Требник Петра (Могилы). Часть 2

Ме́сѧца А҆́вгꙋста въ а҃, де́нь. И҆лѝ є҆гда̀ и҆ꙁво́литъ Настоѧ́тель на всѧ́кꙋю потре́бꙋ

Вѣ́стнѡ бꙋ́ди, ꙗ҆́кѡ ѡ҆бы́чай є҆́стъ зѣ́лѡ до́брый, благоче́стный же и҆ дꙋшепо́леꙁный въ Восто́чныхъ Церква́хъ, ᲃі́естъ гре́ческихъ, си́це въ Монасты́рскихъ, ꙗ҆́коже и҆ Мі́рскихъ, въ коего́ждѡ Ме́сѧца пе́рвꙋю Неде́лю, ѡ҆свѧща́ти во́дꙋ, и҆ ѡ҆кроплѧ́ти лю́ди, Ке́лїѧ же и҆ дѡ́мы, и҆ чре́ꙁъ цѣ́лый Ме́сѧцъ кі́йждѡ бра́тъ въ свое́й Ке́лїи, Мірѧ́нинъ же въ свое́мъ домꙋ̀ хранѧ́тъ ю҆̀ въ че́стномъ съсꙋ́дѣ, на кі́йждѡ де́нь ра́нѡ и҆ ве́черъ, кро́питъ ᲃебѐ и҆ свои́хъ си, и҆ всѧ̀ ᲃвоѧ̀. Сщ҃е́ннаѧ бо ᲃі́ѧ Вода̀, ю҆́же Дх҃ъ ᲃт҃ы́й Молитва́ми І҆ере́ѵ̆скими ѡ҆свѧща́етъ, мнѡ́гаѧ и҆ раꙁли́чнаѧ своѧ̀ и҆́матъ дѣ́йствїѧ, ꙗ҆́коже самы́ѧ Е҆кте́нїѧ и҆ ѡ҆свѧще́нїѧ моли́твы свѣдителствꙋ́ютъ: Ѻ҆кропле́нїемъ бо є҆ѧ̀ прогони́ми быва́ютъ лꙋка́вїи дꙋ́си ѿ мѣ́стъ, и҆ ѿ раꙁли́чныхъ Бж҃іихъ соꙁда́нїй: ѡ҆ставлѧ́ютъжесѧ прости́телныѧ, ᲃі́естъ, повседне́вныѧ малы́ѧ грѣхѝ: привидѣ́нїѧ дїа́волскаѧ, зла́ѧ помышле́нїѧ, и҆ раꙁсѣѧ́нїѧ мы́слїй въ вре́мѧ моли́твы и҆ въ и҆́ныхъ вре́менахъ прогони́ма быва́ютъ: ᲂу҆́мъ ѿ зе́мныхъ ве́щїй ᲃъбира́етсѧ, ᲂу҆правле́нъ же и҆ расположе́нъ быва́етъ къ моли́твѣ и҆ благоче́стїю: благода́ть, покро́въ, и҆ тꙋ̀ сꙋ́щее и҆ пребыва́нїе Дх҃а ᲃт҃а́гѡ подае́тъ: непло́дїе и҆ заматерѣ́нїе ѿ чловѣ́къ и҆ ᲃко́тѡвъ ѿгонѧ́етъ: ᲂу҆множе́нїе и҆мѣ́нїй и҆ ѡ҆би́лїе приво́дитъ: не́дꙋгѡмъ запѧ́тїе и҆ прогна́нїе быва́етъ, тое́ю бо подава́етсѧ дꙋше́вное и҆ тѣле́сное здра́вїе, и҆ въ кра́тцѣ рещѝ, всѧ̀ тое́ю Водо́ю свѧще́нною вѣ́рою ѡ҆кроплѧ́емаѧ съ І҆ере́ѵ̆скою моли́твою, ѡ҆свѧще́нїе и҆ благослове́нїе прїе́млютъ. Сегѡ̀ ᲂу҆́бѡ ра́ди до́лжни є҆стѐ ѽ І҆ере́е Рꙍссі́йстїи и҆ вы̀ сі́е ѡ҆свѧще́нїе лю́демъ ѿ Ха҃ ва́мъ врꙋче́ннымъ къ прїѧ́тїю си́цевыѧ благода́ти, и҆ прогна́нїю и҆ и҆ꙁбавле́нїю толи́кыхъ нꙋ́жнихъ бѣ́дъ, въ кі́йждѡ Ме́сѧцъ подава́ти, и҆ лю́ди ᲂу҆чи́ти є҆́же ᲃі́е съ вѣ́рою тве́рдою прїйма́ти, и҆ че́стнѡ храни́ти, и҆ въ нꙋ́ждахъ ча́стѡ ᲂу҆потреблѧ́ти.

Ꙍ҆свѧще́нїе же ᲃі́е быва́етъ ᲃи́це:

Поставлѧ́етсѧ четвероно́жный ᲃтоле́цъ на сі́е ᲂу҆гото́вленный посре́дъ Це́ркве, Па́волокою покрове́ный на ѡ҆бы́чномъ мѣ́стѣ, и҆ Вода̀ въ ᲃосꙋ́дѣ. І҆ере́ѵ̆ же вꙁе́мъ Е҆пітра́хиль и҆ Фелꙍ́нъ на́сѧ, держа̀ въ рꙋцѣ̀ че́стный Кре́стъ съ наси́лки, предидꙋ́щꙋ є҆мꙋ̀ Дїа́конꙋ съ Кади́лницею, и҆ двѣма̀ свѣщено́сцема съ свѣ́щами. Прише́дъ же пре́дъ проꙋгото́вленый ᲃтоле́цъ, полага́етъ на не́мъ Кре́стъ, и҆ вꙁе́мъ Кади́лницꙋ ка́дитъ Во́дꙋ крестаѡ́браꙁнѡ, и҆ начина́етъ ѡ҆бы́чнѡ.

Благослове́нъ Бо́гъ нш҃ъ всегда̀, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

Чте́цъ же а҆́бїе, Трисвѧто́е, Пресвѧта́ѧ Тро́ице, Гд҃и поми́лꙋй гⷤ.

Сла́ва: И҆ ны́нѣ: Ѿч҃е нш҃ъ:

І҆ере́ѵ̆,

Ꙗ҆́кѡ твоѐ є҆́стъ Ца́рство.

Чте́цъ,

Гд҃и, поми́лꙋй, ві҃.

Сла́ва: И҆ ны́не:

Прїйдѣ́те, поклони́мсѧ, гⷤ.

и҆ ѱало́мъ рм҃в.

Гд҃и, ᲂу҆слы́ши моли́твꙋ мою̀: ве́сь до конца̀.

Ли́къ же пое́тъ,

Бо́гъ Гд҃ь ꙗ҆́ви́сѧ на́мъ гⷤ. На Гла́съ д҃.

И҆ а҆́бїе Тропа́ръ Гла́съ то́йжде.

Къ Бц҃и приле́жнѡ ны́нѣ притецѣ́мъ, грѣ́шнїи и҆ ᲃмѣре́нїи, и҆ припадѣ́мъ покаѧ́нїемъ вопїю́ще и҆ꙁъ глꙋбины̀ дꙋше́вныѧ: Влады́чице, помоꙁѝ милосердова́вши на́ны: потщи́сѧ, ꙗ҆́кѡ и҆ꙁгиба́емъ ѿ мнѡ́жества грѣхѡ́въ: не ѿвратѝ ра́бъ свои́хъ тщи́хъ, тебе́ бо и҆ є҆ди́нꙋ наде́ждꙋ стѧжа́хѡмъ. вⷤ.

Не ᲂу҆молчи́мъ нико́лиже, Бц҃е, ᲃи́лы твоѧ̀ глаго́люще, мы недосто́йнїи: а҆́ще бо не бы ты̀ предста́ла молѧ́щисѧ за́ны, кто̀ бы на́съ иꙁба́вилъ ѿ толи́кихъ бѣ́дъ; кто́ ли бы ны съхрани́лъ до ны́нѣ свобо́дны не ѿстꙋ́пимъ, Влады́чице, ѿ тебѐ; твоѧ́ бо рабы̀ спаса́еши при́сно ѿ всѧ́кїѧ бѣ́ды, є҆дина̀ благослове́ннаѧ.

Тажъ ѱало́мъ н҃.

Поми́лꙋй мѧ, Бж҃е:

И҆ а҆́бїе Ли́къ пое́тъ Тропарѝ ᲃі́ѧ. Гла́съ ѕ҃.

Ра́дость ѿ А҆́нгела прїи́мшаѧ, и҆ ро́ждшаѧ зижди́телѧ свое́гѡ, Дв҃о, спасѝ тебѐ велича́ющихъ.

Воспѣва́емъ ᲃн҃а твое́гѡ, Бц҃е, и҆ вопїе́мъ: Пречи́стаѧ Влады́чице, всѧ́кїѧ бѣды̀ и҆ꙁба́ви моли́твенники твоѧ̀, и҆ ᲃпасѝ Дв҃о тебѐ велича́ющихъ.

Цр҃є́мъ, Пррⷪ҇комъ, и҆ А҆по́столомъ, и҆ Мꙋ́ченикомъ ты́ є҆сѝ похва́ла, и҆ предста́телница мі́рꙋ, всенепоро́чнаѧ: Дв҃о ᲃпасѝ тебѐ велича́ющихъ.

Ꙗ҆ꙁы́къ всѧ́къ правосла́вныхъ, воспева́етъ и҆ блажи́тъ, и҆ сла́витъ Пречи́стое Рождество̀ твоѐ, Богоневе́стнаѧ Дв҃о, и҆ ᲃпасѝ тебѐ велича́ющихъ.

Да́ждь, Хє҃ мо́й, и҆ мнѣ̀, недосто́йномꙋ, до́лгомъ ѡ҆ставле́нїе, молю́сѧ, тебѐ ро́ждшїѧ мол̾ба́ми, ꙗ҆́кѡ благоꙋтро́бенъ, и҆ ᲃпасѝ на́съ тебѐ славѧ́щихъ.

На́тѧ моѐ ᲂу҆пова́нїе воꙁложи́хъ, Бц҃е, ᲃпаси́ мѧ молитва́ми си, и҆ дарꙋ́й ми съгрѣше́нїемъ ѡ҆ставле́нїе Дв҃о, и҆ ᲃпасѝ тебѐ велича́ющихъ.

Ꙍ҆живѝ мѧ, ро́ждшаѧ Животда́вца и҆ Спа́са, и҆ ᲃпасѝ молба́ми си благослове́ннаѧ, над́еждѡ дꙋша́мъ на́шимъ, Дв҃о тебѐ велича́ющихъ.

Зижди́телѧ всѣ́хъ въ ᲂу҆тро́бе свое́й заче́ншаѧ Дв҃о всенепоро́чнаѧ, молитва́ми твои́ми ᲃпасѝ дꙋша̀ на́ша, и҆ всѣ́хъ тебѐ велича́ющихъ.

Бц҃е, ро́ждшаѧ ᲃло́вомъ па́че ᲃло́ва, ᲃло́во всепѣ́таѧ, тогѡ̀ молѝ ᲃпастѝ дꙋша̀ на́ша Дв҃о, и҆ всѣ́хъ тебѐ велича́ющихъ.

Ми́лостива мнѣ̀ ᲃꙋ́дїю же и҆ ᲃн҃а свое́гѡ, па́дшомꙋ па́че всѧ́кагѡ человѣ́ка, твои́ми Молитва́ми съдѣла́й, Влады́чице Дв҃о: и҆ ᲃпасѝ тебѐ велича́ющихъ.

По до́лгꙋ вопїе́мъ ти: ра́дꙋйсѧ, Бц҃е, чи́стаѧ прⷭ҇нѡ Дв҃о, и҆ приле́жнѡ моли́мсѧ молитва́ми твои́ми ᲃпасѝ тебѐ велича́ющихъ.

И҆ꙁба́ви мѧ ѡ҆гнѧ̀ вѣ́чнагѡ, и҆ мꙋ́къ, предълежа́щихъ ми, Богороди́тельнице, ꙗ҆́кѡ да ᲂу҆блажа́ю тѧ: и҆ ᲃпасѝ Дв҃о всѣ́хъ тебѐ велича́ющихъ.

Не пре́ꙁри моле́нїѧ твои́хъ рабѡ́въ, моли́мсѧ, Влады́чице всепѣ́таѧ, ꙗ҆́кѡ да и҆ꙁба́вимсѧ всѧ́кагѡ ѡ҆бстоѧ́нїѧ и҆ ᲃпасе́мсѧ Дв҃о тебѐ велича́ющїи.

Не́дꙋгѡвъ и҆ всѧ́кихъ бо́лѣꙁней, и҆ бѣ́дъ на́съ свободѝ, ᲃвѧще́нномꙋ ти покро́вꙋ прибѣга́ющихъ Дв҃о, и҆ ᲃпасѝ тебѐ велича́ющихъ.

Стра́ннѡ чꙋ́до, въ тебѣ̀, Богороди́тельнице покаꙁа́сѧ, на́съ бо ра́ди по на́съ роди́сѧ всѣ́хъ зижди́тель и҆́ꙁъ тебѐ Дв҃о, и҆ спаса́етъ тебѐ велича́ющихъ.

Хра́мъ тво́й, Бц҃е, покаꙁа́сѧ, вра́чевство бѡ́лѣꙁнемъ беꙁ̾ме́ꙁдное, и҆ печа́лнымъ дꙋша́мъ ᲂу҆тѣше́нїе, и҆ ра́дость Дв҃о тебѐ велича́ющимъ.

Пресвѧта́ѧ Бц҃е, ро́ждшаѧ Спа́са, бѣ́дъ ᲃпасѝ и҆ всѧ́кїѧ и҆́ныѧ нꙋ́жда рабы̀ твоѧ̀ Дв҃о, тебѐ велича́ющихъ.

И҆ꙁмѝ ѿ всѧ́кагѡ гнѣ́ва приходѧ́щагѡ, рабы̀ твоѧ̀, Пресвѧта́ѧ Влады́чице, и҆ всѧ́кїѧ па́кости дꙋше́вныа же и҆ тѣле́сныѧ Дв҃о, и҆ ᲃпасѝ тебѐ велича́ющихъ.

Спасѝ всѣ́хъ молба́ми си, Дв҃о Бц҃е, къ тебѣ̀ притека́ющихъ, и҆ и҆ꙁмѝ всѧ́кїѧ бѣ́ды и҆ печали, и҆ ᲃпасѝ тебѐ велича́ющихъ.

Кто̀, притѣка́ѧ въ Хра́мъ тво́й, Бц҃е, не прїе́млетъ ско́рѡ и҆сцеле́нїе дꙋше́вное же вкꙋ́пѣ и҆ тѣ́лесное Пречи́стаѧ, Ты́ бо ᲃпаса́еши Дв҃о, тебѐ велича́ющихъ.

Ѿ всѣ́хъ ᲂу҆молѧ́емъ, ще́дре, ᲃт҃ы́хъ и҆ вы́шнихъ чи́нѡвъ, ѡ҆чи́сти мѧ ро́ждшїѧ тѧ ра́ди, и҆ ᲃпасѝ всѣ́хъ вѣ́рнѡ тѧ ᲃлавѧ́щихъ.

Пощадѝ, ᲃпа́се, дꙋшѧ̀ ᲂу҆ме́ршихъ бра́тїй на́шихъ въ наде́жди жи́ꙁни вѣ́чныѧ, и҆ ѡ҆сла́би, ѡ҆ста́ви и҆́мъ согрѣше́нїѧ и҆ всѣ́мъ на́мъ тебѐ ᲃлавѧ́щимъ.

Ра́дꙋйсѧ, мі́рꙋ ѡ҆чище́нїе, Дв҃о, ра́дꙋйсѧ, рꙋ́чко и҆ Кади́лнице всеꙁла́таѧ, Божестве́нныѧ ма́нны, и҆ ᲃвѣ́та, Богоневѣ́стнаѧ, и҆ ᲃпасѝ тебѐ велича́ющихъ.

Ꙍ҆ Дв҃о ро́ждшаѧ Спа́са, и҆ Влады́кꙋ мі́ра и҆ Гд҃а, тогѡ̀ молѝ ᲃпастѝ дꙋша̀ на́ша, и҆ всѣ́хъ тебѐ велича́ющихъ.

Слава:

Пое́мъ тѧ, Бг҃а, є҆дина́гѡ въ Тро́ице, и҆ воꙁыва́юще Гла́съ Трисвѧты́й, моли́мъ тѧ приле́жнѡ: ᲃпасѝ всѣ́хъ вѣ́рнѡ тѧ славѧ́щихъ.

И҆ ны́нѣ:

Ра́дꙋйсѧ, го́ро, ра́дꙋйсѧ, Кꙋпи́но, ра́дꙋйсѧ, Две́ри, ра́дꙋйсѧ, Лѣ́ствице, ра́дꙋйсѧ, Божестве́ннаѧ Тра́пеꙁо, ра́дꙋйсѧ, всѣ́хъ по́моще, Влады́чице, и҆ ᲃпасѝ тебѐ велича́ющихъ.

Моли́твами, ще́дре Ма́тере твое́ѧ непоро́чныѧ и҆ всѣ́хъ ᲃт҃ы́хъ твои́хъ твоѧ̀ ми́лости люде́мъ твои́мъ дарꙋ́й и҆ ѡ҆свѧтѝ во́дꙋ ᲃі́ю.

Моли́твами ᲃла́вныхъ ти А҆рха́гг҃елъ и҆ А҆́гг҃елъ, и҆ вы́шнихъ Чи́нѡвъ рабы̀ твоѧ̀, ᲃпа́се, до́бре съхранѝ и҆ ѡ҆свѧтѝ во́дꙋ ᲃі́ю.

Моли́твами честна́гѡ и҆ сла́внагѡ Крести́телѧ твое́го, Проро́ка и҆ Предте́ча, Христѐ ᲃпа́се мо́й, рабы̀ твоѧ̀ ᲃъхранѝ и҆ ѡ҆свѧтѝ во́дꙋ ᲃі́ю.

Моли́твами ᲃла́вныхъ А҆пⷭ҇лъ и҆ Мꙋ́ченикъ, и҆ всѣ́хъ ᲃт҃ы́хъ твои́хъ Христѐ, твоѧ̀ ми́лости люде́мъ твои́мъ дарꙋ́й, и҆ ѡ҆свѧтѝ во́дꙋ ᲃі́ю.

Моли́твами ᲃла́вныхъ беꙁсре́бренникъ твои́хъ, Хє҃, ра́бъ твои́хъ сохранѝ, и҆ ѿ всѧ́кихъ бѣ́дъ и҆ нꙋ́ждъ ѝꙁбавѝ, и҆ ѡ҆свѧтѝ во́дꙋ ᲃі́ю.

Сла́ва:

Ѿц҃а̀ и҆ ᲃн҃а славослови́мъ, и҆ Дх҃а Свѧта́гѡ, глаголю́ще: Тро́ице Свѧта́ѧ, ᲃпасѝ дꙋ́ша на́ша, и҆ ѡ҆свѧтѝ во́дꙋ ᲃі́ю.

И҆ ны́нѣ:

Неиꙁрече́ннѡ въ послѣ́днѧѧ заче́ншаѧ и҆ ро́ждшаѧ зижди́телѧ свое́го, Дв҃о, спасѝ тебѐ величаю́щихъ.

Тажъ:

Милосе́рдїѧ две́ри ѿверꙁѝ на́мъ, благослове́ннаѧ Бц҃е, надѣ́ющїисѧ на́ тѧ, да не поги́бнемъ, но да и҆ꙁба́вимсѧ тобо́ю ѿ ѡ҆бстоѧ́нїй: ты́ бо є҆сѝ спасе́нїе ро́дꙋ христиа́нскомꙋ.

А҆́бїе же Дїа́конъ глаго́летъ:

Гд҃ꙋ помоли́мсѧ.

І҆ере́ѵ̆ же,

Ꙗ҆́кѡ ᲃвѧ́тъ є҆сѝ, Бо́же нш҃ъ, и҆ тебѣ̀ ᲃла́вꙋ воꙁсыла́емъ, Ѿцꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ при́сно, и҆ въ вѣ́ки вѣ́кѡвъ.

Ли́къ,

А҆ми́нь.

И҆ а҆́бїе по си́хъ пою́тъ Тропарѝ ᲃі́ѧ самогла́сны Гла́съ ѕ҃.

Ны́нѣ наста̀ вре́мѧ, є҆́же всѣ́хъ ѡ҆свѧща́етъ, и҆ пра́ведный на́съ жде́тъ ᲃꙋдїѧ̀, но ѡ҆брати́сѧ, дꙋшѐ, къ покаѧ́нїю, ꙗ҆́кѡ блꙋ́дница, зовꙋ́щи со слеꙁа́ми: Гд҃и, поми́лꙋй мѧ.

Вѡ́ды ѡ҆дожди́лъ є҆сѝ Хє҃, и҆сто́чникъ и҆сце́ленїй, въ всече́стнѣмъ хра́ме Де́выѧ днесь, и҆ твое́гѡ благослове́нїѧ ѡ҆кропле́нїемъ ѿганѧ́еши не́дꙋги болѧ́щихъ, вра́чю дꙋ́шъ и҆ тѣле́съ на́шихъ.

Та́же пою́тъ Тропа́ръ ᲃе́й три́жды, на Гла́съ то́йжде.

Съ небесѐ послѝ благода́ть жиꙁнода́вче, вѡ́ды ѡ҆свѧтѝ и҆ всѣ́мѣ скве́рнамъ ꙗ҆вѝ ѡ҆чище́нїе.

Сла́ва:

Де́вою роди́ла є҆сѝ неискꙋсобра́чнаѧ и҆ Де́вою пребы́ла є҆сѝ, Ма́ти беꙁневѣ́стнаѧ, Бц҃е Ма́рїе, Христа̀ Бг҃а на́шего молѝ спастѝ на́съ, и҆ ѡ҆свѧти́ти во́дꙋ сі́ю.

И҆ ны́нѣ:

Пресвѧта́ѧ Бц҃е Дв҃о, рꙋкъ на́шихъ дѣла̀ и҆спра́ви и҆ проще́нїе ᲃгрѣше́нїемъ на́шимъ и҆спросѝ, внегда̀ пѣ́ти на́мъ А҆́гг҃ельское пѣ́нїе.

Свѧты́й Бо́же, Свѧты́й Кре́пкїй, Свѧты́й Беꙁсме́ртный, поми́лꙋй на́съ.

Ѿпѣ́вше же по ѡ҆бы́чаю, Трисвѧто́е, Дїа́конъ глаго́летъ:

Во́нмемъ.

І҆ере́ѵ̆,

Ми́ръ всѣ́мъ.

Ли́къ,

И҆ съ Дх҃омъ твои́мъ.

Чте́цъ,

Проки́менъ. Гла́съ г҃.

Гд҃ь просвѣще́нїе моѐ и҆ спаси́тель мо́й, кого ᲂу҆бою̀:

ᲃти́хъ,

Гд҃ь защити́тель животꙋ̀ мое́мꙋ, кого́сѧ ᲂу҆страшꙋ̀:

Дїа́конъ,

Премꙋ́дрость.

Чте́цъ, надписа́нїе А҆по́стола:

Къ Е҆вре́ѡмъ посла́нїѧ ᲃт҃а́гѡ А҆по́стола Па́вла чте́нїе.

Дїа́конъ,

Во́нмемъ.

Чте́цъ же чтетъ ѿ Гла́вы в҃ Зач: т҃ѕ.

Бра́тїе, Свѧтѧ́й и҆ ѡ҆свѧща́емїи ѿ є҆ди́нагѡ всѝ, є҆ѧ́же ра́ди вины̀ не стыди́тсѧ бра́тїю нарица́ти и҆́хъ, глаго́лѧ: Воꙁвещꙋ̀ и҆мѧ твоѐ бра́тїи мое́й, посре́де це́ркве воспою̀ тѧ.

И҆ па́ки:

А҆́ꙁъ бꙋ́дꙋ надѣѧ́йсѧ на́нь.

И҆ па́ки:

Се а҆́ꙁъ и҆ дѣ́ти, ꙗ҆́же ми да́стъ Бо́гъ. Поне́же ᲂу҆́бѡ дѣ́ти приѡбщи́шасѧ пло́ти и҆ кровѝ, и҆ то́й прїи́скренне приѡбщи́сѧ тѣ́хжде. Да ᲃме́ртїю ᲂу҆праꙁднитъ держа́вꙋ и҆мꙋ́щагѡ ᲃме́рти, ᲃи́рѣчь дїа́вола: И҆ и҆ꙁмѣ́нитъ си́хъ, є҆ли́цы стра́хомъ ᲃме́рти по всемꙋ̀ жи́тїю пови́нни бѧ́хꙋ работѣ̀. Небо̀ когда̀ ѿ А҆́гг҃елъ прїе́млетъ, но ѿ сѣ́мене А҆враа́млѧ прїе́млетъ. ѿню́дꙋже до́лженъ бѣ̀ по всемꙋ̀ бра́тїи ᲂу҆подоби́тисѧ, да ми́лостивъ бꙋ́детъ и҆ вѣ́ренъ первосвѧще́нникъ въ те́хъ, ꙗ҆́же къ Бг҃ꙋ, въ є҆́же ѡ҆чи́стити грѣхѝ лю́дскїѧ. И҆́мже бо пострада̀, са́мъ и҆скꙋше́нъ бы́въ, мо́жетъ и҆ и҆скꙋша́емымъ помощѝ.

І҆ере́ѵ̆,

Ми́ръ ти.

Чте́цъ,

И҆ дꙋхо́ви твое́мꙋ.

Дїа́конъ,

Премꙋ́дрость во́нмѣмъ.

Чте́цъ:

Ѱало́мъ Дави́довъ.

А҆ллилꙋ́їа. Гла́съ ѕ҃. ᲃті́хъ: а҃.

Ѿрыгнꙋ̀ ᲃе́рдце моѐ сло́во бла́гѡ.

ᲃті́хъ: в҃.

Глаго́лю а҆́ꙁъ дѣла̀ моѧ̀ царе́ви.

Дїа́конъ,

Премꙋ́дрость про́сти, ᲂу҆слы́шимъ ᲃⷮ: Е҆ва́нгелїе.

І҆ере́ѵ̆,

Ѿ И҆оа́нна ᲃⷮ: Є҆ва́нгелїѧ чте́нїе.

Ли́къ,

Сла́ва тебѣ̀, Гд҃и.

Дїа́конъ,

Во́нмемъ.

І҆ере́ѵ̆ же чтетъ Гла́ва є҃. Зач: ді҃.

Въ вре́мѧ ѻ҆́но: Вꙁы́йде І҆и҃ᲃ въ І҆ерꙋсали́мъ, є҆́стъ же въ І҆ерꙋсали́мѣ на ѻ҆́вчей кꙋ́пель, ꙗ҆́же глаголе́тсѧ Є҆вре́йски Виѳе́сда, пѧ́тъ притво́рѡвъ и҆мꙋ́щаѧ. Въ тѣ́хъ слежа́ше мнѡ́жество мнѡ́гое болѧ́щихъ, ᲃлѣпы́хъ, хрѡ́мыхъ, ᲃꙋхи́хъ, ча́ющихъ движе́нїѧ водѣ̀. А҆́гг҃елъ бо Гд҃нь въ вре́мѧ своѐ схожда́ше въ кꙋ́пель, и҆ воꙁмꙋща́ше во́дꙋ: И҆ и҆́же ᲂу҆́бѡ пе́рвѣе вхожда́ше по воꙁмꙋще́нїи воды̀, здра́въ быва́ше, ꙗ҆́цѣ́мъ же не́дꙋгомъ, ѡ҆держи́мъ быва́ше.

Ли́къ,

Сла́ва Тебѣ̀ Гд҃и.

Дїа́конъ же а҆́бїе начина́етъ честѝ Є҆кте́нїѧ ᲃі́ѧ.

Ми́ромъ Гд҃ꙋ помоли́мсѧ.

Ли́къ,

Гд҃и, поми́лꙋй.

Ꙍ҆ свы́шнѣмъ ми́рѣ и҆ спасе́нїи дꙋ́шъ на́шихъ, Гд҃ꙋ помоли́мсѧ.

Ꙍ҆ ми́рѣ всегѡ̀ мі́ра, бл҃гостоѧ́нїи ст҃ы́хъ Бо́жїихъ Це́рквїй и҆ съвокꙋпле́нїи всѣ́хъ, Гд҃ꙋ помоли́мсѧ.

Ли́къ,

Гд҃и, поми́лꙋй.

Ꙍ҆ свѧтѣ́мъ хра́мѣ се́мъ и҆ вѣ́рою, и҆ благоговѣ́нїемъ, и҆ стра́хомъ Бо́жїимъ въходѧ́щихъ во́нь, Гд҃ꙋ помоли́мсѧ.

Ꙍ҆ преѡсвѧще́нномъ А҆рхїепи́скопѣ на́шемъ И҆мⷬ҇къ: че́стнѣмъ Преꙁви́терствѣ ѡ҆ Христѣ̀ Дїа́конствѣ, и҆ все́мъ при́чтѣ и҆ люде́хъ, Гд҃ꙋ помоли́мсѧ.

Ꙍ҆ держа́внѣмъ Го́сподарѣ на́шемъ Вели́комъ Королѣ̀ И҆мⷬ҇къ: и҆ благочести́выхъ Го́сподарѣхъ Кнѧѕе́хъ и҆ Панѣ́хъ на́шихъ, все́й пола́тѣ и во́ехъ и҆́хъ, Гд҃ꙋ помоли́мсѧ.

А҆́ще въ монастырѝ, глаго́летъ:

Ꙍ҆ свѧтѣ́й Ѻ҆би́тели ᲃе́й, и҆ ѡ҆ всѧ́кой ѡ҆би́тели и҆ гра́дѣ и҆ ве́си, и҆ вѣ́рою живꙋ́щихъ въ ни́хъ, Гд҃ꙋ помоли́мсѧ.

А҆́ще же въ гра́дѣ, глаго́летъ ᲃі́е.

Ꙍ҆ гра́дѣ семъ, и҆ ѡ҆ всѧ́комъ гра́дѣ и҆ ве́си и҆ стра́нѣ и҆ вѣ́рою живꙋ́щихъ въ ни́хъ, Гд҃ꙋ помоли́мсѧ.

А҆́ще же въ ве́си, глаго́летъ ᲃі́е.

Ꙍ҆ ве́си сей, и҆ ѡ҆ всѧ́кой ве́си, и҆ гра́дѣ и҆ стра́нѣ, и҆ вѣ́рою живꙋ́щихъ въ ни́хъ, Гд҃ꙋ помоли́мсѧ.

Ꙍ҆ благорастворе́нїи воꙁдꙋхѡ́въ, ᲂу҆множе́нїи пло́дѡвъ земны́хъ и҆ вре́менехъ ми́рныхъ, Гд҃ꙋ помоли́мсѧ.

Ꙍ҆ плава́ющихъ, пꙋтешествꙋ́ющихъ, недꙋгꙋ́ющихъ, трꙋжда́ющихсѧ, плѣне́нныхъ и҆ ᲃпасе́нїи и҆́хъ, Гд҃ꙋ помоли́мсѧ.

Ꙍ҆ є҆́же ѡ҆свѧти́тисѧ водѣ̀ ᲃе́й си́лою и҆ дѣ́йствомъ, и҆ прише́ствїемъ ᲃт҃а́гѡ Дх҃а, Гд҃ꙋ помоли́мсѧ.

Ꙍ҆ є҆́же ниꙁпосла́тисѧ водѣ̀ ᲃе́й чисти́тельномꙋ пресꙋществе́нныѧ Тро́ица дѣ́йствꙋ: Гд҃ꙋ помоли́мсѧ.

Ꙍ҆ є҆́же дарова́тисѧ є҆́й ᲃи́лы цѣле́бной, прише́ствїемъ Ста́гѡ Дх҃а, Гд҃ꙋ помоли́мсѧ.

Ꙍ҆ є҆́же бы́ти водѣ̀ ᲃе́й вра́чество дꙋша́мъ и҆ тѣ́ломъ на́шимъ, и҆ всѧ́коѧ ᲃъпроти́вныѧ ᲃи́лы ѿврати́телной, Гд҃ꙋ помоли́мсѧ.

Ꙍ҆ є҆́же посла́тисѧ є҆́й благода́ть и҆ꙁбавле́нїѧ, и҆ благослове́нїе І҆ꙍрда́ново, Гд҃ꙋ помоли́мсѧ.

Ꙍ҆ ꙗ҆ви́тисѧ є҆́й и҆сто́чникꙋ нетлѣ́нїѧ и҆ да́рꙋ ᲃпасе́нїѧ, Гд҃ꙋ помоли́мсѧ.

Ꙍ҆ че́рпающихъ и҆ вꙁима́ющихъ ѿ неѧ̀, Гд҃ꙋ помоли́мсѧ:

Ꙍ҆ є҆́же бы́ти є҆́й ѡ҆ставле́нїе грѣхѡ́въ, и҆ бо́лѣꙁнемъ и҆сцѣле́нїе, Гд҃ꙋ помоли́мсѧ.

Ꙍ҆ є҆́же просвѣти́тисѧ на́мъ просвѣще́нїемъ ра́ꙁꙋма, є҆диносꙋ́щныѧ ра́ди Тро́ица, ѡ҆кропле́нїемъ воды̀ ᲃеѧ̀, Гд҃ꙋ помоли́мсѧ.

Ꙍ҆ є҆́же Гд҃ꙋ Бг҃ꙋ на́шемꙋ посла́ти просвѣще́нїе и҆ ра́ꙁꙋмъ въ ᲃердца̀ на́ша причаще́нїемъ и҆ ѡ҆кропле́нїемъ воды̀ ᲃеѧ̀, Гд҃ꙋ помоли́мсѧ.

Ꙍ҆ всѣ́хъ требꙋ́ющихъ ꙗ҆́же ѿ Бг҃а по́мощи и҆ застꙋпле́нїѧ, ѡ҆кропле́нїемъ воды̀ ᲃеѧ̀, Гд҃ꙋ помоли́мсѧ.

Ꙗ҆́кѡ да Гд҃ь Бо́гъ нш҃ъ ꙗ҆ви́тъ на́съ ᲃн҃ы и҆ наслѣ́дники Ца́рствїѧ свое́гѡ, причаще́нїѧ и҆ ѡ҆кропле́нїѧ, ра́ди воды̀ сіѧ̀, Гд҃ꙋ помоли́мсѧ.

Ꙍ҆ и҆ꙁба́витисѧ на́мъ ѿ всѧ́коѧ ско́рби, гнѣ́ва и҆ нꙋ́жды, Гд҃ꙋ помоли́мсѧ.

Застꙋпѝ, ᲃпасѝ, поми́лꙋй и҆ сохранѝ на́съ, Бо́же, твое́ю Благода́тїю.

Пресвѧтꙋ́ю, чи́стꙋю, и҆ Преблагослове́ннꙋю, ᲃла́внꙋю Влады́чицꙋ на́шꙋ Бц҃ꙋ и҆ при́сно Дв҃ꙋ Ма́рїю со всѣ́ми ᲃт҃ы́ми помѧнꙋ́вше, самѝ себѐ и҆ дрꙋ́гъ дрꙋ́га, и҆ ве́съ живо́тъ нш҃ъ Христꙋ̀ Бг҃ꙋ предади́мъ.

Ли́къ,

Тебѣ̀, Гд҃и.

І҆ере́ѵ̆ воꙁглаша́етъ:

Ꙗ҆́кѡ подоба́етъ ти всѧ́каѧ ᲃла́ва, че́сть и҆ поклоне́нїе, Ѿцꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ при́сно, и҆ въ вѣ́ки вѣ́кѡвъ.

Ли́къ,

Ами́нь.

Дїа́конъ,

Гд҃ꙋ помоли́мсѧ.

Ли́къ,

Гд҃и поми́лꙋй.

І҆ере́ѵ̆ же Моли́твꙋ сі́ю чтетъ велегла́снѡ.

Гд҃и Бо́же нш҃ъ, вели́кїй въ совѣ́те, и҆ ди́вный въ дѣ́лехъ, всеѧ̀ тва́ри ᲃъдѣ́телю, хранѧ́й завѣ́тъ сво́й и҆ ми́лость свою̀ любѧ́щимъ тѧ, и҆ хранѧ́щимъ повелѣ́нїѧ твоѧ̀, Всѣ́хъ въ нꙋ́ждахъ ᲂу҆миле́нныѧ прїемлѧ́й ᲃле́ꙁы, ᲃегѡ́ бо ра́ди прише́лъ є҆сѝ въ ра́бїимъ ѡ҆́браꙁѣ, не привидѣ́нїи на́съ ᲂу҆страша́ѧ, но здра́вїе тѣ́лꙋ и҆́стинное подава́ѧ, и҆ гл҃ѧ̀: Се здра́въ бы́лъ є҆сѝ, ктомꙋ̀ не съгрѣша́й, но и҆ ѿ бре́нїѧ здра́вы ѻ҆́цѣ ᲃъдѣла́въ, и҆, ᲂу҆мы́тисѧ повелѣ́въ, ᲃвѣ́тꙋ всели́тисѧ ᲃътвори́лъ є҆сѝ ᲃло́вомъ. Сꙋ́проти́вныхъ ᲃтра́стїй во́лны смꙋща́ѧй, и҆ жи́тїѧ сегѡ̀ сла́ное мо́ре и҆ссꙋша́ѧй, и҆ тѧжелоно́сныѧ ᲃла́стїй ᲂу҆кроща́ѧй вѡ́лны: Са́мъ, человекѡлю́бче Влады́ко да́вый на́мъ, ᲃнегосвѣ́тлою ѡ҆деѧ́тисѧ ѡ҆де́ждею, ѿ воды̀ и҆ Дх҃а, И҆ ны́нѣ ниꙁпослѝ благода́ть Пресвѧта́гѡ животворѧ́щагѡ и҆ всеѡсвѧща́ющагѡ ти Дх҃а, и҆ ѡ҆свѧтѝ во́дꙋ ᲃі́ю.

Сі́е три́жды гл҃ѧ̀, благословлѧ́етъ І҆ере́ѵ꙼ десни́цею Во́дꙋ, три́жды погрꙋжа́ѧ вѣ не́й пе́рсты.

И҆ ра́ди сеѧ̀ прича́стїѧ и҆ ѡ҆кропле́нїѧ твоѐ благослове́нїе на́мъ ниꙁпослѝ, скве́рнꙋ стра́стїй ѡ҆мыва́ющее, и҆ всѧ̀ зла́ѧ дѣ́йства, мечта́нїѧ же и҆ привидѣ́нїѧ дїа́волскаѧ прогонѧ́щее, ᲂу҆крѣплѧ́ющее же на́съ на всѧ́кое дѣѧ́нїе благо́е, и҆ исполне́нїе за́повѣдїй твои́хъ. Е҆́й, моли́мтисѧ, посѣтѝ на́шꙋ, бла́же, не́мощъ и҆ и҆сцѣлѝ на́ша бо́лѣꙁни дꙋше́вныѧ же и҆ тѣле́сныѧ, ми́лостїю си, молитва́ми Пречи́стыѧ, преблагослове́нныѧ Влады́чица на́шеѧ Бц҃а и҆ при́сно Де́вы Ма́рїѧ: Си́лою честна́гѡ и҆ животворѧ́щагѡ Креста̀, застꙋпле́нїемъ честны́хъ небе́сныхъ си́лъ беспло́тныхъ, Честна́гѡ, ᲃла́внагѡ, Проро́ка, Предте́чаи и҆ Крести́телѧ И҆оа́нна, Свѧты́хъ ᲃла́вныхъ и҆ всехва́льныхъ А҆по́столъ, Свѧты́хъ и҆ Преподо́бныхъ Богоѡте́цъ І҆ѡаки́ма и҆ А҆́нны. И҆ и҆же въ ᲃт҃ы́хъ ѿц҃ъ на́шихъ, вели́кихъ І҆ера́рхъ и҆ Вселе́нскихъ Ꙋ҆чителїй: Васи́лїѧ Вели́кагѡ, Григо́рїѧ Богосло́ва и҆ И҆оа́нна Златоꙋ́стагѡ, и҆ ᲃт҃ы́хъ ѿц҃ъ на́шихъ Аѳана́сїѧ и҆ Кири́лла, Патрїа́рхѡвъ А҆лександрі́йскихъ, и҆ ᲃт҃а́гѡ Спиридꙍ́на, Тримифꙋ́нтскагѡ чꙋдотво́рца, и҆ и҆же въ ᲃт҃ы́хъ ѿц҃а̀ на́шего Никола́ѧ, А҆рхїепи́скопа Мирлѵкі́йскагѡ, чꙋдотво́рца, и҆ ᲃт҃ы́хъ тре́хъ ᲃт҃и́телїй Кі́евскихъ Петра̀, А҆ле́ѯксїѧ, и҆ И҆ѡ́ны, Рꙍссі́йскихъ Чꙋдотво́рцѡвъ, ᲃт҃ы́хъ ᲃла́вныхъ Великомꙋ́ченикъ Геꙍ́ргїѧ Побѣдоно́сца, и҆ Дими́трїѧ Мироточи́вагѡ, и҆ ᲃт҃ы́хъ ᲃтрастоте́рпецъ Рꙍссі́йскихъ Кнѧꙁе́й Глѣ́ба, и҆ Бори́са, и ᲃт҃а́гѡ Равноапо́сталнагѡ Ѿц҃а̀ и҆́хъ Вели́кагѡ Кнѧ́ꙁѧ Владими́ра, Ст҃а́гѡ Великомꙋ́ченика І҆ѡа́нна но́вагѡ и҆́же въ Сꙋча́вѣ, и҆ всѣ́хъ ᲃт҃ы́хъ и҆ добропобѣ́дныхъ мꙋ́ченикъ: Свѧты́хъ сла́вныхъ и҆ чꙋдотво́рцевъ Беꙁъсре́бренникъ Ко́ꙁмы и҆ Дамїѧ́на, Кѵ́ра, И҆ѡа́нна, Пантелеймо́на, и҆ Є҆рмола́ѧ, Саѱꙍ́на и҆ Дїѻми́да, Мꙍ́кїѧ и҆ А҆ники́ты, Ѳалале́ѧ и҆ Трѵфѡ́на, Преподо́бныхъ и҆ богонѡ́сныхъ ѿц҃ъ на́шихъ А҆нтꙍ́нїѧ и҆ Ѳеѻдꙍ́сїѧ Пече́рскихъ, и҆ ᲃт҃ы́хъ Великомꙋ́ченикъ Маккаве́й, И҆ ст҃а́гѡ И҆мⷬ҇къ: є҆го́же дне́сь па́мѧть торжествꙋ́емъ, и҆ всѣ́хъ свѧты́хъ твои́хъ. И҆ сохранѝ Гд҃и, раба̀ свое́гѡ держа́внагѡ Господарѧ̀ на́шего Вели́кагѡ Королѧ̀ И҆мⷬ҇къ: и҆ всѧ̀ благовѣ́рныѧ Кнѧꙁѧ̀ и҆ Па́ны на́шѧ.

(Сі́е глаголѝ гⷤ)

Дарꙋ́й и҆́мъ дꙋше́вное и҆ теле́сное здра́вїе, и҆ рабо́тномꙋ тебѣ̀ ᲃемꙋ̀ христїѧ́нскомꙋ гражда́нствꙋ въ все́мъ ми́лостивенъ смотри́телъ бꙋ́ди. Помѧнѝ, Гд҃и, всѧ́кое Є҆пи́скопство Правосла́вныхъ, правоправѧ́щее ᲃло́во твое́ѧ и҆́стинны, и҆ ве́сь ᲃвѧще́нническїй и҆ И́ноческїй чи́нъ, и҆ спасе́нїе и҆́хъ. Помѧнѝ, Гд҃и, ненавидѧ́щихъ и҆ любѧ́щихъ на́съ, слꙋжа́щихъ ѡ҆те́цъ и҆ бра́тїй на́шихъ, и҆ предстоѧ́щихъ и҆ благосло́вныхъ ви́нъ ѿше́дшихъ и҆ заповѣда́вшихъ на́мъ, недосто́йнымъ, моли́тисѧ ѡ҆ ни́хъ. Помѧнѝ, Гд҃и, въ плене́нїи и҆ ско́рбехъ сꙋ́щихъ ѡ҆те́цъ и҆ бра́тїй на́шихъ и҆ поми́лꙋй и҆́хъ и҆ на́съ по вели́цѣй ми́лости твое́й, всѧ́коѧ нꙋ́жды ско́рѡ и҆ꙁбавлѧ́ѧ и҆́хъ: Ꙗ҆́кѡ ты́ є҆сѝ и҆сто́чникъ и҆сцѣле́нїй, и҆ пода́тель благи́хъ Христѐ Бо́же нш҃ъ, и҆ тебѣ̀ ᲃла́вꙋ воꙁсыла́емъ съ беꙁнача́льнымъ ти Ѿц҃емъ, и҆ съ Пресвѧты́мъ, и҆ благи́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ все́мъ.

Ли́къ,

И҆ дꙋ́хови твое́мꙋ.

Дїа́конъ,

Главы̀ ва́ша Гд҃ви приклони́те.

Ли́къ,

Тебѣ̀ Гд҃и.

І҆ере́ѵ̆ же Моли́твꙋ сі́ю та́йнѡ гл҃е́тъ прекло́нь гла́вꙋ.

Приклонѝ, Гд҃и, ᲂу҆́хо твоѐ и҆ ᲂу҆слы́ши ны, въ І҆орда́не Крести́тисѧ и҆ꙁволи́вый, и҆ ѡ҆свѧти́вый вѡ́ды, и҆ благословѝ всѣ́хъ на́съ, преклоне́нїемъ свое́ѧ вы́ѧ, наꙁнамена́ющихъ работы̀ въѡбраже́нїе, и҆ сподобѝ на́съ и҆сполни́тисѧ ѡ҆свѧще́нїѧ твое́го воды̀ сеѧ̀ причаще́нїемъ, и҆ да бꙋ́детъ на́мъ, Гд҃и, во здра́вїе дꙋшѝ и҆ тѣ́лꙋ.

Во́ꙁгласъ:

Ты́ бо є҆сѝ ѡ҆свѧще́нїе на́ше Христѐ Бо́же нш҃ъ, и҆ тебѣ̀ ᲃла́вꙋ и҆ благодаре́нїе, и҆ поклоне́нїе воꙁсыла́емъ, съ беꙁнача́льнымъ ти Ѿц҃емъ, и҆ Всесвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

А҆́бїе же І҆ере́ѵ̆ вꙁе́мъ честны́й Кре́стъ, благословлѧ́етъ во́дꙋ гⷤ, крестаѻ́браꙁнѡ погрꙋжа́ѧ є҆гѡ̀ въ не́й, ниꙁводѧ̀ и҆ воꙁводѧ̀ пра́вѡ, и҆ поѧ̀ Тропа́рь се́й Гла́съ а҃. гⷤ.

Спасѝ, Гд҃и, лю́ди своѧ̀, и҆ благословѝ достоѧ́нїе твоѐ, побѣ́ды Царе́мъ на́шимъ на сопроти́вныѧ дарꙋ́ѧ и҆ своѧ̀ сохранѧ́ѧ Кресто́мъ си лю́ди.

И҆ посе́мъ пою́тъ Тропа́рь сей Гла́съ в҃.

Твои́хъ да́рѡвъ досто́йны на́съ сътворѝ, Бц҃е Дв҃о, преꙁира́ющи съгрѣше́нїѧ на́ша, и҆ пода́ющи и҆сцѣле́нїѧ, вѣ́рою и҆ любо́вїю прїе́млющимъ благослове́нїе твоѐ, чи́стаѧ.

И҆ а҆́бїе лобꙁа́етъ І҆ере́ѵ̆ честны́й Кре́стъ, та́кожде и҆ всѝ лю́дїе. И҆ кро́питъ всѣ́хъ свѧще́нною Водо́ю, Ѻ҆́҆лтаръ же и҆ Це́рковь всю̀.

Пѣвци́ же пою́тъ настоѧ́щыѧ Стіхи́ры. Гла́съ д҃.

И҆сто́чникъ и҆сцѣле́нїй, и҆мꙋ́ще, ᲃт҃і́и беꙁъсре́бреницы, и҆сцъле́нїѧ подава́ете всѣ́мъ требꙋ́ющимъ, ꙗ҆́кѡ вели́кимъ да́рѡмъ сподо́бл̾шїисѧ ѿ приснѡтекꙋ́щагѡ и҆сто́чника, Спа́са на́шегѡ: рече́ бо къ ва́мъ Гд҃ь, ꙗ҆́кѡ є҆диноревни́телемъ А҆по́стольскимъ: ᲃе да́хъ ва́мъ вла́сть на дꙋ́сѣхъ нечы́стыхъ, ꙗ҆́кѡ тѣ́хъ и҆ꙁгони́ти, и҆ цѣли́ти всѧ́кїй не́дꙋгъ, и҆ всѧ́кꙋю бо́лѣꙁнъ: тѣ́мъ же въ повеле́нїихъ є҆гѡ̀ до́брѣ пожи́вше, тꙋнѐ прїѧ́сте, тꙋнѐ подава́ете, и҆сцѣлѧ́юще стра́сти дꙋ́шъ и҆ теле́съ на́шихъ.

Сла́ва: И҆ ны́нѣ: Богоро́диченъ:

Пода́ждъ ᲂу҆тѣше́нїе свои́мъ рабѡ́мъ всенепоро́чнаѧ, ᲂу҆толѧ́ющи лю́таѧ на́ны воста́нїѧ, всѧ́кїѧ ско́рби на́съ и҆ꙁмѣнѧ́ющи: тѧ́ бо є҆ди́нꙋ непоꙁибле́мое, и҆ и҆ꙁвѣ́стное ᲂу҆твержде́нїе и҆ма́мы: и҆ твоѐ застꙋпле́нїе стѧжа́хѡмъ, да не постыди́мсѧ Влады́чице, тѧ приꙁыва́ющїи: потщи́сѧ на моли́твꙋ тебѣ̀ вѣ́рнѡ въпїю́щихъ, ра́дꙋйсѧ Влады́чице, всѣ́хъ помо́щнице: ра́дости, и҆ покро́ве, и҆ спасе́нїе дꙋша́мъ на́шимъ.

Влады́чице прїймѝ мили́твы рабѡ́въ свои́хъ, и҆ и҆ꙁба́ви на́съ ѿ всѧ́кїѧ нꙋ́жды и҆ ско́рби.

По сверше́нїи же кропле́нїѧ Е҆кте́нїѧ ᲃі́ѧ.

Поми́лꙋй на́съ, Бо́же, по вели́цей ми́лости твое́й, моли́мътисѧ, ᲂу҆слы́ши и҆ поми́лꙋй.

Е҆щѐ моли́мсѧ Гд҃ꙋ Бг҃ꙋ на́шемꙋ, ѡ҆ є҆́же съхрани́тисѧ ᲃт҃ѣ́й Ѻ҆би́тели се́й и҆ всѧ́кой ѡ҆би́тели, и҆ гра́дꙋ, и҆ ве́си и́ стра́нѣ, и҆ вѣ́рою живꙋ́щихъ въ ни́хъ.

А҆́ще ли въ гра́дѣ, глаголѝ ᲃі́е. (ѡ҆ є҆́же съхрани́тисѧ гра́дꙋ семꙋ̀, и҆ всѧ́комꙋ гра́дꙋ и҆ стра́нѣ,) ѿ гла́да, гꙋби́тел̾ства, трꙋ́са, пото́па, ѡ҆гнѧ̀, меча̀, наше́ствїѧ и҆ноплеме́нникъ, междосо́бныѧ ра́ти, и҆ всѧ́коѧ ᲃмертоно́сныѧ ра́ны: и҆ ѡ҆ є҆́же ми́лостивꙋ бы́ти, и҆ благоꙋвѣтли́вꙋ благо́мꙋ и҆ человѣкѡлюби́вомꙋ Бг҃ꙋ ѡ҆ грѣсѣ́хъ на́шихъ, и҆ ѿврати́ти ѿ на́съ вес́ь гнѣ́въ сво́й пра́ведный дви́жимый на́ны: и҆ помилова́ти на́съ бла́гостїю си, рцѣ́мъ всѝ: Гд҃и ᲂу҆слы́ши и҆ поми́лꙋй.

Ли́къ,

Гд҃и поми́лꙋй, м҃.

І҆ере́ѵ̆ же въꙁглаша́етъ.

Ꙋ҆слы́ши ны, Бо́же, ᲃпаси́телю нш҃ъ, ᲂу҆пованїе всѣ́мъ ко́нцемъ землѝ и҆ ᲃꙋ́щимъ на мо́ри дале́че, и҆ ми́лостиве ми́лостивъ бꙋ́ди на́мъ ѡ҆ грѣсе́хъ на́шихъ, и҆ поми́лꙋй на́съ: ми́лостивъ бо и҆ человѣкѡлю́бецъ Бо́гъ є҆сѝ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀, и҆ ᲃн҃ꙋ, и҆ ᲃⷮ: Дх҃ꙋ, ны́нѣ и҆ прⷭ҇нѡ, и҆ во вѣ́ки вѣ́ковъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

Дїа́конъ,

Гла́вы ва́ша Гд҃еви приклони́те.

Ли́къ,

Тебѣ̀ Гд҃и.

Люде́мъ же всѣ́мъ прекло́н̾шимъ гла́вы, І҆ере́ѵ̆ же чтетъ Моли́твꙋ сі́ю велегла́снѡ.

Влады́ко многоми́лостиве, Гд҃и І҆исꙋ́се Христѐ, Бо́же нш҃ъ, Молитва́ми Пречи́стыѧ Влады́чица на́шеѧ Бц҃а, и҆ прⷭ҇нѡ Де́вы Ма́рїѧ, ᲃи́лою честна́гѡ и҆ животворѧ́щагѡ Креста̀, застꙋпле́нїемъ че́стныхъ небе́сныхъ ᲃи́лъ бесъпло́тныхъ: Че́стнагѡ и҆ ᲃла́внагѡ Проро́ка, Предте́ча, и҆ Крести́телѧ І҆оа́нна: ᲃт҃ы́хъ Сла́вныхъ и҆ всехва́лныхъ А҆по́столъ: ᲃт҃ы́хъ и҆ добропобѣ́дныхъ Мꙋ́ченикъ: Преподо́бныхъ и҆ богоно́сныхъ Ѿц҃ъ на́шихъ: свѧты́хъ и҆ Пра́ведныхъ богоѡте́цъ І҆оаки́ма и҆ А҆́нны: и҆ свѧта́гѡ И҆мⷬ҇къ: є҆го́же є҆́стъ хра́мъ, и҆ всѣ́хъ свѧты́хъ твои́хъ, благопрїѧ́тнꙋ ᲃътворѝ Моли́твꙋ на́шꙋ: дарꙋ́й ѡ҆ставле́нїе прегрѣше́нїемъ на́шимъ: покры́й на́съ кро́вомъ кры́лꙋ твое́ю, ѿженѝ ѿ на́съ всѧ́кагѡ врага̀ и҆ сꙋпоста́та, и҆ ᲂу҆мирѝ на́шꙋ жи́ꙁнь, Гд҃и, поми́лꙋй на́съ и҆ мі́ръ сво́й, и҆ ᲃпасѝ дꙋша̀ на́ша, ꙗ҆́кѡ бла́гъ и҆ человѣкѡлю́бецъ.

Ли́къ,

А҆ми́нь.

И҆ ѿпꙋ́стъ.

А҆́ще же є҆́стъ бра́тїй и҆ люді́й мнѡ́гѡ, пою́тсѧ и҆ сі́ѧ ᲃтіхиры̀ всѧ̀, до́ндеже всѝ лобꙁа́ютъ че́стный Кре́стъ, ᲃамогла́сны крестопокло́нны. Гла́съ в҃.

Прїйдѣ́те вѣ́рнїи, животворѧ́щомꙋ дре́вꙋ поклони́мсѧ, на не́мъ же Христо́съ, Ца́рь ᲃла́вы, во́лею рꙋ́цѣ просте́ръ, воꙁнесѐ на́съ на пе́рвое блаже́нство, и҆́хъ же пе́рвѣе вра́гъ сла́стїю ѡ҆кра́дъ, и҆ꙁгна́ны ѿ Бг҃а сътворѝ: прїидѣ́те, вѣ́рнии, Дре́вꙋ поклони́мсѧ, и҆́м̾же сподоби́хѡм̾сѧ невиди́мыхъ врагѡ́въ съкрꙋши́ти гла́вы: прїйдѣ́те, всѧ̀ ѿте́чествїѧ ꙗ҆ꙁы́къ, Кре́стъ Госпо́день пѣ́сн̾ми почтѣ́мъ: ра́дꙋйсѧ, Кре́сте, па́дшагѡ А҆да́ма съверше́нное и҆ꙁбавле́нїе: ѡ҆ тебѣ́ бо вѣ́рнїи Ца́рїе на́ши хва́лѧтсѧ, твое́ю ᲃи́лою И҆ꙁмаи́льскїѧ лю́ди держа́внѡ побѣжда́юще, и҆ тебѐ ны́нѣ съ ᲃтра́хомъ христїѧ́не цѣлꙋ́юще, на тебѣ̀ пригво́ждшагосѧ Бг҃а ᲃла́вимъ, глаголю́ще: Го́споди, на не́мъ пригвоꙁди́выйсѧ, поми́лꙋй на́съ, ꙗ҆́кѡ бла́гъ и человѣкѡлю́бецъ.

Гла́съ є҃.

Зрѧ́щи тѧ тва́ръ всѧ̀ на Крестѣ̀ на́га висѧ́ща, ᲃъдѣ́телѧ и҆ зижди́телѧ всѣ́хъ: и҆ꙁмѣнѧ́шесѧ стра́хомъ и҆ рида́ше: со́лнце же ᲃвѣ́тъ ѡ҆мрачѝ и землѧ̀ колѣба́шесѧ: ка́менїе раꙁсѣда́шесѧ, и҆ Церко́внаѧ ᲃвѣ́тлость раꙁдира́шесѧ: ме́ртвїи воста́ша ѿ гро́бѡвъ, и҆ А҆́ггелскїѧ ᲃи́лы ᲂу҆жасѡ́шасѧ, глаголю́ще: ѽ чꙋдеси! ᲃꙋдїѧ̀ сꙋди́мъ быва́етъ, и҆ стра́ждетъ во́лею, за спасе́нїе мі́ра и҆ ѡ҆бновле́нїе.

Гла́съ и҃.

Дне́сь Влады́ка тва́ри и҆ Госпо́дь ᲃла́вѣ, на Крестѣ̀ пригвожда́етсѧ и҆ въ Ребра̀ пробода́етсѧ, же́лчъ и҆ ѡ҆́цетъ вкꙋша́етъ, ᲃла́дость Церко́внаѧ: вѣнце́мъ ѿ те́рнїй ѡ҆блага́етсѧ, покрыва́ѧй небеса̀ ѡ҆́блаки: червлени́цею ѡ҆дѣва́етсѧ порꙋга́нїѧ, и҆ заꙋша́етсѧ бре́нною рꙋко́ю, ᲃъꙁда́вый человѣ́ка: по плещи́ма бїе́нъ быва́етъ, ѡ҆дѣва́ѧй не́бо ѡъ́блаки: заплева́етсѧ, и҆ ра́ны прїе́млетъ, поноше́нїѧ и҆ нарꙋга́нїѧ, и҆ всѧ́ терпи́тъ менѣ̀ ра́ди ѡ҆сꙋжде́ннагѡ, и҆ꙁбави́тель мо́й Бг҃ъ, да ᲃпасе́тъ мі́ръ ѿ ле́сти, ꙗ҆́кѡ милосе́рдъ.

Сла́ва: И҆ ны́нѣ: Гла́съ тожъ.

Дне́сь неприкоснове́нный ᲃꙋщество́мъ, прикоснове́нъ мнѣ̀ быва́етъ, и҆ стра́ждетъ ᲃтра́сти, свобожда́ѧй мѧ ѿ страстїй, ᲃвѣ́тъ подава́ѧй слѣпы́мъ, ѿ беꙁꙁакѡ́нныхъ ᲂу҆сте́нъ ѡ҆плева́етсѧ, и҆ дае́тъ пле́щи заплѣне́нныхъ на ра́ны. Сегѡ̀ чи́стаѧ Де́ваѧ и҆ Ма́ти на Крестѣ̀ зрѧ́щи, болѣꙁне́ннѡ вѣща́ше: ᲂу҆́вы мнѣ̀ ча́до моѐ, что̀ ᲃе сътвори́лъ є҆сѝ, кра́сный доброто́ю па́че всѣ́хъ человѣ́къ, бе́ꙁъ дыха́нїѧ и҆ бе́ꙁъ зра́ка ꙗ҆влѧ́ешисѧ, не и҆мѣ́ѧ видѣ́нїѧ ни доброты̀: ᲂу҆́вы мнѣ̀ мо́й ᲃвѣ́те, не могꙋ̀ ᲂу҆ме́рша зрѣ́ти тѧ, ᲂу҆тро́бою ᲂу҆ѧꙁвлѧ́юсѧ, и҆ лю́тое ѡ҆рꙋ́жїе се́рдце моѐ про́йде: воспѣва́ю ᲃтра́сти твоѧ̀: покланѧ́юсѧ твое́мꙋ милосе́рдїю: долготерпе́ливе сла́ва тебѣ̀.

По си́хъ же всѣ́хъ Стіхи́ры глаголю́тсѧ Е҆кте́нїѧ вы́ше писа́наѧ, и҆ ѿпꙋ́стъ ᲃе́й.

Хᲃ҃ и҆́стинный Бо́гъ нш҃ъ Молитва́ми Пречи́стыѧ свое́ѧ Ма́тере, ᲃи́лою че́стнагѡ и҆ животворѧ́щагѡ Креста̀, и҆ ᲃт҃ы́хъ се́дмъ Мꙋченикъ Маккаве́й, и҆ ᲂу҆чи́телѧ Е҆леаꙁа́ра, и҆ ма́тере и҆́хъ Соломѡ́нїи, и҆ всѣ́хъ ᲃⷮ: поми́лꙋетъ и҆ спасе́тъ на́съ, ꙗ҆́кѡ бла́гъ и҆ человѣкѡлю́бецъ.

Вѣ́стнѡ же бꙋ́ди, ꙗ҆́кѡ а҆́ще І҆ере́ѵ̆ кро́мѣ пе́рвагѡ днѧ̀ А҆́вгꙋста: въсхо́щетъ ѡ҆свѧще́нїе сі́е сотвори́ти потре́бы ра́ди нѣ́кїѧ, не помина́етъ ᲃⷮ: Мꙋ́ченикъ Маккаве́й въ моли́тве и҆ ѿпꙋ́стѣ. Но то́кмѡ ᲃⷮ: є҆го́же є҆́стъ хра́мъ, и҆ дн҃ъ. По ѿпꙋ́стѣ же и҆схо́дитъ І҆ере́ѵ̆ внѣ̀ ѡ҆би́тели, носѧ̀ Кре́стъ, съ сщ҃енною водо́ю, бра́тїѧмъ пою́щимъ стіхи́ры самогла́сные Крестꙋ̀, ѡ҆бхо́дитъ же кропѧ̀ лю́ди и҆ Монасты́рскꙋю всю̀ ѡ҆гра́дꙋ: внꙋ́тръ же Монастырѧ̀, кро́питъ Ке́лїѧ И҆гꙋме́нскаѧ и҆ бра́тнѧѧ. воꙁвра́щшежесѧ въ Це́рковъ, пою́тъ Ча́съ пе́рвый, и҆ быва́етъ съверше́нный Ѿпꙋ́стъ.

Вѣ́стно бꙋ́ди, ꙗ҆́кѡ ѡ҆свѧще́ніе ᲃі́е нико́ли же наро́днѣ въ Це́ркви быва́етъ, то́чїю ѡ҆со́бнѣ, по нꙋ́ждѣ, ско́рости ра́ди. Въ Це́ркви же два̀ ѡ҆свѧще́нїѧ Водѣ̀ то́чїю соверша́ютсѧ, сі́естъ: Е҆дино̀ А҆́вгꙋстово, предположе́нное, є҆́же и въ Це́ркви всегда̀, и на всѧ́комъ мѣ́стѣ, и на кꙋ́юждѡ потре́бꙋ соверша́етсѧ. Вто́рое же послѣдꙋ́ющее, Богоѧвле́нское, є҆́же два́жды въ Лѣ́то то́чію, сі́естъ, въ На́вече́рїи свѧты́хъ Богоѧвле́нїй по Вече́рни въ Це́ркви, въ самы́й же де́нь Богоѧвле́нїѧ по Ꙋ҆трени, на И́сто́чницѣ и҆лѝ на Рѣцѣ̀ съверша́етсѧ. Тѣ́мъ же раꙁвѣ̀ нꙋ́жды ника́коже ᲃі́е кра́ткое досто́итъ ᲂу҆потреблѧ́ти.

Ѡ҆свѧще́ніе ᲃі́е кра́ткое ᲃи́це съверша́етсѧ.

Вꙁе́мъ І҆ере́ѵ̆ Е҆питра́хиль на ᲃебѐ, начина́етъ ѡ҆бы́чнѡ, и чтетъ, Царю̀ небе́сный: Трисвѧто́е: Ѿч҃е нш҃ъ: Ꙗ҆́кѡ твоѐ є҆́стъ ца́рство: Го́споди, поми́лꙋй, ві҃.

Сла́ва: И҆ ны́нѣ: Прїйдѣ́те поклони́мсѧ, гⷤ. и Ѱало́мъ к҃и. Принесѣ́те Го́сподеви ᲃынѡ́ве Бо́жїи: ве́сь до конца̀.

Сла́ва: И҆ ны́нѣ: А҆ллилꙋ́їѧ, ᲃла́ва тебѣ̀ Бо́же, гⷤ. И посе́мъ пое́тъ и҆лѝ чтетъ гⷤ. Тропа́рь ᲃе́й. Гла́съ ѕ҃.

Съ небесѐ послѝ благода́ть жиꙁнода́вче, во́дꙋ ᲃі́ю ѡ҆свѧтѝ, и҆ всѣ́мъ скве́рнамъ ꙗ҆вѝ ю҆̀ бы́ти ѡ҆чище́нїе.

И҆ꙁре́къ же: Гд҃ꙋ помоли́мсѧ, и҆ Гд҃и поми́лꙋй.

Чтетъ надъ водо́ю въ чи́стомъ ᲃъсꙋ́дѣ сꙋ́щей, Моли́твꙋ ᲃі́ю.

Бж҃е великоимени́тый, творѧ́й чꙋдеса̀, и҆́мже нѣ́стъ числа̀, Прїидѝ ны́нѣ къ молѧ́щимъ тѧ рабѡ́мъ твои́мъ, Влады́ко, и послѝ Дх҃ъ тво́й ᲃт҃ы́й, и ѡ҆свѧтѝ во́дꙋ сі́ю, (ᲃі́ѧ же глаго́лѧ, благословлѧ́етъ во́дꙋ десни́цею три́жды, погрꙋжа́ѧ въ не́й пе́рсты), и҆ ꙗ҆́вѝ ю҆̀ си́лою Свѧта́гѡ твое́гѡ Дх҃а бы́ти пі́ющимъ ѿ не́ѧ, и҆ прїе́млющимъ, и кропѧ́щимсѧ рабѡ́мъ твои́мъ, премѣне́ніе страсте́мъ, ѡ҆ставле́нїе грѣхо́въ, бо́лѣ́ꙁнемъ исцѣле́ніе, и҆ ѿгна́нїе всѧ́кагѡ зла̀, ᲂу҆твержде́нїе же и освѧще́нїе до́мовомъ, и ѡ҆чище́нїе всѧ́коѧ скве́рны, и навѣ́та дїа́вольскагѡ ѿгна́нїе. Ꙗ҆́кѡ благослови́сѧ и просла́висѧ пречестно́е и великолѣ́пое и҆мѧ твоѐ, Ѿц҃а̀ и ᲃн҃а и Свѧта́гѡ Дх҃а, ны́нѣ, и прⷭ҇нѡ, и во вѣ́ки вѣ́кѡвъ. А҆ми́нь.

Посе́мъ, а҆́ще и҆́мать Кре́стъ съ собо́ю, погрꙋжа́етъ є҆гѡ̀ гⷤ. крестаѡ́браꙁнѡ въ водѣ̀, въꙁводѧ̀ и҆ ниꙁводѧ̀. А҆́ще же Крⷭ҇та неи́матъ, то пе́рсты де́сныѧ рꙋкѝ благословлѧ́етъ, во́дꙋ крестаѻ́҆браꙁнѡ погрꙋжа́ѧ и҆́хъ въ водѣ̀, и҆ поѧ̀ и҆лѝ глаго́лѧ Тропа́рь ᲃе́й. Гла́съ а҃.

Спаси́, Гд҃и, лю́ди ᲃвоѧ̀, и҆ благословѝ достоѧ́нїе твоѐ, побѣ́ды Царе́мъ на́шимъ на варва́ры дарꙋ́ѧ, и҆ ᲃвоѧ̀ съхранѧ́ѧ Кресто́мъ си лю́ди.

Посе́мъ а҆́бїе кро́питъ всѣ́хъ водо́ю ᲃвѧще́нною, и҆ твори́тъ обы́чный дне́вный ѿпꙋ́стъ.

Ме́ждꙋ и҆́нѣми зна́менїи (ꙗ҆́же мнѡ́ги и҆ раꙁли́чны сꙋ́тъ) и҆́стинныѧ є҆дины́ѧ, ᲃт҃ы́ѧ, Каѳꙍли́ческїѧ, А҆посто́лскїѧ Це́ркве, не ме́ншее є҆́стъ зна́менїй Вода̀ въ Навече́рїи ᲃт҃ы́хъ Богоѧвле́нїй ѡ҆свѧще́ннаѧ.

Вода́ бо є҆стестве́ннаѧ доне́лиже ѿ и҆сто́чника и҆стѣка́ѧ тече́тъ, и҆лѝ въ рѣцѣ̀ текꙋ́щи и҆де́тъ, цѣ́ло неистлѣ́нна пребыва́етъ, че́рплена же и҆ ѡ҆со́бъ въ ᲃосꙋ́дѣ хране́на, ника́коже надо́лꙁѣ цѣ́ла и҆ но́ва, (сі́естъ, свѣ́жа) пребы́ти мо́жетъ, но ско́рѡ въ растлѣ́нїе, и҆ въ смра́дъ ѡ҆браща́етсѧ, си́це бо ю҆̀ є҆стество̀ є҆ѧ̀ расположѝ и҆ съчинѝ. Ꙍ҆свѧще́ннаѧ же въ ᲃт҃ы́хъ Богоѧвле́нїй Навече́рїи, а҆́ще и҆ ѿ и҆сто́чника и҆лѝ рѣкѝ че́рплена и҆ въ сосꙋ́дѣ въ домꙋ̀ надо́лꙁѣ хра́нена быва́етъ, ника́коже нико́лиже растлѣва́етсѧ, ни́же смерди́тъ, но цѣ́ла, чи́ста, и҆ нерастлѣ́нна, ꙗ҆́коже ны́нѣ ѿ и҆сто́чника че́рпленаѧ, на мнѡ́гаѧ времена̀ пребыва́етъ. Сі́еже сегѡ̀ ра́ди си́це быва́етъ, Дх҃а бо ᲃт҃а́гѡ наше́ствїе и҆де́же каса́етсѧ, та́мѡ и҆ є҆стества̀ чи́нъ премѣнѧ́етъ, претворѧ́етъ, и́ претѣка́етъ, и҆ ᲃегѡ ра́ди надъ є҆стество̀ чꙋ́до си́цево ꙗ҆встве́нное быва́етъ.

Ѡ҆ се́мъ небе́снаѧ ѻ҆́наѧ ᲃлове́снаѧ Ла́стовица, Златосло́вный Вселе́нскїй Ꙋ҆чи́тель І҆ѡа́ннъ Константиногра́дскїй Патрїа́рхъ, въ сло́вѣ свое́мъ ѡ҆ є҆́же сходи́тисѧ Христиа́нѡмъ въ ᲃт҃ꙋ́ю Бо́жїю Це́рковъ, и҆ ѡ҆ креще́нїи, є҆го́же нача́ло. Всѝ вы въ бла́годꙋ́шїи є҆стѐ дне́сь, а҆́ꙁъ же въ печа́ли є҆ди́нъ болѣꙁнꙋ́ю, свѣдителствꙋ́етъ, гл҃ѧ̀,

Но ᲂу҆́бѡ чесо̀ ра́ди не де́нь во́нже роди́сѧ, но де́нь во́нже крести́сѧ, ꙗ҆вле́нїе глаго́летсѧ. Се́й бо є҆́стъ де́нь во́н̾же крести́сѧ, и҆ во́дное ѡ҆свѧтѝ є҆стество̀. Сегѡ̀ ра́ди и҆ въ Полꙋ́нощи на Пра́ꙁдникъ се́й всѝ поче́рпше, въ до́мы Во́дꙋ ѿнѡ́сѧтъ и҆ съблюда́ютъ, и҆ лѣ́то съверше́нно хранѧ́тъ, поне́же дне́съ ѡ҆свѧща́ютсѧ Вѡ́ды, и҆ знаменїе быва́етъ ꙗ҆встве́нное, нерастлѣва́ющꙋсѧ Вѡ́дъ ѻ҆́ныхъ є҆стествꙋ̀ долгото́ю вре́мене, но лѣ́то съверше́нно, и҆ двѣ̀ и҆ трѝ множи́цею дне́съ черпле́ннаѧ Вода̀ цѣ́ла и҆ но́ва пребыва́етъ, и҆ по толи́цѣмъ вре́мени, ны́нѣ ѿ и҆сто́чника вꙁѧ́той Водѣ̀ съравнѧ́етсѧ.

Ꙗ҆встве́ннѡ ᲂу҆́бѡ ᲃі́ѧ ᲃвѧще́ннаѧ Вода̀ є҆́стъ зна́менїе и҆́стинныѧ Це́ркве, и҆ сꙋ́щїѧ въ не́й дѣйстви́телныѧ бла́гости Пресвѧта́гѡ Дх҃а, и҆бѡ̀ а҆́ще въ ве́тсѣмъ завѣ́тѣ, и҆́же бѧ́ше ᲃѣ́нь но́вой благода́ти, ѡ҆́вчаѧ Кꙋпе́ль въ ню́же А҆́гг҃елъ Госпо́день є҆дино́ю на всѧ́кое лѣ́то схожда́ше, и҆ воꙁмꙋща́ше Во́дꙋ, и҆ пе́рвѣе въ ню̀ влаꙁѧ́й недꙋ́жный, здра́вїе полꙋча́ше, зна́менїе Бг҃а чꙋдеса̀ творѧ́щагѡ благода́ти съ людмѝ І҆ꙁраи́левыми сꙋ́щей бѧ́ше, ко́лми па́че въ ново́й бла́гости ᲃі́ѧ Вода̀ и҆́же не А҆́гг҃елъ воꙁмꙋща́етъ, но Дх҃ъ ᲃт҃ы́й ѡ҆свѧща́етъ, и҆ преестестве́ннѡ свое́ю Блжестве́нною ᲃи́лою растлѣ́нїю и҆ смра́дꙋ прича́стнꙋ бы́ти воꙁбранѧ́етъ, и҆́стинное є҆́стъ и҆ и҆ꙁвѣ́стное зна́менїе, и҆ ꙗ҆стве́нное чꙋ́до, и҆́мже и҆ꙁвѣствꙋ́етъ на́съ Бо́гъ, ꙗ҆́кѡ во Це́ркви свое́й ᲃⷮ, съ на́ми є҆́стъ, и҆ благода́ть Дх҃а свое́гѡ Пресвѧта́гѡ проше́нїю прекланѧ́ѧсѧ І҆ере́ѵ̆скомꙋ подае́тъ, и҆бѡ̀ не на є҆дино́мъ мѣ́стѣ, ꙗ҆́коже тогда̀ въ І҆ерꙋсали́мѣ то́чїю (а҆́ще и҆ є҆дино́ю въ лѣ́то,) но по все́й вселе́нной въ всѣ́́хъ Це́рквахъ Правосла́внокаѳѡли́ческихъ ᲃі́е пресла́вное ѡ҆́бщее чꙋ́до ꙗ҆встве́ннѡ быва́етъ.

И҆ ꙗ҆́коже ѡ҆наѧ ѡ҆́вчаѧ Кꙋ́пель доне́лиже Христа̀ Го́спода, И҆́стиннагѡ Бг҃а, и҆ Проро́ка ѡ҆бѣща́ннагѡ Ме́ссїи со́нмище І҆ꙋде́ѵ꙼ское не ѿрече́сѧ, А҆́гг҃елъ Госпо́день въ ню̀ съхожда́ше, и҆ чꙋдодѣйствова́ше, є҆гда́ же ꙗ҆́кѡ ѿме́тницꙋ и҆ ѿстꙋ́пницꙋ пꙋ́стꙋ, Госпо́дь по Божестве́нномꙋ свое́мꙋ рече́нїю, Се ѡ҆ставлѧ́етсѧ ва́мъ до́мъ ва́шъ пꙋ́стъ, Маѳ: Гла́ва: к҃г. Зач: ч҃ѕ. Ꙍ҆ста́ви, ѿто́лѣ повнегда̀ Раꙁслабле́нномꙋ тридесѧтоѡсмолѣ́тномꙋ и҆сцѣле́нїе Госпо́днимъ ᲃло́вомъ прїѧ́ти, нико́лиже чꙋдодѣ́йствꙋ́етъ, ѿе́млема бо є҆́стъ благода́ть Бо́жїѧ ѿ богобо́рнагѡ сегѡ̀ и҆ Христоꙋ́бїйстве́ннагѡ ᲃобо́рища, ᲃи́це и҆ всѧ̀ ᲃобо́рища Е҆рети́ческаѧ и҆ ѿстꙋ́пническаѧ, повнегда̀ ѿстꙋпи́ти и҆́мъ ѿ свѧто́й Православнокаѳꙍли́ческой Це́ркви, и҆́нїи ѿню́дъ во́дное ѡ҆свѧще́нїе ѿметнꙋ́ша, и҆́нїи же а҆́ще и҆ съде́ржатъ, но ᲂу҆́бѡ ѿ и҆́хъ мни́мыхъ І҆ере́ѡвъ, а҆́ще ꙗ҆́кобы и҆ ѡ҆сще́нна бы была̀, цѣ́ла и҆ но́ва на до́лꙁѣ пребы́ти не мо́жетъ, ѿе́млема бо є҆́стъ ѿ ни́хъ Дх҃а Пресвѧта́гѡ благода́ть, и҆ не прїѧ́тна є҆́стъ Бг҃ꙋ мо́лба ѡ҆́нѣхъ, и҆ сегѡ̀ ра́ди ѿ ни́хъ ᲃвѧще́ннаѧ Вода̀, ꙗ҆́кѡ не ѡ҆свѧще́на растлѣ́нїю и҆ смра́дꙋ подлѣга́етъ.

Въ ᲃт҃о́й же Восто́чной Правосла́внокаѳѡли́ческой Це́ркви, ꙗ҆́коже въ ѡ҆́ныхъ дре́вныхъ вре́менахъ (по свѣди́телствꙋ Божестве́ннагѡ Златослове́снагѡ Ꙋ҆чи́телѧ) Дх҃ъ ᲃт҃ы́й ꙗ҆встве́ннѡ чꙋдодѣйствꙋ́етъ, и҆ зна́менїе пресла́вное въ Водѣ̀ ᲃе́й всѣ́мъ ѡчеви́дное ꙗ҆влѧ́етъ. Сі́ѧ бо Це́рковъ и҆́стиннаѧ Невѣ́ста Христо́ва ᲃто́лпъ же и́ ᲂу҆твержде́нїе и҆́стинны є҆́стъ. а҃, Тим: Глава̀, г҃. Зач: сп҃д.

И҆ поне́же чꙋ́до є҆́же въ времена̀ Златоꙋ́ста ᲃт҃а́гѡ, зна́менїе и҆́стинныѧ Це́ркве бѧ́ше, ны́нѣ въ на́шей Це́ркви ᲃт҃о́й Восто́чной благода́тїю ᲃт҃а́гѡ Дх҃а действꙋ́етсѧ, не и҆́наѧ, (ꙗ҆́коже І҆ерети́честїи, и҆ ѿстꙋ́пничестїи дѣ́ти блѧдосло́вѧтъ,) но та́ѧжде и҆ є҆дина̀ є҆́стъ въ не́й и҆ Златоꙋ́стъ ᲃт҃ы́й бѧ́ше. Тѣ́мъ же ᲂу҆́бѡ ѡ҆ Правосла́вный Рꙍссі́йскїй Рѡ́де, и҆ꙁвѣ́стнѡ вѣды́й ꙗ҆́кѡ въ и҆́стинной Це́ркви є҆сѝ, ю҆́же Христо́съ Госпо́дь на ᲃебѣ̀ само́мъ Краеꙋго́лномъ Ка́мени ѡ҆снова̀, ᲃъꙁда̀, є҆́й же вра́та А҆́дова, ꙗ҆́же ᲃꙋ́тъ всѣ́хъ є҆рети́къ и҆ ѿстꙋ́пникѡвъ ᲂу҆ста̀, ѡ҆долѣ́ти не воꙁмогꙋ́тъ, тве́рдѡ и҆ непоꙁыбле́мѡ въ не́й сто́й не поколѣблѧсѧ вѣ́тры ласка́нїй, и҆лѝ бꙋ́рею гоне́нїй, и҆лѝ словопрѣ́нїй Филосо́фскихъ Силлогі́смѡвъ.

Вси́ бо є҆рети́ци и҆ ѿстꙋ́пници въ плете́нїи ᲃлове́съ, велерѣчїи же, и҆ въ є҆́же мꙋдрствова́ти па́че не́жели подоба́етъ ᲂу҆пражнѧ́ютсѧ, и҆ своѐ ᲂу҆пова́нїе воꙁложи́шѧ, и҆ си́цевыми сѣтмѝ, дꙋшѧ̀ неꙋтвержде́нныхъ и҆ про́стыхъ ᲂу҆ловлѧ́ютъ, и҆ съ собо́ю въ поги́бель ведꙋ́тъ.

Мы́ же держи́мсѧ и҆́стинны ю҆́же въ ᲃт҃ы́хъ Прароди́телехъ на́шихъ не по превосхожде́нїѧ ᲃло́ва, и҆лѝ премꙋдрости, ни въ прѣ́нїй человѣ́ческїѧ премꙋ́дрости словесы̀, но въ ꙗ҆вле́нїи Дх҃а и҆ ᲃи́лы прїѧ́хѡмъ, и҆бѡ̀ Вѣ́ра на́ша не во Мꙋ́дрости человѣ́честѣй, но въ ᲃи́лѣ Бо́жїи є҆́стъ все́й бо Це́ркви въ не́й же ны́нѣ є҆смы̀, Вѣ́рꙋ и҆́стиннꙋю ю҆́же Божественнїи проповѣда́ша А҆постоли, зани́же Кро́въ свою̀ пролїѧ́шѧ Мꙋ́ченици, ю҆́же на ᲃт҃ыхъ ᲃедмѝ Вселе́нскихъ Собѡ́рахъ запечатлѣ́шѧ Богонѡ́снїи Ѿц҃ѝ. нерастлѣ́ннꙋ, непремѣ́ннꙋ, ничто́же прило́женѡ къ не́й, и҆лѝ ѿѧ́то ѿ не́ѧ и҆ма́мы.

Въ то́й Це́ркви и҆́стинныѧ се́дмъ Та́йны по ᲂу҆ꙁаконе́нїю и҆ ᲂу҆ста́вы Христо́вой, и҆ преда́нїю ᲃт҃ы́хъ А҆постолъ съверша́ютсѧ, и҆́миже вѣ́рнїи ѡ҆ставле́нїе грѣхѡ́въ, ᲂу҆сыновле́нїе, ѡ҆свѧще́нїе же и҆ благода́ть прїе́млютъ, и҆ небе́снагѡ Ца́рствїѧ вѣнцѧ̀ сподоблѧ́ютсѧ.

Въ се́й Це́ркви ᲃт҃ы́хъ А҆по́столъ преда́нїѧ, и҆ и҆́хъ и҆́стинныхъ воспрїе́мникѡвъ ᲃт҃ы́хъ Ѿц҃ъ и҆ Ꙋ҆чи́телїй Вселе́нскихъ ѡ҆брѧ́ды и҆ ᲂу҆ста́вы, непремѣ́ннѡ съде́ржатсѧ.

Сі́ѧ є҆́стъ Це́рковъ въ не́й же Бо́гъ крѣ́пкїй и҆ ᲃи́лный не то́чїю чре́ꙁъ ѡ҆со́бныхъ Ꙋ҆го́дникѡвъ свои́хъ є҆щѐ на землѝ живꙋ́щихъ по временѝ и҆ потре́бѣ, ди́внаѧ и҆ раꙁли́чнаѧ чꙋдеса̀ тво́ритъ, въ Мꙋ́ченическихъ же и҆ Прпⷣбническихъ, и҆ раꙁли́чныхъ ᲃт҃ы́хъ мо́щехъ, по и҆́хъ сме́рти и҆сцѣле́нїѧ то́читъ, и҆ чꙋдеса̀ и҆ꙁлива́етъ, и҆ ѿ сꙋхи́хъ ко́стїй и҆ гла́въ свои́хъ ᲂу҆го́дникѡвъ Мѵ́ро ꙗ҆́коже ѿ и҆сто́чника и҆сточа́етъ, и҆ требꙋ́ющимъ и҆сцѣле́нїа тѣ́мъ подава́етъ, ꙗ҆́коже ꙗ҆встве́ннѡ въ ᲃт҃о́й вели́кой Чꙋдотво́рной Ла́врѣ Пече́рской Кі́евской, и́ въ сты́хъ є҆́й Пеще́рахъ кі́йждѡ зри́ти мо́жетъ, и҆ въ И҆́конахъ въ то́йжде ᲃт҃о́й Ла́врѣ, и҆ въ и҆́нѣхъ ѡ҆бѣ́телехъ на раꙁли́чныхъ мѣ́стехъ, ꙗ҆́кѡ чꙋдесе́мъ Бо́гъ чꙋдодѣйствꙋ́етъ. Надъ всѧ́же ᲃі́ѧ ѡ҆́бщее, и҆ вселе́нское по всѣ́хъ Правовѣ́рныхъ Церква́хъ ᲃі́е ꙗ҆́вственное въ Водѣ̀ съдѣва́ющеесѧ чꙋ́до, не ны́нѣ, но ѿ А҆по́столскихъ є҆щѐ вре́менъ, и҆бѡ̀ Златоꙋ́стъ ᲃт҃ы́й не во дне́хъ свои́хъ наче́ншеесѧ быва́ти ᲃі́е чꙋдо, но ѡ҆бы́чное ѿ дре́внихъ вре́менъ быва́емое, внегда̀ гл҃е́тъ, ꙗ҆́кѡ всѝ христїа́не, на Пра́ꙁдникъ ᲃе́й въ полꙋ́нощи во́дꙋ че́рплютъ и҆ въ до́мы ѿносѧ́ще хра́нѧтъ, и҆ ꙗ҆́кѡ лѣ́то є҆дино̀, и҆ двѣ̀ и҆ трѝ не растлѣва́етсѧ, проповѣдꙋ́етъ. И҆ сі́ѧ вода̀ не то́чиїю все́мъ чꙋде́сна є҆́стъ ꙗ҆́кѡ не растлѣва́етсѧ, но и҆ ꙗ҆́кѡ и҆ раꙁли́чнаѧ и҆сцѣленїѧ вѣ́рою кропѧ́щимсѧ и҆ пі́ющимъ ю҆̀ подава́етъ, бѣ́сы, гꙋби́телныѧ мѡ́ры, и҆ недꙋ́ги ѿ челове́къ и҆ ско́тѡвъ, и҆ ѿ мѣ́стъ прогонѧ́етъ, и҆ ю҆̀ раꙁли́чнаѧ благодѣѧ́нїѧ Бо́гъ вѣ́рнымъ тое́ю дарꙋ́етъ, и҆ ѿ грѣхѡ́въ мнѡ́жества ра́ди забве́нныхъ неисповѣда́нныхъ и всѣ́хъ прости́телныхъ, сі́естъ, повседне́вныхъ ѡ҆чища́етъ, и҆ къ и҆сполне́нїю за́повѣдїй свои́хъ и҆ всѣ́хъ добродѣ́телїй дѣла́нїю спосо́бными, и҆ благопрїѧ́тными тво́ритъ. Надъ всѧ́же ᲃі́ѧ ᲃщ҃е́ннаѧ Вода̀ подча́съ, ѡ҆ле чꙋдесѝ! ꙗ҆́коже въ Канагалка́си, въ вино̀ прелага́етсѧ, є҆́же здѐ въ Кі́евской землѝ въ на́шѧ времена̀ бы́сть. А҆рхїереѵ꙼ствꙋ́ющꙋ І҆́ꙍвꙋ Боре́цкомꙋ є҆ди́нъ ѿ благоро́дныхъ въ лѣ́то ҂ахк҃ѕ. принесѐ къ не́мꙋ во́дꙋ и҆́же ѡ҆́нъ са́мъ въ Навече́рїю Богоѧвле́нїѧ, въ Це́ркви ᲃт҃а́гѡ А҆рхїстрати́га Міхаи́ла Златове́рхой, ѿ того́жде А҆рхїере́ѧ ѡ҆свѧщеи́нꙋю почерпѐ, и҆ не мало́е вре́мѧ въ домꙋ̀ є҆гѡ̀ хра́нена бы́вши, въ Вино̀ преложи́сѧ, и҆ ѿдава́ѧ А҆рхїере́ю Вино̀ ѿ Воды̀ бы́вшее съ клѧ́твою и҆сповѣда̀, ꙗ҆́ко вода̀ ю҆́же ты ѡ҆свѧти́лъ є҆сѝ во вино̀ претвори́сѧ. Ви́дъ ᲂу҆́бѡ сегѡ̀ вина̀ бѧ́ше во́дный, вкꙋ́съ же и҆ ᲂу҆ха́нїе ви́нное.

Въ Лѣ́то же ҂ах҃и, та́кожде въ Гра́дѣ Ро́жовѣ въ Навече́рїи Богоѧвле́нїѧ Во́дꙋ ѡ҆бы́чнѡ ѡ҆свѧтѝ Филоѳе́й Киꙁаре́вичъ І҆еромона́хъ бы́вый пото́мъ Намѣ́стникъ Пече́рскїй, и҆ И҆гꙋ́менъ Монастырѧ̀ ᲃт҃а́гѡ Міхаи́ла Златове́рхагѡ, погрꙋжа́ѧ въ не́й Животворѧ́щее Дре́во, на не́мъ же ᲃпасе́нїе на́ше Распѧ́то бы́сть, ѿ не́ѧже вꙁѧ́тъ въ до́мъ сво́й Го́спожа Ло́жчинаѧ Марша́лковаѧ Моꙁи́рскаѧ, сі́ѧ же бѣ Госпожо́ю доживо́тнею Гра́да Ро́жова, съхрани́вши же во́дꙋ ѡ҆́нꙋ въ сосꙋ́дѣ ѿи́де въ Лито́вскꙋю зе́млю, не ма́ло же вре́мѧ та́мѡ пребы́вши воꙁврати́сѧ па́ни къ Ро́жовꙋ, и҆ поне́же зима̀ крѣ́пкаѧ бѣ тогда̀, воспомѧнꙋ̀ себѣ̀ во́дꙋ ѡ҆́нꙋ, и҆ боѧ́сѧ да не ка́кѡ раꙁсѣдѣ́сѧ ла́гвица въ не́й же бѣ, (и҆бѡ̀ стеклѧ́на бѧ́ше) повелѣ̀ слꙋꙁѣ̀ свое́мꙋ Напо́л̾скомꙋ ѡ҆глѧди́ти Во́дꙋ ѡ҆́нꙋ, ѡ҆́нъ же ше́дъ и҆ съглѧда́въ, ѡ҆брѣтѐ въ Ла́гвици ѡ҆́ной не во́дꙋ, но ѿ воды̀ че́рвлено благово́нїѧ же вели́кагѡ и҆сполне́нное Вино̀. сі́е и҆сповѣда̀ пре́дъ всѣмѝ и҆ сама̀ предименова́ннаѧ Го́спожа, найпа́че же слꙋ́га̀ є҆́й Напо́л̾скїй, и҆́же є҆́стъ Ри́мскїѧ вѣ́ры, и҆ є҆щѐ и҆ до ны́нѣ живе́тъ, подъ ᲃо́вестїю и ны́нѣ въпраша́ющимъ є҆гѡ̀ повѣда́етъ, ꙗ҆́кѡ ᲃі́е въ и҆́стиннꙋ ᲃи́це бѣ.

Па́ки же, въ Лѣ́то ҂ахи҃д, Ме́сѧца І҆ю́нѧ є҃і днѧ̀: А҆рхима́ндритъ Пече́рскїй Петръ Моги́ла въ Селѣ̀ свое́мъ Монасти́рскомъ, нарица́емомъ Рꙋбежо́вка, ᲂу҆ ᲃлꙋгѝ сво́егѡ Станисла́ва Третѧка̀, и҆́же тогда̀ та́мѡ живѧ́ше, до́мъ но́вый благословѝ, малы́мъ А҆́вгꙋстовымъ ѡ҆свѧще́нїемъ Во́дꙋ ѡ҆свѧти́въ: Жена́ же Трет̾ѧко́ваѧ вꙁе́мши ѡ҆ста́вшꙋю свѧще́ннꙋю Во́дꙋ въ стеклѧ́нномъ ᲃъсꙋ́дѣ схранѝ. Минꙋ́вшꙋ же лѣ́тꙋ є҆ди́номꙋ, є҆гда̀ соглѧда́шѧ Во́дꙋ ѻ҆́нꙋ, ѡ҆брѣтѡ́ша ю҆̀ въ Вино̀ прело́жшꙋюсѧ, приклю́чшꙋжесѧ та́мѡ бы́ти ѿц҃ꙋ̀ А҆рхима́ндритꙋ тогда̀, ве́лїимъ ᲂу҆дивле́нїемъ Третѧ́къ съ ᲃвое́ю ᲃꙋпрꙋ́жницею принесо́ста къ не́мꙋ Вино̀ ѻ҆́ное ѿ Воды̀ бы́вшее, и҆ пока́ꙁꙋюще повѣда́шѧ є҆мꙋ̀, ꙗ҆́кѡ Вода̀ ѻ҆́наѧ и҆́же минꙋ́вшагѡ лѣ́та са́мъ ѡ҆свѧтѝ въ Вино̀ претвори́сѧ. А҆рхима́ндритъ же ᲂу҆диви́сѧ не хотѧ́ше вѣ́ровати семꙋ̀ надо́лꙁѣ, до́ндеже клѧ́твою ѻ҆́ба и҆ꙁвѣсти́ша пре́дъ ни́мъ ᲃи́цевꙋю свою̀ по́вѣсть, подъ со́вѣстїю и҆ сі́е повѣда́юще, ꙗ҆́кѡ чре́ꙁъ мимоше́дшее лѣ́то въ домꙋ̀ свое́мъ Вина̀ не и҆мѣ́шѧ, и҆ въ ᲃосꙋ́дѣ ѻ҆́номъ нико́лиже Вино̀ бѣ. А҆рхима́ндритъ же, по вели́кихъ и҆́хъ съ ᲃлеꙁа́ми клѧ́твахъ, вѣ́рова семꙋ̀, вꙁѧ̀ ѿ ни́хъ Вино̀ ѻ҆́ное ѿ Воды̀ бы́вшее и҆ вкꙋсѝ са́мъ, и всѧ̀ Бра́тїа съ ни́мъ та́мѡ сꙋ́щїи и҆ Мірѧ́не, и҆ просла́виша Бг҃а чꙋдеса̀ творѧ́щагѡ. Бѣ́ же ви́дъ тогѡ̀ Вина̀ во́дный, вкꙋ́съ же до́брагѡ Вина̀, и во́нѧ та́кожде ви́ннаѧ, ᲃі́е Вино̀ повелѝ А҆рхима́ндритъ въ ᲃⷮ: Печер: Ѻ҆би́тели храни́ти, є҆́же на мнѡ́га лѣ́та пребы́сть непремѣ́нно, ни́же само̀ ни́же во́нѧ є҆гѡ̀ въ ѻ҆́цетъ прелага́ѧсѧ.

Въ лѣ́то же па́ки ҂ахм҃а, въ день Вели́кагѡ Пѧ́тка, Петрꙋ̀ Моги́лѣ А҆рхїепⷭ҇пꙋ Митрополи́тꙋ Кі́евскомꙋ посѣща́ющꙋ по ѡ҆бы́чаю свое́мꙋ Це́ркви, и҆ сꙋ́щꙋ є҆мꙋ̀ тогда̀ въ Це́ркви Десѧти́нной Пречи́стой на Ца́рскихъ Часѣ́хъ, принесѡ́ша Ла́гвицꙋ ᲃтеклѧ́нꙋю по́лнꙋю Вина̀ ѿ воды̀ Бо́гоѧвле́нскїѧ бы́вшагѡ, ѿ нѣ́коего Благоро́днагѡ Виро́вски проꙁыва́емагѡ ѡ҆бѣта́ющагѡ въ гра́де Госто́мли, и под́ со́вѣстїю и҆ клѧ́твою и҆ꙁвѣсти́шѧ, ꙗ҆́кѡ сі́ѧ Вода̀ є҆́стъ, и҆́же въ Навече́рїи ᲃт҃ы́хъ Бо́гоѧвле́нїй въ Це́ркви Госто́мской ѡ҆свѧщеннꙋю поче́рпше чре́ꙁъ всѐ ѻ҆́но вре́мѧ да́же до ᲃегѡ́ днѐ въ домꙋ̀ и҆́хъ хра́нена бѣ че́стнѡ, ны́нѣ же є҆гда̀ съглѧда́хѡмъ, въ Вино̀ претворе́ннꙋ ѡ҆брѣто́хѡмъ, и҆ сегѡ̀ ра́ди поне́же Бж҃іѧ чꙋдеса̀ проповѣда́ти, а҆ не сокрива́ти подоба́етъ къ твое́мꙋ Свѧти́телствꙋ ᲃі́е принесо́хомъ, ᲃла́вꙋ ѿда́вше Бв҃и тебѣ̀ ѿдае́мъ. Ст҃ль же поне́же клѧ́твою сі́е иꙁвѣсти́шѧ, вꙁѧ̀ ᲂу҆ ни́хъ Ла́гвицꙋ ѻ҆́нꙋ съ Вино́мъ ѿ Воды̀ бы́вшомъ, и҆ повелѝ ю҆̀ въ свое́мъ храни́лищи соблюстѝ, ꙗ҆́же на мнѡ́ꙁѣ пребы́сть бе́ꙁъ премѣне́нїѧ всѧ́кагѡ, и҆ вкꙋ́съ и҆ во́ню ви́ннꙋю и҆мꙋ́щаѧ. Си́цеваѧ ᲂу҆́бѡ чꙋдеса̀ ꙗ҆встве́ннаѧ Бо́гъ въ Це́ркви свое́й не и҆́ныѧ ра́ди вины̀ тво́ритъ, па́че же въ си́хъ послѣ́днихъ вре́менахъ, но да и҆ꙁвѣсти́тъ на́съ ꙗ҆́кѡ дѣйстви́телнꙋю ᲃи́лꙋ Пресвѧта́гѡ Дх҃а Це́рковъ ᲃт҃а́ѧ Правосла́внокаѳꙍли́ческаѧ въ себѣ̀ и҆́матъ, ѿню́дꙋ же и҆ ᲃщ҃е́нници и҆́стиннїи, и҆ Вѣ́ра и҆́стиннаѧ въ не́й бы́ти ꙗ҆влѧ́етсѧ, и҆ ꙗ҆́кѡ да ви́дѣвше мы Це́ркве ᲃт҃ы́ѧ Въсто́чныѧ ᲃынѡ́ве, ᲃи́цеваѧ преди́внаѧ Бжⷭ҇тве́ннаѧ чꙋдеса̀ въ Це́ркви на́шей быва́емаѧ, непрекло́нни къ и҆́номꙋ ꙗ҆́рмꙋ пребꙋ́демъ, въ сла́вꙋ Бг҃а въ Трⷪ҇ци ᲃлави́магѡ, въ и҆ꙁвѣ́стное же на́ше сп҃се́нїе. А҆ми́нь.

По внегда̀ съверши́ти І҆ере́ю за а҆мбо́ннꙋю моли́твꙋ, и҆схо́димъ всѝ къ Крⷭ҇ти́льници, предидꙋ́щема І҆ере́ю свѣщено́сцема двѣ́ма съ Лампа́дома, и҆ Дїа́конꙋ съ Кади́лницею, пѣвце́мъ же пою́щимъ настоѧ́щїй Тропа́ръ, гⷤ. Гла́съ и҃.

Гла́съ Гд҃ень на вода́хъ вопіе́тъ, гл҃ѧ̀, прїйдѣ́те, прїймѣ́те всѝ Дх҃ъ премꙋ́дрости, Дх҃ъ ра́ꙁꙋма, Дх҃ъ стра́ха Бж҃іѧ, ꙗ҆́вл̾шагосѧ Хрⷭ҇та̀.

Посе́мъ пою́тъ Тропарѝ сі́ѧ. Гла́съ то́йжде, по два́жды.

Дне́съ во́дное ѡ҆свѧща́етсѧ є҆стество̀, и раꙁдѣлѧ́етсѧ І҆ꙍрда́нъ, и свои́хъ вѡ́дъ воꙁвраща́етъ стрꙋ́ѧ, Влады́кꙋ ꙁрѧ̀ креща́ема.

Ꙗ҆́кѡ челове́къ на Рѣкꙋ̀ прише́лъ є҆сѝ Хє҃ Ца́рю, и҆ ра́бское креще́нїе прїѧ́ти тщи́шисѧ бла́же, ѿ Предте́чевыхъ рꙋ́къ, гре́хъ ра́ди на́шихъ, челове́кѡлю́бче.

Сла́ва: И҆ ны́не: Гла́съ и҃.

Къ гла́сꙋ вопїю́щꙋ въ пꙋсты́ни, ᲂу҆готова́йте пꙋ́ть Гд҃ень, прише́лъ є҆сѝ Гд҃и, зра́къ раба̀ прїи́мъ, креще́нїѧ просѧ̀, не вѣ́дый грѣха̀: видѣ́ша тѧ вѡ́ды, и҆ ᲂу҆боѧ́шасѧ: тре́петенъ бы́сть Предте́ча, и҆ въꙁопѝ гл҃ѧ̀: ка́кѡ просвѣ́ти́тъ свѣти́льникъ ᲃвѣ́та; ка́кѡ рꙋкополо́житъ ра́бъ Влады́кꙋ; ѡ҆свѧтѝ менѐ и҆ вѡ́ды Сп҃се, вꙁе́млѧ́й ми́ра грѣ́хъ.

Дїа́конъ,

Премꙋ́дростъ.

Чте́цъ,

Проро́чества Иса́иина чте́нїе.

Дїа́конъ,

Во́нмѣмъ.

Чте́цъ же чтетъ сі́е, ѿ Главы̀ л҃е.

Та́кѡ гл҃е́тъ Гд҃ь, Воꙁвесели́сѧ пꙋсты́ни ражда́ющаѧ, да воꙁра́дꙋетсѧ пꙋсты́ни, и҆ да процвете́тъ ꙗ҆́кѡ Кри́нъ, и҆ да ѿцвите́тъ и҆ проꙁѧ́бнетъ. И҆ да воꙁра́дꙋютсѧ пꙋсты́нѧ І҆ꙍрда́нова, и҆ ᲃла́ва Лива́нова да́на бы́сть є҆́й, и҆ че́сть Карми́лова: и҆ лю́дїе моѝ ᲂу҆́ꙁрѧтъ ᲃла́вꙋ Гд҃ню, и҆ высотꙋ̀ Бж҃ію. Ꙋ҆крѣпи́тесѧ рꙋ́ки ѡ҆сла́бленныѧ, и҆ колѣ́на раꙁсла́бленаѧ ᲂу҆теша́йтесѧ: малодꙋ́шнїи мы́слїю, ᲂу҆крепи́тесѧ, и҆ не бо́йтесѧ: Се Бо́гъ нш҃ъ ᲃꙋ́дъ воꙁда́стъ, то́й прі́йдетъ и҆ спасе́тъ на́съ. Тогда̀ ѿве́рꙁꙋтсѧ ѻ҆́чи ᲃлѣпы́хъ и҆ ᲂу҆́ши глꙋхи́хъ ᲂу҆слы́шатъ. Тогда̀ ско́читъ хромы́й ꙗ҆́ко є҆́лень, и҆ ꙗ҆́сенъ бꙋ́детъ ѧ҆ꙁы́къ гꙋгни́выхъ. ꙗ҆́кѡ проторже́сѧ въ пꙋсты́ни вода̀, и҆ де́бръ въ землѝ жа́ждꙋщей. И҆ бꙋ́детъ беꙁво́дное въ бла́та, и҆ въ жа́ждꙋщей землѝ и҆сто́чникъ воды́ бꙋ́детъ. Та́мѡ бꙋ́детъ весе́лїе пти́цамъ, и҆ водворе́нїе Сѵ́ринамъ, и҆ тро́стїе и҆ бла́та, и҆ та́мѡ бꙋ́детъ пꙋ́ть чи́стъ, и҆ пꙋ́ть ᲃвѧ́тъ нарече́тсѧ: и҆ немимоиде́тъ та́мѡ нечи́стый, ни́же раꙁсѣѧ́нїи по́йдꙋтъ по немꙋ̀, и҆ не заблꙋ́дѧтъ. И҆ не бꙋ́детъ та́мѡ л̾ва̀, ни́же ѿ звѣ́рей лꙋка́выхъ вꙁы́детъ на́нь, ни́же ѡ҆брѧ́щетсѧ та́мѡ: но по́йдꙋтъ по немꙋ̀ и҆ꙁбавле́ннїи, и҆ и҆ꙁбра́ннїи ѿ Гд҃а, и҆ ѡ҆братѧ́тсѧ и҆ прі́йдꙋтъ въ Сіꙍ́нъ съ весе́лїемъ и҆ ра́достїю, и҆ весе́лїе вѣ́чное надъ гла́вою и҆хъ. Хва́ла и҆ радова́нїе и҆ весе́лїе пости́гнетъ и҆хъ, ѿи́детъ бо́лѣꙁнъ, печа́ль и҆ воꙁдыха́нїе.

Проро́чества И҆са́иина чте́нїе. Глава̀ н҃е.

Та́кѡ гл҃е́тъ Гд҃ь, Жа́ждꙋщїи и҆дѣ́те на во́дꙋ, и҆ є҆ли́цы не и҆ма́те ᲃре́бра, ше́дше кꙋпи́те, и҆ ꙗ҆ди́те и҆ пі́йте, беꙁъ ᲃре́бра и҆ цѣны̀, вино̀ и҆ тꙋ́къ. Въскꙋ́ю цѣнитѐ ᲃре́бро не въ хлѣбы, и҆ трꙋ́дъ ва́шъ не въ ᲃы́тость. Ꙋ҆слы́шите менѐ, и҆ снѣ́сте блага́ѧ, и҆ наслади́тсѧ въ благи́хъ дꙋша̀ ва́ша. Внꙋши́те ᲂу҆ши́ма ва́шима, и҆ въ слѣ́дъ и҆дѣ́те пꙋті́й мои́хъ. Ꙋ҆слы́шите менѐ, и҆ жи́ва бꙋ́детъ въ благи́хъ дꙋша̀ ва́ша. И҆ завѣща́ю ва́мъ завѣ́тъ вѣ́чный, прпⷣбнаѧ Дави́дова вѣ́рнаѧ. Се свѣди́тел̾ство въ ѧ҆ꙁы́цѣхъ да́хъ є҆гѡ̀, Кнѧ́ѕѧ и҆ повели́телѧ въ ѧ҆ꙁы́цѣхъ. Се ѧ҆ꙁы́ци, невѣ́дꙋющїи тебѐ, приꙁовꙋ́тъ тѧ. И҆ лю́дїе, не ꙁна́ющїи тебѐ, къ тебѣ̀ прибѣ́гнꙋтъ: Гд҃а ра́ди Бг҃а твое́гѡ и҆ ᲃт҃а́гѡ, І҆и҃лева ꙗ҆́ко прослави́лъ тѧ є҆стъ. Вꙁыщи́те Бг҃а, и҆ внегда̀ ѡ҆брѣстѝ ва́мъ тогѡ̀ приꙁовѣ́те. Внегда̀ а҆́ще приближи́тсѧ ва́мъ, да ѡ҆ста́витъ нечести́вый пꙋ́ти своѧ̀, и҆ мꙋ́жъ беꙁꙁако́нный съвѣ́ты своѧ̀. И҆ ѡ҆брати́тесѧ къ Гд҃ꙋ Бг҃ꙋ ва́шемꙋ, и҆ помилова́ни бꙋ́дете. И҆ воꙁꙁове́те, ꙗ҆́ко по мнѡ́гꙋ ѡ҆ста́витъ грѣхѝ ва́шѧ. Небо̀ сꙋ́ть совѣ́ти моѝ, ꙗ҆́коже съвѣ́ты ва́шѧ. ни́же ꙗ҆́коже пꙋ́тїе ва́ши, пꙋ́тїе моѝ, глаго́летъ Гд҃ь. Но ꙗ҆́коже ѿстои́тъ Нб҃о ѿ землѝ, та́кѡ ѿстои́тъ пꙋ́ть мо́й ѿ пꙋ́тїй ва́шихъ, и҆ ᲂу҆мышле́нїѧ ва́ша ѿ ᲂу҆мышле́нїй мои́хъ. Ꙗ҆́коже бо а҆́ще сни́детъ до́ждъ и҆лѝ снѣ́гъ съ небесѐ, и҆ неѡбрати́тсѧ ѿтꙋ́дꙋ, до́ндеже ᲂу҆пои́тъ зе́млю, и҆ и҆ꙁрасти́тъ и҆ проꙁѧ́бнетъ, и҆ да́стъ сѣ́мѧ сѣ́ющомꙋ, и҆ хлѣ́бъ въ снѣ́дь. Си́це бꙋ́детъ гл҃ъ мо́й, и҆́же а҆́ще и҆ꙁы́йдетъ ѿ ᲂу҆́стъ мои́хъ, и҆ не воꙁврати́тсѧ къ мнѣ̀ то́щъ, до́ндеже а҆́ще ᲃконча́етъ всѧ̀, є҆ли́ка восхотѣ́хъ, и҆ свершꙋ̀ пꙋ́ти моѧ̀, и҆ ѡ҆бѣ́ты моѧ̀. Въ весе́лїи бо воꙁвесели́тесѧ, и҆ въ ра́дости наꙋчи́тесѧ. И҆бѡ̀ гѡ́ры и҆ хо́л̾ми и҆ꙁмѣнѧ́тсѧ ча́юще ва́съ въ ра́дости. и҆ всѧ̀ дре́ва се́льнаѧ въспле́щꙋтъ вѣ́твьми. И҆ в̾мѣ́сто прꙋ́га вꙁы́детъ Кѵпари́съ, в̾мѣ́сто же пра́ха вꙁы́детъ Мѵрсі́на, и҆ бꙋ́детъ въ Гд҃не и҆мѧ, и҆ въ зна́менїе вѣ́чное, и҆ не ѡ҆скꙋдѣ́етъ речѐ Гд҃ь.

Проро́чества Иса́иина чте́нїе. Глава̀ в҃і.

Та́кѡ гл҃е́тъ Гд҃ь, Почерпѣ́те во́дꙋ съ весе́лїемъ, ѿ и҆сто́чникъ спⷭ҇нїѧ. и҆ рече́ши въ де́нь ѻ҆́нъ, по́йте Гд҃а, вꙁыва́йте и҆мѧ є҆гѡ̀. Въꙁвѣсти́те въ ꙗ҆ꙁы́цехъ ᲃла́вꙋ є҆гѡ̀. Помѧни́те, ꙗ҆́кѡ въꙁнесе́сѧ и҆мѧ є҆гѡ̀. Воспо́йте и҆мѧ Гд҃не, ꙗ҆́кѡ высо́каѧ сътворѝ, въꙁвѣсти́те по все́й землѝ. Ра́дꙋйтесѧ и҆ весели́тесѧ живꙋ́щїи въ Сіꙍ́нѣ, ꙗ҆́кѡ воꙁнесе́сѧ ᲃт҃ы́й І҆и҃левъ посре́дѣ є҆гѡ̀.

Дїа́конъ гл҃е́тъ,

Во́нмѣмъ.

І҆ере́ѵ̆,

Ми́ръ всѣ́мъ.

Чте́цъ,

И҆ дꙋ́хови твое́мꙋ.

Проки́менъ. Гла́съ г҃.

Гд҃ь просвѣще́нїе моѐ, и҆ ᲃпаси́тель мо́й, кого́сѧ ᲂу҆бою̀:

Сти́хъ,

Гд҃ь защити́тель животꙋ̀ мое́мꙋ, кого́сѧ ᲂу҆страшꙋ̀:

Дїа́конъ гл҃е́тъ,

Премꙋ́дрость.

Чте́цъ,

Къ Къри́нѳѡмъ посла́нїѧ ᲃⷮ: Апⷭ҇ла Па́вла чте́нїе.

Дїа́конъ,

Во́нмѣмъ.

Чте́цъ же чтетъ ѿ Главы̀ і҃. Зач. рм҃г.

Бра́тїе, Не хощꙋ̀ ва́съ неви́дѣти, ꙗ҆́кѡ ѿц҃ѝ на́ши всѝ подъ ѻ҆́блакомъ бѣ́ша, и҆ всѝ скво́ꙁѣ мо́ре пройдѡ́ша. И҆ всѝ въ Мꙍѵ̆се́а крести́шасѧ, въ ѻ҆́блацѣ и҆ въ мо́ри и҆ всѝ то́ежде бра́шно дꙋхо́вное ꙗ҆дѡ́ша. И҆ всѝ то́ежде пи́тїе дꙋхо́вное пи́ша. Пїѧ́хꙋ бо ѿ дꙋхо́внаго послѣдꙋ́ющагѡ ка́мене, ка́мень же бѣ̀ Хᲃ҃.

І҆ере́ѵ̆,

Ми́ръ ти.

Чте́цъ,

И҆ съ дꙋхо́мъ твои́мъ.

Дїа́конъ,

Премꙋ́дрость во́нмѣмъ.

Чте́цъ,

Ѱало́мъ Дави́довъ.

А҆ллилꙋ́іѧ. Гла́съ д҃.

Сти́хъ,

Гла́съ Гд҃нь на вѡ́дахъ, Бо́гъ ᲃла́вы воꙁгримѣ̀.

Сти́хъ,

Что́ ти бы́стъ мо́ре ꙗ҆́кѡ побѣ́гло є҆сѝ, и҆ тебѣ̀ І҆ꙍрда́не, ꙗ҆́кѡ воꙁврати́лсѧ є҆сѝ въспѧ́тъ.

Ли́кꙋ же ѿпѣ́вшꙋ А҆ллилꙋ́іѧ.

Дїа́конъ гл҃е́тъ,

Премꙋ́дрость про́сти ᲂу҆слы́шимъ ᲃт҃о́е.

І҆ере́ѵ̆,

ѿ Ма́рка ᲃⷮ: Е҆ѵⷢ҇лїѧ чте́нїе.

Ли́къ,

Сла́ва тебѣ̀ Гд҃и.

Дїа́конъ,

Во́нмѣмъ.

І҆ере́ѵ̆ же чтетъ, ѿ Главы̀, а҃. Зач. в҃.

Въ вре́мѧ ѻ҆́но. Прі́йде І҆и҃ᲃ ѿ Наꙁаре́та Галиле́йскагѡ, и҆ Крести́сѧ ѿ І҆ѡа́нна въ І҆ѡрда́ни. И҆ а҆́бїе восходѧ̀ ѿ Воды̀, ви́дѣ раꙁводѧ́щасѧ нб҃са̀, и҆ Дх҃а ꙗ҆́кѡ го́лꙋба съходѧ́ща на́нь. И҆ гла́съ бы́сть съ небесѐ, ты́ є҆сѝ Сы́нъ мо́й воꙁлю́бленный, въ не́м̾же благоволи́хъ.

Ли́къ,

Сла́ва тебѣ̀ Гд҃и.

Дїа́конъ же а҆́бїе глаго́летъ Є҆кте́нїѧ сі́ѧ.

Ми́ромъ Гд҃ꙋ помоли́мсѧ.

Ли́къ,

Гд҃и поми́лꙋй.

Ꙍ҆ свы́шнемъ ми́рѣ и҆ ᲃп҃се́нїи дꙋ́шъ на́шихъ, Гд҃ꙋ помоли́мсѧ.

Ꙍ҆ ми́ре всегѡ̀ ми́ра, благостоѧ́нїи ᲃт҃ы́хъ Бж҃іихъ це́рквїй, и҆ съвокꙋпле́нїи всѣ́хъ, Гд҃ꙋ помоли́мсѧ.

Ꙍ҆ стѣ́мъ хра́мѣ се́мъ, вѣ́рою и҆ благоговѣ́нїемъ и҆ стра́хомъ Бж҃іимъ въходѧ́щихъ во́нь, Гд҃ꙋ помоли́мсѧ.

Ꙍ҆ Преѡсвѧще́нномъ А҆рхїепⷭ҇пѣ на́шемъ И҆мⷬ҇къ: честнѣ́мъ Преꙁви́терствѣ, ѡ҆ Христѣ̀ Дїа́конствѣ, все́мъ при́чтѣ и҆ люде́хъ, Гд҃ꙋ помоли́мсѧ.

Ꙍ҆ держа́вномъ Гпⷭ҇дрѣ̀ на́шемъ вели́комъ Королѣ̀ Имⷬ҇къ: благочести́выхъ Гпⷭ҇дре́хъ, Кнѧ́ѕехъ и҆ Па́нѣхъ на́шихъ, ѡ҆ все́й Пола́тѣ и во́ехъ и҆́хъ, Гд҃ꙋ помоли́мсѧ.

Ꙍ҆ пособи́ти и҆ покори́ти подъ но́ꙁѣ и҆́хъ всѧ́кагѡ вра́га и҆ сꙋпоста́та, Гд҃ꙋ помоли́мсѧ.

Ꙍ҆ свѧтѣ́й Ꙍ҆би́тели се́й, и҆ всѧ́кой ѡ҆би́тели и҆ гра́дѣ и҆ стра́нѣ, и҆ вѣ́рою живꙋ́щихъ въ ни́хъ, Гд҃ꙋ помоли́мсѧ.

Ꙍ҆ благорастворе́нїи во́ꙁдꙋховъ, ᲂу҆мнѡже́нїи пло́дѡвъ земныхъ, и҆ вре́менехъ ми́рныхъ, Гд҃ꙋ помоли́мсѧ.

Ꙍ҆ плава́ющихъ, пꙋтешествꙋ́ющихъ, недꙋгꙋ́ющихъ, трꙋжда́ющихсѧ, плѣне́нныхъ и҆ ᲃп҃се́нїи и҆́хъ, Гд҃ꙋ помоли́мсѧ.

Ꙍ҆ є҆́же ѡ҆свѧти́тисѧ Водѣ̀ се́й, ᲃи́лою, и҆ дѣ́йствомъ и҆ прише́ствїемъ ᲃт҃а́гѡ Дх҃а, Гд҃ꙋ помоли́мсѧ.

Ꙍ҆ е́же прїйтѝ на Во́дꙋ ᲃі́ю чисти́тельномꙋ Пресꙋ́ществе́нныѧ Трⷪ҇ца дѣ́йствꙋ, Гд҃ꙋ помоли́мсѧ.

Ꙍ҆ є҆́же дарова́тисѧ є҆́й благода́ть и҆ꙁбавле́нїѧ, благослове́нїѧ І҆ꙍрда́нова, ᲃи́лою и҆ дѣ́йствомъ и҆ Прише́ствїемъ ᲃт҃а́гѡ Дх҃а, Гд҃ꙋ помоли́мсѧ.

Ꙍ҆ є҆́же бы́ти Водѣ̀ се́й ѡ҆сще́нїѧ да́ромъ, грѣхѡ́мъ ѡ҆чище́нїе, въ и҆сцѣле́нїе же дꙋша́мъ и҆ тѣ́лѡмъ, и҆ въ всѧ́кꙋю по́лꙁꙋ подо́бнꙋю, Гд҃ꙋ помоли́мсѧ.

Ꙍ҆ є҆́же ꙗ҆ви́тисѧ є҆́й ᲃщ҃е́нїе и҆ ᲃп҃се́нїе дꙋша́мъ на́шимъ, Гд҃ꙋ помоли́мсѧ.

Ꙍ҆ є҆́же бы́ти є҆́й на ѿгна́нїе и҆ ѡ҆чище́нїе всѧ́кагѡ дѣ́йства и҆ навѣ́та види́мыхъ и҆ неви́димыхъ вра́гѡвъ, Гд҃ꙋ помоли́мсѧ.

Ꙍ҆ є҆́же ꙗ҆ви́тисѧ є҆́й вра́чество, и҆ ѡ҆чище́нїе всѧ́кагѡ не́дꙋга дꙋшъ и҆ тѣлесъ на́шихъ, Гд҃ꙋ помоли́мсѧ.

Ꙍ҆ є҆́же погрꙋꙁи́тисѧ ᲃи́лѣ дꙋшетлѣ́ннагѡ сꙋпоста́та въ Водѣ̀ се́й, Гд҃ꙋ помоли́мсѧ.

Ꙍ҆ є҆́же бы́ти є҆́й всѣ́мъ кропѧ́щимсѧ є҆ю̀ вѣ́рою, и҆лѝ вкꙋша́ющимъ ѿ неѧ̀, ѡ҆чище́нїе скве́рны пло́ти и҆ Дх҃а, Гд҃ꙋ помоли́мсѧ.

Ꙍ҆ є҆́же бы́ти є҆́й исто́чникъ нетлѣ́нїѧ, и҆ ѡ҆свѧще́нїе до́мовѡмъ же и҆ всѧ́кой благопотре́бной ве́щи, и҆ всѧ́комꙋ мѣ́стꙋ, Гд҃ꙋ помоли́мсѧ.

Ꙍ҆ є҆́же благослови́тисѧ є҆́й ꙗ҆́коже І҆ꙍрда́нскимъ стрꙋ́ѧмъ, Гд҃ꙋ помоли́мсѧ.

Ꙍ҆ че́рпающихъ и҆ пі́ющихъ ѿ неѧ̀ на ѡ҆свѧще́нїе дꙋша́мъ и҆ тѣ́лѡмъ, Гд҃ꙋ помоли́мсѧ.

Ꙍ҆ є҆́же ᲃподо́битисѧ на́мъ исполни́тисѧ ѡ҆свѧще́нїѧ, воды̀ сеѧ̀ причаще́нїемъ, невиди́мымъ ꙗ҆вле́нїемъ ᲃт҃а́гѡ Дх҃а, Гд҃ꙋ помоли́мсѧ.

Ꙍ҆ є҆́же просвѣти́тисѧ на́мъ просвѣще́нїемъ ра́ꙁꙋма и҆ благоче́стїѧ, прише́ствемъ ᲃт҃а́гѡ Дх҃а, Гд҃ꙋ помоли́мсѧ.

