Вослѣдова́нїе Мл҃тве́нное въ вре́мѧ гꙋби́телнагѡ Мо́ра ᲃко́тѡвъ, и҆́же и҆лѝ Бж҃іимъ попꙋще́нїемъ грѣ́хъ ра́ди на́шихъ, и҆лѝ множестве́ннѣе злохи́трїемъ дїа́волскимъ чре́ꙁъ лꙋка́выхъ чл҃къ чародѣѧ́нїѧ быва́етъ

І҆ере́ѵ꙼ ᲂу҆́бѡ въ пе́рвыхъ повелѣва́ет люде́мъ ѡ҆́нымъ и҆́хже ᲃкѡ́ты ᲂу҆мира́ютъ, чи́ннѡ ѿ всѣ́хъ грѣхѡ́въ свои́хъ и҆сповѣдатисѧ, и҆ поели́кꙋ мо́щнѡ млⷭ҇тиню къ ни́щимъ твори́ти, и҆ дн҃ь є҆ди́нъ пре́жде съверше́нїѧ вослѣдова́нїѧ сегѡ̀ по́стити, и҆ въ мл҃твахъ па́че и҆́ных дне́хъ ᲂу҆пражднѧ́тисѧ.

Са́мъ же І҆ере́ѵ꙼ чи́стою ᲃо́вѣстїю, вѣ́рою тве́рдою, и҆ є҆диноде́ннымъ по́стомъ въѡ҆рꙋже́нъ ᲃы́й и҆ ᲃлꙋ́жбꙋ Бжⷭ҇тве́ннꙋю съверши́въ, прихо́дитъ на мѣ́сто и҆де́же скѡ́ты не́дꙋжныѧ сꙋ́тъ, и҆ вꙁе́мъ на ᲃебѐ Е҆пітра́хиль, начина́етъ ѡ҆бы́чнѡ:

Блⷭ҇ве́нъ Бг҃ъ на́шъ: Цр҃ю нбⷭ҇ный: Трⷭ҇то́е: Ѻ҆ч҃е на́шъ: Гд҃и поми́лꙋй, в҃і.

Сла́ва: И҆ ны́нѣ:

Прїйдѣ́те поклон: гⷤ. и҆ ѱало́мъ ѯ҃ѳ: Бж҃е въ по́мощъ мою̀ вонмѝ:

По се́мъ и҆мѣ́ѧ пре́дъ собо́ю всѧ̀ недꙋ́жныѧ ᲃкѡ́ты, зрѧ̀ къ восто́кѡмъ, и҆ ре́къ:

Гд҃ꙋ помоли́мсѧ. и҆ Гд҃и поми́лꙋй.

Чте́тъ над ни́ми Мл҃твꙋ ᲃі́ю.

Гд҃и Бж҃е на́шъ, Бж҃е си́лный и҆ крѣ́пкїй, и҆мѣ́ѧй вла́стъ живота̀ и҆ см҃рти, и҆ чл҃ки и҆ ᲃкѡ́ты сп҃са́ѧй, и҆ ско́рѡ послꙋша́ѧй всѣ́хъ вѣ́рою приꙁыва́ющихъ тѧ, и҆ проше́нїѧ и҆́хъ млⷭ҇твнѡ и҆сполнѧ́ѧй:

Тебѣ̀ мы недосто́йнїи рабѝ твоѝ припада́юще вѣ́рою смире́ннѡ въ се́рдци ᲃкрꙋше́нном моли́мсѧ, и҆ ми́лисѧ дѣ́емъ:

При́ꙁри млⷭ҇тивнѡ на ᲃкѡ́ты сі́ѧ, тѧ́жкимъ не́дꙋгомъ, и҆ лю́тою бо́лѣꙁнїю ѡ҆держи́мыѧ, и҆ ᲃи́лою твое́гѡ блⷭ҇ве́нїѧ ᲃко́рѡ сі́ѧ и҆сцѣлѝ, и҆ погаша́ѧ пла́мень внꙋ́трнѧѧ и҆́хъ жгꙋ́щїй, и҆ ᲂу҆толѧ́ѧ бо́лѣꙁнь, во́ꙁдꙋха злораство́рное гꙋбѧ́щїѧ и҆́хъ, въ бл҃горастворе́нїе претворѝ: и҆ всѐ є҆́же а҆́ще что̀ въ ни́хъ, и҆лѝ ѡ҆ни́хъ є҆́стъ, ѿ лꙋка́вагѡ бѣсо́вскагѡ дѣ́йства, чародѣѧ́нїемъ, ѡ҆бава́нїемъ, и҆лѝ и҆́нымъ кои́мъ волше́бнымъ злохи́трїемъ, и҆ наси́лїемъ дїа́волскимъ наноси́мое и҆́мъ зло̀, ѿженѝ: и҆ дарꙋ́й и҆́мъ живо́тъ, и҆ здра́вїѧ вра́чевствѡ, ни́щихъ ра́ди вѣ́рныхъ же люді́й твои́хъ, на́ми къ тебѣ̀ вопїю́щихъ, и҆ млⷭ҇ть ѿ твое́ѧ блгⷭ҇ти просѧ́щих: Мл҃твами Прчⷭ҇тыѧ влады́чицы на́шеѧ Бц҃а, и҆ прⷭ҇нѡ Дв҃ы Мр҃іѧ:

Си́лою чⷭ҇тна́гѡ и҆ животворѧ́щагѡ Крⷭ҇та̀: предста́телствомъ нбⷭ҇ных ᲃи́лъ беꙁпло́тныхъ, чⷭ҇тна́гѡ и҆ сла́внагѡ Прⷪ҇рка Предте́ча и҆ Крⷭ҇тлѧ І҆ѡа́нна, ᲃт҃ы́хъ сла́вныхъ и҆ всехва́лныхъ А҆пⷭ҇лъ: ᲃт҃ы́хъ и҆ добропобѣ́дныхъ Мч҃никъ: ᲃт҃ы́хъ беꙁме́ꙁдныхъ вра́чевъ Кѡ́ꙁмы и҆ Дамїа́на, Кѵ́ра І҆ѡа́нна, Пантелеи́мона, и҆ всѣ́хъ ᲃт҃ы́хъ твои́хъ.

Ты́ бо є҆сѝ и҆сто́чникъ живота̀, и҆ жи́ꙁни пода́тель, и҆ чл҃ки и҆ скѡ́ты ᲃп҃са́ѧй, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

По се́мъ а҆́бїе чте́тъ ѱало́м, л҃е.

Речѐ законопрестꙋ́пный, є҆́же согрѣша́ти въ себѣ̀:

По ѱалмѣ́ же а҆́ще є҆́стъ подꙁо́ръ ꙗ҆́кѡ ѡ҆чародѣѧ́ны ᲃꙋ́ть ᲃкѡ́ты, чте́тъ и҆ предидꙋ́щꙋю Мл҃твꙋ, и҆ Заклина́нїе, и҆ всѧ̀ про́чаѧ до конца̀.

А҆́ще же ни є҆ди́нагѡ подꙁо́ра и҆́матъ ѡ҆ чародѣѧ́нїѧхъ, минꙋ́въ Мл҃твꙋ и҆ заклина́нїе, а҆́бїе кро́питъ ᲃщ҃е́нною водо́ю, гл҃ѧ̀ всѧ̀ преднапи́саннаѧ по заклина́нїю.

А҆́ще же І҆ере́ѵ꙼ и҆ꙁво́литъ, мо́жетъ и҆ всѧ̀ сі́ѧ прочестѝ.

Ре́къ же Гд҃ꙋ помоли́мсѧ. и҆ Гд҃и поми́лꙋй.

Чте́тъ Мл҃твꙋ сі́ю.

