Вослѣдова́нїе моле́бное ѡ҆ и҆ꙁбавленїи недꙋгꙋ́ющагѡ ѡ҆бꙋрева́нїѧ и҆ наси́лїѧ дꙋ́хѡвъ нечи́стыхъ, и҆ Мл҃твы заклина́телныѧ тѣ́хжде лꙋка́выхъ дꙋ́хѡвъ

А҆́ще и҆ всѧ́къ и҆́стинныѧ Правосла́вно каѳꙍли́ческїѧ Хв҃ы Вѣ́ры и҆сповѣда́тель, ѿре́ксѧ вѣ́рою въ Крⷭ҇ще́нїи ᲃатаны̀, и҆ въ Ха҃ ѡ҆болксѧ, прїѧ́лъ є҆́стъ Ха҃ и҆ Цркве є҆гѡ̀ вла́стъ настꙋпа́ти на змїѧ̀ и҆ ско́рпїѧ а҆́дскїѧ, (и҆ на всю̀ си́лꙋ вра́жїю) и҆ тѣ́мъ си́це въ себѣ̀, ꙗ҆́коже и҆ въ бли́жнихъ любо́вїю себѣ̀ съвокꙋпле́нныхъ съпротивлѧ́тисѧ, и҆ побѣжда́ти:

Но ᲂу҆́бѡ въ Цркви ꙗ҆́же є҆́стъ сочине́нїе По́лкѡвъ чи́ннѡ располо́женныхъ, таковый чи́нъ свойстве́ннѣ прислꙋша́етъ Е҆ѯоркі́стомъ, ᲃі́естъ, Заклина́телємъ, вѧ́щше ще вы́шшымъ чи́нѡмъ Црк҃овнымъ, ᲃі́естъ, свѣщенѡ́сцемъ, Четце́мъ, И҆подїа́конѡмъ, Дїа́конѡмъ, и҆ Преꙁви́терѡмъ: є҆гда́ же бы́ти мо́жетъ, бо́лее Парохїа́лнымъ ᲃщ҃енникѡмъ, и҆лѝ Е҆пⷭ҇пѡмъ.

Но ᲂу҆́бѡ ѿ си́хъ чи́нѡвъ, въ си́цевый по́двигъ въда́ти себѐ хотѧ́й, нераꙁсꙋ́днѣ сі́е да сотво́ритъ, но соиꙁволе́нїемъ и҆ блⷭ҇ве́нїемъ началствꙋ́ющихъ сі́е да соверша́етъ.

Въ пе́рвыхъ ᲂу҆́бѡ и҆ пре́жде всегѡ̀, блюстѝ себѐ до́лженъ є҆́стъ ѿ стра́сти го́рдости и҆ тщесла́вїѧ, да не ка́кѡ ѡ҆брѧ́щетсѧ стра́ждꙋща въ и҆скꙋше́нїи нѣ́коегѡ любопы́тствѧ, и҆лѝ мнѣ́нїѧ ᲃт҃ы́нѣ: Но да и҆́матъ и҆́стинное и҆ глꙋбо́кое смире́нїе, и҆ себѐ сама́гѡ ѿверже́нїе и҆ пренебреже́нїе, недосто́инствѡ своѐ поꙁнава́ѧ: и҆сповѣдꙋ́ѧ: и҆ всю̀ сі́ю вла́сть Бжⷭ҇тве́нномꙋ млⷭ҇рдїю и҆ дѣ́йствꙋ присвоева́ѧ: Дїа́волъ бо надъ всѣ́ми сына́ми го́рдости царствꙋ́ѧй, ѿ себѣ̀ подо́бныхъ, и҆лѝ подрꙋ́чныхъ не побѣжда́етсѧ.

Вто́рое, да блюде́тсѧ ѿ всѧ́кагѡ ви́да сребролю́бїѧ и҆ лихои́мства є҆́же не то́чїю что̀ трꙋ́да ра́ди свое́гѡ не вꙁѧ́ти, но ни́же намѣре́нїе и҆ наде́ждꙋ є҆́же полꙋчи́ти когда̀ ᲃегѡ̀ въ себѣ̀ да и҆́матъ: Воспомина́ѧ себѣ̀, ꙗ҆́кѡ тако́вꙋю вла́сть тꙋнѐ приѧ́лъ є҆́стъ, и҆ ᲃі́ю вꙁи́мъ тꙋнѐ подава́ти до́лженъ є҆́стъ: мꙁдꙋ̀ ѻ҆́нꙋю ѡ҆жида́ѧ, вра́га лꙋка́вагѡ въ коне́цъ побѣди́вши, є҆́же и҆́мени є҆гѡ̀ въ Кни́гахъ живота̀ въпи́санꙋ бы́ти. Сребролю́бїе бо по А҆пⷭ҇лꙋ, є҆́стъ и҆дѡлослꙋже́нїе, и҆мꙋ́щее дꙋшѧ̀ прода́емыѧ: и҆ Верхо́внагѡ А҆пⷭ҇ла Петра̀ сꙋ́домъ, ѿверженъ є҆́стъ си́цевый ѿ жре́бїа слꙋже́нїѧ сегѡ̀, да́ръ ᲃта́гѡ Дх҃а цѣно́ю цѣнѧ́й вре́менною.

Тре́тее, да бюде́тъ себѐ, є҆́же не бы́ти грѣхо́мъ блꙋ́да, и҆ тѣле́сныѧ нечистоты̀ ѡ҆скверне́ный: и҆бѡ̀ ꙗ҆́коже Гд҃ь ᲂу҆ І҆ꙍ́ва свѣдител̾ствꙋ́етъ: Си́ла дїа́волѧ є҆́стъ, въ чре́слѣхъ є҆гѡ̀: и҆ мꙋ́жество є҆гѡ̀, въ пꙋ́пѣ чре́ва є҆гѡ̀: и҆ надъ тѣ́мъ дїа́волъ и҆́матъ вла́сть и҆́же проти́вѡ раꙁꙋма, и҆ За́конꙋ Бж҃ію, тѣ́ломъ свои́мъ злѣ̀ владѣ́етъ, ꙗ҆́кѡ конь и҆́мскъ и҆́мже нѣ́сть ра́ꙁꙋма.

Четве́ртое, да и҆́матъ тве́рдꙋю Вѣ́рꙋ ѡ҆ всѣ́хъ чле́нахъ Православнокаѳꙍли́ческїѧ Вѣ́ры, Восто́чнагѡ бл҃гоче́стїѧ, и҆ да ни въ є҆ди́номъ а҆́ще и҆ ме́ншемъ ᲂу҆сꙋмнѣва́етсѧ: Гл҃етъ бо Гд҃ь: Вѣ́рꙋющимъ, и҆ сі́е междꙋ и҆́нѣми зна́мен̾ми послѣдова́телнѡ бы́ти, є҆́же ѡ҆ И҆менѝ є҆гѡ̀ бѣ́сы и҆ꙁгони́ти. И҆ Петръ ᲃт҃ы́й лвꙋ̀ семꙋ̀ а҆́дскомꙋ рыка́ющомꙋ, въ вѣ́рѣ кре́пкѡ проти́витисѧ ᲂувѣщаваетъ. Ѕѣ́лѡ ᲂу҆́бѡ тве́рдою вѣ́рою ᲃебѐ да и҆ꙁвѣща́етъ, ѿ Ха҃ Бг҃а и҆ ѿ Цр҃кве є҆гѡ̀ и҆мѣ́ти вла́стъ и҆ꙁгонѧ́ти и҆ побѣжда́ти бѣ́сы: и҆ слꙋ́жбꙋ сі́ю Бжⷭ҇тве́ннꙋю свы́шше ᲃи́лою дѣйстви́телнѣ соверша́ти.

Пѧ́тое, да и҆́матъ тве́рдꙋю наде́ждꙋ ѡ҆ Бж҃іей блг҃сти, ꙗ҆́кѡ є҆мꙋ̀ въ си́цевомъ бл҃гочⷭ҇тномъ дѣла́нїи предста́нетъ, и҆ тѣ́мъ ꙗ҆́кѡ чре́ꙁъ своѐ ѡ҆рꙋ́дїе, ᲃоꙁда́нїе ѻ҆́браꙁа свое́гѡ, ѿ мꙋчи́тел̾ства вра́жїѧ свободи́тъ: Ра́ꙁвъ а҆́ще свои́мъ та́йнымъ смотре́ніемъ къ ᲃла́вѣ свое́й, и҆лѝ терпѧ́щагѡ мꙁды̀, и҆ къ и҆́номꙋ чесомꙋ̀ до́бромꙋ не сотво́ритъ, и҆лѝ продо́лжитъ.

Ше́стое же, и҆ надъ всѣ́ми Любо́въ, въ и҆ꙁвѣстнѣ́йшее и҆ началнѣ́йшее ѡ҆снова́нїе дѣ́лꙋ семꙋ̀ да поло́житъ въ не́йже ꙗ҆́кѡ въ тве́рдомъ щи́тѣ, всѧ̀ стрѣ́лы лꙋка́вагѡ раꙁжеже́нныѧ ᲂу҆га́снꙋтъ, и҆ всѧ̀ си́ла є҆гѡ̀ сокрꙋ́шитсѧ. Да внима́етъ же приле́жнѡ є҆́же всѧ̀ твори́ти въ ᲃла́вꙋ Бж҃ію, и҆ въ любо́въ и҆ сътрада́нїе бли́жнѧгѡ, и҆ въ дш҃евнагѡ и҆ тѣле́снагѡ є҆гѡ̀ здра́вїа наꙁида́нїе.

Се́дмое, чи́ннѡ въ ᲃерде́чномъ сокрꙋше́нїи, и҆ крѣ́пкомъ ѡ҆ грѣсе́хъ свои́хъ жалѣ́нїи да и҆сповѣ́сть всѧ̀ согрѣше́нїѧ своѧ̀ пре́дъ дх҃о́внымъ свои́мъ ѿце́мъ, и҆ ѿ негѡ̀ да прі́йметъ ѿ ни́хъ раꙁдрѣше́нїе. Дѣйстви́телнѣе же дѣ́ло сі́е начне́тъ, а҆́ще по Гн҃ю рече́нїю, по́стомъ тридне́внымъ и҆лѝ по си́лѣ є҆ли́кѡ мо́щнѡ себѐ приꙋгото́витъ: въ ты́ѧ же днѝ, да пребыва́етъ въ Мл҃твѣ, и҆ Бл҃гоче́стныхъ раꙁмышле́нїѧхъ: и҆ꙁрѧ́днѣе же та́йны Воплоще́нїѧ, Стрⷭ҇ти, ᲃмр҃ти, и҆ Воскрⷭ҇нїѧ Ха҃ Бг҃а на́шегѡ, и҆́миж҆ на́ше и҆скꙋпле́нїе ѿ мꙋчи́тел̾ства а҆́дова ᲃодѣла́сѧ. Са́мъ бо Гд҃ь ᲃт҃ы́мъ свои́мъ Оу҆́чн҃кѡмъ ѻ҆́браꙁъ и҆ꙁгна́нїѧ бѣсѡ́въ пока́ꙁꙋѧ, гл҃ть: ꙗ҆́кѡ є҆́стъ ро́дъ бѣсо́вскїй и҆́же не и҆схо́дитъ то́чїю Мл҃твою и҆ Посто́мъ. Маѳ: Гла́въ: з҃і. Зач. о҃в. Си́ми ᲂу҆́бѡ двѣма̀ крѣ́пкѡ въѡрꙋжи́всѧ, и҆ Бж҃ію по́мощъ привлече́тъ, и҆ бѣ́са иждене́тъ. Но ᲂу҆́бѡ и҆ ᲃа̀мъ по є҆ли́кꙋ мо́жетъ въ си́хъ да пребꙋ́детъ, и҆ и҆́нѣхъ да є҆мꙋ̀ помо́гꙋтъ ᲂу҆мо́литъ: ᲃи́це бо Бжⷭ҇твеннїи Ѿц҃ѝ творѧ́хꙋ. Сицевы́ми ᲂу҆́бѡ соверше́нїѧ добродѣ́телми Заклина́тель, по є҆ли́кꙋ члчⷭ҇кагѡ є҆стества не́мощъ Бж҃іѧ ᲃи́ла ᲂу҆крѣ́питъ, крѣ́пкѡ себѐ въѡрꙋжи́въ: Въ пе́рвыхъ, да неꙋдо́бъ ᲂу҆вѣритъ, бѣснова́тꙋ бы́ти комꙋ̀: а҆́ще не первѣ́е зна́менїѧ на не́мъ ᲂу҆́ꙁритъ, и҆́миже бѣ́сный, ѿ тѣ́хъ и҆́же че́рною же́лчїю, сі́естъ, Меланхо́лїею, и҆лѝ и҆́нымъ не́дꙋгомъ ѡ҆бѧ́ти сꙋ́тъ, раꙁн̾ствꙋ́етъ. Зна́менїѧ же бѣ́снагѡ ᲃꙋ́тъ сі́ѧ: и҆ноѧꙁы́чнѡ глагола́ти мнѡ́гими ᲃловесы̀, и҆лѝ глаголю́щагѡ раꙁꙋмѣ́ти: дале́че сꙋ́щаѧ и҆ сокрове́ннаѧ ѿкры́ти: ᲃи́лы па́че во́ꙁраста, и҆лѝ па́че є҆стестве́ннаѧ мѣ́ры покаꙁа́ти, и҆ и҆́наѧ си́мъ подо́бнаѧ, ꙗ҆́же мнѡ́га ᲃꙋ́тъ. ꙗ҆́кѡ ᲂу҆́бѡ да ᲃі́ѧ совершеннѣ́йше поꙁна́етъ, по Пе́рвой заклина́тельной, и҆лѝ Вто́рой Мл҃твѣ, да вопро́ситъ бѣ́снагѡ, что̀ ѡ҆щꙋща́етъ въ ᲂу҆мѣ̀ свое́мъ, и҆лѝ въ тѣ́лѣ, ꙗ҆́кѡ да ᲂу҆вѣ́сть кото́рыми словесы̀ зѣ́лнѣе бѣ́сы смꙋща́ютсѧ, въ є҆́же сі́ѧ па́ки прочестѝ и҆ повтори́ти.

Да зна́етъ же, како́выми ко́ꙁн̾ми и҆ лще́н̾ми понꙋжда́ютсѧ бѣ́сы, прелща́ти Заклина́телѧ: ѡ҆быкѡ́шѧ бо мнѡжи́цею ᲂу҆до́бъ ѿвѣщава́ти, неꙋдо́бнѡ же себѐ ѡ҆бъѧвлѧ́ти, ꙗ҆́кѡ да Заклина́тель на до́лꙁѣ ᲂу҆трꙋ́ждсѧ преста́нетъ, и҆лѝ ꙗ҆́кѡ да не́дꙋжный зри́тсѧ не ѿ бѣ́са мꙋ́чимъ бы́ти. И҆ногда же, повнегда̀ ѡ҆бъѧвле́ни быва́ютъ, съкрыва́ютсѧ, и҆ ѡ҆ставлѧ́ютъ тѣ́ло свобо́днѡ бы́ти ѿ всѧ́кагѡ мꙋче́нїѧ, ꙗ҆́кѡ да не́дꙋжный воꙁмни́тъ себѐ всѧ́кѡ свободи́тисѧ ѿ ни́хъ: но ᲂу҆́бѡ да не преста́нетъ Заклина́тель, до́ндеже ᲂу҆ꙁритъ зна́менїѧ свобожде́нїѧ. Ѻ҆́вогда же ᲂу҆́бѡ тво́рѧтъ ꙗ҆́же а҆́ще могꙋ́тъ препѧ́тїѧ, ꙗ҆́кѡ да не́дꙋжный не пода́сть себѐ заклина́нїѧмъ, и҆лѝ тща́тсѧ ᲂу҆вѣщава́ти, ꙗ҆́кѡ не́дꙋгъ є҆́стъ є҆стестве́нный: и҆́ногда же посре́дъ заклина́нїй сътво́рѧтъ ᲂу҆снꙋ́ти недꙋ́жнагѡ, и҆ видѣ́нїе нѣ́кое пока́ꙁꙋютъ є҆мꙋ̀ себѐ съкрива́юще, ꙗ҆́кѡ да не́дꙋжный воꙁмни́тсѧ ᲃвобожде́нъ бы́ти ѿ ни́хъ: нѣ́цїи же и҆ꙁъѧвлѧ́ютъ сътво́реное чарова́нїе, и҆ ѿ когѡ̀ є҆́стъ сотво́рено, и҆ ѡ҆́браꙁъ раꙁдрꙋше́нїѧ є҆гѡ̀: но ѡ҆паснѡ да блюде́тсѧ Заклина́тель да не ѿ сегѡ̀ къ чаро́вникѡмъ, и҆лѝ къ и҆́нѣмъ си́цевымъ, а҆ не къ Цр҃ко́внымъ ᲃлꙋжи́телемъ не́дꙋжный прибѣ́гнетъ, и҆лѝ како́вый забобо́нъ, и҆лѝ и҆́но что̀ ѿ запрѣще́нныхъ ᲂу҆потреблѧ́етъ. И҆ногда дїа́волъ не́дꙋжнагѡ почи́ти, и҆ Бжⷭ҇тве́ннымъ Та́йнамъ причасти́тисѧ ѡ҆ставлѧ́етъ, ꙗ҆́кѡ да ѿше́дша ꙗ҆ви́тсѧ. Въ коне́цъ, беꙁъчисле́нныѧ сꙋ́ть ко́ꙁни ле́сти дїа́волскїѧ къ прелще́нїю члове́ческомꙋ, и҆́миже є҆́же не прелсти́тисѧ да блюде́тсѧ Заклинател̾.

Въ Цр҃кви а҆́ще бы́ти мо́жетъ, и҆лѝ на и҆́номъ чⷭ҇тномъ и҆ ᲃт҃о́мъ мѣ́стѣ ѡ҆со́бномъ, ѿ мнѡ́жества на́рода ᲂу҆едине́номъ, да приве́денъ бꙋ́детъ бѣ́сный, и надъ ни́мъ да съверша́тсѧ заклина́нїѧ: но ᲂу҆́бѡ а҆́ще не́мощенъ, и҆лѝ кто̀ ѿ Бл҃горо́дныхъ ли́цъ бꙋ́детъ, и҆лѝ и҆́ныѧ ра́ди блгⷭ҇ло́вныѧ вины̀, въ ѡ҆со́бномъ до́мꙋ мо́гꙋтъ надъ на́мъ съверша́тисѧ Заклина́нїѧ.

Да нака́жетъ Заклина́тель бѣ́снагѡ, а҆́ще ᲂу҆о́мъ и҆ тѣ́ломъ здравствꙋ́етъ, ꙗ҆́кѡ да приле́жнѡ мл҃и́тсѧ ѡ҆ себѣ̀ Бг҃ꙋ, и҆ по́ститсѧ, и҆ ᲃт҃ы́мъ И҆сповѣда́нїемъ, и҆ Причаще́нїемъ Бж҃естве́нных Та́инъ, ча́стѡ по раꙁсꙋжде́нїю сщ҃енническомꙋ себѐ ѡ҆чи́ститъ и҆ ѡ҆гради́тъ: и҆ є҆гда̀ заклина́нїѧ надъ ни́мъ ᲃъверша́ютсѧ, ве́сь да ѡ҆треꙁви́тсѧ, и҆ всѧ помышле́нїѧ своѧ̀ собра́въ, къ Бг҃ꙋ ѡ҆брати́тъ и҆ въпери́тъ, и҆ тве́рдою наде́ждею ᲃпⷭ҇нїѧ ѿ негѡ̀ да про́ситъ въ всѧ́комъ смѣре́нїи: и҆ по є҆ли́кꙋ лютѣ́е мꙋ́чимъ быва́етъ, по толи́кꙋ терпели́внѣе да пребыва́етъ, ничто́же ᲂу҆сꙋмнѣва́ѧсѧ ѡ҆ Бж҃іей по́мощи. Да и҆́матъ въ рꙋкахъ, и҆лѝ пре́дъ ѻ҆чи́ма, Распѧ́тїе Хв҃о. Мо́щи ᲃт҃ы́хъ, а҆́ще бы́ти могꙋ́тъ, чⷭ҇тнѡ, и҆ до́брѣ свѧ́ꙁани въ чⷭ҇тномъ покри́валѣ на пе́рсехъ завѣ́шени, и҆лѝ на главѣ̀ бѣ́снагѡ да бꙋ́дꙋтъ: Но ᲂу҆́бѡ да блюде́тъ, ꙗ҆́кѡ да чⷭ҇тныѧ ве́щи ѡ҆беꙁчещени не бꙋ́дꙋтъ, и҆ ѿ бѣ́са ѡ҆неправдова́нїе нѣ́кое да не ᲂу҆те́рпѧтъ. Бжⷭ҇тве́нныѧТа́йны, ника́коже на главѣ̀ бѣ́снагѡ да воꙁлага́ютсѧ, и҆лѝ ѝна́кѡ тѣ́ла є҆гѡ̀ да прикоснꙋ́тсѧ, бѣды̀ ра́ди беꙁче́стїѧ.

Заклина́тель да не ᲂу҆праꙁдни́тсѧ многѡгл҃а́нїемъ, и҆лѝ и҆ꙁбы́точными и҆ любопы́тными вопроше́н̾ми, и҆ꙁрѧ́днѣе же ѡ҆ бꙋ́дꙋщихъ, и҆ сокрове́нныхъ ве́щехъ въꙁыскꙋ́ѧ, ꙗ҆́кѡ чи́нови є҆гѡ̀ не прислꙋша́ютъ: но да повели́тъ нечи́стомꙋ дꙋ́хови молча́ти, и҆ къ вопроше́нїю то́чїю ѿвѣщава́ти, ни́ же да вѣ́рꙋетъ є҆мꙋ̀, а҆́ще бы бѣ́съ повѣда́лъ себѐ бы́ти дꙋшѧ̀ нѣ́коегѡ ѿ ᲃт҃ы́хъ, и҆лѝ ᲂу҆ме́ршагѡ кое́гѡ, и҆лѝ А҆́гг҃лъ, всѧ́ бо сі́ѧ ло́жна сꙋ́тъ.

Потре́бнаѧ же вопроше́нїѧ, сꙋ́тъ ᲃі́ѧ: ѡ҆ числѣ̀, и҆ и҆менѝ дꙋ́хѡвъ вше́дшихъ, ѡ҆ вре́мени когда̀ внидѡ́ша, ѡ҆ винѣ̀, кое́ѧ ра́ди, и҆ ѡ҆ и҆́нѣхъ си́цевыхъ. И҆́ныѧ же бѣсо́вскїѧ блѧ́ди, смѣ́хи, и҆ беꙁчи́нїѧ Заклина́тель да запрѣти́тъ, и҆лѝ да ᲂуничижи́тъ: и҆ предстоѧ́щихъ, и҆́хже немнѡ́го бы́ти подоба́етъ, да нака́жетъ, є҆́же не внима́ти си́мъ, ни́же ѡ҆нѝ да вопроша́ютъ бѣ́снагѡ: но смѣре́ннѡ и҆ приле́жнѡ да мл҃ѧ́сѧ ѡ҆ не́мъ Бг҃ꙋ.

Заклина́нїѧ же дерꙁнове́ннѡ, и҆ повели́телнѡ вели́кою вѣ́рою, и҆ смире́ніємъ, и҆ теплото́ю да соверша́етъ: и҆ є҆гда̀ ᲂу҆́ꙁритъ дꙋ́ха зѣ́ѧнѣе мꙋ́чима, тогда̀ ѕѣ́лнѣе да насто́итъ, и҆ заклина́нїѧми и҆ꙁыйти принꙋ́дитъ: и҆ є҆ли́жды а҆́ще ᲂу҆ꙁритъ бѣ́снагѡ, тѣ́ло на нѣ́кꙋю стра́нꙋ движи́мо, и҆лѝ прекланѧ́емо, и҆лѝ болѣꙁнꙋ́емо, и҆лѝ надме́нїе каково̀ на нѣ́коей ча́сти пока́ꙁꙋющеесѧ, та́мо зна́менїе Крⷭ҇та̀ да сотво́ритъ, и҆ ᲃщ҃енною водо́ю да кро́питъ, и҆́же заклина́нїѧ дѣйствꙋѧ бли́ꙁъ себѐ да и҆́матъ.

Да внима́етъ же кото́рых ᲃлове́съ ѕѣ́лнѣе бѣ́сы трепе́щꙋтъ и҆ боѧ́тсѧ, и҆ сі́ѧ ча́стѡ да повторѧ́етъ: и҆ є҆гда̀ прі́йдетъ на запрѣще́нїѧ, сі́ѧ па́ки и҆ мнѡ́гажды да прочте́тъ всегда̀ ка́ꙁнь прилага́ѧ: и҆ а҆́ще ᲂу҆́ꙁритъ себѐ преспѣва́юща, въ се́мъ да пребꙋ́детъ двѣ, три, и҆ четы́ри ча́сы, и҆ мнѡжа́е по є҆ли́кꙋ воꙁмо́жетъ, до́ндеже побѣди́тъ.

Да блюде́тсѧ къ семꙋ̀ Заклина́тель, ни є҆дино̀ вра́чество не́дꙋжномꙋ и҆лѝ бъ́сномꙋ подава́ти, ни́же совѣтова́ти, но ѡ҆ се́мъ тща́нїе вра́чемъ да ѡ҆ста́витъ.

А҆́ще же надъ жено́ю заклина́нїѧ приключитсѧ твори́ти, всегда̀ съ собо́ю да и҆́матъ че́стныѧ лю́ди, къ ᲂу҆держа́нїю бѣ́сныѧ, внегда̀ мꙋ́чима быва́етъ ѿ бѣ́са: и҆ сі́ѧ ᲂу҆́бѡ лю́ди а҆́ще мо́щнѡ є҆́стъ да бꙋ́дꙋтъ бли́жнїи є҆ѧ̀, и҆ ѡ҆бы́чаевъ че́стныхъ.

Да блюде́тсѧ Заклина́тель, є҆́же ничто́же гл҃а́ти и҆лѝ твори́ти, є҆́же бы є҆мꙋ̀ само́мꙋ, и҆лѝ и҆́нѣмъ винꙋ̀ къ злы́мъ по́мыслѡмъ пода́ти могло̀. Внегда́ же заклина́етъ, да ᲂу҆потреблѧ́етъ ѿ Бжⷭ҇тве́нныхъ писа́нїй ᲃловеса̀ па́че, не́жели своѧ́ си, и҆лѝ чꙋ́ждаѧ. Да повели́тъ же де́монꙋ и҆ꙁрещѝ, а҆́ще соде́ржитсѧ въ тѣ́лѣ ѻ҆́номъ, кои́мъ дѣ́йствомъ чаро́внымъ, и҆лѝ чаро́вными зна́менми, и҆лѝ ѡ҆рꙋ́дїю: ꙗ҆́же а҆́ще бѣ́сный ᲂу҆сты̀ въ себѐ прїѧ́лъ є҆́стъ, да повели́тъ и҆ принꙋ́дитъ є҆гѡ̀, сі́ѧ и҆ꙁблева́ти: и҆лѝ а҆́ще и҆́нꙋдѣ и҆ внѣ̀ тѣ́ла сꙋ́тъ да ѿкры́етъ и҆ ѡ҆бъѧви́тъ ѧ҆̀, и҆ ѡ҆брѧ́щена да съжгꙋ́тсѧ. Да нака́жетъ же Заклина́тель бѣ́снагѡ, є҆́же всѧ̀ и҆скꙋше́нїѧ своѧ̀ є҆мꙋ̀ и҆сповѣ́сти и҆ ѿкры́ти ничто́же ᲂу҆таева́ѧ.

А҆́ще по́мощїю Бж҃іею бѣ́сный ᲃвобожде́нъ бꙋ́детъ, да наꙋче́нъ и҆ накаꙁа́нъ бꙋ́детъ, є҆́же ѡ҆па́снѡ ᲃебѐ блюстѝ ѿ грѣхѡ́въ, ꙗ҆́кѡ да не винꙋ̀ да́стъ бѣ́сꙋ є҆́же пи́ки вон̾ воꙁврати́тисѧ, да не бꙋ́дꙋтъ послѣ́днѧѧ члове́кꙋ томꙋ̀ го́ршаѧ пе́рвыхъ.

Приꙋгото́вленꙋ ᲂу҆́бѡ ᲃꙋ́щꙋ ꙗ҆́коже преднаписа́сѧ, Заклина́телю, по є҆ли́кꙋ мо́щнѡ въ все́мъ пре́дъ Бжⷭ҇тве́нною Лѵтр: повелѣ́въ на землѝ ни́цъ припа́сти бѣ́сномꙋ, и҆ прилѣ́жнѡ моли́тисѧ. А҆́ще є҆́стъ І҆ере́ѵ꙼, са́мъ Бжⷭ҇те́ннꙋю соверша́етъ Лѵтꙋ́ргїю; а҆́ще ли ни, то и҆́ный І҆ере́ѵ꙼ сы́й да соверша́етъ, прилѣ́жнѡ Бг҃а молѧ̀ є҆́же бл҃года́тїю свое́ю поспѣши́ти дѣ́лꙋ намѣре́нїѧ є҆гѡ̀. Въ Проскомиса́нїю ᲂу҆́бѡ да принесе́тъ ча́сть ѡ҆ не́дꙋжномъ, глаголѧ̀ Моли́твꙋ ᲃі́ю.

Гд҃и І҆и҃се Хє҃ Бж҃е на́шъ, во́лною ти ᲃтрⷭ҇тїю, и҆ животво́рною ᲃм҃ртїю, всю̀ си́лꙋ дїа́волю ᲂу҆праꙁдни́вый, и҆ держа́вꙋ є҆гѡ̀ раꙁдрꙋши́вый, ро́дъ же члчⷭ҇кїй ѿ мꙋчи́телства є҆гѡ̀ свободи́вый, и҆ вѣ́рныѧ лю́ди себѣ̀ присвои́вый, прїймѝ же́ртвꙋ сі́ю тебѣ̀ ѡ҆ рабѣ̀ твое́мъ, (и҆лѝ ѡ҆ рабѣ̀ твое́й,) И҆мⷬ҇къ: мно́ю недосто́йнымъ рабѣ̀ твое́мъ приноси́мꙋю, и҆ и҆жденѝ ѿ не́гѡ (и҆лѝ, ѿ не́ѧ) приле́жнѡ мо́лимсѧ вселꙋка́вое дїа́волское дѣ́йство, и҆ невреди́ма є҆гѡ̀ (и҆лѝ, ю҆̀) ѿ всѧ́кагѡ мечта́нїѧ и҆ наси́лїѧ де́монскагѡ всегда̀ соблюдѝ. Ты́ бо є҆сѝ И҆ꙁбави́тел̾, вра́чъ же, и҆ посѣти́тель дш҃ъ и҆ тѣле́съ на́шихъ, и҆ твоѧ̀ є҆́стъ ᲃла́ва въ вѣ́ки, А҆ми́нъ.

По И҆ꙁрѧ́дномъ же проче́тъ Мл҃твꙋ ѡ҆бы́чнꙋю, на концѣ̀ є҆ѧ̀ ᲃі́ю да глаголе́тъ.

Гд҃и Бж҃е на́шъ, мо́лимсѧ твое́мꙋ чл҃кѡлю́бїю, и҆ приле́жнѡ про́симъ, бл҃годарнѣ ѿ на́съ прїймѝ смире́ннѡ тебѣ̀ приноси́мый да́ръ и҆ мо́л̾бꙋ, и҆ слове́снꙋю ᲃлꙋ́жбꙋ ѡ҆ рабѣ̀ твое́мъ, (и҆лѝ, ѡ҆ рабѣ̀ твое́й) Имⷬ҇къ: и҆ бл҃гоꙋтро́бнѣ сегѡ̀, (и҆лѝ, сі́ю) ѿ наси́лїѧ лꙋка́вагѡ вра́га ле́сти, и҆ ѿ всѧ́кагѡ є҆гѡ̀ наважде́нїѧ, мꙋче́нїа и҆ держа́вы и҆ꙁмѝ, и҆ свободна покажѝ.

Ты́ бо є҆сѝ Бг҃ъ на́шъ, и҆ ᲃп҃съ дш҃амъ на́шимъ, и҆ тебѣ̀ сла́вꙋ воꙁсыла́емъ съ є҆диноро́днымъ ти ᲃн҃омъ, и прⷭ҇ты́мъ дх҃омъ въ вѣ́ки, А҆ми́нь.

По причаще́нїи же Бжⷭ҇тве́нныхъ Та́инъ, а҆́ще ᲃа́мъ Заклина́тель ᲃщ҃еннодѣ́йствꙋетъ, по ѡ҆бы́чной Моли́твѣ бл҃года́рной, да глаголе́тъ и҆ ᲃі́е.

Тѣ́ло твоѐ Прⷭ҇то́е, Гд҃и І҆и҃се Хє҃ Бж҃е на́шъ, и҆ Кро́вь твоѧ̀ всечⷭ҇тнаѧ, и҆́мже причасти́тисѧ на́мъ чл҃кѡлю́бнѣ и҆ꙁво́лилъ є҆сѝ, да бꙋ́детъ на́мъ въ ѡ҆ставле́нїе грѣхѡ́въ и҆ въ живо́тъ вѣ́чный, въ крѣ́постъ же и҆ въ всеѡрꙋ́жество на всю̀ си́лꙋ дїаволю, и҆ въ побѣ́дное ѡ҆долѣ́нїе и҆ коне́чное и҆ꙁгна́нїе всегѡ̀ дѣ́йства є҆гѡ̀ ѿ раба̀ твое́гѡ (и҆лѝ ѿ рабы̀ твое́ѧ) И҆мⷬ҇къ: ѿ не́гѡ насил̾ствꙋ́емагѡ, (и҆лѝ, насил̾ствꙋ́емыѧ.)

