Молитвы в среду

Молитва в среду по Утрени преподобнаго Кирила.

Госпоже моя Богородице! Умилосердися на мя, много согрешившаго и преступившаго самовластным умом заповеди Сына Твоего и Бога моего. Несть во мне места чиста, но все скверно. Незатвори ушию благоутробия Твоего от покаяния; не отврати лица Твоего от моления унылыя душа моеа; не презри движения нечистую ми устну, но приими въздыхание убогаго ми сердца. Се бо предстою, яко осуженник: скверною греховною, яко свидетели, одержимь, и все тело и душу язвено имея, и всяцей муце повенень¹ сый. Но простри ми, Девице, врачевнеи Твои руце, на нею же поноси целителя и врача всего мира Господа нашего Исуса Христа. О прибежище мое и Заступнице! Не престай о мне молящися Ему: яко зол душа моя наполнися, да тем ужасаюся и трепещу, съкрушенным сердцем и с слезами вопию: не остави мене до конца погыбнути: имаши бо, Госпоже, дерзновение, яко Мати Вышняго: избави мя от работы лукаваго; расторгни узы моя; возврати мя от пленения вражиа, съкруипи сети их, погуби льщение их. Покрый мя Твоим заступлением, Надеже всем концем земли, Пресвятая Госпоже Дево Богородице, ангельское великое удивление, пророческая высокая проповедь, апостольская похвала, мучеником крепкое утвержение, святительское изрядное украшение, Царем православным и князем необоримая держава, церквам честное украшение; мнишьскому же чину Ты еси, Госпоже Богородице, святое упование; постником Ты еси, Госпоже Царице, непобедимая надеже; верным всем твердое огражение и сущим в болезнех легкое исцеление; блудящим нетрудная наставница; в бедах скорая заступница; ненавидимым ты еси, Госпоже, любовное смирение; вдовицам и сиротам питательнице; матерем тихое веселие; девам чистота и похвала; младенцам мудрости наказание; плавающим не влаемое² пристанище; путником легкое прехождение; тружающимся благое покоище; нищим неизготоваемо³ богатство; обидимым покров и прибежище; печальным присная утеха; грешником Ты еси, Госпоже Мати Божиа, к Богу присвоение; христианом всем неложная хранительница; миру всему известное спасение. О, Пресвятая Госпоже Дево Богородице! Ты едина мое утешение, не гнушайся мене сквернаго: надею бо ся Твоея милости: угаси во мне греховный пламень, ороси покаянием иссохновение мое⁴; сердце очисти и ум мой от греховных мыслей и дажь устом моим тихоглаголание и очима моима источник слез; сими да омыю кал неподобных ми дел. Ты же, Госпоже, съвеси нечистоту и скверну окаянныа ми душа. Въздыхаю к Тебе из глубины сердца и мольбу приношу Ти от уст скверных: умилосордися, Девице, и помилуй мя; призри на моление мое; вижь болезнь убогиа моеа душа. Приклонися, Госпоже, к слезам моим, и вижь немощь естества моего, и буди ми ходатаиця к Сыну своему и Богу моему и Творцу моему, о мне недостойнем рабе твоем (имя рек). Укроти, Госпоже, ярость Его матерними Ти молитвами: приемлет бо Тя молящуся о души окаянней: заступницу Тя показа верою призывающим Тя. Аз, Госпоже, всегда на Тя надеюся, упование мое и прибежище, покров и огражение, стено необоримая: к Тебе прибегаю верою, душевных и телесных язв исцеления прошю. Ты бо съвеси помышление преже прошениа моего ⁵: да что прочее к съведущей⁶ мое естество възглаголю? Аще Госпоже восхощеши, можеши мя очистити и прочее время непорочно съхранити и на добродетель укрепити мя: да от сего часа непоработаю скверным мыслем и сластем, влекущим мя в глубину нечаяния; да, свободы воля творя⁷, славословлю пресвятое имя Твое, Богородице Госпоже Владычице: Ты еси моего неведениа направление⁸. Приими мое въздыхание, облегчи мою болезнь, устави бурю злых ми напастей, приражающу ми ся всегда моими грехы, раздери рукописание беззаконий моих и бремя греховное облегчи: подай жадаемое прошение и сподоби мя порадоватися на земли кроткых, в селех праведных, в земли вечной, в пищи неизготоваемой ⁹, в немерцающем свете. О Госпоже моя! Припади молящися о мне убозем; веси бо, каковыа моа беды суть. Подвигнися, яко блага, на помощь мою, да непогибну зле за безчисленыя грехы моа, но везде¹⁰ Тобою избавлюся. Ангельскый глас възываю Ти: радуйся Обрадованная, Дево Мати Богородице, земное Небо, огненосный Престоле, одушвленная Церкви, пространная Палата, Бога невместимаго святое Село, пресветлая Свеща, скорая Молние напомощь, Звезда незаходимая, Чаша напаяющи здравия, Баня омывающи грехы, Възведение человеческому роду, Трапезо хлеба животнаго, Мати Христа Бога нашего, Его же моли, да избавит мя от вечныя мукы Твоими молитвами святыми, всегда ныне присно, и в векы веком. Аминь.

