Вослѣдова́нїе моле́бнагѡ пѣ́нїѧ къ Гд҃ꙋ нш҃мꙋ І҆и҃сꙋ Хрⷭ҇тꙋ̀, пѣва́емаго за творѧ́щих Ми́лостиню
Наче́ншꙋ І҆ере́ю ѡ҆бы́чнѡ, Блⷭ҇ве́нъ Бг҃ъ на́шъ: Кли́ръ чте́тъ. Трⷭ҇то́е: Ѿч҃е на́шъ: Гд҃и поми́лꙋй, в҃і.
Сла́ва: И҆ ны́нѣ:
Прїйде́те покл: гⷤ. и҆ ѱало́мъ л҃ѕ.
Не ревнꙋ́й лꙋкавнꙋ́ющимъ:
Сла́ва: И҆ ны́нѣ:
А҆л҃лилꙋ́іѧ, гⷤ.
Дїа́конъ гл҃є҆́тъ Е҆кте́нїѧ:
Ми́ромъ Гд҃ꙋ пом҃ли́мсѧ. Даже до ѡ҆ плава́ющих.
И҆ а҆́бїе прилага́етъ ᲃі́ѧ.
Ꙍ҆ є҆́же ᲂу҆слы́шати гла́сꙋ мл҃енїѧ ми́лꙋющїѧ на́съ, Гд҃ꙋ помоли́мсѧ.
Ꙍ҆ є҆́же бл҃годѣ́телнѡ и҆сполни́ти всѧ̀ проше́нїѧ и҆́хъ, и҆ прости́ти и҆́мъ всѧ̀ съгрѣше́нїѧ во́лнаѧ и҆ нево́лнаѧ, Гд҃ꙋ помоли́мсѧ.
Ꙍ҆ є҆́же бл҃гопрїѧ́тнымъ бы́ти мл҃ба́мъ и҆ млⷭ҇тынѧмъ и҆́хъ, и҆ на па́мѧть взыйтѝ си́мъ пре́дъ Бг҃омъ, Гд҃ꙋ помоли́мсѧ.
Ꙍ҆ є҆́же стори́цею въ се́й вѣ́къ воꙁда́ти и҆́мъ бл҃годѣ́ѧнїѧ и҆́хъ, ꙗ҆́же къ ни́щымъ рабѡ́мъ свои́мъ, въ бꙋ́дꙋщїй же живо́тъ вѣ́чный, Гд҃ꙋ помоли́мсѧ.
Ꙍ҆ є҆́же и҆сполни́ти храни́лища и҆́хъ, всѣ́хъ бл҃гъ зе́мных, и҆ блⷭ҇ви́ти всѧ̀ дѣ́ла и҆́хъ, и҆ въ все́мъ бл҃гополꙋ́чныхъ сътвори́ти бл҃гостїю си, Гд҃ꙋ помоли́мсѧ.
Ꙍ҆ є҆́же блⷭ҇ви́ти и҆́хъ и҆ бл҃гопоспѣши́ти и҆́мъ въ все́мъ, и҆ и҆ꙁба́вити и҆́хъ ѿ всѣ́хъ вра́гъ ви́димых и҆ неви́димых, и҆ ѿ всѧ́кагѡ зла́гѡ и҆́хъ ѡ҆бстоѧ́нїѧ, Гд҃ꙋ помоли́мсѧ.
Ꙍ҆ є҆́же дарова́ти и҆́мъ здра́вїе дш҃евное же и҆ тѣле́сное, и҆ долгоде́нствїемъ ѡ҆градити и҆́хъ, Гд҃ꙋ помоли́мсѧ.
Ꙍ҆ є҆́же и҆ꙁба́вити и҆́хъ и҆ на́съ ѿ всѧ́кїѧ ско́рби, гнѣ́ва, и҆ нꙋ́ждъ, Гд҃ꙋ помоли́мсѧ.
Застꙋпѝ, ᲃп҃си, поми́лꙋй, и҆ сохранѝ и҆́хъ и҆ на́съ твое́ю бл҃годатїю.
Прⷭ҇тꙋ́ю чⷭ҇тꙋю:
І҆ере́ѵ꙼ же Воꙁглаша́етъ:
Ꙗ҆́кѡ подоба́етъ тѝ всѧ́каѧ:
По се́мъ: Бг҃ъ Гдⷭ҇ь и҆ ꙗ҆ви́сѧ на́мъ:
Тропа́рь Гла́съ, в҃.
Млⷭ҇рдїѧ и҆ бл҃года́ти сы́й и҆сто́чникъ Хє҃ Бж҃е, млⷭ҇ти сподобѝ тебѐ ра́ди на́съ ми́лꙋющихъ, и҆ ѿ тебѐ млⷭ҇ти и҆́щꙋщихъ: при́ꙁри на рабы̀ твоѧ̀ тебѐ на́съ любѧ́щїѧ, ꙗ҆вѝ и҆́мъ прⷭ҇нѡ чл҃кѡлю́бїе твоѐ и҆ млⷭ҇тивнѡ и҆спо́лни проше́нїѧ и҆́хъ, ꙗ҆́кѡ є҆ди́нъ чл҃кѡлю́бецъ.