Ꙗ҆́кѡ ты є҆сѝ крѣ́постъ, ᲃи́ла, и҆ ᲂу҆твержде́нїе на́ше, и҆ тебѣ̀ ᲃла́вꙋ воꙁсыла́емъ съ беꙁнача́лнымъ ти Ѿц҃емъ, и҆ съ прⷭ҇ты́мъ, и҆ бл҃ги́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

А҆́ще же не са́мъ Заклина́тель ᲃлꙋ́житъ, І҆ере́ѵ꙼ ᲃлꙋжа́й глаголе́тъ ᲃі́ю Мл҃твꙋ.

Гд҃и І҆и҃с Хє҃ Бж҃е на́шъ, сподоби́вый мое недосто́инство мно́гагѡ ра́ди млⷭ҇рдїѧ твое́гѡ принестѝ тебѣ̀ ны́нѣ сі́ю сп҃се́ннꙋю беꙁкро́внꙋю Же́ртвꙋ, и҆ причасти́тисѧ Прчⷭ҇тымъ и҆ животворѧ́щимъ ти Та́йнамъ: Мл҃ю́ тѧ приле́жнѡ, є҆дина́гѡ бл҃га́гѡ и҆ чл҃кѡлюби́вагѡ и҆ всеси́лнагѡ Бг҃а, предста́ни ны́нѣ въ по́мощъ рабꙋ̀ твое́мꙋ є҆го́же и҆ꙁбра́лъ є҆сѝ въ слꙋже́нїе сі́е, є҆́же настꙋпа́ти на ѕмїѧ̀ и҆ ᲃко́рпїѧ, и҆ на всю̀ ᲃи́лꙋ вра́жїю, и҆ пода́ждъ є҆мꙋ̀ ᲃи́лꙋ, и҆ крѣ́пость, є҆́же мощѝ крѣ́пкѡ ᲃъпроти́витисѧ всѧ́кой си́лѣ вра́жией, и҆ ѡ҆ И҆менѝ твое́мъ и҆ꙁгони́ти воꙁмощѝ є҆мꙋ̀ держа́внѡ всѐ дїа́воле наси́лїе, насилствꙋ́ющее рабꙋ̀ твое́мꙋ, (и҆лѝ, рабѣ̀ твое́й) И҆мⷬ҇къ: Е҆й Гд҃и Бж҃е на́шъ, да не посрамле́нъ и҆ꙁы́йдетъ ᲂу҆пова́ѧй на млⷭ҇ть твою̀, и҆ на си́лꙋ держа́вы твое́ѧ надѣѧ́йсѧ, но побѣдоно́сецъ да ꙗ҆́витсѧ ѡ҆ твое́й держа́вѣ и҆ всеси́лной крѣ́пости.

Твое́ бо є҆́стъ є҆́же мл҃овати, и҆ ᲃп҃са́ти на́съ Бж҃е на́шъ, и҆ тебѣ̀ ᲃла́вꙋ воꙁсыла́емъ съ беꙁнача́лнымъ ти Ѿц҃емъ, и҆ съ ᲃт҃ы́мъ Дх҃омъ, въ вѣ́ки, А҆ми́нь.

По Лѵтꙋ́ргїи же Бжⷭ҇тве́нной, а҆́ще са́мъ Заклина́тель сщ҃еннодѣйствова́лъ є҆́стъ, да не не слага́етъ съ себѐ ᲃщ҃енныѧ ѡ҆де́жды, но ѡ҆дѣѧ́нъ въ всѧ̀ да съверша́етъ Послѣдова́нїе заклина́нїѧ. А҆́ще же не са́мъ ᲃщ҃еннодѣйствова̀, и҆ а҆́ще І҆ере́ѵ꙼ є҆́стъ, да воꙁло́житъ на себѐ Е҆пітра́хіль и҆ Фелѡ́нъ: а҆́ще же ѿ ме́ншихъ чи́нѡвъ є҆́стъ, въ ᲃтиха́ръ: а҆́ще же є҆́стъ Дїа́конъ, и҆лѝ И҆подїа́конъ: а҆́ще же ѿ ни́ꙁщих, въ кра́ткїй да ѡ҆блачи́тсѧ Фелѡ́нъ, си́це ꙗ҆́кѡ да свое́гѡ Са́на Чи́на не ли́шитсѧ ѡ҆де́жды.

Ѻ҆́бра́щжесѧ къ бѣснꙋ́ющомꙋсѧ и҆ къ предстоѧ́щимъ, да тво́ритъ къ ни́мъ въкра́тцѣ Предосло́вїе поꙋчи́телное, въ є҆́же и҆ ѡ҆ предлежа́щемъ дѣ́лѣ наꙋчи́тсѧ и҆́мъ, и҆ къ теплотѣ̀ мл҃твъ воꙁбꙋжда́тисѧ.

Сконча́въ же сі́е, а҆́бїе ве́лїимъ смѣре́нїемъ и҆ бл҃гоговѣ́нїемъ, а҆́ще І҆ере́ѵ꙼ є҆́стъ, пре́дъ ᲃт҃о́ю Тра́пеꙁою въ Ѻ҆́лтари, ѿверꙁъ Црⷭ҇каѧ Вра́та: а҆́ще же ѿ ме́ншихъ чи́нѡвъ, внѣ̀ Ѻ҆́лтарѧ пре́дъ ᲃт҃ы́ми вра́ты па́дъ ни́цъ на лицѝ свое́мъ, съ ᲂу҆миле́нїемъ и҆ слеꙁа́ми чте́тъ, ѱало́мъ, н҃. Пом҃лꙋй мѧ̀ Бж҃е: До конца̀. Сі́е же тво́рѧтъ и҆ предстоѧ́щїи. По сконча́нїи же ѱалма̀, на колѣ́нехъ ᲃтоѧ̀ чтетъ ᲃі́ю Мл҃твꙋ съ всѧ́кимъ ᲂу҆миле́нїемъ.

Гд҃и І҆и҃с Хє҃ Бж҃е на́шъ, и҆ꙁ беꙁнача́лнагѡ и҆ съпрⷭ҇носꙋ́щнагѡ ти Ѿц҃а̀, беꙁълѣ́тнѡ превѣ́чнѣ рожде́нне неиꙁрече́ннѡ, и҆ въ послѣ́днѧѧ лѣ́та ѿ Прчⷭ҇тыѧ Дв҃ы Мр҃іѧ, спⷭ҇нїѧ ра́ди члчⷭ҇кагѡ непрело́жнѡ вочл҃ве́чивыйсѧ, смире́ннѡ пре́дъ твои́мъ вели́чествомъ колѣ́нѣ дш҃а и҆ тѣ́ла мое́гѡ прекло́нь, ра́бски мл҃ю́сѧ, послѝ бл҃годать твою̀ всечисти́телнꙋю и҆ просвѣща́ющꙋю, и҆ всѧ́ ми ѡ҆мы́й скве́рны и҆ просвѣти́ ми смы́слъ, и҆ рꙋ́кꙋ твою̀ держа́внꙋю и҆ крѣ́пкꙋю, съ высоты̀ жи́лища твое́гѡ прострѝ, и҆ ѡ҆сѣнѝ надъ гла́вою мое́ю въ дн҃ь бра́ни сеѧ̀, и҆ ᲂу҆крѣпи́ мѧ̀ на предлежа́щее дѣ́ло, ᲃи́лꙋ и҆ крѣ́посттъ ꙗ҆́же ѿ тебѐ мнѣ̀ дарꙋ́ѧ, на побѣжде́нїе и҆ и҆ꙁгна́нїе всѧ́кїѧ дїа́волскїѧ си́лы, рабꙋ̀ твое́мꙋ И҆мⷬ҇къ: (и҆лѝ рабѣ̀ твое́й) насилствꙋ́ющїѧ, тебѣ́ бо ꙗ҆вле́нны сꙋтъ стра́сти моѧ̀, и҆ не́мощъ є҆́стⷭ҇тва члчⷭ҇кагѡ, и҆ крѣ́пость сꙋпоста́та и҆ вра́га нш҃егѡ и҆ꙁве́рга же твое́гѡ лꙋка́вагѡ дїѧ́вола:

Ты ᲃа́мъ Влады́ко вѣ́си ꙗ҆́кѡ є҆́стⷭ҇тво на́ше є҆́стъ стра́стнѡ, и҆ си́ла не́мощна, и҆ беꙁъ тебѐ Бг҃а и҆ ᲃп҃са нш҃гѡ, ꙗ҆́коже ничто́же є҆смы̀, си́це и҆ бе́ꙁъ твое́ѧ по́мощи ничто́же ᲂу҆спѣ́ти мо́жемъ. Ѿ тебѐ ᲂу҆́бѡ да́вшагѡ вла́стъ рабѡ́мъ ᲃвои́мъ є҆́же настꙋпа́ти на змїѧ̀ и҆ ско́рпїа, и҆ на всю̀ си́лꙋ вра́жїю, и҆ є҆́же ѡ҆ именѝ твое́мъ и҆ꙁгонѧ́ти лꙋка́выѧ дꙋ́хи, ꙗ҆́кѡ ѿ всемогꙋ́щагѡ Влады́ки и҆ всеси́л̾нагѡ Воево́ды, крѣ́постъ, ᲃи́лꙋ же, и҆ по́мощь про́симъ: и҆ ᲂу҆́бѡ ꙗ҆́кѡ да тобо́ю на́мъ чл҃кѡлю́бнѣ да́ннаѧ сі́ѧ вла́стъ грѣха́ми мои́ми невоꙁбране́на бꙋ́детъ, дѣйстви́телна въ настоѧ́щемъ дѣ́лѣ бы́ти: па́ки и҆ па́ки смѣре́ннѡ ра́бски мл҃и́сѧ.

Но мно́ю ꙗ҆́кѡ свои́мъ, а҆́ще и҆ недосто́йнымъ ѡ҆рꙋ́дїемъ покажѝ си́лꙋ свою̀ вели́кꙋю и҆ крѣ́пкꙋю ны́нѣ. Е҆́й Гд҃и Бж҃е на́шъ, да не посрамле́нъ ѿ тебѐ и҆ꙁыйдꙋ̀, ни́же да воꙁра́дꙋетсѧ вра́гъ дш҃ъ на́шихъ ѡ҆ не́мощи мое́й, но ᲃи́лою и҆ дѣ́йствомъ твое́гѡ Прⷭ҇та́гѡ, великолѣ́пнагѡ, стра́шнагѡ, и҆ покланѧ́емагѡ И҆менѝ, и҆ твое́гѡ беꙁнача́льнагѡ, и҆ превѣ́чнѡ є҆диноестестве́ннагѡ Ѿц҃а̀, и҆ сора́сл̾нагѡ, и҆ є҆диносꙋ́щнагѡ, и҆ съпрⷭ҇то́лнагѡ животворѧ́щагѡ ти Дх҃а, съ ни́ми же є҆ди́нъ по сꙋществꙋ̀ Бг҃ъ сы́й надъ всѣ́ми црⷭ҇твꙋ́еши, да и҆ꙁгнанъ бꙋ́детъ и҆ побѣжде́нъ вра́гъ сꙋпоста́тъ и҆ мꙋчи́тель є҆́стⷭ҇тва на́шегѡ, тво́й же сопроти́вникъ всего́рдый дїа́волъ, и҆ въ бѣ́гство да ѡ҆брати́тсѧ, и҆ а҆́бїе воско́рѣ со все́ю лꙋкавокова́рною си́лою свое́ю да и҆ꙁыйдетъ, и҆ да и҆сче́ꙁнетъ ѿ раба̀ твое́гѡ ᲃегѡ̀, (и҆лѝ ѿ рабы̀ твое́ѧ сеѧ̀) И҆мⷬ҇къ: и҆ ѿ мѣ́ста сегѡ̀, и҆ ктомꙋ̀ въ вѣ́ки да не воꙁврати́тсѧ въспѧ́тъ.

Твое́ бо є҆́стъ црⷭ҇тво, Си́ла же, и҆ держа́ва, и҆ тебѐ сла́витъ всѧ̀ тва́ръ въ вѣ́ки, А҆ми́нь.

Вста́въ же а҆́бїе съ дерꙁнове́нїемъ мно́гимъ и҆ крѣ́пкою вѣ́рою ѡ҆гражда́ѧсѧ три́жды Крⷭ҇тнымъ знаменїемъ, гл҃етъ:

Въ и҆мѧ̀ Ѿц҃а̀, и҆ Сн҃а, и҆ ᲃт҃а́гѡ Дх҃а, А҆ми́нь.

Пото́м же ᲃі́е.

Гд҃и І҆и҃се Хє҃ Сн҃е Бж҃ій пом҃лꙋй мѧ̀ грѣ́шнагѡ.

Бж҃е млⷭ҇тивъ бꙋ́ди мнѣ̀ грѣ́шномꙋ.

Бж҃е въ по́мощь мою̀ вонмѝ.

Гд҃и помощѝ мнѣ̀ потщи́сѧ.

И҆ начина́етъ ѡ҆бы́чнѡ.

Блⷭ҇ве́но Црⷭ҇тво Ѿц҃а̀, и҆ Сн҃а, и҆ ᲃт҃а́гѡ Дх҃а, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Предстоѧ́щїи же Кли́рици, ѿвѣща́ютъ, А҆ми́нь.

Са́мъ же Заклина́тель чте́тъ съ ᲂу҆миле́нїемъ и҆ всѧ́кимъ внима́нїемъ ничто́же борꙁѧ́сѧ: всѧ̀ послѣдꙋ́ющаѧ по чи́нꙋ, наче́нъ ѿ здѐ:

Сла́ва тебѣ̀ Бж҃е на́шъ, сла́ва тебѣ̀. Цр҃ю нбⷭ҇ный: Трⷭ҇то́е: Ѿч҃е на́шъ: Ꙗ҆́кѡ твоѐ є҆́стъ Црⷭ҇тво: Гд҃и пом҃лꙋй, в҃і.

Сла́ва: И҆ ны́нѣ:

Прїйдѣ́те поклони́мсѧ, гⷤ.

И҆ а҆́бїе ѱало́мъ, рм҃в:

Гд҃и ᲂу҆слы́ши мл҃твꙋ мою̀:

и҆ ѱало́мъ, к҃в:

Гд҃ь пасе́тъ мѧ̀ и҆ ничто́же мѧ̀ ли́шитъ:

и҆ ѱало́мъ, к҃ѕ:

Гд҃ь просвѣще́нїе моѐ и҆ ᲃп҃си́тель мо́й:

Сла́ва Ѿц҃ꙋ, и҆ Сн҃ꙋ, и҆ ᲃт҃о́мꙋ Дх҃ꙋ.

Предстоѧ́щїи же І҆ере́є, и҆лѝ про́чїи ѿ сщ҃еннагѡ чи́на тꙋ̀ сꙋ́щїи Кли́рици гл҃ю́тъ:

И҆ ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

А҆л҃лꙋ́іѧ, А҆л҃лꙋ́іѧ, ᲃла́ва тебѣ̀ Бж҃е. гⷤ.

А҆́бїе же Заклина́тел̾ съ всѧ́кимъ бл҃гоговѣ́нїемъ и҆ внима́нїемъ, гл҃етъ сі́ѧ Мл҃твы.

Поклонѧ́юсѧ тебѣ̀ Прⷭ҇та́ѧ Трⷪ҇це, є҆диносꙋ́щнаѧ, животворѧ́щаѧ, и҆ нераꙁдѣли́маѧ, Ѿч҃е, и҆ Сн҃е, и҆ Ст҃ы́й Дш҃е, и҆́стинный є҆ди́ный Бж҃е, и҆ тво́рче мо́й: вѣ́рꙋю въ тѧ̀, и҆сповѣ́дꙋ́ю, славлю̀, блⷭ҇влю̀, бл҃годарю̀, хвалю̀, почита́ю, превоꙁнощꙋ̀, и҆ смире́ннѡ мл҃ю́ тѧ, пом҃лꙋй мѧ̀ непотре́бнагѡ и҆ недосто́йнагѡ раба̀ твое́гѡ: и҆ ѿ ѡ҆ꙁлобле́нїѧ дїа́волскагѡ и҆ꙁба́ви ᲃоꙁда́нїе твоѐ ᲃі́е.

Велича́ю тѧ Прчⷭ҇та́ѧ Дв҃о Бж҃е, воꙁвели́чившꙋю ро́дъ на́шъ, и҆ бл҃жꙋ́ тѧ преблаже́ннꙋю и҆ непоро́чнꙋю Мт҃ръ Бг҃а на́шегѡ, твои́мъ Рдⷭ҇твомъ ꙗ҆ви́вшꙋю на́мъ ᲃвѣ́тъ и҆́стинный: Цр҃и́це нб҃а и҆ землѝ, и҆ ходота́йце всѣ́хъ грѣ́шныхъ: и҆ приле́жнѡ мл҃ю́сѧ, ты сегѡ̀ раба̀ твое́гѡ ѿ зло́бныхъ дꙋ́хѡвъ ѡ҆бꙋрева́емагѡ покры́й, застꙋпѝ, и҆ и҆ꙁба́ви ѿ всѣ́хъ бѣ́дъ и҆ нꙋ́ждъ, дш҃евныхъ и҆ тѣле́сных, и҆ ѿ всѣ́хъ ᲂу҆́ꙁъ грѣхѡ́вныхъ свободѝ є҆гѡ̀, и҆ бꙋ́ди є҆мꙋ̀ и҆ на́мъ застꙋ́пница всеси́л̾ными ти мл҃тва́ми.

Ст҃ы́и Чинонача́л̾ници, Міхаи́ле, Гаврїи́ле, Рафаи́ле, Ꙋ҆рїи́ле, съ всѣ́ми ᲂу҆́мными нбⷭ҇ными ᲃи́лами, Прⷭ҇тлами, Херꙋві́мами, Серафі́мами, Нача́лами, Госпо́дствїами, Вла́ст̾ми, Си́лами, А҆рха́гг҃лами, и҆ А҆гг҃лами, мл҃и́те Бг҃а ѡ҆ рабѣ̀ своє́мъ.

Ст҃ы́й І҆ꙍа́нне Прⷪ҇роче Предъте́че, и҆ Крⷭ҇ти́телю Гн҃ь, ꙗ҆́кѡ и҆мы́й дерꙁнове́нїе къ Влады́цѣ, съ ᲃт҃ы́ми Бг҃оѿтцы І҆ѡаки́момъ и҆ І҆ѡ́сифомъ Дв҃ыѧ Бц҃ы ѡ҆брꙋ́чникомъ, съ Патрїа́рхами, Прⷪ҇ро́ками, и҆ съ всѣ́ми пре́жде За́кона и҆ въ За́конѣ Ха҃ предвоꙁвѣсти́вшими пра́ведными, мл҃ѝ Бг҃а ѡ҆ рабѣ̀ своє́мъ.

Ст҃і́и ᲃла́внїи и҆ всехва́лнїи А҆пⷭ҇ли, Пе́тре, и҆ Па́вле, А҆ндре́е, І҆а́кꙍве, І҆ꙍа́нне, Ѳꙍмѐ, Фили́ппе, І҆а́кꙍве, Варѳꙍломе́е, Матѳе́е, Си́мѡне, Фадде́е, Матѳі́е, Варна́во, Лꙋка̀, Ма́рко, съ всѣ́ми про́чїими А҆пⷭ҇лами, ᲃедмидесѧ́т̾ми же Ꙋ҆ч҃никами, и҆ всѣ́ми Хв҃о Е҆ѵⷢ҇лїе свѣ́тлѡ проповѣда́вшими, мл҃те Бг҃а ѡ҆ рабѣ̀ свое́мъ.

Ст҃и́и добропобѣ́днїи Мч҃нци, Стефа́не, Лавре́нтїе, и҆ І҆гна́тїе Бг҃оносче, Геꙍ́ргїе, Діми́трїе, Проко́пїе, Меркꙋ́рїе, Ѳеꙍ́доре Тѵ́роне и҆ ᲃтратила́те, Кѵпрїа́не, Пантелеи́моне, Кѡꙁма̀ и҆ Дамїа́не, Кѵ́ре, І҆ꙍа́нне, Е҆рмола́е, Но́вый І҆ꙍа́нне ᲃꙋча́вскїй. Чꙋдотво́рнїи Рꙍссі́йстїи ᲃтрⷭ҇тоте́рпци, Глѣ́бе и҆ Бори́се, А҆нтѡ́нїе, І҆ꙍа́нне, Е҆ѵстра́фїе въ Ви́лнѣ Ха҃ ра́ди ᲃтрада́вшїи. Преподобномч҃ниче Е҆ѵстра́тїе Пече́рскїй, и҆ всѣ̀ про́чїи ᲃт҃ы́и Мч҃ници Ха҃ ра́ди пострада́вшїи, и҆ вѣнча́вшїисѧ, съ всѣ́ми ᲃт҃ы́ми И҆сповѣ́дниками, мл҃те Бг҃а ѡ҆ рабѣ̀ свое́мъ.

Ст҃ы́й Васи́лїе Вели́кїй, Григо́рїе Бг҃осло́ве, І҆ꙍа́нне Златоꙋ́стый, Дїа́волꙍни́сїе А҆реꙍпагі́та, А҆ѳана́сїе, Кѵрѵ́лае, А҆леѯандрі́йскїй и҆ І҆ерⷭ҇ли́мскїй, Григо́рїе Ни́сскїй, Климе́нте, Е҆пифа́нїе, Ѳеꙍфила́кте, І҆ꙍа́нне Дамаски́не, и҆ всѣ̀ᲃт҃ы́и Ꙋ҆чи́телїе вселе́нстїи, мл҃и́те Бг҃а ѡ҆ рабѣ̀ свое́мъ.

Ст҃ы́й Нікола́е Мѵрлѵкі́йскїй, Григо́рїе Неѡкесарі́йскїй, Григо́рїе А҆рме́нскїй, Григо́рїе А҆крага́нскїй, Пе́тре А҆нтіѡхі́йскїй, І҆ꙍа́нне Ми́лостивый, Андре́е Кри́тскїй, Спиридо́не Тримифи́нскїй, Пе́тре, А҆ле́ѯїе, І҆ꙍ́но, Кѵпрїа́не, Фо́тїе Кі́евстїи Митрополи́ти, Нифо́нте Новогоро́дскїй, Рѡссі́йстїи Чꙋдотво́рци, и҆ всѣ̀ ᲃт҃ы́и І҆ера́рси, мл҃и́те Бг҃а ѡ҆ рабѣ̀ свое́мъ.

Ст҃ы́й Равноапⷭ҇лный Цр҃ю Кꙍнстанті́не, съ Вели́кимъ Рѡссі́йскимъ Кнѧ́ꙁемъ Владими́ромъ, Міхаи́ломъ Черни́говскимъ, и҆ Ѳеѡ́доромъ болѧ́риномъ є҆гѡ̀, и҆ съ всѣ́ми ᲃт҃ы́ми Цр҃ѝ и҆ Кнѧꙁѝ, молѝ Бг҃а ѡ҆ рабѣ̀ ᲃвое́мъ.

Преподо́бнїи и҆ Бг҃онѡ́снїи Ѿц҃ѝ на́ши, Па́вле Ѳиве́йскїй, А҆нтꙍ́нїе Вели́кїй, Ѳеѻдѡ́сїе, Е҆ѵѳі́мїе, Мака́рїе, А҆ѳана́сїе А҆ѳѡ́нскїй, Са́вво ѡ҆сщ҃енный, Ма́рко Ѳра́ческїй, І҆ларіѡ́не вели́кїй, Ѳеѡ́дѻре Стꙋди́тскїй и҆ Начерта́нный, Сѵмеѡ́не, Данїи́ле, и҆ А҆лі́мпїе ᲃто́лпници, А҆ле́ѯїе Чл҃че Бж҃їй, І҆ꙍа́нне Кꙋ́щиче, Сѵмеꙍ́не, и҆ Васи́лїе Ха҃ ра́ди ю҆роди́вїи, Кѵри́лле филосо́фе, Оу҆ч҃телю ᲃлове́нскїй, и҆ Преподо́бнїи Ѿц҃ѝ на́ши Пече́рскїи А҆нтꙍ́нїе, Ѳеѻдѡ́сїе, Нікола́е Свѧто́ша, Ні́коне, Дамїа́не, А҆гапи́те, А҆ли́мпїе вра́чеве, Григо́рїе, Про́хоре, Чꙋдотво́рнїи, А҆ѳана́сїе, Лавре́нтїе затво́рници, І҆ꙍа́нне, Ні́коне, и҆ І҆саа́кїе многострада́лнїи, Пи́мине многѡтерпели́вый, Ѳеѡ́дѻре, и҆ Васі́лїе ᲃтрⷭ҇тоте́рпци, І҆еремі́а, и҆ Матѳе́е Проꙁорли́вїи, Мѡѵ꙼се́ю Ꙋ҆грине дѣвства̀ ра́ди пострада́вый, Спиридо́не, Никоди́ме Просфородѣ́йче, Е҆ра́ꙁме, Е҆ѵѳи́мїе, и҆ всѝ ст҃ы́и дѣвстве́нници, Пꙋсты́нници, И҆ноци, въ По́стническомъ по́двиꙁѣ Хв҃и ᲂу҆годи́вшїи, моли́те Бг҃а ѡ҆ рабѣ̀ свое́мъ.

Ст҃а́ѧ Ѳе́кло, Е҆катери́но, Варва́ро, Е҆ѵѳі́мїѧ, Мари́но, І҆ꙋсти́но, А҆наста́сїе, Е҆ѵѳроси́но, Е҆ѵге́нїѧ, Е҆ѵѳроси́но По́лоцкаѧ, и҆ всѧ̀ ᲃт҃ы́ѧ Дв҃ы, Ха҃ ра́ди пострада́вшїѧ, и҆ Преподобнѡ пожи́вшїѧ, моли́те Бг҃а ѡ҆ рабѣ̀ ᲃвое́мъ.

Ст҃а́ѧ А҆́нно, Е҆лисаве́ѳо, Ма́рїе Магдалы́но, Цри́це Е҆ле́но, Вели́каѧ Кн҃ги́не Ѻ҆́л̾го, Макри́но, Мела́нїе, Пела́гїе, и҆ всѧ̀ ᲃт҃ы́ѧ Мѵроно́сицѧ, Мч҃ницѧ, и҆ Преподо́бныѧ Же́ны Хв҃и досто́йнѡ послꙋжи́вшїѧ, мл҃и́те Бг҃а ѡ҆ рабѣ̀ свое́мъ.

Мл҃твами всѣ́хъ ᲃты́хъ твои́хъ Гд҃и, млⷭ҇тивъ бꙋ́ди на́мъ и҆ пом҃лꙋй раба̀ ᲃвое́гѡ. Ꙋ҆млⷭ҇рди́сѧ Гд҃и, и҆ ᲂу҆слы́ши на́съ грѣ́шныхъ мл҃ѧ́щихъ ти сѧ, и҆ и҆ꙁба́ви раба̀ свое́гѡ ѿ всѧ́кагѡ зла̀.

Ꙋ҆млⷭ҇рди́сѧ Тво́рче, и҆ и҆скꙋпи́телю на́шъ и҆ ѡ҆чи́сти на́съ, и҆ сегѡ̀ раба̀ твое́гѡ ѿ грѣхѡ́въ и҆ скве́рнъ дш҃евныхъ и҆ тѣле́сных, и҆ пом҃лꙋй на́съ.

Ꙋ҆млⷭ҇рди́сѧ ᲃп҃се, и҆ и҆ꙁбави́телю на́шъ, и҆ ѿвратѝ пра́веднѡ движи́мый гнѣ́въ сво́й ѿ на́съ, и҆ ѿ раба̀ твое́гѡ, и҆ ѿ напра́сныѧ и҆ ненача́емыѧ см҃рти и҆ꙁба́ви, и҆ ѿ всѣ́хъ дїа́волскихъ кова́рствъ, воско́рѣ свободѝ є҆гѡ̀.

Застꙋпѝ, ᲃп҃сѝ, пом҃лꙋй, и҆ съхранѝ є҆гѡ̀ и҆ на́съ Бж҃е твое́ю бл҃годатїю, и҆ ѿ всѧ́кїѧ ско́рби, гнѣ́ва, бѣ́ды̀, и҆ нꙋ́жда, и҆ бо́лѣꙁни дꙋше́вныѧ, и҆ тѣле́сныѧ, и҆ ѿ сме́рти вѣ́чныѧ млⷭ҇рдїемъ си и҆ꙁба́ви.

Пом҃лꙋй на́съ Бж҃е, по вели́цѣй млⷭ҇ти твое́й, ᲃмире́ннѡ мл҃и́мтисѧ, ᲂу҆слы́ши и҆ пом҃лꙋй раба̀ твое́гѡ.

Въплоще́нїѧ ра́ди твое́гѡ, и҆ прише́ствїѧ въ мі́ръ, Рождества́ же и҆ Кр҃ще́нїѧ, и҆ По́ста ᲃт҃а́гѡ твое́гѡ: Крⷭ҇та ра́ди и҆ ᲃтрада́нїѧ, ᲃм҃рти же и҆ Погребе́нїѧ и҆ Воскрⷭ҇нїѧ ра́ди, и҆ пресла́внагѡ Воꙁнесе́нїѧ твое́гѡ, Соше́ствїѧ ра́ди ᲃт҃гѡ твое́гѡ Оу҆тѣши́телѧ Дх҃а, и҆ Вто́рагѡ ᲃтра́шнагѡ твое́гѡ па́ки Прише́ствїѧ, мы грѣ́шнїи и҆ недосто́йнїи рабѝ твоѝ, съ ᲂу҆миле́нїемъ къ тебѣ̀ припада́юще мл҃имсѧ, млⷭ҇тивнымъ си ѻ҆́комъ при́ꙁри на раба̀ твое́гѡ И҆мⷬ҇къ: и҆ прости́въ є҆мꙋ̀ всѧ̀ съгрѣше́нїѧ во́лнаѧ и҆ не во́лнаѧ, ви́ждъ ско́рбъ и҆ ѡ҆ꙁлобле́нїе є҆гѡ̀, и҆ ѡ҆блегчѝ є҆̀, и҆ ми́ръ сво́й да́въ є҆мꙋ̀, чл҃кѡлю́бїемъ и҆ бл҃гостїю твое́ю съблюдѝ є҆гѡ̀, и҆ бл҃гослови́въ ѿ всѧ́кагѡ ѡ҆ꙁлобле́нїѧ, наси́лїѧ, мꙋче́нїѧ, наважде́нїѧ же, и҆ нападе́нїѧ дїа́волскагѡ и҆ꙁѧ́ти и҆ и҆ꙁба́вити тогѡ̀ и҆ꙁволѝ.

Ты́ бо є҆ди́нъ є҆сѝ грѣ́хѝ мі́ра вꙁемлѧ́й, и҆ не́дꙋги и҆ бѡ́лѣꙁни на́шѧ понесы́й, и҆ и҆сто́чникъ цѣлба́мъ, и҆ вра́чъ дш҃амъ и҆ тѣ́лѡмъ на́шимъ: и҆ тебѣ̀ сла́вꙋ воꙁсыла́емъ, съ беꙁнача́лнымъ ти Ѿц҃емъ, и҆ съ прⷭ҇ты́мъ и҆ бл҃ги́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Предстоѧ́щїи же ре́кше:

А҆ми́нь.

Заклина́тель чте́тъ со ᲂу҆миле́нїемъ ѱал: Живый въ по́мощи:

А҆́бїе же предстоѧ́щїи Кли́рици пою́тъ настоѧ́щїй се́й Канѡ́нъ ти́химъ гла́сомъ съ ᲂу҆миле́нїемъ: а҆́ще ли И҆рмосы̀ то́чїю пою́тъ, Тропарѝ Канѡ́на є҆ди́нъ ѿ ᲃщ҃е́нныхъ, и҆лѝ са́мъ Заклина́тел̾ въ ᲂу҆слыша́нїе и҆ раꙁꙋмѣ́нїе предстоѧ́щихъ съ ᲂу҆миле́нїемъ чте́тъ.

Пѣ́снь, а҃. Гла́съ, в҃. И҆рмо́съ.

Грѧдѣ́те лю́дїе, пои́мъ пѣ́снь Хꙋ҃ Бг҃ꙋ, раꙁдѣ́лшомꙋ мо́ре, и҆ прове́дшомꙋ лю́ди ꙗ҆́же и҆спꙋстѝ и҆ꙁ работы̀ Е҆гѵ́петскїѧ, ꙗ҆́кѡ просла́висѧ.

Припѣ́лъ:

И҆ꙁба́ви ѿ бѣ́дъ ᲃп҃се раба̀ свое́гѡ, ꙗ҆́кѡ млⷭ҇рдъ.

Тво́рче и҆ И҆ꙁбави́телю на́шъ Гд҃и, вѣ́рныхъ по́мощи, ᲂу҆скорѝ и҆ и҆ꙁмѝ ѿ настоѧ́щїѧ бѣды̀, раба̀ твое́гѡ приꙁыва́ющагѡ тѧ на́ми чл҃кѡлю́бче.

На́ше є҆ди́нъ вѣды́й неможе́нїе, ѿ настоѧ́щїѧ ско́рби, и҆ ѡ҆бдержа́щїѧ поги́бели предвари́въ и҆схитѝ, и҆ спасѝ ᲃп҃се раба̀ твое́гѡ.

Сла́ва:

А҆́гглⷭ҇кїѧ Чи́ны невеществе́нныхъ ᲃи́лъ, съ А҆пⷭ҇лы и҆ Мчн҃ки ᲂу҆моли́те, всѣ́хъ Влады́кꙋ, ѿ бѣды̀ тѧжча́йшїѧ и҆ꙁѧ́ти раба̀ свое́гѡ.

И҆ ны́нѣ:

Вѣ́рныхъ прибѣ́жище прⷭ҇нѡ Дв҃о, и҆ держа́внаѧ помо́щнице, на́съ рабѡ́въ твои́хъ ᲂу҆слы́ши, и҆ ѿ настоѧ́щїѧ нꙋ́жды раба̀ свое́гѡ мл҃тва́ми твои́ми и҆ꙁба́ви Влады́чце.

