Господину благовѣрному князю Андрѣю Дмитреевичу – Кирил, чернечище грѣшный и непотребный, со своею братиицею.
Много челом бьем и Бога молим о вашем здравии, господей наших, поминая, господине, твою любовь, что имѣеши к Пречистой Богородицы, и к нашей нищете поминая, господине, твою великую любовь и доволную милостыню, нашего господина.
Да что ми еси писал о преславном чюдеси Пречистыя Богородицы, паче слова и смысла преславная чюдеса, – слава Тебѣ, Боже! слава Тебѣ, Крѣпкий! слава Тебѣ, Безсмертный, хвалимый в Троици всѣми небесными силами и родомъ человѣческимъ! Молитвами пречистыа Матери Своея, такову излия милость в последний сей род, услыша моление Матере Своея о роду християньском.
Слыши, господине князь Ондрѣй, Ветхое Писание: егда восхощет Богъ кою землю показнити за нечестие, посылает преже проповѣдники, дабы обратилися. И аще обратятся, отводит Господь от них Свой гнѣв, мимоводит скорбь, и прелагаетъ печаль на радость, и показуетъ на них Свою милость.
Господине князь Андрей! Намъ нынѣ, видѣвше Пречистыя Госпожа Богородица преславная ея и великая чюдеса, и о томъ, господине, радоватися сердцем и душею устрашитися на всякъ часъ, что сподобил насъ Богъ Пречистою Своею Материю в последний сей родъ таковыми знаменми и чюдесы избавити християнский род от нашествия иноплеменных враг. И намъ, господине, нынѣ, видѣвши на насъ Божию милость и Пречистыя Богородицы помощь, поминати бы грѣхи своя и о том бы плакатися и просити у Бога милости и у Пречистые Его Матери помощи на благая дѣла. И аще видить нас милосердый Господь в сокрушении и сѣтовании ходяща, не презритъ насъ, якоже Ниневитяны, но обычнымъ си человѣколюбием помилуетъ.
Благаго и преблагаго Бога благодарити должни есмы, Того бо есмы создание и раби, честною Его кровию искуплени есмы. И ты, господине князь Андрей, видя челоѣколюбие и милосердие Господа нашего Исуса Христа, что гнѣвъ Свой от нас отвелъ, а милость Свою явил народу християнскому, молитвами Пречистыя Госпожа Матере Своея, и ты, господине, смотри того: властель еси во отчине отъ Бога поставленъ, – люди, господине, свои смиряй отъ лихово обычая. Судъ бы, господине, судили праведно, какъ предъ Богомъ право. Поклепом бы, господине, не было. И подметом бы, господине, не было же. Судьи бы посулов не имали, доволни бы были уроки своими, понеже сице глаголеть Господь: «Да не оправдиши нечестиваго мъзды ради,2 ни силна, ни богата устыдися на судѣ, ни брата свойства ради, ни друга любве ради, ни нища нищеты ради. Ни сотвориши неправду на суде,3 яко судъ истиненъ есть; проклят всякъ неправо судя». Пророкъ рече: «Ярость Господня на них неизцѣлна до вѣка, и огнь поястъ нечестивыя» – мзды ради, иже неправдою взимают. Судяи праведно, без мзды, спасени будут и царство небесное наслѣдуют.
И ты, господине, внимай себѣ, чтобы корчмы в твоей отчинѣ не было, занеже, господине, толика погуба душам: християне ся, господине, пропиваютъ, а души гибнут.
Такоже, господине, и мытов бы у тобя не было, понеже, господине, куны неправедныя. А гдѣ перевоз, тут, господине, пригоже дати труда ради.
Такоже, господине, и разбоя бы и татбы во твоей отчинѣ не было. И аще не уймутся своего злаго дѣла, и ты их вели наказывати своимъ наказанием, – чему будут достойни.
Такоже, господине, уймай под собою люди отъ скверных слов и от лаяния, понеже то все прогнѣвает Бога. И аще, господине, не подщишися всего того управити, все то на тебѣ взыщетъ, понеже властель еси своимъ людемъ от Бога поставлен.
А християномъ, господине, не лѣнися управы давати самъ: то, господине, выше тебѣ от Бога вмѣнится и молитвы и поста.
А отъ упивания бы есте уймалися, а милостынку бы есте по силѣ давали, занеже, господине, поститись не можете, а молитися ленитеся: ино в то мѣсто вам милостыня вашъ недостатокъ пополнит.
А великому Спасу и Пречистой Его Матери, госпожи Богородицы, Заступницы христианской, чтобы есте, господине, велѣли молебны пѣти по церквам, а сами бы есте, господине, ко церкви ходити не ленилися.
А во церкви стойте со страхом и трепетом, помышляюще в себѣ аки на небеси стояще. Занеже, господине, церковь нарицается земное небо, в нейже совершается Христова таинства. Блюди, господине, и себе опасно. Во церкви, господине, стоя, бесѣды не твори и не глаголи, господине, никакова слова празна. И аще кого видиши от велмож своих или от простых людей, бесѣдующа во церкви, и ты, господине, возбраняй. Понеже, господине, то все прогневаѣтъ Бога. И ты, господине князь Андрѣй, о том о всемъ внимай себѣ, занеже глава еси и властель от Бога поставлен иже под тобою християномъ.
А милость Божия и Пречистыя Богородицы на тобѣ, на моем господине, и на твоей княгине, и на ваших дѣтках, и мое благословение и молитва и братии моей аминь.
* * *
Примечания
...ко князю Андрею Дмитриевичу. – Андрей Дмитриевич (1382–1432), третий сын великого князя Дмитрия Ивановича Донского. Согласно Духовному завещанию отца, получил в 1389 г. в удел Можайск, Верею, Медынь, Калугу и Белозерск. Был верным союзником своего брата, великого князя Василия Васильевича Темного. Умер в Можайске, похоронен в Кремлевском Архангельском соборе. Оставил детей: Ивана, князя Можайского, Михаила Верейского и Белозерского и дочь Анастасию, бывшую замужем за князем Борисом Александровичем Тверским.
«Да не оправдиши... мъзды ради».– Исх. 23, 7.
«Ни сотвориши неправду на суде». – Лев. 19, 15.