Послѣдова́нїе Лѣ́тнагѡ ѡ҆бхожде́нїѧ ѻ҆свѧще́нїѧ Це́ркве

Вѣ́стнѡ бꙋ́ди, ꙗ҆́кѡ де́нь во́н̾же ѡ҆сщ҃а́етсѧ Це́рковъ Вели́кимъ ѡ҆сщенїемъ А҆рхїере́ѵ꙼скимъ, подоба́етъ всѧ́кѡ всѣ́мъ Парохїа́номъ тоѧ̀ Цркве, (а҆́ще же въ Монастырѝ Бра́тїѧмъ) въ ко́йждѡ го́дъ, ꙗ҆́коже и҆ Пра́ꙁдникъ Хра́ма Праꙁднова́ти, въ то́й бо де́нь ᲃъни́тїе ᲃт҃а́гѡ Дх҃а на ᲃт҃ꙋ́ю Тра́пеꙁꙋ бы́стъ. Быва́етъ ᲂу҆́бѡ Всено́чное бдѣ́нїе съ ве́чера си́це.

На малѣй Вече́рни поста́вимъ Стіхи́ры д҃. Гла́съ, а҃.

Благослови́вый Гд҃и хра́мъ ᲃе́й, и҆ благода́тїю ᲃт҃а́гѡ тѝ Дх҃а ѡ҆ст҃и́вый тогѡ̀, благословѝ и҆ на́съ вѣ́рнѡ ѡ҆бновле́нїе є҆гѡ̀ лѣ́тное праꙁднꙋ́ющихъ, и҆ всегда̀ въ не́мъ ѿда́емыѧ тебѣ̀ ѿ на́съ мо́л̾бы прїимѝ, и҆ ꙗ҆́кѡ ще́дръ поми́лꙋй на́съ. вⷤ.

До́мꙋ твое́мꙋ подоба́етъ ᲃт҃ы́ни въ долготꙋ̀ дне́й Гд҃и, ᲃего̀ ра́ди благоче́стнѡ воспомина́нїе ѡ҆сщ҃енїѧ сегѡ̀ твое́гѡ хра́ма праꙁднꙋ́юще, мо́лимъ, ᲂу҆твердѝ и҆ сохранѝ є҆гѡ̀ въ вѣ́ки непоꙁыбле́мѡ, и҆ въ не́мъ тебѐ ᲃлавѧ́щихъ поми́лꙋй, и҆ ᲃпасѝ дш҃ѧ на́шѧ ꙗ҆́кѡ чл҃кѡлю́бецъ.

Наше́ствїе Дх҃а ᲃт҃а́гѡ благода́ти, ѡ҆ст҃и́ло є҆́стъ хра́мъ се́й, и҆ до́мъ Бж҃ій бы́ти сътвори́ло є҆́стъ, тѣ́мъ благода́рнѡ Бг҃а въ Трⷪ҇ци є҆ди́нагѡ славѧ́ще покланѧ́емсѧ вѣ́рнїи, гл҃ю́ще:

ᲃт҃ъ є҆сѝ Ѿч҃е беꙁънача́лный,

ᲃт҃ъ є҆сѝ ᲃн҃е Ѿц҃ꙋ̀ и҆ Дх҃ви є҆диносꙋ́щне,

ᲃт҃ъ є҆сѝ и҆ Дш҃е ᲃт҃ы́й, Ѿц҃ꙋ̀ и҆ ᲃн҃ꙋ съпрⷭ҇нѡсꙋ́щне, и҆ сопресто́лне,

Трⷪ҇це ᲃт҃а́ѧ Бж҃е на́шъ ᲃла́ва тебѣ̀.

Сла́ва: Гла́съ, є҃.

Прїйдѣ́те вѣ́рныхъ ᲃосло́вїе, прїйдѣ́те, и҆ ликъ съста́вимъ, въ лѣ́тномъ ᲃе́мъ торжестве́нномъ пра́ꙁдницѣ, дх҃о́вно торжествꙋ́юще, и҆ пѣ́сн̾мѝ просла́вимъ благодѣ́телѧ на́шегѡ Бг҃а, на землѝ въ хра́мѣ ᲃе́мъ невиди́мо жи́ти и҆ꙁволи́вшагѡ, и҆ смире́ннѡ къ не́мꙋ воꙁопі́имъ.

Ꙋ҆слы́ши моле́нїѧ и҆ мо́л̾бы рабѡ́въ свои́хъ вѣ́рнѡ тебѣ̀ зде молѧ́щихсѧ, и҆ хра́мъ се́й ѿ всѧ́кагѡ зла́гѡ ѡ҆бстоѧ́нїѧ въ вѣ́ки сохранѝ, подаѧ̀ на́мъ ѡ҆би́л̾нꙋю твою̀ благода́ть, и҆ ве́лїю ми́лость.

И҆ ны́нѣ:

Хра́мꙋ, а҆́ще є҆́стъ Богород: а҆́ще ли нѝ, пое́мъ се́й Догма́тикъ Гла́съ тожъ.

Хра́мъ и҆ Вра́та є҆сѝ, Пола́та и҆ Прⷭ҇тлъ Цр҃евъ, Дв҃о всекра́силѧ, є҆ю́ же И҆ꙁбави́тель мо́й Хᲃ҃ Гд҃ь, въ тмѣ̀ сѣдѧ́щимъ ꙗ҆ви́сѧ, ᲃо́лнце сы́й пра́вды, просвѣти́ти хотѧ̀, ꙗ҆́же ᲃоꙁда̀ по ѻ҆́браꙁꙋ свое́мꙋ, рꙋко́ю свое́ю, тѣ́мъ всепѣ́таѧ, ꙗ҆́кѡ Мт҃рне дерꙁнове́нїе къ не́мꙋ ᲃтѧжа́вшаѧ, непреста́ннѡ молѝ, ᲃпасти́сѧ дꙋша́мъ на́шимъ.

По Свѣ́те ти́хїй Проки́менъ дне́ви, и҆ Сподобѝ Гд҃и въ ве́чер: Беꙁъ Е҆кте́нїѧ.

На ᲃтіхъ: ᲃтіхи́ры Гла́съ, въ҃. Подо́бенъ До́ме є҆фраѳꙍ́въ:

Ꙍ҆ст҃и́вый Хра́мъ ᲃе́й Гд҃и, Дх҃омъ твои́мъ ᲃт҃ы́мъ, ѡ҆ст҃ѝ и҆ на́шѧ помышле́нїѧ, да чⷭ҇тою со́вѣстїю въ не́мъ тебѐ славѧ́ще, ѡ҆брѧ́щемъ ве́лїю ми́лость.

Сті́хъ.

До́мꙋ твое́мꙋ подоба́етъ ᲃт҃ы́ни Гд҃и въ долготꙋ̀ дні́й.

Благодаре́нїѧ и҆ мо́л̾бы, въ хра́мѣ се́мъ тебѣ̀ приноси́мыѧ Хє҃, млⷭ҇тивнѡ прїймѝ, и҆ ꙗ҆́кѡ бл҃гі́й чл҃кѡлю́бецъ, ниꙁпослѝ на́мъ ве́лїю ми́лость.

Сті́хъ.

Бг҃ъ посре́дѣ є҆гѡ̀, и҆ не подви́житсѧ.

Ꙍ҆сщ҃енїе хра́ма сегѡ̀, неѿе́млемѡ въ вѣ́ки сохранѝ Хє҃, и҆ꙁбавлѧ́ѧ є҆гѡ̀, ѿ всѣ́хъ прило́гѡвъ вра́жїихъ, и҆ ми́лостивнѡ спаса́ѧ дш҃а̀ нш҃а.

Сла́ва: Гла́съ тожъ.

Прострѝ рꙋ́кꙋ твою̀ Хє҃ Бж҃е, и҆ блⷭ҇вѝ вѣ́рнѡ тѧ въ хра́мѣ се́мъ славѧ́щихъ, и҆ любо́вїю приꙁыва́ющихъ тѧ̀, проше́нїѧ и҆сполнѝ, ꙗ҆́кѡ чл҃кѡлю́бецъ.

И҆ ны́нѣ:

Бг҃оро́диченъ:

Ро́ждшаѧ мі́рови ᲃп҃са и҆ Гд҃а, тогѡ̀ приле́жнѡ мл҃ѝ, въ хра́мѣ се́мъ ᲃт҃о́мъ, томꙋ̀ вѣ́рнѡ слꙋжа́щихъ, и҆ꙁба́вити и҆ ᲃпастѝ ѿ всѧ́кагѡ зла̀.

А҆́ще же Бг҃оро́д: Храмъ, пое́мъ И҆ ны́нѣ: Хра́мꙋ. По Ны́нѣ ѿпꙋща́єши Троп: А҆́ще приклю́читсѧ въ Нєд: Воскрⷭ҇ный. А҆́щеж Гдⷭ҇кїй Пра́ꙁд: пе́рвѣе Пра́ꙁд: пото́мъ Ꙍ҆бновле́нїю. Та́жъ Бг҃оро́диченъ Гла́сꙋ. Троп: Ѻбновле́н: зрѝ на пре́дѣ по Вели́цѣй вече́рни.

По си́хъ Е҆кте́нїа ѡ҆бы́чнаѧ, и҆ Ѿпꙋ́стъ се́й:

Ниꙁпосла́вый Прⷭ҇та́гѡ ᲃвое́гѡ Дх҃а благода́ть на Хра́мъ и҆ Жерто́вникъ се́й, и҆ ѡ҆ст҃и́вый є҆гѡ̀ въ жи́лище себѣ̀, ᲃпⷭ҇нїѧ на́шегѡ ра́ди, Хᲃ҃ и҆́стинный:

А҆́ще є҆́стъ Недѣ́лѧ, по Блгⷭ҇вѝ дш҃е моѧ̀ Гд҃а. Чте́тсѧ Каѳ: а҃, всѧ̀.

На Гд҃и воꙁва́хъ: поста́вимъ ᲃтіхъ, і҃. И҆ поє́мъ ᲃт҃хи́ръ Въскрⷭ҇ныхъ, ѕ҃. Ѻ҆бновле́нїю же, д҃.

Сла́ва:

Ѻ҆бновле́нїю.

И҆ ны́нѣ:

Догма́тикъ настоѧ́щагѡ Гла́са.

И҆ по Свѣ́те ти́хїй: Проки́менъ Гд҃ь въцари́сѧ:

Пари́мїѧ Ѻ҆бновле́нїю, г҃. Литїѧ Ѻ҆бновле́нїю.

А҆́ще же є҆́стъ Пра́ꙁдникъ како́вый,

Сла́ва: Пое́тсѧ Праꙁ:

И҆ ны́нѣ: Бг҃оро́диченъ:

По семꙋ̀ ᲂу҆ста́вꙋ и҆ въ Гдⷭ҇кїй Праꙁ: а҆́ще приклю́читсѧ ѡ҆бновле́нїе Хра́ма Вечернѧ да соверша́етсѧ, ра́ꙁвѣ то́чїю, да є҆дина̀ Пе́рвой Каѳ: чте́тсѧ Сла́ва: Паримі́ѧ же г҃ Праꙁ: и҆ г҃ Ѻ҆бновле́нїю. На Лѵті́и ᲃт́хи́ры г҃, и҆лѝ в҃, Праꙁ: и҆ Ѻ҆бновле́нїю. Та́кожде

Сла́ва:

Ѻ҆бновле́нїю.

И҆ ны́нѣ:

Праꙁ:

На Стіх: ᲃтіхи́ры Праꙁ:

Сла́ва:

Ѻ҆бновле́нїю.

И҆ ны́нѣ:

Праꙁ:

А҆́ще же въ и҆́нъ де́нь кро́мѣ Нед: и҆ Гдⷭ҇кагѡ Праꙁ: соверше́нїе приклю́читсѧ ѻ҆бновле́нїѧ, по ѡ҆бы́чномъ нача́лѣ бдѣ́нїѧ, и҆ по Блⷭ҇ви дш҃е моѧ̀ Гд҃а: Чте́тсѧ є҆дина Сла́ва а҃, Каѳ:

На Гд҃и воꙁва́хъ: поста́вимъ ᲃт́хи́ръ Ѻ҆бновле́нїю, и҃.

И҆ та́кѡ пое́тсѧ Слꙋ҆жба всѧ̀ Ѻ҆бновле́нїю то́чїю. Въ Ѻ҆ктѡ́ихꙋ же и҆ въ М҆ине́и ничто́же пое́мъ, ꙗ҆́коже и҆ въ Гдⷭ҇кїй Пра́ꙁдникъ.

