Вослѣдова́нїе молебнагѡ пѣ́нїѧ к Гд҃ꙋ нш҃мꙋ І҆и҃сꙋ Хрⷭ҇тꙋ, пѣва́емаго въ вре́мѧ трꙋ́са надо́лꙁѣ непреста́ющагѡ

Наче́ншꙋ І҆ере́ю ѡ҆бы́чнѡ, Блⷭ҇ве́нъ Бг҃ъ на́шъ: Кли́ръ чте́тъ,Трⷭ҇тое: Ѿч҃е на́шъ: Гд҃и поми́лꙋй: в҃і.

Сла́ва: И҆ ны́нѣ:

Прїйдѣ́те покл: гⷤ. и҆ ѱаломъ, н҃ѳ. Бж҃е ѡ҆три́нꙋлъ ны є҆сѝ:

Сла́ва: И҆ ны́нѣ:

А҆ллилꙋ́іѧ, гⷤ.

Дїа́конъ же глаголе́тъ Е҆кте́нїѧ.

Ꙍ҆ є҆́же не помѧнꙋ́ти беꙁꙁако́нїй и҆ собла́ꙁнъ на́съ грѣ́шныхъ. и҆ недосто́йныхъ рабѡ́въ свои́хъ: но млⷭ҇тивнѡ тꙋнѐ ѡ҆чи́стити грѣхѝ на́шѧ, и҆ ѿврати́ти ѿ на́съ ве́сь гнѣ́въ сво́й пра́веднѡ движи́мый на́ны, Гд҃ꙋ помоли́мсѧ.

Ꙍ҆ є҆́же не ꙗ҆́ростїю свое́ю ѡ҆бличи́ти, ни гнѣ́вомъ свои́мъ покаꙁни́ти на́съ: но помѧнꙋ́ти ꙗ҆́кѡ пло́ть є҆смы̀, дꙋ́хъ ѿходѧ́й, и҆ неѡбраща́ѧйсѧ, и҆ млⷭ҇тивнѡ пощади́ти ѿ см҃рти дш҃ѧ̀ на́шѧ: и҆ въ гнѣ́вѣ млⷭ҇ти помѧнꙋ́ти. Гд҃ꙋ помоли́мсѧ.

Ꙍ҆ є҆́же не внитѝ въ сꙋ́дъ съ рабы̀ свои́ми, и҆ ненаꙁрѣ́ти беꙁꙁако́нїѧ на́шѧ: но ѡ҆чи́стити ѧ҆̀, и҆ пощади́ти лю́ди ненача́емыѧ, Гд҃ꙋ помоли́мсѧ..

Ꙍ҆ є҆́же помѧнꙋ́ти щедрѡты̀ и҆ млⷭ҇ти своѧ̀, ꙗ҆́кѡ ѿ вѣ́ка сꙋ́ть: и҆ грѣ́хъ ю҆́ности и҆ невѣдѣ́нїѧ на́шегѡ, и҆ ста́рости ѡ҆каѧ́нства не помѧнꙋ́ти, и҆ пом҃ловати на́съ, Гд҃ꙋ помоли́мсѧ.

Ꙍ҆ є҆́же ᲂу҆слы́шати ѿ жили́ща ᲃт҃а́гѡ свое́гѡ гла́съ на́шъ, и҆ ᲂу҆толи́ти гро́ꙁный се́й Трꙋ́съ, ꙗ҆́кѡ да не пожре́тъ на́съ зе́мнаѧ про́пасть, Гд҃ꙋ помоли́мсѧ.

Ꙍ҆ є҆́же ско́рѡ ᲂу҆ставити пра́ведное своѐ, на́мъ же ᲃтра́шное трꙋ́са согѡ̀ преще́нїе, да не поѧ́сть на́съ зе́мнаѧ глꙋбина̀, и҆ не погꙋ́битъ на́съ въ беꙁꙁакѡ́нїихъ на́шихъ, Гд҃ꙋ помоли́мсѧ.

Ꙍ҆ є҆́же млⷭ҇тивнѡ продо́лжити рабѡ́мъ свои́мъ покаѧ́нїѧ вре́мѧ, и҆ не беꙁго́днѡ ꙗ҆́кѡ непло́днꙋю ᲃмоковни́цꙋ посѣщѝ: но бл҃госе́рдїемъ свои́мъ ѡ҆копа́ти, и҆ млⷭ҇рдїѧ гно́емъ ѡ҆сы́пати, плѡ́ды покаѧ́нїѧ и҆ ѡ҆браще́нїѧ на́шегѡ, чл҃кѡлю́бнѡ є҆щѐ ѡ҆жида́ѧ, Гд҃ꙋ помоли́мсѧ.

Застꙋпѝ, ᲃп҃сѝ: Прⷭ҇тꙋ́ю чⷭ҇тꙋю:

І҆ере́ѵ꙼ же воꙁглаша́етъ:

Ꙗ҆́кѡ подоба́етъ ти всѧ́каѧ сла́ва:

По се́мъ, Бг҃ъ Гд҃ь и҆ ꙗ҆ви́сѧ:

И҆ а҆́бїе пою́тъ Тропарѝ сі́ѧ, Гла́съ, в҃.

Въ гнѣ́вѣ твое́мъ Бж҃е помѧнѝ щедрѡты̀ твоѧ̀, пра́хъ бо и҆ пе́пелъ є҆смы̀, дх҃ъ ѿходѧ́й и҆ неѡбраща́ѧйсѧ: и҆ не ꙗ҆́ростїю твое́ю ѡ҆бличѝ на́съ, да не пожре́тъ на́съ зе́мнаѧ глꙋбина̀, и҆ до конца̀ поги́бнемъ: но пощадѝ дш҃ѧ̀ на́шѧ, ꙗ҆́кѡ є҆ди́нъ милосе́рдъ.

Сла́ва: Гла́съ то́ж:

Приꙁира́ѧй на́ землю и҆ творѧ́й ю҆̀ трѧсти́сѧ, и҆ꙁба́ви на́съ стра́шнагѡ преще́нїѧ Трꙋ́са Хє҃ Бж҃е на́шъ, да не поги́бнемъ лю́тѣ: но пощадѝ дш҃ѧ̀ на́шѧ, ꙗ҆́кѡ є҆ди́нъ млⷭ҇рдъ.

И҆ ны́нѣ:

Застꙋ́пнице хрⷭ҇тїѧнѡмъ непосты́днаѧ, ходота́йце:

Та́же ѱало́мъ, н҃. Поми́лꙋй мѧ̀ Бж҃е:

И҆ канѡ́нъ ᲃе́й Творе́нїе І҆ꙍ́сифово: Е҆мꙋ́же краегранесїе. Ꙍ҆ Хє҃ землѝ колеба́нїе, ᲂу҆стави въско́рѣ.

Пѣ́снь, а҃ Гла́съ, ѕ҃. И҆рмо́съ.