Сла́ва: то́йжде. И҆ ны́нѣ: Бг҃оро́диченъ:
Млⷭ҇рдїѧ сꙋ́щаѧ Мт҃и, млⷭ҇ти твои́ми всеси́лными Моли́твами, твоѧ̀ рабы̀ полꙋчи́ти млⷭ҇тивнѡ сподобѝ Бц҃е: на́ тѧ бо ᲂу҆пова́юще, на́ми ны́нѣ тебѣ̀ вопїю́тъ: Ра́дꙋйсѧ ѡ҆брадова́ннаѧ Гдⷭ҇ь съ тобо́ю.
Та́же ѱало́мъ, н҃.
Пом̀лꙋй мѧ Бж҃е:
И҆ КА҆НꙌНЪ ᲃе́й, Гла́съ, ѕ҃.
Пѣ́снь, а҃ И҆рмо́съ.
Ꙗ҆́кѡ посꙋ́хꙋ ход:
Припѣ́лъ:
Многѡмлⷭ҇тве Гд҃и, поми́лꙋй ми́лꙋющихъ на́съ.
Даѧ́й мл҃твꙋ молѧ́щомꙋсѧ, и҆ блгⷭ҇влѧ́ѧй лѣ́та пра́ведныхъ, пода́ждъ Влады́ко ᲃерде́чнаѧ проше́нїѧ, мл҃ѧ́щимсѧ тебѣ̀ на́ми рабѡ́мъ твои́мъ.
Млⷭ҇ти пода́телю, и҆ блгⷭ҇ти и҆сто́чниче, моли́мъ тѧ приле́жнѡ ѡ҆би́лнꙋю си млⷭ҇ть пода́ждъ, и҆ всѧ́кагѡ дарова́нїѧ и҆сполнѝ дѡ́мы рабѡ́въ твои́хъ.
Прїймѝ хва́лꙋ ѿ ᲂу҆́стъ на́съ скве́рныхъ и҆ грѣ́шныхъ, Трⷪ҇це ст҃а́ѧ Ѿч҃е, и҆ ᲃн҃е, и҆ Дш҃е ᲃт҃ы́й, въ є҆дино́й держа́вѣ покланѧ́емаѧ, и҆ и҆сполнѝ мѡ́л̾бꙋ рабѡ́въ твои́хъ.
Бг҃оро́диченъ:
Пречⷭ҇тѣи си рꙋ́цѣ Влады́чице, млⷭ҇тивнѡ къ ᲃн҃ꙋ свое́мꙋ и҆ Бг҃ꙋ воꙁдеждѝ, грѣхѡ́въ ѡ҆ставле́нїе, жи́тїѧ и҆справле́нїе, всѧ́кꙋю же бл҃годать и҆ млⷭ҇ть и҆спроша́ющи рабѡ́мъ твои́мъ.
Катава́сїѧ:
Спасѝ ѿ бѣ́дъ рабы̀ своѧ̀ млⷭ҇тве:
И҆ дрꙋ́гꙋю Бг҃оро́дичнꙋ.
И҆ꙁба́ви ѿ бѣ́дъ рабы̀ своѧ̀ Прⷭ҇та́ѧ Бц҃е Дв҃о: И҆щѝ наꙁа́ди.
Пѣ́снь, г҃ И҆рмо́съ.
Нѣ́сть ᲃт҃а ꙗ҆́коже ты:
Рекѡ́шѧ ст҃а́ѧ твоѧ̀ ᲂу҆ста̀ Гд҃и: И҆щи́те пре́жде црⷭ҇твїѧ нбⷭ҇нагѡ, и҆ сі́ѧ всѧ̀ прило́жатсѧ ва́мъ: тѣ́мъ же м҃ли́мсѧ, дарꙋ́й прича́стїе съ ст҃ы́ми рабѡ́мъ твои́мъ.
И҆́стиннѡ вѣ́рꙋюще Е҆ѵⷢ҇лскомꙋ гла́сꙋ, и҆́же ре́клъ є҆сѝ Гд҃и: Проси́те и҆ да́стсѧ ва́мъ, и҆щи́те и҆ ѡ҆брѧ́щете.
И҆ мы̀ ны́нѣ мо́лимъ тѧ Хє҃ и҆ про́симъ, дарꙋ́й до́лгое въ жи́тїи бл҃гопребыва́нїе, и҆ нбⷭ҇ныхъ твои́хъ бл҃гъ воспрїѧ́тїе рабѡ́мъ твои́мъ.
Сла́ва:
Трⷪ҇це ᲃт҃а́ѧ є҆диносꙋ́щнаѧ, сохранѝ проти́вныѧ ᲃи́лы, и҆ всѧ́кїѧ на́пасти, моле́бники твоѧ̀, ра́дость дарꙋ́ѧ и҆́мъ дш҃евнꙋю и҆ тѣле́снꙋю, и҆ проща́ѧ всѧ̀ согрѣше́нїѧ рабѡ́мъ твои́мъ.
И҆ ны́нѣ:
Ꙋ҆слы́ши Прчⷭ҇таѧ мл҃енїѧ нш҃ѧ, и҆ всѧ̀ къ спⷭ҇нїю проше́нїѧ Гпⷭ҇же пода́ждъ просѧ́щимъ тѧ ны́нѣ, ѿ всѣ́хъ бѣ́дъ спаса́ѧ и҆́хъ въско́рѣ: и҆ прави́телница бꙋ́ди къ сп҃се́нномꙋ пꙋ́ти Дв҃о рабѡ́мъ твои́мъ.
По Катава́сїѧхъ же, а҆́бїе гл҃етъ Дїа́конъ Е҆кте́нїѧ ᲃі́ѧ.
