Чи́нъ Лѣтопровожде́нїѧ и҆ нача́ло нова́гѡ лѣ́та, съверша́емый въ а҃, де́нь Мцⷭ҇а Септе́м:

По Оу҆́трни пре́дъ Боже́стве́нною Лѵтꙋ́ргїею, прише́дъ ᲃт҃и́тель въ Це́рковъ въ всѣ́мъ ᲃщ҃еннымъ твои́мъ ᲃобо́ромъ, ѡ҆блачитсѧ въ всѧ̀ ᲃт҃и́телскїѧ ѡ҆де́жды, и҆ вше́дъ въ Ѻ҆́лтаръ покланѧ́етсѧ, и҆ лобꙁа́етъ ᲃт҃ꙋ́ю Тра́пеꙁꙋ, и҆ вꙁе́мъ ѿ А҆рхідїа́кона Кади́лницꙋ, ка́дитъ ᲃт҃ꙋ́ю Тра́пеꙁꙋ крⷭ҇таѡ́браꙁнѡ. Вꙁе́мъ же по си́хъ А҆рхідїа́конъ блⷭ҇ве́нїе ѿ ᲃт҃и́телѧ и҆схо́дитъ, и҆ ста́въ на А҆мбѡ́нѣ, воꙁглаша́етъ.

Блⷭ҇вѝ Влады́ко.

Ст҃и́тель же начина́етъ.

Блⷭ҇ве́но Ца́рство Ѿц҃а̀, и҆ Сн҃а, и҆ ᲃт҃а́гѡ Дх҃а, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ:

А҆ми́нь.

Дїа́конъ же гл҃етъ Е҆кте́нїю вели́кꙋю.

Ми́ромъ Гд҃ꙋ помоли́мсѧ.

Ли́къ:

Гд҃и поми́лꙋй.

Ꙍ҆ свы́шнемъ ми́рѣ и҆ ᲃп҃се́нїи дꙋ́шъ на́шихъ, Гд҃ꙋ помоли́мсѧ:

Ꙍ҆ ми́рѣ всегѡ̀ ми́ра, благостоѧ́нїи ᲃт҃ы́хъ Бж҃іихъ:

Ꙍ҆ стѣ́мъ хра́мѣ се́мъ, и҆ съ вѣ́рою и҆ благоговѣ́н:

Ꙍ҆ Преѡсщ҃е́нномъ А҆рхїепи́скопѣ на́шемъ всеѧ̀ Рѡ́ссїи:

Ꙍ҆ Вели́комъ Королѝ на́шемъ Имⷬ҇къ: благочести́в:

Ꙍ҆ є҆́же благопоспѣши́ти и҆́мъ въ все́мъ, и҆ покори́ти подъ но́ꙁѣ и҆́хъ всѧ̀ хрⷭ҇тоненави́стныѧ ꙗ҆ꙁы́ки, и҆ всѧ́кагѡ вра́га и҆ сꙋпоста́та, Гд҃ꙋ помоли́мсѧ.

Ꙍ҆ ст҃ѣ́й Ꙍ҆би́тели се́й и҆ всѧ́кой ѻ҆би́тели:

Ꙍ҆ є҆́же благопрїѧ́тнымъ бы́ти ни́нѣшнимъ на́шимъ, и҆ прости́ти на́мъ и҆ всѣ́мъ люде́мъ свои́мъ всѧ̀ согрѣше́нїѧ во́лнаѧ и҆ нево́лнаѧ, въ мимоше́дшомъ лѣ́тѣ на́ми злѣ̀ содѣѧ́ннаѧ, Гд҃ꙋ помоли́мсѧ.

Ꙍ҆ є҆́же ѿврати́ти ѿ на́съ ве́съ гнѣ́въ сво́й, пра́веднѡ на́ ны грѣ́хъ на́шихъ движи́мый, Гд҃ꙋ помоли́мсѧ.

Ꙍ҆ є҆́же не помѧнꙋ́ти беꙁчисле́ннаѧ беꙁꙁакѡ́нїѧ и҆ лꙋка́ваѧ на́шѧ дѣѧ́нїѧ въ мимоше́дшомъ лѣ́тѣ бы́вшаѧ, и҆ не воꙁда́ти на́мъ по дѣло́мъ на́шимъ: но въ ми́лости и҆ щедрѡта́хъ посѣти́ти на́съ, Гд҃ꙋ помоли́мсѧ.

Ꙍ҆ є҆́же благослови́ти нача́токъ и҆ провожде́нїе начина́емагѡ лѣ́та бла́гостїю чл҃кѡлю́бїѧ сво́егѡ: вре́мена же ми́рна, благораство́рны во́ꙁдꙋхи, и҆ беꙁъгрѣ́шенъ въ здра́вїи съ дово́лствомъ живо́тъ дарова́ти, Гд҃ꙋ помоли́мсѧ.

Ꙍ҆ є҆́же ѿгна́ти ѿ на́съ всѧ̀ дш҃етлѣ́нныѧ стра́сти, и҆ растлѣ́нныѧ ѡ҆бы́чаѧ, и҆ стра́хъ сво́й Боже́ственный всади́ти въ ᲃе́рдца на́ша, къ и҆сполне́нїю за́повѣдїй свои́хъ, Гд҃ꙋ помоли́мсѧ.

Ꙍ҆ є҆́же ѡ҆бнови́ти Дх҃ъ пра́вый въ ᲂу҆тро́бахъ на́шихъ, и҆ ᲂу҆крѣпи́ти на́съ въ правосла́вной вѣ́рѣ, и҆ спѣ́шныхъ къ дѣла́нїю до́брыхъ дѣ́лъ, и҆ и҆сполне́нїю всѣ́хъ за́повѣдїй свои́хъ сътвори́ти, Гд҃ꙋ помоли́мсѧ.

Ꙍ҆ є҆́же блⷭ҇ви́ти вѣне́цъ начина́емагѡ лѣ́та бла́гостїю си, и҆ ᲂу҆толи́ти въ на́съ всѧ̀ вра́жды, нестрое́нїѧ, и҆ междосо́бныѧ бра́ни: пода́ти же мі́ръ, тве́рдꙋю нелицемѣ́рнꙋю любо́въ, благочи́нное же строе́нїе, и҆ добродѣ́телное жи́тїе, Гд҃ꙋ помоли́мсѧ.

Ꙍ҆ є҆́же помѧнꙋ́ти Це́рковъ свою̀ ᲃт҃ꙋ́ю, и҆ ᲂу҆крѣпи́ти, ᲂу҆тверди́ти же раꙁшири́ти, и҆ ᲂу҆мири́ти ю҆̀, и҆ невреди́мꙋ а҆́довами вра́ты и҆ всѣ́ми навѣ́ты ви́димых и҆ неви́димых врагѡ́въ непребори́мꙋ, въ вѣ́ки съблюстѝ, Гд҃ꙋ помоли́мсѧ.

Ꙍ҆ є҆́же ниꙁложи́ти всѧ̀ є҆́реси и҆ ѿстꙋ́пства, и҆ насади́ти всю́дꙋ правовѣ́рїе и҆ благоче́стїе, и҆ ѡ҆брати́ти всѣ́хъ ѿстꙋ́пл̾шихъ ѿ пра́выѧ вѣ́ры къ поꙁна́нїи свое́ѧ и҆́стинны, и҆ съедини́ти и҆́хъ ст҃ѣ́й свое́й Православнокаѳоли́ческой Це́ркви, Гд҃ꙋ помоли́мсѧ.

Ꙍ҆ є҆́же и҆скорени́ти и҆ ᲂу҆гаси́ти все Богохꙋ́лное А҆гарѧ́нское нече́стїе, и҆ Ца́рство и҆́хъ ско́ро раꙁдрꙋши́ти, и҆ правовѣ́рнымъ Царе́мъ преда́ти є҆̀, Гд҃ꙋ помоли́мсѧ.

Ꙍ҆ є҆́же дѡ́жды благовре́менны, же и҆ по́ꙁдны, и҆ ро́сꙋ плодоно́снꙋ: вѣ́тры мѣ́рны и҆ благораство́рны, и҆ теплотꙋ̀ ᲃли́чнꙋю въ мѣ́рꙋ пода́ти, Гд҃ꙋ помоли́мсѧ.

Ꙍ҆ плава́ющихъ, пꙋт̾шествꙋ́ющихъ, трꙋжда́ющихсѧ, плѣне́нныхъ и҆ ѡ҆ ᲃпасе́нїи и҆́хъ, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ на́мъ въ сі́е грѧдꙋ́щее лѣ́то и҆ въ всѧ̀ дни живота̀ на́шегѡ, ѿ гла́да, гꙋби́тел̾ства, трꙋ́са, пото́па, гра́да, ѻ҆гнѧ̀, меча̀, наше́ствїѧ и҆ноплеме́нникъ, и҆ междосо́бныѧ ра́ти, и҆ всѧ́кїѧ смертоно́сныѧ ра́ны, ско́рби же, гнѣ́ва, бѣды̀ и҆ нꙋ́жды, Гд҃ꙋ помоли́мсѧ.

Застꙋпѝ, ᲃп҃си, поми́лꙋй, и҆ сохранѝ на́съ Бж҃е твое́ю благода́тїю.

Прⷭ҇тꙋ́ю чⷭ҇тꙋю, и҆ преблагослове́ннꙋю:

Ст҃лъ же воꙁглаш:

Ꙗ҆́кѡ подоба́етъ тѝ всѧ́каѧ:

Ли́къ:

А҆ми́нь.

А҆бїе же пою́тъ:

Бг҃ъ Гд҃ь и҆ ꙗ҆ви́сѧ на́мъ:

на Гла́съ, в҃. и҆ Тропа́ръ Но́вомꙋ лѣ́тꙋ.

Всеѧ̀ тва́ри ᲃъдѣ́телю, времена̀ и҆ лѣ́та въ свое́й ѡ҆́бласти положи́вый: благословѝ вѣне́цъ лѣ́тꙋ бла́гости твое́ѧ Гд҃и, съхранѧ́ѧ въ ми́рѣ Це́рковъ Царѧ́ же и҆ градъ тво́й, Моли́твами Бц҃а, и҆ спасѝ на́съ. вⷤ.

Сла́ва: И҆ ны́нѣ: Гла́съ, з҃.

Ра́дꙋйсѧ благодатнаѧ Бц҃е Дв҃о, приста́нище и҆ предста́телнице ро́да члчⷭ҇кагѡ: и҆ꙁъ тебе́ бо въплоти́сѧ и҆ꙁбави́телъ мі́ра: є҆дина́ бо є҆сѝ Мт҃и и҆ Дв҃а, прⷭ҇нѡ блⷭ҇ве́нна, и҆ препросла́влена: мл҃ѝ ᲂу҆́бѡ Ха҃ Бг҃а, ми́ръ дарова́ти Це́ркви свое́й и҆ все́й вселе́ннѣй.

Дїа́конꙋ ре́кшꙋ,

Гд҃ꙋ помоли́мсѧ:

Ст҃и́тель чте́тъ Моли́твꙋ сі́ю велегла́снѡ.

Гд҃и Бж҃е на́шъ помѧнѝ на́съ грѣ́шныхъ и҆ недосто́йныхъ ра́бъ твои́хъ, внегда̀ приꙁыва́ти на́мъ всест҃о́е и҆ покланѧ́емое И҆мѧ̀ твоѐ, и҆ не посрамѝ на́съ ѿчаѧ́нїѧ ми́лости твое́ѧ: Но ми́лостивнѡ прости́въ на́мъ всѧ̀ съгрѣше́нїѧ во́лнаѧ и҆ нево́лнаѧ, ꙗ҆́же въ мимоше́дшомъ съгрѣши́хѡмъ лѣ́тѣ, дарꙋ́й на́мъ всѧ̀ ꙗ҆́же къ ᲃп҃се́нїю ᲃмѣре́ннаѧ проше́нїѧ, и҆ сподобѝ на́съ въ про́чее вре́мѧ живота̀ на́шегѡ, люби́ти и҆ боѧ́тисѧ тебѐ ѿ всегѡ̀ се́рдца на́шегѡ, и҆ дѣ́лати пра́вдꙋ на всѧ́кое вре́мѧ, и҆ твори́ти во́лю твою̀ благꙋ́ю, благоꙋго́днꙋю, и҆ съверше́ннꙋю въ всѧ̀ днѝ живота̀ на́шегѡ, и҆ ѡ҆брѣсти ми́лость, и҆ благода́ть полꙋчи́ти ᲂу҆ тебѐ Бг҃а на́шегѡ: Ꙗ҆́кѡ бла́гъ и҆ чл҃кѡлю́бецъ Бг҃ъ є҆сѝ, и҆ тебѣ̀ сла́вꙋ воꙁсыла́емъ Ѿц҃ꙋ̀, и҆ Сн҃ꙋ, и҆ ᲃто́мꙋ Дх҃ꙋ ны́нѣ и҆ прⷭ҇нѡ и҆ въ вѣ́ки вѣ́кѡвъ.

