Николай Константинович Никольский

Приложение второе. Краткое житие988 преп. Кирилла

Извлечено из рукописи Кир. библ. № 142–1219, в полдесть, на 276 листах, пис. полууставом, почерком инока Гурия Тушина (см. л. 1 и 265–274), жившего в конце XV и начале XVI века, см. ниже в главе IV и VI-ой). В XVI веке то житие вошло и в состав рукописных прологов (см. Рукоп. Соф. библ. № 1353 и друг. л.112–115).

«Месяца июня в 9 иже в святые отца нашего кирила александрийского. в тот день преподного отца нашего кирила чюдотворца. в последняя времена явлься, древним святым житием подобен был. в 9 июня кирил на небесная отечества преиде:

Преподный отец наш кириле. рожение и воспитание преимянитого града москвы. благородных и благочтивых родителен сын. вданом быв от млада возраста на учение святых книг. и любоучителен и благоговенне бе отрок зело. того ради в скоре священная писмена извык умудряшеся ими в спасение. в воздержаниеже и чистоты расты, преспеваше в дело божии. По преставленииже родителеи свои, изволи себе приметати в дому божии. отрекшися мира, единому господиви работати. и испыташе места и образы и седалища господе удобно спастися. желая с многим разумом. и попечением художным, обрести мужа. настаника своему спасения непрелесна. Смотрением божиим. наставлен быв от некого старца. именем стефана, прииде в обител зовомую симонову. к архимандриту феодру иже и создателе бе обители тоя. Бе же те феодре муж разсудителен имея разум божественным писании. добре веды наставляти и к бу грядущим. бяше бо ученик и сродник великого сергия. и в многих силах и знамениих просиявшего. Сей феодор приял блаженного кирила. и повеле ему время некое прибыти в монастыре. и испыта известно о нем. и уразумев, яко в страсе божии с тщанием хощет спастеся. абие постриже его, и кратие сечета. Бе же тогда некий старец в обители онои, велми чюдна жительства. именем михаил, иже после, ради добродетельна его жития еписков быв града смоленска. тому быв дан кирил наказан быти иноческому житию. видев же он своего учителя михаила, гобзующа в добродетелех. и наказующего его по разуму божественных писании. истинному пути спасения. всю волю свою отверг. послушаше его в всем. и время довольно пребыв у него в послушании. Таже повелено быв ему архимандритом. советам старца, службы монастырские проходите, хлебню и поварню и прочая. онже во всем послушан. усредно сия творяше. устама от молитвы непресташе умом в разум божии упражняшеся. имаше и пищу умалену зело, жажею и бдением сердце согнетая. и прият умиления дар. слезам источники проливаше: Бяше во предоуготовлен от преподобного послушания. в мнозе времени с трудом и тщанием братии служа; понеже бе искусен к всяку сложбу. бяше премудр по бозе; и чист естеством, с смирением послушлив в всяко благо, и сего ради любим бе, и почитаем от всех. онже ненавидя славы и чести от человек, боголюбиц сый начат творитися юрод. видев же его обители оноя отец, в таков устроени суща. запрещение налагаше ему, на много дни ничтож ино вкушати, разве хлеб и воду. дела монстырская тяжкая вручаше ему. онже запрещение убо дряже с радостью, к службам же усредно тружася. и тако добродетели сокрываше. и познан быв от разумных отец; яко того рад творися миру юрод, да благословен премудр будет. Понудев же быв от отца своего прияти священство, и не хотя повинуся на се. священства убо службу в чину чреды своея проходя, егда имаше празно время, от работы непресташе, смирению же болши вдаваше себе. ради глаголбщего, и хочет старенши быти, да будет всем раб, и иже в вас меньшии. се еси велик. По избрании же феодра архимандрита на престол ростовская архиепископства, почюдившеся вся в всем блаженного кирила исправлением нужею на архимандритию симановскую возведоша его. онже поминая слово господне глаголюще: ему много дано будет. множае изыщеся от него, наипаче подвизашеся, неточию о себе, но и о братском спасении печашеся, с смирением и любовию духовною. сияже видяще, наипаче почитаху его и славяху. онже смирен умом сый, ненавидя ин славы безмолвиеже любя, остави началство. и пребыв мало туй. отиде в монастырь старыи зовомыи. недалече от туду растояние имущь: и тамо безмолствоваше. сущоуже ему в нощном бдении. обычно правило сетворяющу, и поющу святии богородици неседално, дойде мест писанниа; странно рожество видевше, устранимся мира. удивляшисе о словеси сем, помышляя в собе, како сего ради высокии в величестве княжества. на земли явись в плоти. и смирен человек быв. да устранившаася мира любве его ради. к высоте боговидения возведет. И желает всяческы устранитися мира. любве ради божиа. и моляше господа бога и святую богородицу, да наставлен будет како спастися, и абие слышит глас глаголющь ему, кириле, иди на белоезеро. и добро покои обрящеши. отворив же оконце келиа. зрит светопролитие велие с небесе сияюще к странам северным. идеже ес бело озеро, и якоже перстом показующемуся место вселения его. обретеже и сердце свое, радости и мира и утешения исполнено. и пребыв всю нощь веселяся и славя бога. Имеяше же ту духовна брата верна ему суща, именем ферапонта сему поведа яже виде и слышав прослави бога. и согласившеся оба, идоша в путь. и пришедше в странь бела озер обретоша место удобно безмолвию, и прети потокше малу колибу, седоста. потомже блаженныи отец наш кирил, желая конечного без молвия, по совету разлучися с ферапонтом. и ископа себе пещеру в земли, и вселся в ню безмолствоваше. егдаже благоволи бог жителство его, на ползу многим показати. Пронесеся слава о нем повсюду, и прихожаху к нему мнози созидании ради духовных. и уже от благодати святого духа добре возделану сердцу его, сладки плоды учении подаваше. и слышаще сия, и видяще чюдное жие его, мнози. моляху его хотяще пребывати с ним, яко да будет им к богу наставник и пастырь. онже на мнозе отрицашеся, недоснна себе и грешна именуя. побежаемь от милования и братолюбия. едва повинувся: начал приимати братию. и якоже собрашася к нему немало число братии воздвиже церквь во святые богородица честного ея успения. и монастырь состави, и законоположения общажития предасть, самже образ и прописание в всем, сущим у него учиником быв, и по нем хотящем ревновати добродетелному его житию. Претерпеже преже многи напасти от бесов, и от лукавых человек наветы; и от всех благодатию божиею сохранен быв. и в свершену старость доспе, якож быти всех лет жития его девятдесят, и мало поболев, с миром душу в руце богу предаст, многим чюдесем преже смерти соделасти быв. також и по смерти от гроба честных мощеи его. приходящим с верою. знамения различна и исцеления источате. в славу бу прославляющему угодники своя.»

* * *

988

При издании его соблюдена орфография рукописи.


Источник: Кирилло-Белозерский монастырь и его устройство до второй четверти XVII века (1397-1625) / Николай Никольский. - Санкт-Петербург : Синодальная тип., 1897-1910. / Т. 1. Вып. 2: О средствах содержания монастыря. - 1910. – [II], 267, VI с.

Комментарии для сайта Cackle