Ѻ҆бновле́нїѧмъ почита́емымъ бы́ти, Ве́тхїй За́конъ до́брѣ ᲃодержа́ше, въ Но́вой же Благода́ти па́че ѻ҆бновле́нїѧмъ бы́ти подоба́етъ, ѻ҆бновлѧ́ютъ бо сѧ ѻ҆́строви къ Бг҃ꙋ, ꙗ҆́коже речѐ И҆са́їѧ, є҆́же раꙁꙋмѣ́ти подоба́етъ ѿ ꙗ҆ꙁы́къ церква́мъ ны́нѣ ᲂу҆стро́еннымъ, и҆ ѡ҆снова́нїе прїе́млющимъ тве́рдое Хрⷭ҇то́мъ Бг҃омъ, на не́мъ же ꙗ҆́кѡ на неꙁибле́момъ краеꙋго́лномъ ка́мени соꙁида́ютсѧ. Тѣ́мъ и҆ мы̀ настоѧ́щаѧ Хра́ма ᲃегѡ̀ ѡ҆бновле́нїѧ дх҃о́внѣ торжествꙋ́юще, просла́вимъ Ха҃, ᲃи́цевой благода́ти на́съ ᲃподоби́вшагѡ.

Ꙍ҆бновлѧ́имсѧ бра́тїе, и҆ ве́тхагѡ чл҃ка съ стра́стми и҆ по́хот̾мѝ є҆гѡ̀ ѿло́жше, въ но́вости жи́ꙁни поживѣ́мъ, въ но́вагѡ чл҃ка, въ живо́тъ на́съ вѣ́чный ѡ҆бновлѧ́ющагѡ Ха҃ ѡ҆бле́кшесѧ, всѣ́мъ ᲂу҆ꙁдꙋ̀ воꙁло́жимъ, ѿ ни́хъ же сме́рть, всѧ̀ ᲂу҆́ды нака́жимъ и҆ всѧ́кꙋю лꙋка́вꙋю дре́ва снѣ́дь воꙁненави́димъ, и҆ ѻ҆бновле́нїе є҆́же чре́ꙁъ креще́нїе всегда̀ помина́юще, дре́внихъ злы́хъ ѿбѣ́жимъ, та́кѡ бо ѻ҆бновлѧ́етсѧ члове́къ, и҆ си́це почита́етсѧ ѻ҆бновле́нїѧ де́нь.

Положи́лъ є҆сѝ ᲃто́лпъ крѣ́пости Це́ркви твое́й Хє҃, Превѣ́чный ᲃло́ве, ѡ҆снова́лъ бо ю҆̀ є҆сѝ на ка́мени и҆́стинныѧ твое́ѧ вѣ́ры, и҆ сегѡ̀ ра́ди непоꙁибле́ма пребыва́етъ въ вѣ́ки, и҆́матъ бо тебѐ сама́гѡ Въплоще́ннагѡ Бг҃а, ны́нѣ и҆ въ послѣ́днѧѧ днѝ, ѡ҆снова́нїе и҆ гла́вꙋ, тѣ́мъ благода́рнѡ хвалѧ́ще тѧ гл҃емъ, Ты́ є҆сѝ пре́жде вѣ́къ сы́й, и҆ на вѣ́ки, и҆ є҆щѐ, Цр҃ъ и҆ Бг҃ъ на́шъ сла́ва тебѣ̀. Ѿц҃ꙋ̀ Вседержи́телю и҆ꙁволи́вшомꙋ, ᲃн҃ꙋ поспѣши́вшомꙋ, и҆ Дх҃ꙋ ᲃт҃о́мꙋ съверши́вшомꙋ, и҆ ѡ҆ст҃и́вшомꙋ Храмъ ᲃе́й, чⷭ҇ть, сла́вꙋ, и҆ поклоне́нїе, съ смире́ннымъ благодаре́нїемъ ꙗ҆́кѡ Бг҃ꙋ є҆ди́номꙋ въ Трⷪ҇ци слави́момꙋ вѣ́рнїи прино́симъ, въ на́ше бо спас́нїе сі́е съдѣлова̀, ꙗ҆́кѡ да прибѣга́юще въ Хра́мъ ᲃт҃ый, та́йнами ᲃт҃ы́ми є҆гѡ̀ ѿ грѣхѡ́въ ѡ҆чи́стимсѧ, благода́ть прі́ймемъ, и҆ томꙋ̀ съвокꙋпи́вшесѧ, ѡ҆сщ҃енїе, просвѣще́нїе, и҆ вѣ́чнꙋю свободꙋ̀, въ Ца́рствїи є҆гѡ̀ полꙋчи́ти сподоби́мсѧ.

Сла́ва: Гла́съ то́йжде.

Па́мѧть ѡ҆сщ҃енїѧ Хра́ма ᲃегѡ̀ праꙁднꙋ́юще Гд҃и, Тебѐ ѡ҆сщ҃енїѧ да́телѧ сла́вимъ молѧ́щесѧ, и҆ на́шимъ ѡ҆ст҃и́тисѧ чꙋ́вствїѧмъ дш҃евнымъ же и҆ тѣле́снымъ, въ є҆́же ѿ тмы̀ злы́хъ дѣ́лъ ѿстꙋпи́вше, слꙋжи́ти тебѣ̀ въ преподобїи и҆ пра́вдѣ, въ всѧ̀ днѝ живота̀ на́шегѡ воꙁмо́жемъ, и҆ жи́ти съ тобо́ю въ Ца́рствїи твое́мъ сподоби́мсѧ, молитва́ми Бц҃а и҆ сла́вныхъ ᲃтрастоте́рпецъ твои́хъ, благі́й всесилне.

И҆ ны́нѣ: а҆́ще нѣ́стъ Гдⷭ҇кїй Праꙁ: пое́мъ Догма́тикъ ѕ҃-гѡ Гла́са, сі́естъ, Кто тебѐ небл:

По Свѣ́те ти́хій: Прок: дне́ви, и҆ Чте́нѧ г҃, ѻ҆бнов:

Ца́рствъ Тре́тїихъ чте́нїе. Глава̀, и҃.

И҆ бы́стъ вънегда̀ соверши́ти Соломꙍ́нꙋ є҆́же соꙁида́ти Хра́мъ Гдⷭ҇нь, и҆ до́мъ сво́й по два́десѧти лѣ́техъ, тогда̀ собра̀ Ца́рь Соломꙍ́нъ всѧ̀ ᲃта́рцѧ І҆и҃левы, и҆ всѧ̀ Нача́л̾ники колѣ́нъ, Во́жды ѿте́чествїй ᲃн҃ѡ́въ І҆и҃левыхъ къ Царю̀ Соломꙍ́нꙋ въ І҆ерⷭ҇ли́мъ, є҆́же понестѝ Кївꙍ́тъ завѣ́та Гдⷭ҇нѧ ѿ гра́да Даві́дова: се́й є҆́сть ᲃїꙍ́нъ. Въ Мцⷭ҇и А҆ѳані́нѣ въ Пра́ꙁдникъ: ᲃе́й є҆́стъ Мцⷭ҇ъ ᲃе́дмый. И҆ прїидѡ́ша всѝ ᲃта́рци, и҆ вꙁѧ́шѧ І҆ере́е Ківѡ́тъ, и҆ ᲃѣ́нь свѣдѣ́нїѧ, и҆ всѧ̀ сосꙋ́ды ᲃт҃ы́ѧ ꙗ҆̀же въ ᲃѣ́ни ᲃвѣдѣ́нїѧ. И҆ Ца́рь и҆ ве́сь І҆и҃ль, пре́дъ Ківѡ́томъ жрѧ́ще вѡлы̀ и҆ ѡ҆́вцѧ беꙁъ числа̀. И҆ вънѡ́сѧтъ І҆ере́е Ківѡ́тъ завѣ́та Гдⷭ҇нѧ въ мѣ́сто є҆гѡ̀ ᲃт҃и́лищи хра́ма, въ Ст҃а́ѧ ᲃт҃ы́хъ, подъ кри́ла Херꙋві́мова. И҆ бы́стъ ꙗ҆́кѡ и҆ꙁыйдѡ́ша І҆ере́е ѿ ᲃт҃гѡ, и҆ ѻ҆́блакъ и҆сполнѝ Хра́мъ Гд҃ень.

И҆ не воꙁмого́ша І҆ере́е ᲃта́ти ᲃлꙋжи́ти ѿ лица̀ ѻ҆́блака, занѐ и҆сполнѝ ᲃла́ва Гдⷭ҇нѧ Хра́мъ Гдⷭ҇нь. И҆ ста̀ Соломѡ́нъ проти́вѡ лица̀ Жерто́вника Гдⷭ҇нѧ, пре́дъ всѣ́мъ ᲃобо́ромъ ᲃн҃ѡ́въ І҆и҃левыхъ. И҆ прострѐ рꙋ́цѣ своѝ на нб҃о, и҆ речѐ, Гд҃и Бж҃е І҆и҃левъ, нѣ́стъ Бг҃ъ ꙗ҆́коже ты на нб҃си го́рѣ, и҆ на землѝ ни́ꙁꙋ, хранѧ́й завѣ́тъ, и҆ ми́лостъ рабꙋ̀ твое́мꙋ, ходѧ́щомꙋ пре́дъ тобо́ю въ все́мъ ᲃе́рдци свое́мъ, ꙗ҆́же сохрани́лъ є҆сѝ рабꙋ̀ твое́мꙋ Дави́дꙋ Ѻ҆ц҃ꙋ̀ мое́мꙋ, и҆бѡ̀ гл҃алъ є҆сѝ ᲂу҆сты̀ твои́ми, и҆ рꙋко́ю твое́ю и҆сполни́лъ є҆сѝ ꙗ҆́кѡ де́нь се́й. И҆ ны́нѣ Гд҃и Бж҃е І҆и҃левъ, да ᲂу҆вѣ́ритсѧ ᲂу҆́бѡ гл҃ъ тво́й Дави́дꙋ Ѻ҆ц҃ꙋ̀ мое́мꙋ. Ꙗ҆́кѡ а҆́щели въи́стиннꙋ ѡ҆бита́ти бꙋ́детъ Бг҃ъ съ чл҃ки на земли? А҆́ще нб҃о и҆ нб҃о нб҃сѐ не довлѣ́ютъ тѝ, ко́л̾мѝ паче и҆ храмъ ᲃе́й и҆́же соꙁда́хъ и҆менѝ твое́мꙋ? И҆ да при́ꙁриши на моли́твꙋ мою̀ и҆ на моле́нїе моѐ, Гд҃и Бж҃е І҆и҃левъ, є҆́же ᲂу҆слы́шати моле́нїе и҆ моли́твꙋ, є҆ю́же ра́бъ тво́й мо́литсѧ пре́дъ тобо́ю дне́съ къ тебѣ̀, є҆́же бы́ти ѡ҆чи́ма твои́ма ѿве́рстома на хра́мъ се́й дне́мъ и҆ но́щїю, на мѣ́сто є҆́же ре́клъ є҆сѝ, бꙋ́детъ и҆мѧ̀ моѐ та́мѡ, є҆́же ᲂу҆слыша́ти моли́твꙋ, є҆ю́же мо́литсѧ ра́бъ тво́й на мѣ́стѣ се́мъ. И҆ ᲂу҆слы́шиши моли́твꙋ раба̀ твое́гѡ и҆ люді́й твои́хъ І҆и҃лѧ, є҆ю́же а҆́ще помо́лѧтсѧ на мѣ́стѣ се́мъ, и҆ ты ᲂу҆слы́шиши на мѣ́стѣ ѻ҆би́телища твое́гѡ на нб҃сѝ, и҆ сотвори́ши и҆ ми́лостивъ бꙋ́деши. Е҆ли́ка а҆́ще согрѣши́тъ кі́йждѡ и҆́скреннемꙋ свое́мꙋ, и҆ а҆́ще прі́йметъ на́нь клѧтвꙋ є҆́же клѧ́ти є҆гѡ̀, и҆ прі́йдетъ и҆ и҆сповѣ́сть пре́дъ лице́мъ Жерто́вника твое́гѡ въ хра́мѣ се́мъ, и҆ ты ᲂу҆слы́шиши съ нб҃сѐ и҆ сотвори́ши, и҆ сꙋди́ши люде́мъ твои́мъ І҆и҃лю, є҆́же ѡ҆беꙁꙁаконствова́ти беꙁꙁако́ннагѡ, да́ти пꙋ́ть є҆гѡ̀ на гла́вꙋ є҆гѡ̀, и҆ є҆́же ѡ҆правда́ти пра́веднагѡ, да́ти є҆мꙋ̀ по пра́вдѣ є҆гѡ̀. Внегда̀ па́днꙋти люде́м твои́мъ І҆и҃лю пре́дъ врагѝ, ꙗ҆́кѡ согрѣша́тъ тебѣ̀, и҆ ѡ҆братѧ́тсѧ, и҆ и҆сповѣдѧ́тсѧ и҆менѝ твое́мꙋ, и҆ помолѧ́тсѧ и҆ ми́ли дѣ́ѧтисѧ бꙋ́дꙋтъ в храме се́мъ:

И҆ ты̀ да ᲂу҆слы́шиши съ нб҃се, и҆ ми́лостивъ бꙋ́деши грѣхѡ́мъ люді́й твои́хъ І҆и҃ли, и҆ воꙁврати́ши и҆́хъ въ зе́млю ю҆́же да́лъ є҆сѝ ѿце́мъ и҆́хъ. Внегда̀ ᲂу҆держа́тисѧ нб҃ꙋ, и не бы́ти до́ждеви, ꙗ҆́кѡ согреша́тъ тебѣ̀, и҆ помолѧ́тсѧ на мѣ́стѣ се́мъ, и҆ и҆сповѣдѧ́тсѧ и҆менѝ твое́мꙋ, и҆ ѿ грѣхѡ́въ свои́хъ обратѧ́тсѧ, є҆гда̀ смири́ши и҆́хъ:

И҆ да ᲂу҆слы́шиши съ нб҃сѐ, и҆ ми́лостивъ бꙋ́деши грѣхѡ́мъ раба̀ твое́гѡ, и҆ люді́й твои́хъ І҆и҃лѧ, занѐ пока́жеши и҆́мъ пꙋ́ть бла́гъ, ходи́ти по не́мꙋ, и҆ подасѝ до́ждъ на землѝ твое́й, ю҆́же да́лъ є҆сѝ люде́мъ твои́мъ въ наслѣ́дїе. Гла́дъ а҆́ще бꙋ́детъ, сме́ртъ а҆́ще бꙋ́детъ, є҆гда̀ бꙋ́детъ воꙁгорѣ́нїе, хрꙋ́щъ, ржа̀ а҆́ще бꙋ́детъ: и҆ а҆́ще ѡ҆ско́рбитъ є҆гѡ̀ вра́гъ є҆гѡ̀ въ є҆ди́номъ ѿ гра́дѡвъ є҆гѡ̀, всѧ́каѧ стрѧ́ща, всѧ́кꙋю бо́лѣꙁнь: всѧ́кꙋю моли́твꙋ, всѧ́кое проше́нїе, а҆́ще бꙋ́детъ всѧ́комꙋ чл҃кꙋ, по є҆ли́кꙋ ᲂу҆раꙁꙋмѣ́етъ ко́ждѡ ꙗ҆́ꙁвꙋ ᲃе́рдца свое́гѡ, и҆ распростре́тъ рꙋ́цѣ своѝ въ хра́ме се́мъ. И҆ ты да ᲂу҆слы́шиши ѿ нб҃се гото́вагѡ жи́лища твое́гѡ, и҆ ми́лостивъ бꙋ́деши, и҆ сотвори́ши и҆ дасѝ мꙋ́жеви по всѣ́хъ пꙋте́хъ є҆гѡ̀, ꙗ҆́коже а҆́ще поꙁна́еши се́рдце є҆гѡ̀: ꙗ҆́кѡ ты ᲃа́мъ є҆ди́нъ вѣ́си ᲃе́рдца всѣ́хъ ᲃн҃ѡвъ члчⷭ҇ки́хъ, ꙗ҆́кѡ да ᲂу҆боѧ́тсѧ тебѐ въ всѧ̀ днѝ въ нѧ́ же ѡ҆нѝ жи́ти бꙋ́дꙋтъ на землѝ, ю҆́же да́лъ є҆сѝ ѿце́мъ нш҃имъ.

Ца́рствъ Тре́тїихъ чте́нїе. Глава̀ и҃. ᲃтіхъ н҃д.

И҆ бы́сть ꙗ҆́кѡ сконча̀ Соломꙍ́нъ мл҃ѧ́йсѧ къ Гд҃ꙋ всю̀ моли́твꙋ и҆ моле́нїе ᲃі́е, и҆ воста̀ ѿ лица̀ жерто́вника Гн҃ѧ, прекло́н̾сѧ на колѣ́нѣ своѝ, и҆ рꙋ́цѣ є҆гѡ̀ распросте́ртѣ на́ нб҃о. И҆ ста̀, и҆ блⷭ҇вѝ ве́сь ᲃобо́ръ І҆и҃левъ гла́сомъ ве́лїимъ, гл҃ѧ̀: Блⷭ҇ве́нъ Гд҃ь дне́сь, и҆́же дадѐ ᲂу҆покое́нїе люде́мъ свои́мъ І҆и҃лю, по всѣ́хъ ꙗ҆́же гл҃а̀, не нераꙁногласѝ сло́во є҆дино̀ въ всѣ́хъ ᲃловесе́хъ свои́хъ благи́хъ, ꙗ҆́же гл҃а̀ въ рꙋ́цѣ Мѡѵ꙼се́ѧ раба̀ свое́гѡ.

Да бꙋ́детъ Гд҃ь Бг҃ъ на́шъ съ на́ми, ꙗ҆́коже бѣ̀ съ Ѿцы̀ на́шими, и҆ да не ѡ҆ста́витъ на́съ, ни́ же да ѿврати́тъ на́съ, преклони́ти ᲃе́рдца на́шѧ къ не́мꙋ, є҆́же ходи́ти въ всѣ́хъ пꙋте́хъ є҆гѡ̀, и҆ храни́ти всѧ̀ за́повѣди є҆гѡ̀ и҆ повелѣ́нїѧ є҆гѡ̀, и҆ ѡ҆правда́нїѧ є҆гѡ̀, ꙗ҆́же заповѣда̀ ѿцемъ нш҃имъ.

И҆ да бꙋ́дꙋтъ словеса̀ сі́ѧ, и҆́миже помоли́хсѧ пре́дъ Гд҃емъ Бг҃омъ на́шимъ днесь, приближа́ющаѧсѧ къ Гд҃ꙋ Бг҃ꙋ на́шемꙋ дне́мъ и҆ но́щїю, є҆́же твори́ти ѡ҆правда́нїе рабꙋ̀ свое́мꙋ, и҆ ѡ҆правда́нїе люде́мъ свои́мъ І҆и҃лю, гл҃ъ днѧ̀ въ де́нь є҆гѡ̀.

Ꙗ҆́кѡ да ᲂу҆раꙁꙋмѣ́ютъ всѝ лю́дїе землѧ̀, ꙗ҆́кѡ Гд҃ь Бг҃ъ той є҆́стъ Бг҃ъ и҆ нѣ́сть и҆́нагѡ. И҆ да бꙋ́дꙋтъ се́рдца на́шѧ съверше́нна къ Гд҃ꙋ Бг҃ꙋ на́шемꙋ, Преподо́бнѡ ходи́ти въ повелѣ́нїихъ є҆гѡ̀, и҆ храни́ти за́повѣди є҆гѡ̀, ꙗ҆́коже де́нь ᲃе́й.

Ца́рствъ Тре́тїихъ чте́нїе. Глава̀ ѳ҃.

И҆ бы́сть ꙗ҆́кѡ ᲃконча̀ Соломꙍ́нъ зижда́й Хра́мъ Гдⷭ҇нь, и҆ До́мъ Црев҃ъ, и҆ всѧ́кое дѣла́нїе своѐ Соломꙍ́нъ, є҆ли́ка хотѧ́ше сотвори́ти. И҆ ꙗ҆ви́сѧ Гд҃ь Соломꙍ́нꙋ вто́рое, ꙗ҆́коже ꙗ҆ви́сѧ въ Гаваѡ́нѣ. И҆ речѐ є҆мꙋ̀: Ꙋ҆слы́шахъ гла́съ Моли́твы Твое́ѧ, и҆ моле́нїѧ твое́гѡ, и҆́мже моли́лсѧ є҆сѝ пре́до мно́ю, сътвори́хъ тѝ по все́й Моли́твѣ твое́й, и҆ ѡ҆ст҃и́хъ Хра́мъ ᲃе́й, и҆́же съꙁда́лъ є҆сѝ, є҆́же положи́ти И҆мѧ̀ моѐ та́мѡ въ вѣ́ки. И҆ бꙋ́дꙋтъ ѻ҆́цѣ моѝ та́мѡ, и҆ се́рдце моѐ въ всѧ̀ днѝ. И҆ ты̀ а҆́ще по́йдеши пре́до мно́ю, ꙗ҆́коже ходи́лъ є҆́стъ Дави́дъ Ѻ҆́ц҃ъ тво́й въ Преподо́бїи се́рдца, и҆ въ правотѣ̀, и҆ є҆́же твори́ти по всѣ́хъ и҆́хъ же заповѣда́хъ є҆мꙋ̀, и҆ повелѣ́нїѧ моѧ̀, и҆ за́повѣди моѧ̀ съхрани́ши, и҆ воꙁста́влю Прⷭ҇тлъ Ца́рствїѧ твое́гѡ надъ І҆и҃лемъ въ вѣ́къ, ꙗ҆́коже гл҃а́хъ Дави́дꙋ ѿц҃ꙋ̀ твое́мꙋ, гл҃ѧ̀: не ѡ҆скꙋдѣ́етъ тѝ мꙋ́жъ во́ждъ въ І҆и҃лѣ. А҆́ще же ѿвраща́ющесѧ ѿврати́тесѧ вы, и҆ ча́да ва́шѧ ѿ менѐ, и҆ не съхрани́те за́повѣдїй мои́хъ и҆ повелѣ́нїй мои́хъ ꙗ҆́же да́лъ є҆́стъ Мꙍѵ꙼се́й пре́дъ ва́ми, и҆ по́йдете и҆ поработа́ете Богѡ́мъ и҆́нымъ, и҆ поклони́тесѧ и҆́мъ:

И҆ и҆ꙁмꙋ̀ І҆и҃лѧ ѿ землѧ̀ ю҆́же да́хъ и҆́мъ, и҆ Хра́мъ се́й и҆́же ѡ҆ст̀ихъ И҆менѝ мое́мꙋ, ѿвергꙋ̀ ѿ лица̀ мое́гѡ, и҆ бꙋ́детъ І҆и҃ль въ и҆счеꙁнове́нїе, и҆ въ ѡ҆гл҃а́нїе въ всѣ́хъ люде́хъ, и҆ Хра́мъ се́й бꙋ́детъ высо́кїй: всѧ́къ преходѧ́й скво́ꙁѣ є҆гѡ̀ ᲂу҆жа́снетсѧ, и҆ посвѣ́щетъ, и҆ рекꙋ́тъ: чесо́ради ᲃътворѝ Гдⷭ҇ь та́кѡ землѝ се́й, и҆ хра́мꙋ семꙋ̀? И҆ рекꙋ́т: поне́же ѡ҆ста́вишѧ Гдⷭ҇а Бг҃а свое́гѡ, и҆́же и҆ꙁведѐ ѿцѧ̀ и҆́хъ и҆ꙁъ Е҆гѵ́пта ѿ до́мꙋ работы̀, и҆ въспрїѧ́шѧ бѡгѝ чꙋ́ждыѧ, и҆ поклони́шасѧ и҆́мъ, и҆ поработа́шѧ и҆́мъ. Сегѡ̀ ра́ди наведе́тъ Гд҃ь на́ нѧ всю̀ злобꙋ̀ ᲃі́ю.

На Лѵті́и Стіхи́ра Хра́мꙋ є҆дина̀. А҆́ще Гдⷭ҇кїй є҆́стъ Хра́мъ, а҆́ще же кое́гѡ ѿ ᲃт҃ы́хъ не пое́мъ, то́чїю Ѻ҆бновле́нїю, а҆́ще же Бг҃оро́диченъ є҆́стъ Хра́мъ.

И҆ ны́нѣ: то́чїю пое́мъ Хра́мꙋ.

Стіхи́ры ѻ҆бновле́нїю на Лѵті́и. Гла́съ, а҃.

