Вослѣдова́нїе Мл҃тве́нное надъ до́мом, и҆лѝ мѣ́стомъ ѡ҆чародѣѧ́ннымъ, и҆ ѡ҆плаꙁнѧ́емымъ ѿ злы́хъ ме́чтѡвъ

І҆ере́ѵ꙼ предꙋготовле́нъ сы́й по вы́шѣ поло́женномꙋ ᲂу҆ста́вꙋ, повелѣ́въ пре́жде всѣ́мъ въ домꙋ̀ ѻ҆́номъ пребыва́ющимъ грѣхѡ́въ свои́хъ чи́ннѡ и҆сповѣда́тисѧ, и҆ дн҃ь є҆ди́нъ по́стити, и҆ млⷭ҇тыню по си́лѣ ни́щимъ сотвори́ти, и҆ приле́жнѡ Бг҃ꙋ моли́тисѧ. Въ дн҃ь же во́н̾же хо́щетъ ᲃі́е Вослѣдва́нїе соверши́ти, первѣе ᲃлꙋ́жбꙋ Бжⷭ҇т: соверши́въ, прихо́дитъ къ ѡ҆чародѣѧ́нномꙋ до́мꙋ, (и҆лѝ мѣ́стꙋ,) и҆ ста́въ на не́мъ ѡ҆дѣѧ́нъ въ Е҆пітра́хиль, а҆́ще неи́матъ сособо́ю ᲃщ҃енныѧ воды̀, тво́ритъ а҆́бїе мало́е А҆вгꙋстово ѡ҆сщ҃енїе, и҆ ѳѵмїѧ́мъ блⷭ҇ви́тъ, начина́етъ ѡ҆бы́чнѡ:

Блⷭ҇ве́нъ Бг҃ъ на́шъ: и҆ чте́тъ, Ца́рю нбⷭ҇ный: Трⷭ҇то́е: Ѻ҆ч҃е на́шъ: Гд҃и поми́лꙋй, в҃і.

Сла́ва: И҆ ны́нѣ:

Прїйдѣ́те поклон: гⷤ. и҆ ѱало́мъ ѯ҃ѳ: Бж҃е въ по́мощъ мою̀:

По ѱалмѣ́ же гл҃етъ Моли́твꙋ сі́ю, ре́къ:

Гд҃ꙋ помоли́мсѧ. и҆ Гд҃и поми́лꙋй.

Гд҃и І҆и҃с Хє҃ Бж҃е на́шъ, превѣ́чный и҆ сопрⷭ҇нѡсꙋ́щный, беꙁнача́лнагѡ Ѿц҃а̀ жива́гѡ Бг҃а ᲃн҃е, беꙁнача́лныхъ є҆гѡ̀ нѣ́др не ѿлꙋча́ѧсѧ съ нб҃съ соше́дый, и҆ чл҃къ непрело́жнѡ бы́вый, ꙗ҆́кѡ да чл҃ка ѿ пре́лести и҆ мꙋчи́телства дїа́волѧ свободи́въ ᲃебѣ̀ присвои́ши: и҆ ꙗ҆́кѡ да бѣсо́вскаѧ всѧ̀ злодѣѧ́нїѧ и҆спраꙁдни́ши, ст҃ы́мъ свои́мъ ᲂу҆́чн҃кѡмъ и҆ А҆пⷭ҇лѡмъ да́лъ є҆сѝ, є҆́же настꙋпа́ти на змїѧ и҆ ско́рпїѧ, и҆ на всю си́лꙋ вра́жїю: тебѣ̀ ны́нѣ недосто́йнїи рабѝ твоѝ приле́жнѡ моли́мъ: при́ꙁри млⷭ҇твнѡ на до́мъ се́й, (и҆лѝ на мѣ́сто сі́е,) злоко́ꙁнїемъ лꙋка́вых члове́къ, и҆ волше́бныхъ и҆́хъ ѡ҆бава́нїемъ ѡ҆чародѣѧ́ный, (и҆лѝ ѡ҆чародѣѧ́ное) лꙋка́вствомъ же дїа́волимъ ѡ҆плаꙁнѧ́емый и҆ обꙋрева́емый, (и҆лѝ ѡ҆плаꙁнѧ́емое и҆ ѡ҆бꙋрева́емое,) и҆ всемощною ти си́лою чл҃кѡлю́бнѡ всѧ̀ сі́ѧ ражденѝ, и҆ въ ничто́же ѡ҆братѝ, ꙗ҆́кѡ да беꙁпа́костнѡ ѿ ни́хъ вѣ́рнїи рабѝ твоѝ здѐ ѡ҆бита́ющїи и҆ скѡ́ти и҆́хъ, въ ᲃла́вꙋ твою̀ пребꙋ́дꙋтъ.