Пом҃лꙋй на́съ Бж҃е по вели́цѣй ми́лости твое́й, моли́м ти:
Ли́къ:
Гд҃и поми́лꙋй, гⷤ.
Е҆щѐ мл҃и́мсѧ Гд҃ꙋ Бг҃ꙋ на́шемꙋ ѡ҆ є҆́же блⷭ҇ви́ти рабы̀ своѧ̀, И҆мⷬ҇къ: и҆ дарова́ти и҆́мъ здра́вїе дш҃евное же и҆ тѣле́сное, и҆ прости́ти и҆́мъ всѧ́кое прегрѣше́нїе во́лное и нево́лное, и҆ и҆ꙁба́вити и҆́хъ ѿ всѣ́хъ вра́гъ ви́димыхъ и҆ неви́димыхъ, и҆ ѿ всѧ́кагѡ зла́гѡ и҆́хъ ѡ҆бстоѧ́нїѧ, и҆ сподоби́ти и҆́хъ полꙋчи́ти всѧ̀ ꙗ҆́же къ спⷭ҇нїю проше́нїѧ, и҆ бл҃гопоспѣши́ти и҆́мъ въ все́мъ, рцѣ́мъ всѝ, Гд҃и ᲂу҆слы́ши и҆ поми́лꙋй.
Ли́къ же пое́тъ:
Гд҃и поми́лꙋй, є҃і.
І҆ере́ѵ꙼ же воꙁглаша́етъ:
Ꙗ҆́кѡ млⷭ҇твъ и҆:
А҆́бїе же пою́тъ, Сѣда́ленъ, Гла́съ, въ.
Млⷭ҇рдїѧ и҆ блгⷭ҇ти сы́й и҆сто́чникъ Хє҃, млⷭ҇ти твое́ѧ на́съ ми́лꙋющихъ сподобѝ, подава́ѧ тѣ́мъ всѧ̀ ꙗ҆́же къ спⷭ҇нїю проше́нїѧ, и҆ и҆ꙁбавлѧ́ѧ и҆́хъ ѿ всѧ́кагѡ зла̀, ꙗ҆́кѡ є҆ди́нъ ще́дръ и҆ всеми́лостивъ.
Сла́ва: И҆ ны́нѣ: Бг҃оро́диченъ:
Мл҃твеннице те́плаѧ, и҆ ᲃтѣ́но неѡбори́маѧ: ми́лости и҆сто́чниче и҆ мі́рови прибѣ́жище, приле́жнѡ ти вопїемъ Бц҃е Влады́чце, предварѝ и҆ ѿ бѣ́дъ и҆ꙁба́ви млⷭ҇рдїе на́мъ творѧ́щихъ, ꙗ҆́кѡ є҆дина̀ въско́рѣ застꙋпа́ющаѧ.
Пѣ́снь, д҃ И҆рмо́съ.
Хᲃ҃ мнѣ̀ ᲃи́ла Бг҃ъ:
Не пре́ꙁри съꙁда́нїе своѐ Влады́ко, є҆́же свои́ма рꙋка́ма съꙁда́лъ є҆сѝ, и҆ не да́ждъ сꙋ́етными мі́ра ᲃегѡ̀ прелща́тисѧ: но прⷭ҇нѡ Дх҃ъ тво́й ᲃт҃ы́й вселѝ въ се́рдца рабѡ́въ твои́хъ.
Твое́гѡ ра́ди Пртⷭ҇а́гѡ И҆менѝ, на́съ посѣща́ющим и҆ пита́ющимъ, и҆ всѧ̀ на́мъ потре́бнаѧ подава́ющимъ, пода́ждъ Гд҃и всѧ̀ ꙗ҆́же къ ᲃпⷭ҇нїю проше́нїѧ, и҆ вѣ́чныхъ да́рѡвъ наслажде́нїе рабѡ́мъ твои́мъ.
Сла́ва:
Беꙁнача́лнаѧ Трⷪ҇це и҆ живонача́льнаѧ, ᲃп҃сѝ и҆ и҆ꙁба́ви ᲃи́лою твое́ю всѣ́хъ, ми́рнаѧ же лѣ́та, и҆ до́лгїй въ здра́вїи съ дово́л̾ствомъ живо́тъ пода́ждъ рабѡ́мъ твои́мъ.
И҆ ны́нѣ:
Пꙋ́ть живота̀ Дв҃о ро́ждшаѧ, на пꙋ́т̾ ᲃпⷭ҇нїѧ, всѣ́хъ бл҃годѣ́телїй на́шихъ наста́ви, и҆ твори́ти Бжⷭ҇тве́ннаѧ Сн҃а твое́гѡ повелѣ́нїѧ напра́ви, ꙗ҆́кѡ да въ ни́хъ ходѧ́ще, пло́тскїѧ по́хоти не сътво́рѧтъ рабѝ твоѝ.
Пѣ́снь, є҃ И҆рмо́съ.
Бж҃іимъ ᲃвѣ́томъ ти:
Бж҃е ще́дрый, Бж҃е млⷭ҇тивый Гд҃и, по мнѡ́жествꙋ блгⷭ҇ти твое́ѧ, при́ꙁри свы́ше Влады́ко чл҃кѡлю́бче, и҆ ᲂу҆дивѝ млⷭ҇ть твою̀ на рабы̀ твоѧ̀: и҆ ᲃп҃сѝ ᲂу҆пова́ющїѧ на́ тѧ, ѿ противѧ́щихъ сѧ десни́ци твое́й, и҆ съхранѝ ѧ҆̀ ѕѣни́цꙋ ѻ҆́ка.