Ꙍ҆бновлѧ́йсѧ, ѻ҆бновлѧ́йсѧ но́вый І҆ерⷭ҇ли́ме, прі́йде бо тѝ свѣтъ, и҆ ᲃла́ва Гнⷭ҇ѧ на тебѣ̀ воꙁсїѧ̀. Се́й хра́мъ Бг҃ъ Ѻ҆ц҃ъ блⷭ҇вѝ: Сн҃ъ ᲂу҆твердѝ: Дх҃ъ ᲃт҃ы́й ѡ҆ст҃ѝ, въ просвѣще́нїе ᲂу҆твержде́нїе, и҆ ᲃпⷭ҇нїе дꙋша́мъ на́шимъ.

Гла́съ, в҃.

Ꙍ҆бновле́нїе праꙁднꙋ́юще сегѡ̀ ѡ҆сщ҃е́ннагѡ хра́ма твое́гѡ, ра́дꙋющесѧ и҆ благодарѧ́ще тебѐ ᲃла́вимъ Гд҃и, и҆ приле́жнѡ моли́мъ, и҆ на́съ недосто́йныхъ рабѡ́въ твои́хъ дш҃ѧ̀ ѡ҆стѝ, тѣлеса̀ ѡ҆чи́сти, помышле́нїѧ и҆спра́ви, ра́ꙁꙋмъ ᲂу҆цѣломꙋдрѝ и҆ и҆стреꙁвѝ, самосоверше́нною тѝ благодатїю: ꙗ҆́кѡ да въ ᲃт҃о́мъ хра́мѣ се́мъ, ᲃт҃ы́ми твои́ми Та́йнами и҆ беꙁъкро́вными Же́ртвами, ѡ҆сщ҃енїе прі́ймемъ, и҆ соверше́нное ѡ҆ставле́нїе грѣхѡ́въ, и҆ ве́лїю ми́лостъ.

Гла́съ, г҃.

Послѝ благода́ть ᲃт҃а́гѡ тѝ Дх҃а Хрⷭ҇те Бж҃е, є҆ю́же ѡ҆ст҃и́лъ є҆сѝ хра́мъ ᲃе́й, и҆ ѡ҆ст҃ѝ на́съ недосто́йныхъ рабѡ́въ твои́хъ, и҆ хра́мъ и҆ жи́лище ᲃебѣ̀ и҆ Ѿц҃ꙋ̀ свое́мꙋ въ на́съ сътворѝ, по нело́жномꙋ тѝ ѡ҆бѣща́нїю подаѧ̀ на́мъ дх҃о́внꙋю ра́дость, ми́ръ и҆ ве́лїю ми́лость.

Гла́съ, д҃.

Премꙋ́дрость Бж҃аѧ превѣ́чнаѧ, соꙁда̀ и҆ ѡ҆ст҃ѝ себѣ̀ на землѝ хра́мъ се́й, и҆ ᲂу҆твердѝ въ не́мъ ᲃт҃ы́хъ свои́хъ та́инъ ᲃедмъ столпѡ́в: и҆ себѐ сама́гѡ всегда̀ въ Бжⷭ҇тве́нной ᲃлꙋ́жбѣ, въ грѣхочисти́тел̾нꙋю закала́етъ Же́ртвꙋ, сꙋщество̀ хлѣ́ба въ Прчⷭ҇тое своѐ Тѣ́ло, и҆ Вина̀ въ Ча́ши сꙋ́щагѡ въ Бжⷭ҇тве́ннꙋю ᲃвою̀ Кро́вь, въ ѡ҆чище́нїе и҆ спасе́нїе, и҆ вѣ́чное весе́лїе вѣ́рою ᲃі́ѧ прїе́млющимъ и҆́стиннѡ претварѧ́ѧ: благода́рни ᲂу҆́бѡ толи́кїѧ неиꙁрече́нныѧ ᲃп҃са нш҃егѡ бла́гости ᲃꙋ́ще, пѣ́сн̾мѝ просла́вимъ ᲃегѡ̀ вели́кое милосе́рдїе.

Гла́съ, є҃.

Блⷭ҇вѝ Гд҃и до́мъ ᲃе́й и҆менѝ твое́мꙋ ѡ҆сщ҃е́нный, и҆ благода́тїю твое́ю вѣ́чнѡ ᲂу҆крѣпѝ є҆гѡ̀, ѿ всѧ́кагѡ зла́гѡ ѡ҆бстоѧ́нїѧ неврежде́нъ соблюда́ѧ, и҆ въ не́мъ тебѣ̀ ѿда́емыѧ на́шѧ прїемлѧ̀ мо́л̾бы, бога́тыѧ твоѧ̀ ми́лости всегда̀ дарꙋ́й, ѡ҆ставлѧ́ѧ на́мъ согрѣше́нїѧ, ꙗ҆́кѡ чл҃кѡлю́бецъ.

Сла́ва: Гла́съ, ѕ҃.

Се́й де́нь Гдⷭ҇нь, ра́дꙋйтесѧ лю́дїе, се́бо невиди́мый Бг҃ъ, є҆го́же нб҃са̀ нб҃съ, и҆ всѧ̀ тва́ръ вмести́ти не мо́жетъ, за милосе́рдїе ми́лости и҆ чл҃кѡлю́бїѧ, ви́димый се́й на землѝ и҆ꙁбра̀ себѣ̀ хра́мъ, и҆ и҆менѝ свое́мꙋ пресвѧто́мꙋ въ жи́лище ѡ҆ст҃ѝ, и҆ приста́нище ᲃпⷭ҇нное въ бꙋ́рѧхъ прегрѣше́нїй вѣ́рнымъ ᲃотворѝ: тѣ́мъ благодарѧ́ще тогѡ̀ воспо́имъ, и҆ вѣ́рнѡ кланѧ́ищесѧ томꙋ̀ воꙁопі́имъ, ᲂутвердѝ Бж҃е въ вѣ́ки хра́мъ се́й, и҆ на́съ въ не́мъ тебѐ ᲃлавѧ́щихъ поми́лꙋй, по вели́цѣй твое́й ми́лости.

И҆ нынѣ:

А҆́ще Гдⷭ҇кїй є҆стъ хра́мъ, и҆лѝ Бог: пое́мъ хра́мꙋ.

А҆́ще же нѝ, пое́мъ Догма́тик ѕ҃-гѡ Гла́са, сі́естъ: Творецъ и҆ и҆ꙁбави́телъ мой:

На ᲃті́х: Стіхи́ры ѻ҆бновле́нїю. Гла́съ, г҃.

Ро́сꙋ благода́ти твое́ѧ Гд҃и, ꙗ҆́коже въ де́нь ѡ҆сщ҃енїа хра́ма сегѡ̀, съ нб҃сѐ ниꙁпосла́лъ є҆сѝ: ᲃи́це и҆ ны́нѣ въ ѻ҆бновле́нїи ѡ҆сщ҃енїѧ є҆гѡ̀, люде́мъ твои́мъ тꙋ́южде грѣхѝ ѡ҆чища́ющꙋю, и҆ вѣ́рныхъ дш҃ѧ̀ просвѣща́ющꙋю послѝ, и҆ ᲃпасѝ дꙋшѧ̀ на́шѧ, ꙗ҆́кѡ є҆ди́нъ милосе́рдъ.

Сті́хъ.

До́мꙋ твое́мꙋ подоба́етъ ᲃт҃ы́ни Гд҃и въ долготꙋ дні́й.

Нб҃са̀ нб҃съ не довлѣ́ютъ тебѣ̀, ве́ꙁде сꙋ́щомꙋ, и҆ всѧ̀ и҆сполнѧ́ющомꙋ Гд҃и: ка́кѡ ᲂу҆бѡ хра́мъ се́й рабы̀ твои́ми ᲃоꙁда́нный, къ селе́нїю твое́мꙋ ᲂу҆довлѣ́етъ; но ꙗ҆́коже є҆ди́ною прїѧ́ти, и҆ благода́тїю твое́ю ѡ҆ст҃и́ти и҆ꙁво́лилъ є҆сѝ, неѿе́млемꙋ благода́ть твою̀ въ не́мъ соблюдѝ, ᲃі́ю на́мъ бога́тнѡ подава́ѧ, и҆ ѡ҆ставле́нїѧ грѣхѡ́въ къ тебѣ̀ въ не́мъ прибѣга́ющїѧ сподоблѧ́ѧ, ꙗ҆́кѡ є҆ди́нъ милосердъ.

Сті́хъ.

Бг҃ъ посре́дѣ є҆гѡ̀ и҆ не подви́житсѧ.

Нб҃сѝ ᲂу҆подоби́лъ є҆сѝ зе́мный тво́й се́й сщ҃енный хра́мъ, Хє҃ Бж҃е: ꙗ҆́коже бо на нб҃сѝ ѻ҆де́снꙋю свое́гѡ Ѿц҃а̀, си́це на Прⷭ҇то́лѣ въ Бжⷭ҇тве́нныхъ твои́хъ Та́йнахъ, и҆́стиннѡ Бг҃очл҃къ съ на́ми пребыва́еши, и҆ благода́ть и҆ ᲃпⷭ҇нїе вѣ́рою въ нихъ прїе́млющимъ тѧ подава́еши, въ снѣ́дь бо и҆ пи́тїе вѣ́рным подъ ви́домъ Хлѣ́ба и҆ Вина̀ предле́жиши, ꙗ҆́кѡ чл҃кѡлю́бецъ.

Сла́ва: Гла́съ, и҃.

Ꙍ҆ всѣ́хъ твои́хъ бога́тых да́рѡвъ, и҆ вели́кихъ благодѣѧ́нїй, въ мимоше́дшомъ лѣ́тѣ въ хра́мѣ се́мъ, въ Трⷪ҇ци є҆ди́ный Бж҃е, ѿ твое́гѡ неѡ҆скꙋ́днагѡ благоꙋтро́бїѧ сокро́вища, бога́тнѡ прїѧ́тыхъ, благдаре́нїе ра́бски приносѧ́ще: ѡ҆сщ҃е́нїѧ ᲃегѡ̀ твое́гѡ хра́ма па́мѧть торжествꙋ́емъ, и҆ тебѐ ᲃоꙁда́телѧ и҆ Бг҃а, и҆ꙁбави́телѧ и҆скꙋпи́телѧ, и҆ ᲃп҃са зна́юще, правовѣ́рнѡ ᲃла́вимъ, велича́емъ и҆ превоꙁно́симъ, и҆ тебѣ̀ кланѧ́ющесѧ ра́бски ᲃлꙋ́жимъ, и҆ славословѧ́ще поє́мъ: Ст҃ы́й Бж҃е, Ѿч҃е беꙁънача́лне Вседержи́телю: Ст҃ы́й крѣ́пкїй, Сн҃е ѿ Ѿц҃а̀ є҆диноро́дне, Ѿц҃ꙋ̀ и́ Дх҃ови є҆диносꙋ́щне: Ст҃ы́й беꙁъсм̀ртный, Ꙋ҆тѣши́телю Дш҃е ѿ Ѿц҃а̀ и҆сходѧ́й, Ѿц҃ꙋ́ же и҆ ᲃн҃ови собеꙁнача́лне и҆ сопрⷭ҇то́лне: съ Ѿц҃емъ и҆ Сн҃омъ, всѧ̀ и҆сполнѧ́ѧй, всѧ̀ дѣйствꙋ́ѧй, и҆ всѧ̀ ѡ҆сщ҃а́ѧй, и҆ да́ры раꙁдѣлѧ́ѧй вѣ́рнымъ по достоѧ́нїю: Трⷪ҇це ᲃт҃а́ѧ Бж҃е на́шъ ᲃла́ва тебѣ̀.

И҆ ны́нѣ:

А҆́ще Гпⷭ҇дскїй є҆́стъ хра́мъ, и҆лѝ Бог: пое́мъ хра́мꙋ:

А҆́ще же нѣ́стъ, пое́мъ Дог: и҃-гѡ Гла́са, сі́естъ: Цр҃ю нбⷭ҇ный: По Ны́нѣ ѿпꙋщ: и҆ по Трⷭ҇томъ, чте́мъ Троп: Праꙁ:

А҆́ще Гпⷭ҇дский приклю́читсѧ, Сла́ва: И҆ ны́нѣ: ѻ҆бнов: Троп: Гла́съ, д҃.

Ꙗ҆́коже вы́шнѧгѡ тве́рда благолѣ́пїе, и҆ ни́жнюю ра́внѡ ꙗ҆ви́лъ є҆сѝ красотꙋ̀ ᲃт҃а́гѡ ᲃеле́нїѧ сла́вы твое́ѧ Гд҃и: ᲂу҆твердѝ ᲂу҆́бѡ є҆гѡ̀ въ вѣ́ки, и҆ прїймѝ на́шѧ въ не́мъ непреста́ннѡ приноси́мыѧ тѝ мѡ́л̾бы, Моли́твами Бц҃а и҆ всѣ́хъ ᲃт҃ы́хъ твои́хъ, живо́те и҆ Въскрⷭ҇нїе на́ше.