Твое́ бо є҆́стъ є҆́же ми́ловати и҆ сп҃са́ти на́съ Бж҃е на́шъ, и҆ тебѣ̀ ᲃла́вꙋ воꙁсыла́емъ, со беꙁнача́лнымъ ти Ѿц҃емъ и҆ со прⷭ҇тымъ, и҆ бл҃гимъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

А҆́бїе же въꙁе́мъ Кади́лницꙋ, и҆ вложи́въ въ ню̀ ѳимїѧ́мъ блⷭ҇ве́нный, кади́тъ весь до́мъ и҆лѝ мѣ́сто гл҃ѧ̀ ᲃі́е:

Да воскрⷭ҇нетъ Бг҃ъ и҆ раꙁы́йдꙋтсѧ вра́ꙁи є҆гѡ̀, и҆ да бѣжа́тъ ѿ лица̀ є҆гѡ̀ всѝ ненавидѧ́щїи є҆гѡ̀, и҆ ꙗ҆́кѡ и҆щеꙁа́етъ ды́мъ да и҆ще́ꙁнꙋтъ: въ и҆мѧ̀ ѡц҃а̀ и҆ Сн҃а и҆ ᲃⷮ: Дх҃а, А҆ми́нь.

По се́мъ а҆́бїе гл҃етъ:

Премꙋ́дрость про́сти ᲂу҆слы́шимъ ᲃт҃о́е Е҆ѵⷢ҇лїе ѿ І҆ѡанна ᲃт҃а́гѡ Е҆ѵⷢ҇лїѧ чте́нїе.

И҆ чте́тъ Е҆ѵⷢ҇лїе Глав: а҃. Зач: а҃ є҆мꙋ́же нача́лѡ сі́е:

Въ нача́лѣ бѣ ᲃло́во:

Коне́цъ же се́й:

Благода́ть же и҆ и҆́стинна І҆и҃с Хм҃ъ бы́сть. И҆щѝ на за́дѣ Ли́ст. тн҃в²⁹.

По Е҆ѵⷢ҇лїи же чте́тъ ѱал: ч҃. Живы́й въ по́мощъ: И҆ по ѱал: ре́къ:

Гд҃ꙋ помоли́мсѧ и҆ Гд҃и поми́лꙋй.

Чте́тъ Моли́твꙋ ᲃі́ю.

Гд҃и Бж҃е ᲃпⷭ҇нїѧ на́шегѡ, Сн҃е Бг҃а жива́гѡ, на Херꙋві́мѣхъ ꙗ҆ждѧ́й: превы́шше сы́й всѧ́кагѡ Нача́ла, и҆ Вла́сти, и҆ Си́лы, и҆ Гдⷭ҇тва: ты́ є҆сѝ ве́лїй и҆ ᲃтра́шный надъ всѣ́ми сꙋ́щими ѻ҆́крестъ тебѐ: ты́ є҆сѝ поста́вивый нб҃о ꙗ҆́кѡ кама́рꙋ: ты́ є҆сѝ сотвори́вый зе́млю въ крѣ́пости твое́й, и҆ испра́вивый вселе́ннꙋю въ премꙋ́дрости твое́й: сотрѧ́сꙋѧй поднебе́снꙋю ѿ ѡ҆снова́нїй, ᲃтолпы́ же є҆ѧ̀ неподви́жны творѧ́й: глаголѧ́й ᲃл҃нцꙋ и҆ не воꙁсїѧ́етъ, Звѣ́ꙁды же запечатлѣ́ѧй: запрѣща́ѧй мо́рю, и҆ и҆ꙁсꙋша́ѧй є҆̀: є҆гѡ́ же ꙗ҆́ростъ та́етъ Нача́ла и҆ Вла́сти, и҆ каменїе распадѡ́шасѧ ѿ тебѐ.

