде пра́отца обнажи́сте, без дыха́ния ме́ртва сотво́рше.
Припев: Святи́и му́ченицы, моли́те Бо́га о нас.
Мученичен: Вити́йствующе пред беззако́нными му́ченицы, Бо́жия сло́ва ра́зумом благоче́стия украша́еми, мудрецы́ и вити́и вся́ посрами́сте нече́ствующыя, и врага́ умертви́вше.
Припев: Пресвята́я Богоро́дице, спаси́ нас.
Богородичен: На Тя́ я́коже до́ждь, прему́дрости бе́здна Иису́с сни́де, еди́ну Чи́стую Тебе́ обре́т, Богороди́тельнице Де́во, и загради́ нече́стия пото́ки лю́тыя Боже́ственною благода́тию.
Припев: Святи́и арха́нгели и а́нгели, моли́те Бо́га о нас.
Непостижи́мою си́лою от небытия́ приве́л еси́ небе́сныя умы́, сло́ве Бо́жий пресу́щественный, и неизрече́нною Твое́ю сла́вою украси́л еси́, зову́щыя: сла́ва, Христе́, си́ле Твое́й.
Припев: Святи́и арха́нгели и а́нгели, моли́те Бо́га о нас.
Управля́еми вы́шния си́лы ду́хом, и брозда́ми его́, и Боже́ственными заря́ми облиста́еми, неотпа́дающыя чи́ны насле́доваша, еди́но чту́ще все́х нача́ло и Божество́.
Припев: Святи́и арха́нгели и а́нгели, моли́те Бо́га о нас.
Лица́ Твоего́ добро́ту кра́сную зре́ти, сподо́бишася служи́тельныя Твоя́ све́тлости, и отону́ду разуме́ния восприе́млюще, Тебе́ вопию́т: сла́ва, Христе́, си́ле Твое́й.
Припев: Пресвята́я Богоро́дице, спаси́ нас.
Богородичен: Цари́ца Де́во, злато́ю оде́ждою укра́шена, Сы́ну Царю́ ны́не предстои́т, Я́же без сравне́ния а́нгел превы́шши, зову́щих: сла́ва, Христе́, си́ле Твое́й.
Припев: Святы́й проро́че Агге́е, моли́ Бо́га о на́с.
Показа́л еси́ из Де́вы одушевле́нный прия́тый тебе́ дом/ Твоему́ проро́ку, Христе́, с ни́мже вопие́м:/ сла́ва си́ле Твое́й, Го́споди.
Припев: Святы́й проро́че Агге́е, моли́ Бо́га о на́с.
Собра́л еси́ отринове́нныя, Го́споди,/ рабо́ты вра́жия свобожде́й нас,/ я́коже проро́к глаго́лет Богоприя́тный.
Сла́ва Отцу́, и Сы́ну, и Свято́му Ду́ху.
Яви́л еси́ бу́дущее последи́ спасе́ние язы́ков/ Твоему́ проро́ку, Христе́, Тебе́ вопию́щу:/ сла́ва си́ле Твое́й, Го́споди.
И ны́не, и при́сно, и во ве́ки веко́в. Ами́нь.
Богородичен: Преложи́ла еси́ на благослове́ние, Влады́чице,/ прокля́тство Ада́мово, нам ро́ждши Христа́./ К Нему́же вопие́м:/ сла́ва си́ле Твое́й, Го́споди.
Песнь 5
Кано́н покая́нный (в понеде́льник у́тра). Глас 4. На 6. + Кано́н безпло́тных (в понеде́льник у́тра). Глас 4. На 4. + Кано́н проро́ка Агге́я. Глас 7. На 4.
Песнь 5
Ирмос, глас 4: Ны́не воста́ну, проро́чески рече́ Бо́г, ны́не просла́влюся, ны́не вознесу́ся, па́дшаго прие́м от Де́вы, и к Све́ту у́мному вознося́й Моего́ Божества́.
Припев: Поми́луй мя, Бо́же, поми́луй мя.
О ка́ко осужде́н хощу́ предста́ти Тебе́, Судии́ Бо́гу все́х, и обличе́н бы́ти о все́х злы́х, и́хже без ума́ согреши́х во́лею, и всего́ себе́ непотре́бна сотвори́х!
Припев: Поми́луй мя, Бо́же, поми́луй мя.
Спаси́ мя, Го́споди, я́ко зо́л испо́лнихся мно́гих, и молю́ся: исцели́ грехи́ моя́ и гное́ния лю́тая, и не оста́ви поги́бнути мя́ еди́наго, Иису́се мо́й, мно́го Ти́ согреши́вшаго.
Припев: Святи́и му́ченицы, моли́те Бо́га о нас.
Мученичен: Кончи́ну блаже́нну обре́тше страда́льцы я́ве, сла́ву улучи́ша, Христа́ прославля́юще свои́ми у́ды, страстоположи́теля, я́звам и ра́нам причаща́тися му́жески предразсужда́юще.
Припев: Святи́и му́ченицы, моли́те Бо́га о нас.
Мученичен: Бога́тство небе́сное, житие́м Боже́ственным и кра́сным, вене́ц неувяда́емый, и све́т невече́рний, и жили́ще ника́коже обетша́емое нерукотворе́нно насле́довасте, страда́льцы христо́вы блаже́ннии.
Припев: Пресвята́я Богоро́дице, спаси́ нас.
Богородичен: Твоя́ чудеса́ проро́честии прореко́ша гла́си, го́ру нарица́юще Тя́, Пречи́стая, и две́рь, и свети́льник све́тел: из него́же вои́стинну све́т чу́дный просвеща́ет, Чи́стая, ми́р ве́сь.
Припев: Святи́и арха́нгели и а́нгели, моли́те Бо́га о нас.
Тре́петно сла́вят Херуви́ми, и Серафи́ми, со Престо́лы, и Боже́ственнии Арха́нгели, и Госпо́дьствия, и Си́лы, и Нача́ла, и вла́сти со А́нгелы, честно́е еди́но и тро́ическое Божество́.
