Ча́сть пе́рваѧ

Вели́кїй ѻ҆те́цъ на́шъ а҆нтѡ́нїй, верхо́вный ли́ка подви́жникѡвъ, процвѣта́ше въ пꙋсты́ни, въ ца́рствованїе кѡнстанті́на вели́кагѡ, ѻ҆́колѡ тре́хъ сѡ́тъ тридесѧ́тагѡ лѣ́та ѿ ржⷭ҇тва̀ бг҃а сло́ва: совреме́ненъ же бы́лъ вели́комꙋ а҆ѳана́сїю, ѡ҆писа́вшемꙋ простра́ннѡ и҆ житїѐ є҆гѡ̀. На ве́рхъ же добродѣ́тели и҆ безстра́стїѧ дости́гши, а҆́ще и҆ простолюди́нъ и҆ некни́женъ, ᲂу҆чи́телѧ свы́ше и҆мѣ́ѧше, вразꙋмлѧ́ющꙋю ры́бари и҆ младе́нцы премꙋ́дрость дх҃а: ѿ неѧ́же и҆ ᲂу҆мо́мъ просвѣща́ѧсѧ, мнѡ́гїѧ и҆ дрꙋгі̑ѧ свѧщє́нныѧ и҆ дꙋхѡ́вныѧ ᲂу҆чє́нїѧ, разли́чнымъ веща́мъ подоба́ющыѧ и҆здадѐ, и҆ премꙋ̑дрыѧ ѿвѣ́ты къ вопроша́ющымъ, и҆спо́лнєнныѧ дꙋше́вныѧ по́льзы, ꙗ҆́коже во мно́гихъ мѣста́хъ и҆з̾ ста́рческихъ писа́нїй ᲂу҆сма́триваетсѧ. Кромѣ̀ си́хъ и҆ содержа́щыѧсѧ въ настоѧ́щей кни́гѣ сто̀ се́дмьдесѧть гла́въ, се́й препросла́вленный ѻ҆те́цъ на́мъ ѡ҆ста́вилъ. А҆ что̀ ѻ҆́ныѧ сꙋ́ть и҆́стинное порожде́нїе бг҃ови́днагѡ ᲂу҆ма̀ є҆гѡ̀, то̀ све́рхъ про́чихъ, и҆ преподобномꙋ́ченикъ пе́тръ дамаски́нъ ᲂу҆твержда́етъ. Да и҆ са́мый сло́гъ рѣ́чи ѿе́млетъ всѧ́кїй слꙋ́чай сомнѣ́нїѧ, и҆ є҆два̀ гла́са не и҆здае́тъ тща́тельнѡ чтꙋ́щымъ, ꙗ҆́кѡ ѻ҆́ныѧ совреме́нны сꙋ́ть дре́вности ѻ҆́ной свѧще́нной.

Не ди́вно ᲂу҆̀бо, а҆́ще ѻ҆́нъ къ простѣ́йшей бесѣ́дѣ, и҆ древнеѡбра́зной и҆ небрего́мой, сло́гъ рѣ́чи склони́лъ: но то̀ ди́вно, ꙗ҆́кѡ ѿ толи́кїѧ простоты̀ толи́кое сп҃се́нїе и҆ по́льза чтꙋ́щымъ быва́етъ. Коли́кое бо въ ѻ҆́ныхъ ѡ҆брѣта́етсѧ ᲂу҆вѣре́нїе! коли́каѧ ѿ ѻ҆́ныхъ и҆стека́етъ сла́дость! и҆ воѻбщѐ, коли́кѡ и҆сточа́етсѧ благі́й нра́въ и҆ соверше́нство є҆ѵⷢ҇льскагѡ жи́тельства! Оу҆вѣ́дѧтъ коне́чнѡ сла́дость сїю̀ и҆мꙋ́щїи вкꙋси́ти ме́да сегѡ̀ мы́сленною горта́нїю ᲂу҆ма̀.

а҃. Лю́ди слове́сными ѕлоꙋпотреби́тельнѣ глаго́лютсѧ. Не сꙋ́ть же слове́снїи, и҆зꙋчи́вшїисѧ наꙋ́камъ и҆ кни́гамъ дре́внихъ мꙋдрецѡ́въ, но слове́снꙋю и҆мꙋ́щїи дꙋ́шꙋ, и҆ могꙋ́щїи разсꙋжда́ти, что́ є҆сть добро̀, и҆ что́ є҆сть ѕло̀, и҆ лꙋка́выхъ и҆ дꙋшевре́дныхъ ᲂу҆бѣга́ющїи, благи̑мъ же и҆ дꙋшеполє́знымъ тща́тельнѡ поꙋча́ющїисѧ, и҆ сїѧ̑ творѧ́щїи со мно́гимъ благодаре́нїемъ бг҃ꙋ. Сі́и є҆ди́ни слове́сными людьмѝ вои́стиннꙋ до́лженствꙋютъ нарица́тисѧ.

в҃. И҆́стиннѡ слове́сный человѣ́къ ѡ҆ є҆ди́номъ тщи́тсѧ, си́рѣчь, є҆́же повинова́тисѧ и҆ ᲂу҆гожда́ти бг҃ꙋ всѣ́хъ, и҆ семꙋ̀ то́чїю поꙋча́ти дꙋ́шꙋ свою̀, ꙗ҆́кѡ да бл҃гоꙋгоди́тъ бг҃ꙋ, бл҃годарѧ̀ за таковы́й и҆ толи́кїй про́мыслъ є҆гѡ̀, и҆ ᲂу҆правле́нїе всѣ́хъ тва́рей, во всѧ́комъ приключе́нїи жите́йскомъ. Безмѣ́стно бо врача́мъ благодари́ти ѡ҆ здра́вїи тѣ́ла, подаю́щымъ на́мъ и҆ гѡ́рькїѧ и҆ неꙋгѡ́дныѧ врачєвства̀: бг҃ꙋ же ѡ҆ мни́мыхъ на́мъ ско́рбѧхъ не благодари́ти и҆ не разꙋмѣ́ти, ꙗ҆́кѡ всѧ̑ достодо́лжнѡ, и҆ въ по́льзꙋ на́мъ по про́мыслꙋ є҆гѡ̀ быва́ютъ: позна́нїе бо и҆ вѣ́ра въ бг҃а, спасе́нїе и҆ соверше́нство є҆́сть дꙋшѝ.

г҃. Воздержа́нїе, неѕло́бїе, цѣломꙋ́дрїе, крѣ́пость и҆ терпѣ́нїе, и҆ подѡ́бныѧ си̑мъ вели̑кїѧ и҆ добродѣ́тєльныѧ си̑лы полꙋчи́хомъ ѿ бг҃а, противлѧ́ющыѧсѧ, и҆ противостоѧ́щыѧ, и҆ вспомоществꙋ́ющыѧ въ приско́рбностехъ ѻ҆́ныхъ: каковы̑ѧ си̑лы а҆́ще ѡ҆бꙋча́емъ и҆ готѡ́выѧ и҆мѣ́емъ, ничто̀ ᲂу҆жѐ лю̑тымъ, и҆лѝ болѣ́знєннымъ, и҆лѝ неснѡ́снымъ мни́мъ на́мъ бы́ти, помышлѧ́юще, ꙗ҆́кѡ всѧ̑ сꙋ́ть человѣ́чєскаѧ, и҆ побѣжда́ютсѧ ѿ добродѣ́телей, ꙗ҆̀же въ на́съ. Сегѡ̀ не мы́слѧтъ безꙋ́мнїи дꙋше́ю: не помышлѧ́ютъ бо, ꙗ҆́кѡ всѧ̑ до́брѣ и҆ достодо́лжнѡ быва́ютъ въ по́льзꙋ на́шꙋ, да возсїѧ́ютъ добродѣ́тєли, и҆ ᲂу҆вѣнча́емсѧ ѿ бг҃а.

д҃. Стѧжа́нїе и҆мѣ́нїй и҆ бога́тое ѻ҆́ныхъ ᲂу҆потребле́нїе, мечта́нїемъ є҆ди́нымъ маловре́меннымъ почита́ѧ, и҆ вѣ́даѧ, ꙗ҆́кѡ добродѣ́тельное и҆ бг҃оꙋго́дное житїѐ лꙋ́чше є҆́сть бога́тства: семꙋ̀ тве́рдѡ поꙋча́ѧсѧ, и҆ сїѐ въ па́мѧти содержѧ̀, не возстене́ши, не возрыда́еши, не ᲂу҆кори́ши никого́же, но ѡ҆ все́мъ бꙋ́деши благодари́ти бг҃ꙋ, ви́дѧ хꙋ́ждшихъ себѧ̀, и҆ въ сло́вѣ и҆ бога́тствѣ ᲂу҆твержда́ющихсѧ. Ѕла́ѧ бо стра́сть є҆́сть дꙋшѝ, по́хоть, и҆ сла́ва, и҆ невѣ́дѣнїе.

є҃. Слове́сный человѣ́къ, самаго̀ себѧ̀ разсма́триваѧ, и҆скꙋша́етъ подоба̑ющаѧ и҆ полє́знаѧ себѣ̀, и҆ что̀ со́бственно є҆́сть дꙋшѣ̀, и҆ поле́зно, и҆ что̀ чꙋ́ждо є҆ѧ̀. И҆ та́кѡ ᲂу҆бѣга́етъ поврежда́ющихъ дꙋ́шꙋ, ꙗ҆́кѡ чꙋжды́хъ, и҆ ѿлꙋча́ющихъ є҆го̀ ѿ безсме́ртїѧ.

ѕ҃. Є҆ли́кѡ кто̀ ᲂу҆мѣ́реннѣйшее и҆мѣ́етъ житїѐ, толи́кѡ є҆́сть благополꙋ́чнѣйшїй, ꙗ҆́кѡ не пече́тсѧ ѡ҆ мно́гомъ: ѡ҆ раба́хъ, земледѣ́льцахъ и҆ стѧжа́нїи скотѡ́въ. Си̑мъ бо са́ми себѐ пригвожда́юще, и҆ ѿ си́хъ слꙋча́ющымсѧ го́рестѧмъ подпа́дающе, ᲂу҆корѧ́емъ бг҃а. Ѿ самопроизво́льныѧ же по́хоти на́шеѧ сме́рть ᲂу҆си́ливаетсѧ, и҆ пребыва́емъ во тьмѣ̀ житїѧ̀ грѣхо́внагѡ, прельща́еми, не познаю́ще сами́хъ себѐ.

з҃. Не до́лженствꙋетъ кто́либо глаго́лати, ꙗ҆́кѡ не возмо́жно человѣ́кꙋ добродѣ́тельное житїѐ и҆мѣ́ти: но ꙗ҆́кѡ не ᲂу҆до́бно, нижѐ просты̑мъ ᲂу҆добопостижи́мо є҆́сть сїѐ. Добродѣ́тельнагѡ же житїѧ̀ прїѡбща́ютсѧ, є҆ли́цы сꙋ́ть въ лю́дехъ бл҃гочести́вы, и҆ бг҃олюби́вый и҆́мꙋтъ ᲂу҆́мъ: ѻ҆́бщїй бо ᲂу҆́мъ є҆́сть мїрскі́й и҆ превра́тный, помышлє́нїѧ подаю́щїй блага̑ѧ и҆ ѕла̑ѧ, премѣнѧ́ющїйсѧ є҆стество́мъ, и҆ въ вещество̀ и҆змѣнѧ́ющїйсѧ. Бг҃олюби́вый же ᲂу҆́мъ мсти́тель є҆́сть ѕло́бы, самопроизво́льнѡ быва́ющїѧ въ лю́дехъ ѿ лѣ́ности.

и҃. Ненака́заннїи и҆ невѣ̑жды, смѣшны́мъ дѣ́ломъ почита́ютъ наꙋ̑ки, и҆ не жела́ютъ ѻ҆́нымъ внима́ти, поне́же ѡ҆блича́етсѧ и҆́хъ ненака́занность, и҆ жела́ютъ всѣ̑мъ подо́бными себѣ̀ бы́ти: тѣ́мъ же ѡ҆́бразомъ и҆ невозде́ржнїи житїе́мъ и҆ нра́вами, тща́тсѧ, да бꙋ́дꙋтъ всѣ̀ хꙋ́ждшими и҆́хъ, неви́нность себѣ̀ ѿ мно́жества ѕѡ́лъ сниска́ти мнѧ́ще. Погиба́етъ и҆ смꙋща́етсѧ безси́льнаѧ дꙋша̀ ѿ ѕло́бы, и҆мꙋ́щїѧ въ себѣ̀ блꙋ́дъ, го́рдость, ненасы́тимость, гнѣ́въ, проде́рзость, неи́стовство, ᲂу҆бі́йство, во́пль, за́висть, лихои́мство, хище́нїе, трꙋ́дъ, ло́жь, сла́сть, лѣ́ность, печа́ль, стра́хъ, болѣ́знь, не́нависть, ᲂу҆коре́нїе, безси́лїе, ле́сть, невѣ́дѣнїе, пре́лесть, забве́нїе бг҃а. Си́ми и҆ си́мъ подо́бными мꙋ́читсѧ ѻ҆каѧ́ннаѧ дꙋша̀, ѿлꙋча́ющаѧ себѧ̀ ѿ бг҃а.

ѳ҃. Добродѣ́тельное и҆ благочести́вое и҆ сла́вное житїѐ провожда́ти хотѧ́щїи, не по притво́рномꙋ нра́вꙋ, и҆лѝ ло́жномꙋ житїю̀, до́лжны сꙋди́тисѧ: но ꙗ҆́коже хꙋдо́жники, живопи́сцы и҆ болванодѣ́ли, ѿ са́мыхъ дѣ́лъ показꙋ́ютъ ѻ҆нѝ добродѣ́тельное и҆ бг҃олюбе́зное житїѐ, и҆ ꙗ҆́коже сѣ́тей, си́це всѣ́хъ лꙋка́выхъ сласте́й ѿвраща́ютсѧ.

і҃. Бога́тый и҆ благоро́дный без̾ просвѣще́нїѧ дꙋше́внагѡ, и҆ всѧ́кїѧ добродѣ́тели жите́йскїѧ, мꙋ́дрствꙋющими до́брѣе познае́тсѧ ѕлоща́стенъ: ꙗ҆́коже ᲂу҆бо́гїй, и҆ ᲂу҆́частїю ра́бъ, ᲂу҆че́нїемъ и҆ добродѣ́тельнымъ житїе́мъ ᲂу҆кра́шенный, благополꙋ́ченъ є҆́сть. Но ꙗ҆́коже стра́нники на пꙋте́хъ заблꙋжда́ютъ: си́це и҆ добродѣ́тельномꙋ житїю̀ не прилѣжа́щїи, по́хотїю прельща́еми, погиба́ютъ.

а҃і. Человѣкотво́рнымъ до́лженствꙋетъ глаго́латисѧ, ненака́занныхъ ᲂу҆кроти́ти могꙋ́щїй, да возлю́бѧтъ наꙋ̑ки и҆ ᲂу҆че́нїе: тѣ́мъ же ѡ҆́бразомъ и҆ премѣнѧ́ющїи невозде́ржныхъ житїе́мъ къ добродѣ́тельномꙋ и҆ бг҃оꙋго́дномꙋ житїю̀, человѣкотво́рными до́лженствꙋютъ глаго́латисѧ, ꙗ҆́кѡ человѣ́кѡвъ претворѧ́ющїи: кро́тость бо и҆ воздержа́нїе благополꙋ́чїе є҆́сть, и҆ наде́жда блага́ѧ дꙋша́мъ человѣ́чєскимъ.

в҃і. Подоба́етъ лю́демъ, пои́стиннѣ, нра́вы и҆ житїѐ своѐ достодо́лжнѡ ᲂу҆строѧ́ти: семꙋ́ бо и҆спра́вившꙋсѧ, ᲂу҆до́бь познае́тсѧ бг҃ъ. Ѿ всегѡ́ бо се́рдца и҆ вѣ́ры чтꙋ́щїй бг҃а, промышлѧ́емь быва́етъ ѿ негѡ̀, ᲂу҆де́рживати ꙗ҆́рость и҆ по́хоть: занѐ всѣ́хъ ѕѡ́лъ вина̀ є҆́сть по́хоть и҆ ꙗ҆́рость.

г҃і. Человѣ́къ глаго́летсѧ и҆лѝ слове́сный, и҆лѝ и҆спра́витисѧ хотѧ́щїй. Неиспра́вленный бо не человѣ́комъ нарица́етсѧ: ꙗ҆́кѡ сїѐ не человѣ́ческое є҆́сть дѣ́ло, и҆ бѣ́гати подоба́етъ таковы́хъ. Живꙋ́щымъ бо со ѕло́бою не лѣ́ть є҆́сть въ числѣ̀ безсме́ртныхъ бы́ти когда́либо.

д҃і. Слове́сность на́мъ пои́стиннѣ соприсꙋ́тствꙋѧ, досто́йными на́съ твори́тъ, да и҆менꙋ́емсѧ человѣ́ки. Ѿмета́ющесѧ же слове́сности, є҆ди́нымъ расположе́нїемъ чле́нѡвъ, и҆ гла́сомъ ѿ безслове́сныхъ ра́знствꙋемъ. Да позна́етъ ᲂу҆̀бо ᲂу҆́мный человѣ́къ себѐ самаго̀ безсме́ртнымъ, и҆ да возненави́дитъ всѧ́кꙋю сра́мнꙋю по́хоть, вино́ю сме́рти быва́ющꙋю лю́демъ.

є҃і. Ꙗ҆́коже ко́еждо хꙋдо́жество, подлежа́щыѧ себѣ̀ вещєства̀ ᲂу҆краша́ѧ, добродѣ́тель свою̀ показꙋ́етъ, ꙗ҆́кѡ то̀ древодѣ́латель, мѣ́дникъ, злата́рь и҆ сре́бреникъ: та́кѡ и҆ мы̀ благо́е житїѐ и҆ добродѣ́тельное и҆ бг҃оꙋго́дное жи́тельствованїе слы́шѧ, до́лженствꙋемъ ꙗ҆влѧ́тисѧ, ꙗ҆́кѡ лю́ди вои́стиннꙋ слове́снїи є҆смы̀ дꙋше́ю, а҆ не и҆з̾ѡбраже́нїемъ тѣ́ла. Слове́снаѧ же пои́стиннѣ, и҆ бг҃олюби́ваѧ дꙋша̀ а҆́бїе житє́йскаѧ всѧ̑ познае́тъ, и҆ бг҃а ᲂу҆милостивлѧ́етъ любе́знѣ, и҆ благодари́тъ є҆мꙋ̀ во и҆́стинѣ, къ немꙋ̀ и҆мѣ́ѧ стремле́нїе и҆ мы́сль всю̀.

ѕ҃і. Ꙗ҆́коже ко́рмчїє къ цѣ́ли кора́бль ᲂу҆правлѧ́ютъ, да не къ подво́дномꙋ и҆лѝ ви́димомꙋ ка́мню приразѧ́тъ ѻ҆́ный: та́кѡ и҆ добродѣ́тельномꙋ житїю̀ ревнꙋ́ющїи прилѣ́жнѡ да разсма́триваютъ, что̀ подоба́етъ и҆̀мъ твори́ти, и҆ чегѡ̀ ᲂу҆бѣга́ти: и҆ и҆́стинныѧ и҆ бж҃е́ствєнныѧ зако́ны да почита́ютъ поле́зными себѣ̀, лꙋка̑выѧ помышлє́нїѧ ѿ дꙋшѝ ѿсѣка́ѧ.

з҃і. Ꙗ҆́коже ко́рмчїє и҆ ᲂу҆здодержа́тели ᲂу҆праждне́нїемъ и҆ прилѣжа́нїемъ и҆справлѧ́ютъ то̀, ѡ҆ не́мже тща́тсѧ: та́кѡ подоба́етъ и҆ къ пра́вомꙋ и҆ добродѣ́тельномꙋ житїю̀ прилѣжа́щымъ поꙋча́тисѧ и҆ пещи́сѧ, ꙗ҆́кѡ да достодо́лжнѡ и҆ бг҃оꙋго́днѡ поживꙋ́тъ: хотѧ́щїй бо и҆ помы́сливый, ꙗ҆́кѡ мо́жетъ, вѣ́рꙋѧ, къ безсме́ртїю прехо́дитъ.

и҃і. Свобо́дными да мнѧ́тсѧ тѝ, не по состоѧ́нїю свобо́дные, но житїе́мъ и҆ нра́вами свобо́дные. Не подоба́етъ бо нарица́ти свобо́дными вои́стиннꙋ кнѧзе́й ѕлы́хъ сꙋ́щихъ, и҆лѝ невозде́ржныхъ: раби́ бо сꙋ́ть страсте́й веще́ственныхъ. Свобо́да же и҆ благополꙋ́чїе дꙋшѝ є҆́сть и҆́скреннѧѧ чистота̀, и҆ привре́менныхъ презрѣ́нїе.

ѳ҃і. Напомина́й себѣ̀, ꙗ҆́кѡ непреста́ннѡ пока́зоватисѧ подоба́етъ благи́мъ житїе́мъ, и҆ дѣла́ми са́мыми. Та́кѡ бо и҆ болѧ́щїи враче́й не ѿ сло́въ, но ѿ дѣ́лъ спаси́телѧми и҆ благодѣ́телѧми нахо́дѧтъ и҆ признаю́тъ.

к҃. Зна́менїе слове́сныѧ и҆ добродѣ́тельныѧ дꙋшѝ є҆́сть взо́ръ, постꙋ́пка, гла́съ, смѣ́хъ, ѡ҆бхожде́нїе и҆ разгово́ры: всѧ̑ бо и҆змѣнѧ́ютсѧ, и҆ премѣнѧ́ютсѧ въ благоѡбра́знѣйшее. бг҃олюби́вый бо ᲂу҆́мъ слове́сныхъ люде́й, сы́й вра́тарь тре́звый, заключа́етъ вхо́дъ ѕлы̑мъ и҆ сра̑мнымъ помышле́нїѧмъ.

к҃а. Бг҃ъ дꙋ́шꙋ свобо́дною и҆ самовла́стною содѣ́ла въ дѣ́ланїи добра̀ и҆лѝ ѕла̀.

к҃в. Слове́снаѧ дꙋша̀ тщи́тсѧ и҆зба́витисѧ безпꙋ́тства, го́рдости, киче́нїѧ, пре́лести, ᲂу҆бі́йства, хище́нїѧ, и҆ подо́бныхъ, є҆ли̑ка дѣла̀ сꙋ́ть де́монѡвъ и҆ лꙋка́вагѡ произволе́нїѧ. Всѧ̑ же тща́нїемъ и҆ навыкнове́нїемъ постоѧ́ннымъ и҆справлѧ́етъ человѣ́къ, и҆мꙋ́щїй жела́нїе не стремѧ́щеесѧ къ ѕлы̑мъ сласте́мъ.

к҃г. Провожда́ющїи ма́лое и҆ несоверше́нное житїѐ, и҆ бѣ́дъ и҆збавлѧ́ютсѧ, и҆ стрегꙋ́щихъ не тре́бꙋютъ: побѣжда́ѧ же по́хоть во все́мъ, пꙋ́ть къ бг҃ꙋ ᲂу҆до́бь ѡ҆брѣта́ютъ.

к҃д. Словє́снымъ лю́демъ не подоба́етъ мнѡ́гимъ бесѣ́дамъ внима́ти, но полє́знымъ, и҆́миже ᲂу҆правлѧ́етъ во́лѧ бж҃їѧ. Та́кѡ бо къ животꙋ̀ и҆ свѣ́тꙋ вѣ́чномꙋ возвраща́ютсѧ лю́ди.

к҃є. Подоба́етъ добродѣ́тельнагѡ и҆ бг҃олюби́вагѡ и҆́щꙋщымъ житїѧ̀ и҆збы́ти ѿ многомы́слїѧ ѡ҆ себѣ̀, и҆ всѧ́кїѧ тще́тныѧ и҆ ло́жныѧ сла́вы, и҆ пещи́сѧ ѡ҆ благо́мъ и҆справле́нїи житїѧ̀ и҆ мы́сли: бг҃олюби́вый бо и҆ неизмѣ́нный ᲂу҆́мъ, возведе́нїе и҆ пꙋ́ть є҆́сть къ бг҃ꙋ.

к҃ѕ. Ни є҆ди́ныѧ же нѣ́сть по́льзы ᲂу҆чи́тисѧ наꙋ́камъ, а҆́ще не бꙋ́детъ благоꙋго́днагѡ и҆ бг҃оꙋго́днагѡ житїѧ̀ дꙋшѝ: вина́ же всѣ́хъ ѕѡ́лъ заблꙋжде́нїе, пре́лесть и҆ невѣ́дѣнїе бг҃а.

к҃з. Поꙋче́нїе до́бромꙋ житїю̀, и҆ тща́нїе ѡ҆ дꙋшѣ̀, благи́хъ и҆ бг҃олюби́выхъ мꙋже́й содѣ́ловаетъ. И҆́щꙋщїй бо бг҃а ѡ҆брѣта́етъ є҆го̀, побѣжда́ѧ по́хоть во все́мъ, ѿ моли́твы не ѿстꙋпа́ѧ: таковы́й бо бѣсѡ́въ не бои́тсѧ.

к҃и. Жите́йскими наде́ждами прельща́емїи, слове́снѡ то́чїю вѣ́дꙋщїи, ꙗ҆̀же по и҆зѧ́щномꙋ житїю̀ подоба́етъ твори́ти, подо́бное нѣ́что претерпѣва́ютъ стѧжа́вшымъ врачєвства̀, и҆ ѻ҆рꙋ́дїѧ врачє́бныѧ, ᲂу҆потреблѧ́ти же ѻ҆́ныѧ нижѐ вѣ́дꙋщымъ, нижѐ пекꙋ́щымсѧ. Тѣ́мже ᲂу҆чине́нныхъ на́ми грѣхѡ́въ да не поставлѧ́емъ вино́ю николи́же рожде́нїе, и҆лѝ дрꙋга́го нѣ́коего, но сами́хъ себѐ. А҆́ще бо сама̀ дꙋша̀ восхо́щетъ лѣни́тисѧ, непобѣди́ма бы́ти не мо́жетъ.

к҃ѳ. Невѣ́дꙋщемꙋ разсꙋжда́ти, что́ є҆сть бла́го, и҆ что́ є҆сть ѕло̀, не лѣ́ть є҆́сть сꙋди́ти благи́хъ и҆ ѕлы́хъ. Человѣ́къ бо вѣ́дꙋщїй бг҃а, є҆́сть благі́й: а҆́ще же кто̀ нѣ́сть бла́гъ, се́й ничто́же вѣ́сть, нижѐ ᲂу҆вѣ́стьсѧ когда́либо: занѐ спо́собъ ᲂу҆разꙋмѣ́ти бг҃а, є҆́сть бла́гость.

л҃. Благі́е и҆ бг҃олюби́вые мꙋ́жи присꙋ́тствꙋющихъ пред̾ лице́мъ люде́й во ѕлѣ̀ ѡ҆блича́ютъ, неприсꙋ́тствꙋющихъ же не ᲂу҆корѧ́ютъ, и҆ нижѐ предпрїе́млющымъ ѻ҆́нымъ глаго́лати что̀ позволѧ́ютъ.

л҃а. Въ бесѣ́дахъ ни є҆ди́ныѧ стропти́вости да не бꙋ́детъ: слове́сныхъ бо люде́й сты́дъ и҆ цѣломꙋ́дрїе, па́че не́же дѣ́въ, ᲂу҆краша́ти вѣ́сть. боголюби́вый бо ᲂу҆́мъ свѣ́тъ є҆́сть, ѡ҆сїѧва́ющїй дꙋ́шꙋ, ꙗ҆́коже со́лнце тѣ́ло.

л҃в. При всѣ́хъ прилꙋча́ющихсѧ тебѣ̀ дꙋше́вныхъ страсте́хъ, по́мни, ꙗ҆́кѡ пра́вѡ мы́слѧщымъ и҆ хотѧ́щымъ въ подоба́ющее и҆ без̾ѻпа́сное провестѝ положе́нїе до́мъ сво́й. не тлѣ́нное стѧжа́нїе бога́тства сла́достно и҆̀мъ ꙗ҆влѧ́етсѧ, но пра̑выѧ и҆ и҆́стинныѧ по́чєсти: сі́и и҆̀хъ благополꙋ́чными содѣ́ловаютъ. Бога́тство бо и҆ кра́детсѧ, и҆ ѿ си́льнѣйшихъ похища́етсѧ: добродѣ́тель же дꙋшѝ є҆́сть є҆ди́ное стѧжа́нїе и҆ без̾ѻпа́сное и҆ некра́домое, и҆ по сме́рти спаса́ющее стѧжа́вшихъ ѻ҆́ное. Та́кѡ бо мы́слѧщихъ не восхища́етъ мечта́нїе бога́тства и҆ про́чихъ сласте́й.

л҃г. Не подоба́етъ непостоѧ̑ннымъ и҆ ненаꙋчє́ннымъ и҆спы́товати слове́сныхъ мꙋже́й. Слове́сный же мꙋ́жъ є҆́сть богоꙋго́дный, и҆́же ѡ҆ мно́гомъ молчи́тъ, и҆лѝ ма́лѡ и҆ ѡ҆ нꙋ́жномъ и҆ богоꙋго́дномъ разсꙋжда́етъ.

л҃д. Добродѣ́тельномꙋ и҆ боголюбе́зномꙋ житїю̀ послѣ́дꙋющїй, добродѣ́телємъ дꙋшѝ прилѣжа́тъ ꙗ҆́кѡ со́бственномꙋ и҆́хъ стѧжа́нїю, и҆ вѣ́чномꙋ наслажде́нїю сꙋ́щꙋ. Привре́менными же наслажда́ютсѧ, є҆ли́кѡ вмѣсти́тельно, и҆ є҆ли́кѡ бг҃ъ дае́тъ, и҆ хо́щетъ, со всѧ́кимъ весе́лїемъ и҆ благодаре́нїемъ содѣ́ловающе себѣ̀ по́льзꙋ, а҆́ще бы и҆ вельмѝ была̀ ᲂу҆мѣ́ренна. Многоцѣ̑нныѧ бо ꙗ҆́ства тѣлеса̀ пита́ютъ, ꙗ҆́кѡ веще́ствєнныѧ: позна́нїе же бг҃а, и҆ воздержа́нїе, и҆ бла́гость, и҆ благотворе́нїе, и҆ благоче́стїе, и҆ кро́тость дꙋ́шꙋ ѡ҆боготворѧ́ютъ.

л҃є. Произволе́нїемъ слове́сный человѣ́къ ѡ҆блада́етъ ѡ҆ созда́вшемъ бз҃ѣ, и҆́же всѧ́кїѧ нꙋ́жды и҆ всѧ́кїѧ си́лы є҆́сть крѣ́плїй.

л҃ѕ. Неща́стїемъ почита́ющїи лише́нїе бога́тства, и҆лѝ ча̑дъ, и҆лѝ рабѡ́въ, и҆лѝ дрꙋга́гѡ и҆мѣ́нїѧ, да вѣ́дѧтъ, ꙗ҆́кѡ пе́рвѣе дово́льствоватисѧ подоба́етъ подае́мыми ѿ бг҃а, и҆ ꙗ҆́кѡ подоба́етъ ѿдава́ти ѻ҆́наѧ ѻ҆хо́тнѡ и҆ благомы́сленнѡ, ни ма́лѡ не ѡ҆скорблѧ́ѧсѧ лише́нїемъ сегѡ̀, па́че же рещѝ возвраще́нїемъ: попо́льзовавшесѧ бо несо́бственнымъ, па́ки ѻ҆́ное ѿдае́мъ.

л҃з. Дѣ́ло блага́гѡ человѣ́ка є҆́сть, не продава́ти свобо́дное произволе́нїе, внима́ѧ прїѧ́тїю бога́тства, а҆́ще вы̀ и҆ вельмѝ мно́го бы́ло подае́мо. Снꙋ́ бо подѡ́бна сꙋ́ть житє́йскаѧ, и҆ безвѣ̑стнаѧ и҆ маловре́мєннаѧ и҆́мать мечта̑нїѧ бога́тство.

л҃и. И҆̀же вои́стиннꙋ сꙋ́ть человѣ́цы, толи́кѡ да тща́тсѧ боголюбе́знѡ и҆ добродѣ́тельнѡ жи́тельствовати, ꙗ҆́кѡ да просїѧва́етъ добродѣ́тельное житїѐ и҆́хъ междꙋ̀ дрꙋги́ми людьмѝ, ꙗ҆́коже порфѵ́ра ма́лаѧ надѣ́таѧ на бѣ̑лыѧ ѻ҆дє́жды, ᲂу҆краша́ющаѧ ѻ҆́ныѧ, просїѧва́етъ и҆ ꙗ҆влѧ́етсѧ. Та́кѡ бо тве́рже добродѣ́телємъ дꙋшѝ прилѣжа́ти бꙋ́дꙋтъ.

л҃ѳ. Разꙋ̑мнымъ лю́демъ подоба́етъ разсма́тривати свою̀ си́лꙋ, и҆ прїꙋготовле́нїе сꙋ́щїѧ въ ни́хъ дꙋше́вныѧ добродѣ́тели, и҆ та́кѡ прїꙋготовлѧ́тисѧ, и҆ противлѧ́тисѧ срѣта́ющымсѧ страсте́мъ, по сꙋ́щей въ ни́хъ си́лѣ добродѣ́тели, дарова́нной и҆̀мъ, по є҆стествꙋ̀ ѿ бг҃а. Є҆́сть же проти́вꙋ красоты̀ и҆ всѧ́кїѧ по́хоти дꙋшевре́дныѧ, воздержа́нїе: проти́въ трꙋдѡ́въ и҆ скꙋ́дости, крѣ́пость, а҆ проти́вꙋ досажде́нїѧ и҆ ꙗ҆́рости, неѕло́бїе и҆ подѡ́бнаѧ си̑мъ.

м҃. Человѣ́кꙋ благи́мъ и҆ мꙋ́дрымъ скороспѣ́шнѡ содѣ́латисѧ не мо́жно, но трꙋдолю́бнымъ поꙋче́нїемъ, и҆ и҆з̾ꙋче́нїемъ и҆ и҆скꙋ́сомъ, со вре́менемъ и҆ по́двигомъ, и҆ жела́нїемъ блага́гѡ дѣ́ла. Благі́й же и҆ боголюби́вый человѣ́къ, вои́стиннꙋ вѣ́дꙋщїй бг҃а, не престае́тъ незави́стнѡ твори́ти всѧ̑ богоꙋгѡ́днаѧ. Рѣ́дки же таковы́е мꙋ́жи ѡ҆брѣта́ютсѧ.

м҃а. Не подоба́етъ несрѡ́днымъ по є҆стествꙋ̀ лю́дѧмъ, ѿчаѧва́ѧсѧ въ себѣ̀, ѡ҆слабѣва́ти въ боголюбе́зномъ и҆ добродѣ́тельномъ житїѝ, и҆ презира́ти ѻ҆́ное, ꙗ҆́кѡ непристꙋ́пное и҆ непостижи́мое и҆̀мъ, но подоба́етъ поꙋча́тисѧ и҆̀мъ по си́лѣ, и҆ прилѣжа́ти себѣ̀ сами́мъ. А҆́ще бо и҆ не мо́гꙋтъ соверше́ннѡ стѧжа́ти добродѣ́тель и҆ спасе́нїе: ѻ҆ба́че ѿ поꙋче́нїѧ, и҆ жела́нїѧ, и҆лѝ лꙋ́чшими быва́ютъ, и҆лѝ не хꙋ́ждшими, что̀ не ма́лаѧ є҆́сть по́льза дꙋшѣ̀.

м҃в. Человѣ́къ по ᲂу҆мꙋ̀ съ неизрече́нною ѻ҆́ною и҆ боже́ственною си́лою совокꙋплѧ́етсѧ: по тѣ́лꙋ же и҆мѣ́етъ сро́дство съ живо́тными. И҆ не мно́зи, є҆ли́цы то́чїю сꙋ́ть соверше́нные лю́ди, и҆ слове́сные, къ бг҃ꙋ сп҃си́телю мы́сль, и҆ съ ни́мъ сро́дство и҆мѣ́ти тща́тсѧ: и҆ сїѐ дѣла́ми и҆ добродѣ́тельнымъ житїе́мъ показꙋ́ютъ, мно́жайшїи же ѿ люде́й, безꙋ́мнїи дꙋше́ю, бж҃е́ственное ѻ҆́ное и҆ безсме́ртное сыноположе́нїе ѡ҆ста́вивше, къ ме́ртвомꙋ, и҆ бѣ́дственномꙋ, и҆ маловре́менномꙋ сро́дствꙋ тѣле́сномꙋ ᲂу҆клони́вшесѧ, ꙗ҆́кѡ безслове́снїи, мꙋ́дрствꙋѧ плотска̑ѧ, и҆ ѿ сласте́й разжиза́ѧсѧ, ѿлꙋча́ютъ са́ми себѐ ѿ бг҃а, и҆ низво́дѧтъ дꙋ́шꙋ съ нб҃съ въ про́пасть ѿ нбⷭ҇ныхъ є҆ѧ̀ жела́нїй.

м҃г. Слове́сный мꙋ́жъ спребыва́нїе съ бж҃ество́мъ, и҆ сою́зъ помышлѧ́ѧ, николи́же ничегѡ̀ земна́гѡ, и҆лѝ ᲂу҆ниже́ннагѡ не возлю́битъ: но къ небє́снымъ и҆ вѣ̑чнымъ и҆́мать ᲂу҆́мъ, и҆ разꙋмѣ́етъ, ꙗ҆́кѡ во́лѧ бж҃їѧ сїѧ̀ є҆́сть, дабы̀ спа́ссѧ человѣ́къ, ꙗ҆́кѡ ѻ҆на̀ є҆́сть вина̀ всѧ́кагѡ добра̀, и҆ и҆сто́чникъ вѣ́чныхъ бла̑гъ лю́демъ.

м҃д. Є҆гда̀ ѡ҆брѧ́щеши нѣ́коего любопрю́щасѧ и҆ борю́щасѧ съ тобо́ю проти́въ и҆́стины, ꙗ҆́внѡ преста́вши ѿ любопрѣ́нїѧ, ᲂу҆стꙋпѝ таково́мꙋ всѧ́кѡ ѡ҆камене́вшемꙋ ᲂу҆мо́мъ. Ꙗ҆́коже бо добро́тные ві́ны хꙋдѣ́йшаѧ вода̀ непотре́бными твори́тъ: тѣ́мъ же ѡ҆́бразомъ и҆ добродѣ́тельныхъ житїе́мъ и҆ мы́слїю, ѕлы̑ѧ бесѣ̑ды растлѣва́ютъ.

м҃є. А҆́ще всѐ тща́нїе и҆ и҆скꙋ́сство ᲂу҆потреблѧ́емъ длѧ и҆збѣжа́нїѧ тѣле́снагѡ ᲂу҆мерщвле́нїѧ: мно́гѡ па́че тща́тисѧ до́лженствꙋемъ ѡ҆ и҆збѣжа́нїи дꙋше́внагѡ ᲂу҆мерщвле́нїѧ. Хотѧ́щемꙋ во спасти́сѧ ни є҆ди́нагѡ нѣ́тъ препѧ́тствїѧ, ра́звѣ то́чїю нерадѣ́нїе, и҆ ᲂу҆ны́нїе дꙋшѝ.

м҃ѕ. Є҆ли́цы стꙋжа́ютъ мы́слити полє́знаѧ, и҆ добро́мъ глаго́лємаѧ, сі́и ѕлоща́стными бы́ти мнѧ́тсѧ. Є҆ли́цы же разꙋмѣва́ѧ и҆́стинꙋ, безстꙋ́днѡ любопрѧ́тсѧ, си́хъ разꙋмѣ́нїе ᲂу҆мертви́сѧ, и҆ ѕвѣ́рскимъ ᲂу҆чини́сѧ нра́въ и҆́хъ, и҆ не вѣ́дѧтъ бг҃а, нижѐ просвѣти́сѧ дꙋша̀ и҆́хъ.

м҃з. Ро́ды живо́тныхъ бг҃ъ ко взаи́мной нꙋ́ждѣ произведѐ сло́вомъ свои́мъ, и҆ны̑ѧ длѧ ᲂу҆потребле́нїѧ въ пи́щꙋ, и҆ны̑ѧ длѧ слꙋже́нїѧ: человѣ́ка же сотворѝ зри́телемъ ѻ҆́ныхъ, и҆ дѣ́лъ и҆́хъ, и҆ благода́рнымъ и҆столкова́телемъ. Тѣ́мже подоба́етъ тща́тисѧ лю́демъ, да не ка́кѡ неви́дѣвшими и҆ неразꙋмѣ́вшими бг҃а, и҆ дѣ́лъ є҆гѡ̀, ᲂу҆́мрꙋтъ ꙗ҆́кѡ ѕвѣ́ри безслове́снїи. Вѣ́дѣти же подоба́етъ человѣ́кꙋ, ꙗ҆́кѡ бг҃ъ всѧ̑ мо́жетъ, и҆ ничто́же є҆́сть проти́вно всѧ̑ могꙋ́щемꙋ: но и҆з̾ не сꙋ́щагѡ всѧ̑, ꙗ҆̀же восхотѣ̀, сотворѝ, и҆ твори́тъ сло́вомъ свои́мъ во спасе́нїе человѣ́кѡмъ.

м҃и. Сꙋ̑щаѧ на небесѝ безсмє́ртна сꙋ́ть, по бла́гости сꙋ́щей въ ѻ҆́ныхъ: сꙋ̑щаѧ же на землѝ смє́ртна, по сꙋществꙋ́ющей въ ѻ҆́ныхъ самопроизво́льной ѕло́бѣ, ꙗ҆́же прилꙋча́етсѧ безꙋ̑мнымъ ѿ лѣ́ности и҆́хъ, и҆ невѣ́дѣнїѧ бг҃а.

м҃ѳ. Сме́рть разꙋмѣва́ема людьмѝ, безсме́ртїе є҆́сть: не разꙋмѣва́ема же невѣ́ждами, сме́рть є҆́сть. И҆ сеѧ̀ сме́рти не подоба́етъ боѧ́тисѧ, но па́гꙋбы дꙋше́вныѧ, ꙗ҆́же є҆́сть невѣ́дѣнїе бг҃а. Сїе́ бо лю́то є҆́сть дꙋшѣ̀.

н҃. Ѕло́ба, стра́сть вещества̀ є҆́сть. Тѣ́мже не возмо́жно тѣ́лꙋ без̾ ѕло́бы бы́ти. Слове́снаѧ же дꙋша̀ помышлѧ́ѧ сїѐ, сотрѧса́етъ вещества̀ тѧ́жесть, ꙗ҆́же є҆́сть ѕло́ба, и҆ ѿ таковы́ѧ тѧ́жести возника́ѧ, познае́тъ бг҃а всѣ́хъ, и҆ ꙗ҆́коже врагꙋ̀, и҆ ра́таю вне́млетъ тѣ́лꙋ, не повинꙋ́ющисѧ є҆мꙋ̀. И҆ та́кѡ ᲂу҆вѣнчава́етсѧ дꙋша̀ ѿ бг҃а, ꙗ҆́кѡ стра̑сти ѕло́бы, и҆ вещества̑ побѣди́вшаѧ.

н҃а. Ѕло́ба позна́на дꙋше́ю ненави́дима быва́етъ, ꙗ҆́кѡ ѕвѣ́рь ѕлово́ннѣйшїй: не позна́нна же, люби́ма быва́етъ ѿ невѣ́дꙋщагѡ є҆ѐ, и҆ порабоща́ѧ люби́телѧ своего̀, и҆мѣ́етъ є҆го̀ плѣ́нникомъ. И҆ та́кѡ ѕлоща́стный и҆ ѻ҆каѧ́нный человѣ́къ нижѐ зри́тъ поле́зное себѣ̀, нижѐ разꙋмѣ́етъ, но мни́тъ ᲂу҆краша́тисѧ ѿ ѕло́бы, и҆ весели́тсѧ.

н҃в. Чи́стаѧ дꙋша̀, блага̀ сꙋ́щи, просвѣща́етсѧ, и҆ ѡ҆сїѧва́етсѧ ѿ бг҃а, и҆ тогда̀ ᲂу҆́мъ блага̑ѧ мы́слитъ, и҆ словеса̀ боголюби̑ваѧ ражда́етъ. Є҆гда́ же ѕло́бою ѡ҆скверни́тсѧ дꙋша̀, бг҃ꙋ ѿвраща́ющꙋсѧ є҆ѧ̀, па́че же дꙋшѣ̀ ѿлꙋча́ющей себѧ̀ ѿ бг҃а, лꙋка́вые бѣ́сы вше́дше въ по́мыслъ, на непра́вєдныѧ дѣѧ̑нїѧ под̾ꙋща́ютъ дꙋ́шꙋ: на прелюбодѣѧ̑нїѧ, ᲂу҆бі̑йства, хищє́нїѧ, свѧтота̑тства, и҆ подѡ́бнаѧ, є҆ли̑ка дѣла̀ бѣсѡ́вскаѧ сꙋ́ть.

н҃г. Вѣ́дѧщїи бг҃а и҆сполнѧ́ютсѧ всѧ́кїѧ благі́ѧ мы́сли, и҆ небе́сныхъ жела́юще, житє́йскаѧ презира́ютъ. Таковы́и же ни мнѡ́гимъ ᲂу҆гожда́ютъ, ни мнѡ́гимъ ᲂу҆гѡ́дны быва́ютъ, та́къ что̀ за сїѐ не то́кмѡ ненави́димы быва́ютъ, но и҆ посмѣва́емы мно́гими ѿ безꙋ́мныхъ. Всѧ̑ же терпѣ́ти ѿ ᲂу҆бо́жества и҆зволѧ́ютъ, вѣ́дѧще, ꙗ҆́кѡ мнѡ́гимъ ꙗ҆влѧ́ющаѧсѧ ѕло́мъ, ѻ҆́нымъ сꙋ́ть бла́го. Разꙋмѣва́ющїй бо небє́снаѧ, вѣ́рꙋетъ бг҃ꙋ, вѣ́даѧ, ꙗ҆́кѡ всѧ̑ творє́нїѧ зави́сѧтъ ѿ во́ли ѻ҆́нагѡ: не разꙋмѣва́ющїй же не вѣ́рꙋетъ николи́же, ꙗ҆́кѡ мі́ръ є҆́сть дѣ́ло бж҃їе: и҆ длѧ спасе́нїѧ человѣ́ка сотворе́нъ бы́сть.

н҃д. И҆спо́лненнїи ѕло́бы, и҆ невѣ́жествомъ ᲂу҆пива́ющїисѧ, не разꙋмѣ́ютъ бг҃а, не трезвѧ́тсѧ дꙋше́ю: бг҃ъ бо разꙋмѣва́емь є҆́сть, а҆ не ви́димь, вельми́ же ꙗ҆́венъ въ ви́димыхъ тва́рехъ, ꙗ҆́коже дꙋша̀ въ тѣ́лѣ: и҆ ꙗ҆́коже тѣ́лꙋ без̾ дꙋшѝ не возмо́жно состоѧ́ти, та́кѡ и҆ всемꙋ̀ ви́димомꙋ и҆ сꙋ́щемꙋ без̾ бг҃а состоѧ́ти не возмо́жно.

н҃є. Чесѡ̀ ра́ди со́зданъ человѣ́къ; Да творє́нїѧ бж҃їѧ разꙋмѣва́ѧ, ᲂу҆́зритъ є҆го̀, и҆ просла́витъ созда́вшаго ѻ҆́ныѧ длѧ человѣ́ка. Оу҆́мъ же боговозлю́бленный неви́димое є҆́сть бла́го, да́рꙋемый ѿ бг҃а достѡ́йнымъ по благо́мꙋ житїю̀.

н҃ѕ. Свобо́дный є҆́сть, не рабо́тающїй сластє́мъ, но ѿ мꙋ́дрости и҆ цѣломꙋ́дрїѧ ѡ҆блада́ющїй тѣ́ломъ, и҆ дово́льствꙋющїйсѧ со мно́гимъ благодаре́нїемъ подае́мымъ є҆мꙋ̀ ѿ бг҃а, а҆́ще бы и҆ вельмѝ бы́ло ма́лѡ. боголюби́вый бо ᲂу҆́мъ и҆ дꙋша̀, а҆́ще согла́сны бꙋ́дꙋтъ, ми́рно быва́етъ всѐ тѣ́ло, и҆ не хотѧ́щи. Дꙋшѣ́ бо хотѧ́щей, всѧ́кое тѣле́сное движе́нїе погаша́етсѧ.

н҃з. Не дово́льствꙋющїисѧ сꙋ́щимъ ᲂу҆ себѧ̀ и҆мѣ́нїемъ, но бо́льшагѡ жела́ющїи, порабоща́ютъ себѧ̀ страсте́мъ мѧтꙋ́щымъ дꙋ́шꙋ, и҆ влага́ющымъ въ ѻ҆́нꙋю по́мыслы и҆ мечта̑нїѧ, ꙗ҆́кѡ сі́и та̑ѧжде ѕла̑ѧ сꙋ́ть. И҆ ꙗ҆́коже безмѣ̑рныѧ ѻ҆дє́жды подвиза́ющымсѧ въ тече́нїи препѧ́тствꙋютъ: тѣ́мъ же ѡ҆́бразомъ и҆ жела́нїе чрезмѣ́рнагѡ и҆мѣ́нїѧ, дꙋша́мъ подвиза́тисѧ и҆лѝ спасти́сѧ не попꙋска́етъ.

н҃и. Въ че́мъ кто́либо принꙋжде́нъ и҆ нево́ленъ, сїѐ темни́ца є҆́сть є҆мꙋ̀ и҆ мꙋ́ка. Любѝ ᲂу҆̀бо прилꙋча́ющаѧсѧ тѝ, да не бꙋ́деши неблагода́рнѡ сносѧ̀, себѐ самаго̀ нечꙋвстви́тельнѡ мꙋ́чити. Є҆ди́нъ же пꙋ́ть є҆́сть къ семꙋ̀, презрѣ́нїе жите́йскихъ.

н҃ѳ. Ꙗ҆́коже видѣ́нїе и҆́мамы ѿ бг҃а длѧ позна́нїѧ ꙗ҆влѧ́емыхъ веще́й, что̀ бѣло̀, и҆ что̀ цвѣ́тꙋ че́рнагѡ: та́кѡ и҆ слове́сность дарова́на на́мъ ѿ бг҃а, во є҆́же разсꙋжда́ти полє́знаѧ дꙋшѣ̀. По́хоть же ѿ разсꙋ́дка ѿторга́ѧсѧ, сла́сть ражда́етъ, и҆ дꙋшѣ̀ спасти́сѧ и҆лѝ съ бг҃омъ соедини́тисѧ не попꙋска́етъ.

ѯ҃. Не по є҆стествꙋ̀ быва̑ющаѧ, сꙋ́ть грѣхѝ, но по произволе́нїю лꙋка̑ваѧ. Нижѐ ꙗ҆́сти є҆́сть грѣ́хъ, но неблагода́рнѡ, и҆ не благолѣ́пнѡ, и҆ невозде́ржнѡ ꙗ҆́сти: поне́же тѣ́ло сꙋществꙋ́етъ въ жи́зни без̾ всѧ́кагѡ лꙋка́вагѡ помышле́нїѧ. Нижѐ про́стѡ зрѣ́ти є҆́сть грѣ́хъ, но зави́стнѡ и҆ гордели́внѡ, и҆ ненасы́тнѡ зрѣ́ти: и҆ нѣ́сть грѣ́хъ слꙋ́шати ми́рнѡ, но гнѣвли́вѡ: и҆ нѣ́сть грѣ́хъ ѡ҆бꙋ́здывати ѧ҆зы́къ ко благодаре́нїю и҆ моли́твѣ, но ко ѡ҆клевета́нїю: и҆ нѣ́сть грѣ́хъ простира́ти рꙋ́ки къ ми́лостынѣ, но къ ᲂу҆бі́йствамъ и҆ хище́нїѧмъ. И҆ та́кѡ ка́ждый чле́нъ грѣши́тъ, лꙋка̑ваѧ вмѣ́стѡ благи́хъ, проти́въ во́ли бж҃їей, самопроизво́льнѡ дѣ́лающїй.

ѯ҃а. А҆́ще сомнѣва́ешисѧ, ꙗ҆́кѡ ка́ждое дѣ́ло назира́етсѧ ѿ бг҃а, разсꙋдѝ, что̀ ты̀ человѣ́къ сы́й, и҆ пра́хъ, мо́жеши вкꙋ́пѣ и҆ въ ѻ҆дно̀ вре́мѧ ѡ҆ всѧ́кихъ мѣста́хъ разсꙋжда́ти и҆ помышлѧ́ти: мно́гѡ па́че бг҃ъ, всѐ ви́дѧщїй, ꙗ҆́кѡ зе́рно горꙋ́шное, всѐ ѡ҆животворѧ́ющїй и҆ пита́ющїй, ꙗ҆́коже хо́щетъ.

ѯ҃в. Є҆гда̀ заключи́ши двє́ри хра́мины, и҆ є҆ди́нъ бꙋ́деши, зна́й, что̀ соприсꙋ́тствꙋетъ тѝ ѡ҆предѣле́нный ѿ бг҃а ка́ждомꙋ человѣ́кꙋ а҆́гг҃лъ, є҆го́же є҆́ллины домо́вымъ бѣ́сомъ нарица́ютъ. Се́й, неꙋсыпа́емь и҆ непрельща́емь бꙋ́дꙋчи, всегда̀ соприсꙋ́тствꙋетъ тѝ, всѐ ви́дитъ, и҆ мра́комъ не возбранѧ́етсѧ. Вкꙋ́пѣ съ си́мъ признава́й и҆ бг҃а, во всѧ́комъ мѣ́стѣ сꙋ́щаго. И҆́бо нѣ́тъ мѣ́ста, и҆лѝ ве́щи нѣ́кїѧ, въ не́йже бы не бы́лъ бг҃ъ, ꙗ҆́кѡ всѣ́хъ бо́льшїй, и҆ всѣ́хъ содержа́щи въ рꙋцѣ̀ свое́й.

ѯ҃г. А҆́ще во́ины вѣ́рность къ ке́сарю хранѧ́тъ, потомꙋ̀ что̀ подае́тсѧ ѿ негѡ̀ пи́ща: мно́гѡ па́че до́лженствꙋемъ мы̀ благодари́ти безпреста́ннѡ немо́лчными ᲂу҆сты̀, и҆ ᲂу҆гожда́ти бг҃ꙋ, всѧ̑ созда́вшемꙋ длѧ человѣ́ка.

ѯ҃д. Къ бг҃ꙋ благода́рность, и҆ благо́е жи́тельство, человѣ́ческїй пло́дъ є҆́сть бг҃оꙋго́дный. Плоды́ же земны̑ѧ не въ ѻ҆ди́нъ ча́съ созрѣва́ютъ, но по вре́мени, ѿ дожде́й, и҆ прилѣжа́нїѧ: тѣ́мъ же ѡ҆́бразомъ и҆ плоды̀ человѣ́чєскїѧ, по́двигомъ, и҆ поꙋче́нїемъ, со вре́менемъ, крѣ́постїю, и҆ воздержа́нїемъ, и҆ терпѣ́нїемъ ѡ҆свѣща́ютсѧ. А҆́ще же ѿ си́хъ пока́жешьсѧ нѣ́котѡрымъ когда́либо благочести́въ, не вѣ́рь самомꙋ̀ себѣ̀, до́ндеже въ тѣлесѝ, и҆ ничто́же ѿ твои́хъ мнѝ ᲂу҆го́днымъ бы́ти бг҃ꙋ. И҆́бо зна́й, что̀ не ᲂу҆до́бно человѣ́кꙋ до конца̀ сохрани́ти безгрѣ́шность.

ѯ҃є. Сло́ва ᲂу҆ люде́й ничто́же є҆́сть честнѣ́йше. Та́къ си́льно є҆́сть сло́во, что̀ сло́вомъ и҆ благодаре́нїемъ бг҃а чти́мъ: непотре́бное же и҆ безче́стное сло́во ᲂу҆потреблѧ́ѧ, ѡ҆сꙋжда́емъ на́шꙋ дꙋ́шꙋ. Нечꙋвстви́тельнагѡ ᲂу҆́бѡ человѣ́ка є҆́сть дѣ́ло, рожде́нїе своѐ и҆лѝ дрꙋга́го нѣ́коего ѡ҆бвинѧ́ти въ то́мъ, что̀ ѻ҆́нъ грѣши́тъ, ᲂу҆потреблѧ́ѧ самовла́стнѡ и҆лѝ сло́во и҆лѝ дѣ́ло лꙋка́вое.

ѯ҃ѕ. А҆́ще болѣ̑зни тѣлє́сныѧ цѣли́ти тщи́мсѧ за ѡ҆смѣѧ́нїе срѣта́ющихсѧ: мно́гѡ па́че потре́бно тща́тисѧ болѣ̑зни дꙋшє́вныѧ цѣли́ти, ꙗ҆́кѡ пред̾ лице́мъ бж҃їимъ и҆мѣ́емъ сꙋди́ми бы́ти, да не безче́стными ѡ҆брѧ́щемсѧ, и҆лѝ посмѣѧ́нїѧ досто́йными. И҆мѣ́ѧ бо самовла́стїе, а҆́ще восхо́щемъ, похотствꙋ́ѧ къ лꙋка̑вымъ дѣѧ́нїѧмъ, не и҆мѣ́ти ѻ҆́ныхъ, сїѐ сотвори́ти мо́жемъ, и҆ въ на́шей вла́сти є҆́сть бг҃оꙋго́днѡ пожи́ти: и҆ никто́же на́съ принꙋ́дитъ когда̀, про́тивъ во́ли сотвори́ти что̀ лꙋка́вое. Та́кѡ бо подвиза́ющесѧ, бꙋ́демъ досто́йнїи человѣ́цы бж҃їи, и҆ ꙗ҆́кѡ а҆́гг҃ли на небесѣ́хъ жи́тельствꙋющїи.

ѯ҃з. А҆́ще хо́щеши, ра́бъ бы́ти мо́жеши страсте́й: а҆́ще хо́щеши, свобо́денъ бы́ти, мо́жеши, и҆ не преклони́шисѧ къ страсте́мъ. Бг҃ъ бо тѧ̀ самовла́стнымъ сотворѝ. Побѣжда́ѧй стра̑сти плотскі̑ѧ, ᲂу҆вѣнчава́етсѧ нетлѣ́нїемъ. А҆́ще бо не бы̀ бы́ли стра̑сти, не бы̀ бы́ли добродѣ́тєли, нижѐ вѣнцы̀ да́рꙋємыѧ ѿ бг҃а достѡ́йнымъ ѿ человѣ̑къ.

ѯ҃и. Неви́дѧщїи по́льзы своеѧ̀, и҆ бла́га невѣ́дѧщїи слѣпотствꙋ́ютъ дꙋше́ю, и҆ разсꙋ́докъ и҆́хъ ѡ҆слѣпи́сѧ. Тѣ́мже не подоба́етъ къ си̑мъ ѡ҆браща́ти мы́сль, да не томꙋ́жде по нꙋ́ждѣ подпаде́мъ и҆ мы̀, не пред̾ꙋсмотрѣ́въ, ꙗ҆́кѡ слѣпы́е.

ѯ҃ѳ. На согрѣша́ющихъ не подоба́етъ гнѣ́ватисѧ, а҆́ще бы и҆ вины̑, ᲂу҆чинє́нныѧ и҆́ми, мꙋче́нїѧ достѡ́йны бы́ли: но по са́мой пра́вдѣ, ѡ҆браща́ти ѻ҆́ныхъ до́лженствꙋемъ, и҆ мꙋ́чити, а҆́ще та́кѡ слꙋчи́тсѧ, и҆лѝ чрез̾ себѧ̀ сами́хъ, и҆лѝ чрез̾ дрꙋги́хъ. Гнѣ́ватисѧ же и҆лѝ ꙗ҆ри́тисѧ не подоба́етъ. Занѐ гнѣ́въ по стра́сти твори́тъ то́чїю, а҆ не по сꙋдꙋ̀ и҆ пра́вдѣ. Тѣ́мже нижѐ све́рхъ до́лжнагѡ ми́лꙋющихъ похвали́ти подоба́етъ. По са́момꙋ добрꙋ̀, и҆ пра́вдѣ подоба́етъ нака́зывати лꙋка́выхъ, а҆ не по со́бственной стра́сти гнѣ́ва.

ѻ҃. Стѧжа́нїе дꙋше́вное є҆ди́но є҆́сть без̾ѻпа́сно и҆ некра́домо. Є҆́сть же ѻ҆но̀ добродѣ́тельное и҆ бг҃оꙋго́дное житїѐ, и҆ разꙋмѣ́нїе, и҆ творе́нїе благи́хъ дѣ́лъ. Бога́тство во слѣпы́й є҆́сть пꙋтеводи́тель, и҆ совѣ́тникъ безꙋ́мный, и҆ погꙋблѧ́етъ нечꙋвстви́тельнꙋю дꙋ́шꙋ, ѕлѣ̀ и҆ и҆збы́точнѡ бога́тство ᲂу҆потреблѧ́вшїй.

ѻ҃а. Подоба́етъ лю́демъ, и҆лѝ ничегѡ̀ ли́шше не стѧжева́ти, и҆лѝ и҆мѣ́ѧ, сїѐ вѣ́дѣти тве́рдѡ, ꙗ҆́кѡ всѧ̑ житє́йскаѧ, по є҆стествꙋ̀ тлѣ́нна и҆ ᲂу҆добоѿе́млєма сꙋ́ть, ѿмє́тна и҆ преломлѧ́єма: и҆ приклю́чшеесѧ презира́ти не до́лженствꙋютъ.

ѻ҃в. Тѣлє́сныѧ болѣ̑зни, зна́й, что̀ є҆сте́ственнѡ тѣ́лꙋ сво́йственны сꙋ́ть, ꙗ҆́кѡ тлѣ́нномꙋ и҆ веще́ственномꙋ. Подоба́етъ ᲂу҆́бѡ нака́занной дꙋшѣ̀ въ таковы́хъ страсте́хъ, крѣ́пость и҆ терпѣ́нїе, благода́рнѡ пока́зывати, а҆ не ᲂу҆корѧ́ти бг҃а, почто̀ ѻ҆́нъ сотворѝ тѣ́ло.

ѻ҃г. Подвиза́ющїисѧ на ѻ҆лѷмпі́йскихъ и҆́грахъ, не за пе́рвꙋю, и҆лѝ вторꙋ́ю, и҆лѝ тре́тїю побѣ́дꙋ ᲂу҆вѣнчава́ютсѧ: но є҆гда̀ всѣ́хъ съ ни́ми подвиза́ющихсѧ побѣдѧ́тъ. Та́кѡ ᲂу҆́бѡ подоба́етъ ка́ждомꙋ хотѧ́щемꙋ ѿ бг҃а ᲂу҆вѣнча́тисѧ, ѡ҆бꙋча́ти дꙋ́шꙋ свою̀ цѣломꙋ́дрїю, не то́чїю въ разсꙋжде́нїи тѣ́ла, но и҆ въ прибы́ткахъ, и҆ хище́нїѧхъ, и҆ за́висти, и҆ въ пи́щѣ, и҆ тще́тной сла́вѣ, и҆ ᲂу҆коре́нїѧхъ, и҆ сме́рти, и҆ є҆ли̑ка такѡва́ѧ сꙋ́ть.

ѻ҃д. Не человѣ́ческїѧ ра́ди похвалы̀ ѡ҆ благо́мъ и҆ боголюбе́зномъ житїѝ потщи́мсѧ, но спасе́нїѧ ра́ди дꙋшѝ, добродѣ́тельнꙋю жи́знь и҆збере́мъ. Сме́рть бо по всѧ́къ де́нь пред̾ ѻ҆ча́ми на́шими є҆́сть ви́дима, а҆ человѣ́чєскїѧ по́чєсти безвѣ́стны.

ѻ҃є. Въ на́шей вла́сти є҆́сть, цѣломꙋ́дреннѡ пожи́ти: богати́тисѧ же нѣ́сть въ на́шей вла́сти. Что̀ ᲂу҆́бѡ; не подоба́етъ ли ѡ҆сꙋжда́ти на́мъ дꙋ́шꙋ свою̀ за маловре́менное мечта́нїе бога́тства, є҆́же стѧжа́ти вла́сти не и҆́мамы, но жела́емъ то́чїю ѻ҆́нагѡ; ѽ ко́ль несмы́сленнѡ тече́мъ, не вѣ́дѧще, что̀ превы́ше всѣ́хъ добродѣ́телей є҆́сть смиренномꙋ́дрїе, ꙗ҆́коже превы́ше всѣ́хъ страсте́й є҆́сть чревобѣ́сїе и҆ по́хоть жите́йскаѧ!

ѻ҃ѕ. Па́мѧтовати подоба́етъ непреста́ннѡ разꙋ́мнымъ, ꙗ҆́кѡ ма̑лыѧ и҆ маловре́мєнныѧ трꙋды̀ сносѧ̀ въ жи́зни, велича́йшїѧ сла́дости и҆ весе́лїѧ вѣ́чнагѡ наслажда́емсѧ по сме́рти. Тѣ́мже борю́щїйсѧ со страстьмѝ, и҆ жела́ющїй ᲂу҆вѣнча́тисѧ ѿ бг҃а, а҆́ще паде́тъ, да не возмалодꙋ́шествꙋетъ, и҆ пребꙋ́детъ во грѣхѣ̀, ѿчаѧва́ѧсѧ въ себѣ̀: но воста́вши па́ки да побо́ретсѧ, и҆ попече́тсѧ ᲂу҆вѣнча́тисѧ, да́же до послѣ́днѧгѡ воздыха́нїѧ востаѧ̀ ѿ слꙋча́ющагѡсѧ паде́нїѧ. Тѣле́сные бо трꙋды̀ ѻ҆рꙋ̑дїѧ сꙋ́ть добродѣ́телей, и҆ спаси́тельны быва́ютъ дꙋшѣ̀.

ѻ҃з. Житє́йскїѧ ѕлоключє́нїѧ, мꙋже́й и҆ подви́жникѡвъ досто́йными творѧ́тъ ᲂу҆вѣнча́тисѧ ѿ бг҃а. Оу҆мертви́ти ᲂу҆̀бо подоба́етъ въ жи́зни свое́й ᲂу҆́ды ѿ всегѡ̀ жите́йскагѡ: ме́ртвый бо николи́же бꙋ́детъ пещи́сѧ ѡ҆ че́млибо жите́йскомъ.

ѻ҃и. Не подоба́етъ слове́сной и҆ подвиза́ющейсѧ дꙋшѣ̀, а҆́бїе ᲂу҆страша́тисѧ и҆ боѧ́тисѧ прилꙋча́ющихсѧ страда́нїй, да не посмѣ́ѧна бꙋ́детъ ꙗ҆́кѡ боѧзли́ваѧ. Ѿ жите́йскихъ бо мечта́нїй смꙋща́емаѧ дꙋша̀ вы́йдетъ и҆з̾ благочи́нїѧ. Къ вѣ̑чнымъ благи̑мъ ведꙋ́тъ дꙋшє́вныѧ добродѣ́тєли на́ши, мꙋче́нїй же вино́вны быва́ютъ самопроизвѡ́льныѧ ѕлѡ́бы человѣ́чєскїѧ.

ѻ҃ѳ. Слове́сный человѣ́къ, ѿ слове́сныхъ свои́хъ чꙋ́вствъ, чрез̾ стра̑сти дꙋшє́вныѧ ра́тꙋемь быва́етъ. Чꙋ̑вства же тѣлє́сныѧ сꙋ́ть пѧ́ть: зрѣ́нїе, ѡ҆бонѧ́нїе, слꙋ́хъ, вкꙋ́съ и҆ ѡ҆сѧза́нїе. Чрез̾ сі́и пѧ́ть чꙋ́вствъ, четы́ремъ страсте́мъ со́бствєннымъ подпа́даѧ ѻ҆каѧ́ннаѧ дꙋша̀, плѣнѧ́етсѧ. Стра̑сти же дꙋшє́вныѧ сꙋ́ть четы́ре: тщесла́вїе, ра́дость, ꙗ҆́рость и҆ стра́хъ. Є҆гда̀ ᲂу҆́бѡ мꙋ́дростїю и҆ разсꙋжде́нїемъ, до́брѣ во́инствовавшїй человѣ́къ, ѡ҆де́ржитъ и҆ побѣди́тъ стра̑сти: тогда̀ ᲂу҆жѐ не ра́тꙋемь быва́етъ, но ми́ръ и҆́мать въ дꙋшѣ̀, и҆ ᲂу҆вѣнчава́етсѧ ѿ бг҃а, ꙗ҆́кѡ побѣди́вшїй.

п҃. Ѻ҆́ви и҆з̾ находѧ́щихсѧ въ гости́нницахъ, постє́ли полꙋча́ютъ: ѻ҆́ви же не и҆мѣ́ѧ ѻ҆дра̀, но на землѝ спѧ̀ ни ма́лѡ не ме́нѣе, ка́къ и҆ спѧ́щїе на ѻ҆дрѣ̀, храпѧ́тъ, и҆ конца̀ но́чи дожда́вшесѧ, за ᲂу҆́тра постє́ли ѡ҆ста́вивше въ гости́нницѣ, всѣ̀ вкꙋ́пѣ и҆схо́дѧтъ, со́бственное то́чїю несѧ̀. Тѣ́мъ же ѡ҆́бразомъ, и҆ всѝ ходѧ́щїи въ жи́зни, и҆ посре́дственнѡ, и҆ въ сла́вѣ, и҆ въ бога́тствѣ жи́вшїи, ꙗ҆́коже и҆з̾ гости́нницы и҆з̾ жи́зни и҆схо́дѧтъ, ничто́же ѿ сла́дости жите́йскїѧ и҆ бога́тства взима́ѧ съ собо́ю, кромѣ̀ є҆ди́ныхъ со́бственныхъ дѣ́лъ, и҆лѝ до́брыхъ, и҆лѝ ѕлы́хъ, ᲂу҆чине́нныхъ и҆́ми въ жи́зни и҆́хъ.

п҃а. Въ преимꙋ́щественной бꙋ́дꙋчи вла́сти, да не ско́рѡ воспрети́ши комꙋ́либо сме́ртїю, вѣ́дѧщи, ꙗ҆́кѡ по є҆стествꙋ̀ и҆ ты̀ сме́рти подлежи́ши, и҆ ꙗ҆́кѡ дꙋша̀ ѡ҆блека́етсѧ тѣ́ломъ, ꙗ҆́коже ме́ртвенною ѻ҆де́ждою. Сїѐ ꙗ҆́снѡ вѣ́дѧщи, кро́тости поꙋчи́сѧ и҆ благотворѧ̀ благодарѝ бг҃а вы́нꙋ: не ми́лꙋѧй бо не и҆́мать добродѣ́тели въ себѣ̀.

п҃в. Сме́рти и҆збѣжа́ти невозмо́жно и҆ неꙋдо́бно. Сїѐ вѣ́дѧще слове́снїи пои́стиннѣ человѣ́цы, и҆ ѡ҆бꙋче́нїи добродѣ́телемъ, и҆ бг҃олюбе́зномꙋ по́мыслꙋ, прїе́млютъ сме́рть без̾ стена́нїй, стра́ха и҆ пла́ча, неизбѣ́жность є҆ѧ̀ и҆ и҆збавле́нїе ѿ жите́йскихъ ѕѡ́лъ помышлѧ́ѧ.

п҃г. Забы́вшихъ благо́е жи́тельство, и҆ бг҃оꙋго́дное, и҆ не мꙋ́дрствꙋющихъ пра́вые и҆ бг҃олюбе́зные догма́ты, ненави́дѣти не подоба́етъ, сожалѣ́ти же па́че ꙗ҆́кѡ ѡ҆ лише́нныхъ разсꙋ́дка, и҆ слѣпы́хъ се́рдцемъ и҆ мы́слїю. Ѕло́ бо ꙗ҆́кѡ добро̀ прїе́мше, ѿ невѣ́дѣнїѧ погиба́ютъ, и҆ не вѣ́дѧтъ бг҃а треѻкаѧ́ннїи и҆ немы́сленнїи дꙋше́ю.

п҃д. Ѡ҆ благоче́стїи и҆ благожи́тїи со мно́гими разглаго́льствовати ѿрица́йсѧ: не за́висти ра́ди глаго́лю, но ꙗ҆́кѡ несмы́слєннымъ, посмѣѧ́нїѧ, мню̀, досто́йнымъ пока́жешисѧ. Подо́бный бо подо́бнаго лю́битъ: таковы̑ѧ же словеса̀ не мно́гихъ и҆мѣ́ютъ слꙋ́шателей, и҆ мо́жетъ бы́ть вельмѝ рѣ́дкихъ. Лꙋ́чше же не глаго́лати: ꙗ҆́кѡ не сегѡ̀ хо́щетъ бг҃ъ ко сп҃се́нїю человѣ́ка.

п҃є. Дꙋша̀ состра́ждетъ тѣ́лꙋ, тѣ́ло же не состра́ждетъ дꙋшѣ̀: ꙗ҆́коже тѣ́лꙋ сѣко́мꙋ, состра́ждетъ и҆ дꙋша̀, могꙋ́щꙋ же и҆ здра́вствꙋющꙋ тѣ́лꙋ, стра̑сти дꙋшє́вныѧ соꙋслажда́ютсѧ. Дꙋшѣ́ же помышлѧ́ющей, не помышлѧ́етъ ᲂу҆жѐ тѣ́ло, но пребыва́етъ са́мо по себѣ̀ ѻ҆со́бь. Помышле́нїе бо стра́сть є҆́сть дꙋше́внаѧ: ꙗ҆́коже невѣ́дѣнїе, горды́нѧ, невѣ́рїе, лихоима́нїе, не́нависть, за́висть, гнѣ́въ, нерадѣ́нїе, тщесла́вїе, че́сть, несогла́сїе, нечꙋ́вствїе бла́га. Сїѧ̑ бо дꙋше́ю дѣ́йствꙋютсѧ.

п҃ѕ. Помышлѧ́ѧ ѡ҆ бг҃ѣ, благочести́въ бꙋ́ди, незави́стенъ, бла́гъ, цѣломꙋ́дръ, кро́токъ, дарови́тъ по си́лѣ, ѡ҆бщи́теленъ, неспо́рливъ, и҆ прѡ́чаѧ. Сїе́ бо є҆́сть некра́домое стѧжа́нїе дꙋшѝ, є҆́же ᲂу҆гожда́ти бг҃ꙋ си́ми, и҆ никогѡ́же не сꙋди́ти, и҆ не глаго́лати ни ѡ҆ ко́мже, ꙗ҆́кѡ таковы́йто ѕо́лъ є҆́сть, и҆ согрѣши́лъ: но лꙋ́чше и҆спы́товати своѧ̑ ѕла̑ѧ, и҆ смотри́ти на самаго̀ себѧ̀, на своѐ житїѐ, ᲂу҆го́дно ли ѻ҆но̀ є҆́сть бг҃ꙋ. Что́ бо на́мъ нꙋ́жды, а҆́ще дрꙋгі́й є҆́сть лꙋка́въ;

п҃з. И҆́стинный человѣ́къ тщи́тсѧ благочести́въ бы́ти: благочести́вый же є҆́сть нежела́ющїй чꙋжды́хъ: а҆ чꙋ́ждо є҆́сть человѣ́ка всѐ созда́нное. Всѧ̑ ᲂу҆́бѡ презира́й ты̀, ꙗ҆́кѡ ѡ҆́бразъ бж҃їй. Ѡ҆́бразомъ же бж҃їимъ быва́етъ человѣ́къ, є҆гда̀ пра́вѡ и҆ бг҃оꙋго́днѡ жи́тельствꙋетъ. Но семꙋ̀ и҆на́че не возмо́жно бы́ти, а҆́ще не ѿстꙋ́питъ человѣ́къ ѿ жите́йскихъ. И҆мꙋ́щїй же ᲂу҆́мъ бг҃олюбе́зный, всѧ́кꙋю дꙋше́внꙋю по́льзꙋ и҆ всѧ́кое бл҃гоговѣ́инство ѿ негѡ̀ быва́ющее вѣ́сть. Бг҃олюби́вый мꙋ́жъ никогѡ̀ дрꙋга́гѡ не ᲂу҆корѧ́етъ въ че́мъ са́мъ согрѣша́етъ: а҆ сїѐ спаса́ющїѧсѧ дꙋшѝ є҆́сть зна́менїе.

п҃и. Є҆ли́цы привре́менное стѧжа́нїе наси́льственнѡ и҆мѣ́ти тща́тсѧ, и҆ похотѣ́нїе дѣ́лъ ѕло́бы лю́бѧтъ, не вѣ́дѧще сме́рти, и҆ па́гꙋбы своеѧ̀ дꙋшѝ, и҆ не смо́трѧтъ ѻ҆каѧ́ннїи на по́льзꙋ свою̀: таковы́и не мы́слѧтъ, є҆ли́кѡ стра́ждꙋтъ по сме́рти лю́ди ѿ ѕло́бы.

п҃ѳ. Ѕло́ба стра́сть вещества̀ є҆́сть. Бг҃ъ же ѕло́бы невино́венъ: но разꙋмѣ́нїе, зна́менїе, и҆ си́лꙋ ᲂу҆ма̀, раздѣлѧ́ющꙋю добро̀ ѿ ѕла̀, и҆ самовла́стїе дадѐ лю́демъ. Стра̑сти же ѕло́бы ражда́етъ нерадѣ́нїе, и҆ лѣ́ность человѣ́ческаѧ: неви́ненъ бо є҆́сть бг҃ъ всесоверше́ннѡ. Ѿ раздѣле́нїѧ же мы́сли содѣ́лашасѧ бѣ́си лꙋка́вїи, ꙗ҆́коже и҆ мно́жайшїи ѿ люде́й.

ч҃. Со бл҃гоче́стїемъ живꙋ́щїй человѣ́къ ѕло́бѣ вни́ти въ дꙋ́шꙋ не попꙋща́етъ. Ѕло́бѣ же не сꙋ́щей, безбѣ́дственнѡ и҆ невреди́мѡ быва́етъ дꙋшѣ̀: таковы́ми бо ни де́мѡнъ ѕлы́й, ни прилꙋ́чай не ᲂу҆правлѧ́етъ. Бг҃ъ бо и҆збавлѧ́етъ и҆́хъ ѿ ѕѡ́лъ, и҆ живꙋ́тъ невреди́мыми сохранѧ́еми равнобо́жны. А҆́ще бы кто̀ такова́го мꙋ́жа и҆ похвали́лъ, ѻ҆́нъ смѣе́тсѧ въ себѣ̀ самѣ́мъ похвалѧ́ющымъ є҆го̀: а҆́ще бы и҆ безче́стилъ, не ѿвѣща́етъ проти́вꙋ ᲂу҆корѧ́ющымъ, ниже́ бо негодꙋ́етъ на словеса̀ и҆́хъ.

ч҃а. Ѕло̀ є҆стествꙋ̀ послѣ́дꙋетъ, ꙗ҆́коже ржа̀ къ мѣ́ди, и҆ нечистота̀ къ тѣла́мъ. Но нижѐ ржа́вость дѣ́латель мѣ́ди сотвори́лъ, нижѐ нечистотꙋ̀ роди́вшїи: та́кѡ нижѐ ѕло́бꙋ бг҃ъ сотворѝ. Но дадѐ и҆ разꙋмѣ́нїе и҆ разсꙋжде́нїе человѣ́кꙋ, да и҆збѣжи́тъ ѕла̀, ꙗ҆́кѡ вѣ́дѧщїй, что̀ поврежда́етсѧ ѿ ѻ҆́нагѡ и҆ мꙋ́читсѧ. Блюдѝ ᲂу҆̀бо сохра́ннѡ, да нѣ́когда ви́дѣвъ нѣ́коего благополꙋ́чна, въ си́лѣ и҆ бога́тствѣ, ᲂу҆блажи́ши є҆го̀, ѿ мечта́нїѧ де́мѡнскагѡ. Но сме́рть да бꙋ́детъ тѝ а҆́бїе пред̾ ѻ҆ча́ми, и҆ николи́же ничесогѡ̀ ѕла́гѡ, и҆лѝ жите́йскагѡ да не пожела́еши.

ч҃в. Бг҃ъ на́шъ сꙋ́щымъ на нб҃сѣ́хъ безсме́ртїе дарова̀: сꙋ́щымъ же на землѝ премѣ́нꙋ дадѐ, всемꙋ́ же живо́тъ, и҆ движе́нїе дарова̀: и҆ всѐ длѧ человѣ́ка. Да не совосхища́етъ ᲂу҆́бѡ тебѧ̀ жите́йское мечта́нїе де́мѡна, под̾ꙋща́ющагѡ на лꙋка̑выѧ по́мыслы дꙋ́шꙋ, но нбⷭ҇наѧ блага̑ѧ помышлѧ́ѧ са́мъ въ себѣ̀, глаго́ли: а҆́ще хощꙋ̀: въ мое́й вла́сти є҆́сть побѣди́ти и҆ се́й по́двигъ стра́сти: не побѣждꙋ́ же, а҆́ще восхощꙋ̀ полꙋчи́ти своѐ жела́нїе. Въ се́мъ ᲂу҆́бѡ по́двигѣ подвиза́йсѧ, могꙋ́щемъ спастѝ дꙋ́шꙋ твою̀.

ч҃г. Жи́знь є҆́сть соедине́нїе и҆ совокꙋпле́нїе ᲂу҆ма̀, дꙋшѝ и҆ тѣ́ла: сме́рть же нѣ́сть поги́бель совокꙋ́пленныхъ, но разрѣше́нїе зна́нїѧ ѻ҆́ныхъ. Бг҃омъ бо всѧ̑ сохранѧ́ютсѧ и҆ по разрꙋше́нїи.

ч҃д. Оу҆́мъ нѣ́сть дꙋша̀, но да́ръ бж҃їй, спаса́ющїй дꙋ́шꙋ, и҆ предтече́тъ и҆ совѣ́тꙋетъ дꙋшѣ̀ ᲂу҆́мъ бг҃оꙋго́дный, презрѣ́ти привре́мєннаѧ, веще́ствєннаѧ и҆ тлѣ̑ннаѧ, возлюби́ти же вѣ̑чнаѧ, нетлѣ̑ннаѧ и҆ невеще́ствєннаѧ блага̑ѧ, и҆ ходи́ти въ тѣ́лѣ человѣ́кꙋ, нбⷭ҇наѧ и҆ бж҃їѧ, и҆ всѧ̑ вкꙋ́пѣ ᲂу҆мо́мъ помышлѧ́ющꙋ и҆ ви́дѧщꙋ. И҆ та́кѡ бг҃олюби́вый ᲂу҆́мъ є҆́сть благодѣ́тель, и҆ спасе́нїе человѣ́ческїѧ дꙋшѝ.

ч҃є. Дꙋша̀, бꙋ́дꙋчи въ тѣ́лѣ, а҆́бїе ѿ печа́ли и҆ сла́сти помрача́етсѧ и҆ погиба́етъ. Печа́ль и҆ сла́сть, ꙗ҆́коже мокрѡ́ты тѣ́лꙋ сꙋ́ть. Бг҃олюби́вый же ᲂу҆́мъ противлѧ́ѧсѧ, ѡ҆скорблѧ́етъ тѣ́ло, и҆ спаса́етъ дꙋ́шꙋ: ꙗ҆́кѡ вра́гъ сѣкꙋ́щїй и҆лѝ жгꙋ́щїй тѣлеса̀.

ч҃ѕ. Є҆ли́цы дꙋ́шы ра́зꙋмомъ не ѡ҆бꙋ́здываютсѧ и҆ не ᲂу҆правлѧ́ютсѧ ᲂу҆мо́мъ, та́къ что́бы се́й ᲂу҆де́рживалъ и҆ ᲂу҆правлѧ́лъ и҆́хъ стра̑сти, си́рѣчь, печа́ль и҆ сла́сть: сі́и дꙋ́шы, ꙗ҆́кѡ безсловє́сныѧ живѡ́тныѧ, погиба́ютъ, ѿвлека́ющꙋсѧ ра́зꙋмꙋ ѿ страсте́й, ꙗ҆́кѡ ᲂу҆здодержа́телю побѣжде́ннꙋ ѿ коне́й.

ч҃з. Ве́лїѧ болѣ́знь дꙋшѝ, поги́бель и҆ па́гꙋба є҆́сть, не вѣ́дѣти бг҃а, всѧ̑ сотвори́вшаго длѧ человѣ́ка, и҆ дарова́вшаго є҆мꙋ̀ ᲂу҆́мъ и҆ сло́во, и҆́миже возлета́ѧ человѣ́къ, съ бг҃омъ совокꙋплѧ́етсѧ, разꙋмѣва́ѧ и҆ прославлѧ́ѧ бг҃а.

ч҃и. Дꙋша̀ є҆́сть въ тѣ́лѣ, въ дꙋшѣ́ же є҆́сть ᲂу҆́мъ, въ ᲂу҆мѣ́ же є҆́сть сло́во, и҆́миже бг҃ъ разꙋмѣва́емь, и҆ прославлѧ́емь безсме́ртною твори́тъ дꙋ́шꙋ, нетлѣ́нїе є҆́й и҆ сла́дость вѣ́чнꙋю да́рꙋѧ. Бг҃ъ бо всемꙋ̀ сꙋ́щемꙋ бытїѐ по є҆ди́ной бла́гости дарова̀.

ч҃ѳ. Бг҃ъ самовла́стнымъ сотвори́вши человѣ́ка, ꙗ҆́кѡ незави́стный и҆ благі́й, дадѐ є҆мꙋ̀ и҆ возмо́жность, а҆́ще хо́щетъ, ᲂу҆гожда́ти є҆мꙋ̀. Оу҆гожда́етъ же человѣ́къ бг҃ꙋ, є҆гда̀ нѣ́сть въ не́мъ ѕло́бы. А҆́ще бо ᲂу҆ люде́й похвалѧ́ютсѧ дѡ́брыѧ дѣла̀, и҆ добродѣ́тєли преподо́бныѧ и҆ бг҃олюби́выѧ дꙋшѝ, ѡ҆сꙋжда́ютсѧ же сра̑мныѧ и҆ лꙋка̑выѧ дѣѧ̑нїѧ: мно́гѡ па́че ᲂу҆ бг҃а, хотѧ́щагѡ спасти́сѧ человѣ́кꙋ.

р҃. Блага̑ѧ ѿ бг҃а, ꙗ҆́кѡ блага́гѡ, прїе́млетъ человѣ́къ: сегѡ́ бо ра́ди и҆ сотворе́нъ ѿ бг҃а. Ѕла̑ѧ же себѣ̀ привлека́етъ человѣ́къ, ѿ себѧ̀ и҆ своеѧ̀ ѕло́бы, и҆ по́хоти, и҆ нечꙋ́вственности.

р҃а. Несмы́сленнаѧ дꙋша̀ безсме́ртна сꙋ́щи и҆ влады́чица тѣ́ла раболѣ́пствꙋетъ тѣ́лꙋ сластьмѝ, не помышлѧ́ѧ, ꙗ҆́кѡ сла́сть тѣле́снаѧ є҆́сть вре́дъ є҆ѧ̀: не чꙋ́вствꙋѧ же и҆ ю҆ро́дствꙋѧ, пече́тсѧ ѡ҆ сла́сти тѣле́сной.

р҃в. Бг҃ъ є҆́сть бла́гъ, человѣ́къ же ѕо́лъ. Ничегѡ̀ ѕла́гѡ нѣ́тъ на небесѝ: ничегѡ̀ блага́гѡ на землѝ. Слове́сный же человѣ́къ лꙋ̑чшаѧ и҆збира́етъ, и҆ вѣ́сть бг҃а всѣ́хъ. и҆ благодари́тъ и҆ воспѣва́етъ є҆го̀: и҆ пре́жде сме́рти мерзи́тъ тѣ́ломъ, и҆ лꙋка̑вымъ чꙋ́вствїѧмъ не позволѧ́етъ соверши́тисѧ, вѣ́даѧ и҆́хъ па́гꙋбꙋ и҆ си́лꙋ.

р҃г. Лꙋка́вый человѣ́къ лихоима́нїе лю́битъ, пра́вдꙋ же презира́етъ, нижѐ неизвѣ́стность, и҆ непостоѧ́нство, и҆ маловре́менность житїѧ̀ помышлѧ́ѧ, нижѐ недаропрїе́мность, и҆ неизбѣ́жность сме́рти па́мѧтꙋѧ. А҆́ще же ста́ръ є҆́сть сра́менъ и҆ безꙋ́менъ: то̀, ꙗ҆́коже согни́вшее дре́во, ко всѧ́комꙋ ᲂу҆потребле́нїю є҆́сть недѣйстви́теленъ.

р҃д. Ꙗ҆́коже ᲂу҆довѡ́льствїѧ и҆ ра́дость чꙋ́вствꙋемъ тогда̀, є҆гда̀ и҆скꙋ́съ прїе́млемъ печа́лющихъ [веще́й]: ниже́ бо сла́дцѣ пїе́тъ не жажда́вшїй, нижѐ сла́дцѣ ꙗ҆́стъ не а҆лка́вшїй, нижѐ сла́дцѣ спи́тъ не вельмѝ дрема́вшїй, нижѐ чꙋ́вствїе ра́дости прїе́млетъ не ѡ҆скорбле́нный пре́жде: та́кѡ нижѐ вѣ́чныхъ бла̑гъ наслади́мсѧ, а҆́ще не пре́зримъ маловре́мєннаѧ.

р҃є. Сло́во ᲂу҆ма̀ слꙋжи́тель є҆́сть: є҆́же бо хо́щетъ ᲂу҆́мъ, сїѐ сло́во сказꙋ́етъ.

р҃ѕ. Оу҆́мъ всѧ̑ ви́дитъ, и҆ сꙋ̑щаѧ на нб҃сѣ́хъ: и҆ ничто́же ѻ҆́ный помрача́етъ, ра́звѣ то́чїю грѣ́хъ. Чи́стомꙋ ᲂу҆мꙋ̀ ничегѡ̀ нѣ́тъ непостижи́магѡ, ꙗ҆́коже сло́вꙋ ничегѡ̀ неизглаго́ланнагѡ.

р҃з. По тѣ́лꙋ человѣ́къ сме́ртенъ, по ᲂу҆мꙋ́ же и҆ сло́вꙋ безсме́ртенъ. Мо́лчѧ мы́слиши, помы́сливши глаго́леши: въ молча́нїи бо ᲂу҆́мъ ражда́етъ сло́во. Благода́рное же сло́во, бг҃ꙋ приноси́мое, є҆́сть спасе́нїе человѣ́кꙋ.

р҃и. Глаго́лющїй несмы́слєннаѧ, ᲂу҆ма̀ не и҆́мать: ничто́же бо мы́слѧ глаго́летъ. Но разсмотрѝ, что̀ по́льзꙋетъ тѝ твори́ти ко спасе́нїю дꙋшѝ.

р҃ѳ. Сло́во ᲂу҆́мное и҆ дꙋшеполе́зное, бж҃їй да́ръ є҆́сть: ꙗ҆́коже и҆ сло́во, бꙋесло́вїѧ и҆спо́лненное, и҆ и҆зы́скивающее мѣ́рꙋ, и҆ разстоѧ́нїе небесѝ и҆ землѝ, и҆ величинꙋ̀ со́лнца и҆ ѕвѣ́здъ: человѣ́ка всꙋ́е трꙋжда́ющагѡсѧ и҆з̾ѡбрѣ́тенїе є҆́сть. Ни ма́лѡ бо неполе́зныхъ всꙋ́е хвалѧ́сѧ и҆́щетъ, ꙗ҆́кѡ рѣшето́мъ во́дꙋ хотѧ́щїй че́рпати. Сегѡ́ бо лю́демъ не возмо́жно ѡ҆брѣстѝ.

р҃і. Никто̀ не́ба не ви́дитъ, и҆ сꙋ́щихъ въ не́мъ разꙋмѣ́ти не мо́жетъ, ра́звѣ є҆ди́нъ человѣ́къ, добродѣ́тельномꙋ житїю̀ прилѣжа́щїй, и҆ разꙋмѣва́ющїй, и҆ прославлѧ́ющїй сотво́ршаго є҆го̀ во сп҃се́нїе, и҆ живо́тъ є҆мꙋ̀ дарова́вшаго. Вѣ́сть бо несомнѣ́ннѡ бг҃олюби́вый и҆ таковы́й мꙋ́жъ, ꙗ҆́кѡ без̾ бг҃а ничто́же є҆́сть, но вездѣ̀ є҆́сть бг҃ъ, и҆ во всѣ́хъ, ꙗ҆́кѡ неѡпредѣли́мый.

ра҃і. Ꙗ҆́коже и҆з̾ ма́тернѧгѡ чре́ва и҆схо́дитъ человѣ́къ: та́кѡ и҆з̾ тѣ́ла дꙋша̀ на́га и҆схо́дитъ, и҆на́ѧ чиста̀: и҆на́ѧ свѣтла̀: и҆на́ѧ же сквє́рны и҆мѣ́ѧ грѣхѡ́вныѧ, дрꙋга́ѧ же черна̀ ѿ мно́гихъ прегрѣше́нїй. Тѣ́мже слове́снаѧ и҆ бг҃олюби́ваѧ дꙋша̀, па́мѧтꙋющи и҆ помышлѧ́ющи ѕла̑ѧ по сме́рти, благочести́вѡ жи́тельствꙋетъ, да не по томꙋ́жде ѡ҆сꙋди́вшисѧ подпаде́тъ. Невѣ́рꙋющїи бо, несмы́сленнїи дꙋше́ю, нече́ствꙋютъ и҆ согрѣша́ютъ, вѣ́чное презира́юще.

рв҃і. Ꙗ҆́коже и҆зше́дши и҆з̾ чре́ва, бы́вшихъ во чре́вѣ не по́мниши: та́кѡ и҆ и҆з̾ тѣ́ла и҆зше́дши, не помѧне́ши бы́вшихъ тѣ́лѣ.

рг҃і. Ꙗ҆́коже и҆зше́дши и҆з̾ чре́ва, лꙋ́чше и҆ бо́льше дѣ́лаешисѧ тѣ́ломъ: та́кѡ и҆ и҆з̾ тѣ́ла чи́стымъ и҆ нескве́рнымъ и҆зше́дши, лꙋ́чшимъ бꙋ́деши, и҆ нетлѣ́ннымъ на небесѣ́хъ пребыва́ѧ.

рд҃і. Ꙗ҆́коже во чре́вѣ тѣ́лꙋ соверши́вшꙋсѧ подоба́етъ роди́тисѧ: та́кѡ дꙋшѣ̀, въ тѣ́лѣ ѡ҆предѣле́нный ѿ бг҃а предѣ́лъ и҆спо́лнившей, подоба́етъ и҆зы́ти и҆з̾ тѣ́ла.

рє҃і. А҆́ще ка́кѡ содержа́ти бꙋ́деши дꙋ́шꙋ сꙋ́щꙋю въ тѣ́лѣ, та́кѡ и҆ ѻ҆на̀ и҆зше́дши и҆з̾ тѣ́ла содержа́ти бꙋ́детъ тебѧ̀. И҆́бо до́брѣ и҆ простра́ннѡ тѣ́ло здѣ́сь содержа́вшїй, ѕлѣ̀ са́мъ ѡ҆брѣта́етсѧ по сме́рти: ѡ҆сꙋди́ бо дꙋ́шꙋ свою̀ ꙗ҆́кѡ безꙋ́мный.

рѕ҃і. Ꙗ҆́коже тѣ́ло, и҆з̾ ма́тернѧгѡ чре́ва и҆зше́дши несоверше́ннымъ, ѡ҆брати́тисѧ не мо́жетъ: та́кѡ и҆ дꙋша̀, и҆зше́дши и҆з̾ тѣ́ла и҆ вѣ́дѣнїе бг҃а благи́мъ житїе́мъ не и҆спра́вившаѧ: спасти́сѧ и҆лѝ съ бг҃омъ соедини́тисѧ не мо́жетъ.

рз҃і. Тѣ́ло, соединѧ́ѧсѧ съ дꙋше́ю, и҆з̾ тьмы̀ чре́ва во свѣ́тъ и҆схо́дитъ: дꙋша́ же, соединѧ́ѧсѧ съ тѣ́ломъ, во мра́къ тѣ́ла заключа́етсѧ. Тѣ́мже подоба́етъ ненави́дѣти и҆ нака́зывати¹ тѣ́ло, ꙗ҆́кѡ врага̀ и҆ проти́вника сꙋ́ща дꙋшѣ̀. Мно́жество бо снѣ́дей и҆ сладкоѧ̑стїѧ возбꙋжда́ютъ въ лю́дѣхъ ѕлы̑ѧ стра̑сти: воздержа́нїе же чре́ва ᲂу҆смирѧ́етъ стра̑сти, и҆ спаса́етъ дꙋ́шꙋ.

ри҃і. Тѣле́сное зрѣ́нїе, сꙋ́ть ѻ҆́чи: дꙋше́вное же зрѣ́нїе, є҆́сть ᲂу҆́мъ. И҆ ꙗ҆́коже тѣ́ло, ѻ҆че́й не и҆мꙋ́щее, є҆́сть слѣ́по, и҆ со́лнца, всю̀ зе́млю просвѣща́ющагѡ, и҆ мо́ре не ви́дитъ, нижѐ свѣ́та наслади́тисѧ мо́жетъ: та́кѡ и҆ дꙋша̀ до́брагѡ и҆ блага́гѡ житїѧ̀ не и҆мꙋ́щаѧ, слѣпа̀ є҆́сть, и҆ бг҃а творца̀ и҆ благодѣ́телѧ всѣ́хъ не разꙋмѣва́етъ, нижѐ прославлѧ́етъ, и҆ нетлѣ́нїѧ своегѡ̀, и҆ вѣ́чныхъ бла̑гъ наслади́тисѧ не мо́жетъ.

рѳ҃і. Нечꙋ́вствїе и҆ ю҆ро́дство дꙋшѝ, є҆́сть невѣ́дѣнїе бг҃а. Ѕло́ бо ѿ невѣ́дѣнїѧ ражда́етсѧ: бла́го же ѿ вѣ́дѣнїѧ бг҃а прилꙋча́етсѧ лю́демъ, и҆ спаса́етъ дꙋ́шꙋ. А҆́ще ᲂу҆́бѡ хотѣ̑нїѧ твоѧ̑ не твори́ти тщи́шисѧ, тре́звенъ сы́й, и҆ вѣ́дый бг҃а, мы́слиши ѡ҆ добродѣ́телехъ. А҆́ще же хотѣ̑нїѧ твоѧ̑ лꙋка̑выѧ сла́сти ра́ди тщи́шисѧ твори́ти: невѣ́дѣнїемъ бг҃а ᲂу҆пива́ѧсѧ, погиба́еши, ꙗ҆́кѡ безсловє́сныѧ живо́тныѧ, не помышлѧ́ѧ и҆мꙋ̑щаѧ тебѣ̀ слꙋчи́тисѧ по сме́рти ѕла̑ѧ.

р҃к. Про́мысла є҆́сть дѣ́ло, быва̑ющаѧ по предѣ́лꙋ бж҃е́ственномꙋ, ꙗ҆́коже по всѧ́къ де́нь восходи́ти и҆ заходи́ти со́лнцꙋ, и҆ плодоноси́ти землѣ̀: та́кѡ и҆ зако́номъ глаго́летсѧ быва́ющее по нꙋ́ждѣ человѣ́честѣй: всѧ̑ же человѣ́ка ра́ди быва́ютъ.

рк҃а. Є҆ли́ка бг҃ъ твори́тъ, ꙗ҆́кѡ благі́й, длѧ человѣ́ка твори́тъ: є҆ли̑ка же человѣ́къ твори́тъ, себѣ̀ самомꙋ̀ твори́тъ, и҆ дѡ́браѧ и҆ ѕла̑ѧ. Да не диви́шисѧ же благополꙋ́чїю ѕлы́хъ. Разꙋмѣ́й, что̀ ꙗ҆́коже гра́ды соде́ржатъ мꙋчи́телей, не похвалѧ́юще ѕло́е и҆́хъ произволе́нїе, но чрез̾ си́хъ досто́йныхъ мꙋ́чаще: тѣ́мъ же ѡ҆́бразомъ и҆ бг҃ъ лꙋка́вымъ житє́йскаѧ под̾ вла́стїю и҆мѣ́ти попꙋща́етъ, дабы̀ чрез̾ ѻ҆́ныхъ нака́зывалисѧ нечꙋ́вствꙋющїе: напослѣ́докъ же и҆ си́хъ предае́тъ сꙋдꙋ̀. Поне́же не ꙗ҆́кѡ бг҃ꙋ слꙋжа́ще, но своемꙋ̀ лꙋка́вствꙋ рабо́тающе, лю̑таѧ лю́демъ сотвори́ша.

рк҃в. Почита́ющїи і҆́дѡлѡвъ, а҆́ще бы разꙋмѣ́ли, и҆ ви́дѣли се́рдцемъ, что̀ почита́ютъ ѻ҆нѝ, то̀ не заблꙋжда́ли бы ѻ҆каѧ́ннїи ѿ благоче́стїѧ: но ви́дѧ благоꙋкраше́нїе, чи́нъ и҆ про́мыслъ бы́вшихъ, и҆ быва́ющихъ ѿ бг҃а, позна́ли бы сотво́ршаго ѻ҆́наѧ длѧ человѣ́ка.

рк҃г. Человѣ́къ, ꙗ҆́кѡ ѕлы́й и҆ непра́ведный, ᲂу҆би́ти мо́жетъ: бг҃ъ же живо́тъ дарова́ти и҆ недостѡ́йнымъ не престае́тъ. Ꙗ҆́кѡ бо незави́стный и҆ благі́й по є҆стествꙋ̀, восхотѣ̀ бы́ти мі́рꙋ, и҆ бы́сть, и҆ слꙋ́житъ человѣ́кꙋ ко спасе́нїю є҆гѡ̀.

рк҃д. Слове́сный человѣ́къ є҆́сть то́тъ, и҆́же ᲂу҆разꙋмѣ̀ тѣ́ло, что̀ ѻ҆но̀ є҆́сть, ꙗ҆́кѡ тлѣ́нно є҆́сть и҆ маловре́менно. Таковы́й бо и҆ дꙋ́шꙋ разꙋмѣ́етъ, ꙗ҆́кѡ бж҃е́ственна є҆́сть и҆ безсме́ртна, и҆ вдохнове́нїе бж҃їе сꙋ́щи, длѧ и҆скꙋше́нїѧ и҆ ѡ҆бг҃отворе́нїѧ свѧза́сѧ съ тѣ́ломъ. Оу҆разꙋмѣ́вшїи же дꙋ́шꙋ, пра́вѡ и҆ бг҃оꙋго́днѡ жи́тельствꙋетъ, тѣ́лꙋ не повинꙋ́ѧсѧ: но зри́тъ бг҃а ᲂу҆мо́мъ свои́мъ, и҆ да́рꙋємаѧ дꙋшѣ̀ ѿ бг҃а вѣ̑чнаѧ блага̑ѧ ви́дитъ ᲂу҆́мнѣ.

рк҃є. Бла́гъ и҆ незави́стенъ сы́й при́снѡ бг҃ъ, вла́сть дадѐ человѣ́кꙋ въ добрѣ̀ и҆ ѕлѣ̀, ра́зꙋмъ є҆мꙋ̀ дарова́вши, дабы̀ ви́дѧ мі́ръ, и҆ сꙋ̑щаѧ въ не́мъ, позна́лъ сотво́ршаго всѧ̑ длѧ человѣ́ка. Непра́ведномꙋ же мо́щно хотѣ́ти и҆ не разꙋмѣ́ти: мо́щно бо є҆мꙋ̀ и҆ не вѣ́ровати и҆ бѣ́дствовати, и҆ проти̑внаѧ и҆́стинѣ мы́слити. Толи́кꙋю и҆́мать человѣ́къ вла́сть и҆ въ добрѣ̀ и҆ ѕлѣ̀.

рк҃ѕ. Повелѣ́нїе є҆́сть бж҃їе, да растꙋ́щꙋ тѣ́лꙋ, дꙋша̀ и҆сполнѧ́етсѧ ᲂу҆ма̀, да человѣ́къ ѿ добра̀ и҆ ѕла̀ ᲂу҆го́дное себѣ̀ и҆збере́тъ. Дꙋша́ же не и҆збира́ющаѧ добра̀, ᲂу҆ма̀ не и҆́мать. Тѣ́мже всѣ̀ тѣла̀ дꙋ́шꙋ и҆́мꙋтъ: но не всѧ́каѧ дꙋша̀ глаго́летсѧ ᲂу҆́мъ и҆мѣ́ти. Бг҃олюби́вый бо ᲂу҆́мъ быва́етъ въ цѣломꙋ́дренныхъ, и҆ преподо́бныхъ, и҆ пра́ведныхъ, и҆ непоро́чныхъ, и҆ благи́хъ, и҆ ми́лостивыхъ, и҆ благочести́выхъ. Присꙋ́тствїе ᲂу҆ма̀ быва́етъ человѣ́кꙋ по́мощь къ разꙋмѣ́нїю бг҃а.

рк҃з. Є҆ди́но то́чїю не возмо́жно человѣ́кꙋ, си́рѣчь, є҆́же бы́ти безсме́ртнымъ². Съ бг҃омъ соедини́тисѧ возмо́жно є҆мꙋ̀, а҆́ще помы́слитъ, ꙗ҆́кѡ мо́жетъ. Хотѧ́щїй бо, разꙋмѣва́ющїй, вѣ́рꙋющїй, и҆ лю́бѧщїй человѣ́къ, чрез̾ благо́е житїѐ бг҃ꙋ соѻ́бщникъ быва́етъ.

рк҃и. Ѻ҆́ко ꙗ҆влѧ́ємаѧ ви́дитъ, ᲂу҆́мъ же неви̑димаѧ разꙋмѣва́етъ. Бг҃олюби́вый бо ᲂу҆́мъ свѣ́тъ є҆́сть дꙋшѝ. И҆мꙋ́щїй ᲂу҆́мъ бг҃олюби́вый се́рдцемъ просвѣти́сѧ, и҆ зри́тъ бг҃а ᲂу҆мо́мъ свои́мъ.

рк҃ѳ. Ни є҆ди́нъ благі́й нѣ́сть сра́менъ: недо́брый же коне́чнѡ ѕо́лъ и҆ тѣлолюби́въ є҆́сть. Пе́рваѧ же добродѣ́тель человѣ́ческаѧ є҆́сть, презрѣ́нїе пло́ти. Ѿ привре́менныхъ бо, и҆ тлѣ́нныхъ, и҆ веще́ственныхъ ѿлꙋче́нїе произво́льное, а҆ не по ᲂу҆бо́жествꙋ, вѣ́чныхъ и҆ нетлѣ́нныхъ благи́хъ наслѣ́дниками на́съ твори́тъ.

р҃л. И҆мꙋ́щїй ᲂу҆́мъ вѣ́сть себѧ̀, что̀ ѻ҆́нъ є҆́сть, ꙗ҆́кѡ тлѣ́нный є҆́сть человѣ́къ: вѣ́дый же себѧ̀, всѧ̑ вѣ́сть, ꙗ҆́кѡ творє́нїѧ бж҃їѧ сꙋ́ть, и҆ длѧ спасе́нїѧ человѣ́ческагѡ созда́шасѧ: Всѧ̑ бо разꙋмѣ́ти, и҆ вѣ́рити пра́вѡ, во вла́сти человѣ́ческой є҆́сть. Вѣ́сть же по́длиннѡ таковы́й мꙋ́жъ, ꙗ҆́кѡ житє́йскаѧ презира́ющїи, трꙋ́дъ наималѣ́йшїй и҆́мꙋтъ, сла́дость же и҆ поко́й вѣ́чный полꙋча́ютъ ѿ бг҃а по сме́рти.

рл҃а. Ꙗ҆́коже тѣ́ло без̾ дꙋшѝ мертво̀ є҆́сть: та́кѡ и҆ дꙋша̀ без̾ ᲂу҆ма̀ пра́здна є҆́сть, и҆ ца́рствїѧ бж҃їѧ наслѣ́дити не мо́жетъ.

рл҃в. Є҆ди́нагѡ человѣ́ка бг҃ъ слꙋ́шаетъ: є҆ди́номꙋ человѣ́кꙋ бг҃ъ ꙗ҆влѧ́етсѧ. Человѣколюби́въ є҆́сть бг҃ъ, и҆дѣ́же бы а҆́ще бы́лъ человѣ́къ, та́мѡ є҆́сть и҆ бг҃ъ. Є҆ди́нъ человѣ́къ досто́йный є҆́сть покло́нникъ бг҃а. Человѣ́ка ра́ди бг҃ъ преѡбразꙋ́етсѧ.

рл҃г. Бг҃ъ длѧ человѣ́ка всѐ сотвори́лъ, не́бо, и҆ ᲂу҆кра́силъ ѻ҆́ное ѕвѣзда́ми, длѧ человѣ́ка сотвори́лъ зе́млю. Лю́ди воздѣ́лываютъ зе́млю длѧ себѧ̀. Нечꙋ́вствꙋющїи толи́кагѡ бж҃їѧ про́мысла, безꙋ́мни сꙋ́ть дꙋше́ю.

рл҃д. Добро̀ не ꙗ҆́вно є҆́сть, ꙗ҆́коже не ꙗ҆́вна сꙋ̑щаѧ на небесѝ: ѕло̀ ꙗ҆́вно є҆́сть, ꙗ҆́коже ꙗ҆́вна сꙋ̑щаѧ на землѝ. Добро̀ не и҆́мать сравне́нїѧ. И҆мꙋ́щїй же ᲂу҆́мъ человѣ́къ лꙋ́чшее и҆збира́етъ. Є҆ди́номꙋ бо человѣ́кꙋ бг҃ъ и҆ творє́нїѧ є҆гѡ̀ вразꙋми́тєльна сꙋ́ть.

рл҃є. Оу҆́мъ въ дꙋшѣ̀ ꙗ҆влѧ́етсѧ, а҆ є҆стество̀ въ тѣ́лѣ: и҆ ᲂу҆́мъ дꙋше́вный ѡ҆боже́нїе є҆́сть, є҆стество́ же тѣ́ла, разли́тїе є҆́сть. Во всѧ́комъ тѣ́лѣ є҆стество̀ є҆́сть, но не во всѧ́кой дꙋшѣ̀ ᲂу҆́мъ є҆́сть. Тѣ́мже и҆ не всѧ́каѧ дꙋша̀ спаса́етсѧ.

рл҃ѕ. Дꙋша̀ въ мі́рѣ є҆́сть, ꙗ҆́кѡ рожде́ннаѧ: ᲂу҆́мъ же и҆ превы́ше мі́ра, ꙗ҆́кѡ нерожде́нный. Разꙋмѣва́ющаѧ же мі́ръ, и҆ хотѧ́щаѧ спасти́сѧ дꙋша̀, по всѧ́къ ча́съ и҆́мать зако́нъ непрестꙋ́пнымъ, помышлѧ́ѧ въ себѣ̀, ꙗ҆́кѡ дне́сь по́двигъ и҆ и҆спыта́нїе, и҆ не мо́жно ᲂу҆держа́ти [ ᲂу҆моли́ти] сꙋдїю̀, и҆ ꙗ҆́кѡ погиба́етъ и҆ храни́тсѧ дꙋша̀ ѿ ма́лыѧ и҆ сра́мныѧ сла́сти.

рл҃з. На землѝ созда́сѧ ѿ бг҃а гее́нна и҆ сме́рть, на небеси́ же про́мыслъ и҆ неизмѣнѧ́емость. Всѧ̑ же длѧ человѣ́ка и҆ спасе́нїѧ є҆гѡ̀ сотвори́шасѧ. Бг҃ъ, не тре́бꙋѧй никаки́хъ бла̑гъ, длѧ человѣ́ка сотвори́лъ не́бо, и҆ зе́млю, и҆ стїхі̑и, чрез̾ сі́и всѧ́кое наслажде́нїе бла̑гъ да́рꙋѧ є҆мꙋ̀.

рл҃и. Сме́ртное безсмє́ртнымъ подлежи́тъ, безсме́ртное же смє́ртнымъ:³ слꙋ́жатъ, си́рѣчь, стїхі̑и человѣ́кꙋ, по человѣколю́бїю, и҆ врожде́нной въ ни́хъ бла́гости созда́вшагѡ бг҃а.

рл҃ѳ. Оу҆бо́гїй, и҆ вре́дъ причини́ти не могꙋ́щїй, во благочести́выхъ дѣѧ́нїемъ не вмѣнѧ́етсѧ, но могꙋ́щїй вре́дъ причини́ти, и҆ си́лꙋ свою̀ во ѕло̀ не ᲂу҆потреблѧ́ющїй, щадѧ́щїй же смире́нныхъ за благоче́стїе къ бг҃ꙋ: се́й благі̑ѧ мзды̑ стѧжева́етъ и҆ по сме́рти.

р҃м. По человѣколю́бїю созда́вшагѡ на́съ бг҃а вельмѝ мнѡ́гїѧ сꙋ́ть лю́демъ ко спасе́нїю пꙋтѝ, ѡ҆браща́ющыѧ дꙋ́шы, и҆ возводѧ́щыѧ и҆̀хъ на нб҃са̀. Полꙋча́ютъ бо дꙋ́шы человѣ́чєскїѧ за добродѣ́тель возмє́здїѧ, за престꙋплє́нїѧ же наказа̑нїѧ.

рм҃а. Сн҃ъ во ѻ҆ц҃ѣ̀, и҆ дх҃ъ въ сн҃ѣ, ѻ҆ц҃ъ же во ѻ҆бои́хъ є҆́сть. Вѣ́рою всѧ̑ неви̑димаѧ и҆ разꙋмѣва́ємаѧ познае́тъ человѣ́къ. Вѣ́ра же є҆́сть произво́льное дꙋшѝ согла́сїе.

рм҃в. Ꙗ҆́коже по нѣ̑кїимъ тре́бамъ и҆лѝ ѻ҆бстоѧ́тельствамъ, въ велича́йшихъ рѣка́хъ пла́вати принꙋжда́ющїисѧ, є҆́стьли тре́звы сꙋ́ть, то̀ сохранѧ́ютсѧ, а҆́ще бы и҆ си̑льныѧ бы́ли стрꙋи̑, ма́лѡ поколеба́вшисѧ сохранѧ́ютсѧ, є҆́стьли что̀ ѿ быва́ющихъ ѻ҆быкнове́ннѡ при брега́хъ и҆зловлѧ́ютъ. Є҆ли́цы же пїѧ́ни ѡ҆брѧ́щꙋтсѧ, а҆́ще бы и҆ тьмокра́тнѡ на кра́й плы́ти стара́лисѧ, но вїно́мъ побѣжда́емы, во стрꙋѧ́хъ потоплѧ́ютсѧ. Тѣ́мже ѡ҆́бразомъ ᲂу҆мерщвлѧ́етсѧ и҆ дꙋша̀, въ нечистѡты̀ и҆ развлече́нїе во́лнъ жите́йскихъ впа́даѧ, а҆́ще ѿ ѕло́бы вещества̀ возни́кнꙋвши, не позна́етъ себѧ̀, ꙗ҆́кѡ бж҃е́ственна бꙋ́дꙋчи, и҆ безсме́ртна со маловре́меннымъ, многостра́стнымъ, и҆ сме́ртнымъ вещество́мъ и҆скꙋше́нїѧ ра́ди свѧза́сѧ, є҆́же привлека́тисѧ ѿ тѣле́сныхъ сласте́й въ па́гꙋбꙋ: презира́ѧ себѧ̀, и҆ невѣ́дѣнїемъ ᲂу҆пива́ѧсѧ, и҆ не воспрїе́млѧ попече́нїе ѡ҆ себѣ̀ погиба́етъ, и҆ внѣ̀ живꙋ́щихъ ѡ҆брѣта́етсѧ. На подо́бїе бо рѣкѝ ча́стѡ привлека́етъ на́съ тѣ́ло къ нелѣ̑пымъ сласте́мъ.

рм҃г. Слове́снаѧ дꙋша̀ въ до́бромъ произволе́нїи неподви́жима стоѧ̀, ѡ҆бꙋ́здываетъ ꙗ҆́коже конѧ̀, ꙗ҆́рость и҆ по́хоть, безсловє́сныѧ своѝ стра̑сти, и҆ побѣжда́ѧ, и҆ ᲂу҆кроща́ѧ, и҆ превосходѧ̀ ѻ҆́ныѧ, ᲂу҆вѣнчава́етсѧ и҆ небе́снагѡ сподоблѧ́етсѧ житїѧ̀, сїю̀ мздꙋ̀ за побѣ́дꙋ и҆ трꙋды̀ прїе́млѧ ѿ созда́вшагѡ є҆ѐ бг҃а.

рм҃д. Слове́снаѧ пои́стиннѣ дꙋша̀ ви́дѧ благополꙋ́чїе лꙋка́выхъ, и҆ благоде́нствїе недосто́йныхъ, не смꙋща́етсѧ представлѧ́ѧ и҆̀хъ въ жи́зни се́й наслажде́нїе, ꙗ҆́коже несмы́сленные лю́ди. Вѣ́сть бо по́длиннѡ и҆ ща́стїѧ непостоѧ́нство, и҆ житїѧ̀ неизвѣ́стность, и҆ жи́зни маловре́менность, и҆ сꙋда̀ недаропрїе́мность, и҆ вѣ́рꙋетъ такова́ѧ дꙋша̀, ꙗ҆́кѡ бг҃ъ ѡ҆ нꙋ́жной пи́щи длѧ неѧ̀ пече́тсѧ.

рм҃є. Жи́знь тѣле́снаѧ, и҆ въ бога́тствѣ мно́гомъ, и҆ си́лѣ житїѧ̀ сегѡ̀ наслажде́нїе, сме́рть быва́етъ дꙋшѝ. Трꙋ́дъ же и҆ терпѣ́нїе, и҆ ᲂу҆бо́жество со благодаре́нїемъ, и҆ ᲂу҆мерщвле́нїе тѣ́ла, живо́тъ є҆́сть и҆ сла́дость вѣ́чнаѧ дꙋшѝ.

рм҃ѕ. Слове́снаѧ дꙋша̀ веще́ственное созда́нїе, и҆ маловре́меннꙋю жи́знь презира́ѧ и҆збира́етъ небе́снꙋю сла́дость, и҆ вѣ́чнꙋю жи́знь, благи́мъ житїе́мъ ѿ бг҃а сїю̀ полꙋча́ѧ.

рм҃з. И҆мꙋ́щїи ѡ҆черне́ннꙋю грѧ́зїю ѻ҆де́ждꙋ, ѡ҆сквернѧ́ютъ ѻ҆де́ждꙋ прикаса́ющихсѧ къ ни̑мъ. Тѣ́мъ же ѡ҆́бразомъ и҆ ѕлы́е произволе́нїемъ, и҆ житїе́мъ непра́вые со простѣ́йшими ѡ҆браща́ѧсѧ, глаго́лѧ съ ни́ми неподоба̑ющаѧ, наподо́бїе ти́ны чрез̾ слꙋ́хъ ѡ҆сквернѧ́ютъ дꙋ́шꙋ.

рм҃и. Нача́ло грѣха̀ є҆́сть по́хоть, ѿ неѧ́же погиба́етъ слове́снаѧ дꙋша̀. Нача́ло же спасе́нїѧ и҆ ца́рствїѧ небе́снагѡ быва́етъ дꙋшѣ̀ любо́вь.

рм҃ѳ. Ꙗ҆́коже мѣ́дь небрего́маѧ, и҆ подоба́ющагѡ прилѣжа́нїѧ не ᲂу҆досто́иваемаѧ, ѿ ражда́ющїѧсѧ ржа́вости, ѿ долговре́меннагѡ свѧза́нїѧ, и҆ неꙋпотребле́нїѧ, согнива́етъ, и҆ непотре́бною и҆ недобро́тною дѣ́лаетсѧ: тѣ́мъ же ѡ҆́бразомъ и҆ дꙋша̀ пра́зднаѧ, и҆ не пекꙋ́щаѧсѧ ѡ҆ благо́мъ житїѝ и҆ ѡ҆браще́нїи къ бг҃ꙋ, ѿлꙋча́ющаѧ себѧ̀ чрез̾ лꙋка̑выѧ дѣѧ̑нїѧ ѿ покро́ва бж҃їѧ, по ѕло́бѣ ражда́ющейсѧ ѿ лѣ́ности, вещество́мъ тѣ́ла, ꙗ҆́кѡ мѣ́дь ѿ ржа́вщины потреблѧ́етсѧ, и҆ недобро́тною и҆ непотре́бною ѡ҆брѣта́етсѧ.

р҃н. Бг҃ъ є҆́сть бла́гъ, безстра́стенъ и҆ непремѣ́ненъ. А҆́ще же кто̀ за благосло́вное почита́етъ и҆ и҆́стинное, ꙗ҆́кѡ бг҃ъ не премѣнѧ́етсѧ, но недоꙋмѣва́етъ, ка́кѡ благи́ми ѻ҆́нъ ᲂу҆веселѧ́етсѧ, ѕлы́хъ же ѿвраща́етсѧ, и҆ на согрѣша́ющихъ гнѣ́ваетсѧ, почита́емь же милосе́рдъ быва́етъ: подоба́етъ рещѝ, ꙗ҆́кѡ нижѐ ра́дꙋетсѧ бг҃ъ, нижѐ гнѣ́ваетсѧ: ра́дость бо и҆ печа́ль сꙋ́ть стра̑сти: нижѐ дара́ми ᲂу҆гожда́етсѧ: сла́стїю бо побѣжда́лсѧ бы. Не лѣ́по є҆́сть, ѿ человѣ́ческихъ дѣ́лъ благи̑мъ и҆лѝ хꙋды̑мъ бы́ти бг҃ꙋ. Но ѻ҆́нъ бла́гъ є҆́сть, и҆ по́льзꙋетъ то́чїю, а҆ николи́же вреди́тъ, то́йжде и҆ є҆дина́ковъ сы́й. Мы́ же благи́ми пребыва́ѧ по подо́бїю съ бг҃омъ соединѧ́емсѧ: ѕлы̑ же бꙋ́дꙋчи по несхо́дствꙋ, ѿлꙋча́емсѧ ѿ бг҃а. И҆ добродѣ́тельнѡ живѧ̀ де́ржимсѧ бг҃а: ѕлы̑ же бꙋ́дꙋчи, враго́мъ на́мъ твори́мъ ѻ҆́наго, не всꙋ́е гнѣ́вающимсѧ, но на грѣхѝ, непопꙋща́ющыѧ бг҃ꙋ въ на́съ возсїѧ́ти, со де́мѡнами же мꙋчи́тельными соединѧ́ющыѧ. А҆́ще же моли́твами и҆ благотворе́нїѧми разрѣше́нїе грѣхѡ́въ ѡ҆брѣта́емъ, не чти́мъ бг҃а, и҆ не премѣнѧ́емъ, но дѣла́ми, и҆ ѡ҆браще́нїемъ къ бг҃ꙋ, ѕло́бꙋ на́шꙋ и҆сцѣлѧ́ѧ, па́ки бж҃їѧ бла́гости причаща́емсѧ. Тѣ́мже бг҃ъ та́кожде ѿвраща́етсѧ ѕлы́хъ, ꙗ҆́коже и҆ со́лнце ѿ лише́нныхъ зрѣ́нїѧ сокрыва́етсѧ.

рн҃а. Благочести́ваѧ дꙋша̀ вѣ́сть бг҃а всѧ́ческихъ. Благоче́стїе бо не что̀ и҆но́е є҆́сть, ра́звѣ творе́нїе во́ли бж҃їѧ, въ че́мъ состои́тъ вѣ́дѣнїе бг҃а, си́рѣчь: є҆́же незави́стнымъ бы́ти, цѣломꙋ́дреннымъ, кро́ткимъ, благода́тнымъ по си́лѣ, ѡ҆бщи́тельнымъ, несварли́вымъ, и҆ твори́ти, є҆ли̑ка сꙋ́ть ᲂу҆гѡ́дна во́ли бж҃їей.

рн҃в. Вѣ́дѣнїе бг҃а, и҆ стра́хъ є҆гѡ̀, и҆сцѣле́нїе є҆́сть страсте́й веще́ственныхъ. Невѣ́дѣнїю бо бж҃їю, дꙋшѣ̀ соприсꙋ́тствꙋющꙋ, пребыва́ющыѧ неисцѣ̑льныѧ стра̑сти согно́иваютъ дꙋ́шꙋ, ꙗ҆́коже ѿ долговре́меннагѡ гно́ѧ согнива́ющей є҆́й ѿ ѕло́бы, є҆ѧ́же неви́ненъ бг҃ъ, зна́нїе и҆ ра́зꙋмъ низпосла́вшїй лю́демъ.

рн҃г. Человѣ́ка позна́нїѧ и҆ ра́зꙋма и҆спо́лнилъ бг҃ъ, стра̑сти и҆ самопроизво́льнꙋю ѕло́бꙋ ѡ҆чи́стити тща́сѧ, и҆ сме́ртное къ безсме́ртїю, по свое́й бла́гости, преложи́ти хотѧ̀.

рн҃д. Оу҆́мъ, сꙋ́щїй въ чи́стой и҆ боголюби́вой дꙋшѣ̀, вои́стиннꙋ зри́тъ бг҃а нерожде́ннаго, и҆ неви́димаго, и҆ неизглаго́ланнаго, є҆ди́наго чи́стаго длѧ чи́стыхъ се́рдцемъ.

рн҃є. Вѣне́цъ нетлѣ́нїѧ, и҆ добродѣ́тель, и҆ спасе́нїе человѣ́ка є҆́сть, благодꙋ́шнѡ и҆ благода́рнѡ сноси́ти ѕлоключє́нїѧ: ᲂу҆де́рживати же ꙗ҆́рость, ѧ҆зы́къ, чре́во и҆ сла̑сти, ве́лїѧ є҆́сть по́мощь дꙋшѣ̀.