На Ꙋ҆трни по Е҆ѯа́ѱалмѣхъ, а҆́ще є҆́стъ Нѣде́лѧ, пое́тсѧ Троп: Въскрⷭ҇нъ, вⷤ

И҆ ны́нѣ: Ѻ҆бновле́нїю.

По а҃-й Каѳ: Сѣдал: Въскрⷭ҇:

По в҃-й Сѣдал: Ѻ҆бновле́нїю. Та́же Непороч:

По си́хъ же Ѵпак: и҆ а҆́бїе пое́тсѧ Полѵе́лей, и҆ Припѣ́ла ѻ҆бновлен: ꙗ҆́же напре́ди на своє́мъ мѣ́стѣ поло́жены сꙋ́ть съ ѱалмо́мъ И҆ꙁбра́ннымъ. Та́же А҆нтіф: Гла́сꙋ съ Прок: Въскрⷭ҇: Е҆ѵⷢ҇лїе въскрⷭ҇:

Въскрⷭ҇нїе Хв҃о вид:

По ѱалмѣ́ же н҃-мъ, поє́мъ Сла́в: Мл҃твъ ра́ди ᲃт҃ыхъ А҆пⷭ҇лъ:

И҆ ны́нѣ:

Мл҃твъ ра́ди прⷭ҇тыѧ Бц҃а: Поми́лꙋй на́съ Бж҃е: и҆ ᲃтіхи́рꙋ Въскрⷭ҇:

Въскр҃съ І҆и҃с ѿ гро́ба:

Посе́мъ Канѡ́нъ Въскр҃: на ѕ҃. и҆ ѡ҆бновлен: на и҃. По г҃, пѣ́сни ᲃѣдал: Ѻ҆бнов:

А҆́ще же є҆́стъ Гпⷭ҇кїй Праꙁ: Код: и҆ І҆кос ѻ҆бнов: и҆ ᲃѣд: Праꙁ:

По ѕ҃ же Пѣс: а҆́ще Гдⷭ҇кїй є҆́стъ Праꙁ: Код: и҆ І҆косъ Праꙁ: а҆́ще же Нѣде́лѧ и҆лѝ и҆́нъ де́нь то ѡ҆бнов:

По сконча́нии же Канѡ́на, Ст҃ъ Гд҃ь Бг҃ь на́шъ и҆ ᲃвѣт:

Въскрⷭ҇: Сла́ва: И҆ ны́нѣ: ѻ҆бнов:

На Хвал: ᲃтіхи́ры Въскрⷭ҇: д҃ и҆ ѻ҆бнов: на д҃.

Сла́ва: Стіхи́ра Е҆ѵⷢ҇скаѧ.

И҆ ны́нѣ:

Преблⷭ҇ве́нна є҆сѝ Бц҃е Дв҃о:

Славосло́в: Вели́к: Е҆ктен: и҆ Ѿпꙋ́стъ ѡ҆быч:

Се́й ᲂу҆ставъ Нѣде́лный, да храни́мъ бꙋ́детъ и҆ въ Гпⷭ҇дскїѧ Праꙁ: а҆́ще въ нѣ́кїй ѿ нихъ приклю́читсѧ ѻ҆бновле́нїе: ᲃі́е то́чїю да съблюде́тсѧ:

На Полі́елеи, Прик: Праꙁ: и҆ Ѻ҆бнов:

А҆ще же въ про́стый де́нь приклю́читсѧ ѻ҆бнов:

На Оу҆́трии, на Бг҃ъ Гд҃ь: Троп: ѻбновле́нїю, Гла́съ, д҃. повторѧ́етсѧ гⷤ.

По а҃-й Каѳ: ᲃѣд: ѻ҆бновлен: Гла́съ, и҃. под: Пища́ли:

Ли́къ А҆́гглⷭ҇кїй неви́димѡ дне́сь предсто́итъ съ на́ми, та́йнѡ Бг҃ꙋ пѣ́снь воꙁсыла́ѧ, Хра́мъ се́й ѡ҆ст҃и́вшомꙋ Дх҃а свое́гѡ благода́тїи, въ не́мъ же же́ртва въ вы́шнихъ сꙋ́щомꙋ беꙁъкро́внаѧ прино́ситсѧ всегда̀, є҆ю́же мі́ръ ѡ҆сщ҃а́етсѧ.

Сла́ва: И ны́нѣ: Гла́съ, д҃. Под: Ско́рѡ предварѝ.

Всѧ̀ просвѣти́вый въ пло́ти свои́мъ ѿ Дв҃ы прише́ствїемъ Хᲃ҃, мі́ръ ѡ҆бновѝ Дх҃омъ свои́мъ Божестве́нным: и҆ ни́нѣ того́жде Дх҃а свое́гѡ благода́тїю въ та́йнахъ, дш҃ѧ̀ вѣ́рныхъ ѡ҆бновлѧ́етъ: хра́мъ бо се́й ѡ҆ст҃ѝ въ сла́вꙋ свою̀, въ не́мъ же и҆ се́рдца вѣ́рныхъ ѡ҆бновлѧ́етъ, и҆ благода́ть свою̀ дарꙋ́етъ ꙗ҆́кѡ Бг҃ъ, и҆ ᲃп҃съ дш҃а́мъ на́шимъ.

По в҃ Каѳ: Сѣд: Ѻ҆бновлен:

Гла́съ, и҃. Подо́бенъ. Премꙋдрости:

А҆́гглⷭ҇тїи чи́ни на нб҃се́хъ, и҆ члчⷭ҇кїй ро́дъ въ Црк҃ви, Тріст҃а́гѡ пѣ́нїѧ, немо́лчнꙋю прино́ситъ тѝ хва́лꙋ Тво́рче, ᲃлавосло́вїе съ пѣ́нїемъ воꙁъсыла́ѧ, ты́ бо Кро́вїю свое́ю є҆́стество на́ше ѡ҆бнови́лъ є҆сѝ: и҆ хра́ма сегѡ̀ ѡ҆бновле́нїе вѣ́рнѡ праꙁднꙋ́юще, приле́жнѡ мл҃и́мъ, въ не́мъ на́мъ тебѐ славѧ́щимъ, согрѣше́нїемъ ѡ҆ставле́нїе дарꙋ́й Хє҃ Бж҃е, стра́хомъ и҆ вѣ́рою пою́щимъ тѧ.

Сла́ва: И҆ ны́нѣ: Бог: Гла́съ, д҃. Под: Ско́рѡ предварѝ:

Вѣ́рою ѻ҆бновле́нїе хра́ма твое́гѡ, свѣ́тлѡ соверша́юще: Мт҃рь твою̀ Прчⷭ҇тꙋю, Ли́ки нбⷭ҇ныхъ ᲃи́лъ, А҆пⷭ҇лъ, и҆ Мч҃никъ, съ Пррⷪ҇ки же Прпⷣбныхъ и҆ Пра́ведныхъ, и҆ всѣ́хъ ᲃт҃ы́хъ, въ мо́л̾бꙋ къ тебѣ̀ дви́жемъ Хє҃ Бж҃е, приле́жнѡ молѧ́щесѧ, тѣ́хъ предста́тел̾ствомъ, ᲂу҆твердѝ въ вѣ́ки Хра́мъ ᲃе́й, и҆ просвѣтѝ, и҆ сп҃сѝ дш҃ѧ нш҃ѧ, ꙗ҆́кѡ чл҃кѡлю́бецъ.

А҆́бїе же по си́хъ. пое́мъ Пол́ілей, сі́естъ: Хвали́те И҆мѧ̀ Гнⷭ҇е:

Ѱало́мъ рл҃д. И҆сповѣда́йтесѧ Гвⷭ҇и:

Ѱало́мъ рл҃е. Съ А҆ллилꙋ́ꙗми кра́снѡ.

И҆ по си́хъ Припѣ́лъ Ѻ҆бновле́нїю.

Велича́ємъ тѧ животда́вче Хє҃, Божестве́ннагѡ хра́ма твоегѡ Ѻ҆бновле́нїе праꙁднꙋ́юще: ты́ бо Божестве́нными си Та́йнами вѣ́рныхъ свои́хъ въ не́мъ ѡ҆сщ҃а́еши.

Дрꙋ́гаѧ ᲃтра́на то́йжде Припѣ́лъ беꙁъ ᲃтіха̀ поє́тъ:

Та́же Пе́рваѧ ᲃтра́на начина́єтъ Сті́хъ, а҃:

Ве́лїй Гд҃ь и҆ хва́ленъ ѕѣ́лѡ въ гра́д:

И҆ по не́мъ Припѣ́лъ. Си́це же и҆ на всѣ́хъ ᲃтіха́хъ про́чїхъ тво́римъ.

Ве́лїй Гд҃ь и҆ хва́ленъ ѕѣ́лѡ въ гра́дѣ Бг҃а на́шегѡ, въ Горѣ̀ ᲃто́й є҆гѡ̀².

Сі́ѧ вра́та Гнⷭ҇ѧ, пра́веднїи вни́дꙋтъ въ нѧ̀³.

Пресла́внаѧ гл҃ашасѧ ѡ҆ тебѣ̀ Гра́де Бж҃ій⁴.

Ѻ҆ст҃и́лъ є҆́стъ селе́нїе своє̀ Вы́шнїй⁵.

Бг҃ъ посре́дѣ є҆гѡ̀ и҆ не подвижи́тсѧ.

Ꙗ҆́кѡ и҆ꙁбра̀ Гдⷭ҇ь ᲃіꙍ́на, и҆ и҆ꙁволѝ є҆гѡ̀ въ жи́лище себѣ̀⁶.

Здѐ въселю́сѧ, ꙗ҆́кѡ и҆ꙁволи́хъ и҆̀.

Ꙗ҆́кѡ та́мѡ заповѣда̀ Гд҃ъ блⷭ҇ве́нїе, и҆ живо́тъ до вѣ́ка⁷.

Ст҃ы́ни и҆ велелѣ́пота въ ᲃт҃и́лѣ є҆гѡ̀⁸.

Ст҃а Црк҃ви твоѧ̀ ди́вна въ пра́вдѣ⁹.

До́мꙋ твое́мꙋ подоба́етъ ᲃт҃ы́нѧ Гдⷭ҇и, въ долготꙋ̀ дні́й¹⁰.

Вни́демъ въ селе́нїѧ є҆гѡ̀: поклони́мсѧ на мѣ́стѣ и҆де́же стоѧ́стѣ но́ꙁѣ є҆гѡ̀¹¹.

Гра́дъ Цр҃ѧ̀ вели́кагѡ: Бг҃ъ въ дѡ́мѣхъ є҆гѡ̀ зна́емъ є҆́стъ є҆гда̀ застꙋпа́етъ и҆̀¹².

Бг҃ъ ѡ҆снова̀ и҆̀ въ вѣ́къ.

Гд҃ь въ Цр҃кви ᲃт҃ѣ́й свое́й, Гд҃ь на Нб҃сѝ Прⷭ҇толъ є҆гѡ̀¹³.

Прїймѣ́те же́ртвы, и҆ вхо́дите во дво́ры є҆гѡ̀¹⁴.

Поклони́тесѧ Гв҃и въ дворѣ̀ ᲃт҃о́мъ є҆гѡ̀¹⁵.

Бг҃ъ въ мѣ́стѣ ᲃт҃о́мъ свое́мъ: Бг҃ъ вселѧ́етъ є҆диномысле́нныѧ въ домꙋ̀¹⁶.

И҆ въ Цр҃кви є҆гѡ̀ всѧ́къ кто̀ гл҃етъ сла́вꙋ¹⁷.

Воꙁноси́те Гд҃а Бг҃а на́шегѡ, и҆ кла́нѧйтесѧ въ горѣ̀ ᲃт҃ой є҆гѡ̀, ꙗ҆́кѡ ᲃт҃ъ Гд҃ь Бг҃ъ на́шъ¹⁸.

Сла́ва: И҆ ны́нѣ: А҆ллилꙋ́іа, гⷤ.