Припев: Святи́и арха́нгели и а́нгели, моли́те Бо́га о нас.
Тре́петно сла́вят Херуви́ми, и Серафи́ми, со Престо́лы, и Боже́ственнии Арха́нгели, и Госпо́дьствия, и Си́лы, и Нача́ла, и вла́сти со А́нгелы, честно́е еди́но и тро́ическое Божество́.
Припев: Святи́и арха́нгели и а́нгели, моли́те Бо́га о нас.
Яви́шася А́нгели светови́дно сия́юще, Христе́, Твое́ Воскресе́ние пропове́дающе в ми́ре преподо́бным жена́м, и враго́в Твои́х сотряса́юще у́м блиста́ньми Твоего́ Божества́.
Припев: Пресвята́я Богоро́дице, спаси́ нас.
Богородичен: Ны́не сохрани́ ополче́ние арха́нгельскими Це́рковь Твою́, Тебе́ сла́вящую правосла́вными гла́сы, и́же от Де́вы неизрече́нно рожде́йся, и челове́ки от тли́ избавля́яй.
Припев: Святы́й проро́че Агге́е, моли́ Бо́га о на́с.
Хра́мы бы́ти Бо́га Жива́го, блаже́нне, сподо́би/ светоно́сный твой соверша́ющия пра́здник,/ на ка́мени утверди́в твои́х догма́тов моли́твами твои́ми.
Припев: Святы́й проро́че Агге́е, моли́ Бо́га о на́с.
Я́ко Благоде́тель, Твой мир даждь нам, Го́споди,/ я́же на устрое́ние, мир душе́вный,/ его́же Боже́ственный Агге́й Ду́хом Боже́ственным предглаго́ла.
Сла́ва Отцу́, и Сы́ну, и Свято́му Ду́ху.
Вели́ко бу́дет Це́ркве и́стинно благосла́вие,/ па́че пе́рваго Изра́илева со́нмища/ вопло́щшагося Сло́ва и челове́ком приобщи́вшася.
И ны́не, и при́сно, и во ве́ки веко́в. Ами́нь.
Богородичен: Благослове́нная препросла́вленная Ма́ти Неискусому́жная,/ умерщвле́нную грехми́ ду́шу мою́/ и страстьми́ невоздержа́ния погребе́нную оживотвори́.
Песнь 6
Кано́н покая́нный (в понеде́льник у́тра). Глас 4. На 6. + Кано́н безпло́тных (в понеде́льник у́тра). Глас 4. На 4. + Кано́н проро́ка Агге́я. Глас 7. На 4.
Песнь 6
Ирмос, глас 4: Приидо́х во глубины́ морски́я, и потопи́ла мя́ е́сть бу́ря мно́гих грехо́в: но я́ко Бо́г из глубины́ возведи́ живо́т мо́й, Многоми́лостиве.
Припев: Поми́луй мя, Бо́же, поми́луй мя.
Ме́ртв сы́й не разуме́ю, не чу́вствуя окая́нный, и со́весть оскверне́ну нося́ при́сно: Бо́же Созда́телю мо́й, да не до конца́ погуби́ши мене́.
Припев: Поми́луй мя, Бо́же, поми́луй мя.
Дея́ния моя́ я́коже врази́ оклевета́ти мя́ хотя́т на суди́щи твое́м, Ще́дре: от ни́хже ско́ро изба́ви, Христе́, наставля́я мя́ к покая́нию.
Припев: Святи́и му́ченицы, моли́те Бо́га о нас.
Мученичен: Сокруши́ ко́сти страстоно́сец собо́р законопресту́пных, но не сокруши́ те́х ве́ру, ея́же ра́ди насле́дницы яви́шася Бо́гу, и Спа́су ду́ш на́ших.
Припев: Святи́и му́ченицы, моли́те Бо́га о нас.
Мученичен: Я́ко честно́е ка́мение, на ка́мени непоколе́блеме наде́жди богому́дренно назда́шася страстоно́сцы, и я́ко хра́мы Свята́го Ду́ха, в хра́м Бо́жий всели́шася.
Припев: Пресвята́я Богоро́дице, спаси́ нас.
Богородичен: Омрачи́вшееся се́рдце мое́ те́мными наи́тии греха́, Све́том, и́же в Тебе́, Богоневе́стная, озари́, я́ко со́лнце Христа́ ро́ждшая.
Припев: Святи́и арха́нгели и а́нгели, моли́те Бо́га о нас.
О́крест Влады́ки предстоя́ще а́нгельская во́инства, и чи́сте наслажда́ющеся сия́нием нача́ла све́тлаго, просвети́те ве́рою ва́с пою́щих.
Припев: Святи́и арха́нгели и а́нгели, моли́те Бо́га о нас.
О́крест Влады́ки предстоя́ще а́нгельская во́инства, и чи́сте наслажда́ющеся сия́нием нача́ла све́тлаго, просвети́те ве́рою ва́с пою́щих.
Припев: Святи́и арха́нгели и а́нгели, моли́те Бо́га о нас.
Прему́дростию Твое́ю сотвори́вый А́нгельския ли́ки, Госпо́дьствия же и Си́лы, и Серафи́мы, я́ко Влады́ка показа́л еси́, хвала́ми Тя́ чту́щыя.
Припев: Пресвята́я Богоро́дице, спаси́ нас.
Богородичен: Я́ко на престо́лех превознесе́нных, Христе́, почива́яй, и вся́ческая Боже́ственным про́мыслом соблюда́яй, на руку́ деви́ческую Влады́ко почи́л еси́.
Припев: Святы́й проро́че Агге́е, моли́ Бо́га о на́с.
Ю́ношески благоче́стию, блаже́нне, уча́,/ воздви́гл еси́ Влады́це всех храм освяще́н,/ оби́лие благи́х обеща́я.
Припев: Святы́й проро́че Агге́е, моли́ Бо́га о на́с.