Ли́къ:

А҆ми́нь.

Ст҃и́тель ѡ҆бра́щсѧ къ лю́демъ благословлѧ́етъ и҆́хъ десни́цею, гл҃ѧ̀.

Ми́ръ всѣ́мъ.

Ли́къ:

И҆ дх҃ови твое́мꙋ.

Дїа́конъ:

Гла́вы ва́ша Гв҃и прек:

Ли́къ:

Тебѣ̀ Гд҃и.

Ст҃и́тель же чте́тъ та́йнѡ Моли́твꙋ сі́ю, всѣ́мъ Гла́вы прекло́ншимъ.

Гд҃и ᲃт҃ы́й, въ вы́шнихъ живы́й, и҆ на ᲃмѣре́нныѧ приꙁира́ѧй, всевидѧ́щимъ ѻ҆́комъ твои́мъ приꙁира́ѧй на всю̀ тва́рь: тебѣ̀ преклони́хомъ вы́ѧ ᲃе́рдца на́шегѡ и҆ тѣ́лесѐ, и҆ мл҃и́мътисѧ, прострѝ рꙋ́кꙋ твою̀ невиди́мꙋю, ѿ ᲃт҃гѡ жи́лища твое́гѡ, и҆ благословѝ всѣ́хъ на́съ: и҆ є҆́же согрѣши́хѡмъ въ мимоше́дшомъ лѣ́тѣ во́лею и҆лѝ нево́лею, ꙗ҆́кѡ бла́гъ и҆ чл҃кѡлю́бецъ Бг҃ъ простѝ: дарꙋ́ѧ на́мъ ны́нѣ, и҆ въ грѧдꙋ́щее вре́мѧ ми́рскаѧ и҆ преми́рнаѧ твоѧ̀ блага́ѧ.

И҆ воꙁглаша́етъ.

Твое́ бо є҆́стъ є҆́же ми́ловати и҆ ᲃп҃са́ти на́съ Бж҃е на́шъ, и҆ тебѣ̀ ᲃла́вꙋ воꙁсыла́емъ Ѿц҃ꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Ли́къ:

А҆ми́нь.

И҆схо́дитъ же по си́хъ Дїа́конъ, и҆ ста́въ на А҆мбо́нѣ, воꙁглаша́етъ.

Благословѝ Влады́ко.

Ст҃ль же гл҃етъ:

Блⷭ҇ве́нна ᲃла́ва Гдⷭ҇нѧ ѿ мѣ́ста ᲃт҃а́гѡ є҆гѡ̀, всегда̀ ны́нѣ и прⷭ҇нѡ, и҆ во вѣ́ки вѣ́кѡвъ.

Ли́къ:

А҆ми́нь.

Дїа́конъ же гл҃етъ:

Съ ми́ромъ и҆ꙁыйдѣмъ

Кли́ръ:

Ꙍ҆ и҆менѝ Гн҃и.

И҆сходитъ же ᲃт҃ль, предидꙋ́щимъ ᲃвѣщенѡ́сцемъ съ ᲃвѣща́ми, Дїа́конѡмъ съ Кади́лницами. І҆ере́ѡмъ съ крⷭ҇ты̀: пре́дъ самы́мъ же ᲃт҃лемъ. А҆рхідїа́конꙋ съ Е҆ѵⷢ҇лїемъ, и҆ дрꙋго́мꙋ Дїа́конꙋ съ Кади́лницею, и҆ двѣма̀ и҆ под дїа́конома съ свѣща́ми, и҆ та́кѡ и҆де́тъ ники́мъ не поддержи́мъ, творѧ̀ ѡ҆бхожде́нїе ѡ҆́крестъ Це́ркве.

Пѣвци́ же пою́тъ Стіхи́ры Новомꙋ лѣ́тꙋ. Гла́съ, а҃. Под: Нбⷭ҇ным Чи́нѡмъ радова́нїе.

Самосла́внагѡ и҆ Божестве́ннагѡ ᲂу҆ченїѧ Хв҃а, моли́твꙋ навы́кше, на всѧ́къ де́нь воꙁопі́имъ зижди́телю:

Ѿч҃е на́шъ, на нб҃се́хъ живы́й: насꙋ́щный хлѣ́бъ да́ждъ на́мъ, преꙁира́ѧ на́шѧ прегрѣше́нїѧ.

На ᲃіна́йстѣй горѣ̀, ᲃкрижа́ли написа́вый дре́вле, то́йжде и҆ ны́нѣ, въ гра́дѣ Наꙁаре́тѣ по пло́ти, Кни́гꙋ прїѧ́лъ є҆сѝ Пррⷪ҇ческꙋю прочестѝ, Хє҃ Бж҃е: и҆ сі́ю согнꙋ́въ, наꙋча́лъ є҆сѝ лю́ди, и҆сполни́тисѧ писа́нїю на тебѣ̀.

Ꙗ҆́коже є҆вре́йскаѧ тѣлеса̀, въ пꙋсты́нѣ дре́вле: непоко́ршихсѧ въи́стиннꙋ тебѣ̀ всѣ́хъ Влады́цѣ, досто́йнѡ падѡ́ша: ᲃи́це и҆ ны́нѣ, кѡ́сти раꙁсыплѝ, злочести́выхъ и҆ невѣ́рныхъ А҆гарѧ́нъ, ѱало́мски при А҆́дѣ Гд҃и.

Гла́съ, ѕ҃.

Дх҃ꙋ ᲃт҃о́мꙋ съедине́ный, беꙁнача́лне ᲃло́ве и҆ ᲃн҃е: всѣ́хъ ви́димыхъ и҆ неви́димыхъ ᲃодѣ́телю и҆ зижди́телю: вѣне́цъ лѣ́та блⷭ҇вѝ, ᲃохранѧ́ѧ въ ми́рѣ правосла́вных мнѡ́жества: молитва́ми Бц҃а, и҆ всѣ́хъ ᲃты́хъ твои́хъ.

Гла́съ, є҃.

Ты Цр҃ю ᲃы́й прⷭ҇нѡ, и҆ пребыва́ѧй въ вѣ́ки беꙁъконе́чныѧ: прїймѝ моле́нїѧ грѣ́шныхъ просѧ́щихъ ᲃпⷭ҇нїѧ, и҆ пода́ждъ чл҃кѡлю́бче землѝ твое́й благопло́дїе, благораство́рны во́ꙁдꙋхи дарꙋ́ѧ: вѣрнѣ́йшомꙋ Царю̀ сопоборствꙋ́й на беꙁъбо́жныѧ А҆гарѧ́ны, ꙗ҆́коже и҆но́гда Дави́дꙋ: ꙗ҆́кѡ прїйдо́ша ᲃі́и въ селе́нїѧ твоѧ̀, и҆ всест҃о́е мѣ́сто ѡ҆скверни́ша ᲃп҃се: но ты̀ дарꙋ́й побѣ́ды Хє҃ Бж҃е моле́нїемъ Бц҃а. побѣ́да бо ты́ є҆сѝ правосла́внымъ и҆ похва́ла.

Гла́съ, а҃.

Ди́венъ є҆сѝ Бж҃е, и҆ ди́вна сꙋ́тъ дѣ́ла твоѧ̀, и҆ пꙋ́тїе твоѝ неиꙁслѣдова́нны: є҆сѝ бо мꙋ́дростъ Бж҃іѧ, и҆ соста́въ соверше́нъ и҆ си́ла: събеꙁнача́ленъ же, и҆ съпрⷭ҇нѡсꙋ́щенъ, и҆ дѣ́йствомъ всеси́лныѧ вла́сти въ мі́ръ прише́лъ є҆сѝ, (и҆скі́й ᲂу҆добри́ти ᲃоꙁда́нїе своѐ,) неиꙁрече́ннѡ ѿ неискꙋсомꙋ́жныа Мт҃ре, не прело́жсѧ Божество́мъ: завѣщава́ѧ ᲂу҆ста́вы и҆ лѣ́та, въ ᲃпⷭ҇нїе на́ше неиꙁмѣ́нне: ᲃегѡ̀ ра́ди вопїе́мъ тѝ, благі́й Гд҃и ᲃла́ва тебѣ̀.

Премꙋ́дростїю всѧ̀ ᲃодѣѧ́вый превѣ́чное ᲃло́во Ѿч҃ее, И҆ всѧ́ческꙋю тва́ръ всеси́лнымъ твои́мъ ᲃло́вомъ соста́вивый: блⷭ҇вѝ вѣне́цъ лѣ́тꙋ бла́гости твое́ѧ, и҆ є҆́реси ниꙁложѝ Бц҃а ра́ди, ꙗ҆́кѡ бла́гъ и҆ чл҃кѡлю́бецъ.

Сла́ва: И҆ ны́нѣ: Гла́съ, тожъ.

Хє҃ Бж҃е на́шъ, премꙋ́дростїю всѧ̀ содѣѧ́вый, и҆ ѿ несꙋ́щихъ въ бы́тїе приведы́й: блⷭ҇вѝ вѣне́цъ лѣ́та, и҆ гра́дъ на́шъ сохранѝ невреди́мъ, вѣ́рныѧ же Царѧ̀ на́шѧ, ᲃи́лою свое́ю воꙁвеселѝ, побѣ́ды длѧ̀ и҆́мъ на ᲃꙋпоста́ты, Бц̀а ра́ди дарꙋ́ѧ мі́рови ве́лїю ми́лость.

Пою́щꙋ же сі́ѧ ᲃтіхи́ры, вⷤ, ѻ҆бходѧ́тъ Це́рковъ.

Тре́тее же ѻ҆бходѧ́ще, прише́дше на ю҆́жнюю ᲃтра́нꙋ ста́нꙋтъ, А҆рхідїѧ́конъ же, гл҃етъ Е҆кте́нїю ᲃі́ю за Царѧ̀.

Е҆щѐ моли́мсѧ Гд҃ꙋ Бг҃ꙋ на́шемꙋ, ѡ҆ є҆́же поми́ловати вели́кагѡ Королѧ̀ на́шегѡ, И҆мⷬ҇къ: и҆ и҆ꙁба́вити є҆гѡ̀ ѿ всѧ́кїѧ ᲃко́рби, бѣ́ды, и҆ нꙋ́жды, и҆ всѧ́кїѧ бо́лѣꙁни: и҆ покори́ти подъ но́ꙁѣ є҆гѡ̀ всѧ̀ хрⷭ҇тонена́вистныѧ ꙗ҆ꙁы́ки бра́немъ хотѧ́шїѧ: ми́ромъ же ѡ҆гради́ти Ца́рство є҆гѡ̀, и҆ ми́рнаѧ и҆ блага́ѧ гл҃а́ти въ ᲃе́рдци є҆гѡ̀ всегда̀ ѡ҆ Це́ркви свое́й ᲃт҃ой, и҆ ѡ҆ всѣ́хъ лю́дехъ свои́хъ, рцѣ́м всѝ, Гд҃и ᲂу҆слы́ши и҆ поми́лꙋй.

Пѣвци́ же пою́тъ, гⷤ,

Гд҃и поми́лꙋй.

Ст҃ль же Воꙁгласи́въ,

Ꙗ҆́кѡ бла́гъ и҆ чл҃кѡлю́бецъ Бг҃ъ є҆сѝ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Ли́къ:

А҆ми́нь.

Кресто́мъ благословлѧ́етъ лю́ди.

И҆дꙋ́ще же пѣвцѝ пою́тъ Тропа́ръ ᲃе́й, Гла́съ, а҃.

Спасѝ Гд҃и лю́ди своѧ̀ и҆ блⷭ҇вѝ достоѧ́нїе твоѐ, побѣ́ды Царе́мъ на́шимъ на ва́рвары дарꙋ́ѧ, и҆ своѧ̀ сохранѧ́ѧ Кресто́мъ си лю́ди.

Прише́дше же на Восто́къ, и҆ ста́вше лице́мъ къ за́падꙋ, А҆рхідїа́конъ гл҃етъ Е҆кте́нїю сі́ю, за ᲃт҃а́ѧ.