Вра́та мѣ́дѧнаѧ сте́рлъ є҆сѝ, и҆ ве́рїѧ желѣ́ꙁныѧ сокрꙋши́лъ є҆сѝ: крѣ́пкагѡ свѧꙁа́лъ є҆сѝ, и҆ сосꙋ́ды є҆гѡ̀ расхити́лъ є҆сѝ: мꙋчи́телѧ Крⷭ҇то́мъ свои́мъ ниꙁложи́лъ є҆сѝ, и҆ змїю̀ ᲂу҆́дицею вочл҃че́нїѧ твое́гѡ привле́клъ є҆сѝ, и҆ ᲂу҆́ꙁами мра́ка въ та́ртарѣ посади́въ свѧꙁалъ є҆сѝ: ᲃа́мъ Гд҃и ᲂу҆твержде́нїе на́тѧ наде́ждꙋ воꙁлага́ющихъ, и҆ крѣ́пкаѧ стѣ́но на́тѧ ᲂу҆пова́ющихъ, ѿстꙋпи́ти сотворѝ, ѿженѝ, и҆ въ бѣ́гство претворѝ всѧ́кое дїа́вол̾ское дѣ́йство, и҆ всѧ́кое сатани́нское нахожде́нїе, всѧ́кїѧ навѣ́ты сопроти́вныѧ, и҆ надлежа́щїѧ си́лы ѿ кро́ва ᲃегѡ̀, (и҆лѝ мѣ́ста сегѡ̀,) ѝ ѿ ѻ҆бходѧ́щихъ подъ ни́мъ, (и҆лѝ ѿходѧ́щихъ на не́мъ,) наꙁнамена́нїе стра́шнагѡ є҆́же на бѣсы̀ ѡ҆долѣ́нїѧ крⷭ҇та̀ твое́гѡ на себѣ̀ носѧ́щихъ, и҆ приꙁыва́ющихъ и҆мѧ̀ твоѐ бл҃го́е.

Е҆́й Гд҃и, легеѡ́на бѣ́сѡвъ ѿгна́вый, и҆ глꙋхо́мꙋ и҆ нѣмо́мꙋ бѣ́сꙋ, и҆ нечи́стомꙋ дꙋ́хꙋ ᲂу҆держа́вшомꙋсѧ, ѿ члове́ка и҆ꙁыйтѝ, и҆ и҆схо́дꙋ невоꙁвра́тнꙋ бы́ти повелѣ́вый: всѐ ѡ҆полче́нїе неви́димых врагѡ́въ на́шихъ сокрꙋши́вый, вѣ́рнымъ же и҆ поꙁна́вшимъ тебѐ рекі́й: Се даю̀ ва́мъ вла́сть, є҆́же настꙋпа́ти на ѕмїѧ̀ и҆ ᲃко́рпїѧ, и҆ на всю̀ ᲃи́лꙋ вра́жїю.

Са́мъ Влады́ко всѧ́кагѡ вре́да и҆ прило́га неприкоснове́нных всѣ́х сꙋ́щихъ въ домꙋ̀ ᲃе́мъ (и҆лѝ пребыва́ющих на мѣ́сте се́мъ) соблюдѝ, и҆ꙁба́влѧ́ѧ и҆́хъ ѿ стра́ха нощнагѡ, ѿ стрелы̀ летѧ́щїѧ въ днѝ, ѿ ве́щи въ тмѣ̀ преходѧ́щїѧ, ѿ срѧ́ща и҆ бѣ́са полꙋ́деннагѡ, ꙗ҆́кѡ да рабѝ твоѝ, и҆ рабы́нѧ твоѧ̀ и҆ младе́нци, твое́ѧ наслажда́ющесѧ по́мощи, и҆ А҆́гглⷭ҇кимъ во́инствомъ ѡ҆граждаеми, вси ꙗ҆́кѡ є҆ди́нъ въ є҆диномы́слїи вѣ́рнѡ тебѣ̀ воспо́ютъ: Гдⷭ҇ь мнѣ̀ помо́щникъ неꙋбою́сѧ зла̀ ꙗ҆́кѡ ты со мно́ю є҆сѝ: Ты́ бо є҆сѝ Бж҃е ᲂу҆твержде́нїе моѐ, крѣ́пкїй Властели́нъ, Кн҃ѕь ми́ра, Ѻ҆ц҃ъ бꙋ́дꙋщагѡ вѣ́ка, и҆ Црⷭ҇тво твоѐ вѣ́чное, и҆ тебѐ сама́гѡ є҆́стъ Црⷭ҇тво и҆ си́ла и҆ ᲃла́ва съ Ѿц҃ем, и҆ ᲃⷮ: Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

