№ 32. 1664 г., декабря 18. Сказание патриарха Никона о бывшем ему видении

Сказание смиренного Никона, Божьей милостью патриарха, какой виной из Воскресенского монастыря возвратился на свой стол, во царствующий град Москву. Зане слыша смятение, и молву велику о патриаршеском столе, овии тако, инии инако глаголюще развращеная, и несть ничтоже истина, но кождо что хощет, то тот и глаголет. И того ради 173 году, Ноября от 14 дня, удалився в пустыню вне монастыря на молитву и пост дабы известил Господь Бог, чему подобает быти. И тако молихомся довольно ко Господу Богу со слезами, и не бысть ми извещения. И Декабря от 13 дне уязвихомся любовию Божьей паче первыя, и приложихом пред Господем Богом молитву к молитве, и слезы к слезам, и бдение ко бдению, и пост к посту, и постихомся даже до 17 дне; бе же день той, отнележе нача поститися, – вторник, и постихомся до суботы, ничтоже вкусив, ни воды пия, но хлеб менив молитву и питие слезы, и ни сну причащаяся, лежа на ребрех, развее утомився седев с час в сутки, но трудихомся и моляхомся со слезами, вопиюще, и плачуще, Дóндеже известит ми Господь Бог, что̀ суть подобает сотворити, и что суть годно Его святой воле. И моляхся множицею, глаголах ко Господу нашему Иисусу Христу: Ты, Господи, рекл еси пречистыми своими, неложными усты, аще что просите молящеся, и о имени Моем дастся вам. И паки рекл еси, Господи: просите и приимите, ищите и обрящете, толцете и отверзется вам. И помале рече: всяк бо просяй приемлет и толкущему отверзется. И тако множицею стужая человеколюбию Божию, и от многого труда, седох во церкви на месте своем, понеже по вся четыре нощи, и три дни не исходил для спанья. И бысть яко седох, в мал сон сведен бых седя. И видех и се: обретохся во святей соборной церкви, и видех свет велик зело, обаче от живущих никого ту видех, но прежде бывшими леты усопших святителей, и священников, стоящих по странам, идеже гроби прежде усопших святых отец митрополитов и патриархов. Един же некто святолепен муж, сединой честной доволен, или велми красен, браду имея густу велми, мало продолговату, во священных святителских одеждах вси стояху. Той же вышепомянутый святолепный муж, обходя по иным святым отцам, хартию и киноварницу с киноварем обносит по всем святителем, они же вси подписуют. Аз же со страхом приступив к носящему хартию и киноварницу, вопросих его, что сие творите, подписующе руки на хартии? Он же рече ми; о твоем пришествии на престол святый. Аз рече: покажи ми, аще есть истина. Он же показа ми и смотрех, и бысть тако. Аз же паки рекох ему: ти подпишешилися. Он рече, подписахомся уже. И показа ми о себе написанное. Аз смотрив со вниманием, и обретшеся истина, написано полтретьи строки сице: смиренный Иона, Божьей милостью митрополит, тако страхом Божиим подписую подобно есть. Аз же приим дерзновение, идох к месту. И хотящу ми взыти, обретох святителя, стояща на месте, в честных одеян архиерейских одеждах, и ужасохся. Он же рече ми, не ужасайся, брате, яко тако воля Божия есть. Взыди на стол свой и паси словесныя Христовы овцы, яже ти Господь поручил. И абие невидны бысть. Аз же утвердився, взыдох. Мню же святителя стояща, Петра чудотворца. Ей ей, тако ми Господь свидетель на се. Аминь.