Воследова́нїе Моле́бное сопроти́въ чародѣѧ́нїѧмъ ѡ҆бава́нїѧмъ члове́кѡвъ и҆ ᲃко́тѡвъ, до́мѡвъ же и҆ Мѣ́стъ ѡплаꙁнѧ́емыхъ ѿ злы́хъ ме́чтѡвъ

Дїа́воли и҆мꙋ́ще зѣ́лнꙋю по премно́гꙋ къ члове́кѡмъ нена́висть, не то́чїю самы́хъ, но и҆ живо́тнаѧ, и҆ и҆́наѧ соꙁда́нїѧ къ ᲂу҆потребле́нїю и҆́хъ ѿ Бг҃а да́ннаѧ, врежда́ти ѡ҆быкѡ́шѧ, ꙗ҆́коже Бгоно́снїи ѿцѝ, ѿ Бг҃а вла́сть и҆ꙁгна́нїѧ бѣсѡ́въ и҆мѣ́вшїю и҆скꙋ́сни все́мъ бы́вше, повѣда́шѧ, Ѻ҆́браꙁъ же сегѡ̀ ꙗ҆́сный въ многѡстрада́лномъ Пра́ведномъ І҆ꙍ́вѣ и҆ма́мы, є҆гѡ́ же дїа́волъ не пре́жде ѿ верхꙋ̀ гла́вы до ᲃто́пы но́жныѧ вре́до́мъ лꙋка́вымъ пораꙁѝ, доне́лиже пе́рвѣе ꙗ҆́коже въ мгнове́нїи всѧ̀ и҆мѣ́нїѧ є҆гѡ̀ погꙋбѝ.

Сі́е же бѣ́сѡве по бо́лшей ча́сти лꙋка́выми члове́ки, ꙗ҆́коже свои́ми ѡ҆рꙋ́дїи тво́рѧтъ.

Но ᲂу҆́бѡ ничто́же па́че надъ є҆́же Бг҃ъ попꙋска́етъ твори́ти что̀ могꙋ́тъ, ꙗ҆́въ є҆́стъ и҆ сі́е, въ чародѣѧ́нїѧхъ во́лхвѡвъ фараꙍ́новыхъ, и҆́же не всѐ твори́ти воꙁмогѡ́шѧ є҆́же хотѣ́шѧ, и҆ є҆́же ра́бъ Бж҃ій Мѡѵ꙼се́й ᲃи́лою Бж҃іею творѧ́ше, но то́чїю є҆ли́кѡ и҆́мъ Бг҃ъ попꙋстѝ.

И҆ а҆́ще Бг҃ъ ᲃи́цевыѧ ка́ꙁни ча́стѡ попꙋска́етъ, и҆скꙋ́ства ра́ди, и҆ вѣнца̀, въ до́брыхъ и҆ непоро́чныхъ, но ᲂу҆́бѡ ча́стѣе тѣ́ми ᲂу҆дарѧ́етъ въ ка́ꙁнь согрѣша́ющихъ.

Нача́токъ ᲂу҆́бѡ и҆сцѣле́нїѧ въ си́цевыхъ бѣда́хъ є҆́стъ, є҆́же къ не́мꙋ прибѣ́гнꙋти, чре́ꙁъ и҆́стинное покаѧ́нїе и҆сповѣда́нїе же грѣхѡ́въ свои́хъ, и҆ довлетворе́нїе, въ тѣ́хъ ꙗ҆́же къ Бг҃ꙋ и҆ бли́жнемꙋ прислꙋша́ютъ.

Пото́мъ же притещѝ къ Мл҃твѣ Цр҃ко́вной, чре́ꙁъ Бжⷭ҇тве́нныѧ Лѵтꙋ́ргїѧ, Мл҃твы же, Млⷭ҇тинѧ, и҆ Поще́нїѧ.

Досто́итъ же чародѣ́йствїѧ сокрове́ннаѧ поиска́ти, и҆ ѡ҆брѣте́ннаѧ сожещѝ.

Но ᲂу҆́бѡ ника́коже подоба́етъ чародѣѧ́нїѧ, чародѣ́йствомъ и҆спражнѧ́ти, нечести́во бо є҆́стъ се, и҆ зѣ́лѡ проти́внѡ.

И҆ ᲂу҆́бѡ а҆́ще зло̀ ѻ҆́ное не преста́нетъ, сі́е дх҃о́вное вра́чевствѡ нанѐ да ᲂу҆потреблѧ́етъ, по ни́жей напи́санномꙋ Вослѣдова́нїю.