По се́мъ чте́тъ ѱал: ѯ҃з. Да воскрⷭ҇нетъ Бг҃ъ, и҆ раꙁы́йдꙋтсѧ вразѝ є҆гѡ̀.

И҆ Заклина́нїе ᲃі́е.

Заклина́ю ва́съ вселꙋка́вїи злонача́лници, проклѧ́тїи ме́рꙁскїи бе́сѡве, и҆́же а҆́ще кто̀ є҆стѐ, и҆ є҆ли́кѡ ва́съ є҆́стъ, и҆́же ѡ҆бава́нїѧми, чародѣ́йствы же и҆ злотво́рными дѣѧ́нїи ѿда́вшагѡ ᲃебѐ ва́мъ лꙋка́вагѡ чл҃ка приве́дени бы́вше, до́мъ се́й (и҆лѝ мѣ́сто сі́е,) ѡ҆бꙋрева́ете, и҆ злы́ми ме́чты и҆ ѡ҆пла́ꙁнъствы свои́ми, живꙋщимъ въ не́мъ (и҆лѝ на не́мъ,) ѡ҆скорблѧ́ете и҆ ѡ҆ꙁлоблѧ́ете, и҆ ѡ҆ всеси́лномъ и҆ всемо́щномъ И҆менѝ, є҆динагѡ вседержи́телѧ Бг҃а, въ Трⷪ҇ци ᲃто́й слави́магѡ, Ѿц҃а̀, и҆ Сн҃а, и҆ ᲃт҃а́гѡ Дх҃а, и҆ въ си́лѣ чⷭ҇тна́гѡ и҆ животворѧ́щагѡ Крⷭ҇та̀, и҆ всѣ́хъ ᲃп҃си́телныхъ Стрⷭ҇тїй, и҆ животво́рныѧ ᲃм҃рти Гд҃а Бг҃а и҆ ᲃп҃са на́шегѡ І҆и҃с Ха҃, є҆юже всѧ̀ те́мнаѧ ва́ша вла́сть, и҆ лю́тое надъ чл҃ки, и҆ всѣ́ми ᲃоꙁда́нїѧми Бж҃іими мꙋчи́телство и҆спраꙁдне́нно и҆ ѡ҆ничтоже́нно є҆́стъ, крѣ́пкѡ повелѣва́ю, ꙗ҆́кѡ да ѿ ны́нѣ со всѣ́ми волше́бствы ѡ҆бава́нїѧми и҆ чародѣ́йствы ва́шими ѿ до́мꙋ (и҆лѝ мѣ́ста) сегѡ̀ ско́рѡ ѿбѣжи́те, и҆ ктомꙋ̀ ника́коже нико́лиже воспѧ́тъ воꙁврати́тесѧ: ничто́же ᲂу҆́бѡ медли́те ѡ҆̀ проклѧ́тїи ниꙁверже́нници, но ѡ҆брати́тесѧ воспѧ́тъ, и҆ ско́рѡ ѿтꙋ́дꙋ съ всѣ́ми злодѣѧ́нїи ва́шими дале́че ѿбѣжи́те, и҆ дадѣ́те мѣ́сто Бж҃іей ᲃи́лѣ, свои́мъ неисче́тнымъ млⷭ҇рдїє҆мꙋ̀, и҆ блⷭ҇гтїю раꙁдрꙋша́ющей злодѣѧнїѧ ва́ша.

