Минея, 20 Января.
Глас 8
Песнь 1
Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.
Припев: Преподо́бне о́тче Евфи́мие, моли́ Бо́га о на́с.
А́гнче Бо́жий, песнь твоему́ уго́днику, и́же на земли́ Тебе́ просла́вльшему,/ Евфи́мию принести́, Христе́, да́руй,/ я́ко Смыслода́вца пе́сньми возвели́чу Тя.
Припев: Преподо́бне о́тче Евфи́мие, моли́ Бо́га о на́с.
Благоду́шию тезоимени́т быв,/ благоду́шествам ми сподо́би и Бо́гу помоли́ся, о́тче,/ я́ко да пою́ твою́ па́мять пе́сньми Боже́ственными, ра́дуяся.
Сла́ва Отцу́ и Сы́ну и Свято́му Ду́ху.
Весь освяще́н быв благода́тию Христо́вою, о́тче Евфи́мие,/ вои́стинну, я́ко избра́н сосу́д, Бо́гови пока́зася/ и жили́ще чи́сто Свято́му Ду́ху.
И ны́не и при́сно и во ве́ки веко́в. Ами́нь.
Богородичен: Госпо́дь, из Тебе́ роди́вся, Влады́чице Всенепоро́чная,/ облада́юща врага́ ми́ром изба́вил есть вся,/ преподо́бныя же, я́ко возлюби́вшия Сего́, возвели́чил есть.
Песнь 3
Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Припев: Преподо́бне о́тче Евфи́мие, моли́ Бо́га о на́с.
Ду́ха Свята́го зарю́ прии́м,/ я́ко звезда́ пресве́тлая, возсия́л еси́, о́тче Евфи́мие,/ сия́я благода́тию чуде́с всем, и́же ве́рою к тебе́ притека́ющим.
Припев: Преподо́бне о́тче Евфи́мие, моли́ Бо́га о на́с.
Евфи́мию Вели́кому соиме́нна бы́ти себе́ боля́щей жене́ пове́дал еси́, свя́те,/ ю́же от одержа́вшаго ея́ неду́га моли́твами здра́ву сотвори́л еси́.
Сла́ва Отцу́ и Сы́ну и Свято́му Ду́ху.
Жизнь свою́ сотвори́л еси́ в моли́твах и поще́нии,/ зако́нно препроводи́л еси́, о́тче, в безстра́стие облече́ся,/ пло́ти мудрова́ния смири́в кре́постию Боже́ственнаго Ду́ха.
И ны́не и при́сно и во ве́ки веко́в. Ами́нь.
Богородичен: Зачала́ еси́ вои́стинну во утро́бе Свое́й, Богома́ти,/ Безнача́льнаго Бо́га Сло́ва, нас ра́ди в челове́цех бы́вша,/ непрело́жна по нас во двою́ естеству́ познава́ема.
Песнь 4
Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Припев: Преподо́бне о́тче Евфи́мие, моли́ Бо́га о на́с.
Земля́ от свои́х недр предаде́ свяще́нныя твоя́ мо́щи,/ благоуха́нием и чудесы́ удивля́ющия гра́да жи́телей, проро́чески вопию́щих:/ пра́ведницы во ве́ки живу́т.
Припев: Преподо́бне о́тче Евфи́мие, моли́ Бо́га о на́с.
И́же любо́вию творя́щих святу́ю твою́ па́мять/ от вся́ких боле́зней и страсте́й моли́твами свои́ми избавля́й при́сно,/ я́ко дерзнове́ние стяжа́в у Спа́са, о́тче Евфи́мие.
Сла́ва Отцу́ и Сы́ну и Свято́му Ду́ху.
Израсти́вше тя, оте́чество ра́дуется ти днесь,/ и светле́ется Це́рковь Спа́са и Бо́га, иму́щи святы́я твоя́ мо́щи,/ благоуха́ющия и чудеса́ испуща́ющия всем, ве́рою притека́ющим.
И ны́не и при́сно и во ве́ки веко́в. Ами́нь.
Богородичен: Кра́сну обре́т и до́бру в жена́х Тя, Всенепоро́чная,/ прекра́сное Сло́во всели́ся в пресвято́е чре́во Твое́/ и вся ли́ки преподо́бных рождество́м Свои́м возвели́чил есть.