Е҆щѐ мо́лимсѧ ѡ҆ Преѡсщ҃е́нномъ А҆рхїепⷭ҇пѣ на́шемъ всеѧ̀ Рꙍ́ссїи Митрополи́тѣ, И҆мⷬ҇къ: (и҆лѝ ѡ҆ Боголюби́вомъ Е҆пⷭ҇пѣ на́шемъ, И҆мⷬ҇къ:) и҆ ѡ҆ є҆́же Гд҃ꙋ Бг҃ꙋ на́шемꙋ дарова́ти є҆гѡ̀ ᲃт҃ы́мъ свои́мъ Церква́мъ въ ми́рѣ, здра́ва, долгоден̾ствꙋ́юща, и҆ правопрввѧ́ща ᲃло́во свое́ѧ и҆́стинны: и҆ и҆ꙁба́вити є҆гѡ̀ и҆ ве́сь При́четъ Церко́вный и҆ всѧ̀ правосла́вныѧ хрⷭ҇тїа́ны ѿ всѧ́кїѧ ско́рби, бѣ́ды, гнѣ́ва, и҆ нꙋ́жды, и҆ ѿ всѧ́кїѧ бо́лѣꙁни дш҃евныѧ и҆ тѣле́сныѧ, и҆ прости́ти и҆́мъ всѧ́кое согрѣше́нїе во́лное и҆ нево́лное, рцѣ́мъ всѝ, Гд҃и ᲂу҆слы́ши и҆ поми́лꙋй.

Пѣ́вцємъ же ѿпѣ́вшимъ гⷤ,

Гд҃и поми́лꙋй.

Ст҃ль воꙁглаш:

Ꙗ҆́кѡ ми́лостивъ и҆ чл҃кѡлю́бецъ Бг҃ъ є҆сѝ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Ли́къ:

А҆ми́нь.

Блⷭ҇ви́въ же ᲃт҃ль лю́ди Кресто́мъ, и҆де́тъ къ ᲃѣ́верной ᲃтра́нѣ, Пѣвце́мъ пою́щимъ Троп: се́й Гла́съ, з҃.

Гд҃и Гд҃и, при́ꙁри съ нб҃се и҆ ви́ждъ, и҆ посѣтѝ виногра́дъ се́й, и҆ совершѝ є҆гѡ̀, є҆го́же насадѝ десни́ца твоѧ̀: Влады́кꙋ же и́ А҆рхіере́ѧ на́шегѡ на мнѡ́гїѧ лѣ́та въ ми́рѣ съ всѣ́мъ Кли́ромъ съхранѝ.

Прише́дше же и҆ ста́вше на ᲃѣ́верной ᲃтранѣ, А҆рхідїаконъ гл҃е́тъ Е҆кте́нїю сі́ю ѡ҆ все́й Цркви.

Е҆щѐ мл҃имсѧ Гд҃ꙋ Бг҃ꙋ на́шъ҃емꙋ, ѡ҆ є҆́же и҆ꙁба́вити Це́рковъ свою̀ ᲃт҃ꙋ́ю ѿ всѧ́кагѡ зла́гѡ ѡ҆бстоѧ́нїѧ, и҆ сопроти́внагѡ навѣ́та ꙗ҆ꙁы́ческагѡ, є҆рети́ческагѡ, и҆ ѿстꙋ́пническагѡ, и҆ всѣ́хъ вра́гъ ви́димыхъ и҆ неви́димыхъ, и҆ ми́ромъ и҆ благостоѧ́нїемъ соверше́ннымъ ѡ҆гради́ти ю҆̀: всѧ́ же є҆́реси и҆ ѿстꙋ́пства, и҆ богобо́рное А҆гарѧ́нское нечестїе и҆скорени́ти, и҆ ско́рѡ ᲂу҆гаси́ти: и҆ всѧ̀ лю́ди своѧ̀ блⷭ҇ви́ти, и҆ въ Правосла́вной Вѣ́рѣ крѣ́пкихъ и҆ непоꙁыбле́мыхъ въ здра́вїи, и҆ дш҃евномъ и҆ тѣле́сномъ благополꙋ́чїи соблюстѝ, рцѣ́мъ всѝ, Гд҃и ᲂу҆слы́ши и҆ поми́лꙋй.

Пѣвцемъ ѿпѣ́вшимъ гⷤ: Гд҃и поми́лꙋй, Ст҃ль воꙁглаш:

Твое́ бо є҆́стъ є҆́же ми́ловати и҆ спаса́ти ны Бж҃е на́шъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Ли́къ:

А҆ми́нь.

Ст҃ль же блⷭ҇ви́въ лю́ди Кресто́мъ, и҆детъ на четве́ртꙋю стра́нꙋ за́паднюю, Пѣвце́мъ пою́щимъ Троп: се́й Гла́съ, д҃.

Спасѝ ѿ бѣдъ Це́рковъ свою̀ Ѿч҃е, и҆ ᲃн҃е, и҆ ᲃт҃ы́й Дш҃е, и҆ ᲂу҆мирѝ ю҆̀ соверше́ннѣ, є҆́реси же всѧ̀ и҆ ѿстꙋ́пства и҆скоренѝ, и҆ ѿ всѣ́хъ бѣ́дъ на́съ свободѝ, ꙗ҆́кѡ мы вѣ́рнѡ къ тебѣ̀ прибѣга́емъ, ми́лостивомꙋ И҆ꙁбави́телю, Бг҃ꙋ є҆ди́номꙋ Трісоста́вномꙋ.

Пою́тъ же и҆ се́й Бг҃оро́диченъ:

И҆ꙁба́ви ѿ бѣ́дъ Це́рковъ ᲃн҃а твое́гѡ, моли́твами си Бц҃е Дв҃о, ꙗ҆́кѡ мы всѝ по Бꙁ҃ѣ къ тебѣ̀ прибѣга́емъ, ꙗ҆́кѡ къ нерꙋши́мой стѣнѣ̀, и҆ предста́телници.

Пришедше же къ за́падѡмъ, и҆ ста́вше пре́дъ Церко́вными две́рми къ Восто́кꙋ лице́мъ, А҆рхідїа́конъ гл҃е́тъ:

Гд҃ꙋ помоли́мсѧ.

Ли́къ:

Гд҃и поми́лꙋй.

Ст҃ль же чте́тъ Моли́твꙋ ᲃі́ю велегла́снѡ, съ всѧ́кимъ ᲂу҆миленїемъ.

Гд҃и ще́дрый и҆ ми́лостивый, долготерпе́ливый и҆ многѡси́лостивый, вънꙋшѝ ми́лостивнѡ, смѣре́ннѡ моли́мсѧ принесе́ннꙋю тѝ ны́нѣ ѿ на́съ вѣ́рою моли́твꙋ, и҆ благоꙋтро́бнѡ вон̾мѝ тѝ моле́нїѧ на́шегѡ, є҆́же тѝ ꙗ҆́кѡ рабѝ Влады́цѣ, и҆ соꙁда́нїе ᲃодѣ́телю, въ ᲃе́рдци сокрꙋше́нномъ принестѝ хо́щемъ: и҆ Дх҃а не ꙗ҆́ростїю твое́ю грѣ́хъ ра́ди на́шихъ ѻ҆бличиши на́съ, ни́ же гнѣ́вомъ твои́мъ беꙁꙁакѡ́нїй ра́ди на́шихъ пока́жеши на́съ: но сотворѝ съ на́ми по ми́лости твое́й, вра́чꙋ и҆ и҆сцѣли́телю дш҃ъ на́шихъ, и҆ наста́ви на́съ на пꙋ́ть тво́й, и҆ къ приста́нищꙋ хотѣ́нїѧ твое́гѡ, є҆́же шествова́ти на́мъ всегда̀ въ и҆́стиннѣ твое́й.

Просвѣтѝ ѻ҆́чи ᲃерде́цъ на́шихъ, въ поꙁна́нїе твое́ѧ и҆́стинны: и҆ дарꙋ́й на́мъ начина́ющенѧ лѣ́то ми́рнѡ и҆ беꙁъгрѣ́шнѡ, и҆ все вре́мѧ живота̀ нашегѡ конча́ти: и҆ послѝ на́мъ А҆́гг҃ла ми́ра, вѣ́рна наста́вника и҆ храни́телѧ дш҃ѧ́мъ и҆ тѣ́лѡмъ на́шимъ, и҆ꙁбавлѧ́юща на́съ ѿ всѧ́кагѡ зла̀, и҆ и҆справлѧ́юща въхо́ды и҆ и҆схо́ды на́шѧ, къ дѣла́нїю за́повѣдїй твои́хъ: Ꙗ҆́кѡ ты́ є҆сѝ Бг҃ъ на́шъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Ли́къ:

А҆ми́нь.

А҆рхїдїа́конꙋ же ре́кшꙋ:

Съ ми́ромъ вни́дѣмъ.

Кли́ръ:

Ꙍ҆ и҆менѝ Гн҃и.

Вхо́дѧтъ а҆́бїе въ це́рковъ: пѣвце́мъ пою́щимъ Тропа́ръ се́й Гла́съ, а҃.

Премꙋдрости и҆ проꙋвидѣ́нїѧ и҆сто́чникъ ᲃы́й Гд҃и, наста́ющагѡ ны́нѣ крꙋ́гъ лѣ́та ми́рнѡ препроводи́ти сподобѝ рабы̀ своѧ̀: Царе́мъ побѣди́телнаѧ, и҆ Це́ркви ми́ръ и҆ ᲂу҆твержде́нїе ꙗ҆́кѡ бла́гъ дарꙋ́ѧ: молитва́ми Бц҃а, и҆ всѣ́хъ ᲃт҃ы́хъ твои́хъ.

Посе́мъ ᲃтіхи́ры сі́ѧ Іѡа́нна Мона́ха, Гла́съ, г҃.

Превѣ́чное ᲃло́во Ѿч҃ее, въ ѻ҆́браꙁѣ Бж҃їи ᲃы́й, и҆ состави́вый тваръ ѿ небы́тїѧ въ бы́тїе: Времена̀ и҆ лѣ́та въ свое́й ѻ҆бласти положи́вый, блⷭ҇вѝ вѣне́цъ лѣ́тꙋ бла́гости твое́ѧ, дарꙋ́ѧ ми́ръ церква́мъ твои́мъ, побѣ́ды вѣ́рномꙋ Царю̀, благопло́дїе же землѝ, и҆ на́мъ ве́лїю ми́лость.

Сла́ва: Гла́съ, д҃.

Ца́рствїе твоѐ Хє҃ Бж҃е, ца́рство всѣ́хъ вѣ́кѡвъ: и҆ Влады́чество твоѐ въ всѧ́комъ ро́дѣ и҆ ро́дѣ: всѧ́ бо премꙋ́дростїю сотвори́лъ є҆сѝ, времена̀ и҆ лѣ́та на́мъ предложи́въ. Тѣ́мъ благодарѧ́ще ѡ҆ всѣ́хъ и҆ за всѧ̀, вопїе́мъ: благословѝ вѣне́цъ лѣ́тꙋ бла́гости твое́ѧ, и҆ сподобѝ на́съ неѡсꙋжде́ннѡ вопи́ти тебѣ̀, Гд҃и сла́ва тебѣ̀.

И҆ ны́нѣ: Бг҃ро́диченъ: Догмати́къ, Пода́ждъ ᲂу҆теше́нїе:

Посе́мъ Е҆кклисїархъ чте́тъ ѱало́м, н҃.

Поми́лꙋй мѧ Бж҃е: и҆ а҆́бїе пою́тъ Канꙍ́нъ се́й Но́вомꙋ лѣ́тꙋ. Творе́нїе І҆ѡа́нна Мона́ха. Гла́съ, а҃. Пѣ́снь, а҃. И҆рмо́съ:

Пои́мъ всѝ лю́дїе: лю́ты работы̀ Фараꙍ́нѧ И҆ꙁра́илѧ и҆ꙁмѣ́ншомꙋ: и҆ въ глꙋбинѣ̀ мо́рстѣй, нога́ми немо́крыми прове́дшомꙋ: пѣ́снь побѣ́днꙋю ꙗ҆́кѡ прослав:

Воспои́мъ всѝ Хв҃и, и҆́мже соста́вишасѧ всѧ́ческаѧ, и҆ въ не́мъ же соверши́шасѧ нераꙁлꙋ́чнѡ, ꙗ҆́кѡ ѿ беꙁнача́лнагѡ ро́ждшꙋсѧ Бг҃а ѿц҃а̀, соста́вномꙋ ᲃло́вꙋ: пѣ́снь побѣ́днꙋю ꙗ҆́кѡ просла́висѧ.