рн҃ѕ. Соде́ржитъ мі́ръ про́мыслъ бж҃їй, и҆ нѣ́тъ мѣ́ста ниеди́нагѡ, не и҆мꙋ́щагѡ про́мысла. Про́мыслъ же є҆́сть самоконе́чное сло́во бж҃їе, и҆з̾ѡбразꙋ́ющее грѧдꙋ́щее въ мі́ръ вещество̀, и҆ творе́цъ и҆ хꙋдо́жникъ всегѡ̀ быва́ющагѡ. Ниже́ бо возмо́жно веществꙋ̀ ᲂу҆краси́тисѧ без̾ разсꙋжда́ющїѧ си́лы сло́ва, є҆́же є҆́сть ѡ҆́бразъ и҆ ᲂу҆́мъ и҆ премꙋ́дрость, и҆ про́мыслъ бж҃їй.

рн҃з. Сꙋ́щаѧ ѡ҆ помышле́нїѧ по́хоть, ко́рень є҆́сть страсте́й сро́дныхъ тьмѣ̀: и҆ дꙋша̀ сꙋ́щаѧ въ помышле́нїи по́хоти, не вѣ́сть себѧ̀, ꙗ҆́кѡ бж҃їе вдꙋнове́нїе є҆́сть, и҆ та́кѡ несе́тсѧ ко грѣхꙋ̀, не помышлѧ́ѧ безꙋ̑мнаѧ ѡ҆ ѕлы́хъ, по сме́рти и҆мѣ́ющихъ бы́ти.

рн҃и. Ве́лїѧ и҆ неисцѣ́льнаѧ болѣ́знь дꙋшѝ и҆ поги́бель, є҆́сть безбо́жїе и҆ славолю́бїе. Похотѣ́нїе бо ѕла̀, лише́нїе є҆́сть бла́га. Бл҃го же є҆́сть є҆́же незави́стнѡ дѡ́браѧ всѧ̑ твори́ти, є҆ли̑ка ᲂу҆гѡ́дна сꙋ́ть бг҃ꙋ всѣ́хъ.

рн҃ѳ. Человѣ́къ є҆ди́нъ богопрїе́млющь є҆́сть. Съ си́мъ бо є҆ди́нѣмъ живо́тнымъ бесѣ́дꙋетъ бг҃ъ, но́щїю чрез̾ сновидѣ̑нїѧ, дне́мъ же чрез̾ ᲂу҆́мъ: и҆ чрез̾ всѧ̑ достѡ́йнымъ свои̑мъ лю́демъ предглаго́летъ, и҆ предзна́менꙋетъ бꙋ̑дꙋщаѧ блага̑ѧ.

р҃ѯ. Ничто́же неꙋдо́бно є҆́сть вѣ́рꙋющемꙋ, и҆ жела́ющемꙋ разꙋмѣ́ти бг҃а. А҆́ще же хо́щеши є҆го̀ и҆ зрѣ́ти, ви́ждь благоꙋкраше́нїе и҆ про́мыслъ всегѡ̀ бы́вшагѡ, и҆ быва́ющагѡ сло́вомъ є҆гѡ̀. Всѧ́ же длѧ человѣ́ка.

рѯ҃а. Ст҃ы́мъ и҆менꙋ́етсѧ чи́стый ѿ ѕло́бы и҆ грѣхѡ́въ.Тѣ́мже и҆ ве́лїе є҆́сть дꙋшѝ и҆справле́нїе, и҆ ᲂу҆го́дно бг҃ꙋ, є҆гда̀ нѣ́сть ѕло́бы въ человѣ́кѣ.

рѯ҃в. И҆́мѧ є҆́сть знаменова́нїе є҆ди́нагѡ ѿ мно́гихъ. Тѣ́мже безꙋ́мно мы́слити, ꙗ҆́кѡ бг҃ъ, є҆ди́нъ бꙋ́дꙋчи и҆ є҆дина́ковъ, и҆но́е и҆́мать и҆́мѧ. И҆́мѧ бо сїѐ, бг҃ъ, зна́менꙋетъ безнача́льнаго, всѧ̑ сотво́ршаго длѧ человѣ́ка.

рѯ҃г. А҆́ще свѣ́дꙋщъ ты̀ въ себѣ̀ ѡ҆ дѣѧ́нїѧхъ лꙋка́выхъ, ѿсѣцы̀ ѻ҆́ныѧ ѿ дꙋшѝ твоеѧ̀ ча́ѧнїемъ до́брымъ. Пра́веденъ бо бг҃ъ и҆ человѣколюби́въ.

рѯ҃д. Позна́етъ бг҃а человѣ́къ, и҆ позна́етсѧ ѿ бг҃а тща́щїйсѧ вы́нꙋ неразлꙋ́ченъ бы́ти съ бг҃омъ. Неразлꙋ́ченъ же съ бг҃омъ быва́етъ человѣ́къ благі́й во все́мъ, и҆ всѧ́кꙋю побѣжда́ющїй сла́сть, не по скꙋ́дости подаѧ́нїѧ ѻ҆́ныхъ, но по и҆зволе́нїю и҆ воздержа́нїю своемꙋ̀.

рѯ҃є. Благотворѝ ѡ҆би́дѧщемꙋ тѧ̀, и҆ дрꙋ́гомъ и҆мѣ́ти бꙋ́деши бг҃а. Ни пред̾ кѣ́мъ не ѡ҆клеве́тывай врага̀ твоего̀: и҆мѣ́й любо́вь, цѣломꙋ́дрїе, терпѣ́нїе, воздержа́нїе, и҆ подѡ́бнаѧ. Сїе́ бо є҆́сть вѣ́дѣнїе бг҃а, си́рѣчь, смиренномꙋ́дрїемъ и҆ таковы́ми дѣла́ми послѣ́дованїе бг҃ꙋ. Дѣла́ же сїѧ̑ сꙋ́ть не просты́хъ люде́й, но разꙋ́мныѧ дꙋшѝ.

рѯ҃ѕ. Ѡ҆ нечести́вѡ дерза́ющихъ называ́ти ѡ҆дꙋшевле́нными прозѧбє́нїѧ и҆ ѕє́лїѧ, написа́хъ главꙋ̀ простѣ́йшымъ длѧ свѣ́дѣнїѧ. Тра́вы жи́знь и҆мѣ́ютъ є҆сте́ственнꙋю, дꙋши́ же не и҆мѣ́ютъ. Слове́снымъ же живо́тнымъ человѣ́къ глаго́летсѧ, ꙗ҆́кѡ ᲂу҆́мъ и҆́мать, и҆ наꙋ̑ки вмѣща́етъ. Дрꙋгі̑ѧ живѡ́тныѧ земны̑ѧ и҆ воздꙋ̑шныѧ гла́съ въ себѣ̀ и҆мѣ́ютъ, ꙗ҆́кѡ дꙋ́хъ въ ни́хъ є҆́сть и҆ дꙋша̀: и҆ всѣ̀ живѡ́тныѧ сꙋ́ть растꙋ́щыѧ и҆ ᲂу҆меньша́ющыѧсѧ, ꙗ҆́кѡ живꙋ́тъ и҆ растꙋ́тъ, но не всѣ̀ и҆мѣ́ютъ дꙋ́шꙋ. Разли̑чїѧ же четы́ре сꙋ́ть живо́тныхъ. И҆ны̑ѧ бо и҆з̾ ѻ҆́ныхъ безсмє́ртны сꙋ́ть и҆ ѡ҆дꙋшевлє́нны, ка́къ-то а҆́гг҃ли: и҆ны̑ѧ же ᲂу҆́мъ, дꙋ́шꙋ и҆ дꙋ́хъ и҆мѣ́ютъ, ка́къ-то лю́ди: и҆ны̑ѧ же дꙋ́хъ и҆мѣ́ютъ и҆ дꙋ́шꙋ, ка́къ-то живѡ́тныѧ: и҆ны̑ѧ же то́кмѡ жи́знь и҆мѣ́ютъ, ка́къ-то прозѧбє́нїѧ: то́чїю жи́знь въ прозѧбе́нїѧхъ, без̾ дꙋшѝ, и҆ дꙋ́ха, и҆ ᲂу҆ма̀, и҆ безсме́ртїѧ состои́тъ. И҆ всѧ̑ прѡ́чаѧ без̾ жи́зни не мо́гꙋтъ бы́ти. Всѧ́каѧ же дꙋша̀, си́рѣчь человѣ́ческаѧ, всегда̀ дви́житсѧ съ ѻ҆дногѡ̀ мѣ́ста на дрꙋго́е.

рѯ҃з. Є҆гда̀ сла́сти нѣ́кїѧ мечта́нїе воспрїи́меши, блюдѝ себѐ, да не а҆́бїе совосхище́нъ бꙋ́деши ѿ ѻ҆́нагѡ: но ма́лѡ ѿложи́вши, помѧнѝ сме́рть, и҆ помы́сли, ка́кѡ лꙋ́чше є҆́сть свѣ́дѣти въ себѣ̀, что̀ сїю̀ пре́лесть сла́сти побѣди́вшꙋ.

рѯ҃и. Ꙗ҆́коже въ са́момъ рожде́нїи є҆́сть стра́сть, быва́ющее бо въ жи́зни и҆ растлѣва́етсѧ: та́кѡ и҆ въ стра́сти є҆́сть ѕло́ба. Да не рече́ши ᲂу҆́бѡ, не мо́гъ бг҃ъ ѕло́бꙋ ѿсѣщѝ: сїе́ бо глаго́лющїи, и҆ безчꙋ́вственнѡ и҆ безꙋ́мнѡ глаго́лютъ. Не подоба́ше бг҃ꙋ ѿсѣщѝ вещество̀: вещєства́ бо сꙋ́ть сі́и стра̑сти. Бг҃ъ же по́льзы ра́ди ѿсѣчѐ ѕло́бꙋ ѿ люде́й, ᲂу҆́мъ, зна́нїе и҆ ра́зꙋмъ, и҆ разсꙋжде́нїе добра̀ дарова́вши и҆̀мъ, да ви́дѧще ѕло́бꙋ, ꙗ҆́кѡ поврежда́емсѧ є҆́ю, бѣжи́мъ ѿ неѧ̀. Безꙋ́мный же человѣ́къ послѣ́дꙋетъ ѕло́бѣ, и҆ хва́литсѧ є҆́ю, и҆ ꙗ҆́коже во мре́жꙋ попа́дшисѧ, ра́тꙋемь быва́етъ ѿ неѧ̀, въ не́й пови́тъ бꙋ́дꙋчи, и҆ николи́же ѿрещи́сѧ можѧ̀, и҆ ви́дѣти, и҆ позна́ти бг҃а, всѧ̑ сотво́ршаго во спасе́нїе и҆ ѡ҆боже́нїе человѣ́ка.

рѯ҃ѳ. Сме́ртное са́мо себѧ̀ ненави́дитъ, что̀ пред̾ꙋзна́етъ свою̀ сме́рть. И҆ безсме́ртное, занѐ є҆́сть бла́го, прилꙋча́етсѧ преподо́бной дꙋшѣ̀: сме́ртное же, занѐ є҆́сть ѕло̀, прилꙋча́етсѧ безꙋ́мной и҆ ѻ҆каѧ́нной дꙋшѣ̀.

р҃ѻ. Є҆гда̀ со благодаре́нїемъ на своѐ ло́же ѡ҆брати́шисѧ, благодѣѧ̑нїѧ и҆ толи́кїй про́мыслъ бж҃їй ѡ҆ себѣ̀ помышлѧ́ѧ, и҆спо́лнившисѧ благі́ѧ мы́сли, па́че да весели́шисѧ, и҆ бꙋ́детъ тѝ со́нъ тѣле́сный, трезве́нїе дꙋшѝ, и҆ смеже́нїе ѻ҆че́й твои́хъ, и҆́стинное видѣ́нїе бг҃а, и҆ молча́нїе твоѐ, и҆спо́лнено бꙋ́дꙋчи бла́га, возда́стъ ѿ всеѧ̀ дꙋшѝ и҆ си́лы воспарѧ́ющꙋю, ѡ҆щꙋти́тельнꙋю сла́вꙋ бг҃ꙋ всѣ́хъ. ѕло́бѣ бо не сꙋ́щей ѿ человѣ́ка и҆ благодаре́нїе є҆ди́ное, па́че всѧ́кїѧ многоцѣ́нныѧ же́ртвы, ᲂу҆го́дно бг҃ꙋ, є҆мꙋ́же сла́ва во вѣ́ки вѣкѡ́въ, а҆ми́нь.

Преподо́бный ѻ҆те́цъ на́шъ ма́ркъ подви́жникъ процвѣтѐ ѻ҆́колѡ четы́реста тридесѧ́тагѡ лѣ́та по ржⷭ҇твѣ̀ хрⷭ҇то́вѣ: ᲂу҆чени́къ бѣ̀ ст҃а́гѡ і҆ѡа́нна златоꙋ́стагѡ, по свидѣ́тельствꙋ нїки́фора ка́ллїста въ то́мѣ в҃, кни́гѣ д҃і, главѣ̀ н҃г, совреме́ненъ бы́въ ст҃о́мꙋ ні́лꙋ и҆ і҆сі́дѡрꙋ пилꙋсїѡ́тскомꙋ, сла̑внымъ подви́жникамъ. Трꙋдолюби́въ же сы́й, и҆ преда́всѧ и҆зꙋче́нїю бж҃е́ственнагѡ писа́нїѧ, мнѡ́гїѧ написа́лъ словеса̀, всѧ́кагѡ наставле́нїѧ и҆ по́льзы и҆спо́лнєнныѧ: и҆з̾ ни́хъ же ѡ҆ три́десѧти двꙋ́хъ ᲂу҆помина́етсѧ ᲂу҆ нїки́фора ка́ллїста, и҆з̾ꙋча́ющихъ всѧ́комꙋ пꙋтѝ подви́жническагѡ житїѧ̀, ꙗ҆̀же ны́нѣ не ѡ҆брѣта́ютсѧ. Хранѧ́тсѧ же дрꙋгі̑ѧ словеса̀ є҆гѡ̀ ѻ҆́смь то́чїю, ѡ҆ ни́хже и҆ ка́ллїстъ ѻ҆́ный ᲂу҆помина́етъ, и҆ крі́тїкъ [и҆спыта́тель писа́нїй] фѡ́тїй въ чте́нїи с҃, стран. сѯ҃и.

И҆з̾ си́хъ слове́съ пе́рвое ѡ҆ зако́нѣ дꙋхо́внѣмъ, и҆ тре́тїе ѡ҆ мнѧ́щихсѧ ѿ дѣ́лъ ѡ҆правда́тисѧ, на ꙗ҆́сныѧ главы̑ раздѣлє́нныѧ, и҆ ѻ҆смо́е къ нїкола́ю и҆́нокꙋ, здѣ́сь положены̀, ꙗ҆́кѡ про́чихъ поле́знѣйшыѧ. Оу҆помина́етъ же ѡ҆ сочине́нїѧхъ є҆гѡ̀ и҆ преподобномꙋ́ченикъ пе́тръ дамаски́нъ, и҆ свѧты́й григо́рїй ѳессалоні́тскїй, и҆ григо́рїй сїнаі́тъ, и҆ ка́ллїстъ ст҃ѣ́йшїй патрїа́рхъ, и҆ па́ѵелъ благодѣ́тельный, и҆ дрꙋгі́е мно́гїе и҆з̾ ѻ҆тцє́въ, кото́рые прочита́въ ѻ҆́ныѧ и҆ на́съ къ чте́нїю ѻ҆́ныхъ ᲂу҆вѣщава́ютъ. Сего̀ и҆ ст҃а́ѧ цр҃ковь бж҃їѧ чествꙋ́ѧ, є҃ ма́рта па́мѧть є҆гѡ̀ твори́тъ, по́стническїе є҆гѡ̀ по́двиги, и҆ въ словесѣ́хъ мꙋ́дрость, и҆ свы́ше да́ннꙋю є҆мꙋ̀ благода́ть чꙋде́съ проповѣ́дꙋѧ.

а҃. Поне́же вы̀ мно́жицею хотѣ́сте ᲂу҆вѣ́дѣти, ка́кѡ зако́нъ дꙋхо́венъ є҆́сть по сло́вꙋ а҆пⷭ҇ла, и҆ како́е и҆́мꙋтъ разꙋмѣ́нїе и҆ дѣ́ланїе хотѧ́щїи храни́ти є҆го̀: сегѡ̀ ра́ди по си́лѣ рече́мъ.

в҃. Пе́рвѣе вѣ́мы, ꙗ҆́кѡ бг҃ъ всѧ́кагѡ бла́га нача́ло є҆́сть, и҆ среди́на, и҆ коне́цъ. Благо́е же не мо́жетъ бы́ти вѣ́рꙋемо и҆лѝ дѣ́йствꙋемо, то́чїю ѡ҆ хрⷭ҇тѣ̀ і҆и҃сѣ, и҆ ст҃о́мъ дс҃ѣ.

г҃. Всѧ́кое бла́го смотри́тельнѣ ѿ гдⷭ҇а дарова́сѧ, и҆ та́кѡ вѣ́рꙋѧй не погꙋби́тъ ѻ҆́ное.

д҃. И҆звѣ́стнаѧ вѣ́ра сто́лпъ є҆́сть крѣ́пкїй, хрⷭ҇то́съ же всѧ̑ вѣ́рꙋющемꙋ быва́етъ.

є҃. Да предначина́етъ тебѣ̀ во всѧ́комъ твое́мъ начина́нїи бг҃ъ, предначина́ющїй всѧ́кое бла́го, ꙗ҆́кѡ да по бз҃ѣ бꙋ́детъ предлежа́щее [дѣ́ло].

ѕ҃. Смиреномꙋ́дрый, и҆ дѣ́ло и҆мы́й дꙋхо́вно, чтѧ̀ бж҃е́ствєнныѧ писа̑нїѧ, всѧ̑ къ себѣ̀ ѿнесе́тъ, а҆ не ко и҆ны̑мъ.

з҃. Призыва́й бг҃а, да ѿве́рзетъ ѻ҆́чи се́рдца твоегѡ̀, и҆ ᲂу҆́зриши по́льзꙋ моли́твы и҆ чте́нїѧ, и҆скꙋ́сомъ разꙋмѣва́емагѡ.

и҃. И҆мѣ́ющїй дарова́нїе нѣ́кое дꙋхо́вное, и҆ состра́ждꙋщїй неимꙋ́щымъ, сострада́нїемъ храни́тъ да́ръ. Кичли́вый же погꙋби́тъ є҆̀, по́мыслы киче́нїѧ ѻ҆́крестъ бїе́мь.

ѳ҃. Оу҆ста̀ смиренномꙋ́драгѡ глаго́лютъ и҆́стинꙋ: проти́вꙋ глаго́лѧй же се́й, подо́бенъ є҆́сть слꙋзѣ̀ ѻ҆́номꙋ, въ лани́тꙋ гдⷭ҇а ᲂу҆да́рившемꙋ.

і҃. Не быва́й ᲂу҆чени́къ хва́лѧщагѡ себѧ̀ самаго̀, да не вмѣ́стѡ смиренномꙋ́дрїѧ, го́рдости наꙋчи́шисѧ.

а҃і. Не возноси́сѧ въ се́рдцѣ твое́мъ разꙋмѣ́нїемъ писа́нїй, да не въ дꙋ́хъ хꙋлы̀ ᲂу҆мо́мъ впаде́ши.

в҃і. Не покꙋша́йсѧ ве́щь неꙋдо́бнꙋ разрѣши́ти любопрѣ́нїемъ, но и҆́миже дꙋхо́вный зако́нъ повелѣва́етъ, си́рѣчь терпѣ́нїемъ и҆ моли́твою, и҆ є҆диномы́сленною наде́ждою.

г҃і. Слѣ́пъ є҆́сть вопїѧ́й и҆ глаго́лѧй: сн҃е дв҃довъ, поми́лꙋй мѧ̀! молѧ́йсѧ тѣле́снѣ, и҆ не ᲂу҆̀ и҆мы́й дꙋхо́внагѡ ра́зꙋма.

д҃і. Слѣпы́й нѣ́когда прозрѣ́въ, и҆ ви́дѣвъ гдⷭ҇а, не ктомꙋ̀ є҆го̀ сн҃а дв҃дова, но сн҃а бж҃їѧ и҆сповѣ́давъ, поклони́сѧ.

є҃і. Да не вознесе́шисѧ и҆злива́ѧ сле́зы въ моли́твѣ твое́й: хрⷭ҇то́съ бо коснꙋ́сѧ ѻ҆́чїю твоє́ю, и҆ ᲂу҆́мнѣ прозрѣ́лъ є҆сѝ.

ѕ҃і. По примѣ́рꙋ слѣпа́гѡ, ѿвергі́й ри̑зы, и҆ прибли́живыйсѧ ко гдⷭ҇ꙋ, послѣ́дователь є҆мꙋ̀, и҆ проповѣ́дникъ быва́етъ соверше́ннѣйшихъ ᲂу҆че́нїй.⁴

з҃і. Ѕло́ба, въ по́мыслѣхъ размышлѧ́ема, де́рзостнымъ твори́тъ се́рдце: и҆стреблѧ́ема же воздержа́нїемъ и҆ наде́ждою сокрꙋша́етъ ѻ҆́ное.

и҃і. Сокрꙋше́нїе се́рдца ѻ҆дно̀ є҆́сть мѧ́гкое и҆ поле́зное ко ᲂу҆миле́нїю є҆гѡ̀: дрꙋго́е же жесто́кое и҆ привре́дное, къ запреще́нїю є҆гѡ̀ слꙋжа́щее.

ѳ҃і. Бдѣ́нїе и҆ моли́тва, и҆ находѧ́щихъ терпѣ́нїе, сокрꙋше́нїе є҆́сть безвре́дное и҆ поле́зное се́рдцꙋ, то́чїю а҆́ще лихои́мствомъ не ѿсѣче́мъ и҆́хъ срастворе́нїе. Сїѧ̑ бо терпѧ́й, и҆ въ про́чихъ вспомоществꙋ́емь бꙋ́детъ: нерадѧ́й же и҆ ѡ҆слаблѧ́ѧйсѧ, при кончи́нѣ нестерпи́мꙋю болѣ́знь и҆мѣ́ти бꙋ́детъ.

к҃. Сластолюби́вое се́рдце темни́цею и҆ ᲂу҆́зами быва́етъ дꙋшѣ̀ во вре́мѧ и҆схо́да: трꙋдолюби́вое же, две́рь є҆́сть ѿве́рстаѧ.

к҃а. Жесто́кое се́рдце є҆́сть, желѣ̑зныѧ врата̀ во гра́дъ вводѧ́щыѧ: ѕлостра́ждꙋщемꙋ же и҆ ѡ҆скорбле́нномꙋ са́ми собо́ю ѿве́рзꙋтсѧ ѻ҆́ныѧ ꙗ҆́коже и҆ петро́ви.

к҃в. Мно́гїе сꙋ́ть ѡ҆́бразы моли́твы, є҆ди́нъ ѿ дрꙋга́гѡ разли́чествꙋющїе. Ѻ҆ба́че ни є҆ди́нъ ѡ҆́бразъ моли́твы нѣ́сть вре́денъ, ра́звѣ что̀ нѣ́сть моли́тва, но дѣ́ланїе сатани́нское.

к҃г. Человѣ́къ, ѕло̀ сотвори́ти хотѧ́й, пе́рвѣе мо́литсѧ мы́слїю по ѻ҆бы́чаю, и҆ смотри́тельнѣ возбране́нъ бꙋ́дꙋчи, по́слѣжде мно́гѡ благодари́тъ.

к҃д. Дв҃дъ, ᲂу҆би́ти хотѧ́й нава́ла карми́льскаго, воспомина́нїемъ бж҃е́ственнагѡ воздаѧ́нїѧ ѿвраще́нъ бы́въ ѿ начина́нїѧ ѻ҆́нагѡ, мно́гѡ возблагодари́лъ. Вѣ́мы же па́ки, ꙗ҆кѡва̀ сотвори́лъ ѻ҆́нъ забы́въ бг҃а, и҆ не престаѧ́ше, до́ндеже наѳа́нъ проро́къ приведѐ є҆го̀ въ воспомина́нїе бг҃а.

к҃є. Во вре́мѧ па́мѧти бж҃їѧ ᲂу҆мно́жи моле́нїе, да є҆гда̀ забꙋ́деши, гдⷭ҇ь воспомѧ́нетъ тѧ̀.

к҃ѕ. Чита́ѧ бж҃е́ственное писа́нїе, разꙋмѣва́й сокровє́ннаѧ въ не́мъ. Є҆ли̑ка бо преднапи̑сана бы́ша, глаго́летъ, всѧ̑ въ на́ше наказа́нїе пред̾написа́шасѧ⁵.

к҃з. Вѣ́рꙋ писа́нїе нарица́етъ ᲂу҆пова́емыхъ и҆звѣще́нїемъ⁶: и҆ не познава́ющихъ вселе́нїѧ хрⷭ҇то́ва, неискꙋ́сными и҆менꙋ́етъ⁷.

к҃и. Ꙗ҆́коже ѿ дѣ́лъ и҆ слове́съ ꙗ҆влѧ́етсѧ мы́сль, та́кѡ и҆ ѿ серде́чныхъ дѣ́йствїй бꙋ́дꙋщее воздаѧ́нїе.

к҃ѳ. Ще́дрое се́рдце ꙗ҆́вѣ, ꙗ҆́кѡ ᲂу҆ще́дритсѧ: проти̑внаѧ же послѣ́дствїе провозглаша́етъ.

л҃. Зако́нъ свобо́ды ᲂу҆́читъ всѧ́кой и҆́стинѣ, и҆ мно́зи чита́ютъ є҆го̀ по разꙋмѣ́нїю, но ма́ли разꙋмѣ́ютъ є҆го̀ по мѣ́рѣ за́повѣдей дѣ́ланїѧ.

л҃а. Не и҆щѝ соверше́нства є҆гѡ̀ въ добродѣ́телѧхъ человѣ́ческихъ. Соверше́нный бо въ ѻ҆́ныхъ не ѡ҆брѣта́етсѧ: занѐ соверше́нство є҆гѡ̀ во крⷭ҇тѣ̀ хрⷭ҇то́вѣ сокрове́но є҆́сть.

л҃в. Зако́нъ свобо́ды разꙋмѣ́нїемъ и҆́стиннымъ чте́тсѧ, дѣ́ланїемъ же за́повѣдей разꙋмѣ́етсѧ: и҆сполнѧ́етсѧ же щедро́тами хрⷭ҇то́выми.

л҃г. Є҆гда̀ ко всѣ̑мъ за́повѣдемъ бж҃їимъ со́вѣстїю направлѧ́тисѧ понꙋ́димсѧ: тогда̀ ᲂу҆разꙋмѣ́емъ, ꙗ҆́кѡ зако́нъ гдⷭ҇нь непоро́ченъ въ на́шихъ дѣ́лѣхъ до́брыхъ храни́тсѧ, а҆ соверши́тисѧ кромѣ̀ щедро́тъ бж҃їихъ въ человѣ́цѣхъ не мо́жетъ.

л҃д. Є҆ли́цы всѧ́кїѧ за́повѣди хрⷭ҇то́вы должника́ми себѐ бы́ти не вмѣни́ша, сі́и зако́нъ бж҃їй тѣле́снѣ чтꙋ́тъ не разꙋмѣ́юще, ни ꙗ҆̀же глаго́лютъ, ни ѡ҆ ни́хже ᲂу҆твержда́ютсѧ: тѣ́мъ же и҆ мнѧ́тъ и҆сполнѧ́ти є҆го̀ дѣла́ми.

л҃є. И҆на́ѧ ве́щь є҆́сть ꙗ҆́внѡ до́браѧ въ соверше́нїи, а҆ намѣ́ренїе соверша́ющагѡ ѻ҆́нꙋю нѣ́сть во благо́е: и҆на́ѧ же соверша́етсѧ а҆́ки лꙋка́ваѧ, а҆ намѣ́ренїе соверша́ющагѡ ѻ҆́нꙋю є҆́сть во благо́е. Не то́чїю же дѣла̀ творѧ́тъ нѣ́цыи, но и҆ словеса̀ глаго́лютъ предрече́ннымъ ѡ҆́бразомъ. Занѐ ѻ҆́ви премѣнѧ́ютъ ве́щь по неискꙋ́ствꙋ и҆лѝ невѣ́дѣнїю, ѻ҆́ви же по предложе́нїю лꙋка́вства, и҆ні́и же по благоче́стїю.

л҃ѕ. Сокрыва́ѧй въ покро́вѣ похва́лъ клеветꙋ̀ и҆ порица́нїе, не ᲂу҆добоѡбрѣта́емь є҆́сть простѣ́йшымъ: подо́бенъ же семꙋ̀ є҆́сть и҆ тщесла́вствꙋѧй во смире́ннѣмъ ѡ҆́бразѣ: и҆̀же на мно́зѣ прехищрѧ́юще и҆́стинꙋ лже́ю, попꙋще́ни бы́вше, по́слѣжде дѣ́лы ѡ҆блича́ютсѧ.

л҃з. И҆ны́й твори́тъ ве́щь нѣ́кꙋю ꙗ҆́внѡ ꙗ҆́кѡ до́брꙋю. ѿмщева́ѧ бли́жнемꙋ: дрꙋгі́й же не сотвори́вши тоѧ̀, воспо́льзꙋетсѧ во ᲂу҆мѣ̀.

л҃и. И҆но́е ѡ҆бличе́нїе є҆́сть по ѕло́бѣ и҆ ѿмще́нїю, а҆ и҆но́е є҆́сть по стра́хꙋ бж҃їю и҆ и҆́стинѣ.

л҃ѳ. Преста́вшаго ѿ грѣха̀, и҆ ᲂу҆жѐ ка́ющагосѧ не ктомꙋ̀ ѡ҆блича́й. А҆́ще же глаго́леши, ꙗ҆́кѡ по бз҃ѣ ѡ҆блича́еши є҆го̀, пе́рвѣе своѧ̑ ѕла̑ѧ ꙗ҆́вными сотворѝ.

м҃. Всѧ́кою добродѣ́телїю нача́льствꙋетъ бг҃ъ, ꙗ҆́коже и҆ дневны́мъ свѣ́томъ со́лнце.

м҃а. Сотвори́въ добродѣ́тель, помѧнѝ ре́кшаго, ꙗ҆́кѡ без̾ менѐ не мо́жете твори́ти ничесѡ́же⁸.

м҃в. Ско́рби ра́ди блага̑ѧ человѣ́кѡмъ ᲂу҆готѡ́вана сꙋ́ть: подо́бнѣ же и҆ ѕла̑ѧ тщесла́вїѧ ра́ди и҆ сла́сти.

м҃г. И҆збѣга́етъ грѣха̀ ѡ҆би́димый ѿ человѣ̑къ, и҆ ра́вное ско́рби ѡ҆брѣта́етъ застꙋпле́нїе.

м҃д. Вѣ́рꙋѧй хрⷭ҇тꙋ̀ ѡ҆ воздаѧ́нїи, всѧ́кꙋю ѻ҆би́дꙋ ᲂу҆се́рднѡ те́рпитъ по мѣ́рѣ вѣ́ры.

м҃є. Молѧ́йсѧ ѡ҆ человѣ́цѣхъ ѡ҆би́дѧщихъ, сокрꙋша́етъ бѣ́сы: сопротивлѧ́ѧйсѧ же пє́рвымъ, ѿ вторы́хъ ᲂу҆ѧзвлѧ́етсѧ.

м҃ѕ. Лꙋ́чше прегрѣшє́нїѧ человѣ́чєскаѧ, не́жели бѣсѡ́вскаѧ: благоꙋгожда́ѧй же гдⷭ҇ви, ѻ҆бои́хъ побѣжда́етъ.

м҃з. Всѧ́кое бла́го ѿ гдⷭ҇а смотри́тельнѣ прихо́дитъ: ѿхо́дитъ же та́йнѣ ѿ неблагода́рныхъ, неразꙋ́мныхъ и҆ пра́здныхъ.

м҃и. Всѧ́каѧ возбране́ннаѧ ѕло́ба ѡ҆ка́нчиваетсѧ сла́стїю, и҆ всѧ́каѧ добродѣ́тель дꙋхо́внымъ ᲂу҆тѣше́нїемъ. И҆ ꙗ҆́коже пе́рваѧ держа́вствꙋѧ, поѡщрѧ́етъ своѧ̑, си́це и҆ втора́ѧ подо́бнѣ срѡ́днаѧ є҆́й.

м҃ѳ. Поноше́нїе человѣ́ческое ско́рбь наво́дитъ се́рдцꙋ, чистоты́ же быва́етъ вино́вно терпѧ́щемꙋ.

н҃. Невѣ́дѣнїе, вопрекѝ глаго́лати поле́знымъ твори́тъ, и҆ де́рзостно быва́ѧ, возраща́етъ предлежа̑щаѧ ѕло́бѣ.

н҃а. Ничи́мже ѡ҆тщетева́емь, скѡ́рбнаѧ прїе́мли: и҆ ꙗ҆́кѡ сло́во возда́ти и҆мѣ́ѧ, лихои́мство ѿве́ргни.

н҃в. Согрѣши́въ вта́й, не покꙋша́йсѧ ᲂу҆таи́ти. Всѧ̑ бо нага̑ и҆ ѡ҆б̾ѧвлє́на пред̾ ѻ҆чи́ма гдⷭ҇а, къ немꙋ́же на́мъ сло́во⁹.

н҃г. Оу҆́мственнѣ показꙋ́й себѧ̀ влⷣцѣ: человѣ́къ бо на лицѐ, бг҃ъ же на се́рдце зри́тъ¹⁰.

н҃д. Ничто́же помышлѧ́й и҆лѝ содѣва́й без̾ намѣ́ренїѧ, є҆́же по бз҃ѣ. Безразсꙋ́днѡ бо пꙋтеше́ствꙋѧй, сꙋ́етнѡ трꙋди́тисѧ и҆́мать.

н҃є. Без̾ нꙋ́жды согрѣша́ющемꙋ неꙋдо́бнѡ ка́ѧтисѧ быва́етъ: зане́же ᲂу҆таи́тисѧ не мо́жно ѿ бж҃їѧ пра́вды.

н҃ѕ. Слꙋ́чай болѣ́зненный па́мѧть бж҃їю подае́тъ разꙋ́мномꙋ, ѡ҆скорблѧ́ѧ по ра́венствꙋ забыва́ющаго ѡ҆ бг҃ѣ.

н҃з. Всѧ́каѧ нево́льнаѧ болѣ́знь да наꙋча́етъ тѧ̀ па́мѧтовати бг҃а: и҆ не ѡ҆скꙋдѣ́етъ тѝ вина̀ къ покаѧ́нїю.

н҃и. Забве́нїе са́мо по себѣ̀ ни є҆ди́нꙋ и҆́мать си́лꙋ, но ѿ на́шегѡ нерадѣ́нїѧ по мѣ́рѣ ᲂу҆крѣплѧ́етсѧ.

н҃ѳ. Не глаго́ли, что̀ сотворю̀, ꙗ҆́кѡ не хощꙋ̀, и҆ прихо́дитъ: зане́же по́мнѧ, пренебре́глъ є҆сѝ до́лжное.

ѯ҃. Є҆́же по́мниши бла́го, сотворѝ: и҆ є҆́же не по́мниши, ѿкро́етсѧ тѝ: и҆ не преда́ждь безразсꙋ́дномꙋ забве́нїю мы́сль.

ѯ҃а. Писа́нїе глаго́летъ: а҆́дъ и҆ па́гꙋба ꙗ҆́вна пред̾ гдⷭ҇емъ¹¹. Сїѧ̑ же ѡ҆ серде́чномъ невѣ́дѣнїи и҆ забве́нїи глаго́летъ.

ѯ҃в. А҆́дъ бо є҆́сть невѣ́дѣнїе: ѻ҆боѧ́ бо сꙋ́ть не ꙗ҆́вна [не сꙋ̑щаѧ]: па́гꙋба же є҆́сть забве́нїе: зане́же ѿ сꙋ́щихъ погибо́ша.

ѯ҃г. Своѧ̑ и҆спытꙋ́й ѕла̑ѧ, а҆ не бли́жнѧгѡ, и҆ не ѡ҆кра́дено бꙋ́детъ ᲂу҆́мное твоѐ дѣ́лателище.

ѯ҃д. Ѡ҆ всѣ́хъ поси́льныхъ добродѣ́телѧхъ неꙋдобопрости́тельно нерадѣ́нїе. Ми́лостынѧ же и҆ моли́тва возставлѧ́етъ нерадѣ́вшихъ.

ѯ҃є. Всѧ́каѧ ско́рбь по бз҃ѣ сꙋще́ственное дѣ́ло є҆́сть благоче́стїѧ. И҆́стиннаѧ бо любо́вь проти́вными и҆скꙋша́етсѧ.

ѯ҃ѕ. Не глаго́ли, стѧжа́ти добродѣ́тель без̾ ско́рби: неискꙋ́сенъ бо є҆́сть ѿра́дꙋ и҆мꙋ́щїй.

ѯ҃з. Коне́цъ всѧ́кїѧ нево́льныѧ ско́рби разсꙋжда́й, и҆ ѡ҆брѧ́щеши въ не́мъ и҆стребле́нїе грѣха̀.

ѯ҃и. Мно́гїе совѣ́ты бли́жнѧгѡ на по́льзꙋ быва́ютъ: комꙋ́ждо же своегѡ̀ совѣ́та ничто́же є҆́сть прили́чнѣе.

ѯ҃ѳ. И҆щѧ̀ врачева́нїѧ, пеки́сѧ ѡ҆ со́вѣсти, и҆ є҆ли̑ка глаго́летъ тѝ, сотворѝ, и҆ ѡ҆брѧ́щеши по́льзꙋ.

ѻ҃. Та̑йнаѧ коегѡ́ждо бг҃ъ вѣ́сть, и҆ со́вѣсть, и҆ ѿ си́хъ са́мыхъ да прїе́млетъ кі́йждо и҆справле́нїе.

ѻ҃а. Человѣ́къ, є҆ли́кѡ мо́жетъ, ѡ҆бꙋча́етсѧ по свое́й во́ли: бг҃ъ же собы́тїе сегѡ̀ твори́тъ по пра́вдѣ.

ѻ҃в. А҆́ще хо́щеши неѡсꙋжде́ннѡ похвалꙋ̀ ѿ человѣ̑къ прїима́ти, пе́рвѣе ѡ҆ грѣсѣ́хъ твои́хъ возлюбѝ ѡ҆бличе́нїе.

ѻ҃г. Є҆ли́къ сра́мъ а҆́ще кто̀ прїи́метъ за и҆́стинꙋ хрⷭ҇то́вꙋ, стори́цею ѿ мно́гихъ просла́витсѧ. Лꙋ́чше же всѧ́кое бла́го твори́ти бꙋ́дꙋщихъ ра́ди.

ѻ҃д. Є҆гда̀ человѣ́къ человѣ́ка воспо́льзꙋетъ словесы̑, и҆лѝ дѣ́лы, бж҃їю бы́ти благода́ть да разꙋмѣ́ютъ ѻ҆́ба. Не разꙋмѣ́ѧй же сегѡ̀, ѿ разꙋмѣ́ющагѡ ѡ҆блада́нъ бꙋ́детъ.

ѻ҃є. Похвалѧ́ѧй бли́жнѧго по нѣ́коемꙋ лицемѣ́рїю, ᲂу҆ничижи́тъ є҆го̀ во вре́мѧ, и҆ са́мъ посрами́тсѧ.

ѻ҃ѕ. Не вѣ́дый подса́ды сꙋпоста́тѡвъ, ᲂу҆до́бь закала́етсѧ: и҆ не вѣ́дый вины̀ страсте́й, низпа́даетъ ᲂу҆до́бнѣ.

ѻ҃з. Ѿ сластолю́бїѧ нерадѣ́нїе, а҆ ѿ нерадѣ́нїѧ забве́нїе прихо́дитъ. Поле́знагѡ бо разꙋмѣ́нїе бг҃ъ всѣ̑мъ дарова̀.

ѻ҃и. Человѣ́къ совѣ́тꙋетъ бли́жнемꙋ, ꙗ҆́коже вѣ́сть: бг҃ъ же дѣ́йствꙋетъ въ слы́шащемъ, ꙗ҆́коже вѣ́рова.

ѻ҃ѳ. Ви́дѣхъ невѣ́ждъ, дѣ́ломъ смиренномꙋ́дрствовавшихъ, и҆ бы́ша премꙋ́дрыхъ премꙋ́дрѣйшїи.

п҃. Дрꙋгі́й невѣ́жда, слы́шавъ ѻ҆́ныхъ похвалѧ́емыхъ, смиренномꙋ́дрїю и҆́хъ не подража́етъ, но невѣ́жествомъ тщесла́вѧсѧ, горды́ню прїе́млетъ.

п҃а. Оу҆ничижа́ѧй ра́зꙋмъ, и҆ невѣ́жествомъ хвалѧ́йсѧ, не сло́вомъ то́кмѡ є҆́сть невѣ́жда, но и҆ ра́зꙋмомъ.

п҃в. Ꙗ҆́коже бо и҆но́е є҆́сть премꙋ́дрость въ сло́вѣ, и҆ и҆но́е мꙋ́дрость: си́це и҆но́е є҆́сть невѣ́жество въ сло́вѣ, и҆ и҆но́е безꙋ́мїе.

п҃г. Ни ма́лѡ не повреди́тъ неискꙋ́сство въ рече́нїѧхъ благоговѣ́йнѣйшаго, ꙗ҆́коже ни премꙋ́дрость въ словесѣ́хъ смиренномꙋ́драгѡ.

п҃д. Не глаго́ли, ꙗ҆́кѡ не вѣ́мъ подоба́ющагѡ, и҆ неизвини́теленъ є҆́смь, не творѧ̀ ѻ҆́нагѡ. А҆́ще бо твори́лъ бы є҆сѝ дѡ́браѧ, є҆ли̑ка вѣ́си, и҆ прѡ́чаѧ бы́ти порѧ́дꙋ ѿкры́лисѧ, є҆ди́но чрез̾ дрꙋго́е ᲂу҆разꙋмѣва́ема. Не по́льзꙋетъ тѝ пре́жде дѣ́ланїѧ пе́рвыхъ, ᲂу҆вѣ́дѣти втѡра́ѧ. Ра́зꙋмъ бо кичи́тъ ѡ҆ пра́здности, а҆ любы̀ созида́етъ¹², зане́же всѧ̑ терпи́тъ.

п҃є. Бж҃е́ственнагѡ писа́нїѧ глаго́лы дѣѧ́ньми чита́й, а҆ не многосло́вь, кича́сѧ просты́ми понѧ́тїѧми.

п҃ѕ. Ѡ҆ста́вивый дѣѧ́нїе, и҆ на просто́мъ ра́зꙋмѣ ᲂу҆твержда́ѧйсѧ, вмѣ́стѡ ѻ҆бою́дꙋ ѻ҆́стра меча̀, тро́стѧнъ же́злъ де́ржитъ, и҆́же во вре́мѧ бра́ни, по писа́нїю, пронзе́тъ рꙋ́кꙋ є҆гѡ̀, и҆ вни́детъ въ ню̀, ꙗ҆́дъ киче́нїѧ пре́жде сꙋпоста́тѡвъ влага́ѧ.

п҃з. Мѣ́рꙋ и҆́мать и҆ вѣсы̀ пред̾ бг҃омъ всѧ́каѧ мы́сль. Мо́щно бо є҆́сть то́жде и҆лѝ встра́стнѣ, и҆лѝ є҆диноѡбра́знѣ помы́слити.

п҃и. Сотвори́вый за́повѣдь, да ѡ҆жида́етъ ѡ҆ не́й и҆скꙋше́нїѧ. Любо́вь бо ко хрⷭ҇тꙋ̀ проти́вными и҆скꙋша́етсѧ.

п҃ѳ. Да не помы́слиши когда̀ нерадѣ́ти ѡ҆ по́мыслѣхъ. Неꙋтае́ма бо є҆́сть ѿ бг҃а всѧ́каѧ мы́сль.

ч҃. Є҆гда̀ ᲂу҆ви́диши по́мыслъ, человѣ́ческꙋю тѝ сла́вꙋ предлага́ющъ, позна́й ꙗ҆́снѡ, ꙗ҆́кѡ стꙋ́дъ тѝ ᲂу҆строѧ́етъ.

ч҃а. Вѣ́сть вра́гъ дꙋхо́внагѡ зако́на пра́ведность, и҆ и҆́щетъ то́чїю сложе́нїе ᲂу҆ма̀. Та́кѡ бо и҆лѝ покаѧ́нїѧ трꙋда́ми пови́нна сотвори́тъ подвла́стнаго, и҆лѝ нека́ющасѧ нево́льными наведе́ньми болѣ́знь причини́тъ є҆мꙋ̀. Ѻ҆вогда́ же и҆ проти́вꙋ невѣ́дѣнїй ра́товати под̾ꙋща́етъ, да и҆ здѣ̀ болѣ̑зни ᲂу҆мно́житъ, и҆ во и҆схо́дѣ нетерпѣ́нїѧ ра́ди пока́жетъ невѣ́рна.

ч҃в. Проти́вꙋ находѧ́щымъ мно́зи мно́гѡ воспроти́вишасѧ: но без̾ моли́твы и҆ покаѧ́нїѧ никто́же лю́тыхъ и҆збѣжѐ.

ч҃г. Ѕла̑ѧ є҆ди́но чрез̾ є҆ди́ное прїе́млютъ си́лꙋ, ꙗ҆́коже и҆ блага̑ѧ дрꙋ́гъ ѿ дрꙋ́га возраста́ютъ, и҆ своего̀ прича́стника на прє́днѧѧ бо́лѣе возбꙋжда́ютъ.

ч҃д. Ма̑лаѧ согрѣшє́нїѧ ᲂу҆меньша́етъ дїа́волъ. И҆́накѡ бо на бѡ́льшаѧ ѕла̑ѧ привестѝ не мо́жетъ.

ч҃є. Ко́рень стꙋ́дныѧ по́хоти є҆́сть человѣ́ческаѧ похвала̀, ꙗ҆́коже и҆ цѣломꙋ́дрїѧ ѡ҆бличе́нїе ѡ҆ ѕло́бѣ, не є҆гда̀ слы́шимъ то́чїю, но є҆гда̀ и҆ прїе́млемъ ѻ҆́ное.

ч҃ѕ. Никоеѧ́же не полꙋча́етъ по́льзы ѿрекі́йсѧ, и҆ сладостра́ствꙋѧй. Є҆́же бо творѧ́ше стѧжа́нїемъ, сїѐ и҆ ничегѡ́же и҆мѣ́ѧ, дѣ́лаетъ.

ч҃з. Па́ки возде́ржникъ, а҆́ще стѧжава́етъ пѣ́нѧзи, бра́тъ є҆́сть пе́рвомꙋ помышле́нїемъ, ѿ ма́тере тоѧ́жде, ᲂу҆́мныѧ ра́ди сла́сти, ѿ ѻ҆тца́ же дрꙋга́гѡ, по причи́нѣ премѣне́нїѧ стра́сти.

ч҃и. И҆ны́й ѿсѣца́етъ стра́сть бо́льшагѡ ра́ди сладостра́стїѧ, и҆ ѿ невѣ́дѧщихъ є҆гѡ̀ намѣ́ренїѧ сла́вимь є҆́сть: мо́жетъ же бы́ть и҆ са́мъ ѻ҆́нъ себѐ не вѣ́сть трꙋдѧ́сѧ безполе́знѡ.

ч҃ѳ. Вина̀ всѧ́кїѧ ѕло́бы є҆́сть тщесла́вїе и҆ сла́сть. Невозненави́дѣвый же сїѧ̑, не и҆стреблѧ́етъ стра́сть.

р҃. Ко́рень всѣ̑мъ ѕлы̑мъ, рече́но є҆́сть, сребролю́бїе¹³. Но сїѐ ꙗ҆́внѡ ѻ҆́ными составлѧ́етсѧ.

р҃а. Ѡ҆слѣплѧ́етсѧ ᲂу҆́мъ си́ми тремѧ̀ страстьмѝ: сребролю́бїемъ, глаго́лю, тщесла́вїемъ и҆ сла́стїю.

р҃в. Сі́и трѝ дщє́ри сꙋ́ть пїѧ̑вицы¹⁴, по писа́нїю, ѿ ма́тере безꙋ́мїѧ любо́вїю возлю́блєнны.

р҃г. Ра́зꙋмъ и҆ вѣ́ра, є҆стества̀ на́шегѡ совоспи́танники, ни ѿ чегѡ̀ и҆но́гѡ, то́чїю ѿ ѻ҆́ныхъ притꙋпи́стасѧ.

р҃д. Ꙗ҆́рость, и҆ гнѣ́въ, и҆ бра̑ни, и҆ ᲂу҆бі̑йства, и҆ всѧ̑ прѡ́чаѧ ѕла̑ѧ порѧ́дꙋ, ѿ ѻ҆́ныхъ въ человѣ́цѣхъ ѕѣлѡ̀ ᲂу҆крѣпи́шасѧ.

р҃є. Та́кѡ подоба́етъ возненави́дѣти сребролю́бїе, тщесла́вїе и҆ сла́сть, ꙗ҆́кѡ ма́терей ѕѡ́лъ, и҆ ма́чихъ добродѣ́телей.

р҃ѕ. Си́хъ ра́ди не люби́ти мі́ра, ни ꙗ҆̀же въ мі́рѣ, повелѣ́но на́мъ, не да созда̑нїѧ бж҃їѧ безразсꙋ́днѡ возненави́димъ, но ꙗ҆́кѡ да трїе́хъ ѻ҆́ныхъ страсте́й вины̑ ѿсѣче́мъ.

р҃з. Никто́же, глаго́летъ писа́нїе, во́инъ быва́ѧ, ѡ҆бѧзꙋ́етсѧ кꙋ́плѧми жите́йскими¹⁵. Хотѧ́й бо съ соплете́нїемъ стра̑сти побѣди́ти, подо́бенъ є҆́сть со пле́велы ᲂу҆гаша́ющемꙋ запале́нїе.

р҃и. За пѣ́нѧзи, и҆лѝ за сла́вꙋ, и҆лѝ за сла́сть гнѣ́ваѧйсѧ на бли́жнѧго, не ᲂу҆̀ позна̀, ꙗ҆́кѡ пра́веднѡ ᲂу҆правлѧ́етъ бг҃ъ тва́рьми.

р҃ѳ. Є҆гда̀ ᲂу҆слы́шиши гдⷭ҇а глаго́люща, ꙗ҆́кѡ а҆́ще кто̀ не ѿрече́тсѧ всегѡ̀ и҆мѣ́нїѧ своегѡ̀, нѣ́сть менѐ досто́инъ¹⁶, не то́чїю ѡ҆ и҆мѣ́нїи разꙋмѣ́й рече́нное, но и҆ ѡ҆ всѣ́хъ дѣ́йствїѧхъ ѕло́бы.

р҃і. Не разꙋмѣ́ѧй и҆́стины, нижѐ и҆́стиннѡ вѣ́ровати мо́жетъ. Ра́зꙋмъ бо по є҆стествꙋ̀ предварѧ́етъ вѣ́рꙋ.

ра҃і. Ꙗ҆́коже ка́ждой ви́димой ве́щи ѡ҆предѣли́лъ є҆́сть бг҃ъ сро́дное ка́чество, си́це и҆ человѣ́чєскимъ по́мысламъ, а҆́ще хо́щемъ, и҆ не хо́щемъ.

рв҃і. А҆́ще кто̀ ꙗ҆́внѣ согрѣша́ѧ, и҆ не ка́ѧсѧ, ничто́же пострада̀ да́же до и҆схо́да своегѡ̀, да мни́ши, ꙗ҆́кѡ сего̀ неми́лостивъ пости́гнетъ сꙋ́дъ.

рг҃і. Молѧ́йсѧ разꙋ́мнѣ, терпи́тъ находѧ̑щаѧ: ѕлопа́мѧтꙋѧй же, не ᲂу҆̀ чи́стѣ помоли́сѧ.

рд҃і. Ѡ҆би́димь, и҆лѝ поноше́нъ, и҆лѝ и҆згна́нъ бы́въ ѿ когѡ̀, не ѡ҆ настоѧ́щемъ помышлѧ́й, но бꙋ́дꙋщагѡ ѡ҆жида́й: и҆ ѻ҆брѧ́щеши, ꙗ҆́кѡ то́й мно́гихъ тѝ бла̑гъ бы́сть вино́венъ, не то́чїю въ настоѧ́щемъ, но и҆ въ бꙋ́дꙋщемъ вѣ́цѣ.

рє҃і. Ꙗ҆́коже ѕлопи̑щныѧ по́льзꙋетъ го́рькаѧ пелы́нь: та́кѡ ѕлонра̑внымъ по́льзꙋетъ ѕла̑ѧ страда́ти. Занѐ ѻ҆́вѣхъ здра́выми бы́ти, ѻ҆́вѣхъ же ка́ѧтисѧ врачевства̑ содѣ́ловаютъ.

рѕ҃і. А҆́ще не хо́щеши ѕлострада́ти, нижѐ ѕлотвори́ти жела́й. Поне́же то̀ за си́мъ непрестꙋ́пнѡ послѣ́дствꙋетъ. Є҆́же бо а҆́ще сѣ́етъ кі́йждо, то́жде и҆ по́жнетъ¹⁷.

рз҃і. Во́лею ѕла̑ѧ сѣ́юще, и҆ нево́лею ѻ҆́наѧ жнꙋ́ще, пра́вдѣ бж҃їей диви́тисѧ до́лжни є҆смы̀.

ри҃і. Поне́же вре́мѧ нѣ́кое междꙋ̀ сѣ́ѧнїемъ и҆ жа́твою ѡ҆предѣли́сѧ, сегѡ̀ ра́ди не вѣ́рꙋемъ ѡ҆ воздаѧ́нїи.

рѳ҃і. Согрѣши́вши не ѡ҆бвинѧ́й дѣѧ́нїе, но мы́сль. А҆́ще бо не бы̀ ᲂу҆́мъ предте́клъ, то̀ не бы̀ тѣ́ло припослѣ́довало.

р҃к. Та́йный ѕлодѣ́тель лꙋка́внѣйшїй є҆́сть ꙗ҆́внѣ ѡ҆би́дѧщихъ. Тѣ́мже то́й и҆ ѕлѣ́е мꙋ́читсѧ.

рк҃а. Кова̑рства соплета́ѧй, и҆ сокрове́ннѣ ѕлотворѧ́й, ѕмі́й є҆́сть, по писа́нїю, сѣдѧ́й на пꙋтѝ, и҆ ᲂу҆грыза́ѧй пѧ́тꙋ ко́нскꙋ¹⁸.

рк҃в. И҆́же вкꙋ́пѣ въ че́мнибꙋдь похвалѧ́етъ, и҆ въ че́мнибꙋдь порица́етъ бли́жнѧго, се́й тщесла́вїемъ и҆ за́вистїю ѡ҆держи́мь є҆́сть: и҆ похвала́ми сокрыва́ти покꙋша́етсѧ за́висть, порече́нїѧми же себѧ̀ благоискꙋ́снѣйшимъ ѻ҆́нагѡ поставлѧ́етъ.

рк҃г. Ꙗ҆́коже нѣ́сть мо́щно вкꙋ́пѣ и҆ ѻ҆́вцы пастѝ, и҆ во́лки: та́кѡ не возмо́жетъ полꙋчи́ти ми́лость, и҆́же ѕло̀ твори́тъ бли́жнемꙋ.

рк҃д. Примѣша́ѧй къ за́повѣди ѻ҆́тай свою̀ во́лю, прелюбодѣ́й є҆́сть, ꙗ҆́коже въ премꙋ́дрости показа́сѧ, и҆ за скꙋ́дость ᲂу҆ма̀ болѣ̑зни и҆ безчє́стїѧ понесе́тъ.¹⁹

рк҃є. Ꙗ҆́коже воды̀ и҆ ѻ҆гнѧ̀ совокꙋпле́нїе проти́вно: та́кѡ сопротивлѧ́ютсѧ дрꙋ́гъ дрꙋ́гꙋ словоѡправда́нїе и҆ смире́нїе.

рк҃ѕ. И҆ща́й ѿпꙋще́нїѧ грѣхѡ́въ, лю́битъ смиренномꙋ́дрїе: ѡ҆сꙋжда́ѧй же дрꙋга́го, запечатлѣва́етъ своѧ̑ ѕла̑ѧ.

рк҃з. Да не ѡ҆ста́виши неизгла́жденнымъ грѣ́хъ, а҆́ще и҆ малѣ́йшїй є҆́сть, да не по́слѣжде на бѡ́льшаѧ ѕла̑ѧ привлече́тъ тѧ̀.

рк҃и. А҆́ще хо́щеши спасти́сѧ, и҆́стинное сло́во возлюбѝ, и҆ никогда́же безразсꙋ́днѡ ѡ҆бличе́нїѧ да ѿврати́шисѧ.

рк҃ѳ. Сло́во и҆́стины премѣнѝ порождє́нїѧ є҆хі̑дныѧ, и҆ сказа̀ и҆̀мъ бѣжа́ти ѿ бꙋ́дꙋщагѡ гнѣ́ва.

р҃л. Прїе́млѧй словеса̀ и҆́стины, прїе́млетъ бг҃а сло́ва. Глаго́летъ бо хрⷭ҇то́съ: прїе́млѧй ва́съ, менѐ прїе́млетъ.²⁰

рл҃а. Разсла́бленный свѣ́шенный сквозѣ̀ кро́ва, є҆́сть грѣ́шникъ ѿ вѣ́рныхъ по бз҃ѣ ѡ҆блича́емый, и҆ вѣ́ры ра́ди ѻ҆́нѣхъ прїе́млѧй ѿпꙋще́нїе.²¹

рл҃в. Лꙋ́чше є҆́сть съ благоговѣ́нїемъ моли́тисѧ ѡ҆ бли́жнемъ, не́жели ѡ҆блича́ти є҆го̀ ѡ҆ всѧ́комъ согрѣше́нїи.

рл҃г. Ка́ѧйсѧ пра́вѡ, ѿ безꙋ́мныхъ порꙋга́емь быва́етъ. Сїе́ же є҆мꙋ̀ є҆́сть зна́менїе благоꙋгожде́нїѧ.

рл҃д. Подвиза́ѧйсѧ ѿ всѣ́хъ воздержи́тсѧ,²² и҆ не престае́тъ твори́ти сїѐ, до́ндеже потреби́тъ гдⷭ҇ь сѣ́мѧ ѿ вавѷлѡ́на.

рл҃є. Помы́сли, ꙗ҆́кѡ двана́десѧть є҆́сть страсте́й безче́стныхъ. А҆́ще є҆ди́нꙋ ѡ҆ тѣ́хъ во́лею возлю́биши, ѻ҆́наѧ и҆спо́лнитъ мѣ́сто є҆динона́десѧти.

рл҃ѕ. Ѻ҆́гнь є҆́сть горѧ́щїй грѣ́хъ. Коли́кѡ ᲂу҆́бѡ ѿсѣче́ши вещество̀, толи́кѡ ᲂу҆га́снетъ, и҆ коли́кѡ а҆́ще приложи́ши, по мѣ́рѣ возгори́тсѧ.

рл҃з. Возвы́сивсѧ похвала́ми, ѡ҆жида́й безче́стїѧ. Глаго́летъ бо: Возносѧ́йсѧ, смири́тсѧ.²³

рл҃и. Є҆гда̀ всѧ́кꙋю во́льнꙋю ѕло́бꙋ ѿ мы́сли ѿве́ргнемъ: тогда̀ па́ки бра́нь сотвори́мъ съ сꙋ́щими страстьмѝ по предпрїѧ́тїю.

рл҃ѳ. Предпрїѧ́тїе є҆́сть пре́жнихъ ѕѡ́лъ нево́льное воспомина́нїе въ подви́жникѣ произы́ти въ стра́сть возбранѧ́емое, въ побѣди́телѣ же до прило́га низвраща́емое.

р҃м. Прило́гъ є҆́сть безви́дное движе́нїе се́рдца, по подо́бїю за́мка ѿ и҆скꙋ́сныхъ пред̾ꙋде́рживаемый.

рм҃а. И҆дѣ́же сꙋ́ть ѡ҆́брази по́мысла, та́мѡ сложе́нїе быва́етъ. Движе́нїе бо безви́дное, безвино́вный є҆́сть прило́гъ. И҆ и҆ны́й ѡ҆ си́хъ ѿбѣга́етъ, ꙗ҆́кѡ головнѧ̀ ѿ ѻ҆гнѧ̀: и҆ны́й же не возвраща́етсѧ, до́ндеже возже́тъ пла́мень.

рм҃в. Не глаго́ли, ꙗ҆́кѡ не хощꙋ̀, и҆ прихо́дитъ: коне́чнѡ бо а҆́ще и҆ не то́жде са́мое, но вины̑ лю́биши ве́щи тоѧ̀.

рм҃г. И҆ща́й похвалы̀, ѡ҆брѣта́етсѧ во стра́сти, и҆ ѡ҆ ско́рби наше́дшей пла́чꙋщїй, лю́битъ сла́сть.

рм҃д. Ꙗ҆́коже на вѣса́хъ, непостоѧ́ненъ є҆́сть сладостра́ствꙋющагѡ по́мыслъ: ѻ҆вогда̀ пла́четъ и҆ пла́четсѧ грѣхѡ́въ ра́ди, ѻ҆вогда́ же ра́тꙋетъ, и҆ противоглаго́летъ бли́жнемꙋ, ѿгонѧ́ѧ сла̑сти.

рм҃є. Всѧ̑ и҆скꙋша́ѧй, и҆ до́брое содержа́й, послѣ́довательнѡ ѿ всѧ́кагѡ ѕла̀ ᲂу҆дали́тсѧ.

рм҃ѕ. Долготерпѣли́въ мꙋ́жъ мно́гъ въ ра́зꙋмѣ: подо́бнѣ и҆ словесє́мъ премꙋ́дрости прилага́й ᲂу҆́хо своѐ.

рм҃з. Без̾ па́мѧти бж҃їей ра́зꙋмъ и҆́стинный бы́ти не мо́жетъ. Без̾ пе́рвагѡ бо вторы́й ло́женъ є҆́сть.

рм҃и. Жестокосе́рдаго по́льзꙋетъ тонча́йшагѡ ра́зꙋма сло́во: поне́же без̾ стра́ха, трꙋдѡ́въ покаѧ́нїѧ не прїе́млетъ.

рм҃ѳ. Кро́ткомꙋ человѣ́кꙋ вѣрносло́вїе прили́чествꙋетъ: поне́же не и҆скꙋша́етъ бж҃їѧ долготерпѣ́нїѧ, и҆ не побѣжда́етсѧ ча́стымъ престꙋпле́нїемъ.

р҃н. Мꙋ́жа си́льна да не ѡ҆бличи́ши ѡ҆ тщесла́вїи, но покажѝ є҆мꙋ̀ и҆мѣ́ющее нанести́сѧ безче́стїе. Си́мъ бо ѡ҆́бразомъ разꙋ́мный сла́дцѣ ѡ҆блича́емь быва́етъ.

рн҃а. Ненави́дѧй ѡ҆бличє́нїѧ, по ᲂу҆мышле́нїю лежи́тъ [погрѧза́етъ] во стра́сти. Любѧ́й же [ѻ҆́ное] ꙗ҆́вѣ, ꙗ҆́кѡ предпрїѧ́тїемъ хо́дитъ.

рн҃в. Не жела́й слы́шати чꙋжда̑ѧ лꙋка́вствѡванїѧ: въ таково́й бо во́ли и҆ черты̑ лꙋка́вствованїй написꙋ́ютсѧ.

рн҃г. Ѕлы̑мъ словесє́мъ наꙋчи́всѧ, на себѧ̀ гнѣ́вайсѧ, а҆ не на глаго́лавшаго. Лꙋка́вагѡ бо слꙋ́ха, лꙋка́въ и҆ ѿвѣщава́тель.

рн҃д. А҆́ще кто̀ съ сꙋесло́вными человѣ́ки бесѣ́довати бꙋ́детъ, пови́нна себѐ да вмѣнѧ́етъ таковы́хъ глагѡ́лъ, а҆́ще и҆ не вско́рѣ по́слѣ тогѡ̀, но ѿ дре́внѧгѡ до́лгꙋ.

рн҃є. А҆́ще ᲂу҆ви́диши кого̀ лицемѣ́рнѡ хва́лѧща тѧ̀, во своѐ вре́мѧ ѿ ѻ҆́нагѡ порече́нїѧ ѡ҆жида́й.

рн҃ѕ. Настоѧ́щыѧ скѡ́рби премѣнѧ́й на бꙋ̑дꙋщаѧ блага̑ѧ: и҆ никогда́же нерадѣ́нїе разсла́битъ по́двигъ тво́й.

рн҃з. А҆́ще за тѣле́сное подаѧ́нїе похва́лиши человѣ́ка, ꙗ҆́кѡ блага́го, кромѣ̀ бг҃а, по́слѣ то́йжде лꙋка́въ тебѣ̀ ꙗ҆ви́тсѧ.

рн҃и. Всѧ́кое бла́го ѿ гдⷭ҇а смотри́тельнѣ прихо́дитъ: и҆ носѧ́щїе ѻ҆́наѧ, сꙋ́ть слꙋжи́тели бла̑гъ.

рн҃ѳ. Сплетє́нїѧ бла̑гъ и҆ ѕѡ́лъ ра́внымъ по́мысломъ прїе́мли: и҆ та́кѡ премѣнѧ́етъ бг҃ъ нера́вность веще́й.

р҃ѯ. Нера́вность помыслѡ́въ нано́ситъ ѻ҆сѡ́бныѧ премѣ̑ны: занѐ бг҃ъ нево́льное во́льномꙋ сро́днѣ приложи́лъ.

рѯ҃а. Чꙋ́вствєннаѧ, ᲂу҆́мныхъ сꙋ́ть порождє́нїѧ, носѧ́щаѧ подоба́ющее по ѡ҆предѣле́нїю бж҃їю.

рѯ҃в. Се́рдцꙋ сладостра́ствꙋющꙋ, по́мыслы и҆ словеса̀ па̑гꙋбныѧ прозѧба́ютъ: и҆ ѿ ды́ма внꙋ́трь лежа́щее вещество̀ познава́емъ.

рѯ҃г. Пребыва́й въ ра́зꙋмѣ, и҆ не ᲂу҆трꙋди́шисѧ во и҆скꙋше́нїѧхъ: ѿѻнꙋ́дꙋже ѿходѧ̀ терпѝ находѧ̑щаѧ.

рѯ҃д. Моли́сѧ, да не прїи́детъ тѝ и҆скꙋше́нїе: прише́дшее же прїимѝ ꙗ҆́кѡ твоѐ, а҆ не чꙋ́ждее.

рѯ҃є. Ѿвратѝ мы́сль ѿ всѧ́кагѡ лихои́мства, и҆ тогда̀ возмо́жеши ᲂу҆ви́дѣти кѡ́зни дїа́вѡльскїѧ.

рѯ҃ѕ. Глаго́лѧй всѧ̑ ви́дѣти кѡ́зни дїа́вѡльскїѧ, ꙗ҆́коже не вѣ́сть себѐ, соверше́нна себѐ ꙗ҆влѧ́етъ.

рѯ҃з. Є҆гда̀ и҆зы́детъ ᲂу҆́мъ ѿ тѣле́сныхъ попече́нїй, ви́дитъ по мѣ́рѣ ᲂу҆хищрє́нїѧ врагѡ́въ.

рѯ҃и. Совосхища́емый по́мыслы ѡ҆слѣплѧ́етсѧ ѿ ни́хъ, и҆ дѣ̑йствїѧ грѣха̀ ви́дитъ, вины́ же дѣ́йствїй ᲂу҆ви́дѣти не мо́жетъ.

рѯ҃ѳ. И҆ны́й твори́тъ ꙗ҆́внѣ за́повѣдь, рабо́таѧ стра́сти, и҆ лꙋка́выми по́мыслы благо́е дѣѧ́нїе потреблѧ́ѧ.

р҃ѻ. Вводи́мь въ нача́ло ѕла̀, не глаго́ли, ꙗ҆́кѡ не побѣди́тъ мѧ̀. Поколи́кꙋ бо вво́дишисѧ, потоли́кꙋ ᲂу҆жѐ побѣжде́нъ є҆сѝ.

рѻ҃а. Ко́еждо быва́ющее ѿ ма́ла начина́етсѧ, и҆ поча́стнѡ пита́емо, возраста́етъ.

рѻ҃в. Мре́жа многоплете́нна є҆́сть ко́знь ѕло́бы, и҆ ча́стѣ запꙋ́тавыйсѧ, а҆́ще вознеради́тъ, ѿвсю́дꙋ ѡ҆б̾е́млетсѧ.

рѻ҃г. Не жела́й слы́шати ѕлополꙋ́чїѧ вражде́бныхъ человѣ̑къ. Слы́шащїи бо такѡвы́ѧ глаго́лы, плоды̀ взе́млютъ своегѡ̀ произволе́нїѧ.

рѻ҃д. Не всѧ́кꙋ ско́рбь находи́ти человѣ́кѡмъ за грѣхѝ мнѝ: сꙋ́ть бо нѣ́цыи благоꙋгожда́ющїи, и҆ и҆скꙋша́емїи. Пи́сано бо є҆́сть: нечести́вїи и҆ беззакѡ́нницы и҆зженꙋ́тсѧ.²⁴ Подо́бнѣ, и҆ хотѧ́щїи благоче́стнѡ жи́ти ѡ҆ хрⷭ҇тѣ̀, гони́ми бꙋ́дꙋтъ.²⁵

рѻ҃є. Во вре́мѧ ско́рби ви́ждь прило́гъ сла́сти: поне́же бо ᲂу҆тѣша́етъ ско́рбь, благопрїѧ́тенъ [на́мъ] быва́етъ.

рѻ҃ѕ. Нѣ́цыи мꙋ́дрыми глаго́лютъ ᲂу҆доборазсꙋжда́ющихъ ѡ҆ чꙋ́вственныхъ веща́хъ: мꙋ́дри же сꙋ́ть ѡ҆блада́ющїи свои́ми хотѣ́нїѧми.

рѻ҃з. Пре́жде и҆стребле́нїѧ ѕѡ́лъ, да не повине́шисѧ се́рдцꙋ твоемꙋ̀: какѡва́ бо вложє́нїѧ и҆́мать, таковы́хъ и҆ приложе́нїй взыскꙋ́етъ.

рѻ҃и. Ꙗ҆́коже сꙋ́ть ѕмїи̑ срѣта́ющїисѧ въ пеще́рахъ, и҆ сꙋ́ть и҆ні́и кры́ющїисѧ во хра́минахъ: та́кѡ сꙋ́ть стра̑сти, мы́сленнѣ воѡбража́ємыѧ, и҆ сꙋ́ть и҆ны̑ѧ дѣ́ѧтельнѣ дѣ́йствꙋємыѧ, а҆́ще и҆ ѿ є҆ди́ныхъ въ дрꙋгі̑ѧ ѡ҆́бразы преѡбража́ютсѧ.

рѻ҃ѳ. Є҆гда̀ ᲂу҆ви́диши внꙋ́трь лежа̑щаѧ си́льнѣ дви̑жима, и҆ къ стра́сти призыва̑юща безмо́лвствꙋющїй ᲂу҆́мъ: вѣ́ждь, ꙗ҆́кѡ ᲂу҆́мъ нѣ́когда сїѧ̑ предвари́лъ, и҆ въ дѣѧ́нїе сїѐ приведѐ, и҆ въ се́рдце вложѝ.

р҃п. Не составлѧ́етсѧ ѻ҆́блако без̾ дыха́нїѧ вѣ́тра, и҆ не ражда́етсѧ стра́сть без̾ мы́сли.

рп҃а. Є҆гда̀ не ктомꙋ̀ твори́мъ по́хѡти плотскі̑ѧ, по писа́нїю, ᲂу҆до́бь ѡ҆ гдⷭ҇ѣ преста́нꙋтъ внꙋ́трь предлежа̑щаѧ.

рп҃в. Ѡ҆́бразы мечта́нїѧ ᲂу҆ма̀ лꙋка́внѣйшыѧ сꙋ́ть и҆ крѣ́пльшыѧ: помы́слєнныѧ же си́хъ вино́вни и҆ предвари́тєльны сꙋ́ть.

рп҃г. Є҆́сть ѕло́ба, въ се́рдцѣ содержа́щаѧсѧ, да́внѧгѡ ра́ди предпрїѧ́тїѧ, и҆ є҆́сть ѕло́ба, по́мыслы ра́тꙋющаѧ, повседне́вными вещьмѝ.

рп҃д. Бг҃ъ дѣѧ̑нїѧ и҆ намѣ́рєнїѧ вмѣнѧ́етъ. Да́стъ тѝ, глаго́летъ бо, гдⷭ҇ь по се́рдцꙋ твоемꙋ̀.²⁶

рп҃є. Въ разсма́триванїи со́вѣсти не пребыва́ющїй, нижѐ тѣлє́сныѧ трꙋды̀ ѡ҆ благоче́стїи прїе́млетъ.

рп҃ѕ. Со́вѣсть є҆́сть є҆сте́ственнаѧ кни́га. Дѣ́ѧтельнѣ чита́ющїй ѻ҆́нꙋю, и҆скꙋ́сомъ познае́тъ бж҃е́ственное застꙋпле́нїе.

рп҃з. Не прїе́млѧй во́льныхъ трꙋдѡ́въ ѡ҆ и҆́стинѣ, ѿ нево́льныхъ лютѣ́е наказꙋ́емь быва́етъ.

рп҃и. Позна́вый во́лю бж҃їю, и҆ по си́лѣ творѧ́й ѻ҆́нꙋю, ма́лѣми трꙋды̀ вели́кихъ и҆збѣжи́тъ.

рп҃ѳ. Кромѣ̀ моли́твы и҆ терпѣ́нїѧ хотѧ́й побѣди́ти и҆скꙋшє́нїѧ, не ѿри́нетъ ѧ҆̀, но мно́жае ѡ҆плете́тсѧ ѻ҆́ными.

р҃ч. Гдⷭ҇и сокрове́нъ є҆́сть во свои́хъ за́повѣдехъ, и҆ и҆́щꙋщымъ є҆го̀ по мѣ́рѣ ѡ҆брѣта́етсѧ.

рч҃а. Да не рече́ши: сотвори́хъ за́пѡвѣди, и҆ не ѡ҆брѣто́хъ гдⷭ҇а. Ра́зꙋмъ бо съ пра́вдою, по писа́нїю, мно́жицею ѡ҆брѣ́лъ є҆сѝ, пра́вѡ же и҆́щꙋщїи є҆го̀, ѡ҆брѧ́щꙋтъ ми́ръ.

рч҃в. Ми́ръ є҆́сть страсте́й и҆збавле́нїе, є҆́же без̾ дѣ́йствїѧ ст҃а́гѡ дх҃а не ѡ҆брѣта́етсѧ.

рч҃г. И҆но́е є҆́сть дѣ́ланїе за́повѣди, а҆ и҆но́е добродѣ́тель, а҆́ще и҆ дрꙋ́гъ ѿ дрꙋ́га вины̑ благопрїе́млютъ.

рч҃д. Дѣ́ланїе за́повѣди глаго́летсѧ, внегда̀ содѣ́ѧхомъ повелѣ́нное, добродѣ́тель же, внегда̀ содѣ́ланное ᲂу҆го́дно є҆́сть вои́стиннꙋ.

рч҃є. Ꙗ҆́коже є҆ди́но є҆́сть чꙋ́вственное бога́тство, по стѧжа́нїю же многоча́стнѡ: та́кѡ є҆ди́на є҆́сть добродѣ́тель, многоѡбра̑знаѧ же и҆мѣ́етъ дѣ̑йствїѧ.

рч҃ѕ. Кромѣ̀ дѣ́ла ᲂу҆хищрѧ́ѧйсѧ и҆ глаго́лѧй словеса̀, богатѣ́етъ ѿ непра́вды, и҆ трꙋды̀ є҆гѡ̀, по писа́нїю въ до́мы чꙋ́жды вхо́дѧтъ.

рч҃з. Всѧ̑ повинꙋ́тсѧ зла́тꙋ, глаго́летъ писа́нїе, и҆ благода́тїю бж҃їею мы́слєннаѧ ᲂу҆пра́влєна бꙋ́дꙋтъ.

рч҃и. Со́вѣсть блага́ѧ моли́твою ѡ҆брѣта́етсѧ, и҆ моли́тва чи́стаѧ со́вѣстїю. Є҆ди́но бо дрꙋго́е по є҆стествꙋ̀ прїе́млетъ.

рч҃ѳ. І҆а́кѡвъ і҆ѡ́сифови ри́зꙋ пе́стрꙋ сотворѝ и҆ гдⷭ҇ь кро́ткомꙋ ра́зꙋмъ и҆́стины да́рꙋетъ, ꙗ҆́коже пи́сано є҆́сть: ꙗ҆́кѡ наꙋчи́тъ гдⷭ҇ь крѡ́ткїѧ пꙋтє́мъ свои̑мъ.²⁷

с҃. Всегда̀ дѣ́лай благо́е по си́лѣ, и҆ во вре́мѧ бо́льшагѡ не ѡ҆браща́йсѧ на ме́ньшее: ѡ҆брати́выйсѧ бо вспѧ́ть, глаго́летъ, нѣ́сть ᲂу҆пра́вленъ въ црⷭ҇твїи бж҃їи.²⁸

а҃. Ѕловѣ́рїе внѣ́шнихъ въ послѣ́дꙋющемъ писа́нїи ѡ҆бличи́тсѧ ѿ тве́рдѡ вѣ́рꙋющихъ, и҆ позна́вшихъ и҆́стинꙋ.

в҃. Гдⷭ҇ь всѧ́кꙋю за́повѣдь показа́ти хотѧ̀ до́лжною, сыноположе́нїе же человѣ́кѡмъ свое́ю кро́вїю дарова́ннымъ, глаго́летъ: Є҆гда̀ всѧ̑ сотворитѐ повелѣ̑ннаѧ ва́мъ, тогда̀ рцы́те, ꙗ҆́кѡ рабѝ неключи́ми є҆смы̀, и҆ є҆́же до́лжни бѣ́хомъ сотвори́ти, сотвори́хомъ.²⁹ Сегѡ̀ ра́ди нѣ́сть мзда̀ дѣ́лъ црⷭ҇твїе небе́сное, но благода́ть влⷣки, вѣ̑рнымъ рабѡ́мъ ᲂу҆гото́ваннаѧ.

г҃. Не тре́бꙋетъ ра́бъ свобо́ды, ꙗ҆́кѡ мзды̀, но бл҃гоꙋгожда́етъ, ꙗ҆́кѡ должни́къ, и҆ по благода́ти ѡ҆жида́етъ.

д҃. Хрⷭ҇то́съ ᲂу҆́мре, по писа́нїю, грѣ̑хъ ра́ди на́шихъ, и҆ благорабо́тающымъ є҆мꙋ̀ свобо́дꙋ да́рꙋетъ.³⁰ Глаго́летъ бо: До́брѣ, ра́бе благі́й и҆ вѣ́рный, ѡ҆ ма́лѣ бы́лъ є҆сѝ вѣ́ренъ, над̾ мно́гими тѧ̀ поста́влю: вни́ди въ ра́дость гдⷭ҇а твоегѡ̀.³¹

є҃. Не ᲂу҆̀ вѣ́ренъ є҆́сть ра́бъ, на просто́мъ ра́зꙋмѣ ᲂу҆твержда́ѧйсѧ, но послꙋша́нїемъ заповѣ́давшемꙋ хрⷭ҇тꙋ̀ вѣ́рꙋѧй.

ѕ҃. Почита́ѧй влⷣкꙋ твори́тъ повелѣва́ємаѧ: согрѣши́вый же и҆лѝ преслꙋ́шавый те́рпитъ находѧ̑щаѧ, ꙗ҆́кѡ своѧ̑.

з҃. Любоꙋче́нъ сы́й, бꙋ́ди и҆ трꙋдолюби́въ: просты́й бо ра́зꙋмъ напыща́етъ человѣ́ка.

и҃. Неча́ѧннѡ слꙋча́ющыѧсѧ на́мъ и҆скꙋшє́нїѧ смотри́тельнѣ на́съ трꙋдолюби́выми наꙋча́ютъ бы́ти, и҆ не хотѧ́щихъ къ покаѧ́нїю влекꙋ́тъ.

ѳ҃. Находѧ́щыѧ скѡ́рби человѣ́кѡмъ, порождє́нїѧ сꙋ́ть со́бственныхъ и҆́хъ ѕѡ́лъ. А҆́ще же ѻ҆́ныѧ посре́дствомъ моли́твы те́рпимъ, ѡ҆брѣта́емъ па́ки благи́хъ веще́й наведе́нїе.

і҃. Нѣ́цыи за добродѣ́тель похвале́ни бы́вше, ᲂу҆слади́шасѧ, и҆ сла́сть тщесла́вїѧ своегѡ̀ возмнѣ́ша бы́ти ᲂу҆тѣше́нїе. И҆ и҆ні́и, ѡ҆ грѣсѣ̀ ѡ҆бличе́ни бы́вше, поболѣ́ша, и҆ поле́знꙋю болѣ́знь почто́ша бы́ти дѣ́йствомъ ѕло́бы.

а҃і. Є҆ли́цы под̾ предло́гомъ по́двигѡвъ пред̾ неради́вѣйшими возно́сѧтсѧ, сі́и ѿ дѣ́лъ тѣле́сныхъ ѡ҆правди́тисѧ мнѧ́тъ: є҆ли́цы же ᲂу҆твержда́ющесѧ на просто́мъ ра́зꙋмѣ, невѣ́дѧщихъ ѡ҆хꙋжда́емъ, мно́гѡ безꙋ́мнѣйши ѻ҆́ныхъ быва́емъ.

в҃і. Не ᲂу҆̀ и҆звѣ́стенъ ра́зꙋмъ без̾ дѣ́лъ по немꙋ̀, а҆́ще и҆ и҆́стиненъ є҆́сть: зане́же всѧ́кой ве́щи, дѣ́ло є҆́сть и҆звѣще́нїе.

г҃і. Мно́жицею ѿ нерадѣ́нїѧ ѡ҆ дѣѧ́нїи и҆ ра́зꙋмъ помрача́етсѧ. И҆́же бо дѣ́ланїѧ совсѣ́мъ пренебрего́ша, си́хъ и҆ па́мѧть пома́лꙋ потреби́тсѧ.

д҃і. Писа́нїе сегѡ̀ ра́ди въ ра́зꙋмѣ вѣ́дѣти бг҃а совѣ́тꙋетъ, да пра́вѡ є҆мꙋ̀ дѣ́лы рабо́таемъ.

є҃і. Є҆гда̀ ꙗ҆́внѣ соверша́емъ за́пѡвѣди, сво́йствєннаѧ ᲂу҆́бѡ ѿ гдⷭ҇а по мѣ́рѣ прїе́млемъ, по́льзꙋемсѧ же по намѣ́ренїю произволе́нїѧ.

ѕ҃і. Хотѧ́й что̀ содѣ́ѧти, и҆ не могі́й, ꙗ҆́кѡ сотвори́вый є҆́сть пред̾ сердцевѣ́дцемъ бг҃омъ. Сїе́ же и҆ ѡ҆ благи́хъ, и҆ ѡ҆ ѕлы́хъ дѣла́хъ разꙋмѣ́ти подоба́етъ.

з҃і. Оу҆́мъ кромѣ̀ тѣ́ла, блага̑ѧ и҆ ѕла̑ѧ соверша́етъ мнѡ́гаѧ. Тѣ́ло же кромѣ̀ ᲂу҆ма̀, ничто́же ѿ си́хъ соверши́ти мо́жетъ: зане́же зако́нъ свобо́ды пре́жде дѣѧ́нїѧ чте́тсѧ.

и҃і. Нѣ́цыи не творѧ́ще за́пѡвѣди пра́вѡ вѣ́ровати мнѧ́тъ, нѣ́цыи же творѧ́ще, ꙗ҆́кѡ мзды̀ до́лжныѧ, црⷭ҇твїѧ ѡ҆жида́ютъ. Ѻ҆бои́ же ѿ и҆́стины погрѣша́ютъ.

ѳ҃і. Ѿ влⷣки мзда̀ раба́мъ не по до́лгꙋ быва́етъ, нижѐ па́ки полꙋча́ютъ свобо́дꙋ не рабо́тающїи пра́вѡ.

к҃. А҆́ще хрⷭ҇то́съ за ны̀ ᲂу҆́мре, по писа́нїємъ, и҆ не живе́мъ мы̀ себѣ̀, но ᲂу҆ме́ршемꙋ за ны̀, и҆ воскре́сшемꙋ: ꙗ҆́вѣ, ꙗ҆́кѡ рабо́тати є҆мꙋ̀ до сме́рти ѡ҆должи́хомсѧ. Ка́кѡ ᲂу҆́бѡ до́лжнымъ бы́ти сыноположе́нїе возмни́мъ;

к҃а. А҆́ще хрⷭ҇то́съ влⷣка є҆́сть по сꙋществꙋ̀, и҆ влⷣка по смотре́нїю: занѐ и҆ не сꙋ́щыѧ сотворѝ, и҆ грѣхо́мъ ᲂу҆ме́ршыѧ свое́ю кро́вїю и҆скꙋпѝ, и҆ та́кѡ вѣ́рꙋющихъ благода́ть дарова̀.

к҃в. Є҆гда̀ ᲂу҆слы́шиши писа́нїе глаго́лющее, ꙗ҆́кѡ воздае́тъ комꙋ́ждо по дѣлѡ́мъ є҆гѡ̀: то̀ да не разꙋмѣ́еши, ꙗ҆́кѡ дѣла̀ достѡ́йна сꙋ́ть гее́нны, и҆лѝ ца́рствїѧ, но воздае́тъ хрⷭ҇то́съ комꙋ́ждо по дѣлѡ́мъ невѣ́рїѧ въ него̀, и҆лѝ вѣ́ры, не ꙗ҆́кѡ примири́тель веще́й, но ꙗ҆́кѡ бг҃ъ, созда́тель и҆ и҆скꙋпи́тель на́шъ.

к҃г. Є҆ли́цы ба́ни пакибытїѧ̀ сподо́бихомсѧ, блага̑ѧ дѣла̀ не воздаѧ́нїѧ ра́ди прино́симъ, но хране́нїѧ ра́ди да́нныѧ на́мъ чистоты̀.

к҃д. Всѧ́кое дѣ́ло благо́е, є҆́же є҆стество́мъ на́шимъ дѣ́лаемъ, ᲂу҆далѧ́етъ на́съ ѿ врага̀, приложе́нїѧ же ѡ҆свѧще́нїѧ без̾ благода́ти сотвори́ти не мо́жемъ.

к҃є. Возде́ржный ᲂу҆далѧ́етсѧ чревобѣ́сїѧ, нестѧжа́тельный лихои́мства, безмо́лвный многосло́вїѧ, чи́стый любосла́стїѧ, честны́й блꙋда̀, самодово́льный сребролю́бїѧ, кро́ткїй смꙋще́нїѧ. смиренномꙋ́дрый тщесла́вїѧ, послꙋшли́вый любопрѣ́нїѧ, ѡ҆бличи́тельный лицемѣ́рїѧ: подо́бнѣ и҆ молѧ́йсѧ ᲂу҆далѧ́етсѧ безнаде́ждїѧ, ни́щїи многоимѣ́нїѧ, и҆сповѣ́дникъ ѿверже́нїѧ, мꙋ́ченикъ і҆дѡлослꙋже́нїѧ. Ви́диши ли, ка́кѡ всѧ́каѧ добродѣ́тель до сме́рти соверша́емаѧ, не и҆но́е что̀ є҆́сть, то́чїю ѿ грѣха̀ ᲂу҆дале́нїе; ѿ грѣха́ же ᲂу҆дале́нїе є҆́сть дѣ́ло є҆стества̀, а҆ не мзда̀ ца́рствїѧ.

к҃ѕ. Человѣ́къ є҆два̀ храни́тъ, ꙗ҆̀же є҆сте́ствєнна є҆мꙋ̀: хрⷭ҇то́съ же кресто́мъ сыноположе́нїе да́рꙋетъ.

к҃з. И҆на́ѧ за́повѣдь є҆́сть ча́стнаѧ, и҆ и҆на́ѧ ѡ҆бдержа́щаѧ. Нѣ́гдѣ бо ча́стнѣ повелѣва́етъ подава́ти неимꙋ́щемꙋ, нѣ́гдѣ же заповѣ́даетъ всегѡ̀ ѿрещи́сѧ и҆мѣ́нїѧ.

к҃и. И҆но́е дѣ́йствїе є҆́сть благода́ти, младе́нцꙋ невѣ́домое, и҆ и҆но́е ѕло́бы, и҆́стинѣ ᲂу҆подоблѧ́емое. Добро́ же є҆́сть на такѡва́ѧ не взира́ти пре́лести ра́ди, нижѐ проклина́ти и҆́стины ра́ди: но всѧ̑ ᲂу҆пова́нїемъ приноси́ти бг҃ови: то́й бо вѣ́сть ѻ҆боюполе́зное.

к҃ѳ. Хотѧ́й преплы́ти мы́сленное мо́ре, долготерпи́тъ, смиренномꙋ́дрствꙋетъ, бди́тъ, возде́рживаетсѧ. Кромѣ́ же четы́рехъ си́хъ а҆́ще вни́ти понꙋ́дитсѧ, возмꙋща́етъ се́рдце, прейти́ же не мо́жетъ.

л҃. Безмо́лвїе є҆́сть ѿсѣче́нїе ѕѡ́лъ. А҆́ще же и҆ четы́ре добродѣ́тели сі́и къ моли́твѣ прїе́млетъ, ближа́йшїѧ по́мощи ниеди́ныѧ нѣ́сть є҆мꙋ̀ къ безстра́стїю.

л҃а. Невозмо́жно є҆́сть безмо́лвствовати ᲂу҆мо́мъ кромѣ̀ тѣ́ла, нижѐ разори́ти средостѣ́нїе си́хъ без̾ безмо́лвїѧ и҆ моли́твы.

л҃в. Пло́ть похотствꙋ́етъ на дꙋ́ха, и҆ дꙋ́хъ на пло́ть, дꙋ́хомъ же ходѧ́щїи пѡ́хоти плотскі̑ѧ не и҆́мꙋтъ соверша́ти.³²

л҃г. Нѣ́сть соверше́нна моли́тва без̾ мы́сленнагѡ призыва́нїѧ: безмо́лвнѡ же вопїю́щꙋю мы́сль ᲂу҆слы́шитъ гдⷭ҇ь.

л҃д. Оу҆́мъ неразвлече́ннѣ молѧ́йсѧ ᲂу҆тѣснѧ́етъ се́рдце. Се́рдце же сокрꙋше́нно и҆ смире́нно бг҃ъ не ᲂу҆ничижи́тъ.

л҃є. И҆ моли́тва добродѣ́телїю глаго́летсѧ, а҆́ще и҆ ма́терь ѻ҆́ныхъ є҆́сть: ражда́етъ бо ѻ҆́наѧ ѿ соедине́нїѧ со хрⷭ҇то́мъ.

л҃ѕ. Є҆́же а҆́ще содѣ́емъ без̾ моли́твы и҆ благі́ѧ наде́жды, по́слѣжде привре́дно и҆ несоверше́нно быва́етъ.

л҃з. Є҆гда̀ ᲂу҆слы́шиши, что̀ бꙋ́дꙋтъ послѣ́днїи пе́рви, и҆ пе́рвїи послѣ́дни,³³ разꙋмѣва́й прича́стникѡвъ добродѣ́телей, и҆ прича́стникѡвъ любвѝ. Любо́вь бо послѣ́днѧѧ и҆з̾ добродѣ́телей є҆́сть по чи́нꙋ, пе́рваѧ же ѡ҆брѣта́етсѧ всѣ́хъ по досто́инствꙋ, пре́жде себѣ̀ бы́вшїѧ послѣ́дними показꙋ́ющи.

л҃и. А҆́ще ᲂу҆ны́еши молѧ́сѧ, и҆лѝ ѿ ѕло́бы многоѡбра́знѣ ѡ҆скорблѧ́емь: помѧнѝ и҆схо́дъ и҆ лю̑тыѧ мꙋ̑ки. Лꙋ́чше же є҆́сть прилѣплѧ́тисѧ бг҃ови мл҃твою и҆ ᲂу҆пова́нїемъ, не́жели па́мѧтовати внѣ̑шнѧѧ, а҆́ще и҆ полє́зна сꙋ́ть.

л҃ѳ. Ни є҆ди́наѧ же ѿ добродѣ́телей сама̀ собо́ю то́чїю ѿверза́етъ є҆сте́ственнꙋю на́шꙋ две́рь, а҆́ще не всѣ̀ є҆ди́на ѿ дрꙋгі́ѧ послѣ́довательнѡ зави́сѧтъ.

м҃. Нѣ́сть возде́ржникъ пита́ѧйсѧ по́мыслы, а҆́ще бо и҆ поле́зны сꙋ́ть: не сꙋ́ть бо поле́знѣйшїи наде́жды.

м҃а. Всѧ́кїй грѣ́хъ непокаѧ́нный є҆́сть къ сме́рти, ѡ҆ не́мже а҆́ще бы и҆ ст҃ы́й за дрꙋга́го помоли́лсѧ, не ᲂу҆слы́шимь быва́етъ.

м҃в. Ка́ѧйсѧ пра́вѡ не ра́вный дрє́внимъ грѣха́мъ вмѣнѧ́етъ трꙋ́дъ, но тѣ́мъ бг҃а ᲂу҆милостивлѧ́етъ.

м҃г. Є҆ли̑ка а҆́ще и҆́мать є҆стество̀ на́ше дѡ́браѧ, по всѧ́къ де́нь твори́ти ѧ҆̀ до́лжни є҆смы̀. Что̀ ᲂу҆́бѡ за пре́жде бы̑вшаѧ ѕла̑ѧ бг҃ови воздади́мъ;

м҃д. Є҆ли́кѡ прїꙋмноже́нїе добродѣ́тели дне́сь ни сотвори́мъ, ѡ҆бличе́нїе є҆́сть преше́дшагѡ нерадѣ́нїѧ, а҆ не воздаѧ́нїе.

м҃є. Оу҆тѣснѧ́ѧйсѧ ᲂу҆́мнѣ, и҆ ᲂу҆покоива́ѧйсѧ тѣле́снѣ, подо́бенъ є҆́сть тѣле́снѣ ᲂу҆тѣснѧ́ющемꙋсѧ, и҆ ᲂу҆́мнѣ веселѧ́щемꙋсѧ.

м҃ѕ. Во́льнаѧ ѿ ѻ҆бою̀ ско́рбь содѣ́йствꙋетъ взаи́мнѡ, мы́сленнаѧ плотско́й, и҆ плотска́ѧ мы́сленной. Сло́жность бо и҆́хъ го́ршею быва́етъ.

м҃з. Ве́лїѧ є҆́сть добродѣ́тель терпѣ́ти находѧ̑щаѧ и҆ люби́ти бли́жнѧго ненави́дѧща, по сло́вꙋ гдⷭ҇ню.

м҃и. Любвѐ нелицемѣ́рныѧ зна́менїе є҆́сть ѻ҆би́дъ проще́нїе. Та́кѡ бо и҆ гдⷭ҇ь мі́ръ се́й возлюбѝ.

м҃ѳ. Невозмо́жно є҆́сть ѿ се́рдца прости́ти нѣ̑каѧ прегрѣшє́нїѧ без̾ и҆́стиннагѡ ра́зꙋма. То́й бо ѻ҆со́бь комꙋ́ждо находѧ̑щаѧ показꙋ́етъ.

н҃. Ничто́же погꙋби́ши ѿ тѣ́хъ, ꙗ҆̀же ѡ҆ста́вилъ є҆сѝ гдⷭ҇а ра́ди, во свое́ бо вре́мѧ мно́жайше прїи́детъ.

н҃а. Є҆гда̀ ᲂу҆́мъ забꙋ́детъ цѣ́ль благоче́стїѧ, тогда̀ и҆ ꙗ҆́вственное дѣ́ло добродѣ́тели безполе́зно быва́етъ.

н҃в. А҆́ще всѧ́комꙋ человѣ́кꙋ вре́денъ є҆́сть ѕлы́й совѣ́тъ, мно́гѡ па́че ѻ҆па́снꙋю жи́знь воспрїѧ́вшымъ.

н҃г. Дѣ́ломъ любомꙋ́дрствꙋй ѡ҆ совѣ́тѣ человѣ́честѣмъ, и҆ воздаѧ́нїи бж҃їи: нѣ́сть бо сло́во мꙋдрѣ́е и҆лѝ поле́знѣе дѣ́ланїѧ.

н҃д. По трꙋдѣ́хъ ѡ҆ благоче́стїи послѣ́дствꙋетъ застꙋпле́нїе. Сїе́ же вѣ́дѣти подоба́етъ ѿ зако́на бж҃їѧ и҆ со́вѣсти.

н҃є. Є҆ди́нъ прїѧ́тъ мꙋдрова́нїе, и҆ без̾ разсмотрѣ́нїѧ ᲂу҆держа̀: дрꙋгі́й же прїѧ́тъ, и҆ со и҆́стиною сравнѝ. Взыска́ти подоба́етъ, кто̀ и҆з̾ ни́хъ благочести́вѣе сотворѝ;

н҃ѕ. И҆́стинный ра́зꙋмъ є҆́сть терпѣ́нїе скорбе́й, и҆ не ѡ҆бвинѧ́ти люде́й въ свои́хъ бѣ́дствїѧхъ.

н҃з. Творѧ́й благо́е, и҆ и҆ща́й воздаѧ́нїѧ, не рабо́таетъ бг҃ꙋ, но свое́й во́ли.

н҃и. Невозмо́жно є҆́сть согрѣши́вшемꙋ воздаѧ́нїѧ и҆збѣ́гнꙋти, то́чїю покаѧ́нїемъ прили́чествꙋющимъ согрѣше́нїю.

н҃ѳ. Нѣ́цыи глаго́лютъ: не мо́жемъ сотвори́ти благо́е, а҆́ще не дѣ́йственнѣ прїи́мемъ благода́ть дх҃а.

ѯ҃. При́снѡ пребыва́ющїи произволе́нїемъ во сласте́хъ, є҆́же по си́лѣ ѡ҆ставлѧ́ютъ, ꙗ҆́кѡ безпомо́щное.

ѯ҃а. Благода́ть во хрⷭ҇та̀ крести́вшымсѧ та́инственнѣ дарова́сѧ. Дѣ́йствꙋетъ же по мѣ́рѣ дѣ́ланїѧ за́повѣдей, и҆ ѻ҆́тай благода́ть помоществова́ти на́мъ не престае́тъ, въ на́шей же вла́сти є҆́сть твори́ти, и҆лѝ не твори́ти благо́е по си́лѣ.

ѯ҃в. Пе́рвѣе бг҃олѣ́пнѡ возбꙋжда́етъ со́вѣсть, ѿѻнꙋ́дꙋже и҆ ѕлотво́рцы пока́ѧвшесѧ бг҃ови благоꙋгоди́ша.

ѯ҃г. Па́ки во ᲂу҆че́нїи бли́жнѧгѡ сокрове́на є҆́сть. Ѻ҆вогда́ же и҆ во чте́нїи мы́сли послѣ́дствꙋетъ, и҆ є҆сте́ственнымъ послѣ́дованїемъ наꙋча́етъ ᲂу҆́мъ и҆́стинѣ свое́й. А҆́ще ᲂу҆́бѡ ѿ ча́стнагѡ сегѡ̀ послѣ́дованїѧ не сокры́емъ тала́нтъ, въ ра́дость гдⷭ҇ню дѣ́йственнѣ вни́демъ.

ѯ҃д. Пре́жде дѣ́ланїѧ за́повѣдей, дѣ́йствїй дꙋ́ха взыскꙋ́ѧй, подо́бенъ є҆́сть рабꙋ̀, среброкꙋ́пленꙋ, и҆́же ѿне́лѣже кꙋ́пленъ бы́сть, съ цѣно́ю и҆ свобо́дѣ напи́санной бы́ти и҆́щетъ.

ѯ҃є. Внѣ̑шнѧѧ наведє́нїѧ пра́вдою бж҃їею приходѧ̑щаѧ ѡ҆брѣты́й, се́й и҆ща̀ гдⷭ҇а, ѡ҆брѣ́те ра́зꙋмъ съ пра́вдою.

ѯ҃ѕ. А҆́ще разꙋмѣ́ти бꙋ́деши, по писа́нїю, ꙗ҆́кѡ по все́й землѝ сꙋдьбы̑ гдⷭ҇ни, бꙋ́детъ тѝ всѧ́кїй слꙋ́чай, бг҃оразꙋ́мїѧ ᲂу҆чи́тель.

ѯ҃з. По коегѡ́ждо мы́сли, срѣта́етсѧ до́лжное: разли́чїе же наведе́нїѧ прили́чнагѡ є҆ди́нъ бг҃ъ вѣ́сть.

ѯ҃и. Є҆гда̀ безче́стїе нѣ́кое ѿ человѣ̑къ постра́ждеши, а҆́бїе разꙋмѣ́й сїѐ наведе́нїемъ сла́вы ѿ бг҃а, и҆ въ безче́стїе безпеча́ленъ, и҆ без̾ смꙋще́нїѧ бꙋ́деши, въ сла́вѣ же, є҆гда̀ прїи́детъ, вѣ́ренъ и҆ неѡсꙋжде́нъ бꙋ́деши.

ѯ҃ѳ. Похвалѧ́емь ѿ мно́гихъ по благоволе́нїю бж҃їю, ничто́же самохва́льное да примѣ́сиши смотре́нїю гдⷭ҇ню, да не па́ки ѿ премѣ́ны въ проти́вное впаде́ши.

ѻ҃. Сѣ́ѧнїе не возрасте́тъ без̾ землѝ и҆ воды̀: и҆ не полꙋ́читъ по́льзы человѣ́къ без̾ во́льныхъ трꙋдѡ́въ и҆ бж҃е́ственнагѡ застꙋпле́нїѧ.

ѻ҃а. Невозмо́жно є҆́сть без̾ ѻ҆́блака и҆злїѧ́тисѧ дождю̀, нижѐ без̾ со́вѣсти благі́ѧ благоꙋгоди́ти бг҃ꙋ.

ѻ҃в. Не ѿрека́йсѧ наꙋча́тисѧ, а҆́ще и҆ ѕѣлѡ̀ мꙋ́дръ є҆сѝ. Смотре́нїе бо бж҃їе поле́знѣйше є҆́сть на́шеѧ мꙋ́дрости.

ѻ҃г. Є҆гда̀ ѿ сла́сти нѣ́кїѧ се́рдце предви́гнетсѧ съ мѣ́ста трꙋдолю́бїѧ: тогда̀, ꙗ҆́коже ка́мень тѧжча́йшїй на нисхожде́нїе поползнꙋ́вшїйсѧ, неꙋдободержи́мо быва́етъ.

ѻ҃д. Ꙗ҆́коже теле́цъ неискꙋ́сенъ на травꙋ̀ течѧ̀ ᲂу҆пада́етъ ѿ ѻ҆бою́дꙋ въ стремни́нꙋ: та́кѡ ѡ҆брѣта́етсѧ дꙋша̀ пома́лꙋ ѿ по́мыслѡвъ прельща́емаѧ.

ѻ҃є. Є҆гда̀ ᲂу҆́мъ мꙋ́жествовавъ ѡ҆ гдⷭ҇ѣ, ѿвлека́етъ дꙋ́шꙋ ѿ долговре́меннагѡ предпрїѧ́тїѧ: тогда̀ се́рдце, ꙗ҆́кѡ ѿ спекꙋла́торѡвъ мꙋ́читсѧ, ѿ ᲂу҆ма̀ и҆ стра́сти, тѧ́жꙋщихъ ю҆̀ сю́дꙋ и҆ сю́дꙋ.

ѻ҃ѕ. Ꙗ҆́коже пловꙋ́щїи въ мо́ри, во ᲂу҆пова́нїи прїѡбрѣ́тенїѧ, прїѧ́тнѣ те́рпѧтъ со́лнечный зно́й: та́кѡ ненави́дѧщїи ѕло́бꙋ лю́бѧтъ ѡ҆бличе́нїе, зане́же сопротивлѧ́етсѧ ѻ҆́въ вѣ́тромъ, ѻ҆́въ же страстє́мъ.

ѻ҃з. Ꙗ҆́коже бѣ́гство въ зимѣ̀, и҆лѝ въ сꙋббѡ́тꙋ болѣ́знь быва́етъ пло́ти, и҆ ѡ҆скверне́нїе дꙋшѣ̀: та́кѡ воста́нїе страсте́й [тѧ́жꙋщихъ] въ ста́ростнѣ тѣ́лѣ и҆ дꙋшѣ̀ ѡ҆свѧще́ннѣй.

ѻ҃и. Никто́же та́кѡ бла́гъ и҆ ще́дръ, ꙗ҆́коже гдⷭ҇ь: не ка́ющемꙋсѧ же нижѐ то́й ѿпꙋща́етъ.

ѻ҃ѳ. Мно́зи печа́лꙋемъ ѡ҆ грѣсѣ́хъ: вины̑ же и҆́хъ прїѧ́тнѣ прїе́млемъ.

п҃. Кро́тъ под̾ земле́ю по́лзающїй, слѣ́пъ сы́й, ѕвѣ́здъ ᲂу҆ви́дѣти не мо́жетъ: и҆ невѣ́рꙋѧй привре́мєннымъ, нижѐ вѣ̑чнымъ вѣ́ровати мо́жетъ.

п҃а. И҆́стинный ра́зꙋмъ благода́ть пре́жде благода́ти дарова́сѧ лю́демъ ѿ бг҃а, наꙋча́ющїй прича́стникѡвъ свои́хъ пре́жде всегѡ̀ дарова́вшемꙋ вѣ́ровати.

п҃в. Є҆гда̀ грѣхо́внаѧ дꙋша̀ находѧ́щыѧ скѡ́рби не прїе́млетъ, тогда̀ а҆́гг҃ли ѡ҆ не́й глаго́лютъ: цѣли́хомъ вавѷлѡ́нъ, и҆ не и҆сцѣлѣ̀.

п҃г. Оу҆́мъ, забыва́ющїй и҆́стинный ра́зꙋмъ, за проти̑внаѧ, ꙗ҆́кѡ полє́знаѧ, съ человѣ́ки ра́тꙋетсѧ.

п҃д. Ꙗ҆́коже въ водѣ̀ ѻ҆́гнь ᲂу҆коснѣ́ти не мо́жетъ: та́кѡ нижѐ по́мыслъ скве́рный въ бг҃олюби́вѣ се́рдцѣ. Зане́же всѧ́къ бг҃олюби́въ є҆́сть и҆ трꙋдолюби́въ. Во́льный же трꙋ́дъ вра́гъ є҆́сть сла́сти по є҆стествꙋ̀.

п҃є. Стра́сть са́мымъ дѣ́ломъ па́жить ᲂу҆держа́вши доброво́льнѡ, по́слѣжди и҆ не хотѧ́щꙋ прича́стникꙋ, наси́льнѣ на́нь возно́ситсѧ.

п҃ѕ. Нево́льныхъ по́мыслѡвъ вины̑ лю́бимъ, и҆ сегѡ̀ ра́ди ѻ҆нѝ нахо́дѧтъ: во́льныхъ же ꙗ҆́вѣ, ꙗ҆́кѡ и҆ дѣла̀ лю́бимъ.

п҃з. Мнѣ́нїе и҆ киче́нїе винѡ́вны сꙋ́ть хꙋлы̀, сребролю́бїе же и҆ тщесла́вїе немилосе́рдїѧ и҆ лицемѣ́рїѧ.

п҃и. Є҆гда̀ ᲂу҆ви́дитъ дїа́волъ, ꙗ҆́кѡ ᲂу҆́мъ ѿ се́рдца помоли́сѧ: тогда̀ вє́лїѧ и҆ ѕлохꙋдѡ́жнаѧ и҆скꙋшє́нїѧ нано́ситъ. Ма̑лыѧ бо добродѣ́тєли вели́кими наведе́ньми потреблѧ́ти хо́щетъ.

п҃ѳ. По́мыслъ ᲂу҆коснѣва́ѧ, ꙗ҆влѧ́етъ пристра́стїе человѣ́ка: ско́рѡ же и҆стреблѧ́емь, зна́менꙋетъ бра́нь и҆ сопротивле́нїе.

ч҃. Трѝ сꙋ́ть мы́слєнныѧ мѣста̀, въ нѧ́же ᲂу҆́мъ ѿ премѣне́нїѧ вхо́дитъ: є҆сте́ственное, пачеесте́ственное и҆ противꙋесте́ственное: и҆ є҆гда̀ въ мѣ́сто є҆сте́ственное вни́детъ, ѡ҆брѣта́етъ себѧ̀ вино́внымъ лꙋка́выхъ по́мыслѡвъ, и҆ и҆сповѣ́дꙋетъ бг҃ови грѣхѝ, познава́ѧ вины̑ страсте́й. Є҆гда́ же въ противꙋесте́ственномъ мѣ́стѣ бꙋ́детъ, забыва́етъ пра́вдꙋ бж҃їю, и҆ съ человѣ́ки ра́тꙋетсѧ ꙗ҆́кѡ съ ѡ҆би́дѧщими є҆го̀, є҆гда́ же въ пачеесте́ственное приведе́нъ бꙋ́детъ, ѡ҆брѣта́ютъ плоды̀ ст҃а́гѡ дх҃а, и҆̀же наречѐ а҆пⷭ҇лъ, любо́вь, ра́дость, ми́ръ, и҆ прѡ́чаѧ. И҆ вѣ́сть, ꙗ҆́кѡ а҆́ще пред̾избира́етъ тѣлє́снаѧ попечє́нїѧ, внꙋ́трь пребыва́ти та́мѡ не мо́жетъ: и҆ ѿходѧ́й ѿ мѣ́ста ѻ҆́нагѡ, впа́даетъ въ грѣ́хъ и҆ въ послѣ́дꙋющыѧ томꙋ̀ лю̑тыѧ слꙋ́чаи, а҆́ще и҆ не вско́рѣ, но во своѐ вре́мѧ, ꙗ҆́коже вѣ́сть пра́вда бж҃їѧ.

ч҃а. Толи́кѡ ра́зꙋмъ коегѡ́ждо и҆́стиненъ є҆́сть, є҆ли́кѡ кро́тость, смире́нїе и҆ любы̀ є҆гѡ̀ ᲂу҆твержда́ютъ.

ч҃в. Всѧ́къ крести́выйсѧ правосла́внѡ, прїѧ́тъ та́инственнѡ всѧ́кꙋю благода́ть. И҆звѣствꙋ́етсѧ же про́чее, по дѣ́ланїю за́повѣдей.

ч҃г. За́повѣдь хрⷭ҇то́ва, по со́вѣсти соверша́емаѧ, по мно́жествꙋ болѣ́зней се́рдца, да́рꙋетъ ᲂу҆тѣше́нїе, ѻ҆ба́че ко́еждо и҆з̾ ѻ҆́ныхъ во своѐ вре́мѧ прихо́дитъ.

ч҃д. И҆мѣ́й непреры́вное моле́нїе во всѧ́кой ве́щи, ꙗ҆́коже ничто́же соверша́ти без̾ по́мощи бж҃їѧ.

ч҃є. Ничто́же моли́твы сильнѣ́е въ дѣ́йствѣ, и҆ къ благоꙋгожде́нїю бж҃їю ничто́же ѻ҆́ныѧ поле́знѣе.

ч҃ѕ. Всѧ́кое дѣ́ланїе за́повѣдей въ не́й ѡ҆бдержи́тсѧ: любве́ бо къ бг҃ꙋ ничто́же є҆́сть вы́шше.

ч҃з. Моли́тва непари́тельнаѧ є҆́сть зна́менїе бг҃олю́бїѧ пребыва́ющагѡ въ ѻ҆́ной, нерадѣ́нїи же ѡ҆ не́й, и҆ паре́нїе, є҆́сть зна́менїе сластолю́бїѧ.

ч҃и. Безско́рбнѡ бдѧ́й и҆ долготерпѧ́й, и҆ молѧ́йсѧ, дх҃а ст҃а́гѡ дѣ́йственнѣ прича́стникъ є҆́сть. Стꙋжа́ющїй ѿ си́хъ и҆ хотѣ́нїемъ терпѧ́й, и҆ се́й ско́рѡ полꙋча́етъ застꙋпле́нїе.

ч҃ѳ. За́повѣдь за́повѣди показꙋ́етсѧ вы́шшею: си́це и҆ вѣ́ра вѣ́ры и҆звѣ́стнѣйшаѧ ѡ҆брѣта́етсѧ.

р҃. Є҆́сть вѣ́ра ѿ слꙋ́ха³⁴, по сло́вꙋ а҆пⷭ҇ла: и҆ є҆́сть вѣ́ра ᲂу҆пова́емыхъ и҆звѣще́нїе³⁵.

р҃а. Добро̀ словесы̑ по́льзовати вопроша́ющыѧ, лꙋ́чше же моли́твою и҆ добродѣ́телїю содѣ́йствовати ѻ҆́нѣмъ. Си́ми бо себѐ приносѧ́й бг҃ови, помоществꙋ́етъ и҆ бли́жнемꙋ свои́мъ помоществова́нїемъ.

р҃в. А҆́ще хо́щеши кра́ткимъ сло́вомъ воспо́льзовати ᲂу҆ченолюби́ваго, покажѝ є҆мꙋ̀ моли́твꙋ, и҆ вѣ́рꙋ пра́вꙋю, и҆ находѧ́щихъ терпѣ́нїе. Всѧ̑ бо про́чее дѡ́браѧ си́ми ѡ҆брѣта́ютсѧ.

р҃г. Въ не́мже кто̀ ᲂу҆пова̀ на бг҃а, не ктомꙋ̀ ѡ҆ то́мъ съ бли́жнимъ ра́тꙋетсѧ.

р҃д. А҆́ще всѧ́кое нево́льное ѿ во́льныхъ и҆́мать винꙋ̀. по писа́нїю, то̀ никто́же та́кѡ вра́гъ є҆́сть человѣ́кꙋ, ꙗ҆́коже са́мъ ѻ҆́нъ себѣ̀.

р҃є. Всѣ́хъ ѕѡ́лъ предварѧ́етъ невѣ́дѣнїе, второ́е же сегѡ̀ є҆́сть невѣ́рїе.

р҃ѕ. Бѣ́гай и҆скꙋше́нїѧ терпѣ́нїемъ и҆ моле́нїемъ: а҆́ще же без̾ си́хъ сопротивлѧ́ешисѧ, мно́жае нахо́дитъ.

р҃з. Кро́ткїй по бз҃ѣ премꙋ́дрыхъ є҆́сть премꙋ́дрѣйшїй, и҆ смире́нный се́рдцемъ си́льныхъ си́льнѣйшїй. Поне́же и҆́го хрⷭ҇то́во въ ра́зꙋмѣ но́сѧтъ.

р҃и. Є҆ли̑ка без̾ моли́твы и҆лѝ глаго́лемъ, и҆лѝ содѣва́емъ, по́слѣжде и҆лѝ погрѣ̑шна, и҆лѝ врє́дна сꙋ́ть, и҆ на́съ невѣ́домѡ дѣ́лы ѡ҆блича́ютъ.

р҃ѳ. Ѿ дѣ́лъ и҆ слове́съ, и҆ мы́сли, пра́ведникъ є҆ди́нъ: ѿ вѣ́ры же и҆ благода́ти и҆ покаѧ́нїѧ, мно́зи пра́вєдницы.

р҃і. Ꙗ҆́коже ка́ющемꙋсѧ высокомꙋ́дрствовати є҆́сть чꙋ́ждо: та́кѡ во́лею согрѣша́ющемꙋ смиренномꙋ́дрствовати невозмо́жно.

ра҃і. Смиренномꙋ́дрїе нѣ́сть со́вѣсти зазрѣ́нїе, но благода́ть бж҃їѧ, и҆ позна́нїе милосе́рдїѧ.

рв҃і. Є҆́же є҆́сть чꙋ́вственный до́мъ ѻ҆́бщемꙋ воздꙋ́хꙋ, сїѐ слове́сный ᲂу҆́мъ бж҃е́ственнѣй благода́ти. И҆ є҆ли́кѡ а҆́ще и҆зве́ргнеши вещество̀, толи́кѡ сама̀ собо́ю прїи́детъ, и҆ є҆ли́кѡ а҆́ще вложи́ши, толи́кѡ ѿи́детъ.

рг҃і. Вещество̀ дома́шнее є҆́сть сосꙋ́ды и҆ бра̑шна: вещество́ же ᲂу҆ма̀ тщесла́вїе и҆ сла́сть.

рд҃і. Простра́нство се́рдца є҆́сть ᲂу҆пова́нїе на бг҃а, тѣснота́ же є҆гѡ̀ попече́нїе тѣле́сное.

рє҃і. Є҆ди́на и҆ неизмѣ́нна є҆́сть благода́ть дх҃а, дѣ́йствꙋетъ же въ ко́емждо ѻ҆со́бь, ꙗ҆́коже хо́щетъ.

рѕ҃і. Ꙗ҆́коже до́ждь и҆зли́вшисѧ на зе́млю, произрастѣ́нїѧмъ прили́чное подае́тъ ка́чество, сла̑дкимъ сла́дость, крѣ̑пкимъ же крѣ́пость: та́кѡ и҆ благода́ть, въ сердца̀ вѣ́рныхъ непрело́жнѣ входѧ́щаѧ, прили́чествꙋющыѧ добродѣ́телемъ дѣ̑йствїѧ да́рꙋетъ.

рз҃і. А҆́лчꙋщемꙋ хрⷭ҇та̀ ра́ди быва́етъ пи́ща, жа́ждꙋщемꙋ сладча́йшее питїѐ, зѧ́бнꙋщемꙋ ѻ҆де́жда, трꙋжда́ющемꙋсѧ поко́й, молѧ́щемꙋсѧ и҆звѣ́ствованїе, и҆ пла́чꙋщемꙋ ᲂу҆тѣше́нїе.

ри҃і. Є҆гда̀ ᲂу҆́бѡ ᲂу҆слы́шиши писа́нїе глаго́лющее ѡ҆ ст҃ѣ́мъ дс҃ѣ, ꙗ҆́кѡ сѣ́де на є҆ди́номъ ко́емждо ѿ а҆пⷭ҇лѡвъ, и҆лѝ нападѐ на проро́ка, и҆лѝ дѣ́йствꙋетъ, и҆лѝ ѡ҆скорблѧ́емь є҆́сть, и҆лѝ ᲂу҆гаша́емь, и҆лѝ раздража́емь: и҆ па́ки, ѻ҆́вѣхъ ᲂу҆́бѡ нача́токъ и҆мꙋ́щихъ, ѻ҆́вѣхъ же и҆спо́лнь сꙋ́щихъ дх҃а ст҃а: то̀ не сѣче́нїе, и҆лѝ преложе́нїе, и҆лѝ и҆змѣне́нїе нѣ́кое да разꙋмѣ́еши ѡ҆ дс҃ѣ, но вѣ́рꙋй, и҆́мже ѡ҆́бразомъ предреко́хомъ, непрело́жна, неизмѣ́нна и҆ всеси́льна є҆го̀ бы́ти. Тѣ́мже и҆ въ дѣ́йствїѧхъ пребыва́етъ, є҆́же є҆́сть, и҆ комꙋ́ждо подоба́ющее храни́тъ бг҃олѣ́пнѣ. То́й бо, ꙗ҆́коже со́лнце, на крести́вшыѧсѧ соверше́ннѣ и҆злїѧ́сѧ: кі́йждо же ѿ на́съ по коли́кꙋ помрача́ющыѧ стра̑сти возненави́дѣвъ ѿе́млетъ, по мѣ́рѣ се́й просвѣща́етсѧ: а҆ по коли́кꙋ любѧ̀ ты̑ѧ помышлѧ́етъ ѡ҆ ни́хъ, подо́бнѣ помрача́етсѧ.

рѳ҃і. Ненави́дѧй стра̑сти, ѿе́млетъ си́хъ вины̑: въ вина́хъ же ѻ҆́ныхъ пребыва́ѧй, ѿ страсте́й и҆ не хотѧ̀ ра́тꙋемь быва́етъ.

р҃к. Є҆гда̀ лꙋка̑выѧ по́мыслы въ на́съ дѣ́йствꙋютъ, сами́хъ себѐ, а҆ не ѻ҆те́ческїй грѣ́хъ да ѡ҆бвинѧ́емъ.

рк҃а. Корє́нїѧ по́мыслѡвъ сꙋ́ть ꙗ҆́вствєнныѧ ѕлѡ́бы, ꙗ҆̀же рꙋка́ми, и҆ нога́ми, и҆ ᲂу҆сты̀ защища́емъ вы́нꙋ.

рк҃в. Невозмо́жно прїѡбща́тисѧ стра́сти въ мы́сли, нелю́бѧщемꙋ ви́нъ сеѧ̀.

рк҃г. Кто́ бо сты́дъ презира́ѧ, тщесла́вїю прїѡбща́етсѧ; и҆лѝ кто̀ ᲂу҆ничиже́нїе любѧ̀, безче́стїемъ смꙋща́етсѧ; кто́ же се́рдце сокрꙋше́нно и҆ смире́нно и҆мѣ́ѧ, сла́сть плотскꙋ́ю прїе́млетъ; и҆лѝ кто̀ хрⷭ҇тꙋ̀ вѣ́рꙋѧ, пече́тсѧ ѡ҆ привре́менныхъ, и҆лѝ ра́тꙋетсѧ;

рк҃д. Ѿмета́емый ѿ нѣ́коегѡ, и҆ нижѐ сло́вомъ, нижѐ мы́слїю со ѿме́щꙋщимъ нелюбопрѧ́щїйсѧ, ра́зꙋмъ и҆́стинный стѧжа̀, и҆ вѣ́рꙋ тве́рдꙋю показꙋ́етъ влады́цѣ.

рк҃є. Лжи́ви сы́нове человѣ́честїи въ мѣ́рилѣхъ, є҆́же непра́вдовати³⁶, длѧ коегѡ́ждо пра́ведное бг҃ови хранѧ́щꙋ.

рк҃ѕ. А҆́ще нижѐ ѡ҆би́дѧщꙋ є҆́сть и҆збы́точествїе, нижѐ ѡ҆би́димомꙋ лише́нїе: ѡ҆́бразомъ ᲂу҆́бѡ хо́дитъ человѣ́къ, ѻ҆ба́че всꙋ́е мѧте́тсѧ³⁷.

рк҃з. Є҆гда̀ ᲂу҆ви́диши кого̀ во мно́гихъ безче́стїѧхъ болѣ́знꙋюща, вѣ́ждь, ꙗ҆́кѡ по́мыслы тщесла́вїѧ насы́тивсѧ, непрїѧ́тнѣ серде́чныхъ сѣ́менъ жне́тъ рꙋкоѧ̑ти.

рк҃и. Тѣле́сными сластьмѝ па́че подоба́ющагѡ наслади́выйсѧ, стори́чными болѣ́зньми вознагради́тъ и҆збы́точествїе.

рк҃ѳ. Нача́льникъ послꙋ́шникꙋ до́лженъ є҆́сть глаго́лати до́лжное: є҆гда́ же преслꙋ́шаетъ є҆гѡ̀, наведе́нїе ѕѡ́лъ предвозвѣща́ти.

р҃л. Ѡ҆би́димый ѿ нѣ́коегѡ, и҆ не и҆зыскꙋ́ѧй ѿ ѡ҆би́дѧщагѡ, се́ю ча́стїю вѣ́рꙋетъ хрⷭ҇то́ви, и҆ стори́цею прїе́млетъ въ вѣ́цѣ се́мъ, и҆ живо́тъ вѣ́чный наслѣ́дствꙋетъ.

рл҃а. Па́мѧть бж҃їѧ є҆́сть болѣ́знь се́рдца, ѡ҆ благоче́стїи быва́ема: всѧ́къ же забыва́ѧй бг҃а, сладостра́ствꙋетъ и҆ безболѣ́зненъ быва́етъ.

рл҃в. Не глаго́ли, ꙗ҆́кѡ безстра́стный скорбѣ́ти не мо́жетъ: а҆́ще бо не ѡ҆ себѣ̀, но ѡ҆ бли́жнемъ сїѐ твори́ти до́лженъ є҆́сть.

рл҃г. Є҆гда̀ вра́гъ бы́вшихъ въ забве́нїи согрѣше́нїй мнѡ́гаѧ ᲂу҆де́ржитъ рꙋкописа̑нїѧ: тогда̀ и҆ въ па́мѧти та̑ѧжде твори́ти должника̀ понꙋжда́етъ, зако́нъ грѣхо́вный благосло́внѣ во ѕло̀ ᲂу҆потреблѧ́ѧ.

рл҃д. А҆́ще хо́щеши вы́нꙋ помина́ти бг҃а, не ѿри́ни наведє́нїѧ, ꙗ҆́кѡ непра́вєдныѧ, но ꙗ҆́кѡ пра́веднѡ находѧ́щыѧ терпѝ. Терпѣ́нїе бо ка́ждымъ слꙋ́чаемъ па́мѧть возбꙋжда́етъ, ѡ҆ставле́нїе же ᲂу҆малѧ́етъ ᲂу҆́мное се́рдца мꙋдрова́нїе, и҆ ѻ҆тра́дою забве́нїе произво́дитъ.

рл҃є. А҆́ще хо́щеши ѿ гдⷭ҇а покры́тисѧ грѣхо́мъ твои́мъ, да не ꙗ҆́вѣ сотвори́ши человѣ́кѡмъ, а҆́ще и҆́маши добродѣ́тель. Є҆́же бо а҆́ще содѣва́емъ въ си́хъ, сїѐ и҆ во ѻ҆́нѣхъ бг҃ъ дѣ́лаетъ.

рл҃ѕ. Сокры́въ добродѣ́тель, не возноси́сѧ, ꙗ҆́кѡ пра́вдꙋ соверша́ѧй. Пра́вда бо є҆́сть не то́чїю сокрыва́ти дѡ́браѧ, но и҆ ни ѡ҆ че́мъ же ѿ запреще́нныхъ не помышлѧ́ти.

рл҃з. Не ра́дꙋйсѧ, є҆гда̀ благосотвори́ши комꙋ̀, но є҆гда̀ непамѧтоѕло́бнѣ прете́рпиши послѣ́дствꙋющее сопротивле́нїе. И҆́мже бо ѡ҆́бразомъ нѡ́щи дни̑, та́кѡ ѕлѡ́бы благотворє́нїѧ прее́мствꙋютъ.