Песнь 5
Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
Припев: Преподо́бне о́тче Евфи́мие, моли́ Бо́га о на́с.
Ле́ты многи́ми сокрыва́емы бя́ху,/ честны́я мо́щи твоя́ в просвеще́ние на́ше яви́шася,/ ны́не источа́юще ре́ки исцеле́ния и чуде́с благода́ти.
Припев: Преподо́бне о́тче Евфи́мие, моли́ Бо́га о на́с.
Мирополо́жнице мы́сленная моще́й ра́ка твоя́ яви́ся,/ преподо́бне о́тче Евфи́мие,/ источа́ющи нам чуде́с ми́ро, к тебе́ прибега́ющим.
Сла́ва Отцу́ и Сы́ну и Свято́му Ду́ху.
На неду́зи разли́чныя исцеле́ния благода́ть дарова́ тебе́ Христо́с,/ преподо́бне о́тче Евфи́мие,/ исцеля́ти вся, ве́рою к тебе́ притека́ющая.
И ны́не и при́сно и во ве́ки веко́в. Ами́нь.
Богородичен: О Тебе́ ра́дуется вся́ко созда́ние Бо́жие,/ Ма́ти Бо́га Вы́шняго,/ Его́же понесла́ еси́, нося́щаго вся,/ и мы, чту́ще Тя вои́стинну я́ко Богоро́дицу,/ в пе́снех велича́ем.
Песнь 6
Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Припев: Преподо́бне о́тче Евфи́мие, моли́ Бо́га о на́с.
Помо́щник ве́лий был еси́, преподо́бне, на мо́ри стра́ждущим челове́ком,/ я́влься на возгла́вии лади́йцы и стоя́,/ и сих изба́вил еси́ от потопле́ния.
Припев: Преподо́бне о́тче Евфи́мие, моли́ Бо́га о на́с.
Разсла́бленнаго неду́гом и неи́стовая глаго́лавшаго к тебе́ принесо́ша, свя́те,/ но, пока́явшася, па́ки здра́ва сего́ ми́лостию свое́ю вско́ре сотвори́л еси́.
Сла́ва Отцу́ и Сы́ну и Свято́му Ду́ху.
Слепы́м е́же зре́ти и разсла́бленным востягнове́ние,/ ско́рбным избавле́ние подае́ши си́лою Христо́вою,/ преподо́бне о́тче Евфи́мие.
И ны́не и при́сно и во ве́ки веко́в. Ами́нь.
Богородичен: Тя Предста́тельницу тве́рду, Богороди́тельнице, стяжа́хом,/ упова́ние на Тя положи́вше, спаса́емся,/ к Тебе́ бо прибега́юще, огражда́емся.
Кондак, глас 3
Пра́зднует днесь Арха́нгелов град пра́здник пресве́тлый светоно́сныя твоея́ па́мяти,/ вся созыва́я окре́стныя его́,/ ра́дуется бо, я́ко стяжа́в сокро́вище ве́лие – честны́я мо́щи твоя́, преподо́бне Евфи́мие,/ его́же сохраня́й всегда́ моли́твами твои́ми от всех зол, да зове́м ти:/ ра́дуйся, о́тче, благоду́шию тезоимени́те.
Икос
Уста́ мне пода́ждь, Пребезнача́льное Сло́во,/ хотя́щу пе́ти твоего́ уго́дника Евфи́мия,/ и́маши бо бога́тство милосе́рдия неизрече́нно, Христе́ мой, твои́х суде́б,/ да и аз душе́внаго мра́ка очи́щуся,/ ума́ же вся́ку скве́рну омы́в, храм свяще́ния де́лы Боже́ственными бу́ду/ и досто́йная воспою́ преподо́бному:/ ра́дуйся, о́тче, благоду́шию тезоимени́те.
Песнь 7
Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.
Припев: Преподо́бне о́тче Евфи́мие, моли́ Бо́га о на́с.
Утро́бою стра́ждущей жене́ во сне яви́ся,/ сосу́д освяще́нный воды́ в ру́ку имы́й,/ и, то́чию сию́ напои́в, здра́ву сотвори́л еси́,/ прославля́я Христа́, тебе́ просла́вльшаго.