Возве́л еси́ от да́льняго, Спа́се, плене́ния челове́ка,/ из глубины́ до́льнейшия,/ и к Го́рнему гра́ду возве́л еси́ его́ я́ко Человеколю́бец.
Сла́ва Отцу́, и Сы́ну, и Свято́му Ду́ху.
Ра́дуяся, Ду́ха заре́ю, проро́че,/ проре́кл еси́ де́ятельных словеса́/ и благоче́стия наказа́л еси́ нас оправда́нием.
И ны́не, и при́сно, и во ве́ки веко́в. Ами́нь.
Богородичен: Хоте́нием пад, изгна́ся Ада́м из рая́,/ Сло́во же, вопло́щся из Де́вы,/ сего́ взыва́ет и к Го́рней сла́дости возводи́т.
Катавасия
Ирмос, глас 7: Ио́на из чре́ва а́дова вопия́ше:/ возведи́ от тли живо́т мой./ Мы же Тебе́ вопие́м:/ Всеси́льне Спа́се, поми́луй нас.
Кондаки по 6 песне
Кондак
Глас 4: Просвети́вшееся Ду́хом чи́стое твое́ се́рдце,/ проро́чества бы́сть светле́йшаго прия́телище:/ зри́ши бо я́ко настоя́щая дале́че су́щая:/ сего́ ра́ди тя́ почита́ем,/ проро́че блаже́нне, Агге́е сла́вне.
Песнь 7
Кано́н покая́нный (в понеде́льник у́тра). Глас 4. На 6. + Кано́н безпло́тных (в понеде́льник у́тра). Глас 4. На 4. + Кано́н проро́ка Агге́я. Глас 7. На 4.
Песнь 7
Ирмос, глас 4: Ю́ноши три́ в Вавило́не, веле́ние мучи́телево на бу́йство прело́жше, посреде́ пла́мене вопия́ху: благослове́н еси́ Го́споди Бо́же оте́ц на́ших.
Припев: Поми́луй мя, Бо́же, поми́луй мя.
Кому́ Тя уподо́блю, душе́ моя́ окая́нная, увы́ мне́, лю́бящую безме́стная, а не до́брая взыску́ющую? Те́мже пре́жде конца́ потщи́ся о́бразы благи́я показа́ти.
Припев: Поми́луй мя, Бо́же, поми́луй мя.
Ту́чу ми́, Христе́, сле́з да́ждь, я́ко да от лю́тых мои́х измы́юся, и не оста́ви мене́, Спа́се, ны́не поги́бнути, согреши́вшаго Ти́ мно́го па́че челове́к.
Припев: Святи́и му́ченицы, моли́те Бо́га о нас.
Мученичен: Ме́ртвость умерщвле́ннаго сло́ва нося́ще на те́ле свое́м, пре́лесть умертви́сте: живете́ же и уме́рше сла́внии, и умерщвле́нныя страстьми́ страда́льцы врачу́ете.
Припев: Святи́и му́ченицы, моли́те Бо́га о нас.
Мученичен: Ко́е ме́сто ны́не не и́мать ва́с му́ченицы просвети́тели, и предгра́дие? Ка́я страна́ не освяща́ется ва́шими страда́ньми сла́внии, и восто́ками исцеле́ний?
Припев: Пресвята́я Богоро́дице, спаси́ нас.
Богородичен: Еди́на пребыва́еши по Рождестве́, Влады́чице, де́вственною добро́тою сия́ющи, еди́на ма́терних избе́гла еси́ боле́зней: Бо́га бо еди́на родила́ еси́, изба́вителя ду́ш на́ших.
Припев: Святи́и арха́нгели и а́нгели, моли́те Бо́га о нас.
Свиде́тели соде́янным иму́ще мы́сленныя А́нгелы, избере́м чи́стое житие́ душе́ моя́, вопию́ще: благослове́н еси́ Го́споди Бо́же оте́ц на́ших.
Припев: Святи́и арха́нгели и а́нгели, моли́те Бо́га о нас.
Свиде́тели соде́янным иму́ще мы́сленныя А́нгелы, избере́м чи́стое житие́ душе́ моя́, вопию́ще: благослове́н еси́ Го́споди Бо́же оте́ц на́ших.
Припев: Святи́и арха́нгели и а́нгели, моли́те Бо́га о нас.
У́глем очище́нный, престо́лу Твоему́ предстоя́щыя зри́т серафи́мы, Боже́ственный вопия́ Иса́иа: благослове́н еси́ Го́споди Бо́же оте́ц на́ших.
Припев: Пресвята́я Богоро́дице, спаси́ нас.
Богородичен: Чи́ны все́х безпло́тных, Де́во, я́ве превосхо́диши, я́ко Творца́ ро́ждши и Го́спода: благослове́н, Пречи́стая, пло́д Твоего́ чре́ва.
Припев: Святы́й проро́че Агге́е, моли́ Бо́га о на́с.
Очи́стив твой ум,/ восприя́л еси́ сия́ния я́ве, проро́че, Ду́ха, све́тло прорица́я и взыва́я:/ благослове́н еси́, Го́споди, Бо́же оте́ц на́ших.
Припев: Святы́й проро́че Агге́е, моли́ Бо́га о на́с.
Очи́стив твой ум,/ восприя́л еси́ сия́ния я́ве, проро́че, Ду́ха, све́тло прорица́я и взыва́я:/ благослове́н еси́, Го́споди, Бо́же оте́ц на́ших.
Сла́ва Отцу́, и Сы́ну, и Свято́му Ду́ху.
Свяще́ннейшую тя жи́знь проходя́ща ви́дев Бог,/ проро́ка предлага́ет Своего́ прише́ствия, всем вопию́ща:/ благослове́н еси́, Го́споди, Бо́же оте́ц на́ших.
И ны́не, и при́сно, и во ве́ки веко́в. Ами́нь.
Богородичен: В пещи́ о́гненней три о́троки спасы́й, Де́во,/ Той, всели́вся во утро́бу Твою́,/ на Того́ наде́ющияся спаса́ет, вопию́щия:/ благослове́н, Всечи́стая, Плод чре́ва Твоего́.