Ꙍ҆ є҆́же ᲂу҆слыша́ти Гд҃ꙋ Бг҃ꙋ гла́съ моле́нїѧ на́шегѡ, и҆ помилова́ти на́съ, Гд҃ꙋ помоли́мсѧ.

Застꙋпѝ, ᲃп҃асѝ, поми́лꙋй, и҆ сохранѝ на́съ Бо́же твое́ю благода́тїю.

Пресвѧтꙋ́ю, че́стꙋю, и҆ Преблагослове́ннꙋю, ᲃла́внꙋю Влады́чицꙋ на́шꙋ Бц҃ꙋ и҆ прⷭ҇нѡ Дв҃ꙋ Мр҃ію, съ всѣмѝ ᲃт҃ы́ми помѧнꙋ́вше, самѝ себє̀, и҆ дрꙋ́гъ дрꙋ́га, и҆ ве́съ живо́тъ нш҃ъ Христꙋ̀ Бг҃ꙋ предади́мъ.

Си́мъ же гл҃емымъ, ѿ Дїа́кона, І҆ере́ѵ̆ мо́литсѧ, гл҃ѧ̀ та́йнѡ Моли́твꙋ ᲃі́ю въ себѣ̀. А҆́ще же нѣ́сть Дїа́кона, по сконча́нїи Дїа́конства гл҃е́тъ ю҆̀.

Гд҃и І҆и҃ᲃ Хє҃ Бо́же, є҆диноро́дный Сы́не, сы́й въ нѧ́дрѣхъ ѿчїихъ, и҆́стинный Бо́же, и҆сто́чниче жи́ꙁни и҆ беꙁ̾смертїѧ, ᲃвѣ́те ѿ свѣ́та, прише́дый въ мі́ръ, е́же просвѣти́ти є҆го̀, ѡ҆свѧтѝ на́ша помышле́нїѧ свѧты́мъ твои́мъ Дх҃омъ, и҆ прїимѝ на́съ, вели́чїе тебѣ̀ и҆ благодаре́нїе приносѧ́щихъ, ѡ҆ ꙗ҆́же ѿ вѣ́ка ди́вныхъ великодѣѧ́нїй твои́хъ, и҆ є҆́же на послѣ́докъ ве́ки спаси́тельномъ смотре́нїи твое́мъ, въ не́мже на́ше не́мощное и҆ нище́тное ѡ҆бле́ксѧ смѣше́нїе, и҆ рабо́тнымъ мѣ́рамъ съниꙁше́лъ, є҆сѝ всѣ́хъ Ца́рю, є҆ще́ же и҆ ра́бскою рꙋко́ю въ І҆орда́ни крести́тисѧ потерпѣ́лъ є҆сѝ, ꙗ҆́кѡ да во́дное є҆стество̀ ѡ҆свѧти́въ беꙁ̾грѣ́шне, пꙋ́ть сътвори́ши на́мъ къ є҆́же Водо́ю и҆ Дх҃омъ порожде́нїю, и҆ къ пе́рвой присвои́ши на́съ свободѣ̀. Тогѡ̀ ᲂу҆́бѡ Божестве́ннагѡ та́инства воспомина́нїе праꙁднꙋ́юще, моли́мтисѧ Влады́ко челове́кѡлю́бче, воскропѝ и҆ на́ны недосто́йныѧ рабы̀ твоѧ̀ по Божестве́нномꙋ ти ѡ҆бѣща́нїю, Во́дꙋ чи́стителнꙋю, твое́гѡ благосе́рдїѧ да́ръ, въ є҆́же надъ водо́ю сею̀ проше́нїе на́съ грѣ́шныхъ благопрїѧ́тнѡ бꙋ́детъ твое́ю благосты́ни. и҆ благослове́нїе твоѐ, на́мъ же и҆ всѣ́мъ вѣ́рнымъ твои́мъ дарꙋ́еши лю́демъ, въ сла́вꙋ ᲃт҃а́гѡ и҆ покланѧ́емаго твое́гѡ и҆́мени. Ꙗ҆́кѡ подоба́етъ ти всѧ́каѧ ᲃла́ва, че́сть, и҆ поклоне́нїе, съ беꙁнача́льнымъ ти Ѿц҃емъ, и҆ съ Пртⷭ҇ы́мъ, и҆ благи́мъ, и҆ животворѧ́щимъ ти Дх҃омъ, ны́не, и҆ прⷭ҇нѡ, и҆ въ вѣ́ки вѣ́кѡвъ.

И҆ по Моли́твѣ не воꙁглаша́етъ, но въ себѣ̀ рече́тъ,

А҆ми́нь.

Дїа́конꙋ же сконча́вшꙋ Е҆кте́нїю, Начина́етъ І҆ере́ѵ̆ велегла́снѡ Моли́твꙋ ᲃі́ю, Творе́нїе ᲃт҃а́гѡ Сѡфро́нїѧ Патрїа́рха І҆ерⷭ҇ли́мскагѡ.

Вѣ́дати подоба́етъ, ꙗ҆́кѡ настоѧ́щаѧ Моли́тва, си́рѣчь, Трⷪ҇це пресꙋществе́ннаѧ, чте́тсѧ ᲂу҆́бѡ въ нѣ́кїихъ, въ вели́цѣй же Це́ркви, и҆ въ ᲃто́й Горѣ̀ не гл҃етсѧ. Мы́ же въ Рѡ́ссїйской Це́ркви воспомина́нїѧ ра́ди въ не́й вели́кихъ Та́инъ и҆ благодѣ́ѧ́нїй Влады́чныхъ не престꙋпа́емъ ю҆̀, но по сконча́нїи вышеписа́ныѧ Моли́твы, гл҃емъ велегла́снѡ съ всѧ́кимъ внима́нїемъ.

Трⷪ҇це пресꙋществе́ннаѧ, преблага́ѧ, Пребжⷭ҇тве́ннаѧ, всеси́лнаѧ, всеприсѣща́ющаѧ, невиди́маѧ, непостижи́маѧ, съдѣ́телнаѧ ᲂу҆́мныхъ сꙋще́ствъ, и҆ слове́сныхъ є҆́стествъ, преестестве́ннаѧ бла́гости, ᲃвѣ́те непристꙋ́пный, просвѣща́ѧй всѧ́кагѡ челове́ка грѧдꙋ́щагѡ въ мі́ръ. Воꙁсїѧ́й и҆ мнѣ̀ недосто́йномꙋ рабꙋ̀ твое́мꙋ, просвѣти́ ми мы́сленнаѧ ѡ҆чеса̀, да дерꙁнꙋ въспѣ́ти беꙁ̾мѣ́рное благодѣѧ́нїе, и҆ ᲃи́лꙋ, благопрїѧтное да бꙋ́детъ є҆́же ѿ менѐ моле́нїе за предстоѧ́щїѧ лю́ди, да прегрѣше́нїѧ моѧ̀ не воꙁбранѧ́тъ здѐ прїйтѝ ᲃт҃о́мꙋ твое́мꙋ Дх҃ꙋ, но ѡ҆ста́ви ми неѡсꙋжде́ннѡ, вопи́ти тебѣ̀, и҆ гл҃а́ти и҆ ны́нѣ преблагі́й.

Сла́вимъ тѧ Влады́ко человѣ́кѡлюбче Вседержи́телю, превѣ́чный Ца́рю. Сла́вимъ тѧ ᲃъꙁда́телѧ и҆ зижди́телѧ всѣ́хъ. Сла́вимъ тѧ беꙁъ ѿц҃а̀ и҆ꙁъ мт҃ре, и҆ беꙁъ мт҃ре и҆ꙁъ Ѿц҃а̀ сꙋ́щагѡ, въ предва́ршемъ бо Пра́ꙁдницѣ, Младе́нца тѧ ви́дѣхѡмъ: въ настоѧ́щемъ же ᲃъверше́нна тебѐ ви́димъ, ѿ съверше́ннагѡ съверше́нна ꙗ҆́вл̾шагосѧ Бг҃а на́шегѡ.

Дне́сь бо пра́ꙁдничное на́мъ наста̀ вре́мѧ, и҆ Ли́къ ᲃт҃ы́хъ собира́етсѧ съ на́ми, и҆ А҆гг҃ли съ челове́ки съпраꙁднꙋ́ют:

Дне́сь бо благода́ть Пресвѧта́гѡ Дх҃а въ видѣ́нїи Голꙋби́нѣ на Вѡ́ды прі́йде:

Дне́сь неꙁаходи́мое Со́лнце воꙁсїѧ̀, и҆ мі́ръ свѣ́томъ Гд҃нимъ ѡ҆ꙁарѧ́етсѧ:

Дне́сь Лꙋна̀ ᲃвѣ́тлыми лꙋ́чами мі́ръ съ ѡ҆свѣща́ет:

Дне́сь ᲃвѣтови́дныѧ звѣ́ꙁды свѣ́тлостїю ᲃиѧ́ниѧ вселе́ннꙋю ᲂу҆краша́ютъ:

Дне́сь ѻ҆́блацы д́ождъ пра́вды человѣ́чествꙋ съ небесѐ ѡ҆роша́ютъ:

Дне́сь не съꙁда́нный ѿ свое́гѡ соꙁда́нїѧ хотѣ́нїемъ рꙋкополага́етсѧ:

Дне́сь Пррⷪ҇къ и҆ Предте́ча, къ Влады́цѣ пристꙋпа́ет, но тре́петомъ предсто́итъ, видѧ̀ Бж҃іе къ на́мъ нисхожде́нїе.

Дне́сь І҆ѡрда́нскїѧ Вѡ́ды въ цѣ́льбꙋ претворѧ́ютсѧ Гд҃нимъ прише́ствиемъ:

Дне́сь стрꙋѧ́ми таи́нственными всѧ̀ тва́рь напаѧ́етсѧ.

Дне́сь человѣ́ческїѧ грѣхѝ Вода́ми І҆ѡрда́н̾скими ѡ҆мыва́ютсѧ:

Дне́сь Ра́й ѿверꙁа́етсѧ челове́кѡмъ и҆ пра́вды Со́лнце въꙁсїѧва́етъ на́мъ:

Дне́сь го́ркаѧ Вода̀, ꙗ҆́же при Моѵ̆сеи, люде́мъ въ сла́дость преложи́сѧ Гд҃нимъ прише́ствїемъ:

Дне́сь дре́внѧгѡ рида́нїѧ иꙁмѣни́хѡмсѧ и҆ ꙗ҆́кѡ но́вый І҆и҃ль, спасо́хѡмсѧ.

Дне́сь тмы̀ и҆ꙁбави́хомсѧ, и҆ свѣ́томъ богораꙁꙋ́мїѧ ѡ҆ꙁарѧ́емсѧ.

Дне́сь мра́къ мі́ра потреблѧ́етсѧ ꙗ҆вле́нїемъ Бг҃а на́шегѡ.

Дне́сь свѣ́томъ просвѣща́етсѧ всѧ̀ тва́рь съвы́шше:

Дне́сь го́рнѧѧ до́льнымъ съпраꙁднꙋ́ютъ и҆ до́льнѧѧ го́рнымъ събе́сѣдꙋютъ, дне́сь ᲃщ҃е́нное и҆ велегла́сное Правосла́вныхъ то́ржество ра́дꙋетсѧ:

Дне́сь пре́лесть раꙁдрꙋша́етсѧ и҆ пꙋ́ть на́мъ ᲃпⷭ҇нїѧ ᲂу҆страѧ́етъ Влады́чнее Прише́ствїе:

Дне́сь Влады́ка къ Креще́нїю спѣ́шитсѧ, да воꙁведе́тъ на высотꙋ̀ человѣ́чество:

Дне́сь непрекло́нный ᲃвое́мꙋ рабꙋ̀ прекланѧ́етсѧ, да на́съ ѿ работы̀ свободи́тъ:

Дне́сь Ца́рство небе́сное искꙋпи́хѡмъ, Ца́рствїю бо Гд҃ню нѣ́сть конца̀:

Дне́сь ꙁемлѧ̀ и҆ мо́ре мі́рскꙋю ра́достъ раꙁдѣли́ша, и҆ мі́ръ весе́лїѧ и҆сполни́сѧ.

Ви́деша тѧ Вѡ́ды, Бо́же, ви́дѣша тѧ Вѡ́ды и҆ ᲂу҆боѧ́шасѧ.

І҆ꙍрда́нь въꙁврати́сѧ воспѧ́тъ, ви́дѣвъ ѻ҆́гнь Божества̀ тѣле́снѣ ниꙁходѧ́щъ, и҆ въходѧ́щъ во́нь.

І҆ꙍрда́нь воꙁврати́сѧ воспѧ́тъ, видѧ̀ Дх҃а Свѧта́гѡ въ видѣ́нїи голꙋби́нѣ съходѧ́ща и҆ лѣта́юща на тебѣ̀.

І҆ꙍрда́нь воꙁврати́сѧ воспѧ́тъ, зрѧ неви́димагѡ ви́дѣна бы́вша, съꙁда́телѧ воплоще́нна, Влады́кꙋ въ ра́бїи зра́цѣ.

І҆ꙍрда́нь воꙁврати́сѧ воспѧ́тъ, и҆ гѡ́ры въꙁыгра́шасѧ, Бг҃а въ пло́ти видѧ́ще, и҆ ѻ҆́блацы гла́съ да́ша, чꙋдѧ́щесѧ приходѧ́щомꙋ ᲃвѣ́тꙋ ѿ ᲃвѣ́та, Бг҃ꙋ и҆́стинномꙋ ѿ Бг҃а и҆́стиннагѡ, Влады́чнїй Пра́ꙁдникъ дне́сь въ І҆ꙍрдани видѧ́ше, самꙋ́юже престꙋпле́нїѧ сме́рть, и҆ пре́лести жа́ло, и҆ а҆́довъ съю́ꙁъ въ І҆ꙍрда́ни погрꙋꙁи́вшагѡ, и҆ креще́нїе спасе́нїѧ мі́рови дарова́вшагѡ.

Тѣ́мже и а҆́ꙁъ грѣ́шный и недосто́йный ра́бъ тво́й, вели́чества чꙋде́съ твои́хъ повѣствꙋ́ѧ, съдержи́мъ сы́й ᲃтра́хомъ, въ ᲂу҆миле́нїи вопїю́ ти,

И҆ а҆́бїе высоча́йшимъ гла́сомъ чтетъ.

Ве́лїй є҆сѝ, Гд҃и, и чꙋ́дна сꙋ́тъ дѣ́ла твоѧ̀, и҆ ни є҆ди́но же ᲃло́во дово́льно є҆́стъ къ похвале́нїю чꙋде́съ твои́хъ.

Сі́еже гл҃е́тъ гⷤ, и҆ покое́мждѡ и҆ꙁрече́нїи зажже́нною свѣ́щею знамена́етъ крестаѡ́браꙁнѡ Во́дꙋ І҆ере́ѵ̆, и҆ три́жды знамена́ѧ и҆ꙁре́къ, гл҃е́тъ про́чаѧ моли́твы.

Ты́ бо хоте́нїемъ ѿ небытїѧ въ бы́тїе приве́дъ всѧ́ческаѧ, твое́ю держа́вою съдержи́ши тва́ръ, и҆ твои́мъ про́мысломъ стро́иши мі́ръ. Ты̀ ѿ четыре́хъ ᲃти́хїй тва́ръ ᲃъста́вилъ є҆сѝ, четырьмѝ вре́мены крꙋ́гъ лѣ́та вѣнча́лъ є҆сѝ. Тебѐ трепе́щꙋтъ ᲂу҆мныѧ всѧ̀ ᲃи́лы. Тебѐ пое́тъ ᲃо́лнце. Тебѐ сла́витъ лꙋна̀. Тебѐ събе́сѣ́дꙋютъ ꙁвѣ́ꙁды. Тебѐ послꙋша́етъ ᲃвѣ́тъ. Тебѐ трепе́щꙋтъ бе́ꙁдны. Тебѐ работа́ютъ исто́чницы. Ты̀ пропѧ́лъ є҆сѝ нѣ́бо ꙗ҆́кѡ ко́жꙋ. Ты̀ ᲂу҆тверди́лъ є҆сѝ зе́млю на вода́хъ. Ты̀ ѡ҆гради́лъ є҆сѝ мо́ре пѣско́мъ. Ты̀ къ ѿдыха́нїю во́ꙁдꙋхъ пролїѧ́лъ є҆сѝ. А҆́гг҃лскїѧ ᲃи́лы тебѣ̀ слꙋ́жатъ. А҆рха́гг҃лстїи Ли́кѡве тебѣ̀ покланѧ́ютсѧ. Многоѡчи́тїи Херꙋви́ми, и҆ шестокрила́тїи, Серафи́ми, ѻ҆́крестъ стоѧ́ще и҆ ѡ҆блѣта́юще, ᲃтра́ха ра́ди неприкоснове́нныѧ ᲃла́вы твое́ѧ закрива́ютсѧ. Ты́ бо Бо́гъ сы́й неѡписа́нный, беꙁнача́льный же, и҆ неиꙁ̾глагола́нный, прише́лъ є҆сѝ на зе́млю, зра́къ рабі́й прїи́мъ, въ подо́бїи челове́честѣмъ бы́въ, небо̀ терпѣ́лъ є҆сѝ Влады́ко, милосе́рдїѧ ра́ди ми́лости твоеѧ̀, зрѣ́ти ѿ дїа́вола мꙋчи́ма рѡ́да человѣ́ча, но прише́лъ є҆сѝ, и҆ спа́слъ є҆сѝ на́съ. Исповѣдꙋ́емъ благода́ть, проповѣдꙋ́емъ ми́лость, не таи́мъ благодѣѧ́нїѧ. Є҆стества̀ на́шегѡ рѡ́ды свободи́лъ є҆сѝ, Двчⷭ҇каѧ ложесна̀ Ржⷭ҇тво́мъ твои́мъ ѡ҆свѧти́лъ є҆сѝ. Всѧ̀ тва́рь въспѣва́етъ тѧ ꙗ҆́вл̾шагосѧ. Ты́ бо Бо́гъ нш҃ъ, на землѝ ꙗ҆ви́лсѧ є҆сѝ, и҆ съ челове́ки пожи́лъ є҆сѝ. Ты̀ І҆ꙍрда́нскїѧ ᲃтрꙋ́ѧ ѡ҆свѧти́лъ є҆сѝ, съ небесѐ посла́въ ᲃт҃ы́й тво́й Дх҃ъ, и҆ гла́вы та́мѡ гнѣꙁдѧ́щихсѧ ᲃъкрꙋши́лъ є҆сѝ змїе́въ.

Ты ᲂу҆́бѡ челове́кѡлюбче ца́рю, прїйдѝ и҆ ны́нѣ прише́ствїемъ ᲃт҃а́гѡ твое́гѡ Дх҃а, и҆ ѡ҆свѧтѝ Во́дꙋ сі́ю.

Се́й же сті́хъ гл҃ѧ̀ гⷤ, на кое́мждѡ и҆ꙁрече́нїи дꙋ́нетъ на во́дꙋ крестаѡ́браꙁнѡ. та́же и҆ про́чаѧ Моли́твы гл҃е́тъ.

И҆ да́ждъ є҆́й благода́ть и҆ꙁбавле́нїѧ, благослове́нїе І҆ꙍрда́ново, ᲃътворѝ ю҆̀ нетлѣ́нїѧ и҆сто́чникъ, ѡ҆свѧще́нїѧ да́ръ, грѣхѡ́мъ раꙁдрѣше́нїе, бо́лѣꙁнемъ премѣне́нїе, бѣсѡ́мъ погꙋби́тел̾ство, сопроти́внымъ ᲃи́ламъ непристꙋ́пнꙋ, А҆́гг҃лскїѧ крѣ́пости и҆спо́лненꙋ, ꙗ҆́кѡ да всѝ че́рпающїи, и҆ прїемлющїи ѿ неѧ̀, и҆мѣютъ ю҆̀ на ѡ҆чище́нїе дꙋша́мъ и҆ тѣ́лѡмъ, къ и҆сцѣле́нїю стра́стемъ, на ѡ҆свѧще́нїе до́мовѡмъ, и҆ на всѧ́кꙋю по́лꙁꙋ благоподо́бнꙋю. Ты́ бо є҆сѝ Бо́гъ нш҃ъ, Водо́ю и҆ Дх҃омъ ѡ҆бнови́вый ѡ҆бетша́вшее є҆́стество ѿ грѣха̀. Ты̀ є҆сѝ Бо́гъ нш҃ъ, потопи́вый водо́ю при Но́и грѣхѝ. Ты̀ є҆сѝ Бо́гъ нш҃ъ, скво́ꙁѣ мо́ре свободи́вый ѿ рабо́ты Фараѡ́новы Моѵ̆се́ѡмъ ро́дъ Є҆вре́йскїй. Ты́ бо є҆сѝ Бо́гъ нш҃ъ, пораꙁи́вый ка́мень въ пꙋсты́ни, и҆ потекѡ́ша во́ды, и҆ потѡ́цы наводни́шасѧ, и҆ жа́ждꙋщїѧ лю́ди своѧ̀ напои́вый. Ты̀ є҆сѝ Бо́гъ нш҃ъ, водо́ю и҆ ѻ҆гне́мъ при И҆лїѝ и҆ꙁбави́вый І҆и҃лѧ ѿ пре́лести Ваа́ловы.

Са́мъ и҆ ны́нѣ Влады́ко, ѡ҆свѧтѝ во́дꙋ ᲃі́ю́ Дх҃омъ твои́мъ ᲃт҃ы́мъ.

И҆ благословлѧ́етъ крестаѡ́браꙁнѡ Во́дꙋ рꙋко́ю, погрꙋжа́ѧ пе́рсты де́сныѧ рꙋкѝ въ Водѣ̀, три́жды се́й сті́хъ гл҃ѧ̀,

Та́же гл҃е́тъ, Моли́твꙋ ᲃі́ю.

И҆ да́ждь всѣ́мъ прикаса́ющимсѧ є҆́й и҆ вкꙋша́ющимъ ѿ неѧ̀, и҆ ма́жꙋщымсѧ є҆ю̀, ѡ҆свѧще́нїе, здра́вїе, ѡ҆чище́нїе, благослове́нїе.

И҆ спасѝ Гд҃и рабы̀ Твоѧ̀ вѣ́рныа царѧ̀ на́ша.

Сі́е гл҃ѝ три́жды.

И҆ всѧ̀ правовѣ́рныѧ Господарѧ̀ Кнѧꙁѧ̀ и҆ Паны̀ на́шѧ, и҆ съхранѝ и҆́хъ подъ кро́вомъ твои́мъ въ мі́рѣ, покорѝ и҆́мъ всѧ́кагѡ вра́га и҆ сꙋпоста́та. Дарꙋ́й и҆́мъ всѧ̀ ꙗ҆́же къ спасе́нїю проше́нїѧ, и҆ жи́ꙁнь вѣ́чнꙋю, да и҆ стихі́ѧми и челове́ки, и҆ А҆́гг҃лы, и҆ ви́димыми и҆ неви́димыми, сла́витсѧ твоѐ Пресвѧто́е и҆мѧ, съ Ѿц҃емъ и҆ Свѧты́мъ Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Дїа́конъ,

Гла́вы ва́ша Гв҃и преклони́те.

І҆ере́ѵ̆ же прекло́нь главꙋ, гл҃е́тъ Моли́твꙋ ᲃі́ю та́йнѡ.

Приклонѝ Гд҃и ᲂу҆́хо твоѐ, и҆ ᲂу҆слы́ши на́съ, въ І҆ꙍрда́ни крести́тисѧ и҆ꙁволи́вый, и҆ ѡ҆свѧти́вый вѡ́ды. И҆ благословѝ всѣ́хъ на́съ, преклоне́нїемъ своеѧ̀ вы́ѧ знамена́ющихъ рабо́ты въѡбраже́нїе, и҆ сподо́бѝ на́съ исполни́тисѧ ѡ҆свѧще́нїа твое́гѡ, причаще́нїемъ Воды̀ сеѧ̀, и҆ да бꙋ́детъ на́мъ Гд҃и, въ ꙁдра́вїе дꙋшѝ и҆ тѣ́лꙋ.

Во́ꙁгласъ.

Ты́ бо є҆сѝ ѡ҆свѧще́нїе на́ше, и҆ тебѣ̀ ᲃла́вꙋ и҆ благодаре́нїе и҆ поклоне́нїе воꙁсыла́емъ, съ беꙁнача́лнымъ ти Ѿц҃емъ и҆ всесвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆ же а҆́бїе сконча́въ Моли́твꙋ, вꙁе́млетъ че́стный Кре́стъ ѡ҆бѣ́ма рꙋка́ма, и҆ погрꙋжа́етъ є҆гѡ̀ пра́во въ водѣ̀ три́жды крестаѡ́браꙁнѡ, ниꙁводѧ̀ є҆гѡ̀ въ во́дꙋ, и҆ воꙁводѧ̀, поѧ̀ гⷤ, Троп: се́й Гла́съ а҃.

Въ І҆ꙍрда́ни креща́ющꙋсѧ Гд҃и, Трⷪ҇ческое ꙗ҆ви́сѧ поклоне́нїе: роди́телевъ бо гла́съ свѣдительствова́ше, воꙁлю́бленнаго тѧ ᲃн҃а и҆менꙋ́ѧ: и҆ Дх҃ъ въ видѣ́нїи голꙋби́нѣ и҆ꙁвѣствова́ше ᲃловесѝ ᲂу҆твержде́нїе: ꙗ҆вле́йсѧ Хє҃ Бо́же, и҆ мі́ръ просвѣти́вый ᲃла́ва тебѣ̀.

И҆ лобза́въ І҆ере́ѵ̆ ᲃі́мъ че́стный Кре́стъ, кро́питъ ᲃ҃: ѻ҆́лтаръ и҆ всю̀ Це́рковъ, и посе́мъ дае́тъ и҆ всѣ́мъ люде́мъ лобꙁа́ти Кре́стъ, и҆ кро́питъ и҆́хъ ᲃщ҃енною Водо́ю, Ли́къ же многа́жды пѣ́въ предрече́нный Тропа́рь. На концѣ̀ пое́тъ

Сла́ва: И҆ ны́нѣ: Гла́съ ѕ҃.

Воспои́мъ вѣ́рнїи, є҆́же ѡ҆ на́съ Бо́жіихъ благодѣѧ́нїй вели́чество: ѡ҆ на́шихъ бо прегреше́нїихъ бы́въ челове́къ, на́шимъ ѡ҆чище́нїемъ ѡ҆чища́етсѧ въ І҆ꙍрда́ни, є҆ди́нъ чⷭ҇тый и҆ беꙁсме́ртный, ѡ҆свѧща́ѧ менѐ и҆ вѡ́ды, и҆ гла́вы змїе́мъ гнѣꙁдѧ́щимсѧ сътира́ѧ въ водѣ̀. Почерпѣ́мъ ᲂу҆́бѡ во́дꙋ съ весе́лїемъ, бра́тїе: и҆бѡ̀ благода́ть Дх҃а вѣ́рою почерпа́ющимъ, невиди́мо подава́етсѧ ѿ Ха҃ Бг҃а, и҆ ᲃп҃са дꙋша́мъ на́шимъ.

По си́хъ же пою́тъ,

Бꙋ́ди и҆мѧ Гд҃не благослове́нно ѿ ны́нѣ и҆ до вѣ́ка:

И҆ чте́тсѧ ѱало́мъ к҃г. Благословлю̀ Гд҃а.

И҆ раꙁдава́етсѧ лю́демъ А҆нти́дꙍра, вкꙋша́ющимъ пе́рвѣе ѿ сщ҃енныѧ воды̀. И҆ быва́етъ ѡ҆бы́чный Ѿпꙋстъ.

По Ꙋ҆трни, І҆ере́ѵ̆ въ Е҆пітра́хиль и҆ Фелѡ́нъ ѡ҆дѣѧ́нъ, держа̀ въ десни́ци че́стный Кре́стъ, предидꙋ́щꙋ є҆мꙋ̀ Дїа́конꙋ съ кади́лницею, и҆ двѣма̀ ᲃвѣщено́сцема съ Лампа́дома двѣ́ма, и҆схо́дитъ съ всѣ́ми людмѝ и҆́съ Це́ркве на и҆сто́чники вѡ́дныѧ, и҆лѝ на рекꙋ̀, пою́ще И҆рмосы̀ Пра́ꙁдничныѧ:

Прише́дше же на мѣ́сто и҆де́же бы́ти и҆́матъ ѡ҆свѧще́нїе, предꙋготовле́ннꙋ сꙋ́щꙋ та́мѡ столцꙋ̀ че́стнѡ покрове́ннꙋ, и҆ прорꙋ́банꙋ ле́дꙋ на рѣцѣ̀, ста́нетъ І҆ере́ѵ̆ пре́дъ столце́мъ, и҆ положи́въ на не́мъ Кре́стъ, вꙁе́млетъ Кади́лницꙋ, и҆ покади́въ крестаѡ́браꙁнѡ и҆сто́чникъ, и҆лѝ на рѣцѣ̀ про́рꙋблъ, ста́въ къ Восто́кѡмъ, начина́етъ ѡ҆бы́чнѡ.

Благослове́нъ Бо́гъ нш҃ъ:

Пѣвци́ же пою́тъ, ᲃтіхи́ры. Гла́съ и҃.

Гла́съ Гн҃ь на вода́хъ:

И҆ про́чаѧ всѧ̀ порѧ́дꙋ, ꙗ҆́коже и҆ вче́ра на ѡ҆свѧще́нїи, и҆ Чте́нїѧ, и҆ Проки́менъ, и҆ А҆пⷭ҇лъ, и҆ Е҆ѵⷢ҇лїе, и҆ Дїа́конства, ꙗ҆́же а҆́ще нѣ́сть Дїа́кона, са́мъ І҆ере́ѵ̆ чтетъ.

Внегда́ же чтꙋ́тсѧ Пари́мїѧ, чтетъ Моли́твꙋ та́йнꙋю, ꙗ҆́же є҆́стъ:

Гд҃и І҆и҃ᲃ Хє҃ є҆диноро́дный Сы́не:

Ꙗ҆́кѡ да гото́въ бꙋ́детъ къ чте́нїю Дїа́конства, и҆ про́чїихъ Моли́твъ. Пото́мъ же чтетъ всѧ̀ Моли́твы порѧ́дꙋ и҆́хъ до конца̀, ничто́же ѡ҆ставлѧ́ѧ:

Та́же ѡ҆бы́чнѡ погрꙋжа́етъ Кре́стъ въ водѣ̀ гⷤ, поѧ̀ Тропа́ръ: Гла́съ а҃.

Въ І҆ꙍрда́ни Креща́ющꙋ ти сѧ̀ Гд҃и:

Ꙍ҆кропи́въ же всѧ̀ лю́ди ᲃвѧще́нною водо́ю, воꙁвраща́ютсѧ къ Це́ркви пою́ще И҆рмосы̀ ѡ҆ста́вльшїѧсѧ и҆дꙋ́ще къ и҆сто́чникꙋ, и҆ли па́ки начина́юще ᲃі́ѧ, входѧ́ще же въ Це́рковъ поютъ, Конда́къ Пра́ꙁдничный Гла́съ д҃.

Ꙗ҆ви́лсѧ є҆сѝ дне́сь вселе́ннѣй, и҆ свѣ́тъ тво́й Гд҃и знамена́сѧ на на́съ, въ ра́ꙁꙋмѣ пою́щихъ тѧ: прише́лъ є҆сѝ и҆ ꙗ҆ви́лсѧ є҆сѝ ᲃвѣ́те неприкоснове́нный.

Та́же, Сла́ва: И҆ ны́нѣ: Гла́съ в҃. и҆ Тропа́ръ ᲃе́й.

Трⷪ҇ци ꙗ҆вле́нїе въ І҆ꙍрда́ни бысть, ᲃі́е бо Пребожестве́нное є҆стество̀: Ѿц҃ъ воꙁгласѝ, се́й Креща́емый, Сы́нъ мо́й воꙁлюбле́нный: Дх҃ъ же прі́йде къ подо́бномꙋ, є҆го́же благословѧ́тъ лю́дїе, и҆ превоꙁно́сѧтъ въ всѧ̀ вѣ́ки.

А҆бїе же быва́ютъ Е҆кте́нїѧ ѿ Дїа́кона, и҆лѝ ѿ І҆ере́ѧ, и҆ цѣлова́вше че́стный Кре́стъ, быва́етъ коне́чный ѿпꙋ́стъ. А҆́ще же не а҆́бїе по ᲃлавосло́вїю и҆де́мъ на во́дꙋ, но по Пе́рвомъ часѣ̀, не быва́ютъ Е҆кте́нїѧ, но по пѣ́нїю, а҆́бїе ѿпꙋ́стъ.

Вѣ́стнѡ бꙋ́ди, ꙗ҆́кѡ Це́рковъ никто́же мо́жетъ ѡ҆снова́ти, ни́же ка́меннꙋю, ни́же древѧ́нꙋю, кро́мѣ сама́гѡ Е҆пⷭ҇па, и҆лѝ ѡ҆со́бнагѡ є҆гѡ̀ на сі́е благослове́нїѧ, чре́ꙁъ Протопо́пꙋ, и҆лѝ є҆дина́гѡ ѿ І҆ереѵ̆, є҆го́же ѡ҆́нъ и҆ꙁво́литъ посла́ти.

А҆́ще же кто̀ дерꙁне́тъ кро́мѣ Е҆пⷭ҇пскагѡ благослове́нїѧ самово́лнѣ съ Моли́твою, и҆лѝ кро́мѣ Моли́твъ, Це́рковъ нача́ти зда́ти, и҆лѝ и҆ꙁверже́нїю, и҆лѝ вели́кой Е҆пⷭ҇пской ка́ꙁни, ꙗ҆́кѡ Е҆пⷭ҇пскїѧ вла́сти ᲂу҆ничижи́тель подлѣга́ти бꙋ́детъ.

Сіе́же ѡ҆снова́нїе быва́етъ си́це: а҆́ще ка́меннаѧ ᲃъꙁда́тисѧ и҆́матъ Це́рковъ, ᲃт҃и́тель, и҆лѝ ѿ негѡ̀ на сі́е и҆мы́й благослове́нїе, въ пе́рвыхъ повелѣва́етъ и҆скопа́ти ро́въ, и҆де́же ѡ҆снова́нїе положе́ное бы́ти и҆́матъ, приꙋготовлѧ́ти же ка́менїѧ и ми́ла, къ зача́тїю зда́нїѧ.

На положе́нїе же ѡ҆снова́нїѧ, повелѣва́етъ ка́мень є҆ди́нъ четвероꙋго́льный приꙋготовлѧ́ти, и҆ на не́мъ Кре́стъ и҆ꙁ̾ѡбраꙁи́ти, подъ Кресто́мъ же (а҆́ще Е҆пⷭ҇пъ, и҆ли є҆гѡ̀ намѣ́стникъ и҆ꙁво́литъ) мѣ́сто на воꙁложе́нїе Мо́щїй ᲃт҃ы́хъ и҆ Писа́нїѧ, въ то́мжде ка́мени и҆ꙁ̾сѣ́чи.

Писа́нїе же быва́етъ на Мембра́нѣ, сі́естъ, на Паргами́нѣ, и҆лѝ на Мѣ́дѧной до́сци, си́цевое: Въ И҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а, основа́сѧ сі́ѧ Це́рковъ, въ че́сть и҆ па́мѧтъ, И҆мⷬ҇къ: Пра́ꙁдника Гд҃кагѡ, и҆лѝ Бо́гро́дичнагѡ, и҆лѝ ᲃт҃а́гѡ. При держа́вѣ Вели́кагѡ Гпⷭ҇дарѧ̀ на́шегѡ, И҆мⷬ҇къ: При ᲃт҃и́телствѣ же Гд҃нѧ И҆мⷬ҇къ: А҆рхїепⷭ҇па, и҆лѝ Е҆пⷭ҇па И҆мⷬ҇къ: гра́дꙋ. и҆ положе́ны сꙋ́ть здѐ Мо́щи ᲃⷮ: и҆лѝ ᲃт҃ы́хъ: И҆мⷬ҇къ: Въ лѣто: ... Мцⷭ҇а ... днѧ̀.

Вѣ́стнѡ же бꙋ́ди, ꙗ҆́кѡ и҆ кро́мѣ мо́щїй ᲃт҃а́гѡ, и҆ писа́нїѧ си́цевагѡ положи́тисѧ ѡ҆снова́нїе мо́жетъ, и҆ сегѡ̀ ра́ди предрече́сѧ.

А҆́ще Е҆пⷭ҇пъ, и҆лѝ вмѣ́сто є҆гѡ̀ сі́е дѣйствꙋѧй, и҆ꙁво́литъ.

Но ᲂу҆́бѡ кро́мѣ кро́мѣ предрече́ннагѡ четвероꙋго́лнагѡ ка́мене, ꙗ҆́коже въ ка́менной ᲃи́це и҆ древѧ́ной не быва́етъ. Къ семꙋ̀ приꙋготовле́нъ быва́етъ Кре́стъ вели́кий древѧ́ный, и҆ и҆де́же Престо́лъ и҆́матъ бы́ти, ро́въ и҆скопава́етсѧ, въ є҆́же въдрꙋꙁи́ти въ не́мъ Кре́стъ.

А҆́ще древѧ́наѧ и҆́матъ бы́ти Це́рковъ, копа́нїе не быва́етъ, то́чїю подъ стѣно́ю Ѻ҆́лтарнею къ восто́кѡмъ и҆скопаваетсѧ ро́въ, на воꙁложе́нїе ка́менѧ: приꙋготовлѧ́ютжесѧ бе́рвна, сі́естъ: подло́ги, на ни́хъ же Це́рковъ съставлѧ́тисѧ и҆́матъ, и҆ по мѣ́рѣ є҆ю́же Це́рковъ бы́ти и҆́матъ, въ широтꙋ̀ и҆ долготꙋ̀ поставлѧ́ютъ ѧ҆̀: такожде и҆ Кре́стъ приꙋготовле́нъ быва́етъ.

А҆ и҆де́же и҆́матъ бы́ти Престо́лъ, и҆скопа́ный да бꙋ́детъ ро́въ къ въдрꙋже́нїю Креста̀. Си́мъ же ᲃи́це предꙋгото́вленнымъ бы́вшимъ, ᲃт҃и́тель, и҆лѝ Намѣ́стникъ є҆гѡ̀, въ прибли́жней Це́ркви мѣ́ста ѻ҆́нагѡ и҆де́же ѡснова́нїе бы́ти и҆́матъ, въ ᲂу҆́трѣе ра́но ѡ҆дѣѧ́всѧ въ всѧ̀ ᲃт҃и́телскаѧ, (а҆́ще же І҆ере́ѵ̆ сі́е дѣйствꙋ́етъ, въ всѧ̀ ᲃщ҃енническаѧ) ѡ҆дѣѧ́нїѧ, съ всѣ́мъ Кли́ромъ и҆схо́дитъ, предидꙋ́щимъ є҆мꙋ̀ Дїа́конѡмъ съ Кади́лницами, І҆ере́емъ же съ Кресты̀ два̀ два̀, по ни́хъ же Ст҃ль, и҆лѝ Намѣ́стникъ є҆гѡ̀.

И҆дꙋ́ще же пою́тъ ᲃтіхи́ры Литі́йныи Хра́мꙋ бꙋ́дꙋщей Це́ркви.

Прише́дше же на мѣ́сто, полага́ютъ на предположе́нномъ та́мѡ столцѣ̀ че́стнѡ покрове́нномъ ᲃⷮ: Е҆ѵⷢ҇лїе и҆ Кре́стъ.

Вѣ́стнѡ же бꙋ́ди, ꙗ҆́кѡ а҆́ще и҆ꙁво́литъ ᲃт҃и́тель, и҆лѝ Намѣ́стникъ є҆гѡ̀, и҆ кро́мѣ си́цевой Литі́и, а҆́бїе на предꙋготова́нное мѣ́сто прихо́дитъ и҆ ѡ҆снова́нїе полага́етъ, ѡ҆дѣѧ́всѧ ᲃт҃и́тель, въ Е҆пітра́хиль и҆ Ꙍ҆мо́форъ верхꙋ Ма́нтїи, и҆ въ Ми́трꙋ: І҆ере́ѵ̆ же въ Е҆пітра́хиль и҆ Фелѡ́нъ: и҆ вꙁе́мъ Кади́лницꙋ ка́дитъ сі́ѧ крестаѡ́браꙁнѡ, и҆ ѡ҆бы́чнѡ начина́етъ.

Благослове́нъ Бо́гъ нш҃ъ:

Кли́ръ же весъ пое́тъ:

Ца́рю небѣ́сный:

Доне́лиже ᲂу҆бѡ ᲃко́нчитсѧ пѣ́нїе ᲃтои́тъ началствꙋ́ѧй пре́дъ ᲃт҃ы́мъ Е҆ѵⷢ҇лїемъ кадѧ̀ сі́е:

По пѣ́нїи же на́йдитъ всѧ̀ рѡ́вы, и҆лѝ знамена́ное мѣ́сто и҆де́же ѡ҆снова́нїе бы́ти и҆́матъ. Наче́нъ ѿ пе́рвыѧ ᲃтѣны̀ Ѻ҆лтаревы и҆ды́й проти́во ᲃо́лнцꙋ ѡ҆крестъ, донде́же прі́йдетъ ѿню́дꙋже нача̀: И҆ посе́мъ ка́дитъ кли́ръ и҆ лю́ди, и҆ па́ки ᲃт҃о́е Е҆ѵⷢ҇лїе.

Е҆кклисїа́рхъ же чтетъ, Трⷭ҇то́е: и҆ по Ѿч҃е нш҃ъ:

Прїйдѣ́те поклони́мсѧ: три́жды: и҆ ѱало́мъ, рм҃в.

Гд҃и, ᲂу҆слы́ши Моли́твꙋ мою̀:

Сла́ва: И҆ ны́нѣ: А҆ллилꙋ́іа, гⷤ.

Дїа́конъ же Е҆кте́нїѧ ᲃі́ѧ.

Ми́ромъ Гд҃ꙋ помоли́мсѧ: И҆ проч: да́же до плава́ющихъ: И҆ по си́хъ а҆́бїе гл҃е́тъ ᲃі́ѧ:

Ꙍ҆ є҆́же при́ꙁрѣти милости́внѡ на мѣ́сто ᲃі́е къ соꙁда́нїю на не́мъ Це́ркве, въ ᲃла́вꙋ Пресвѧта́гѡ и҆менѝ є҆гѡ̀ и҆ꙁбра́нное, и҆ благослове́нїемъ свои́мъ небѣ́снымъ благослови́ти є҆̀, Гд҃ꙋ помоли́мсѧ.

Ꙍ҆ є҆́же благослови́ти до́брое ᲃі́е намѣре́нїе, и҆ дѣ́ло рабѡ́въ свои́хъ (зде Кти́торовъ помина́етъ и҆лѝ раба̀ свое́гѡ,) И҆мⷬ҇къ: Гд҃ꙋ помоли́мсѧ.

Ꙍ҆ є҆́же благослови́ти нача́токъ ѡ҆снова́нїѧ и҆ꙁда́нїа сегѡ̀, и҆ благополꙋ́чнѡ въ ᲃла́вꙋ И҆менѝ ᲃвое́гѡ нача́ло є҆гѡ̀ положи́тсѧ, и҆ ᲃпѣ́шнѡ въ ᲃъверше́нїе кро́мѣ всѧ́кагѡ препѧ́тїѧ проиꙁвести́сѧ си́лою дѣ́йствомъ и҆ благодатїю Пресвѧта́гѡ Дх҃а, Гд҃ꙋ помоли́мсѧ:

Ꙍ҆ є҆́же трꙋжда́ющимсѧ дѣла́телемъ благопоспѣ́шество въ все́мъ пода́ти, и҆ дѣла̀ рꙋ́къ и҆́хъ и҆справити, и҆ въ соверше́нїе ᲃи́лою дѣ́йствомъ, и҆ благода́тїю Пресвѧта́гѡ Дх҃а спѣ́шнѡ проиꙁвестѝ, Гд҃ꙋ помоли́мсѧ:

Ꙍ҆ є҆́же благо́мꙋ семꙋ̀ тща́нїю рабѡ́въ свои́хъ (и҆лѝ раба̀ свое́гѡ) И҆мⷬ҇къ: благопоспѣ́шество съ всѧ́кимъ дово́л̾ствомъ, си́лою, дѣ́йствомъ и҆ благода́тїю Пресвѧта́гѡ Дх҃а пода́ти, Гд҃ꙋ помоли́мсѧ.

Ꙍ҆ є҆́же приста́вити дѣ́лꙋ ᲃемꙋ̀, и҆ дѣла́телемъ є҆гѡ̀ А҆́гг҃ла свое́гѡ храни́телѧ, є҆́же неви́димѡ ѿраꙁи́ти всѧ̀ проти́вныѧ навѣ́ты, ви́димыхъ и҆ неви́димыхъ врагѡ́въ, и҆ въ все́мъ благопоспѣ́шество, къ соѡрꙋже́нїю же мꙋ́дрость, и҆ къ соверше́нїю ᲃи́лꙋ ᲃи́лою дѣ́йствомъ, и҆ благода́тїю Пресвѧта́гѡ Дх҃а пода́ти, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ на́мъ: И҆ проч: всѧ до конца̀.

Началствꙋ́ѧй же, воꙁглаша́етъ.

Ꙗ҆́кѡ подоба́етъ:

По во́ꙁгласѣ же пою́тъ.

Бо́гъ Гд҃ь и҆ ꙗ҆ви́сѧ на́мъ:

А҆́ще хра́мъ Госпо́дскїй бы́ти и҆́матъ, на Гла́съ Тропарѧ̀ Пра́ꙁднична, по Пра́ꙁдничномъ же, на ᲃла́вѣ пое́мъ, ѡ҆снова́нїю, И҆ ны́нѣ Пра́ꙁдникꙋ. А҆́ще же не Госпо́дскїй, то на гла́съ в҃. и҆ Тропаръ се́й ѡ҆снова́нїю.

Тво́рче и҆ соꙁда́телю всѧ́ческихъ Бо́же, дѣ́ло рꙋ́къ на́шихъ, къ ᲃла́вѣ твое́й начина́емое, твои́мъ благослове́ниемъ спѣ́шно и҆спра́ви, и ᲃи́лою твое́ю въ съверше́нїе ско́рѡ проиꙁведѝ, ꙗ҆́кѡ є҆ди́нъ всеси́ленъ, и҆ человѣкѡлю́бецъ.

А҆́ще же Бо́гро́диченъ бы́ти и҆́матъ Хра́мъ, съ ᲃла́вою повторѧ́юще Троп: ѡ҆снова́нїю, И҆ ны́нѣ пое́мъ хра́мꙋ. А҆́ще же и҆́нагѡ кое́гѡ ѿ свѧты́хъ, пе́рвѣе пое́мъ Тропа́ръ ѡ҆снова́нїю, на ᲃла́вѣ же ᲃт҃о́мꙋ, И҆ ны́нѣ же Бо́горо́диченъ по Гла́сꙋ. По Тропарѧ́хъ же, а҆́бїе Е҆кклисїа́рхъ чтетъ, ѱало́мъ, н҃.

Поми́лꙋй мѧ Бо́же:

Принесе́ной же сꙋ́щей Водѣ̀ въ честно́мъ съсꙋ́дѣ поставле́на быва́етъ на столцѣ̀, и҆лѝ пре́дъ столце́мъ: и҆ съсꙋ́дъ дрꙋ́гїй съ є҆ле́ѡмъ: по сконча́нїи же ѱалма̀, пою́тъ гⷤ, Тропа́ръ се́й. Гла́съ ѕ҃.

Съ небесѐ послѝ благода́ть жиꙁнода́вче, и҆ во́дꙋ сі́ю ѡ҆свѧтѝ, и҆ всѣ́мъ скве́рнамъ ꙗ҆вѝ ю҆̀ бы́ти ѡ҆чище́нїе.

Ре́кшꙋ же Дїа́конꙋ:

Гд҃ꙋ помоли́мсѧ.

и҆ Ли́кꙋ:

Гд҃и поми́лꙋй.

Нача́лникъ чтетъ Моли́твꙋ сі́ю надъ водо́ю.

Бо́же Великоимени́тый, Ѿч҃е Гд҃а на́шегѡ І҆и҃ᲃ Ха҃, творѧ́й чꙋдеса̀ є҆ди́нъ, и҆́мже нѣ́сть числа̀, є҆го́же гла́съ на вѡда́хъ мнѡ́гихъ, є҆го́же ви́дѣвше вѡ́ды ᲂу҆боѧ́шасѧ, и҆ смѧтѡ́шасѧ бе́ꙁдны, и҆ мнѡ́жество шꙋ́ма вѡ́дъ: є҆го́же пꙋ́тїе въ мо́ри, и҆ стеꙁѧ̀ въ вѡда́хъ мнѡ́гихъ, и҆ стопы̀ твоѧ̀ не поꙁна́ютсѧ: и҆́же креще́нїемъ є҆диноро́днагѡ ᲃн҃а твое́гѡ воплоще́ннагѡ, и҆ сни́тїемъ на́нъ Пресвѧта́гѡ Дх҃а въ видѣ́нїи Го́лꙋба, и҆ твои́мъ Ѿч҃еским гла́сомъ І҆ꙍрда́нскїѧ ᲃтрꙋ́ѧ ѡ҆свѧти́лъ є҆сѝ, тебѐ ны́нѣ смире́ннѡ недосто́йнїи рабѝ твоѝ мо́лимъ и҆ ми́лисѧ дѣ́емъ, послѝ благода́ть Пресвѧта́го Дх҃а на во́дꙋ сі́ю, и҆ небе́снымъ твои́мъ благослове́нїемъ благословѝ, ѡ҆чи́сти, и҆ ѡ҆свѧтѝ ю҆̀, и҆ дарꙋ́й є҆́й благода́ть и҆ благослове́нїе І҆ꙍрда́ново, и҆ ᲃи́лꙋ всѣ́хъ скве́рнъ ѡ҆чища́ющꙋю, и҆ всѧ́къ не́дꙋгъ и҆сцѣлѧ́ющꙋю, и҆ бѣ́совъ и҆ всѣ́хъ навѣ́товъ и҆ кѡ́ꙁнїй и҆́хъ прогони́тел̾нꙋю. И҆ ꙗ҆вѝ ю҆̀ си́лою, дѣ́йствомъ и҆ благода́тїю Пресвѧта́гѡ Дх҃а, бы́ти всѣ́мъ ѿ неѧ̀ вѣ́рою пі́ющимъ, прїе́млющимъ же и҆ кропѧ́щимсѧ рабѡ́мъ твои́мъ, грѣхѡ́въ ѡ҆ставле́нїе, и҆ꙁмѣне́нїе стра́стемъ, прогна́ние всѧ́кагѡ зла̀, ᲂу҆множе́нїе добродѣ́телїй, бо́лѣꙁнемъ и҆сцѣле́нїе, до́мовѡмъ же и҆ всѧ́комꙋ мѣ́стꙋ ѡ҆свѧще́нїе и҆ благослове́нїе, гꙋби́тельныхъ и҆ всѧ́кихъ злораство́рныхъ во́ꙁдꙋхѡвъ ѿгна́ние, и благода́ти твое́ѧ присвое́нїе.

Ꙗ҆́кѡ ты́ є҆сѝ благословлѧ́й и҆ ᲃт҃ѧ́й всѧ́ческаѧ, Бж҃е нш҃ъ, и҆ тебѣ̀ ᲃла́вꙋ воꙁсыла́емъ съ є҆диноро́днымъ ти Сы́номъ, и҆ съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

Дїа́конъ,

Гла́вы ва́ша Гв҃и преклони́те.

Ли́къ,

Тебѣ̀ Гд҃и.

І҆ере́ѵ꙼ же чтетъ та́йнѡ Моли́твꙋ сі́ю.

Приклонѝ, Гд҃и, ᲂу҆́хо твоѐ, и҆ ᲂу҆слы́ши мѧ, вѡ́ды І҆ѡрда́нскїѧ ꙗ҆вле́нїемъ Ха҃ твое́гѡ ѡ҆свѧти́вый, и҆ благословѝ всѣ́хъ на́съ, преклоне́нїемъ свое́ѧ вы́ѧ знамена́ющихъ работы̀ и҆ꙁ̾ѡбраже́нїе, и҆ ᲃподобѝ на́съ и҆сполни́тисѧ твое́гѡ ѡ҆свѧще́нїѧ Воды̀ ᲃеѧ̀ прїѧ́тїемъ, и҆ да бꙋ́детъ на́мъ въ здра́вїе дꙋша́мъ же и҆ тѣлесе́мъ.

И҆ воꙁглаша́етъ.

Ты́ бо є҆сѝ ѡ҆свѧщенїе на́ше, и҆ тебѣ̀ ᲃла́вꙋ воꙁсыла́емъ, съ є҆диноро́днымъ ти Сы́номъ, и҆ Пресвѧты́мъ и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

Нача́лникъ же вꙁе́мъ Кре́стъ погрꙋжа́етъ є҆гѡ̀ въ водѣ̀ крестаѡ́браꙁнѡ, пра́вѡ ниꙁводѧ̀ и҆ воꙁводѧ̀, поѧ̀ Троп: Гла́съ а҃.

Спасѝ Гд҃и лю́ди своѧ̀, и҆ благословѝ достоѧ́нїе твоѐ, побѣ́ды Царе́мъ на́шимъ на ва́рвары дарꙋ́ѧ, и҆ своѧ̀ съхранѧ́ѧ Кресто́мъ си лю́ди.

А҆́бїе же Настоѧ́тель благословлѧ́етъ Е҆ле́й десни́цею три́жды, гл҃ѧ̀:

Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Ре́кшꙋ же Дїа́конꙋ:

Гд҃ꙋ помоли́мсѧ.

и҆ Кли́рꙋ:

Гд҃и поми́лꙋй:

Чтетъ Моли́твꙋ ᲃі́ю.

Гд҃и Бо́же ѿц҃ъ на́шихъ є҆мꙋ́же и҆ꙁлѣѧ́нїе Е҆ле́ѧ, є҆́же и҆ꙁлѣѧ̀ І҆а́кѡвъ на ка́мень є҆го́же поста́вивъ ᲃто́лпъ, и҆ До́мъ Бо́жій наречѐ, благоꙋго́дное и҆ прїѧ́тное бысть: при́ꙁри моли́мъ тѧ и҆ ны́нѣ ми́лостивнѡ, на Е҆ле́й се́й, и҆ небе́снымъ твои́мъ благослове́нїемъ благословѝ и҆ ѡ҆свѧтѝ є҆гѡ̀, и҆ да́ждъ є҆мꙋ̀ ᲃи́лꙋ благода́тїю Пресвѧта́гѡ твое́гѡ Дх҃а, є҆́же всѐ тѣ́мъ въ сла́вꙋ твою̀ пома́ꙁꙋемое ѡ҆свѧще́ннѡ, и҆̀ благослове́но, и҆ тебѣ̀ благоꙋго́дно и҆ прїѧ́тнѡ бы́ти: щедрота́ми є҆диноро́днагѡ ᲃн҃а твое́гѡ, съ ни́мъ же благослове́нъ є҆сѝ, съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

И҆ а҆́бїе вꙁе́мъ ᲃвѧще́ннꙋю Во́дꙋ, кро́питъ мѣ́сто иде́же Кре́стъ въдрꙋже́нъ бы́ти и҆́матъ, гл҃ѧ̀:

Благоволѝ Гд҃и І҆и҃ᲃ Хє҃ Бо́же нш҃ъ зна́менїемъ ᲃтра́шнымъ, и҆ си́лою Креста̀ твое́гѡ ѡ҆гради́тисѧ мѣ́стꙋ ᲃемꙋ̀, въ ᲃла́вꙋ тебѐ Распѧ́тагѡ Бг҃а на́шегѡ, и҆ твое́гѡ беꙁнача́лнагѡ Ѿц҃а̀, и҆ Пресвѧта́гѡ ти Дх҃а: и҆ А҆́нгелъ всегꙋби́телный, и҆ всѧ̀ съпроти́вныѧ ᲃи́лы да ѿстꙋпѧ́тъ ѿ не́гѡ: Ꙗ҆́кѡ твоѧ̀ є҆́стъ держа́ва, и҆ твоѣ̀ є҆́стъ Ца́рство, и҆ ᲃи́ла Вели́кагѡ Бг҃а и҆ Спа́са на́шегѡ І҆и҃ᲃ Ха҃, ны́нѣ и҆ прⷭ҇нѡ, и҆ въ вѣ́ки вѣ́кѡвъ. А҆ми́нь.

Свѧще́нници же вꙁе́мше Кре́стъ, въдрꙋжа́ютъ є҆гѡ̀ въ предꙋготова́нное мѣ́сто, въкꙋ́пѣ съ нача́л̾никомъ пою́ще Тропа́ръ се́й. Гла́съ в҃.

Крестꙋ̀ въдрꙋꙁи́вшꙋсѧ на землѝ, ниꙁпадѐ и҆ ѿню́дъ потреби́сѧ шата́нїе врагѡ́въ: пре́жде же ѿринове́нный человѣ́къ, въ Ра́й па́ки въхо́дитъ: но ᲃла́ва тебѣ̀ є҆дино́мꙋ Бг҃ꙋ на́шемꙋ, си́це благоиꙁволи́вшомꙋ.

По семъ чтꙋ́тъ, и҆лѝ пою́тъ Конда́къ ѡснова́нїю Гла́съ ѕ҃.

Ско́рый въ застꙋпле́нии, и҆ крѣ́пкий въ по́мощъ, предста́ни благода́тїю ᲃи́лы твое́ѧ ны́не, и҆ благослови́въ ᲂу҆крѣпѝ, и҆ въ соверше́нїе благо́е дѣ́ла рабѡ́въ твои́хъ проиꙁведѝ: всѧ́ бо є҆ли́ка хо́щеши, ꙗ҆кѡ всеси́льный Бо́гъ, твори́ти мо́жеши.

Сла́ва: И҆ ны́нѣ:

Застꙋ́пнице христїѧ́нѡмъ непосты́днаѧ.

Ре́кшꙋ же Дїа́конꙋ:

Гд҃ꙋ помоли́мсѧ.

Нача́лникъ чтетъ Моли́твꙋ сі́ю пре́дъ водрꙋже́ннымъ Кресто́мъ зрѧ̀ на восто́къ.

Гд҃и Бо́же Вседержи́телю, проѡобраꙁи́вый жеꙁло́мъ Мꙍѵ꙼се́ѻвымъ, че́стный и҆ животворѧ́щий Кре́стъ воꙁлюбле́ннагѡ ᲃн҃а твое́гѡ Гд҃а на́шегѡ І҆и҃ᲃ Ха҃, ᲃамъ благословѝ и҆ ѡ҆свѧтѝ мѣ́сто сі́е, ᲃи́лою и҆ дѣ́йствомъ честна́гѡ и҆ животворѧ́щагѡ дре́ва ѡ҆́наго Кре́стнагѡ (є҆́же снабдѣ̀ ѡ҆кропле́нїемъ че́стныѧ Кровѐ ᲃн҃а твое́гѡ,) въ ѿгна́нїе бѣ́сѡвъ, и҆ всѧ́кагѡ съпротивле́нїѧ, съхранѧ́ѧ мѣ́сто сі́е, и҆ на не́мъ тебѣ̀ слꙋжа́щихъ ѿ всѧ́кагѡ зла̀ невре́дны, Моли́твами Пресла́вныѧ Влады́чица на́шеѧ Бц҃а, и҆ прⷭ҇нѡ Дв҃ы Мр҃іѧ, (Здѐ помина́етъ и҆ ст҃а́гѡ є҆го́же и҆́матъ бы́ть Хра́мъ.) Ꙗ҆́кѡ благослови́сѧ и́ просла́висѧ твоѐ Ца́рство, Ѿц҃а̀, и҆ ᲃн҃а, и҆ ᲃт҃а́гѡ Дх҃а, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Кли́ръ,

А҆ми́нь.

Посе́мъ и҆де́тъ Нача́лникъ къ ро́вꙋ, и҆де́же ѡ҆снова́нїе поло́жено бы́ти и҆ма́ть: и҆ прине́сенꙋ бы́вшꙋ ка́меню четвероꙋго́лномꙋ поставлѧ́етсѧ пре́дъ ни́мъ на столцѣ̀, а҆́бїе же нача́лникъ съ всѣ́мъ Кли́ромъ чтетъ ѱало́мъ п҃г.

Коль воꙁлю́бленна ᲃела̀ твоѧ̀ Гд҃и ᲃи́лъ: Весъ до конца̀.

Сла́ва: И҆ ны́нѣ: А҆л҃лꙋ́іа, гⷤ.

Дїа́конꙋ же ре́кшꙋ:

Гд҃ꙋ помоли́мсѧ,

и҆ Кли́рꙋ:

Гд҃и поми́лꙋй.

Чтетъ Моли́твꙋ сі́ю надъ ка́менемъ.

Гд҃и І҆и҃ᲃ Хє҃ Сы́не Бг҃а жива́гѡ, и҆́стинный Бо́же, сїѧ́нїе и҆ Ꙍ҆браꙁе беꙁнача́лнагѡ Ѿц҃а̀, и҆ живо́те вѣ́чный: краеꙋго́лный ᲃы́й ка́мень, ѿ Прче́стыѧ Двчⷭ҇кїѧ горы̀ беꙁъ рꙋ́къ мꙋ́жескагѡ ᲃѣ́мене, ѿсѣ́ченный, и҆ не поꙁи́блемое свое́ѧ Це́ркве ѡ҆снова́нїе, и҆́же и҆ꙁлѣѧ́нїемъ че́стныхъ твои́хъ Кро́вїй свою̀ Це́рковъ ѡ҆снова́лъ є҆сѝ, ᲃме́ртїю же воꙁдви́глъ, Воскресе́нїемъ съверши́лъ, Воꙁнесе́нїемъ благослови́лъ, Съше́ствїемъ же ᲃт҃а́гѡ ти Дх҃а ѡ҆свѧти́лъ и҆ раꙁшири́лъ ю҆̀ є҆сѝ: тебѐ ны́нѣ ᲃмире́ннѡ моли́мъ, послѝ благода́ть ᲃт҃а́гѡ твое́гѡ Дх҃а, и҆ благословѝ положе́нїе ка́мене сегѡ̀, и҆ все ѡ҆снова́нїе начина́ющагосѧ зда́нїѧ въ ᲃла́вꙋ Пресвѧта́гѡ ти И҆́мене (А҆́ще є҆́стъ Госпо́дскїй Пра́ꙁд: гл҃е́тъ, Въ че́сть же и҆ въ па́мѧтъ ᲃт҃а́гѡ твое́гѡ Рождетва̀, И҆лѝ и҆́нагѡ, и҆лѝ Ꙋ҆спе́нїѧ Прече́стыѧ ти Мт҃ре, И҆лѝ и҆́нагѡ є҆ѧ̀ Пра́ꙁдника, и҆лѝ ᲃт҃а́гѡ И҆мⷬ҇къ:) И҆ ты и҆́же є҆си А҆́лфа и҆ Ꙍ҆ме́га, нача́ло и҆ коне́цъ, въ не́мъ же Нача́лѣ Ѿц҃ъ и҆ско́ни всѧ́ческаѧ съꙁда̀, бꙋ́ди нача́ло, ᲂу҆множе́нїе, и҆ съверше́нїе дѣ́лꙋ ᲃемꙋ̀: Кти́торѡвъ же и҆ дѣла́телїй благословѝ, и҆ дѣ́лꙋ рꙋ́къ и҆́хъ поспѣшѝ, и҆ всѧ̀ потребова́нїѧ къ съѡрꙋже́нїю и҆ съверше́нїю Хра́ма ᲃегѡ̀ твои́мъ Божестве́ннымъ про́мысломъ и҆ꙁ̾ѡ҆би́лнѡ ᲂу҆множѝ, ꙗ҆́кѡ да съверше́нъ Хра́мъ бы́въ твое́ѧ ᲃла́вы, просла́витсѧ въ не́мъ твоѐ Пресвѧто́е и҆ вели́кое И҆мѧ съ Ѿц҃емъ, и҆ Пресвѧты́мъ Дх҃омъ, благослове́но сꙋ́щее всегда̀ ны́нѣ и҆ прⷭ҇нѡ и҆ въ вѣ́ки вѣ́кѡвъ.

Кли́ръ:

А҆ми́нь.

Начал̾ствꙋ́ѧй же, вꙁе́мъ ᲃвѧще́ннꙋю Во́дꙋ кро́питъ Ка́мень, гл҃ѧ̀.

Благословлѧ́етсѧ Ка́мень ᲃе́й ѡ҆кропле́нїемъ свѧще́нныѧ воды̀ сеѧ̀ въ непоколѣби́мое ѡ҆снова́нїе хра́ма, соꙁида́емагѡ, въ И҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

А҆́бїе же, а҆́ще хо́щетъ въ Ка́менъ в̾ложи́ти Мо́щи ᲃт҃ы́хъ, проче́тъ писа́нїе є҆ди́нъ ѿ І҆ере́ѵ̆ в̾лага́етъ Мо́щи въ предꙋготовле́нное въ ка́мени ѡ҆́номъ мѣ́сто, гл҃ѧ̀:

Хвали́те Бг҃а въ ᲃт҃ы́хъ є҆гѡ̀, хвали́те є҆гѡ̀ въ ᲂу҆твержде́нїе ᲃи́лъ є҆гѡ̀. Ꙗ҆́кѡ въсхва́лѧтсѧ Преподо́бнїи въ ᲃла́вѣ, и҆ въꙁра́дꙋютсѧ на ло́жахъ ᲃвои́хъ.

И҆ сі́ѧ ре́къ покрыва́етъ ѧ҆̀. А҆́ще ᲂу҆́бѡ нѣ́сꙋтъ мо́щи, ничто́же ѿ си́хъ тво́ритъ, но в̾ꙁе́мъ ка́мень свои́ма рꙋка́ма полага́етъ є҆гѡ̀ на ми́лѣ, ᲃі́естъ, на ва́пнѣ въ ро́вѣ, гл҃ѧ̀:

Ꙍ҆снова́етсѧ Це́рковъ сі́ѧ въ ᲃла́вꙋ вели́кагѡ Бг҃а и҆ ᲃпа́са на́шегѡ І҆и҃ᲃ Ха҃, въ че́сть и҆ па́мѧтъ И҆мⷬ҇къ: (пра́ꙁдника є҆гѡ̀, и҆лѝ Бо́городична, и҆лѝ ᲃт҃а́гѡ) въ И҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

А҆́бїе же в̾ꙁе́мъ Е҆ле́й, гл҃е́тъ.

Вы́шнїй ѡ҆снова̀ сі́ю це́рковъ, Бо́гъ посре́дѣ є҆ѧ̀, и҆ не подви́житсѧ, помо́жетъ є҆́й Бо́гъ ᲂу҆́трѡ заꙋ́тра.

И҆ воꙁлива́етъ Е҆ле́й на положе́ный Ка́менъ, глаго́лѧ:

Благослове́но и҆ знамена́но бꙋ́ди мѣ́сто сі́е въ до́мъ молитве́нный, въ че́сть и҆ ᲃла́вꙋ Бг҃а въ Тро́ици ᲃт҃ѣ́й слави́магѡ, Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Посе́мъ съ всѣ́мъ Кли́ромъ пое́тъ сі́е. Гла́съ ѕ҃.

Въста́въ І҆а́кѡвъ заꙋ́тра, и҆ вꙁѧ́тъ ка́мень є҆го́же бѣ положи́лъ воꙁгла́вїе себѣ̀, и҆ поста́ви є҆гѡ̀ ᲃто́лпъ, и҆ воꙁлїѧ̀ Е҆ле́й верхꙋ̀ є҆гѡ̀, и҆ речѐ: Ꙗ҆́кѡ є҆́стъ Гд҃ь на мѣ́стѣ се́мъ, а҆́ꙁъ же не вѣ́дѣхъ: стра́шно є҆́стъ мѣ́сто сі́е, нѣ́стъ сі́е до́мъ Бо́жій, и҆ сі́ѧ сꙋ́ть вра́та небе́снаѧ. А҆ллилꙋ́іѧ, А҆ллилꙋ́іѧ, А҆ллилꙋ́іѧ.

Вѣ́стнѡ же бꙋ́ди, ꙗ҆́кѡ а҆́ще древѧ́ной Це́ркви быва́етъ ѡ҆снова́нїе, всѧ́ предположе́наѧ соверши́вше. Нача́лникъ в̾ꙁемъ ᲃеки́рꙋ, ᲂу҆дарѧ́етъ три́жды въ сре́днее бервно̀ Ѻ҆́лтарнее, гл҃ѧ̀:

Начина́етсѧ дѣ́ло сі́е, въ И҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а, въ че́сть же и҆ въ па́мѧть Имⷬ҇къ: (Пра́ꙁдника и҆лѝ ᲃт҃а́гѡ). А҆ми́нь.

Посе́мъ же а҆́бїе начина́етъ кропи́ти всѧ̀ ѡ҆снова́нїѧ ѻ҆́крестъ, ᲃи́мъ ѡ҆́браꙁомъ, и҆ды́й ᲃѣ́верныѧ ᲃтра́ны проти́въ ᲃо́лнцꙋ кро́питъ, гл҃ѧ̀:

Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Кли́рꙋ чтꙋ́щꙋ ѱало́мъ, п҃ѕ.

Ꙍ҆снова́нїѧ є҆гѡ̀ на гора́хъ свѧты́хъ. Ве́сь до конца̀.

Дѣла́телїе же а҆́бїе спѣ́шнѡ въ и҆мѧ Гд҃не начина́ютъ дѣ́лати. Проше́дшꙋ же Нача́лникꙋ пе́рвꙋю ча́сть ѡ҆снова́нїй ᲃѣ́верныѧ стра́ны, а҆́бїе ста́нетъ къ ᲃѣ́верꙋ лице́мъ, и҆ сконча́нꙋ ѱалмꙋ̀, Дїа́конꙋ ре́кшꙋ,

Гд҃ꙋ помоли́мсѧ.

и҆ Кли́рꙋ:

Гд҃и поми́лꙋй.

Чтетъ Молитвꙋ ᲃі́ю.

Гд҃и Бо́же нш҃ъ, ᲃѣ́веръ и҆ Мо́ре, и҆ всѧ́ческаѧ соꙁда́вый, є҆го́же не́бо, и҆ землѧ̀ въмѣсти́ти не мо́жетъ, на землѝ хра́мъ себѣ̀ и҆мѣ́ти къ всегда́шнемꙋ хвале́нїю пресвѧта́гѡ И҆менѝ твое́гѡ и҆ꙁволѧ́еши, ᲃмире́ннѡ припада́юще, твоѐ челове́колю́бїе моли́мъ: ѡ҆снова́нїѧ Хра́ма сегѡ̀, и҆ всѐ є҆гѡ̀ зда́нїе благословѝ, и҆ си́лою твое́ю ᲂу҆твердѝ, непоꙁыбле́мо же и҆ нераꙁрꙋши́мо сотворѝ, въ ᲃла́вꙋ тебѣ̀ є҆ди́нагѡ въ Тро́ици ᲃт҃о́й слави́магѡ Бг҃а, Ѿц҃а̀, и҆ ᲃн҃а, и҆ ᲃт҃а́гѡ Дх҃а, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

По Моли́твѣ же, а҆́ще древѧ́на и҆́матъ бы́ти це́рковъ, в̾ꙁемъ ᲃеки́рꙋ, ᲂу҆дарѧ́етъ въ сре́днее бервно̀, то́ежде гл҃ѧ̀, є҆́же и҆ во пе́рвомъ ᲂу҆даре́нїи, и҆ и҆де́тъ, вто́рꙋю ча́сть ѡ҆снова́нїѧ кропѧ̀, и҆ гл҃ѧ̀:

Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Кли́ръ же чтетъ ѱало́мъ рк҃ѕ:

А҆́ще не Гд҃ь соꙁи́ждетъ до́мъ: Ве́сь до конца̀.

Прише́дъ же на за́паднюю стра́нꙋ, а҆́бїе нача́лникъ ста́въ лице́мъ къ за́падꙋ, сконча́нꙋ же ѱалмꙋ̀, и́ Дїа́конꙋ ре́кшꙋ:

Гд҃ꙋ помоли́мсѧ.

и҆ Кли́рꙋ:

Гд҃и поми́лꙋй.

Чтетъ Моли́твꙋ ᲃі́ю.

Гд҃и Бо́же нш҃ъ, є҆го́же хва́лнѡ и҆мѧ ѿ въсто́къ ᲃо́лнца до за́падъ, твои́мъ Божестве́ннымъ про́мысломъ и҆ꙁбра́вый въ жи́лище себѣ̀ мѣ́сто сі́е: Послѝ ны́нѣ, смире́нно моли́мъ тѧ, небе́сное твоѐ благослове́нїе нанѐ, и҆ благословѝ нача́ло зда́нїѧ сегѡ̀, и҆ ᲂу҆крѣпѝ и҆ ᲂу҆твердѝ є҆̀, и҆ благопоспѣ́шно къ соверше́нїю приведѝ. Ты́ бо є҆сѝ всѧ̀ на по́льꙁꙋ дꙋ́шъ на́шихъ дѣйствꙋ́ѧй, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡ́въ.

Ли́къ,

А҆ми́нь.

По Моли́твѣ же, а҆́ще є҆стъ древѧ́ной Це́ркви ѡ҆снова́нїе, ꙗ҆́коже и҆ пе́рвѣе секи́рою, гⷤ въ бервно̀ ᲂу҆дарѧ́етъ, и҆ то́ежде гл҃е́тъ, И҆ и҆́детъ, тре́тюю ча́сть ѡ҆снова́нїѧ кропѧ̀, и҆ гл҃ѧ̀:

Въ и҆мѧ Ѿц҃а̀, и҆ ᲃн҃а, и҆ ᲃⷮ: Дх҃а. А҆ми́нь.

Кли́ръ же чтетъ ѱало́мъ рк҃а.

Въꙁвесели́хсѧ ѡ҆ ре́кшихъ мнѣ̀, въ до́мъ Гд҃нь вни́демъ.

Прише́дъ же на Ю҆́жнюю стра́нꙋ Нача́лникъ, ста́въ лице́мъ къ Ю҆́гꙋ: По сконча́нїи же ѱалма̀, Дїаконꙋ ре́кшꙋ:

Гд҃ꙋ помоли́мсѧ:

и҆ Кли́рꙋ:

Гд҃и поми́лꙋй.

Чтетъ Моли́твꙋ сі́ю:

Гд҃и І҆и҃ᲃ Хє҃ Бо́же нш҃ъ, ѿ Ю҆́га на ᲃпасе́нїе на́ше прише́дый, и҆ ѿ присѣ́нныѧ де́вическїѧ горы̀ ꙗ҆́кѡ ᲃвѧ́тъ ꙗ҆ви́выйсѧ, и҆ съ человѣ́ки пожи́вый, при́ꙁри ми́лостивнѡ, моли́мсѧ, на Кти́торѡвъ зача́тагѡ въ И҆мѧ твоѐ зда́ти сѧ Хра́ма, и҆ въ все́мъ благословѝ и҆́хъ, и҆ дарꙋ́й и҆́мъ ᲃи́лꙋ и҆ крѣ́епость, благомо́щїе же и҆ и҆ꙁѡби́лство съ здра́вїемъ, и҆ въ все́мъ къ съверше́нїю въ сла́вꙋ твою̀ зача́тагѡ дѣ́ла поспѣшество: Ты́ бо є҆сѝ Бо́гъ ми́лостемъ, и҆ щедрѡ́тъ, и҆ человѣ́кѡлю́бїѧ, и҆ тебѣ̀ ᲃла́вꙋ воꙁсыла́емъ, съ беꙁнача́льнымъ ти Ѿц҃емъ, и҆ съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ:

А҆ми́нь.

По Моли́твѣ же, а҆́ще древѧ́наѧ ѡ҆снова́етсѧ це́рковъ, вꙁемъ четве́ртое ᲃеки́рꙋ, гⷤ, ᲂу҆дарѧ́етъ въ сре́днее бервно̀, гл҃ѧ̀ є҆́же и҆ пе́рвѣе.

И҆ а҆́бїе и҆де́тъ, четве́ртꙋю ча́сть ѡ҆снова́ниѧ кропѧ̀, и҆ гл҃ѧ̀:

Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь. Кли́ръ же чтетъ ѱало́мъ рл҃а.

Помѧнѝ, Гд҃и, Дави́да и҆ всю̀ кро́тость є҆гѡ̀.

Прише́дъ же на мѣ́сто, и҆деже нача̀ кропи́ти, преста́етъ, и҆ шедъ ста́нетъ пре́дъ водрꙋже́ннымъ Кресто́мъ къ восто́кꙋ лице́мъ, по сконча́нїи же ѱа́лма, ᲃамъ Нача́лникъ съ всѧ́кимъ ᲂу҆миле́нїемъ начина́етъ пѣ́ти вкꙋ́пе съ всѣ́мъ Кли́ромъ:

Ца́рю небѣ́сный ᲂу҆тѣ́ши́телю:

По сконча́нии же пѣ́нїѧ, Дїа́конꙋ ре́кшꙋ:

Гд҃ꙋ помоли́мсѧ,

и҆ Кли́рꙋ:

Гд҃и поми́лꙋй.

Чтетъ Моли́твꙋ ᲃі́ю:

Гд҃и Бо́же нш҃ъ, и҆ꙁво́ливый на се́мъ мѣ́стѣ, и҆ на се́мъ поло́женномъ и҆ въ и҆мѧ твоѐ благослове́нномъ ка́мени ѡ҆снова́ти себѣ̀ Це́рковъ: Са́мъ твоѧ̀ ѿ твои́хъ тебѣ̀ приносѧ́щихъ, въ воꙁдвиже́нїи къ твое́мꙋ ᲃлавосло́вїю зижде́маго Хра́ма, (въ че́сть же и҆ па́мѧтъ, Имⷬ҇къ: Пра́ꙁдника и҆лѝ ᲃт҃а́гѡ,) милости́внѡ прїи́мъ, мнѡ́жествомъ твои́хъ небе́сныхъ и҆ зе́мныхъ бла́гъ воꙁда́ждъ: всѣ́мъ же къ соѡрꙋже́нїю и҆ соверш́енїю Це́ркве сеѧ̀ по́мощь творѧ́щимъ, тѣле́сное здра́вие и҆ дꙋше́вное ᲃпасе́нїе дарꙋ́й: дѣла́телѧ ᲂу҆крѣепѝ, невре́дны ѿ всѧ́кагѡ зла̀ ᲃъблюда́ѧ: ѡ҆снова́нїѧ же сі́ѧ нераꙁори́ма, и҆ непоꙁибле́ма съблюдѝ, и҆ Хра́мъ тво́й се́й въ ᲃъверше́ние ско́рѡ приведѝ: ꙗ҆́ко да въ не́мъ непреста́ннѡ всехва́лными Пѣ́сн̾ми и҆ славословле́нїи, и҆ беꙁкро́вными же́ртвами сла́вимъ и҆ воспева́емъ тѧ, є҆ди́нагѡ и҆стиннагѡ Бг҃а на́шегѡ. Тебѣ́ бо подоба́етъ всѧ́каѧ сла́ва, че́сть и҆ поклоне́ние, Ѿц҃ꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ:

А҆ми́нь.

Нача́лникъ:

Ми́ръ всѣ́мъ.

Кли́ръ:

И҆ дꙋхови твое́мꙋ.

Дїа́конъ же:

Со всѧ́кимъ ᲂу҆миле́нїемъ всѝ колѣ́нѣ прекло́нше, Гд҃ꙋ помоли́мсѧ.

Кли́ръ: гⷤ,

Господи поми́лꙋй.

Нача́лникъ же прекло́нь колѣ́нѣ на просте́ртомъ ко́врѣ съ всѣ́ми, ᲂу҆миле́ннѡ чтетъ Моли́твꙋ ᲃі́ю:

Хва́лимъ тѧ Гд҃и Бо́же ᲃи́лъ, ᲃпаси́телю нш҃ъ, ꙗ҆́кѡ премнѡ́гїѧ ра́ди твое́ѧ бла́гости и҆ человѣкѡлю́бїѧ, и҆ꙁбра́лъ и҆ ѡ҆свѧти́лъ є҆сѝ мѣ́сто сі́е, и҆ къ соꙁида́нїю на не́мъ Це́ркви въ сла́вꙋ Пресвѧта́гѡ и҆менѝ твое́гѡ, на́ми недосто́йными рабы̀ твои́ми ѡ҆снова́лъ є҆сѝ. Моли́мъ ᲂу҆́бѡ тѧ смѣре́ннѡ, колѣ́нѣ дꙋшъ и҆ тѣле́съ на́шихъ прекло́н̾ше, благоволѝ на мѣ́стѣ се́мъ и҆ Жерто́вникъ къ приноше́нїю на не́мъ беꙁкро́вныѧ Же́ртвы Пресвѧта́гѡ Тѣ́ла и҆ Чтⷭ҇ныѧ Крвѐ Ха҃ твое́гѡ, въ ᲃла́вꙋ твою̀ и҆ въ спⷭ҇нїе дꙋ́шъ на́шихъ соꙁда́тисѧ: и҆ ꙗ҆́коже хра́мъ, си́це и҆ Жерто́вникъ се́й, нача́ло ны́нѣ прїемлѧ́й, въ ᲃоверш́енїе ᲃпѣ́шнѡ твое́ю Бжⷭ҇тве́нною ᲃи́лою приведѝ, да въ не́мъ и҆ на не́мъ да́же до сконча́нїѧ вѣ́ка ᲃлавосло́вїе твое́гѡ Пресвѧта́гѡ И҆́мене, и҆ беꙁкро́вныѧ твоѧ̀ ᲃлове́сныѧ Же́ртвы ѿ правовѣ́рныхъ люді́й твои́хъ, тебѣ̀ беꙁпреста́ннѡ кро́мѣ всѧ́кагѡ препѧ́тїѧ приноси́ма и҆ соверш́аема бꙋ́дꙋтъ, всѧ́ бо ᲂу҆ тебѐ воꙁмо́жна сꙋ́тъ. И҆ тебѣ̀ ᲃла́вꙋ воꙁсыла́емъ, съ є҆диноро́днымъ ти Сы́номъ, и҆ съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆минь.

Всѣ́мъ же въста́вшимъ, Дїа́конъ гл҃е́тъ Є҆ктенїѧ ᲃі́ѧ:

Поми́лꙋй на́съ Бо́же, по вели́цѣй млⷭ҇ти твое́й, моли́мътисѧ, ᲂу҆слы́ши и҆ поми́лꙋй.

Кли́ръ:

Гд҃и поми́лꙋй, гⷤ.

Е҆щѐ моли́мсѧ ѡ҆ вели́комъ Королѝ нашемъ, И҆мⷬ҇къ:

Е҆щѐ моли́мсѧ ѡ҆ Преѡсвѧщен̾нейшомъ А҆рхїепⷭ҇копи на́шемъ И҆мⷬ҇къ: Е҆щѐ моли́мсѧ ѡ҆ благочести́выхъ Кти́торехъ, и҆ ѡ҆снова́телїй въ ᲃла́вꙋ Бж҃ію соѡрꙋжа́ти наче́ншагосѧ хра́ма И҆мⷬ҇къ: и҆ ѡ҆ благополꙋ́чномъ поспѣше́нїи ᲃт҃а́гѡ дѣ́ла и҆́хъ, о здра́вїи же, ᲃпⷭ҇нїи, и҆ ѡ҆ставле́нїи грѣхѡ́въ и҆́хъ, рцѣ́мъ всѝ, Гд҃и ᲂу҆слы́ши и҆ поми́лꙋй.

Е҆щѐ моли́мсѧ, ѡ҆ є҆́же приста́вити дѣ́лꙋ семꙋ̀ ᲃт҃о́мꙋ А҆́гг҃ела храни́телѧ, ѿ всѧ́кагѡ зла́гѡ ѡ҆бстоѧ́нїѧ, и҆ ви́димыхъ и҆ неви́димыхъ врагѡ́въ препѧ́тий и҆ꙁбавлѧ́юща и҆ защища́юща, и҆ дѣла́телїй ᲂу҆крѣплѧ́юща, рцѣ́мъ всѝ, Гд҃и ᲂу҆слы́ши и҆ поми́лꙋй.

Нача́льникъ же воꙁглаша́етъ:

Ꙋ҆слы́ши ны Бо́же ᲃп҃си́телю нш҃ъ, ᲂу҆пова́нїе всѣ́мъ ко́нцемъ землѝ, и҆ сꙋ́щимъ на мо́ри дале́че, и҆ млⷭ҇тве, млⷭ҇тивъ бꙋ́ди на́мъ ѡ҆ грѣсе́хъ на́шихъ, и҆ поми́лꙋй на́съ, и҆ ѡ҆снова́телїй ᲃт҃а́гѡ хра́ма сегѡ̀: млⷭ҇тивъ бо и҆ человѣкѡлю́бецъ Бо́гъ є҆сѝ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ:

А҆ми́нь.

И҆ а҆́бїе быва́етъ ѿпꙋ́стъ ѡ҆бы́чный Хра́мꙋ. Пода́въ же ᲃт҃ль благослове́нїе люде́мъ, и҆ ѿложи́въ ᲃщ҃е́нныѧ ѡ҆де́жды, и҆де́тъ во своѧ̀ си.

А҆́ще же съ Литі́ею прише́лъ є҆́сть, ꙗ҆́коже предꙋкаꙁа́сѧ, та́кожде съ Литі́ею воꙁвращ́етсѧ въ Це́рковь, ѿню́дꙋже прїйде, пою́щꙋ Кли́рꙋ ᲃтихи́ры хра́мꙋ, и҆лѝ и҆́но что̀ є҆́же а҆́ще и҆ꙁволѧтъ, въ сла́вꙋ Бж҃ію.

Вꙁе́мъ І҆ере́ѵ̆ Е́пітра́хиль на себє̀, и покади́въ Кре́стъ Фимїа́момъ благослове́ннымъ, начина́етъ ѡ҆бы́чнѡ.

Благослове́нъ Бо́гъ нш҃ъ.

Ли́къ,

Трⷭ҇то́е. и҆ по Ѿч҃е нш҃ъ:

І҆ере́ѵ̆,

Ꙗ҆́кѡ Твоѐ є҆́стъ Ца́рство:

И҆ а҆́бїе пою́тъ, и҆лѝ чтꙋ́тъ тропарѝ сі́ѧ. Гла́съ а҃:

Сп҃сѝ, Гд҃и, людѝ своѧ̀.

Сла́ва:

Въꙁнесы́йсѧ на Кре́стъ во́лею.

И҆ ны́нѣ:

Застꙋ́пнице хрⷭ҇тїа́нѡмъ непосты́днаѧ.

Посе́мъ ре́кшꙋ І҆ере́ю,

Гд҃ꙋ помоли́мсѧ.

и҆ Кли́рꙋ:

Гд҃и поми́лꙋй.

Чтетъ Моли́твꙋ ᲃі́ю.

Гд҃и Вседержи́телю Бо́же ѿц҃ъ нашихъ, жеꙁло́мъ Мѡѵ꙼се́ѡвымъ, и҆ дре́вомъ ѡ҆́нымъ, на не́мъ же змїю̀ мѣ́дѧнꙋю въ пꙋсты́нѣ, ѿ ᲂу҆грыꙁе́нїѧ змїє́въ и҆ꙁбавлѧ́ѧ лю́ди, привѧꙁа́ти повелѣ́лъ є҆сѝ, ѡ҆́браꙁъ честна́гѡ и҆ животворѧ́щагѡ Крⷭ҇та̀ въꙁлюбле́ннагѡ ᲃн҃а твое́гѡ Гд҃а нашегѡ І҆҆и҃ᲃ Ха҃ проѡбраꙁи́вый, и҆́мже дїа́волѧ си́ла ᲂу҆праꙁдни́сѧ, и҆ змі́емъ ѡ҆́нымъ дре́внымъ вселꙋка́вымъ ᲂу҆гриꙁеный и҆ ᲂу҆мерщвле́нный ро́дъ нш҃ъ ѡ҆животвори́сѧ: смире́ннѡ твое́мꙋ беꙁмѣ́рномꙋ челове́кѡлю́бїю припа́дающе, моли́мсѧ и҆ ми́лисѧ дѣ́емъ, послѝ ны́нѣ благослове́нїе твоѐ небе́сное, и҆ благословѝ зна́менїе ᲃі́е Крⷭ҇тное, и҆ да́ждь є҆мꙋ̀ си́лꙋ и҆ крѣ́пость благослове́ннагѡ ѡ҆́нагѡ, кро́вїю ᲃн҃а твое́гѡ ѡ҆кропле́ннагѡ дре́ва, въ є҆́же бы́ти хра́мꙋ ᲃемꙋ̀, и҆́мени твое́мꙋ̀ соꙁда́нномꙋ, покро́въ держа́венъ, тве́рдое ѡ҆гражде́нїе, и҆ ѿ всѧ́кагѡ зла́гѡ ѡ҆бстоѧ́нїѧ всегда́шнее и҆ꙁбавле́нїе, благолѣ́пїе же и҆ ᲂу҆краше́нїе, и҆ зна́менїе ви́димымъ и҆ неви́димымъ врагѡ́мъ стра́шное и҆ ᲂу҆жа́сное, всѣ́хъ же въ хра́мъ ᲃе́й вѣ́рою въходѧ́щихъ, и҆ нанѐ вꙁира́ющихъ, и҆ Распѧ́томꙋ на Крⷭ҇тѣ́ ᲃн҃ꙋ твое́мꙋ кла́нѧющихсѧ благословѝ, и҆ ᲃи́лою крестною ѡ҆гради́въ, неврежде́нныхъ ѿ всѧ́кагѡ зла̀ всегда̀ съблюдѝ: Кре́стъ бо є҆́стъ красота̀ церко́внаѧ, Цр҃емъ держа́ва, вѣ́рнымъ ᲂу҆твержде́нїе, Па́влова похва́ла, бѣ́сѡмъ же ꙗ҆́ꙁва. Е҆́й, Гд҃и Бо́же нш҃ъ, всѣ́хъ вѣ́рою на зна́менїе ᲃі́е въꙁира́ющихъ, и҆ ᲃп҃си́тельнꙋю Гд҃а на́шегѡ І҆и҃ᲃ Ха҃ ᲃн҃а твое́гѡ ᲃтрⷭ҇ть въспомина́ющихъ, и҆ тебѣ прилѣ́жнѡ молѧ́щихсѧ, млⷭ҇остивнѡ ᲂу҆слы́ши и҆ человѣкѡлю́бне поми́лꙋй: здра́вїе же съ долгоде́нствїемъ дарꙋ́й, и҆ црⷭ҇ствїѧ твое́гѡ сподобѝ, благода́тїю, и҆ щедро́тами, и҆ человѣкѡлю́бїемъ є҆диноро́днагѡ ᲃн҃а твое́го, съ ни́мъ же благослове́нъ є҆сѝ со Пресвѧты́мъ, и҆ благи́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆ же в̾ꙁе́мъ ᲃщ҃е́ннꙋю Во́дꙋ, кропи́тъ є҆ю̀ Кре́стъ, гл҃ѧ̀:

Благословлѧ́етсѧ и҆ ѡ҆свѧща́етсѧ зна́менїе сі́е Крⷭ҇тное, блⷣтїю ᲃт҃а́гѡ Дх҃а, ѡ҆кропле́нїемъ Воды̀ ᲃеѧ̀ ᲃщ҃е́нныѧ, Въ и҆мѧ Ѿц҃а̀, и҆ ᲃн҃а, и҆ ᲃⷮ: Дх҃а. А҆ми́нь.

А҆́бїе же чтетъ, и҆ли пое́тъ Тропаръ се́й. Гла́съ д҃.

Воꙁнесы́йсѧ на Кре́стъ во́лею теꙁоимени́тымъ ти люде́мъ, и҆ Хра́мꙋ твое́мꙋ ᲃемꙋ̀ щедроты̀ твоѧ̀ дарꙋ́й Хє҃ Бо́же, въꙁвеселѝ ᲃи́лою твое́ю вѣ́рныѧ лю́ди твоѧ̀, и҆ꙁбавле́нїе и҆́мъ дарꙋ́ѧ, ѿ всѣ́хъ ви́димыхъ врагѡ́въ, посо́бїемъ Крⷭ҇та̀ твое́гѡ ᲃи́лы, то́й бо є҆́стъ ѿ тебѐ да́ннаѧ мі́рꙋ непобѣди́маѧ побѣ́да.

Посе́мъ а҆́бїе твори́тъ ѡ҆бы́чный ѿпꙋ́стъ Хра́мꙋ, дѣла́телїе же вꙁе́мше Кре́стъ, поставлѧ́ютъ є҆го̀ на свое́мъ мѣ́стѣ верхꙋ̀ Це́ркве.

Вѣ́стнѡ ᲂу҆́бѡ бꙋ́ди, ꙗ҆́кѡ трѝ ве́щи сꙋ́тъ, ꙗ҆́же никто́же кро́мѣ сама́гѡ точїю Епⷭ҇па съверша́ти мо́жетъ, сі́естъ Хірото́нїѧ, и҆лѝ Рꙋкоположе́нїе, на ᲃщ҃енническїѧ ᲃте́пени. Ꙍ҆свѧщенїе вели́кагѡ Мѵ́ра, и Ꙍ҆бновле́нїе, и҆лѝ ѡ҆свѧще́нїе Це́ркве. Се́й же ѡ҆бы́чай Це́рковъ ᲃⷮ: Восто́чнаѧ Правосла́внокаѳоли́ческаѧ, ѿ Преда́нїѧ ᲃт҃ы́хъ А҆пⷭ҇лъ (и҆́же ѿ сама́гѡ ᲂу҆ставополо́жника, и҆ Законода́вца Ха҃ Гд҃а прїѧ́ша,) съдержи́тъ, ꙗ҆́коже Бжⷭ҇тве́нный А҆плⷭ҇кїй Ꙋ҆ч҃никъ Діѡнѵ́сїй А҆реѻпагі́та ᲃвѣдителствꙋ́етъ, въ Кни́ꙁѣ свое́й ѡ҆ ᲃщ҃еннонача́лїи Црк҃о́вномъ въ Главѣ̀ пѧ́той, гл҃ѧ̀: А҆́ще бо и҆ ѿ ᲃщ҃енникѡвъ съверша́ютсѧ нѣ́кїѧ ѿ честны́хъ Та́инъ, но нико́лиже ᲃще́нное Бгорожде́нїе ᲃщ҃енникъ дѣйствова́ти и҆́матъ, Бжⷭ҇твеннагѡ Мѵ́ра кро́мѣ. Ни́же сꙋ́щаѧ Бжⷭ҇тве́ннагѡ Причаще́нїѧ съверши́тъ та́инства, а҆́ще не на Бжⷭ҇твенномъ Жерто́вницѣ причасти́телныѧ предло́житъ ѡ҆́браꙁы: но ни́же са́мъ ᲃщ҃енникъ бꙋ́детъ, а҆́ще не ѿ ᲃщ҃еннонача́лническихъ съверше́нїй, въ се́й жре́бїй пречте́нъ бꙋ́детъ. Тѣ́мъ же Бжⷭ҇твенное ᲂу҆ставоположе́нїе, ᲃщ҃еннонача́лническихъ Чи́нѡвъ ᲃщ҃е́нїе, и҆ Бжⷭ҇тве́ннагѡ Мѵ́ра съверше́нїе, и҆ ᲃщ҃енное Жерто́вника ᲃщ҃еннодѣ́йствїе, Бжⷭ҇тве́нныхъ ᲃщ҃еннонача́лникѡвъ, съверше́ннѣ дѣйстве́ннымъ ᲃи́ламъ є҆ди́нѣ въ достоѧ́нїе жре́бїемъ предадѐ. Ма́ѯимъ же ᲃт҃ы́й И҆сповѣ́дникъ и҆столкова́тель Деѡиѵ́сїевъ, на сі́ѧ ᲃловеса̀, гл҃е́тъ, Знамена́й, ꙗ҆́кѡ ѡ҆свѧщати и҆ съверша́ти Мѵ́ро, нѣ́сть Преꙁви́терѡвъ, и҆́хже и҆ ᲃщ҃е́нники нарица́етъ: ко ни́же Жерто́вникъ ᲃъверша́ти, (сі́естъ, ѡ҆свѧща́ти) ꙗ҆́кѡ да и҆ прино́ситъ на не́мъ: ни́же Рꙋкополага́ти: ᲃі́ѧ бо є҆ди́нъ А҆рхїере́ѵ꙼ тво́ритъ, и҆́хже кро́мѣ Преꙁви́теръ ни́же Крⷭ҇ти́ти, ни́же приноси́ти бꙋ́детъ, но въ преⷣѡсвѧще́нныхъ ѿ Е҆пⷭ҇па ᲃщ҃еннодѣйствова́ти бꙋ́детъ.

Подо́бнымъ ѡ҆́браꙁомъ и҆ Геꙍ́ргїй Пахиме́ра того́жде ᲃт҃а́гѡ Діѻнѵ́сїѧ Толко́вникъ, на та́ѧжде ᲃловеса̀ гл҃е́тъ, Все́мъ ᲂу҆́бѡ и҆ꙁрѧ́днѣе ᲃщ҃еннонача́лникꙋ къ ᲃщ҃еннодѣ́йствїю, а҆ не чре́ꙁъ и҆́ныхъ ᲃлꙋже́нїе, въ достоѧ́нїе жре́бїемъ преда́нѡ є҆́стъ, Мѵ́ра ᲃщ҃енїе, Жерто́вника ѡ҆свѧщенїе, и҆ ᲃщ҃еннонача́лническихъ Чи́нѡвъ Рꙋкоположе́нїѧ.

Тѣ́мъ же ᲂу҆бѡ никто́же ѿ І҆ере́ѵ̆ Це́рковъ съверше́ннѣ ѡ҆свѧти́ти ника́коже нико́лиже мо́жетъ, а҆́ще же и҆ дерꙁнетъ кто̀ ᲃі́е дѣйствова́ти, не то́чїю ничто́же съверши́тъ, но и҆ ᲃме́ртнѡ ꙗ҆́коже каса́тисѧ дерꙁнꙋ́вый не да́нныѧ є҆мꙋ̀ вла́сти, съгрѣ́шите, и҆ и҆ꙁверже́нїѧ винѣ̀ подлѣга́ти бꙋ́детъ. Но ᲂу҆бѡ понеже всегда̀ и҆ всю́дꙋ Е҆пⷭ҇пꙋ къ ѡ҆свѧщенїю Це́рквїй шествова́ти не воꙁмо́жнѡ, да не новосъѡрꙋже́нныѧ въ ᲃла́вꙋ Бж҃ію Церквы̀ на до́лꙁѣ пра́ꙁдны пребꙋ́дꙋтъ, чре́ꙁъ Протопо́пꙋ ѿ Е҆пⷭ҇па власть си́цевꙋю да́ннꙋю и҆мꙋ́щагѡ, сі́е благослове́нїе съ положе́нїемъ А҆нтіми́са, и҆́же є҆́стъ в̾мѣ́сто Престо́ла съверше́ннѡ ѡ҆свѧщенный, въ є҆́же доне́ли же съверше́ннымъ ѡ҆свѧщенїемъ ѿ Е҆пⷭ҇па не ѡ҆свѧти́тсѧ Це́рковъ, Бжⷭ҇тве́ннаѧ беꙁ̾кро́внаѧ Же́ртва съверши́тисѧ воꙁ̾можетъ въ не́й. И҆мы́й ᲂу҆́бѡ ѿ Е҆пⷭ҇па̀ си́цевꙋю вла́сть, Протопо́па (и҆лѝ и҆́нъ кто̀ ѿ І҆ере́ѵ̆) собра́въ ᲃщ҃е́нникѡвъ побли́жнихъ, є҆ли́кѡ и҆́хъ бы́ти мо́жетъ, съ ве́чера съверша́етъ въ Но́вой Це́ркви малꙋ́ю Вече́рню, потомъ же ѡ҆бы́чное Всено́щное Бдѣ́нїе хра́мꙋ.

По Ꙋ҆трни же пре́жде вре́мене слꙋже́нїѧ прихо́дитъ къ Це́ркви, и҆ ѡ҆дѣѧ́всѧ съ и҆́ными ᲃщ҃е́нники въ Е҆пітра́хиль и҆ Фелѡ́нь, пре́дъ Це́рквїю, и҆лѝ въ Притво́рѣ Церко́вномъ, поста́вленꙋ сꙋ́щꙋ ᲃтолцꙋ̀ че́стнѡ покрове́ннꙋ, и҆ на не́мъ А҆нтими́сꙋ Е҆ѵⷢ҇лїю и҆ Крⷭ҇тꙋ, и҆ Водѣ̀ въ ᲃосꙋ́дѣ предꙋготовле́нной, въ Це́ркви нико́мꙋ же сꙋ́щꙋ. Престо́лъ же и҆ Жерто́вникъ да бꙋ́детъ ѡ҆бнаже́нъ.

Соверша́етъ А҆́бїе мало́е ѡ҆свѧщенїе водѣ̀ А҆́вгꙋстово, по ᲃоверше́ниїи же ѡ҆свѧщенїѧ тво́рѧтъ Литі́ю ѻ҆́крестъ це́ркве ничто́же носѧ́ще то́чїю Крⷭ҇ты, пою́тъ же Литі́йныѧ ᲃтіхиры̀, и҆лѝ И҆рмосы̀ Хра́мꙋ, Нача́лникъ же кро́питъ всѧ̀ стѣ́ны церко́вныѧ, гл҃ѧ̀:

Ꙍ҆кропи́ши мѧ ѵ҆ссѡ́помъ и҆ ѡ҆чищꙋ́сѧ, ѡ҆мы́еши мѧ и҆ па́че снѣ́га ᲂу҆бѣлю́сѧ, въ И҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Ꙍ҆бше́дше же є҆дино́щи, ста́нꙋтъ пре́дъ церко́вными две́рьми, ре́кшꙋ Дїа́конꙋ:

Гд҃ꙋ помоли́мсѧ.

и҆ Кли́рꙋ:

Гд҃и поми́лꙋй.

Нача́льникъ чтетъ Моли́твꙋ сі́ю:

Гд҃и Бо́же нш҃ъ, Моли́твами Пресвѧты́ѧ Влⷣчица на́шеѧ Бц҃а и҆ Прⷭ҇нѡ Дв҃ы Мр҃їѧ, и҆ ст҃а́го И҆мⷬ҇къ: є҆го́же є҆́стъ хра́мъ, и҆ всѣ́хъ ᲃт҃ы́хъ твои́хъ, дѣла̀ рꙋ́къ на́съ недосто́йныхъ рабѡ́въ твои́хъ и҆спра́ви, и҆ въ все́мъ на́мъ благоꙋгожда́ти твое́й бла́гости сподобѝ, ты́ бо І҆ере́ѡмъ твои́мъ си́цевꙋю благода́ть надъ и҆́нѣми дарова́лъ є҆сѝ, ꙗ҆́кѡ да всѐ є҆́же въ И҆мѧ твоѐ досто́йнѡ и҆ соверше́нно воспро́сѧтъ, прі́имꙋтъ, и҆ є҆́же сотво́рѧтъ, ѿ тебѐ ᲃі́е бы́ти сотво́ренно вѣрꙋетсѧ:

Приле́жнѡ ᲂу҆́бо и҆ смире́нно моли́мсѧ, и҆ твое́мꙋ благоꙋтро́бїю ми́лисѧ дѣ́емъ, ꙗ҆́кѡ да всѐ ны́нѣ на́ми посѣща́емое посѣти́ши, и҆ благословлѧ́емое благослови́ши, и҆ съ вохо́домъ на́шимъ въхо́дꙋ ᲃт҃ы́хъ А҆́гг҃лъ ᲃътвори́ши бы́ти, съ слꙋжа́щихъ на́мъ и҆ съпрославлѧ́ющихъ твою̀ блгⷭ҇сть, въ бѣ́гство же претворѧ́ющихъ всѐ дїа́вольское ѡ҆полче́нїе, и҆ и҆справлѧ́ющихъ вохо́ды и҆ и҆схо́ды на́шѧ къ дѣла́нїю за́повѣдїй твои́хъ: Ты́ бо є҆сѝ всѧ̀ къ ᲃпⷭ҇нїю дꙋшъ на́шихъ дѣйствꙋ́ѧй, и҆ тебѣ̀ ᲃла́вꙋ воꙁсыла́емъ, съ є҆диноро́днымъ ти Сы́номъ, и҆ съ Пресвѧты́мъ и҆ благи́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ:

А҆ми́нь.

Абїе же посе́мъ знамена́етъ две́рѣ десни́цею крестаѡ́браꙁнѡ гл҃ѧ̀:

Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а.

С ми́ромъ внидѣ́мъ.

И҆ ѿверꙁъ две́рѣ, вхо́дитъ въ Це́рковь.

Кли́рꙋ же ре́кшꙋ:

Ꙍ҆ и҆менѝ Гд҃ни.

А҆бїе пою́тъ Стихи́рꙋ ᲃі́ю. Гла́съ и҃.

Ꙗ҆́коже Закхе́ѡвꙋ до́мꙋ твои́мъ Хє҃ въхо́домъ ᲃпⷭ҇нїе бы́сть, ᲃи́це и҆ ны́нѣ вхо́домъ ᲃщ҃енныхъ слꙋжи́телїй твои́хъ, и҆ съ ни́ми ᲃт҃ы́хъ твои́хъ А҆́гг҃елъ, ми́ръ тво́й пода́ждъ хра́мꙋ семꙋ̀, и҆ милости́внѡ благословѝ є҆гѡ̀, ᲃп҃са́ѧ и҆ просвѣща́ѧ дꙋша на́ша.

Нача́лникъ же кро́питъ всю Це́рковь и҆ весь ѻ҆́лтаръ, гл҃ѧ̀:

Ꙍ҆кропи́ши мѧ ѵ҆ссо́помъ и҆ ѡ҆чищꙋ́сѧ:

И҆ проч: Сконча́вшꙋ же є҆мꙋ̀ кропле́нїе, и҆ Кли́рꙋ пѣ́нїе, ᲃта́въ пре́дъ црⷭ҇кими Вра́ты начина́етъ ѡ҆бы́чно.

Благослове́нъ Бо́гъ нш҃ъ:

Кли́ръ: же ве́съ пое́тъ:

Ца́рю небѣ́сный.

Посе́мъ чтꙋ́тъ, Трⷭ҇то́е: Ѿч҃е нш҃ъ: Прїйдѣ́те поклони́мсѧ, гⷤ. и҆ а҆́бїе ѱало́мъ рк҃а.

Въꙁвесели́хсѧ ѡ҆ ре́кшихъ мнѣ въ до́мъ Гд҃нь вни́демъ:

Ве́съ до конца̀. Сла́ва: И҆ ны́нѣ: А҆лл҃илꙋ́іѧ, гⷤ.

Дїа́конъ же гл҃е́тъ Е҆кте́нїѧ ᲃі́ѧ: (а҆́ще же Дїа́кона нѣ́сть, са́мъ Нача́лникъ гл҃е́тъ ѧ҆̀.)

Ми́ромъ Гд҃ꙋ помоли́мсѧ.

Кли́ръ:

Гд҃и поми́лꙋй.

Ꙍ҆ свы́шнѣмъ ми́ре и҆ ᲃп҃се́нїи дꙋ́шъ на́шихъ, Гд҃ꙋ помоли́мсѧ.

Ꙍ҆ ми́рѣ в̾сегѡ̀ мі́ра, благостоѧ́нїи ᲃт҃ы́хъ Бж҃:

Ꙍ҆ Преѡсвѧще́нномъ А҆рхїепⷭ҇пѣ (и҆лѝ ѡ҆ Бо́голюби́вомъ Е҆пⷭ҇пѣ,) на́шемъ Имⷬ҇къ: че́стнѣмъ Преꙁви́терствѣ, є҆́же ѡ҆ Хє҃ Дїа́конствѣ, и все́мъ при́чтѣ и҆ люде́хъ, Гд҃ꙋ помоли́мсѧ.

Ꙍ҆ є҆́же посѣти́ти мѣ́сто ᲃі́е, и҆ благода́тїю свое́ю ѡ҆сѣни́ти є҆̀, Гд҃ꙋ помоли́мсѧ.

Ꙍ҆ є҆́же благослови́тисѧ хра́мꙋ семꙋ̀, и҆ сꙋ́щей въ не́мъ Тра́пеꙁѣ небе́снымъ благослове́нїемъ, Гд҃ꙋ помоли́мсѧ.

Сі́еже гⷤ, гл҃е́тъ.

Нача́лникъ же десни́цею подне́съ ю҆̀ го́рѣ къ Восто́кꙋ, благословлѧ́етъ, крестаѡ́браꙁно знамена́ѧ.

Ꙍ҆ вели́комъ Королѝ на́шемъ И҆мⷬ҇къ: ѡ҆ благовѣ́рныхъ Кнѧꙁе́хъ и҆ Па́нѣхъ на́шихъ, ѡ҆ все́й Пола́тѣ и҆ Во́ехъ и҆́хъ, и҆ ѡ҆ є҆́же ми́рнаѧ и҆ блага́ѧ всегда̀ гл҃а́ти въ ᲃрⷣци и҆́хъ ѡ҆ це́ркви свое́й, Гд҃ꙋ помоли́мсѧ.

Ꙍ҆ благочести́выхъ и҆ хрⷭ҇толюби́выхъ бл҃же́нныхъ Кти́торѡвъ че́стнагѡ хра́ма сегѡ̀, и҆ ѡ҆ всѣ́хъ вѣ́рою, благоговѣ́нїемъ и҆ стра́хомъ Бж҃іимъ входѧ́щихъ во́нь, Гд҃ꙋ помоли́мсѧ.

Ꙍ҆ благорастворе́нїи во́ꙁдꙋховъ, ᲂу҆множе́нии плодо́въ:

Ꙍ҆ плава́ющихъ, пꙋтшествꙋ́ющихъ, недꙋгꙋ́ющихъ:

Ꙍ҆ є҆же и҆скорени́ти всѧ̀ є҆́реси и҆ ѡ҆тстꙋ́пства, и҆ всѐ беꙁ̾бо́жїе А҆гарѧ́нское, насади́ти же всю́дꙋ правовѣ́рїе и҆ благоче́стїе, и҆ воꙁдви́гнꙋти ро́гъ хрⷭ҇тїѧ́нскїй, Гд҃ꙋ помоли́мсѧ.

Ꙍ҆ є҆́же ᲂу҆слы́шати мо́лбы всѣ́хъ вѣ́рнѡ въ хра́ме се́мъ молѧ́щихсѧ, и҆ млⷭ҇тивнѡ и҆сполни́ти проше́нїѧ и҆́хъ, Гд҃ꙋ помоли́мсѧ.

Ꙍ҆ є҆же и҆ꙁба́витисѧ на́мъ ѿ всѧ́коѧ ско́рби:

Застꙋпѝ, ᲃп҃сѝ, поми́лꙋй и҆ сохранѝ на́съ Бо́же:

Пресвѧтꙋ́ю, че́стꙋю:

Кли́ръ:

Тебѣ̀ Гд҃и.

Нача́лникъ воꙁглаша́етъ:

Ꙗ҆́кѡ подоба́етъ ти всѧ́каѧ сла́ва:

Кли́ръ:

А҆ми́нь.

Абїе же чтꙋ́тъ ѱаломъ р҃к.

Воꙁведо́хъ ѻ҆́цѣ моѝ въ горы: весь до конца. По сконча́нии же ᲃегѡ̀, пою́тъ Стихи́рꙋ, ᲃі́ю Гла́съ є҃.

Благословѝ Гд҃и хра́мъ се́й и҆менѝ твое́мꙋ ᲃоꙁда́нный, и҆ ᲂу҆слыша́ны въ не́мъ ᲃътворѝ Моли́твы на́ша, же́ртвы же и҆ приноше́нїѧ прїймѝ, и҆ грѣхѝ люді́й твои́хъ всѧ̀ ѡ҆чи́сти, и҆ благода́ть ᲂу҆ тебѐ полꙋчи́ти сътворѝ, и҆ всѣ́хъ на́съ поми́лꙋй по вели́цѣй твое́й млⷭ҇ти.

Сконча́нꙋ же пѣ́нїю, Нача́лникъ схо́дитъ въ ѻ҆́лтаръ, гл҃ѧ̀:

Съ ми́ромъ вни́дѣмъ.

Кли́ръ:

Ꙍ҆ и҆менѝ Гд҃ни.

Нача́лникъ же кро́питъ Тра́пеꙁꙋ и҆ Жерто́вникъ, гл҃ѧ̀:

Ꙍ҆кропи́ши мѧ ѵ҆ссо́помъ и҆ ѡ҆чищꙋ́сѧ: И҆ проч:

Посе́мъ а҆́бїе благословлѧ́етъ И҆нди́тїѧ Престо́льнаѧ и҆ Жерто́вничнаѧ, рекшꙋ Дїа́конꙋ:

Гд҃ꙋ помолимсѧ.

и҆ Кли́рꙋ:

Гд҃и, поми́лꙋй.

Зрѝ на пре́дѣ, Чи́нъ благослове́нїѧ И҆нди́тїй и҆ Сава́новъ

По соверше́нии же си́хъ ѡ҆дѣва́етъ Престо́лъ и҆ Жерто́вникъ ничто́же гл҃ѧ̀: ᲃта́въ же пре́дъ Престо́ломъ, ре́кшꙋ Дїа́конꙋ:

Гд҃ꙋ помоли́мсѧ.

Кли́ръ:

Гд҃и, поми́лꙋй.

Чтетъ Моли́твꙋ ᲃі́ю:

Гд҃и Бж҃е нш҃ъ Ца́рю вѣ́ковъ и҆ тво́рче всѣ́хъ, ве́ꙁде на всѧ́комъ мѣ́стѣ Влады́чствїѧ твое́гѡ сы́й, всѧ̀ и҆сполнѧ́ѧй, и҆ всѧ̀ дѣйствꙋ́ѧй, мѣ́ста къ ᲃлавосло́вїю свое́мꙋ и҆ꙁбира́ѧй, и҆ сі́ѧ благословѧ́й:

При́ꙁри ны́нѣ на Моли́твꙋ на́съ, смире́нныхъ и҆ недосто́йныхъ рабѡ́въ твои́хъ, и҆ хра́мꙋ семꙋ̀ є҆го́же въ ᲃла́вꙋ свою̀ и҆ꙁбра́лъ и҆ ѡ҆снова́лъ є҆сѝ, бꙋ́ди покрови́тель и҆ защи́тникъ, ꙗ҆кѡ да ни є҆дина̀ злоба̀ проти́вныхъ си́лъ здѐ пребы́ти воꙁмо́жетъ, но всѧ̀ всегда̀ ᲃи́лою твое́ю прогони́ма бꙋ́детъ.

Е҆й Гд҃и Бо́же ᲃп҃си́телю нш҃ъ, и҆ꙁлѣ́й небе́сное твоѐ благослове́нїе на хра́мъ ᲃе́й молитве́нный, ꙗ҆́кѡ да всѝ въ не́мъ приꙁыва́ющїи тѧ по́мощъ млⷭ҇рдїѧ твое́гѡ ѡ҆щꙋ́тѧтъ: и҆ не ѿемле́мѡ и҆ ненасилствова́ннѡ благослове́нїе мѣ́ста ᲃегѡ̀ твое́ю благода́тїю, ѿ всѣ́хъ съпроти́вныхъ ѡ҆бстоѧ́нїй въ вѣ́ки ᲃъхран̀и, ꙗ҆́кѡ да въ не́мъ тебѣ̀ ѿ на́съ всегда̀ чⷭ҇тое ᲃлꙋже́нїе на́ше приноси́мое, и҆ Моли́твы, Же́ртвы же и҆ благодаре́нїѧ, съ ᲃлавосло́вїемъ благопрїѧ́тны бꙋ́дꙋтъ:

Ты́ бо є҆сѝ Бо́гъ млⷭ҇тїй и҆ щедрѡ́тъ и҆ человѣкѡлю́бїѧ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ во вѣ́ки вѣ́кѡвъ:

Кли́ръ:

А҆ми́нь.

А҆́бїе же вꙁе́мле Антими́съ, и҆ полага́етъ є҆гѡ̀ на Престо́лѣ, гл҃ѧ̀ велегла́снѡ:

Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а,

Благослове́нїемъ и҆ и҆ꙁволе́нїемъ Преосвѧще́ннагѡ А҆рхїепⷭ҇па на́шегѡ Митрополи́та Кі́евскагѡ Га́лицкагѡ и҆ всеѧ̀ Рꙍ́ссїи, И҆мⷬ҇къ: (и҆лѝ Бо́голюби́вагѡ Епⷭ҇па И҆мⷬ҇къ: Богосп҃са́емагѡ гра́да И҆мⷬ҇къ:) полага́ю на се́й благослове́нной Тра́пеꙁе въ хра́мѣ се́мъ Бжⷭ҇тве́нный се́й благода́тїю Пресвѧта́гѡ Дх҃а, рꙋко́ю же є҆гѡ̀ ᲃт҃и́тельскою ᲃъверше́нно ѡ҆свѧщенный А҆нтими́съ, въ є҆́же доне́лиже ᲃъверше́нно А҆рхїере́ѵ꙼скою рꙋко́ю ѡ҆ст҃и́сѧ Це́рковъ и҆ Тра́пеꙁа сі́ѧ, съверша́тисѧ на не́мъ Божестве́ннаѧ беꙁкро́внаѧ Же́ртва, въ сла́вꙋ Бг҃а є҆ди́нагѡ въ Трⷪ҇ци ᲃт҃о́й слави́магѡ, въ спⷭ҇нїе же всѣ́хъ правовѣ́рныхъ люді́й.

А҆бїе же посе́мъ Кли́ръ пое́тъ вы́шше пи́санꙋю ᲃтихи́рꙋ. Гла́съ є҃:

Благослови Гд҃и хра́мъ се́й:

По пѣ́нїи же Дїа́конъ а҆́ще є҆́сть: а҆́ще же нѣ́стъ, са́мъ Началствꙋ́ѧй, гл҃е́тъ Е҆кте́нїѧ сі́ѧ.

Поми́лꙋй на́съ Бо́же по вели́цѣй млⷭ҇ти твое́й, мо́лимътисѧ ᲂу҆слы́ши и҆ поми́лꙋй.

Ли́къ,

Гд҃и, поми́лꙋй гⷤ.

Е҆щѐ моли́мсѧ ѡ҆ Вели́комъ Королѝ на́шемъ, И҆мⷬ҇къ: и҆ ѡ҆ є҆́же Гд҃ꙋ Бг҃ꙋ на́шемꙋ гл҃а́ти ми́рнаѧ и҆ блага́ѧ всегда̀ въ срⷣци є҆гѡ̀ ѡ҆ Це́ркви свое́й ᲃто́й и҆ всѣ́хъ лю́дехъ ᲃвои́хъ, и҆ благопоспѣши́ти є҆мꙋ̀ въ все́мъ, и҆ покори́ти подъ но́ꙁѣ є҆гѡ̀ всѧ́кагѡ вра́га и҆ ᲃꙋпоста́та.

Е҆щѐ моли́мсѧ ѡ҆ Преѡсвѧще́нномъ А҆рхїепⷭ҇пѣ на́шемъ всеѧ̀ Рꙍ́ссїи Митрополи́ти И҆мⷬ҇къ: (и҆лѝ ѡ҆ Бо́голюби́вомъ Епⷭ҇ко́пѣ на́шемъ И҆мⷬ҇къ:)

Е҆щѐ моли́мсѧ ѡ҆ бл҃же́нныхъ и҆ приснѡпомина́емыхъ Кти́торехъ ны́нѣ благослове́ннагѡ Хра́ма ᲃегѡ̀, и҆ ѡ҆ є҆́же Гд҃ꙋ Бг҃ꙋ на́шемꙋ благослови́ти и҆́хъ, здра́вїемъ же и҆ долгоде́нствїемъ, и҆ всѧ́кимъ благополꙋче́нїемъ ᲂу҆гобꙁи́ти, и҆ благодетѣльствова́ти и҆́хъ.

Е҆щѐ моли́мсѧ, ѡ҆ є҆́же ᲂу҆слы́шаннымъ бы́ти Моли́твамъ всѣ́мъ прибѣга́ющимъ въ Хра́мъ сей, и҆ всѧ̀ ꙗ҆́же къ ᲃпⷭ҇нїю проше́нїѧ и҆́хъ и҆спо́лнити.

Е҆щѐ моли́мсѧ за всѧ̀ бра́тїѧ на́ша, и҆ за всѧ̀ Правосла́вныѧ Хрⷭ҇тїа́ны.

Настоѧ́телъ же воꙁглаша́етъ:

Ꙋ҆слы́ши ны Бо́же ᲃп҃си́телю нш҃ъ:

По во́ꙁгласѣ же Дїа́конъ,

Премꙋ́дрость.

Ли́къ,

Чтⷭ҇нѣ́йшꙋю Херꙋви́мъ:

Сла́ва: И҆ Ны́нѣ:

Гд҃и поми́лꙋй гⷤ.

Благословѝ.

Началствꙋ́ѧй же тво́ритъ ѡ҆тпꙋ́стъ ѡ҆бы́чный Хра́мꙋ.

А҆бїе же а҆́ще сосꙋ́ды и҆ ѡ҆де́жды Церко́вныѧ сꙋ́ть не ѡ҆свѧще́нны, по чи́нꙋ ни́жей напи́санномꙋ, зрѝ Чи́нъ благослове́нїѧ и҆ ѡ҆свѧщенїѧ нѡ́выхъ съсꙋ́дѡвъ слꙋже́бныхъ, благословлѧ́етъ ѧ҆̀.

Си́мъ же благослове́ннымъ сꙋ́щимъ, хотѧ́й Лѵтꙋргиса́ти ᲃщ҃е́нникъ, Проскоми́дїю начина́етъ. Начальствꙋ́ѧй же, а҆́ще Де́исꙋсъ, ᲃі́естъ, ѡ҆браꙁы сꙋ́тъ не благослове́ны, благословлѧ́етъ ѧ҆̀ по чи́нꙋ ни́жей написа́номꙋ, зрѝ Чи́нъ благослове́нїѧ и҆лѝ ѡ҆свѧще́нїѧ катапета́ꙁмы или Де́исꙋса.

А҆ще же ᲂу҆жѐ благослове́нны ᲃꙋ́ть, вто́рое не благословлѧ́етъ ѧ҆̀, но а҆́бїе Часы̀ чтꙋ́тсѧ. По Часѣ́хъ же Бжⷭ҇твеннаѧ Лѵтꙋ́ргїѧ наче́ншисѧ съверша́етсѧ по чи́нꙋ ᲃвое́мъ ѡ҆бы́чноѡ.

Проки́менъ Хра́мꙋ и҆ Дне́ви, А҆пⷭ҇лъ и҆ Е҆ѵⷢ҇лїе, та́кожде и҆ Прича́стенъ.

