Служба с акафистами Сергию, игумену Радонежскому

Ве́чер, на ма́лей вече́рни стихи́ры на 4, глас 5.

Подо́бен: Преподо́бне о́тче:

Преподо́бне о́тче,/ ду́шу твою́ с те́лом очи́стив,/ Свята́го Ду́ха прекра́сная оби́тель яви́лся еси́,/ И́же сла́вна тя конце́м, преблаже́нне Се́ргие, соде́я./ В чудесе́х же вели́каго свети́льника,/ просвети́вшаго во мра́це су́щия,/ и наста́вника мона́хов,/ соше́дшеся велему́дренно ублажа́ем.

Яви́лся еси́, богоблаже́нне,/ му́драя плени́ца,/ связу́я мно́гая враго́в ополче́ния:/ те́мже и венце́м увя́злся еси́ от Бо́га неувяда́ющим,/ и весе́лие и ра́дость/ и сла́ву ве́чную восприя́л еси́, прему́дре Се́ргие./ Того́ моли́, Тому́ помоли́ся, преподо́бне,/ дарова́ти мир ми́ру,/ и душа́м на́шим ве́лию ми́лость.

Преподо́бне о́тче,/ теле́сныя стра́сти зе́льным воздержа́нием,/ и чи́стыми моли́твами,/ по́том же воздержа́ния угаси́л еси́ у́глие страсте́й:/ того́ ра́ди чудесы́ сла́вна тя/ Росси́йским страна́м, сла́вне Се́ргие, показа́,/ украси́в Небе́сными дарми́ Христо́с./ Того́ моли́, Тому́ помоли́ся, преподо́бне,/ дарова́ти мир ми́ру,/ и душа́м на́шим ве́лию ми́лость.

Сла́ва, глас 6:

Прииди́те, мона́шествующих мно́жество, дне́сь,/ Се́ргия, благоче́стия подража́теля,/ пе́сньми и пе́ньми восхва́лим,/ и честну́ю его́ и многоцеле́бную ра́ку обстоя́ще,/ любе́зно облобыза́ем, глаго́люще:/ ра́дуйся, пресла́вне Се́ргие, Оте́честву твоему́ пресве́тлый свети́льниче./ Ра́дуйся, я́ко чи́сте Чисте́йшему Све́ту совокупи́вся./ Ра́дуйся, я́ко Тро́ице предстои́ши со А́нгелы:/ Ю́же непреста́нно моли́,// дарова́ти душа́м на́шим ве́лию ми́лость.

И ны́не, Богоро́дичен: Богоро́дице, Ты еси́ Лоза́:

На стихо́вне стихи́ры, глас 6.

Подо́бен: А́нгельския:

От ма́терних пеле́н, му́дре,/ Бо́гу возложе́н, Се́ргие преподо́бне,/ и пусты́ню я́ко град соде́лав,/ в ней мно́жества мона́хов собра́л еси́/ сла́вити многопе́тую Тро́ицу,/ Ю́же моли́ спасти́ся душа́м на́шим.

Стих: Честна́ пред Го́сподем/ сме́рть преподо́бных Его́.

Богому́дре Се́ргие,/ а́ще бо и по́слежди ле́ты тя новопросвеще́нная Росси́йская страна́ возрасти́:/ но дре́вних че́сти сподо́бился еси́,/ и дарова́ния чуде́с досто́йно прие́м,/ мона́хов мно́жества песносло́вят/ и правове́рною ве́рою Христа́ хва́лят,/ твои́ми покаря́ющеся уче́ньми:/ моли́ спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Я́ко в высо́ких черто́зех,/ доброде́тели предугото́вал еси́ дом себе́,/ Се́ргие, о́тче наш,/ и я́ко вои́стинну Боже́ственную све́тлость/ зре́ти сподо́бился еси́,/ в ню́же всели́вся, зри́ши Святу́ю Тро́ицу:/ Ейже моли́ся,/ дарова́ти ми́ру ве́лию ми́лость.

Сла́ва, глас 8:

Преподо́бне о́тче,/ ми́ра красоту́ и сла́дость вре́менную/ отню́д возненави́дел еси́,/ мона́шеское житие́ па́че возлюби́в,/ и А́нгелом собесе́дник бы́ти сподо́бился еси́,/ и свети́льник многосве́тлый Росси́йския земли́,/ чудесми́, я́коже второ́е со́лнце сия́я./ Но всех нас помина́й,/ соверша́ющих свяще́нную па́мять твою́:/ мы бо ча́да твоя́,/ и о́вцы слове́сных твои́х уче́ний/ и тя на по́мощь призыва́ем,/ прося́ще тобо́ю прия́ти мир и ве́лию ми́лость.

И ны́не, Богоро́дичен: Влады́чице, приими́:

Тропа́рь, глас 4:

И́же доброде́телей подви́жник,/ я́ко и́стинный во́ин Христа́ Бо́га,/ на стра́сти вельми́ подвиза́лся еси́ в жи́зни вре́менней,/ в пе́ниих, бде́ниих же и поще́ниих о́браз быв твои́м ученико́м:/ те́мже и всели́ся в тя Пресвятый Дух,/ Его́же де́йствием све́тло укра́шен еси́./ Но я́ко име́я дерзнове́ние ко Святе́й Тро́ице,/ помина́й ста́до, е́же собра́л еси́, му́дре,/ и не забу́ди, я́коже обеща́лся еси́,/ посеща́я чад твои́х,// Се́ргие преподо́бне, о́тче наш.

Сла́ва, и ны́не: Е́же от ве́ка утае́нное:

На вели́цей вече́рни, Блаже́н муж, пе́рвый антифо́н.

На Го́споди, воззва́х: стихи́ры на 8, глас 6:

Подо́бен: Всю отложи́вше:

Ми́ра мяте́ж, преподо́бне, оста́вив,/ и взем крест твой, после́довал еси́ Христу́/ невозвра́тным по́мыслом,/ и в пусты́ню всели́лся еси́, преподо́бне,/ душе́вныя стра́сти из ко́рене исторга́я/ и теле́сная чу́вства огорчева́я,/ и ча́стыми бде́нии и моли́твами/ благода́ть восприя́л еси́, преподо́бне,/ цели́ти разли́чныя неду́ги,/ А́нгелов собесе́дниче и преподо́бных сожи́телю:/ моли́ся Го́споду, Се́ргие преподо́бне,// поми́ловатися душа́м на́шим.

Преподо́бне о́тче,/ кто испове́сть труды́ твоя́ и боле́зни?/ Или́ кий язы́к изрече́т/ жесто́кое твое́ житие́,/ бде́ние же и сухояде́ние,/ и е́же на земли́ лега́ние,/ чистоту́ душе́вную и теле́сную,/ устна́ми и умо́м соверше́нное безмо́лвие,/ смире́ние же нелицеме́рное,/ моли́твы непреста́нныя и разсужде́ние доброразсу́дное,/ ху́дость ри́зную и па́мять сме́ртную?/ Се́ргие о́тче наш,// моли́ спасти́ся душа́м на́шим.