Бж҃е пребл҃гі́й, посѣтѝ на́съ ѡ҆бы́чнымъ ти чл҃кѡлю́бїемъ, и҆ мл҃е́бнꙋю прїймѝ Мл҃твꙋ ѿ ᲂу҆́стъ на́съ грѣ́шныхъ: и҆ пом҃лꙋй млⷭ҇рде Влады́ко, на́ тѧ надѣ́ющїѧсѧ рабы̀ твоѧ̀, и҆ на́съ ми́лꙋщїѧ, и҆ съхранѝ и҆́хъ подъ кро́вомъ твои́мъ ꙗ҆́кѡ ѕѣни́цꙋ ѻ҆́ка.
Сла́ва:
Превѣ́чномꙋ Ѿц҃ꙋ̀, събеꙁнача́лномꙋ ᲃн҃ꙋ, и҆ ᲃъпрⷭ҇носꙋ́щномꙋ Дх҃ꙋ, въ є҆ди́нствѣ покланѧ́емсѧ, и҆ приле́жнѡ мл҃и́мъ, на стра́шномъ ти ᲃꙋ́дѣ де́снагѡ стоѧ́нїѧ, и҆ бл҃ги́хъ воспрїѧ́тїѧ рабѡ́въ твои́хъ сподобѝ, зде́ же сі́ѧ съхранѝ, ꙗ҆́кѡ ѕѣни́цꙋ ѻ҆́ка.
И҆ ны́нѣ: Бг҃оро́диченъ:
Подвигнѝ чⷭ҇таѧ, А҆́гг҃лы и҆ А҆рха́гг҃лы, Прⷪ҇ро́ки и҆ Мч҃ники, Преподо́бныѧ и҆ ᲃт҃и́лѧ, на Мл҃твꙋ къ ᲃн҃ꙋ твое́мꙋ, и҆ Бг҃ꙋ въ дн҃ь ᲃꙋ́дный: є҆́же тогда̀ ᲂу҆лꙋчи́ти рабѡ́мъ твои́мъ ѡ҆бѣтованнаѧ бл҃га́ѧ: зде́же сі́ѧ подъ кро́вомъ твои́мъ сохранѝ, ꙗ҆́кѡ ѕѣни́цꙋ ѻ҆́ка.
Пѣ́снь, ѕ҃ И҆рмо́съ.
Жите́йскагѡ мо́рѧ:
Жи́тїѧ на́шегѡ дні́е, ꙗ҆́кѡ сѣ́нь прехо́дѧтъ: но ты Гд҃и, дарова́вый Е҆ꙁе́кїи приложе́нїе лѣ́та животꙋ̀, да́ждъ и҆ рабѡ́мъ твои́мъ ᲂу҆множе́нїе лѣ́тъ, и҆ въ ни́хъ здра́вїе и҆ ᲃпⷭ҇нїе.
Жи́тїѧ на́шегѡ вре́мѧ, ᲃко́ро тече́т, и҆ дні́е лѣ́тъ на́шихъ, ꙗ҆́кѡ ды́мъ расхо́дитсѧ: но ты Гд҃и, приложѝ лѣ́та животꙋ̀ рабѡ́мъ твои́мъ на́шимъ же бл҃годѣ́телемъ, ꙗ҆́коже Е҆ꙁекі́и и҆́ногда, и҆ въ ни́хъ здра́вїе тѣ́мъ пода́ждъ и҆ ᲃпⷭ҇нїе.
Сла́ва:
На Пртⷭ҇о́лѣ Херꙋві́мстѣмъ съ Ѿц҃емъ сѣ́дѧ́й, и҆ съ Дх҃омъ нераꙁдѣ́лнѡ, и҆ ѿ нбⷭ҇ныхъ ᲃи́лъ неиꙁрече́ннѡ хва́лꙋ прїемлѧ́й, тѣ́хъ Мл҃твами, и҆ всѣ́хъ беꙁпло́тныхъ ᲃи́лъ, рабѡ́мъ твои́мъ ми́ръ пода́ждъ, здра́вїе же и҆ ᲃпⷭ҇нїе.
И҆ ны́нѣ:
Ꙗ҆́кѡ застꙋ́пницꙋ сꙋ́щимъ въ бѣда́хъ, тебѐ мл҃и́м, и҆ къ тебѣ̀ прибѣга́емъ: при́ꙁри на рабы̀ твоѧ̀ Бц҃е, и҆ ѿ всѧ́кїѧ на́пасти, печа́ли же и҆ бѣ́ды сі́ѧ и҆ꙁба́ви, и҆ Мл҃и́твами ти пода́ждъ и҆́мъ здра́вїе и҆ ᲃпⷭ҇нїе.