Поста́вленꙋ бы́вшꙋ ᲃтолцꙋ̀ и҆ че́стнѡ покры́тꙋ пре́дъ ᲃт҃ы́ми Вра́ты, и҆ на не́мъ ᲃосꙋ́ды. І҆ер́еѵ꙼, ѡ҆деѧ́нъ въ Е҆питра́хиль и҆ Фелꙍ́нь, съ Кади́льницею и҆схо́дитъ ᲃт҃ы́ми Вра́ты, и҆ покади́въ крестаѡ́браꙁно, начина́етъ ѡ҆бычнѡ:

Благослове́нъ Бо́гъ нш҃ъ:

Чте́цъ же чтетъ:

Ца́рю небѣ́сный: Трⷭ҇то́е: и҆ по Ѿч҃е нш҃ъ:

І҆ере́й:

Ꙗ҆́кѡ твое є҆́стъ Ца́рство: Гд҃и поми́лꙋй, в҃і.

Сла́ва: И҆ ны́нѣ:

Прїйдѣ́те, поклони́мсѧ: гⷤ.

и҆ Ѱало́мъ к҃в.

Гд҃ь пасе́тъ мѧ:

Сла́ва: И҆ ны́нѣ:

А҆лл҃илꙋ́іа, ᲃла́ва тебѣ̀ Бо́же.

Дїа́конъ,

Гд҃ꙋ помоли́мсѧ.

Ли́къ,

Гд҃и поми́лꙋй.

І҆ере́ѵ̆ же чтетъ Моли́твꙋ ᲃі́ю надъ Ди́скосомъ но́вымъ.

Влады́ко Вседержи́телю Гд҃и Бо́же нш҃ъ, пода́вый Мѡѵ̆сею рабꙋ̀ твое́мꙋ За́конъ, ѡ҆правда́нїѧ же и҆ слꙋ́жбы, и҆ въ ст҃и́лищи тѣ́мъ, въ ᲃла́вꙋ Преᲃт҃о́мꙋ и҆менѝ твое́мꙋ съѡрꙋже́нномъ, съсꙋ́ды зла́ты и҆ сре́брѧны къ приноше́нию раꙁли́чныхъ же́ртвъ тебѣ̀ и҆́стинномꙋ Бг҃ꙋ на́шемꙋ (ꙗ҆́же бы́ша сѣ́нь и҆ ѻ҆́браꙁъ ни́нѣшнѣй и҆́стинной беꙁ̾кровной на́шей же́ртвѣ) твори́ти и҆ ѡ҆свѧти́ти повелѣ́лъ є҆сѝ. Ты ᲃа́мъ и҆ ны́нѣ человѣкѡлю́бче Гд҃и, благословѝ Ди́скосъ се́й, и҆ ѡ҆свѧти є҆гѡ̀ ᲃи́лою, дѣ́йствомъ и҆ благода́тїю всест҃а́гѡ и҆ животворѧ́щагѡ твое́гѡ Дх҃а, (а҆́ще є҆́стъ да Покро́вецъ и҆ Ѕвѣꙁда̀, гл҃ѝ и҆ сі́е,. и҆ все ᲂу҆краше́нїе є҆гѡ̀,) въ є҆́же приноси́тисѧ тебѣ̀ на не́мъ, и҆́стиннаѧ, жива́ѧ, беꙁ̾кро́внаѧ и҆ слове́снаѧ жертва, Пресвѧто́е Тѣ́ло Вели́кагѡ Бг҃а и҆ ᲃп҃са на́шегѡ І҆и҃ᲃ Ха҃, ᲃн҃а твое́гѡ, и҆́же на́съ дѣ́лѧ и҆ на́шегѡ ра́ди спⷭ҇їѧ тебѣ̀ Бг҃ꙋ и҆ Ѿцꙋ̀ свое́мꙋ є҆дино́ю сама́гѡ себє̀ въ же́ртвꙋ благопрїѧ́тнꙋ на Крⷭ҇тномъ жерто́вницѣ принесѐ. Тебѣ́ бо съ ни́мъ, и҆ съ пресвѧты́мъ, и҆ благи́мъ, и҆ животворѧ́щимъ ти Дх҃омъ, подоба́етъ всѧ́ческаѧ сла́ва, че́сть и҆ поклоне́нїе ны́нѣ и҆ прⷭ҇нѡ, и҆ во вѣ́ки вѣ́кѡвъ.

Ли́къ,

А҆ми́нь.

Дїа́конꙋ ре́кшꙋ:

Гд҃ꙋ помоли́мсѧ.

Ли́къ,

Гд҃и поми́лꙋй.

І҆ере́ѵ̆ же гл҃е́тъ Моли́твꙋ ᲃі́ю.

Влады́ко Вседержи́телю, Гд҃и Бо́же Ѿц҃ъ на́шихъ, тебѣ̀ моли́мсѧ, и҆ тебѐ приꙁыва́емъ, и҆ приле́жнѡ про́симъ: ниꙁпослѝ благода́ть Пресвѧта́гѡ всеосвѧща́ющагѡ и҆ животворѧ́щагѡ ти Дх҃а на ча́шꙋ сі́ю, (а҆́ще сꙋ́ть покро́вцы и҆ Ло́жица, гл҃и и҆ ᲃі́е: и҆ на все ᲂу҆краше́нїе є҆́гѡ̀,) и҆ благословѝ, ѡ҆чи́сти, и҆ ѡ҆свѧтѝ ю҆̀, ꙗ҆́коже благослови́лъ, ѡ҆чи́стилъ и҆ ѡ҆свѧти́лъ є҆сѝ ча́шꙋ ᲃщ҃е́нника твое́гѡ Мелхиседе́ка, и҆ ча́шꙋ ст҃ы́хъ А҆пⷭ҇лъ на та́йной Вече́ри Ха҃ твое́гѡ и҆ досто́йнꙋ жерто́вника твое́гѡ бы́ти ᲃотворѝ, въ є҆́же приноси́тисѧ въ не́й тебѣ̀ Бг҃ꙋ и҆ Ѿц҃ꙋ̀ ᲂу҆милостиви́тельной беꙁ̾кро́вной Же́ртве, Тѣ́ло и҆ Кро́въ є҆диноро́днагѡ ᲃн҃а твое́гѡ, Гд҃а Бг҃а и҆ ᲃп҃са на́шегѡ І҆и҃ᲃ Ха҃: Сни́мже тебѣ̀, и҆ Пресвѧтомꙋ и҆ животворѧ́щомꙋ ти Дх҃ꙋ, подоба́етъ всѧ́каѧ ᲃла́ва, че́сть и҆ поклоне́нїе, ны́нѣ и҆ прⷭ҇нѡ, и҆ во вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋ́хови твое́мꙋ.

Дїа́конъ,

Гла́вы ва́ша Гд҃еви приклони́те.

Ли́къ,

Тебѣ̀ Гд҃и.

І҆ере́ѵ̆ же прекло́нъ гла́вꙋ, гл҃е́тъ Моли́твꙋ сі́ю надъ ѡ҆бѣ́ма.

Гд҃и Бо́же нш҃ъ, при́ꙁри ны́нѣ на Моли́твꙋ недосто́йнагѡ менѐ раба̀ твое́гѡ, и҆ ниꙁпослѝ бога́тство благослове́нїѧ твое́гѡ на сосꙋ́ды ᲃі́ѧ, и҆ ѡ҆свѧти ѧ҆̀ Дх҃омъ твои́мъ ᲃт҃ы́мъ въ ѡ҆кропле́нїи ᲃщ҃енныѧ сеѧ̀ воды̀, въ є҆́же бы́ти и҆́мъ досто́йное в̾мѣсти́лище пречи́стагѡ Тѣ́ла и҆ че́стныѧ Крвѐ Ха҃ твое́гѡ.

И҆ воꙁглаша́етъ.

Ты́ бо є҆сѝ и҆сто́чникъ ѡ҆свѧще́нїѧ, и҆ тебѣ̀ съ є҆диноро́днымъ Сы́номъ, и҆ съ Пресвѧты́мъ и҆ благи́мъ и҆ животворѧ́щимъ ти Дх҃омъ подоба́етъ всѧ́каѧ ᲃла́ва, че́сть и поклоне́нїе ны́нѣ и прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

И҆ а҆́бїе кро́питъ ᲃосꙋ́ды ᲃщ҃енною водо́ю, гл҃ѧ̀:

Ꙍ҆свѧща́ютсѧ ᲃосꙋ́ды ᲃі́ѧ благода́тїю Пресвѧта́гѡ Дх҃а ѡ҆кропле́нїемъ воды̀ ᲃеѧ̀ ᲃщ҃енныѧ, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

А҆ще ᲂу҆́бѡ ᲃлꙋжи́ти а҆́бїе и҆́матъ, вꙁе́млетъ ᲃа́мъ ᲃъсꙋ́ды и҆ вно́ситъ ѧ҆̀ въ Ѻ҆́лтаръ, и҆ поста́вивъ на Жерто́вници слꙋ́житъ и҆́ми. А҆́ще же ᲃлꙋжи́ти не бꙋ́детъ, ᲃътвори́въ ѡ҆бы́чнѡ Дне́вный ѿпꙋ́стъ, вно́ситъ съсꙋ́ды въ Ѻ҆́лтаръ.

Ре́кшꙋ Дїа́конꙋ:

Гд҃ꙋ помоли́мсѧ.

и҆ Ли́кꙋ:

Гд҃и поми́лꙋй.

І҆ере́ѵ̆ чтетъ Моли́твꙋ ᲃі́ю

Гд҃и І҆и҃ᲃ Хє҃ Бо́же нш҃ъ, въ Верте́пѣ ѿ Дв҃ы роди́выйсѧ, и҆ Во́лхвы звѣꙁдо́ю къ поклоне́нїию ᲃвое́мꙋ наста́вивый: послѝ ны́нѣ, ᲃмире́нно мо́лимъ тѧ, Небе́сное твоѐ бл҃венїе на Звѣꙁдꙋ ᲃі́ю, и҆ благослови и҆ ѡ҆ст̀и ю҆̀, ꙗ҆́коже бы́ти є҆́й достойное ѡ҆рꙋ́дїе къ слꙋже́нию ᲃт҃ы́мъ твои́мъ Та́йнамъ, и҆ въ воспомина́нїе и҆ ᲃлавосло́вїе Бг҃отѣл́еснагѡ твое́гѡ ѿ Дв҃ы Ржⷭ҇тва: Ты́ бо є҆сѝ благословѧ́й и҆ ᲃт҃ѧ́й всѧ́ческаѧ, Хє҃ Бо́же нш҃ъ, и҆ тебѣ̀ ᲃла́вꙋ воꙁсыла́емъ съ беꙁнача́льнымъ твои́мъ Ѿц҃е́мъ, и҆ съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

И҆ а҆́бїе кро́питъ Звеꙁдꙋ̀ водо́ю ᲃщ҃енною, гл҃ѧ̀:

Ꙍ҆свѧща́етсѧ Звеꙁда̀ сі́ѧ благода́тїю Пресвѧта́гѡ Дх҃а, ѡ҆кропле́нїемъ воды̀ ᲃеѧ̀ ᲃщ҃е́нныѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Дїаконъ:

Гд҃ꙋ помоли́мсѧ.

Ли́къ,

Гд҃и поми́лꙋй.

И҆ере́ѵ̆ же чтетъ Моли́твꙋ ᲃі́ю:

Гд҃и Бо́же Вседержи́телю, Ꙋ҆глемъ ѿ Серафі́ма Клѣща́ми вꙁѧ́томъ, и҆ прикоснове́нїемъ ᲂу҆сты̀ Прⷪ҇ро́ка ѡ҆чища́ющомъ, проѡбраꙁи́вый и҆́ногда си́лꙋ Бжⷭ҇тве́нныхъ Та́инъ Тѣ́ла и҆ Крвѐ Ха҃ твое́гѡ, Ло́жицею ны́нѣ вѣ́рнымъ твои́мъ люде́мъ въ ѡ҆чище́нїе грѣхѡ́вныхъ ᲃкве́рнъ подава́емыхъ: При́ꙁри ны́нѣ млⷭ҇тивнѡ на Моли́твꙋ на́шꙋ: и҆ ниꙁпослѝ Небе́сное твоѐ благослове́нїе на Ло́жицꙋ ᲃі́ю, и҆ благословѝ и҆ ѡ҆свѧтѝ ю҆̀, въ є҆́же бы́ти є҆́й досто́йный ᲃосꙋ́дъ къ прїѧ́тию и҆ подаѧ́нїю Прче́стагѡ Тѣ́ла, и че́стныѧ Крвѐ Ха҃ твое́гѡ, въ ѡ҆ставле́нїе грѣхѡ́въ всѣ́хъ люде́й твои́хъ: Ты́ бо є҆сѝ и҆сто́чникъ ѡ҆свѧще́нїѧ, и҆ пода́тель всѧ́ческихъ бла́гъ, и҆ тебѣ̀ ᲃла́вꙋ и҆ благодаре́нїе, и҆ поклоне́нїе воꙁсыла́емъ, съ є҆диноро́днымъ ти Сы́номъ, и҆ съ Пресвѧты́мъ и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

А҆́бїе же кро́питъ Ло́жицꙋ ᲃщ҃е́нною Водо́ю, гл҃ѧ̀ та́ѧжде, ꙗ҆́же и҆ надъ Звеꙁдою, ᲃі́естъ:

Ꙍ҆свѧща́етсѧ Ло́жица сі́ѧ: И҆ проч:

И҆ та́ко ᲃъчетава́етъ ю҆̀ къ и҆́нымъ ᲃщ҃еннымъ ᲃъсꙋ́дѡмъ.

Вѣ́стнѡ же бꙋ́ди, ꙗ҆́ко а҆́ще и҆ є҆ли́жди съсꙋ́ды сі́ѧ ᲃлꙋже́бныѧ ѿно́влены, и҆лѝ и҆ꙁчи́щены бꙋ́дꙋтъ рꙋко́ю не ᲃщ҃енною, то́лижды си́цевымъ преднаписа́ннымъ благослове́нїемъ благослови́ти, и҆ ст҃и́ти ѧ҆̀ подоба́етъ, и҆бѡ̀ и҆на́кѡ творѧ̀, ѽ І҆ере́ю, ᲃме́ртнѡ съгрѣши́ши, ꙗ҆́кѡ ᲂу҆ничижи́тель Хв҃ыхъ Та́инъ.

Дїа́конꙋ ре́кшꙋ:

Гд҃ꙋ помоли́мсѧ,

и҆ Кли́рꙋ:

Гд҃и поми́лꙋй.

І҆ере́ѵ̆ чтетъ Моли́твꙋ ᲃі́ю.

Гд҃и Бо́же Вседержи́телю, ѡ҆деѧ́йсѧ ᲃвѣ́томъ ꙗ҆́кѡ ри́ꙁою, ѡ҆блага́ѧй нб҃о ѡ҆́блаки, и҆ покрыва́ѧй вода́ми превы́спреннѧѧ ᲃвоѧ̀, при́ꙁри ны́нѣ, ᲃмире́ннѡ моли́мъ тѧ, на приле́жное ны́нѣшнее моленїе на́ше, и҆ ниꙁпослѝ небе́сное твоѐ благослове́нїе на Покро́вцѧ ᲃі́ѧ, (и҆лѝ на Покро́вецъ ᲃе́й) и҆ благословѝ, ѡ҆чи́сти и҆ ѡ҆свѧти ѧ҆̀, (и҆лѝ є҆гѡ̀) въ є҆́же бы́ти и҆́мъ (и҆лѝ є҆мꙋ̀) досто́йнымъ (и҆лѝ досто́йнꙋ) къ покрове́нїю ᲃт҃ы́хъ и҆ Бжⷭ҇тве́нныхъ Та́инъ Тѣ́ла и҆ Крвѐ Ха҃ твое́гѡ, съ ни́мже благослове́нъ є҆сѝ, съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ, и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆ же кро́питъ а҆́бїе Покро́вцѧ Водо́ю ᲃщ҃е́нною, гл҃ѧ̀ то́жде, є҆́же и҆ надъ Звеꙁдо́ю, ᲃі́есть:

Ꙍ҆свѧща́ютсѧ Покро́вцѧ ᲃі́ѧ (и҆лѝ ѡ҆свѧща́етсѧ Покро́вецъ ᲃе́й И҆ про́чаѧ.

Поста́вленꙋ сꙋ́щꙋ ᲃтолцꙋ̀, че́стнѡ покрове́ннꙋ пре́дъ Црⷭ҇кими Две́рми, и҆ на не́мъ но́вомꙋ Кивѡ́тꙋ, Панама́рꙋ же держа́щꙋ ᲃъсꙋ́дъ съ ᲃщ҃енною Водо́ю, І҆ере́ѵ̆ и҆схо́дитъ Црⷭ҇кими Вра́ты, ѡ҆дѣ́ѧнъ въ Е҆питра́хиль и҆ Фелѡ́нъ, съ Кади́лницею, и҆ покади́въ крестаѡбраꙁнѡ Ківѡ́тъ, начина́етъ ѡ҆бы́чнѡ:

Благослове́нъ Бо́гъ нш҃ъ:

Чте́цъ,

Ца́рю небесный: Трⷭ҇то́е. Ѿч҃е нш҃ъ: Ꙗ҆́кѡ твоѐ є҆́стъ Црⷭ҇твѡ:

Чте́цъ,

Гд҃и поми́лꙋй. в҃і.

Прїйдѣ́те, поклони́мсѧ: гⷤ,

и҆ Ѱаломъ рл҃а.

Помѧнѝ Гд҃и Дв҃да, и҆ всю̀ кро́тость є҆гѡ̀: Весъ до конца̀.

Сла́ва: И҆ ны́нѣ:

А҆ллилꙋ́іа, ᲃла́ва тебѣ̀ Бо́же.

Діа́конъ:

Гд҃ꙋ помоли́мсѧ.

Ли́къ,

Гд҃и поми́лꙋй.

І҆ере́ѵ̆ же чтетъ Моли́твꙋ ᲃі́ю.

Гд҃и Бж҃е нш҃ъ, и҆мѣ́ѧй Престо́лъ Нб҃ѡ, и҆ подно́жїе Зе́млю, а҆́ще и҆ всѧ̀ тва́рь въмѣсти́ти тѧ не мо́жетъ, ни́же ᲂу҆́мъ А҆гг҃лскїй и҆ члчⷭ҇кїй вели́чество ᲃла́вы твое́ѧ пости́гнꙋти, и҆ по достоѧ́нїю ᲃкаꙁа́ти воꙁмага́етъ: но ты̀ млⷭ҇рдїѧ ра́ди млⷭ҇ти и҆ человѣкѡлю́бїѧ, въ чре́вѣ Дв҃и́честѣмъ неиꙁрече́ннѡ вмѣсти́тисѧ и҆ꙁво́лилъ є҆сѝ, и҆ челове́къ бы́въ, Бо́гъ сы́й и҆́стиненъ, да человѣ́ка себѣ̀ присвои́ши, подъ ви́димымъ ви́домъ Хлѣ́ба и҆ Вина̀, Пло́ть и҆ Кро́въ свою̀ въ снѣ́дъ вѣ́рнымъ да́лъ є҆сѝ. Ꙗ҆́кѡ Бо́гъ ᲂу҆́бѡ, а҆́ще и҆ ве́ꙁде є҆сѝ, и҆ всѧ̀ и҆сполнѧ́еши, но ꙗ҆́коже Бо́гъ и҆ человѣ́къ, на нб҃сѝ ѡ҆де́снꙋю Ѿц҃а̀, и҆ на землѝ въ Пресвѧты́хъ то́чїю Тѣ́ла и҆ Крвѐ твое́ѧ Та́йнахъ и҆́стиннѡ бы́ти и҆ꙁволѧ́еши: Тѣ́мже ны́нѣ смире́ннѡ молю́ тѧ, при́ꙁри млⷭ҇стивнѡ на Моли́твꙋ на́шꙋ, и҆ на ᲃъсꙋ́дъ се́й, въ ᲃла́вꙋ твою̀ соорꙋже́нный, и҆ благослове́нїе твоѐ Небе́сное ниꙁпослѝ на́нь, благословѝ, ѡ҆чи́сти и҆ ѡ҆свѧтѝ є҆гѡ̀, въ є҆́же бы́ти є҆мꙋ̀ досто́йное въмѣсти́лище, но́вый же гро́бъ и҆ храни́лище ᲃт҃ы́мъ и҆ животворѧ́щимъ Та́йнамъ Пресвѧта́гѡ Тѣ́ла и҆ че́стныѧ Крвѐ твое́ѧ: Ты́ бо є҆сѝ ѡ҆свѧщенїе на́ше, и҆ тебѣ̀ ᲃла́вꙋ въꙁсылаемъ съ беꙁнача́льнымъ ти Ѿц҃е́мъ, и҆ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

Діа́конъ:

Гла́вы ва́ша Гв҃и преклони́те.

Ли́къ,

Тебѣ̀ Гд҃и.

І҆ере́ѵ̆ же, главꙋ преклонъ, та́йнѡ чтетъ Моли́твꙋ ᲃі́ю:

Гд҃и Бо́же нш҃ъ, приклонѝ ᲂу҆́хѡ твоѐ и҆ ᲂу҆слыши мѧ, и҆́же млⷭ҇ти ра́ди и҆ человѣкѡлю́бїѧ съ на́ми неѿтстꙋ́пнѡ до сконча́нїѧ вѣ́ка пребыва́ти ѡ҆бѣща́лсѧ є҆сѝ, и҆ послѝ благода́ть Пресвѧта́гѡ твое́гѡ Дх҃а, и҆ въ ѡ҆кропле́нїи ᲃщ҃енныѧ ᲃеѧ̀ воды̀, благословѝ и҆ ѡ҆свѧти ᲃосꙋ́дъ сей, на хране́нїе Бжⷭ҇тве́нныхъ Та́инъ Тѣ́ла и҆ Крвѐ твое́ѧ съѡрꙋже́нный.

И҆ воꙁглаша́етъ:

Ты́ бо є҆сѝ благословѧ́й и҆ ᲃт҃ѧ́й всѧ́ческаѧ, Хє҃ Бо́же нш҃ъ, и҆ тебѣ̀ сла́вꙋ воꙁсыла́емъ, съ беꙁнача́льнымъ Ѿц҃е́мъ, и҆ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆ же вꙁе́мъ ᲃщ҃еннꙋю во́дꙋ, кро́питъ є҆ю̀ Ківꙍ́тъ, гл҃ѧ̀:

Ꙍ҆свѧща́етсѧ Ківꙍ́тъ се́й благода́тїю Пресвѧта́гѡ Дх҃а, ѡ҆кропленїемъ воды̀ ᲃеѧ̀ ᲃщ҃енныѧ, въ и҆́мѧ Ѿц҃а̀ и҆ ᲃн҃а, и҆ ᲃⷮ: Дх҃а. А҆ми́нь.

Сътвори́въ же ѡ҆бы́чный дне́вный ѿпꙋ́стъ, вꙁе́млетъ ᲃщ҃енный Ківꙍ́тъ, и҆ ѿно́ситъ є҆гѡ̀ на ᲃт҃ꙋ́ю Тра́пеꙁꙋ, и҆ влага́етъ въ не́мъ Бж҃стве́нныѧ Та́йны.

Подоба́етъ вѣ́дати, ꙗ҆́кѡ И҆літꙍ́нъ и҆́матъ бы́ти ѿ те́нкагѡ лнѧ́нагѡ гꙋста́гѡ, гла́дкагѡ же но́вагѡ пла́тка, на ло́котъ въ широтꙋ̀ и҆ долготꙋ̀ ᲃъѡрꙋже́ный, и҆ до́брѣ ᲂу҆крохма́леный. Си́це ᲂу҆́бѡ ᲂу҆гото́вленый, полага́етъ є҆гѡ̀, Протопо́па (и҆мѣ́ѧй на сі́е А҆рхїере́йское благослове́нїе) на ᲃт҃о́й Тра́пеꙁѣ распросте́ръ, ѡ҆дѣѧнъ же въ Е҆пітра́хиль и҆ Фелѡнъ, покади́въ крестаѡ́браꙁнѡ ᲃт҃ꙋ́ю Тра́пеꙁꙋ, ста́нетъ съпре́ди, и҆ ѡ҆бы́чнѡ начина́етъ.

Благослове́нъ Бо́гъ нш҃ъ.

Ли́къ же чтетъ:

Ца́рю небѣ́сный: Трⷭ҇то́е: и҆ Ѿч҃е нш҃ъ: и҆ по Ꙗ҆́кѡ твоѐ є҆́стъ црⷭ҇тво:

Гд҃и поми́лꙋй, в҃і. Прїидѣ́те, поклони́мсѧ: гⷤ.

и҆ ѱало́мъ р҃і.

И҆сповѣ́мсѧ тебѣ̀ Гд҃и, всѣ́мъ се́рдцемъ мои́мъ, въ совѣ́тѣ пра́выхъ и҆ со́нмѣ: Ве́съ до конца̀.

Сла́ва: И҆ ны́нѣ:

А҆ллилꙋ́іа, сла́ва тебѣ̀ Бо́же.

Діа́конъ:

Гд҃ꙋ помоли́мсѧ.

Ли́къ,

Гд҃и поми́лꙋй.

І҆ере́ѵ̆ чтетъ Моли́твꙋ ᲃі́ю:

Гд҃и І҆и҃ᲃ Хє҃ Бо́же нш҃ъ, Сы́не и҆ ᲃло́ве Бг҃а жива́гѡ, и҆ꙁволи́вый спⷭ҇нїѧ ра́ди на́шегѡ ѿ Прче́стыѧ Дв҃ы воплоти́тисѧ, и҆ по рождествѣ̀ пелена́ми пови́тъ бы́ти, и҆ въ ꙗ҆́слехъ положи́тисѧ: по см҃рти же Крⷭ҇тной, ю҆́же на́съ дѣ́лѧ во́лею претерпѣ́лъ є҆сѝ, Плащени́цею чⷭ҇тою и҆ ᲃꙋда́ремъ ѡ҆бви́тъ, и҆ въ Гро́бѣ положе́нъ бы́ти: Тебѐ ны́нѣ про́симъ и҆ смире́ннѡ моли́мъ, послѝ Бжⷭ҇тве́нное благослове́нїе и҆ благода́ть ᲃт҃а́гѡ твое́гѡ Дх҃а, на И҆литꙍ́нъ се́й, и҆ благословѝ, ѡ҆чи́сти и҆ ѡ҆свѧтѝ є҆гѡ̀, въ є҆́же бы́ти є҆мꙋ̀ досто́йнꙋ, є҆́же на не́мъ ѡ҆свѧти́тисѧ Бжⷭ҇тве́ннымъ та́йнамъ Пресвѧта́гѡ Тѣ́ла и҆ че́стныѧ Крвѐ твое́ѧ, въ ᲃла́вꙋ твою̀ и҆ беꙁнача́льнагѡ ти Ѿц҃а̀, и҆ є҆диносꙋ́щнагѡ и҆ животворѧ́щагѡ ти Дх҃а, и҆ въ спⷭ҇нїе всѣ́хъ люді́й твои́хъ: ꙗ҆́кѡ ты́ є҆сѝ ѡ҆свѧщенїе на́ше, и҆ тебѣ̀ сла́вꙋ воꙁсыла́емъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

Діа́конъ:

Гла́вы ва́ша Гв҃и приклони́те.

Ли́къ,

Тебѣ̀ Гд҃и.

І҆ере́ѵ̆ же, гла́вꙋ преклони́въ, та́йнѡ гл҃е́тъ Моли́твꙋ ᲃі́ю:

Гд҃и І҆и҃ᲃ Хє҃ Бо́же нш҃ъ, приле́жнꙋю ᲃі́ю мо́лбꙋ прїимѝ ѿ на́съ недосто́йныхъ рабѡ́въ твои́хъ, и҆ ꙗ҆́кѡ бла́гъ и҆ человѣкѡлю́бецъ, благоволѝ ны́нѣ ниꙁпосла́ти благослове́нїе твоѐ ᲃт҃о́е на И҆литꙍ́нъ сей, и҆ благословѝ, и҆ ѡ҆свѧтѝ є҆гѡ̀ Дх҃омъ твои́мъ ᲃт҃ы́мъ, въ ѡ҆кропле́нїи Воды̀ ᲃеѧ̀ ᲃщ҃енныѧ, ꙗ҆́коже ѡ҆свѧти́лъ є҆сѝ ᲃты́ѧ твоѧ̀ гро́бныѧ пе́лены, въ є҆́же бы́ти є҆мꙋ̀ но́вомꙋ ᲃꙋда́рꙋ, и҆ Синдѡ́нꙋ Преᲃт҃о́мꙋ Тѣ́лꙋ и҆ Крвѐ твое́ѧ че́стныѧ.

И҆ воꙁглаша́етъ.

Ты́ бо є҆сѝ благословлѧ́й и҆ ᲃт҃ѧ́й всѧ́ческаѧ, Хє҃ Бо́же нш҃ъ, и҆ тебѣ̀ ᲃла́вꙋ воꙁсыла́емъ, съ беꙁнача́льнымъ ти Ѿц҃е́мъ, и҆ съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆ же а҆́бїе кро́питъ И҆литонъ ᲃщ҃енною водо́ю, гл҃ѧ̀:

Ꙍ҆свѧща́етсѧ И҆литѡ́нъ ᲃе́й благода́тїю Пресвѧта́гѡ Дх҃а, ѡ҆кропле́нїемъ Воды̀ ᲃеѧ̀ ᲃщ҃енныѧ, Во и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ а҆́бїе тво́ритъ ѡ҆бы́чный Дне́вный Ѿпꙋстъ.

Поста́вленꙋ ᲃꙋ́щꙋ ᲃтолцꙋ̀ пре́дъ Црⷭ҇кими Вра́ты че́стнѡ покрове́ннꙋ, полага́ютсѧ на не́мъ но́выѧ ѡ҆де́жды, къ ѡ҆свѧще́нїю прине́сенныѧ, Е҆кклисїархꙋ и҆лѝ Панама́рꙋ ᲃосꙋ́дъ съ ᲃщ҃е́нною водо́ю держа́щꙋ, І҆ере́ѵ̆ ѡ҆дѣѧ́нъ въ Є҆питра́хиль и҆ Фелꙍ́нъ съ Кади́льницею, ѿве́рꙁъ Црⷭ҇кїѧ Две́ри и҆схо́дитъ, и покади́въ крестаѡ́браꙁнѡ ѡ҆де́жды, ѡ҆бычнѡ начина́етъ:

Благослове́нъ Бо́гъ нш҃ъ:

Чте́цъ,

Ца́рю небѣ́сный: Трⷭ҇то́е. Ѿч҃е нш҃ъ:

І҆ере́ѵ̆ же:

Ꙗ҆́кѡ твоѐ є҆́стъ Црⷭ҇твѡ.

Чте́цъ:

Гд҃и поми́лꙋй, ві҃.

Сла́ва: И҆ ны́нѣ: Прїидѣ́те, поклони́мсѧ: гⷤ,

и ѱало́мъ рл҃в.

Се ны́нѣ что̀ добро̀, и҆лѝ что̀ кра́снѡ: Весъ до конца̀.

Сла́ва: И҆ ны́нѣ:

А҆ллилꙋ́іа сла́ва тебѣ̀ Бо́же.

Дїа́конъ,

Гд҃ꙋ помоли́мсѧ.

Кли́ръ:

Гд҃и поми́лꙋй.

І҆ере́ѵ̆ чтетъ Моли́твꙋ ᲃі́ю:

Гд҃и Бо́же Вседержи́телю, и҆ꙁъ нача́ла по́леꙁнаѧ члчⷭ҇комꙋ ро́дꙋ всѧ̀ дѣйствꙋ́ѧй, хра́мы рꙋко́ю члчⷭ҇кою ᲃътворе́ннаѧ и҆менѝ твое́мꙋ ᲃт҃о́мꙋ ᲃъꙁда́ти, и҆ ты́ѧ въ ᲃла́вꙋ свою̀ ѡ҆свѧща́ти, и҆ мѣ́сто ᲃеле́нїѧ ᲃла́вы твое́ѧ нарица́ти восхотѣ́вый: и҆ рабо́мъ твои́мъ Мꙍѵ̆се́ѡмъ ѡ҆дѣѧ́нїѧ архїереѵ̆скаѧ, І҆ере́ѵ̆скаѧ же и҆ Левви́тскаѧ, и҆ и҆́наѧ раꙁли́чнаѧ ᲂу҆крашенїѧ въ блг҃олѣ́пїе и҆ красотꙋ̀ ᲃти́лища и҆ ѻ҆́лтарѧ твое́гѡ бы́ти повелѣ́вый: ᲂу҆слы́ши млⷭ҇тивнѡ ны́нѣ моленїѧ на́ша, и҆ ѡ҆де́жды ᲃі́ѧ (а҆́ще є҆динꙋ̀ то́чїю ст҃и́ши, си́це чтѝ: Стиха́ръ се́й, и҆лѝ Е҆питра́хилъ сей, и҆лѝ По́ѧсъ се́й, и҆лѝ Фелѡ́нъ се́й, и҆лѝ Нара́квици ᲃі́ѧ.) въ че́сть и҆ ᲃла́вꙋ Пресвѧта́гѡ и҆менѝ твое́гѡ, въ ᲂу҆краше́нїе же и҆ благолѣ́пїе слꙋжи́телемъ ᲃт҃а́гѡ твое́гѡ Ѻ҆́лтарѧ, и҆ ᲃт҃ы́хъ твои́хъ Та́инъ ᲂу҆гото́вленныѧ̀ (и҆лѝ ᲂу҆гото́вленнагѡ) мно́ю ᲃмире́ннымъ и҆ недосто́йнымъ рабо́мъ твои́мъ благословѝ, ѡ҆чи́сти и҆ ѡ҆свѧти, ꙗ҆́кѡ да къ слꙋже́нїю ᲃты́мъ твои́мъ Та́йнамъ, и҆ къ всѧ́комꙋ славосло́вїю Пресвѧта́гѡ И҆менѝ твое́гѡ досто́йны, (и҆лѝ досто́инъ) бы́ти ꙗ҆вѧ́тсѧ, (и҆лѝ ꙗ҆ви́тсѧ) и҆ ᲃщ҃е́ннымъ ᲃлꙋжи́телемъ твои́мъ тѣ́ми (и҆лѝ тѣ́мъ) ѡ҆дѣю́щимсѧ, да бꙋ́дꙋтъ (и҆лѝ да бꙋ́детъ) въ и҆ꙁбавленїе и҆ покро́въ, ѿ всѣ́хъ кѡ́ꙁней и҆ со́блаꙁнѡвъ вра́жїихъ, въ твое́же благоꙋгожде́нїе, и҆ досто́йное ᲃлꙋже́нїе ᲃт҃ы́мъ твои́мъ Та́йнамъ, и҆ въ снабдѣ́нїе твое́ѧ благода́ти и҆ млⷭ҇рдїѧ: благода́тїю и҆ щедрота́ми, и҆ человѣкѡлю́бїемъ є҆диноро́днагѡ твое́гѡ ᲃн҃а, съ ни́мъ же благослове́нъ є҆сѝ, съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

Дїа́конъ,

Гла́вы ва́ша Гв҃и приклони́те.

Ли́къ,

Тебѣ̀ Гд҃и.

І҆ере́ѵ̆ же, преклонь гла́вꙋ, мо́литсѧ.

Влады́кѡ Бо́же Вседержи́телю, всѣ́хъ благи́хъ пода́телю и҆ ѡ҆свѧщенїѧ и҆сто́чниче, при́ꙁри ны́нѣ на молитвꙋ на́шꙋ, и҆ ѡ҆де́жды сі́ѧ (А҆́ще є҆дина̀ ст҃и́тсѧ гл҃ѝ си́це: Стихаръ се́й, и҆лѝ Е҆пітрахиль ᲃі́й, и҆лѝ По́ѧсъ се́й, и҆лѝ Фелѡ́нъ се́й, и҆лѝ Нара́квици сі́ѧ,) въ ᲂу҆краше́нїе и҆ благолѣ́пїе ᲃщ҃е́нныхъ ᲃлꙋжи́телей твои́хъ съѡрꙋже́нныѧ (и҆лѝ съѡрꙋже́нный, благода́тїю Пресвѧта́гѡ твое́гѡ Дх҃а, ѡ҆кропле́нїемъ Воды̀ ᲃеѧ̀ ᲃщ҃енныѧ благослове́нны, ᲃт҃ы и҆ ѡ҆свѧще́нны, (и҆лѝ блⷭ҇ве́нный, ᲃт҃ы́й, и҆ ѡ҆сщ҃енный бы́ти ꙗ҆ви,) и҆ всѣ́хъ тѣ́ми, (и҆лѝ тѣ́мъ) ѡ҆дѣ́ющихсѧ досто́йнѡ ᲃт҃ы́мъ твои́мъ Та́йнамъ ᲃлꙋжи́ти, и҆ тебѣ̀ благоꙋгожда́ти всегда̀ сътворѝ.

И҆ воꙁглаша́етъ:

Ꙗ҆́кѡ ты́ є҆сѝ ѡ҆свѧще́нїе на́ше, и҆ тебѣ̀ ᲃла́вꙋ воꙁсыла́емъ съ є҆диноро́днымъ ти Сы́номъ, и҆ съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆ же вꙁе́мъ ᲃщ҃е́ннꙋю Во́дꙋ, кро́питъ є҆ю̀ предлежа́щїѧ ѡ҆де́жды, гл҃ѧ̀:

Ѻ҆свѧща́ютсѧ ѡ҆де́жды сі́ѧ ᲃщ҃енническїѧ (и҆лѝ ѡ҆свѧща́етсѧ Стїха́ръ се́й. и҆лѝ, Е҆питра́хїлъ се́й. и҆лѝ, По́ѧсъ ᲃе́й. и҆лѝ, Нара́квици ᲃі́ѧ.) Благода́тїю всест҃а́гѡ Дх҃а, ѡ҆кропле́нїемъ воды̀ ᲃеѧ̀ ᲃщ҃енныѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ а҆́ще абїе Лѵтꙋргиса́ти и҆́матъ, не творѧ̀ ѿпꙋ́ста, но вꙁе́мъ ѧ҆̀ ᲃа́мъ І҆ере́ѵ̆ вно́ситъ въ ᲃт҃ы́й Ѻ҆́лтарь, и҆ ѡ҆блачи́тсѧ въ нѧ̀, и҆ слꙋ́житъ: А҆́ще же слꙋжи́ти не и҆́мать, сътвори́въ ѡ҆бы́чный Дне́вный Ѿпꙋ́стъ, вно́ситъ ѧ҆̀ въ Ѻ҆́лтарь, и҆ на ᲃт҃о́й Тра́пеꙁѣ поставлѧ́етъ.

Поставле́ннымъ бы́вшимъ си́мъ на столцѣ̀ пре́дъ ᲃт҃ы́ми Вра́ты, поста́вленой сꙋ́щей тꙋ и҆ водѣ̀ ᲃщ҃енной, І҆ере́ѵ̆ и҆схо́дитъ и҆́ꙁъ Ѻ҆́лтарѧ, ѡ҆дѣѧ́нъ въ Е҆пітра́хїль и҆ Фелѡ́нъ, и҆ покади́въ крⷭ҇стаѡ́браꙁнѡ, начина́етъ ѡ҆бычнѡ.

Благослове́нъ Бо́гъ нш҃ъ.

Чте́цъ,

Ца́рю небѣ́сный: Трⷭ҇то́е, Ѿч҃е нш҃ъ:

І҆ере́ѵ̆,

Ꙗ҆́кѡ твоѐ є҆́стъ Црⷭ҇тво: Гд҃и поми́лꙋй, в҃і.

Сла́ва: И҆ ны́нѣ:

Прїидѣ́те, поклони́мсѧ: гⷤ, и҆ ѱаломъ ч҃в.

Гд҃ь воцари́сѧ и҆ влѣ́потꙋсѧ ѡ҆блечѐ: Весъ до конца̀.

Сла́ва: И҆ ны́нѣ: А҆лл҃ꙋ́іа ᲃла́ва тебѣ̀ Бо́же.

Дїа́конъ,

Гд҃ꙋ помоли́мсѧ.

Ли́къ,

Гд҃и поми́лꙋй.

І҆ере́ѵ̆ же чтетъ Моли́твꙋ ᲃі́ю:

Гд҃и Бж҃е Ѿч҃е Вседержи́телю, рабꙋ̀ твое́мꙋ Законополо́жникꙋ Мꙍѵ̆се́ю на Сіна́йстѣй Горѣ̀ раꙁли́чнаѧ ᲂу҆краше́нїѧ, покрыва́ла же и҆ пла́тна, въ ᲂу҆потребле́нїе ᲃлꙋже́нїѧ ᲃѣ́ни ᲃвѣди́телства, и҆ за́коннагѡ твое́гѡ ᲃт҃и́лища твори́ти повелѣвый: Ты и҆ ны́нѣ, приле́жнѡ моли́мъ тѧ, ꙗ҆́коже тогда̀ ѡ҆́наѧ благоꙋтро́бнѣ прїи́мъ, рꙋко́ю А҆а́рꙍнію ѡ҆свѧти́лъ є҆сѝ, и҆ сі́ѧ млⷭ҇тивнѡ прїи́мъ, Дх҃омъ твои́мъ ᲃт҃ы́мъ, рꙋко́ю менѐ грѣ́шнагѡ благословѝ, ѡ҆чи́сти и҆ ѡ҆свѧтѝ, и҆ досто́йна къ покрове́нїю и҆ ѡ҆бви́тїю Бжⷭ҇тве́ннагѡ Ѻ҆́лтарѧ и҆ Жерто́вника въꙁлюбле́ннагѡ ᲃн҃а твое́гѡ, Гд҃а на́шегѡ І҆и҃ᲃ Ха҃, бы́ти ᲃътворѝ. ѿ тебѐ бо ᲃъвы́шше всѧ́кѡ даѧ́нїе благо́е, и҆ всѧ́кїй да́ръ ᲃъверше́нный и҆схо́дитъ: и҆ тебѣ̀ ᲃла́вꙋ воꙁсыла́емъ, съ є҆диноро́днымъ ти Сы́номъ, и҆ съ Пресвѧты́мъ и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

Діа́конъ:

Гла́вы ва́ша Гв҃и преклони́те.

Ли́къ,

Тебѣ̀ Гд҃и.

І҆ере́ѵ̆ же, гла́вꙋ прекло́нь, гл҃е́тъ Моли́твꙋ ᲃі́ю.

Приклонѝ Гд҃и ᲂу҆́хѡ твоѐ, и҆ ᲂу҆слы́ши мѧ недосто́йнагѡ раба̀ твое́гѡ, и҆ сі́ѧ покрыва́льнаѧ пла́тна, къ ᲂу҆потребле́нїю ᲃт҃а́гѡ Ѻ҆́лтарѧ и҆ Жерто́вника Ха҃ твое́гѡ ᲂу҆строе́ннаѧ, благода́тїю твое́ю всеѡсвѧща́ющою, въ ѡ҆кропле́нїи воды̀ ᲃеѧ̀ ᲃщ҃енныѧ, благословѝ, ѡ҆чи́сти и҆ ѡ҆свѧтѝ.

И҆ воꙁглаша́етъ.

Ты́ бо є҆сѝ благословлѧ́й и҆ ᲃт҃ѧ́й всѧ́ческаѧ Бо́же нш҃ъ, и҆ тебѣ̀ ᲃла́вꙋ воꙁсыла́емъ, съ є҆диноро́днымъ ти Сы́номъ, и҆ съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆ же а҆́бїе кро́питъ покрыва́ла, гл҃ѧ̀:

Ѻ҆свѧща́ютсѧ покрыва́ла ᲃі́ѧ благода́тїю Пресвѧта́гѡ Дх҃а, ѡ҆кропле́нїемъ воды̀ ᲃеѧ̀ ᲃщ҃е́нныѧ, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ сотвори́въ ѡ҆бы́чный Ѿпꙋстъ, вꙁе́млетъ ᲃа́мъ покрыва́ла, и҆ покрыва́етъ и҆́ми Престо́лъ и҆ Жерто́вникъ.

Поста́вленꙋ бы́вшꙋ тетрапо́дꙋ че́стнѡ покрове́ннꙋ пре́дъ ᲃт҃ы́ми Вра́ты, І҆ере́ѵ̆ въ Е҆пітра́хиль и҆ Фелꙍ́нъ ѡ҆дѣѧ́нъ, и҆схо́дитъ, и҆ крестаѡ́браꙁнѡ покади́въ но́вый Кре́стъ, начина́етъ ѡ҆бы́чнѡ.

Благослове́нъ Бо́гъ нш҃ъ:

Ли́къ пое́тъ:

Ца́рю небе́сный.

Сконча́нꙋ же пѣ́нїи, чтꙋ̀тъ Трⷭ҇то́е. Ѿч҃е нш҃ъ: и҆ по Ꙗ҆́кѡ твоѐ є҆́стъ Црⷭ҇твѡ: Гд҃и поми́лꙋй, в҃і. Прїидѣ́те, поклони́мсѧ: гⷤ.

и҆ ѱало́мъ рл҃а.

Помѧнѝ Гд҃и Дави́да:

и҆ н҃ѳ.

Бо́же, ѿри́нꙋлъ ны є҆сѝ:

и҆ ч҃и.

Гд҃ь въцари́сѧ, да гнѣ́ваютсѧ лю́дїе.

Сла́ва: И҆ ны́нѣ.

А҆ллилꙋ́іа, гⷤ

Гд҃и поми́лꙋй, гⷤ,

Сла́ва: И҆ ны́нѣ.

и҆ Тропа́рь. Гла́съ а҃.

Сп҃сѝ Гд҃и лю́ди ᲃвоѧ̀, и҆ благословѝ достоѧ́нїе твоѐ, побѣ́ды Царе́мъ на́шимъ на ва́рвари дарꙋ́ѧ, и҆ своѧ̀ сохранѧ́ѧ Крⷭ҇то́мъ лю́ди.

Сла́ва: Гла́съ д҃. Конда́къ Крⷭ҇тꙋ̀.

Воꙁнесы́йсѧ на Кре́стъ во́лею, теꙁоимени́томꙋ ти гражда́нствꙋ, щедроты̀ твоѧ̀ дарꙋ́й Хє҃ Бо́же: воꙁвеселѝ ᲃи́лою ᲃвое́ю вѣ́рныѧ Цр҃ѧ̀ на́шѧ, побѣ́ды даѧ̀ и҆́мъ на ᲃꙋпоста́ты, посо́бїе и҆мꙋ́щимъ твоѐ ѻ҆рꙋ́жїе мі́ра, непобѣди́мꙋю побѣ́дꙋ.

И҆ ны́нѣ тожъ

Животворѧ́щїй Кре́стъ твое́ѧ блгⷭ҇ти, є҆го́же дарова́лъ є҆сѝ на́мъ недосто́йнымъ, Гд҃и, тебѣ̀ прино́симъ въ Моли́твꙋ ᲃпасѝ Царѧ̀ и҆ вѣрныѧ лю́ди Бц҃а ра́ди, ѡ҆ на́съ тебѣ̀ молѧщїѧсѧ, є҆дине человѣкѡлю́бче.

А҆́бїе же посе́мъ пою́тъ трижды Тропа́ръ ᲃе́й. Гла́съ ѕ҃.

Послѝ благода́ть твою̀ жиꙁнода́вче, и҆ Кре́стъ се́й ѡ҆свѧтѝ, и҆ всѣ́мъ люде́мъ твои́мъ ꙗ҆́вѝ є҆гѡ̀ бы́ти по́мощъ и҆ ᲂу҆твержде́нїе.

Дїа́конъ,

Гд҃ꙋ помоли́мсѧ.

Ли́къ,

Гд҃и поми́лꙋй.

І҆ере́ѵ̆ же съ ᲂу҆миле́нїемъ чтетъ Моли́твꙋ ᲃі́ю.

Гд҃и Бо́же ᲃла́вы, Ѿч҃е Вседержи́телю, Бо́же Саваꙍ́ѳ, и҆́же дре́вомъ живота̀ посре́дѣ Ра́ѧ сꙋ́щагѡ, проѡбраꙁи́лъ є҆сѝ животво́рный Кре́стъ є҆диноро́днагѡ ᲃн҃а твое́гѡ: и҆ въ мѣ́стѡ дре́ва преслꙋша́нїѧ, є҆го́же вкꙋ́сомъ вселꙋка́вый змі́й Пра́ѿцѧ на́ша, и҆ съ ни́ми ве́сь ро́дъ члчⷭ҇кїй и҆́ꙁъ Ра́ѧ и҆ꙁгна̀, и҆ въ ᲃме́ртъ привлечѐ, зна́менїе ѡ҆́нагѡ живоно́снагѡ Крⷭ҇та̀, на не́мъ же воꙁлюбле́нный тво́й Сы́нъ пригвожде́нъ бы́въ ᲂу҆мрѐ, и҆ смр҃тїю ᲃме́рть ᲂу҆мертвѝ, и҆ всю̀ ᲃи́лꙋ дїаволю ᲂу҆праꙁднѝ, и҆ живо́тъ мі́рꙋ дарова̀, Це́ркви свое́й ѡ҆рꙋ́жїе непобѣди́мое, ѡ҆свѧщенїе же и҆ покро́въ держа́венъ, и҆ Вѣ́рѣ ᲂу҆твержденїе, и҆ ѿ всѣ́хъ дїа́вольскихъ кѡ́ꙁнїй и҆ꙁба́вꙋ, и҆ крѣ́пкое ᲃпⷭ҇нїѧ ᲂу҆пованїе, и҆ живота̀ полꙋче́нїе непосты́днꙋю наде́ждꙋ дарова́лъ є҆сѝ: Тѣ́мъ же мы рабѝ твоѝ, толи́кїѧ блг҃ода́ти твое́ѧ тꙋнѐ сподо́блъшесѧ, благда́рни сꙋ́ще, ᲃла́вꙋ и҆ благодаре́нїе и҆ смѣре́нное поклоне́нїе прино́симъ твое́мꙋ вели́чествꙋ, и҆ моли́мсѧ ᲂу҆ми́льнѡ, ꙗ҆́кѡ да млⷭ҇тивно при́ꙁриши на зна́менїе сїе Крⷭ҇тное, ю҆́же вѣ́рнїи рабѝ твоѝ ѿ ᲂу҆се́рдїѧ и҆ тве́рдїѧ вѣ́ры и҆ любвѐ, ꙗ҆́же къ тебѣ̀, съѡрꙋжи́шѧ, въ зна́менїе побѣ́ды ᲃн҃а твое́гѡ, Гд҃а на́шегѡ І҆и҃ᲃ Ха҃, свободи́ же и҆ и҆ꙁбавленїѧ на́шегѡ, и҆ ниꙁпослѝ нань небе́сное твоѐ благослове́нїе, и҆ благословѝ и҆ ѡ҆свѧти є҆́, и҆ и҆сполнѝ ᲃи́лы и҆ благослове́нїѧ ѡ҆́нагѡ дре́ва, на не́мже пригвожде́нѡ бы́сть Пресвѧто́е тѣ́лѡ Гд҃а на́шегѡ І҆и҃ᲃ Ха҃ є҆диноро́днагѡ ᲃн҃а твое́гѡ, и҆́мже ᲃи́ла дїа́волѧ попра́сѧ, и҆ зе́мнїи свободꙋ̀ ᲂу҆лꙋчи́хомъ, и҆ животꙋ̀ ᲃподоби́хомсѧ. Е҆́й, моли́мъ тѧ Влады́ко Прест҃ы́й, ᲃт҃ы́хъ ра́ди Стрⷭ҇тїй, и҆ ᲃт҃ы́хъ Кро́вїй и҆ꙁлїѧ́нїѧ, и҆ животво́рныѧ см҃рти є҆диноро́днагѡ ᲃн҃а твое́гѡ, Гд҃а на́шегѡ І҆и҃ᲃ Ха҃, ꙗ҆́же ᲃъвѣ́томъ тебѐ Бг҃а Ѿц҃а̀ беꙁнача́лнагѡ, и҆ Пресвѧта́гѡ ти Дх҃а во́лею, ᲃпⷭ҇нїѧ на́шегѡ ра́ди на дре́ве Крⷭ҇тномъ претерпѣ̀, и҆ тѣ́ми дре́во Крⷭ҇тное, є҆́же и҆́ногда ᲃъгреша́ющимъ и҆ злотво́рнымъ ка́ꙁнь бѧ́ше, благослове́но, ᲃвѧ́то, животода́тельно же, и҆ и҆ꙁба́вꙋ согрѣша́ющимъ бы́ти ᲃътворѝ, ꙗ҆́же въ мо́льбꙋ ти принѡ́симъ: послѝ ны́нѣ благода́ть Пртⷭ҇а́гѡ твое́гѡ Дх҃а на зна́менїе сі́е Крⷭ҇тное, и҆ благословѝ и҆ ѡ҆свѧти є҆́, и҆ да́ждь є҆мꙋ̀ бы́ти зна́менїемъ ᲃтра́шнымъ и҆ крѣ́пкимъ на всѧ̀ врагѝ ви́димыѧ и҆ неви́димыѧ, прогна́нїе же и҆ ѿраже́нїе всѣ́хъ кѡ́ꙁнїй, навѣ́тѡвъ же и҆ прило́гѡвъ дїа́вольскихъ: Люде́мъ же твои́мъ да бꙋ́детъ покро́въ держа́венъ, вѣ́рѣ ᲂу҆твержденїе, наде́ждѣ подкрѣпле́нїе, въ бра́нехъ побѣ́да, и҆ въ всѣ́хъ добродѣ́телехъ преспѣѧ́нїе, и҆ всѣ́мъ пре́дъ си́мъ зна́менїемъ тебѣ̀ кла́нѧющимсѧ и҆ мо́лъбы приносѧ́щимъ млⷭ҇тивенъ послꙋша́тель, и҆ всѧ̀ ꙗ҆́же къ ᲃпⷭ҇нїю проше́нїѧ бога́тый пода́тель бꙋ́ди. И҆ ꙗ҆́коже Крⷭ҇то́мъ мі́ръ ѿ грѣхо́внагѡ ѡ҆сꙋжде́нїѧ свободи́лъ є҆сѝ: ᲃи́це рабѡ́въ твои́хъ, ᲃі́е Крⷭ҇тное зна́менїе тебѣ̀ ѿ дꙋша̀ вѣ́рнѡ приносѧ́щихъ, ᲃи́лою Крⷭ҇та̀ воꙁлюбле́ннагѡ ᲃн҃а твое́гѡ, всегда̀ побѣди́тели бы́ти грѣха̀ ꙗ҆вѝ, и҆ всѧ̀ зе́мнаѧ и҆ небе́снаѧ твоѧ̀ блага́ѧ и҆́мъ дарꙋ́й, и҆ Крⷭ҇томъ всегда̀ къ благо́мꙋ всѣ́хъ вѣ́рныхъ наставлѧ́ѧ, къ воспрїѧ́тїю небе́снагѡ вѣнца̀ приведѝ. Ты́ бо є҆сѝ ѡ҆свѧщенїѧ и҆сто́чникъ, и҆ всѣ́хъ благи́хъ бога́тый пода́тель, и҆ тебѣ̀ ᲃла́вꙋ воꙁсыла́емъ, съ є҆диноро́днымъ ти Сы́номъ, и҆ съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

Дїа́конъ,

Гла́вы ва́ша Гв҃и приклони́те.

Ли́къ,

Тебѣ̀ Гд҃и.

І҆ере́ѵ̆ же чтетъ та́йнѡ Моли́твꙋ ᲃі́ю:

Бо́же и҆ Ѿч҃е Гд҃а на́шегѡ І҆и҃ᲃ Ха҃, и҆́же Крⷭ҇томъ є҆гѡ̀ дїа́вола побѣди́въ и҆ ᲃме́рть ᲂу҆мертви́въ, рѡ́дъ члчⷭ҇кїй ѿ ле́сти и҆ мꙋчи́тельства є҆гѡ̀ свободи́лъ є҆сѝ: При́ꙁри ны́нѣ на Моли́твꙋ на́шꙋ и҆ на зна́менїе сі́е Крⷭ҇тное, въ ᲃла́вꙋ тебѐ Бг҃а Ѿц҃а̀ и҆ є҆диносꙋ́щнагѡ ти ᲃн҃а и҆ съ є҆стестве́ннагѡ ти Дх҃а, и҆ въ воспомина́нїе ѡ҆́ныѧ бы́вшїѧ пресла́вныѧ надъ дїа́воломъ, ᲃме́рти же и҆ А҆́да побѣ́ды, и҆ на́шегѡ и҆ꙁбавле́нїѧ съѡрꙋже́нное, Дх҃омъ твои́мъ ᲃт҃ы́мъ, въ ѡ҆кропле́нїи воды̀ ᲃеѧ̀ ᲃщ҃е́нныѧ благословѝ и҆ ѡ҆свѧти, и҆ и҆ꙁле́й нанѐ благослове́нїе твоѐ ᲃт҃о́е и҆ ᲃи́лꙋ, ю҆́же ѡ҆кропле́нїемъ Кр҃вѐ и҆ пригвожде́нїемъ Тѣ́ла воꙁлюбле́ннагѡ ᲃн҃а твое́гѡ ѡ҆́но преблагослове́нное Дре́во ᲃтѧжа́лѡ є҆́стъ: и҆ томꙋ̀ пода́ждь, въ є҆́же бы́ти вѣ́рнымъ люде́мъ твои́мъ въ стѣ́нꙋ̀ и҆ покро́въ, и҆ въ сто́лпъ крѣ́пости ѿ лица̀ вра́жїѧ, въ ѿгна́нїе же всѧ́кагѡ зла̀ сопроти́внагѡ, и҆ въ и҆сцѣле́нїе дꙋше́вныхъ, и҆ тѣле́сныхъ не́дꙋговъ, и҆ въ є҆́же ᲂу҆слы́шаннымъ бы́ти мо́льбамъ и҆ моленїѧмъ всѣ́мъ вѣ́рнѡ тебѣ̀ пре́дъ си́мъ зна́менїемъ молѧщимсѧ.

И҆ воꙁглаша́етъ:

Ты́ бо є҆сѝ Бо́гъ млⷭ҇стїй, и҆ щедрѡ́тъ, и҆ человѣкѡлю́бїѧ, и҆ тебѣ̀ ᲃла́вꙋ воꙁсыла́емъ, съ є҆диноро́днымъ ти Сы́номъ, и҆ съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆ же кро́питъ Кре́стъ ᲃщ҃енною водо́ю, гл҃ѧ̀:

Ѻ҆свѧща́етсѧ Крⷭ҇тное ᲃі́е зна́менїе благода́тїю Пресвѧта́гѡ Дх҃а, ѡ҆кропле́нїемъ воды̀ ᲃеѧ̀ ᲃщ҃енныѧ, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

А҆́бїе же посе́мъ ᲃта́въ благоговѣ́йнѡ пре́дъ ᲃт҃ы́мъ Крⷭ҇тнымъ зна́менїемъ, Кади́льницꙋ же вꙁе́мъ ка́дитъ є҆̀ крестаѡ́браꙁнѡ, поѧ̀ сі́ѧ ᲃтихи́ры. Гла́съ и҃.

Кре́стъ храни́тель є҆́стъ все́й вселе́ннѣй: Кре́стъ красота̀ Церко́внаѧ: Кре́стъ царе́мъ держа́ва: Кре́стъ вѣ́рнымъ ᲂу҆твержде́нїе: Кре́стъ А҆́ггелѡмъ ᲃла́ва, и҆ бѣ́сѡмъ ꙗ҆́ꙁва.

Сла́ва: И҆ ны́нѣ: Гла́съ д҃.

Ꙍ҆ тебѣ̀, требл҃же́нне и҆ жиꙁнода́вче Крⷭ҇те, лю́дїе пита́еми съпраꙁднꙋ́ютъ: съ Беꙁпло́тными Ли́ки, Чи́нъ А҆рхїере́ѵ̆скїй благоговѣ́ннѡ пое́тъ: множествѡ̀ же И҆ночествꙋ́ющихъ и҆ По́стникѡвъ покланѧ́етсѧ: Ха҃ же на тебѣ̀ Распе́ншагосѧ вси прославлѧ́емъ.

Покланѧ́етсѧ благоговѣ́ннѡ до землѝ, и҆ лобꙁа́етъ че́стный и҆ ᲃщ҃енный Кре́стъ. По лобꙁа́нїи же па́ки, трети́цею поѧ̀ то́ежде, покланѧ́етсѧ.

Та́кожде же и҆ вси предстоѧ́щїи покланѧ́ютсѧ, и҆ лобꙁа́ютъ че́стный Кре́стъ.

Ли́кꙋ пою́щꙋ ᲃтихи́рꙋ ᲃі́ю. Гла́съ в҃.

Прїйдѣ́те вѣ́рнїи, Крⷭ҇та ᲃи́лѣ поклони́мсѧ: дре́во бо въ Раѝ ᲃме́рть проꙁѧбѐ, ᲃі́е же жи́ꙁнь процветѐ, беꙁгрѣ́шна и҆мы́й пригвожде́нна на себѣ̀ Га҃. ѿ не́гоже всѝ ꙗ҆ꙁы́цы нетлѣ́нїе ѡ҆бъе́млюще, зове́мъ: Крⷭ҇то́мъ сме́рть ᲂу҆праꙁдни́вый, и҆ на́съ ѿ пре́лести и҆ мꙋчи́тельства дїа́волѧ свободи́вый, Гд҃и ᲃла́ва тебѣ̀.

А҆́бїе же посе́мъ тво́ритъ ѿпꙋ́стъ се́й.

Ре́кшꙋ Дїа́конꙋ:

Премꙋ́дрость.

и҆ Ли́кꙋ:

Чтⷭ҇нѣ́йшꙋю Херꙋві́мъ.

Сла́ва: И҆ ны́нѣ: Гд҃и поми́лꙋй, гⷤ, Благословѝ.

На дре́ве Крⷭ҇тномъ ᲃпⷭ҇нїѧ на́шегѡ ра́ди Распны́йсѧ, и҆ ᲃм҃рть подъѧ́ти и҆ꙁволи́вый, и҆ тридне́внѡ и҆́ꙁъ ме́ртвыхъ Воск҃рсы́й: Хᲃ҃ и҆́стинный Бо́гъ нш҃ъ, молитва́ми Пречи́стыѧ ᲃвое́ѧ Ма́тере, ᲃи́лою честна́гѡ и҆ животворѧ́щагѡ Креста̀, и҆ всѣ́хъ ра́ди ᲃт҃ы́хъ свои́хъ, ᲃп҃се́тъ и҆ поми́лꙋетъ на́съ, ꙗ҆́кѡ бла́гъ и҆ человѣкѡлю́бецъ.

Ли́къ,

А҆ми́нь.

І҆ере́ѵ̆ же, вꙁе́мъ Кре́стъ, вно́ситъ є҆гѡ̀ въ Ѻ҆лтарь Црⷭ҇кими Вра́ты, и҆ ѡ҆бра́щьсѧ къ люде́мъ, благословлѧ́етъ и҆́хъ Крⷭ҇то́мъ, гл҃ѧ̀:

Сп҃си Гд҃и лю́ди ᲃвоѧ̀, и҆ благословѝ достоѧ́нїе твоѐ:

Поста́вленꙋ сꙋ́щꙋ пре́дъ А҆мвѡ́номъ Тетрапо́дꙋ, чⷭ҇тнѡ покрове́ннꙋ, и҆ на не́мъ Ѻ҆́браꙁъ Сп҃совъ, и҆лѝ мнѡ́ги Ѻ҆́браꙁы, є҆ли́кѡ и҆́хъ бꙋ́детъ, І҆ере́ѵ̆ въ Е҆питра́хиль и҆ Фелѡ́нъ ѡ҆дѣѧ́нъ, крестаѻ́браꙁнѡ покади́въ Ѻ҆́браꙁъ, начина́етъ ѡ҆бы́чнѡ.

Благослове́нъ Бо́гъ нш҃ъ:

Чте́цъ,

Ца́рю небе́сный: Трⷭ҇то́е: Ѿч҃е нш҃ъ: и҆ по Ꙗ҆кѡ твоѐ є҆́стъ Црⷭ҇твѡ: Гд҃и поми́лꙋй, в҃і.

Сла́ва: И҆ ны́нѣ: Прїйдѣ́те поклони́мсѧ, гⷤ. И҆ Ѱало́мъ п҃н:

Млⷭ҇ти твоѧ̀ Гд҃и въ вѣ́къ воспою̀:

Се́й ѱало́мъ не чте́тсѧ ве́сь, но да́же до сегѡ̀ мѣ́ста.

И҆ въ благволе́нїи твое́мъ воꙁнесе́тсѧ ро́гъ нш҃ъ.

Сла́ва: И҆ ны́нѣ: А҆ллилꙋ́іа, гⷤⷤ:

Сла́ва тебѣ̀ Бо́же.

Дїа́конъ,

Гд҃ꙋ помоли́мсѧ.

Ли́къ,

Гд҃и поми́лꙋй.

І҆ере́ѵ̆ же чтетъ Моли́твꙋ ᲃі́ю:

Гд҃и Бж҃е Вседержи́телю, Бж҃е ѿц҃ъ на́шихъ, хотѧ́й лю́ди твоѧ̀, и҆ꙁбра́ннагѡ І҆и҃лѧ, ѿ пре́лести и҆дѡлослꙋже́нїѧ и҆ꙁба́вити, и҆ въ поꙁна́нїи и҆ слꙋже́нїи тебѣ̀ є҆ди́номꙋ и҆́стинномꙋ Бг҃ꙋ всегда̀ неѿстꙋ́пнѡ и҆мѣ́ти, є҆́же не твори́ти себѣ̀ ѻ҆́браꙁа и҆ подо́бїѧ тебѣ̀ и҆́стинномꙋ Бг҃ꙋ сопроти́внагѡ, въ є҆́же ꙗ҆́кѡ Бг҃ꙋ кла́нѧтисѧ и҆ ᲃлꙋжи́ти є҆мꙋ̀, преще́нїемъ запрѣти́лъ є҆сѝ. Па́ки же подо́бїа и҆ ѻ҆́браꙁы, и҆́миже не чꙋ́ждыхъ ло́жныхъ богѡ́въ, но тебѐ є҆ди́нагѡ и҆́стиннагѡ Бг҃а Пресвѧто́е и҆ великолѣ́пое и҆мѧ сла́витсѧ, Мꙍѵ̆се́омъ пе́рвѣе въ твое́мъ за́конномъ ᲃт҃и́лищи, надъ Кивꙍ́томъ ᲃвѣдѣ́нїѧ Херꙋви́ма два̀ зла́та, два́ же ᲂу҆ ᲂу҆глѡ́въ ѡ҆чище́нїѧ поста́вити, на ѡ҆по́нахъ же мнѡ́жество Херꙋві́мѡвъ дѣ́ломъ шве́ннымъ ᲂу҆строи́ти и҆ соѡрꙋжи́ти повелѣ́лъ є҆сѝ: и҆ Соломѡ́номъ въ ѻ҆́лтари Херꙋві́ма два̀, ѿ дре́ва кипари́са зла́томъ ѡ҆бъѧ́та поста́влена бы́ста: Кивꙍ́тъ же, въ не́мже ᲃкрижа́ли Завѣ́та ка́менни, ᲃта́мна зла́та, и҆ А҆а́ꙍновъ же́ꙁлъ бѧ́хꙋ, ꙗ҆́кѡ твоѐ съ людьмѝ тꙋ сꙋ́щїи, и҆ ᲃла́вы твое́ѧ вели́чествѡ знамена́ющїѧ, и҆ па́мѧть твои́хъ пресла́вныхъ чꙋде́съ и҆ благодѣѧ́нїй и҆мѣ́ющїѧ, (а҆́ще и҆ дѣ́лѡ рꙋ́къ члчⷭ҇кихъ бѧ́хꙋ) съ стра́хомъ и҆ тре́петомъ и҆ Бо́голѣ́пнымъ поклоне́нїемъ, кажде́нїемъ же и҆ пре́дъ тѣ́ми моленїемъ, чти́ти сі́ѧ повелѣ́лъ є҆сѝ, и҆ че́сть ѡ҆́нꙋю, ꙗ҆́кѡже себѣ̀ само́мꙋ ѿда́ннꙋю, млⷭ҇тивнѡ прїйма́лъ є҆сѝ. Въ и҆сполне́нїи же вре́менъ посла́лъ є҆сѝ є҆диноро́днагѡ ᲃн҃а твое́гѡ, Гд҃а на́шегѡ І҆и҃ᲃ Ха҃, ражда́емагѡ ѿ Жены̀, прⷭ҇нѡ же Дв҃ы Мр҃іѧ, и҆́же зра́къ раба̀ пріи́мъ и҆ въ подо́бїи человѣ́честемъ бы́въ, подо́бїе свое́гѡ прчи́стагѡ ѻ҆́браꙁа, нерꙋкотворе́нно къ свое́мꙋ Преᲃт҃о́мꙋ лицꙋ̀ ᲂу҆брꙋ́съ приложи́въ, и҆ꙁобраꙁѝ, и҆ А҆вга́рꙋ Є҆де́сскомꙋ Кнѧ́ꙁю посла̀, и҆ тѣ́мъ ѿ не́дꙋга тогѡ̀ и҆сцѣлѝ, и҆ всѣ́мъ вѣ́рою къ не́мꙋ приходѧ́щимъ и҆ кла́нѧющимсѧ, неиꙁче́тнаѧ и҆сцѣле́нїѧ и҆ мнѡ́гаѧ бл҃агодѣѧ́нїѧ чꙋдодѣйствꙋ́ѧ подава́ше. И҆ мы̀ ᲂу҆́бѡ, ѽ бл̀агі́й Вседержи́телю Влады́ко, ᲃе́й ѻ҆́браꙁъ, (и҆лѝ, ᲃі́ѧ ѻ҆́браꙁы,) въꙁлюбле́ннагѡ ᲃн҃а твое́гѡ, въ воспомина́нїе ᲃп҃си́тельнагѡ Воплоще́нїѧ, и҆ всѣ́хъ пресла́вныхъ є҆гѡ̀ чꙋде́съ и҆ благодѣѧ́нїй, ꙗ҆́же на землѝ, ꙗ҆́кѡ человѣ́къ ꙗ҆ви́всѧ, члчⷭ҇комꙋ ро́дꙋ покаꙁа̀, не Бо́готворѧ́ще съѡрꙋжи́хомъ, но вѣдꙋ́ще, ꙗ҆́кѡ по́честь ѻ҆́браꙁа на первоѡ́браꙁное въсхо́дитъ, пре́дъ твои́мъ вели́чествомъ че́стнѡ предложи́хомъ, и҆ припада́юще приле́жнѡ моли́мъ: при́ꙁри ми́лостивно на́ ны и҆ на ѻ҆́браꙁъ се́й (и҆лѝ на ѻ҆́браꙁы сі́ѧ) и҆ Воплоще́нїѧ и҆ ѧ҆вле́нїѧ ра́ди є҆диноро́днагѡ ᲃн҃а твое́гѡ, въ є҆го́же воспомина́нїе ᲃе́й (и҆лѝ ᲃі́ѧ) ᲂу҆строи́хомъ, послѝ на́нь (и҆лѝ на́ нѧ) твоѐ нбⷭ҇ное благослове́нїе и҆ благода́ть Пресвѧта́гѡ Дх҃а, и҆ благословѝ и҆ ѡ҆свѧти є҆гѡ̀ (и҆лѝ ѧ҆̀) и҆ пода́ждъ є҆мꙋ̀, (и҆лѝ и҆́мъ) си́лꙋ цѣле́бнꙋ, и҆ всѣ́хъ ко́ꙁней дїа́вольскихъ прогони́тельнꙋ, и҆ и҆сполнѝ є҆гѡ̀ (и҆лѝ ѧ) благослове́нїѧ и҆ крѣ́пости ѻ҆́нагѡ ᲃт҃а́гѡ нерꙋкотворе́ннагѡ Ѻ҆́браꙁа, ю҆́же ѿ прикоснове́нїѧ Пресвѧта́гѡ и҆ пречи́стагѡ лица̀ воꙁлюбле́ннагѡ ᲃн҃а твое́гѡ бога́тнѡ стѧжа̀, въ є҆́же си́ламъ и҆ чꙋдесе́мъ тѣ́мъ (и҆лѝ, тѣ́ми) къ ᲂу҆твержде́нїю правосла́вныѧ вѣ́ры, и҆ ᲃпⷭ҇нїю вѣ́рныхъ люде́й твои́хъ дѣйствова́тисѧ, и҆ въ є҆́же всѣ́мъ тебѣ̀ и҆ є҆диноро́дномꙋ твое́мꙋ ᲃн҃ꙋ и҆ Преᲃт҃о́мꙋ Дх҃ꙋ пре́дъ ни́мъ кла́нѧющимсѧ, и҆ вѣ́рнѡ приꙁыва́ющимъ, и҆ приле́жнѡ молѧ́щимсѧ ᲂу҆слы́шаннымъ бы́ти, и҆ млⷭ҇сть привлещѝ твое́гѡ человѣкѡлю́бїѧ, и҆ благода́ть полꙋчи́ти. Ты́ бо є҆сѝ ѡ҆свѧщенїе на́ше, и҆ тебѣ̀ ᲃла́вꙋ воꙁсыла́емъ съ є҆диноро́днымъ ти Сы́номъ, и҆ Пресвѧты́мъ, и҆ благи́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

Дїа́конъ,

Гла́вы ва́шѧ Гв҃и приклони́те.

Ли́къ,

Тебѣ̀ Гд҃и.

І҆ере́ѵ̆ же чтетъ та́йнѡ Моли́твꙋ ᲃі́ю:

Вонмѝ Гд҃и Бо́же мо́й ѿ ᲃт҃а́гѡ жи́лища, и҆ ѿ Престо́ла ᲃла́вы Црⷭ҇твїѧ твое́гѡ, и҆ ми́лостивнѡ послѝ благослове́нїе твоѐ ᲃт҃о́е на ѻ҆́браꙁъ сей (и҆лѝ на ѻ҆́браꙁы сі́ѧ,) и҆ въ ѡ҆кропле́нїи воды̀ ᲃеѧ̀ ᲃщ҃е́нныѧ, благословѝ и҆ ѡ҆свѧтѝ є҆гѡ̀, (и҆лѝ ѧ҆̀) и҆ да́ждь є҆мꙋ̀ (и҆лѝ и҆́мъ) ᲃи́лꙋ цѣле́бнꙋ, всѧ́коѧ бо́лѣꙁни и҆ не́дꙋга, и҆ всѣ́хъ дїа́вольскихъ ко́ꙁнїй прогони́тельнꙋ ѿ всѣ́хъ вѣ́рнѡ къ не́й (и҆лѝ къ ни́мъ) прибѣга́ющимъ, и҆ пре́дъ тѣ́мъ (и҆лѝ тѣ́ми) тебѣ̀ кла́нѧющимсѧ, молѧ́щимъ же сѧ, и҆ прибѣга́ющимъ: и҆ всегда̀ ᲂу҆слы́шана и҆ благопрїѧ́тна тебѣ̀ да бꙋ́детъ и҆́хъ мо́льба.

И҆ воꙁглаша́етъ.

Благода́тїю и҆ щедрѡта́ми є҆диноро́днагѡ ᲃн҃а твое́гѡ, съ ни́мже благослове́нъ є҆сѝ и҆ съ Пресвѧты́мъ и҆ благи́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆ же кро́питъ ᲃщ҃енною водо́ю ѻ҆́браꙁъ, гл҃ѧ̀:

Ꙍ҆свѧща́етсѧ ѻ҆́браꙁъ сей (и҆лѝ ѻ҆́браꙁы сі́а) благода́тїю Пресвѧта́гѡ Дх҃а, ѡ҆кропле́нїемъ ᲃщ҃е́нныѧ воды̀ ᲃеѧ̀, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

А҆́бїе же І҆ере́ѵ̆ ка́дитъ ѻ҆́браꙁъ, и҆ покланѧ́етсѧ, поѧ̀ и҆лѝ гл҃ѧ̀ Тропа́рь ᲃе́й. Гла́съ в҃.

Пречи́стомꙋ ти Ѻ҆́браꙁꙋ покланѧ́емсѧ благі́й, просѧ́ще проще́нїѧ прегрѣше́нїемъ на́шимъ, Хє҃ Бо́же: во́лею бо благоиꙁволи́лъ є҆сѝ въꙁыйтѝ на Кре́стъ, да и҆ꙁба́виши, и҆́хже соꙁда́лъ є҆сѝ, ѿ работы̀ вра́жїѧ: тѣ́мъ благодарѧ́ще вопїе́мъ ти: ра́дости всѧ̀ и҆сполни́лъ є҆сѝ ᲃп҃се нш҃ъ, прише́дый спастѝ мі́ръ.

Лобꙁа́въ же ѻ҆́браꙁъ, гл҃е́тъ,

Сла́ва: И҆ ны́нѣ. Гла́съ в҃.

Бжⷭ҇тве́нный тво́й зра́къ на И҆́коне и҆ꙁъѡбраꙁꙋ́юще Хє҃ Бо́же, є҆́же ѿ Дв҃ы Ржⷭ҇тво̀ твоѐ ꙗ҆́снѡ раꙁꙋмѣва́емъ: чꙋдеса́ же твоѧ̀ неиꙁъгл҃а́ннаѧ, и҆ во́льное Распѧ́тїе воспомина́юще, проповѣда́емъ: ѿню́дꙋже бѣ́сѡве прогонѧ́ютсѧ ᲃтра́хѡмъ, злосла́внїи же въ печа́лехъ рыда́ютъ, ꙗ҆́кѡ си́мъ ᲃоприча́стници.

И҆ а҆́бїе тво́ритъ ѿпꙋстъ се́й:

Неиꙁрече́ннымъ ᲃмотре́нїемъ пре́жде ᲃвое́ѧ во́льныѧ Стрⷭ҇ти, и҆ꙁволи́вый на Ѻ҆брꙋ́се нерꙋкотворе́ннѡ и҆ꙁобраꙁи́ти Пречи́стагѡ и҆ Бо́гочѣлове́чнагѡ свое́гѡ лица̀ ѻ҆́браꙁъ, Хᲃ҃ и҆́стинный Бо́гъ нш҃ъ, Молитва́ми Пречи́стыѧ свое́ѧ Мт҃ре, и҆ всѣ́хъ ᲃт҃ы́хъ ᲃвои́хъ, поми́лꙋетъ и҆ ᲃп҃асе́тъ на́съ, ꙗ҆́кѡ благъ и҆ человѣкѡлю́бецъ.

И҆ полага́етъ Ѻ҆́браꙁъ че́стнѡ на свое́мъ мѣ́сте, благодарѧ̀ Бг҃а.

Начина́етъ же І҆ере́ѵ̆ все по предꙋкаꙁа́нномꙋ на благослове́нїи Ѻ҆́браꙁа Хв҃а, зрѝ на Листѐ, рд҃¹, да́же до ѱалма̀, и҆́же здѐ чте́тсѧ, м҃д.

Ѿригнꙋ̀ ᲃе́рдце моѐ ᲃло́вѡ бла́го: Весъ до конца̀.

Сла́ва: И҆ ны́нѣ: А҆лл҃ꙋ́іа ᲃла́ва тебѣ̀ Бо́же.

Дїа́конъ,

Гд҃ꙋ помоли́мсѧ.

Ли́къ,

Гд҃и поми́лꙋй.

І҆ере́ѵ̆ же чтетъ Моли́твꙋ ᲃі́ю:

Гд҃и Бж҃е нш҃ъ, и҆́же съ предвѣ́чномꙋ и҆ є҆диносꙋ́щномꙋ твое́мꙋ ᲃн҃ꙋ и҆ ᲃло́вꙋ, ѿ Пречи́стыѧ прⷭ҇нѡ Дв҃ы Мр҃іѧ въплоти́тисѧ и҆ꙁволи́лъ є҆сѝ, и҆ ᲃі́ю Бц҃ꙋ Ржⷭ҇тво́мъ є҆гѡ̀ Пречесты́мъ и҆́ꙁъ неѧ̀ ᲃъдѣла́въ, предста́тел̾ницꙋ, помо́щницꙋ и҆ молитве́нницꙋ всѣ́мъ вѣ́рнымъ сътвори́лъ є҆сѝ: при́ꙁри ны́нѣ на на́съ смире́ннѡ молѧ́щихтисѧ, и҆ Бц҃ꙋ ᲃі́ю и҆́стиннѡ и҆менꙋ́ющихъ, и҆ бы́ти вѣ́рꙋющихъ, и҆ ᲃі́ю въ мо́льбꙋ къ тебѣ̀ вѣ́рнѡ приꙁыва́ющихъ, и҆ молитва́ми є҆ѧ̀ ᲂу҆слы́шаны ᲃътворѝ проше́нїѧ и҆ мѡ́льбы на́шѧ, и҆ ниꙁпослѝ благода́ть Пресвѧта́гѡ твое́гѡ Дх҃а на И҆́конꙋ сі́ю, ю҆́же рабѝ твоѝ въ че́сть и҆ па́мѧтъ є҆ѧ̀ съѡрꙋжи́ша, и҆ благословѝ и҆ ѡ҆свѧтѝ ю҆̀ небе́снымъ твои́мъ благослове́нїемъ: и҆ пода́ждь є҆́й ᲃи́лꙋ и҆ крѣ́пость чꙋдотво́рнагѡ дѣ́йствїѧ, сътворѝ ю҆̀ враче́бницꙋ и҆ цѣлбамъ и҆сто́чникъ, всѣ́мъ въ бѡ́лѣꙁнехъ къ не́й притѣка́ющимъ, и҆ Бц҃а ра́ди ѿ тебѐ по́мощъ просѧ́щимъ: и҆ всѣ́мъ и҆́же пре́дъ сею̀ И҆́коною Преблагослове́ннꙋю Дв҃ꙋ, и҆ Мт҃ръ Гд҃а на́шегѡ І҆и҃ᲃ Ха҃, воꙁлюбле́ннагѡ ᲃн҃а твое́гѡ, досто́йнѡ чти́ти, и҆ ꙗ҆́кѡ предста́телницꙋ рѡ́да Хрⷭ҇тїа́нскагѡ въ мо́льбꙋ къ тебѣ̀ и҆ въ по́мощь въ бѣда́хъ и҆ нꙋ́ждахъ свои́хъ приꙁыва́ти бꙋ́дꙋтъ, и҆ꙁба́вꙋ, застꙋпле́нїе и҆ ско́рꙋю по́мощь полꙋчи́ти сподобѝ: съгрѣше́нїемъ же ѡ҆ставле́нїе и҆́мъ млⷭ҇тивнѡ пода́ждь, и҆ благода́ть проси́мꙋю ѿ тебѐ ᲃко́рѡ прїѧ́ти и҆ млⷭ҇ть ѡ҆брѣстѝ ѿ твое́гѡ человѣкѡлю́бїѧ жела́ннꙋю, небе́снагѡ Црⷭ҇твїѧ прича́стники бы́ти ᲃътворѝ: щедрота́ми и҆́ꙁъ неѧ̀ пло́тїю ро́ждшагосѧ є҆диноро́днагѡ ᲃн҃а твое́гѡ, Въплоще́ннагѡ Бг҃а и҆ Сп҃са на́шегѡ І҆и҃ᲃ Ха҃, съ ни́мже тебѣ̀ подоба́етъ всѧ́каѧ ᲃла́ва, че́сть и҆ поклоне́нїе, съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

Дїа́конъ,

Гла́вы ва́ша Гд҃ви приклони́те.

Ли́къ,

Тебѣ̀ Гд҃и.

І҆ере́ѵ̆ же чтетъ Моли́твꙋ ᲃі́ю та́йнѡ:

Влады́кѡ Бо́же Ѿч҃е Вседержи́телю, и҆ꙁволивый є҆динꙋ ѿ всегѡ̀ ро́да члове́ча, че́стꙋю голꙋби́цꙋ и҆ нескве́рнꙋю А҆́гницꙋ, прⷭ҇нѡ Дв҃ꙋ Мр҃їю въ Мт҃ерь є҆диноро́дномꙋ ти ᲃн҃ꙋ и҆ꙁбра́ти, и҆ въ жи́лище є҆мꙋ̀ наи́тїемъ Пресвѧта́гѡ твое́гѡ Дх҃а ѡ҆свѧтити, вы́шшꙋю же и҆ честнѣ́йшꙋю Херꙋві́мѡвъ и҆ Серафі́мѡвъ, и҆ всеѧ̀ тва́ри ᲃлавнѣ́йшꙋю, ходота́ицꙋ и҆ молитве́нницꙋ члчⷭ҇комꙋ ро́дꙋ сотвори́лъ ю҆̀ є҆сѝ: Тоѧ̀ молитва́ми и҆ предста́тельствомъ И҆́конꙋ ᲃі́ю, въ ч҃сть и҆ въ па́мѧть є҆ѧ̀, и҆ въ сла́вꙋ и҆́ꙁъ не́ѧ рожде́ннагѡ є҆диноро́днагѡ и҆ є҆диносꙋ́щнагѡ ти ᲃн҃а, и҆ тебѐ беꙁнача́льнагѡ є҆гѡ̀ Ѿц҃а̀, и҆ Пресвѧта́гѡ и҆ животворѧ́щагѡ ти Дх҃а соста́вленнꙋю, благода́тїю твое́ю въ ѡ҆кропле́нїи воды̀ ᲃеѧ̀ ᲃщ҃енныѧ, благословѝ и҆ ѡ҆свѧти, и҆ ꙗ҆вѝ ю҆̀ всѣ́мъ вѣ́рою пре́дъ не́ю молѧ́щимътисѧ, цѣле́бницꙋ дꙋше́вныхъ не́дꙋгѡвъ и҆ тѣле́сныхъ, и҆ ѿ всѣ́хъ вра́жїихъ навѣ́товъ свобожде́нїе и҆ покро́въ держа́венъ, и҆ молба́мъ благопрїѧ́тнымъ ᲂу҆ тебѐ бы́ти сотворѝ.

И҆ воꙁглашаетъ:

Щедрѡта́ми є҆диноро́днагѡ ᲃн҃а твое́гѡ, и҆́ꙁъ неѧ̀ пло́тїю рожде́ннагѡ, Гд҃а нш҃гѡ І҆и҃ᲃ Ха҃, съ ни́мже благослове́нъ є҆сѝ, съ Пртⷭ҇ы́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆ же кропитъ и҆конꙋ, гл҃ѧ̀:

Ѻ҆свѧща́етсѧ И҆́кона сі́ѧ благода́тїю Пртⷭ҇а́гѡ Дх҃а, ѡ҆кропле́нїемъ Воды̀ ᲃеѧ̀ ᲃщ҃енныѧ, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ а҆́бїе пою́тъ Тропарѝ ᲃі́ѧ Бо́горо́дичны. Гла́съ а҃.

Подъ тво́й покро́въ прибѣга́емъ Бц҃е Дв҃о, моли́твъ на́шихъ въ ско́рбехъ не пре́ꙁри: но ѿ бѣ́дъ и҆ꙁба́ви на́съ, є҆дина̀ чⷭ҇таѧ и҆ благослове́ннаѧ.

Бц҃е Дв҃о, ра́дꙋйсѧ, ѡ҆брадова́ннаѧ Мр҃їе, Гд҃ь съ тобо́ю, благослове́нна ты въ жена́хъ, и҆ благослове́нъ пло́дъ чре́ва твое́го, ꙗ҆́кѡ Сп҃са роди́ла є҆сѝ дꙋша́мъ на́шимъ.

Сла́ва: Гла́съ а҃.

Ѿ ᲃт҃ы́ѧ твое́ѧ И҆́коны, Прчⷭ҇таѧ Бц҃е, цѣ́л̾бы и҆ и҆сцѣле́нїѧ подава́ютсѧ неꙁа́вистнѡ всѣ́мъ, вѣ́рою къ не́й притѣка́ющимъ, и҆ твоѐ застꙋпле́нїе ѿ се́рдца приꙁыва́ющимъ. тѣ́мъ и҆ моѧ̀ неможе́ниѧ посѣтѝ Дв҃о, и҆ дꙋше́вныѧ и҆ тѣле́сныѧ стра́сти млⷭ҇тивнѡ ᲂу҆врачꙋ́й.

И҆ ны́нѣ: Гла́съ то́йже:

Любо́вїю, честаѧ Дв҃о, твою̀ ᲃт҃ꙋю И҆́конꙋ почита́ющимъ, и҆ Бж҃ію тѧ и҆́стиннꙋю Мт҃ръ, согла́снѡ воꙁвѣща́ющимъ, и҆ вѣ́рнѡ покланѧ́ющимътисѧ, храни́тельница ꙗ҆ви́сѧ, и҆ держа́внаѧ предста́тельница, всѧ́кое зло̀ ѿ си́хъ ᲂу҆далѧ́ющи, ꙗ҆́кѡ всѧ̀ могꙋ́щаѧ.

Посемъ: Досто́йнѡ є҆́стъ:

И лобꙁа́вше ѻ҆́браꙁъ, тво́ритъ І҆ере́ѵ̆ ѿпꙋ́стъ ѡ҆бы́чный.

Вѣ́стнѡ же бꙋ́ди, ꙗ҆́кѡ а҆́ще И҆́кона бꙋ́детъ ѿ Пра́ꙁдникѡвъ Бо́горо́дичныхъ, по ѡ҆свѧщенїи є҆ѧ̀ а҆́бїе Тропа́рь и҆ Конда́къ Пра́ꙁдничный пое́мъ, пото́мъ же сі́ѧ преднаписа́нныѧ Тропарѝ.

І҆ере́ѵ̆ ѡ҆бы́чнѡ по предꙋкаꙁа́нномꙋ ѻ҆́браꙁꙋ наче́нъ, ᲃъверша́етъ всѐ да́же до ѱалма̀.

Зде́же чте́тсѧ ѱало́мъ ѯѕ҃:

Бо́же ᲂу҆щедрѝ ны, и҆ благословѝ ны: просвѣтѝ лицѐ твоѐ на ны, и҆ поми́лꙋй ны. Весь до конца̀.

Сла́ва: И҆ ны́нѣ: А҆лл҃ꙋ́іа, ᲃла́ва тебѣ̀ Бо́же.

Дїа́конъ,

Гд҃ꙋ помоли́мсѧ.

Ли́къ,

Гд҃и поми́лꙋй.

І҆ере́ѵ̆ же чтетъ Моли́твꙋ ᲃі́ю:

Гд҃и Бж҃е, въ Трⷪ҇ци ᲃтѣ́й ᲃлави́мый, є҆го́же ни ᲂу҆́мъ пости́гнꙋти мо́жетъ, ни́же ᲃло́во ᲃкаꙁа́ти воꙁмога́етъ, є҆го́же никто́же ѿ человѣ́къ нигде́же ви́дѣ, то́чїю ꙗ҆́коже ѿ ᲃт҃ы́хъ писа́нїй и҆ Бо́гогла́сныхъ А҆пⷭ҇лъ ᲂу҆че́нїй наꙋчи́хѡмсѧ, ᲃи́це вѣ́рꙋемъ, и҆ ᲃи́це тебѐ Бг҃а Ѿц҃а̀ беꙁнача́льнагѡ, и҆ ᲃн҃а твое́гѡ є҆диносꙋ́щнагѡ, и҆ Дх҃а твое́гѡ съпресто́льнагѡ и҆ съестестве́ннагѡ и҆сповѣ́дꙋемъ: и҆ ꙗ҆́коже писа́нїе на́мъ ве́тхое повѣствꙋ́етъ ѡ҆ ꙗ҆вле́нїи твое́мъ въ ѡ҆́браꙁе трі́ехъ А҆гг҃лѡвъ, ѡ҆́номꙋ пресловꙋ́томꙋ Патрїа́рхꙋ А҆враа́мꙋ бы́вшомъ. Въ но́вей же блг҃да́ти ѻ҆ц҃ъ въ гла́сѣ, Сы́нъ пло́тїю въ І҆ꙍрда́ни, Дх҃ъ же ᲃт҃ы́й въ видѣ́нїи Го́лꙋбѧ ꙗ҆ви́сѧ. и҆ па́ки, Сы́нъ, и҆́же пло́тїю воꙁнесе́сѧ на́ нб҃о, и҆ ѡ҆де́снꙋю Бг҃а ᲃѣди́тъ, Ꙋ҆теши́телѧ Дх҃а на А҆пⷭ҇лы въ видѣ́нїи ѻ҆́гненныхъ ꙗ҆ꙁы́къ посла̀: и҆ на Ѳавꙍ́ре Ѿц҃ъ въ гла́сѣ, Дх҃ъ ᲃт҃ый въ ѡ҆́блацѣ, Сы́нъ же въ Пресвѣ́тломъ Свѣ́те Ꙋ҆ч҃никомъ трі́емъ покаꙁа́сѧ: си́це всегда́шнѧгѡ ра́ди воспомина́нїѧ, тебѐ є҆дина́гѡ ᲃлави́магѡ Бг҃а не то́чїю ᲂу҆сты̀ и҆сповѣдꙋ́емъ, но и҆ ѡ҆́браꙁъ пи́шемъ, не є҆́же Бо́готвори́ти ᲃе́й, но є҆́же на́нь тѣле́сныма ѡ҆чи́ма въꙁира́юще, ᲂу҆́мныма на тебѐ Бг҃а на́шегѡ зрѣ́ти, и҆ тогѡ̀ чтꙋ́ще, тебѐ ᲃоꙁда́телѧ, и҆скꙋпи́телѧ и҆ ѡ҆ст҃лѧ нашегѡ сла́вити и҆ велича́ти и҆ твоѧ̀ неисче́тнаѧ благодѣѧ́нїѧ воспомина́ти: по́честь бо ѡ҆́браꙁа на первоѡ́браꙁное прехо́дитъ. Предло́жше ᲂу҆́бѡ И҆́конꙋ ᲃі́ю ны́нѣ пре́дъ твои́мъ вели́чествомъ, благоче́стнымъ и҆́мже предрѣ́хѡмъ намѣре́нїемъ, про́симъ и҆ моли́мъ, и҆ твое́мꙋ блг҃оꙋтро́бїю ми́лисѧ дѣ́емъ, при́ꙁри млⷭ҇тивнѡ на́ню и҆ ниꙁпослѝ небе́сное твоѐ благослове́нїе, и҆ въ и҆мѧ твоѐ Тртⷭ҇ое благословѝ и҆ ѡ҆свѧтѝ ю҆̀, въ є҆́же ᲃі́ю благоче́стнѡ чтꙋ́щїи, и҆ пре́дъ не́ю тебѣ̀ ᲃмире́нно кла́нѧющїи, и҆ вѣ́рнѡ молѧ́щїисѧ ѡ҆брѧ́щꙋтъ млⷭ҇ть, и҆ благода́ть полꙋ́чатъ, и҆ ѿ всѣ́хъ бѣ́дъ и҆ ско́рбей свобо́дни бꙋ́дꙋтъ, грѣхѡ́въ же проще́нїе полꙋ́чатъ, и҆ црⷭ҇твїѧ небе́снагѡ сподобѧ́тсѧ: Благода́тїю и҆ щедрѡ́тами, и҆ человѣкѡлю́бїемъ тебѐ є҆ди́нагѡ въ Трⷪ҇ци слави́магѡ Бг҃а, Ѿц҃а̀, и҆ ᲃн҃а, и҆ ᲃт҃а́гѡ Дх҃а, є҆мꙋже ᲃла́ва, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

Дїа́конъ,

Гла́вы ва́ша Гв҃и приклони́те.

І҆ере́ѵ̆ же чтетъ Моли́твꙋ ᲃі́ю тайнѡ:

Гд҃и Бж҃е, въ Трⷪ҇це ᲃт҃ѣ́й слави́мый и҆ покланѧ́емый, ᲂу҆слы́ши ны́нѣ Моли́твꙋ на́шꙋ, и҆ ниꙁпослѝ благослове́нїе твоѐ Бжⷭ҇тве́нное небе́сное, и҆ благословѝ, и҆ ѡ҆свѧтѝ ѻ҆́браꙁъ се́й ѡ҆кропле́нїемъ воды̀ ᲃеѧ̀ ᲃщ҃енныѧ, въ сла́вꙋ твою̀ и҆ въ ᲃпⷭ҇нїе люде́й твои́хъ.

И҆ воꙁглашаетъ:

Ты́ бо є҆сѝ ѡ҆свѧще́нїе на́ше, и҆ тебѣ̀ ᲃла́вꙋ въꙁсыла́емъ, Ѿц҃ꙋ̀, и҆ ᲃн҃ꙋ, и҆ ᲃт҃омꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆ же кро́питъ ᲃщ҃е́нною водо́ю ѻ҆́браꙁъ, гл҃ѧ̀:

Ꙍ҆свѧща́етсѧ ѻ҆́браꙁъ ᲃе́й благода́тїю Пресвѧта́гѡ Дх҃а, ѡ҆кропле́нїемъ воды̀ ᲃеѧ̀ ᲃщ҃е́нныѧ, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

А҆́бїе же чтетъ, и҆лѝ пое́тъ Стихи́рꙋ ᲃі́ю. Гла́съ и҃.

Прїйдѣ́те лю́дїе, трисоста́вномꙋ Бжⷭ҇твꙋ поклони́мсѧ, ᲃн҃ꙋ въ Ѿц҃ѝ, съ ᲃт҃ы́мъ Дх҃омъ: Ѿц҃ъ бо беꙁлѣ́тнѡ родѝ ᲃн҃а ᲃъпрⷭ҇нѡсꙋ́щна и҆ съпⷭ҇то́льна, и҆ Дх҃ъ ᲃт҃ы́й бѣ въ Ѿц҃ѝ съ Сы́номъ прославлѧ́емь: є҆ди́на си́ла, є҆ди́но сꙋщество̀, є҆ди́но Бжⷭ҇тво̀, є҆мꙋ́же покланѧ́ющесѧ всѝ гл҃емъ: Ст҃ы́й Бж҃е, всѧ̀ содѣлова́ѧй Сы́номъ, дѣ́йствомъ ᲃт҃а́гѡ Дх҃а. Ст҃ы́й крѣ́пкїй, и҆́мже Ѿц҃а̀ поꙁна́хомъ, и҆ Дх҃ъ ᲃт҃ы́й прі́иде въ мі́ръ: Ст҃ы́й беꙁсме́ртный, ᲂу҆теши́тельный Дꙋше, ѿ Ѿц҃а̀ и҆сходѧ́й, и҆ въ ᲃн҃ѣ почива́ѧй, Трⷪ҇це ᲃт҃а́ѧ, сла́ва тебѣ̀.

Вѣ́стнѡ же бꙋ́ди, ꙗ҆́кѡ а҆́ще и҆́кона бꙋ́детъ ᲃт҃о́й Трⷪ҇ци, ᲃі́ѧ Стихи́ра пое́тсѧ. А҆́ще же Бо́гоѧвле́нїѧ и҆лѝ Преѡбраже́нїѧ, и҆лѝ Соше́ствїѧ ᲃⷮ: Дх҃а, пое́тсѧ и҆лѝ чтетъ Тропа́рь и҆ Конда́къ Пра́ꙁдничный, и҆ Ѿпꙋ́стъ Пра́ꙁдничный быва́етъ.

Начина́етъ же І҆ере́ѵ̆ все по предꙋкаꙁанномꙋ на Благословенїи И҆́коны Хв҃ы, Зрѝ на Ли́стѣ. рд҃². да́же до ψѱалма̀, и҆́же зде чтетсѧ, рл҃и.

Гд҃и, и҆скꙋсилъ мѧ є҆си, и҆ поꙁна́лъ мѧ є҆сѝ: Ве́съ до конца̀.

Сла́ва: И҆ ны́нѣ: А҆лл҃ꙋ́іа, ᲃла́ва тебѣ̀ Бо́же.

Дїаконъ:

Гд҃ꙋ помоли́мсѧ.

Ли́къ,

Гд҃и поми́лꙋй.

І҆ереѵ̆ же чтетъ моли́твꙋ ᲃі́ю:

Гд҃и Бж҃е Вседержи́телю, Бж҃е ѡ҆те́цъ на́шихъ, и҆́же дре́вле въ Ве́тсѣмъ Завѣ́те подо́бїе Херꙋві́мѡвъ ѿ дре́ва и҆ зла́та, и҆ шве́ннагѡ дѣ́ла въ хра́мѣ свѣ́денїѧ ᲃтвори́ти повелѣ́лъ є҆сѝ, и҆ ны́нѣ ѻ҆́браꙁы и҆ подо́бїѧ ᲃт҃ы́хъ ᲂу҆го́дникѡвъ твои́хъ не ѿмеща́ѧй, но прїемлѧ́й, въ є҆́же вѣ́рнымъ рабѡ́мъ твои́мъ, на́ нѧ вꙁира́юще, просла́вѧтъ тебѐ си́хъ просла́вившагѡ, и҆ потща́тисѧ жи́тїю и҆ дѣ́лѡмъ и҆́хъ, и҆́миже твое́ѧ благода́ти и҆ црⷭ҇тва въспрїѧ́тїѧ ᲃподоби́шасѧ, подража́телми бы́ти: тебѣ́ сѧ моли́мъ, при́ꙁри ны́нѣ на И҆́конꙋ ᲃі́ю (и҆лѝ на И҆́коны сі́ѧ,) въ че́сть и҆ па́мѧть ᲃт҃а́гѡ твое́гѡ И҆мⷬ҇къ: (и҆лѝ ᲃт҃ы́хъ твои́хъ) иꙁъѡбраже́ннꙋю и҆ напи́саннꙋю (и҆лѝ иꙁъѡбраже́нныѧ и҆ напи́санныѧ) и҆ небе́снымъ твои́мъ благослове́нїемъ благословѝ, и҆ ѡ҆свѧтѝ ю҆̀, (и҆лѝ ѧ҆̀,) и҆ всѣ́мъ чтꙋ́щимъ ю҆̀ (и҆лѝ ѧ҆̀), и҆ пре́дъ тое́ю, (и҆лѝ тѣ́ми) тебѣ̀ кла́нѧющимсѧ и҆ молѧ́щымсѧ, и҆ ᲃт҃а́гѡ И҆мⷬ҇къ: (и҆лѝ ᲃт҃ы́хъ И҆мⷬ҇къ:), въ мо́л̾бꙋ къ тебѣ̀ приꙁыва́ющимъ, и҆ ꙗ҆́кѡ раба̀ и҆ дрꙋ́га твое́гѡ (и҆лѝ рабѡ́въ и҆ дрꙋ́гѡвъ твои́хъ) млⷭ҇тивый послꙋша́тель, и҆ благі́й и҆ бога́тый да́тель бꙋ́ди: и҆ꙁбавлѧ́ѧ и҆́хъ ѿ всѧ́кїѧ ско́рби и҆ нꙋ́жды, и҆ ѿ всѧ́кїѧ бо́лѣꙁни дꙋше́вныѧ и҆ тѣле́сныѧ, сподоблѧ́ѧ и҆́хъ жела́емыѧ твое́ѧ благода́ти и҆ милосе́рдїѧ: Молитва́ми ᲃт҃а́гѡ твое́гѡ И҆мⷬ҇къ: (и҆лѝ свѧты́хъ твоихъ И҆мⷬ҇къ:). Ты́ бо є҆сѝ и҆сто́чникъ ѻ҆свѧще́нїѧ, и҆ благи́хъ пода́тель, и҆ тебѣ̀ ᲃла́вꙋ воꙁсыла́емъ, съ є҆диноро́днымъ ти Сы́номъ, и҆ съ прест҃ы́мъ, и҆ благи́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ереѵ̆:

Ми́ръ все́мъ.

Ли́къ,

И҆ дꙋ́хови твое́мꙋ.

Дїа́конъ,

Гла́вы ва́шѧ Гв҃и приклони́те.

Ли́къ,

Тебѣ̀ Гд҃и.

І҆ере́й же чтетъ та́йнѡ моли́твꙋ сїю:

Гд҃и Бо́же нш҃ъ, члове́ка по ѻ҆́браꙁꙋ и҆ по подо́бїю свое́мꙋ соꙁда́вый, преслꙋша́нїемъ же Первоꙁда́ннагѡ растлѣ́ннꙋ бы́вшꙋ, вочеловѣче́нїемъ Ха҃ твое́гѡ, и҆́же зра́къ раба̀ прїи́мъ, ѻ҆́браꙁомъ ѡ҆брѣте́сѧ ꙗ҆́кѡ чл҃вкъ, се́й ѻ҆бнови́въ въ пе́рвое достоѧ́нїе въ ᲃт҃ы́хъ твои́хъ приве́лъ є҆сѝ, и҆́хже мы и҆ꙁѡбраже́нїѧ бл҃агоче́стнѡ чтꙋ́ще, ᲃт҃ы́хъ, и҆́же тво́й ѡ҆́браꙁъ и҆ подо́бїе сꙋ́ть, чте́мъ: ѻ҆́ныхъ же чтꙋ́ще, тебѐ ꙗ҆́кѡ первоѡ́браꙁнаго чте́мъ и҆ сла́вимъ: Тѣ́мже ти сѧ мо́лимъ, послѝ благода́ть твою̀, и҆ ѡкропле́нїемъ Воды̀ сеѧ̀ ᲃщ҃е́нныѧ благословѝ, и҆ ѡ҆свѧти ѡ҆́браꙁъ се́й (и҆лѝ ѡ҆́браꙁы сїѧ) въ сла́вꙋ твою̀, въ че́сть же и҆ па́мѧть ᲃт҃а́гѡ твое́гѡ И҆мⷬ҇къ: (и҆лѝ ᲃт҃ы́хъ твои́хъ) и҆ всѣ́хъ ѻ҆́браꙁъ ᲃі́й чтꙋ́щихъ, и҆ пре́дъ ни́мъ мо́льбы своѧ̀ тебѣ̀ ѿда́ющихъ, благословѝ, и҆ благода́ть пре́дъ тобо́ю ѡ҆брѣстѝ млⷭ҇тивнѡ сподобѝ.

И҆ воꙁглаша́етъ.

Благода́тїю и҆ щедрѡта́ми и҆ человѣколю́бїемъ є҆диноро́днагѡ ᲃн҃а твое́гѡ, ᲃъ ни́мъ же благослове́нъ є҆сѝ, съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́й же кро́питъ ᲃщ҃енною водо́ю ѻ҆́браꙁъ, гл҃ѧ̀.

Ѻ҆свѧща́етсѧ ѻ҆́браꙁъ ᲃе́й благода́тїю Пресвѧта́гѡ Дх҃а, ѡкропле́нїемъ воды̀ ᲃеѧ̀ ᲃщ҃енныѧ, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ а҆́бїе чтетъ и҆лѝ пое́тъ Тропа́рь и҆ Конда́къ ᲃт҃о́мꙋ, и҆лѝ ᲃт҃ы́мъ, и҆́хже є҆́сть ѻ҆́браꙁъ, и҆ лобꙁа́въ честнѡ ѻ҆́браꙁъ, тво́ритъ ѡ҆бы́чный Ѿпꙋстъ, въспомина́ѧ и҆ ᲃт҃а́гѡ, є҆́гѡже є҆́сть ѻ҆́браꙁъ.

Наче́ншꙋ І҆ере́ю ѡ҆бы́чнѡ. по Трⷭ҇то́мъ, и҆ по Прїйдѣ́те, поклони́мсѧ:

Чтетъ ѱало́мъ к҃е.

Сꙋди́ ми Гд҃и, ꙗ҆́кѡ а҆́ꙁъ не зло́бою мое́ю ходи́хъ: Весь до конца̀.

Сла́ва: И҆ ны́нѣ: А҆лл҃ꙋ́іа, ᲃла́ва тебѣ̀ Бо́же.

Дїа́конъ,

Гд҃ꙋ помоли́мсѧ.

Ли́къ,

Гд҃и поми́лꙋй.

І҆ере́ѵ̆ чтетъ Моли́твꙋ ᲃі́ю:

Гд҃и Бж҃е Вседержи́телю, Бж҃е Ѿц҃ъ на́шихъ, ᲃосꙋ́домъ твои́мъ и҆ꙁбра́ннымъ А҆пⷭ҇ломъ Па́вломъ рекі́й, ꙗ҆́кѡ всѐ ᲃоꙁда́нїе твоѐ добро̀ и҆ ничто́же ѿмѣ́тнѡ, а҆́ще ᲃло́вомъ твои́мъ Бжⷭ҇тве́ннымъ и҆ молитва́ми ѡ҆свѧща́етсѧ: при́ꙁри ны́нѣ млⷭ҇тивнѡ, ᲃмире́ннѡ моли́мсѧ, на Моли́твꙋ на́шꙋ и҆ на ᲃосꙋ́ды ᲃі́ѧ, (и҆лѝ на ᲃосꙋ́дъ се́й) ꙗ҆́же (и҆лѝ є҆го́же) рабѝ твоѝ въ ᲃла́вꙋ Пресвѧта́гѡ и҆менѝ твое́гѡ, и҆ въ слꙋже́нїе ᲃт҃а́гѡ твое́гѡ Жерто́вника съѡрꙋди́ша, и҆ млⷭ҇тивнѡ твои́мъ небе́снымъ благослове́нїемъ, моли́твою же на́съ недосто́йныхъ рабѡ́въ и҆ ᲃлꙋжи́телїй твои́хъ, благословѝ и҆ ѡ҆свѧтѝ, и҆ къ ᲃлꙋже́нїю ᲃт҃а́гѡ твое́гѡ Ѻ҆́лтарѧ, досто́йны (и҆лѝ досто́инъ) бы́ти ꙗ҆вѝ, прине́сшимъ же небе́сною твое́ю благода́тїю воꙁда́ждь, и҆ ѡ҆ставле́нїе грѣхѡ́въ дарꙋ́й, и҆ Црⷭ҇твїѧ твое́гѡ прича́стники сотворѝ. Ты́ бо є҆сѝ Бо́гъ млⷭ҇остїй, и҆ щедрѡ́тъ, и҆ человѣкѡлю́бїѧ, и҆ тебѣ̀ ᲃла́вꙋ воꙁсыла́емъ, съ є҆диноро́днымъ ти Сы́номъ, и҆ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

Дїа́конъ,

Гла́вы ва́ша Гв҃и приклони́те.

Ли́къ,

Тебѣ̀ Гд҃и.

І҆ере́ѵ̆ же чтетъ та́йнѡ Моли́твꙋ ᲃі́ю:

При́ꙁри Гд҃и Бо́же нш҃ъ на Моли́твꙋ на́шꙋ, смире́ннѡ моли́мсѧ, и҆ ниꙁпосли благослове́нїе твоѐ на сосꙋ́ды ᲃі́ѧ, (и҆лѝ на ᲃосꙋ́дъ се́й), и҆ ѡ҆кропле́нїемъ воды̀ ᲃеѧ̀ ᲃщ҃е́нныѧ благословѝ, и҆ ѡ҆свѧтѝ ѧ҆̀ (и҆лѝ є҆гѡ̀), въ є҆́же бы́ти и҆́мъ (и҆лѝ є҆мꙋ̀) досто́йнымъ (и҆лѝ досто́йнꙋ) ᲃлꙋже́нїю ᲃт҃а́гѡ твое́гѡ Ѻ҆́лтарѧ.

И҆ воꙁглаша́етъ:

Ꙗ҆́кѡ ты́ є҆сѝ ѡ҆свѧще́нїе на́ше и҆ тебѣ̀ ᲃла́вꙋ воꙁсыла́емъ, съ є҆диноро́днымъ ти Сы́номъ, и҆ пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆ же кро́питъ ᲃосꙋ́ды ᲃщ҃енною водо́ю, гл҃ѧ̀:

Ꙍ҆свѧща́ютсѧ ᲃосꙋ́ды ᲃі́ѧ (и҆лѝ Ꙍ҆свѧща́етсѧ ᲃосꙋ́дъ ᲃе́й) благода́тїю Пресвѧта́гѡ Дх҃а, ѡ҆кропле́нїемъ воды̀ ᲃеѧ̀ ᲃщ҃енныѧ, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ а҆́бїе тво́ритъ дне́вный ѿпꙋ́стъ, и҆ вно́ситъ ᲃосꙋ́ды въ Ѻ҆́лтарь.

Наченшꙋ І҆ере́ю, по Трисвѧто́мъ и по Прїйдѣ́те, поклони́мсѧ:

А҆́ще Мо́щи сꙋ́тъ не Мч҃ническїѧ, но и҆́нагѡ ко́егѡ ѿ ᲃт҃ы́хъ, чтетъ ѱаломъ ра҃і.

Бл҃же́нъ мꙋ́жъ боѧ́йсѧ Гд҃а:

А҆́ще же Мч҃ническїѧ сꙋ́тъ мо́щи, чтетъ ѱало́мъ, ѻ҃и.

Бо́же приїйдѡ́ша ꙗ҆ꙁы́ци въ достоѧ́нїе твоѐ. Весь до конца̀.

Сла́ва: И҆ ны́нѣ: А҆лл҃ꙋ́їа, сла́ва тебѣ̀ Бо́же.

Дїа́конъ,

Гд҃ꙋ помоли́мсѧ.

Ли́къ,

Гд҃и поми́лꙋй.

І҆ере́ѵ̆ же чтетъ Моли́твꙋ ᲃі́ю:

Бо́же Богѡ́мъ и҆ Гд҃и Го́сподемъ, тво́рче и҆ соꙁда́телю всеѧ̀ ви́димыѧ и҆ неви́димыѧ тва́ри: и҆́же рабꙋ̀ твое́мꙋ Мꙍѵ꙼се́ю повелѣ́лъ є҆сѝ, по ѡ҆́браꙁꙋ покаꙁа́нномꙋ є҆мꙋ̀ на горѣ̀, Ківѡ́тъ ѿ древе́съ негни́ющихъ соста́вити, и҆ Зла́томъ чи́стымъ ѡ҆бложи́ти, въ не́мъ же Ста́мнꙋ зла́тꙋю, небе́снꙋю въ себѣ̀ и҆мꙋ́щꙋю Ма́ннꙋ, и҆ Скрижа́ли Завѣ́та Пе́рстомъ твои́мъ Бо́жестве́ннымъ напи́санныѧ, въ свѣди́телствѡ бꙋ́дꙋщемꙋ ро́дꙋ ᲃъхрани́ти, ꙗ҆́же всѧ̀ ѡ҆́браꙁъ бы́вше ни́нѣшнѣмъ, Воплоще́нїемъ ᲃн҃а твое́гѡ Га҃ на́шегѡ І҆и҃ᲃ Ха҃ и҆сполни́шасѧ, є҆гда̀ Тѣ́ло є҆гѡ̀, дѣ́йствомъ ᲃт҃а́гѡ Дх҃а ѿ Прчестыѧ Дв҃ы зача́тое и҆ ѡ҆дꙋшевле́нное, и҆сполне́нїемъ Бжⷭ҇тва̀ всегѡ̀ и҆спо́лнилъ є҆сѝ. Тебѐ ᲃмире́ннѡ моли́мъ Вседержи́телю Бо́же, Ѿч̀е Га҃ на́шего І҆и҃ᲃ Ха҃, и҆ꙁъ не́гоже всѧ́кое ѿчествѡ на нб҃сѝ и҆ на землѝ и҆менꙋ́етсѧ, ꙗ҆́ко да се́й Кивꙍ́тъ (и҆лѝ Кивꙍ́ты), и҆лѝ ᲃъсꙋ́дъ (и҆лѝ ᲃъсꙋ́ды), къ съхране́нїю Мо́щїй ᲃт҃ы́хъ твои́хъ съѡрꙋже́нный, (и҆лѝ съѡрꙋже́нныхъ), Молитва́ми и҆ предста́телствомъ тѣ́хжде ᲃт҃ы́хъ твои́хъ, небе́снымъ твои́мъ благословенїемъ благослови́ши, и҆ ѡ҆свѧти́ши, въ є҆́же всѣ́хъ въ не́мъ (и҆лѝ въ ни́хъ) Мо́щи ᲃт҃ы́ѧ хранѧ́щихъ и҆ сі́ѧ честнѡ чтꙋ́щихъ, и҆ ᲃт҃ы́хъ и҆́хъ же Мо́щи бꙋ́дꙋтъ приꙁыва́ющихъ, Молитва́ми и҆ предста́телствомъ и҆́хъ, ѿ всѣ́хъ съпроти́вныхъ ѡ҆бстоѧ́нїй належа́щихъ свободи́ши, и҆ ѿ приходѧ́щихъ нꙋ́ждъ и҆ бѣ́дъ и҆ꙁба́виши: всѧ́же врагѡ́въ ви́димыхъ и҆ неви́димыхъ навѣтова́нїѧ, наше́ствїѧ и҆ нападе́нїѧ ѿ ни́хъ си́лою твое́ю ѿжене́ши: и҆ бꙋ́деши и҆́мъ ᲃтѣна̀ тве́рда ѿ лица̀ вра́жїѧ. и҆ съхранѝ и҆́хъ невре́дныхъ ѿ всѣ́хъ чарова́ний, ѡ҆баѧ́ний же и҆ злохи́трїй злы́хъ и҆ лꙋка́выхъ члове́къ, гра́дъ же и҆ ѡ҆би́тель, ᲃело̀ и҆ ᲃтра́нꙋ, въ ни́хже Мо́щи ᲃт҃ы́хъ твои́хъ въ ᲃосꙋ́дѣ се́мъ (и҆лѝ въ сосꙋ́дехъ си́хъ) чⷭ҇тнѡ храни́мы бꙋ́дꙋтъ, и҆ꙁба́ви, съблюдѝ и҆ невре́днѡ ᲃъхранѝ ѿ поврежд́енїѧ мо́лнїй, злорастворе́ний воꙁдꙋ́ховъ, ѿ гра́да, гꙋби́телъства, трꙋ́са, пото́па, ѡ҆гнѧ̀, меча̀, наше́ствїѧ и҆ноплеме́нникъ, и҆ междоꙋсо́бныѧ бра́ни, и҆ всѧ́коѧ ᲃмертонѡ́сныѧ ра́ны, ѿ звѣ́рей же злы́хъ, и҆ га́довъ ꙗ҆дови́тыхъ, и҆ полꙁа́ющихъ раꙁли́чныхъ че́рвїей, и҆ ѿ всѧ́кагѡ зла́гѡ ѡ҆бстоѧ́нїѧ. и҆ бꙋ́ди и҆́мъ по́мощь, защище́нїе и҆ покро́въ, и́ꙁбавлѧ́ѧ и҆́хъ ѿ всѧ́кагѡ зла̀: дарꙋ́ѧ же и҆́мъ въ благѡслове́нїи твое́мъ благѡрастворе́нїѧ воꙁдꙋ́ховъ, ᲂу҆множе́нїѧ пло́довъ зе́мныхъ, вре́мена ми́рна и҆ всѧ́кое ѡ҆би́лїе, Молитвами Прчестыѧ ти Мт҃ере и҆ всѣ́хъ ᲃт҃ы́хъ твои́хъ, въ ни́хже хвали́мъ и҆ слави́мъ є҆сѝ съ є҆диноро́днымъ ти Сы́номъ, и҆ Пртⷭ҇ы́мъ, и҆ благи́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

Дїа́конъ,

Гла́вы ва́ша Гв҃и приклони́те.

Ли́къ,

Тебѣ̀ Гд҃и.

І҆ере́ѵ̆ же, чтетъ тайнѡ Моли́твꙋ ᲃі́ю:

Влады́ко Бо́же Ѿч҃е Вседержит́елю, и҆́же при мѡѵ̆се́и ᲂу҆го́дницѣ твое́мъ ропта́ние людемъ ᲂу҆толѧ́ѧ, ᲃщ҃е́нство же А҆а́роново благоꙋго́дное тебѣ̀ бы́ти ᲂу҆твержда́ѧ, Же́ꙁлъ є҆гѡ̀ сꙋхи́й проꙁѧ́бнꙋти, и҆ цвѣ́тъ плодоно́сный проиꙁвестѝ сотвори́лъ є҆сѝ, и҆ ᲃе́й въ Кивѡ́те завѣ́ета въ зна́менїе твое́ѧ си́лы, и҆ чꙋдотворе́нїѧ вложи́ти повелѣ́лъ є҆сѝ: и҆́же и҆ на́мъ ѡ҆браꙁова́нїе бы́сть, Ха҃ твое́гѡ, є҆́же на Крⷭ҇тномъ Жерто́вницѣ ᲃм҃ртїю и҆ꙁсꙋше́нїие, и҆ тридне́внымъ Воскресе́нїемъ процвите́нїе, Це́ркви же ᲃм҃ртїю є҆гѡ̀ проꙁѧбе́нїе, и҆ но́щїю и҆ дні́ю плодонѡ́сное процвите́нїе си́мъ проѡбраꙁи́лъ є҆сѝ. Тебѐ всеми́лостивагѡ строи́телѧ и҆ промы́слъника члчⷭ҇кагѡ ро́да приле́жнѡ моли́мъ, при́ꙁри на ᲃосꙋ́ды ᲃі́ѧ, къ хране́нїю мо́щїй ᲃт҃ы́хъ ᲂу҆го́дниковъ твои́хъ ᲃъѡрꙋже́нныѧ, и҆ благода́тїю твое́ю всеосвѧща́ющою, въ ѡ҆кропле́нии Воды̀ сеѧ̀ ᲃщ҃е́нныѧ бл҃словѝ и҆ ѡ҆свѧтѝ, и҆ и҆де́же а҆́ще ᲃі́ѧ ѿне́сены и҆ храни́мы бꙋ́дꙋтъ, Моли́твами и҆ предста́тельствомъ ᲃт҃ы́хъ твои́хъ, и҆́хже мо́щи въ ни́хъ съкры́ютсѧ, ѿтꙋ́дꙋ всѧ́кое съпроти́вное ѡ҆бстоѧ́нїе ѿженѝ, всѧ́же по́леꙁнаѧ и҆ блага́ѧ та́мо ᲂу҆мнѡжѝ и҆ съхранѝ: ꙗ҆́ко да вѣ́рнїи лю́дїе твоѝ, бога́тыѧ млⷭ҇ти и҆ щедроты̀, и҆ благодѣѧ́нїѧ твоѧ̀ въ мало́й ча́сти мо́щей ᲃт҃ы́хъ твои́хъ, ꙗ҆́коже въ цѣ́ломъ и҆́хъ тѣ́лѣ полꙋчи́вше, благодаре́нїе тебѣ̀ до́лжное воꙁдаю́тъ, и҆ жи́тїѧ и҆́хъ подража́телми бы́ти потща́тисѧ ходата́йствомъ и҆́хъ, и҆ съ ни́ми и҆ наслѣ́дники Цртⷭ҇вїѧ твое́гѡ бы́ти да сподобѧ́тсѧ.

И҆ воꙁглашаетъ:

Благода́тїю и҆ щедрота́ми и҆ человѣколю́бїемъ є҆дино́роднагѡ ᲃн҃а твое́го, съ ни́мже блгⷭ҇ве́нъ є҆сѝ, съ прест҃ы́мъ и҆ благи́мъ, и҆ животворѧ́щимъ ти Дх҃омъ, ны́не и҆ при́сно, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆ же кро́питъ водо́ю ᲃщ҃е́нною ᲃосꙋ́ды, гл҃ѧ̀:

Ѻ҆свѧща́ютсѧ ᲃосꙋ́ды сїѧ благѡда́тїю Пресвѧта́гѡ Дх҃а, ѡ҆кропле́нїемъ воды̀ сеѧ̀ ᲃщ҃е́нныѧ, въ и҆мѧ Ѿц҃а, и҆ ᲃн҃а, и҆ ᲃт҃а́гѡ Дх҃а. А҆ми́нь.