По се́й и҆ по кое́йждѡ Пѣ́сни, пою́тъ Катава́сїю сі́ю.

Спасѝ ѿ бѣ́дъ раба̀ свое́гѡ Млⷭ҇тиве, ꙗ҆́кѡ мы ᲂу҆се́рднѡ къ тебѣ̀ прибѣга́емъ, къ млⷭ҇тивомꙋ И҆ꙁбави́телю, всѣ́хъ Влады́цѣ Гд҃ꙋ І҆и҃сꙋ.

И҆ дрꙋ́гꙋю к Бг҃оро́дици.

И҆ꙁба́ви ѿ бѣ́дъ раба̀ ᲃвое́гѡ Прⷭ҇та́ѧ Бц҃е Дв҃о, ꙗ҆́кѡ мы ᲂу҆се́рднѡ къ тебѣ̀ прибѣга́емъ ꙗ҆́кѡ къ нерꙋши́мой ᲃтѣнѣ̀, и҆ застꙋпле́нїю.

Пѣ́снь, г҃ И҆рмо́съ.

Ꙋ҆твердѝ на́съ собо́ю Гд҃и, дре́вомъ ᲂу҆мертви́вый грѣ́хъ, и҆ стра́хъ тво́й насадѝ въ се́рдца на́съ пою́щихъ тѧ.

Припѣ́лъ:

И҆ꙁба́ви ѿ бѣ́дъ раба̀ твое́гѡ, ꙗ҆́кѡ млⷭ҇рдъ.

Ꙗ҆́коже дре́вле І҆а́кѡва, твое́гѡ раба̀ и҆ꙁба́вилъ є҆сѝ І҆са́вова наважде́нїѧ, си́це и҆ꙁба́ви и҆ раба̀ твое́гѡ, ѿ настоѧ́щїѧ нꙋ́жды, ꙗ҆́кѡ чл҃кѡлю́бецъ.

Чл҃кѡлю́бче ᲃп҃се, приꙁыва́етъ тѧ въ ско́рби сы́й и҆ недоꙋмѣ́нїи ра́бъ тво́й, не пре́ꙁри тогѡ̀ и҆ на́шѧ мо́л̾бы: но потщи́сѧ тогѡ̀ и҆ꙁба́вити, ꙗ҆́кѡ бл҃гоꙋтро́бенъ.

Сла́ва:

Е҆ди́не бл҃же, є҆ди́не бл҃гоꙋтро́бне, є҆ди́не ще́дре, и҆ млⷭ҇тиве, Мл҃тва́ми всѣ́хъ ᲃт҃ы́хъ, твое́гѡ раба̀ ᲂу҆щедри́въ, свободѝ.

И҆ ны́нѣ:

Бг҃а є҆го́же роди́ла є҆сѝ чⷭ҇таѧ, мл҃ѝ съ всѣ́ми А҆́гг҃лы и҆ А҆пⷭ҇лы, со Прⷪ҇рки и҆ Мч҃нки, ѿ бѣ́дъ ра́ба свое́гѡ свободи́ти.

Ѿпѣ́вше же Катава́сїю, Заклина́тель а҆́ще І҆ере́ѵ꙼ є҆́стъ, гл҃етъ Е҆кте́нїю сі́ю.

Пом҃лꙋй на́съ Бж҃е, по вели́цѣй млⷭ҇ти твое́й, мо́ли́мтисѧ ᲂу҆слыш:

Предстоѧ́щїи же:

Гд҃и поми́лꙋй, гⷤ.

І҆ере́ѵ꙼:

Е҆щѐ моли́мсѧ Гд҃ꙋ Бг҃ꙋ на́шемꙋ, ѡ҆ є҆́же ᲂу҆слы́шати гла́сꙋ Мл҃твы на́шеѧ, и҆ пощади́ти и҆ помл҃вати раба̀ свое́гѡ (и҆лѝ рабꙋ̀ свою̀) и҆ покаꙁа́ти на не́мъ вели́кꙋю свою̀ млⷭ҇ть, и҆ ѿвративъ ве́сь гнѣ́въ сво́й пра́веднѡ движи́мый нань, (и҆лѝ на ню̀,) простѝ є҆мꙋ̀ (и҆лѝ є҆́й,) всѐ мнѡ́жество ᲃогрѣше́нїй, и҆ и҆ꙁба́вити є҆гѡ̀ (и҆лѝ ю҆̀) ѿ всѧ́кагѡ ѡ҆бстоѧ́нїѧ и҆ ѡ҆ꙁлобле́нїѧ, наси́лїѧ же, и҆ мꙋчи́телства лꙋка́вагѡ дїа́вола, и҆ прогна́ти ѿ негѡ, (и҆лѝ ѿ неѧ̀,) вселе́стное ᲃатани́нское мечта́нїе, привидѣ́нїе же и҆ ᲃтрахова́нїе, и҆ всю є҆гѡ̀ мꙋчи́телскꙋю ᲃи́лꙋ ѡ҆бдержа́щꙋю є҆гѡ̀, (и҆лѝ ю҆̀ здра́вїе же дш҃евное и҆ тѣле́сное ско́рѡ пода́ти є҆мꙋ̀ (и҆лѝ є҆́й,) блгⷭ҇тїю свое́ю и҆ пом҃лова́ти є҆гѡ̀, (и҆лѝ ю҆̀,) и҆ на́съ всѣ́хъ, рцѣ́мъ всѝ, Гд҃и ᲂу҆слы́ши и҆ поми́л:

Предстоѧ́щїи же пою́тъ съ ᲂу҆миле́нїемъ: Гд҃и поми́лꙋй, м҃.

І҆ере́ѵ꙼ воꙁглаша́етъ:

Ꙋ҆слы́ши ны Бж҃е ᲃп҃си́телю на́шъ, ᲂу҆пова́нїе всѣ́мъ кон:

Предстоѧ́щїи:

А҆ми́нь.

Сѣдал: Гла́съ, в҃.

Послѝ ско́рѡ ᲃи́лꙋ твою̀ Хє҃ Бж҃е, вѣ по́мощъ и҆ застꙋпле́нїе рабꙋ̀ твое́мꙋ злѣ̀ ѿ наси́лїѧ дїа́волѧ бѣдствꙋ́ющомꙋ, и҆ вселꙋка́вое є҆гѡ̀ дѣ́йство ᲃко́рѡ и҆жденѝ ѿ не́гѡ, цѣ́ла же и҆ здра́ва сотворѝ, ты́ бо са́мъ є҆ди́нъ є҆сѝ въско́рѣ застꙋпа́ѧй.

Сла́ва: И҆ ны́нѣ:

Мл҃твеннице те́плаѧ, и҆ стѣ́но неѡбори́маѧ, млⷭ҇ти и҆сто́чниче, и҆ мі́рови прибѣ́жище: приле́жнѡ вопїемъ ти Бц҃е Влады́чце, ᲂу҆скорѝ и҆ ѿ бѣ́дъ и҆ꙁба́ви раба̀ свое́гѡ, є҆ди́на въско́рѣ предстателствꙋ́ющаѧ.

Пѣ́снь, д҃ И҆рмо́съ.

Прише́лъ є҆сѝ ѿ Дв҃ы, ни Ходота́й ни А҆́гг҃лъ, но са́мъ Гд҃ь воплоти́выйсѧ, и҆ спа́слъ є҆сѝ всегѡ̀ менѐ чл҃ка: тѣ́мъ вопїю́ ти, ᲃла́ва ᲃи́лѣ твое́й.

Припѣ́лъ:

И҆ꙁба́ви ѿ бѣ́дъ ᲃп҃се раба̀ свое́гѡ:

Бꙋ́рею бѣ́дъ лю́тѣ колѣ́блемагѡ твое́гѡ раба̀ Влады́ко, и҆ пꙋчи́ною ско́рбїй, ны́нѣ потоплѧ́емагѡ, къ ти́хомꙋ приста́нищꙋ наста́ви.

Ѻ҆скорблѧ́ющїи Твое́гѡ раба̀ Хє҃ ᲂу҆множи́шасѧ, и҆ ꙗ҆ꙁы́къ и҆ꙁъѡстри́ша ꙗ҆́коже ѡ҆бою́дꙋ ѻ҆́стрый ме́чъ: ви́ждъ ᲂу҆́бѡ чл҃кѡлю́бче, и҆ ѿ непра́ведныѧ сме́рти и҆ꙁба́ви раба̀ твое́гѡ.

Сла́ва:

А҆рха́гг҃ли, Вла́сти, Си́лы, и҆ А҆́гг҃ли, А҆пⷭ҇ли, Мчн҃ци, Преподо́бнїи, Прⷪ҇рци, и҆ Пра́веднїи всѝ, мл҃и́тесѧ ѡ҆ всеѡкаѧ́ннѣ ны́нѣ бѣдствꙋ́ющомъ.

И҆ ны́нѣ:

Всепѣ́таѧ чл҃кѡмъ гото́ваѧ помо́щнице, ди́выѧ волне́нїѧ и҆скꙋше́нїй ᲂу҆кротѝ, и҆ подъ кро́въ тво́й прибѣгѧ́ющагѡ раба̀ твое́гѡ, спасѝ Влады́це.

Пѣ́снь, є҃ И҆рмо́съ.

Свѣ́та пода́телю, и҆ вѣ́кѡвъ Тво́рче Гд҃и, въ свѣ́тѣ повелѣ́нїй твои́хъ наста́ви на́съ: ра́ꙁвѣ бо тебѐ и҆́нагѡ Бо́га не зна́ємъ.

И҆ꙁба́ви ѿ бѣ́дъ ᲃп҃се раба̀ свое́гѡ, ꙗ҆́кѡ млⷭ҇рдъ.

Е҆ꙁе́кїины и҆́ногда Мл҃твы и҆сполни́вый Гд҃и, и҆ моѧ̀ и҆спо́лни въско́рѣ є҆ди́не бл҃же, и҆ ᲃпасѝ раба̀ твое́гѡ ѿ всѧ́кагѡ ѡ҆ꙁлобле́нїѧ.

А҆́гглⷭ҇кима рꙋка́ма, верхо́внагѡ ᲂу҆́чн҃ка Гд҃и, и҆ꙁъ темни́ци, Бжⷭ҇тве́нною си́лою и҆́ногда и҆ꙁве́дый, и҆ свое́го раба̀ лю́тѣ бѣдствꙋ́ющагѡ ѿ бѣ́сѧ свободѝ.

Сла́ва:

А҆́гглⷭ҇каѧ Во́инства, А҆пⷭ҇лскїй Прⷪ҇рческїй, Собо́ръ же всесла́вныхъ Мчн҃къ и҆ Преподо́бныхъ, ѡ҆ сꙋ́щимъ во лю́тыхъ, кꙋ́пнѡ Мл҃твꙋ сотвори́те.

И҆ ны́нѣ:

Мт҃и Ха҃ Бг҃а, ᲂу҆скорѝ и҆ꙁъѧ́ти вѣрнагѡ свое́гѡ раба̀, ѿ лю́тыѧ и҆ нꙋ́ждныѧ бѣды̀ ны́нѣ наше́дшїѧ, да тѧ сла́витъ ᲃе́рдцемъ и҆ ᲂу҆стна́ми.

Пѣ́снь, ѕ҃ И҆рмо́съ.

Въ бе́ꙁднѣ грѣхо́вной ѡ҆держи́мъ, неиꙁслѣ́днꙋю млⷭ҇рдїѧ твое́гѡ приꙁыва́ю бе́ꙁднꙋ, ѿ тлѧ̀ Бж҃е мо́й воꙁведи́ мѧ̀.

Припѣ́л:

И҆ꙁба́ви ѿ бе́дъ ᲃп҃се раба̀ свое́гѡ ꙗ҆́кѡ млⷭ҇рдъ.

Кі́тꙍва чре́ва и҆ꙁба́вивый дре́вле Прⷪ҇рка твое́гѡ Влады́ко Гд҃и, и҆ твое́гѡ раба̀ и҆ꙁба́ви, да вѣ́рою и҆ любо́вїю ᲃла́витъ тѧ.

Данїи́ла ꙗ҆́коже и҆ꙁба́вилъ є҆сѝ ѿ л̾вѡ́въ Хрⷭ҇те, и҆ꙁба́ви ѿ бѣ́сѡвъ лꙋка́выхъ ны́нѣ твое́гѡ раба̀ Влады́ко, и҆ ѿ и҆стлѣ́нїѧ и҆ ᲃме́рти и҆ꙁмѝ.

Сла́ва:

Бѣдствꙋ́юща спасѝ раба̀ твое́гѡ ᲃп҃се, ᲃт҃ы́хъ А҆́гг҃лъ Мл҃тва́ми, Прⷪ҇ркъ Мч҃никѡвъ же, и҆ премꙋ́дрыхъ ᲂу҆чн҃икъ твои́хъ ᲂу҆моле́н̾ми.

И҆ ны́нѣ:

Не преда́ждъ лю́тѣ ѡ҆бꙋрева́емагѡ, и҆ недоꙋмѣ́нїемъ ѡ҆держи́магѡ ѻ҆трокови́це свое́гѡ раба̀, но ѡ҆бы́чнѣ и҆ꙁба́ви, прибѣга́ющагѡ подъ кро́въ тво́й Прчⷭ҇таѧ.

По Катава́сїи же, гл҃тъ І҆ере́ѵ꙼ Е҆ктен: сїѧ.

Па́ки и҆ па́ки ми́ромъ Гд҃ꙋ помоли́мсѧ.

Кли́ръ:

Гд҃и поми́лꙋй.

І҆ере́ѵ꙼:

Ꙍ҆ и҆ꙁбавле́нїи и҆ свобожде́нїи раба̀ є҆гѡ̀, (и҆лѝ рабы́нѣ є҆гѡ̀,) И҆мⷬ҇къ: ѿ наси́лїѧ и҆ ѡ҆бстоѧ́нїѧ дїа́волскагѡ, и҆ вселꙋка́вагѡ є҆гѡ̀ кова́рства.

Кли́ръ:

Гд҃и поми́лꙋй.

І҆ере́ѵ꙼:

Застꙋпѝ, спасѝ пом҃лꙋй, и҆ сохранѝ є҆гѡ̀ и҆ на́съ Бж҃е твое́ю бл҃года́тью.

Кли́ръ:

Гд҃и поми́лꙋй.

І҆ере́ѵ꙼:

Прⷭ҇тꙋ́ю чⷭ҇тꙋю преблⷭ҇веннꙋю:

Кли́ръ:

Тебѣ̀ Гд҃и.

І҆ере́ѵ꙼:

Ꙗ҆́кѡ ты є҆сѝ Цр҃ъ мі́р:

Кли́ръ:

А҆ми́нь.

Конда́къ, Гла́съ, ѕ҃.

Неима́мы и҆́ныѧ державнѣ́йшїѧ помощи неима́мы и҆́ныѧ и҆ꙁвѣстнѣ́йшїѧ наде́жды, ра́ꙁвѣ тебѐ Хє҃ Бж҃е на́шъ, въ не́гѡ же вѣ́рꙋемъ и҆ и҆́мже хва́лимсѧ: ты ᲂу҆́бѡ на́мъ помоꙁѝ, и҆ ѿ всѧ́кагѡ ѡ҆бстоѧ́нїѧ ско́рѡ и҆ꙁба́ви, твои́ бо є҆смы̀ рабѝ да не постыди́мсѧ.

Дрꙋ́гїй Конда́къ Гла́съ тож.

Застꙋ́пнице Хрⷭ҇тїѧ́нѡмъ непосты́днаѧ, ходота́ице къ тво́рцꙋ непрело́жнаѧ, непре́ꙁри грѣ́шных мл҃енїѧ гла́сы, но предварѝ ꙗ҆́кѡ бл҃га́ѧ на по́мощъ на́съ вѣ́рнѡ вопїю́щихъ ти, ᲂу҆скорѝ на Мл҃твꙋ и҆ потщи́сѧ на ᲂу҆моле́нїе: застꙋпа́ющи прⷭ҇нѡ Бц҃е чтꙋ́щихъ тѧ.

Посе́мъ І҆ере́ѵ꙼ глаголе́тъ:

Во́нмѣмъ, ми́ръ всѣ́мъ.

Кли́ръ:

И҆ съ дх҃о́мъ твои́мъ.

І҆ере́ѵ꙼:

Премꙋ́дрость во́нмѣ́мъ.

Прок: Гла́съ, ѕ҃.

Бж҃е въ по́мощъ мою̀ во́нми, Гд҃и помощи́ ми потщи́сѧ.

Сті́хъ:

Да воꙁвратѧ́тсѧ въспѧ́тъ и҆ постыдѧ́тсѧ мыслѧ́щїи мнѣ зла́ѧ.

І҆ере́ѵ꙼:

Гд҃ꙋ помоли́мсѧ.

Кли́ръ:

Гд҃и поми́лꙋй.

І҆ере́ѵ꙼:

Ꙗ҆́кѡ ᲃт҃ъ є҆сѝ Бж҃е на́шъ и҆ на ᲃт҃ы́хъ почива́еши, и҆ тебѣ̀ ᲃла́вꙋ воꙁсыла́емъ Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Кли́р:

А҆ми́нь.

Всѧ́кое дыха́нїе да хва́литъ Гд҃а.

Сті́хъ:

Хвали́те Бг҃а въ ᲃт҃ы́хъ є҆гѡ̀.

І҆ере́ѵ꙼ же:

Ꙍ҆ є҆́же сподоби́тисѧ на́мъ слыша́нїю ᲃта́гѡ Е҆ѵⷢ҇лїѧ, ми́ромъ Гд҃а Бг҃а моли́мъ.

Кли́ръ:

Гд҃и поми́лꙋй, гⷤ.

І҆ере́ѵ꙼:

Премꙋдрость, про́сти, ᲂу҆слышимъ ᲃⷮ: Е҆ѵⷢ҇лїе. Миръ всѣ́мъ.

Кли́ръ:

И҆ дх҃ови твое́мꙋ.

І҆ере́ѵ꙼:

Ѿ Ма́рка ᲃт҃а́гѡ Е҆ѵⷢ҇лїѧ чте́нїе.

Кли́ръ:

Сла́ва тебе Гд҃и.

І҆ере́ѵ꙼:

Во́нмѣмъ.

І҆ере́ѵ꙼ же заклина́ѧй крѣ́пкѡ повелѣ́въ держа́ти бѣ́снагѡ, надъ главо́ю є҆гѡ̀ Кни́гꙋ держа̀ чте́тъ Е҆ѵⷢ҇лїе ѿ Мар: Глав: ѕ҃і. Зач: ѻ҃а.

Въ вре́мѧ ѻ҆́но: Воскр҃съ І҆и҃с ѿ мр҃твыхъ, ꙗ҆ви́сѧ Ꙋ҆чн҃кѡмъ свои́мъ, воꙁлежа́щимъ и҆́мъ є҆динона́десѧти, и҆ поносѝ невѣ́рствїю и҆́хъ и҆ жестосе́рдїю: ꙗ҆́кѡ ви́дѣвшимъ є҆гѡ̀ въста́вша, неѧ́ша вѣ́ры.

И҆ речѐ и҆́мъ: ше́дше въ мі́ръ ве́сь, проповѣди́те Е҆ѵⷢ҇лїе въ се́й тва́ри.

И҆́же вѣ́рꙋ и҆метъ и҆ крⷭ҇ти́тсѧ, ᲃпасе́нъ бꙋ́детъ: а҆ и҆́же неи́метъ вѣ́ры, ѡ҆сꙋжде́нъ бꙋ́детъ. зна́менїѧ же вѣ́ровавшимъ сі́ѧ послѣдꙋ́ютъ: И҆́менемъ мои́мъ бѣ́сы и҆жденꙋ́тъ.

Словеса́ же сі́ѧ чты́й Заклина́тель, десни́цею прикаса́етсѧ главы̀ бѣ́снагѡ.

Ꙗ҆ꙁы́ки воꙁгл҃ю́тъ но́вы: змїѧ̀ во́ꙁмꙋтъ: а҆́ще и҆ что̀ сме́ртное и҆спі́ютъ, не повреди́тъ и҆́хъ: на недꙋ́жныѧ рꙋ́цѣ воꙁло́жатъ и҆ здра́ви бꙋ́дꙋтъ. Сі́е же чты́й, подъ держа́щꙋ є҆ди́номꙋ ѿ кли́рикъ Кни́гꙋ, Заклина́тель рꙋ́цѣ ѻ҆́бѣ воꙁлага́етъ на гла́вꙋ бѣ́снагѡ, и҆ чте́тъ про́чаѧ ᲃт҃а́гѡ Е҆ѵⷢ҇лїѧ. Гд҃ъ же ᲂу҆́бѡ по гл҃а́нїи є҆гѡ̀ къ ни́мъ, воꙁнесе́сѧ на́ нб҃о, и҆ сѣдѐ ѡ҆де́снꙋю Бг҃а.

Ѻ҆ни́ же и҆ꙁшедше, проповѣда́ша всю́дꙋ: Гд҃ꙋ поспѣшествꙋ́ющꙋ, и҆ ᲃло́во ᲂу҆твержда́ющꙋ, послѣдствꙋ́ющими зна́мен̾ми, а҆ми́нь.

Кли́ръ пое́тъ:

Сла́ва тебѣ̀ Гд҃и.

Заклина́тель же дае́тъ бѣ́сномꙋ лобꙁа́ти ᲃт҃о́е Е҆ѵⷢ҇лїе, и҆ вꙁемъ ᲃщ҃е́ннꙋю во́дꙋ кропи́тъ бѣ́снагѡ крⷭ҇таѡ́браꙁнѡ, гл҃ѧ̀:

Въ и҆мѧ̀ беꙁнача́лнагѡ, не соꙁда́ннагѡ, и҆ не рожде́ннагѡ, Ѿц҃а. 🕂

Вто́рое же гл҃ѧ̀:

И҆ є҆диноро́днагѡ, є҆диносꙋ́щнагѡ, и҆ собеꙁнача́лнагѡ Сн҃а є҆гѡ̀, Гд҃а нш҃егѡ І҆и҃с Ха҃. 🕂

И҆ па́ки тре́тее кро́питъ, гл҃ѧ̀:

И҆ Дх҃а ᲃт҃гѡ животворѧ́щагѡ, ѿ Ѿц҃а и҆сходѧ́щагѡ, Бг҃а є҆ди́нагѡ въ Трⷪ҇ци ᲃт҃ѣ́й слави́магѡ и҆ покланѧ́емагѡ 🕂 А҆ми́нь.

Кли́рици же а҆́бїе пою҃тъ:

Сла́ва:

Ѿч҃е, ᲃло́ве, и҆ Дш҃е, Трⷪ҇це ᲃта́ѧ, ѡ҆чи́сти мнѡ́жество согрѣше́нїй на́шихъ.

И҆ ны́нѣ:

Мл҃твъ ра́ди Прест҃ы́ѧ Бц҃а млⷭ҇тиве, ѡ҆чи́сти мнѡ́жество грѣ́хъ на́шихъ.

И҆ а҆́бїе пою́тъ Стіхи́рꙋ сі́ю, Гла́съ, ѕ҃ Под:

Всѐ воꙁло́жше:

Не ѡ҆ста́ви раба̀ твое́гѡ въ члчⷭ҇кое застꙋпле́нїе, пребеꙁнача́лнаѧ Трⷪ҇це: но прїймѝ Влады́ка мл҃е́нїе на́съ рабѡ́въ твои́хъ, скѡ́рби бо ѡ҆бде́ржатъ є҆гѡ̀, терпѣ́ти не мо́жетъ ѿ бѣсо́вскагѡ наси́лїѧ, и҆ лю́тагѡ є҆гѡ̀ ѡ҆бстоѧ́нїѧ: покро́ва не стѧжа́лъ є҆́стъ нигде́ же прибѣ́гнꙋти, стра́стми всегда̀ побѣжда́емый, ᲂу҆теше́нїѧ не и҆ма́тъ и҆́нагѡ ра́ꙁвѣ тебѐ Тво́рче Мі́ра, ᲂу҆пова́нїе и҆ спⷭ҇нїе вѣ́рных: не пре́ꙁри мл҃енїѧ на́шѧ, но соверше́нна сотворѝ.

По ᲃтіхирѣ̀ же се́й, а҆́бїе Заклина́тель а҆́ще І҆ере́ѵ꙼ є҆́стъ, ᲃа́мъ гл҃етъ вели́кꙋю Е҆кте́нїю сі́ю: А҆́ще же не І҆ере́ѵ꙼ є҆́стъ, то є҆динъ ѿ предстоѧ́щихъ І҆ере́ѡвъ, и҆ꙁрѧ́днѣе же ᲃщ҃еннодѣйствова́вый Бжⷭ҇тве́ннꙋю Слꙋ́жбꙋ, да гл҃етъ:

Е҆кті́нїѧ Вели́каѧ.

Сп҃сѝ Бж҃е лю́ди своѧ̀, и҆ блⷭ҇вѝ достоѧ́нїе твоѐ: посѣтѝ мі́ръ тво́й млⷭ҇тїю и҆ щедрота́ми: воꙁвысѝ ро́гъ хрⷭ҇тїѧ́нскїй, и҆ ᲂу҆мирѝ Цр҃ковъ Твою̀ ᲃт҃ꙋ́ю, и҆ ниꙁложѝ врагѝ на́шѧ: ми́р и҆ любо́въ Царе́мъ хрⷭ҇тїѧ́нскимъ всегда̀ подава́й, всѣ́мъ же вѣ́рнымъ рабѡ́мъ твои́мъ є҆диномы́слїе и҆ съгла́сїе въ вѣ́рѣ дарꙋ́й, и҆ ниꙁпослѝ на́ ны и҆ на всѧ̀ Хрⷭ҇тоимени́тыѧ лю́ди твоѧ̀ млⷭ҇ти твоѧ̀ бога́тыѧ: и҆ сегѡ̀ предстоѧ́щагѡ раба̀ твое́гѡ, (и҆лѝ рабꙋ̀ твою̀,) И҆мⷬ҇къ: въ ѻ҆́браꙁъ и҆ подо́бїе твоѐ ᲃоꙁда́ннагѡ, (и҆лѝ ᲃоꙁда́ннꙋю) и҆ всечⷭ҇тною Кро́вїю Сн҃а твое́гѡ и҆скꙋпле́ннагѡ (и҆лѝ и҆скꙋпле́ннꙋю) ѿ наси́лїѧ и҆ мꙋче́нїѧ дїа́волѧ свободѝ и҆ и҆́стинное поболѣ́нїе ѡ҆ свои́хъ грѣсе́хъ покаꙁа́ти, и҆ пло́ды досто́йны покаѧ́нїѧ сотвори́ти, и҆ ѿ тебѐ ѡ҆ставле́нїе тѣ́хъ прїѧ́ти сподобѝ.

На́съ же недосто́йныхъ рабѡ́въ твои́хъ, ѡ҆ свобожде́нїи є҆гѡ̀ (и҆лѝ є҆ѧ̀) трꙋжда́ющихсѧ ᲂу҆слы́ши, и҆ по́мощь твою̀ всеси́лнꙋю на́мъ ниꙁпослѝ, приле́жнѡ и҆ смѣре́ннѡ мл҃мсѧ: ᲃи́лою чⷭ҇тна́гѡ и҆ животворѧ́щагѡ Крⷭ҇та̀: Мл҃тва́ми и҆ мл҃енїемъ Пречⷭ҇тыѧ Влады́чца на́шеѧ Бц҃а, и҆ прⷭ҇нѡ Дв҃ы Мр҃іѧ: Застꙋпле́нїемъ и҆ Мл҃тва́ми чⷭ҇тныхъ вели́кихъ Чинонача́лникъ и҆ А҆рхистра́тигъ Міхаи́ла, Гаврїи́ла, Рафаи́ла, Ꙋ҆рїи́ла, и҆ про́чїихъ всѣ́хъ ᲃт҃ы́хъ нбⷭ҇ныхъ ᲃи́лъ беꙁъплѡ́тныхъ: чтⷭ҇нагѡ и҆ ᲃла́внагѡ Прⷪ҇рка Предте́ча, и҆ Крⷭ҇ти́тлѧ І҆ꙍа́нна: Ст҃ы́хъ сла́вныхъ и҆ всехва́лныхъ А҆пⷭ҇лъ, Петра̀, и҆ Па́вла, А҆ндре́ѧ, І҆а́кꙍва, І҆ꙍа́нна, Ѳꙍмы̀, Філі́ппа, І҆а́кꙍва, Варѳолꙍме́а, Матѳі́ѧ, Сѵ́мꙍна, Ѳадде́а, Матѳі́а, Варна́вы, Лꙋкѝ, Ма́рка, и҆ всѣ́хъ ᲃт҃ы́хъ А҆пⷭ҇лъ и҆ ᲃедмдесѧ́ти Оу҆́чн҃къ Хв҃ыхъ: Ст҃ы́хъ и҆ добропобѣ́дных̀ Мч҃нкъ Стефа́на, Геꙍ́ргїѧ, Дими́трїѧ, Проко́пїѧ, Кѵпрїа́на, Кѵ́ра, І҆ѡа́нна, Пантелеи́мꙍна, І҆ѡа́нна Но́вагѡ и҆́же въ ᲃꙋча́вѣ: Ст҃ы́хъ ᲃтрⷭ҇тоте́рпецъ Кі́евскихъ Кн҃ꙁе́й, Глѣ́ба, и҆ Бори́са, и҆ всѣ́хъ ᲃт҃ы́хъ Мч҃ни́къ и҆ и҆сповѣ́дникъ: Ст҃ы́хъ Мчн҃цъ Ѳе́клы, Е҆катери́ны, Варва́ры, Мари́ны, Е҆вѳи́мїи, І҆ꙋсти́ны, и҆ всѣ́хъ ᲃт҃ы́хъ Мч҃ницъ: Сты́хъ І҆ера́рхъ и҆ Ꙋ҆чт҃лїй Вселе́нскихъ, Васи́лїа Вели́кагѡ, Григо́рїѧ Бг҃осло́ва, І҆ѡа́нна Златоꙋ́стагѡ, А҆ѳана́сїѧ, Кѵри́ллѡвъ, Григо́рїѧ Ни́сскагѡ, Е҆піфа́нїѧ, и҆ всѣ́хъ ᲃт҃ыхъ Ꙋ҆чт҃лїй вселенскихъ: Ст҃ы́хъ І҆ера́рхъ Никола́ѧ Мѵрликі́йскагѡ, Григо́рїевъ Неѡкесарі́йскагѡ и҆ А҆рме́нскагѡ Чꙋдотво́рцѡвъ: Ст҃ы́хъ трехъ Кі́евскихъ Митрополи́тѡвъ Петра̀, А҆ле́ѯїа, и҆ І҆ꙍ́ны, и всѣ́хъ ᲃт҃ы́хъ І҆ера́рхъ. Преподо́бных и҆ Бг҃оно́сныхъ Ѻ҆ц҃ъ на́шихъ А҆нтꙍнїѧ Вели́кагѡ, Па́вла Ѳиве́йскагѡ, Са́ввы ѡ҆сщ҃еннагѡ, Ма́рка Ѳра́ческагѡ, и҆ Преподо́бныхъ Ѻ҆ц҃ъ на́шихъ Пече́рскихъ, А҆нтꙍ́нїѧ, и҆ Ѳеѻдѡ́сїа, и҆ и҆́хъ Оу҆́чн҃къ и҆ съпо́стникъ, І҆ꙍа́нна Мнѡгострада́лнагѡ, І҆саа́кїѧ, и҆ Ма́рка, Пече́рскихъ, Ни́кона, и҆ про́хора Чꙋдотворцѡвъ, и҆ всѣ́хъ ᲃты́хъ Преподо́бныхъ Пꙋсты́нникъ, По́стникъ, и҆ И҆́нокѡвъ: Ст҃ы́хъ и҆ пра́ведных Бг҃оѡц҃ъ І҆ꙍаки́ма, и҆ А҆́нны, и҆ всѣ́хъ ᲃты́хъ Мꙋже́й, Дв҃цъ же, и҆ Бл҃гоче́стнѡ тебѣ̀ послꙋжи́вшихъ Женъ, мо́лимъ тѧ многомлⷭ҇тиве Гд҃и, ᲂу҆слы́ши на́съ грѣ́шныхъ, молѧ́щихтисѧ и҆ поми́лꙋй.

Предстоѧ́щїи же Кли́рици ᲂу҆миле́ннѡ ти́химъ гла́сомъ пою́т:

Гд҃и поми́лꙋй, є҃і.

Заклина́тель же воꙁглаша́етъ:

Млⷭ҇тїю и҆ щедрѡта́ми и҆ чл҃кѡлю́бїемъ єдиноро́днагѡ Сн҃а:

Пѣ́снь, з҃ И҆рмо́съ.

Тѣ́лꙋ зла́томꙋ премꙋ́дрїи дѣ́ти не послꙋжи́ша, ѡ҆ велѣ́нїи мꙋчи́телевѣ неради́ша, и҆ Богѝ є҆гѡ̀ ᲂу҆ничижи́ша: сре́дѣ же пла́мене въꙁопи́ша и҆ ѡ҆росѝ ѧ҆̀ А҆гг҃лъ ре́къ: ᲂу҆слыша́сѧ ᲂу҆жѐ ᲂу́стъ ва́шихъ Мл҃тва.

Припѣ́л:

И҆ꙁба́ви ѿ бѣ́дъ ᲃп҃се раба̀ свое́гѡ:

Ꙗкоже дре́вле, трі́ехъ ѻ҆тро́къ ѿ пе́щи ѻ҆́гненной и҆ꙁба́вилъ є҆сѝ: и҆ꙁба́ви ще́дре и҆ ны́нѣ раба́ твое́гѡ, ꙗ҆́кѡ бл҃гъ мл҃и́мъ тѧ, находѧ́щїѧ нꙋ́жды и҆ жже́нїѧ Влады́ко, нестерпи́мыхъ и҆скꙋше́нїй, ꙗ҆́кѡ да сла́витъ тѧ.