Ꙗ҆́кѡ посꙋ́хꙋ ходи́въ І҆и҃ль по бе́ꙁднѣ стопа́мъ:

Припѣ́лъ:

И҆ꙁба́ви на́съ стра́шнагѡ гнѣ́ва твое́гѡ Гд҃и, не погребѝ въ землѝ.

Кѡ́ль стра́шенъ гнѣ́въ тво́й, ѿ не́го же на́съ и҆ꙁба́ви Гд҃и: не погребѝ въ землѝ всѐ воста́нїе нш҃е, ꙗ҆́кѡ да бл҃года́рнѡ тѧ прⷭ҇нѡ ᲃла́вимъ.

Ра́дꙋѧйсѧ нш҃мꙋ вы́нꙋ, всесоверше́нномꙋ и҆справле́нїю Влады́ко, ꙗ҆́коже листъ хꙋ́дъ сотрѧсꙋ́еши всю̀ землю: въ стра́сѣ твое́мъ вѣ́рныхъ ᲂу҆тверждаѧ Гд҃и.

И҆ꙁба́ви трꙋ́са тѧ́жкагѡ всѣ́хъ на́съ, и҆ не да́ждъ Гд҃и поги́бнꙋти до конца̀, наслѣ́дїю твое́мꙋ, мнѡ́гими прогнѣва́ющомꙋ злы́ми тебѐ долготерпе́ливагѡ.

И҆ ны́нѣ: Бг҃оро́диченъ:

Ра́бски тебѣ̀ вопїемъ Мт҃и Бж҃іѧ: ѡ҆бы́чное млⷭ҇рдїе твоѐ, на гра́дъ и҆ лю́ди състрада́тел̾нѡ пока́ꙁꙋющи, трꙋ́са тѧжча́йшагѡ, и҆ тлѧ̀ на́съ свободѝ.

Катава́сїѧ.

Спасѝ ѿ бѣ́дъ рабы̀ своѧ̀ млⷭ҇тве:

и҆ Бг҃оро́диченъ:

И҆ꙁба́ви ѿ бѣ́дъ рабы̀ своѧ̀ Прест҃а́ѧ Бц҃е Дв҃о:

Пѣ́снь, в҃ И҆рмо́съ.

Ви́дите ви́дите ꙗ҆́кѡ:

Сътрѧсы́й приꙁрѣ́нїемъ си, всю̀ зе́млю всѣ́хъ Цр҃ю, въве́лъ є҆сѝ въ ᲃтра́хъ на́шѧ помышле́нїѧ: но ᲂу҆ста́ви Влады́ко ще́дрый гнѣ́въ сво́й, и҆ не да́ждъ въ всеконе́чнꙋю поги́бель твоѧ̀ лю́ди.

Ктѡ̀ ᲂу҆мл҃и́тъ тѧ̀, ѡ҆ люде́хъ раꙁли́чными стꙋ́да долгѝ прⷭ҇нѡ покрива́емыхъ, и҆ поги́бнꙋти ча́ющихъ твои́мъ гнѣ́вомъ: ѿ не́го же на́съ Хє҃ твои́мъ млⷭ҇рдїемъ и҆ꙁмѝ.

Сла́ва:

Ꙗ҆ви́лъ є҆сѝ стра́ха твое́гѡ ны́нѣ Хє҃ стра́шнаѧ, приꙁира́нїемъ свои́мъ сътрѧса́ѧ землѝ ѻ҆снова́нїѧ: но ѡ҆бы́чнѡ покажѝ па́ки млⷭ҇тве, млⷭ҇ть твою̀, да не поги́бнемъ лю́тѣ.

И҆ ны́нѣ: Бг҃оро́диченъ:

Ктѡ̀ кро́мѣ тебѐ мо́жетъ, Пречⷭ҇таѧ Чтⷭ҇аѧ, Бг҃а негодꙋ́ющагѡ на на́съ премѣни́ти: тѣ́мъ мл҃и́сѧ Прⷭ҇та́ѧ, ᲂу҆ста́ви ско́рѡ, колѣбле́нїе землѝ, погꙋби́ти на́съ хотѧ́щее.

Пѣ́снь, г҃ И҆рмо́съ.

Нѣ́сть ᲃт҃а ꙗ҆́коже ты:

Землѧ̀ ᲂу҆ѧꙁвлѧ́етсѧ, на́мъ злѣ̀ пребыва́ющимъ: и҆ прⷭ҇нѡ гнѣ́въ тво́й сподвиꙁа́ющимъ на́ ны, ще́дре всѣ́хъ Цр҃ю: но пощадѝ Влады́ко рабы̀ твоѧ̀.

Сътрѧ́сꙋѧй Гд҃и зе́млю, ᲂу҆твердѝ ю҆̀ па́ки: и҆бѡ̀ къ ѡ҆браще́нїю не́мощъ на́шꙋ нака́ꙁꙋеши, въ Бжⷭ҇твенномъ си стра́сѣ хотѧ̀ на́съ ᲂу҆тверждати, ꙗ҆́кѡ пребл҃гі́й.

Сла́ва:

Ражда́ющихъ го́ркꙋю см҃рть, и҆ трꙋ́сы тѧжча́йшїа, и҆ ꙗ҆́ꙁвы нестерпи́мыѧ, грѣхѡ́въ бра́тїе ᲂу҆бѣжи́м, и҆ Бг҃а покаѧ́нїа ѻ҆́браꙁы млⷭ҇тва сотво́римъ.

И҆ ны́нѣ:

Е҆дина̀ сꙋ́щаѧ бл҃га́ѧ, пребл҃го́е ᲃло́во приле́жнѡ ᲂу҆молѝ, нꙋ́жды настоѧ́щагѡ трꙋ́са, и҆ гнѣ́ва и҆ꙁба́вити всѣ́хъ: Бц҃е чⷭ҇таѧ моли́мсѧ.

По Катава́сїѧхъ же гл҃етъ Дїа́конъ Е҆кте́нїѧ сі́ѧ.

Пом҃лꙋй на́съ Бж҃е по вели́цѣй млⷭ҇ти твое́й, моли́мтисѧ ᲂу҆слы́ши и҆ пом҃лꙋй.

Ли́къ:

Гд҃и поми́лꙋй, гⷤ.

Согрѣши́хѡмъ, и҆ беꙁꙁаконова́хѡмъ, сегѡ̀ ра́ди пра́ведный тво́й гнѣ́въ пости́же на́съ Гд҃и Бж҃е, и҆ стра́хъ ᲃм҃ртный ѡ҆бы́йде на́съ, и҆ къ а҆́довымъ вра́тѡмъ приближи́хѡмсѧ: но къ тебѣ̀ Бг҃ꙋ на́шемꙋ въ стра́шной се́й бѣдѣ̀ на́шей ᲂу҆миле́ннѡ вопїемъ: пощадѝ, пощадѝ лю́ди твоѧ̀ Влады́ко, и не до конца̀ погꙋбѝ, смѣре́ннѡ моли́мтисѧ, ско́рѡ ᲂу҆слыши, и҆ млⷭ҇тивнѡ пом҃лꙋй.

