№ 53. 1666 г. Выписка из правил вселенских соборов и из номоканона, по церковно-судному делу о патриархе Никоне

Первого вселенского собора 5 правило¹⁰¹.

Своими епископы отлучении инеми да не будут прияти; обаче аще не за малодушие, или за некую распрю, или за ино нечто таковое отлучение бысть. Того бо ради повелено бысть дващи в лете в коеждо области собору быти; первое убо прежде четыредесяти дний святого и великого поста, второе же, по времени овощнем.

Толкование:

Подобает, по приточному словеси, уязвившему человека, тому же и исцелити его. Такоже и от своего епископа, отлучения заповедь приемша, от иного прияту быти без испытания и без взыскания вины несть достойно; но и вины отлучения смотрити подобает, да некогда не по достоянию нанесено бысть нань отлучение, но от малодушия; се же есть от ярости епископли, или от распри некия, или иные ради вины се сотворшу, страстныя воли епископли. Страстная же воля есть, еже рещи, не сотворил ми еси сего, да будеши отлучен. Но убо да ни отлучаемии кроме подобный вины отлучаются, ни отлучающии их епископи преобидени будут другим епископом, приемлющим без испытания таковыя. Сего ради дважды в лете в коеждо области собору быти святый собор повеле, да общею волею всех епископов тоя области всяко совопрошение и истязание церковное и всяко прекословие разрешится; якоже и 37-е правило святых Апостол повелевает.