патриарх Никон (Минин)

Поучение священному чину и причетникам

Никон, Божиею милостию Патриарх Московский и всея Русии сыном своим Архимандритом и Игуменом, Протопопом и всем священником и диаконом и причетником.

Ведомо нам учинилося, что во святых церквах небрежение велико есть и житие зазорно, и о преданных евангелских повелений и апостолских преданий и святых богоносных отец седми Вселенских Соборов и прочих святых отец, еже должно вам хранити, и не сохраняете тоя, яко же божественный Павел уча ны пишет к Титу, глаголя: во еже обучати же ся всегда к благочестию, трезвению, целомудрию, благоговению и будете, рече, честни, страннолюбивы, не пианицы, не бийцы, не мшелоимцы, не сварливы, но кротцы[ки], смотреливы, не завистливы, не сребролюбцы, учителны, яко же Вселенскаго Собора 19-е правило глаголет: иереи должни суть учити причет церковный и вся люди благоверию и божественным повелениом; паче же иных дний, во всякую неделю всего причта и народа поучати благочестию словесы, яко же предречеся от Божественнаго писания, избирающем истинная разумения же и судбы, и не преступати еже положенныя пределы и богоносных отец предания, но точию от Божественных писаний сказывати и учити истинному разумению Божиих заповедей. Аще ж кто вопросит словесе Божественных Писаний, да не своего ума то сказовати, но якоже церковнии светилницы и учителие своих писаний истолковаша; то бо есть благоволно, еже ведети и умети предания богоносных отец, и потом разрешати вопрошаемая, да не како недоумеюще от себе разрешите, восхотят таковии истиннаго сказания далече отпадут. Небрегущих же иереов, ни учащих причетников людей благоверию 58-е апостолское правило первее отлучает; потом, аще в ленности пребывает, от сана измещет. Потщитеся, о презвитери, представити себе делателие непостыдны: правяще слово истинное николи же да не станете в соборе вражду имея на кого, да непрощением Утешителя в день собора молвы не творити и не препирайтеся, но в церкви пребывая молитеся и почитайте книги святыя до часа, в онь же подобает вам совершити Божественную службу, и тако предстаните со умилением и чистым сердцем святому жертвеннику не озираяся семо и овамо, но в страсе и трепете предстояще Небесному Царю ничим же мнее небеснаго предстояния; да не угодия ради человеческаго подщитеся скратити молитвы, не приимите ж лица человеча, но взирающе ко единому Царю и предстоящим окрест Его силам достойны себе творити священным правилом, и их же отрекоша с теми не служити же; блюдите, Кому предстоите и Кому служите и которым даете причащения, не забывайте Владычних заповедей и святых Его апостол: не дадите бо, рече, святых псом и бисера не мещите пред свиниями; блюдите пес и яж по сих смотрите, да не убойтеся человек, на грех себе не дадите Сына Божия в руки недостойным, не устыдитеся никого же от славных земли в час той, ни самаго того, носящаго венец; причащения же достойным подавайте, якоже и вы сами прияли, есте имже божественная правила не повелевают, не подавайте яко иноязычницы бо вменишася и аще не обратятся, горе и тем и причащающим их; блюдите, аз и о сем дела не имам, вы узрите такожде иже аще кто от вас причащаяй люди Пречистым и Животворящим Тайнам, и аще бо просит медницы, таковый извержется по 23-му правилу шестаго Вселенскаго собору. Такожде аще который презвитер, или диакон, или поддиакон, или чтец, или певец в четыредесят дней, сиречь в Великий пост, не постится и во вся лета во всякия среды и пятки, да извержен будет по 69 му правилу святых апостол. Аще же мирский человек не постится, да отлучится, или аще кто преданыя посты, хранимыя Церковию, разреша, таковый проклят есть по 18 правилу иже в Гангрех Собора; а от престола, к нему же кто благословен есть и у него же кто служити начнет, преходити, никако же власти не имати по 3-му правилу иже во Антиохии, и двема церквама да никто же владеет по 15 правилу седмаго Вселенскаго собора, да не святая корчемствовати от вас явитца, но кийждо единому и тоемужде престолу да предстоит в церкви свободою изобилующей, а в церкви, куплею стяжанней, рекше, не у купленнаго места, ея ж ради извержению предает той же Вселенский Собор по 13-му правилу, или аще кто от вас лихву взяв от должника, да извержется по 44-му правилу святых апостол.