По Полїелеи Сѣд: ѻ҆бнов: Гла́съ, д҃. Подо́бенъ. Ско́рѡ предварѝ:

Пра́ꙁдничный де́нь ѻ҆бновле́нїѧ приспѣ̀ дне́сь вѣ́рнїи: предꙋготовлѧ́ѧй на́съ въ жи́лище и҆ꙁбра́нное Хв҃и: ѡ҆бновлѧ́ти бо сѧ на́мъ предповелѣва́етъ, и҆ свѣ́тлымъ лице́мъ въ чⷭ҇той со́вѣсти, пѣ́нїѧ Влады́цѣ и҆ꙁъ глꙋбины̀ се́рдца въ покаѧ́нїи приноси́ти ᲂу҆вѣщава́етъ: тѣ́мъ въ ѡ҆бновле́нїи жи́ꙁни да хо́димъ, въ добродѣ́телехъ преспѣва́юще ꙗ҆́кѡ да прі́ймемъ ѿ не́гѡ благода́ть, ѻ҆бновле́нїе же и҆ ѡ҆сщ҃енїе дш҃а́мъ на́шимъ, и҆ несконча́емꙋю жи́ꙁнь въ Ца́рствїи нбⷭ҇номъ.

Сла́ва: И҆ ны́нѣ: Гла́съ, и҆ Под: то́йжде.

Вѣ́рою ѻ҆бновле́нїѧ ᲃъверша́емъ ᲃвѣ́тлагѡ хра́ма ᲃн҃а твое́гѡ, Преблⷭ҇ве́ннаѧ Дв҃о всепѣ́таѧ, и҆ ра́дꙋющесѧ тогѡ̀ сла́вимъ, тебе́ же ꙗ҆́кѡ застꙋ́пницꙋ на́шꙋ на моли́твꙋ приꙁыва́емъ: не преста́й ꙗ҆́кѡ Мт҃и тогѡ̀ ѡ҆ на́съ мл҃ѧ́щи: ᲃпⷭ҇тѝ и҆ просвѣти́ти дш҃ѧ̀, вѣ́рою и҆ любо́вїю тѧ и҆́стиннꙋю Бц҃ꙋ и҆сповѣда́ющихъ.

Степен: а҃, А҆нтиѳ: д҃, Гла́съ: Прок: Гла́съ, д҃.

Ст҃а Це́ркви твоѧ̀ ди́вна въ пра́вдѣ.

Сті́хъ:

Тебѣ̀ подоба́етъ пѣ́снь Бж҃е въ ᲃіꙍ́нѣ. Всѧ́кое дыха́нїе да хва́литъ Гд҃а.

Сті́хъ:

Хвали́те Бг҃а въ ᲃт҃ы́хъ є҆гѡ̀:

Е҆ѵⷢ҇лїе ѿ Маѳ: Глава̀, к҃а. Зача́ло, п҃г.

Въ вре́мѧ ѻ҆́нѡ, Вни́де І҆и҃с въ Це́рковъ Бж҃ію, и҆ и҆ꙁгна̀ всѧ̀ прода́ющїѧ и҆ кꙋпꙋ́ющїѧ въ Це́ркви: и҆ тра́пеꙁы то́ржникѡвъ и҆справержѐ, и҆ сѣда́лища прода́ющихъ го́лꙋбы. И҆ гл҃а̀ и҆́мъ, пи́санѡ є҆́стъ: До́мъ мо́й до́мъ Моли́твы нарече́тсѧ: вы́ же сътвори́сте є҆гѡ̀ верте́пъ раꙁбо́йникѡмъ. И҆ пристꙋпи́шѧ къ не́мꙋ хро́мїи и҆ слѣпїи во Це́ркви и҆ и҆сцѣлѝ и҆́хъ. Ви́дѣвше же Ѳарісе́е и҆ Кни́жници чꙋдеса̀ ꙗ҆́же сотворѝ, и҆ ѻ҆тро́ки зовꙋ́щїѧ въ Це́ркви, и҆ гл҃ю́щїѧ: Ꙍ҆са́нна ᲃн҃ꙋ Дави́довꙋ, негодова́шѧ, и҆ рѣ́шѧ є҆мꙋ̀: ᲃлы́шиши ли что̀ сі́и гл҃ю́тъ;

І҆и҃с же речѐ и҆́мъ, Е҆́й: Нѣ́стели члѝ нико́лиже. Ꙗ҆́кѡ и҆ꙁъ ᲂу҆́стъ младе́нецъ, и҆ съсꙋ́щихъ ᲃъверши́лъ є҆сѝ хва́лꙋ.

По Ѱалмѣ́ же, н҃ пое́мъ ᲃтіхи́рꙋ сі́ю ѻ҆бнов: Гла́съ, ѕ҃:

Твое́гѡ всечⷭ҇тнагѡ хра́ма ᲃегѡ̀, ѻ҆бновле́нїе праꙁднꙋ́юще дне́сь, тебѐ се́й ѡ҆ст҃и́вшагѡ вѣ́рнѡ прославлѧ́емъ Гд҃и, и҆ приле́жнѡ моли́мъ: наи́тїемъ ᲃт҃а́гѡ тѝ Дх҃а, чꙋ́вства дш҃ъ и҆ тѣле́съ на́шихъ ѡ҆ст҃ѝ, къ и҆сполне́нїю на́съ твои́хъ за́повѣдїй наставлѧ́ѧ, Молитва́ми Бц҃а и҆ всѣ́хъ ᲃт҃ы́хъ твои́хъ чл҃кѡлю́бче.

Посе́мъ же Дїа́конъ гл҃етъ Е҆ктен:

Сп҃сѝ Бж҃е лю́ди твоѧ̀:

Ли́къ же пое́тъ:

Гд҃и помил: є҃і.

І҆ере́ѵ꙼ же воꙁ:

Ми́лостїю и҆ щедрот:

Клиръ:

А҆ми́нь.

По сє́мъ Канꙍ́нъ ѻ҆бновле́нїю, Гла́съ, д҃. Пѣснь, а҃. И҆рмосъ:

Мо́рѧ че́рмнагѡ пꙋчи́нꙋ:

Припѣ́лъ:

Сла́ва тебѣ̀ Бж҃е на́шъ сла́ва:

Сто́лпомъ наста́вивый дре́вле и҆ꙁбра́ннагѡ І҆и҃лѧ:

Ба́нею Крщ҃енїѧ Хє҃ ѿ ꙗ҆ꙁы́къ събра́въ, насади́лъ є҆сѝ Це́рковъ свою̀, вѣ́рнѡ зовꙋ́щꙋю: пои́мъ пѣ́снъ побѣ́днꙋю Бг҃ꙋ на́шемꙋ, ꙗ҆́кѡ просла́висѧ.

Дх҃а твое́го ᲃт҃агѡ наи́тїемъ Гд҃и, на землѝ въдрꙋже́нный тебѣ̀ се́й хра́мъ, нб҃о ᲂу҆строи́лъ є҆сѝ: въ не́мъ же ᲃъгла́снѡ пое́мъ тебѣ̀ пѣ́снь Бг҃ꙋ на́шемꙋ, ꙗ҆́кѡ просла́висѧ.

Не за́кономъ Це́рковъ ᲂу҆краша́етсѧ Гд҃и, ни ра́бскихъ рꙋ́къ воꙁдѣ́ѧнїемъ: но Крⷭ҇тною тѝ благода́тїю хвалѧ́щисѧ, вѣ́рнѡ тебѣ̀ въ ра́дости пое́мъ пѣ́снь Бг҃ꙋ на́шемꙋ, ꙗ҆́кѡ просла́висѧ.

Бг҃оро́диченъ:

Беꙁъ сѣ́мене Ѿч҃ею во́лею, ѿ Божестве́ннагѡ Дх҃а, Бж҃іѧ зача́ла є҆сѝ Сн҃а: и҆ пло́тїю роди́ла є҆сѝ ѿ Ѿц҃а̀ беꙁъ Мт҃ре сꙋ́щагѡ, на́съ же ра́ди и҆ꙁъ тебѐ беꙁъ Ѿц҃а̀ бы́вшагѡ: є҆мꙋ́же ꙗ҆́кѡ Бг҃ꙋ вѣ́рнѡ пое́мъ, ꙗ҆́кѡ просла́висѧ.

Пѣ́снь, г҃. И҆рмо́съ:

Весели́тсѧ ѡ҆ тебѣ̀ Це́ркви твоѧ̀: Прик: Сла́ва тебѣ̀ Бж҃е на́шъ:

Ꙍ҆сти́лъ є҆сѝ на землѝ Це́рковъ сі́ю Хє҃, Дх҃омъ твои́м ᲃт҃ы́мъ, въ славосло́вїе тебѣ̀ съꙁда́ннꙋю: пома́ꙁавъ ю҆̀ весе́лїѧ ма́стїю.

Ѻ҆снова́нїе тѧ Хє҃ нераꙁори́мое Це́рковъ и҆мꙋщи: Твои́мъ Кресто́мъ вѣнча́етсѧ, ꙗ҆́коже ца́рской Дїади́мою, пома́ꙁана сꙋ́щи весе́лїѧ мастїю.

Ꙗ҆ви́лъ є҆сѝ бла́же рꙋкотворе́ннꙋю сі́ю ᲃкѵ́нїю, па́че ᲂу҆ма̀ по смотре́нїю бы́ти тебѣ̀ жи́лище: пома́ꙁавъ и҆̀ весе́лїѧ ма́стїю.

Бг҃оро́диченъ:

Хра́ме ᲃт҃ы́й Бж҃ій Дв҃о, Сн҃ꙋ твое́мꙋ помоли́сѧ, хра́мъ ᲃе́й ᲂу҆тверди́ти, є҆го́же въ жи́лище и҆ꙁбра̀ ᲃебѣ̀, пома́ꙁавъ весе́лїѧ ма́стїю.

Код: ᲃт҃о́мꙋ и҆ І҆косъ є҆гѡ̀. Сѣда́ленъ ѻ҆бновле́нїю, Гла́съ, и҃. Подо́бенъ:

Повелѣ́нное та́йнѡ:

Свѣдѣ́нїѧ хра́мъ Бг҃ъ ꙗ҆́вѣ на горѣ̀ Сина́йстѣй ѻ҆́браꙁъ покаꙁа̀: Бжⷭ҇тве́нный же Мꙍѵ꙼сі́й на землѝ соѡрꙋжѝ: Соломѡ́нъ же ᲃоꙁда́въ Же́ртвами ѡ҆бновѝ Це́рковъ: мы́ же благода́тїю просвѣще́ни, вѣ́рою къ хра́мꙋ Гн҃ю прибѣга́юще, благодарстве́нное Дави́дски Распѧ́томꙋ за на́съ Хꙋ҃ Бг҃ꙋ принѡ́симъ пѣ́нїе, зовꙋ́ще: ᲃт҃а Церкви твоѧ̀ ди́вна въ пра́вдѣ: ᲃт҃ы́нѣ бо и҆ велелѣпота въ ᲃт҃и́лѣ твое́й, и҆ Бг҃ъ посре́дѣ є҆ѧ̀ и҆ не подви́жисѧ.

Сла́ва: И҆ ны́нѣ: Бг҃оро́диченъ: Гла́съ, то́йжде.

Мт҃и Бж҃іѧ Пречⷭ҇таѧ Дв҃о, лю́тыѧ дш҃ъ и҆ тѣле́съ на́шихъ твои́ми всеси́лными моли́твами и҆сцѣлѝ стра́сти, проще́нїе грѣхѡвъ на́мъ и҆спраша́ющи: ꙗ҆́кѡ да досто́йнѡ въ хра́мѣ се́мъ ᲃт҃о́мъ ᲃн҃а твое́гѡ съ Ѿц҃емъ и҆ ᲃт҃ы́мъ Дх҃омъ просла́вимъ, и҆ ѡ҆брѧ́щемъ ми́лость, и҆ благода́ть полꙋ́чимъ въ благовре́меннꙋю по́мощъ.

Пѣ́снь, д҃. И҆рмо́съ:

Воꙁдви́гнена тѧ ви́дѣвши Це́ркви на Крестѣ̀ ᲃо́лнце пра́вды:

Не же́ртвами беꙁъслове́сныхъ, но твое́ю Кро́вїю ѡ҆кропле́нна Хє҃ Це́рковъ красꙋ́етсѧ, вѣ́рою въ лѣпотꙋ̀ зовꙋ́щи: ᲃла́ва си́лѣ твое́й Гд҃и.

Селе́нїѧ Гнⷭ҇ѧ воꙁлюбле́ннаѧ, въ нѧ́же ви́дѣти ᲃла́вꙋ лица̀ є҆гѡ̀ жела́ющїи, въ хра́мѣ є҆гѡ̀ всегда̀ стоѧ́ще зовꙋ́т: ᲃла́ва си́лѣ твое́й Гд҃и.