Сщ҃е́нникъ ѿгна́ти хотѧ́й ᲃи́цеваѧ чародѣѧ́нїѧ, тве́рдою вѣ́рою и҆ добродѣтелнымъ жи́тїемъ въѡрꙋже́нъ сы́й: дн҃ь є҆ди́нъ понѐ пре́жде соверше́нїѧ сегѡ̀ Вослѣдова́нїѧ да по́ститсѧ.

Въ самы́й же дн҃ъ во́н̾же ѿгна́ти хо́щетъ, подоба́етъ є҆мꙋ̀ Бжⷭ҇тве́ннꙋю соверши́ти Слꙋ́жбꙋ, по́мощъ Бж҃ію къ дѣ́лꙋ семꙋ̀ приꙁыва́ѧ, и҆ ѡ҆ и҆ꙁбавле́нїи стра́ждꙋщаго мл҃ѧ́сѧ.

Стражда́й же члове́къ съ всѣ́ми дома́шными свои́ми до́лженъ є҆́стъ всѧ́кѡ чи́ннѡ пре́жде си́хъ Мл҃твъ соверше́нїѧ пре́дъ І҆ере́емъ и҆сповѣда́ти всѧ̀ согрѣше́нїѧ своѧ̀, и҆ жалѣ́ти си занѧ̀, и҆ понѐ є҆ди́нъ дн҃ь по́ститисѧ, и҆на́кѡ бо ника́коже досто́итъ І҆ере́ю послѣдова́нїе сїе надъ ни́мъ соверша́ти: да не порꙋга́нъ бꙋ́де́тъ ѿ дїа́вола.

А҆́ще въ Це́ркви сі́е дѣйствꙋ́етъ І҆ере́ѵ꙼, ѡ҆дѣѧ́нъ въ Е҆питра́хиль и҆ Фелꙍ́нъ, а҆́ще же внѣ̀ Це́ркве, въ Е҆пітра́хиль то́чїю, и҆мѣ́ѧ пре́дъ собо́ю ѡ҆чарова́ннагѡ члове́ка: и҆ а҆́ще ᲂу҆́бѡ неи́матъ Бг҃оѧвле́нскꙋю, и҆лѝ А҆́вгꙋстовꙋю ᲃщ҃еннꙋю во́дꙋ, тво́ритъ мало́е ѡ́сщ҃енїе водѣ̀, и҆ ѳѵмїѧ́мъ ѡ҆сщ҃а́етъ, а҆́ще же и҆́матъ ᲃі́ѧ гото́ва, начина́етъ ѡ҆бы́чнѡ:

Блⷭ҇гве́нъ Бг҃ъ на́шъ всегда̀ ны́нѣ и҆:

И҆ чте́тъ, Цр҃ю нбⷭ҇ный: Трⷭ҇то́е: Ѿч҃е на́шъ: Гд҃и поми́лꙋй, в҃і.

Сла́ва: И҆ ны́нѣ:

Прїйдѣ́те поклони́мсѧ, гⷤ. и҆ ѱал: л҃:

На́ тѧ Гд҃и ᲂу҆пова́хъ, да непостыждꙋ́сѧ въ вѣ́къ: Ве́съ до конца.

И҆ а҆́бїе знамена́етъ Крⷭ҇тнымъ зна́менїемъ, гл҃ѧ̀:

Въ и҆мѧ̀ Ѿц҃а̀, и҆ Сн҃а, и҆ ᲃт҃а́гѡ Дх҃а.

И҆ Тропа́ръ се́й.

Гд҃и ѡ҆рꙋ́жїе на дїа́вола Крⷭ҇тъ тво́й да́лъ є҆сѝ на́мъ:

А҆́бїе же речѐ:

Гд҃ꙋ помоли́мсѧ. Гд҃и поми́лꙋй.

Чте́тъ Мл҃твꙋ сі́ю надъ главо́ю ѡ҆чародѣйствова́ннагѡ.