Гд҃и І҆и҃с Хє҃ Бж҃е на́шъ, ᲃовѣ́томъ Превѣ́чнагѡ ти Ѿц҃а̀, и҆ спрⷭ҇носꙋ́щнагѡ ти Дх҃а, млⷭ҇рдїѧ ра́ди млⷭ҇ти и҆ є҆́же къ чл҃кѡмъ неиꙁрече́нныѧ любвѐ съ нб҃съ съше́дый, и҆ дѣ́йствомъ Прⷭ҇та́гѡ Дх҃а ѿ Прчⷭ҇ты́ѧ Дв҃ы Мрі҃ѧ въплоти́выйсѧ, и҆ чл҃къ съверше́нный, Бг҃ъ сы́й и҆́стинный бы́вай, ꙗ҆́кѡ да дїа́волскꙋю всю̀ и҆спраꙁдни́ши си́лꙋ, и҆ ѿ мꙋчи́телства є҆гѡ̀ съꙁда́нїе своѐ свободи́ши, ᲃт҃ы́мъ свои́мъ Ꙋ҆́чникѡмъ и҆ А҆пⷭ҇лѡмъ, и҆ тѣ́ми дрꙋгопрїйма́телнѣ всѣ́мъ вѣ́рнымъ твои́мъ, па́че же І҆ере́ѡмъ вла́ст̾ да́лъ є҆сѝ, є҆́же настꙋпа́ти на ѕмїѧ̀ и҆ ско́рпїѧ, и҆ на всю̀ си́лꙋ вра́жїю, и҆ є҆́же ѿ соꙁда́нїѧ твое́гѡ и҆ꙁгонѧ́ти бѣ́сы:

Тебѐ ны́нѣ недосто́йнїи рабѝ твоѝ приле́жнѡ мл҃и́мъ, при́ꙁри на ᲃъꙁда́нїе твоѐ сі́е, и҆́хъ ѡ҆бава́нїемъ ѡ҆чародѣѧ́ное, ѡ҆бꙋрева́нїемъ же и҆ наси́лствомъ дїа́волимъ ги́бнꙋщее, и҆ всемо́щною ти си́лою чл҃кѡлю́бнѡ всѧ̀ волше́бства и҆ злодѣѧ́нїѧ сі́ѧ, и҆ ѡ҆бꙋрева́нїѧ злонача́лнагѡ вра́га ѿ не́гѡ ѿженѝ, и҆ въ ничто́же ѡ҆брати, и҆ дарꙋ́й и҆́мъ ꙗ҆́кѡ живота̀ и҆сто́чникъ здра́вїе, ꙗ҆́кѡ да и҆ въ беꙁслове́сных твоѐ бл҃годѣѧ́нїе ꙗ҆ви́тсѧ, въ слове́сныхъ же вѣ́рныхъ рабѣ́хъ твои́хъ твое́гѡ млⷭ҇рдїѧ на́ми и҆́щꙋщихъ, твоѐ всест҃о́е и҆ великолѣ́пое И҆мѧ̀ ᲃла́витсѧ, съ беꙁнача́лнымъ ти Ѿц҃емъ и҆ со прⷭ҇тымъ, и҆ бл҃гимъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

Вꙁе́мъ же блⷭ҇ве́нный Ѳѵмїамъ, влага́етъ є҆гѡ̀ на ѻ҆́гнь сꙋ́щїй въ чи́стомъ съсꙋ́дѣ, и҆ полага́етъ є҆гѡ̀ ме́ждꙋ ᲃкѡ́ты ѿ вѣ́трꙋ, є҆́же всѣ́мъ ско́тѡмъ ѡ҆бонѧ́ти во́ню є҆гѡ̀, и҆ чте́тъ ѱало́мъ, ѯ҃з.

Да воскрⷭ҇нетъ Бг҃ъ, и҆ раꙁы́йдꙋтсѧ враꙁѝ є҆гѡ̀.