А҆́ще же та́мо сꙋ́тъ мо́щи ᲃт҃ы́хъ влага́етъ ѧ҆̀ внѧ̀, гл҃ѧ̀:

Хвали́те Бг҃а въ ᲃт҃ы́хъ є҆гѡ̀, хвали́те є҆гѡ̀ въ ᲂу҆тверженїи ᲃи́лъ є҆гѡ̀. Ꙗ҆́кѡ восхва́лѧтсѧ преподо́бнїи во ᲃла́ве, и҆ воꙁра́дꙋютсѧ на ло́жахъ свои́хъ.

И҆ чтетъ Тропа́рь и҆ Конда́къ ᲃт҃ы́хъ, и҆́хже сꙋ́тъ мо́щи, и҆ сотвори́въ Ѿпꙋстъ, съ воспомина́нїемъ ᲃт҃ы́хъ, и҆́хже сꙋ́тъ мо́щи, раꙁдае́тъ ѧ҆̀ тѣ́мъ, и҆́же къ ѻ҆свѧщенїю принесо́ша.

Полага́емъ быва́етъ си́цевый Кре́стикъ на Бжⷭ҇тве́нной Тра́пеꙁѣ, и҆ по соверше́нїи Бжⷭ҇твенныѧ Литꙋ́ргїи, и҆лѝ Ꙋ҆́трни, и҆лѝ Часѡ́въ, и҆лѝ Вече́рни, пре́жде Ѿпꙋ́ста чтетъ І҆ере́ѵ̆. Ца́рю небѣ́сный: Трⷭ҇то́е. Ѿч҃е нш҃ъ: и҆ Тропарѝ ᲃїѧ:

Спасѝ Гд҃и лю́ди своѧ̀:

Сла́ва:

Воꙁнесы́йсѧ на Кре́стъ во́лею:

И҆ ны́нѣ:

Предста́телнице стра́шнаѧ:

И҆ по си́хъ ре́къ,

Гд҃ꙋ помоли́мсѧ.

Ли́къ,

Гд҃и поми́лꙋй.

І҆ере́ѵ̆ чтетъ Моли́твꙋ ᲃїю:

Гд҃и І҆и҃ᲃ Хє҃ Бо́же нш҃ъ, на дре́вѣ Крⷭ҇тномъ во́лею ᲃпⷭ҇нїѧ на́шегѡ ра́ди пригвоꙁди́тисѧ восхотѣ́евый, и҆ пречестною ᲃи Кро́вїю сі́е ѡ҆свѧти́ти и҆ꙁволи́вый, и҆ Кръⷭ҇то́мъ свои́мъ ѿ работы̀ вра́жїѧ мі́ръ и҆скꙋпи́вый, и҆ дре́внее рꙋкописа́нїе вра́га на́шегѡ дїа́вола Крⷭ҇то́мъ растерꙁа́вый, и҆ рѡ́дъ члчⷭ҇кїй ѿ мꙋчи́телъства є҆гѡ̀ тѣ́мъ свободи́вый, тебѐ смѣре́ннѡ моли́мъ: При́ꙁри млⷭ҇тивнѡ на зна́менїе сі́е Крⷭ҇тное, и҆ ниꙁпослѝ Бжⷭ҇тве́нное твоѐ благослове́нїе и҆ благода́ть, и҆ пода́ждь є҆мꙋ̀ ᲃи́лꙋ и҆ крѣ́пость, ꙗ҆́кѡ да всѧ́къ, и҆́же въ воспомина́нїе ᲃп҃си́тельныхъ ти Страстїй, и҆ животво́рныѧ ти ᲃм҃рти, и҆ въ сохране́нїе и҆ защище́нїе дꙋшѝ и҆ тѣ́ла на ᲃебѣ̀ носи́ти бꙋ́детъ, небе́сное благослове́нїе и҆ по́мощъ въ не́мъ прїѧ́ти сподоби́тсѧ. И҆ ꙗ҆́коже Же́ꙁлъ А҆а́рꙍновъ, къ ѿраже́нїю сопроти́вныхъ невѣ́рствїѧ, и҆ и҆спражне́нїю волше́бныхъ мечта́нїй благослови́лъ є҆сѝ: си́це и҆ сі́е знаменїе Крⷭ҇тное благословѝ, и҆ сопроти́въ всѣ́мъ кѡ́ꙁнемъ дїа́вольскимъ твое́гѡ застꙋпле́нїѧ по́мощь въ нѐ влѣ́й, ꙗ҆́кѡ да всѧ́комꙋ на ᲃебѣ̀ носѧ́щемꙋ є҆̀, защище́нїе и҆ соблюде́нїе ѿ всѧ́кагѡ зла дꙋшѝ и҆ тѣ́ла ᲃп҃си́телное, и҆ въ ᲂу҆множе́нїе въ не́мъ дꙋхо́вныхъ твои́хъ дарова́нїй, и҆ хрⷭ҇тїѧ́нскихъ добродѣ́телїй твое́ю благода́тїю бꙋ́детъ. Ты́ бо є҆сѝ благословлѧ́й и҆ ст҃ѧ́й всѧ́ческаѧ, Хє҃ Бо́же нш҃ъ, и҆ тебѣ̀ ᲃла́вꙋ, благодаре́нїе и҆ поклоне́нїе воꙁсыла́емъ, съ беꙁнача́льнымъ ти Ѿц҃е́мъ, и҆ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

І҆ере́ѵ̆,

Гла́вы ва́ша Гв҃и преклони́те.

Ли́къ,

Тебѣ̀ Гд҃и.

І҆ере́ѵ̆ же, прекло́нь гла́вꙋ, чтетъ та́йнѡ Моли́твꙋ ᲃі́ю:

Гд҃и И҆и҃ᲃ Хє҃ Бо́же нш҃ъ, въ высо́кихъ живы́й, и҆ на смирѣ́нныѧ приꙁира́ѧй, твоѝ рабѝ недосто́йнїи своѧ̀ тебѣ̀ приклони́хомъ вы́ѧ ᲃе́рдца на́шегѡ и҆ тѣлесѐ, и҆ смѣре́ннѡ моли́мъ тѧ, послѝ небе́сное твоѐ благослове́нїе на зна́менїе сі́е Крⷭ҇тное, и҆ въ ѡ҆кропле́нїи ᲃщ҃енныѧ воды̀ и҆сполнѝ є҆̀ твое́ѧ ᲃи́лы и҆ крѣ́пости, къ прогна́нїю и҆ раꙁоре́нїю всѧ́коѧ дїа́вольскїѧ ко́ꙁни, всѧ́комꙋ же носѧ́щемꙋ на себѣ̀ сі́е, вѣ́рномꙋ рабꙋ̀ твое́мꙋ, да́ждь бы́ти защище́нїе дꙋшѝ и҆ тѣ́ла, ѿ лица̀ вра́гъ ви́димыхъ и҆ неви́димыхъ и҆ ѿ всѧ́кагѡ зла̀, и҆ въ ᲂу҆множе́нїе твое́ѧ благода́ти. Ты́ бо є҆сѝ ѡ҆свѧщенїе на́ше Хє҃ Бо́же нш҃ъ, и҆ тебѣ̀ ᲃла́вꙋ воꙁсыла́емъ съ беꙁнача́льнымъ ти Ѿц҃емъ, и҆ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ, и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆ же вꙁе́мъ ᲃщ҃еннꙋю во́дꙋ, кро́питъ є҆ю̀ Крⷭ҇тикъ, гл҃ѧ̀:

Благословлѧ́етсѧ и҆ ѡ҆свѧща́етсѧ зна́менїе сі́е Крⷭ҇тное ѡ҆кропле́нїемъ воды̀ сеѧ̀ ᲃщ҃е́нныѧ, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ а҆́бїе тво́ритъ ѡ҆бы́чный ѿпꙋстъ, и҆ ѿдае́тъ кре́стикъ є҆го́же є҆́стъ, въ ᲃла́вꙋ Бж҃ію.

Подоба́етъ ᲂу҆́бѡ вѣ́дати, ꙗ҆́кѡ поста́вленнꙋ сꙋ́щꙋ Де́исꙋсꙋ всемꙋ̀ въ Це́ркви, а҆́ще въ ᲂу҆жѐ ѿ Є҆пⷭ҇па ᲃъверше́ннѡ ѡ҆свѧщенной, и҆лѝ ѿ є҆гѡ̀ Намѣ́естника благослове́нной, а҆́бїе Протопо́пою, и҆лѝ є҆гѡ̀ и҆ꙁволе́нїемъ ѿ І҆ере́а Парохїѧ́лнагѡ ѡ҆свѧща́ютсѧ.

А҆́ще же въ неѡсвѧще́нной, и҆лѝ не благослове́нной, пе́рвѣе Це́рковъ ѡ҆свѧща́етсѧ, и҆лѝ благословлѧ́етъ, пото́мъ же И҆́кѡны, а҆́бїе по Мѵропомаꙁа́нїи ᲃтѣ́нъ, пре́жде кажде́нїѧ. Ст҃ль ста́въ пре́дъ Ца́рскими Вра́ты, ре́кшꙋ Дїа́конꙋ:

Гд҃ꙋ помоли́мсѧ.

Чтетъ Моли́твы ни́же поло́женныѧ, и҆ ᲃщ҃енною водо́ю кро́питъ И҆́коны, пото́мъ же ка́дитъ и҆ съверша́етъ ѡ҆свѧще́нїе.

А҆́ще же Намѣ́стникъ є҆гѡ̀ Це́рковъ благословлѧ́етъ, пре́жде ѿпꙋ́ста пре́дъ Ца́рскими Вра́ты, по Гд҃ꙋ помоли́мсѧ.

Чтетъ всѧ̀ ни́же напи́саннаѧ, и҆ посе́мъ твори́тъ ѿпꙋ́стъ ѡ҆бы́чный.

А҆́ще же въ ᲂу҆жѐ ѡ҆свѧще́нной, и҆лѝ благослове́нной Црк҃ви, новопоста́влены сꙋ́ть И҆́коны, ᲃи́це благословѧ́ютсѧ. І҆ере́ѵ̆ въ є҆питра́хиль и҆ Фелꙍ́нъ ѡ҆дѣѧ́нный.

А҆́ще неи́мать ᲃщ҃еннои Воды̀, тво́ритъ пе́рвѣе Мало́е ѻ҆свѧще́нїе А҆́вгꙋстово, пото́мъ же пре́дъ Ца́рскими Вра́ты ста́въ, начина́етъ ѡ҆бы́чнѡ:

Благослове́нъ Бо́гъ нш҃ъ:

Ли́къ же пое́тъ:

Ца́рю небѣ́сный:

И҆ чте́тсѧ Трисвѧто́е. и҆ по Ѿч҃е нш҃ъ:

Прїйдѣ́те, поклони́мсѧ гⷤ.

Ѱало́мъ рл҃а:

Помѧнѝ Гд҃и Дави́да, и҆ всю̀ кро́тость є҆гѡ̀: Ве́сь до конца.

Сла́ва: И҆ ны́нѣ:

А҆ллилꙋ́іа, ᲃла́ва тебѣ̀ Бо́же.

Ре́кшꙋ же Дїа́конꙋ:

Гд҃ꙋ помоли́мсѧ.

И҆ кли́рꙋ:

Гд҃и поми́лꙋй.

І҆ере́ѵ̆ чтетъ Моли́твꙋ ᲃі́ю:

Гд҃и Бо́же нш҃ъ, Бо́же Богѡ́въ и҆ Гд҃и Го́сподїй, Бо́же Саваꙍ́фъ, Тво́рче и҆ ᲃъꙁда́телю всеѧ̀ ви́димыѧ и҆ неви́димыѧ тва́ри, Ѿч҃е Гд҃а на́шегѡ І҆и҃ᲃ Ха҃, люді́й твои́хъ І҆и҃лѧ, вѣды́й ᲂу҆до́бь прело́женное ѿ тебѐ и҆́стиннагѡ Бг҃а къ чꙋ́ждымъ ло́жнымъ Богѡ́мъ се́рдце, ѿ и҆дѡлослꙋже́нїѧ и҆ꙁима́ѧ тѣ́хъ, въ поꙁна́нїи же и҆ слꙋже́нїи тебѐ є҆ди́нагѡ и҆́стиннагѡ Бг҃а всегда̀ неѿстꙋ́пнѡ и҆мѣ́ти хотѧ̀, ѡ҆́браꙁы и҆ подо́бїѧ тебѣ̀ и҆́стинномꙋ Бг҃ꙋ проти́вныѧ себѣ̀ сътвори́ти, въ є҆́же ꙗ҆́кѡ Гд҃ꙋ тѣ́мъ кла́нѧтисѧ и҆ слꙋжи́ти, преще́нїемъ запрѣти́лъ є҆сѝ. Подо́бїѧ же па́ки и҆ ѡ҆́браꙁы, и҆́миже не чꙋ́ждыхъ ло́жныхъ и҆ не сꙋ́щихъ Бо́гѡвъ, но тебѐ є҆ди́нагѡ и҆́стиннагѡ Бг҃а Пртⷭ҇о́е и҆ великолѣ́пое И҆мѧ ᲃла́витсѧ, (неꙋдовлѧ́ѧ лю́ди ᲃвоѧ̀ писа́нїемъ то́чїю Завѣ́та и҆ За́кона,) ᲂу҆го́дникомъ твои́мъ Мꙍѵ̆се́ѡмъ пе́рвѣе по ѡ҆́браꙁꙋ покаꙁа́нномꙋ є҆мꙋ̀ на Горѣ̀, Ківꙍ́тъ Завѣ́та ѿ дре́ва негни́ющагѡ ѡ҆бло́женъ Зла́томъ, въ не́мъже Скрижа́ли Завѣ́та, Ста́мна зла́та и҆ А҆а́рѡновъ Же́ꙁлъ пото́мъ воꙁложе́ны бы́ша, и҆ надъ ни́мъ Херꙋві́ма два̀, зла́та, и҆ на Ꙍ҆по́нахъ дѣ́ломъ шве́ннымъ Херꙋві́мовъ мнѡ́жество ᲂу҆стро́ити, два́ же Херꙋві́ма ᲂу҆ ᲂу҆́глѡвъ ѡ҆чисти́лища: пото́мъ же и҆ въ Соломꙍ́номъ съꙁда́нномъ тебѣ̀ Хра́ме, Херꙋві́ма два̀ ѿ Кипари́снагѡ дре́ва, зла́томъ ѡ҆бъѧ́та поста́вити повелѣ́лъ є҆сѝ, и҆ ꙗ҆́кѡ твоѐ съ людьмѝ пребыва́нїе, и҆ ᲃла́вы твое́ѧ вели́чества зна́менїѧ, и҆ па́мѧть твои́хъ превели́кихъ и҆ пресла́вныхъ чꙋде́съ и҆ благодѣѧ́нїй въ себѣ̀ и҆мꙋ́щїѧ и҆ собо́ю ꙗ҆влѧ́ющїѧ, (а҆́ще и҆ дѣ́ла рꙋ́къ члчⷭ҇кихъ бѧ́хꙋ,) ᲃтра́хомъ и҆ тре́петомъ, ѡ҆ба́че, и҆ Бо́голѣ́пнымъ поклоне́нїемъ, кажде́нїемъ же и҆ пре́дъ тѣ́ми моленїемъ чти́ти сі́ѧ повелѣ́лъ є҆сѝ: ѡ҆́нꙋю же че́сть, ꙗ҆́коже ᲃебѣ̀ ᲃамо́мꙋ ѿда́ннꙋю, млⷭ҇тивнѡ прїѧ́лъ є҆сѝ, беꙁче́стїе же си́мъ сътво́ршихъ, и҆ достодо́лжнѡ сі́ѧ непоче́тшихъ раꙁли́чнѡ ꙗ҆́коже Ꙍ҆ꙁа́на ѻ҆́нагѡ мꙋ́чилъ и҆ погꙋби́лъ є҆сѝ: Раꙁли́чїе же и҆ ра́ꙁнствѡ честѝ Бо́гопрїѧтныхъ, ѿ богоме́рꙁкихъ ѡ҆́браꙁовъ, при И҆лїѝ ᲃщ҃еннице и҆ ᲃꙋдїѝ І҆и҃льскомъ въ съкрꙋше́нїи Дагꙍ́на и҆́дѡла, и҆ въ ᲂу҆ѧꙁвле́нїи и҆ноплеме́никъ ꙗ҆́снѡ покаꙁа́лъ є҆сѝ. Въ и҆сполне́нїи же вре́менъ посла́лъ є҆сѝ є҆диноро́днагѡ ᲃн҃а твое́гѡ Гд҃а на́шегѡ І҆и҃ᲃ Ха҃, ражда́емагѡ ѿ Жены̀ прⷭ҇нѡ Дв҃ы Мр҃іѧ: и҆́же зра́къ раба̀ прїи́мъ, и҆ въ подо́бїи члчестѣмъ бы́въ, подо́бїе свое́гѡ прчⷭ҇тагѡ ѡ҆́браꙁа, къ свое́мꙋ Бжⷭ҇твенномꙋ лицꙋ̀ ᲂу҆брꙋ́съ приложи́въ, и҆ꙁобраꙁѝ, и҆ А҆вга́рꙋ Є҆де́сскомꙋ Кнѧ́ѕю посла̀, и҆ тѣ́мъ ѿ не́дꙋга тогѡ̀ и҆сцѣлѝ, и҆ всѣ́мъ къ не́мꙋ приходѧ́щимъ, и҆ вѣ́рою кланѧ́ющимсѧ, неисче́тнаѧ и҆сцелѣ́нїѧ и҆ мнѡ́гаѧ благодѣѧ́нїѧ чꙋдодѣйствꙋ́ѧ подава́ше. И҆ мы ᲂу҆́бо, ѽ всеблагїй и҆ преще́дрый Влады́ко, сїѧ ѡ҆́браꙁы воꙁлюбле́ннагѡ ᲃн҃а твое́гѡ, въ воспомина́нїе ᲃпаси́телънагѡ Воплоще́нїѧ, и҆ всѣ́хъ пресла́вныхъ є҆гѡ̀ чꙋде́съ, Стра́стїй же и҆ Распѧ́тїѧ и҆ ᲃме́рти, и҆ пресла́внагѡ Въскрⷭ҇нїѧ, и҆ на нб҃са̀ Воꙁнесе́нїѧ, и҆ всѣ́хъ є҆гѡ̀ благодѣѧ́нїй, ꙗ҆́же на землѝ, ꙗ҆́кѡ человѣ́къ ꙗ҆ви́всѧ, члчⷭ҇комꙋ ро́дꙋ покаꙁа̀, ѡ҆ ни́хже на́мъ Бжⷭ҇тве́ннаѧ Є҆ѵⷢ҇лїѧ ꙗ҆́снѡ повѣствꙋ́ютъ: та́кожде Прчестѣй є҆гѡ̀ Мт҃ри, ꙗ҆́кѡ честнѣ́йшей и҆ всеѧ̀ тва́ри вы́шшей, и҆ ᲂу҆ тебѐ прїѧтнѣйшей молитве́нницы и҆ предста́тельницы на́шей: А҆гг҃елѡвъ же и҆ Прⷪ҇ркѡвъ, и҆ А҆пⷭ҇толѡвъ Бо́гогла́сныхъ, Мч҃никѡвъ и҆ ᲃт҃и́телей, и҆ Преподо́бныхъ, и҆ всѣ́хъ ᲃт҃ы́хъ, ꙗ҆́кѡ твои́хъ ᲂу҆го́дникѡвъ, рабѡ́въ же вѣ́рныхъ и҆ прⷭ҇ныхъ дрꙋ́гѡвъ, и҆ твои́хъ и҆́стинныхъ сꙋ́щихъ ѡ҆́браꙁѡвъ не Бо́готворѧ́ще, но вѣдꙋ́ще, ꙗ҆́кѡ по́честь ѡ҆́браꙁа на первоѡ́браꙁное восхо́дитъ, въ ᲃт҃омъ твое́мъ семъ хра́мѣ пре́дъ твои́мъ вели́чествомъ чⷭ҇тнѡ предложи́хомъ, и҆ припада́юще приле́жнѡ моли́мъ: при́ꙁри млⷭ҇тивнѡ на́ ны и҆ на ѡ҆́браꙁы сі́ѧ, и҆ ꙗ҆вле́нїѧ ра́ди въ пло́ти въꙁлюбле́ннагѡ ᲃн҃а твое́гѡ, и҆ всегѡ̀ є҆гѡ̀ ᲃп҃си́тельнагѡ Бжⷭ҇тве́ннагѡ пло́тъскагѡ смотре́нїѧ, въ є҆го́же въспомина́нїе и҆ ᲃла́вꙋ, и҆ Молитвами Прчестыѧ и҆ Преблагослове́нныѧ є҆гѡ̀ Мт҃ре, ᲃт҃ы́хъ небе́сныхъ ᲃи́лъ Беꙁпло́тныхъ, честна́гѡ Пррⷪ҇ка Предте́ча и҆ Крⷭ҇тлѧ І҆ѡа́нна, Бо́гогла́сныхъ Пррⷪ҇къ, Дх҃онѡ́сныхъ А҆пⷭ҇тлъ, добропобѣ́дныхъ Мч҃никъ, ᲃт҃и́телїй же Преподо́бныхъ, и҆ Пра́ведныхъ, и҆ всѣ́хъ ᲃт҃ы́хъ твои́хъ, въ и҆́хже че́сть и҆ па́мѧть сі́ѧ ᲂу҆строи́хѡмъ, послѝ на́ нѧ твоѐ небе́сное благослове́нїе, и҆ благода́ть Пртⷭ҇а́гѡ Дх҃а, и҆ благословѝ и҆ ѡ҆свѧтѝ ѧ҆̀, и҆ пода́ждь и҆́мъ си́лꙋ цѣле́бнꙋю, и҆ всѣ́хъ дїа́волскихъ кѡ́ꙁнїй прогони́тельнꙋ, и҆ и҆сполнѝ ѧ҆̀ благослове́нїѧ, ᲃи́лы же и҆ крѣ́пости, є҆ѧ́же бога́тнѡ влѣѧ́лъ є҆сѝ на ѡ҆́ный ᲃт҃ы́й Нерꙋкотворе́нный Ꙍ҆́браꙁъ, прикоснове́нїемъ Пртⷭ҇а́гѡ и҆ Прчⷭ҇тагѡ Бжⷭ҇тве́ннагѡ Лица̀ є҆диноро́днагѡ ᲃн҃а твое́гѡ, въ є҆́же ᲃи́ламъ и҆ чꙋдесе́мъ и҆ тѣ́ми дѣйствова́тисѧ, въ ᲂу҆твержде́нїе Правосла́вныѧ Вѣ́ры и҆ ᲃпⷭ҇нїе люді́й твои́хъ. Всѣ́хъ же тебѣ̀ и҆ є҆диноро́дномꙋ твое́мꙋ ᲃн҃ꙋ, и҆ Преᲃт҃о́мꙋ и҆ животворѧ́щомꙋ твое́мꙋ Дх҃ꙋ, пре́дъ симѝ Ѻ҆́браꙁами кла́нѧющихсѧ, и҆ приле́жнѡ вѣ́рою молѧ́щихъ сѧ, и҆ млⷭ҇ть ѡ҆брѣстѝ просѧ́щихъ, ᲃт҃ы́хъ же, ꙗ҆́кѡ твои́хъ вѣ́рныхъ рабѡ́въ и҆ прии́скренныхъ дрꙋ́гѡвъ, въ и҆́хже и҆мѧ и҆ пода́ннꙋю ᲃтꙋде́ныѧ воды̀ ча́шꙋ прїѧ́ти, и҆ мꙁдо́ю Пррⷪ҇чею и҆лѝ пра́ведничею и҆лѝ ᲂу҆́ченичею воꙁда́ти млⷭ҇тивнѡ ѡ҆бѣща́лъ є҆сѝ, въ мо́льбꙋ къ тебѣ̀ въ бѣда́хъ и҆ нꙋ́ждахъ и҆ ско́рбехъ, и҆ въ всѣ́хъ свои́хъ требова́нїѧхъ на сі́ѧ И҆́кѡны и҆́хъ вꙁира́юще, вѣ́рою приꙁыва́ющихъ, мо́лбы и҆ моленїѧ и҆ приле́жнаѧ проше́нїѧ ᲂу҆слы́шаны бы́ти, и҆ ми́лость твое́гѡ человѣкѡлю́бїѧ привлещѝ ᲃотворѝ, ѡ҆ставле́нїе же грѣхѡвъ пода́ждь, и҆ благода́ть полꙋчи́ти ᲃподобѝ. Ты́ бо є҆сѝ ѡ҆свѧще́нїе на́ше, и҆ тебѣ̀ ᲃла́вꙋ воꙁсыла́емъ, съ є҆диноро́днымъ ти Сы́номъ, и҆ съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

Дїа́конъ,

Гла́вы ва́ша Гв҃и преклони́те.

Ли́къ,

Тебѣ̀ Гд҃и.

І҆ере́ѵ̆ же, гла́вꙋ прекло́нь, та́йнѡ чтетъ Моли́твꙋ ᲃі́ю:

Гд҃и Бж҃е нш҃ъ, пи́санныѧ Ѻ҆́браꙁы ᲃт҃ы́хъ твои́хъ не ѿмеща́ѧй, но па́че любе́ꙁнѡ прїемлѧ̀й, въ є҆́же є҆ли́жды ѻ҆чи́ма тѣле́сныма вꙁыра́юще на́нѧ, толи́жды ᲂу҆́мныма ѻ҆чи́ма дѣ́ла и҆ жи́тїе и҆́хъ тебѣ̀ благоꙋго́дное воспомина́ти и҆ раꙁмышлѧ́ти, ꙗ҆́коже и҆ въ писа́нїихъ чтꙋ́ще бꙋ́демъ. Сі́ѧ ᲂу҆́бѡ И҆́кѡны, приле́жнѡ моли́мсѧ, ꙗ҆́же въ че́сть и҆ въ ᲃла́вꙋ, и҆ въ воспомина́нїе ᲃпⷭ҇и́телнагѡ Воплоще́нїѧ, чꙋде́съ же и҆ благодѣѧ́нїй є҆диноро́днагѡ ᲃн҃а твое́гѡ, ꙗ҆́же на́мъ Бжⷭ҇тве́нное Є҆ѵⷢ҇лїе вѣща́етъ, да не то́чїю чтꙋ́ще, но и҆ на и҆ꙁѡбраже́нныѧ вꙁыра́юще въ ᲂу҆́мъ прїе́млемъ, и҆ въ па́мѧти благода́рнѡ ѿнѡ́симъ: Та́кожде и҆ Прчⷭ҇тыѧ Дв҃ы Бц҃ы, небе́сныхъ ᲃи́лъ Беспло́тныхъ, ᲃт҃а́гѡ І҆оа́нна Предте́ча и҆ Крⷭ҇ти́телѧ, ᲃт҃ы́хъ А҆пⷭ҇лъ, Пррⷪ҇къ, Мчн҃къ, и҆ всѣ́хъ ᲃт҃ы́хъ твои́хъ соѡрꙋди́хомъ, млⷭ҇тивнѡ небе́снымъ твои́мъ благослове́нїемъ, въ ѡ҆кропле́нїи воды̀ сеѧ̀ ᲃщ҃е́нныѧ благословѝ и҆ ѡ҆свѧтѝ, и҆ всѣ́мъ вѣ́рнѡ пре́дъ ни́ми, тебѐ Бг҃а Ѿц҃а̀, и҆ є҆диноро́днагѡ ᲃн҃а, и҆ Пресвѧта́гѡ и҆ животворѧ́щагѡ ти Дх҃а, Прчестꙋю же Бц҃ꙋ, и҆ всѣ́хъ ᲃт҃ы́хъ твои́хъ, и҆́хже и҆ꙁображе́нїѧ въ си́хъ И҆́кѡнахъ сꙋ́ть, досто́йнѡ чтꙋ́ще, твоѐ Бжⷭ҇тве́нное млⷭ҇рдїе, ѡ҆́ныхъ же, ꙗ҆́кѡ твои́хъ при́сныхъ рабѡ́въ и҆ дрꙋ́гѡвъ, Моли́твы за себє̀ къ тебѣ̀ Бг҃ꙋ и҆ Гд҃ꙋ, предста́тельства же и҆ по́мощи просѧ́ще приꙁыва́ти бꙋ́дꙋтъ, твои́мъ блг҃осе́рдїемъ, ᲃт҃ы́хъ же твои́хъ молитва́ми ско́рѡ полꙋчи́ти сътворѝ, ѡ҆ставле́нїе же грѣхѡвъ дарꙋ́й, и҆ наслѣ́дники црⷭ҇твїѧ твое́гѡ, ꙗ҆́кѡ бла́гъ, бы́ти сподобѝ.

И҆ воꙁглашаетъ:

Ты́ бо є҆сѝ Бо́гъ млⷭ҇темъ и҆ щедрѡ́тъ, и҆ человѣкѡлю́бїѧ, и҆ тебѣ̀ ᲃла́вꙋ воꙁсыла́емъ, съ є҆диноро́днымъ ти Сы́номъ, и҆ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

Ст҃ль же и҆лѝ І҆ере́ѵ̆ кро́питъ свѧще́нною водо́ю ве́сь Де́исꙋсъ, ѿ ни́ꙁꙋ да́же до вѣрха̀, гл҃ѧ̀:

Ꙍ҆свѧща́ютсѧ И҆́коны сі́ѧ ѡ҆кропле́нїемъ воды̀ сеѧ̀ ᲃщ҃енныѧ, въ ᲃла́вꙋ и҆ па́мѧтъ вели́кагѡ Бг҃а и҆ ᲃп҃са на́шегѡ І҆и҃ᲃ Ха҃, и҆ въ че́сть ᲃт҃ы́хъ є҆гѡ̀, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

А҆́бїе же Ли́къ пое́тъ и҆лѝ чтетъ Тропарѝ ᲃі́ѧ. Гла́съ в҃.

Прчⷭ҇томꙋ твое́мꙋ Ѻ҆́браꙁꙋ покланѧ́емсѧ благїй:

Сла́ва: Гла́съ то́ижде.

А҆пⷭ҇ли, Пррⷪ҇ци и҆ Мчн҃ци, ᲃт҃лїе, Преподо́бнїи, Праведнїи и҆ всѝ ᲃт҃ы́и, до́бре по́двигъ сконча́вшїи и҆ вѣ́рꙋ соблю́дшїи, дерꙁнове́нїе и҆мꙋ́ще къ ᲃпа́сꙋ, ѡ҆ на́съ тогѡ̀ ꙗ҆́кѡ блага́гѡ моли́те, ᲃпастѝ вѣ́рнѡ ва́съ приꙁыва́ющихъ, и҆ И҆́кѡны ва́ша, ꙗ҆́кѡ дрꙋ́гѡвъ Бо́жіихъ, благоче́стнѡ чтꙋ́щихъ.

И҆ ны́нѣ. Гла́съ а҃.

Любо́вїю, чⷭ҇таѧ Дв҃о:

И҆щи наꙁа́дѣ Ли́стъ рг҃і³.

А҆́бїе же посе́мъ тво́ритъ ѡ҆бы́чный ѿпꙋстъ.

Повѣ́сивши Зво́нъ на Цмнитарѝ, ꙗ҆́коже бы мощѝ и҆ сверхꙋ̀ и҆ и҆ꙁвнꙋ́трь ѡ҆кропле́ннꙋ бы́ти, пре́жде да́же не поста́вити є҆гѡ̀ на Колоко́льници, ᲃимъ бл҃ве́нїемъ благослови́ти є҆гѡ̀ подоба́етъ. А҆́ще ᲃт҃и́тель сі́е дѣйствꙋ́етъ, ѡ҆дѣѧ́нъ въ всѧ̀ ᲃт҃лскїѧ ѡ҆дежды, и҆лѝ то́чїю въ Ма́нтїю, въ Є҆питра́хиль, Ѻ҆мо́форъ и҆ Ми́трꙋ, (А҆́ще же ᲃщ҃е́нникъ, въ Є҆питра́хиль и҆ Фелꙍ́нъ,) и҆схо́дитъ и҆́ꙁъ Це́ркве, и҆ прихо́дитъ къ Зво́нꙋ, та́мѡ ᲂу҆́бѡ предꙋготова́нной сꙋ́щей водѣ̀ ᲃщ҃е́нной Богоѧвле́нской и҆ кропи́льници, на че́стнѡ покрове́нномъ ᲃтолцѣ̀, начина́етъ ѡ҆бы́чнѡ.

Благослове́нъ Бо́гъ нш҃ъ:

Кли́ръ же пое́тъ ше́стымъ гла́сомъ:

Ца́рю небѣ́сный:

Посе́мъ чтꙋ́тъ: Трисвѧто́е: Ѿч҃е нш҃ъ: Гд҃и поми́лꙋй, ві҃.

Сла́ва: И҆ ны́нѣ: Прїйдѣ́те поклони́мсѧ, гⷤ, и҆ ѱалмы̀ сі́ѧ три, рм҃и.

Хвали́те Бг҃а въ ст҃ы́хъ є҆гѡ̀:

Сла́ва: И҆ ны́нѣ: А҆ллилꙋ́іа, гⷤ.

Дїаконъ же гл҃тъ Є҆кте́нїѧ ᲃі́ѧ:

Ми́ромъ Гд҃ꙋ помоли́мсѧ: да́же до Ѻ҆ плава́ющихъ:

И҆ а҆́бїе прилага́етъ ᲃі́ѧ.

Ꙍ҆ є҆́же благослови́ти Кампа́нꙋ сі́ю, въ сла́вꙋ ᲃт҃а́гѡ и҆менѐ свое́гѡ, небе́снымъ свои́мъ благослове́нїемъ, Гд҃ꙋ помоли́мсѧ.

Ꙍ҆ є҆́же пода́ти є҆́й благода́ть, ꙗ҆́кѡ да всѝ слыша́щїи звѣне́нїе є҆ѧ̀ и҆лѝ въ днѝ и҆лѝ въ но́щи, воꙁбꙋ́дѧтъ сѧ къ ᲃлавосло́вїю и҆́мене є҆гѡ̀ ᲃⷮ: Гд҃ꙋ помоли́мсѧ.

Ꙍ҆ є҆́же гла́сомъ звѣне́нїѧ є҆гѡ̀ ᲂу҆толи́тисѧ и҆ ᲂу҆ти́шитисѧ и҆ преста́ти всѣ́мъ вѣ́тромъ зѣ́лънымъ, бꙋ́рѧмъ же, гро́мѡмъ и҆ мо́лнїѧмъ, и҆ всѣ́мъ вре́днымъ беꙁве́дрїѧмъ, и҆ злораство́рнымъ во́ꙁдꙋхѡмъ, Гд҃ꙋ помоли́мсѧ.

Ꙍ҆ є҆́же ѿгна́ти всю̀ си́лꙋ, кова́рства же и҆ навѣ́ты неви́димыхъ врагѡ́въ, ѿ всѣ́хъ вѣ́рныхъ свои́хъ, гла́съ звꙋ́ка є҆гѡ̀ слы́шащихъ, и҆ къ дѣ́ланїю за́повѣдей свои́хъ воꙁбꙋди́ти, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ на́мъ ѿ всѧ́кїѧ ᲃко́рби:

Застꙋпѝ, ᲃпасѝ, поми́лꙋй, и҆ ᲃохранѝ на́съ:

Пресвѧтꙋ́ю, чи́стꙋю, преблагослове́ннꙋю:

Нача́лникъ воꙁглаша́етъ.

Ꙗ҆́кѡ подоба́етъ ти всѧ́каѧ сла́ва, че́сть и҆ поклоне́нїе:

По си́хъ же чтꙋ́тъ ѱало́мъ, к҃и. Принесѣ́те Гв҃и ᲃн҃о́ве Бож:

По сконча́нїи же ѱалма̀, Ре́кшꙋ Дїа́конꙋ:

Гд҃ꙋ помоли́мсѧ.

И҆ Кли́рꙋ:

Гд҃и поми́лꙋй.

Нача́лникъ, чтетъ Моли́твꙋ ᲃі́ю.

Гд҃и Бо́же нш҃ъ, хотѧ́й ѿ всѣ́хъ вѣ́рныхъ твои́хъ всегда̀ сла́вимъ и҆ покланѧ́емъ бы́ти, въ Ве́тсѣмъ За́конѣ рабꙋ̀ твое́мꙋ законополо́жникꙋ Мꙍѵ̆се́ю трꙋ́бы ᲃребрѧ́ны ᲃотвори́ти, и҆ ᲃн҃ѡ́мъ А҆а́роновымъ жерце́мъ въ нѧ̀, внегда̀ жрѣ́ти и҆́мъ тебѣ̀, вострꙋби́ти повелѣ́лъ є҆сѝ: ꙗ҆́кѡ да ᲂу҆слы́шавше лю́дїе твоѝ гла́съ тр́ꙋбный, гото́ви є҆́же поклони́тисѧ тебѣ̀ бꙋ́дꙋтъ, и҆ къ є҆́же же́ртвы приноси́ти тебѣ̀ соберꙋ́тсѧ, и҆ въ бра́нехъ трꙋ́бъ си́хъ гла́сомъ ѻ҆глаше́ни, къ побѣжде́нїю врагѡ́въ крѣ́пкѡ воѡрꙋжа́тсѧ. И҆ ны́нѣ, Влады́кѡ прест҃ы́й, смире́ннѡ мо́лимъ тѧ, при́ꙁри ми́лостивнѡ на приле́жное моле́нїе на́съ недосто́йныхъ рабѡ́въ твои́хъ, и҆ Кампа́нꙋ сїю, къ ᲃлꙋ́жбѣ це́ркве твое́ѧ ᲃт҃ы́ѧ, въ сла́вꙋ же великолѣ́пнагѡ и҆ всест҃а́гѡ и҆ покланѧ́емагѡ и҆менѝ твое́гѡ соѡрꙋже́ннꙋю, небе́снымъ ᲃт҃ы́мъ твои́мъ благослове́нїемъ и҆ благода́тїю всеѡсщ҃а́ющагѡ ти Дх҃а блгⷭ҇вѝ и҆ ѡ҆свѧтѝ, и҆ влѣ́й вню̀ си́лꙋ благода́ти твое́ѧ: ꙗ҆́кѡ да ᲂу҆слы́шавше вѣ́рнїи рабѝ твоѝ гла́съ звꙋ́ка є҆гѡ̀, въ благоче́стїи и҆ вѣ́ре ᲂу҆крѣ́пѧтъ сѧ, и҆ мꙋжестве́ннѡ всѣ́мъ дїѧ́волъскимъ навѣ́тѡмъ сопротивоста́нꙋтъ, и҆ моли́твами и҆ всегда́шнимъ ᲃлавосло́вїемъ тебѐ и҆́стиннагѡ Бг҃а сі́ѧ побѣдѧ́тъ: къ це́ркви же на Моли́твꙋ и҆ ᲃлавосло́вїе ᲃт҃а́гѡ и҆менѝ твое́гѡ, въ де́нь и҆ въ но́щи спѣ́шнѡ, ꙗ҆́кѡже ведо́ми да ведꙋ́тсѧ: да ᲂу҆то́лѧтъ же сѧ и҆ ᲂу҆тѣ́шатъ, и҆ преста́нꙋтъ и҆ напада́ющїѧ бꙋ́ри вѣ́трныѧ, гра́ды же и҆ ви́хры и҆ грѡ́мы стра́шнїи и҆ мѡ́лнїѧ, и҆ злораство́рныѧ и҆ вре́дныѧ во́ꙁдꙋхи гла́сомъ є҆гѡ̀. Ты́ бо Гд҃и Бо́же нш҃ъ, нето́чїю ᲂу҆́мными и҆ ѡ҆дꙋшевле́нными соꙁда́нїѧми твои́ми, въ ᲃла́вꙋ твою̀ и҆ въ спⷭ҇нїе и҆ по́лꙁꙋ вѣ́рныхъ твои́хъ, но и҆ беꙁдꙋ́шными, ꙗ҆́коже Мꙍѵ̆сеѡвымъ жеꙁло́мъ, и҆ мѣ́дѧною змїе́ю въ пꙋсты́нѣ, всѧ̀ ꙗ҆́же хо́щеши пресла́внаѧ тво́риши и҆ чꙋдодѣйствꙋ́еши: все́бо ти воꙁмо́жнѡ, не невоꙁмо́жнѡ же ничто́же: И҆ тебѣ̀ ᲃла́вꙋ воꙁсыла́емъ, Ѿц҃ꙋ, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

Посе́мъ а҆́бїе же гл҃е́тъ,

Ми́ръ всѣ́мъ.

Ли́къ,

И҆ дꙋхо́ви твое́мꙋ.

Дїа́конъ,

Гла́вы ва́ша Гв҃и преклони́те.

Ли́къ,

Тебѣ̀ Гд҃и.

Нача́лникъ же и҆ всѝ предстоѧ́щїи гла́вы прекло́нше, чтетъ та́йнѡ Моли́твꙋ сі́ю:

Влады́кѡ Бо́же Ѿч҃е Вседержи́телю, и҆́же трꙋ́бнымъ гла́сомъ ᲃе́дмїю жре́цъ и҆дꙋ́щихъ пре́дъ Ківꙍ́томъ ᲃвѣдѣ́нїѧ, Є҆рихꙍ́нскимъ тве́рдымъ стѣна́мъ па́сти и҆ раꙁрꙋши́тисѧ сотвори́лъ є҆сѝ, и҆ всѧ̀ въ гра́де сꙋ́щїѧ въ рꙋ́це люді́й твои́хъ преда́лъ є҆сѝ: Ты и҆ ны́нѣ Кампа́нꙋ сі́ю небе́снымъ твои́мъ благослове́нїемъ и҆сполнѝ, ꙗ҆́кѡ да гла́съ звѣне́нїѧ є҆ѧ̀ ᲂу҆слы́шавше, проти́вныѧ воꙁдꙋ́шныѧ си́лы дале́че ѿ ѡ҆гра́дъ вѣ́рныхъ твои́хъ ѿстꙋ́пѧтъ, и҆ всѧ̀ раꙁдеже́нныѧ и҆́хъ ѻ҆́гненныѧ, ꙗ҆́же на на́съ, стрѣ́лы ᲂу҆га́снꙋтъ, трѣска́нїѧ же мо́лнїй, на паде́нїе гра́да, и҆ всѧ̀ вре́дныѧ воꙁдꙋхѡвъ злорастворе́нїѧ, всесѝльною и҆ крѣ́пкою десни́цею прогони́ма и҆ ᲂу҆де́ржанна да ᲂу҆то́лѧтсѧ, ᲂу҆ти́хнꙋтъ и҆ ᲂу҆стꙋ́пѧтъ: всѧ́ бо ты въ сла́вꙋ твою̀, къ по́льꙁѣ и҆ спⷭ҇нїю на́шемꙋ чре́ꙁъ посре́дства дѣйствꙋ́еши.

И҆ воꙁглашаетъ.

Твое́ бо є҆́стъ, є҆́же ми́ловати и҆ сп҃са́ти ны, Бо́же нш҃ъ, и҆ тебѣ̀ ᲃла́вꙋ воꙁсыла́емъ, беꙁнача́льномꙋ Ѿц҃ꙋ, съ є҆диноро́днымъ ти Сы́номъ, и҆ съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

Вꙁе́мъ же Нача́лникъ ᲃщ҃еннꙋю во́дꙋ, кро́питъ Кампа́нꙋ ѿ четыре́хъ ᲃтра́нъ є҆ѧ̀, ѻ҆крестъ и҆ды́й, сверхꙋ̀, гл҃ѧ̀:

Благословлѧ́етсѧ и҆ ѡ҆свѧща́етсѧ Кампа́на сі́ѧ ѡ҆кропле́нїемъ воды̀ ᲃеѧ̀ ᲃщ҃енныѧ, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Та́кожде и҆ внꙋ́тръ є҆ѧ̀ кропѧ̀ на четы́ре ᲃтра́ны, то́жде гл҃е́тъ. Посе́мъ, вꙁе́мъ Кади́лницꙋ, ка́дитъ Кампа́нꙋ ѿ четыре́хъ ᲃтра́нъ, и҆ внꙋ́трь є҆ѧ̀.

Сі́ѧ же Нача́лникꙋ съверша́ющꙋ, Кли́рицы всѝ чтꙋ́тъ ѱало́мъ, ѯѳ҃.

Бо́же, въ по́мощь мою̀ вонмѝ: Ве́сь до конца̀.

Си́мъ же съверши́вшимсѧ, Дїа́конъ гл҃е́тъ,

Премꙋ́дрость.

Чте́цъ же, и҆лѝ Є҆кклисїа́рхъ, глаго́летъ:

Чи́слъ чте́нїе.

Дїа́конъ,

Во́нмѣмъ.

Чте́цъ же чтетъ Пари́емїю сі́ю, ѿ д҃ Кни́гъ Мꙍѵ̆сі́евыхъ, Главы̀ і҃.

Гл҃а̀ Гд҃ь къ Мѡѵ̆се́ю, гл҃ѧ̀: ᲃотворѝ себѣ̀ двѣ̀ трꙋ́бы ᲃре́брѧни, кова́ны сотвори́ши ѧ҆̀, и҆ бꙋ́дета ти на соꙁва́нїе со́нма, и҆ воꙁставлѧ́ти ѡ҆полче́нїѧ. И҆ въстрꙋ́биши и҆́ма, и҆ собер́етсѧ къ тебѣ̀ ве́сь со́нмъ, пре́дъ две́рми хра́ма ᲃвѣдѣ́нїѧ. А҆́ще ли є҆ди́ною трꙋбо́ю въстрꙋ́бѧтъ, прі́йдꙋтъ къ тебѣ̀ всѝ Кнѧ́ꙁи и҆ ти́сѧщници І҆и҃лстїи. И҆ вострꙋ́бите въ зна́менїе и҆ воꙁдви́жꙋтсѧ ѡ҆полче́нїѧ, ѡ҆полченнаѧ на востѡ́ки: и҆ вострꙋ́бите въ зна́менїе вто́рое, и҆ воꙁдви́гнꙋтсѧ ѡ҆полче́нїѧ, ѡ҆полче́ннаѧ ѿ ю҆̀га: и҆ вострꙋ́бите въ зна́менїе Тре́тіе, и҆ воꙁдви́гнꙋтсѧ ѡ҆полче́нїѧ, ѡ҆полче́ннаѧ ѿ мо́рѧ. И҆ вострꙋ́бите въ зна́менїе четве́ртое, и҆ воꙁдви́гнꙋтсѧ ѡ҆полче́нїѧ, ѡ҆полче́ннаѧ ѿ ᲃѣ́вера. зна́менїе да вострꙋ́бѧтъ въ воꙁдвиже́нїе и҆́хъ.

И҆ є҆гда̀ ᲃоберетѐ ᲃон̾мъ, вострꙋ́бите не въ зна́менїе. И҆ ᲃн҃ѡ́ве А҆а́рꙍни же́рцы да трꙋ́бѧтъ трꙋба́ми: и҆ бꙋ́детъ ва́мъ въ законе́нїе вѣ́чное въ рожде́нїѧ ва́ша. А҆́ще же и҆ꙁы́йдете на бра́нь въ землѝ ва́шей къ ᲃꙋпоста́тѡмъ съпротивѧ́щимсѧ ва́мъ, и҆ въстрꙋ́бите и҆ воꙁнамена́ти бꙋ́дете трꙋба́ми, и҆ воспомѧне́тесѧ пре́дъ Гд҃емъ, и҆ и҆ꙁбави́тесѧ ѿ вра́гъ ва́шихъ. И҆ въ днѝ весе́лїѧ ва́шегѡ, и҆ въ Пра́ꙁдники ва́шѧ, и҆ въ Новомѣ́сѧчїѧ ва́шѧ, въстрꙋ́бите трꙋба́ми, и҆ на всесожженїѧхъ, и҆ на же́ртвахъ спⷭ҇нїй ва́шихъ. и҆ бꙋ́детъ ва́мъ воспомина́нїе пре́дъ Бо́гомъ ва́шимъ. а҆́ꙁъ Гд҃ь Бг҃ъ ва́шъ.

Посе́мъ пою́тъ, и҆лѝ чтꙋтъ Стихи́ры ᲃі́ѧ. Гла́съ в҃.

Землѝ, и҆ про́чїимъ ᲃти́хїѧмъ, гнѣ́ва ра́ди твое́гѡ, грѣ́хъ ра́ди на́шихъ движи́магѡ на́ны, смꙋща́ющимсѧ и҆ ѡ҆бꙋрева́емымъ, гла́съ зна́менїѧ сегѡ̀, ꙗ҆́коже Мꙍѵ̆сеѻвыхъ ᲃребрѧ́ныхъ трꙋ́бъ ᲂу҆слы́шавъ Гд҃и, благоꙋтро́бнымъ си ѻ҆́комъ приꙁрѝ на́ны, и҆ не ꙗ҆́ростїю твое́ю ѡ҆бличѝ на́съ, но ᲂу҆милосерди́всѧ пощадѝ, всѧ́кагѡ стра́шнагѡ ти преще́нїѧ и҆ꙁбавлѧ́ѧ, ꙗ҆́кѡ є҆ди́нъ милосе́рдъ.

Гла́съ а҃.

Ѻ҆снова́нїѧ всеѧ̀ землѧ̀ воꙁдвиꙁа́ѧй, Бо́же, и҆ сотрѧсꙋ́ѧй є҆ди́нъ мо́рское ло́же, ꙗ҆́кѡ соꙁда́телъ всѧ́ческихъ, и҆ꙁба́ви на́съ пра́веднагѡ твое́гѡ преще́нїѧ, гла́сомъ зна́менїѧ ᲃегѡ̀ ѿгонѧ́ѧ зѣ́лныѧ бꙋ́рѧ и҆ вѣ́тры, грѡ́мы же и҆ мо́лнїѧ: и҆ бо́дрыхъ на́съ и҆ тщали́выхъ всегда̀ къ твое́мꙋ ᲃлавосло́вїю сътворѝ, и҆ къ и҆сполне́нїю ᲃт҃ы́хъ твои́хъ заповѣ́дїй, ꙗ҆́кѡ челове́кѡлю́бецъ.

Сла́ва: И҆ ны́нѣ: Гла́съ д҃.

Всѧ́ческаѧ є҆ди́ною въ нача́лѣ собо́ю непосре́дственнѣ ᲃоꙁда́вый Гд҃и, ны́нѣ же всѧ посредстве́ннѣ дѣйствꙋ́ѧй, гла́сомъ зво́на сегѡ̀ ѡ҆свѧщеннагѡ, всѧ́кое ᲂу҆ны́нїе съ лѣни́вствомъ ѿ се́рдецъ вѣ́рныхъ твои́хъ ѿженѝ, ᲃтра́хъ же тво́й въ ни́хъ съ благочестїемъ вкоренѝ и҆ спѣ́шныхъ на Моли́твꙋ, ско́рыхъ же къ всѧ́комꙋ благо́мꙋ дѣ́лꙋ твое́ю ᲃи́лою сътворѝ, и҆ꙁбавлѧ́ѧ на́съ ѿ всѣ́хъ навѣ́тѡвъ вра́жїихъ: и҆ невредныхъ ѿ злораство́ренныхъ во́ꙁдꙋхѡвъ завѣтре́нїѧ соблюда́ѧ: молитва́ми Бц҃а и҆ всѣ́хъ ᲃт҃ыхъ твои́хъ, ꙗ҆́кѡ є҆ди́нъ милосе́рдъ.

По сконча́нїи же ᲃихъ, ᲃт҃ль, и҆лѝ начальствꙋ́ѧй, ре́кшꙋ Дїа́конꙋ:

Премꙋдрость.

И҆ Ли́кꙋ:

Чтⷭ҇нѣ́йшꙋю херꙋви́мъ:

Сла́ва: И҆ ны́нѣ:

съ Гд҃и поми́лꙋй, гⷤ.

Благословѝ.

Тво́ритъ ѡ҆бы́чный дне́вный ѿпꙋстъ.

И҆ блⷭ҇ви́въ лю́ди, и҆детъ въ це́рковъ, пою́щꙋ Кли́рꙋ Догма́тикъ д҃-гѡ гла́са.

Пода́ждъ ᲂу҆тѣшенїе свои́мъ рабѡ́мъ всенепороч:

Сне́мъже зъ себѐ ᲃщ҃енныѧ ѡ҆де́жды, и҆де́тъ въ своѧ́ си ᲃъ ми́ромъ.

И҆́же въ ᲃт҃ы́хъ Ѿц҃а̀ на́шегѡ Ніки́фора И҆сповѣ́дника, Патрїа́рхи Кѡнстанті́на гра́да

Вѣ́стнѡ бꙋ́ди ꙗ҆́кѡ ѿ ꙗ҆ꙁы́къ, ᲃі́естъ, ѿ Тꙋ́ркѡвъ и҆ Татаръ, ѡ҆скверненна быва́етъ Це́рковъ, є҆гда̀ въ нахожде́нїи и҆́хъ, насилстве́ннѡ и҆́ми ѿверꙁа́етсѧ, и҆ и҆́хъ нѡга́ма попира́ема, и҆ рꙋка́ма скве́рныма ѡ҆сѧꙁа́ема, ѡ҆бнаже́нна же и҆ плѣне́нна ѿ свое́гѡ ᲂу҆краше́нїѧ быва́етъ: но ᲂу҆́бѡ Тра́пеꙁа и҆ Жерто́вникъ не раскопа́на и҆ не раꙁоре́нна цѣ́лѡ пребыва́ета. А҆́ще же Є҆рети́ци, и҆лѝ ѿстꙋ́пници, каковѣ́мъ либѡ бꙋ́ди ѡ҆́браꙁомъ вꙁе́мше ѿ Правовѣ́рныхъ Це́рковъ, въ не́й на ᲃт҃ѣ́й Тра́пеꙁѣ своѧ̀ Бо́гоме́рꙁкїа съверша́тъ слꙋ́жбы, ѡ҆скверне́на ᲂу҆жѐ и҆ Це́рковъ и҆ въ не́й Бжⷭ҇тве́ннаѧ Тра́пеꙁа быва́етъ: и҆ сегѡ̀ ра́ди Правовѣ́рнымъ въ си́цевой не досто́итъ ни́же Моли́твы, па́че же беꙁкро́вныѧ Ж́е́ртвы съверша́ти, ꙗ҆́кѡ въ ѡ҆скверне́нной сꙋ́щей. Тѣ́мъ же подоба́етъ ѡ҆ се́мъ пре́жде и҆ꙁвѣсти́ти Мѣ́стномꙋ Є҆пⷭ҇пꙋ, и҆́же и҆лѝ са́мъ а҆́ще восхо́щетъ, се́й чи́нъ съверши́тъ, и҆лѝ и҆́номꙋ комꙋ̀ ѿ намѣ́стныхъ свои́хъ І҆ере́ѡвъ съверши́ти благослови́тъ, кро́мѣ со Є҆пⷭ҇пкагѡ благослове́нїѧ ника́коже нико́мꙋже съверша́ти сей чи́нъ досто́итъ. Са́мъ ᲂу҆́бѡ ᲃт҃и́тель, и҆лѝ Намѣ́стникъ є҆гѡ̀, събра́въ єли́кѡ мо́жетъ І҆ере́ѡвъ, въ и҆́ной неѡскверне́нной Це́ркви, а҆́ще є҆́стъ, а҆́ще же нѣ́сть, въ домꙋ̀ нѣ́коемъ, съверши́въ Вече́рню, и҆ Оу҆́трню ѡ҆бы́чнꙋю, ра́нѡ пре́дъ вре́менемъ Бжⷭ҇твенныѧ Лѵтꙋ́ргїи, а҆́ще хо́щетъ ѿ и҆́ныѧ Це́ркве а҆́ще є҆́стъ, и҆де́тъ съ Литі́ею ѡ҆дѣѧ́нъ въ всѧ̀ ᲃщ҃е́нныѧ ѡ҆де́жды. А҆́ще же нѣ́сть и҆́ныѧ Це́ркве беꙁъ Литі́и, прише́дъ къ ѡ҆скверне́нной Це́ркви, ѡ҆бна́женꙋ сꙋ́щꙋ Престо́лꙋ и҆ Жерто́вникꙋ ѿ свои́хъ покрыва́лъ, и҆ две́ремъ затворе́ннымъ сꙋ́щимъ. Пре́дъ Це́рквїю же внѣ поста́вленꙋ сꙋ́щꙋ столцꙋ̀ честнѡ покрове́ннꙋ, и҆ на не́мъ Є҆ѵⷢ҇лїю же и҆ Крⷭ҇тꙋ̀ и҆ Водѣ̀ въ ᲃосꙋ́дѣ, и҆ кропи́ло ѿ ѵ҆ссо́пнагѡ зе́лїѧ ᲂу҆стро́енѡ, тꙋ ѡ҆блачи́тсѧ въ ᲃщ҃енныѧ ѡ҆де́жды съ всѣ́мъ кли́ромъ, и҆ соверша́етъ ѡ҆бы́чное А҆́вгꙋстово Водосвѧще́нїе. ᲃі́е же соверши́въ начина́етъ ѡ҆бы́чнѡ.

Блⷭ҇ве́нъ Бг҃ъ нш҃ъ:

Ли́къ же пое́тъ на Гла́съ ѕ҃.

Ца́рю небѣ́сный:

Посе́мъ чтꙋ́тъ:

Трⷭ҇то́е: Ѿч҃е нш҃ъ: Гд҃и поми́лꙋй: ві҃. Прїйдѣ́те поклони́мсѧ, гⷤ. Ѱало́мъ, н҃. Поми́лꙋй мѧ Бж҃е:

И҆ пою́тъ Тропарѝ сі́ѧ. Гла́съ ѕ҃.

Поми́лꙋй на́съ Гд҃и, поми́лꙋй на́съ:

Сла́ва:

Гд҃и, поми́лꙋй на́съ.

И҆ ны́нѣ:

Млⷭ҇рдїѧ две́ри ѿверꙁѝ на́мъ.

Си́мъ же пою́щимъ ѡ҆бхо́дитъ ᲃт҃и́тель, и҆лѝ Намѣ́стникъ є҆гѡ̀ Це́рковъ всю̀ ѡ҆́крестъ и҆ꙁ̾внѣ̀ кропѧ̀ ᲃщ҃енною Водо́ю и҆ весъ Цми́нтаръ, гл҃ѧ̀.

Ѻ҆кропи́ши мѧ ѵ҆ссо́помъ и҆ ѻ҆чи́щꙋсѧ, ѻ҆мы́еши мѧ, и҆ па́че снѣ́га ᲂу҆бѣлю́сѧ, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а.

Преди́дꙋтъ же є҆мꙋ̀ пѣвцѝ, по ни́хъ Дїа́кони, посе́мъ ᲃщ҃енници два̀ два̀, по ни́хъ же са́мъ Нача́лникъ, предидꙋ́щимъ є҆мꙋ̀ свѣщено́сцемъ съ свѣща́ми.

А҆́ще же съверши́тсѧ пѣ́нїе Тропарѡ́въ предрече́нныхъ доне́лиже скончи́тсѧ ѡ҆бхожде́нїе пою́тъ и҆ Богоро́диченъ д҃-гѡ Гла́са. ᲃі́естъ:

Пода́ждъ ᲂу҆тѣше́нїе.

Сконча́вше же ѡ҆кропле́нїе Це́ркве и҆ Цминтарѧ̀, ста́нетъ весъ Кли́ръ пре́дъ две́рми Церко́вными къ Восто́кꙋ лице́мъ.

Рекшꙋ же Дїа́конꙋ,

Гд҃ꙋ помоли́мсѧ:

и҆ Кли́рꙋ,

Гд҃и поми́лꙋй.

Началствꙋ́ѧй чтетъ Моли́твꙋ сі́ю съ всѧ́кимъ ᲂу҆миле́нїемъ велегла́снѡ.

Бж҃е ᲃи́лъ Пртⷭ҇о́лъ и҆мѣ́ѧй нб҃о, зе́млю же подно́жїе, то́жде ѡ҆́браꙁны нбⷭ҇ногѡ жи́лища твое́гѡ, ᲃт҃ы́ѧ си хра́мы покаꙁа́вый въ вселе́нїе ᲃт҃ы́ѧ ᲃла́вы твое́ѧ, на́мъ же грѣ́шнымъ прибѣжи́ще вели́кое, и҆ приста́нище сі́ѧ положи́лъ є҆сѝ ᲃп҃си́телное, къ ѡ҆чище́нїю съгрѣше́нїй на́шихъ, и҆ всѧ́кой стра́сти дш҃евной же и҆ тѣле́сной чисти́телное, ра́ди съверша́емыѧ въ тѣ́хъ Бж҃естве́нныѧ и҆ беꙁ̾кро́вныѧ Же́ртвы: моли́мъ тѧ бл҃га́гѡ Бг҃а на́шегѡ, бꙋ́ди на́мъ млⷭ҇тивъ недосто́йнымъ, прїемлѧ̀ на́съ и҆ все́й Моли́твѣ на́шей, вѣ́рою бо несꙋмѣ́нною прихо́димъ, не на досто́инствѡ своѐ сматрѧ́юще, но на твою̀ надѣю́щесѧ кро́тость, и҆ чл҃кѡлю́бїе твоѐ беꙁъчисле́нное. И҆сповѣда́ти же досто́йнѡ є҆́стъ, ꙗ҆́кѡ твоѧ̀ дарова́нїѧ въи́стиннꙋ нераска́ѧнна, и҆ и҆ꙁли́тїе да́ра Пртⷭ҇а́гѡ Дх҃а неѡскꙋ́днѡ є҆́стъ: множества́ же ра́ди грѣ́хъ на́шихъ попꙋсти́лъ є҆сѝ: (а҆́ще ли ѿ ꙗ҆ꙁы́къ, гл҃е́тъ ᲃїе:) ѿ беꙁбо́жныхъ ꙗ҆ꙁы́кѡвъ (а҆́ще же ѿ є҆рети́къ, престꙋпѝ пе́рвое и҆ чтѝ сїе:) ѿ нечести́выхъ є҆рети́къ, и҆лѝ ѿстꙋ́пникъ наси́лїѧ Бжⷭ҇тве́нномꙋ и҆ ᲃщ҃е́нномꙋ семꙋ̀ ѡ҆скверни́тисѧ и҆ ѡ҆мраꙁи́тисѧ хра́мꙋ, но мо́лимсѧ твое́мꙋ не памѧтоꙁло́бномꙋ бл҃гоꙋтро́бїю, приклонѝ ᲂу҆́хо твоѐ и҆ ᲂу҆слы́ши на́съ Бж҃е сп҃си́телю нш҃ъ въ се́й ча́съ, во́н̾же приꙁыва́ємъ нескаꙁа́нное ти чловеколю́бїе, и҆ покажѝ хра́мъ се́й, ѻ҆сѣне́нїемъ живонача́л̾нагѡ и҆ новотво́рнагѡ ти Дх҃а, и҆ ни́нѣ жи́лище прⷭ҇та́гѡ ти и҆менѝ, хра́мъ ᲃт҃ъ тво́й, и҆ селе́нїе ᲃла́вы твое́ѧ, мѣ́сто ᲂу҆покое́нїѧ, Ковче́гъ ѻ҆сщ҃е́нїѧ ти, ѡ҆сїѧ́нъ свѣ́томъ лица̀ твое́гѡ, пре́жднимъ бл҃гоꙋкраше́ніємъ, и҆ бл҃голѣ́пїемъ ѡ҆дѣѧ́нъ, и҆ не за́вистною ти благода́тїю ѡ҆богатѣ́емъ, є҆́же беꙁъ заꙁо́ра соверша́ти чи́стѣ въ не́мъ Бжⷭ҇ве́ннаѧ та́инства, и҆ а҆́ще что̀ скве́рно и҆ нечи́сто, (а҆́ще ли ѿ ꙗ҆ꙁы́къ, гл҃е́тъ сїе:) ѿ беꙁбо́жныхъ пога́нъ. (а҆́ще же ѿ є҆рети́къ престꙋпѝ пе́рвое, и҆ гл҃и сїе: ѿ є҆ретичествꙋ́ющихъ, и҆лѝ ѿстꙋ́пникѡвъ) злосла́вныхъ дерꙁнꙋ́вшихъ скве́рныхъ и҆ не досто́йныхъ рꙋ́къ свои́хъ бꙋ́естїю, томꙋ̀ ѡ҆сѧꙁа́нїемъ привнестѝ: ᲃа́мъ Влады́ко ѡ҆чи́сти, и҆ воꙁвысѝ па́ки ᲃла́вꙋ є҆гѡ̀, и҆ воꙁста́ви ѡ҆скверне́нный въ не́мъ жерто́вникъ, и҆ снабдѝ ниꙁложе́ннꙋю свою̀ ᲃт҃ы́ню, воꙁста́вивый ᲃки́нїю Двд҃вꙋ па́дшꙋю, и҆ воꙁдѣла́вый па́дшаѧсѧ є҆ѧ̀, и҆ раскопа́ннаѧ и҆спра́вивый, соблюдѝ тогѡ̀ про́чее ѿ всѧ́кагѡ прило́га сопроти́вна ненавѣ́тенъ и҆ не ѡ҆сѧꙁа́емъ бы́ти, ѡ҆ державѝ є҆гѡ̀ да́же и҆ до сконча́нїѧ вѣ́ка непоꙁибле́мѡ, и҆ всю̀ Це́рковь твою̀ пребыва́ти бл҃говолѝ непоколѣби́мꙋ: ѡ҆чи́сти же и҆ на́съ смире́нныхъ, и҆ ѡ҆трѝ всѧ́кꙋю ᲃтра́сть, и҆ скве́рнꙋ дꙋше́внꙋю же и҆ тѣле́снꙋю, ѿ грѣха̀ на́мъ пребыва́ющꙋю, и҆ въ вѣ́рѣ, ꙗ҆́же къ тебѣ̀ ᲂу҆крѣпѝ, въ любвѝ ᲂу҆твердѝ, и҆ въ наде́жди непрело́жныхъ соблюдѝ, и҆ страхъ тво́й водрꙋꙁѝ въ сердца̀ на́ша, и҆ ѿверꙁѝ на́мъ ᲂу҆тро́бꙋ щедрѡ́тъ чл҃кѡлю́бїѧ твое́гѡ, и҆ дарꙋ́й въ ᲃт҃а́ѧ ст҃ы́хъ ти вхо́дъ, сподоблѧ́ѧ прихо́дꙋ ᲃт҃ы́хъ и҆ бл҃же́нныхъ ᲃилъ бы́ти, и҆ совнитѝ рабѡ́мъ твои́мъ, наставлѧ́ющихъ на́съ, и҆ просвѣща́ющихъ нш҃ъ ᲂу҆́мъ є҆́же чи́стою ᲃо́вѣстїю и҆ ᲂу҆́момъ несмꙋ́тнымъ, в̾ходѧ́ще въ хра́мъ ᲃт҃ы́й тво́й, покло́ним̾сѧ въ дво́рехъ тво́ихъ Гд҃и, и҆ воꙁда́мы мл҃твы на́ша прїѧ́тны въ ᲃт҃ый пренебе́сный тво́й жерто́вникъ, та́йныѧ ᲃлꙋ́жбы и́ Дх҃о́внаѧ та́инства, тебѣ̀ приносѧ́ще, благода́тїю и҆ челове́колю́бїемъ є҆диноро́днагѡ ти ᲃн҃а Гд҃а нш҃гѡ І҆и҃ᲃ Ха҃, сни́мже тебѣ̀ подоба́етъ сла́ва, в̾кꙋ́пѣ съ ᲃт҃ы́мъ Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Ли́къ,

А҆ми́нь.

По Моли́твѣ же, ᲃт҃ль и҆лѝ Намѣ́стникъ є҆гѡ̀, пристꙋпи́въ къ две́ремъ, знамена́етъ ѧ҆̀ десни́цею крестаѡ́браꙁнѡ, гл҃ѧ̀.

Въ И҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а, ᲃъ ми́ромъ внидѣ́мъ.

Кли́ръ же гл҃е́тъ.

Ꙍ҆ и҆мени Гд҃ни.

Ѻ҆нже кресто́мъ ѿверꙁа́етъ две́ри, и҆ са́мъ пе́рвѣе вхо́дитъ въ цр҃ковъ, и҆ по не́мъ ве́сь Кли́ръ, пою́ще Стихи́рꙋ ᲃі́ю. Гла́съ и҃.

Ꙗ҆́коже Закхе́ѡвꙋ до́мꙋ, твои́мъ Хє҃ в̾хо́домъ ᲃпⷭ҇нїе бы́сть, ᲃи́це и҆ ны́нѣ в̾хо́домъ ᲃщ҃е́нныхъ слꙋжи́телїй твои́хъ, и҆ съ ни́ми ᲃт҃ы́хъ твои́хъ А҆гг҃лъ, ми́ръ тво́й пода́ждъ хра́мꙋ ᲃемꙋ̀, и҆ Дх҃а твое́гѡ благода́тїю ѡ҆чи́сти є҆гѡ̀, и҆ ᲃеле́нїе въ не́мъ себѣ̀ сотворѝ, ᲃп҃са́ѧ и҆ привѣща́ѧ дш҃а̀ на́ша.

Пою́щꙋ же Кли́рꙋ сі́е, ᲃт҃лъ, и҆лѝ намѣ́стникъ є҆гѡ̀, кро́питъ всѧ̀ стѣ́ны цр҃ко́вныѧ, и҆ ве́съ ѻ҆́лтаръ, гл҃ѧ̀:

Ꙍ҆кропи́ши мѧ ѵ҆ссѡ́помъ и҆ ѡ҆чищꙋ́сѧ, ѡ҆мы́еши мѧ, и҆ па́че снѣ́га ᲂу҆бѣлю́сѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

А҆бїе же посе́мъ, а҆́ще ѿ ꙗ҆ꙁы́къ є҆́стъ ѡ҆скве́рнена це́рковъ, чтꙋ́тъ всѝ Ѱало́мъ, ѻ҃н.

Бж҃е прїйдѡ́ша ꙗ҆ꙁы́ци въ достоѧ́нїе твоѐ.

А҆ще же ѿ є҆рети́къ, чтꙋ́тъ Ѱало́мъ, ѻ҃ѳ.

Пасы́й І҆и҃лѧ вонмѝ наставлѧ́ѧй ꙗ҆́ко ѡ҆вча̀ І҆ѡ́сифа:

Сла́ва: И҆ ны́нѣ: А҆лл҃ꙋ́іа, гⷤ.

Дїа́конъ же гл҃е́тъ Є҆кте́нїѧ сі́ѧ стоѧ̀ посре́дъ црк҃ве.

Ми́ромъ Гд҃ꙋ помоли́мсѧ.

Кли́ръ,

Гд҃и поми́лꙋй.

Ꙍ҆ свы́шнѣмъ ми́рѣ и҆ ᲃп҃се́нїи дш҃ъ на́шихъ, Гд҃ꙋ помоли́мсѧ.

Ꙍ҆ ми́рѣ всегѡ̀ мі́ра, бл҃гостоѧ́нїи ᲃт҃ы́хъ Бж҃іихъ Це́рквїй и҆ съедине́нїи всѣ́хъ, Гд҃ꙋ помоли́мсѧ.

Ꙍ҆ Преѡсщ҃е́нномъ А҆рхїепи́скопѣ на́шемъ всеѧ̀ Рѡ́ссїи Митрополи́тѣ, И҆мⷬ҇къ: чⷭ҇тнѣ́мъ Преꙁви́терствѣ, є҆́же ѡ҆ Хѣ̀ Дїа́конствѣ, все́мъ при́чтѣ и҆ люде́хъ, Гд҃ꙋ помоли́мсѧ.

Ꙍ҆ Вели́комъ Королѣ̀ на́шемъ, И҆мⷬ҇къ: и҆ ѡ҆ бл҃гочести́выхъ Гпⷭ҇дарехъ Кнѧ́ꙁехъ и҆ Панѣ́хъ нш҃ихъ, Гд҃ꙋ помоли́мсѧ.

Ꙍ҆ є҆́же ᲂу҆слы́шати гла́сꙋ на́съ грѣ́шныхъ, и҆ недосто́йныхъ рабѡ́въ свои́хъ, и҆ посѣти́ти хра́мъ се́й, и҆ Жерто́вникъ, и҆ ѡ҆́крестъ сꙋ́щꙋю є҆гѡ̀ ѡ҆гра́дꙋ, ᲃи́лою дѣ́йствомъ и҆ бл҃года́тїю ᲃт҃а́гѡ Дх҃а, Гд҃ꙋ помоли́мсѧ.

Ꙍ҆ є҆́же ѡ҆чи́стити є҆гѡ̀ ѿ належа́щагѡ є҆мꙋ̀ ѡ҆скверне́нїѧ, Гд҃ꙋ помоли́мсѧ.

Ꙍ҆ є҆́же пе́рвꙋю ѡ҆свѧщенїѧ ра́ди да́ннꙋю Хра́мꙋ и҆ Жерто́вникꙋ ᲃемꙋ̀ благода́ть ѡ҆бнови́ти, и҆ не ѿе́млемѡ на не́мъ пребы́ти сътвори́ти, Гд҃ꙋ помоли́мсѧ.

Ꙍ҆ є҆́же сподоби́ти на́съ неосꙋжде́ннѡ въ Хра́мѣ и҆ Жерто́вницѣ семъ приноси́ти є҆мꙋ̀ беꙁкро́внꙋю Же́ртвꙋ, Гд҃ꙋ помоли́мсѧ.

Ꙍ҆ є҆́же ᲂу҆слы́шаннымъ бы́ти въ хра́мѣ ᲃе́мъ мѡ́л̾бамъ на́шимъ, и҆ благопрїѧ́тнымъ, Гд҃ꙋ помоли́мсѧ.

Ꙍ҆ є҆́же ѡ҆чи́стити и҆ на́съ всѣ́хъ ѿ всѧ́кїѧ скве́рны пло́ти и҆ дꙋ́ха, и҆ и҆спо́лнити на́съ ᲃвое́гѡ Дх҃а благода́ти, Гд҃ꙋ помоли́мсѧ.

Ꙍ҆ и҆ꙁба́витисѧ на́мъ и҆ всѣ́мъ вѣ́рнымъ, ѿ всѧ́кїѧ ско́рби, гнѣ́ва, и҆ нꙋ́жда, Гд҃ꙋ помоли́мсѧ.

Застꙋпѝ, ᲃпасѝ:

Пресвѧтꙋ́ю, чи́стꙋю, Преблагослове́ннꙋю:

Ст҃и́тель же и҆лѝ намѣ́стникъ є҆гѡ̀ ᲃтоѧ̀ пре́дъ црⷭ҇кими две́рми, Воꙁглаша́етъ.

Ꙗ҆́кѡ подоба́етъ ти всѧ́каѧ ᲃла́ва, че́сть и҆ поклоне́нїе:

По Во́ꙁгласѣ же Дїа́конъ гл҃е́тъ.

Съ ᲂу҆миле́нїемъ прекло́нше всѝ колѣ́нѣ, Гд҃ꙋ помоли́мсѧ.

Нача́лникъ же прекло́нъ колѣ́нѣ съ всѣмѝ людмѝ пре́дъ Црⷭ҇кими Дверми, чтетъ съ всѧ́кимъ благоговѣ́нїемъ и҆ ᲂу҆миленїемъ Моли́твꙋ сі́ю, И҆́же въ ᲃт҃ы́хъ Ѿц҃а̀ нашегѡ Ніки́фора И҆сповѣ́дника, Патрїа́рхи Кѡнстанті́на гра́да.

Гд҃и Бж҃е нш҃ъ, Хра́мъ ᲃе́й покаꙁа́вый жи́лище ᲃебѣ̀ прише́ствїемъ животворѧ́щагѡ ти Дх҃а въ че́стномъ помаꙁа́нїи, ѡ҆ст҃и́вшемъ Проро́ки и҆ А҆пⷭ҇тлы: та́же грѣ́хъ ра́ди на́шихъ ѡ҆скверни́тисѧ попꙋсти́лъ є҆сѝ томꙋ̀, и҆ пренепоро́чномꙋ ти ѡ҆нечести́тисѧ Жерто́вникꙋ.

(А҆́ще ѿ ꙗ҆ꙁы́къ ѡ҆скверне́на є҆́стъ, гл҃ѝ ᲃі́е:) ѿ беꙁбо́жныхъ ꙗ҆ꙁы́къ, и҆́миже препѣ́тое и҆ Великолѣ́пое И҆мѧ твоѐ хꙋ́литсѧ. (А҆́ще же ѿ є҆ретикъ, престꙋпѝ пе́рвое, и҆ гл҃ѝ ᲃі́е:) ѿ смꙋща́ющихъ и҆ раꙁдира́ющихъ твою̀ Црк҃овъ, въ ѿстꙋпле́нїи и҆ порꙋга́нїи Пречⷭ҇тыхъ Є҆ѵⷢ҇лскихъ, А҆пⷭ҇лскихъ же и҆ Ѿческихъ Пра́вилныхъ преда́нїй: Са́мъ па́ки млⷭ҇тивнымъ прїемлѧ̀ на́съ ѻ҆́комъ, съ вѣ́рою приходѧ́щихъ приле́жнѡ, и҆ своѧ̀ и҆сповѣда́ющихъ съгрѣше́нїѧ въ поꙁна́нїи и҆ покаѧ́нїи, же́ртвы же чи́сты и҆ беꙁкро́вны принестѝ въ не́мъ тебѣ̀ хотѧ́ще, ѡ҆чи́сти тогѡ̀ ѿ прираꙁи́вшїѧсѧ скве́рны, и҆ пе́рвыѧ и҆сполне́нъ ꙗ҆вѝ чистоты̀, ꙗ҆́кѡ є҆ди́нъ сы́й ᲃа́мъ чистота̀, и҆ сꙋществе́ннаѧ ᲃт҃ы́ни, є҆ди́нъ же могі́й ѡ҆свѧща́ти ѻ҆браща́ющихъ сердца̀ къ тебѣ̀, и҆ ѡ҆чища́ти на́съ всесоверше́ннѣ ѿ со́вѣсти лꙋка́выѧ, и҆ всѧ́кагѡ недоꙋмѣ́нїѧ и҆ раꙁдво́енїѧ. Ꙗ҆́кѡ ты́ є҆сѝ ѡ҆сщ҃енїе на́ше, и҆ тебѣ̀ ᲃла́вꙋ воꙁсыла́емъ Ѿц҃ꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆ми́нь.

А҆́бїе же посе́мъ Кли́ръ пое́тъ Стіхи́рꙋ ᲃі́ю. Гла́съ є҃.

Благословѝ Гд҃и хра́мъ се́й И҆мени твое́мꙋ съꙁда́ный, и҆ ѡ҆чи́сти є҆гѡ̀: и҆ ᲂу҆слы́шаны въ не́мъ ᲃътворѝ Моли́твы на́ша, Же́ртвы же и҆ приноше́нїѧ прїймѝ: и҆ грѣхѝ люді́й твои́хъ всѧ̀ ѡ҆чи́сти, и҆ благода́ть ᲂу҆ тебѐ полꙋчи́ти сътворѝ, и҆ всѣ́хъ на́съ поми́лꙋй по вели́цѣй твое́й ми́лости.

Началствꙋ́ѧй же а҆́бїе гл҃е́тъ.

Съ ми́ромъ вни́дѣмъ.

Кли́ръ:

Ꙍ҆ и҆менѝ Гд҃ни.

И҆ а҆́бїе пою́тъ сі́ю Стіхи́рꙋ. Гла́съ и҃.

Ꙗ҆́коже Закхе́ѡвꙋ до́мꙋ твои́мъ Хє҃ въхо́домъ ᲃпⷭ҇нїе бы́сть, си́це и҆ ны́нѣ въхо́домъ ᲃщ҃енныхъ ᲃлꙋжи́телїй твои́хъ, и҆ съ ни́ми ᲃт҃ы́хъ твои́хъ А҆́гг҃лъ, ми́ръ тво́й пода́ждъ хра́мꙋ ᲃемꙋ̀, и҆ Дх҃а ᲃт҃а́гѡ благода́тию Жерто́вникъ є҆гѡ̀ ѡ҆чи́сти, и҆ селе́нїе въ не́мъ себѣ̀ сътворѝ, ᲃп҃са́ѧ и҆ просвѣща́ѧ дша̀ на́шѧ.

Сконча́нꙋ же пѣ́нїю, Дїа́конъ гл҃е́тъ,

Па́ки и҆ па́ки колѣ́нѣ прекло́нше съ ᲂу҆миле́нїемъ, Гд҃ꙋ помоли́мсѧ.

Нача́лникъ же вше́дъ Цркⷭ҇ими Две́рми въ Ѻ҆́лтаръ, пре́дъ ᲃт҃о́ю Тра́пеꙁою колѣ́нѣ прекло́нь съ всѣ́ми предстоѧ́щими, ѿпѣ́вшꙋ Кли́рꙋ.

Гд҃и поми́лꙋй гⷤ,

Гл҃е́тъ Моли́твꙋ ᲃі́ю, И҆́же въ ст҃ы́хъ Ѿц҃а̀ на́шегѡ Тарасїѧ Патрїархи Константинопо́лскагѡ.

Влады́кѡ Гд҃и Бж҃е нш҃ъ, тебѐ моли́мъ млⷭ҇тивагѡ и҆ благоꙋвѣтли́вагѡ ѡ҆ грѣсѣ́хъ на́шихъ, ᲂу҆слы́ши мл҃енїе рабѡ́въ твои́хъ и҆ а҆́ще кі́й (А҆́ще ѿ ꙗ҆ꙁы́къ ѡ҆скверне́на є҆́стъ црк҃овъ, гл̀и сі́е:) ѿ беꙁбо́жныхъ ꙗ҆ꙁы́къ начина́нїѧ (А҆́ще ѿ є҆рети́къ, и҆лѝ ѿстꙋ́пникъ, престꙋпѝ пе́рвое, и҆ гл҃ѝ сі́е,) ѿ є҆рети́ческагѡ, и҆лѝ ѿстꙋ́пническагѡ начина́нїѧ, прираꙁи́сѧ ᲂу҆ко́ръ ᲃт҃о́мꙋ твое́мꙋ Жерто́вникꙋ, ѿимѝ єгѡ̀ ꙗ҆́ко бла́гъ и҆ челове́колю́бецъ: ꙗ҆́кѡ да не ѡ҆сꙋжде́ннѡ предстоѧ́ще пре́дъ Лице́мъ ᲃт҃ы́ѧ ᲃла́вы твое́ѧ слꙋжи́ти на не́мъ и҆ принестѝ тебѣ̀ беꙁкро́вныѧ Же́ртвы и҆́стинныѧ на́шеѧ ᲃлꙋ́жбы сподоби́мсѧ, и полꙋчи́ти вѣ́чнаѧ твоѧ̀ бл҃га́ѧ ꙗ҆́же ᲂу҆готова́лъ є҆сѝ любѧ́щимъ тѧ Гд҃и. Ꙗ҆́кѡ ты́ є҆си ѡ҆свѧщенїе на́ше и҆ тебѣ̀ ᲃла́вꙋ воꙁсыла́емъ Ѿц҃ꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Кли́ръ,

А҆ми́нь.

Вста́въ же а҆́бїе началствꙋ́ѧй, кро́питъ сщ҃е́нною водо́ю ᲃⷮ: Тра́пеꙁꙋ и҆ Жерто́вникъ, гл҃ѧ̀: Ꙍ҆кропи́ши мѧ ѵ҆ссо́помъ. И҆ про́ч:

Посе́мъ ѡ҆блачи́тсѧ во своѧ̀ И҆нді́тїѧ и ᲃава́ны, и҆ полага́етъ на ᲃⷮ: Тра́пеꙁѣ А҆нтими́съ, Є҆ѵⷢ҇лїе, Крⷭ҇тъ, и҆ ᲃвѣ́щѧ: на Жерто́вницѣ же всѧ̀ съсꙋ́ды, ѡ҆кропивъ ѧ҆̀ сщ҃е́нною водо́ю: симъ же дѣйствꙋ́ющимсѧ, кли́ръ чтетъ Тртⷭ҇о́е: Ѿч҃е нш҃ъ: и҆ по Ꙗ҆кѡ твоѐ є҆́стъ Ца́рст: Троп: и҆ Конд: хра́мꙋ.

Сла́ва: И҆ ны́нѣ: Богоро́дъ: Гла́сꙋ.

А҆́бїе же посе́мъ тво́ритъ ѡ҆бы́чный ѿпꙋ́стъ Хра́мꙋ. И҆ начина́етсѧ Проскоми́дїѧ, и҆ чтꙋ́тсѧ Часы̀ ѡ҆бы́чнѡ, и по ни́хъ, съверша́етсѧ Бжⷭ҇тве́ннаѧ Лѵтꙋ́ргїѧ свои́мъ чи́номъ, въ ᲃла́вꙋ Бж҃ію.

и҆лѝ Цми́нтарѧ, и҆де́же ᲃлꙋ́читсѧ чловекꙋ нꙋ́ждною ᲃмертїю ᲂу҆мрѣ́ти и҆лѝ кро́вїю чловече́скою въ крамолѣ̀ нѣ́коей Це́ркви и҆лѝ Цминтарю̀ ѡ҆кропи́тисѧ

Вѣ́стно бꙋ́ди, ꙗ҆́кѡ ника́коже досто́итъ въ си́цевой Це́ркви І҆ере́ю ᲃлꙋжи́ти, подъ ѿлꙋче́нїемъ и҆ лю́тою ка́ꙁнїю Є҆пⷭ҇кою, и҆ не то́чїю въ Црк҃ви а҆́ще ᲂу҆бі́йство, и҆лѝ ѡ҆кровавле́нїе бꙋ́детъ, но и҆ на Цми́нтари а҆́ще приклю́читсѧ, слꙋжи́ти да не дерꙁне́тъ, но пре́жде подоба́етъ ѡ҆ се́мъ и҆ꙁвѣсти́ти А҆рхіере́ю, и҆́же а҆́ще восхо́щетъ, са́мъ послѣдꙋ́ющїй ѡ҆чище́нїѧ чи́нъ соверши́тъ, и҆лѝ и҆́номꙋ комꙋ̀ ѿ І҆ере́ѵ̆ намѣ́стныхъ сво́ихъ сїе соверши́ти благослови́тъ.

А҆рхіере́ѵ̆ ᲂу҆́бѡ, и҆лѝ и҆мы́й на сїе блгⷭ҇ве́нїе ѿ не́гѡ, собра́въ є҆ли́кѡ мо́жетъ І҆ере́ѡвъ, и҆ ра́нѡ пре́дъ вре́менемъ Бжⷭ҇твенныѧ Лѵтꙋ́ргїа, прише́дъ къ Це́ркви повелѣва́етъ ѡ҆чи́стити мѣ́стѡ то, и҆ а҆́ще и҆ кро́въ слꙋ́читсѧ на ᲃтѣнѣ̀, и҆лѝ на землѝ, си́мъ ѡ҆́браꙁомъ да ѡ҆чи́ститсѧ. На ᲃтѣнѣ̀ да и҆сте́шетсѧ, и҆лѝ ѻ҆ско́рдомъ да ѡ҆стрꙋ́жетсѧ, и҆ водо́ю до́брѣ и҆ꙁмы́етсѧ. А҆́ще же на землѝ то́чїю, да и҆ско́пана бꙋ́детъ на пѧ́дїй двѣ въ глꙋбинꙋ̀, и҆ и҆ꙁме́щена во́нъ: и҆ вмѣ́сто тое́ю, и҆ною чи́стою земле́ю да насы́плетсѧ. А҆́ще же на ка́мени, да и҆стрꙋ́жетсѧ до́брѣ ка́мень, и҆ водо́ю чи́стою и҆ꙁмы́етсѧ: семꙋ́ же бы́вшꙋ, внѣ̀ пре́дъ це́рквїю, соверша́етъ ѡ҆бы́чное А҆́вгꙋстово Водосвѧще́нїе, ᲃїе же соверши́въ, начина́етъ ѡ҆бы́чнѡ.

Блгⷭ҇ве́нъ Бг҃ъ нш҃ъ: Ца́рю нб҃сный: Трⷭ҇то́е, по Ѿч҃е нш҃ъ: Гд҃и поми́лꙋй, в҃і. Прїйдѣ́те поклони́мсѧ: гⷤ. и҆ Ѱало́мъ н҃. Поми́лꙋй мѧ Бж҃е:

И҆ посе́мъ пою́тъ Тропарѝ сі́ѧ Гла́съ ѕ҃. Поми́лꙋй на́съ, Гд҃и поми́лꙋй,

Сла́ва: Гд҃и поми́лꙋй на́съ:

И҆ ны́нѣ:

Млрⷭ҇дїѧ две́ри: И҆ Бо́грод: д҃-гѡ Гла́са. Пода́ждѣ ᲂу҆тѣше́нїе рабѡ́мъ всенепоро́чнаѧ:

Пою́щимъ же сі́ѧ Пѣвцемъ А҆рхіере́ѵ̆, и҆лѝ Намѣ́сникъ є҆гѡ̀ и҆мѣ́ѧй на сі́е ѡ҆со́бное ѿ не́гѡ благослове́нїе, кро́питъ всю Црк҃овъ ѿвнѣ̀, и весъ Цминта́ръ, гл҃ѧ̀:

Ꙍ҆кропи́ши мѧ ѵ҆ссо́помъ, и҆ ѡ҆чи́щꙋсѧ, ѡ҆мы́еши мѧ, и҆ па́че снѣ́га ᲂу҆бѣлю́сѧ, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ ста́въ пре́дъ церко́вными две́рми заключеннымъ и҆ сꙋ́щимъ, ᲃт҃ль, и҆лѝ Намѣ́сникъ є҆гѡ̀ съ всѣ́мъ Кли́ромъ и҆ людмѝ, Дїа́конъ гл҃е́тъ Є҆кте́нїѧ ᲃі́ѧ.

Ми́ромъ Гд҃ꙋ помоли́мсѧ.

Кли́ръ:

Гд҃и, поми́лꙋй.

Ꙍ҆ свы́шнѣмъ ми́рѣ и҆ спасе́нїи дꙋ́шъ на́шихъ, Гд҃ꙋ помоли́мсѧ.

Ꙍ҆ ми́рѣ всегѡ̀ мі́ра, благостоѧ́нїи свѧты́хъ Бо́жїихъ Це́рквїй и҆ соедине́нїи всѣ́хъ, Гд҃ꙋ помоли́мсѧ.

Ꙍ҆ Преѡсщ҃е́нномъ А҆рхїепи́скопѣ на́шемъ всеѧ̀ Рѡ́ссїи Митрополи́тѣ, И҆мⷬ҇къ: (и҆лѝ ѡ҆ Бо́голюби́вомъ Є҆пⷭ҇пѣ на́шемъ, И҆мⷬ҇къ:) честнѣ́мъ преꙁви́терствѣ, є҆́же ѡ҆ Хрⷭ҇тѣ̀ дїа́конствѣ, все́мъ при́чтѣ и҆ люде́хъ, Гд҃ꙋ помоли́мсѧ.

Ꙍ҆ вели́комъ Королѣ̀ на́шемъ И҆мⷬ҇къ: и҆ ѡ҆ благочести́выхъ Гпⷭ҇дре́хъ Кнѧ́ꙁехъ и҆ Па́нѣхъ на́шихъ, Гд҃ꙋ помоли́мсѧ.

Ꙍ҆ є҆́же ᲂу҆слы́шати гла́сꙋ на́съ грѣ́шныхъ, и҆ недосто́йныхъ рабѡ́въ свои́хъ, и҆ посѣти́ти Хра́мъ се́й, и҆ Жерто́вникъ, и҆ ѡ҆́крестъ сꙋ́щꙋю є҆гѡ̀ ѡ҆гра́дꙋ, ᲃи́лою дѣ́йствомъ и҆ благода́тїю ᲃт҃а́гѡ Дх҃а, Гд҃ꙋ помоли́мсѧ.

Ꙍ҆ є҆́же ѡ҆чи́стити є҆гѡ̀ ѿ належащагѡ є҆мꙋ̀ ѡ҆скверне́нїѧ, Гд҃ꙋ помоли́мсѧ.

Ꙍ҆ є҆́же пе́рвꙋю ѡ҆свѧщенїѧ ра́ди да́ннꙋю Хра́мꙋ и҆ Жерто́вникꙋ ᲃемꙋ̀ благода́ть ѡ҆бнови́ти, и҆ неѿе́млемѡ на не́мъ пребы́ти сътвори́ти, Гд҃ꙋ помоли́мсѧ.

Ꙍ҆ є҆́же сподоби́ти на́съ неосꙋжде́ннѡ въ Хра́мѣ и҆ Жерто́вницѣ се́мъ приноси́ти є҆мꙋ̀ беꙁкро́внꙋю Же́ртвꙋ, Гд҃ꙋ помоли́мсѧ.

Ꙍ҆ є҆́же ᲂу҆слы́шаннымъ бы́ти въ хра́мѣ ᲃе́мъ мѡ́л̾бамъ на́шимъ, и҆ благопрїѧ́тнымъ, Гд҃ꙋ помоли́мсѧ.

Ꙍ҆ є҆́же ѡ҆чи́стити и҆ на́съ всѣ́хъ ѿ всѧ́кїѧ скве́рны пло́ти и҆ дꙋ́ха, и҆ и҆спо́лнити ᲃвое́гѡ Дх҃а благода́тїю, Гд҃ꙋ помоли́мсѧ.

Ꙍ҆ и҆ꙁба́витисѧ на́мъ и҆ всѣ́мъ вѣ́рнымъ, ѿ всѧ́кїѧ ᲃко́рби, гнѣ́ва, и҆ нꙋ́жда, Гд҃ꙋ помоли́мсѧ.

Застꙋпѝ, ᲃпасѝ, и҆ поми́лꙋй:

Пресвѧтꙋ́ю, чи́стꙋю, Преблагослове́ннꙋю:

Ст҃и́тель же и҆лѝ Намѣ́стникъ є҆гѡ̀ ᲃтоѧ̀ пре́дъ церко́вными две́рми, Въꙁглаша́етъ.

Ꙗ҆́кѡ подоба́етъ ти всѧ́каѧ ᲃла́ва, че́сть и҆ поклоне́нїе:

Сконча́ннымъ же бы́вшимъ Є҆кте́нїѧмъ, ᲃт҃ль пристꙋпа́етъ къ две́ремъ, и҆ благослови́тъ ѧ҆̀ десни́цею крестаѡ́браꙁнѡ, гл҃е́тъ,

Съ ми́ромъ вни́демъ.

Кли́ръ же гл҃е́тъ,

Ꙍ҆ и҆менѝ Гд҃ни.

И҆ ѿверꙁъ две́ри жеꙁло́мъ (а҆́ще же Намѣ́сникъ є҆гѡ̀ не тво́ритъ, не жеꙁломъ, но Крⷭ҇то́мъ ѿверꙁа́етъ ѧ҆̀,) и҆ вхо́дитъ въ Це́рковъ.

Ли́къ же пое́тъ Стіхи́рꙋ ᲃі́ю. Гла́съ и҃.

Ꙗ҆́коже Закхе́ѡвꙋ до́мꙋ твои́мъ Хє҃ въхо́домъ ᲃпⷭ҇нїе бы́сть, ᲃи́це и҆ ны́нѣ вхо́домъ ᲃщ҃енныхъ слꙋжи́телїй твои́хъ, и҆ съ ни́ми ᲃт҃ы́хъ твои́хъ А҆́гг҃елъ, ми́ръ тво́й пода́ждъ хра́мꙋ семꙋ̀, и҆ Дх҃а твое́гѡ благода́тїю ѡ҆чи́сти є҆гѡ̀, и҆ ᲃеле́нїе въ не́мъ ᲃебѣ̀ сотворѝ, ᲃп҃са́ѧ и҆ привѣща́ѧ дꙋша на́ша.

Пою́щимъ же Кли́рикомъ ᲃі́е, Ст҃лъ, и҆лѝ Намѣ́стникъ є҆гѡ̀, кро́питъ всю це́рковъ, гл҃ѧ̀:

Ꙍ҆кропи́ши мѧ ѵ҆ссѡ́помъ и҆ ѡ҆чищꙋ́сѧ, ѡ҆мы́еши мѧ, и҆ па́че снѣ́га ᲂу҆бѣлю́сѧ, Въ и҆мѧ Ѿц҃а, и҆ ᲃн҃а, и҆ ᲃⷮ: Дх҃а. А҆ми́нь.

И҆ а҆́ще ѿ ꙗ҆ꙁы́къ пога́ныхъ и҆лѝ къ наси́лїи єрети́ческомъ ᲂу҆бийство въ Це́ркви, и҆лѝ на Цминтарѝ бы́сть, ᲃта́въ посре́дъ Це́ркве съ ᲂу҆миле́нїемъ, гл҃е́тъ Ѱало́мъ, о҃и.

Бж҃е прїйдоша ꙗ҆ꙁы́ци въ достоѧ́нїе твоѐ: Ве́съ до конца̀.

А҆́ще же и҆́нѣмъ ко́имъ слꙋча́емъ ᲂу҆бі́йство слꙋ́читсѧ бы́ти, не гл҃ю́тъ Ѱало́мъ се́й, но Ѱало́мъ рм҃в. Гд҃и ᲂу҆слы́ши молитвꙋ мою̀:

И҆ по ѱалмѣ̀ а҆́бїе вхо́дитъ въ Ѻ҆́лтаръ, и҆ Дїа́конꙋ возгласи́вшꙋ,

Съ ᲂу҆миле́нїемъ преклонше колѣ́нѣ всѝ, Гд҃ꙋ помоли́мсѧ.

Ст̀ль, и҆лѝ Намѣ́сникъ єгѡ̀, прекло́нь колѣ́нѣ съ всѣ́ми людмѝ, съ всѧ́кимъ благоговѣ́нїемъ и҆ ᲂу҆миле́нїемъ чтетъ Моли́твꙋ ᲃі́ю.

Влады́кѡ Гд҃и Бж҃е нш҃ъ, мно́гою ти и неиꙁрече́нною благосты́нею ᲃподоби́вый наꙁда́тисѧ хра́мꙋ семꙋ̀ въ жи́лище твое́ѧ непристꙋ́пныѧ и҆ неописа́нныѧ сла́вы, и҆ Пресвѧта́гѡ и҆ животворѧ́щагѡ ти Дх҃а дѣ́йствомъ ѡ҆свѧти́тисѧ: ны́нѣ же ра́ди на́шихъ согрѣше́нїй мно́жества, попꙋсти́лъ є҆сѝ ѡ҆скверни́тисѧ семꙋ̀ ѿ наси́лїѧ и҆ ѡ҆кровавле́нїѧ члове́ческою кро́вїю, ѿ нападе́нїѧ нꙋ́жныѧ сме́рти, бы́вшїѧ въ чл҃цѣ по ѻ҆́браꙁꙋ твое́мꙋ соꙁда́нномъ, ѿ ко́ꙁни и҆сперва сꙋ́щагѡ чловекоꙋбі́йцы дїа́вола: ᲃа́мъ па́ки ра́ди мнѡ́гїѧ и҆ неисче́тныѧ ти млⷭ҇ти на́съ грѣ́шныхъ и҆ недосто́йныхъ рабѡ́въ твои́хъ проше́нїе прїемлѧ̀, ѿ приле́жныѧ приноси́мыѧ ти на́шеѧ ꙗ҆́же въ тебѣ̀ вѣ́ры, ѡ҆чи́сти хра́мъ се́й, и҆ сꙋ́щїй въ не́мъ Жерто́вникъ, и҆ ѻ҆́крестъ сꙋ́щꙋю є҆гѡ̀ ѡ҆гра́дꙋ прише́ствїемъ ᲃт҃а́гѡ ти Дх҃а, и҆ пе́рвꙋю твою̀ благода́ть ѡ҆бновѝ въ ни́хъ, въ ᲃлавосло́вїе непреста́нное твое́гѡ прест҃а́гѡ И҆́мене, въ приноше́нїе же благопрїѧтное беꙁъкро́вныѧ ти Же́ртвы, и҆ въ ᲃла́вꙋ и҆ хва́лꙋ твое́ѧ благода́ти. Є҆́й Влады́ко всѣ́хъ є҆ди́нъ сы́й є҆́стествомъ чи́стый, и҆ Пресвѧты́й, ѡ҆свѧща́ѧй всѧ ᲃло́вомъ твои́мъ, и҆ на́съ всѣ́мъ се́рдцемъ и҆́щꙋщихъ тѧ, ѡ҆чи́сти ѿ всѧ́кїа скве́рны пло́ти и҆ дꙋ́ха, ра́ди по́мысловъ сꙋ́етныхъ, и҆ ᲃо́вѣсти лꙋка́выѧ прибы́вшеѧ. Ꙗ҆́кѡ ты є҆сѝ ѡ҆свѧщенїе на́ше, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ. А҆ми́нь.

По Моли́твѣ же вста́въ, кро́питъ ᲃт҃ꙋ́ю Тра́пеꙁꙋ, глѧ̀:

Ꙍ҆кропи́ши мѧ ѵ҆ссѡ́помъ и҆ ѡ҆чищꙋ́сѧ, ѡ҆мы́еши мѧ и҆ па́че снѣ́га ᲂу҆бѣлю́сѧ: Въ И҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Посе́мъ кро́питъ Жерто́вникъ, и ве́съ Ѻ҆́лтаръ то́жде глѧ̀.

Кли́ръ же чтетъ,

Трⷭ҇то́е: Ѿч҃е нш҃ъ:

Ст҃ль же и҆лѝ Намѣ́сникъ є҆гѡ̀,

Ꙗ҆́кѡ твоѐ є҆́стъ ца́рство:

Кли́ръ же чтетъ Троп: и Конд: Хра́мꙋ,

Сла́ва: И҆ ны́нѣ: Боⷢ҇: Гла́сꙋ.

И҆ бы́вшꙋ ѡ҆бы́чномꙋ Ѿпꙋ́стꙋ, начина́етсѧ Проскоми́дїѧ и҆ Боже́ственнаѧ Литꙋ́ргїѧ соверша́етсѧ ѡ҆бычнѡ.

Вѣ́стнѡ бꙋ́ди, ꙗ҆́кѡ и҆́мже ѻ҆́браꙁомъ Церковъ никто́же мо́жетъ ѡ҆снова́ти кро́мѣ сама́гѡ Є҆пⷭ҇па, и҆ли ѡ҆со́бнагѡ є҆гѡ̀ на сі́е благослове́нїѧ, чре́ꙁъ Протопо́пꙋ и҆ли є҆ди́нагѡ ѿ І҆еромо́нахѡвъ, є҆го́же ѡ҆́нъ и҆ꙁво́литъ посла́ти. ᲃи́це и҆ Монасты́ръ, ка́менный ли, и҆лѝ древѧ́ный. Дерꙁнꙋ́вый же І҆ере́ѵ̆, и҆лѝ І҆еромо́нахъ кро́мѣ Є҆пⷭ҇пкагѡ благослове́нїѧ ᲃі́е содѣлова́ти, и҆ꙁверже́нїю, и҆лѝ вели́кой ка́ꙁни, ꙗ҆́ко Є҆пⷭ҇кїѧ вла́сти ᲂу҆ничижи́тель, подлѣга́ти бꙋ́детъ. Сі́еже ѡ҆снова́нїе быва́етъ ᲃи́це. А҆́ще ка́менный ѡ҆снова́тисѧ и҆́матъ Монасты́ръ, Ст҃ль, и҆лѝ ѿ негѡ̀ на сі́е ᲂу҆ста́вленый І҆ере́ѵ̆, въ пе́рвыхъ повелѣва́етъ хꙋдо́жникѡмъ и҆ꙁмѣри́ти, и҆ и҆скопа́ти мѣ́сто и҆де́же ѡ҆снова́нїе Монасты́рскїѧ ѡ҆гра́ды бы́ти и҆́матъ, приꙋготовлѧ́ти же ка́менїѧ и҆ ми́ла, къ зача́тїю зда́нїѧ: ѡ҆со́бнѣ же приꙋготовлѧ́ютсѧ четы́ри ка́мени четвероꙋго́лни, и҆ на кое́мждо и҆́хъ три Кресты̀ и҆ско́ваны, и҆ поста́вѧтъ ка́мень є҆ди́нъ надъ ро́вомъ къ Восто́кѡмъ на ᲃтолцѣ̀. Вто́рый же на сре́днее стра́нѣ ᲃѣ́верной та́кожде поставлѧ́етсѧ. Тре́тїй же, на сре́днее стра́нѣ за́падней. Четве́ртый же, на сре́днее ю́жней стра́нѣ. А҆́ще же древѧ́ный бы́ти и҆́матъ Монасты́ръ, копа́нїе не быва́етъ, то́чїю раꙁмѣ́ривше ѡ҆гра́дꙋ въ долготꙋ̀ и҆ широтꙋ̀, бе́рвна на ни́хже ѡ҆гра́да основа́ти сѧ и҆́матъ полага́ютсѧ. Си́мъ же си́це приꙋготовле́инымъ бы́вшимъ, ᲃт҃ль и҆лѝ ѿ негѡ̀ на сі́е ᲂу҆ста́вленый, на мѣ́сто сре́днее, и҆де́же Монасты́ръ бы́ти и҆матъ, та́може поста́вленꙋ сꙋ́щꙋ столцꙋ̀ чⷭ҇тнѡ покровеннꙋ, и҆ на не́мъ Є҆ѵⷢ҇лїе и҆ Кре́стъ. А҆́ще ᲂу҆́бѡ ᲃт҃ль сі́е дѣйствꙋ́етъ, ста́въ къ восто́кѡмъ пре́дъ предꙋготова́ннымъ столце́мъ, ѡ҆дева́етсѧ въ Є҆п́тра́хилъ и҆ Ѻ҆мо́форъ ве́рхꙋ Ма́нтїи, и҆ въ Ми́трꙋ, и҆ Же́ꙁлъ сво́й вꙁе́млетъ въ шꙋи́цꙋ: А҆́ще же І҆ере́ѵ̆ въ Є҆пітра́хиль и҆ Фелѡ́нъ. и҆ вꙁе́мъ Кади́лницꙋ ка́дитъ ᲃт҃о́е Є҆ѵⷢ҇лїе и҆ Кре́стъ крестаѡ́браꙁно, и҆ начинаетъ ѡ҆бычнѡ:

Благослове́нъ Бг҃ъ нш҃ъ:

Кли́ръ же пое́тъ,

Ца́рю небе́сный ᲂу҆тѣшителю Дꙋ́ше и҆́стиный:

Доне́лиже ᲂу҆бѡ скончи́тсѧ пѣ́нїе, Началствꙋ́ѧй стои́тъ пре́дъ ᲃт҃ымъ Є҆ѵⷢ҇лїемъ кадѧ̀ сїе. Сконча́нꙋ же пѣ́нїю, ка́дитъ всѧ̀ рѡ́вы, и҆лѝ знамена́ное къ ѻ҆снова́нїю мѣ́сто, наче́нъ ѿ пе́рвыѧ стѣны̀ ѿ восто́ка, и҆ды́й проти́во ᲃо́лнцꙋ ѡ҆́крестъ, до́ндеже прїйдетъ ѿню́дꙋже нача̀. Посе́мъ же ка́дитъ Кли́ръ и҆ лю́ди, и҆ па́ки ᲃт҃ое Є҆ѵⷢ҇лїе.

Кли́ръ же чтетъ, Трⷭ҇то́е. и҆ по: Ѿч҃е нш҃ъ: Прїйдѣте, поклони́мсѧ: гⷤ. и҆ Ѱало́мъ д҃і. Гд҃и кто̀ ѡ҆бита́етъ въ жили́щи твое́мъ:

Сла́ва: И҆ ны́нѣ: А҆ллилꙋ́їа: гⷤ.

Дїа́конъ же гл҃е́тъ Є҆кте́нїѧ ᲃі́ѧ.

Ми́ромъ Гд҃ꙋ помоли́мсѧ. И҆ про́чаѧ да́же до Ꙍ҆ плава́ющихъ.

И҆ а҆́бїе къ си́мъ прилага́етъ сїѧ.

Ꙍ҆ є҆́же при́ꙁрѣти на мѣ́сто ᲃі́е къ соꙁда́нїю на не́мъ ѻ҆би́тели въ ᲃлавосло́вїе всегда́шнее прест҃а́гѡ и҆менѝ є҆гѡ̀ и҆ꙁбра́нное, и́ благослове́нїемъ свои́мъ небе́снымъ благослови́ти є҆̀, Гд҃ꙋ помоли́мсѧ.

Ꙍ҆ є҆́же бл҃го́е сі́е намѣре́нїе и҆ дѣ́ло рабѡ́въ свои́хъ, (здѐ кти́торѡвъ помина́етъ) и҆лѝ раба̀ свое́гѡ, И҆мⷬ҇къ: Гд҃ꙋ помоли́мсѧ.

Ꙍ҆ є҆́же благослови́ти нача́токъ ѡ҆снова́нїѧ и҆ зда́нїѧ сегѡ̀, є҆́же благополꙋ́чнѡ въ ᲃла́вꙋ и҆менѝ свое́гѡ положи́тисѧ и҆ спѣ́шнѡ въ съверше́нїе кро́мѣ всѧ́кагѡ препѧ́тїа проиꙁвести́сѧ, ᲃи́лою дѣ́йствомъ и҆ благода́тїю пресвѧта́гѡ Дх҃а, Гд҃ꙋ помоли́мсѧ.

Ꙍ҆ є҆́же трꙋжда́ющимсѧ дѣла́телемъ благопоспѣ́шество въ все́мъ пода́ти, и҆ дѣ́ла рꙋ́къ и҆́хъ и҆спра́вити, и҆ въ соверше́нїе си́лою, дѣ́йствомъ, и҆ благода́тїю пресвѧта́гѡ Дх҃а спѣ́шнѡ проиꙁвестѝ, Гд҃ꙋ помоли́мсѧ.

Ꙍ҆ є҆́же благо́мꙋ ᲃемꙋ̀ тща́нїю рабѡ́въ свои́хъ (и҆лѝ раба̀ свое́гѡ) И҆мⷬ҇къ: благопоспѣ́шество съ всѧ́кимъ дово́лствомъ, ᲃи́лою, дѣ́йствомъ и҆ благода́тїю пресвѧта́гѡ Дх҃а пода́ти, Гд҃ꙋ помоли́мсѧ.

Ꙍ҆ є҆́же приста́вити дѣ́лꙋ семꙋ̀, и҆ дѣла́телемъ є҆гѡ̀ А҆гг҃ла свое́гѡ храни́телѧ, є҆́же неви́димѡ ѿраꙁи́ти всѧ проти́вныѧ навѣ́ты, ви́димыхъ и҆ неви́димыхъ врагѡ́въ, и҆ въ все́мъ благопоспѣ́шество, къ съѡрꙋже́нїю же мꙋ́дрость и҆ къ съверше́нїю си́лꙋ, ᲃи́лою дѣ́йствомъ и҆ благода́тїю пресвѧта́гѡ Дх҃а подати, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ на́мъ: И҆ проч: всѧ до конца̀.

Началствꙋ́ѧй же воꙁглаша́етъ:

Ꙗ҆́кѡ подоба́етъ ти всѧ́каѧ сла́ва:

По во́ꙁгласѣ же пою́тъ, Бг҃ъ Гд҃ь и҆ ꙗ҆ви́сѧ на́мъ: Гла́съ в҃. и҆ Тропа́рь се́й ѻ҆снова́нїю.

Тво́рче и҆ ᲃоꙁда́телю всѧ́ческихъ Бж҃е, дѣ́ло рꙋ́къ на́шихъ къ ᲃла́вѣ твое́й начина́емое, твои́мъ благослове́нїемъ спѣ́шно и҆спра́ви, и҆ ᲃи́лою твое́ю въ ᲃоверше́нїе ско́рѡ проиꙁведѝ, ꙗ҆́кѡ є҆ди́нъ всеси́ленъ и҆ чл҃ѡлю́бецъ.

Сла́ва то́йжде. И҆ ны́нѣ:

Застꙋ́пнице хрⷭ҇тїѧ́нѡмъ непосты́днаѧ:

Сконча́нꙋ же пѣ́нїю, чте́тсѧ ѱало́мъ, н҃. Поми́лꙋй мѧ Бж҃е:

Принесе́нной же ᲃꙋ́щей водѣ̀ въ че́стномъ ᲃосꙋ́де, поста́вленна быва́етъ на ᲃтолцѣ̀ и҆лѝ пре́дъ столце́мъ и҆ ᲃосꙋ́дъ дрꙋ́гїй съ є҆́ле́ѡмъ:

По скончанїи же Ѱалма̀, пою́тъ гⷤ, Троп: се́й Гла́съ ѕ҃.

Съ небесѐ послѝ благода́ть жиꙁнода́вче, во́дꙋ ᲃі́ю ѡ҆ст҃ѝ. и всѣ́мъ ᲃкве́рнамъ ꙗ҆вѝ ю҆̀ бы́ти ѡ҆чище́нїе.

Ре́кшꙋ же Дїа́конꙋ,

Гд҃ꙋ помоли́мсѧ.

Ли́къ,

Гд҃и поми́лꙋй.

Нача́лникъ чтетъ Моли́твꙋ надъ водо́ю.

Бж҃е великоимени́тый Ѿч҃е Гд҃а на́шегѡ І҆и҃ᲃ Ха҃, творѧ́й чꙋдеса̀ є҆ди́нъ, и҆́мже нѣ́сть числа̀, є҆го́же гла́съ на вода́хъ мнѡ́гихъ, є҆го́же ви́дѣвше вѡ́ды ᲂу҆боѧ́шасѧ и҆ смѧтѡ́шасѧ бе́ꙁдны, и҆ множествѡ̀ шꙋ́ма вѡ́дъ: є҆го́же пꙋ́тїе въ мо́ри, и҆ стеꙁѧ̀ въ вода́хъ мнѡ́гихъ, и҆ стопы̀ твоѧ̀ не поꙁна́ютсѧ: и҆́же креще́нїемъ є҆диноро́днагѡ ᲃн҃а твое́гѡ воплоще́ннагѡ и҆ наи́тїемъ на́нь Пресвѧта́гѡ Дх҃а въ видѣ́нїи Го́лꙋба, и҆ твои́мъ ѿческимъ гла́сомъ І҆ѡрда́нскїѧ ᲃтрꙋ́ѧ ѡ҆свѧти́лъ є҆сѝ, тебѐ ны́нѣ смире́ннѡ недосто́йнїи рабѝ твоѝ мо́лимъ и҆ ми́лисѧ дѣ́емъ, послѝ благода́ть пресвѧта́гѡ Дх҃а на во́дꙋ ᲃі́ю, и҆ небе́снымъ твои́мъ благослове́нїемъ благословѝ, ѡ҆чи́сти, и́ ѡ҆свѧтѝ ю̀, и҆ дарꙋ́й є҆̀ благода́ть и҆ благослове́нїе І҆ѡрда́ново, и҆ ᲃи́лꙋ всѣ́хъ ᲃкве́рнъ ѡ҆чища́ющꙋю, и всѧкъ не́дꙋгъ и҆сцѣлѧ́ющꙋю, и҆ бѣсѡ́въ и҆ всѣ́хъ навѣ́товъ и҆ кѡ́ꙁнїй и҆́хъ прогони́телнꙋю. И҆ ꙗ҆вѝ ю҆̀ ᲃи́лою дѣ́йствомъ, и҆ благода́тїю пресвѧта́гѡ Дх҃а бы́ти всѣ́мъ ѿ неѧ̀ вѣ́рою пі́ющимъ, прїемлющимъ же и҆ кропѧ́щимъ сѧ рабѡ́мъ твои́мъ, грѣхѡ́въ ѡ҆ставле́нїе, и҆ꙁмене́нїе стра́стемъ, прогна́нїе всѧ́кагѡ зла̀, ᲂу҆множе́нїе добродѣ́телїй бо́лѣꙁнемъ и҆сцѣле́нїе, до́мовѡмъ же и всѧ́комꙋ мѣ́стꙋ ѡ҆свѧще́нїе и҆ благослове́нїе, гꙋби́телныхъ и҆ всѧ́кихъ злораство́рныхъ во́ꙁдꙋховъ ѿгна́нїе, и҆ благода́ти твое́ѧ присвое́нїе. Ꙗ҆́кѡ ты́ є҆си благословлѧ́й и҆ ᲃт҃ѧ́й всѧ́ческаѧ Бж҃е нш҃ъ, и҆ тебѣ̀ ᲃла́вꙋ воꙁ͏сыла́емъ съ є҆диноро́днымъ ти ᲃы́номъ, и҆ пресвѧты́мъ и҆ благи́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ̆,

Ми́ръ всѣ́мъ.

Ли́къ,

И҆ дх҃о́ви твое́мꙋ.

Дїа́конъ,

Гла́вы ва́ша Гв҃и преклони́те.

Ли́къ,

Тебѣ̀ Гд҃и.

І҆ере́ѵ̆ же чтетъ та́йнѡ Моли́твꙋ ᲃі́ю.

Приклонѝ, Гд҃и, ᲂу҆́хо твоѐ и҆ ᲂу҆слы́ши мѧ, во́ды І҆ѡрда́нскїѧ ꙗ҆вле́нїемъ Ха҃ твое́гѡ ѡ҆свѧти́вый, и҆ благословѝ всѣ́хъ насъ, приклоне́нїемъ свое́ѧ вы́ѧ знамена́ющихъ работы̀ и҆ꙁображе́нїе, и҆ сподобѝ на́съ и҆сполни́тисѧ твое́гѡ ѡ҆свѧще́нїѧ воды̀ сеѧ̀ прїѧ́тїемъ, и҆ да бꙋ́детъ намъ въ здра́вїе дꙋша́мъ же и҆ тѣлесе́мъ.

И҆ воꙁглаша́етъ:

Ты́ бо є҆сѝ ѡ҆свѧще́нїе на́ше, и҆ тебѣ̀ ᲃла́вꙋ воꙁсыла́емъ съ є҆диноро́днымъ ти ᲃн҃омъ, и҆ пресвѧты́мъ и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

Нача́лникъ же вꙁе́мъ Кре́стъ погрꙋжа́етъ и҆ три́жды въ водѣ̀ крестаѡ́браꙁнѡ, пра́вѡ ниꙁводѧ̀ и҆ воꙁводѧ̀, поѧ̀ Тропа́ръ. Гла́съ а҃.

Сп҃сѝ Гд҃и лю́ди своѧ̀, и҆ благословѝ достоѧ́нїе твоѐ, побѣ́ды Царе́мъ на́шимъ на ва́рвары дарꙋ́ѧ, и҆ своѧ̀ съхранѧ́ѧ Крⷭ҇томъ си лю́ди.

Посе́мъ же пою́тъ и҆лѝ чтꙋ́тъ Конда́къ ѡ҆снова́нїю Гла́съ ѕ҃.

Ско́рый въ застꙋпле́нїи, и҆ крѣ́пкїй въ по́мощи, предста́ни благода́тїю ᲃи́лы твое́ѧ ны́нѣ, и благослови́въ ᲂу҆крѣпѝ, и҆ въ соверше́нїе дѣ́ла рабѡ́въ твои́хъ проиꙁведѝ: всѧ́ бо, є҆ли́ка хо́щеши, ꙗ҆́кѡ всеси́лный Бг҃ъ, твори́ти мо́жеши.

Сла́ва: И҆ ны́нѣ: Застꙋ́пнице хрⷭ҇тїѧ́нѡмъ:

Ре́кшꙋ же Дїа́конꙋ:

Съ ᲂу҆миле́нїемъ всѝ колѣ́нѣ прекло́нше, Гд҃ꙋ помоли́мсѧ.

Кли́ръ пое́тъ гⷤ,

Гд҃и помилꙋй.

Нача́лникъ же съ всѣ́мъ Кли́ромъ и҆ людмѝ колѣ́нѣ прекло́нь чтетъ Моли́твꙋ ᲃі́ю велегла́снѡ.

Влады́ко Гд҃и Бж҃е Вседержи́телю, Ѿч҃е Гд҃а на́шегѡ І҆и҃ᲃ Ха҃, просте́рый не́бо ꙗ҆́кѡ ко́жꙋ, и҆ зе́млю на вода́хъ ѡ҆снова́вый, и҆ꙁбра́вый же горꙋ̀ Сіꙍ́нскꙋю па́че всѣ́хъ холмѡ́въ и҆ гѡ́ръ зе́мныхъ, и҆ па́че всѣ́хъ селе́нїй І҆а́кꙍвлихъ, и҆ ᲃеле́нїе въ не́й себѣ̀ ᲃотвори́вый: Ты и҆ ны́нѣ ми́лостивнымъ си ѻ҆́комъ при́ꙁри на мѣ́сто сі́е, ра́бски моли́мъ тѧ, и҆ и҆ꙁберѝ є҆̀ въ достоѧ́нїе ᲃебѣ̀, и҆ благослове́нїе твоѐ небе́сное ниꙁпослѝ на ѻ҆снова́нїе Ѻ҆би́тели ᲃеѧ̀, въ ᲃла́вꙋ твою̀, и҆ є҆диноро́днагѡ ти ᲃн҃а, и҆ пресвѧта́гѡ и҆ животворѧ́щагѡ ти Дх҃а начина́емыѧ, и҆ ꙗ҆́коже Є҆вꙋсе́ѡвъ живꙋ́щихъ въ І҆ерⷭ҇ли́мѣ и҆ꙁби́въ, Дави́да съ вѣ́рными твои́ми І҆и҃л̾тѧ́ны всели́лъ є҆сѝ и҆ градъ ѡ҆стѣни́въ, ѿ всѣ́хъ врагѡ́въ и҆ꙁбавлѧ́ѧ благослови́лъ є҆сѝ: Си́це и҆ ѿ мѣ́ста ᲃегѡ̀ всѧ́кое лꙋка́вое дѣ́йство ви́димыхъ, и҆ неви́димыхъ врагѡ́въ ѿженѝ, и҆ въ соверше́нїе ѡ҆гра́ды Ѻ҆би́тели сеѧ̀ нача́ло спѣ́шнѡ приве́дъ, вѣ́рнымъ рабѡ́мъ твои́мъ мі́ръ ѡ҆ста́вл̾шимъ, и҆ тебѣ̀ є҆ди́номꙋ Влады́цѣ ᲃлꙋжи́ти прибѣга́ющимъ, въ ᲃла́вꙋ пресвѧта́гѡ ти и҆́мени здѐ ми́рнѡ беꙁпа́костнѡ, и҆ не вре́днѡ ѿ всѧ́кагѡ зла, за́повѣди твоѧ̀ и҆сполнѧ́ющихъ, и҆ въ всѣ́хъ добродѣ́телехъ приспѣва́ющихъ всели́тисѧ и҆ жи́ти благоволѝ. Ѻ҆снова́нїѧ же сі́ѧ въ и҆мѧ твоѐ полага́емыѧ ᲂу҆крѣпѝ, ᲂу҆твердѝ, и҆ непоꙁибле́мы всегда̀ сохранѝ. Дх҃ъ ᲂу҆ны́нїѧ и҆ небреже́нїѧ, ᲃребролю́бїѧ же и҆ нена́висти и҆ мѧте́жъ мы́слемъ и҆ ско́рбъ наносѧ́й и҆ крамо́лы дѣѧ́й, ѿ мѣ́ста сегѡ̀, и҆ жи́ти на не́мъ хотѧ́щихъ ѿженѝ. Дх҃ъ же бо́дрости и҆ треꙁве́нїѧ, нищелю́бїа же съ братолю́бїемъ, весе́лїѧ же дꙋхо́внагѡ мы́сли и҆ сердца̀ рабѡ́въ твои́хъ и҆сполнѧ́ѧй, тишинꙋ́ же и҆ ми́ръ творѧ́й и҆ къ подвигѡмъ дꙋхо́внымъ ᲃи́лꙋ и́ крѣ́постъ подава́ѧй ми́лостивнѡ послѝ, и҆ на мѣ́стѣ се́мъ неѿе́млемѡ вселѝ, А҆гг҃ла твое́гѡ ми́ра наста́вника и҆ храни́телѧ, мѣ́сто ᲃі́е и҆ на не́мъ жи́ти въ ᲃла́вꙋ твою̀ хотѧ́щихъ сохранѧ́юща и҆ и҆ꙁбавлѧ́юща ѿ всѧ́кагѡ зла̀ ви́димыхъ и҆ неви́димыхъ врагѡ́въ, и҆ всегда̀ наставлѧ́юща и҆ къ дѣ́ланию и҆ и҆сполне́нїю все́хъ заповѣдїй твои́хъ ᲂу҆крѣплѧ́юща приста́ви: Ты́ бо є҆сѝ Бг҃ъ ми́лостїй и҆ щедрѡ́тъ, и҆ ѿ тебѐ Ѿц҃а̀ ᲃвѣ́тѡвъ всѧ́ко даѧ́нїе благо́е, и҆ всѧ́къ да́ръ ᲃверше́нный и҆схо́дитъ: и҆ тебѣ̀ ᲃла́вꙋ воꙁсыла́емъ съ є҆диноро́днымъ ти ᲃы́номъ, и҆ пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

Вста́въ же, и҆детъ Нача́лникъ со всѣ́мъ Кли́ромъ и҆ людмѝ къ ро́вꙋ, и҆лѝ бе́рвнꙋ къ ѻ҆снова́нїю поло́женномꙋ, и҆ды́й же са́мъ кро́питъ мѣ́сто свѧще́нною Водо́ю ѵ҆ссо́пнымъ кропи́ломъ, гл҃ѧ̀:

Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а, а҆ми́нь.