Припев: Преподо́бне о́тче Евфи́мие, моли́ Бо́га о на́с.
Фарао́на мы́сленнаго победи́л еси́, от Христа́ дерзнове́ние прии́м,/ исцеля́еши разли́чныя неду́ги всех,/ и́же с ве́рою к тебе́ прибега́ющих.
Сла́ва Отцу́ и Сы́ну и Свято́му Ду́ху.
Храни́тель бу́ди оте́честву своему́ всегда́, преподо́бне о́тче Евфи́мие,/ избавля́я сие́ от гла́да же и па́губы,/ да, твои́ми к Бо́гу моли́твами изба́вльшеся вси,/ я́ко засту́пника тя почита́ем.
И ны́не и при́сно и во ве́ки веко́в. Ами́нь.
Богородичен: Тро́ицы Пребоже́ственныя Пречи́стыя Еди́наго родила́ еси́,/ из Тебе́ пло́тию я́вльшагося по нас благоволе́нием Роди́теля/ и споспеше́нием Ду́ха Свята́го, Богоневе́сто.
Песнь 8
Ирмос: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.
Припев: Преподо́бне о́тче Евфи́мие, моли́ Бо́га о на́с.
Це́ркве Правосла́вней испроси́, о́тче преподо́бне, мир, лю́дем здра́вие и стране́ на враги́ одоле́ние.
Припев: Преподо́бне о́тче Евфи́мие, моли́ Бо́га о на́с.
Чудесы́ у́бо свои́ми, я́ко фи́никс, процве́л еси́,/ по проро́ку, я́коже глаго́лет:/ пра́ведник, я́ко фи́никс, процвете́т./ Сего́ ра́ди вси тя ны́не велича́ем.
Сла́ва Отцу́ и Сы́ну и Свято́му Ду́ху.
Ше́ствие свое́ до́бре сконча́л еси́,/ Христу́ предстоя́, о нас моли́ся, о́тче Евфи́мие,/ и́же твою́ па́мять досто́йно почита́ющих.
И ны́не и при́сно и во ве́ки веко́в. Ами́нь.
Богородичен: Щедраго и человеколюби́ваго Бо́га роди́ти, Богоро́дице, сподо́бися,/ Сего́ моли́, Неискусобра́чная Де́во,/ ниспосла́ти нам ве́лию ми́лость.
Песнь 9
Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческого чре́ва быв Челове́к./ Те́мже Пречи́стую Богоро́дицу, ве́рнии, велича́ем.
Припев: Преподо́бне о́тче Евфи́мие, моли́ Бо́га о на́с.
И́же от се́рдца руко́ю, недосто́йнии, прино́сим тебе́ хвале́ние,/ приими́, о́тче, благоду́шию тезоимени́те,/ и мольбу́ сотвори́ о мне ко Христу́ Бо́гу,/ я́ко да пода́ст ми согреше́нием оставле́ние.
Припев: Преподо́бне о́тче Евфи́мие, моли́ Бо́га о на́с.
Облежа́щая пе́рсть свята́го твоего́ гро́ба ка́мене сапфи́ра дража́йши, о́тче, показа́ся, целе́бна бо, и чудотвори́ва, и па́че зла́та ве́рными разделя́ема, пою́щими досто́йно: со́н че́стен пред Го́сподем – сме́рть преподо́бных Его́.
Сла́ва Отцу́ и Сы́ну и Свято́му Ду́ху.
А́ще и в после́дняя сия́ ле́та изнесе́ся сей Арха́нгельский град,/ но дре́вних оте́ц че́сти сподо́бися, о́тче Евфи́мие,/ дарова́ний бо чуде́с обогати́лся еси́ оби́льно,/ подава́я всем, с ве́рою к тебе́ прибега́ющим.
И ны́не и при́сно и во ве́ки веко́в. Ами́нь.
Богородичен: Наде́жда на́ша непосты́дная,/ наде́жда тве́рдая, и стена́ непоколеби́мая,/ и покро́в, и Помо́щнице бу́ди ми, Всенепоро́чная, наде́ющемуся на Тя,/ на Тя бо возлага́ю, Чи́стая, всю наде́жду спасе́ния моего́.