По Катава́сїи же быва́етъ мала́ѧ Е҆кте́нїѧ, и҆ ѿ І҆ере́ѧ Воꙁгла́съ:
Ꙗ҆́кѡ ты́ є҆сѝ Цр҃ъ ми́ра:
И҆ а҆́бїе Код: Гла́съ ѕ҃. Под:
Ненача́емаѧ:
Не има́мы и҆́ныѧ по́мощи, не има́мы и҆́ныѧ наде́жды, ра́ꙁвѣ тебѐ І҆и҃се Бж҃е чл҃кѡлю́бче: дѣ́́ло ᲂу҆́бѡ рꙋ́къ твои́хъ не пре́ꙁри мл҃ѧ́щихъ ны́нѣ тебѣ̀: но послѝ бл҃гі́ѧ твоѧ̀ да́ры рабѡ́мъ твои́мъ ми́лꙋющихъ на́съ: на тебе́ бо сѧ надѣ́емъ и҆ тобо́ю сѧ хва́лимъ, и҆ твоѝ є҆смы̀ рабѝ да не постыди́мсѧ.
І҆ко́съ.
Всѣ́хъ ᲃы́й Ѿц҃ъ пребл҃гі́й, не затворѝ ѿ на́съ щедроты̀ твоѧ̀: но при́ꙁри съ нб҃сѐ на ᲂу҆пова́ющихъ на твоѐ беꙁчисле́нное млⷭ҇рдїе и҆ чл҃кѡлю́бїе, и҆ не пре́ꙁри на́съ ѡ҆ рабѣ́хъ твои́хъ ѡ҆ И҆менѝ твое́мъ, мл҃ꙋющихъ и҆ посѣща́ющихъ на́съ, мл҃ѧ́щихсѧ: но ѿ всѧ́кїѧ бѣ́ды, гнѣ́ва, и҆ нꙋ́жды, плѣне́нїѧ же и҆ ско́рби свободѝ и҆́хъ, дарꙋ́ѧ и҆́мъ жи́тїе ми́рное и҆ беꙁмѧте́жное, беꙁъболѣꙁне́нное же и҆ невре́дное, и҆ всѧ̀ ꙗ҆́же къ сп҃се́нїю проше́нїѧ и҆́хъ всегда̀ и҆спо́лни: твои́ бо є҆смы̀ рабѝ да не постыди́мсѧ.
По се́мъ пою́тъ ᲃтепе́нна в҃-гѡ Гла́са, А҆нтіфꙍ́нъ, в҃.
Воꙁва́хъ ти Гд҃и те́плѣ, и҆ꙁ глꙋбины̀ дш҃а̀ мое́ѧ, и҆ мнѣ̀ бꙋ́дета на послꙋша́нїе Бжⷭ҇тве́ннїи твоѝ ᲂу҆́ши.
На Гд҃а наде́ждꙋ всѧ́къ стѧжа́вый: вы́шшїй є҆́стъ всѣ́хъ скорбѧ́щихъ.
Ст҃ы́мъ Дх҃омъ, точа́тсѧ бл҃года́тныѧ вѡ́ды, напаѧ́ющїѧ всѧ́кꙋю тва́ръ къ ѡ҆живле́нїю.
Та́же Проки́менъ Гла́съ, д҃.
Оу҆пова́й на Гд҃а, и҆ творѝ бл҃госты́ню: и҆ населѝ зе́млю, и҆ ᲂу҆пасе́шисѧ въ бога́тствѣ є҆ѧ̀.
Сті́хъ.
Весь дн҃ь ми́лꙋетъ, и҆ вꙁаи́мъ дае́тъ Пра́ведный: и҆ сѣ́мѧ є҆гѡ̀ въ блⷭ҇ве́нїи бꙋ́детъ.
Всѧ́кое дыха́нїе да хва́лит Гд҃а.
Сті́хъ.
Хвали́те Бг҃а въ ᲃт҃ы́хъ є҆гѡ̀.
Е҆ѵⷢ҇лїе ѿ Маѳ: Гла́ва з҃. Зач. к҃. Нача́ло є҆гѡ̀ сі́е:
Речѐ Гд҃ь, проси́те и҆ да́стсѧ ва́мъ:
Конѐцъ же се́й.
Ко́л̾ми па́че Ѿц҃ъ ва́шъ нбⷭ҇ный да́стъ бл҃га́ѧ просѧ́щимъ ᲂу҆ не́гѡ.
Ѿпѣ́вше же Сла́ва тебѣ̀ Гд҃и. Пою́тъ Сла́ва Гла́съ, д҃. Ѿч҃е, сло́ве, и҆ дш҃е:
И҆ ны́нѣ:
Мл҃твъ ра́ди Пртⷭ҇ыѧ Бц҃а: Пом҃лꙋй на́съ Бж҃е:
И҆ а҆́бїе Стіхи́рꙋ ᲃі́ю, Гла́съ, ѕ҃.
Не ѡ҆ста́ви на́съ въ члчⷭ҇кое предстоѧ́нїе І҆и҃се Бж҃е пребл҃гі́й, но прїймѝ мл҃енїѧ рабѡ́въ твои́хъ: ско́рби бо ѡ҆бдержа́тъ ны, терпѣ́ти не мо́жемъ ѿ бѣсо́вскагѡ стрѣлѧ́нїѧ и҆ лꙋка́выхъ врагѡ́въ ѡ҆бстоѧ́нїѧ: покро́ва не стѧжа́хѡмъ нигде́же прибѣ́гнꙋти стра́стнїи всегда̀ побѣжда́еми: ᲂу҆тѣше́нїѧ неима́мы ра́ꙁвѣ тебѐ И҆ꙁбави́телю на́шъ, ᲂу҆пова́нїе и҆ ᲃпⷭ҇нїе вѣ́рнымъ, не пре́ꙁри мл҃енїѧ на́шѧ: но съверше́на сътворѝ.