Кли́ръ же чтетъ Ѱало́мъ р҃к:

Воꙁведо́хъ ѡ҆́чы моѝ въ гѡ́ры: Весь до конца̀.

Сла́ва: И҆ ны́нѣ: А҆ллилꙋ́їа: гⷤ.

Прише́дъ же на мѣ́сто, кро́питъ ᲃщ҃е́нною водо́ю ка́мень, гл҃ѧ̀:

Благословлѧ́етсѧ Ка́мень се́й, ѡ҆кропле́ниемъ воды̀ ᲃеѧ̀ ᲃвѧще́нныѧ, въ непоколѣби́мое ѻ҆снова́нїе Ѻ҆би́тели сеѧ̀ созида́емыѧ, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ а҆́бїе вꙁе́мъ Ка́мень свои́ма рꙋ́кама, полага́етъ є҆гѡ̀ на ми́лѣ, ᲃі́естъ, на ва́пнѣ въ ровѣ, гл҃ѧ̀:

Ꙍ҆снова́етсѧ Ѻ҆би́тель сі́ѧ въ сла́вꙋ вели́кагѡ Бг҃а и҆ ᲃп҃са на́шегѡ І҆и҃ᲃ Ха҃, въ че́сть же и҆ па́мѧтъ И҆мⷬ҇къ: Пра́ꙁдника є҆гѡ̀: (и҆лѝ Богоро́дична: и҆лѝ ᲃⷮ: є҆го́же и҆́матъ бы́ти Монасты́рскїй Хра́мъ,) въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Вѣ́стнѡ же бꙋ́ди, ꙗ҆́кѡ а҆́ще древѧ́ной ѡ҆би́тели быва́етъ ѡ҆снова́нїе, ни́же ро́въ и҆скопова́етсѧ, ни́же ка́менїй тре́бѣ є҆́стъ: Но прише́дъ наꙁнамена́ное мѣ́сто и҆де́же берво̀ поло́жено є҆́стъ, кро́питъ бервно̀ свѧще́нною Водо́ю, гл҃ѧ̀:

Благословлѧ́етсѧ бервно̀ сі́е въ непоколѣби́мое ѡ҆снова́нїє ѻ҆би́тели ᲃеѧ̀ съѡрꙋжа́емыѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

По си́хъ вꙁе́мъ ᲃеки́рꙋ ᲂу҆дарѧ́етъ въ бервно̀ Три́жды, гл҃ѧ̀:

Ꙍ҆снова́етсѧ ѡ҆би́тель сїѧ: И҆ про́чаѧ ꙗ҆́коже и҆ вы́шше.

Посе́мъ же а҆́бїе начина́етъ кропи́ти всѧ̀ ѻ҆снова́нїѧ ѡ҆́крестъ си́мъ ѡ҆́браꙁомъ, и҆ды́й ѿ сѣ́верныѧ стра́ны проти́въ со́лнцꙋ кро́питъ гл҃ѧ̀:

Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Кли́рꙋ чтꙋ́щꙋ Ѱало́мъ, п҃ѕ:

Ꙍ҆снова́нїѧ є҆гѡ̀ на гора́хъ ᲃт҃ы́хъ: Ве́съ до конца̀.

Дѣла́телїе же а҆́бїе спѣ́шнѡ въ и҆мѧ Гн҃е начина́ютъ дѣ́лати.

Нача́лникъ же проше́дшꙋ пе́рвꙋю ча́стъ ѻ҆снова́нїй ᲃѣ́верныѧ стра́ны, ста́въ къ ᲃѣ́верꙋ лице́мъ, и҆ сконча́нꙋ ѱалмꙋ̀, кро́питъ Ка́мень, и҆лѝ Бервно̀ то́жде гл҃ѧ̀, и҆ творѧ̀ є҆́же и҆ вы́шше.

И҆ и҆де́тъ Вто́рꙋю ча́сть ѻ҆снова́нїѧ кропѧ̀, и҆ гл҃ѧ̀:

Въ и҆мѧ Ѿц҃а̀: И҆ про́чаѧ.

Кли́ръ же чтетъ Ѱало́мъ, к҃г:

Гд҃нѧ є҆́стъ землѧ̀ и҆ и҆сполне́нїе є҆ѧ̀: Ве́съ до конца̀.

Прише́дъ же на за́паднюю стра́нꙋ Нача́лникъ, и҆ ста́въ лице́мъ къ за́падꙋ: по сконча́нїю ѱалма̀, та́кожде кро́питъ, и҆ то́ежде гл҃е́тъ, и҆ тво́ритъ надъ ка́менемъ, и҆лѝ бервно́мъ, ꙗ҆́коже предꙋкаꙁа́сѧ: И҆ и҆́детъ Тре́тюю ча́стъ ѻ҆снова́нїѧ кропѧ̀, и҆ гл҃ѧ̀:

Въ и҆мѧ Ѿц҃а̀: И҆ про́чаѧ.

Кли́ръ же чтетъ Ѱало́мъ, ді҃,

Гд҃и кто̀ ѡ҆бита́етъ въ жили́щи твое́мъ: Ве́съ до конца̀.

Нача́лникъ же прише́дъ на ю҆́жнꙋю стра́нꙋ и҆ ста́въ лице́мъ ко ю҆́гꙋ, по сконча́нїи ѱалма̀, а҆́бїе кро́питъ ка́мень, и҆лѝ бервно̀ и҆ гл҃е́тъ и҆ тво́ритъ всѧ̀ ꙗ҆́коже предꙋкаꙁа́сѧ.

И҆ и҆де́тъ Четве́ртꙋю ча́сть ѻ҆снова́нїѧ кропѧ̀, и҆ гл҃ѧ̀:

Въ и҆мѧ Ѿц҃а̀: И҆ про́чаѧ.

Кли́ръ же чтетъ Ѱало́мъ, ме҃:

Бг҃ъ на́мъ прибѣ́жище и҆ си́ла: Ве́съ до конца̀.

Прише́дъ же на мѣ́сто и҆де́же нача̀, кропи́ти престае́тъ, и҆ ше́дъ па́ки на пе́рвое сре́днее мѣ́сто, ста́нетъ пре́дъ столце́мъ: и҆ по сконча́нїи ѱалма̀, са́мъ Нача́лникъ съ всѣ́мъ Кли́ромъ ᲂу҆миле́ннѡ пое́тъ ᲃтіхи́рꙋ сїю:

Ца́рю небѣ́сный ᲂу҆тѣши́телю Дш҃е и҆́стины:

По сконча́нїи же пѣ́нїѧ, Дїа́конꙋ ре́кшꙋ,

Гд҃ꙋ помоли́мсѧ.

и҆ Кли́рꙋ:

Гд҃и поми́лꙋй.

Чтетъ Моли́твꙋ ᲃію̀.

Гд҃и Бж҃е нш҃ъ, и҆ꙁволи́вый на се́мъ мѣ́сте въ сла́вꙋ твою̀ ѡ҆снова́ти ѡ҆би́тель и҆ ѡ҆гра́дꙋ, къ пребыва́нїю распе́ншимъ ᲃебѣ̀ тебѐ ра́ди мі́рови, и҆ ᲃебѣ̀ тебѣ̀ Бг҃ꙋ и҆ Влады́цѣ Же́ртвꙋ жи́вꙋ прине́сшихъ, въ є҆́же тѣ́ми непреста́нныѧ тебѣ̀ мо́лбы и҆ славосло́вїе съ дꙋховнымъ пѣ́нїемъ здѐ ѡ҆ себѣ̀ и҆ ѡ҆ лю́дскихъ съгрѣше́нїихъ прине́сеннымъ бы́ти: Са́мъ твоѧ̀ ѿ твои́хъ тебѣ̀ приносѧ́щихъ въ въꙁдвиже́нїи къ твое́мꙋ славосло́вїю ѡ҆би́тели ᲃіѧ̀, ми́лостивнѡ прїи́мъ, множество́мъ твои́хъ небе́сныхъ и҆ зе́мныхъ бла́гъ въꙁда́ждъ. Всѣ́мъ же къ съѡрꙋже́нїю Монастырѧ̀ ᲃегѡ̀ по́мощъ творѧ́щимъ, тѣле́сное здра́вїе, и҆ дꙋше́вное ᲃпасе́нїе дарꙋ́й. Дѣла́телѧ ᲂу҆крѣпѝ, невре́дны ѿ всѧ́кагѡ зла̀ съблюда́ѧ. Ꙍ҆снова́нїѧ же ᲃі́ѧ нераꙁори́ма и҆ не поꙁибле́ма съблюдѝ, и҆ ѡ҆би́тель ᲃі́ю въ съверше́нїе ско́рѡ приведѝ, ꙗ҆́кѡ да въ не́й рабѝ твоѝ непреста́ннѡ всехва́лными пѣ́сн̾ми, ѱа́лмы же и славословлен̾ми, и҆ всегда́шными молитва́ми тебѐ ᲂу҆милостивлѧ́юще, ми́лостива на́мже и҆ всѣ́мъ люде́мъ твои́мъ сътво́рѧтъ: Тебѣ́ бо подоба́етъ всѧ́каѧ ᲃла́ва, че́сть, и҆ поклоне́нїе беꙁнача́льномꙋ Ѿц҃ꙋ̀, съ є҆диноро́днымъ ти Сы́номъ, и҆ всесвѧты́мъ и҆ благи́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ:

А҆ми́нь.

Посе́мъ ре́кшꙋ нача́лникꙋ:

Ми́ръ всѣ́мъ.

и҆ Кли́рꙋ,

И҆ дꙋ́хови твое́мꙋ.

Дїа́конъ гл҃е́тъ,

Съ всѧ́кимъ ᲂу҆миле́нїемъ всѝ колѣ́ни прекло́нше, Гд҃ꙋ помоли́мсѧ.

Клиръ:

Гд҃и поми́лꙋй гⷤ.

Нача́льникъ же на просте́ртомъ Ко́врѣ прекло́нь колѣ́нѣ съ всѣ́ми, съ всѧ́кимъ ᲂу҆миле́нїемъ чтетъ Моли́твꙋ ᲃі́ю.

Хва́лимъ тѧ Гд҃и Бж҃е ᲃи́лъ ᲃп҃си́телю нш҃ъ, ꙗ҆́кѡ премнѡ́гїѧ ра́ди твое́ѧ бла́гости и҆ чл҃кѡлю́бїѧ, и҆ꙁбра́лъ и҆ ѡ҆свѧти́лъ є҆сѝ мѣ́сто ᲃі́е, и҆ къ съꙁида́нїю и҆ съѡрꙋже́нїю на не́мъ Ѻ҆би́тели и҆ Монастырѧ̀ въ ᲃла́вꙋ Пресвѧта́гѡ И҆́мени твое́гѡ, на́ми недосто́йными рабы̀ твои́ми ѡ҆снова́лъ є҆сѝ: моли́мъ ᲂу҆́бѡ тѧ ᲃмире́ннѡ колѣ́нѣ дꙋшъ и҆ тѣле́съ на́шихъ прекло́н̾ше, благоволѝ и҆ въ съверше́нїе спѣ́шнѡ твое́ю Бжⷭ҇тве́нною ᲃи́лою привестѝ, ꙗ҆́кѡ давне́мъ да́же до сконча́нїѧ вѣ́ка рабѝ твоѝ въ всѧ́комъ бла́гочестїи и҆ че́стности живꙋ́ще непреста́нное ᲃлавосло́вїе Преᲃт҃о́мꙋ И҆менѝ твое́мꙋ, кро́мѣ всѧ́кагѡ препѧ́тїѧ тебѣ̀ благоꙋго́дное въ правовѣрїи принѡ́сѧтъ, всѧ́ бо тебѣ̀ воꙁмо́жна, и҆ ничто́же невоꙁмо́жнѡ челове́колю́бїю твое́мꙋ: и҆ тебѣ̀ ᲃла́вꙋ воꙁсыла́емъ съ є҆диноро́днымъ ти Сы́номъ, и҆ Пресвѧты́мъ и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ:

А҆ми́нь.

Всѣ́мъ же вста́вшимъ, Дїа́конъ гл҃е́тъ Є҆кте́нїѧ ᲃі́ѧ.

Поми́лꙋй на́съ, Бж҃е, по вели́цей ми́лости твое́й, моли́мътисѧ:

Е҆щѐ моли́мсѧ ѡ҆ вели́комъ Королѝ на́шемъ Имⷬ҇къ:

Е҆щѐ моли́мсѧ ѿ Преѡсвѧще́нномъ А҆рхїепⷭ҇пѣ на́шемъ И҆мⷬ҇къ: (и҆лѝ Ꙍ҆ Боголюби́вомъ Є҆пⷭ҇пѣ, И҆мⷬ҇къ:).

Е҆щѐ моли́мсѧ ѡ҆ благочести́выхъ Кти́торехъ и҆ ѡ҆снова́телїй въ ᲃла́вꙋ Бж҃ію съѡрꙋжа́ти наче́н̾шагосѧ Монастырѧ̀, и҆ благополꙋ́чномъ поспѣше́нїи ᲃт҃а́гѡ дѣ́ла и҆́хъ: ѡ҆ здра́вїи же, ᲃпасе́нїи, и҆ ѡ҆ставле́нїи грѣхѡвъ и҆́хъ, рцѣ́мъ всѝ, Гд҃и ᲂу҆слышъ и҆ поми́лꙋй:

Е҆щѐ моли́мсѧ, ѡ҆ є҆́же приста́вити дѣ́лꙋ семꙋ̀ ᲃт҃о́мꙋ А҆гг҃ла Храни́телѧ, ѿ всѧ́кагѡ зла́гѡ ѡ҆бстоѧ́нїѧ, и҆ всѣ́хъ ви́димыхъ и҆ неви́димыхъ врагѡ́въ препѧ́тїй и҆ꙁбавлѧ́юща и҆ защища́юща, и҆ дѣ́лателей ᲂу҆креплѧ́юща: рцѣ́мъ всѝ, Гд҃и ᲂу҆слы́шъ и҆ поми́лꙋй:

Нача́лникъ же воꙁглаша́етъ.

Ꙋ҆слы́ши ны Бж҃е ᲃп҃си́телю нш҃ъ, ᲂу҆пова́нїе всѣ́мъ конце́мъ землѝ, и҆ ᲃꙋ́щимъ на мо́ри дале́че, и҆ ми́лостиве ми́лостивъ бꙋ́ди ѡ҆ грѣсе́хъ на́шихъ и҆ поми́лꙋй на́съ, и҆ ѡ҆снователїй ᲃт҃ы́ѧ ѡ҆би́тели сеѧ̀: ми́лостивъ бо и҆ чл҃кѡлю́бецъ Бг҃ъ є҆сѝ, и҆ тебѣ̀ ᲃла́вꙋ воꙁсыла́емъ, Ѿцꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ при́сно, и҆ въ вѣ́ки вѣ́кѡвъ.

Кли́ръ:

А҆ми́нь.

И҆ а҆́бїе быва́етъ ѿпꙋ́стъ ѡ҆бы́чный Хра́мꙋ и҆́же и҆́матъ бы́ти. Пода́въ же нача́лникъ благослове́нїе люде́мъ, ѿлага́етъ ᲃвѧще́нныѧ ѡ҆де́жды, и҆ и҆де́тъ въ своѧ́ си.

Вѣ́стно бꙋ́ди, ꙗ҆́кѡ ᲃі́е ѡ҆свѧще́ние мо́жетъ не то́чїю ᲃа́мъ Е҆пⷭ҇пъ, но и҆ ѡ҆со́бное на ᲃі́е и҆мѣ́ѧй Е҆пⷭ҇пское благословенїе І҆еромо́нахъ, и҆лѝ є҆ди́нъ ѿ старѣ́йшихъ І҆ере́ѵ̆, кро́мѣ же ѡ҆со́бнагѡ благослове́нїѧ дерꙁа́ѧй сі́е дѣйствова́ти, и҆ тѧ́жкѡ ꙗ҆́кѡ Е҆пⷭ҇пскїѧ вла́сти ᲂу҆ничижи́тель съгрѣ́шитъ, и҆ вели́кой Е҆пⷭ҇пской ка́ꙁни подлѣга́ти бꙋ́детъ: всѧ́ бо чи́нно въ Це́ркви Бо́жіей бы́ти и҆мꙋ́тъ, и҆ всегда̀ ме́ншїй ѿ бо́лшагѡ благослови́тисѧ до́лженъ є҆́стъ. Сі́е же благослове́нїе быва́етъ си́це.

Ꙍ҆свѧти́въ пе́рвѣе посре́дъ двора̀ Монасты́рскагѡ на ᲂу҆строе́нномъ мѣ́сте А҆́вгꙋстовымъ ѡ҆свѧще́нїемъ во́дꙋ, а҆́бїе прино́ситъ А҆рхидїа́конъ съсꙋ́дъ съ Е҆ле́ѡмъ къ ᲃт҃лю, и҆ гл҃е́тъ,

Гд҃ꙋ помоли́мсѧ.

Ст҃и́тель же знамена́етъ Е҆ле́й десни́цею крестаѡ́браꙁнѡ три́жды, гл҃ѧ̀:

Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ а҆́бїе чтетъ Моли́твꙋ ᲃі́ю.

Гд҃и Бж҃е нш҃ъ, при́ꙁри ны́нѣ ми́лостивно на Моли́твꙋ менѣ̀ ᲃмире́ннагѡ и҆ недосто́йнагѡ раба̀ твое́гѡ, и҆ ниꙁпослѝ благода̀ть пресвѧта́гѡ твоегѡ Дх҃а на Е҆ле́й ᲃе́й, и҆ ѡ҆свѧтѝ є҆гѡ̀, ꙗ҆́кѡ да бꙋ́детъ въ ѡ҆свѧще́нїе мѣ́стꙋ семꙋ̀, и҆ на не́мъ съѡрꙋже́ннымъ домо́вѡмъ, и҆ всѣ́мъ в̾кꙋша́ющимъ ѿ не́гѡ, и҆ на прогна́нїе всѧ́коѧ ᲃъпроти́вныѧ ᲃи́лы и҆ ᲃатани́нскихъ навѣ́тѡвъ: Ты́ бо є҆сѝ благословлѧ́й и҆ ст҃ѧ́й всѧ́ческаѧ Хє҃ Бж҃е нш҃ъ, и тебѣ̀ ᲃла́вꙋ воꙁсыла́емъ, Ѿцꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ при́сно, и҆ въ вѣ́ки вѣ́кѡвъ.

Ли́къ,

А҆ми́нь.

Посе́мъ же А҆рхидїа́конъ воꙁглаша́етъ:

Съ ᲂу҆миле́нїемъ всѝ колѣ́нѣ прекло́нше, Гд҃ꙋ помоли́мсѧ.

Ст҃и́тель же, съ всѣ́ми людмѝ колѣ́нѣ прекло́нъ, гл҃е́тъ Моли́твꙋ ᲃі́ю велегла́снѡ.

Гд҃и Бж҃е нш҃ъ и҆мѣ́ѧй Престо́лъ Нб҃о, и подно́жїе зе́млю, є҆го́же ни ᲂу҆́мъ пости́гнꙋти, ни сло́во скаꙁа́ти, ни́же мѣ́стѡ коѐ вмѣсти́ти вели́чествѡ твоѐ воꙁмага́етъ: Въ є҆стестве́нномъ за́конѣ є҆динꙋ ѿ го́ръ А҆враа́мꙋ въ приноше́нїе тебѣ̀ же́ртвꙋ покаꙁа́вый: Мꙍѵ̆се́ѡви же при Кꙋпинѣ̀, и҆ І҆сꙋ́сꙋ На́ввинꙋ при Е҆рихѡ́нѣ А҆рхистрати́гомъ Михаи́ломъ раꙁдрѣши́ти ᲃапо́ги но́гꙋ свое́ю повелѣ́вый, мѣ́сто ᲃвѧ́то на не́мъ же стоѧ́ше бы́ти нарекі́й. И҆ посе́мъ Горꙋ̀ Сісꙍ́ню, и҆ І҆ерⷭ҇ли́мъ въ жи́лище ᲃт҃а́гѡ И҆менѝ твое́гѡ и҆ꙁбра́вый, и҆ гра́дъ ᲃт҃ы́й и҆ воꙁлюбле́нный тогѡ̀ проꙁва́вый: Въ но́вой же Благода́ти мѣ́ста раꙁли́чна въ ᲃла́вꙋ ᲃт҃а́гѡ И҆менѝ твое́гѡ и҆ꙁбира́ѧй, ѡ҆свѧща́ѧй, и҆ въ ни́хъ чꙋдодѣйствꙋ́ѧй: Ты и҆ ны́нѣ Влады́ко Вседержи́телю ми́лостивый, твои́мъ неиꙁрече́ннымъ благоꙋтро́бїемъ, и҆ мѣ́сто сі́е въ жилище и҆ ᲃла́вꙋ Пресвѧта́гѡ И҆́мени твое́гѡ и҆ꙁбра́ти благоиꙁволи́вый, ᲃмире́ннѡ припада́юще моли́мътисѧ, ми́лостивнѡ съ высоты̀ ᲃт҃а́гѡ жи́лища твое́гѡ благоꙋтро́бнымъ всевидѧ́щимъ свои́мъ ѻ҆́комъ нанѐ при́ꙁри, и҆ прострѝ всеси́лнꙋю ти десни́цꙋ и҆ благословѝ є҆̀, и҆ ниꙁпосла́въ нанѐ всечисти́телнꙋю благода́ть и да́ръ Пресвѧта́гѡ Дх҃а, ѿ всѧ́кїѧ скве́рны ѡ҆чи́сти и҆ ѡ҆свѧтѝ, и҆ непоро́чно сътворѝ: ѿжени ѿ не́гѡ всѧ́кое лꙋка́вое бѣсо́вское дѣ́йство, и҆ сатани́на мечта́нїѧ, и҆ вредныѧ є҆гѡ̀ нало́ги: ѿ стра́ха но́щнагѡ, ѿ стрѣ́лы летѧ́щїѧ въ днѐ, ѿ ве́щи въ тмѣ̀ преходѧ́щїѧ, ѿ срѧ́ща и́ бѣ́са полꙋ́деннагѡ, неприкоснове́ннѡ всемо́щною ти ᲃи́лою съхранѝ. А҆гг҃лѡвъ твои́хъ ѡ҆полче́нїе томꙋ̀ въ соблюде́нїе ѿ всѣ́хъ ви́димыхъ и҆ неви́димыхъ врагѡ́въ приста́ви: въ є҆́же до сконча́нїѧ вѣ́ка невреди́мо и҆ непоколѣби́мо ѿ тѣ́хъ въ благостоѧ́нїи, ми́рѣ же и҆ всѧ́комъ и́ꙁ̾ѡби́лїи твое́ю держа́вою пребꙋ́детъ. При́ꙁри Гд҃и и҆ на собира́ющїѧ сѧ, и҆ жи́ти на се́мъ мѣ́стѣ въ сла́вꙋ твою̀, и҆ въ спасе́нїе люді́й твои́хъ хотѧ́щїѧ смире́нныѧ рабы̀ твоѧ̀, и҆ благословѝ и҆́хъ вхо́ды и҆ и҆схо́ды: и҆ пребыва́нїе и҆́хъ ти́хое, ми́рное, и҆ беꙁпа́костное въ днѝ и҆ въ но́щи, и҆ на всѧ́кое вре́мѧ ѿ всѧ́кагѡ дѣ́йства, и҆ сатани́на нахожде́нїѧ, и҆ всѣ́хъ навѣ́товъ сопроти́вныхъ съблюди. Ѿженѝ ѿ мѣ́ста ᲃегѡ̀, и҆ ѿ пребыва́ющихъ на не́мъ рабѡ́въ твои́хъ дꙋ́хъ ᲂу҆ны́нїѧ, и҆ раꙁлѣне́нїѧ, и҆ смꙋще́нїе ᲂу҆́мꙋ и҆ по́мыслы лꙋка́выѧ наносѧ́й, подава́ѧ и҆́мъ бо́дрость и҆ треꙁве́нїе ᲂу҆ма̀, къ и҆сполне́нїю всѣ́хъ за́повѣдїй твои́хъ, и҆ є҆́же всегда̀ поꙋча́тисѧ и҆ раꙁмышлѧ́ти твоѧ̀ благодеѧ́нїѧ, и҆ Божестве́ннаѧ ꙗ҆́же ѡ҆ спасе́нїи ро́да на́шегѡ смотре́нїѧ, и҆ ѡ҆ свое́мъ и҆ бли́жнѧгѡ всегда̀ прилежа́ти, надъ все́же сла́вꙋ Пресвѧта́гѡ И҆менѝ Твое́гѡ, и҆ Вѣ́рꙋ Правосла́внꙋю раꙁширѧ́ти и҆ ᲂу҆множа́ти приле́жнѡ тща́тисѧ. Ѿженѝ ѿ ни́хъ дꙋ́хъ блꙋ́дныѧ по́хоти, раждеже́нїѧ же и҆ всѧ́кїѧ пло́тскїѧ стра́сти, и҆ дꙋшетлѣ́ннаѧ сладостра́стїѧ наносѧ́й. А҆гг҃лѡвъ твои́хъ стра́жа и҆ храни́телѧ тѣ́мъ приста́ви: ꙗ҆́кѡ да тѣ́хъ ѡ҆полче́нїемъ съблюда́еми и҆ наставлѧ́еми въ правовѣ́рїи пребыва́юще, въ чистотѣ̀ дꙋше́вной и҆ тѣле́сной, въ и҆́стинномъ послꙋша́нїи, ᲃмире́нїи же и҆ цѣломꙋ́дрїи, и҆ по А҆по́столскомꙋ первонача́лномꙋ жи́тїю вкꙋ́пѣ въ є҆диномы́слїи и҆ съгла́сїи, ничто́же себѣ̀ ѡ҆собнѡ, но всѧ̀ ꙗ҆́же на потре́бꙋ ѡ҆́бщꙋю и҆мꙋ́ще, пребꙋ́дꙋтъ є҆динодꙋ́шнѡ въ хвале́нїи тебѐ и҆́стиннагѡ Бг҃а, въ ᲂу҆че́нїи Божестве́ннагѡ Писа́нїѧ, въ ѡ҆бще́нїе же и҆ преломле́нїи хлѣ́ба, и҆ въ всегда́шнихъ Моли́твахъ въ Це́ркви, въ ра́дости и҆ простотѣ̀ ᲃе́рдца терпѧ́ще.

Да́ждъ и҆́мъ Гд҃и Бж҃е нш҃ъ, ꙗ҆́коже въ первонача́лной твое́й Це́ркви первовѣрова́вшимъ, є҆́же бы́ти и҆́хъ се́рдце и҆ дш҃а̀ є҆дина̀, и҆ є҆́же ни є҆ди́нъ ѿ ни́хъ что̀ ѿ и҆мѣ́нїй гл҃а́ти, и҆лѝ мнѣ́ти своѐ бы́ти: но бы́ти и҆́мъ всѧ̀ ѡ҆́бща. Да́ждъ и҆́мъ дерꙁнове́нїе въ є҆́же вели́кою си́лою воꙁдаѧ́ти ᲃвѣди́телствѡ, и҆́стиннагѡ є҆́же въ тѧ Правовѣ́рїѧ, наꙋча́ти же беꙁъ всѧ́кагѡ преткнове́нїѧ лю́ди за́повѣди твоѧ̀ и҆ ѡ҆правда́нїй твои́хъ, и҆ всѣ́хъ до́брыхъ ᲂу҆че́нїй и҆ благи́хъ нра́вѡвъ: да́ждъ и҆́мъ благода́ть твою̀ вели́кꙋю, въ є҆́же ꙗ҆́коже ᲂу҆ тебѐ сама́гѡ и҆ ᲂу҆ всѣ́хъ люді́й и҆мѣ́ти благода́ть: Да́ждъ и҆́мъ тишинꙋ̀ мы́слїй, и҆ ᲂу҆ма̀ къ тебѣ̀ просте́ртїе, бо́дрость же и҆ не ᲂу҆ны́лое терпѣ́нїе: прїймѝ и҆́хъ на се́мъ мѣ́стѣ ꙗ҆́кѡ Кади́лѡ благоприѧ́тное въ во́ню благоꙋха́нїѧ дꙋхо́внагѡ, моле́нїѧ и҆ мо́л̾бы, сле́ꙁы же и҆ стена́нїѧ, колѣнопреклоне́нїѧ, бдѣ́нїѧ, и҆ ниꙁꙋлѣга́нїѧ, и҆ всѧ̀ И҆́ноческїѧ трꙋ́ды же и҆ по́двиги, ѡ҆ свои́хъ грѣсе́хъ, и҆ ѡ҆ лю́дскихъ невѣ́ждествїихъ, и҆ ѡ҆ тишинѣ̀, ми́рѣ, и҆ благостоѧ́нїи ᲃт҃ѣ́й твое́й Це́ркви тебѣ̀ приноси́мыѧ, и҆ благопрїѧ́тна тебѣ̀ да бꙋ́дꙋтъ. Пода́ждъ и҆́мъ ми́ръ и҆ долгоде́нствїе съ здра́вїемъ и҆ въ всѣ́хъ добродѣ́телехъ, преподо́бїи же и҆ пра́вдѣ преспѣѧ́нїе.

Благословѝ Гд҃и па́ки смире́ннѡ моли́мъ тѧ мѣ́стѡ сі́е, и҆ на не́мъ ᲂу҆строе́ннꙋю ᲃт҃ꙋ́ю Ѻ҆би́тель ᲃі́ю, и҆ ᲂу҆довлѝ є҆гѡ̀ и҆ ᲂу҆гобꙁѝ, Пшени́цею Вино́мъ и҆ Е҆ле́ѡмъ, и҆ всѣ́ми ᲂу҆потребле́нїи, є҆́же къ жи́тїю рабѡ́мъ твои́мъ въ дово́лствѣ: ꙗ҆́кѡ да всѧ́къ дово́лъ рабѝ твоѝ и҆мꙋ́ще, и҆ꙁѡбилꙋ́ютъ беꙁпеча́лнѡ въ всѧ́комъ дѣ́лѣ бл҃ꙁѣ. Съꙁда́телей же и҆ всѣ́хъ благодѣ́телїй ᲃт҃ы́ѧ ѡ҆би́тели сеѧ̀ благословѝ, здра́вїемъ же долгоде́нствїемъ, и҆ всѣ́ми благи́ми твои́ми да́ры ѡ҆благодатѝ и҆ ᲂу҆гобꙁѝ, и҆ вѣ́чныхъ твои́хъ бла́гъ съ ᲃт҃ы́ми твои́ми воспрїѧтїѧ сподобѝ, ѿ тебе́ бо Ѿц҃а̀ ᲃвѣ́тѡвъ, и҆схо́дитъ всѧ́кое благо́е даѧ́нїе, и҆ всѧ́къ да́ръ съверше́нный, и҆ тебѣ̀ ᲃла́вꙋ воꙁсыла́емъ съ є҆диноро́днымъ ти ᲃн҃омъ, и҆ Пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

Свѧти́тель,

Ми́ръ всѣ́мъ.

Дїа́конъ,

Гла́вы ва́шѧ Гв҃и преклони́те.

Ст҃и́тель гла́вꙋ прекло́нь, та́йнѡ гл҃е́тъ Моли́твꙋ ᲃі́ю.

Гд҃и І҆и҃се Хє҃ Бж҃е нш҃ъ, въ высо́кихъ живый, и҆ на смире́нныѧ приꙁира́ѧй. Тебѣ̀ вы́ѧ се́рдца и҆ тѣ́ла на́шегѡ рабѝ твоѝ прекланѧ́юще моли́мсѧ, при́ꙁри ны́нѣ чл҃кѡлю́бнѡ ми́лостивнымъ си ѻ҆́комъ на мѣ́сто ᲃі́е и҆ посети є҆̀ ᲃи́лою, благода́тїю, и҆ прише́ствїемъ ᲃт҃а́гѡ твое́гѡ Дх҃а, и҆ ѡ҆чища́ѧ є҆̀ ѿ всѧ́кїѧ скве́рны, ѿженѝ ѿ негѡ̀ ны́нѣ и҆ всегда̀, всѧ̀ лꙋка́ваѧ ви́димыхъ и҆ неви́димыхъ врагѡ́въ навѣтова́нїѧ, и҆ ѡ҆ст҃ѝ є҆̀ въ жилище ᲃт҃а́гѡ и҆менѝ твое́гѡ, благословлѧ́ѧ и҆ живꙋ́щїѧ на не́мъ рабы̀ твоѧ̀, ѝ хра́мы ᲃі́ѧ къ жи́тел̾ствꙋ тѣ́хъ съѡрꙋже́нныѧ блⷭ҇вѝ, и҆ ѡ҆ст҃ѝ твои́мъ Божестве́ннымъ ѡ҆свѧще́нїемъ.

Воꙁглаша́етъ,

Ты́ бо є҆сѝ ѡ҆сщ҃е́нїе дш҃ъ и҆ тѣ́ле́съ на́шихъ, и҆ тебѣ̀ ᲃла́вꙋ воꙁсыла́емъ, съ Ѿц҃емъ, и҆ ᲃт҃ы́мъ Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

Посе́мъ а҆́бїе Свѧти́тель и҆схо́дитъ въ Ке́лїѧ, и ᲃтавъ посре́дѣ и҆́хъ, А҆рхідїа́конꙋ ре́кшꙋ:

Гд҃ꙋ помоли́мсѧ.

Свѧти́тель чтетъ Моли́твꙋ ᲃі́ю.

Гд҃и Бж҃е ᲃпⷭ҇е́нїѧ на́шегѡ, ᲃн҃е и҆ ᲃло́ве Бг҃а жива́гѡ, на Херꙋві́мѣхъ ꙗ҆ждѧ́й, превы́шше всѧ́кагѡ Нача́ла и҆ вла́сти и Госпо́дства сы́й: ты ве́лїй є҆сѝ и҆ стра́шный надъ всѣ́ми сꙋ́щими ѻ҆́крестъ тебѐ: Ты поста́вилъ є҆сѝ нб҃о ꙗ҆́кѡ кама́рꙋ: ты сотвори́лъ є҆сѝ зе́млю крѣ́постїю, и҆ испра́вилъ є҆сѝ вселе́ннꙋю мꙋ́дростїю твое́ю: Ты сотрѧсꙋ́ѧй є҆сѝ поднебе́снꙋю ѿ ѡ҆снова́нїй: ᲃтолпы́ же є҆ѧ̀ неподви́жны ᲃотвори́вый: Повелѣ́вый ᲃо́лнцꙋ въ страда́нїи свое́мъ въ тмꙋ̀ претвори́тисѧ, Лꙋнѣ́ же и҆ звѣꙁда́мъ не воꙁсїѧва́ти: запрѣща́ѧй мо́рю и҆ и҆ꙁсꙋша́ѧй є҆гѡ̀: є҆гѡ́же животво́рнаѧ сме́рть, Нача́ла, и҆ Вла́сти, тмы вѣ́ка ᲃегѡ̀ и҆стаѧ̀ и҆ и҆спраꙁднѝ, ка́менїе распада́тисѧ сотворѝ, вра́та мѣ́дѧнаѧ сокрꙋшѝ, и҆ ве́рїѧ желѣ́ꙁныѧ ᲃотрѐ: є҆го́же ᲃоше́ствїе Божестве́нное въ а҆́дъ, крѣ́пкагѡ свѧꙁа̀, и҆ ᲃосꙋ́ды є҆гѡ̀ расхитѝ: и҆́же мꙋчи́телѧ Кресто́мъ свои́мъ ниꙁложи́лъ є҆сѝ, и҆ змїю̀ ᲂу҆́дицею въчеловѣче́нїѧ твое́гѡ привле́къ, и҆ ᲂу҆́ꙁами мра́ка въ та́ртари поса́ждъ свѧꙁа́лъ є҆сѝ: Са́мъ сы́й ᲂу҆твержденїе и҆ крѣ́постъ на тѧ ᲂу҆пова́ющимъ, ѿстꙋпи́ти сотворѝ приле́жнѡ припада́юще мо́лимъ тѧ, и҆ ѿженѝ и҆ въ бѣ́гство ѡ҆братѝ всѧ́кое дїа́волское дѣ́йство, и҆ всѧ́кое ᲃатани́нское нахожде́нїе, всѧ́кїѧ навѣ́ты ᲃопроти́вныѧ, и҆ надлежа́щїѧ ᲃи́лы ѿ кро́ва сегѡ̀, и҆ ѿ ѡ҆бходѧ́щихъ подъ ни́мъ, зна́менїе же стра́шное на бѣ́сы, ѡ҆долѣ́нїе Креста̀ твое́гѡ на себѣ̀ носѧ́щихъ, и҆ правовѣ́рнѡ приꙁыва́ющихъ И҆мѧ твоѐ благо́е, ᲃтра́шное же и҆ превели́кое.

Е҆́й Гд҃и Бж҃е нш҃ъ Легеꙍ́на бѣсо́въ прогна́вый, и҆ глꙋхо́мꙋ и҆ нѣмо́мꙋ бѣ́сꙋ, и҆ мнѡ́гимъ нечи́стымъ дꙋ́хѡмъ ѿ человѣ́къ и҆сходи́ти невоꙁвра́тнѡ повелѣ́вый, и҆ все ѡ҆полче́нїе неви́димыхъ врагѡ́въ на́шихъ до конца̀ погꙋби́вый, вѣ́рнымъ же и҆ поꙁна́вшимъ тѧ рекі́й: ᲃе даю̀ вамъ вла́сть настꙋпа́ти на змїю̀ и҆ на ᲃко́рпїю, и҆ на всю̀ си́лꙋ вра́жїю: Са́мъ и҆ ны́нѣ Влады́ко преблагі́й, всѧ́кагѡ вре́да и҆ нало́га вы́шшихъ всѣ́хъ въ дѡ́мехъ сихъ жи́ти хотѧ́щихъ твое́ю ᲃи́лою соблюдѝ, и҆ꙁбавлѧ́ѧ и҆́хъ ѿ стра́ха но́щнагѡ, ѿ стрѣ́лы летѧ́щїѧ въ днѝ, ѿ ве́щи въ тмѣ̀ преходѧ́щїѧ, ѿ срѧ́ща, и҆ бѣ́са полꙋ́деннагѡ, и҆ ѿ всѧ́кагѡ та́йнагѡ и҆ ꙗ҆встве́ннагѡ вра́жїагѡ прило́га: ꙗ҆́кѡ да твоѝ рабѝ твое́ѧ наслажда́ющесѧ по́мощи, и҆ А҆гг҃лскими ѡ҆полче́нїи ѡ҆гражда́еми, всѝ ꙗ҆́коже є҆ди́нъ въ є҆диномы́слїи вѣ́рнѡ тебѣ̀ вопи́ти бꙋ́дꙋтъ: Гд҃ь ми помо́щникъ и҆ не ᲂу҆бою́сѧ что сотво́ритъ ми человѣ́къ: И҆ па́ки, Не ᲂу҆бою́сѧ зла, ꙗ҆́кѡ ты со мно́ю є҆сѝ: и҆ ꙗ҆́кѡ ты́ є҆сѝ Бг҃ъ и҆ ᲂу҆твержде́нїе на́ше, крѣ́пкїй Властели́нъ, Кнѧ́ꙁь мі́ра, Ѿц҃ъ бꙋ́дꙋщагѡ вѣ́ка, и҆ ца́рство твоѐ ца́рство вѣ́чное, и҆ тебѐ ᲃама́гѡ ца́рство є҆́стъ, ᲃи́ла же и҆ ᲃла́ва Ѿц҃а̀, и҆ ᲃн҃а, и҆ ᲃт҃а́гѡ Дх҃а, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нъ.

И҆ па́ки А҆рхідїа́конъ воꙁглаша́етъ,

Гд҃ꙋ помоли́мсѧ:

Ст҃ль же чтетъ, всю̀ ᲃі́ю Моли́твꙋ.

Гд҃и Бж҃е нш҃ъ, и҆ꙁво́ливый в̾нїйтѝ подъ кро́въ Закхе́ѡвъ, ᲃпасе́нїе же само́мꙋ и҆ всемꙋ̀ до́мꙋ є҆гѡ̀ бы́вый: Ты и҆ ны́нѣ благода́тїю всесвѧта́гѡ твое́гѡ Дх҃а благословѝ, и҆ ѡ҆свѧтѝ хра́мы и҆ жи́лища сі́ѧ, и҆ ᲂу҆твердѝ ѧ҆̀ на тве́рдомъ ка́мени, ѡ҆снови́ же по Божестве́нномꙋ твое́мꙋ Є҆ѵⷢ҇лскомꙋ гла́сꙋ, ꙗ҆́кѡ да ни вѣ́тръ, ни вода̀, ни ѻ҆́гнь, ни и҆́нѡ чтѡ̀ проти́вное раꙁори́ти и҆ повреди́ти ѧ҆̀ воꙁмо́жетъ, и҆ хотѧ́щихъ зде жи́ти, и҆ моли́твы тебѣ̀ и҆ славосло́вїѧ дне́мъ и҆ но́щїю въ ни́хъ приноси́ти, твое́ю си́лою просла́ви, и҆ беꙁъ па́кости и҆ врежде́нїа, ѿ всѧ́коѧ ᲃопроти́вныѧ ᲃи́лы находѧ́щїѧ жи́тїе и҆́хъ ᲃоблюдѝ, дарꙋ́ѧ и҆́мъ бога́тыми твои́ми дарова́н̾ми, миръ, беꙁмѧте́жїе, согла́сїе, и҆ всѧ́кое и҆ꙁ̾ѡби́лїе зе́мныхъ и҆ небѣ́сныхъ твои́хъ бла́гъ: Ты́ бо є҆сѝ ᲃп҃съ и҆ посѣти́тель дꙋ́шъ и҆ тѣле́съ на́шихъ, и҆ тебѣ̀ ᲃла́вꙋ воꙁсыла́емъ съ беꙁнача́льнымъ ти Ѿц҃емъ, и҆ съ Пресвѧты́мъ, и҆ бл҃ги́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

А҆́бїе же вꙁемъ Ст҃ль во́дꙋ ᲃщ҃е́ннꙋю кро́питъ е҆́ю хра́мы, сі́естъ, Ке́лїѧ, гл҃ѧ̀.

Въ И҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а, ѡ҆кропле́нїемъ воды̀ ᲃеѧ̀ ᲃщ҃енныѧ, въ бѣ́гство да претво́ритсѧ все лꙋка́вое бѣсо́вское дѣ́йство.

Вѣ́стнѡ бꙋ́ди ꙗ҆́кѡ кропле́нїе и҆ помаꙁа́нїе си́цево, а҆́ще Е҆пⷭ҇пъ и҆ꙁво́литъ мо́жетъ І҆ере́ѵ̆ соверши́ти.

Певци́ же пою́тъ ᲃтіхи́рꙋ сі́ю. Гла́съ ѕ҃.

Благословѝ Гд҃и хра́мъ се́й благослове́нїемъ твои́мъ ᲃт҃ы́мъ, и҆ ѡ҆полче́нїемъ А҆гг҃скимъ ѡ҆градѝ є҆гѡ̀, и҆справлѧ́ѧ въ немъ моли́твы и҆ моле́нїѧ рабѡ́въ твои́хъ, ꙗ҆́кѡ кади́ло пре́дъ тобо́ю, многѡми́лостиве Гд҃и ᲃла́ва Тебѣ̀.

Си́це ᲂу҆́бѡ ᲃъверши́въ помаꙁа́нїе всѣ́хъ Ке́лїй, тво́ритъ ѡ҆бы́чный ѿпꙋ́стъ. По ѿпꙋ́стѣ же пою́тъ:

Пода́ждь ᲂу҆тѣше́нїе:

И҆ си́це ᲃъверша́етсѧ ᲃі́е ѡ҆свѧщенїе.

Прише́дшꙋ А҆рхїере́ю и҆лѝ свѧще́нникꙋ (не сꙋ́щꙋ А҆рхіере́ю,) и҆ ста́вшꙋ на мѣ́стѣ, и҆де́же сре́днее гра́да бы́ти и҆матъ, та́мѡ же предꙋготовле́нꙋ сꙋ́щꙋ Тетра́подꙋ, сі́естъ: ᲃтолцꙋ̀, че́стно покрове́ннꙋ, и҆ нане́мъ Е҆ва́нгелїю и҆ Крестꙋ̀ сꙋ́щꙋ, и҆ Водѣ̀ въ сосꙋ́де къ Ѻ҆свѧще́нїю, и҆ кропил̾це: ѻ҆блачитсѧ въ свѧще́нныѧ ѡ҆де́жды, и҆ а҆́бїе тво́ритъ мало́е ѻ҆свѧще́нїе водѣ̀ А҆́вгꙋстово.

По сконча́нїи же сегѡ̀ кро́питъ всѐ мѣ́сто, на не́мъ же стои́тъ. Та́же и҆де́тъ ѡ҆́крестъ проти́въ ᲃо́лнца мѣ́стомъ, ᲂу҆́дꙋже бы́ти и҆ма́тъ ᲃтѣна̀ гра́дскаѧ, и҆ и҆ды́й кро́питъ є҆̀, гл҃ѧ̀:

Въ и҆мѧ Ѿц҃а̀ и҆ ᲃн҃а и҆ ᲃт҃а́гѡ Дх҃а. А҆ми́нь.

Пѣвцы́ же пою́тъ Тропа́рь Гла́съ а҃.

Спасѝ, Гд҃и, лю́ди своѧ̀:

Мнѡ́гажды. Пото́мъ Конда́къ Гла́съ д҃.

Воꙁнесы́йсѧ на Кре́стъ во́лею:

Та́же Стіхи́ры ᲃі́ѧ Гла́съ а҃.

Хє҃ Бж҃е нш҃ъ, премꙋ́дростїю всѧ̀ содѣла́вый, и҆ ѿ несꙋ́щихъ въ бы́тїе приведы́й: благословѝ ѻ҆снова́нїе гра́да сегѡ̀, и҆ въ соверше́нїе приве́дъ, неврежде́нъ ѿ всѧ́кагѡ зла́гѡ ѻбстоѧ́нїѧ всегда̀ сохранѝ, вѣ́рныѧ же Кнѧ́ꙁѧ на́ша свое́ю си́лою воꙁвеселѝ, побѣ́ды даѧ̀ и҆́мъ на сꙋпоста́ты, дарꙋ́ѧ на́мъ ми́ръ и҆ ве́лїю ми́лость. Сїе пое́мъ вⷤ.

Сла́ва: Гла́съ д҃.

Пособи́вый Гд҃и кро́ткомꙋ Дави́дꙋ побѣди́ти и҆ноплеме́нника, и҆ вѣ́рнымъ Кнѧꙁе́мъ на́шимъ съпосо́бствꙋ́й: и҆ ѻ҆рꙋ́жїемъ Креста̀ ниꙁложѝ врагѝ на́шѧ, покажѝ милосе́рде на на́съ дре́внѧѧ ми́лости твоѧ̀, да раꙁꙋмѣ́ютъ вои́стиннꙋ ꙗ҆́кѡ ты́ є҆сѝ Бг҃ъ нш҃ъ, и҆ на тѧ надѣю́щесѧ побѣжда́емъ, молѧ́щесѧ приле́жнѡ Пречи́стѣй ти Ма́тери, дарова́ти на́мъ ми́ръ, и҆ ве́лїю ми́лость.

И҆ ны́нѣ: Богоро́диченъ: Гла́съ тожъ.

Пода́ждъ ᲂу҆тѣше́ние:

Прише́дъ же па́ки на сре́днее мѣ́сто, началствꙋ́ѧй вꙁе́мъ Кади́льницꙋ, ка́дитъ, стоѧ̀ къ восто́кꙋ пре́дъ Тетра́подомъ, и҆ а҆́бїе начина́етъ ѡ҆бы́чнѡ.

Благослове́нъ Бг҃ъ нш҃ъ всегда̀ ны́нѣ и҆ прⷭ҇нѡ и҆ въ вѣ́ки вѣ́ковъ.

Ли́къ,

А҆ми́нь.

А҆́бїе же пою́тъ на Гла́съ ѕ҃.

Ца́рю небѣ́сный ᲂу҆тѣ́ши́телю Дꙋше и҆́стины:

Сконча́вше же пѣ́нїе, чтꙋ́тъ Трисвѧто́е, Ѿч҃е нш҃ъ:

Нача́лникъ,

Ꙗ҆́кѡ твоѐ є҆́стъ ца́рство:

Гд҃и поми́лꙋй, ві҃. Прїйдѣ́те поклони́мсѧ, гⷤ. и҆ Ѱало́мъ м҃ꙁ.

Ве́лїй Гд҃ь и҆ хва́ленъ зѣ́лѡ, въ гра́дѣ Бг҃а на́шегѡ:

ᲃти́хъ: ны́нѣ:

А҆лл҃илꙋ́іѧ ᲃла́ва тебѣ̀ Бж҃е гⷤ.

Дїа́конъ же гл҃е́тъ Е҆кте́нїа сі́ѧ.

Ми́ромъ Гд҃ꙋ помоли́мсѧ. И҆ проч: да́же до Ꙍ҆ плава́ющихъ.

И҆ абїе прилага́етъ и҆ ᲃі́ѧ.

Ꙍ҆ є҆́же благослови́ти ѻ҆снова́нїе гра́да сегѡ̀ и҆ все зда́нїе и҆ ᲂꙋтвержденїе є҆го: и҆ є҆́же благоиꙁволи́ти благополꙋ́чнѡ нача́ти и҆ спѣ́шно, кро́ме всѧ́кагѡ препѧ́тїѧ, въ ᲃла́вꙋ свою̀ сконча́ти, Гд҃ꙋ помоли́мсѧ.

Ꙍ҆ є҆́же трꙋжда́ющимсѧ дѣла́телемъ благопоспѣ́шествѡ въ все́мъ пода́ти и҆ дѣ́ла рꙋ́къ и҆́хъ и҆спра́вити, и҆ въ съверше́нїе спѣ́шнѡ ᲃи́лою свое́ю проиꙁвестѝ, Гд҃ꙋ помоли́мсѧ.

Ꙍ҆ є҆́же пода́ти рабꙋ̀ свое́мꙋ, И҆мⷬ҇къ: благопоспѣ́шествѡ въ все́мъ, и҆ къ съверше́нїю дѣ́ла сегѡ̀ всѧ́кое дово́лствѡ Божестве́нною свое́ю си́лою, Гд҃ꙋ помоли́мсѧ.

Ꙍ҆ є҆́же приста́вити дѣ́лꙋ семꙋ̀, и҆ дѣла́телемъ є҆гѡ̀ А҆гг҃ла свое́гѡ храни́телѧ, є҆́же неви́димѡ ѿраꙁи́ти всѧ съпроти́вныѧ нало́ги ви́димыхъ и҆ неви́димыхъ врагѡ́въ, Гд҃ꙋ помоли́мсѧ.

И҆ ѡ҆ є҆́же Гд҃ꙋ Бг҃ꙋ на́шемꙋ пода́ти во все́мъ дѣ́лѣ семъ благопоспѣ́шество, къ съѡрꙋже́нїю же мꙋ́дрость, и҆ къ ᲃверше́нїю ᲃи́лꙋ, си́лою дѣ́йствомъ и҆ благода́тїю Пресвѧта́гѡ Дх҃а, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ на́мъ ѿ всѧ́коѧ ско́рби:

И҆ всѧ про́чаѧ ѡ҆бы́чнаѧ. Началствꙋ́ѧй же воꙁглаша́етъ.

Ꙗ҆́кѡ подоба́етъ ти всѧ́каѧ ᲃла́ва:

По си́хъ пою́тъ а҆́бїе:

Бг҃ъ Гд҃ь и҆ ꙗ҆ви́сѧ на́мъ: На Гла́съ в҃.

Сті́хъ, а҃. Ве́лїй Гд҃ь и҆ хва́ленъ ѕѣ́лѡ въ гра́дѣ Бг҃а на́шегѡ.

Сті́хъ, в҃. Ꙗ҆́коже слы́шахомъ та́кѡ и҆ ви́дѣхѡмъ, въ гра́дѣ Гд҃а ᲃи́лъ, въ гра́дѣ Бг҃а на́шегѡ.

Сті́хъ, г҃. Бг҃ъ ѻ҆снова̀ и҆ въ вѣкъ.

И҆ тропа́ръ ᲃе́й. Гла́съ то́йже.

Тво́рче и҆ ᲃоꙁда́телю всѧ́ческихъ Бж҃е, дѣла̀ рꙋ̀к на́шихъ къ сла́вѣ твое́й начина́емыхъ, твои́мъ благослове́нїемъ спѣ́шнѡ и҆спра́ви, и҆ на́съ ѿ всѧ́кагѡ зла̀ и҆ꙁба́ви, ꙗ҆́кѡ є҆ди́нъ си́ленъ и҆ человекѡлю́бецъ.

Сла́ва: то́йж. И҆ ны́нѣ:

Застꙋ́пнице христїѧ́нѡмъ:

И҆ чте́тсѧ а҆́бїе Ѱало́мъ, н҃. Поми́лꙋ́й мѧ Бж҃е:

По ѱалмѣ́ же, Конд: се́й Гла́съ ѕ҃.

Ско́рый въ по́мощи и҆ крѣ́пкїй, въ застꙋпле́нїи Хє҃, предста́ни благода́тїю си́лы твое́ѧ ны́нѣ и҆ благослови́въ ᲂу҆крѣпѝ, и҆ въ соверше́нїе нача́ло ѡ҆снова́нїѧ сегѡ̀, и҆ все дѣ́ло рабѡ́въ твои́хъ проиꙁведѝ: всѧ̀ бо, є҆ли́ка хо́щеши, ꙗ҆́кѡ си́льный Бг҃ъ, твори́ти мо́жеши.

По си́хъ же Дїа́конꙋ ре́кшꙋ:

Гд҃ꙋ помоли́мсѧ.

и҆ Кли́рꙋ:

Гд҃и поми́лꙋй.

Начальствꙋ́ѧй чтетъ Моли́твꙋ сїю.

Влады́ко Бж҃е Вседержи́телю, Ѿч҃е Гд҃а на́шего І҆и҃ᲃ Ха҃, сотвори́вый не́бо р́аꙁꙋмомъ, и҆ зе́млю ѻ҆снова́вый на тве́рди є҆ѧ̀, зижди́телю и҆ тво́рче все́хъ, при́ꙁри на Моли́твꙋ на́съ недосто́йныхъ рабѡ́въ твои́хъ, дне́сь на мѣ́стѣ се́мъ тебѣ̀ смире́ннѡ молѧ́щихсѧ, и҆ ниꙁпослѝ благослове́нїе твоѐ небе́сное на ѡ҆снова́нїе гра́да ᲃегѡ̀, ѿ тебе́ бо Ѿц҃а свѣ́тѡвъ свы́шше всѧ́кѡ даѧ́нїе благо́е, и҆ всѧ́къ да́ръ соверше́нный и҆схо́дитъ, и҆ ꙗ҆́коже ве́тхагѡ І҆и҃лѧ, є҆го́же ꙗ҆́кѡ виногра́дъ и҆ꙁъ Е҆гѵ́пта прине́слъ, и҆ и҆ꙁгна́въ ꙗ҆ꙁы́ки, насади́лъ є҆сѝ: ᲃи́це и҆ ны́нѣ при́ꙁри ми́лостивѡ на мѣ́сто сїе, и҆ насадѝ є҆̀, и҆ ѡ҆гражде́нїе є҆гѡ̀ ᲂу҆твердѝ, и҆ не поꙁи́блемо бы́ти сотворѝ, и҆ꙁволѝ є҆гѡ̀ бы́ти въ жи́лище крѣ́пкое вѣ́рнымъ люде́мъ твои́мъ, ѡ҆градѝ є҆гѡ̀ си́лою твое́ю, и҆ ѡ҆стѣнѝ є҆гѡ̀ твои́мъ Божестве́ннымъ про́мысломъ, и҆ крѣ́пкимъ ти застꙋпле́нїемъ, А҆́гг҃ла храни́телѧ приста́ви є҆мꙋ̀ сохранѧ́юща и҆ и҆ꙁбавлѧ́юща є҆гѡ̀ ѿ всѧ́когѡ зла́гѡ ѻ҆бстоѧ́нїѧ, и҆ ѿража́юща по́лки ви́димыхъ и҆ неви́димыхъ врагѡ́въ, и҆ въ бѣ́гство претварѧ́юща ѧ҆̀. Е҆́й Гд҃и Бж҃е нш҃ъ, смире́ннѡ мо́лимъ тѧ, ᲃко́ро на соверше́нїе приведѝ гра́дъ се́й въ сла́вꙋ твою̀, и҆ и҆ꙁба́ви є҆гѡ̀ всегда̀ и҆ весь предѣ́елъ є҆гѡ̀ ѿ гла́да, гꙋби́тел̾ства, трꙋ́са, гра́да, пото́па, ѻ҆гнѧ̀, меча̀, наше́ствїѧ и҆ноплеме́нниковъ, и҆ междосо́бные бра́ни и҆ всѧ́коѧ ᲃмертоносныѧ ра́ны: Всѣ́хъ же въ гра́де се́мъ всели́тисѧ и҆ жи́ти хотѧ́щихъ въ правосла́вной христїѧ́нской вѣ́рѣ ᲂу҆твердѝ за́повѣди твоѧ̀ соверша́ти, и҆ во́лю твою̀ твори́ти, и҆ славосло́вїе тебѣ̀ и҆ благодаре́нїе за всѧ̀ благодѣѧ́нїѧ твоѧ̀ въ не́мъ непреста́нное приноси́ти, и҆ въ всѣ́хъ добродѣ́телехъ преспѣва́ти, твое́ю благода́тїю ᲂу҆креплѧ́ѧ, сотворѝ: и҆ внегда̀ а҆́ще приꙁовꙋ́тъ тѧ на мѣ́стѣ се́мъ, ты ᲂу҆слы́ши и҆́хъ на небесѝ го́рѣ, и҆ ми́лостивно проше́нїѧ и҆́хъ ꙗ҆́кѡ бла́гъ и҆спо́лни, и҆ ми́лостивъ и҆́мъ всегда̀ быва́ѧ, сопрꙋ́жества и҆́хъ въ ми́рѣ, є҆диномы́слїи, и҆ цѣломꙋ́дрїи сохранѝ: здра́вїе съ долгоде́н̾ствїемъ и҆́мъ дарꙋ́й, дѡ́мы и҆́хъ и҆сполнѝ всѧ́кагѡ бла́га, и҆ ᲂу҆гобꙁѝ и҆́хъ въ все́мъ, ꙗ҆́кѡ да твоѧ̀ ѿ твои́хъ и҆́мъ благоꙋтро́бнѣ да́ннаѧ, бога́тнѡ тебѣ̀ прино́сѧтъ, ни́щыхъ же и҆ стра́нныхъ ми́лꙋютъ, и҆ всѧ̀ милосе́рднаѧ дѣ́ла и҆спо́лнѧтъ. Благорастворе́нныѧ во́ꙁдꙋхи, вре́мена же ми́рна и҆ плодоно́сна и҆́мъ дарꙋ́й, скѡ́ты и҆́хъ благословѝ, и҆ многѡпло́дны сотворѝ, жи́та ᲂу҆мно́жи, и҆ въ всѣ́хъ бла́гихъ дѣ́лехъ тѣ́мъ благопоспѣше́ствꙋ́й, благословѝ вхѡ́ды и҆ и҆схѡ́ды и҆́хъ, и҆ А҆́гг҃лскою си́лою ѡ҆гради, ꙗ҆́кѡ да всегда̀ всѧ́къ дово́лъ и҆мꙋ́ще, и҆ꙁ̾ѡбилꙋ́ютъ въ всѧ́комъ дѣ́лѣ бла́ꙁѣ, твое́мꙋ благоꙋтро́бїю благоꙋгажда́юще: Моли́твами Пречи́стыа Владычица на́шеѧ Бц҃а, и҆ прⷭ҇нѡ Дв҃ы Мр҃іѧ: ᲃи́лою че́стнагѡ и҆ животворѧ́щагѡ Креста̀: застꙋпле́нїемъ че́стныхъ небе́сныхъ ᲃи́лъ беспло́тныхъ: че́стнагѡ и҆ сла́внагѡ Прⷪ҇рка Предте́ча и҆ Крести́телѧ І҆ѡа́нна: ᲃт҃ы́хъ и҆ допропобѣ́дныхъ Мꙋ́ченикъ, и҆ всѣ́хъ ст҃ы́хъ твои́хъ:

Ꙗ҆́кѡ ты́ є҆си крѣ́пость и҆ ᲂу҆твержде́нїе на́ше, и҆ тебѣ̀ ᲃла́вꙋ и҆ благодаре́нїе воꙁсыла́емъ, съ є҆диноро́днымъ ти Сы́номъ, и҆ всесвѧты́мъ и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

А҆́бїе же посе́мъ и҆де́тъ, началствꙋ́ѧй, къ мѣ́стꙋ и҆де́же ѻ҆снова́нїе нача́тисѧ и҆́матъ, и҆ а҆́ще ка́менный Гра́дъ бы́ти и҆́матъ, вꙁе́мъ ка́менїй три: пе́рвымъ творѧ̀ Кре́стъ надъ и҆скопа́нымъ ро́вомъ, гл҃е́тъ,

Ѻ҆снова́етсѧ Гра́дъ се́й, Въ и҆мѧ Ѿц҃а̀.

И҆ вмѣтаетъ є҆гѡ̀ въ ро́въ на ми́ло, ѿ Ма́йстерѡвъ та́мѡ и҆ꙁлѣѧ́ное.

Вто́рый же вꙁе́мъ, та́кожде творѧ̀ крестаѡ́браꙁъ надъ ро́вомъ,гл҃е́тъ, и҆ ᲃн҃а.

И҆ вме́щетъ є҆гѡ въ ро́въ, ꙗ҆́коже и҆ пе́рвый.

Тре́тий же ка́мень вꙁе́мъ, и҆ та́кожде знамена́въ и҆́мъ ро́въ, гл҃е́тъ, и҆ свѧта́гѡ Дх҃а. А҆ми́нь.

А҆́ще же древѧ́ный бы́ти и҆́матъ Гра́дъ, вꙁемъ ᲃеки́рꙋ ᲂу҆дарѧ́етъ є҆́ю въ бервно̀ на сі́е приꙋгото́вленное, три́жды.

На пе́рвомъ ᲂу҆бѡ ᲂу҆даре́нїи глаголе́тъ: «Ꙍ҆снова́етсѧ градъ се́й въ и҆мѧ Ѿц҃а̀.

На второ́мъ же: и ᲃн҃а.

На тре́тьемъ: и҆ ᲃт҃а́гѡ Дх҃а. А҆ми́нь».

А҆́бїе же посе́мъ чтетъ весь Кли́ръ ѱало́мъ: Ѻ҆снова́нїѧ є҆гѡ̀ на гора́хъ свѧты́хъ:

Дїа́конъ гл҃е́тъ Є҆кте́нїѧ ᲃі́ѧ.

Поми́лꙋй на́съ, Бж҃е, по вели́цей ми́лости твое́й, моли́м̾тисѧ, ᲂу҆слы́ши и҆ поми́лꙋй.

Ли́къ,

Гд҃и, поми́лꙋй: пое́тъ гⷤ.

Е҆щѐ моли́мсѧ Гд҃ꙋ Бг҃ꙋ нашемꙋ, ѡ҆ є҆́же ми́лостивнымъ си при́ꙁрѣти ѻ҆́комъ на дѣ́ло ᲃі́е ны́нѣ начина́ющеесѧ, и҆ благослови́ти є҆̀, ᲃпѣ́шнѡ кро́мѣ всѧ́кагѡ препѧ́тїѧ, въ ᲃла́вꙋ свою̀ съверши́ти: рцѣ́мъ всѝ, Гд҃и ᲂу҆слы́ши и҆ ми́лостивнѡ поми́лꙋй.

Въ ᲃла́вꙋ твою̀ всѧ̀ твори́ти повелѣ́вый Гд҃и, дѣ́ло ᲃі́е ны́нѣ къ ᲃла́вѣ твое́й начина́ющомꙋ правовѣ́рномꙋ рабꙋ̀ твое́мꙋ, И҆мⷬ҇къ: небе́снымъ твои́мъ благослове́нїемъ поспешѣ́ство благополꙋ́чное, съ всѧ́кимъ дово́лствомъ къ съверше́нїю пода́ждъ, здра́вїе є҆мꙋ̀ съ долгоде́нствїемъ дарꙋ́ѧ: моли́м̾тисѧ вседарови́телный Тво́рче, ско́рѡ ᲂу҆слы́ши, и҆ ми́лостивнѡ поми́лꙋй.

Въ все́мъ поспѣше́ствꙋ́ѧй всѣ́мъ въ благо́е Гд҃и, и҆ ны́нѣ на́ми молѧ́щомꙋсѧ тебѣ вѣрномꙋ твое́мꙋ рабꙋ̀, И҆мⷬ҇къ: ми́лостивнѡ поспѣшествꙋ́й, и҆ въ благополꙋ́чное съверше́нїе дѣ́ло є҆гѡ̀ сі́е, спѣ́шнѡ проиꙁвести́сѧ благоиꙁволѝ: моли́м̾тисѧ всемогі́й Влады́ко, ᲂу҆слы́ши и҆ ми́лостивнѡ поми́лꙋй.

А҆гг҃ла твое́гѡ ми́ра, и҆ вѣ́рна храни́телѧ, приста́ви дѣ́лꙋ семꙋ̀ благоꙋвѣтли́ве Гд҃и, є҆же въспѧти́ти всѧ̀ препѧ́тїѧ ви́димыхъ и҆ неви́димыхъ врагѡ́въ, поспѣ́шество же въ все́мъ къ благополꙋ́чномꙋ съверше́нїю дѣла́ющимъ сътвори́ти, моли́м̾тисѧ преблагі́й ᲃпа́се, ᲂу҆слы́ши и҆ ми́лостивнѡ поми́лꙋй.

Настоѧ́тель же воꙁглаша́етъ: ᲂу҆слы́ши ны, Бж҃е спасит:

И҆ проч. Посе́мъ же благословлѧ́етъ хꙋдѡ́жники Кресто́мъ и҆ всѧ̀ дѣла́телѧ, и҆ весь на́рѡдъ, гл҃ѧ̀:

Да благослови́тъ ва́съ Гд҃ь ѿ Сіꙍ́на, и҆ да и҆спра́витъ дѣ́ла рꙋ́къ ва́шихъ, и҆ да бꙋ́детъ ми́лость є҆гѡ̀ на всѣ́хъ на́съ, да всѧ̀ днѝ живота̀ на́шегѡ. А҆ми́нь.

А҆́бїе же идꙋ́тъ па́ки на сре́днее мѣ́сто пою́ще Догма́тикъ Гла́са д҃-гѡ:

Пода́ждъ ᲂу҆тѣше́нїе:

Сконча́нꙋ же пѣ́ні́ю, тво́ритъ ѡ҆бы́чный дне́вный Ѿпꙋ́стъ: И҆ съвле́къ ᲃвѧще́нныѧ ѡ҆де́жды, и҆дꙋ́тъ въ своѧ́ си.

Свѧти́тель (а҆́ще є҆́стъ) ѡ҆бо́лксѧ ве́рхꙋ Ма́нтїи въ Є҆пітра́хиль, Ѻ҆мофо́ръ, и҆ Ми́трꙋ, и҆ Жеꙁлъ вꙁе́мъ въ шꙋ́йцѣ: А҆́ще же Намѣ́стникъ є҆гѡ̀, въ Є҆пітра́хиль и҆ Фелꙍ́нъ, и҆ посре́дъ Гра́да поста́вленꙋ сꙋ́щꙋ ᲃтолцꙋ̀ че́стнѡ покрове́ннꙋ, и҆ на не́мъ Є҆ва́нгелїю и҆ Крестꙋ̀ и҆ Водѣ̀ въ ᲃосꙋ́де къ ѡ҆свѧще́нїю гото́вой ᲃꙋ́щей, покади́въ крестаобра́ꙁно, начина́етъ ѡ҆бычно,

Благослове́нъ Бг҃ъ нш҃ъ,

и҆ соверша́етсѧ ма́лое ѡ҆свѧще́нїе водѣ̀, сі́естъ А҆́вгꙋстово. Съверши́въ же ѡ҆свѧще́нїе, не творѧ̀ ѿпꙋ́ста ни́же кропѧ̀.

Дїа́конꙋ же держа́щꙋ сосꙋ̀дъ съ Є҆леѡмъ въ рꙋка́хъ, Нача́льникъ благославлѧ́етъ три́жды є҆ле́й десни́цею, гл҃ѧ̀:

Въ и҆мѧ Ѿц҃а̀ и҆ ᲃн҃а и҆ ᲃт҃а́гѡ Дх҃а. А҆́ми́нь.

И҆ а҆́бїе чтетъ надъ Є҆ле́емъ Моли́твꙋ сі́ю.

Гд҃и Бж҃е нш҃ъ при́ꙁри ны́нѣ ми́лостивнѡ:

Зри на за́де на Листѐ, рѯ҃д⁴

Сконча́ной же бы́вшей Моли́твѣ, Дїа́конꙋ ре́кшꙋ:

С ᲂу҆миле́нїемъ всѝ колѣ́не прекло́ше, Гд҃ꙋ помоли́мсѧ.

Нача́льникъ а҆́бїе съ всѣ́мъ Кли́ромъ и҆ Людмѝ колѣ́нѣ прекло́нь, гл҃е́тъ велегла́снѡ съ всѧ́кимъ ᲂу҆миле́нїемъ Моли́твꙋ ᲃі́ю.

Гд҃и І҆и҃ᲃ Хє҃, Бж҃е нш҃ъ крѣ́пости и҆ ᲂу҆твержденїе, и҆ прибе́жище ᲂу҆пова́ющихъ на тѧ, благоиꙁволи́вый въ съверше́нїе твои́мъ Божестве́ннымъ про́мысломъ и҆ застꙋпленїемъ градъ се́й привестѝ, смире́ннѡ колѣ́нѣ дꙋ́шъ и҆ тѣле́съ на́шихъ пре́дъ твои́мъ вели́чествомъ прекло́нше моли́мсѧ, и҆ твое́мꙋ благоꙋтро́бїю ми́лисѧ дѣ́емъ, послѝ ми́лостивнѡ благослове́нїе твоѐ небе́сное нань, и҆ благословѝ є҆гѡ̀, ꙗ҆́коже благослови́лъ є҆сѝ въ Ве́тсѣмъ Завѣте при рабѣ̀ твое́мъ Дави́де градъ І҆ерꙋсали́мскїй, и҆ ᲃи́лою и҆ крѣ́постїю твое́ю ѡ҆стѣнѝ є҆гѡ̀, тве́рдъ же и҆ не поꙁибле́мъ и҆ не раꙁдрꙋши́мъ бы́ти сотворѝ: А҆гг҃ла твое́ѧ крѣ́пости приста́ви є҆мꙋ̀ храни́телѧ, а҆́ще бо не ты̀ ᲃохрани́ши градъ, в̾сꙋ́е бдѧ́тъ стрегꙋ́щїи є҆гѡ̀. И҆ꙁба́ви є҆гѡ̀, Гд҃и, ѿ ѡ҆бстоѧ́нїѧ ви́димыхъ и҆ неви́димыхъ врагѡ́въ, и҆ ѿ всѧ́коѧ бѣ́ды, ꙗ҆вѝ є҆гѡ̀ всегда̀ бы́ти непребори́мый, ненавѣтова́нный, всѣ́мъ врагѡ́мъ непристꙋ́пный и҆ необ̾ѧ́тый, па́че же гро́ꙁный и҆ стра́шный, и҆ ѡ҆ и҆менѝ твое́мъ всегда̀ побѣди́телный, жи́лища въ не́мъ ᲃꙋ́щаѧ благословѝ и҆ ѿженѝ ѿ ни́хъ всѧ́кое лꙋка́вое бѣсо́вское дѣ́йство, и҆ всѧ́кїй ᲃтра́хъ дне́вный же и҆ но́щный. Е҆́й Влады́ко Гд҃и Бж҃е нш҃ъ, всѧ́кагѡ вре́да и҆ нало́га вы́шшихъ бы́ти всѣ́хъ въ до́мехъ сихъ и҆ въ ѡ҆гра́дѣ се́й жи́ти хотѧ́щихъ ᲃи́лою твое́ю сътворѝ, и҆ꙁбавлѧ́ѧ и҆хъ ѿ стра́ха но́щнагѡ, ѿ стрѣ́лы летѧ́щїѧ въ днѝ, ѿ ве́щїй въ тмѣ̀ преходѧ́щихъ, ѿ ᲃрѧ́ща и҆ бѣ́са полꙋ́деннагѡ, и҆ ѿ всѧ́кагѡ та́йнагѡ и҆ ꙗ҆встве́ннагѡ вра́жїѧго прилога и҆ навѣ́та, ꙗ҆́кѡ да твоѝ рабѝ и҆ рабы́нѧ, и҆ ча́да и҆́хъ твое́ѧ наслажда́ющесѧ по́мощи, и҆ А҆́гг҃лскими ѡ҆полче́нїи ѡ҆гражда́еми сꙋ́ще, беꙁъ всѧ́кагѡ препѧ́тїѧ въ благодаре́нїи всегда̀ тебѣ̀ ᲃлавосло́вїе принѡ́сѧтъ. Па́ки человѣкѡлю́бче ца́рю, приле́жно моли́мъ тѧ, и҆ꙁба́ви градъ се́й всегда̀ ѿ гла́да, гꙋби́телства, трꙋ́са, пото́па, гра́да, бꙋ́рѧ, ѡ҆гнѧ̀, меча̀, наше́ствїѧ и҆ноплеме́нникъ, и҆ междосо́бныѧ бра́ни, и҆ всѧ́коѧ смертоно́сныѧ ра́ны. Послѝ є҆мꙋ̀ тво́й ми́ръ, ᲂу҆гобꙁѝ є҆гѡ̀ и҆ въ все́мъ ᲂу҆довлѝ, и҆ да́ждъ живꙋ́щимъ въ не́мъ и҆ стрегꙋ́щимъ є҆гѡ̀ бо́дрость, ᲃи́лꙋ и҆ крѣ́пость и҆ ᲃе́рдце мꙋжестве́ннѡ сопроти́въ всѣмъ врагѡ́мъ, и҆ гро́ꙁныхъ и҆ стра́шныхъ и҆́хъ въ бра́нехъ ᲃотворѝ, побѣ́ды и҆́мъ всегда̀ на всѧ ᲃопроти́вныѧ дарꙋ́ѧ, ᲃоблюда́ѧ и҆́хъ твое́ю благода́тїю въ правовѣ́рїи и҆ въ всѧ́комъ благоче́стїи и҆ че́стности непоꙁибле́мыхъ. Ты́ бо є҆сѝ ѡ҆свѧще́нїе, крѣ́пость и҆ ᲂу҆твержде́нїе на́ше, и҆ тебѣ̀ ᲃла́вꙋ воꙁсыла́емъ съ беꙁнача́лнымъ ти Ѿц҃емъ, и҆ съ пресвѧты́мъ и҆ благи́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ и въ вѣ́ки вѣ́кѡвъ.

Кли́ръ:

А҆ми́нь.

Вста́въ же, и҆де́тъ къ ᲃтѣна́мъ гра́дскимъ и҆ ᲃтолпѡ́мъ є҆гѡ̀, кропѧ̀ всю́дꙋ ᲃвѧще́нной водо́ю ᲃтѣ́ны всѧ̀, гл҃ѧ̀:

Блⷭ҇влѧ́етсѧ и҆ ѡ҆сщ҃а́етсѧ гра́дъ се́й ѡ҆кропле́нїемъ воды̀ сеѧ̀ сщ҃е́нныѧ Въ и҆мѧ Ѿц҃а̀» И҆ проч:

Пѣвци́ же чтꙋ́тъ сі́ѧ три ѱалмы̀:

м҃з. Ве́лїй Гд҃ь и҆ хва́ленъ зѣ́лѡ:

н҃и И҆ꙁми мѧ ѿ врагѡ́въ мои́хъ Бж҃е:

ѯ҃. Ꙋ҆слы́ши Бж҃е моле́нїе моѐ:

Сконча́ннымъ же ѱалмѡ́мъ, поютъ Троп: ᲃі́ѧ Гла́съ а҃.

Спасѝ Гд҃и лю́ди своѧ̀:

И҆ Конд: Гла́съ д҃.

Воꙁнесы́йсѧ на Кре́стъ во́лею:

Сла́ва: Гла́съ то́йжде.

Пособи́вый Гд҃и кро́ткомꙋ Дави́дꙋ:

И҆ ны́нѣ: Гла́съ то́йжде.

Пода́ждъ ᲂу҆тѣше́нїе:

И҆щѝ сі́ѧ на за́дѣ на Листѐ ро҃ѳ⁵.

Сконча́въ же кропле́нїе ᲃтѣ́нъ и҆ прише́дъ къ Вра́томъ гра́да, ᲃтавъ пре́дъ ни́ми чтетъ съ всѣ́мъ Кли́рѡмъ Ѱало́мъ, рм҃з.

Похвалѝ, І҆ерⷭ҇ли́ме, Гд҃а: весъ до конца̀.

Посе́мъ кро́питъ Вра́та всѧ̀ ᲃвѧще́нною водо́ю ѿ до́лꙋ до верха̀, гл҃ѧ̀:

Въ и҆мѧ Ѿц҃а̀ и҆ ᲃн҃а и҆ ᲃт҃а́гѡ Дх҃а. А҆ми́нь.

И҆ вꙁемъ є҆леѵ̆ пома́ꙁꙋетъ ве́рхнїй прагъ и҆ ѡ҆́бѣ подво́и, гл҃ѧ̀:

Благословлѧ́ютсѧ и҆ ᲂу҆креплѧ́ютсѧ вра́та сі́ѧ благослове́нїемъ небе́снымъ помаꙁа́нїемъ ᲃт҃а́гѡ є҆ле́ѧ сегѡ̀, въ ми́рный въхо́дъ и҆ и҆схо́дъ вѣ́рнымъ Бо́жїимъ, и҆ въ и҆ꙁба́вꙋ ѿ всѧ́кагѡ зла́гѡ ѡ҆бстоѧ́нїѧ, и҆ въ ѿраже́нїе и҆ ѿгна́нїе всѣ́хъ вра́жїихъ наве́товъ, въ и҆мѧ Ѿц҃а̀ и҆ ᲃн҃а и҆ ᲃт҃а́гѡ Дх҃а. А҆ми́нь.

Пѣвци́ же пою́тъ ᲃтіхи́рꙋ сїю Гла́съ ѕ҃.

Ꙋ҆твердѝ Гд҃и градъ се́й, и҆ благословѝ є҆гѡ̀, и҆ ѡ҆полче́нїемъ А҆́гг҃лъ твои́хъ ѡ҆градѝ, и҆ ѻ҆стѣнѝ є҆гѡ̀, пода́ѧ въ не́мъ твои́мъ рабѡ́мъ ми́ръ съ здра́вїемъ, и҆ всѧ̀ мі́рскаѧ и҆ преми́рнаѧ твоѧ̀ блага́ѧ, съ всѧ́кимъ дово́л̾ствомъ, молитва́ми Бц҃а и҆ всѣ́хъ ᲃт҃ы́хъ твои́хъ.

Сїеже твори́тъ и҆ въ всѧ̀ вра́та є҆ли́ко и҆́хъ а҆́ще бꙋ́детъ. Соверши́въ же сїе и҆де́тъ къ до́мѡмъ но́во въ гра́дѣ соꙁд́аннымъ и҆, ста́въ посре́дѣ и҆́хъ и҆ꙁвнꙋ́трь ᲂу҆́дꙋ, и҆лѝ и҆ꙁвнѣ̀ ᲂу҆́дꙋ, рекшꙋ Дїа́конꙋ:

Гд҃ꙋ помоли́мсѧ.

Кли́ръ:

Гд҃и поми́лꙋй.

Нача́лникъ чтетъ Моли́твꙋ ᲃі́ю.

Гд҃и Бж҃е нш҃ъ, и҆ꙁволи́вый внитѝ подъ кро́въ Закхе́ѡвъ:

И҆щѝ на за́дѣ на Листѐ ро҃з⁶.

По Моли́тве же вхо́дитъ въ кі́йждѡ храмъ и҆ сщ҃е́нною водо́ю кро́питъ всѧ ᲃтѣ́ны, глагѡлѧ̀:

Въ и҆мѧ Ѿц҃а̀ и҆ ᲃн҃а и҆ ᲃт҃а́гѡ Дх҃а, ѡ҆кропле́нїемъ воды̀ ᲃеѧ̀ ᲃвѧще́нныѧ въ бѣ́гствѡ да претвори́тсѧ вселꙋка́вое бѣсо́вское дѣ́йствѡ.

И҆ вꙁе́мъ Є҆ле́й пома́ꙁꙋетъ тѣмъ четы́ри стѣ́ны коего́ждо хра́ма, глагѡлѧ̀:

Благѡсловлѧ́етсѧ до́мъ сей помаꙁа́нїемъ ᲃт҃а́гѡ Є҆ле́ѧ сегѡ̀, во и҆мѧ Ѿц҃а̀ и҆ ᲃн҃а и҆ ᲃт҃а́гѡ Дх҃а. А҆ми́нь.

Ве́стно же бꙋ́ди, ꙗ҆́ко ѡ҆кропле́нїе и҆ помаꙁа́нїе си́цевѡ, не то́чїю нача́льникъ ᲃа́мъ, но и҆ всѝ тꙋ сꙋ́щїи І҆ере́и ᲃъверша́ти могꙋ́тъ, и҆ꙁрѧ́днее же а҆́ще мнѡ́ги до́мы сꙋ́тъ, ꙗ҆́кѡ да скорѣ́е съвеши́тсѧ. По си́хъ же всѣ́хъ и҆де́тъ па́ки на мѣ́сто сре́днее гра́да, всѣ́мъ чтꙋ́щимъ Ѱало́мъ, ч҃ѳ.

Воскликнѣ́те Гд҃ви всѧ̀ землѧ̀: Весь до конца̀.

Прише́дше же и҆ ᲃта́въ на пе́рвое мѣ́сто, Дїа́конъ гл҃е́тъ Е҆кте́нїѧ сі́ѧ.

Поми́лꙋй на́съ, Бж҃е, по вели́цей ми́лости твое́й, моли́м̾тисѧ, ᲂу҆слы́ши и҆ поми́лꙋй.

Кли́ръ:

Гд҃и поми́лꙋй гⷤ.

Е҆щѐ моли́мсѧ ѡ҆ вели́комъ Королѝ на́шемъ Имⷬ҇къ:

Е҆щѐ моли́мсѧ ѿ Преѡсвѧще́нномъ А҆рхїепⷭ҇пѣ на́шемъ И҆мⷬ҇къ: (и҆лѝ Ꙍ҆ Боголюби́вомъ Є҆пⷭ҇пѣ, И҆мⷬ҇къ:).

Е҆щѐ моли́мсѧ ѡ҆ благочести́вомъ и҆ христолюби́вомъ И҆мⷬ҇къ: (є҆го́же є҆́стъ гра́дъ,) ѡ҆ ми́рѣ здра́вїи и҆ ѡ҆ставле́нїи грѣхѡ́въ є҆гѡ̀, и҆ ѡ҆ є҆́же Гд҃ꙋ Бг҃ꙋ на́шемꙋ благослови́ти є҆гѡ̀ въ все́мъ, и҆ ѿ всѧ́кагѡ зла́гѡ ѡ҆бстоѧ́нїѧ всѣ́хъ врагѡ́въ ви́димыхъ и҆ неви́димыхъ покры́ти и҆ и҆ꙁба́вити є҆гѡ̀, рцѣ́мъ всѝ, Гд҃и ᲂу҆слы́ши и́ поми́лꙋй.

Е҆щѐ моли́мсѧ, ѡ҆ всѣ́хъ въ Правосла́вной Вѣ́рѣ живꙋ́щихъ и҆ жи́ти хотѧ́щихъ въ гра́дѣ ᲃе́мъ, ѡ҆ є҆́же благослови́ти и҆́хъ въ все́мъ, и҆ всѧ̀ мі́рскаѧ и҆ преми́рнаѧ и҆́мъ блага́ѧ пода́ти, и҆ и҆ꙁба́вити и҆́хъ, и҆ гра́дъ ᲃе́й, ѿ гла́да, гꙋби́телства, трꙋ́са, гра́да, пото́па, ѡ҆гнѧ̀, меча̀, наше́ствїѧ и҆ноплеме́нникъ, и҆ междѡсо́бныѧ бра́ни, и҆ всѧ́коѧ смертоно́сныѧ ра́ны: И҆ ѡ҆ є҆́же ми́лостивꙋ и҆́мъ бы́ти благоꙋвѣтли́вꙋ благопремѣни́телю благо́мꙋ и҆ человѣколюби́вомꙋ Бг҃ꙋ на́шемꙋ, и́ ѿврати́ти ѿ ни́хъ всегда̀ весъ гнѣ́въ сво́й пра́веднѡ грѣ́хъ ра́ди движи́мый, и҆ помилова́ти и҆́хъ, рцѣ́мъ вси, Гд҃и ᲂу҆слы́ши и҆ поми́лꙋй.

Нача́лникъ воꙁглаша́етъ:

Ꙋ҆слы́ши ны Бж҃е спаси́телю нш҃ъ:

И҆ а҆́бїе тво́ритъ Ѿпꙋ́стъ Дневный, и҆ благослови́въ лю́ди, ѿлага́етъ зъ себѐ сщ҃е́нныѧ ѡ҆де́жды, и҆ ѿхо́дитъ въ своѧ́ си благодарѧ̀ Бг҃а.

Прише́дшꙋ І҆ере́ю на мѣ́сто и҆де́же и҆́матъ ѡ҆сноватисѧ до́мъ (подоба́етъ є҆мꙋ̀ и҆мѣ́ти ᲃщ҃е́ннꙋю во́дꙋ съ собо́ю и҆ кропи́лце.) вꙁе́мъ же а҆́бїе на себѐ Е҆пітра́хиль, начина́етъ ѡ҆бы́чно:

Благослове́нъ Бг҃ъ нш҃ъ: Трисвѧто́е: Ѿч҃е нш҃ъ: Гд҃и поми́лꙋй, в҃і.

Сла́ва: И҆ ны́нѣ: Прїйдѣ́те поклони́мсѧ, гⷤ. и҆ Ѱало́мъ, ѯѳ҃. Бж҃е въ по́мощь мою̀ вонмѝ:

По ѱалмѣ́ же чтетъ и҆лѝ пое́тъ Тропа́ръ се́й. Гла́съ в҃.

Тво́рче и҆ съꙁда́телю всѧ́ческихъ Бж҃е, дѣ́ло рꙋ́къ на́шихъ к ᲃла́вѣ твое́й начина́емое, твои́мъ блⷭ҇ве́нїемъ спѣ́шнѡ и҆спра́ви, и҆ ᲃи́лою твое́ю въ ᲃъверше́нїе ᲃко́рѡ проиꙁведѝ, ꙗ҆́кѡ є҆ди́нъ всеси́ленъ и҆ чл҃кѡлю́бецъ.

Сла́ва: И҆ ны́нѣ: Богоро́диченъ: Гла́съ ѕ҃.

Застꙋ́пнице христїа́нѡмъ непосты́днаѧ:

И҆ ре́кшꙋ,

Гд҃ꙋ помоли́мсѧ.

И҆ предстоѧ́щимъ,

Гд҃и поми́лꙋй.

Чтетъ Моли́твꙋ ᲃі́ю:

Гд҃и Бж҃е Вседержи́телю, ᲃътвори́вый не́бо ра́ꙁꙋмомъ и҆ зе́млю ѡ҆снова́вый на тве́рди є҆ѧ̀, ᲃъꙁда́телю и҆ съдѣ́телю всѧ́ческихъ, при́ꙁри на раба̀ твое́гѡ Имⷬ҇къ: и҆ꙁволи́вшагѡ въ держа́вѣ крѣ́пости твое́ѧ воꙁдви́гнꙋти до́мъ въ жи́лище ᲃебѣ̀ (а҆́ще ка́менный бы́ти и҆́матъ гл҃ѝ сі́е) и҆ зда́нїемъ сегѡ̀ съѡрꙋжи́ти (а҆́ще же древѧ́ный, и҆ ѿ дре́ва съста́вити є҆гѡ̀) ᲂу҆твердѝ є҆гѡ̀ на тве́рдомъ ка́мени, и҆ ѡ҆сновѝ по Бжⷭ҇тве́нномꙋ твое́мꙋ Є҆ѵⷢ҇лскомꙋ гла́сꙋ, є҆го́же ни вѣ́тръ, ни вода̀ повреди́ти да не воꙁмо́жетъ: и҆ бл҃говолѝ є҆мꙋ̀ спѣ́шнѡ въ съверше́ние и҆ бл҃гі́й коне́цъ привести́сѧ, и҆ хотѧ́щихъ въ не́мъ жи́ти ѿ всѧ́кагѡ навѣ́та ᲃъпроти́вна беꙁъ вре́да ᲃъхранѝ: Ꙗ҆́кѡ твоѧ̀ держа́ва и҆ твоѐ є҆́сть ца́рство, и҆ ᲃи́ла, и҆ ᲃла́ва, Ѿц҃а̀ и҆ ᲃн҃а, и҆ ᲃт҃а́гѡ Дх҃а ны́не и҆ прⷭ҇нѡ и҆ въ вѣ́ки вѣ́кѡвъ.

Ли́къ,

А҆ми́нь.

А҆ще ᲂу҆́бѡ ка́менный бы́ти и҆́матъ до́мъ, вꙁе́млетъ І҆ере́ѵ̆ ка́мений три, и҆ ста́въ надъ ро́вомъ и҆де́же ѡ҆снова́нїе бы́ти и҆́матъ, гл҃е́тъ,

Ꙍ҆снова́етсѧ до́мъ се́й, Въ и҆мѧ Ѿц҃а̀.

И҆ сотво́ръ крⷭ҇тное зна́менїе надъ ро́вомъ ка́менемъ є҆ди́нѣмъ, ме́щетъ є҆гѡ̀ въ ро́въ на ми́ло та́мѡ ѿ дѣла́телїй и҆ꙁлѣѧ́нное. И҆ вꙁемъ вто́рый, и҆ сътво́ръ та́кожде ме́щетъ є҆гѡ̀, гл҃ѧ̀:

и҆ ᲃн҃а.

Вꙁе́мъ же тре́тїй, и҆ та́кожде зна́менїе крⷭ҇тное сотво́ръ, ме́щетъ є҆гѡ̀, гл҃ѧ̀:

И҆ ᲃт҃а́гѡ Дх҃а. А҆ми́нь.

А҆бїе же кро́питъ всѧ̀ рѡ́вы и҆ мѣ́сто все, гл҃ѧ̀:

Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

А҆́ще же древѧ́ный до́мъ и҆́матъ бы́ти, вꙁемъ ᲃеки́рꙋ ᲂу҆дарѧ́етъ въ є҆дино̀ бе́рвнѡ сꙋ́щее поло́женѡ къ Въсто́кѡмъ три́жды, гл҃ѧ̀:

Ѻ҆снова́етсѧ домъ се́й, Въ и҆мѧ Ѿц҃а̀,  и҆ ᲃн҃а,  и҆ ᲃт҃а́гѡ  Дх҃а. А҆ми́нь.

И҆ та́кожде кро́питъ сщ҃енною водо́ю мѣ́сто и҆ дре́во и҆ дѣла́телїй, и҆ а҆́бїе тво́ритъ ѡ҆бы́чный ѿпꙋ́стъ дне́вный, и и҆де́тъ въ своѧ́ си.

Прише́дшꙋ І҆ере́ю въ до́мъ, є҆го́же бл҃гослови́ти и҆́матъ, подоба́етъ є҆мꙋ̀ и҆мѣ́ти съ собо́ю сщ҃еннꙋю во́дꙋ въ ᲃосꙋ́дѣ и҆ кропи́лце, и҆ є҆ле́й въ ма́ломъ сосꙋ́дцѣ: къ семꙋ́же на ко́ейждо ѿ четыре́хъ стѣ́нъ да бꙋ́детъ КРЕ́СТЪ напи́санъ ᲃи́цевый:

Кре́стъ, напи́санный на сте́нахъ

Вꙁе́мъ же на себе́ Е҆пітра́хиль, (а҆́ще хо́щетъ и҆ Фелꙍ́нъ,) начина́етъ ѡ҆бычнѡ:

Бл҃гослове́нъ Бг҃ъ нш҃ъ:

И҆ а҆́бїе пое́тъ съ Кли́рики:

Цр҃ю̀ небе́сный ᲂу҆тѣши́телю Дш҃е и҆́стинны:

Сконча́нꙋ же пѣ́нїю, чтетъ: Трⷭ҇то́е, Ѿч҃е нш҃ъ: Гд҃и поми́лꙋй, в҃і.

Сла́ва: И҆ ны́нѣ: Прїйдѣ́те поклони́мсѧ, гⷤ.

И҆ Ѱало́мъ ч҃:

Живы́й въ по́мощи вы́шнѧгѡ:

По ѱалмѣ́ же чтетъ, и҆лѝ пое́тъ тропа́рь се́й, гла́съ и҃:

Ꙗ҆́коже Закхе́евꙋ до́мꙋ твои́мъ, Хє҃, вхо́домъ ᲃпасе́нїе бы́сть, си́це и҆ ны́нѣ вхо́домъ ᲃщ҃е́нныхъ ᲃлꙋжи́телїй твои́хъ, и҆ съ ни́ми ст҃ы́хъ твои́хъ А҆́гг҃лъ, ми́ръ тво́й пода́ждь хра́мꙋ ᲃемꙋ̀, и҆ млⷭ҇тивнѡ бл҃словѝ є҆гѡ̀, ᲃпаса́ѧ и҆ просвѣща́ѧ всѣ́хъ жи́ти хотѧ́щихъ въ не́мъ.

Сꙋ́щей же трапе́зѣ ᲂу҆брꙋ́сомъ покры́той, и҆ Крⷭ҇тꙋ̀ и҆ ᲃвѣща́мъ горѧ́щымъ, и҆ водѣ̀ сщ҃е́нной и҆ є҆ле́ю, ста́въ І҆ере́ѵ̆ къ Восто́кꙋ лице́мъ и҆ ре́кшꙋ:

Гд҃ꙋ помо́лимсѧ.

И҆ Кли́рꙋ.

Гд҃и поми́лꙋй.

Чтетъ Моли́твꙋ сїю̀ во ᲂу҆слыша́нїе всѣ́мъ:

Гд҃и І҆и҃ᲃ Хє҃ Бж҃е нш҃ъ, и҆ꙁво́ливый подъ сѣ́нь Закхе́ѡвъ внитѝ, и҆ спасе́нїе само́мꙋ и҆ всемꙋ̀ до́мꙋ є҆гѡ̀ бы́вый: Са́мъ и҆ ны́нѣ хотѧ́щихъ здѣ̀ жи́ти, и҆ на́ми недосто́йными мо́лбы тебѣ̀ и҆ мл҃нїѧ приносѧ́щими, ѿ всѧ́кагѡ вре́да соблюдѝ неврежде́нныхъ, блⷭ҇влѧ́ѧ и҆́хъ и҆ ѡ҆бита́лище сі́е, и҆ ненавѣ́тенъ живо́тъ и҆́хъ сохранѧ́ѧ, и҆ и҆ꙁ̾ѡби́лнѡ всѧ бл҃га́ѧ и҆́мъ твои́мъ блⷭ҇ве́нїемъ всегда̀ подава́ѧ: Ты́ бо є҆сѝ блⷭ҇вѧ́й и҆ ст҃ѧ́й всѧ́ческаѧ, и҆ тебѣ̀ подоба́етъ всѧ́каѧ ᲃла́ва, че́сть и҆ поклоне́нїе, съ беꙁнача́льнымъ ти Ѿ҆ц҃емъ, и҆ прⷭ҇ст҃ымъ, и҆ бл҃ги́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ во вѣ́ки вѣ́кѡвъ.

Кли́ръ,

А҆ми́нь.

І҆ере́ѵ̆,

Ми́ръ всѣ́мъ.

Кли́ръ,

И҆ дх҃о́ви твое́мꙋ.

І҆ере́ѵ̆,

Гла́вы ва́шѧ Гв҃и приклони́те.

Кли́ръ, Тебѣ̀ Гд҃и.

І҆ере́ѵ̆ же чтетъ Моли́твꙋ ᲃі́ю та́йнѡ:

Влады́ко Гд҃и Бж҃е нш҃ъ, на высо́кихъ живы́й и҆ на всѧ̀ приꙁира́ѧй: блⷭ҇ви́вый до́мъ Лава́новъ при вхо́дѣ І҆а́кѡвли, и҆ до́мъ Пенте́фрїевъ при І҆ꙍ́сифовомъ: блⷭ҇ви́вый до́мъ А҆веда́рїинъ въ вохо́дѣ Кѵвꙍ́та: и҆ Воплоще́нїемъ Ха҃ твое́гѡ, спⷭ҇нїе до́мꙋ Закхе́ѡвꙋ бы́вый, ᲃа́мъ блⷭ҇вѝ и҆ до́мъ се́й, и҆ въ не́мъ жи́ти хотѧ́щихъ стра́хомъ твои́мъ ѡ҆градѝ, и҆ невреди́мыхъ ѿ сопроти́вныхъ ᲃохранѝ, и҆ блⷭ҇ве́нїе твоѐ съ высоты̀ жи́лища твое́гѡ ниꙁпослѝ и҆́мъ, и҆ блⷭ҇вѝ и҆ ᲂу҆множѝ всѧ бл҃га́ѧ въ до́мꙋ̀ се́мъ.

Во́ꙁгласъ.

Твое́ бо є҆́сть, є҆́же ми́ловати и҆ спаса́ти на́съ, Бж҃е нш҃ъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ во вѣ́ки вѣ́кѡвъ.

Кли́ръ,

А҆ми́нь.

А҆́бїе же посе́мъ зна́менавъ три́жды є҆ле́й, гл҃ѧ̀:

Въ и҆мѧ Ѿ҆ц҃а, и҆ ᲃн҃а, и҆ ᲃт҃а́гѡ Дх҃а. А҆ми́нь.

Чтетъ надъ ни́мъ Моли́твꙋ ᲃі́ю:

Гд҃и Бж҃е нш҃ъ, при́ꙁри ны́нѣ млⷭ҇тивнѡ:

И҆щѝ на за́дѣ въ ѡ҆сщ҃енїи Монастырѧ̀, на Листе рѯ҃ѳ⁷.

По моли́твѣ же вꙁе́млетъ ᲃщ҃е́ннꙋю во́дꙋ, и҆ кро́питъ є҆́ю всѧ̀ стѣ́ны до́мꙋ ѡ҆́крестъ и҆ всѧ̀ клѣ́ти є҆гѡ̀, гл҃ѧ̀:

Въ и҆мѧ Ѿ҆ц҃а̀, и҆ ᲃн҃а, и҆ ᲃт҃а́гѡ Дх҃а, ѡ҆кропле́нїемъ воды̀ сеѧ̀ сщ҃е́нныѧ, въ бѣ́гство да претвори́тсѧ вселꙋка́вое бѣсо́вское дѣ́йство. А҆ми́нь.

Ѿкропи́въ же всѐ, вꙁе́мъ є҆ле́й, пома́ꙁꙋетъ и҆́мъ стѣ́ны хра́ма, и҆де́же є҆́сть Кре́стъ напи́санъ въ сре́днее є҆гѡ̀, наче́нъ ѿ Восто́чныѧ, посе́мъ и҆ за́паднюю, и҆ поси́хъ сѣ́вернꙋю, въ коне́цъ же ю҆́жнꙋю, надъ ко́ейждѡ гл҃ѧ̀:

Блⷭ҇влѧ́етсѧ до́мъ се́й пома́ꙁанїемъ ᲃт҃а́гѡ є҆ле́а ᲃегѡ̀, въ и҆мѧ Ѿ҆ц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Пома́ꙁавъ же а҆́бїе ᲃвѣща́ми горѧ́щими сожига́етъ пома́ꙁанїе, на ко́ейждо ᲃтѣнѣ̀. Семꙋ́же быва́ющꙋ, пѣвцѝ пою́тъ Стіхи́рꙋ ᲃі́ю. Гла́съ є҃:

Блⷭ҇вѝ, Гд҃и, до́мъ се́й, и҆ и҆сполнѝ є҆гѡ̀ зе́мныхъ твои́хъ бл҃гъ: и҆ въ не́мъ бл҃гоче́стнѡ жи́ти хотѧ́щихъ ѿ всѧ́кагѡ зла́гѡ ѡ҆б̾стоѧ́нїѧ неврежде́нныхъ сохранѝ, и҆ всѧ́кое и҆ꙁ̾ѡби́лїе нбⷭ҇нагѡ и҆ зе́мнагѡ твое́гѡ блⷭ҇ве́нїѧ тѣ́мъ дарꙋ́й, и҆ ꙗ҆́кѡ ще́дръ поми́лꙋй, по вели́цѣй твое́й ми́лости.

Сконча́нꙋ же помаꙁа́нїю, ста́нетъ І҆ере́ѵ̆ лице́мъ къ Восто́кѡмъ. И҆ а҆́ще домъ вели́кїй ка́менный, и҆лѝ древѧ́ный є҆́стъ, бо́лшеѧ ра́ди че́сти Господи́на до́мꙋ, а҆́ще І҆ере́ѵ̆ и҆ꙁво́литъ мо́жетъ и҆ Є҆ѵⷢ҇лїе честѝ, рекъ:

Премꙋ́дрость про́сти, ᲂу҆слы́шимъ ᲃт҃о́е Є҆ѵⷢ҇лїе, ѿ Лꙋкѝ ᲃт҃а́гѡ Є҆ѵⷢ҇лїѧ чте́нїе.

Ли́къ,

Сла́ва тебѣ̀, Гд҃и.

И҆ чтетъ ѿ Главы̀ ѳ҃і. Зача́ло ч҃д, є҆го́же нача́ло сі́е:

Въ вре́мѧ ѻ҆́но. Прі́йде І҆и҃ᲃ въ І҆ерихѡ́нъ:

Коне́цъ же се́й.

Прі́йде бо Сн҃ъ члчⷭ҇кїй вꙁыска́ти и҆ спастѝ поги́бшее.

Ли́къ,

Сла́ва тебѣ̀, Гд҃и.

И҆ а҆́бїе чтꙋ́тъ Ѱало́мъ р҃.

Млⷭ҇ть и҆ сꙋ́дъ пою̀ тебѣ̀, Гд҃и: Весь до конца̀.

А҆́ще же І҆ере́ѵ̆ хо́щетъ, гл҃ѧ̀ Ѱало́мъ, ка́дитъ весъ домъ.

Посе́мъ же гл҃е́тъ Є҆кте́нїѧ ᲃі́ѧ:

Поми́лꙋй на́съ, Бж҃е, по вели́цѣй млⷭ҇ти твое́й, мо́лимтисѧ:

Е҆щѐ моли́мсѧ ѡ҆ є҆́же ниꙁпосла́ти блⷭ҇ве́нїе ᲃвоѐ на до́мъ се́й и҆ на раба̀ свое́гѡ И҆мⷬ҇къ: и҆ на всѣ́хъ въ не́мъ бл҃гоче́стнѡ жи́ти хотѧ́щихъ, и҆ посла́ти и҆́мъ А҆́гг҃ла свое́гѡ млⷭ҇тива, соблюда́юща и҆ сохранѧ́юща и҆́хъ ѿ всѧ́кагѡ зла̀, и҆ наставлѧ́юща къ дѣ́ланїю всѣ́хъ добродѣ́телей, и҆ ко и҆сполне́нїю ᲃт҃ыхъ Хв҃ыхъ за́повѣдїй: и҆ ѡ҆ є҆́же сохрани́ти и҆́хъ ѿ гла́да, гꙋби́тельства, трꙋ́са, пото́па, ѻ҆гнѧ̀, меча̀ и҆ наше́ствїѧ и҆ноплеме́нникъ, и҆ всѧ́коѧ ᲃмертоно́сныѧ ра́ны, и҆ дарова́ти и҆́мъ здра́вїе, и҆ долгоде́нствїемъ ѡ҆гради́ти и҆́хъ, и҆ во все́мъ ᲂу҆гобꙁи́ти, рце́мъ всѝ, Гд҃и, ᲂу҆слыши и҆ поми́лꙋй.

Е҆щѐ моли́мсѧ за всѧ̀ бра́тїа на́ша и҆ за всѧ̀ и҆ пр:

Во́ꙁгласъ.

Ꙋ҆слы́ши ны̀, Бж҃е ᲃп҃и́телю нш҃ъ:

И҆ тво́ритъ дне́вный ѡ҆бы́чный ѿпꙋ́стъ: многолѣ́тствовавъ же до́мꙋ Влады́цѣ, ѿхо́дитъ въ своѧ́ си, бл҃годарѧ̀ Бг҃а.

Наче́нъ І҆ереѵ̆ ѡ҆бы́чнѡ:

Блⷭ҇ве́нъ Бг҃ъ нш҃ъ:

Чтетъ,

Цр҃ю нбⷭ҇ный: Трⷭ҇то́е: Ѿч҃е нш҃ъ: Гд҃и поми́лꙋй, в҃і.

Сла́ва: И҆ ны́нѣ: Прїйдѣ́те поклони́мсѧ, гⷤ. И҆ Ѱал: рм҃в. Гд҃и ᲂу҆слы́ши моли́твꙋ:

Сконча́въ же Ѱал: и рек:

Гд҃ꙋ помол: и҆ Гд҃и поми́л:

Чтетъ Мол: сі́ю.

Бж҃е Вѣ́чный, и҆́же се́дьмъ седми́цею раждеже́ннꙋю пещъ, и҆ пла́мень и҆́же въ Вавѵлꙍ́нѣ на ро́сꙋ преложи́лъ є҆сѝ, и҆ въверже́нныѧ вню̀ ѿ царѧ̀ Навꙋходоно́сѡра ст҃ы́ѧ три Ѻ҆тро́ки, А҆на́нїю, А҆ꙁа́рїю, и Мисаи́ла цѣ́лы сблю́лъ є҆сѝ: Са́мъ блⷭ҇вѝ и҆ Пе́щъ сі́ю, вели́кїѧ ра́ди твое́ѧ млⷭ҇сти: и блⷭ҇вѝ въ не́й дѣ́ла рꙋ́къ рабѡ́въ твои́хъ, и҆ спѣ́й и҆́мъ бл҃годеѧнїемъ твои́мъ, и҆ и҆спра́ви ѧ҆̀ по множествꙋ̀ щедрѡ́тъ твои́хъ: Молитва́ми Пртⷭ҇ыѧ Влады́чица на́шеѧ Бц҃а, и҆ прⷭ҇нѡ Дв҃ы Мр҃іѧ, ᲃи́лою чⷭ҇тна́гѡ и животворѧ́щаго Кртⷭ҇а, предста́тел̾ствомъ Превели́кихъ Чинонача́льникъ Михаи́ла и҆ Гаврїи́ла, и всѣ́хъ небе́сныхъ ᲃи́лъ беꙁпло́тныхъ, чⷭ҇тна́гѡ и҆ ᲃла́внагѡ Пррⷪ҇ка Предте́ча и҆ Кртⷭ҇лѧ І҆ѡа́нна, ᲃт҃ыхъ сла́вныхъ и҆ всехва́льныхъ А҆пⷭ҇лъ, ᲃт҃а́гѡ Сщ҃енномч҃ника Кѵпрїа́на, и҆́же въ ᲃт҃ы́хъ Ѿц҃а̀ на́шегѡ Никола́ѧ Мѵрылѵкїйскагѡ чꙋдотво́рца, и҆ всѣ́хъ ᲃт҃ы́хъ: Ꙗ҆́кѡ ты́ є҆сѝ бл҃гословѧ́й и҆ ᲃт҃ѧ́й всѧ́ческаѧ Бж҃е нш҃ъ, и҆ тебѣ̀ ᲃла́вꙋ воꙁсыла́емъ Ѿц҃ꙋ̀ и ᲃн҃ꙋ и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆ми́нь.

Вꙁе́мъ же І҆ереѵ̆ ᲃщ҃е́ннꙋю во́дꙋ, кро́питъ пе́щъ и҆ꙁ̾внѐ и҆ внꙋ́тръ, гл҃ѧ̀:

Блⷭ҇влѧ́етсѧ пе́щъ сі́ѧ ѡ҆кропле́нїемъ воды̀ сеѧ̀ ᲃщ҃енныѧ, въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ посе́мъ, гл҃е́тъ Є҆кте́нїа сі́ѧ.

Поми́лꙋй на́съ Бж҃е по вели́цѣй млⷭ҇ти твое́й, моли́м̾тисѧ ᲂу҆слы́ши и҆ поми́лꙋй, гⷤ.

Є҆щѐ моли́мсѧ ѡ҆ млⷭ҇ти, жи́ꙁни, ми́рѣ, здра́вїи, ᲃпⷭ҇нїи, посѣще́нїи, проще́нїи и҆ ѿпꙋще́нїи грѣхѡ́въ рабѡ́въ твои́хъ И҆мⷬ҇къ: и҆ ѡ҆ є҆́же бл҃гослови́тисѧ и҆ ᲂу҆множи́ти дѣ́ла рꙋкъ трꙋжда́ющих̾сѧ въ пе́щи се́й, моли́мтисѧ Гд҃и ᲂу҆слы́ши, и҆ млⷭ҇тивнѡ поми́лꙋй.

И҆ воꙁгла́ш:

Ꙋ҆слы́ши ны Бж҃е сп҃си́телю нш҃ъ:

И҆ а҆́бїе тво́ритъ ѻ҆бы́чный дне́вный ѿпꙋ́стъ.

Прише́дшꙋ І҆ере́ю на мѣ́сто и҆де́же кла́дѧꙁь и҆скопа́нъ бы́ти и҆́матъ, и҆мы́й съ собо́ю сщ҃е́ннꙋю во́дꙋ и҆ кропи́лце, вꙁе́млетъ на́ сѧ Є҆пітра́хиль, и҆ начина́етъ ѡ҆бы́чнѡ:

Блⷭ҇ве́нъ Бг҃ъ нш҃ъ: Трⷭ҇то́е: Ѿч҃е нш҃ъ: Гд҃и поми́лꙋй, в҃і.

Сла́ва: И҆ ны́нѣ: Прїйдѣ́те поклони́мсѧ, гⷤ. И҆ Ѱал: рг҃і.

Въ и҆схо́дѣ І҆и҃лвѣ ѿ Є҆гѵ́пта:

Сконча́въ же Ѱал: се́й,

Гд҃ꙋ помоли́мсѧ и҆ Гд҃и, поми́лꙋй.

Чтетъ Моли́твꙋ ᲃі́ю.

Гд҃и Бж҃е нш҃ъ, Вседержи́телю и҆ всеси́льне, творѧ́й всѧ̀ и҆ претворѧ́й хотѣ́нїемъ си то́чїю: въ непрохо́дныхъ и҆ беꙁво́дныхъ мѣ́стехъ про́ходъ и҆ и҆сто́чники вѡ́дъ и҆ꙁ̾ѡбрѣта́ѧй неиꙁ̾реченною и҆ непости́жимою ти премꙋ́дростїю: и҆́же ѿ сꙋха́гѡ ка́мене во́дныѧ и҆стещѝ сътвори́лъ є҆сѝ потѡ́ки, и҆ жаждꙋщїѧ лю́ди твоѧ̀ напои́лъ є҆сѝ: Са́мъ и҆ ны́нѣ, Влады́ко всѧ́ческихъ, ᲂу҆слы́ши моле́нїе насъ недосто́йныхъ рабѡ́въ твои́хъ, и҆ дарꙋ́й на́мъ во́дꙋ на се́мъ ме́сте, ᲃла́дкꙋю же и҆ вкꙋ́снꙋ, дово́льнꙋ ᲂу҆бѡ къ потре́бѣ, невреди́тельнꙋ же къ прїѧ́тїю: Ꙗ҆́кѡ да и҆ въ се́мъ ᲃла́вимъ Пртⷭ҇о́е и҆ Великолѣ́пое И҆мѧ твоѐ, Ѿц҃а̀, и҆ ᲃн҃а, и҆ ᲃт҃а́гѡ Дх҃а, ны́нѣ и҆ прⷭ҇нѡ, и҆ въ вѣки вѣ́кѡвъ.

Кли́ръ,

А҆ми́нь.

Абїе же І҆ере́ѵ̆ вꙁе́мъ моты́кꙋ, са́мъ въ пе́рвыхъ начина́етъ копа́ти, и҆ є҆дино́щи копа́въ, гл҃е́тъ,

Въ и҆мѧ Ѿц҃а̀,

Втори́цею же глаголе́тъ:

и҆ ᲃн҃а.

Трети́цею:

и҆ ᲃт҃а́гѡ Дх҃а. А҆ми́нь.

И҆ вꙁе́мъ ᲃщ҃е́ннꙋю во́дꙋ кро́питъ мѣ́сто и҆ дѣла́телей, гл҃ѧ̀:

Блⷭ҇ве́нїе Гд҃не бꙋ́ди на мѣ́сто сі́е, и҆ на всѣ́хъ ва́съ.

И҆ а҆́бїе тво́ритъ дне́вный Ѿпꙋ́стъ, и ѿхо́дитъ въ своѧ́ си.

Прише́дшꙋ І҆ере́ю къ Кла́дѧꙁю, и҆мы́й съ собо́ю сщ҃еннꙋю во́дꙋ и҆ Кади́лницꙋ, и҆ вже́гшꙋ свѣщѝ трѝ, вꙁе́млетъ на себѐ Е҆пітра́хиль, и҆ покади́въ Кла́дѧꙁъ, ѻ҆́крⷭ҇тъ, и҆ ста́въ къ Восто́комъ, начина́етъ ѡ҆бы́чно:

Блⷭ҇ве́нъ Бг҃ъ нш҃ъ:

Клиръ же чтетъ,

Цр҃ю нбⷭ҇ный: Трⷭ҇то́е: Ѿч҃е нш҃ъ: Гд҃и, поми́лꙋй: в҃і.

Сла́ва: И҆ ны́нѣ: Прїйдѣ́те поклони́мсѧ, гⷤ.

И҆ Ѱало́мъ к҃и: Принесѣ́те Гд҃ви, ᲃн҃ѡ́ве Бж҃іи:

По Ѱалмѣ́ же ре́кшꙋ, Гд҃ꙋ̀ помол: и҆ Гд҃и, поми́лꙋй.

Чтетъ надъ Кла́дѧꙁемъ Моли́твꙋ ᲃі́ю:

Зижди́телю и҆ Тво́рче всѧ́ческихъ, въ нача́ле ᲃътвори́вый Нб҃о и҆ Зе́млю и҆ Вѡ́ды, ве́рхꙋ и҆́хже Дх҃ъ Бж҃ій ноша́шесѧ: и҆ ᲃло́вомъ свои́мъ събра́вый вѡ́ды поднбⷭ҇ныѧ въ совокꙋпле́ние є҆ди́нѡ: Посыла́ѧ и҆сто́чники въ де́брехъ и҆ посре́дѣ гѡ́ръ провожда́ѧй во́ды, напаѧ́ющаѧ всѧ̀ звѣ́рѧ се́льныѧ: го́рькїѧ вѡ́ды при Моѵ꙼се́и въ пꙋсты́ни жеꙁло́мъ ᲂу҆слади́вый, и҆ пораꙁи́вый ка́мень, и҆ потекѡ́ша вѡ́ды, и҆ жа́ждꙋщїѧ лю́ди ᲃвоѧ̀ напои́вый: При Е҆лиссе́и же Прⷪ҇ро́цѣ ᲃо́лїю беꙁча́дныѧ вѡ́ды и҆сцѣли́вый: Ты и҆ ны́нѣ ꙗ҆́кѡ бл҃гъ и҆ человекѡлю́бецъ, смире́ннѡ моли́мъ тѧ, при́ꙁри на моли́твꙋ на́съ недостѡ́йныхъ рабѡ́въ твои́хъ, и҆ ниꙁпослѝ бл҃агослове́нїе твоѐ нбⷭ҇ное на во́дꙋ сі́ю, въ стꙋде́нцѣ се́мъ сꙋ́щꙋю, и҆ Бжⷭ҇тве́нною ти ᲃи́лою и҆ крѣ́пкою десни́цею ѿженѝ ѿ неѧ̀ всѧ́кꙋю ᲃъпроти́внꙋю дѣ́телъ и҆ дѣ́йство дїа́воле: ѿимѝ ѿ не́ѧ всѧ́кꙋю го́рестъ и҆ сла́ностъ и҆ беꙁча́дство, и҆ блⷭ҇вѝ и҆ ѡ҆ст҃ѝ ю҆̀, ᲂу҆слади́ же и҆ бл҃гѡча́днꙋ сътворѝ: и҆ всѣ́мъ прїемлющимъ и҆ пі́ющимъ ѿ не́ѧ, и҆ мы́ющимсѧ є҆ю̀, да́ждъ бы́ти во здра́вїе, и҆ и҆ꙁмене́нїе всѧ́коѧ стра́сти и҆ не́дꙋга, и҆ во и҆сцѣле́ние всѧ́коѧ бо́лѣꙁни, въ ᲃла́вꙋ тебѐ є҆дина́гѡ въ Трⷪ҇ици ᲃлави́магѡ Бг҃а. Ты́ бо є҆сѝ блⷭ҇вѧ́й и҆ ст҃ѧ́й всѧ́ческаѧ, и҆ тебѣ̀ сла́вꙋ воꙁсыла́емъ, Ѿц҃ꙋ̀, и҆ ᲃн҃ꙋ, и҆ ᲃт҃омꙋ Дх҃ꙋ, ны́нѣ и҆ при́сно, и҆ въ вѣ́ки вѣ́кѡвъ.

Кли́ръ,

А҆ми́нь.

А҆бїе же вꙁе́мъ сщ҃еннꙋю во́дꙋ, влива́етъ ю҆̀ три́жды крⷭ҇таѡ́браꙁно въ стꙋде́нецъ, гл҃ѧ̀:

Блⷭ҇влѧ́ет̾сѧ и҆ ѡ҆сща́етсѧ ᲃтꙋде́нецъ ᲃе́й и҆ вода̀ въ не́мъ сꙋ́щаѧ, благѡда́тїю ᲃт҃а́гѡ Дх҃а и҆ꙁлїѧ́нїемъ воды̀ сеѧ̀ ᲃщ҃е́нныѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ тво́ритъ ѡ҆бы́чный дне́вный Ѿпꙋ́стъ.

И҆ посе́мъ вкꙋша́етъ пе́рвѣе І҆ере́ѵ꙼ ѿ воды̀ кла́дѧꙁѧ, та́же тꙋ сꙋ́щїи съ ни́мъ, ѿхо́дѧтъ въ своѧ́ си.

По и҆ꙁверже́нїи впа́дшагѡ нечи́стагѡ, пре́жде подоба́етъ и҆ꙁлѣѧ́ти и҆ꙁъ не́гѡ м҃ вѣ́деръ воды̀, пото́мъ же І҆ере́ѵ꙼ вже́гъ трѝ свѣ́щи, и҆ вꙁе́мъ на себѐ Е҆пітра́хиль ка́дитъ ᲃтꙋде́нецъ ѻ҆́крⷭ҇тъ, и҆ ста́въ къ восто́кꙋ лице́мъ, начина́єтъ ѡ҆бы́чнѡ:

Блⷭ҇ве́нъ Бг҃ъ нш҃ъ: Цр҃ю нбⷭ҇ный: Трⷭ҇то́е: Ѿч҃е нш҃ъ: Гд҃и поми́лꙋй: в҃і.

Сла́ва: И҆ ны́нѣ: Прїйдѣ́те поклони́мсѧ, гⷤ.

И҆ Ѱало́мъ н҃:

Поми́лꙋй мѧ Бж҃е:

Посе́мъ чтетъ Моли́твꙋ ᲃі́ю.

Бж҃е Вели́кїй и҆ ди́вный, неиꙁрече́нною ти блгⷭ҇тїю, и҆ бога́тымъ про́мысломъ строѧ́й члчⷭ҇кїй живо́тъ, и҆ дарова́вый на́мъ твоѧ̀ зе́мнаѧ бл҃га́ѧ: претвори́вый при Мꙍѵ꙼се́и го́ркꙋю во́дꙋ въ сла́дкꙋю и҆ врежда́ющꙋю во́дꙋ при Е҆ліссе́и ᲃо́лію и҆сцѣли́вый: И҆ верхо́вномꙋ твое́мꙋ А҆пⷭ҇лꙋ Петрꙋ̀ видѣ́ніемъ и҆ гла́сомъ въꙁакони́вый, ничто́же скве́рно, и҆лѝ нечи́сто мнѣ́ти ѿ сотворе́нныхъ тобо́ю на пи́щꙋ члове́кѡмъ бы́ти: И҆ съсꙋ́домъ твои́мъ и҆ꙁбра́ннымъ Па́вломъ А҆пⷭ҇ломъ, всѧ̀ чи́ста чи́стымъ бы́ти заповѣда́вый: Ты Влады́ко чл҃кѡлю́бче блⷭ҇вѝ во́дꙋ сі́ю, и҆ ѡ҆чи́сти ю҆̀ ѿ всѧ́кїа нечистоты̀, и҆ ѡ҆ст҃ѝ ю҆̀ Дх҃омъ твои́мъ ᲃт҃ы́мъ въ є҆́же бы́ти чи́ста, здра́ва же, и҆ беꙁвре́дна вкꙋша́ющимъ и҆ пі́ющимъ ѿ неѧ, и҆ мы́ющимсѧ є҆́ю: Ты́ бо є҆сѝ Бг҃ъ нш҃ъ, блⷭ҇вѧ́й и҆ ст҃ѧ́й всѧ́ческаѧ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ во вѣ́ки вѣ́кѡвъ.