Помаꙁа́нїе мѵ́ра, и҆́мже ѡ҆ст҃и́сѧ хра́мъ ᲃе́й, и҆ꙁъѡбраꙁꙋ́етъ Бжⷭ҇тве́ннагѡ Дх҃а благода́ть, є҆ю́же и҆ꙁбра́ннїи лю́дїе твоѝ помаꙁа́вшесѧ зовꙋ́тъ: ᲃла́ва ᲃи́лѣ твое́й Гд҃и.

Мѵ́ра ᲃт҃а́гѡ помаꙁа́нїе, и҆́мже ѡ҆ст҃и́сѧ хра́мъ ᲃе́й, Бжⷭ҇тве́ннагѡ Дх҃а подае́тъ благода́ть, є҆ю́ же просвѣти́вшесѧ лю́дїе твоѝ Хє҃ вѣ́рнѡ пою́тъ: ᲃла́ва ᲃи́лѣ твое́й Гд҃и.

Бг҃оро́диченъ:

Ст҃ы́нѣ всеѧ̀ прїѧ́телище Дв҃о, Дх҃а ᲃт҃а́гѡ благода́тїю є҆ю́ же ѡ҆ст҃и́сѧ хра́мъ се́й, и҆ на́мъ ѡ҆ст҃и́тисѧ молѝ, Сн҃ꙋ твое́мꙋ вѣ́рнѡ пою́щимъ: ᲃла́ва ᲃи́лѣ твое́й Гд҃и.

Пѣ́снь, є҃. И҆рмо́съ:

Ты Гдⷭ҇и мо́й ᲃвѣ́тъ, въ мїръ прише́лъ є҆сѝ.

Ты дре́вле на Сина́и, Скѵ́нїю нерꙋкотворе́ннꙋю Мꙍѵ꙼се́ю покаꙁа́лъ є҆сѝ проѡбраꙁꙋ́ѧ ᲃвою̀ Хє҃ Це́рковъ, въ не́й же вѣ́рнымъ благода́ть Дх҃а, и҆ вѣ́чнꙋю жи́ꙁнь подава́еши.

Ты Гд҃и, ᲃѣ́нь на землѝ поста́вилъ є҆сѝ, въ не́й же чи́нѡмъ нбⷭ҇ным, зе́мныхъ ликостоѧ́нїѧ, ꙗ҆́кѡ Бг҃ъ сочетава́ѧ крѣ́постїю си, благода́ть Дх҃а и҆ жиꙁнь подава́еши.

Тебѐ Гд҃и, и҆сто́чникъ живота̀ и҆ благода́ти свѣ́мы, є҆го́ же бога́тнѡ въ Це́ркви та́йнами и҆сточа́ѧ вѣ́рнымъ бога́тнѡ, ꙗ҆́кѡ чл҃кѡлю́бецъ подава́еши.

Бг҃оро́диченъ:

Ты Бг҃а є҆го́же всѧ̀ тва́ръ въ мѣсти́ти не мо́жетъ въ чре́вѣ твое́мъ вмѣсти́ла є҆сѝ Бц҃е: тогѡ̀ Мт҃рски молѝ, въ хра́мѣ се́мъ ᲃт҃о́мъ молѧ́щимсѧ ны́нѣ благода́ть пода́ти.

Пѣ́снь, ѕ҃. И҆рмо́съ:

Пожрꙋ́ тѝ съ гла́сомъ хвале́ниѧ Гд҃и:

Доброты̀ Цр҃ъ Хᲃ҃ вожделѣ́въ, и҆ꙁбра́нной Це́ркви, ᲃі́ю ны́нѣ ꙗ҆ꙁы́комъ Мт҃ръ покаꙁа̀, ѿ работы̀ ᲃн҃отвори́мымъ благода́тїю Дх҃а.

Трепе́щꙋтъ вражде́бныхъ бѣ́сѡвъ по́лки, Хв҃ой Це́ркви, крⷭ҇тнымъ ѡ҆́браꙁомъ знаменова́нной, и҆ ѿ всѧ́кагѡ зла̀ сі́ю ѡ҆сѣнѧ́етъ благода́ть Дх҃а.

Не пѣсо́къ, но Ха҃ ѡ҆снова́нїе и҆мꙋ́щи ꙗ҆́же ѿ ꙗ҆ꙁы́къ Це́рковъ, Ца́рскою вѣнча́етсѧ Дїади́мою, доброто́ю ᲂу҆краша́ѧсѧ благода́ти всест҃агѡ Дх҃а.

Бг҃оро́диченъ:

Всѣ́хъ ᲃт҃ы́хъ ᲃт҃ѣ́йшаѧ Дв҃о, ᲃт҃ы́хъ ᲃт҃а́гѡ тѝ Сн҃а, хра́мъ се́й ѡ҆ст҃и́вшагѡ, молѝ приле́жнѡ, и҆ на́съ въ не́мъ томꙋ̀ вѣ́рнѡ ᲃлꙋжа́щихъ, ѡ҆ст҃и́ти благода́тїю Дх҃а.

Код: ѻ҆бновлен: Гла́съ, в҃. Под: Тве́рдыѧ:

Ꙍ҆бновле́нїе Дх҃а се́рдцем, и҆ просвѣще́нїе внꙋ́трным дарꙋ́й Хє҃, вѣ́рою ᲃъверша́ющимъ ᲃщ҃еннаѧ ѻ҆бновле́нїѧ, хра́ма селе́нїѧ твое́гѡ, є҆мꙋ́ же благоволи́лъ є҆сѝ Бжⷭ҇тве́нное и҆мѧ̀: є҆ди́не въ ᲃт҃ы́хъ прославлѧ́емый.

І҆косъ:

Ꙍ҆́блакомъ Кѵвꙍ́тъ въ Законномъ дре́вле ᲃт҃и́лищи ѡ҆сѣни́ти, въ ѡ҆браꙁъ є҆́же съ людмѝ на землѝ неви́димагѡ твое́гѡ пребыва́нїѧ, всѣ́хъ Тво́рче и҆ꙁво́лилъ є҆сѝ: въ Но́вой же Благода́ти, Дх҃а твое́гѡ Благода́тїю соверше́ннѡ ѡ҆сщ҃а́еши и҆ ѡ҆сѣнѧ́еши, чⷭ҇тною си на Крⷭ҇тѣ и҆скꙋпле́ннꙋю Кро́вїю Це́рковь: и҆ въ не́й вѣ́рнымъ благода́ть.

Та́йнами твои́ми бога́тнѡ, по мѣ́рѣ досто́инства подава́еши: вѣ́чномꙋ же животꙋ̀ въ Ца́рствїи свое́мъ, и҆ зрѣ́нїю свѣ́тлости твое́гѡ лица̀ сподоблѧ́еши. Тѣ́мъ ны́нѣ вѣ́рнїи рабѝ твоѝ, толи́кїѧ Благода́ти тꙋнѐ сподо́бшїисѧ, благода́рни сꙋ́ще, па́мѧтъ Ѻ҆сщ҃е́нїѧ сегѡ̀ ᲃт҃а́гѡ тѝ Хра́ма соверша́юще: благода́рное пѣ́нїе принѡ́симъ тѝ вопїю́ще:

Сла́вимъ тѧ и҆ꙁлїѧнїемъ Крвѐ свое́ѧ чⷭ҇тныѧ ѿ работы̀ на́съ вра́жїа и҆ А҆́дова мꙋчи́тел̾ства ᲃвободи́вшагѡ, ᲃн҃ы́ же и҆ наслѣ́дники Ца́рствїѧ сотво́ршагѡ:

Сла́вимъ тѧ грѣхѡ́въ ѻ҆ставле́нїе, ра́ꙁꙋма просвѣще́нїе, дꙋша́мъ же и҆ тѣ́лѡмъ ѡ҆сщ҃енїе, и҆ въ добродѣ́телехъ преспѣѧ́нїе въ Це́ркви твое́й сꙋ́щимъ вѣ́рнымъ подава́ющагѡ, и́ ра́бски припада́юще, ᲃла́вꙋ и҆ благодаре́нїе тебѣ̀ и҆ ѡ҆ ѡ҆сщ҃енїи ᲃт҃агѡ Хра́ма сегѡ̀ принѡ́симъ, и҆ смѣреннѡ мо́лимъ: прїймѝ всегда̀ въ не́мъ ѿ на́съ приноси́мыѧ тѝ мо́л̾бы, и҆ слове́сныѧ ᲃлꙋжбы, и҆ всѣ́хъ на́съ ꙗ҆́кѡ ще́дръ поми́лꙋй, Е҆ди́нъ бо є҆сѝ въ ᲃт҃ы́хъ прославлѧ́емый.

Пѣ́снь, з҃. И҆рмо́съ:

Въ пе́щи А҆враа́мстїи дѣ́ти Перси́дстей:

Благода́рни сꙋ́ще рабѝ твоѝ ѡ҆ всѣ́хъ твои́хъ благодѣѧ́нїй, бога́тнѡ на́мъ въ ᲃт҃о́мъ хра́мѣ се́мъ подава́емыхъ, ра́бски зове́мъ: блⷭ҇ве́нъ є҆сѝ въ Це́ркви ᲃла́вы твое́ѧ Гд҃и.

Ба́ню дх҃о́внꙋю грѣхѝ та́йнами твои́ми ѡ҆мыва́ющꙋю, ꙗ҆ви́лъ є҆сѝ Хє҃ Це́рковъ ᲃі́ю, и҆ всѣ́мъ скве́рнамъ ѡ҆чисти́лище: тѣмъ вѣ́рнѡ тѝ въпїе́мъ: благослове́нъ є҆сѝ въ Це́ркви сла́вы твое́ѧ Гд҃и.

Въ хра́мѣ ᲃе́мъ ᲃт҃о́мъ приноси́мыѧ ѿ на́съ же́ртвы и҆ мо́лбы, чл҃кѡлю́бче, и҆ грѣхѡ́мъ пода́ждъ ѡ҆ставле́нїе въпїю́щимъ: благослове́нъ є҆сѝ въ це́ркви сла́вы твое́ѧ Гд҃и.

Бг҃оро́диченъ:

Мо́лбы на́ша въ хра́мѣ ᲃе́мъ приноси́мыѧ, ᲃн҃ꙋ твое́мꙋ благопрїѧ́тны бы́ти сътворѝ Дв҃о, томꙋ̀ вѣ́рнѡ пою́щихъ: Благослове́нъ є҆сѝ въ Це́ркви ᲃла́вы твое́ѧ Гд҃и.

Пѣ́снь, и҃. И҆рмо́съ:

Рꙋ́цѣ распросте́ръ Данїи́лъ Лвѧ̀ зїѧ́нїѧ:

Рꙋ́къ воꙁдѣѧ́нїѧ, ᲃле́ꙁы въ сокрꙋше́нномъ се́рдци, и҆ моли́твы смире́нны въ хра́мѣ се́мъ тебѣ̀ приноси́мыѧ, благопрїѧтны Дх҃а бꙋ́дꙋтъ всеще́дре моли́мъ тѧ̀, всѣ́хъ ве́рнѡ пою́щихъ тѝ: благослови́те всѧ́каѧ дѣ́ла Гдⷭ҇нѧ Гд҃а.

Въ хра́мѣ и҆ Жерто́вницѣ се́мъ, и҆́хъ же ѡ҆ст҃и́лъ є҆сѝ въ помаꙁа́нїи ᲃт҃а́гѡ Мѵ́ра Дх҃а ᲃт҃а́гѡ благода́тїю, благопрїѧ́тны Дх҃а бꙋ́дꙋтъ тебѣ̀ приноси́мыѧ ᲃлове́сныѧ же́ртвы и҆ Слꙋже́нїѧ, ѿ на́съ вѣ́рнѡ пою́щихъ: блⷭ҇ви́те всѧ́каѧ дѣ́ла Гдⷭ҇нѧ Гд҃а.

Же́ртвꙋ беꙁъкро́внꙋю, пѣ́нїе и҆ хва́лꙋ, славосло́вїе съ моли́твою, во ѡ҆ставле́нїе грѣхѡ́въ, во хра́мѣ се́мъ тебѣ̀ досто́йнѡ всегда̀ приноси́ти, вѣ́рнѡ вопїющихъ тѝ сподобѝ: дѣ́ла всѧ́каѧ блⷭ҇ви́те Гн҃ѧ Гд҃а.