Да запрѣти́тъ ва́мъ Пе́рстъ Бж҃їй фараѡ́новыхъ во́лхвѡвъ ѡ҆баѧ́нїѧ и҆ волше́бнаѧ мечта́нїѧ беꙁдѣ́лны ᲃътвори́вый, и҆ тѣ́хъ мꙋ́чивый.

Да запрѣти́тъ ва́мъ то́й є҆го́же ᲃи́ла запрѣще́нїемъ Па́вла А҆пⷭ҇ла не́мощнꙋю ва́шегѡ лꙋка́вства ᲃи́лꙋ въ Е҆лли́мъ Во́лхвѣ всѧ́кїѧ ле́сти и҆ зло́бы и҆сполне́нномъ, вра́ꙁѣ же всѧ́кїѧ пра́вды и҆ дїа́волскомъ ᲃы́нѣ, и҆́мже вы мнѡ́гихъ поврежда́сте, и҆ пꙋ́ти Гдⷭ҇нѧ пра́выѧ раꙁвраща́ти потща́стесѧ, ѡ҆бличѝ, посрамѝ, и҆ и҆спраꙁнѝ.

Да запрѣти́тъ ва́мъ то́й ѡ҆ є҆го́же И҆менѝ Па́вла А҆пⷭ҇ла запрѣще́нїемъ дꙋ́ха пытли́вагѡ ѿ ѻ҆трокови́ци ѡ҆́ныѧ и҆ꙁгна̀, ꙗ҆́же волше́бствомъ ᲃвои́мъ тѧжа́нїе ве́лїе даѧ́ше Го́сподемъ свои́мъ. И҆ ꙗ҆́коже на ᲃт҃ꙋ́ю І҆ꙋсти́нꙋ Крⷭ҇та̀ зна́менїемъ и҆ на не́мъ Распѧ́тагѡ Ха҃ Бг҃а на́шегѡ ᲃи́лою ѡ҆гражде́нною, ѡ҆бава́ющꙋ и҆ ва́съ ᲂу҆бѣжда́ющꙋ Кѵпрїа́нꙋ, ничто́же ᲂу҆спѣ́сте но стра́хѡмъ и҆ тре́петомъ ѡ҆держи́ми ѿбѣго́сте:

Си́це и҆ ны́нѣ да нападе́тъ на ва́съ и҆ ѡ҆бы́йметъ вы ᲂу҆жа́съ, тре́петъ, и҆ стра́хъ Бг҃а вседержи́телѧ, Ѻ҆ц҃а̀, и҆ ᲃн҃а, и҆ ᲃта́гѡ Дх҃а, хотѧ́щагѡ ва́съ ниꙁринꙋти въ ѻ҆́гнь вѣ́чный, и҆ беꙁконе́чнѡ въ не́мъ мꙋ́чити, А҆ми́нь.

Вꙁе́мъ же сщ҃еннꙋю во́дꙋ, кро́питъ ве́сь до́мъ, и҆лѝ мѣ́сто, гл҃ѧ̀:

Да ѡбѣ́гнꙋтъ и҆ ѿстꙋ́пѧтъ ѿ до́мꙋ (и҆лѝ мѣ́ста) ᲃегѡ̀, всѧ̀ лꙋка́ваѧ дїа́волскаѧ ѡ҆бава́нїѧ, чародѣѧ́нїѧ, и҆ волше́бнаѧ дѣ́йства, ѡ҆кропле́нїемъ воды̀ сеѧ̀ ᲃщ҃енныѧ, и҆ въ ничто́же да ѡ҆братѧ́тсѧ и҆ и҆ще́ꙁнꙋтъ, въ и҆мѧ̀ Ѿц҃а̀, и҆ ᲃн҃а, и҆ ᲃт҃а́гѡ Дх҃а, А҆ми́нь.

По си́хъ тво́ритъ ѡ҆бы́чный дне́вный ѿпꙋ́стъ: и҆ ѿхо́дѧт въ своѧ́ си.