Преподо́бне о́тче Се́ргие,/ ты врач душ и теле́с яви́лся еси́,/ источа́я неду́жным исцеле́ния струи́,/ да́ром же проро́чествия укра́шен,/ прорица́я я́ко настоя́щая бу́дущая./ Моли́твою бо кня́зя вооружи́в/ ва́рвары победи́ти,/ хва́лящияся Оте́чество его́ разори́ти,/ но самие́х богопораже́нною я́звою/ тру́пия досто́йно падо́ша// псало́мски при а́де, преподо́бне.

Богому́дре Се́ргие,/ сла́ву маловре́менную оста́вль,/ и в пусты́нях и гора́х/ ты живы́й яви́лся еси́,/ и Тро́ицы чи́стый дом, блаже́нне, был еси́,/ Ея́же си́лою пресвяты́я хра́мы воздви́г,/ и огра́ды мона́шествующим во спасе́ние созда́л еси́:/ живя́ше же в тебе́ Христо́с Бог наш,/ Его́же от ю́ности возжеле́л еси́./ Того́ моли́, Се́ргие преподо́бне,// спасти́ся душа́м на́шим.

И́ны стихи́ры преподо́бнаго, глас 2.

Подо́бен: Терпя́ще муче́ния:

Терпя́ ны́нешняя му́жественно,/ веселя́ся бу́дущими,/ ко всем глаго́лал еси́, преподо́бне Се́ргие:/ еда́ у́бо ту́не подвиза́емся,/ но ве́чнаго живота́ ча́юще получи́ти?/ Лю́ты ско́рби, но сла́док рай:/ боле́зненны труды́, но присносу́щно восприя́тие./ Не облени́мся у́бо, о по́стницы! Ма́ло стерпи́м,/ да венцы́ нетле́нными увязе́мся// от Христа́ Бо́га и Спа́са душ на́ших. [Два́жды.]

Зря я́ко наслажде́ние ско́рби,/ ше́ствуя те́сным путе́м,/ ко ученико́м твои́м глаго́лал еси́, преблаже́нне Се́ргие:/ не устраши́мся по́двига по́стнаго,/ да стра́шнаго гее́нскаго муче́ния избе́гнем,/ согбе́нне бу́дут ру́це,/ да простира́ются же к Бо́гу,/ но́зе же утвержде́ны/ на моли́тве предстоя́ти./ Не пощади́м естества́ тле́ннаго, изво́лим по́двиг,/ да венцы́ побе́дными увязе́мся/ от Христа́ Бо́га и Спа́са душ на́ших.

Отве́рг тле́нныя ри́зы,/ ходи́л еси́ в зиме́ без те́плой оде́жды, я́ко же в ле́те,/ глаго́ля, терпели́ве Се́ргие:/ за рай, его́же погуби́хом,/ ри́зы мя́гкия ны́не отлага́ем,/ грехо́м иногда́ преступле́ния оде́яхомся,/ совлече́мся ны́не, ра́ди нетле́нных риз,/ небреже́м, бра́тие, о зиме́ преходя́щей:/ пло́ть изнури́м,/ да венцы́ побе́дными увязе́мся/ от Христа́ Бо́га и Спа́са душ на́ших.

Сла́ва, глас 6:

Е́же по о́бразу соблю́д невреди́мо,/ ум влады́ку над страстьми́ па́губными по́стнически поста́вив,/ во е́же по подо́бию я́ко мо́щно возше́л еси́:/ му́жески бо естество́ пону́див,/ потща́лся еси́ ху́ждшее покори́ти лу́чшему,/ и пло́ть порабо́тити ду́ху:/ тем же мона́шествующих яви́лся еси́ верх,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее,/ и ны́не на Небесе́х, зерца́лом разре́шшимся,/ о́тче наш Се́ргие,/ чи́сте зри́ши Святу́ю Тро́ицу,/ моля́ся несре́дственне// о и́же ве́рою и любо́вию чту́щих тя.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чтения.

При́тчей чте́ние (главы́ 3 и 8):

Па́мять пра́веднаго с похвала́ми, и благослове́ние Госпо́дне на главе́ его́./ Блаже́н челове́к, и́же обре́те прему́дрость: и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же е́сть ка́мений многоце́нных, все же честно́е недосто́йно ея́ е́сть./ Долгота́ бо дней, и ле́та живота́ в десни́це ея́: в шу́йце же ея́ бога́тство, и сла́ва./ От уст ея́ исхо́дит пра́вда, зако́н же и ми́лость на язы́це но́сит./ Послу́шайте у́бо мене́, о ча́да! честна́я бо реку́: и блаже́н челове́к, и́же пути́ моя́ сохрани́т:/ исхо́ди бо мои́, исхо́ди живота́, уготовля́ется хоте́ние от Го́спода./ Сего́ ра́ди молю́ вас, и предлага́ю мой глас сыново́м челове́ческим:/ я́ко аз прему́дрость устро́их сове́т, и ра́зум и смысл аз призва́х./ Мой сове́т и утвержде́ние, мой ра́зум, моя́ же кре́пость./ Аз мене́ лю́бящия люблю́, и́щущии же мене́ обря́щут благода́ть./ Разуме́йте у́бо, незло́бивии кова́рство ненака́заннии же прилага́йте се́рдца./ Послу́шайте мене́ и па́ки, честна́я бо реку́, и отве́рзу от усте́н пра́вая:/ я́ко и́стине поучи́тся горта́нь мой, ме́рзки же предо мно́ю устны́ лжи́выя./ С пра́вдою вси глаго́лы уст мои́х: ничто́же в них стро́потно, ниже́ развраще́нно:/ Вся пра́ва су́ть разумева́ющим, и про́ста обрета́ющим ра́зум./ Науча́ю бо вас и́стине, да бу́дет о Го́споде наде́жда ва́ша, и испо́лнитеся Ду́ха.

При́тчей чте́ние (главы́ 10 и 11):

Уста́ пра́веднаго ка́плют прему́дрость, язы́к же непра́веднаго поги́бнет./ Устне́ муже́й пра́ведных ка́плют благода́ти, уста́ же нечести́вых развраща́ются./ Ме́рила льсти́вая ме́рзость пред Го́сподом: вес же пра́ведный прия́тен Ему́./ Иде́же а́ще вни́дет досажде́ние, та́мо и безче́стие: уста́ же смире́нных поуча́ются прему́дрости./ Соверше́ние пра́вых наста́вит их, и поползнове́ние отрица́ющихся упасе́т их./ Не по́льзуют име́ния в де́нь я́рости, пра́вда же изба́вит от сме́рти./ У́мер пра́ведный, оста́ви раска́яние: нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́, в нече́стие же впа́дает непра́вда./ Пра́вда муже́й пра́вых изба́вит их: безсове́тием же пленя́ются беззако́ннии./ Сконча́вшуся му́жу пра́ведну, не поги́бнет наде́жда: похвала́ же нечести́вых поги́бнет./ Пра́ведник от ло́ва убе́гнет, вме́сто же его́ предае́тся нечести́вый./ Во усте́х нечести́вых се́ть гра́жданом, чу́вство же пра́ведных благопоспе́шное./ Во благи́х пра́ведных испра́вится град, и в поги́бели нечести́вых ра́дование./ Во благослове́нии пра́вых возвы́сится град, усты́ же нечести́вых раскопа́ется./ Руга́ется гра́жданом лише́нный ра́зума, муж же му́дрый безмо́лвие во́дит.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же су́ть в ми́ре./ И́бо пред лице́м челове́ческим, а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я, и обре́те их досто́йны Себе́./ Я́ко зла́то в горни́ле искуси́ их, и я́ко всепло́дие же́ртвенное прия́т я./ И во вре́мя посеще́ния их возсия́ют: и я́ко и́скры по сте́блию потеку́т./ Су́дят язы́ком, и облада́ют людьми́, и воцари́тся Госпо́дь в них во ве́ки./ Наде́ющиися На́нь разуме́ют и́стину, и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.