Бг҃оро́диченъ:

Хра́мъ Бг҃а невмѣсти́магѡ, нескаꙁа́ннѡ бы́вшаѧ Пречи́стаѧ, хра́мы на́съ тогѡ̀ благода́ти Бжⷭ҇тве́нныѧ бы́ти покажѝ, въ хра́мѣ ᲃе́мъ благоче́стнѡ томꙋ̀ пою́щихъ: блⷭ҇ви́те всѧ́каѧ дѣла̀ Гнⷭ҇ѧ Гд҃а.

Пѣ́снь, ѳ҃. И҆рмо́съ:

Ка́мень нерꙋкосѣ́чный, ѿ тебѐ несѣко́мыѧ горы̀ Дв҃и́це:

Ꙗ҆́кѡ да́ръ всече́стный, и҆ приноше́нїе благопрїѧ́тное, въ во́ни благоꙋха́нїѧ хра́мъ се́й прїи́мъ, соꙁда́телемъ ᲂу҆со́пшимъ вѣ́чное съ ᲃт҃ы́ми ᲂу҆покое́нїе, живы́мъ же благополꙋ́чное здра́вїе ми́лостивнѡ Хє҃ дарꙋ́й.

Приноси́мыѧ тѝ ѿ на́съ, нощедне́вныѧ въ хра́мѣ се́мъ мо́л̾бы и҆ же́ртвы Хє҃, ми́лостивнѡ прїи́мъ, Це́рковъ ᲂу҆мирѝ, вѣ́рꙋ ᲂу҆твердѝ, є҆́реси и҆скоренѝ, ᲂу҆со́пшихъ вѣ́рныхъ съ ᲃт҃ы́ми ᲂу҆поко́й, живы́мъ же благода́ть свою̀ дарꙋ́й.

Благолѣ́пїе до́мꙋ твое́гѡ любѧ́щихъ, ѡ҆ст҃ѝ ᲃп҃се, и҆ хра́мъ се́й въ сла́вꙋ твою̀ соꙁда́нный красѧ́щыхъ, ᲂу҆довлѝ Хє҃: ми́ръ же и҆ благослове́нїе, и҆ живо́тъ вѣ́чный те́мъ ꙗ҆́кѡ ще́дръ и҆ чл҃кѡлю́бецъ ми́лостивнѡ дарꙋ́й.

Бг҃оро́диченъ:

Ꙗ҆́кѡ те́плаѧ моли́твенница, и҆ ми́лостиваѧ ходота́ица, моли́твы на́шѧ прїи́мши, къ ᲃн҃ꙋ си доннѝ Дв҃о: и҆ грѣхѡ́мъ ѡ҆ставле́ние, жи́тїѧ и҆справле́нїе, и҆ живо́тъ беꙁъконе́чный, въ хра́мѣ се́мъ томꙋ̀ слꙋжа́щихъ ми́лостивнѡ и҆спросѝ.

Свѣти́ленъ ѻ҆бновле́нїю.

Под: Дх҃омъ въ ст҃и́лищ:

Прест҃о́ю тѝ Кро́вїю и҆скꙋпи́вый ᲃло́ве, ᲃт҃ꙋ́ю Собо́рнꙋю А҆пⷭ҇лскꙋю си це́рковъ, и҆ Дх҃омъ твои́мъ ᲃі́ю ѡ҆ст҃и́вый, и҆ Дв҃ꙋ чⷭ҇тꙋ себѣ̀ сі́ю вѣ́чнѡ ѡ҆брꙋчи́вый, ты и ны́нѣ, въ ᲃла́вꙋ твою̀ хра́мъ ᲃе́й соꙁда́нный и҆ ѡ҆сщ҃енный, за́́рѧми твое́го Дх҃а и҆ ᲃи́лою чꙋде́съ непреста́ннѡ просла́ви, и҆ тебѐ въ не́мъ вѣ́рнѡ славѧ́щихъ всегда̀ благословѝ.

Бг҃оро́диченъ:

Свѣ́томъ Бжⷭ҇тве́ннымъ въ хра́мѣ ᲃе́мъ правовѣ́рнѡ слꙋжа́щихъ, ѡ҆ꙁари́ти всест҃а́ѧ Дв҃о, ᲃн҃а твое́гѡ и҆ Бг҃а молѝ, стра́стїй тмꙋ̀ глꙋбо́кꙋю ѿ ни́хъ ѿганѧ́ѧ, и҆ благода́ть Дх҃а подава́ѧ, всѣ́мъ вѣ́рнѡ чтꙋ́щимъ Пречи́стое Рождество̀ твоѐ ѡ҆брадова́ннаѧ.

На Хвали́техъ, Всѧ́кое дыха́нїе: и҆ поста́вимъ ѻ҆бновле́нїю ᲃтіхи́ръ, д҃. Гла́съ, д҃.

Влады́ко Хє҃ беꙁъсм҃ртне, наше́ствїемъ ᲃт҃а́гѡ тѝ Дх҃а свы́шше, ꙗ҆́коже ѡ҆ст҃и́лъ є҆сѝ Це́рковъ ᲃі́ю: си́це и҆ до сконча́нїѧ вѣ́ка недвижи́мꙋ сохранѝ, вѣ́рныхъ же въ не́й къ тебѣ̀ притѣка́ющихъ, приноси́мыѧ тѝ мо́л̾бы прїймѝ, и҆ всѣхъ неприкоснове́ннагѡ твое́гѡ ᲃвѣ́та сподобѝ, ꙗ҆́кѡ милосе́рдъ.

Въ ѻ҆бновле́нїи хра́ма дре́вле Соломѡ́нъ, беꙁъслове́сныхъ живо́тныхъ же́ртвы, и҆ всесожже́нїѧ приносѧ́ тѝ Гд҃и, колѣ́нѣ прекло́нъ молѧ́шесѧ, благопрїѧ́тнѣй тебѣ̀ въ не́мъ, Моли́твѣ люді́й твои́хъ бы́ти: и҆ мы ᲂу҆́бѡ въ лѣ́тной ѡ҆сщ҃е́нїѧ ᲃегѡ̀ чⷭ҇тнагѡ тѝ хра́ма па́мѧти, колѣ́нѣ дꙋ́шъ и҆ серде́цъ на́шихъ ра́бски прекло́нше, ᲂу҆сердѡ тѧ моли́мъ, ми́лостивнѡ ꙗ҆́кѡ ще́дръ поми́лꙋй и҆ сп҃си́ на́съ.

Прїйдѣ́те вѣ́рныхъ ᲃобѡ́ры, праꙁденстве́ннѡ ли́къ дꙋхо́вный ны́нѣ соста́вл̾ше, и҆ дꙋ́шъ на́шихъ ᲃвѣща̀ добродѣ́тел̾мѝ просвѣти́вше, ᲃвѣ́тлѡ Дави́дски воꙁопі́имъ: ᲃе́й є҆́стъ де́нь и҆́же сотворѝ Гд҃ь, воꙁра́дꙋемсѧ и҆ воꙁвесели́мсѧ во́нь: ᲃе́ бо ми́лостивнѡ и҆ꙁбра̀ ᲃебѣ̀ Хра́мъ ᲃе́й, и҆ и҆ꙁволѝ є҆гѡ̀ въ жи́лище ᲃебѣ̀, въ и҆ꙁвѣ́стное вѣ́рнымъ прибѣ́жище, и҆ ᲃпасе́нїе дꙋша́мъ на́шимъ.

Ꙍ҆брѣ́тше вѣ́рнїи мѣ́сто Гв҃и, и҆ ᲃеле́нїе Бг҃ꙋ на́шемꙋ: ра́достнѡ ны́нѣ внидѣ́мъ, и҆ поклони́мсѧ во дворѣъ ᲃт҃о́мъ є҆гѡ̀, ᲂу҆миле́ннѡ зовꙋ́ще: Ꙍ҆ст҃и́лъ є҆сѝ ᲃеле́нїе своѐ сі́е вы́шнїй Бж҃е, пребꙋ́ди ᲂу҆бо посре́дѣ є҆гѡ̀, и҆ не подви́житсѧ въ вѣ́ки, и҆ на́мъ всегда̀ въ не́мъ тѧ вѣ́рнѡ славѧ́щимъ, пода́ждъ грѣхѡ́въ ѡ҆ставле́нїе, и҆ ве́лїю ми́лость.

Сла́ва: Гла́съ, ѕ҃.

Поꙁна́имъ бра́тїе пра́ꙁденства ѻ҆бновле́нїѧ та́йнꙋ, и҆ въ себѐ прише́дше ѡ҆чи́стимъ себѐ ѿ всѧ́кїа скве́рны пло́ти и҆ дꙋ́ха, ѡ҆бновле́нїе ѿ злотворе́нїѧ, въ добродѣ́телехъ жи́тїѧ на́шегѡ пра́ꙁденство въ стра́сѣ Бж҃іимъ всегда̀ творѧ́ще, ꙗ҆́кѡ Дх҃а чи́сты хра́мы добродѣ́тел̾мѝ себѐ Хрⷭ҇тꙋ̀ содѣла́вше, съ Ѿц҃емъ свои́мъ беꙁнача́лнымъ и҆ Дх҃омъ Божестве́нным прі́йдетъ, и҆ ѻ҆би́телъ въ на́съ сотво́ритъ, и҆ свое́ѧ благода́ти ᲃїѧ́нїѧ дш҃ѧ̀ на́шѧ и҆спо́лнитъ, и҆ ᲃла́дкагѡ съ ᲃт҃ы́ми прича́стїѧ ᲃвое́гѡ наслажде́нїе дарꙋ́етъ: ᲃи́це бо ѻ҆бновлѧ́етсѧ чл҃къ, и҆ та́кѡ почита́етсѧ ѻ҆бновле́нїѧ день.

И҆ ны́нѣ:

Бц҃е ты є҆сѝ лоꙁа̀ и҆́стиннаѧ:

Славосло́вїе вели́к: По Трⷭ҇том: Троп: Ꙍ҆бновлен: Е҆кте́нїѧ ѡ҆бы́чнаѧ и҆ Ѿпꙋ́стъ. Часъ а҃-й, и҆ на не́мъ Троп: и҆ Код: ѻ҆бновле́нїю, та́кожде и҆ на про́чїихъ Часѣ́хъ.

Блаже́нна ѿ Канꙍ́на Ѻ҆́бновлен: Пѣ́снъ г҃, и҆ ѕ҃. Прок: Гла́съ, д҃. Гдⷭ҇ь въ Це́ркви ᲃт҃ѣ́й свое́й, Гд҃ь на нб҃сѝ Престо́лъ є҆гѡ̀.

Сті́хъ:

Ꙗ҆́кѡ пра́веденъ Гд҃ь и҆ пра́вды воꙁлюбѝ, пра́ваѧ видѣ̀ лицѐ є҆гѡ̀.

А҆пⷭ҇лъ къ Римлѧ́нѡмъ, Гла́ва, в҃і. Зач: р҃и. Нача́ло є҆гѡ̀ ᲃі́е.

Бра́тїе, Молю̀ ва́съ щедрота́ми Бо́жіими:

Коне́цъ же ᲃе́й.

Коемꙋ́ждѡ ꙗ҆́коже Бг҃ъ раꙁдѣли́лъ є҆́стъ мѣ́рꙋ вѣ́ры.

А҆ллил: Гла́съ, а҃. Сті́хъ, а҃

Ст҃ы́ни и҆ велелѣ́пїе въ ᲃт҃и́лѣ є҆гѡ̀.

Сті́хъ в҃.

Поклони́тесѧ Гдⷭ҇ви въ дво́рѣ ᲃт҃о́мъ є҆гѡ̀.

Е҆ѵⷢ҇лїе ѿ І҆ѡан: Глава̀, і҃. зача́ло, л҃ꙁ. Е҆го́ же нача́ло сі́е.

Въ вре́мѧ ѻ҆́но. Бы́шѧ ѻ҆бновле́нїѧ въ І҆ерⷭ҇ли́мѣхъ.

Конецъ же є҆гѡ̀.

А҆́ꙁъ и҆ ѡ҆ц҃ъ є҆дино̀ є҆́сма.

Прича́стенъ:

Гд҃и воꙁлюби́хъ благолѣ́пїе до́мꙋ твое́гѡ, и҆ мѣ́сто вселе́нїѧ ᲃла́вы твое́ѧ, А҆ллилꙋ́іѧ.

Коне́цъ ᲃлꙋ́жбы ѡ҆бновле́нїѧ, въ ᲃла́вꙋ Бо́жію.