рл҃и. Тщесла́вїе, сребролю́бїе и҆ сла́сть, нескве́рно благотворе́нїе пребы́ти не ѡ҆ставлѧ́ютъ, а҆́ще не пе́рвѣе сїѧ̑ стра́хомъ бж҃їимъ низпадꙋ́тъ.

рл҃ѳ. Въ нево́льныхъ болѣ́знехъ ми́лость бж҃їѧ сокрове́на є҆́сть, терпѧ́щаго къ покаѧ́нїю влекꙋ́щаѧ, и҆ и҆збавлѧ́ющаѧ ѿ вѣ́чныѧ мꙋ́ки.

р҃м. Нѣ́цыи творѧ́ще за́пѡвѣди, на вѣса́хъ проти́вꙋ грѣхѡ́въ и҆звѣ́сити ѻ҆́ныѧ ѡ҆жида́ютъ: нѣ́цыи же тѣ́ми ᲂу҆ме́ршаго ѡ҆ грѣсѣ́хъ на́шихъ ᲂу҆милостивлѧ́ютъ. Взыска́ти подоба́етъ, кто̀ ѡ҆ ни́хъ и҆́мать пра́вое мꙋдрова́нїе.

рм҃а. Стра́хъ гее́нны, и҆ любо́вь ца́рствїѧ подаю́тъ терпѣ́нїе скорбе́й, и҆ сїѐ не ѿ себѐ, но ѿ вѣ́дꙋщагѡ помышлє́нїѧ на̑ша.

рм҃в. Вѣ́рꙋѧй бꙋ́дꙋщымъ. здѣ́шнихъ сла́достей неистѧза́тельнѣ ᲂу҆далѧ́етсѧ: невѣ́рꙋѧй же, сла́достенъ и҆ безболѣ́зненъ быва́етъ.

рм҃г. Да не рече́ши, ка́кѡ сладостра́ствовати бꙋ́детъ ᲂу҆бо́гїй, не и҆мѣ́ѧ вино́вныхъ сегѡ̀: мо́жетъ бо и҆ны́й и҆ по́мыслами ѻ҆каѧ́ннѣе сладостра́ствовати.

рм҃д. И҆но́е є҆́сть ра́зꙋмъ веще́й, и҆ и҆но́е ра́зꙋмъ и҆́стины. Є҆ли́кѡ ра́знствꙋетъ ѿ лꙋны̀ со́лнце, толи́кѡ второ́е пе́рвагѡ поле́знѣйше є҆́сть.

рм҃є. Ра́зꙋмъ веще́й по мѣ́рѣ дѣ́ланїѧ за́повѣдей прибыва́етъ: ра́зꙋмъ же и҆́стины, по мѣ́рѣ наде́жды на хрⷭ҇та̀.

рм҃ѕ. А҆́ще хо́щеши спасти́сѧ, и҆ въ ра́зꙋмъ и҆́стины прїитѝ, покꙋша́йсѧ всегда̀ превосходи́ти чꙋ́вствєннаѧ, и҆ є҆ди́ною наде́ждою прилѣплѧ́тисѧ бг҃ꙋ. Та́кѡ бо нево́лею ᲂу҆клонѧ́ѧсѧ, ѡ҆брѧ́щеши нача̑ла и҆ вла̑сти, прило́гами бра́нь творѧ̑ща съ тобо́ю. Сїѧ̑ же моли́твою побѣжда́ѧ, и҆ пребыва́ѧ благонаде́женъ, и҆мѣ́ти бꙋ́деши благода́ть бж҃їю, ѿ бꙋ́дꙋщагѡ гнѣ́ва и҆збавлѧ́ющꙋю тѧ̀.

рм҃з. Разꙋмѣ́ѧй та́инственнѣ рече́нное ѿ ст҃а́гѡ па́ѵла, глаго́лавшагѡ, бра́ни бы́ти къ дꙋховѡ́мъ ѕло́бы, ᲂу҆вѣ́сть и҆ при́тчꙋ гдⷭ҇ню, ю҆́же глаго́лаше ѡ҆ то́мъ, ꙗ҆́кѡ подоба́етъ всегда̀ моли́тисѧ, и҆ не стꙋжа́ти сѝ.

рм҃и. Зако́нъ ѡ҆бра́знѣ ше́сть дне́й дѣ́лати, въ седмы́й же пра́здновати повелѣва́етъ. Зане́же дꙋшѝ є҆́сть дѣ́ло благотворе́нїе и҆мѣ́нїемъ, си́рѣчь дѣ́лы: ᲂу҆праждне́нїе же є҆ѧ̀ и҆ поко́й, прода́ти всѧ̑ и҆ да́ти ни́щымъ, по словесѝ гдⷭ҇ню, и҆ ѿ нестѧжа́нїѧ почи́вшꙋ во ᲂу҆́мнѣмъ пребыва́ти ᲂу҆пова́нїи. Въ се́й ᲂу҆́бѡ поко́й и҆ па́ѵелъ со тща́нїемъ на́съ вни́ти поѡщрѧ́етъ, глаго́лѧ: Потщи́мсѧ вни́ти во ѻ҆́ный поко́й³⁸.

рм҃ѳ. Сїѧ̑ же рѣ́хомъ не заключа́юще бꙋ̑дꙋщаѧ, нижѐ здѣ̀ всеѻ́бщемꙋ воздаѧ́нїю бы́ти ѡ҆предѣлѧ́юще: но ꙗ҆́кѡ подоба́етъ пе́рвѣе въ се́рдцѣ и҆мѣ́ти дѣ́йствꙋющꙋю благода́ть ст҃а́гѡ дх҃а, и҆ та́кѡ по мѣ́рѣ вни́ти въ ца́рствїе нбⷭ҇ное. Сїѐ ѡ҆б̾ѧвлѧ́ѧ и҆ гдⷭ҇ь глаго́ла: ца́рствїе небе́сное внꙋ́трь ва́съ є҆́сть³⁹. Сїѐ и҆ а҆пⷭ҇лъ глаго́ла: є҆́сть вѣ́ра ᲂу҆пова́емыхъ и҆звѣще́нїе⁴⁰. И҆ па́ки: та́кѡ тецы́те, да пости́гнете⁴¹. И҆ па́ки: И҆скꙋша́йте себѐ, а҆́ще є҆стѐ въ вѣ́рѣ: и҆лѝ не зна́ете, ꙗ҆́кѡ і҆и҃съ хрⷭ҇то́съ живе́тъ въ ва́съ, ра́звѣ то́чїю чи́мъ неискꙋ́сни є҆стѐ⁴².

р҃н. Позна́вый и҆́стинꙋ, скѡ́рбнымъ наведе́нїѧмъ не сопротивлѧ́етсѧ: вѣ́сть бо, ꙗ҆́кѡ ко стра́хꙋ бж҃їю наставлѧ́ютъ человѣ́ка.

рн҃а. Дре́внїи грѣсѝ по ви́дꙋ воспомѧнꙋ́вшесѧ вредѧ́тъ благонаде́жнаго. Съ печа́лїю бо произше́дше, ѿ ᲂу҆пова́нїѧ ѿлꙋча́ютъ, безпеча́льнѣ же и҆з̾ѡбрази́вшесѧ, дре́внюю внꙋ́трь скве́рнꙋ влага́ютъ.

рн҃в. Є҆гда̀ ᲂу҆́мъ ѿверже́нїемъ самаго̀ себѐ, ᲂу҆де́ржитъ є҆диномы́сленнꙋю наде́ждꙋ: тогда̀ вра́гъ под̾ предло́гомъ и҆сповѣ́данїѧ пре́жде бы̑вшаѧ ѕла̑ѧ и҆з̾ѡбража́етъ, да благода́тїю бж҃їею забвє́нныѧ стра̑сти воздви́гнетъ, и҆ ѻ҆́тай ѡ҆би́дитъ человѣ́ка. Тогда́ бо и҆ крѣ́пкїй и҆ страстоненави́стный по нꙋ́ждѣ помрачи́тсѧ, смꙋти́всѧ ѡ҆ содѣ́ѧнныхъ. И҆ а҆́ще мра́ченъ є҆щѐ и҆ сластолюби́въ є҆́сть, всѧ́кѡ ᲂу҆косни́тъ, и҆ встра́ственнѣ бесѣ́довати и҆́мать съ прило́ги, ꙗ҆́коже предпрїѧ́тїю ѡ҆брѣсти́сѧ таково́й па́мѧти, а҆ не и҆сповѣ́данїю.

рн҃г. А҆́ще хо́щеши бг҃ꙋ приноси́ти и҆сповѣ́данїе неѡсꙋжде́нное, не помина́й по ви́дꙋ прило́ги, но терпѝ до́блественнѣ наведе́нїе си́хъ.

рн҃д. Печа̑ли за преждебы́вшыѧ грѣхѝ нахо́дѧтъ, приносѧ̀ сро́дное всѧ́комꙋ прегрѣше́нїю.

рн҃є. Разꙋ́мный, и҆ вѣ́дꙋщїй и҆́стинꙋ, не па́мѧтїю содѣ́ѧнныхъ, но терпѣ́нїе находѧ́щихъ и҆сповѣ́даетсѧ бг҃ꙋ.

рн҃ѕ. Ѿве́ргши болѣ́знь и҆ безче́стїе, не ѡ҆бѣщава́йсѧ и҆ны́ми добродѣ́телѧми ка́ѧтисѧ. Тщесла́вїе бо и҆ непоболѣ́нїе, рабо́тати грѣхꙋ̀, и҆ пра́выми [дѣла́ми] навыко́ша.

рн҃з. Ꙗ҆́коже бо добродѣ́тель бѡлѣ́зни и҆ безчє́стїѧ ражда́ти ѡ҆быко́ша, та́кѡ и҆ ѕло́бꙋ сла̑сти и҆ тщесла̑вїѧ.

рн҃и. Всѧ́каѧ тѣле́снаѧ сла́сть ѿ предвари́тельныѧ є҆́сть ѻ҆тра́ды: ѻ҆тра́дꙋ же ражда́етъ невѣ́рїе.

рн҃ѳ. Сы́й под̾ грѣхо́мъ, не мо́жетъ є҆ди́нъ ѡ҆долѣ́ти плотско́е мꙋдрова́нїе: зане́же раждеже́нїе непреста́нное и҆ лежа́щее во ᲂу҆десѣ́хъ и҆́мать.

р҃ѯ. Стра̑стнымъ сꙋ́щымъ моли́тисѧ подоба́етъ и҆ повинова́тисѧ. Є҆два́ бо возмо́жно є҆́сть съ по́мощїю бра́нь сотвори́ти съ предпрїѧ́тїѧми.

рѯ҃а. Съ повинове́нїемъ и҆ моли́твою подвиза́ѧйсѧ во́лею, подви́жникъ є҆́сть благохꙋдо́женъ, мы́сленнꙋю борьбꙋ̀ ᲂу҆дале́нїемъ ѿ чꙋ́вственныхъ ꙗ҆́вственнѣ показꙋ́ѧ.

рѯ҃в. Не примирѧ́ѧй съ бг҃омъ свою̀ во́лю, запина́етсѧ во свои́хъ начина́нїѧхъ, и҆ подрꙋ́чникъ сꙋпоста́тѡмъ быва́етъ.

рѯ҃г. Є҆гда̀ ᲂу҆ви́диши двои́хъ ѕлы́хъ и҆мꙋ́щихъ дрꙋ́гъ ко дрꙋ́гꙋ любо́вь, вѣ́ждь, ꙗ҆́кѡ є҆ди́нъ дрꙋго́мꙋ содѣ́йствꙋетъ въ во́ли.

рѯ҃д. Высокомꙋ́дрый и҆ тщесла́вный прїѧ́тнѣ дрꙋ́гъ съ дрꙋ́гомъ примирѧ́ютсѧ: то́й бо тщесла́внаго ра́бски подпа́дающа похвалѧ́етъ, се́й же высокомꙋ́драго ча́стѣ похвалѧ́ема велича́етъ.

рѯ҃є. Бг҃олюби́вый слы́шатель ѿ ѻ҆бои́хъ полꙋча́етъ по́льзꙋ. Во благи́хъ свидѣ́тельствꙋемь, ᲂу҆се́рднѣйшимъ быва́етъ, во ѕлы́хъ же ѡ҆блича́емь, ка́ѧтисѧ понꙋжда́етсѧ. Подоба́етъ же на́мъ по преꙋспѣ́ѧнїю и҆ житїѐ и҆мѣ́ти, и҆ по житїю̀ до́лжни є҆смы̀ бг҃ови моли̑твы возноси́ти.

рѯ҃ѕ. Добро̀ є҆́сть гла́внѣйшꙋю содержа́ти за́повѣдь, и҆ ни ѡ҆ че́мже по ви́дꙋ пещи́сѧ, нижѐ по ви́дꙋ моли́тисѧ, но то́кмѡ и҆ска́ти црⷭ҇твїѧ и҆ сло́ва бж҃їѧ. А҆́ще же ѡ҆ ко́ейждо потре́бѣ є҆щѐ пече́мсѧ, до́лжни є҆смы̀ и҆ ѡ҆ ко́ейждо моли́тисѧ. Без̾ моли́твы бо что̀ творѧ́й и҆лѝ пекі́йсѧ, неблагоꙋспѣ́шенъ быва́етъ къ концꙋ̀ дѣ́ла. И҆ сїѐ є҆́сть, є҆́же речѐ гдⷭ҇ь: не мо́жете без̾ менѐ твори́ти ничесѡ́же⁴³.

рѯ҃з. Пренебрега́ющаго за́повѣдь ѡ҆ моли́твѣ, безмѣ̑стнѣйшаѧ преслꙋша̑нїѧ постига́ютъ, є҆ди́но ко дрꙋго́мꙋ пресыла́юще є҆го̀, ꙗ҆́коже ᲂу҆́зника.

рѯ҃и. Настоѧ́щыѧ скѡ́рби ча́ѧнїемъ бꙋ́дꙋщихъ бла̑гъ прїе́млѧй, ра́зꙋмъ и҆́стины ѡ҆брѣ́те, и҆ гнѣ́ва и҆ печа́ли ᲂу҆до́бнѣ и҆зба́витсѧ.

рѯ҃ѳ. Ѡ҆ѕлобле́нїе и҆ безче́стїе за и҆́стинꙋ прїе́млѧй, а҆по́стольскимъ пꙋте́мъ ше́ствꙋетъ, взѧ́въ кре́стъ, и҆ вери́гами ѡ҆блага́ѧсѧ. Без̾ си́хъ же се́рдцꙋ внима́ти покꙋша́ѧйсѧ, скита́етсѧ ᲂу҆мо́мъ, и҆ впа́даетъ во и҆скꙋшє́нїѧ и҆ сѣ̑ти дїа́вѡльскїѧ.

р҃ѻ. Ни ѕлы̑ѧ по́мыслы без̾ ви́нъ, ни вины̑ без̾ по́мыслѡвъ не возмо́жно є҆́сть ра́тꙋющемꙋ побѣди́ти николи́же: є҆гда́ бо є҆ди́но ча́снѣ ѿме́щемъ, не по мно́зѣ дрꙋги́мъ во ѻ҆бои́хъ содєржи́мы быва́емъ.

рѻ҃а. Ѿ стра́ха ѕлострада́нїѧ и҆ поноше́нїѧ съ человѣ́ки ра́тꙋѧйсѧ, и҆лѝ здѣ̀ наведе́ньми и҆зли́шнѡ ѕлостра́ждетъ, и҆лѝ въ бꙋ́дꙋщемъ вѣ́цѣ неми́лостивнѡ мꙋ́читсѧ.

рѻ҃в. Всѧ́кое ѕло́е наведе́нїе возбрани́ти хотѧ́й, до́лженъ є҆́сть моли́твою примири́ти съ бг҃омъ дѣла̀, и҆ и҆мѣ́ти ᲂу҆́мнѣ ᲂу҆пова́нїе на него̀, попече́нїе же ѡ҆ чꙋ́вственныхъ по си́лѣ пренебрега́ти.

рѻ҃г. Є҆гда̀ ѡ҆брѧ́щетъ дїа́волъ без̾ нꙋ́жды человѣ́ка въ тѣле́сныхъ дѣ́лѣхъ ᲂу҆пражнѧ́ющасѧ, пе́рвѣе похища́етъ коры̑сти ра́зꙋма є҆гѡ̀, пото́мъ ᲂу҆пова́нїе на бг҃а, ꙗ҆́кѡ главꙋ̀ ѿсѣца́етъ.

рѻ҃д. А҆́ще когда̀ пости́гнеши крѣ́пкое мѣ́сто чи́стыѧ моли́твы, то разꙋмѣ́нїе веще́й, приноси́мое ѿ врага̀, во вре́мѧ ѻ҆́но не прїе́мли, да не бо́льшее погꙋби́ши. Лꙋ́чше бо стрѣла́ми моли́твы стрѣлѧ́ти въ него̀, до́лꙋ не́гдѣ заключе́нна, не́жели бесѣ́довати съ ни́мъ ѕла̑ѧ приносѧ́щимъ, и҆ ѿвлека́ти на́съ ѿ моле́нїѧ на́нь ᲂу҆хищрѧ́ющимсѧ.

рѻ҃є. Разꙋмѣ́нїе веще́й во вре́мѧ и҆скꙋше́нїѧ и҆ ᲂу҆ны́нїѧ, по́льзꙋетъ человѣ́кꙋ, во вре́мѧ же моли́твы поврежда́ти навы́че.

рѻ҃ѕ. Полꙋчи́въ жре́бїй ᲂу҆чи́ти ѡ҆ гдⷭ҇ѣ, и҆ преслꙋша́емь скорбѝ ᲂу҆́мственнѣ, и҆ не смꙋща́йсѧ ꙗ҆́вственнѣ: скорбѧ́ бо не бꙋ́деши ѡ҆сꙋжде́нъ со преслꙋша́ющимъ: смꙋща́ѧсѧ же въ то́йжде ве́щи, и҆скꙋше́нъ бꙋ́деши.

рѻ҃з. Во вре́мѧ и҆столкова́нїѧ да не сокры́еши прили́чєствꙋющаѧ присꙋ́тствꙋющымъ, благолѣ̑пнаѧ ꙗ҆́снѣе, жестѡ́каѧ же гада́тельнѣ повѣ́даѧ.

рѻ҃и. Не сꙋ́щемꙋ въ повинове́нїи твое́мъ да не предста́виши согрѣше́нїе пред̾ лице́мъ. Сїе бо вла́сти є҆́сть па́че, не́жели совѣ́та.

рѻ҃ѳ. Мно́жественнѣ глаго́лємаѧ быва́ютъ всѣ̑мъ полє́зна. Занѐ ка́ждомꙋ своѧ̑ въ со́вѣсти и҆з̾ѧвлѧ́ютсѧ.

р҃п. Глаго́лѧй пра́вѡ, до́лженъ є҆́сть и҆ са́мъ, ꙗ҆́кѡ ѿ бг҃а прїима́ти глаго́лы. И҆́стина бо не глаго́лющагѡ є҆́сть, но дѣ́йствꙋющагѡ бг҃а.

рп҃а. Не и҆мѣ́й прѣ́нїѧ съ противлѧ́ющимисѧ и҆́стинѣ, и҆̀же не признаю́тсѧ тебѣ̀ послꙋ́шными, да не не́нависть возбꙋ́диши, по писа́нїю.

рп҃в. Послꙋ́шникꙋ противоглаго́лати, и҆дѣ́же не подоба́етъ, попꙋща́ѧй, прельща́етъ є҆го̀ во ѻ҆́ной ве́щи, и҆ ѻ҆бѣ́ты повинове́нїѧ ѿверга́ти сотворѧ́етъ.

рп҃г. Со стра́хомъ бж҃їимъ наꙋча́ѧй, и҆ наказꙋ́ѧй согрѣша́ющаго, сопротивлѧ́ющꙋюсѧ согрѣше́нїю добродѣ́тель себѣ̀ стѧжева́етъ: ѕлопо́мнѧй же и҆ ѕлово́льнѣ поноша́ѧй, въ подо́бнꙋю стра́сть по дꙋхо́вномꙋ впа́даетъ зако́нꙋ.

рп҃д. До́брѣ наꙋчи́выйсѧ зако́нꙋ, бои́тсѧ законополо́жника, и҆ боѧ́сѧ є҆гѡ̀, ᲂу҆клонѧ́етсѧ ѿ всѧ́кагѡ ѕла̀.

рп҃є. Не быва́й двоѧзы́ченъ, и҆́накѡ сло́вомъ: и҆́накѡ со́вѣстїю бꙋ́дꙋчи расположе́нъ: такова́го бо писа́нїе под̾ клѧ́твою поставлѧ́етъ.

рп҃ѕ. И҆ны́й и҆́стинꙋ глаго́летъ, и҆ ѿ безꙋ́мныхъ ненави́димь быва́етъ, по сло́вꙋ а҆пⷭ҇ла: а҆ и҆ны́й лицемѣ́рствꙋетъ, и҆ за сїѐ люби́мь быва́етъ. Ѻ҆ба́че ни то̀, ни дрꙋго́е ѿ воздаѧ́нїй си́хъ долговре́меннѡ не быва́етъ: зане́же гдⷭ҇ь во своѐ вре́мѧ комꙋ́ждо подоба́ющее возда́стъ.

рп҃з. Бꙋ̑дꙋщаѧ ѕла̑ѧ потреблѧ́ти хотѧ́й, настоѧ̑щаѧ сла́дцѣ до́лженъ є҆́сть сноси́ти. Та́кѡ бо ᲂу҆́мнѣ премѣнѧ́ѧ ѻ҆днꙋ̀ ве́щь на дрꙋгꙋ́ю, ма́лыми болѣ́зньми вели́кихъ и҆збѣжи́тъ мꙋче́нїй.

рп҃и. Затворѝ ᲂу҆́мъ ѿ самохвале́нїѧ, и҆ по́мыслъ ѿ высокомы́слїѧ, да не попꙋще́нъ бꙋ́деши, и҆ содѣ́еши проти̑внаѧ: не бо̀ ѿ человѣ́ка є҆ди́нагѡ соверша́етсѧ благо́е, но ѿ всеви́дца бг҃а.

рп҃ѳ. Всеви́дѣцъ бг҃ъ ꙗ҆́коже дѣлѡ́мъ на́шымъ достѡ́йнаѧ наведє́нїѧ ѡ҆предѣлѧ́етъ: си́це и҆ помыслѡ́мъ и҆ вѡ́льнымъ разꙋмѣ́нїѧмъ.

р҃ч. Нево́льные по́мыслы ѿ предвари́тельнагѡ грѣха̀ произраста́ютъ, во́льные же ѿ самовла́стныѧ во́ли. Тѣ́мже вторы́е винѡ́вны ѡ҆брѣта́ютсѧ пе́рвыхъ.

рч҃а. Ѕлы̑мъ проти́вꙋ намѣ́ренїѧ прилꙋча́ющымсѧ мы́слемъ печа́ль послѣ́дꙋетъ: тѣ́мже и҆ ско́рѡ ѻ҆нѝ потреблѧ́ютсѧ, сꙋ́щымъ же по и҆зволе́нїю, ра́дость: тѣ́мже и҆ неꙋдобопремѣнѧ́ємы быва́ютъ.

рч҃в. Сластолюби́вый печа́литсѧ ѡ҆ порече́нїѧхъ и҆ ѕлострада́нїѧхъ: бг҃олюби́вый же ѡ҆ похвале́нїѧхъ и҆ лихои́мствѣ.

рч҃г. Не познава́ѧй сꙋде́бъ бж҃їихъ, ѻ҆́крестъ стремни́нный пꙋ́ть прехо́дитъ ᲂу҆мо́мъ, и҆ ѿ всѧ́кагѡ вѣ́тра ᲂу҆до́бь низвраща́етсѧ: похвалѧ́емь возно́ситсѧ, и҆ порица́емь ѡ҆горчева́етсѧ, пи́ршествꙋѧ блꙋ́дствꙋетъ, и҆ ѕлострада́ѧ пла́четъ, разꙋмѣ́ѧ пока́зыватисѧ хо́щетъ таковы́мъ, и҆ не разꙋмѣ́ѧ притворѧ́етсѧ разꙋмѣ́ющимъ, богатѣ́ѧ кичи́тсѧ, и҆ ᲂу҆бо́жествꙋѧ лицемѣ́рствꙋетъ, насы́тивсѧ де́рзокъ быва́етъ, и҆ постѧ́сѧ тщесла́витсѧ, со ѡ҆блича́ющими лю́битъ прѣ́тисѧ, и҆ проще́нїе є҆мꙋ̀ подаю́щымъ, ꙗ҆́кѡ несмы́слєннымъ внима́етъ.

рч҃д. А҆́ще кто̀ ᲂу҆̀бо бл҃года́тїю хрⷭ҇то́вою ра́зꙋма и҆́стины и҆ стра́ха бж҃їѧ не стѧ́жетъ, то̀ не то́чїю ѿ страсте́й, но и҆ ѿ приключе́нїй лю́тѣ ᲂу҆ѧзвлѧ́емь быва́етъ.

рч҃є. Є҆гда̀ разрѣши́ти хо́щеши ве́щь неꙋдобопостига́емꙋю, и҆щѝ ѡ҆ не́й, что̀ бг҃ови ᲂу҆го́дно, и҆ ѡ҆брѧ́щеши рѣше́нїе тоѧ̀ поле́зное.

рч҃ѕ. Ѡ҆ ни́хже а҆́ще веще́хъ бл҃говоли́тъ бг҃ъ, си́ми и҆ всѧ́ка тва́рь слꙋ́житъ: а҆ ѿ ни́хже то́й ѿвраща́етсѧ, подо́бнѣ и҆ тва́рь си̑мъ сопротивлѧ́етсѧ.

рч҃з. Сопротивлѧ́ѧйсѧ печа̑льнымъ наведе́нїѧмъ, противꙋра́тꙋетъ, ꙗ҆́коже не вѣ́сть, повелѣ́нїю бж҃їю: прїе́млѧй же та̑ѧ съ ра́зꙋмомъ и҆́стиннымъ, се́й, по писа́нїю, те́рпитъ гдⷭ҇а.

рч҃и. И҆скꙋше́нїю наше́дшꙋ, не и҆щѝ, почто̀ и҆лѝ чрез̾ что̀ прїи́де, но ꙗ҆́кѡ да ѻ҆́ное бл҃года́рнѣ и҆ безпеча́льнѣ, и҆ непамѧтоѕло́бнѣ прете́рпиши.

рч҃ѳ. Чꙋждо́е ѕло̀ не прилага́етъ грѣха̀, а҆́ще не прїи́мемъ мы̀ ѻ҆́ное ѕлы́ми мы́сльми.

с҃. А҆́ще нѣ́сть ᲂу҆до́бно ѡ҆брѣстѝ благоꙋгоди́вша без̾ и҆скꙋше́нїй, то̀ благодари́ти подоба́етъ бг҃а ѡ҆ всѧ́комъ приключе́нїи.

с҃а. А҆́ще не бы̀ нощнꙋ́ю лови́твꙋ ѡ҆ста́вилъ пе́тръ, не бы̀ дневнꙋ́ю полꙋчи́лъ: и҆ а҆́ще не бы̀ чꙋ́вственнѣ ѡ҆слѣ́плъ па́ѵелъ, не бы̀ мы́сленнѣ прозрѣ́лъ: и҆ а҆́ще не бы̀ ꙗ҆́кѡ хꙋ́льникъ ѡ҆клевета́нъ бы́лъ стефа́нъ, не бы̀ ѿве́рзшымсѧ є҆мꙋ̀ небесє́мъ ᲂу҆ви́дѣлъ бг҃а.

с҃в. Ꙗ҆́коже дѣ́ланїе по бз҃ѣ, добродѣ́тель глаго́летсѧ: та́кѡ и҆ неча́ѧннаѧ ско́рбь, и҆скꙋше́нїе и҆менꙋ́етсѧ.

с҃г. Бг҃ъ а҆враа́ма и҆скꙋша́ше, то́ є҆сть на по́льзꙋ ѡ҆скорблѧ́ше, не да ᲂу҆разꙋмѣ́етъ, како́въ є҆́сть: вѣ́дѧше бо є҆го̀ вѣ́дѧй всѧ̑ пре́жде бытїѧ̀: но ꙗ҆́кѡ да винꙋ̀ пода́стъ къ соверше́нной вѣ́рѣ.

с҃д. Всѧ́каѧ ско́рбь ѡ҆блича́етъ ᲂу҆клоне́нїе во́ли: а҆́ще ли на десна̑ѧ преклонѧ́етсѧ, и҆лѝ на шꙋ̑ѧѧ. Сегѡ̀ ра́ди слꙋча́йною ско́рбїю и҆скꙋше́нїе и҆менꙋ́етсѧ, прича́стникꙋ подаю́щи и҆скꙋ́съ сокрове́нныхъ жела́нїй.

с҃є. Стра́хъ бж҃їй понꙋжда́етъ на́съ бра́нь твори́ти со ѕло́бою: на́мъ же ра́тꙋющымъ, бл҃года́ть бж҃їѧ ра́тꙋетъ на ню̀.

с҃ѕ. Премꙋ́дрость є҆́сть, не то́чїю є҆сте́ственнымъ порѧ́дкомъ ᲂу҆вѣ́дѣти и҆́стинꙋ, но и҆ сноси́ти лꙋка́вство ѡ҆би́дѧщихъ, ꙗ҆́кѡ своѐ. Занѐ въ пе́рвой пребыва́ющїи къ го́рдости возвыша́ютсѧ, до второ́й же дости́гшїи смиренномꙋ́дрїе стѧжева́ютъ.

с҃з. А҆́ще хо́щеши не стꙋжа́емь бы́ти ѿ лꙋка́выхъ пѡ́мыслъ, ᲂу҆ничиже́нїе дꙋшѝ, и҆ ско́рбь пло́ти прїе́мли, и҆ сїѐ не ча́стнѣ, но во всѧ́комъ вре́мени, мѣ́стѣ и҆ ве́щи.

с҃и. Въ ско́рбныхъ во́льнѣ наказꙋ́емый, ѿ нево́льныхъ пѡ́мыслъ не ѡ҆блада́нъ бꙋ́детъ: не прїе́млѧй же пе́рвыхъ, ѿ вторы́хъ, и҆ не хотѧ̀ плѣнѧ́емь быва́етъ.

с҃ѳ. Є҆гда̀ ѡ҆би́димꙋ тебѣ̀ ѡ҆жесточи́тсѧ ᲂу҆тро́ба и҆ се́рдце, не печа́льсѧ, ꙗ҆́кѡ смотри́тельнѣ подви́жесѧ внꙋтрѝ преждележа́вшее: но ра́дꙋѧсѧ низвраща́й привозни́кшыѧ по́мыслы, вѣ́дый, ꙗ҆́кѡ си̑мъ ѿ прило́га и҆стреблѧ́ємымъ, и҆ ѕло́е по движе́нїи вкꙋ́пѣ и҆стреблѧ́тисѧ ѡ҆бы́че. По́мыслѡмъ же ᲂу҆чаща́ющымъ, и҆ ѻ҆́ное ᲂу҆жноже́нїе прїима́ти ѡ҆бы́че.

с҃і. Без̾ сокрꙋше́нїѧ се́рдца невозмо́жно є҆́сть совсѣ́мъ и҆зба́витисѧ ѿ ѕло́бы. Сокрꙋша́етъ же се́рдце трича́стное воздержа́нїе, ѿ сна̀, глаго́лю, и҆ пи́щи, и҆ тѣле́сныѧ ѿра́ды: и҆зли́шество бо си́хъ сладостра́стїе влага́етъ, сладостра́стїе же прїе́млетъ лꙋка̑выѧ по́мыслы, и҆ сопротивлѧ́етсѧ моли́твѣ, и҆ прили́чествꙋющемꙋ слꙋже́нїю.

са҃і. Повелѣва́ти бра́тїею жре́бїй прїѧ́вшїй, хранѝ чи́нъ тво́й, и҆ да не прекосло́вѧщихъ ра́ди преꙋмолчи́ши подоба̑ющаѧ. Въ ни́хже ѻ҆нѝ повинꙋ́ютсѧ, мздꙋ̀ и҆мѣ́ти бꙋ́деши ты̀ за добродѣ́тель ѻ҆́ныхъ: а҆ въ ни́хже преслꙋ́шаютъ, совсѣ́мъ да ѿпꙋ́стиши и҆̀мъ, и҆ прїи́меши ра̑внаѧ ѿ ре́кшагѡ: ѿпꙋсти́те, и҆ ѿпꙋ́ститсѧ ва́мъ⁴⁴.

св҃і. Торго́вли подо́бенъ є҆́сть всѧ́кїй слꙋ́чай: вѣ́дый кꙋ́плю содѣ́ѧти, прїѡбрѣте́тъ мнѡ́гаѧ, невѣ́дый же ᲂу҆ро́нъ те́рпитъ.

сг҃і. Неслꙋ́шающагѡсѧ ѿ є҆ди́нагѡ сло́ва, не нꙋ́ди съ любопрѣ́нїемъ, но прїѡбрѣ́тенїе, є҆́же ѿве́рже ѻ҆́нъ, ты̀ стѧжѝ себѣ̀. Мно́жае бо и҆справле́нїѧ ѻ҆́нагѡ воспо́льзꙋетъ тебѧ̀ неѕло́бїе.

сд҃і. Є҆гда̀ вре́дъ є҆ди́нагѡ ко мнѡ́гимъ ѿно́ситсѧ: тогда̀ не подоба́етъ долготерпѣ́ти, нижѐ и҆ска́ти своеѧ̀ по́льзы, но мно́гихъ, да спасꙋ́тсѧ. Зане́же многоча́стнаѧ добродѣ́тель є҆диноча́стныѧ поле́знѣе є҆́сть.

сє҃і. А҆́ще кто̀ впаде́тъ въ ко́елибо согрѣше́нїе, и҆ не бꙋ́детъ печа́литисѧ по мѣ́рѣ согрѣше́нїѧ, ᲂу҆до́бь па́ки въ тꙋ́южде впа́даетъ мре́жꙋ.

сѕ҃і. Ꙗ҆́коже льви́ца къ ю҆́ницѣ любо́внѣ не пристꙋпа́етъ: та́кѡ безстꙋ́дїе не прїе́млетъ прїѧ́зненнѣ по бз҃ѣ печа́ль.

сз҃і. Ꙗ҆́коже съ во́лкомъ ѻ҆вца̀ не схо́дитсѧ къ чадоро́дїю: та́кѡ нижѐ съ сы́тостїю болѣ́знь серде́чнаѧ къ зача́тїю добродѣ́телей.

си҃і. Никто́же мо́жетъ болѣ́знь и҆ печа́ль и҆мѣ́ти по бз҃ѣ, а҆́ще не пе́рвѣе вины̑ си́хъ возлю́битъ.

сѳ҃і. Стра́хъ бж҃їй и҆ ѡ҆бличе́нїе внꙋ́трь вмѣща́ютъ печа́ль: воздержа́нїе же и҆ бдѣ́нїе прїѡбща́ютсѧ болѣ́зни.

с҃к. Писа́тельными за́повѣдьми и҆ ᲂу҆че́нїи не наказꙋ́емый, биче́мъ ко́нскимъ и҆ рожно́мъ ѻ҆сли́нымъ погна́нъ бꙋ́детъ. А҆́ще же и҆ сїѧ̑ ѿри́нетъ, броздо́ю и҆ ᲂу҆здо́ю по че́люстемъ, приведе́нъ бꙋ́детъ.

ск҃а. Ѿ ма́лыхъ ᲂу҆до́бь побѣжда́емый, и҆ вели́кими по нꙋ́ждѣ порабоще́нъ бꙋ́детъ: презира́ѧй же сїѧ̑, вели̑кимъ ѡ҆ гдⷭ҇ѣ сопротивꙋста́нетъ.

ск҃в. Не покꙋша́йсѧ ѡ҆бличе́ньми по́льзовати хва́лѧщемꙋсѧ добродѣ́телѧми. Занѐ то́йжде и҆ любопоказа́теленъ и҆ и҆стиннолю́бецъ бы́ти не мо́жетъ.

ск҃г. Всѧ́кїй глаго́лъ хрⷭ҇то́въ ми́лость, и҆ пра́вдꙋ, и҆ премꙋ́дрость ꙗ҆влѧ́етъ бж҃їю, и҆ си́лꙋ си́хъ посре́дствомъ слꙋ́ха влага́етъ въ слꙋ́шающихъ сла́дцѣ: тѣ́мже и҆ неми́лостивїи, и҆ непра́вєдницы не сла́достнѣ слꙋ́шаѧ, премꙋ́дрость бж҃їю позна́ти не возмого́ша, но и҆ ᲂу҆ча́щаго ѻ҆́ной распѧ́ша. И҆ мы̀ ᲂу҆̀бо да смо́тримъ, сла́дцѣ ли є҆го̀ слꙋ́шаемъ. То́й бо речѐ: Любѧ́й мѧ̀, за́пѡвѣди моѧ̑ соблюде́тъ: и҆ возлю́бленъ бꙋ́детъ ѻ҆ц҃е́мъ мои́мъ, и҆ а҆́зъ возлюблю̀ є҆го̀, и҆ ꙗ҆влю́сѧ є҆мꙋ̀ са́мъ⁴⁵. Ви́диши ли, ка́кѡ ꙗ҆вле́нїе своѐ въ за́повѣдехъ сокры́лъ є҆́сть; всѣ̀ ᲂу҆̀бо за́пѡвѣди ѡ҆бде́ржитъ любо́вь къ бг҃ꙋ и҆ бли́жнемꙋ, ꙗ҆́же ѿ ᲂу҆дале́нїѧ веще́ствъ, и҆ ѿ безмо́лвїѧ по́мыслѡвъ составлѧ́етсѧ.

ск҃д. Сїѐ вѣ́дый гдⷭ҇ь заповѣ́дꙋетъ на́мъ, глаго́лѧ: Не пецы́тесѧ ѡ҆ ᲂу҆́треннѣмъ⁴⁶: да и҆ пра́ведно. Ѿ веще́ствъ бо и҆ попече́нїѧ ѡ҆ ни́хъ не и҆зба́вивыйсѧ, лꙋка́выхъ пѡ́мыслъ ка́кѡ и҆зба́витсѧ; по́мыслы же содержи́мый, ка́кѡ ᲂу҆ви́дитъ под̾ си́ми кро́ющїйсѧ грѣ́хъ веще́ственный, и҆́же є҆́сть тьма̀ и҆ мгла̀ дꙋшѝ, ѿ лꙋка́выхъ мы́слей и҆ дѣѧ́нїй прїе́млѧй нача́ло; дїа́волꙋ прило́гомъ не нꙋди́тельнымъ и҆скꙋша́ющꙋ, и҆ нача́ло показꙋ́ющꙋ, человѣ́кꙋ же сластолю́бїемъ и҆ тщесла́вїемъ сла́дцѣ прїѡбщи́вшꙋсѧ, а҆́ще по разсꙋжде́нїю и҆ не хотѧ́ше, но по дѣ́йствꙋ ᲂу҆слажда́шесѧ и҆ прїе́млѧше. Сегѡ́ же ѡ҆бдержи́тельнагѡ грѣха̀ не ᲂу҆вѣ́дѣвый, когда̀ помоли́всѧ ѡ҆ не́мъ ѡ҆чи́ститсѧ; Не ѡ҆чи́стивыйсѧ же, ка́кѡ ѡ҆брѧ́щетъ мѣ́сто чи́стагѡ є҆стества̀⁴⁷; Сегѡ́ же не ѡ҆брѣты́й, ка́кѡ ᲂу҆ви́дитъ внꙋ́треннїй до́мъ хрⷭ҇то́въ⁴⁸; Поне́же до́мъ є҆смы̀ бж҃їй, по проро́ческомꙋ и҆ є҆ѵⷢ҇льскомꙋ и҆ а҆пⷭ҇льскомꙋ словесѝ.

ск҃є. Подоба́етъ ᲂу҆́бѡ предрече́ннымъ порѧ́дкомъ и҆ска́ти, дабы̀ ѡ҆брѣстѝ до́мъ се́й, и҆ моли́твою неѿстꙋ́пнѡ толца́ти, ꙗ҆́кѡ да и҆лѝ здѣ̀, и҆лѝ во и҆схо́дѣ ѿве́рзетъ на́мъ влⷣка, и҆ да не вознерадѣ́вшымъ рече́тъ: Не вѣ́мъ ва́съ, ѿкꙋ́дꙋ є҆стѐ⁴⁹. Не то́чїю же до́лжни є҆смы̀ проси́ти и҆ прїѧ́ти, но и҆ да́нное сохрани́ти. Сꙋ́ть бо нѣ́цыи, и҆̀же и҆ по прїѧ́тїи погꙋби́ша. Тѣ́мже предрече́нныхъ веще́й просто́е разꙋмѣ́нїе, и҆лѝ слꙋча́тельный и҆скꙋ́съ, мо́жетъ бы́ть, и҆ по́здѣ наче́ншїи ᲂу҆чи́тисѧ, и҆ ю҆́нїи и҆мѣ́ютъ: продолжи́тельное же съ терпѣ́нїемъ дѣ́ланїе є҆два̀ и҆ благоговѣ́йнїи ѿ ста́рцєвъ и҆мѣ́ютъ, и҆ многоискꙋ́снїи мно́жицею ѻ҆́ное невнима́нїемъ погꙋ́бльшїи, и҆ во́льными трꙋды̑ па́ки взыска́вшїи, и҆ ѡ҆брѣ́тшїи. Сїѐ ᲂу҆̀бо и҆ мы̀ твори́ти не преста́немъ, до́ндеже ѻ҆́ное не ѿе́млемо стѧ́жемъ.

ск҃ѕ. Сїѧ̑ дꙋхо́внагѡ зако́на ѡ҆правда̑нїѧ, и҆з̾ мно́гихъ немнѡ́гаѧ позна́хомъ, и҆̀мже и҆ вели́кїй ѱалмопѣ́вецъ непреста́ннѡ совѣ́тꙋетъ наꙋча́тисѧ, и҆ твори́ти ѻ҆́наѧ ча́стѡ пою́щымъ ѡ҆ гдⷭ҇ѣ і҆и҃сѣ. Томꙋ̀ сла́ва и҆ держа́ва, и҆ поклоне́нїе подоба́етъ ны́нѣ, и҆ во вѣ́ки, а҆ми́нь.

Превожделѣ́нномꙋ ча́дꙋ нїкола́ю.

Поне́же пре́жде мно́гѡ пе́клсѧ є҆сѝ ѡ҆ спасе́нїи свое́мъ, и҆ мно́гое и҆мѣ́лъ попече́нїе ѡ҆ жи́зни, ꙗ҆́же по бз҃ѣ, предложи́лъ є҆сѝ на́мъ ѡ҆ себѣ̀ повѣ́даѧ, ꙗ҆ковы́ми трꙋды̀, и҆ стремле́нїемъ горѧ́щимъ прилѣпи́тисѧ хотѣ́лъ є҆сѝ ко гдⷭ҇ꙋ ѻ҆па́снымъ жи́тельствомъ и҆ воздержа́нїемъ, и҆ всѧ́кимъ ѕлострада́нїемъ, бдѣ́нїемъ же мно́гимъ, и҆ крѣ́пкою моли́твою подвиза́ѧсѧ: и҆ ꙗ҆ковы̀ бра̑ни и҆ мно́жество плотски́хъ страсте́й въ тѣле́снѣмъ воздвиза́ютсѧ є҆стествѣ̀, и҆ на дꙋ́шꙋ востаю́тъ ѿ грѣхо́внагѡ зако́на противꙋвою́ющагѡ зако́нꙋ ᲂу҆ма̀ на́шегѡ. Пла́калсѧ же, ꙗ҆́кѡ и҆зли́шнѣе стꙋжа́ешисѧ ѿ стра́сти гнѣ́ва и҆ по́хоти, и҆ спо́соба нѣ́коегѡ и҆ слове́сна совѣ́та и҆ска́лъ є҆сѝ, ꙗ҆ковы̀ трꙋды̀ и҆ по́двиги ᲂу҆потреби́въ, побѣди́ти предречє́нныѧ гꙋби́тєльныѧ стра̑сти возмо́жеши. И҆ во ѻ҆́но вре́мѧ, є҆ли́кѡ бѣ̀ мо́щно, въ лицѐ любвѝ твое́й совѣ́товахомъ, дꙋшеполє́знаѧ разꙋмѣ̑нїѧ и҆ мꙋдрова̑нїѧ предлага́юще и҆ показꙋ́юще, ꙗ҆ковы́ми трꙋды̀ и҆ ᲂу҆си́лїѧми по́стническими съ ра́зꙋмомъ и҆ просвѣще́ннымъ вѣ́дѣнїемъ слове́снымъ, по є҆ѵⷢ҇лїю, жи́тельствовавши дꙋша̀ вѣ́рою помоществꙋ́ема благода́тїю, мо́жетъ ѡ҆долѣ́ти внꙋ́трь ѕло́бы и҆стека̑ющаѧ ѕла̑ѧ, па́че же предречє́нныѧ стра̑сти. Ѿ ко́ихъ бо страсте́й по предпрїѧ́тїю наипа́че и҆ привы́чкѣ ка́къ бы ѡ҆́бразъ воспрїѧ́ла дꙋша̀, мно́жае ѿ ѻ҆́ныхъ бꙋ́дꙋчи привлека́ема: проти́вꙋ си́хъ тща́тельнѣйшїй и҆ непреста́нный по́двигъ воспрїѧ́ти должна̀ є҆́сть, до́ндеже покори́тъ плотскі̑ѧ и҆ безсловє́сныѧ дѣ̑йствїѧ се́рдца, и҆̀мже пе́рвѣе покарѧ́шесѧ, и҆ и҆́миже привлека́шесѧ, и҆ ча́стымъ пѡ́мыслъ воспомина́нїемъ, и҆ поꙋче́нїемъ ѕлы́мъ по внꙋ́треннемꙋ мы́слей сложе́нїю плѣ́нницею ѿводѧ́шесѧ. Поне́же ᲂу҆́бѡ тѣле́снѣ вма́лѣ ѿстои́мъ ѿ тебѐ лице́мъ, а҆ не се́рдцемъ, въ пꙋсты́ню ᲂу҆ше́дше къ и҆́стиннымъ дѣ́лателємъ и҆ подви́жникѡмъ хрⷭ҇тѡ́вымъ, ꙗ҆́кѡ да и҆ мы̀ хотѧ̀ ма́лѡ нѣ́какѡ подвиза́вшесѧ, и҆ сподвиза́ющесѧ со бра́тїею подвиза́ющеюсѧ проти́вꙋ сопроти́вныхъ дѣ́йствїй, и҆ страстє́мъ до́блественнѣ сопротивлѧ́ющеюсѧ, лѣ́ность ѿложи́мъ, ᲂу҆ны́нїе ѿтрѧсе́мъ, нерадѣ́нїе ѿ на́съ ѿве́ргнемъ, и҆ всѧ́кое тща́нїе и҆ прилѣжа́нїе воспрїи́мемъ, благоꙋгоди́ти бг҃ови тща́щесѧ. Тѣ́мже ма́лый совѣ́тъ и҆ ᲂу҆че́нїе поле́зное воз̾ꙋсе́рдствовахомъ пи́смены начерта́ти и҆́скренности твое́й, да ѡ҆ ни́хже въ лицѐ тебѣ̀ глаго́лахъ, сїѧ̑ вкра́тцѣ въ ма́ломъ совѣ́тованїѧ на́шегѡ пи́смени прочита́ѧ прилѣ́жнѡ, ꙗ҆́кѡ присꙋ́тствꙋющымъ на́мъ дꙋхо́вныѧ по́льзы наслади́шисѧ. Нача́ло ᲂу҆̀бо по́льзы твоеѧ̀, ꙗ҆́же по бз҃ѣ, ѽ ча́до, ѿсю́дꙋ твори́ти до́лженъ є҆сѝ. Незабве́ннѡ и҆ приснопа́мѧтнѡ въ непреста́нномъ поꙋче́нїи помышлѧ́ти тебѣ̀ подоба́етъ ѡ҆ всѣ́хъ смотре́нїѧхъ, и҆ благодѣѧ́нїѧхъ человѣколюби́вагѡ бг҃а бы́вшихъ къ тебѣ̀, и҆ быва́ющихъ ко спасе́нїю дꙋшѝ твоеѧ̀: а҆ не забве́нїемъ ѕло́бы покрыва́емꙋ, и҆лѝ по причи́нѣ ᲂу҆ны́нїѧ не помина́ти мнѡ́гаѧ и҆ вели̑каѧ є҆гѡ̀ благодѣѧ̑нїѧ, и҆ сегѡ̀ ра́ди безполе́знѡ и҆ неблагода́рнѡ, преходи́ти про́чее вре́мѧ. Такова́ѧ бо непреста́ннаѧ па́мѧть, ꙗ҆́коже нѣ́кїй ѻ҆сте́нъ пробода́ющи се́рдце, подви́житъ ѻ҆́ное всегда̀ ко и҆сповѣ́данїю, ко смире́нїю, ко благодаре́нїю съ сокрꙋше́нною дꙋше́ю, ко всѧ́комꙋ тща́нїю бла́гꙋ, къ воздаѧ́нїю нра́вѡвъ, и҆ ѻ҆бы́чаєвъ благи́хъ и҆ всѧ́кїѧ по бз҃ѣ добродѣ́тели, се́рдце приснополꙋча́ющеесѧ съ благосо́вѣстною мы́слїю семꙋ̀ проро́ческомꙋ словесѝ: Что̀ возда́мъ гдⷭ҇ви ѡ҆ всѣ́хъ, ꙗ҆̀же воздадѐ мѝ;⁵⁰ Є҆гда́ бо помы́слитъ дꙋша̀ ѡ҆ благодѣѧ́нїѧхъ человѣколюби́вагѡ бг҃а, ꙗ҆̀же ѿ рожде́нїѧ, и҆лѝ ѿ коли́кихъ бѣ́дъ мно́жицею и҆зба́влена бы́сть, и҆лѝ коли̑кимъ ѕлы̑мъ подпа́дши, и҆ въ прегрѣшє́нїѧ мно́жицею во́лею поползнꙋ́вшисѧ, не предана̀ бы́сть пра́веднѡ прельсти́вшымъ дꙋховѡ́мъ въ поги́бель и҆ сме́рть: но долготерпѣли́внѣ человѣколюби́вый влⷣка презира́ѧ согрѣшє́нїѧ, ѡ҆жида́ѧ ѡ҆браще́нїѧ є҆ѧ̀, и҆ врагѡ́мъ и҆ лꙋка̑вымъ дꙋхѡ́мъ во́льнѣ страстьмѝ рабо́тавшꙋю, то́й пита́ше, покрыва́ѧ и҆ всѧ́чески промышлѧ́ѧ, и҆ напослѣ́докъ благи́мъ ма́нїемъ на пꙋ́ть спасе́нїѧ наста́ви, и҆ любо́вь къ подви́жническомꙋ житїю̀ въ се́рдце вложѝ, и҆ съ ра́достїю мі́ръ, и҆ всѧ́кꙋю є҆гѡ̀ пре́лесть плотски́хъ сласте́й ѡ҆ста́вити ᲂу҆крѣпѝ, и҆ а҆́гг҃льскимъ ѡ҆́бразомъ по́стническагѡ чи́на ᲂу҆красѝ, и҆ ᲂу҆до́бь прїѧ́тꙋ бы́ти ѿ свѧты́хъ мꙋже́й въ собра́нїе бра́тства ᲂу҆стро́и. Кто́ же благосо́вѣстнꙋю и҆мѣ́ѧ мы́сль, и҆ сїѧ̑ помышлѧ́ѧ, не всегда̀ въ сокрꙋше́нїи бꙋ́детъ се́рдца, и҆мѣ́ѧ толи̑каѧ ѡ҆брꙋчє́нїѧ предвари́тельныхъ благодѣѧ́нїй, ни є҆ди́но бла́го пе́рвѣе са́мъ сотвори́въ; Не всегда́ ли тве́рдꙋю наде́ждꙋ воспрїѧ́лъ бы, сїѐ разсмотрѣ́въ, ꙗ҆́кѡ а҆́ще и҆ ни є҆ди́но бла́го мнѣ̀ сотво́ршꙋ, но и҆ мно́гѡ пред̾ ни́мъ согрѣши́вшꙋ, въ нечистота́хъ плотски́хъ и҆ во и҆ны́хъ мно́гихъ ѕло́бахъ пожи́вшꙋ, не по грѣхѡ́мъ мои̑мъ сотвори́лъ є҆́сть, нижѐ по беззако́нїѧмъ мои̑мъ возда́лъ є҆́сть, но толи̑кїѧ да́ры и҆ благода́ти во спасе́нїе ᲂу҆стро́и. А҆́ще всеконе́чнѣ преда́мъ себѐ про́чее рабо́тати є҆мꙋ̀ во всѧ́комъ непоро́чномъ пребыва́нїи и҆ добродѣ́телей и҆справле́нїи: то коли́кихъ бла̑гъ, и҆ дꙋхо́вныхъ дарова́нїй сподо́битъ, на всѧ́кое дѣ́ло благо́е ᲂу҆крѣплѧ́ѧ, и҆справлѧ́ѧ и҆ наставлѧ́ѧ; Тѣ́мже и҆мѣ́ѧй всегда̀ таковы́й по́мыслъ, и҆ не забыва́ѧй бж҃їихъ благодѣѧ́нїй, преклонѧ́етъ себѐ и҆ ᲂу҆правлѧ́етъ и҆ понꙋжда́етъ ко всѧ́комꙋ ѡ҆бꙋче́нїю добродѣ́тели благо́мꙋ, и҆ ко всѧ́комꙋ дѣ́ланїю пра́вды, всегда̀ ᲂу҆се́рденъ, всегда̀ гото́въ сы́й, во є҆́же твори́ти во́лю бж҃їю. Сегѡ̀ ра́ди, ѽ ча́до возлю́бленное! и҆мѣ́ѧй благода́тїю хрⷭ҇то́вою є҆сте́ственный ра́зꙋмъ, сїѐ всегда́шнее размышле́нїе, и҆ поꙋче́нїе благо́е всегда̀ въ себѣ̀ хранѝ, не ѿ забве́нїѧ гꙋби́тельнагѡ покрыва́емь, нижѐ возбранѧ́емь ѿ ᲂу҆ны́нїѧ творѧ́щагѡ ᲂу҆́мъ сꙋ́етнымъ, и҆ ᲂу҆клонѧ́ющагѡ ѿ жи́зни и҆лѝ ѿ невѣ́жества, вины̀ всѣ́хъ ѕѡ́лъ по́мысломъ помрача́емь, и҆лѝ ѿ нерадѣ́нїѧ всеѕло́бнагѡ прельща́емь, ни ѿ сла́сти плотскі́ѧ ѿвлека́емь, ни ѿ чревобѣ́сїѧ побѣжда́емь, ни ѿ по́хоти ᲂу҆мо́мъ плѣнѧ́емь, и҆ сосложе́нїемъ пѡ́мыслъ блꙋ́дныхъ ѡ҆скверне́нїе въ себѣ̀ производѧ̀, ни ѿ гнѣ́ва ражда́ющагѡ братоненавидѣ́нїе побѣжда́емь, и҆ милосе́рдїѧ ра́ди и҆ под̾ предло́гомъ ѻ҆каѧ́ннымъ ѡ҆печа́лꙋѧ, и҆ ѡ҆печа́лꙋемь, и҆ приводѧ̀ на па́мѧть лꙋка̑выѧ по́мыслы на бли́жнѧго, ѿ чи́стыѧ ко бг҃ꙋ моли́твы ᲂу҆клонѧ́ѧсѧ, и҆ ᲂу҆мо́мъ плѣнѧ́емь, и҆ ѕвѣ́рскимъ по́мысломъ є҆динодꙋ́шнаго бра́та подзира́ѧ, и҆ безслове́снымъ плотска́гѡ мꙋдрова́нїѧ нра́вомъ въ со́вѣсти свѧзꙋ́емь, и҆ лꙋка́вымъ дꙋха́мъ, и҆̀мже повинꙋ́лсѧ, въ наказа́нїе предае́мь до вре́мене, до́ндеже ѿвсю́дꙋ вознедоꙋмѣ́въ ᲂу҆́мъ, и҆ ѿ печа́ли и҆ ᲂу҆ны́нїѧ поглоще́нъ бы́въ, и҆ предспѣ́ѧнїе, є҆́же по бз҃ѣ предвари́тельными вины̑ погꙋби́въ, па́ки начне́тъ воспрїима́ти со мно́гимъ смире́нїемъ нача́ло пꙋтѝ спасе́нїѧ: и҆ мно́гѡ потрꙋди́всѧ въ моли́твахъ и҆ всено́щныхъ бдѣ́нїѧхъ, разрѣши́въ вины̑ смире́нїемъ и҆ и҆сповѣ́данїемъ бг҃ꙋ и҆ бли́жнемꙋ, та́кѡ начина́етъ па́ки и҆стрезвлѧ́тисѧ, и҆ просвѣще́нїемъ ра́зꙋма є҆ѵⷢ҇льскагѡ, бж҃їею бл҃года́тїю просвѣща́емь, позна́етъ, что̀ не преда́вый себѐ соверше́ннѣ на кре́стъ мꙋдрова́нїемъ смире́ннымъ и҆ ᲂу҆ничиже́ннымъ, и҆ не пове́ргїй себѐ под̾ всѣ́ми, є҆́же попира́тисѧ и҆ ᲂу҆ничижа́тисѧ и҆ презира́тисѧ, и҆ ѡ҆би́димꙋ бы́ти, и҆ ѻ҆смѣва́емꙋ и҆ порꙋга́емꙋ, и҆ сїѧ̑ всѧ̑ съ ра́достїю гдⷭ҇а ра́ди терпѣ́ти, не ѿмщева́ющїй ѿню́дъ человѣ́ческой сла́вѣ, и҆лѝ че́сти, и҆лѝ похвалѣ̀, и҆лѝ сла́сти ꙗ҆́стїѧ и҆лѝ питїѧ̀, и҆лѝ ѡ҆дѣѧ́нїѧ, хрїстїа́нинъ и҆́стиненъ бы́ти не мо́жетъ. Тѣ́мже таковы̑мъ предлежа́щымъ на́мъ по́двигѡмъ и҆ по́честємъ, и҆ вѣнцє́мъ, доко́лѣ мы̀ ѿ притво́рнагѡ благочести́вагѡ ви́дꙋ порꙋга́еми бꙋ́демъ, съ ᲂу҆хищре́нїемъ гдⷭ҇ви рабо́тающе, и҆́но ѿ человѣ̑къ почита́еми, а҆ и҆́но ви́дими сꙋ́ще ѿ вѣ́дꙋщагѡ та̑йнаѧ; свѧті́и бо ѿ мно́гихъ почита́еми, свирѣ́пыхъ є҆щѐ нра́вѡвъ є҆смы̀, вои́стиннꙋ ѡ҆́бразъ благоче́стїѧ и҆мꙋ́ще, си́лы же є҆гѡ̀ пред̾ бг҃омъ не стѧжа́вше,⁵¹ дѣ́вственниками и҆ чи́стыми ѿ мно́гихъ почита́еми, и҆ пред̾ вѣ́дꙋщимъ та̑йнаѧ нечи́стыми сложе́нїи пѡ́мыслъ блꙋ́дныхъ внꙋтрьꙋ́дꙋ ѡ҆сквернѧ́ющесѧ, и҆ дѣ́йствїѧми страсте́й ѡ҆калѧ́ющесѧ, и҆ ра́ди притво́рнагѡ є҆щѐ подви́жничества на́шегѡ, и҆ ѿ похва́лъ человѣ́ческихъ поница́юще, и҆ ᲂу҆мо́мъ ѡ҆слѣплѧ́ющесѧ. Доко́лѣ ᲂу҆̀бо въ сꙋетѣ̀ ᲂу҆ма̀ хо́димъ, за є҆ѵⷢ҇льское мꙋдрова́нїе не є҆́млющесѧ, и҆ жи́тельство по со́вѣсти не познава́емъ, да со тща́нїемъ сїѐ пожене́мъ, ꙗ҆́кѡ да и҆ въ со́вѣсти дерзнове́нїе ѡ҆брѧ́щемъ: но є҆щѐ на мни́мой внѣ́шнѧгѡ человѣ́ка пра́вдѣ є҆ди́ной ᲂу҆твержда́емсѧ, лише́нїѧ ра́ди и҆́стиннагѡ ра́зꙋма, и҆ внѣ́шними то́чїю ѡ҆бꙋче́нїи себѐ прельща́емъ, человѣ́кѡмъ ᲂу҆гожда́ти хотѧ́ще, и҆ сла́вы ѿ ни́хъ, и҆ че́сти и҆ похва́лъ и҆щѧ̀; Прїи́детъ вои́стиннꙋ та́йнаѧ тьмы̀ ѿкрыва́ѧй, и҆ ѡ҆б̾ѧвлѧ́ѧй совѣ́ты сердє́чныѧ:⁵² неѡбольсти́мый сꙋдїѧ̀, ни бога́тагѡ срамлѧ́ѧйсѧ, ни ни́щагѡ ми́лꙋѧй, ѡ҆́бразъ внѣ́шнїй ѿе́млѧй, и҆ и҆́стинꙋ внꙋтрьꙋ́дꙋ сокрове́ннꙋю ѡ҆б̾ѧвлѧ́ѧй, по со́вѣсти жи́тельствꙋющихъ и҆́стинныхъ подви́жникѡвъ и҆ страда́льцєвъ въ присꙋ́тствїи а҆́гг҃лъ пред̾ свои́мъ ѻ҆ц҃е́мъ вѣнча́ѧй: а҆ притво́рныхъ и҆ ѡ҆́бразомъ благоче́стїѧ ѡ҆дѣ́ѧнныхъ, и҆ ви́димое то́чїю житїѐ человѣ́кѡмъ показꙋ́ющихъ, и҆ на се́мъ сꙋ́етнѣ ᲂу҆твержда́ющихсѧ, и҆ ᲂу҆мо́мъ прельща́ющихъ себѐ, пред̾ вы́шнею це́рковїю свѧты́хъ, и҆ пред̾ всѣ́мъ небе́снымъ во́инствомъ и҆з̾ѡблича́ѧй, и҆ та́кѡ лю́тѣ стыдѧ́щихсѧ во тьмꙋ̀ кромѣ́шнꙋю посыла́ѧй, по ѡ҆́бразꙋ ю҆ро́дивыхъ дѣ́въ, ꙗ҆̀же внѣ́шнее дѣ́вство сохрани́ша: нима́лѡ бо за сїѐ не порече́ни бы́ша, но и҆ є҆ле́й ѿ ча́сти въ сосꙋ́дѣхъ и҆мѣ́ѧхꙋ, то́ є҆сть, добродѣ́телей нѣ́кихъ и҆ и҆справле́нїй внѣ́шнихъ, и҆ дарова́нїй нѣ́кихъ прича̑стницы бѧ́хꙋ. Тѣ́мже и҆ свѣти́льницы и҆̀хъ до нѣ́коегѡ вре́мени горѧ́хꙋ: по нерадѣ́нїю же и҆ невѣ́жествꙋ, и҆ ᲂу҆ны́нїю, промышле́нїѧ не сотвори́ша, и҆ кро́ющеесѧ внꙋтрьꙋ́дꙋ мно́жество страсте́й ѿ лꙋка́выхъ дꙋхѡ́въ дѣ́йствꙋемое и҆звѣ́стнѡ не позна́ша: но ѿ сопроти́вныхъ дѣ́йствъ ра́зꙋмы и҆́хъ и҆стлѣва́хꙋ, сосложе́нїемъ помыслѡ́въ прїѡбща́ющесѧ съ ни́ми, и҆ прельща́еми та́йнѡ, и҆ побѣжда́еми за́вистїю ѕло́бнѣйшею, ре́вностїю доброненави́стною, ра́спрею, любопрѣ́нїемъ, не́навистїю, гнѣ́вомъ, го́рестїю, памѧтоѕло́бїемъ, лицемѣ́рїемъ, ꙗ҆́ростїю, горды́нею, тщесла́вїемъ, человѣкоꙋго́дїемъ, самоꙋго́дїемъ, сребролю́бїемъ, ᲂу҆ны́нїемъ, по́хотїю плотско́ю, по́мыслы сладостра́стїе содѣва́ющими, невѣ́рїемъ, безстра́шїемъ, боѧ́знїю, печа́лїю, прекосло́вїемъ, сла́бостїю, сно́мъ, высокомы́слїемъ, ѡ҆правда́нїемъ, возноше́нїемъ, киче́нїемъ, несы́тствомъ, невозде́ржностїю, лихои́мствомъ, ѿча́ѧнїемъ всегѡ̀ лютѣ́йшимъ, и҆ то́нкими ѕло́бы дѣ́йствїи: ꙗ҆̀же, дѣ̑вы, и҆ до́брыхъ дѣ́ланїе, и҆лѝ житїѐ честно́е, є҆́же мнѧ́хꙋ пред̾ человѣ́ки твори́ти, и҆ длѧ полꙋче́нїѧ ѿ ни́хъ похва́лъ, а҆́ще и҆ нѣ́кихъ дарова́нїй прича̑стницы бѧ́хꙋ, дꙋховѡ́мъ тщесла́вїѧ и҆ человѣкоꙋго́дїѧ продава́хꙋ ѻ҆́наѧ, и҆ прѡ́чимъ страстє́мъ прїѡбща́ющесѧ, смѣ́шавахꙋ дѡ́браѧ ѡ҆бꙋчє́нїѧ съ лꙋка́выми и҆ плотски́ми мꙋдрова́нїѧми. Тѣ́мже непрїѧ́тными и҆ нечи́стыми ѻ҆́наѧ содѣ́ловахꙋ, ꙗ҆́коже ка́їновꙋ же́ртвꙋ, женихо́вы ра́дости лиши́вшесѧ, и҆ черто́га небе́снагѡ внѣ̀ затворе́ни бы́вше. Сїѧ̑ ᲂу҆́бѡ помышлѧ́юще и҆ разсꙋжда́юще, и҆ и҆скꙋша́юще, позна́имъ и҆ ᲂу҆разꙋмѣ́имъ, въ кі́ихъ дѣ́лѣхъ є҆смы̀: да доко́лѣ є҆щѐ вре́мѧ покаѧ́нїѧ и҆ ѡ҆браще́нїѧ и҆́мамы, себѐ и҆спра́вимъ, ꙗ҆́кѡ да дѡ́браѧ на̑ша дѣла̀ чи́стѣ соверша́єма, и҆́стинна и҆ дѡбра̀ бꙋ́дꙋтъ, съ плотски́мъ мꙋдрова́нїемъ не смѣ́шиваєма да не ѿве́ржєна бꙋ́дꙋтъ ꙗ҆́кѡ же́ртва поро́чна, за безстра́шїе и҆ нерадѣ́нїе, и҆ и҆́стиннагѡ ра́зꙋма ѡ҆скꙋдѣ́нїе: да не ка́кѡ и҆ трꙋ́дъ дѣ́вства, и҆ воздержа́нїѧ, и҆ бдѣ́нїѧ, и҆ поста̀ и҆ страннолю́бїѧ прете́рпимъ, и҆ дни̑ и҆ждиве́мъ, и҆ за предречє́нныѧ страсте́й вины̑, мни̑мыѧ на́ши ѡ҆правда̑нїѧ же́ртвою поро́чною ѡ҆брѣ́тшесѧ, непрїѧ̑тны бꙋ́дꙋтъ небе́сномꙋ свѧще́нникꙋ, хрⷭ҇тꙋ̀. Ѡ҆ вѣ́дѣнїи ᲂу҆́бѡ, ѽ ча́до! и҆ ра́зꙋмѣ предвари́тельнѡ тща́тисѧ подоба́етъ хотѧ́щемꙋ кре́стъ взѧ́ти, и҆ послѣ́довати съ непреста́ннымъ въ себѣ̀ и҆спыта́нїемъ помыслѡ́въ свои́хъ, и҆ мно́гимъ попече́нїемъ ѡ҆ спасе́нїи и҆ ра́зꙋмѣ, и҆ мно́гимъ къ бг҃ꙋ тща́нїемъ, и҆ вопроше́нїемъ є҆динодꙋ́шныхъ и҆ є҆диномꙋ́дренныхъ рабѡ́въ бж҃їихъ, и҆ тѣ́мъ же по́двигомъ подвиза́ющихсѧ, да не невѣ́дый, гдѣ̀ и҆ ка́кѡ хо́дитъ, во тьмѣ̀ без̾ свѣ́та свѣти́льнична ше́ствꙋетъ: и҆́же бо самочи́ннѣ, без̾ є҆ѵⷢ҇льскагѡ ра́зꙋма и҆ наставле́нїѧ ко́егѡ ше́ствꙋетъ, мно́гѡ претыка́етсѧ, и҆ во мнѡ́гїѧ ꙗ҆́мы и҆ сѣ̑ти лꙋка́вагѡ впа́даетъ, и҆ мно́гѡ заблꙋжда́етъ, и҆ во мнѡ́ги впа́даетъ бѣды̑, и҆ не вѣ́сть, како́въ коне́цъ полꙋча́етъ. Мно́зи бо мно́гими трꙋды̀, и҆ по́стничествомъ, и҆ ѕлострада́нїемъ проидо́ша, и҆ трꙋды̀ мно́ги бг҃а ра́ди претерпѣ́ша: но самочи́нїе, и҆ неразсꙋжде́нїе, и҆ нетре́бованїе ѿ бли́жнѧгѡ по́льзы, таковы̑ѧ трꙋды̀ и҆́хъ нетве́рдыми и҆ сꙋ́етными содѣ́лаша. Ты̀ ᲂу҆́бѡ, ѽ ча́до возлю́бленное! въ нача́лѣ ᲂу҆вѣща́нїѧ сло́ва, бы́вшыѧ къ тебѣ̀ покланѧ́емагѡ и҆ человѣколюби́вагѡ бг҃а благодѣѧ̑нїѧ не забыва́й, ѿвлека́емь краде́нїемъ ѕло́бы и҆ ᲂу҆ны́нїѧ, но ꙗ҆̀же ѿ нача́ла рожде́нїѧ твоегѡ̀ да́же до ны́нѣ, и҆лѝ тѣлє́снаѧ и҆лѝ дꙋхѡ́внаѧ благодѣѧ̑нїѧ пред̾ ѻ҆ча́ми полага́ѧ, размышлѧ́й ѡ҆б̾ ѻ҆́ныхъ, и҆ при́снѡ поꙋча́йсѧ, по рече́нномꙋ: Не забыва́й всѣ́хъ воздаѧ́нїй є҆гѡ̀,⁵³ да ᲂу҆до́бнѡ ко стра́хꙋ бж҃їю и҆ любвѝ се́рдце дви́жетсѧ, є҆́же и҆спо́лнити по си́лѣ житїѐ ѻ҆па́сно, жи́тельство добродѣ́тельно, со́вѣсть благочести́вꙋ, сло́во благосли́чно, вѣ́рꙋ пра́вꙋ, мꙋдрова́нїе смире́нно, и҆ про́стѣ рещѝ: всего̀ себѐ бг҃ꙋ возложи́ти, ᲂу҆бѣжда́ѧсѧ па́мѧтїю благодѣѧ́нїй є҆гѡ̀, ꙗ҆̀же прїѧ́лъ є҆сѝ ѿ блага́гѡ и҆ человѣколюби́вагѡ бг҃а, ꙗ҆́кѡ да сами́мъ ѡ҆ себѣ̀, нѣ́кимъ ѡ҆́бразомъ, таково́ю благодѣѧ́нїй па́мѧтїю, па́че же содѣ́йствꙋющей тѝ и҆ свы́ше по́мощи, въ любо́вь и҆ жела́нїе ᲂу҆ѧзвлѧ́етсѧ се́рдце твоѐ: занѐ ꙗ҆̀же и҆нѣ́мъ мно́гѡ лꙋ́чшымъ тебѐ, не сотвори́лъ є҆́сть чꙋ̑днаѧ, неизрече́ннымъ свои́мъ человѣколю́бїемъ тебѣ̀ сотвори́лъ є҆́сть. Всѧ̑ ᲂу҆́бѡ бы̑вшаѧ тѝ ѿ бг҃а блага̑ѧ въ па́мѧти непреста́ннѣй содержа́ти потщи́сѧ. Ѻ҆со́беннѡ же ѻ҆́нꙋю вели́кꙋю и҆ ди́внꙋю благода́ть и҆ благодѣѧ́нїе непреста́ннѡ помина́й, ю҆́же ѿплы́вшꙋ тебѣ̀ кꙋ́пнѡ съ ма́терїю твое́ю ѿ свѧты́хъ мѣ́стъ къ кѡнстанті́нꙋ гра́дꙋ, подадѐ тебѣ̀, ꙗ҆́коже на́мъ повѣ́далъ є҆сѝ: є҆гда̀ стра́шнаѧ ѻ҆́наѧ и҆ неꙋдержи́маѧ бꙋ́рѧ, и҆ волне́нїе въ нощѝ воздви́жесѧ, и҆ всѝ бы́вшїи въ кораблѝ кꙋ́пнѡ съ кора́бленниками, и҆ съ са́мою ма́терїю твое́ю погибо́ша во глꙋбинѣ̀, и҆ пресла́вною бж҃е́ственною си́лою є҆ди́нъ ты̀ со двѣма̀ и҆нѣ́ма и҆зве́ржени бы́вше спасо́стесѧ, и҆ ка́кѡ ᲂу҆стро́и прїитѝ тебѣ̀ во а҆гкѵ́рꙋ, и҆ ѻ҆те́ческими ᲂу҆тро́бами ѿ нѣ́коегѡ щедролю́бца прїѧ́тꙋ бы́ти тебѣ̀, и҆ любо́вїю сопрѧже́нꙋ бы́ти съ благоговѣ́йнѣйшимъ ча́домъ є҆пїфа́нїемъ, да ѻ҆́ба наста́вльшесѧ преподо́бнымъ мꙋ́жемъ, прїитѝ на пꙋ́ть спасе́нїѧ, и҆ ѿ ст҃ы́хъ рабѡ́въ бж҃їихъ, ꙗ҆́кѡ ча̑да и҆́скреннѧѧ прїѧ́ты бы́ти. Ѡ҆ си́хъ ᲂу҆̀бо всѣ́хъ ѿ бг҃а тебѣ̀ бы́вшихъ благодѣѧ́нїѧхъ, что̀ досто́йно и҆́маши возда́ти призва́вшемꙋ дꙋ́шꙋ твою̀ въ живо́тъ вѣ́чный; Себѣ́ бо про́чее пра́веднѣ не ктомꙋ̀ жи́ти до́лженъ є҆сѝ, но за тѧ̀ ᲂу҆ме́ршемꙋ и҆ воскре́сшемꙋ хрⷭ҇тꙋ̀ во всѧ́кой добродѣ́тели, пра́вдѣ, во всѧ́комъ и҆справле́нїи за́повѣдей, и҆щѧ̀ при́снѡ, что́ є҆сть во́лѧ бж҃їѧ, блага́ѧ и҆ соверше́ннаѧ, и҆ ᲂу҆го́днаѧ,⁵⁴ и҆ сїѐ все́ю мо́щїю тща́тисѧ постига́ти. Ѻ҆ба́че ю҆́ность твою̀, ча́до, та́кѡ покорѝ сло́вꙋ бж҃їю, ꙗ҆́коже са́мо тѝ сло́во и҆стѧзꙋ́етъ, предста́вити тѣ́ло же́ртвꙋ жи́вꙋ, свѧ́тꙋ, благоꙋго́днꙋ бг҃ови, слове́сное слꙋже́нїе,⁵⁵ и҆ всѧ́кꙋ мокро́тꙋ по́хоти плотскі́ѧ малотре́бованїемъ, и҆ малопи́тїемъ, и҆ всено́щными бдѣ́нїи и҆зсѧ́кнꙋти сотворѝ и҆ и҆зсꙋшѝ, да и҆ са́мъ ѿ завѣща́нїѧ рече́ши: Бы́хъ ꙗ҆́кѡ мѣ́хъ на сла́нѣ, ѡ҆правда́нїй твои́хъ не забы́хъ:⁵⁶ и҆ позна́въ, ꙗ҆́кѡ хрⷭ҇то́въ є҆сѝ, пло́ть свою̀ распнѝ, по а҆по́стольскомꙋ гла́сꙋ, со страстьмѝ и҆ похотьмѝ:⁵⁷ и҆ ᲂу҆́ды, ꙗ҆̀же на землѝ, ᲂу҆мертвѝ, не то́чїю дѣѧ́нїе блꙋда̀, но и҆ дѣ́йствꙋемꙋю ѿ лꙋка́выхъ дꙋхѡ́въ во пло́ти нечистотꙋ̀. И҆ не то́чїю до сегѡ̀ поставлѧ́етъ по́двигъ и҆́стиннагѡ и҆ нескве́рнагѡ и҆ всесоверше́ннагѡ дѣ́вства вѣнца̀ ѡ҆жида́ѧй, но послѣ́дствꙋѧ а҆по́стольскомꙋ ᲂу҆че́нїю, и҆ са́мыѧ тоѧ̀ стра́сти ꙗ҆вле́нїе и҆ движе́нїе ᲂу҆мерщвлѧ́ти подвиза́етсѧ: и҆ нижѐ та́кѡ є҆щѐ и҆звѣ́ствꙋемь быва́етъ ѕѣ̑льнымъ раче́нїѧмъ, а҆́гг҃льское и҆ пречи́стое дѣ́вство во своѐ тѣ́ло всели́ти ча́ѧ, но и҆ са́момꙋ воспомина́нїю то́нкїѧ по́хоти въ є҆ди́номъ по́мыслѣ без̾ движе́нїѧ и҆ дѣ́йства тѣле́сныѧ стра́сти, ꙗ҆́кѡ во вре́мѧ развѣ́ѧнїѧ ᲂу҆ма̀ восходѧ́щемꙋ и҆стреби́тисѧ мо́литсѧ. Семꙋ́ же по́мощїю свы́ше, и҆ си́лою и҆ подаѧ́нїемъ дх҃а є҆ди́нымъ и҆спра́витисѧ мо́щно. Сꙋ́ть ли ᲂу҆́бѡ нѣ́цыи благода́ти сеѧ̀ сподоблѧ́ющїисѧ; Та́кѡ чи́стагѡ, и҆ невеще́ственнагѡ, и҆ нескве́рнагѡ дѣ́вства вѣнца̀ ѡ҆жида́ѧй, распина́етъ по́стническими трꙋды̀ пло́ть, ᲂу҆мерщвлѧ́етъ ᲂу҆́ды, ꙗ҆̀же на землѝ, продолжи́тельнымъ и҆ непреста́ннымъ воздержа́нїемъ, и҆стлѣва́ѧ внѣ́шнѧго человѣ́ка, и҆ и҆стончава́ѧ є҆го̀, и҆ ѡ҆бетшава́ѧ, и҆ и҆зсо́хшимъ содѣ́ловаѧ, да вѣ́рою, и҆ по́двиги, и҆ дѣ́йствїемъ благода́ти внꙋ́треннїй человѣ́къ ѡ҆бновлѧ́етсѧ де́нь ѿ днѐ, на лꙋ́чшее пред̾ꙋспѣва́ѧ, любо́вїю расты́й, кро́тостїю ᲂу҆краша́ѧсѧ, ра́дованїемъ дꙋ́ха веселѧ́сѧ, ми́ромъ хрⷭ҇то́вымъ любода́рствꙋемь, благода́тїю води́мь, благосты́нею стрего́мь, стра́хомъ бж҃їимъ ѡ҆бдержи́мь, ра́зꙋмомъ и҆ вѣ́дѣнїемъ ѡ҆свѣща́емь, премꙋ́дростїю просвѣща́емь, смиренномꙋ́дрїемъ наставлѧ́емь. Си́ми и҆ си̑мъ подо́бными добродѣ́тельми ѡ҆бновлѧ́емь, ᲂу҆́мъ ѿ дх҃а, бг҃ови́днагѡ ѡ҆́браза начерта́нїе въ себѣ̀ познава́етъ, и҆ влады́чнѧгѡ подо́бїѧ мы́сленнꙋю и҆ неизрече́ннꙋю добро́тꙋ ᲂу҆смотрѣва́етъ, и҆ самонаꙋче́нныѧ и҆ саморазꙋ́мныѧ премꙋ́дрости завѣща́тельнагѡ зако́на бога́тство постиза́етъ. И҆стончѝ ᲂу҆̀бо, ѽ ча́до! ю҆́ношескꙋю пло́ть, и҆ предрече́нными ᲂу҆тꙋчнѝ безсме́ртнꙋю дꙋ́шꙋ: предрече́нными добродѣ́тельми ѡ҆бновѝ ᲂу҆́мъ содѣ́йствїемъ дх҃а. Ю҆́ностнаѧ бо пло́ть, ᲂу҆тꙋчне́ннаѧ разли́чными бра́шны и҆ вїнопи́тїемъ, є҆́сть ꙗ҆́кѡ ве́прь гото́вый на заколе́нїе, є҆го́же раждеже́нїемъ тѣле́сныхъ сласте́й дꙋша̀ закала́етсѧ, и҆ распале́нїемъ ѕлы́ѧ по́хоти ᲂу҆́мъ плѣнѧ́етсѧ, противлѧ́тисѧ сластє́мъ плотски̑мъ не могі́й. Втече́нїе бо кро́ве, ѿхожде́нїе дх҃а содѣ́ловаетъ. Ѻ҆со́беннѡ же причаще́нїѧ вїна̀ нижѐ да ѡ҆бонѧ́етъ ю҆́ность: да не сꙋгꙋ́бымъ пожа́ромъ ꙗ҆влѧ́ющимсѧ во внꙋ́треннѣмъ дѣ́йствѣ стра́сти, и҆ ѿвнѣ̀ вїнопи́тїемъ ѡ҆блива́емь, и҆́миже сла́сть плотска́ѧ па́че возгара́етсѧ, дꙋхо́внꙋю сла́дость болѣ́зненнагѡ ᲂу҆миле́нїѧ ѿ неѧ̀ ѿжене́тъ, и҆ слїѧ́нїе и҆ нечꙋ́вствїе въ се́рдцѣ сотвори́тъ: но жела́нїѧ ра́ди дх҃о́внагѡ, и҆ воды̀ въ сы́тость ю҆́ношество да не прїе́млетъ: ѕѣлѡ́ бо къ содѣ́йствїю цѣломꙋ́дрїѧ помоществꙋ́етъ скꙋ́дость воды̀. И҆ сїѐ дѣ́ломъ и҆скꙋси́въ, самѣ́мъ тѣ́мъ и҆скꙋ́сомъ и҆звѣствова́нїе прїи́меши. Не бо̀ ꙗ҆́кѡ ꙗ҆ре́мъ нꙋ́жды тебѣ̀ наложи́ти хотѧ́ще, сїѐ законополага́емъ и҆лѝ повелѣва́емъ, но ꙗ҆́кѡ ᲂу҆мышле́нїю и҆ хꙋдо́жествꙋ бла́гꙋ къ содѣ́йствꙋ и҆́стиннагѡ дѣ́вства, и҆ и҆звѣ́стнагѡ цѣломꙋ́дрїѧ любе́знѣ поꙋча́емъ и҆ совѣ́тꙋемъ, самовла́стномꙋ твоемꙋ̀ произволе́нїю ѡ҆ставлѧ́юще твори́ти, є҆́же хо́щетъ.

Про́чее прїидѝ, и҆ ѡ҆ безслове́сной стра́сти гнѣ́ва ма́лѡ разсꙋ́димъ, всѧ́кꙋю дꙋ́шꙋ ѡ҆пꙋстоша́ющей, и҆ смꙋща́ющей, и҆ помрача́ющей, и҆ ѕвѣрє́мъ подо́бна человѣ́ка показꙋ́ющей во вре́мѧ движе́нїѧ и҆ дѣ́йствїѧ своегѡ̀, наипа́че же ᲂу҆добопоползнове́ннагѡ и҆ быстропрекло́ннагѡ къ не́й. Стра́сть сїѧ̀ ѻ҆со́беннѡ го́рдостїю ᲂу҆твержда́етсѧ, и҆ ᲂу҆крѣплѧ́етсѧ, и҆ не разори́ма быва́етъ, до́ндеже наплѧ́емо быва́етъ сїѐ дїа́вольское дре́во, го́рести и҆ гнѣ́ва и҆ ꙗ҆́рости, ѕло́ю го́рдости водо́ю, благоцвѣтꙋ́що и҆ благорастꙋ́що мно́гъ пло́дъ беззако́нїѧ прино́ситъ. И҆ та́кѡ неразори́мо быва́етъ въ дꙋшѝ зда́нїе лꙋка́выхъ, и҆мꙋ́що ᲂу҆твержде́нїе и҆ ᲂу҆крѣпле́нїе ѡ҆снова́нїѧ го́рдости. А҆́ще ᲂу҆́бѡ хо́щеши дре́вꙋ семꙋ̀ беззако́нїѧ, стра́сти, глаго́лю, го́рести, и҆ гнѣ́ва, и҆ ꙗ҆́рости въ тебѣ̀ и҆зсꙋши́тисѧ, и҆ безпло́днꙋ бы́ти, да сѣки́ра дх҃а прише́дши посѣче́тъ є҆̀, и҆ во ѻ҆́гнь вве́ржетъ, по є҆ѵⷢ҇льскомꙋ гла́сꙋ, и҆ потреби́тъ со всѧ́кою ѕло́бою: и҆ а҆́ще хо́щеши до́мꙋ семꙋ̀ беззако́нїѧ, є҆го́же лꙋка́вый зи́ждетъ ѕлѣ̀ въ дꙋшѝ при́снѡ, ꙗ҆́кѡ ка́менїе, вины̀ разли̑чныѧ благослѡ́вныѧ, и҆лѝ безсловє́сныѧ собира́ѧ, дѣла̀ вещества̀ и҆лѝ глаго́лы въ по́мыслѣхъ, и҆ зда́нїе ѕло́бы въ дꙋшѝ соѡрꙋжа́ѧ, въ ᲂу҆твержде́нїе и҆ ᲂу҆крѣпле́нїе по́мыслы го́рдости подлага́ѧ: а҆́ще глаго́лю, хо́щеши семꙋ̀ до́мꙋ разори́тисѧ и҆ раскопа́тисѧ: то̀ и҆мѣ́й смире́нїе гдⷭ҇не незабве́нно въ се́рдцѣ твое́мъ, кто̀ сы́й, и҆ что̀ бы́сть на́съ ра́ди, и҆ ѿ ꙗ҆ковы́ѧ высоты̀ свѣ́та бж҃ества̀ ѿкрове́ннагѡ, по си́лѣ го́рнихъ сꙋще́ствъ, и҆ на небесѣ́хъ сла́вимагѡ ѿ всегѡ̀ слове́снагѡ є҆стества̀ а҆́гг҃лъ, а҆рха̑гг҃лъ, престѡ́лъ, гдⷭ҇ьствїй, нача̑лъ, власте́й, херꙋві̑мъ и҆ серафі̑мъ, и҆ не и҆менꙋ́емыхъ ᲂу҆́мныхъ си́лъ, и҆́хже не достиго́ша къ на́мъ и҆мена̀, по проро́чествꙋ а҆по́стола, въ ꙗ҆ковꙋ̀ глꙋбинꙋ̀ смире́нїѧ человѣ́ческагѡ по неизрече́нной бла́гости сни́де по всемꙋ̀ ᲂу҆подо́бльсѧ на́мъ, во тьмѣ̀ и҆ сѣ́ни сме́ртнѣй сѣдѧ́щымъ, и҆ а҆да́мовымъ престꙋпле́нїемъ плѣ́нникѡмъ бы́вшымъ, и҆ дѣ́йствїемъ страсте́й ѿ врага̀ ѡ҆блада́ємымъ. Въ таковѣ́мъ ᲂу҆́бѡ плѣне́нїи лю́тѣ сꙋ́щымъ на́мъ, и҆ ѡ҆блада́ємымъ ѿ неви́димыѧ и҆ го́рькїѧ сме́рти, не постыдѣ́сѧ влⷣка всеѧ̀ тва́ри ви́димыѧ и҆ неви́димыѧ: но смири́въ себѐ, и҆ воспрїе́мь ѿ страсте́й безче́стїѧ, и҆ запреще́нїѧ, и҆ влады́чнѧгѡ и҆зрече́нїѧ ѡ҆сꙋжде́ннагѡ человѣ́ка, по всемꙋ̀ подо́бенъ на́мъ бы́сть кромѣ̀ грѣха̀, то́ є҆сть кромѣ̀ страсте́й безче́стїѧ. Наведє́ннаѧ бо грѣха̀ ра́ди престꙋплє́нїѧ ѿ влады́чнѧгѡ и҆зрече́нїѧ человѣ́кꙋ въ наказа́нїе, си́рѣчь сме́рть, трꙋ́дъ, а҆́лчбꙋ, жа́ждꙋ, и҆ такова̑ѧ всѧ̑ воспрїѧ́тъ, бы́въ є҆́же мы̀ є҆смы̀: да бꙋ́демъ, є҆́же ѻ҆́нъ є҆́сть, сло́во пло́ть бы́сть, да пло́ть бꙋ́детъ сло́во: бога́тъ сы́й ѡ҆бнища̀ на́съ ра́ди, да мы̀ нището́ю ѻ҆́нагѡ ѡ҆богати́мсѧ: ᲂу҆подо́бисѧ мно́гагѡ ра́ди человѣколю́бїѧ на́мъ, да всѧ́кою добродѣ́телїю ᲂу҆подо́бимсѧ мы̀ є҆мꙋ̀. Ѿне́леже бо прїи́де хрⷭ҇то́съ, вои́стиннꙋ по ѡ҆́бразꙋ и҆ по подо́бїю но́вый человѣ́къ благода́тїю дх҃а и҆ си́лою ѡ҆бновлѧ́етсѧ, въ мѣ́рꙋ соверше́нныѧ любвѐ достиза́ющи, во́нъ и҆згонѧ́ющїѧ стра́хъ, не ктомꙋ̀ под̾ паде́нїемъ бы́ти могꙋ́щыѧ: любы́ бо никогда́же па́даетъ.⁵⁸ Бг҃ъ бо, глаго́летъ і҆ѡа́ннъ, любы̀ є҆́сть, и҆ пребыва́ѧй въ любвѝ, въ бз҃ѣ пребыва́етъ. Сеѧ̀ мѣ́ры сподо́бившесѧ а҆по́столи, и҆ подо́бнѣ тѣ́мъ добродѣ́тели ѡ҆бꙋчи́вшїисѧ, и҆ соверше́нныхъ себѐ гдⷭ҇еви предста́вльшїи, и҆ соверше́ннымъ жела́нїемъ во все́й жи́зни свое́й хрⷭ҇тꙋ̀ послѣ́довавшїи. Таково́е ᲂу҆́бѡ смире́нїе, є҆́же любвѐ ра́ди къ на́мъ неизрече́ннымъ человѣколю́бїемъ воспрїѧ́тъ гдⷭ҇ь, а҆́ще всегда̀ незабве́ннѡ разсмотрѣва́еши, то́ є҆сть, въ ложесна́хъ бг҃а сло́ва вселе́нїе, воспрїѧ́тїе человѣ́ка, рожде́нїе ѿ жены̀, тѣле́снагѡ во́зраста по ча́сти растѣ́нїе, безче́стїе, доса̑ды, поношє́нїѧ, порꙋга̑нїѧ, ᲂу҆корє́нїѧ, бїє́нїѧ, ѡ҆плева̑нїѧ, насмѣѧ́нїе, нарꙋга́нїе, червле́ннꙋю хламѵ́дꙋ, терно́вый вѣне́цъ, кнѧзе́й на него̀ и҆зрече́нїе, беззако́нныхъ і҆ꙋдє́й є҆диноплеме́нныхъ сꙋ́щихъ на него̀ вопи́тїе: Возмѝ, возмѝ, распнѝ є҆го̀:⁵⁹ крⷭ҇тъ, гво́здїе, копїѐ, напаѧ́нїе ѻ҆́цтомъ и҆ же́лчемъ, торжествова́нїе ꙗ҆зы́кѡвъ, насмѣѧ́нїе тѣ́хъ, и҆̀же хожда́хꙋ и҆ глаго́лахꙋ: а҆́ще сн҃ъ є҆сѝ бж҃їй, сни́ди со креста̀, и҆ вѣ́рꙋемъ въ тѧ̀:⁶⁰ и҆ прѡ́чїѧ стра̑сти, ꙗ҆̀же на́съ ра́ди претерпѣ̀: распѧ́тїе, сме́рть, тридне́вное во гро́бѣ погребе́нїе, во а҆́дъ соше́ствїе, та́же страсте́й приплѡ́дїѧ ꙗ҆ковы̑ и҆ кі̑ѧ; то́ є҆сть, и҆з̾ ме́ртвыхъ воскресе́нїе, а҆́да и҆ сме́рти плѣне́нїе, ше́дшихъ съ гдⷭ҇емъ дꙋ́шъ на небеса̀ вознесе́нїе, ѡ҆деснꙋ́ю ѻ҆ц҃а̀ сѣдѣ́нїе, превы́ше всѧ́кагѡ нача́льства и҆ вла́сти, и҆ всѧ́кагѡ и҆́мене и҆менꙋ́емагѡ, че́сть и҆ сла́вꙋ, всѣ́хъ а҆́гг҃лъ поклоне́нїе пе́рвенцꙋ ме́ртвыхъ, вины̀ ра́ди страсте́й,⁶¹ по а҆по́стольскомꙋ сло́вꙋ глаго́лющемꙋ: Сїѐ да мꙋ́дрствꙋетсѧ въ ва́съ, є҆́же и҆ во хрⷭ҇тѣ̀ і҆и҃сѣ, и҆́же во ѡ҆́бразѣ бж҃їи сы́й, не восхище́нїемъ непщева̀ бы́ти ра́венъ бг҃ꙋ, но себѐ ᲂу҆ма́лилъ, зра́къ раба̀ прїи́мъ, въ подо́бїи человѣ́честѣмъ бы́въ, и҆ ѡ҆́бразомъ ѡ҆брѣ́тесѧ, ꙗ҆́коже человѣ́къ, смири́лъ себѐ, послꙋшли́въ бы́въ да́же до сме́рти, сме́рти же крⷭ҇тныѧ. Тѣ́мже и҆ бг҃ъ є҆го̀ превознесѐ, и҆ дарова̀ є҆мꙋ̀ и҆́мѧ, є҆́же па́че всѧ́кагѡ и҆́мене: да ѡ҆ и҆́мени і҆и҃съ хрⷭ҇то́вѣ всѧ́ко колѣ́но поклони́тсѧ небе́сныхъ и҆ земны́хъ, и҆ преиспо́днихъ, и҆ прѡ́чаѧ.⁶² Сѐ предрече́нныхъ вины̑ по пра́вдѣ бж҃їей, въ каковѐ сла́вꙋ и҆ высотꙋ̀ гдⷭ҇нѧ человѣ́ка возведо́ша! Тѣ́мже а҆́ще любо́вїю и҆ жела́нїемъ незабве́ннѡ па́мѧтовати сїѧ̑ бꙋ́деши въ се́рдцѣ твое́мъ, не и҆́мать ѡ҆блада́ти тобо́ю стра́сть го́рести гнѣ́ва и҆ ꙗ҆́рости. Ѡ҆снова́нїемъ бо стра́сти го́рдости, смире́нїемъ хрⷭ҇то́вымъ, є҆́же разсмотрѣва́еши, на ве́рхъ и҆зше́дшымъ, всѐ зда́нїе беззако́нїѧ, ꙗ҆́рости, гнѣ́ва и҆ печа́ли ᲂу҆до́бнѣ и҆ са́мо ѡ҆ себѣ̀ разорѧ́етсѧ. Ко́е бо жесто́кое и҆ ка́менное се́рдце, а҆́ще и҆́мать во ᲂу҆мѣ̀ при́снѡ толи́кое є҆диноро́днагѡ бж҃ество̀, на́съ ра́ди смири́вшеесѧ, и҆ и҆счи́сленныхъ предрече́нныхъ страсте́й па́мѧть не сокрꙋши́тсѧ, не ᲂу҆мили́тсѧ, не смири́тсѧ; не землѧ́ ли и҆ пе́пелъ, и҆ попра́нїе ѿ всѣ́хъ человѣ̑къ во́льнѣ, по писа́нїю, бꙋ́детъ; та́коже смирѧ́емѣй и҆ сокрꙋша́емѣй дꙋшѣ̀, на смире́нїе хрⷭ҇то́во смотрѧ́ющей, ка́ѧ ꙗ҆́рость є҆́ю воз̾ѡблада́ти возмо́жетъ; кі́й гнѣ́въ; ка́ѧ го́ресть ѡ҆долѣ́ти; Но ꙗ҆́коже мни́тсѧ, забве́нїе по́льзꙋющихъ си́хъ, и҆ животворѧ́щихъ ны̀ по́мыслѡвъ, и҆ сестра̀ є҆гѡ̀ ᲂу҆ны́нїе, и҆ си̑мъ содѣ́йствꙋющее и҆ є҆динонра́вное невѣ́дѣнїе, тѧжча́йшыѧ внꙋ́треннѣйшыѧ дꙋшѝ стра̑сти, неꙋдобоѡбрѣта́ємыѧ, и҆ неꙋдобоисправлѧ́ємыѧ любопы́тствомъ лю́тымъ дꙋ́шꙋ покрыва́юще и҆ помрача́юще, прѡ́чимъ ѕло́бы страстє́мъ дѣ́йствовати и҆ кры́тисѧ въ не́й сотворѧ́ютъ: занѐ безстра́шїе и҆ нерадѣ́нїе ѡ҆ до́брыхъ дѣ́лѣхъ влага́ютъ, входи́ти же и҆ дѣ́йствовати ка́ждой стра́сти де́рзостнѣ ᲂу҆до́бь попꙋща́ютъ. Покрове́ннѣй бо дꙋшѝ ѿ всеѕла́гѡ забве́нїѧ, и҆ гꙋби́тельнагѡ ᲂу҆ны́нїѧ, и҆ всѣ́хъ ѕѡ́лъ ма́тере и҆ пита́тельницы невѣ́дѣнїѧ, къ коемꙋ́ждо ѿ ви́димыхъ, и҆лѝ разꙋмѣва́емыхъ, и҆лѝ слы́шимыхъ ᲂу҆до́бь привѧзꙋ́етсѧ ѻ҆каѧ́нный и҆ слѣпотствꙋ́ющїй ᲂу҆́мъ: си́рѣчь, а҆́ще добро́тꙋ ᲂу҆ви́дитъ жены̀, а҆́бїе ᲂу҆ѧзвлѧ́етсѧ плотско́ю по́хотїю. И҆ та́кѡ про́чее прее́мстовавше па́мѧти встра́ственнѣ, и҆ сла́дцѣ ви́дѣнное, и҆лѝ слы́шанное, и҆лѝ ѡ҆сѧ́занное воѡбраже́нїемъ мы́слей, и҆ ѕлы́мъ поꙋче́нїемъ внꙋ́трь ѡ҆́бразы живонаписꙋ́ютъ. И҆ та́кѡ ѡ҆стра́ственный є҆щѐ и҆ ѻ҆каѧ́нный ѡ҆сквернѧ́ютъ ᲂу҆́мъ дѣ́йствїемъ блꙋ́дныхъ дꙋхѡ́въ. Про́чее бо и҆ пло́ть, а҆́ще бꙋ́детъ тꙋчна̀, и҆лѝ ю҆нѣ́йша, и҆лѝ мокро́тнѣйша, таковы́ми воспомина́нїѧми ᲂу҆до́бь возбꙋжда́ема, стра́стїю дѣ́йствꙋетъ своѧ̑ сѝ, къ по́хоти дви́жꙋщисѧ, и҆лѝ ѻ҆вогда̀ во снѣ̀, и҆лѝ ꙗ҆́вѣ ничистотꙋ̀ дѣ́лающи, а҆́ще во ви́димыхъ женѣ̀ и҆ не прїѡбщи́лсѧ є҆́сть. Цѣломꙋ́дрымъ, и҆ дѣ́вственникомъ, и҆ чи́стымъ ѿ мно́гихъ почита́емый, а҆́ще и҆ свѧ́та мни́тъ себѧ̀, пред̾ та̑йнаѧ же назира́ющимъ скве́рненъ, и҆ блꙋдни́къ, и҆ прелюбодѣ́й сꙋ́дитсѧ бы́ти, и҆ пра́веднѣ во ѻ҆́нъ де́нь ѡ҆сꙋжда́етсѧ, а҆́ще не пла́четъ, и҆ рыда́етъ, и҆ поще́ньми и҆ бдѣ́нїи, и҆ моли́твами непреста́нными пло́ть и҆ста́ѧвъ, и҆ ᲂу҆́мъ воспомина́ньми и҆ поꙋче́нїи сло́ва бж҃їѧ и҆сцѣли́въ, и҆ и҆спра́вивъ, досто́йное покаѧ́нїе бг҃ови не принесе́тъ, пред̾ ни́мже ѕла̑ѧ помы́слилъ є҆́сть, и҆лѝ сотвори́лъ. Нело́женъ бо є҆́сть живы́й гла́съ ре́кшїй: А҆́зъ же глаго́лю ва́мъ: всѧ́къ, и҆́же воззри́тъ на женꙋ̀, ко є҆́же вожделѣ́ти є҆ѧ̀, ᲂу҆жѐ любодѣ́йствова съ не́ю въ се́рдцѣ свое́мъ.⁶³ Сегѡ̀ ра́ди поле́зно є҆́сть ю҆́нымъ наипа́че, є҆́же ѿню́дъ, а҆́ще мо́щно є҆́сть, не бесѣ́довати со жена́ми, а҆́ще и҆ свѧ́ты бы́ти мнѧ́тсѧ: а҆́ще ли же мо́щно, и҆ внѣ̀ человѣ̑къ пребыва́ти, легча́йшꙋ бра́нь соверша́етъ, и҆ ꙗ҆снѣ́е разꙋмѣ́етъ своѐ предспѣ́ѧнїе: па́че же, а҆́ще ѻ҆па́снѣ внима́етъ себѣ̀, и҆ съ малотре́бованїемъ, и҆ малопи́тїемъ воды̀, и҆ бдѣ́нїемъ мно́гимъ въ моли́твѣ пребыва́етъ, подвиза́ѧсѧ и҆ съ дх҃о́вными и҆скꙋ́сными ѻ҆тцы̀ соѡбраща́тисѧ и҆ сопребыва́ти, и҆ наставлѧ́тисѧ ѿ ни́хъ тща́сѧ. Бѣ́дственно бо наединѣ̀, и҆ самочи́нно и҆ несвидѣ́тельствованно, и҆ съ неискꙋ́сными дх҃о́вныѧ бра́ни вкꙋ́пѣ жи́ти: и҆нѣ́ми бо ѡ҆́бразы бра́ней такові́и є҆́млеми быва́ютъ. Занѐ мнѡ́гїѧ сꙋ́ть ѕло́бы кѡ́зни, и҆ подса̑ды сокровє́нны, и҆ разли̑чныѧ сѣ̑ти вра́жїѧ ѿвсю́дꙋ водрꙋже́ни сꙋ́ть. Сегѡ̀ ра́ди, а҆́ще мо́щно є҆́сть, вкꙋ́пѣ ходи́ти, си́рѣчь ча́стѡ приходи́ти къ разꙋ́мнымъ мꙋжа́мъ тща́тисѧ подоба́етъ, и҆ подвиза́тисѧ, ꙗ҆́кѡ да а҆́ще са́мъ и҆ не и҆́мать свѣти́льника и҆́стинна ра́зꙋма, за несоверше́нность є҆щѐ ᲂу҆́мнагѡ во́зраста, и҆ младе́нчество: то со и҆мꙋ́щимъ вкꙋ́пѣ ше́ствꙋѧ, не хо́дитъ во тьмѣ̀, не бѣ́дствꙋетъ ѿ тене́тъ и҆ сѣ́тей, и҆ въ мы́слєнныѧ не па́даетъ ѕвѣ́ри, во тьмѣ̀ пасꙋ́щыѧсѧ, и҆ въ не́й без̾ ᲂу҆́мнагѡ свѣти́льника бж҃е́ственнагѡ сло́ва ходѧ́щихъ похища́ющыѧ и҆ ᲂу҆бива́ющыѧ. А҆́ще ᲂу҆́бѡ хо́щеши, ча́до, свѣти́льникъ сво́й ᲂу҆́мнагѡ свѣ́та и҆ ра́зꙋма дх҃о́внагѡ внꙋ́трь ᲂу҆́дꙋ и҆мѣ́ти, да не преткнове́ннѡ во глꙋбоча́йшей но́щи вѣ́ка сегѡ̀ ходи́ти возмо́жеши, и҆ ѿ гдⷭ҇а стѡпы̀ твоѧ̑ напра́вѧтсѧ,⁶⁴ ꙗ҆́кѡ да пꙋтѝ є҆ѵⷢ҇лїа восхо́щеши ѕѣлѡ̀, по проро́ческомꙋ словесѝ, то́ є҆сть, съ вѣ́рою горѧча́йшею соверше́ннѣйшыѧ є҆ѵⷢ҇льскїѧ за́пѡвѣди проходи́ти, и҆ стрⷭ҇те́й гдⷭ҇нихъ жела́нїемъ и҆ моли́твою прича́стникъ бы́ти: показꙋ́ю тебѣ̀ хꙋдо́жество ди́вное, и҆ ᲂу҆мышле́нїе нра́ва дꙋхо́внагѡ, не тѣле́снагѡ трꙋда̀, и҆лѝ по́двига тре́бꙋющее, но дꙋше́внагѡ трꙋда̀, и҆ ᲂу҆ма̀ настоѧ́тельства, и҆ внима́тельныѧ мы́сли тре́бꙋющее. стра́хомъ и҆ любо́вїю бж҃їею поспѣшествꙋ́емое, и҆́мже ᲂу҆мышле́нїемъ по́лкъ вра́жескїй ᲂу҆до́бь побѣди́ти возмо́жеши, по примѣ́рꙋ блаже́ннагѡ даві́да, ᲂу҆би́вшагѡ є҆ди́наго и҆споли́на ѿ и҆ноплемє́нникъ вѣ́рою и҆ ᲂу҆пова́нїемъ на бг҃а, и҆ та́кѡ тьмы̀ врагѡ́въ ᲂу҆до́бь со свои́ми людьмѝ побѣди́вшагѡ. Содержа́нїе же на́шегѡ сло́ва тре́хъ си́льныхъ и҆ крѣ́пкихъ и҆ноплеме́нничихъ и҆споли́нѡвъ зри́тъ, на ни́хже ᲂу҆твержда́етсѧ всѧ̀ мы́сленнагѡ ѻ҆лофе́рна сопроти́внаѧ си́ла: и҆̀мже низложє́ннымъ и҆ ᲂу҆мерщвлє́ннымъ бы́вшымъ, ᲂу҆до́бь про́чее во ᲂу҆бїе́нїи всѧ́каѧ лꙋка́выхъ дꙋхѡ́въ и҆знемо́жетъ си́ла. Сꙋ́ть же и҆споли́ни лꙋка́вагѡ, мнѧ́щїисѧ крѣ́пцы, трѝ ᲂу҆жѐ предрече́ннїи: невѣ́дѣнїе, ма́ти всѣ́хъ ѕѡ́лъ: забве́нїе, сестра̀ сегѡ̀, и҆ содѣ́йственница, и҆ помо́щница: и҆ ᲂу҆ны́нїе, те́мнꙋю че́рнагѡ ѻ҆́блака ѻ҆де́ждꙋ, и҆ покрыва́ло дꙋшѝ соткава́ющее, и҆ пє́рвыѧ ѻ҆́ба ᲂу҆твержда́ющее и҆ ᲂу҆крѣплѧ́ющее, и҆ составле́нїе си̑мъ подаю́щее, и҆ въ неради́вѣйшей дꙋшѣ̀ ѕло̀ всажде́ннымъ и҆ тве́рдымъ содѣ́ловающее. Ѿ ᲂу҆ны́нїѧ бо, забве́нїѧ же и҆ невѣ́дѣнїѧ, про́чихъ страсте́й подтверждє́нїѧ ᲂу҆крѣплѧ́ютсѧ и҆ ᲂу҆вели́чиваютсѧ. Помѡ́щницы бо дрꙋ́гъ дрꙋ́гꙋ сꙋ́ще, и҆ є҆ди́но без̾ дрꙋга́гѡ соста́витисѧ не могꙋ́ще, крѣ́пкими сопроти́внагѡ си́лами показꙋ́ютсѧ, и҆ крѣ́пкими лꙋка́вагѡ кнѧ̑зи, и҆́миже всѐ во́инство дꙋхѡ́въ лꙋка́вствїѧ ѡ҆браща́етсѧ и҆ подтвержда́етсѧ, и҆ помышлє́нїѧ соверша́ти возмога́етъ, без̾ ни́хже соста́витисѧ предречє́ннаѧ не мо́гꙋтъ. А҆́ще ᲂу҆́бѡ хо́щеши над̾ страстьмѝ предрече́нными побѣ́дꙋ ѡ҆держа́ти, и҆ по́лкъ мы́сленныхъ и҆ноплемє́нникъ ᲂу҆до́бь побѣди́ти, моли́твою и҆ содѣ́йствомъ бж҃їимъ въ себѐ прише́дъ, и҆ во глꙋбинꙋ̀ се́рдца входѧ̀, и҆зслѣ́дꙋй тре́хъ си́хъ си́льныхъ дїа́вола и҆споли́нѡвъ: забве́нїе, глаго́лю, и҆ ᲂу҆ны́нїе, и҆ невѣ́дѣнїе, подтвержде́нїе мы́сленныхъ и҆ноплемє́нникъ, и҆́миже прѡ́чїѧ ѕло́бы стра̑сти ѡ҆браща́ющесѧ дѣ́йствꙋютъ и҆ живꙋ́тъ, и҆ возмога́ютъ въ сердца́хъ сластолю́бцєвъ, и҆ въ дꙋша́хъ ненака́занныхъ. И҆ мно́гимъ внима́нїемъ, и҆ ᲂу҆ма̀ настоѧ́тельствомъ съ по́мощїю, ꙗ҆́же свы́ше, ѡ҆брѣ́тъ про́чымъ невѣ́дѡмаѧ, и҆ нижѐ бы́ти непщꙋ́ємаѧ, гꙋби́тєльнѣйшаѧ же про́чихъ сꙋ̑ща ѕла̑ѧ, ѻ҆рꙋ́жїи пра́вды сопроти́вными ѻ҆́нѣмъ, па́мѧтїю благо́ю, глаго́лю, вино́ю, всѣ́хъ благи́хъ, и҆ ра́зꙋмомъ просвѣще́ннымъ, и҆́мже бо́дрствꙋющи дꙋша̀ тьмꙋ̀ невѣ́дѣнїѧ ѿгонѧ́етъ ѿ себѐ, и҆ ᲂу҆се́рдїемъ и҆зрѧ́днѣйшимъ ко спасе́нїю ᲂу҆готовлѧ́ющимъ, и҆ возбꙋжда́ющимъ дꙋ́шꙋ: въ сїѧ̑ добродѣ́тели ѻ҆рꙋ̑жїѧ ѡ҆бле́кшисѧ, си́лою дх҃а ст҃а́гѡ, всѧ́кою моли́твою и҆ моле́нїемъ до́блественѣ и҆ мꙋ́жественнѣ побѣди́ши мы́слєнныѧ и҆ноплеме́нники, предречє́нныѧ трѝ и҆споли́ны, и҆зрѧ́днѣйшꙋю па́мѧтїю бг҃а: є҆ли̑ка сꙋ́ть и҆́стинна, є҆ли̑ка чє́стна, є҆ли̑ка пра́вєдна, є҆ли̑ка пречи̑ста, є҆ли̑ка доброхва̑льна, а҆́ще ка́ѧ добродѣ́тель, и҆ а҆́ще ка́ѧ похвала̀, всегда̀ помышлѧ́ѧ,⁶⁵ всеѕлѣ́йшее забве́нїе ѿ себѐ ѿгонѧ́ѧ: просвѣще́ннымъ же и҆ нбⷭ҇нымъ ра́зꙋмомъ гꙋби́тельное невѣ́дѣнїе тьмы̀ и҆стреблѧ́ѧ: вседобродѣ́тельнымъ же и҆ добрѣ́йшимъ ᲂу҆се́рдїемъ безбо́жное ᲂу҆ны́нїе, содѣ́ловающее ѕло̀ въ дꙋшѣ̀ всажде́ннымъ и҆згонѧ́ѧ. Сїѧ̑ же добродѣ́тєли не просты́мъ є҆ди́нѣмъ произволе́нїемъ, но си́лою бж҃їею и҆ содѣ́йствомъ дх҃а ст҃а́гѡ со мно́гимъ внима́нїемъ и҆ моли́твою стѧжа́въ, та́кѡ возмо́жеши и҆зба́витисѧ предрече́нныхъ крѣ́пкихъ трїе́хъ и҆споли́нѡвъ лꙋка́вагѡ. Ра́зꙋма бо и҆́стиннагѡ, и҆ па́мѧти слове́съ бж҃їихъ, и҆ блага́гѡ ᲂу҆се́рдїѧ согла́сїемъ, благода́тїю дѣ́йственною въ дꙋшѣ̀ соста́витисѧ нꙋ́дѧщимсѧ, и҆ прилѣ́жнѡ хранѧ́щимсѧ: забве́нїѧ и҆ невѣ́дѣнїѧ, и҆ ᲂу҆ны́нїѧ слѣ́дъ въ не́й потреблѧ́етсѧ, и҆ въ не сꙋ́щее превраща́етсѧ, благода́ти про́чее ца́рствꙋющей въ не́й, ѡ҆ хрⷭ҇тѣ̀ і҆и҃сѣ гдѣ̀ на́шемъ, є҆мꙋ́же сла́ва и҆ держа́ва во вѣ́ки вѣкѡ́въ, а҆ми́нь.

Ст҃ы́й ѻ҆тє́цъ на́шъ сѷмеѡ́нъ, по дарова́ннѣй є҆мꙋ̀ ѿ бг҃а благода́ти богосло́вїѧ, нарече́нный но́вый богосло́въ, бѣ̀ во вре́мѧ ца́рствованїѧ кѡнстанті́на порфѷроро́днагѡ, въ десѧ́томъ столѣ́тїи по ржⷭ҇твѣ̀ хрⷭ҇то́вѣ. Оу҆ченико́мъ же бы́вши сѷмеѡ́на, нарица́емагѡ благочести́вагѡ, и҆ ѿ негѡ̀ по́стничєскимъ по́двигамъ ѡ҆бꙋчи́вшисѧ, до толи́кїѧ высоты̀ добродѣ́тели и҆ безстра́стїѧ вознесе́сѧ, и҆ то́ль бога́тнѡ бж҃е́ственныѧ благода́ти сподо́бисѧ, что̀ є҆два̀ возмо́жно писа́нїемъ преда́ти ѡ҆ не́мъ ꙗ҆́коже ѡ҆писа́нїе житїѧ̀ є҆гѡ̀, бꙋ́дꙋчи многості́шно, па́че всѧ́кагѡ и҆но́гѡ простра́ннѣйше повѣствꙋ́етъ. Всю́ бо, ꙗ҆́коже рещѝ, си́лꙋ ᲂу҆тѣ́шителѧ дх҃а въ себѧ̀ прїѧ́въ, и҆ прїѧ́телищемъ сїѧ́нїй є҆гѡ̀ бы́въ, показа́сѧ богосло́вїѧ и҆сто́чникъ, бж҃е́ственнагѡ просвѣще́нїѧ гости́нница, та̑инъ неизрече́нныхъ сладча́йшее ѻ҆бита́лище, и҆ вкра́тцѣ рещѝ, всѧ́кїѧ премꙋ́дрости и҆ бж҃е́ственнагѡ ра́зꙋма жили́ще. Се́ю си́лою просвѣща́емь бꙋ́дꙋчи, многоразли́чныхъ мы́слей сочинє́нїѧ, и҆ по стїха́мъ, и҆ по слова́мъ пи́санныѧ соста́вилъ, число̀ почтѝ превыша́ющыѧ, и҆ мно́гїѧ по́льзы и҆спо́лнєнныѧ. Ѿ ни́хже то́чїю настоѧ́щыѧ и҆збра́вше, въ се́й кни́зѣ положи́хомъ: мно́гаѧ бо и҆ незави́стнаѧ ѿ ѻ҆́ныхъ ѿкрыва́етсѧ чтꙋ́щымъ по́льза.

а҃. Вѣ́ра є҆́сть, є҆́же хрⷭ҇та̀ ра́ди за за́повѣдь є҆гѡ̀ ᲂу҆мре́ти, и҆ вѣ́ровати, ꙗ҆́кѡ сме́рть сїѧ̀ жи́зни вино́вна є҆́сть: ᲂу҆бо́жество, ꙗ҆́кѡ бога́тство вмѣнѧ́ти: хꙋ́дость и҆ ᲂу҆ничиже́нїе, ꙗ҆́кѡ сла́вꙋ вои́стиннꙋ и҆ свѣ́тлость: и҆ внегда̀ ничто́же и҆́мамы, вѣ́ровати, ꙗ҆́кѡ всѧ̑ соде́ржимъ. Па́че же стѧжа́ти неизслѣ́дное бога́тство ра́зꙋма хрⷭ҇то́ва, и҆ ꙗ҆́кѡ на бре́нїе и҆лѝ ды́мъ, на всѧ̑ ви̑димаѧ взира́ти.

в҃. Вѣ́ра во хрⷭ҇та̀ є҆́сть, є҆́же не то́чїю презрѣ́ти, ꙗ҆̀же въ житїѝ сꙋ́ть сла́дѡстнаѧ, но и҆ є҆́же понестѝ и҆ претерпѣ́ти всѧ́ко и҆скꙋше́нїе грѧдꙋ́щее съ печа́льми и҆ скорбьмѝ и҆ бѣда́ми, до́ндеже восхо́щетъ и҆ посѣти́тъ на́съ бг҃ъ: Терпѧ́ бо, глаго́летъ даві́дъ, потерпѣ́хъ гдⷭ҇а, и҆ внѧ́тъ мѝ⁶⁶.

г҃. Предпочита́ющїи свои́хъ роди́телей въ нѣ́чесомъ за́повѣди бж҃їей, вѣ́ры не стѧжа́ша ко хрⷭ҇тꙋ̀: всѧ́кѡ бо ѿ своеѧ̀ сꙋ́дѧтсѧ со́вѣсти, а҆́ще со́вѣсть жи́вꙋ и҆́мꙋтъ въ невѣ́рїи свое́мъ: вѣ́рныхъ бо сїѐ є҆́сть, є҆́же ѿню́дъ ни въ чесо́мъ за́повѣдь вели́кагѡ бг҃а и҆ сп҃са на́шегѡ і҆и҃са хрⷭ҇та̀ не престꙋпа́ти.

д҃. Вѣ́ра, ꙗ҆́же во хрⷭ҇та̀ и҆́стиннаго бг҃а, жела́нїе добра̀ ражда́етъ, и҆ стра́хъ мꙋче́нїй: жела́нїе же лꙋ́чшагѡ и҆ стра́хъ мꙋче́нїй, блюде́нїе ѻ҆па́сное за́повѣдей содѣ́ловаетъ: ѻ҆па́сное же за́повѣдей блюде́нїе, свое́й не́мощи человѣ́ки и҆з̾ꙋча́етъ: разꙋмѣ́нїе же и҆́стинныѧ не́мощи на́шеѧ, па́мѧть сме́рти ражда́етъ: сожи́тельницꙋ же сїю̀ стѧжа́вый, наꙋчи́тисѧ болѣ́зненнѡ взы́щетъ, каково̀ бꙋ́детъ є҆мꙋ̀ по и҆схо́дѣ ѿ житїѧ̀ сегѡ̀ ѿше́ствїе. Бꙋ̑дꙋщаѧ же разꙋмѣ́ти тща́йсѧ, пе́рвѣе всѣ́хъ себѐ лиши́ти настоѧ́щихъ до́лженъ є҆́сть: въ си́хъ бо да́же и҆ до хꙋда́гѡ чесогѡ̀ ѿ пристра́стїѧ держи́мый, ѻ҆́нѣхъ ра́зꙋма соверше́нна не мо́жетъ стѧжа́ти. А҆́ще же сегѡ̀ и҆ вкꙋ́ситъ по смотре́нїю бж҃їю, а҆́ще не скорѣ́е та̑ѧ ѡ҆ста́витъ, ѿ ни́хже и҆ въ ни́хже по пристра́стїю держи́мь є҆́сть, и҆ ве́сь такова́гѡ не бꙋ́детъ и҆спо́лненъ ра́зꙋма, ничто́же па́че сегѡ̀ и҆́но ѿвнѣꙋ́дꙋ разꙋмѣ́ти во́лею прїе́млѧ: и҆ то̀, є҆́же мни́тсѧ и҆мѣ́ти, во́зметсѧ ѿ негѡ̀.

є҃. Ѿрече́нїе мі́ра, и҆ всеконе́чное ѿше́льствїе, воспрїе́мшее ѿ всѣ́хъ ᲂу҆стране́нїе, ꙗ҆̀же сꙋ́ть въ житїѝ, веще́ствъ, и҆ нра́вѡвъ, и҆ произволе́нїй, и҆ ли́цъ, и҆ ѿверже́нїе тѣ́ла и҆ во́ли, вели́кїѧ по́льзы вино́вно быва́етъ, та́кѡ те́плѣ ѿре́кшемꙋсѧ въ кра́тцѣ вре́мени.

ѕ҃. Оу҆бѣга́ѧ мі́ра, зрѝ, да не да́си дꙋ́шꙋ твою̀ во ᲂу҆тѣше́нїе, въ нача́лѣ во ѻ҆́номъ ѡ҆бита́ѧ, а҆́ще и҆ всѝ срѡ́дницы и҆ дрꙋ́зи сїѐ твори́ти тѧ̀ понꙋжда́ютъ: сїе́ бо ѻ҆́нѣмъ бѣ́сове совѣ́тꙋютъ, ꙗ҆́кѡ да теплотꙋ̀ погасѧ́тъ твоегѡ̀ се́рдца. А҆́ще бо и҆ несоверше́ннѣ воспрепѧ́тствꙋютъ намѣ́ренїю, но слабѣ́йше сїѐ всѧ́кѡ и҆ не́мощно содѣ́лаютъ.

з҃. Є҆гда̀ ко всѣ̑мъ житїѧ̀ сегѡ̀ сла́достемъ ѡ҆брѧ́щешисѧ мꙋ́жественъ и҆ без̾ꙋтѣ́шенъ: тогда̀ а҆́кибы къ милосе́рдїю бѣ́сове, сро́дникѡвъ ѡ҆брати́вше, пла́кати возбꙋ́дѧтъ и҆ рыда́ти пред̾ лице́мъ твои́мъ тебѐ ра́ди. И҆ сїѐ и҆́стинно бы́ти позна́еши, є҆гда̀ ты̀ ᲂу҆́бѡ непрело́женъ въ се́мъ пребꙋ́деши прило́зѣ, а҆ ѻ҆́нѣхъ въ неи́стовство, є҆́же на тѧ̀, и҆ не́нависть внеза́пꙋ возже́гшихсѧ ᲂу҆ви́диши, и҆ ꙗ҆́кѡ врага̀ ѿвраща́ющихсѧ тебѐ, и҆ зрѣ́ти не хотѧ́щихъ.

и҃. Ѿ роди́телей и҆ бра́тїй и҆ дрꙋгѡ́въ твои́хъ ско́рбь зрѧ̀ тебѣ̀ быва́емꙋ, смѣ́йсѧ под̾ꙋща́ющемꙋ разли́чнѣ ѻ҆́нымъ на тѧ̀ находи́ти бѣ́сꙋ, и҆ со стра́хомъ и҆ тща́нїемъ мно́гимъ ѿстꙋпѝ, и҆ бг҃а прилѣ́жнѣ ᲂу҆молѧ́й, є҆́же скорѣ́е во приста́нище до́брагѡ ѻ҆ц҃а̀ дости́гнꙋти тебѣ̀, въ не́мже дꙋ́шꙋ твою̀, и҆ трꙋжда́ющꙋсѧ и҆ ѡ҆бремене́ннꙋ сꙋ́щꙋ, то́й ᲂу҆поко́итъ: пꙋчи́на бо житїѧ̀ сегѡ̀ мнѡ́гаѧ и҆́мать винѡ́внаѧ бѣ́дъ и҆ поги́бели кра́йнїѧ.

ѳ҃. Хотѧ́й возненави́дѣти мі́ръ, любо́вь и҆з̾ глꙋбины̀ дꙋшѝ и҆мѣ́ти до́лженъ є҆́сть къ бг҃ꙋ, и҆ па́мѧть сегѡ̀ непреста́ннꙋ: ниже́ бо и҆́но что̀, ꙗ҆́коже сїѧ̑, всѧ̑ съ ра́достїю ѡ҆ставлѧ́ти, и҆ а҆́ки ᲂу҆ме́тѡвъ ѿвраща́тисѧ твори́тъ.

і҃. Не жела́й по благосло́внымъ вина́мъ, и҆лѝ безсловє́снымъ, въ мі́рѣ пребы́ти ѿню́дъ, но є҆гда̀ зва́нъ бꙋ́деши, ско́рѡ послꙋ́шай: ни ѡ҆ чесо́мъ бо и҆но́мъ та́кѡ бг҃ъ, ꙗ҆́коже ѡ҆ ско́рости на́шей весели́тсѧ. Поне́же и҆ лꙋ́чше є҆́сть послꙋша́нїе ско́рое со ᲂу҆бо́жествомъ, не́жели ме́дленность со мно́жествомъ и҆мѣ́нїй.

а҃і. А҆́ще мі́ръ, и҆ ꙗ҆̀же въ мі́рѣ, прехо́дѧтъ всѧ̑, бг҃ъ же є҆ди́нъ нетлѣ́ненъ и҆ безсме́ртенъ є҆́сть: ра́дꙋйтесѧ, є҆ли́цы є҆гѡ̀ ра́ди тлѣ̑ннаѧ ѡ҆ста́висте. Тлѣ̑нна же сꙋ́ть не то́чїю бога́тство и҆ пѣ́нѧзи, но и҆ всѧ́ка сла́сть и҆ наслажде́нїе грѣха̀, тлѧ̀ сꙋ́ть. Є҆ди̑ны же за́пѡвѣди свѣ́тъ сꙋ́ть и҆ живо́тъ, и҆ си́це ѿ всѣ́хъ нарица́ютсѧ.

