№ 21. 1660 г., после марта. Перевод с греческого письма о том, что не следует в России руководствоваться существующим в Восточной церкви обыкновением давать в управление лишившимся от гонения Турок престолов и патриарших низшие епархии, с правом присутствования на соборах

Благочестивейший и самодержче, великий царю и святой священный собор! Суть некие или дружбою носимы прежнего патриарха господина Никона, или не разумея добре разумеваемо правил, скорбятся об извержении его, сиречь, еже по времени упражнения священства его, еже священный собор, якоже священные законы и правила повелевают, согласующе все изрекоша быти, Дóндеже той господин Никон смирится и паки взыщет со умолением от нового рукополагаемаго патриарха и священного собора священства, яко же и при святом и вселенском третьем соборе сотвори Евстафий, Панфилийский епископ; обаче сицевий не розумевающе добре священных правил непщевают, яко несть праведно извергнуть его и упразднить его от священства и распрю творяще, утверждают и показуют образ патриархи Константинопольские; яко и суще вне престол своих имут священство и священнодействуют и рукополагают, и глаголют сицевая, зане не ведают добре вин и чего ради сице надержится и бывает ныне в том святейшем престоле Константинопольском; да слышат же добре распрю творяще и да навыкнут, яко не пребеззаконно священство имут, суще вне престола своего, но ниже по законом и правилам, обаче смотрение употребивше, пребеззаконно бо отметаются и отгоняются престола своего от нечестивых агарян, а не волею оставляют престолы и епархии, ниже от неких оглаголемы, ниже от собора судимы и извержены свещеннодействуют, но кроме оглаголания некоего и кроме суда соборного и кроме извержения и кроме оставления вольного, но нуждою и насилием нечестивые изгоняют, или и пенезей ради многих, яже Турки от них просят, и не имуще дати, боящейся нужды и насилия их, отступают от того великого престола и ини иного престола; и сего ради с рассуждением паки потом, когда умирятся вещи, упокоить их собор смотрительно управления ради церкви Христовы, зане Турки Бога и веру и закон пенези имут и навыкоша сицевым образом взяти пенези часто от патриаршества и от прочих архиереев, и когда желают пенези или скипетры держать, или первый их князь, глаголемый визирь, или иной кто от великих пашей вначале глаголют ему, яко сотвори некое погрешение и извещают ему, яко сице слышано о тебе, и аще убо пошлет толико пенезей десять или пятнадцать тысяч златых, имамы умирити вещь; аще ж великое зло придёт на тебе слышай сие патриарх Константинопольский что может творити; ино разве аще случатся пенези послет я с достойными человеком заградить уста врагов веры; аще же не случатся пенези, что ино может творить разве дать место гневу? и так втайне утаится и бежит, куда может. Таже Турки видя, яко не получили желания своего, гневаясь зело на избежавшего патриарха, именуют его врагом царства, и так повелевают собору архиерейскому, случающемуся по времени оному в Константинополе, и князям и клирикам великой церкви с запретами и угрозами великими, яко да поставят вскоре иного патриарха, и сие не творят Турки, яко имеют попечение о патриаршестве, но сущу обычаю ветхому, яко когда сядет новый патриарх, дать царю почесть толико тысяч златых и визирю подобно толико тысяч, и иному паше великому толико, и всякому паше по толику, якоже имут и учинено и обычай, и сего ради повелевают с понуждением и насилием, да поставят вскоре иного патриарха, помышляя: аще от первого патриарха не получили и не взяли пенези, ныне от нового возьмут учинённое. И что ино имать творити собор и клирицы и князи токмо аще есть возможно укротить вину пенезями по силе своей, да исходит яве первый патриарх и да будет паки на престоле своём уже добре; аще ж и видят, яко гнев Турок есть великий, да не явятся сопротивные царству и погибнет совершенно великая церковь Христова покоряясь и царствию и управляющей церковь Христову, избирают от случающихся в настоящее архиереев единого избранного и возводят его на патриаршеский престол, и даются учинённые почести царствию и прочим пашам. Так мирствует гнев их. Также когда престанет господин их, исходит яве прежний утаённый патриарх и беглец и призывает собор архиереев и князей и клириков, глаголя: святой священный соборе, сами добре весте, яко аз отрицания престола своего не сотворих, ниже волею отступих, ниже архиерейство ваше изверже мене, но нужда и насильство держащих нас понуди и мене и отступих от престола и архиерейство ваше понуди, и возведосте иного на престол мой ныне, понеже благодатью Христовой укротился гнев их; сотворите, якоже возлюбленнии братия и сослужители, суд и рассуждение: или престол мой паки дадите мне, или упокойте меня иным престолом, да живопитаюся. И так собор и новый патриарх согласуемы все упокоевают его и дают ему един престол, о котором согласят иметь им и обладать и священнодействовать и рукополагать и совершать все