Кли́ръ,

А҆ми́нь.

Вꙁе́мже сщ҃еннꙋю во́дꙋ влива́етъ ю҆̀ три́жды крⷭ҇таѡ́браꙁно въ ᲃтꙋде́нецъ ᲃе́й, и҆ вода̀ в̾не́мъ сꙋ́щаѧ благода́тїю ᲃт҃а́гѡ Дх҃а и҆ꙁлїѧ́нїемъ воды̀ сеѧ̀ ᲃщ҃енныѧ, Въ и҆мѧ Ѿц҃а̀,  и҆ ᲃн҃а,  и҆ ᲃт҃а́гѡ  Дх҃а. А҆ми́нь.

И҆ посе́мъ а҆́бїе тво́ритъ ѿпꙋ́стъ дневный, и҆ поче́рпъ во́дꙋ ѿ стꙋденца.

Первѣ́е вкꙋша́етъ І҆ере́ѵ꙼, та́же предстоѧ́щїи, и҆ отхо́дѧтъ въ своѧ́ си.

А҆́ще ᲂу҆́бѡ впа́дшее не раꙁгнило́сѧ є҆́стъ, подоба́етъ и҆ꙁврещѝ є҆̀ во́нъ, и҆ съсꙋдъ и҆́ный чⷭ҇тый ѿмы́вше и҆ꙁвнѣ̀ и҆ и҆ꙁвнꙋтръ ᲂу҆́дꙋ.

І҆ере́ѵ꙼ вꙁемъ на себѐ Е҆пітра́хиль, и҆ покади́въ съсꙋ́дъ внѣꙋ́дꙋ и҆ внꙋт̾рꙋ́дꙋ, повелѣваетъ: влїѧ́ти вне́мъ Вино̀, и҆лѝ Е҆лей, и҆лѝ и҆нѡ что̀ а҆́ще бꙋ́детъ: са́мже наче́нъ ѡ҆бы́чнѡ.

Блⷭ҇ве́нъ Бг҃ъ нш҃ъ:

Чтетъ. Цр҃ю нбⷭ҇ный: Трⷭ҇то́е: Ѿч҃е нш҃ъ: Гд҃и поми́лꙋй: в҃і.

Сла́ва: И҆ ны́нѣ: Прїйдѣ́те, поклони́мсѧ, гⷤ.

И҆ Ѱало́мъ н҃:

Поми́лꙋй мѧ Бж҃е:

По Ѱалмѣ́ же ре́къ,

Гд҃ꙋ помоли́мсѧ, и Гд҃и, поми́лꙋй.

Чтетъ Моли́твꙋ сі́ю.

Ст҃ы́й Влады́ко Гд҃и І҆и҃ᲃ Хє҃ Бж҃е нш҃ъ, и҆́же твои́мъ бл҃гоꙋтро́бнымъ на землѝ прише́ствїемъ всѧ́кꙋю нечистотꙋ̀ вра́жїю раꙁдрꙋши́лъ є҆сѝ, ре́къ: не ѡ҆скверни́тисѧ члове́кѡмъ входѧ́щими въ ᲂу҆ста̀, но всѧ̀ чи́ста чи́стымъ бы́ти: и҆ ᲃъсꙋ́домъ твои́мъ и҆ꙁбра́ннымъ А҆пⷭ҇ломъ Па́вломъ наꙋчи́вый на́съ вѣ́ровати, всѣмъ създа́ннымъ тобо́ю до́брымъ бы́ти, и҆ ничто́же ѿмѣ́тнѡ, па́че же Бж҃іимъ ᲃло́вомъ и҆ моли́твою ѡ҆сщ҃еннѡ: Ты ᲃа́мъ и҆ ны́нѣ бл҃гословѝ Вино̀ сі́е, (и҆лѝ: Е҆ле́й, и҆лѝ и҆́нѡ что̀ а҆́ще бꙋдетъ, здѐ и҆менꙋ́й) свое́ю бл҃года́тїю и҆ ѡ҆кропле́нїемъ ᲃщ҃е́нныѧ воды̀ ѡ҆ и҆менѝ твое́мъ, всѧ́кꙋю скве́рнꙋ, и҆лѝ ᲂу҆сꙋмнѣ́нїе впа́дшаго ра́ди внѐ га́да дѣ́телїю непрі́ѧꙁне́ннагѡ, ѿженѝ ѿ со́вѣсти рабѡ́въ твои́хъ: и҆ да́ждъ и҆́мъ ᲂу҆пова́нїемъ и҆ и҆ꙁвѣще́нїемъ щедрѡ́тъ твои́хъ, семꙋ̀ причасти́тисѧ въ весе́лїе, и҆ всѣ́мъ вкꙋша́ющимъ ѿ не́гѡ беꙁъ ᲂу҆сꙋмнѣ́нїѧ въ ѡ҆сщ̀енїе и҆ чⷭ҇той ᲃо́вѣсти пристꙋпа́ти къ Прчⷭ҇тымъ ти Та́йнамъ: Ты́ бо є҆си блⷭ҇влѧ́й и҆ ст҃ѧ́й всѧ́ческаѧ, и҆ тебѣ̀ ᲃла́вꙋ воꙁсыла́емъ, съ беꙁнача́льнымъ ти Ѿц҃емъ, и҆ Прⷭ҇ты́мъ, и҆ бл҃ги́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆минь.

А҆́бїе же посе́мъ вꙁе́мъ ᲃщ҃еннꙋю во́дꙋ Бг҃оѧвле́нскꙋю, влива́етъ внѐ гⷤ, крⷭ҇таѡ́браꙁнѡ, гл҃ѧ̀:

Блⷭ҇влѧ́етсѧ и҆ очища́етсѧ Вино̀ сі́е, (и҆лѝ а҆́ще и҆́нѡ чтѡ̀ бꙋ́детъ, здѐ и҆менꙋетъ) благода́тїю Пртⷭ҇а́гѡ Дх҃а, ѡ҆кропле́нїемъ воды̀ сеѧ̀ ᲃщ҃енныѧ, Въ и҆мѧ Ѿц҃а̀  и҆ ᲃн҃а  и҆ ᲃт҃а́гѡ  Дх҃а. А҆ми́нь.

И҆ сътвори́въ ѡ҆бы́чный ѿпꙋ́стъ дне́вный, пе́рвѣе са́мъ І҆ере́ѵ꙼ вкꙋша́етъ ѿ блⷭ҇ве́ннагѡ пи́тїѧ, и҆лѝ ꙗ҆́ди, пото́мъ же до́мꙋ Влады́ка.

Вѣ́стнѡ же бꙋ́ди, ꙗ҆́кѡ а҆́ще впа́дшее живо́тнѡ и҆ꙁгнило̀ бꙋ́детъ, пи́тїе, и҆лѝ ꙗ҆́дь внѧ́же впадѐ, во́нъ и҆ꙁлїѧ́нѡ нико́мꙋ же ѿ ни́хъ вкꙋша́ющꙋ да бꙋ́детъ: и҆лѝ ꙗ҆́коже І҆ере́ѵ꙼ раꙁсꙋ́дитъ, си́це да сътво́рѧтъ.

И҆скопа́ннымъ сꙋ́щимъ ро́вѡмъ, и҆ прине́сеннымъ бы́вшимъ ро́ждїѧмъ, І҆ере́ѵ꙼ и҆мы́й съ собо́ю сщ҃еннꙋю во́дꙋ прише́дъ, и҆ вꙁемъ на себѐ Е҆пітра́хиль, и҆ стоѧ̀ надъ ро́ждіѧми къ Восто́кꙋ лице́мъ, начина́ет ѡ҆бы́чнѡ:

Блⷭ҇ве́нъ Бг҃ъ нш҃ъ:

и҆ чтетъ Трⷭ҇то́е: Ѿч҃е нш҃ъ: Гд҃и поми́лꙋй: в҃і.

Сла́ва: И҆ ны́нѣ: Прїйдѣ́те, поклони́мсѧ, гⷤ.

И҆ Ѱало́мъ о҃ѳ.

Пасы́й І҆и҃лѧ вонмѝ наставлѧ́ѧй ꙗ҆́кѡ ѡ҆вча̀ І҆ѡⷭ҇:

Сконча́въ же Ѱало́мъ, и҆ рекъ, Гд҃ꙋ помоли́мсѧ и҆ Гд҃и, поми́лꙋй.

Чтетъ Моли́твꙋ ᲃі́ю.

Гд҃и І҆и҃ᲃ Хє҃, Бж҃е нш҃ъ, и҆же є҆сѝ лоза̀ и҆стиннаѧ, и҆ Ѿц҃ъ тво́й дѣла́тель, ты и҆ А҆пⷭ҇лы своѧ̀ наре́клъ є҆сѝ ро́ждиѧми: Ты и҆ І҆и҃лѧ и҆ꙁгна́въ въмѣ́сто є҆гѡ̀ ꙗ҆ꙁы́ки насади́лъ є҆си Ты и҆ ны́не, Влады́ко, посѣтѝ Виногра́дъ ᲃе́й, и҆ насадѝ є҆гѡ̀: ᲂу҆глꙋбѝ ми́лость твою̀ нане́мъ: да́ждь є҆мꙋ̀ храни́телѧ, по́мощъ твою̀, ѡ҆градѝ в̾хо́ды и҆ и҆схо́ды єгѡ̀ твои́мъ про́мысломъ и҆ꙁба́ви єгѡ̀ ѿ всѧ́каго врежде́нїѧ, гꙋсе́ницъ, хрꙋщѡ́въ, и҆ мнѡгоѡ́браꙁныхъ мꙋ́хъ, и҆ мꙋ́шницъ, и҆ че́рвїй, и҆ всѧ́кихъ га́дѡвъ и҆ звѣ́рей, ѿ гра́да же, ᲃнѣ́га, мра́ꙁа, и҆ ледѧ́ници нꙋ́жднѡ носи́мыѧ, ѿ ᲃтра́шныѧ зимы̀ и҆ вѣ́трѡвъ сожже́нїѧ: ѿ бꙋ́рѧ и҆ бѣсѡ́въ, и҆ всѧ́кагѡ нахожде́нїѧ ви́димыхъ же и҆ неви́димыхъ врагѡ́въ. При́ꙁри и҆ посѣтѝ Виногра́дъ се́й, и҆ блⷭ҇вѝ є҆гѡ̀ и҆ насадѝ є҆гѡ̀ Десни́цею твое́ю, ꙗ҆́кѡ да воꙁрасти́въ воꙁда́стъ въ вре́мѧ и҆ ча́съ пло́дъ сво́й, и҆ да сподоби́мсѧ и҆ мы̀ твое́ю благода́тїю собра́ти є҆гѡ̀, и҆ принестѝ тебѣ̀ ѿ негѡ̀, на́шемꙋ Влады́цѣ и҆ бл҃года́телю къ соверше́нїю беꙁ̾кровныѧ ти Же́ртвы Прчⷭ҇тыѧ и҆ Бжⷭ҇тве́нныѧ Крвѐ твое́ѧ, по твое́мꙋ преда́нїю и҆ повелѣ́нїю съверша́емыѧ въ ѻ҆ставле́нїе грѣхѡ́въ на́шихъ, Ты́ бо є҆сѝ Бг҃ъ млⷭ҇тій и҆ щедрѡ́тъ, и҆ тебѣ̀ ᲃла́вꙋ воꙁсыла́емъ съ беꙁнача́льнымъ ти Ѿц҃емъ, и҆ съ прⷭ҇ты́мъ, и҆ бл҃ги́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣки вѣ́кѡвъ.

Кли́ръ,

А҆минь.

И҆ вꙁе́мъ ᲃщ҃еннꙋю во́дꙋ кро́питъ є҆́ю ро́ждїа, гл҃ѧ̀,

Блⷭ҇ве́нїе Гд҃не да сни́детъ и҆ пребꙋ́детъ на Виногра́дѣ се́мъ, ѡ҆кропле́нїемъ воды̀ сеѧ̀ сщ҃е́нныѧ, Въ и҆́мѧ Ѿц҃а̀,  и҆ ᲃн҃а  и҆ ᲃт҃а́гѡ  Дх҃а. А҆ми́нь.

Посе́мъ кро́питъ рѡ́вы всѧ̀, гл҃ѧ̀,

Бл҃гослове́нїе Гд҃не да пребꙋ́детъ на землѝ се́й, Въ и҆мѧ Ѿц҃а̀, и҆ ᲃн҃а и҆ ᲃт҃а́гѡ Дх҃а. А҆ми́нь.

И҆ взе́мъ є҆динꙋ̀ ро́ꙁгꙋ са́дитъ и҆ са́мъ І҆ере́ѵ꙼, а҆́бїе же дѣла́телїе вси начина́ютъ ᲃади́ти, І҆ере́ѵ꙼ же тво́ритъ ѡ҆бы́чный Ѿпꙋ́стъ дне́вный, и҆ ѿхо́дитъ въ ᲃвоѧ̀ си.

Прине́сенымъ гро́ꙁдїѧмъ въ цр҃ковъ, и҆ поста́вленнымъ бы́вшимъ на ѡ҆бы́чномъ мѣ́стѣ по Лѵтꙋ́ргїи Бжⷭ҇ве́нной, по за Амбо́нной Моли́твѣ, покади́въ І҆ере́ѵ꙼ гроꙁдїѧ чтетъ Трⷭ҇то́е: Ѿч҃е нш҃ъ: Гд҃и поми́л: в҃і.

Сла́ва: И҆ ны́нѣ: Прїйдѣ́те поклони́мсѧ, гⷤ.

и҆ Ѱало́мъ ѯѕ҃.

Бж҃е ᲂу҆щедри́ ны и҆ блⷭ҇ви́ ны:

И҆ по Ѱалмѣ̀ Троп: и҆ Каѳ: Пра́ꙁд: И҆ посе́мъ ре́кшꙋ Дїа́конꙋ,

Гд҃ꙋ помоли́мсѧ.

и҆ Кли́рꙋ,

Гд҃и поми́лꙋй.

І҆ере́ѵ꙼ гл҃е́тъ Моли́твꙋ сі́ю.

Бж҃е ᲃп҃си́телю нш҃ъ, бл҃гоиꙁволи́вый лоꙁо́ю виногра́да нарещи́сѧ є҆диноро́дномꙋ твое́мꙋ Сн҃ꙋ Гд҃ꙋ на́шемꙋ І҆и҃ᲃ Хрⷭ҇тꙋ̀, и҆ пло́дъ є҆гѡ̀ беꙁ̾сме́ртїѧ вино́венъ бы́ти покаꙁа́вый, Дх҃а твое́гѡ благода́тїю: Са́мъ и҆ ны́нѣ Влады́ко, и҆ виногра́дный пло́дъ блгⷭ҇вѝ, и҆ да́ждъ всѣ́мъ рабѡ́мъ твои́мъ вкꙋша́ющимъ ѿ не́гѡ ѡ҆сщ҃енїе и҆ преспѣѧ́нїе дꙋшѝ, съ здра́вїемъ тѣле́снымъ: и҆ живо́тъ нш҃ъ твое́ю благода́тїю вы́нꙋ беꙁ̾мѧте́женъ сохранѝ, вѣ́чными твои́ми и҆ неѿемле́мыми дш҃а на́ша да́ры ᲂу҆краша́ѧ, и҆ ми́ръ всегда̀ лю́демъ твои́мъ дарꙋ́ѧ. Винога́дъ же вѣ́рныхъ рабѡ́въ твои́хъ блⷭ҇вѝ ᲂꙋмножѝ, и҆ всегда̀ и҆ꙁ̾ѡби́лнѡ плодоноси́ти сотворѝ, и҆ храни́лища и҆́хъ всѣ́хъ зе́мныхъ твои́хъ бл҃ги́хъ и҆сполнѝ, ꙗ҆́кѡ да всѧ́къ дово́лъ и҆мꙋ́ще, и҆ꙁ̾ѡбилꙋ́ютъ въ всѧ́комъ дѣ́лѣ бл҃ꙁѣ: Благода́тїи и҆ щедрѡта́ми, и҆ чл҃кѡлю́бїемъ є҆диноро́днагѡ твое́гѡ ᲃн҃а, съ ни́мъ же благослове́нъ є҆сѝ, съ прⷭ҇ты́мъ и҆ благи́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆минь.

Вꙁе́мъ же ᲃщ҃еннꙋю во́дꙋ кро́питъ гро́ꙁдїѧ, гл҃ѧ̀:

Блⷭ҇влѧ́етсѧ гро́ꙁдїѧ сі́ѧ, и҆ ѡ҆сщ҃а́ютсѧ ѡ҆кропле́нїемъ воды̀ сеѧ̀ ᲃщ҃енныѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Посе́мъ же раꙁдава́етсѧ А҆нти́дора, и҆ чте́тсѧ Ѱало́мъ л҃г.

Блⷭ҇влю̀ Гд҃а:

И҆ быва́етъ ѡ҆бы́чный Пра́ꙁдничный ѿпꙋ́стъ.

Вꙁе́мъ І҆ере́ѵ꙼ Е҆пітра́хиль на себѐ, и҆ покади́въ ᲃосꙋ́дъ съ Вино́мъ, начина́етъ ѡ҆бы́чнѡ:

Благослове́н Бо́гъ нш҃ъ:

и҆ чтетъ, Цр҃ю нбⷭ҇ный: Трⷭ҇то́е: Ѿч҃е нш҃ъ: Гд҃и поми́лꙋй: в҃і.

Сла́ва: И҆ ны́нѣ: Прїйдѣ́те, поклони́мсѧ, гⷤ.

И҆ Ѱало́мъ к҃в.

Гд҃ь пасе́тъ мѧ, и҆ ничто́же мѧ лиши́тъ.

Посе́мъ ре́къ.

Гд҃ꙋ помоли́мсѧ и҆ Гд҃и, поми́лꙋй.

Чтетъ Моли́твꙋ сі́ю.

Гд҃и Бж҃е нш҃ъ, благі́й и человекѡлюби́вый, при́ꙁри на Вино̀ сі́е и на пі́ющихъ ѿ не́го, и҆ блⷭ҇вѝ є҆̀, ꙗ҆́коже блⷭ҇ви́лъ є҆сѝ ᲃтꙋде́нецъ І҆а́кѡвль, и҆ Кꙋ́пель Силоа́мскꙋю, и҆ Ча́шꙋ ᲃт҃ы́хъ твои́хъ А҆пⷭ҇лъ: И҆ ꙗ҆́коже прише́дъ въ Канагалиле́и блⷭ҇ви́лъ є҆сѝ ше́сть водоно́сѡвъ, и҆ во́дꙋ въ Вино̀ преложи́лъ, є҆сѝ, и҆ ᲃла́вꙋ ᲃвою̀ ꙗ҆́ви́лъ є҆сѝ ᲃт҃ы́мъ ᲃвои́мъ Ꙋ҆ч҃еникѡмъ и҆ А҆пⷭ҇лѡмъ, си́це и҆ ны́нѣ Гд҃и, послѝ ᲃт҃ы́й тво́й Дх҃ъ на Вино̀ сі́е, и҆ блⷭ҇вѝ є҆̀ въ И҆мѧ твоѐ ᲃт҃о́е.

Ꙗ҆́кѡ ты є҆сѝ блⷭ҇вѧ́й, и҆ ст҃ѧ́й, всѧ́ческаѧ, Хє҃ Бж҃е нш҃ъ, и тебѣ̀ ᲃла́вꙋ воꙁсыла́емъ съ Ѿц҃емъ, и ᲃт҃ы́мъ Дх҃омъ, ны́нѣ и҆ прⷭ҇нѡ, и въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ꙼,

Ми́ръ всѣ́мъ.

Ли́къ,

И҆ дх҃о́ви твое́мꙋ.

І҆ере́ѵ꙼,

Гла́вы ва́ша Гд҃еви преклони́те.

Ли́къ,

Тебѣ̀ Гд҃и.

І҆ере́ѵ꙼ же чтетъ та́йнѡ Моли́твꙋ ᲃі́ю.

Гд҃и Бж҃е нш҃ъ бл҃гі́й и҆ чл҃кѡлюби́вый, при́ꙁри на вино̀ сі́е, и҆ на пі́ющихъ ѿ не́го, и҆ блⷭ҇вѝ є҆̀, ꙗ҆́коже блⷭ҇ви́лъ є҆сѝ стꙋде́нецъ І҆а́кѡвль, и҆ Кꙋ́пель Силоа́мскꙋю, и҆ Ча́шꙋ ᲃт҃ы́хъ твои́хъ А҆пⷭ҇лъ: И҆ ꙗ҆́коже прише́дъ въ Канагалиле́и блⷭ҇ви́лъ є҆сѝ ше́сть водоно́сѡвъ, и҆ во́дꙋ въ Вино̀ преложи́лъ є҆сѝ, и҆ ᲃла́вꙋ ᲃвою̀ ꙗ҆́ви́лъ є҆сѝ ᲃт҃ы́мъ ᲃвои́мъ Ꙋ҆ч҃никѡмъ и҆ А҆пⷭ҇лѡмъ: Си́це и҆ ны́нѣ Гд҃и, послѝ ᲃт҃ы́й тво́й Дх҃ъ на Вино̀ сі́е, и҆ блⷭ҇вѝ є҆̀ въ И҆мѧ твоѐ ᲃт҃о́е. Ꙗ҆́кѡ ты є҆сѝ блⷭ҇вѧй и҆ ст҃ѧ́й всѧ́ческаѧ Хє҃ Бж҃е нш҃ъ, и҆ тебѣ̀ ᲃла́вꙋ воꙁсыла́емъ съ Ѿц҃емъ, и҆ ᲃт҃ы́мъ Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ꙼,

Ми́р всѣ́мъ.

Ли́къ,

И҆ дх҃о́ви твое́мꙋ.

І҆ере́ѵ꙼,

Гла́вы ва́ша Гд҃еви преклони́те.

Ли́къ,

Тебѣ̀ Гд҃и.

І҆ере́ѵ꙼ же чтетъ та́йнѡ Моли́твꙋ ᲃі́ю.

Гд҃и Бж҃е нш҃ъ, преложи́вый во́дꙋ въ Вино̀ въ Канагалиле́йстѣмъ бра́цѣ, и҆ ᲃла́вꙋ свою̀ ꙗ҆ви́вый Ꙋ҆ч҃никѡмъ свои́мъ: Ты и҆ ны́не посѣтѝ ᲃт҃а́гѡ жи́лища твое́гѡ и҆ блⷭ҇вѝ Вино̀ сі́е, и҆ сътворѝ є҆̀ бы́ти въ бл҃горастворе́нїе и҆ здра́вїе всѧ́комꙋ пі́ющомꙋ є҆̀, и҆ ꙗ҆́кѡ да беꙁ̾всѧ́кїѧ непрїѧꙁне́нныѧ дѣ́тели пі́юще сі́е, сла́вимъ тебѐ да́телѧ всѧ́кагѡ до́брагѡ проше́нїѧ.

И҆ воꙁглаш:

Ты́ бо є҆сѝ ѡ҆сщ҃е́нїе на́ше, и҆ тебѣ̀ сла́вꙋ воꙁсыла́емъ съ беꙁнача́льнымъ ти Ѿц҃емъ, и҆ Пртⷭ҇ы́мъ, и҆ бл҃ги́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

И҆ а҆́бїе вꙁе́мъ сщ҃еннꙋю во́дꙋ, влива́етъ ма́ло въ вино̀, гл҃ѧ̀:

Бл҃гословлѧ́етсѧ вино̀ сі́е благода́тїю Пртⷭ҇а́гѡ Дх҃а ѡ҆кропле́нїемъ воды̀ ᲃеѧ̀ ᲃщенныѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а, А҆ми́нъ.

И҆ сотвори́въ ѿпꙋ́стъ ѡ҆бы́чный дне́вн., (а҆́ще не къ Лѵтꙋргиса́нїю блⷭ҇ви́лъ є҆́стъ Вино̀) ᲃамъ І҆ере́ѵ꙼ пі́етъ ѿ не́гѡ, пото́м же до́мꙋ Влады́ка є҆го́ же є҆́стъ Вино̀, и҆ є҆мꙋ́ же ѻ҆́нъ и҆ꙁво́литъ да́ти, и҆ та́кѡ ѿтхо́дѧтъ благодарѧ́ще Бг҃а.

Вꙁе́мъ І҆ере́ѵ꙼ во́дꙋ съ собо́ю и҆ Кропи́лце, и҆ Пшени́цꙋ, на Всен́очномъ блⷭ҇ве́ннꙋю, прихо́дитъ къ ни́вамъ, и҆де́же ᲃѣѧ́нїе бы́ти и҆́матъ, и҆ вꙁе́мъ на́ сѧ Е҆пітра́хиль, ста́въ къ Восто́кꙋ лице́мъ надъ ᲃѣ́менемъ начина́етъ ѡ҆бычнѡ:

Блⷭ҇ве́нъ Бг҃ъ нш҃ъ: и҆ чтетъ, Цр҃ю нбⷭ҇ный: Трⷭ҇то́е: Ѿч҃е нш҃ъ: Гд҃и поми́лꙋй, в҃і. Сла́ва: И҆ ны́нѣ: Прїйдѣ́те поклони́мсѧ, гⷤ. И҆ Ѱало́мъ: Ѯд҃.

Тебѣ̀ подоба́етъ пѣ́снь, Бж҃е, въ Сіꙍ́нѣ:

Посе́мъ ре́къ,

Гд҃ꙋ помоли́мсіѧ и҆ Гд҃и, поми́лꙋй.

Чтетъ Моли́твꙋ сі́ю.

Гд҃и Бж҃е нш҃ъ, ѿ прчⷭ҇тыѧ и҆ пребога́тыѧ дла́ни твое́ѧ, предлежа́щее пре́дъ ѡ҆чи́ма твои́ма ᲃѣ́менъ пода́ѧнїе принесо́хомъ, Влады́ко, и҆ ᲃі́е тебѣ̀ предложи́вше моли́м̾сѧ: небо̀ смѣ́ѧхѡмъ въ беꙁ̾дꙋ́шныхъ ꙁемлѧ̀ нѣ́дрехъ затвори́ти ᲃі́ѧ, а҆́ще не пе́рвѣе во́ꙁримъ на повелѣ́нїе тво́егѡ вели́чества, повелѣва́ющее роди́ти, и҆ проꙁѧба́ти ꙁемлѝ, и҆ да́ти сѣ́мена сѣ́ющемꙋ, и҆ хлѣ́бъ въ снѣ́дь. И҆ ны́нѣ моли́мъ ти́ сѧ, Бж҃е нш҃ъ, ᲂу҆слы́ши насъ молѧ́щїхъ ти́ сѧ, и҆ ѿве́рꙁѝ на́мъ съкро́вище твоѐ вели́кое, и҆ благо́е, и҆ небе́сное, и҆ и҆ꙁлѣ́й бл҃гослове́нїе твое, доне́лиже ᲂу҆довли́мсѧ по не ло́жномꙋ Твое́мꙋ ѡ҆бѣща́нїю: и҆ ѿженѝ ѿ на́съ всѧ̀ снѣда́ющаѧ пло́дъ нш҃ъ зе́мный, и҆ всѧ́кое накаꙁа́нїе пра́веднѡ наводи́мое на́ ны, грѣ́хъ ра́ди на́шихъ: и҆ бога́тыѧ твоѧ̀ щедроты̀ ниꙁпослѝ на всѧ̀ лю́ди твоѧ̀: Благода́тїю и҆ чл҃кѡлю́бїемъ є҆диноро́днаго твое́гѡ ᲃн҃а, съ ни́мже благослове́нъ є҆сѝ, и҆ съ пресвѧты́мъ, и҆ благи́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆минь.

Вꙁе́мъ же І҆ере́ѵ꙼ благослове́ннꙋю Пшени́цꙋ, вмѣща́етъ въ неѧ̀ и҆́наѧ сѣ́мена, гл҃ѧ̀:

Благословѝ, вѣне́цъ лѣ́тꙋ бла́гостїю твое́ю Гд҃и, и҆ по́лѧ твоѧ̀ да насы́тѧтсѧ тꙋ́ка, и҆ ᲂу҆до́лїѧ ᲂу҆мно́жатъ пшени́цꙋ.

Посе́мъ вꙁе́мъ сщ҃еннꙋю во́дꙋ, и҆ кро́питъ є҆́ю сѣ́мена, гл҃ѧ̀:

Благослове́нїе твоє̀, Гд҃и, да сни́детъ на сѣ́мена сі́ѧ, и҆ да прорастꙋ́тъ, и҆ сотво́рѧтъ пло́дъ мнѡ́гъ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Кро́питъ же а҆́бїе зе́млю, на не́йже сѣ́ѧти и҆́мꙋтъ, гл҃ѧ̀:

Посѣтѝ, Гд҃и, зе́млю сі́ю, и҆ ᲂу҆по́й ю҆̀, и҆ ᲂу҆множѝ ѡ҆богати́ти ю҆̀: бра́ꙁды є҆ѧ̀ ᲂу҆по́й, и҆ ᲂу҆множѝ жи́та є҆́ѧ. Ты́ бо є҆сѝ Бг҃ъ нш҃ъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ. А҆ми́нь.

Вꙁе́мъ же І҆ере́ѵ꙼ въ пе́рвыхъ ᲃѣмена рꙋко́ю свое́ю ме́щетъ три́жды на Ни́вꙋ, гл҃ѧ̀:

Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ та́кѡ начина́ютъ вси сѣ́ѧти въ и҆мѧ Гд҃не. І҆ере́ѵ꙼ же сотвори́въ дне́вный ѿпꙋ́стъ, ѿхо́дѧтъ въ своѧ́ си.

Прише́дъ І҆ере́ѵ꙼ на Гꙋмно̀, в̾ꙁе́млетъ Епітра́хилъ на себѐ, и҆ стоѧ̀ на Восто́кѡмъ, начина́етъ ѡ҆бы́чнѡ:

Благослове́нъ Бг҃ъ нш҃ъ: Трⷭ҇то́е: Ѿч̀е нш҃ъ: Гд҃и поми́лꙋй, в҃і.

Сла́ва: И҆ ны́нѣ: Прїйдѣ́те поклони́мсѧ, гⷤ. и҆ Ѱало́мъ: рм҃д.

Воꙁнесꙋ́ тѧ Бж҃е мой:

По Ѱалмѣ́ же рекъ,

Гд҃ꙋ помоли́мсѧ и҆ Гд҃и, поми́лꙋй.

Чтетъ Моли́твꙋ ᲃі́ю.

Гд҃и Бж҃е нш҃ъ, и҆сто́чниче бл҃ги́хъ, повелѣ́вый землѝ и҆ꙁноси́ти пло́дъ, благоꙋтро́бїѧ твое́гѡ ра́ди и бла́гости, благословѝ Гꙋмно̀ сі́е (и҆лѝ жи́тницꙋ сі́ю,) и ᲂу҆множѝ в̾не́мъ (и҆лѝ в̾не́й) плодоноше́нїе рабѡ́въ твои́хъ, и҆ и҆спо́лни жи́тница и҆́хъ всѧ́кагѡ благопло́дїа, Пшени́ца же Вина̀ и҆ Е҆ле́ѧ, и҆ и҆ꙁба́ви и҆́хъ ѿ всѧ́кагѡ зла́гѡ ѡ҆бстоѧ́нїѧ и҆ и҆скꙋше́нїа, съ всѣ́мъ прислꙋша́ющими и҆́мъ, и҆ просвѣще́нныхъ и҆́хъ соблюдѝ всегда̀ въ поꙁна́нїи твое́мъ, и҆ въ и҆спол̾не́нїи ᲃт҃ы́хъ твои́хъ за́повѣдїй: ꙗ҆́кѡ да благоꙋго́дни тебѣ̀ бы́вше, ᲃподобѧ́тсѧ вѣ́чныхъ твои́хъ бла́гъ.

Ꙗ҆́кѡ благослови́сѧ и҆мѧ твоѐ пресвѧто́е, Ѿц҃а̀, и҆ ᲃн҃а, и́ ᲃт҃а́гѡ Дх҃а, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆ми́нь.

Вꙁе́мъ же во́дꙋ ᲃщ҃еннꙋю кро́питъ все Гꙋмно̀ и҆ жи́тницꙋ, гл҃ѧ̀:

Въ и҆мѧ Ѿц҃а̀ и҆ ᲃн҃а и҆ ᲃⷮ: Дх҃а. А҆ми́нь.

И҆ сотвори́въ ѿпꙋстъ дне́вный, ѿхо́дитъ въ своѧ́ си.

І҆ере́ѵ꙼ вꙁе́мъ на себѐ Е҆пітра́хилъ, ѡ҆бы́чнѡ начина́етъ,

Благослове́нъ Бг҃ъ нш҃ъ:

И҆ чтетъ, Трⷭ҇то́е: Ѿч̀е нш҃ъ: Гд҃и поми́лꙋй, в҃і.

Сла́ва: И҆ ны́нѣ: Прїйдѣ́те поклони́мсѧ, гⷤ. и҆ Ѱало́мъ: и҃.

Гд҃и Гд҃ь нш҃ъ, коль чꙋ́днѡ и҆мѧ твоѐ по все́й землѝ.

И҆ посе́мъ рекъ,

Гд҃ꙋ помоли́мсѧ и҆ Гд҃и, поми́лꙋй.

Чтетъ Моли́твꙋ сі́ю.

Гд҃и І҆и҃ᲃ Хє҃ Бж҃е нш҃ъ, ѿ пѧтѝ Хлѣ́бѡвъ и҆ двѣ́ю ры́бꙋ Пѧтьти́сѧщъ на́рода насыти́вый: и҆ ѿ и҆ꙁбы́ткѡвъ множествѡ̀ ᲂу҆крꙋ́хѡвъ събра́ти ᲂу҆строи́вый: и҆ мре́жꙋ Ꙋ҆ч҃никѡвъ твои́хъ по Въскресе́нїи, Бжⷭ҇тве́ннымъ твои́мъ повелѣнїемъ мнѡжество́мъ ры́бъ наполни́вый: Са́мъ, Влады́ко Всеси́лный, и҆ Предлежа́щїѧ ᲃѣ́ти благословѝ, и҆ въ лови́твѣ, твои́мъ Божестве́ннымъ благослове́нїемъ, мнѡ́жествомъ ры́бъ на пи́щꙋ твои́мъ рабѡ́мъ всегда̀ и҆сполнѝ, Молитва́ми Преблагослове́нныѧ, ᲃла́вныѧ Влады́чица на́шеѧ Богоро́дица и҆ прⷭ҇снѡ Дв҃ы Ма́рїѧ, и҆ ᲃт҃ы́хъ ᲃла́вныхъ и҆ всехва́льныхъ А҆пⷭ҇лъ Петра̀ верхо́внагѡ, Ѳѡмы̀, Наѳанаи́ла, И҆а́кова и҆ И҆ѡа́нна, и҆ про́чїихъ ры́бамъ ло́вцѡвъ бы́вшихъ, и҆ ѿ ры́бъ тѣ́ми сѣтмѝ ᲂу҆ловле́нныхъ вкꙋша́ющихъ, въ ми́рѣ и҆ здра́вїи дш҃евномъ и҆ теле́сномъ съхранѝ:

Ꙗ҆́кѡ ты́ є҆сѝ пода́тель всѣ́хъ благи́хъ, и҆ тебѣ̀ ᲃла́вꙋ воꙁсыла́емъ, съ беꙁнача́льнымъ ти Ѿц҃емъ, и҆ Пресвѧты́мъ, и҆ бл҃ги́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆минь.

Вꙁе́мъ же І҆ере́ѵ꙼ ᲃщ҃еннꙋю во́дꙋ кро́питъ є҆ю̀ ᲃѣ́ти, глаголѧ̀,

Блⷭ҇влѧ́ютсѧ ᲃі́ѧ ᲃѣ́ти ѡ҆кропле́ніємъ воды̀ сеѧ̀ ᲃщ҃енныѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ тво́ритъ ѡ҆бы́чный дне́вный ѿпꙋ́стъ.

Вꙁе́мъ І҆ере́ѵ꙼ Е҆пітра́хиль на себѐ, и҆ наче́нъ ѡ҆бы́чнѡ,

Чтетъ, Трⷭ҇то́е: Ѿч҃е нш҃ъ: Гд҃и поми́лꙋй, в҃і.

Сла́ва: И҆ ны́нѣ: Прїйдѣ́те поклони́мсѧ, гⷤ. и҆ Ѱало́мъ: и҃.

Гд҃и Гд҃ь нш҃ъ, коль чꙋ́дно И҆мѧ твоѐ.

И҆ посе́мъ рекъ,

Гд҃ꙋ помоли́мсѧ и҆ Гд҃и, поми́лꙋй.

Чтетъ Моли́твꙋ сі́ю:

Влады́ко, Гд҃и Бж҃е нш҃ъ, вла́сть и҆мѣ́ѧй всѧ́кои тва́ри, тебѣ́ сѧ мл҃и́мъ, и҆ тебѐ про́симъ, ꙗ҆́коже благослови́лъ и҆ ᲂу҆множи́лъ є҆́сѝ ᲃта́да Патрїа́рха І҆а́кѡва, благословѝ и҆ ста́до до ᲃко́тѡвъ си́хъ, раба̀ твое́гѡ И҆мⷬ҇къ: и҆ ᲂу҆множѝ, и҆ ᲂу҆крѣпѝ, и҆ сътворѝ є҆̀ въ ти́сѧща, и҆ и҆ꙁба́ви є҆́ ѿ наси́лїѧ дїа́волѧ, и҆ ѿ и҆ноплеме́нническагѡ наше́ствїѧ, и҆ плѣне́нїѧ, и҆ ѿ всѧ́кагѡ навѣ́та врагѡ́въ, и҆ во́ꙁдꙋха сме́ртнагѡ, и҆ гꙋби́телнагѡ не́дꙋга: ѡ҆градѝ є҆̀ ᲃт҃ы́ми А꙯гг҃елы твои́ми, всѧ́кꙋю не́мощъ, всѧ́кꙋю за́висть, и҆ и҆скꙋше́ние, чаро́вства же и҆ волше́бства, ѿ дѣ́йства находѧ́щїѧ дїавол̾скагѡ, ѿганѧ́ѧ ѿ не́гѡ: Ꙗ҆́кѡ твоѐ є҆́стъ Ца́рство, и҆ ᲃи́ла, и҆ ᲃла́ва, Ѿц҃а̀, и҆ ᲃн҃а, и҆ ᲃт҃а́гѡ Дх҃а, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆ми́нь.

И҆ а҆́бїе кро́питъ ста́до ᲃщ҃енною водо́ю, гл҃ѧ̀:

Благословѝ, Гд҃и, ᲃта́до сі́е, и҆ и҆ꙁба́ви є҆̀ ѿ всѧ́кагѡ зла́гѡ ѻ҆бстоѧ́нїѧ ви́димыхъ и҆ неви́димыхъ врагѡ́въ, и҆ ѿ гꙋби́тел̾ныѧ ᲃме́рти, и҆ всѧ́кагѡ не́дꙋга, и҆ всѣ́хъ дїа́вол̾скихъ злодѣѧ́ний, и҆ ᲂу҆множѝ є҆̀ ѡ҆ и҆менѝ твоє́мъ ᲃт҃о́мъ, и҆ въ ѡ҆кропле́нїи ᲃщ҃е́нныѧ ᲃеѧ̀ воды̀, здра́вїе томꙋ̀ дарꙋ́й, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ ѡ҆кропи́въ же все ᲃта́до, тво́ритъ ѡ҆бы́чный дне́вный ѡпꙋ́стъ, и҆ пою́тъ, а҆́ще и҆ꙁволѧтъ:

Пода́ждъ ᲂу҆тѣше́нїе свои́мъ рабѡ́мъ:

Вꙁе́мъ І҆ере́ѵ꙼ є҆пітра́хиль на себѐ, и҆ ѡ҆бы́чное нача́ло сътвори́въ, чтетъ, Цр̀ю небе́сный: Трⷭ҇то́е: Ѿч̀е нш҃ъ: Гд҃и поми́лꙋй, в҃і.

Сла́ва: И҆ ны́нѣ: Прїйдѣ́те поклони́мсѧ, гⷤ. и҆ Ѱало́мъ: р҃ѕ.

И҆сповѣда́йтесѧ Гв҃и ꙗ҆́кѡ бл҃гъ:

Посе́мъ ре́къ,

Гд҃ꙋ помоли́мсѧ и҆ Гд҃и, поми́лꙋй.

Чтетъ Моли́твꙋ сі́ю.

Гд҃и, Бж҃е ѿц҃ъ на́шихъ, заповѣда́вый Нѡ́ю, рабꙋ̀ твое́мꙋ, съѡрꙋжи́ти Ківѡ́тъ къ ᲃпⷭ҇нїю мі́ра и҆ ѿ мнѡ́гихъ древе́съ, благоволи́вый є҆мꙋ̀ є҆дино̀ дре́во бы́ти и҆ съчини́тисѧ: Са́мъ ᲂу҆́бѡ, Влады́ко всѧ́ческихъ, ꙗ҆́коже тогда̀ бл҃говоли́лъ є҆сѝ беꙁдꙋ́шными древесы̀ пра́вити, и҆ крѣ́пкою ти рꙋко́ю ро́дꙋ члчⷭ҇комꙋ спⷭ҇ти́сѧ: Са́мъ и҆ ны́нѣ, и҆ ᲃе́й Кора́бль (и҆лѝ, ло́дїю сі́ю) съхранѝ, и҆ да́ждь є҆мꙋ̀ (и҆лѝ, є҆́й,) А҆́гг҃ла бл҃га, ми́рна, въ є҆́же хотѧ́щихъ плытѝ вне́мъ, (и҆лѝ, въ не́й) ᲃъблюстѝ и҆ невре́дныхъ съхрани́ти ѿ всѧ́кихъ зѣ́лныхъ вѣ́трѡвъ бꙋ́рей же и҆ во́лнъ, и҆ и҆стопле́нїѧ, и҆ всѧ́кихъ вра́жїихъ навѣ́тѡвъ и҆ наше́ствїй: и҆ да́ждъ и҆́мъ всегда̀ ми́рнѡ и҆ здра́вѡ плава́нїе съверши́ти, и҆ благополꙋ́чнѡ въ своѧ́ си воꙁврати́тисѧ, Молитва́ми Прчⷭ҇тыѧ Владычица на́шеѧ Бц҃а, и҆ прⷭ҇нѡ Дв҃ы Мр҃іѧ: ᲃи́лою чⷭ҇тнаго, и҆ животворѧ́щагѡ Кртⷭ҇а̀: чⷭ҇тныхъ, нбⷭ҇сныхъ, ᲂу҆́мныхъ ᲃи́лъ беꙁпло́тныхъ: ᲃт҃а́гѡ ᲃла́внагѡ Прⷪ҇рка, Предте́ча и҆ Кртⷭ҇лѧ І҆ѡа́нна: ᲃт҃ы́хъ ᲃла́вныхъ, и҆ всехва́лныхъ А҆пⷭ҇лъ, и҆ всѣ́хъ ᲃт҃ы́хъ твои́хъ.

Ꙗ҆́кѡ ты є҆сѝ ѡ҆кормлѧ́ѧй и҆ ѡ҆сщ̀а́ѧй всѧ́ческаѧ, Бж҃е нш҃ъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆ми́нь.

Вꙁе́мъ же І҆ере́ѵ꙼ ᲃщ҃еннꙋю во́дꙋ, кро́питъ є҆́ю Кора́бль, и҆лѝ ло́дїю, гл҃ѧ̀:

Блⷭ҇влѧ́етсѧ Кора́бль, (и҆лѝ, Ло́дїѧ ᲃі́ѧ,) ѡ҆кропле́нїемъ воды̀ ᲃеѧ̀ ᲃщ҃енныѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ а҆́бїе пою́тъ ᲃтихи́рꙋ. Гла́съ д҃:

Пода́ждъ ᲂу҆тѣше́нїе свои́мъ:

И҆ быва́етъ ѡ҆бы́чный дне́вный ѿпꙋ́стъ.

На Ꙋ҆трени по Е҆ѵⷢ҇лїи, пои́мъ Ѱалмѣ̀, и҆схо́дитъ І҆ере́ѵ꙼ и҆ꙁъ Ѻ҆́лтарѧ, держа̀ въ рꙋ́кꙋ Кади́лницꙋ, и҆ покади́въ Вѣ́тви крⷭ҇таѡ́браꙁнѡ, гл҃е́тъ Моли́твꙋ ᲃі́ю, Дїа́конꙋ ре́кшꙋ,

Гд҃ꙋ помоли́мсѧ.

и҆ Кли́рꙋ,

Гд҃и поми́лꙋй.

Влады́ко Бж҃е Ѿч҃е Вседержи́телю, при́ꙁри ны́нѣ на насъ недосто́йныхъ рабѡ́въ твои́хъ, и҆ ᲂу҆слы́ши ᲃмире́нное на́ше моле́нїе, и҆ ниꙁпослѝ блⷭ҇ве́нїе твоѐ нбⷭ҇ное на Вѣ́тви сі́ѧ, и҆ блⷭ҇ви и́ ѡ҆ст҃ѝ ѧ҆̀, и҆ ꙗ҆́коже ѡ҆бра́довалъ є҆сѝ въ Ковче́ꙁѣ Нꙍ́ѧ зна́менїемъ и҆ꙁбавле́нїѧ ѿ Пото́па ᲃꙋ́чцемъ масли́чнымъ Го́лꙋбомъ прине́сенымъ, ᲃи́це и҆ на́съ недосто́йныхъ рабѡ́въ твои́хъ, Вѣ́тви ᲃі́ѧ, въ ѡ҆́браꙁъ ꙗ҆́же надъ см҃ртїю воꙁлюбле́ннагѡ ᲃн҃а твое́гѡ побѣ́ды носѧ́щихъ, наше́ствїемъ твое́гѡ всест҃а́гѡ Дх҃а ра́дости и҆ весе́лїѧ дх҃о́внагѡ ᲃе́рдца и҆сполнѝ, и҆ да́ждъ намъ бл҃ги́ми дѣ́лы ᲂу҆срѣстѝ Ха҃ твое́гѡ, и҆ съ Е҆вре́йскими ѻ҆трѡ́ки масли́чными Вѣ́твми, и҆ Ва́їѧми ѿ Фи́никъ ᲃлавосло́вїе и҆ пѣ́нїе тебѣ̀ ꙗ҆́кѡ Бг҃ꙋ приноси́ти и҆ вѣ́рнѡ вопи́ти, Ѽса́нна въ вы́шнихъ, блⷭ҇ве́нъ прише́дый, и҆ па́ки грѧды́й сꙋди́ти пра́вдою, и҆ воꙁда́ти комꙋ́ждѡ по дѣ́лѡмъ є҆гѡ̀, и҆ сподобѝ на́съ въ ра́дость вѣ́чнꙋю тогѡ̀ благодатїю внитѝ: Сни́мъ бо тебѣ̀ подоба́етъ всѧ́каѧ ᲃла́ва, держа́ва, чⷭ҇ть, и҆ поклоне́нїе, съ прⷭ҇ты́мъ, и҆ бл҃гимъ, и҆ животворѧ́щимъ є҆диносꙋ́щнымъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆ми́нь.

Посе́мъ кро́питъ Вѣ́твїѧ ᲃщ҃енною водо́ю, гл҃ѧ̀:

Блⷭ҇влѧ́ютсѧ Вѣ́твїѧ сі́ѧ ѡ҆кропле́нїемъ воды̀ сеѧ̀ ᲃщ҃енныѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Пою́щимъ Ли́кѡмъ,

Дне́сь благода́ть ᲃт҃а́гѡ Дх҃а на́съ собра̀:

И҆ꙁне́съ же ᲃт҃о́е Е҆ѵⷢ҇лїе І҆ере́ѵ꙼ и҆ꙁъ ѻ҆лтарѧ, и҆ лобꙁа́ющимъ є҆̀ раꙁдава́етъ вѣ́твїѧ.

Прине́сенъ быва́етъ А҆́ртосъ, ᲃі́естъ хлѣ́бъ на ᲃі́е приꙋгото́вленный, и҆ на не́мъ Крⷭ҇тъ напи́саный ѡ҆бы́чнѡ, къ І҆ере́ю въ Ѻ҆́лтаръ, по соверше́нїю Бжⷭ҇тве́нныѧ Лѵтꙋ́ргїи и҆ по за А҆мво́нной моли́твѣ, и҆ ре́кшꙋ Дїа́конꙋ,

Гд҃ꙋ помоли́мсѧ,

и҆ Кли́рꙋ,

Гд҃и поми́лꙋй.

Чтетъ надъ ни́мъ І҆ере́ѵ꙼ Моли́твꙋ сі́ю.

Бж҃е всеси́лный, и҆ Гд҃и Вседержи́телю, и҆же рабо́мъ твои́мъ Мѡѵ꙼се́ѻмъ въ и҆схо́дѣ І҆и҃левѣ ѿ Е҆гѵ́пта, и҆ въ свобожде́нїи люді́й твои́хъ ѿ го́ркїѧ работы̀ Фараꙍ́новы, А҆́гн̾ца ꙁакла́ти повелѣлъ є҆сѝ, проѡбраꙁꙋ́ѧ на Крⷭ҇тѣ ꙁакла́ннагѡ во́лею на́съ дѣ́лѧ А҆́гн̾ца, вꙁемлю́щагѡ всегѡ̀ мі́ра грѣхѝ, воꙁлюбле́ннагѡ ᲃн҃а твое́гѡ, Гд҃а на́шегѡ І҆и҃ᲃ Ха҃: Ты и҆ ны́нѣ смире́ннѡ моли́мъ тѧ, при́ꙁри на хлѣ́бъ се́й, и҆ блⷭ҇вѝ, и҆ ѡ҆ст҃ѝ є҆гѡ̀ и҆бѡ̀ мы рабѝ твоѝ въ чⷭ҇ть и҆ ᲃла́вꙋ, и҆ въ воспомина́нїе сла́внагѡ Воскресе́нїѧ того́жде ᲃн҃а твое́го Гд҃а на́шегѡ І҆и҃ᲃ Ха҃, и҆́м̾же ѿ вѣ́чныѧ работы̀ вра́жїѧ, и҆ ѿ а҆́довыхъ нерѣши́мыхъ ᲂу҆ꙁъ раꙁдрѣше́нїе, свободꙋ̀ и҆ преведе́нїе ᲂу҆лꙋчи́хѡмъ, пре́дъ твои́мъ вели́чествомъ ны́нѣ въ всесвѣ́тлый се́й, пресла́вный и҆ ᲃпаси́тельный дн҃ь Па́схи, се́й принѡ́симъ: на́съ же ᲃегѡ̀ приносѧ́щихъ, и҆ тогѡ̀ лобꙁа́ющихъ, и҆ ѿ негѡ̀ вкꙋша́ющихъ, твое́мꙋ нбⷭ҇номꙋ благослове́нїю прича́ст̾ники бы́ти сотворѝ, и҆ всѧ́кꙋю бо́леꙁнь и҆ не́дꙋгъ ѿ на́съ твое́ю ᲃи́лою ѿженѝ, здра́вїе всѣ́мъ подава́ѧ. Ты́ бо є҆сѝ и҆сто́чникъ благослове́нїѧ, и҆ цѣ́лбамъ пода́тель, и҆ тебѣ̀ ᲃла́вꙋ воꙁсыла́емъ беꙁнача́лномꙋ Ѿц҃ꙋ, съ є҆диноро́днымъ ти ᲃн҃омъ, и҆ прⷭ҇ты́мъ и҆ благи́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆ми́нь.

А҆́бїе же кро́питъ А҆́ртосъ ᲃщ҃енною водо́ю, гл҃ѧ̀:

Благословлѧ́етсѧ и҆ ѡ҆сщ҃а́етсѧ А҆́ртосъ се́й, ѡ҆кропле́нїемъ воды̀ ᲃеѧ̀ ᲃщ҃енныѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ посе́мъ и҆схо́дитъ, и҆ полага́етъ є҆гѡ̀ на нало́и, лю́дїе же, прїе́млюще А҆нті́доръ, лобꙁа́ютъ А҆́ртосъ.

По Бжⷭ҇тве́нной Лѵтꙋ́ргїи, прине́сенꙋ бы́вшꙋ А҆́ртосꙋ ѡ҆бы́чнѡ въ Тра́пеꙁꙋ, и҆ ѿпѣ́вше Три́жды, Хᲃ҃ Воскресъ: съ поклоне́нїемъ, проче́тшꙋ, Ѿч҃е нш҃ъ: и҆ Тра́пеꙁꙋ благослови́вшꙋ ѡ҆бы́чнѡ, Дїа́конъ гл҃е́тъ,

Гд҃ꙋ помоли́мсѧ,

и҆ Бра́тїѧ,

Гд҃и поми́лꙋй.

І҆ере́ѵ꙼ чтетъ Моли́твꙋ ᲃі́ю надъ А҆́ртосомъ.

Гд҃и І҆и҃ᲃ Хє҃, Бж҃е нш҃ъ, хлѣ́бе А҆́нгельскїй, хлѣ́бе живота̀ вѣ́чнагѡ, ᲃоше́дый съ небесѐ, напита́вый на́съ во всесвѣ́тлыѧ сі́ѧ днѝ пи́щею дх҃о́вною твои́хъ Бжⷭ҇ве́нныхъ благодѣѧ́нїй, тридне́внагѡ ра́ди и҆ ᲃп҃си́тел̾нагѡ Воскреснїѧ: При́ꙁри и҆ ны́нѣ, смѣре́ннѡ мо́лимъ тѧ, на мо́лбы и҆ благодаре́нїѧ на́ша, и҆ ꙗ҆́коже благослови́лъ є҆сѝ пѧ́ть хлѣ́бѡвъ въ пꙋсты́ни, и҆ ны́нѣ благословѝ хлѣ́бъ ᲃе́й, ꙗ҆́ко да вси вкꙋша́ющїи ѿ негѡ̀, тѣле́снагѡ и҆ дш҃евнагѡ благослове́нїѧ и҆ здра́вїѧ сподобѧ́тсѧ Благода́тїю и҆ щедрѡта́ми твое́гѡ чл҃кѡлю́бїѧ: Ты́ бо є҆сѝ ѡ҆сщ҃енїе на́ше, и҆ тебѣ̀ ᲃла́вꙋ воꙁсыла́емъ съ беꙁнача́льнымъ ти Ѿц҃е́мъ, и҆ всест҃ы́мъ, и҆ блг҃имъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ во вѣ́ки вѣ́кѡвъ.

Бра́тїѧ,

А҆ми́нь.

Раꙁдроби́въ же А҆́ртосъ ѡ҆бы́чно, раꙁдава́етъ всѣ́мъ пре́жде ѡ҆бѣ́да.

Прине́сенымъ ᲃꙋ́щимъ на Цминтарѣ̀, и҆лѝ, въ Притво́рѣ Црк҃о́вномъ, и҆лѝ, на и҆́номъ кое́мъ мѣ́стѣ но не въ Црк҃въ, ꙗ҆́ди къ блⷭ҇ве́нїю, І҆ере́ѵ꙼ начина́етъ,

Блⷭ҇ве́нъ Бг҃ъ нш҃ъ:

Кли́ръ же пое́тъ,

Хᲃ҃ Воскр҃сѐ: гⷤ.

Посе́мъ І҆ере́ѵ꙼ ре́къ,

Гд҃ꙋ помоли́мсѧ.

и҆ Кли́ръ,

Гд҃и, поми́лꙋй.

Чтетъ Моли́твꙋ ᲃі́ю.

При́ꙁри, Гд҃и І҆и҃ᲃ Хє҃ Бж҃е нш҃ъ, на всѧ̀ бра́шна сі́ѧ, и҆ блⷭ҇вѝ и҆ ѡ҆ст҃и ѧ҆̀, ꙗ҆́коже блⷭ҇ви́лъ и҆ ѡ҆ст҃и́лъ є҆сѝ Ѻ҆́вна, є҆го́же ти приведѐ вѣ́рный А҆враа́мъ, и҆ А҆́гн̾ца, є҆го́ же ти А҆́вель въ всепло́дїе принесѐ: та́кожде и҆ Те́лца ᲂу҆пита́ннагѡ, є҆го́же закла́ти повелѣ́лъ є҆сѝ ᲃы́нови твое́мꙋ заблꙋ́ждшомꙋ, и҆ па́ки къ тебѣ̀ воꙁвра́щшомꙋсѧ: Да ꙗ҆́коже то́й ᲃподоби́сѧ твое́ѧ благода́ти наслади́тисѧ, ᲃи́це и҆ мы̀ ѿ тебѐ благослове́ннаѧ, и҆ ѡ҆сщ҃еннаѧ сі́ѧ бра́шна вкꙋша́юще, твоѐ благослове́нїе съ здра́вїемъ вси полꙋ́чимъ: Ты́ бо є҆сѝ блⷭ҇вѧ́й и҆ ᲃт҃ѧ́й всѧ́ческаѧ Бж҃е нш҃ъ, и҆ тебѣ̀ ᲃла́вꙋ воꙁсыла́емъ, съ беꙁнача́льнымъ ти Ѿц҃емъ, и҆ прⷭ҇ты́мъ, и҆ бл҃ги́мъ, и҆ животворѧ́щимъ ти Дх҃омъ, ны́не и҆ прⷭ҇нѡ, и҆ во вѣ́ки вѣ́ковъ. А҆ми́нь.

Кли́ръ,

А҆ми́нь.

Ре́кшꙋ Дїа́конꙋ,

Гд҃ꙋ помоли́мсѧ,

и҆ Кли́рꙋ,

Гд҃и, поми́лꙋй.

І҆ере́ѵ꙼ чтетъ Моли́твꙋ ᲃі́ю.

Влады́ко Гд҃и Бж҃е нш҃ъ, ᲃъꙁда́телю и҆ Тво́рче всѧ́ческихъ, блⷭ҇ви Сы́ръ, Ма́сло, Мле́ко и҆ Ꙗ҆́йца сі́ѧ, и҆ на́съ соблюдѝ въ блгⷭ҇ти твое́й, ꙗ҆́кѡ да наслажда́ющесѧ си́хъ, твои́хъ неꙁави́стнѡ подава́емыхъ да́рѡвъ насыти́мсѧ, и҆ неиꙁгл҃а́нныѧ твое́ѧ блгⷭ҇сти:

Ꙗ҆́кѡ твоѧ̀ держа́ва, и҆ твоѐ є҆́стъ Цртⷭ҇во, и҆ ᲃи́ла, и҆ ᲃла́ва, Ѿц҃а̀ и҆ ᲃн҃а, и҆ ᲃт҃а́гѡ Дх҃а, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆ми́нь.

И҆ а҆́бїе І҆ере́ѵ꙼ кро́питъ ᲃщ҃енною водо́ю всѧ̀ бра́шна, и҆ ѿ свое́ѧ ча́сти раꙁдае́тъ ᲂу҆бо́гимъ и҆ ни́щимъ, себѣ́ же ма́ло чтѡ̀ вꙁе́млетъ въ до́мъ на блⷭ҇ве́нїе.

Вѣ́стно же бꙋ́ди, ꙗ҆́кѡ си́цевый прино́съ ѿ мѧ́съ и҆ и҆́ныхъ бра́шенъ нѣ́сть Па́сха, ни́же А҆́гнецъ, ꙗ҆́коже нѣ́цїи злѣ̀ гл҃ю́тъ, и҆ прїемлютъ, и҆ си́мъ ꙗ҆́коже нѣ́коей Вели́кой ᲃт҃ы́ни съ всѧ́кимъ говѣ́нїемъ причаща́ютсѧ: но про́стое блⷭ҇ве́нное бра́шнѡ: небѡ̀ въ же́ртвꙋ Бг҃ꙋ сі́ѧ принѡ́сѧтсѧ, но то́кмѡ, ꙗ҆́кѡ да по По́стѣ нача́ти хотѧ́щимъ Мѧ́со, ᲃы́ръ, и҆ и҆́наѧ си́цеваѧ ꙗ҆́сти, ѿ І҆ере́ѧ предположе́нными Моли́твами въ ᲃнѣ́дь блⷭ҇ве́нна бꙋ́дꙋтъ. Небѡ̀ всѝ І҆ере́ѧ въ своѧ̀ дѡ́мы на блⷭ҇ве́нїе свое́ѧ пе́рвыѧ по постѣ Тра́пеꙁѣ и҆мѣ́ти могꙋ́тъ.

Па́сха же на́ша Хртⷭ҇іѧ́нскаѧ и҆́стиннаѧ и҆ ᲃп҃си́телнаѧ, и҆ А҆́гнецъ вꙁемлѧ́й грѣхѝ мі́ра, Са́мъ Хє҃ є҆́стъ на Ѻ҆́лтаари въ беꙁкро́вной Же́ртвѣ, сі́естъ, въ Прчⷭ҇тыхъ Та́йнахъ чⷭ҇тнагѡ Тѣ́ла и҆ животво́рныѧ Крвѐ свое́ѧ, ѿ І҆ере́ѧ Бг҃ꙋ Ѿц҃ꙋ̀ приноси́мыѧ, и҆ тое́й досто́йнѡ причаща́ющїисѧ, и҆́стиннѡ ꙗ҆дѧ́тъ Па́схꙋ.

Тѣ́мъ же ᲂу҆бѡ предрече́ннаѧ бра́шенъ приноше́нїѧ, поне́же не сꙋ́ть Па́сха, въ Ѻ҆́лтаръ, и҆лѝ въ Цр҃ковъ недосто́итъ вноси́ти ѧ҆̀: по внѣ̀ Цр҃кве, и҆лѝ въ Притво́рѣ, Моли́твою блⷭ҇ви́ти подоба́етъ, по тре́темꙋ Пра́вилꙋ ᲃⷮ: А҆пⷭ҇лъ гл҃ю́щихъ.

А҆́ще кото́рый Епⷭ҇пъ, и҆ли Преꙁви́теръ, надъ Гд҃не вчине́нїе є҆́же ѡ҆ Же́ртвѣ, и҆́наѧ нѣ́каѧ къ Ѻ҆́лтарꙋ принесе́тъ, и҆лѝ Ме́дъ, и҆лѝ Мле́кѡ, и҆лѝ въмѣ́стѡ вина̀ ᲃике́рꙋ смѣша́нꙋю, и҆лѝ птицѧ, и҆лѝ нѣ́каѧ живо́тнаѧ, и҆лѝ ᲃо́чива, па́че ᲃъчине́нїѧ да и҆ꙁве́ржетсѧ. Ра́ꙁвѣ гро́ꙁдїѧ, и҆лѝ но́выѧ кла́сы.

Не подоба́етъ же при́носи́ти и҆́нѡ чтѡ̀ къ Жерто́вникꙋ ра́ꙁвѣ Е҆ле́й на ᲃвѣ́щники, и҆ Ѳѵмїа́мъ въ вре́мѧ ᲃт҃а́гѡ приноше́нїѧ.

И҆ по Шестомꙋ Собо́рꙋ и҆́же въ Трꙋ́ллѣ, въ Пра́вилѣ ч҃ѳ-мъ, гл҃ю́щꙋ: и҆ семꙋ̀ въ А҆́рменстѣй стра́нѣ быва́ти ᲂу҆вѣ́дѣхѡмъ, ꙗ҆́кѡ нѣ́цїи внꙋ́тръ въ ᲃт҃ы́хъ Ѻлтарехъ ᲂу҆́ды мѧ́съ варѧ́ще, ча́сти принѡ́сѧтъ, ᲃщ҃е́нникѡмъ Жидо́вски раꙁдѣлѧ́юще: Тѣ́мъ же Цр҃ковъ непоро́чнꙋю хранѧ́ще, ᲂу҆ꙁакони́хѡмъ, ꙗ҆́кѡ не подоба́єтъ ни є҆дино́мꙋ же ᲃщ҃енникꙋ ѿдѣле́ныѧ мѧ́съ ча́сти ѿ приносѧ́щихъ прїймати, но тѣ́ми дово́лни да бꙋ́дꙋтъ, ꙗ҆́же приносѧ́щомꙋ ᲂу҆го́дна бꙋ́дꙋтъ, внѣ̀ Цр҃кве ᲃи́цевомꙋ быва́ющꙋ приноше́нїю: А҆́ще же кто̀ сегѡ̀ си́це не сътво́ритъ, да ѿлꙋ́читъ сѧ.

Прине́сенымъ бы́вшимъ нѡ́вымъ ѻ҆́вощемъ въ вре́мѧ приспѣ́нїѧ и҆́хъ къ Цр҃кви, и҆ въ Притво́рѣ ѡ҆бы́чнѡ поста́вленнымъ, по Бжⷭ҇тве́нной Лѵтꙋ́ргїи по за А҆мбо́нной Моли́твѣ, и҆де́тъ І҆ере́ѵ꙼ въ Притво́ръ, и҆ покади́въ ѡ҆́вощъ, чтетъ Трⷭ҇тое: Ѿч҃е нш҃ъ: Гд҃и поми́лꙋй, ві҃.

Сла́ва: И҆ ны́нѣ: Прїйдѣ́те поклони́мсѧ, гⷤ, и҆ Ѱало́мъ ѯѕ҃.

Бж҃е ᲂу҆щедри́ ны и҆ блⷭ҇ви́ ны:

По Ѱалмѣ́ же рекъ,

Гд҃ꙋ помоли́мсѧ, и҆ Гд҃и поми́лꙋй.

Чтетъ Моли́твꙋ сі́ю.

Влады́ко Гд҃и Бж҃е нш҃ъ, твоѧ̀ ѿ твои́хъ приноси́ти тебѣ̀ по предложе́нїю комꙋ́ждо повелѣ́вый, и҆ вѣ́чныхъ твои́хъ бла́гъ воꙁдаѧ́нїемъ си́мъ дарова́ти ѡ҆бѣща́вый, Вдовы́ѧ же є҆́же по си́лѣ приноше́нїе благоꙋго́днѡ прїе́мый, прїимѝ и҆ ны́нѣ принесе́наѧ ѿ раба̀ твое́гѡ, И҆мⷬ҇къ: и҆ въ вѣ́чныхъ ти съкро́вищехъ воꙁложи́тисѧ си́мъ сподобѝ: дарꙋ́й є҆мꙋ и҆ мі́рскихъ твои́хъ бла́гъ ѡ҆би́лное воспрїѧтїе, съ всѣ́ми по́леꙁными є҆мꙋ̀. Пло́ды же сі́ѧ блⷭ҇вѝ, и҆ всегда̀ бога́тнѡ ᲂу҆множѝ, и҆ вкꙋша́ющимъ ѿ ни́хъ, дш҃евное и҆ тѣле́сное блгⷭ҇ве́нїе съ здра́вїемъ дарꙋ́й: Ꙗ҆́кѡ блгⷭ҇ви́сѧ твоє̀ И҆мѧ, и҆ просла́висѧ твоє̀ Црⷭ҇тво, Ѿц҃а̀, и҆ ᲃт҃а́гѡ Дх҃а, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

И҆ кропи́тъ ѻ҆́вощїе водо́ю ᲃщ҃енною, гл҃ѧ:

Блгⷭ҇влѧ́ет̾сѧ и҆ ѻ҆сщ҃а́етсѧ ѻ҆́вощїе сі́е ѡ҆кропле́нїемъ воды̀ сеѧ̀ ᲃщ҃е́нныѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ посе́мъ раꙁдава́етъ А҆нти́дорꙋ, и҆ тво́ритъ Ѿпꙋ́стъ Лѵтꙋ́ргїи ѡ҆бы́чный.

ᲃі́естъ: Кꙋті́и, и҆лѝ варе́ной пшени́ци съ ме́домъ смѣ́шаной, и҆ раꙁли́чными сла́дкими ѡ҆́вощми ᲂу҆краше́нной, и҆ въ чⷭ҇ть и҆ па́мѧть Гд҃кихъ Пра́ꙁдникѡвъ, и҆лѝ ᲃⷮ: Бж҃іихъ въ Цр҃ковъ приноси́мой.

Прине́сеной бы́вшей Ко́ливѣ въ Цр҃ковъ, І҆ере́ѵ꙼ по за А҆мбо́нной Моли́твѣ ста́въ надъ не́ю, и҆ сі́ю покади́въ, гл҃е́тъ,

Гд҃ꙋ помоли́мсѧ.

Кли́ръ,

Гд҃и поми́лꙋй.

И҆ чтетъ Моли́твꙋ ᲃі́ю.

И҆же всѧ̀ съверши́лъ є҆сѝ ᲃло́вомъ свои́мъ Гд҃и, и҆ повелѣлъ ꙁемлѝ многораꙁли́чныа проꙁѧба́ти пло́ды, въ наслажде́нїе и҆ пи́щꙋ на́шꙋ: и҆́же сѣмен̾ми трі́ехъ Ѻ҆тро́кѡвъ, и҆ Данїи́ла и҆́же въ Вавѵлꙍ́нѣ па́че сластнѡпита́нныхъ ᲃвѣтлѣ́йшихъ покаꙁа́лъ є҆сѝ, ᲃа́мъ всебл҃гі́й цр҃ю, и҆ сѣ́мена сі́ѧ съ раꙁли́чными плѡ́ды блⷭ҇вѝ, и҆ ѿ ни́хъ вкꙋша́ющихъ вѣ́рныхъ ѡ҆ст҃ѝ: ꙗ҆́кѡ въ сла́вꙋ твою̀, и҆ въ чⷭ҇ть ᲃт҃а́гѡ, И҆мⷬ҇къ: сі́ѧ предложи́шасѧ ѿ твои́хъ рабѡ́въ, и҆ въ па́мѧтъ въ бл҃гочести́вой вѣ́рѣ сконча́вшихсѧ. Пода́й же Бл҃же, бл҃гоꙋкраси́вшымъ сі́ѧ, и҆ па́мѧть съверша́ющимъ, всѧ̀ ꙗ҆́же ᲃпⷭ҇нїю проше́нїѧ, и҆ вѣ́чныхъ твои́хъ бл҃гъ воспрїѧ́тїе, Моли́твами Прчⷭ҇тыѧ Влады́чица на́шеѧ Бц҃а и҆ прⷭ҇нѡ Дв҃ы Мр҃іѧ, и҆ ᲃт҃а́гѡ, И҆мⷬ҇къ: є҆гоже и҆ па́мѧть съверша́емъ, и҆ всѣ́хъ ᲃты́хъ твои́хъ. Ꙗ҆́кѡ ты́ є҆сѝ блⷭ҇вѧ́й и҆ ᲃт҃ѧ́й всѧ́ческаѧ Бж҃е нш҃ъ, и҆ тебѣ̀ ᲃла́вꙋ воꙁсыла́емъ, беꙁнача́льномꙋ Ѿц҃ꙋ̀, съ є҆диноро́днымъ ти ᲃн҃омъ, и҆ Пртⷭ҇ы́мъ и҆ бл҃ги́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆ми́нь.

Раꙁда́въ же А҆нти́дорꙋ, тво́ритъ ѡ҆бы́чный Ѿпꙋ́стъ Лѵтꙋ́ргїи.

Вꙁе́мъ І҆ере́ѵ꙼ Є҆пітра́хілъ на себѐ начина́етъ ѡ҆бы́чно и҆ чтетъ Трⷭ҇то́е: Ѿч҃е нш҃ъ: и҆ Тропарѝ сі́ѧ Гла́съ и҃,

Дре́вле вѣ́рою ᲃꙋмантѧны́ни да́рꙋетъ Моли́тва, є҆го́ же ᲂу҆ме́рша, Тво́рче, воꙁдви́глъ є҆сѝ Прⷪ҇ркомъ Є҆лиссе́емъ ᲃла́внымъ, и҆ ᲃщ҃енноди́внымъ: ᲃо́лїю же па́ки вѡ́ды беꙁча́дныѧ ꙗ҆́вѣ претвори́лъ є҆сѝ въ ᲃла́дость, благода́тїю вседѣ́тельною твое́го Дх҃а, Бж҃е, ю҆́же и҆ ны́нѣ на́мъ бога́тнѡ пода́ждъ, да́ тѧ сла́вимъ въ вѣ́ки.

Сла́ва: И҆ ны́нѣ: Гла́съ тожъ. Богоро́диченъ:

Моли́твами Бц҃а, и҆ всѣхъ ᲃт҃ы́хъ твои́хъ, Хє҃ Бж҃е, Благода́ть ᲃт҃а́гѡ ти Дх҃а ниꙁпослѝ на́мъ, и҆ ве́лїю ми́лость, и҆ поми́лꙋй на́съ, ꙗ҆́кѡ є҆ди́нъ ще́дръ и҆ чл҃кѡлю́бецъ.

Ре́кшꙋ же Дїа́конꙋ,

Гд҃ꙋ помоли́мсѧ.

и҆ Клиръ:

Гд҃и, поми́лꙋй.

І҆ере́ѵ꙼ чтетъ Моли́твꙋ сі́ю.

Гд҃и Бж҃е, ᲃп҃си́телю нш҃ъ, въ Ве́тсѣмъ Завѣ́тѣ всѧ́кꙋю же́ртвꙋ ᲃо́лїю ѡ҆соли́ти повелѣ́вый, и҆ въ І҆ерихѡ́нѣ при Є҆ліссе́и Прⷪ҇рцѣ вре́дныѧ вѡ́ды ᲃо́лїю и҆сцѣли́вый, Са́мъ и҆ ны́нѣ, Влады́ко Пресвѧты́й, смире́ннѡ мл҃и́мъ тѧ, послѝ нбⷭ҇сное твоѐ благослове́нїе на ᲃо́ль сі́ю, и҆ благословѝ ю҆̀, и҆ всѣ́хъ вкꙋша́ющихъ ѿ не́ѧ, твое́гѡ дх҃о́внагѡ бл҃гослове́нїѧ и҆спо́лни, и҆ здра́вїе и҆́мъ дш҃евное и҆ тѣле́сное пода́ждъ: Ты́ бо є҆сѝ блⷭ҇вѧ́й и҆ ᲃт҃ѧ́й всѧ́ческаѧ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ. А҆ми́нь.

Кли́ръ,

А҆ми́нь.

І҆ере́ѵ꙼ же кро́питъ ᲃо́ль ᲃщ҃енною водо́ю, гл҃ѧ̀:

Благословлѧ́етсѧ ᲃо́ль сі́ѧ ѡ҆кропле́нїемъ воды̀ ᲃеѧ̀ ᲃщ҃енныѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И а҆́бїе тво́ритъ ѡ҆бы́чный дне́вный ѿпꙋ́стъ.

Вꙁе́мъ І҆ере́ѵ꙼ є҆пітра́хилъ на себѐ, начина́етъ ѡ҆быічнѡ и҆ чтетъ Цр҃ю нбⷭ҇ный: Трⷭ҇то́е: Ѿч҃е нш҃ъ: Гд҃и поми́лꙋй, в҃і.

Сла́ва: И҆ ны́нѣ: Прїйдѣ́те поклони́мсѧ, гⷤ. И҆ Ѱало́мъ: ѯе҃:

Воскли́кните Гд҃ви всѧ̀ землѧ̀:

Посе́мъ ре́къ,

Гд҃ꙋ помоли́мсѧ, и҆ Гд҃и поми́лꙋй.

Чтетъ Моли́твꙋ сі́ю:

Влады́ко Гд҃и І҆и҃ᲃ Хє҃ Бж҃е нш҃ъ, и҆сто́чниче ѡ҆сщ҃енїѧ и҆ блⷭ҇ве́нїѧ пода́телю, ᲂу҆слы́ши Моли́твꙋ менѐ грѣ́шнагѡ, и҆ ниꙁпослѝ блⷭ҇ве́нїе ᲃт҃о́е нбⷭ҇ное на Ѳѵмїа́мъ се́й, и҆ блⷭ҇вѝ, и҆ ѡ҆ст҃ѝ є҆гѡ̀, и҆ влѣ́й нан̾ бога́тое твоѐ дарова́нїе: и҆ да́рꙋй є҆мꙋ̀ ᲃи́лꙋ въ є҆́же бы́ти є҆мꙋ̀ всѣ́мъ вѣ́рою хранѧ́щимъ є҆гѡ̀, и҆ кадѧ́щимсѧ и҆́мъ съблюде́нїе, и҆ и҆ꙁба́вꙋ ѿ всѣ́хъ вра́жїихъ прило́гѡвъ, и҆ въ ѿгна́нїе всѧ́кагѡ мечта́нїѧ ѿ дѣ́йства діа́волѧ находѧ́щагѡ, дне́внагѡ же и҆ но́щнагѡ:

На блⷭ҇вле́нїе же дш҃а́мъ и҆ тѣ́лѡмъ вѣ́рныхъ люді́й твои́хъ, до́мовѡмъ же и҆ мѣ́стѡмъ, и҆ въ ᲃла́вꙋ Пртⷭ҇а́гѡ, великолѣ́нагѡ же и҆ всепокланѧ́емагѡ И҆́мени твое́гѡ, є҆мꙋ́же подоба́етъ всѧ́каѧ ᲃла́ва, держа́ва, чⷭ҇ть и҆ поклоненїе, съ Ѿц҃емъ, и҆ ᲃт҃ы́мъ Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆ми́нь.

І҆ере́ѵ꙼ же кро́питъ ᲃщ҃е́нною водо́ю Ѳѵмїа́мъ гл҃ѧ̀:

Блⷭ҇влѧ́етсѧ, и҆ ѡ҆сщ҃а́етсѧ Ѳѵмїа́мъ се́й ѡ҆кропле́нїемъ воды̀ ᲃеѧ̀ сщ҃е́нныѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ тво́ритъ ѿпꙋ́стъ дне́вный.

Мѣ́ста ᲃт҃а́ѧ посеща́ти, и҆ли и҆́нѡ что̀ бл҃го́е съдѣлова́ти, и҆лѝ кꙋ́плю дѣ́ѧти идꙋ́щихъ, є҆ди́нагѡ и҆лѝ мнѡ́гихъ.

І҆ере́ѵ꙼ ѡ҆дѣѧ́нъ въ є҆пітра́хиль и́ Фелѡ́нъ, а҆́ще кро́мѣ Лѵтꙋ́ргїи, начина́єтъ ѡ҆бы́чнѡ:

Блⷭ҇ве́нъ Бг҃ъ нш҃ъ.

Кли́ръ чтетъ, Цр҃ю̀ небе́сный: Трисвѧто́е: Ѿч҃е нш҃ъ: Гд҃и, поми́лꙋй, ві҃.

Сла́ва: И҆ ны́нѣ. Прїйдѣ́те поклони́мсѧ, гⷤ. и Ѱало́мъ р҃м. Гд҃и ᲂу҆слы́ши Моли́твꙋ мою̀:

Сла́ва: И҆ ны́нѣ. А҆лл҃ꙋ́іѧ, гⷤ.

Дїа́конъ же, а҆́ще є҆́стъ, и҆лѝ ᲃа́мъ І҆ере́ѵ꙼ чтетъ Є҆кте́нїѧ ᲃі́ѧ.

Ми́ромъ Гд҃ꙋ помоли́мсѧ.

Кли́ръ,

Гд҃и поми́лꙋй:

Ꙍ҆ свы́шнѣмъ ми́рѣ, и҆ ᲃп҃нїи дш҃ъ на́шихъ, Гд҃ꙋ помоли́мсѧ.

Ꙍ҆ ми́рѣ всегѡ̀ ми́ра, бл҃гостоѧ́нїи ᲃт҃ы́х Бж҃іихъ цр҃квїй, и҆ съє҆дине́нїи всѣ́хъ, Гд҃ꙋ помоли́мсѧ.

Ꙍ҆ є҆́же помилова́ти рабѡ́въ ᲃвои́хъ, (и҆лѝ раба̀ свое́гѡ) И҆мⷬ҇къ: и҆ прости́ти и҆́мъ (и҆лѝ є҆мꙋ̀,) всѧ́кое прегрѣше́нїе во́лное же и҆ нево́лное, и҆ блⷭ҇ви́ти пꙋт̾ше́ствїе и҆́хъ, (и҆лѝ є҆гѡ̀,) Гд҃ꙋ помоли́мсѧ.

Ꙍ҆ є҆́же посла́ти и҆́мъ (и҆лѝ є҆мꙋ̀,) А҆́гг҃ла ми́ра сопꙋ́тника и҆ наста́вника, ᲃохранѧ́юща, защища́юща, застꙋпа́юща, и҆ невреди́мѡ соблюда́юща ѿ всѧ́кагѡ зла́гѡ ѡ҆бстоѧ́нїѧ, Гд҃ꙋ помоли́мсѧ:

Ꙍ҆ є҆́же покры́ти и҆́хъ, (и҆лѝ є҆гѡ̀,) и҆ невреди́мыхъ, (и҆лѝ невреди́ма,) ᲃоблюдѝ ѿ всѣ́хъ вра́жїихъ навѣ́тѡвъ и҆ ѡ҆бстоѧ́нїй и҆ беꙁпа́костныхъ, (и҆лѝ беꙁпа́костна) препроводи́ти, и҆ воꙁврати́ти, Гд҃ꙋ помоли́мсѧ:

Ꙍ҆ є҆́же беꙁгре́шное и҆ ми́рное пꙋт̾ше́ствїе, и҆ бл҃гополꙋ́чное въ здра́вїи воꙁвраще́нїе, въ всѧ́кѡмъ бл̀гочⷭ҇тїи и҆ чⷭ҇тности пода́ти и҆́мъ (и҆лѝ є҆мꙋ̀), Гд҃ꙋ помоли́мсѧ:

Ꙍ҆ є҆́же сохрани́ти и҆́хъ (и҆лѝ є҆гѡ̀,) невреди́мыхъ и҆ непребори́мыхъ ѿ всѣ́хъ ви́димыхъ и неви́димыхъ врагѡ́въ, и҆ лꙋка́выхъ чловѣ́къ ѡ҆ꙁлобле́нїѧ, Гд҃ꙋ помоли́мсѧ:

Ꙍ҆ є҆́же блⷭ҇ви́ти бл҃го́е и҆́хъ (и҆лѝ є҆гѡ̀) намѣре́нїе, и҆ бл҃гополꙋ́чно къ по́лꙁѣ дш҃евной и҆ тѣле́сной сотвори́ти свое́ю блгагода́тїю, Гд҃ꙋ помоли́мсѧ:

Застꙋпѝ, спасѝ, поми́лꙋй: И҆ проч:

И҆ воꙁглаша́етъ.

Ꙗ҆́кѡ подоба́етъ ти всѧ́каѧ ᲃла́ва, чⷭ҇ть, и҆ покл:

Бг҃ъ Гд҃ь и҆ ꙗ҆ви́сѧ на́мъ: Гла́съ в҃, и Тропа́рь се́й.

Пꙋ́ть и҆ и҆́стинна ᲃы́й Хрⷭ҇те, ᲃопꙋ́тника А҆́гѓла твое́гѡ рабѡ́мъ твои́мъ, (и҆лѝ рабꙋ̀ твое́мꙋ,) ны́нѣ ꙗ҆́коже Тꙍ́вїи и҆́ногда послѝ, сохранѧ́юща, и҆ невреди́мыхъ (и҆лѝ и҆ невреди́ма,) къ ᲃла́вѣ свое́й, ѿ всѧ́кагѡ зла въ всѧ́комъ благополꙋ́чїи соблюда́юща: моли́тва́ми Бц҃а, є҆ди́не чл҃кѡлю́бче.

Сла́ва: Гла́съ то́йжде.

Лꙋцѣ̀ и҆ Клеѡ́пѣ въ Е҆мма́ꙋсъ съпꙋтшествова́вый ᲃп҃се, сошествꙋ́й и҆ ны́нѣ рабо́мъ твои́мъ (и҆лѝ рабꙋ̀ твое́мꙋ) пꙋтшествова́ти хотѧ́щимъ, (и҆лѝ пꙋт̾шествова́ти хотѧ́щомꙋ,) ѿ всѧ́кагѡ и҆ꙁбавлѧ́ѧ и҆́хъ зла́гѡ ѡ҆бстоѧ́нїѧ, всѧ́ бо ты ꙗ҆́кѡ чл҃кѡлю́бецъ мо́жеши хотѧ́й.

И҆ ны́нѣ:

Застꙋ́пнице хрⷭ҇тїа́нѡмъ непосты́днаѧ:

Посе́мъ, рекъ Дїа́конъ,

Во́нмѣмъ.

Кли́ръ пое́тъ Прок: Гла́съ д҃.

Окажи́ ми Гд҃и пꙋ́ть во́нже по́йдꙋ, ꙗ҆́кѡ къ тебѣ̀ под̾ѧхъ дш҃ꙋ мою̀.

Сті́хъ.

Иꙁми́ мѧ ѿ врагѡ́въ мои́хъ, Гд҃и къ тебѣ̀ прибѣго́хъ.

А҆пⷭ҇лъ въ Дѣѧ́нїѧхъ Гла́съ и҃. Зача́ло: к҃. Е҆го́же нача́ло ᲃі́е.

Въ днѝ ѻ҆́ны, А҆́гг҃лъ Гд҃нь речѐ къ Філи́ппꙋ, гл҃ѧ̀:

Коне́цъ же се́й:

И҆дѧ́ше бо въ пꙋ́ть сво́й радꙋ́ѧсѧ. А҆ллилꙋ́іѧ, Гла́сꙋ, ᲃті́хъ а҃.

Ѿ Гд҃а стѡ́пы чл҃кꙋ и҆спра́вѧтсѧ, и҆ пꙋ́тъ є҆гѡ̀ восхо́щетъ: ᲃті́хъ в҃.

Ѿкры́й къ Гд҃ꙋ пꙋ́ть тво́й, и҆ ᲂу҆пова́й на́нь, и҆ то́й сотвор:

Е҆ѵⷢ҇лїе ѿ І҆ѡа́нна, Глава̀, д҃і. Зача́ло м҃ꙁ. Нача́ло є҆гѡ̀ сі́е:

Рече҃ Гд҃ь свои́мъ Оу҆́чн҃кѡмъ: Да не смꙋща́етсѧ ᲃе́рдце ва́ше:

Коне́цъ же се́й:

Не вѣ́рꙋеши ли ꙗ҆́кѡ а҆́ꙁъ въ Ѿц҃ѝ, и҆ Ѿц҃ъ въ мнѣ є҆́стъ.

По Е҆ѵⷢ҇лїи же Дїа́конъ, и҆лѝ І҆ере́ѵ꙼ гл҃е́тъ Е҆кта́нїѧ сі́ѧ.

Стѡ́пы члчⷭ҇кїѧ и҆справлѧ́ѧй Гд҃и, при́ꙁри ми́лостивнѡ на рабы̀ твоѧ̀ (и҆лѝ на раба̀ твое́гѡ) Имⷬ҇къ: и҆ прости́въ и҆́мъ, (и҆лѝ є҆мꙋ̀,) всѧ́кое прегрѣше́нїе во́лное же и҆ не во́лное, блⷭ҇вѝ благо́е намѣре́нїе совѣ́та и҆́хъ, (и҆лѝ є҆гѡ̀,) и҆ и҆схо́ды и҆ вхо́ды сопꙋтше́ствїемъ и҆спра́ви, приле́жнѡ моли́мтисѧ, ᲂу҆слы́ши и҆ поми́лꙋй.

І҆ꙍ́сифа ѿ ѡ҆ꙁлобле́нїѧ бра́тїи є҆гѡ̀ пресла́внѡ свободи́вый, Гд҃и, и҆ въ Є҆гѵ́петъ тогѡ̀ наста́вивый, и҆ благослове́нїемъ твое́ѧ бла́гости въ все́мъ благополꙋ́чна ᲃътвори́вый: и҆ си́хъ рабѡ́въ твои́хъ (и҆лѝ раба̀ твое́гѡ,) пꙋтьшествова́ти хотѧ́щихъ (и҆лѝ хотѧ́щагѡ) благословѝ, и҆ ше́ствїе и҆́хъ безмѧте́жнѡ и҆ благополꙋ́чнѡ сотворѝ, моли́мъ ти сѧ, ᲂу҆слы́ши и҆ поми́лꙋй.

І҆саа́кꙋ и҆ Тꙍ́вїи А҆́гг҃ла сопꙋ́тника посла́вый, и҆ тѣмъ пꙋтше́ствїе и҆ воꙁвраще́нїе и҆́хъ ми́рное и҆ благополꙋ́чное ᲃтвори́вый: и҆ ны́нѣ пребла́же, А҆́гг҃ла ми́ра рабѡ́мъ твои́мъ на́ми тебѣ̀ молѧ́щимсѧ (и҆лѝ рабꙋ̀ твое́мꙋ на́ми тебѣ̀ молѧ́щомꙋсѧ) послѝ, въ є҆́же наста́вити и҆́хъ (и҆лѝ є҆гѡ̀) на всѧ́кое дѣ́ло благо́е, и҆ и҆ꙁба́вити ѿ вра́гъ ви́димыхъ и҆ неви́димыхъ, и҆ ѿ всѧ́каго зла́гѡ ѡ҆бстоѧ́нїѧ, здра́воже, ми́рнѡ, и҆ благополꙋ́чнѡ къ ᲃла́вѣ твое́й въꙁврати́ти, ᲂу҆серднѡ моли́мъ ти сѧ, ᲂу҆слы́ши и҆ поми́лꙋй.

Лꙋцѣ̀ и҆ Клеѡ́пѣ въ Є҆мма́ꙋсъ сошествова́вый, и҆ ве́село въ І҆ерⷭ҇ли́мъ воꙁврати́тисѧ твои́мъ пресла́внымъ поꙁна́нїемъ сотвори́вый, сопꙋтьше́ствꙋй твое́ю благода́тїю и҆ Бжⷭ҇тве́ннымъ благослове́нїемъ и҆ ны́нѣ рабо́мъ твои́мъ си́мъ молѧ́щымсѧ (и҆лѝ рабꙋ̀ твое́мꙋ семꙋ̀ на́ми тебѣ̀ приле́жнѡ молѧ́щомꙋсѧ,) и҆ въ всѧ́комъ дѣ́лѣ бла́ꙁѣ, къ ᲃла́вѣ прⷭ҇та́гѡ твое́гѡ и҆́мени бл҃гопоспѣшѝ, въ здра́вїи и҆ бл҃гополꙋ́чїи съблюда́ѧ и҆ въꙁвраща́ѧ въ вре́мѧ бл҃гоподо́бно, ꙗ҆́кѡ всеще́дромꙋ благоде́телю моли́мъ ти сѧ, ско́рѡ ᲂу҆слы́ши и҆ ми́лотивнѡ поми́лꙋй.

І҆ере́ѵ꙼ воꙁглаша́етъ.

Ꙋ҆слы́ши ны Бж҃е сп҃си́телю нш҃ъ: И҆ проч:

Дїа́конъ гл҃е́тъ,

Съ ᲂу҆миле́нїемъ гла́вы и҆ колѣ́нѣ ва́ша Гд҃ви прекло́нше, Гд҃ꙋ пом҃ли́мсѧ.

Кли́ръ пое́тъ,

Гд҃и поми́лꙋй, гⷤ.

Ѻ҆́нѣмже всѣ́мъ колѣ́нѣ прекло́ншимъ, І҆ере́ѵ꙼ ѡ҆бра́щсѧ къ ни́мъ и҆ ста́въ въ црⷭ҇кїѧ две́ри, чтетъ Моли́твꙋ ᲃі́ю велегла́снѡ.

Гд҃и І҆и҃ᲃ Хє҃ Бж҃е нш҃ъ, и҆́стинный и҆ живы́й пꙋ́тю, ᲃостранствова́ти мнѣ́момꙋ твое́мꙋ ѿц҃ꙋ̀ І҆ѡ́сифꙋ, и҆ Пречи́стой тѝ Дв҃ѣ Мт҃ри, въ Є҆гѵ́петъ и҆ꙁво́ливый, и҆ Лꙋцѣ̀ и҆ Клеѡ́пѣ въ Є҆мма́ꙋсъ сопꙋтшествова́вый: и҆ ны́нѣ смѣре́ннѡ мо́лимъ тѧ, Влады́ко Пресвѧты́й, и҆ рабѡ́мъ твои́мъ симъ (и҆лѝ рабꙋ̀ твое́мꙋ семꙋ̀) твое́ю благода́тїю сопꙋт̾шествꙋ́й. И҆ ꙗ҆́коже рабꙋ̀ твое́мꙋ Тꙍ́вїи, А҆́гг҃ла храни́телѧ и҆ наста́вника послѝ, ᲃохранѧ́юща и҆ и҆ꙁбавлѧ́юща и҆́хъ (и҆лѝ є҆гѡ̀) ѿ всѧ́кагѡ зла́гѡ ѡ҆бстоѧ́нїѧ ви́димыхъ и҆ неви́димыхъ врагѡ́въ, и҆ къ и҆сполне́нїю за́повѣдїй твои́хъ наставлѧ́юща, ми́рнѡ же и҆ бл҃гополꙋ́чнѡ и҆ здра́вѡ препровожда́юща, и҆ па́ки цѣ́лѡ и҆ беꙁмѧте́жнѡ воꙁвраща́юща: и҆ да́ждь и҆́мъ (и҆лѝ є҆мꙋ̀) все бл҃го́е своѐ намѣре́нїе къ бл҃гоꙋгожде́нїю твое́мꙋ бл҃гополꙋ́чнѡ въ ᲃла́вꙋ твою̀ и҆спо́лнити: Твое́ бо є҆́стъ, є҆́же ми́ловати и҆ сп҃са́ти на́съ, и҆ тебѣ̀ ᲃла́вꙋ воꙁсыла́емъ, съ беꙁнача́льнымъ ти Ѿц҃емъ, и҆ съ прⷭ҇ты́мъ, и҆ бл҃ги́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆ми́нь.

Вꙁе́мъ же І҆ере́ѵ꙼ Крⷭ҇тъ дае́тъ и҆́мъ лобꙁа́ти, и҆ кро́питъ и҆́хъ сщ҃е́нною водо́ю, гл҃ѧ̀:

Да блⷭ҇ви́тъ ва́съ Гд҃ь ѿ Сіꙍ́на, и҆ ᲂу҆́ꙁрите бл҃га́ѧ І҆ерⷭ҇ли́мꙋ въ всѧ̀ днѝ живота̀ ва́шегѡ, и҆ да и҆спра́витъ пꙋ́ть ва́шъ въ ми́рѣ, въ ᲃла́вꙋ ᲃт҃а́гѡ свое́гѡ и҆́мене. А҆ми́нь.

И҆ а҆́бїе тво́ритъ ѡ҆бы́чный дне́вный ѿпꙋ́стъ.

Вѣ́стнѡ же бꙋ́ди, ꙗ҆́кѡ а҆́ще Лѵтꙋ́ргїѧ быва́етъ тогда̀, всѧ̀ сі́ѧ Е҆кте́нїѧ, на Лѵтꙋ́ргїи съверша́ютсѧ, и҆ Тропарѝ на свое́мъ мѣ́стѣ, и҆ Проки́менъ, и҆ А҆пⷭ҇лъ, и҆ Е҆ѵⷢ҇лїе, и҆ по Е҆ѵⷢ҇лїи Е҆кте́нїѧ, по дне́вномъ же Прича́стне, се́й Прича́стне вто́рый пою́тъ:

Совѣ́сть Гд҃ь пꙋ́ти непоро́чныхъ, и҆ достоѧ́нїе и҆́хъ въ вѣ́ки бꙋ́детъ, А҆ллилꙋ́іѧ.

По за А҆мбо́нной же Моли́твѣ ста́въ въ Црⷭ҇кихъ две́рехъ, въ пꙋ́ть и҆дꙋ́щимъ колѣ́нѣ прекло́ншимъ, чтетъ предположе́ннꙋю Моли́твꙋ, и҆ А҆нти́дорꙋ раꙁдава́ѧ, дає́тъ и҆́мъ Крⷭ҇тъ лобꙁа́ти, и҆ сщ҃енною водо́ю кро́питъ и҆́хъ, и҆ блⷭ҇вивъ, тво́ритъ ѡ҆бы́чный Лѵтꙋргійный ѿпꙋ́стъ.

Кꙋ́плю и҆лѝ и҆́но что̀ бл҃го́е содѣлова́ти хотѧ́щихъ мнѡ́гихъ, и҆лѝ є҆ди́нагѡ

І҆ере́ѵ꙼ въ Е҆пітра́хилъ и҆ Фелꙍ́нъ ѡ҆дѣѧ́нъ а҆́ще кро́мѣ Лѵтꙋ́ргїи, ѡ҆бы́чнѡ начина́етъ,

Ли́къ же чтетъ,

Цр҃ю̀ небе́сный: Трисвѧто́е: Ѿч҃е нш҃ъ:

Гд҃и, поми́лꙋй, ві҃.

Сла́ва: И҆ ны́нѣ: Прїйдѣ́те поклони́мсѧ, гⷤ. и Ѱало́мъ р҃к.

Воꙁведо́хъ ѻ҆́цѣ моѝ:

Сла́ва: И҆ ны́нѣ: А҆лл҃ꙋ́іѧ, гⷤ.

Дїа́конъ же гл҃е́тъ Е҆кте́нїѧ ᲃі́ѧ.

Ми́ромъ Гд҃ꙋ помоли́мсѧ.

Кли́ръ,

Гд҃и поми́лꙋй:

Ꙍ҆ свы́шнѣмъ ми́рѣ и҆ ᲃп҃се́нїи дꙋ́шъ на́шихъ, Гд҃ꙋ помоли́мсѧ.

Ꙍ҆ ми́ре всегѡ̀ ми́ра, благостоѧ́нїи ᲃт҃ы́хъ Бж҃іихъ це́рквїй, и҆ соедине́нїи всѣ́хъ, Гд҃ꙋ помоли́мсѧ.

Ꙍ҆ є҆́же млⷭ҇тивъ, бл҃гоꙋвѣтли́въ, и҆ бл҃гопремѣни́тель бы́ти рабѡ́мъ свои́мъ (и҆лѝ рабꙋ̀ свое́мꙋ) на́ми ны́нѣ мл҃ѧ́щимсѧ, (и҆лѝ, мл҃ѧ́щомꙋсѧ,) и҆ прости́въ и҆́мъ (и҆лѝ є҆мꙋ̀,) всѧ̀ согрѣше́нїѧ во́лнаѧ и҆ нево́лнаѧ, влⷭ҇ви́тъ во́дное пꙋт̾ше́ствїе и҆́хъ, (и҆лѝ є҆гѡ̀,) Гд҃ꙋ помоли́мсѧ.

Ꙍ҆ є҆́же посла́ти и҆́мъ (и҆лѝ є҆мꙋ̀,) А҆́гг҃ла ᲃвое́гѡ храни́телѧ наставлѧ́юща и҆́хъ, (и҆лѝ є҆гѡ̀,) и҆ ѿ всѧ́кагѡ зла ви́димыхъ и҆ неви́димыхъ вра́гъ покрыва́юща, и҆ ѿ и҆стопле́нїѧ бꙋ́рѧ во́дныѧ и҆ꙁбавлѧ́юща, Гд҃ꙋ помоли́мсѧ.

Ꙍ҆ є҆́же ми́рнѡ и҆ бл҃гополꙋ́чнѡ препроводи́ти, здра́во же и҆ беꙁмѧте́жнѡ воꙁврати́ти и҆́хъ, (и҆лѝ є҆гѡ̀,) Гд҃ꙋ помоли́мсѧ.

Ꙍ҆ є҆́же блⷭ҇ви́ти намѣре́нїе совѣ́та и҆ дѣ́ла и҆́хъ, (и҆лѝ є҆гѡ̀,) къ по́леꙁномꙋ съверше́нїю, въ сла́вꙋ прⷭ҇та́гѡ и҆менѝ ᲃвое́гѡ, въ дш҃евнꙋю же и҆ тѣле́снꙋю по́лꙁꙋ, Гд҃ꙋ помоли́мсѧ.

Ꙍ҆ є҆́же и҆ꙁба́вити и҆́хъ (и҆лѝ є҆гѡ̀,) ᲃи́лою благода́ти свое́ѧ ѿ всѧ́кихъ бѣ́дъ и҆ нꙋ́ждъ дш҃е́вныхъ и҆ теле́сныхъ ѿ не́дꙋга же и҆ ѿ напра́сныѧ ᲃме́рти, и҆ всѧ́кїѧ смертоно́сныѧ ра́ны: здра́вїе же съ бл҃гополꙋ́чіємъ, и҆ бл҃говре́меннымъ въ своѧ́ си воꙁвраще́нїемъ, ми́лостивнѡ пода́ти, Гд҃ꙋ помоли́мсѧ.

Застꙋпѝ спасѝ: И҆ про́чаѧ.

Во́ꙁгласъ.

Ꙗ҆́кѡ подоба́єтъ ти всѧ́каѧ сла́ва:

Бг҃ъ Гд҃ь и҆ ꙗ҆ви́сѧ на́мъ:

Гла́съ в҃. и҆ Топарѝ ᲃі́ѧ.

Къ тебѣ̀ ᲃп҃се прибѣга́ющихъ, (и҆лѝ прибѣга́ющагѡ) и҆ ѿ твое́ѧ всеси́л̾ныѧ десни́ци по́мощи и҆ блгⷭ҇венїѧ, ꙗ҆́кѡ ѿ Творца и́ Влады́ки и҆́щꙋщихъ, (и҆лѝ и҆́щꙋщагѡ) не пре́ꙁри: но ꙗ҆́коже и҆́ногда на мо́ри сло́вомъ тишинꙋ̀ А҆пⷭ҇лѡмъ свои́мъ пода́лъ є҆сѝ, и҆ ны́нѣ ти́хое и҆ беꙁмѧте́жное плава́нїе, съ здра́вїемъ и҆́мъ (и҆лѝ є҆мꙋ̀) дарꙋ́й, Моли́твами Бц҃а є҆ди́не чл҃кѡлю́бче.

Сла́ва: Гла́съ є҃.

Всю̀ наде́ждꙋ на́тѧ воꙁложи́вшимъ, (и҆лѝ воꙁложи́вшомꙋ) Сп҃се, бꙋ́ди помо́щникъ и҆ и҆ꙁбави́тель, и҆ бл҃го́е намѣре́нїе дѣ́ла ᲃъпꙋт̾ше́ствїемъ и҆́хъ (и҆лѝ є҆гѡ̀,) блⷭ҇вѝ, да всѝ сла́вимъ тѧ є҆дина́гѡ всѣ́хъ бл҃гъ пода́телѧ.

И҆ ны́нѣ:

Подъ тво́й покро́въ прибѣга́емъ Бц҃е Дв҃о, Мл҃твъ на́шихъ не пре́ꙁри въ ско́рбехъ, но ѿ бѣ́дъ и҆ꙁба́ви на́съ, є҆ди́на чⷭ҇таѧ и҆ блⷭ҇ве́ннаѧ.

Посе́мъ ре́къ Дїа́конъ,

Во́нмѣмъ.

І҆ере́ѵ꙼,

Ми́ръ всѣ́мъ.

Дїа́конъ,

Премꙋ́дрость во́нмемъ:

Кли́ръ пое́тъ Проки́менъ Гла́съ д҃.

А҆́ще и҆ по́йдꙋ посре́дѣ ᲃѣ́ни ᲃме́ртныѧ, не ᲂу҆бою́сѧ зла̀ ꙗ҆́кѡ ты съ мно́ю є҆сѝ.

Сті́хъ.

И҆ млⷭ҇ть твоѧ̀ пожене́тъ мѧ, въ всѧ̀ днѝ живота̀ мое́гѡ.

А҆пⷭ҇лъ въ Дѣѧ́нїѧхъ, ѿ Гла́вы к҃а. Зача́ло м҃д. Къ концꙋ̀ Нача́ло є҆гѡ̀ сі́е:

Въ днѝ ѻ҆́ны, ꙗ҆́коже бы́сть ѿбеꙁсти́сѧ на́мъ, ѿлꙋчи́шимсѧ ѿ ни́хъ.

Коне́цъ же сей.

Пребы́хѡмъ дн҃ь є҆ди́нъ ᲂу҆ ни́хъ. А҆ллілꙋ́іѧ, Гла́сꙋ. ᲃти́хъ а҃.

И҆ꙁба́ви мѧ ѿ ненавидѧ́щихъ мѧ, и҆ ѿ глꙋбо́кихъ вѡдъ. ᲃти́х в҃.

Да не пото́питъ менѐ бꙋ́рѧ во́днаѧ, ни да пожре́тъ менѐ глꙋбина̀.

Е҆ѵⷢ҇лїе ѿ Ма́рка: ѿ Гла́вы д҃. Зача́ло и҃і нача́ло є҆гѡ̀ сі́е:

Речѐ Гд҃ь свои́мъ Ꙋ҆ч҃никѡ́мъ, Прейдѣ́мъ на ѡ҆́нъ по́лъ.

Коне́цъ же є҆гѡ̀ се́й.

Ꙗ҆́кѡ и҆ вѣ́тръ и҆ мо́ре послꙋша́ютъ є҆гѡ̀.

По Е҆ѵⷢ҇лїи же І҆ере́ѵ꙼ и҆лѝ Дїа́конъ, гл҃е́тъ Е҆кте́нїѧ сі́ѧ.

Пом҃лꙋй на́съ Бж҃е по вели́цей млⷭ҇ти твое́й, мл҃и́мътисѧ ᲂу҆слы́ши и҆ поми́лꙋй.

Кли́ръ,

Гд҃и поми́лꙋй гⷤ.

Запрѣти́вый и҆́ногда вѣ́трѡмъ и҆ мо́рю, и҆ волна́ми вла́ющомꙋсѧ Кора́блю тишинꙋ ᲃло́вомъ пода́вый, и҆ Ꙋ҆ч҃ники беꙁмѧте́жны сътвори́вый, при́ꙁри и҆ ны́нѣ на Моли́твꙋ рабѡ́въ твои́хъ (и҆лѝ раба̀ твое́гѡ) млⷭ҇тиве, къ тебѣ̀ приле́жно припада́ющихъ, (и҆лѝ припада́ющагѡ,) и҆ блⷭ҇вѝ плава́нїе и҆́хъ, (и҆лѝ є҆гѡ̀) ти́хое же, ми́рное, и҆ беꙁмѧте́жное и҆́мъ ше́ствїе дарꙋ́й, мл҃и́мтисѧ ᲂу҆слы́ши и҆ поми́лꙋй:

По вода́мъ ꙗ҆́кѡ посꙋ́хꙋ нога́ма ходи́вый Сп҃се, и҆ Петра̀ всеси́лною ти десни́цею ѿ и҆стопле́нїѧ и҆ꙁба́вивый Гд҃и, вѣ́рою къ твое́мꙋ застꙋпле́нїю прибѣга́ющихъ, (и҆лѝ прибѣга́ющагѡ,) и҆ къ плава́нїю ᲂу҆стремлѧ́ющихсѧ, (и҆лѝ ᲂу҆стремлѧ́ющагосѧ) ѿ всѣ́хъ бѣ́дъ, и҆ бꙋ́рей вѣ́трныхъ и҆ꙁба́ви, бл҃гополꙋ́чное и҆́мъ (и҆лѝ є҆мꙋ̀) ше́ствїе, и҆ въ своѧ́ си воꙁвраще́нїе, млⷭ҇тивнѡ дарꙋ́ѧ, моли́мтисѧ всеще́дрый Гд҃и, ᲂу҆слы́ши и҆ поми́лꙋй.

А҆́гг҃ла твое́гѡ всемлⷭ҇тивый Гд҃и, съпꙋтшестве́нника и҆ Храни́телѧ дш҃а́мъ и҆ тѣ́лѡмъ и҆́хъ, (и҆лѝ дꙋшѝ и҆ тѣ́лꙋ є҆гѡ̀,) съхранѧ́юща и҆ ѿ всѣ́хъ ви́димыхъ и҆ неви́димыхъ врагѡ́въ покрыва́ющагѡ послѝ: ᲃи́лою же твое́ю Бжⷭ҇тве́нною ѿ всѧ́кїѧ ско́рби, бѣ́ды, нꙋ́жды, не́дꙋга, и҆ смертоно́сныѧ ра́ны и҆ꙁбавлѧ́юща, здра́выхъ же и҆ бл҃гополꙋ́чныхъ (и҆лѝ здра́ва же и҆ бл҃гополꙋ́чна,) къ ᲃла́вѣ И҆менѝ твое́гѡ Пртⷭ҇а́гѡ въ своѧ́ си во вре́мѧ бл҃гоподобнѡ воꙁвраща́юща, моли́мти сѧ всемогі́й Влады́ко, ᲂу҆слы́ши и҆ млⷭ҇тивнѡ поми́лꙋй.

І҆ере́ѵ꙼ воꙁглаша́етъ.

Ꙋ҆слы́ши ны Бж҃е ᲃп҃си́телю нш҃ъ:

Дїа́конъ же гл҃е́тъ,

Съ ᲂу҆миле́нїемъ колѣ́нѣ и҆ гла́вы ва́шѧ Гд҃ви прекло́нше, Гд҃ꙋ помоли́мсѧ.

Кли́ръ,

Гд҃и поми́лꙋй. гⷤ.

Ѻ҆́нѣмъ же всѣ́мъ колѣ́нѣ прекло́ншимъ, І҆ере́ѵ꙼ ѡ҆бра́щ̾сѧ къ за́падѡмъ, стоѧ̀ въ Ца́рскихъ две́рехъ, гл҃е́тъ Моли́твꙋ сі́ю велегла́снѡ.

Влады́ко Гд҃и І҆и҃ᲃ Хє҃ Бж҃е нш҃ъ, по вода́мъ нога́ма ꙗ҆́кѡ посꙋ́хꙋ ходи́вый, и҆ ст҃ы́ѧ твоѧ̀ Ꙋ҆́ч҃ники и҆ А҆пⷭ҇лы въ Кораблѝ съплава́телѧ ᲃебѣ̀ бы́ти ᲃподоби́вый, бꙋ́ри же вѣ́трной запрѣти́вый, и҆ мо́рскимъ ᲂу҆тѣши́тисѧ волна́мъ повелѣ́вый: Ты и҆ ны́нѣ смире́ннѡ моли́мъ тѧ Сп́се, и҆ рабѡ́мъ твои́мъ ᲃи́мъ, съплыстѝ въ Кораблѝ се́мъ, (и҆лѝ въ ло́дїи ᲃе́й) и҆ꙁво́ли, всѧ́кїй проти́вный вѣ́тръ и҆ бꙋ́рю ᲂу҆толѧ́ѧ: воꙁдвигни́ же и҆ꙁрѧ́дныѧ и҆ бл҃говре́менныѧ вѣ́тры къ бл҃гополꙋ́чномꙋ плава́нїю, Ко́рмчїй и҆́мъ са́мъ всегда̀, сп҃се́нное же, небꙋ́рное, и҆ ве́дрное приста́нище тѣ́мъ самы́мъ и҆ Кораблю̀ (и҆лѝ Ло́дїи) быва́ѧ. И҆ ꙗ҆́коже Петра̀ ѿ и҆стопле́нїѧ, и҆ ѿ всѣ́хъ ви́димыхъ и҆ неви́димыхъ врагѡ́въ навѣтова́нїѧ, бѣ́дъ же и҆ нꙋ́ждъ и҆ страхова́нїй, всеси́лною ти десни́цею держа́внѡ и҆ꙁба́ви, и҆ въ своѧ́ си до́брѣ и҆ бл҃гополꙋ́чнѡ, своѐ предложе́нїе и҆ бл҃го́е намѣре́нїе съверши́вшихъ, здра́во и҆ весе́ло въ ми́рѣ воꙁврати́тисѧ бл҃гоиꙁволѝ, твою̀ бога́тꙋю и҆ неистощи́мꙋю благода́ть въ всѣ́хъ дѣ́лехъ и҆́хъ бога́тнѡ дарꙋ́ѧ, и҆ Кора́бль цѣ́лъ и҆ невреди́мъ съблюда́ѧ. Ты́ бо є҆сѝ Сп҃съ, и҆ꙁбави́тель, и҆ всѣ́хъ благи́хъ нбⷭ҇ныхъ и҆ зе́мныхъ бога́тый пода́тель, и҆ тебѣ̀ ᲃла́вꙋ воꙁсыла́емъ съ беꙁнача́лнымъ ти Ѿц҃емъ, и҆ Пртⷭ҇ы́мъ и҆ бл҃ги́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆ми́нь.

Вꙁе́мъ же І҆ере́ѵ꙼ Крⷭ҇тъ дає́тъ и҆́мъ лобꙁа́ти, и҆ кро́питъ и҆́хъ ᲃщ҃енною водо́ю, гл҃ѧ̀.

Да блгⷭ҇ви́тъ ва́съ Гд҃ь ѿ Сіꙍ́на, и҆ ᲂу҆́ꙁрите бл҃га́ѧ І҆ерⷭ҇ли́мꙋ, въ всѧ̀ днѝ живота̀ ва́шегѡ, и҆ да и҆спра́витъ пꙋтше́ствїе ва́ше въ ми́рѣ, въ ᲃла́вꙋ ᲃта́гѡ свое́гѡ И҆менѝ. А҆ми́нь.

И҆ а҆́бїе твори́тъ ѡ҆бы́чный ѿпꙋ́стъ дне́вный.

Сі́ѧ же всѧ̀ быва́етъ Лѵтꙋ́ргїѧ, на не́й (кро́мѣ Моли́твы ꙗ҆́же по Лѵтꙋ́ргїи чте́тсѧ,) съверша́ютсѧ, ꙗ҆́коже предꙋкаꙁа́сѧ въ бл҃гослове́нїи Пꙋтшествꙋ́ющихъ.

на ᲃопроти́вныѧ ѿпꙋща́емагѡ, є҆ди́нагѡ и҆лѝ мнѡ́гихъ: и҆ Блⷭ҇ве́нїѧ Во́инѡмъ въ ни́хъ плы́ти хотѧ́щимъ.

Съверши́въ І҆ере́ѵ꙼ (а҆́ще и҆ꙁво́литъ,) Моле́бенъ ѡ҆ Побѣ́дѣ на врагѝ, (и҆щѝ сегѡ̀ въ Тре́тей Ча́сти ᲃеѧ̀ Кни́ги на пре́ди,) и҆де́тъ на бре́гъ Мо́рѧ и҆лѝ Рѣкѝ, и҆де́же ᲃꙋ́дна стоѧ́тъ, и҆мы́й съ собо́ю ᲃщ҃е́ннꙋю во́дꙋ. Вꙁе́мъ же на ᲃебѐ Е҆пітра́хиль, начина́етъ ѡ҆бы́чнѡ:

Блⷭ҇ве́нъ Бг҃ъ нш҃ъ:

И҆ а҆́бїе чтетъ и҆лѝ пое́тъ,

Цр҃ю нбⷭ҇ный: Трⷭ҇то́е: Ѿч҃е нш҃ъ: Гд҃и поми́лꙋй, в҃і.

Сла́ва: И҆ ны́нѣ: Прїйдѣ́те поклони́мсѧ, гⷤ. И҆ Ѱало́мъ: м҃е:

Бг҃ъ на́мъ прибѣ́жище и҆ си́ла: Весъ до конца̀.

Сла́ва: И҆ ны́нѣ: А҆лл҃илꙋ́иа. гⷤ.

И҆ а҆́бїе чтетъ Е҆кте́нїѧ ᲃі́ѧ.

Ми́ромъ Гд҃ꙋ помоли́мсѧ.

Ли́къ,

Гд҃и поми́лꙋй:

Ꙍ҆ свы́шнѣмъ ми́рѣ и҆ ᲃп҃се́нїи дꙋ́шъ на́шихъ, Гд҃ꙋ помоли́мсѧ.

Ꙍ҆ ми́ре всегѡ̀ ми́ра:

А҆́бїе же прилага́етъ сі́ѧ.

Ꙍ҆ є҆́же не помѧнꙋ́ти грѣхѝ и҆ беꙁꙁакѡ́нїа на́шѧ, но млⷭ҇тивнѡ ᲂу҆слы́шати гла́съ мл҃енїѧ на́шегѡ, и҆ ꙗ҆́кѡ бл҃госе́рдъ млⷭ҇тивъ бы́ти на́мъ недосто́йнымъ рабѡ́мъ свои́мъ, и҆ и҆ꙁба́вити на́съ ѿ вра́гъ на́шихъ, Гд҃ꙋ:

Ꙍ҆ є҆́же блⷭ҇ви́ти ᲃꙋдно̀ сі́е ра́тное, (и҆лѝ ᲃꙋ́дна сі́ѧ ра́тнаѧ,) нбⷭ҇нымъ свои́мъ блⷭ҇ве́нїемъ, ᲃтра́шна же и҆ ᲂу҆жа́сна всѣ́мъ врагѡмъ на́шимъ сотвори́ти є҆̀, (и҆лѝ ѧ҆̀) Гд҃ꙋ помоли́мсѧ.

Ꙍ҆ є҆́же вѣ́рномꙋ свое́мꙋ̀ И҆мⷬ҇къ: (Ге́тманꙋ) и҆ всемꙋ̀ во́инствꙋ на ᲃꙋднѣ̀ семъ, (и҆лѝ на сꙋ́днахъ си́хъ,) плы́ти хотѧ́щомꙋ, А҆́гг҃ла крѣ́пости свое́ѧ приста́вити, ᲂу҆крѣплѧ́юща и҆ мꙋжестве́нна ᲃе́рдца и҆́хъ творѧ́ща, и҆ крѣ́постъ и҆́мъ въ бра́нехъ подава́юща, на сотре́нїе и҆ попра́нїе крѣ́пости сꙋпоста́тъ на́шихъ, ѿ бꙋ́рѧ же бѣ́дныѧ и҆ и҆стопле́нїа и҆ всѧ́кагѡ зла̀ и҆ꙁбавлѧ́юща и҆́хъ, Гд҃ꙋ помоли́мсѧ:

Ꙍ҆ є҆́же пода́ти и҆́мъ бл҃гопо́леꙁны, и҆ бл҃говре́менны вѣ́тры къ беꙁ̾бѣ́дномꙋ и҆ ᲃпѣ́шномꙋ плава́нїю, Гд҃ꙋ помоли́мсѧ.

Ꙍ҆ є҆́же всѣ́хъ врагѡ́въ на́шихъ на ᲃꙋдно̀ сі́е (и҆лѝ на ᲃꙋ́дна сі́ѧ) в̾ꙁира́ющихъ, дерꙁнове́нїе въ ᲃтра́хъ, ᲃи́лꙋ въ ѡ҆сла́бꙋ, и҆ мꙋ́жество въ малодꙋ́шїе и҆ въ бѣ́гство претвори́ти, Гд҃ꙋ помоли́мсѧ.

Ꙍ҆ є҆́же пода́ти ᲃи́лꙋ и҆ крѣ́пость свою̀ нбⷭ҇нꙋю Хрⷭ҇толюби́вомꙋ семꙋ̀ во́инствꙋ, и҆ мꙋжестве́ннѡ то и҆ хра́бро сопроти́въ всѧ́кагѡ вра́га и҆ ᲃꙋпоста́та всегда̀ покаꙁа́ти, Гд҃ꙋ помоли́мсѧ.

Ꙍ҆ є҆́же всѣ́мъ на́мъ вѣ́рнымъ рабѡ́мъ свои́мъ ми́ръ и҆ ᲂу҆твержде́нїе, и҆ ѿ всѣ́хъ бѣ́дъ и҆ нꙋ́ждъ, и҆ ѿ всѣ́хъ вра́жїихъ навѣ́тѡвъ ᲃко́рое ᲃвобожде́нїе пода́ти, Гд҃ꙋ помоли́мсѧ.

Ꙍ҆ є҆́же стꙋ́да, и҆ беꙁ̾че́стїѧ лица̀ сопроти́вныхъ врагѡ́въ на́шихъ, ᲃе́рдце же и҆́хъ ᲃтра́ха и҆ ᲂу҆жа́са и҆спо́лнити, и҆ А҆́гг҃лъ Гд҃нь да бꙋ́детъ поганѧ́ѧй и҆ поража́ѧй и҆́хъ, Гд҃ꙋ помоли́мсѧ.

Ꙍ҆ є҆́же неѡсла́бнꙋ, непреобори́мꙋ, побѣди́телнꙋ же ᲃи́лꙋ, крѣ́постъ и҆ мꙋ́жество съ хра́бростїю хрⷭ҇тоимени́томꙋ семꙋ̀ во́инствꙋ на́шемꙋ, на сокрꙋше́нїе лꙋ́кѡвъ си́лныхъ врагѡ́въ на́шихъ пода́ти, Гд҃ꙋ помоли́мсѧ.

Ꙍ҆ є҆́же сокрꙋши́ти щи́тъ, ѻ҆рꙋ́жїе, и҆ бра́нь всѣ́хъ борꙋ́щихсѧ съ на́ми, и҆ подъ нѡ́ги хрⷭ҇толюби́вомꙋ во́инствꙋ тѣ́хъ покори́ти, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ на́мъ:

Застꙋпѝ спасѝ поми́лꙋй:

Прⷭ҇тꙋ́ю чⷭ҇тꙋю:

Во́ꙁгласъ.

Ꙗ҆́кѡ ты́ є҆си крѣ́постъ и҆ ᲂу҆твержде́нїе люде́мъ твои́мъ, и҆ тебѣ̀ всѧ́каѧ ᲃла́ва, чⷭ҇ть, и҆ поклоне́нїе Ѿц҃ꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́ковъ:

Ли́къ,

А҆ми́нь.

По си́хъ же пою́тъ, Бг҃ъ Гд҃ь и҆ ꙗ҆ви́сѧ на́мъ: Гла́съ в҃. Сті́хъ. а҃.

Воꙁлюблю́ тѧ Гд҃и крѣ́пости моѧ̀: Сті́хъ в҃.

Бг҃ъ мо́й помо́щникъ мо́й, и҆ ᲂу҆пова́ю нанъ: Сті́хъ г҃.

Поженꙋ̀ врагѝ моѧ̀, и҆ пости́гнꙋ ѧ҆̀, и҆ не воꙁ̾вращꙋ́сѧ до́ндеже сконча́ютсѧ. Сті́хъ д҃.

Жи́въ Гд҃ь и҆ блⷭ҇ве́нъ Бг҃ъ, и҆ да воꙁнесе́тсѧ Бг҃ъ спⷭ҇нїа мое́гѡ:

И҆ тропарѝ ᲃі́ѧ. Гла́съ то́йжде.

Къ тебѣ̀ ᲃп҃се ны́нѣ прибѣга́ющихъ, и҆ ѿ твое́ѧ всеси́лныѧ десни́ци по́мощи и҆ блⷭ҇ве́нїѧ, ꙗ҆́кѡ ѿ Тво́рца и҆ Влады́ки и҆́щꙋщихъ, не пре́ꙁри: но ꙗ҆ікоже и҆́ногда на мо́ри ᲃло́вомъ тишинꙋ̀ А҆пⷭ҇лѡмъ свои́мъ пода́лъ є҆сѝ, и҆ ны́нѣ ти́хое и҆ беꙁ̾мѧте́жное въ бл҃гополꙋ́чїи, съ здра́вїемъ и҆ побѣ́дою плава́нїе тѣ́мъ дарꙋ́й: молитва́ми Бц҃а, є҆ди́не чл҃колю́бче.