Бж҃е Богѡ́въ, и҆ Гд҃и Го́сподїй, Цр҃ю и҆ ᲃодѣ́телю всѣ́хъ, въ крѣ́пости си́лный, и҆ ди́вный въ всѣ́хъ дѣ́лехъ свои́хъ: ᲃътвори́вый нб҃о и҆ зе́млю, мо́ре и҆ всѧ̀ ꙗ҆́же въ ни́хъ, ви́димаѧ же и҆ не ви́димаѧ всѧ̀, и҆́же сатанꙋ̀ тебѣ̀ тво́рцꙋ свое́мꙋ го́рдостїю съпроти́вившагосѧ, кꙋ́пнѡ съ всѣ́ми послѣдова́вшими є҆мꙋ̀, ꙗ҆́кѡ мо́лнїю съ нб҃сѐ ниꙁве́рглъ є҆сѝ, и҆ слꙋжи́телїй є҆гѡ̀ во́лхвѡвъ фараѡ́новыхъ, Мꙍѵ꙼се́ю рабꙋ̀ твое́мꙋ ᲃъпроти́вившихсѧ, ѡ҆баѧ́нїѧ и҆ чародѣ́ѧнїѧ беꙁдѣ́лна сътвори́лъ є҆сѝ: Тебѣ̀ смире́ннѡ припада́юще, приле́жнѡ мл҃и́мсѧ, ѡ҆баѧ́нїѧ, волше́бнаѧ же мечта́нїѧ, и҆ чародѣѧ́нїѧ, ᲃемꙋ̀ рабꙋ̀ твое́мꙋ (и҆лѝ се́й рабѣ̀ твое́й) злохи́трїемъ дїа́волскимъ, нане́сена и҆ сътво́рена, бл҃гоꙋтро́бнымъ си млⷭ҇рдїемъ, и҆ всеси́лною ти крѣ́постїю ѿвратѝ и҆ ѿженѝ, и҆ сі́ѧ беꙁдѣ́лны сътворѝ: ꙗ҆́кѡ да тѣ́хъ мꙋчи́телства ᲃвобо́ждшисѧ, кро́мѣ всѧ́кагѡ препѧ́тїѧ, тебѣ̀ Гд҃ꙋ Бг҃ꙋ свое́мꙋ послꙋ́житъ, и҆ И҆мѧ̀ твоѐ Прⷭ҇то́е приле́жнѣе съ всѣ́ми на́ми сла́витъ, Ѿц҃а и҆ Сн҃а, и҆ ᲃт҃а́гѡ Дх҃а, ꙗ҆́кѡ блⷭ҇ве́нно и҆ препросла́вленнѡ сꙋ́щее, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

По Мл҃твѣ же ᲃе́й, вꙁе́мъ Кади́лницꙋ ѳимїѧ́момъ блⷭ҇ве́ннымъ ка́дитъ ѡ҆чарова́ннагѡ, гл҃ѧ̀:

Да воскрⷭ҇нетъ Бг҃ъ и҆ раꙁы́йдꙋтсѧ всѝ вра́ꙁи є҆гѡ̀, и҆ да бѣжа́тъ ѿ лица̀ є҆гѡ̀ всѝ ненавидѧ́щїи є҆гѡ̀, и҆ ꙗ҆́кѡ и҆щеꙁа́єтъ ды́мъ да и҆ще́ꙁнꙋтъ, въ и҆мѧ̀ Ѿц҃а, и҆ ᲃн҃а, и҆ ᲃⷮ: Дх҃а, А҆ми́нь.

По се́мъ а҆́бїе гл҃етъ:

Премꙋ́дрост̾ь про́сти ᲂу҆слышим ᲃт҃о́е Е҆ѵⷢ҇лїе, ѿ Матѳе́ѧ ᲃт҃а́гѡ Е҆ѵⷢ҇лїѧ чте́нїе.

Глава̀ і҃. Зач: л҃д. є҆мꙋ́ же сі́е начало:

Въ вре́мѧ ѻ҆́но, Приꙁва́въ І҆и҃с двана́десѧть ᲂу҆́ченики своѧ̀, дадѐ и҆́мъ вла́сть на дꙋ́сѣхъ нечи́стыхъ.

Коне́цъ же ᲃе́й:

Тꙋнѐ прїѧсте, тꙋнѐ дади́те. И҆щѝ на за́дѣ Ли́стъ. тм҃в²⁸.

А҆́бїе же по Е҆ѵⷢ҇лїи, воꙁлага́етъ ѡ҆́бѣ рꙋ́цѣ на гла́вѣ ѡ҆чарова́ннагѡ, и҆ гл҃етъ:

Да ᲂу҆га́снꙋтъ и҆ ѿбѣ́жатъ ѿ тебѐ всѧ̀ бѣсо́вскаѧ злодѣѧ́нїѧ, чародѣѧ́нїѧ же, ѡ҆баѧ́нїѧ и҆ волше́бнаѧ злотворе́нїѧ, ᲃи́лою ᲃлове́съ Бж҃естве́ннагѡ Е҆ѵⷢ҇лїѧ: Въ и҆мѧ̀ Ѻ҆ц҃а, и҆ Сн҃а, и҆ ᲃт҃а́гѡ Дх҃а.

Ре́кже, Гд҃ꙋ помоли́мсѧ. Гд҃и поми́лꙋй.