Пѣ́снь, ꙁ҃ И҆рмо́съ.
Хладода́вцꙋ ᲂу҆́бѡ пе́щъ:
Па́че всѣ́хъ бога́тыхъ да́рѡвъ двѣ цѧ́тѣ вдовы́ѧ и҆́ногда прїи́мый Гд҃и, и҆ ны́нѣ прїймѝ млⷭ҇тыню, ѿ творѧ́щихъ на́мъ сі́ю, и҆ седмори́цею въ нѣ́дра и҆́хъ ѿда́ждъ, вели́кꙋю си млⷭ҇ть.
Съ нб҃сѝ пода́ждъ на́мъ Хє҃ твою̀ млⷭ҇ть, на́ тѧ надѣ́ющимсѧ, про́симъ грѣ́шнїи и҆ недосто́йнїи, и҆ стокра́тнѡ млⷭ҇ть на́мъ пока́ꙁꙋющим, на земли бл҃га́ѧ дарꙋ́й, и҆ въ зе́мныхъ мѣ́сто нбⷭ҇наѧ, и҆ вели́кꙋю си млⷭ҇ть.
Сла́ва:
Ѿч҃е, и҆ ᲃн҃е, и҆ ᲃты́й Дш҃е: тебѣ̀ вѣ́рнѡ покланѧ́емсѧ, твое́ѧ млⷭ҇ти требꙋ́юще, пода́ждъ рабѡ́мъ твои́мъ на́съ ми́лꙋющимъ, въмѣ́сто зе́мныхъ нбⷭ҇наѧ, и҆ въмѣ́сто привре́менныхъ вѣ́чнаѧ бл҃га́ѧ, и҆ вели́кꙋю млⷭ҇ть.
И҆ ны́нѣ:
Па́че всѣ́хъ грѣшнѣ́йши сꙋ́ще, на́ нб҃о воꙁрѣ́ти не смѣ́емъ: но къ тебѣ̀ прибѣга́емъ, и҆ мл҃ѧ́щесѧ вопїе́мъ ти: Влады́чице Мт҃и Бж҃іѧ Прчⷭ҇таѧ, рабы̀ твоѧ̀ на́съ ми́лꙋющїѧ, вѣ́чнагѡ и҆ꙁба́ви мꙋче́нїѧ, и҆ испросѝ и҆́мъ ᲂу҆ Хрⷭ҇та̀ вели́кꙋю ми́лость.
Пѣ́снь, и҃ И҆рмо́съ.
И҆́ꙁъ пла́мене ᲃт҃ы́мъ росꙋ̀:
Млⷭ҇тивый чл҃кѡлю́бче Гд҃и, мі́ра всегѡ̀ грѣхѝ въꙁемлѧ́й, всѧ́кое прегрѣше́нїе во́лное и҆ нево́лное, въ вѣдѣ́нїи и҆ не вѣдѣ́нїи, ᲃло́вомъ и҆ помышле́нїемъ содѣѧ́нное, на́съ ми́лꙋющимъ простѝ рабѡ́мъ твои́мъ.
Воꙁри́те на пти́цѧ нбⷭ҇ныѧ, ре́клъ є҆сѝ Гд҃и, ꙗ҆́же Ѻ҆ц҃ъ мо́й нбⷭ҇ный пита́етъ: и҆ на́мъ рабѡ́мъ твои́мъ Влады́ко, на́ тѧ ᲂу҆пова́ющимъ, хлѣ́бъ на́шъ по всѧ̀ днѝ пода́ждъ: и҆ и҆ꙁба́ви на́съ ѿ лꙋка́вагѡ, и҆ бл҃готворѧ́щїѧ на́мъ рабы̀ твоѧ̀.
Сла́ва:
Гд҃и, Пртⷭ҇а́гѡ твое́гѡ Дх҃а ѿ Ѿц҃а̀ и҆сходѧ́щагѡ А҆пⷭ҇лѡмъ свои́мъ посла́вый, тогѡ̀ бл҃гі́й ѿ на́съ не ѿимѝ, и҆ ѿ творѧ́щихъ на́мъ млⷭ҇тыню: но ѡ҆би́тель томꙋ̀ въ на́съ сътворѝ, и҆ ᲃп҃сѝ вѣ́рою слꙋжа́щихъ ти рабѡ́въ твои́хъ.
И҆ ны́нѣ:
Ꙗ҆́встве́ннаѧ ѿ вѣ́ка хрⷭ҇тїа́нѡмъ застꙋ́пнице, и҆ къ Бг҃ꙋ ходота́йце, Бц҃е прⷭ҇нѡ Дв҃о, прїймѝ мл҃твы на́шѧ, и҆ донесѝ ѧ҆̀ ᲃн҃ꙋ свое́мꙋ и҆ Бг҃ꙋ, є҆́же ᲃпⷭ҇тѝ ѿ всѧ́кїѧ бѣды̀ и҆ на́пасти, на́съ ми́лꙋющїѧ рабы̀ твоѧ̀.
Пѣ́снь, ѳ҃ И҆рмо́съ.