Живото́мъ и҆ см҃ртїю Владычствꙋ́ѧй Гд҃и, не затворѝ въ см҃рти дш҃ѧ̀ на́шѧ: но преста́ни ѿ гнѣ́ва и҆ ѿста́ви ꙗ҆́рость, занѐ ѿ стра́ха гро́ꙁнагѡ преще́нїѧ твое́гѡ, и҆щеꙁа́ютъ ꙗ҆́кѡ ды́мъ да не до конца̀ поги́бнемъ грѣ́хъ ра́ди на́шихъ: съ слеꙁа́ми въ покаѧ́нїи моли́мтисѧ, ᲂу҆слыши въско́рѣ, и҆ бл҃гоꙋтробнѡ пом҃лꙋй.

Па́че всѣ́хъ съгрѣши́хѡмъ ти, но предложе́нїе на́ше вмѣ́сто покаѧ́нїѧ прїймѝ, и҆ на млⷭ҇ть прело́жсѧ, гро́ꙁнагѡ ᲃегѡ̀ преще́нїѧ, и҆ ча́емыѧ напра́сныѧ поги́бели, ꙗ҆́кѡ чл҃кѡлю́бецъ свободѝ рабы̀ своѧ̀, въ се́рдци сокрꙋше́нномъ мл҃и́мтисѧ ᲂу҆слы́ши, и҆ ско́рѡ пом҃лꙋй.

Приꙁира́ѧй на́ землю, и҆ творѧ́й ю҆̀ трѧсти́сѧ, не помѧнѝ беꙁꙁакѡ́нїй и҆ непра́вдъ люді́й твои́хъ, и҆́хже ра́ди гро́ꙁнѡ колѣ́блеши ѿ ѡ҆снова́нїѧ зе́мли: но млⷭ҇рдїѧ ра́ди щедрѡ́тъ, млⷭ҇тивнѡ при́ꙁри на́ ны, пре́жде да́же не ѿверꙁстѝ землѝ ᲂу҆ста̀ твоѧ̀ и҆ пожрѣ́ти на́съ: преста́ни ѿ гнѣ́ва и҆ ᲂу҆ста́ви стра́шное си преще́нїе, се́ бо ѿ стра́ха ꙗ҆́рости твое́ѧ ꙗ҆́кѡ ли́ствїе колѣ́блемсѧ, и҆ ꙗ҆́кѡ трава̀ и҆ꙁсыха́ємъ: въ стра́сѣ и҆ тре́петѣ пре́дъ тобо́ю припада́юще, сълеꙁа́ми мл҃и́мсѧ, ско́рѡ ᲂу҆слы́ши, и҆ чл҃кѡлю́бно пом҃лꙋй.

І҆ере́ѵ꙼ же воꙁглаш:

Ꙋ҆слы́ши ны Бж҃е спс:

Сѣда́ленъ Гла́съ ѕ҃. Подо́бенъ: Е҆же ѡ҆ на́съ:

Пощадѝ, пощадѝ Гд҃и съгрѣшшїѧ, ꙗ҆́же ᲃтѧжа́лъ є҆сѝ чⷭ҇тною си Кро́вїю: и҆ не преда́ждъ въ поги́бель ᲃтра́шномꙋ семꙋ̀ трꙋ́са проще́нїю: но млⷭ҇тїю си и҆ чл҃кѡлю́бїемъ побежда́емъ, ꙗ҆́кѡ ще́дръ пре́ꙁри на́шѧ сгрѣше́нїѧ, и҆́миже твою̀ блгⷭ҇ть прогнѣва́хомъ, и҆ Мл҃твами Бц҃а ско́рѡ и҆ꙁба́ви на́съ ѿ па́гꙋбныѧ сеѧ̀ бѣды̀: раꙁвѣ бо тебѐ и҆́нагѡ Бо́га не зна́емъ.

Пѣ́снь, д҃ И҆рмо́съ.

Хᲃ҃ мнѣ̀ ᲃи́ла Бг҃ъ и Гд҃ъ:

Колѣ́блеши Гд҃и зе́млю, хотѧ̀ ᲃтра́хомъ и҆́стиннымъ, всѣ́мъ на́мъ Влады́ко ᲂу҆твержда́тисѧ: колѣбле́мымъ прираже́нми л̾сти́вагѡ бо́рца.

Бжⷭ҇тве́ннымъ ти манове́нїемъ, дви́жеши всѧ́ческаѧ: и҆ стра́хомъ подвиꙁа́еши се́рдца, на землѝ живꙋ́щимъ Влады́ко: но праведнагѡ твое́гѡ гнѣ́ва ᲂу҆ста́ви Гд҃и во́лны.

Сла́ва:

Ни́же ѿню́дъ и҆мꙋ́щимъ въ ᲂу҆мѣ̀ ᲃтра́хъ тво́й, ᲂу҆страша́еши ᲃе́рдца колѣба́нїемъ зе́мнымъ, є҆ди́не бл҃гоꙋтро́бне: но ѡ҆бы́чнѡ на на́съ ми́лость твою̀ ᲂу҆дивѝ.

И҆ ны́нѣ: Бг҃оро́диченъ:

Хра́мъ тѧ Влады́чце, Бж҃їй вѣдꙋ́ще: въ ᲃт҃ѣ́мъ хра́мѣ твое́мъ, рꙋ́цѣ ᲂу҆ми́лнѡ въꙁдвиꙁа́емъ на Мл҃твꙋ: ви́ждъ ᲂу҆́бѡ ѡ҆ꙁлобле́нїе на́ше и҆ пода́ждъ по́мощъ.

Пѣ́снь, є҃ И҆рмо́съ.

Бж҃іимъ свѣ́томъ ти блж:

И҆ ты се́рдце сътрѧси́сѧ ны́нѣ, зрѧ̀ Бж҃і́е преще́нїе надлежа́щее, и҆ воꙁопі́й: пощадѝ лю́ди твоѧ̀ Влады́ко Гд҃и: и҆ преста́ти ᲃътворѝ пра́ведномꙋ твое́мꙋ гнѣ́вꙋ, бл҃гоꙋтро́бне.

Лю́ди и҆ гра́дъ, и҆́же стѧжа́лъ є҆сѝ свое́ю Кро́вїю І҆и҃се, не преда́ждъ въ поги́белъ: внегда̀ смꙋща́еши зе́млю трꙋ́сомъ ᲃтра́шнымъ, Ли́къ А҆пⷭ҇лскїй мо́литъ тѧ.

Сла́ва:

Ѿ пꙋ́тїй твои́хъ Влады́ко пра́выхъ, мы́слїю ᲂу҆кло́ншесѧ раꙁвраще́нною, въ негодова́нїе ѡ҆браща́емъ тѧ млⷭ҇тивагѡ, и҆ непамѧтоꙁло́бнагѡ, но млⷭ҇тивъ и҆ ще́дръ, бꙋ́ди рабѡ́мъ твои́мъ.