Чте́тъ надъ ни́мъ Мл҃твꙋ ᲃі́ю Вто́рꙋю.

Всеси́лный и҆ чл҃кѡлюби́вый Гд҃и І҆и҃с Хє҃ Бж҃е на́шъ, превѣ́чнагѡ Ѿц҃а събеꙁнача́лный и҆ сопрⷭ҇нѡсꙋ́щный Сн҃е и҆ ᲃло́ве, на послѣ́докъ лѣ́тъ съ нб҃съ съше́дый, и҆ ѿ прⷭ҇нѡ Дв҃ы чⷭ҇тыѧ неиꙁрече́ннѡ воплоти́выйсѧ, и҆ непрело́жнѡ чл҃къ бы́вый, ꙗ҆́кѡ да злодѣѧ́нїѧ бѣсо́вскаѧ и҆спраꙁдни́ши, и҆ ᲂу҆́чн҃кѡмъ свои́мъ вла́сть да́вый, є҆́же настꙋпа́ти на змїѧ̀ и҆ ᲃко́рпїѧ, и҆ на всю̀ си́лꙋ вра́жїю: тебѐ смире́ннѡ ꙗ҆́кѡ рабѝ чл҃кѡлюби́вагѡ Влады́кꙋ приле́жнѡ мо́лимъ: при́ꙁри на раба̀ твое́гѡ сегѡ̀ (и҆лѝ, на рабꙋ̀ твою̀ ᲃі́ю) И҆мⷬ҇къ: и҆ всѐ злоко́ꙁнїе дре́внѧгѡ и҆ вселꙋка́вагѡ змїѧ̀ дїа́вола, томꙋ̀ (и҆лѝ то́й) навѣтꙋ́ющее, подъ нѡ́ги рабѡ́въ твои́хъ сотрѝ, и҆ дѣ́йство и҆́хъ є҆́же волше́бными ѡ҆бава́нїи и҆ чародѣ́йствы лꙋка́выхъ члове́къ томꙋ̀ себѐ ѿда́вшихъ, въ поги́бель рабꙋ̀ твое́мꙋ, (и҆лѝ рабѣ твоей,) И҆мⷬ҇къ: нано́ситъ и҆ содѣлова́етъ: бл҃гоꙋтро́бнымъ си чл҃кѡлю́бїемъ и҆ Бжⷭ҇тве́нною ᲃи́лою раꙁдрꙋшѝ, и҆ беꙁдѣ́лны сотвори́въ въ ничто́же ѡ҆братѝ.

Твое́ бо є҆́стъ є҆́же ми́ловати, и҆ сп҃са́ти на́съ Бж҃е на́шъ, и҆ тебѣ̀ ᲃла́вꙋ воꙁсыла́емъ, съ беꙁнача́лным ти Ѿц҃емъ, и҆ со прⷭ҇сты́мъ и҆ бл҃гимъ и҆ животворѧ́щимъ ти Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

По се́мъ проче́тъ: Вѣ́рꙋю въ є҆ди́нагѡ Бг҃а: Ѻ҆ч҃е на́шъ: Бц҃е Дв҃о: и҆ Воꙁбра́нной воево́дѣ:

И҆ а҆́бїе чте́тъ ѱало́мъ, ѯ҃з:

Да воскре́снетъ Бг҃ъ и҆ раꙁы́йдꙋтсѧ:

И҆ по се́мъ заклина́нїе сі́е.