Молитва в среду по часех святаго Кирила священноинока.

Приими, Госпоже Богородице, глас молитвы моея, юже недостойне¹¹ приношу от смиреннаго ми сердца. Иного бо развее Тебе не свем ходатая к Сыну Твоему и Богу и Творцу моему. Яко в суетнемь семь житии вся неподобная, стыдная дела сътворих, яже аще помянути восхощу, весь в глубину нечаяния погружаюся. Съвесть бо ми душа деяния, яже сътворих в мимошедшее время живота моего и до сего дне плотьскыми похотьми облекохся¹² и вся чювствиа моя, душевная и телесная, оскверних. Того ради уны в мне дух мой, трепещут ми составы, и ужасаеть ми ся сердце, изнемогаеть ми язык. Несть ни единаго дела зла, его же не сотворих окаянный аз; но Ты, Пресвятая Богородице Дево Марие, живота моего прибежище, помощнице верным, грешником надеже, непрезри молениа¹³ моего; к Тебе все упование възложих, умилосердися, Владычице, неостави мене до конца погыбнути; зане зело грешень есмь и несмь достоин много глаголати пред Тобою Госпоже. Поминаю бо Давыда, рекшаго: мужь язычен не исправится на земли¹⁴. Но сама, Госпоже, веси струпы сердца моего и болезнь душа моея; тужю и скорблю и печалию уязвляюся; судный час помышляю и весь изнемогаю, в оньже¹⁵ суд¹⁶ праведен, и никто никому же помощи может. Того ради, жерлом¹⁷ с слезами вопию Ти, Мати Божиа Пресвятая: умоли Христа преблагаго Человеколюбчя: да непомянет многых безаконий моих, но избавит мя плача оного безконечнаго и скрежета зубнаго и червиа неусыпающаго и огненного родства, идеже греховнии козлища пасоми суть. Но дай же ми твою милость и сподоби мя десных овец паствины, окрест святых селищ, в оплоте небеснаго¹⁸ рая. Ты бо еси нам надежа убогим и Тебе ся мили деем¹⁹, просяще получити прощения грехов Твоими богоприятными молитвами, всегда ныне присно, в векы веком. Аминь.

Молитва в среду по Вечернии святаго Кирила.

Вечер и заутра и полудне исповедаю Ти ся, Господи Боже Вседержителю, Отче Господа нашего Исуса Христа, Его же послал еси взыскати заблужших и спасти погыбших, от них же первый есмь аз, заблудивый²⁰ праваго пути, ведущаго в жизнь и уклонився в дебри любосластныя, углебох в тине дел моих, и безаконным тернием весь осужен бых²¹! И видя мя враг, в тех тружающася ²², болшими сквернами хощет потопити окаянную мою душю; но Тебе Единаго Избавителю молю, Тебе помощника призываю милостива и человеколюбца: не гнушайся мене, Владыко, не отрини от Твоего лица, зане вся злая пред Тобою съдеях. Исповедаю Ти, Господи, вся грехы моя, яже сътворих на убогую мою душю, и бых преступник всех Твоих заповедей, безсловесным повенуяся похотем; работая чреву, душю измождих²³. Ныне приметаюся в щедроты Твоя ²⁴ и вечернюю Ти приношу молитву. Послушай мене, Господи, обещавыйся услышати во истину призывающих Тя. Дажь ми Твой ангел, да запретит всем нечистым духом, борющимся со мною, да постыдятся и посрамятся ищущеи душю мою, и да потребить от моего сердца всяко подвижение моего плотскаго помысла, от неприязненых похотей въстающее. Да будет всегда со мною хряняй мя, укрепляя мя на дела блага и на всяк день донося молитвы моя Тобе Богу и Творцу моему. Ты убо Пресвятый Царю, от всеа твари поклоняемый Исусе Христе, праведники любя, никогдаже отступающая от Тебе, и грешники милуя, обращающаяся к покаянию, и вся призывая на спасение: направи нозе мои к заповедем Твоим, пригвозди плоть мою страсе Твоемь; сердце очисти правоверием, уста наполни богословия ²⁵ Твоего; язык умири²⁶ смирено глаголати, душю освяти и очисти Святаго Твоего Духа посещениемь²⁷; мысль исправи не прилепну земных; ум возвыси крилома богоразумия и всего мя устрой, яко Своего угодника. Да якоже сподобил ми еси преити день сий, и нощный покой дайждь ми²⁸ безо всякаго мечтаниа, диявольскых деяний: да и на одре постеля моея поминаю пресвятое имя Твое, и темь просвещаемь, не омрачаюся в день исхода, егда же разлучается душа моя от телесе моего. Но дай же ми обрести радость пред славою Твоею, да приимуть мя праведници с веселием в вечную жизнь в невечерний свет²⁹, в неизреченную радость, молитвами Пречистыя Ти Владичица нашеа Богородица ³⁰ и святых верховных Апостол Твоих и святаго святителя отца нашего Николы и всех святых. Яко благословися и прославися велелепно имя Твое Отца, и Сына, и Святаго Духа, ныне и присно и в векы веком. Аминь.