Песнь 8
Кано́н покая́нный (в понеде́льник у́тра). Глас 4. На 6. + Кано́н безпло́тных (в понеде́льник у́тра). Глас 4. На 4. + Кано́н проро́ка Агге́я. Глас 7. На 4.
Песнь 8
Ирмос, глас 4: Изба́вителю все́х, Всеси́льне, посреде́ пла́мене благоче́ствовавшыя, снизше́д ороси́л еси́, и научи́л еси́ пе́ти: вся́ дела́ благослови́те, по́йте Го́спода.
Припев: Поми́луй мя, Бо́же, поми́луй мя.
Яви́хся ското́м подо́бен безслове́сным, подклони́вся страсте́м. Сло́ве Бо́жий пребезнача́льне, обрати́в мя́, спаси́ вопию́ща: благослови́те вся́ дела́ Госпо́дня Го́спода.
Припев: Поми́луй мя, Бо́же, поми́луй мя.
Озоба́ ве́прь, позоба́ еди́нок мя́, Спа́се, я́коже виногра́д возде́ланный ду́хом: от него́же изба́ви мя́, Сло́ве, и плодоно́сна доброде́тельми а́бие Тебе́ покажи́.
Припев: Святи́и му́ченицы, моли́те Бо́га о нас.
Мученичен: Оброще́ния кро́вная очервлени́ша багряни́цу ва́м боготка́нную, е́юже украси́стеся му́ченицы, венцы́ нося́ще побе́ды, и́же в вы́шних Царю́ ве́чному предстоите́.
Припев: Святи́и му́ченицы, моли́те Бо́га о нас.
Мученичен: Свяще́нное му́чеников сосло́вие несвяще́нное разруши́ согла́сие, беззако́нновати повелева́ющее, и зако́нно пострада́в, от Влады́ки все́х зако́нно венча́ся.
Припев: Пресвята́я Богоро́дице, спаси́ нас.
Богородичен: Благослови́т вся́ тва́рь рождество́ Твое́, благослове́ньми на́с венча́вшее, и от кля́твы изъе́мшее, Всеблагослове́нная еди́на, и препросла́вленная, я́же ро́д на́ш облагода́тившая.
Припев: Святи́и арха́нгели и а́нгели, моли́те Бо́га о нас.
Я́ко сы́й живо́т безсме́ртный, безсме́ртному животу́ причаща́тися зижди́тельне сотвори́л еси́ А́нгелы, и научи́л еси́ пе́ти: благослови́те, по́йте Го́спода.
Припев: Святи́и арха́нгели и а́нгели, моли́те Бо́га о нас.
Я́ко сы́й живо́т безсме́ртный, безсме́ртному животу́ причаща́тися зижди́тельне сотвори́л еси́ А́нгелы, и научи́л еси́ пе́ти: благослови́те, по́йте Го́спода.
Припев: Святи́и арха́нгели и а́нгели, моли́те Бо́га о нас.
Мы́сленно обстоя́ще Тя́ Арха́нгели, непреста́нными гла́сы воспева́ют, боголе́пно чту́ще Тя́ я́ко Влады́ку все́х: благослови́те, по́йте Го́спода.
Припев: Пресвята́я Богоро́дице, спаси́ нас.
Богородичен: Зако́ннии о́брази прообража́ху Тя́, Всеблаже́нная, ро́ждшую Бо́га, ве́щи пло́тстей соединя́ема, пре́жде невеще́ственна су́ща Боже́ственным естество́м: благослови́м, Де́во, Рождество́ Твое́.
Припев: Святы́й проро́че Агге́е, моли́ Бо́га о на́с.
Песносло́вим тя, всех Влады́ку,/ Его́же проро́к Богови́дец Агге́й показа́ покланя́тися же и пе́ти:/ по́йте, свяще́нницы, лю́дие, превозноси́те Его́ во ве́ки.
Припев: Святы́й проро́че Агге́е, моли́ Бо́га о на́с.
Песносло́вим тя, всех Влады́ку,/ Его́же проро́к Богови́дец Агге́й показа́ покланя́тися же и пе́ти:/ по́йте, свяще́нницы, лю́дие, превозноси́те Его́ во ве́ки.
Благослови́м Отца́ и Сы́на и Свята́го Ду́ха, Го́спода.
Сло́ву Безнача́льному в после́дних времене́х яви́тися, Богови́дче проро́че,/ провозвести́л еси́ явле́нно, взыва́я:/ по́йте, свяще́нницы, лю́дие, превозноси́те Его́ во ве́ки.
И ны́не, и при́сно, и во ве́ки веко́в. Ами́нь.
Богородичен: Пре́жде Неви́денный и Невмести́мый естество́м,/ во чре́во Твое́ вме́щся, ви́ден бысть, Всечи́стая./ Ему́же ве́рно вопие́м:/ по́йте, свяще́нницы, лю́дие, превозноси́те Его́ во ве́ки.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Катавасия
Ирмос, глас 7: Еди́наго Безнача́льнаго Царя́ Сла́вы,/ Его́же благословя́т Небе́сныя си́лы/ и трепе́щут чи́ни А́нгельстии,/ по́йте, свяще́нницы,/ лю́дие, превозноси́те Его́ во ве́ки.
Песнь Богородице
Диакон: Богоро́дицу и Мате́рь Све́та в пе́снех возвели́чим.
Песнь Пресвятыя Богородицы
Лик: Вели́чит душа́ Моя́ Го́спода, и возра́довася дух Мой о Бо́зе Спа́се Мое́м.
Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Я́ко призре́ на смире́ние Рабы́ Своея́, се бо от ны́не ублажа́т Мя вси ро́ди.
Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.
Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Сотвори́ держа́ву мы́шцею Свое́ю, расточи́ го́рдыя мы́слию се́рдца их.
Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Низложи́ си́льныя со престо́л, и вознесе́ смире́нныя; а́лчущия испо́лни благ, и богатя́щияся отпусти́ тщи.
Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.
Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Песнь 9
Кано́н покая́нный (в понеде́льник у́тра). Глас 4. На 6. + Кано́н безпло́тных (в понеде́льник у́тра). Глас 4. На 4. + Кано́н проро́ка Агге́я. Глас 7. На 4.
Песнь 9
Ирмос, глас 4: Е́ва у́бо неду́гом преслуша́ния кля́тву всели́ла е́сть: ты́ же, Де́во Богоро́дице, прозябе́нием чревоноше́ния, ми́рови благослове́ние процвела́ е́сть: те́м Тя́ вси́ велича́ем.
Припев: Поми́луй мя, Бо́же, поми́луй мя.
Се́ покая́ния вре́мя, что́ лени́мся, что́ сно́м погружа́емся? Уны́ния да отсту́пим, украси́м свещы́, я́коже пи́шет, еле́ем благотворе́ния: да не оста́нем внеу́ду двере́й рыда́ющи.
Припев: Поми́луй мя, Бо́же, поми́луй мя.
До́ндеже е́сть вре́мя пока́ятися, обрати́ся от зо́л Твои́х, душе́ моя́, я́же соде́ла еси́ ве́дением и неве́дением, и возопи́й к ве́дущему вся́: согреши́х Ти́, прости́ Влады́ко, и не гнуша́йся мене́, недосто́йнаго.
Припев: Святи́и му́ченицы, моли́те Бо́га о нас.
Мученичен: Собра́ Христо́с страда́вшыя святы́я явле́ннейше, от вся́кия страны́ и гра́да на ме́ста сла́вная, в честна́я поко́ища, и ны́не перворо́дных Це́рковь просвеща́ют веселя́щеся.
Припев: Святи́и му́ченицы, моли́те Бо́га о нас.
Мученичен: Всечестна́я ра́ка честны́х му́ченик Твои́х, Го́споди, луча́ми Боже́ственнаго ду́ха озаря́ема, пресла́вне исцеле́ния испуща́ет све́тлость, и разоря́ет неду́гов боле́зни, еди́не Многоми́лостиве.
Припев: Пресвята́я Богоро́дице, спаси́ нас.
Богородичен: От све́та, и́же в Тебе́, Богоневе́сто, заря́ми ду́шу мою́ просвети́, лежа́щую в ро́ве поги́бели возста́ви, враги́ сокруша́ющи, оскорбля́ющыя се́рдце мое́ при́сно, и к страсте́м порева́ющыя мя́.
Припев: Святи́и арха́нгели и а́нгели, моли́те Бо́га о нас.
И́же ума́ роди́теля, и предложи́теля Сы́ну и Ду́ху пою́ще А́нгели, ны́не к на́м Боже́ственныя благода́ти подая́ния, приле́жно прие́мше посыла́ти усе́рдствуйте.
Припев: Святи́и арха́нгели и а́нгели, моли́те Бо́га о нас.
И́же ума́ роди́теля, и предложи́теля Сы́ну и Ду́ху пою́ще А́нгели, ны́не к на́м Боже́ственныя благода́ти подая́ния, приле́жно прие́мше посыла́ти усе́рдствуйте.
Припев: Святи́и арха́нгели и а́нгели, моли́те Бо́га о нас.
Красно́ удобря́еми нетле́ния да́ром и благода́тию, Боже́ственнии Арха́нгели, Тебе́ Исто́чника Христе́ присносу́щна нетле́ния, пою́ще я́ко Благода́теля велича́ют.
Припев: Пресвята́я Богоро́дице, спаси́ нас.
Богородичен: Неве́стник воплоще́ния неизрече́ннаго, и черто́г одушевле́нный, и ковче́г зако́на благода́ти Тя́, Богома́ти, ве́рнии све́мы: те́мже Тя́ непреста́нно велича́ем.
Припев: Святы́й проро́че Агге́е, моли́ Бо́га о на́с.
Вкуси́в е́же па́че сло́ва Боговиде́ния,/ оттря́сл еси́, проро́че, попече́ния земна́я/ и препросла́вленному Бо́гу предста́л еси́ досто́йно./ Те́мже вси тя, ве́рнии, ублажа́ем.
Припев: Святы́й проро́че Агге́е, моли́ Бо́га о на́с.
Боже́ственное и чу́дное твое́, блаже́нне, житие́/ предста́теля тя Бо́гу показа́, Богому́дре,/ и со Безпло́тными ли́ки весели́шися ве́чно./ Те́мже вси тя при́сно ублажа́ем.
Сла́ва Отцу́, и Сы́ну, и Свято́му Ду́ху.
Подоба́ше тебе́, я́ко благоче́стия учи́телю, с Бо́гом бы́ти/ и Сего́ страствори́тися Пречи́стейшему Све́ту,/ Его́же, блаже́нне, ны́не моли́ изба́вити искуше́ний ду́ши на́ша.
И ны́не, и при́сно, и во ве́ки веко́в. Ами́нь.
Богородичен: Ты была́ еси́ преесте́ственно, Богороди́тельнице, жили́ще и́стинно всех Царя́/ и златови́дный ковче́г, Еди́наго Законода́вца внутрь име́я,/ Христа́ воплоща́ема.
Катавасия
Ирмос, глас 7: Всепе́тая, Небе́с превы́шшая,/ Безнача́льное Сло́во безсе́менно заче́ншая/ и воплоще́ннаго Бо́га ро́ждшая челове́ком,/ тем Тя вси велича́ем.
Достойно есть...
Досто́йно есть...
Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.
Светильны
Cветильны
Не́бо звезда́ми украси́вый я́ко Бо́г, и Твои́ми а́нгелы всю́ зе́млю просвети́вый, Соде́телю все́х, пою́щыя Тя́ спаса́й.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен: Сла́дость а́нгелов, скорбя́щих ра́дость, христиа́н предста́тельница Де́во Ма́ти Госпо́дня, заступи́ на́с, и изба́ви ве́чных му́к.