в҃і. А҆́ще пла́мень прїѧ́лъ є҆сѝ, бра́те, и҆ те́кши прише́лъ є҆сѝ во ѻ҆́бщее житїѐ, и҆лѝ къ дꙋхо́вномꙋ ѻ҆тцꙋ̀, сегѡ̀ ра́ди а҆́ще поꙋча́емь є҆сѝ ѿ негѡ̀, и҆лѝ ѿ подви́жничествꙋющихъ съ тобо́ю бра́тїй, ба́ней и҆лѝ бра́шенъ, и҆лѝ и҆ны́хъ врачева́нїй ᲂу҆потреби́ти поко́ѧ ра́ди, да не прїи́меши сїѐ: но при́снѡ ᲂу҆гото́ванъ бꙋ́ди къ поще́нїю, къ ѕлострада́нїю, къ воздержа́нїю кра́йнѣйшемꙋ, да а҆́ще ѿ твоегѡ̀ ѡ҆ гдⷭ҇ѣ ѻ҆тца̀ понꙋжде́нъ бꙋ́деши вкꙋси́ти ѿ трапе́зы, ѡ҆брѧ́щешисѧ ѻ҆́номꙋ ᲂу҆̀бо послꙋшли́въ, свою́ же во́лю нижѐ въ се́мъ творѧ̀: а҆́ще ли же не съ ра́достїю те́рпиши, ꙗ҆̀же во́лею сотвори́ти не восхотѣ́лъ є҆сѝ, ѡ҆брѧ́щешисѧ дꙋше́внѣ по́льзꙋемь. Сїе́ бо хранѧ̀, бꙋ́деши вы́нꙋ во всѣ́хъ ꙗ҆́кѡ постѧ́йсѧ и҆ возде́рживающїйсѧ, и҆ своеѧ̀ во́ли по всемꙋ̀ ѿрекі́йсѧ: не то́чїю же, но и҆ сꙋ́щїй въ се́рдцѣ твое́мъ пла́мень неꙋгаси́мь соблюде́ши, всѧ̑ презира́ти тѧ̀ понꙋжда́ющїй.

г҃і. Є҆гда̀ всѧ̑ ѿ себѐ бѣ́сове содѣ́ютъ, и҆ намѣ́ренїе на́ше, є҆́же по бз҃ѣ, поколеба́ти и҆лѝ возбрани́ти не возмо́гꙋтъ, тогда̀ въ лицемѣ́рствꙋющихъ благоговѣ́нїемъ ѻ҆́тай входѧ́ще, тѣ́ми подвиза́ющихсѧ возбранѧ́ти покꙋша́ютсѧ. И҆ пе́рвѣе ᲂу҆́бѡ, ꙗ҆́кѡ ѿ любвѐ, си́рѣчь, и҆ милосе́рдїѧ дви́жими, въ тѣле́сный поко́й входи́ти тѣ̑мъ совѣ́тꙋютъ: да не и҆ тѣ́ло и҆знемо́жетъ, глаго́лютъ, и҆ во ᲂу҆ны́нїе впаде́тъ. Та́же и҆ въ бесѣ̑ды неполє́зны и҆ззыва́юще, дни́ въ си́хъ прїиждива́ти тѣ́хъ понꙋжда́ютъ. А҆́ще ᲂу҆́бѡ кто̀ ѿ тщали́выхъ послꙋ́шавъ ᲂу҆подо́битсѧ тѣ̑мъ, ѡ҆браща́ютсѧ и҆ насмѣва́ютсѧ поги́бели є҆гѡ̀: а҆́ще же не покори́тсѧ и҆́хъ словесє́мъ, но блюде́тъ себѐ стра́нна ѿ всѣ́хъ, и҆ ѡ҆смотри́тельна и҆ бездерзнове́нна, дви́жꙋтсѧ на за́висть, и҆ всѧ̑ творѧ́тъ и҆ дѣ́ютъ, до́ндеже и҆ ѿ ѻ҆би́тели є҆го̀ и҆зженꙋ́тъ: не те́рпитъ бо тщесла́вїе безче́стное, похвалѧ́емо смире́нїе ви́дѣти пред̾ собо́ю.

д҃і. Болѣ́знꙋетъ тщесла́вный, зрѧ̀ смиренномꙋ́дра пролива́юща сле́зы, и҆ сꙋгꙋ́бѡ по́льзꙋема, дѣ́лающа ѻ҆́ными бг҃а ми́лостивымъ, и҆ человѣ́ки къ безво́льнѣй похвалѣ̀ привлека́юща.

є҃і. Ѿне́лѣже себѐ всего̀ дꙋхо́вномꙋ твоемꙋ̀ ѻ҆тцꙋ̀ преда́си, вѣ́ждь, ꙗ҆́кѡ стра́ненъ є҆сѝ ѿ всѣ́хъ, и҆́миже ѿвнѣꙋ́дꙋ кичи́лсѧ є҆сѝ, человѣ́ческихъ, глаго́лю, веще́й и҆ и҆мѣ́нїй. Без̾ негѡ́же ничто́же тѣ́ми содѣ́ѧти и҆лѝ сотвори́ти да восхо́щеши: но ни ма́лꙋ, ни вели́кꙋ ве́щь да попро́сиши ѿ негѡ̀, ра́звѣ то́чїю что̀ са́мъ ѻ҆́нъ свои́мъ произволе́нїемъ, и҆лѝ повели́тъ прїѧ́ти, и҆лѝ са́мъ своерꙋ́чнѣ пода́стъ тебѣ̀.

ѕ҃і. Не да́ждь без̾ ѻ҆тца̀ твоегѡ̀, и҆́же по бз҃ѣ ми́лостыню ѿ пѣ́нѧзей, ꙗ҆̀же прине́слъ є҆сѝ, и҆ ни чрез̾ хода́таѧ ѿ ѻ҆́нагѡ прїѧ́ти нѣ̑каѧ ѿ тѣ́хъ да восхо́щеши: лꙋ́чше бо ни́щꙋ и҆ стра́ннꙋ бы́ти и҆ нарица́тисѧ тебѣ̀, не́жели расточа́ти пѣ́нѧзи, и҆ даѧ́ти ᲂу҆бѡ́гимъ новонача́льнꙋ сꙋ́щꙋ. Вѣ́рою же чи́стою всѧ̑ ꙗ҆́кѡ въ рꙋ́кꙋ бж҃їю, въ рꙋ́кꙋ дꙋхо́внагѡ твоегѡ̀ ѻ҆тца̀ возложи́ти да восхо́щеши.

з҃і. Нижѐ прїѧ́ти питїѧ̀ воды̀ да попро́сиши а҆́ще и҆ слꙋчи́тсѧ тебѣ̀ ѿ жа́жды пали́мꙋ бы́ти. до́ндеже са́мъ ѡ҆ себѣ̀ подви́гнꙋвсѧ дꙋхо́вный тво́й ѻ҆те́цъ побꙋди́тъ тѧ̀. Оу҆дрꙋча́й себѧ̀ и҆ понꙋжда́й во все́мъ, покарѧ́ѧ и҆ глаго́лѧ по́мыслѡмъ: а҆́ще хо́щетъ бг҃ъ, и҆ досто́инъ є҆сѝ питїѧ̀, ѿкры́етъ всѧ́кѡ дꙋхо́вномꙋ ѻ҆тцꙋ̀ твоемꙋ̀, и҆ рече́тъ тѝ: пі́й. И҆ тогда̀ пїе́ши съ чи́стою со́вѣстїю, а҆́ще и҆ не прїи́де вре́мени тогѡ̀ ча́съ.

и҃і. И҆скꙋ́съ и҆мѣ́ѧй дꙋхо́вныѧ по́льзы, и҆ чи́стꙋ вѣ́рꙋ стѧжа́вый, свидѣ́телѧ и҆́стины бг҃а предлага́ѧ, глаго́летъ: положи́хъ тако́въ во мнѣ̀ по́мыслъ, ꙗ҆́кѡ ни ꙗ҆́сти ни пи́ти попроси́ти когда̀ ѿ ѻ҆тца̀ моегѡ̀, и҆лѝ кромѣ̀ є҆гѡ̀ причасти́тисѧ чесогѡ̀ ѿню́дъ, до́ндеже бг҃ъ и҆звѣ́стна сотвори́тъ є҆го̀, и҆ повели́тъ мѝ. И҆ та́кѡ сы́й, никогда́же, глаго́летъ, въ намѣ́ренїи мое́мъ погрѣши́хъ.

ѳ҃і. Вѣ́рꙋ стѧжа́вый и҆звѣ́стнꙋ ко ѻ҆ц҃ꙋ̀ своемꙋ̀, и҆́же по бз҃ѣ, зрѧ̀ є҆го̀, зрѣ́ти самаго̀ мни́тъ хрⷭ҇та̀. И҆ съ ни́мъ сы́й и҆лѝ послѣ́дꙋѧ є҆мꙋ̀, со хрⷭ҇то́мъ бы́ти и҆ послѣ́довати и҆звѣ́стнѡ вѣ́рꙋетъ. Таковы́й ни вожделѣ́етъ съ и҆нѣ́мъ нѣ́кимъ побесѣ́довати когда̀, ни предпочте́тъ что̀ ѿ мїрски́хъ веще́й па́мѧти и҆ любвѐ ѻ҆́нагѡ. Что́ бо и҆ лꙋ́чше и҆лѝ поле́знѣйше въ настоѧ́щемъ и҆лѝ въ бꙋ́дꙋщемъ животѣ̀ тогѡ̀, є҆́же бы́ти со хрⷭ҇то́мъ; что́ же краснѣ́йше и҆лѝ сла́ждше видѣ́нїѧ є҆гѡ̀; А҆́ще же и҆ бесѣ́ды є҆гѡ̀ сподоблѧ́етсѧ, всѧ́кѡ живо́тъ вѣ́ченъ ѿ сеѧ̀ почерпа́етъ.

к҃. И҆́же ѿ ᲂу҆се́рдїѧ лю́битъ ᲂу҆корѧ́ющихъ и҆лѝ ѻ҆би́дѧщихъ и҆лѝ лиша́ющихъ є҆го̀, и҆ ѡ҆ си́хъ мо́литсѧ, въ предспѣ́ѧнїе вели́ко вма́лѣ восхо́дитъ: въ чꙋ́вствѣ бо се́рдца сїѐ быва́емо, въ бе́зднꙋ смире́нїѧ и҆ въ и҆сто́чники сле́зъ слове́сность низво́дитъ, въ ни́хже потоплѧ́етсѧ трича́стность дꙋшѝ: возво́дитъ же на не́бо безстра́стїѧ ᲂу҆́мъ, и҆ зри́теленъ содѣ́ловаетъ, и҆ вкꙋше́нїемъ та́мошнїѧ бла́гости всѧ̑ ностоѧ́щагѡ житїѧ̀ за ᲂу҆ме́ты вмѣнѧ́ти твори́тъ, и҆ са́мꙋю пи́щꙋ и҆ питїѐ не сла́стнѣ и҆лѝ не ча́стѣе прїима́ти.

к҃а. Не дѣѧ́нїй лꙋка́выхъ то́чїю ѿстꙋпа́ти, но и҆ пѡ́мыслъ, и҆ мы́слей проти́вныхъ тща́тисѧ подоба́етъ подви́жникꙋ свобо́днꙋ бы́ти: ᲂу҆пражднѧ́тисѧ же при́снѡ въ дꙋшеполе́зныхъ и҆ дꙋхо́вныхъ помышле́нїихъ, да та́кѡ безпопечи́теленъ ѡ҆ жите́йскихъ пребꙋ́детъ.

к҃в. Ꙗ҆́коже всѐ своѐ ѡ҆бнажи́вый тѣ́ло, а҆́ще покро́вомъ нѣ́кимъ покрове́ннѣ и҆́мать ѻ҆́чи, а҆́ще не восхо́щетъ ѿтрѧстѝ ѻ҆́ной, не мо́жетъ ѿ є҆ди́нагѡ ѡ҆бнаже́нїѧ ᲂу҆ви́дѣти свѣ́тъ про́чїѧгѡ тѣлесѐ: си́це и҆ всѧ̑ и҆ны̑ѧ вє́щи вкꙋ́пѣ и҆ и҆мѣ́нїе презрѣ́вый, и҆ са́мыхъ тѣ́хъ страсте́й и҆зба́вивыйсѧ, а҆́ще и҆ ѿ жите́йскихъ воспомина́нїй и҆ лꙋка́выхъ мы́слей не свободи́тъ дꙋше́вное ѻ҆́ко, никогда́же ᲂу҆́зритъ ᲂу҆́мнагѡ свѣ́та гдⷭ҇а на́шего і҆и҃са хрⷭ҇та̀ и҆ бг҃а.

к҃г. Ꙗ҆́коже покро́въ на ѻ҆́чи наложе́нъ, та́кѡ по́мыслы мїрскі̑ѧ, и҆ житє́йскїѧ воспомина̑нїѧ въ мы́сли, си́рѣчь во ѻ҆́цѣ дꙋше́внѣмъ быва́ютъ. Во є҆ли́ко ᲂу҆́бѡ вре́мѧ допꙋще́ни бꙋ́дꙋтъ, не и҆́мамы ви́дѣти: внегда́ же ѿи́мꙋтсѧ па́мѧтїю сме́рти, тогда̀ ꙗ҆́снѡ ᲂу҆ви́димъ свѣ́тъ и҆́стинный, и҆́же просвѣща́етъ всѧ́каго человѣ́ка, въ го́рнїй мі́ръ грѧдꙋ́щаго.

к҃д. И҆́же ѿ рождества̀ є҆́сть слѣ́пъ, не ᲂу҆разꙋмѣ́етъ, нижѐ вѣ́ровати и҆́мать пи́шемыхъ си́лѣ: прозрѣ́ти же нѣ́когда сподо́бивыйсѧ, созасвидѣ́тельствовати и҆́мать, ꙗ҆́кѡ и҆́стинна сꙋ́ть пи́шємаѧ.

к҃є. Ви́дѧй чꙋ́вственныма ѻ҆чи́ма, вѣ́сть когда̀ но́щь, когда́ же де́нь є҆́сть: слѣпы́й же ѻ҆боѧ̀ не вѣ́сть, и҆ дꙋхо́внѣ прозрѣ́вый и҆ ᲂу҆́мныма зрѧ́й ѻ҆чи́ма, ᲂу҆ви́дѣвъ и҆́стинный и҆ незаходи́мый свѣ́тъ, є҆гда̀ ѿ ᲂу҆ны́нїѧ на пре́жнюю возврати́тсѧ слѣпотꙋ̀, и҆ свѣ́та лиши́тсѧ, благоразꙋ́мнѣ ѡ҆щꙋща́етъ сегѡ̀ лише́нїе, и҆ ѿкꙋ́дꙋ се́й [слѣпотѣ̀] слꙋчи́сѧ бы́ти, не не вѣ́сть. Пребыва́ѧй же слѣ́пъ ѿ рождества̀, ничто́же ѿ си́хъ, ни и҆скꙋ́сомъ, ни дѣ́йствомъ вѣ́сть, ра́звѣ что̀ ѿ слꙋ́ха ᲂу҆слы́шитъ и҆ ᲂу҆разꙋмѣ́етъ ѡ҆ тѣ́хъ, ꙗ҆̀же никогда́же ви́дѣ, и҆ повѣ́сть и҆нѣ́мъ, ꙗ҆̀же слы́ша са́мъ: и҆ слы́шащымъ, ѡ҆ каковы́хъ веще́хъ дрꙋ́гъ со дрꙋ́гомъ бесѣ́дꙋютъ, не вѣ́дѧщымъ.

к҃ѕ. Не возмо́жно є҆́сть, и҆ пло́ть сы́тостїю бра́шенъ наполнѧ́ти, и҆ дꙋхо́внѣ ᲂу҆́мныѧ и҆ бж҃е́ственныѧ наслажда́тисѧ бла́гости: є҆ли́кѡ бо кто̀ чре́вꙋ рабо́тати бꙋ́детъ, толи́кѡ ѻ҆́ныѧ себѐ лиши́тъ: по є҆ли́кꙋ же тѣ́ло ᲂу҆дрꙋчи́тъ, по толи́кꙋ и҆ дꙋхо́вныѧ пи́щи и҆ ᲂу҆тѣше́нїѧ и҆спо́лнитсѧ.

к҃з. Ѡ҆ста́вимъ всѧ̑, ꙗ҆̀же на землѝ, не бога́тство то́чїю и҆ зла́то, и҆ и҆на̑ѧ житє́йскаѧ вещєства̀, но и҆ жела́нїе къ си̑мъ ѿ дꙋ́шъ на́шихъ соверше́ннѣ ѿжене́мъ. Возненави́димъ не то́чїю сла̑сти тѣлесѐ, но и҆ безсловє́снаѧ движє́нїѧ є҆гѡ̀, и҆ потщи́мсѧ ᲂу҆мертви́ти сїѐ трꙋды̑: чрез̾ сїе́ бо дѣ́йствꙋютъ по́хѡти, и҆ въ дѣ́ло произво́дѧтсѧ. И҆ живꙋ́щꙋ томꙋ̀ нꙋ́жда всѧ́ка дꙋшѝ на́шей ме́ртвѣй бы́ти, и҆ неꙋдободви́жнѣй ко всѧ́кой бж҃їей за́повѣди, и҆лѝ и҆ всеконе́чнѣ недви́жнѣй.

к҃и. Ꙗ҆́коже пла́мень ѻ҆́гненный на высотꙋ̀ при́снѡ взе́млетсѧ, и҆ наипа́че а҆́ще ѡ҆брати́ши вещество̀, и҆́мже возжига́етсѧ: та́кѡ и҆ тщесла́вное се́рдце смири́тисѧ не мо́жетъ. Но ꙗ҆́коже а҆́ще рече́ши є҆мꙋ̀ хвалы̑ є҆гѡ̀, па́че возно́ситсѧ: ѡ҆блича́емь бо и҆лѝ ᲂу҆чи́мь, проти́вꙋ глаго́летъ ѕѣ́льнѣ: похвалѧ́емь же и҆ моли́мь возвыша́етсѧ ѕлѣ̀.

к҃ѳ. Человѣ́къ поꙋчи́всѧ противоглаго́лати, са́мъ себѣ̀ ѻ҆бою́дꙋ ѻ҆́стръ є҆́сть ме́чь, ᲂу҆бива́ѧ невѣ́домѡ свою̀ дꙋ́шꙋ, и҆ вѣ́чныѧ жи́зни чꙋ́жда себѐ дѣ́лаѧ.

л҃. Противꙋглаго́лѧй, подо́бенъ є҆́сть во́лею пре́данна себѐ творѧ́щемꙋ, ѻ҆́тай сопрѡти́внымъ царє́вымъ врагѡ́мъ: прекосло́вїе бо ᲂу҆́дица є҆́сть, льще́нїе и҆мꙋ́щи словоѡправда́нїе, є҆гѡ́же ра́ди прельща́еми, ᲂу҆́дицꙋ грѣха̀ поглоща́емъ: є҆́юже и҆ похища́тисѧ ѡ҆бы́че ѻ҆каѧ́ннаѧ дꙋша̀ ѧ҆зы́комъ и҆ горта́нїю ѿ дꙋхѡ́въ лꙋка́вствїѧ, и҆ ѻ҆вогда̀ на высотꙋ̀ го́рдости возводи́тисѧ, ѻ҆вогда́ же въ про́пасть бе́здны грѣха̀ погрꙋжа́тисѧ, и҆ со и҆спа́дшими съ нб҃сѐ ѡ҆сꙋжда́тисѧ.

л҃а. Безче́ствꙋемый и҆лѝ досажда́емый, и҆ ѕѣлѡ̀ болѣ́знꙋѧй се́рдцемъ, познава́емь є҆́сть ѿ сегѡ̀, ꙗ҆́кѡ дре́внѧго ѕмі́а ѡ҆бно́ситъ въ нѣ́дрѣхъ. А҆́ще ᲂу҆́бѡ съ молча́нїемъ прете́рпитъ, и҆лѝ со мно́гимъ смире́нїемъ ѿвѣща́ти бꙋ́детъ, не́мощна сего̀ и҆ разсла́бленна содѣ́ла: а҆́ще же съ го́рестїю противорече́тъ и҆лѝ возглаго́летъ съ де́рзостїю, дадѐ крѣ́пость ѕмі́ю ꙗ҆́дъ и҆злїѧ́ти въ се́рдце є҆гѡ̀, и҆ свирѣ́пѡ поѧда́ти внꙋ́трєннѧѧ є҆гѡ̀, ꙗ҆́коже ѿсю́дꙋ на всѧ́къ де́нь ᲂу҆крѣплѧ́емꙋ томꙋ̀, снѣ́дїю твори́ти и҆справле́нїе во благи́хъ, и҆ крѣ́пость ѻ҆каѧ́нныѧ є҆гѡ̀ дꙋшѝ, и҆ жи́ти є҆мꙋ̀ ѿто́лѣ грѣхꙋ̀, ме́ртвꙋ же всеконе́чнѡ бы́ти пра́вдѣ.

л҃в. А҆́ще ѿрещи́сѧ восхо́щеши, и҆ є҆ѵⷢ҇льскомꙋ житїю̀ наꙋчи́тисѧ, да не неискꙋ́снꙋ нижѐ стра́стнꙋ ᲂу҆чи́телю себѐ вда́си, да не вмѣ́стѡ є҆ѵⷢ҇льскагѡ, дїа́вольскомꙋ житїю̀ наꙋчи́шисѧ: поне́же до́брыхъ ᲂу҆чи́телей, дѡбра̀ ᲂу҆чи́тєльства: ѕлы́хъ же ѕла̑ѧ, и҆ сѣ́менъ лꙋка́выхъ, всѧ́кѡ лꙋка̑ва сꙋ́ть воздѣ̑ланїѧ.

л҃г. Моли́твами и҆ слеза́ми бг҃а ᲂу҆молѝ посла́ти тѝ наста́вника безстра́стна и҆ свѧ́та. И҆спытꙋ́й же и҆ са́мъ бж҃е́ствєннаѧ писа̑нїѧ, и҆ писа̑нїѧ. ст҃ы́хъ ѻ҆тє́цъ, наипа́че дѣ́ѧтєльнаѧ, да си̑мъ проти́вꙋ приложи́въ ѿ ᲂу҆чи́телѧ и҆ предстоѧ́телѧ тобо́ю ᲂу҆чи̑маѧ и҆ содѣва́ємаѧ, ꙗ҆́кѡ въ зерца́лѣ ви́дѣти возмо́жеши сїѧ̑, и҆ разꙋмѣва́ти, и҆ согласꙋ́ющаѧ ᲂу҆́бѡ съ писа́нїемъ внѣдрѧ́ти, и҆ содержа́ти та̑ въ мы́сли: лѡ́жнаѧ же и҆ чꙋ̑ждаѧ различа́ти и҆ ѿсыла́ти, да не прельсти́шисѧ: мно́зи бо, вѣ́ждь, прелє́стницы и҆ лжеꙋчи́тели во дне́хъ си́хъ бы́ша.

л҃д. Всѧ́къ неви́дѧй, и҆нѣ́хъ же наставлѧ́ти ѡ҆бѣщава́ѧсѧ, преле́стникъ є҆́сть, и҆ послѣ́дꙋющихъ є҆мꙋ̀ въ ро́въ поги́бели вверга́етъ, по гдⷭ҇ню гла́сꙋ: слѣпе́цъ слѣпца̀ а҆́ще во́дитъ, ѻ҆́ба въ ꙗ҆́мꙋ впадꙋ́тъ⁶⁷.

л҃є. Слѣпы́й во є҆ди́номъ, слѣ́пъ ве́сь во все́мъ є҆́сть ви́дѧй же во є҆ди́номъ, во видѣ́нїи всѣ́хъ є҆́сть: и҆ видѣ́нїѧ всѣ́хъ ѿстои́тъ, и҆ во видѣ́нїи всѣ́хъ быва́етъ, и҆ ви́димыхъ внѣ̀ є҆́сть. Во є҆ди́номъ та́кѡ сы́й, всѧ̑ ви́дитъ: и҆ во всѣ́хъ сы́й, ничто́же ѿ всѣ́хъ ви́дитъ. Ви́дѧй же во є҆ди́номъ, є҆ди́нагѡ ра́ди и҆ себѐ и҆ всѣ́хъ, и҆ всѧ́чєскаѧ зри́тъ: и҆ сокрове́нъ сы́й въ не́мъ, ничто́же. ѿ всѧ́ческихъ зри́тъ.

л҃ѕ. Во ѡ҆́бразъ гдⷭ҇а на́шегѡ і҆и҃са хрⷭ҇та̀, небе́снагѡ человѣ́ка и҆ бг҃а въ слове́снѣмъ и҆ ᲂу҆́мнѣмъ человѣ́цѣ благоразꙋ́мнѣ и҆ познава́тельнѣ не ѡ҆блекі́йсѧ, кро́вь то́чїю є҆́сть и҆ пло́ть, дꙋхо́вныѧ сла́вы чꙋ́вствованїе не могі́й сло́вомъ прїѧ́ти: ꙗ҆́коже и҆ ѿ рождества̀ слѣпі́и, сло́вомъ то́чїю свѣ́та со́лнечнагѡ позна́ти не мо́гꙋтъ.

л҃з. Слы́шай та́кѡ и҆ ви́дѧй и҆ разꙋмѣ́ѧй, вѣ́сть глаго́лемыхъ си́лꙋ, ꙗ҆́кѡ ᲂу҆жѐ ѡ҆́бразъ носѧ́й небе́снагѡ, и҆ въ мꙋ́жа прише́дый и҆сполне́нїѧ хрⷭ҇то́ва⁶⁸, и҆ та́кѡ сы́й мо́жетъ до́брѣ и҆ наставлѧ́ти на пꙋ́ть за́повѣдей бж҃їихъ ста́до бж҃їе: невѣ́дый же и҆́наковъ сы́й, ꙗ҆́вѣ ꙗ҆́кѡ ни чꙋ̑вства дꙋшє́внаѧ и҆ ᲂу҆ѧснє́нна и҆ здра̑ва въ себѣ̀ и҆́мать. Є҆мꙋ́же и҆ па́че до́брѣ прили́чествовати бꙋ́детъ, є҆́же води́мꙋ бы́ти, не́жели води́ти прибѣ́дственнѡ.

л҃и. На ᲂу҆чи́телѧ и҆ наста́вника своего̀, ꙗ҆́кѡ на бг҃а зрѧ́й, сопроти́въ глаго́лати не мо́жетъ: а҆́ще же мни́тъ и҆ глаго́летъ ѻ҆боѧ̑ и҆мѣ́ти, да вѣ́сть, ꙗ҆́кѡ прельсти́лсѧ є҆́сть: каковꙋ́ бо бж҃їи къ бг҃ꙋ и҆́мꙋтъ любо́вь, не вѣ́сть.

л҃ѳ. Вѣ́рꙋѧй въ рꙋцѣ̀ па́стырѧ своегѡ̀ бы́ти животꙋ̀ є҆гѡ̀ и҆ сме́рти, никогда́же проти́вꙋ рече́тъ: си́хъ же невѣ́дѣнїе, прекосло́вїе ражда́етъ, вино́вное мы́сленныѧ и҆ вѣ́чныѧ сме́рти.

м҃. Пре́жде не́же прїѧ́ти и҆зрече́нїе ѡ҆сꙋ́жденникꙋ, мѣ́сто дае́тсѧ ѿвѣ́тствованїѧ є҆мꙋ̀ глаго́лати сꙋдїѝ ѡ҆ тѣ́хъ, ꙗ҆̀же содѣ́ѧ: по ꙗ҆вле́нїи же содѣ́ѧнныхъ, и҆ сꙋдїи́номъ и҆зрече́нїи, ничто́же и҆лѝ ма́ло и҆лѝ вели́ко и҆стѧзꙋ́ющымъ прекосло́витъ.

м҃а. Пре́жде не́же вни́ти въ сїѐ сꙋди́лище и҆́нокꙋ, и҆ ꙗ҆ви́ти є҆мꙋ̀ сердє́чнаѧ, мо́жетъ бы́ть, и҆ противоглаго́лати досто́итъ є҆мꙋ̀, ѻ҆́ва ᲂу҆́бѡ по невѣ́дѣнїю, ѻ҆́ва же и҆ ꙗ҆́кѡ мнѧ́щꙋсѧ кры́ти своѧ̑ сѝ. По ѿкрове́нїи же по́мыслѡвъ и҆ чи́стѣй и҆́сповѣди, не досто́итъ сопроти́въ глаго́лати сꙋдїѝ по бз҃ѣ и҆ ѡ҆блада́телю своемꙋ̀, да́же до сме́рти. И҆́нокъ бо, въ сїѐ сꙋди́лище въ нача́лѣ вше́дый, и҆ ѡ҆б̾ѧви́вый та̑йнаѧ се́рдца своегѡ̀, и҆звѣсти́лсѧ є҆́сть ѿ нача́ла, а҆́ще и҆ ра́зꙋмъ како́въ нибꙋ́дь и҆́мать, ꙗ҆́кѡ безчи́сленныхъ смерте́й досто́инъ є҆́сть, и҆ послꙋша́нїемъ свои́мъ и҆ смире́нїемъ всѧ́кагѡ томле́нїѧ и҆ мꙋче́нїѧ и҆зба́витисѧ вѣ́рꙋетъ, а҆́ще вои́стиннꙋ та́инства ѡ҆́бразъ вѣ́сть.

м҃в. Хранѧ́й сїѧ̑ неизглажда́емѡ во свое́й мы́сли, никогда́же се́рдцемъ подви́гнетсѧ наказꙋ́емь, и҆лѝ ᲂу҆чи́мь, и҆лѝ ѡ҆блича́емь. Поне́же впа́даѧй въ такова̑ѧ ѕла̑ѧ, глаго́лю же въ прекосло́вїе и҆ невѣ́рїе, є҆́же къ дꙋхо́вномꙋ ѻ҆ц҃ꙋ̀ своемꙋ̀ и҆ ᲂу҆чи́телю, въ сѣ́ть и҆ глꙋбинꙋ̀ а҆́довꙋ є҆щѐ жи́въ сы́й, ѻ҆каѧ́ннѣ низво́дитсѧ, и҆ до́мъ сатани́нъ и҆ всѧ́кїѧ є҆гѡ̀ нечи́стыѧ си́лы быва́етъ, ꙗ҆́кѡ непокори́въ и҆ сы́нъ поги́бели.

м҃г. Молю́ тѧ послꙋ́шника, да сїѧ̑ ѡ҆браща́еши ча́стѣ въ мы́сли твое́й, и҆ всѧ́цѣмъ тща́нїемъ подвиза́тисѧ, є҆́же не сни́ти въ речє́ннаѧ а҆́дѡва ѕла̑ѧ, но та́кѡ моли́тисѧ те́плѣ бг҃ови на всѧ́къ де́нь и҆ глаго́лати: бж҃е и҆ гдⷭ҇и всѣ́хъ! всѧ́кагѡ дыха́нїѧ и҆ дꙋшѝ и҆мы́й вла́сть, є҆ди́нъ и҆сцѣли́ти мѧ̀ могі́й, ᲂу҆слы́ши моле́нїе мѧ̀ ѻ҆каѧ́ннагѡ, и҆ гнѣздѧ́щагосѧ во мнѣ̀ ѕмі́а наи́тїемъ всест҃а́гѡ и҆ животворѧ́щагѡ дх҃а ᲂу҆мертви́въ, потребѝ: и҆ менѐ ни́ща и҆ на́га всѧ́кїѧ добродѣ́тели сꙋ́ща, къ нога́мъ ст҃а́гѡ моегѡ̀ ѻ҆тца̀ со слеза́ми припа́сти сподо́би, и҆ ст҃ꙋ́ю є҆гѡ̀ дꙋ́шꙋ къ милосе́рдїю, є҆́же поми́ловати мѧ̀, привлецы̀. И҆ да́ждь, гдⷭ҇и, въ се́рдцѣ мое́мъ смире́нїе и҆ по́мыслы бла́ги, подоба́ющыѧ грѣ́шникꙋ согласи́вшꙋсѧ тебѣ̀ ка́ѧтисѧ, и҆ да не вконе́цъ ѡ҆ста́виши дꙋ́шꙋ, є҆ди́ною сочета́вшꙋсѧ тебѣ̀, и҆ и҆сповѣ́давшꙋ тѧ̀, и҆ вмѣ́стѡ всегѡ̀ мі́ра и҆збра́вшꙋ, и҆ предпоче́тшꙋ тѧ̀: вѣ́си во гдⷭ҇и, ꙗ҆́кѡ хощꙋ̀ спасти́сѧ, а҆́ще и҆ лꙋка́вый мо́й ѻ҆бы́чай препѧ́тствїемъ мѝ быва́етъ: но возмѡ́жна тебѣ̀, влⷣко, сꙋ́ть всѧ̑, є҆ли̑ка невозмѡ́жна сꙋ́ть ѿ человѣ̑къ.

м҃д. До́брое ѡ҆снова́нїе вѣ́ры и҆ наде́жды во дворѣ̀ бл҃гоче́стїѧ положи́вшїи со стра́хомъ и҆ тре́петомъ, и҆ на ка́мени послꙋша́нїѧ дꙋхо́внымъ ѻ҆тце́мъ нѡ́зѣ незы́блеми ᲂу҆тверди́вшїи, и҆ ꙗ҆́кѡ ѿ бж҃їихъ ᲂу҆́стъ ѿ ѻ҆́нѣхъ заповѣ́дꙋємаѧ слꙋ́шающїи, на ѡ҆снова́нїи се́мъ послꙋша́нїѧ без̾ сомнѣ́нїѧ назида́юще ѻ҆́наѧ во смире́нїи дꙋшѝ а҆́бїе и҆справлѧ́ютъ: и҆ и҆справлѧ́етсѧ и҆́ми вели́кое сїѐ и҆ пе́рвое дѣ́ло, самѣ́хъ себѐ ѿверже́нїемъ. Є҆́же бо и҆сполнѧ́ти чꙋ́ждꙋ во́лю, а҆ не свою̀, не то́чїю ѿверже́нїе своеѧ̀ дꙋшѝ, но и҆ ᲂу҆мерщвле́нїе, є҆́же ко всемꙋ̀ мі́рꙋ, содѣ́ловаетъ.

м҃є. Ѡ҆ сопроти́въ глаго́лющемъ своемꙋ̀ ѻ҆тцꙋ̀, сора́дꙋютсѧ бѣ́си: смирѧ́ющꙋсѧ же да́же до сме́рти, ᲂу҆дивлѧ́ютсѧ а҆́гг҃ли: дѣ́ло бо бж҃їе таковы́й дѣ́лаетъ, ᲂу҆подоблѧ́ѧсѧ сн҃ꙋ бж҃їю, и҆спо́лнившемꙋ послꙋша́нїе своемꙋ̀ ѻ҆ц҃ꙋ̀ да́же до сме́рти, сме́рти же кре́стныѧ.

м҃ѕ. Мно́гое и҆ безвре́менное сокрꙋше́нїе се́рдца, помрача́етъ и҆ возмꙋща́етъ смы́слъ, и҆ чи́стꙋю моли́твꙋ и҆ ᲂу҆миле́нїе ѿ дꙋшѝ и҆стреблѧ́етъ: болѣ́знь же серде́чнꙋ сотворѧ́етъ. Ѿсю́дꙋ же жесто́кость и҆ нечꙋ́вство безчи́сленно, си́ми же дꙋхѡ́внымъ мꙋжє́мъ ѿча́ѧнїе бѣ́сове ᲂу҆строѧ́ютъ.

м҃з. Внегда̀ тѧ̀ сїѧ̑, и҆́ноче, срѧ́щꙋтъ, и҆ ѡ҆брѧ́щеши ре́вность и҆ жела́нїе соверше́нства въ дꙋши́ твое́й, ꙗ҆́кѡ вожделѣ́ти всѧ́кꙋ за́повѣдь бж҃їю и҆спо́лнити, и҆ нижѐ до пра́здна словесѐ па́дати и҆ согрѣша́ти, и҆ ни ѿ є҆ди́нагѡ ѿ дре́внихъ свѧты́хъ ѿста́ти дѣѧ́нїемъ, и҆ ра́зꙋмомъ, и҆ видѣ́нїемъ: зри́ши же себѐ возбранѧ́ема ѿ ѻ҆́тай сѣ́ющагѡ пле́велы печа́ли, и҆ не ѡ҆ставлѧ́етъ тѧ̀ взы́ти на толи́кꙋ высотꙋ̀ свѧты́ни, внегда̀ подмета́ти є҆мꙋ̀ по́мыслы печа́ли, и҆ глаго́лати: не мо́щно тѝ посредѣ̀ мі́ра спасти́сѧ, и҆ сохрани́ти всѧ̑ за́пѡвѣди бж҃їѧ без̾ ѡ҆скꙋдѣ́нїѧ, тогда̀ ты̀ во є҆ди́номъ сѣ́дъ ᲂу҆глѣ̀, наединѣ̀ стѧгнѝ себѐ, и҆ соберѝ по́мыслъ, и҆ да́ждь бла́гъ совѣ́тъ дꙋшѝ твое́й, и҆ рцы̀: вскꙋ́ю приско́рбна є҆сѝ, дꙋшѐ моѧ̀; и҆ вскꙋ́ю смꙋща́еши мѧ̀; ᲂу҆пова́й на бг҃а, ꙗ҆́кѡ и҆сповѣ́мсѧ є҆мꙋ̀, сп҃се́нїе лица̀ моегѡ̀ не дѣла̀ моѧ̑, но бг҃ъ мо́й є҆́сть⁶⁹. Кто́ бо ѿ дѣ́лъ зако́на ѡ҆правди́тсѧ; не ѡ҆правди́тсѧ бо пред̾ тобо́ю всѧ́къ живы́й⁷⁰: но ѿ вѣ́ры, ꙗ҆́же въ са́маго бг҃а моего̀, ᲂу҆пова́ю спасти́сѧ неизрече́ннымъ милосе́рдїемъ є҆гѡ̀ тꙋ́не. И҆дѝ за мно́ю, сатано̀. Гдⷭ҇ꙋ моемꙋ̀ кла́нѧюсѧ, и҆ томꙋ̀ ѿ ю҆́ности моеѧ̀ слꙋжꙋ̀, могꙋ́щемꙋ спастѝ менѐ є҆ди́ною ми́лостїю свое́ю. Ѿстꙋпѝ ᲂу҆̀бо ѿ менѐ: бг҃ъ, сотвори́вый мѧ̀ по ѡ҆́бразꙋ и҆ по подо́бїю своемꙋ̀, сокрꙋши́тъ тѧ̀.

м҃и. Бг҃ъ ѿ на́съ человѣ́кѡвъ ничто́же взыскꙋ́етъ и҆́но, но то́кмѡ є҆́же не согрѣша́ти: сїе́ же нѣ́сть дѣ́ло зако́на, но хране́нїе непрестꙋ́пно ѡ҆́браза и҆ го́рнѧгѡ досто́инства. Въ ни́хже по є҆стествꙋ̀ стоѧ́ще, и҆ ри́зꙋ носѧ́ще просвѣще́ннꙋ дх҃а, въ бз҃ѣ пребыва́емъ, и҆ то́й въ на́съ, положе́нїемъ бо́зи и҆ сы́нове сꙋ́ще, свѣ́томъ ра́зꙋма бж҃їѧ зна́менаеми.

м҃ѳ. Оу҆ны́нїе и҆ тѧ́жесть тѣ́ла, ѿ лѣ́ности и҆ нерадѣ́нїѧ прибыва́ющыѧ въ дꙋшѝ, ѿ ѻ҆бы́чнагѡ ѿставлѧ́ютъ пра́вила, и҆ помраче́нїѧ ᲂу҆мꙋ̀ винѡ́вна быва́ютъ и҆ печа́ли, ꙗ҆́коже ѿсю́дꙋ помыслѡ́мъ страхова́нїѧ и҆ хꙋлы̀ ꙗ҆влѧ́тисѧ въ се́рдцѣ, и҆ нижѐ во ѻ҆бы́чное мѣ́сто моли́твы вни́ти ѿ бѣ́са ᲂу҆ны́нїѧ и҆скꙋша́емомꙋ мощѝ: но и҆ лѣни́тисѧ є҆мꙋ̀, и҆ на творца̀ всѣ́хъ помышлѧ́ти безмѣ̑стнаѧ. Позна́въ ᲂу҆̀бо винꙋ̀, и҆ ѿкꙋ́дꙋ на тѧ̀ сїѧ̑ наидо́ша, тща́тельнѣ вни́ди во ѻ҆бы́чное мѣ́сто моли́твы твоеѧ̀, и҆ къ человѣколю́бцꙋ бг҃ꙋ припа́дъ помоли́сѧ со стена́нїи и҆ слеза́ми въ болѣ́зни се́рдца твоегѡ̀, ѡ҆ и҆збавле́нїи тѧ́жести, ᲂу҆ны́нїѧ и҆ лꙋка́выхъ пѡ́мыслъ, и҆ да́стсѧ тебѣ̀ вско́рѣ си́хъ свобожде́нїе. болѣ́зненнѣ толкꙋ́щꙋ и҆ терпѧ́щꙋ.

н҃. Се́рдце чи́сто стѧжа́вый, страхова́нїе побѣдѝ. Є҆ще́ же ѡ҆чища́ющїисѧ ѻ҆вогда̀ низлага́етъ є҃, ѻ҆вогда́ же низлага́емь є҆́сть ѿ негѡ̀. Ѿню́дъ же неподвиза́ѧйсѧ, и҆лѝ всеконе́чнѣ не чꙋ́вствꙋетъ, и҆ внегда̀ дрꙋ́гомъ бы́ти є҆мꙋ̀ страсте́й и҆ бѣсѡ́въ, све́рхъ тщесла́вїѧ и҆ возноше́нїемъ недꙋ́гꙋетъ, мнѧ́сѧ бы́ти что̀, ничто́же сы́й: и҆лѝ страхова́нїю ра́бъ є҆́сть и҆ подчине́нъ, трепе́щѧ ꙗ҆́кѡ младе́нецъ мꙋдрова́нїемъ, и҆ боѧ́сѧ стра́ха та́мѡ, и҆дѣ́же нѣ́сть стра́ха нижѐ страхова́нїѧ боѧ́щымсѧ гдⷭ҇а.

н҃а. Боѧ́йсѧ гдⷭ҇а, бѣсо́вскихъ стремле́нїй не бои́тсѧ, нижѐ немощны́хъ нахожде́нїй и҆́хъ, но нижѐ преще́нїй лꙋка́выхъ человѣ̑къ. И҆ ꙗ҆́коже нѣ́кїй пла́мень, и҆лѝ палѧ́щь ѻ҆́гнь ве́сь сы́й, въ непроходи́мыхъ и҆ те́мныхъ мѣ́стѣхъ въ нощѝ и҆ во днѝ проходѧ̀ ѿгонѧ́етъ бѣ́сы, бѣжа́щыѧ є҆гѡ̀ па́че, не́жели ѻ҆́нъ и҆́хъ, дабы̀ не ѡ҆пали́тисѧ и҆̀мъ ѿ и҆сходѧ́щагѡ ѿ негѡ̀ пламеннови́днагѡ лꙋча̀ бж҃е́ственнагѡ ѻ҆гнѧ̀.

н҃в. И҆́же стра́хомъ бж҃їимъ хо́дитъ, се́й съ мꙋ́жи лꙋка́выми ѡ҆браща́ѧсѧ не бои́тсѧ, стра́хъ є҆гѡ̀ внꙋ́трь и҆мѣ́ѧ, и҆ носѧ̀ неѡбори́мое вѣ́ры ѻ҆рꙋ́жїе, съ ни́мже возмога́етъ и҆ мо́жетъ всѧ̑ твори́ти, и҆ ꙗ҆̀же мнѧ́тсѧ мнѡ́гимъ неꙋдѡ́бна и҆ невозмѡ́жна. Но ꙗ҆́коже нѣ́кїй и҆споли́нъ посредѣ̀ ѻ҆безьѧ́нъ, и҆лѝ ле́въ рыка́ющїй посредѣ̀ псѡ́въ и҆ ли́сѡвъ пребыва́ѧй, ᲂу҆пова́етъ на гдⷭ҇а: и҆ тве́рдостїю мꙋдрова́нїѧ ᲂу҆ѧзвлѧ́етъ и҆́хъ, и҆ ᲂу҆страша́етъ смы́слы и҆́хъ, ꙗ҆́кѡ же́злъ желѣ́зный, премꙋ́дрое наводѧ̀ сло́во.

н҃г. Не безмо́лвствꙋѧй то́чїю и҆лѝ повинꙋ́ѧйсѧ, но и҆ и҆гꙋ́менствꙋѧй, и҆ мно́гихъ предстоѧ́тель сы́й, и҆ са́мъ то́й слꙋжа́й, без̾ попече́нїѧ до́лженъ бы́ти, си́рѣчь свобо́денъ ѿ всѣ́хъ жите́йскихъ веще́й несомнѣ́ннѡ. А҆́ще бо пеце́мсѧ, прєстꙋ́пницы за́повѣди бж҃їѧ ѡ҆брѣта́емсѧ, глаго́лющїѧ: не пецы́тесѧ дꙋше́ю ва́шею что̀ ꙗ҆́сте, и҆лѝ что̀ пїе́те, и҆лѝ во что̀ ѡ҆блече́тесѧ, всѣ́хъ бо си́хъ ꙗ҆зы́цы и҆́щꙋтъ⁷¹. И҆ па́ки: зри́те, да не когда̀ ѡ҆тѧгча́ютъ сердца̀ ва̑ша ѡ҆б̾ѧде́нїемъ и҆ пїѧ́нствомъ, и҆ печа́льми жите́йскими⁷².

н҃д. Ѡ҆ жите́йскихъ веще́хъ пекꙋ́щїйсѧ по́мыслъ и҆мы́й, нѣ́сть свобо́денъ: попече́нїемъ бо ѡ҆ си́хъ содержи́мь є҆́сть и҆ порабоща́емь, а҆́ще ѡ҆ себѣ̀ само́мъ пече́тсѧ си́ми, а҆́ще ѡ҆ и҆нѣ́хъ. Свобо́дный же ѿ си́хъ, ни ѡ҆ себѣ̀ само́мъ, ни и҆нѣ́хъ ра́ди попече́тсѧ ѡ҆ жите́йскихъ, а҆́ще и҆ є҆пі́скопъ, а҆́ще и҆ дїа́конъ, а҆́ще и҆ и҆гꙋ́менъ бы́ти слꙋчи́тсѧ. Но нижѐ пра́зденъ и҆́мать бы́ти когда̀, и҆лѝ что̀ пре́зритъ ѿ хꙋдѣ́йшихъ и҆ малѣ́йшихъ: бг҃оꙋго́днѣ же всѧ̑ творѧ̀ и҆ содѣва́ѧ, без̾ попече́нїѧ во всѣ́хъ ве́щехъ пребꙋ́детъ, и҆ во все́мъ житїѝ.

н҃є. Да не разори́ши хра́минꙋ твою̀, внегда̀ хотѣ́ти тѝ бли́жнѧгѡ созда́ти: ви́ждь бо, ко́ль трꙋ́дно є҆́сть дѣ́ло сїѐ и҆ неꙋдо́бно, да не когда̀ произволѧ́ющꙋ тебѣ̀ сїѐ, и҆ твою̀ низложи́ши, и҆ ѻ҆́нагѡ созда́ти ѿню́дъ не возмо́жеши.

н҃ѕ. А҆́ще несоверше́нное безпристра́стїе веще́й жите́йскихъ и҆ и҆мѣ́нїй стѧ́жеши, да не восхо́щеши врꙋче́нꙋ бы́ти тебѣ̀ ᲂу҆правле́нїю [во ѻ҆би́тели] дѣ́лъ, да не ꙗ҆́тъ бы́въ си́ми, вмѣ́стѡ є҆́же прїѧ́ти мздꙋ̀ слꙋ́жбы, ѡ҆сꙋжде́нїе та́тѧ и҆ свѧщеннокра́дца понесе́ши. А҆́ще же ѿ предстоѧ́телѧ на сїѐ понꙋжде́нъ бꙋ́деши, ꙗ҆́кѡ ѻ҆́гнь палѧ́щь во ᲂу҆правле́нїи бꙋ́ди: и҆ прило́гъ по́мысла и҆́сповѣдїю и҆ покаѧ́нїемъ возбранѧ́ѧ, невреди́мь моли́твою предстоѧ́телѧ соблюде́шисѧ.

н҃з. Не бы́вый безстра́стенъ, нижѐ ꙗ҆́кѡ є҆́сть безстра́стїе, вѣ́сть, и҆ нижѐ вѣ́рꙋетъ бы́ти комꙋ̀ таковꙋ̀ на землѝ. Ка́кѡ бо себѐ не ѿвергі́йсѧ пе́рвѣе, и҆ кро́вь свою̀ не и҆стощи́вый ᲂу҆се́рднѣ блаже́нныѧ ра́ди вои́стиннꙋ жи́зни сеѧ̀, возмни́тъ, ꙗ҆́кѡ и҆ны́й сїѧ̑ сотворѝ, во є҆́же стѧжа́ти безстра́стїе; та́коже и҆ мнѧ́йсѧ и҆мѣ́ти дх҃а ст҃а, ничто́же и҆мѣ́ѧ, не вѣ́рꙋетъ никогда́же, слы́ша дѣ̑йствїѧ є҆гѡ̀ познава́єма во и҆мꙋ́щихъ дх҃а ст҃а́го, ꙗ҆́кѡ є҆́сть кто̀ въ ро́дѣ се́мъ ра́венъ а҆пⷭ҇лѡмъ хрⷭ҇тѡ́вымъ, и҆ сꙋ́щымъ ѿ вѣ́ка ст҃ы̑мъ, дѣ́йствꙋемь и҆ дви́жимь бж҃е́ственнымъ дх҃омъ, и҆лѝ во видѣ́нїи сегѡ̀ и҆ въ чꙋ́вствїи бы́въ. Кі́йждо во ѿ своегѡ̀ ᲂу҆строе́нїѧ, и҆ ѡ҆ дѣла́хъ бли́жнѧгѡ сꙋ́дитъ, ꙗ҆кѡва̀ сꙋ́ть, и҆лѝ ѡ҆ добродѣ́тели рещѝ, и҆лѝ ѡ҆ ѕло́бѣ.

н҃и. И҆́но є҆́сть безстра́стїе дꙋшѝ, и҆ и҆́но безстра́стїе тѣ́ла: ѻ҆́во бо и҆ тѣ́ло ѡ҆свѧща́етъ свое́ю свѣ́тлостїю, и҆ свѣтоли́тїемъ ст҃а́гѡ дх҃а: ѻ҆́во же є҆ди́но са́мо ѡ҆ себѣ̀ ни въ чесо́мъ стѧжа́вшаго по́льзовати мо́жетъ.

н҃ѳ. Ꙗ҆́коже ѿ кра́йнїѧ нищеты̀ въ бога́тство и҆ свѣ́тлый са́нъ царе́мъ возведе́нный, и҆ во ᲂу҆́тварь ѿ негѡ̀ свѣ́тлꙋ ѡ҆блече́нный, и҆ пред̾ лице́мъ є҆гѡ̀ стоѧ́ти повелѣ́нїе полꙋчи́вшїй, и҆ самаго̀ того̀ царѧ̀ съ вожделѣ́нїемъ ви́дитъ, и҆ ꙗ҆́кѡ благодѣ́телѧ вельмѝ лю́битъ, и҆ ᲂу҆́тварь, въ ню́же ѡ҆блече́сѧ, ꙗ҆́снѣ разсма́триваетъ, и҆ са́нъ познава́етъ, и҆ да́нное є҆мꙋ̀ бога́тство вѣ́сть: та́кѡ и҆ и҆́нокъ вои́стиннꙋ ѿ мі́ра и҆ веще́й ѻ҆́нагѡ ѿше́дъ, и҆ пристꙋ́пль ко хрⷭ҇тꙋ̀, воззва́нъ бы́въ благоразꙋ́мнѡ, и҆ къ высотѣ̀ дꙋхо́внагѡ видѣ́нїѧ дѣ́ланїемъ за́повѣдей возведе́нъ бы́въ, и҆ самаго̀ бг҃а непреле́стнѣ зри́тъ, и҆ бы́вшее въ себѣ̀ и҆змѣне́нїе ꙗ҆́снѣ ᲂу҆сма́триваетъ. Ви́дитъ бо при́снѡ благода́ть животворѧ́щагѡ дх҃а, ѡ҆сїѧва́ющꙋю є҆го̀, ꙗ҆́же и҆ ѡ҆дѣѧ́нїе нарица́етсѧ, и҆ ца́рскаѧ багрѧни́ца, па́че же самаго̀ хрⷭ҇та̀ гдⷭ҇а, занѐ во хрⷭ҇та̀ вѣ́рꙋющїи, въ него̀ ѡ҆блека́ютсѧ.

ѯ҃. Мно́зи чтꙋ́тъ бж҃е́ствєннаѧ писа̑нїѧ, и҆ ѻ҆́ви чтѡ́маѧ слы́шатъ: ма́ли же что́мыхъ си́лꙋ и҆ ра́зꙋмъ пра́вѡ вѣ́дѣти мо́гꙋтъ: и҆̀же ѻ҆вогда̀ невозмѡ́жна бы́ти, ꙗ҆̀же ѿ бж҃е́ственныхъ писа́нїй ᲂу҆твержда́ютъ: ѻ҆вогда́же и҆ невѣ̑рна всеконе́чнѣ мнѧ́тъ, и҆̀же и҆носказꙋ́ютъ сїѧ̑ ѕлѣ̀. И҆ по настоѧ́щемꙋ вре́мени глаго́лємаѧ сꙋ́дѧтъ, ꙗ҆́кѡ въ бꙋ́дꙋщемъ произы́дꙋтъ: ѡ҆ бꙋ́дꙋщихъ же речє́ннаѧ, ꙗ҆́кѡ ᲂу҆жѐ бы̑вшаѧ, и҆ на всѧ́къ де́нь быва̑ющаѧ сказꙋ́ютъ. И҆ та́кѡ нѣ́сть сꙋда̀ пра́ва въ ни́хъ, нижѐ распозна́нїѧ и҆́стинна въ бж҃е́ственныхъ и҆ человѣ́ческихъ ве́щехъ.

ѯ҃а. Всѣ́хъ вѣ́рныхъ ꙗ҆́кѡ є҆ди́наго зрѣ́ти до́лжни є҆смы̀ вѣ́рнїи, и҆, ꙗ҆́кѡ при є҆ди́номъ ко́емждо и҆́хъ є҆́сть хрⷭ҇то́съ, помышлѧ́ти: та́кѡ къ немꙋ̀ любо́вїю расположены̀ бы́ти, ꙗ҆́кѡ готѡ́вымъ бы́ти за него̀ положи́ти дꙋ́шы своѧ̑. Ѿню́дъ бо нижѐ глаго́лати и҆лѝ мнѣ́ти до́лжни є҆смы̀ кого̀ лꙋка́ва, но на всѣ́хъ, ꙗ҆́кѡ благи́хъ зрѣ́ти, ꙗ҆́коже реко́хомъ. А҆́ще бо и҆ ѿ страсте́й стꙋжа́ема ᲂу҆ви́диши кого̀, не бра́та, но стра̑сти возненави́ждь ра́тꙋющыѧ є҆го̀. А҆́ще и҆ ѿ по́хотей и҆ предпрїѧ́тїй мꙋ́чима, наипа́че ᲂу҆милосе́рдисѧ, да не когда̀ и҆ са́мъ и҆скꙋше́нъ бꙋ́деши, ꙗ҆́кѡ под̾ премѣ́ною сы́й вещества̀ ᲂу҆добоизмѣнѧ́емагѡ.

ѯ҃в. А҆́ще кто̀ ло́женъ ѿ лицемѣ́рїѧ и҆лѝ ѿ дѣ́лъ поро́ченъ, и҆лѝ вма́лѣ ᲂу҆ѧ́звленъ ѿ є҆ди́ныѧ стра́сти, и҆лѝ нѣ́коликѡ лиша́емь ѿ нерадѣ́нїѧ въ нѣ́коей ча́сти є҆́сть, не счислѧ́етсѧ со всѣ́ми, но ꙗ҆́кѡ непотре́бенъ и҆ ѿве́рженъ ѿме́щетсѧ: ꙗ҆́кѡ да не вовре́мѧ протѧже́нїѧ расто́ргнꙋтисѧ сотвори́тъ сою́зꙋ вери́ги, и҆ раздѣле́нїе въ нераздѣле́нныхъ, и҆ печа́ль въ ѻ҆бои́хъ содѣ́лаетъ пред̾ ни́мъ ѡ҆ послѣ́днихъ, си̑мъ же ѡ҆ разлꙋче́нїи предварѧ́ющихъ болѣ́знꙋющымъ.

ѯ҃г. И҆́мъ же ѡ҆́бразомъ на пла́мень горѧ́щїѧ пе́щи пе́рсть пове́ргшїй кто́-либо, ᲂу҆гаша́етъ ѻ҆́ный: тѣ́мъ же ѡ҆́бразомъ и҆ житє́йскаѧ попечє́нїѧ, и҆ всѧ́ко пристра́стїе хꙋды́ѧ и҆ малѣ́йшїѧ ве́щи, возже́гшꙋюсѧ въ нача́лѣхъ теплотꙋ̀ се́рдца потреблѧ́ютъ.

ѯ҃д. Всѧ́кагѡ ꙗ҆́стїѧ и҆ питїѧ̀, и҆ ᲂу҆краше́нїѧ ри́знагѡ, зачина́ѧй внꙋ́трь себѐ стра́хъ сме́рти, возгнꙋша́етсѧ, и҆ не бꙋ́детъ сла́достнѣ ꙗ҆́сти хлѣ́ба, ни пи́ти воды̀: пода́стъ же є҆ди́нꙋ потре́бꙋ тѣлесѝ, є҆ли́кѡ то́чїю самодово́льно є҆́сть къ житїю̀: всѧ́кїѧ во́ли своеѧ̀ ѿве́ржетсѧ, и҆ ра́бъ всѣ́хъ съ разсꙋжде́нїемъ повелѣва́емыхъ бꙋ́детъ.

ѯ҃є. Въ раба̀ себѐ преда́вый сꙋ́щымъ по бз҃ѣ ѻ҆тцє́мъ свои̑мъ стра́ха ра́ди мꙋ́ки, не бы̀ повелѣва́ємаѧ ѡ҆блегчава̑ющаѧ болѣ́знь се́рдца є҆гѡ̀ и҆збра́лъ, ни рѣша̑ющаѧ ᲂу҆́зы стра́ха, нижѐ на такѡва́ѧ любо́внѣ и҆лѝ ласка́тельнѣ и҆лѝ повели́тельнѣ поѡщрѧ́ющихъ послꙋ́шаетъ: но па́че возраща̑ющаѧ є҆го̀ предпочте́тъ, и҆ спекꙋла́тора возмога́юща возлю́битъ. И҆ въ си́хъ пребыва́етъ, ꙗ҆́кѡ не ча́ѧ когда̀ свобо́дꙋ прїѧ́ти ѿню́дъ ѿ тѣ́хъ: ᲂу҆пова́нїе бо и҆збавле́нїѧ болѣ́знь легча́йшꙋ дѣ́лаетъ, є҆́же є҆́сть безполе́зно ка́ющемꙋсѧ те́плѣ.

ѯ҃ѕ. Всѧ́комꙋ по бз҃ѣ жи́ти начина́ющемꙋ поле́зенъ є҆́сть стра́хъ мꙋ́ки, и҆ болѣ́знь ѿ негѡ̀ ражда́емаѧ: без̾ таковы́ѧ же болѣ́зни, и҆ ᲂу҆́зъ нача́ло положи́ти мечта́ѧйсѧ, не на песцѣ̀ то́чїю дѣѧ́нїй свои́хъ ѡ҆снова́нїе полага́етъ, но и҆ на воздꙋ́сѣ мни́тсѧ без̾. ѡ҆снова́нїй составлѧ́ти хра́минꙋ, є҆́же ѿню́дъ невозмо́жно. Болѣ́знь бо сїѧ̀ ско́рѡ всѧ́кꙋ ра́дость ражда́етъ, и҆ ᲂу҆́зы сїѧ̑ всѣ́хъ согрѣше́нїй и҆ страсте́й ᲂу҆́зы расте́рзываютъ, и҆ спекꙋла́торъ се́й не сме́рти, но жи́зни вѣ́чныѧ вино́венъ быва́етъ.

ѯ҃з. И҆́же а҆́ще не восхо́щетъ ѿскочи́ти и҆ ѿбѣ́гнꙋти ражда́ющїѧсѧ болѣ́зни ѿ стра́ха вѣ́чныѧ мꙋ́ки, но произволе́нїемъ се́рдца послѣ́дꙋетъ є҆́й, и҆ востѧ́гнетъ на себѐ ᲂу҆́зы сеѧ̀ по мѣ́рѣ, скорѣ́е ше́ствовати и҆́мать, и҆ сїѧ̀ пред̾ лице́мъ цр҃ѧ̀ ца́рствꙋющихъ предста́витъ є҆го̀. Семꙋ́ же бы́вшꙋ, кꙋ́пнѡ є҆́же воззрѣ́ти є҆мꙋ̀ не ꙗ҆́снѣ къ сла́вѣ є҆гѡ̀, а҆́бїе разрѣша́тсѧ ᲂу҆́зы, спекꙋла́торный же стра́хъ бѣжа́ти и҆́мать ѿ негѡ̀, и҆ ꙗ҆́же въ се́рдцѣ є҆гѡ̀ болѣ́знь преложи́тсѧ въ ра́дость, и҆ и҆сто́чникъ бꙋ́детъ точа́щъ чꙋ́вственнѣ сле́зы подоборѣ́чнѣ приснотекꙋ́щыѧ, мы́сленнѣ же тишинꙋ̀, кро́тость и҆ неизрече́ннꙋ сла́дость, є҆ще́ же мꙋ́жество, є҆́же ко всѧ́комꙋ послꙋша́нїю за́повѣдей бж҃їихъ свобо́днѣ и҆ невозбра́ннѣ тещѝ, є҆́же є҆щѐ новонача̑льнымъ невозмо́жно є҆́сть: къ средѣ́ же по предспѣ́ѧнїю восше́дшымъ и҆ сво́йственно є҆́сть: совершє́ннымъ же быва́ющымъ свѣ́тъ быва́етъ и҆сто́чникъ се́й, се́рдцꙋ а҆́бїе и҆змѣнѧ́емꙋ и҆ прелага́емꙋ.

ѯ҃и. И҆мы́й внꙋ́трь себѐ свѣ́тъ всест҃а́гѡ дх҃а, не терпѧ̀ сегѡ̀ зрѣ́ти, на зе́млю ни́цъ па́даетъ, зове́тъ и҆ вопїе́тъ во ᲂу҆́жасѣ и҆ стра́сѣ мно́зѣ, ꙗ҆́кѡ па́че є҆стества̀, па́че сло́ва, па́че мы́сли дѣ́йство ви́дѣвъ и҆ ѡ҆щꙋти́въ: и҆ быва́етъ подо́бенъ человѣ́кꙋ горѧ́щꙋ ѿ чесогѡ́либо внꙋ́трь ᲂу҆́дꙋ ѻ҆гне́мъ и҆́мже пали́мь, и҆ жже́нїѧ пла́мене не могі́й терпѣ́ти, быва́етъ ꙗ҆́кѡ и҆зстꙋпи́вшїй, и҆ нижѐ сво́й бы́ти ѿню́дъ могі́й. Слеза́ми же полива́емь присноте́чнѣ, и҆ си́ми прохлажда́емь ѻ҆́гнь возжига́етъ жела́нїѧ ѕѣ́льнѣе: ѿсю́дꙋ же сле́зы пролива́етъ мно́жае, и҆ си́хъ и҆злїѧ́нїемъ ѡ҆мыва́емь, свѣтлѣ́е сїѧ́етъ. Є҆гда́ же ве́сь разже́гсѧ ꙗ҆́кѡ свѣ́тъ бꙋ́детъ, тогда̀ и҆сполнѧ́етсѧ рече́нное: бг҃ъ съ ѡ҆божа́емыми ѿ негѡ̀ человѣ́ки соединѧ́емь и҆ и҆́ми познава́емь, и҆ толи́кѡ, мо́жетъ бы́ть, є҆ли́кѡ ᲂу҆жѐ съ совокꙋпи́вшимисѧ соедини́сѧ, и҆ позна́вшымъ ѿкры́сѧ.

ѯ҃ѳ. Пре́жде пла́ча и҆ сле́зъ никто́же на́съ да прельща́етъ тще́тными словесы̑, нижѐ са́ми прельща́емъ себѐ: нѣ́сть въ на́съ покаѧ́нїѧ, нижѐ и҆́стинна раска́ѧнїѧ, ни стра́ха бж҃їѧ въ сердца́хъ на́шихъ, ни зазрѣ́хомъ себѐ, ни въ чꙋ́вство бꙋ́дꙋщагѡ сꙋда̀ и҆ вѣ́чныхъ мꙋ́къ прїи́де дꙋша̀ на́ша. А҆́ще бо зазрѣ́ли бы́хомъ себѐ, и҆ стѧжа́ли бы́хомъ сїѧ̑, и҆ въ сїѧ̑ пришлѝ бы́хомъ, а҆́бїе и҆ сле́зы произвелѝ бы́хомъ: си́хъ бо кромѣ̀ ни жестокосе́рдїе на́ше ᲂу҆мѧгчи́тисѧ когда̀ мо́жетъ, ни дꙋша̀ на́ша дꙋхо́внѡ смире́нїе стѧ́жетъ, ни смире́ни бы́ти возмо́жемъ. Тако́въ же не бы́вый, соедини́тисѧ дх҃ꙋ ст҃о́мꙋ не мо́жетъ: семꙋ́ же ѡ҆чище́нїемъ не соедини́выйсѧ, нижѐ во видѣ́нїе и҆ ра́зꙋмъ бж҃їй прїитѝ мо́жетъ, нижѐ досто́инъ є҆́сть добродѣ́телемъ смире́нїѧ та́инственнѣ и҆з̾ꙋча́тисѧ.

ѻ҃. Притворѧ́ющихсѧ добродѣ́тельными, и҆ ко́жею ѻ҆́вчею по ѡ҆́бразꙋ и҆́но ꙗ҆влѧ́ющихъ и҆́но же сꙋ́щихъ по внꙋ́треннемꙋ человѣ́кꙋ, всѧ́кїѧ не́гли и҆спо́лненныхъ непра́вды, по́лныхъ за́висти и҆ рве́нїѧ, и҆ сласте́й ѕлосмра́дїѧ, ꙗ҆́кѡ безстра́стныхъ мно́жайшїи, ꙗ҆́кѡ ст҃ы́хъ чтꙋ́тъ, неѡчище́нно и҆мꙋ́ще дꙋше́вное ѻ҆́ко, нижѐ позна́ти и҆̀хъ могꙋ́ще ѿ плодѡ́въ и҆́хъ: во благоговѣ́нїи же и҆ добродѣ́тели и҆ простотѣ̀ се́рдца пребыва́ющихъ, и҆ ст҃ы́хъ сꙋ́щихъ вои́стиннꙋ ꙗ҆́кѡ про́чїихъ ѿ человѣ̑къ пренебрега́ютъ, и҆ презира́юще и҆̀хъ притека́ютъ, и҆ за ничто́же вмѣнѧ́ютъ.

ѻ҃а. Глаго́ливаго и҆ тщесла́внаго, ᲂу҆чи́тельнымъ па́че и҆ дꙋхо́внымъ такові́и бы́ти вмѣнѧ́ютъ: молчали́ваго же и҆ ѿ праздносло́вїѧ блюдꙋ́щагосѧ, невѣ́ждою и҆ безгла́снымъ бы́ти ᲂу҆твержда́ютъ.

ѻ҃в. Дх҃омъ ст҃ы́мъ вѣща́ющаго, высокомꙋ́дреннїи и҆ го́рдостїю недꙋ́гꙋющїи дїа́волею, ꙗ҆́кѡ высокомꙋ́дра и҆ го́рда ѿвраща́ютсѧ, ѿ слове́съ є҆гѡ̀ ᲂу҆жаса́ющесѧ, па́че не́жели ᲂу҆милѧ́ющесѧ. Ѿ чре́ва же и҆лѝ ᲂу҆че́нїй тонкосло́вствꙋющаго, и҆ проти́вꙋ спасе́нїѧ своегѡ̀ лгꙋ́щаго, вельмѝ похвалѧ́ютъ и҆ прїе́млютъ: и҆ та́кѡ никто́же є҆́сть и҆з̾ таковы́хъ до́брѣ, и҆ ꙗ҆кова̀ є҆́сть ве́щь, разсꙋди́ти и҆ ᲂу҆ви́дѣти могꙋ́щїй.

ѻ҃г. Блаже́ни, глаго́летъ бг҃ъ, чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ⁷³: чи́сто же се́рдце, не є҆ди́на добродѣ́тель, ни двѣ̀, ни де́сѧть ѡ҆быко́ша соверша́ти, но всѧ̑ вкꙋ́пѣ, ꙗ҆́коже рещѝ, а҆́ки є҆ди́на нѣ́каѧ сꙋ́щи и҆ соверше́ннѣ и҆спра́влени бы́вше: и҆ нижѐ та́кѡ чи́сто се́рдце є҆ди́ни сотвори́ти мо́гꙋтъ без̾ дѣ́йствїѧ и҆ прише́ствїѧ ст҃а́гѡ дх҃а. Ꙗ҆́коже бо кова́чь хꙋдо́жество ѻ҆рꙋ́дїи свои́ми показꙋ́етъ, без̾ ѻ҆́гненнагѡ же дѣ́йствїѧ ничто́же ѿню́дъ произвестѝ въ дѣ́ло мо́жетъ: та́кѡ и҆ человѣ́къ всѧ̑ твори́тъ, и҆ ꙗ҆́кѡ ѻ҆рꙋ̑дїѧ, ᲂу҆потреблѧ́етъ добродѣ́тєли: без̾ прише́ствїѧ же дꙋхо́внагѡ ѻ҆гнѧ̀, недѣ́йствєнны пребыва́ютъ и҆ безполє́зны, скве́рнꙋ и҆ нечистотꙋ̀ не ѡ҆чища́ющыѧ дꙋше́внꙋю.

ѻ҃д. Ѿ бж҃е́ственнагѡ креще́нїѧ согрѣше́нїй прїе́млемъ ѡ҆ставле́нїе и҆ пре́жднїѧ клѧ́твы свобожда́емсѧ, и҆ прише́ствїемъ ст҃а́гѡ дх҃а ѡ҆свѧща́емсѧ: соверше́ннꙋю же благода́ть, по семꙋ̀: Вселю́сѧ въ ни́хъ, и҆ похождꙋ̀⁷⁴ не тогда̀: сїе́ бо є҆́сть и҆звѣстновѣ́рныхъ, и҆ ѿ дѣ́лъ сїю̀ показꙋ́ющихъ. По креще́нїи бо на́шемъ, къ лꙋка̑вымъ и҆ стꙋ̑днымъ дѣѧ́нїємъ ᲂу҆клонѧ́ющесѧ, и҆ са́мо то̀ ѡ҆свѧще́нїе всѧ́чески ѿме́щемъ. покаѧ́нїемъ же и҆ и҆́сповѣдїю и҆ слеза́ми по мѣ́рѣ ѡ҆ставле́нїе пре́жнихъ согрѣше́нїй прїе́млемъ: и҆ та́кѡ ѡ҆свѧще́нїе со благода́тїю, ꙗ҆́же свы́ше прїе́млемъ.

ѻ҃є. Ѿмы́тїе скве́рны стꙋ́дныхъ дѣѧ́нїй покаѧ́нїемъ быва́етъ, посе́мъ же прича́стїе ст҃а́гѡ дх҃а: не про́стѣ же, но по вѣ́рѣ, и҆ завѣща́нїю, и҆ смире́нїю, ѿ всеѧ̀ дꙋшѝ ка́ющихсѧ: не то́чїю же тогда̀, но и҆ по прїѧ́тїи соверше́ннагѡ ѡ҆ставле́нїѧ согрѣше́нїй ѿ ѻ҆тца̀ и҆ воспрїе́мника. Сегѡ̀ ра́ди добро̀ є҆́сть, на всѧ́къ де́нь ка́ѧтисѧ, по за́повѣди повелѣва́ющей: пока́йтесѧ, прибли́жибосѧ ца́рствїе нбⷭ҇ное⁷⁵, непредѣ́льно на́мъ ꙗ҆влѧ́етъ дѣ́ланїе.

ѻ҃ѕ. Бл҃года́ть всест҃а́гѡ дх҃а ᲂу҆невѣща́ющымсѧ хрⷭ҇тꙋ̀ дꙋша́мъ ꙗ҆́кѡ ѡ҆брꙋче́нїе дае́тсѧ. И҆ ꙗ҆́коже без̾ ѡ҆брꙋче́нїѧ не и҆́мать ᲂу҆твержде́нїѧ жена̀, є҆́же сочета́нїю съ мꙋ́жемъ когда́либо по́длиннѡ бы́ти: та́кѡ нижѐ дꙋша̀ тве́рдое прїе́млетъ и҆звѣ́ствованїе когда́либо, є҆́же со влⷣкою свои́мъ и҆ бг҃омъ во вѣ́ки вкꙋ́пѣ бы́ти. И҆лѝ та́инственнѡ и҆ неизрече́ннѡ съ ни́мъ соединѧ́тисѧ, и҆ непрестꙋ́пныѧ добро́ты є҆гѡ̀ наслажда́тисѧ, а҆́ще ѡ҆брꙋче́нїѧ благода́ти є҆гѡ̀ не прїи́метъ, и҆ разꙋ́мнѣ є҆гѡ̀ себѣ̀ не стѧ́жетъ.

ѻ҃з. И҆́мъ же ѡ҆́бразомъ пи́шємыѧ согла̑сныѧ хартїѝ а҆́ще по́дписей достовѣ́рныхъ свидѣ́телей не прїи́мꙋтъ, нѣ́сть ѡ҆брꙋче́нїе и҆звѣ́стно: та́кѡ нижѐ пре́жде дѣ́ланїѧ за́повѣдей и҆ добродѣ́телей стѧжа́нїѧ, просвѣще́нїе благода́ти тве́рдо быва́етъ. Є҆́же бо въ согла́сїѧхъ свидѣ́телїе, сїѐ въ дꙋхо́внѣмъ ѡ҆брꙋче́нїи дѣ́ланїе за́повѣдей и҆ добродѣ́тєли сꙋ́ть: соверше́нное бо си́ми прїе́млетъ ѡ҆держа́нїе ѡ҆брꙋче́нїѧ кі́йждо ѿ и҆мꙋ́щихъ спасти́сѧ.

ѻ҃и. Пе́рвѣе а҆́ки согла̑сїѧ пи́шꙋтсѧ дѣ́ланїемъ за́повѣдей, та́же ѿ добродѣ́телей запечатлѣва́ютсѧ и҆ подписꙋ́ютсѧ: и҆ тогда̀ дае́тъ пе́рстень жени́хъ хрⷭ҇то́съ невѣ́стѣ дꙋшѝ, си́рѣчь ѡ҆брꙋче́нїе дх҃а.

ѻ҃ѳ. Ꙗ҆́коже невѣ́ста пре́жде бра́ка ѡ҆брꙋче́нїе то́чїю ѿ жениха̀ прїе́млетъ: прида́ное же по согла́сїю и҆ ѻ҆бѣща́нныѧ въ ѻ҆́номъ да́ры по бра́цѣ прїѧ́ти ѡ҆жида́етъ. Та́кѡ ᲂу҆́бѡ и҆ невѣ́ста вѣ́рныхъ це́рковь, и҆ дꙋша̀ є҆ди́нагѡ когѡ́ждо и҆з̾ на́съ, пе́рвѣе ѿ жениха̀ хрⷭ҇та̀ ѡ҆брꙋче́нїе то́чїю прїе́млетъ дх҃а: вѣ̑чнаѧ же блага̑ѧ и҆ нбⷭ҇ное црⷭ҇твїе по ѿше́ствїи ѿсю́дꙋ прїѧ́ти ѡ҆жида́етъ, и҆звѣствꙋ́ема ѡ҆брꙋче́нїемъ показꙋ́ющимъ є҆́й сїѧ̑ ꙗ҆́кѡ въ зерца́лѣ, и҆ ᲂу҆твержда́ющимъ блага̑ѧ, на нѧ̑же согласи́сѧ со влⷣкою свои́мъ и҆ бг҃омъ.

п҃. Ꙗ҆́коже коснѧ́щꙋ жени́хъ во ѿше́ствїи, и҆лѝ ᲂу҆пражнѧ́ющꙋсѧ во и҆нѣ́хъ нѣ́кихъ дѣ́лѣхъ, и҆ бра́къ є҆щѐ ѿлага́ющꙋ сотвори́ти, а҆́ще разгнѣ́вавшисѧ невѣ́ста, любо́вь ѻ҆́нагѡ пре́зритъ, и҆ ѡ҆брꙋчи́тельнꙋю хартїю̀ и҆лѝ и҆згла́дитъ, и҆лѝ раздере́тъ: ѿпаде́тъ а҆́бїе ѿ наде́жды на жениха̀: та́кѡ и҆ съ дꙋше́ю ѡ҆бы́че быва́ти: внегда́ бо рече́тъ кто̀ ѿ подвиза́ющихсѧ, доко́лѣ ѕлострада́ти до́лженъ є҆́смь; и҆ по́стничєскїѧ по́двиги и҆ трꙋды̀ пренебреже́тъ, и҆ нерадѣ́нїемъ за́повѣдей, и҆ ѡ҆ставле́нїемъ всегда́шнѧгѡ покаѧ́нїѧ, а҆́ки и҆згла́дитъ и҆ раздере́тъ согла̑сїѧ: а҆́бїе ѿпа́даетъ и҆ ѿ ѡ҆брꙋче́нїѧ, и҆ ѿ наде́жды на бг҃а соверше́ннѡ.

п҃а. Ꙗ҆́коже невѣ́ста, а҆́ще ко и҆но́мꙋ любо́вь ѡ҆брꙋче́ннагѡ съ не́ю жениха̀ прело́житъ, и҆ сожи́тельствовати и҆́мать съ ни́мъ ꙗ҆́вѣ и҆лѝ ѻ҆́тай: не то́чїю ничто́же ѿ ѡ҆бѣща́нныхъ є҆́й ѿ жениха̀ прїе́млетъ, но и҆ ка́зней и҆ ѡ҆сꙋжде́нїѧ ѿ зако́на ча́ѧти бꙋ́детъ досто́йнѡ. Та́кѡ и҆ съ на́ми быва́ти ѡ҆бы́че. А҆́ще бо прело́житъ кто̀ любо́вь жениха̀ хрⷭ҇та̀ на и҆́нꙋ нѣ́кꙋю ве́щь ꙗ҆́вѣ и҆лѝ ѻ҆́тай, и҆ ᲂу҆де́ржано бꙋ́детъ се́рдце є҆гѡ̀ въ не́й: ненави́стно є҆́сть женихо́ви, и҆ ме́рзко и҆ недосто́йно соедине́нїѧ є҆гѡ̀. рече́ бо: а҆́зъ лю́бѧщыѧ мѧ̀ люблю̀⁷⁶.

п҃в. Подоба́етъ комꙋ́ждо ѿ таковы́хъ зна́менїй смотрѣ́ти, а҆́ще ѡ҆брꙋче́нїе дꙋ́ха ѿ жениха̀ и҆ влⷣки хрⷭ҇та̀ прїѧ́лъ є҆́сть. И҆ а҆́ще ᲂу҆́бѡ прїѧ́лъ є҆́сть, да тщи́тсѧ сїѐ содержа́ти: а҆́ще не ᲂу҆̀ сїѐ прїѧ́ти сподо́бисѧ, да потщи́тсѧ дѣ́лы благи́ми и҆ дѣѧ́нїи и҆ теплѣ́йшимъ покаѧ́нїемъ по си́хъ прїѧ́ти и҆ сохрани́ти є҆̀ дѣ́ланїемъ за́повѣдей и҆ добродѣ́телей притѧжа́нїемъ.

п҃г. Ꙗ҆́коже покро́въ всеѧ̀ хра́мины ѡ҆снова́ньми и҆ про́чїимъ зда́нїемъ стои́тъ, и҆ ꙗ҆́коже ѡ҆снова̑нїѧ тогѡ̀ ра́ди полага́ютсѧ, дабы̀ держа́ли покро́въ, ꙗ҆́кѡ нꙋ̑жныѧ и҆ потрє́бныѧ, и҆ нижѐ покро́въ без̾ ѡ҆снова́нїѧ стоѧ́ти ѡ҆бы́че, нижѐ ѡ҆снова̑нїѧ без̾ покро́ва къ житїю̀ потрє́бна и҆лѝ всѧ́кѡ полє́зна сꙋ́ть: та́кѡ и҆ благода́ть дх҃а соблюда́етсѧ дѣ́ланїемъ за́повѣдей, и҆ дѣѧ̑нїѧ за́повѣдей по да́рꙋ бж҃їю, ꙗ҆́кѡ ѡ҆снова̑нїѧ полага́ютсѧ. И҆ нижѐ бл҃года́ть дх҃а пребыва́ти въ на́съ ѡ҆бы́че без̾ дѣ́ланїѧ за́повѣдей, нижѐ дѣ́ланїе за́повѣдей без̾ благода́ти бж҃їѧ потре́бно и҆ поле́зно є҆́сть.

п҃д. И҆́мже ѡ҆́бразомъ безпокро́внаѧ хра́мина, ѿ нерадѣ́нїѧ созда́вшагѡ та́кѡ ѡ҆ста́вленнаѧ, не то́чїю непотре́бна є҆́сть, но и҆ вино́вна быва́етъ тогѡ̀, є҆́же посмѣва́емꙋ бы́ти созда́вшемꙋ: та́кѡ и҆ ѡ҆снова̑нїѧ дѣ́ланїѧ за́повѣдей полага́ѧй, и҆ стѣ́ны высо́кихъ добродѣ́телей возста́вивый, а҆́ще и҆ благода́ть ст҃а́гѡ дх҃а во видѣ́нїи и҆ ра́зꙋмѣ дꙋшѝ прїи́метъ, несоверше́нъ є҆́сть, ѡ҆ не́мже соверше́ннїи состра́ждꙋтъ, ѿ двою́ бо се́ю винꙋ̑ соверше́ннѡ лиша́етсѧ: и҆ли́ бо ѡ҆ покаѧ́нїи вознерадѣ̀, и҆лѝ ѿ сосло́вїѧ добродѣ́телей, ꙗ҆́кѡ ѿ безчи́сленнагѡ вещества̀ ѿре́кшисѧ, ѡ҆ста́ви нѣ̑каѧ ѿ мнѧ́щихсѧ на́мъ малѣ́йшихъ: нꙋ́ждныхъ же сꙋ́щихъ къ соверше́нїю до́мꙋ добродѣ́телей, ꙗ҆́коже не мощѝ без̾ ѻ҆́нѣхъ благода́тїю дх҃а покры́тисѧ є҆мꙋ̀.

п҃є. А҆́ще сегѡ̀ ра́ди на зе́млю сн҃ъ бж҃їй и҆ бг҃ъ сни́де, да собо́ю со свои́мъ ѻ҆ц҃е́мъ примири́тъ на́съ сꙋ́щыѧ врагѝ, и҆ совокꙋпи́тъ на́съ себѣ̀ разꙋ́мнѡ ст҃ы́мъ и҆ є҆диносꙋ́щнымъ дх҃омъ свои́мъ. Сеѧ̀ ѿпа́даѧй благода́ти, кꙋ́ю и҆́нꙋ полꙋ́читъ; нижѐ всѧ́кѡ примири́сѧ съ ни́мъ, нижѐ соедине́нїе съ ни́мъ прича́стїемъ дх҃а и҆́мать.

п҃ѕ. Стра́стныхъ по́хотей и҆ сласте́й и҆збавлѧ́етсѧ причасти́выйсѧ бж҃е́ственнагѡ дх҃а: съ тѣле́сными же є҆стества̀ нꙋ́ждами не разлꙋча́етсѧ. И҆ ꙗ҆́коже ᲂу҆́бѡ свобожде́нъ бы́въ ᲂу҆́зъ стра́стнагѡ похотѣ́нїѧ, совокꙋ́пльсѧ съ безсме́ртною сла́вою и҆ сла́достїю, непреста́ннѡ горѣ̀ понꙋжда́етсѧ бы́ти, и҆ съ бг҃омъ пребыва́ти, и҆ нижѐ вма́лѣ ѿ видѣ́нїѧ є҆гѡ̀ ѿстоѧ́ти, и҆ ненасы́тимагѡ наслажде́нїѧ: а҆ ꙗ҆́коже тѣ́ломъ и҆ тле́ю ѡ҆ко́вываемь сы́й, ѿ негѡ̀ низвлека́етсѧ и҆ влече́тсѧ, и҆ къ зємны́мъ ѡ҆браща́етсѧ: толи́кꙋ тогда̀ ѡ҆ си́хъ печа́ль и҆́мать, є҆ли́кꙋ, мню̀, и҆́мать дꙋша̀ грѣ́шника, разлꙋча́ющаѧсѧ ѿ тѣ́ла.

п҃з. Ꙗ҆́коже мїролюби́вомꙋ, тѣлолюби́вомꙋ и҆ жизнолюби́вомꙋ, пристра́стномꙋ къ вре́менной сꙋ́етной жи́зни, и҆ сластолюби́вомꙋ разлꙋче́нїе ѿ таковы́хъ сме́рть є҆́сть: та́кѡ чистолюби́вомꙋ и҆ бг҃олюби́вомꙋ, невеществолюби́вомꙋ и҆ хрⷭ҇толюби́вомꙋ, сме́рть вои́стиннꙋ є҆́сть и҆ ма́лое мы́слїю ѿ таковы́хъ разстоѧ́нїе. А҆́ще бо свѣ́тъ ви́дѧй чꙋ́вственный а҆́ще ма́лѡ смѣжи́тъ ѻ҆́чи, и҆лѝ лише́нъ бꙋ́детъ си́хъ ѿ и҆но́гѡ, печа́лꙋетъ и҆ скорби́тъ, и҆ сноси́ти ѿню́дъ сїѐ не мо́жетъ, и҆ наипа́че а҆́ще нꙋ̑жднаѧ нѣ̑каѧ и҆ чꙋ̑днаѧ зрѣ̀: кольмѝ па́че ст҃ы́мъ дх҃омъ просвѣща́емый, и҆ блага̑ѧ ѻ҆́наѧ зрѧ́й па́че ᲂу҆ма̀, бдѧ̀ и҆ спѧ̀, и҆́хже ѻ҆́ко не ви́дѣ, и҆ ᲂу҆́хо не слы́ша, и҆ на се́рдце человѣ́кꙋ не взыдо́ша, въ нѧ́же прини́кнꙋти а҆́гг҃ли жела́ютъ, а҆́ще ѿто́рженъ бꙋ́детъ ѿ видѣ́нїѧ таковы́хъ, ѿ нѣ́коегѡ, ѡ҆печа́литсѧ и҆ ѡ҆скорби́тсѧ: сме́рть бо є҆мꙋ̀ пра́веднѡ мни́тсѧ сїѐ, и҆ ѿчꙋжде́нїе вѣ́чныѧ жи́зни.

п҃и. Мно́зи пꙋсты́нное, и҆ні́и же сопребыва́тельное, си́рѣчь ѻ҆бщежи́тельное ᲂу҆блажи́ша житїѐ. И҆ні́и же, є҆́же нача́льствовати людьмѝ, совѣ́товати и҆ ᲂу҆чи́ти, и҆ составлѧ́ти цє́ркви. И҆̀же разли́чни сꙋ́ще, и҆ні́и тѣле́снѡ, и҆ні́и дꙋше́внѡ ѡ҆быко́ша препитава́тисѧ: а҆́зъ же ни є҆ди́но ѿ и҆́хъ па́че дрꙋга́гѡ предпоче́лъ бы́хъ. Нижѐ ѻ҆но̀ ᲂу҆́бѡ похвалы̀, сїе́ же порече́нїѧ досто́йно ре́клъ бы́хъ: но во всѧ́комъ, и҆ во всѣ́хъ дѣ́лѣхъ и҆ дѣѧ́нїѧхъ, житїѐ бг҃а ра́ди и҆ по бз҃ѣ преблаже́нно є҆́сть.

п҃ѳ. Ꙗ҆́коже ѡ҆ разли́чныхъ житїѧ̀ и҆скꙋ́сствъ и҆ хꙋдо́жествъ человѣ́ческое житїѐ составлѧ́етсѧ, и҆но́мꙋ и҆́но дѣ́лающꙋ, ꙗ҆́вѣ ꙗ҆́кѡ и҆ споспѣша́ющꙋ, и҆ дрꙋ́гъ дрꙋ́гꙋ преподаю́ще, и҆ дрꙋ́гъ ѿ дрꙋ́га прїе́млюще. живꙋ́тъ человѣ́цы, тѣлє́снаѧ тре́бѡванїѧ є҆стествꙋ̀ подаю́ще, та́кѡ мо́щно ᲂу҆ви́дѣти и҆ при дꙋхо́вныхъ ве́щехъ, и҆но́мꙋ и҆́нꙋ добродѣ́тель проходѧ́щꙋ, и҆ дрꙋго́мꙋ дрꙋгі́й житїѧ̀ пꙋ́ть соверша́ющꙋ, и҆ во є҆ди́но намѣ́ренїе ѿ всѣ́хъ си́хъ всѝ стека́ютсѧ.

ч҃. Намѣ́ренїе всѣ́хъ жи́тельствꙋющихъ по бз҃ѣ є҆́сть, є҆́же благоꙋгоди́ти хрⷭ҇тꙋ̀ бг҃ꙋ на́шемꙋ, и҆ примире́нїе со ѻ҆ц҃е́мъ прїѧ́ти прише́ствїемъ дх҃а и҆лѝ прича́стїемъ, и҆ спасе́нїе своѐ си́мъ прїѡбрѣстѝ: сїе́ бо всѧ́кїѧ дꙋшѝ и҆ всѧ́кагѡ человѣ́ка спасе́нїе є҆́сть. Є҆мꙋ́же не бы́вшꙋ, тще́тенъ трꙋ́дъ, и҆ сꙋ́етно є҆́сть дѣ́ланїе на́ше, и҆ безполе́зенъ всѧ́къ житїѧ̀ пꙋ́ть къ семꙋ̀, ѻ҆́нымъ текꙋ́щагѡ не приводѧ́щїй.

ч҃а. Мі́ръ ве́сь ѡ҆ста́вивый, въ го́рꙋ же ꙗ҆́кѡ на безмо́лвїе ѿше́льствовавый, и҆ ѿѻнꙋ́дꙋ тщесла́внѣ пиша̀ къ сꙋ́щымъ въ мі́рѣ, ѻ҆́вѣхъ ᲂу҆блажа́ѧ, ѻ҆́вѣхъ же ласка́ѧ и҆ похвалѧ́ѧ, ᲂу҆подо́бисѧ разве́дшемꙋсѧ съ жено́ю блꙋдни́цею, во вре́тище ѡ҆блече́нною и҆ всеѕло́бною, и҆ на странꙋ̀ дале́кꙋ ѿше́дшемꙋ, во є҆́же и҆зба́витисѧ и҆ па́мѧти ѻ҆́нѣй, та́же забы́вшемꙋ намѣ́ренїе, є҆гѡ́же ра́ди въ го́рꙋ дости́же, и҆ къ соѡбраща́ющымсѧ съ блꙋдни́цею ѻ҆́ною да рекꙋ̀, и҆ соѡсквернѧ́ющымсѧ писа́ти жела́ющемꙋ, и҆ тѣ́хъ ᲂу҆блажа́ющемꙋ. И҆́же а҆́ще и҆ не тѣ́ломъ, но се́рдцемъ всѧ́кѡ и҆ ᲂу҆мо́мъ состра́ждетъ, по намѣ́ренїю таковы́хъ прїе́млѧ, соедине́нїѧ ра́ди и҆́хъ со ѻ҆́ною.

ч҃в. Є҆ли́кѡ посредѣ̀ мі́ра ѡ҆браща́ющїисѧ и҆ ѡ҆чища́ющїи чꙋ̑вства и҆ се́рдце ѿ всѧ́кїѧ лꙋка́выѧ по́хоти, сꙋ́ть похва́льни и҆ блаже́ни: толи́кѡ въ гора́хъ и҆ въ верте́пѣхъ пребыва́ющїи, и҆̀же похва́лъ и҆ ᲂу҆блаже́нїй человѣ́ческихъ жела́ютъ, поро́чни сꙋ́ть и҆ ѿве́ржени. Ꙗ҆́коже бо прелюбодѣ́йствꙋющїи бꙋ́дꙋтъ пред̾ бг҃омъ и҆спытꙋ́ющимъ на̑ша сердца̀. Жела́ѧй бо ᲂу҆слы́шанꙋ бы́ти житїю̀ є҆гѡ̀ и҆ и҆́мени и҆ жи́тельствꙋ въ мі́рѣ, любодѣ́йствꙋетъ ѿ бг҃а, по ѡ҆́бразꙋ дре́внѧгѡ і҆ꙋде́йскагѡ наро́да, ꙗ҆́коже глаго́летъ даві́дъ.

ч҃г. Вѣ́рою несомнѣ́нною къ бг҃ꙋ, мі́ра и҆ ꙗ҆̀же въ мі́рѣ ѿрекі́йсѧ, вѣ́рꙋетъ, ꙗ҆́кѡ ми́лостивъ є҆́сть и҆ ще́дръ гдⷭ҇ь, и҆ прїе́млетъ съ покаѧ́нїемъ пристꙋпа́ющыѧ къ немꙋ̀, вѣ́дый чрез̾ безче́стїе почита́ти рабы̑ своѧ̑, и҆ чрез̾ нищетꙋ̀ кра́йнюю ѡ҆богаща́ти и҆̀хъ, чрез̾ досаждє́нїѧ и҆ ᲂу҆ничижє́нїѧ прославлѧ́ти и҆̀хъ, и҆ сме́ртїю вѣ́чныѧ жи́зни прича́стники и҆ наслѣ́дники ѧ҆̀ ᲂу҆строѧ́ти: поспѣша́етъ ꙗ҆́кѡ є҆ле́нь жа́ждꙋщїй, си́ми и҆тѝ ꙗ҆́кѡ по лѣ́ствицѣ къ безсме́ртномꙋ и҆сто́чникꙋ и҆ къ го́рнемꙋ, є҆́юже а҆́гг҃ли восхо́дѧтъ и҆ нисхо́дѧтъ: бг҃ъ же свы́ше, по си́лѣ на́шей предложе́нїѧ и҆ тща́нїѧ ѡ҆жида́ѧ, сѣди́тъ, не ꙗ҆́кѡ трꙋдѧ́щихсѧ на́съ весели́тсѧ зрѣ́ти, но ꙗ҆́кѡ до́лгъ мздꙋ̀ хотѧ̀ да́ти на́мъ, чл҃вѣколю́бецъ.

ч҃д. Бг҃ъ несꙋмнѣ́ннѡ къ немꙋ̀ приходѧ́щихъ, ѿню́дъ не ѡ҆ставлѧ́етъ низпа́сти, но и҆знемога́ющихъ ви́дѧ и҆̀хъ, содѣ́йствꙋетъ и҆ помога́етъ, подаѧ̀ и҆̀мъ рꙋ́кꙋ си́лы свы́ше, и҆ къ себѣ̀ ѡ҆браща́етъ. Содѣ́йствꙋетъ же кꙋ́пнѡ ꙗ҆́вѣ и҆ не ꙗ҆́вѣ, вѣ́домѡ и҆ невѣ́домѡ: до́ндеже на всю̀ возше́дше лѣ́ствицꙋ, къ немꙋ̀ прибли́жатсѧ, и҆ всѝ совсѣ́мъ соединѧ́тсѧ, и҆ всѧ̑ забꙋ́дꙋтъ земна̑ѧ, сꙋ́ще съ ни́мъ та́мѡ, а҆́ще въ тѣ́лѣ, и҆лѝ кромѣ̀ тѣ́ла не вѣ́мъ, и҆ сожи́тельствꙋюще, и҆ вѣ́чныхъ съ ни́мъ наслажда́ющесѧ бла̑гъ.

ч҃є. Пра́ведно є҆́сть, пре́жде и҆́гꙋ за́повѣдей хрⷭ҇то́выхъ подложи́ти своѧ̑ вы̑и, и҆ не ꙗ҆ри́тисѧ, нижѐ вспѧ́ть ᲂу҆стꙋпа́ти, но пра́вѡ и҆ ᲂу҆се́рднѡ да́же до сме́рти ходи́ти въ ни́хъ, и҆ самѣ́хъ себѐ но́выми дѣ́лати, но́вый вои́стиннꙋ бж҃їй ра́й, до́ндеже сн҃ъ со ѻ҆ц҃е́мъ чрез̾ ст҃а́го дх҃а вни́детъ, и҆ всели́тсѧ въ на́съ. И҆ тогда̀ є҆гда̀ всего̀ того̀ стѧ́жемъ все́льшасѧ и҆ ᲂу҆ча́ща себѐ, є҆мꙋ́же ѿ на́съ а҆́ще что̀ повели́тъ, и҆ ꙗ҆ково̀ ввѣ́ритъ слꙋже́нїе. сїѐ томꙋ̀ врꙋчи́тсѧ, и҆ ꙗ҆́коже ѻ҆́номꙋ є҆́сть ᲂу҆го́дно, сотвори́тъ ᲂу҆се́рднѡ. Не лѣ́ть же є҆́сть, пре́жде вре́мене сїѐ и҆ска́ти, но нижѐ дае́мое ѿ человѣ̑къ прїима́ти, но пребыва́ти въ за́повѣдехъ влⷣки на́шегѡ и҆ бг҃а, и҆ повелѣ́нїѧ є҆гѡ̀ ѡ҆жида́ти.

ч҃ѕ. Повнегда̀ врꙋче́нꙋ бы́ти на́мъ слꙋже́нїю бж҃е́ственныхъ веще́й, и҆ въ не́мъ просїѧ́ти, а҆́ще повелѣ́но на́мъ бꙋ́детъ ѿ дх҃а ко и҆но́мꙋ прейтѝ слꙋже́нїю, и҆лѝ дѣ́ланїю, и҆лѝ дѣѧ́нїю, не сопротивлѧ́имсѧ. Бг҃ъ бо нижѐ пра̑зднымъ на́мъ бы́ти, нижѐ въ є҆ди́номъ и҆ то́мжде дѣ́ланїи, є҆́же нача́хомъ, до конца̀ пребыва́ти хо́щетъ: но предспѣ́ющымъ и҆ приснодви̑жнымъ бы́ти къ полꙋче́нїю лꙋ́чшихъ, бж҃е́ственною си́рѣчь, а҆ не свое́ю ходѧ́щымъ во́лею.

ч҃з. И҆́же свою̀ во́лю тщи́тсѧ ᲂу҆мертви́ти, бж҃їю твори́ти во́лю до́лженъ є҆́сть, и҆ вмѣ́сто своеѧ̀ во́ли, бж҃їю вводи́ти въ себѐ, и҆ всажда́ти и҆ вонза́ти сїю̀ въ се́рдце своѐ: и҆ къ си́мъ ѡ҆па́снѡ смотрѣ́ти, а҆́ще насажда́єма и҆ вонза́єма, ѻ҆́ва во глꙋбинꙋ̀ нѣ́гдѣ вкорени̑вшасѧ прозѧба́ютъ, ѻ҆́ва же соѡстрꙋпѣ́вша и҆ соедини̑вшасѧ, во дре́во быва́ютъ, а҆́ще возрасто́ша и҆ процвѣто́ша, и҆ пло́дъ красе́нъ и҆ сла́докъ сотвори́ша, ꙗ҆́коже не не вѣ́дѣти є҆мꙋ̀ и҆ предпод̾е́мшей сѣ́мѧ землѝ и҆ ко́рени, на не́мже прицѣпи́лосѧ є҆́сть недоразꙋмѣва́емое и҆ неизрече́нное ѻ҆́ное, и҆ живоно́сное прозѧбе́нїе.

ч҃и. Ѿсѣца́ѧй во́лю свою̀ стра́ха ра́ди бж҃їѧ, невѣ́домо та́кѡ, ꙗ҆́коже не вѣ́сть. Бг҃ъ да́рꙋетъ є҆мꙋ̀ во́лю свою̀, и҆ неизглажда́емꙋ тꙋ̀ соблюда́етъ въ се́рдцѣ є҆гѡ̀, и҆ ѿверза́етъ ѻ҆́чи смы́сла є҆гѡ̀, є҆́же познава́ти ю҆̀, и҆ крѣ́пость дае́тъ и҆сполнѧ́ти ю҆̀: сїѧ́ же благода́ть ст҃а́гѡ дх҃а дѣ́йствꙋетъ, и҆ без̾ неѧ̀ ничто́же быва́етъ.

ч҃ѳ. А҆́ще всѣ́хъ твои́хъ согрѣше́нїй ѡ҆ставле́нїе прїѧ́лъ є҆сѝ, и҆лѝ и҆́сповѣдїю, и҆лѝ ѡ҆дѣѧ́нїемъ ст҃а́гѡ и҆ а҆́гг҃льскагѡ ѡ҆́браза, коли́кꙋю тебѧ̀ сїѐ возбꙋжда́етъ и҆мѣ́ти любо́вь и҆ благодаре́нїе и҆ смире́нїе, ꙗ҆́кѡ безчи́сленныхъ сы́й мꙋче́нїй досто́инъ, не то́чїю си́хъ и҆зба́вилсѧ є҆сѝ, но и҆ сыноположе́нїѧ, и҆ сла́вы, и҆ небе́снагѡ сподо́билсѧ є҆сѝ ца́рства. Сїѧ̑ ѡ҆браща́ѧ въ мы́сли, и҆ вы́нꙋ помышлѧ́ѧ, гото́въ бꙋ́ди, и҆ пред̾ꙋготовлѧ́йсѧ не ѡ҆безче́стити сотво́ршаго тебѐ и҆ поче́тшаго, и҆ безчи́слєннаѧ прости́вшаго согрѣшє́нїѧ, но всѣ́ми твои́ми дѣ́лы просла́вити и҆ почти́ти є҆го̀, да и҆ то́й тѧ̀ вѧ́щше возпросла́витъ, є҆го́же почтѐ па́че всѧ́кїѧ ви́димыѧ тва́ри, и҆ дрꙋ́га своего̀ и҆менова́ти тѧ̀ бꙋ́детъ и҆́скреннѧ.

р҃. Є҆ли́кѡ дꙋша̀ честнѣ́йша тѣлесѐ є҆́сть, толи́кѡ слове́сный человѣ́къ честнѣ́йшїй є҆́сть всегѡ̀ мі́ра, не на вели́чество бо сꙋ́щихъ въ не́мъ созда́нїй смотрѧ̀, и҆ сегѡ̀ ра́ди честнѣ́йшими ѻ҆́ныѧ себѐ бы́ти вмѣнѧ́й, человѣ́че: но къ да́ннѣй тебѣ̀ благода́ти воззрѣ́въ, и҆ ᲂу҆́мныѧ и҆ слове́сныѧ дꙋшѝ твоеѧ̀ досто́инство ᲂу҆разꙋмѣ́въ, воспѣва́й па́че всѣ́хъ ви́димыхъ почти́вшаго тѧ̀ бг҃а.

р҃а. Да смо́тримъ, ка́кѡ просла́вимъ бг҃а: сла́витсѧ же ѿ на́съ не и҆на́кѡ, то́чїю ꙗ҆́коже ѿ сн҃а просла́висѧ: и҆́миже бо то́й ѻ҆ц҃а̀ своего̀ просла́ви, просла́висѧ и҆ сн҃ъ ѿ ѻ҆ц҃а̀ тѣ́ми. Та̑ѧжде и҆ мы̀ со тща́нїемъ содѣ́имъ, да си́ми просла́вимъ прїе́мшаго нарица́тисѧ ѻ҆ц҃е́мъ на́шимъ сꙋ́щимъ на нб҃сѣ́хъ, и҆ просла́вимсѧ ѿ негѡ̀ си́лою сн҃о́внею, ю҆́же и҆мѣ́ѧше ᲂу҆ негѡ̀, пре́жде мі́ръ не бы́сть. Сїѧ́ же сꙋ́ть крⷭ҇тъ, си́рѣчь, ᲂу҆мерщвле́нїе ѿ всегѡ̀ мі́ра, скѡ́рби, и҆скꙋшє́нїѧ, и҆ что́либо и҆́но ѿ стрⷭ҇те́й хрⷭ҇то́выхъ, ꙗ҆̀же сносѧ́ще терпѣ́нїемъ мно́гимъ, подража́емъ хрⷭ҇тѡ́вымъ страстє́мъ. Прославлѧ́емъ же и҆́ми ѻ҆ц҃а̀ на́шего и҆ бг҃а, ꙗ҆́кѡ сы́нове є҆гѡ̀ благода́тїю, и҆ наслѣ̑дницы хрⷭ҇тѡ́вы.

р҃в. Дꙋша̀, соверше́ннѡ навыкнове́нїѧ и҆ пристра́стїѧ къ ви̑димымъ благоразꙋ́мнѡ не и҆зба́вльшаѧсѧ, приключа́ющыѧсѧ є҆́й печа̑ли, и҆ находѧ̑щаѧ на ню̀ и҆скꙋшє́нїѧ ѿ бѣсѡ́въ и҆ человѣ̑къ, безпеча́льнѡ сноси́ти не мо́жетъ: но а҆́ки сою́зомъ свѧ́зана сꙋ́щи пристра́стїемъ человѣ́ческихъ веще́й, тщето́ю и҆мѣ́нїѧ ᲂу҆грыза́етсѧ, и҆ ѡ҆ лише́нїи веще́й печа́лꙋетъ, и҆ ѡ҆ ꙗ҆́звахъ, наноси́мыхъ тѣлесѝ є҆ѧ̀, ѕѣлѡ̀ болѣ́знꙋетъ.

р҃г. А҆́ще кто̀ ѿ навыкнове́нїѧ и҆ жела́нїѧ чꙋ́вственныхъ ѿто́рже дꙋ́шꙋ свою̀, и҆ съ бг҃омъ сїю̀ свѧза̀, не то́чїю и҆ стѧжа̑нїѧ и҆ пѣ́нѧзи своѝ пре́зритъ, и҆ ꙗ҆́кѡ ѡ҆ чꙋжди́хъ и҆ стра́нныхъ, лиша́емь си́хъ, не бꙋ́детъ печа́литисѧ, но и҆ наводи̑маѧ на тѣ́ло є҆гѡ̀ болѣ́знєннаѧ, съ ра́достїю и҆ прили́чествꙋющимъ благодаре́нїемъ терпѣ́ти бꙋ́детъ, ви́дѧ при́снѡ, по сло́вꙋ бж҃е́ственнагѡ а҆пⷭ҇ла, внѣ́шнѧго тлѣ́ема человѣ́ка, внꙋ́треннѧго же де́нь ѿ днѐ ѡ҆бновлѧ́ема.⁷⁷ И҆́накѡ же невозмо́жно є҆́сть скѡ́рби по бз҃ѣ съ ра́достїю претерпѣ́ти: ра́зꙋмъ бо соверше́нный въ си́хъ потре́бенъ, и҆ премꙋ́дрость дꙋхо́внаѧ. Си́хъ же лише́нный во тьмѣ̀ безнаде́ждїѧ и҆ неразꙋ́мїѧ при́снѡ хо́дитъ: не могі́й свѣ́та терпѣ́нїѧ и҆ ᲂу҆тѣше́нїѧ ѿню́дъ ᲂу҆ви́дѣти.

р҃д. Всѧ́къ мнѧ́йсѧ мꙋ́дрствовати ѿ и҆зꙋче́ннагѡ хꙋдо́жества, въ та̑йны бж҃їѧ прони́кнꙋти и҆ ᲂу҆ви́дѣти не сподо́битсѧ никогда̀, до́ндеже смири́тисѧ пе́рвѣе восхо́щетъ, и҆ бꙋ́й бꙋ́детъ, съ высокоꙋ́мїемъ ѿве́ргши ра́зꙋмъ, є҆го́же стѧжа̀. Сїе́ бо творѧ́й, и҆ премꙋ̑дрымъ въ бж҃е́ственныхъ разꙋмѣ́нїѧхъ съ несомнѣ́нною вѣ́рою послѣ́дствꙋѧ, и҆ ѿ си́хъ рꙋководи́мь, вхо́дитъ съ ни́ми во гра́дъ жива́гѡ бг҃а, и҆ ѿ бж҃е́ственнагѡ дх҃а наставлѧ́емь и҆ просвѣща́емь, зри́тъ и҆ наꙋча́етсѧ, ꙗ҆̀же никто́же ѿ про́чїихъ человѣ̑къ ᲂу҆ви́дѣти и҆ наꙋчи́тисѧ когда̀ мо́жетъ и҆ быва́етъ тогда̀ бг҃омъ наꙋче́нъ.

р҃є. Наꙋче́нныхъ бг҃омъ, ᲂу҆ченицы̀ премꙋ́дрыхъ вѣ́ка сегѡ̀ человѣ̑къ, мнѧ́тъ бы́ти бꙋ́ихъ, са́ми сꙋ́ще вои́стиннꙋ бꙋ́и, ѿ ѡ҆б̾юродѣ́вшїѧ премꙋ́дрости внѣ́шнїѧ и҆з̾ѡстри́вшесѧ, ю҆́же ѡ҆бꙋѝ бг҃ъ, по сло́вꙋ бж҃е́ственнагѡ а҆пⷭ҇ла, ю҆́же и҆ бг҃осло́вный гла́съ и҆сповѣ́дꙋетъ бы́ти зе́мнꙋ, дꙋше́внꙋ, бѣсо́вскꙋ, по́лнꙋ рве́нїѧ и҆ за́висти.⁷⁸ Внѣ́ бо сꙋ́ще такові́и бж҃е́ственнагѡ свѣ́та, не могꙋ́ще ᲂу҆ви́дѣти чꙋдеса̀, ꙗ҆̀же въ не́мъ, водворѧ́ющихсѧ во свѣ́тѣ, и҆ ꙗ҆̀же въ не́мъ, ви́дѧщихъ, и҆ ᲂу҆ча́щихъ, ꙗ҆́кѡ прельще́нныхъ вмѣнѧ́ютъ, прельще́ни сꙋ́ще са́ми, и҆ невкꙋ́сни неизрече́нныхъ бж҃їихъ бла̑гъ.

р҃ѕ. Ꙗ҆́кѡ и҆ ны́нѣ сꙋ́ть безстра́стнїи и҆ ст҃і́и, и҆ и҆спо́лненнїи бж҃е́ственнагѡ свѣ́та, пребыва́ющїи посредѣ̀ на́съ, и҆ толи́кѡ ᲂу҆мертви́вшїи ᲂу҆́ды своѧ̑, ꙗ҆̀же на землѝ, ѿ всѧ́кїѧ нечистоты̀ и҆ стра́стнѣйшїѧ по́хоти, ꙗ҆́кѡ не то́чїю ѿ себѐ никогда́же помышлѧ́ти и҆лѝ сотвори́ти что̀ ѿ ѕлы́хъ, но нижѐ ѿ и҆но́гѡ на сїѐ влекѡ́мымъ, и҆змѣне́нїе нѣ́кое прили́чествꙋющагѡ себѣ̀ безстра́стїѧ терпѣ́ти: вѣ́дѣли бы си́хъ, а҆́ще бы вѣ́дѣли на всѧ́къ де́нь чтѡ́маѧ бж҃е́ствєннаѧ словеса̀, и҆ пѣва́ємаѧ ѿ ни́хъ не разли́чїе такѡвы́мъ приписꙋ́ющїи, и҆ невѣ́рꙋющїи ѡ҆ бж҃е́ственныхъ та́инствахъ ᲂу҆ча́щымъ премꙋ́дростїю дх҃а. А҆́ще бо разꙋмѣ́ли бы́ша соверше́ннѣ бж҃е́ственное писа́нїе, вѣ́ровали бы́ша глагѡ́ланнымъ ѿ бг҃а, и҆ дарѡва́ннымъ на́мъ благи̑мъ. А҆ поне́же неприча́стни сꙋ́ть таковы́хъ бла̑гъ ѿ возноше́нїѧ и҆ нерадѣ́нїѧ, и҆ прича́стникѡвъ бы́вшихъ, и҆ ѡ҆ таковы́хъ ᲂу҆ча́щихъ не вѣ́рꙋюще ѡ҆болгава́ютъ.

р҃з. Сегѡ̀ ра́ди то́чїю приходи́ти и҆ ви́дѣти сꙋ́щихъ въ мі́рѣ хотѧ́тъ, благода́ти бж҃їѧ и҆спо́лненнїи, и҆ соверше́ннїи ра́зꙋмомъ и҆ премꙋ́дростїю, ꙗ҆́же свы́ше, да мздꙋ̀ нѣ́кꙋю подадꙋ́тъ и҆̀мъ воспомина́нїемъ за́повѣдей бж҃їихъ, и҆ благодѣ́ланїемъ, а҆́ще послꙋ́шаютъ, а҆́ще ᲂу҆разꙋмѣ́ютъ и҆ повинꙋ́тсѧ. Поне́же бж҃їимъ не води́мїи дх҃омъ во тьмѣ̀ хо́дѧтъ, и҆ не вѣ́дѧтъ, нижѐ гдѣ̀ и҆́дꙋтъ, нижѐ въ кі́ихъ пред̾ꙋспѣва́ютъ за́повѣдехъ. Не́гли бо нѣ́когда воспрѧнꙋ́вше ѿ ѡ҆бдержа́щагѡ и҆̀хъ мнѣ́нїѧ, прїи́мꙋтъ и҆́стинное ст҃а́гѡ дх҃а ᲂу҆че́нїе, и҆ во́лю бж҃їю и҆́скреннѣ и҆ не корче́мнѣ слы́шавше пока́ютсѧ, и҆ сотво́рше ю҆̀, прича̑стницы бꙋ́дꙋтъ нѣ́коегѡ дарова́нїѧ дꙋхо́вна. А҆́ще же таковы́ѧ по́льзы не возмо́гꙋтъ и҆̀мъ бы́ти вино́вни, пла́чꙋще ѡ҆ ѡ҆слѣпле́нїи се́рдца и҆́хъ, возвратѧ́тсѧ во хра̑мины ке́ллїи своеѧ̀, но́щь и҆ де́нь молѧ́щесѧ ѡ҆ спасе́нїи и҆́хъ. Ѡ҆ и҆но́мъ бо чесо́мъ никогда́же ѡ҆печа́лѧтсѧ съ бг҃омъ непреста́ннѡ сꙋ́щїи, и҆ преисполнѧ́ющїисѧ всѧ́кагѡ бла́га.

р҃и. Ко́е намѣ́ренїе є҆́сть смотре́нїѧ воплоще́нїѧ бж҃їѧ сло́ва, во все́мъ бж҃е́ственномъ писа́нїи проповѣ́дꙋемое, и҆ ѿ на́съ прочи́тываемое, но не познава́емое; То́чїю, да прїѡбщи́всѧ на́шегѡ [є҆стества̀] прича́стники сотвори́тъ ны̀ своегѡ̀: сн҃ъ бо бж҃їй сегѡ̀ ра́ди сн҃ъ человѣ́чь бы́сть, да сы́ны бж҃їѧ сотвори́тъ ны̀ человѣ́ки, є҆́же є҆́сть по є҆стествꙋ̀ то́й, [къ семꙋ̀] по благода́ти возводѧ̀ ро́дъ на́шъ, ражда́ѧ ны̀ свы́ше дх҃омъ ст҃ы́мъ, и҆ а҆́бїе вводѧ̀ ны̀ въ ца́рствїе небе́сное, па́че же внꙋ́трь на́съ ца́рствїе небе́сное и҆мѣ́ти на́мъ да́рꙋѧ,⁷⁹ ꙗ҆́кѡ не во ᲂу҆пова́нїи бы́ти на́мъ, є҆́же вни́ти во ѻ҆́ное, но ѡ҆бдержа́щымъ сїѐ вопи́ти: живо́тъ же на́шъ сокрове́нъ є҆́сть со хрⷭ҇то́мъ въ бз҃ѣ.

р҃ѳ. Самовла́стїѧ и҆ самопроизволе́нїѧ на́шегѡ не ѿе́млетъ креще́нїе, но свобо́дꙋ на́мъ да́рꙋетъ, є҆́же не ктомꙋ̀, и҆ не хотѧ́щымъ на́мъ мꙋ̑чимымъ бы́ти ѿ дїа́вола. Въ на́шемъ же произволе́нїи є҆́сть, по креще́нїи и҆лѝ пребыва́ти самово́льнѣ въ за́повѣдехъ хрⷭ҇та̀, въ него́же крести́хомсѧ, влⷣки бг҃а, и҆ пꙋте́мъ ходи́ти повелѣ́нїй є҆гѡ̀, и҆лѝ ᲂу҆клонѧ́тисѧ ѿ пра́вагѡ пꙋтѝ сегѡ̀, и҆ къ сꙋпоста́тꙋ и҆ врагꙋ̀ на́шемꙋ дїа́волꙋ лꙋка́выми дѣѧ́ньми вспѧ́ть возврати́тисѧ.

р҃і. Повинꙋ́ющїисѧ по ст҃ѣ́мъ креще́нїи хотѣ́нїѧмъ лꙋка́вагѡ, и҆ совѣ́ты ѻ҆́нагѡ и҆сполнѧ́ющїи, самѣ́хъ себѐ ѿ ст҃ы́хъ ложе́снъ ст҃а́гѡ креще́нїѧ ѿчꙋжда́ютъ, по рече́нномꙋ ѿ дв҃да. Ниже́ бо и҆змѣнѧ́етсѧ кі́йждо ѿ на́съ, и҆лѝ ѿ тогѡ̀ є҆стества̀, ꙗ҆́коже созда́сѧ, прелага́етсѧ:⁸⁰ но бла́гъ созда́нъ бы́въ ѿ бг҃а, [ѕло́е бо бг҃ъ не сотворѝ] непрело́женъ є҆стество́мъ, ꙗ҆́коже созда́сѧ, и҆ сꙋщество́мъ сы́й, ꙗ҆̀же доброво́льною мы́слїю произволѧ́етъ и҆ хо́щетъ, сїѧ̑ и҆ содѣва́етъ, а҆́ще блага̑ѧ, а҆́ще ѕла̑ѧ. Ꙗ҆́коже бо ме́чь, а҆́ще и҆ на ѕло̀ кто̀ то́й, а҆́ще и҆ на добро̀ ᲂу҆потреби́тъ, ѿ своегѡ̀ не прелага́етсѧ є҆стества̀, но пребыва́етъ желѣ́зо сꙋ́щи: та́кѡ и҆ человѣ́къ дѣ́йствꙋетъ ᲂу҆́бѡ и҆ содѣва́етъ, та́коже рече́сѧ, ꙗ҆̀же хо́щетъ: и҆з̾ своегѡ́ же не и҆зстꙋпа́етъ є҆стества̀.

ра҃і. Спаса́етъ не сїѐ, є҆́же є҆ди́наго поми́ловати: но, є҆́же є҆ди́нагѡ презрѣ́ти, во ѻ҆́гнь посыла́етъ. Взалка́хсѧ бо, и҆ возжада́хсѧ, не ꙗ҆́кѡ є҆ди́ною, рече́сѧ, ни ꙗ҆́кѡ во є҆ди́нъ де́нь, но чре́зъ всѐ житїѐ ꙗ҆влѧ́етъ: не ꙗ҆́кѡ напита́тисѧ хрⷭ҇тꙋ̀, напои́тисѧ и҆ ѡ҆дѣ́ѧтисѧ, и҆ что́либо и҆́но си̑мъ послѣ́дствꙋетъ, не є҆ди́ною, но ꙗ҆́кѡ вы́нꙋ и҆ во всѣ́хъ ѿ рабѡ́въ свои́хъ сїѧ̑ прїе́млетъ, и҆сповѣ́да гдⷭ҇ь на́шъ и҆ бг҃ъ.⁸¹

рв҃і. Стѡ́мъ да́вый ми́лостыню, могі́й же и҆ дрꙋги̑мъ да́ти, напои́ти же и҆ напита́ти мно́гихъ молѧ́щихъ є҆го̀, и҆ вопїю́щихъ ѿсла́вый, ꙗ҆́кѡ ни напита́въ хрⷭ҇та̀, сꙋди́мь бꙋ́детъ ѿ негѡ̀. Поне́же во ѻ҆́нѣхъ всѣ́хъ са́мъ то́й є҆́сть, и҆́же и҆ во є҆ди́номъ ко́емждо ѿ малѣ́йшихъ пита́емь є҆́сть ѿ на́съ.

рг҃і. Всѣ̑мъ ᲂу҆́бѡ всѧ̑ къ тре́бованїю тѣлесѐ пода́вый дне́сь, могі́й же и҆ наꙋ́трїе сїѐ сотвори́ти, а҆́ще вознеради́тъ ѡ҆ нѣ́коей бра́тїи, и҆ гла́домъ, и҆ жа́ждою, и҆ хла́домъ ѡ҆ста́витъ ᲂу҆мре́ти, презрѣ́лъ ю҆̀, є҆́же ᲂу҆мре́ти, презрѣ́лъ и҆ самаго̀ ре́кшаго: Поне́же сотвори́сте є҆ди́номꙋ си́хъ ме́ньшихъ, мнѣ̀ сотвори́сте.

рд҃і. Сегѡ̀ ра́ди коегѡ́ждо ᲂу҆бо́га лицѐ воспрїѧ́ти благоизво́ли, и҆ всѧ́комꙋ ᲂу҆бо́гꙋ себѐ ᲂу҆подо́би, да никто́же ѿ вѣ́рꙋющихъ въ него̀, на бра́та возно́ситсѧ: но кі́йждо ви́дѧ бра́та своего̀ и҆ бли́жнѧго ꙗ҆́кѡ бг҃а своего̀, да вмѣнѧ́етъ малѣ́йша себѐ па́че бра́та, ꙗ҆́кѡ старѣ́йшагѡ є҆гѡ̀, и҆ ꙗ҆́кѡ сего̀ да прїе́млетъ и҆ почита́етъ, и҆ всѧ̑ да и҆стощава́етъ и҆мѣ̑нїѧ къ слꙋже́нїю є҆гѡ̀, ꙗ҆́коже хрⷭ҇то́съ и҆ бг҃ъ на́шъ и҆стощи́лъ є҆́сть кро́вь свою̀ за спасе́нїе на́ше.

рє҃і. Є҆мꙋ́же бли́жнѧго и҆мѣ́ти ꙗ҆́кѡ самаго̀ себѐ повелѣ́но бы́сть, то́й не є҆ди́нъ де́нь, но чрез̾ всѐ житїѐ сего̀ и҆мѣ́ти та́кѡ до́лженъ є҆́сть: и҆ є҆мꙋ́же всѧ́комꙋ просѧ́щемꙋ даѧ́ти повелѣ́но, сїѐ твори́ти повелѣва́етсѧ є҆мꙋ̀ во все́й жи́зни свое́й. И҆ хотѧ́й, да творѧ́тъ є҆мꙋ̀ и҆ні́и блага̑ѧ, ꙗ҆̀же хо́щетъ, сїѧ̑ и҆ то́й твори́ти и҆нѣ̑мъ потре́бꙋ и҆мѣ́ти бꙋ́детъ.

рѕ҃і. Ꙗ҆́коже ᲂу҆̀бо и҆мѣ́ѧй бли́жнѧго ꙗ҆́кѡ самаго̀ себѐ ничто́же и҆мѣ́ти мно́жае бли́жнѧгѡ те́рпитъ. А҆́ще же и҆́мать, и҆ не подае́тъ и҆з̾ѻби́льнѡ, до́ндеже и҆ са́мъ ни́щь бꙋ́детъ, и҆ бли̑жнимъ свои́мъ ᲂу҆подо́битисѧ, за́повѣди влⷣчнїѧ и҆сполни́тель не ѡ҆брѣта́етсѧ. Ни и҆́же всѣ̑мъ просѧ́щымъ даѧ́ти хотѧ́й, а҆́ще да́же до пѣ́нѧзѧ и҆лѝ ᲂу҆крꙋ́ха хлѣ́ба и҆мѣ́ѧ, ѿврати́тъ кого̀ ѿ просѧ́щихъ ᲂу҆ негѡ̀: ни́же бли́жнемꙋ не творѧ́й, є҆ли́кѡ хо́щетъ, да и҆́нъ сотвори́тъ къ немꙋ̀. Та́кѡ и҆ всѧ́каго ᲂу҆бо́га и҆ малѣ́йша напита́вый, напои́вый, ѡ҆дѣ́ѧвый, и҆ и҆́наѧ всѧ̑ пред̾ ни́мъ содѣ́лавый, є҆ди́наго же то́чїю пренебрегі́й, и҆ того̀ презрѣ́вый, ꙗ҆́кѡ хрⷭ҇та̀ бг҃а презрѣ́въ а҆́лчꙋща и҆ жа́ждꙋща и҆ то́й вмѣни́тсѧ.