И҆ ны́нѣ:

Ны́нѣ по́мощи вре́мѧ: ны́нѣ примире́нїѧ потре́ба чⷭ҇таѧ, къ ᲃн҃ꙋ твое́мꙋ и҆ Гд҃ꙋ: ꙗ҆́кѡ да прираꙁи́вшихсѧ є҆мꙋ̀ на́съ, надлежа́щагѡ гнѣ́ва и҆ꙁба́витъ.

Пѣ́снь, ѕ҃ И҆рмо́съ.

Жите́йскагѡ мо́рѧ:

Не имꙋ́ще Влады́ко дерꙁнове́нїѧ смире́ннїи, высотꙋ̀ твою̀ ᲂу҆мл҃и́ти, и҆ꙁбра́нныѧ твоѧ̀ А҆́гг҃лы на те́плꙋю дви́жемъ мл҃бꙋ: тѣ́хъ ра́ди гнѣ́ва твое́гѡ и҆ꙁмѝ на́съ.

Ны́нѣ поꙁна́емъ Гд҃и, ꙗ҆́кѡ ми́лꙋеши ᲃоꙁда́нїе своѐ, а҆́ще въ землѝ не съкры́еши на́съ, прегрѣше́нїи мнѡ́гими тебѐ прогнѣва́вшихъ: но пощадѝ на́съ Хє҃, ꙗ҆́кѡ да бл҃года́рнѡ тѧ сла́вимъ.

Сла́ва:

Повелѣва́еши колѣба́тисѧ ѡ҆снова́нїѧмъ землѝ, ꙗ҆́кѡ да мы преста́немъ смѣре́ннїи колѣба́тисѧ ѿ добродѣ́телїй лꙋ́чшагѡ стоѧ́нїѧ, стра́хомъ твои́мъ ᲃло́ве ᲂу҆твержда́емъ.

И҆ ны́нѣ:

Ст҃а́ѧ Бг҃невѣ́сто, недоꙋмѣва́ющїѧсѧ твоѧ̀ лю́ди, ны́нѣ ᲂу҆щедрѝ: и҆ Мтр҃ними мл҃бами, є҆́же на́ ны Бж҃іе негодова́нїе претворѝ воско́рѣ, мл҃имъ тѧ.

По Катава́сїѧхъ же, Конда́къ Гла́съ, є҃.

Приꙁира́ѧй на́ землю, и҆ грѣ́хъ ра́ди на́шыхъ творѧ́й ю҆̀ трѧсти́сѧ, помѧнѝ щедрѡты̀, и҆ млⷭ҇ти твоѧ̀ ѿ вѣ́ка сꙋ́щїѧ, и҆ преложи́сѧ на млⷭ҇ть, и҆ ᲂу҆ста́ви стра́шное трꙋ́са преще́нїе, да не пожре́тъ на́съ немлⷭ҇тивнѡ зе́мнаѧ глꙋбина̀: и҆ ꙗ҆́кѡ млⷭ҇тивъ пощадѝ, пощадѝ щедре люди ѿчаѧ́нныѧ.

І҆ко́съ.

Стра́хъ ве́лїй ꙗ҆́кѡ тма̀ ѡ҆быйде на́съ Влады́ко чл҃кѡлю́бче и҆ тре́петъ нестерпи́мый вни́де въ кѡ́сти на́шѧ, и҆ ᲂу҆жа́съ недоꙋмѣ́нный ѡ҆бдержи́тъ се́рдце на́ше, ѿ лица̀ гнѣ́ва твое́гѡ непостоѧ́ннагѡ, и҆ ꙗ҆́рости твое́ѧ нестерпи́мыѧ: при́ꙁрѣлъ бо є҆сѝ Гд҃и негодова́нїемъ грѣ́хъ ра́ди на́шихъ на́ землю, и҆ се ꙗ҆́кѡ ли́стъ хꙋды́й трѧсе́тсѧ, и҆ поги́белїю прѣти́тъ на́мъ: но Гд҃и, Гд҃и ще́дрый и҆ млⷭ҇тивый, пощадѝ лю́ди ᲃъгрѣ́шшїѧ, и҆ до́ндеже не присы́плетъ на́съ жи́выхъ зе́мнаѧ пе́рсть, и҆ не пожре́тъ на́съ глꙋбина̀, ᲂу҆ста́ви гро́ꙁное сі́е зе́мное колѣбле́нїе, и҆ не погꙋбѝ на́съ съ беꙁꙁакѡ́н̾ми на́шими, но щедрѡта́ми твои́ми прекло́н̾сѧ на ми́лость, ꙗ҆́кѡ бл҃госе́рдъ поми́лꙋй лю́ди ѿчаѧ́нныѧ.

Пѣ́снь, з҃ И҆рмо́съ.

Росода́вицꙋ ᲂу҆́бѡ пе́щъ:

Препѣ́тый Гд҃и долготерпели́ве, не ᲂу҆морѝ на́съ рабѡ́въ твои́хъ распаде́нїемъ, и҆ Трꙋ́сомъ стра́шнымъ землѧ̀: но ѿста́ви стра́хъ се́й ᲃко́роѡ, и҆ ѿ злы́хъ ѡ҆братѝ, и҆ пощадѝ всѣ́хъ на́съ.

Стена́нїе ѿ се́рдца и҆спꙋ́стимъ, и҆ ᲃле́ꙁы пролі́емъ, ꙗ҆́кѡ да млⷭ҇тва Влады́кꙋ, и҆мѣ́емъ Ха҃, съкрꙋши́ти хотѧ́щагѡ трꙋ́сомъ всѣ́хъ на́съ: ᲂу҆множе́нїѧ ра́ди грѣхѡ́въ, съвы́шше прѣтѧ́ща лю́тѣ.

Ꙋ҆вы̀ воꙁꙁѡвѣ́мъ, и҆ рꙋ́цѣ воꙁдежи́мъ къ Бг҃ꙋ вы́шнемꙋ, и҆ престанѣ́мъ про́чее твори́ти лꙋка́ваѧ: ᲃе ᲃп҃съ негодꙋ́ѧ, колѣ́блетъ всю зе́млю, ᲂу҆тверди́ти хотѧ̀ на́съ.

Бг҃оро́диченъ:

Пода́ждъ Прчⷭ҇таѧ ᲃп҃се́нїе мл҃твами си, ги́бнꙋти и҆мꙋ́щимъ гнѣ́вомъ Бж҃іимъ, и҆ ꙗ҆́ростїю вели́кою и҆ стра́шною, ны́нѣ наше́дшагѡ преще́нїѧ, мнѡ́жества ра́ди мнѡ́гихъ съгрѣше́нїй на́шихъ.

Пѣ́снь, и҃ И҆рмо́съ.

И҆ꙁ пла́мени ᲃт҃ы́мъ:

Пра́ведномꙋ семꙋ̀ гнѣ́вꙋ чл҃кѡлю́бче, наше́дшꙋ внеꙁаа́пꙋ, смꙋти́хѡмсѧ, и҆ ѿчаѧ́нїемъ всеконе́чнымъ ᲃъдержи́ми є҆смы̀, негодꙋ́юща тѧ зрѧ́ще ще́дре на на́съ.