Хвалитные стихиры
На 6: Сотвори́ти в них суд напи́сан, сла́ва сия́ бу́дет всем преподо́бным Его.
Псалом 150
Хвали́те Бо́га во святы́х Его́, хвали́те Его́ во утверже́нии си́лы Его́.
На 4: Хвали́те Его́ на силах Его, / хвали́те Его́ по мно́жеству вели́чествия Его́.
Хвали́те Его́ во гла́се тру́бнем, / хвали́те Его́ во псалти́ри и гу́слех.
Хвали́те Его́ в тимпа́не и ли́це, / хвали́те Его́ во стру́нах и орга́не.
Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Тебе́ сла́ва подоба́ет, Го́споди Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно, и во ве́ки веко́в. Ами́нь.
На стиховне
Стихиры на стиховне
Глас 4: Омы́й мя́ слеза́ми мои́ми, Спа́се, я́ко оскверни́хся мно́гими грехи́. Те́мже и припа́даю Ти́: согреши́х, Бо́же, поми́луй мя́.
Стих: Испо́лнихомся зау́тра ми́лости Твоея́, Го́споди, и возра́довахомся и возвесели́хомся: во вся́ дни́ на́шя возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.
Глас 4: Овча́ е́смь слове́снаго Твоего́ ста́да, и к Тебе́ прибега́ю, Па́стырю до́брому: взыщи́ мене́ заблу́ждшаго, Бо́же, и поми́луй мя́.
Стих: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.
Глас 4: Кто́ не ужаса́ется, зря́, святи́и му́ченицы, по́двига до́браго ва́шего, и́мже подвиза́стеся? Ка́ко во пло́ти су́ще, безпло́тнаго врага́ победи́сте, Христа́ испове́дающе, и кресто́м вооружи́вшеся! Те́мже досто́йно яви́стеся бесо́в прогони́телие, и ва́рваров сопротивобо́рцы, непреста́нно моля́щеся, спасти́ся душа́м на́шым.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Глас 4: Богоро́дице все́х Цари́це, правосла́вных похвало́, ерети́чествующих шата́ния разори́, и ли́ца и́х посрами́, не кла́няющихся, ниже́ чту́щих, Пречи́стая, честны́й Тво́й о́браз.
Тропари в конец утрени
Глас 2: Проро́ка Твоего́ Агге́я па́мять, Го́споди, пра́зднующе,/ те́м Тя́ мо́лим,/ спаси́ ду́ши на́ша.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 2: Мати Свята́я неизреченнаго Света, ангельскими Тя песньми почитающе, благочестно величаем.
Отпуст
Евангельская стихира
На часах
1-й Час
Сла́ва Отцу́, и Сы́ну, и Свято́му Ду́ху.
Тропарь прор. Агге́я, глас 2
Проро́ка Твоего́ Агге́я па́мять, Го́споди, пра́зднующе,/ те́м Тя́ мо́лим,/ спаси́ ду́ши на́ша.
И ны́не, и при́сно, и во ве́ки веко́в. Ами́нь.
Кафизм нет
Паремии
Евангелие
Кондак прор. Агге́я, глас 4
Просвети́вшееся Ду́хом чи́стое твое́ се́рдце,/ проро́чества бы́сть светле́йшаго прия́телище:/ зри́ши бо я́ко настоя́щая дале́че су́щая:/ сего́ ра́ди тя́ почита́ем,/ проро́че блаже́нне, Агге́е сла́вне.
Отпуст
Христо́с И́стинный Бог наш, моли́твами Пречи́стыя Своея́ Ма́тере, предста́тельствы честны́х Небе́сных Сил Безпло́тных: святы́х сла́вных и всехва́льных Апо́стол, Престольный праздник, прор. Агге́я, святы́х пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко Благ и Человеколю́бец.3-й Час
Сла́ва Отцу́, и Сы́ну, и Свято́му Ду́ху.
Тропарь прор. Агге́я, глас 2
Проро́ка Твоего́ Агге́я па́мять, Го́споди, пра́зднующе,/ те́м Тя́ мо́лим,/ спаси́ ду́ши на́ша.
И ны́не, и при́сно, и во ве́ки веко́в. Ами́нь.
Кафизм нет
Паремии
Евангелие
Кондак прор. Агге́я, глас 4
Просвети́вшееся Ду́хом чи́стое твое́ се́рдце,/ проро́чества бы́сть светле́йшаго прия́телище:/ зри́ши бо я́ко настоя́щая дале́че су́щая:/ сего́ ра́ди тя́ почита́ем,/ проро́че блаже́нне, Агге́е сла́вне.
6-й Час
Сла́ва Отцу́, и Сы́ну, и Свято́му Ду́ху.
Тропарь прор. Агге́я, глас 2
Проро́ка Твоего́ Агге́я па́мять, Го́споди, пра́зднующе,/ те́м Тя́ мо́лим,/ спаси́ ду́ши на́ша.
И ны́не, и при́сно, и во ве́ки веко́в. Ами́нь.
Кафизм нет
Паремии
Евангелие
Кондак прор. Агге́я, глас 4
Просвети́вшееся Ду́хом чи́стое твое́ се́рдце,/ проро́чества бы́сть светле́йшаго прия́телище:/ зри́ши бо я́ко настоя́щая дале́че су́щая:/ сего́ ра́ди тя́ почита́ем,/ проро́че блаже́нне, Агге́е сла́вне.
9-й Час
Сла́ва Отцу́, и Сы́ну, и Свято́му Ду́ху.
Тропарь прор. Агге́я, глас 2
Проро́ка Твоего́ Агге́я па́мять, Го́споди, пра́зднующе,/ те́м Тя́ мо́лим,/ спаси́ ду́ши на́ша.
И ны́не, и при́сно, и во ве́ки веко́в. Ами́нь.
