№ 24. 1660 г. Мнение, неизвестно кем поданное царю, с разрешением вопросов:

1) можно ли, не низложив соборно Никона, возвести нового патриарха?

2) Можно ли Никона, отрёкшегося своего престола, возвести паки?

3) Можно ли низложить Никона и возвести иного, ещё живу ему сущу, правильно? и

4) аще Никона низложить, то от патриаршего ли престола токмо, или вкупе; и от архиерейства

Долгим рассмотрением ни единой от вещественных тварей обретох в том же и едином чину доблестно всегда содержащие, но вся применению повинна, Богом венчанный государю, православный царю и великий князь Алексею Михайлович, всея Великой и Малой и Белой Росии самодержец, и иных многих государств обладателю. Вознесох бо очеса горе и видех пространное небо беспрестанным движением от востока на запад многоличным разнствием точащеся со светилы и всею лепотою своею; зрех низу, и се вся непостоянна и мимогрядущая. Еще возвед очи на стихия, вижду, яко аер исполнь есть различнаго применения, огнь скорому повинен изменению, земля же ныне благовонными украшена цветы, на утрие нага внезапу зрится и безплодна. Сонмище паки водное коль есть непостоянное, чаю, никомужде невестно не быти. Отпустиша иногда апостолы корабль от брега желанную на море тишину имуще, и се далече отшедшим им воста буря и вмале не погибоша от зельных ветров и волн не содержимых, даже истинный кормчий Христос Спаситель, виде их страждущих в плавании, вниде к ним в корабль, и улеже ветр и тако спасошася. Что двоенадесятница апостолов в вещественнем корабли и на стихийном пострада море от противных ветров в небытии Христове, се мы в мысленном корабли Российской церкви на житейском море во оставлении зверхнейшаго кормчего страждем; но да небольшая сих приключатся, всяко подобает кормчего и управителя в корабли имети, егоже обрести и возвести многого рассмотрения есть дело, понеже новое и странное кораблеве церкви Росийской приключилось сущу кормчию безкормчество; необычное Христовой невесте жениху живу сущу вдовство; и нам отца имеющим сиротство, новое, глаголю, и необычное; ибо святейший Никон, архиепископ царствующего великого и преименитого града Москвы и всея Росии патриарх, не преставлением ся от мира, но оставлением вольным престола своего в таковые ввёл нас труды. Оставлением же несовершенным, яко от его дел внимаю, понеже и ныне архиерейское действует, имже аще бы оставил был истинною, не дерзнул бы совести запрещающей прикоснуться и престола писменем не отрицается, но точию усты глаголя, яко не хощет быти патриарх московский: се же аще смиренномудрия ради, или да устрашит и в чувство введёт, наипаче же ко смирению преклонит противящихся себе и негодующих о нём, или иной коей ради вины будущая яве сотворят. Ныне же рассудить подобает: его ли паки Никона возвести на престол, или, оставив его, иного избрать нужда есть? Аз что ми совесть всякую страсть отчуждивше и разум повелевает, хотяще, помощью Божией, по моей возвестить силе. Во первых, моление приношу, да свободным разумения моего и совести гласом никтоже негодует себе; а к тому аще что от малоумия моего глаголемых негоде видится кому быти, да прощения сподоблен буду. Велие дело нам начинающим в настоящем приключении оставления престола, тщание приложить хотящим, да не впредь празден будет, рассуждать подобает.

а) Можно ли, не низложив соборно Никона, возвести иного?

в) Можно ли Никона, отрёкшегося своего престола, возвести паки?

г) Можно ли низложить Никона и иного возвести, ему живу сущу, правильно?

д) Аще Никона низложить, то рассудить, от самого ли престола, или вкупе и от архиерейства.

В первой статье такое моё есть разумение, яко не низложив Никона соборно, иного возвести неможно.

Рече кто:

Яко Никон сам низложил себя и отрёкся престола.