На лити́и стихи́ра хра́ма.

И свята́го стихи́ры, глас 6:

Прииди́те, празднолю́бцы/ и по́стников сосло́вие,/ ве́рою соше́дшеся,/ и́стиннаго по́стника почти́м дне́сь Се́ргия,/ с весе́лием ше́ствовавшаго по стопа́м Влады́ки своего́/ у́зкий пу́ть, и безстра́стную жи́знь,/ и ве́рою возопие́м:/ о всеблаже́нне, преподо́бных сожи́телю,/ и по́стников похвало́!/ О нас моли́ся ко Го́споду,/ поми́ловатися душа́м на́шим.

Преподо́бне и богоно́се Се́ргие,/ любве́ ра́ди Христо́вы вся оста́вил еси́,/ и в пусты́ню вшед,/ ника́коже убоя́лся еси́ неви́димых враго́в кова́рствия:/ а́ще бо и мно́гажды приидо́ша на тя,/ скрежета́нием зубны́м я́рость показу́юще:/ ты же моли́твами твои́ми,/ я́ко дым без ве́сти сих сотвори́л еси́./ О непоро́чныя твоея́ души́,/ и кре́пкаго терпе́ния твоего́!/ Христа́ непреста́нно моли́/ спасти́ся душа́м на́шим.

Росси́йская у́бо всеосвяще́нная, и вели́кая Це́рковь,/ с правосла́вными кня́зи, мона́хи же и просты́ми/ ева́нгельских исто́чников струя́ми напои́вшеся,/ духо́вно весели́мся,/ в наро́читом пра́зднице, до́браго па́стыря и учи́теля,/ и целе́бныя его́ мо́щи обстоя́ще любе́зно облобыза́ем./ И сих я́ко цве́ты пе́сньми и хвала́ми увязе́м реку́ще:/ Ра́дуйся, Се́ргие блаже́нне,/ Небе́сный челове́че, земны́й А́нгеле,/ и Ду́ха Свята́го оби́тель./ Ра́дуйся, я́ко мно́гих ко спасе́нному пути́ наста́вил еси́./ Ра́дуйся, правосла́вному во́инству на́шему похвала́ и утвержде́ние./ Преподо́бне Се́ргие богоприя́тне,/ Оте́честву твоему́ пресве́тлый свети́льниче,/ и моли́твенниче о душа́х на́ших.

Сла́ва, глас 6:

Прииди́те, мона́шествующих: (пи́сан на ма́лей вече́рни).

И ны́не, Богоро́дичен: Творе́ц и Изба́витель Мой:

На стихо́вне стихи́ры, глас 1.

Подо́бен: Небе́сных чино́в:

Наста́, богоно́се, со́лнца светле́йши твой пра́здник,/ озаря́я приходя́щия к тебе́ ве́рою,/ и безсме́ртие благоуха́ет:/ душа́м же источа́ет нетле́ние от свята́го твоего́ телесе́,/ Се́ргие преподо́бне,// моли́твенниче о душа́х на́ших.

Стих: Честна́ пред Го́сподем/ сме́рть преподо́бных Его́.

Чу́вственныя стра́сти теле́сныя победи́л еси́,/ воздержа́ния брозда́ми, чудоде́йственне Се́ргие,/ и ре́вность к безпло́тным на земли́ показа́л еси́,/ все же плотско́е жела́ние ду́ху повину́л еси́./ Тем и ны́не в Небе́сных дво́рех водворя́яся,/ моли́ о душа́х на́ших.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Блаже́нне Се́ргие, основа́ние положи́в доброде́тели,/ дре́вняго челове́ка совле́кся с похотьми́,/ и во Христа́ обле́клся еси́ и́стину./ Тем обличи́л еси́, преподо́бне, мно́гая враго́в ополче́ния,/ наста́вник мона́хов быв,/ моли́ спасти́ся душа́м на́шим.

Сла́ва, глас 8:

Мона́хов мно́жества/ наста́вника тя почита́ем, о́тче наш Се́ргие:/ твое́ю бо стезе́ю вои́стинну пра́во ходи́ти позна́хом./ Блаже́н еси́ Христу́ рабо́тав,/ и вра́жию обличи́л еси́ си́лу,/ А́нгелов собесе́дниче и преподо́бных соприча́стниче и пра́ведных:/ с ни́ми же моли́ся Го́сподеви,/ поми́ловатися душа́м на́шим.

И ны́не, Богоро́дичен: Безневе́стная Де́во:

Тропа́рь (пи́сан на ма́лей вече́рни).

На у́трени, тропа́рь свята́го [Два́жды].

Сла́ва, и ны́не, Богоро́дичен.

По 1-м стихосло́вии седа́лен, глас 8.

Подо́бен: Прему́дрости:

Ве́сь освяще́н и богоно́сен показа́лся еси́,/ ми́ра и бога́тства све́тлости,/ и вся ели́ка ви́димых добро́т маловре́менных преоби́дев,/ смире́нием же и нището́ю Влады́це Христу́ после́довал еси́,/ собра́в мона́хов мно́жества, и сих правосла́вия уче́нием просвети́л еси́./ Тем и по кончи́не нестаре́емую благода́ть прия́л еси́,/ и во гро́бе лежа́ нетле́нен пребыва́еши, Се́ргие богоблаже́нне,/ моли́ Христа́ Бо́га согреше́ний оставле́ние дарова́ти,/ чту́щим любо́вию святу́ю па́мять твою́. [Два́жды].

Сла́ва, и ны́не, Богоро́дичен:

Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ Прия́телище я́ко су́щи Уте́шителя Всепе́тая,/ беззако́ния мя су́ща скве́рно жили́ще,/ и де́монов игра́лище в ра́зуме бы́вша,/ потщи́ся и сих злоде́йствия мя изба́вити,/ све́тло жили́ще доброде́тельми соде́лавши./ Светода́тельная и Нетле́нная,/ разжени́ о́блак страсте́й, и Вы́шняго прича́стия сподо́би,/ и Све́та невече́рняго моли́твами Твои́ми.

По 2-м стихосло́вии седа́лен, глас 3.

Подо́бен: Красоте́ де́вства:

Е́же к Бо́гу мудрова́ние горе́ име́я о́тче,/ и я́же на земли́ оста́вил еси́,/ и мно́гими боле́зньми, све́тло твое́ житие́ изъясни́в,/ вся́кия же Боже́ственныя доброде́тели оби́тель показа́вся,/ в моли́твах и мольба́х и поще́ниих Го́споду прибли́жился еси́./ Моли́ Христа́ Бо́га, спасти́ся душа́м на́шим. [Два́жды].