Молитва в среду по Вечерни³¹.

Моля, ныне предстах Апостольский лик, числом дванадесять! Приимите воздыхание мое и милосердно с небеси призрите на мя, спасения просяща; молитвами вашими, блаженнии, из глубины зол возведите мя; яже всего мира от тля восхищающе, от прелести дияволя избавите; вернии столпове приисходньцы (?); заповедьми Христовыми утвердите мя: церковнии светильницы, озарите мя, грехми ослепленна; из Египта страстей изведите мя и на землю спасениа наставите; воздеяние руку моею приимите и воздыхание сердца моего услышите и к Богу о мне мольбу сотворите Апостоли! Да милостив ми будет Бог и уветлив: ожидает бо человеком покаяниа, зане человек бысть. Святии Апостолп славнии, Петре и Павле, Иоанне треблаженный, Матфею, Марко и Лука с Филиппом и с Симоном, разумееми верным заступници, Фома, Варфломею, Андрею и Иакове и вси святии Апостоли, утвержение всех, заступница же и стены недвижимыя: молитеся избавитися мне мучениа; молитвенници сущии, всегда славнии, милости мене сподобите и пленица моих грехов разрешите и в он час варите, егда пред Богом станем: страшно бо там судище, нагим всем стоящим на обличение. Апостоли святии, законоположници славнии! Тогда мя вскоре избавите и ущедрите мя грешнаго, егда Богу предстанем, Емуже поклонение, слава и хваление со Отцем и с безначальным Духом, и ныне и присно и в векы Аминь.

Молитва в среду по Вечерни святому Николе.

Яко тепла в бедах помощника молю, Тя, треблаженный Николае! Се бо прихожю Ти осуженый, многими грехи уязвен. Полунощи припадаю Ти в молитвах молящися: милостивне приклони уши и глас молениа моего внуши. Се бо страсти моя плотьскиа мучащи: якоже преже избавил еси воеводы пришедша, блаженне, якоже во сне цареви предстал еси и от темница неповинныя избавил еси, тако и мене, связаннаго страстьми, спаси и избави, молю Ти ся, многосплетеных сетей змиин: яко избавляеши к Тебе прибегающаго от враг видимых и невидимых и подаеши божественную помощь, яко пастух милостивый от гордаго мя зверя исхити, яко же трие воеводы. Первие Троицы быв служитель, и молитвы творя к Ней, прииди и возстави мя от глубины согрешений моих. Отче Николае! Заступи мя в день страшный и от муки изми и свободи мя от тьмы несветимыя и от скрежета зубнаго. Святителю! да победит множество щедрот твоих соблазн моих бездну. Егда хощет мя судити Зиждитель, испытая зол моих множество, и тогда да обрящю тя помощника, избавляющаго мя от напасти видимых и невидимых враг моих. Святителю, молитвами си исцели и избави! Покажи, отче Николае, твоими молитвами бодра мя к Богу, от всякаго мя избави кова бесов. Христе Боже, молитвами Пречистыя Твоея Матере муки страшныя избави: свеси бо моя согрешения многая, но сия очисти по благости. Свят, свят, свят еси во векы веком. Аминь.

Примечания:

При издании молитв св. Кирилла, были использованы:

Три рукописи Соловецкой библиотеки

а) сборник под № 802, состоящий из статей разнаго содержания, написанных в XV и XVI в., в 4-ю долю, на 202 стр; здесь помещены 21 молитва св. Кирилла на л. 171–201: все молитвы названы именем Кирилла Туровскаго, или Кирилла преподобнаго, Кирилла священноинока;

б) Большой Требник дачи Новгор. Митроп. Макария под № 1085, написаный в 1505 г., в лист, на 712 листах: молитвы св. Кирилла, в числе 21, занимают здесь 684–712 стр;

в) Следованная Псалтырь, принадлежавшая св. Филиппу Митрополиту, написанная в XVI в. в 4 долю на 547 стр: здесь помещены четыре молитвы св. Кирилла: по одной молитве после каждаго молебнаго канона Святой Троице, св. Крестителю, св. Апостолам и всем Святым;

Две рукописи Волоколамскаго Монастыря

г) Сборник под № 109, состоящий из разных молитв и написанный в конце XV или начале XVI в., в 4 долю, на 258 стр: здесь, на стр. 46–138, находится 50 молитв, которыя названы именем Кирилла грешнаго, мниха недостойнаго, кроме 8 молитв, не означенных ни чьим именем;

д) Сборник под № 413, написанный в XVI в, в 4-ю долю, на 788 стр: здесь помещено 12 молитв с именем преподобнаго Кирилла или Кирилла священноинока, на стр. 648–686. За основание текста молитв мы принимаем список их в сборн. Солов. № 802, как более исправный сравнительно с другими списками и будем указывать на замечательныя разности, заключающияся как в этих списках, так и в печатном издании (см. статью «От издателя»). Молитвы же, не находящияся в этом списке, будут напечатаны по рукописи Волокол. № 109.