рз҃і. Тѧ́гостна сїѧ̑ всѣ̑мъ не́гли ꙗ҆вѧ́тсѧ, тѣ́мже и҆ возмнѧ́тъ благосло́внѣ глаго́лати въ себѣ̀: кто̀ ᲂу҆́бѡ сїѧ̑ всѧ̑ сотвори́ти мо́жетъ, ꙗ҆́коже всѣ̑мъ послꙋжи́ти и҆ напита́ти, и҆ ѿню́дъ кого̀ ѿ си́хъ не презрѣ́ти: Но да ᲂу҆слы́шатъ па́ѵла, проѧвле́ннѣ вопїю́ща: Любы̀ во хрⷭ҇то́ва ѡ҆бдержи́тъ на́съ сꙋди́вшихъ сїѐ, ꙗ҆́кѡ а҆́ще є҆ди́нъ за всѣ́хъ ᲂу҆́мре, то̀ ᲂу҆́бѡ всѝ ᲂу҆мро́ша.⁸²

ри҃і. Ꙗ҆́коже гла́внѣйшыѧ за́пѡвѣди ѡ҆бдержа́тъ въ себѣ̀ всѣ̀ ча̑стныѧ за́пѡвѣди, та́кѡ и҆ гла́внѣйшыѧ добродѣ́тєли ѡ҆б̾е́млютъ въ себѣ̀ ча̑стныѧ добродѣ́тєли: прода́вый бо и҆мѣ́нїе своѐ, и҆лѝ расточи́вый є҆̀ ни́щымъ, и҆ ᲂу҆бо́гъ є҆ди́ною бы́вый, всѧ̑ є҆ди́ною ча̑стныѧ за́пѡвѣди и҆спо́лни: не ктомꙋ́ бо потре́бꙋ и҆́мать просѧ́щемꙋ даѧ́ти, и҆ли́ не ѿврати́тисѧ ѿ хотѧ́щагѡ заѧ́ти ѿ негѡ̀. Та́кѡ и҆ непреста́ннѡ молѧ́йсѧ въ се́мъ всѧ̑ созаключѝ, и҆ не ктомꙋ̀ седмери́цею дне́мъ хвали́ти гдⷭ҇а, и҆лѝ ве́черъ, и҆ заꙋ́тра, и҆ полꙋ́дне нꙋ́ждꙋ и҆́мать, ꙗ҆́кѡ всѧ̑ ᲂу҆жѐ и҆спо́лнивъ: є҆ли̑ка ᲂу҆̀бо пра́вильнѣ и҆ во ѡ҆предѣлє́нныѧ времена̀ и҆ часы̀ мо́лимсѧ и҆ пое́мъ. Та́кѡ и҆ даю́щаго ра́зꙋмъ человѣ́кѡмъ бг҃а стѧжа́вый въ себѣ̀ разꙋ́мнѡ, всѐ ст҃о́е писа́нїе про́йде, и҆ всѧ́кꙋ ѿ чте́нїѧ по́льзꙋ прїѡбрѣ́те, и҆ не ктомꙋ̀ кни́ги чте́нїѧ востре́бꙋетъ: ка́кѡ бо востре́бꙋетъ вдохнꙋ́вшаго въ написа́вшихъ бж҃е́ствєннаѧ писа̑нїѧ собесѣ́дникомъ стѧжа́вый, и҆ ѿ негѡ̀ наꙋча́емый неизречє́ннымъ сокровє́ннымъ та́йнамъ; Но кни́га сїѧ̀ прѡ́чїимъ бг҃одꙋхнове́нна бꙋ́детъ, нѡ́выѧ и҆ дрє́внїѧ та̑инства содержа́щи, пи̑саннаѧ пе́рстомъ бж҃їимъ въ не́й: ꙗ҆́кѡ всѧ̑ соверши́въ и҆ почи́въ ѿ всѣ́хъ дѣ́лъ свои́хъ въ бз҃ѣ, въ нача́льнѣмъ соверше́нствѣ.

рѳ҃і. Приключа́ющеесѧ во снѣ̀ и҆стече́нїе ѿ мно́гихъ ви́нъ ѡ҆бы́че быва́ти: ѿ чревобѣ́сїѧ, ѿ тщесла́вїѧ, и҆ ѿ за́висти бѣсѡ́въ. Быва́етъ же и҆ ѿ мно́га бдѣ́нїѧ, ко снꙋ̀ клонѧ́щꙋсѧ тѣлесѝ: и҆ ѿ стра́ха, є҆́же не пострада́ти сїѐ: и҆лѝ бж҃е́ственныѧ ра́ди лїтꙋргі́и сщ҃е́нникꙋ сꙋ́щꙋ, и҆лѝ и҆ ра́ди причаще́нїѧ: и҆ съ си́ми по́мыслы сочетава́ѧсѧ боѧ́знь на ѻ҆дрѣ̀, є҆́же ка́кѡ не пострада́ти, ᲂу҆снꙋ́въ сїѐ стра́ждетъ: и҆ сїѐ са́мое за́висти бѣсо́вскїѧ є҆́сть дѣ́ло. И҆ и҆́накѡ: ви́дѣвъ кто̀ благозра́чно лицѐ во днѝ, та́же на ло́жи написꙋ́ѧ сїѐ въ мы́сли, ᲂу҆́снетъ съ блꙋ́дными пѡ́мыслы, по разслабле́нїю не ѿри́нꙋвъ и҆̀хъ, па́даетъ во снѣ̀, не́гли же и҆ бо́дръ лежа̀ на ло́жи. И҆ и҆́накѡ сꙋ́ть нѣ́цыи ᲂу҆ны́ли, ꙗ҆́коже а҆́зъ, сѣдѧ́щїи, и҆ ѡ҆ стра́стныхъ бесѣ́дꙋющїи ве́щехъ, и҆лѝ стра́стнѣ, и҆лѝ нѝ; та́же на ло́же грѧдꙋ́ще, и҆ сїѧ̑ во ᲂу҆мѣ̀ и҆мꙋ́ще, и҆ съ сочита́нїемъ си́хъ ᲂу҆сыпа́юще, во снѣ̀ стра́ждꙋтъ, не́гли же и҆ въ са́мой бесѣ́дѣ ѿ є҆ди́нагѡ человѣ́ка дрꙋгі́й вре́дъ прїѧ́тъ. Сегѡ̀ ра́ди внима́ти себѣ̀ подоба́етъ всегда̀, и҆ словесѝ проро́ческомꙋ поꙋча́тисѧ: Предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менѐ є҆́сть, да не подви́жꙋсѧ:⁸³ и҆ слꙋ́хъ загражда́ти ѿ таковы́хъ слове́съ. Мно́жицею и҆ ѿ моли́твы нѣ́цыи ᲂу҆праздни́вшесѧ, въ движє́нїѧ плотска̑ѧ ври́нꙋшасѧ, ꙗ҆́коже и҆ во главѣ̀ ѡ҆ моли́твѣ ꙗ҆ви́хомъ.

р҃к. Бра́те, въ нача́лѣ ѿрече́нїѧ потщи́сѧ благі̑ѧ добродѣ́тєли въ тебѣ̀ само́мъ насади́ти, ꙗ҆́кѡ да и҆ ѻ҆́бществꙋ бꙋ́деши потре́бенъ, и҆ возвели́читъ тѧ̀ напослѣ́докъ гдⷭ҇и. Да не и҆́маши когда̀ дерзнове́нїѧ пред̾ и҆гꙋ́меномъ, ꙗ҆́коже и҆ во и҆но́мъ мѣ́стѣ рѣ́хомъ, нижѐ и҆щѝ ѿ негѡ̀ че́сти. Да не стѧ́жеши дрꙋ́жбы съ преимꙋ́щими, нижѐ кє́ллїи и҆́хъ ѡ҆бходѝ, вѣ́дый, ꙗ҆́кѡ си́мъ не то́чїю стра́сть тщесла́вїѧ вкоренѧ́тисѧ начина́етъ въ тебѣ̀, но и҆ ненави́димь ѿ предстоѧ́телѧ бꙋ́деши: а҆ є҆́же ка́кѡ, разꙋмѣ́ѧй да разꙋмѣ́етъ. Сѣди́ же въ ке́ллїи твое́й, ꙗ҆́коже возмо́жно є҆́сть, съ ми́ромъ: и҆ ѿ хотѧ́щагѡ съ тобо́ю бесѣ́довати да не ѿврати́шисѧ благоговѣ́нїѧ ра́ди, но совѣ́томъ ѻ҆те́ческимъ съ си́мъ бесѣ́довавъ не повреди́шисѧ, а҆́ще ѻ҆́нъ и҆ ѿ сопроти́вныхъ є҆́сть: а҆́ще же не ви́диши поле́зно сїѐ, намѣ́ренїю поле́зномꙋ подоба́етъ слѣ́довати.

рк҃а. Подоба́етъ же вы́нꙋ стра́хъ бж҃їй и҆мѣ́ти, и҆ на всѧ́къ де́нь себѐ и҆стѧ́зовати: что̀ ᲂу҆́бѡ бла́го, что́ же ѿ ѕлы́хъ содѣ́ѧно є҆́сть тобо́ю. И҆ блага̑ѧ ᲂу҆́бѡ забы́ти, да не ка́кѡ въ стра́сть тщесла́вїѧ впаде́ши: ѡ҆ сопроти́вныхъ же сле́зы и҆злива́ти со и҆сповѣ́данїемъ и҆ моли́твою крѣ́пкою. Да бꙋ́детъ же и҆стѧза́нїе та́кѡ, сконча́вшꙋсѧ дню̀, и҆ ве́черꙋ пости́гшꙋ, въ себѣ̀ размышлѧ́ти: ка́кѡ ᲂу҆̀бо съ по́мощїю бж҃їею де́нь проведо́хъ; Не ѡ҆сꙋди́хъ ли кого̀, и҆лѝ досади́хъ, и҆лѝ соблазни́хъ; и҆лѝ на лицѐ чїѐ стра́стнѣ смотрѣ́хъ: и҆лѝ настоѧ́телѧ въ слꙋже́нїи преслꙋ́шахъ, и҆ ѡ҆ то́мъ вознеради́хъ; и҆лѝ прогнѣ́вахсѧ на кого̀; и҆лѝ въ собра́нїи стоѧ́щꙋ мѝ, ᲂу҆мо́мъ въ безполе́зныхъ ᲂу҆пражнѧ́хсѧ; и҆лѝ ᲂу҆ны́нїемъ ѡ҆тѧгче́нъ бы́въ, це́ркве и҆ пра́вила ᲂу҆дали́хсѧ; Є҆гда́ же во всѣ́хъ си́хъ себѐ непови́нна ѡ҆брѧ́щеши, є҆́же є҆́сть невозмо́жно: Никто́же бо чи́стъ є҆́сть ѿ скве́рны нижѐ а҆́ще є҆ди́нъ де́нь бꙋ́детъ житїѧ̀ є҆гѡ̀:⁸⁴ и҆ никто́же похва́литсѧ чи́сто и҆мѣ́ти се́рдце:⁸⁵ тогда̀ къ бг҃ꙋ со мно́гими слеза́ми возопі́й: гдⷭ҇и! простѝ мѧ̀, є҆ли̑ка сло́вомъ и҆ дѣ́ломъ и҆ вѣ́дѣнїемъ, и҆ невѣ́дѣнїемъ согрѣши́хъ: мнѡ́га бо согрѣша́емъ, и҆ не вѣ́мы.

рк҃в. Подоба́етъ же на всѧ́къ де́нь и҆сповѣ́дати всѧ́кїй по́мыслъ дꙋхо́вномꙋ ѻ҆тцꙋ̀, и҆ глаго́лемое тебѣ̀ ѿ негѡ̀, ꙗ҆́кѡ ѿ бж҃їихъ ᲂу҆́стъ, прїима́ти со всѧ́кимъ и҆звѣствова́нїемъ, и҆ не произноси́ти и҆но́мꙋ комꙋ̀ сїѧ̑: ꙗ҆́кѡ сїѐ и҆ сїѐ вопроси́ мѧ ѻ҆те́цъ, и҆ сїе́ ми провѣща̀: и҆ добро́ ли ᲂу҆́бѡ речѐ, и҆лѝ нѝ: и҆ что̀ ᲂу҆́бѡ до́лженъ є҆́смь содѣ́ѧти ко ᲂу҆врачева́нїю; Сі́и бо глаго́лы невѣ́рїѧ по́лны сꙋ́ть ко ѻ҆тцꙋ̀ и҆ дꙋшеврє́дны, ꙗ҆̀же наипа́че слꙋча́тисѧ ѡ҆быко́ша съ новонача́льными.

рк҃г. Подоба́етъ же всѣ́хъ сꙋ́щихъ во ѻ҆бщежи́тїи ꙗ҆́кѡ ст҃ы́хъ зрѣ́ти, и҆ себѐ то́чїю грѣ́шна и҆ послѣ̑днѧ помышлѧ́ти: ꙗ҆́кѡ и҆з̾ всѣ́хъ спаса́емыхъ ѻ҆́нъ є҆ди́нъ мꙋ́читисѧ и҆́мать въ де́нь ѻ҆́ный. И҆ въ собра́нїи стоѧ̀, сїѐ помышлѧ́ѧ да не преста́неши со ᲂу҆миле́нїемъ те́плѣ пла́кати, не творѧ̀ сло́ва соблазнѧ́ющымсѧ ѡ҆ се́мъ, и҆лѝ посмѣва́ющымсѧ. А҆́ще же ви́диши себѐ ѿ сегѡ̀ во тщесла́вїе пополза́ющасѧ, и҆зходѧ̀ и҆з̾ це́ркве вта́йнѣ сїѐ творѝ, па́ки ско́рѡ въ своѐ мѣ́сто возвраща́ѧсѧ. Сїе́ бо новонача̑льнымъ ѕѣлѡ̀ є҆́сть добро̀: па́че же во вре́мѧ шестоѱа́лмїѧ, и҆ стїхосло́вїѧ, и҆ чте́нїѧ, и҆ бж҃е́ственной лїтꙋргі́и. Внемли́ же, дабы̀ не ѡ҆сꙋди́ти когѡ̀, но сїѐ положѝ во ᲂу҆мѣ̀, ꙗ҆́кѡ є҆ли́цы ви́дѧтъ мѧ̀ та́кѡ пла́чꙋща, помышлѧ́юще многогрѣ́шна бы́ти менѐ, мо́лѧтсѧ ѡ҆ мое́мъ спасе́нїи. И҆ вои́стиннꙋ, сїѐ при́снѡ помышлѧ́ѧ и҆ непреста́ннѡ соверша́ѧ, вельмѝ воспо́льзꙋешисѧ, и҆ благода́ть бж҃їю привлече́ши, и҆ бж҃е́ственнагѡ блаже́нства прича́стникъ бꙋ́деши.

рк҃д. Да не прихо́диши же въ ке́ллїю чїю̀ кромѣ̀ и҆гꙋ́менскїѧ, и҆ сїѐ рѣ́дцѣ. Но а҆́ще ѡ҆ по́мыслѣ ко́емъ того̀ вопроси́ти хо́щеши: въ це́ркви сїѐ творѝ. Ѿ собра́нїѧ же а҆́бїе въ ке́ллїю ѿходѝ, та́же си́це на слꙋже́нїе. По па́вечерницѣ же внѣ̀ ке́ллїи и҆гꙋ́менскїѧ положи́въ покло́нъ: и҆ просѧ̀ моли́твы, па́ки пони́къ съ молча́нїемъ въ ке́ллїю притека́й: лꙋ́чше бо є҆́сть є҆ди́но трист҃о́е со внима́нїемъ, внегда̀ ко снꙋ̀ ѿходи́ти, не́жели бдѣ́нїе четыре́хъ часѡ́въ въ бесѣ́дахъ безполе́зныхъ. Ѻ҆ба́че и҆дѣ́же є҆́сть ᲂу҆миле́нїе и҆ пла́чь дꙋхо́вный, та́мѡ и҆ просвѣще́нїе бж҃е́ственно: сегѡ́ же наи́тїемъ ѿгонѧ́етсѧ ᲂу҆ны́нїе и҆ недꙋ́гъ.

рк҃є. Любо́вь же ѻ҆со́бнꙋ съ каковы́млибо лице́мъ да не стѧ́жеши, па́че же съ новонача́льнымъ, а҆́ще и҆ возмни́тсѧ тѝ житїѐ и҆зрѧ́нѣйше и҆мѣ́ти, а҆ не зазо́рно. И҆́бо ѿ дꙋхо́вныѧ любвѐ прелага́етъ тѧ̀ въ стра́стнꙋ наиможа́йше, и҆ впа́даеши въ скѡ́рби безполє́зны: сїе́ бо наипа́че ѡ҆бы́че подвиза́ющымсѧ слꙋча́тисѧ. Ѻ҆ба́че смире́нїе и҆ ча́стаѧ моли́тва семꙋ̀ наꙋ́читъ: не бо̀ є҆́сть вре́мѧ подро́бнѡ ѡ҆ си́хъ глаго́лати, разꙋмѣ́ѧй же да разꙋмѣ́етъ.

рк҃ѕ. Подоба́етъ же и҆мѣ́ти себѐ ѿ всѧ́кагѡ бра́та сꙋ́щаго во ѻ҆бщежи́тїи стра́ннымъ, мно́жае же ѿ зна́емыхъ въ мі́рѣ: всѣ́хъ же ра́внѡ люби́ти, и҆ благоговѣ́йныхъ и҆ подвиза́ющихсѧ ꙗ҆́кѡ ст҃ы́хъ вмѣнѧ́ти: ѡ҆ сꙋ́щихъ же, ꙗ҆́коже а҆́зъ, ᲂу҆ны́лыхъ ᲂу҆се́рднѡ моли́тисѧ. Ѻ҆ба́че, ꙗ҆́коже вы́шше ꙗ҆ви́хомъ, всѣ́хъ ст҃ы́ми вмѣнѧ́ѧ, тщи́сѧ пла́чемъ ѿ страсте́й ѡ҆чи́ститисѧ, ꙗ҆́кѡ да просвѣти́шисѧ ѿ благода́ти, всѣ́хъ ра́внѣ вмѣнѧ́ти: и҆ блаже́нство чи́стыхъ се́рдцемъ полꙋчи́ши.

рк҃з. Сїе́ же вмѣнѧ́й, бра́те, глаго́латисѧ ѿше́льство соверше́нно ѿ мі́ра, всеконе́чное во́ли своеѧ̀ ᲂу҆мерщвле́нїе: та́же къ роди́телємъ, дома̑шнимъ и҆ дрꙋгѡ́мъ безпристра́стїе и҆ ѿрече́нїе.

рк҃и. Та́же, и҆ є҆́же всегѡ̀ ѡ҆бнажи́тисѧ и҆мѣ́нїѧ, раздѣли́вшꙋ ᲂу҆бѡ́гимъ, по ре́кшемꙋ: Прода́ждь и҆мѣ́нїе твоѐ, и҆ да́ждь ни́щымъ:⁸⁶ и҆ забы́ти ли́ца всѣ́хъ, ꙗ҆̀же по свойствꙋ̀ люби́лъ є҆сѝ и҆лѝ тѣле́снѣ, и҆лѝ дꙋхо́внѣ.

рк҃ѳ. И҆ и҆сповѣ́данїе всѣ́хъ та́йныхъ се́рдца ѿ младе́нчества и҆ да́же до сегѡ̀ часа̀ тобо́ю содѣ́ѧнныхъ, дꙋхо́вномꙋ ѻ҆тцꙋ̀, и҆лѝ и҆гꙋ́менꙋ, ꙗ҆́кѡ самомꙋ̀ бг҃ꙋ и҆стѧзꙋ́ющемꙋ сердца̀ и҆ ᲂу҆трѡ́бы, вѣ́даѧ, ꙗ҆́кѡ і҆ѡа́ннъ креща́ше креще́нїемъ покаѧ́нїѧ, и҆ всѝ грѧдѧ́хꙋ къ немꙋ̀, и҆сповѣ́дающе грѣхѝ своѧ̑.⁸⁷ И҆́бо ѿ сегѡ̀ вели́ка ра́дость дꙋшѝ, и҆ ѡ҆блегче́нїе со́вѣсти быва́етъ, по проро́ческомꙋ словесѝ: Глаго́ли ты̀ пе́рвѣе грѣхѝ твоѧ̑, да ѡ҆правди́шисѧ.⁸⁸

р҃л. Є҆́же положи́ти въ по́мыслѣ таково́е и҆звѣствова́нїе по вхо́дѣ во ѻ҆бщежи́тельство, ꙗ҆́кѡ ᲂу҆мро́ша всѝ роди́телїе и҆ дрꙋ́зи, и҆ то́чїю вмѣнѧ́ти за ѻ҆тца̀ и҆ ма́терь, бг҃а и҆ предстоѧ́телѧ: и҆ никогда́же тѣле́сныѧ ра́ди тре́бы ѿ ни́хъ что̀ попроси́ти. А҆́ще же и҆ про́мысломъ ѿ ни́хъ что̀ тебѣ̀ по́слетсѧ, прїимѝ, и҆ помоли́сѧ ѡ҆ и҆́хъ прилѣжа́нїи, и҆ пода́й по́сланное въ страннопрїи́мницꙋ, и҆лѝ въ больни́цꙋ. И҆ сїѐ сотворѝ со смире́нїемъ: не бо̀ соверше́нныхъ є҆́сть сїѐ, но малѣ́йшихъ.

рл҃а. Твори́ти же всѧ́кꙋ ве́щь, ꙗ҆́же є҆́сть добра̀, со смире́нїемъ помышлѧ́ющꙋ ѡ҆ ре́кшемъ: Є҆гда̀ сотворитѐ всѧ̑, глаго́лите, рабѝ неключи́ми є҆смы̀: є҆́же до́лжни бѣ́хомъ сотвори́ти сотвори́хомъ.⁸⁹

рл҃в. Храни́тисѧ же, и҆ дабы̀ никогда́же причаще́нїѧ прїѧ́ти, и҆мꙋ́щꙋ тѝ на кого̀ да́же и҆ прило́гъ по́мысла, доне́лѣже покаѧ́нїемъ примире́нїе содѣ́лаеши: ѻ҆ба́че и҆ семꙋ̀ ѿ моли́твы наꙋчи́шисѧ.

рл҃г. Гото́вꙋ же бы́ти на всѧ́къ де́нь къ под̾ѧ́тїю всѧ́кїѧ ско́рби, помышлѧ́ющꙋ, ꙗ҆́кѡ сі́и и҆збавле́нїе сꙋ́ть ѿ мно́гихъ долгѡ́въ, и҆ благодаре́нїѧ ст҃о́мꙋ бг҃ꙋ. Ѿ си́хъ бо стѧжева́етсѧ дерзнове́нїе непосты́дно, по сло́вꙋ вели́кагѡ а҆пⷭ҇ла: Ско́рбь бо терпѣ́нїе содѣ́ловаетъ, терпѣ́нїе же и҆скꙋ́сство, и҆скꙋ́сство же ᲂу҆пова́нїе, ᲂу҆пова́нїе же не посрами́тъ.⁹⁰ И҆́бо и҆́хже ѻ҆́ко не ви́дѣ, и҆ ᲂу҆́хо не слы́ша, и҆ на се́рдце человѣ́кꙋ не взыдо́ша,⁹¹ сїѧ̑ сꙋ́ть по нело́жномꙋ ѡ҆бѣтова́нїю показꙋ́ющымъ въ ско́рбехъ терпѣ́нїе, содѣ́йствꙋющей благода́ти: без̾ благода́ти бо не мо́жетъ что́либо и҆спра́витисѧ.

рл҃д. Не стѧжа́ти же что̀ ѿ веще́ственныхъ въ ке́ллїи да́же и҆ и҆глы̀, кромѣ̀ рогози́ны, ко́жи ѻ҆́вчїѧ, и҆ рѧ́сы, и҆ тогѡ̀, и҆́мже ѡ҆дѣ́ешисѧ, а҆́ще возмо́жно, нижѐ подно́жїѧ: є҆́сть бо и҆ ѡ҆ си́хъ нѣ́кое сло́во. Ѻ҆ба́че разꙋмѣ́ѧй да разꙋмѣ́етъ.

рл҃є. Нижѐ па́ки просѝ ѿ и҆гꙋ́мена нѣ́что ѿ потре́бныхъ веще́й, кромѣ̀ предрече́нныхъ, и҆ сїѧ̑ є҆гда̀ са́мъ призва́въ пода́стъ, ника́коже повинꙋ́ѧсѧ совѣ́тꙋющемꙋ по́мыслꙋ премѣни́ти нѣ́что ѿ подае́мыхъ, но ꙗ҆кова̀ сꙋ́ть, ꙗ҆́кѡ ѿ бг҃а съ благодаре́нїемъ прїима́й, и҆ тѣ́ми ѡ҆кормлѧ́йсѧ: невозмо́жно же кꙋпова́ти и҆́но. Ѡ҆черне́ннꙋю же ри́зꙋ два́жды въ лѣ́то подоба́етъ и҆змыва́ти, просѧ́щꙋ въ ѡ҆́бразѣ ни́ща и҆ стра́нна со всѧ́кимъ смире́нїемъ ᲂу҆ и҆но́гѡ бра́та ѻ҆де́жды, доне́лѣже своѧ̀ и҆змове́нна ѿ со́лнца и҆зсо́хнетъ. Та́же си́це па́ки съ благодаре́нїемъ ѿдаѧ́ти, та́кожде и҆ рѧ́сꙋ и҆ что́либо и҆́но.

рл҃ѕ. Трꙋди́тисѧ же по си́лѣ въ слꙋже́нїи, въ ке́ллїи же пребыва́ти въ моли́твѣ со ᲂу҆миле́нїемъ и҆ внима́нїемъ, и҆ ча́стыми слеза́ми, и҆ не полага́ти въ мы́сли, ꙗ҆́кѡ дне́сь преизли́шше ᲂу҆трꙋди́всѧ, ᲂу҆ймꙋ̀ нѣ́что ѿ моли́твы тѣле́снагѡ ра́ди трꙋда̀: глаго́лю бо тѝ, ꙗ҆́кѡ є҆ли́кѡ а҆́ще кто̀ себѐ понꙋ́дитъ въ слꙋже́нїи лиши́всѧ моли́твы, ве́лїе нѣ́что погꙋби́ти да мни́тсѧ. Та́кѡ бо є҆́сть.

рл҃з. Пре́жде же всѣ́хъ притека́ти въ церкѡ́внаѧ собра̑нїѧ, и҆ по́слѣжде ѿходи́ти, кромѣ̀ вели́кїѧ нꙋ́жды, па́че же на ᲂу҆́трени и҆ на лїтꙋргі́и.

рл҃и. Всѧ́кое же повинове́нїе стѧжа́ти къ твоемꙋ̀ и҆гꙋ́менꙋ, ѿ негѡ́же и҆ постри́глсѧ є҆сѝ, и҆ несꙋмнѣ́ннѡ повелѣва̑емаѧ ѿ негѡ̀ и҆сполнѧ́ти да́же до сме́рти, а҆́ще и҆ невозмо́жно тебѣ̀ мни́тсѧ: въ се́мъ бо подража́еши послꙋ́шавшагѡ да́же до сме́рти, сме́рти же кре́стныѧ. Не то́чїю же и҆гꙋ́мена, но и҆ всѐ бра́тство, и҆ того̀, є҆мꙋ́же слꙋжє́нїѧ врꙋчєна̀ сꙋ́ть, не подоба́етъ преслꙋ́шати въ чесо́мъ: но а҆́ще и҆ па́че си́лы бꙋ́детъ повелѣва́емое, положи́въ покло́нъ, просѝ проще́нїѧ. А҆́ще же на сїѐ не соизволѧ́етъ, помышлѧ́й самаго̀ себѐ нꙋ́дити: нꙋ́дѧщихсѧ бо ца́рствїе небе́сное є҆́сть, и҆ нꙋ́ждницы восхища́ютъ є҃.⁹²

рл҃ѳ. Є҆́же съ сокрꙋше́ннымъ се́рдцемъ поверга́тисѧ при нога́хъ всегѡ̀ бра́тства, ꙗ҆́кѡ безвѣ́стнꙋ и҆ незна́емꙋ, и҆ ѿню́дъ не сꙋ́щꙋ. И҆́бо си́це въ житїѝ пребыва́ѧй, дерза́ю рещѝ, прозри́теленъ бы́въ, мнѡ́га предглаго́летъ благода́ти содѣ́йствꙋющей. Таковы́й и҆ ѡ҆ грѣсѣ́хъ дрꙋги́хъ пла́четъ, неразвлека́емь ѿ пристра́стїѧ къ веще́мъ пребыва́ѧ, дх҃о́вномꙋ и҆ бж҃е́ственномꙋ раче́нїю не ѡ҆ставлѧ́ющꙋ є҆го̀ въ сїѧ̑ поползнꙋ́тисѧ. Не ди́вно же є҆́сть, ꙗ҆́кѡ предглаго́летъ: мно́жицею же слꙋча́етсѧ и҆ ѿ бѣсѡ́въ семꙋ̀ приходи́ти. Но разꙋмѣ́ѧй разꙋмѣ́ти бꙋ́детъ. Ѻ҆ба́че а҆́ще начне́тъ кто̀ прїима́ти и҆сповѣ̑данїѧ, мо́жетъ бы́ть и҆ лиша́етсѧ сегѡ̀, ᲂу҆пражднѧ́ѧсѧ въ то́мъ, є҆́же по́мыслы дрꙋги́хъ и҆стѧ́зовати: а҆́ще же па́ки ѿ мно́га смире́нїѧ ѿ сегѡ̀ преста́нетъ, си́рѣчь, ѿ є҆́же глаго́лати и҆ слы́шати, па́ки возво́дитсѧ въ пре́жднее ᲂу҆строе́нїе. Вѣ́сть же такова̑ѧ є҆ди́нъ бг҃ъ: а҆́зъ бо стра́хомъ содержи́мь, ѡ҆ таковы́хъ не смѣ́ю провѣща́ти.

р҃м. И҆мѣ́ти же ᲂу҆́мъ всегда̀ ко бг҃ꙋ, и҆ во снѣ̀ и҆ бо́дрости, во вре́мѧ ꙗ҆́стїѧ и҆ бесѣ́ды, въ рꙋкодѣ́лїи же и҆ во всѧ́комъ и҆но́мъ дѣѧ́нїи, по словесѝ проро́ческомꙋ: Предзрѣ́хъ гдⷭ҇а предо мно́ю вы́нꙋ.⁹³ Вмѣнѧ́й же себѐ бы́ти грѣ́шнѣйшимъ всѧ́кагѡ человѣ́ка: пребыва́ющей бо таково́й па́мѧти, ѡ҆бы́че быва́ти во ᲂу҆мѣ̀ просвѣще́нїе, а҆́ки лꙋ́чь, и҆ є҆ли́кѡ сегѡ̀ и҆́щеши съ мно́гимъ внима́нїемъ и҆ неразвлека́емою мы́слїю, трꙋдо́мъ мно́гимъ и҆ слеза́ми, свѣтлѣ́е ви́дитсѧ, ви́димо же люби́мо быва́етъ, люби́мо же ѡ҆чища́етъ: ѡ҆чища́ѧ же бг҃ови́дна содѣ́ловаетъ, просвѣща́ѧ и҆ ᲂу҆чѧ̀ различа́ти до́брое ѿ го́ршагѡ. Ѻ҆ба́че, бра́те, мно́гагѡ тре́бꙋетсѧ трꙋда̀ съ по́мощїю бж҃їею, є҆́же соверше́ннѣ семꙋ̀ всели́тисѧ въ дꙋ́шꙋ твою̀, и҆ си́мъ просвѣти́ти ю҆̀, ꙗ҆́коже просвѣща́етъ лꙋна̀ нощны́й мра́къ. Внима́ти же подоба́етъ и҆ прило́гѡмъ помыслѡ́въ тщесла́вїѧ и҆ мнѣ́нїѧ, є҆́же не ѡ҆сꙋжда́ти когѡ̀ зрѧ̀ неподо́бно что̀ дѣ́юща. Бѣ́сове бо, ви́дѧще дꙋ́шꙋ ѿ страсте́й и҆ и҆скꙋше́нїй вселе́нїемъ благода́ти и҆ ми́рнагѡ ᲂу҆строе́нїѧ свобожде́ннꙋ, предлага́ютъ такова̑ѧ: ѻ҆ба́че по́мощь є҆́сть ѿ бг҃а. Да бꙋ́детъ же тѝ и҆ пла́чь всегда́шнїй, и҆ сы́тости въ слеза́хъ да не бꙋ́детъ. Блюди́сѧ же, дабы̀ не пострада́ти что̀ ѿ мно́гїѧ ра́дости и҆ ᲂу҆миле́нїѧ, нижѐ помы́слити ꙗ҆́кѡ ѿ своегѡ̀ трꙋда̀, а҆ не ѿ благода́ти бж҃їѧ сїѧ̑ сꙋ́ть, и҆ ѿи́мꙋтсѧ ѿ тебѐ, и҆ мно́гѡ взы́щеши моли́твою, и҆ не ѡ҆брѧ́щеши: и҆ ᲂу҆вѣ́си, како́въ да́ръ погꙋби́лъ є҆сѝ. Но никогда́же, гдⷭ҇и, да лиши́мсѧ твоеѧ̀ бл҃года́ти. Ѻ҆ба́че, бра́те, а҆́ще слꙋчи́тсѧ сїѐ, возве́рзи на гдⷭ҇а не́мощь твою̀, и҆ воста́въ воздѣ́въ рꙋ́цѣ, помоли́сѧ, глаго́лѧ си́це: Гдⷭ҇и! поми́лꙋй мѧ̀ грѣ́шнаго и҆ немощна́го, и҆ ѻ҆каѧ́ннаго, и҆ низпослѝ на мѧ̀ бл҃года́ть твою̀, не ѡ҆ставлѧ́ѧ и҆скꙋси́тисѧ мѝ па́че, є҆́же могꙋ̀. Ви́ждь, гдⷭ҇и, мно́зи грѣсѝ моѝ, въ каковꙋ̀ печа́ль и҆ по́мыслы приведо́ша мѧ̀. А҆́зъ гдⷭ҇и, а҆́ще и҆ восхощꙋ̀ ѿ бѣсѡ́въ и҆ мнѣ́нїѧ помы́слити ѡ҆ лише́нїи твоегѡ̀ ᲂу҆тѣше́нїѧ, не могꙋ̀: вѣ́мъ бо проти́вꙋ си́хъ самѣ́хъ ѡ҆полча́тисѧ, во́лю твою̀ те́плѣ соверша́ющихъ. А҆́зъ же, во́лю и҆́хъ на всѧ́къ де́нь и҆сполнѧ́ѧ, ка́кѡ ѿ ни́хъ и҆скꙋша́емь бꙋ́дꙋ; и҆скꙋша́юсѧ же вои́стиннꙋ ѿ свои́хъ грѣхѡ́въ. И҆ ны́нѣ, гдⷭ҇и мо́й, гдⷭ҇и, а҆́ще є҆́сть во́лѧ твоѧ̀, и҆ мнѣ̀ є҆́сть поле́зно, да вни́детъ па́ки бл҃года́ть твоѧ̀ въ раба̀ твоего̀, ꙗ҆́кѡ да ви́дѧ сїю̀, ра́дꙋюсѧ со ᲂу҆миле́нїемъ и҆ пла́чемъ, просвѣща́емь ѿ сегѡ̀ присносвѣ́тлагѡ просвѣще́нїѧ, сохранѧ́емь ѿ скве́рныхъ пѡ́мыслъ и҆ всѧ́кїѧ лꙋка́выѧ ве́щи, и҆ на всѧ́къ де́нь мно́ю твори́мыхъ въ вѣ́дѣнїи и҆ невѣ́дѣнїи, дѣ́лъ же и҆ слове́съ, прїе́млѧ и҆звѣ́ствованїе въ дерзнове́нїи къ тебѣ̀, гдⷭ҇и, ѿ приключа́ющихсѧ на всѧ́къ де́нь скорбе́й рабꙋ̀ твоемꙋ̀ ѿ бѣсѡ́въ и҆ человѣ̑къ, и҆ ѿ ѿсѣче́нїѧ своеѧ̀ во́ли, помышлѧ́ѧ и҆ ᲂу҆готѡ́ваннаѧ блага̑ѧ лю́бѧщымъ тѧ̀, гдⷭ҇и. Ты́ бо ре́клъ є҆сѝ, гдⷭ҇и, ꙗ҆́кѡ просѧ́й прїе́млетъ, и҆ и҆ща́й ѡ҆брѣта́етъ, и҆ толкꙋ́щемꙋ ѿве́рзетсѧ.⁹⁴ Къ си̑мъ же, бра́те, и҆ и҆́на, є҆ли́ка пода́стъ бг҃ъ въ мы́сль твою̀, пребꙋ́ди молѧ̀, неразслаблѧ́емь ѿ ᲂу҆ны́нїѧ: и҆ бг҃ъ благі́й не ѡ҆ста́витъ тѧ̀.

рм҃а. Въ ке́ллїи же, ю҆́же ѿ предстоѧ́телѧ въ нача́лѣ прїѧ́лъ є҆сѝ, пребꙋ́ди да́же до конца̀: а҆́ще же ве́тхости ра́ди и҆лѝ паде́нїѧ є҆ѧ̀ ѿ по́мысла стꙋжа́ешисѧ, положи́въ покло́нъ предстоѧ́телю, со смире́нїемъ воспомѧнѝ. И҆ а҆́ще ᲂу҆́бѡ ᲂу҆слы́шитъ тѧ̀, ра́дꙋйсѧ: а҆́ще ли же нѝ, и҆ та́кѡ благодарѝ, воспомѧнꙋ́въ влⷣкꙋ твоего̀, не и҆мѣ́вшаго гдѣ̀ главꙋ̀ подклони́ти. А҆́ще бо два́жды и҆ три́жды, и҆лѝ четы́режды ѡ҆ се́мъ стꙋжа́лъ є҆сѝ, ражда́етсѧ дерзнове́нїе, та́же невѣ́рїе, и҆ наконе́цъ презрѣ́нїе. А҆́ще ᲂу҆́бѡ хо́щеши ти́хое и҆ безмо́лвное житїѐ препроводи́ти: не и҆спра́шивай ѿню́дъ тѣле́сныѧ потре́бы ѿ и҆гꙋ́мена: и҆́бо въ нача́лѣ не сїѐ ѡ҆бѣща́лсѧ є҆сѝ, но и҆ ѿ всѣ́хъ презира́емь и҆ ᲂу҆ничижа́емь бы́ти по за́повѣди гдⷭ҇ней, и҆ терпѣ́ти до́блественнѣ. А҆́ще ᲂу҆́бѡ хо́щеши вѣ́рꙋ и҆ любо́вь къ немꙋ̀ храни́ти, и҆ ꙗ҆́кѡ на ст҃а́го того̀ зрѣ́ти, трѝ сїѧ̑ сохранѝ: не проси́ти, ꙗ҆̀же на потре́бꙋ тѣле́снꙋ, и҆ не глаго́лати съ дерзнове́нїемъ, и҆ не ᲂу҆чаща́ти къ немꙋ̀, ꙗ҆́коже нѣ́цыи творѧ́тъ, а҆́ки си́рѣчь врачꙋ́еми ѿ негѡ̀: не и҆́ноческое є҆́сть дѣ́ло сїѐ, но человѣ́ческое, не ѡ҆сꙋжда́ю же, и҆ є҆́же не скрыва́ти ѿ негѡ̀ всѧ́кїй по́мыслъ приходѧ́щїй тебѣ̀. А҆́ще бо сїѧ̑ сохрани́ши, неволнꙋ́емѡ пре́йдеши жите́йское мо́ре, и҆ ѻ҆тца̀, како́въ ни є҆́сть, свѧ́та возмни́ши. А҆́ще же прише́дъ вопроси́ти въ це́ркви твоего̀ ѻ҆тца̀ ѡ҆ по́мыслѣ, ѡ҆брѧ́щеши и҆но́го предвари́вша тѧ̀ тоѧ́жде ра́ди вины̀, и҆лѝ и҆ и҆ны́ѧ ра́ди нѣ́кїѧ, и҆ сегѡ̀ ра́ди презрѣ́нна тѧ̀ на ма́лое вре́мѧ: да не печа́лꙋеши, нижѐ проти́вное что̀ помы́слиши. Но ѻ҆со́бь сто́й, рꙋ́цѣ и҆мѣ́ѧ сложе́ннѣ да́же до и҆сполне́нїѧ потре́бы тогѡ̀, и҆ твоегѡ̀ призва́нїѧ. Ѡ҆бы́че бо сїѐ быва́ти на́мъ ѿ ѻ҆тє́цъ не́гли и҆ во́лею ко и҆скꙋше́нїю и҆ и҆збавле́нїю ѿ преждебы́вшихъ грѣхѡ́въ.

рм҃в. Пости́тисѧ же трѝ поста̀. Въ вели́кїй по́стъ сꙋгꙋ́бѡ, кромѣ̀ вели́кагѡ пра́здника, сꙋббѡ́ты и҆ недѣ́ли: въ два́ же дрꙋгі̑ѧ, чрез̾ є҆ди́нъ де́нь. Во про́чыѧ же дни̑ лѣ́та, є҆ди́ною дне́мъ ꙗ҆́сти, кромѣ̀ сꙋббѡ́ты и҆ недѣ́ли и҆ пра́здника, но не къ сы́тость.

рм҃г. Потщи́сѧ же ѡ҆́бразъ поле́зный всемꙋ̀ бра́тствꙋ бы́ти, ко всѧ́кой добродѣ́тели, смире́нїю и҆ кро́тости, къ ми́лостыни и҆ послꙋша́нїю да́же и҆ хꙋдѣ́йшымъ, къ безгнѣ́вїю и҆ безпристра́стїю, къ нестѧжа́нїю и҆ ᲂу҆миле́нїю, къ неѕло́бїю и҆ нелюбопы́тствꙋ, къ простотѣ̀ нра́ва, и҆ ᲂу҆стране́нїю ѿ всѧ́кагѡ человѣ́ка, къ посѣще́нїю немощствꙋ́ющихъ, къ ᲂу҆тѣше́нїю скорбѧ́щихъ, є҆́же не ѿврати́тисѧ когѡ̀ ѿ тре́бꙋющихъ по́льзы ѿ тебѐ собесѣ́дованїѧ ра́ди съ бг҃омъ: лꙋ́чше бо мл҃твы є҆́сть любы̀. Сострада́тельнꙋ же бы́ти тебѣ̀ ко всѣ̑мъ, нетщесла́внꙋ, бездерзнове́ннꙋ, неѡбличи́тельнꙋ, неистѧзꙋ́ющꙋ что̀ ѿ предстоѧ́телѧ, и҆лѝ ѿ нѣ́коегѡ ѿ слꙋжи́телей, ко всѣ̑мъ сщ҃е́нникѡмъ че́сть хранѧ́щꙋ: внима́нїе въ моли́твѣ и҆ ᲂу҆строе́нїе неꙋхищре́нное, и҆ любо́вь ко всѣ̑мъ пока́зовати. Не сла́вы ра́ди тща́тисѧ любопы́тствовати и҆ и҆спы́товати писа̑нїѧ: моли́тва бо, ꙗ҆́же со слеза́ми, и҆ є҆́же ѿ благода́ти просвѣще́нїе семꙋ́ тѧ наꙋ́читъ. Вопроша́емь ᲂу҆̀бо ѡ҆ чесо́млибо прили́чествꙋющемъ, со мно́гимъ смире́нїемъ ѿ житїѧ̀ твоегѡ̀, ꙗ҆́кѡ ѿ и҆но́гѡ бж҃е́ственнымъ дѣ́ломъ подаю́щей благода́ти, ᲂу҆чѝ не тщесла́внымъ по́мысломъ, кто̀ бы ни слꙋчи́лсѧ по́льзы жела́ѧй. И҆ ѿ и҆́щꙋщагѡ воспо́льзоватисѧ въ по́мыслѣ ѿ тебѐ да не ѿврати́шисѧ, но воспрїимѝ согрѣшє́нїѧ є҆гѡ̀, ꙗ҆кѡва̀ ни сꙋ́ть, пла́чѧ ѡ҆ не́мъ и҆ молѧ́сѧ: зна́менїе бо сꙋ́ть и҆ сїѧ̀ любвѐ и҆ соверше́ннагѡ сострада́нїѧ. И҆ тогѡ̀ ра́ди, дабы̀ не повреди́тисѧ ѿ слꙋ́шанїѧ таковы́хъ, да не ѿри́неши прише́дшагѡ: благода́ти содѣ́йствꙋющей, ничто́же повреди́шисѧ. Ѻ҆ба́че, дабы̀ не причини́ти вре́дъ мнѡ́гимъ, въ та́йнѣ мѣ́стѣ сїѐ подоба́етъ рещѝ, а҆́ще не́гли и҆ прило́гъ по́мысла ꙗ҆́кѡ человѣ́къ прете́рпиши. А҆́ще бо и҆ благода́ти и҆спо́лненъ бꙋ́деши, нижѐ сїѐ да ᲂу҆вѣща́етъ тѧ̀ ѿврати́тисѧ. И҆́бо поꙋча́емсѧ мы̀ не своегѡ̀ и҆ска́ти, но ꙗ҆̀же и҆нѣ́хъ, да спасꙋ́тсѧ. И҆ ꙗ҆́коже предреко́хомъ, храни́ти тебѣ̀ подоба́етъ безмо́лвное житїѐ, и҆ нестѧжа́тельное. И҆ самаго̀ себѐ тогда̀ возмни́ши дѣ́йствꙋема бы́ти ѿ благода́ти, грѣ́шнѣйша всѣ́хъ человѣ̑къ: сїе́ же ка́кѡ быва́етъ, не могꙋ̀ глаго́лати, бг҃ъ вѣ́сть.

рм҃д. Часы́ же бдѣ́нїѧ, до́лженъ є҆́сть честѝ часа̀ два̀, и҆ два̀ моли́тисѧ во ᲂу҆миле́нїи со слеза́ми, и҆ канѡ́нъ, ꙗ҆ко́въ хо́щеши, и҆ двана́десѧть ѱалмы̀, а҆́ще хо́щеши, и҆ моли́твꙋ, нескве́рнаѧ: и҆ моли́твꙋ ст҃а́гѡ є҆ѵстра́тїа, сїѧ̑ въ вели́кїѧ нѡ́щи. Въ ма̑лыѧ же, кратча́йшее послѣ́дованїе, по си́лѣ дае́мой тебѣ̀ ѿ бг҃а: без̾ негѡ́ бо ниеди́но бла́го и҆справлѧ́етсѧ, ꙗ҆́коже глаго́летъ проро́къ: ѿ гдⷭ҇а стѡпы̀ человѣ́кꙋ и҆справлѧ́ютсѧ⁹⁵. И҆ самомꙋ̀ сп҃сꙋ ре́кшꙋ: без̾ менѐ не мо́жете твори́ти ничесѡ́же⁹⁶. Без̾ сле́зъ же никогда́же да причасти́шисѧ.

рм҃є. Ꙗ҆́сти же предлага́ємаѧ тѝ, ꙗ҆кѡва̀ ни сꙋ́ть: подо́бнѣ же и҆ вїно̀ съ воздержа́нїемъ без̾ ропта́нїѧ. А҆́ще же и҆ наединѣ̀ сѣди́ши не́мощи ра́ди, сꙋ́рѡва ѕє́лїѧ съ ма́слинами. А҆́ще же кто̀ ѿ бра́тїи снѣ́дно что̀ по́слетъ тѝ, прїимѝ съ благодаре́нїемъ и҆ смире́нїемъ ꙗ҆́кѡ стра́ненъ, и҆ ѿ тогѡ̀ причасти́сѧ, а҆́ще что́либо є҆́сть: а҆ ѡ҆ста́вшеесѧ послѝ и҆но́мꙋ бра́тꙋ ни́щꙋ и҆ благоговѣ́йнꙋ. А҆́ще же кто̀ позове́тъ тѧ̀ на трапе́зꙋ, ѿ всѣ́хъ предлага́емыхъ тебѣ̀ вкꙋсѝ, но по ма́лꙋ, по за́повѣди, воздержа́нїе хранѧ̀. Востаѧ́ же положи́въ покло́нъ по ѻ҆бы́чаю стра́нна и҆ ни́ща, благодаре́нїе томꙋ̀ возда́ждь, глаго́лѧ: бг҃ъ ѻ҆́тче ст҃ы́й, мздꙋ̀ да да́стъ тебѣ̀. Блюди́сѧ же глаго́лати что̀, а҆́ще бы не́гли и҆ поле́зно бы́ло.

рм҃ѕ. А҆́ще ли же кто̀ ѿ бра́тїй ѡ҆скорбле́нъ бы́въ, и҆лѝ ѿ предстоѧ́телѧ, и҆лѝ і҆коно́ма, и҆лѝ ѿ и҆но́гѡ когѡ̀, и҆ прїи́детъ къ тебѣ̀, ᲂу҆тѣ́ши є҆го̀ си́це: вѣ́рꙋ мѝ и҆мѝ, бра́те, ко и҆скꙋше́нїю тебѣ̀ сїѐ бы́сть. и҆ мнѣ́ бо разли́чнѣ сїѐ слꙋча́лосѧ, и҆ ѿ малодꙋ́шїѧ печа́ловахъ: а҆ поне́же и҆звѣсти́хсѧ, ꙗ҆́кѡ сїѧ̑ быва́ютъ ко и҆скꙋше́нїю, то̀ сношꙋ̀ благода́рнѣ. и҆ ты̀ ᲂу҆́бѡ та́кѡ творѝ, и҆ па́че да возвесели́шисѧ ѡ҆ таковы́хъ ско́рбѣхъ. А҆́ще же и҆ доса́довати бꙋ́детъ, нижѐ та́кѡ да ѿврати́шисѧ, но ꙗ҆́коже благода́ть пода́стъ тебѣ̀, ᲂу҆тѣ́ши є҆го̀: мнѡ́га бо сꙋ́ть разсꙋждє́нїѧ, и҆ ꙗ҆́коже разꙋмѣ́еши ᲂу҆строе́нїе бра́та и҆ по́мыслы: примирѧ́й є҆го̀, да не ѡ҆ста́виши неꙋврачева́нна є҆го̀ ѿитѝ.

рм҃з. Немощствꙋ́ющꙋ же бра́тꙋ, а҆́ще слꙋчи́тсѧ тебѣ̀ не посѣти́ти до́лгѡ, подоба́етъ тѝ нѣ́что предпосла́ти ꙗ҆влѧ́ѧ и҆ сїѐ, ꙗ҆́кѡ вѣ́рꙋ и҆мѝ, ѻ҆́тче ст҃ы́й, дне́сь ᲂу҆разꙋмѣ́хъ ѡ҆ недꙋ́зѣ, и҆ прошꙋ̀ проще́нїѧ. Та́же си́це ше́дъ, и҆ покло́нъ положи́въ, и҆ моли́твꙋ соверши́въ, та́кѡ рцы̀ є҆мꙋ̀: ка́кѡ бг҃ъ помо́же тѝ, ѻ҆́тче ст҃ы́й; И҆ сѣ́дъ сложи́въ рꙋ́цѣ, молчѝ. А҆́ще же и҆ и҆ні́и прїидо́ша посѣще́нїѧ ра́ди, блюди́сѧ сопобесѣ́довати ѡ҆ че́мъ и҆лѝ ѿ писа́нїй, и҆лѝ ѿ є҆сте́ственнагѡ разсꙋ́дка, па́че же невопроша́емь, да не по́слѣжде скорбѣ́ти и҆́маши: сїе́ бо наимно́жайше слꙋча́етсѧ съ простѣ́йшею бра́тїею.

рм҃и. Съ благоговѣ́йною бра́тїею а҆́ще слꙋчи́тсѧ ᲂу҆чрежда́емꙋ бы́ти, ѿ предлежа́щихъ без̾ сꙋмнѣ́нїѧ подоба́етъ тѝ причаща́тисѧ, а҆́ще что́либо бꙋ́детъ. А҆́ще же за́повѣдь чїю̀ и҆́маши, и҆лѝ ры̑бы, и҆лѝ и҆но́гѡ чесогѡ̀ не ꙗ҆́сти, сꙋ́ть же предлага́єма: а҆́ще бли́зъ тѝ бꙋ́детъ за́повѣдь да́вый, ше́дъ ᲂу҆молѝ є҆го̀, да попꙋ́ститъ тѝ вкꙋси́ти: а҆́ще же не присꙋ́тствꙋетъ, и҆лѝ и҆ зна́еши, ꙗ҆́кѡ не попꙋ́ститъ тѝ, и҆ па́ки тѣ́хъ не хо́щеши соблазни́ти, по ᲂу҆чрежде́нїи возвѣстѝ є҆мꙋ̀ дѣ́ланїе своѐ, просѧ̀ проще́нїѧ. А҆́ще же ни тогѡ̀, ни дрꙋга́гѡ ѿ си́хъ не хо́щеши, лꙋ́чше тѝ є҆́сть не пойтѝ къ ни̑мъ: и҆́бо сꙋгꙋ́бѡ прїѡбрѧ́щеши, и҆ бѣ́са тщесла́вїѧ и҆збѣжи́ши, и҆ тѣ́хъ собла́зна и҆ ско́рби и҆зба́виши. А҆́ще же ѻ҆ни́ дебелѣ́йши сꙋ́ть, сохранѝ пра́вило, лꙋ́чше же є҆́сть, и҆ при ни́хъ ѿ всегѡ̀ по ма́лꙋ причасти́тисѧ. Подо́бнѣ и҆ при ᲂу҆тѣше́нїи чїе́мъ, по а҆пⷭ҇лꙋ законополага́ющꙋ, всѐ предлага́емое ꙗ҆́сти подоба́етъ, ничто́же сꙋмнѧ́щесѧ, за со́вѣсть⁹⁷.

рм҃ѳ. А҆́ще творѧ́щꙋ тѝ въ ке́ллїи твое́й моли́твꙋ, ᲂу҆да́ритъ кто̀ во две́рь, ѿве́рзи є҆мꙋ̀, и҆ сѣ́дъ побесѣ́дꙋй со смире́нїемъ, а҆́ще что́либо предложи́тъ ѿ прили́чествꙋющихъ на по́льзꙋ. И҆ а҆́ще ѿ ско́рби є҆́сть ѡ҆тѧгче́нъ, потщи́сѧ и҆лѝ сло́вомъ и҆лѝ дѣ́ломъ ᲂу҆врачева́ти є҆го̀. И҆ па́ки томꙋ̀ ѿше́дшꙋ затвори́въ, воспрїе́мь моли́твꙋ соверша́й. И҆́бо подо́бно примире́нїю є҆́сть и҆ врачева́нїе приходѧ́щихъ. Съ мїрски́ми же не та́кѡ подоба́етъ твори́ти: но и҆спо́лнѧ моли́твꙋ, та́кѡ съ ни́ми бесѣ́довати.

р҃н. Молѧ́щꙋсѧ же тебѣ̀, а҆́ще страхова́нїе нѣ́кое, и҆лѝ шꙋ́мъ, и҆лѝ ꙗ҆́кѡ свѣ́тъ ѡ҆сїѧ́етъ, и҆лѝ и҆́но что̀ слꙋчи́тсѧ, ты̀ да не ᲂу҆жасне́шисѧ, но па́че прилѣ́жнѣе въ моли́твѣ пребꙋ́ди: смꙋще́нїе бо быва́етъ бѣсо́вское, и҆ тре́петъ, и҆ ᲂу҆́жасъ, ꙗ҆́кѡ да разсла́бивсѧ моли́твꙋ ѡ҆ста́виши, и҆ про́чее прїѡбы́кшꙋ тѝ къ семꙋ̀ воз̾ѡблада́ютъ тобо́ю. А҆́ще же моли́твꙋ соверша́ющꙋ тѝ, и҆́нъ свѣ́тъ ѡ҆сїѧ́етъ тѧ̀, є҆го́же не возмо́жно и҆зрещѝ, и҆ дꙋша̀ ра́дости и҆спо́лнена бꙋ́детъ, и҆ жела́нїе лꙋ́чшихъ, и҆ сле́зъ тече́нїе со ᲂу҆миле́нїемъ: вѣ́ждь, ꙗ҆́кѡ бж҃е́ственно посѣще́нїе сїѐ є҆́сть и҆ застꙋпле́нїе. И҆ а҆́ще пребыва́етъ надо́лзѣ, да не бꙋ́детъ ти́ что̀ мно́жае ѿ продолже́нїѧ сле́зъ, плѣнѝ ᲂу҆́мъ тво́й въ нѣ́что ѿ тѣле́сныхъ, и҆ си́мъ да смири́шисѧ. Мл҃твꙋ же, внемлѝ, да не ѡ҆ста́виши ѿ ᲂу҆страше́нїѧ вра́жїѧ: но ꙗ҆́коже ѻ҆́трокъ ѿ нѣ́кихъ личи́нъ ᲂу҆страше́нъ под̾ ѡ҆б̾ѧ̑тїѧ ма́тере и҆лѝ ѻ҆тца̀ прибѣга́ѧ, стра́хъ си́хъ ѿгонѧ́етъ, та́кѡ и҆ ты̀ моли́твою къ бг҃ꙋ восте́къ, стра́ха си́хъ и҆збѣжи́ши.

рн҃а. А҆́ще сѣдѧ́щꙋ тѝ въ ке́ллїи бра́тъ нѣ́кїй прише́дъ вопро́ситъ тѧ̀ ѡ҆ плотско́й бра́ни, да не ѿврати́ши такова́го: но со ᲂу҆миле́нїемъ тѣ́ми, ꙗ҆̀же благода́ть бж҃їѧ пода́стъ тебѣ̀, и҆ є҆́же ѿ дѣѧ́нїѧ стѧжа́лъ є҆сѝ, воспо́льзꙋй є҆го̀, и҆ та́кѡ ѿпꙋстѝ. И҆зходѧ́щꙋ же, положи́въ покло́нъ къ немꙋ̀, рцы̀, вѣ́рꙋ и҆мѝ, бра́те, ᲂу҆пова́ю на человѣколю́бїе бж҃їе, ꙗ҆́кѡ бѣжа́ти и҆́мать ѿ тебѐ такова́ѧ бра́нь, то́чїю да не ѻ҆́тай ᲂу҆стꙋ́пиши, и҆лѝ разсла́бишисѧ. И҆зше́дшꙋ же томꙋ̀, воста́въ и҆ воѡбрази́въ бра́нь є҆гѡ̀, воздѣ́въ рꙋ́цѣ со слеза́ми ко бг҃ꙋ, со стена́нїемъ ѡ҆ бра́тѣ помоли́сѧ, глаго́лѧ: гдⷭ҇и бж҃е, не хотѧ́й сме́рти грѣ́шнагѡ, ꙗ҆́коже вѣ́си, на по́льзꙋ бра́тꙋ семꙋ̀ ᲂу҆стро́й. И҆ бг҃ъ, вѣ́дый вѣ́рꙋ є҆гѡ̀ къ тебѣ̀, твое́ же ѿ любвѐ сострада́нїе и҆ чи́стꙋю ѡ҆ не́мъ мл҃твꙋ, ѡ҆блегчава́етъ бра́нь є҆гѡ̀.

рн҃в. Сїѧ̑ же всѧ̑ потрє́бна сꙋ́ть, бра́те, ко ᲂу҆миле́нїю, и҆ подоба́етъ съ сокрꙋше́ннымъ се́рдцемъ, терпѣ́нїемъ и҆ благодаре́нїемъ соверша́ти, ꙗ҆̀же сле́зъ сꙋ́ть винѡ́вна, и҆ низлага́ютъ стра̑сти, и҆ небе́снагѡ винѡ́вна ца́рствїѧ: нꙋ́дѧщихсѧ бо є҆́сть ца́рствїе небе́сное, и҆ нꙋ́ждницы восхища́ютъ є҆̀⁹⁸. И҆́бо а҆́ще сїѧ̑ и҆спра́виши, ѿ дре́внихъ нра́вѡвъ соверше́ннѣ ѿстꙋ́пиши, не́гли и҆ ѿ са́мыхъ прило́гѡвъ по́мысла: ѡ҆бы́че бо ᲂу҆стꙋпа́ти свѣ́тꙋ тьма̀, и҆ со́лнцꙋ сѣ́нь. И҆́бо а҆́ще ѡ҆ си́хъ вознеради́тъ кто̀ въ нача́лѣ разслаблѧ́ѧ по́мыслъ, любопы́тенъ бы́въ, благода́ти лиша́етсѧ. И҆ тогда̀ во стра̑сти ѕлы̑ѧ впа́дъ, познава́етъ свою̀ не́мощь, боѧ́зни и҆сполнѧ́емь. Не подоба́етъ же и҆ и҆справлѧ́ющемꙋ помышлѧ́ти, ꙗ҆́кѡ свои́мъ трꙋдо́мъ сїѐ и҆справлѧ́етъ, но благода́тїю бж҃їею. Пред̾ѡчища́ти же подоба́етъ себѐ, по ре́кшемꙋ⁹⁹: ѡ҆чища́тисѧ пе́рвѣе, та́же съ чи́стымъ бесѣ́довати подоба́етъ. Ѿ мно́гихъ бо сле́зъ ᲂу҆мꙋ̀ ѡ҆чище́нꙋ бы́вшꙋ, и҆ просвѣще́нїе бж҃е́ственнагѡ свѣ́та под̾е́млющꙋ, є҆го́же мі́ръ ве́сь а҆́ще прїи́метъ, не ᲂу҆малѧ́етъ, ᲂу҆́мнѣ то́й въ бꙋ́дꙋщихъ пребыва́етъ.

Вопроше́нъ бы́сть нѣ́когда ст҃ы́й и҆ блаже́нный се́й сѷмеѡ́нъ: како́въ до́лженъ є҆́сть бы́ти сщ҃е́нникъ; И҆ ѿвѣща̀, глаго́лѧ: а҆́зъ ᲂу҆́бѡ нѣ́смь досто́инъ бы́ти сщ҃е́нникъ, ѻ҆ба́че како́въ бы́ти до́лженъ є҆́сть и҆мꙋ́щїй свѧщеннодѣ́йствовати бг҃ови, тве́рдѡ вѣ́мъ. Вопе́рвыхъ ᲂу҆́бѡ чи́стъ не тѣ́ломъ то́чїю, но и҆ дꙋше́ю, и҆ къ си̑мъ не прича́стенъ бы́ти всѧ́кагѡ грѣха̀. Второ́е же, смире́нъ и҆ внѣ́шнимъ нра́вомъ, и҆ внꙋ́треннимъ дꙋшѝ ᲂу҆строе́нїемъ. Та́же, є҆гда̀ предстои́тъ ст҃ѣ́й и҆ сщ҃е́ннѣй трапе́зѣ, ᲂу҆́мнѣ ᲂу҆́бѡ бж҃ество̀, чꙋ́вственнѣ же предлежа̑щаѧ ст҃а̑ѧ зрѣ́ти до́лженъ є҆́сть несомнѣ́ннѡ. Не то́чїю же, но и҆ самаго̀ того̀ въ тѣ́хъ ст҃ы́хъ да́рѣхъ неви́димѡ сꙋ́щаго, живꙋ́ща стѧжа́ти до́лженъ є҆́сть въ се́рдцѣ свое́мъ разꙋ́мнѡ, да мо́жетъ си́це со дерзнове́нїемъ мольбы̑ приноси́ти, и҆ ꙗ҆́кѡ дрꙋ́гъ ко дрꙋ́гꙋ бесѣ́дꙋѧ, та́кѡ глаго́лати: ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ: ꙗ҆влѧ́ющей моли́твѣ, ꙗ҆́кѡ є҆стество́мъ сꙋ́щагѡ сн҃а бж҃їѧ и҆́мать живꙋ́ща въ себѣ̀ со ѻ҆ц҃е́мъ и҆ ст҃ы́мъ дх҃омъ. Таковы̀ ви́дѣхъ пресвѵ́теры, прости́те мѝ, ѻ҆тцы̀ и҆ бра́тїе.

Глаго́лаше же и҆ сїѐ, ꙗ҆́кѡ ѡ҆ и҆но́мъ нѣ́коемъ, себѐ ᲂу҆таева́ѧ, и҆ человѣ́ческїѧ сла́вы и҆збѣга́ѧ, ѿ человѣколю́бїѧ же са́мъ себѐ по нꙋ́ждѣ ꙗ҆влѧ́етъ. Слы́шахъ, глаго́летъ, ѿ нѣ́коегѡ и҆́нока сщ҃е́нника дерзнове́нїе и҆мꙋ́щагѡ ко мнѣ̀, ꙗ҆́кѡ къ возлю́бленномꙋ своемꙋ̀ сїѐ: никогда́же слꙋжи́хъ а҆́зъ, не ви́дѧ дх҃а ст҃а́го, ꙗ҆́коже того̀ ви́дѣхъ прише́дша на мѧ̀, є҆гда́ мѧ рꙋкополага́хꙋ, и҆ моли́твꙋ сщ҃е́нническꙋ митрополі́тъ глаго́лаше, тре́бникꙋ лежа́щꙋ на ѻ҆каѧ́нной мое́й главѣ̀. Вопроше́нъ ᲂу҆́бѡ бы́въ ѿ менѐ, ка́кѡ сего̀ ви́дѣ тогда̀ и҆ въ каково́мъ зра́кѣ лица̀; Речѐ, про́ста ᲂу҆́бѡ и҆ безви́дна, ѻ҆ба́че ꙗ҆́кѡ свѣ́тъ. И҆ ꙗ҆́коже диви́хсѧ въ нача́лѣ ви́дѧ, є҆́же никогда́же ви́дѣхъ, и҆ что̀ бы бы́ло сїѐ размышлѧ́ющꙋ мѝ, глаго́ла мѝ та́инственнѡ ѻ҆́нъ, ꙗ҆́коже въ ра́зꙋмѣ гла́са: а҆́зъ на всѧ̑ проро́ки и҆ а҆пⷭ҇лы и҆ ны̑нѣшнїѧ и҆збра̑нныѧ бж҃їѧ и҆ ст҃ы̑ѧ нахождꙋ̀: дх҃ъ бо ст҃ы́й є҆́смь бж҃їй. Томꙋ̀ сла́ва и҆ держа́ва во вѣ́ки, а҆ми́нь.

Переведено̀ съ проста́гѡ гре́ческагѡ ѧ҆зы́ка.

Возлю́бленнаѧ моѧ̑ бра́тїѧ и҆ ѻ҆тцы̀! вельмѝ до́брое и҆ дꙋшеполе́зное є҆́сть дѣ́ло, проповѣ́дывати всѣ̑мъ ѻ҆́бще ве́лїю и҆ безконе́чнꙋю ми́лость всеблага́гѡ и҆ многоми́лостивагѡ бг҃а на́шегѡ, и҆ ꙗ҆влѧ́ти всѣ̑мъ бра́тїѧмъ на́шымъ хрїстїа́намъ пꙋчи́нꙋ благоꙋтро́бїѧ и҆ бла́гости бж҃їѧ, ю҆́же и҆́мать къ на́мъ. А҆́зъ ᲂу҆́бѡ ꙗ҆́коже ви́дите бра́тїѧ моѧ̑, и҆ зна́ете до́брѣ, ни поще́нїй мно́гихъ и҆ преизли́шнихъ не сотвори́хъ, ни бдѣ́нїй, ни долꙋлега́нїй, и҆ нижѐ и҆ны́хъ си̑мъ подо́бныхъ жесто́кихъ преизли́шнихъ тѣле́сныхъ ѡ҆бꙋче́нїй, но позна́хъ недосто́инство моѐ, и҆ помы́слихъ ѡ҆ грѣсѣ́хъ мои́хъ, и҆ ѡ҆сꙋди́хъ себѐ, и҆ смири́хсѧ, и҆ многоблагоꙋтро́бный и҆ всеблагі́й гдⷭ҇ь си́мъ мѧ̀ спасѐ, ꙗ҆́коже глаго́летъ и҆ бж҃е́ственный дв҃дъ: Смири́хсѧ, и҆ спасе́ мѧ¹⁰⁰. И҆ да рекꙋ̀ ва́мъ сїѐ вкра́тцѣ, вѣ́ровахъ то́чїю словесє́мъ бж҃їимъ, и҆ прїѧ́тъ мѧ̀ гдⷭ҇и и҆ бг҃ъ мо́й се́ю вѣ́рою. Зане́же мнѡ́гаѧ сꙋ́ть препѧ̑тїѧ, возбранѧ̑ющаѧ стѧжа́ти смире́нїе: ѡ҆брѣсти́ же вѣ́рꙋ, и҆ словесє́мъ бж҃їимъ ᲂу҆вѣ́ровати, нѣ́сть ниеди́нагѡ препѧ́тствїѧ возбранѧ́ющагѡ. Сегѡ̀ ра́ди, а҆́ще восхо́щемъ ѿ всеѧ̀ дꙋшѝ на́шеѧ ѡ҆брѣстѝ вѣ́рꙋ, а҆́бїе без̾ всѧ́кагѡ трꙋда̀ ѡ҆брѣта́емъ ю҆̀: зане́же вѣ́ра є҆́сть да́ръ всеблага́гѡ бг҃а, є҆го́же дарова̀ на́мъ є҆сте́ственнѡ, да и҆мѣ́емъ ѻ҆́ный въ произволе́нїи на́шемъ, и҆ и҆мѣ́емъ, є҆гда̀ хо́щемъ. Сегѡ̀ ра́ди ви́димъ, ꙗ҆́кѡ и҆ скѵ́ѳы и҆ ва́рвары, и҆ всѧ̑ ꙗ҆зы́ки и҆мѣ́ютъ вѣ́рꙋ є҆сте́ственнѡ, и҆ вѣ́рꙋетъ є҆ди́нъ словесє́мъ дрꙋга́гѡ, и҆ показꙋ́ютъ вѣ́рꙋ междꙋ̀ собо́ю. И҆ да покажꙋ̀ ва́мъ сїѐ дѣ́ломъ, а҆ не словесы̀, то́чїю внемли́те слѣ́дꙋющей по́вѣсти. Нѣ́кто, геѡ́ргїй и҆́менемъ, ю҆́нъ вельмѝ во́зрастомъ ꙗ҆́кѡ два́десѧти лѣ́тъ, живѧ́ше въ кѡнстантїнопо́ли во времена̀ на̑ша, и҆́же бѧ́ше благоѡбра́зенъ вельмѝ ви́домъ, и҆ таковы́й зра́къ внѣ́шнїй и҆мѣ̀, ꙗ҆́кѡ мно́зи и҆мѣ́ѧхꙋ ѡ҆ не́мъ стꙋ̑дныѧ мы̑сли, наипа́че ті́и, є҆ли́цы ѻ҆быкнове́ннѡ смо́трѧтъ то́кмѡ на внѣ́шнїй ѡ҆́бразъ человѣ́ка, и҆ не зна́ѧ ка́ждагѡ та́йныхъ, ѡ҆сꙋжда́ютъ, и҆ быва́ютъ сꙋдїи̑ дрꙋги̑мъ безразсꙋ́дни. Се́й ю҆́ноша позна́сѧ со и҆́нокомъ нѣ́кїимъ, мꙋ́жемъ ст҃ы́мъ, и҆́же живѧ́ше въ монастырѣ̀ нѣ́коемъ кѡнстантїнопо́льскомъ, и҆ ꙗ҆влѧ́ѧ є҆мꙋ̀ всѧ̑ та̑йнаѧ се́рдца своегѡ̀, речѐ и҆ сїѐ, ꙗ҆́кѡ хо́щетъ ѻ҆́нъ спасти́сѧ, и҆ и҆мѣ́етъ ве́лїе жела́нїе и҆зы́ти ѿ мі́ра, и҆ бы́ти и҆́нокомъ. Честны́й же ѻ҆́ный ста́рецъ похвалѝ є҆гѡ̀ намѣ́ренїе, є҆́же и҆мѣ̀ и҆ поꙋчѝ є҆го̀, ꙗ҆́коже подоба́ше, и҆ дадѐ є҆мꙋ̀ кни́гꙋ ст҃а́гѡ ма́рка подви́жника прочестѝ, въ не́йже пи́сано ѡ҆ зако́нѣ дꙋхо́внѣмъ: ю҆́же ю҆́ноша прїѧ̀ съ толи́кимъ жела́нїемъ и҆ благоговѣ́нїемъ, ꙗ҆́кѡ ѻ҆на̀ посла́сѧ ѿ бг҃а, и҆ толи́кѡ вѣ́рова ѻ҆́ной, ꙗ҆́кѡ ᲂу҆пова̀ полꙋчи́ти велича́йшꙋю по́льзꙋ, и҆ прише́дъ въ до́мъ сво́й а҆́бїе нача́тъ чита́ти ю҆̀ съ вели́кимъ внима́нїемъ, и҆ прочтѐ всю̀ со мно́гимъ благоговѣ́нїемъ три́жды и҆ четы́режды, и҆ па́ки и҆з̾ рꙋ́къ свои́хъ не выпꙋска́ше, и҆ ꙗ҆́коже ᲂу҆пова̀, воспо́льзовасѧ мно́гѡ ѿ кни́ги ѻ҆́ныѧ. Ѻ҆ба́че и҆збра̀ трѝ то́чїю главы̑, и҆ впечатлѣ̀ ѻ҆́ныѧ въ се́рдцѣ свое́мъ, и҆ положѝ са́мъ въ себѣ̀ и҆спо́лнити ѻ҆́ныѧ дѣ́ломъ, и҆ сохрани́ти со всѧ́кимъ внима́нїемъ. Въ пе́рвой главѣ̀ рече́сѧ сїѐ: а҆́ще хо́щеши ѡ҆брѣстѝ и҆сцѣле́нїе дꙋшѝ твоеѧ̀, потре́ба и҆мѣ́ти ве́лїе прилѣжа́нїе и҆ попече́нїе, да сохрани́ши до́брѣ со́вѣсть твою̀, ꙗ҆́кѡ да не ѡ҆блича́етъ тѧ̀ ни во є҆ди́ной ве́щи, и҆ є҆ли̑ка дѡ́браѧ дѣла̀ глаго́летъ тѝ со́вѣсть твоѧ̀, да сотвори́ши, да не ѡ҆тѧгчи́шисѧ, но сотворѝ ѻ҆́наѧ, и҆ ѡ҆брѧ́щеши ве́лїю по́льзꙋ. Въ дрꙋго́й главѣ̀ рече́сѧ сїѐ: И҆ща́й взыска́ти дѣ́йствїѧ ст҃а́гѡ дх҃а пре́жде дѣ́ланїѧ за́повѣдей бж҃їихъ, подо́бенъ є҆́сть кꙋ́пленꙋ рабꙋ̀ просѧ́щемꙋ ѿ господи́на своегѡ̀ свобо́ды себѣ̀ въ то́тъ са́мый ча́съ, є҆гда̀ да́стъ ѻ҆́нъ цѣ́нꙋ и҆скꙋпи́ти є҆го̀. И҆ въ тре́тїей главѣ̀ рече́сѧ сїѐ: Кто̀ мо́литсѧ ᲂу҆стна́ми, и҆ не стѧжа́лъ є҆щѐ ра́зꙋма дꙋхо́внагѡ, нижѐ вѣ́сть ᲂу҆́мнѣ моли́тисѧ, се́й подо́бенъ є҆́сть слѣпо́мꙋ томꙋ̀, и҆́же вопїѧ́ше: сн҃е дв҃довъ, поми́лꙋй мѧ̀¹⁰¹. Но то́тъ, кто̀ стѧжа́лъ ра́зꙋмъ дꙋхо́вный, и҆ мо́литсѧ ᲂу҆́мнѣ, и҆ ѿве́рзе ѻ҆чеса̀ дꙋшѝ своеѧ̀, подо́бенъ є҆́сть томꙋ́жде слѣпо́мꙋ, є҆гда̀ и҆сцѣлѝ є҆го̀ гдⷭ҇и ѿ слѣпоты̀, є҆гда̀ полꙋчѝ свѣ́тъ ѻ҆́чїю своє́ю, и҆ ви́дѣ гдⷭ҇а, и҆ не ктомꙋ̀ и҆менова̀ є҆го̀ сн҃омъ дв҃довымъ, но и҆сповѣ́да є҆го̀ сн҃омъ бж҃їимъ, и҆ поклони́сѧ є҆мꙋ̀, ꙗ҆́коже подоба́ше. Сі́и трѝ главы̑ ᲂу҆гѡ́дны бѧ́хꙋ вельмѝ ю҆́ношѣ ѻ҆́номꙋ, и҆ ѕѣлѡ̀ ѻ҆́нымъ почꙋди́сѧ, и҆ прїѧ̀ и҆звѣще́нїе въ дꙋшѣ̀ свое́й, и҆ ᲂу҆вѣ́рова несомнѣ́ннѡ, ꙗ҆́кѡ ѡ҆брѧ́щетъ ве́лїю по́льзꙋ, а҆́ще внима́ти бꙋ́детъ до́брѣ со́вѣсти свое́й, ꙗ҆́коже глаго́летъ ст҃ы́й ма́ркъ, и҆ ꙗ҆́кѡ наслади́тсѧ дара́ми ст҃а́гѡ дх҃а и҆ си́лою є҆гѡ̀, а҆́ще храни́ти бꙋ́детъ за́пѡвѣди бж҃їѧ: и҆ тре́тїе, ꙗ҆́кѡ да́ромъ ст҃а́гѡ дх҃а сподо́битсѧ ѿве́рсти ѻ҆чеса̀ дꙋшѝ своеѧ̀, и҆ зрѣ́ти ᲂу҆́мнѣ гдⷭ҇а. Ѿѻнꙋ́дꙋже ᲂу҆пова́ѧ ви́дѣти неизрече́ннꙋю ѻ҆́нꙋю красотꙋ̀ гдⷭ҇ню, ᲂу҆ѧ́звленъ бы́сть въ се́рдцѣ любо́вїю є҆ѧ̀, и҆ и҆мѣ́ѧше ве́лїе жела́нїе къ семꙋ̀ Ѻ҆ба́че не сотворѝ и҆на́гѡ ничегѡ̀, ꙗ҆́коже мѧ̀ ᲂу҆вѣ́ри по́слѣжде съ клѧ́твою, кромѣ̀ тогѡ̀ то́чїю: по всѧ́къ ве́черъ, є҆гда̀ ѿхожда́ше на ѻ҆́дръ сво́й почи́ти, творѧ́ше пе́рвѣе моли́твꙋ и҆ покло́ны ѻ҆́ныѧ, ꙗ҆̀же заповѣ́да ст҃ы́й ѻ҆́ный ста́рецъ, и҆ тогда̀ возлега́ше почи́ти. По проше́ствїи ᲂу҆́бѡ нѣ́коегѡ вре́мени, внима́ющꙋ є҆мꙋ̀ до́брѣ со́вѣсти свое́й, є҆гда̀ и҆сполнѧ́ше ѻ҆́нъ пра́вило ѻ҆́нагѡ ста́рца, во є҆ди́нъ ве́черъ глаго́летъ є҆мꙋ̀ со́вѣсть є҆гѡ̀, да сотвори́тъ и҆ дрꙋгꙋ́ю моли́твꙋ є҆щѐ, и҆ дрꙋгі̑ѧ покло́ны, и҆ да глаго́летъ є҆щѐ и҆ сїѐ: гдⷭ҇и і҆и҃се хрⷭ҇тѐ, поми́лꙋй мѧ̀! многокра́тнѣ, є҆ли́кѡ мо́жетъ сїѐ твори́ти. И҆ ѻ҆́нъ повинꙋ́сѧ томꙋ̀ съ вели́кимъ ᲂу҆се́рдїемъ, є҆́же речѐ є҆мꙋ̀ со́вѣсть, и҆ нача́тъ без̾ всѧ́кагѡ сомнѣ́нїѧ то̀ твори́ти, вѣ́рꙋѧ, ꙗ҆́кѡ са́мъ бг҃ъ глаго́ла є҆мꙋ̀ ѻ҆́наѧ, ꙗ҆̀же творѧ́ше. И҆ ѿто́лѣ не ктомꙋ̀ возлега́ше на ѻ҆́дръ почи́ти, а҆́ще не сотвори́тъ пе́рвѣе, є҆́же глаго́ла є҆мꙋ̀ со́вѣсть є҆гѡ̀, ꙗ҆́кѡ мо́жетъ то̀ сотвори́ти. И҆ таки́мъ ѡ҆́бразомъ повинꙋ́ющꙋсѧ є҆мꙋ̀ со́вѣсти свое́й, и҆ ѻ҆́ною вы́нꙋ просвѣща́ющꙋсѧ, глаго́лющей є҆́й. да твори́тъ сїѐ мно́жае, и҆ въ ма́лое вре́мѧ толи́кѡ возрастѐ моли́тва, что̀ творѧ́ше ю҆̀, ꙗ҆́коже реко́хомъ, по всѧ́къ ве́черъ. Занѐ въ де́нь не и҆мѣ̀ благовре́менїѧ моли́тисѧ, поне́же и҆мѣ̀ нача́льствованїе над̾ всѣ́мъ до́момъ вели́кагѡ нѣ́коегѡ кнѧ́зѧ, и҆ и҆мѣ́ѧ мнѡ́гїѧ попечє́нїѧ и҆ дѣла̀, хожда́ше ка́ждый де́нь въ ца̑рскїѧ пала̑ты, и҆ не ѡ҆става́шесѧ є҆мꙋ̀ вре́мени дне́мъ моли́тисѧ, но ка́ждый ве́черъ, є҆гда̀ ѿхожда́ше почи́ти, молѧ́шесѧ, ꙗ҆́коже реко́хомъ и҆ нача̀ согрѣва́тисѧ се́рдце є҆гѡ̀, и҆ приходи́ти во ᲂу҆миле́нїе, и҆ точи́ти ѿ ѻ҆́чїю своє́ю сле́зы мнѡ́гїѧ, и҆ твори́ти ча́стѡ колѣнопреклонє́нїѧ, и҆ глаго́лати мнѡ́гїѧ моли̑твы къ бг҃ома́тери съ воздыха́нїи и҆ болѣ́знїю серде́чною: и҆ помышлѧ́ше, ꙗ҆́кѡ предстои́тъ пред̾ гдⷭ҇емъ, и҆ припа́даше къ пречи̑стымъ нога́мъ є҆гѡ̀, и҆ молѧ́ше є҆го̀ со слеза́ми, да ᲂу҆милосе́рдитсѧ над̾ ни́мъ, ꙗ҆́коже над̾ слѣпы́мъ, ѡ҆ не́мже глаго́летъ свѧще́нное є҆ѵⷢ҇лїе, и҆ да да́рꙋетъ свѣ́тъ ѻ҆ча́мъ дꙋшѝ є҆гѡ̀. И҆ де́нь ѿ днѐ толи́кѡ возсїѧва́ше моли́тва твори́маѧ по всѧ́къ ве́черъ, ꙗ҆́кѡ содержа́ше ѻ҆́нꙋю да́же до полꙋ́нощи, и҆ є҆гда̀ молѧ́шесѧ, неподви́жнѡ стоѧ́ше а҆́ки нѣ́кїй сто́лпъ, и҆ не дви́заше ни но́гъ соверше́ннѣ свои́хъ, ни и҆ны́ѧ какі́ѧ ча́сти тѣ́ла своегѡ̀, нижѐ ѻ҆́чи своѝ ѡ҆браща́ше сѣ́мѡ и҆ ѻ҆ва́мѡ, є҆́же смотрѣ́ти, но стоѧ́ше съ вели́кимъ стра́хомъ и҆ тре́петомъ, не дре́млющи, нижѐ ᲂу҆ныва́ѧ, и҆ не лѣ́ностнѣ. Во є҆ди́нъ ᲂу҆́бѡ ве́черъ, є҆гда̀ молѧ́шесѧ, и҆ глаго́лаше мы́сленнѣ ᲂу҆мо́мъ свои́мъ сїѐ: бж҃е! ми́лостивъ бꙋ́ди мнѣ̀ грѣ́шникꙋ: внеза́пꙋ ѡ҆свѣтѝ є҆го̀ сїѧ́нїе нѣ́кое бж҃е́ственное, и҆ и҆спо́лнисѧ свѣ́та ѻ҆́нагѡ, и҆ бѣ̀ ю҆́ноша ѻ҆́ный блаже́нный, глаго́лю, геѡ́ргїй во и҆зстꙋпле́нїи, и҆ забы̀ себѐ самаго̀, а҆́ще ѡ҆брѣта́шесѧ ѻ҆́нъ въ хра́минѣ, поне́же всю́дꙋ зрѧ́ше свѣ́тъ, и҆ бѧ́ше внѣ̀ самогѡ̀ себѧ̀, и҆ не постига́ше тогда̀, а҆́ще на землѝ ѻ҆́нъ хожда́ше, и҆лѝ стои́тъ на воздꙋ́сѣ: и҆ ни є҆ди́нагѡ попече́нїѧ тѣле́снагѡ и҆лѝ мїрска́гѡ всеконе́чнѣ не и҆мѣ̀, но забы̀ соверше́ннѣ ве́сь мі́ръ, и҆ и҆змѣни́сѧ ве́сь, и҆ бы́сть соедине́нъ съ бж҃е́ственнымъ ѻ҆́нымъ свѣ́томъ, и҆ ꙗ҆влѧ́шесѧ є҆мꙋ̀, ꙗ҆́кѡ и҆ са́мъ ѻ҆́нъ содѣ́ласѧ свѣ́тъ, и҆ бѣ̀ ве́сь и҆спо́лненъ сле́зъ, и҆ ра́дости неизрече́нныѧ: и҆ та́же восхище́нъ бѣ̀ ᲂу҆́мъ є҆гѡ̀ на не́бо, и҆ та́мѡ ви́дѣ и҆ны́й свѣ́тъ мно́жае свѣтлѣ́йшїй, и҆ при ѻ҆́номъ свѣ́тѣ ᲂу҆зрѣ̀ стоѧ́ща ст҃а́го ѻ҆́наго ста́рца, и҆́же дадѐ є҆мꙋ̀, ꙗ҆́коже реко́хомъ, кни́гꙋ а҆́ввы ма́рка и҆ пра́вило, є҆́же творѧ́ше. А҆́зъ ᲂу҆́бѡ ᲂу҆слы́шавъ сїѧ̑ ѿ ю҆́ноши, разꙋмѣ́хъ, ꙗ҆́кѡ моли́тва ст҃а́гѡ ста́рца содѣ́йствоваше вельмѝ въ се́мъ, и҆ си́це ᲂу҆стро́и сїѐ бг҃ъ, є҆́же показа́ти ю҆́ношѣ, въ каково́й высо́цѣй добродѣ́тели ѡ҆брѣта́шесѧ ст҃ы́й ѻ҆́ный ста́рецъ, сегѡ̀ ра́ди ви́дѣ є҆го̀ стоѧ́ща при ѻ҆́номъ свѣ́тѣ. Тогда̀ ю҆́ноша ѻ҆́ный, ꙗ҆́коже ѿи́де сїѐ видѣ́нїе, и҆ прїи́де па́ки въ себѐ самаго̀, и҆спо́лненъ бѣ̀, ꙗ҆́коже глаго́лаше, ра́дости и҆ ᲂу҆́жаса, и҆ и҆спꙋска́ше ѿ се́рдца своегѡ̀ сле́зы, и҆ вкꙋ́пѣ со ѻ҆́ными слеза́ми послѣ́доваше сла́дость ве́лїѧ. Наконе́цъ возлежѐ на ѻ҆́дръ, є҆́же почи́ти ма́лѡ, и҆ въ то́й же ча́съ возгласѝ пѣ́телъ, и҆ вско́рѣ нача́хꙋ клепа́ти въ це́рквахъ къ ᲂу҆́трени, и҆ воста̀ ю҆́ноша, є҆́же прочестѝ по ѻ҆бы́чаю своемꙋ̀ ᲂу҆́треню, и҆ во ѻ҆́нꙋю но́щь ѿню́дъ не спа̀, нижѐ въ мы́сль со́нъ прїи́де є҆мꙋ̀ всеконе́чнѣ. Сїѧ̑ повѣ́да ю҆́ноша, ꙗ҆̀же бѣ́ша съ ни́мъ, и҆̀же ничто́же и҆́но сотворѝ, ꙗ҆́коже са́мъ мѧ̀ ᲂу҆вѣ́ри, кромѣ̀ си́хъ, ꙗ҆̀же слы́шасте, є҆ди́нꙋ и҆мѣ́ѧше вѣ́рꙋ и҆ ᲂу҆пова́нїе несомнѣ́нное, и҆ сегѡ̀ ра́ди сподо́бисѧ ви́дѣти таково́е видѣ́нїе. И҆ да не рече́тъ кто̀, ꙗ҆́кѡ ѻ҆́нъ сотворѝ сїѧ̑ хвалѧ́сѧ: поне́же ѻ҆́нъ, ꙗ҆́коже мѝ глаго́ла, нижѐ помышлѧ́ше ѡ҆ се́мъ, є҆́же и҆ска́ти когда̀, но и҆мѣ́ѧше несомнѣ́ннꙋю вѣ́рꙋ: ѿсе́лѣ ѿве́ргши ѿ себѐ всѧ́кїй и҆ны́й по́мыслъ плотскі́й и҆ мїрскі́й, то́ль вели́кое прилѣжа́нїе воз̾имѣ̀, є҆́же сохрани́ти со́вѣсть свою̀ и҆ и҆спра́вити, ꙗ҆̀же глаго́лаше со́вѣсть, ꙗ҆́коже ко всѣ̑мъ веще́мъ сегѡ̀ мі́ра ѡ҆брѣта́шесѧ ꙗ҆́кѡ безчꙋ́вственъ, и҆ ѿню́дъ не ѡ҆щꙋща́ше, нижѐ ꙗ҆́сти и҆лѝ пи́ти и҆мѣ̀ жела́нїе, та́кѡ ꙗ҆́кѡ мно́жицею пребыва́ше въ постѣ̀. Слы́шасте ли, бра́тїѧ моѧ̑ возлю́блєннаѧ, каковы̑ѧ дѣла̀ и҆справлѧ́етъ вѣ́ра, и҆ коли́кꙋю и҆́мать си́лꙋ, є҆гда̀ ᲂу҆твержда́етсѧ благи́ми дѣ́лы; Позна́сте ли, ꙗ҆́кѡ ни ю҆́ность вреди́тъ на́съ ничто́же, ни ста́рость не по́льзꙋетъ на́мъ, а҆́ще ѡ҆скꙋдѣва́етъ въ на́съ стра́хъ бж҃їй; Наꙋчи́стесѧ ли дне́сь, ꙗ҆́кѡ нижѐ въ мі́рѣ, и҆ во гра́дѣ жи́тельствованїе не воспѧща́етъ на́мъ твори́ти за́пѡвѣди бж҃їѧ, а҆́ще и҆мѣ́емъ ᲂу҆се́рдїе; Нижѐ па́ки ѿше́льство ѿ мі́ра и҆ ᲂу҆едине́нїе по́льзꙋютъ на́съ, а҆́ще пребыва́емъ мы̀ въ лѣ́ности и҆ нерадѣ́нїи; Всѝ мы̀ слы́шимъ ѡ҆ дв҃дѣ, ꙗ҆́кѡ при толи́кихъ попече́нїѧхъ и҆ ца́рскомъ ᲂу҆правле́нїи и҆мѣ́ѧше ᲂу҆́мъ сво́й соверше́ннѡ ве́сь въ бз҃ѣ, и҆ ᲂу҆дивлѧ́емсѧ семꙋ̀, и҆ глаго́лемъ, ꙗ҆́кѡ дв҃дъ бы́сть тако́въ, ꙗ҆ко́въ не бѣ̀ и҆́нъ. И҆ сѐ съ ю҆́ношею си́мъ вѧ́щше дв҃да послѣ́дова: занѐ дв҃дъ прїѧ̀ зва́нїе ѿ самагѡ̀ бг҃а, пома́занъ бы́сть во проро́ка и҆ царѧ̀, прїѧ̀ и҆ благода́ть ст҃а́гѡ дх҃а. А҆́ще ᲂу҆́бѡ и҆ согрѣшѝ къ бг҃ꙋ, и҆ лиши́сѧ благода́ти ст҃а́гѡ дх҃а и҆ досто́инства проро́ческагѡ, и҆ ᲂу҆дали́сѧ ѿ соедине́нїѧ съ бг҃омъ, по́слѣжде прїи́де въ чꙋ́вство, и҆ помы́сли ѡ҆ благи́хъ, ꙗ҆́же и҆мѣ̀, и҆ погꙋбѝ, и҆ и҆ска́ше па́ки ѡ҆брѣстѝ ѻ҆́наѧ, каково́е ᲂу҆дивле́нїе; Ди́вно же и҆ достохва́льно, ꙗ҆́кѡ человѣ́къ ю҆́ный два́десѧти лѣ́тъ, и҆́же прилѣпле́нъ бы́сть соверше́ннѡ къ мїрски̑мъ веще́мъ, и҆ къ си̑мъ привре́мєннымъ и҆мѣ̀ пригвожде́нъ ᲂу҆́мъ сво́й, и҆ кромѣ̀ си́хъ ничегѡ̀ и҆на́гѡ высоча́йшагѡ не помышлѧ́ше, ко́емꙋ нижѐ во ᲂу҆́мъ прихожда́ше сицевы́й по́мыслъ, и҆ кото́рый то́чїю ᲂу҆слы́ша ма́лѡ ѿ ст҃а́гѡ ѻ҆́нагѡ ста́рца, и҆ прочтѐ трѝ главы̑ ѻ҆́ныѧ а҆́ввы ма́рка, а҆́бїе ᲂу҆вѣ́рова несомнѣ́ннѡ пи̑саннымъ и҆ и҆спо́лни дѣ́ломъ со ᲂу҆пова́нїемъ тве́рдымъ, и҆ ма́лымъ ѻ҆́нымъ дѣ́ланїемъ, є҆́же творѧ́ше, сподо́бисѧ восхище́нїѧ ᲂу҆ма̀ на не́бо, и҆ преклонѝ бг҃ома́терь къ милосе́рдованїю ѡ҆ не́мъ, да хода́тайствомъ свои́мъ къ бг҃ꙋ толи́кѡ примири́тъ є҆го̀ съ ни́мъ, ꙗ҆́кѡ да низпо́слетъ свы́ше бж҃е́ственное своѐ просвѣще́нїе, и҆ благода́ть всест҃а́гѡ дх҃а, ꙗ҆́же да ᲂу҆крѣпи́тъ є҆го̀ дости́гнꙋти блаже́нства, и҆ наслади́тисѧ ѻ҆́нагѡ свѣ́та, є҆гѡ́же мно́зи жела́ютъ, но не мно́зи полꙋча́ютъ. Къ томꙋ́жъ блаже́нный се́й ю҆́ноша геѡ́ргїй, и҆́же ни мнѡ́гїѧ лѣ̑та пости́сѧ, и҆лѝ бдѣ̀, и҆лѝ и҆ны̑ѧ по́двиги по́стничєскїѧ сотворѝ, нижѐ спа̀ когда̀ на землѝ, нижѐ власѧни́цꙋ носѧ́ше, нижѐ и҆́нокомъ бѧ́ше, нижѐ ѿ мі́ра ѿи́де тѣле́снѣ: то́чїю ма́лымъ бдѣ́нїемъ и҆ моли́твою, ю҆́же творѧ́ше, содѣ́ласѧ земны́й а҆́гг҃лъ, и҆ человѣ́къ нбⷭ҇ный: человѣ́къ по ви́дꙋ, и҆ безтѣле́сенъ по ᲂу҆мꙋ̀, веще́ственный и҆ невеще́ственный, всѣ́ми ви́димый, и҆ є҆ди́нъ пребыва́ющїй со є҆ди́нѣмъ бг҃омъ вѣ́дꙋщимъ всѧ̑. Сегѡ̀ ра́ди и҆ сподо́бисѧ зрѣ́ти сладча́йшїй ѻ҆́ный свѣ́тъ ᲂу҆́мнагѡ со́лнца пра́вды: да и҆ пра́веднѡ. Поне́же любо́вь и҆ вожделѣ́нїе, є҆́же и҆мѣ̀ ѻ҆́нъ къ бг҃ꙋ, содѣ́лаша, ꙗ҆́кѡ бѣ̀ ѻ҆́нъ внѣ̀ мі́ра дх҃о́внѣ, и҆ забы̀ мі́ръ и҆ пло́ть, и҆ всѣ̀ сꙋ́єтныѧ вє́щи мі́ра, и҆ прилѣпи́сѧ соверше́ннѣ къ бг҃ꙋ: и҆ си́це бы́сть ве́сь дꙋхо́венъ, и҆ ве́сь просвѣти́сѧ, и҆ ви́дѣ сицево́е видѣ́нїе, и҆ наслади́сѧ толи́кагѡ наслажде́нїѧ. А҆ наипа́че, ꙗ҆́кѡ живѧ́ше во гра́дѣ, и҆ во гра́дѣ сицево́мъ, и҆дѣ́же пребыва́ше въ ца́рскихъ пала́тахъ, и҆ и҆мѣ̀ прито́мъ нача́льство вели́кагѡ кнѧ́зѧ над̾ толи́кими нево́льниками и҆ и҆ны́ми мно́гими слꙋжи́телѧми, и҆ слꙋжє́нїѧ, и҆ дѣла̀ вели̑кїѧ и҆ мнѡ́гїѧ.

Но довѡ́льна сꙋ́ть сїѧ̑, ꙗ҆̀же реко́хомъ къ похвалѣ̀ ю҆́ноши ѻ҆́нагѡ, и҆ къ возбꙋжде́нїю ва́шемꙋ, да прїи́дете и҆ вы̀ къ вожделѣ́нїю сицево́мꙋ, и҆ да подража́ете є҆мꙋ̀, да сподо́битесѧ прїѧ́ти ра́внꙋю благода́ть ѿ бг҃а. И҆лѝ хо́щете, да рекꙋ̀ ва́мъ и҆ и҆́на бѡ́льша си́хъ, ꙗ҆̀же реко́хъ ва́мъ; Но что̀ и҆́но бо́льше є҆́сть стра́ха бж҃їѧ; ꙗ҆́коже глаго́летъ бг҃осло́въ григо́рїй, си́рѣчь: ꙗ҆́кѡ нача́ло премꙋ́дрости є҆́сть стра́хъ бж҃їй. Занѐ и҆дѣ́же є҆́сть стра́хъ бж҃їй, та́мѡ є҆́сть и҆ хране́нїе за́повѣдей: а҆ и҆дѣ́же є҆́сть хране́нїе за́повѣдей, та́мѡ є҆́сть ѡ҆чище́нїе пло́ти, ꙗ҆́же є҆́сть гꙋсто́е нѣ́кое ѻ҆́блако пред̾ дꙋше́ю, и҆ не попꙋща́етъ є҆́й ви́дѣти ꙗ҆́снѡ бж҃е́ственное сїѧ́нїе. И҆ па́ки: и҆дѣ́же є҆́сть ѡ҆чище́нїе пло́ти, та́мѡ є҆́сть сїѧ́нїе бж҃е́ственное, и҆ и҆дѣ́же є҆́сть сїѧ́нїе бж҃е́ственное, та́мѡ є҆́сть соверше́нїе бж҃е́ственнагѡ жела́нїѧ. Тѣ́мже ѡ҆сїѧ́нїе бж҃е́ственнагѡ свѣ́та и҆ просвѣще́нїе ст҃а́гѡ дх҃а, є҆́сть коне́цъ неконча́емый всѧ́кїѧ добродѣ́тели, и҆ дости́гшїй сегѡ̀ конца̀, забыва́етъ всѧ̑ чꙋ́вствєннаѧ, и҆ начина́етъ приходи́ти въ позна́нїе дꙋхо́вныхъ дарова́нїй. Сїѧ̑ сꙋ́ть, бра́тїѧ моѧ̑, ди̑внаѧ дѣла̀ всеблага́гѡ бг҃а, си́мъ ꙗ҆влѧ́етъ премꙋ́дрый бг҃ъ сокрове́нныхъ ст҃ы́хъ свои́хъ, и҆ да подража́ютъ и҆̀мъ дрꙋгі́е, и҆ прохо́дѧтъ житїѐ ꙗ҆́коже ѻ҆нѝ, и҆лѝ а҆́ще ни бꙋ́дꙋтъ подража́ти, да пребꙋ́дꙋтъ без̾ѿвѣ̑тны, и҆ да не и҆́мꙋтъ рещѝ ниеди́нагѡ ѿвѣ́та. Поне́же и҆ тѣ̀, ко́и ѡ҆брѣта́ютсѧ въ попече́нїѧхъ и҆ смꙋще́нїѧхъ, а҆́ще жи́тельствꙋютъ, ꙗ҆́коже подоба́етъ, спаса́ютсѧ, и҆ сподоблѧ́ютсѧ прїѧ́ти ѿ бг҃а вє́лїѧ блага̑ѧ є҆ди́ною вѣ́рою, ю҆́же и҆́мꙋтъ въ него̀. Поболи́те ᲂу҆̀бо, бра́тїе, дꙋше́ю ва́шею, и҆ ᲂу҆вѣ́рꙋйте всѣ́мъ се́рдцемъ ва́шимъ несомнѣ́ннѡ гдⷭ҇ꙋ ва́шемꙋ, и҆ словесє́мъ є҆гѡ̀, и҆ возненави́дите преходѧ́щыѧ сі́и вє́щи мі́ра, и҆ ѡ҆ста́вите ѻ҆́ныѧ ꙗ҆́кѡ приврє́менныѧ, и҆ прїиди́те къ бг҃ꙋ, и҆ прилѣпи́тесѧ къ немꙋ̀. Поне́же без̾ бг҃а ничто́же є҆́сть въ мі́рѣ: всѣ̀ ве́щи сꙋ́ть ничто̀, є҆гда̀ не прилѣплѧ́емсѧ къ бг҃ꙋ. Сегѡ̀ ра́ди пла́чꙋ и҆ рыда́ю и҆ скорблю̀ ѕѣлѡ̀, є҆гда̀ помы́шлю, ꙗ҆́кѡ и҆́мамы сицева́го гдⷭ҇а богатодарови́таго и҆ человѣколюби́ваго, и҆́же є҆ди́ныѧ ра́ди вѣ́ры, дѣ́ломъ показꙋ́емыѧ къ немꙋ̀ и҆ къ ѡ҆бѣща́нїѧмъ є҆гѡ̀, подае́тъ на́мъ сицевы̑ѧ да́ры, ꙗ҆̀же слы́шахомъ и҆ ви́дѣхомъ: и҆ мы̀ несмы́сленнѣ ꙗ҆́коже безсловє́сныѧ живѡ́тныѧ почита́емъ па́че зе́млю, и҆ земны̑ѧ и҆ тлѣ̑нныѧ вє́щи, ꙗ҆̀же всеблагі́й бг҃ъ кра́йнѧгѡ ра́ди благоꙋтро́бїѧ своегѡ̀ дадѐ на́мъ богатода́рнѡ длѧ потре́бы тѣ́лꙋ, да ᲂу҆потреблѧ́емъ ѻ҆́ныѧ ᲂу҆мѣ́реннѣ, є҆ли́кѡ нꙋ́жнѡ длѧ жи́зни, и҆ дꙋша̀ да не и҆мѣ́етъ ни є҆ди́нагѡ препѧ́тствїѧ, дѣ́йствовати своѝ мы̑сли, и҆ да жи́тельствꙋетъ, ꙗ҆́коже подоба́етъ, и҆ да пита́етсѧ ᲂу҆́мною пи́щею, и҆ благода́тїю ст҃а́гѡ дх҃а. Поне́же человѣ́къ сегѡ̀ ра́ди со́зданъ въ мі́ръ се́й, да ѡ҆брѧ́щетъ винꙋ̀ ѿ си́хъ мїрски́хъ веще́й просла́вити бг҃а да́вшаго є҆мꙋ̀ сїѧ̑, и҆ да позна́етъ благодѣ́телѧ своего̀ и҆ всеблага́го, и҆ да лю́битъ є҆го̀, и҆ благодари́тъ и҆ сло́вомъ и҆ бг҃оꙋго́дными дѣ́лы, и҆ си́це да сподо́битсѧ прїѧ́ти и҆ и҆ны̑ѧ благодѣѧ̑нїѧ ѿ бг҃а, и҆ дарова̑нїѧ велича́йшыѧ и҆ вѣ̑чныѧ. Но мы̀, ᲂу҆вы̀! ѿню́дъ не помышлѧ́емъ ѡ҆б̾ ѻ҆́ныхъ бꙋ́дꙋщихъ дарова́нїѧхъ, то́чїю пригвожда́емсѧ настоѧ́щымъ, и҆ ѡ҆ си́хъ пече́мсѧ и҆ тщи́мсѧ, ꙗ҆́кѡ да стѧ́жемъ ѻ҆́ныѧ, ꙗ҆́кѡ да и҆збы́точествꙋемъ ѻ҆́ными: а҆ ѡ҆ то́мъ, и҆́же дадѐ на́мъ ѻ҆́ныѧ, ѿню́дъ не мы́слимъ, но показꙋ́емъ ве́лїю неблагода́рность къ немꙋ̀, и҆ быва́емъ подо́бни бѣсовѡ́мъ, и҆лѝ и҆ хꙋ́ждшы, а҆́ще подоба́етъ рещѝ и҆́стинꙋ. И҆ сегѡ̀ ра́ди подоба́етъ на́мъ нака̑заннымъ бы́ти вѧ́щше ѻ҆́ныхъ, занѐ вѧ́щшыѧ и҆ благодѣѧ̑нїѧ прїѧ́хомъ. Поне́же мы̀ роди́хомсѧ хрїстїа́не, прїѧ́хомъ толи̑кїѧ та̑инства, толи̑кїѧ дарова̑нїѧ дꙋхѡ́вныѧ, и҆ вѣ́рꙋемъ во є҆ди́наго бг҃а, и҆́же бы́сть на́съ ра́ди человѣ́къ, и҆ претерпѣ̀ толи̑кїѧ страда̑нїѧ, и҆ наконе́цъ сме́рть кре́стнꙋю, да на́съ свободи́тъ ѿ ле́сти дїа́воли и҆ ѿ грѣха̀: и҆ при все́мъ то́мъ вѣ́рꙋемъ въ него̀ словесы̀ то́чїю, а҆ дѣ́лы на́шими преслꙋ́шаемъ є҆гѡ̀ коне́чнѣ. Не проповѣ́дꙋетсѧ ли и҆́мѧ хрⷭ҇то́во дне́сь повсю́дꙋ, и҆ во гра́дѣхъ, и҆ ве́сѣхъ, и҆ монастырѣ́хъ, и҆ пꙋсты́нѣхъ; А҆́ще же ли хо́щеши, и҆спыта́й и҆звѣ́стнѡ, да позна́еши, є҆ли́цы хрїстїа́не хранѧ́тъ за́пѡвѣди є҆гѡ̀: и҆ є҆два̀ междꙋ̀ толи́кими ѡ҆брѧ́щеши є҆ди́наго и҆́стиннаго хрїстїа́нина и҆ словесы̑ и҆ дѣ́лы. Не рече́ ли гдⷭ҇ь на́шъ во сщ҃е́нномъ є҆ѵⷢ҇лїи: Вѣ́рꙋѧй въ мѧ̀, дѣла̀, ꙗ҆̀же а҆́зъ творю̀, и҆ то́й сотвори́тъ, и҆ бѡ́льша си́хъ сотвори́тъ¹⁰²; Дне́сь кто̀ и҆з̾ на́съ де́рзнетъ рещѝ, ꙗ҆́кѡ а҆́зъ творю̀ дѣла̀ хрⷭ҇тѡ́вы, и҆ вѣ́рꙋю пра́вѡ въ него̀; Ви́дите ли бра́тїѧ, ꙗ҆́кѡ невѣ́рни и҆мѣ́емъ ѡ҆брѣсти́сѧ въ стра́шный ѻ҆́ный де́нь сꙋда̀, и҆ и҆мѣ́емъ мꙋ́читисѧ го́рше ѻ҆́ныхъ, и҆̀же не вѣ́дѧтъ коне́чнѣ хрⷭ҇та̀, нижѐ вѣ́рꙋютъ є҆мꙋ̀; Поне́же надлежи́тъ, и҆лѝ на́мъ ѡ҆сꙋждє́ннымъ бы́ти ꙗ҆́кѡ невѣ̑рнымъ, и҆лѝ гдⷭ҇ꙋ на́шемꙋ і҆и҃сꙋ хрⷭ҇тꙋ̀ самои́стиннѣ ꙗ҆ви́тисѧ неи́стинствꙋющымъ, є҆́же є҆́сть невозмо́жно. И҆ сїѧ̑ писа́хъ, бра́тїѧ моѧ̑, не съ таковы́мъ намѣ́ренїемъ, дабы̀ возбрани́ти хрїстїа́намъ ѿше́льствовати и҆ безмо́лвствовати, предпочита́ѧ лꙋ́чше житїѐ мїрско́е. Да не бꙋ́детъ сїѐ николи́же: но намѣ́ренїе моѐ, да и҆звѣщꙋ̀ всѣ́хъ и҆мꙋ́щихъ чита́ти настоѧ́щꙋю по́вѣсть, ꙗ҆́кѡ хотѧ́й и҆ жела́ѧй ѿ всеѧ̀ дꙋшѝ и҆ се́рдца, твори́ти бла́го, и҆ добродѣ́тель прїе́млетъ си́лꙋ ѿ всеси́льнагѡ бг҃а, дабы̀ мощѝ твори́ти сїѐ во всѧ́комъ мѣ́стѣ, и҆ да сподо́битсѧ прїѧ́ти дарова̑нїѧ дꙋхѡ́вныѧ и҆ бж҃е́ствєнныѧ видѣ̑нїѧ, ꙗ҆́коже и҆ се́й ю҆́ноша блаже́нный, глаго́лю, геѡ́ргїй: є҆го́же и҆мѣ́ѧ а҆́зъ зна́емымъ и҆ дрꙋ́гомъ себѣ̀ при́снымъ, проси́хъ, да сїѧ̑ мѝ повѣ́даетъ, ꙗ҆́коже та̀ написа́хъ. Сегѡ̀ ра́ди, бра́тїѧ моѧ̑ ѡ҆ хрⷭ҇тѣ̀ молю̀ вы̀, да прїи́мемъ и҆ мы̀ ᲂу҆се́рдїе и҆ жела́нїе въ се́рдцѣ на́шемъ твори́ти добро̀, и҆ да тече́мъ съ вѣ́рою несомнѣ́нною и҆ ᲂу҆пова́нїемъ, да и҆спра́вимъ за́пѡвѣди бж҃їѧ: и҆ вѣ́ренъ и҆ нело́женъ є҆́сть гдⷭ҇ь на́шъ, ли́ца на̑ша не постыдѧ́тсѧ. И҆́стиннѡ возмо́жемъ и҆спра́вити всѧ́кое добро̀, въ не́мже бы мѣ́стѣ не бы́хомъ: и҆лѝ во гра́дѣхъ, и҆лѝ въ ве́сехъ, и҆лѝ въ монастырѣ́хъ, и҆лѝ въ пꙋсты́нехъ. Поне́же всеблагі́й бг҃ъ по ѡ҆бѣща́нїю своемꙋ̀ ѿверза́етъ врата̀ ца́рствїѧ своегѡ̀ всѧ́комꙋ толкꙋ́щемꙋ, и҆ нѣ́сть ѡ҆́браза сицева́гѡ, дабы̀ и҆ща́й вседꙋ́шнѡ не ѡ҆брѣ́лъ бога́тства дарова́нїй бж҃їихъ. Є҆мꙋ́же сла́ва во вѣ́ки вѣкѡ́въ, а҆ми́нь.

Трѝ сꙋ́ть ѡ҆́бразы внима́нїѧ и҆ моли́твы, и҆́миже дꙋша̀ и҆лѝ возво́дитсѧ и҆ пред̾ꙋспѣва́етъ, и҆лѝ низверга́етсѧ и҆ погꙋблѧ́етсѧ. И҆ а҆́ще сі́и трѝ ѡ҆́бразы ᲂу҆потреблѧ́етъ во своѐ вре́мѧ, ꙗ҆́коже подоба́етъ, то̀ пред̾ꙋспѣва́етъ: а҆́ще же ᲂу҆потреби́тъ несмы́сленнѡ и҆ безвре́меннѡ, низверга́етсѧ. Внима́нїе ᲂу҆̀бо до́лженствꙋетъ бы́ти толи́кѡ свѧзꙋ́емо и҆ неразлꙋ́чно съ моли́твою, ꙗ҆́коже свѧзꙋ́етсѧ и҆ не разлꙋча́етсѧ тѣ́ло съ дꙋше́ю, и҆ є҆ди́но без̾ дрꙋга́гѡ не мо́жетъ состоѧ́ти. И҆ внима́нїе до́лженствꙋетъ предварѧ́ти и҆ стрещѝ врагѡ́въ, ꙗ҆́кѡ нѣ́кїй стра́жъ, и҆ ѻ҆́ное пе́рвѣе да подвиза́етсѧ на грѣ́хъ, и҆ да противꙋстои́тъ лꙋка̑вымъ помыслѡ́мъ приходѧ́щымъ въ се́рдце, внима́нїю же да послѣ́дꙋетъ моли́тва, ꙗ҆́же потреблѧ́етъ и҆ ᲂу҆мерщвлѧ́етъ а҆́бїе всѣ̀ лꙋка̑выѧ ѻ҆́ныѧ по́мыслы, съ ни́миже бра́нь пе́рвѣе внима́нїе творѧ́ше: поне́же сїѐ є҆ди́ное не мо́жетъ и҆̀хъ ᲂу҆мертви́ти. И҆ въ се́мъ вре́мени бра́ни внима́нїѧ и҆ моли́твы, состои́тъ живо́тъ и҆ сме́рть дꙋшѝ, ꙗ҆́кѡ а҆́ще внима́нїемъ храни́тъ моли́твꙋ чи́стꙋ, то̀ пред̾ꙋспѣва́емъ: а҆́ще же не тщи́мсѧ храни́ти ю҆̀ чи́стꙋ, но ѡ҆ставлѧ́емъ нестрего́мꙋ, то̀ ѡ҆сквернѧ́етсѧ ѻ҆на̀ ѿ лꙋка́выхъ помыслѡ́въ, и҆ мы̀ быва́емъ непотре́бни и҆ неꙋспѣ́шни. Поне́же ᲂу҆̀бо, ꙗ҆́коже реко́хомъ, трѝ ѡ҆́бразы сꙋ́ть внима́нїѧ и҆ моли́твы: подоба́етъ и҆з̾ѧсни́ти и҆ ѡ҆ сво́йствахъ ка́ждагѡ ѡ҆́браза, да и҆збере́тъ лꙋ́чшее, и҆́же хо́щетъ спасти́сѧ, а҆ не хꙋ́ждшее.

Ѡ҆ пе́рвомъ ѡ҆́бразѣ внима́нїѧ и҆ моли́твы

Пе́рвагѡ ѡ҆́браза свѡ́йства сꙋ́ть сїѧ̑: є҆гда̀ кто̀ предстоѧ̀ на моли́твѣ, возво́дитъ на не́бо рꙋ́цѣ своѝ, и҆ ѻ҆́чи, и҆ ᲂу҆́мъ, и҆ воѡбража́етъ во ᲂу҆мѣ̀ свое́мъ бж҃е́ствєнныѧ совѣ́ты, небє́снаѧ блага̑ѧ, чи́ны свѧты́хъ а҆́гг҃лъ, и҆ ски̑нїи свѧты́хъ: и҆ вкра́тцѣ, всѧ̑, є҆ли̑ка слы́ша ѿ бж҃е́ственнагѡ писа́нїѧ, собира́етъ во ᲂу҆́мъ сво́й, и҆ размышлѧ́етъ ѡ҆б̾ ѻ҆́ныхъ во вре́мѧ моли́твы, и҆ зри́тъ на не́бо, и҆ возбꙋжда́етъ ѻ҆́ными дꙋ́шꙋ свою̀ къ жела́нїю и҆ любвѝ бж҃е́ственной, и҆ногда̀ и҆спꙋща́етъ сле́зы, и҆ пла́четъ. И҆ таковы́мъ ѡ҆́бразомъ ма́лѡ пома́лꙋ кичи́тсѧ се́рдце є҆гѡ̀, не понима́ѧ тогѡ̀ ᲂу҆мо́мъ, и҆ воѡбража́етъ, ꙗ҆́кѡ є҆́же твори́тъ ѻ҆́нъ, быва́етъ ѿ благода́ти бж҃е́ственныѧ ко ᲂу҆тѣше́нїю є҆гѡ̀, и҆ мо́литъ бг҃а, да сподо́битъ є҆го̀ ѡ҆брѣта́тисѧ въ сицево́мъ дѣ́ланїи: ꙗ҆̀же сꙋ́ть зна́менїе пре́лести: поне́же до́брое нѣ́сть добро̀, є҆гда̀ не бꙋ́детъ проходи́мо до́брѣ, и҆ ꙗ҆́коже подоба́етъ. Тѣ́мже таковы́й человѣ́къ, а҆́ще и҆ безмо́лвствовати бꙋ́детъ безмо́лвїемъ соверше́ннымъ, не мо́жетъ не и҆зстꙋпи́ти и҆з̾ ᲂу҆ма̀, и҆ не безꙋ́мствовати: а҆́ще же и҆ не прилꙋчи́тсѧ сегѡ̀ съ ни́мъ, ѻ҆ба́че не возмо́жно николи́же прїитѝ є҆мꙋ̀ въ ра́зꙋмъ, и҆ дости́гнꙋти добродѣ́тели, и҆лѝ безстра́стїѧ. Си́мъ ѡ҆́бразомъ прельсти́шасѧ ви́дѣвшїи свѣ́тъ, и҆ сїѧ́нїе ѻ҆чесы̑ си́ми тѣле́сными, и҆ ѡ҆бонѧ́вшїи благовѡ́нїѧ ѡ҆бонѧ́нїемъ свои́мъ, и҆ слы́шавшїи ᲂу҆шесы̑ свои́ми гла́сы, и҆ и҆на̑ѧ си̑мъ подѡ́бнаѧ: и҆ ѻ҆́ви ѿ ни́хъ возбѣснова́шасѧ, и҆ прехожда́хꙋ ᲂу҆мовре́днѣ съ мѣ́ста на мѣ́сто: ѻ҆́ви же прїѧ́ша бѣ́са, и҆ ꙗ҆́вльшасѧ и҆ преѡбрази́вшасѧ во а҆́гг҃ла свѣ́тла, и҆ прельсти́шасѧ, и҆ пребы́ша неиспра́влени да́же до конца̀, не прїе́млѧ совѣ́та ни ѿ є҆ди́нагѡ бра́та: ѻ҆́ви же ѿ ни́хъ, под̾ꙋща́еми дїа́воломъ, са́ми себѐ ᲂу҆би́ша: ѻ҆́ви же во стремни̑ны низверго́шасѧ, ѻ҆́ви ᲂу҆дави́шасѧ: и҆ кто̀ мо́жетъ и҆зрещѝ разли̑чнаѧ прельщє́нїѧ дїа́вѡлѧ, и҆́миже ѻ҆́нъ прельща́етъ, и҆ ꙗ҆̀же сꙋ́ть неисповѣди̑ма; Ѻ҆ба́че ѿ си́хъ, ꙗ҆̀же реко́хомъ, всѧ́къ разꙋ́мный человѣ́къ мо́жетъ наꙋчи́тисѧ, кі́й вре́дъ происхо́дитъ ѿ сегѡ̀ пе́рвагѡ ѡ҆́браза внима́нїѧ и҆ моли́твы. А҆́ще же слꙋчи́тсѧ комꙋ̀ ѿ ѻ҆́ныхъ, и҆̀же ᲂу҆потреблѧ́ютъ се́й ѡ҆́бразъ, не пострада́ти ниеди́нагѡ ѕла̀ ѿ тѣ́хъ, ꙗ҆̀же реко́хомъ, ра́ди сожи́тельствованїѧ съ бра́тїею, [занѐ ѻ҆́наѧ ѕла̑ѧ стра́ждꙋтъ наипа́че ѿше́льники, и҆̀же сꙋ́ть є҆ди́ни]: но сицевы́й прово́дитъ всю̀ жи́знь свою̀ без̾ꙋспѣ́шнѡ.

Ѡ҆ второ́мъ ѡ҆́бразѣ внима́нїѧ.

Вторы́й ѡ҆́бразъ внима́нїѧ и҆ моли́твы є҆́сть се́й: є҆гда̀ кто̀ собира́етъ ᲂу҆́мъ сво́й къ себѣ̀, ѿвлека́ѧ є҆го̀ ѿ всегѡ̀ чꙋ́вственнагѡ, и҆ храни́тъ чꙋ̑вства своѝ, и҆ собира́етъ всѧ̑ по́мыслы своѧ̑, да не скита́ютсѧ въ сꙋ́етныхъ ве́щехъ сегѡ̀ мі́ра, и҆ ѻ҆вогда̀ и҆стѧзꙋ́етъ по́мыслы своѧ̑, ѻ҆вогда̀ внима́етъ словесє́мъ моли́твы, ю҆́же глаго́летъ: и҆ во и҆́нъ ча́съ собира́етъ къ себѣ̀ всѧ̑ по́мыслы, своѧ̑ плѣнє́нныѧ ѿ дїа́вола, и҆ превращє́нныѧ въ лꙋка̑ваѧ и҆ сꙋ́єтнаѧ, и҆ во и҆́нъ ча́съ па́ки съ трꙋдо́мъ мно́гимъ и҆ нꙋ́ждею прихо́дитъ въ самаго̀ себѧ̀, бы́въ ѡ҆блада́нъ и҆ побѣжде́нъ каково́юлибо стра́стїю. И҆ и҆мѣ́ѧ се́й по́двигъ, и҆ бра́нь въ себѣ̀, не мо́жетъ ми́ренъ бы́ти николи́же, нижѐ ѡ҆брѣстѝ вре́мѧ твори́ти добродѣ́тєли, и҆ прїѧ́ти вѣне́цъ пра́вды. Зане́же сицевы́й ᲂу҆подо́бисѧ творѧ́щемꙋ бра́нь со врагѝ свои́ми но́щїю во тьмѣ̀, и҆́же гла́сы вра̑жїѧ слы́шитъ и҆ ра̑ны прїе́млетъ ѿ ни́хъ, но не мо́жетъ ви́дѣти ꙗ҆́снѡ, кто̀ ѻ҆нѝ сꙋ́ть, и҆ ѿкꙋ́дꙋ прїидо́ша, и҆ ка́кѡ, и҆ чесѡ̀ ра́ди бо́рютъ є҆го̀. Поне́же тьма̀ ꙗ҆́же є҆́сть во ᲂу҆мѣ̀ є҆гѡ̀, и҆ бꙋ́рѧ, ю҆́же и҆́мать въ по́мыслѣхъ, прино́сѧтъ є҆мꙋ̀ сїю̀ тщетꙋ̀, и҆ не мо́жетъ николи́же свободи́тисѧ ѿ вра̑гъ свои́хъ мы́сленныхъ, и҆̀же бы не сокрꙋша́ли є҆гѡ̀, и҆ таковы́й трꙋ́дъ под̾е́млетъ, мзды́ же лиша́етсѧ, занѐ ѡ҆кра́даетсѧ тщесла́вїемъ, не понима́ѧ сегѡ̀, мни́тъ ѡ҆ себѣ̀, ꙗ҆́кѡ ѻ҆́нъ внима́теленъ є҆́сть: и҆ мно́гажды ѿ го́рдости презира́етъ дрꙋги́хъ, и҆ и҆̀хъ ѡ҆хꙋжда́етъ, и҆ поставлѧ́етъ себѧ̀ досто́йнымъ, по своемꙋ̀ мечта́нїю, бы́ти па́стыремъ ѻ҆ве́цъ, и҆ пꙋтеводи́тельствовати и҆̀хъ, и҆ ᲂу҆подоблѧ́етсѧ слѣпцꙋ̀ покꙋша́ющꙋсѧ води́ти и҆ны̑ѧ слѣпцы̀.

Се́й є҆́сть вторы́й ѡ҆́бразъ внима́нїѧ, и҆ подоба́етъ всѧ́комꙋ хотѧ́щемꙋ спасе́нїѧ, и҆ внима́ти до́брѣ, познава́ти вре́дъ, є҆го́же се́й нано́ситъ дꙋшѣ̀. Ѻ҆ба́че се́й вторы́й ѡ҆́бразъ лꙋ́чше є҆́сть пе́рвагѡ, ꙗ҆́коже лꙋ́чше є҆́сть но́щь, ꙗ҆́же и҆́мать лꙋнꙋ̀, но́щи мра́чныѧ, и҆ тоѧ̀, ꙗ҆́же є҆́сть без̾ лꙋны̀.

Ѡ҆ тре́тїемъ ѡ҆́бразѣ внима́нїѧ.

Тре́тїй ѡ҆́бразъ є҆́сть вои́стиннꙋ ве́щь пресла́внаѧ и҆ неꙋдобьсказꙋ́емаѧ, и҆ невѣ́дѧщымъ не то́чїю неꙋдобопостижи́ма є҆́сть, но и҆ ѿню́дъ невѣроѧ́тна. Поне́же во времена̀ сїѧ̑ ѡ҆брѣта́етсѧ се́й ѡ҆́бразъ не вельмѝ во мно́гихъ: и҆ ꙗ҆́коже а҆́зъ мню̀, притека́етъ къ на́мъ сїѐ бла́го ѿ послꙋша́нїѧ. Поне́же послꙋша́нїе, ꙗ҆влѧ́емое дꙋхо́вномꙋ своемꙋ̀ ѻ҆тцꙋ̀, всѧ́каго твори́тъ безпеча́льнымъ: сицевы́й ᲂу҆жѐ дале́къ є҆́сть ѿ пристра́стїѧ мі́ра сегѡ̀, и҆ вельмѝ до́брый и҆ нелѣ́ностный дѣ́латель сегѡ̀ тре́тїѧгѡ ѡ҆́браза, а҆́ще то́чїю ѡ҆брѣ́те ᲂу҆чи́телѧ и҆ дꙋхо́внаго ѻ҆тца̀ и҆́стиннаго, не не заблꙋжда́ющаго, не и҆мꙋ́щаго ни є҆ди́ныѧ ле́сти. Зане́же возложѝ себѐ, и҆ всю̀ печа́ль свою̀ на бг҃а, и҆ на дꙋхо́внаго своего̀ ѻ҆тца̀, и҆ послꙋша́нїемъ и҆́стиннымъ не ктомꙋ̀ живе́тъ себѣ̀, є҆́же бы твори́ти во́лю свою̀, но ᲂу҆мертви́сѧ ѿ всѧ́кагѡ пристра́стїѧ мїрска́гѡ и҆ своегѡ̀ тѣ́ла. Се́й ѿ каковы́ѧ привре́менныѧ ве́щи мо́жетъ бы́ти побѣжде́нъ и҆ порабоще́нъ; и҆лѝ кꙋ́ю печа́ль и҆ попече́нїе мо́жетъ и҆мѣ́ти сицевы́й человѣ́къ; Си́мъ ᲂу҆́бѡ ѡ҆́бразомъ быва́ющимъ чрез̾ послꙋша́нїе, всѣ̀ хи́трѡсти бѣсѡ́вскїѧ, и҆ всѣ̀ и҆з̾ѡбрѣ́тєнїѧ и҆́хъ, и҆́миже ᲂу҆хищрѧ́ютсѧ привлещѝ ᲂу҆́мъ ко мнѡ́гимъ и҆ разли̑чнымъ по́мысламъ, и҆счеза́ютъ и҆ разрꙋша́ютсѧ: и҆ тогда̀ ᲂу҆́мъ ѻ҆́нагѡ человѣ́ка быва́етъ свобо́денъ ѿ всегѡ̀, и҆ съ вели́кою вла́стїю благовре́меннѣ и҆стѧзꙋ́етъ по́мыслы всѣва́ємыѧ ѿ бѣсѡ́въ, и҆ съ вели́кимъ и҆скꙋ́сствомъ ѿгонѧ́етъ ѻ҆́ныѧ, и҆ се́рдцемъ чи́стымъ прино́ситъ моли́твы своѧ̑ бг҃ꙋ. Сїѐ є҆́сть нача́ло и҆́стиннагѡ житїѧ̀, и҆ є҆ли́цы не творѧ́тъ сегѡ̀ нача́ла, всꙋ́е трꙋжда́ютсѧ, и҆ не разꙋмѣ́ютъ сегѡ̀.