Бг҃а чл҃кѡмъ не ᲂу҆до́бъ ви́дѣти, на́нь ж:
Блгⷭ҇ти и҆сто́чниче Хрⷭ҇те Бж҃е, и҆ щедрѡ́тъ неиꙁслѣди́маѧ пꙋчи́но, рабы̀ твоѧ̀ на́мъ бл҃готворѧ́щїѧ пом҃лꙋй, преꙁира́ѧ и҆́хъ съгрѣше́нїѧ, и҆ ѿ на́пастїй и҆ бѣ́дъ ᲃвобожда́ѧ ᲃко́рѡ: и҆ въ твое́мъ ѡ҆свѧще́нїи ᲃъблюдѝ: Пречⷭ҇тыѧ ти Мт҃ре мольба́ми.
Бг҃а пло́тїю ро́ждшаѧ Влады́чице, и҆ пита́вшаѧ пи́щꙋ да́ющагѡ всѧ́кой пло́ти, на́съ ми́лꙋющихъ и҆ пита́ющих, свое́ѧ не лишѝ мꙁды̀: но всѧ̀ бл҃га́ѧ стори́цею здѐ прїѧти, та́мѡжде вѣ́чнꙋю жи́ꙁнь полꙋчи́ти сподобѝ Мт҃рними си мл҃ба́ми.
Сла́ва:
Ꙍ҆ всемлⷭ҇тиваѧ Трⷪ҇це Прест҃а́ѧ, пом҃лꙋй рабы̀ своѧ̀ на́съ ми́лꙋющїѧ, подава́ѧ и҆́мъ дово́лнаѧ, и҆ по мнѡ́жествꙋ твои́хъ щедрѡ́тъ, храни́лища и҆́хъ исполнѝ всѧ́кагѡ бл҃га, и҆ нбⷭ҇ныхъ дарова́нїй тѣ́хъ ꙗ҆́кѡ ще́дръ ᲃподобѝ, Дв҃ы Прчⷭ҇тыѧ мольба́ми.
И҆ ны́нѣ:
За всѧ̀ Хрⷭ҇тїѧ́ны пом҃ли́сѧ Влады́чце, съ всѣ́ми ᲃт҃а́ми непреста́ннѡ, и҆ ѡ҆ ѡ҆гра́дѣ се́й и всѧ́кой стра́нѣ, и҆ вѣ́рою въ ни́хъ живꙋ́щихъ: любѧ́щимъ же и҆ мл҃ꙋющимъ на́съ и҆спросѝ ᲂу҆ ᲃн҃а си и҆ Бг҃а, бога́тыѧ да́ры, и҆ мнѡ́жество щедрѡ́тъ, Ма́терними си мл҃бами.
По катавасїѧхъ же, съвокꙋпи́вшасѧ ѡ҆́ба ли́ка посре́дъ Цр҃кве, пою́тъ, Достойно є҆́стъ:
По се́мъ чтꙋ́тъ, Трⷭ҇то́е: Ѿч҃е на́шъ: И҆ троп: предписанныѧ.
А҆́бїе же по си́хъ Дїа́конъ гл҃етъ:
Съ ᲂу҆миле́нїемъ всѝ колѣ́нѣ прекло́нше, Гд҃ꙋ помоли́мсѧ.
І҆ере́ѵ꙼ же съ всѣ́ми колѣ́нѣ прекло́нь, чте́тъ Мл҃твꙋ сі́ю.
Гд҃и Бж҃е на́шъ, помѧнѝ на́съ грѣ́шныхъ и҆ недосто́йных рабѡ́въ твои́хъ, внегда̀ приꙁыва́ти на́мъ ᲃт҃о́е и҆ покланѧ́емое И҆мѧ̀ твоѐ: и҆ не посрамѝ на́съ ѿ чаѧ́нїѧ млⷭ҇ти твое́ѧ, но неиꙁрече́ннымъ твои́мъ млⷭ҇рдїемъ при́ꙁри на́ ны и҆ пом҃лꙋй на́съ: неима́мы бо и҆́нагѡ ᲂу҆пова́нїѧ ра́ꙁвѣ тебѐ: пре́ꙁри на́мъ тꙋ́не всѧ̀ согрѣше́нїѧ на́шѧ, не ꙗ҆́кѡ бо что̀ бл҃го сотвори́хѡмъ пре́дъ тобо́ю прихо́димъ, ни́же ꙗ҆́кѡ чтѡ̀ ѿ бл҃ги́хъ требꙋ́еши принѡ́симъ: но ты ᲃа́мъ Гд҃и по блгⷭ҇ти твое́й, да́ждъ на́мъ ѿ ны́нѣ положи́ти нача́ло бл҃гое, и҆ ꙗ҆́коже заповѣда́лъ є҆сѝ люби́ти дрꙋ́гъ дрꙋ́га. Се́бо Гд҃и Бж҃е на́шъ, съ стра́хомъ и҆ тре́петом недосто́инство своѐ вѣдꙋ́ще пре́дъ тобо́ю прихо́димъ, и҆ ꙗ҆́коже заповъда́лъ є҆сѝ дрꙋ́гъ ѡ҆ дрꙋ́ꙁѣмъ мл҃и́тисѧ: за всѧ̀ члове́ки, за Царѧ́ же и҆ за всѧ̀ во вла́сти сꙋ́щїѧ, мл҃твы, моле́нїѧ, проше́нїѧ, и҆ бл҃годаре́нїѧ твори́ти, съсꙋ́домъ свои́мъ и҆ꙁбра́ннымъ А҆пⷭ҇ломъ Па́вломъ повелѣлъ є҆сѝ: и҆ сі́ѧ до́бра и҆ бл҃гопрїѧ́тна пре́дъ тобо́ю ᲃп҃си́телемъ на́шимъ Бг҃омъ бы́ти и҆ꙁво́лилъ є҆сѝ.