Сла́ва, и ны́не, Богоро́дичен:

Я́ко невозде́ланна, Де́во, Лоза́,/ прекра́сный Грозд, Христа́, возрасти́ла еси́,/ источа́юща нам вино́ спаси́тельное, всех веселя́щее ду́ши и телеса́./ Те́мже, я́ко вино́вну Тя до́брых ублажа́юще,/ при́сно со А́нгелом вопие́м Ти:/ ра́дуйся, Обра́дованная.

По полиеле́и седа́лен, глас 8.

Подо́бен: Прему́дрости:

Егда́, блаже́нне, боже́ственному жела́нию ум твой впери́в,/ тогда́ оста́вил еси́ вся до́лу влеку́щая мудрова́ния,/ и, в пусты́ню всели́вся, я́ко крин процве́л еси́ доброде́тели прекра́сный,/ и, страсте́й искорени́в те́рние, в нем насади́л еси́ плоды́ трудо́в твои́х./ Те́мже и пожа́л еси́ рукоя́ти, неотъе́млемо бога́тство на Небесе́х./ Се́ргие преподо́бне, моли́ Христа́ Бо́га/ согреше́ний оставле́ние дарова́ти чту́щим любо́вию святу́ю па́мять твою́. [Два́жды].

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тва́рь,/ А́нгельский собо́р и челове́ческий род,/ Освяще́нный Хра́ме и Раю́ слове́сный,/ Де́вственная Похвало́, из Нея́же Бог воплоти́ся/ и Младе́нец бы́сть, пре́жде век сый Бог наш:/ ложесна́ бо Твой престо́л сотвори́,/ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тва́рь,/ сла́ва Тебе́.

Степе́нна, 1-й антифо́н 4-го гла́са. Проки́мен: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми?

Ева́нгелие от Матфе́я, зача́ло 43.

По 50-м псалме́ стихи́ра, глас 6:

И́же на земли́ А́нгела,/ и на Небеси́ челове́ка Бо́жия,/ ми́ра благо́е украше́ние,/ пи́щу благи́х доброде́тельных,/ по́стников похвалу́,/ Се́ргия вели́каго почти́м:/ насажде́н бо в дому́ Госпо́дни,/ и процвете́ пра́ведно,/ я́ко кедр в пусты́ни,/ умно́жив ста́до Христо́во слове́сных ове́ц,// в преподо́бстве и пра́вде.

Кано́н Богоро́дицы со ирмосо́м на 6 и свята́го на 8.

Кано́н Пресвяты́я Богоро́дицы, глас 6.

Песнь 1

Ирмо́с: Я́ко по су́ху пешеше́ствовав Изра́иль/ по бе́здне стопа́ми,// гони́теля фарао́на/ ви́дя потопля́ема,// Бо́гу побе́дную пе́снь пои́м, вопия́ше.

Прича́щшися Е́ва са́да, преслуша́ннаго бра́шна, кля́тву введе́:/ но сию́ разреши́ла еси́, Чи́стая,/ благослове́ния Нача́ток, Христа́ ро́ждши.

Я́же би́сера от Боже́ственныя мо́лнии, Христа́ ро́ждши,/ страсте́й мои́х мглу и прегреше́ний смуще́ние,/ Чи́стая, разжени́ све́том Твое́й све́тлости.

Язы́ков Жда́ние Иа́ков из Тебе́ воплоща́емаго/ предзря́ше та́йно у́мными очесы́:/ Бо́га, изба́вльшаго нас хода́тайством Твои́м.

Оскуде́вшим нача́льником от пле́мени Иу́дова, Пречи́стая,/ Сын Твой и Бог, проше́д Во́ждь,/ над концы́ земны́ми ны́не вои́стину воцари́ся.

Кано́н преподо́бнаго Се́ргия, его́же краегране́сие сицево́: Се́ргия похвали́ти, Бо́же мой, да́руй ми. Глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в,/ и раздели́в мо́ре,/ Изра́иля же беглеца́, пешехо́дца спасе́,// пе́снь Бо́гови воспева́юща.

Христа́, нас ра́ди во́лею смири́вшагося да́же до ра́бия о́браза, подража́в,/ возлюби́л еси́ смире́ние,/ и, зе́льным бде́нием и моли́твами душегу́бныя стра́сти умертви́в,/ на го́ру безстра́стия возше́л еси́, Се́ргие пребога́те.

Я́ко свети́льник све́та,/ твою́ ду́шу сле́зными пото́ки украша́я,/ и друга́го Исаа́ка подо́бно сам себе́ возне́сл еси́, преподо́бне,/ и се́рдце твое́ Бо́гу поже́рл еси́.

И́же во чре́ве ма́тери трикра́ты проглаше́нием/ Тро́ицы служи́тель показа́лся еси́/ и, Трисо́лнечным све́том озаря́емь,/ де́монская ополче́ния, я́ко паучи́ну, разори́л еси́, преблаже́нне Се́ргие.

Богоро́дичен: Зако́нов кроме́ есте́ственных родила́ еси́ Законода́вца Бо́га и Челове́ка бы́вша,/ Того́, я́ко Бла́га, моли́, Всенепоро́чная,/ на́ша беззако́ния презре́ти, вопию́щих всегда́:/ пои́м Го́споду, сла́вно бо просла́вися.

Ин кано́н свята́го. Глас 1.

Песнь 1

Ирмо́с: Твоя́ победи́тельная десни́ца/ боголе́пно в кре́пости просла́вися,/ та бо, Безсме́ртне,/ я́ко всемогу́щая, проти́вныя сотре́,// Изра́ильтяном пу́ть глубины́ новосоде́лавшая.

Любо́вию Христо́вою утверди́лся еси́, преподо́бне,/ и яви́лся еси́, я́ко река́, оби́льно всю зе́млю напая́я сло́вом уче́ния,/ богоблаже́нне Се́ргие,/ те́мже па́мять твою́ любо́вию ублажа́ем.

Твое́ю руко́ю бы́сть благослове́ние Боже́ственным манове́нием:/ невла́жная бо земля́ твое́ю моли́твою во́ду источи́,/ ю́же ны́не почерпа́юще, исцеле́ние прие́млем незави́стно,/ преподо́бне Се́ргие.

Ве́сь от ю́ности Бо́гу освяти́лся еси́,/ к Нему́ доброде́тельми приближа́яся,/ тле́нная бо, я́же на земли́, оста́вив,/ Небе́сное обре́л еси́ бога́тство.

Богоро́дичен: Ра́дуйся, благода́ти исто́чниче;/ ра́дуйся, Ле́ствице и Две́ре Небе́сная;/ ра́дуйся, Све́щниче, и Ста́мно злата́я, и Горе́ несеко́мая,/ я́же Жизнода́вца Христа́ ми́ру родила́ еси́.

Катава́сия: Отве́рзу уста́ моя́:

Песнь 3

Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

Тле́нную мою́ пло́ть и сме́ртную, Всечи́стая Богома́ти,/ из чре́ва Твоего́ несказа́нно прие́м Благи́й/ и обезтле́нив сию́, ве́чне Себе́ связа́л е́сть.