Воꙁдежди́мъ рꙋ́цѣ вѣ́рнїи, и҆ ѻ҆́чи къ є҆ди́номꙋ Влады́цѣ, ᲃпⷭ҇тѝ могꙋ́щемꙋ, зовꙋ́ще: Хє҃ ꙗ҆́рость твою̀ ѿвратѝ ѿ на́съ воско́рѣ, ꙗ҆́кѡ чл҃кѡлю́бецъ.

Ти́сѧщи А҆́гг҃лѡвъ, Мч҃никъ съсло́вїе, Прⷪ҇ро́къ и҆ А҆пⷭ҇лъ, преподо́бныхъ и҆ Ст҃и́телїй, ᲃт҃ы́й Ли́къ мл҃и́тъ тѧ Влады́ко: пощадѝ лю́ди твоѧ̀ смире́нныѧ.

Вѣды́й ще́дре неможе́нїе на́ше, и҆ ᲂу҆до́бъ пополꙁнове́нїе всѧ́кѡ, и҆ неисправле́ное, ѡ҆сла́би гнѣ́въ, и҆ смꙋще́нїе ᲂу҆толѝ, и҆ твое́ю ми́лостїю ᲂу҆щедрѝ мі́ръ.

Бг҃оро́диченъ:

Млⷭ҇тиваѧ Бц҃е, бл҃госе́рдагѡ ро́ждшаѧ ᲃп҃са, ви́ждъ ѡ҆ꙁлобле́нїе, и҆ воꙁдыха́нїе люді́й твои́хъ: и҆ ᲂу҆скорѝ тогѡ̀ ᲂу҆м҃ли́ти, є҆́же ᲂу҆щедри́ти на́съ.

Пѣ́снь, ѳ҃ И҆рмо́съ.

Бг҃а чл҃кѡмъ неꙋдо́бъ:

Се всѝ мы съгрѣши́хѡмъ, и҆ стра́шнѡ ᲂу҆́бѡ землѧ̀, ничто́же ᲃъгрѣши́вшаѧ мꙋ́читсѧ: нака́ꙁꙋѧ бо на́съ чл҃кѡлю́бецъ, всю̀ ᲃі́ю колѣ́блетъ: прїймѣ́мъ ᲂу҆́бѡ чꙋ́вство, и́ ѡ҆ ᲃпⷭ҇нїи свое́мъ попецѣ́мсѧ.

Ча́совѡмъ и҆ лѣ́тѡмъ сы́й Гд҃ь, въ мгнове́нїи ѻ҆́ка хотѧ́й сътри́ти рабы̀ своѧ̀: на мнѡ́гимъ ти бл҃госе́рдїемъ воꙁбране́нъ бꙋ́ди: мл҃и́мъ тѧ мы беꙁъѿвѣ́тнїи, є҆ди́не чл҃кѡлю́бче.

Ѿ трꙋ́са и҆ меча̀ го́ркагѡ ᲂу҆бие́нїѧ, и҆ ꙗ҆ꙁы́ческагѡ Хє҃ наше́ствїѧ, и҆ нападе́нїѧ, ѿ гла́да и҆ гꙋби́тел̾ства, и҆ ѡ҆ꙁлобле́нїѧ всѧ́кагѡ и҆́нагѡ ще́дре, и҆ꙁба́ви лю́ди своѧ̀, и҆ всѧ́кꙋю ᲃтра́нꙋ пѣснословѧ́щꙋю тѧ.

Сла́ва:

Землѧ̀ беꙁъꙗꙁы́чнѣ вопїе́тъ стенѧ́щи: что́ мѧ̀ злы́ми мнѡ́гими ѡ҆сквернѧ́ете всѝ чл҃ци; и҆ ва́съ Влады́ка щадѧ̀, менѐ то́кмѡ самꙋ́ю ᲂу҆ѧꙁвлѧ́етъ: прїймѣ́те чꙋ́вство, и҆ покаѧ́нїемъ Бг҃а ᲂу҆милостиви́те.

И҆ ны́нѣ: Бг҃оро́диченъ:

Тлѧ въ Рождествѣ̀ не претерпѣ́вшаѧ, всѧ́кагѡ тлѣ́нїѧ Дв҃о и҆ꙁмѝ на́съ всѣ́хъ, и҆ трꙋ́са зѣ́лѡ тѧжча́йшагѡ, и҆ печа́ли, ᲂутолѧ́ющи Влады́чнее негодова́нїе, твои́ми Мт҃рними примире́нїи, Бг҃орадова́ннаѧ.

По Катава́сїѧхъ же, а҆́бїе пою́тъ Стіхи́ры ᲃі́ѧ, ѡ҆ и҆ꙁбавле́нїи Трꙋ́са, Гла́съ, а҃.

Подо́бенъ:

Нбⷭ҇нымъ чи́нѡмъ:

Ꙍ҆снова́нїѧ всеѧ̀ землѧ̀ подвиꙁа́ѧй Бж҃е: сътрѧ́сꙋѧй є҆ди́нъ мо́рское ло́же ꙗ҆́кѡ соꙁда́тель всѣ́х: и҆ꙁба́ви на́съ стра́шнагѡ трꙋ́са преще́нїѧ, свои́мъ си бл҃госе́рдїемъ прⷭ҇нѡ ᲂу҆м҃лѧ́емъ, чл҃кѡлю́бче.

Гла́съ, в҃. Сті́хъ:

Приꙁира́ѧй на́ землю, и҆ творѧ́й трѧсти́сѧ.

Землѝ смꙋща́емѣй гнѣ́ва твое́гѡ стра́хомъ: хѡ́лми и҆ гѡ́ры трѧсꙋ́тсѧ Гд҃и: но ты бл҃гоꙋтро́бїѧ ѻ҆́комъ, на на́съ при́ꙁрѣвъ, не ꙗ҆́ростїю твое́ю прогнѣва́йсѧ на́ ны: но ᲂу҆млⷭ҇рди́всѧ на дѣ́ла рꙋ́къ твои́хъ, стра́шнагѡ трꙋ́са преще́нїѧ свободѝ, ꙗ҆́кѡ бл҃гъ и҆ чл҃кѡлю́бецъ.

Гла́съ, ѕ҃. Сті́хъ.

Сотрѧ́слъ є҆сѝ зе́млю, и҆ смꙋти́лъ є҆сѝ ю҆̀.

Неневитѧ́не съгрѣше́нїй ра́ди, трꙋ́снымъ преще́нїемъ поги́белное паде́нїе слы́шахꙋ, въ ходотайстве́нномъ же зна́менїи Кѵ́та, І҆ѡ́ны воста́нїе, покаѧ́нїе ᲂу҆мл҃ѝ: но ꙗ҆́коже ѡ҆́нѣхъ люді́й твои́хъ во́пль, съ младе́нцы и҆ скѡ́ты, ᲂу҆щедри́въ приѧ́лъ є҆сѝ: и҆ на́съ каꙁни́мыхъ, тридне́внагѡ ра́ди Воскрⷭ҇нїѧ, пощадѝ и҆ пом҃лꙋй.