Е҆ди́не вѣды́й не́мощь Хрⷭ҇те члчⷭ҇кꙋю, покаꙁа́вый въ ско́рбехъ ᲂу҆тѣше́нїи чл҃кѡлю́бче, и҆ꙁба́ви настоѧ́щїѧ бѣды̀ и҆ раба̀ твое́гѡ, вопїю́щагѡ: блⷭ҇ве́нъ Бг҃ъ ѡ҆ц҃ъ на́шыхъ.

Сла́ва:

А҆́гг҃лѡвъ мнѡ́жествѡ, А҆пⷭ҇лѡвъ, Прⷪ҇ркѡвъ, Мч҃никѡвъ Бжⷭ҇тве́нныхъ, и҆ Пра́ѡц҃ъ Бжⷭ҇тве́нное съсло́вїе, бл҃га́гѡ мл҃и́те ны́нѣ, пла́чъ ѡ҆брати́ти въ ра́дость въꙁыва́ющагѡ, бл҃гослове́нъ є҆сѝ Бж҃е ѡ҆ц҃ъ на́шихъ.

И҆ ны́нѣ: Бг҃оро́диченъ:

Е҆ди́на наде́жде и҆ по́мощи вѣ́рнымъ Бг҃ородителнице, потщи́сѧ помоꙁѝ рабꙋ̀ твое́мꙋ, ѡ҆бꙋрева́емомꙋ ско́рбми ѿ всю́дꙋ, и҆ недоꙋмѣ́нїемъ ѡ҆держи́мꙋ, и҆ въ бо́лѣꙁни сꙋ́щомꙋ, и҆ къ тебѣ̀ прибѣга́ющомꙋ въ наде́ждѣ дш҃евной.

Пѣ́снь, и҃ И҆рмо́съ.

Въ пе́щъ ѻ҆́гненнꙋю къ дѣте́мъ Е҆ѵре́йскимъ соше́дшагѡ, и҆ пла́мень на хла́дъ прело́жшагѡ Бг҃а: по́йте всѧ̀ дѣ́ла Гд҃а, и҆ превоꙁноси́те въ всѧ̀ вѣ́ки.

Припе́лъ:

И҆ꙁба́ви ѿ бѣ́дъ ᲃп҃а́се:

Па́вла и҆ Сѵ́лы Мл҃твы, ꙗ҆́коже прїѧ́лъ є҆сѝ, и҆ ѿ ᲂу҆́ꙁъ тѣ́хъ и҆ꙁба́вилъ є҆сѝ, и҆ на́съ млⷭ҇тиве, недосто́йныхъ ны́нѣ вопїю́щихъ, гла́сы ᲂу҆слы́ши, и҆ и҆ꙁба́ви раба̀ свое́гѡ, плѣне́нїѧ же и҆ ᲃм҃рти.

Не ѿвратѝ ѿ менѐ раба̀ твое́гѡ Хє҃, лицѐ твоѐ, ꙗ҆́кѡ скорблю̀ ско́рѡ ᲂу҆слы́ши мѧ̀, и҆ и҆ꙁмѝ настоѧ́щагѡ и҆стопле́нїѧ: на́ми вопїе́т ти ра̀бъ тво́й ще́дре.

Сла́ва:

Мл҃тва́ми Бж҃е, невеществе́нныхъ ᲃлꙋжи́телїй, и҆ А҆пⷭ҇лъ, и҆ Мч҃никъ Ли́кѡвъ, и҆ сщ҃енныхъ Прⷪ҇ркъ, Преподо́бныхъ, и҆ Пра́ведныхъ всѣ́хъ, и҆ и҆ꙁба́вивъ и҆ꙁмѝ свое́гѡ раба̀ ѿ лю́тыѧ беды̀.

И҆ ны́нѣ:

Прибѣ́жище хрⷭ҇тїа́нѡмъ, помо́щнице въ лю́тыхъ ѡ҆бꙋрева́емымъ, не пре́ꙁри свое́гѡ раба̀ бѣда́ми потоплѧ́емагѡ, и҆ къ держа́вномꙋ твое́мꙋ прибѣга́ющагѡ покро́вꙋ.

Пѣ́снь, ѳ҃ И҆рмо́съ.

Ѿ Бг҃а Бг҃а Сло́во, неиꙁрече́нною мꙋ́дростїю прише́дшагѡ ѡ҆бнови́ти А҆да́ма, ꙗ҆́дїю тлѣ́нїѧ па́дшагѡ лю́тѣ, ѿ ст҃ы́ѧ Дв҃ы неиꙁрече́ннѡ на́съ дѣ́лѧ въпло́щшеесѧ, вѣ́рнїи є҆диномы́сленнѡ пѣ́сн̾ми велича́емъ.

Припе́лъ:

И҆ꙁба́ви ѿ бѣ́дъ ᲃп҃се:

Ско́рбнаѧ твое́гѡ раба̀, настоѧ́щїѧ бѣды̀, ѡ҆бꙋрева́нїѧ, мнѡ́гаѧ и҆ тѧ́жкаѧ претворѝ Влады́ко, и҆ превратѝ сегѡ̀ пла́чъ въ ра́дость всегда́шнюю: да вѣ́рою и҆ любо́вїю всегда̀ велича́етъ тѧ.

Твоѐ вели́кое бл҃гоꙋтро́бїе, да не побѣди́тсѧ ще́дре, мнѡ́жествомъ беꙁчисле́нныхъ ми зѡ́лъ: но по ѡ҆бы́чной твое́й млⷭ҇ти, на́ми въꙁыва́етъ ра́бъ тво́й, ᲃп҃сѝ, и҆ и҆ꙁми́ мѧ Хє҃, ѿ вре́да всѧ́кагѡ, є҆ди́не многѡмлⷭ҇тиве.

Сла́ва:

Пощадѝ Гд҃и, пощадѝ раба̀ твое́гѡ и҆ всѣ́хъ на́съ, и҆ єгда̀ хо́щеши ᲃꙋди́ти, не ѡ҆сꙋдѝ въ ѻ҆́гнь, ни ꙗ҆́ростїю твое́ю ѡ҆бличѝ, мл҃итъ тѧ Дв҃аѧ тебѐ ро́ждшаѧ Хртⷭ҇е, А҆́гг҃ъ мнѡ́жество, и҆ Мꙋ́ченикѡвъ ᲃъсло́вїе.

И҆ ны́нѣ: Бг҃оро́диченъ:

Прⷭ҇та́ѧ Дв҃о, съ беꙁпло́тными ᲃлꙋжи́тели, и҆ ᲃт҃ы́ми А҆́гг҃лы, А҆пⷭ҇лы, Прⷪ҇рки, Мч҃ники, и҆ Преподо́бными всѣ́ми, всѣ́хъ є҆ди́нагѡ пребл҃га́гѡ Бг҃а мл҃и́те, и҆ꙁба́вити ѿ ѡ҆ꙁлобле́нїа раба̀ свое́гѡ.

По се́мъ а҆́бїе пою́тъ всѝ съ ᲂу҆миле́нїемъ, Досто́йнѡ є҆́стъ: А҆́бїе же по си́хъ знамена́етъ себѐ Заклина́тель Крⷭ҇тнымъ зна́ме́нїемъ, гⷤ, гл҃ѧ̀:

Въ и҆мѧ̀ Ѿц҃а, и҆ Сн҃а, и҆ ᲃⷮ: Дх҃а, А҆ми́нь.

И҆ чте́тъ ѱаломъ, ѯ҃ѳ. Бж҃е въ по́мощъ мою̀ во́нми, до конца̀.

По се́мъ бѣ́снагѡ а҆́ще лю́тый є҆́стъ, свѧ́ꙁанна и҆ крѣ́пкѡ держи́ма пре́дъ собо́ю и҆мѣ́ѧ, десни́ци свое́ѧ персты̀ тогѡ̀ каса́ѧсѧ, крⷭ҇таѡ́браꙁнѡ блⷭ҇влѧ́етъ, гⷤ, гл҃ѧ̀:

Въ и҆мѧ̀ Ѿц҃а̀, и҆ ᲃн҃а, и҆ ᲃт҃а́гѡ Дх҃а, А҆ми́нь.

Посе́мъ ѡ҆бра́щсѧ къ Восто́кѡмъ, и҆ ᲃта́въ пре́дъ Црⷭ҇кими вра́ты, па́ки зна́менїемъ крⷭ҇тнымъ себѐ въѡрꙋжаѧ, гл҃етъ:

Ꙋ҆пова́нїе ми Ѻ҆ц҃ъ прибѣ́жище ми Снъ, покрови́телъ ми є҆́стъ Дх҃ъ ᲃт҃ы́й: Трⷪ҇це ᲃт҃а́ѧ ᲃла́ва тебѣ̀.

И҆ ᲃїѧ.

Влады́чце Мт҃и ᲃп҃сова, прїймѝ мѡ́л̾бы недосто́йныхъ рабѡ́въ твои́хъ, и҆ ходотайствꙋй ѡ҆ на́съ къ и҆стебѐ ро́ждшомꙋсѧ, и҆ бꙋ́ди на́мъ помо́щница.

Всѧ̀ А҆́гглⷭ҇каѧ воинства, Предте́че Гн҃ь, А҆пⷭ҇лскаѧ двоена́десѧтнице, и҆ всѝ ᲃт҃ы́и, мо́лбꙋ сотвори́те, въе́же спасти́сѧ на́мъ.

Воꙁдѣ́въ же рꙋ́цѣ го́рѣ съ ᲂу҆миле́нїемъ гл҃етъ:

Ѿч҃е на́шъ:

И҆ посе́мъ ре́къ:

Съ ᲂу҆миле́нїемъ колѣ́нѣ прекло́нше всѝ Гд҃ꙋ пом҃ли́м:

Всѝ прекло́нше колѣ́нѣ ᲂу҆миле́ннѡ пою́тъ:

Гд҃и пом҃лꙋй, гⷤ.

Заклина́телъ же, на колѣ́нѣхъ стоѧ̀ съ всѧ́кимъ ᲂу҆миле́нїемъ, а҆́ще же мо́щнѡ и҆ съ ᲃлеꙁа́ми чте́тъ Мл҃твꙋ ᲃі́ю.

Гд҃и І҆и҃с Хє҃ Бж҃е на́шъ, всеѧ̀ тво́рче и҆ ᲃодѣ́телю: жива́гѡ и҆ беꙁсме́ртнагѡ Ѿц҃а̀ ᲃн҃е собеꙁнача́лне и҆ съпрⷭ҇носꙋщне, мно́гагѡ ра́ди и҆ беꙁмѣ́рнагѡ твое́гѡ чл҃кѡлю́бїѧ, А҆́пⷭ҇лѡмъ свои́мъ вла́стъ да́вый, є҆́же настꙋпа́ти на змїѧ̀, и҆ на ᲃко́рпїѧ, и҆ на всю̀ ᲃи́лꙋ вра́жїю, и҆ є҆́же ѡ҆ и҆менѝ твое́мъ бѣ́сы и҆ꙁгонѧ́ти, ѿ ни́хъ же и҆ а҆́ꙁъ недосто́йный дрꙋгопрїйма́телнѣ, твои́мъ чл҃кѡлю́бнымъ смотре́нїемъ ᲃі́е досто́инство прїи́мъ, твоѐ великолѣ́пое и҆ всестра́шное и҆мѧ̀, съ стра́хомъ и҆ тре́петомъ въ смире́нїи мнѡ́ꙁѣмъ приꙁыва́ѧ, тебѣ̀ Влады́цѣ мое́мꙋ ра́бски молю́сѧ, приꙁри на́ мѧ недосто́йнагѡ и҆ непотре́бнагѡ раба̀ твое́гѡ, и҆ пре́ꙁривъ ми всѧ̀ согрѣше́нїѧ, во́лнаѧ и҆ нево́лнаѧ, ᲂу҆крѣпи́ мѧ̀ ны́нѣ на бра́нь сі́ю дерꙁнове́нїе ми подава́ѧ и҆ си́лꙋ, є҆ю́же побѣди́мъ бы́въ сатана̀, ꙗ҆́кѡ мо́лнїѧ съ нб҃сѐ ниꙁпадѐ: ꙗ҆́кѡ да и҆ а҆́ꙁъ тое́ю въѡрꙋженъ крѣ́пкѡ побѣждꙋ̀ и҆ съкрꙋшꙋ̀, лю́тагѡ сегѡ̀ и҆ лꙋка́вагѡ змїѧ си́лы.

Твоѧ́ бо є҆́стъ держа́ва, ᲃи́ла же, и҆ црⷭ҇тво, и҆ ᲃла́ва, съ беꙁнача́лнымъ ти Ѿц҃емъ, и҆ съ прⷭ҇ты́мъ и҆ бл҃ги́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

А҆́бїе же въста́въ, водо́ю сщ҃енною кро́питъ себѐ, и҆ бѣ́снагѡ, и҆ всѣ́хъ предстоѧ́щихъ, гл҃ѧ̀:

Си́ла и҆ дѣ́йствѡ Всест҃а́гѡ и҆ животворѧ́щагѡ Дх҃а, ѡ҆ст҃и́вшагѡ во́дꙋ сі́ю, да свободи́тъ тѧ ѿ всѧ́кагѡ наси́лїѧ и҆ ѡ҆бстоѧ́нїѧ вра́жїѧ, и҆ на́съ всѣ́хъ да ᲂу҆тѣ́шитъ.

По се́мъ гл҃етъ:

Блⷭ҇ве́нный бꙋ́ди дн҃ь и҆ ча́съ, во́н̾же Гд҃ь и҆ Бг҃ъ на́шъ І҆и҃с Хᲃ҃ роди́сѧ ѿ Дв҃ы Мр҃іѧ, на сотре́нїе и҆ раꙁдрꙋше́нїе дїа́волскагѡ мꙋчи́телства, и҆ спⷭ҇нїе вѣ́рныхъ.

Держи́мꙋ же крѣ́пкѡ бѣ́сномꙋ, стоѧщꙋ къ Восто́кꙋ лице́мъ, Заклина́тель знамена́етъ себѐ Крⷭ҇тнымъ зна́менїемъ крѣ́пкою вѣ́рою, и҆ ве́лїимъ дерꙁнове́нїемъ гл҃ѧ̀:

Въ и҆мѧ̀ Ѿц҃а, и҆ Сн҃а, и҆ ᲃт҃а́гѡ Дх҃а, повелѣва́ю ва́мъ вселꙋка́вымъ, скве́рнымъ, и҆ нечи́стымъ дꙋховѡ́мъ, прише́дшимъ здѐ въ по́мошъ и҆ застꙋпле́нїе семꙋ̀ бѣ́сꙋ, (и҆лѝ си́мъ бѣсѡ́мъ,) раба̀ Бж҃іѧ ᲃегѡ̀ И҆мⷬ҇къ: дш҃ꙋ и҆ тѣ́ло мꙋча́щомꙋ, (и҆лѝ мꙋча́щимъ,) и҆ запрѣща́ю ва́мъ ка́ꙁнїю ниꙁринове́нїѧ въ гее́нꙋ и҆ є҆́ꙁеро ѻ҆́гненное, и҆ въ тмꙋ̀ кромѣ́шнюю, ᲃи́лою и҆ дѣ́йствомъ Прⷭ҇ты́ѧ Живонача́лныѧ и҆ нераꙁдѣ́л̾ныѧ Трⷪ҇ца, на лѣ́тъ сто, ꙗ҆́кѡ да не дерꙁнетѐ ни́ же воꙁмо́жете ни въ чесо́мъ же защище́нїе, по́мощъ же и҆лѝ застꙋпле́нїе є҆мꙋ̀ (и҆лѝ и҆́мъ,) бы́ти: но а҆́бїе да ѿи́дете въ мѣ́сто и҆де́же ва́мъ Бж҃іе смотре́нїе наꙁнаменова́ло є҆́стъ пребыва́ти.

Оу҆бо́йтесѧ, бѣжи́те, и҆ ᲂу҆страни́тесѧ, превели́кагѡ, стра́шнагѡ, ᲃи́льнагѡ, и҆ великолѣ́пнагѡ и҆́мене Вседержи́телѧ Бг҃а на́шегѡ: и҆ держа́вныѧ ᲃи́лы въѡ҆браже́нїѧ зна́менїѧ чтⷭ҇нагѡ и҆ животворѧ́щагѡ Крⷭ҇та̀, Гд҃а на́шегѡ І҆и҃с Хрⷭ҇та, и҆́мже попра́на и҆ и҆спра́ꙁднена бы́сть не́мощнаѧ ва́ша ᲃи́ла, и҆ мꙋчи́телскаѧ вла́сть.

А҆́бїе же вꙁе́мъ въ десни́цꙋ Крⷭ҇тъ, подно́ситъ є҆гѡ̀: и҆ крⷭ҇таѡ́браꙁнѡ знамена́ѧ бѣ́снагѡ, гл҃етъ:

Се Крⷭ҇тъ Гдⷭ҇нь, бѣжи́те проти́вныѧ ᲃи́лы: побѣди́лъ бо є҆́стъ Ле́въ ѿ колѣ́на І҆ꙋдова Гд҃ъ и Бг҃ъ на́шъ І҆и҃с Хᲃ҃, попра́вый и҆ сте́рый вш҃ꙋ не́мощнꙋю ᲃи́лꙋ.

По се́мъ знамена́ѧ ᲃебѐ Крⷭ҇тнымъ зна́менїемъ и҆ съ ѡ҆бо́ю стра́нꙋ Крⷭ҇томъ предстоѧ́щихъ блⷭ҇влѧ́ѧ, глаголе́тъ Тропа́ръ се́й:

Гд҃и ѡ҆рꙋ́жїе на дїа́вола Крⷭ҇тъ тво́й да́лъ є҆сѝ на́мъ, трепе́щетъ бо и҆ трѧсе́тсѧ, не могі́й воꙁира́ти на си́лꙋ є҆гѡ̀, ꙗ҆́кѡ мр҃твыѧ воскрⷭ҇ша́єтъ, и҆ сме́рть ᲂу҆праꙁдни́лъ є҆́стъ: сегѡ̀ ра́ди кла́нѧемсѧ Крⷭ҇тꙋ̀ твое́мꙋ и҆ Воскресе́нїю.

Вꙁе́мъ же ᲃт҃ы́хъ Мо́щи а҆́ще и҆́матъ, воꙁлага́етъ ѧ҆̀ на пе́рси бѣ́снагѡ, а҆́ще же мо́щїй неи́матъ, Крⷭ҇тъ нѣ́кїй ѡ҆сщ҃енный воꙁлага́етъ на́нь. положи́въ же десни́цꙋ и҆ коне́цъ Е҆пітра́хилѧ на главѣ̀ є҆гѡ̀, съ всѧ́кимъ внима́нїемъ ничто́же борꙁѧ́сѧ чте́тъ раꙁдѣ́лнѣ, ѱало́мъ се́й, ѯ҃з:

Да въскрⷭ҇нетъ Бг҃ъ, и҆ раꙁы́йдꙋтсѧ вра́ꙁи є҆гѡ̀.

Сла́ва: И҆ ны́нѣ:

А҆ллилꙋ́іѧ, гⷤ.

Гд҃и пом҃лꙋй, гⷤ.

И҆ па́ки:

Сла́ва: И҆ ны́нѣ:

И҆ а҆́бїе начина́ет съ всѧ́кимъ внима́нїемъ и҆ ве́лїимъ дерꙁнове́нїемъ честѝ Мл҃твы ᲃі́ѧ.

Бж҃е Богѡ́въ, и҆ Гд҃и Гѡ́сподїй, ѻ҆́гненныхъ Чи́нѡвъ Тво́рче, и҆ невеществе́нныхъ ᲃи́лъ хи́трче, нбⷭ҇ныхъ и҆ на зе́мныхъ ᲃъдѣ́тели: є҆го́ же никто́же ѿ чл҃къ видѣ̀, ни́ же ви́дѣти мо́жетъ: є҆гѡ же бои́тсѧ и҆ тепе́щетъ всѧ̀ тва́ръ: вы́ю и҆́ногда го́рдостїю воꙁне́сшагѡ Чинонача́лника и҆ свое́ си ᲃлꙋже́нїе преслꙋша́нїемъ ѡ҆ста́вившагѡ, ниꙁвергі́й на́ землю, и҆ съ ѿстꙋ́пл̾шихъ съ ни́мъ А҆́гг҃елѡвъ бѣ́сы бы́вшихъ, въ тмꙋ̀ глꙋбины̀ Та́ртара преда́вый, да́ждъ заклина́нїю семꙋ̀ ѡ҆ ᲃтра́шнѣмъ И҆менѝ твое́мъ съверша́емомꙋ, стра́хъ бы́ти семꙋ̀ предводи́телю лꙋка́вствїѧ, и҆ всѣ́мъ по́лкѡмъ є҆гѡ̀ съ ни́мъ ниꙁпа́дшимъ ѿ вы́сшнихъ ᲃвѣтоноше́нїй, и҆ ѡ҆братѝ є҆гѡ̀ въ бѣ́гство, и҆ запрѣтѝ є҆мꙋ̀ и҆ де́монѡмъ є҆гѡ̀ ѿитѝ коне́чнѣ, ꙗ҆́кѡ да ничто́же вреди́телнѡ, съпроти́въ семꙋ̀ знамена́нномꙋ твое́мꙋ ѻ҆́браꙁꙋ сътво́ритъ: но да́ждъ мнѣ недосто́йномꙋ рабꙋ̀ твое́мꙋ Кртⷭ҇нымъ зна́менїемъ въѡрꙋже́нномꙋ, ᲃи́лꙋ держа́вы, є҆́же настꙋпа́ти на ѕмїѧ̀ и҆ ᲃкѡ́рпїѧ, и҆ на всю̀ ᲃи́лꙋ вра́жїю. Твое́ бо пѣсносло́витсѧ и҆ велича́етъ, и҆ ѿ всѧ́кагѡ дыха́нїѧ съ ᲃтра́хомъ ᲃла́витсѧ Всест҃о́е И҆мѧ̀ Ѿц҃а̀, и҆ Сн҃а, и҆ ᲃт҃а́гѡ Дх҃а, ны́нѣ и҆ прⷭ҇нѡ, и҆ въ вѣ́ки ве́кѡвъ, А҆ми́нь.

Посе́мъ  Заклина́телъ вꙁе́мъ ᲃщ҃енный По́ѧсъ, ѡ҆бложи́въ є҆гѡ̀ ѡ҆ вы́ю бѣ́снагѡ, а҆кѝ свѧꙁꙋ́ѧ є҆гѡ̀: повелѣва́етъ бѣ́сꙋ си́мъ ѡ҆́браꙁомъ.

Повелѣва́ю тебѣ̀, и҆́же а҆́ще є҆сѝ нечи́стый дꙋ́ше, и҆ всѣ́мъ клеврѣ́тѡмъ твои́мъ сегѡ̀ раба̀ Бж҃їѧ ѡ҆бсѣдѧ́щихъ, чре́ꙁъ та́йнꙋ Воплоще́нїѧ, ᲃтрⷭ҇тїй, Воскрⷭ҇нїѧ, и҆ на́ нб҃о Воꙁнесе́нїѧ Гд҃а на́шегѡ І҆и҃с Ха҃ чре́ꙁъ Съше́ствїе ᲃт҃а́гѡ и҆ животворѧ́щагѡ Дх҃а, и҆ чре́ꙁъ Вто́рое и҆ ᲃтра́шное Прише́ствїе того́жде Гд҃а на́шегѡ І҆и҃с Ха҃ на ᲃꙋ́дъ, є҆́же ᲃꙋди́ти живы́мъ и҆ ме́ртвымъ, и҆ ᲃатанꙋ̀ съ всѣ́ми ва́ми вѣ́чномꙋ преда́ти ѡ҆гнѝ, ꙗ҆́кѡ да рече́ши ми и҆мѧ̀ твоѐ, дн҃ь же и҆ ча́съ и҆схо́да и҆ ѿхо́да твое́гѡ съ нѣ́кїимъ зна́менїемъ, и҆ ꙗ҆́кѡ да мнѣ̀ Бж҃ію ᲃлꙋжи́телю, а҆́ще и҆ недосто́йномꙋ ѡ҆ И҆менѝ Гд҃а на́шегѡ І҆и҃с Ха҃ въ все́мъ повинꙋ́ешисѧ всѧ́кѡ, и҆ ꙗ҆́кѡ да ника́коже въ ничесо́мъ же ᲃі́е Бж҃їе съꙁда́нїе ни́ же предстоѧ́щихъ, ни́ же что̀ ѿ и҆мѣ́нїй и҆́хъ повреди́ши: но ᲃвѧ́ꙁанъ ᲃы́й мно́ю рабо́мъ Бж҃іимъ ѡ҆ ᲃтра́шномъ и҆ ᲃп҃си́телномъ И҆менѝ Гд҃а на́шегѡ І҆и҃с Ха҃ съ всѣ́ми клеврѣ́ты твои́ми, и҆ съ все́ю зло́бною си́лою твое́ю си́мъ ᲃщ҃е́ннымъ По́ѧсомъ, ти́хѡ на не́мъ же є҆́стѐ мѣ́стѣ ᲂу҆слы́шите ᲃловеса̀ Заклина́нїѧ мое́гѡ, и҆ ᲃи́лꙋ ᲂу҆раꙁꙋмѣ́ете, и҆ побѣжде́нныхъ себѐ ѡ҆щꙋтитѐ завѣща́нїемъ на ва́съ сътворе́ннымъ, до́ндеже ᲃи́лою Бг҃а Вседержи́телѧ и҆ꙁгна́ни бꙋ́дете: ᲃи́це ва́мъ завѣща́ю и҆ крѣ́пкѡ повелѣва́ю, въ И҆мѧ̀ Ѿц҃а, и҆ Сн҃а, и҆ ᲃт҃а́гѡ Дх҃а, А҆ми́нь.

А҆́бїе же гл҃ет:

Премꙋ́дрость про́сти ᲂу҆слышим ᲃт҃о́е Е҆ѵⷢ҇лїе, Ѿ Маѳ: ᲃт҃а́гѡ Е҆ѵⷢ҇лїа чте́нїе.

Кли́ръ:

Сла́ва тебѣ̀ Гд҃и.

Заклина́тель:

Во́нмѣмъ.

И҆ а҆́бїе чте́тъ Е҆ѵⷢ҇лїе сі́е Главы̀, і҃. Зача́ло, а҃д. над гла́вою бѣ́снагѡ.

Въ вре́мѧ ѡ҆́но: Приꙁва́въ І҆и҃с двана́десѧть Ꙋ҆́чн҃ки своѧ̀, дадѐ и҆́мъ вла́сть на дꙋ́сѣхъ нечи́стыхъ, є҆́же и҆ꙁгони́ти и҆́хъ, и҆ цѣли́ти всѧ́къ не́дꙋгъ и҆ всѧ́кꙋю бо́лѣꙁнь.

Си́хъ двана́десѧти посла̀ І҆и҃с, заповѣда́въ и҆́мъ, гл҃ѧ̀: на пꙋ́ть ꙗ҆ꙁы́ческїй не и҆дѣ́те и҆ въ гра́дъ Самарі́йскїй не внидѣ́те: и҆дѣ́те же па́че къ ѻ҆́вцамъ поги́бшимъ до́мꙋ І҆и҃лева.

Ходѧ́ще же проповѣдꙋ́йте, гл҃ю́ще: ꙗ҆́кѡ приближи́сѧ црⷭ҇твїе нбⷭ҇ное.

Болѧ́щїѧ и҆сцѣлѧ́йте, прокаже́нныѧ ѡ҆чища́йте, мр҃твыѧ воскреша́йте, бѣ́сы и҆ꙁгони́те: тꙋнѐ прїѧ́сте, тꙋнѐ дади́те.

Кли́ръ:

Сла́ва тебѣ̀ Гд҃и.

Заклина́тель же са́мъ лобꙁа́въ ᲃт҃о́е, Е҆ѵⷢ҇лїе дае́тъ є҆̀ и҆ бѣ́сномꙋ лобꙁа́ти, и҆ а҆́бїе воꙁло́жъ десни́цꙋ на главѣ̀ є҆гѡ̀, глаголе́тъ:

Словесы̀ Бжстве́ннагѡ Е҆ѵⷢ҇лїа да ᲂу҆гаснетъ и҆ и҆ще́ꙁнетъ въ тебѣ̀ И҆мⷬ҇къ: всѧ̀ си́ла лꙋка́вагѡ дїа́вола, и҆ да влѣє́тсѧ си́ла Бжстве́ннагѡ Дх҃а, А҆ми́нь.

Посе́мъ десни́цею и҆лѝ Кртⷭ҇о́мъ бл҃гословлѧ́ѧ є҆гѡ̀, гл҃етъ:

Се Крⷭ҇тъ Гд҃нь, бѣжи́те проти́вныѧ ᲃи́лы, побѣди́лъ бо є҆́стъ Ле́въ ѿ колѣ́на І҆ꙋ́дова Ко́рен̾ Дави́довъ, Гд҃ь и҆ Бг҃ъ на́шъ І҆и҃с Хᲃ҃, попра́вый и҆ сте́рый ва́шꙋ не́мощнꙋю ᲃи́лꙋ.

Бл҃гоⷭ҇ве́нъ бꙋ́ди дн҃ь и҆ ча́съ, во́ньже Гд҃ь и Бг҃ъ на́шъ І҆и҃с Хᲃ҃ роди́сѧ ѿ Дв҃ы Мр҃́ѧ, на сътре́нїе и҆ раꙁдрꙋше́нїе дїа́волскагѡ мꙋчи́телства, и҆ въ спⷭ҇нїе вѣ́рныхъ.

и҆ Троп:

Гд҃и ѡ҆рꙋ́жїе на дїа́вола Кртⷭ҇ъ тво́й да́лъ:

По си́хъ же гл҃етъ ѱал: н҃г.

Бж҃е въ и҆мѧ̀ твоѐ сп҃си́ мѧ и҆ въ си́лѣ:

А҆́бїе же съ всѧ́кимъ дерꙁнове́нїемъ крѣ́пкою вѣ́рою чте́тъ Заклина́нїе сі́е ᲃт҃а́гѡ Вели́кагѡ Васи́лїѧ.

Заклина́ю тѧ злонача́лника хꙋ́л̾нагѡ, нача́лника съпроти́внагѡ воста́нїѧ, и҆ самодѣ́телѧ злобы̀.

Заклина́ю тѧ ниꙁверже́ннагѡ ѿ вы́шнѧгѡ Свѣтоноше́нїѧ, и҆ въ тмꙋ̀ глꙋбины̀ ниꙁведе́ннагѡ воꙁноше́нїѧ ра́ди.

Заклина́ю тебѐ и҆ всю̀ ниꙁпа́дшꙋю си́лꙋ послѣ́дова́телнꙋю твое́гѡ предложе́нїѧ.

Заклина́ю тѧ дꙋ́ше нечи́стый, Бг҃ъ҃омъ Саваꙍ́ѳомъ, и҆ всѣ́мъ Во́инствѡмъ А҆гг҃лъ Бж҃іихъ, А҆дѡнаі̀ Е҆лѡі̀ Бг҃а Вседержи́телѧ, и҆ꙁы́йдѝ и҆ ᲂу҆страни́сѧ ѿ раба̀ Бж҃іѧ, И҆мⷬ҇къ.

Заклина́ю тѧ Бг҃омъ, сло́вомъ всѧ̀ съꙁда́вшимъ, и҆ Гд҃емъ на́шимъ І҆и҃с Хрⷭ҇то́мъ, є҆диноро́днымъ Сн҃омъ є҆гѡ̀, пре́жде вѣ́къ неиꙁреч́ннѡ, и҆ беꙁстра́стнѡ ѿ не́гѡ рожде́ннымъ, ви́димꙋю же и҆ неви́димꙋю тва́ръ съꙁда́вшимъ, по ѻ҆́браꙁꙋ свое́мꙋ чл҃ка сътво́ршимъ, за́кономъ пе́рвѣе є҆стестве́ннѣ ᲃегѡ̀ дѣтоводи́вшимъ, и҆ А҆́гглⷭ҇ким приставле́нїемъ съхра́ншимъ, водо́ю съгрѣше́нїе свы́шше потопи́вшимъ, и҆ поднбⷭ҇ныѧ бе́ꙁдны раꙁꙋсти́вшимъ, и҆ гіга́нты нечествова́вшїѧ раꙁтлѣ́вшимъ, и҆ ᲃто́лпъ скве́рныхъ растрѧ́сшимъ, и҆ зе́млю Содо́мѡвъ и҆ Гомѡ́ррѡвъ ѻ҆гне́мъ Бжⷭ҇тве́ннымъ и҆спепели́вшимъ, є҆гѡ́ же въ ᲃвѣди́тел̾ство ды́мъ неꙋгаса́ѧй кꙋ́ритсѧ:

Жеꙁло́мъ мо́ре раꙁде́лшимъ, и҆ лю́ди нога́ми немо́крыми прове́дшимъ и҆ мꙋчи́телѧ Фараꙍ́на и҆ во́инство Бг҃обо́рное въ вѣ́ки волна́ми нечести́вѡ бра́нь воꙁдви́гшеє покры́вшимъ:

На коне́цъ вѣ́кѡвъ ѿ Дв҃ы чⷭ҇тыѧ воплоти́вшимисѧ неиꙁрече́ннѡ, и҆ цѣ́лы печа́ти чⷭ҇тоты̀ двⷭ҇тва̀ съхра́ншимъ: ѡ҆мы́ти Кр҃ще́нїемъ ве́тхꙋю на́шꙋ ᲃкве́рнꙋ бл҃гоиꙁволи́вшимъ, є҆ю́же мы престꙋпле́нїемъ ѡ҆скверни́хѡмсѧ.