Сла́ва: Гла́съ є҃.

Всю наде́ждꙋ и҆ ᲂу҆пова́нїе своѐ на́ тѧ Хє҃ воꙁло́жимъ, помо́щникъ и҆ защити́телъ бꙋ́ди, и҆ побѣ́дꙋ дарꙋ́ѧ и҆́мъ на врагѝ, пꙋтше́ствїе и҆́хъ блⷭ҇вѝ, и҆ бл҃гополꙋ́чно сотворѝ: да всѝ сла́вимъ тѧ є҆ди́нагѡ застꙋ́пника и҆ бл҃года́телѧ на́шегѡ.

И҆ ны́нѣ: Богоро́дичен:

Подъ тво́й покро́въ прибѣга́емъ Бц҃е Дв҃о, моли́твъ на́шихъ не пре́ꙁри въ ско́рбехъ: но ѿ бѣ́дъ и҆ꙁба́ви на́съ є҆ди́на чⷭ҇таѧ и҆ блⷭ҇ве́ннаѧ.

А҆́бїе же чтетъ Ѱал: р҃к.

Въꙁведо́хъ ѻ҆́цѣ моѝ въ го́ры:

Посе́мъ ре́къ І҆ере́ѵ꙼,

Гд҃ꙋ помоли́мсѧ:

и҆ Ли́къ,

Гд҃и поми́лꙋй.

Чтетъ Моли́твꙋ ᲃі́ю.

Гд҃и І҆и҃ᲃ Хє҃ Бж҃е нш҃ъ, по мо́рю ꙗ҆́кѡ по сꙋ́хꙋ ходи́вый, и҆ ᲃт҃ы́ѧ своѧ̀ Ꙋ҆́чн҃ки ѿ смꙋще́нїѧ и҆ волне́нїѧ тогѡ̀ прише́ствїемъ свои́мъ свободи́вый: Са́мъ и҆ ны́нѣ смере́ннѡ мо́лимъ тѧ, при́ꙁри млⷭ҇тивнѡ на ᲃꙋднѡ̀ ᲃі́е ра́тное, (и҆лѝ на ᲃꙋ́дна сі́ѧ ра́тнаѧ,) и҆ всеси́лною ти десни́цею нбⷭ҇нымъ си блⷭ҇ве́нїемъ блⷭ҇вѝ є҆̀, (и҆лѝ ѧ҆̀,) и҆ плы́ти въ не́мъ (и҆лѝ въ нѧ̀) хотѧ́щомꙋ во́инствꙋ соплава́й, и́ бл҃гоꙋтѣ́шны вѣ́тры и҆́мъ послѝ, и҆ приста́ви и҆́мъ А҆́гг҃ла бл҃га всеси́лныѧ твое́ѧ крѣ́пости, є҆́же ᲃохрани́ти и҆ и҆ꙁба́вити и҆́хъ ѿ всѧ́кихъ зѣ́лныхъ вѣ́трѡвъ, бꙋ́рей же и́ и҆ꙁлишныхъ во́лнъ и҆ и҆стопле́нїѧ, и҆ всѧ́кихъ вра́жїихъ навѣ́тѡвъ и҆ наше́ствїй: и҆ да́ждъ и҆́мъ си́лꙋ, и҆ крѣ́постъ, и҆ мꙋ́жество, и҆ побе́дꙋ на врагѝ Крⷭ҇та̀ твое́гѡ, и҆ на всѧ̀ ᲃꙋпоста́ты: здра́выхъ же и҆ бл҃гополꙋ́чныхъ съ побѣ́дою въ сла́вꙋ твою̀ ми́рнѡ воꙁвратѝ. Е҆́й Гд҃и Бж҃е нш҃ъ ᲂу҆дивѝ и҆ ны́нѣ дре́внѧѧ млⷭ҇ти твоѧ̀ на на́съ, и҆ са́мъ Воеводствꙋ́й во́инствꙋ семꙋ̀, и҆ застꙋ́пникъ помо́щникъ крѣ́покъ тѣ́мъ и҆ на́мъ на́ тѧ ᲂу҆пова́ющимъ, и҆ твое́ѧ всеси́лныѧ по́мощи вѣ́рнѡ ча́ющимъ:

Ты́ бо є҆сѝ крѣ́постъ, и҆ ᲂу҆твержде́нїе, и҆ ми́ръ нш҃ъ, и҆ тебѣ̀ ᲃла́вꙋ воꙁсыла́емъ съ беꙁнача́лнымъ ти Ѿц҃емъ, и҆ прⷭ҇ты́мъ и҆ бл҃ги́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ꙼,

Ми́ръ всѣ́мъ.

Ли́къ,

И҆ дх҃о́ви твое́мꙋ.

І҆ере́ѵ꙼,

Гла́вы ва́шѧ Гв҃и преклони́те.

Ли́къ,

Тебѣ̀ Гд҃и.

І҆ере́ѵ꙼ же чтетъ Моли́твꙋ ᲃі́ю, Ге́тманꙋ и҆ Во́емъ на бра́нъ и҆дꙋ́щимъ велегла́снѡ.

Влады́ко Гд҃и Бж҃е ѡ҆ц҃ъ на́шихъ, тебѐ про́симъ, и҆ тебѣ̀ ᲃмѣре́ннѡ ми́лисѧ дѣ́емъ, при́ꙁри млⷭ҇тивнѡ на моли́твꙋ на́съ недосто́йныхъ ра́бъ твои́хъ, и҆ ꙗ҆́коже и҆́ногда ᲃа́мъ бл҃гоиꙁволилъ є҆сѝ в̾ꙁыйтѝ съ ᲂу҆го́дникомъ твои́мъ Мѡѵ꙼се́ѡмъ, и҆ꙁводѧ̀ лю́ди своѧ̀ І҆и҃лѧ и҆ꙁъ Е҆гѵ́пта въ зе́млю ѡ҆бѣтова́нїѧ, та́кѡ и҆ ны́нѣ ᲃа́мъ и҆дѝ съ рабѡ́мъ твои́мъ си́мъ, И҆мⷬ҇къ: и҆ съ Во́и си́ми, и҆ са́мъ бꙋ́ди и҆́мъ помо́щникъ и҆ застꙋ́пникъ, и҆ ᲃохранѝ и҆́хъ и҆ въ дн҃ь и҆ въ но́щи неприкоснове́нныхъ и҆ неврежде́нныхъ ѿ всѧ́кагѡ зла́гѡ ѡ҆бстоѧ́нїѧ: не́дꙋга же, гла́да, и҆ и҆стопле́нїѧ, и҆ всѧ́кагѡ ᲃтра́ха.

И҆ ꙗ҆́коже ᲂу҆крѣпи́лъ є҆сѝ І҆исꙋ́са На́вина крⷭ҇таѡ́браꙁнымъ воꙁдвиже́нїемъ рꙋ́къ Мѡѵ꙼се́ѻвыхъ на А҆мали́ка, и҆ на Ца́рствїѧ Ханаа́нска бра́вшаѧсѧ съ ни́мъ, є҆́же ѡ҆долѣ́ти и҆́мъ: и҆ тѣмъ Зи́ва, и҆ Зеве́ѧ, и҆ Салма́на, и҆ всѧ Кнѧ́зѧ и҆́хъ погꙋби́вый:

И҆ ꙗ҆́коже помо́глъ є҆сѝ Гедіꙍ́нꙋ съ трема̀ ᲃты̀ и҆ꙁбра́нныхъ мꙋже́й побѣди́ти множествѡ̀ Мадїа́мское, та́кѡ и҆ си́мъ вѣ́рнымъ рабѡ́мъ твои́мъ крѣ́постъ, ᲃи́лꙋ, и҆ мꙋжестве́нное ᲃе́рдце, по́мощъ же и҆ застꙋпле́нїе дарꙋ́й. И҆ ꙗ҆́коже ꙗ҆вле́нїемъ нбⷭ҇нымъ пе́рвомꙋ въ хрⷭ҇тїѧ́нскихъ Цр҃ехъ Кꙍнстанті́нꙋ пособи́лъ є҆сѝ проти́вныѧ ᲃꙋпоста́ты твоѧ̀ побѣди́ти, ᲃи́це и҆ си́мъ Хрⷭ҇тоимени́тымъ рабѡ́мъ твои́мъ ны́нѣ, побѣ́дꙋ и҆ крѣ́пкое ѡ҆долѣ́нїе на всѧ̀ врагѝ, и҆ беꙁ̾бо́жныѧ пога́ны, млⷭ҇тивнѡ пода́ждъ, и҆ ѿ всю́дꙋ А҆гг҃лъ твои́хъ ѡ҆полче́нїемъ ѡ҆градѝ и҆́хъ, и҆ въѡрꙋжѝ ᲃи́лою и҆ защище́нїемъ чⷭ҇тна́гѡ и҆ животворѧ́щагѡ Крⷭ҇та̀ въ и҆мѧ тебѐ Бг҃а Ѿц҃а̀, и҆ воꙁлюбле́ннагѡ є҆диноро́днагѡ ᲃн҃а твое́гѡ, Гд҃а на́шегѡ І҆и҃ᲃ Ха҃ и҆ Всест҃а́гѡ и҆ животворѧ́щагѡ ти Дх҃а, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

Взе́мъ же І҆ере́ѵ꙼ ᲃщ҃еннꙋю во́дꙋ кро́питъ є҆́ю ᲃꙋ́дна, гл҃ѧ̀:

Блⷭ҇влѧ́ютсѧ сꙋ́дна сі́ѧ ѡ҆кропле́нїемъ воды̀ сеѧ̀ ᲃщ҃е́нныѧ, въ бл҃гополꙋ́чное ше́ствїе, и҆ въ побѣ́дꙋ на врагѝ Хрстолюби́вомꙋ во́инствꙋ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а, а҆ми́нь.

(А҆́ще ᲂу҆́бѡ є҆дино̀ то́чїю ᲃꙋдно̀ є҆стъ, є҆динстве́ннѣ гл҃ѝ: Бл҃гословлѧ́етсѧ ᲃꙋдно̀ сі́е: И҆ про́чаѧ.)

Посе́мъ кро́питъ Ге́тмана, и҆ Во́инство, гл҃ѧ̀:

Да блⷭ҇ви́тъ ва́съ Гд҃ь ѿ Сіꙍ́на, и҆ да преда́сть врагѝ ва́ша по́дъ рꙋ́ки ва́мъ, и҆ да покори́тъ ѧ҆̀ по́дъ нѡ́ги ва́шѧ въ ᲃла́вꙋ свою̀: Вы́ же мꙋжа́йтесѧ, и҆ дакрѣ́питсѧ ᲃе́рдце ва́ше, и҆ ᲂу҆пова́юще на Гд҃а побѣжда́йте врагѝ ва́шѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

А҆́бїе же тво́ритъ ѿпꙋ́стъ ᲃе́й.

Хᲃ҃ и҆́стинный Бг҃ъ нш҃ъ, Молитва́ми Прчⷭ҇тыѧ свое́ѧ Мт҃ре, ᲃи́лою чⷭ҇тнагѡ и҆ животворѧ́щагѡ Крⷭ҇та̀, застꙋпле́нїемъ ᲃт҃ы́хъ вели́кихъ А҆рхістра́тигъ Міхаи́ла, и҆ Гаврїи́ла, и҆ всѣ́хъ нбⷭ҇ныхъ беспло́тныхъ ᲃи́лъ, и҆ ᲃт҃ы́хъ Великомꙋ́ченикъ Геꙍ́ргїѧ, Дими́трїѧ, Проко́пїѧ, Ѳеѻ́дѡрѡвъ Стратила́та и҆ Ти́рѡна, и҆ всѣ́хъ ᲃт҃ы́хъ свои́хъ поми́лꙋетъ, и҆ ᲂу҆крѣ́питъ ва́съ въ де́нь бра́ни, и҆ ᲃпасе́тъ ꙗ҆́кѡ бл҃гъ и҆ чл҃кѡлю́бецъ.

Ли́къ же пое́тъ Догма́тикъ д҃-гѡ Гла́са:

Пода́ждъ ᲂу҆тѣш:

І҆ере́ѵ꙼ же десни́цею блⷭ҇влѧ́ѧ Во́инство, гл҃е́тъ,

Блⷭ҇ве́нїе Гд҃не бꙋ́ди на всѣ́хъ ва́съ всегда̀, ны́нѣ и҆ прⷭ҇нѡ, и҆ въ вѣ́ки вѣ́кѡвъ. А҆ми́нь.

Сне́мъ же зъ себѐ Е҆пітра́хилъ и҆де́тъ съ ми́ромъ въ своѧ́ си: Во́инство же ᲂу҆стремлѧе́тсѧ къ плава́нїю, въ и҆мѧ Гд҃не.

А҆́ще хо́щетъ ᲃт҃и́тель, и҆лѝ І҆ере́ѵ꙼, съверши́ти въ кꙋ́пѣ и҆ Мл҃ебенъ ѡ҆ Побѣ́дѣ на врагѝ, въ пе́рвыхъ ᲃъверша́етъ Мл҃ебенъ по чи́нꙋ є҆гѡ̀, по Канѡ́нѣ же, и҆ по Е҆кте́нїѧхъ, начина́єтсѧ чи́нъ се́й ѿ С на́ми Бг҃ъ: є҆́же съ ѱало́мскими стіха́ми.

А҆́ще же беꙁъ Мл҃бна, съвꙋрша́етсѧ си́це. Поста́вленымъ сꙋ́щимъ Хорꙋгвѧ́мъ на А҆мбѡ́нѣ распросте́ртымъ, ᲃт҃и́тель и҆лѝ І҆ере́ѵ꙼, пре́дъ ᲃт҃о́ю Тра́пеꙁою стоѧ̀, начина́етъ ѡ҆бы́чнѡ.

Блⷭ҇ве́нъ Бг҃ъ нш҃ъ:

Ли́къ же пое́тъ,

Цр҃ю нбⷭ҇ный:

И҆ чтетъ,

Тртⷭ҇о́е: и҆ по Ѿч҃е нш҃ъ: Гд҃и поми́лꙋй, ві҃.

Сла́ва: И҆ ны́нѣ: Прїйдѣ́те поклони́мсѧ, гⷤ. и҆ ѱало́мъ рм҃г. Блⷭ҇ве́нъ Гд҃ь Бг҃ъ мо́й наꙋч: Весъ до конца̀.

Посе́мъ пою́тъ и҆лѝ чтꙋ́тъ на ѡ҆́бѣ ᲃтра́нѣ ѱало́мъ се́й и҆ꙁбранный, съ Припѣ́ломъ симъ.

⁸Воꙁлюблю́ тѧ, Гд҃и, крѣ́посте моѧ̀: Гд҃ь ᲂу҆твержде́нїе моѐ, и҆ прибѣ́жище моѐ, и҆ И҆ꙁбави́тель мо́й, Бг҃ъ мо́й, помо́щникъ мо́й, и҆ ᲂу҆пова́ю нань. Защи́титель мо́й, и҆ ро́гъ ᲃпⷭ҇нїѧ мое́гѡ, и҆ застꙋ́пникъ мо́й. Хвалѧ̀ приꙁовꙋ̀ Гд҃а и҆ ѿ врагѡ́ъ мои́хъ сп҃сꙋ́сѧ. И҆ꙁба́витъ мѧ ѿ врагѡ́въ мои́хъ ᲃи́льныхъ и҆ ѿ ненави́дѧщихъ мѧ. И҆ бы́сть Гд҃ь ᲂу҆твержде́нїе моѐ. И҆ и҆ꙁведе́ мѧ на широтꙋ̀: и҆ꙁба́витъ мѧ, ꙗ҆́кѡ восхотѣ́ мѧ. Бг҃ъ мо́й, непоро́ченъ пꙋ́ть є҆гѡ̀: защи́титель є҆́сть всѣ́мъ ᲂу҆пова́ющимъ нанъ. Ꙗ҆́кѡ кто̀ Бг҃ъ, ра́ꙁвѣ Гд҃а; и҆лѝ кто̀ Бг҃ъ, кро́мѣ Бг҃а на́шегѡ; Бг҃ъ препоѧса́ѧй мѧ ᲃи́лою, и҆ положѝ непоро́ченъ пꙋ́ть мо́й. Соверша́ѧй но́ꙁѣ моѝ ꙗ҆́кѡ Є҆ле́нѣ, и҆ на высо́кихъ поставлѧ́ѧй мѧ. Наꙋча́ѧй рꙋ́цѣ моѝ на бра́нь, и҆ положи́лъ є҆сѝ лꙋ́къ мѣ́дѧнъ мы́шцѧ моѧ̀. Оу҆шири́лъ є҆сѝ сто́пы моѧ̀ подо мно́ю, и҆ не и҆ꙁнемо́жетѣ пле́снѣ моѝ. Поженꙋ̀ врагѝ моѧ̀, и҆ пости́гнꙋ ѧ҆̀, и҆ не воꙁвращꙋ́сѧ, до́ндеже сконча́ют̾сѧ. Ѻ҆скорблю̀ и҆̀хъ, и҆ не воꙁмо́гꙋтъ ста́ти, падꙋ́тъ подъ нога́ма мои́ма. И҆ препоѧ́салъ мѧ є҆сѝ ᲃи́лою на бра́нь, ᲃпѧ́лъ є҆сѝ всѧ̀ воста́ющыѧ на́мѧ подъ мѧ. И҆ вра́гъ мои́хъ да́лъ мѝ є҆сѝ хребе́тъ и҆ ненавидѧ́щїѧ мѧ потреби́лъ є҆сѝ. Воꙁва́ша, и҆ не бѣ̀ ᲃп҃аса́ѧй: къ Гд҃ꙋ, и҆ не ᲂу҆слы́ша и҆́хъ. И҆ и҆стню̀ и҆́хъ ꙗ҆́кѡ пра́хъ пре́дъ лице́мъ вѣ́трꙋ, ꙗ҆́кѡ бре́нїе пꙋ́ти погла́ждꙋ и҆́хъ. И҆ꙁба́виши мѧ ѿ прерѣка́нїѧ люді́й: поста́виши мѧ въ гла́вꙋ ꙗ҆ꙁы́кѡмъ. Лю́дїе, и҆́х̾же не видѧ́хъ, поработа́ша мѝ, въ слꙋ́хъ ᲂу҆́ха ᲂу҆слыша́ша мѧ: Жи́въ Гд҃ь, и҆ блгⷭ҇ве́нъ Бг҃ъ, и҆ да воꙁнесе́тсѧ Бг҃ъ спⷭ҇нїѧ мое́гѡ. Бж҃е даѧ́й ѿмще́нїе мнѣ̀ и҆ повинꙋ́ѧй лю́ди подъ мѧ, и҆ꙁбави́телю мо́й ѿ вра́гъ мои́хъ гнѣвли́выхъ. Ѿ востаю́щихъ на́мѧ воꙁнесе́ши мѧ, ѿ мꙋ́жа непра́ведна и҆ꙁба́виши мѧ.

⁹Препоѧшѝ ѻ҆рꙋ́жїе твоѐ по бе́дрѣ твоемъ, ᲃи́льне. И҆ налѧцы̀, и҆ ᲂу҆спѣва́й, и҆ царствꙋ́й и҆́стинны ра́ди и҆ кро́тости и҆ пра́вды: и҆ наста́витъ тѧ ди́внѡ десни́ца твоѧ̀. Стрѣ́лы твоѧ̀ и҆ꙁострены ᲃи́льне, лю́дїе подъ тобо́ю па́дꙋ́тъ въ ᲃе́рдци врагѡ́въ царе́выхъ.

¹⁰Сегѡ̀ ра́ди и҆сповѣ́мсѧ тебѣ̀ въ ꙗ҆ꙁы́цѣхъ, Гд҃и, и҆ и҆менѝ твое́мꙋ пою̀, велича́ѧ спⷭ҇нїѧ царе́ва.

¹¹ Гд҃ь помо́щникъ мо́й и҆ защити́тель мо́й: нань ᲂу҆пова̀ ᲃе́рдце моѐ, и҆ помо́же мѝ. Гд҃ь ᲂу҆твержде́нїе люде́мъ свои́мъ и҆ защити́тель ᲃпⷭ҇нїи Ха҃ ᲃвое́гѡ є҆́сть. Сп҃сѝ лю́ди твоѧ̀, и҆ блгⷭ҇вѝ достоѧ́нїе твоѐ, и҆ ᲂу҆пасѝ ѧ҆̀, и҆ воꙁмѝ ѧ҆̀ до вѣ́ка.

Сла́ва: И҆ ны́нѣ:

Съ на́ми Бг҃ъ раꙁꙋмѣ́йте ꙗ҆ꙁы́ци. А҆́лл҃ꙋ́іѧ, а҆́лл҃ꙋ́іѧ. Сла́ва тебѣ̀ Бж҃е, гⷤ.

Дїа́конъ гл҃е́тъ Е҆кте́нїѧ ᲃі́ѧ.

Ми́ромъ Гд҃ꙋ помоли́мсѧ.

Ꙍ҆ свы́шнѣмъ ми́рѣ и҆ спⷭ҇нїи дш҃ъ на́шихъ, Гд҃ꙋ:

Ꙍ҆ ми́ре всегѡ̀ ми́ра, благостоѧ́нїи ᲃт҃ы́хъ:

Ꙍ҆ ᲃт҃ѣ́мъ хра́мѣ семъ, и҆ съ вѣ́рою и҆ бл҃гоговѣнїи:

Ꙍ҆ Преѡсщ҃енномъ А҆рхіепⷭ҇пѣ на́шемъ И҆мⷬ҇къ: и҆лѝ ѡ҆ Бг҃олюби́вомъ Е҆пⷭ҇пѣ на́шемъ: И҆мⷬ҇къ:

Ꙍ҆ вели́комъ Королѣ̀ на́шемъ: И҆мⷬ҇къ:

Ꙍ҆ є҆́же пособи́ти и҆ покори́ти подъ но́ꙁѣ и҆́хъ:

Ꙍ҆ є҆́же не помѧнꙋ́ти грѣхѝ и҆ беꙁꙁакѡ́нїа нш҃ѧ, но ꙗ҆́кѡ бл҃госе́рдъ, млⷭ҇тивъ на́мъ бы́ти недосто́йнымъ рабѡ́мъ свои́мъ въ бѣда́хъ сꙋ́щимъ, и҆ и҆ꙁба́вити на́съ ѿ вра́гъ на́шихъ, Гд҃ꙋ помоли́мсѧ.

Ꙍ҆ є҆́же блⷭ҇ви́ти зна́менїе сі́е во́инское блⷭ҇ве́нїемъ свои́мъ нбⷭ҇нымъ, стра́шнѡ же и҆ ᲂу҆жа́снѡ всѣ́мъ врагѡ́мъ на́шимъ сі́е сътвори́ти, Гд҃ꙋ помоли́мсѧ.

Ꙍ҆ є҆́же вѣ́рномꙋ свое́мꙋ во́инствꙋ, зна́менїе сі́е носѧ́щомꙋ и҆ на ᲃі́е вꙁира́ющомꙋ дерꙁнове́нїе, си́лꙋ, и҆ крѣ́пость на сътре́нїе и҆ попра́нїе крѣ́пости сꙋпоста́тъ на́шихъ, млⷭ҇тивнѡ пода́ти, Гд҃ꙋ помоли́мсѧ:

Ꙍ҆ є҆́же всѣ́хъ врагѡ́въ на́шихъ на зна́менїѧ сі́ѧ вꙁира́ющихъ, дерꙁнове́нїе въ стра́хъ, ᲃи́лꙋ въ ѡ҆сла́бꙋ, и҆ мꙋ́жествѡ въ малодꙋ́шїе и҆ бѣ́гствѡ претвори́ти, Гд҃ꙋ помоли́мсѧ.

Ꙍ҆ є҆́же пода́ти ᲃи́лꙋ и҆ крѣ́пость Хрⷭ҇толюби́вомꙋ во́инствꙋ, и҆ мꙋжестве́ннѡ то и҆ хра́брѡ съпроти́въ всѧ́кагѡ вра́га и҆ сꙋпоста́та всегда̀ покаꙁа́ти, и҆ рабѡ́мъ свои́мъ ми́ръ и҆ ᲂу҆твержде́нїе, и҆ ѿ всѣ́хъ бѣ́дъ и҆ нꙋ́ждъ, и҆ вра́жїихъ навѣ́тѡвъ ско́рое свобожде́нїе пода́ти, Гд҃ꙋ помоли́мсѧ.

Ꙍ҆ є҆́же ми́ръ и҆ ᲃла́вꙋ всели́ти въ землѝ на́шей, и҆ и҆ꙁба́вити на́съ ѿ всѣ́хъ вра́жїихъ навѣ́тѡвъ и҆ бѣ́дныхъ нахожде́нїй, Гд҃ꙋ помоли́мсѧ.

Ꙍ҆ є҆́же не преда́ти на́съ въ попра́нїе и҆ раꙁоре́нїе врагѡ́мъ и҆ ᲃꙋпоста́тѡмъ на́шимъ, но въ бѣ́гствѡ все дерꙁнлве́нїе и҆́хъ претвори́ти, и҆ мы́шцꙋ и҆́хъ съкрꙋши́ти, и҆ подъ но́ги вѣ́рныхъ свои́хъ покори́ти, Гд҃ꙋ помоли́мсѧ.

Ꙍ҆ є҆́же стꙋ́да и҆ беꙁче́стїѧ лица̀ съпроти́вныхъ и҆спо́лнити, ᲃе́рдце же и҆́хъ ᲃтра́ха и҆ ᲂу҆жа́са, и҆ А҆́гг҃лъ Гд҃нь да бꙋ́детъ поганѧ́ѧй и҆ поража́ѧй и҆́хъ, Гд҃ꙋ помоли́мсѧ.

Ꙍ҆ є҆́же лꙋ́къ мѣ́дѧнъ положи́ти мы́шцѧ вѣ́рныхъ свои́хъ, и҆ ᲂу҆крѣпи́ти десни́цꙋ и҆́хъ, си́лою крѣ́пости свое́ѧ въ побѣжде́нїе и҆ попра́нїе врагѡ́въ, и҆ сꙋпоста́тъ воста́ющихъ на́ны, Гд҃ꙋ помоли́мсѧ.

Ꙍ҆ є҆́же премѣни́ти всю̀ ско́рбъ и сѣтова́нїе нш҃е на ра́дость и҆ весе́лїе, и҆ бѣдова́нїе въ тве́рдый ми́ръ, и҆ непребори́мыхъ ѿ всѣ́хъ вра́жїихъ навѣ́тѡвъ всегда̀ сътвори́ти, Гд҃ꙋ помоли́мсѧ.

Ꙍ҆ є҆́же съкрꙋши́ти щи́тъ, ѡ҆рꙋ́жїе, и҆ бра́нь всѣ́хъ борꙋ́щих̾сѧ съ на́ми, и҆ подъ нѡ́ги хрⷭ҇толюби́вомꙋ Во́инствꙋ тѣ́хъ покори́ти, Гд҃ꙋ помоли́мсѧ.

Ꙍ҆ є҆́же неѡсла́бнꙋ, непребори́мꙋ, победи́телнꙋ же ᲃи́лꙋ, крѣ́пость, и҆ мꙋ́жествѡ съ хра́бростїю хрⷭ҇тоимени́томꙋ Во́инствꙋ на́шемꙋ, на съкрꙋше́нїе лꙋ́кѡвъ ᲃи́лныхъ врагѡ́въ на́шихъ пода́ти, Гд҃ꙋ помоли́мсѧ.

Ꙍ҆ є҆́же пода́ти и҆ꙁба́вꙋ вѣ́рнымъ рабѡмъ свои́мъ ѿ наше́ствїй и҆ноплеме́нникъ, и҆ ѿ всѣ́хъ бра́немъ хотѧ́щихъ чл҃къ, и҆ ра́тныхъ нахожде́нїй, и҆ въ ми́рѣ глꙋбо́цѣ Цр҃ковъ, Цр҃ѧ́ же, и҆ лю́ди своѧ̀ ᲃоблюстѝ, побѣ́дꙋ и҆́мъ на врагѝ ны́нѣ и҆ всегда̀ дарꙋ́ѧ, Гд҃ꙋ помоли́мсѧ.

Ꙍ҆ є҆́же и҆ꙁба́вити на́съ ѿ всѧ́къ: Застꙋпѝ спасѝ: Прⷭ҇тꙋ́ю чⷭ҇тꙋю:

Ст҃ль же, и҆лѝ І҆ере́ѵ꙼ сі́е дѣйствꙋ́ѧй, Воꙁглаша́етъ.

Ꙗ҆́кѡ ты́ є҆сѝ крѣ́постъ и҆ ᲂу҆твержде́нїе люде́мъ свои́мъ, и҆ тебѣ̀ подоба́етъ всѧ́каѧ ᲃла́ва чⷭ҇ть и҆ поклоне́нїе Ѿц҃ꙋ̀, и҆ ᲃн҃ꙋ и҆ ᲃт҃омꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆ми́нь.

Посе́мъ пою́тъ,

Бг҃ъ Гд҃ъ и҆ ꙗ҆ви́сѧ на́мъ: на Гла́съ: а҃.

И҆ тропарѝ ᲃі́ѧ.

Сп҃сѝ Гд҃и лю́ди своѧ̀, и҆ блⷭ҇вѝ достоѧ́нїе твоѐ, побѣ́ды Цр҃ю на́шемꙋ и҆ во́инствꙋ є҆гѡ̀ на врагѝ дарꙋ́ѧ: и҆ своѧ̀ съхранѧ́ѧ Крⷭ҇то́мъ си лю́ди.

Сла́ва: то́йжде. И҆ ны́нѣ: Гла́съ ѕ҃.

Застꙋ́пнице хрⷭ҇тїѧ́нѡмъ непосты́д:

Посе́мъ же чте́т̾сѧ Конда́къ. Гла́съ д҃.

Воꙁнесы́йсѧ на Крⷭ҇тъ вол:

И҆ пою́тъ коне́цъ є҆гѡ̀. Та́же ᲃт҃лю и҆ꙁше́дшꙋ и҆́ꙁъ Ѻ҆лтарѧ и҆ ста́вшꙋ на́дъ Хорꙋгвѧ́ми за А҆мбо́номъ къ Въстокꙋ лице́мъ, и҆ Дїа́конꙋ ре́кшꙋ,

Гд҃ꙋ помоли́мсѧ.

Кли́ръ,

Гд҃и поми́лꙋй.

Чтетъ Моли́твꙋ ᲃі́ю велегла́снѡ.

Всеси́лный и҆ Превѣ́чный Бж҃е нш҃ъ, Ѿч҃е Гд҃а Бг҃а и҆ ᲃп҃са нш҃егѡ І҆и҃ᲃ Ха҃, ᲃа́мъ ᲃы́й всемꙋ̀ мі́рꙋ Тво́рецъ, и҆ всеѧ̀ тва́ри блⷭ҇ве́нїе, и҆ побѣжда́ющимъ крѣ́пость, при́ꙁри млⷭ҇рднымъ свои́мъ ѻ҆́комъ на на́съ смире́нныхъ и҆ недосто́йныхъ рабѡ́въ твои́хъ, и҆ на моли́твꙋ нш҃ꙋ, и҆ сі́ю Хорꙋгѡ́въ, ю҆́же на дѣ́ло бра́ни приꙋготова́хомъ, нбⷭ҇нымъ твои́мъ блⷭ҇венїемъ, присѣтѝ, блⷭ҇вѝ, и҆ ѡ҆ст҃ѝ, ꙗ҆́кѡ да бꙋ́детъ вѣ́рномꙋ си во́инствꙋ на съпроти́вныѧ ꙗ҆ꙁы́ки ѡ҆долѣ́нїе и҆ и҆ꙁвѣ́стнаѧ побѣ́да: и҆ храни́телствомъ твои́мъ ѡ҆гражде́нна сꙋ́щи, въ бѣ́гство да претво́ритъ всѣ́хъ ᲃꙋпоста́тѡвъ на́шихъ пѡ́лки, и҆ врагѡ́мъ хрⷭ҇тїа́нскагѡ ро́да стра́шна всегда̀ и҆ ᲂу҆жа́сна да ꙗ҆ви́тсѧ, вѣ́рнымъ же тво́имъ на́ тѧ ᲂу҆пова́ющимъ, и҆ꙁвѣ́стное ᲂу҆пова́нїе побѣ́ды, дерꙁнове́нїе же и҆ крѣ́пость да бꙋ́детъ: Молитва́ми же ᲃт҃ы́хъ твои́хъ ᲂу҆крѣпле́на, и҆ А҆гг҃лъ твои́хъ ѡ҆полче́нїемъ ѡ҆гражде́нна сꙋ́щи, да ꙗ҆ви́тсѧ рабѡ́мъ твои́мъ зна́менїе весе́лїѧ и҆ крѣ́пости, зна́менїе побѣ́ды и҆ серде́чныѧ крѣ́пости и҆ мꙋ́жества на сꙋпоста́ты. Ты́ бо є҆си Цр҃ъ ми́ра, и҆ Бг҃ъ съкрꙋша́ѧй бра́ни, и҆ крѣ́пость даѧ́й ᲂу҆пова́ющимъ на́ тѧ, и҆ тебѣ̀ ᲃла́вꙋ воꙁсыла́емъ съ є҆диноро́днымъ ти ᲃн҃омъ, и҆ съ Пртⷭ҇ы́мъ, и҆ бл҃ги́мъ, и҆ животворѧ́щимъ ти Дх҃омъ, ны́нѣ и҆ въ беꙁконе́чныѧ вѣ́ки вѣ́кѡвъ.

Кли́ръ,

А҆ми́нь.

Ст҃и́тель же ѡ҆бра́щсѧ къ предстоѧ́щимъ во́инѡмъ, десни́цею блⷭ҇влѧ́ѧ и҆́хъ, гл҃е́тъ,

Ми́ръ всѣ́мъ.

Дїа́конъ,

Гла́вы ва́шѧ Гд҃ви прекл:

Ст҃ль же чтетъ велегла́снѡ Моли́твꙋ сі́ю зрѧ̀ къ за́падѡмъ.

Гд҃и Бж҃е нш҃ъ, послꙋша́вый Мꙍѵ꙼се́ѧ просте́ршагѡ къ тебѣ̀ рꙋ́цѣ своѝ, и҆ лю́ди І҆и҃левы ᲂу҆крѣпи́вых на А҆мали́ка, и҆ І҆сꙋ́сꙋ На́ввинꙋ ѡ҆полчи́вшꙋсѧ, попꙋсти́лъ є҆сѝ ᲃо́лнцꙋ ста́ти въ ѡ҆́браꙁъ побѣ́дный. Ты и҆ ны́нѣ ᲂу҆слы́ши на́съ мл҃ѧ́щих̾тисѧ ѡ҆ събра́вших̾сѧ во́ехъ си́хъ: и҆ блⷭ҇вѝ, и҆ ᲂу҆крѣпѝ и҆́хъ, и҆ да́ждъ и҆́мъ ᲃе́рдце мꙋжестве́ннѡ на съпроти́вныѧ врагѝ. А҆гг҃ла свѣ́тла пошлѝ и҆́мъ, врагѡ́мъ же стра́шна и҆ ᲂу҆жа́сна, запина́юща же и҆ поганѧ́юща, и҆ ᲃе́рдце и҆́хъ раꙁ̾слабѣва́юща, и҆ дерꙁнове́нїе въ бѣ́гство претварѧ́юща: ѿими́ же ѿ рабѡ́въ твои́хъ на бра́нь ны́нѣ и҆сходѧ́щихъ, и҆ ѿ всѣ́хъ на́съ всѧ́кїй гла́дъ, и҆ гꙋби́телствѡ, и҆ и҆ꙁба́ви на́съ ѿ ѻ҆гнѧ̀, и҆ меча̀, и҆ наше́ствїѧ врагѡ́въ и҆ ѿ всѧ́кагѡ воста́нїѧ проти́внагѡ: съ пꙋтшестве́нникъ и҆́мъ бꙋ́ди, и҆ пода́ждъ и҆́мъ всѧ̀ ꙗ҆́же къ ᲃпⷭ҇нїю проше́нїѧ, наꙋчѝ и҆́хъ и҆ враꙁꙋмѝ, ᲃп҃сѝ, защитѝ, съхранѝ, ѡ҆чи́сти, и҆ ра́дости дх҃овныѧ и҆спо́лни: дш҃ѝ и҆ тѣ́лꙋ и҆́хъ застꙋ́пникъ и҆ защи́тникъ бꙋ́ди: и҆ ꙗ҆́кѡ бла́гъ и҆ млⷭ҇рдъ и҆ чл҃кѡлю́бецъ проще́нїе грѣхѡ́въ пода́ждъ и҆́мъ, въ дн҃ь же ᲃꙋ́дный, поми́лꙋй и҆́хъ и҆ на всѣ́хъ, и҆ блⷭ҇вѝ въ всѧ̀ днѝ живота̀ на́шегѡ: да ѿ тебѐ по́мощъ и҆ застꙋпле́нїе, и҆ и҆ꙁба́вꙋ прїи́мше, ᲃла́вꙋ и҆ бл҃годаре́нїе беꙁ всѧ́кагѡ препѧ́тїѧ всегда̀ воꙁсыла́емъ: Ты́ бо є҆сѝ крѣ́постъ и҆ ᲂу҆твержде́нїе люде́мъ твои́мъ, и҆ тебѣ̀ ᲃла́вꙋ воꙁсыла́емъ съ бл҃ги́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Кли́ръ,

А҆ми́нь.

Посе́мъ вꙁе́мъ ᲃт҃ль ᲃщ҃еннꙋю во́дꙋ, кро́питъ є҆́ю Хорꙋго́въ, гл҃ѧ̀:

Блⷭ҇влѧ́етсѧ и҆ ѡ҆сщ҃а́етсѧ зна́менїе сі́е во́инское, въ крѣ́пость, и҆ ᲂу҆твержде́нїе хрⷭ҇тоимени́томꙋ во́инствꙋ, и҆ въ побе́дꙋ на всѧ̀ врагѝ ѡ҆кропле́нїемъ воды̀ сеѧ̀ сщ҃енныѧ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Посе́мъ а҆́ще Е҆пⷭ҇пъ сі́е дѣйствꙋ́етъ вꙁе́мъ Ми́трꙋ, и҆ сѣ́дъ на сѣда́лищи своє́мъ: (а҆́ще же І҆ере́ѵ꙼ не сѧ́детъ, но сто̀ѧ) вꙁе́млетъ Хорꙋгѡ́въ, и҆ дае́тъ и҆ є҆мꙋ́же прислꙋша́етъ въ рꙋ́цѣ, колѣ́нѣ томꙋ̀ прекло́н̾шꙋ, глаголѧ̀:

Прїймѝ Хорꙋгѡ́въ сі́ю, нбⷭ҇нымъ блⷭ҇ве́нїемъ ѡ҆сщ҃еннꙋю: бꙋ́ди же та врагѡ́мъ хрⷭ҇тїа́нскагѡ рѡ́да ᲃтра́шна и҆ ᲂу҆жа́сна: и҆ да да́сть ти Гд҃ь благода́ть, ꙗ҆́кѡ да къ ᲃла́вѣ И҆менѝ є҆гѡ̀ Прⷭ҇та́гѡ тое́ю про́йдеши мꙋжестве́ннѡ вра́жїѧ ѡ҆полче́нїѧ невреди́мъ, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

И҆ блⷭ҇влѧ́єтъ є҆гѡ̀, глѧ̀:

Ми́ръ ти.

Ѻ҆́нъ же прїемлѧ̀ Хорꙋгѡ́въ, лобꙁа́етъ десни́цꙋ пода́вшагѡ ю҆̀. А҆́ще же сꙋ́тъ та́мѡ во́ини, блⷭ҇влѧ́етъ и҆́хъ, гл҃ѧ̀:

Блⷭ҇ве́нїе Гдⷭ҇не бꙋ́ди на всѣ́хъ ва́съ, вы́ же мꙋжа́йтесѧ, и҆ да крѣ́питсѧ ᲃе́рдце ва́ше, и҆ ᲂу҆пова́йте на Гд҃а, ꙗ҆́кѡ то́й побѣди́тъ врагѝ на́шѧ. А҆ми́нь.

И҆ кро́питъ всѣ́хъ ᲃщ҃енною водо́ю, знамена́ѧ и҆́хъ Крⷭ҇то́мъ, пѣвце́мъ пою́щимъ ᲃтіхи́рꙋ сі́ю. Гла́съ д҃.

Пособи́вый, Гд҃и, кро́ткомꙋ Дв҃дꙋ побѣди́ти и҆ноплеме́нника, вѣ́рномꙋ Цр҃ю на́шемꙋ ᲃъпособствꙋй, и҆ ѡ҆рꙋжїемъ Крⷭ҇та̀ ниꙁложитѝ врагѝ на́шѧ: покажѝ, бл҃гоꙋтро́бїе, на на́съ дре́внеѧ ми́лости твое́ѧ, и҆ да раꙁꙋмѣ́ютъ въи́стиннꙋ, ꙗ҆́кѡ ты є҆сѝ Бг҃ъ, и на́ тѧ надѣ́ющесѧ побѣжда́емъ, молѧ́щейсѧ ѡ҆бы́чнѡ Прчⷭ҇тѣй ти Ма́тери, дарова́ти на́мъ ве́лїю ми́лость.

По си́хъ тво́ритъ Ѿпꙋ́стъ се́й. а҆́ще є҆́стъ Неде́лѧ.

Воскр҃сы́й и҆ꙁъ ме́ртвыхъ: (А҆́ще же и҆́нъ дн҃ь.) Хᲃ҃ и҆́стинный Бг҃ъ нш҃ъ, Мл҃твами Прчⷭ҇тыѧ свое́ѧ Мт҃ре, ᲃи́лою чⷭ҇тна́гѡ и҆ животворѧ́щагѡ Крⷭ҇та̀, застꙋпле́нїемъ ᲃⷮ: А҆рхистрати́гъ Міхаи́ла и҆ Гаврїи́ла, и҆ всѣ́хъ беꙁпло́тныхъ ᲃи́лъ нбⷭ҇ныхъ: И҆ ᲃт҃ы́хъ Великомч҃никъ Геꙍ́ргїѧ, Діми́трїѧ, и҆ Проко́пїѧ, и҆ всѣ́хъ ᲃт҃ы́хъ поми́лꙋетъ и҆ ᲃп҃се́тъ на́съ, и҆ ᲂу҆крѣ́питъ Во́инствѡ сі́е въ дн҃ь бра́ни, ꙗ҆́кѡ бла́гъ и҆ чл҃кѡлю́бецъ.

Пѣ́вци́ же пою́тъ.

Пода́й же ᲂу҆тѣше́нїе:

И҆ сконча́вше ᲃі́е ѿхо́дѧтъ въ своѧ́ си съ ми́ромъ въ сла́вꙋ Бж҃ію.

Ст҃ль ѡ҆дѣѧ́нъ въ Є҆пітра́хиль и҆ ѻ҆мо́форъ и҆ Ми́трꙋ, и҆лѝ І҆ере́ѵ꙼ въ Є҆пітра́хиль и҆ Фелꙍ́нь, повелѣ́въ поста́вити ѻ҆рꙋ́жїѧ пре́дъ А҆мбꙍ́номъ на ᲃтолцѣ̀ покрове́номъ, и҆схо́дитъ и҆ꙁъ ѻ҆́лтарѧ, и҆ покади́въ ѧ҆̀ крестаѡ́браꙁнѡ, начина́етъ ѻ҆бы́чнѡ,

Бл҃гослове́нъ Бг҃ъ нш҃ъ:

Чте́цъ же чтетъ:

Цр҃ю̀ нбⷭ҇ный: Трⷭ҇то́е: Ѿч҃е нш҃ъ: Гд҃и, поми́лꙋй, в҃і.

Сла́ва: И҆ ны́нѣ: Прїиди́те, поклони́мсѧ, гⷤ. И҆ Ѱало́мъ, л҃д.

Сꙋдѝ, Гд҃и, ѡ҆бидѧ́щїѧ мѧ:

Ре́кшꙋ же Дїа́конꙋ,

Гд҃ꙋ помоли́мсѧ.

Ст҃ль, и҆лѝ І҆ере́ѵ꙼, чтетъ Моли́твꙋ ᲃі́ю на́дъ Ѻ҆рꙋ́жїѧми.

Гд҃и Бж҃е нш҃ъ, Бж҃е ᲃи́лъ, ᲃи́л̾ный въ крѣ́пости, и҆ крѣ́пкїй въ бра́нехъ, ѻ҆тро́кꙋ твое́мꙋ дре́вле Дв҃дꙋ преди́внꙋю ᲃи́лꙋ къ побѣжде́нїю проти́внагѡ хꙋ́лника Голїа́ѳа дарова́вый, ты и҆ ны́нѣ ми́лостивнѡ прїимъ смире́нныѧ мо́льбы на́шѧ: на ѻ҆рꙋ́жїѧ сїѧ̀ нбⷭ҇ное твоѐ бл҃гослове́нїе ниꙁпослѝ и҆ рабꙋ̀ твое́мꙋ ᲃемꙋ̀, И҆мⷬ҇къ: ᲃі́ѧ носи́ти ко ᲂу҆крѣпле́нїю и҆ застꙋпле́нїю цр҃кве твое́ѧ ст҃ы́ѧ, ᲃи́рыхъ же и҆ вдови́цъ, и҆ на землѝ сꙋ́щагѡ ᲃт҃а́гѡ достоѧ́нїѧ твое́гѡ жела́ющагѡ, си́лꙋ и҆ крѣ́пость пода́ждъ, и҆ сопроти́въ всѧ́комꙋ вра́жїю ѡ҆полче́нїю си́ми гро́ꙁна и҆ стра́шна сотворѝ, и҆ побѣдоно́сна всегда̀ въ ᲃла́вꙋ твою̀ ꙗ҆вѝ: Ты́ бо є҆сѝ крѣ́пость и҆ ᲂу҆твержде́нїе на́ше и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

Посе́мъ вꙁе́мъ ᲃщ҃е́ннꙋю во́дꙋ, кро́питъ є҆ю̀ ѻ҆рꙋ́жїа, гл҃ѧ̀:

Блⷭ҇ве́нїе Бг҃а въ Трⷪци ᲃт҃ѣ́й ᲃлави́магѡ, Ѿц҃а̀, и҆ ᲃн҃а, и҆ ᲃт҃а́гѡ Дх҃а, ѡ҆кропле́нїемъ воды̀ ᲃеѧ̀ ᲃщ҃е́нныѧ, да сни́детъ и҆ пребꙋ́детъ на ѻ҆рꙋ́жїе сі́ѧ, и҆ на носѧ́щихъ ѧ҆̀ къ защище́нїю и҆ застꙋпле́нїю и҆́стинны Хв҃ы. А҆ми́нь.

Ѻ҆кропи́въ же и҆ во́ина, є҆гѡ́же сꙋ́ть ѻ҆рꙋ́жїѧ, гл҃е́тъ,

Мꙋжа́йсѧ и҆ да крѣ́питсѧ ᲃе́рдце твоѐ, и҆ побѣжда́й врагѝ твоѧ̀, ᲂу҆пова́ѧ на Гд҃а, Въ и҆мѧ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Да́въ же є҆мꙋ̀ лобꙁа́ти чⷭ҇тны́й Крⷭ҇тъ, тво́ритъ ѡ҆бы́чный дне́вный ѿпꙋ́стъ, и҆ ѿхо́дѧтъ съ ми́ромъ въ ᲃвоѧ́ си.

Вѣ́стнѡ бꙋ́ди, ꙗ҆́кѡ си́мъ блⷭ҇ве́нїемъ блⷭ҇влѧ́ет̾сѧ, и҆ Ме́чъ, и҆ Са́блѧ. Е҆гда́же є҆ди́нъ ме́чъ, и҆лѝ є҆дина̀ Са́блѧ блгⷭ҇влѧ́етсѧ, то́чїю є҆динстве́ннѣ глаголе́тъ, Ме́чъ ᲃе́й, и҆лѝ ѻ҆рꙋ́жїе ᲃі́е. А҆́ще же мнѡ́гїѧ, глаголе́тъ: Бл҃гословлѧ́ютсѧ Ме́чи ᲃі́ѧ, и҆лѝ ѻ҆рꙋ́жїѧ ᲃі́ѧ.

Вѣ́стнѡ бꙋ́ди, ꙗ҆́кѡ а҆́ще нача́тки всѣ́хъ дѣѧ́нїй на́шихъ ѿ Бжⷭ҇тве́нныхъ Моли́твъ и҆ ѿ и҆сто́чника всѣ́хъ бл҃ги́хъ, и҆ помо́щника Бг҃а бы́ти и҆мꙋ́тъ, ко́лми па́че нача́токъ твори́ти хотѧ́ще, є҆́же ᲂу҆че́нїемъ премꙋ́дрости полꙋчи́ти, є҆́йже нача́ло є҆́стъ ᲃтра́хъ Бж҃ій: и҆ ни ѿ кого́же пода́тисѧ мо́жетъ, ра́ꙁвѣ ѿ премꙋ́дрости соверше́нныѧ и҆сто́чника Бг҃а. Тѣ́мъ же всѝ роди́телїе, ча́да своѧ̀ ᲂу҆че́нїю Бжⷭ҇тве́нныхъ Писа́нїй хотѧ́щїи вда́ти, до́лжни сꙋ́тъ ѿ Цр҃ко́вныхъ Моли́твъ нача́ти:

Ꙍ҆ блⷭ҇ве́нїи бо ᲃѣ́ющїи съ блⷭ҇венїемъ и҆ живꙋ́тъ.

Си́цевомꙋ ᲂу҆бѡ ᲃтолѣ́пномꙋ и҆ полеꙁномꙋ ѡ҆бы́чаю, І҆ере́е своѧ̀ Парохїѧ́ны до́лжны ᲃꙋ́тъ наꙋчи́ти.

Приве́денꙋ ᲂу҆бѡ сꙋ́щꙋ си́цевомꙋ ѻ҆троча́ти къ І҆ере́ю въ Цр҃ковъ: І҆ере́ѵ꙼ вꙁе́мъ на ᲃебѐ Е҆пітра́хиль и҆ Фелꙍ́нъ. А҆́ще въ домꙋ̀ ᲃі́е дѣйствꙋ́етъ, Е҆пітра́хиль то́чїю, и҆ начина́етъ ѡ҆бы́чнѡ:

Блⷭ҇ве́нъ Бг҃ъ нш҃ъ: и҆ чтетъ Трⷭ҇то́е: Прⷭ҇та́ѧ Трⷪ҇це: Ѿч҃е нш҃ъ: Гд҃и поми́лꙋй, в҃і. Сла́ва: И҆ ны́нѣ: Прїйдѣ́те поклони́мсѧ, гⷤ. и҆ Ѱало́мъ, л҃г.

Блⷭ҇влю̀ Гд҃а на всѧ́кое вре́мѧ:

Сла́ва: И҆ ны́нѣ: А҆ллилꙋ́їѧ, гⷤ. И҆ Е҆кте́нїѧ ᲃі́ѧ.

Ми́ромъ Гд҃ꙋ помоли́мсѧ:

Ꙍ҆ свы́шнѣмъ ми́рѣ и҆ спⷭ҇нїи:

Ꙍ҆ ми́рѣ всегѡ̀ мі́ра:

Ꙍ҆ ст҃ѣ́мъ хра́мѣ ᲃемъ:

И҆ а҆́бїе прилага́етъ ᲃі́ѧ.

Ꙍ҆ є҆́же ниꙁпосла́ти на ѻ҆троча̀ ᲃі́е, Дх҃а премꙋ́дрости и҆ ра́ꙁꙋма, и҆ ѿверстѝ ᲂу҆́мъ и҆ ᲂу҆ста̀, и҆ просвѣти́ти ᲃе́рдце є҆гѡ̀, къ прїѧ́тїю накаꙁа́нїа до́брыхъ ᲂу҆че́нїй, Гд҃ꙋ помоли́мсѧ.

Ꙍ҆ є҆́же всади́ти въ ᲃе́рдце є҆гѡ̀, зача́ло премꙋ́дрости ᲃтра́хъ сво́й Бжⷭ҇тве́нный, и҆ тѣ́мъ бꙋ́есть ю҆́ности ѿгна́ти ѿ ᲃе́рдца є҆гѡ̀ и҆ просвѣти́ти ᲂу҆́мъ є҆гѡ̀, є҆́же ᲂу҆клони́тисѧ ѿ зла̀ и҆ твори́ти бл҃го́е, Гд҃ꙋ помоли́мсѧ:

Ꙍ҆ є҆́же ѿверстѝ ᲂу҆́мъ є҆гѡ̀ є҆́же прїѧ́ти и҆ раꙁꙋмѣ́ти и҆ памѧтствова́ти всѧ̀ до́браѧ и҆ дш҃епо́леꙁнаѧ ᲂу҆че́нїѧ, Гд҃ꙋ помоли́мсѧ.

Ꙍ҆ є҆́же пода́ти є҆мꙋ̀ присѣдѧ́щꙋю Прⷭ҇тлꙋ є҆гѡ̀ премꙋ́дрость, и҆ всели́ти ю҆̀ въ ᲃе́рдце є҆гѡ̀, ꙗ҆́кѡ да наꙋ́читъ є҆гѡ̀ что̀ є҆́стъ бл҃гоꙋго́дное пре́дъ ни́м, Гд҃ꙋ помоли́мсѧ.

Ꙍ҆ є҆́же преспѣѧ́ти є҆мꙋ̀ премꙋ́дростїю и҆ во́ꙁрастомъ въ ᲃла́вꙋ Бж҃ію, Гд҃ꙋ помоли́мсѧ.

Ꙍ҆ є҆́же бы́ти є҆мꙋ̀ премꙋ́дростию, и҆ добродѣ́тел̾ным жи́тїемъ и҆ ᲂу҆тѣше́нїе роди́телемъ свои́мъ, и҆ Цр҃кве Православнокаѳоли́ческой ᲂу҆твержде́нїе, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ є҆мꙋ̀ и҆ на́мъ ѿ всѧ́кїѧ ско́рби:

Застꙋпѝ, спасѝ, поми́лꙋй, и҆ сохранѝ є҆гѡ̀ и҆ на́съ Бж҃е:

Прⷭ҇тꙋ́ю чⷭ҇тꙋю:

І҆ере́ѵ꙼ Воꙁглаш:

Ꙗ҆́кѡ подоба́етъ:

Посе́мъ чтетъ Тропарѝ ᲃі́ѧ. Гла́съ ѕ҃.

Ꙗ҆́кѡ посре́дѣ Ꙋ҆́ч҃никъ твои́хъ прише́лъ є҆сѝ ᲃп҃се ми́ръ даѧ̀ и҆́м, прїйди и҆ къ на́мъ, и҆ сп҃сѝ на́съ.

Беꙁ̾кни́жныѧ Ꙋ҆́ч҃ники Дх҃ъ тво́й ᲃт҃ы́й накаꙁа́телѧ ꙗ҆вѝ Хє҃ Бж҃е: и҆ мнѡговѣща́ннымъ съли́чествомъ ꙗ҆ꙁы́къ пре́лестъ ᲂу҆малѝ, ꙗ҆́кѡ всеси́ленъ.

Ѧ҆ꙁы́ки и҆норо́дными ѡ҆бнови́лъ є҆сѝ Хє҃ твоѧ̀ Ꙋ҆́ч҃ники, да тѣ́ми тѧ проповѣдѧ́тъ ᲃло́ва и҆ Бг҃а, пода́ющагѡ дш҃а́м на́шимъ ве́лїю ми́лость.

Сла́ва: Цр҃ю нбⷭ҇ный: И҆ ны́нѣ: Млⷭ҇рдїѧ две́ри ѿверꙁи:

По си́хъ же гл҃е́тъ,

Премꙋ́дрость про́сти ᲂу҆слы́шимъ ᲃто́е Е҆ѵⷢ҇лїе, ѿ Ма́рка ᲃт҃а́гѡ Е҆ѵⷢ҇лїа чте́нїе. ѿ Главы і҃. Зач: м҃д.

Въ вре́мѧ ѻ҆́нѡ, Приноша́хꙋ къ І҆и҃сови дѣ́ти, да косне́тсѧ и҆́хъ: Ꙋ҆́чн҃ци же преща́хꙋ приносѧ́щымъ. Ви́дѣвъ же І҆и҃ᲃ, негодова̀: и҆ речѐ и҆̀мъ: ѡ҆ста́вите дѣ́ти приходи́ти къ мнѣ̀, не бранѣ́те и҆̀мъ, тацѣ́хъ бо є҆́стъ црⷭ҇твїе Бж҃іе. А҆ми́нь гл҃ю̀ ва́мъ: и҆́же а҆́ще не прїйме́тъ црⷭ҇твїе Бж҃іе. А҆ми́нь гл҃ю̀ ва́мъ, и҆́же а҆́ще не прїйметъ црⷭ҇твїѧ Бж҃іѧ ꙗ҆́кѡ ѻ҆троча̀, неи́матъ внитѝ внѐ, и҆ ѡ҆б̾е́мъ ѧ҆̀, воꙁло́жь рꙋ́цѣ нанѧ̀ блⷭ҇вѝ ѧ҆̀.

Ли́къ,

Сла́ва тебѣ̀ Гд҃и.

Лобꙁа́въ же ᲃа́мъ ᲃт҃о́е Е҆ѵⷢ҇лїе, дае́тъ и҆ ѻ҆тро́чищꙋ лобꙁа́ти, и҆ воꙁло́жъ нанѧ̀ рꙋ́цѣ, гл҃е́тъ,

Си́ла ᲃлове́съ Бжⷭ҇тве́ннагѡ Е҆ѵⷢ҇лїа да просвѣ́титъ ᲂу҆́мъ тво́й ᲃвѣ́томъ свое́гѡ Бг҃ораꙁꙋ́мїѧ, и҆ ѿверꙁет ᲃе́рдце и҆ ᲂу҆ста̀ твоѧ̀, є҆́же прїѧ́ти и҆ раꙁꙋмѣ́ти Бжⷭ҇тве́ннаѧ писа́нїѧ, и҆ всѧ̀ дш҃еполеꙁнаѧ ᲂу҆че́нїа: и҆ да сни́детъ на́тѧ блⷭ҇ве́нїе нбⷭ҇ное.

Десни́цею же блⷭ҇влѧ́ѧ гла́вꙋ є҆гѡ̀, глаголе́тъ:

Въ и҆мѧ Ѿц҃а̀  и҆ ᲃн҃а  и҆ ᲃт҃а́гѡ  Дх҃а, а҆ми́нь.

А҆бїе же глаголе́тъ Моли́твы ᲃі́ѧ на́дъ гла́вою Ѻ҆троча́те: ре́къ,

Гд҃ꙋ помоли́мсѧ, и҆ Гд҃и поми́лꙋй.

Гд҃и І҆и҃ᲃ Хє҃ Бж҃е нш҃ъ, всели́выйсѧ въ ᲃердца̀ Двана́десѧти А҆пⷭ҇лъ твои́хъ нелицемѣ́рнѡ благодатїю всест҃а́гѡ Дх҃а, соше́дша́гѡ въ видѣ́нїи ѻ҆́гненныхъ ѧ҆ꙁы́къ, и҆ ᲃи́хъ ᲂу҆стнѣ̀ ѿве́рꙁлъ є҆сѝ, и҆ нача́ша гл҃а́ти и҆́нѣми ѧ҆ꙁы́ки: Самъ и҆ ны́нѣ послѝ ᲃегѡ̀ Дх҃а твое́гѡ ᲃт҃а́гѡ на ѻ҆троча̀ сі́е, И҆мⷬ҇къ: и́ насадѝ въ ᲂу҆шеса̀ ᲃе́рдца є҆гѡ̀, ᲃщ҃еннаѧ писа́нїа, ꙗ҆́же рꙋка̀ твоѧ̀ прчⷭ҇таѧ на Скрижа́лехъ и҆ꙁ̾ѡбраꙁѝ Законополо́жникꙋ Мѡѵ꙼се́ю, и҆ всѧ̀ про́чаѧ дш҃епо́леꙁнаѧ ᲂу҆че́нїѧ, да́ждъ є҆мꙋ̀ навы́кнꙋти кро́мѣ всѧ́кагѡ препѧ́тїѧ, въ ᲃла́вꙋ прⷭ҇та́гѡ и҆менѝ твое́гѡ: Ты́ бо є҆сѝ блⷭ҇венъ и҆ препросла́вленъ съ беꙁнача́лнымъ ти Ѿц҃емъ, и҆ съ прⷭ҇ты́мъ, и҆ бл҃ги́мъ, и҆ животворѧщимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

І҆ере́ѵ꙼ же ре́къ,

Гд҃ꙋ помоли́мсѧ.

Ли́къ,

Гд҃и поми́лꙋй.

Чтетъ Моли́твꙋ ᲃі́ю, в҃-ю.

Гд҃и І҆и҃се Бж҃е нш҃ъ, всели́выйсѧ и҆ просвѣти́вый ᲃе́рдца, Два́десѧти четыре́мъ ᲃта́рцемъ, и҆ ᲃт҃ы́мъ твои́мъ Ꙋ҆́ченикѡмъ и҆ А҆пⷭ҇лѡмъ, и҆ ᲃт҃ы́мъ А҆пⷭ҇лѡмъ и҆ Е҆ѵⷢ҇ли́стѡмъ твои́мъ, І҆ѡа́ннꙋ, Матѳе́ю, Ма́ркꙋ, и҆ Лꙋцѣ̀. Наꙋчи́вый и҆ просвѣти́вый ᲃт҃а́гѡ Первомꙋ́ченика Стефа́на. Са́мъ и҆ ны́нѣ Гд҃и, просвѣтѝ ᲂу҆́мъ и҆ ᲂу҆мꙋдрѝ ᲃе́рдце, раба̀ твое́гѡ ѻ҆тро́ка сегѡ̀, И҆мⷬ҇къ: въ є҆́же прїѧ́ти накаꙁа́нїе, и҆ навы́кнꙋти Бжⷭ҇тве́ннаѧ писа́нїѧ, и҆ всѧ̀ дш҃епо́леꙁнаѧ ᲂу҆че́нїѧ ᲂу҆твердѝ є҆гѡ̀ въ Правосла́вной Вѣ́рѣ, и҆ просвѣтѝ є҆гѡ̀ ᲃвѣ́томъ Бж҃естве́ннагѡ твое́гѡ ра́ꙁꙋма, и҆ ᲃтра́хъ тво́й всадѝ въ ᲃе́рдце є҆гѡ̀, ꙗ҆́кѡ да поꙋ́читсѧ въ За́конѣ твое́мъ де́нь и҆ но́щъ, и҆ за́повѣди твоѧ̀ спасе́нныѧ ѿ ю҆́ности свое́ѧ соблюстѝ и҆ и҆сполнѧ́ти наꙋ́читсѧ, Молитва́ми пребл҃гослове́нныѧ Влады́чици на́шеѧ Бц҃а и҆ прⷭ҇нѡ Двы҃ Мр҃іѧ: ᲃи́лою чⷭ҇тнагѡ и҆ животворѧ́щагѡ Крⷭ҇та̀: Моле́нїемъ чⷭ҇тнагѡ и҆ ᲃла́внагѡ Пррⷪ҇ка Предте́ча и҆ Крⷭ҇ти́телѧ І҆ѡа́нна: ᲃт҃ы́хъ ᲃла́вныхъ и҆ всехвал̾ныхъ А҆пⷭ҇лъ: ᲃт҃а́гѡ А҆пⷭ҇ла Е҆ѵⷢ҇ли́ста Матѳе́ѧ: ᲃт҃ы́хъ Мꙋ́ченикъ А҆гапи́та, Проко́пїѧ, и҆ Фили́та, и҆ всѣ́хъ ᲃт҃ы́хъ: Ꙗ҆́кѡ ты́ є҆сѝ просвѣще́нїе дш҃ъ и҆ тѣ́лесъ на́шихъ, и҆ тебѣ̀ ᲃла́вꙋ воꙁсыла́емъ, събеꙁнача́л̾нымъ ти Ѿц҃ем, и҆ съ прⷭ҇ты́мъ и҆ бл҃ги́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

Па́ки же І҆ере́ю ре́кшꙋ, Гд҃ꙋ помоли́мсѧ, и҆ Гд҃и поми́лꙋй.

Чтетъ Моли́твꙋ ᲃі́ю, г҃-ю.

Гд҃и Бж҃е нш҃ъ, ѻ҆́браꙁомъ свои́мъ почты́й на́съ чл҃ове́ки и҆ ᲃамовла́стною ѡ҆деѧ́вый во́лею: въ цр҃кви вше́дый преполови́вшꙋсѧ Пра́ꙁдникꙋ, и҆ ᲂу҆чи́вый лю́ди, чꙋдѧ́щим̾сѧ на́родѡмъ, и҆ гл҃ю́щимъ: Ѿкꙋ́дꙋ се́й вѣ́сть Писа́нїѧ ненаꙋчи́всѧ; Дв҃да, Прїйдѣте ча́да (просвѣти́вый гл҃а́ти) и҆ послꙋша́йте менѐ, стра́хꙋ Гд҃ню наꙋчꙋ̀ ва́с. И҆ Соломꙍ́на мꙋ́дрости наꙋчи́вый Бж҃е всѧ́ческихъ, ᲃло́ве всѣ́хъ Цр҃ю, ѿверꙁѝ дш҃ꙋ и҆ ᲃе́рдце, ᲂу҆ста̀ и҆ ᲂу҆́мъ рабꙋ̀ твое́мꙋ ѻ҆тро́кꙋ ᲃемꙋ̀, И҆мⷬ҇къ: въ є҆́же раꙁꙋмѣ́ти и҆ прїѧ́ти накаꙁа́нїе, и҆ спѣ́шнѡ навы́кнꙋти преподае́маѧ є҆мꙋ̀ по́леꙁнаѧ ᲂу҆че́нїѧ, въ ᲃла́вꙋ и҆менѝ твое́гѡ ᲃт҃а́гѡ, и҆ въ по́лꙁꙋ и҆ соꙁида́нїе ᲃт҃ѣ́й твое́й собо́рной А҆пⷭ҇лской цр҃кви, поꙁна́ти же и҆ раꙁꙋмѣ́ти и҆ твори́ти во́лю твою̀ бл҃гꙋю, бл҃гоꙋго́днꙋю же и҆ соверше́ннꙋю: и҆ и҆ꙁба́ви є҆гѡ̀ ѿ всѧ́кагѡ нало́га дїа́волскагѡ, соблюда́ѧ є҆гѡ̀ въ правосла́вной Вѣ́рѣ и҆ въ всѧ́комъ бл҃гоче́стїи и҆ че́стности въ всѧ̀ днѝ живота̀ є҆гѡ̀: и҆ да преспѣва́ѧй бꙋ́детъ въ ра́ꙁꙋмѣ и҆ въ всѣ́хъ за́повѣдехъ твои́хъ вы́нꙋ: мл҃тва́ми Прчⷭ҇тыѧ ти Мт҃ре и҆ всѣ́хъ ᲃт҃ы́хъ твои́хъ: Ꙗ҆́кѡ ты є҆сѝ посѣти́тель дш҃ъ и҆ тѣле́съ на́шихъ Хє҃ Бж҃е нш҃ъ, и҆ тебѣ̀ ᲃла́вꙋ воꙁсыла́емъ, съ Ѿц҃емъ, и҆ Прⷭ҇ты́мъ Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ,

А҆ми́нь.

Посе́мъ знамена́ѧ є҆гѡ̀ десни́цею крⷭ҇таѡ́браꙁнѡ, гл҃е́тъ.

Ста́ни до́брѣ, ᲃта́ни съ ᲃтра́хѡмъ Бж҃іимъ, и҆ ᲂу҆се́рднѡ внима́й Бжⷭ҇тве́ннымъ и҆ дш҃епо́леꙁнымъ ᲂу҆че́нїѧмъ въ ᲃла́вꙋ Бж҃ію. А҆ми́нь.

Та́жъ, гл҃е́тъ Е҆ктенїю сі́ю.

Поми́лꙋй на́съ Бж҃е по вели́цей ми́лости твое́й, моли́мтисѧ ᲂу҆слы́ши и поми́лꙋй.

Ли́къ,

Гд҃и поми́лꙋй: гⷤ.

Е҆щѐ моли́мсѧ Гд҃ꙋ Бг҃ꙋ на́шемꙋ, ѡ҆ є҆́же при́ꙁрѣти ми́лостивнѡ на ѻ҆троча̀ сі́е, И҆мⷬ҇къ: и҆ ниꙁпосла́ти въ ᲃе́рдце въ ᲂу҆мъ и҆ въ ᲂу҆ста є҆гѡ̀ Дх҃а премꙋ́дрости, ра́ꙁꙋма же и҆ благоче́стїѧ, и҆ стра́ха ᲃвое́гѡ, и҆ просвѣти́ти є҆гѡ̀ ᲃвѣ́томъ ᲃвое́гѡ Бг҃ораꙁꙋ́мїѧ, и҆ пода́ти є҆мꙋ̀ ᲃи́лꙋ и҆ крѣ́пость, въ є҆́же ᲃко́рѡ прїѧ́ти, и҆ ᲃпѣ́шнѡ навы́кнꙋти Бжⷭ҇тве́ннагѡ за́кона є҆гѡ̀ накаꙁа́нїе, и҆ всѧ̀ до́браѧ и́ полеꙁнаѧ ᲂу҆че́нїѧ: и҆ є҆́же преꙋспѣва́ти є҆мꙋ̀ премꙋ́дростїю и҆ ра́ꙁꙋмомъ, и҆ всѣ́ми добродѣ́телми, и҆ и҆сполне́нїемъ за́повѣдїй є҆гѡ̀, въ сла́вꙋ прест҃а́гѡ свое́гѡ и҆́мени: и҆ дарова́ти є҆мꙋ̀ здра́вїе, и҆ долголѣ́тна сътвори́ти є҆гѡ̀, къ съꙁида́нїю и҆ ᲂу҆краше́нїю Цр҃кве свое́ѧ ᲃт҃ы́ѧ: рцѣ́мъ всѝ, Гд҃и ᲂу҆слы́ши и҆ ми́лостивнѡ поми́лꙋй.

Ли́къ,

Гд҃и поми́лꙋй, ві҃.

І҆ере́ѵ꙼ же воꙁглаша́етъ.

Ꙋ҆слы́ши ны Бж҃е ᲃп҃си́телю:

По си́хъ же вꙁе́мъ ᲃщ҃еннꙋю Во́дꙋ кро́питъ є҆ю̀ ѻ҆троча̀, глаголѧ̀:

Прїймѝ Ча́дѡ накаꙁа́нїе, и҆ стра́хъ Бж҃ій да всели́тсѧ въ ᲃе́рдце твоѐ, то́й бо є҆́стъ нача́ло премꙋ́дрости, и҆ се́й просвѣ́титъ ᲂу҆́мъ и҆ ᲃе́рдце твоѐ, є҆́же раꙁꙋмѣ́ти и҆ зна́ти Гд҃а, и҆ твори́ти во́лю є҆гѡ̀ на всѧ́кое вре́мѧ: Въ и҆мѧ̀ Ѿц҃а̀, и҆ ᲃн҃а, и҆ ᲃт҃а́гѡ Дх҃а. А҆ми́нь.

Та́же тво́ритъ ѡ҆бы́чный дне́вный ѿпꙋ́стъ. И҆ отхо́дитъ съ ми́ромъ ѻ҆троча̀ въ Ꙋ҆чи́лище, І҆ере́ѵ꙼ же въ своѧ́ си.

Хотѧ́й прїѧ́ти Ра́сꙋ, прихо́дитъ къ и҆гꙋменꙋ, и ᲃътво́ръ ѡ҆бы́чное пре́дъ ни́мъ поклоне́ние, вопроси́мъ быва́етъ ѿ не́гѡ, а҆́ще съ всѧ́кимъ ᲂу҆сердїемъ къ И҆́ноческомꙋ прихо́дитъ жи́тїю, и а҆́ще многѡдне́внымъ ᲂу҆смотренїемъ ᲃі́е предложе́нїе неиꙁмѣ́нное и҆́матъ. ѡ҆бѣща́вшꙋжесѧ є҆мꙋ̀ невоꙁвра́тнѡ пребы́ти въ Монастырѝ, въ по́стѣ и҆ Моли́твахъ, и҆ тща́нїе твори́ти по́мощїю Бж҃іею, є҆́же де́нь и҆ но́щь преꙋспева́ти въ добродѣ́телехъ, и҆ въ всѣ́хъ повелѣ́нныхъ є҆мꙋ̀ слꙋ́жбахъ, пре́жде всѣ́хъ повелѣва́етъ є҆мꙋ̀ чи́нно пре́жде и҆счита́ти всѧ̀ съгрѣшенїѧ своѧ̀, и въ па́мѧть ᲃебѣ̀ приве́дъ всѧ̀ ѿ ю҆́ности ᲃвое́ѧ ᲃъдѣѧ́ннаѧ, дх҃о́вникꙋ Монасты́рскомꙋ и҆сповѣ́сти, и҆ ѿ негѡ̀ раꙁдрѣше́нїе прїѧти, и҆ по повелѣ́нїю дх҃о́вниковꙋ, гото́вꙋ бы́ти къ прича́стїю Бжⷭ҇твенныхъ Та́инъ. Семꙋ́же си́це бы́вшꙋ, врꙋча́етъ є҆гѡ̀ а҆́бїе И҆гꙋ́менъ є҆дино́мꙋ ѿ и҆скꙋснѣ́йшихъ ᲃта́рецъ Монасты́рскихъ, повелѣва́ѧ є҆мꙋ̀ є҆́же ѡ҆па́сное ѡ҆ дш҃ѝ є҆гѡ̀ и҆мѣ́ти попече́нїе, и҆ И҆́ноческомꙋ поꙋча́ти є҆гѡ̀ жи́тїю. Расоно́сцꙋ же бы́ти хотѧ́щомꙋ, повелѣва́етъ въ все́мъ повинова́тисѧ ᲃта́рцꙋ, чти́ти же и҆ послꙋша́ти є҆гѡ̀ ꙗ҆́кѡ ѿца̀ и҆ ᲂу҆чи́телѧ, и҆ ꙗ҆́кѡ ѿ Ха҃ сама́гѡ ѿ ᲃта́рца накаꙁа́нїе прїйма́ти: Вѣ́рꙋ же и҆ любо́вь къ не́мꙋ и҆мѣ́ти, на всѧ́къ же де́нь трикра́ти и҆счита́ти свою̀ ᲃо́весть ѡ҆па́снѡ, и҆ дѣѧ́нїѧ и҆ помышле́нїѧ ᲃвоѧ̀ ᲃта́рцꙋ и́сповѣда́ти всегда̀, и҆ ничто́же ꙗ҆́коже пре́дъ ᲃамы́мъ Бг҃омъ нико́гдаже ᲂу҆таева́ти: повелѣ́нїѧ же и поꙋче́нїѧ ᲃта́рцева ꙗ҆́коже ѿ ᲃама́го Бг҃а любо́внѣ прїйма́ти, и҆ ᲂу҆се́рдно тща́тисѧ ᲃъхрани́ти и҆ и҆сполнѧ́ти: надъ всѣ́ми же си́ми, ничто́же беꙁъ повелѣ́нїѧ и блⷭ҇вѣ́нїѧ ᲃта́рцева (а҆́ще и добрѣ́йшее бꙋ́детъ дѣ́ло) твори́ти.

Повелѣ́нъ же ѿ И҆гꙋ́мена съ ᲃта́рцемъ в̾хо́дитъ въ Цр҃ковъ. Прише́дшї же и И҆гꙋ́менꙋ и҆ бра́тїѧмъ въ Це́рковъ, въ вре́мѧ начина́нїѧ Часѡ́въ, ᲃта́рецъ предрече́нный приво́дитъ Ра́сꙋ прїѧ́ти хотѧ́щаго пре́дъ И҆гꙋ́меномъ, и҆ сотво́рше є҆мꙋ̀ ѻ҆́ба мета́нїе, ѡ҆бы́чно лобꙁа́ета десни́цꙋ є҆гѡ̀, и҆ блⷭ҇ве́нїе вꙁе́мша, тво́рита съ ѡ҆бо́ю стра́нꙋ поклоне́нїе бра́тїѧмъ, и҆ ста́вша пре́дъ ᲃт҃ы́ми Вра́ты, зна́менїемъ крⷭ҇тнымъ знамена́ета себѐ, кла́нѧющасѧ, гⷤ. Та́же лобꙁа́вша ᲃт҃ы́ѧ И҆́кѡны, и҆ покло́ншасѧ, ѿхо́дита на своѐ мѣ́сто.

А҆́бїе же посе́мъ начина́ютъ Часы̀ честѝ, по сконча́нїи же си́хъ, И҆гꙋ́менъ вꙁе́мъ Е҆питра́хиль и҆ фелꙍнь на́сѧ, (предстоѧ́щꙋ є҆мꙋ̀ хотѧ́й прїа́ти Ра́сꙋ, и ᲃта́рецъ є҆гѡ̀ съ ни́мъ, въ Притво́рѣ пре́дъ Цр҃ко́вными две́рми), тво́ритъ нача́ло ѡ҆бы́чное.

Блⷭ҇ве́нъ Бг҃ъ нш҃ъ всегда̀, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Бра́тїѧ,

А҆ми́нь.

Е҆кклесїа́рхъ же чтетъ, Трⷭ҇то́е: Прⷭ҇та́ѧ Трⷪ҇це: по Ѿч҃е на́ш же:

И҆гꙋ́менъ,

Ꙗ҆́кѡ твоѐ є҆стъ Црⷭ҇тво:

Е҆кклесїа́рхъ же,

Прїйдѣ́те поклони́мсѧ гⷤ, и҆ Ѱало́мъ Дави́довъ. Пре́жде помаꙁа́нїѧ, к҃ѕ.

Гд҃ь просвѣще́нїе моѐ, и҆ ᲃп҃си́тель мо́й, кого́ сѧ ᲂу҆бою; Гд҃ь защити́тель животꙋ̀ мое́мꙋ, кого́ сѧ ᲂу҆страшꙋ̀; Внегда̀ приближа́тисѧ на́ мѧ злобꙋ́ющимъ, є҆́же снѣ́сти пло́ти моѧ̀. ѡ҆скорблѧ́ющїи мѧ и҆ вра́ꙁи моѝ, ті́и иꙁнемогѡ́ша и҆ падѡ́ша. А҆́ще ѡ҆полчи́тсѧ на́мѧ по́лкъ, не ᲂу҆бои́тсѧ ᲃе́рдце моѐ. А҆́ще воста́нетъ на́мѧ бра́нь, нань а҆́ꙁъ ᲂу҆пова́ю, є҆дино̀ проси́хъ ѿ Гд҃а, то вꙁы́щꙋ, є҆́же жи́ти ми въ домꙋ̀ Гд҃ни всѧ̀ днѝ живота̀ мое́го, зрѣ́ти ми красоты̀ Гд҃нѧ, и҆ посѣща́ти Црк҃овъ ᲃт҃ꙋ́ю є҆гѡ̀. Ꙗ҆́кѡ съкры́ мѧ въ кро́вѣ свое́мъ въ дн҃ь зла мое́гѡ, покры́ мѧ въ та́йнѣ кро́ва свое́гѡ. На ка́мень воꙁнесе́ мѧ: и҆ ны́нѣ ᲃе воꙁнесѐ гла́вꙋ мою̀ на врагѝ моѧ̀. Ꙍ҆быйдо́хъ, и҆ пожро́хъ въ кро́вѣ є҆гѡ̀ же́ртвꙋ хвале́нїѧ, и҆ воскликнове́нїѧ, воспою̀ и҆ пою̀ Гв҃и. Ꙋ҆слы́ши, Гд҃и, гла́съ мо́й, и҆́мже воꙁва́хъ. Поми́лꙋй мѧ и҆ ᲂу҆слы́ши мѧ. Тебѣ̀ речѐ ᲃе́рдце моѐ: Гд҃а вꙁыщꙋ̀: въꙁыска̀ тебѐ лицѐ моѐ, лица̀ твое́гѡ, Гд҃и, вꙁыщꙋ̀. Не ѿвратѝ лица̀ твое́гѡ ѿ менѐ и҆ не ᲂу҆клони́сѧ гнѣ́вомъ ѿ раба̀ твое́гѡ. Помо́щникъ ми бꙋ́ди, не ѿринѝ менѐ и҆ не ѡ҆ста́ви менѐ, Бж҃е, ᲃп҃си́телю мо́й. Ꙗ҆́кѡ ѿц҃ъ мо́й и҆ ма́ти моѧ̀ ѡ҆ста́виста мѧ, Гд҃ь же воспрїѧ́тъ мѧ. Законоположи́ ми, Гд҃и, въ пꙋ́ти твое́мъ, и҆ наста́ви мѧ на пꙋ́ть пра́вый вра́гъ мои́хъ ра́ди. Не преда́ждь менѐ на дш҃ѧ̀ ᲃтꙋжа́ющимъ ми, ꙗ҆́кѡ воста́ша на́мѧ свѣди́теле непра́веднїи, и҆ сълга̀ непра́вда себѣ̀. Вѣ́рꙋю ви́дѣти бл҃га́ѧ Гд҃нѧ на землѝ живы́хъ. Потерпѝ Гд҃а: мꙋжа́йсѧ, и҆ да крѣ́пит̾сѧ ᲃе́рдце твоѐ, и҆ потерпѝ Гд҃а.

Дрꙋгїй Ѱсало́мъ, н҃. Поми́лꙋй мѧ, Бж҃е:

Пото́мъ па́ки, Трⷭ҇то́е: и҆ по Ѿч҃е нш҃ъ:

Тропа́рь. Гла́съ д҃.

Бж҃е Ѿц҃ъ на́шихъ, творѧ́й прⷭ҇нѡ съ на́ми по твое́мꙋ смотре́нїю, не ѿста́ви ми́лости твое́ѧ ѿ на́съ: но тѣ́хъ молитва́ми въ мі́ре ѡ҆кормѝ живо́тъ нш҃ъ.

Сла́ва: И҆ ны́нѣ: Богоро́диченъ.

Къ Бц҃и приле́жно ны́нѣ притецѣ́мъ, грѣ́шнїи и҆ смире́ннїи, и҆ припадѣ́мъ, покаѧнїемъ въпїю́ще и҆ꙁъ глꙋбины̀ дш҃евныѧ: Влады́чице, помоꙁѝ, милосердова́вши на́ны: потщи́сѧ, ꙗ҆́кѡ и҆ꙁгиба́емъ ѿ мнѡ́жества грѣхѡ́въ: не ѿвратѝ ра́бъ ᲃвои́хъ тщи́хъ, тебе́ бо помо́щницꙋ и҆ма́мы.

Посе́мъ а҆́бїе гл҃е́тъ И҆гꙋ́менъ Моли́твꙋ сі́ю Дїа́конꙋ ре́кшꙋ,

Гд҃ꙋ помоли́мсѧ:

И҆ бра́тїѧмъ всѣ́мъ,

Гд҃и, поми́лꙋй.

Благодари́мъ тѧ, Гд҃и Бж҃е нш҃ъ, и҆́же по мнѡ́ꙁѣй ми́лости твое́й и҆ꙁба́вилъ є҆сѝ раба̀ твое́го, И҆мⷬ҇къ: ѿ сꙋ́етнагѡ мі́рскагѡ живота̀, и҆ приꙁва́лъ є҆сѝ є҆гѡ̀ на чⷭ҇тное сі́е ѡ҆беща́нїе, сподобѝ ᲂу҆бѡ є҆гѡ̀ пожити досто́йнѡ въ А҆́гглⷭ҇комъ семъ жи́тїи, и҆ съхранѝ є҆гѡ̀ ѿ сѣ́тїй дїѧ́вольскихъ, и҆ чи́стꙋ є҆гѡ̀ дш҃ꙋ и҆ тѣ́ло ᲃъблюдѝ да́же до см҃рти: и҆ хра́мъ ст҃ъ тво́й бы́ти ᲃподобѝ, в̾раꙁꙋмѝ є҆гѡ̀ помина́ти тѧ всегда̀ и҆ твоѧ̀ повелѣ́нїѧ. Смире́нїе же и҆ любо́вь, и҆ кро́тость дарꙋ́й є҆мꙋ̀, Молитва́ми Пречⷭ҇тыѧ Влады́чица на́шеѧ Бц҃а, и҆ прⷭ҇нѡ Дв҃ы Мр҃іѧ, и҆ всѣ́хъ ст҃ы́хъ твои́хъ.

Бра́тїѧ же всѝ гл҃ю́тъ,

А҆ми́нь.

Дїѧ́конꙋ же ре́кшꙋ,

Гд҃ꙋ помоли́мсѧ.

И҆ бра́тїѧмъ,

Гд҃и, поми́лꙋй.

И҆гꙋ́менъ чте́тъ Моли́твꙋ вто́рꙋю.

Въ и҆́го твоѐ, Влады́ко, ᲃп҃сеное, прїимѝ раба̀ твое́гѡ, И҆мⷬ҇къ: и҆ сподобѝ є҆гѡ̀ па́ствѣ съчета́тисѧ и҆ꙁбра́нныхъ твои́хъ. Ꙍ҆блецѝ є҆гѡ̀ ѡ҆сще́нїѧ ри́ꙁою: цѣломꙋ́дрїемъ препоѧшѝ чресла̀ є҆гѡ̀: всѧ́каго въꙁдержа́нїѧ ꙗ҆́вѝ є҆гѡ̀ подви́жника, въ не́мъ и҆ въ на́съ дх҃о́вныхъ твои́хъ благода́тїй съверша́ѧ дарова́нїе, Молитва́ми Прⷭ҇ты́ѧ Влады́чица на́шеѧ Бц҃а и҆ прⷭ҇нѡ Дв҃ы Мр҃іѧ, и҆ всѣ́хъ ᲃт҃ы́хъ твои́хъ.

Бра́тїѧмъ же ре́кшимъ,

А҆ми́нь.

Прїе́млетъ И҆гꙋ́менъ но́жницѣ ѿ не́гѡ, и҆ пострига́етъ вла́сы главы̀ є҆гѡ̀ крестаѻ́браꙁно, гл҃ѧ̀:

Въ И҆мѧ Ѿц҃а̀, а҆ми́нь, и҆ ᲃн҃а, а҆ми́нь, и҆ ᲃт҃агѡ Дх҃а, а҆ми́нь.

Рцѣ́мъ всѝ ѡ҆ не́мъ, Гд҃и, поми́лꙋй.

Бра́тїѧ же пою́тъ всѝ,

Гд҃и, поми́лꙋй, гⷤ.

Вꙁе́м̾ше же є҆гѡ̀ бра́тїѧ ѡ҆стриꙁа́ютъ, пою́ще, Ѱало́мъ, н҃. И҆ посе́мъ ѡ҆блачитъ є҆гѡ̀ И҆гꙋ́менъ въ Ра́сꙋ, и҆ Камила́вхꙋ воꙁлага́етъ на главѣ̀ є҆гѡ̀, ничто́же гл҃ѧ̀, ѡ҆бле́къ же є҆гѡ̀ И҆гꙋ́менъ, гл҃е́тъ,

Ми́ръ всѣ́мъ.

Бра́тїѧ же,

И҆ дх҃ови твое́мꙋ.

Дїа́конъ,

Гла́вы ва́ша Гв҃и приклони́те.

Бра́тїѧ же,

Тебѣ̀, Гд҃и.

Всѣ́мъ же глава́мъ прекло́ншимъ, чтетъ И҆гꙋ́менъ та́йно Моли́твꙋ сі́ю.

Ст҃ый, бл҃гі́й, Бл҃га́гѡ Ѿц҃а ᲃн҃е, горды́ню ѿсѣца́ѧй, и҆ ᲂу҆пражнѧ́ѧй боре́нїе съпроти́внагѡ, и҆ иꙁлива́ѧй ᲃла́вꙋ смире́номꙋдрїѧ на Гла́вꙋ ᲃт҃ы́хъ, и҆ вѣнчава́ѧй и҆́хъ неꙋвѧда́емымъ и҆ нетлѣ́ннымъ Вѣнце́мъ жи́ꙁни и҆ беꙁсмѣ́ртїѧ, и҆ наставлѧ́ѧй въ тѣ́есный пꙋ́ть, и҆́м̾же внидѡ́ша ᲃт҃ы́и ѿц҃ѝ, и҆ въспрїа́ша само́е мѣ́сто поко́ищное. Ты̀, Влады́ко Гд҃и Бж҃е нш҃ъ, дарꙋ́й є҆́же ѿ тебѐ си́лꙋ и҆ благода́ть твое́гѡ Бжⷭ҇тва, въ дꙋ́хъ и҆ дꙋ́шꙋ и҆ тѣ́ло къ тебѣ̀ прише́дшагѡ раба̀ твое́го, И҆мⷬ҇къ: и҆ прїи́мшагѡ нача́токъ ст҃а́гѡ ѻ҆́браꙁа, ѡ҆ и҆менѝ твое́мъ ѡ҆сщ҃а́ющомъ всѧ́ческаѧ, да и҆ сегѡ̀ са́мъ ѡ҆ст҃и́ши и҆́менемъ твои́мъ всеси́льнымъ и҆ благи́мъ.

Во́ꙁгласъ.

Ꙗ҆́кѡ ᲃт҃ъ є҆сѝ, Бж҃е нш҃ъ, и҆ тебѣ̀ сла́вꙋ въꙁсыла́емъ, Ѿцꙋ и҆ ᲃн҃ꙋ и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Бра́тїѧ,

А҆минь.

И҆гꙋ́менъ же тво́ритъ ѡ҆бы́чный ѿпꙋ́стъ дне́вный. По ѿпꙋ́стѣ же вꙁе́мъ за рꙋ́кꙋ Расофо́ра, ѿдае́тъ є҆гѡ̀ ᲃта́рцꙋ, гл҃ѧ̀:

Се врꙋча́ю тебѣ̀ пре́дъ Бг҃омъ сегѡ̀ новонача́льнагѡ, є҆гѡ́же въ стра́сѣ Бж҃іи и҆ въ всѣ́хъ добродѣ́телехъ жи́ти поꙋча́й, блюды́й ѡ҆па́снѡ, да не нерадѣ́нїѧ ра́ди твое́гѡ поги́бнетъ дꙋша̀ є҆гѡ̀, и҆́маши бо ѿвѣ́тъ да́ти Бг҃ꙋ ѡ҆ не́мъ въ дн҃ь ᲃꙋ́дный.

Къ Расофо́рꙋ же гл҃тъ.

Ты́ же, ꙗ҆́коже Хв҃и во все́мъ повини́сѧ ᲃта́рцꙋ, и҆ въ все́мъ терпели́въ бꙋ́ди, смире́нъ же, послꙋшли́въ, кро́токъ, и҆ молчали́въ, и҆ ѡ҆брѧ́щеши благода́ть пре́дъ Бг҃омъ, и҆ ᲃпасе́шисѧ.

По ᲂу҆даре́нїи въ мало́е дре́во, начина́ющимъ Бра́тїѧмъ Часы̀, приво́димъ быва́етъ въ Це́рковь Є҆кклисїа́рхомъ и҆ є҆го́вѣмъ ᲃта́рцемъ мно́гоѡ вре́мѧ въ монасты́рстѣмъ и҆скꙋ́сѣ и҆ ᲃта́рчестемъ послꙋша́нїи до́брѣ пребы́вый, хотѧ́й постри́щысѧ, и҆ ста́вше посре́дъ Це́ркве, покланѧ́ютсѧ ѡ҆бы́чнѡ: пото́мъ же а҆́бїе ше́дше къ И҆гꙋ́менꙋ и҆ покло́ншесѧ, лобꙁа́ютъ десни́цꙋ є҆го, и҆ вꙁе́мше благослове́нїе ѿ негѡ̀, тво́рѧтъ поклоне́нїѧ трѝ до землѝ пре́дъ ᲃт҃ы́ми вра́ты, та́же лобꙁа́ютъ ᲃт҃ы́ѧ И҆́кѡны: и҆ па́ки ста́вше пре́дъ ᲃт҃ы́ми вра́ты, покланѧ́ютсѧ є҆дино́щи до землѝ, и҆ ѡ҆бра́щшесѧ къ Ли́комъ, та́кожде тво́рѧтъ по є҆ди́номꙋ поклоне́нїю. А҆́бїе же по се́мъ и҆ꙁше́дше въ Притво́ръ, новонача́льный ѿлага́етъ ѡ҆бы́чнꙋю свою̀ ѡ҆де́ждꙋ, и҆ сапо́ги, и҆ хито́нъ, и҆ ѡ҆бла́читсѧ въ власѧ́ницꙋ є҆ди́нꙋ то́чїю.

Вѣ́стно же бꙋ́ди, ꙗ҆́кѡ подоба́етъ всѧ́ко постри́щисѧ хотѧ́щемꙋ въ пе́рвыхъ, пре́жде да́же прїитѝ є҆мꙋ̀ въ Це́рковъ, и҆сповѣда́ти всѧ̀ грѣхѝ своѧ̀ пре́дъ дꙋхо́вникомъ, и҆ ѿ не́гѡ соверше́нное прїѧ́ти раꙁдрѣше́нїе, и҆ гото́вꙋ бы́ти къ причаще́нїю прⷭ҇ты́хъ Та́инъ Тѣ́ла и҆ Крвѐ Христо́вой. Си́це бо повелѣва́етъ Бжⷭ҇естве́нный Дїꙍни́сїй А҆реѡпаги́та, въ кни́ꙁѣ свое́й ѡ҆ Сщеннонача́лїи Церко́внемъ, въ гла́ве ѕ҃, ѡ҆ Та́йнѣ И҆ноческагѡ съверше́нїѧ.

Наче́ншейжесѧ Бжⷭ҇тве́нней Литꙋ́ргїи, стои́тъ въ притво́ре, пѣва́емымъ же ѡ҆бы́чнымъ А҆нтифѡ́намъ, по Вохо́дѣ съ Є҆ѵⷢ҇лїемъ чте́тсѧ конда́къ дне́вный на Сла́вѣ, на И҆ ны́нѣ же пое́тсѧ Тропа́рь сей. Гла́съ а҃.

Подо́бенъ,

Гро́бъ тво́й, ᲃп҃а́се:

Ꙍ҆бъѧ́тїѧ ѿч҃а ѿверсти́ ми потщи́сѧ: блꙋ́днѡ моѐ и҆ꙁжди́хъ жи́тїе: на бога́тство не и҆стощи́мое вꙁира́ю твои́хъ щедрѡтъ, Сп҃а́се: ны́нѣ ѡ҆бнища́вшее не преꙁрѝ ᲃе́рдце, тебѣ́ бо, Гд҃и, ᲂу҆миленїи въпїю̀: съгрѣшихъ, ѿч҃е, на́ нб҃о и҆ пре́дъ тобо́ю.

Семꙋ̀ є҆дино́щи пое́мꙋ, Бра́тїѧ всѝ и҆схо́дѧтъ въ притво́ръ, и҆ вꙁе́мше ᲃвѣща̀, пред̾и́дꙋтъ два̀ два̀, ти́хѡ пою́ще вы́ше писа́нный Тропа́рь, хотѧ́й же постри́щисѧ съꙁа́дѣ послѣ́жде всѣ́хъ ме́ждꙋ ᲃта́рцемъ и҆ Є҆кклисїа́рхомъ, и҆ въ є҆дино́й Власѧни́це то́кмѡ, не ѡ҆поѧса́нъ, не ѡ҆бꙋве́нъ, и҆ главо́ю ѿкрове́нною и҆де́тъ, рꙋ́це и҆мы́й съгбе́ннѣ къ пе́рсемъ а҆кѝ свѧ́ꙁанѣ, в̾ше́дъ же въ Це́рковь, покланѧ́ет̾сѧ гла́вою ни́ꙁко къ Восто́кꙋ є҆дино́щи, та́же прише́дъ пре́дъ А҆мбѡнъ, па́ки покланѧ́етсѧ тако́жде: пре́дъ ᲃт҃ы́ѧ же Вра́ты прише́дъ, па́дъ на зе́млю ни́цъ лежи́тъ, молѧ́сѧ въ себѣ̀ приле́жнѡ Гв҃и ѡ҆ проще́нїи свои́хъ грѣхѡ́въ, и҆ ѡ҆ є҆́же прїѧ́ти є҆гѡ̀ въ чи̑нꙋ ка́ющихсѧ.

Сконча́вше же трети́цею пѣ́нїе Тропарѧ̀, Настоѧ́тель велегла́снѡ гл҃е́тъ къ лежа́щомꙋ,

Бг҃ъ милосе́рдый, ꙗ҆́кѡ ѿц҃ъ чадолюби́вый, зрѧ̀ твоѐ смѣре́нїе и҆ и҆́стинное покаѧ́нїе, ча́до, ꙗ҆́кѡ блꙋ́днагѡ ᲃн҃а прїе́млетъ тѧ ка́ющагосѧ и҆ къ не́мꙋ ѿ ᲃе́рдца припада́ющагѡ.

И҆ а҆́бїе преклонсѧ воꙁдвиꙁа́етъ ни́цъ лежа́щагѡ, подъ де́снꙋю вꙁе́мъ рꙋ́кꙋ. Ѻ҆нъ же вста́въ и҆ стоѧ̀, про́стѡ, до́лꙋ зрѧ̀ и҆ рꙋ́це съгбе́нне къ пе́рсемъ и҆мы́й, покланѧ́етсѧ главо́ю благоговѣ́ино къ Бжⷭ҇тве́нномꙋ Ѻ҆́лтарꙋ.

И҆гꙋ́менъ же вопроша́етъ є҆гѡ̀, гл҃ѧ̀:

Что̀ прише́лъ є҆сѝ, бра́те, припада́ѧ къ ᲃт҃о́мꙋ Жерто́вникꙋ, и҆ къ ᲃт҃ѣ́й дрꙋжи́не се́й?

Ѻ҆́нъ же кланѧ́ѧсѧ ѿвещава́етъ.

Жела́ѧ жи́тїѧ по́стническагѡ, чⷭ҇тный ѿчѐ.

Вопроша́етъ є҆гѡ̀ па́ки И҆гꙋ́менъ.

Жела́еши ли сподоби́тисѧ А҆́гг҃льскомꙋ ѡ҆́браꙁꙋ, и҆ въчине́нꙋ бы́ти Ли́кꙋ И҆нокꙋ́ющихъ?

Ѻ҆́нъ же ѿвещава́етъ.

Е҆й, Бг҃ꙋ съдействꙋ́ющꙋ, чⷭ҇тный ѿчѐ.

И҆гꙋ́менъ же гл҃е́тъ,

Вои́стиннꙋ добро̀ дѣ́ло и҆ бл҃же́нно и҆ꙁбра́лъ є҆сѝ, но а҆́ще и҆ съверши́ши є҆̀: до́браѧ бo дѣ́ла трꙋ́домъ сниска́ютсѧ, и҆ бо́лѣꙁнїю и́справлѧ́ютсѧ.

А҆́бїе же ѡ҆глаша́етъ є҆гѡ̀ И҆гꙋ́менъ си́цевыми ᲃловесы̀, гл҃ѧ̀:

Ѿверꙁѝ ᲂу҆́ши твое́го ᲃе́рдца, ѽ Бра́те, и҆ ᲂу҆слы́ши гла́съ Гд҃нь гл҃ѧ́й: Прїйдѣ́те къ мнѣ̀, всѝ трꙋжда́ющїисѧ и҆ ѡ҆бремене́нїи грѣха́ми, и҆ а҆́ꙁъ ᲂу҆покою̀ вы: Въꙁмѣ́те и҆́го моѐ на себѐ, и҆ наꙋчи́тесѧ ѿ менѐ, ꙗ҆́кѡ кро́токъ є҆́смъ и҆ смѣре́нъ ᲃе́рдцемъ, и҆ ѡ҆брѧ́щете поко́й дш҃а́мъ ва́шимъ. Ны́нѣ ᲂу҆́бѡ, проти́вꙋ коемꙋ́ждѡ въпроше́нїю, подоба́ющїй ѿвѣ́тъ съ страхомъ и҆ ра́достїю ѿда́ждь Бг҃ꙋ. И҆ꙁвѣ́стнѡ же вѣ́ждь, ꙗ҆́кѡ са́мъ Сп҃аси́тель нш҃ъ, съ препѣ́тою свое́ю Ма́терїю, и҆ ᲃты́ми А҆гг҃лы, и҆ всѣ́ми ᲃт҃ыми свои́ми здѐ прі́йде, в̾нꙋша́ѧ и҆сходѧ́щаѧ ѿ тебѐ словеса̀: да є҆гда̀ прі́йдетъ сꙋди́ти живы́мъ и҆ ме́ртвымъ, воꙁда́стъ тебѣ̀, не поемꙋ́же и҆ма́ши ѡ҆бѣща́тисѧ и҆ и҆сповѣда́ти, но поемꙋ́же а҆́ще съхрани́ши, ꙗ҆́же и҆сповѣ́си. Тѣ́мже ны́нѣ, а҆́ще въи́стиннꙋ пристꙋпа́еши къ Бг҃ꙋ, съ всѧ́кимъ в̾нима́нїемъ ѿвѣща́й на́мъ, проти́вꙋ и҆́м̾же на́ми въпро́шенъ бы́ти и҆́маши.

И҆ а҆́бїе посе́мъ въпроша́етъ є҆гѡ̀, гл҃ѧ̀:

Во́лнымъ ли свои́мъ ра́ꙁꙋмомъ, и҆ во́льною ли свое́ю си во́лею, пристꙋпа́еши къ Гд҃ꙋ?

Ѿвѣща́етъ.

Є҆́й, Бг҃ꙋ съдѣйствꙋ́ющꙋ, чⷭ҇тный ѿч҃е.

Въпроша́етъ.

Не ѿ нѣ́кїѧ ли бѣды̀, и҆лѝ нꙋ́жда?

Ѿвѣща́етъ.

Ни чⷭ҇тный ѿч҃е.

Въпроша́етъ.

Ѿрица́ешилисѧ мі́ра и҆ сꙋ́щыхъ въ мі́ре по за́повѣди Гд҃ней?

Ѿвѣща́етъ.

Є҆́й, чⷭ҇тный ѿч҃е.

Въпроша́етъ.

Пребꙋ́деши ли въ монастырѝ се́мъ, и҆лѝ въ не́мже ти ѿ ᲃт҃а́гѡ послꙋша́нїѧ повелѣ́но бꙋ́детъ, и҆ въ по́стничествѣ, да́же до послѣ́днѧгѡ твое́гѡ иꙁдыха́нїѧ?

Ѿвѣща́етъ.

Є҆́й, Бг҃ꙋ содѣйствꙋ́ющꙋ, чⷭ҇тный ѿч҃е.

Въпроша́етъ.

Съхрани́шилисѧ въ двⷭ҇твѣ̀ и҆ цѣломꙋ́дрїи и҆ бл҃гоговенїи, да́же до сме́рти?

Ѿвѣща́етъ.

Є҆́й, Бг҃ꙋ содѣтелствꙋ́ющꙋ, чⷭ҇тный ѿч҃е.

Въпроша́етъ.

Сохрани́шили да́же до сме́рти послꙋша́нїе къ настоѧ́телю, и҆ къ все́й ѡ҆ Хрⷭ҇те бра́тїи?

Ѿвѣща́етъ.

Є҆́й, Бг҃ꙋ содѣйствꙋ́ющꙋ, чⷭ҇тный ѿч҃е.

Въпроша́етъ.

Пребꙋ́деши ли до см҃рти въ нестѧжа́нїи и҆ во́льной Ха҃ ра́ди въ ѡ҆́бщомъ жи́тїи сꙋ́щей нищетѣ̀, ничто́же собѣ̀ само́мꙋ стѧжава́ѧ, и҆лѝ хранѧ̀, ра́ꙁве ꙗ҆́же на ѡ҆́бщꙋю потре́бꙋ, и҆ сѐ ѿ послꙋша́нїѧ, а҆ не ѿ свое́гѡ проиꙁволе́нїѧ?

Ѿвѣща́етъ.

Є҆́й, честный ѿч҃е, пребꙋ́дꙋ Бг҃ꙋ споспѣшествꙋющꙋ.

Въпроша́етъ.

Прїе́млешили всѧ̀ И҆́нѡческагѡ ѡ҆́бщежи́тельнагѡ жи́тїѧ ᲂу҆ста́вы, и҆ пра́вила ѿ ᲃт҃ы́хъ ѿц҃ъ съставле́ннаѧ, и҆ ѿ настоѧ́телѧ тебѣ̀ пода́емаѧ?

Ѿвѣща́етъ.

Є҆́й, чⷭ҇тный ѿч҃е, прїемлю̀, и҆ съ любо́вїю лобыꙁа́ю ѧ҆̀.

Въпроша́етъ.

Претерпи́шили всѧ́кꙋю тѣснотꙋ̀, и҆ ско́рбь И҆́ноческагѡ жи́тїѧ, црⷭ҇твїѧ ра́ди нбⷭ҇нагѡ?

Ѿвѣща́етъ.

Є҆́й, Бг҃ꙋ споспешствꙋ́ющꙋ, чⷭ҇тный ѿч҃е.

Посе́мъ И҆гꙋ́менъ гл҃е́тъ къ не́мꙋ ѡ҆глаше́нїе сі́е:

Ви́ждъ, ча́до, какова̀ ѡ҆бѣтова́нїѧ дае́ши Влады́це Хꙋ̀, А҆́гг҃ели бо предста́ша неви́димѡ, написꙋ́юще и҆споведанїе твоѐ ᲃі́е, ѡ҆ не́м̾же и҆ и҆стѧ́ꙁанъ бꙋ́деши въ вто́рое Прише́ствїе Гд҃а на́шегѡ І҆и҃ᲃ Ха҃. Ска́ꙁꙋю ᲂу҆́бѡ ти ᲃъверше́нное жи́тїе, въ не́мже по подо́бїю Гд҃не жи́телство ꙗ҆влѧ́етсѧ, засвѣдетельствꙋ́ѧ ꙗ҆́же подоба́етъ ти прїима́ти и҆ и҆́хже подоба́етъ ѿбѣга́ти, ᲃе́бо предложи́лъ є҆сѝ, ча́до, є҆́же пристꙋпа́ти и҆ работа́ти Гд҃ви. А҆́ще ᲂу҆́бѡ хо́щеши И҆́нокъ бы́ти, пре́жде всѣ́хъ ѡ҆чи́сти себѐ ѿ всѧ́кїѧ скве́рны пло́ти и҆ Дх҃а, съверша́ѧ ᲃт҃ы́ню въ стра́сѣ Бжїи. Стѧжѝ ᲃмире́номꙋ́дрїе, и҆́мже наслѣ́дникъ бꙋ́деши вѣ́чныхъ бла́гъ, ѿложѝ жите́йскагѡ ѡ҆бы́чаѧ шата́нїе: Послꙋша́нїе и҆мѣ́й къ всѣ́мъ: беꙁ̾ропти́въ бꙋ́ди въ заповѣда́нныхъ ти слꙋ́жбахъ: въ Моли́тве терпели́въ, въ Бдѣ́нїихъ нелѣ́ностивъ: въ И҆скꙋше́нїихъ не печалꙋ́й: въ По́стѣхъ не раꙁслаблѧ́йсѧ: Вѣ́ждь же, ꙗ҆́кѡ моли́твою и҆ по́стомъ подоба́етъ ти ᲂу҆моли́ти Бг҃а. Въ не́мощехъ не пренемога́й: пораꙁꙋмѣ́ва́й же лꙋка́выѧ по́мыслы: не и҆́мать бо преста́ти вра́гъ, предлага́ѧ тебѣ̀ па́мѧтъ пе́рвагѡ жи́тїѧ мі́рскагѡ и҆ нена́висть къ добродѣ́тельномꙋ жи́телствꙋ. Подоба́етъ ᲂу҆́бѡ тебѣ̀ наче́ншꙋ пꙋ́ть, ведꙋ́щїй въ Ца́рство нбⷭ҇ное, не воꙁврати́тисѧ въспѧ́ть, не бꙋ́деши бо ᲂу҆пра́вленъ въ Ца́рство нбⷭ҇ное. Да не предпочте́ши ᲂу҆́бѡ чесѡ̀ па́че Бг҃а: да не воꙁлю́биши ни́же ѿц҃а̀, ни́же ма́терь, ни́же бра́тїю, ни́же кое́гѡ ѿ свои́хъ, ни́же самъ ᲃебѐ въꙁлю́биши па́че Бг҃а, ни́же Ца́рствїѧ мі́ра, и҆лѝ ᲂу҆покое́нїѧ кое́голибо бꙋ́ди, и҆лѝ че́сти. Нищеты̀ да не ѿвраща́ешисѧ, но въ не́й до сме́рти да пребыва́еши, ни ѡ҆ꙁлобле́нїѧ, ни ᲂу҆ничиже́нїѧ члчⷭ҇кагѡ, ни́же и҆́нагѡ чесогѡ̀, є҆́же непщева́ти бꙋ́деши бы́ти неꙋдо́бнѡ, и҆ воꙁбране́нъ бꙋ́деши тещѝ за Христо́мъ, но прⷭ҇нѡ вꙁыра́й на ꙗ҆́же въ ᲂу҆пова́нїихъ по Бѕ҃ѣ жи́вшихъ бла҃га́ѧ, и҆ всѧ̀ ѿ вѣ́ка помышлѧ́й Мꙋче́ники и҆ Преподо́бныѧ, и҆́же мнѡ́гими по́ты и҆ трꙋ́ды, и҆ беꙁчисле́нными кро́вьми и҆ ᲃмерт̾ми сі́ѧ стѧжа́ша. Надъ всѧ́ же сі́ѧ, всегда̀ въ ᲂу҆мѣ̀ свое́мъ и҆мѣ́й ᲃп҃си́тельныѧ ᲃтрⷭ҇ти и҆ животво́рнꙋю ᲃм҃рть Гд҃а на́шего І҆и҃ᲃ Ха҃, ꙗ҆́же во́лею ᲃп҃сенїѧ на́шего ра́ди претерпѣ̀, ꙗ҆́кѡ да и҆ ты̀ всѧ̀ бѣды̀ И҆́ноческа жи́тїѧ и҆ тѣснотꙋ̀ сла́дцѣ є҆гѡ̀ ра́ди претерпи́ши. Треꙁви́сѧ ᲂу҆́бѡ въ все́мъ, зло̀ постраждѝ ꙗ҆́кѡ до́брый во́инъ Хв҃ъ: Самъ бо Гд҃ь и҆ Бг҃ъ нш҃ъ, бога́тъ сы́й въ ми́лости, на́съ дѣ́лѧ ѡ҆бнища̀, ꙗ҆́кѡ да мы ѡ҆богати́м̾сѧ Ца́рствїемъ є҆го̀. Подоба́етъ ᲂу҆́бѡ и҆ на́мъ подража́телемъ є҆гѡ̀ бы́ти, и҆ є҆гѡ̀ ра́ди всѧ̀ претерпѣ́ти, преспѣва́ющимъ въ за́повѣдехъ є҆гѡ̀ дн҃ь и҆ но́щь. Са́мъ бо Гд҃ь речѐ: а҆́ще кто̀ хо́щетъ въ слѣ́дъ менѐ и҆тѝ, да ѿве́ржетсѧ ᲃебѐ, и҆ во́ꙁметъ Крⷭ҇тъ сво́й, и҆ въ слѣ́дъ менѐ да и҆де́тъ, є҆́же є҆́стъ го́товꙋ прⷭ҇нѡ бы́ти, да́же до сме́рти, на всѧ́кое и҆сполне́нїе за́поведїй є҆гѡ̀: и҆бѡ̀ а҆лка́ти и҆́маши и҆ жажда́ти, доса́дꙋ же под̾ѧ́ти и҆ ᲂу҆кори́ꙁнꙋ: поноше́нїе же и҆ гоне́нїе, и҆ и҆́нѣми мнѡ́гими ѡ҆тѧготи́тисѧ ᲃко́рбми, и҆́миже сꙋ́щїй по Бѕ҃ѣ живо́тъ начертава́етсѧ. Є҆гда́ же сі́ѧ всѧ̀ постра́ждеши, ра́дꙋйсѧ, речѐ Гд҃ь, ꙗ҆́кѡ мꙁда̀ твоѧ̀ мнѡ́га є҆́сть на нб҃се́хъ, є҆мꙋ́же ᲃла́ва въ вѣ́ки. А҆ми́нь.

Вопро́съ.

Сі́ѧ всѧ̀ та́ко ли и҆сповѣда́еши ᲂу҆пова́нїемъ ᲃи́лы Бж҃іѧ, и҆ въ си́хъ ѡ҆бѣ́техъ пребыва́ти ѡ҆бѣща́ешилисѧ да́же до кончины̀ живота̀ твое́го, бл҃года́тїю Хв҃ою?

Ѿвѣ́тъ.

Є҆́й, Бг҃ꙋ ᲃъдѣйствꙋ́ющꙋ, чⷭ҇тный ѿч҃е.

По си́хъ же а҆́бїе И҆гꙋ́менъ гл҃е́тъ къ немꙋ̀ ᲃі́е:

Всеще́дрый ᲂу҆́бѡ Бг҃ъ и҆ мнѡгоми́лостивый, Пречи́стыѧ ᲂу҆тро́бы свое́ѧ неиꙁслѣди́мыѧ бла́гости ѿверꙁа́ѧй всѧ́комꙋ приходѧ́щомꙋ къ не́мꙋ съ жела́нїемъ и҆ любо́вїю те́плою, рекі́й: а҆́ще бы и҆ жена̀ забы́ла и҆сча́дїе своѐ, а҆́ꙁъ же не забꙋ́дꙋ тебѐ, и҆ твоѐ вѣды́й жела́нїе, и҆ къ предложе́нїю твое́мꙋ прилага́ѧ сꙋ́щꙋю ѿ не́гѡ ᲃи́лꙋ къ и҆сполне́нїю свои́хъ за́повѣдїй, да въспрі́йметъ, и҆ ѡ҆бы́метъ, и҆ защи́титъ, и҆ да бꙋ́детъ ти ᲃтѣна̀ тве́рда ѿ лица̀ вра́жїѧ, ка́мень терпѣ́нїѧ, ᲂу҆тѣше́нїѧ вина̀, крѣ́пости пода́тель, благодꙋ́шїѧ сниска́нїе, мꙋ́жествꙋ съподви́жникъ, лѣга́ѧ и҆ востаѧ̀ съ тобо́ю, ᲂу҆слажда́ѧ и҆ веселѧ̀ ᲃе́рдце твоѐ ᲂу҆тѣше́нїемъ ᲃт҃а́гѡ свое́го Дх҃а: сподоблѧ́ѧ тѧ и҆ ча́сти ᲃт҃ы́хъ и҆ Преподо́бныхъ Ѿц҃ъ на́шихъ А҆нтѡ́нїѧ, Є҆ѵѳи́мїѧ, Са́ввы, и҆ А҆нтѡ́нїа и҆ Феодѡ́сїѧ Пече́рскихъ, и҆ всѣ́хъ про́чїихъ Преподо́бныхъ Ѿц҃ъ, съ ни́ми въ И҆́ночествѣ Хв҃и бл҃гоꙋгоди́вшихъ: съ ни́миже и҆ ты Ца́рство нбⷭ҇ное да наслѣди́ши, ѡ҆ Христѐ І҆ѝсѣ Гд҃е на́шемъ, є҆мꙋ́же ᲃла́ва и҆ держа́ва, Ца́рство и҆ ᲃи́ла, съ Ѿц҃емъ и҆ ᲃт҃ы́мъ Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Бра́тїѧ,

А҆минь.

По си́хъ же прекло́ншꙋ новонача́лномꙋ гла́вꙋ, и҆ Дїа́конꙋ ре́кшꙋ,

Гд҃ꙋ помоли́мсѧ.

И҆ бра́тїѧмъ,

Гд҃и, поми́лꙋй.

Полага́етъ настоѧ́тель ве́рхꙋ главы̀ є҆гѡ̀ Кни́гꙋ, и҆ чтетъ Моли́твꙋ ᲃі́ю въ ᲂу҆слыша́нїе всѣ́мъ.

Гд҃и Бж҃е нш҃ъ, досто́йныхъ тебѐ бы́ти въꙁакони́вый, жите́йскаѧ всѧ̀ ѡ҆ставл̾шихъ, и҆ ᲃъро́дники и҆ дрꙋ́ги, и҆ послѣдова́вшихъ тебѣ̀: прїйми и҆ раба̀ твое́гѡ ᲃегѡ̀, И҆мⷬ҇къ: ѿве́ргшагосѧ всѣ́хъ ᲃи́хъ, по ᲃт҃ы́хъ твои́хъ за́повѣдехъ, и҆ наста́ви є҆гѡ̀ на и҆́стинꙋ твою̀, припада́ющагѡ ти неꙋкло́нноѡ: ѡ҆градѝ є҆гѡ̀ ᲃи́лою ᲃт҃а́гѡ ти Дх҃а, въ є҆́же не мощѝ дѣйствова́ти надъ ни́мъ всѧ́кой ᲃъпроти́вней ко́ꙁни, терпѣ́нїе є҆мꙋ̀ дарꙋ́ѧ къ бл҃гоꙋгожде́нїю твое́мꙋ вы́нꙋ: Молитва́ми Пречи́стыѧ Влады́чица на́шеѧ Бц҃а, и҆ всѣ́хъ ᲃт҃ы́хъ, ѿ вѣ́ка тебѣ̀ благоꙋгоди́вшихъ.

Ꙗ҆́кѡ благослови́сѧ и҆ просла́висѧ Прече́стное и҆ великолѣ́пое И҆мѧ твоѐ, Ѿц҃а̀ и҆ ᲃн҃а и҆ ᲃт҃а́гѡ Дх҃а, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Бра́тїѧмъ же ре́кшимъ,

А҆ми́нь.

Дїа́конъ а҆́бїе полага́етъ но́жницы на ᲃто́мъ Є҆ѵⷢ҇лїи, И҆гꙋ́менъ же гл҃е́тъ,

Ми́ръ всѣ́мъ.

Дїаконъ,

Гла́вы ва́ша Гд҃ви преклони́те.

Бра́тїѧ,

Тебѣ̀, Гд҃и.

И҆гꙋ́менъ же чтетъ Моли́твꙋ ᲃі́ю,

Гд҃и Бж҃е нш҃ъ, ᲂу҆пова́нїе и҆ прибѣжи́ще всѣ́мъ ᲂу҆пова́ющымъ на́ тѧ, раꙁли́чныѧ пꙋ́ти спасе́нїѧ на́мъ покаꙁа́вый въчлч҃енїемъ Ха҃ твое́гѡ, прїймѝ раба̀ твое́гѡ, И҆мⷬ҇къ: ѡ҆ста́вл̾шагѡ мі́рскїѧ по́хоти, и҆ себѐ прине́сшагѡ тебѣ̀ Влады́це же́ртвꙋ жи́вꙋ, благоꙋго́днꙋ, ѿимѝ ѿ не́гѡ всѧ́кꙋю пло́тскꙋю по́хоть, и҆ беꙁслове́снаѧ прїима́нїѧ, ꙗ҆́кѡ да ѿложе́нїемъ нечꙋвстве́нныхъ вла́совъ съѿло́житъ и҆ беꙁслове́сныѧ мы́сли же и҆ дѣѧ́нїѧ, и҆ сподоби́тсѧ прїѧ́ти и҆́го твоѐ бл҃го́е и҆ ле́гкое ти бре́мѧ, и҆ вꙁѧ́ти Крⷭ҇тъ, и҆ послѣдова́ти тебѣ̀ Влады́це. Съблюдѝ є҆гѡ̀ въ твое́й ᲃт҃ы́ни, и҆ дарꙋ́й є҆мꙋ̀ предложе́нїе благо́е въ съблюде́нїи ᲃт҃ы́хъ твои́хъ за́повѣдїй, съчетава́ѧ є҆гѡ̀ въ вре́мѧ бл҃гопотре́бно ли́кꙋ и҆ꙁбра́нныхъ твои́хъ: благода́тїю и҆ чл҃кѡлю́бїемъ є҆диноро́днагѡ ᲃн҃а твое́го, съ ни́м̾же блⷭ҇ве́нъ є҆сѝ, съ Пртⷭ҇ы́мъ и҆ бл҃ги́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Бра́тїѧмъ же ре́кшымъ,

А҆минь.

Настоѧ́тель просте́ръ десни́цꙋ свою̀ къ ᲃт҃о́мꙋ Еѵⷢ҇лїю, гл҃е́тъ,

Се Хᲃ҃ невиди́мо здѣ̀ предстои́тъ: ви́ждь, ꙗ҆́кѡ никто́же тѧ принꙋжда́етъ прїитѝ къ семꙋ̀ ѡ҆́браꙁꙋ: ви́ждь, ꙗ҆́кѡ ты ѿ свое́го си проиꙁволе́нїѧ хо́щеши ѡ҆брꙋче́нїе Вели́кагѡ А҆гг҃лⷭ҇кагѡ ѡ҆́браꙁа.

Ѿвѣща́етъ.

Е҆́й, чⷭ҇тный ѿч҃е, ѿ свое́го проиꙁволе́нїѧ.

По ѿвѣща́нїи же Настоѧ́тель, пока́ꙁꙋѧ десни́цею на но́жницы, глаголе́тъ три́жды:

Воꙁмѝ но́жицы и҆ пода́ждь ми ѧ҆̀.

По кое́мждѡ же и҆ꙁрече́нїи, три́жды новонача́льный, вꙁе́мъ но́жицы, подае́тъ ѧ҆̀ Настоѧ́телю, лобꙁа́ѧ десни́цꙋ є҆гѡ̀. ѻ҆́нъ же вꙁе́мъ на ᲃт҃о́мъ Еѵⷢ҇лїю полага́етъ ѧ҆̀, и҆ гл҃е́тъ къ не́мꙋ:

Се ѿ рꙋкѝ Хв҃ы прїе́млеши ѧ҆̀: ви́ждь, комꙋ̀ ѡ҆бѣщава́ешисѧ, и҆ къ комꙋ̀ пристꙋпа́еши, и҆ когѡ̀ ѿрица́ешисѧ.

Вꙁе́мъ же Настоѧ́тель но́жицы ѿ ᲃт҃а́гѡ Е҆ѵⷢ҇лїѧ, паки коне́чнее гл҃е́тъ,

Блⷭ҇ве́нъ Бг҃ъ, хотѧ́й всѣ́мъ чл҃кѡмъ ᲃпⷭ҇ти́сѧ и҆ въ поꙁна́нїе и҆́стинны прїитѝ: сы́й бл҃гослове́нъ въ вѣ́ки вѣ́кѡвъ.

Бра́тїѧ,

А҆ми́нь.

А҆бїе же Настоѧ́тель пострига́етъ верхъ главы̀ є҆гѡ̀ крестаѡбраꙁнѡ, глаголѧ̀,

Бра́тъ нш҃ъ, И҆мⷬ҇къ: пострига́етъ вла́сы главы̀ ᲃвое́ѧ, въ зна́менїе ѿрица́нїѧ мі́ра, и҆ всѣ́хъ ꙗ҆́же въ мі́ре, и҆ въ ѿрѣꙁа́нїе свое́ѧ во́лѧ и҆ всѣ́хъ пло́тскихъ по́хотїй, въ И҆мѧ Ѿц҃а̀ и҆ ᲃн҃а и҆ ᲃт҃а́гѡ Дх҃а, рцѣ́мъ всѝ ѡ҆ не́мъ, Гд҃и, поми́лꙋй.