Сті́хъ.

Гд҃и не ꙗ҆ростїю твое́ю ѡ҆бличѝ на́съ, ни гнѣ́вомъ твои́мъ покажѝ на́съ.

Стра́шенъ є҆сѝ Гд҃и, и҆ ктѡ̀ стерпи́тъ пра́веднагѡ твое́гѡ гнѣ́ва: и҆лѝ ктѡ̀ тебѐ ᲂу҆мл҃и́тъ, и҆лѝ ктѡ̀ ᲂу҆кроти́тъ бл҃гі́й, ѡ҆ лю́дехъ согрѣ́шшихъ, и҆ ѿчаѧ́вшихсѧ; нбⷭ҇ныи то́чїю чи́нѡве, А҆́гг҃ели, Нача́ла, и҆ Вла́сти, Прⷭ҇то́ли, и҆ Гдⷭ҇твїѧ, Херꙋві́ми, и҆ Серафі́ми, ѡ҆ на́съ тебѣ̀ вопїю́щїи: Ст҃ъ, Ст҃ъ, Ст҃ъ є҆сѝ Гд҃и, дѣ́ла рꙋ́кꙋ твое́ю не пре́ꙁри бл҃же, но бл҃гоꙋтро́бїѧ ра́ди щедрѡ́тъ: ᲃпасѝ гра́дъ бѣдствꙋ́ющїй.

Сла́ва: И҆ ны́нѣ: Гла́съ, ѕ҃.

Нбⷭ҇ный Цр҃ю, чл҃кѡлю́бче Гд҃и, долготерпе́ливе и҆ многѡмлⷭ҇тве, при́ꙁри ѿ ст҃а́гѡ жи́лища твое́гѡ, ви́ждъ ᲃмире́нїе, ви́ждъ и҆ ѡ҆ꙁлобле́нїе на́ше, и҆ не ꙗ҆́ростїю твое́ю ѻ҆бличѝ на́съ, ни́ же гнѣ́вомъ твои́мъ покажѝ на́съ: и҆ не преда́ждъ на́съ зе́мномꙋ поже́ртїю, ни ꙗ҆ꙁы́ческомꙋ наше́ствїю, ни ва́рварскимъ рꙋка́мъ, ни глꙋбинѣ̀ въ поглоще́нїе: да не когда̀ рекꙋ́тъ ꙗ҆ꙁы́ци, где є҆́стъ Бг҃ъ и҆́хъ; мы́ же лю́дїе твоѝ, и҆ ѻ҆́вцѧ па́жити твое́ѧ, и҆ и҆мѧ̀ твоѐ приꙁыва́емъ: и҆ма́ши же на сі́е прекланѧ́ющꙋю тѧ є҆стⷭ҇тве́ннꙋю свою̀ блгⷭ҇ть, є҆ю́же покры́й гра́дъ се́й: и҆ма́ши же и҆ мл҃ѧ́щꙋю тѧ Бц҃ꙋ, тебѐ рождшꙋю ᲃло́ве, ли́къ А҆пⷭ҇лскїй, и҆ мнѡ́жество Мч҃никъ и҆ Преподо́бныхъ: прїймѝ ᲂу҆́бѡ мѡ́л̾бы ѡ҆ лю́дехъ согрѣ́шшихъ и҆ ѿчаѧ́нных, и҆ спасѝ неꙁлоби́ве достоѧ́нїе твоѐ.

По си́хъ же а҆́бїе пою́тъ Досто́йнѡ є҆́стъ: И҆ чте́тъ Тртⷭ҇ое: по Ѿч҃е на́шъ: Поют Троп: Гла́съ ѕ҃. Пом҃лꙋй на́съ Гд҃и, пом:

Сла́ва:

Гд҃и поми́лꙋй:

И҆ ны́нѣ:

Млⷭ҇рдїѧ две́ри ѿвер:

Таже Дїа́конꙋ воꙁгласи́вшꙋ:

Съ ᲂу҆миле́нї҆мъ всѝ, въ ᲃе́рдци сокрꙋше́нномъ колѣ́нѣ прекло́нше съ слеꙁа́ми, Гд҃ꙋ помоли́мсѧ.

І҆ере́ѵ꙼ же съ всѣ́ми колѣ́нѣ преклон̾, съ бл҃гоговѣ́нїемъ и҆ всѧ́кимъ ᲂу҆миле́нїемъ, а҆́ще же воꙁмо́жнѡ и҆ съ слеꙁа́ми чте́тъ Мл҃твы ᲃі́ѧ.

Бж҃е вели́кїй и҆ стра́шный и҆ ди́вный: вели́кїй и҆ и҆стинный, творѧ́й всѧ̀ и҆ претворѧ́й: приꙁира́ѧй на́ землю, и҆ творѧ́й ю҆̀ трѧсти́сѧ: прикаса́ѧйсѧ гѡра́мъ и҆ ды́мѧтсѧ: сътрѧ́сꙋѧй поднебе́сное ѿ ѡ҆снова́нїй, и҆ ᲃтолпы̀ є҆ѧ̀ не дви́жꙋтсѧ, ѡ҆снова́нїѧ зе́мнаѧ подвиꙁа́ѧй, и҆ сі́ѧ ᲂу҆твержда́ѧй свои́мъ ма́нїемъ: є҆го́же всѧ̀ боѧ́тсѧ, и҆ трепе́щꙋтъ ѿ лица̀ ᲃи́лы твое́ѧ: ꙗ҆́кѡ непостоѧ́ненъ є҆́стъ гнѣ́въ и҆́же на на́съ грѣ́шных преще́нїѧ твое́гѡ, не и҆щетъ на́съ же и҆ неиꙁслѣдова́нна млⷭ҇ть ѡ҆бѣща́нїѧ твое́гѡ: ты ᲃа́мъ помѧнѝ щедро́ты твоѧ̀ Гд҃и, и҆ млⷭ҇ти твоѧ̀ да́ждъ на́мъ, ꙗ҆́кѡ ѿ вѣ́ка сꙋ́тъ: ᲂу҆твердѝ тва́рь, ᲂу҆крѣпѝ зе́млю, ᲂу҆ставѝ колѣбле́нїе є҆ѧ̀, ᲂу҆твердѝ поколѣба́вшꙋюсѧ вселе́ннꙋю, и҆ не погꙋбѝ на́съ съ беꙁꙁако́н̾ми на́шими, ни́же ѡ҆сꙋдѝ на́съ съ греха́ми на́шими въ преиспо́днѧѧ землѝ, ꙗ҆́кѡ ты́ є҆сѝ Бг҃ъ на́шъ, Бг҃ъ є҆́же ми́лова́ти и҆ сп҃са́ти, и҆ тебѣ̀ сла́вꙋ воꙁсыла́емъ, Ѻ҆ц҃ꙋ̀, и҆ ᲃн҃ꙋ и҆ ст҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡ́въ, А҆ми́нь.