архиерейства, и именоваться прежнему патриарху Константинопольским и председателю оной сице митрополии сиречь оныя, юже дают ему, якож дааша и митрополию Броилавскую блаженной памяти прежнему патриарху господину Афанасию Пателару, и якож даша и Ефес господину Паисию, прежнему патриарху, и Паронаксию и Фермию господину Ианикию, и тому прежнему патриарху, и священнодействуют и освящают и совершают всё архиерейское, наипаче господин Паисий идёт часто в Константин град и сходится с настоящим патриархом, и многажды суда смотриша вкупе и судиша и служиша вкупе многажды; обаче сия яже бывают ныне в Константине граде не бывают по законом и правилом, но ниже пребеззаконно, и кроме правил творят от себе сия; но и сия сице творят ныне правляюще Христову святую и великую церковь в сем злополучном времени укротяюще и иже кроме слова гнев держащих нас нечестивых, зане аще не сотворяху сицевое управление возгорился бы вящи гнев нечестивых на церковь Христову; якоже все ведают, что случися в прошлое время господину Парфению патриарху и прият сицевую неправедну и безчестную смерть; кая ина бе вина, токмо просяще от него наши пенези и той не имеяй дати, и паки, ведая себе неповинна, не отступи. И тако видеша паши, яко стоит неуклонно на престоле своём, клевету на него возносяще, поведающе держащему скипетры, яко есть враг царствию его и яко писаниями своими восставляет брани и воинства, призывая христиан на Турок, и наконец, повесили его и стал мучеником истиннейшим. Таким образом, страждут в странах наших архиерее часто, так претерпевают мучения и клеветы, и аще оставят и престолы свои, от таковых нужд и от таковых мучений, отставят их, и сего ради законно и праведно имут и священство, идеже аще обрящутся и служат и рукополагают и все архиерейства совершают, имуще паки и благословение и волю от собора и от патриарха. Сия бо и образ сицевый сущу благочестивому царю и христианству неприличны суть, ниже да будут, ниже да внимаются, ниже да слышатся; зане благодатью всесильного Бога, елико выше поведахом, в странах сих христианского царствия ниже бяху, ниже суть, ниже когда быти Бог сохранит; и сущу зде благочестию и христианству несть лепо внимать, и яже яко от нужды управляются в странах наших нынешнего времени, зане они добре ведают священные законы и правила, но время не помогает им во всех; обаче зде, благодатью Божьею, время помогает смотреть священные правила что повелевают; и так по законам и правилам да будет и да совершится и обычай да надержится, якоже правила повелевают; об отрицании же и извержении и упражнении священства, якоже рехом, и паки глаголем, образ чист есть в том в священных правилах Евстафий, Панфилийский епископ, и иже при святом и вселенском великом третьем соборе, иже имал разум и ум здрав во главе своей да смотрит и узрит яснее, како обдержит послание святого и вселенского третьего собора к сущим в Памфилии, яко по отрицании, еже сотвори Евстафий, пребысть и извержен, якож является, не от себе извержеся, но от собора извержен и возбранися священства. Зане аще не бе извержен от собора и возбранен не совершити священства, и не токмо священства не совершити, но ниже имя епископа имети, аще не бе сице, не бе нужда и потреба притекати и припасти ко святому и вселенскому третьему собору, просить со многими слезами и многим умолением имени и чести епископа; и умолены бывше, пишет, слезами его и многою старостью и смирением его благоувевшеся, дася ему имя и честь епископа имети, но не священнодействовати и рукополагати егда сам хощет, но егда от брата и сослужителя, иже по месту архиерея призовётся и повелен. Неправедно же сия решася святыми, но смотрение и снисхождение употребив, кий грех или кое ино согрешение, рцыте нам, о мудрейшии, сотвори той Евстафий, и извержеся и управися, сице. Яве есть, яко не за иное согрешение, токмо яко отречеся престола своего, и когда и в кое время отречеся престола своего, и кто изверже его, и кто паки с прощением управи его, явлено известно есть, яко святой и великий вселенский третий собор; хотите ещё иной больший собор от того? Хотите правило большее и известнейшее от того? И образ чистейший того же Евстафия и суд и рассуждение известнейшее от святого и вселенского третьего собора. Который иной святейший и мудрейший обрящется от тех святых отец того же святого собора творить лучший и мудрейший суд и рассуждение? Сего ради возбудитесь, братие, молю вас, еликих в сем смущаются ум ваш и внемлите, яко и ныне собравшийся содействием Святого Духа священный собор не иным образом судил и изрёк, но неизменно по тому ж образу и суду и рассуждению святого и вселенского третьего собора согласуемы все судили и изрекли, яко неизменно в сем быть, как же и при Евстафии было. Хотите, братия и друзья, показать помощь и дружбу и недобро мыслите мыслимая правил, обаче престанете распри и оглаголания, и да имамы прощение.

На обороте письма помета дьяка: 168.

По склейкам: 168 Диак Александр Дуров.