Заклина́ю тѧ Крⷭ҇ти́вшимсѧ въ І҆ꙍрда́ни, и҆ ѻ҆́браꙁъ на́мъ нетлѣ́нїѧ въ водѣ̀ по бл҃года́ти пода́вшимъ: є҆гѡ́же А҆гг҃ли и҆ всѧ̀ ᲃи́лы нбⷭ҇ныѧ ᲂу҆жасѡ́шасѧ, воплоще́нна Бг҃а смири́вшагосѧ зрѧ́ще, є҆гда̀ беꙁнача́лный Ѻ҆ц҃ъ беꙁнача́лное Ржⷭ҇тво ᲃн҃о́внее ѿкры̀, и҆ ᲃт҃агѡ Дха ᲃъхожде́нїе, Трⷪ҇ческое є҆динство̀ ᲃвѣдѣтельствова̀:

Заклина́ю тѧ вѣ́трꙋ запрѣти́вшимъ, и҆ бꙋ́рю морскꙋю ᲂу҆кроти́вшимъ, и҆ пѡ́лкъ де́мѡнскїй прогна́вшимъ, и҆ зѣни́цѣ ѻ҆́чныѧ ѿ ᲂу҆тро́бы лише́нныѧ, бре́нїемъ слѣпы́ѧ проꙁрѣ́ти содѣла́вшимъ, и҆ дре́внее ро́да нш҃егѡ соꙁда́нїе ѡ҆бнови́вшимъ, и҆ нѣмы́м є҆́же гл҃а́ти дарова́вшимъ, и҆ стрꙋ́пы прока́ꙁъ ѡ҆чисти́вшимъ, и҆ мр҃твыхъ ѿ гро́бѡвъ воскр҃си́вшимъ и҆ да́же до Погребе́нїѧ чл҃кѡмъ бесѣдова́вшимъ, и҆ а҆́дъ воста́нїемъ плѣни́вшимъ, и҆ всѐ члчⷭ҇твѡ неѡбъѧ́то ᲃме́ртїю ᲂу҆строи́вшимъ.

Заклина́ю тѧ Бг҃омъ Вседержи́телемъ, Бг҃одꙋхнове́ннымъ гла́сомъ чл҃ки водхнꙋ́вшимъ, и҆ А҆пⷭ҇лѡмъ содѣйствова́вшимъ, и҆ всю̀ вселе́ннꙋю бл҃гоче́стїемъ и҆сполни́вшимъ: ᲂу҆бо́йсѧ, бѣжѝ, съ стра́хомъ ѿврати́сѧ, ᲂу҆страни́сѧ де́моне нечи́стый и҆ скве́рный, преиспо́днїй глꙋби́нный, л̾сти́вый беꙁъѡ́браꙁный, ви́димый беꙁстꙋ́дїѧ ра́ди, неви́димый лицемѣ́рїѧ ра́ди, и҆де́же а҆́ще є҆сѝ, и҆ ѿню́дꙋже а҆́ще и҆де́ши: и҆лѝ а҆́ще са́мъ є҆сѝ веелꙁевꙋ́лъ, и҆лѝ сотрѧса́ѧй, и҆лѝ змїеви́дный, и҆лѝ звѣроли́чный, и҆лѝ ꙗ҆́кѡ па́ра, и҆лѝ ꙗ҆́кѡ пти́ца, и҆лѝ нощеглаго́лникъ, и҆лѝ глꙋхі́й, и҆лѝ нѣмы́й, и҆лѝ ѿ наше́ствїѧ ᲂу҆страша́ѧй, и҆лѝ растерꙁа́ѧй, и҆лѝ л̾сти́внѡ совѣтꙋ́ѧй, и҆лѝ въ снѣ̀ тѧ́жцѣ, и҆лѝ въ бо́лѣꙁни, и҆лѝ въ не́мощи, и҆лѝ въ смѣ́сѣ скокота́ѧй, и҆лѝ сле́ꙁы любосла́стны творѧ́й, и҆лѝ на блꙋ́дъ воꙁбꙋжда́ѧй, и҆лѝ злосмра́дный, и҆лѝ по́хотный, и҆лѝ сластотво́рный, и҆лѝ ѡ҆траволюби́вый, и҆лѝ любонеисто́вный, и҆лѝ звѣꙁдоволхвꙋ́ѧй, и҆лѝ домоволше́бникъ, и҆лѝ беꙁстꙋ́дный, и҆лѝ любопри́телный, и҆лѝ непостоѧ́нный, и҆лѝ съ Мцⷭ҇емъ премѣнѧ́ѧйсѧ, и҆лѝ вре́менемъ нѣ́кїимъ съѡбраща́ѧйсѧ, и҆лѝ ᲂу҆трнїй, и҆лѝ полꙋ́денный, и҆лѝ полꙋ́нощный, и҆лѝ беꙁъго́дїѧ нѣ́коегѡ, и҆лѝ блиста́нїѧ, и҆лѝ са́мъ собо́ю прилꙋчи́лсѧ є҆сѝ, и҆лѝ ѿ когѡ̀ посла́нъ є҆сѝ, и҆лѝ наше́лъ є҆сѝ внеꙁаа́пꙋ, и҆лѝ въ мо́ри, и҆лѝ въ рѣцѣ̀, и҆лѝ ѿ землѧ̀, и҆лѝ и҆ꙁъ кла́дѧꙁѧ, и҆лѝ и҆ ѿ бре́га, и҆лѝ ѿ ро́ва, и҆лѝ ѿ є҆́ꙁера, и҆лѝ ѿ тро́сти, и҆лѝ ѿ ве́щи, и҆лѝ ѿ ве́рхꙋ землѧ̀, и҆лѝ ѿ скве́рны, и҆лѝ ѿ лꙋ́га, и҆лѝ и҆ꙁъ во́лчца, и҆лѝ ѿ дре́ва, и҆лѝ ѿ гро́ма, и҆лѝ ѿ покро́ва ба́ннагѡ, и҆лѝ ѿ кꙋ́пели во́дныѧ, и҆лѝ ѿ гро́ба І҆дѡл̾скагѡ, и҆лѝ ѿню́дꙋже вѣ́мы и҆лѝ не вѣ́мы, и҆лѝ ѿ зна́емыхъ и҆лѝ ѿ неꙁна́емыхъ, и҆лѝ ѿ непосѣ́ща́емагѡ мѣста, ѿлꙋчи́сѧ и҆ премѣни́сѧ, ᲂу҆стыди́сѧ ѻ҆́браꙁа рꙋко́ю Бж҃іею соꙁда́ннагѡ и҆ въѡбраже́ннагѡ: ᲂу҆бо́йсѧ воплоще́ннагѡ Бг҃а подо́бїѧ, и҆ не сокры́йсѧ въ рабѣ̀ Бж҃іи И҆мⷬ҇къ: и҆́бѡ же́ꙁлъ желѣ́ꙁный, и҆ пе́щъ ѻ҆́гненнаѧ и҆ та́ртаръ и҆ скре́жетъ зꙋ́бный, ѿмще́нїе преслꙋша́нїѧ тебѐ ѡ҆жида́етъ.

Ꙋ҆бо́йсѧ, ᲂу҆молкнѝ, бѣжѝ, и҆ не воꙁврати́сѧ, ни́ же ᲃокры́йсѧ съ и҆́нѣми зло́бы нечи́стыми дꙋ́хи: но ѿидѝ въ зе́млю беꙁво́днꙋю пꙋ́стꙋю недѣла́ннꙋю, на не́й же чл҃къ не ѡ҆бита́етъ, но Бг҃ъ є҆ди́нъ приꙁира́етъ, свѧꙁа́ѧй всѣ́хъ ᲂу҆ѧꙁвлѧ́ющихъ и҆ злосовѣтꙋ́ющихъ на ѻ҆́браꙁъ є҆гѡ̀, и҆ вери́гами мра́ка та́ртарꙋ преда́вый, въ до́лгꙋю но́щъ и҆ дн҃ь тебѐ всѣ́хъ злы́хъ и҆скꙋси́телѧ и҆ и҆ꙁѡбрѣта́телѧ дїа́вола: ꙗ҆́кѡ ве́лїй є҆́стъ страхъ Бж҃ій, и҆ ве́лїѧ ᲃла́ва Ѿц҃а, и҆ ᲃн҃а, и҆ ᲃт҃а́гѡ Дх҃а, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

А҆́бїе гл҃етъ:

Премꙋ́дрость про́сти ᲂу҆слы́шимъ ᲃт҃о́е Е҆ѵⷢ҇лїе, ѿ Лꙋкѝ ᲃⷮ: Е҆ѵⷢ҇лїѧ чте́нїе.

Кли́р:

Сла́ва тебѣ̀ Гд҃и.

Заклина́тель:

Во́нмѣмъ.

И҆ чте́тъ ѿ Главы̀, і҃. Зач: н҃а надъ гла́вою беснагѡ.

Въ вре́мѧ ѻ҆́но: Воꙁврати́шасѧ ᲃедмдесѧ́тъ съ ра́достїю, гл҃ю́ще: Гд҃и, и҆ бѣ́сы повинꙋ́ютсѧ на́мъ ѡ҆ и҆менѝ твое́мъ. Рече́ же и҆́мъ І҆и҃с: ви́дѣхъ ᲃатанꙋ̀ ꙗ҆́кѡ мо́лнїю съ нб҃сѐ спа́дша. Се, даю̀ ва́мъ вла́сть настꙋпа́ти на змїѧ̀ и҆ скѡ́рпїѧ и҆ на всю̀ си́лꙋ вра́жїю: и҆ ничто́же ва́съ вреди́тъ. Ѻ҆ба́че ѡ҆ се́мъ не ра́дꙋйтесѧ, ꙗ҆́кѡ дꙋ́си ва́мъ повинꙋ́ютсѧ: ра́дꙋйтежесѧ, па́че, ꙗ҆́кѡ и҆мена̀ ва́шѧ напи́сана ᲃꙋ́ть на нб҃сѣ́хъ.

Кли́ръ:

Сла́ва тебѣ̀ Гд҃и.

Заклина́тель же са́мъ лобꙁа́въ ᲃⷮ: Е҆ѵⷢ҇лїе, дае́тъ є҆̀ и҆ бѣ́сномꙋ лобꙁа́ти, и҆ а҆́бїе воꙁло́жъ десни́цꙋ на главѣ̀ є҆гѡ̀, гл҃етъ:

Словесы̀ Бж҃ственнагѡ Е҆ѵⷢ҇лїѧ, да ᲂу҆га́снетъ и҆ и҆сче́ꙁнетъ въ тебѣ̀ И҆мⷬ҇къ: всѧ̀ си́ла лꙋка́вагѡ дїа́вола, и҆ да влѣ́етсѧ ᲃи́ла Бжⷭ҇тве́ннагѡ Дх҃а, А҆ми́нь.

По се́мъ десни́цею и҆лѝ Крⷭ҇то́мъ бл҃гословлѧ́етъ є҆гѡ̀, глаголе́тъ.

Се Крⷭ҇тъ Гдⷭ҇нь, бѣжи́те проти́вныѧ си́лы: побѣди́лъ бо є҆́стъ Ле́въ ѿ колѣ́на І҆ꙋ́дова Ко́рен̾ Дави́довъ, Гд҃ь и҆ Бг҃ъ на́шъ І҆и҃с Хᲃ҃, попра́вый и҆ сте́рый ва́шꙋ не́мощнꙋю си́лꙋ.

Блⷭ҇ве́нъ бꙋ́ди дн҃ь и҆ ча́съ, во́н̾же Гд҃ь и҆ Бг҃ъ на́шъ І҆и҃с Хᲃ҃ роди́сѧ ѿ Дв҃ы Мр҃іѧ, на сотре́нїе и҆ раꙁдрꙋше́нїе дїа́волскагѡ мꙋчи́тел̾ства, и҆ въ спⷭ҇нїе вѣ́рныхъ.

и҆ Троп:

Гд҃и ѻ҆рꙋ́жїе на дїа́вола:

рекъ, Гд҃ꙋ помоли́мсѧ.

и҆ Кли́рꙋ:

Гд҃и поми́лꙋй.

И҆ а҆́бїе гл҃етъ съ всѧ́кимъ ᲂу҆миле́нїемъ Мл҃твꙋ ᲃі́ю:

Гд҃и Саваꙍ́ѳъ, и҆сцѣлѧ́ѧй всѧ́кꙋю бо́лѣꙁнь и҆ всѧ́кїй не́дꙋгъ, при́ꙁри на раба̀ твое́гѡ И҆мⷬ҇къ: вꙁыщѝ, и҆ стѧжѝ, и҆ ѿженѝ ѿ не́гѡ лꙋка́вагѡ дїа́вола, и҆ все є҆гѡ̀ мꙋчи́тел̾ское дѣ́йство, кры́ющеесѧ и҆ гнѣꙁдѧ́щеесѧ въ не́м: запрѣтѝ млⷭ҇тве всеси́лною ти вла́стїю нечи́стымъ дꙋ́ховѡ́мъ, и҆ и҆жденѝ и҆́хъ ѿ ᲃоꙁда́нїѧ твое́гѡ ᲃегѡ̀, и҆ ѡ҆чи́сти дѣ́ло рꙋ́кꙋ твое́ю ѿ всѧ́кагѡ и҆́хъ злодѣ́йства, и҆ бы́стрымъ твои́мъ стѧжа́въ дѣ́йствомъ, сокрꙋшѝ ᲃатанꙋ̀, и҆ всѧ̀ вражде́бныѧ є҆гѡ̀ си́лы подъ нѡ́ги на́шѧ въско́рѣ, и҆ дарꙋ́й на́мъ побѣ́дꙋ нань и҆ на нечи́стыѧ є҆гѡ̀ дꙋ́хи: ꙗ҆́кѡ да є҆́же ѿ тебѐ млⷭ҇ть полꙋчи́въ, сподоби́тсѧ съ на́ми въ чи́стой со́вѣсти, бе́ꙁъ всѧ́кагѡ препѧ́тїѧ, сла́вити тебѐ є҆ди́нагѡ Бг҃а въ Трⷪ҇ци ᲃт҃ѣ́й слави́магѡ, Ѿц҃а, и҆ ᲃн҃а, и҆ ст҃а́гѡ Дх҃а, ны́нѣ и҆ прⷭ҇нѡ, и҆ въ вѣ́ки вѣ́кѡвъ, А҆ми́нь.

По се́мъ, а҆́бїе чте́тъ ѱало́мъ, рз҃і. И҆сповѣда́йтесѧ Гв҃и ꙗ҆́кѡ бла́гъ ꙗ҆́кѡ въ вѣ́къ млⷭ҇ть є҆гѡ̀. Ве́сь до конца̀. И҆ гл҃етъ:

Премꙋ́дрость про́сти ᲂу҆слы́шимъ ᲃт҃о́е Е҆ѵⷢ҇лїе, ѿ Лꙋкѝ ᲃт҃гѡ Е҆ѵⷢ҇лїѧ чте́нїе.

Кли́ръ:

Сла́ва тебѣ̀ Гд҃и.

Заклинатель:

Во́нмѣмъ.

И҆ чте́тъ ѿ Главы̀, а҃і, Зач: н҃ꙁ надъ гла́вою бѣ́снагѡ.

Въ вре́мѧ ѻ҆́но, бе І҆и҃с и҆ꙁгонѧ̀ бѣ́са, и҆ то́й бѣ нѣ́мъ.

Бы́сть же бѣ́сꙋ и҆ꙁше́дшꙋ, прогл҃а̀ нѣмы́й, и҆ ᲂудиви́шасѧ на́роди.

Нѣ́цїи же ѿ ни́хъ рѣ́ша ѡ҆ Веел̾ꙁевꙋ́лѣ кнѧꙁѝ бѣ́со́встѣмъ и҆ꙁго́нитъ бѣ́сы. Дрꙋ́ꙁїи же и҆скꙋша́юще, зна́менїѧ ѿ не́гѡ и҆ска́хꙋ съ нб҃сѐ.

Ѻ҆́нъ же вѣды́й помышле́нїѧ и҆́хъ, речѐ и҆́мъ: всѧ́кѡ ца́рство на́ сѧ раꙁдѣ́л̾шеесѧ, запꙋстѣва́єтъ, и҆ до́мъ на до́мъ ᲂу҆пада́єтъ. А҆́ще же и҆ сатана̀ на себѐ сама́гѡ раꙁдѣли́сѧ, ка́кѡ ста́нетъ ца́рство є҆гѡ̀? ꙗ҆́кѡ гл҃етѐ ѡ҆ Веел̾ꙁевꙋ́лѣ и҆ꙁгонѧ́ща мѧ̀ бѣ́сы. А҆́щеже а҆́ꙁъ ѡ҆ Веел̾ꙁевꙋ́лѣ и҆ꙁгоню̀ бѣ́сы, ᲃынѡ́ве ва́ши ѡ҆комъ и҆ꙁго́нѧтъ?

Сегѡ̀ ра́ди ᲃꙋдїѧ̀ ва́мъ тїи бꙋ́дꙋтъ. А҆́ще же ѡ҆ пе́рстѣ Бж҃іи и҆ꙁгоню̀ бѣ́сы, ᲂу҆́бѡ пости́же на ва́съ црⷭ҇твїе Бж҃іе. Е҆гда̀ крѣ́пкїй въѡ҆рꙋже́нный храни́тъ сво́й дво́ръ, въ ми́рѣ сꙋ́тъ и҆мѣ́нїа є҆гѡ̀. Е҆гда̀ крѣплѣ́йшїй є҆гѡ̀ наше́дъ побѣди́тъ є҆гѡ̀, всеѡрꙋ́жество є҆гѡ̀ вꙁе́млетъ, на не́же ᲂу҆пова́ше, и҆ кори́сть є҆гѡ̀ раꙁдае́тъ.

Кли́ръ:

Сла́ва тебѣ̀ Гд҃и.

Заклина́тель же са́мъ лобꙁа́въ ст҃о́е Е҆ѵⷢ҇лїе, дае́тъ є҆̀ и҆ бѣ́сномꙋ лобꙁа́ти. и҆ а҆́бїе воꙁло́жъ десни́цꙋ на главѣ̀ є҆гѡ̀, гл҃етъ.

Словесы̀ Бжⷭ҇твеннагѡ Е҆ѵⷢ҇лїѧ да ᲂу҆га́снетъ и҆ и҆счеꙁнетъ въ тебѣ̀ И҆мⷬ҇къ: всѧ̀ си́ла лꙋка́вагѡ дїа́вола, и҆ да влѣ́етсѧ си́ла Бжстве́ннаго Дх҃а, А҆ми́нь.

Посе́мъ десни́цею и҆лѝ Крⷭ҇томъ блⷭ҇влѧ́ѧ є҆гѡ̀, гл҃етъ:

Се Крⷭ҇тъ Гдⷭ҇нь, бѣжи́те проти́вныѧ си́лы: побѣди́лъ бо є҆́стъ Ле́въ ѿ Колѣ́на І҆ꙋдова, Гд҃ь и҆ Бг҃ъ на́шъ І҆и҃с Хᲃ҃, попра́вый и҆ сте́рый ва́шꙋ не́мощнꙋю си́лꙋ.

Блⷭ҇ве́нъ бꙋ́ди дн҃ь и҆ ча́съ, во́н̾же Гдⷭ҇ь и҆ Бг҃ъ на́шъ І҆и҃с Хᲃ҃ ѿ Дв҃ы Мр҃іѧ роди́сѧ, на сътре́нїе и҆ раꙁдрꙋше́нїе дїа́вол̾скагѡ мꙋчи́тел̾ства, и҆ въ спⷭ҇нїе вѣ́рныхъ.

И҆ Троп:

Гд҃и ѻ҆рꙋ́жїе на дїа́вола:

И҆ а҆́бїе съ всѧ́кимъ дерꙁнове́нїемъ крѣ́пкою вѣ́рою чте́тъ Заклина́нїе сі́е ᲃт҃а́гѡ Григо́рїѧ Чꙋдотво́рца.

Запрѣща́етъ ти Гдⷭ҇ь дїа́воле, прише́дый въ мі́р, и҆ всели́выйсѧ въ чл҃цѣхъ, ꙗ҆́кѡ да твоѐ ниꙁло́житъ мꙋчи́тел̾ство, и҆ чл҃ки ѿ тоѧ̀ и҆схи́титъ: на дре́вѣ сопроти́вныѧ си́лы победи́вый, ᲃо́лнцꙋ поме́ркшꙋ, землѣ̀ поколѣба́вшейсѧ, и҆ гро́бѡмъ ѿверꙁа́ющимсѧ, и҆ тѣлесе́мъ ᲃт҃ы́хъ воста́ющимъ: раꙁдрꙋши́вый см҃ртїю сме́рт̾, и҆ ᲂу҆праꙁдни́вый держа́вꙋ и҆мꙋ́щагѡ сме́рти, ᲃі́естъ: тебѐ дїа́вола.

Заклина́ю тѧ̀ Бг҃омъ покаꙁа́вшимъ дре́во живота̀, и҆ съчини́вшимъ Херꙋви́ма, и҆ пла́менное ѻ҆рꙋ́жїе ѻ҆браща́ющеесѧ стрещѝ то.

Запрѣще́нъ бꙋ́ди, ѡ҆́нѣмъ бот и запрѣща́ю, ходи́вшимъ ꙗ҆́кѡ посꙋ́хꙋ на пле́щꙋ мо́рскꙋю, и҆ запрѣти́вшимъ бꙋ́рѧмъ вѣ́трнымъ: є҆го́ же воꙁрѣ́нїе и҆ꙁсꙋша́етъ бе́ꙁдны, и҆ преще́нїе та́етъ го́ры: то́й бо и҆ ны́нѣ повелѣва́єтъ ти на́ми. ᲂу҆бо́йсѧ, и҆ꙁыйдѝ, и҆ ᲂу҆страни́сѧ ѿ соꙁда́нїѧ сегѡ̀, и҆ да не воꙁврати́шисѧ, ни́ же срѧ́щеши є҆гѡ̀, и҆лѝ дѣйствꙋ́еши: ни въ но́щи, ни въ днѐ, и҆лѝ въ ча́сѣ, и҆лѝ въ полꙋ́дне: но ѿидѝ въ сво́й та́ртаръ, да́же до ᲂу҆готова́ннагѡ вели́кагѡ днѐ сꙋ́днагѡ.

Ꙋ҆бо́йсѧ Бг҃а сѣдѧ́щагѡ на Херꙋви́мѣхъ, и҆ приꙁира́ющагѡ бе́ꙁдны: є҆го́же трепе́щꙋтъ А҆́гг҃ли, А҆рха́гг҃ли, Прⷭ҇то́ли, Гдⷭ҇твїѧ, Нача́ла, Вла́сти, Си́лы, Мнѡгоѡчи́тїи Херꙋви́ми, и҆ Шестокрила́тїи Серафі́ми: є҆го́же трепе́щетъ нб҃о и҆ землѧ̀, мо́ре и҆ всѧ̀ ꙗ҆́же въ ни́хъ, и҆ꙁыйдѝ и҆ ᲂу҆страни́сѧ ѿ Бж҃іѧгѡ соꙁда́нїѧ сегѡ̀, и҆ вѣ́рнагѡ раба̀ Ха҃ Бг҃а на́шегѡ: ѡ҆́нѣмъ бо ти запрѣща́ю, и҆́же хо́дитъ на кри́лꙋ вѣ́трню, и҆ твори́тъ А҆́гг҃лы своѧ̀ дх҃и.

И҆ꙁыйдѝ и҆ ᲂу҆страни́сѧ ѿ соꙁда́нїѧ сегѡ̀ со всею̀ си́лою и҆ а҆́нгелы твои́ми: ꙗ҆́кѡ просла́висѧ И҆мѧ̀ Ѿц҃а, и҆ ᲃн҃а, и҆ ᲃⷮ: Дх҃а, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

А҆́бїе гл҃етъ:

Премꙋ́дрость про́сти ᲂу҆слы́шимъ ᲃт҃о́е Е҆ѵⷢ҇лїе, ѿ І҆ѡа́нна ᲃⷮ: Е҆ѵⷢ҇лїѧ чте́нїе.

И҆ а҆́бїе чте́тъ Е҆ѵⷢ҇лїе ᲃі́е Глава̀, а҃. Зача́ло, а҃.

Въ нача́лѣ бѣ ᲃло́во, и҆ ᲃло́во бѣ ᲂу҆ Бг҃а, и Бг҃ъ бѣ ᲃло́во.

Сі́е бѣ и҆ско́ни ᲂу҆ Бг҃а. Всѧ̀ тѣ́мъ бы́ша, и҆ бе́ꙁъ не́гѡ ничто́же бы́сть, є҆́же бы́сть. Въ то́мъ живо́тъ бѣ, и҆ живо́тъ бѣ ᲃвѣ́тъ чл҃кѡмъ, и҆ ᲃвѣ́тъ въ тмѣ̀ свѣ́титсѧ, и҆ тьма̀ є҆гѡ̀ не ѡ҆б̾ѧ́ть. Бы́сть Чл҃къ по́сланъ ѿ Бг҃а, и҆мѧ̀ є҆мꙋ̀ І҆ꙌАННЪ. Се́й прі́йде въ ᲃвѣди́тел̾ствѡ, ꙗ҆́кѡ да свѣдител̾ствꙋ́етъ ѡ҆ свѣ́тѣ, ꙗ҆́кѡ да всѝ вѣ́рꙋ и҆мꙋ́тъ тѣ́мъ. Не бѣ̀ то́й свѣ́тъ, но да свѣдител̾ствꙋ́етъ ѡ҆ ᲃвѣ́тѣ. Бѣ ᲃвѣ́тъ и҆́стинный, просвѣща́ѧй всѧ́кагѡ чл҃ка грѧдꙋ́щагѡ въ мі́ръ. Въ мі́рѣ бѣ, и҆ мі́ръ тѣ́мъ бы́ст̾, и҆ мі́ръ є҆го̀ не позна̀. Въ своѧ̀ прі́йде, и҆ ᲃвоѝ є҆гѡ̀ не прїѧ́ша: є҆ли́цы же прїѧ́ша є҆гѡ̀, дадѐ и҆́мъ вла́сть ча́да Бж҃іѧ бы́ти, вѣ́рꙋющимъ въ и҆мѧ̀ є҆гѡ̀. И҆́же не ѿ Крвѝ, ни́же ѿ по́хоти плотскїа, но ѿ Бг҃а роди́шасѧ, и҆ всели́сѧ въ ны̀. И҆ ви́дѣхѡмъ ᲃла́вꙋ є҆гѡ̀, ᲃла́вꙋ ꙗ҆́кѡ є҆диноро́днагѡ ѿ Ѿц҃а, и҆спо́лнь бл҃годати и҆ и҆́стины. І҆ꙍа́ннъ ᲃвѣдител̾ствꙋ́етъ ѡ҆ не́мъ и҆ воꙁва̀, гл҃ѧ̀: ᲃе́й бѣ, є҆го́же рѣ́хъ, и҆́же по мнѣ̀ грѧдетъ, предомно́ю бы́сть, ꙗ҆́кѡ пе́рвый менѐ бѣ. И҆ ѿ и҆сполне́нїѧ є҆гѡ̀ мы всѝ прїѧ́хѡмъ и҆ бл҃годать воꙁблагода́ть.

Ꙗ҆́кѡ зако́нъ Мꙍѵ꙼се́ѡмъ да́нъ бы́сть, бл҃годать и҆ и҆́стинна І҆и҃съ Хрⷭ҇то́мъ бы́сть.

Кли́ръ:

Сла́ва тебѣ̀ Гд҃и.

Заклина́тель же ᲃа́мъ лобꙁа́въ ᲃт҃о́е Е҆ѵⷢ҇лїе, дае́тъ є҆̀ и҆ бѣ́сномꙋ лобꙁа́ти: и҆ а҆́бїе воꙁло́жъ десни́цꙋ на главъ̀ є҆гѡ̀, гл҃тъ:

Словесы̀ Бж҃стве́ннагѡ Е҆ѵⷢ҇лїѧ да ᲂу҆га́снетъ и҆ и҆ще́ꙁнетъ въ тебѣ̀ И҆мⷬ҇къ: всѧ̀ си́ла лꙋка́вагѡ дїа́вола, и҆ да влѣ́етсѧ ᲃи́ла Бж҃ственнагѡ Дха, А҆ми́нь.

По се́мъ:

Се Крⷭ҇тъ Гн҃ь, бѣжи́те проти́вныа си́лы, побѣди́лъ бо є҆́стъ Ле́въ ѿ колѣ́на І҆ꙋ́дова, Ко́рень Дави́дѡвъ, Гд҃ь и҆ Бг҃ъ на́шъ І҆и҃с Хᲃ҃, попра́вый и҆ сте́рый ва́шꙋ не́мощнꙋю си́лꙋ. Блⷭ҇ве́нъ бꙋ́ди дн҃ь и҆ ча́съ, во́н̾же Гд҃ь и҆ Бг҃ъ на́шъ І҆и҃с Хᲃ҃ роди́сѧ ѿ Дв҃ы Мр҃іѧ, на сотре́нїе и҆ раꙁдрꙋше́нїе дїа́волскагѡ мꙋчи́тнл̾ства, и҆ во спⷭ҇нїе вѣ́рныхъ.

И҆ Троп: Гд҃и ѻ҆рꙋ́жїе на дїа́вол:

По се́мъ же а҆́бїе чте́тъ, Вѣ́рꙋю въ є҆ди́нагѡ Бг҃а: Ѿч҃е на́шъ: и Бц҃е Дв҃о: и҆ Мл҃твꙋ сі́ю рек: Гд҃ꙋ помоли́мсѧ.

Мл҃тва І҆ꙍа́нна Златоꙋ́стагѡ, а҃.

Бж҃е вѣ́чный, и҆ꙁбави́вый ро́дъ члчⷭ҇кій ѿ плѣне́нїѧ дїа́волскагѡ, и҆ꙁба́ви раба̀ свое́го И҆мⷬ҇къ: всѧ́кагѡ дѣ́йства дꙋ́хѡвъ нечи́стых: повелѝ лꙋка́вымъ и҆ нечи́стым дꙋ́хѡмъ же и҆ де́монѡмъ, ѿстꙋпи́ти ѿ дш҃а и҆ тѣ́ла раба̀ твое́гѡ И҆мⷬ҇къ: и҆ не пребыва́ти ни́ же сокри́тисѧ въ не́мъ.

Да бѣжа́тъ и҆́мене твое́гѡ ст҃а́гѡ, и҆ є҆диноро́днагѡ твое́го ᲃн҃а, и҆ животворѧ́щагѡ ти Дх҃а, ѿ соꙁда́нїѧ рꙋ́къ твои́х, ꙗ҆́кѡ да ѡ҆чи́щенъ бы́въ ѿ всѧ́кагѡ дїа́вол̾скагѡ навѣ́та, преподо́бнѡ и҆ пра́веднѡ и҆ бл҃гоче́стнѡ поживе́тъ.

Сподобле́нъ бы́въ Прчⷭ҇тыхъ Та́инъ є҆диноро́днагѡ ᲃн҃а твое́гѡ и҆ Бг҃а на́шегѡ: съ ни́мъ же бл҃гослове́нъ є҆сѝ, и҆ препросла́вленъ, съ прⷭ҇ты́мъ и҆ бл҃ги́мъ и҆ животворѧ́щимъ ти́ Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

А҆́бїе же по се́мъ чте́тъ ѱало́мъ л҃д. Сꙋдѝ Гд҃и ѡ҆бидѧ́щїѧ мѧ воꙁ: Ве́сь до конца̀.

По се́мъ гл҃тъ: Премꙋ́дрость про́сти ᲂу҆слы́шимъ ᲃт҃о́е Е҆ѵⷢ҇лїе, ѿ Ма́рка ᲃⷮ: Е҆ѵⷢ҇лїѧ чте́нїе.

И҆ а҆́бїе чте́т Е҆ѵⷢ҇лїе сі́е, Гла́ва ѳ. Зач: м҃.

Въ вре́мѧ ѻ҆́нѡ, Чл҃къ нѣ́кїй прі́йде къ І҆и҃сꙋ, кланѧ́ѧсѧ є҆мꙋ̀, и҆ глаголѧ̀: Ꙋ҆ч҃телю, приведо́хъ ᲃы́на мое́гѡ къ тебѣ̀, и҆мꙋ́ща дꙋ́ха нѣ́ма: и҆ и҆де́же а҆́ще и҆́метъ є҆гѡ̀, раꙁбива́етъ є҆го̀, и҆ пѣ́ны тѣ́щитъ, и҆ скреже́щетъ зꙋба́ми свои́ми, и҆ ѡ҆цѣпенѣва́етъ. И҆ рѣ́хъ Ꙋ҆́ченикѡмъ твои́мъ, ꙗ҆́кѡ да и҆жденꙋ́тъ є҆го̀, и҆ не воꙁмого́ша. Ѻ҆́нъ же ѿвѣща́въ є҆мꙋ̀, гл҃етъ: ѽ, рѡ́де невѣ́рный, доко́лѣ въ ва́съ бꙋ́дꙋ? доко́лѣ терплю̀ вы? приведѣ́те є҆го̀ къ мнѣ̀. И҆ приведѡ́ша є҆го̀ къ немꙋ̀. И҆ ви́дѣвъ є҆го̀, а҆́бїе дꙋ́хъ стрѧсѐ є҆го̀, и҆ па́дъ на землѝ, валѧ́шесѧ, пѣ́ны тѣщѧ̀. И҆ вопросѝ ѿца̀ є҆гѡ̀, коли́кѡ вре́мѧ є҆́сть, ѿне́лѣже ᲃі́е бы́сть є҆мꙋ̀? Ѻ҆́нъ же речѐ: и҆ꙁдѣ́тска: и҆ мнѡга́жды є҆го̀ и҆ въ ѻ҆́гнь въвержѐ и҆ въ во́ды, ꙗ҆́кѡ да погꙋ́битъ є҆го̀, но а҆́ще что̀ мо́жеши, помоꙁѝ на́мъ, млⷭ҇рдова́въ ѡ҆ на́съ.