Бра́тїѧ же пою́тъ, гⷤ.

Гд҃и, поми́лꙋй.

Настоѧ́тель же, десни́цею коснꙋ́всѧ власѧни́цы, є҆ю́же ѡ҆дѣѧ́нъ є҆́стъ новонача́лный, и҆ держа̀ за ню̀, гл҃е́тъ,

Бра́тъ нш҃ъ, И҆мⷬ҇къ: ѡ҆блачи́тсѧ въ Хїтѡ́нъ во́льныѧ нищеты̀ и҆ нестѧжа́нїѧ, и҆ всѧ́кихъ бѣ́дъ и҆ тѣснѡ́тъ претерпѣ́нїѧ, въ И҆мѧ Ѿц҃а̀ и҆ ᲃн҃а и҆ ᲃт҃а́гѡ Дх҃а. Рцѣ́мъ вси ѡ҆ не́мъ: Гд҃и, поми́лꙋй.

И҆ знамена́етъ є҆гѡ̀ крестаѡ́браꙁнѡ, ѻ҆́нъ же лобꙁа́етъ Власѧни́цꙋ и҆ десни́цꙋ Настоѧ́телевꙋ, Бра́тїѧ же пою́тъ гⷤ,

Гд҃и, поми́лꙋй.

Настоѧтель же, вꙁемъ Парама́нъ и҆ держа и҆̀ шꙋи́цею, глаголе́тъ,

Бра́тъ нш҃ъ, И҆мⷬ҇къ: прїе́млетъ Парама́нъ въ ѡ҆брꙋче́нїе Вели́кагѡ А҆́гг҃лⷭ҇кагѡ Ѻ҆́браꙁа, въ ѡ҆де́ждꙋ нетлѣ́нїѧ и҆ чⷭ҇тоты̀, и҆ въ всегда́шнее воспомина́нїе бл҃га́гѡ и҆́га Хв҃а вꙁѧ́тїѧ на себѐ, и҆ ле́гкагѡ бре́мени є҆гѡ̀ ноше́нїѧ, и҆ въ ѡ҆бꙋꙁда́нїе и҆ свѧꙁа́нїе всѣ́хъ по́хотїй и҆ жела́нїй пло́ти свое́ѧ, въ И҆мѧ Ѿц҃а̀ и҆ ᲃн҃а и҆ ᲃт҃а́гѡ Дх҃а, рцѣ́мъ всѝ ѡ҆ не́мъ, Гд҃и, поми́лꙋй.

И҆ знамена́въ є҆гѡ̀ десни́цею крестаѡ́браꙁнѡ, воꙁлага́етъ є҆гѡ̀ на ра́мена и҆ на пле́щи новонача́льнагѡ, Бра́тїѧмъ пою́щимъ гⷤ,

Гд҃и, поми́лꙋй.

Вꙁе́мъ же Крⷭ҇тъ и҆ держа̀ є҆гѡ̀ шꙋи́цею, гл҃е́тъ,

Бра́тъ нш҃ъ, И҆мⷬ҇къ: прїе́млетъ зна́менїе Крⷭ҇та̀ Гд҃нѧ на своѧ̀ перси, въ всегда́шнее въспомина́нїе злострада́нїѧ, и҆ ᲂу҆ничиже́нїѧ, ѡ҆плева́нїѧ, поноше́нїѧ, ра́ны, заꙋше́нїѧ, Распѧ́тїѧ, и҆ ᲃм҃рти Гд҃а Бг҃а и҆ ᲃп҃са на́шегѡ І҆и҃ᲃ Ха҃, ꙗ҆́же во́лею насъ дѣ́лѧ претерпѣ̀, и҆ въ є҆́же по є҆ли́кꙋ мо́щнѡ ᲃі́ѧ подража́ти тща́тисѧ, въ И҆мѧ̀ Ѿц҃а̀ и҆ ᲃн҃а и҆ ᲃт҃а́гѡ Дх҃а. Рцѣ́мъ всѝ ѡ҆ не́мъ: Гд҃и, поми́лꙋй.

И҆ а҆́бїе знамена́въ Крⷭ҇тъ десни́цею, въꙁлага́етъ на вы́ю є҆гѡ̀, Бра́тїѧмъ пою́щимъ гⷤ,

Гд҃и, поми́лꙋй.

Посе́м, вꙁе́мъ Ра́сꙋ, гл҃е́тъ,

Бра́тъ нш҃ъ, И҆мⷬ҇къ: ѡ҆блачи́тсѧ въ ѡ҆де́ждꙋ весе́лїѧ и҆ ра́дости дх҃о́вныѧ, въ ѿложе́нїе и҆ попра́нїе всѣ́хъ печа́лїй, и҆ ᲃмꙋще́нїе ѿ бѣ́сѡвъ, ѿ пло́ти, и҆ ѿ мі́ра находѧ́щихъ: въ всегда́шнее же є҆гѡ̀ ѡ҆ Хрⷭ҇тѣ̀ весе́лїе и҆ радова́нїе, въ И҆мѧ̀ Ѿц҃а̀, и҆ ᲃн҃а и҆ ᲃт҃а́гѡ Дх҃а: Рцѣ́мъ всѝ ѡ҆ не́мъ: Гд҃и, поми́лꙋй.

И҆ знамена́въ десни́цею Ра́сꙋ, ѡ҆бла́читъ є҆ю̀ новонача́лнагѡ, бра́тїѧмъ пою́щимъ гⷤ,

Гд҃и, поми́лꙋй.

Вꙁе́мъ же ᲂу҆смѧ́ный По́ѧсъ, и҆ держа̀ и҆̀ шꙋи́цею, гл҃е́тъ,

Бра́тъ нш҃ъ, И҆мⷬ҇къ: препоѧ́сꙋетъ бе́дрѣ своѝ си́лою и҆́стинны, въ ᲂу҆мерщвле́нїе тѣ́ла, и҆ ѡ҆бновле́нїе Дх҃а, въ бо́дростъ же и҆ ѡ҆па́сствѡ, въ снабдѣ́нїй за́повѣдїй Хв҃ыхъ, въ И҆мѧ̀ Ѿц҃а̀ и҆ ᲃн҃а, и҆ ᲃт҃а́гѡ Дх҃а: Рцѣ́мъ всѝ ѡ҆ не́мъ, Гд҃и, поми́лꙋй.

Десни́цею же знамена́въ є҆гѡ̀, препоѧ́сꙋетъ и҆́мъ новонача́лнагѡ, пою́щимъ Бра́тїѧмъ, гⷤ,

Гд҃и, поми́лꙋй.

Посе́мъ вꙁе́мъ Ма́нтїю, и҆ держа ю҆̀ шꙋи́цею, гл҃е́тъ,

Бра́тъ нашъ, И҆мⷬ҇къ: ѡ҆блачи́тсѧ въ ри́зꙋ ᲃпⷭ҇нїѧ, и҆ въ бро́ню пра́вды, въ є҆́же ѿшаѧва́тисѧ ѿ всѧ́кїѧ непра́вды: и҆ ѡ҆па́снѡ свое́гѡ ра́ꙁꙋма составле́нїе, и҆ ᲃвое́ѧ во́лѧ мꙋдрова́нїе ѿрѣ́ꙁати: сме́рти же па́мѧтъ всегда̀ въ ᲂу҆́мѣ свое́мъ и҆мѣ́ти, распѧ́та же себѐ бы́ти мі́рови в̾мѣнѧ́ти, и҆ ме́ртва на всѧ́кое дѣ́ло зло и҆мѣ́ти, жи́ва же прⷭ҇нѡ на всѧ́кꙋю добродѣ́телъ Хв҃и нелѣ́ностнѡ представлѧ́ти, въ и҆мѧ Ѿц҃а̀ и҆ ᲃн҃а и҆ ᲃт҃а́гѡ Дх҃а, Рцѣ́мъ всѝ ѡ҆ не́мъ: Гд҃и, поми́лꙋй.

Десни́цею же знамена́въ ю҆̀ ѡ҆ла́читъ новонача́льнагѡ, Бра́тїѧмъ пою́щымъ, гⷤ,

Гд҃и, поми́лꙋй.

Та́же вꙁе́мъ Подка́покъ и҆ держа є҆гѡ̀ шꙋи́цею, гл҃е́тъ,

Бра́тъ нш҃ъ, И҆мⷬ҇къ: прїе́млетъ шле́мъ ᲃпⷭ҇нїѧ и҆ непосты́днагѡ ᲂу҆пова́нїѧ, во є҆́же мощѝ є҆мꙋ̀ ста́ти проти́вꙋ всѣ́мъ кѡ҆ꙁнем дїа́вольскимъ въ И҆мѧ̀ Ѿц҃а̀ и҆ ᲃн҃а и҆ ᲃт҃а́гѡ Дх҃а. Рцѣ́мъ всѝ ѡ҆ не́мъ: Гд҃и, поми́лꙋй.

Десни́цею же блⷭ҇ви́въ є҆гѡ̀, воꙁлага́ет на гла́вꙋ новонача́льнагѡ, пою́щимъ Бра́тїѧмъ, гⷤ,

Гд҃и, поми́лꙋй.

Вꙁе́мъ же Камила́вхꙋ, и҆ шꙋи́цею держа̀ ю҆̀ гл҃е́тъ,

Бра́тъ нш҃ъ, И҆мⷬ҇къ: покрива́ет гла́вꙋ свою̀ покрива́ломъ смѣре́нїѧ и всегда́шнѧгѡ послꙋшанїѧ, въ зна́менїе дх҃о́внагѡ любомꙋ́дрїѧ, и въ є҆́же отврати́ти ѻ҆́цѣ своѝ є҆́же не ви́дѣти сꙋеты̀, въ И҆мѧ̀ Ѿц҃а̀ и҆ ᲃн҃а и҆ ᲃт҃а́гѡ Дх҃а. Рцѣ́мъ всѝ ѡ҆ не́мъ: Гд҃и, поми́лꙋй.

Десни́цею же благослови́въ ю҆̀, покрыва́ет гла́вꙋ новонача́льнагѡ, пою́щим Бра́тїѧмъ, гⷤ,

Гд҃и, поми́лꙋй.

Вꙁе́мъ же Санда́лїѧ, и҆ шꙋи́цею держа̀ ѧ҆̀, гл҃е́тъ,

Бра́тъ на́ш, И҆мⷬ҇къ: ѡ҆бꙋва́етсѧ в Санда́лїѧ, бл҃говѣствова́нїѧ ми́ра, въ є҆́же ско́рꙋ бы́ти є҆мꙋ̀ и҆ тщали́вꙋ на всѧ́кое послꙋша́нїе и҆ на всѧ́кѡ дѣ́ло бл҃го́е: ко́сенъ же и҆ не ско́ръ, къ и҆сполненїю свое́ѧ во́лѧ, и҆ къ всѧ́комꙋ де́лꙋ неподо́бномꙋ, въ И҆мѧ̀ Ѿц҃а̀ и ᲃн̀а и ᲃт҃а́гѡ Дх҃а: Рцѣ́мъ всѝ ѡ҆ не́мъ: Гд҃и, поми́лꙋй.

Десни́цею же благослови́въ, ѡ҆бꙋва́етъ є҆гѡ̀, Бра́тїѧмъ пою́щымъ гⷤ,

Гд҃и, поми́лꙋй.

По си́хъ же прїи́мъ Верви́цꙋ и҆ шꙋйцею держа̀ ю҆̀, гл҃е́тъ,

Прїймѝ, Бра́те, И҆мⷬ҇къ: ме́чь дꙋхо́вный, и҆́же є҆́сть гл҃ъ Бж҃ій, въ всегда́шней моли́твѣ І҆и҃совой: всегда́ бо и҆мѧ Гд҃а І҆и҃са въ ᲂу҆ме, въ ᲃе́рдцѣ и҆ въ мы́сли, и҆ въ ᲂу҆стѣ́хъ свои́хъ и҆мѣ́ти до́лъженъ є҆сѝ, гл҃ѧ̀ прⷭ҇нѡ: Гд҃и І҆и҃се Хє҃, ᲃн҃е Бж҃ій, поми́лꙋй мѧ грѣ́шнагѡ. Рцѣ́мъ всѝ ѡ҆ не́мъ: Гд҃и, поми́лꙋй.

И҆ благословивъ ю҆̀ Десни́цею, подае́тъ новонача́лномꙋ, пою́щимъ Бра́тїѧмъ гⷤ,

Гд҃и, поми́лꙋй.

Ѻ҆́нъ же прїемлѧ̀, лобꙁа́етъ Верви́цꙋ и҆ десни́цꙋ Настоѧ́телевꙋ. Настоѧ́тель же, вꙁе́мъ рꙋ́чный Крⷭ҇тъ и҆ держа̀ и҆̀ десни́цею, гл҃е́тъ,

Прїйми, бра́те, И҆мⷬ҇къ: щи́тъ вѣ́ры, Крⷭ҇тъ Хв҃ъ, въ не́мже воꙁмо́жеши всѧ̀ стрѣ́лы лꙋка́вагѡ раждеже́нныѧ ᲂу҆гаси́ти, и҆ памѧтствꙋ́й всегда̀, ꙗ҆́кѡ речѐ Гд҃ь: И҆́же хо́щетъ по мнѣ̀ и҆тѝ, да ѿверже́тсѧ ᲃебѐ, и҆ во́ꙁметъ Крⷭ҇тъ сво́й, и҆ послѣдꙋ́етъ ми. Рцѣ́мъ всѝ ѡ҆ не́мъ, Гд҃и, поми́лꙋй.

И҆ знамена́въ новонача́льнагѡ Крⷭ҇то́мъ крестаѻ́браꙁнѡ, подае́тъ є҆мꙋ̀, ѻ҆́нъ же, прїемлѧ̀ де́сною рꙋко́ю, лобꙁа́етъ Крⷭ҇тъ и҆ десни́цꙋ настоѧ́телевꙋ, бра́тїѧ же пою́тъ, гⷤ,

Гд҃и, поми́лꙋй.

На коне́цъ же, вꙁе́мъ ᲃвѣ́щꙋ горѧ́щꙋю, Настоѧ́тель подае́тъ є҆мꙋ̀, гл҃ѧ̀,

Прїимѝ, бра́те, ᲃвѣщꙋ̀ сі́ю, и҆ вѣ́ждь, ꙗ҆́кѡ ѿсе́ле до́лженъ є҆сѝ чⷭ҇тымъ и҆ добродѣ́тельнымъ жи́тїемъ, и҆ бл҃ги́ми нра́вы, ᲃвѣ́тъ бы́ти мі́рꙋ. Рече́ бо Гд҃ь, та́ко да просвѣти́тсѧ ᲃвѣ́тъ ва́шъ пре́дъ челове́ки, ꙗ҆́кѡ да ви́дѧтъ ва́ша до́браѧ дѣ́ла, просла́вѧтъ Ѿц҃а̀ ва́шегѡ, и҆́же є҆́стъ на нб҃се́хъ, рцѣ́мъ всѝ ѡ҆ не́мъ, Гд҃и, поми́лꙋй.

Новонача́льный же, вꙁе́мъ ᲃвѣ́щꙋ, лобꙁа́етъ десни́цꙋ є҆гѡ̀. По всѣ́хъ же си́хъ, десни́цею бл҃гословлѧ́ѧ новонача́лнагѡ, Настоѧ́тель гл҃е́тъ,

Бра́тъ нш҃ъ, И҆мⷬ҇къ: въспрїѧ́лъ є҆́сть ѡ҆брꙋче́нїе Вели́кагѡ А҆́гг҃елⷭ҇кагѡ Ѻ҆́браꙁа, и҆ ѡ҆бо́лк̾сѧ є҆́сть въ всѧ̀ ѡ҆рꙋ́жїѧ Бж҃іѧ, въ є҆́же мощѝ є҆мꙋ̀ крѣ́пкѡ побѣди́ти всю̀ си́лꙋ и҆ бра́ни нача́лъ и҆ вла́стїй и҆ миродержи́телїй тмы̀ вѣ́ка сегѡ̀, и҆ дх҃овъ злобы̀ поднебе́сныхъ, въ И҆мѧ̀ Ѿц҃а̀ и҆ ᲃн҃а и҆ ᲃт҃а́гѡ Дх҃а. Рцѣ́мъ всѝ ѡ҆ не́мъ, Гд҃и, поми́лꙋй.

Бра́тїѧ же всѝ пою́тъ гⷤ,

Гд҃и, поми́лꙋй.

Та́же Дїа́конъ глаголе́тъ,

Гд҃ꙋ помоли́мсѧ.

Братїѧ же,

Гд҃и, поми́лꙋй.

Настоѧ́тель же чте́тъ Моли́твꙋ ᲃі́ю,

Гд҃и Бж҃е нш҃ъ, въведѝ раба̀ твое́гѡ сегѡ̀, И҆мⷬ҇къ: въ дх҃о́вный тво́й дво́ръ и҆ съпричтѝ є҆гѡ̀ слове́сномꙋ ти ста́дꙋ, ѡ҆чи́сти є҆гѡ̀ мꙋдрова́нїе ѿ пло́тскихъ по́хотїй, и҆ тще́тныѧ пре́лести жи́тїѧ сегѡ̀, и҆ да́ждь є҆мꙋ̀ неꙁабы́тнѡ помина́ти ᲂу҆готова́ннаѧ бл҃га́ѧ любѧ́щиъ тѧ, и҆ распе́ншымъ себѐ жи́тїю семꙋ̀, Цртⷭ҇вїѧ ра́ди твое́го. Ты́ бо є҆сѝ па́стырь и҆ посѣти́тель дш҃ъ на́шихъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Бра́тїѧ гл҃ю́тъ,

А҆ми́нь.

И҆ а҆́бїе пою́тъ ᲃтихі́рꙋ ᲃі́ю. Гла́съ а҃.

Поꙁна́имъ, бра́тїе, та́йны ᲃи́лꙋ, и҆бѡ̀ ѿ грѣха̀ къ ѿческомꙋ до́мꙋ воꙁврати́вшагосѧ блꙋ́днагѡ ᲃн҃а преблагі́й ѿц҃ъ пред̾ꙋстрѣта́ѧ лобꙁа́етъ, и҆ па́ки свое́ѧ ᲃла́вы дарꙋ́етъ поꙁна́нїе: и҆ та́йное го́рнимъ ᲃъверша́етъ весе́лїе, закала́ѧ те́льца ᲂу҆пита́ннагѡ, ꙗ҆́кѡ да и҆ мы досто́йнѡ поживе́мъ закла́вшемꙋ чл҃кѡлю́бномꙋ Ѿц҃ꙋ̀, и҆ пресла́вномꙋ заколе́нїю, ᲃп҃а́сꙋ дш҃а́мъ на́шимъ.

Пою́щимъ же сі́е, дае́тсѧ новонача́лномꙋ ᲃт҃о́е Е҆ѵⷢ҇лїе: Бра́тїѧ же всѝ, два̀ два̀, приходѧ́ще порѧ́дꙋ, лобꙁа́ютъ ᲃт҃о́е Еѵⷢ҇лїе и҆ новонача́льнагѡ бра́та въ де́снꙋю лани́тꙋ, вопроша́юще є҆гѡ̀ си́це:

Что́ ти є҆́сть и҆мѧ, бра́те?

Новонача́льный же ѿвѣща́етъ, повѣда́ѧ ᲃвоѐ но́вое И҆мѧ, гл҃ѧ̀: А҆нтѡ́нїй, и҆лѝ и҆́ное, како́вѣмъ ли́бо но́вѡ и҆менова́нъ бꙋ́детъ. Бра́тїѧ же, кі́йждѡ и҆́хъ кланѧ́ѧсѧ, и҆ ѿходѧ̀, гл҃е́тъ къ не́мꙋ,

Сп҃са́йсѧ въ А҆гглⷭ҇темъ чи́нꙋ.

А҆́ще же Лѵтꙋ́ргїѧ Бжⷭ҇тве́ннаѧ ᲃъверша́етсѧ, тогда̀ ᲃлꙋжа́й І҆ере́ѵ꙼, а҆́бїе по коне́чней Моли́тве по́стрига, въꙁглаша́етъ,

Ꙗ҆́кѡ ᲃвѧ́тъ є҆сѝ Бж҃е нш҃ъ:

Ли́ци же пою́тъ,

Ст҃ы́й Бж҃е:

Проки́менъ же постриже́нїѧ и҆ А҆пⷭ҇лъ и҆ Е҆ѵⷢ҇лїе, по дне́вномъ а҆́бїе чтꙋ́тсѧ. Про́чее же, Бжⷭ҇тве́ннаѧ Слꙋ́жба съверша́етсѧ всѧ̀ порѧ́дꙋ ѡ҆бы́чнѡ, причасти́въжесѧ новонача́лный Бжⷭ҇тве́ннымъ Та́йнамъ Тѣ́ла и҆ Крвѐ Гдⷭ҇ней, по за А҆мбѡ́нной Моли́твѣ, и҆ по блⷭ҇влю̀ Гд҃а, на раꙁдаѧ́нїи Дѡры̀, Пѣ́нїе ᲃтихиры̀, и҆ лобꙁа́нїе Е҆ѵⷢ҇лїѧ и҆ новонача́лнагѡ, съ въпроше́нїемъ ѡ҆ и҆менѝ по всемꙋ̀ ꙗ҆́коже предꙋкаꙁа́сѧ быва́етъ, по сконча́нїи же пѣ́нїѧ быва́етъ ѿпꙋ́стъ слꙋже́бный ѡ҆бы́чный.

А҆́ще же кро́мѣ Лѵтꙋ́ргїѧ сі́е быва́етъ, а҆́бїе по Моли́твѣ коне́чной Е҆кте́нїѧ сі́ѧ Дїа́конъ гл҃е́тъ,

Ми́ромъ Гд҃ꙋ помоли́мсѧ.

Бра́тїѧ,

Гд҃и, поми́лꙋй.

Ꙍ҆ свы́шнѣмъ ми́ре и҆ ᲃп҃се́нїи дш҃ъ на́шихъ, Гд҃ꙋ помоли́мсѧ.

Ꙍ҆ ми́ре всегѡ̀ ми́ра, благостоѧ́нїи ᲃт҃ы́хъ Бж҃іихъ Цр҃квїй и҆ съедине́нїи всѣ́хъ, Гд҃ꙋ помоли́мсѧ.

Ꙍ҆ бра́тѣ на́шемъ, И҆мⷬ҇къ: и҆ є҆́же ѿ Бг҃а покро́ва и҆ по́мощи є҆гѡ, Гд҃ꙋ помоли́мсѧ.

Ꙍ҆ є҆́же беꙁъ поро́ка, неѡсꙋжде́нно, и҆ непреткнове́ннѡ, и҆спра́вити є҆гѡ̀ намѣренїе мн́ишескагѡ ѡ҆́браꙁа, Гд҃ꙋ помоли́мсѧ.

Ꙍ҆ є҆́же пребы́ти є҆мꙋ̀ въ всѧ́комъ бл҃гоче́стїи и҆ бл҃гоговѣ́нїи и҆ чистотѣ̀, Гд҃ꙋ помоли́мсѧ.

Ꙍ҆ є҆́же ѿложи́ти є҆мꙋ̀ ве́тхагѡ чл҃ка, и҆ ѡ҆блещи́сѧ въ но́вагѡ по Бѕ҃е соꙁда́ннагѡ, Гд҃ꙋ помоли́мсѧ.

Ꙍ҆ ѡ҆ставле́нїи и҆ проще́нїи грѣхѡ̀въ є҆гѡ̀, Гд҃ꙋ помоли́мсѧ.

Ꙍ҆ є҆же и҆ꙁба́витисѧ є҆мꙋ̀ и҆ на́мъ ѿ всѧ́кїѧ ско́рби, гнѣ́ва и҆ нꙋ́жды, Гд҃ꙋ помоли́мсѧ.

Застꙋпѝ, ᲃп҃сѝ, поми́лꙋй и҆ сохранѝ на́съ, Бж҃е, твое́ю благода́тїю.

Пресвѧтꙋ́ю, чⷭ҇тꙋю, и҆ преблⷭ҇ве́ннꙋю, ᲃла́внꙋю Влады́чицꙋ на́шꙋ Бц҃ꙋ, и҆ прⷭ҇снѡ Дв҃ꙋ Мр҃ію, съ всѣ́ми ᲃт҃ы́ми помѧнꙋ́вше, самѝ себѐ и҆ дрꙋ́гъ дрꙋ́га, и҆ весь живо́тъ нш҃ъ Христꙋ̀ Бг҃ꙋ предади́мъ.

Бра́тїѧ,

Тебѣ̀, Гд҃и.

І҆ере́ѵ꙼,

Ꙗ҆́кѡ ᲃт҃ъ є҆сѝ, Бж҃е нш҃ъ, и҆ тебѣ̀ ᲃла́вꙋ въꙁсыла́емъ, Ѿц҃ꙋ̀ и҆ ᲃн҃ꙋ и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Бра́тїѧ,

А҆ми́нь.

И҆ пою́тъ,

Є҆ли́цы въ Ха҃ Крести́стесѧ, въ Ха҃ ѡ҆блеко́стесѧ. А҆ллилꙋ́іа.

Дїа́конъ,

Во́нмѣмъ.

Настоѧ́тель,

Ми́ръ всѣ́мъ.

Чте́цъ,

И҆ дх҃ови твое́мꙋ.

Дїа́конъ,

Премꙋ́дрость, во́нмѣмъ.

Чте́цъ, Проки́менъ. Гла́съ г҃.

Гд҃ь просвѣще́нїе моѐ и҆ ᲃп҃аси́тель мо́й, кого́сѧ ᲂу҆́бою̀.

Сті́хъ.

Гд҃ь защити́тель животꙋ̀ мое́мꙋ, кого́сѧ ᲂу҆страшꙋ̀;

Дїа́конъ,

Премꙋ́дрость.

Чте́цъ,

Къ Є҆фесе́ѡмъ посла́нїѧ ᲃт҃а́гѡ А҆по́стола Па́вла чте́нїе.

Дїа́конъ,

Во́нмѣмъ.

Чте́цъ же чтетъ, А҆по́столъ къ Є҆фесе́ѡмъ, Глава ѕ҃, Зача́ло сл҃г.

Бра́тїе, воꙁмога́йте ѡ҆ Гд҃ѣ и҆ въ держа́вѣ крѣ́пости є҆гѡ̀. Ѻ҆блецѣ́тесѧ въ всѐ ѡ҆рꙋ́жество Бж҃іе, ꙗ҆́кѡ воꙁмощѝ ва́мъ ста́ти проти́вꙋ ко́ꙁнемъ дїа́вольскимъ, ꙗ҆́кѡ нѣ́сть на́мъ бра́нь къ крвѝ и҆ пло́ти, но къ Нача́ломъ, къ Вла́стемъ, къ Мїродержи́телемъ тмы̀ вѣ́ка сегѡ̀, къ дꙋ́хѡмъ злобѣ̀ въ поднебе́снымъ. Сегѡ̀ ра́ди воꙁмѣ́те все ѡ҆рꙋжество Бж҃іе, да воꙁмо́жете проти́витисѧ въ де́нь лю́тъ и҆ всѧ̀ съдѣѧ́вше ста́ти. Ста́ните ᲂу҆́бѡ препоѧса́ни чре́сла ва́ша и҆́стинною, и҆ ѻ҆болкшесѧ въ бро́нѧ пра́вды, и҆ ѡ҆бꙋ́вше но́ꙁѣ въ ᲂу҆готова́нїе благовѣствова́нїѧ ми́ра. Надъ всѣ́ми же въспрїи́мше щи́тъ вѣ́ры, въ не́мъже воꙁмо́жете всѧ̀ стрѣ́лы лꙋка́вагѡ раждеже́нныѧ ᲂу҆гаси́ти. И҆ шле́мъ ᲃпасе́нїѧ въспрїимѣ́те, и҆ ме́чъ дх҃а, є҆́же є҆́стъ гл҃ъ Бж҃ій.

Настоѧ́тель гл҃е́тъ,

Ми́ръ ти.

Чте́цъ,

И҆ дх҃о́ви твое́мꙋ.

Дїа́конъ,

Премꙋ́дрость во́нмѣмъ.

Чте́цъ, Ѱало́мъ Дави́довъ, А҆лл҃ꙋїа. Сті́хъ.

Се ни́щїй въꙁва̀, и҆ Гд҃ь ᲂу҆слы́ша и҆̀: и҆ ѿ всѣ́хъ ско́рбїй є҆гѡ̀ ᲃп҃сѐ и҆̀.

Дїа́конъ,

Премꙋ́дрость, про́сти, ᲂу҆слы́шимъ ᲃт҃о́е Є҆ѵⷢ҇лїе.

Настоѧ́тель,

Ми́ръ всѣ́мъ.

Бра́тїѧ,

И҆ дх҃ови твое́мꙋ.

Настоѧ́тель,

Ѿ Матѳе́а ᲃт҃агѡ Є҆ѵⷢ҇лїѧ чте́нїе.

Дїа́конъ,

Во́нмемъ.

Настоѧ́тель чтетъ Є҆ѵⷢ҇лїе ѿ Матѳе́а, Гла́ва і҃. Зача́ло л҃ѳ и҆ м҃г.

Речѐ Гд҃ь: любѧ́й ѿц҃а̀, и҆лѝ ма́терь па́че менѐ, нѣ́сть менѐ досто́инъ, и҆ любѧ́й ᲃн҃а, и҆лѝ дще́рь па́че менѐ, нѣ́сть менѐ досто́инъ. И҆ и҆́же не во́ꙁметъ Крⷭ҇тъ сво́й, и҆ не и҆де́тъ въ слѣ́дъ менѐ, нѣ́сть менѐ досто́инъ. Прїйдѣ́те къ мнѣ̀, всѝ трꙋжда́ющїисѧ и҆ ѡ҆бремене́нїи, и҆ а҆́ꙁъ ᲂу҆покою̀ вы̀, въꙁми́те и҆́го моѐ на себѐ и҆ наꙋчи́тесѧ ѿ ме́не, ꙗ҆́кѡ кро́токъ є҆́смъ и҆ смире́нъ ᲃе́рдцемъ: и҆ ѡ҆брѧ́щете поко́й дꙋша́мъ ва́шымъ: и҆́го бо моѐ бл҃го, и҆ бре́мѧ моѐ ле́гко є҆́сть.

По є҆ѵⷢ҇лїи же, Дїа́конъ гл҃е́тъ Є҆кте́нїѧ ᲃі́ѧ,

Поми́лꙋй на́съ, Бж҃е, по вели́цей ми́лости твое́й, моли́мтисѧ, ᲂу҆слы́ши и҆ поми́лꙋй.

Е҆щѐ моли́мсѧ ѡ҆ ѡ҆ставле́нїи и҆ проще́нїи грѣхѡ́въ рабꙋ̀ Бж҃ію, И҆мⷬ҇къ:

Настоѧ́тель же воꙁглаша́етъ,

Ꙗ҆́кѡ ми́лостивъ и҆ чл҃кѡлю́бецъ Бг҃ъ є҆сѝ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Бра́тїѧ,

А҆ми́нь.

По си́хъ же ᲃтіхи́рꙋ вы́шѣ пи́санꙋю,

Поꙁна́имъ, бра́тїе, та́йны си́лꙋ:

Пою́тъ. И҆ а҆́бїе бывает цѣлова́нїе ѡ҆бы́чное. И҆ по ᲃтіхи́рѣ̀ Дїа́конъ гл҃е́тъ,

Премꙋ́дрость.

Бра́тїѧ же,

Честне́йшꙋю херꙋви́мъ:

Настоѧ́тель,

Сла́ва ти Бж҃е, ᲂу҆пова́нїе на́ше, ᲃла́ва ти.

Бра́тїѧ,

Сла́ва: И҆ ны́нѣ: Гд҃и, поми́лꙋй, гⷤ. Благословѝ.

Настоѧ́тель же ѿпꙋ́стъ,

Хᲃ҃ и҆́стинный Бг҃ъ нш҃ъ, молитва́ми пречи́стыѧ свое́ѧ мт҃ре, ᲃт҃ы́хъ сла́вныхъ и҆ всехва́льныхъ А҆пⷭ҇лъ, и҆ преподо́бныхъ и҆ бг҃онѡ́сныхъ ѿц҃ъ на́шихъ А҆нтꙍ́нїа и҆ Ѳеодꙍ́сїа Пече́рскихъ, и҆ про́чїихъ въ по́стничествѣ просїѧ́вшихъ, и҆ всѣ́хъ ᲃт҃ы́хъ свои́хъ, ᲃпасе́тъ и҆ поми́лꙋетъ на́съ, ꙗ҆́кѡ бла́гъ и҆ чл҃кѡлю́бецъ.

Вѣ́дати же подоба́етъ, ꙗ҆́кѡ тако́вый новопостри́женный И҆́нокъ, до́лженъ є҆́сть присѣ́дити въ Це́ркви дні́й пѧть, ᲂу҆пражнѧ́ѧсѧ ѿ всѧ́кагѡ дѣ́ла, кро́мѣ чте́нїѧ, а҆́ще ᲂу҆мѣ́ти бꙋ́детъ, въ дх҃о́вныхъ же раꙁмышле́нїѧхъ и҆ въ ᲂу҆́мной Моли́твѣ пребыва́ѧ.

Хотѧ́й ᲃт҃ы́й вели́кїй А҆́ггъ҃лскїй ѡ҆́браꙁъ прїѧ́ти, въ пе́рвыхъ и҆счита́ти свою̀ со́вѣсть ѡ҆па́сно, и҆ порѧ́днѣ всѧ̀ а҆́ще и҆ ме́шаѧ своѧ̀ и҆сповѣ́да́ти предъ свои́мъ дꙋхо́внымъ ѿце́мъ съгрѣше́нїѧ, и҆ ѿ не́гѡ съверше́нное раꙁдрѣше́нїе прїѧ́ти, и҆ си́це свою̀ ѡ҆чи́стивъ со́вѣсть, приꙋготовлѧ́ти себѐ къ причаще́нїю ᲃт҃ы́хъ и҆ Бжⷭ҇тве́нныхъ Та́инъ Тѣ́ла и҆ Крв҃е Гд҃ней, всѧ́кѡ ꙗ҆́коже ᲂу҆мира́ѧй, до́лженъ є҆́стъ: и҆бѡ̀ коне́чнѣе вто́рыми ѡ҆бѣ́ты, и҆ ѿрица́нїемсѧ мі́ра, мі́рꙋ и҆ всѣ́мъ мі́рскимъ пристра́стїемъ ᲂу҆мира́етъ.

С ве́чера ᲂу҆́бѡ вноси́ма быва́ютъ ѡ҆дѣѧ́нїѧ хотѧ́щагѡ прїѧ́ти ᲃт҃ы́й ѡ҆́браꙁъ въ ᲃт҃ы́й Жерто́вникъ, и҆ полага́ютсѧ на подно́жїи ᲃт҃ы́ѧ Тра́пеꙁы.

На Ꙋ҆́трни же пое́тсѧ Канѡ́нъ, є҆мꙋ́же Краегранесїе,

Бл҃гоискꙋ́сный коне́цъ, бл҃гоискꙋ́снꙋ ми сꙋ́щꙋ, Хє҃, пода́ждь.

Пѣ́снь а҃. Гла́съ в҃. И҆рмо́съ,

Грѧдѣ́те, лю́дїе, пои́мъ пѣ́снь Хрⷭ҇тꙋ̀ Бг҃ꙋ.

Къ твое́мꙋ чл҃кѡлю́бїю прите́кшагѡ, Хє҃: и҆ въ ᲃт҃ы́й ѡ҆́браꙁъ ны́нѣ приходѧ́щагѡ, дꙋше́вною любо́вїю и҆ мы́слїю добродѣтельною, ᲃп҃се, прїимѝ.

Под̾ѧ́ти ми твоѐ и҆́го бл҃го́е, бл҃же, и҆ бре́мѧ, Влады́ко, вꙁѧ́ти сподобѝ, мнѡ́гихъ ми прегрѣше́нїй бре́мѧ и҆ꙁнꙋрѧ́ѧ, ꙗ҆́кѡ ми́лостивъ.

Ꙋ҆бѣ́гнꙋти грѣхо́внагѡ пополꙁнове́нїѧ, ѿны́нѣ бл҃гоиꙁволѝ, съдѣѧ́нныхъ мно́ю беꙁмѣ́рныхъ прегрѣше́нїй ꙗ҆́ꙁвы ѡ҆чища́ѧ росо́ю благода́ти.

Сла́ва:

На́съ дѣ́лѧ въ пло́ть ѡ҆болкїйсѧ, и҆ сме́рть ѡ҆ на́съ ꙗ҆́кѡ бл҃гоꙋтро́бенъ въспрїи́мый, пло́тскихъ ѡ҆скверне́нїй ѡ҆чи́сти, ще́дре, пристꙋпа́ющагѡ къ тебѣ̀.

И҆ ны́нѣ, Бг҃оро́диченъ.

Прибѣ́жище и҆ предста́тельницꙋ, и҆ покро́въ тѧ свѣ́телъ стѧжа́хѡмъ, Бц҃ꙋ тѧ, прⷭ҇та́ѧ, мꙋдрствꙋ́ющїи, и҆ Бжⷭ҇тве́ннагѡ зрѣ́нїѧ сподоблѧ́емсѧ.

Пѣ́снь, г҃. И҆рмо́съ:

Ꙋ҆твердѝ на́съ собо́ю Гд҃и, дре́вомъ ᲂу҆мерщвле́й прегрѣш:

Ꙍ҆чи́сти, Хє҃, къ тебѣ̀ притѣка́ющагѡ раба̀, и҆ сегѡ̀ жи́тїю Преподо́бныхъ сподобѝ, бл҃гоче́стнѡ и҆ пра́веднѡ пожи́ти.

Преложе́нїе живота̀ и҆ претворе́нїе, ѡ҆́браꙁъ Бж҃тве́нный се́й пода́ждь, и҆ съгрѣше́нїемъ ѡ҆чище́нїе бы́ти, къ тебѣ̀ приходѧ́щемꙋ вѣ́рномꙋ рабꙋ̀ твое́мꙋ.

Е҆динѐ бл҃же, не хотѧ́й сме́рти чл҃кѡмъ, ми́лостиве, твое́го раба̀, тебѣ̀ припада́ющагѡ, Ли́кꙋ ᲃт҃ы́хъ сопричтѝ.

Сла́ва:

Ны́нѣ хотѧ́щагѡ твои́мъ пꙋте́мъ шествова́ти, и҆ жи́тїе и҆ꙁбра́ти крестоно́сное, прїи́мъ, ѡ҆чи́сти мѧ ѿ первыхъ съгрѣше́нїй, чл҃кѡлю́бче.

И҆ ны́нѣ, Богоро́диченъ:

Е҆́винꙋ клѧ́твꙋ, чⷭ҇таѧ, раꙁдрѣши́ла є҆сѝ, ро́ждши всѣ́мъ бл҃гослове́нїе неиꙁнꙋрѧ́емое и҆сточи́вшагѡ, ᲃп҃са мі́рꙋ, мт҃и Дв҃о.

Седа́ленъ. Гла́съ д҃. Подо́бенъ:

Ско́ро предварѝ:

Хотѧ́щїи, речѐ Гд҃ь, и҆тѝ в̾слѣ́дъ менѐ, ѿвержѣ́́тесѧ мі́рскихъ пристра́стїй, роди́телїй роди́вшихъ, ча́дъ же и҆ же́нъ, бра́тїй же и҆ дрꙋ́гѡвъ, съро́дникъ же и҆ рабѡ́въ, и҆мѣ́нїй и҆ до́мѡвъ, и҆ прїимѣ́те досто́инство А҆пⷭ҇лъ мои́хъ.

Пѣ́снь, д҃. И҆рмо́съ.

Ꙋ҆слыша́хъ, Гд҃и, слꙋ́хъ твое́го смотре́нїѧ:

Ꙍ҆браща́ющагосѧ прїйми́ мѧ, ᲃло́ве Бж҃ій, ꙗ҆́кѡ блꙋ́днагѡ дре́вле, и҆ ꙗ҆́кѡ Мытарѧ̀, є҆ди́не человѣкѡлю́бче.

И҆ꙁбави́тель на́мъ бы́въ, Кресто́мъ мі́ръ и҆скꙋпи́лъ є҆сѝ: тѣ́мже ти припада́ю, и҆ꙁба́ви мѧ, Влады́ко.

Знамена́ннагѡ благода́тїю, и҆ свѣ́томъ твое́гѡ бг҃ораꙁꙋ́мїѧ, слове́снагѡ ти ста́да ꙗ҆ви́ мѧ ѡ҆вча̀.

Сла́ва:

Воꙁдвигнꙋ́вый Ла́ꙁара и҆ꙁъ мр҃твыхъ, и҆ менѐ ᲂу҆мерщвле́ннагѡ грѣхо́внымъ жа́ломъ, Влады́ко, ѡ҆живѝ.

И҆ ны́нѣ, Бг҃оро́диченъ:

Блⷭ҇ве́ннаѧ Прчⷭ҇таѧ Мт҃и Бж҃іѧ, твои́мъ мѧ предста́тельствомъ и҆ Бжⷭ҇тве́ннымъ покро́вомъ съблюдѝ, Влады́чице.

Пѣ́снь є҃. И҆рмо́съ,

Свѣ́та пода́телю и҆ вѣ́ковъ тво́рче, Гд҃и, въ свѣ́те твои́хъ:

Послꙋша́нїемъ твои́мъ, Хє҃, на́ше ꙗ҆́кѡ Бг҃ъ раꙁдрѣши́лъ є҆сѝ преслꙋша́нїе, и҆ Ца́рствїѧ на́мъ вхо́дъ покаѧ́нїемъ и҆ вѣ́рою покаꙁа́лъ є҆сѝ.

Сконча́вшагѡ въ небреже́нїи жи́тїе зрѧ̀ менѐ, внима́нїе прилежа́нїѧ приста́ви, Хє҃, пра́вды ѡ҆бо́лкъ мѧ бро́нею.

Вѣ́рою, па́ки порожде́нїѧ же ба́нею, ѡ҆мы́лъ мѧ є҆сѝ ѿ прароди́тельныѧ клѧ́твы, ны́нѣ же ѡ҆мы́й ᲃле́ꙁъ и҆сто́чниками, ѡ҆скверне́ннагѡ лю́тыми грѣхопаде́нїи.

Сла́ва:

Прекло́ншагосѧ ни́ꙁꙋ, и҆ ᲃлѧче́ннагѡ мѧ къ землѝ, Влады́ко, ᲃтра́стнымъ и҆ ᲃмертоно́снымъ грѣхо́внымъ бре́менемъ: ᲃвое́ю живоно́сною рꙋко́ю и҆спра́ви.

И҆ ны́нѣ, Бг҃оро́диченъ.

Ра́венъ сы́й Ѿц҃ꙋ̀ по беꙁнача́льномꙋ зра́кꙋ: бы́лъ є҆сѝ на́мъ ра́венъ, ѿ неискꙋсобра́чныѧ роди́всѧ Мт҃ре: є҆ѧ́же мл҃итва́ми, бг҃очл҃че, сп҃аси́ мѧ.

Пѣ́снь, ѕ҃. И҆рмо́съ,

Въ бе́ꙁднѣ грѣхо́внѣ ѡ҆крꙋжа́емъ, неиꙁслѣ́днꙋю:

Не пре́ꙁри съꙁда́нїе своѐ, Влады́ко, но Крⷭ҇та̀ твое́гѡ благода́тїю сп҃аси́ мѧ, и҆ чⷭ҇тною Кро́вїю, ю҆́же ѿ Божестве́ннагѡ ти ребра̀ и҆сточи́лъ є҆сѝ.

Ꙗ҆́кѡ не сꙋ́ща пе́рвее ᲃъꙁда́лъ є҆сѝ, та́ко и҆ погꙋблѧ́ема мѧ грѣхѝ въꙁыска́въ ᲃпасѝ, ꙗ҆́кѡ Па́стыръ бла́гъ же и҆ милосе́рдъ.

Сла́ва:

Блаже́ннымъ наде́ждамъ причасти́тисѧ, ᲂу҆готова́ннымъ всѣ́мъ досто́йнымъ твои́мъ, и҆ тѣ́хъ жи́тїе подража́ти сподоби́ мѧ, є҆динѐ человекѡлю́бче.

И҆ ны́нѣ, Бг҃оро́диченъ:

Рꙋка́ма нетлѣ́нныма въѡбраꙁи́вый мѧ, па́ки въѡбраꙁѝ ѿ непотребле́ннагѡ лю́тѣ: и҆ꙁъ чре́ва твое́гѡ, Влады́чице, пріи́мъ мѧ съверше́ннѣ, ꙗ҆́кѡ милосе́рдъ.

Конда́къ. Гла́съ а҃.

Ꙍ҆б̾ѧ́тїѧ ѿч҃а ѿверсти́ ми потщи́сѧ, блꙋ́днѡ моѐ и҆жди́хъ жи́тїе: на бога́тство неистощи́мое в̾ꙁыра́ѧй твои́хъ щедрѡ́тъ ᲃп҃а́се, ны́нѣ ѡ҆бнища́вшее не пре́ꙁри ᲃе́рдце, тебѣ́ бо, Гд҃и, ᲂу҆миленїемъ въпїю̀: съгрѣши́хъ, Ѿч҃е, на̀ нб҃о и҆ пре́дъ тобо́ю.

Пѣ́снь з҃. И҆рмо́съ:

Тѣ́лꙋ зла́томꙋ премꙋ́дрїѧ дѣ́ти:

Напра́ви къ себѣ̀ пꙋ́ти моѧ̀, бла́же, и҆ ᲃе́рдце моѐ ѡ҆бновле́нїемъ Божестве́ннагѡ Дх҃а, ѡ҆бетша́вшагѡ наꙁида́й, ᲃт҃ы́ни доброто́ю ᲂу҆краси́въ въпїю́щагѡ ти: благослове́нъ Бг҃ъ ѿц҃ъ на́шихъ.

За рꙋ́кꙋ мѧ де́снꙋю, ꙗ҆́кѡ бла́гъ, в̾ꙁе́мъ, къ жи́тїю, тебѣ̀ благоꙋго́дномꙋ, пра́во стꙋпа́ти покажѝ, и҆ къ соверше́нствꙋ жи́тїѧ въсходи́ти, вопїю́щагѡ къ тебѣ̀: благослове́нъ Бг҃ъ ѿц҃ъ на́шихъ.

Лѣ́ностно пре́жде препровожда́ѧ моѐ жи́тїе ѡ҆каѧ́нный, къ тебѣ̀ Влады́це ны́нѣ прихождꙋ̀, твое́й надѣѧ́всѧ бла́гости, благоꙋтро́бїю твое́мꙋ є҆ди́номꙋ: и҆ припада́ю, вꙁыва́ѧ ти: благослове́нъ є҆сѝ Бж҃е ѡ҆те́цъ на́шихъ.

Сла́ва:

Ꙗ҆дри́ломъ Крⷭ҇та и҆ вѣ́тромъ чⷭ҇тнагѡ и҆ Бжⷭ҇твеннагѡ Дх҃а къ приста́нищꙋ наста́ви твое́гѡ сла́внагѡ хотѣ́нїѧ, и҆ къ нбⷭ҇номꙋ наслѣ́дїю: и҆ пе́ти: благослове́нъ Бг҃ъ ѿц҃ъ на́шихъ.

И҆ ны́нѣ, Бг҃оро́диченъ.

Сп҃са Бг҃а, и҆ мі́рꙋ и҆ꙁбави́телѧ, всечи́стаѧ, породи́ла є҆сѝ, є҆го́же ны́нѣ молѝ, благолѣ́пїемъ добродѣ́телей, и҆ ᲃвѣ́тлостїю, и҆ по́стническою благода́тїю ѡ҆блещѝ пою́щыѧ: благослове́нна є҆сѝ, Бг҃а пло́тїю ро́ждшаѧ.

Пѣ́снь и҃. И҆рмо́съ.

Пещь ѻ҆́гненнаѧ и҆́ногда въ Вавилꙍ́нѣ дѣ́тели:

Побѣ́дꙋ на́мъ на дїа́вола, Крⷭ҇та твое́гѡ ѡ҆́браꙁъ да́лъ є҆сѝ, въ не́мже ниꙁлага́емъ ѻ҆́нагѡ ко́ꙁни и҆ лꙋка́ваѧ шата́нїѧ, зовꙋ́ще: благослови́те, всѧ̀ дѣ́ла Гд҃нѧ, Гд҃а.

Да́лъ є҆сѝ на́мъ, є҆́же мощѝ ѡ҆бнови́ти благода́ть креще́нїѧ, и҆сповѣда́нїемъ, жи́тїѧ чистото́ю, ᲃле́ꙁъ пролїѧ́нїемъ, и҆ покаѧ́нїемъ прїи́скренимъ, чл҃овекѡлю́бче.

Стра́сти пло́тскїѧ ᲂу҆́мꙋ покори́ти, воꙁдержа́нїемъ и҆ по́стничествомъ, пода́ждь рабѡ́мъ твои́мъ, ѡ҆́браꙁа ра́ди лꙋ́чшества, ᲂу҆дале́нїемъ го́ршагѡ и҆ непреста́ннымъ за́повѣдїй твои́хъ соблюде́нїемъ.

Сла́ва:

Свы́шше на́мъ твое́гѡ ᲃыноположе́нїѧ характи́ръ ѡ҆бновѝ Бжⷭ҇тве́ннагѡ твое́го Дх҃а дѣ́йствомъ же и҆ благода́тїю, ꙗ҆́кѡ є҆ди́нъ бл҃гопремѣни́тель, хꙋдо́жествомъ чл҃овекѡлю́бїѧ, и҆ премно́гїѧ ти бла́гости.

И҆ ны́нѣ: Бг҃оро́диченъ.

Расторгнѝ плени́цѧ прегрѣше́нїй, и҆ грѣ́ховное рꙋкописа́нїе, къ Бжⷭ҇тве́нномꙋ ѡ҆́браꙁꙋ приходѧ́щагѡ ти́хостїю, и҆ бл҃гоговѣ́нїемъ, Пречи́стаѧ, вѣ́рою правосла́вною ᲂу҆твержде́нна, съблюда́ющи.

Пѣ́снь ѳ҃. И҆рмо́с.

Беꙁнача́льна родителѧ̀ ᲃн҃ъ, Бг҃ъ и҆ Гд҃ь:

Досто́йно зва́нїю и҆ ᲃт҃о́мꙋ ѡ҆́браꙁꙋ пожи́ти, ᲃло́ве Бж҃ій, пода́ждь ми, грѣха̀ мое́гѡ скве́рнꙋ и҆ стрꙋ́пы прегрѣше́нїй Бжⷭ҇тве́нною твое́ю благода́тїю ѡ҆чисти́въ, многѡми́лостиве.

Сп҃се, ꙗ҆́кѡ и҆менꙋ́емый, ᲃпаси́ мѧ, молю́сѧ чи́стымъ ᲃе́рдцемъ къ тебѣ̀ приходѧ́щагѡ, и҆ злобы̀ мое́ѧ тѧготꙋ̀ ѿемлѧ̀, ꙗ҆́кѡ є҆ди́нъ ще́дръ, ми́лостивне ᲂу҆поко́й, ꙗ҆́кѡже ѡ҆бѣща́лсѧ є҆сѝ, всеси́льне.

Хᲃ҃ ны́нѣ дарꙋ́етъ, бл҃гъ сы́й и҆ милосе́рдъ, къ не́мꙋ приходѧ́щымъ Бжⷭ҇тве́ннаѧ дарова́нїѧ, пристꙋпа́ющымъ къ Бжⷭ҇тве́нномꙋ бл҃гоговѣ́нно бл҃гти Престо́лꙋ, даръ бл҃гости нетлѣ́нныѧ подава́ѧ.

Сла́ва:

Имѣ́ѧй съри́щꙋщꙋю твое́мꙋ хотѣ́нїю ᲃи́лꙋ, слꙋжи́телѧ досто́йны насъ покажѝ Е҆ѵⷢ҇лїа твое́гѡ, ᲃло́ве, и҆ ꙗ҆́же къ тебѣ̀ ѡ҆бѣ́ты соверши́ти, молитва́ми ᲃт҃ыхъ твои́хъ, живода́вче, сподобѝ.

И҆ ны́нѣ: Бг҃оро́диченъ.

Сн҃а твое́го бл҃госе́рдагѡ, пренепоро́чнаѧ, ᲂу҆молѝ, вѣ́рнѡ приходѧ́щагѡ къ Бжⷭ҇тве́нномꙋ ѡ҆́браꙁꙋ, по́стническагѡ доспѣ́ти, всебл҃гоговѣ́йно, многѡмоле́бнагѡ конца̀, тебѣ́ бо Пречи́стꙋю застꙋ́пницꙋ стѧжа́хомъ.

Стіхи́ры. Гла́съ в҃.

Подо́бенъ: Є҆́гда ѿ дре́ва тѧ мѐртва:

Вѣ́рою приходѧ́щагѡ къ тебѣ̀, Влады́ко, на ᲃте́ꙁю пра́вды твое́ѧ поста́вль, наведи́ мѧ, ꙗ҆́кѡ є҆ди́нъ бл҃гоꙋтро́бенъ: и҆ лю́тѣ па́дшагѡ мѧ, и҆ ниꙁверже́ннагѡ мнѡ́жествомъ съгрѣше́нїй мои́хъ, ᲃп҃се, и҆спра́ви, на твое́ бо надѣ́ѧвсѧ поспѣше́нїе, къ А҆́гглⷭ҇комꙋ гражда́нствꙋ семꙋ̀ прихождꙋ̀, чл҃кѡлю́бче.

И҆мѣ́ѧй и҆сто́чникъ благи́хъ, грѣ́шныхъ не хотѧ́й, Хє҃, сме́рти, за неиꙁрече́ннꙋю ми́лость: но покаѧ́нїе вѣ́рнымъ дарова́вый, поꙁна́вшымъ пренепости́жное ᲃмотре́нїе твоѐ, прїимѝ приходѧ́щагѡ ᲂу҆се́рдно къ Бжⷭ҇тве́нномꙋ ти ѡ҆́браꙁꙋ и҆ спасѝ чл҃кѡлю́бїю ти припада́ющагѡ.

Стѣ́нꙋ прелѣ́ꙁꙋ ѡ҆ тебѣ̀, грѣха̀ мое́гѡ, ᲃп҃се, и҆ и҆ꙁба́влюсѧ: ты́ бо воꙁда́лъ є҆сѝ мо́й до́лгъ, и҆ цѣно́ю и҆скꙋпи́лъ мѧ є҆сѝ плѣне́ннагѡ, бл҃гости пока́ꙁꙋѧ бога́тство, и҆ милосе́рдїѧ бе́ꙁднꙋ и҆сточи́ти хотѧ́й всѣ́мъ пою́щымъ тѧ, чл҃кѡлю́бче.

Сла́ва: И҆ ны́нѣ: Бг҃оро́диченъ.

Всѣ́мъ предстател̾ствꙋ́еши, бл҃га́ѧ, прибѣга́ющымъ ти съ вѣ́рою въ держа́вный ти покро́въ, и҆́ноѧ бо не и҆ма́мы грѣ́шнїи къ Бг҃ꙋ въ бѣда́хъ и҆ ско́рбехъ прⷭ҇нѡ и҆ꙁбавле́нїе, ѡ҆бремене́ни грѣхѝ мнѡ́гими, Мт҃и Бг҃а вы́шнѧгѡ: тѣ́мже ти припада́емъ, и҆ꙁба́ви ѿ всѧ́кагѡ ѡ҆бстоѧ́нїѧ рабы̀ ᲃвоѧ̀.

На ᲃто́й же Лѵтꙋргїи, Вхо́дꙋ бы́вшꙋ съ Е҆ѵⷢ҇лїемъ, хотѧ́й прїѧ́ти ᲃт҃ы́й Ꙍ҆́браꙁъ ᲃнима́етъ главы̀ свое́ѧ покро́въ, и҆ сꙋ́щыѧ на нога́хъ Каллі́ги, и҆ ᲃътвори́въ мета́нїй трѝ посре́де Це́ркве, ста́нетъ та́мѡ. По Вохо́дѣ же прочте́нꙋ бы́вшꙋ Тропарю̀ дне́вномꙋ, а҆́бїе пою́тъ А҆нтифѡ́ны сі́ѧ. Гла́съ д҃. А҆нтифѡ́нъ а҃.

Хотѣ́хъ слеꙁа́ми ѡ҆чи́стити, мои́хъ грѣхопаде́нїй, Гд҃и, рꙋкописа́нїе, и҆ про́чее живота̀ мое́гѡ покаѧ́нїемъ ᲂу҆годи́ти тебѣ̀, но вра́гъ льсти́тъ мѧ и҆ бо́ретъ дш҃ꙋ мою̀, Гд҃и, пре́жде да́же до конца̀ не поги́бнꙋ, ᲃпаси́ мѧ.

Кто̀ ѡ҆бꙋрева́емъ и҆ притѣка́ѧ къ приста́нищꙋ ᲃемꙋ̀ не ᲃп҃се́тсѧ: и҆лѝ кто̀ болѣꙁнꙋ́ѧ и҆ припада́ѧ къ вра́чевствꙋ семꙋ̀ не и҆сцѣлѣ́етъ: ᲃъдѣ́телю всѧ́ческихъ, и҆ вра́чꙋ не́дꙋжныхъ, Гд҃и, пре́жде да́же до конца̀ не поги́бнꙋ, ᲃп҃си́ мѧ.

Ꙍ҆вча̀ є҆́смь ᲃлове́снагѡ ти ᲃта́да, и҆ къ тебѣ̀ прибѣга́ю Па́стырꙋ до́бромꙋ: вꙁыщи́ мѧ заблꙋ́дшагѡ, Бж҃е, и҆ поми́лꙋй мѧ.

Сла́ва: И҆ ны́нѣ: Бг҃оро́диченъ.

Ѿ всѧ́кихъ бѣ́дъ и҆ꙁба́ви насъ, блⷭ҇ве́ннаѧ Бц҃е, да всѝ въпїе́мъ ти: ра́дꙋйсѧ, є҆ди́на застꙋ́пнице дш҃амъ на́шимъ.

А҆нтифѡ́нъ в҃:

Въ и҆сто́чницѣ та́йномъ порожде́нїѧ ᲃыноположе́нїе прїи́мъ и҆ и҆ꙁбавле́нїе, въ лѣ́ности жи́тїе и҆ грѣхопаде́нїихъ и҆ꙁнꙋри́въ, бла́же, ны́нѣ зовꙋ̀ тебѣ̀: ᲃле́ꙁъ покаѧ́нїѧ и҆сто́чникъ ми дарꙋ́й, и҆ ѡ҆мы́й скве́рнꙋ мои́хъ прегрѣше́нїй, всеси́льне ᲃп҃се и҆ мнѡгоми́лостиве.

Бꙋ́рѧ грѣхо́внаѧ ѡ҆де́ржитъ мѧ, ᲃп҃а́се, и҆ ᲂу҆жѐ не терпѧ̀ волне́нїѧ: къ тебѣ̀ припада́ю є҆ди́номꙋ прави́телю, ꙗ҆́кѡ Петро́ви рꙋ́кꙋ ми прострѝ чл҃кѡлю́бїѧ твое́го и҆ ᲃпаси́ мѧ.

Сла́ва: И҆ ны́нѣ: Бг҃оро́диченъ.

Иꙁба́ви на́съ ѿ бѣ́дъ на́шихъ, Ма́ти Ха҃ Бг҃а, ро́ждшаѧ всѣ́хъ Тво́рца, да всѝ въпїемъ ти: ра́дꙋйсѧ, є҆ди́на предста́тельнице дш҃а́мъ на́шимъ.

А҆нтифѡ́нъ г҃.

Где є҆́сть ми́рское пристра́стїе, гдѐ є҆́стъ привре́менныхъ мечта́нїе; не се́ ли сі́ѧ зри́мъ зе́млю и҆ пе́пелъ быва́юща, что̀ ᲂу҆́бѡ трꙋжда́емсѧ всꙋ́е; почто̀ не ѿверже́мсѧ мі́ра и҆ не послѣдꙋ́емъ зовꙋ́щемꙋ: хотѧ́й и҆тѝ въ слѣ́дъ менѐ, да во́ꙁметъ кре́стъ сво́й, и҆ живо́тъ вѣ́чный наслѣдствꙋ́етъ.

Сті́хъ,

Прїйдѣ́те, ча́да, послꙋша́йте менѐ, ᲃтра́х:

Прїидѣ́те къ мнѣ̀, всѝ трꙋжда́ющїисѧ и҆ ѡ҆бремене́нїи, и҆ а҆́ꙁъ ᲂу҆покою̀ вы, въꙁмѣ́те и҆́го моѐ на се́бе, и҆ наꙋчи́тесѧ ѿ менѐ, ꙗ҆́кѡ Кро́токъ є҆́смъ и҆ смире́нъ ᲃе́рдцемъ, и҆ ѡ҆брѧ́щете поко́й дш҃а́мъ ва́шимъ.

Сті́хъ.

Заблꙋди́хъ ꙗ҆́кѡ ѡ҆вча̀ поги́бшее.

Ꙍ҆вча̀ є҆́смъ слове́снагѡ ти ста́да, и҆ къ тебѣ̀ прибѣга́ю Па́стырю до́бромꙋ: в̾ꙁыщи́ мѧ заблꙋ́ждшагѡ, Бж҃е, и҆ поми́лꙋй мѧ.

Та́же:

Прїйдѣ́те, поклони́мсѧ и҆ припадѣ́мъ, и҆ воспла́чимсѧ пре́дъ Гд҃емъ ᲃътво́ршимъ насъ, пою́ще є҆мꙋ̀: А҆ллїлꙋ́іа, а҆ллїлꙋ́іа, а҆ллїлꙋ́іа.

Семꙋ̀ пое́мꙋ, грѧде́тъ прїемлѧ́й Схи́мꙋ да́же до ᲃт҃ыхъ Две́рїй, и҆ пре́дъ тѣ́ми па́дъ на землѝ ни́цъ, не въстае́тъ до́ндеже пою́тсѧ Тропарѝ се҆ѧ. Гла́съ д҃.

Гд҃и, Гд҃и, при́ꙁри съ небесѐ и҆ ви́ждь, и҆ посѣтѝ виногра́дъ се́й, и҆ съвершѝ є҆гѡ̀, є҆гѡ́ же насадѝ десни́ца твоѧ̀.

Сла́ва: И҆ ны́нѣ: Бг҃оро́диченъ.

Е҆дина̀ чⷭ҇таѧ и҆ непоро́чнаѧ Дв҃о, ро́ждшаѧ Бг҃а беꙁъ сѣ́мене пло́тїю: тогѡ̀ мл҃ѝ ѡ҆ ᲃп҃се́нїи дш҃ъ на́шихъ.

Посе́мъ.

Ꙍ҆б̾ѧ́тїѧ ѿч҃а ѿверсти́ ми потщи́сѧ, блꙋ́днѡ моѐ и҆жди́хъ жи́тїе: но на бога́тство неистощи́мое вꙁира́ю твои́хъ щедрѡ́тъ, ᲃп҃се, ны́нѣ ѡ҆бнища́вшее не пре́ꙁри ᲃе́рдце. тебѣ́ бо, Гд҃и ᲂу҆миле́нїемъ въпїю̀: съгрѣши́хъ, ѿч҃е, на нб҃о и҆ пре́дъ тобо́ю.

По сконча́нїи же пѣ́нїѧ въꙁдвиꙁа́етъ ни́цъ лежа́щагѡ десни́цею, гл҃ѧ̀:

Бг҃ъ милосе́рдый, ꙗ҆́кѡ ѿц҃ъ чадолюби́вый, зрѧ̀ твоѐ глꙋбо́кое смире́нїе, и҆ и҆́стинное покаѧ́нїе, ча́до, ꙗ҆́кѡ блꙋ́днагѡ ᲃн҃а прїе́млетъ тѧ ка́ющагосѧ, и҆ къ не́мꙋ втори́цею ѿ ᲃе́рдца припада́ющагѡ.

Вста́вшагѡ же Настоѧ́тель велегла́сно въпрошаетъ, глаголѧ̀:

Что̀ прише́лъ є҆сѝ, бра́те, втори́цею припада́ѧ къ ᲃт҃о́мꙋ Жерто́вникꙋ, и҆ къ ᲃт҃е́й дрꙋжи́нѣ ᲃе́й?

Отвѣ́тъ.

Жела́ѧ жи́тїѧ ᲃъвершеннѣ́йшагѡ По́стническагѡ, чⷭ҇тный ѿч҃е.

Вопро́съ.

Жела́еши ли сподоби́тисѧ А҆́гглⷭ҇комꙋ Ꙍ҆браꙁꙋ, и҆ съпричте́нъ бы́ти Ли́кꙋ И҆нокꙋ́ющихъ, и҆ И҆́ноческїѧ ѡ҆бѣ́ты ᲂу҆сꙋгꙋбле́нїемъ пре́дъ Гд҃емъ ѡ҆бновлѧ́ти?

Отве́тъ.

Є҆́й, чⷭ҇тный ѿч҃е.

І҆ере́ѵ꙼.

Въи́стиннꙋ добро̀ дѣ́ло и҆ блаже́нно и҆ꙁбра́лъ є҆сѝ, но а҆́ще и҆ ᲃъверши́ши є҆̀: добраѧ бо дѣ́ла трꙋ́домъ ᲃтѧжава́ютсѧ, и҆ бо́лѣꙁнїю и҆справлѧ́ютсѧ.

Вопро́съ.

Во́льнымъ ли свои́мъ ра́ꙁꙋмомъ втори́цею ᲃи́цевымъ ѡ҆́браꙁомъ пристꙋпа́еши къ Гд҃ꙋ?

Ѿве́тъ. є҆й, чⷭ҇тный ѿч҃е.

Вопросъ:

Не ѿ некїѧ ли беды, и҆ли нꙋжды?

Ѿве́тъ.

Ни, чⷭ҇тный ѿч҃е.

Вопро́съ.

Ѿрица́ешилисѧ вто́рицею мі́ра и҆ ꙗ҆́же въ мі́рѣ по за́повѣди Гд҃ней?

Ѿве́тъ.

Є҆́й, чⷭ҇тный ѿч҃е.

Вопро́съ.

Ꙍ҆бѣща́еши ли втори́цею въ Монастырѝ се́мъ, и҆лѝ въ не́мже ти ѿ ᲃт҃а́гѡ послꙋша́нїѧ повелѣ́нно бꙋ́детъ, и҆ въ По́стничествѣ да́же до послѣ́днѧго и҆ꙁдыха́нїѧ твое́гѡ пребы́ти?

Ѿве́тъ.

Є҆́й, Бг҃ꙋ съдѣействꙋ́ющꙋ, чⷭ҇тный ѿч҃е.

Вопро́съ.

Ꙍ҆бѣща́еши ли втори́цею ᲃъхрани́ти ᲃебѐ въ дѣвствѣ̀, и҆ цѣломꙋ́дрїи, и҆ бл҃гоговѣ́нїи да́же до ᲃм҃рти?

Ѿве́тъ.

Є҆́й, Бг҃ꙋ поспѣшествꙋ́ющꙋ, чⷭ҇тный ѿч҃е.

Вопро́съ.

Ꙍ҆бѣща́еши ли втори́цею храни́ти послꙋша́нїе да́же до сме́рти къ И҆гꙋ́менꙋ и҆ къ все́й ѡ҆ Хє҃ бра́тїи?

Ѿтвѣща́етъ.

Є҆́й, Бг҃ꙋ поспѣшествꙋ́ющꙋ, чⷭ҇тный ѿч҃е.

Вопро́съ.

Претерпи́ши ли всѧ́кꙋю ᲃко́рбь и҆ тѣснотꙋ̀ И҆ноческагѡ жи́тїѧ, Ца́рствїѧ ра́ди нбⷭ҇нагѡ?

Ѿве́тъ.

Є҆́й, Бг҃ꙋ поспѣшествꙋ́ющꙋ, чⷭ҇тный ѿч҃е.

Вопро́съ.

Ꙍ҆бѣща́еши ли втори́цею пребы́ти въ нестѧжа́нїи и҆ во́льной Ха҃ ра́ди въ ѡ҆́бщемъ жи́тїи ᲃꙋ́щей нищетѣ̀, ничто́же себѣ̀ ᲃамо́мꙋ стѧжава́ѧ, и҆лѝ хранѧ̀, ра́ꙁвѣ ꙗ҆́же на ѡ҆́бщꙋю потре́бꙋ, и҆ ᲃѐ ѿ послꙋша́нїѧ, а҆ нѐ ѿ свое́гѡ си проиꙁволе́нїѧ?

Ѿве́тъ.

Є҆́й, чⷭ҇тный ѿч҃е, пребꙋ́дꙋ, Бг҃ꙋ поспѣшествꙋ́ющꙋ.

И҆ а҆́бїе ѡ҆глаше́нїе.

Вѣ́ждь, ча́до, каковы̀ ѡ҆бѣ́ты втори́цею дае́ши Влады́цѣ Хꙋ̀: А҆́гг҃ли бо прїидѡ́ша неви́димѡ, напи́сꙋюще и҆сповѣда́нїе твоѐ ᲃі́е, ѡ҆ не́мже и҆ма́ши и҆стѧꙁа́нъ бы́ти въ Вто́рое прише́ствїе Гд҃а на́шегѡ І҆и҃ᲃ Ха҃. Ска́ꙁꙋю ᲂу҆́бѡ тебѣ̀ всесоверше́нное жи́тїе, въ не́мже по подо́бїю Гд҃не жи́тельство ꙗ҆влѧ́етсѧ, засвѣдительствꙋ́ѧ ꙗ҆́же подоба́етъ ти храни́ти и҆ и҆́хже подоба́етъ бѣ́гати. Ѿрече́нїе ᲂу҆́бѡ мі́ра и҆ сꙋ́щихъ въ мі́рѣ ничто́же и҆́но є҆́стъ, по рече́нномꙋ, ра́ꙁвѣ Креста̀ и҆ сме́рти ѡ҆бѣща́нїе, вѣ́ждь ᲂу҆́бѡ ᲃебѐ ѿ дне́шнѧго дне распѧ́тъ и҆ ᲂу҆мерщвле́нъ бы́ти мі́рови, съверше́ннагѡ ра́ди сꙋгꙋ́багѡ ѿрече́нїѧ: ѿрица́еши бо сѧ роди́телїй, бра́тїй, жены̀, чадъ, ѿч҃а ᲃъро́дства, съдрꙋ́жества дрꙋ́гѡвъ ѡ҆бы́чныхъ, сꙋ́щихъ въ мі́рѣ мѧ́тежїй, попече́нїй, стѧжа́нїй, и҆мѣ́нїй, тще́тныѧ и҆ ᲃꙋ́етныѧ ᲃла́сти же и҆ сла́вы, и҆ ѿврещи́сѧ и҆́маши не то́чїю предрече́нныхъ, но и҆ свое́ѧ дш҃а по глаголꙋ̀ Гд҃ню, гл҃ю́щꙋ: И҆́же хо́щетъ по мнѣ̀ и҆тѝ, да ѿверже́тсѧ себѐ, и҆ во́ꙁметъ кре́стъ сво́й, и҆ послѣдꙋ́етъ ми: А҆́ще ᲂу҆́бѡ въи́стиннꙋ послѣдова́ти є҆мꙋ̀ и҆ꙁво́лилъ є҆сѝ, и҆ а҆́ще нело́жнѡ нарещи́сѧ тогѡ̀ ᲂу҆́ченикъ жела́еши, ᲂу҆гото́висѧ ѿ ны́нѣшнѧго вре́мене, не къ ѿра́дамъ, ни беꙁ̾печа́лїю, ни къ пи́щамъ, ни́же къ и҆́номꙋ чесо́мꙋ ѿ сꙋ́щихъ на землѝ кра́сныхъ же и҆ сла́дкихъ: но къ по́двигѡмъ дх҃ѡ́внымъ, къ воꙁдержа́нїю пло́ти, къ ѡ҆чище́нїю дш҃ѝ, къ нищетѣ̀ дх҃о́вной же и҆ тѣле́сной, къ пла́чꙋ благо́мꙋ, къ всѣ́мъ ско́рбнымъ и҆ болѣꙁне́ннымъ, радостотво́рнагѡ по Бꙁ҃ѣ жи́тїѧ, и҆бѡ̀ а҆лка́ти и҆́маши, и҆ жажда́ти, и҆ наготꙋ̀ терпѣ́ти, доса́дꙋ же под̾ѧ́ти, и҆ нарꙋга́нїе, поноше́нїе, и҆ гоне́нїе, и҆ въ мнѡ́ги и҆́ны в̾па́сти на́пасти, и҆́миже ᲃꙋ́щїй по Бꙁ҃ѣ живо́тъ начертава́етсѧ, и҆ є҆гда̀ сі́ѧ всѧ̀ постра́ждеши, ра́дꙋйсѧ, речѐ Гд҃ь: ꙗ҆́кѡ мꙁда̀ твоѧ̀ мнѡ́га на нб҃се́хъ є҆́стъ. Ра́достїю ᲂу҆́бѡ ра́дꙋйсѧ, и҆ весе́лїемъ весели́сѧ, ꙗ҆́кѡ дне́сь и҆ꙁбра́ тѧ, и҆ ѿлꙋчи́ тѧ Гд҃ь Бг҃ъ ѿ мі́рскагѡ жи́тїѧ, и҆ поста́ви тѧ ꙗ҆́кѡже пре́дъ лице́мъ ᲃвои́мъ, въ предстоѧ́нїи И҆́ноческагѡ Чи́на, въ во́инствѣ А҆гг҃лови́днагѡ жи́тїѧ, въ высотѣ̀ нб҃сѐ подража́тельнагѡ жи́тельства, томꙋ̀ А҆́гг҃елⷭ҇ки слꙋжи́ти, и҆ томꙋ̀ всецѣ́лѡ работа́ти, го́рнѧѧ мꙋдрствова́ти, гѡ́рнихъ и҆ска́ти, на́ше бо жи́тїе, по А҆пⷭ҇лꙋ, на нб҃сѣ́хъ є҆́стъ. ѽле но́вагѡ зва́нїѧ! ѽле да́ра та́йны! Вто́рое креще́нїе прїе́млеши днесь, бра́те, бога́тыми чл҃кѡлю́бца Бг҃а дарова́нїи, и҆ ѿ грѣхѡ́въ свои́хъ ѡ҆чища́ешисѧ, и҆ ᲃы́нъ свѣ́та быва́еши, и҆ ᲃамъ Хᲃ҃ Бг҃ъ нашъ ра́дꙋетсѧ съ ᲃт҃ы́ми ᲃвои́ми А҆́гг҃лы ѡ҆ покаѧ́нїи твое́мъ, закала́ѧ тебѣ̀ те́льца ᲂу҆пита́ннагѡ. Досто́йно про́чее зва́нїю ходѝ, ᲂу҆страни́сѧ ѿ ᲃꙋ́етныхъ пристра́стїй, ѡ҆мерꙁѝ себѣ̀ въ до́лнѧѧ влекꙋ́щꙋю тѧ по́хоть, все своѐ жела́нїе преложѝ къ небе́снымъ, ѿню́дъ не воꙁвраща́йсѧ вспѧ́ть, да не бꙋ́деши сто́лпъ со́лный, ꙗ҆́кѡ жена̀ Лꙍ́това, и҆лѝ ꙗ҆́коже песъ на своѧ̀ блево́тины воꙁвраща́ѧйсѧ: и҆ и҆сполни́тсѧ на тебѣ̀ ᲃло́во Гд҃не, гл҃ю́щее, ꙗ҆́кѡ никто́же воꙁложи́въ рꙋ́кꙋ на ра́ло, и҆ ѡ҆бра́щсѧ въспѧ́ть, ᲂу҆пра́вленъ є҆́стъ въ ца́рствїи нбⷭ҇номъ. Нѣ́сть бо ти ма́ла бѣда̀ ѡ҆бѣща́вшомꙋсѧ ны́нѣ всѧ предрече́ннаѧ храни́ти, пото́мъ же неради́ти ѡ҆ ѡ҆бѣтова́нїи, и҆лѝ на пе́рвое жи́тїе воꙁврати́тисѧ, и҆лѝ ѿц҃а твое́гѡ дх҃внагѡ раꙁлꙋчи́тисѧ, и҆ съпостѧ́щихсѧ бра́тїй: и҆лѝ тꙋнѐ ходѧ́щꙋ въ небреже́нїи и҆жди́ти дни своѧ̀, поне́же тѧжча́йшее ѡ҆брѧ́щеши ѡ҆сꙋжде́нїе, па́че пе́рвыхъ на стра́шномъ и҆ неꙋмы́тнемъ ᲃꙋ́дищи Хв҃омъ, є҆ли́ко множа́йшїѧ бл҃года́ти наслади́шисѧ ны́нѣ, и҆ лꙋ́чше ти бѣ̀, по рече́нномꙋ, не ѡ҆бѣща́тисѧ, не́жели ѡ҆бѣща́вшꙋсѧ не ѿда́ти. Ни́же па́ки мнѝ, ꙗ҆́кѡ въ мимоше́дшемъ вре́мени зде́шнѧго пребыва́нїѧ дово́льнѡ подвиꙁа́лсѧ є҆сѝ къ неви́димымъ си́ламъ вра́жїѧмъ: но вѣ́ждь, ꙗ҆́кѡ найпа́че ѿ ны́нѣ прі́ймꙋтъ тѧ мнѡжа́йшїи по́двиги къ бра́немъ є҆гѡ̀, ника́коже ᲂу҆́бѡ тѧ побѣди́ти воꙁмо́жетъ ѡ҆гражде́нна тѧ ѡ҆брѣ́тъ, къ наставлѧ́ющемꙋ тѧ вѣ́рою крѣ́пкою, и҆ любо́вїю: и҆ къ всѧ́комꙋ послꙋша́нїю и҆ ᲃмире́нїю правото́ю. Сегѡ̀ ра́ди да ѿи́детъ ѿ тебѐ всѧ́кое непослꙋша́нїе, прекосло́вїе, горды́нѧ, рве́нїе, ре́вность, за́висть, ꙗ҆́рость, кличь, хꙋла̀, тайнѡѧде́нїе, дерꙁнове́нїе, ѡ҆со́бное дрꙋ́жество, беꙁчи́нїе, любопрѣ́нїе, роптанїе, шепта́нїе, притѧжа́нїе себѣ̀ само́мꙋ ѡ҆со́бное, а҆́ще и҆ малы́ѧ кое́ѧ и҆ ѡ҆каѧ́нныѧ ве́щи, и҆ дрꙋ́гїа всѧ зло́бныѧ ви́ди, и҆́хже ра́ди прихо́дитъ гнѣ́въ Бж҃ій на такова́ѧ дѣ́ющихъ, и҆ в̾коренѧ́тисѧ начина́етъ въ ни́хъ дш҃а́мъ тли́тель, па́че же в̾мѣ́сто сихъ стѧжѝ подоба́ющаѧ ᲃт҃ы́мъ, братолю́бїе, беꙁ̾мо́лвїе, кро́тость, молча́нїе, бл҃гоговѣ́нїе, поꙋче́нїе и҆ раꙁмышле́нїе Бжⷭ҇тве́нныхъ ᲃлове́съ, и҆ чте́нїе, съблюде́нїе ᲃе́рдца ѿ лꙋка́выхъ по́мыслѡвъ, дѣла́нїе по си́лѣ, воꙁдержа́нїе, и҆ терпѣ́нїе да́же до ᲃме́рти: И҆ на него́же ѿц҃а̀ ѡ҆бѣтова́нїе своѐ въꙁложи́лъ є҆сѝ, и҆ пе́рвое и҆ послѣ́днее и҆сповѣда́нїе, ᲃерде́чныхъ та́инъ твои́хъ нико́лиже ѿ негѡ̀ съкрива́й, но всегда̀ ѿкрыва́ѧ є҆мꙋ̀ ᲃі́ѧ и҆сповѣдай, ꙗ҆́коже Бжⷭ҇тве́ннаѧ писа́нїѧ гл҃ю́тъ: кр҃ща́хꙋбосѧ речѐ и҆сповѣда́юще грѣхѝ ᲃвоѧ̀.

Вопро́съ.

Сі́ѧ всѧ та́коли втори́цею и҆сповѣда́еши ѡ҆ ᲂу҆пова́нїи ᲃи́лы Бж҃іѧ: и҆ въ си́хъ ѡ҆бѣтова́нїихъ претерпѣ́ти ѡ҆бѣщава́еши ли сѧ да́же до кончины̀ живота̀ тво́егѡ, бл҃года́тїю Хв҃ою?

Ѿве́тъ.

Є҆́й, Бг҃ꙋ поспѣшествꙋ́ющꙋ, че́стный ѿч҃е.

Та́же ᲃщ҃е́нникъ гл҃е́тъ Моли́твꙋ ᲃі́ю:

Всеще́дрый ᲂу҆́бѡ Бг҃ъ и҆ многоми́лостивый, Пречи́стыѧ ᲂу҆тро́бы неиꙁслѣди́мыѧ бл҃гости свое́ѧ ѿверꙁа́ѧй всѧ́комꙋ приходѧ́щомꙋ къ не́мꙋ, жела́нїемъ и҆ любо́вїю те́плою: рекі́й: а҆́ще бы и҆ жена̀ забы́ла и҆сча́дїе своѐ, а҆́ꙁъ же не забꙋ́дꙋ тебѐ, и҆ твоѐ вѣды́й жела́нїе, и҆ къ предложе́нїю твое́мꙋ прилага́ѧй ꙗ҆́же ѿ себѐ ᲃи́лꙋ, къ и҆сполне́нїю за́повѣдїй свои́хъ: да воспрі́иметъ, и҆ ѡ҆б̾и́метъ, и҆ защи́титъ тѧ, и҆ бꙋ́детъ ти стѣна̀ тве́рда ѿ лица̀ вра́жїѧ, ка́мень терпѣ́нїа, ᲂу҆теше́нїѧ вина̀: благомо́щїѧ пода́тель, бл҃годꙋ́шїѧ сниска́нїе, мꙋ́жествꙋ съподви́жникъ, сълѣга́ѧ, съвостаѧ̀, ᲂу҆слажда́ѧ и҆ веселѧ̀ ᲃе́рдце твоѐ ᲂу҆тѣше́нїемъ ᲃт҃а́гѡ свое́гѡ Дх҃а: сподоблѧ́ѧ тѧ и҆ ча́сти ᲃт҃ы́хъ и҆ Преподо́бныхъ ѿц҃ъ на́шихъ, А҆нтꙍ́нїа, Е҆ѵѳи́мїа, Са́вы и҆ и҆же съ ни́ми, и҆ Преподо́бныхъ ѿц҃ъ на́шихъ А҆нтѡ́нїа и҆ Ѳеѻдꙍ́сїѧ Пече́рскихъ, и҆ всѣ́хъ ᲃт҃ы́хъ: Съ ни́миже и҆ да наслѣди́ши ца́рство нбⷭ҇ное ѡ҆ Хє҃ І҆и҃сѣ Гд҃е на́шемъ, є҆мꙋ́же ᲃла́ва и҆ держа́ва, и҆ ца́рство, и҆ ᲃи́ла, съ Ѿц҃е́мъ и҆ ᲃт҃ы́мъ Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Бра́тїѧмъ же ре́кшымъ,

А҆ми́нь.

Настоѧ́тель знамена́етъ три́жды гла́вꙋ Схи́мꙋ прїе́млющагѡ, и҆ по знамена́нїи гл҃е́тъ,

Гд҃ꙋ помоли́мсѧ.

И҆ ѡ҆бра́щьсѧ къ Восто́кѡмъ, гл҃е́тъ Моли́твꙋ ᲃі́ю:

Сы́й Влады́ко Вседержи́телю, превы́шный Цр҃ю ᲃла́вы, съ живы́мъ и҆ съста́внымъ свои́мъ сло́вомъ, и҆ ѿ тебѐ и҆сходѧ́щимъ Дх҃омъ и҆́стиннымъ Господствꙋ́ѧй всѧ́кою тва́рїю ви́димою же и҆ неви́димою, Бж҃е сѣдѧ́й на Херꙋви́мѣхъ и҆ трⷭ҇ты́мъ гла́сомъ ѿ Серафи́мѡвъ воспѣева́емый непреста́ннѡ, є҆мꙋ́же предстоѧ́тъ ти́сѧща ти́сѧщы, и҆ тмы̀ темъ ᲃт҃ы́хъ А҆́гг҃лъ и҆ А҆рха́гг҃лъ вѡ́инства: ты є҆сѝ свѣ́тъ просвѣща́ѧй всѧ́кагѡ чл҃вка грѧдꙋ́щагѡ въ мі́ръ, ᲂу҆молѧ́емь ѿ ᲃт҃ы́ѧ Бц҃а и҆ прⷭ҇нѡ Дв҃ы Марїѧ, и҆ всеѧ̀ неб́есныѧ ти Це́ркве перве́нецъ въ І҆ерꙋсали́ме: при́ꙁри ми́лостивнымъ ѻ҆́комъ на смире́нїе раба̀ твое́гѡ, И҆мⷬ҇къ: и҆́же воꙁложѝ и҆сповѣда́нїе пре́дъ мнѡ́гими свѣдѣ́тели, съвокꙋпѝ є҆гѡ̀ дарова́нномꙋ є҆мꙋ̀ ѿ прароди́телїей да́рꙋ ᲃыноположе́нїѧ, и҆ Ца́рствїѧ твое́гѡ ᲃт҃ы́мъ Креще́нїемъ: И҆́ноческое сі́е и҆ А҆́гг҃елови́дное ѡ҆бѣща́нїе поста́ви съверше́ннѡ на кра́есѣко́мемъ и҆ дх҃о́внемъ ка́мени є҆́же въ тѧ̀ вѣ́ры: ᲂу҆крѣпѝ є҆гѡ̀ въ держа́вѣ ᲃи́лы твое́ѧ, и҆ ѡ҆блецы̀ є҆гѡ̀ въ всеѡрꙋ́жество ᲃт҃а́гѡ ти Дх҃а, ꙗ҆́кѡ нѣ́сть є҆мꙋ̀ бра́нь къ кро́ви и҆ пло́ти, но къ Нача́лѡмъ, къ Вла́стемъ, къ Мїродержи́телемъ тмы̀ вѣ́ка сегѡ̀, къ дꙋ́ховѡмъ лꙋка́вства, препоѧшѝ чре́сла є҆гѡ̀ ᲃи́лою и҆́стины, и҆ ѡ҆блецѝ є҆гѡ̀ въ бро́нѧ пра́вды и҆ ра́дости, и҆ ѡ҆бꙋ́й нѡ́ꙁѣ є҆гѡ̀ въ ᲂу҆готова́нїе бл҃говѣствова́нїѧ ми́ра, ᲂу҆мꙋдрѝ є҆гѡ̀ въспрїѧ́ти щи́тъ вѣ́ры, въ не́мже въꙁмо́жетъ всѧ̀ стрѣ́лы лꙋка́вагѡ раждеже́нныѧ ᲂу҆гаси́ти, и҆ шле́мъ ᲃпасе́нїѧ прїѧ́ти, и҆ ме́чъ дꙋхо́вный, є҆́же є҆́стъ сло́во твоѐ: и҆ застꙋпа́ѧ неиꙁ̾гл҃а́ннаѧ ᲃе́рдца є҆гѡ̀ въꙁдыха́нїѧ, съпричтѝ є҆гѡ̀ и҆ꙁбра́ннымъ твои́мъ, ꙗ҆́кѡ да бꙋ́детъ ти съсꙋ́дъ и҆ꙁбра́нный, ᲃн҃ъ и҆ наслѣ́дникъ Ца́рствїѧ твое́гѡ, ᲃн҃ъ ᲃвѣ́та и҆ днѐ, мꙋ́дрость, пра́вда, ѡ҆сщ҃е́нїе, и҆ꙁбавле́нїе. Сътворѝ є҆гѡ̀ ѡ҆рга́нъ доброгла́сенъ, Ѱалты́рь кра́сенъ ᲃт҃а́гѡ Дх҃а, ꙗ҆́кѡ да ѿсю́дꙋ по преспѣѧ́нїю съвле́к̾сѧ ве́тхагѡ чл҃ка, тлѣ́ющагѡ по сластолю́бїи пре́лестника многоѡ́браꙁнагѡ змїѧ̀, ѡ҆блече́тсѧ въ но́вагѡ А҆да́ма, по Бѕ҃ѣ съꙁда́ннагѡ, въ преподо́бїи и҆ пра́вдѣ, Ꙋ҆҆твердѝ є҆гѡ̀ всегда̀ и҆ ꙗ҆́ꙁвы и҆ Кре́стъ І҆и҃совъ носи́ти на тѣ́ле свое́мъ, и҆́миже є҆мꙋ̀ мі́ръ распѧ́т̾сѧ, и҆ то́й мі́рови, въѡбраꙁѝ въ не́мъ добродѣ́тель и҆́стиннꙋю води́ти, а҆ нѐ на ᲂу҆гожде́нїе чл҃кѡмъ, и҆лѝ на самоꙋго́дїе, въ терпѣ́нїи бл҃гоче́стїе, въ бл҃гоче́стїи же братолю́бїе и҆ послꙋша́нїе, Ꙍ҆ бл҃года́ти є҆гѡ̀ бодрствꙋ́юща, дѣла́юща, спѧ́ща, въста́юща, въ ѱа́лмѣхъ и҆ пѣ́нїихъ и҆ пѣ́снехъ дх҃о́вныхъ, А҆́гг҃лⷭ҇ки зрѣ́ти тебѐ чи́стымъ ᲃе́рдцемъ, и҆ покланѧ́тисѧ тебѣ̀ є҆дино́мꙋ живо́мꙋ и҆ и҆́стинномꙋ Бг҃ꙋ, въ ра́дость є҆гѡ̀ неиꙁ̾глагола́ннꙋю.

Ꙗ҆́кѡ твое́ є҆́стъ Ца́рство и҆ держа́ва и҆ вла́сть, и҆ тебѣ̀ подоба́етъ всѧ́каѧ ᲃла́ва, чⷭ҇ть и҆ поклоне́нїе, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Бра́тїѧ же гл҃ю́тъ,

А҆ми́нь.

И҆ а҆́бїе полага́ютсѧ но́жницы на ᲃт҃о́мъ Е҆ѵⷢ҇лїи. Настоѧ́тель же гл҃е́тъ Моли́твꙋ ᲃі́ю.

Дїа́конꙋ рекшꙋ,

Гд҃ꙋ помоли́мсѧ.

Бра́тїѧмъ же,

Гд҃и, помилꙋй.

Ст҃ы́й Гд҃и ᲃи́лъ, Ѿч҃е Гд҃а на́шего І҆и҃ᲃ Ха҃, бл҃гословѝ раба̀ твое́гѡ, є҆гѡ́же приꙁва́лъ є҆сѝ въ дх҃о́вный тво́й невѣ́стникъ, и҆ ᲃподобѝ є҆гѡ̀ бы́ти твои́мъ Преподо́бнымъ рабо́мъ, ᲂу҆мꙋдрѝ є҆гѡ̀, и҆ и҆ꙁлѣ́й нань ѿ Влады́чнѧго твое́гѡ Дх҃а бл҃года́ть и҆ ра́ꙁꙋмъ, ᲂу҆крѣпѝ є҆гѡ̀ на невиди́магѡ врага̀ бра́нь, пло́тскаѧ въста́нїѧ держа́вною ти ᲃи́лою ниꙁложѝ, да́ждь є҆мꙋ̀ бл҃гоꙋгожда́ти тебѣ̀ въ пѣ́нїи и҆ ᲃлавосло́вїи непреста́ннемъ, въ пѣ́снехъ бл҃говре́менныхъ, въ моли́твахъ бл҃гопрїѧ́тныхъ, въ совѣ́тѣ пра́ве, въ ᲃе́рдци смире́ннѣ, въ дѣѧ́нїи жи́ꙁни, и҆ кро́тости и҆ и҆́стинне, и҆ сподобѝ є҆гѡ̀ бл҃гоꙋгоди́ти тебѣ̀ въ кро́тости, въ любвѝ, въ сѣверше́нствѣ, въ ра́ꙁꙋме, въ мꙋ́жествѣ, и҆ приноси́ти тебѣ̀ пѣ́нїѧ и҆ славосло́вїѧ и҆ моли́твы въ во́ню бл҃гоꙋха́нїѧ, ᲃъвершѝ є҆гѡ̀ жи́тїе въ преподо́бїи и҆ пра́вдѣ, ꙗ҆́кѡ да всегда̀ и҆ нескве́рнѡ и҆мѣ́ѧ къ тебѣ̀ съвокꙋпленїе, сподоби́тсѧ небе́снагѡ Ца́рствїѧ, бл҃года́тїю и҆ щедрѡта́ми є҆диноро́днагѡ ᲃн҃а твое́гѡ, съ ни́мже бл҃гослове́нъ є҆сѝ, съ Пртⷭ҇ы́мъ и҆ благи́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Бра́тїѧ гл҃ютъ,

А҆ми́нь.

Настоѧ́тель же просте́ръ рꙋ́кꙋ къ ᲃт҃омꙋ Е҆ѵⷢ҇лїю, гл҃е́тъ,

Се Хᲃ҃ невиди́мо предсто́итъ: ви́ждь, ꙗ҆́кѡ никто́же тѧ принꙋжда́етъ прїйтѝ къ семꙋ̀ ѡ҆́браꙁꙋ: вѣ́ждь, ꙗ҆́кѡ ты ѿ предложе́нїѧ ᲃвое́гѡ хо́щеши вели́кїй ᲃе́й А҆́гглⷭ҇кїй ѡ҆́браꙁъ.

Ѿве́тъ.

Е҆́й, че́стный ѿч҃е, ѿ предложе́нїѧ.

По ѡ҆бѣща́нїи же, Настоѧ́тель гл҃е́тъ къ не́мꙋ три́жды ᲃі́е:

Воꙁмѝ но́жицѣ и҆ пода́ждъ ми ѧ҆̀.

Пода́вшꙋ же є҆мꙋ̀ но́жицѣ трети́цею, Настоѧ́тель, пока́ꙁꙋѧ десни́цею къ ᲃт҃омꙋ Е҆ѵⷢ҇лїю, па́ки гл҃е́тъ къ не́мꙋ:

Се ѿ рꙋкѝ Хв҃ы втори́цею вꙁе́млеши ѧ҆̀: вѣ́ждь, къ комꙋ̀ прихо́диши, комꙋ̀ ѡ҆бѣщава́ешисѧ, и҆ когѡ̀ ѿрица́ешисѧ.

Вꙁе́мъ же Настоѧ́тель но́жицѣ, гл҃е́тъ,

Благослове́нъ Бг҃ъ, хотѧ́й всѣ́мъ чл҃кѡмъ спасти́сѧ и҆ въ поꙁна́нїе и҆́стинны прїйтѝ, сы́й бл҃гослове́нъ въ вѣ́ки вѣ́кѡвъ.

Бра́тїѧ же гл҃ю́тъ,

А҆ми́нь.

Настоѧ́тель же постриꙁа́етъ верхꙋ̀ главы̀ є҆гѡ̀ крестаѻ́браꙁно, гл҃ѧ̀:

Бра́тъ нашъ, И҆мⷬ҇къ: пострига́етъ вто́рое вла́сы главы̀ свое́ѧ, въ зна́менїе коне́чнагѡ ѿрица́нїѧ сѧ мі́ра, и҆ всѣ́хъ ꙗ҆́же въ мі́ре, и҆ въ коне́чное ѿрѣꙁа́нїе свое́ѧ во́ли, и҆ всѣ́хъ пло́тскихъ по́хотїй, и҆ въ є҆́же въ беꙁмо́лвїи и҆ дѣ́тельномъ присѣдѣ́нїи себѣ̀ внима́ти, въ И҆мѧ̀ Ѿц҃а и҆ ᲃн҃а и҆ ᲃт҃а́гѡ Дх҃а: Рцѣ́мъ всѝ ѡ҆ немъ: Гд҃и, поми́лꙋй.

Бра́тїѧ же пою́тъ три́жды,

Гд҃и, поми́лꙋй.

Коснꙋ́въжесѧ Настоѧ́тель десни́цею Власѧни́цы, є҆ю́же ѡ҆дѣѧ́нъ є҆́стъ Схи́мꙋ прїемлѧ́й, и҆ держа̀ за́ню, гл҃е́тъ,

Бра́тъ нашъ, И҆мⷬ҇къ: ѡ҆бла́читсѧ втори́цею въ Хитꙍ́нъ пра́вды, и҆ ѡ҆дѣва́етсѧ въ ри́ꙁꙋ радова́нїѧ Вели́кагѡ А҆́гглⷭ҇кагѡ ѡ҆́браꙁа, въ є҆́же пребы́ти є҆мꙋ̀ въ соверше́нной Ха҃ ра́ди во́льней нищетѣ̀ дх҃вной же и҆ тѣле́сней, и҆ всѧ́кѡ ѡ҆шаѧва́тисѧ всѧ́кагѡ ᲃтѧжа́нїѧ и҆ и҆мѣ́нїй събра́нїѧ, и҆ въ ѿложе́нїе и҆ попра́нїе всѣ́хъ печа́лїей и҆ смꙋще́нїй ѿ бѣ́сѡвъ, ѿ пло́ти и҆ ѿ мі́ра находѧ́щихъ: въ всегда́шнее же ᲃвоѐ є҆́же ѡ҆ Хє҃ дх҃о́вное весе́лїе и҆ радова́нїе, въ И҆мѧ̀ Ѿц҃а̀ и҆ ᲃн҃а и҆ ᲃт҃а́гѡ Дх҃а, Рцѣ́мъ всѝ ѡ҆ не́мъ: Гд҃и, поми́лꙋй.

И҆ знамена́етъ є҆гѡ̀ крестаѻ́браꙁнѡ, ѡ҆́нъ же лобꙁа́етъ Власѧ́ницꙋ и҆ десни́цꙋ Настоѧ́телевꙋ. Настоѧ́тель же а҆́бїе ѡ҆блачи́тъ є҆гѡ̀ въ Схи́мническꙋю Ра́сꙋ, ꙗ҆́же и҆́матъ бы́ти ᲃꙋ́та, сі́есть шве́на и҆ на пре́дѣ.

Бра́тїѧмъ пою́щимъ гⷤ,

Гд҃и, поми́лꙋй.

Настоѧ́тель же, вꙁемъ вели́кїй Парама́нъ и҆ держа̀ є҆гѡ̀ шꙋи́цею, гл҃е́тъ,

Бра́тъ нашъ, И҆мⷬ҇къ: прїе́млетъ съверше́нный Парама́нъ вели́кагѡ А҆́ггелⷭ҇кагѡ ѡ҆́браꙁа, въ ѡ҆де́ждꙋ нетлѣ́нїѧ и҆ чистоты̀ дш҃е́вныѧ же и҆ тѣле́сныѧ, и҆ въ всегда́шнее воспомина́нїе блага́гѡ и҆́га Хв҃а на себѐ вꙁѧ́тїѧ, и҆ ле́гкагѡ бре́мене є҆гѡ̀ ноше́нїѧ, и҆ въ ѡ҆бꙋꙁда́нїе и҆ ᲃвѧꙁа́нїе всѣ́хъ по́хѡтїей и҆ жела́нїй пло́ти ᲃвое́ѧ, въ и҆мѧ̀ Ѿц҃а и҆ ᲃн҃а и҆ ᲃт҃а́гѡ Дх҃а: Рцѣ́мъ всѝ ѡ҆ немъ, Гд҃и, поми́лꙋй.

Знамена́въ же и҆ да́въ є҆мꙋ̀ лобꙁа́ти, налага́етъ на пле́щи є҆гѡ̀, Бра́тїѧмъ пою́щымъ гⷤ,

Гд҃и, поми́лꙋй.

Настоѧ́тель же, вꙁе́мъ По́ѧсъ ᲂу҆смѧ́ный и҆ держа̀ є҆гѡ̀ шꙋи́цею, гл҃е́тъ,

Бра́тъ нашъ, И҆мⷬ҇къ: препоѧсꙋ́етъ втори́цею чре́сла своѧ̀ си́лою и҆́стинны, въ ᲂу҆мерщвле́нїе тѣ́ла и҆ ѡ҆бновле́нїе дх҃а, въ бо́дрость же и҆ ѡ҆па́сство, въ снабдѣ́нїе за́повѣдїй Хв҃ыхъ, въ И҆мѧ̀ Ѿц҃а и҆ ᲃн҃а и҆ ᲃт҃а́гѡ Дх҃а. Рцѣ́мъ всѝ ѡ҆ немъ, Гд҃и, поми́лꙋй.

Десни́цею же знамена́въ є҆гѡ̀, препоѧсꙋ́етъ и҆́мъ Схи́мника, бра́тїѧмъ пою́щымъ гⷤ,

Гд҃и, поми́лꙋй.

Настоѧ́тель же вꙁе́мъ Кꙋ́кꙋль съ А҆нала́вомъ, ꙗ҆́же всегда̀ вкꙋ́пе быва́ютъ, и҆ держа̀ ѧ҆̀ шꙋи́цею, гл҃е́тъ,

Бра́тъ нашъ, И҆мⷬ҇къ: ѡ҆бла́читсѧ въ Кꙋ́кꙋль беꙁ̾ꙁло́бїѧ, въ шле́мъ ᲃп҃си́телнагѡ ᲂу҆пова́нїѧ, и҆ молчали́вагѡ въ дх҃о́вномъ раꙁмышле́нїи пребыва́нїѧ, и҆ ѡ҆па́снагѡ себѣ̀ внима́нїѧ, въ И҆мѧ̀ Ѿц҃а̀ и҆ ᲃн҃а и҆ ᲃт҃а́гѡ Дх҃а. Рцѣ́мъ всѝ ѡ҆ не́мъ, Гд҃и, поми́лꙋй.

Благослови́въ же десни́цею Кꙋ́кꙋль съ А҆нала́вомъ, и҆ да́въ є҆мꙋ̀ лобꙁа́ти, въꙁлага́етъ нань, покрыва́ѧ гла́вꙋ, пре́дънѧѧ же и҆ за́днѧѧ є҆гѡ̀, и҆ а҆́бїе вꙁе́мъ шꙋи́цею коне́цъ пре́днеѧ по́лы А҆нала́ва, десни́цею бл҃гословлѧ́етъ ю҆̀ и҆ дае́тъ є҆мꙋ̀ лобꙁа́ти, гл҃ѧ̀.

Бра́тъ нашъ, И҆мⷬ҇къ: прїе́млетъ А҆нала́въ, ꙗ҆́кѡже кре́стъ сво́й на ра́мо, въ є҆́же послѣдова́ти Влады́це Хꙋ̀, и҆ всегда̀ во́льныѧ є҆гѡ̀ стра́сти и҆ сме́рть, ꙗ҆́же насъ дѣ́лѧ претерпѣ́лъ є҆́стъ, памѧтствова́ти, и҆ поели́кꙋ мо́щно, сі́ѧ подража́ти тща́тисѧ, въ И҆мѧ̀ Ѿц҃а̀ и҆ ᲃн҃а и҆ ᲃт҃а́гѡ Дх҃а, Рцѣ́мъ всѝ ѡ҆ немъ: Гд҃и, поми́лꙋй.

Бра́тїѧ же пою́тъ гⷤ,

Гд҃и, поми́лꙋй.

Посе́мъ же вꙁе́мъ Ма́нтїю ᲃхи́мническꙋю беꙁъ фа́лдѡвъ сꙋ́щꙋю, и҆ держа̀ ю҆̀ шꙋи́цею, гл҃е́тъ,

Бра́тъ нашъ, И҆мⷬ҇къ: ѡ҆блачи́тсѧ вто́рое въ ри́ꙁꙋ спасе́нїѧ и҆ въ бро́нѧ пра́вды, вое́же ѿшаѧва́тисѧ ѿ всѧ́кїѧ непра́вды, и҆ ѡ҆па́снѡ свое́го ра́ꙁꙋма съставле́нїе, и҆ свое́ѧ во́лѧ мꙋдрова́нїѧ ѿрѣ́ꙁати, сме́рти же па́мѧть всегда̀ въ ᲂу҆мѣ̀ свое́мъ и҆мѣ́ти, распѧ́та же себѐ бы́ти мі́рови в̾менѧ́ти, и҆ мр҃тва на всѧ́кое дѣ́ло зло и҆мѣ́ти, жи́ва же прⷭ҇нѡ на всѧ́кꙋю добродѣ́тель Хв҃и нелѣ́ностнѡ представлѧ́ти, въ и҆мѧ̀ Ѿц҃а̀ и҆ ᲃн҃а и҆ ᲃт҃а́гѡ Дх҃а. Рцѣ́мъ всѝ ѡ҆ немъ: Гд҃и, поми́лꙋй.

Десни́цею же знамена́въ ю҆̀, ѡ҆бла́читъ Схи́мника, Бра́тїѧмъ пою́щымъ гⷤ,

Гд҃и, поми́лꙋй.

Вꙁе́мъ же Санда́лїѧ и҆ шꙋи́цею держа̀ ѧ҆̀, гл҃е́тъ,

Бра́тъ нашъ, И҆мⷬ҇къ: ѡ҆бꙋва́етсѧ втори́цею въ Санда́лїѧ, бл҃говествова́нїѧ ми́ра, въ є҆́же ско́рꙋ бы́ти и҆ тщали́вꙋ на всѧ́кое послꙋша́нїе и҆ на всѧ́кѡ дѣ́ло бл҃го́е, ко́сенъ же и҆ неско́ръ къ и҆сполне́нїю свое́ѧ во́ли и҆ къ всѧ́комꙋ дѣ́лꙋ неподо́бномꙋ, и҆ въ є҆́же бо́дрнѡ и҆ терпели́внѡ но́щное и҆ дне́вное на моли́твахъ стоѧ́нїе съверша́ти, въ И҆мѧ̀ Ѿц҃а̀ и҆ ᲃн҃а и҆ ᲃт҃а́гѡ Дх҃. Рцѣ́мъ всѝ ѡ҆ не́мъ: Гд҃и, поми́лꙋй.

Десни́цею же бл҃гослови́въ, ѡ҆бꙋва́етъ є҆гѡ̀, Бра́тїѧмъ пою́щымъ гⷤ,

Гд҃и, поми́лꙋй.

По си́хъ же прїи́мъ Верви́цꙋ и҆ шꙋи́цею держа̀ ю҆̀, гл҃е́тъ,

Прїйми, бра́те, И҆мⷬ҇къ: втори́цею ме́чъ дх҃о́вный, и҆́же є҆́стъ гл҃ъ Бж҃ій, въ всегда́шней мл҃итвѣ І҆и҃сово́й, всегда́ бо и҆мѧ̀ Гд҃а І҆и҃са въ ᲂу҆мѣ, въ ᲃе́рдцѣ, въ мы́сли, и҆ въ ᲂу҆стѣ́хъ свои́хъ и҆мѣ́ти до́лженъ є҆сѝ, гл҃ѧ̀ прⷭ҇нѡ, Гд҃и І҆и҃се Хє҃, ᲃн҃е Бж҃ій, поми́лꙋй мѧ грѣ́шнагѡ, и҆ вѣ́ждъ, ꙗ҆́кѡ ѿсе́лѣ всегда̀ беꙁпреста́нно ᲃло́во Бж҃іе въ моли́твѣ, въ ѱалмѣ́хъ и҆ пѣ́нїихъ и҆ пѣ́снехъ дх҃о́вныхъ, въ ᲂу҆стѣ́хъ свои́хъ и҆мѣ́ти до́лженъ є҆сѝ, ᲃло́во же гнило́е да не и҆ꙁы́йдетъ и҆ꙁъ ᲂу҆́стъ твои́хъ, въ И҆мѧ Ѿц҃а̀ и҆ ᲃн҃а и҆ ᲃт҃а́гѡ Дх҃а. Рцѣ́мъ всѝ ѡ҆ немъ: Гд҃и, поми́лꙋй.

И҆ бл҃гослови́въ ю҆̀ десни́цею, подае́тъ Схи́мникꙋ, Бра́тїѧмъ пою́щымъ гⷤ.

Гд҃и, поми́лꙋй.

Ѻ҆́нъ же, прїемлѧ̀, лобыꙁа́етъ Верви́цꙋ и҆ десни́цꙋ Настоѧ́телевꙋ.

Настоѧ́тель же, вꙁе́мъ рꙋ́чный Кре́стъ и҆ держа̀ и҆̀ десни́цею, гл҃е́тъ,

Прїйми, бра́те, И҆мⷬ҇къ: втори́цею щи́тъ веры, Кре́стъ Хв҃ъ, въ не́мже воꙁмо́жеши всѧ стрѣ́лы лꙋка́вагѡ раждеже́нныѧ ᲂу҆гаси́ти, и҆ памѧтствꙋ́й всегда̀, ꙗ҆́кѡ речѐ Гд҃ь: и҆́же хо́щетъ по мнѣ̀ и҆тѝ, да ѿверже́тсѧ себѐ, и҆ во́ꙁметъ Кре́стъ сво́й, и҆ послѣдꙋ́етъ ми, Рцѣ́мъ всѝ ѡ҆ не́мъ: Гд҃и, поми́лꙋй.

И҆ знамена́въ Схи́мника Кресто́мъ крестаѻ́браꙁнѡ, подае́тъ є҆мꙋ̀, ѡ҆́нъ же, прїемлѧ̀ де́сною рꙋко́ю, лобꙁа́етъ Кре́стъ и҆ десни́цꙋ Настоѧ́телевꙋ, Бра́тїѧ же пою́тъ гⷤ, Гд҃и, поми́лꙋй.

Наконе́цъ же, вꙁе́мъ Настоѧ́тель горѧ́щꙋю Свѣ́щꙋ, подае́тъ є҆мꙋ̀ гл҃ѧ̀:

Прїймѝ, бра́те, втори́цею свѣщꙋ̀ ᲃі́ю, и҆ вѣ́ждь, ꙗ҆́кѡ ѿсе́ле до́лженъ є҆сѝ чⷭ҇тымъ и҆ добродѣ́телнымъ жи́тїемъ, и҆ бл҃ги́ми нра́вы, сло́вомъ же и҆ дѣ́ломъ, смѣре́ннымъ же ѡ҆́браꙁомъ, кро́ткимъ же и҆ молчали́вымъ себѣ̀ внима́нїемъ, и҆ крѣ́пкимъ ѿ всегѡ̀ воꙁдержа́нїемъ, свѣ́тъ бы́ти мі́рови. Рече́ бо Гд҃ь: та́ко да просвѣ́титсѧ свѣ́тъ вашъ предъ человѣ́ки, ꙗ҆́кѡ да ви́дѧтъ ва́ша до́браѧ дѣ́ла, и҆ просла́вѧтъ ѿц҃а̀ ва́шего, и҆́же є҆́стъ на небесе́хъ, Рцѣ́мъ всѝ ѡ҆ не́мъ, Гд҃и, поми́лꙋй.

Схи́мникъ же, вꙁе́мъ свѣ́щꙋ, лобꙁа́етъ десни́цꙋ є҆гѡ̀.

По всѣ́хъ же си́хъ, десни́цею бл҃гословлѧ́ѧ Схи́мника, Настоѧ́тель гл҃е́тъ.

Бра́тъ нашъ, И҆мⷬ҇къ: воспрїѧ́лъ є҆́стъ вели́кїй А҆́гглⷭ҇кїй ѡ҆́браꙁъ, и҆ втори́цею ѡ҆бо́лксѧ є҆́стъ въ всѧ̀ ѡ҆рꙋ́жїѧ Бж҃іѧ, въ є҆́же мощѝ є҆мꙋ̀ крѣ́пкѡ победи́ти всю си́лꙋ и҆ бра́ни Нача́лъ, и҆ Вла́стїй, и҆ Мїродержи́телей тмы вѣ́ка ᲃегѡ̀, и҆ дх҃ѡвъ злобы̀ поднебе́сныхъ, беꙁъмо́л̾внѡ же себѣ̀ внима́ти, въ И҆мѧ̀ Ѿц҃а̀ и҆ ᲃн҃а и҆ ᲃт҃а́гѡ Дх҃а. Рцѣ́мъ всѝ ѡ҆ не́мъ. Гд҃и, поми́лꙋй.

Бра́тїѧ же пою́тъ гⷤ,

Гд҃и, поми́лꙋй.

А҆́бїе же по си́хъ всѣ́хъ бра́тїѧ пою́тъ Тропарѝ ᲃі́ѧ. Гла́съ д҃.

Ꙍ҆блецѣ́тесѧ въ ри́ꙁꙋ спасе́нїѧ, препоѧши́тесѧ по́ѧсомъ цѣломꙋ́дрїѧ, прїймѣ́те зна́менїе креста̀, но́ги ᲂу҆́мныѧ въѡрꙋжи́те въꙁдержа́нїѧ ѻ҆рꙋ́жїи, и҆ ѡ҆брѧ́щете поко́й дш҃а́мъ ва́шимъ.

Да воꙁра́дꙋетсѧ дш҃а̀ моѧ̀ ѡ҆ Гд҃е, ѡ҆блече́ бо мѧ въ ри́ꙁꙋ спасе́нїѧ и҆ ѡ҆де́ждею весе́лїѧ ѡ҆дѣѧ́ мѧ, ꙗ҆́кѡ на жени́ха воꙁложѝ на́ мѧ вѣне́цъ, и҆ ꙗ҆́кѡ невѣ́стꙋ ᲂу҆краси́ мѧ красото́ю.

По си́хъ же чте́тъ Настоѧ́тель моли́твꙋ сі́ю, рекшꙋ Дїа́конꙋ,

Гд҃ꙋ помоли́мсѧ.

Гд҃и Бж҃е нашъ, вѣ́рный въ ѡ҆бѣтова́нїихъ твои́хъ, и҆ нераскаѧ́нный въ свои́хъ ти дарова́нїй, и҆ неиꙁрече́нный въ человекѡлю́бїи твое́мъ, приꙁва́вый ᲃъꙁданїе твоѐ зва́нїемъ ᲃт҃ы́мъ, и҆ приведы́й раба̀ твое́гѡ, И҆мⷬ҇къ: въ дх҃о́вное твоѐ жи́тїе, да́ждь є҆мꙋ̀ живо́тъ бл҃гоѡ́браꙁный, пребыва́нїе добродѣ́тельное и҆ неꙁаꙁо́рное, ꙗ҆́кѡ да въ ѡ҆свѧще́нїи пожи́въ, нескве́рненъ съхранитъ во́нже си́лою твое́ю ѡ҆блече́сѧ ѡ҆́браꙁъ, и҆ ᲂу҆́бѡ ри́ꙁою въ пра́вдꙋ ѡ҆дѣва́ѧсѧ, По́ѧсомъ же ме́ртвость тѣ́ла, и҆ цѣломꙋ́дрїѧ въ себѣ̀ ѡ҆бносѧ̀, Кꙋкꙋ́ль же смиреномꙋ́дрїѧ и҆ шле́мъ ᲃпасе́нїѧ въꙁложи́въ, А҆нала́вомъ же, Кресто́мъ и҆ вѣ́рою ᲂу҆краша́емъ, ѡ҆дѣѧ́нїемъ въ ри́ꙁꙋ нетлѣ́нїѧ въѡрꙋжа́емъ, Санда́лїѧми же да настꙋ́питъ на пꙋ́ть ми́ра и҆ спасе́нїѧ, въ є҆́же бы́ти є҆мꙋ̀ ᲃтра́шнꙋ съ проти́внымъ, не є҆́млемꙋ ра́тными, всѧ́кїѧ сла́сти и҆ сра́мныѧ по́хоти чꙋ́ждꙋ, послꙋша́нїемъ нака́ꙁꙋемъ, воꙁдержа́нїе проходѧ̀, и҆ по́стничества съдержа̀ пра́вило, ꙗ҆́кѡ да въ ѱалмѣхъ и҆ пѣ́нїихъ и҆ пѣ́снехъ дх҃о́вныхъ хва́литъ Прече́стное и҆ великолѣ́пое И҆мѧ̀ твоѐ, ᲃтопа́мъ послѣдꙋ́ѧ Вели́кагѡ Проро́ка И҆лїи и҆ ᲃт҃агѡ Проро́ка, Предте́ча и҆ Крести́телѧ І҆ꙍа́нна, ꙗ҆́кѡ да дости́гъ мѣ́рꙋ ᲃъверше́нїѧ, тече́нїе сконча́етъ, вѣ́рꙋ съблюде́тъ, и҆ ѡ҆блече́тсѧ нетлѣ́нїемъ А҆гглⷭ҇кимъ, и҆ съпричте́тсѧ ᲃт҃о́мꙋ ти ᲃтадꙋ, и҆ полꙋ́читъ де́снагѡ ти предстоѧ́нїѧ, и҆ ᲂу҆слы́шитъ блаже́нный гла́съ, Прїйдѣ́те, бл҃гослове́ннїи Ѿц҃а̀ мое́го, наслѣдꙋ́йте ᲂу҆готова́нное вамъ Ца́рство ѿ сложе́нїѧ мі́ра, є҆гѡ́же и҆ на́съ наслѣ́дники сподобѝ бы́ти, Бж҃е, твое́ю бл҃года́тїю.

Ꙗ҆́кѡ Бг҃ъ ми́лостїй, щедрѡ́тъ и҆ человекѡлю́бїѧ є҆сѝ, и҆ тебѣ̀ ᲃла́вꙋ въꙁсыла́емъ, Ѿц҃ꙋ̀ и҆ ᲃн҃ꙋ и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Бра́тїѧ гл҃ютъ,

А҆ми́нь.

Настоѧ́тель,

Ми́ръ всемъ.

Бра́тїѧ,

И҆ дх҃о́ви твое́мꙋ.

Дїа́конъ,

Гла́вы ва́ша Гд҃еви приклони́те.

Бра́тїѧ,

Тебѣ̀, Гд҃и.

Настоѧ́тель же чте́тъ ᲃі́ю моли́твꙋ ти́хѡ, прекло́нь главꙋ̀.

Гд҃и Бж҃е нашъ, въведѝ раба̀ твое́гѡ, И҆мⷬ҇къ: въ дх҃о́вный тво́й дво́ръ и҆ сопричтѝ є҆гѡ̀ ᲃлове́сномꙋ ти ᲃта́дꙋ, ѡ҆чи́сти є҆гѡ̀ мꙋдрова́нїе ѿ пло́тскихъ по́хотїй и҆ тще́тныѧ пре́лести жи́тїѧ сегѡ̀, и҆ да́ждь є҆мꙋ̀ непреста́ннѡ помина́ти ᲂу҆готова́ннаѧ блага́ѧ любѧ́щимъ тѧ и҆ распе́ншымъ себѐ жи́тїю семꙋ̀, Ца́рствїѧ ра́ди твое́гѡ. Ты́ бо є҆сѝ Па́стырь и҆ посѣти́тель дш҃ъ на́шихъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Бра́тїѧ,

А҆ми́нь.

А҆́ще же не съверша́етсѧ Божестве́ннаѧ Литꙋ́ргїѧ, гл҃ю́тсѧ ѿ Дїа́кона, Дїа́конства ᲃі́ѧ, и҆ чте́тсѧ А҆пⷭ҇лъ, и҆ Е҆ѵⷢ҇лїе.

Ми́ромъ Гд҃ꙋ помоли́мсѧ.

Ꙍ҆ свы́шнѣмъ ми́ре и҆ ᲃпасе́нїи дш҃ъ на́шихъ:

Ꙍ҆ ми́ре всегѡ̀ мі́ра, бл҃гостоѧ́нїи ᲃт҃ыхъ:

Ꙍ҆ ᲃт҃ѣ́мъ хра́мѣ семъ, и҆ съ вѣ́рою:

Ꙍ҆ А҆рхїепⷭ҇пѣ на́шемъ, И҆мⷬ҇къ: чⷭ҇тнѣмъ преꙁ:

Ꙍ҆ бра́тѣ на́шемъ, И҆мⷬ҇къ: и҆ є҆́же ѿ Бг҃а поспѣше́нїѧ и҆ по́мощи є҆гѡ̀, Гд҃ꙋ помоли́мсѧ.

Ꙍ҆ є҆́же непоро́чно, неѡсꙋжде́нно и҆ непреткнове́нно и҆спра́вити є҆мꙋ̀ намѣре́нїе И҆́ноческагѡ вели́кагѡ ѡ҆́браꙁа, Гд҃ꙋ помоли́мсѧ.

Ꙍ҆ є҆́же просвѣти́тисѧ дш҃ѝ є҆гѡ̀ въ воꙁдержа́нїи и҆ по́стничествѣ, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ є҆мꙋ̀ ѿ всѧ́кїѧ мі́рскїѧ по́хоти, и҆ къ сꙋ́щымъ по пло́ти ᲃъро́дникѡмъ пристра́стїѧ, Гд҃ꙋ помоли́мсѧ.

Ꙍ҆ ѡ҆ставле́нїи грѣхѡ́въ и҆ проще́нїи съгрѣше́нїй є҆гѡ̀, и҆ є҆́же бы́ти є҆мꙋ̀ вы́шше всѣ́хъ мі́рскихъ мꙋдрова́нїй, Гд҃ꙋ помоли́мсѧ.

Ꙍ҆ є҆́же пребы́ти є҆мꙋ̀ въ всѧ́комъ бл҃гоче́стїи, и҆ бл҃гоговѣ́нїи, и҆ чистотѣ̀, Гд҃ꙋ помоли́мсѧ.

Ꙍ҆ є҆́же ѿложи́ти є҆мꙋ̀ ве́тхагѡ чл҃ка, и҆ ѡ҆блещи́сѧ въ но́вагѡ по Бꙁ҃ѣ съꙁда́ннагѡ, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ є҆мꙋ̀ и҆ намъ ѿ всѧ́кїѧ ско́рби:

Застꙋпѝ, ᲃпасѝ, поми́лꙋй и҆ съхранѝ:

Прест҃ꙋ́ю, чⷭ҇тꙋю, пребл҃гослов́еннꙋю, ᲃла́внꙋю Влады́чицꙋ нш҃ꙋ Бц҃ꙋ и҆ прⷭ҇нѡ Дв҃ꙋ:

Настоѧ́тель же воꙁглаша́етъ,

Ꙗ҆́кѡ ᲃт҃ъ є҆сѝ, Бж҃е нашъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Бра́тїѧ,

А҆ми́нь.

И҆ пою́тъ ѡ҆бы́чно,

Е҆лицы въ Ха҃ Крести́стесѧ, въ Ха҃ ѡ҆блеко́стесѧ. А҆ллилꙋїа.

Дїа́конъ,

Во́нмѣмъ.

Настоѧ́тель,

Ми́ръ всѣ́мъ.

Бра́тїѧ,

И҆ дх҃о́ви твое́мꙋ.

Чте́цъ,

Проки́менъ. Гла́съ г҃.

Гд҃ь просвѣще́нїе моѐ и҆ спаси́тель мой, кого́сѧ ᲂу҆́бѡю̀?

Сти́хъ,

Гд҃ь защити́тель животꙋ̀ мое́мꙋ, кого́сѧ ᲂу҆страшꙋ̀?

Дїа́конъ,

Премꙋ́дрость.

Чте́цъ,