№ 33. 1664 г., декабря 18. Письмо патриарха Никона к царю, с изложением причины его приезда в Москву

Великому государю царю и великому князю Алексею Михайловичу, всея Великой и Малой и Белой Росии самодержцу, и государыне царице и великой княгине Марии Ильиничне, и государю царевичу и великому князю Алексею Алексеевичу, и государю царевичу и великому князю Феодору Алексеевичу, и государыне царевне и великой княжне Ирине Михайловне, и государыне царевне и великой княжне Анне Михайловне, и государыне царевне и великой княжне Татиане Михайловне, и государыне царевне и великой княжне Евдокии Алексеевне, и государыне царевне и великой княжне Марфе Алексеевне, и государыне царевне и великой княжне Софии Алексеевне, и государыне царевне и великой княжне Екатерине Алексеевне и государыне царевне и великой княжне Марии Алексеевне, и государыне царевне и великой княжне Феодосии Алексеевне, благодать, милость, мир от Бога Отца и Господа нашего Иисуса Христа, богомолец ваш смиренный Никон, Божьей милостью патриарх, Господа Бога молю, да подаст вам Господь Бог душевное спасение и телесное здравие и царствие мирное и безгрешное. И есмь обретаюся днесь во святей Божии велицей соборней апостольстей церкви пресвятой Богородицы, исповедан вашему царскому величеству, понеже отхождения своего вину исполнил, яже помыслил и сотворил. И се приидох видети пресветлые лица ваша, и поклонитися пресвятей славе царствия вашего. Вину прием от священного евангелия, идеже бе написано⁵⁸: вы, рече, взыдете в праздник сей, аз не взыду в праздник сей, яко время Мое не исполнися. И сия рек им, оста в Галилеи. Егда же взыдоша братия его в праздник, тогда и сам взыде, не яве, но яко тай. И паки ино писание: рече Павел к Варнаве: возвращьшеся посетив братию нашу во всех градох, в них же возвестихом слово Божие, како суть. Такожде и мы пришли, како суть у вас государей и у всех сущих во царствующем граде Москве, и по всех градех. Приидохом же в кротости и смирении, якоже Господь наш научи мя глаголя: научитеся от Мене, яко кроток есмь и смирен сердцем. Нося с собой мир, его же Господь наш Иисус Христос смирив Себе преклонив небеса сниде на землю и снесе его, и остави святым своим учеником и апостолом и по них по времени священнодействующим во святей Его церкви архиереям, глаголя: мир Мой оставляю вам, мир⁵⁹ Мой даю вам. Ко входящим⁶⁰ же во град или в дом заповедал, глаголя: в оньже град или дом входите, первие глаголите: мир дому сему. И аще убо будет ту сын мира, почиет на нем мир ваш. И не сие точию благодатию Божиею, еже мир даровати кому, но и оставление грехов имамы власть подати. Господу свидетельствующу, глаголя: приимете Дух Свят⁶¹. Имже отпустите грехи, отпустятся, имже держите, держатся. И еще не до сего, но на земли и на небеси власть имамы вязати и решати. Якоже паки Господь свидетельствует и не просто глаголет: аминь бо глаголю вам, елика аще свяжете на земли, будет связано на небеси, и елика аще разрешите на земли, будет разрешено на небесех. Но аще и болши сих восхощет твое царское величество слышати и навыкнути, то не отречемся сказати. Хощеши ли самого Христа прияти, мы твоему благородию покажем, како Господу свидетельствующу: приемляй вас – Мене приемлет. И елико сотвористе меньших Моих – Мне сотвористе. И идеже бо два или трие собрани во имя Мое, ту есмь посреде их. И инде паки: и се Аз с вами есмь, до скончания века, аминь. И приемляй вас Мене приемлет⁶², и слушаяй вас, Мене слушает. Иже твое благородие изволит, то да сотворит, или во имя Господне приими нас, и дому отверзи двери, да мзда твоя по всему не отменит, якоже есть писано. Се же написахом твоему царскому величеству не от себе что-либо, ибо о себе глаголяй, славу свой ищет. Ищай же славы⁶³ пославшего, сей истинен есть, и неправды в нем несть. Несмы бо⁶⁴ якоже корчемствующе слово Божие, но от чистоты яко от Бога, пред Богом о Христе глаголем. Не от прелести, ни от нечистоты, ниже лестью, сице глаголем не яко человеком угождающе, но Богу, искушающему сердца наша. Аминь.