І҆и҃съ же речѐ є҆мꙋ̀ ᲃі́е, а҆́ще что̀ мо́жеши вѣ́ровати, всѧ̀ воꙁмѡ́жна вѣ́рꙋющомꙋ. И҆ а҆́бїе воꙁопи́въ ѿц҃ъ ѻ҆троча́те, со слеꙁа́ми гл҃ѧ, вѣ́рꙋю, Гд҃и, помоꙁѝ моемꙋ̀ невѣ́рїю.

Ви́дѣвъ же І҆и҃с, ꙗ҆́кѡ сри́щетсѧ наро́дъ, запрѣтѝ дꙋ́хови нечи́стомꙋ, гл҃ѧ̀ є҆мꙋ̀: дꙋ́ше нѣмы́й и҆ глꙋхі́й, а҆́ꙁъ ти повелѣва́ю: и҆ꙁыйдѝ и҆ꙁъ не́гѡ и҆ ктомꙋ̀ не внидѝ во́нь. И҆ воꙁопи́въ и҆ мно́гѡ ᲃътрѧ́съ є҆гѡ̀, и҆ꙁы́йде: и҆ бы́сть ꙗ҆́кѡ ме́ртвъ, ꙗ҆́кѡ мнѡ́гимъ гл҃ати, ꙗ҆́кѡ ᲂу҆́мре. І҆и҃с же и҆́мь є҆гѡ̀ за рꙋ́кꙋ, воꙁдвижѐ є҆гѡ̀, и҆ воста̀. И҆ вше́дшꙋ є҆мꙋ̀ въ до́мъ, Ꙋ҆чн҃ицы̀ є҆гѡ̀ вопроша́хꙋ є҆гѡ̀ на є҆динѣ̀, чесѡ̀ ра́ди мы̀ не воꙁмого́хѡмъ и҆ꙁгна́ти є҆гѡ̀? И҆ речѐ и҆́мъ: се́й рѡ́дъ ничи́мже мо́жетъ и҆ꙁыйтѝ, то́чїю Мл҃твою и҆ По́стомъ.

Сла́ва тебѣ̀ Гд҃и.

Заклина́тель же са́мъ лобꙁа́въ ᲃт҃о́е Е҆ѵⷢ҇лїе, дае́тъ є҆̀ бѣ́сномꙋ лобꙁа́ти, и҆ воꙁло́жъ десни́цꙋ на главѣ̀ є҆гѡ̀, гл҃етъ:

Словесы̀ Бжⷭ҇тве́ннагѡ Е҆ѵⷢ҇лїѧ да ᲂу҆га́снетъ и҆ и҆ще́ꙁнетъ въ тебѣ̀ И҆мⷬ҇къ: всѧ̀ си́ла лꙋка́вагѡ дїа́вола, и҆ да влѣє́тсѧ ᲃи́ла Бжⷭ҇тве́ннагѡ Дх҃а, А҆ми́нь.

По се́мъ:

Се Крⷭ҇тъ Гдⷭ҇нь, бѣжи́те проти́вныѧ ᲃи́лы, побѣди́лъ бо є҆́стъ Ле́въ ѿ колѣ́на І҆ꙋ́дова, Ко́рень Дави́дѡвъ Гд҃ь и҆ Бг҃ъ на́шъ І҆и҃с Хᲃ҃, попра́вый и҆ сте́рый ва́шꙋ не́мощнꙋю ᲃи́лꙋ.

Блⷭ҇ве́нъ бꙋ́ди дн҃ь и҆ ча́с, во́н̾же Гд҃ь и Бг҃ъ на́шъ І҆и҃с Хᲃ҃ роди́сѧ ѿ Дв҃ы Мр҃іѧ, на сътре́нїе и҆ раꙁдрꙋше́нїе дїа́волскагѡ мꙋчи́телства, ᲃпⷭ҇нїе вѣ́рныхъ.

и҆ Тропа́ръ:

Гд҃и ѡ҆рꙋ́жїе на дїа́вола Крⷭ҇тъ тво́й да́лъ є҆сѝ на́мъ: По си́хъ же чте́тъ заклина́нїе ᲃі́е ᲃт҃а́гѡ І҆ꙍа́нна Златоꙋ́стагѡ.

Бжⷭ҇тве́нное, и҆ ᲃт҃о́е, и҆ Вели́кое, и҆ ᲃтра́шное, и҆ нестерпи́мое и҆менова́нїе, и҆ приꙁыва́нїе тво́римъ на твоѐ прогна́нїе ѿстꙋ́пниче, та́кожде и҆ запрѣще́нїе на твоѐ съкрꙋше́нїе дїа́воле. Бг҃ъ ᲃт҃ы́й, беꙁнача́лный, ᲃтра́шный, невиди́мый ᲃꙋщество́мъ, непобѣди́мый си́лою, и҆ непостижи́мый Бж҃ество́мъ: Цр҃ъ ᲃла́вы и҆ Вседержи́тель Влады́ка, запрѣща́ет ти дїа́воле, ѿ несꙋ́щихъ въ є҆́же бы́ти всѧ̀ бл҃голѣ́пнѡ ᲃло́вомъ соста́вивый, ходѧ́й на кры́лꙋ вѣ́трню.

Запрѣща́етъ ти Гд҃ь дїа́воле, приꙁыва́ѧй во́дꙋ мо́рскꙋю, и҆ и҆ꙁлива́ѧй ᲃі́ю на лицѐ всеѧ̀ землѧ̀, Гд҃ь си́лъ и҆мѧ̀ є҆мꙋ̀.

Запрѣща́етъ ти Гд҃ь дїа́воле, ѿ беꙁчисле́нных нбⷭ҇ныхъ Чи́нѡвъ ѻ҆́гненныхъ стра́хѡмъ слꙋжи́мый и҆ воспѣва́емый, и҆ ѿ мнѡ́жества ли́кѡвъ А҆́гглⷭ҇кихъ и҆ А҆рха́гглⷭ҇кихъ съ тре́петомъ покланѧ́емый и҆ слави́мый.

Запрѣща́етъ ти Гд҃ь дїа́воле, ѡ҆крꙋжа́емый ѿ предстоѧ́щихъ ᲃи́лъ и҆ стра́шныхъ и҆ мнѡгоѡчи́тыхъ Херꙋві́мѡвъ и҆ Серафі́мѡвъ, лица̀ своѧ̀ двѣ́ма кры́лома покрыва́ющихъ неꙁри́магѡ ра́ди є҆гѡ̀, и҆ неиꙁслѣди́магѡ Бжⷭ҇тва̀, и҆ двѣ́ма кры́лома своѧ̀ нѡ́ги покрыва́ющихъ, въ є҆́же не ѡ҆пали́тисѧ ѿ неиꙁрече́нныѧ ᲃла́вы, и҆ недомысли́магѡ вели́чества є҆гѡ̀, и҆ двѣ́ма кры́лома лѣта́ющихъ, и҆ нб҃о и҆сполнѧ́ющихъ ѿ вопїе́нїѧ свое́гѡ, сі́естъ: ᲃт҃ъ, ᲃт҃ъ, ᲃт҃ъ Гд҃ь Саваꙍ́ѳъ, и҆сполнь нб҃о и҆ землѧ̀ ᲃла́вы є҆гѡ̀.

Запрѣща́етъ ти Гд҃ь дїа́воле, ѿ нѣ́дра Ѿч҃а съше́дый съ нб҃съ Бг҃ъ ᲃло́во, и҆ ѿ Дв҃ы ᲃт҃ы́ѧ покло́ннымъ неиꙁрече́ннымъ Воплоще́нїемъ, неиꙁгл҃а́ннѡ ꙗ҆ви́выйсѧ въ мі́рѣ є҆́же спⷭ҇тѝ є҆гѡ̀, и҆ Влады́чнею свое́ю ᲃи́лою и҆ꙁвергі́й тебѐ съ нб҃съ и҆ ѿме́щенна ѿ всегѡ̀ покаꙁа́вый.

Запрѣща́етъ ти Гд҃ь дїа́воле, рекі́й мо́рю, ᲂу҆молкнѝ, преста́ни, и҆ повелѣ́нїемъ а҆́бїе преста̀.

Запрѣща́етъ ти Гд҃ь дїа́воле, Прчⷭ҇тымъ плюнове́нїемъ бре́нїе сътвори́вый, и҆ лише́нный ᲂу҆́дъ ѿ рожде́нїѧ, слѣпо́мꙋ съꙁда́вый, и҆ свѣ́тъ дарова́вый.

Запрѣща́етъ ти Гд҃ь дїа́воле, дще́ръ А҆рхісинагꙍ́говꙋ сло́вомъ ѡ҆животвори́вый, и҆ вдови́ча ᲃн҃а и҆ꙁъ ᲂу҆́стъ см҃рти восхити́вый, и҆ свое́й є҆гѡ̀ мт҃ри цѣ́ла и҆ здра́ва дарова́вый.

Запрѣща́етъ ти Гд҃ь дїа́воле, Ла́ꙁара и҆ꙁъ мр҃твыхъ четверодне́вна нерастлѣ́нна ꙗ҆́кѡ не ᲂу҆мерша, и҆ беꙁвре́дна въ ᲂу҆дивле́нїе мнѡ́гимъ предста́вивый.

Запрѣща́етъ ти Гд҃ь дїа́воле, заꙋше́нїемъ клѧ́твꙋ и҆спраꙁдни́вый, и҆ Ко́пїемъ прчⷭ҇тыхъ Ре́бръ свои́хъ, Ра́йское хранѧ́щее пла́менное ѡ҆рꙋ́жїе ѿста́вивый.

Запрѣща́етъ ти Гд҃ь дїа́воле, заплева́нїемъ чⷭ҇тнагѡ ᲃвое́гѡ Лица̀ всѧ́кꙋю ᲃлеꙁꙋ̀ ѿ всѧ́кагѡ лица̀ ѡ҆те́рый.

Запрѣща́етъ ти Гд҃ь дїа́воле, въдрꙋꙁи́вый Крⷭ҇тъ въ ᲂу҆твержде́нїе Цр҃кви и҆ ᲃпⷭ҇нїе мі́ра, въ паде́нїе же твоѐ, и҆ всѣ́хъ подъ тобо́ю сꙋ́щихъ а҆́нгелѡвъ.

Запрѣща́етъ ти Гд҃ь дїа́воле, да́вый гла́съ на Крⷭ҇тѣ̀ свое́мъ, и҆ завѣ́са Цр҃ко́внаѧ раꙁдра́сѧ, и҆ ка́менїѧ распадо́шасѧ, и҆ гро́бы ѿверꙁо́шасѧ, и҆ ѿ вѣ́ка сꙋ́щїѧ мертвцѝ воста́ша.

Запрѣща́етъ ти Гд҃ь дїа́воле, см҃ртїю сме́рть ᲂу҆мр҃тви́вый, и҆ живо́т воста́нїемъ свои́мъ чл҃кѡмъ дарова́вый.

Запрѣща́етъ ти Гд҃ь дїа́воле, съше́дый въ а҆́дъ, и҆ темни́цѧ є҆гѡ̀ съкрꙋши́вый, и҆ всѣ́хъ въ не́мъ съдержи́мыхъ свѧ́ꙁаныхъ свободи́вый, и҆ къ себѣ̀ воꙁва́вый: є҆гѡ́ же вра́тници ви́дѣвше ᲂу҆жасѡ́шасѧ, и҆ подви́жници а҆́довы крі́ющесѧ и҆щеꙁѡ́ша.

Запрѣща́етъ ти Гд҃ь дїа́воле, и҆ꙁъ мр҃твыхъ Въскр҃сы́й Хᲃ҃ Бг҃ъ на́шъ, и҆ всѣ́мъ Воскрⷭ҇нїе своѐ дарова́вый.

Запрѣща́етъ ти Гд҃ь дїа́воле, на́ нб҃о съ сла́вою воꙁнесы́йсѧ къ Ѿц҃ꙋ̀ свое́мꙋ, и҆ ѡ҆де́снꙋю вели́чествїѧ на Прⷭ҇то́лѣ ᲃла́вы сѣды́й.

Запрѣща́етъ ти Гд҃ь дїа́воле, па́ки грѧдый съ ᲃла́вою на ѡ҆́блацѣхъ нбⷭ҇ныхъ, съ ᲃт҃ы́ми А҆́гг҃лы ᲃвои́ми, ᲃꙋди́ти живы́мъ и҆ ме́ртвымъ.

Запрѣща́етъ ти Гд҃ь дїа́воле, ѻ҆́гнь неꙋгаса́емый, и҆ че́рвъ неꙋсыпа́ющїй, и҆ тмꙋ̀ кромѣ́шнюю ᲂу҆готова́вый тебѣ̀ въ вѣ́чнꙋю мꙋ́кꙋ.

Запрѣща́етъ ти Гд҃ь дїа́воле, є҆го́ же всѧ̀ боѧ́тсѧ и҆ трепе́щꙋтъ ѿ лица̀ ᲃи́лы є҆гѡ̀, ꙗ҆́кѡ непостоѧ́ненъ є҆́стъ гнѣ́въ є҆́же на тебѐ преще́нїѧ є҆гѡ̀: то́й запреща́етъ тебѣ̀ Гд҃ь дїа́воле, стра́шнымъ свои́мъ и҆́менемъ, ᲂу҆страши́сѧ, вострепещѝ, ᲂу҆бо́йсѧ, ᲂу҆страни́сѧ, съкрꙋши́сѧ, бѣжѝ, ниꙁпады́й съ нб҃сѐ, и҆ съ тобо́ю всѧ̀ лꙋка́выѧ дꙋ́хи: всѧ́кїй дꙋ́хъ лꙋка́вый, дꙋ́хъ нечистоты̀, дꙋ́хъ лꙋка́вства, дꙋ́хъ но́щный, и҆ дне́вный, полꙋ́денный же и҆ вече́рнїй, дꙋ́хъ полꙋ́нощный, дꙋ́хъ привидѣ́нный, дꙋ́хъ срѣща́телный, и҆лѝ во́дный, и҆лѝ дꙋбра́вный, и҆лѝ въ дꙋбра́вахъ, и҆лѝ въ тро́сти, и҆лѝ въ стремни́нахъ, и҆лѝ во двопꙋ́тїѧхъ и҆ трепꙋ́тїѧхъ, въ є҆́ꙁерахъ и҆лѝ рѣкахъ, въ до́мѣхъ, въ дво́рѣхъ, и҆ въ ба́нѧхъ преходѧ́й и҆ вражда́ѧй, и҆ ѿемлѧ́й ᲂу҆́мъ члчⷭ҇кїй, въско́рѣ ѿиди́те ѿ ᲃоꙁда́нїѧ ᲃоꙁда́телѧ Ха҃ Бг҃а на́шегѡ, и҆ ѿлꙋчи́тесѧ ѿ раба̀ Бж҃іѧ, И҆мⷬ҇къ: ѿ ᲂу҆ма̀, ѿ дш҃и, ѿ се́рдца, ѿ жи́лъ, ѿ чꙋ́вствїй, и҆ ѿ всѣ́хъ ᲂу҆́дѡвъ є҆гѡ̀, въе́же бы́ти є҆мꙋ̀ здра́вꙋ и҆ всецѣ́лꙋ, и҆ свобо́днꙋ, въе́же слꙋжи́ти въ преподо́бїи и҆ пра́вдѣ бе́ꙁъ всѧ́кагѡ проткнове́нїѧ въ всѧ̀ днѝ живота̀ свое́гѡ, Бг҃ꙋ живо́мꙋ и҆ и҆́стинномꙋ.

Томꙋ́ бо подоба́єтъ всѧ́каѧ сла́ва, чⷭ҇ть, и҆ поклоне́нїе, и҆ велелѣ́пїе, съ беꙁнача́лнымъ є҆гѡ̀ Ѿц҃емъ, и҆ прⷭ҇ты́мъ и҆ бл҃ги́мъ и҆ животворѧ́щимъ є҆гѡ̀ Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

Посе́мъ гл҃етъ:

Премꙋ́дростъ про́сти ᲂу҆слы́шимъ ᲃⷮ: Е҆ѵⷢ҇лїе, ѿ Ма́рка ᲃт҃гѡ Е҆ѵⷢ҇лїѧ чте́нїе.

И҆ а҆́бїе чте́тъ Е҆ѵⷢ҇лїе ᲃі́е Глава̀, а҃. Зача́ло, д҃.

Въ вре́мѧ ѻ҆́но, Чл҃къ нѣ́кїй бѣ въ ᲃо́нмищи І҆ꙋде́йскомъ, въ дꙋ́сѣ нечи́стѣ, и҆ воꙁꙁва̀, гл҃ѧ̀: ѡ҆ста́ви, что̀ на́мъ и҆ тебѣ̀, І҆и҃се Наꙁарѧни́не? прише́лъ є҆сѝ погꙋби́ти на́съ? вѣ́мъ тѧ, кто̀ є҆сѝ, ᲃт҃ы́й Бж҃ій. И҆ запретѝ є҆мꙋ̀ І҆и҃с, гл҃ѧ̀: ᲂу҆молкнѝ, и҆ и҆ꙁы́йди и҆ꙁъ не́гѡ. И҆ сотрѧ́съ є҆гѡ̀ дꙋ́хъ нечи́стый, и҆ воꙁопи́въ гла́сомъ ве́лїимъ, и҆ и҆ꙁы́йде и҆ꙁъ не́гѡ. И҆ ᲂу҆жасѡ́шасѧ всѝ, ꙗ҆́кѡ стѧꙁа́тисѧ и҆̀мъ въ себѣ̀, гл҃ю́щимъ: что̀ є҆́сть се? что̀ ᲂу҆че́нїе но́вое ᲃі́е? ꙗ҆́кѡ по вла́сти и҆ дꙋ́ховѡ́мъ нечи́стымъ повелѣва́етъ, и҆ послꙋ́шаютъ є҆гѡ̀.

Кли́ръ:

Сла́ва тебѣ Гд҃и.

Заклина́тель же ᲃа́мъ лобꙁа́етъ ᲃто́е Е҆ѵⷢ҇лїе, дае́тъ є҆ѧ̀ и҆ бѣ́сномꙋ лобꙁа́ти, и҆ а҆́бїе воꙁло́жъ десни́цꙋ на главѣ̀ є҆гѡ̀, гл҃етъ:

Словесы҃ Бжⷭ҇тве́ннагѡ Е҆ѵⷢ҇лїѧ да ᲂу҆га́снетъ и҆ и҆ще́ꙁнетъ въ тебѣ̀ И҆мⷬ҇къ: всѧ̀ си́ла лꙋка́вагѡ дїа́вола, и҆ да влѣє́тсѧ си́ла Бжⷭ҇тве́ннагѡ Дх҃а, А҆ми́нь.

По се́мъ:

Се Крⷭ҇тъ Гдⷭ҇нь, бѣжи́те проти́вныѧ ᲃи́лы: побѣди́лъ бо є҆́стъ Ле́въ ѿ колѣ́на І҆ꙋ́дова Ко́рен̾ Дави́довъ, Гд҃ь и҆ Бг҃ъ на́шъ І҆и҃с Хᲃ҃, попра́вый и҆ сте́рый ва́шꙋ не́мощнꙋю ᲃи́лꙋ.

Блⷭ҇ве́нъ бꙋ́ди дн҃ь и҆ ча́съ, во́ньже Гд҃ь и҆ Бг҃ъ на́шъ І҆и҃с Хᲃ҃ роди́сѧ ѿ Дв҃ы Мр҃іѧ, на сътре́нїе и҆ раꙁдрꙋше́нїе дїа́волскагѡ мꙋчи́телства, и҆ въ спⷭ҇нїе вѣ́рных.

И҆ Троп:

Гд҃и ѡ҆рꙋ́жїе на дїа́вола Кртⷭ҇ъ тво́й да́лъ:

А҆́бїе же ре́къ:

Гд҃ꙋ помоли́мсѧ.

И҆ Кли́ръ:

Гд҃и поми́лꙋй.

Чте́тъ Мл҃твꙋ ᲃі́ю ᲃт҃гѡ І҆ꙍа́нна Златоꙋ́стагѡ.

Всѣ́мъ нечи́стымъ дꙋ́ховѡмъ запрѣти́вый, и҆ ᲃи́лою глагола̀ и҆ꙁгна́вый легеꙍ́на, ꙗ҆ви́сѧ и҆ ны́нѣ є҆диноро́днымъ ти ᲃн҃омъ на соꙁда́нїе є҆́же по ѻ҆́браꙁꙋ свое́мꙋ ᲃотвори́лъ є҆сѝ, и҆ и҆ꙁмѝ є҆̀ насил̾ствова́нное ѿ сопроти́внагѡ: ꙗ҆́кѡ да поми́лованъ и҆ ѻ҆чище́нъ бывъ, чⷭ҇тое пребыва́нїе твое́гѡ Прⷭ҇та́гѡ Дх҃а бꙋ́детъ, и҆ бе́ꙁъ всѧ́кагѡ препѧ́тїѧ съ на́ми свобо́днѡ просла́витъ тѧ беꙁнача́лнагѡ Ѿц҃а, съ є҆диноро́днымъ ти ᲃн҃омъ съ прⷭ҇ты́мъ, и҆ бл҃гимъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

По се́мъ, чте́тъ Ѿч҃е на́шъ: Бц҃е Дв҃о: и҆ Воꙁбра́нной Воево́дѣ:

И҆ а҆́бїе гл҃етъ:

Премꙋ́дрость про́сти ᲂу҆слы́шимъ ᲃⷮ: Е҆ѵⷢ҇лїе, ѿ Ма́рка ᲃт҃а́гѡ Е҆ѵⷢ҇лїѧ чте́нїе.

И҆ чте́тъ, Е҆ѵⷢ҇лїе ᲃі́е Глав: з҃. Зачал: л҃.

Въ вре́мѧ ѻ҆́но, Прі́йде І҆и҃с въ предѣ́лы тѵ́рскїѧ и҆ Сѵдꙍ́нскїѧ, и҆ вше́дъ въ до́мъ, хотѧ́ше дабы̀ никто́же, ѡ҆ не́мъ вѣ́далъ: и҆ не мо́же ᲂу҆таи́тисѧ. Слы́шавши бо жена̀ ѡ҆ не́мъ, є҆ѧ́же дщѝ и҆мѧ́ше дꙋ́ха нечи́стагѡ, прише́дши припадѐ къ нога́ма є҆гѡ̀, жена́ же бѣ Е҆́ллинска, Сѵрофінікі́сса ро́домъ: и҆ молѧ́ше є҆го̀, ꙗ҆́кѡ да бѣ́са и҆ждене́тъ и҆ꙁъ дще́ре є҆ѧ̀. І҆и҃с же речѐ є҆́й: ѡ҆ста́ви, да пе́рвѣе насы́тѧтсѧ ча́да: Нѣ́ст̾ бо добро̀ ѿѧ́ти хлѣ́бъ ча́дѡмъ и҆ поврещѝ псѡ́мъ. Ѻ҆на́ же ѿвѣща́, и҆ гл҃а̀ є҆мꙋ̀: є҆́й Гд҃и, и҆́бѡ̀ и҆ псѝ под̾ трапе́ꙁою ꙗ҆дѧ́тъ ѿ крꙋпи́цъ дѣті́й. И҆ речѐ є҆́й: за сі́е сло́во, и҆дѝ: и҆ꙁы́де бѣ́съ и҆ꙁъ дще́ре твое́ѧ. И҆ ше́дши въ до́мъ сво́й, ѡ҆брѣтѐ бѣ́са и҆ꙁше́дша и҆ дще́рь лежа́щꙋ на ѻ҆́дрѣ.

Кли́ръ:

Сла́ва тебѣ̀ Гд҃и.

Заклина́тель же ᲃа́мъ лобꙁа́въ ᲃт҃о́е Е҆ѵⷢ҇лїе, дае́тъ є҆̀ и҆ бѣ́сномꙋ лобꙁа́ти, и҆ а҆́бїе воꙁло́жъ десни́цꙋ на главѣ̀ є҆гѡ̀, глаго́летъ:

Словесы̀ Бжⷭ҇тве́ннагѡ Е҆ѵⷢ҇лїѧ да ᲂу҆га́снетъ и҆ и҆счеꙁнетъ въ тебѣ̀ И҆мⷬ҇къ: всѧ̀ си́ла лꙋка́вагѡ дїа́вола, и҆ да влѣ́етсѧ ᲃи́ла Бжⷭ҇тве́ннагѡ Дх҃а, Ами́нь.

По се́мъ:

Се Крⷭ҇тъ Гдⷭ҇нь, бѣжи́те проти́вныѧ си́лы: побѣдилъ є҆́стъ Ле́въ ѿ колѣ́на І҆ꙋ́дова Ко́рен̾ Дави́дѡвъ, Гд҃ь и҆ Бг҃ъ на́шъ І҆и҃с Хᲃ҃, попра́вый и҆ сте́рый ва́шꙋ не́мощнꙋю си́лꙋ.

Блⷭ҇ве́нъ бꙋ́ди дн҃ь и҆ ча́съ, во́н̾же Гд҃ь и҆ Бг҃ъ на́шъ І҆и҃с Хᲃ҃ роди́сѧ ѿ Дв҃ы Мр҃іѧ, на сотре́нїе и҆ раздрꙋше́нїе дїа́волскагѡ мꙋчи́тел̾ства, и҆ въ спⷭ҇нїе вѣ́рныхъ.

и҆ Троп:

Гд҃и ѻ҆рꙋ́жїе на дїа́вола:

И҆ а҆́бїе ве́лїимъ дерꙁнове́нїемъ гл҃етъ запрѣще́нїѧ ᲃі́ѧ ᲃт҃гѡ Григо́рїѧ Чꙋдотво́рца.

Бг҃ъ ᲃт҃ы́й, ᲃтрашный, и҆ ᲃла́вный, въ всѣ́хъ дѣ́лехъ и҆ крѣ́пости свое́й непостижи́мый и҆ неиꙁслѣди́мый сы́й: то́й предꙋста́вивый тебѣ̀ дїа́воле вѣ́чныѧ мꙋ́ки томле́нїе, на́ми непотре́бными рабы̀ свои́ми повелѣва́етъ тебѣ̀, и҆ все́й съпоспѣ́шной твое́й си́лѣ, ѿстꙋпи́ти ѿ сегѡ̀ ᲃоꙁда́нїѧ рꙋ́кꙋ є҆гѡ̀.

Заклина́ю ᲂу҆́бѡ тѧ вселꙋка́вый, и҆ нечи́стый, и҆ скве́рный, и҆ ме́рꙁскїй, и҆ чꙋ́ждый дꙋ́ше, ᲃи́лою І҆и҃с Хв҃ою, всѧ́кꙋю вла́сть и҆мꙋ́щагѡ на нб҃сѝ и҆ на землѝ: ре́кшагѡ глꙋхо́мꙋ и҆ беꙁгла́сномꙋ бѣ́сꙋ, и҆ꙁыйдѝ ѿ чл҃ка, и҆ ктомꙋ̀ да не вни́деши во́нь: ѿидѝ, поꙁна́й свою̀ сꙋ́етнꙋю си́лꙋ, ни на сви́нїѧхъ вла́сть и҆мꙋ́щꙋю, помѧнѝ повелѣ́вшагѡ ти по твое́мꙋ проше́нїю въ ста́до сви́нное внитѝ.

Ꙋ҆бойсѧ Бг҃а, є҆го́ же повелѣ́нїемъ землѧ̀ на вода́хъ ᲂу҆твержде́нна бы́сть: ᲃоꙁда́вшагѡ нб҃о, и҆ поста́вившагѡ гѡ́ры пра́вилѡмъ, и҆ ᲂу҆дѡ́лїѧ мѣри́лѡмъ: и҆ поло́жшагѡ пѣсо́къ мо́рю предѣ́лъ, и҆ въ водѣ̀ зѣ́лной сте́ꙁю тве́рдꙋю: прикаса́ющагосѧ гора́мъ, и҆ воꙁдымѧ́тсѧ: ѿдѣва́ющагосѧ свѣ́томъ ꙗ҆́кѡ ри́ꙁою: пропина́ющагѡ нб҃о ꙗ҆́кѡ ко́жꙋ: покрыва́ющагѡ вода́ми превы́спрнѧѧ своѧ̀: ѡ҆снова́вшагѡ зе́млю на тве́рди є҆ѧ̀, и҆ не прекло́нитсѧ въ вѣ́къ вѣ́ка: приꙁыва́ющагѡ во́дꙋ мо́рскꙋю, и҆ пролива́ющагѡ ю҆̀ на лицѐ всеѧ̀ землѧ̀: и҆ꙁыйдѝ и҆ ᲂу҆страни́сѧ ѿ соꙁда́нїѧ є҆гѡ̀.

Заклина́ю тѧ ᲃп҃си́тел̾ною ᲃтрⷭ҇тїю Гд҃а на́шегѡ І҆и҃с Ха҃, и҆ чⷭ҇тнымъ є҆гѡ̀ тѣ́ломъ и҆ кро́вїю, и҆ прише́ствїемъ є҆гѡ̀ стра́шнымъ: прі́йдетъ бо и҆ не ᲂу҆медли́тъ, ᲃꙋдѧ́й все́й землѝ: и҆ тебѐ, и҆ содѣйстве́ннꙋю твою̀ си́лꙋ ᲂу҆мꙋ́читъ въ гее́нѣ ѻ҆́гненной, преда́въ тмꙋ̀ кромѣ́шнюю, и҆ де́же че́рвъ неꙋсыпа́етъ, и҆ ѻ҆́гнь неꙋгаса́етъ:

Ꙗ҆́кѡ держа́ва Ха҃ Бг҃а нш҃егѡ, съ Ѿц҃емъ и҆ ст҃ы́мъ Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

По се́мъ гл҃етъ ѱало́мъ, г҃. Гд҃и, что́сѧ ᲂу҆множи́ша стꙋжа́ющїи: Ве́сь до конца̀.

И҆ а҆́бїе гл҃етъ:

Премꙋ́дрость про́сти ᲂу҆слы́шимъ ᲃт҃о́е Е҆ѵⷢ҇лїе, ѿ Лꙋкѝ ᲃт҃а́гѡ Е҆ѵⷢ҇лїѧ чте́нїе.

И҆ чте́тъ Е҆ѵⷢ҇лїе ᲃі́е, Глава̀, и҃, Зача́ло, л҃и.

Въ вре́мѧ ѡ҆́но: Прише́дшꙋ І҆и҃сꙋ въ стра́нꙋ Гадари́нскꙋю, ꙗ҆́же є҆́сть ѡ҆бонъ по́лъ Галиле́ѧ.

И҆ꙁше́дшꙋ же є҆мꙋ̀ на́ зе́млю, стрѣтѐ є҆гѡ̀ мꙋ́жъ нѣ́кїй ѿ гра́да, и҆́же и҆мѧ́ше бѣ́сы ѿ вре́менъ мнѡ́гихъ, и҆ въ ри́ꙁꙋ не ѡ҆блача́шесѧ, и҆ въ храминѣ̀ не живѧ́ше, но въ гро́бѣхъ.

Ꙋ҆́ꙁрѣ́въ же І҆и҃са и҆ воꙁопи́въ, припадѐ къ не́мꙋ, и҆ гла́сомъ ве́лїимъ речѐ: что̀ мнѣ̀ и҆ тебѣ̀, І҆и҃се Сн҃е Бг҃а вы́шнѧгѡ? мл҃ю́тѧ не мꙋ́чи менѐ. Повелѣва́ше бо дꙋ́хови нечи́стомꙋ и҆ꙁы́йти ѿ чл҃ка: Ѿ мнѡ́гихъ бо вре́менъ восхища́ше є҆гѡ̀ и҆ вѧꙁа́хꙋ є҆гѡ̀ вери́гами и҆ пꙋ́ты, стрего́мъ є҆гѡ̀ и҆ растерꙁа́ѧ ᲂу҆́ꙁы, гони́мъ быва́ше ѿ бѣ́са въ пꙋсты́нѧ.

Въпроша́ше же є҆гѡ̀ І҆и҃с гл҃ѧ̀: что́ тѝ є҆́сть и҆́мѧ̀?

Ѻ҆́нъ же речѐ: легеѡ́нъ: ꙗ҆́кѡ бѣ́сы мнѡ́ꙁи внидѡ́ша во́нь.

И҆ молѧ́хꙋ є҆гѡ̀, да не повели́тъ и҆́мъ въ бе́ꙁднꙋ ѿитѝ.

Бѣ́ же та́мѡ ᲃта́до сви́нїй мнѡ́го пасо́мое въ горѣ̀, и҆ мл҃ѧ́хꙋ є҆гѡ̀, да повели́тъ и҆́мъ въ ты̀ внитѝ: и҆ повелѣ̀ и҆́мъ.

И҆ꙁше́дше же бѣ́сы ѿ чл҃ка, внидѡ́ша въ сви́нїѧ, и҆ ᲂу҆стреми́сѧ ᲃта́до по бре́гꙋ въ є҆́ꙁерѡ, и҆ и҆стопѐ.

Ви́дѣвше же пасꙋ́щїи бы́вшее, бѣжа́ша, и҆ ше́дше воꙁвѣсти́ша въ гра́дѣ, и҆ въ се́лѣхъ.

И҆ꙁыйдо́ша же ви́дѣти бы́вшее, и҆ прише́дше къ І҆и҃сови и҆ ѡ҆брѣтѡ́ша сѣдѧ́ща чл҃ка, и҆ꙁъ него́же бѣ́сы и҆ꙁыйдѡ́ша, ѡ҆болче́нна и҆ смыслѧ́ща, при но́гꙋ І҆и҃совꙋ: и҆ ᲂу҆боѧ́шасѧ.