Нача́ло сегѡ̀ тре́тїѧгѡ ѡ҆́браза внима́нїѧ нѣ́сть сїѐ, є҆́же взира́ти на не́бо, и҆ воздѣва́ти рꙋ́цѣ своѝ, и҆ и҆мѣ́ти ᲂу҆́мъ сво́й въ небе́сныхъ воѡбраже́нїихъ, и҆ ѿтꙋ́дꙋ проси́ти по́мощи, занѐ сїѧ̑, ꙗ҆́коже реко́хомъ, сꙋ́ть свѡ́йства пе́рвагѡ ѡ҆́браза пре́лести: нижѐ па́ки сїѐ, є҆́же храни́ти ᲂу҆мо́мъ своѧ̑ чꙋ̑вства и҆ внима́ти соверше́ннѡ семꙋ̀, и҆ внꙋ́трєннїѧ бра̑ни, дꙋшѣ̀ причинѧ́ємыѧ ѿ врагѡ́въ, не зрѣ́ти, нижѐ внима́ти ѻ҆́нымъ, ꙗ҆́кѡ сїѧ̑ сꙋ́ть свѡ́йства втора́гѡ ѡ҆́браза, и҆ творѧ́щїй ѻ҆́ныѧ низлага́етсѧ ѿ бѣсѡ́въ, но са́мъ не низлага́етъ: поража́етсѧ, и҆ не вѣ́сть тогѡ̀: плѣнѧ́етсѧ, и҆ порабоща́етсѧ, и҆ не мо́жетъ сотвори́ти ѿмще́нїе плѣни́вшымъ є҆го̀, но всегда̀ врагѝ ꙗ҆́внѡ и҆ та́йнѡ ра́тꙋютъ є҆го̀, и҆ дѣ́лаютъ тщесла́вна и҆ самомни́тельна.

Ты́ же, возлю́бленне, а҆́ще хо́щеши спасти́сѧ, до́лженъ є҆сѝ нача́ти се́й тре́тїй ѡ҆́бразъ ѿсю́дꙋ. По соверше́ннѣмъ послꙋша́нїи, ѡ҆ не́мже предреко́хомъ, ꙗ҆́кѡ подоба́етъ тѝ храни́ти ѻ҆́ное къ дꙋхо́вномꙋ твоемꙋ̀ ѻ҆тцꙋ̀, и҆ твори́ти всѧ̑ дѣла̀ твоѧ̑ съ чи́стою со́вѣстїю а҆́ки пред̾ лице́мъ бг҃а. Кромѣ́ бо послꙋша́нїѧ не возмо́жно николи́же бы́ти со́вѣсти чи́стой: и҆ со́вѣсть твою̀ къ тре́мъ веще́мъ подоба́етъ тѝ храни́ти чи́стꙋю: пе́рвѣе къ бг҃ꙋ, пото́мъ къ дꙋхо́вномꙋ твоемꙋ̀ ѻ҆тцꙋ̀, и҆ тре́тїе ко и҆ны̑мъ лю́демъ, и҆ къ веще́мъ.

И҆ къ бг҃ꙋ до́лгъ и҆́маши сохрани́ти со́вѣсть твою̀ чи́стꙋю: си́рѣчь не твори́ти, є҆ли̑ка вѣ́си, ꙗ҆́кѡ непрїѧ̑тна бг҃ꙋ, и҆ неꙋгѡ́дна сꙋ́ть є҆мꙋ̀. Къ дꙋхо́вномꙋ твоемꙋ̀ ѻ҆тцꙋ̀ та́кожде, да твори́ши всѧ̑, є҆ли̑ка тѝ глаго́летъ, ни бо́лѣе заповѣ́данныхъ, ни ме́нѣе, но по предложе́нїю и҆ по во́ли є҆гѡ̀ си́це да хо́диши. Ко и҆ны̑мъ же лю́демъ подоба́етъ тѝ храни́ти со́вѣсть чи́стꙋю, не твори́ти и҆̀мъ тогѡ̀, є҆́же са́мъ ненави́диши и҆ не хо́щеши, дабы̀ твори́ли сїѐ ѻ҆нѝ тебѣ̀. И҆ въ веще́хъ па́ки, до́лгъ и҆́маши храни́тисѧ ѿ ѕлоꙋпотребле́нїѧ, си́рѣчь да ᲂу҆потреблѧ́еши всѐ подоба́ющимъ ѡ҆́бразомъ, пи́щꙋ, питїѐ и҆ ѻ҆де́ждꙋ: и҆ вкра́тцѣ, всѐ до́лженъ є҆сѝ твори́ти ꙗ҆́кѡ пред̾ лице́мъ бг҃а, и҆ ѿню́дъ да ни во є҆ди́номъ дѣ́лѣ ѡ҆блича́етъ и҆ терза́етъ тѧ̀ со́вѣсть твоѧ̀, ꙗ҆́кѡ не до́брѣ сотвори́лъ є҆сѝ. И҆ си́це да прохо́диши и҆́стинный и҆ неле́стный пꙋ́ть тре́тїѧгѡ ѡ҆́браза внима́нїѧ и҆ моли́твы, и҆́же є҆́сть се́й: ᲂу҆́мъ да храни́тъ се́рдце во вре́мѧ моли́твы, и҆ да пребыва́етъ при́снѡ внꙋ́трь ѻ҆́нагѡ, и҆ ѿтꙋ́дꙋ, сі́есть, и҆з̾ глꙋбины̀ се́рдца, да возсыла́етъ моли̑твы къ бг҃ꙋ: и҆ є҆гда̀ ѿ среды̀ се́рдца вкꙋ́ситъ, ꙗ҆́кѡ бла́гъ гдⷭ҇ь, и҆ ᲂу҆слади́тсѧ, не ктомꙋ̀ бꙋ́детъ и҆сходи́ти ѿ мѣ́ста серде́чнагѡ: и҆ тогда̀ рече́тъ, ꙗ҆́коже а҆по́столъ пе́тръ, добро̀ є҆́сть на́мъ здѣ̀ бы́ти¹⁰³. И҆ вы́нꙋ въ сїѐ, си́рѣчь, внꙋ́трь се́рдца зрѣ́ти, и҆ та́мѡ ѡ҆браща́тисѧ бꙋ́детъ, вымышлѧ́ѧ ѡ҆́бразъ нѣ́кїй прогонѧ́ти всѣ̀ по́мыслы всѣва́ємыѧ та́мѡ ѿ врага̀ дїа́вола. Ѻ҆ба́че тѣ̑мъ, є҆ли́цы не и҆́мꙋтъ никакова́гѡ вѣ́дѣнїѧ ѡ҆ спаси́тельномъ се́мъ дѣ́ланїи, мно́жицею ꙗ҆влѧ́етсѧ ѻ҆но̀ вельмѝ трꙋ́днымъ и҆ тѣ́снымъ. Но є҆ли́цы вкꙋси́ша сла́дость, ю҆́же и҆́мать, и҆ наслади́шасѧ сла́достїю во глꙋбинѣ̀ се́рдца своегѡ̀, сі́и съ бж҃е́ственнымъ па́ѵломъ возглаго́лютъ: Кто́ ны разлꙋчи́тъ ѿ любвѐ хрⷭ҇то́вы¹⁰⁴; и҆ прѡ́чаѧ.

Свѧті́и ѻ҆тцы̀ на́ши, слы́шѧ гдⷭ҇а глаго́люща во свѧще́нномъ є҆ѵⷢ҇лїи, ꙗ҆́кѡ ѿ се́рдца и҆схо́дѧтъ помышлє́нїѧ ѕла̑ѧ, ᲂу҆бі̑йства, прелюбодѣѧ̑нїѧ, любодѣѧ̑нїѧ, татьбы̑, лжесвидѣ́тєльства, хꙋлы̑, и҆ ꙗ҆́кѡ сїѧ̑ сꙋ́ть сквернѧ̑щаѧ человѣ́ка¹⁰⁵: и҆ па́ки слы́шѧ въ дрꙋго́мъ мѣ́стѣ є҆ѵⷢ҇лїа, ꙗ҆́кѡ заповѣ́дꙋетъ на́мъ, ѡ҆чи́стити внꙋтрьꙋ́дꙋ стклѧ́ницы, да бꙋ́детъ и҆ внѣ́шнее чи́сто¹⁰⁶: ѡ҆ста́виша всѧ́кое и҆но́е дѣ́ло, и҆ подвиза́хꙋсѧ всѧ́чески въ се́мъ дѣ́ланїи, си́рѣчь въ хране́нїи се́рдца, вѣ́дѧще и҆звѣ́стнѡ, ꙗ҆́кѡ вкꙋ́пѣ съ си́мъ дѣ́ланїемъ стѧ́жꙋтъ ᲂу҆до́бнѡ всѧ́кꙋю и҆нꙋ́ю добродѣ́тель: но кромѣ̀ сегѡ̀ не мо́жетъ стѧжа́тисѧ и҆ пребы́ти ни є҆ди́наѧ добродѣ́тель. Сїѐ дѣ́ланїе нѣ́цыи ѿ ѻ҆тє́цъ на́шихъ и҆менова́ша безмо́лвїе серде́чное: и҆ні́и ѻ҆́ное нареко́ша внима́нїе, и҆ні́и трезвѣ́нїе и҆ противорѣ́чїе, и҆ні́и и҆стѧза́нїе по́мыслѡвъ и҆ хране́нїе ᲂу҆ма̀. Поне́же всѝ ᲂу҆пражднѧ́хꙋсѧ въ се́мъ, и҆ си́мъ сподо́бишасѧ бж҃е́ственныхъ дарова́нїй, и҆ ѡ҆ се́мъ глаго́летъ и҆ є҆кклесїа́стъ: Весели́сѧ, ю҆́ноше, въ ю҆́ности твое́й, и҆ ходѝ въ пꙋте́хъ се́рдца твоегѡ̀ непоро́ченъ¹⁰⁷ и҆ чи́стъ, и҆ ᲂу҆далѝ се́рдце твоѐ ѿ помышле́нїй. И҆ ѡ҆ се́мъ са́момъ глаго́летъ и҆ при́точникъ: а҆́ще взы́детъ на тѧ̀ прило́гъ дїа́вола, да не ѡ҆ста́виши вни́ти въ мѣ́сто твоѐ¹⁰⁸, мѣ́сто же разꙋмѣ́етъ се́рдце. И҆ гдⷭ҇ь на́шъ глаго́летъ во сщ҃е́нномъ є҆ѵⷢ҇лїи: не возноси́тесѧ¹⁰⁹, си́рѣчь, не расточа́йте ᲂу҆ма̀ ва́шегѡ сѣ́мѡ и҆ ѻ҆ва́мѡ. и҆ во и҆но́мъ мѣ́стѣ па́ки глаго́летъ: блаже́ни ни́щїи дꙋ́хомъ¹¹⁰, си́рѣчь, блаже́ни сꙋ́ть тѣ̀, є҆ли́цы не стѧжа́ша въ се́рдце своѐ ни є҆ди́ныѧ мы́сли сегѡ̀ мі́ра, но сꙋ́ть ни́щи ѿ всѧ́кагѡ по́мысла мїрска́гѡ. И҆ всѝ бж҃е́ственнїи ѻ҆тцы̀ на́ши писа́ша мно́гѡ ѡ҆ се́мъ, и҆ кто̀ хо́щетъ прочестѝ писа̑нїѧ и҆́хъ, да ви́дитъ, є҆ли̑ка написа̀ подви́жникъ ма́ркъ, и҆ є҆ли̑ка речѐ ст҃ы́й і҆ѡа́ннъ лѣ́ствичникъ, и҆ преподо́бный и҆сѵ́хїй, и҆ сїнаи́тъ фїлоѳе́й, и҆ а҆́вва и҆са́їа, и҆ вели́кїй варсоно́фїй, и҆ и҆́ни мно́зи.

И҆ вкра́тцѣ: кто̀ не вне́млетъ храни́ти ᲂу҆́мъ сво́й, то́тъ не мо́жетъ бы́ти чи́стъ се́рдцемъ, и҆ сподо́битисѧ зрѣ́ти бг҃а. Кто̀ не вне́млетъ, то́тъ не мо́жетъ бы́ти ни́щь дх҃омъ, нижѐ мо́жетъ пла́кати и҆ рыда́ти, и҆лѝ бы́ти кро́токъ и҆ смире́нъ, и҆лѝ бы́ти ми́лостивъ и҆ миротво́рецъ, и҆лѝ и҆згна́нъ пра́вды ра́ди: и҆ да рекꙋ̀ воѻбщѐ: не мо́жно стѧжа́ти дрꙋгі́ѧ добродѣ́тєли и҆ны́мъ ѡ҆́бразомъ, то́чїю си́мъ внима́нїемъ. Сегѡ̀ ра́ди па́че всегѡ̀ ѡ҆ не́мъ подоба́етъ тѝ пещи́сѧ, да пости́гнеши и҆скꙋ́сомъ сїѧ̑, ꙗ҆̀же тѝ глаго́лю. А҆́ще же хо́щеши позна́ти и҆ ѡ҆́бразъ, ка́кѡ сїѐ твори́ти, а҆́зъ тѝ рекꙋ̀ и҆ ѡ҆ се́мъ по си́лѣ, ты́ же внемлѝ до́брѣ.

Трѝ вє́щи потре́ба тѝ храни́ти пре́жде всегѡ̀ и҆но́гѡ: пе́рвое, безпопече́нїе ѡ҆ всѧ́кой ве́щи ка́къ благосло́вной, та́къ и҆ неблагосло́вной и҆ сꙋ́етной, си́рѣчь, ᲂу҆мерщвле́нїе ѿ всѣ́хъ си́хъ: второ́е, со́вѣсть чи́стꙋ во все́мъ, ꙗ҆́коже реко́хомъ, да не ѡ҆блича́етъ тѧ̀ со́вѣсть ни во є҆ди́ной ве́щи: и҆ тре́тїе, безпристра́стїе соверше́нное, да не ᲂу҆клонѧ́етсѧ по́мыслъ тво́й въ пристра́стїе ни є҆ди́ныѧ мїрскі́ѧ ве́щи. Посе́мъ сѧ́ди во є҆ди́номъ мѣ́стѣ ѻ҆со́бенномъ и҆ безмо́лвномъ наединѣ̀, во є҆ди́номъ ᲂу҆глѣ̀, и҆ затворѝ две́рь, и҆ соберѝ ᲂу҆́мъ тво́й ѿ всѧ́кїѧ привре́менныѧ и҆ сꙋ́етныѧ ве́щи, та́же прилѣпѝ къ пе́рсемъ брадꙋ̀ твою̀, и҆ внима́й въ се́рдцѣ ᲂу҆мо́мъ твои́мъ и҆ чꙋ́вственными твои́ми ѻ҆ча́ми, и҆ ᲂу҆держѝ ма́ло дыха́нїе твоѐ, и҆ да и҆́маши та́мѡ ᲂу҆́мъ тво́й, и҆ и҆спытꙋ́й ᲂу҆́мнѣ ѡ҆брѣстѝ мѣ́сто, и҆дѣ́же є҆́сть се́рдце твоѐ, да бꙋ́детъ та́мѡ соверше́ннѡ и҆ ᲂу҆́мъ тво́й: и҆ въ нача́лѣ ѡ҆брѧ́щеши та́мѡ тьмꙋ̀, и҆ ѡ҆слѣпле́нїе мно́гое, и҆ жесто́кость: по́слѣжде, є҆гда̀ твори́ти бꙋ́деши, сїѐ внима́нїе непреста́ннѡ но́щь и҆ де́нь, ѡ҆брѧ́щеши, ѽ чꙋдесѐ! непреста́нное весе́лїе. Поне́же ᲂу҆́мъ подвиза́ѧсѧ въ се́мъ ѡ҆брѧ́щетъ мѣ́сто серде́чное, и҆ тогда̀ а҆́бїе ᲂу҆́зритъ та́мѡ сицєва́ѧ, ꙗ҆̀же не ви́дѣ николи́же, нижѐ вѣ́дѧше. Оу҆́зритъ бо воздꙋ́хъ ѻ҆́ный ѡ҆брѣта́ющїйсѧ та́мѡ внꙋ́трь се́рдца, и҆ всего̀ себѐ свѣ́тла, и҆ и҆спо́лненна всѧ́кагѡ благоразꙋ́мїѧ и҆ разсꙋжде́нїѧ. И҆ ѿто́лѣ и҆ впре́дь, ѿкꙋ́да бы ни возни́къ, и҆ ни ꙗ҆ви́лсѧ нѣ́кїй по́мыслъ, пре́жде не́жели ѻ҆́нъ вни́детъ, и҆ и҆з̾ѡбрази́тсѧ, а҆́бїе прогонѧ́етъ є҆го̀ ѿтꙋ́дꙋ, и҆ потреблѧ́етъ и҆́менемъ і҆и҃совымъ, си́рѣчь си́мъ: гдⷭ҇и і҆и҃се хрⷭ҇тѐ, поми́лꙋй мѧ̀! И҆ ѿсю́дꙋ ᲂу҆жѐ ᲂу҆́мъ человѣ́чь начина́етъ и҆мѣ́ти памѧтоѕло́бїе и҆ не́нависть къ бѣсѡ́мъ, и҆ бра́нь непреста́ннꙋю, и҆ воздвиза́етъ на ни́хъ ꙗ҆́рость є҆сте́ственнꙋю, го́нитъ и҆̀хъ, бїе́тъ и҆ потреблѧ́етъ. Прѡ́чаѧ же, ꙗ҆̀же навыко́ша бы́ти, позна́еши по си́хъ съ по́мощїю бж҃їею, са́мъ и҆скꙋ́сомъ посре́дствомъ внима́нїѧ ᲂу҆ма̀ твоегѡ̀, и҆ держа̀ въ се́рдцѣ і҆и҃са, си́рѣчь моли́твꙋ сїю̀: гдⷭ҇и і҆и҃се хрⷭ҇тѐ, и҆ прѡ́чаѧ: глаго́летъ бо и҆ нѣ́кїй ѿ ѻ҆тє́цъ: Сѣдѝ въ ке́ллїи твое́й, и҆ ѻ҆на̀ тѧ̀ всемꙋ̀ наꙋ́читъ.

Воп: Чесѡ̀ ра́ди пе́рвый и҆ вторы́й ѡ҆́бразъ, ѡ҆ ни́хже реко́хомъ, не мо́гꙋтъ и҆спра́вити сегѡ̀;

Ѿв: Поне́же не прохо́димъ мы̀ сїѧ̑, ꙗ҆́коже подоба́етъ. Занѐ и҆ ст҃ы́й і҆ѡа́ннъ лѣ́ствичникъ ᲂу҆подоблѧ́етъ сі́и трѝ ѡ҆́бразы лѣ́ствицѣ ѡ҆ четыре́хъ степе́нехъ, и҆ глаго́летъ: ѻ҆́ви ᲂу҆кроща́ютъ и҆ ᲂу҆малѧ́ютъ стра̑сти: и҆ ѻ҆́ви пою́тъ, си́рѣчь, мо́лѧтсѧ ᲂу҆сты̑ свои́ми: и҆ ѻ҆́ви ᲂу҆пражднѧ́ютсѧ во ᲂу҆́мной моли́твѣ: и҆ ѻ҆́ви восхо́дѧтъ къ видѣ́нїю. Тѣ́мже хотѧ́щїи взы́ти на сі́и четы́ре степє́ни, да не начина́ютъ съ верхꙋ̀ и҆дтѝ на ни́зъ, но съ ни́зꙋ на ве́рхъ да восхо́дѧтъ на пе́рвꙋю степе́нь, пото́мъ на вторꙋ́ю, и҆ тогда̀ на тре́тїю, а҆ по́слѣ на четве́ртꙋю. И҆ си́мъ ѡ҆́бразомъ мо́жетъ всѧ́къ ѿ землѝ возста́ти, и҆ взы́ти на не́бо. И҆ пе́рвѣе потре́ба подвиза́тисѧ, ꙗ҆́кѡ да ᲂу҆кроти́тъ и҆ ᲂу҆ма́литъ стра̑сти: второ́е, да ᲂу҆пражднѧ́етсѧ во ѱалмопѣ́нїи, си́рѣчь, да мо́литсѧ ᲂу҆сты̑: є҆гда́ бо ᲂу҆ма́лѧтсѧ стра̑сти, тогда̀ ᲂу҆жѐ моли́тва по є҆стествꙋ̀ подае́тъ весе́лїе и҆ сла́дость ѧ҆зы́кꙋ, и҆ вмѣнѧ́етсѧ благоꙋго́дною бг҃ови: тре́тїе, да мо́литсѧ ᲂу҆́мнѣ: и҆ четве́ртое, да восхо́дитъ къ видѣ́нїю. И҆ пе́рвое є҆́сть новонача́льныхъ, второ́е возраста́ющихъ въ пред̾ꙋспѣ́ѧнїи, тре́тїе дости́гшихъ до кра́йнѧгѡ предспѣ́ѧнїѧ, а҆ четве́ртое є҆́сть соверше́нныхъ.

И҆ та́кѡ нача́ло нѣ́сть и҆́но, то́чїю ᲂу҆мале́нїе страсте́й, ꙗ҆̀же не ᲂу҆малѧ́ютсѧ въ дꙋшѣ̀ и҆нѣ́мъ ѡ҆́бразомъ, то́чїю хране́нїемъ се́рдца и҆ внима́нїемъ. Ѿ се́рдца бо и҆схо́дѧтъ, ꙗ҆́коже глаго́летъ влⷣка на́шъ, помышлє́нїѧ ѕла̑ѧ, сквернѧ̑щаѧ человѣ́ка¹¹¹, и҆ та́мѡ тре́бꙋетсѧ бы́ти хране́нїю и҆ внима́нїю. И҆ є҆гда̀ стра̑сти преста́нꙋтъ и҆ ᲂу҆ма́лѧтсѧ ѿ бра́ни и҆ сопротивле́нїѧ, є҆́же твори́тъ на ни́хъ се́рдце, тогда̀ ᲂу҆́мъ жела́етъ и҆ взыскꙋ́етъ, ка́кѡ бы примири́тисѧ съ бг҃омъ, и҆ си́це ᲂу҆множа́етъ моли́твꙋ, и҆ ᲂу҆пражднѧ́етсѧ въ не́й: и҆ си́мъ жела́нїемъ и҆ моли́твою ᲂу҆крѣплѧ́емь, прогонѧ́етъ всѧ̑ ѻ҆́крестъ по́мыслы, и҆̀же покꙋша́ютсѧ вни́ти въ се́рдце, поража́ѧ и҆̀хъ моли́твою. И҆ тогда̀ быва́етъ бра́нь, ра́тꙋютъ съ вели́кимъ возмꙋще́нїемъ лꙋка́вїи бѣ́си, и҆ дѣ́йствїемъ страсте́й творѧ́тъ мѧте́жъ и҆ бꙋ́рю въ се́рдцѣ, но и҆́менемъ і҆и҃са хрⷭ҇та̀ потреблѧ́ютсѧ и҆ разрꙋша́ютсѧ, ꙗ҆́коже во́скъ ѿ ѻ҆гнѧ̀. И҆ па́ки, є҆гда̀ ѿгна́ни бꙋ́дꙋтъ, и҆ ѿи́дꙋтъ ѿ се́рдца, не престаю́тъ, но возмꙋща́ютъ ᲂу҆́мъ внѣ́шними чꙋ́вствы ѿвнѣ̀: и҆ сегѡ̀ ра́ди ѕѣлѡ̀ ско́рѡ ѡ҆щꙋща́етъ ᲂу҆́мъ тишинꙋ̀ и҆ безмо́лвїе въ себѣ̀: є҆гда́ бо не и҆́мꙋтъ си́лы возмꙋти́ти ᲂу҆́мъ во глꙋбинѣ̀, возмꙋща́ютъ є҆го̀ ѿвнѣ̀ мечта́нїѧми. Тѣ́мже невозмо́жно свободи́тисѧ соверше́ннѡ бра́ни, и҆ не ра́тꙋемꙋ бы́ти ѿ лꙋка́выхъ си́хъ дꙋхѡ́въ. Поне́же сїѐ є҆́сть соверше́нныхъ и҆ тѣ́хъ, є҆ли́цы ᲂу҆дали́шасѧ соверше́ннѡ ѿ всегѡ̀, и҆ пребыва́ютъ вы́нꙋ во внима́нїи се́рдца. И҆́же ᲂу҆́бѡ прохо́дитъ сїѧ̑ по чи́нꙋ, ка́ждое во вре́мѧ своѐ, се́й мо́жетъ по ѡ҆чище́нїи се́рдца своегѡ̀ ѿ страсте́й, и҆ во ѱалмопѣ́нїи ᲂу҆пражднѧ́тисѧ соверше́ннѣ ве́сь, и҆ по́мыслѡмъ противора́товати, и҆ на не́бо взира́ти чꙋ́вственными ѻ҆ча́ми, є҆гда̀ потре́бно бꙋ́детъ, ᲂу҆́мными же дꙋше́вными зрѣ́ти ѻ҆́ное, и҆ моли́тисѧ чи́стѡ во и҆́стинѣ, ꙗ҆́коже подоба́етъ.

Ѻ҆ба́че взира́ти на не́бо ѕѣлѡ̀ рѣ́дкѡ подоба́етъ стра́ха ра́ди лꙋка́выхъ на воздꙋ́сѣ дꙋхѡ́въ, сегѡ̀ ра́ди и҆ и҆менꙋ́ютсѧ воздꙋ́шнїи дꙋ́си, и҆́же произво́дѧтъ мнѡ́гїѧ и҆ разли̑чныѧ пре́лєсти на воздꙋ́сѣ: подоба́етъ ᲂу҆̀бо на́мъ внима́ти. Поне́же сегѡ̀ то́чїю тре́бꙋетъ ѿ на́съ бг҃ъ, да бꙋ́детъ ѡ҆чище́нно се́рдце на́ше хране́нїемъ и҆ внима́нїемъ. И҆ а҆́ще ко́рень є҆́сть свѧ́тъ, ꙗ҆́коже глаго́летъ а҆по́столъ, ꙗ҆́вѣ, ꙗ҆́кѡ и҆ вѣ̑тви сꙋ́ть свѧ́ти и҆ пло́дъ¹¹². Без̾ сегѡ́ же ѡ҆́браза, ѡ҆ не́мже реко́хомъ, возводѧ́й ѻ҆́чи своѝ и҆ ᲂу҆́мъ сво́й на не́бо, и҆ хотѧ́й воѡбража́ти нѣ́что ᲂу҆́мственно, мечта̑нїѧ зри́тъ, и҆ лѡ́жныѧ пре́лєсти, а҆ не и҆́стинныѧ, занѐ и҆́мать нечи́сто се́рдце своѐ. Ча́стѡ, ꙗ҆́коже реко́хомъ, пе́рвый и҆ вторы́й ѡ҆́бразъ во ᲂу҆спѣ́ѧнїе не приво́дѧтъ человѣ́ка. Ꙗ҆́коже бо хотѧ́ще зда́ти до́мъ, пе́рвѣе не полага́емъ ве́рхъ, пото́мъ ѡ҆снова́нїе, поне́же сїѐ є҆́сть невозмо́жно: но пе́рвѣе полага́емъ ѡ҆снова́нїе, пото́мъ зи́ждемъ до́мъ, та́же полага́емъ ве́рхъ. Си́це подоба́етъ на́мъ твори́ти и҆ въ дꙋхо́вномъ дѣ́ланїи: пе́рвѣе да полага́емъ ѡ҆снова́нїе, си́рѣчь, да сохрани́мъ се́рдце, и҆ да ᲂу҆ма́лимъ ѿ негѡ̀ стра̑сти, пото́мъ да сози́ждемъ дꙋхо́вный до́мъ, си́рѣчь, да ѿрази́мъ возмꙋще́нїе лꙋка́выхъ дꙋхѡ́въ, вою́ющихъ на на́съ чрез̾ чꙋ́вствы, и҆ да бѣжи́мъ скорѣ́е бра́ни и҆́хъ, и҆ тогда̀ да полага́емъ и҆ ве́рхъ, си́рѣчь, да ᲂу҆клони́мсѧ соверше́ннѡ ѿ всѣ́хъ веще́й, да ми́рни бꙋ́демъ, ꙗ҆́коже подоба́етъ, и҆ да соедини́мсѧ соверше́ннѡ бг҃ꙋ. И҆ си́це да соверша́емъ дꙋхо́вный до́мъ ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ, є҆мꙋ́же сла́ва во вѣ́ки вѣкѡ́въ, а҆ми́нь.

И҆́же во ст҃ы́хъ ѻ҆тє́цъ на́шихъ григо́рїй на сїна́йстѣй горѣ̀ во и҆́нока бы́сть постри́женъ, и҆ сегѡ̀ ра́ди сїнаи́тъ нарече́сѧ, процвѣте́ же во вре́мѧ ца́рствованїѧ а҆ндроні́ка, ѻ҆́колѡ ты́сѧщи три́ста тридесѧ́тагѡ го́да, во а҆ѳѡ́нъ же го́рꙋ прише́дъ, и҆ та́мѡшнїѧ ѡ҆бше́дъ ѻ҆би́тели и҆ безмо́лвничєства: мно́гихъ ᲂу҆̀бо ѡ҆брѣ́те смы́сломъ и҆ нра́вѡвъ чистото́ю ᲂу҆кра́шенныхъ, и҆ ѡ҆ дѣѧ́нїи то́чїю тщали́выхъ, блюде́нїю же ᲂу҆ма̀ и҆ безмо́лвїѧ, ѡ҆па́сствꙋ и҆ видѣ́нїю толи́кѡ ненаꙋче́нныхъ, ꙗ҆́кѡ нижѐ по и҆́мени та̑, ꙗ҆кѡва́ же сꙋ́ть, разꙋмѣ́ти. Є҆ди́нѣмъ то́чїю тре́мъ прилꙋчи́сѧ въ ски́тѣ магꙋ́ла лежа́щемъ проти́вꙋ фїлоѳе́а [и҆са́їа, корни́лїй и҆ мака́рїй тѣ̑мъ и҆мена̀] ма́лѡ и҆ ѡ҆ видѣ́нїи трꙋжда́тисѧ. Сегѡ̀ ра́ди ре́вностїю бж҃їею распалѧ́емь, не то́чїю ѻ҆со́бь безмо́лвствꙋющихъ, но и҆ въ ѻ҆бщежи́тїѧхъ всѣ́хъ, трезвѣ́нїю и҆ блюде́нїю ᲂу҆ма̀ и҆ ᲂу҆́мнѣй моли́твѣ ᲂу҆ча́ше. Не то́чїю же, но и҆ по предмо́рїѧмъ македѡ́нскимъ трѝ ла̑ѵры вє́лїѧ ᲂу҆стро́ивъ, и҆ мѣста̀ мнѡ́жайша и҆ ѻ҆́бласти преше́дъ, всѣ́хъ ѻ҆́бще ѡ҆ дѣ́ланїи ᲂу҆́мныѧ и҆ непреста́нныѧ моли́твы, бж҃е́ственными свои́ми ᲂу҆че́ньми наставлѧ́ше. И҆ мно́гихъ тѣ́мъ грѣ́шникѡвъ ѡ҆брати́въ, и҆ досто́йныхъ и҆з̾ недосто́йныхъ показа́въ, спаса́емыхъ ча́сти тѣ́мъ ᲂу҆досто́итисѧ вино́венъ бы́сть. тѡ́же и҆ жи́знь ка́ллїстъ свѧтѣ́йшїй патрїа́рхъ, и҆ ᲂу҆чени́къ є҆гѡ̀, и҆звѣ́ствовавшїй, простра́ннѣ написа̀. Но ꙗ҆́кѡ бо въ жи́зни свое́й, сла́венъ ѻ҆́бщїй ᲂу҆чи́тель свѧще́ннагѡ трезвѣ́нїѧ ꙗ҆ви́сѧ, си́це по сме́рти, къ томꙋ́жде настоѧ́щими свои́ми списа́ньми пꙋтеведе́тъ. Оу҆́мныѧ бо и҆ серде́чныѧ мл҃твы дѣ́ѧтельный спо́собъ и҆зрѧ́днѣйше и҆ соверше́ннѣйше наставлѧ́етъ, и҆ ѡ҆ нра́вственныхъ добродѣ́телехъ и҆ страсте́хъ и҆зꙋча́етъ, и҆ и҆ны̑ѧ ᲂу҆̀бо зна́мєнїѧ пре́лести, и҆́на же благода́ти въ си́хъ ꙗ҆вѝ. И҆ всѧ́кѡ преполе́зное є҆́сть сїѐ творе́нїе ра́внѣ новонача̑льнымъ, срє́днимъ же и҆ совершє́ннымъ: сокрове́нное же въ ни́хъ дꙋхо́вно бога́тство, ꙗ҆ково̀ и҆ коли́ко є҆́сть, нелѣ́ностнѣ прочты́й ѡ҆брѧ́щетъ, и҆ ра́достїю вои́стиннꙋ неизрече́нною возра́дꙋетсѧ ѡ҆ ѡ҆брѣ́тенїи тогѡ̀.

Словеса̀ разли̑чнаѧ ѡ҆ за́повѣдехъ, догма́тѣхъ, мꙋ́кахъ, и҆ ѡ҆бѣтова́нїѧхъ: є҆ще́ же ѡ҆ по́мыслѣхъ, страсте́хъ, добродѣ́телехъ, безмо́лвїи и҆ моли́твѣ.

а҃. Слове́снꙋ ᲂу҆̀бо бы́ти, и҆лѝ содѣ́латисѧ комꙋ̀ по є҆стествꙋ̀, ꙗ҆́коже бѣ̀ пре́жде въ чистотѣ̀ и҆ нетлѣ́нїи, невозмо́жно. То́ю бо чꙋ́вственное безслове́сїѧ навыкнове́нїе, се́ю же тлѣ́нное пло́ти состоѧ́нїе ѡ҆блада̀.

в҃. По є҆стествꙋ̀ слове́сными є҆ди́ни то́чїю чистото́ю свѧті́и ꙗ҆ви́шасѧ: сло́ва бо чи́ста никто́же ѿ мꙋ́дрыхъ въ сло́вѣ и҆мѣ̀, ѿ нача́ла слове́сность по́мыслы растли́вшихъ. Веще́ственный бо и҆ многоглаго́льный премꙋ́дрости мі́ра сегѡ̀ дꙋ́хъ, словеса̀ ᲂу҆̀бо на многовѣ́дѣнїе, по́мыслы же на дича́йшее наводѧ̀, водворѧ́етсѧ въ ни́хъ, лиши́въ и҆̀хъ воѷпоста́сныѧ премꙋ́дрости и҆ видѣ́нїѧ нераздѣ́льнагѡ и҆ є҆ди́нственнагѡ ра́зꙋма.

г҃. Ра́зꙋмъ и҆́стины, чꙋ́вство благода́ти со́бственнѡ бы́ти разꙋмѣ́й, прѡ́чїѧ же разꙋмѣ̑нїѧ, помышле́нїй ꙗ҆влє́нїѧ и҆ веще́й доказа̑нїѧ, нарица́ти подоба́етъ.

д҃. Є҆ли́цы благода́ти не полꙋча́ютъ, ра́ди невѣ́рїѧ и҆ нерадѣ́нїѧ сїѐ стра́ждꙋтъ: и҆ є҆ли́цы па́ки ѡ҆брѣта́ютъ вѣ́рою и҆ тща́нїемъ. Си́хъ ᲂу҆̀бо ра́ди въ прє́днѧѧ при́снѡ простира́ютсѧ, сопроти́вныхъ же ра́ди, вспѧ́ть соверше́ннѣ ѡ҆браща́ютсѧ.

є҃. Равно̀ є҆́сть и҆ ме́ртвꙋ и҆ нечꙋ́вственнꙋ бы́ти, и҆ ᲂу҆мо́мъ слѣ́пꙋ, и҆ тѣле́снѣ не зрѣ́ти. Ѻ҆́въ бо лиши́сѧ ᲂу҆́бѡ живы́ѧ и҆ дѣ́йствꙋющїѧ си́лы: ѻ҆́въ же лиши́сѧ, не ви́дѧ бжⷭ҇твеннагѡ свѣ́та, творѧ́щагѡ зрѣ́ти и҆ зрѣ́тисѧ.

ѕ҃. Си́лꙋ и҆ премꙋ́дрость, ѻ҆боѧ̑ ѿ бг҃а ма́ли прїе́млютъ: ѻ҆́на бо є҆́сть бж҃е́ственныхъ причаща́тєльна бла̑гъ: сїѧ̑ же и҆з̾ѧви́тєльна, воспрїима́ти же є҆ѐ и҆ преподаѧ́ти, бж҃е́ственный вои́стиннꙋ да́ръ и҆ вы́ше человѣ́ка.

з҃. Свѣти́лище и҆́стинно и҆ пре́жде бꙋ́дꙋщагѡ житїѧ̀ є҆́сть, є҆́же без̾ пѡ́мыслъ се́рдце дѣ́йствꙋемо дх҃омъ: всѧ̑ бо та́мѡ соверша́ютсѧ и҆ глаго́лютсѧ дх҃о́внѣ. И҆ не стѧжа́вый сїѐ ѿсю́дꙋ, ка́мень є҆́сть ра́ди и҆нѣ́хъ добродѣ́телей, потре́бенъ въ назида́нїе бж҃е́ственнагѡ хра́ма, а҆ не хра́мъ и҆ свѧщеннодѣ́йствитель дх҃а.

и҃. Нетлѣ́ненъ человѣ́къ со́зданъ бы́сть кромѣ̀ мокро́тъ, ꙗ҆ко́въ же и҆ воскре́снетъ. Не непремѣ́ненъ же, нижѐ па́ки премѣ́ненъ. Си́лꙋ и҆мѣ́ѧ во́льнагѡ хотѣ́нїѧ преложи́тисѧ, и҆лѝ нѝ: соверше́ннагѡ бо непреложе́нїѧ не твори́тъ къ є҆стествꙋ̀ хотѣ́нїе, то́ бо є҆́сть по́честь бꙋ́дꙋщагѡ непрело́жнагѡ ѡ҆боже́нїѧ.

ѳ҃. Тлѣ́нїе бо пло́ти рожде́нїе, ꙗ҆́сти же и҆ и҆зли́шество и҆зпромета́ти, и҆ свирѣ́пѣти и҆ спа́ти, є҆сте́ствєннаѧ ѕвѣре́й и҆ скотѡ́въ свѡ́йства, по ни́мже преслꙋша́нїѧ ра́ди скотѡ́мъ ᲂу҆подо́бльшесѧ, ѿпадо́хомъ свои́хъ и҆ бг҃ода́нныхъ бла̑гъ, и҆ ско́тни ѿ слове́сныхъ, и҆ ѕвѣ́рсти ѿ бж҃е́ственныхъ содѣ́лавшесѧ.

і҃. Ра́й сꙋгꙋ́бъ є҆́сть: чꙋ́вственный и҆ ᲂу҆́мный, си́рѣчь во є҆де́мѣ, и҆ благода́тный.

а҃і. Преходѧ́ща, си́рѣчь, тлѣ́нна тва́рь не бы́сть пе́рвѣе, сказꙋ́ютъ, сотворе́на: по́слѣжде же растли́вшисѧ, и҆ тлѣ́нїю подпа́дши, и҆ сꙋетѣ̀, по писа́нїю, повинꙋ́сѧ, си́рѣчь, человѣ́кꙋ, не во́лею, и҆ не хотѧ́щи, но за повинꙋ́вшаго ю҆̀, на ᲂу҆пова́нїи¹¹³ ѡ҆бновле́нїѧ и҆стлѣ́вшагѡ а҆да́ма. Ѡ҆бнови́вый того̀ и҆ ѡ҆свѧти́вый, а҆́ще и҆ тлѣ́нно но́ситъ то́й тѣ́ло, вре́менныѧ ра́ди жи́зни, и҆ сїю̀ ѡ҆бновѝ, но не ᲂу҆̀ ѿ тлѣ́нїѧ свободи́въ. Ѿ тлѣ́нїѧ же и҆збавле́нїе тва́ри, и҆́нїи глаго́лютъ, бы́ти на лꙋ́чшее премѣне́нїе, дрꙋзі́и же, соверше́нное чꙋ́вственныхъ преложе́нїе. Ѻ҆бы́чай бо є҆́сть писа́нїю, ѡ҆ недоꙋмѣва́емыхъ досе́лѣ твори́ти сказа́нїе про́стѡ и҆ немногопы́тнѣ.

в҃і. Благода́ть прїе́млющїи ꙗ҆́коже въ зача́тїи, и҆ непра́здни сꙋ́ще дх҃омъ, и҆лѝ чрез̾ падє́нїѧ бж҃е́ственное ѿмета́ютъ сѣ́мѧ, и҆лѝ вдо́вствꙋтъ ѿ бг҃а, прїѻбще́нїемъ врага̀ кры́ющагѡсѧ въ ни́хъ. И҆ ѡ҆ставле́нїе ᲂу҆́бѡ благода́ти, дѣ́йства ра́ди страсте́й, соверше́нное же лише́нїе, грѣхо́внагѡ ра́ди дѣѧ́нїѧ быва́етъ. Дꙋша́ бо страстолюби́ваѧ и҆ грѣхолюби́ваѧ, лише́на и҆ ѿве́ржена сꙋ́щи благода́ти и҆ вдо́вствꙋюща, жили́ще бꙋ́детъ страсте́мъ, да не рекꙋ̀ бѣсѡ́мъ, ны́нѣ и҆ въ бꙋ́дꙋщемъ вѣ́цѣ.

г҃і. Ꙗ҆́рость ти́хою и҆ кро́ткою ничто́же и҆́но твори́тъ, ꙗ҆́коже мꙋ́жество и҆ ми́лость: ѻ҆́ва ᲂу҆́бѡ внѣ̑шнїѧ: ѻ҆́ва же внꙋ́трєннїѧ, ꙗ҆́коже градое́мнїи хи́трѡсти сокрꙋша́ющи.

д҃і. Мно́зи за́пѡвѣди дѣ́лающе, мнѧ́тъ ше́ствовати, не ᲂу҆̀ гра́да дости́гше внѣꙋ́дꙋ пребыва́ютъ. И҆схожде́нїе бо ца́рскихъ пра́выхъ пꙋте́й, си́рѣчь подо́бныѧ добродѣ́телѧмъ ѕло́бы ѻ҆́тай взе́мше неꙋспѣ́шнѡ ше́ствꙋютъ. За́пѡвѣди бо тре́бꙋютъ нижѐ ᲂу҆мале́нїѧ, нижѐ превосхожде́нїѧ, но и҆ намѣ́ренїѧ бг҃оꙋго́дна, и҆ бж҃е́ственныѧ то́чїю и҆́щꙋще во́ли. А҆́ще ли не та́кѡ, всꙋ́е трꙋ́дъ, пра̑вы, по писа́нїю, не твори́ти стєзѝ бж҃їѧ: во всѧ́комъ бо дѣ́лѣ, намѣ́ренїе взыскꙋ́етсѧ ве́щи.

є҃і. Въ пꙋтѝ, си́рѣчь за́повѣдьми въ се́рдцѣ, взыскꙋ́й гдⷭ҇а. Є҆гда́ бо слы́шиши і҆ѡа́нна вопїю́ща, и҆ повелѣва́юща всѣ̑мъ ᲂу҆гото́вати пꙋ́ть гдⷭ҇нь: пра́вы твори́ти стєзѝ¹¹⁴ велѧ́ща, за́пѡвѣди, и҆ сердца̀ и҆ дѣѧ̑нїѧ бы́ти непщꙋ́й. Не возмо́жно бо сотвори́ти пꙋ́ть пра́въ за́повѣдей и҆ дѣѧ́нїе непогрѣ́шно, а҆́ще не серде́чнꙋ правотꙋ̀ сотвори́ши.

ѕ҃і. Же́злъ и҆ па́лицꙋ,¹¹⁵ є҆гда̀ ᲂу҆слы́шиши по проро́ческомꙋ словесѝ писа́нїе глаго́лющее, сꙋ́дъ и҆ про́мыслъ бы́ти непщꙋ́й: по нра́вственномꙋ же сло́вꙋ пѣ́нїе и҆ моли́твꙋ. Сꙋди́ми бо ѿ гдⷭ҇а жезло́мъ наказа́нїѧ, ко ѡ҆браще́нїю наказꙋ́емсѧ: наказꙋ́юще же востаю́щыѧ на ны̀ жезло́мъ мꙋ́жественнагѡ пѣ́нїѧ, моли́твою ᲂу҆твержда́емсѧ. И҆мꙋ́ще ᲂу҆̀бо же́злъ и҆ па́лицꙋ въ рꙋцѣ̀ дѣѧ́нїѧ ᲂу҆ма̀, не преста́немъ нака́зовати и҆ нака́зоватисѧ, до́ндеже под̾ про́мысломъ сꙋ́ще, соверше́ннѣ и҆збѣ́гнемъ сꙋда̀ ны́нѣшнѧгѡ и҆ бꙋ́дꙋщагѡ.

з҃і. Сво́йственно є҆́сть за́повѣдемъ, є҆́же предпочита́ти присноѡбде́ржнꙋю за́повѣдь, бж҃їю па́мѧть, глаго́лющꙋю: помѧнѝ гдⷭ҇а бг҃а твоего̀ вы́нꙋ,¹¹⁶ є҆́юже бо погибо́ша, се́ю и҆ сохрани́тисѧ мо́гꙋтъ. Забве́нїе бо погꙋбѝ бж҃їю и҆знача́ла па́мѧть, за́пѡвѣди помрачи́вши, и҆ та́кѡ на́га человѣ́ка ѿ всѧ́кагѡ бла́га содѣ́ла.

и҃і. Двѣма̀ за́повѣдьми подви́жники па́ки дре́внѧгѡ досто́инства достиза́ютъ: послꙋша́нїемъ и҆ посто́мъ. Ѿ несохране́нїѧ бо си́хъ всѧ́каѧ ѕло́ба ро́дꙋ человѣ́ческомꙋ привни́де. И҆ и҆̀же послꙋша́нїемъ ᲂу҆́бѡ хранѧ́щїи за́пѡвѣди, поспѣ́шнѣе къ бг҃ꙋ восхо́дѧтъ, а҆ и҆̀же посто́мъ и҆ моли́твою, косни́тельнѣе. И҆ послꙋша́нїе ᲂу҆́бѡ новонача̑льнымъ прили́чествꙋетъ: по́стъ же срє́днимъ, и҆ разꙋ̑мнымъ, и҆ мꙋ́жествєннымъ. Є҆́же бо соблюстѝ за́повѣдьми неле́стное послꙋша́нїе бг҃ꙋ, ѕѣлѡ̀ ма́лѣхъ є҆́сть, и҆ самѣ̑мъ тѣ̑мъ мꙋ́жествєннымъ притрꙋ́дно.

ѳ҃і. Зако́нъ дх҃а жи́зни, по а҆пⷭ҇лꙋ,¹¹⁷ є҆́сть, и҆́же въ се́рдцѣ дѣ́йствꙋѧй и҆ глаго́лѧй, ꙗ҆́коже и҆ пи́сьменный во пло́ти дѣ́йствꙋемый. То́й бо ᲂу҆́бѡ свобожда́етъ ᲂу҆́мъ ѿ зако́на грѣхо́внагѡ и҆ сме́рти: се́й же ѻ҆́тай фарїсе́а содѣ́ловаетъ, тѣле́снѣ зако́нъ творѧ́ща, и҆ помышлѧ́юща, и҆ во є҆́же ви́дѣнꙋ бы́ти за́пѡвѣди дѣ́лающа.

к҃. Составле́нїе всѣ́хъ за́повѣдей, слага́емыхъ и҆ соѡрꙋжа́емыхъ дꙋ́хомъ, человѣ́ка соверше́нна глаго́лютъ бы́ти, и҆лѝ несоверше́нна по предспѣ́ѧнїю быва́ема. И҆ за́пѡвѣди ᲂу҆́бѡ, ꙗ҆́коже тѣ́ло, добродѣ́тєли же а҆́ки кѡ́сти ка́чествъ навыкнове́нїѧ благода́ть же, ꙗ҆́кѡ дꙋ́шꙋ жи́вꙋ сꙋ́щꙋю, и҆ дви́жꙋщꙋсѧ и҆ дѣ́йствꙋющꙋ, ꙗ҆́коже тѣ́ло всѣ́хъ за́повѣдей дѣѧ́нїѧ. Нерадѣ́нїе бо и҆ тща́нїе къ превозраще́нїѧмъ хрⷭ҇тѡ́вымъ, показꙋ́ютъ человѣ́ка, младе́нца и҆лѝ соверше́нна, ны́нѣ же и҆ въ бꙋ́дꙋщемъ вѣ́цѣ.

к҃а. Хотѧ́й тѣ́ло за́повѣдей возрасти́ти, слове́снагѡ чи́стагѡ млека̀ ма́тернїѧ благода́ти жела́ти да тщи́тсѧ. Ѿтꙋ́дꙋ бо млекопита́етсѧ всѧ́къ, ѡ҆ хрⷭ҇тѣ̀ и҆́щꙋщїй и҆ хотѧ́щїй возраще́нїемъ возрасти́тисѧ. Млеко́ бо къ возраще́нїю премꙋ́дрость ѿ свои́хъ сосє́цъ ѡ҆ хрⷭ҇тѣ̀ младе́нцємъ теплотꙋ̀ подае́тъ: ме́дъ же пи́щный совершє́ннымъ весе́лїе своѐ ко ѡ҆чище́нїю дае́тъ. Ме́дъ, глаго́летъ, и҆ млеко̀ под̾ ѧ҆зы́комъ твои́мъ.¹¹⁸ Млекꙋ̀ ᲂу҆́бѡ и҆мѣ́ти пита́тельнꙋю и҆ возрасти́тельнꙋю, ме́дꙋ же ѡ҆чисти́тельнꙋю дꙋ́ха си́лꙋ, соломѡ́нъ речѐ. Вели́кїй же а҆пⷭ҇лъ, разли́чїе дѣ́йствъ назна́менꙋѧ, глаго́ла: ꙗ҆́кѡ младе́нцєвъ, млеко́мъ вы̀ напои́хъ, а҆ не бра́шномъ.¹¹⁹

к҃в. Слове́съ за́повѣдей, кромѣ̀ за́повѣдей взыскꙋ́ѧй, и҆ ᲂу҆че́нїемъ и҆лѝ чте́нїемъ ѡ҆брѣстѝ жела́ѧй, подо́бенъ є҆́сть воѡбража́ющемꙋ себѣ̀ сѣ́нь вмѣ́стѡ и҆́стины. Словеса̀ во и҆́стины въ прича́стницѣхъ и҆́стинѣ прича́ствꙋеми сꙋ́ть. И҆́стины бо неприча́стнїи и҆ невѣ́дꙋщїи, взыскꙋ́ѧ слове́съ, ѡ҆брѣта́ютъ ѧ҆̀ ѿ ѡ҆б̾юродѣ́вшїѧ премꙋ́дрости, и҆̀хже и҆ дꙋше́вными наре́клъ а҆пⷭ҇лъ, дх҃а не и҆мꙋ́щихъ, а҆́ще и҆ и҆́стиною не́гли велича́ютсѧ.

к҃г. Ꙗ҆́коже чꙋ́вственное ѻ҆́ко взира́етъ на пи́смѧ, и҆ ѿ пи́смене чꙋ́вствєннаѧ прїе́млетъ разꙋмѣ̑нїѧ: си́це и҆ ᲂу҆́мъ, є҆гда̀ ѡ҆чи́ститсѧ, и҆ въ первобы́тное дости́гнетъ досто́инство, на бг҃а зри́тъ, и҆ ѿ негѡ̀ прїе́млетъ бж҃е́ствєннаѧ разꙋмѣ̑нїѧ, и҆ вмѣ́стѡ ᲂу҆́бѡ кни́ги и҆́мать дх҃а, вмѣ́стѡ же тро́сти писа́тельныѧ, смы́слъ и҆ ѧ҆зы́къ. Ѧ҆зы́къ мо́й, глаго́летъ, тро́сть:¹²⁰ свѣ́тъ же вмѣ́стѡ черни́ла. Погрꙋжа́ѧ ᲂу҆́бѡ мы́сль во свѣ́тѣ, и҆ свѣ́тъ соверша́ѧ, начертава́етъ словеса̀ дꙋ́хомъ въ чи́стыхъ сердца́хъ послꙋ́шающихъ. Тогда̀ позна́етъ рече́нное, ка́кѡ бꙋ́дꙋтъ вѣ́рнїи наꙋче́ни бг҃омъ, и҆ ка́кѡ ᲂу҆чи́тъ бг҃ъ человѣ́ка ра́зꙋмꙋ, по проро́чествꙋ, дх҃омъ.¹²¹

к҃д. Зако́нъ за́повѣдей, серде́чнѡ дѣ́йствꙋемꙋю вѣ́рꙋ непосре́дственнѡ бы́ти разꙋмѣ́й. Ѿ неѧ́ бо всѧ́ка за́повѣдь и҆сточа́етсѧ, и҆ дꙋша́мъ просвѣще́нїе дѣ́йствꙋетъ, и҆́хже плоды̀ и҆́стинныѧ и҆ дѣ́йствꙋемыѧ вѣ́ры сꙋ́ть: воздержа́нїе и҆ любо́вь, и҆ коне́цъ бг҃ода́рное смире́нїе, любвѐ нача́ло и҆ ᲂу҆твержде́нїе.

к҃є. Сла́ва сꙋществꙋ́ющихъ нело́жна, є҆́сть и҆́стинный ра́зꙋмъ ви́димыхъ и҆ неви́димыхъ. Ви́димыхъ ᲂу҆́бѡ, чꙋ́вственныхъ: неви́димыхъ же, мы́сленныхъ и҆ слове́сныхъ, и҆ ᲂу҆́мныхъ и҆ бж҃е́ственныхъ.

к҃ѕ. Предѣ́лы правосла́вїѧ сꙋ́ть два̀ вѣ́ры догма́та ѿ чистоты̀ вѣ́дѣти, и҆ позна́ти ѿ себѐ, трⷪ҇цꙋ глаго́лю и҆ дво́ицꙋ. Трⷪ҇цꙋ ᲂу҆́бѡ въ є҆ди́ницѣ, несли́тнѣ и҆ несѣко́мѣ зрѣ́ти и҆ познава́ти: дво́ицꙋ же хрⷭ҇то́выхъ є҆сте́ствъ во є҆ди́ной ѵ҆поста́си, си́рѣчь є҆ди́наго сн҃а и҆ пре́жде воплоще́нїѧ, и҆ по воплоще́нїи во двою̀ є҆стествꙋ̑ и҆сповѣ́довати, и҆ вѣ́дѣти, во двою̀ хотѣ̑нїю бж҃е́ственнагѡ же и҆ человѣ́ческагѡ, несли́тнѡ сла́вима.

к҃з. Рожде́нїе, и҆ нерожде́нїе, и҆ и҆схожде́нїе, трѝ недви́жима и҆ непрелѡ́жна свѡ́йства прест҃ы́ѧ трⷪ҇цы, потре́бно и҆сповѣ́довати благоче́стнѡ. Ѻ҆ц҃а̀ ᲂу҆́бѡ, нерожде́нїе и҆ безнача́лїе: сн҃а же, рожде́нїе и҆ собезнача́лїе: дх҃а же ст҃а́гѡ, и҆схожде́нїе ѿ ѻ҆ц҃а̀, сн҃омъ же, ꙗ҆́коже речѐ дамаски́нъ, соприсносꙋ́щнимъ подава́ема.

к҃и. Є҆ди́на бы благода́ти вѣ́ра довлѣ́ла ко спасе́нїю, за́повѣдьми дѣ́йствꙋема дꙋ́хомъ, а҆́ще бы храни́ли, а҆ не ме́ртвꙋ и҆ недѣ́йственнꙋ па́че живо́й и҆ дѣ́йствꙋемой ѡ҆ хрⷭ҇тѣ̀ предпоче́тше. Довлѣ́етъ бо вѣ́рномꙋ воѡбраже́нїе и҆ жи́знь ѡ҆ хрⷭ҇тѣ̀ дѣ́йствꙋемыѧ вѣ́ры. Вѣ́рѣ бо въ сло́вѣ ме́ртвой и҆ нечꙋ́вственной невѣ́жество, а҆ не є҆́йже во благода́ти вѣ́рѣ, благочести́выхъ ны́нѣ наꙋчи́ло є҆́сть.

к҃ѳ. Проста́ѧ є҆ди́ница є҆́сть трⷪ҇ца, поне́же нека́чественна и҆ несло́жна трⷪ҇ца во є҆ди́ницѣ. Трїѷпоста́сенъ бо є҆́сть бг҃ъ, несли́тно и҆мѣ́ѧ є҆́же дрꙋ́гъ дрꙋ́га вмѣще́нїе всѧ́чески.

л҃. Тро́ичнѣ во все́мъ бг҃ъ познава́етсѧ же и҆ глаго́летсѧ: неѡпи́санъ бо. Всѣ́хъ бо є҆́сть содержи́тель и҆ промысли́тель чрез̾ сн҃а, ѡ҆ ст҃о́мъ дс҃ѣ: и҆ нѣ́сть є҆ди́нъ внѣ̀, и҆лѝ без̾ дрꙋги́хъ ли́цъ глаго́лемь и҆ разꙋмѣва́емь, и҆дѣ́же а҆́ще и҆менꙋ́етсѧ.

л҃а. Ꙗ҆́коже въ человѣ́кѣ є҆́сть ᲂу҆́мъ, и҆ сло́во и҆ дꙋ́хъ, и҆ нижѐ ᲂу҆́мъ без̾ сло́ва, нижѐ сло́во без̾ дꙋ́ха, и҆ дрꙋ́гъ въ дрꙋ́зѣ сꙋ́ща, и҆ ѡ҆ себѣ̀. Оу҆́мъ бо сло́вомъ глаго́летъ, и҆ сло́во дꙋ́хомъ ꙗ҆влѧ́етсѧ. По примѣ́рꙋ семꙋ̀, те́менъ ѡ҆́бразъ без̾име́нныѧ и҆ началоѡбра́зныѧ трⷪ҇цы но́ситъ человѣ́къ: є҆́же по ѡ҆́бразꙋ сꙋ́щее вкра́тцѣ и҆ ѡ҆ се́мъ ꙗ҆влѧ́ѧ.

л҃в. Оу҆́мъ ᲂу҆́бѡ ѻ҆ц҃ъ, сло́во же сн҃ъ, дх҃ъ же ст҃ы́й, вои́стиннꙋ дх҃ъ, бг҃оно́снїи ѻ҆тцы̀ при́точнѣ ᲂу҆ча́тъ, пресꙋ́щнꙋю ст҃ꙋ́ю и҆ преесте́ственнꙋю догма́тствꙋюще трⷪ҇цꙋ. є҆ди́наго бг҃а въ трїе́хъ ѵ҆поста́сѣхъ, на́мъ вѣ́рꙋ и҆́стиннꙋю и҆ ко́твꙋ наде́жды ѡ҆ста́вльше. Є҆́же бо вѣ́дѣти є҆ди́наго, по писа́нїю, бг҃а, є҆́сть ко́рень безсме́ртїѧ, и҆ вѣ́дѣти держа́вꙋ трїѷпоста́сныѧ є҆ди́ницы всецѣ́лаѧ пра́вда. И҆лѝ па́ки, потре́бно є҆ѵⷢ҇льски рече́нное си́це разꙋмѣ́ти: Се́ же є҆́сть живо́тъ вѣ́чный, да зна́ютъ тебѐ є҆ди́наго и҆́стиннаго бг҃а въ трїе́хъ ѵ҆поста́сѣхъ, и҆ є҆го́же посла́лъ є҆сѝ і҆и҃са хрⷭ҇та̀,¹²² во двою̀ є҆стествꙋ̑ и҆ хотѣ̑нїю.

л҃г. Мꙋ̑ки разли́чни сꙋ́ть, ꙗ҆́коже и҆ благи́хъ возмє́здїѧ. Всѧ́ же мꙋ̑ки под̾ а҆́домъ, по писа́нїю глаго́лющемꙋ: въ землѝ те́мной и҆ мра́чной, въ землѝ тьмы̀ вѣ́чныѧ,¹²³ и҆дѣ́же грѣ̑шницы и҆ пре́жде живꙋ́тъ сꙋда̀, и҆ и҆зрече́нїемъ па́ки въ ню̀ возвраща́ютсѧ. Є҆́же бо: да возвратѧ́тсѧ грѣ̑шницы во а҆́дъ:¹²⁴ и҆, сме́рть ᲂу҆пасе́тъ и҆̀хъ,¹²⁵ что̀ и҆́но є҆́сть, то́чїю коне́чный ѿвѣ́тъ и҆ ѡ҆сꙋжде́нїе вѣ́чно;

л҃д. Ѻ҆́гнь, и҆ тьма̀, и҆ че́рвь, и҆ та́ртаръ є҆́сть всѧ́кое сладостра́стїе, и҆ всеѻ́бщее тьмы̀ неразꙋ́мїе, и҆ є҆́же во всѣ́хъ движе́нїе любосла́стїѧ, и҆ тре́петъ, и҆ смра́дъ ѕлово́нный грѣха̀. Ꙗ҆̀же ᲂу҆́бѡ ѡ҆брꙋче́нїе и҆ нача́тки мꙋ́къ, ᲂу҆жѐ ѿсю́дꙋ въ дꙋша́хъ грѣ́шничихъ дѣ́йствꙋѧ, навыкнове́нїемъ ꙗ҆влѧ́ютсѧ

л҃є. Навыкновє́нїѧ страсте́й сꙋ́ть ѡ҆брꙋчє́нїѧ мꙋче́нїй, ꙗ҆́коже и҆ црⷭ҇твїѧ нбⷭ҇нагѡ дѣ̑йства добродѣ́телей. Потре́бно же разꙋмѣ́ти и҆ нарица́ти за́пѡвѣди ᲂу҆́бѡ дѣ́йства: добродѣ́тели же навыкновє́нїѧ, ꙗ҆́коже и҆ ѕло́бы, по ᲂу҆чаще́нїю навыкновє́нїѧми нарица́ютъ.

л҃ѕ. Ра̑вна возме́здїй воздаѧ̑нїѧ, ѿ мно́гихъ нера̑вна ви̑димаѧ сꙋ́ть. Си̑мъ ᲂу҆́бѡ вѣ́чнꙋю жи́знь, тѣ̑мже вѣ́чнꙋю мꙋ́кꙋ бж҃е́ственнаѧ пра́вда воздае́тъ. Ѻ҆бои́ же, ны́нѣшнїй вѣ́къ до́брѣ и҆лѝ ѕлѣ̀ преше́дше, по дѣлѡ́мъ воздаѧ̑нїѧ и҆мѣ́ти бꙋ́дꙋтъ. Коли́чество же и҆ ка́чество прича́стїѧ, по страсте́й и҆лѝ добродѣ́телей навыкнове́нїємъ и҆ дѣ́йствꙋ воспрїи́мꙋтъ.

л҃з. Є҆зє́ра ѻ҆́гненна сꙋ́ть сладостра́ствꙋющыѧ дꙋ́шы, въ ни́хже ꙗ҆́коже тимѣ́нїе смердѧ́щее, є҆́сть смра́дъ страсте́й. Неꙋсыпа́ющаго че́рвїѧ пита́етъ блꙋда̀ по́хотное пло́ти неꙋдержа́нїе, и҆ ѕмі́й, и҆ жа̑бъ, и҆ пїѧ́вицъ, по́хотей лꙋка́выхъ, скве́рныхъ и҆ ꙗ҆дови́тыхъ по́мыслѡвъ же и҆ бѣсѡ́въ. Сицево́е состоѧ́нїе ѿсю́дꙋ прїе́млетъ ѡ҆брꙋче́нїе та́мошнїѧ мꙋ́ки.

л҃и. Ꙗ҆́коже мꙋ́къ нача́тки въ дꙋша́хъ грѣ́шныхъ сокрове́нни сꙋ́ть: си́це и҆ благи́хъ ѡ҆брꙋчє́нїѧ въ сердца́хъ пра́ведныхъ, и҆ дѣ́йствꙋютъ дꙋ́хомъ и҆ прича́ствꙋютсѧ. Ца́рствїе бо небе́сное є҆́сть добродѣ́тельное житїѐ, ꙗ҆́коже и҆ мꙋ́ка страсте́й навыкнове́нїе.

л҃ѳ. Но́щь грѧдꙋ́щаѧ є҆́сть, по словесѝ гдⷭ҇ню, соверше́нное недѣ́ланїе бꙋ́дꙋщїѧ тьмы̀.¹²⁶ И҆лѝ по дрꙋго́мꙋ ѡ҆́бразꙋ а҆нті́хрїстъ, но́щь и҆ тьма̀, и҆ є҆́сть и҆ нарица́етсѧ. И҆лѝ па́ки по нра́вственномꙋ сло́вꙋ, коегѡ́ждо днѧ̀ нерадѣ́нїе, є҆́же ꙗ҆́кѡ тьма̀ ᲂу҆мерщвлѧ́етъ дꙋ́шꙋ сно́мъ нечꙋ́вствїѧ. Ꙗ҆́коже бо но́щь ᲂу҆сыплѧ́етъ всѣ́хъ, и҆ ѡ҆́бразъ є҆́сть сме́рти по ᲂу҆мерщвле́нїю: си́це и҆ но́щь бꙋ́дꙋщїѧ тьмы̀ содѣ́ловаетъ грѣ́шникѡвъ ме́ртвыми нечꙋ́вственнымъ пїѧ́нствомъ болѣ́зней.

м҃. Сꙋ́дъ мі́ра сегѡ̀ є҆́сть, по є҆ѵⷢ҇льскомꙋ словесѝ, невѣ́рїе нечести́выхъ, по семꙋ̀: Не вѣ́рꙋѧй ᲂу҆жѐ ѡ҆сꙋжде́нъ є҆́сть:¹²⁷ и҆ сꙋди́тєльнаѧ про́мысла къ воспѧще́нїю, и҆лѝ ко ѡ҆браще́нїю приведє́нїѧ, и҆ предложе́нїй на́шихъ во благи́хъ и҆лѝ ѕлы́хъ ᲂу҆клоне́нїе по дѣ́йствꙋ, по семꙋ̀: ѡ҆чꙋжде́ни бы́ша грѣ̑шницы ѿ ложе́снъ:¹²⁸ къ невѣ́рїю бо и҆ наказа́нїю и҆ дѣѧ́нїю, пра́ведный бж҃їй сꙋ́дъ тогда̀ ꙗ҆влѧ́етсѧ. Ѻ҆́вѣхъ ᲂу҆́бѡ наказꙋ́ѧ, ѻ҆́вѣхъ же ми́лꙋѧ, ѻ҆́вѣмъ же вѣнцы̀ и҆лѝ мꙋ́кꙋ даѧ̀. Пе́рвїи бо сꙋ́ть всѧ́чески нечести́ви: вторі́и же, а҆́ще и҆ вѣ́рнїи, но неради́ви: сегѡ̀ ра́ди и҆ человѣколю́бнѣ наказꙋ́ютсѧ. Соверше́ннїи же, и҆лѝ въ добродѣ́телѣхъ и҆лѝ ѕлы́хъ паде́нїѧхъ бы́вше, воздаѧ̑нїѧ и҆мѣ́ти бꙋ́дꙋтъ.

м҃а. А҆́ще не соблюде́тсѧ нескве́рно, и҆лѝ не ѡ҆чи́ститсѧ, ꙗ҆́коже бѣ̀ є҆стество̀ дꙋ́хомъ, невозмо́жно бы́ти во є҆ди́но тѣ́ло и҆ дх҃ъ ѡ҆ хрⷭ҇тѣ̀, ны́нѣ же и҆ въ бꙋ́дꙋщее сочета́нїе. Рꙋ́бище бо ве́тхости страсте́й, къ но́вой ри́зѣ благода́ти къ восполне́нїю, содержи́тельнаѧ и҆ соедини́тельнаѧ дх҃а си́ла прилага́ти не ѡ҆бы́че.

м҃в. Равноче́стїе къ сꙋ́щемꙋ ѡ҆ хрⷭ҇тѣ̀ ѡ҆́бразꙋ и҆мѣ́ти бꙋ́детъ, ѡ҆бновле́нїе дх҃а прїѧ́вый тꙋ́не, и҆ сохрани́вый, преесте́ственное ѡ҆боже́нїе, тогда̀ стражда̀ неизрече́ннѡ: є҆ди́нъ бо ѡ҆ хрⷭ҇тѣ̀, и҆лѝ ᲂу҆́дъ хрⷭ҇то́въ не бꙋ́детъ, не содѣ́ѧвыйсѧ ѿсю́дꙋ благода́ти прича́стникъ, ѡ҆́браза ра́зꙋма и҆ и҆́стины, но а҆пⷭ҇лꙋ, не и҆мꙋ́щъ въ себѣ̀.¹²⁹

м҃г. Оу҆подо́бисѧ ца́рствїе небе́сное ски́нїи бг҃осоѡрꙋже́ннѣй, по мѡѷсе́евой во двою̀ завѣ̑сꙋ, ᲂу҆ставле́нїѧ бꙋ́дꙋщагѡ вѣ́ка и҆мꙋ́щее. И҆ въ пе́рвꙋю ᲂу҆́бѡ ски́нїю всѝ, є҆ли́цы свѧще́нницы благода́ти вни́дꙋтъ: во вторꙋ́ю же, ꙗ҆́кѡ ᲂу҆́мнꙋю, є҆ли́цы ѿсю́дꙋ во мра́кѣ бг҃осло́вїѧ сщ҃еннонача́льнѣ въ соверше́нствѣ тро́ичнѣ слꙋжи́вшїи, і҆и҃са слꙋжбонача́льника и҆ свѧщеннонача́льника пе́рваго въ трⷪ҇цѣ и҆мꙋ́ще хода́таѧ, въ ски́нїю, ю҆́же водрꙋзѝ. входѧ́ще, и҆ свѣтлѣ́е зарѧ́ми тогѡ̀ ѡ҆сїѧва́еми.

м҃д. Мнѡ́ги ѻ҆би́тєли наречѐ сп҃си́тель,¹³⁰ разли̑чнаѧ восхождє́нїѧ и҆ преспѣ̑ѧнїѧ та́мошнѧгѡ состоѧ́нїѧ. Є҆ди́но ᲂу҆́бѡ є҆́сть ца́рствїе, мнѡ́га же внꙋ́трь разли̑чїѧ и҆́мать: ꙗ҆́кѡ бы́ти небє́снымъ и҆ земны̑мъ, по добродѣ́тели же и҆ ра́зꙋмꙋ коли́чество ѡ҆боже́нїѧ и҆мꙋ́щымъ. И҆́на бо сла́ва со́лнцꙋ, и҆ и҆́на лꙋнѣ̀, и҆ и҆́на ѕвѣзда́мъ, и҆ ѕвѣзда̀ ѿ ѕвѣзды̀ ра́знствꙋетъ во сла́вѣ,¹³¹ ꙗ҆́коже глаго́летъ бж҃е́ственный а҆пⷭ҇лъ: а҆́ще и҆ всѝ на є҆ди́ной бж҃е́ственной тве́рди сїѧ́ютъ.

м҃є. Вма́лѣ человѣ́къ неединожи́теленъ а҆́гг҃лѡмъ быва́етъ, и҆ а҆́ки безпло́тенъ нетлѣ́ненъ, и҆́же ᲂу҆́мъ слеза́ми ѡ҆чи́стивый, дꙋ́шꙋ же ѿсю́дꙋ воскреси́вый дх҃омъ: пло́ть же ра́зꙋмꙋ и҆ покори́вый и҆ повинꙋ́вый, свѣтови́денъ же и҆ ѻ҆́гненъ ѡ҆́бразъ бж҃е́ственныѧ красоты̀ сотвори́вый є҆стество́мъ бре́нное человѣкоподо́бїе своѐ. Поне́же нетлѣ́нїе тѣле́съ є҆́сть, мокро́тъ ѡ҆скꙋдѣ́нїе и҆ дебельства̀.

м҃ѕ. Зе́млено бꙋ́детъ тѣ́ло нетлѣ́нїѧ, не и҆мꙋ́щее мокро́тъ и҆ дебе́лости, претворѧ́емо неизрече́ннѡ и҆з̾ дꙋше́внагѡ въ дꙋхо́вно тѣ́ло, ꙗ҆́кѡ и҆ пе́рстнꙋ бы́ти є҆мꙋ̀ и҆ небе́снꙋ то́нкостїю бг҃овидѣ́нїѧ. Ꙗ҆ково́ бо со́здано бѣ̀ ѿ нача́ла, таково̀ и҆ воскре́снетъ: ꙗ҆́кѡ да соѡбра́зно бꙋ́детъ ѡ҆́бразꙋ сн҃а бж҃їѧ, по всецѣ́ломꙋ ѡ҆боже́нїѧ прича́стїю.

м҃з. Землѧ̀ кро́ткихъ є҆́сть ца́рствїе небе́сное, и҆лѝ бг҃омꙋ́жное сн҃а бж҃їѧ жи́тельство, въ не́же взыдо́хомъ, и҆лѝ восхо́димъ, ѿ негѡ́же и҆ назда́ни бы́хомъ, є҆́же бо благода́ти рожде́нїе сыноположе́нїѧ, и҆ воскресе́нїемъ ѡ҆бновле́нїе прїѧ́вше, и҆лѝ па́ки: землѧ̀ ст҃а́ѧ є҆́сть, ѡ҆божи́вшеесѧ є҆стество̀, и҆лѝ не́гли и҆ ѡ҆чи́щшаѧсѧ землѧ̀ сїѧ̀, ᲂу҆ землены́хъ по досто́инствꙋ сицевы́хъ: и҆лѝ по дрꙋго́мꙋ ᲂу҆мышле́нїю: землѧ̀ наслѣ́дствꙋемаѧ є҆́сть вои́стиннꙋ ст҃ы́ми, безво́лненнаѧ є҆́же сꙋ́щагѡ па́че ᲂу҆ма̀ ми́ра бж҃е́ственнаѧ тишина̀, въ ню́же ро́дъ пра́выхъ всели́тсѧ, нечесомꙋ́ же ѿ ꙗ҆̀же въ сꙋ́щихъ ѻ҆́крестъ шꙋмѧ́щꙋ и҆лѝ смꙋща́ющꙋ и҆̀хъ.

м҃и. Ѻ҆бѣтова́нїѧ землѧ̀ є҆́сть безстра́стїе, въ не́мже и҆стека́етъ, ꙗ҆́кѡ ме́дъ и҆ млеко̀, весе́лїе дꙋ́ха.

м҃ѳ. Внꙋ́треннее сло́во ст҃і́и дрꙋ́гъ въ дрꙋ́зѣ въ бꙋ́дꙋщемъ вѣ́цѣ вѣща́ютъ та́йнѡ, дх҃омъ ст҃ы́мъ и҆зглаша́емо.

н҃. А҆́ще не ᲂу҆вѣ́мы, ꙗ҆ковы́хъ на́съ сотворѝ бг҃ъ, не позна́емъ, ꙗ҆ковы́хъ на́съ сотворѝ грѣ́хъ.

н҃а. Ра́вни во́зрастомъ сꙋ́ть въ дс҃ѣ, є҆ли́цы и҆сполне́нїе хрⷭ҇то́ва соверше́нства ѿсю́дꙋ воспрїѧ́ша.

н҃в. И҆́хже трꙋды̀, си́хъ и҆ воздаѧ̑нїѧ. Коли́чество же и҆лѝ ка́чество, си́рѣчь мѣ́рꙋ, ꙗ҆кова̀ є҆́сть, чи́нъ и҆ состоѧ́нїе, та́мѡ прича́стїемъ ꙗ҆влѧ́ютъ.

н҃г. Оу҆мы̀, си́рѣчь равноа́гг҃ли, глаго́летъ писа́нїе, бꙋ́дꙋтъ сы́нове воскресе́нїѧ хрⷭ҇то́ва,¹³² нетлѣ́нїемъ и҆ ѡ҆боже́нїемъ ст҃і́и.

н҃д. Въ бꙋ́дꙋщемъ вѣ́цѣ а҆́гг҃ли и҆ ст҃і́и, глаго́лютъ, преꙋспѣва́юще въ приложе́нїи дарова́нїй никогда́же преста́нꙋтъ и҆лѝ ѡ҆слабѣ́ютъ въ жела́нїи благи́хъ. Оу҆мале́нїѧ бо и҆лѝ и҆змѣне́нїѧ ѿ добродѣ́тели на ѕло́бꙋ ѻ҆́ный вѣ́къ не и҆́мать.

н҃є. Соверше́нна мꙋ́жа непщꙋ́й бы́ти ны́нѣ, и҆́же подо́бїе хрⷭ҇то́выхъ превозраще́нїй прїѧ̀ въ себѣ̀, ꙗ҆́кѡ во ѡ҆брꙋче́нїи: въ бꙋ́дꙋщемъ же вѣ́цѣ соверше́ннымъ показꙋ́етъ ѡ҆боже́нїѧ си́ла.

н҃ѕ. Ра́вно и҆́мать є҆динови́дныхъ и҆ досто́инство и҆ ѡ҆боже́нїе въ бꙋ́дꙋщемъ вѣ́цѣ, по добродѣ́тели ѿсю́дꙋ къ превозраще́нїѧмъ дꙋхѡ́внымъ содѣ́лавшїйсѧ соверше́нъ.

н҃з. Сла́ва и҆́стинна є҆́сть ра́зꙋмъ и҆лѝ бг҃олѣ́пное зрѣ́нїе дꙋхо́вно, и҆лѝ догма́тѡвъ и҆звѣ́ствованное вѣ́дѣнїе, и҆ вѣ́ры и҆́стинныѧ позна́нїе.

н҃и. Оу҆́жасъ є҆́сть, є҆́же къ ᲂу҆разꙋмѣ̑ннымъ же и҆ соединє́ннымъ великолѣ́пныѧ сла́вы дꙋше́вныхъ си́лъ соверше́нное возвыше́нїе. И҆лѝ па́ки: ᲂу҆́жасъ є҆́сть чи́стое и҆ всецѣ́лое къ сꙋ́щей во свѣ́тѣ безконе́чнѣй си́лѣ просте́ртїе: и҆зстꙋпле́нїе же не то́чїю дꙋше́вныхъ си́лъ къ нб҃сѝ восхище́нїе, но и҆ са́магѡ чꙋ́вства всѧ́чески по всемꙋ̀ и҆зстꙋпле́нїе: раче́нїе же сꙋгꙋ́бое є҆́сть жела́нїѧ подви́жное дх҃о́вное пїѧ́нство.

н҃ѳ. Вои́стиннꙋ два̀ сꙋ́ть ѡ҆ дс҃ѣ и҆зстꙋпи́тєльнаѧ рачє́нїѧ: серде́чное и҆ и҆зстꙋпи́тельное. Ѻ҆́но ᲂу҆́бѡ є҆щѐ просвѣща́емыхъ є҆́сть: сїе́ же въ любвѝ ᲂу҆соверши́вшихсѧ: ѻ҆боѧ́ же дѣ́йствꙋемый ᲂу҆́мъ ѿ чꙋ́вства и҆згонѧ́ютъ. Занѐ раче́нїе бж҃е́ственно є҆́сть, пїѧ́нство дꙋ́ха къ лꙋ́чшемꙋ є҆сте́ственныхъ смы́слѡвъ, и҆́мже пїѧ́нство и҆ чꙋ́вство ѿе́млетсѧ ѿ ѡ҆держа́нїй.

ѯ҃. Нача́ло по́мыслѡвъ и҆ вина̀ є҆́сть раздѣ́льшаѧсѧ престꙋпле́нїемъ человѣ́ка є҆динови́днаѧ проста́ѧ па́мѧть, є҆́юже и҆ бж҃е́ственнꙋю погꙋбѝ, содѣ́лавшисѧ свои́ми си́лами сло́жна и҆з̾ просто́й, и҆ разли́чна ѿ є҆динови́дной поги́бе.

ѯ҃а. И҆сцѣле́нїе є҆́сть началобы́тныѧ па́мѧти, ѿ лꙋка́выѧ по́мыслѡвъ пагꙋборо́дныѧ па́мѧти, къ дре́вней простотѣ̀ є҆ѧ̀ возвраще́нїе: ѻ҆рꙋ́дїе бо ѕло́бы преслꙋша́нїе, не то́чїю дꙋшѝ ко благо́мꙋ простꙋ́ю па́мѧть погꙋбѝ, но и҆ всѣ̀ є҆ѧ̀ си̑лы растлѝ, є҆сте́ственныѧ жела̑нїѧ къ добродѣ́тели ѡ҆мрачи́вшо. И҆сцѣлѧ́етъ же па́мѧть вои́стиннꙋ бж҃е́ственнаѧ ᲂу҆тверди́вшаѧсѧ пребыва́тельнаѧ моли́твою па́мѧть ѿ є҆́же по є҆стествꙋ̀ сꙋ́щагѡ ко є҆́же вы́ше є҆стества̀ сꙋ́щемꙋ раствори́вшисѧ дх҃омъ.

ѯ҃в. Страсте́мъ ᲂу҆́бѡ вины̑ сꙋ́ть грѣхѡ́внаѧ дѣѧ̑нїѧ, по́мыслѡмъ же стра́сти, мечта́нїѧмъ же по́мыслы, мы́слемъ же па́мѧть, па́мѧти же забве́нїе, забве́нїе же ражда́етъ невѣ́жество: невѣ́жествꙋ же вина̀ разлѣне́нїе, разлѣне́нїе же ражда́етъ по́хоти вожделѣ́нїе, вожделѣ́нїй же ма́ти превраще́нїѧ движе́нїе, движе́нїѧ же дѣ́йство дѣѧ̑нїѧ, дѣѧ́нїе же є҆́сть ѕла̀ безслове́сное жела́нїе и҆ прилѣпле́нїе къ чꙋ́вствєннымъ и҆ къ чꙋ́вствамъ.

ѯ҃г. Во слове́снѣмъ ᲂу҆́бѡ по́мыслы, въ ꙗ҆́ростнѣмъ же ѕвѣ̑рскїѧ стра̑сти, въ жела́тельнѣмъ же па́мѧть ско́тскагѡ похотѣ́нїѧ, во ᲂу҆мѣ́ же мечта́тєльнаѧ воѡбражє́нїѧ, въ размышле́нїи же мы̑сли дѣ́йствꙋютъ и҆ возсїѧва́ютъ.

ѯ҃д. Тече́нїе рѣ́чное є҆́сть наше́ствїе помыслѡ́въ лꙋка́выхъ, въ ни́хже прило́гъ, съ прило́гомъ же сосложе́нїе грѣха̀, ꙗ҆́коже наводне́нїе волнꙋ́емо быва́етъ, покрыва́ющо се́рдце.

ѯ҃є. Тимѣ́нїе глꙋбины̀, мокро́тнꙋю разꙋмѣ́й сла́сть, и҆лѝ блꙋ́днꙋю нечистотꙋ̀, и҆лѝ и҆ веще́ственныхъ стѧжа́нїй ѡ҆бремене́нїе: и҆́миже ѡ҆тѧгоща́емь встра́стный ᲂу҆́мъ во глꙋбинꙋ̀ ѿча́ѧнїѧ по́мыслами себѐ погрꙋжа́етъ.

ѯ҃ѕ. По́мыслами мно́жицею и҆ словеса̀ веще́й писа́нїе нарица́етъ, ꙗ҆́коже и҆ помышлє́нїѧ словеса́ми, и҆ словеса̀ противоѡбра́тнѣ помышле́нїѧми. Сїе́ же быва́етъ, поне́же движе́нїе таковы́хъ са́мо ѡ҆ себѣ̀ невеще́ственно є҆́сть: веща́ми же воѡбража́етсѧ въ ви́дъ, и҆ претворѧ́етсѧ: и҆ си́мъ ѡ҆́бразомъ прило́гъ ꙗ҆влѧ́емый познава́етсѧ и҆ глаго́летсѧ.

ѯ҃з. По́мыслы, словеса̀ бѣсѡ́въ сꙋ́ть и҆ страсте́й предте́чи, ꙗ҆́коже и҆ дѣ́лъ словеса̀ и҆ помышлє́нїѧ: невозмо́жно бо є҆́сть, бла́го и҆лѝ ѕло̀ содѣ́ѧти, не прїѧ́въ пе́рвѣе своегѡ̀ по́мысла. Поне́же по́мыслъ є҆́сть, безви́днагѡ прило́га движе́нїе ꙗ҆ковы́хъ ли́бо веще́й.

ѯ҃и. Вещество̀ веще́й ражда́етъ просты̑ѧ по́мыслы, бѣсо́вскїй же прило́гъ лꙋка́выми содѣ́лываетъ. Разли́чїе ᲂу҆́бѡ и҆́мꙋтъ є҆сте́ственнїи словеса̀ и҆ по́мыслы ѿ чрезъесте́ственныхъ и҆ вышеесте́ственныхъ по сравне́нїю.

ѯ҃ѳ. По́мыслы ра́вное и҆́мꙋтъ дѣ́йство по сꙋ́щемꙋ во мгнове́нїи и҆змѣне́нїю, є҆сте́ственнїи ᲂу҆́бѡ къ чрезъесте́ственнымъ, чрезъесте́ственнїи же къ вышеесте́ственнымъ а҆́бїе ѡ҆браща́еми: вино́вни же сꙋ́ть по́мыслы сꙋ́щемꙋ дрꙋ́гъ въ дрꙋ́зѣ превраще́нїю и҆ рожде́нїю, и҆̀же ѿ вещества̀, на бѣсѡ́вскїѧ превраща́ющесѧ: а҆ и҆̀же ѿ прило́га по́мыслы на веще́ственные: ꙗ҆́коже и҆ є҆сте́ственнїи по́мыслы бж҃е́ственни, бж҃е́ственнїи же вышеесте́ственни ражда́ютъ: ко́еждо бо къ сро́дномꙋ себѣ̀ своѐ дви́жительное и҆змѣне́нїе и҆́мать по четвери́чнѡ раздѣле́ннѣй винѣ̀ и҆ рожде́нїю.

ѻ҃. Вѣ́ждь ꙗ҆́кѡ вины̑ предположе́ни сꙋ́ть помыслѡ́мъ, по́мыслы же мечта́нїѧмъ, мечта̑нїѧ же страсте́мъ, стра̑сти же бѣсовѡ́мъ, ꙗ҆́коже цѣ́пь нѣ́каѧ и҆ чи́нъ въ безчи́нныхъ дꙋсѣ́хъ, лꙋка́внѣ, и҆ є҆ди́на дрꙋгі́ѧ держа́щисѧ свѧ́зани сꙋ́ть. Ѻ҆ба́че стра́нное и҆ несро́дное человѣ́кꙋ, ничто́же дѣ́йствꙋетъ са́мо ѡ҆ себѣ̀, но ѿ бѣсѡ́въ дѣ́йствꙋемо є҆́сть: ниже́ бо по́мыслъ прило́гствꙋетъ когда̀, нижѐ мечта́нїе і҆дѡлотвори́тсѧ, нижѐ стра́сть дѣ́йствꙋетъ, кромѣ̀ ѻ҆́тай сокрове́нныѧ бѣсо́вскїѧ си́лы. А҆́ще бо и҆ падѐ сатана̀ сокрꙋши́всѧ, но мно́жае крѣпи́тсѧ на́шею лѣ́ностїю, кича́сѧ ѡ҆ на́съ.

ѻ҃а. Воѡбража́ютъ ᲂу҆́мъ на́шъ, па́че же воѡбража́ютсѧ ѿ на́съ сами́хъ, и҆ прило́гствꙋютъ по навыкнове́нїю, ѡ҆блада́ющыѧ и҆ дѣ́йствꙋющыѧ въ дꙋшѣ̀ стра̑сти: винꙋ́ бо къ і҆дѡлотворе́нїю стра́стное навыкнове́нїе бѣ́сове и҆́мꙋтъ. И҆́мать же винꙋ̀ мечта́нїе тро́йственнѣ, и҆змѣнѧ́ющꙋю зра́ки дꙋхѡ́въ, по прича́стномꙋ дꙋшѝ сво́йствꙋ: ꙗ҆́коже и҆ мечта́нїю тро́йственнꙋ бы́ти во пти́цахъ, ѕвѣре́хъ, скотѣ́хъ, къ жела́тельной, ꙗ҆́ростной и҆ слове́сной дꙋшє́внымъ си́ламъ. Трі́и бо нача́льнїи стра̑сти, на трїе́хъ при́снѡ воѡрꙋжа́ютсѧ, и҆ въ не́йже дꙋша̀ ᲂу҆ка́чествисѧ стра́сти, къ то́й по сро́дствꙋ воѡбража́ютсѧ на́мъ и҆ прихо́дѧтъ.

ѻ҃в. Ꙗ҆́кѡ ѻ҆́гнь ᲂу҆́бѡ мно́гажды и҆ ꙗ҆́кѡ ᲂу҆́глїе, бѣ́сове сласте́й прихо́дѧтъ. Занѐ сластолю́бнїи дꙋ́си жела́тельное разжиза́ютъ, ꙗ҆́ростное возмꙋща́ютъ, слове́сное же смꙋща́юще помрача́ютъ дꙋ́шꙋ: разжже́нїѧ бо, смꙋще́нїѧ и҆ тьмы̀ вина̀ нача́льнѣйшаѧ и҆з̾ страсте́й сла́сть.

ѻ҃г. Но́щь страсте́й, неразꙋ́мїѧ тьма̀ є҆́сть. И҆лѝ па́ки: но́щь є҆́сть, роди́тельное страсте́й держа́вствованїе, въ не́мже ца́рствꙋетъ тьмы̀ нача́льникъ.

ѻ҃д. Во вре́мѧ дѣ́йства страсте́й ѻ҆́вїи по́мыслы пред̾и́дꙋтъ, ѻ҆́вїи же послѣ́дꙋютъ. Пред̾и́дꙋтъ ᲂу҆́бѡ по́мыслы мечта́нїй, мечта́нїѧмъ же послѣ́дꙋютъ стра̑сти, стра̑сти ᲂу҆́бѡ бѣсѡ́въ предварѧ́ютъ, бѣ́сове же послѣ́дꙋютъ страсте́мъ.

ѻ҃є. Нача́ло страсте́й и҆ вина̀, є҆́сть ѕлоꙋпотребле́нїе: ѕлоꙋпотребле́нїѧ же, превраще́нїе: превраще́нїѧ же, преклоне́нїе во́льнагѡ навыкнове́нїѧ: хотѣ́нїѧ же и҆скꙋ́съ є҆́сть прило́гъ: прило́га же бѣ́сове, про́мысломъ попꙋща́еми пока́зовати, каково̀ на́ше є҆́сть самовла́стїе.

ѻ҃ѕ. Ꙗ҆́дъ жа́ла грѣхо́внагѡ, приводѧ́щагѡ къ сме́рти, є҆́сть стра́стное навыкнове́нїе дꙋшѝ: неподви́женъ бо и҆́мать и҆ непрело́женъ нра́въ, и҆́же страстьмѝ ᲂу҆ка́чествовавыйсѧ во́льнѣ.

ѻ҃з. Стра̑сти глаго́лютсѧ многоѡбра́знѣ: раздѣлѧ́ютсѧ же на тѣлє́сныѧ и҆ дꙋшє́вныѧ. Тѣлє́сныѧ раздѣлѧ́ютсѧ на болѣ́знєнныѧ и҆ согрѣши́тєльныѧ: болѣ́знєнныѧ раздѣлѧ́ютсѧ на недꙋ̑жныѧ и҆ наказа́тєльныѧ: дꙋшє́вныѧ же па́ки дѣлѧ́тсѧ на ꙗ҆́рѡстныѧ, по́хѡтныѧ и҆ словє́сныѧ: словє́сныѧ раздѣлѧ́ютсѧ на мечта́тєльныѧ и҆ размысли́тєльныѧ. И҆з̾ си́хъ ᲂу҆́бѡ ѻ҆́вїи сꙋ́ть по ѕлоꙋпотребле́нїю во́льни, ѻ҆́вїи же по нꙋ́ждѣ нево́льни, и҆ ꙗ҆́кѡ незазѡ́рны стра̑сти бы́ти глаго́лютсѧ, ꙗ҆̀же и҆ припослѣ́дѡванїѧ, и҆ є҆сте́ствєнна свѡ́йства ѻ҆тцы̀ нареко́ша.

ѻ҃и. И҆́ны сꙋ́ть тѣлє́сныѧ стра̑сти, и҆ и҆́ны дꙋшє́вныѧ, жела́тєльныѧ и҆́ны, и҆ ꙗ҆́рѡстныѧ и҆́ны, дрꙋгі̑ѧ сꙋ́ть стра̑сти слове́сности, и҆ и҆́ны ᲂу҆ма̀ и҆ мы́сли: прїѡбща́ютсѧ же дрꙋ́гъ дрꙋ́гꙋ, и҆ содѣ́йствꙋютъ є҆ди́ны дрꙋги̑мъ. Тѣлє́сныѧ ᲂу҆́бѡ жела́тєльнымъ, дꙋшє́вныѧ же ꙗ҆́рѡстнымъ. И҆ па́ки помы́слєнныѧ ко ᲂу҆́мнымъ, и҆ ᲂу҆́мныѧ къ мы́слєннымъ и҆ па̑мѧтнымъ страда́нїѧмъ.

ѻ҃ѳ. Ꙗ҆́ростныѧ ᲂу҆́бѡ ча̑сти стра̑сти сꙋ́ть: гнѣ́въ, го́ресть, во́пль, ѡ҆строже́лчїе, де́рзость, киче́нїе, надме́нность, и҆ а҆́ще что̀ дрꙋго́е. Жела́тєльныѧ ча̑сти: лихои́мство, нечистота̀, неѡбꙋзда́нїе, неꙋдержа́нїе, ненасыще́нїе, сластолю́бїе, сребролю́бїе, самолю́бїе, є҆́же всѣ́хъ страсте́й лютѣ́йшее. Плотскі̑ѧ же: блꙋ́дъ, прелюбодѣѧ́нїе, нечистота̀, стꙋдодѣѧ́нїе, непра́вда, чревобѣ́сїе, ᲂу҆ны́нїе, превозноше́нїе, любоꙋкраше́нїе, и҆ а҆́ще что̀ дрꙋго́е. Словє́сныѧ же ча̑сти сꙋ́ть: невѣ́рїе, хꙋла̀, лꙋка́вство, кова́рство, многопы́тство, двоедꙋ́шїе, ᲂу҆кори́зна, клевета̀, ѡ҆сꙋжде́нїе, ᲂу҆ничиже́нїе, кощꙋ́нство, лицемѣ́рїе, лжа̀, скверносло́вїе, бꙋесло́вїе, ле́сть, нарꙋга́нїе, ꙗ҆влѧ́тельство, человѣкоꙋго́дїе, выше́нїе, клѧтвопрестꙋпле́нїе, праздносло́вїе, и҆ прѡ́чаѧ. Оу҆́мныѧ же: мнѣ́нїе, возноше́нїе, велехвале́нїе, ра́спрѧ, рве́нїе, самоꙋго́дїе, пререка́нїе, непослꙋша́нїе, мечта̑нїѧ, примышлє́нїѧ, любопоказа̑нїѧ, славолю́бїе, горды́нѧ, пе́рвое и҆ послѣ́днее и҆з̾ всѣ́хъ ѕѡ́лъ. Мы́слєнныѧ же сꙋ́ть сїѧ̑: парє́нїѧ, глꙋмлє́нїѧ, плѣнє́нїѧ, помраче́нїе, ѡ҆слѣпле́нїе, ѿведє́нїѧ, прило́зи, сосложє́нїѧ, ᲂу҆клонє́нїѧ, превращє́нїѧ, препарє́нїѧ, и҆ подѡ́бнаѧ си̑мъ. И҆ кра́ткѡ рещѝ: всѧ̑, ꙗ҆̀же внѣ̀ є҆стества̀, ѕла̑ѧ трїе́мъ си́ламъ дꙋшє́внымъ сопримѣси́шасѧ, ꙗ҆́коже и҆ блага̑ѧ въ ни́хъ всѧ̑ совокꙋ́пнѣ быва́ютъ по є҆стествꙋ̀.

п҃. Ѽ дв҃дова къ бг҃ꙋ со ᲂу҆́жасомъ восклица́нїѧ! Оу҆диви́сѧ, глаго́люща, ра́зꙋмъ тво́й ѿ менѐ.¹³³ Не возмога́ю бо къ немꙋ̀ крѣпча́йшꙋ сꙋ́щꙋ и҆ непости́жнꙋ, па́че моегѡ̀ немощна́гѡ ра́зꙋма и҆ си́лы сꙋ́щїѧ во мнѣ̀, ка́кѡ и҆ пло́ть сїѧ̀ непости́жна є҆́сть по сложе́нїю созда́нїѧ.

п҃а. Зако́ны є҆стества̀ сꙋ́ть ка́чествєннаѧ дѣ́йствꙋемыхъ ᲂу҆дѡ́въ сложє́нїѧ, є҆́же и҆ разли́чїѧ сло́во наречѐ, а҆́ки многоча̑стїѧ свои́хъ сво́йствъ. И҆лѝ па́ки: зако́нъ є҆сте́ственный є҆́сть, коегѡ́ждо ви́да и҆ ᲂу҆́да дѣ́йство въ си́лѣ. Ꙗ҆́коже бо бг҃ъ все́ю тва́рїю, си́це и҆ дꙋша̀ тѣле́сными ᲂу҆́ды и҆ дѣ́йствꙋетъ и҆ дви́жетъ кі́йждо ко своемꙋ̀ дѣ́йствꙋ. Здѣ̀ вопроси́ти потре́бно, кі́имъ ѡ҆́бразомъ ꙗ҆́рость и҆ вожделѣ́нїе бг҃оно́снїи мꙋ́жи, ѻ҆вогда̀ плотски́ми си́лы нарица́ютъ, ѻ҆вогда́ же дꙋше́вными; глаго́лемъ: ꙗ҆́кѡ ни коегѡ́ждо и҆́мꙋтъ разногла́сїѧ словеса̀ ст҃ы́хъ во и҆звѣ́стнѡ вѣ́дѧщихъ ѧ҆̀, но ѻ҆боѧ̑ и҆́стинствꙋютъ, и҆ по прили́чїю нарече́нїѧ премѣнѧ́ютъ ѕѣлѡ̀ премꙋ́дрѣ: неизрече́ннагѡ ра́ди ѻ҆бою̀ бытїѧ̀, во є҆́же бы́ти по вкꙋ́пѣ бытїѧ̀ ѡ҆́бразꙋ. Ꙗ҆́кѡ бы́ти соверше́ннѣй ᲂу҆́бѡ ѿсю́дꙋ дꙋшѣ̀, тѣ́лꙋ же несоверше́ннꙋ пита́тельнагѡ ра́ди возраще́нїѧ. Дꙋша́ бо сама̀ ѡ҆ себѣ̀ и҆́мать си́лꙋ и҆ жела́тєльна хотѣ̑нїѧ, и҆ ꙗ҆́ростнꙋ къ мꙋ́жествꙋ раче́нїѧ дви́жительнꙋ, ѿ созда́нїѧ є҆ѧ̀, слове́снѣй и҆ ᲂу҆́мнѣй со́зданнѣй бы́вшей. Не бы́сть бо создана̀ вкꙋ́пѣ съ не́ю ꙗ҆́рость безслове́сна и҆ безꙋ́мно жела́нїе, ꙗ҆́коже нижѐ бѣ̀ во пло́ти пе́рвѣе: но созда́нно нетлѣ́нно бѣ̀ кромѣ̀ мокро́тъ, ѿ ни́хже послѣ́дова жела́нїе и҆ ꙗ҆́рость ѕвѣ́рскаѧ. По преслꙋша́нїи бо, па́дшꙋ человѣ́кꙋ во тлю̀ и҆ дебельство̀ безслове́сныхъ, по нꙋ́ждѣ и҆ ꙗ҆́рость и҆ вожделѣ́нїе въ не́мъ возни́че. Сегѡ́ бо ра́ди и҆ сопротивлѧ́етсѧ хотѣ́нїю дꙋше́вномꙋ по ꙗ҆́рости же и҆ жела́нїю, є҆гда̀ ѡ҆блада́етъ. Внегда́ же покори́тсѧ ме́ртвенное слове́сномꙋ, послѣ́дꙋетъ дꙋшѣ̀ ко дѣ́йствꙋ благи́хъ. Є҆гда́ бо смѣси́шасѧ и҆ совокꙋ́пна бы́ша плотска̑ѧ приведє́ннаѧ съ дꙋше́ю свѡ́йства: тогда̀ ᲂу҆подо́бисѧ скотѡ́мъ, повинꙋ́всѧ зако́нꙋ грѣха̀, є҆сте́ственныѧ ра́ди нꙋ́жды, ско́тъ ѿ слове́снагѡ и҆ ѕвѣ́рь ѿ человѣ́ка бы́въ.

п҃в. Ꙗ҆́коже дꙋша̀ вдꙋнове́нїемъ сотворена̀ слове́сною, и҆ ᲂу҆́мною жи́зненнымъ вдохнове́нїемъ, ꙗ҆́рость и҆ по́хоть ско́тскꙋ не созда̀ съ не́ю бг҃ъ, но жела́нїѧ си́лꙋ вожделѣ́тельнꙋ и҆ къ не́й любле́нїѧ рачи́тельно мꙋ́жество. Си́це нижѐ тѣлесѝ созда́ннꙋ ꙗ҆́рость и҆ по́хоть безслове́снꙋ въ нача́лѣ вложѝ, послѣди́ бо сїѧ̑ преслꙋша́нїѧ ра́ди прїѧ̀ ме́ртвенно и҆ тлѣ́нно и҆ ско́тско, и҆́мже и҆ ᲂу҆подо́бисѧ, бы́вшо. Тѣ́ло бо, ꙗ҆́коже глаго́лютъ бг҃осло́вы, нетлѣ́нно создано̀ бы́сть, ꙗ҆ково́же и҆ воскре́снетъ, ꙗ҆́коже и҆ дꙋша̀ безстра́стна, а҆́ще и҆ прїѧ́тно тлѣ́нїѧ. Растлѣ́шасѧ же ѻ҆боѧ̑, и҆ сраствори́шасѧ ра́ди є҆сте́ственнагѡ зако́на вмѣще́нїѧ дрꙋ́гъ въ дрꙋ́га и҆ преподаѧ́нїѧ, си́рѣчь дꙋша̀ и҆ тѣ́ло. Ѻ҆́на ᲂу҆́бѡ страстьмѝ, па́че же бѣ́сы ᲂу҆ка́чествовавшисѧ: сїе́ же безсловє́снымъ скотѡ́мъ ᲂу҆подоблѧ́ѧсѧ, состоѧ́нїѧ дѣ́йствомъ и҆ ѡ҆блада́нїемъ тлѣ́нїѧ, и҆ къ є҆ди́номꙋ ѻ҆бои́хъ си́ламъ ᲂу҆стремле́ннымъ сꙋ́щымъ: є҆ди́нъ ско́тъ безслове́сенъ и҆ безꙋ́менъ ꙗ҆́ростїю и҆ по́хотїю бы́въ соверши́сѧ. И҆ си́це приложи́сѧ скотѡ́мъ, по писа́нїю, и҆ ᲂу҆подо́бисѧ и҆̀мъ,¹³⁴ по всѧ́комꙋ ѡ҆́бразꙋ.

п҃г. Нача́ло добродѣ́телей и҆ и҆сто́чникъ є҆́сть благо́е предложе́нїе, си́рѣчь жела́нїе добра̀. Ꙗ҆́коже бг҃ъ є҆́сть вина̀ и҆ и҆сто́чникъ всѧ́кагѡ бла́га, добра́ же нача́ло вѣ́ра, па́че же хрⷭ҇то́съ ка́мень вѣ́ры, є҆гѡ́же нача́ло и҆ ѡ҆снова́нїе и҆́мамы всѣ́хъ добродѣ́телей: ѡ҆ не́мже стои́мъ, и҆ зи́ждемъ всѧ́кое дѣ́ло бла́го. Се́й є҆́сть ка́мень краеꙋго́льный, свѧзꙋ́ѧй на́съ съ собо́ю, и҆ многоцѣ́нный би́серъ, є҆гѡ́же и҆ща̀, во глꙋбинꙋ̀ безмо́лвїѧ входѧ́щїй и҆́нокъ, всѧ̑ хотѣ̑нїѧ своѧ̑ продае́тъ послꙋша́нїемъ за́повѣдей, ꙗ҆́кѡ да стѧ́жетъ є҆го̀ ѿсю́дꙋ.

п҃д. Добродѣ́тєли и҆́мꙋтъ междꙋ̀ собо́ю ра́вность, и҆ всѧ̑ во є҆ди́но соединѧ́ютсѧ, и҆ є҆ди́нъ ᲂу҆ста́въ и҆ ви́дъ добродѣ́тели и҆сполнѧ́ютъ. Сꙋ́ть бо добродѣ́тєли, и҆ добродѣ́телей бо́льшыѧ добродѣ́тєли, ꙗ҆́кѡ ѡ҆бдержи́тєльныѧ и҆ содержи́тєльныѧ мно́жайшихъ, и҆лѝ и҆ всѣ́хъ: ꙗ҆́кѡ бж҃е́ственныѧ любы̀ и҆ смире́нїе, и҆ бж҃е́ственное терпѣ́нїе. Глаго́летъ бо ѡ҆ не́мъ гдⷭ҇ь: въ терпѣ́нїи ва́шемъ стѧжи́те дꙋ́шы ва́шѧ¹³⁵: и҆ не речѐ, въ постѣ̀ ва́шемъ, и҆лѝ бдѣ́нїи ва́шемъ. Ѡ҆ терпѣ́нїи же глаго́лю, по бг҃ꙋ быва́емомъ, нача́лѣ добродѣ́телей, ѡ҆снова́нїи мꙋжедо́блестїй. Ѻ҆но́ бо є҆́сть са́мое, во бра́нехъ ми́ръ, въ бꙋ́ри тишина̀, и҆ во и҆спра́вльшихъ ѻ҆́ное сто́лпъ непревратноводрꙋже́нный: є҆го́же ѡ҆ хрⷭ҇тѣ̀ і҆и҃сѣ стѧжа́вша ни ѻ҆рꙋ̑жїѧ, ни лꙋ́цы, ни кѡ́пїѧ, ни вѡ́инства попꙋща́ема, ни са́мое бѣсѡ́въ ѡ҆полче́нїе, ни те́мнїи сопроти́вныхъ полцы̀ вреди́ти возмо́гꙋтъ.

п҃є. Добродѣ́тєли, а҆́ще и҆ є҆ди̑ны дрꙋгі̑ѧ ражда́ютъ, но ѿ трїе́хъ дꙋше́вныхъ си́лъ бытїѐ и҆́мꙋтъ, кромѣ̀ бж҃е́ственныхъ. Вина́ бо и҆ нача́ло четы́ремъ пе́рвѣйшымъ во є҆сте́ственныхъ и҆ бж҃е́ственнымъ добродѣ́телємъ, ѿ ни́хже и҆ и҆́миже прѡ́чїѧ составлѧ́ютсѧ: мꙋ́дрости же и҆ мꙋ́жества, цѣломꙋ́дрїѧ же и҆ пра́вды є҆́сть бж҃е́ственнаѧ бг҃осло́вѡвъ дх҃одви́жнаѧ премꙋ́дрость, во ᲂу҆мѣ̀ четвери́чнѡ дви́жимаѧ: Не всѧ́ же кꙋ́пнѡ дѣ́йствꙋетъ, но ѻ҆со́бь кꙋ́юждо во вре́мѧ є҆ѧ̀, ꙗ҆́коже хо́щетъ: и҆ ѻ҆́вꙋ ᲂу҆́бѡ, ꙗ҆́кѡ свѣ́тъ: ѻ҆́вꙋ же, ꙗ҆́кѡ си́лꙋ ѻ҆стрꙋ̀ и҆ приснодви́жно вдохнове́нїе: ѻ҆́вꙋ же, ꙗ҆́кѡ ѡ҆свѧти́тельнꙋ си́лꙋ и҆ чисти́тельнꙋ: ѻ҆́вꙋ же, ꙗ҆́кѡ ро́сꙋ чистоты̀ весели́тельнꙋ, и҆ зно́й страсте́й прохлажда́ющꙋ. Кꙋ́юждо комꙋ́ждо, ꙗ҆́коже предрече́но бы́сть, соверше́нномꙋ соверше́нное и҆ дѣ́йство по преспѣ́ѧнїю да́рꙋетъ.

п҃ѕ. Си́лы соверше́нной дꙋшѣ̀ не да́рꙋютъ ѿ своегѡ̀ тща́нїѧ добродѣ́телей начина̑нїѧ, а҆́ще не сꙋще́ственнѣ въ навыкнове́нїи бл҃года́тїю прїи́дꙋтъ. Ка́ѧждо бо и҆́мать дарова́нїе сво́йственно, дѣ́йство ѡ҆ себѣ̀, ꙗ҆́кѡ мощѝ и҆ нехотѧ́щихъ привлача́ти прича́стникѡвъ свои́хъ къ себѣ̀, навыкнове́нїемъ и҆ є҆стество́мъ блага́гѡ. И҆ є҆гда̀ на́мъ да́стсѧ да́ръ се́й, непремѣ́ненъ и҆ непрело́женъ ѿто́лѣ соблюда́етсѧ: жи́вꙋ бо, ꙗ҆́коже дꙋ́шꙋ, є҆́же дѣ́йствовати ѻ҆́ныѧ во ᲂу҆десѣ́хъ свои́хъ, и҆́мꙋтъ бл҃года́ть дх҃а. Тѣ́мже и҆ ме́ртвъ добродѣ́телей собо́ръ без̾ ѻ҆́ныѧ быва́етъ. И҆ мнѧ́щымсѧ соверше́ннѣ и҆мѣ́ти, и҆лѝ и҆сполнѧ́ти ѧ҆̀, є҆ди̑ны сꙋ́ть сѣ̑ни и҆ ѡ҆́бразы добра̀, а҆ не и҆́стины начерта̑нїѧ.

п҃з. Сꙋ́ть ᲂу҆́бѡ четы́ре нача̑льныѧ добродѣ́тєли: мꙋ́жество, мꙋ́дрость, цѣломꙋ́дрїе и҆ пра́вда. Ѻ҆́смь же, по преꙋмноже́нїю и҆ ѡ҆скꙋдѣ́нїю ѻ҆́ныхъ близпослѣ́дꙋющыѧ: ѕлѡ́бы ᲂу҆́бѡ ѿ на́съ, добродѣ́тєли же ѿ сꙋ́щихъ въ мі́рѣ и҆ нарица́ємы и҆ разꙋмѣва́ємы. Мꙋ́жества ᲂу҆́бѡ, де́рзость и҆ страхова́нїе: мꙋ́дрости же, лꙋка́вство и҆ неразꙋ́мїе, цѣломꙋ́дрїѧ же, невоздержа́нїе и҆ ѡ҆камене́нїе: пра́вды же, лишшеи́мство и҆ непра́вда, си́рѣчь меньшеи́мство. Среди́ бо си́хъ сꙋ́ть добродѣ́тєли, не то́чїю нача̑льныѧ и҆ є҆сте́ствєнныѧ, и҆ всѧ́кагѡ приꙋмноже́нїѧ и҆ ѡ҆скꙋдѣ́нїѧ превы́шшыѧ, но и҆ дѣ́ѧтєльны сꙋ́ть. И҆ ѻ҆́вы ᲂу҆́бѡ добродѣ́тєли произволе́нїе совѣ́та нра́востїю. ѻ҆́вы же превраще́нїе и҆ мнѣ́нїе содѣ́йственно стѧжа́ша. Ѡ҆ тѣ́хъ бо, ꙗ҆́кѡ средѝ сꙋ́ть добродѣ́тели пра́вости, свидѣ́тельствꙋетъ при́тча, си́це глаго́лющи: и҆ и҆спра́виши всѧ̑ ѻ҆́си бла́ги. Всѧ̑ ᲂу҆́бѡ въ трїе́хъ си́лахъ дꙋше́вныхъ состоѧ́тъ и҆ ражда́ютсѧ и҆ зи́ждꙋтсѧ, ꙗ҆́коже бо ѡ҆снова́нїе своегѡ̀ зда́нїѧ четы́ре нача̑льныѧ добродѣ́тєли, па́че же хрⷭ҇та̀ и҆́мꙋтъ, да є҆сте́ствєнныѧ дѣ́ѧтельными воз̾ѡчища́ютсѧ: бж҃е́ствєнныѧ же и҆ па́че є҆стества̀ бл҃гостїю дх҃а да́рꙋютсѧ.

п҃и. Добродѣ́тєли ѻ҆́вы сꙋ́ть дѣ́ѧтєльны, ѻ҆́вы же є҆сте́ствєнны, ѻ҆́выѧ бж҃е́ствєнны и҆ дꙋхѡ́вны. И҆ дѣ́ѧтєльныѧ ᲂу҆́бѡ сꙋ́ть произволе́нїѧ, є҆сте́ствєнныѧ же сложє́нїѧ, бж҃е́ствєнныѧ же благода̑ти.

п҃ѳ. Ꙗ҆́коже добродѣ́телей рожде́нїе и҆́мать дꙋша̀, си́це и҆ страсте́й. Но ты̑ѧ ᲂу҆́бѡ по є҆стествꙋ̀: сїѧ̑ же внѣ̀ є҆стества̀ ражда́ти ѻ҆бы́че. Винꙋ́ бо къ рожде́нїю до́брагѡ и҆лѝ ѕла́гѡ дꙋша̀ и҆́мать преклоне́нїе хотѣ́нїѧ, ꙗ҆́коже ѻ҆сте́нъ нѣ́кїй къ черта́мъ, и҆лѝ возложе́нїе чегѡ́либо на вѣсы̀, а҆́може а҆́ще прекло́нитсѧ, то̀ къ содѣ́йствїю и҆ прїе́млетъ и҆ дѣ́йствꙋетъ. Подлежа́ще бо є҆́сть ѻ҆бѣ́ма дѣ́йствамъ предложе́нїе: поне́же и҆ сїѧ̑ и҆ ѻ҆́наѧ въ себѣ̀ содержи́тъ. Тꙋ̀ ᲂу҆́бѡ рожде́нїемъ: сїю́ же самопроизво́льнымъ преклоне́нїемъ хотѣ́нїѧ.

ч҃. Ѻ҆трокови́цами писа́нїе нарица́етъ добродѣ́тєли¹³⁶, раствори́тельнагѡ ра́ди и҆́хъ съ дꙋше́ю соедине́нїѧ быва́ющагѡ, и҆ зане́же и҆̀мъ во є҆ди́нъ дꙋ́хъ и҆ тѣ́ло съ не́ю ви́дитисѧ. Любви́ бо зна́менїе ѻ҆трокови́цы ви́дъ, и҆ чистоты̀ и҆ ѡ҆свѧще́нїе свидѣ́тельство, ѡ҆́бразъ свѧще́нныхъ си́хъ дѣ́въ. Ѡ҆бы́че бо бж҃е́ственнаѧ преѡбража́ти благода́ть, къ немꙋ́же ᲂу҆ка́чествишасѧ, и҆ къ сро́дномꙋ непреле́стнѣ въ могꙋ́щихъ видотвори́ти.

ч҃а. Ѻ҆́смь ᲂу҆́бѡ сꙋ́ть ꙗ҆́кѡ пе́рвѣйшыѧ всѣ́хъ страсте́й, трѝ ᲂу҆́бѡ вели́цыи, ꙗ҆̀же сꙋ́ть: чревобѣ́сїе, сребролю́бїе и҆ тщесла́вїе. Пѧ́ть же си̑мъ послѣ́дꙋющыѧ: блꙋ́дъ и҆ гнѣ́въ, печа́ль, и҆ ᲂу҆ны́нїе, и҆ го́рдость. Си́це же сꙋ́ть и҆ проти̑вныѧ си̑мъ трѝ ѡ҆бде́ржныѧ добродѣ́тєли: нестѧжа́нїе, воздержа́нїе и҆ смире́нїе. Съ ни́ми же и҆ тѣ̑мъ послѣ́дꙋющыѧ: чистота̀, и҆ кро́тость, ра́дость, и҆ мꙋ́жество, и҆ ᲂу҆ничиже́нїе, и҆ всѐ добродѣ́телей послѣ́дованїе. Си́лꙋ же и҆ дѣ́йство и҆ ᲂу҆ха́нїе сво́йственно ко́ейждо добродѣ́тели и҆лѝ ѕло́бѣ навы́кнꙋти и҆ позна́ти тꙋ̀, не всѧ́кагѡ хотѧ́щагѡ є҆́сть, но творѧ́щагѡ и҆ подвиза́ющасѧ дѣ́ломъ и҆ сло́вомъ, и҆ ѿ дх҃а да́ръ вѣ́дѣнїѧ и҆ разсꙋжде́нїѧ прїе́мшагѡ.

ч҃в. Добродѣ́тєли, ѻ҆́вы ᲂу҆́бѡ дѣ́йствꙋютъ, ѻ҆́вы же дѣ́йствꙋеми сꙋ́ть, и҆ дѣ́йствꙋютъ ᲂу҆́бѡ сїѧ̑ въ на́съ приходѧ́ще, є҆гда̀ подоба́етъ, и҆ внегда̀, и҆ є҆ли́кѡ хотѧ́тъ, и҆ ꙗ҆́коже. Мы̀ дѣ́йствꙋемъ ты̑ѧ по произволе́нїю и҆ нра́вственномꙋ навыкнове́нїю на́шегѡ ѡ҆бꙋче́нїѧ. Но ѻ҆́ныѧ ᲂу҆́бѡ сꙋще́ственнѣ, мы́ же ѡ҆бра́знѣ по пра́вꙋ воѡбража́еми: занѐ ѡ҆́бразъ є҆́сть всѣ́хъ на́шихъ дѣ́ланїй спо́собъ къ та́мошнемꙋ началоѡбра́зномꙋ. Ма́лѣми бо ѕѣлѡ̀ сꙋще́ственнѡ мы́слєннаѧ прича́ствꙋютсѧ, пре́жде бꙋ́дꙋщагѡ непрело́жнагѡ наслажде́нїѧ. Трꙋды́ бо здѣ̀ и҆ ѡ҆́бразы, а҆ не са̑мыѧ добродѣ́тєли вои́стиннꙋ дѣ́йствꙋемъ и҆ прїе́млемъ.

ч҃г. Свѧщеннодѣ́йствꙋетъ є҆ѵⷢ҇лїе по па́ѵлꙋ, и҆́же причаща́тисѧ и҆ преподаѧ́ти могі́й дѣ́йствомъ, и҆ дрꙋги̑мъ просвѣще́нїе хрⷭ҇то́во, ꙗ҆́коже нѣ́кое сѣ́мѧ бж҃е́ственно сѣ́етъ сло́во, въ дꙋше́вныхъ слꙋ́шателей ни́вахъ. Сло́во ва́ше, глаго́летъ писа́нїе, да быва́етъ всегда̀ во благода́ти, со́лїю растворе́но бж҃е́ственныѧ бл҃гости¹³⁷, ꙗ҆́кѡ да да́стъ бл҃года́ть вѣ́рою слы́шащымъ¹³⁸. Земледѣ́латели же па́ки, и҆ земледѣ́ланїемъ, ᲂу҆чи́телей и҆ ᲂу҆чи́мыхъ наре́къ, ѕѣлѡ̀ мꙋ́дрѣ ꙗ҆влѧ́етъ. Ѻ҆́выхъ ᲂу҆́бѡ, ꙗ҆́кѡ ѻ҆ра́таєвъ и҆ сѣ́ѧтелей бж҃е́ственнагѡ сло́ва: ѻ҆́выхъ же ꙗ҆́кѡ зе́млю добродѣ́телей плодоно́снꙋ, тꙋ́чнꙋ и҆ благокла́снꙋ. Свѧщеннодѣ́йство бо и҆звѣще́нно, не то́чїю бж҃е́ственныхъ є҆́сть дѣ́йство, но и҆ прича́стїе благи́хъ и҆ преподаѧ́нїе.

ч҃д. Разли́чно є҆́сть произноше́нїемъ къ поꙋче́нїю происходѧ́щее сло́во, и҆ разли́чнѣ ѿ мно́гихъ ѡ҆́бразѡвъ собира́етсѧ, ѿ четы́рехъ ви́дѡвъ. Ѻ҆́во ᲂу҆́бѡ быва́етъ ѿ ᲂу҆че́нїѧ, ѻ҆́во ѿ чте́нїѧ: и҆́но ѿ дѣѧ́нїѧ, и҆ и҆́но ѿ благода́ти. И҆ ꙗ҆́коже вода̀ є҆ди́на є҆́сть є҆стество́мъ, претворѧ́етсѧ же и҆ премѣнѧ́етсѧ во своѐ ка́чество по разли́чїю подлежа́щагѡ пе́рстнагѡ вещества̀, ꙗ҆́кѡ и҆ вкꙋ́сомъ познава́етсѧ. Ѻ҆́ва ᲂу҆́бѡ горька̀, ѻ҆́ва же сладка̀, и҆ и҆́на сла́на и҆ смра́дна: си́це и҆ по нра́вственномꙋ навыкнове́нїю коегѡ́ждо происходѧ́щее сло́во и҆змѣнѧ́емо, дѣ́йствомъ познава́етсѧ и҆ по́льзꙋ прино́ситъ.

ч҃є. Поне́же сло́во въ наслажде́нїе дано̀ бы́сть всѧ́кагѡ слове́снагѡ є҆стества̀, и҆ ꙗ҆́коже ꙗ҆́стїѧ нѣ̑каѧ мнѡ́гаѧ и҆ разли̑чна дꙋша̀ прїе́млющи, сла́дость и҆́хъ разли́чнѣ ѡ҆щꙋща́етъ. Хꙋдо́жественное бо сло́во и҆́мать ꙗ҆́кѡ пѣ́стꙋна, ко нра́вꙋ воѡбража́ющи. Чита́емое же, ꙗ҆́кѡ во́дꙋ ᲂу҆спокое́нїѧ даю́ще дѣ́ѧтельное же, ꙗ҆́кѡ мѣ́сто ѕла́чно тꙋчнѧ́щее. Благода́ти же, ꙗ҆́кѡ ча́шꙋ ᲂу҆поѧ́щꙋю и҆ веселѧ́щꙋю. Неизрече́нное же тоѧ̀ ра́дованїе, ꙗ҆́кѡ є҆ле́й ᲂу҆маща́ющїй лицѐ, и҆ свѣ́тло содѣ́ловающїй.

ч҃ѕ. Вои́стиннꙋ, не то́чїю ꙗ҆́кѡ живо́тъ въ себѣ̀ дꙋша̀ сїѧ̀ и҆́мать, но є҆гда̀ и҆ ѿ и҆нѣ́хъ послꙋ́шаетъ та́ ко ᲂу҆че́нїю, ѡ҆щꙋща́етъ: внегда̀ предварѧ́етъ ѻ҆бою̀ любы̀ и҆ вѣ́ра. И҆ се́й ᲂу҆́бѡ вѣ́рою слы́ша, то́йже любо́вїю наказꙋ́ѧ, кромѣ̀ киче́нїѧ и҆ сла́вы словеса̀ добродѣ́телей творѧ̀. Є҆́же ᲂу҆́бѡ ѿ ᲂу҆че́нїѧ сло́во, ꙗ҆́кѡ пѣ́стꙋна прїе́млетъ: а҆ є҆́же ѿ чте́нїѧ, ꙗ҆́кѡ пита́телѧ: є҆́же ѿ дѣѧ́нїѧ, ꙗ҆́кѡ зало́гъ, ꙗ҆́кѡ невѣстокраси́телѧ сладча́йшаго: а҆ є҆́же ѿ дх҃а просвѣще́нїе, ꙗ҆́кѡ женихо́во сло́во соединѧ́ющее и҆ веселѧ́щее. Всѧ́къ бо глаго́лъ и҆сходѧ́щъ ѿ ᲂу҆́стъ бж҃їихъ є҆́сть, и҆лѝ ꙗ҆̀же дх҃омъ ѿ ᲂу҆́стъ ст҃ы́хъ произшє́дшаѧ словеса̀, и҆лѝ сладча́йшее дѣ́йствомъ дх҃а вдохнове́нїе, но є҆ди́ни ст҃і́и. И҆ поне́же наслажде́нїе слове́снїи и҆́мꙋтъ въ сло́вѣ, здѣ̀ ᲂу҆́бѡ дх҃омъ дѣ́йственнѡ веселѧ́щїисѧ, ѕѣлѡ̀ ма́ли сꙋ́ть: ѡ҆́бразы бо то́чїю дꙋхо́вныхъ слове́съ мно́зи па́мѧтїю вѣ́дѧтъ, и҆ причаща́ютсѧ и҆̀мъ, хлѣ́ба и҆́стиннагѡ бꙋ́дꙋщагѡ [вѣ́ка], въ чꙋ́вствѣ бг҃а сло́ва не ᲂу҆̀ причасти́вшесѧ. Є҆ди́нъ бо то́й та́мѡ предлежи́тъ во всѧ́кꙋ достѡ́йнымъ дово́льнѣ. сла́дость, нижѐ и҆ждива́емь, и҆лѝ и҆з̾ѧда́емь когда̀.