Бо́га воплоща́ема из Тебе́ зря́ще, Де́во,/ ужаса́хуся стра́хом ли́цы А́нгельстии/ и я́ко Ма́терь Бо́жию немо́лчными пе́сньми Тя почита́ют.

Ужасе́ся, го́ру у́мную ви́дев Тя, проро́к Дании́л,/ из Нея́же Ка́мень отсече́ся кроме́ рук/ и де́монская ка́пища, Богома́ти, кре́пко сокруши́.

Не мо́жет сло́во Тя челове́ческое,/ ниже́ язы́к, Де́во, похвали́ти досто́йно:/ из Тебе́ бо без Се́мене Жизнода́вец Христо́с воплоти́тися, Пречи́стая, благоволи́.

Ин

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко не́сть свят па́че Тебе́,// Еди́не Человеколю́бче.

Благи́х о́браз тебе́ дав твои́м ученико́м,/ и привле́кл еси́ мно́ги ду́ши во спасе́ние, отлучи́вшихся мирска́го пристра́стия,/ и́же утеше́ния улучи́ша ра́йскаго наслажде́ния.

Я́ко добропло́дная ма́слина в дому́ Бо́жии, блаже́нне, процве́л еси́,/ и еле́ем умаща́я ду́ши любо́вию тя пою́щих, преблаже́нне Се́ргие,/ и ве́рою Христу́ вопию́щих:/ не́сть свят па́че Тебе́, Человеколю́бче.

Стра́сти душетле́нныя успи́л еси́ бо́дренными бде́нии, блаже́нне,/ и сих ра́ди в черто́г Небе́сный всели́лся еси́,/ прие́м, богому́дре Се́ргие, благода́ть исцеле́ний.

Богоро́дичен: Херуви́мов и Серафи́мов превы́шши яви́лася еси́, Богоро́дице:/ Ты бо еди́на прия́ла еси́ невмести́маго Бо́га во чре́ве Твое́м, Нескве́рная./ Те́мже Тя, вси ве́рнии, пе́сньми, Чи́стая, ублажа́ем.

Ин

Ирмо́с: Еди́не ве́дый челове́ческаго существа́ не́мощь/ и ми́лостивно в не вообра́жься/, препоя́ши мя с высоты́ си́лою,/ е́же вопи́ти Тебе́, Святы́й:// одушевле́нный хра́ме неизрече́нныя сла́вы Твоея́, Человеколю́бче.

Тле́нную сла́ву презре́в, блаже́нне,/ нетле́нныя и Боже́ственныя сла́вы насле́дник бы́ти сподо́бился еси́,/ всю бо попра́в жития́ красоту́,/ со А́нгелы в Вы́шних Боже́ственныя сла́вы наслажда́ешися.

Ра́лом моли́твенным, преподо́бне, зе́млю се́рдца твоего́ обнови́в/ и сию́ насе́яв се́менем трудо́в твои́х,/ и яви́лся еси́ прекра́сная Сло́ва пшени́ца,/ и дости́гл еси́ незаходи́маго Све́та селе́ние.

Ду́ха Свята́го сия́ньми почте́н, и светоно́сным житие́м украси́лся еси́,/ тре́бующим подава́я неоску́дно/ и прие́мля с любо́вию мона́шествующих чи́ны, о́тче преподо́бне.

Богоро́дичен: Из Тебе́ прозябе́, Чи́стая, Цвет неувяда́емый,/ облагово́нствуя все челове́чество Боже́ственным ми́ром естества́ Своего́,/ И́же и Отцу́ Собезнача́льный, из Тебе́ бы́сть под ле́том, Де́во Всенепоро́чная.

Седа́лен, глас 4.

Подо́бен: Вознесы́йся на Крест:

Я́ко вои́стину тле́нных оста́вив нестоя́нное,/ Христу́ от души́ после́довав еси́,/ и боле́знми и труды́ и зе́льным воздержа́нием,/ я́ко беспло́тен пожи́в преблаже́нне Се́ргие:/ моли́ Христа́ Бо́га, спасти́ся душа́м на́шим. [Два́жды].

Сла́ва, и ны́не, Богоро́дичен: Херуви́мов и серафи́мов превы́шши еси́ Богоро́дице,/ Небесе́ же и земли́ простра́ннейши,/ ви́димыя тва́ри и неви́димыя яви́лася еси́ преиму́щи/ несосудными сосужде́нием:/ Его́же бо простра́нствия Небеса́ не вмещают,/ в Твое́й утро́бе вмести́ла еси́, Чи́стая,/ Его́же моли́, спасти́ся рабо́м твои́м.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т взыва́ющи,// от смы́сла чи́ста, о Го́споде пра́зднующи.

Пое́м, Пречи́стая, Тя, Всенепоро́чную, и́же Тобо́ю спа́сшиися,/ и, благоче́стно пою́ще, взыва́ем:/ благослове́нна, Я́же Бо́га, Присноде́во, ро́ждшая.

Свет незаходи́мый, Де́во, родила́ еси́,/ су́щим во тьме́ жития́ Пло́тию светя́щ, Всеблаже́нная,/ и пою́щим Тя ра́дость, Присноде́во, источи́ла еси́.

Благода́ть процвете́, Зако́н преста́ Тобо́ю, Всесвята́я:/ Ты бо, Чи́стая, родила́ еси́ Го́спода,/ подаю́щаго нам, Присноде́во, оставле́ние.

Ме́ртва мя показа́ са́да вкуше́ние,/ Жи́зни же Дре́во, из Тебе́ я́вльшееся, Пречи́стая, воскреси́/ и ра́йския сла́дости насле́дника мя устро́й.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Ду́ха Пресвятаго храм, о́тче, был еси́ и жи́зненных вод река́ исполня́ема,/ основа́ние непоколеби́мо Це́ркве, мона́шествующих утвержде́ние,/ Се́ргие досточу́дне.

Проро́чески сле́зными ка́плями на всяк день посте́лю омоча́я, Се́ргие сла́вне,/ до́ндеже до конца́ страсте́й пучи́ну изсуши́л еси́;/ те́мже па́мять твою́ почита́ем, присночестну́ю и свяще́нную.

Лице́ Христо́во лице́м, преподо́бне Се́ргие, зре́ти сподо́бился еси́,/ зерца́лом вои́стину разре́шшимся./ Сие́ бо и от ми́ра отлучи́ тя к возлю́бленному жела́нию.

Богоро́дичен: Очище́ние на́ших да́руй неве́дений, я́ко безгре́шен,/ и умири́ мир Твой, Бо́же, моли́твами Ро́ждшия Тя.

Ин

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му,// во спасе́ние на́ше и обновле́ние.

Просвеща́емь светолу́чными заря́ми, преблаже́нне,/ наслажде́ние Небе́сное прия́л еси́, ра́дуяся,/ я́ко вои́стину чисте́йший хлеб Творцу́ был еси́, му́дре Се́ргие, Ему́же взыва́я:/ си́ле Твое́й сла́ва, Человеколю́бче.

Стра́сти душетле́нныя преше́д и во глубину́ безмо́лвия вшед,/ пре́жде отреше́ния теле́снаго сою́за уме́ршее отроча́ возста́вил еси́/ и па́че наде́жди роди́телю его́ ра́дость сотвори́л еси́./ Тем, удиви́вся, Творцу́ вопия́л еси́:/ си́ле Твое́й сла́ва, Человеколю́бче.