Заклина́ю ва́съ вселꙋка́вїи злонача́л̾ници, проклѧ́тїи бѣ́сѡве, и҆́же а҆́ще кто̀ є҆стѐ, и҆ є҆ли́кѡ ва́съ є҆́стъ, и҆́же ѡ҆бава́нїѧми чародѣ́йствы, и҆ злотво́рными дѣѧ́нїи присвое́ннагѡ ва́мъ чл҃ка приве́дени бы́вше, чл҃ка сегѡ̀, И҆мⷬ҇къ: лю́тѡ ѡ҆бꙋрева́ете, мꙋ́чите, и҆ ѡ҆ꙁлоблѧ́ете, ꙗ҆́кѡ да ѿ ны́нѣ со всѣ́ми волше́бствы и҆ чародѣ́йствы ва́шими ѿбѣжитѐ ѿ не́гѡ, и҆ къ томꙋ̀ ника́коже нико́лиже къ не́мꙋ воꙁврати́тесѧ. Сі́е ᲂу҆́бѡ не свое́ю ми си́лою, и҆лѝ бл҃гоче́стїемъ (є҆́же въ себѣ̀ неѡщꙋща́ю,) но ѡ҆ всеси́лномъ, всемо́щномъ, и҆ вседержи́телномъ и҆́мени, є҆ди́нагѡ Бг҃а въ Трⷪ҇ци слави́магѡ, Ѿц҃а, и҆ Сн҃а, и҆ ᲃт҃а́гѡ Дх҃а, и҆ въ си́лѣ чⷭ҇тнагѡ и҆ животворѧ́щагѡ Крⷭ҇та̀, и҆ ᲃм҃рти Гд҃а Бг҃а и҆ ᲃп҃са нш҃е́гѡ І҆и҃с Ха҃, є҆ю́ же всѧ̀ те́мнаѧ ва́ша вла́сть, и҆ лю́тое надъ чл҃ки и҆ все́ми соꙁда́нїѧми Бж҃іими мꙋчи́телство и҆спра́ꙁдненно и҆ ѡ҆ничто́жено є҆́стъ. ѻ҆брати́тесѧ ᲂу҆́бѡ воспѧтъ, и҆ бѣжи́те ѿтꙋ́дꙋ дале́че, и҆ дади́те мѣ́сто Бж҃іей ᲃи́ле, раꙁдрꙋша́ющей злодѣѧ́нїѧ ва́ша ᲃвои́мъ неище́тнымъ млⷭ҇рдїемъ и҆ блгⷭ҇тїю, да запрѣти́тъ ва́мъ пе́рстъ Бжій фараѡ́новыхъ во́лхвѡ́въ ѡ҆бава́нїѧ и҆ волше́бнаѧ мечта́нїѧ, беꙁдѣ́лны сотвори́вый, и҆ то́й є҆го́же си́лꙋ тогда̀ поꙁна́ете, є҆гда̀ Па́вла А҆пⷭ҇ла запрѣще́нїемъ си́лꙋ ва́шꙋ въ Е҆лли́мѣ во́лхвовѣ рабѐ ва́шемъ, є҆гѡ́ же ма́нїемъ мнѡ́гихъ поврежда́сте, посрамѝ и҆ и҆спраꙁднѝ, и҆ ꙗ҆́коже на ᲃт҃ꙋ́ю І҆ꙋсти́нꙋ Крⷭ҇та̀ зна́менїемъ, и҆ на не́мъ Распѧ́тагѡ Ха҃ Бг҃а на́шегѡ ᲃи́лою ѡ҆гражде́ннꙋю, ѡ҆бава́ющꙋ, и҆ ва́съ ᲂу҆бѣжда́ющꙋ Кѵпрїѧ́нꙋ, ничто́же ᲂу҆спѣ́ти воꙁмогѡ́сте, но стра́хомъ и҆ тре́петомъ ѡ҆держи́ми ѿбѣгѡ́сте, да бꙋ́детъ и ны́нѣ на ва́съ ᲂу҆жа́съ и҆ тре́петъ и҆ стра́хъ Бг҃а Вседержи́телѧ, Ѿц҃а, и҆ Сн҃а, и҆ ᲃⷮ: Дх҃а, хотѧ́щагѡ ва́съ ниꙁри́нꙋти въ ѻ҆́гнь вѣ́чный, и҆ беꙁконе́чнѡ въ не́мъ мꙋчити, А҆ми́нь.

Вꙁе́мъ же сщ҃еннꙋю во́дꙋ кро́питъ ѡ҆чарова́ннагѡ, гл҃ѧ̀:

Да ѿбѣ́гнꙋтъ и҆ ѿстꙋ́пѧтъ ѿ тебѐ всѧ̀ лꙋка́ваѧ дїа́волскаѧ ѡ҆бава́нїѧ, чародѣѧ́нїѧ, и҆ волше́бнаѧ дѣ́йства ѡ҆кропре́нїемъ воды̀ сеѧ̀ сщ҃енныѧ и҆ въ ничто́же да ѡ҆братѧ́тсѧ и҆ и҆ще́ꙁнꙋтъ, ты́ же здра́въ и҆ цѣ́лъ бꙋ́ди, въ и҆мѧ̀ Ѿц҃а, и҆ Сн҃а, и҆ ᲃт҃а́гѡ Дх҃а, А҆ми́нь.

Въ мѣ́сто же ѿпꙋ́ста рꙋко́ю блгⷭ҇влѧ́ѧ є҆гѡ̀ и҆ предстоѧ́щихъ, гл҃етъ сі́е.

Блⷭ҇ве́нїе Гн҃е бꙋ́ди на тебѣ̀ и҆ на всѣ́хъ на́съ, всегда̀ ны́нѣ и҆ прⷭ҇нѡ, и҆ въ вѣ́ки вѣ́кѡвъ, А҆ми́нь.