Воꙁвѣсти́ша же и҆́мъ ви́дѣвшїи, ка́кѡ ᲃп҃се́сѧ бѣснова́выйсѧ.

И҆ молѝ є҆гѡ̀ всѐ мно́жествѡ стра́ны Гадари́нскїѧ ѿитѝ ѿ ни́хъ, ꙗ҆́кѡ стра́хѡмъ ве́лїимъ ѡ҆держи́ми бѧ́хꙋ. Ѻ҆́нъ же вше́дъ въ кора́бль, воꙁврати́сѧ.

Молѧ́шежесѧ є҆мꙋ̀ мꙋ́жъ, и҆ꙁъ не́го же и҆ꙁыйдѡ́ша бѣ́си, дабы̀ съ ни́мъ бы́лъ. Ѿпꙋсти́ же є҆гѡ̀ І҆и҃с, гл҃ѧ̀: воꙁврати́сѧ въ до́мъ сво́й и҆ повѣда́й, є҆ли́ка сотворѝ тебѣ̀ Бг҃ъ.

И҆ и҆́дѐ, по всемꙋ̀ гра́дꙋ проповѣ́даѧ, є҆ли́ка сътворѝ є҆мꙋ̀ І҆и҃с.

Кли́ръ:

Сла́ва тебѣ̀ Гд҃и.

Заклина́тель же са́мъ лобꙁа́въ ᲃт҃ое Е҆ѵⷢ҇лїе, дае́тъ є҆̀ и҆ бѣ́сномꙋ лобꙁа́ти: и҆ а҆́бїе воꙁло́жъ десни́цꙋ на главѣ̀ є҆гѡ̀, гл҃етъ:

Словесы̀ Бжⷭ҇тве́ннагѡ Е҆ѵⷢ҇лїѧ да ᲂу҆гаснетъ и҆ и҆сче́ꙁнетъ въ тебѣ̀ И҆мⷬ҇къ: всѧ̀ си́ла лꙋка́вагѡ дїа́вола, и ҆да влѣ́етсѧ ᲃи́ла Бжⷭ҇тве́ннагѡ Дх҃а, Ами́нь.

По се́мъ гл҃етъ:

Се Крⷭ҇тъ Гдⷭ҇нь, бѣжи́те проти́вныѧ ᲃи́лы, победи́лъ бо є҆́стъ Ле́въ ѿ Колѣ́на І҆ꙋ́дова, Ко́рен̾ Дави́дѡвъ, Гд҃ь и҆ Бг҃ъ на́шъ І҆и҃с Хᲃ҃, попра́вый и҆ сте́рый ва́шꙋ не́мощнꙋю ᲃи́лꙋ.

Блⷭ҇ве́нъ бꙋ́ди дн҃ь и҆ ча́съ, во́н̾же Гд҃ь и҆ Бг҃ъ на́шъ І҆и҃с Хᲃ҃ роди́сѧ ѿ Дв҃ы Мр҃іа, на сотре́нїе и҆ раꙁдрꙋше́нїе дїа́вол̾скагѡ мꙋчи́телства, и҆ въ ᲃпⷭ҇нїе вѣ́рныхъ.

И҆ Тропа́ръ:

Гд҃и ѻ҆рꙋ́жїе на дїа́вола Крⷭ҇тъ тво́й да́лъ є҆сѝ:

И҆ а҆́бїе чте́тъ Мл҃твꙋ сі́ю запрѣща́лнꙋю ᲃт҃а́гѡ ᲃщ҃енномч҃ника Кѵпрїа́на.

Приꙁыва́емъ тѧ Влады́ко Бж҃е Вседержи́телю, вы́шнїй, неискꙋси́мый, ми́рный Цр҃ю: приꙁыва́емъ тѧ ᲃътво́ршагѡ нб҃о и҆ зе́млю, ѿ тебе́ бо проиꙁы́йде А҆́лфа и҆ Ꙍ҆ме́га, ᲃі́естъ: Нача́ток и҆ Коне́цъ.

Преда́вый чл҃кѡмъ въ послꙋша́нїе четвероно́жныѧ и҆ беꙁслове́сныѧ живо́тныѧ, ты́ бо покори́лъ є҆сѝ сі́ѧ Гд҃и, прострѝ рꙋ́кꙋ твою̀ крѣ́пкꙋю, и҆ мы́шцꙋ твою̀ высо́кꙋю и҆ ᲃт҃ꙋ́ю, и҆ присѣще́нїемъ твои́мъ ᲃт҃ы́мъ посѣтѝ съꙁда́нїе твоѐ сі́е, и҆ ниꙁпослѝ є҆мꙋ̀ А҆́гг҃ла ми́ра, А҆́гг҃ла держа́вна, дш҃ѝ и҆ тѣ́ла храни́телѧ, ꙗ҆́кѡ да запрѣти́тъ и҆ ѿжене́тъ ѿ не́гѡ всѧ́кагѡ лꙋка́вагѡ и҆ нечи́стагѡ де́мона: Ты́ бо є҆сѝ Гд҃ь є҆ди́нъ высо́кїй Вседержи́тель, блⷭ҇ве́нный въ вѣ́ки вѣкѡ́въ, А҆ми́нь.

Заклина́ю тѧ дꙋ́ше вражде́бный вседержи́телемъ Бг҃омъ.

Заклина́ю тѧ Дх҃омъ, въдхнꙋ́вшимъ чл҃кѡмъ живо́тъ вѣ́чный, є҆го́же И҆мѧ̀ ᲃтра́шнѡ, и҆ ᲂу҆сты̀ члове́ческими неиꙁгл҃а́ннѡ.

Заклина́ю тѧ грѧдꙋ́щимъ ѻ҆гне́мъ, и҆ жꙋ́пеломъ и҆ Пе́кломъ и҆ трꙋбо́ю, є҆мꙋ́ же ꙗ҆́вл̾шꙋсѧ ᲃл҃нце побѣжи́тъ на за́падъ, и҆ звѣ́ꙁды спа́дꙋтъ на землю, и҆ воспла́чꙋтсѧ всѧ̀ пле́мена и҆ лю́дїе.

Заклина́ю тѧ съше́дшимъ въ до́лнѧѧ стра́ны землѧ̀, и҆ расто́ргшимъ тве́рдыѧ ве́рїѧ, и҆ раꙁдрꙋши́вшимъ бо́лѣꙁни сме́ртныѧ, и҆ бл҃говѣсти́вшимъ Патрїа́рхѡмъ и҆ꙁъ мр҃твыхъ воскресе́нїе.

Заклина́ю тѧ ходи́вшимъ по мо́рю, и҆ ᲂу҆кроти́вшимъ вѡ́лны є҆гѡ̀.

Заклина́ю тѧ повелѣ́ти хотѧ́щимъ мо́рю и҆ꙁда́ти всѧ̀ въ не́мъ и҆стопи́вшїѧсѧ, и҆ землѝ въ не́й лежа́щихъ ме́ртвыхъ предста́вити живы́хъ на сꙋ́дъ Бг҃ꙋ.

Заклина́ю тѧ повелѣ́вшим мо́рю не престꙋпа́ти предѣ́ла свое́гѡ, до́ндеже прі́йдетъ Гд҃ь сꙋди́ти ми́рꙋ.

Заклина́ю тѧ соше́дшимъ на Сіна́йскꙋю горꙋ̀, и҆ гл҃а́вшимъ съ Мѡѵ꙼се́ѡмъ и҆ А҆а́рѡномъ, и҆ ꙗ҆вл̾шимсѧ и҆́ма въ пла́мени ѻ҆́гненномъ, и҆ въ ᲃтолпѣ̀ ѻ҆́блачномъ.

Заклина́ю тѧ и҆ꙁве́дшимъ лю́ди своѧ̀ ѿ землѧ̀ Е҆гѵ́петскїѧ, и҆ да́вшимъ и҆́мъ и҆ꙁъ ка́мене сла́дкꙋю во́дꙋ пи́ти, и҆ претвори́вшимъ во́дꙋ въ кро́въ.

Заклина́ю тѧ каꙁни́вшимъ Е҆гѵ́пта Мѡѵ꙼се́ѡмъ десѧ́тїю ꙗ҆́ꙁвъ.

Заклина́ю тѧ пораꙁи́вшимъ перве́нца Е҆гѵ́петскїѧ.

Заклина́ю тѧ попали́вшимъ Содѡ́мꙋ и҆ Гомѡ́ррꙋ, и҆ пѧ́ть гра́дѡвъ и҆́ныхъ ѡ҆дожде́нїемъ съ нб҃сѐ ѻ҆́гненнагѡ гра́да.

Заклина́ю тѧ сѣдѧ́щимъ на Прⷭ҇то́лѣ ᲃла́вы, пре́дъ ни́мъ же ѻ҆́гнь тече́тъ, и҆ є҆мꙋ́ же предстоѧ́тъ тма́ми те́мъ А҆гг҃лъ, и҆ ти́сѧщами ти́сѧща А҆рха́гг҃лъ, и҆ Серафі́ми вопїю́щїи, ᲃт҃ъ, ᲃт҃ъ, ᲃт҃ъ Гд҃ь Саваꙍ́ѳъ, и҆спо́лнь нб҃о и҆ земла̀ ᲃла́вы твое́ѧ, блⷭ҇ве́нъ є҆сѝ въ вѣ́ки, А҆ми́нь.

И҆ ты̀ дꙋ́ше лꙋка́вый, а҆́ще и҆ не хотѧ̀ воꙁда́ждъ ᲃла́вꙋ И҆менѝ ᲃт҃о́мꙋ є҆гѡ̀, и҆де́жъ а҆́ще сѣди́ши въ ᲂу҆десѝ тѣ́ла соꙁда́нїѧ сегѡ̀, и҆лѝ въ гла́вѣ, и҆лѝ въ тѣ́мени, и҆лѝ въ бро́вѣ, и҆лѝ въ ѻ҆́чїю, и҆лѝ въ ᲂу҆́шїю, и҆лѝ въ ᲂу҆стѣ́хъ, и҆лѝ въ ꙗ҆ꙁы́цѣ, и҆лѝ въ вы́и, и҆лѝ въ пле́щꙋ, и҆лѝ междꙋ плещи́ма, и҆лѝ въ мы́шца, и҆лѝ въ пе́рсехъ, и҆лѝ въ дш҃ѝ, и҆лѝ въ ᲃе́рдци, и҆лѝ въ ᲃелеꙁе́нѣ, и҆лѝ въ плю́цах, и҆лѝ в чре́вѣ, и҆лѝ под чре́вомъ, и҆лѝ въ точи́ле, и҆лѝ въ є҆стестве́нныхъ предѣ́лехъ, и҆лѝ въ крѣ́пости, и҆лѝ въ жи́лахъ, и҆лѝ въ колѣ́нахъ, и҆лѝ въ лы́стахъ, и҆лѝ въ го́ленѣ, и҆лѝ въ рꙋ́кꙋ, и҆лѝ въ ногꙋ, и҆лѝ въ жи́лицахъ, и҆лѝ въ крова́вици, и҆лѝ въ кѡ́стехъ, и҆лѝ въ мо́ꙁгꙋ, и҆лѝ въ крвѝ, и҆лѝ въ вла́сѣхъ, и҆лѝ въ но́гтехъ, и҆лѝ въ все́м тѣ́лѣ, ѿлꙋчи́сѧ ᲂу҆страни́сѧ и҆ ѝꙁыйдѝ дꙋ́ше лꙋка́вый, и҆ да́ждъ сла́вꙋ Бв҃и, ꙗ҆́кѡ Гд҃ь ᲃи́лный надъ всѣ́ми є҆́стъ: и҆бѡ̀ клѧ́стесѧ и҆де́же а҆́ще кто̀ приꙁове́тъ И҆мѧ̀ Гдⷭ҇не, є҆́же и҆ще́ꙁнꙋти ва́мъ.

Заклина́ю тѧ И҆мене́мъ Гд҃а І҆и҃с Хрⷭ҇та̀, распе́ншагосѧ при Понтїйстѣмъ Піла́тѣ.

Заклина́ю тѧ ре́кшимъ: Нб҃о мнѣ̀ Прⷭ҇то́лъ є҆́стъ, землѧ́ же подно́жїе нога́ма мои́ма.

Заклина́ю тѧ А҆рха́гг҃лами є҆гѡ̀, Міхаи́ломъ и҆ Гаврїи́ломъ, Оу҆рїи́ломъ и҆ Рафаи́ломъ.

Заклина́ю тѧ Вели́кимъ И҆́менемъ Сн҃а Бж҃іѧ, ѿлꙋчи́тисѧ ѿ ᲃоꙁда́нїѧ ᲃегѡ̀, и҆ ни́же съ ни́мъ ꙗ҆́сти, ни́же сло́жнꙋ бы́ти съ ни́мъ, но да́ти ᲃла́вꙋ, и҆ слꙋ́жбꙋ И҆менѝ ᲃт҃о́мꙋ є҆гѡ̀.

Заклина́ю тѧ всеѡ́браꙁное на злострѣте́нїе, и҆ нападе́нїе дне́вное и҆ полꙋ́денное и҆ полꙋ́нощное, и҆де́же а҆́ще є҆сѝ, ѿлꙋчи́сѧ ѿ соꙁда́нїѧ сегѡ̀, не и҆ꙁведѝ дш҃ꙋ, ни раꙁсыплѝ, ни раꙁдрꙋшѝ тѣ́ло є҆гѡ̀, но ѡ҆ста́ви є҆гѡ̀ чи́ста и҆ жи́ва Бг҃ꙋ на слꙋжбꙋ.

Заклина́ю тѧ грѧдꙋ́щимъ ᲂу҆тверди́ти Прⷭ҇то́лъ ме́ждꙋ нб҃омъ и҆ земле́ю, и҆ сꙋди́ти всемꙋ̀ ро́дꙋ члчⷭ҇комꙋ, пра́веднымъ же и҆ грѣ́шнымъ.

Ты̀ ᲂу҆́бѡ дш҃е нечи́стый, ᲂу҆бо́йсѧ И҆менѝ ᲃт҃а́гѡ є҆гѡ̀, и҆ ѿидѝ ѿ соꙁда́нїѧ сегѡ̀:

Оу҆бо́йсѧ ѻ҆гнѧ̀ неꙋгаса́емагѡ, ᲂу҆бо́йсѧ ро́дства ѻ҆́гненнагѡ всепоѧда́ющагѡ:

Оу҆бо́йсѧ ᲂу҆готова́вшагѡ тебѣ̀ ѻ҆́гнь и҆ жꙋ́пел̾ и҆ пе́кло гꙋби́телеви:

Оу҆бо́йсѧ ꙗ҆́вльшаго сѧ Мѡѵ꙼се́ѡви и҆ А҆а́рѡнови на горѣ̀ Сіна́йстѣй:

Оу҆бо́йсѧ ꙗ҆влшагосѧ І҆ѡаннꙋ на рѣцѣ̀ І҆ꙍрда́нстѣй, є҆гѡ́ же ви́дѣвши рѣка̀ ᲂу҆боѧ́сѧ, и҆ ᲂу҆стꙋпѝ, и҆ въꙁврати́сѧ воспѧ́тъ:

И҆ ты̀ дꙋ́ше лꙋка́вый ᲂу҆бо́йсѧ, ѿстꙋпѝ и҆ ᲂу҆страни́сѧ ѿ соꙁда́нїѧ сегѡ̀.

Заклина́ю тѧ ѡ҆дѣ́ющимсѧ ᲃвѣ́томъ ꙗ҆́кѡ ри́ꙁою, є҆динѣ́мъ и҆мѣ́ющимъ беꙁсмр҃тїе: Томꙋ́ бо подоба́етъ всѧ́каѧ ᲃла́ва, чⷭ҇ть, и҆ поклоне́нїе Ѿц҃ꙋ, и҆ Сн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

По се́мъ гл҃етъ:

Премꙋ́дрость про́сти ᲂу҆слы́шимъ ᲃт҃о́е Е҆ѵⷢ҇лїе, ѿ Маѳ: ᲃт҃а́гѡ Е҆ѵⷢ҇лїѧ чте́нїе.

Кли́ръ:

Сла́ва тебе Гд҃и.

И҆ чте́тъ Е҆ѵⷢ҇лїе ᲃі́е, ѿ Матѳі́а, Глав: и҃. Зача́ло, к҃ѕ.

Въ вре́мѧ ѻ҆́но: Прише́дъ І҆и҃с въ до́мъ Петро́въ, ви́дѣ те́щꙋ є҆гѡ̀ лежа́щꙋю и҆ ѻ҆гне́вицею ѡ҆держи́мꙋю, и҆ прикоснꙋ́всѧ рꙋцѣ̀ є҆ѧ̀, и҆ ѡ҆ста́ви ю҆̀ ѻ҆гне́вица, и҆ въста̀ и҆ слꙋжа́ше и҆́мъ, по́ꙁдѣ же бы́вшꙋ, приведѡ́ша къ не́мꙋ бѣснꙋ́ющихсѧ мнѡ́гихъ, и҆ и҆ꙁгна̀ дꙋ́хи сло́вомъ и҆ всѧ̀ болѧ́щаѧ и҆сцѣлѝ, да ᲃобꙋ́детсѧ рече́нное И҆са́їемъ Прⷪ҇ро́комъ, гл҃ю́щимъ: се́й недꙋ́ги на́шѧ прїѧ́тъ и҆ бо́лѣ́ꙁни понесѐ.

Кли́ръ:

Сла́ва тебѣ̀ Гд҃и.

Заклина́тель же са́мъ лобꙁа́въ ᲃт҃ое Е҆ѵⷢ҇лїе, дае́тъ є҆а̀ и҆ бѣ́сномꙋ лобꙁа́ти: и҆ а҆́бїе воꙁло́жъ десни́цꙋ на главѣ̀ є҆гѡ̀, гл҃етъ:

Словесы̀ Бжⷭ҇тве́ннагѡ Е҆ѵⷢ҇лїѧ да ᲂу҆га́снетъ и҆ и҆сче́ꙁнетъ въ тебѣ̀ И҆мⷬ҇къ: всѧ̀ си́ла лꙋка́вагѡ дїа́вола, и҆ да влѣ́етсѧ ᲃи́ла Бжⷭ҇тве́ннагѡ Дх҃а, Ами́нь.

По се́мъ:

Се Крⷭ҇тъ Гдⷭ҇нь, бѣжи́те проти́вныѧ ᲃи́лы, победи́лъ бо є҆́стъ Ле́въ ѿ Колѣ́на І҆ꙋ́дова, Ко́рень Дави́дѡвъ, Гд҃ь и҆ Бг҃ъ на́шъ І҆и҃с Хᲃ҃, попра́вый и҆ сте́рый ва́шꙋ не́мощнꙋю ᲃи́лꙋ.

Блⷭ҇ве́нъ бꙋ́ди дн҃ь и҆ ча́съ, во́н̾же Гд҃ь и҆ Бг҃ъ на́шъ І҆и҃с Хᲃ҃ роди́сѧ ѿ Дв҃ы Мр҃іа, на сотре́нїе и҆ раꙁдрꙋше́нїе дїа́вол̾скагѡ мꙋчи́телства, и҆ въ ᲃпⷭ҇нїе вѣ́рныхъ.

И҆ Тропа́ръ:

Гд҃и ѻ҆рꙋ́жїе на дїа́вола Крⷭ҇тъ тво́й да́лъ є҆сѝ на́мъ:

И҆ а҆́бїе гл҃етъ Заклина́нїе ᲃі́е.

Заклина́ю тѧ, горды́нѣ и҆ всѧ́коѧ злобы̀ лꙋка́вства же и҆ ѿстꙋпства и҆ꙁѡбрѣта́телю и҆ нача́лниче дїа́воле, превели́кимъ, преди́внымъ, пресла́вным, стра́шнымъ и҆ неиꙁрече́ннымъ, че́сти всѧ́коѧ и҆ покло́на досто́йнымъ, великолѣ́пнымъ и҆́менемъ є҆ди́нагѡ въ Трⷪ҇ци ᲃт҃ѣ́й ᲃлави́магѡ и҆ покланѧ́емагѡ, Ѿц҃а, и҆ ᲃн҃а, и҆ ᲃт҃а́гѡ дх҃а, н҃бо и҆ зе́млю и҆ всѧ̀ ꙗ҆́же на ни́хъ ви́димаѧ и҆ неви́димаѧ, и҆ тебѐ добра и҆ ᲃт҃а ѿ небы́тїѧ ᲃтво́ршагѡ, го́рдости же ра́ди и҆ воꙁноше́нїѧ твое́гѡ и҆ꙁве́ргшагѡ тѧ и҆ всѣ́хъ съпспѣшникѡвъ твое́ѧ злобы̀ нечи́стых дꙋ́хѡвъ съ нб҃съ, и҆ ᲂу҆́ꙁами мра́ка свѧꙁа́вшимъ: ᲂу҆бо́йсѧ сегѡ̀ ѡ҆сꙋжде́нниче, и҆ ско́рѡ и҆ꙁыйдѝ ѿ ᲃоꙁда́нїѧ є҆гѡ̀.

Заклина́ю тѧ, вселꙋка́вый вра́же члчⷭ҇кагѡ ро́да, дре́внїй змій, превели́кимъ и́ стра́шнымъ и҆́менемъ Гд҃а на́шегѡ І҆и҃с Ха҃, є҆мꙋ́же всѧ́кѡ колѣ́но нбⷭ҇ныхъ, и҆ зе́мныхъ, и҆ преиспо́днихъ, съ тре́петом покланѧ́етсѧ, ᲂу҆бо́йсѧ сегѡ̀ проклѧ́тый ниꙁверже́нниче, и҆ꙁыйдѝ, ᲂу҆страни́сѧ, и҆ ѿидѝ ѿ соꙁда́нїѧ сегѡ̀.

Заклина́ю тѧ, и҆ запреща́ю ти ᲃп҃си́телнымъ Воплоще́нїемъ Гд҃а на́шегѡ І҆и҃с Ха҃, и҆ пресла́внымъ є҆гѡ̀ ѿ прⷭ҇нѡ Дв҃ы Мр҃іѧ Рождиствомъ, и҆́мже ключа̀ дѣвства̀ не вреди́въ, цѣ́ла сохранѝ: ᲂу҆бо́йсѧ сегѡ̀ и҆́стинны сопроти́вниче и҆ ѿидѝ ѿ соꙁда́нїѧ є҆гѡ̀.

Заклина́ю тебѐ всѣ́хъ злы́хъ и҆скꙋси́телѧ, пло́тїю ѡ҆смодне́внагѡ ѡ҆брѣꙁа́вшимсѧ Гдⷭ҇емъ, и҆ четыридесѧ́тагѡ днѐ Дв҃ою Мт҃рїею въ І҆ерⷭ҇ли́мъ приве́денымъ, и҆ на ѡ҆бѧ́тїѧхъ Пра́веднагѡ Сѵмеꙍ́на воꙁле́гшимъ, и҆ дванадесѧтолѣ́тне во́ꙁрастомъ сы́й воꙁше́дшимъ въ І҆ерⷭ҇ли́мъ, и҆ посре́дѣ ᲂу҆чи́телїй се́дшимъ, и҆ ра́ꙁꙋмомъ свои́мъ Бжⷭ҇тве́нным, и҆ ѿвѣ́ты преди́вными всѣ́х послꙋша́ющих ᲂу҆диви́вшимъ: ᲂу҆бо́йсѧ ᲃегѡ̀ ѿстꙋ́пниче ме́рꙁскїй и҆ ско́рѡ и҆ꙁыйдѝ.

Заклина́ю тѧ скве́рный де́моне, Гдⷭ҇емъ въ І҆ꙍрда́ни Пло́тїю Кр҃щшимсѧ, и҆ Дх҃омъ ᲃт҃ы́мъ въ ѻ҆́браꙁѣ Голꙋби́нном соше́дшимъ нанб, и҆ гла́сомъ Ѿч҃їимъ съ нб҃сѐ бы́вшимъ, Ты́ є҆сѝ ᲃн҃ъ мо́й воꙁлюбле́нный, въ тебѣ̀ бл҃говолихъ: ᲂу҆бо́йсѧ сегѡ̀ беꙁстꙋ́дный ле́стче и҆ ѿидѝ и҆ ктомꙋ̀ не воꙁврати́сѧ.

Заклина́ю тѧ поги́белный дꙋ́ше, четыридесѧ́тъ дні́й, и҆ четыридесѧ́тъ но́щїй пости́вшимсѧ, и҆ твоѐ и҆скꙋше́нїе дїа́воле побѣди́вшимъ, ре́къ: Неискꙋси́вши Гд҃а Бг҃а твое́гѡ: ᲂу҆бо́йсѧ ᲃегѡ̀ всѧ́коѧ лжѝ ѿче, и҆ а҆́бїе ѿ соꙁда́нїѧ сегѡ̀ ᲂу҆страни́сѧ.

Заклина́ю тѧ дїа́воле Бг҃омъ воплоще́ннымъ, на землѝ ꙗ҆́вл̾шимсѧ, и҆ съ чл҃ки пожи́вшимъ, неище́тнаѧ бл҃годѣ́ѧнїѧ сотво́ршимъ, и҆ пꙋ́ть ᲃпⷭ҇нїѧ мі́рови покаꙁа́вшимъ, и҆ повелѣ́нїѧ ᲃпⷭ҇и́телнаѧ да́вшимъ, и҆ бѣ́сы ᲃло́вомъ прогна́вшимъ, и҆ раꙁли́чныѧ не́дꙋги и҆сцѣли́вшим̀: ᲂу҆бо́йсѧ сегѡ̀ а҆́дскїй вселꙋка́вый ᲃмо́че, въстрепещѝ и҆ ᲂу҆страни́сѧ.

Заклина́ю тѧ а҆́дскїй всепа́гꙋбный лвѐ, прокаже́нныѧ ѡ҆чисти́вшимъ, слѣпы́ѧ проꙁрѣ́ти, нѣмы́ѧ гл҃а́ти, глꙋхі́ѧ слы́шати, хро́мыѧ ходи́ти, расслабле́нныѧ воста́ти сотво́ршимъ, и҆ ме́ртвыѧ воскр҃си́вшимъ: ᲂу҆бо́йсѧ сегѡ̀ и҆сконный чл҃овекѡꙋбі́йцо дїа́воле, и҆ ско́рѡ съ тре́петомъ ѿбѣжѝ.

Заклина́ю тѧ прего́рдый лꙋка́вства рачи́телю, ᲃмире́нїѧ пꙋ́ть на́мъ покаꙁа́вшимъ въ ниꙁложе́нїе твое́ѧ высо́кїѧ горды́нѧ, ᲂу҆мове́нїемъ но́гъ ᲃт҃ы́мъ свои́мъ Ꙋ҆чн҃кѡмъ и҆ А҆пⷭ҇лѡм: ᲂу҆бо́йсѧ сегѡ̀ горды́нею воꙁнесы́йсѧ, и҆ до а҆́да ниꙁверже́нїемъ смири́вый сѧ, и҆ а҆́бїе и҆ꙁыйдѝ и҆ бѣжѝ.

Заклина́ю тѧ всѧ́кагѡ сꙋро́вства и҆ немлⷭ҇ти и҆спо́лненный мꙋчи́телю, на Та́йной свое́й Вече́ри преестестве́ннѡ сꙋщество̀ Хлѣ́ба въ Те́ло своѐ Прⷭ҇то́е и҆ сꙋщество̀ вина̀ въ Кро́вь ᲃвою̀ прече́стнꙋю претвори́вый, и҆ вѣ́рнымъ свои́мъ въ снѣ́дь и҆ пи́тїе въ ѡ҆ставле́нїе грѣхѡ́въ пода́вый, и҆ сі́е твори́ти въ своѐ воспомина́нїе повелѣ́вый: ᲂу҆бо́йсѧ тогѡ̀ всѣ́хъ є҆́ресїй и҆ꙁъѡбрѣта́телю и҆ нече́стїѧ всѧ́кагѡ ко́рени дїа́воле, и҆ ничто́же ᲂу҆медлѝ, но а҆́бїе и҆ꙁыйдѝ и҆ ᲂу҆страни́сѧ.

Заклина́ю тѧ всѣ́хъ грѣхѡ́въ и҆ поги́бели и҆сто́чниче, беꙁкро́вною стра́шною животворѧ́щею же Же́ртвою Тѣ́ла и҆ Крвѐ Гд҃а нш҃гѡ І҆и҃с Ха҃, є҆ю́же вѣ́рнїи спаса́ютсѧ, ты́ же и҆ поги́белнаѧ твоѧ̀ си́ла и҆спражнѧ́етсѧ, ᲂу҆бо́йсѧ сеѧ̀ непокаѧ́телнаѧ злобо̀, ме́рꙁскїй и҆ нечи́стый дꙋ́ше, и҆ бежѝ ѿ ᲃоꙁда́нїѧ сегѡ̀.

Заклина́ю тѧ за́висти глꙋби́но преестестве́нною въ вертогра́дѣ Мл҃твою Гн҃ею, и҆ ка́плѧми Крвѐ, ꙗ҆́кѡ по́тъ ѿ Прчⷭ҇тагѡ Тѣ́ла є҆гѡ̀ на землѝ ка́пнꙋвшими: ᲂу҆бо́йсѧ си́хъ добронена́вистниче, и҆ поги́бели ᲃы́не, и҆ ско́рѡ и҆ꙁыйдѝ.

Заклина́ю тѧ пре́лести всѧ́кїѧ и҆сто́чниче, и҆ꙁво́лившимъ ꙗ҆́тъ, свѧ́ꙁанъ, бїе́нъ и҆ ве́денъ къ А҆́ннѣ, и҆ Каїа́фѣ, заꙋше́нъ же, ѡ҆плеванъ, и҆ лю́то мꙋ́чимъ ѻ҆бъно́щъ бы́ти, и҆ Піла́тꙋ предста́вшим, и҆ ѿ негѡ̀ мно́гѡ и҆стѧ́ꙁаннымъ, мꙋчи́мымъ же и҆ ᲂу҆ столпа̀ на́гѡ свѧ́ꙁаннымъ и҆ би́тымъ, въ Хлами́дꙋ нарꙋга́нїѧ ѡ҆бле́ченымъ, вѣнце́мъ терно́вымъ ѡ҆бло́женнымъ, тро́стїемъ по Главѣ̀ бі́еннымъ, ѿ І҆рꙍда ᲂу҆коре́ннымъ и҆ порꙋга́ннымъ, и҆ на ᲃм҃рть ѿ Піла́та ѡ҆сꙋжденнымъ: ᲂу҆бо́йсѧ ᲃегѡ̀ дре́внѧѧ злобо̀, всѧ́кїѧ мꙋ́ки досто́йный, и҆ є҆гѡ̀ лю́тыхъ бо́лѣꙁнїй и҆ стра́шныхъ, на́мъ же сп҃се́нныхъ мꙋ́к, и҆́миже твою̀ не́мощнꙋю си́лꙋ сокрꙋшѝ, и҆ въстрепета́въ въ бѣ́гство претвори́сѧ.

Заклина́ю тѧ съ нб҃сѐ спа́дшаѧ денни́це, на ᲃм҃рть ведо́мымъ Гдⷭ҇емъ, и҆ Крⷭ҇тъ сво́й поне́сшимъ, и҆ мнѡ́гаѧ ᲂу҆ничиже́нїѧ и҆ ра́ны тогда̀ ѿ ведꙋ́щихъ є҆гѡ̀ ᲃпⷭ҇нїѧ на́шегѡ, поги́бели же твое́ѧ ра́ди претерпѣ́вшимъ.

Заклина́ю тѧ беꙁстꙋ́дный ѡ҆болга́телю и҆ клеве́тниче, на́гѡ на Крⷭ҇тѣ̀ посре́дѣ дво́ю раꙁбо́йникꙋ распѧ́тымъ и҆ четырмѧ̀ гво́ꙁдми пригвожде́ннымъ, ѡ҆́цтомъ и҆ же́лчїю напое́ннымъ, и҆ лю́тыми и҆ неиꙁгл҃а́нными бо́лѣꙁн̾ми є҆гѡ̀, ꙗ҆́же на Крⷭ҇тѣ̀ нш҃егѡ ра́ди спⷭ҇нїѧ, ѡ҆сꙋжде́нїѧ же твое́гѡ дѣ́лѧ во́лею претерпѣ̀, и҆ ст҃ы́ми Прчⷭ҇тыми Крві́й є҆гѡ̀ неща́дными и҆ꙁлїѧ́нїи: ᲂу҆бо́йсѧ си́хъ Бж҃ій вра́же и҆ лꙋка́вства и҆сто́чниче, ᲂу҆жасни́сѧ и҆ а҆́бїе и҆ꙁыйдѝ.

Заклина́ю тѧ беꙁстꙋ́дный ѡ҆болга́телю и҆ клеве́тниче, ᲃе́дмїю ᲃлове́съ Гдⷭ҇нихъ на Крⷭ҇тѣ̀ на спⷭ҇нїе на́ше, на твою́ же вѣ́чнꙋю поги́белъ и҆ꙁрече́нными, и҆ животво́рною є҆гѡ̀ ᲃм҃ртїю, є҆ю́же мы ѡ҆жи́хѡмъ, ты́ же ᲂу҆мерщле́нъ є҆сѝ: ᲂу҆бо́йсѧ сегѡ̀ всѧ́кїѧ благода́ти вѣ́чнѡ ѡ҆чꙋжде́нне, востенѝ и҆ ско́рѡ и҆ще́ꙁни ѿ соꙁда́нїѧ сегѡ̀.