Воспои́мъ всѝ Хв҃и, Ѿч҃имъ благоволе́ніємъ ꙗ҆́вл̾шомꙋсѧ ѿ Дв҃ы, и҆ проповѣда́вшꙋ лѣ́то Гн҃е прїа́тнѡ, на́мъ на и҆ꙁбавле́нїе: пѣ́снь побѣ́днꙋю, ꙗ҆́кѡ прослав:

Сла́ва:

Въ Наꙁаре́тъ вше́дъ пода́тель за́конꙋ, въ де́нь ᲃꙋббѡ́тный ᲂу҆ча́ше, законополага́ѧ є҆вре́ѡмъ, Прише́ствїе своѐ неиꙁрече́нное: и҆́мже ꙗ҆́кѡ ми́лостивъ ᲃпаса́етъ рѡ́дъ на́шъ.

И҆ ны́нѣ: Бг҃ро́диченъ.

Пою́ще всѝ вѣ́рнїи, преди́внꙋю Дв҃ꙋ: Хрⷭ҇та̀ вселе́ннѣй воꙁсїѧ́вшꙋю, и҆ ра́дости всѧ́ческаѧ и҆сполни́вшꙋю присносꙋ́щагѡ живота̀, прⷭ҇нѡ восхва́лимъ, ꙗ҆́кѡ просла́висѧ.

Посе́мъ, Катавасїю сі́ю.

Спасѝ ѿ бѣ́дъ, и҆ блⷭ҇вѝ рабы̀ своѧ̀ млⷭ҇тве, ꙗ҆́кѡ мы ᲂу҆се́рднѡ къ тебѣ̀ прибѣга́емъ, млⷭ҇тивомꙋ И҆ꙁбави́телю, всѣ́хъ Влады́цѣ Гд҃ꙋ І҆и҃сꙋ.

Сі́ю по кое́йждѡ Пѣ́сни пое́мъ.

Пѣ́снь, г҃ И҆рмо́съ:

Ꙋ҆твердѝ менѐ Хє҃, на недвижи́момъ ка́мени за́повѣдїй твои́х: и҆ просвѣти́ мѧ ᲃвѣ́томъ лица̀ твое́гѡ: нѣ́сть бо ᲃт҃а ра́ꙁвѣ тебѐ чл҃кѡлю́бче.

Ꙋ҆твердѝ бла́же, ᲃе́й є҆го́же насадѝ любо́вїю на землѝ десни́ца твоѧ̀, плодови́тый виногра́дъ: сохранѧ́ѧ це́рковъ твою̀ всеси́лне.

Въ дѣ́лехѣ дх҃о́вныхъ Бг҃окра́сныхъ красѧ́щимсѧ, наста́вшее Гд҃и лѣ́то ᲃі́е, проводи́ти да́ждъ Влады́ко, вѣ́́рою тѧ пѣснословѧ́щихъ, Бж҃е всѧ́ческихъ.

Под: Бг҃оро́диченъ:

Въ дѣ́лехѣ дх҃о́вныхъ Боголѣ́пнѡ, прейтѝ лѣ́то Дв҃о, пода́ждъ Влады́чице: вѣ́рнѡ тѧ пѣснословѧ́щимъ, прⷭ҇нѡ Дв҃ꙋю.

Сла́ва:

Ꙋ҆тѣши́ мѝ Хє҃ лѣ́тный крꙋ́гъ, пода́ждъ ще́дре и҆ насыти́ мѧ̀ ᲃлове́съ Божестве́нныхъ тѝ и҆́хже ꙗ҆́вилъ є҆сѝ гл҃ѧ̀ І҆ꙋде́ѡмъ въ ᲃꙋббѡ́тахъ.

И҆ ны́нѣ: Бг҃оро́диченъ:

Ꙗ҆́кѡ є҆ди́нꙋ па́че є҆́стества, па́че чл҃ка благода́ть въ свою̀ ᲂу҆тро́бꙋ прїи́мшꙋю, и҆ непрело́жнѡ ро́ждшꙋю, Ха҃ Бг҃а на́шегѡ, прⷭ҇нѡ тѧ ᲃла́вимъ.

По Катава́сїи же, Дїа́конъ гл҃етъ Е҆кте́нїѧ сі́ѧ.

Поми́лꙋй на́съ Бж҃е по вели́цѣй ми́лости твое́й мол:

Е҆щѐ моли́мсѧ ѡ҆ ᲂу҆строе́нїи всеѧ̀ вселе́нныѧ, благостоѧ́нїи ᲃт҃ы́хъ Бж҃іихъ це́рквїй, и҆ совокꙋпле́нїи и҆ соедине́нїи всѣ́хъ: и҆ ѡ҆ є҆́же Гд҃ꙋ Бг҃ꙋ на́шемꙋ церкві́й раꙁдира́нїѧ ᲂу҆тѣ́шити, ꙗꙁы́ческаѧ шата́нїѧ ᲂу҆гаси́ти, и҆ є҆́ресїй и҆ ѿстꙋ́пствъ всѣ́хъ воста́нїѧ раꙁори́ти, и҆ ско́рѡ ᲃатанꙋ̀, и҆ всѧ̀ кѡ́ꙁни є҆гѡ̀ подъ нѡ́ги на́съ вѣ́рныхъ рабѡ́въ свои́хъ сокрꙋши́ти, рцѣ́мъ всѝ: Гд҃и ᲂу҆слы́ши и҆ поми́лꙋй.

Е҆щѐ моли́мсѧ Гд҃ꙋ Бг҃ꙋ на́шемꙋ, ѡ҆ є҆́же ᲂу҆слы́шати є҆мꙋ̀ гла́сꙋ моли́твы на́шеѧ, и҆ ми́лостивꙋ, долготерпе́ливꙋ, ти́хꙋ и҆ благопремѣ́ннꙋ бы́ти и҆ чл҃кѡлю́бцꙋ ѡ҆ грѣсѣ́хъ на́шихъ, и҆ поми́ловати на́съ, и҆ ѿврати́ти ве́сь гнѣ́въ сво́й пра́веднѡ движи́мый на́ ны, и҆ и҆ꙁба́вити на́съ належа́щагѡ свое́го пра́веднагѡ преще́нїѧ: и҆ и҆ꙁба́вити гра́дъ се́й (а҆́ще же въ Монастырѝ, ᲃтꙋ́ю Ѿби́тель сі́ю, и҆ всѧ́кꙋю ѻ҆би́телъ) и҆ всѧ́къ гра́дъ и҆ ве́сь и҆ стра́нꙋ, и҆ вѣ́рою живꙋ́щихъ въ нихъ ѿ гра́да, гꙋби́тел̾ства, трꙋ́са, пото́па, ѻ҆гнѧ̀, меча̀, и҆ раꙁли́чныхъ бо́лѣꙁнїй, и҆ напра́сныѧ ᲃме́рти, наше́ствїѧ же и҆ноплеме́нникъ вра́жїѧгѡ нападе́нїѧ, междꙋсо́бныѧ бра́ни, и҆ всѧ́коѧ смертоно́снаѧ ра́ны: И҆ ѡ҆ є҆́же и҆ꙁба́вити на́съ належа́щихъ бѣ́дъ всѣ́х, и҆ дарова́ти на́мъ рабѡ́мъ свои́мъ ти́хое и҆ ми́рное лѣ́то, и҆ вѣне́ц є҆гѡ̀ блгⷭ҇тїи си благослови́ти: благораство́рныѧ во́ꙁдꙋхи пода́ти, и҆ ᲂу҆множи́ти плѡ́ды земныѧ, и҆ всѧ̀ скорбѧ́щіа и҆ ѡ҆ꙁлобле́нныѧ лю́ди своѧ̀ благода́тїю свое́ю ᲂу҆тиши́ти, и҆ всѣ́хъ недостойныхъ рабѡ́въ свои́хъ ми́лостїю и҆ щедрѡта́ми свои́ми поми́ловати, рцѣ́мъ всѝ съ слеꙁа́ми: Гд҃и ᲂу҆слы́ши и҆ поми́лꙋй.

Ст҃и́тель же воꙁглаша́етъ.

Ꙋ҆слы́ши ны Бж҃е ᲃп҃си́телю на́шъ, ᲂу҆пова́нїе всѣ́мъ ко́нцемъ землѝ, и҆ сꙋ́щимъ на мо́ри дале́че: и҆ ми́лостиве ми́лостивъ бꙋ́ди на́мъ ѡ҆ грѣсехъ на́шихъ, и҆ поми́лꙋй на́съ: ми́лостивъ бо и҆ чл҃кѡлю́бецъ Бг҃ъ є҆сѝ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Ли́къ:

А҆ми́нь.

Посе́мъ Сѣд: Гла́съ, и҃. Под:

Премꙋ́дрости и҆ сло́ва:

Времена̀ плодонѡ́сны и҆ дѡ́жды, съ нб҃сѐ подава́ѧ сꙋ́щимъ на землѝ: и҆ ны́нѣ прїемлѧ̀ проше́нїѧ ра́бъ твои́хъ, ѿ всѧ́коѧ и҆ꙁба́ви нꙋ́жды гра́дъ тво́й: щедрѡты́ бо твоѧ̀ вои́стиннꙋ на всѧ̀ дѣ́ла твоѧ̀: тѣ́мъ же въхѡ́ды благословлѧ́ѧ, и҆ и҆схѡ́ды: дѣ́ла рꙋ́къ на́шихъ напра́ви на на́съ, и҆ прегрѣше́нїй проще́нїе дарꙋ́й на́мъ Бж҃е: ты́ бо ѿ несꙋ́щихъ всѧ́ческаѧ, въ є҆́же бы́ти ꙗ҆́кѡ ᲃи́ленъ приве́лъ є҆сѝ.

Пѣ́снь, д҃. И҆рмо́съ:

Раꙁꙋмѣ́хъ всеси́лне, твоѐ смотре́нїе, и҆ съ стра́хомъ просла́вихъ тѧ Сп҃а́се.

Нача́токъ тебѣ̀ лѣ́тꙋ, лю́дїе твоѝ принѡ́сѧтъ: А҆гглⷭ҇кими пѣсн̾мѝ славословѧ́ще тѧ ᲃп҃а́се.

Ꙗ҆́кѡ чл҃кѡлю́бецъ, ᲃподобѝ наче́нши лѣ́то ᲃі́е, и҆ ᲃконча́ти тебѣ̀ благоꙋго́днѡ Хрⷭ҇те.

Вседержи́телю є҆динъ Гд҃и, лѣ́тъ ѡ҆бхожде́нїѧ ти́хаѧ мїрови дарꙋ́й.

Бг҃оро́диченъ:

Ꙗ҆́кѡ приста́нище ны́нѣ дꙋ́шъ на́шихъ, и҆ и҆ꙁвѣ́стное ᲂу҆пова́нїе, Бц҃ꙋ всѝ воспо́имъ.

Пѣ́снь, є҃. И҆рмо́съ:

Ѿ но́щи ᲂу҆треню́юще, хва́лимъ тѧ Хє҃, Ѿцꙋ събеꙁнача́лна, и҆ ᲃп҃а́са дꙋша́мъ на́шимъ: ми́ръ мїрови пода́ждъ чл҃кѡлю́бче.

И҆сполнѧ́ѧй всѧ́ческаѧ бла́гости Хє҃, ты благорастворе́нными и҆ благопло́дными блгⷭ҇ве́н̾мѝ, венча́емо мнѡгокрꙋ́жное лѣ́то рабѡ́мъ твои́мъ дарꙋ́й.

Лѣ́тное воꙁдаѧ́нїе ꙗ҆вѝ на́мъ, преложе́нїе къ лꙋ́чшимъ: ми́рное же ᲂу҆строе́нїе, вѣдꙋ́щимъ тѧ ᲃло́ве Бж҃ій, ᲂу҆подо́бл̾шагосѧ чл҃кѡмъ.

На́ землю прише́лъ є҆сѝ собеꙁнача́лне Ѿц҃ꙋ̀: плѣ́нъникѡмъ ѿпꙋще́нїе, ᲃлѣпы́мъ же проꙁрѣ́нїе, ѿ Ѿц҃а̀ воꙁвѣща́ѧ, вы́шшїй лѣ́тъ сы́й.

Бг҃оро́диченъ:

На́шѧ наде́жды Бц҃е чⷭ҇таѧ, и҆ на́ше жела́нїе на́ тѧ воꙁлага́емъ: ми́лостива на́мъ сотворѝ Дв҃о, є҆го́же роди́ла є҆сѝ.

Пѣ́снь, ѕ҃. И҆рмо́съ:

Пррⷪ҇ка спа́слъ є҆сѝ ѿ Кѵ́та чл҃кѡлю́бче: и҆ менѐ, и҆ꙁъ глꙋбины̀ прегрѣше́нїй воꙁведѝ, молю́тисѧ.