ч҃з. Кромѣ̀ ᲂу҆́мнагѡ чꙋ́вства, невозмо́жно вкꙋси́ти въ чꙋ́вствѣ сла́дости бж҃е́ственныѧ. Ꙗ҆́коже бо чꙋ̑вства притꙋпи́вый, недѣ́йствєнна та̑ къ чꙋ́вствєннымъ содѣ́ла, и҆ нижѐ зри́тъ, нижѐ слы́шитъ, нижѐ ѡ҆бонѧ́етъ, разсла́бленъ сы́й, па́че же полꙋме́ртвъ: си́це и҆ дꙋшє́вныѧ по є҆стествꙋ̀ си̑лы ᲂу҆мертви́вый страстьмѝ, нечꙋ́вствєнны сотворѝ къ дѣ́йствꙋ и҆ прича́стїю та́инствъ дх҃а. Не зрѧ́й и҆ не слы́шай и҆ не ѡ҆щꙋща́ѧй дх҃о́внѣ, ме́ртвъ є҆́сть: не живе́тъ бо въ не́мъ хрⷭ҇то́съ, нижѐ са́мъ ѡ҆ не́мъ дви́жетсѧ и҆ дѣ́йствꙋетъ.

ч҃и. Ра́вно и҆ то́жде са́мо, да не рекꙋ̀, є҆ди́но дѣ́йство и҆́мꙋтъ чꙋ̑вства къ дꙋшє́внымъ си́ламъ, и҆ па́че же є҆гда̀ здра̑ва сꙋ́ть: и҆́ми бо сїѧ̑ и҆ живꙋ́тъ и҆ дѣ́йствꙋютъ, и҆ ѻ҆вои̑мъ живи́тельный сраствори́сѧ дꙋ́хъ. Недꙋ́гꙋетъ бо вои́стиннꙋ человѣ́къ, є҆гда̀ собо́рнꙋю страсте́й въ не́мощь въ себѣ̀ но́ситъ, въ больни́цѣ лѣ́ности при́снѡ лежѧ̀. Чꙋ̑вства ᲂу҆́бѡ чꙋ́вствєннаѧ, ѻ҆́ныѧ же дꙋшє́вныѧ си̑лы, мы́слєннаѧ ꙗ҆́снѣ зрѧ́тъ: и҆ па́че є҆гда̀ нѣ́сть въ ни́хъ кі́ѧлибо сатани́нныѧ ра́ти, зако́нꙋ ᲂу҆ма̀ и҆ дꙋ́ха сопротивлѧ́ющейсѧ. Є҆гда́ же во є҆ди́но совокꙋпѧ́тсѧ дх҃омъ, є҆динови̑дны бы́вше: тогда̀ бж҃е́ствєннаѧ и҆ человѣ́чєскаѧ непосре́дственнѣ и҆ сꙋще́ственнѣ, ꙗ҆́коже сꙋ́ть, є҆стества̀ вѣ́дѧтъ, и҆ словеса̀ и҆̀хъ ꙗ҆́вственнѣ ви́дѧтъ, и҆ є҆ди́нꙋю винꙋ̀ всѧ́ческихъ трⷪ҇цꙋ, ꙗ҆́коже мо́щно, чи́стѣ зрѧ́тъ.

ч҃ѳ. Безмо́лвствꙋющемꙋ ᲂу҆́бѡ пе́рвѣе до́лжно и҆мѣ́ти, ꙗ҆́кѡ ѡ҆снова́нїе, сі́и пѧ́ть добродѣ́телей, на не́мже и҆ дѣ̑ланїѧ созида́ти: си́рѣчь, молча́нїе, воздержа́нїе, бдѣ́нїе, смире́нїе и҆ терпѣ́нїе. Дѣ́ланїй же бг҃оꙋго́дныхъ трѝ: ѱалмопѣ́нїе, моли́твꙋ, и҆ чте́нїе, и҆ рꙋкодѣ́лїе, а҆́ще є҆́сть не́мощенъ. Предречє́нныѧ бо добродѣ́тели не то́чїю всѣ̀ прѡ́чїѧ въ себѣ̀ ѡ҆бдержа́тъ, но и҆ є҆ди́на дрꙋгꙋ́ю составлѧ́ютъ. И҆ ѿ ᲂу҆́тра ᲂу҆́бѡ пребыва́ти въ па́мѧти бж҃їей моли́твою и҆ безмо́лвїемъ серде́чнымъ, терпѣли́внѣ моли́тисѧ ча́съ пе́рвый: пото́мъ вторы́й честѝ: тре́тїй пѣ́ти: четве́ртый моли́тисѧ: пѧ́тый честѝ: шесты́й пѣ́ти: седьмы́й моли́тисѧ: ѻ҆сьмы́й честѝ, девѧ́тый пѣ́ти: десѧ́тый ꙗ҆́сти: є҆динонадесѧ́тый спа́ти, а҆́ще потре́бꙋ и҆́мать: дванадесѧ́тый пѣ́ти вечє́рнѧѧ. И҆ та́кѡ до́брѣ преходѧ̀ дневно́е по́прище, ᲂу҆гожда́етъ бг҃ꙋ.

р҃. Ѿ всѣ́хъ добродѣ́телей ꙗ҆́кѡ пчелѣ̀, полє́знѣйшаѧ собира́ти подоба́етъ, и҆ та́кѡ причаща́ѧсѧ ѿ всѣ́хъ пома́лꙋ, вели́кое добродѣ́телей дѣ́ланїѧ твори́ти сложе́нїе: ѿ ни́хже ме́дъ премꙋ́дрости прїѡбрѣта́етсѧ къ благора́дованїю дꙋше́вномꙋ.

р҃а. А҆́ще хо́щеши ᲂу҆до́бѣе и҆ нощно́е разстоѧ́нїе прейтѝ, внемлѝ, ꙗ҆́кѡ трѝ жи́тєльства и҆́мать бдѣ́нїе нощно́е новонача́льныхъ, сре́днихъ и҆ соверше́нныхъ. И҆ пе́рвое ᲂу҆́бѡ жи́тельство є҆́сть сїѐ: полно́щи спа́ти, и҆ полно́щи бдѣ́ти, и҆лѝ ѿ ве́чера до полꙋ́нощи, и҆лѝ ѿ полꙋ́нощи да́же до ᲂу҆́тра. Второ́е же жи́тельство є҆́сть сїѐ: бдѣ́ти ѿ ве́чера ча́съ є҆ди́нъ и҆лѝ два̀, та́же спа́ти часѡ́въ четы́ре, возстава́ти же на ᲂу҆́треню, поѧ̀ и҆ молѧ́сѧ часѡ́въ ше́сть, да́же до ᲂу҆́тра. Та́же пѣ́ти пе́рвый ча́съ, и҆ сѣдѣ́ти безмо́лвствꙋѧ, ꙗ҆́коже предрече́сѧ, и҆лѝ ᲂу҆ста́вы дѣ́ланїй храни́ти часа́ми, и҆лѝ ча́стость, си́рѣчь, моли́твꙋ неразлꙋ́чнꙋ соблюда́ти, є҆́юже навыкнове́нїе быва́етъ по жи́тельствꙋ. Тре́тїе же жи́тельство, всено́щное и҆́мать стоѧ́нїе и҆ бо́дрствованїе.

р҃в. Сѐ ᲂу҆́бѡ и҆ ѡ҆ снѣ́ди рече́мъ, ꙗ҆́кѡ лі́тра хлѣ́ба довлѣ́етъ всѧ́комꙋ подвиза́ющемꙋсѧ ѡ҆ безмо́лвїи, и҆ вїна̀ нерастворе́нна двѣ̀ ча́ши и҆спива́ти, воды́ же трѝ, и҆ ѿ ѡ҆брѣта́ющихсѧ бра́шенъ снѣда́ти, не є҆ли́кѡ є҆стество̀ и҆́щетъ жела́тельнѣ, но є҆ли́кѡ про́мыслъ ᲂу҆строѧ́етъ, ᲂу҆потреблѧ́ти съ воздержа́нїемъ. И҆зрѧ́днѣйшее же и҆ кратча́йшее вѣ́дѣнїе ѡ҆ тре́звеннѣ жи́тельствовати хотѧ́щихъ, є҆́сть хране́нїе тре́хъ добродѣ́телей, ꙗ҆̀же и҆ прѡ́чїѧ въ себѣ̀ ѡ҆бдержа́тъ: по́стъ, глаго́лю, бдѣ́нїе и҆ мл҃твꙋ, и҆звѣствꙋ́ющыѧ держа́внѣйшее всѣ́хъ добродѣ́телей ᲂу҆твержде́нїе.

р҃г. Безмо́лвїе па́че всегѡ̀ вѣ́ры и҆ терпѣ́нїѧ тре́бꙋетъ, любве́ же и҆ наде́жды, и҆ ꙗ҆́же ѿ всегѡ̀ се́рдца, и҆ крѣ́пости и҆ си́лы. Вѣ́рꙋѧй бо а҆́ще здѣ̀ и҆ско́мое и҆ не полꙋ́читъ нерадѣ́нїѧ ра́ди мо́жетъ бы́ть, и҆лѝ и҆ны́ѧ нѣ́кїѧ вины̀, но во и҆схо́дѣ всѧ́чески невозмо́жно є҆́сть не прїѧ́ти и҆звѣще́нїѧ ѡ҆ плодѣ̀ вѣ́ры и҆ по́двига, и҆ не ᲂу҆зрѣ́ти свобо́ды, и҆́же є҆́сть і҆и҃съ хрⷭ҇то́съ, дꙋ́шъ и҆скꙋпле́нїе и҆ спасе́нїе, бг҃очл҃вѣ́къ сло́во. Не вѣ́рꙋѧй же всѧ́кѡ ѡ҆сꙋжде́нъ бꙋ́детъ во и҆схо́дѣ, но ᲂу҆жѐ и҆ ѡ҆сꙋжде́нъ є҆́сть¹³⁹, по глаго́лꙋ гдⷭ҇ню. Сласте́мъ бо рабо́таѧй, и҆ сла́вꙋ ѿ человѣ̑къ взыскꙋ́ѧй,¹⁴⁰ а҆ не ѿ бг҃а, невѣ́ренъ є҆́сть, глаго́летъ, а҆́ще сло́вомъ вѣ́ренъ бы́ти мни́тсѧ: просты́мъ и҆сповѣ́данїемъ и҆ вѣ́рою таковы́й ѻ҆́тай прельстѝ самаго̀ себѐ. Оу҆слы́шитъ бо, ꙗ҆́кѡ занѐ не прїѧ́лъ мѧ̀ є҆сѝ въ се́рдцѣ твое́мъ, но ѿве́рглъ мѧ̀ є҆сѝ вспѧ́ть хребта̀ твоегѡ̀, и҆ а҆́зъ ѿри́нꙋ тѧ̀: вѣ́рнꙋ бо, бл҃гонаде́жнꙋ подоба́етъ бы́ти, и҆ вѣ́ровати бж҃їей и҆́стинѣ, свидѣ́тельствꙋемой во всѣ́хъ писа́нїѧхъ. И҆сповѣ́дати свою̀ не́мощь, да не сꙋгꙋ́бо воз̾имѣ́етъ ѡ҆сꙋжде́нїе и҆ неизбѣ́жное.

р҃д. Ничто́же та́кѡ твори́тъ се́рдце сокрꙋше́нно и҆ дꙋ́шꙋ смире́ннꙋ, ꙗ҆́кѡ є҆́же ᲂу҆единѧ́тисѧ въ ра́зꙋмѣ, и҆ ѿ всѣ́хъ молча́нїе. Не и҆́но бо вои́стиннꙋ є҆́сть что̀ гꙋбѧ́щее ᲂу҆строе́нїе безмо́лвїѧ, и҆ бж҃е́ственнꙋю ѿ негѡ̀ ѿе́млетъ си́лꙋ, ꙗ҆́коже сі́и ше́сть ѡ҆бдє́ржныѧ стра̑сти: дерзнове́нїе, чревобѣ́сїе, многослове́сїе же и҆ молва̀: надме́нїе, и҆ влады́чица страсте́й мнѣ́нїе, въ ни́хже со ᲂу҆се́рдїемъ навы́кнꙋвый соверше́ннѣ, и҆ по преспѣ́ѧнїи па́че ѡ҆мрача́етсѧ, и҆ нечꙋ́вственъ быва́етъ. И҆ а҆́ще ᲂу҆́бѡ возни́кнетъ па́ки нача́ло положи́ти съ вѣ́рою и҆ ᲂу҆се́рдїемъ, па́ки ѡ҆брѧ́щетъ и҆ско́мое, па́че же смирѧ́ѧсѧ и҆ и҆щѧ̀. А҆́ще ли же что̀ ѿ предрече́нныхъ и҆ є҆ди́но нерадѣ́нїемъ воцари́тсѧ въ не́мъ, тогда̀ всѣ́хъ ѕѡ́лъ собо́ръ съ па́гꙋбнымъ невѣ́рствїемъ ѡ҆полчи́вшись, пꙋ́стꙋ добродѣ́телей дꙋ́шꙋ и҆ и҆спо́лненнꙋ страсте́й содѣ́ловаетъ: ꙗ҆́кѡ и҆́нъ нѣ́кїй вавѷлѡ́нскїй гра́дъ бѣсо́вскими ѡ҆пꙋстѣ́вшїй молва́ми и҆ мѧте́жми, ꙗ҆́кѡ бы́ти послѣ̑днимъ го́ршымъ пе́рвыхъ: и҆ врагꙋ̀ ꙗ҆рови́днꙋ и҆ клеветникꙋ̀, на безмо́лвствꙋющихъ быва́емꙋ, и҆ ѧ҆зы́кꙋ ꙗ҆́кѡ стрѣлѣ̀, и҆ ꙗ҆́кѡ мечꙋ̀ ѻ҆бою́дꙋ ѻ҆́стрꙋ на нѧ̀ и҆з̾ѡщрѧ́тисѧ.

р҃є. Во́ды страсте́й, и҆́миже мꙋ́тное и҆ возмꙋще́нное безмо́лвїѧ мо́ре наводнѧ́етъ дꙋ́шꙋ, нѣ́сть возмо́жно и҆на́кѡ прейтѝ, а҆́ще не на кораблѝ пра́зднѣмъ и҆ ле́гцѣмъ ѡ҆бдержа́щагѡ нестѧжа́нїѧ и҆ воздержа́нїѧ: ѿ невоздержа́нїѧ бо и҆ веществолю́бїѧ, страсте́й пото́цы зе́млю се́рдца потоплѧ́ютъ, и҆ всѧ́кꙋю нечистотꙋ̀, и҆ вещество̀ по́мыслѡвъ вне́сше въ ню̀, смꙋще́нїе ᲂу҆́бѡ ᲂу҆мꙋ̀, мѧте́жъ мы́сли, тѧ́гость тѣлесѝ творѧ́тъ, и҆ лѣ́ность и҆ мра́къ и҆ нечꙋ́вствїе въ дꙋшѣ̀ и҆ се́рдцѣ содѣва́ютъ, и҆ сво́йственное по є҆стествꙋ̀ навыкнове́нїе и҆ чꙋ́вство и҆стреблѧ́ютъ.

р҃ѕ. Ничто́же и҆́но та́кѡ сла́бꙋ, неради́вꙋ и҆ безꙋ́мнꙋ дꙋ́шꙋ подвиза́ющихсѧ твори́тъ, ꙗ҆́коже самолю́бїе, сїе́ бо вои́стиннꙋ страсте́й пита́тельница. Внегда́ бо тѣле́сное ᲂу҆спокое́нїе предпочита́етъ па́че сꙋ́щихъ ѡ҆ добродѣ́тели трꙋдѡ́въ и҆ пред̾ꙋсмотри́тельнꙋ ра́зꙋмꙋ то̀ восписꙋ́етъ, є҆́же не трꙋди́тисѧ въ дѣ́лѣхъ во́лею, па́че же ᲂу҆до́бныхъ и҆ ма́лѣхъ по́тѣхъ за́повѣдей, тогда̀ сла́бꙋ твори́тъ дꙋ́шꙋ къ прохожде́нїю безмо́лвнагѡ по́прища, и҆ безси́лїе въ дѣ́лѣхъ крѣ́пко и҆ непреѡбори́мо содѣ́ловаетъ.

р҃з. И҆зрѧ́днѣйшїй и҆ пе́рвый вра́чь ра́ди немощствꙋ́ющихъ къ за́повѣдемъ, и҆ мꙋ́тное потемнѣ́нїе ᲂу҆до́бнѡ и҆зблева́ти хотѧ́щымъ, ничто́же и҆́но є҆́сть, ꙗ҆́кѡ неразсꙋ́дное и҆ съ вѣ́рою во все́мъ послꙋша́нїе. Врачевство́ бо є҆́сть живи́тельно многосло́жнѡ ѿ добродѣ́телей пїю́щымъ, и҆ но́жъ, зна́мєнїѧ ꙗ҆́звєнныѧ є҆ди́ною ѡ҆чища́ющь, є҆́же послꙋша́нїе съ вѣ́рою и҆ простото́ю предпочти́вый па́че всѣ́хъ дѣ́йствовати, всѧ̑ стра̑сти є҆ди́ною ѿсѣчѐ: и҆ не то́чїю безмо́лвїѧ дости́гъ, но ᲂу҆жѐ то̀ и҆ послꙋша́нїемъ совершѝ, ѡ҆брѣ́тъ хрⷭ҇та̀, и҆ подража́тель є҆гѡ̀ и҆ ра́бъ, и҆ бы́въ и҆ глаго́лемь.

р҃и. Кромѣ̀ плаче́внагѡ дѣ́ланїѧ и҆ жи́тельства, невозмо́жно є҆́сть претерпѣ́ти безмо́лвїѧ ва́ра. Пла́чꙋщїй бо и҆ размышлѧ́ющїй ѡ҆ ꙗ҆̀же пре́жде сме́рти и҆ по сме́рти лю́тыхъ, пре́жде не́же са́ми ѡ҆ себѣ̀ прїи́дꙋтъ, и҆ терпѣ́нїе и҆мѣ́ти бꙋ́детъ и҆ смире́нїе, два̀ ѻ҆́наѧ безмо́лвїю ѡ҆снова́нїѧ. Кромѣ́ же предрече́нныхъ безмо́лвствꙋѧй, соѻ́бщника и҆́мать при́снѡ, нерадѣ́нїю мнѣ́нїе: ѿ ни́хже плѣнє́нїѧ и҆ парє́нїѧ ᲂу҆множа́ютсѧ, и҆ къ сла́бости на́съ спорѣва́ютъ. Ѿсю́дꙋ разлѣне́нїѧ и҆сто́чникъ невоздержа́нїе, сла́бо ᲂу҆́бѡ и҆ не́мощно содѣ́ловаетъ тѣ́ло, ᲂу҆́мъ же помраче́нъ и҆ ѡ҆жесточе́нъ твори́тъ. Тогда́ же и҆ і҆и҃съ ᲂу҆клонѧ́етсѧ, наро́дꙋ сꙋ́щꙋ помышле́нїй и҆ по́мыслѡвъ на ᲂу҆́мнѣмъ мѣ́стѣ.

р҃ѳ. Со́вѣсти мꙋчє́нїѧ ны́нѣшнїѧ и҆лѝ бꙋ́дꙋщїѧ вкꙋси́ти въ чꙋ́вствѣ всѣ̑мъ невозмо́жно. Є҆ди́нѣмъ бо тѣ̑мъ сво́йственнѣ быва́етъ, и҆̀мже сла́ва и҆ любы̀ здѣ̀ и҆лѝ та́мѡ ѡ҆скꙋдѣва́етъ. Ꙗ҆́коже бо мꙋчи́тель нѣ́кїй стра́шенъ, пови́нныхъ многоѡбра́знѣ мꙋ́чѧ, и҆ ре́вность и҆лѝ ѡ҆бличе́нїе, ꙗ҆́кѡ ме́чь ѻ҆́стръ мꙋчи́тельски ѡ҆бнажа́ѧ при́снѡ ꙗ҆влѧ́етсѧ. Треѡбра́знѡ ᲂу҆́бѡ двиза́тисѧ къ сопроти̑внымъ и҆ є҆стествꙋ̀ и҆ дꙋшѣ̀, дана̀ бы́сть со́вѣсть, глаго́лемаѧ ре́вность, ѿ и҆нѣ́хъ же є҆сте́ственнаѧ ꙗ҆́рость: ю҆́же ꙗ҆́рость, ꙗ҆́кѡ ме́чь лю́тый на врагѝ и҆з̾ѡщрѧ́ти на́мъ повелѣва́етъ, и҆ а҆́ще ᲂу҆́бѡ побѣди́вши покори́тъ два̀ та̑ є҆ди́номꙋ, ᲂу҆ста́въ мꙋ́жества тогда̀ претворѧ́емь къ бг҃ꙋ быва́етъ. А҆́ще же покори́тсѧ двѣма̀ си́ма дꙋша̀, грѣхꙋ̀, глаго́лю, и҆ пло́ти, наконе́цъ та́мѡ мꙋ́ка є҆́й неми́лостива быва́етъ, ꙗ҆́кѡ порабо́тившейсѧ самоизво́льнымъ разꙋмѣ́нїемъ сопроти́внымъ. Здѣ̀ содѣва́ющи стꙋ̑днѣйшаѧ, и҆ ꙗ҆́кѡ добродѣ́тельное ᲂу҆строе́нїе погꙋ́бльши ѿпа́даетъ, ѿлꙋчи́вшисѧ ѿ бг҃а.

р҃і. Вои́стиннꙋ, и҆з̾ всѣ́хъ страсте́й двѣ̀ сꙋ́ть жесто́цы и҆ тѧжча́йшыѧ стра̑сти: блꙋ́дъ и҆ ᲂу҆ны́нїе, и҆̀же ѡ҆блада́ѧ ѻ҆каѧ́нною дꙋше́ю, разслаблѧ́ютъ ю҆̀. Ѻ҆́бщее и҆́мꙋтъ междꙋ̀ собо́ю є҆ди́на дрꙋго́й содержа́нїе и҆ сопрѧже́нїе дрꙋ́гъ со дрꙋ́гомъ, неꙋдобопреѡбори́мы и҆ неѡдолѣ́ємы сꙋ́ть, и҆ соверше́ннѣ ѿ на́съ непобѣди́ми. И҆ и҆на́ѧ ᲂу҆́бѡ ᲂу҆множа́етсѧ въ по́хоти, ѡ҆бде́ржитъ же вещество̀ є҆стество́мъ нераздѣ́льнѣ ѻ҆бои́хъ, дꙋшѝ, глаго́лю, и҆ тѣ́ла, растворе́ннꙋ и҆мѣ́ѧ всю̀ во всѣ́хъ ᲂу҆́дѣхъ сла́сть свою̀. И҆на́ѧ же, свы́ше влады́чественное держа̀ всю̀ дꙋ́шꙋ и҆ пло́ть ꙗ҆́коже смі́лаѯъ, ѿвсю́дꙋ ѡ҆б̾е́млющи, ко́сно и҆ безси́льно и҆ разсла́бленно є҆стество̀ твори́тъ. И҆згонѧ́ютсѧ же, а҆ не соверше́ннѣ побѣжда́ютсѧ, пре́жде блаже́ннагѡ безстра́стїѧ, внегда̀ дꙋша̀ прїе́мши моли́твою дх҃а ст҃а́гѡ си́лꙋ, творѧ́щꙋю є҆́й ѿра́дꙋ и҆ крѣ́пость, и҆ ми́ръ глꙋбо́кїй въ се́рдцѣ безмо́лвїемъ весели́тсѧ. Сїѧ̀ є҆́сть нача́ло и҆ цари́ца, и҆ госпожа̀, и҆ ѡ҆бдержа́щаѧ прѡ́чїѧ сла̑сти, сла́сть, и҆ дрꙋги́нѧ є҆ѧ̀ разлѣне́нїе трїста́ты фараѡ́нѡвы, наводѧ́щаѧ непобори́мꙋю колесни́цꙋ: и҆́миже вины̑ страсте́й житїю̀ ѻ҆каѧ̑ннымъ на́мъ привнидо́ша.

ра҃і. Нача́ло ᲂу҆́мныѧ моли́твы є҆́сть дѣ́йство, си́рѣчь чисти́тельнаѧ дх҃а си́ла, и҆ та́йное ᲂу҆ма̀ сщ҃еннодѣ́йствїе: ꙗ҆́коже нача́ло безмо́лвїѧ, безпопече́нїе. Среди́на же, просвѣти́тельнаѧ си́ла и҆ видѣ́нїе. Коне́цъ же, и҆зстꙋпле́нїе и҆ восхище́нїе ᲂу҆ма̀ ко бг҃ꙋ.

рв҃і. Свѧти́лище дꙋхо́вное є҆́сть, пре́жде бꙋ́дꙋщагѡ па́че ᲂу҆ма̀ наслажде́нїѧ, ᲂу҆́мное дѣ́йство ᲂу҆ма̀ свѧщеннодѣ́йствꙋющагѡ и҆ причаща́ющагѡсѧ та́йнѡ на дꙋше́внѣмъ же́ртвенницѣ а҆́гнца во ѡ҆брꙋче́нїи бж҃їи. Ꙗ҆́сти же а҆́гнца на ᲂу҆́мнѣмъ дꙋшѝ же́ртвенницѣ, не то́чїю є҆́сть, є҆́же ᲂу҆разꙋмѣ́ти и҆лѝ причасти́тисѧ, но и҆ є҆́же бы́ти ꙗ҆́коже а҆́гнецъ по ѡ҆бразова́нїю въ бꙋ́дꙋщемъ. Здѣ̀ ᲂу҆́бѡ словеса̀, дѣла́ же та̑инъ та́мѡ воспрїѧ́ти ᲂу҆пова́емъ.

рг҃і. Въ новонача́льныхъ ᲂу҆́бѡ моли́тва є҆́сть, ꙗ҆́кѡ ѻ҆́гнь весе́лїѧ ѿ се́рдца и҆здава́емь: въ соверше́нныхъ же, ꙗ҆́кѡ свѣ́тъ благоꙋха́ющїй дѣ́йствꙋемь. И҆лѝ па́ки: мл҃тва є҆́сть, а҆по́столѡвъ проповѣ́данїе, вѣ́ры дѣ́йствїе, па́че же непосре́дственнаѧ вѣ́ра, ᲂу҆пова́емыхъ составле́нїе, дѣ́йствꙋемаѧ любы̀, а҆́гг҃льское движе́нїе, си́ла безпло́тныхъ, дѣ́ло и҆ весе́лїе и҆́хъ, благовѣствова́нїе бж҃їе, и҆звѣще́нїе се́рдца, спасе́нїѧ наде́жда, ѡ҆свѧще́нїѧ зна́менїе, свѧ́тости ѡ҆бразова́нїе, бж҃їе позна́нїе, креще́нїѧ ꙗ҆вле́нїе, ба́ни ѡ҆чище́нїе, дх҃а ст҃а́гѡ ѡ҆брꙋче́нїе, і҆и҃сово ра́дованїе, весе́лїе дꙋшѝ, ми́лость бж҃їѧ, примире́нїѧ зна́менїе, хрⷭ҇то́ва печа́ть, лꙋ́чь мы́сленнагѡ со́лнца, денни́ца серде́цъ, хрїстїа́нства ᲂу҆твержде́нїе, примире́нїѧ бж҃їѧ ꙗ҆вле́нїе, благода́ть бж҃їѧ, премꙋ́дрость бж҃їѧ, па́че же самопремꙋ́дрости нача́ло, бж҃їе ꙗ҆вле́нїе, и҆́нокѡвъ дѣ́ло, безмо́лвствꙋющихъ жи́тельство, безмо́лвїѧ вина̀, а҆́гг҃льскагѡ жи́тельства зна́менїе. И҆ что̀ мно́жайше глаго́лати; Моли́тва є҆́сть бг҃ъ, дѣ́йствꙋѧй всѧ̑ во всѣ́хъ, за є҆́же є҆ди́нꙋ бы́ти ѻ҆ц҃а̀, и҆ сн҃а, и҆ ст҃а́гѡ дх҃а дѣ́йствꙋ, дѣ́йствꙋющагѡ всѧ̑ ѡ҆ хрⷭ҇тѣ̀ і҆и҃сѣ.

рд҃і. А҆́ще мѡѷсе́й не бы̀ прїѧ́лъ ѿ бг҃а жезла̀ си́лы, не бы̀ бг҃ъ фараѡ́на ᲂу҆́бѡ и҆ є҆гѵ́пта и҆̀мъ порази́лъ: и҆ ᲂу҆́мъ а҆́ще не си́лꙋ моли́твеннꙋ въ рꙋцѣ̀ и҆мѣ́ти бꙋ́детъ, грѣ́хъ и҆ сопроти̑вныѧ си̑лы сокрꙋши́ти не возмо́жетъ.

рє҃і. Глаго́лющїи и҆лѝ творѧ́щїи что̀ кромѣ̀ смире́нїѧ, ᲂу҆подо́бишасѧ зи́ждꙋщемꙋ хра́минꙋ въ зимѣ̀, и҆лѝ без̾ бре́нїѧ. И҆скꙋ́сомъ же и҆ ра́зꙋмомъ ѡ҆брѣстѝ и҆ позна́ти смире́нїе, ѕѣлѡ̀ ма́лѣхъ є҆́сть: сло́вомъ бо ѡ҆ не́мъ повѣ́дающїи подо́бни сꙋ́ть и҆змѣрева́ющымъ бе́зднꙋ. Мы́ же слѣпі́и, ѻ҆́трочески ѡ҆ вели́цѣмъ се́мъ свѣ́тѣ ма́лѡ мечта́юще, глаго́лемъ: смире́нїе вои́стиннꙋ ни смиренносло́вїе и҆́мать, ни смиренноѡбра́зїе ꙗ҆влѧ́етъ, нижѐ мꙋ́дрствовати смирє́ннаѧ нꙋ́дитсѧ, нижѐ себѐ ᲂу҆корѧ́етъ смирѧ́ѧсѧ, а҆́ще и҆ сїѧ̑ вины̑ и҆ ѡ҆́бразы смире́нїѧ сꙋ́ть, ꙗ҆́коже разли́чнїи спо́собы, но благода́ть є҆́сть сїѐ и҆ да́ръ свы́ше. Два́ же сꙋ́ть, ꙗ҆́коже глаго́лютъ ѻ҆тцы̀, смирє́нїѧ: є҆́же непщева́ти себѐ ме́ньша всѣ́хъ, и҆ є҆́же бг҃ꙋ припи́сывати и҆справлє́нїѧ своѧ̑. И҆ пе́рвое ᲂу҆́бѡ нача́ло, второ́е же коне́цъ. Взыскꙋ́ющымъ же смире́нїѧ, съ ра́зꙋмомъ подоба́етъ и҆мѣ́ти и҆ помышлѧ́ти трѝ сїѧ̑ въ себѣ̀: є҆́же па́че всѣ́хъ человѣ̑къ грѣ́шна бы́ти, и҆ па́че всѣ́хъ тва́рей стꙋ́дна, ꙗ҆́кѡ внѣ̀ є҆стества̀ сꙋ́ща, и҆ па́че бѣсѡ́въ ѻ҆каѧ́ннѣйша, ꙗ҆́кѡ раба̀ сꙋ́ща бѣсовѡ́мъ. Глаго́лати же си́це досто́итъ: гдѣ́ бо вѣ́мъ а҆́зъ и҆звѣ́стнѡ человѣ́ческїѧ грѣхѝ, какѡвы̀ сꙋ́ть и҆ коли́цы; превосхо́дѧтъ ли и҆лѝ ра́вны сꙋ́ть мои̑мъ беззако́нїѧмъ; И҆ невѣ́жества ра́ди, ѽ дꙋшѐ! ме́ньшїи па́че всѣ́хъ человѣ̑къ є҆смы̀, ꙗ҆́кѡ землѧ̀ и҆ пе́пелъ, и҆ под̾ нога́ми и҆́хъ. Ка́кѡ же и҆ не мнѣ́ти себѐ сквернѣ́йша всѣ́хъ тва́рей, во є҆́же по є҆стествꙋ̀ сꙋ́щихъ, ꙗ҆́коже бы́ша, а҆́зъ же ра́ди безмѣ́рныхъ беззако́нїй, во є҆́же внѣ̀ є҆стества̀; Вои́стиннꙋ бо и҆ ѕвѣ́рїе и҆ ско́ти чистѣ́йшы менѐ грѣ́шнагѡ сꙋ́ть: и҆ сегѡ̀ ра́ди є҆́смь ме́ньши всѣ́хъ, ꙗ҆́кѡ во а҆́дъ и҆ пре́жде сме́рти низведы́йсѧ, низлежꙋ̀. Кто́ же не вѣ́сть въ чꙋ́вствѣ, ꙗ҆́кѡ и҆ бѣсѡ́въ го́ршїй є҆́сть грѣ́шный, ꙗ҆́кѡ ра́бъ и҆́хъ, и҆ тѣ́хъ послꙋ́шающїй, и҆ ѿсю́дꙋ съ ни́ми во тьмѣ̀ бе́здны заключе́нъ; Вои́стиннꙋ го́ршїй и҆ бѣсѡ́въ є҆́сть, ѿ ни́хъ ѡ҆блада́емый: и҆ сегѡ̀ ра́ди съ ни́ми бе́зднꙋ, дꙋшѐ, наслѣ́довала є҆сѝ ѻ҆каѧ́ннаѧ. Въ землѣ́ же и҆ а҆́дѣ и҆ бе́зднѣ пре́жде сме́рти ѡ҆бита́ѧ, ка́кѡ себѐ пра́ведна нарица́ѧ прельща́ешисѧ ᲂу҆мо́мъ, грѣ́шна сотвори́въ себѐ и҆ скве́рна и҆ бѣ́са ѕлы́ми дѣ́лы; Оу҆вы̀ прельще́нїѧ твоегѡ̀ и҆ заблꙋжде́нїѧ, ѽ ѕлобѣ́сне! псѐ нечи́сте же и҆ всескве́рне, во ѻ҆́гнь и҆ тьмꙋ̀ си́хъ ра́ди ѿсыла́емь!

рѕ҃і. Премꙋ́дрость дꙋходви́жна є҆́сть, по разсꙋжде́нїю бг҃осло́вѡвъ, си́ла ᲂу҆́мныѧ и҆ чи́стыѧ и҆ а҆́гг҃льскїѧ мл҃твы, є҆ѧ́же зна́менїе є҆́сть, є҆́же внегда̀ моли́тисѧ, ᲂу҆мꙋ̀ безви́днꙋ всѧ́чески зрѣ́тисѧ, и҆ нижѐ себѐ ни и҆́но что̀ въ дебельствѣ̀ ви́дѣти, но и҆ чꙋ́вствѡмъ мно́гажды ѿ свѣ́та ѻ҆́нагѡ сокрыва́ємымъ: ᲂу҆́мъ бо невеще́ственъ и҆ свѣтови́дѣнъ тогда̀ быва́етъ, бг҃ꙋ неизрече́ннѡ во є҆ди́нъ дꙋ́хъ прилѣплѧ́емь.

рз҃і. Се́дмь сꙋ́ть разли́чнїи ѡ҆́бразы привводѧ́щїи и҆ пꙋтево́дствꙋющїи въ то̀ бг҃ода́нное смире́нїе, составлѧ́ющїи дрꙋ́гъ дрꙋ́га и҆ ражда́ющїи: молча́нїе, смиренномꙋ́дрїе, смиренносло́вїе, смиренноѡдѣѧ́нїе, самоꙋкоре́нїе, сокрꙋше́нїе, послѣ́дность. И҆ молча́нїе ᲂу҆́бѡ въ ра́зꙋмѣ ражда́етъ смиренномꙋ́дрїе, ѿ смиренномꙋ́дрїѧ же ражда́ютсѧ трѝ ѡ҆́бразы смире́нїѧ: смирє́нна вѣща́ти, смирє́нна и҆ хꙋ́да носи́ти, и҆ себѐ всегда̀ ᲂу҆корѧ́ти. Сі́и же трѝ ѡ҆́бразы ражда́ютъ сокрꙋше́нїе, ѿ попꙋще́нїѧ и҆скꙋше́нїй быва́емое, є҆́же и҆ смотри́тельное наказа́нїе глаго́лютъ, и҆ ѿ бѣсѡ́въ смире́нїе. Сокрꙋше́нїе же ᲂу҆до́бь дѣ́ломъ твори́тъ дꙋ́шꙋ ме́ньшꙋ всѣ́хъ бы́ти и҆ послѣ́днѣйшꙋ, ꙗ҆́кѡ ѿ всѣ́хъ ѡ҆блада́емꙋ. Два́ же сі́и ѡ҆́бразы, соверше́нное и҆ бг҃ода́рное прино́сѧтъ смире́нїе, є҆́же си́лꙋ, соверше́нство всѣ́хъ добродѣ́телей нарица́ютъ: и҆ то̀ бг҃ꙋ приписꙋ́етъ и҆справлє́нїѧ. Пе́рвое всѣ̑мъ и҆ ѡ҆снова́нїе є҆́сть молча́нїе, ѿ негѡ́же ражда́етсѧ смиренномꙋ́дрїе: сїе́ же ражда́етъ трѝ ѡ҆́бразы смире́нїѧ: трїе́ же ражда́ютъ є҆ди́нъ сокрꙋше́нїѧ: а҆ ѡ҆́бразъ сокрꙋше́нїѧ ражда́етъ седьмы́й, ме́ньшїй всѣ́хъ пе́рвагѡ смире́нїѧ ѡ҆́бразъ, є҆го́же и҆ смотри́тельно смире́нїе глаго́лютъ. Смотри́тельное же прино́ситъ бг҃ода́рное и҆ соверше́нное и҆ безви́дное и҆ и҆́стинное смире́нїе. И҆ пе́рвое ᲂу҆́бѡ быва́етъ си́це: а҆́ще человѣ́къ не бꙋ́детъ ѡ҆ста́вленъ, и҆ побѣжде́нъ, и҆ ѡ҆блада́нъ, порабо́тившись всѧ́кой стра́сти и҆ по́мыслꙋ, и҆ дꙋ́хомъ побѣжда́емь, и҆ ни ѿ дѣ́лъ ѿню́дъ по́мощи не ѡ҆брѣта́ѧ, ни ѿ бг҃а, ни ѿ и҆на́гѡ когѡ̀, ꙗ҆́кѡ ма́лѡ и҆ не во ѿча́ѧнїе прїитѝ и҆скꙋша́емꙋ во всѣ́хъ, не мо́жетъ сокрꙋши́тисѧ, и҆ и҆мѣ́ти себѐ ме́ньша всѣ́хъ, и҆ послѣ́днѣйша и҆ раба̀ всѣ́хъ, и҆ са́мыхъ бѣсѡ́въ неключи́мѣйша, ꙗ҆́кѡ мꙋ́чима и҆ побѣжда́ема. И҆ сїѐ є҆́сть смотри́тельное про́мысла наказа́тельно смире́нїе, и҆́мже второ́е и҆ высо́кое ѿ бг҃а дае́тсѧ, є҆́же є҆́сть бж҃е́ственнаѧ си́ла дѣ́йствꙋющаѧ и҆ творѧ́щаѧ всѧ̑ тѣ́мъ: ѻ҆рꙋ́дїе то̀ себѣ̀ ви́дѧщи вы́нꙋ, и҆ тѣ́мъ чꙋдеса̀ бж҃їѧ дѣ́ющи.

ри҃і. Ѵ҆поста́сное свѣ́та дꙋхо́вное видѣ́нїе, ᲂу҆́мъ безмечта́теленъ и҆ не вы́сѧщїйсѧ, дѣ́йство моли́твы и҆́стинное, и҆ ѿ среды̀ се́рдца приснотекꙋ́щее, дꙋшѝ воскресе́нїе и҆ воспросте́ртїе, ᲂу҆́жасъ бж҃е́ственный, и҆ въ гѡ́рнѧѧ ше́ствїе ѿ си́хъ всѣ́хъ, и҆зстꙋпле́нїе мы́сли въ дꙋ́сѣ соверше́нно ѿ чꙋ́вствъ, восхище́нїе ᲂу҆ма̀ ѿ свои́хъ си́лъ, дꙋшѝ а҆́гг҃льское движе́нїе бг҃одви́жное, къ безконе́чномꙋ же и҆ горено́сномꙋ дви́жимо, въ ро́дѣ на́шемъ ѡ҆брѣстѝ невозмо́жно, страсте́й мꙋчи́тельствꙋ на́ми ѡ҆блада́ющꙋ ны́нѣ, мно́гихъ ра́ди и҆скꙋше́нїй. Ѡ҆бы́че бо ᲂу҆́мъ въ легча́йшихъ па́че, и҆ пре́жде вре́мени сїѧ̑ мечта́ти, ꙗ҆́кѡ да и҆ да́нное є҆мꙋ̀ ѿ бг҃а ма́лое ᲂу҆строе́нїе погꙋби́тъ, и҆ ме́ртвъ ѿ всѣ́хъ бꙋ́детъ. Тѣ́мже подоба́етъ со мно́гимъ разсꙋжде́нїемъ, ни ꙗ҆́же вре́мени пре́жде вре́мене и҆ска́ти, ни ꙗ҆́же въ рꙋкꙋ̀ ѿверга́ти, и҆́на и҆ мечта́ти. Є҆стество́мъ бо ᲂу҆́мъ вышерече́нныхъ ᲂу҆до́бь мечты̑ твори́тъ и҆ преѡбража́етъ, и҆ во ꙗ҆̀же не пред̾ꙋспѣ̀. Сегѡ̀ ра́ди нема́лъ стра́хъ є҆́сть, ꙗ҆́кѡ да не и҆ да́нныхъ таковы́й лиши́тсѧ, и҆ смы́слъ мно́гажды погꙋби́тъ прельсти́всѧ, бы́въ мечта́тель, а҆ не безмо́лвникъ.

рѳ҃і. Благода́ть нѣ́сть вѣ́ра то́чїю, но и҆ дѣ́йствꙋемаѧ моли́тва: любо́вїю бо дѣ́йствꙋемаѧ дꙋ́хомъ, вѣ́рꙋ и҆́стиннꙋ и҆мꙋ́щꙋю, живо́тъ і҆и҃совъ ꙗ҆влѧ́емь показꙋ́етъ. Тѣ́мже вѣ́рꙋ и҆́мать сопроти́внꙋ и҆ ме́ртвꙋ и҆ неживо́тнꙋ, не и҆мы́й тꙋ̀ дѣ́йствꙋющꙋ въ себѣ̀, но нижѐ вѣ́ренъ вои́стиннꙋ глаго́летсѧ, и҆́же сло́вомъ то́чїю є҆ди́нѣмъ вѣ́рꙋетъ, а҆ не дѣ́йствꙋемꙋ тꙋ̀ за́повѣдьми и҆лѝ дꙋ́хомъ и҆́мать. Достои́тъ ᲂу҆̀бо тꙋ̀ ꙗ҆влѧ́ти преспѣ́ѧнїѧми дѣ́лъ, и҆лѝ дѣ́лы дѣ́йствꙋемꙋ во свѣ́тѣ, и҆ сїѧ́ющꙋ и҆мѣ́ти, ꙗ҆́коже речѐ бж҃е́ственный а҆пⷭ҇лъ: покажи́ ми вѣ́рꙋ твою̀ ѿ дѣ́лъ твои́хъ, и҆ а҆́зъ тебѣ̀ покажꙋ̀ ѿ дѣ́лъ мои́хъ вѣ́рꙋ мою̀¹⁴¹. Ꙗ҆влѧ́ѧ си́мъ, ꙗ҆́кѡ дѣла̀ за́повѣдей показꙋ́ютъ благода́тнꙋю вѣ́рꙋ, ꙗ҆́коже дѣ́йствꙋеми сꙋ́ть за́пѡвѣди сꙋ́щею во благода́ти вѣ́рою, и҆ сїѧ́ютъ. Ко́рень бо за́повѣдей є҆́сть вѣ́ра, па́че же и҆сто́чникъ къ возраще́нїю напаѧ́ющъ сїѧ̑ за́повѣдей, раздѣлѧ́ѧсѧ на дво́е: на и҆сповѣ́данїе и҆ благода́ть, а҆́ще и҆ нераздѣ́льна є҆стество́мъ є҆́сть.

р҃к. Ма́лаѧ и҆ вели́каѧ и҆ сокраще́ннаѧ повинꙋ́ющихсѧ лѣ́ствица пѧ́ть и҆́мать степе́нїй, къ соверше́нствꙋ ведꙋ́щихъ: пе́рвый, ѿверже́нїе: вторы́й, повинове́нїе: тре́тїй, послꙋша́нїе: четве́ртый, смире́нїе: пѧ́тый, бж҃е́ственнаѧ любы̀, ꙗ҆́же є҆́сть бг҃ъ. И҆ ѿверже́нїе ᲂу҆́бѡ ѿ а҆́да возво́дитъ лежа́щаго, и҆ порабоще́ннаго ѿ вещества̀ свобожда́етъ: повинове́нїе же хрⷭ҇та̀ ѡ҆брѣта́етъ, и҆ томꙋ̀ слꙋ́житъ, ꙗ҆́коже са́мъ глаго́летъ: а҆́ще кто̀ мнѣ̀ слꙋ́житъ, мнѣ̀ да послѣ́дствꙋетъ: и҆ и҆дѣ́же є҆́смь а҆́зъ, тꙋ̀ и҆ слꙋга̀ мо́й бꙋ́детъ¹⁴². Гдѣ́ же є҆́сть хрⷭ҇то́съ; на нб҃сѣ́хъ сѣди́тъ ѡ҆деснꙋ́ю ѻ҆ц҃а̀. Тѣ́мже та́мѡ подоба́етъ бы́ти и҆ слꙋзѣ̀, и҆дѣ́же и҆ слꙋжи́мый, возводѧ́щїй но́гꙋ къ восхожде́нїю, и҆лѝ и҆ пре́жде восхожде́нїѧ ѻ҆́нѣми ѡ҆́бразы, со хрⷭ҇то́мъ восходѧ́щꙋ и҆ совоз̾идꙋ́щꙋ. Послꙋша́нїе же, дѣ́йствꙋемо за́повѣдьми, всѧ́кѡ зи́ждетъ лѣ́ствицꙋ ѿ разли́чныхъ добродѣ́телей, и҆ сїѧ̑ добродѣ́тєли, ꙗ҆́кѡ восхождє́нїѧ въ дꙋшѣ̀ полага́етъ: ѿ негѡ́же послꙋша́нїѧ высокотво́рное ражда́етсѧ смире́нїе, тꙋ̀ ѡ҆б̾е́млѧ, и҆ горѣ̀ возносѧ̀ къ небесѝ, цари́цѣ добродѣ́телей любвѝ предае́тъ, и҆ ко хрⷭ҇тꙋ̀ приводѧ̀, представлѧ́етъ. И҆ та́кѡ сокраще́нною лѣ́ствицею во и҆́стинѣ повинꙋ́ѧйсѧ, ᲂу҆до́бь на не́бо восхо́дитъ.

рк҃а. Нѣ́сть и҆на́гѡ кратча́йшагѡ пꙋтѝ, къ вы̑шнимъ черто́гамъ ма́лою лѣ́ствицею добродѣ́телей ведꙋ́щагѡ, ꙗ҆́коже ᲂу҆мерщвле́нїе пѧтѝ послꙋша́нїю сопротивлѧ́ющихсѧ страсте́й: преслꙋша́нїѧ глаго́лю, и҆ прекосло́вїѧ, самоꙋго́дїѧ же и҆ ѡ҆правда́нїѧ, и҆ па́гꙋбнагѡ мнѣ́нїѧ. Сїѧ̑ бо сꙋ́ть ᲂу҆́ди и҆ ча̑сти непокори́вагѡ бѣ́са, поглоща́ющагѡ прелюбодѣ́йчищныхъ послꙋ́шникѡвъ, и҆ ѿсыла́ющагѡ ко ѕмі́ю въ бе́зднꙋ. И҆ преслꙋша́нїе ᲂу҆́бѡ є҆́сть, а҆́дскаѧ ᲂу҆ста̀: прекосло́вїѧ же, ѧ҆зы́къ є҆гѡ̀ ꙗ҆́кѡ ме́чь ѻ҆́стръ: самоꙋго́дїе же, и҆з̾ѡщре́ннїи є҆гѡ̀ зꙋ́бы: ѡ҆правда́нїе же, горта́нь є҆гѡ̀: ѿдыха́нїе же всепожира́ющагѡ чре́ва є҆гѡ̀ є҆́сть мнѣ́нїе сопровожда́ющее ко а҆́дꙋ. И҆́же ᲂу҆́бѡ пе́рвое послꙋша́нїемъ побѣжда́ѧй, прѡ́чаѧ є҆ди́ною ѿсѣка́етъ, и҆ на нб҃са̀ є҆ди́нѣмъ степе́немъ бы́стрѣ востека́етъ! Чꙋ́до же вои́стиннꙋ, и҆ ѿ неизрече́нныхъ сꙋ́щее и҆ непостижи́мое, є҆гѡ́же и҆ чл҃вѣколю́бецъ на́шъ сотворѝ гдⷭ҇и, дабы̀ є҆ди́ною добродѣ́телїю, и҆лѝ па́че за́повѣдїю, неко́сненнѡ востещѝ на нб҃са̀, ꙗ҆́коже и҆ є҆ди́нымъ преслꙋша́нїемъ снидо́хомъ, и҆ низхо́димъ во а҆́дъ.

рк҃в. Ꙗ҆́коже и҆́нъ нѣ́кїй сꙋгꙋ́бый мі́ръ є҆́сть человѣ́къ, и҆ но́въ и҆менꙋ́етсѧ по бж҃е́ственномꙋ а҆пⷭ҇лꙋ, си́це ре́кшемꙋ: а҆́ще ка́ѧ ѡ҆ хрⷭ҇тѣ̀, нова̀ тва́рь¹⁴³. И҆́бо и҆ и҆́бо и҆ землѧ̀, и҆ всѧ̑, є҆ли̑ка сꙋ́ть мі́ръ, человѣ́къ же по добродѣ́тели быва́етъ и҆ и҆менꙋ́етсѧ: ѡ҆ не́мже всѧ́ко сло́во и҆ всѧ́ко та́инство, ꙗ҆́коже бг҃осло́въ речѐ. Поне́же бо бра́ни на́шей бы́ти не къ кро́ви и҆ пло́ти, но къ нача́лѡмъ и҆ ко властє́мъ тьмы̀ вѣ́ка сегѡ̀, къ дꙋховѡ́мъ ѕло́бы ѡ҆ нбⷭ҇ныхъ кнѧ́зѧ, воздꙋ́шнагѡ¹⁴⁴, а҆пⷭ҇лꙋ глаго́лавшꙋ. Прили́чествꙋетъ, ꙗ҆́кѡ во и҆но́мъ мі́рѣ вели́цѣ є҆стества̀ дꙋ́шъ на́шихъ си́лъ, бы́ти сопротивоборю́щымсѧ та́йнѡ съ на́ми, и҆ на трїе́хъ трїѐ кнѧ́зи подви́жникѡвъ противовостаю́ще, во́євъ ᲂу҆готовлѧ́ютъ, и҆ въ не́мже кто̀ пред̾ꙋспѣ̀, и҆ въ не́мже дѣ́лаетъ, си́ми бори́мь быва́етъ. Ѕмі́й ᲂу҆́бѡ кнѧ́зь бе́здны, противꙋсерде́чнѣ внима́ющихъ вою́ѧ, противобо́рствꙋетъ ꙗ҆́кѡ къ чреслꙋ̀ по́хоти и҆ пꙋ́па, и҆́мать крѣ́пость, и҆ сла́стнымъ и҆споли́номъ забве́нїѧ пали́тєльныѧ раждеже́нныхъ стрѣ́лъ пꙋща́етъ на нѧ̀ си̑лы, ꙗ҆́коже и҆́но мо́ре и҆ бе́зднꙋ и҆мѣ́ѧ по́хоть, захо́дитъ, пресмыка́етсѧ, возмꙋща́етъ тꙋ̀ по́хоть, и҆ распѣнѧ́етъ, и҆ возжиза́етъ, и҆ ко смѣше́нїѧмъ воспалѧ́етъ, и҆ сласте́й пото́ками наводнѧ́етъ тꙋ̀, и҆ ꙗ҆́кѡ ненасы́тнꙋ не насыща́етъ. Кнѧ́зь же мі́ра сегѡ̀, къ проходѧ́щымъ дѣ́ѧтельнꙋю добродѣ́тель, сопротивлѧ́етсѧ, и҆ къ ꙗ҆́ростной ча́сти борьбꙋ̀ и҆мѣ́ѧ, лѣ́ности и҆споли́номъ, всѧ́чєскаѧ страсте́й ѕлохи̑трства ꙗ҆́кѡ въ и҆но́мъ мі́рѣ, и҆лѝ позо́рищѣ же и҆ по́прищѣ боре́нїе ᲂу҆́мнѣ твори́тъ, побѣжда́етъ при́снѡ съ ни́мъ мꙋ́жественнѡ борю́щихсѧ, и҆лѝ побѣжда́етсѧ, и҆ вѣнцє́въ и҆лѝ стꙋда̀ пред̾ а҆́гг҃лы тѣ́мъ вино́венъ быва́етъ, и҆ полкѝ своѧ̑ на ны̀ вы́нꙋ воѡрꙋжа́ѧ, съ ни́ми ра́тꙋетсѧ. Кнѧ́зь же воздꙋ́ха, на тща́щихсѧ мы́слїю къ прѣ́нїю нахо́дитъ: мечта́нїѧми видѣ́нїе ᲂу҆ма̀ и҆спытꙋ́етъ, къ слове́сной и҆ ᲂу҆́мной ча́сти приближа́ѧсѧ съ воздꙋ́шными дꙋ́хи лꙋка́вствїѧ, и҆ неразꙋ́мїѧ и҆споли́номъ, возница́тельнꙋю мы́сль ꙗ҆́кѡ и҆но́е слове́сное не́бо возмꙋща́етъ: мечта́тєльныѧ же ꙗ҆влѧ́ѧ мглѧ̑ныѧ дꙋхѡ́въ ѡ҆́бразы и҆ преѡбражє́нїѧ преле́стнѣ, ꙗ҆́коже мѡ́лнїи и҆ гро́мы, бꙋ̑ри и҆ звꙋ́ки, страхова́нїе наво́дитъ. Кі́йждо комꙋ́ждо, си́рѣчь тремѝ къ трича́стномꙋ дꙋшѝ приража́ѧсѧ, сопротивлѧ́етсѧ, и҆ къ ко́ей ча́сти бра́нь и҆́мать, къ то́й и҆ по́двигъ стѧжава́етъ.

рк҃г. Оу҆мы́ бо нѣ́когда сꙋ́щїи и҆ ті́и, и҆ безвеще́ствїѧ ѻ҆́нагѡ и҆ то́нкости ѿпа́дше, веще́ственнꙋю нѣ́кꙋю дебе́лость кі́йждо и҆́мать, по чи́нꙋ и҆лѝ дѣ́йствꙋ втѣлесева́емь, по немꙋ́же дѣ́йствꙋ ᲂу҆ка́чествисѧ: поне́же бо и҆ ті́и, подо́бнѣ человѣ́кꙋ, а҆́гг҃льскꙋю сла́дость погꙋ́бльше, наслажде́нїѧ бж҃е́ственнагѡ лиши́шасѧ, и҆ въ пе́рсти, ꙗ҆́коже и҆ мы̀, наслажде́нїе и҆́мꙋтъ, веще́ственни нѣ́какѡ и҆ ті́и бы́вше веще́ственныхъ страсте́й навыкнове́ньми. И҆ чꙋди́тисѧ не досто́итъ, поне́же и҆ на́ша дꙋша̀, создана̀ бы́вши по ѡ҆́бразꙋ бж҃їю, слове́сна же и҆ ᲂу҆́мна, не позна́вши же бг҃а, ско́тна содѣ́ласѧ и҆ нечꙋ́вственна, и҆ ма́лѡ небезꙋ́мна веще́ственныхъ дѣ́лъ наслажде́ньми: ѡ҆бы́че бо навыкнове́нїе претворѧ́ти є҆стество̀, и҆ и҆змѣнѧ́ти дѣ́йство къ произволе́нїю. И҆ні́и же ле́гцы и҆ то́нцы, ꙗ҆́кѡ воздꙋ́шнїи дꙋ́си сꙋ́ще, зрѣ́нїе дꙋшѝ развлека́ютъ вѣ́тры нѣ̑кїѧ бꙋ́рны и҆ мечта̑нїѧ наводѧ̀, ѻ҆вогда̀ и҆ во а҆́гг҃лы преѡбразꙋ́ютсѧ, прельща́ютъ дꙋ́шꙋ, па̑мѧти видотворѧ́тъ, зна́емыхъ нѣ́кїихъ преѡбразꙋ́ѧ и҆ превраща́ѧ всѧ́кое дꙋхо́вное видѣ́нїе, па́че же въ подвиза́ющихсѧ є҆щѐ пре́жде чистоты̀ и҆ разсꙋжде́нїѧ дꙋхо́внагѡ. Ничто́же бо є҆́сть дꙋхо́вно, въ не́же не преѡбразꙋ́ютсѧ ѻ҆́тай, ꙗ҆́коже по мечта́нїю. И҆ ті́и бо воѡрꙋжа́ютсѧ проти́вꙋ ᲂу҆строе́нїѧ и҆ мѣ́ры предспѣ́ѧнїѧ, пре́лесть вмѣ́стѡ и҆́стины, и҆ мечта̑нїѧ вмѣ́стѡ видѣ́нїѧ приводѧ́ще вно́сѧтъ.

рк҃д. Воста́нїе страсте́й и҆ воздвиза́ющаѧсѧ плотска́ѧ бра́нь на дꙋ́шꙋ, пѧтьмѝ ѡ҆́бразы въ на́съ прихо́дитъ. Ѻ҆вогда̀ ᲂу҆́бѡ пло́ть ѕлоꙋпотреблѧ́ющи сꙋ̑щаѧ, ѻ҆вогда́ же внѣесте́ствєннаѧ, ꙗ҆́кѡ по є҆стествꙋ̀, взыскꙋ́етъ дѣ́ѧти: ѻ҆вогда́ же и҆ ѿ бѣсѡ́въ воѡрꙋжа́етсѧ на дꙋ́шꙋ, ꙗ҆́кѡ сла́дцѣ содрꙋ́жествꙋѧ си̑мъ: и҆ногда́ же дꙋша̀ ѿ сладостра́стїѧ преднавыкнове́ннагѡ и҆ сама̀ ѡ҆ себѣ̀ безчи́нствꙋетъ, ꙗ҆́кѡ вка́чествившаѧсѧ страстьмѝ: послѣди́ же быва́етъ бра́нь и҆ ѿ за́висти бѣсѡ́въ, по попꙋще́нїю сопротивлѧ́ющихсѧ на́мъ смире́нїѧ ра́ди, є҆гда̀ не ᲂу҆спѣ́ютъ во всѣ́хъ предрече́нныхъ.

рк҃є. Пе́рвѣйшыѧ же вины̑ бра́ни трѝ сꙋ́ть, ѿ всѣ́хъ и҆ всѣ́ми на́мъ пребыва́ющыѧ: ѕлоꙋпотребле́нїе сꙋ́щихъ, за́висть и҆ бра́нь бѣсѡ́въ, ꙗ҆́же по попꙋще́нїю. А҆ є҆́же востава́ти, и҆ вожделѣ́ти пло́ти на дꙋ́шꙋ, и҆ дꙋшѣ̀ на пло́ть, то́йжде ѡ҆́бразъ по навыкнове́нїю и҆ дѣ́йствꙋ и҆́мꙋтъ плѡтскі́ѧ на дꙋ́шꙋ стра̑сти, и҆ дꙋшє́вныѧ проти́вꙋ пло́ти борє́нїѧ. И҆ са́мъ же сꙋпоста́тъ и҆ногда̀ без̾ разсмотрѣ́нїѧ и҆ вины̀, ꙗ҆́кѡ безстꙋ́денъ, дерза́ѧ проти́вꙋ на́съ ра́тꙋетъ. Не да́ждь ᲂу҆́бѡ, ѽ дрꙋ́же, пїѧ́вицѣ ꙗ҆́кѡ кровора́дꙋющейсѧ и҆зсыса́ти крѡ́вныѧ жи̑лы, и҆ не и҆́мать блева́ти кро́вь: нижѐ пе́рсти попꙋска́й въ сы́тость ѕмі́ю и҆ драко́нꙋ, и҆ ᲂу҆до́бь попере́ши горды́ню льва̀ и҆ ѕмі́ѧ. Воздыха́й, до́ндеже совле́кшисѧ ѻ҆блече́шисѧ въ вы́шнее жи́тельство, и҆ ѡ҆бразова̑нїѧ по ѡ҆́бразꙋ созда́вшагѡ тѧ̀, і҆и҃са хрⷭ҇та̀.

рк҃ѕ. Вои́стиннꙋ, и҆̀же са́мымъ дѣ́ломъ пло́ть сꙋ́щїи и҆ самолю́бїемъ влеко́ми, сла́сти и҆ тщесла́вїю при́снѡ рабо́таютъ, въ ни́хже за́висть ᲂу҆корени́сѧ: печа́лїю бо та́ѧ, и҆ бли́жнѧгѡ благополꙋ́чїемъ ѡ҆горча́ѧсѧ, ѡ҆блыга́ютъ дѡ́браѧ ꙗ҆́кѡ ѕла̑ѧ, и҆ пре́лести сꙋ́щаѧ порождє́нїѧ, ни ꙗ҆̀же сꙋ́ть дх҃а, прїе́млютъ и҆лѝ вѣ́рꙋютъ, ни бг҃а ᲂу҆вѣ́дѣти и҆лѝ позна́ти маловѣ́рїемъ свои́мъ мо́гꙋтъ. Такові́и, по ѡ҆слѣпле́нїю своемꙋ̀ и҆ маловѣ́рїю, впра́вдꙋ та́мѡ ᲂу҆слы́шатъ: є҆́же не вѣ́мъ ва́съ¹⁴⁵. Вѣ́рномꙋ бо вопроша́ющемꙋ подоба́етъ и҆лѝ вѣ́ровати, ꙗ҆̀же не вѣ́дѧше, слы́ша и҆лѝ ᲂу҆чи́тисѧ, и҆̀мже вѣ́рꙋетъ, и҆лѝ ᲂу҆чи́ти, ꙗ҆̀же ᲂу҆вѣ́дѣ, и҆ ᲂу҆множа́ти незави́стнѣ въ воспрїе́млющихъ вѣ́рнѣ тала́нтъ. А҆́ще ли же не вѣ́рꙋетъ, ꙗ҆̀же не вѣ́сть, и҆ ᲂу҆ничижа́етъ, ꙗ҆̀же не ᲂу҆вѣ́дѣ, и҆ ᲂу҆́читъ, и҆̀мже не наꙋчи́сѧ, клеве́ща на ᲂу҆ча́щихъ си̑мъ дѣ́ѧтельнѣ, бꙋ́детъ ча́сть є҆гѡ̀ всѧ́кѡ со и҆мꙋ́щими же́лчь го́рести въ наказа́нїе.

рк҃з. Вѣті́й є҆́сть, по мнѣ́нїю и҆́стиннѡ премꙋ́дрыхъ, и҆́же кра́ткѡ ѻ҆́бщимъ вѣ́жествомъ сꙋ̑щаѧ ѡ҆б̾е́млетъ, и҆ ꙗ҆́кѡ є҆ди́но тѣ́ло и҆ раздѣлѧ́етъ та̑ и҆ совокꙋплѧ́етъ, ꙗ҆влѧ́ѧ сїѧ̑ ꙗ҆́кѡ є҆диноси́льна принѧ̑таѧ въ и҆́накомъ и҆ то́мъ же смы́слѣ: и҆лѝ и҆́же пои́стиннѣ доказа́теленъ глаго́летсѧ. И҆лѝ па́ки, вѣті́й є҆́сть вои́стиннꙋ дꙋхо́венъ, и҆́же раздѣлє́ннаѧ собѡ́рнаѧ сꙋ́щихъ ѻ҆́бщаѧ свѡ́йства, ꙗ҆̀же вочл҃вѣ́чившеесѧ сло́во совокꙋпи́ло, раздѣлѧ́етъ и҆ соединѧ́етъ ѡ҆б̾ѧ́тнымъ сло́вомъ ка́чественнагѡ гла́са: ꙗ҆́кѡ вѣті́й не то́чїю ѡ҆б̾е́млетъ всѐ є҆ди́нымъ доказа́тельнымъ сло́вомъ, по внѣ́шности показꙋ́ѧ и҆нѣ̑мъ та̑, но ѿ ꙗ҆влѧ́ющихсѧ є҆мꙋ̀ дꙋ́хомъ сꙋ́щихъ видѣ́нїй и҆ дрꙋги́хъ просвѣти́ти мо́жетъ. И҆́стинный же любомꙋ́дрецъ є҆́сть, и҆́же ѿ сꙋ́щихъ винꙋ̀ сꙋ́щихъ вѣ́дый, и҆лѝ ѿ вины̀ сꙋ̑щаѧ познава́ѧй, по соедине́нїю вы́ше ᲂу҆ма̀ и҆ непосре́дственнѣй вѣ́рѣ бы́сть любомꙋ́дръ, не то́чїю навы́къ бж҃е́ствєннымъ, но и҆ прїѧ́въ та̑. И҆лѝ па́ки: и҆́стинный любомꙋ́дрецъ є҆́сть, дѣ́йствꙋющїй и҆ зри́тельнѣ жи́тельствꙋющїй ᲂу҆́мъ. Соверше́ннѣ же ᲂу҆́мъ любомꙋ́дрый є҆́сть, и҆́же нра́вственное и҆ є҆сте́ственное и҆ бг҃осло́вное и҆спра́ви любомꙋ́дрїе, па́че же бг҃олю́бїе, и҆ нра́вственнагѡ ᲂу҆́бѡ любомꙋ́дрїѧ дѣѧ́нїѧмъ, є҆сте́ственнагѡ же словесє́мъ, бг҃осло́вскагѡ же видѣ́нїѧ и҆ догма́тѡвъ правотѣ̀ ѿ бг҃а и҆зꙋчи́лсѧ є҆́сть. И҆лѝ па́ки: въ бж҃е́ственныхъ бж҃е́ственный вѣті́й є҆́сть, и҆́же и҆́стиннѡ сꙋ̑щаѧ ѿ сꙋ́щихъ и҆лѝ ѿ не сꙋ́щихъ раздѣлѧ́етъ, и҆ словеса̀ ᲂу҆́бѡ ѻ҆́нѣхъ ѿ си́хъ показꙋ́етъ, и҆ ѿ си́хъ ѻ҆́нѣхъ ѡ҆боже́ннѣйше зри́тъ словеса̀: и҆ ѡ҆ мы́сленномъ ᲂу҆́бѡ мі́рѣ и҆ неви́димомъ, ѿ чꙋ́вственнагѡ и҆ ви́димагѡ, ѡ҆ чꙋ́вственномъ же и҆ ви́димомъ, ѿ неви́димагѡ и҆ мы́сленнагѡ сказꙋ́етъ, ѡ҆ ви́димомъ ꙗ҆́кѡ ѡ҆́бразѣ неви́димагѡ, ѡ҆ неви́димомъ же ꙗ҆́кѡ первоѡбра́зномъ ви́димагѡ. Предположи́сѧ бо, глаго́летъ, невоѡбраже́нныхъ ѡ҆́бразы, ѡ҆бразова̑нїѧ неѡбразꙋ́емыхъ, ꙗ҆́кѡ ѡ҆ не́мъ семꙋ̀, и҆ си̑мъ ѡ҆ не́мъ ꙗ҆влѧ́тисѧ дх҃о́внѣ, и҆ ꙗ҆́вѣ ѻ҆дномꙋ̀ дрꙋга́го дрꙋ́гъ въ дрꙋ́зѣ зрѣ́ти, и҆ ꙗ҆вле́нна и҆́стины сло́вомъ твори́ти, не возводѧ́щими и҆лѝ и҆носказа́тельными словесы̑ назида́ти, подо́бнѣ со́лнцꙋ сїѧ́ющїй ра́зꙋмъ и҆́стины, но вѣ́дѣнїемъ и҆ си́лою дх҃о́вною и҆з̾ѧсни́ти, пока́зоваѧ ꙗ҆вле́ннѣйше и҆́стины словеса̀ ѻ҆бои́хъ мїрѡ́въ. Ꙗ҆́кѡ семꙋ̀ ᲂу҆́бѡ пѣ́стꙋномъ на́шимъ бы́ти, ѻ҆́номꙋ же вѣ́чнымъ бж҃е́ственнымъ до́момъ на́съ ра́ди ꙗ҆́вственнѣ бы́вшꙋ. Любомꙋ́дрецъ же бж҃е́ственный є҆́сть, и҆́же дѣѧ́нїемъ и҆ видѣ́нїемъ несре́дственнѣ соедини́выйсѧ бг҃ꙋ, и҆ дрꙋ́гъ томꙋ̀ є҆́сть и҆ глаго́летсѧ, ꙗ҆́кѡ пе́рвꙋю и҆ тво́рческꙋю и҆ и҆́стиннꙋю премꙋ́дрость возлюби́въ, па́че всѧ́кагѡ и҆на́гѡ дрꙋ́жества и҆ премꙋ́дрости и҆ ра́зꙋма. Любосло́вецъ же є҆́сть, а҆ не и҆́стиннѡ любомꙋ́дрецъ, а҆́ще и҆ сла́ва любомꙋ́дрїѧ и҆́мѧ ѻ҆́тай ᲂу҆сво́и, ꙗ҆́коже речѐ вели́кїй григо́рїй. И҆́же премꙋ́дрость творе́нїѧ бж҃їѧ и҆ лю́битъ и҆ и҆спытꙋ́етъ, по послѣ́днемꙋ и҆зглаше́нїю: но ѡ҆бꙋча́етсѧ любомꙋ́дрїю семꙋ̀ не похвалы̀ и҆ сла́вы ра́ди человѣ́ческїѧ показа́тельнѣ, ꙗ҆́кѡ да невеществолю́бецъ бꙋ́детъ и҆ не любомꙋ́дрецъ є҆стествосло́вныѧ бж҃їѧ премꙋ́дрости. Кни́жникъ же є҆́сть, и҆́же въ ца́рствїи бж҃їи наꙋчи́выйсѧ, всѧ́къ, и҆́же дѣѧ́нїемъ въ видѣ́нїи ѡ҆ бз҃ѣ трꙋжда́етсѧ, и҆ въ безмо́лвїи претерпѣва́етъ, и҆́же и҆зно́ситъ ѿ серде́чнагѡ своегѡ̀ сокро́вища нѡ́ваѧ и҆ вє́тхаѧ, си́рѣчь є҆ѵⷢ҇льскаѧ и҆ проро́чєскаѧ, и҆лѝ ѿ но́вагѡ и҆ ве́тхагѡ завѣ́та, и҆лѝ поꙋчи́тєльнаѧ и҆ дѣ́ѧтєльнаѧ, и҆лѝ закѡ́ннаѧ и҆ а҆пⷭ҇льскаѧ. Сїѧ̑ бо сꙋ́ть нѡ́ваѧ и҆ вє́тхаѧ та̑инства, ꙗ҆̀же дѣ́ѧтельный кни́жникъ и҆зно́ситъ, въ бг҃оꙋго́дномъ наꙋчи́всѧ жи́тельствѣ. Кни́жникъ па́ки є҆́сть, всѧ́къ дѣ́ѧтельный, є҆щѐ тѣле́снѣ въ дѣ́ланїѧхъ ᲂу҆пражнѧ́ѧсѧ. Вѣті́й же бж҃е́ственный є҆́сть, и҆́же є҆сте́ственнѣ средѝ стои́тъ къ ра́зꙋмамъ и҆ словесє́мъ сꙋ́щихъ и҆ доказꙋ́етъ всѧ̑ въ дꙋ́сѣ раздѣли́тельною сло́ва си́лою. Любомꙋ́дрецъ же и҆́стинный є҆́сть, и҆́же преесте́ственное бж҃їе соедине́нїе вѣ́домѣ и҆ непосре́дственнѣ въ себѣ̀ и҆́мать.

рк҃и. И҆̀же кромѣ̀ дх҃а пи́шꙋще же и҆ глаго́люще, и҆ це́рковь созида́ти хотѧ́ще, сꙋ́ть дꙋше́вни, ꙗ҆́кѡ и҆́же нѣ́гдѣ глаго́летъ бж҃е́ственный а҆пⷭ҇лъ, дх҃а не и҆мꙋ́ще¹⁴⁶. Такові́и бо пови́нни сꙋ́ть клѧ́твѣ глаго́лющей: го́ре, и҆̀же мꙋ́дри въ себѣ̀ сами́хъ, и҆ пред̾ собо́ю разꙋ́мни! ѿ себе́ бо глаго́лютъ, а҆ не дх҃ъ бж҃їй въ ни́хъ є҆́сть глаго́лѧй¹⁴⁷, по гдⷭ҇ню словесѝ. Ѿ свои́хъ бо пѡ́мыслъ пре́жде чистоты̀ глаго́лющїи прельсти́шасѧ дꙋ́хомъ мнѣ́нїѧ. Ѡ҆ се́мъ бо при́тча глаго́летъ: ви́дѣхъ мꙋ́жа непщева́вша себѐ мꙋ́дра бы́ти, ᲂу҆пова́нїе же и҆́мать безꙋ́мный па́че є҆гѡ̀¹⁴⁸. И҆ є҆́же: не быва́йте мꙋ́дри ѡ҆ себѣ̀¹⁴⁹. Премꙋ́дрость на́мъ заповѣ́даетъ. Но и҆ са́мъ и҆спо́лненный дх҃а бж҃е́ственный а҆пⷭ҇лъ и҆сповѣ́дꙋетъ, глаго́лѧ: Не бо̀ дово́льни є҆смы̀ ѿ себѐ помы́слити что̀, ꙗ҆́кѡ ѿ себѐ, но дово́льство на́ше ѿ бг҃а¹⁵⁰. И҆ є҆́же: но ꙗ҆́кѡ ѿ бг҃а пред̾ бг҃омъ, ѡ҆ хрⷭ҇тѣ̀ глаго́лемъ¹⁵¹. Таковы́хъ бо словеса̀ несла́дѡстны и҆ непросвѣщє́нны, не ѿ жива́гѡ бо и҆сто́чника дх҃а прїе́млюще глаго́лютъ, но ꙗ҆́кѡ ѿ нѣ́коегѡ є҆́зера тиме́нна, ѿ се́рдца и҆мꙋ́щагѡ и҆ пита́ющагѡ пїѧ́вицъ и҆ ѕмі́й, и҆ жа́бъ по́хотей и҆ киче́нїѧ, и҆ невоздержа́нїѧ, и҆ вода̀ ра́зꙋма и҆́хъ смердѧ́ща, мꙋ́тна же и҆ теплохла́дна, ѿ неѧ́же пїю́щїи на недꙋгова́нїе и҆ гнꙋ́сность и҆ блева́нїе премѣнѧ́еми ѡ҆браща́ютсѧ.

рк҃ѳ. Тѣ́ло хрⷭ҇то́во мы̀ є҆смы̀, глаго́летъ бж҃е́ственный а҆пⷭ҇лъ, и҆ ᲂу҆́ди ѿ ча́сти¹⁵². И҆ па́ки: є҆ди́но тѣ́ло, є҆ди́нъ дх҃ъ є҆́сть, ꙗ҆́коже и҆ зва́ни бы́сте¹⁵³. Ꙗ҆́коже бо тѣ́ло без̾ дꙋ́ха мертво̀ є҆́сть¹⁵⁴ и҆ нечꙋ́вственно, си́це ᲂу҆мертви́выйсѧ страстьмѝ за́повѣдей небреже́нїемъ по креще́нїи, недѣ́йственъ быва́етъ, и҆ непросвѣще́нъ ст҃ы́мъ дх҃омъ, и҆ бл҃года́тїю хрⷭ҇то́вою. И҆́мать ᲂу҆́бѡ дꙋ́ха вѣ́рою и҆ па́ки рожде́нїемъ, недѣ́йственна и҆ недви́жительна ра́ди дꙋше́вныѧ ме́ртвенности. Ꙗ҆́коже бо и҆ дꙋша̀ є҆ди́на є҆́сть, ᲂу҆́ди же тѣле́сни мно́зи, и҆ всѧ̑ та̑ дꙋша̀ держи́тъ, и҆ животвори́тъ и҆ дви́жетъ прїе́млющее жи́знь: а҆ ꙗ҆̀же по нѣ́коей слꙋча́йной не́мощи ᲂу҆вѧ́дшыѧ ᲂу҆́ди, ꙗ҆́кѡ мє́ртвы и҆ неподви̑жны, а҆́ще и҆ но́ситъ въ себѣ̀, ѻ҆ба́че неживѡ́тны и҆ нечꙋ́вствєнны. Си́це ве́сь во всѣ́хъ несмѣ́шаннѣ хрⷭ҇то́выхъ ᲂу҆десѣ́хъ є҆́сть хрⷭ҇то́въ дх҃ъ, дѣ́йствꙋѧй и҆ животворѧ́й причаща́тисѧ живота̀ могꙋ́щыѧ, но и҆ не могꙋ́щыѧ причаща́тисѧ немощны̑ѧ, человѣколю́бнѣ ꙗ҆́кѡ своѧ̑ ѡ҆бде́ржитъ. Тѣ́мже и҆ всѧ́къ вѣ́рный прича́стенъ ᲂу҆́бѡ є҆́сть вѣ́рою сыноположе́нїѧ дх҃о́внагѡ, недѣ́йственъ же быва́етъ и҆ непросвѣще́нъ, ме́ртвостїю страсте́й и҆ небреже́нїемъ и҆ невѣ́рїемъ, лиша́емь свѣ́та и҆ жи́зни і҆и҃совы. Ꙗ҆́кѡ всѧ́къ вѣ́рный є҆́сть ᲂу҆́дъ хрⷭ҇то́въ, и҆ дх҃а хрⷭ҇то́ва и҆́мать. Недѣ́йственъ же и҆ неподви́женъ ко прича́стїю благода́ти, неключи́мь.

р҃л. Ѻ҆́смь собо́рныхъ видѣ́нїй глаго́лемъ бы́ти: пе́рвое, є҆́же бг҃а безви́дна и҆ безнача́льна, и҆ несозда́нна, и҆ всѣ́хъ вины̀, трⷪ҇цы є҆ди́ныѧ, и҆ пресꙋ́щественна бж҃ества̀. Второ́е, ᲂу҆́мныхъ си́лъ чи́на и҆ ᲂу҆строе́нїѧ. Тре́тїе, сꙋ́щихъ составле́нїѧ. Четве́ртое, смотри́тельнагѡ сло́ва снисхожде́нїѧ. Пѧ́тое, всеѻ́бщагѡ воскресе́нїѧ. Шесто́е, стра́шнагѡ и҆ втора́гѡ хрⷭ҇то́ва прише́ствїѧ. Седьмо́е, вѣ́чнагѡ мꙋче́нїѧ. Ѻ҆сьмо́е, црⷭ҇твїѧ нбⷭ҇нагѡ. И҆ четы́ре ᲂу҆́бѡ преше́дшихъ и҆ бы́вшихъ сꙋ́ть, четы́ре же бꙋ́дꙋщихъ, и҆ не ᲂу҆̀ ꙗ҆влѧ́ющихсѧ: ви̑дима же сїѧ̑ сꙋ́ть ꙗ҆́внѣ, и҆ ѡ҆брѣта́ютсѧ ᲂу҆ стѧжа́вшихъ бл҃года́тїю мно́гꙋю ᲂу҆ма̀ чистотꙋ̀. Кромѣ́ же свѣ́та къ си̑мъ пристꙋпа́ѧй да вѣ́сть, мечта̑нїѧ воѡбража́ти, а҆ не видѣ̑нїѧ, мечта́тельнымъ дꙋ́хомъ мечта́емь и҆ мечта́ѧ.

рл҃а. Сѐ и҆ ѡ҆ пре́лести нꙋ́жно по си́лѣ рещѝ, ꙗ҆́кѡ сꙋ́щей мно́зѣмъ, по многоко́зненной и҆ многоѡбра́знѣй є҆ѧ̀ подса́дѣ, неꙋдобьразꙋмѣва́емой, и҆ вма́лѣ непости́жнѣй. Пре́лесть, глаго́летсѧ, во двою̀ ѡ҆́бразꙋ ꙗ҆влѧ́етсѧ, и҆лѝ па́че нахо́дитъ и҆ прибыва́етъ по мечта́нїю и҆ дѣ́йствꙋ, а҆́ще и҆ ѿ є҆ди́ныѧ го́рдости нача́ло и҆́мать и҆ винꙋ̀. И҆ пе́рваѧ ᲂу҆́бѡ нача́ло вторы́ѧ: втора́ѧ же, нача́ло, ꙗ҆́же по и҆зстꙋпле́нїю, тре́тїѧ є҆́сть. Нача́ло бо сꙋ́щаго по мечта́нїю видѣ́нїѧ, мнѣ́нїе, є҆́же бж҃е́ственное ꙗ҆́кѡ ѡ҆́бразъ нѣ́кїй мечта́тисѧ твори́тъ, ѿ негѡ́же мнѣ́нїѧ послѣ́дꙋетъ ꙗ҆́же по мечта́нїю къ заблꙋжде́нїю пре́лесть, є҆́юже хꙋле́нїе ражда́етсѧ, съ ни́миже по мечта́нїю быва́ющаѧ пре́лесть ражда́етъ страхова́нїе безмѣ́стныхъ ме́чтъ, и҆ во бдѣ́нїи и҆ во снѣ̀, є҆́же тре́петъ и҆ колеба́нїе дꙋшѝ нарица́ютъ. Го́рдости во послѣ́дꙋетъ пре́лесть, пре́лести хꙋла̀, хꙋ́лѣ страхова́нїе, страхова́нїю тре́петъ, тре́петꙋ же и҆зстꙋпле́нїе по є҆стествꙋ̀ сꙋ́щагѡ смы́сла. Се́й є҆́сть, є҆́же по мечта́нїю, пре́лести пе́рвый ѡ҆́бразъ, по дѣ́йствꙋ же вторы́й. Нача́ло бо и҆́мать чрез̾ сладостра́стїе, ѿ є҆сте́ственнагѡ похотѣ́нїѧ ражда́емо. Ѿ сла́сти бо ражда́етсѧ неꙋдержа́нїе неизглаго́ланныхъ нечисто́тъ: разгрѣва́ѧ бо то̀ всѐ є҆стество̀, и҆ возмꙋти́въ влады́чественное привидѣ́нїй сочета́нїемъ, во и҆зстꙋпле́нїе ᲂу҆́мъ приво́дитъ, пїѧ́нствомъ пали́тельнагѡ дѣ́йства къ безꙋ́мїю є҆го̀ приводѧ̀, и҆ прорица́ти твори́тъ лжепроро́чествїе, прорица́ющее а҆́ки видѣ̑нїѧ ст҃ы́хъ нѣ́кїихъ, и҆ словеса̀ ѻ҆́нѣхъ чрез̾ него̀ ѿкрыва́ющее, ᲂу҆пи́вшасѧ твори́тъ ѡ҆мраче́нїемъ стра́сти, и҆ нра́въ премѣ́ненъ и҆ бѣснова́тъ. Кова́рствомъ пре́лести води́мїи, въ мі́рѣ таковы́хъ дꙋ̑шицы нарица́ютъ, и҆̀же присѣдѧ́тъ и҆ пребыва́ютъ во хра́мѣ ст҃ы́хъ нѣ́кїихъ. И҆ ꙗ҆́кѡ си́рѣчь дꙋ́хи ѡ҆бдержи́ми, и҆ ѿ сами́хъ и҆́хъ дѣ́йствꙋеми и҆ мꙋ́чими, и҆ чрез̾ ни́хъ лю́дѧмъ провозглаша́ютъ: и҆̀хже бѣснꙋ́ющимисѧ па́че и҆ заблꙋ́ждшими, и҆ пре́лести порабоще́нными нарица́ти досто́итъ, а҆ не проро́ки и҆ предглаго́лющими настоѧ̑щаѧ и҆ бꙋ̑дꙋщаѧ. Са́мъ бо блꙋ́дный бѣ́съ, помрачи́въ и҆́хъ ᲂу҆́мъ сла́стнымъ ѻ҆гне́мъ, во и҆зстꙋпле́нїе приво́дитъ смы́слѡвъ, ꙗ҆влѧ́ѧ и҆̀мъ въ мечта́нїи ст҃ы́хъ нѣ́кїихъ, и҆ бесѣ̑ды и҆ видѣ̑нїѧ показꙋ́ѧ. И҆ногда́ же и҆ са́ми ѻ҆́нїи бѣ́сове ꙗ҆влѧ́ютсѧ, страхова́нїемъ смꙋти́ти тѣ́хъ. И҆́гомъ бо велїа́ровымъ ѡ҆тѧгчи́въ тѣ́хъ, ко грѣхꙋ̀, и҆́же по дѣ́йствꙋ, нꙋ́дѧ порѣва́етъ, и҆ ꙗ҆́кѡ рабѡ́въ и҆́мать пре́данныхъ да́же до сме́рти, въ мꙋ́кꙋ и҆мы́й препосла́ти.

рл҃в. Подоба́етъ вѣ́дати, ꙗ҆́кѡ пре́лесть трѝ первонача̑льныѧ вины̑ и҆́мать, и҆́миже нахо́дитъ на человѣ́ки: ѿ го́рдости, ѿ за́висти бѣсо́вскїѧ, и҆ ѿ наказа́тельнагѡ попꙋще́нїѧ. Си́хъ же вины̑ сꙋ́ть: го́рдости ᲂу҆́бѡ ле́гкость, преспѣ́ѧнїю же за́висть: наказа́тельномꙋ же попꙋще́нїю, грѣхо́вное житїѐ. И҆ ѿ за́висти ᲂу҆́бѡ, и҆ є҆ди́нагѡ мнѣ́нїѧ ско́рое и҆́мать и҆сцѣле́нїе, па́че же є҆гда̀ смири́тсѧ человѣ́къ. А҆ є҆́же ѿ наказа́нїѧ грѣха̀ ра́ди сатанѣ̀ преда́нїе, мно́жицею да́же до сме́рти бг҃ъ попꙋща́етъ ѻ҆́ное свои́мъ ѡ҆ставле́нїемъ. И҆ногда̀ и҆ непови̑ннымъ мꙋ́читисѧ ко спасе́нїю попꙋща́етъ. Вѣ́дати же подоба́етъ, ꙗ҆́кѡ и҆ са́мъ то́й мнѣ́нїѧ бѣ́съ предглаго́летъ въ невнима́ющихъ до́брѣ своемꙋ̀ се́рдцꙋ.

рл҃г. Всѝ благочести́вїи сщ҃е́нницы и҆ ца́рїе и҆́стиною помазꙋ́ютсѧ во ѡ҆бновле́нїи, ꙗ҆́коже и҆ дре́внїи тогда̀ по проѡбразова́нїю. Ѡ҆́бразы бо ѻ҆́ныѧ бы́ша на́шей и҆́стинѣ не ѿ ча́сти, но всѝ на́съ всѣ́хъ назна́меновахꙋ. Не бо̀ по ѻ҆́нѣмъ ѡ҆бразова́нїѧмъ на́ше ца́рство и҆ сщ҃е́нство подобоѡбра́зно є҆́сть и҆ є҆динови́дно, а҆́ще и҆ сꙋ́ть ті́иже ѡ҆́бразы: нижѐ распредѣлѧ́етъ на́ми є҆стество̀ разли́чїѧ пома́занныхъ, и҆лѝ благода́ть и҆ зва́нїе къ пома́занїю, но є҆ди́ное и҆ то́жде зва́нїе и҆ вѣ́рꙋ и҆ пома́занїе и҆ ѡ҆бразова́нїе и҆́мамы. Показꙋ́етъ же и҆ ꙗ҆влѧ́етъ по сло́вꙋ и҆́стины чи́стое и҆ безстра́стное, и҆ всего̀ ѡ҆сщ҃е́нна бы́ти бг҃ꙋ, ны́нѣ же и҆ въ бꙋ́дꙋщемъ вѣ́цѣ.

рл҃д. Тогда̀ глаго́летъ ᲂу҆сты̀ премꙋ́дрость и҆ поꙋче́нїемъ се́рдца ра́зꙋмъ, и҆́же бг҃а сло́ва, и҆ ѻ҆ц҃а̀ ѵ҆поста́снꙋю премꙋ́дрость ꙗ҆́снѡ ѿ сꙋ́щихъ ꙗ҆влѧ́етъ, ꙗ҆́кѡ словеса̀ первоѡбра́зныхъ въ сꙋ́щихъ начертава́ющыѧ и҆мы́й, и҆ дѣ́йствомъ живꙋ́щагѡ сло́ва, премꙋ́дрость ѿ премꙋ́дрости ᲂу҆сты̀ глаго́летъ: се́рдцемъ же ѡ҆сїѧва́емъ си́лою претвори́тельнагѡ ра́зꙋма, поꙋча́емагѡ дꙋ́хомъ, твори́ти и҆ просвѣща́ти мо́жетъ ра́зꙋмъ вѣ́рнѡ слы́шащыѧ.

рл҃є. Вели́каѧ и҆́стинѣ противобо́рница и҆ къ поги́бели влекꙋ́щаѧ дне́сь человѣ́ки пре́лесть, є҆́юже неразꙋ́мїе тьмы̀, въ дꙋша́хъ лѣ́ностныхъ воцари́сѧ, ѿчꙋжди́вши и҆̀хъ ѿ бг҃а. И҆ ᲂу҆̀бо невѣ́дꙋщїи бы́ти бг҃а, породи́вшаго ны̀ и҆ просвѣти́вшаго, и҆лѝ сло́вомъ є҆ди́нѣмъ то́чїю вѣ́рꙋема и҆ познава́ема, а҆ не дѣ́ломъ, и҆лѝ дрє́внимъ є҆ди́нѣмъ ꙗ҆влѧ́ема, а҆ не и҆ на́мъ, и҆ свидѣ́тєльства ѡ҆ бз҃ѣ писа́нїй и҆нѣ́мъ, а҆ не и҆зре́кшымъ восписꙋ́етъ, и҆ сла́вꙋ, ꙗ҆́коже глаго́летъ писа́нїе, ѡ҆ бз҃ѣ, хꙋ́лѧтъ¹⁵⁵. Позна́нїе же благоче́стїѧ всѧ́кѡ ѿмета́ѧ, и҆ тѣле́снѣ то́чїю, да не рекꙋ̀ і҆ꙋде́йски, чтꙋ́тъ писа̑нїѧ, и҆лѝ и҆ познава́ютъ: воскресе́нїѧ же ра́ди дꙋшѝ ѿсю́дꙋ воста́нїе ѿме́щꙋще, при́снѡ во гробѣ́хъ вселѧ́тисѧ неразꙋ́мнѣ жела́ютъ. Трѝ сїѧ̑ стра̑сти сꙋ́ть: невѣ́рїе, лꙋка́вство и҆ разлѣне́нїе: ражда́ютъ же и҆ соде́ржатъ дрꙋ́гъ дрꙋ́га. Невѣ́рїе бо лꙋка́вствїю ᲂу҆чи́тель, лꙋка́вство же сопꙋ́тникъ разлѣне́нїю, є҆гѡ́же соверше́ннаѧ лѣ́ность є҆́сть зна́менїе. И҆лѝ па́ки: разлѣне́нїе лꙋка́вства роди́тель, ꙗ҆́коже речѐ гдⷭ҇ь: лꙋка́вый ра́бе и҆ лѣни́вый¹⁵⁶! лꙋка́вство же ѻ҆те́цъ невѣ́рїю, всѧ́къ во лꙋка́вый невѣ́ренъ. Невѣ́рꙋѧй же и҆ небг҃обоѧ́зливъ є҆́сть: ѿ негѡ́же разлѣне́нїе ражда́етсѧ, ма́ти презрѣ́нїю, и҆́мже всѧ́кое благо́е небреже́тсѧ, и҆ всѧ́кое ѕло̀ содѣва́етсѧ.

рл҃ѕ. И҆́стиннаѧ ѡ҆ бз҃ѣ сла́ва, и҆ ра́зꙋмъ сꙋ́щихъ нело́женъ, соверше́нное догма́тѡвъ правосла́вїе составлѧ́ютъ. Тѣ́мже и҆ славосло́вити таковы́й си́це до́лженъ є҆́сть: сла́ва тебѣ̀, хрⷭ҇тѐ бж҃е на́шъ, сла́ва тебѣ̀! ꙗ҆́кѡ на́съ ра́ди вочл҃вѣ́чилсѧ є҆сѝ, бг҃ъ сло́во пресꙋ́щественное. Сегѡ̀ ра́ди вели́ко є҆́сть та́инство смотре́нїѧ твоегѡ̀, сп҃се на́шъ, сла́ва тебѣ̀!

рл҃з. Списꙋ́емыхъ ᲂу҆́бѡ слове́съ, по вели́комꙋ маѯі́мꙋ, сꙋ́ть трѝ разли́чнїи ѡ҆́бразы, незазо́рные же и҆ нижѐ ѡ҆сꙋжде́нїѧ достѡ́йны. Пе́рвый, па́мѧти ра́ди своеѧ̀: вторы́й, по́льзы ра́ди дрꙋги́хъ: тре́тїй, послꙋша́нїѧ ра́ди пи́шемый, и҆́мже и҆ премнѡ́гаѧ ѿ писа́нїй сложи́шасѧ ра́ди смире́ннѣ взыскꙋ́ющихъ сло́во. А҆́ще же кто̀ ᲂу҆гожде́нїѧ ра́ди и҆ сла́вы, и҆ показа́нїѧ ра́ди добродѣ́телей списꙋ́етъ, ѿстои́тъ, глаго́летъ, мзды̀ своеѧ̀, нико́еѧ здѣ̀ и҆мѣ́ѧ по́льзы, и҆лѝ мзды̀ въ бꙋ́дꙋщемъ вѣ́цѣ, но ꙗ҆́кѡ человѣкоꙋго́дникъ и҆ льсте́цъ корче́мствꙋѧ сло́во бж҃їе, ѡ҆сꙋжде́нъ бꙋ́детъ.

а҃. Всѧ́къ крести́выйсѧ во хрⷭ҇та̀ до́лженъ є҆́сть доспѣ́ти всѣ́хъ ѡ҆ хрⷭ҇тѣ̀ превозраще́нїй: предпрїѧ́лъ бо є҆́сть си́хъ си́лꙋ, и҆ посре́дствомъ за́повѣдей ѡ҆брѣстѝ сїѧ̑, и҆ навы́кнꙋти мо́жетъ. Зача́тїе ᲂу҆́бѡ є҆́сть, ѡ҆брꙋче́нїе дꙋ́ха: рожде́нїе же дѣ́йство ра́дованїѧ: креще́нїе же, чисти́тельнаѧ дꙋхо́внагѡ ѻ҆гнѧ̀ си́ла: преѡбраже́нїе же, бж҃е́ственнагѡ свѣ́та видѣ́нїе: распѧ́тїе же, є҆́же ѿ всѣ́хъ ᲂу҆мерщвле́нїе: погребе́нїе, хране́нїе въ се́рдцѣ бж҃е́ственнагѡ раче́нїѧ: воскресе́нїе, животво́рное дꙋшѝ воста́нїе: вознесе́нїе же, є҆́же къ бг҃ꙋ и҆зстꙋпле́нїе и҆ восхище́нїе ᲂу҆ма̀. Не ѡ҆брѣ́тшїй же сїѧ̑ и҆ не ѡ҆щꙋти́вшїй, младе́нецъ є҆щѐ є҆́сть и҆ тѣ́ломъ и҆ дꙋ́хомъ, а҆́ще и҆ сѣ́дъ є҆́сть, и҆ дѣ́ѧтельнымъ ѿ всѣ́хъ почита́етсѧ.

в҃. Стрⷭ҇ти хрⷭ҇тѡ́вы животво́рное и҆́мꙋтъ ᲂу҆мерщвле́нїе въ терпѧ́щихъ всѧ̑, а҆́ще во состра́ждемъ и҆ спросла́вимсѧ. Стра̑сти же сласте́й смертотво́рное ᲂу҆мерщвле́нїе и҆́мꙋтъ въ дѣ́йствꙋющихъ ѻ҆́ныѧ. Стрⷭ҇те́й бо хрⷭ҇то́выхъ во́льное страда́нїе, распѧ́тїѧ є҆́сть распѧ́тїе, и҆ ᲂу҆мерщвле́нїѧ ᲂу҆мерщвле́нїе.

г҃. Страда́ти ѡ҆ хрⷭ҇тѣ̀ є҆́сть, є҆́же терпѣ́ти и҆мꙋ̑щаѧ приключа́тисѧ. За́висть бо непови̑ннымъ къ по́льзѣ є҆́сть: ѡ҆бличе́нїе же ко ѡ҆браще́нїю, наказа́нїе гдⷭ҇не ѿверза́етъ на́мъ ᲂу҆шеса̀ пови́ннымъ сꙋ́щымъ: тѣ́мже и҆ вѣне́цъ терпѧ́щымъ ѡ҆бѣща́лъ є҆́сть гдⷭ҇ь во вѣ́къ вѣ́ка. Сла́ва тебѣ̀, бж҃е на́шъ, сла́ва тебѣ̀! Трⷪ҇це ст҃а́ѧ, всѣ́хъ ра́ди сла́ва тебѣ̀.

Ѡ҆ стра́стнѣмъ и҆змѣне́нїи.

д҃. Оу҆ны́нїе, неꙋдобопреѡбори́маѧ сꙋ́щи стра́сть ѡ҆слаблѧ́етъ тѣ́ло, ѡ҆слаблѧ́емꙋ же тѣ́лꙋ, ѡ҆слаблѧ́етсѧ и҆ дꙋша̀: ѻ҆бои̑мъ же разслабѣ́вшымъ, и҆змѣнѧ́ютъ сладостра́стїемъ растворе́нїе тѣле́сное: сладостра́стїе же дви́жетъ похотѣ́нїе: похотѣ́нїе, раждеже́нїе: раждеже́нїе, воста́нїе: воста́нїе дви́жетъ па́мѧть: па́мѧть, мечта́нїе: мечта́нїе, прило́гъ: прило́гъ, сочета́нїе: сочета́нїе, сосложе́нїе: сосложе́нїе же твори́тъ дѣѧ́нїе и҆лѝ тѣ́ломъ, и҆лѝ многоѡбра́зными прикоснове́ньми. И҆ та́кѡ человѣ́къ побѣжде́нъ бы́въ па́даетъ.

Ѡ҆ бла́зѣмъ и҆змѣне́нїи.

є҃. Терпѣ́нїе во всѧ́комъ дѣ́лѣ ражда́етъ мꙋ́жество: мꙋ́жество же, ᲂу҆се́рдїе: ᲂу҆се́рдїе же, пожда́нїе: пожда́нїе, протѧже́нїе: протѧже́нїе дѣ́ла, си́рѣчь приложе́нїе ᲂу҆толѧ́етъ неꙋдержа́нїе тѣле́сное, и҆ по́хѡти сладостра́стїѧ ᲂу҆кроща́етъ: похотѣ́нїе же дви́жетъ жела́нїе: жела́нїе, любо́вь: любы̀, ре́вность: ре́вность теплотꙋ̀: теплота̀, возбꙋжде́нїе: возбꙋжде́нїе, тща́нїе: тща́нїе, моли́твꙋ: мл҃тва, безмо́лвїе: безмо́лвїе ражда́етъ ᲂу҆мозрѣ́нїе: ᲂу҆мозрѣ́нїе, ра́зꙋмъ: ра́зꙋмъ, постиже́нїе та́инствъ: коне́цъ же та́инствъ, бг҃осло́вїе: пло́дъ же бг҃осло́вїѧ, соверше́ннаѧ любы̀: любви́ же, смире́нїе: смире́нїѧ, безстра́стїе: безстра́стїѧ, прозрѣ́нїе, и҆ проро́чество, и҆ пред̾ꙋвѣ́дѣнїе. Не бо̀ и҆́мать кто̀ совершє́нныѧ ѿсю́дꙋ добродѣ́тєли, нижѐ є҆ди́ною ᲂу҆малѧ́етъ ѕло́бы, но пома́лꙋ возраща́емѣй добродѣ́тели, пома́лꙋ и҆ ѕло́ба въ не сꙋ́щее прихо́дитъ.

Ѡ҆ безмо́лвїи и҆ моли́твѣ, є҆ще́ же и҆ ѡ҆ зна́менїѧхъ благода́ти и҆ пре́лести: и҆ ко́е є҆́сть разли́чїе теплоты̀ и҆ дѣ́йства, и҆ ꙗ҆́кѡ без̾ наста́вника пре́лестїю ᲂу҆до́бнѡ побѣжда́емсѧ, гла́въ і҃.

а҃. Подоба́ше ᲂу҆́бѡ на́мъ рещѝ, по вели́комꙋ ᲂу҆чи́телю, ꙗ҆́кѡ непотре́бна по́мощь ѿ писа́нїй и҆лѝ ѿ и҆нѣ́хъ ѻ҆тє́цъ. ѽ знаменоно́сне ло́ггїне! но си́це бы́ти бг҃онаꙋчє́ннымъ: бꙋ́дꙋтъ бо, глаго́летъ писа́нїе, всѝ наꙋче́ни бг҃омъ¹⁵⁷, ꙗ҆́кѡ ѿ негѡ̀ и҆ тѣ́мъ. вѣ́дѣти же и҆ наꙋча́тисѧ полє́знаѧ, не то́чїю мы̀ сподо́бихомсѧ, но и҆ кі́йждо ѿ вѣ́рныхъ, ꙗ҆́кѡ зако́нъ дх҃а на скрижа́лѣхъ серде́цъ на́шихъ начерта́нъ носи́ти, и҆ непосре́дственнѣ и҆ херꙋві́мски, є҆́же ᲂу҆дивле́нїѧ досто́йно, чи́стою въ се́рдцѣ моли́твою бесѣ́довати со і҆и҃сомъ. Но поне́же младе́нцы є҆смы̀ во вре́мѧ па́ки созда́нїѧ, нижѐ благода́ть разꙋмѣ́юще, ни ѡ҆бновле́нїѧ созира́юще, нижѐ па́че вѣ́дѧще превосходѧ́щее вели́чества, че́сти же и҆ сла́вы, є҆́йже прїѡбщи́хомсѧ, и҆ ꙗ҆́кѡ до́лжни є҆смы̀ за́повѣдьми возрасти́тисѧ дꙋше́внѣ и҆ дꙋхо́внѣ, и҆ ᲂу҆ви́дѣти ᲂу҆́мнѣ, є҆́же прїѧ́хомъ: па́даемъ мно́зїи въ нечꙋ́вство и҆ помраче́нїе небреже́нїемъ и҆ стра́стнѣйшимъ навыкнове́нїемъ. И҆ нижѐ а҆́ще є҆́сть бг҃ъ, вѣ́мы, нижѐ что̀ є҆смы̀, и҆лѝ каковы̀ бы́хомъ сы́нове бж҃їи, и҆ сы́нове свѣ́та, ча̑да и҆ ᲂу҆́ди хрⷭ҇тѡ́вы. А҆́ще же и҆ мꙋ́жи сꙋ́ще креща́емсѧ, ѻ҆ба́че въ водѣ̀ то́чїю, а҆ не и҆ дꙋ́хомъ ѡ҆щꙋща́емъ. А҆́ще же и҆ дꙋ́хомъ ѡ҆бновлѧ́емсѧ, вѣ́рꙋемъ просто́ю вѣ́рою ме́ртвою, а҆ не дѣ́йствꙋемою, и҆ во двоедꙋ́шїи быва́ти глаго́лемъ: и҆ та́кѡ са́мою ве́щїю пло́ть сꙋ́ще, и҆ пло́тски живе́мъ и҆ хо́димъ. А҆́ще же и҆ ка́емсѧ, тѣле́снѣ то́чїю, а҆ не дꙋхо́внѣ за́пѡвѣди твори́мъ и҆ познава́емъ. А҆́ще же и҆ мно́гихъ ра́ди трꙋдѡ́въ человѣколю́бнѣ сподо́битъ нѣ́кихъ благода́ть ꙗ҆вле́нїѧ, ꙗ҆́кѡ пре́лесть тꙋ̀ прїе́млемъ. А҆́ще же и҆ въ дрꙋги́хъ дѣ́йствꙋемꙋ благода́ть ᲂу҆слы́шимъ, ꙗ҆́кѡ пре́лесть ѻ҆́нꙋю за́висти ра́ди вмѣнѧ́емъ. И҆ та́кѡ ме́ртви пребыва́емъ да́же до сме́рти, не ѡ҆ хрⷭ҇тѣ̀ живѧ̀ и҆ не дѣ́йствꙋѧ, и҆ є҆́же и҆́мамы, по писа́нїю, во вре́мѧ и҆схо́да и҆лѝ сꙋда̀, невѣ́рїѧ ра́ди и҆лѝ ѿча́ѧнїѧ ѿи́метсѧ ѡ҆ на́съ¹⁵⁸, не разꙋмѣва́ѧ, ꙗ҆́кѡ по ѻ҆ц҃ꙋ̀ подоба́етъ и҆ ча́дѡмъ бо́зѣмъ бы́ти ѿ бг҃а, и҆ дꙋхѡ́внымъ ѿ дх҃а, рожде́нное бо, глаго́летъ писа́нїе, ѿ дꙋ́ха, дꙋ́хъ є҆́сть¹⁵⁹: мы́ же пло́ть є҆смы̀, а҆́ще и҆ вѣ́рни и҆ небе́сни бы́вше, сегѡ̀ ра́ди дх҃ъ бж҃їй не пребыва́етъ въ на́съ. И҆ сегѡ̀ ра́ди попꙋстѝ гдⷭ҇ь наведє́нїѧ и҆ плѣнє́нїѧ, и҆ заколє́нїѧ ᲂу҆мно́жи, ѿсѣщѝ хотѧ̀ ѕло́бꙋ, и҆лѝ спастѝ крѣ́пльшими врачевства́ми.

в҃. И҆ пе́рвѣе ᲂу҆́бѡ рещѝ подоба́етъ, бг҃ꙋ даю́щꙋ глаго́лъ благовѣствꙋ́ющымъ сицева̑ѧ блага̑ѧ, ка́кѡ ѡ҆брѧ́щетъ кто̀, па́че же ѡ҆брѣ́тено бы́сть, є҆́же и҆́мать, и҆лѝ прїѧ́тъ хрⷭ҇та̀ креще́нїемъ въ дс҃ѣ, по а҆пⷭ҇лꙋ па́ѵлꙋ: и҆лѝ не зна́ете себѐ, ꙗ҆́кѡ і҆и҃съ хрⷭ҇то́съ живе́тъ въ сердца́хъ ва́шихъ;¹⁶⁰ глаго́летъ писа́нїе. Пото́мъ же и҆ ка́кѡ пред̾ꙋспѣ́ти, по си́хъ же и҆ ка́кѡ ѡ҆брѣ́тенное сохрани́ти. И҆зѧ́щнѣйшїй бо и҆ кра́ткїй ѡ҆́бразъ, рещѝ ѡ҆ кра́йнихъ со средо́ю сокраще́ннѣ, мно́гꙋю и҆мꙋ́щихъ широтꙋ̀. Занѐ мно́зи по́двигомъ подвиза́шасѧ, доне́лѣже ѡ҆брѣто́ша и҆ско́мое, и҆ до сегѡ̀ жела́нїе своѐ простро́ша, въ прє́днѧѧ же не и҆́дꙋтъ, нижѐ пекꙋ́тсѧ ѡ҆ си́хъ, дово́льни сꙋ́ще то́чїю, є҆́же въ нача́лѣ ѡ҆брѣто́ша: запе́ншесѧ же и҆ ѻ҆́тай распꙋ́тїемъ ше́дше, до́брѣ ше́ствовати мнѧ́тъ, и҆ без̾ прїѡбрѣ́тенїѧ во́дѧтсѧ внѣꙋ́дꙋ сегѡ̀. Ѻ҆́вїи же дости́гше среды̀ просвѣще́нїѧ, къ концꙋ̀ разлѣни́вшесѧ ѡ҆слабѣ́ша, и҆лѝ вспѧ́ть неради́вымъ житїе́мъ возврати́вшесѧ новонача́льнїи содѣ́лашасѧ. Ѻ҆́вїи же дости́гше соверше́нства, невнима́нїемъ па́даютъ ѿ мнѣ́нїѧ, и҆ вспѧ́ть возвраща́ютсѧ, и҆ дѣ́лы и҆ срє́днимъ и҆ новонача̑льнымъ ра́вни быва́ютъ. Новонача́льныхъ же и҆ сре́днихъ и҆ соверше́нныхъ є҆́сть, ѻ҆́вѣхъ ᲂу҆́бѡ дѣ́йство: ѻ҆́вѣхъ же, просвѣще́нїе: ѻ҆́вѣхъ же, ѡ҆чище́нїе дꙋшѝ, и҆лѝ воскресе́нїе.

Ѡ҆ є҆́же ка́кѡ ѡ҆брѣстѝ дѣ́йство.

г҃. Двѣма̀ ѡ҆́бразы прїѡбрѣта́етсѧ дѣ́йство дх҃а, є҆́же въ креще́нїи та́инственнѣ прїѧ́хомъ. И҆ вопе́рвыхъ ѻ҆́бще рещѝ, дѣ́ланїемъ за́повѣдей, мно́гимъ трꙋдо́мъ и҆ вре́менемъ да́ръ се́й ѿкрыва́етсѧ, ꙗ҆́коже ма́ркъ ст҃ы́й глаго́летъ. И҆ є҆ли́кѡ и҆сполнѧ́емъ за́пѡвѣди, потоли́кꙋ ꙗ҆вле́ннѣе возсїѧва́етъ на́мъ своѧ̑ зари̑. Второ́е, хꙋдо́жественнымъ и҆ ча́стымъ призыва́нїемъ гдⷭ҇а і҆и҃са, си́рѣчь па́мѧтїю бж҃їею ꙗ҆влѧ́етсѧ въ повинове́нїи. И҆ ѿ пе́рвагѡ ᲂу҆́бѡ жи́тельства коснѣ́е: ѿ втора́гѡ же скорѣ́е, а҆́ще и҆ навыкнове́нїемъ ѡ҆брѧ́щетъ болѣ́зненнѣ и҆ терпѣли́внѣ, копа́ѧ зе́млю и҆ и҆зыскꙋ́ѧ зла́то. А҆́ще ᲂу҆́бѡ хо́щемъ непреле́стнѣ ѡ҆брѣстѝ и҆́стинꙋ, и҆ позна́ти ю҆̀, потщи́мсѧ серде́чно то́чїю и҆мѣ́ти дѣ́йство, безви́дно всѧ́чески, невоѡбраже́нно, и҆ нижѐ зра́къ и҆лѝ ѡ҆́бразъ а҆́кибы ст҃а́гѡ мечта́тельнѣ созерца́ти, нижѐ свѣ́ты зрѣ́ти: ѡ҆бы́че бо пре́лесть въ нача́лѣ па́че прельща́ти ᲂу҆́мъ неискꙋ́сныхъ таковы́ми ло́жными мечта́ньми. Но то́чїю дѣ́йство моли́твы въ се́рдцѣ дѣ́йствꙋющее и҆мѣ́ти потщи́мсѧ, согрѣва́ющо ᲂу҆́мъ и҆ веселѧ́що, и҆ къ неизрече́ннѣй любвѝ бж҃їей и҆ человѣ́честѣй распалѧ́ющо дꙋ́шꙋ. Тѣ́мже и҆ смире́нїе и҆ сокрꙋше́нїе нема́ло тогда̀ ѿ мл҃твы быва́етъ: поне́же моли́тва въ новонача́льныхъ є҆́сть приснодви́жимое ᲂу҆́мное дѣ́йство ст҃а́гѡ дх҃а. Въ нача́лѣ ᲂу҆́бѡ ꙗ҆́кѡ ѻ҆́гнь весе́лїѧ, ѿ се́рдца прозѧба́емь: въ концѣ́ же, ꙗ҆́коже свѣ́тъ благоꙋха́ющъ дѣ́йствꙋемь.

д҃. Въ нача́лѣ же зна́мєнїѧ и҆́щꙋщымъ ѻ҆́нꙋю и҆́стинꙋ, а҆ не ꙗ҆́кѡ и҆скꙋша́ющымъ сꙋ́ть такова̑, ꙗ҆́коже сама̀ премꙋ́дрость вѣща́етъ: Ѡ҆брѣта́етсѧ не и҆скꙋша́ющымъ є҆гѡ̀: ꙗ҆влѧ́етсѧ же не невѣ́рꙋющымъ є҆мꙋ̀.¹⁶¹ Въ и҆нѣ́хъ ᲂу҆́бѡ ꙗ҆́кѡ свѣ́тъ возсїѧва́етъ. въ и҆нѣ́хъ же ра́дованїе тре́петно: въ дрꙋги́хъ же ра́дость, въ и҆нѣ́хъ же совокꙋ́пнѣ ра́дость и҆ стра́хъ: въ и҆нѣ́хъ же тре́петъ и҆ ра́дость, въ ѻ҆́вѣхъ же, и҆ногда̀ и҆ сле́зы и҆ стра́хъ. Ра́дꙋетсѧ ᲂу҆́бѡ дꙋша̀ посѣще́нїю и҆ ми́лости бж҃їей, бои́тсѧ же и҆ трепе́щетъ прише́ствїѧ є҆гѡ̀, ꙗ҆́кѡ пови́нна во грѣсѣ́хъ мно́зѣхъ. Оу҆ ѻ҆́выхъ же па́ки въ нача́лѣ быва́етъ сокрꙋше́нїе неизрече́нное, и҆ болѣ́знь дꙋшѝ неизглаго́ланнаѧ: Болѣ́знꙋетъ бо ꙗ҆́кѡ ражда́ющаѧ и҆ болѧ́щаѧ, по писа́нїю.¹⁶² Жи́во бо сло́во и҆ дѣ́йственно, си́рѣчь і҆и҃съ прохо́дитъ, ꙗ҆́коже а҆пⷭ҇лъ глаго́летъ, до раздѣле́нїѧ дꙋши́ же и҆ дꙋ́ха, членѡ́въ же и҆ мозгѡ́въ, ꙗ҆́кѡ да стра́стное и҆ста́етъ всѧ́чески ѿ всѣ́хъ часте́й дꙋшѝ и҆ тѣ́ла.¹⁶³ Во и҆нѣ́хъ же любо́вь и҆ ми́ръ ко всѣ̑мъ нера́тꙋемый зри́тсѧ: въ дрꙋги́хъ же ра́дованїе, є҆́же и҆ взыгра́нїе мно́гими ѡ҆́бразы ѻ҆тцы̀ реко́ша, дꙋ́ха сꙋ́щи си́ла и҆ се́рдца жи́ва движе́нїе. Сїе́ же и҆ скака́нїе и҆ воздыха́нїе дх҃а нарица́етсѧ, неизглаго́ланнѣ ѡ҆ на́съ хода́тайствꙋющагѡ къ бг҃ꙋ. Во́лнꙋ же сїѐ пра́вды бж҃їѧ и҆са́їа и҆менова̀, и҆ боде́нїе вели́кїй є҆фре́мъ: Гдⷭ҇ь же и҆сто́чникъ воды̀ текꙋ́щїѧ въ живо́тъ вѣ́чный.¹⁶⁴ Во́дꙋ же дх҃ъ и҆менова̀ ска́чꙋщꙋю въ се́рдцѣ; и҆ кипѧ́щꙋю си́лою ѕѣ́льною.

є҃. Вѣ́дѣти досто́итъ, ꙗ҆́кѡ взыгра́нїе, си́рѣчь возра́дованїе, два̀ разли̑чїѧ и҆́мать. Є҆ди́но є҆́сть тихоѡбра́зное, є҆́же и҆ бїе́нїе и҆ воздыха́нїе, и҆ хода́тайство дх҃а глаго́летсѧ: и҆ вели́кое се́рдца, є҆́же и҆ взыгра́нїе и҆ скака́нїе глаго́летсѧ, се́рдца жи́ва къ бж҃е́ственномꙋ воздꙋ́хꙋ воспротѧже́нное летѣ́нїе. Ѿ бж҃е́ственнагѡ бо дх҃а воскрилѧ́ема раче́нїемъ, и҆ ѿ ᲂу҆́зъ страсте́й ѡ҆свобожда́емаѧ дꙋша̀, къ гѡ́рнимъ и҆ пре́жде и҆схо́да возлетѣ́ти тщи́тсѧ, жела́ѧ тѧготы̀ разрѣши́тисѧ. Сїе́ же и҆ возмꙋще́нїе дх҃а, и҆лѝ воскипѣ́нїе и҆ движе́нїе глаго́летсѧ, по є҆́же: І҆и҃съ же возмꙋти́сѧ дх҃омъ, подви́гсѧ си́лою, и҆ речѐ: гдѣ̀ положи́сте є҆го̀;¹⁶⁵

ѕ҃. Подоба́етъ же вѣ́дати, ꙗ҆́кѡ бж҃е́ственный стра́хъ тре́пета не и҆́мать. Ѡ҆ тре́петѣ же глаго́лю, не и҆́же ѿ ра́дости происхо́дитъ, но и҆́же ѿ гнѣ́ва, си́рѣчь наказа́нїѧ и҆ ѡ҆ставле́нїѧ: но тре́петное ра́дованїе, є҆́же ѿ мл҃твы, во ѻ҆гнѣ̀ бж҃е́ственнагѡ стра́ха приходѧ́що. Стра́хъ же не тре́петный, и҆́же ѿ гнѣ́ва си́рѣчь мꙋ́ки, но ѿ премꙋ́дрости, и҆́же и҆ нача́ло премꙋ́дрости глаго́летсѧ.¹⁶⁶ Раздѣлѧ́етсѧ же стра́хъ троѧ́кѡ, а҆́ще и҆ двоѧ́кѡ ѻ҆тцы̀ реко́ша: на стра́хъ вво́дный, соверше́нный, та́же и҆ гнѣ́вный, є҆го́же и҆ тре́петъ вои́стиннꙋ досто́итъ зва́ти, си́рѣчь колеба́нїе и҆ сокрꙋше́нїе.

з҃. Тре́петъ же разли̑чїѧ и҆́мать многоѡбра́зна: и҆́нъ є҆́сть гнѣ́ва, и҆́нъ ра́дости, и҆ и҆́нъ ꙗ҆́рости, и҆ и҆́нъ и҆́же ѿ ста́рости, и҆ дрꙋгі́й, и҆́же ѿ грѣха̀, си́рѣчь пре́лести. Ѻ҆ба́че подви́жника въ нача́лѣ ра́тꙋетъ тре́петъ, и҆́же ѿ ра́дости, и҆ и҆́же ѿ грѣха̀: но не всѣ̑мъ же си́це быва́етъ. Зна́мєнїѧ же ѻ҆бою̀ сꙋ́ть: є҆ди́нагѡ ᲂу҆̀бо тре́петное ра́дованїе во мно́зѣ весе́лїи и҆ слеза́хъ, бл҃года́ть ᲂу҆тѣша́етъ дꙋ́шꙋ. Дрꙋга́гѡ же нестро́йна теплота̀ и҆ киче́нїе и҆ жестокосе́рдїе распалѧ́етъ дꙋ́шꙋ, и҆ разжиза́етъ сочета́тельныѧ ᲂу҆́ды, и҆ къ сплете́нїю тѣлесѝ и҆ любвѝ мечта́нїемъ внꙋ́трь въ соизволе́нїи твори́тъ стꙋдодѣѧ́нїе.

и҃. Вѣ́мы сꙋгꙋ́бꙋ бы́ти дѣ́йствїю всѧ́комꙋ новонача́льномꙋ, и҆ сꙋгꙋ́бѡ дѣ́йствꙋемꙋ въ се́рдцѣ и҆ несмѣ́снѣ. Ѻ҆́вꙋ ᲂу҆́бѡ ѿ благода́ти, ѻ҆́вꙋ же ѿ пре́лести, ꙗ҆́коже свидѣ́тельствꙋетъ вели́кїй ма́ркъ подви́жникъ, си́це глаго́лѧ: Є҆́сть дѣ́йство дх҃о́вное, и҆ є҆́сть дѣ́йство сатанино̀, младе́нцꙋ невѣ́домо. И҆ па́ки вѣ́мы тро́йственной бы́ти теплотѣ̀ дѣ́йства, въ человѣ́цѣхъ воспалѧ́емой: и҆но́й бы́ти ѿ бл҃года́ти, и҆но́й ѿ пре́лести, си́рѣчь грѣха̀, и҆ и҆но́й ѿ ᲂу҆множе́нїѧ кро́ви, є҆́же и҆ растворе́нїе а҆фрїка́нскїй наречѐ ѳала́ссїй, и҆ ꙗ҆́кѡ воздержа́нїемъ ᲂу҆мѣ́реннымъ ᲂу҆кроща́ти сїю̀ и҆ ᲂу҆смирѧ́ти подоба́етъ.

ѳ҃. Дѣ́йство бл҃года́ти є҆́сть си́ла ѻ҆гнѧ̀ дх҃о́внагѡ: є҆́же въ ра́дости и҆ весе́лїи серде́чнѣ дви́жетъ, ᲂу҆твержда́етъ и҆ согрѣва́етъ и҆ ѡ҆чища́етъ дꙋ́шꙋ, и҆ по́мыслы ᲂу҆́бѡ ᲂу҆толѧ́етъ, ꙗ҆́кѡ на ча́съ: тѣле́сное же движе́нїе ᲂу҆мерщвлѧ́етъ на вре́мѧ. Зна́мєнїѧ же є҆гѡ̀ и҆ плоды̀, ꙗ҆влѧ́ющїе и҆́стинꙋ, сꙋ́ть сїѧ̑: сле́зы, сокрꙋше́нїе, смире́нїе, воздержа́нїе, молча́нїе, терпѣ́нїе, є҆́же кры́тисѧ, и҆ є҆ли̑ка сꙋ́ть такѡва́ѧ, и҆́миже несꙋмнѣ́ннѣ и҆звѣща́емсѧ.

і҃. Дѣ́йство пре́лести є҆́сть, грѣха̀ раждеже́нїе, є҆́же въ сла́сти распалѧ́етъ дꙋ́шꙋ, и҆ къ совокꙋпле́нїю тѣле́съ неи́стово жела́нїе къ тѣле́снѣмъ движе́нїи воздвиза́етъ. Нека́чественно же є҆́сть всѐ и҆ нестро́йно, по ст҃о́мꙋ дїа́дохꙋ: ра́дость и҆́мать безслове́снꙋ, и҆ мнѣ́нїе, и҆ мѧте́жъ, и҆ весе́лїе нека́чественно. И҆лѝ па́че рещѝ, непита́тельнѡ дѣ́йствꙋетъ къ по́хотной ча́сти въ сла́сти растепле́ннѣй, подаѧ̀ по́хоти вещество̀ раждеже́нїѧ сла́сти, и҆ несы́тнꙋ ᲂу҆тро́бꙋ содѣ́йственницею и҆мꙋ́що. Ѿсю́дꙋ бо прїѡбща́етъ и҆ возжига́етъ растворе́нїе пло́ти, прїе́млѧ винꙋ̀ ко є҆́же дѣ́йствовати и҆ жещѝ дꙋ́шꙋ, и҆ ко є҆́же привлещѝ ю҆̀ къ себѣ̀, ꙗ҆́кѡ да пома́лꙋ ѿжене́тъ ѿ себѐ человѣ́къ благода́ть навыкнове́нїемъ сладостра́стїѧ.

Глава̀ а҃.

Два̀ ѡ҆́браза сꙋ́ть соедине́нїѧ: па́че же вхо́ды ѿ ѻ҆бою̀ странꙋ̑ ᲂу҆́мныѧ моли́твы, дѣ́йствꙋемыѧ дꙋ́хомъ въ се́рдцѣ, и҆́миже ᲂу҆́мъ и҆лѝ предварѧ́етъ сїю̀, та́мѡ прилѣплѧ́ѧйсѧ гдⷭ҇ви,¹⁶⁷ по писа́нїю: и҆лѝ дви́жꙋщꙋсѧ дѣ́йствꙋ по предше́ствїю ѻ҆гне́мъ весе́лїѧ привлека́етъ ᲂу҆́мъ, и҆лѝ привѧзꙋ́етъ є҆го̀ къ призыва́нїю и҆ соедине́нїю гдⷭ҇а і҆и҃са. А҆́ще бо дꙋ́хъ и҆ ѻ҆со́бь коемꙋ́ждо дѣ́йствꙋетъ, ꙗ҆́коже хо́щетъ,¹⁶⁸ по а҆пⷭ҇льскомꙋ словесѝ, но ѻ҆вогда̀ въ нѣ́кїихъ є҆ди́но дрꙋга́го предварѧ́етъ по предречє́ннымъ ѡ҆бразѡ́мъ. И҆ ѻ҆вогда̀ ᲂу҆́бѡ дѣ́йство дви́жетсѧ въ се́рдцѣ, страстє́мъ си́рѣчь ᲂу҆малѧ́ющымсѧ ча́стымъ призыва́нїемъ і҆и҃са хрⷭ҇та̀, ꙗ҆́вльшейсѧ бж҃е́ственнѣй теплотѣ̀: бг҃ъ бо на́шъ ѻ҆́гнь є҆́сть поѧда́ющь стра̑сти, глаго́летъ писа́нїе.¹⁶⁹ Ѻ҆вогда́ же дх҃ъ привлачи́тъ къ себѣ̀ ᲂу҆́мъ, водрꙋжа́ѧ є҆го̀ во глꙋбинꙋ̀ се́рдца, и҆ ѿ ѻ҆бы́чнагѡ скита́нїѧ ᲂу҆де́рживаѧ. И҆ тогда̀ не ктомꙋ̀ плѣ́нникъ во а҆ссѷрі́аны ведо́мь ѿ і҆ерⷭ҇ли́ма, но ѿ вавѷлѡ́на въ сїѡ́нъ преселе́нїе твори́тъ лꙋ́чшее, ꙗ҆́коже и҆ є҆мꙋ̀ съ проро́комъ вѣща́ти: Тебѣ̀ подоба́етъ пѣ́снь бж҃е въ сїѡ́нѣ, и҆ тебѣ̀ возда́стсѧ моли́тва во і҆ерꙋсали́мѣ.¹⁷⁰ И҆ па́ки: Внегда̀ возврати́ти гдⷭ҇ꙋ плѣ́нъ сїѡ́нь.¹⁷¹ И҆ є҆́же: возра́дꙋетсѧ і҆а́кѡвъ, и҆ возвесели́тсѧ і҆и҃ль:¹⁷² си́рѣчь дѣ́ѧтельный и҆ зри́тельный ᲂу҆́мъ, и҆́же дѣѧ́нїемъ стра̑сти побѣжда́етъ съ по́мощїю бж҃їею и҆ видѣ́нїемъ зри́тъ є҆го̀, є҆ли́кѡ дости́жно. Тогда́ бо ᲂу҆́мъ ꙗ҆́кѡ на трапе́зꙋ ѻ҆би́льнѣйшꙋ призва́нъ, пи́щею бж҃е́ственною веселѧ́сѧ пое́тъ: Оу҆гото́валъ є҆сѝ предо мно́ю трапе́зꙋ, прѧ́мѡ стꙋжа́ющымъ мѝ, бѣсовѡ́мъ же и҆ страстє́мъ.¹⁷³

Глава̀ в҃. Ѡ҆ є҆́же ка́кѡ подоба́етъ дѣ́йствовати моли́твꙋ.