Заклина́ю тѧ всѧ́коѧ пра́вды проти́вниче, тѣ́мъ є҆гѡ́ же ᲃл҃нце на Крⷭ҇тѣ̀ висѧ́ща ви́дѣвше померчѐ, и҆ землѧ̀ въстрепета̀, и҆ завѣ́са Цр҃ко́внаѧ раꙁдра́сѧ, и҆ є҆гѡ́ же ᲃи́лою ка́менїе распадѡ́шасѧ, и҆ грѡ́бы ѿверꙁѡ́шасѧ, и҆ тѣлеса̀ ᲂу҆сѡ́пшихъ ст҃ы́хъ въста́ша, и҆ по Воскрⷭ҇нїи є҆гѡ̀ внидо́ша въ ᲃт҃ы́й гра́дъ, и҆ ꙗ҆ви́шасѧ мнѡ́гимъ: ᲂу҆бо҆йсѧ ᲃегѡ̀ сꙋро́вый мꙋчи́телю, и҆ лꙋка́вства бе́ꙁдно, и҆ ско́рѡ и҆ꙁыйдѝ и҆ ᲂу҆страни́сѧ ѿ соꙁда́нїѧ є҆гѡ̀.

Заклина́ю тѧ раꙁвра́тниче вселꙋка́вый, прободе́нїемъ Прчⷭ҇тагѡ ребра̀ Гн҃ѧ, и҆ꙁъ не́го же и҆стечѐ Кро́вь и҆ Вода̀, въ на́ше ᲃпⷭ҇нїе и҆ ѡ҆бновле́нїе, въ твое́ же коне́чное сотре́нїе, и҆ си́лы твое́ѧ сокрꙋше́нїе: ᲂу҆бо́йсѧ сегѡ̀ ѻ҆гнѧ̀ вѣ́чнагѡ ве́ществѡ, и҆ ско́рѡ ᲂу҆страни́сѧ.

Заклина́ю тѧ беꙁчи́нїѧ всѧ́кагѡ и҆ раꙁдо́рѡвъ и҆ꙁъѡбрѣта́телю, Бг҃отѣле́снымъ Гд҃а на́шегѡ І҆и҃с Ха҃ Погребе́нїемъ, и҆ всеси́лнымъ є҆гѡ̀ въ а҆́дъ съ дш҃ею и҆ Бж҃ство́мъ соше́ствїемъ, и҆́же та́мѡ си́лою свое́ю Бж҃стве́нною тебѐ воꙁлобѣ̀ си́лнагѡ злонача́лника свѧꙁа̀, и҆ си́лꙋ твое́ѧ злобы̀ и҆спраꙁднѝ, и҆ дш҃а пра́ведныхъ та́мѡ свѧ́ꙁанныхъ плѣнѝ, и҆ съ собо́ю ꙗ҆́кѡ си́ленъ въ крѣ́пости въꙁведѐ: ᲂу҆бо́йсѧ ᲃегѡ̀ вѣ́чнагѡ Бж҃іѧгѡ гнѣ́ва наслѣ́дниче, и҆ ско́рѡ ѿ соꙁда́нїѧ є҆гѡ̀ ѿидѝ.

Заклина́ю тѧ крамо́лниче навѣтли́вый, ᲃм҃ртїю сме́рть попра́вшимъ, и҆ твою̀ мꙋчи́тел̾скꙋю держа́вꙋ раꙁдрꙋши́вшимъ, пресла́внѡ же и҆ꙁъ мр҃твыхъ ᲃи́лою свое́гѡ Бжⷭ҇тва̀ ᲃамовла́стнѡ Воскреⷭ҇шимъ Гдⷭ҇емъ на́шимъ І҆и҃с Хрⷭ҇то́мъ, ᲂу҆бо́йсѧ сегѡ̀ крѣ́пкагѡ побѣдоно́сца Бж҃ій сопротивобо́рче и҆ поги́белный сосꙋ́де, и҆ тре́петнѡ въско́чивъ ᲂу҆страни́сѧ.

Заклина́ю тѧ клѧ́твы и҆ ѡ҆сꙋжденїа наслѣ́дниче, по Воскрⷭ҇нїи свое́мъ, А҆пⷭ҇лѡмъ свои́мъ пресла́внѡ пло́тїю ꙗ҆ви́вшимсѧ, и҆ ми́ръ ᲃво́йтѣ́мъ и҆ вла́сть свою̀ на прогна́нїе тебѐ да́вшимъ, и҆ съ ни́ми ри́бы пече́ны и҆ ѿ пче́лъ ᲃо́тъ ꙗ҆́дшимъ, и҆ Ѳѡмꙋ̀ прикоснове́нїемъ свои́хъ Пречⷭ҇тыхъ ре́бръ, рꙋ́чныхъ же но́жныхъ ꙗ҆́ꙁвъ ᲂу҆вѣри́вшимъ, и҆ четырдесѧ́тъ дні́й на землѝ пребы́вшимъ ᲂу҆бо́йсѧ сегѡ̀ вѣ́чныѧ см҃рти пови́нниче, и҆ ско́рѡ и҆ꙁыйдѝ, и҆ дале́че ѿско́чи ѿ ᲃоꙁда́нїѧ є҆гѡ̀.

Заклина́ю тѧ ме́рꙁскїй и҆ всѧ́кїѧ нечистоты̀ и҆сполненый дꙋ́ше, пло́тїю воꙁне́сшимсѧ на нб҃са̀ Гдⷭ҇емъ нш҃имъ І҆и҃с Хртⷭ҇о́мъ, и҆ на Прⷭ҇то́лѣ сла́вы ѡ҆деснꙋю Бг҃а Ѿц҃а̀ сѣдѧ́щимъ, и҆ въ сконча́нїи дні́й Пѧтьдесѧ́тница по свое́мꙋ нело́жномꙋ ѡ҆бѣща́нїю Дх҃а ᲃт҃а́гѡ ѿ Ѿц҃а̀ и҆сходѧ́щагѡ, на своѧ̀ А҆пⷭ҇лы въ ѻ҆́гненныхъ ꙗ҆ꙁы́цехъ ниꙁпосла́вшимъ и҆ тѣ́хъ Бг҃ораꙁꙋ́мїемъ, тѣми́ же ве́сь мі́ръ просвѣти́вшимъ, и҆ ѿ І҆дѡлослꙋже́нїѧ къ себѣ̀ ѡ҆брати́вшимъ, тебе́ же и҆ твою̀ ле́сть и҆спраꙁдни́вшимъ: Ꙋ҆бо́йсѧ сегѡ̀ всѧ́коѧ злобы̀ неистощи́маѧ пꙋчи́нѡ, вострепещѝ, ᲂу҆бо́йсѧ, и҆ ѿбѣжѝ.

Заклина́ю тѧ напра́сный, сверѣ́пый, и҆ напыще́нный дꙋ́ше, па́ки съ сла́вою мнѡ́гою на ѡ҆́блацѣ́хъ грѧдꙋ́щимъ сꙋди́ти живы́мъ и҆ ме́ртвымъ, вели́кимъ Бг҃омъ и҆ ᲃп҃си́телемъ нш҃имъ І҆и҃с Хрⷭ҇томъ, тебе́ же и҆ всю̀ споспѣ́шнꙋю зло́бнꙋю твою̀ си́лꙋ вѣ́чномꙋ ѻ҆гню̀ въ несконча́емыѧ вѣ́ки преда́ти хотѧ́щимъ: ᲂу҆бо́йсѧ сегѡ̀ дꙋшехи́щный звѣ́рꙋ, ѻ҆гнѧ́ же гее́нскагѡ и҆ вѣ́чныѧ мꙋ́ки вино́вниче, и҆ꙁыйдѝ что̀ медли́ши, нбⷭ҇ныѧ бра́ни побѣжде́нный нача́лниче, ѿстꙋпѝ Бж҃ій ѿстꙋ́пниче, ᲂу҆страни́сѧ Бг҃омъ побѣжде́нне хꙋ́лниче, бѣжѝ Хрⷭ҇томъ и҆спра́жненный и҆ попра́нный враждонача́лниче, Бг҃ъ си́лный въ крѣ́пости, и҆ крѣ́пкїй въ си́лѣ, стра́шный въ бра́нехъ, и҆ ди́вный въ чꙋдесе́хъ, то́й тебѣ̀ млⷭ҇ти недосто́йномꙋ, всѧ́кїѧ непра́вды и҆сполне́нномꙋ, и҆ свѣтоно́сїѧ нбⷭ҇нагѡ лише́нномꙋ преле́стникꙋ, крѣ́пкѡ и҆ гро́ꙁнѡ мно́ю недосто́йнымъ рабо́мъ свои́мъ повелѣва́етъ, ѿидѝ а҆́бїе ѿ соꙁда́нїѧ сегѡ̀, въ пꙋ́стаѧ и҆ беꙁво́днаѧ мѣ́ста, и҆де́же ни́ же чл҃къ, ни́ же звѣ́ръ ѡ҆бита́етъ, и҆ ктомꙋ̀ въ вѣ́ки не воꙁвратисѧ къ не́мꙋ:

Ꙗ҆́кѡ ᲃи́ла и҆ держа́ва, Црⷭ҇тво и҆ ᲃла́ва, Ха҃ Бг҃а на́шегѡ съ беꙁнача́лнымъ є҆гѡ̀ Ѿц҃емъ, и҆ съ Прⷭ҇ты́мъ, и҆ бл҃ги́мъ, и҆ животворѧ́щимъ є҆гѡ̀ Дх҃омъ, ны́нѣ и҆ прⷭ҇нѡ и҆ въ бесконе́чныѧ вѣ́ки вѣ́кѡвъ, А҆ми́нь.

По си́хъ же чте́тъ Ѿч҃е на́шъ: Бц҃е Дво: и Воꙁбра́нной Воево́де: и҆ ѱалѡ́мъ в҃і. Доко́лѣ Гд҃и забꙋ́деши мѧ̀ до конца̀.

По се́мъ:

Премꙋ́дрость про́сти ᲂу҆слышим ᲃт҃о́е Е҆ѵⷢ҇лїе, ѿ Лꙋкѝ ᲃт҃а́гѡ Е҆ѵⷢ҇лїѧ чте́нїе.

Кли́ръ:

Сла́ва тебѣ̀ Гд҃и.

И҆ чте́тъ Е҆ѵⷢ҇лїе ᲃі́е.

Глава̀, а҃. Зача́ло. д҃.

Въ днѝ ѡ҆́ны, Воста́вши же Мр҃іѧмъ во днѝ сі́ѧ, и҆дѐ въ гѡ́рнѧѧ со тща́нїемъ, въ гра́дъ І҆ꙋ́дѡвъ: и҆ вни́де въ до́мъ заха́рїинъ и҆ цѣлова̀ Є҆лїсаве́ѳꙋ. И҆ бы́сть ꙗ҆́кѡ ᲂу҆слы́ша Є҆лїсаве́ѳа цѣлова́нїе Мр҃і́ино, вꙁыгра́сѧ младе́нецъ въ чре́вѣ є҆ѧ̀. И҆ и҆сполни́сѧ Дх҃а ᲃт҃а Є҆лїсаве́ѳа, и҆ воꙁопѝ гла́сомъ ве́лїимъ, и҆ речѐ: Блⷭ҇ве́нна ты въ жена́хъ, и҆ блⷭ҇ве́нъ пло́дъ чре́ва твое́гѡ. И҆ ѿкꙋ́дꙋ мнѣ̀ сі́е, ꙗ҆́кѡ да прїйдетъ Мт҃и Гд҃а моегѡ̀ къ мнѣ̀. Се́ бо, ꙗ҆́кѡ бы́ст̾ гла́съ цѣлова́нїѧ твоегѡ̀ во ᲂу҆́шїю мое́ю, вꙁыгра́сѧ ра́дощами младе́нецъ въ чре́вѣ мое́мъ. И҆ бл҃же́нна вѣ́ровавшаѧ, ꙗ҆́кѡ бꙋ́детъ соверше́нїе гл҃аннымъ є҆́й ѿ Гд҃а, и҆ речѐ Мр҃іѧмъ: Вели́читъ дш҃а̀ моѧ̀ Гд҃а, и҆ воꙁра́довасѧ Дх҃ъ мо́й ѡ҆ Бѕ҃ѣ ᲃп҃сѣ мое́мъ. Ꙗ҆́кѡ при́ꙁрѣ на смире́нїе рабы̀ свое́ѧ: ᲃе́ бо, ѿ ны́нѣ ᲂу҆блажа́тъ мѧ̀ всѝ рѡ́ди. Ꙗ҆́кѡ сътворѝ мнѣ̀ вели́чїѧ ᲃи́льный, и҆ ᲃт҃о И҆́мѧ є҆гѡ̀: И҆ млⷭ҇ть є҆гѡ̀ въ ро́дъ родѡ́въ боѧ́щыхъ сѧ є҆гѡ̀. Сътворѝ держа́вꙋ мы́шцею свое́ю, расточѝ го́рдыѧ мы́слїю се́рдца и҆́хъ. Ниꙁложѝ ᲃи́льныѧ съ прⷭ҇то́лъ, и҆ воꙁнесѐ смире́нныѧ. А҆́лчꙋщїѧ и҆сполнѝ бл҃гъ, и҆ богатѧ́щїѧсѧ ѿпꙋстѝ тща̀. Воспрїѧ́тъ І҆и҃лѧ ѻ҆тро́ка свое́гѡ, помѧнꙋ́ти млⷭ҇ти. Ꙗ҆́коже гл҃а̀ къ Ѿц҃емъ на́шимъ, А҆враа́мꙋ и҆ сѣ́мени є҆гѡ̀ до вѣ́ка. Пребы́сть же Мр҃іѧмъ съ не́ю ꙗ҆́кѡ Мцⷭ҇а трѝ, и҆ воꙁврати́сѧ въ до́мъ сво́й.

Кли́ръ:

Сла́ва тебѣ̀ Гд҃и.

Заклина́тель же са́мъ лобꙁа́въ ᲃт҃ое Е҆ѵⷢ҇лїе, дае́тъ є҆̀ и҆ бѣ́сномꙋ лобꙁа́ти: и҆ воꙁло́жъ десни́цꙋ на главѣ̀ є҆гѡ̀, гл҃етъ:

Словесы̀ Бжⷭ҇тве́ннагѡ Е҆ѵⷢ҇лїа да ᲂу҆га́снетъ и҆ и҆сче́ꙁнетъ въ тебѣ̀ И҆мⷬ҇къ: всѧ̀ си́ла лꙋка́вагѡ дїа́вола, и҆ да влѣ́етсѧ ᲃи́ла Бжⷭ҇тве́ннагѡ Дх҃а, Ами́нь.

По се́мъ:

Се Крⷭ҇тъ Гдⷭ҇нь, бѣжи́те проти́вныѧ ᲃи́лы: победи́лъ бо є҆́стъ Ле́въ ѿ Колѣ́на І҆ꙋ́дова, Ко́рен̾ Дави́дѡвъ, Гд҃ь и҆ Бг҃ъ на́шъ І҆и҃с Хᲃ҃, попра́вый и҆ сте́рый ва́шꙋ не́мощнꙋю ᲃи́лꙋ.

Блⷭ҇ве́нъ бꙋ́ди дн҃ь и҆ ча́съ, во́н̾же Гд҃ь и҆ Бг҃ъ на́шъ І҆и҃с Хᲃ҃ роди́сѧ ѿ Дв҃ы Мр҃іа, на сотре́нїе и҆ раꙁдрꙋше́нїе дїа́вол̾скагѡ мꙋчи́телства, и҆ въ ᲃпⷭ҇нїе вѣ́рныхъ.

И҆ Тропа́ръ:

Гд҃и ѻ҆рꙋ́жїе на дїа́вола Крⷭ҇тъ тво́й да́лъ є҆сѝ на́мъ:

По си́хъ же чте́тъ ѱал: л҃:

На́ тѧ̀, Гд҃и, ᲂу҆пова́хъ, да не постыждꙋ́сѧ въ вѣ́къ.

И҆ а҆́бїе гл҃етъ:

Премꙋ́дрост̾ь про́сти ᲂу҆слышим ᲃт҃о́е Е҆ѵⷢ҇лїе, ѿ Лꙋкѝ ᲃт҃а́гѡ Е҆ѵⷢ҇лїѧ чте́нїе.

Кли́ръ:

Сла́ва тебѣ̀ Гд҃и.

И҆ чте́тъ Е҆ѵⷢ҇лїе, ѿ Главы̀, а҃ Зача́ло, д҃.

Въ вре́мѧ ѡ҆́но, Заха́рїѧ ѻ҆ц҃ъ Предте́чевъ и҆сполни́сѧ Дх҃а ᲃт҃а, и҆ Прⷪ҇рчествова̀, гл҃ѧ̀: Блⷭ҇ве́нъ Гдⷭ҇ь Бг҃ъ І҆и҃левъ, ꙗ҆́кѡ посѣтѝ и҆ сътворѝ и҆ꙁбавле́нїе люде́мъ свои́мъ: и҆ воꙁдвижѐ ро́гъ ᲃпⷭ҇нїѧ на́мъ, въ домꙋ̀ Дв҃да ѻ҆тро́ка свое́гѡ, ꙗ҆́коже гл҃ѧ̀ Ꙋ҆сты̀ ᲃт҃ы́хъ сꙋ́щихъ ѿ вѣ́ка Прⷪ҇ркъ свои́хъ, ᲃпⷭ҇нїе ѿ вра́гъ на́шихъ и҆ и҆ꙁъ рꙋкѝ всѣ́хъ ненави́дѧщихъ на́съ. Сътвори́ти млⷭ҇ть съ Ѿц҃ѝ на́шими, и҆ помѧнꙋ́ти Завѣ́тъ ᲃт҃ы́й сво́й. Клѧ́твꙋ, є҆ю́же клѧ́тсѧ къ А҆враа́мꙋ Ѿц҃ꙋ̀ на́шемꙋ, є҆́же да́ти на́мъ, беꙁ̾ стра́ха, и҆ꙁъ рꙋкѝ вра́гъ на́шихъ и҆ꙁба́вл̾шимсѧ, послꙋжи́ти є҆мꙋ̀ въ преподобїи и҆ пра́вдѣ пре́дъ ни́мъ всѧ̀ днѝ живота̀ на́шегѡ. И҆ ты̀, Ѻ҆троча̀, Прⷪ҇ро́къ вы́шнѧгѡ нарече́шисѧ. Преди́деши бо пре́дъ лице́мъ Гдⷭ҇нимъ, ᲂу҆готова́ти пꙋ́ти є҆гѡ̀, є҆́же да́ти ра́ꙁꙋмъ ᲃпⷭ҇нїѧ люде́мъ є҆гѡ̀, въ ѡ҆ставле́нїе грѣхѡ́въ и҆́хъ, млⷭ҇рдїѧ ра́ди млⷭ҇ти Бг҃а на́шегѡ, въ ни́хъ же посѣти́лъ є҆́сть на́съ Восто́къ ᲃъвы́ше, просвѣти́ти въ тмѣ̀ и҆ сѣ́ни сме́ртнѣй сѣдѧ́щїѧ, напра́вити нѡ́ги на́ша на пꙋ́т̾ ми́ра.

Кли́ръ:

Сла́ва тебѣ̀ Гд҃и.

Заклина́тель же ᲃа́мъ лобꙁа́въ ᲃт҃ое Е҆ѵⷢ҇лїе, дае́тъ є҆̀ и҆ бѣ́сномꙋ лобꙁа́ти: и҆ а҆́бїе воꙁло́жъ десни́цꙋ на главѣ̀ є҆гѡ̀, глаголе́тъ:

Словесы̀ Бжⷭ҇тве́ннагѡ Е҆ѵⷢ҇лїѧ да ᲂу҆га́снетъ и҆ и҆ще́ꙁнетъ въ тебѣ̀ И҆мⷬ҇къ: всѧ̀ ᲃи́ла лꙋка́вагѡ дїа́вола, и҆ да влѣ́етсѧ си́ла Бжⷭ҇тве́ннагѡ Дх҃а, Ами́нь.

По се́мъ:

Се Крⷭ҇тъ Гдⷭ҇нь, бѣжи́те проти́вныѧ си́лы: побѣди́лъ бо є҆́стъ Ле́въ ѿ Колѣ́на І҆ꙋ́дова, Ко́рен̾ Дави́дѡвъ, Гд҃ь и҆ Бг҃ъ на́шъ І҆и҃с Хᲃ҃, попра́вый и҆ сте́рый ва́шꙋ не́мощнꙋю си́лꙋ.

Блⷭ҇ве́нъ бꙋ́ди дн҃ь и҆ ча́съ, во́н̾же Гд҃ь и҆ Бг҃ъ на́шъ І҆и҃с Хᲃ҃ ѿ Дв҃ы Мр҃іа роди́сѧ, на сътре́нїе и҆ раꙁдрꙋше́нїе дїа́вол̾скагѡ мꙋчи́телства, и҆ въ спⷭ҇нїе вѣ́рныхъ.

И҆ Тропа́ръ:

Гд҃и ѻ҆рꙋ́жїе на дїа́вола:

По си́хъ же чте́тъ ѱал: к҃а:

Бж҃е Бж҃е мо́й въскꙋ́ю ѡ҆ста́вилъ мѧ̀:

Сла́ва: И҆ ны́нѣ:

И҆ а҆́бїе чте́тъ

И҆́же а҆́ще хо́щетъ ᲃпасе́н бы́ти, подоба́ет є҆мꙋ̀ пре́жде всѣ́хъ держа́ти Каѳоли́ческꙋю Вѣ́рꙋ, ю҆́же а҆́ще кто̀ цѣ́лꙋ и҆ ненасилствова́ннꙋ не сохрани́тъ, кро́мѣ всѧ́каго недоꙋменїѧ, въ вѣ́ки поги́бнетъ.

Вѣ́ра же Каѳꙍли́ческаѧ є҆́сть ᲃі́ѧ: є҆́же Бг҃а є҆ди́нагѡ въ Трⷪ҇ци, и Трⷪ҇цꙋ въ є҆ди́нствѣ и҆сповѣда́ти и҆ чти́ти.

Не слива́юще лицѧ̀, ни́ же раꙁдѣлѧ́юще ᲃꙋщество̀. И҆́ное бо є҆́стъ лицѐ Ѿч҃ее, и҆́ное Сн҃о́внее, и и҆́ное Дх҃а ᲃт҃а́гѡ. Но Ѿч҃ее, и Сн҃о́внее, и҆ Дх҃а ᲃт҃а́гѡ, є҆дино̀ є҆́сть Бжⷭ҇тво̀: ра́вное хвале́нїе съпредвѣ́чное вели́чество.

Ꙗ҆ко́вый є҆́стъ Ѻ҆ц҃ъ, тако́вый є҆́стъ Сн҃ъ, тако́вый Дх҃ъ ᲃт҃ы́й. Несоꙁда́нный є҆́стъ Ѻ҆ц҃ъ, несоꙁда́нный Сн҃ъ, несоꙁда́нный Дх҃ъ ᲃт҃ы́й.

Непостижи́мъ є҆́стъ Ѻ҆ц҃ъ, непостижи́мый Сн҃ъ, непостижи́мый Дх҃ъ ᲃт҃ы́й.

Превѣ́чный є҆́стъ Ѻ҆ц҃ъ, превѣ́чный Сн҃ъ, превѣ́чный Дх҃ъ ᲃт҃ы́й Но ᲂу҆́бѡ не трѝ сꙋ́ть превѣ́чнїи, но є҆ди́нъ превѣ́чный. Ꙗ҆́коже не трѝ несоꙁда́ннїи, ни́ же трѝ непости́жимїи, но є҆ди́нъ несоꙁда́нный, и є҆ди́нъ непостижи́мый.

Подо́бнѣ, Вседержи́тель є҆́стъ Ѻ҆ц҃ъ, Вседержи́тель Сн҃ъ, Вседержи́тель Дх҃ъ ᲃт҃ы́й.

Но ᲂу҆́бѡ не трѝ вседержи́тели, но є҆ди́нъ Вседержи́тель.

Та́кожде Бг҃ъ є҆́стъ Ѻ҆ц҃ъ, Бг҃ъ Сн҃ъ, Бг҃ъ Дх҃ъ ᲃт҃ы́й.

Но ᲂу҆́бѡ не трѝ бо́ги, но є҆ди́нъ Бг҃ъ.

Та́кожде, Гд҃ь є҆́стъ Ѻ҆ц҃ъ, Гд҃ь Сн҃ъ, Гд҃ь Дх҃ъ ᲃт҃ы́й.

Но ᲂу҆́бѡ не трѝ сꙋ́тъ Госпо́дїе, но є҆ди́нъ Гд҃ь.

И҆́бѡ̀, ꙗ҆́коже ѡ҆со́бнѣ кое́ждѡ лицѐ Бг҃а и҆ Гд҃а и҆сповѣда́ти, Христіѧ́нскаѧ и҆́стинна на́съ ᲂу҆́читъ и҆ принꙋжда́етъ: ᲃи́це трі́ехъ богѡ́въ, и҆лѝ го́сподїй и҆сповѣда́ти, ᲂу҆че́нїе Хрⷭ҇тїѧ́нское на́мъ воꙁбранѧ́ет.

Ѻ҆ц҃ъ ни ѿ кого́же є҆́стъ ᲃоꙁда́нный, ни́ же сътворе́нный, ни́ же рожде́нный.

Сн҃ъ ѿ Ѿц҃а є҆ди́нагѡ є҆́сть, несотворе́нный, ни́ же ᲃоꙁда́нный, но рожде́нный.

Дх҃ъ ᲃт҃ы́й ѿ Ѿц҃а є҆́стъ, не сотворе́нный, не соꙁда́нный, ни́ же рожде́нный, но и҆сходѧ́щїй.

Е҆ди́нъ ᲂу҆́бѡ є҆́стъ Ѻ҆ц҃ъ, не трѝ ѿцѝ, є҆ди́нъ Сн҃ъ, не трѝ ᲃынѡ́ве, є҆ди́нъ Дх҃ъ ᲃт҃ы́й, не трѝ дꙋ́хѡве ᲃт҃ы́й.

И҆ въ се́й Трⷪ҇ци ничто́же є҆́стъ первѣ́йшее ни́ же послѣднѣ́йшее, ничто́же бо́лшее ни ме́ньшее: но цѣ́лы и҆ трѝ лица̀, съпредвѣ́чны себѣ̀ сꙋ́тъ и҆ съра́вны.

Си́це ᲂу҆́бѡ ꙗ҆́коже предрече́сѧ, є҆ди́нство въ Трⷪ҇ци, Трⷪ҇ца же въ є҆ди́нствѣ почита́на бы́ти и҆́матъ.

И҆́же ᲂу҆́бѡ хо́щетъ ᲃпⷭ҇ти́сѧ, си́це ѡ҆ Трⷪ҇ци ᲃт҃ой раꙁꙋмѣ́ти до́лженъ є҆́стъ.

Є҆́стъ ᲂу҆́бѡ Вѣ́ра и҆́стиннаѧ, ꙗ҆́кѡ да вѣ́рꙋемъ и҆ и҆сповѣдꙋ́ємъ, ꙗ҆́кѡ на́шъ Гд҃ь І҆и҃ᲃ Хᲃ҃ Бж҃ій Сн҃ъ, Бг҃ъ и҆ Чл҃къ є҆́стъ.

Бг҃ъ є҆́стъ ѿ сꙋщества̀ Ѻ҆ч҃а пре́дъ вѣ́ки рожде́нный: и҆ чл҃къ є҆́стъ ѿ ᲃꙋщества̀ Мт҃рнѧ, напослѣ́докъ вѣ́кѡвъ рожде́нный.

Соверше́нный є҆́стъ Бг҃ъ, и҆ соверше́нный чл҃къ: ѿ Дш҃ѝ раꙁꙋ́мной, и҆ ѿ члчⷭ҇кагѡ тѣ́ла ᲃы́й.

Ра́вный є҆́стъ Ѿц҃ꙋ по Бжⷭ҇твꙋ̀: ме́ншїй Ѿц҃а по члчⷭ҇твꙋ: но а҆́ще и҆ Бг҃ъ є҆́стъ и҆ Чл҃къ, не два̀ ᲂу҆́бѡ, но є҆ди́нъ Хᲃ҃.

Е҆ди́нъ ᲂу҆́бѡ непремѣне́нїемъ Бжⷭ҇тва̀ въ тѣ́ло, но восприѧ́тїемъ члчⷭ҇тва въ Бг҃а.

Е҆ди́нъ ᲂу҆́бѡ вои́стиннꙋ, не смѣше́нїемъ ᲃꙋщества̀, но є҆ди́нствомъ лица̀.

И҆бѡ̀ ꙗ҆́коже Дш҃а раꙁꙋ́мнаѧ и҆ тѣ́ло, є҆ди́нъ є҆́стъ чл҃къ: ᲃи́це Бг҃ъ и҆ чл҃къ, є҆ди́нъ є҆́стъ Хᲃ҃.

И҆́же пострада̀ ᲃпⷭ҇нїѧ на́шегѡ ра́ди, ᲃни́де въ а҆́дъ: тридне́внѡ и҆ꙁъ ме́ртвыхъ Воскр҃сѐ.

Воꙁнесе́сѧ на нб҃са̀, сѣди́тъ ѡ҆де́снꙋю Бг҃а Ѿц҃а̀ Вседержи́телѧ, и҆ ѿ ѻ҆ню́дꙋ прїйтѝ и҆́матъ сꙋди́ти живы́мъ и҆ ме́ртвымъ.

Въ є҆го́же прише́ствїи всѝ Воскрⷭ҇нꙋтъ съ тѣлесы̀ свои́ми: и҆ воꙁда́ти и҆́мꙋтъ ѿвѣ́тъ ѡ҆ дѣлехъ свои́хъ.

И҆ сотво́ршїи бл҃га́ѧ, по́йдꙋтъ въ живо́тъ вѣ́чный: зла́ѧ же содѣ́лавшїю, по́йдꙋ́тъ въ ѻ҆́гнь вѣ́чный.

Сі́ѧ є҆́стъ Вѣ́ра Каѳꙍли́ческаѧ, ю҆́же а҆́ще кто̀ вѣ́рнѡ и҆ крѣ́пкѡ съде́ржати не бꙋ́детъ, ᲃпасе́нъ бы́ти не мо́жетъ.

Сла́ва: И҆ ны́нѣ: и҆ ѱало́мъ, і҃:

На Гд҃а ᲂу҆пова́хъ, ка́кѡ рече́те:

Коне́цъ Мл҃твамъ и҆ Заклина́нїѧмъ надъ бѣ́снымъ.

Вѣ́стно бꙋ́ди, ꙗ҆́кѡ а҆́ще бѣ́съ не и҆ꙁы́йдетъ є҆дино́ю надъ ни́мъ прочита́нїемъ си́хъ всѣ́хъ, и҆ па́ки повтори́ти ᲃі́ѧ всѧ̀ до́ндеже ᲃи́лою Хв҃ою побѣжде́нъ и҆ꙁы́йдет: є҆гда́ же и҆ꙁгна́нъ бꙋ́детъ бѣ́съ, и҆ съверше́ннѡ свобожде́нъ бꙋ́детъ ѿ не́гѡ не́дꙋжный, прочтѝ Мл҃твꙋ сі́ю съ всѧ́кимъ ᲂу҆миле́нїемъ.

Благодари́мъ тѧ, пое́мъ, ᲃла́вимъ, и҆ велича́емъ крѣ́пкꙋю, и҆ великолѣ́пнꙋю ᲃи́лꙋ держа́вы вла́сти твое́ѧ Гд҃и Бж҃е Ѿч҃е Вседержи́телю: ꙗ҆́кѡ премнѡ́гихъ ра́ди твои́хъ неисче́тныхъ щедрѡ́тъ, и҆ чл҃кѡлю́бнагѡ твое́гѡ млⷭ҇рдїѧ, и҆ꙁво́лилъ є҆сѝ и҆ꙁба́вити, и҆ свободи́ти раба̀ свое́гѡ (и҆лѝ рабꙋ̀ свою̀) И҆мⷬ҇къ: ѿ ѡ҆бдержа́вшагѡ и҆ мꙋ́чившагѡ є҆гѡ̀ (и҆лѝ є҆ѧ̀) нечи́стагѡ дꙋ́ха: и҆ смире́ннѡ ра́бски припада́юще, приле́жнѡ твоѐ бл҃гоꙋтро́бїе мо́лимъ, да не ктомꙋ̀ дꙋ́хъ лꙋка́вый вла́сть и҆́матъ надъ ни́мъ, (и҆лѝ надъ не́ю,) но бѣ́гаѧ да бѣжи́тъ, и҆ дале́че ᲂу҆страни́тсѧ, и҆ ктомꙋ̀ да не воꙁврати́тсѧ.

Да всели́тжесѧ во́нь (и҆лѝ въ ню̀) Гд҃и всемлⷭ҇тивый, тебѣ̀ бл҃гоиꙁволѧ́ющꙋ, бл҃гость и҆ ми́ръ є҆диноро́днагѡ твое́гѡ ᲃн҃а, Гд҃а же на́шегѡ І҆и҃с Ха҃, и҆́мже и҆скꙋпле́ни бы́хѡмъ ѿ работы̀ вра́жїѧ, и҆ всѧ́кагѡ зла̀ неꙋбо́йсѧ, ꙗ҆́кѡ съ на́ми Гд҃ь: и҆ благода́ть ᲃт҃а́гѡ Дх҃а да ᲂу҆крѣпи́тъ, и҆ ᲂу҆тверди́тъ є҆гѡ̀ (и҆лѝ ю҆̀) въ всѧ́кѡмъ дѣ́лѣ бл҃ꙁѣ, твори́ти во́лю твою̀ бл҃гꙋ́ю, бл҃гоꙋго́днꙋю же и҆ ᲃоверше́ннꙋю въ всѧ̀ дни живота̀ є҆гѡ̀, (и҆лѝ є҆ѧ̀,) и҆ тебѐ съ всѣ́ми вѣ́рными ᲃла́вити и҆ велича́ти, съ є҆диноро́днымъ твои́мъ ᲃн҃омъ, и҆ всест҃ы́мъ, и҆ бл҃ги́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.