священномученик Ермоген, патриарх Московский

Грамота митрополиту Филарету*

Богомольная Грамота патриарха Ермогена митрополиту Ростовскому и Ярославскому Филарету о молебствии во всех церквах, по случаю войны царя Василия Иоанновича с приверженцами второго самозванца, укрепившимися в селе Коломенском.

1606 года, Ноября 29-го.

Благословение великого господина святейшаго Ермогена, Патриарха Московскаго и всеа Русии, о Святем Дусе сыну и сослужебнику нашего смирения Филарету, Митрополиту Ростовскому и Ярославскому.

Божиим попущением, за безчисленные наши всенароднаго множества грехи, над Московским государьством и на всей Великой Росийской земле, от християньского врага, еретика, от чернца от Гришки Отрепьева учинилась неудобьсказаемая напасть: назвался злодей сыном великого Государя нашего Царя и Великого Князя Ивана Васильевича всеа Русии, Царевичем Дмитреем, и бесосоставным своим умышлением так прелстил люди Божия государьства Росийского, что не токмо поклонишася ему, но множество силных и великих, прочих же и без числа, и острием меча падоша, побораючи по нем злое; не токмо же се едино, но и воцарися и всю Русь нашу, воистинну святую и Богом любимую, восхоте не токмо обесчестити, но и конечно разорити, и святыя церкви в Римские костелы хотя превратити и люди Божия погубити, малодушные же во след погибели своея с собою во ад свести.

Милосердый же и человеколюбивый в Троицы славимый Бог наш, Иже есть Источник милости, всякия премудрости Содетель, молитвами крепкия нашея Заступницы Пречистыя Богородицы и всех ради святых Своих, не попусти быти конечному разорению православныя веры и нас не преда на погубитель: преславно умилосердися о создании Своем, о нас бесчисленных тмах народа, и сперва во обличение, последи же на конечное истребление, воздвиг на него, на своего врага и нашего губителя. на отметника иноческаго образа и на поругателя веры крестьянския, нынешняго Государя нашего Царя и великого Князя Василья Ивановича всеа Русии.

И сперва убо велегласно обличая злокозненное его пронырство, что он не сын Царев и не Дмитрей Царевичь, но враг Божий и наш губитель и веры крестьянския разоритель, и за сию истинную проповедь не токмо множество бед претерпе от того злодея, но и мученые главные сосуды перед очима своима виде и преславно от смерти Богом избавлен бысть, сему ж и вси Московстии народы самовидцы быша; последи ж, от Бога данным ему Государю советом и мудростию, с любящими Христа и с нехотящими повинутися сотоне и того дьяволским четам, конечно погубиша того злодея и скаредное его тело огню предаша, яко ни праху сквернаго его тела на земли оставитися; и о сем всесилному и прещедрому в Троицы славимому Богу и Пречистей Владычице нашей Богородицы и всем святым благодарение и хвалныя песни возсылаем, понеже паки от смерти в живот претвори нас Бог и от тмы во свет приведе нас.

К сему же еще истинну объяви нам, страстотерпца своего и мученика Царевича Дмитрия многими чудесы прослави и царьствующему преславному граду Московскому яко многоценный дар подал: неоскудная исцеления подает всем, с верою приходящим к нему. его же молитвами надеемся вси мы Бога получити; и о сем, сыну, о всем и самим вам пространно ведомо.

Вся же ведый Бог виде Государя нашего правую к нему веру, и твердость ума ко крестьянскому нашему закону, и мужество на Божия врага и на разорителя святыя нашея веры и на губителя крестьянскаго, яко же бо нача с Божиею помощию, обличая того злодея, тако и соверши и разруши и того всеконечной пагубе преда: за сию же к Богу веру, и мужество, и крепость, и разум, возлюби его Государя Бог и избра, постави нам Росийскому царьству Государя Царя и Великого Князя Василья Ивановича, всеа Русии самодержца.

Не престая же воюя на род человечьский древний враг наш, злокозненый диявол, видя себя обличенна и козни его разсыпаны, и не получиша своего хотения, и угодника своего конечно сокрушенна крепким крестьянским поборником нашим, по Бозе заступником, Государем Царем и Великим Князем Васильем Ивановичем всеа Русии, паки вооружается свирепый волк на крепкаго пастыря веры крестьянския и паки собирает человеки, приемлющих соблазны его, воли же Божии неведущих и глаголющих ложная: сказывают его злодея жива и много кровопролития разными виды и бесчисленныя беды и напасти делают крестьянскому роду, и отводят православных крестьян во след себе, от света во тму и от живота к смерти, и погибают конечне душевне и телесне, идуще во след погибели их привременно и вечно.

А которые православные крестьяне, надеющися на милость Божию и на молитвы Пречистыя Богородицы и на всех святых молитвы, и им злодеем не повинуются, и хотят душа своя за истинну положити и за крестное целование, на чем целовали крест Государю Царю и Великому Князю Василью Ивановичу, всеа Русии Самодержцу, вседушно хотят померети, и с теми Божия милость и молитвы Пречистыя Богородицы и всех святых молитвы поспешествуют им, и побеждают врагов Божиих и своих супостатов, по писанному: «поборай (рече) по истинне, истинна поможет ти», и: «надеяся на Бога кто когда погибе?»

Сему же слову ревнуя и Тверский Архиепископ Феоктист с Тверскими людми, своея Богом порученныя ему паствы, ту живущими во граде людми и не с воинскими, на воинских многу победу показаша; надеющиися бо на Господа врагом страшны, всем дивны, горе бо зрят, сию речь уповают на Господа, сотворившаго небо и землю, и вопиют радостными гласы: «с нами Бог, разумейте язы́цы, и покаряйтеся, яко с нами Бог (Ис.8:9) преступившим крестное целование, и нивочто же вмениша, и забыша на чем крест целовали Богом возлюбленному и Богом данному нам Государю, Царю и Великому Князю Василью Ивановичу всеа Русии, аще и от славных, аще и оруженосцы, аще и множество их.