Въ заꙋ́трїи сѣ́й, глаго́летъ соломѡ́нъ, сѣ́мѧ твоѐ, си́рѣчь моли̑твы, и҆ въ ве́черъ да не ѡ҆ставлѧ́етъ рꙋка̀ твоѧ̀.¹⁷⁴ Да не разстоѧ́нїемъ вре́мени всегда́шность моли́твы лиши́тсѧ тогѡ̀ часа̀, во́ньже бы ᲂу҆слы́шана была̀: ꙗ҆́кѡ не вѣ́си, глаго́летъ соломѡ́нъ, ко́е произы́детъ, сїѐ и҆лѝ ѻ҆́но.¹⁷⁵ И҆ ѿ ᲂу҆́тра ᲂу҆́бѡ сѣдѧ̀ на сѣда́лищи є҆ди́ныѧ пѧ́ди, низведѝ ᲂу҆́мъ ѿ влады́чественнагѡ въ се́рдце, и҆ держѝ є҆го̀ въ не́мъ, болѣ́зненнѣ же прекло́ньсѧ и҆ пе́рсьми, ра́мены же и҆ вы́ею ѕѣлѡ̀ болѧ̀, непреста́ннѡ зовѝ ᲂу҆́мнѣ и҆лѝ дꙋше́внѣ: гдⷭ҇и і҆и҃се хрⷭ҇тѐ, поми́лꙋй мѧ̀! Та́же тѣсноты̀ ра́ди и҆ приболѣ́зненности, и҆ ча́стости ра́ди не́гли и҆ приско́рбнѣ и҆мѣ́ѧ. Є҆́же є҆́сть ра́ди є҆ди́ныѧ снѣ́ди трїиме́ннагѡ, ча́стѡ ꙗ҆до́мыѧ: ꙗ҆дꙋ́щїи бо мѧ̀, глаго́летъ, є҆щѐ вза́лчꙋтъ. ¹⁷⁶ Премѣнѧ́ѧ ᲂу҆́мъ во дрꙋгꙋ́ю полови́нꙋ, глаго́ли: сн҃е бж҃їй, поми́лꙋй мѧ̀! И҆ многокра́тнѣ глаго́лѧ полови́нꙋ сїю̀, не до́лженъ є҆сѝ ча́стѡ ѿ лѣ́ности ѻ҆́наѧ премѣнѧ́ти: не ᲂу҆коренѧ́ютсѧ бо са́дове ча́стѡ пресажда́еми. Оу҆де́рживай же и҆ ѿдыха́нїе ле́гкагѡ, да не де́рзостнѣ ды́шеши: и҆́бо дохнове́нїе дꙋхѡ́въ, ѿ се́рдца восходѧ́що, помрача́етъ ᲂу҆́мъ и҆ развѣва́етъ мы́сль. Ѿтꙋ́дꙋ воспѧща́ѧ є҆го̀, и҆лѝ плѣ́нника забве́нїю предае́тъ, и҆лѝ вмѣ́стѡ тогѡ̀ дрꙋго́мꙋ поꙋча́тисѧ ᲂу҆строѧ́етъ, нечꙋ́вственнѣ во ꙗ҆̀же не подоба́етъ ѡ҆брѣта́ющасѧ. А҆́ще же ᲂу҆ви́диши нечистѡты̀ лꙋка́выхъ дꙋхѡ́въ, си́рѣчь по́мыслы возница́ємы и҆лѝ преѡбразꙋ́ющыѧсѧ во ᲂу҆мѣ̀ твое́мъ, не ᲂу҆жасни́сѧ, а҆́ще и҆ блага̑ѧ разꙋмѣ̑нїѧ веще́й нѣ́кїихъ ꙗ҆влѧ́ютсѧ тѝ, не внима́й и҆̀мъ: но держѧ̀ дыха́нїе, ꙗ҆́коже тѝ мо́щно, и҆ ᲂу҆́мъ въ се́рдцѣ заключа́ѧ, и҆ призыва́нїе гдⷭ҇а і҆и҃са ча́стѡ и҆ пребыва́тельнѣ дѣ́йствꙋѧй, ско́рѡ сокрꙋши́ши и҆ и҆стреби́ши ѻ҆́ныѧ, ꙗ҆звѧ̀ и҆́хъ неви́димѡ бж҃е́ственнымъ и҆́менемъ. Глаго́летъ бо лѣ́ствичникъ: І҆и҃совымъ и҆́менемъ бі́й ра́тники, нѣ́сть бо ниеди́нагѡ крѣпча́йша ѻ҆рꙋ́жїѧ на нб҃сѝ и҆ на землѝ.

Глава̀ г҃. Ѡ҆ дыха́нїи.

Ꙗ҆́коже до́лженъ є҆сѝ держа́ти дыха́нїе, свидѣ́тель и҆са́їа ѿше́льникъ, ѡ҆ се́мъ глаго́лѧй, и҆ и҆ні́и мно́зи. Ѻ҆́въ ᲂу҆́бѡ, держѝ ᲂу҆́мъ неꙋдержи́мый, си́рѣчь порѣва́емь и҆ разсѣва́емь ѿ сопроти́вныѧ си́лы, возврати́вшїѧсѧ па́ки по креще́нїи небреже́нїѧ ра́ди, со и҆ны́ми лꙋка́внѣйшими дꙋ́хи въ лѣ́ностнꙋю дꙋ́шꙋ, ꙗ҆́коже глаго́летъ гдⷭ҇ь: И҆ послѣ̑днѧѧ сотвори́шасѧ гѡ́рша пе́рвыхъ.¹⁷⁷ Ѻ҆́въ же ꙗ҆́кѡ до́лженъ є҆́сть и҆́нокъ и҆мѣ́ти па́мѧть бж҃їю вмѣ́стѡ дыха́нїѧ. И҆́нъ же любо́вь бж҃їю предварѧ́ющꙋ тогѡ̀ дыха́нїе. И҆ но́вый бг҃осло́въ глаго́летъ: пома́лꙋ ᲂу҆де́рживай и҆ но́здренное влече́нїе, да не де́рзостнѣ ды́шеши.¹⁷⁸ И҆ лѣ́ствичникъ: І҆и҃сова па́мѧть да соедини́тсѧ съ дыха́нїемъ твои́мъ, и҆ тогда̀ ᲂу҆разꙋмѣ́еши безмо́лвїѧ по́льзꙋ. И҆ а҆пⷭ҇лъ: не то́й, но хрⷭ҇то́съ въ не́мъ живѧ́ше дѣ́йствꙋѧ,¹⁷⁹ и҆ живо́тъ бж҃е́ственный вдыха́ѧ. И҆ гдⷭ҇ь: дх҃ъ, и҆дѣ́же хо́щетъ, ды́шетъ,¹⁸⁰ глаго́летъ, прїѧ́въ примѣ́ръ ѿ дыха́нїѧ чꙋ́вственнагѡ вѣ́тра. Поне́же чи́сти бы́вше кр҃ще́нїемъ, прїе́мше хрⷭ҇та̀ ѡ҆бꙋче́нїемъ дх҃а, и҆ ꙗ҆́кѡ сѣ́мѧ всажде́нное сло́во, по бг҃обра́тꙋ і҆а́кѡвꙋ, прїѧ́хомъ,¹⁸¹ є҆́же насажде́но бы́вше, и҆ ꙗ҆́кѡ соедини́вшесѧ въ прича́стїи неприча́стномъ и҆ несмѣ́сномъ, ѡ҆божа́етъ на́съ нѣ́кїимъ ѡ҆́бразомъ, преиспо́лненно сꙋ́щи за бла́гость, мы́ же ꙗ҆́кѡ ѡ҆ храни́тельныхъ за́повѣдехъ благода́ти вознеради́вше: падо́хомъ па́ки въ стра̑сти лѣ́ности ра́ди, и҆ вмѣ́стѡ дыха́нїѧ дх҃а ст҃а́гѡ, дыха́нїѧ дꙋхѡ́въ лꙋка́выхъ и҆спо́лнихомсѧ. Стѧжа́вый бо дх҃а, и҆ тѣ́мъ ѡ҆чище́нъ бы́въ, разгрѣва́етсѧ ѿ негѡ̀ и҆ бж҃е́ственнымъ вдыха́етсѧ живото́мъ, и҆ глаго́летъ, и҆ разꙋмѣва́етъ, и҆ дви́жетсѧ, по гдⷭ҇немꙋ гла́сꙋ: Ꙗ҆́кѡ не вы́ бо бꙋ́дете глаго́лющїи, но дх҃ъ ѻ҆ц҃а̀ ва́шегѡ глаго́лѧй, речѐ, въ ва́съ.¹⁸² Подо́бнѣ па́ки: и҆́же сопроти́внаго и҆мѣ́ѧй, и҆ ѿ тогѡ̀ ѡ҆блада́нъ бы́въ, сопроти̑внаѧ дѣ́лаетъ и҆ глаго́летъ. ¹⁸³

Глава̀ д҃. Ѡ҆ є҆́же ка́кѡ пѣ́ти подоба́етъ.

Оу҆трꙋди́всѧ, глаго́летъ лѣ́ствичникъ, воста́въ помоли́сѧ, и҆ па́ки сѣ́дъ, пе́рвѣйшагѡ дѣ́ланїѧ мꙋ́жественнѣ и҆ми́сѧ. А҆́ще бо и҆ ѡ҆ ᲂу҆мѣ̀ речѐ: є҆гда̀ дости́гнетъ серде́чное блюде́нїе, сїѧ̑ твори́ти до́лжни сꙋ́ть, но не неприли́чнѣ и҆ ѡ҆ ѱалмопѣ́нїи речѐ то̀. Глаго́летсѧ бо, ꙗ҆́кѡ вопроше́нъ бы́сть ѡ҆ пѣ́нїи вели́кїй варсоно́фїй, си́рѣчь, ка́кѡ подоба́етъ пѣ́ти; и҆ ѿвѣща̀ ста́рецъ: часы̀ и҆ пѣ̑сни сꙋ́ть преда̑нїѧ це́ркви, и҆ до́брѣ согла́сїѧ ра́ди дана̀ бы́ша. Ски́тѧне же нижѐ часы̀ пою́тъ, нижѐ пѣ̑сни и҆́мꙋтъ: но рꙋкодѣ́лїе, и҆ наединѣ̀ поꙋче́нїе, и҆ пома́лꙋ моли́твꙋ. Стоѧ́ же на моли́твѣ, до́лженъ є҆сѝ глаго́лати Трист҃о́е, и҆ Ѻ҆́ч҃е на́шъ. Моли́ти же и҆ бг҃а, ѡ҆ є҆́же ве́тхагѡ и҆зба́витисѧ человѣ́ка, и҆ во ѻ҆́ной не коснѣ́ти, ве́сь бо де́нь ᲂу҆́мъ тво́й въ моли́твѣ да бꙋ́детъ. И҆ сїѐ ꙗ҆вѝ ста́рецъ, ꙗ҆́кѡ наединѣ̀ поꙋче́нїе, є҆́сть серде́чнаѧ моли́тва: пома́лꙋ же моли́тва, стоѧ́нїе є҆́сть пѣ́нїѧ. Ꙗ҆́вѣ же глаго́летъ и҆ вели́кїй і҆ѡа́ннъ лѣ́ствичникъ: дѣ́ло безмо́лвїѧ, безпопече́нїе ѡ҆ всѣ́хъ и҆ нелѣ́ностна моли́тва є҆́сть стоѧ́нїе, и҆ тре́тїе дѣ́ланїе се́рдца некра́домо. Сїѐ є҆́сть сѣда́лище моли́твы, си́рѣчь безмо́лвїѧ.

Глава̀ є҃. Ѡ҆ разли́чїи пою́щихъ.

Ко́е разли́чїе, ꙗ҆́кѡ ѻ҆́ви ᲂу҆́бѡ мно́гѡ пѣ́ти ᲂу҆́чатъ, ѻ҆́вїи же ма́лѡ, дрꙋзі́и же ника́коже ѿню́дъ, но є҆ди́нꙋ моли́твꙋ и҆ трꙋ́дъ, рꙋкодѣ́лїе не́гли и҆лѝ мета̑нїѧ, и҆лѝ и҆́но нѣ́кое притрꙋ́дно дѣ́ланїе; Рѣше́нїе же сегѡ̀ є҆́сть сицево̀: є҆ли́цы дѣѧ́нїемъ, мно́гими трꙋды̀ и҆ лѣ́ты ѡ҆брѣто́ша благода́ть, ꙗ҆́коже навыко́ша, си́це и҆ дрꙋги́хъ поꙋча́ютъ. Не покарѧ́ютсѧ же непрїе́млющїи хꙋдо́жественнѣ въ то̀ доспѣ́вшымъ ми́лостїю бг҃а, вско́рѣ те́плою вѣ́рою, ꙗ҆́коже глаго́летъ ст҃ы́й і҆саа́къ. Тѣ́мже и҆ порица́ютъ таковы́хъ, ѿ неразꙋ́мїѧ и҆ мнѣ́нїѧ крадо́ми, и҆ и҆ны́хъ и҆звѣствꙋ́ютъ, ꙗ҆́кѡ а҆́ще є҆́сть и҆́накѡ, пре́лесть є҆́сть, а҆ не благода́ти дѣ́йство. И҆ не вѣ́дѧтъ, ꙗ҆́кѡ ᲂу҆до́бно пред̾ ѻ҆чи́ма бж҃їима, по писа́нїю, внеза́пꙋ ѡ҆богати́ти ни́ща.¹⁸⁴ И҆, нача́ло премꙋ́дрости, стѧжа́ти премꙋ́дрость, благода́ть,¹⁸⁵ глаго́летъ при́тча. Оу҆корѧ́етъ же и҆ а҆пⷭ҇лъ тогда̑шнїѧ ᲂу҆ченикѝ невѣ́дꙋщыѧ благода́ти, глаго́лѧ: И҆лѝ не зна́ете себѐ, ꙗ҆́кѡ і҆и҃съ хрⷭ҇то́съ въ ва́съ є҆́сть; ра́звѣ то́чїю чи́мъ неискꙋ́сни є҆стѐ,¹⁸⁶ сі́есть за лѣ́ность ва́шꙋ не предспѣ́ѧтельни. Тѣ́мже ра́ди невѣ́рїѧ и҆ высокомꙋ́дрїѧ, и҆ ди́вныѧ въ нѣ́кїихъ моли́твы сво́йства ѿ дх҃а, ѻ҆со́беннымъ ѡ҆́бразомъ дѣ́йствꙋема, не прїе́млютъ.

Глава̀ ѕ҃. Противорѣ́чїе тогѡ́жде.

Рцы́ ми, такѡва́ѧ глаго́лѧй: а҆́ще кто̀ пости́тсѧ, возде́ржитсѧ, бди́тъ, стои́тъ, мета̑нїѧ твори́тъ, пла́четъ, не стѧжа́тельствꙋетъ, нѣ́сть ли сїѐ дѣ́ланїе; Ка́кѡ ᲂу҆́бѡ глаго́ленїи кромѣ̀ дѣѧ́нїѧ, пѣ́нїе то́чїю предлага́ѧ, не мо́щно ᲂу҆держа́ти мл҃твꙋ; Сїѧ̑ не дѣ̑ланїѧ ли сꙋ́ть;

Рѣше́нїе.

А҆́ще кто̀ ᲂу҆сты̑ мо́литсѧ, а҆ ᲂу҆́мъ пари́тъ, ка́ѧ по́льза; Є҆ди́нъ зи́ждѧ, а҆ дрꙋгі́й разорѧ́ѧ, ничто́же ра́звѣ трꙋды̀. Но ꙗ҆́коже тѣ́ломъ дѣ́лаетъ человѣ́къ, си́це до́лженъ твори́ти и҆ ᲂу҆мо́мъ, да не тѣ́ломъ ᲂу҆́бѡ ѡ҆брѧ́щетсѧ пра́веденъ, въ се́рдцѣ же всѧ́кагѡ ᲂу҆ны́нїѧ и҆ нечистоты̀ и҆спо́лненъ. Сїе́ бо и҆ а҆пⷭ҇лъ и҆звѣствꙋ́етъ, глаго́лѧ: А҆́ще бо молю́сѧ ꙗ҆зы́комъ, си́рѣчь, ᲂу҆сты̀, дх҃ъ мо́й мо́литсѧ и҆лѝ гла́съ мо́й, а҆ ᲂу҆́мъ мо́й без̾ плода̀ є҆́сть. Помолю́сѧ ᲂу҆̀бо дх҃омъ, помолю́сѧ же и҆ ᲂу҆мо́мъ. И҆ хощꙋ̀ рещѝ пѧ́ть слове́съ, и҆ прѡ́чаѧ.¹⁸⁷ Свидѣ́тель же, ꙗ҆́кѡ ѡ҆ се́мъ глаго́летъ и҆ лѣ́ствичникъ, глаго́лющїй въ сло́вѣ ѡ҆ моли́твѣ: вели́кїй вели́кїѧ и҆ соверше́нныѧ моли́твы дѣ́латель си́це глаго́летъ: хощꙋ̀ рещѝ пѧ́ть слове́съ ᲂу҆мо́мъ мои́мъ, и҆ прѡ́чаѧ. Дѣ̑ланїѧ же сꙋ́ть мнѡ́га, по ча̑стна сꙋ́ть: серде́чнаѧ же моли́тва є҆́сть дѣ́ланїе вели́ко и҆ ѡ҆бдержи́тельно, ꙗ҆́кѡ и҆сто́чникъ добродѣ́телей, по словесѝ лѣ́ствичника, є҆́юже всѧ́кое прїѡбрѣта́етсѧ бла́го. Нѣ́сть, глаго́летъ ст҃ы́й маѯі́мъ, страшнѣ́е мы́сли сме́ртныѧ, нижѐ па́мѧти бж҃їѧ велелѣ́пнѣе, ꙗ҆влѧ́ѧ превосхо́дство дѣ́ла. Нѣ́цыи же нижѐ, а҆́ще є҆́сть благода́ть, въ ны́нѣшнее вре́мѧ слы́шати хотѧ́тъ, ѿ мно́гагѡ нечꙋ́вствїѧ и҆ неразꙋмѣ́нїѧ ѡ҆мраче́ни сꙋ́ще и҆ маловѣ́рни.

Глава̀ з҃.

Ма́лѡ же пою́щїи, до́брѣ, мню̀, творѧ́тъ, соразмѣ́рность почти́вше: всѧ́каѧ бо мѣ́ра добра̀ є҆́сть, по словесѝ премꙋ́дрыхъ, да не всю̀ си́лꙋ дꙋше́внꙋю въ дѣѧ́нїе и҆стоща́юще, ᲂу҆́мъ бꙋ́детъ ма́лѡ радѣ́теленъ въ моли́твѣ, и҆ и҆знемо́жетъ къ не́й: но да ѿ ча́сти пою́ще, мно́жае въ мл҃твꙋ прострꙋ́тсѧ. Пра́ведно же є҆́сть, є҆гда̀ ᲂу҆́мнымъ и҆ ча́стымъ во́племъ и҆ пожда́тельнымъ водрꙋже́нїемъ стꙋжи́въ ᲂу҆́мъ, причаща́етсѧ ма́лыѧ ѿра́ды во є҆́же попꙋсти́ти є҆го̀ въ простра́нство пѣ́нїѧ ѿ стѣсне́нїѧ безмо́лвнагѡ. Се́й чи́нъ ѕѣлѡ̀ до́бръ є҆́сть, и҆ ᲂу҆че́нїе мꙋже́й премꙋ́дрыхъ.

Глава̀ и҃.

А҆ и҆́же ѿню́дъ непою́щїи, та́кожде до́брѣ творѧ́тъ, а҆́ще сꙋ́ть въ пред̾ꙋспѣ́ѧнїи: сі́и бо не тре́бꙋютъ глаго́лати ѱалмы̀, но молча́нїе и҆ непреста́ннꙋю моли́твꙋ и҆ видѣ́нїе, а҆́ще доспѣ́ша въ просвѣще́нїе съ бг҃омъ бо соедине́ни сꙋ́ть, и҆ не до́лжни сицеві́и ѿвлещѝ ѿ негѡ̀ ᲂу҆́мъ сво́й, и҆ вда́ти є҆го̀ въ смꙋще́нїе. Паде́нїе ᲂу҆̀бо,¹⁸⁸ глаго́летъ лѣ́ствичникъ, послꙋ́шникꙋ своѧ̀ во́лѧ, безмо́лвникꙋ же моли́твы ѡ҆ставле́нїе: прелюбы́ бо дѣ́етъ таковы́хъ ᲂу҆́мъ, є҆гда̀ ѿстꙋ́питъ ѿ па́мѧти бж҃їѧ ꙗ҆́кѡ ѿ жениха̀, и҆ за малѣ̑йшїѧ дѣла̀ люби́тельнѣ є҆́млетсѧ. Наꙋчи́ти же и҆ дрꙋги́хъ томꙋ́жде чи́нꙋ, не во всѣ́хъ є҆́сть возмо́жно, просты́хъ ᲂу҆́бѡ послꙋ́шникѡвъ сꙋ́щихъ и҆ некни́жныхъ та́кѡ: занѐ послꙋша́нїе ѿ всѧ́кїѧ добродѣ́тели смире́нїѧ ра́ди прича́ствꙋетъ: непокори̑вымъ же не дае́тсѧ, да не ᲂу҆до́бь прельстѧ́тсѧ, грꙋ́би и҆ люборазꙋ́мични сꙋ́ще. Зане́же самочи́нникъ не мо́жетъ и҆збѣ́гнꙋти мнѣ́нїѧ, и҆́мже пре́лесть послѣ́довати ѡ҆бы́че, ꙗ҆́коже глаго́летъ ст҃ы́й і҆саа́къ. И҆ні́и же не помышлѧ́юще ѡ҆ и҆мꙋ́щемъ бы́ти вре́дѣ, за є҆́же ѡ҆бы́кнꙋти глаго́лютъ и҆ возлюби́ти ᲂу҆мꙋ̀ па́мѧть бж҃їю, прилꙋча́ющихсѧ сїю̀ є҆ди́нꙋ дѣ́йствовати ᲂу҆́чатъ, є҆́же не мо́щно є҆́сть, наипа́че же своечи́нникѡмъ сꙋ́щымъ. Є҆ще́ бо ᲂу҆мꙋ̀ и҆́хъ нечи́стꙋ сꙋ́щꙋ, ра́ди небреже́нїѧ и҆ высокомꙋ́дрїѧ, и҆́же слеза́ми не пред̾ѡчи́стивыйсѧ, кꙋмі́ры па́че сквє́рны по́мыслъ, а҆ не моли́твꙋ созерца́етъ, въ се́рдцѣ нечи́стымъ дꙋховѡ́мъ смꙋти́вшымсѧ ѿ страши́лищнагѡ дꙋ́ха, и҆ ᲂу҆би́ти скреже́щꙋщымъ ра́нѧщаго. А҆́ще же ᲂу҆слы́шитъ и҆лѝ наꙋче́нъ бꙋ́детъ самочи́нникъ ѡ҆ се́мъ дѣ́ланїи, и҆ хо́щетъ то̀ ᲂу҆держа́ти, є҆ди́но ѿ двою̀ и҆́мать пострада́ти: а҆́ще ᲂу҆́бѡ нꙋ́дитсѧ, прельща́етсѧ, и҆ неисцѣ́ленъ пребыва́етъ: а҆́ще ли небреже́тъ, без̾ пред̾ꙋспѣ́ѧнїѧ во все́мъ животѣ̀ свое́мъ быва́етъ.

Глава̀ ѳ҃.

Рекꙋ́ же и҆ а҆́зъ, ꙗ҆́кѡ ѿ и҆скꙋ́са ма́лѡ позна́въ. Є҆гда̀ бꙋ́деши сидѣ́ти во днѝ, и҆лѝ въ нощѝ безмо́лвствꙋѧ, ча́стѣ молѧ́сѧ бг҃ови кромѣ̀ пѡ́мыслъ во смире́нїи, и҆ ᲂу҆̀бо и҆знемо́жетъ ᲂу҆́мъ зовы́й, и҆ возболѣ́знꙋетъ тѣ́ло и҆ се́рдце ѕѣ́льнымъ водрꙋже́нїемъ ча́стагѡ і҆и҃сова призыва́нїѧ, и҆ не ктомꙋ̀ согрѣва́емь и҆лѝ возвеселѧ́емь, и҆́миже ᲂу҆се́рдїе и҆ терпѣ́нїе ражда́етсѧ подви́жникꙋ: тогда̀ воста́въ, ста́ни и҆ по́й наединѣ̀, и҆лѝ съ сꙋ́щимъ съ тобо́ю ᲂу҆ченико́мъ, и҆лѝ ᲂу҆пражнѧ́йсѧ въ поꙋче́нїи нѣ́коегѡ глаго́ла, и҆лѝ въ па́мѧти сме́рти, и҆лѝ въ рꙋкодѣ́лїи и҆ про́чемъ, и҆лѝ чте́нїю па́че стоѧ̀ внемлѝ, да трꙋ́дъ тѣлесѝ сотвори́ши. И҆ є҆гда̀ ᲂу҆́бѡ стои́ши наединѣ̀ поѧ̀, глаго́ли Трист҃о́е, и҆ посе́мъ моли́твꙋ дꙋше́внѣ и҆лѝ ᲂу҆́мнѣ, внима́ѧ ᲂу҆мо́мъ се́рдцꙋ. А҆́ще ли же тѝ належи́тъ ᲂу҆ны́нїе, глаго́ли и҆ ѱалмы̀ два̀ и҆лѝ трѝ, и҆ тропарѝ ᲂу҆мили́тельны без̾ гла́са, ꙗ҆́кѡ не воспою́тъ сицеві́и, глаго́летъ лѣ́ствичникъ. Довлѣ́етъ бо тѣ̑мъ во весе́лїе болѣ́знь серде́чнаѧ, ѡ҆ благоче́стїи быва́ема, ꙗ҆́коже речѐ ст҃ы́й ма́ркъ, и҆ теплота̀ дх҃а, къ ра́дости и҆ весе́лїю тѣ̑мъ да́рꙋема. Глаго́ли же по всѧ́комъ ѱалмѣ̀ и҆ моли́твꙋ ᲂу҆́мнѣ, и҆лѝ дꙋше́внѣ, непари́тельнѣ, и҆ а҆ллилꙋ́їа. Тако́въ бо є҆́сть чи́нъ ст҃ы́хъ ѻ҆тє́цъ, варсоно́фїа и҆ дїа́доха, и҆ про́чихъ. И҆ ꙗ҆́коже глаго́летъ бж҃е́ственный васі́лїй, подоба́етъ на всѧ́къ де́нь ѱалмы̀ премѣнѧ́ти, за є҆́же къ ᲂу҆се́рдїю поѡщрѧ́ютъ, и҆ да не глаго́летъ, вы́нꙋ та̑ѧжде поѧ̀, ᲂу҆́мъ несла́достнѣ ѡ҆браща́етсѧ, но свобо́дꙋ томꙋ̀ даѧ́ти подоба́етъ, да и҆ є҆щѐ па́че на ᲂу҆се́рдїе ᲂу҆крѣпи́тсѧ. А҆́ще же со ᲂу҆ченико́мъ вѣ́рнымъ стои́ши поѧ̀: ѻ҆́нъ ᲂу҆̀бо ѱалмы̀ да глаго́летъ, ты́ же се́рдцꙋ та́йнѣ вне́млѧ и҆ молѧ́сѧ: блюдѝ себѐ, и҆ всѧ̑ разꙋмѣ̑нїѧ, и҆лѝ чꙋ́вствєнна и҆лѝ ᲂу҆́мна, ѿ се́рдца и҆сходѧ̑ща презира́й, моли́твѣ содѣ́йствꙋющей. Безмо́лвїе бо є҆́сть, ѿложе́нїе до вре́мени разꙋмѣ́нїй, є҆́же не ѿ дх҃а сꙋ́ть бж҃е́ственнѣйша, да не вне́млѧ си̑мъ, ꙗ҆́кѡ дѡ́брымъ, бѡ́льшаѧ погꙋби́ши.

Глава̀ і҃. Ѡ҆ пре́лести.

Внемлѝ ᲂу҆̀бо ѻ҆па́снѡ, рачи́телю бж҃їй, въ ра́зꙋмѣ, внегда̀ дѣ́лаѧ дѣ́ло, ᲂу҆́зриши свѣ́тъ, и҆лѝ ѻ҆́гнь и҆звнѣꙋ́дꙋ, и҆лѝ внꙋ́трь, и҆лѝ ѡ҆́бразъ нѣ́кїй, си́рѣчь хрⷭ҇та̀, и҆лѝ а҆́гг҃ла и҆лѝ и҆на́го кого̀, не прїе́мли того̀, да не вре́дъ прете́рпиши: нижѐ ты̀ са́мъ ѿ себѐ ѡ҆бра́знѣ вне́млѧ, попꙋ́стиши ᲂу҆мꙋ̀ и҆з̾ѡбража́ти такѡва́ѧ: всѧ̑ бо сїѧ̑ и҆звнѣꙋ́дꙋ безвре́меннѣ преѡбразꙋ́єма, ко є҆́же прельсти́ти дꙋ́шꙋ быва́ютъ. Нача́ло бо моли́твы и҆́стинное, є҆́сть теплота̀ серде́чнаѧ, попалѧ́ющаѧ стра̑сти, и҆ ти́хость и҆ ра́дость въ дꙋшѣ̀ и҆звѣ́стною любо́вїю творѧ́щаѧ, и҆ се́рдце несомнѣ́ннымъ и҆звѣще́нїемъ ᲂу҆твержда́ющаѧ. Все́ бо приходѧ́щее къ дꙋшѝ, глаго́лютъ ѻ҆тцы̀, а҆́ще чꙋ́вственно, а҆́ще ᲂу҆́мно, и҆ ᲂу҆сꙋмни́тсѧ ѡ҆ се́мъ се́рдце, не прїе́млющи тогѡ̀, нѣ́сть ѿ бг҃а, но ѿ сопроти́вника прїи́де. И҆ а҆́ще ᲂу҆ви́диши ᲂу҆́мъ ѿвнѣꙋ́дꙋ, и҆лѝ свы́ше влеко́мь нѣ́коею неви́димою си́лою, не вѣ́рꙋй семꙋ̀, нижѐ попꙋстѝ є҆мꙋ̀ влеко́мꙋ бы́ти: но понꙋ́ди того̀ а҆́бїе въ дѣ́ло є҆гѡ̀: ꙗ҆̀же бж҃їѧ, глаго́летъ ст҃ы́й і҆саа́къ ѿ себѐ прихо́дѧтъ, невѣ́дꙋщꙋ тѝ вре́мени. А҆́ще вра́гъ внꙋ́трь є҆сте́ственныхъ чре́слъ и҆ преѡбразꙋ́етъ дх҃о́внаѧ, ꙗ҆́коже хо́щетъ, мечта́тельнѣ и҆на̑ѧ вмѣ́стѡ дрꙋги́хъ: и҆ вмѣ́стѡ теплоты̀ своѐ нестро́йное наводѧ̀ жже́нїе, ꙗ҆́коже ѡ҆тѧгча́тисѧ тогда̀ дꙋшѣ̀ въ таково́й пре́лести, вмѣ́стѡ же весе́лїѧ ра́дость безслове́снꙋ и҆ сла́дость мокро́тнꙋ сотворѧ́ѧ, и҆ мнѣ́нїю ѿ си́хъ и҆ киче́нно ви́дѣтисѧ ражда́емꙋ, скрыва́етъ же себѐ ѿ неискꙋ́сныхъ, и҆ ꙗ҆́коже бл҃года́ть дѣ́йствꙋющꙋ, свою̀ пре́лесть непщева́ти нꙋ́дитсѧ. Но ᲂу҆̀бо вре́мѧ, и҆ и҆скꙋ́съ и҆ чꙋ́вство, ꙗ҆вле́нна того̀ твори́ти ѡ҆бы́че, не ѕѣлѡ̀ неви́дѧщымъ тогѡ̀ ѕлоꙋхищре́нїѧ. Горта́нь бо, глаго́летъ писа́нїе, бра̑шна различа́етъ, си́рѣчь вкꙋ́съ дꙋхо́венъ, ꙗ҆влє́нна всѧ̑, ꙗ҆кова̑же сꙋ́ть, непреле́стнѣ показꙋ́етъ.

Глава̀ а҃і. Ѡ҆ чте́нїи.

Да бꙋ́дꙋтъ тебѣ̀, дѣ́лателю сꙋ́щꙋ, глаго́летъ лѣ́ствичникъ, прочи́тываємаѧ дѣ́ѧтєльна: си́хъ бо дѣѧ́нїе, и҆зли́шно содѣ́ловаетъ про́чїихъ чте́нїе. Прочи́тывай же при́снѡ ꙗ҆̀же ѡ҆ безмо́лвїи и҆ моли́твѣ, си́рѣчь въ лѣ́ствицѣ, во ст҃о́мъ і҆саа́кѣ, ꙗ҆̀же ст҃а́гѡ маѯі́ма, ꙗ҆̀же но́вагѡ бг҃осло́ва и҆ ᲂу҆ченика̀ є҆гѡ̀ стиѳа́та, ꙗ҆̀же и҆сѷхі́а, ꙗ҆̀же фїлоѳе́а сїнаи́та и҆ про́чихъ таковы́хъ, є҆ли́ка сицева̑ сꙋ́ть. Прѡ́чаѧ же ѡ҆ста́ви до вре́мени, не ꙗ҆́кѡ ѿве́ржєнна, но ꙗ҆́кѡ не прили́чєствꙋющаѧ намѣ́ренїю, и҆ ᲂу҆́мъ тѣ́ми повѣствова́нїѧми ѿ моли́твы ѿводѧ̑щаѧ. Да бꙋ́детъ же тѝ чте́нїе на є҆динѣ̀, и҆ не во гла́сѣ киче́нїѧ велича́ющасѧ, ни во тща́нїи благоѧзы́чїѧ ᲂу҆кра́шенно, и҆лѝ доброглаго́ланїи сло́ва, и҆лѝ пѣ́сненныѧ сла́дости, и҆лѝ ѿсꙋ́тствꙋющъ ꙗ҆́кѡ присꙋ́тствꙋющъ стра́стнѣ крадо́мь ко ᲂу҆гожде́нїю нѣ́кїихъ, нижѐ па́ки ненасы́тнѣ. Ꙗ҆́кѡ всѧ́ка мѣ́ра добра̀ є҆́сть, нижѐ бо́рзостнѣ, нижѐ лѣ́ностнѣ и҆ небре́жнѣ, но цѣломꙋ́дреннѡ, кро́ткѡ, постоѧ́ннѡ, разꙋ́мнѡ, благочи́ннѣ, ᲂу҆́мнѣ же и҆ дꙋше́внѣ, и҆лѝ и҆ слове́снѣ. Въ си́хъ бо ᲂу҆крѣплѧ́емь ᲂу҆́мъ, си́лꙋ въ навыкнове́нїи прїе́млетъ, во є҆́же крѣ́пцѣ моли́тисѧ. Въ предрече́нныхъ же сопроти́вныхъ си́мъ, помраче́нїе ᲂу҆́мъ стѧжава́етъ: сла́бость же и҆ и҆зстꙋпле́нїе, ꙗ҆кожѐ болѣ́ти и҆ влады́чественномꙋ въ мозгѣ̀, и҆ въ моли́твѣ и҆знемога́ти.

Глава̀ в҃і.

Внемли́ же и҆ предложе́нїю на всѧ́къ ча́съ, и҆звѣ́стнѡ то̀ и҆спытꙋ́ѧ, ка́мѡ кло́нитсѧ, и҆ а҆́ще по бз҃ѣ са́магѡ ра́ди добра̀, и҆ дꙋше́вныѧ по́льзы сѣди́ши безмо́лвствꙋѧ, и҆лѝ поѧ̀, и҆лѝ прочи́тываѧ, и҆лѝ молѧ́сѧ, и҆лѝ кꙋ́юлибо творѧ̀ добродѣ́тель, да не ѡ҆кра́дешисѧ невѣ́домѣ: да не ка́кѡ ѡ҆брѧ́щешисѧ ѡ҆́бразомъ ᲂу҆́бѡ дѣ́латель, нра́вомъ же и҆ ᲂу҆мо́мъ человѣ́кѡмъ, а҆ не бг҃ꙋ ᲂу҆годи́ти хотѧ́й: мнѡ́ги бо сꙋ́ть подса̑ды льсти́вагѡ, и҆ вельмѝ хи́тростнѣ зри́тъ ᲂу҆клоне́нїе намѣ́ренїѧ, ꙗ҆́коже мнѡ́гимъ неꙋвѣ́домь быва́етъ, и҆ при́снѡ хо́щетъ кра́сти дѣ́ло невѣ́домѣ, да не по бз҃ѣ дѣ́емое бꙋ́детъ. А҆́ще ᲂу҆́бѡ и҆ неѡсла́бнѡ ра́тꙋетъ, и҆ безстꙋ́днѡ пристꙋпа́етъ, но ты̀ тве́рдое намѣ́ренїе къ бг҃ꙋ и҆мѣ́ѧ, не ѡ҆кра́дешисѧ ча́стѡ, а҆́ще и҆ нево́льнѣ ѿ ѻ҆́нагѡ ᲂу҆клоне́нїе во́ли пари́ти нꙋ́дитсѧ. И҆ не́гли и҆ ѿ не́мощи побѣжда́етсѧ кто̀ нево́льнѣ, но а҆́бїе проща́етсѧ и҆ похвалѧ́етсѧ ѿ вѣ́дѧщагѡ намѣ́рєнїѧ и҆ сердца̀. Сїѧ̀ стра́сть, тщесла́вїѧ глаго́лю, не попꙋща́етъ и҆́нокꙋ пред̾ꙋспѣ́ти въ добродѣ́тели: но трꙋды̀ ᲂу҆̀бо сицевы́й претерпѣва́етъ, и҆ въ ста́рости безпло́денъ ѡ҆брѣта́етсѧ. И҆́бо и҆ трїє́мъ посмѣва́етсѧ при́снѡ, и҆ дѣ̑ланїѧ добродѣ́телей ѡ҆бнажа́етъ: новонача́льнꙋ, глаго́лю, и҆ сре́дню, и҆ соверше́ннꙋ.

Глава̀ г҃і.

Се́ же на́выкъ, глаго́лю, ꙗ҆́кѡ кромѣ̀ добродѣ́телей си́хъ и҆́нокъ никогда́же пред̾ꙋспѣ́етъ, си́рѣчь, поще́нїѧ, воздержа́нїѧ, бдѣ́нїѧ, терпѣ́нїѧ, мꙋ́жества, безмо́лвїѧ, мл҃твы, молча́нїѧ, пла́ча и҆ смире́нїѧ. Сꙋ́ть бо добродѣ́тєли сі́и ражда́тельни є҆ди́на дрꙋго́й, и҆ храни́тельни. Ѿ ча́ста бо поще́нїѧ ᲂу҆вѧда́емо жела́нїе ражда́етъ воздержа́нїе: воздержа́нїе, бдѣ́нїе: бдѣ́нїе, терпѣ́нїе: терпѣ́нїе, мꙋ́жество: мꙋ́жество, безмо́лвїе: безмо́лвїе, мл҃твꙋ: мл҃тва, молча́нїе: молча́нїе, пла́чь: пла́чь, смире́нїе: смире́нїе воз̾ѡбра́тнѣ, пла́чь. И҆ па́ки вспѧ́ть дщє́ри ма́терей ка́кѡ ражда́ютъ, воз̾ѡбра́тнѣ ѡ҆брѧ́щеши. Сегѡ̀ ᲂу҆̀бо взаи́мна дрꙋгородстводѣ́йства, бо́льшагѡ въ добродѣ́телехъ нѣ́сть. Проти̑внаѧ же си́хъ, всѣ̑мъ сꙋ́ть ꙗ҆влє́нна.

Глава̀ д҃і.

Подоба́етъ же и҆ ѡ҆ трꙋдѣ́хъ и҆ болѣ́знехъ дѣ́ланїѧ здѣ̀ рещѝ, и҆ ка́кѡ до́лжно є҆́сть проходи́ти ко́еждо дѣ́ланїе, ꙗ҆́снѣ показа́ти, да не неболѣ́зненнѣ кто̀ ше́ствꙋѧ по слꙋ́хꙋ, и҆ непрїѧ́въ плода̀, на́съ и҆лѝ нѣ̑кїѧ ѡ҆бвини́тъ, ꙗ҆́кѡ нѣ́сть си́це, ꙗ҆́коже реко́хомъ: болѣ́знь бо серде́чнаѧ, и҆ тѣле́сный трꙋ́дъ, вѣ́сть дѣ́ло и҆́стины твори́ти, и҆з̾ ни́хже дѣ́йство дх҃а ст҃а́гѡ ꙗ҆влѧ́етсѧ, ст҃ы́мъ креще́нїемъ тебѣ̀ и҆ всѧ́комꙋ вѣ́рнꙋ дае́мое, є҆́же за́повѣдей небреже́нїемъ страстьмѝ спогреба́етсѧ, и҆ покаѧ́нїѧ па́ки на́шегѡ за неизрече́ннꙋю ми́лость ѡ҆жида́етъ. Да не въ коне́цъ за безпло́дїе на́ше ᲂу҆слы́шимъ: Возми́те ѿ негѡ̀ тала́нтъ, и҆ є҆́же мни́тсѧ и҆мѣ́ти, во́зметсѧ ѿ негѡ̀¹⁸⁹, и҆ въ мꙋ́кꙋ по́слетъ на́съ, вѣ́чнѡ въ гее́ннѣ болѧ́щихъ, ꙗ҆́кѡ прїѡбще́нїѧ тогѡ̀ не прїе́млющихъ, и҆лѝ прїе́мшихъ и҆ ѿ небреже́нїѧ ѿве́ргшихъ. Всѧ́ко бо дѣ́ланїе тѣле́сное же и҆ дꙋхо́вное, не и҆мꙋ́щее болѣ́зни и҆лѝ трꙋда̀, никогда́же прино́ситъ пло́дъ то̀ проходѧ́щемꙋ: ꙗ҆́кѡ нꙋ́ждно є҆́сть ца́рствїе небе́сное, глаго́летъ гдⷭ҇ь, и҆ нꙋ́ждницы восхища́ютъ є҆̀.¹⁹⁰ Нꙋ́ждꙋ разꙋмѣ́й тѣле́сное во все́мъ¹⁹¹ приболѣ́зненно чꙋ́вство. Поне́же мно́зи ᲂу҆́бѡ мнѡ́га не́гли лѣ̑та неболѣ́зненнѡ дѣ́лаша, и҆лѝ дѣ́лаютъ, и҆ за є҆́же не съ болѣ́знїю въ те́пломъ ᲂу҆се́рдїи се́рдца трꙋды̀ творѧ́тъ, тщы̀ чистоты̀, и҆ дх҃а ст҃а́гѡ не прича́стни бы́ша, лю́тѡсти болѣ́зней ѿве́ргше. Въ небреже́нїи бо и҆ сла́бости дѣ́лающїи, трꙋдѧ́тсѧ ᲂу҆̀бо не́гли, ꙗ҆́коже мнѧ́тъ, мно́гѡ: но никогда̀ не пожина́ютъ плода̀ за безболѣ́зненность, всѧ́чески безболѣ́зненни сꙋ́ще. И҆ свидѣ́тель глаго́лѧй: А҆́ще и҆ всѧ̑ жи́тєльства на̑ша вели̑ка и҆́мамы, се́рдца же болѣ́зненна не и҆́мамы, неи̑стинна сїѧ̑ и҆ безполє́зна сꙋ́ть: мо́жетъ же бы́ти, є҆гда̀ и҆ не неболѣ́зненнѣ ше́ствꙋемъ, но ѿ ᲂу҆ны́нїѧ въ попечє́нїѧ спорѣва́ющесѧ неполє́знаѧ, помрача́емсѧ¹⁹². Мнѧ́ще бо въ си́хъ ѡ҆сла́бꙋ ѡ҆брѣстѝ, є҆́же нѣ́сть возмо́жно. Но плени́цами нерѣши́мыми неви́димѡ свѧзꙋ́еми, недви́жни и҆ недѣ́йственни во всѧ́ко дѣ́ло быва́емъ, сла́бости въ на́съ ᲂу҆мно́жившейсѧ, па́че же новонача̑льнымъ сꙋ́щымъ: совершє́ннымъ бо всѧ̑ въ мѣ́рꙋ полє́зна сꙋ́ть. Сїѐ свидѣ́тельствꙋетъ и҆ вели́кїй є҆фре́мъ, глаго́лѧ: трꙋдѧ́сѧ трꙋди́сѧ притрꙋ́днѣ, да ми́мѡ пре́йдеши сꙋ́етныхъ трꙋдѡ́въ трꙋды̀. А҆́ще, не по проро́кꙋ, чресла̀ на̑ша и҆сче́знꙋтъ ѿ сла́бости по́стнымъ трꙋдо́мъ и҆знемо́гшѧ, и҆ болѣ̑зни страда́нїи зачне́мъ, ꙗ҆́кѡ ражда́ющаѧ младе́нца болѣ́зненнымъ се́рдца водрꙋже́нїемъ, и҆ не и҆́мамы роди́ти дꙋ́ха спасе́нїѧ на землѝ серде́чнѣй¹⁹³, ꙗ҆́коже слы́шалъ є҆сѝ. Но лѣ́ты то́чїю, и҆ пꙋсты́нею безполе́зною, и҆ сла́бостнымъ безмо́лвїемъ нѣ́что бы́ти мнѧ́щесѧ хва́лимсѧ. Во вре́мѧ же и҆схо́да несомнѣ́ннѡ ве́сь пло́дъ всѝ позна́емъ.

Глава̀ є҃і.

Немо́щно же собо́ю самѣ́мъ комꙋ̀ добродѣ́телей хꙋдо́жествꙋ навы́кнꙋти, а҆́ще и҆ нѣ́цыи, ꙗ҆́коже ᲂу҆чи́телѧ, и҆скꙋ́съ сво́й ᲂу҆потреби́ша. Є҆́же бо ѿ себѐ сама́гѡ, а҆ не по совѣ́тꙋ пред̾ꙋспѣ́вшихъ твори́мъ, мнѣ́нїе и҆́мать, па́че же ражда́ти ѡ҆бы́че. А҆́ще бо сн҃ъ ничесѡ́же ѿ себѐ твори́тъ, но ꙗ҆́коже наꙋчѝ є҆го̀ ѻ҆ц҃ъ, си́це твори́тъ: и҆ дх҃ъ не бо̀ глаго́лати и҆́мать ѿ себѐ. Кто̀ є҆́сть се́й, къ толи́кой добродѣ́тели высотѣ̀ дости́гшїй, ꙗ҆́кѡ не тре́бꙋѧй и҆но́гѡ когѡ̀ тайноводѧ́щагѡ є҆го̀; горды́ню па́че, не́же добродѣ́тель непщꙋ́етъ и҆мѣ́ти: прельсти́лсѧ є҆́сть. Тѣ́мже покарѧ́тисѧ подоба́етъ вѣ́дꙋщымъ трꙋды̀ дѣ́ѧтельныѧ добродѣ́тели, и҆ та́кѡ проходи́ти: си́рѣчь по́стъ а҆лка́теленъ, воздержа́нїе несла́достно, бдѣ́нїе пожда́тельно, колѣнопреклоне́нїе притрꙋ́дно, стоѧ́нїе неподви́жнѣ приболѣ́зненно, моли́твꙋ пребыва́тельнꙋ, смире́нїе нелицемѣ́рно, сокрꙋше́нїе и҆ воздыха́нїе непреста́нно, молча́нїе благосло́вно, и҆ ꙗ҆́кѡ со́лїю растворе́нно, во все́мъ терпѣ́нїе. Не бо̀ подоба́етъ всегда̀ въ поко́и пребыва́ти, нижѐ въ сѣда́лищи то́чїю всегда̀ пре́жде вре́мене, и҆лѝ ста́рости, и҆лѝ не́мощи потерпѣва́ти. Занѐ трꙋды̀, глаго́летъ писа́нїе, добродѣ́телей твои́хъ снѣ́си¹⁹⁴, и҆ нꙋ́дѧщихсѧ є҆́сть ца́рствїе небе́сное¹⁹⁵. Предречє́ннаѧ ᲂу҆́бѡ дѣ̑ланїѧ тща́йсѧ на всѧ́къ де́нь болѣ́зненнѣ, си́рѣчь подви́жнѡ, ᲂу҆си́льнѡ соверша́ти, и҆ пло́дъ съ бг҃омъ во вре́мѧ си́хъ по́жнетъ.

Ѡ҆ є҆́же ка́кѡ подоба́етъ безмо́лвствꙋющемꙋ сѣдѣ́ти, и҆ твори́ти моли́твꙋ.

а҃. Ѻ҆вогда̀ ᲂу҆̀бо¹⁹⁶ на стꙋ́льцѣ, за притрꙋ́дность сѣдѣ́ти подоба́етъ: ѻ҆вогда́ же и҆ на посте́ли ма́лѡ, до вре́мене за ѿра́дꙋ. Въ терпѣ́нїи же сѣдѣ́нїе твоѐ бы́ти до́лжно, ре́кшагѡ ра́ди: Въ моли́твѣ терпѣ́ти досто́итъ¹⁹⁷, и҆ не ско́рѡ востава́ти, малодꙋ́шествꙋѧ притрꙋ́дныѧ ра́ди болѣ́зни, и҆ ᲂу҆́мнагѡ взыва́нїѧ, и҆ ча́стагѡ ᲂу҆ма̀ водрꙋже́нїѧ. Се́ бо вѣща́етъ проро́къ, болѣ̑зни ѡ҆б̾ѧ́ша мѧ̀ а҆́ки ражда́ющїѧ¹⁹⁸. Но пони́къ до́лꙋ, и҆ ᲂу҆́мъ въ се́рдце собира́ѧ, и҆ а҆́ще ᲂу҆́бѡ ѿве́рзесѧ тѝ се́рдце твоѐ, призыва́й въ по́мощь гдⷭ҇а і҆и҃са: болѧ́ же ра́мены, и҆ главо́ю мно́гажды болѣ́знꙋѧ, терпѝ та̑ притрꙋ́днѣ и҆ рачи́тельнѣ, взыскꙋ́ѧ въ се́рдцѣ гдⷭ҇а: нꙋ́дѧщихбосѧ є҆́сть ца́рствїе небе́сное, и҆ нꙋ́ждницы восхища́ютъ є҆̀¹⁹⁹. Словесы̑ си́ми тща́нїе и҆ по́двиги такѡвы̀ вои́стиннꙋ ꙗ҆влє́нны твори́тъ гдⷭ҇ь: терпѣ́нїе бо и҆ пожда́нїе во всѧ́цѣмъ дѣ́лѣ, роди́тель є҆́сть болѣ́зней²⁰⁰ и҆ тѣле́сныхъ и҆ дꙋше́вныхъ.

Ѡ҆ є҆́же ка́кѡ подоба́етъ глаго́лати моли́твꙋ.

в҃. Си́це ѻ҆тцы̀ реко́ша: ѻ҆́въ ᲂу҆́бѡ глаго́летъ, гдⷭ҇и і҆и҃се хрⷭ҇тѐ сн҃е бж҃їй, поми́лꙋй мѧ̀! всѐ. Ѻ҆́въ же, по́лъ: і҆и҃се сн҃е бж҃їй, поми́лꙋй мѧ̀! є҆́же ᲂу҆до́бнѣйше є҆́сть за не́мощь є҆щѐ ᲂу҆ма̀ и҆ младе́нчество: ниже́ бо мо́жетъ кто̀ ѡ҆ себѣ̀ та́йнѡ без̾ дх҃а є҆ди́нъ рещѝ гдⷭ҇а і҆и҃са, то́чїю дх҃омъ ст҃ы́мъ²⁰¹, чи́стѣ и҆ соверше́ннѣ: но ꙗ҆́кѡ младе́нецъ нѣмотꙋ́ѧ, є҆щѐ соверши́ти сїю̀ члено́внѣ не могі́й. Не до́лженъ же є҆́сть ча́стѡ премѣнѧ́ти призыва̑нїѧ и҆ме́нъ лѣ́ности ра́ди, но ко́сненнѡ ᲂу҆держа́нїѧ ра́ди. Па́ки: ѻ҆́вїи ᲂу҆́бѡ ᲂу҆сты̀, ѻ҆́ви же ᲂу҆мо́мъ ᲂу҆́чатъ глаго́лати тꙋ̀, а҆́зъ же ѻ҆боѧ̑ глаго́лю. Ѻ҆вогда̀ ᲂу҆̀бо и҆знемога́етъ ᲂу҆́мъ глаго́лати ᲂу҆ныва́ѧ, ѻ҆вогда́ же ᲂу҆ста̀: и҆ сегѡ̀ ра́ди ѻ҆бои́ми подоба́етъ моли́тисѧ, и҆ ᲂу҆сты̀ и҆ ᲂу҆мо́мъ, ѻ҆ба́че безмо́лвнѣ и҆ несмꙋще́ннѣ вопи́ти подоба́етъ, ꙗ҆́кѡ да не гла́съ, смꙋща́ѧ чꙋ́вство и҆ внима́нїе ᲂу҆ма̀, воспѧща́етсѧ, до́ндеже ᲂу҆́мъ ѡ҆бы́кнꙋвъ въ дѣ́лѣ пред̾ꙋспѣ́етъ, и҆ си́лꙋ ѿ дх҃а прїи́метъ, во є҆́же крѣ́пцѣ и҆ всѧ́кѡ моли́тисѧ. Тогда́ бо не тре́бꙋетъ глаго́лати ᲂу҆сты̀, нижѐ мо́жетъ, дово́ленъ сы́й то́чїю ᲂу҆мо́мъ соверше́ннѡ твори́ти дѣ́ланїе.

Ѡ҆ є҆́же ка́кѡ подоба́етъ держа́ти ᲂу҆́мъ.

г҃. Вѣ́ждь, ꙗ҆́кѡ никто́же мо́жетъ собо́ю ᲂу҆держа́ти ᲂу҆́мъ, а҆́ще не ѿ дꙋ́ха ᲂу҆держа́нъ бꙋ́детъ: неꙋдержи́мь бо є҆́сть, не по є҆стествꙋ̀, ꙗ҆́кѡ при́снѡ дви́жимь, но ѿ нерадѣ́нїѧ скита́нїе ᲂу҆сво́йствовавъ себѣ̀, ѿ нача́ла въ се́мъ ѡ҆бы́кнꙋвъ. Престꙋпле́нїемъ бо за́повѣдей ѿ бг҃а возроди́вшагѡ на́съ ѿлꙋчи́хомсѧ, є҆́же въ чꙋ́вствѣ ᲂу҆́мное є҆гѡ̀ чꙋ́вство же и҆ соедине́нїе погꙋби́вше. Ѿтꙋ́дꙋ бо поползнꙋ́всѧ ᲂу҆́мъ, и҆ бг҃а ѿлꙋчи́всѧ, повсю́дꙋ во́дитсѧ ꙗ҆́кѡ плѣ́нникъ. И҆ невозмо́жно є҆мꙋ̀ и҆́накѡ стоѧ́ти, а҆́ще не бг҃ꙋ повине́тсѧ и҆ ᲂу҆держа́нъ бꙋ́детъ ѿ негѡ̀, и҆ томꙋ̀ соединѧ́тисѧ съ весе́лїемъ, и҆ моли́тисѧ є҆мꙋ̀ ча́стѣ и҆ терпѣли́внѣ, и҆ и҆сповѣ́доватисѧ томꙋ̀ ᲂу҆́мнѣ на всѧ́къ де́нь, є҆ли̑ка согрѣша́емъ, и҆́же и҆ проща́етъ всѧ̑ а҆́бїе во смире́нїи и҆ сокрꙋше́нїи просѧ́щымъ, и҆ при́снѡ и҆́мѧ є҆гѡ̀ ст҃о́е призыва́ющымъ. И҆сповѣ́дайтесѧ бо, глаго́летъ дв҃дъ, гдⷭ҇ви, и҆ призыва́йте и҆́мѧ ст҃о́е є҆гѡ̀²⁰². И҆ воздохнове́нїе же ѿ дыха́нїѧ, внегда̀ смежи́ти ᲂу҆ста̀, ᲂу҆держи́тъ ᲂу҆́мъ, но ѿ ча́сти и҆ па́ки расточа́етсѧ. Є҆гда́ же ᲂу҆́бѡ прїи́детъ дѣ́йство моли́твы, тогда̀ вои́стиннꙋ то̀ держи́тъ є҆го̀ ᲂу҆ себѐ, и҆ весели́тъ, и҆ ѿ плѣне́нїѧ возбранѧ́етъ. Ѻ҆ба́че быва́етъ, є҆гда̀ ᲂу҆мꙋ̀ молѧ́щꙋсѧ и҆ въ се́рдцѣ пребыва́ющꙋ, и҆ мы́сль пари́тъ, и҆ны̑мъ поꙋча́ющисѧ. Сїѧ́ же ниеди́номꙋ покарѧ́етсѧ, ра́звѣ то́чїю совершє́ннымъ въ дс҃ѣ ст҃ѣ, во є҆́же не пари́ти доспѣ́вшымъ ѡ҆ хрⷭ҇тѣ̀ і҆и҃сѣ.

Ѡ҆ є҆́же ка́кѡ подоба́етъ ѿгонѧ́ти по́мыслы.

д҃. Никто̀ новонача́ленъ когда̀ ѿгонѧ́етъ по́мыслъ, а҆́ще не бг҃ъ ѿжене́тъ того̀, си́льныхъ бо є҆́сть, бра́нь сотвори́ти и҆ прогонѧ́ти ѧ҆̀: но и҆ сі́и не ѿ себѐ ѿгонѧ́ютъ и҆̀хъ, но съ бг҃омъ подви́жꙋтсѧ на бра́нь проти́вꙋ и҆̀хъ, ꙗ҆́кѡ ѡ҆болче́ни сꙋ́ще во всеѻрꙋ́жїе є҆гѡ̀. Ты́ же приходѧ́щымъ по́мыслѡмъ призыва́й, вмѣ́стѡ ѻ҆рꙋ́жїѧ, гдⷭ҇а і҆и҃са ча́стѣ и҆ терпѣли́внѣ, и҆ ѿбѣ́гнꙋтъ: не терпѧ́ще бо теплоты̀ серде́чныѧ ѿ моли́твы восходѧ́щїѧ, ꙗ҆́кѡ ѿ ѻ҆гнѧ̀ пали́ми ѿбѣга́ючъ. І҆и҃совымъ, глаго́летъ лѣ́ствичникъ, и҆́менемъ бі́й сꙋпоста́ты: и҆́бо бг҃ъ на́шъ ѻ҆́гнь є҆́сть, поѧда́ѧй ѕло́бꙋ: ско́рый въ по́мощь гдⷭ҇ь, сотвори́тъ а҆́бїе ѿмще́нїе вседꙋ́шнѣ вопїю́щихъ къ немꙋ̀ де́нь и҆ но́щь. Не и҆мы́й же дѣ́йства мл҃твы, и҆ны́мъ ѡ҆́бразомъ побѣжда́етъ тѣ́хъ, мѡѷсе́ю подража́ѧ: воста́вшꙋ бо, и҆ на не́бо просте́ршꙋ рꙋ́цѣ и҆ ѻ҆́чи²⁰³, ѿгонѧ́етъ и҆̀хъ бг҃ъ. Та́же па́ки сѣ́дъ, начина́етъ таковы́й моли́твꙋ терпѣли́внѣ, и҆ то́йже ѡ҆́бразъ ᲂу҆потреблѧ́етъ, и҆́же не ᲂу҆̀ стѧжа́вый си́лꙋ моли́твы, но и҆́же и҆мѣ́ѧй дѣ́йство моли́твы на тѣлє́сныѧ стра̑сти: ᲂу҆ны́нїе, глаго́лю, и҆ блꙋ́дъ, жестѡ́кїѧ и҆ тѧ́жшыѧ стра̑сти, мно́жицею востаѧ̀, простира́етъ рꙋ́цѣ въ по́мощь на нѧ̀. Ѻ҆ба́че ма́лѡ, пре́лести ра́ди сїѐ твори́тъ, и҆ па́ки сѣди́тъ, да не ка́кѡ возмечта́етъ ᲂу҆́мъ є҆гѡ̀ вра́гъ свы́ше, воѡбраже́нїе си́рѣчь и҆́стины показа́въ. Є҆́же бо и҆мѣ́ти ᲂу҆́мъ горѣ̀, и҆ до́лꙋ, и҆ въ се́рдцѣ, и҆ повсю́дꙋ непогрѣ́шенъ и҆ безвре́денъ соблюстѝ, є҆ди́нѣхъ сво́йственно є҆́сть чи́стыхъ и҆ соверше́нныхъ.

Ѡ҆ є҆́же ка́кѡ подоба́етъ пѣ́ти.

є҃. Ѻ҆́вїи ᲂу҆̀бо ма́лѡ глаго́лютъ, ѻ҆́вїи же мно́гѡ, дрꙋзі́и же ника́кѡ. Ты́ же ни мно́гащи по́й, смꙋще́нїе бо є҆́сть, нижѐ ѿню́дъ ѡ҆ставлѧ́й, послѣ́дꙋющагѡ ра́ди разслабле́нїѧ и҆ нерадѣ́нїѧ, но и҆̀же ма́лѡ пою́щымъ подража́й: Всѧ́ка бо мѣ́ра и҆зѧ́щна, по рече́нїю премꙋ́дрыхъ. Є҆́же бо мнѡ́га пѣ́ти дѣ́лательныхъ є҆́сть, ра́зꙋма ра́ди и҆ трꙋда̀, а҆ не безмо́лвныхъ: довлѣ́юще и҆̀мъ въ бз҃ѣ є҆ди́номъ въ се́рдцѣ моли́тисѧ, ᲂу҆клонѧ́ющесѧ ѿ помышле́нїй. Безмо́лвїе бо є҆́сть ѿложе́нїе помышле́нїй чꙋ́вственныхъ же и҆ ᲂу҆́мныхъ, по лѣ́ствичникꙋ. Си́лꙋ бо свою̀ всю̀ и҆стощи́въ ᲂу҆́мъ, въ пѣ́нїи и҆знемо́жетъ, во є҆́же не крѣ́пцѣ и҆ терпѣли́внѣ моли́тисѧ. Но́щїю ᲂу҆̀бо, глаго́летъ лѣ́ствичникъ, мно́гое вре́мѧ моли́твѣ дава́й, ма́ло же пѣ́нїю: си́це и҆ ты̀ до́лженъ є҆сѝ твори́ти. Є҆гда̀ зри́ши въ сидѣ́нїи твое́мъ дѣ́йствꙋющꙋ моли́твꙋ, и҆ не престаю́щꙋ двиза́тисѧ въ твое́мъ се́рдцѣ, да не когда̀ ѡ҆ста́виши ю҆̀, и҆ воста́неши пѣ́ти до вре́мене, а҆́ще не по смотре́нїю ѡ҆ста́витъ тѧ̀. Бг҃а бо ѡ҆ста́вивъ внꙋ́трь, и҆звнѣ̀ томꙋ̀ прибесѣ́дꙋеши, ѿ высо́кихъ къ до́лꙋ пове́ржєннымъ прекланѧ́ѧсѧ, но и҆ молвꙋ̀ є҆́й содѣ́ловаеши, и҆ тишинꙋ̀ ᲂу҆ма̀ смꙋща́еши: безмо́лвїе бо по и҆́мени свое́мъ и҆ дѣѧ́нїе и҆́мать, є҆́же въ ми́рѣ и҆ тишинѣ̀ и҆мѣ́ти то̀: Бг҃ъ бо ми́ръ є҆́сть, превы́шше молвы̀ и҆ во́плей. И҆ пѣ́сни бо на́шей а҆́гг҃льской бы́ти досто́итъ по жи́тельствꙋ, а҆ не плотско́й. Є҆́же бо гла́снымъ во́племъ пѣ́ти, ᲂу҆́мнагѡ во́плѧ є҆́сть зна́менїе, и҆ ра́ди лѣ́ности и҆ невѣ́жества на́шегѡ дано̀ бы́сть, за є҆́же привозводи́тисѧ ко и҆́стиннымъ. Невѣ́дꙋющымъ бо моли́твы, ꙗ҆́же є҆́сть добродѣ́телей и҆сто́чникъ по лѣ́ствичникꙋ, напаѧ́ющїй сады̀, дꙋшє́вныѧ си̑лы, подоба́етъ мно́гѡ пѣ́ти, и҆ без̾ мѣ́ры, и҆ при́снѡ въ разли́чїи мно́гихъ бы́ти, и҆ никогда́же престава́ти, до́ндеже ѿ мно́гагѡ приболѣ́зненнагѡ дѣѧ́нїѧ во видѣ́нїе пред̾ꙋспѣ́ютъ, моли́твꙋ ᲂу҆́мнꙋю ѡ҆брѣ́тше, дѣ́йствꙋющꙋ внꙋ́трь и҆́хъ. И҆́но бо є҆́сть дѣѧ́нїе безмо́лвїѧ, и҆ и҆́но ѻ҆́бщагѡ житїѧ̀: ко́йждо же, въ не́же при́званъ бѣ̀, пребыва́ѧй спасе́тсѧ. Тѣ́мже бою́сѧ писа́ти ра́ди немощны́хъ, зрѧ́ тѧ посредѣ̀ си́хъ ѡ҆браща́ющасѧ. Всѧ́къ бо, и҆́же ѿ слы́шанїѧ и҆лѝ ᲂу҆че́нїѧ въ моли́твѣ стражда́й, погиба́етъ, ꙗ҆́кѡ нестѧжа́вый наставлѧ́ющагѡ. Вкꙋси́вый же благода́ти, до́лженъ є҆́сть въ мѣ́рꙋ пѣ́ти, ꙗ҆́коже ѻ҆тцы̀ реко́ша, мно́жае же въ моли́твѣ трꙋжда́тисѧ. Разлѣни́выйсѧ же до́лженъ є҆́сть пѣ́ти, и҆лѝ прочита́ти дѣ́ѧтєльнаѧ ѻ҆те́чєскаѧ писа̑нїѧ. Не тре́бꙋетъ во кора́бль ве́сєлъ, вѣ́трꙋ вѣ̑трила протѧ́жꙋщꙋ, бла́го є҆мꙋ̀ вѣ́ѧнїе, дꙋ́хꙋ подаю́щꙋ къ препла́ванїю сла́нагѡ мо́рѧ страсте́й: стоѧ́щъ же вє́слы, и҆лѝ ладїе́ю влече́тсѧ. А҆́ще же нѣ́цыи любопри́тельнѣ предлага́ютъ ѻ҆тє́цъ ст҃ы́хъ, и҆лѝ здѣ̀ нѣ́кїихъ, ꙗ҆́кѡ всено́щное творѧ́хꙋ стоѧ́нїе, и҆ непреста́нно ѱалмопѣ́нїе: ѿвѣща́емъ си̑мъ ѿ писа́нїй, ꙗ҆́кѡ не всѣ́хъ всѧ̑ совершє́нна скꙋ́дости ра́ди тща́нїѧ, и҆ и҆знеможе́нїѧ си́лы: но ма̑лаѧ ᲂу҆́бѡ, не всѧ́кѡ ма̑ла длѧ вели́кихъ: вели̑каѧ же въ ма́лыхъ, не всѧ́кѡ совершє́нна: совершє́ннымъ бо всѧ̑ ᲂу҆до́бь дѣ́йствꙋєма сꙋ́ть. Зане́же не всѝ сꙋ́ть при́снѡ, ны́нѣ и҆лѝ дре́вле дѣ́латели, нижѐ всѝ тѣ́мъ же пꙋте́мъ ше́ствоваша, и҆лѝ до конца̀ въ то́мъ пребы́ша. Мно́зи бо ѿ дѣ́ланїѧ прїидо́ша въ видѣ́нїе, и҆ преста́ша ѿ всѣ́хъ, сꙋббѡ́тствовавше по дꙋхо́вномꙋ зако́нꙋ, и҆ ѡ҆ бз҃ѣ є҆ди́номъ веселѧ́хꙋсѧ, насыще́ни бж҃е́ственныѧ пи́щи, и҆ не попꙋща́еми пѣ́ти, и҆лѝ во и҆но́мъ чесо́мъ поꙋча́тисѧ, ѿ благода́ти сꙋ́ще во ᲂу҆́жасѣ до вре́мене, дости́гше жела́нїй конца̀ ѿ ча́сти ꙗ҆́кѡ во ѡ҆брꙋче́нїи. И҆ні́и же, да́же до кончи́ны въ дѣ́ланїи ᲂу҆́спше спасо́шасѧ, воздаѧ́нїѧ въ бꙋ́дꙋщемъ ѡ҆жида́юще. Нѣ́цыи же, при сме́рти и҆звѣще́нїе прїе́мше, и҆лѝ по сме́рти возблагоꙋха́вше въ показа́нїе своегѡ̀ спасе́нїѧ, благода́ть креще́нїѧ и҆мꙋ́ще ꙗ҆́коже всѝ, и҆ ра́ди плѣне́нїѧ и҆ невѣ́дѣнїѧ ᲂу҆ма̀ и҆́хъ не прїѡбщи́вшесѧ, та́йнѡ съ не́ю сꙋ́ще живꙋ́ще. И҆ні́и же во ѻ҆бои́хъ благоискꙋ́сствꙋютъ, си́рѣчь въ пѣ́нїи и҆ моли́твѣ, и҆ та́кѡ жи́тельствꙋютъ, бога́тꙋ и҆мꙋ́ще благода́ть ꙗ҆́кѡ приснодви́жимꙋ, никогда́же ѿ чесогѡ̀ возбранѧ́еми. Дрꙋзі́и же, да́же до конца̀ па́че грꙋ́би сꙋ́ще, безмо́лвїе соблюдо́ша, дово́льствꙋеми къ моли́твѣ то́чїю ѕѣлѡ̀ до́брѣ, ꙗ҆́кѡ є҆ди́ни съ є҆ди́нымъ бг҃омъ соедини́вшесѧ. Соверше́ннїи бо, ꙗ҆́коже реко́хомъ, всѧ̑ мо́гꙋтъ ѡ҆ ᲂу҆крѣплѧ́ющемъ и҆̀хъ хрⷭ҇тѣ̀, є҆мꙋ́же сла́ва во вѣ́ки вѣкѡ́въ, а҆ми́нь.

Ѡ҆ є҆́же ка́кѡ подоба́етъ пита́тисѧ.

ѕ҃. Ѡ҆ ᲂу҆тро́бѣ же что̀ рекꙋ̀, цари́цѣ страсте́й; А҆́ще возмо́жеши ᲂу҆мертви́ти тꙋ̀, и҆ полꙋме́ртвꙋ содѣ́лати, да не и҆знемо́жеши. Ѡ҆блада́ бо мѧ̀, возлю́бленне, и҆ ꙗ҆́кѡ ра́бъ тоѧ̀ и҆ содрꙋ́гъ слꙋжꙋ̀ є҆́й, содѣ́йственницѣ бѣсовѡ́мъ и҆ вселе́нїю страсте́й. То́ю бо паде́нїе на́ше быва́етъ, и҆ то́ю воста́нїе, є҆гда̀ благоꙋчреди́тсѧ, и҆ то́ю ѿпадо́хомъ пе́рвагѡ и҆ втора́гѡ досто́инства бж҃е́ственнагѡ. И҆́бо растлѣ́вшꙋсѧ є҆мꙋ̀ сꙋ́щꙋ и҆з̾ нача́ла, па́ки ѡ҆ хрⷭ҇тѣ̀ ѡ҆бновле́ни бы́хомъ. И҆ сѐ ѿпадо́хомъ ны́нѣ ѿ бг҃а небреже́нїемъ за́повѣдей, блюдꙋ́щихъ и҆ возраста́ющихъ благода́ть во предспѣ́ѧнїи: а҆́ще не разꙋмѣ́юще и҆ возно́симсѧ, мнѧ́щесѧ съ бг҃омъ бы́ти. Мнѡ́га же разли̑чїѧ и҆́мꙋтъ въ пи́щи тѣлеса̀, ꙗ҆́коже ѻ҆тцы̀ реко́ша. И҆ ѻ҆́въ ᲂу҆́бѡ ма́лѡ: ѻ҆́въ же мно́гѡ тре́бꙋетъ къ составле́нїю є҆сте́ственныѧ своеѧ̀ си́лы: кі́йждо по си́лѣ, и҆ навыкнове́нїю дово́ленъ сы́й. Ѻ҆ба́че безмо́лвствꙋѧй, всегда̀ въ скꙋ́дости до́лженъ є҆́сть бы́ти не насыща́ѧсѧ: ѡ҆тѧгче́ннꙋ бо стома́хꙋ, и҆ ᲂу҆мꙋ̀ помꙋще́ннꙋ си́мъ, нижѐ моли́твꙋ мо́жетъ глаго́лати крѣ́пцѣ, и҆лѝ чи́стѣ: но ѡ҆ воспаре́нїѧ мно́гихъ бра́шенъ сно́мъ преклонѧ́емь, ᲂу҆снꙋ́ти ско́рѡ жела́етъ, ѿ чесогѡ̀ мечта̑нїѧ безчи́слєнна во снѣ̀ привпа́даютъ ᲂу҆мꙋ̀. Тѣ́мже хотѧ́щемꙋ спасе́нїе полꙋчи́ти, и҆ нꙋ́дѧщемꙋсѧ гдⷭ҇а ра́ди безмо́лвнѡ пожи́ти: хлѣ́ба, ꙗ҆́коже мню̀, лі́тра²⁰⁴ довлѣ́етъ є҆мꙋ̀, и҆ воды̀, и҆лѝ вїна̀, въ де́нь трѝ и҆лѝ четы́ре ча̑ши, и҆ ѿ прилꙋча́ющихсѧ снѣ́дей ма́лѡ ѿ всѣ́хъ во вре́мѧ причаща́тисѧ, ѿрѣва́ѧ насыще́нїе. Да понѐ сїѐ премꙋ́дрѣ ᲂу҆потреби́въ, киче́нїѧ причаще́нїемъ ѿ всѣ́хъ и҆збѣ́гнꙋти возмо́жетъ, и҆ бж҃їихъ ѕѣлѡ̀ до́брыхъ творе́нїй не возгнꙋша́етсѧ, благодарѧ̀ є҆мꙋ̀ ѡ҆ всѣ́хъ: и҆ сїѐ є҆́сть благоразꙋ́мныхъ разсꙋжде́нїе. Немоществꙋ́ющымъ же въ вѣ́рѣ и҆ дꙋшѣ̀, воздержа́нїе мно́жае поле́зно є҆́сть ѿ снѣ́дей, и҆̀мже ѕе́лїе ꙗ҆́сти повелѣ̀ а҆пⷭ҇лъ,²⁰⁵ за є҆́же не вѣ́ровати и҆̀мъ ѿ бг҃а сохранє́нымъ бы́ти. Что́ же тѝ рекꙋ̀, ꙗ҆́кѡ пра́вила, и҆ тѧготы̀ мно́ги попроси́лъ є҆сѝ, ста́ръ сы́й; ю҆́нїи не мо́гꙋтъ мѣ́риломъ и҆ мѣ́рою, и҆ ка́кѡ ты̀ то̀ ᲂу҆держи́ши; свобо́дꙋ бо подоба́етъ тѝ и҆мѣ́ти во все́мъ ꙗ҆дꙋ́щꙋ. А҆́ще же побѣжда́ешисѧ, раска́йсѧ, и҆ за́зри себѣ̀, и҆ па́ки начнѝ, и҆ не преста́ни си́це творѧ̀ всегда̀, па́даѧ и҆ востаѧ̀, и҆ ᲂу҆корѧ́ѧ при́снѡ себѐ, а҆ не и҆но́го, и҆ поко́й и҆мѣ́ти бꙋ́деши: премꙋ́дрѣ паде́нїѧми побѣ́дꙋ творѧ̀, по писа́нїю. Ѻ҆ба́че да не прехо́диши предѣ́лъ, є҆го́же предположи́хомъ, и҆ довлѣ́етъ тѝ. Не ᲂу҆крѣплѧ́ютъ бо тѣ́хъ прѡ́чїѧ снѣ̑ди толи́кѡ, є҆ли́кѡ хлѣ́ба и҆ воды̀ причаще́нїе. Сегѡ̀ ра́ди глаго́ла проро́къ, и҆на̑ѧ въ ничто́же полага́ѧ: Сы́не человѣ́чь! ꙗ҆́ждь вѣ́сомъ хлѣ́бъ тво́й, и҆ во́дꙋ мѣ́рою пі́й.²⁰⁶ Три́ бо предѣ́лы и҆́мать снѣ́дь: воздержа́нїе, самодово́лїе и҆ сы́тость. Воздержа́нїе є҆́сть, є҆́же а҆лка́ти ꙗ҆́дшꙋ: самодово́лїе же, є҆́же ни а҆лка́ти, ни ѡ҆тѧгоща́тисѧ: сы́тость же, є҆́же ѡ҆тѧгча́тисѧ ма́лѡ. А҆ є҆́же по насыще́нїи па́ки ꙗ҆́сти, две́рь є҆́сть чревобѣ́сїю, є҆́юже блꙋ́дъ вхо́дитъ. Ты́ же сїѧ̑ и҆звѣ́стнѡ вѣ́дый, по свое́й си́лѣ лꙋ́чшее и҆зберѝ, не престꙋпа́ѧ предѣ́лы: соверше́нныхъ бо є҆́сть и҆ сїѐ, по а҆пⷭ҇лꙋ, є҆́же и҆ насыща́тисѧ и҆ а҆лка́ти, и҆ во все́мъ мѡ́щнымъ бы́ти.²⁰⁷

Ѡ҆ пре́лести, и҆дѣ́же и҆ ѡ҆ и҆ны́хъ мно́гихъ предло́гахъ.

з҃. Зрѝ ᲂу҆̀бо, ꙗ҆́кѡ хощꙋ́ тѧ и҆звѣ́стнѡ вѣ́дѣти ѡ҆ пре́лести, є҆́же сохранѧ́тисѧ ѿ неѧ̀, да не ка́кѡ невѣ́дѣнїемъ стреми́вшись ве́лїй вре́дъ прїи́меши, и҆ дꙋ́шꙋ погꙋби́ши. Занѐ ᲂу҆до́бь приклонѧ́етсѧ самовла́стное человѣ́ка, ко прїѡбще́нїю сопроти́вныхъ, па́че же неискꙋ́сныхъ, ꙗ҆́кѡ ѿ ни́хъ дѣ́йствꙋемыхъ. Бли́зъ бо и҆́хъ и҆ ѻ҆́крестъ бѣ́сове новонача́льныхъ и҆ самочи́нныхъ сꙋ́ть, распростира́юще сѣ̑ти по́мыслѡвъ, и҆ рвы̀ паде́нїй, и҆ мечта́нїй па́гꙋбꙋ: гра́дъ бо и҆́хъ под̾ ѡ҆блада́нїемъ ва́рварѡвъ є҆́сть. И҆ не подоба́етъ чꙋди́тисѧ, а҆́ще прельсти́сѧ кто̀, и҆лѝ и҆зстꙋпѝ ᲂу҆мо́мъ, и҆лѝ пре́лесть прїѧ́тъ, и҆лѝ прїе́млетъ, и҆лѝ чꙋ́ждаѧ и҆́стины зри́тъ, и҆лѝ глаго́летъ ѿ неискꙋ́сства и҆ неразꙋ́мїѧ неподоба̑ющаѧ. Мно́гажды бо ѿ грꙋ́бости кто̀ ѡ҆ и҆́стинѣ вѣща́ѧ, и҆ и҆на̑ѧ вмѣ́стѡ и҆нѣ́хъ та́йнѣ глаго́лѧ, не вѣ́сть пра́вѣ рещѝ ꙗ҆́коже є҆́сть, и҆ мно́зѣхъ ᲂу҆жасѝ и҆ поноше́нїе и҆ смѣ́хъ, безꙋ́мнѣ глаго́лѧ, безмо́лвствꙋющымъ нано́ситъ. Нѣ́сть бо чꙋ́дно прельсти́тисѧ комꙋ̀ новонача́льнꙋ и҆ по мно́зѣхъ трꙋдѣ́хъ, зане́же бы́сть мнѡ́зѣмъ и҆ ны̑нѣшнимъ и҆ дрє́внимъ бг҃а взыскꙋ́ющымъ. И҆́бо па́мѧть бж҃їѧ, сі́есть ᲂу҆́мнаѧ моли́тва, вы́шша всѣ́хъ дѣ́ланїй є҆́сть, сїѧ̀ є҆́сть и҆ добродѣ́телей глава̀, ꙗ҆́кѡ любы̀ бж҃їѧ. И҆ и҆́же безстꙋ́днѣ и҆ де́рзостнѣ хотѧ́й ко бг҃ꙋ вни́ти, и҆ и҆сповѣ́дати є҆го̀ чи́стѣ, и҆ стѧжа́ти є҆го̀ въ себѣ̀ нꙋ́дѧсѧ, ᲂу҆до́бь ᲂу҆мерщвлѧ́емь є҆́сть сицевы́й ѿ самѣ́хъ бѣсѡ́въ, глаго́лю, а҆́ще попꙋ́ститсѧ: дерзнове́ннѡ бо и҆ де́рзостнѡ па́че ᲂу҆строе́нїѧ своегѡ̀ взыска́въ, съ киче́нїемъ понꙋжда́етсѧ до тогѡ̀ пре́жде вре́мени доспѣ́ти. Мно́гажды же благоꙋтро́бствꙋѧ гдⷭ҇ь, зрѧ̀ на́съ въ высо́кихъ де́рзѡстны, не попꙋща́етъ и҆скꙋшє́ннымъ бы́ти, ꙗ҆́кѡ да своѐ ко́ждо позна́въ мнѣ́нїе ѡ҆ себѣ̀ ѡ҆брати́тсѧ, пре́жде да́же не бꙋ́детъ поноше́нїе бѣсѡ́мъ, и҆ смѣ́хъ, и҆лѝ пла́чь въ человѣ́цѣхъ, и҆ па́че съ долготерпѣ́нїемъ взыскꙋ́ющемꙋ и҆ со смире́нїемъ, па́че же съ повинове́нїемъ, и҆ вопроше́нїемъ и҆скꙋ́сныхъ быва́етъ сїѐ чꙋ́дное дѣ́ло. Да не ка́кѡ вмѣ́стѡ пшени́цы, те́рнїе ѻ҆́тай по́жнетъ, и҆ го́ресть вмѣ́стѡ сла́дости, и҆ вмѣ́стѡ спасе́нїѧ ѡ҆брѧ́щетъ поги́бель. Си́льныхъ бо и҆ соверше́нныхъ є҆́сть противобо́рствовати при́снѡ бѣсѡ́мъ и҆ ме́чь дх҃о́вный, и҆́же є҆́сть глаго́лъ бж҃їй,²⁰⁸ вы́нꙋ на ни́хъ возпростира́ти. Немощні́и же и҆ новонача́льнїи, бѣ́гство со благоговѣ́нїемъ и҆ стра́хомъ ꙗ҆́кѡ тверды́ню ᲂу҆потреблѧ́юще, и҆ бра́ни ѿрека́ющесѧ, не смѣ́ѧ пре́жде вре́мени ра́товатисѧ, сме́рти ᲂу҆бѣга́ютъ. Ты́ же, а҆́ще безмо́лвствꙋеши до́брѣ, ча́ѧ со бг҃омъ бы́ти, никогда́же да прїи́меши, а҆́ще что̀ ви́диши чꙋ́вственно и҆лѝ ᲂу҆́мно, и҆лѝ и҆звнѣꙋ́дꙋ, и҆лѝ внꙋтрьꙋ́дꙋ, и҆лѝ а҆́ще и҆ ѡ҆́бразъ хрⷭ҇то́въ, и҆лѝ си́рѣчь а҆́гг҃лѡвъ, и҆лѝ ст҃а́гѡ зра́къ, и҆лѝ свѣ́тъ ᲂу҆мо́мъ мечта́етсѧ, и҆лѝ воѡбража́етсѧ, ꙗ҆́кѡ и҆ са́мъ ᲂу҆́мъ ѡ҆ себѣ̀ є҆стество́мъ и҆́мать мечта́тельное, и҆ ᲂу҆до́бь зра́ки содѣва́ти мо́жетъ, во ꙗ҆̀же жела́етъ не ᲂу҆̀ ѻ҆па́снѣ семꙋ̀ внима́ющымъ: и҆́же и҆ са́мъ на себѧ̀ нано́ситъ вре́дъ: и҆ сама́ же та̀ па́мѧть благи́хъ и҆лѝ ѕлы́хъ воѡбража́ти внеза́пꙋ ᲂу҆ма̀ чꙋ́вство, и҆ къ мечта́нїю возводи́ти ѻ҆бы́че, и҆дѣ́же и҆ мечта́тель быва́етъ таковы́й ѡ҆ себѣ̀, а҆ не безмо́лвникъ. Сегѡ̀ ра́ди внима́й, да не приложи́ши вѣ́ровати чесомꙋ̀, согласꙋ́ѧсѧ съ тѣ́мъ вско́рѣ, а҆́ще и҆ бла́го є҆́сть, пре́жде вопроше́нїѧ и҆скꙋ́сныхъ и҆ и҆стѧза́нїѧ мно́га, ꙗ҆́кѡ да не вре́дъ прїи́меши: но пребыва́й негодꙋ́ѧ къ томꙋ̀, при́снѡ блюдѧ̀ ᲂу҆́мъ сво́й неѡбразова́нъ, безви́денъ, невоѡбрази́теленъ. Мно́гажды бо и҆ є҆́же ко и҆скꙋ́сꙋ ѿ бг҃а по́сланное вѣнца̀ ра́ди, мно́зѣхъ вредѝ. Хо́щетъ бо гдⷭ҇ь на́шъ самовла́стное на́ше и҆скꙋси́ти, ка́мѡ преклонѧ́етсѧ. Оу҆зрѣ́вый бо что̀ въ мы́сли и҆лѝ въ чꙋ́вствѣ, а҆́ще и҆ ѿ бг҃а є҆́сть, и҆ кромѣ̀ вопроше́нїѧ вѣ́дꙋщихъ прїи́метъ, ᲂу҆до́бь прельща́етсѧ, и҆лѝ прельща́тисѧ хо́щетъ, ꙗ҆́кѡ ᲂу҆добопрїѧ́теленъ. До́лженъ є҆́сть новонача́льный внима́ти серде́чномꙋ то́чїю дѣ́йствꙋ ꙗ҆́кѡ непреле́стнꙋ, и҆на̑ѧ же всѧ̑ не прїима́ти до вре́мене ми́ра страсте́й. Бг҃ъ бо не негодꙋ́етъ на и҆́же ѻ҆па́снѡ себѣ̀ внима́ющаго пре́лести ра́ди, а҆́ще си́це и҆ не прїи́метъ, є҆́же ѿ негѡ̀ кромѣ̀ вопроше́нїѧ, и҆ мно́га и҆спыта́нїѧ, но па́че похвалѧ́етъ ꙗ҆́кѡ премꙋ́дра, а҆́ще на нѣ́кїихъ и҆ негодова̀. Не всѣ́хъ же до́лженъ є҆́сть вопроша́ти, но є҆ди́наго, є҆мꙋ́же ввѣ́рено є҆́сть и҆ дрꙋги́хъ ѡ҆кормле́нїе, и҆ житїе́мъ блиста́юща, ᲂу҆бо́га ᲂу҆́бѡ сꙋ́ща, мнѡ́га же богатѧ́ща по писа́нїю²⁰⁹. Мно́зи бо неискꙋ́сни мно́зѣхъ немы́сленныхъ повреди́ша, и҆́хже сꙋ́дъ и҆́мꙋтъ по сме́рти. ²¹⁰ Не всѣ́хъ бо є҆́сть наста́вити и҆ и҆нѣ́хъ, но и҆̀мже даде́сѧ бж҃е́ственное разсꙋжде́нїе, по а҆пⷭ҇лꙋ. Разсꙋжде́нїе дх҃ѡ́въ ѿлꙋча́ющее го́ршее ѿ лꙋ́чшагѡ мече́мъ сло́ва. Кі́йждо бо сво́й ра́зꙋмъ и҆ разсꙋжде́нїе є҆сте́ственно, и҆лѝ дѣ́ѧтельно, и҆лѝ хꙋдо́жественно и҆́мать, а҆ не всѝ дх҃о́вное. Сегѡ̀ ра́ди глаго́ла премꙋ́дрый сїра́хъ: Совѣ̑тницы же твоѝ є҆ди́нъ ѿ ты́сѧщъ.²¹¹ Не ма́лъ же по́двигъ є҆́сть наста́вника ѡ҆брѣстѝ непреле́стна, и҆ дѣ́лы и҆ словесы̑ и҆ разꙋмѣ́ньми. Въ си́хъ ви́димь є҆́сть кто̀ непреле́стенъ сы́й, є҆гда̀ свидѣ́тельствовано ѿ бж҃е́ственныхъ писа́нїй и҆́мать и҆ дѣѧ́нїе и҆ мꙋдрова́нїе, смиренномꙋ́дрствꙋѧ, въ ни́хже подоба́етъ мꙋ́дрствовати. Нꙋ́жда бо не ма́ла дости́гнꙋти и҆́стины ꙗ҆́вственнѣ, и҆ чи́стꙋ бы́ти ѿ сопроти́вныхъ благода́ти, ꙗ҆́кѡ во ѡ҆́бразѣ и҆́стины ѡ҆бы́че дїа́волъ въ новонача́льныхъ па́че пока́зовати пре́лесть свою̀, преѡбразꙋ́ѧ лꙋка̑ваѧ своѧ̑ ꙗ҆́кѡ дꙋхѡ́вна. Сегѡ̀ ра́ди и҆́же къ чи́стѣй моли́твѣ доспѣ́ти тща́йсѧ въ безмо́лвїи, въ тре́петѣ мно́зѣ и҆ пла́чѣ и҆ чрез̾ вопро́съ и҆скꙋ́сныхъ наставле́нїемъ до́лженъ є҆́сть ше́ствовати, и҆ пла́кати всегда̀ ѡ҆ свои́хъ грѣсѣ́хъ, печа́лꙋѧ и҆ боѧ́сѧ, да не ка́кѡ мꙋ́ченъ бꙋ́детъ, и҆лѝ ѿпаде́тъ ѿ бг҃а, ѿлꙋче́нъ бы́въ ны́нѣ, и҆лѝ въ бꙋ́дꙋщемъ. Є҆гда̀ ᲂу҆́бѡ ви́дитъ кого̀ дїа́волъ плаче́внѣ живꙋ́ща, не пребыва́етъ та́мѡ, є҆́же ѿ пла́ча приходѧ́щагѡ смире́нїѧ боѧ́сѧ. А҆́ще же мечта́етъ кто̀ высѡ́каѧ со мнѣ́нїемъ доспѣ́ти, и҆ жела́нїе сатанино̀, а҆ не и҆́стинно стѧжа́въ, свои́ми сѣтѧ́ми ᲂу҆до́бь свѧзꙋ́етъ є҆го̀, ꙗ҆́кѡ своего̀ слꙋгꙋ̀. Сегѡ̀ ра́ди вели́ко ѻ҆рꙋ́жїе є҆́сть, є҆́же держа́ти въ моли́твѣ и҆ пла́чь, ꙗ҆́кѡ да не во мнѣ́нїе ѿ ра́дости моли́твы впаде́тъ: но радостопеча́лїе себѣ̀ и҆збира́ѧ, соблюде́тъ себѐ безвре́дна. Непреле́стнаѧ бо мл҃тва, теплота̀ съ моли́твою і҆и҃совою, влага́ющею ѻ҆́гнь въ зе́млю се́рдца на́шегѡ, попалѧ́ющаѧ стра̑сти ꙗ҆́кѡ те́рнїе, и҆ весе́лїе и҆ ти́хость въ дꙋшѣ̀ творѧ́щи, и҆ ни ѿ десны́ѧ и҆лѝ шꙋ́їѧ, и҆лѝ свы́ше грѧде́тъ, но въ се́рдцѣ прозѧба́етъ, ꙗ҆́коже и҆сто́чникъ воды̀ ѿ животворѧ́щагѡ дх҃а. И҆ сїю̀ є҆ди́нꙋ въ се́рдцѣ свое́мъ возлюбѝ ѡ҆брѣстѝ и҆ стѧжа́ти, блюдѧ̀ сво́й ᲂу҆́мъ присномечта́теленъ, и҆ на́гъ разꙋмѣ́нїй и҆ помышле́нїй, и҆ не бо́йтесѧ. Рекі́й бо: Дерза́йте: а҆́зъ є҆́смь, не бо́йтесѧ:²¹² то́й є҆́сть съ на́ми, є҆го́же мы̀ и҆́щемъ, защища́юща на́съ всегда̀, и҆ не до́лжни є҆смы̀ боѧ́тисѧ и҆лѝ воздыха́ти, бг҃а призыва́юще. А҆́ще же нѣ́цыи и҆ соврати́шасѧ, врежде́ни бы́вше ᲂу҆мо́мъ, вѣ́ждь, ꙗ҆́кѡ ѿ самочи́нїѧ и҆ высокомꙋ́дрїѧ сѐ пострада́ша. И҆́же бо въ повинове́нїи съ вопроше́нїемъ и҆ смиренномꙋ́дрїемъ взыскꙋ́ѧй бг҃а, никогда́же прїи́метъ вре́дъ благода́тїю хрⷭ҇та̀, всѣ̑мъ человѣ́кѡмъ хотѧ́щагѡ спасти́сѧ. А҆́ще же и҆ слꙋчи́тсѧ и҆скꙋше́нїе, ко и҆скꙋ́сꙋ и҆ вѣнцꙋ̀ быва́етъ, скорѣ́йшꙋ и҆мѣ́ѧ попꙋща́ющагѡ бг҃а по́мощь, и҆́миже вѣ́сть ѡ҆́бразы. Пра́вдѣ бо живꙋ́щаго, и҆ непоро́чнѣ жи́тельствꙋющаго и҆ ᲂу҆далѧ́ющагосѧ человѣкоꙋго́дїѧ и҆ высокомꙋ́дрїѧ, а҆́ще и҆ безчи́слєнна подви́гнетъ и҆скꙋшє́нїѧ на́нь ве́сь бѣсо́вскїй по́лкъ, не и҆́мать є҆го̀ вреди́ти, ꙗ҆́коже ѻ҆тцы̀ глаго́лютъ. Де́рзостнѣ же и҆ своесовѣ́тнѣ ходѧ́щїи, сі́и и҆ вре́дъ ᲂу҆до́бнѡ стра́ждꙋтъ. Сегѡ̀ ра́ди ца́рскїй пꙋ́ть при́снѡ держа́ти до́лженъ є҆́сть безмо́лвствꙋѧй, превосхожде́нїю бо во всѣ́хъ ᲂу҆до́бь мнѣ́нїе послѣ́довати ѡ҆бы́че, є҆го́же пре́лесть прїе́млетъ. Держи́ же и҆ дыха́нїе ᲂу҆ма̀, ма́лѡ смѣжи́въ въ моли́твѣ ᲂу҆ста̀, а҆ не дыха́нїе ноздре́й, ꙗ҆́коже неꙋче́ннїи, да не вре́дъ прїи́меши надыма́ѧсѧ. Три́ же добродѣ́тєли сꙋ́ть безмо́лвїѧ, и҆̀хже подоба́етъ ѻ҆па́снѡ соблюда́ти, и҆ на всѧ́къ ча́съ и҆спы́товати, а҆́ще въ тѣ́хъ при́снѡ пребыва́емъ, да не ка́кѡ ѿ забве́нїѧ крадо́ми, внѣꙋ́дꙋ тѣ́хъ ходи́ти бꙋ́демъ. Ꙗ҆̀же сꙋ́ть сїѧ̑: воздержа́нїе, молча́нїе и҆ самоꙋкоре́нїе, си́рѣчь смире́нїе: ѡ҆бдержи́тельны бо сꙋ́ть и҆ дрꙋ́гъ дрꙋ́га храни́тельны, ѿ ни́хже моли́тва ражда́етсѧ и҆ возраста́етъ вы́нꙋ. Разли́чно же нача́ло благода́ти въ моли́твѣ ꙗ҆влѧ́етсѧ въ нѣ́кїихъ, и҆ многоѡбра́знѣ раздѣле́нїе дх҃а,²¹³ глаго́летъ а҆пⷭ҇лъ, по свое́й є҆мꙋ̀ во́ли ви́димо є҆́сть и҆ познава́емо, ꙗ҆́коже по ѡ҆́бразꙋ и҆лїѝ ѳесві́тѧнина и҆ въ на́съ ꙗ҆влѧ́етсѧ. Въ нѣ́кїихъ ᲂу҆́бѡ дх҃ъ стра́ха, и҆стаева́ющъ го́ры страсте́й, и҆ сокрꙋша́ющъ ꙗ҆́коже ка́менїе жестѡ́каѧ сердца̀ прихо́дитъ ꙗ҆́кѡ ѿ стра́ха пригвожда́тисѧ, и҆ ме́ртвѣй пло́ти быва́ти. Въ дрꙋги́хъ же сотрѧсе́нїе, си́рѣчь ра́дованїе, є҆́же и҆ взыгра́нїе ꙗ҆снѣ́йше ѻ҆тцы̀ реко́ша, въ пе́рвыхъ невеще́ственное и҆ сꙋще́ственное во ᲂу҆тро́бѣ показꙋ́етсѧ: є҆́же бо безсꙋще́ственно и҆ неѷпоста́сно, и҆ не сꙋ́щее є҆́сть. Въ дрꙋги́хъ же коне́ченъ хла́дъ то́нокъ свѣ́та ми́ренъ, въ пред̾ꙋспѣ́вшихъ наипа́че въ моли́твѣ, дѣ́йствꙋетъ бг҃ъ, все́льшꙋсѧ хрⷭ҇тꙋ̀ въ се́рдцѣ,²¹⁴ по а҆пⷭ҇лꙋ, и҆ та́йнѣ ꙗ҆влѧ́емꙋ дх҃омъ. Сегѡ̀ ра́ди глаго́лаше бг҃ъ ко и҆лїѝ въ горѣ̀ хѡри́встѣй, ꙗ҆́кѡ не въ се́мъ и҆лѝ во ѻ҆́номъ гдⷭ҇ь, въ ча́стныхъ дѣ́йствахъ новонача́льныхъ, но въ хла́дѣ то́нцѣ свѣ́та, и҆ та́мѡ гдⷭ҇ь,²¹⁵ соверше́нство показа́въ моли́твы.

Вопро́съ: Что̀ сотвори́тъ кто̀, є҆гда̀ преѡбразꙋ́етсѧ бѣ́съ во а҆́гг҃ла свѣ́тла, и҆ прельща́етъ человѣ́ка;

Ѿвѣ́тъ: Сегѡ̀ ра́ди тре́бꙋетъ человѣ́къ мно́га разсꙋжде́нїѧ, ꙗ҆́кѡ да разли́чїе до́брагѡ и҆ ѕла́гѡ позна́етъ. Не вдава́йсѧ ᲂу҆̀бо ско́рѡ ꙗ҆влѧ́ємымъ ле́гкости ра́ди, но пребыва́й тѧ́жекъ, и҆ со и҆скꙋше́нїемъ мно́гимъ ᲂу҆де́рживай до́брое, лꙋка́вое же ѿмета́й: до́лженъ бо є҆сѝ и҆скꙋша́ти и҆ разсꙋжда́ти, и҆ тогда̀ вѣ́ровати. Вѣ́ждь ᲂу҆́бѡ, ꙗ҆́кѡ ꙗ҆влє́нна сꙋ́ть дѣ̑йства благода́ти, ꙗ҆̀же бѣ́съ, а҆́ще и҆ преѡбразꙋ́етсѧ, пода́ти не мо́жетъ ни кро́тости, ни ти́хости, ни смире́нїѧ, ни ненавидѣ́нїѧ мі́ра, ни сла̑сти и҆ стра̑сти ᲂу҆толѧ́етъ, ꙗ҆̀же сꙋ́ть благода́ти дѣ̑йства. Дѣ́йство же ѻ҆́нагѡ є҆́сть, дмѣ́нїе, и҆ высокомꙋ́дрїе и҆ страхова́нїе, и҆ всѧ́ка ѕло́ба. Ѿ дѣ́йства ᲂу҆́бѡ возмо́жеши позна́ти возсїѧ́вшїй свѣ́тъ въ дꙋшѣ̀ твое́й, бж҃їй ли є҆́сть, и҆лѝ сатани́нъ. Ѳрі́даѯъ подо́бенъ є҆́сть, по зрѣ́нїю горчи́цѣ, и҆ ѻ҆́цетъ подо́бенъ вїнꙋ̀, по видѣ́нїю: но ѿ вкꙋше́нїѧ горта́нь познава́етъ, и҆ разсꙋжда́етъ коегѡ́ждо разли́чїе. Си́це и҆ дꙋша̀, а҆́ще и҆́мать разсꙋжде́нїе, ѿ ᲂу҆́мнагѡ чꙋ́вства познава́етъ ст҃а́гѡ дх҃а дарова̑нїѧ, и҆ сатанина̀ мечта̑нїѧ.

Срѣ́тивъ бж҃е́ственный григо́рїй сїнаи́тъ ст҃а́го маѯі́ма, и҆ собесѣ́дꙋѧ съ ни́мъ, междꙋ̀ про́чимъ глаго́ла є҆мꙋ̀ и҆ сїѐ: Молю̀ тѧ̀, ѻ҆́тче мо́й честнѣ́йшїй, рцы́ ми: держи́ши ли ᲂу҆́мнꙋю моли́твꙋ; Ѻ҆́нъ же пони́къ ѡ҆скла́бисѧ, и҆ речѐ: не сокры́ю ѿ тебѐ, честны́й ѻ҆́тче, є҆́же бы́сть ѡ҆ мнѣ̀ чꙋ́до бг҃омт҃ре. А҆́зъ ѿ ю҆́ности моеѧ̀ ве́лїю и҆мѣ́хъ вѣ́рꙋ къ гпⷭ҇жѣ̀ мое́й бг҃омт҃ри, моли́хсѧ є҆́й со слеза́ми, да да́стъ мѝ благода́ть сїю̀ ᲂу҆́мныѧ моли́твы, и҆ нѣ́когда со слеза́ми во хра́мъ є҆ѧ̀ прише́дъ по ѻ҆бы́чаю, те́плѣ молѧ́хъ ю҆̀ ѡ҆ се́мъ. Пристꙋ́пль же и҆ бж҃е́ственное зра́ка є҆ѧ̀ начерта́нїе лобыза́ти со стра́хомъ, а҆́бїе ѡ҆щꙋти́хъ теплотꙋ̀ въ пє́рси моѧ̑ и҆ се́рдце впа́дшꙋ, не ѡ҆палѧ́ющꙋю внꙋ́трєннѧѧ, па́че же ᲂу҆слажда́ющꙋю и҆ ѡ҆роша́ющꙋю, и҆ къ ᲂу҆миле́нїю дꙋ́шꙋ мою̀ дви́жꙋщꙋю. Ѿто́лѣ ᲂу҆̀бо, ѻ҆́тче, се́рдце моѐ нача́тъ въ моли́твѣ внꙋтрьꙋ́дꙋ поꙋча́тисѧ, и҆ ᲂу҆́мъ въ па́мѧти і҆и҃са моегѡ̀ и҆ бг҃омт҃ре ᲂу҆слажда́тисѧ, и҆ непреста́ннѡ сего̀ и҆мѣ́ти, и҆ никогда́же ѡ҆скꙋдѣ̀ моли́тва сїѧ̀ ѿ се́рдца моегѡ̀: прости́ ми. И҆ бж҃е́ственный григо́рїй глаго́летъ, рцы́ ми: бы́сть ли тѝ ст҃е, моли́твѣ се́й, гдⷭ҇и і҆и҃се хрⷭ҇тѐ, и҆ прѡ́чаѧ, ѿ тебѐ соверша́емѣй, и҆змѣне́нїе бж҃е́ственное, и҆лѝ и҆зстꙋпле́нїе когда̀, и҆лѝ и҆́нъ нѣ́кїй пло́дъ моли́твы и҆ ст҃а́гѡ дх҃а; бж҃е́ственный же маѯі́мъ речѐ: сегѡ̀ ра́ди, ѻ҆́тче, ѿхожда́хъ, въ пꙋсты́нно мѣ́сто, и҆ безмо́лвїѧ при́снѡ жела́хъ, да пло́дъ моли́твы ꙗ҆вле́ннѣйшїй и҆ бога́тый ѡ҆брѧ́щꙋ, и҆́же є҆́сть бж҃е́ственное раче́нїе, и҆ восхище́нїе ᲂу҆ма̀ ко гдⷭ҇ꙋ. И҆ ст҃ы́й григо́рїй глаго́летъ: молю́ тѧ, ѻ҆́тче, рцы́ ми: и҆́маши ли сїѧ̑, ꙗ҆̀же глаго́ла; И҆ бж҃е́ственный маѯі́мъ па́ки пони́къ ѡ҆скла́бисѧ, и҆ глаго́ла: да́ждь мѝ ꙗ҆́сти, речѐ, и҆ не и҆спытꙋ́й пре́лести. Тогда̀ глаго́летъ є҆мꙋ̀ бж҃е́ственный григо́рїй: ѽ да бы́хъ и҆ а҆́зъ въ таковꙋ̀ пре́лесть впа́лъ, ст҃е, но молю́ тѧ, рцы́ ми ꙗ҆́снѣ: во вре́мѧ моли́твы, внегда̀ ᲂу҆́мъ восхи́титсѧ къ бг҃ꙋ, что̀ зри́тъ ᲂу҆́мныма ѻ҆чи́ма, мо́жетъ ли тогда̀ се́рдцемъ возводи́ти моли́твꙋ; И҆ ст҃ы́й маѯі́мъ ѿвѣща̀: ника́коже. Є҆гда́ бо благода́ть дх҃а ст҃а́гѡ прїи́детъ въ моли́твѣ, и҆ ᲂу҆держи́тъ ᲂу҆́мъ, тогда̀ престае́тъ моли́тва: занѐ ᲂу҆́мъ ѡ҆блада́емь є҆́сть прише́ствїемъ ст҃а́гѡ дх҃а, и҆ не мо́жетъ простира́ти си́лы своеѧ̀, но быва́етъ пра́зденъ, и҆ покарѧ́етеѧ то́чїю дх҃ꙋ ст҃о́мꙋ, а҆́може и҆зво́дитъ дх҃ъ, и҆лѝ въ невеще́ственный воздꙋ́хъ бж҃е́ственнагѡ и҆ неизрече́ннагѡ свѣ́та, и҆лѝ въ дрꙋго́е зрѣ́нїе и҆зстꙋпи́тельно и҆ несказа́нно и҆лѝ въ бж҃е́ственнꙋю бесѣ́дꙋ возво́дитъ ᲂу҆́мъ: си́рѣчь ᲂу҆тѣ́шитель дх҃ъ ст҃ы́й, коемꙋ́ждо по досто́инствꙋ самовла́стнѡ, ꙗ҆́коже хо́щетъ, подае́тъ ᲂу҆тѣше́нїе. И҆ сїѐ, є҆́же глаго́лю, мо́щно ви́дѣти ꙗ҆́снѡ во проро́цѣхъ и҆ а҆пⷭ҇лѣхъ, сподо́бившихсѧ зрѣ́ти толи̑каѧ видѣ̑нїѧ, а҆́ще и҆ человѣ́цы рꙋга́шасѧ, и҆ ꙗ҆́кѡ прельсти́вшихсѧ и҆ ᲂу҆пи́вшихсѧ вмѣнѧ́хꙋ. И҆ и҆са́їа ᲂу҆́бѡ глаго́летъ: ви́дѣхъ гдⷭ҇а на престо́лѣ высо́цѣ и҆ превознесе́ннѣ,²¹⁶ и҆ серафі́ми ѻ҆́крестъ є҆гѡ̀ предстоѧ́щыѧ. Стефа́нъ же первомꙋ́ченикъ зрѧ́ше нб҃са̀ ѿвє́рста, и҆ сн҃а человѣ́ческаго ѡ҆деснꙋ́ю стоѧ́ща бг҃а,²¹⁷ и҆ прѡ́чаѧ. Сицевы́мъ ѡ҆́бразомъ и҆ дне́сь рабѝ хрⷭ҇тѡ́вы сподоблѧ́ютсѧ зрѣ́ти видѣ̑нїѧ разли̑чна, и҆̀мже нѣ́цыи не вѣ́рꙋютъ, и҆ ника́коже ѻ҆́ныѧ прїе́млютъ за и҆́стинꙋ, но за пре́лесть, и҆ ви́дѧщихъ ѻ҆́ныѧ мнѧ́тъ прельсти́вшимсѧ. И҆ чꙋждꙋ́сѧ вельмѝ, ка́кѡ ѡ҆слѣпле́ннїи дꙋше́ю не вѣ́рꙋютъ дре́вле пред̾ѡбѣтова́нной і҆ѡ́илемъ благода́ти дх҃а, ꙗ҆́кѡ ѿ лица̀ бж҃їѧ речѐ: И҆злїю̀ ѿ дх҃а моегѡ̀ на всѧ́кꙋ пло́ть, и҆ прорекꙋ́тъ:²¹⁸ ю҆́же при́снѡ хрⷭ҇то́съ и҆ ны́нѣ подае́тъ, и҆ бꙋ́детъ подава́ти да́же до сконча́нїѧ, по ѡ҆бѣтова́нїю своемꙋ̀ всѣ̑мъ вѣ̑рнымъ рабѡ́мъ свои̑мъ. Сїѧ̀ ᲂу҆̀бо благода́ть внегда̀ въ ко́мъ бꙋ́детъ, не показꙋ́етъ є҆мꙋ̀ ѻ҆бы̑чнаѧ, нижѐ чꙋ́вствєннаѧ мі́ра сегѡ̀: но тайнонаꙋча́етъ тѣ̑мъ, ꙗ҆̀же пе́рвѣе не ви́дѣ никогда́же, нижѐ воѡбразѝ. Тогда̀ тайнонаꙋча́етсѧ ᲂу҆́мъ та́инствамъ высѡ́кимъ и҆ сокровє́ннымъ, ꙗ҆̀же, по бж҃е́ственномꙋ па́ѵлꙋ, не мо́жетъ ви́дѣти ѻ҆́ко человѣ́че, нижѐ ᲂу҆́мъ пости́гнꙋти собо́ю.²¹⁹ И҆ да позна́еши, ка́кѡ ви́дитъ ѻ҆́наѧ ᲂу҆́мъ на́шъ, внемлѝ, є҆́же тѝ рекꙋ̀: во́скъ, лежа́щь дале́че ѿ ѻ҆гнѧ̀, є҆́сть же́стокъ, и҆ рꙋка́ми ѡ҆б̾е́млемь, но ве́рженъ во ѻ҆́гнь и҆стоплѧ́етсѧ, и҆ ѻ҆гне́мъ возжига́етсѧ, и҆ возгара́етъ, и҆ быва́етъ ве́сь свѣ́тъ, и҆ си́це соверша́етсѧ ве́сь во пла́мени се́мъ, и҆ не мо́щно не и҆стопи́тисѧ во пла́мени, и҆ не бы́ти ꙗ҆́коже водѣ̀. Си́це и҆ ᲂу҆́мъ человѣ́чь, бы́въ є҆ди́нъ кромѣ̀ соедине́нїѧ съ гдⷭ҇емъ, разсꙋжда́етъ, є҆ли̑ка сꙋ́ть си́лы є҆гѡ̀: є҆гда́ же присоедини́тсѧ ѻ҆гню̀ бж҃ества̀ и҆ дх҃ꙋ ст҃о́мꙋ, тогда̀ ѡ҆блада́емь быва́етъ ве́сь ѿ бж҃е́ственнагѡ ѻ҆́нагѡ свѣ́та, и҆ быва́етъ ве́сь свѣ́тъ, и҆ во пла́мени всест҃а́гѡ дх҃а воспалѧ́етсѧ, и҆ и҆сполнѧ́етсѧ бж҃е́ственнагѡ ра́зꙋма, и҆ не мо́щно во пла́мени ѻ҆́номъ бж҃ества̀ мы́слити ѡ҆ свои́хъ, и҆ ѡ҆ тѣ́хъ, ꙗ҆̀же хо́щетъ. Тогда̀ глаго́летъ є҆мꙋ̀ бж҃е́ственный григо́рїй: сꙋ́ть же и҆ и҆́на си̑мъ подѡ́бнаѧ дѣ̑йства пре́лести. И҆ вели́кїй ѻ҆́ный маѯі́мъ ѿвѣща̀: ꙗ҆́кѡ и҆́на зна́мєнїѧ сꙋ́ть пре́лести, и҆́на же благода́ти. Лꙋка́вый бо пре́лести дꙋ́хъ бли́зъ прише́дъ, ᲂу҆́мъ слива́етъ, и҆ свирѣпови́денъ содѣ́ловаетъ, ѡ҆жесточа́етъ се́рдце и҆ помрача́етъ, твори́тъ боѧ́знь и҆ стра́хъ, и҆ возноше́нїе, свирѣ́питъ ѻ҆́чи, мо́згъ смꙋща́етъ, тре́петъ твори́тъ во все́мъ тѣлесѝ, показꙋ́етъ мечта́тельнѣ во ѻ҆чесѣ́хъ свѣ́тъ несвѣ́телъ и҆ нечи́стъ, но красе́нъ, ᲂу҆́мъ твори́тъ и҆зстꙋпи́теленъ и҆ бѣсо́вственъ, и҆ побꙋжда́етъ ꙗ҆зы́комъ произноси́ти глаго́лы нелѣ̑пыѧ и҆ хꙋ̑льныѧ. И҆ и҆́же ви́дитъ сего̀ дꙋ́ха пре́лести, ꙗ҆ри́тсѧ мно́жицею и҆ гнѣ́ваетсѧ, благово́нїѧ въ не́мъ смире́нїѧ и҆лѝ моли́твы, и҆лѝ слезы̀ и҆́стинныѧ ника́коже ѡ҆брѣта́етсѧ: но при́снѡ хва́литсѧ свои́ми добродѣ́телѧми, и҆ тщесла́вствꙋетъ и҆ лꙋка̑вымъ страсте́мъ безстра́шнѣ при́снѡ прїѡбща́етсѧ: и҆ наконе́цъ и҆зстꙋпа́етъ соверше́ннѡ и҆з̾ ᲂу҆ма̀, и҆ прихо́дитъ къ соверше́нной поги́бели. Сеѧ́ же пре́лести да и҆зба́вимсѧ мы̀ твои́ми ко гдⷭ҇ꙋ моли́твами. Благода́ти же зна́мєнїѧ сꙋ́ть сїѧ̑: прише́дъ дх҃ъ ст҃ы́й, собира́етъ ᲂу҆́мъ внима́теленъ и҆ смире́нъ се́й содѣва́ѧ, па́мѧть сме́рти: и҆ грѣхѡ́въ свои́хъ, и҆ вѣ́чнагѡ мꙋче́нїѧ и҆мѣ́ти внегда̀ твори́тъ, дꙋ́шꙋ благоꙋмиле́ннꙋ и҆ пла́чꙋщꙋ, и҆ ѻ҆́чи є҆гѡ̀ кро́тости и҆ сле́зъ и҆сполнѧ́етъ. И҆ є҆ли́кѡ приближа́етсѧ человѣ́кꙋ, толи́кѡ ᲂу҆смирѧ́етъ дꙋ́шꙋ, и҆ ᲂу҆тѣша́етъ ст҃ы́ми страстьмѝ гдⷭ҇а на́шегѡ і҆и҃са хрⷭ҇та̀, и҆ безмѣ́рнымъ человѣколю́бїемъ є҆гѡ̀, и҆ высѡ́каѧ и҆ непрелє́стнаѧ видѣ̑нїѧ подае́тъ ᲂу҆мꙋ̀: пе́рвѣе, непостижи́мою си́лою бж҃їею, ꙗ҆́кѡ то́й є҆ди́нымъ сло́вомъ сотворѝ всѧ̑ сꙋ̑щаѧ ѿ не сꙋ́щагѡ, во є҆́же бы́ти. Второ́е, безмѣ́рною си́лою всѧ̑ содержа́щею и҆ ᲂу҆правлѧ́ющею и҆ промышлѧ́ющею. Тре́тїе, непостижи́мою прест҃о́ю трⷪ҇цею, и҆ неизслѣ́димою пꙋчи́ною бж҃їѧ сꙋщества̀, и҆ прѡ́чаѧ. И҆ тогда̀ ᲂу҆́мъ восхища́етсѧ бж҃е́ственнымъ ѻ҆́нымъ свѣ́томъ, и҆ просвѣща́етсѧ просвѣще́нїемъ бж҃е́ственнагѡ ра́зꙋма, и҆ се́рдце тихоѡбра́зно быва́етъ, точа́щее бж҃е́ственнагѡ дх҃а плоды̀: ра́дость, ми́ръ, долготерпѣ́нїе, бла́гость, милосе́рдїе, ²²⁰ и҆ всѧ̑ содержа́щее хрⷭ҇топодража́тельное бж҃е́ственное смире́нїе: и҆ прїе́млетъ дꙋша̀ є҆гѡ̀ весе́лїе неизрече́нно. Слы́шавъ сїѧ̑ ст҃ы́й григо́рїй сїнаи́тъ бы́сть во и҆зстꙋпле́нїи, и҆ ᲂу҆диви́сѧ тѣ̑мъ, ꙗ҆̀же глаго́ла бж҃е́ственный маѯі́мъ, и҆ не ктомꙋ̀ и҆менова́ше є҆го̀ человѣ́ка, но а҆́гг҃ла зе́мна.

і҃ от соверше́нство. от Пе́рвѣе є҆́сть, моли́тва чистѣ́йшаѧ.

ѳ҃ от просвѣще́нїе се́рдца. от Ѿ неѧ́же происхо́дитъ серде́чнаѧ нѣ́каѧ теплота̀.

и҃ от ѡ҆сїѧ́нїе стра́нное. от По не́йже дѣ́йство стра́нное и҆ ст҃о́е.

з҃ от видѣ́нїе та́инствъ. от Та́же сле́зы бж҃е́ствєнныѧ серде́чныѧ, И҆́хже ра́ди ми́ръ многоразли́чныхъ по́мыслѡвъ.

ѕ҃ от ѡ҆чище́нїе ᲂу҆ма̀ от Ѿ негѡ́же и҆стека́етъ ᲂу҆ма̀ ѡ҆чище́нїе, И҆ видѣ́нїе вы́шнихъ та́инствъ.

є҃ от ми́ръ по́мыслѡвъ от По не́мже стра́нное ѡ҆сїѧ́нїе несказа́ннымъ ѡ҆́бразомъ.

д҃ от сле́зы сердє́чныѧ. от негѡ́же неизрече́нное се́рдца просвѣще́нїе.

г҃ от дѣ́йство ст҃о́е. от И҆ ѿсю́дꙋ па́ки несоверше́нное соверше́нство.

в҃ от теплота̀ се́рдца. от Про́чее широтꙋ̀ ᲂу҆́бѡ безконе́чнꙋ и҆́мать се́й степе́нь, А҆́ще и҆ въ є҆ди́номъ заключи́лсѧ бы стїхѣ̀.

а҃ от моли́тва чи́стаѧ. от Пе́рвѣе на лѣ́ствицѣ до́льный степе́нь,

от Восхожде́нїе бж҃е́ственное. от То́чїю моли́твꙋ чи́стꙋю показꙋ́етъ. Ви́ды же є҆ѧ̀ сꙋ́ть и҆ вельмѝ мнѡ́ги:

И҆ а҆́ще хотѣ́ли бы́хомъ ны́нѣ ѻ҆́ныѧ и҆счи́слити,

Продолжа́тъ на́ше сло́во.

То́жде мѝ разꙋмѣ́й во всѣ́хъ степе́нехъ, возлю́бленне,

И҆скꙋ́съ же ᲂу҆чи́тель ѻ҆́ныхъ є҆́сть, а҆ не сло́во.

Лѣ́ствица возводѧ́щаѧ на высотꙋ̀ стра́ннѡ.

Десѧти́ца степе́ней, є҆́сть дꙋшѝ ѡ҆животворе́нїе стра́нное,

Десѧти́ца степе́ней, живо́тъ дꙋшѝ проповѣ́дꙋетъ.

И҆ глаго́летъ нѣ́гдѣ нѣ́кто ѿ бг҃оно́сныхъ сїѧ̑:

Не тща́йсѧ стѧжа́ти живо́тъ здѣ̀,

Тще́тною наде́ждою дꙋшѝ да не прельща́етъ себѐ,

Ꙗ҆́кѡ та́мѡ полꙋ́читъ є҆го̀.

Десѧти́ца степе́ней, є҆́сть бж҃е́ственное любомꙋ́дрїе,

Десѧти́ца степе́ней, є҆́сть пло́дъ всѣ́хъ кни́гъ.

Десѧти́ца степе́ней, соверше́нство показꙋ́етъ.

Десѧти́ца степе́ней, на нб҃са̀ возво́дитъ.

Десѧти́ца степе́ней, бг҃а твори́тъ вѣ́дѣти.

Лѣ́ствица зри́тсѧ долгото́ю кратча́йша:

А҆́ще же и҆скꙋ́сомъ прїи́метъ кто̀ внꙋ́трь се́рдца,

Бога́тство ѡ҆брѧ́щетъ невмѣсти́мо мі́рꙋ,

И҆ и҆сто́чникъ бж҃е́ственный точа́щъ живо́тъ стра́нный.

Оу҆чи́тель и҆зрѧ́днѣйшїй є҆́сть лѣ́ствица сїѧ̀,

Ꙗ҆́снѣ ᲂу҆вѣ́дѣти коемꙋ́ждо мѣ̑ры своѧ̑.

Зрѧ̀ бж҃е́ственнꙋю лѣ́ствицꙋ десѧтѝ дарѡ́въ,

А҆́ще мни́ши стоѧ́ти водрꙋже́ннѡ на се́й,

Рцы̀, на ко́емъ є҆сѝ степе́ни сеѧ̀,

На по́льзꙋ и҆ на́мъ ᲂу҆ны̑лымъ.

А҆́ще хо́щеши, возлю́бленне, чесомꙋ̀ наꙋчи́тисѧ ѡ҆ си́хъ,

Бꙋ́ди без̾ попече́нїѧ ѡ҆ всѧ́ческихъ ве́щехъ, безслове́сныхъ же,

И҆ по мнѣ́нїю благосло́вныхъ.

Не бо̀ чесомꙋ̀ наꙋчи́шисѧ, кромѣ̀ без̾ попече́нїѧ.

И҆скꙋ́сомъ же сїѧ̑ познава́ютсѧ, а҆ не сло́вомъ.

Сїе́ же, а҆́ки воспомина́нїе то́чїю, глаго́лю тѝ:

Є҆́сть же сло́во ст҃ы́хъ бг҃оно́сцєвъ,

А҆́ще и҆ тѧ́жцѣ въ слꙋ́хъ вни́детъ:

Не ѡ҆брѣты́йсѧ на є҆ди́номъ ѿ степе́ней

И҆лѝ не поꙋча́ѧйсѧ всегда̀ въ таковы́хъ,

При кончи́нѣ и҆ во вре́мѧ сме́рти,

Стра́хъ вои́стиннꙋ вели́къ и҆ тре́петъ и҆мѣ́ти бꙋ́детъ,

И҆ боѧ́знь безмѣ́рнꙋ, да не ѿлꙋче́нъ бꙋ́детъ.

Во стра́сѣ ко́нчишасѧ стїхѝ,

Поле́знѣ же вельмѝ слꙋчи́сѧ та́кѡ.

Не бо̀ благи́ми возво́дѧтсѧ наипа́че,

Къ покаѧ́нїю и҆ бла́гости,

Жесточа́йшїи, ѿ ни́хже а҆́зъ є҆́смь пе́рвый,

Но стра́шными и҆ боѧ́зни вино́вными быва́ющими.

И҆мѣ́ѧй ᲂу҆́шы слы́шати, да слы́шитъ.

Слы́ши и҆ разꙋмѣ́й ты̀, написа́вый сїѧ̑:

Ка́кѡ дерзнꙋ́лъ є҆сѝ ты̀ рещѝ такова̑ѧ,

Человѣ́къ, ничто́же и҆мы́й ѿню́дъ ѿ си́хъ;

Ка́кѡ же не ᲂу҆жаснꙋ́лсѧ є҆сѝ ѡ҆ си́хъ ᲂу҆чи́ти;

Не слы́шалъ ли є҆сѝ что̀ ѻ҆зі́а пострада̀,

Хотѧ̀ и҆спра́вити кївѡ́тъ бж҃е́ственный;

Да не возмни́ши, ꙗ҆́кѡ ᲂу҆ча̀, сїѧ̑ глаго́лю:

Но да самаго̀ себѧ̀ ѡ҆бличꙋ̀ си́ми,

Зрѧ̀ побѣ̑дныѧ по́чєсти подвиза́ющихсѧ,

И҆ моѐ безпло́дїе во всѣ́хъ.