Душе́вный ра́зум впери́в, сла́вне, и чу́вствия окорми́в, му́дре,/ святы́ню благоче́стия су́щим на земли́ возвести́л еси́ к Небе́сному ше́ствию.

Богоро́дичен: Ра́дость Тебе́, Чи́стая, яви́, с Небесе́ прише́д, Архистрати́г, благовести́, рек:/ Бог изы́дет Пло́тию из Тебе́, Де́во Пречи́стая, во спасе́ние любо́вию пою́щих Тя:/ сла́ва си́ле Твое́й, челове́ком Помо́щнице.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ И́стиннаго Бо́га,// от мра́ка грехо́внаго взыва́юща.

Чистото́ю воссия́вши све́тло,/ Боже́ственное пребыва́ние Влады́ки, Всепе́тая, была́ еси́:/ Ты бо еди́на Ма́ти Бо́жия яви́лася еси́,/ во объя́тиих, я́ко Младе́нца, Сего́ носи́вши.

Нося́щи добро́ту у́мную красне́йшия Твоея́ души́,/ Неве́ста Бо́жия была́ еси́,/ запеча́тствована де́вством, Чи́стая,/ и све́том чистоты́ мир просвеща́ющи.

Да рыда́ет собра́ние злочести́вых,/ не пропове́дающих Тя я́ве Чи́стую Богома́терь,/ Ты бо врата́ Боже́ственнаго Све́та яви́лася еси́ нам/, мрак прегреше́ний разгоня́ющи.

Ин

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х// пути́ моя́ напра́ви, молю́ся.

В поще́ниих непрекло́нен пребы́л еси́, му́дре,/ и до отше́ствия своего́ храня́ сие́ опа́сно,/ и́мже сподо́бился еси́ я́ве нетле́ннаго блаже́нства.

Остр ум име́я к Бо́гу внима́ти, страсти душетле́нныя успи́л еси́, о́тче,/ и снопы́ благопло́дия пожа́л еси́,/ пита́я благоче́стно восхваля́ющия тя, преподо́бне о́тче Се́ргие.

Све́тло житие́ твое́, преподо́бне Се́ргие, и изве́стно всем конце́м яви́ся,/ и боже́ственныя добро́ты испо́лнено,/ моли́твами же, и поще́ньми, и любо́вию, я́же ко Христу́ Человеколю́бцу.

Богоро́дичен: Тя сте́ну иму́ще и заступле́нием Твои́м соблюда́ема,/ Твое́ю боже́ственною сла́вою хва́лящеся, Тя ублажа́ем./ Ты бо, Пречи́стая, душа́м на́шим источа́еши весе́лие и ра́дование.

Ин

Ирмо́с: Бог сый ми́ра, Оте́ц щедро́т,/ Вели́каго Сове́та Твоего́ А́нгела,/ мир подава́юща, посла́л еси́ нам;/ тем богоразу́мия к све́ту наста́вльшеся,/ от но́щи у́тренююще,// славосло́вим Тя, Человеколю́бче.

Обветша́вшаго челове́ка я́ве, о́тче, совле́клся еси́,/ и, я́ко скве́рну ри́зу, отве́рг с грехо́вными страстьми́,/ в новаго обле́клся еси́, е́же по подо́бию о Христе́, всече́стне.

Стра́стныя у́зы расто́рг высо́ким твои́м равноа́нгельным житие́м/ и свы́ше прии́м чудоде́йствия дарова́ние,/ согреше́ний на́ших очище́ние, Се́ргие, испроси́.

Богоро́дичен: Кля́тву Евы, всех прама́тере, Твои́м рождество́м, Де́во, упраздни́ла еси́,/ ми́ру благослове́ние возсия́вши Христа́./ Те́мже Тя, ра́дующеся, язы́ком и се́рдцем Богоро́дицу и́стинно испове́дающе, велича́ем.

Песнь 6

Ирмо́с: Жите́йское мо́ре/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,// Многоми́лостиве.

Вели́кий преднаписа́ во проро́цех Моисе́й Тя ковче́г,/ и трапе́зу, и све́щник, и ста́мну, обра́зно назна́менуя/ воплоще́ние, е́же из Тебе́, Высоча́йшаго, Ма́ти Де́во.

Умерщвля́ется смерть, упраждня́ется и тле́ние Ада́мова осужде́ния,/ Плоду́ Твоему́, о Влады́чице, прирази́вшееся:/ Жизнь бо родила́ еси́, от тли избавля́ющую пою́щия Тя.

Зако́н изнемо́же, и пре́йде сень,/ па́че бо ума́ и по́мысла яви́вшейся мне благода́ти, я́же из Тебе́, Де́во,/ Рождество́м Бо́га и Спа́са, Многопе́тая.

Ин

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́.

Па́мять твою́ творя́щим свяще́нную, о́тче,/ не преста́й, моля́ Изба́вителя дарова́ти согреше́ний оставле́ние/ и Небе́сное Ца́рство восприя́ти, иде́же глас пра́зднующих весели́т вся.

О Христе́ укрепля́емь,/ вся кова́рствия лука́ваго тве́рдым умо́м, Се́ргие,/ я́коже сеть, расто́ргнул еси́/ и пресве́тло свети́ло ми́ру, о́тче, показа́лся еси́.

Све́том Боже́ственным осия́емь/ и со А́нгелы ны́не на Небесе́х водвори́лся,/ помина́й ве́рою чту́щих па́мять твою́,/ преподо́бне Се́ргие приснопа́мятне.

Богоро́дичен: Возвы́сила еси́ вои́стину па́дшее челове́ческое существо́,/ я́же о́бразом Боже́ственным и Отца́ ра́венством,/ ви́димым Сы́ном неизме́нным, Богома́ти,/ без Се́мене во чре́ве поноси́вши.

Ин

Ирмо́с: Из утро́бы Ио́ну младе́нца изблева́ морски́й зверь,/ якова́ прия́т;/ в Де́ву же все́льшееся Сло́во/ и Плоть прие́мшее про́йде, сохра́ншее нетле́нну:/ Его́же бо не пострада́ нетле́ния,// Ро́ждшую сохрани́ неврежде́нну.

Нас свы́ше, ста́до твое́, озаря́еши ми́лостивно, о́тче,/ во́инству благочести́вому побе́ду подая́ моли́твами твои́ми, возвыша́я рог правосла́вных,/ от нас же приими́, а́ще и ма́лое, приноси́мое тебе́ моле́ние.

На неду́зех разли́чных исцеле́ния благода́ть тебе́ дарова́ся/ и на ду́сех нечи́стых от Христа́ власть, му́дре,/ я́ко боже́ственный до́блественник, вене́ц прия́л еси́ побе́ды от всех Ца́рствующаго.

Богоро́дичен: Весь лик проро́ческий, от Бо́га науче́н, Твое́ провозгласи́ та́инство/ несказа́ннаго Боже́ственнаго зача́тия е́же из Тебе́ Сло́ва, Ма́ти Де́во:/ Ты бо И́стинный нача́льный Свет родила́ еси́.

Конда́к, глас 8.