Ответ:

Отрёкся (устами), да покорятся ему непокорные, а не делом, понеже без писмени и несоборно; к тому и в архиерейской, судом Божьим, вышел в мантии и ныне архиерейское действует. Но буди отрёкся и делом, се же есть не по заповеди церковной, понеже, по святому Кирилу, архиепископу Александрийскому, аще бы и писанием отрёкся, аще достоин есть святительства, – да служит; аще же есть недостоин, да не отрицается, но обличён быв судом, да извержется; кроме же обличения никак чужд может быть престола: убо Никоново отрицание ничто есть; и аще не имеет недостоинства никакого, да служит; аще ли имеет недостоинство, соборно вопросить о нём, и судом обличив, низложить. Сице бо научает нас правило 16-е соборов вселенских первого и второго, глаголющее: ни по которому же образу да не взыйдет кто на епископию, еяже епископ жив есть; подобает бо вину изыскать, и по извержении его другого поставить. И так иного нам избирать, Никону живу сущу, видится мне неможно. Никона же, аще и отрёкшегося, можно возвести паки, по святому Кирилу, глаголющему: аще достоин, да служит. И се довлеет и на вторую статью.

Рече кто:

Не угоден бе никому, убо да не возведётся.

Ответ:

Врач не должен воле больного угождать, но яже весть от своей хитрости быть полезна, сия творить. Сице и пастору подобает да спасёмся, не всуе жезл имеет. Отец же, любя сына, не щадит жезла, сын паки благопокоривый должен есть с царствующим глаголать пророком: жезл твой и палица твоя та мя утешиста. И сосуд избранный глаголет: аще терпите наказание, сынове есте. Тем же, мню аз, яко святейший Никон многажды прочтя вещь, Илию, архиерею ветхого завета, за ненаказание сынов приключившуюся, брегл есть себе, да не подобная постраждет.

И аще же неудобь всем бе носи́м Никон, то не оу извержения достоин, но сыновним повиновением и любовью молить его, да исправится во нраве своём; судить же его кто от нас и как может? понеже по правилу 9 вселенского собора иже в Халкидоне; аще епископы имеют что на митрополита своего, Константина града патриарху да возвестят, емуже под иными патриархи архиереев сущих судить. И зде вышше неже с митрополитом дело, ибо с всея Росии патриархом, со отцом отцов и пастырем пастырей. Кто ж из сынов отца, которая овца пастыря судить дерзость восприимет; отнюдь моим рассуждением неможно, токмо возвестить патриарху Константина града. И тако сими глаголы 3-я статья рассуждается, яко нелеть нам есть по сим правилам Никона судить и низложить, впоследствии же иного возвести, ему сущу живу. Но понеже не точию правила святых отец, но и образы дел бывших, не осуждённые на соборах, суть нам зерцалом, в неже зряще управлятися мощно есть. Имамы же некия образы о престолах, оставленных от пастырей, на них же иного избрав отцы святые поставляли ещё живу сущу оставленному, яко Григорий святой оставил престол свой и возведён иной в его место, и якоже Евстафию, оставившему свою епископию, иной взошёл на престол его. Се же поставление иного епископа не осуждено собором вселенским, и прочее многое. Убо можно по сих образах в настоящим приключении по оставлении архиерейского престола от святейшего Никона, бывшем в церкви соборной при преосвященных архиереях, всечестных архимандритах, при многом клире и народа православного, можно, глаголю, живу сущу Никону (ибо и ротися не помыслити о возвращении на престол), возвести иного. Точно яко Григорий святой, оставив престол, не чужд бысть архиерейского сана, и Евстафию честь и служение епископское собором вселенским не суть возбранена. Сице подобает и Никона чести и служения архиерейского не отчуждать, аще и безпрестолен будет. И тако видится мне Богу быть угодно, и оставившему престол не безчестно, нам безгрешно, и всему народу годе. Аще же в чести сый оставлен Никон промышлял бы что смятения сотворить, сим самым делом повинен будет чести и действия архиерейского от себе удаления. Сим четвёртую статью замыкая и моего разумения конец творя со блуждением, аще кая суть, прощения желаю, и вся высочайшему разуму твоего пресветлого царского величества, и всему преосвященному собору, ничесому же прекословяще, вручаю.