№ 51. 1666 г., ноябрь. Проект приветственной речи восточным патриархам

Радуйтася обрадовавша пришествием вашим великоросийскую церковь святейша патриарха, господие отцы и пастырие наши, радуйтеся о Господе, егоже волю исполняюща, дело пастырей добрых прилежно совершаета.

Егда аки из горы паствинныя с высоты престолу вашего низшедша, во страны православно Росийскаго царства внити изволила еста, еже соглядати стада Христова и от него заблуждьшия вашим премудрым наставлением вовести во двор овец Христовых, недугующия душами, духовными исцелити врачбами, уязвенные обвязати и изнемогшия, еже на рамо вашего пособства возложше, принести ко Отцу небесному, и во церковнех упокоити недрех. Над всеми ж сими вдовствующему церкве престолу достойна жениха сочетати. Воистинну преблага еста пастыря всех пастырей началнику уподобившася, не своих си ищуща, но Христовых и Его стада корыстей.

Сего ради, мы всерадостными сердцы и превеселыми душами целующе многотрудное пришествие ваше не во вертеп вифлиемской, но аще бы возможно во сердца и утробы наша ваше святительство еже витати приемлем. Сам пастыриначалник, странствовавый во вифлеемской пещере, весть сердец наших благохотство и благодарствие сего странствования вашего.

Темже се во пребожественной своей иконе со преблагословенной Своею Материю и со прочими слугами и угодники своими сам исходит вама в стретение, яко верный свидетель радости и благоприятьства нашего.

Еще же, и да благословит вас сим животворящим крестом своим за благословение ваше, еже на ны излиати богатно приходите.

Изливайта убо на ны, преклоняющия главы наша пред вама, святительское ваше благословение.

Рцыта мир градом нашим¹⁰⁰ и домом нашим, а Христос Спаситель, обещавый во Аврааме благословити благословящия ны се готов есть возблагословити, егоже и мы повседневно не престаем молити, да даст вама во мире здраво, честно, долгоденьственно правити слово своея истинны. По мнозех же странствиях в мире сем благополучных летех, небесная да дарует вама жилища наследити.