Подо́бен: Избра́нной Воево́де:

Христо́вою любо́вию уязви́вся, преподо́бне,/ и Тому́ невозвра́тным жела́нием после́довав,/ вся́кое наслажде́ние плотско́е возненави́дел еси́/ и, я́ко со́лнце, Оте́честву твоему́ возсия́л еси́;/ тем и Христо́с да́ром чуде́с обогати́ тя./ Помина́й нас, чту́щих пресве́тлую па́мять твою́, да зове́м ти:// ра́дуйся, Се́ргие богому́дре.

И́кос:

Ева́нгельский глас, о́тче, услы́шав,/ вся оста́вил еси́ плотска́я мудрова́ния,/ бога́тство же и сла́ву, я́ко прах, вмени́в,/ и на стра́сти, я́ко беспло́тен, подвиза́вся,/ и безпло́тных ликостоя́нием че́сти сподо́бился еси́./ Ра́зума дарова́ние прия́л еси́,/ е́же и пода́ждь в пе́снех пою́щим ти си́це:/ Ра́дуйся, Се́ргие преподо́бне и богоно́се, Небе́сный челове́че, земны́й А́нгеле./ Ра́дуйся, Ду́ха Святаго оби́тель./ Ра́дуйся, моли́твами богода́нен дар прие́мый./ Ра́дуйся, я́ко пре́жде рожде́ния проглаше́нием просла́вив Святу́ю Тро́ицу, Яже тя просла́ви в жи́зни сей и по сме́рти./ Ра́дуйся, целому́дрия сто́лпе, и́мже вся́ка страсть попра́ся./ Ра́дуйся, я́ко от млады́х ногте́й после́дствовал еси́ Христу́./ Ра́дуйся, притека́ющим к тебе́ спасе́ния хода́тай./ Ра́дуйся, свети́льниче многосве́тлый, возведы́й ко Христу́ мона́хов мно́жества./ Ра́дуйся, похвала́ Оте́честву твоему́./ Ра́дуйся, проро́чеством укра́шенный, во е́же прорица́ти, я́ко настоя́щая, бу́дущая./ Ра́дуйся, я́ко моли́твами твои́ми сопроти́внии побежда́ются./ Ра́дуйся, правосла́вному во́инству на́шему похвала́ и утвержде́ние,/ его́же соблюди́ моли́твами твои́ми от враг ненаве́тно, да зове́м ти:/ ра́дуйся, Се́ргие богому́дре.

Акафист первый: Кондаки и икосы похвальныя, преподобному и Богоносному отцу нашему Сергию, игумену Радонежскому чудотворцу

Конда́к 1

Возбра́нный воево́до во́инов духо́вных, под зна́мением Креста́ во́инствующих на неви́димаго врага́, Се́ргие чудотво́рче: я́ко изба́вльшеся от бед твои́ми победоно́сными предста́тельствы, в бра́ни жития́ сего́, похва́льная воспису́ем тебе́ в хвале́ небе́сней торжеству́ющему добропобе́дно: ты же я́ко име́я дерзнове́ние к Непобеди́мому Царю́, посо́бствуй хода́тайственно всем ве́рно призыва́ющим тя, да́руя побе́ду на ви́димых и неви́димых врагов, да зове́м ти:

Ра́дуйся, преподо́бне чудотво́рче Се́ргие, о́тче наш.

И́кос 1

А́нгелов Творе́ц в Тро́ице Бог, сла́вимый от тро́йственных священнонача́лий а́нгельских трисвяты́ми гла́сы, избра́ тя, преподо́бне Се́ргие, во равноа́нгельное священнослуже́ние Себе́ еще́ от утро́бы ма́терни, в нейже трикра́ты во вре́мя Святы́я Литурги́и пачеесте́ственно возгласи́л еси́. Тем я́ко подобноа́нгельскому служи́телю Святы́я Тро́ицы, в ра́дости неизрече́нной со А́нгелы водворя́ющемуся, ра́достная приглаша́ем тебе́ си́це:

Ра́дуйся, от чре́ва ма́терня освяще́нный.

Ра́дуйся, в рожде́нии твое́м Варфоломе́ем, си́речь сыном ра́дости нарече́нный.

Ра́дуйся, безпло́тных священнонача́льствию а́нгельским во пло́ти житие́м твои́м подража́вый.

Ра́дуйся, о́гненную в се́рдце твое́м к Бо́гу любо́вь серафи́мски стяжа́вый.

Ра́дуйся, херуви́мски просвеще́нный зна́нием о Бо́зе.

Ра́дуйся, Престо́лу Его́ предста́вый в дерзнове́нии мно́зе.

Ра́дуйся, госпо́дствию ду́ха плоть свою́ покори́вый.

Ра́дуйся, си́лу дарова́ния в чудесе́х яви́вый.

Ра́дуйся, име́яй власть проти́вныя вла́сти тмы побежда́ти.

Ра́дуйся, нача́льствующих наста́вивый богоуго́дно управля́ти.

Ра́дуйся, арха́нгельски Бо́жия дела́ возвеща́яй.

Ра́дуйся, всех прибега́ющих к тебе́ от бед а́нгельски сохраня́яй.

Ра́дуйся, преподо́бне чудотво́рче Се́ргие, о́тче наш.

Конда́к 2

Ви́дяще стра́нное твое́ воздержа́ние, великочуде́сне Се́ргие, я́ко от дне рожде́ния не ссал еси́ в сре́ду и пято́к, и никако́ва же вкуша́л еси́ млека́: отсю́ду позна́хом тя, от сосе́ц ма́терних, чудотво́рца и по́стника су́ща. Сего́ ра́ди Бо́га из уст младе́нец и ссу́щих хвалу́ соверша́ющаго похваля́юще, зове́м: Аллилу́иа.

И́кос 2

Ра́зум безчи́сленный подава́я лю́дем Бог ра́зумов Госпо́дь, отве́рзе тебе́ ум разуме́ти писа́ния, Се́ргие преподо́бне, пре́жде ко́сну и неудо́бну ко изуче́нию кни́жныя прему́дрости бы́вшу, да яви́тся, я́ко не от челове́к, но и от Бо́га прия́л еси́ ра́зум кни́жный: о не́мже обра́дованный от я́вльшагося тебе́ во о́бразе и́ночестем А́нгела, приими́ от нас ра́достное пе́ние сие́:

Ра́дуйся, изучи́вый во пе́рвых че́сти сло́во, е́же в нача́ле бе у Бо́га.

Ра́дуйся, обреты́й в нем сокро́вище прему́дрости и ра́зума мно́га.

Ра́дуйся, на хартии́ телесе́ Христо́ва, а́ки пять слове́с, пять язв больши́х прочита́вый.

Ра́дуйся, в Писа́нии том живо́т ве́чный испыта́вый.

Ра́дуйся, ум твой к Небеси́ чте́нием книг боже́ственных воспери́вый.

Ра́дуйся, во творе́нии руку́ Его́ себе́ поучи́вый.

Ра́дуйся, навы́кнувый храни́ти страх Бо́жий прему́дрости нача́ло.

Ра́дуйся, всем соуча́щимся к тебе́ бы́вый доброде́тели зерца́ло.