По ѱалмѣ́ же чте́тъ Заклина́нїе сі́е.

Заклина́ю ва́съ вселꙋка́вїи злонача́л̾ници дре́внїи змі́еве, проклѧ́тїи же и҆ ме́рꙁкїи бѣ́сове, и҆́же а҆́ще кто̀ є҆ста̀, и҆ є҆ли́кѡ ва́съ є҆́стъ, и҆́же ѡ҆бава́нїами чародѣ́йствы же и҆ злоко́ꙁными дѣѧ́нїи ѿда́вшагѡ себѐ ва́мъ лꙋка́вагѡ чл҃ка приведе́ни бы́вше, соꙁда́нїе сі́е Бж҃іе ѡ҆бꙋрева́ете, и҆ лю́тымъ свои́мъ мꙋчи́тел̾ствомъ погꙋблѧ́ете, и҆ всеси́лнымъ и҆ всемо́щнымъ И҆́менемъ є҆ди́нагѡ вседержи́телѧ Бг҃а, въ Трⷪ҇ци ᲃт҃о́й ᲃлави́магѡ, Ѿц҃а, и҆ Сн҃а, и҆ ᲃт҃а́гѡ Дх҃а, и҆ въ си́лѣ чⷭ҇тнагѡ и҆ животворѧ́щагѡ Крⷭ҇та̀, и҆ всѣ́хъ ᲃп҃си́телныхъ Стрⷭ҇тїй и҆ животво́рныѧ см҃рти Гд҃а Бг҃а и҆ ᲃп҃са на́шегѡ І҆и҃с Ха҃, є҆ю́ же всѧ̀ те́мнаѧ ва́ша вла́ст̾, и҆ лю́тое надъ чл҃ки и҆ всѣ́ми соꙁда́нїѧми Бж҃іими мꙋчи́телствѡ и҆спра́ꙁненнѡ, и҆ ѡ҆ничтоже́ннѡ є҆́стъ, крѣ́пкѡ повелѣва́ю, ꙗ҆́кѡ да ѿ ны́нѣ съ всѣ́ми волше́бствы ѡ҆бава́нїѧми и҆ чародѣ́йствы ва́шими ѿ съꙁда́нїѧ сегѡ̀ Бж҃іѧ ско́рѡ ѿбѣжитѐ, и҆ ктомꙋ̀ ника́коже нико́лиже воспѧ́тъ воꙁврати́тесѧ.

Ничто́же ᲂу҆́бѡ медли́те ѡ҆̀ проклѧ́тїи ниꙁверже́нници, но ѡ҆братитесѧ воспѧ́тъ, и҆ ᲃкѡ́рѡ ѿтꙋ́дꙋ съ всѣ́ми злодѣѧ́нїи ва́шими дале́че ѿбѣжи́те, и҆ дадѣ́те мѣ́сто Бж҃ей си́ле, свои́мъ неисче́тнымъ млⷭ҇рдїемъ и҆ блгⷭ҇тїю раꙁдрꙋша́ющей злодѣѧ́нїѧ ва́ша.

Да запрѣти́тъ ва́мъ Пе́рстъ Бж҃ій, фараѡ́новыхъ во́лхвѡвъ ѡ҆баѧ́нїѧ, и҆ волше́бнаѧ мечта́нїѧ беꙁдѣ́лны сътвори́вый, и҆ тѣ́хъ мꙋ́чивый.

Да запрѣти́тъ ва́мъ то́й є҆го́ же ᲃи́ла запрѣще́нїемъ Па́вла А҆пⷭ҇ла, не́мощнꙋю вш҃гѡ лꙋка́вства ᲃи́лꙋ въ Е҆лли́мѣ во́лхвѣ, всѧ́кїѧ ле́сти и҆ злобы̀ и҆сполне́нномъ вра́ꙁѣ же всѧ́кїѧ пра́вды, и҆ дїа́волскомъ ᲃы́нѣ, и҆́мже вы мнѡ́гих поврежда́сте, и҆ пꙋ́ти Гнⷭ҇ѧ пра́выѧ раꙁвраща́ти потща́стесѧ, ѡ҆бличѝ, посрамѝ, и҆ и҆спраꙁнѝ.