Ведомо ж нам и се, что во святыя посты поклоны творят не по церковному преданию, еже есть метание с великима не разлучают, овии поклонився единою на землю и тако не всклоняся множицею крестится да точию головою кивает, а инии на скамейцы. И о том бы вам самем испытно ведати, что метание и что суть великия поклоны метание суть: в пояс поклонитися как мощи до земли рукою достати, а великий поклон в землю челом ударити. И отныне клали бы есте сами поклоны и прочим повелевали по уставу Святые Восточные Церкви и по благословению нашего смирения вси вкупе равно тихо. Егда полагаются седмь на десять поклонов по «Сущую Богородицу» поклон земный и прочих три великия в землю с молитвою «Господи, Владыко животу моему», к сем же два на десять метания в пояс, и последний великий ж поклон в землю. Тако и «Святый Боже» и на «Приидите, поклонимся». Поясныя ж поклоны клали со всяким благочинием немятежно. Аще ли же кто от вас о сем завещании не брещи имать или чесого неподобающаго священства кто от вас начнет деяти еже чрез заповедь святых апостол и богоносных отец и нашего благословения, яже выше рекохом, таковым будет суд без милости от нас по правилом святых апостол и богоносных отец; такоже аще кто и мирский человек прекослов и нерадив явится о преданых заповедех Христовых и святых апостол и святых отец, и вам бы им запрещати по правилом святых апостол и святых отец. А аще кто зело явится прекословен, и вам бы возвещати нам, Великому Государю Святейшему Никону, Патриарху Московскому и всея Русии. А аще ли же таковым сам не запретит и нам не возвестит, таковый о всяцем неисправлении сам ответ даст в день праведнаго суда Христова, еже зде правилным судом от нас истязан немилостиво будет. Сего ради, братие, завещанным внимайте да сохраняюще заповеди Божия и предания святых апостол и святых богоносных отец злобы избывше, с правдою поживем о Христе Иисусе Господе нашем, Ему же слава со безначалным Его Отцем и со Пресвятым и благим и Животворящим Духом ныне и присно и во веки веков. Аминь.


Источник: ГИМ. Собр. А.С. Уварова. Ф. 17. Оп. 2. № 54. Л. 1. См.: Леонид (Кавелин), архимандрит. Систематическое описание рукописей графа А.С. Уварова. М., 1894. Ч. 3. Отд. IV. № 1543 (312) (750). Документ относится к февралю 1654 г. См. редакцию этого текста: Лобачев С.В. Патриарх Никон. СПб., 2003. Приложение 5. С. 372–375.

Вам может быть интересно:

1. Слово отвещательное патриарх Никон (Минин)

2. Краткое сказание о жизни блаженной памяти отца Феофана, Кирилло-Новоезерской Пустыни священно-архимандрита, с присовокуплением нравственно-духовных его поучений архимандрит Феофан (Соколов)

3. Сущность и юридическая природа церковного властвования профессор Павел Васильевич Гидулянов

4. К материалам для истории Московских соборов 1666-1667 гг. Сергей Алексеевич Белокуров

5. Слово похвальное на пренесение мощей свв. Бориса и Глеба: неизданный памятник литературы XII века Хрисанф Мефодиевич Лопарев

6. О пресвитере Пиерии Александрийском святитель Фотий, патриарх Константинопольский

7. Спиритизм перед судом науки и христианства Михаил Осипович Вержболович

8. Роль мирян в управлении церковным имуществом митрополит Николай (Ярушевич)

9. Участие древле-русских архиереев в делах общественных профессор Филипп Алексеевич Терновский

10. Слова и речи протоиерей Михаил Соколов

Комментарии для сайта Cackle