Жи́тїе нача́ти благоꙋго́дное тебѣ̀ Влады́ко, съ лѣ́тнымъ нача́ткомъ на́съ сподобѝ.

Дні́й дх҃о́вныхъ, въ поꙋче́нїи за́кона твое́гѡ пода́ждъ: по́лнъ сы́й щедрѡ́тъ ᲃп҃а́се пою́щимъ тѧ.

Бг҃оро́диченъ:

Къ тебѣ̀ прибѣга́ющихъ, ѿ всѧ́кихъ моли́мсѧ, и҆ꙁба́ви бѣ́дъ, ро́ждшаѧ Ха҃ Бг҃а на́шегѡ.

Конда́къ, Гла́съ, в҃

Въ вы́шнихъ живы́й Хє҃ Цр҃ю, всѣ́хъ ви́димыхъ и҆ неви́димыхъ тво́рче и҆ зижди́телю, и҆́же дні́е и҆ нѡ́щи, времена̀ и҆ лѣ́та сотвори́лъ є҆сѝ: блⷭ҇вѝ ны́нѣ вѣне́цъ лѣ́та, соблюди́ же и҆ сохранѝ въ ми́рѣ вѣ́рнагѡ Царѧ̀, це́рковъ, и҆ гра́дъ, и҆ всѧ̀ лю́ди твоѧ̀, мнѡгоми́лостве.

Посе́мъ пою́тъ ᲃтепе́нна в҃-гѡ Гла́са, повторѧ́юще ᲃтіхѝ. А҆нтіфꙍ́нъ, а҃.

На́ нб҃о ѻ҆́цѣ пꙋща́ю мое́гѡ ᲃе́рдца, къ тебѣ̀ ᲃп҃а́се: ᲃпаси́ мѧ̀ твои́мъ ѡ҆сѣне́нїемъ.

Поми́лꙋй на́съ, согрѣ́шшихъ тѝ мно́гѡ, на всѧ́кїй ча́съ ѽ Хє҃ мо́й, и҆ да́ждъ мѝ ѻ҆́браꙁъ, пре́жде конца̀ пока́ѧтисѧ къ тебѣ̀.

Ст҃о́мꙋ Дх҃ꙋ, є҆́же ца́рствова́ти подоба́етъ, ѡ҆сщ҃а́ти, и҆ подвиꙁа́ти тва́ръ, Бг҃ъ бо є҆́стъ, є҆диносꙋ́щенъ Ѿц҃ꙋ̀, и҆ ᲃло́вꙋ.

Та́жъ, Проки́менъ, Гла́съ, д҃.

Блⷭ҇ви́ши вѣне́цъ лѣ́тꙋ бла́гости твое́ѧ Гд҃и, и҆ по́лѧ твоѧ̀ насы́тѧтсѧ тꙋ́ка.

Сті́хъ:

Хвали́те Бг҃а въ ᲃт҃ы́хъ є҆гѡ̀.

Е҆ѵⷢ҇лїе ѿ Лꙋкѝ, Гла́ва, д҃. Зач: г҃і.

Нача́лѡ є҆гѡ̀ сі́е.

Въ вре́мѧ ѻ҆́но. Прі́йде І҆и҃с въ Наꙁаре́тъ, и҆де́же бѣ̀ воспи́танъ.

Коне́цъ же сей.

И҆ дивлѧ́хꙋсѧ ᲃловесе́мъ благода́ти, и҆сходѧ́щимъ и҆ꙁъ ᲂу҆стъ є҆гѡ̀.

Пѣ́вци же ѿпѣ́вше ᲃла́ва тебѣ̀ Гд҃и. Пою́тъ, Сла́ва: Гла́съ, д҃.

Ѿч҃е, Сло́ве, и҆ Дш҃е, Трⷪ҇це ᲃт҃а́ѧ, ѡ҆чистѝ мно́жествѡ согрѣше́нїй на́шихъ.

И҆ ны́нѣ:

Моли́твъ ра́ди Прест҃ы́ѧ Бц҃а, ми́лостивне ѡ҆чистѝ мнѡ́жество согрѣше́нїй на́ших.

Поми́лꙋй на́съ Бж҃е по вели́цѣй млⷭ҇тѝ твое́й, и҆ по мнѡ́гимъ щедрѡта́мъ твои́мъ ѡ҆чи́сти беꙁꙁако́нїѧ на́шѧ.

По си́хъ же Стіхи́рꙋ ᲃі́ю, Гла́съ, д҃. Под: Ꙋ҆диви́сѧ І҆ꙍ́сифъ:

Ꙗ҆́кѡ Влады́цѣ всѣ́хъ, и҆ благи́хъ пода́телю, тебѣ̀ припада́емъ вѣ́рнѡ, приле́жнѡ вопїю́ще: ѿ свое́гѡ си ᲂу҆молѧ́емъ благоꙋтро́бїѧ, ᲃп҃а́се: и҆ молитва́ми ро́ждшїѧ тѧ Бг҃омт҃ре, и҆ всѣ́хъ прⷭ҇нѡ благоꙋгажда́ющихъ тѝ ᲃт҃ы́хъ: лѣ́то благопрїа́тнѡ принестѝ тебѣ̀, ꙗ҆́кѡ бла́гъ ᲃподобѝ: въ дво́ю ᲃꙋществꙋ̀ чтꙋ́щихъ, и҆ вѣ́рнѡ Хє҃ ᲃлавѧ́щихъ тѧ.

А҆рхідїа́конъ же гл҃етъ Е҆кте́нїю ᲃі́ю.

Сп҃сѝ Бж҃е лю́ди своѧ̀, и҆ блⷭ҇вѝ достоѧ́нїе твоѐ: посѣтѝ мі́ръ тво́й ми́лостїю и҆ щедрѡта́ми, ᲂу҆крѣпѝ, ᲂу҆твердѝ, ᲂу҆мирѝ, и҆ раꙁширѝ Це́рковъ твою̀ ᲃт҃ꙋ́ю: є҆́реси же всѧ̀ и҆ ѿстꙋ́пства, и҆ ꙗ҆ꙁы́ческое шата́нїе ско́рѡ ниꙁложѝ: Ца́ремъ Хрⷭ҇тїѧ́нскимъ ми́ръ и҆ междосо́бнꙋю любо́въ пода́ждъ, ᲂу҆крѣплѧ́ѧ и҆́хъ на всѧ̀ хрⷭ҇тоненави́стныѧ ꙗ҆ꙁы́ки: всѣ́хъ заблꙋ́ждшихъ ѿ пра́выѧ вѣ́ры къ поꙁна́нїю твое́ѧ и҆́стинны ѡ҆братѝ, и҆ свое́мꙋ ᲃⷮ: и҆ꙁбра́нномꙋ ста́дꙋ соединѝ: Наста́вшее же ны́нѣ Лѣ́то въ ми́рѣ, покаѧ́нїи беꙁгрѣ́шнѡ, въ всѧ́комъ благоче́стїи и҆ чⷭ҇тности, и҆ всѧ̀ про́чаѧ днѝ и҆ лѣ́та живота̀ на́шегѡ христїански препроводи́ти и҆ конча́ти, чл҃кѡлю́бнѡ сподобѝ: Моли́твами Пречи́стыѧ Влады́чица на́шеѧ Бц҃а и҆ прⷭ҇нѡ Дв҃ы Ма́рїѧ: Си́лою чⷭ҇тнагѡ и҆ животворѧ́щагѡ Крⷭ҇та̀, застꙋпле́нїемъ че́стныхъ нбⷭ҇ныхъ ᲃи́лъ беꙁпло́тныхъ: че́стнагѡ и҆ сла́внагѡ Пррⷪ҇ка, Предте́ча, и҆ Крⷭ҇тлѧ І҆ѡа́нна: Ст҃ы́хъ ᲃла́вныхъ и҆ всехва́лныхъ А҆пⷭ҇лъ: ᲃт҃ы́хъ и҆ добропобѣ́дныхъ Мч҃никъ: и҆́же въ ᲃт҃ы́хъ Ѻ҆ц҃ъ на́шихъ Вселе́нскихъ Ꙋ҆чи́телїй и҆ Ст҃и́телїй, Васи́лїѧ Вели́кагѡ, Григо́рїѧ Бг҃осло́ва, и҆ І҆ѡа́нна Златоꙋ́стагѡ: и҆ и҆́же въ ᲃт҃ы́хъ Ѿц҃а̀ на́шегѡ Нікола́ѧ Мѵрылѵкі́йскагѡ Чꙋдотво́рца: Ст҃ы́хъ тре́хъ Ст҃и́телїй Кі́евскихъ Петра̀, А҆ле́ѯїѧ, и҆ І҆ꙍ́ны, Рꙍссі́йскихъ чꙋдотво́рцѡвъ: Ст҃а́гѡ Вели́кагѡ Рѡссі́йскагѡ Кнѧ́ꙁѧ Владими́ра, и҆ ᲃт҃ы́хъ ᲃтрⷭ҇тоте́рпецъ Кі́евскихъ Кнѧꙁе́й Глѣ́ба и҆ Бори́са: Ст҃а́гѡ Великомꙋ́чника І҆ѡа́нна но́вагѡ и҆́же въ Сꙋча́вѣ: Преподо́бныхъ и҆ Бг҃онѡ́сных Ѻ҆ц҃ъ на́шихъ, А҆нтѡ́нїѧ и҆ Ѳеѻдѡ́сїѧ Пече́рскихъ: ᲃт҃ы́хъ и҆ Пра́ведныхъ Богоѡте́цъ І҆ѡаки́ма и҆ А҆нны: и҆ Преподо́бнагѡ ѿц҃а̀ на́шегѡ Сѵмеѡ́на Сто́лпника, и҆ про́чїихъ и҆́хже дне́сь па́мѧтъ съверша́емъ, и҆ всѣ́хъ ᲃт҃ы́хъ: мл҃и́мъ тѧ мнѡгоми́лостиве Гд҃и, ᲂу҆слы́ши на́съ грѣ́шныхъ мл҃ѧ́щихътисѧ и҆ поми́лꙋй на́съ.

Ли́къ же пое́тъ.

Гд҃и поми́лꙋй, є҃і.

Ст҃и́тель воꙁглаша́етъ.

Ми́лостїю и҆ щедрѡта́ми и҆ чл҃кѡлю́бїемъ є҆диноро́днагѡ Сн҃а:

Пѣвци́ же пою́тъ про́чаѧ Канѡ́нꙋ. Пѣ́снь, з҃. И҆рмо́съ:

Ꙍ҆трѡ́ци въ благоче́стїи въспита́нїи, нечести́ва велѣ́нїѧ небре́гше: ѡ҆́гненнагѡ преще́нїѧ не ᲂу҆боѧ́шасѧ: но посре́дѣ пла́мене стоѧ́ще поѧ́хꙋ: Ѿц҃емъ Бж҃е блⷭ҇ве́нъ є҆сѝ.

Начина́юще Лѣ́то сі́е, и҆ пѣ́снь ꙗ҆́кѡ нача́токъ сътворѧ́емъ цртⷭ҇вꙋ́ющомꙋ Хꙋ҃, Црⷭ҇твомъ беꙁъконе́чнымъ, Правосла́внїи лю́дїе, благоче́стнѡ пою́ще: Ѿц҃емъ Бж҃е благослове́нъ є҆сѝ.

Сы́й пре́жде вѣ́къ, до вѣ́ка же и҆ пото́мъ Гд҃ь: воспѣва́ющимъ тѝ Хє҃ и҆сто́чниче бла́гости, благи́хъ твои́хъ да́рѡвъ Ле́то сі́е и҆спо́лни. Ѿц҃емъ Бж҃е благослове́нъ є҆сѝ.

Бг҃оро́диченъ:

Ꙗ҆́кѡ рабѝ Влады́цѣ, въ Моли́твꙋ чⷭ҇тꙋю Мт҃ръ твою̀, тебѣ̀ предлага́емъ Хрⷭ҇те: ѿ всѧ́кагѡ ѡ҆бстоѧ́нїѧ, люде́мъ твои́мъ бла́же и҆ꙁба́витисѧ пою́щимъ: ѿц҃емъ Бж҃е блⷭ҇ве́нъ є҆сѝ.

Пѣ́снь, и҃. И҆рмо́съ:

Песнослове́сники въ пе́щи съблю́дшагѡ дѣ́ти, и҆ пламенно-шꙋмѧ́щꙋю пещъ прело́жшагѡ въ росꙋ̀: Ха҃ Бг҃а по́йте, и҆ превоꙁноси́те є҆гѡ̀ въ вѣ́ки.