Да запрѣти́тъ ва́мъ то́й, ѡ҆ є҆го́же И҆менѝ того́жде Па́вла А҆пⷭ҇ла запрѣще́нїе, дꙋ́ха пытли́вагѡ ѿ ѻ҆трокови́ци ѡ҆́ныѧ и҆ꙁгна̀, ꙗ҆́же волше́бствомъ ᲃвои́мъ тѧжа́нїе ве́лїе даѧ́ше го́сподемъ свои́мъ.

И҆ ꙗ҆́коже на ᲃт҃ꙋ́ю І҆ꙋсти́нꙋ, Крⷭ҇та̀ зна́менїемъ, и҆ на не́мъ Распѧ́тагѡ Ха҃ Бг҃а на́шегѡ ᲃи́лою ѡ҆гражде́нною ѡ҆бава́ющꙋ Кѵпрїа́нꙋ, ничто́же ᲂу҆спѣ́сте, но стра́хѡмъ и҆ тре́петомъ ѡ҆держи́ми ѿбѣгѡ́сте:

Си́це и҆ ны́нѣ да нападе́тъ на ва́съ и҆ ѻ҆бы́йметъ вы ᲂу҆жа́съ, тре́петъ, и҆ стра́хъ Бг҃а вседержи́телѧ, Ѿц҃а̀, и҆ Сн҃а, и҆ ᲃт҃а́гѡ Дх҃а, хотѧ́щагѡ ва́съ ниꙁринꙋ́ти въ ѻ҆́гнь вѣ́чный, и҆ беꙁконе́чнѡ въ не́мъ мꙋ́чити, А҆ми́нь.

По се́мъ вꙁе́мъ І҆ере́ѵ꙼ ᲃвѧще́ннꙋю во́дꙋ, кро́питъ є҆́ю всѧ̀ ᲃкѡ́ты, гл҃ѧ̀:

Да ᲂу҆га́снетъ и҆ прогони́ма бꙋ́детъ всѧ́каѧ бо́лѣꙁнь и҆ не́дꙋгъ, и҆ всѐ лꙋка́вое бѣсо́вское дѣ́йствѡ ѿ ско́тѡвъ ᲃи́хъ, ѡ҆кропле́нїемъ ᲃщ҃енныѧ сеѧ̀ воды̀, въ И҆мѧ̀ Ѻ҆ц҃а̀, и҆ ᲃн҃а, и҆ ᲃт҃а́гѡ Дх҃а, А҆ми́нь.

И҆ кро́питъ всѐ мѣ́сто и҆де́же ᲃкѡ́ты ѡ҆бита́ютъ, и҆ сѣ́но є҆́же ꙗ҆дѧ́тъ, поѧ̀ Бг҃оро́диченъ:

Пода́ждъ ᲂу҆тѣше́нїе свои́мъ рабѡ́мъ:

И҆ быва́етъ Ѿпꙋ́стъ ѻ҆бы́чный дне́вный.

Подоба́етъ вѣ́дати, ꙗ҆́кѡ на всѧ́къ дн҃ь си́цевымъ ско́тѡмъ не́дꙋжнымъ въ водѣ̀ є҆гда̀ напаѧ́ютъ ѧ҆̀, ѿ воды̀ сщ҃енныѧ влѣѧ́ти потре́ба, и҆ сѣ́но кропи́ти, и҆ со́ль блⷭ҇веннꙋю ᲃщ҃енническою Мл҃твою къ ꙗ҆де́нїю подава́ти, наде́ждꙋ и҆мѣ́юще въ Гд҃а ꙗ҆́кѡ и҆сцѣли́тъ ѧ҆̀, и҆ бꙋ́детъ та́кѡ.