Не един бо град собрася отпасти славы Божия, но множество их, видяще себе в конечной беде и в сраме и в погибели: и воспомянуша преступление честнаго и животворящаго креста, и смертный час, и страшный суд Христов, и праведным милость и воздаяние царьствовати со Христом во веки, грешным же месть и мука без конца во аде, к тому ж и здешное конечное разорение, и воспрянуша аки от сна, и возвратишася от погибели, и покаяшася к Богу и ко Государю Царю и Великому Князю Василью Ивановичу всеа Русии вины своя принесоша и милости просяще.

Он же Государь, подобяся милостию своею милостивому Богу, яко чадолюбивый отец со слезами вся целуя и вся прощая, и отнюдь грубости их не помнити глаголаше, толко (рече) християнский закон ими был невредим и небесчестен, и крестьянская бы кровь от них не лилася, и сами бы жили в покое, и людем бы от иноплеменников и от межоусобныя брани своим обереганием покой давали.

А из Смоленска, сыну, и из Вязмы тож писали, что Божиею милостию и молитвами Пречистыя Богородицы и святых великих чудотворцов и всех святых молитвами, Смоленские и Вяземские и окрестные их грады воинские и посадские и по селам все люди крепко помнят, на чем целовали крест Государю Царю и Великому Князю Василью Ивановичу всеа Русии, стоят за православную веру и за святыя церкви, на враги великия победы за их правду Бог подает им; да и сами пришли во царьствующий град Москву и иных многих градов воинские люди, Ноября в день, прося у Бога милости, по Государеву указу над злодеи промышляти.

И как к тебе, сыну, приидет ся наша грамота и ты б шел во святую, соборную и апостольскую церковь Пречистыя Богородицы честнаго и славнаго ея Успения и велел бы еси быти к себе архимандритом и игуменом, протопопу и всему священному чину, и приказным людем, и князем, и дворяном, и детем боярским, и всяким служивым и посадским людем, и молили бы естя соборне и по кельям Бога и Пречистую Богородицу и святых великих чудотворцов и всех святых: о мире всего мира, и о благосостоянии святых Божиих церквах и о совокуплении всех православных християн паки воедино: и о здравии и спасении Богом венчаннаго и Богом возлюбленнаго Государя, Царя и Великаго Князя Василья Ивановича, всеа Русии Самодержца; и о его Государевых боярех, и благочестивых князех, и о христолюбивом его воинстве, и о всех православных християнех: и чтоб Господь Бог унял праведный гнев Свой и межуусобную брань разрушил; и устроил бы Господь Бог люди Своя, вся православные крестьяня, по прежнему Своему человеколюбию в мире и в повиновении и в любви: и боляре б, и князи, и христолюбивое воиньство, и вся православные крестьяня, в любви и в повиновении ему Государю учинил, и возвысил бы десницу, и покорил бы под нозе его вся враги его, и подал бы вся благая и полезная и умножение плодов земных.

А сю б еси, сыну, грамоту велел чести на соборе не поодинова, чтобы ведомо было всем православным крестьяном; и в свои монастырьские села, по всем святым церквам, с сее нашия грамоты списки посылал к священником и призывая их с поучением наказывал от божественнаго писания, чтоб отпадших крестьянския веры разбойников и губителей крестьянских, злодеев, воров, не слушали никак ни в чем, надеяся бы на милость Божию и на молитвы Пречистыя Богородицы и великих Чудотворцов, Леонтия и Исаия и Игнатия и Якова, Аврамия, Петра и Сидора, и преподобнаго Кирилла Чудотворца, и всех святых молитв, и помня б на чем крест целовали Государю Царю и Великому Князю Василью Ивановичу всеа Русии, стояли б против воров крепко, чтоб им тако ж не погинути и с женами и с детми в разорении не быти, как и прочим, которые поддалися им.

А стоят те воры под Москвою, в Коломенском, и пишут к Москве проклятые свои листы, и велят боярским холопем побивати своих бояр, и жены их и вотчины и поместья им сулят, и шпыням и безъимянником вором велят гостей и всех торговых людей побивати и животы их грабити, и призывают их воров к себе и хотят им давати боярство, и воеводство, и околничество, и дьячество.

Божиим же неизреченным человеколюбием и молитвами крепкия нашия Заступницы Пречистыя Богородицы, и святых великих чудотворцов Московских Петра и Алексия и Ионы, и новаго страстотерпца Царевича и мученика Дмитрея, и всех святых молитвами, и целованием креста животворящаго, всенародное множество государьства Московского крепко вооружась стоят против тех врагов креста Христова и просятся на них у Государя, мстити кровь християнскую; и Государь милостив, ждет их воров к себе обращения, и чтобы престала брань межуусобная и погибели бы крестьяном не было, к ним злодеем от Москвы ни един же отторжеся, а от них к Государю приезжаючи многие добивают челом и Государь милостив их вины им отпущает.

* * *

*

Текст приводится в оригинальной орфографии. – Редакция «Азбуки Веры»


Источник: Творения святейшаго Гермогена, Патрiарха Московскаго и всея России. С приложением чина поставления в Патрiарха. - Издание Церковной Комиссии по чествованiю юбилейных событiй 1612, 1613 и 1812 годов. М.: Печатня А. И. Снегиревой, 1912. - с. 62-66.

Комментарии для сайта Cackle