Ꙗ҆́кѡ нача́лникꙋ ᲃпⷭ҇нїѧ Хє҃ нача́токъ тебѣ̀ принѡ́ситъ лѣ́тный, чⷭ҇тнаѧ Це́рковъ, зовꙋ́щи: по́йте и҆ превоꙁноси́те є҆гѡ̀ въ всѧ̀ вѣ́ки.

Ѿ несꙋ́щихъ, всѧ́ческаѧ мꙋ́дрѣ ѡ҆бнови́вшагѡ Гд҃а: и҆ проводѧ́щагѡ вре́менъ ѡ҆браще́нїѧ хотѣ́нїемъ ꙗ҆́кѡ Бг҃а: по́йте и҆ превоꙁноси́те є҆гѡ̀ въ всѧ̀ вѣ́къ.

Строѧ́щомꙋ всѧ́ческаѧ Бг҃ꙋ, и҆ времена̀ премѣнѧ́ющомꙋ, къ многоѡ́браꙁномꙋ члчⷭ҇комꙋ ᲂу҆правле́нїю, тебѣ̀ Бж҃е пое́мъ и҆ превоꙁно́симъ въ всѧ̀ вѣ́къ:

Бг҃оро́диченъ:

Богома́теръ дв҃ꙋ чⷭ҇тꙋю, лѣ́тъ ѡ҆бхожде́н̾мѝ же и҆ ѡ҆браще́нми, правосла́внѡ члове́честїи ᲃобѡ́ры Прчⷭ҇таѧ, пое́мъ тѧ ꙗ҆́кѡ Бц҃ꙋ, и҆ всѣ́хъ сп҃се́нїе.

Пѣ́снь, ѳ҃. И҆рмо́съ:

Ѻ҆браꙁъ чⷭ҇тагѡ Ржⷭ҇тва̀ твое́гѡ, распалѧ́ема кꙋпина̀ ꙗ҆вѝ неѡпали́ма, и҆ ны́нѣ на на́съ на́паст̾мѝ сверѣпѣ́ющꙋю, ᲂу҆гаси́ти мл҃и́мсѧ пе́щъ: да́тѧ Бц҃е непреста́ннѡ велича́емъ.

Сло́ве Бж҃ій и҆ ᲃи́ло, и҆́стиннаѧ мꙋ́дрости и҆ ᲃъста́внаѧ, съдержа́щаѧ и҆ ᲂу҆правлѧ́ющаѧ всѧ́ческаѧ мꙋ́дрѣ: и҆ ны́нѣ наста́вшее рабѡ́мъ твои́мъ вре́мѧ, въ ᲂу҆строе́нїи ти́ сѣ препровожда́й.

Всѧ̀ дѣ́ла твоѧ̀ Гд҃и: Нб҃са, Землѧ̀, Свѣ́тъ и҆ Мо́ре: вѡ́ды, и҆ всѝ и҆стѡ́чници, и҆ ᲃо́лнце: Мцⷭ҇ъ, Тма̀, Звѣ́ꙁды, ѻ҆́гнъ и҆ ᲃвѣ́тъ: чл҃вци и҆ ᲃкѡ́ти, съ А҆́гг҃лы восхвалѧ́ютъ тѧ.

Е҆ди́нъ є҆сѝ превѣ́чный, ꙗ҆́кѡ тво́рецъ вѣ́кѡвъ, Божество̀ нераꙁдѣ́лное, молба́ми чⷭ҇тыѧ Богома́тере, лѣ́то плодоно́снѡ наслѣ́дїю твое́мꙋ пода́ждъ.

Бг҃оро́диченъ:

Спа́се всѣ́хъ и҆ строи́телю, ᲃъдѣ́телю и҆ Вседержи́телю тва́ри: мол̾ба́ми беꙁсѣ́меннѡ ро́ждшїѧ тѧ̀, ми́ръ мі́рови твое́мꙋ пода́ждъ, съблюда́ѧ Це́рковъ всегда̀ недвижи́мꙋ.

Съвокꙋпи́вше же сѧ ѻ҆́ба Ли́ка пою́тъ И҆рмо́съ се́й.

Побѣжда́ютсѧ є҆́стества ᲂу҆ста́вы, въ тебѣ̀ Дв҃о чⷭ҇таѧ: дѣвствꙋ́етъ бо рождество̀, и҆ живо́тъ ѻ҆брꙋча́етъ ᲃм҃рть: по Рождествѣ̀ сꙋ́щи Дв҃а, и҆ по ᲃм҃рти жи́ва, ᲃп҃са́еши прⷭ҇нѡ Бц҃е достоѧ́нїе твоѐ.

Сконча́ной же пѣсни, Дїа́конъ гл҃етъ.

Въ ᲂу҆миленїи съ слеꙁа́ми всѝ колѣ́нѣ дꙋ́шъ и҆ тѣле́съ на́шихъ прекло́н̾ше, съ благодаре́нїемъ, Гд҃ꙋ помоли́мсѧ.

Кли́ръ пое́тъ:

Гд҃и поми́лꙋй. гⷤ.

Сте́ль же прекло́нъ колѣ́нѣ съ всѣ́ми предстоѧ́щими, чте́тъ велегла́снѡ благода́рныѧ сі́ѧ Моли́твы съ всѧ́ким ᲂу҆миле́нїемъ.

Благодари́мъ тѧ̀, ᲃла́вимъ тѧ̀, и҆ припада́юще поклонѧ́емтисѧ Вседержи́телю, Тво́рче, и҆ ᲃоꙁда́телю на́шъ Бж҃е, є҆ди́не въ Трⷪ҇ци ᲃт҃ѣ́й покланѧ́емый, и҆ ѿ всеѧ̀ тва́ри пѣва́емый и҆ славослови́мый, ꙗ҆́кѡ сподоби́лъ є҆сѝ на́съ грѣ́шныхъ, недосто́йныхъ, и҆ непотре́бныхъ ра́бъ твои́хъ, крꙋ́гъ мимоше́дшагѡ лѣ́та прейтѝ въ ми́рѣ, и҆ доспѣ́ти нача́ло наста́вшагѡ ни́нѣ, и҆ ѡ҆ всѣ́хъ благодѣѧ́нїихъ твои́хъ, дꙋше́вныхъ же и҆ тѣле́сныхъ: и҆́хже не ра́ди на́шегѡ досто́инства є҆го́же неима́мы, но мно́гагѡ ра́ди милосе́рдїѧ твое́гѡ и҆ неиꙁрече́ннагѡ чл҃кѡлю́бїѧ, пока́ꙁꙋѧ свою̀ є҆стестве́ннꙋю бла́гость, въ мимоше́дшее вре́мѧ, благоꙋтро́бнѣ пода́лъ є҆сѝ на́мъ неблагода́рнымъ и҆ злонра́внымъ: и҆ смире́ннѡ пре́дъ твои́мъ стра́шнымъ Прⷭ҇то́ломъ припада́юще, моли́мтисѧ беꙁънача́лне нерожде́нне Ѿч҃е, Сн҃е превѣ́чнѡ ѿ Ѿц҃а̀ рожде́нне, и҆ томꙋ̀ є҆диносꙋ́щне и҆ собеꙁнача́лне, и҆ Дш҃е ᲃт҃ы́й ѿ Ѿц҃а беꙁлѣ́тнѡ и҆сходѧ́й, Ѿц҃ꙋ̀ и҆ ᲃн҃ꙋ соестестве́нне и҆ соприсносꙋ́щне, Трⷪ҇це ᲃт҃а́ѧ, и҆ є҆дини́це неслива́емаѧ, и҆ нераꙁдѣ́лнаѧ, при́ꙁри на на́ше ᲃмире́нное и҆ недосто́йное моле́нїе, и҆ благодарстве́нное благодаре́нїе, и҆ простѝ на́мъ рабѡ́мъ твои́мъ всѧ̀ во́лнаѧ и҆ нево́лнаѧ на́шѧ мимоше́дшаѧ согрѣше́нїѧ, и҆́миже раꙁдражи́хѡмъ твою̀ благода́ть, и҆ прогнѣва́хѡмъ твоѐ чл҃кѡлю́бїе: и҆ не ѿвратѝ лица̀ твое́гѡ ѿ на́съ, и҆ не ᲂу҆клони́сѧ гнѣ́вомъ ѿ рабѡ́въ твои́хъ: но пощадѝ, поми́лꙋй, и҆ ᲂу҆щедрѝ ᲃоꙁда́нїе своѐ зижди́телю и҆ Тво́рче: А҆ще бо и҆ зло̀ что̀ пострада́хѡмъ, и҆лѝ ѿ сопроти́внагѡ растворе́нїѧ во́ꙁдꙋхѡвъ, и҆лѝ ѿ ѡ҆ꙁлобле́нїѧ и҆ наважде́нїѧ съпроти́вных, дш҃евныхъ и҆ теле́сныхъ врагѡвъ, и҆лѝ ѿ коеголи́бѡ ѡ҆ꙁлобле́нїа, беꙁꙁакѡ́нїй ра́ди на́шихъ смире́нни бы́хомъ, благода́рнѣ ѿ тебѐ Гд҃а и҆ Влады́ки на́шегѡ прїе́млемъ: вѣдꙋ́ще ꙗ҆́кѡ бо́лшаѧ и҆ лютѣ́йшаѧ, проти́вꙋ согрѣше́нїемъ на́шимъ, и҆́миже негодова́нїе твоѐ на на́съ привлеко́хѡмъ досто́йны бы́хомъ: но ты ꙗ҆́кѡ чл҃кѡлюби́вый Ѻ҆ц҃ъ покаꙁа́въ поми́ловалъ є҆сѝ: ꙗ҆́коже ᲃмоковни́цꙋ неплодѧ́щꙋю, милосе́рдїемъ твои́мъ ѡ҆копа́въ, въ грѧдꙋ́щее лѣ́то плодоноси́ти пощади́лъ є҆сѝ.

Тѣ́мъ благоꙋтро́бне, неꙁлоби́ве, всемогі́й Гд҃и, въ грѧдꙋ́щее, дне́сь же начина́ющеесѧ лѣ́то простѝ всѧ̀ беꙁꙁакоѡнїѧ и҆ ᲃо́блаꙁны беꙁъмѣ́стнѣ содѣѧ́нныѧ на́ми, да́ждъ на́мъ благода́ть твою̀ Прⷭ҇тꙋ́ю, въ є҆́же ᲂу҆крѣпи́ти на́съ, и҆ ᲃи́лꙋ на́мъ пода́ти къ всѧ́комꙋ благотворе́нїю, и҆ ᲂу҆гожде́нїю пресвѧто́й во́ли твое́й, и҆ и҆сполне́нїю ᲃт҃ы́хъ тѝ за́повѣдїй, и҆ плодоноше́нїю всѣ́хъ добродѣ́телїй, на прогна́нїе же лꙋка́выхъ по́мыслѡвъ, и҆ дѣ́йствъ ᲃатани́ныхъ, и҆ къ соблюде́нїю и҆ ᲃохране́нїю на́съ ѿ всѣ́хъ дїа́вол̾скихъ ᲃѣ́тїй, и҆ раꙁоре́нїю всѧ́кагѡ є҆гѡ̀ лꙋка́вагѡ на на́съ совѣтова́нїѧ: є҆́стество на́ше не́мощно є҆́стъ, ᲃи́ла же лꙋка́вства є҆гѡ̀ крѣпкокова́рна: А҆́ще ᲂу҆́бѡ не твоѧ̀ благода́ть помо́жетъ на́мъ, ничто́же самѝ собо́ю ᲂу҆спѣ́емъ. Помоꙁѝ на́мъ ᲂу҆́бѡ Бж҃е ᲃпаси́телю на́шъ, помоꙁѝ: и҆ и҆ꙁба́ви на́съ, И҆менѝ твое́гѡ ра́ди, ꙗ҆́кѡ бл҃га ми́лость твоѧ̀: и҆ не ѡ҆ста́ви на́съ ᲂу҆пова́ющихъ на́тѧ, мы́ бо лю́дїе твоѝ є҆смы̀, и҆ ѡ҆́вцѧ па́жити твое́ѧ, и҆ твои́мъ ᲃтра́хѡмъ ѡ҆градѝ живо́тъ на́шъ.