Цр҃ю ᲃт҃ы́й чл҃кѡлю́бче Бж҃е Цр҃ю долготерпе́ливе Гд҃и, всѧ́кїѧ чꙋвстве́нныѧ и҆ ᲂу҆́мныѧ тва́ри содѣ́телю: всѧ́ческаѧ носѧ́й гл҃о́мъ неиꙁрече́нныѧ ᲃи́лы твое́ѧ, и҆ є҆ди́нъ и҆мѣ́ѧй животꙋ̀ и҆ см҃рти вла́стъ: нака́ꙁꙋѧй пра́веднѣ, и҆ чл҃кѡлю́бнѣ па́че ми́лꙋѧй: вре́менный на́шъ живо́тъ всемꙋ́дрымъ свои́мъ про́мысломъ ѡ҆кормлѧ́ѧй, и҆ ѿвсю́дꙋ спⷭ҇нїѧ нш҃его лѣ́та ᲂу҆страѧ́ѧй.

Вѣ́мы ꙗ҆́кѡ мнѡ́гихъ злы́хъ на́шихъ грѣхѡ́въ колѣ́блеши зе́млю, и҆ трѧсе́ши ю҆̀, и҆ ᲃтра́хъ и҆ ᲂу҆жа́съ прі́йде на́ ны ѿ лица̀ гнѣ́ва твое́гѡ долготерпе́ливе: ᲃе́рдце на́ше смꙋти́сѧ ᲂу҆ѧꙁвлѧ́емѣй то́й, и҆ бо́ѧꙁнь см҃ртнаѧ нападѐ на́ ны, се́й колѣ́блемѣй, да некогда̀ похити́тъ ꙗ҆́кѡ ле́въ дш҃а на́ша, и҆ нѣ́стъ и҆ꙁбавлѧ́ѧй: да некогда̀ поглотитъ на́съ, и҆ тлѧ̀ на́съ покры́етъ, не сꙋ́щꙋ и҆ꙁбавлѧ́ющꙋ ни́же сп҃са́ющꙋ: сего ра́ди тебѣ́ сѧ ми́ли дѣє́мъ, и҆ тебѐ моли́мъ є҆ди́нагѡ беꙁꙁлоби́вагѡ Бг҃а, не помѧнѝ на́шихъ беꙁꙁакѡ́нїй пе́рвыхъ, и҆ ны́нѣ бы́вшихъ: ни́ же воꙁмѣ́ри тѧ́жестъ грѣхѡ́въ на́шихъ подо́бномꙋ воꙁдаѧ́нїю: а҆́ще бо вни́деши въ сꙋ́дъ съ ро́домъ нш҃имъ си́мъ, никто́же пре́дъ тобо́ю ѡ҆правди́тсѧ, но поги́бнетъ всѧ́чески ѿ землѧ̀ всѣ́хъ на́съ па́мѧтъ.

Помѧнѝ долготерпе́ливе ѿ вѣ́ка сꙋ́щїѧ щедрѡты̀ твоѧ̀, и҆ млⷭ҇ти твоѧ̀, и҆ и҆́же къ ѿце́мъ на́шимъ и҆́стинный завѣ́тъ тво́й, и да не поглоти́тъ на́съ глꙋбина̀ зе́мнаѧ, ни да пожрꙋ́тъ на́съ ᲂу҆ста̀ є҆ѧ̀: но ᲂу҆щедрѝ на́съ сокрꙋше́нныхъ, и҆ пом҃лꙋй смире́нных: и҆ ѿ стра́шнагѡ преще́нїѧ трꙋ́са и҆ ᲃмꙋще́нїѧ, стра́хомъ мнѡ́гимъ и҆ тре́петомъ ѡ҆держи́мыхъ посѣтѝ.

А҆́ще ли где и҆ нѣ́цїи сꙋ́тъ посре́дѣ на́съ боѧ́щїисѧ и҆́мени твое́гѡ, и҆ хранѧ́щїи твоѧ̀ повелѣ́нїѧ, ма́ла нѣ́каѧ и҆ꙁбра́ннаѧ ча́сть, ᲃѣ́мѧ блⷭ҇ве́нно, сокро́вище ᲃокрове́нно, тебѣ̀ є҆ди́номꙋ вѣ́домо и҆ соблюда́емо, тѣ́хъ ꙗ҆́кѡ бл҃гъ ᲂу҆слы́ши ѡ҆ на́съ недосто́йныхъ, благодетел̾ства ра́ди млⷭ҇ти твое́ѧ: прїймѝ си́хъ мл҃е́нїѧ ѡ҆ лю́дехъ согрѣ́шшихъ, приноси́маѧ тебѣ̀ чл҃кѡлю́бче Влады́ко, ꙗ҆́коже А҆враа́ма ѡ҆ Содомлѧ́нехъ, ꙗ҆́коже Данїи́ла, и҆ Е҆ремі́ю Бж҃естве́нныѧ твоѧ̀ Прⷪ҇рки, ѡ҆ І҆и҃ли въ плѣне́нїи твою̀ ᲂу҆моли́вшихъ блгⷭ҇ты́ню, ꙗ҆́кѡ да ѿ ро́да въ ро́дъ сла́витсѧ твое́гѡ чл҃кѡлю́бїѧ пꙋчи́на неиꙁслѣдова́ннаѧ: и҆ ꙗ҆́кѡ да и҆ мы̀ принесе́мъ ти да́ръ благода́рстве́нный на́шегѡ ѡ҆браще́нїѧ и҆ покаѧ́нїѧ, держа́вною ти рꙋко́ю ᲂу҆крѣплѧ́еми: Мл҃тва́ми, и҆ моле́нїемъ Прчⷭ҇тыѧ твое́ѧ Мт҃ре, и҆ всѣ́хъ ѿ вѣ́ка ᲃт҃ы́хъ ᲂу҆годи́вшихъ ти, А҆ми́нь.

Влады́ко Гд҃и І҆и҃с Хє҃ Бж҃е на́шъ, щедрѡ́тъ неисчерпа́емый и҆сто́чниче, чл҃кѡлю́бїѧ неиꙁслѣди́маѧ пꙋчи́нѡ, неискꙋси́маѧ бе́ꙁднѡ щедрѡ́тъ, и҆ бл҃гости, и҆́же по ро́дꙋ находѧ́щаѧ ро́дꙋ члчⷭ҇комꙋ, ра́ны же и҆ ка́ꙁни, и҆ по́леꙁнѡ ра́ди чл҃кѡлю́бїѧ беꙁмѣ́рнагѡ наноси́ши, ꙗ҆́кѡ да є҆́же къ грѣхꙋ̀ на́ше не ᲂу҆держа́нное и҆ скоропрело́жное, ꙗ҆́коже нѣ́коей ᲂу҆ꙁдо́ю Бжⷭ҇тве́ннымъ ти съдержи́ши стра́хомъ, ꙗ҆́кѡ да не беꙁчиннѡ дви́жетсѧ на Бжⷭ҇твенный ѻ҆́браꙁъ, ни дш҃евномꙋ бл҃горо́дїю злѣ досажда́етъ.