Са́мъ же реклъ є҆сѝ: Проси́те и҆ да́стсѧ ва́мъ, и҆щи́те и҆ ѡ҆брѧ́щете, толцѣ́те и҆ ѿве́рꙁетсѧ ва́мъ: Пре́дъ тобо́ю припада́ємъ, и҆ приле́жнѡ м҃лѧ́щесѧ про́симъ, и҆сполнѝ млⷭ҇твнѡ нн҃ѣшнѧѧ на́шѧ проше́нїѧ, и҆ чл҃кѡлю́бнѡ пом҃лꙋй всѣ́хъ рабѡ́въ твои́хъ ми́лꙋющихъ на́съ, и҆ бл҃готворѧ́щихъ на́мъ и҆менѝ ра́ди твое́гѡ ᲃт҃а́гѡ: и҆ и҆спо́лни дѡ́мы и҆ жи́лища и҆́хъ всѧ́кагѡ бл҃га, и҆ дш҃ѧ̀ и҆́хъ въ твое́мъ ѡ҆сщ҃енїи соблюдѝ: и҆ ны́нѣ на́мъ приноси́мꙋю и҆ пода́нꙋю млⷭ҇тню, бл҃гоꙋгоднѡ ѿ твои́хъ рабѡвъ, И҆мⷬ҇къ: ꙗ҆́кѡ ще́дръ прїймѝ, и҆ въ вѣ́чнаѧ твоѧ̀ сокро́вища вложи́въ сокры́й, и҆ дарꙋ́й тѣ́мъ пода́телю бл҃гихъ, въ мі́рѣ ѡ҆би́лное твои́хъ бл҃гъ въспрїѧ́тїе, съ всѣ́ми вѣ́рою просѧ́щими ᲂу҆ тебѐ вели́кꙋю ми́лостъ: и҆ пода́ждъ и҆́мъ ꙗ҆́кѡ жи́ꙁни пода́тель, долгоде́нствїе съ здра́вїемъ, ᲃохранѝ и҆́хъ подъ кро́вомъ кры́лꙋ твое́ю, воꙁсїѧ́й въ ᲃе́рдцѧ и҆́хъ пра́вдꙋ, и҆ мнѡ́жествомъ ми́ра ѡ҆градѝ и҆́хъ, и҆ ᲂу҆дивѝ на ни́хъ ми́лостъ твою̀, ꙗ҆́кѡ на промышлѧ́ющихъ и҆ пекꙋ́щихсѧ ѡ҆ ни́щихъ рабѣ́хъ твои́хъ: ты́ бо въ Писа́нїихъ ре́клъ є҆сѝ, ꙗ҆́кѡ рꙋка̀ да́ющаѧ нико́лиже ѡ҆скꙋдѣ́етъ. и, не ви́дѣхъ пра́ведника ѡ҆ста́влена, ни ᲃѣ́мене є҆гѡ̀ просѧ́ща хлѣ́бы. и҆ па́ки: И҆ ᲃѣ́мѧ є҆гѡ̀ въ бл҃гоⷭ҇ве́нїи бꙋ́детъ.
Е҆́й Влады́ко Гд҃и, млⷭ҇твнѡ преклони́сѧ къ смѣре́ннымъ на́шимъ мѡ́л̾бамъ, и҆ цѣ́лыхъ и҆ невре́дныхъ тѣ́хъ всегда̀ сохранѝ, и҆ вы́шшихъ всѧ́кагѡ навѣ́та и҆ ѡ҆ꙁлобле́нїѧ ви́димыхъ и҆ неви́димыхъ врагѡ́въ сотворѝ, всѧ̀ бл҃га́ѧ и҆́хъ проше́нїѧ и҆сполнѧ́ѧ: вѣ́чныѧ же мꙋ́ки тѣ́хъ свободи́въ, Црⷭ҇твїю нбⷭ҇номꙋ сподобѝ: На́ тѧ бо ᲂу҆пова́нїе своѐ съ на́ми воꙁложи́шѧ, и҆ кро́мѣ тебѐ и҆́нагѡ Бо́га не зна́емъ, и҆ ѿ тебѐ всѝ млⷭ҇ти ча́емъ, и҆ тебѐ и҆́щемъ и҆ про́симъ: Ты́ бо є҆сѝ Бг҃ъ на́шъ, Бг҃ъ є҆́же мл҃вати, и҆ спаса́ти, и҆ тебѣ̀ ᲃла́вꙋ воꙁсыла́емъ, съ беꙁнача́лнымъ ти Ѿц҃емъ, и҆ съ прⷭ҇тымъ, и҆ бл҃ги́мъ, и҆ животворѧ́щимъ ти Дхомъ, ны́нѣ и҆ прⷭ҇нѡ и҆ въ вѣ́ки вѣ́кѡвъ.
Ли́къ:
А҆ми́нь.
Въста́въ же, а҆́бїе тво́ритъ ѡ҆бы́чный дне́вный Ѿпꙋ́стъ, и҆ подае́тъ бл҃года́телемъ Крⷭ҇тъ лобꙁа́ти, и҆ кро́питъ и҆́хъ ᲃщ҃енною водо́ю: и҆ та́кѡ съ Бг҃омъ ѿхо́дѧтъ въ своѧ́ си съ ми́ром.