Помѧнѝ Гд҃и Бж҃е на́шъ, є҆динꙋ̀ ᲃт҃ꙋю твою̀, ᲃобо́рнꙋю, А҆пⷭ҇лскꙋю Це́ркѡвъ, ѿ ко́нецъ да́же до ко́нецъ вселе́нныѧ сꙋ́щꙋю, и҆ ѿ всѣ́хъ бѣ́дъ съпроти́вныхъ А҆поста́тъ, є҆рети́ческихъ же, и҆ ꙗ҆ꙁы́ческихъ наси́льствїй и҆ꙁмѝ, и въ тишинѣ̀ твое́й ми́ромъ глꙋбо́кимъ съверше́ннѣ ѡ҆градивъ, на ка́мени и҆́стиннагѡ твое́гѡ и҆сповѣ́да́нїѧ ᲂу҆твердѝ, ᲂу҆крѣпѝ, раꙁширѝ, ᲂу҆множѝ, и҆ непреобори́мꙋ а҆́довыми вра́ты въ вѣ́ки съхранѝ.

Держа́внагѡ Гпⷭ҇дрѧ̀ на́шегѡ вели́кагѡ Королѧ̀ И҆мⷬ҇къ: и҆ всѣ́хъ благочести́выхъ и҆ правовѣ́рныхъ Цр҃ей, Гпⷭ҇дре́й, Кнѧꙁе́й, и҆ Панѡ́въ хрістїа́нскихъ и҆́хже ѡ҆правда́лъ є҆сѝ црⷭ҇твова́ти на землѝ, ѡ҆рꙋ́жіємъ и҆́стинны, ѻ҆рꙋ́жіємъ благоволе́нїѧ вѣнча́й и҆́хъ: ѡ҆сѣнѝ надъ гла́вою и҆́хъ въ де́нь бра́ни: ᲂу҆крѣпѝ мы́шцꙋ и҆́хъ: держа́вна сътворѝ и҆́хъ ца́рства, и҆ го́сподства: покорѝ и҆́мъ всѧ̀ пога́ныѧ ꙗ҆ꙁы́ки бра́немъ хотѧ́щїѧ: дарꙋ́й и҆́мъ глꙋбо́кїй, и҆ неѿе́млемый ми́ръ: гл҃ѝ въ ᲃе́рдци и҆́хъ ми́рнаѧ и҆ блага́ѧ ѡ҆ це́ркви и҆ ѡ҆ всѣ́хъ люде́хъ твои́хъ, ꙗ҆́кѡ Дх҃а въ тишинѣ̀ и҆́хъ, ти́хое и҆ беꙁмо́л̾вное жи́тїе поживе́мъ, въ всѧ́комъ благоче́стїи и҆ чⷭ҇тности.

Помѧнѝ Гд҃и ᲃт҃ѣ́йшагѡ А҆рхіепⷭ҇копа на́шегѡ вселе́нскагѡ Патрїа́рха И҆мⷬ҇къ: и҆ преѡсщ҃е́ннагѡ А҆рхіепⷭ҇копа на́шегѡ всеѧ̀ Рѡ́ссїи Мітрополи́та, И҆мⷬ҇къ: и҆ всѣ́хъ боголюби́выхъ Е҆пⷭ҇копѡвъ ᲃт҃ы́ѧ Рꙍссі́йскїѧ Це́ркве Правосла́вныхъ, и҆ ве́съ при́четъ церко́вный, и҆ въ здра́вїи, долгоденствꙋ́ющихъ, ми́рнѡ правопра́вити ᲃло́во твое́ѧ и҆́стины съхранѝ, и҆ поми́лꙋй: и҆ всѣ́хъ на́съ припа́дшихъ пре́дъ лице́мъ ᲃла́вы твое́ѧ въ бла́гости твое́й посѣтѝ Гд҃и, и҆ ꙗ҆ви́сѧ на́мъ въ наста́вшее лѣ́то бога́тыми твои́ми щедрѡта́ми. Благорастворе́нныѧ и҆ поле́ꙁныѧ вѡ́ꙁдꙋхи на́мъ дарꙋ́й: до́ждъ землѝ, къ плодоноше́нїю благовре́менный ра́ненъ и҆ по́ꙁдей, и҆ ро́сꙋ плодоно́снꙋ пода́ждъ. Благословѝ вѣне́цъ лѣ́тꙋ бла́гости твое́ѧ, раꙁдира́нїѧ це́рквїй ᲂу҆тишѝ. ᲂу҆гасѝ шата́нїѧ ꙗ҆ꙁы́ческаѧ: и҆ є҆́ресїй въста́нїе и҆ ѿстꙋ́пства ско́рѡ раꙁорѝ, и҆ въ ничто́же си́лою ᲃт҃а́гѡ тѝ Дх҃а ѻ҆братѝ. Всѣ́хъ же на́съ въ правосла́вной Вѣ́рѣ, въ любви́ же ꙗ҆́же къ тебѣ̀ и҆ и҆́скрнемꙋ и҆ къ и҆сполне́нїю за́повѣдїй твои́хъ твое́ю благода́тїю ᲂу҆твердѝ и҆ непоꙁибле́мыхъ съхранѝ, и҆ прїймѝ въ Ца́рство твоѐ, ᲃыны́ же ᲃвѣ́та, и҆ ᲃыны̀ днѧ̀ покаꙁа́въ: тво́й ми́ръ, и҆ твою̀ любо́въ дарꙋ́й на́мъ Гд҃и Бж҃е на́шъ. Твое́ бо є҆́стъ є҆́же ми́ловати и҆ спаса́ти на́съ, и҆ тебѣ̀ ᲃла́вꙋ воꙁсыла́емъ Ѿц҃ꙋ̀, и҆ ᲃн҃ꙋ, и҆ ᲃто́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Ли́къ:

А҆ми́нь.

Дїа́конъ па́ки гл҃етъ. Гд҃ꙋ помоли́мсѧ.

Моли́тва, вто́раѧ.

Влады́ко Гд҃и І҆и҃с Хє҃ Бж҃е на́шъ, приклонѝ ᲂу҆хо твоѐ, и҆ ᲂу҆слы́ши на́съ припада́ющихъ стра́шномꙋ и҆ покланѧ́емомꙋ и҆менѝ твое́мꙋ: и҆ вон̾мѝ хꙋдо́мꙋ и҆ смѣре́нномꙋ моле́нїю на́шемꙋ, и҆ по ми́лости твое́й помѧнѝ поми́лꙋй всѣ́хъ правосла́вныхъ хрⷭ҇тїѧ́нъ, по вѡда́хъ плава́ющихъ, въ пꙋ́тъ шествꙋ́ющихъ, трꙋжда́ющихсѧ, плѣне́нных, и҆ ꙗ҆́кѡ благі́й промы́сл̾никъ ѡ҆ спасе́нїи и҆ свобожде́нїи и҆́хъ про́мыслъ сътворѝ.

Помѧнѝ Гд҃и, ᲂу҆бо́гїѧ вдови́цѧ, стра́нныѧ и҆ ни́щыѧ, а҆́лчꙋщыѧ же, и҆ жа́ждꙋщїѧ, и҆ недꙋгꙋ́ющїѧ, и҆ ми́лостїю твое́ю бога́тою, и҆ Боже́стве́ннымъ си про́мысломъ тѣ́хъ ᲂу҆щедрѝ посѣтѝ и҆сцѣлѝ и҆ поми́лꙋй.

Помѧнѝ въ темни́цахъ сꙋ́щихъ и҆ бѣда́хъ, въ пла́чи же и҆ стꙋже́нїихъ ѡ҆брѣта́ющихсѧ, и҆ бо́лѣꙁнїю тѧ́жкою ѡ҆держи́мыхъ, и҆ вели́кою твое́ю ми́лостїю посѣтѝ ᲂу҆тѣшѝ, и҆ ско́рѡ ѡ҆сла́бꙋ и҆́мъ пода́ждъ чл҃кѡлю́бче благі́й.

Помѧнѝ Гд҃и, ѿ бѣ́сѡвъ мꙋчи́мыхъ, ѡ҆скорблѧ́емыхъ же и҆ смꙋща́емыхъ, и҆ дꙋше́внѣ заблꙋжда́ющихъ, и҆ ᲂу҆ѧꙁвлѧ́емыхъ лꙋка́выми стрѣла́ми грехо́вными, и҆ ми́лостивнѡ и҆сцѣлѝ и҆́хъ твои́мъ благосе́рдїемъ.

Помѧнѝ Гд҃и, всѣ́хъ въ гоне́нїи тебѐ ра́ди и҆ вѣ́ры правосла́вныѧ ѿ ꙗ҆ꙁы́къ беꙁ̾бо́жныхъ, ѿ ѿстꙋ́пникъ, и҆ є҆ретикѡ́въ, въ темни́цахъ, ѡ҆кѡ́вахъ, заточе́нїи҆́хъ, и҆ въ всѧ́кой тѣснотѣ̀, бѣда́хъ же и҆ ско́рбехъ пребыва́ющихъ, и҆ въ на́пастехъ злѣ̀ стра́ждꙋщихъ, и҆ ѡ҆горчева́емыхъ, и҆ ка́плю сла́дости и҆ ᲂу҆тѣше́нїѧ ᲃт҃а́гѡ твое́гѡ Дх҃а въ ᲃе́рдцѧ и҆́хъ и҆спꙋстѝ, ꙗ҆́кѡ Дх҃а наслажда́еми, ᲂу҆тѣша́еми, и҆ насыща́еми, и҆ꙁбѣ́гше ѿчаѧ́нїѧ, сла́вѧтъ твою̀ благосты́ню: и҆ не ѡ҆ста́ви и҆́мъ па́че ᲃи́лы и҆скꙋша́тисѧ, но Бж҃іимъ тѝ про́мысломъ ᲃко́рѡ свободꙋ̀ и҆ и҆ꙁба́вꙋ и҆́мъ пода́ждъ.

Помѧнѝ Гд҃и, ᲃт҃ѣ́йшихъ четыре́хъ Патрїа́рхѡвъ, А҆рхіепⷭ҇пѡвъ, и҆ Е҆пⷭ҇кпѡвъ благочести́выхъ, (и҆ Преѡ҆сщ҃е́ннагѡ А҆рхіепⷭ҇па на́шегѡ всеѧ̀ Рꙍ́ссїи Митрополи́та, И҆мⷬ҇къ:) І҆ере́ѡвъ же, и҆ Дїа́конѡвъ правовѣ́рныхъ ᲃт҃ы́ѧ ᲃобо́рныѧ Восто́чныѧ Це́ркве, и҆ ве́съ При́четъ церко́вный и҆ всѣ́хъ поми́лꙋй, и҆ правопра́вити ᲃло́во твое́ѧ и҆́стинны мѣ́рнѡ ᲂу҆крѣпѝ, и҆ молитва́ми и҆́хъ мнѡ́житво беꙁчисле́нное прегрѣше́нїй на́шихъ простѝ.

Помѧнѝ Гд҃и, въ пꙋсты́нѧхъ, и҆ гора́хъ, и҆ пеще́рахъ, и҆ раꙁсѣ́аннахъ зе́мныхъ, тебѐ ра́ди ᲃкита́ющихсѧ, и҆ ве́съ чⷭ҇тный и҆ ᲃт҃ы́й И҆́ноческїй чи́нъ, и҆ благода́тїю си ᲂу҆крепѝ и҆́хъ въ по́двиꙁехъ и҆́хъ, и҆ молитва́ми и҆́хъ в̾ни́ди и҆ всели́сѧ въ ᲃе́рдца на́съ недосто́йныхъ ра́бъ свои́хъ и҆ ѻ҆би́тель себѣ̀ вѣ́чнꙋю въ на́съ сотворѝ.

Помѧнѝ Гд҃и благотворѧ́щихъ ᲃт҃ы́мъ твои́мъ церква́мъ, и҆ Монастыре́мъ и҆ ми́лꙋющихъ ни́щихъ, и҆ ми́лостивнѡ вре́менными и҆ вѣ́чными твои́ми дарова́н̾мѝ тѣ́мъ воꙁда́ждъ.

Помѧнѝ Гд҃и держа́внагѡ Господарѧ̀ на́шегѡ Вели́кагѡ королѧ̀ И҆мⷬкъ: и҆ всѣ́хъ правосла́вныхъ Господаре́й, Кнѧꙁе́й, и҆ Панѡ́въ на́шихъ, и҆ въ здра́вїи ми́рнѡ царствова́ти и҆ до́лгѡ жи́ти ᲂу҆крѣпѝ и҆ сотворѝ: ве́съ родъ правовѣ́рныхъ христїанъ, и҆ всѣ́хъ любѧ́щихъ и҆ ненавидѧ́щихъ на́съ, и҆ заповѣда́вшихъ недосто́йнымъ моли́тисѧ ѡ҆ ни́хъ, помѧнѝ и҆ поми́лꙋй ѿстꙋпи́вшихъ ѿ пра́выѧ вѣ́ры, и҆ поги́бел̾ными є҆́реси ѡ҆слѣпле́нныхъ, ᲃвѣ́томъ твое́ѧ и҆́стинны просвѣтѝ, и҆ це́ркви твое́й ᲃт҃о́й съединѝ.