Ꙋ҆ста́ви мл҃и́мсѧ ᲃтра́шное землѝ колѣбле́нїе, и҆ не ѡ҆бы́чное сеѧ̀ движе́нїе, є҆́же ны́нѣ пра́веднѡ съпроти́въ на́мъ двиꙁа́тисѧ сі́ю сотвори́лъ є҆сѝ, во воспомина́нїе є҆́же къ всѧ́комꙋ грѣхꙋ̀ чре́ꙁъ є҆стестве́нное на́ше ᲂу҆стремле́нїе, и҆ твое́ѧ ᲃегѡ̀ ра́ди є҆́же на на́съ праведныѧ ка́ꙁни, и҆бѡ̀ а҆́ще бы́хѡмъ мы твоѧ̀ повелѣ́нїѧ ᲃъхрани́ли, и҆ въ свойстве́нныѧ предѣ́лы ста́ли, небы̀ землѧ̀ твое́мꙋ всеси́лномꙋ повелѣ́нїю повинꙋ́ѧсѧ съпроти́въ на́мъ двиꙁа́ласѧ ны́нѣ, и҆ є҆стестве́ннагѡ недвиже́нїѧ и҆стꙋпи́вши, и҆ чре́ꙁъ є҆стестве́нныхъ ᲃи́мъ движе́нїемъ поглоти́ти на́съ и҆́щꙋщи: и҆ пра́веднѡ, ѡ҆̀ пра́ведне Гд҃и, небѡ̀ твори́мъ повелѣ́нїѧ Црⷭ҇твїѧ твое́гѡ: и҆ не творѧ́щимъ сі́ѧ, не бои́мсѧ пра́веднагѡ твое́гѡ гнѣ́ва съпроти́въ на́съ Влады́ко, но лꙋка́вое тво́римъ пре́дъ твои́ма ѻ҆чи́ма, ненавидѧ́ще дрꙋ́гъ дрꙋ́гꙋ, гнѣ́вающесѧ дрꙋ́гъ на дрꙋ́га: ѿ любвѐ ѿсто́имъ, братолю́бїе ѿринꙋ́хѡмъ, млⷭ҇тыню ѿверго́хѡмъ, и҆ среболю́бїе воꙁлюби́хѡмъ, любостѧжа́нїе ѡ҆блобыꙁа́хѡмъ, и҆ нестѧжа́нїе воꙁненави́дѣхѡмъ, чревоѡбъѧде́нїе и҆ сластолю́бїе воꙁюби́хѡмъ, поще́нїе и҆ воꙁдержа́нїе не вожделѣ́хѡмъ и҆ про́стѡ рещѝ, всѧ́кꙋю твою̀ за́повѣдь ѿринꙋ́хом Гд҃и, и всѧ́кїй грѣ́хъ съдѣва́емъ: И҆́хже ра́ди (ꙗ҆́коже писа́нїе гл҃етъ,) гнѣ́въ Бж҃ій грѧде́тъ на сыны̀ проти́вныѧ и҆ непокори́выѧ.

Сі́ѧ сꙋ́т̾ злобы̀ нш҃еѧ и҆ꙁво́дства, сі́е лꙋка́выхъ и҆ нечи́стыхъ на́шихъ дѣ́лъ, є҆́же къ дрꙋ́гъ дрꙋ́гꙋ събы́тїе: ᲃі́ѧ нена́вистїй и҆ горды́нѧ, и҆ сокрове́ннѣ и҆ ꙗ҆́вѣ быва́емыхъ, беꙁꙁакѡ́нїй на́шихъ лю́таѧ и҆справле́нїѧ см҃ртоно́снаѧ, и҆ и҆́ныѧ ка́ꙁни находѧ́щїѧ. Колѣба́нїѧ землѝ и҆ трꙋ́са, гꙋби́телства и҆ гла́ды, и҆ ᲃꙋпоста́тъ нахожде́нїѧ, и҆ по си́хъ неиꙁрече́нное ѻ҆́ное и҆ беꙁконе́чное мꙋче́нїе.

Но не преда́ждъ на́съ до конца̀ И҆́мене ра́ди твое́гѡ ᲃт҃а́гѡ, и҆ да не пожре́тъ на́съ живы́хъ землѧ̀ грѣ́хъ ра́ди на́шихъ: да не покаѧ́нїѧ и҆ ѡ҆браще́нїѧ ѿщети́мсѧ вре́мене ѡ҆каѧ́ннїи: и҆бѡ̀ и҆ многа́жды покаѧ́нїе ѡ҆бѣща́хѡмъ и҆ многа́жды тебѣ̀ Бв҃и на́шемꙋ сълга́хѡмъ: тѣ́мже и҆ посѣче́нїю непло́дныѧ ᲃмоковни́ца ѡ҆сꙋди́лъ є҆сѝ, землѝ цѣ́лѡ повелѣ́въ покры́ти всѣ́хъ на́съ.

Но є҆щѐ и҆ ны́нѣ долготерпѝ ѡ҆̀ чл҃кѡлюби́вый земледѣ́льче, не хотѧ́й см҃рти грѣ́шнагѡ, но є҆́же ѡ҆брати́тисѧ и҆ жи́вꙋ бы́ти є҆мꙋ̀:

Седмъкра́тъ ᲃедмери́цею проща́ти бра́тїѧмъ повелѣва́ѧй съгрѣше́нїѧ, не погꙋбѝ мало́е твоѐ ᲃта́дѡ сі́е, стра́хомъ съкрꙋше́нное и҆ пла́чемъ смире́нное, и҆ землѝ колѣбленїемъ ᲂустраше́нное, и҆ недоꙋмѣ́нное ѿ всю́дꙋ:

Но помѧнѝ долготерпе́ливе щедрѡты̀ твоѧ̀ и҆ млⷭ҇ти твоѧ̀, помѧнѝ ꙗ҆́кѡ приле́жнѡ лежи́тъ помышле́нїе чл҃ка къ злы́мъ ѿ ю҆́ности є҆гѡ̀, и҆ никто́же чи́стъ є҆́стъ ѿ скве́рны пре́дъ тобо́ю, ꙗ҆́кѡ да и҆ ны́нѣ неиꙁрече́ннꙋю твою̀ блгⷭ҇ть воспрїи́мше, бл҃годари́мъ за всѧ̀ пресла́внаѧ и҆ стра́шнаѧ дѣ́ла твоѧ̀, ꙗ҆́же сътвори́лъ є҆сѝ и҆ твори́ши съ недосто́инствомъ на́шимъ, и҆ твое́гѡ чл҃кѡлю́бїѧ неиꙁслѣди́мое мо́ре: бл҃года́тїю беꙁнача́лнагѡ ти Ѿц҃а̀, и҆ животворѧ́щагѡ ти Дх҃а: Мл҃тва́ми же и҆ моле́н̾ми Пречⷭ҇тыѧ ти Мт҃ре, и҆ всѣ́хъ ст҃ы́хъ твои́хъ, А҆ми́нь.