Кафизм нет
Паремии
Евангелие
Кондак прор. Агге́я, глас 4
Просвети́вшееся Ду́хом чи́стое твое́ се́рдце,/ проро́чества бы́сть светле́йшаго прия́телище:/ зри́ши бо я́ко настоя́щая дале́че су́щая:/ сего́ ра́ди тя́ почита́ем,/ проро́че блаже́нне, Агге́е сла́вне.
На Литургии Иоанна Златоуста
Антифоны
Антифон 1
Первый вседневный антифон
1 Лик: Бла́го есть/ испове́датися Го́сподеви. Молитвами Богородицы, Спасе, спаси нас.
2 Лик: Благо есть исповедатися Господеви, и пети имени Твоему, Вышний. Моли́твами Богоро́дицы, Спа́се, спаси́ нас.
1 Лик: Возвеща́ти зау́тра ми́лость Твою́/ и и́стину Твою́ на вся́ку нощь. Моли́твами Богоро́дицы, Спа́се, спаси́ нас.
2 Лик: Я́ко прав Госпо́дь Бог наш,/ и несть непра́вды в Нем. Моли́твами Богоро́дицы, Спа́се, спаси́ нас.
1 Лик: Сла́ва Отцу́ и Сы́ну/ и Свято́му Ду́ху: Моли́твами Богоро́дицы, Спа́се, спаси́ нас.
2 Лик: И ны́не и при́сно/ и во ве́ки веко́в. Ами́нь. Моли́твами Богоро́дицы, Спа́се, спаси́ нас.
Антифон 2
Второй вседневный антифон
1 Лик: Госпо́дь воцари́ся,/ в ле́поту облече́ся. Моли́твами святы́х Твои́х, Спа́се, спаси́ нас.
2 Лик: Госпо́дь воцари́ся, в ле́поту облече́ся:/ облече́ся Госпо́дь в си́лу и препоя́сася. Моли́твами святы́х Твои́х, Спа́се, спаси́ нас.
1 Лик: И́бо утверди́ вселе́нную,/ я́же не подви́жится. Моли́твами святы́х Твои́х, Спа́се, спаси́ нас.
2 Лик: Свиде́ния Твоя́ уве́ришася зело́,/ до́му Твоему́ подоба́ет святы́ня, Го́споди, в долготу́ дний. Моли́твами святы́х Твои́х, Спа́се, спаси́ нас.
Антифон 3 / Блаженны
Третий вседневный антифон
1 Лик: Прииди́те, возра́дуемся Го́сподеви,/ воскли́кнем Бо́гу Спаси́телю на́шему. Спаси́ ны, Сы́не Бо́жий, во святы́х ди́вен сый, пою́щия Ти: аллилу́иа.
2 Лик: Предвари́м лице́ Его́ во испове́дании,/ и во псалме́х воскли́кнем Ему: Спаси́ ны, Сы́не Бо́жий, во святы́х ди́вен сый, пою́щия Ти: аллилу́иа.
1 Лик: Я́ко Бог Ве́лий Госпо́дь,/ и Царь Ве́лий по всей земли. Спаси ны, Сы́не Бо́жий, во святы́х ди́вен сый, пою́щия Ти: аллилу́иа.
2 Лик: Я́ко в ру́це Его́ вси концы́ земли́, / и высо́ты гор Того́ суть. Спаси ны, Сы́не Бо́жий, во святы́х ди́вен сый, пою́щия Ти: аллилу́иа.
1 Лик: Я́ко Того́ есть мо́ре, и Той сотвори́ е́,/ и су́шу ру́це Его́ созда́сте. Спаси́ ны, Сы́не Бо́жий, во святы́х ди́вен сый, пою́щия ти: аллилу́иа.
Входное
В будни: Прииди́те, поклони́мся и припаде́м ко Христу́. / Спаси́ ны, Сы́не Бо́жий, / во святы́х Ди́вен сый, пою́щия Ти, / Аллилу́иа. Единожды.
Тропари и кондаки на входе
В понедельник, Небесных чинов Бесплотных, глас 4
Небе́сных во́инств Архистрати́зи,/ мо́лим вас при́сно мы недосто́йнии,/ да ва́шими моли́твами оградите́ нас/ кро́вом крил невеще́ственныя ва́шея сла́вы,/ сохраня́юще нас пpипа́дающия приле́жно и вопию́щия:/ от бед изба́вите нас,// я́ко чинонача́льницы вы́шних Сил.
храма святого, глас *
... Укажите в настройках престольный праздник вашего храма ...
Тропарь прор. Агге́я, глас 2
Проро́ка Твоего́ Агге́я па́мять, Го́споди, пра́зднующе,/ те́м Тя́ мо́лим,/ спаси́ ду́ши на́ша.
В понедельник, Небесных чинов Бесплотных, глас 2
Архистрати́зи Бо́жии,/ служи́телие Боже́ственныя сла́вы,/ А́нгелов нача́льницы, и челове́ков наста́вницы,/ поле́зное нам проси́те, и ве́лию ми́лость,// я́ко Безпло́тных Архистрати́зи.
Кондак храма святого, глас *
... Укажите в настройках престольный праздник вашего храма ...
Кондак прор. Агге́я, глас 4
Просвети́вшееся Ду́хом чи́стое твое́ се́рдце,/ проро́чества бы́сть светле́йшаго прия́телище:/ зри́ши бо я́ко настоя́щая дале́че су́щая:/ сего́ ра́ди тя́ почита́ем,/ проро́че блаже́нне, Агге́е сла́вне.
Сла́ва Отцу́, и Сы́ну, и Свято́му Ду́ху.
Кондaк за умерших, глас 8
Со святы́ми упоко́й,/ Христе́,/ ду́ши раб Твои́х,/ иде́же несть боле́знь, ни печа́ль,/ ни воздыха́ние,// но жизнь безконе́чная.
И ны́не, и при́сно, и во ве́ки веко́в. Ами́нь.
Кондaк Пресвятой Богородице, глас 6
Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти:/ ускори́ на моли́тву и потщи́ся на умоле́ние,// предста́тельствующи при́сно, Богоро́дице, чту́щих Тя.