Нечести́выхъ пога́нъ, поꙁна́нїемъ трісїѧтелнагѡ є҆ди́нагѡ Божества̀ просвѣтѝ, и҆ ᲃт҃о́мꙋ тѝ ᲃта́дꙋ причтѝ.

Ме́рꙁкое и҆ богохꙋ́лное А҆гарѧ́нское ца́рство съ всѣ́мъ и҆́хъ нечести́вымъ ᲂу҆че́нїемъ, ᲃко́ро и҆спровержѝ, и҆ правовѣ́рнымъ царе́мъ па́ки ми́лостивнѡ врꙋчѝ, и҆ воꙁдвигнѝ ро́гъ христїѧ́нскїй, ниꙁпосыла́ѧ на́мъ ми́лости твоѧ̀ бога́тыѧ.

Помѧнѝ Гд҃и ᲃт҃ы́й хра́мъ се́й, и҆ невреди́мъ и҆ непоколѣби́мъ, и҆ ѿ всѣ́хъ є҆рети́ковъ и҆ ѿстꙋ́пникѡвъ неприкоснове́нъ, и҆ неѡскверне́нъ соблюдѝ, и҆ да́же до сконча́нїѧ вѣ́ка ᲂу҆твердѝ.

Помѧнѝ Гд҃и и҆ гра́дъ се́й, и҆ всѧ́къ гра́дъ и҆ стра́нꙋ, и҆ всѧ́кое мѣ́сто, и҆ всѧ̀ ᲃт҃ы́ѧ Монастырѧ̀ и҆ Ꙍ҆би́тели, и҆ всѣ́хъ въ ни́х правовѣ́рнѡ живꙋщихъ, и҆ благоче́стнѡ тебѣ̀ слꙋжа́щихъ, и҆ и҆ꙁба́ви и҆́хъ ѿ гла́да, гꙋби́телства, трꙋ́са, пото́па, ѡ҆гнѧ̀, гра́да, меча̀, наше́ствїѧ и҆ноплеме́нникъ, и҆ междосо́бныѧ бра́ни, и҆ всѧ́коѧ смертоно́сныѧ ра́ны.

Помѧнѝ Гд҃и, и҆ моѐ недосто́инствѡ, хꙋ́дость и҆ ѡ҆каѧ́нство, и҆ прости́въ мѝ всѧ̀ согрѣше́нїѧ во́лнаѧ и҆ не во́л̾наѧ, поми́лꙋй мѧ̀ по вели́цѣй ми́лости твое́й.

Помѧнѝ Гд҃и блаже́нных и҆ при́снопомина́емыхъ, кти́торѡвъ ᲃт҃а́гѡ хра́ма сегѡ̀, и҆ всѣ́хъ ѡ҆ц҃ъ и҆ бра́тїй на́шихъ, въ всѧ́комъ чи́нꙋ и҆ во́ꙁрастѣ, въ благовѣ́рїи и҆ наде́ждѣ въскрⷭ҇нїѧ и҆ живота̀ вѣ́чнагѡ, въ покаѧ́нїи же въ любвѝ ꙗ҆́же къ тебѣ̀ и҆ бли́жнемꙋ преста́вльшихсѧ, и҆ ᲂу҆поко́й и҆́хъ и҆де́же присѣща́єтъ ᲃвѣ́тъ лица̀ твоегѡ, и҆ весели́тъ всѧ̀ и҆́же ѿ вѣ́ка ᲃты́ѧ твоѧ̀:

Твое́ бо є҆́стъ є҆́же ми́ловати, и҆ спаса́ти на́съ Бж҃е на́шъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Въста́вше же, а҆́бїе Дїа́конъ гл҃етъ:

Премꙋ́дрость.

Ли́къ:

Блⷭ҇вѝ.

Ст҃ль:

Сы́й благословенъ и҆ препросла́влен:

Ли́къ:

А҆ми́нь.

Ꙋ҆твердѝ Бж҃е ᲃт҃ꙋ́ю Православнꙋю:

Ст҃ль:

Прⷭ҇та́ѧ Бц҃е спасѝ на́съ.

Ли́къ:

Чтⷭ҇нѣ́йшꙋю Херꙋви́мъ:

Ст҃ль:

Сла́ва тѝ Бж҃е ᲂу҆пова́нїе на́ше:

Ли́къ:

Сла́ва: И҆ ны́нѣ. Гд҃и поми́лꙋй. гⷤ. Благослови.

Ст҃ль же тво́ритъ дне́вный ѡ҆бы́чный Ѿпꙋ́стъ.

И҆ а҆́бїе начина́етсѧ Божестве́ннаѧ Лѵтꙋ́ргїѧ.

Въ то́йже де́нь, на Лѵтꙋ́ргїи, Антифꙍнъ, а҃.

Ѿ Ѱалма̀, ѯд҃. Сті́хъ, а҃.

Тебѣ̀ подоба́етъ пѣ́снь, Бж҃е, въ ᲃїѡ́нѣ, и҆ тебѣ̀ воꙁда́стсѧ моли́тва во І҆ерⷭ҇ли́мѣ.

Припелъ:

Спасѝ и҆ застꙋпѝ на́съ ᲃн҃е Бж҃ій, ди́венъ сы́й въ ᲃт҃ы́хъ пою́щих тѝ, А҆ллил:

То́йжде ᲃті́хъ пое́тъ и҆ вто́рый Ли́къ.

Сті́хъ, в҃.

Ꙋ҆слы́ши ны Бж҃е ᲃпаси́телю на́шъ, ᲂу҆пова́нїе всѣ́мъ ко́нцемъ землѝ.

Спасѝ и҆ застꙋпѝ на́съ:

Сті́хъ, г҃.

Блгⷭ҇ви́ши вѣне́цъ лѣ́та благости твоеѧ̀, и҆ полѧ̀ твоѧ̀ насы́тѧтсѧ тꙋ́ка.

Спасѝ и҆ застꙋпѝ на́съ:

Сті́хъ, д҃.

Ѻ҆дѣ́ѧшасѧ ѡ҆́вни ѡ҆́вчїи, и҆ ᲂу҆до́лїѧ ᲂу҆мно́жатъ пшени́цꙋ: воꙁꙁо́вꙋ́тъ, и҆бѡ̀ воспою́тъ.

Спасѝ и҆ застꙋпѝ на́съ:

Сла́ва:

Спасѝ и҆ застꙋпѝ на́съ:

И҆ ны́нѣ:

Спасѝ и҆ застꙋпѝ на́съ:

А҆нтиф: в҃ ѿ Ѱалма̀ к҃. Сті́хъ, а҃.

Гд҃и, си́лою твое́ю воꙁвесели́тсѧ Ца́рь, и҆ ѡ҆ спⷭ҇нїи твое́мъ воꙁра́дꙋетсѧ ѕѣ́лѡ.

Припѣ́лъ.

Благословѝ Цр҃ѧ̀ и҆ лю́ди твоѧ̀ Гд҃и. Моли́твами Бц҃а, ᲃп҃се, и҆ ᲃп҃сѝ на́съ.

Сті́хъ, в҃.

Ꙗ҆́кѡ дасѝ є҆мꙋ̀ блгⷭ҇ве́нїе въ вѣ́къ вѣ́ка: вꙁвесели́ши є҆гѡ̀ ра́достїю съ лице́мъ твои́мъ.

Благословѝ Цр҃ѧ̀:

Сті́хъ, г҃.

Ꙗ҆́кѡ ца́рь ᲂу҆пова́етъ на Гд҃а, и҆ млⷭ҇тїю вы́шнѧгѡ не подви́житсѧ.

Благословѝ Цр҃ѧ̀:

Сті́хъ, д҃.

Воꙁнеси́сѧ, Гд҃и, ᲃи́лою твое́ю: воспое́мъ и҆ пое́мъ ᲃи́лы твоѧ̀.

Благословѝ Цр҃ѧ̀:

Сла́ва: И҆ ны́нѣ: Е҆диноро́дный Сн҃е:

А҆нтиф: г҃ ѿ Ѱалма̀ рк҃д. Сті́хъ, а҃.

Надѣ́ющїисѧ на Гд҃а, ꙗ҆́кѡ гора̀ Сіѡ́нъ: не подви́житсѧ въ вѣ́къ живы́й въ І҆ерⷭ҇ли́мѣ.

Припѣ́лъ:

Съхранѝ въ ми́рѣ Це́рковь и҆ гра́дъ тво́й Гд҃и, моли́твами всѣ́хъ ᲃт҃ы́хъ тво́ихъ, и҆ спасѝ на́съ.

Сті́хъ, в҃.

Ꙗ҆́кѡ не ѡ҆ста́витъ Гд҃ь жеꙁла̀ грѣ́шныхъ на жре́бїй пра́ведныхъ.

Съхранѝ въ ми́рѣ Це́рковь:

Сті́хъ, г҃.

Ꙋ҆блажѝ, Гд҃и, бл҃гїѧ и҆ пра́выѧ се́рцемъ:

Съхранѝ въ ми́рѣ Це́рковь:

Сті́хъ, д҃.

Ꙋ҆кланѧ́ющїѧ въ раꙁвраще́нїѧ поведе́тъ Гд҃ь со дѣ́лающими беꙁꙁако́нїе: ми́ръ на І҆и҃лѧ.

Съхранѝ въ ми́рѣ Це́рковь:

На Вѣхо́де же пою́тъ.

Благослови вѣне́цъ лѣ́тꙋ бла́гости твое́ѧ.

Спаси́ на́съ ᲃн҃е Бж҃ій, ди́венъ сы́й въ ᲃт҃ы́хъ пою́щихъ тѝ. А҆ллил: гⷤ.

По Въхо́дѣ, Троп: Но́вомꙋ лѣ́тꙋ. Та́жъ Препод: и҆ Код: є҆гѡ̀. Посе́мъ

Сла́ва: Код: Но́вомꙋ лѣ́тꙋ.

И҆ ны́нѣ: Бц҃и.

Ра́дꙋйсѧ благодатнаѧ.

Прок: Но́вомꙋ лѣ́тꙋ, Гла́съ, г҃.

Ве́лїй Гд҃ь на́шъ, и҆ ве́лїѧ крѣ́пость є҆гѡ̀, и҆ ра́ꙁꙋмꙋ є҆гѡ̀ нѣ́сть числа̀.

Сті́хъ.

Хвали́те Гд҃а ꙗ҆́кѡ бла́гъ:

Прпд: Прок: Гла́съ, з҃.

Чтⷭ҇на пре́дъ Гд҃емъ ᲃм҃рть Преподобнагѡ є҆гѡ̀:

А҆пⷭ҇лъ Тї: Зач. сп҃в.

Прпд: Колоⷭ҇: Зач. сн҃и. А҆ллил: Гла́съ, д҃. Сті́хъ а҃.

Тебѣ̀ подоба́єтъ пѣ́снъ Бж҃е.

Сті́хъ в҃.

Благослови́ши вѣне́цъ лѣ́тꙋ:

Прпд: Блаже́нъ мꙋжъ боѧ́йсѧ Гд҃а:

Е҆ѵⷢ҇: Лꙋк: Зач. г̀і. Прпд: Маѳ Зач. м҃г. Прик.

Благослови́ши вѣне́цъ лѣ́тꙋ бла́гости твое́ѧ Гд҃и.

Дрꙋг: Въ па́мѧть:

А҆́ще же Неде́лѧ, А҆нтиѳ: всѧ̀ поє́мъ ꙗ҆́кожъ ᲂу҆каꙁа́сѧ, Блаже́нна же не поє́мъ.

По Въхо́де Троп: Въскреⷭ҇: и҆ І҆ндек: ѝ ᲃⷮ: съ Код: є҆гѡ̀.

Сла́ва: Код: І҆ндек: И҆ ны́нѣ: Бг҃ро́диченъ. Прок: І҆ндек: и҆ Въскреⷭ҇: А҆пⷭ҇лъ и҆ Е҆ѵⷢ҇: пре́жде І҆ндек: пото́мъ Нєд:

А҆́ще же Хра́мъ є҆́стъ ᲃⷮ: прилага́ємъ и҆ ᲃⷮ: Прик: І҆ндек: и҆ ᲃт҃о́мꙋ.

Си́це тво́римъ а҆́ще и҆ Хра́мъ є҆́стъ ᲃⷮ: ᲃѵмеѡ́на сто́лпника.