Прокимен
Чтец: Прокимен, глас 4: Творя́й а́нгелы Своя́ ду́хи, / и слуги́ Своя́ пла́мень о́гненный.
Лик: Творя́й а́нгелы Своя́ ду́хи, / и слуги́ Своя́ пла́мень о́гненный.
Чтец: Стих: Благослови́, душе́ моя́, Го́спода, Го́споди Бо́же мой, возвели́чился еси́ зело́.
Лик: Творя́й а́нгелы Своя́ ду́хи, / и слуги́ Своя́ пла́мень о́гненный.
Чтец: Творя́й а́нгелы Своя́ ду́хи,
Лик: и слуги́ Своя́ пла́мень о́гненный.
Апостол
И чтец надписание Апостола: Ко Евре́ем посла́ния свята́го Апо́стола Па́вла чте́ние.
И паки диакон: Во́нмем.
Зачало 319 В понедельник 30-я недели. (Евр.8:7-13)
Бра́тие, а́ще бы пе́рвый зако́н непоро́чен был, не бы второ́му иска́лося ме́сто. Укоря́я бо их глаго́лет: се дни́е гряду́т, глаго́лет Госпо́дь, и совершу́ на дом Изра́илев и на дом Иу́дов заве́т нов, не по заве́ту, его́же сотвори́х отце́м их в день, во́ньже е́мшу ми их за ру́ку, извести́ их от земли́ Еги́петския, зане́ ти́и не пребы́ша в заве́те Мое́м, и Аз неради́х о них, глаго́лет Госпо́дь. Я́ко сей заве́т, его́же завеща́ю дому́ Изра́илеву по о́нех днех, глаго́лет Госпо́дь, дая́ зако́ны Моя́ в мы́сли их, и на сердца́х их напишу́ их, и бу́ду им Бог, и ти́и бу́дут Мне лю́дие. И не и́мать научи́ти ко́ждо и́скренняго своего́ и ко́ждо бра́та своего́, глаго́ля: позна́й Го́спода, я́ко вси уве́дят Мя от ма́ла да́же и до вели́ка их, зане́ ми́лостив бу́ду непра́вдам их и грехо́в их и беззако́ний их не и́мам помяну́ти ктому́. Внегда́ же глаго́лет нов, обветши́ пе́рваго, а обветша́ющее и состаре́ющееся близ есть истле́ния.
Аллилуиарий
Чтец: Аллилу́иа. Аллилу́иа. Аллилу́иа, глас 5.
Лик: Аллилу́иа. Аллилу́иа. Аллилу́иа.
Чтец: Хвали́те Го́спода, вси а́нгели Его́, хвали́те Его́, вся си́лы Его́.
Лик: Аллилу́иа. Аллилу́иа. Аллилу́иа.
Чтец: Стих: Я́ко Той рече́ и бы́ша, Той повеле́ и созда́шася.
Лик: Аллилу́иа. Аллилу́иа. Аллилу́иа.
Евангелие
Диакон: Благослови́, влады́ко, благовести́теля свята́го Апо́стола и Евангели́ста Ма́рка.
Священник, осеняя его крестным знамением, произносит: Бо́г, моли́твами свята́го, сла́внаго, всехва́льнаго Апо́стола и Евангели́ста Ма́рка, да да́ст тебе́ глаго́л благовеству́ющему си́лою мно́гою во исполне́ние Ева́нгелия Возлю́бленнаго Сы́на Своего́, Го́спода на́шего Иису́са Христа́.
И подает ему святое Евангелие.
Диакон: Ами́нь.
Священник: Прему́дрость, про́сти, услы́шим свята́го Ева́нгелия. Таже: Ми́р все́м.
Лик: И ду́хови твоему́.
Диакон: От Ма́рка свята́го Ева́нгелия чте́ние.
Лик: Сла́ва Тебе́, Го́споди, сла́ва Тебе́.
Священник: Во́нмем.
Евангелие от Марка, зачало 42. Понедельник 31-я недели. (Мк.9:42-10:1)
Рече́ Госпо́дь: и́же а́ще соблазни́т еди́наго от ма́лых сих ве́рующих в Мя, до́брее есть ему́ па́че, а́ще облежи́т ка́мень же́рновный о вы́и его́, и вве́ржен бу́дет в мо́ре. И а́ще соблажня́ет тя рука́ твоя́, отсецы́ ю́, до́бре ти есть бе́днику в живо́т вни́ти, не́же о́бе ру́це иму́щу вни́ти в гее́нну, во огнь неугаса́ющий, иде́же червь их не умира́ет, и огнь не угаса́ет. И а́ще нога́ твоя́ соблажня́ет тя, отсецы́ ю́, до́бре ти есть вни́ти в живо́т хро́му, не́же две но́зе иму́щу вве́ржену бы́ти в гее́нну, во огнь неугаса́ющий, иде́же червь их не умира́ет, и огнь не угаса́ет. И а́ще о́ко твое́ соблажня́ет тя, исткни́ е́, до́бре ти есть со еди́нем о́ком вни́ти в Ца́рствие Бо́жие, не́же две о́це иму́щу вве́ржену бы́ти в гее́нну о́гненную, иде́же червь их не умира́ет, и огнь не угаса́ет. Всяк бо огне́м осоли́тся, и вся́ка же́ртва со́лию осоли́тся. Добро́ соль, а́ще же соль не слана́ бу́дет, чим осоли́тся? Име́йте соль в себе́, и мир име́йте между́ собо́ю. И отту́ду воста́ пре́йде в преде́лы Иуде́йския, чрез страну́ я́же об он пол Иорда́на. И снидо́шася па́ки наро́ди к Нему́, и я́ко обы́чай име́, па́ки уча́ше их.
Задостойник
Досто́йно есть...
Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.
Причастен
Творя́й А́нгелы Своя́ ду́хи и слуги́ Своя́ пла́мень о́гненный.
Аллилу́иа. Аллилу́иа. Аллилу́иа.