Ра́дуйся, на скрижа́ли се́рдца своего́ Зако́н Бо́жий написа́вый.

Ра́дуйся, уче́ние сие́ всем послу́шающим тя преда́вый.

Ра́дуйся, ю́ность твою́ в целому́дрии обучи́вый.

Ра́дуйся, я́ко де́ву чи́сту Жениху́ Христу́ себе́ обручи́вый.

Ра́дуйся, преподо́бне чудотво́рче Се́ргие, о́тче наш.

Конда́к 3

Си́ла Вы́шняго осени́, преподо́бне, непоро́чную твою́ ду́шу, в нейже страх Бо́жий заче́нши, и поболе́вши мно́гими труды́, разли́чная искуше́ния и ско́рби му́жественно претерпе́вши, родила́ еси́ дух спасе́ния, пою́щи всеси́льному Бо́гу: Аллилу́иа.

И́кос 3

Имы́й помышле́ние таково́е в себе́, преподо́бне Се́ргие, по сме́рти роди́телей свои́х, я́ко вся́ко умре́ти и́мать, благоразу́мно рассуди́в кра́ткость сея́ жи́зни, разда́л еси́ вся оста́вльшая име́ния ни́щим, ничто́же на пропита́ние себе́ оставля́я, ны́не у́бо в присносу́щных бога́тствах бессме́ртныя насыща́яся сла́вы, слы́шиши от нас такова́я:

Ра́дуйся, любве́ ра́ди Зижди́теля своего́ земна́я к земли́ возврати́вый.

Ра́дуйся, приобре́тения ра́ди Христо́ва, уме́ты вся бы́ти вмени́вый.

Ра́дуйся, отве́ргий бога́тство, я́ко те́рние подавля́ющее се́мена духо́вна.

Ра́дуйся, возненави́девый то, я́ко вещество́ пла́мене грехо́вна.

Ра́дуйся, блаже́нство нищеты́ духо́вныя сподо́бльшийся прия́ти.

Ра́дуйся, восхоте́вый нище́тне вни́ти в Небе́сное Ца́рствие у́зкими враты́, и в простра́нстве ста́ти.

Ра́дуйся, и́го Христо́во благо́е и бре́мя ле́гкое понесы́й измла́да.

Ра́дуйся, не обрати́выйся вспять в ше́ствии до Го́рняго гра́да.

Ра́дуйся, пре́жде кончи́ны твоея́ во умерщвле́ние страсте́й облече́нный.

Ра́дуйся, во умерщвле́нном телеси́ нетле́ния ри́зою украше́нный.

Ра́дуйся, бога́тства неги́блющаго в животе́ ве́чнем облада́телю.

Ра́дуйся, непостижи́мыя сла́вы святы́х созерца́телю.

Ра́дуйся, преподо́бне чудотво́рче Се́ргие, о́тче наш.

Конда́к 4

Бу́ря безме́рная лука́вых духо́в, многоразли́чне тща́шеся препя́ти твоему́, преподо́бне Се́ргие, трудолю́бному житию́: овогда́ бо в зве́ри и зми́и преобразова́хуся, овогда́ же я́ко не́кое во́инство со я́ростью устремля́хуся на тя свире́по: ты же му́жественно моли́твою себе́ вооружа́я, прогна́л еси́ вся их бесо́вская по́лчища, не убоя́вся ко́зней их, зовы́й Бо́гу: Аллилу́иа.

И́кос 4

Слы́шаще твое́ терпеливоду́шное в безмо́лвии житие́, преблаже́нне, мно́зи от окре́стных градо́в и стран стека́хуся к тебе́ по́льзы ра́ди, ини́и же хотя́ще с тобо́ю жи́ти и наставля́тися от тебе́ на путь спасе́ния: и́хже любе́зно прие́мля, созда́л еси́ к моле́нию це́рковь во и́мя Пресвяты́я Тро́ицы, устроева́я наипа́че самого́ себе́ в жили́ще досто́йно Еди́ному в Тро́ице Бо́гу. Сего́ ра́ди похваля́ем тя, глаго́люще:

Ра́дуйся, трича́стное души́ твоея́ к Бо́гу Триипоста́сному впери́вый.

Ра́дуйся, Бо́га Отца́ ве́тхаго де́нми воспомина́нием дре́вних благодея́ний Бо́жиих в па́мяти твое́й носи́вый.

Ра́дуйся, я́ко му́дрость Сы́на, прему́дре о нас смотре́ние соверши́вшаго, в ра́зуме твое́м сия́ше.

Ра́дуйся, я́ко благода́ть Бо́га Ду́ха Свята́го в во́ли твое́й благи́х хоте́вшей обита́ше.

Ра́дуйся, три изря́дныя доброде́тели и́ночества твоего́ же́ртвовавый Тро́ице неле́стно.

Ра́дуйся, отда́вый послуша́ние Бо́гу Отцу́, Ему́же Сын послушли́в бе да́же до сме́рти кре́стной.

Ра́дуйся, нищету́ твою́ Бо́гу Сы́ну обнища́вшему нас ра́ди, в пло́ти твое́й яви́вый смире́нно.

Ра́дуйся, чистоту́ свою́ Свято́му Ду́ху, в чи́стых сердца́х живу́щему, сохрани́вый нетле́нно.

Ра́дуйся, с доброде́тельными твои́ми плоды́ возложи́вый на Бо́га Отца́ ве́ру всеце́лу.

Ра́дуйся, окрила́тевый я́ко оре́л, наде́ждею на Бо́га Сы́на, собира́ющаго нас ко Своему́ Те́лу.

Ра́дуйся, Бо́га Ду́ха Свята́го, во о́гненных соше́дшаго язы́цех, о́гненною любо́вию возлюби́вый.

Ра́дуйся, и́хже о́ко не ви́де, и у́хо не слы́ша, и на се́рдце челове́ку не взыдо́ша, сия́ от Тро́ицы получи́вый.

Ра́дуйся, преподо́бне чудотво́рче Се́ргие, о́тче наш.

Конда́к 5

Богото́чный исто́чник пресве́тлых чуде́с яви́лся еси́, сла́вне Се́ргие, излива́я благоуго́дных вод струи́, стремле́нием свои́м веселя́щия град Бо́жий, оби́тель Пресвяты́я Тро́ицы, па́че же и лице́ всея́ земли́ напая́ющия оби́льно: отону́ду же всяк с ве́рою почерпа́я, мно́гая исцеле́ния прие́млет, просла́вльшему тя Бо́гу благода́рственно зовы́й: Аллилу́иа.

И́кос 5

Ви́девше Росси́йстии сы́нове пречу́дное по Бо́зе житие́ твое́, Се́ргие преподо́бне, я́ко и а́ще последи́ ле́ты в новопросвеще́нной стране́ Росси́йстей возра́сл еси́, но дре́вних преподо́бных оте́ц че́сти сподо́бился еси́, дарова́ния чуде́с досто́йно прие́м от Бо́га, того́ ра́ди научи́шася пе́ти тебе́:

Ра́дуйся, Анто́нию Вели́кому равнострада́льне в терпе́нии бесо́вских возста́ний.

Ра́дуйся, Феодо́сию общежи́тельства нача́льнику подобонра́вне, в хране́нии общежи́тельных преда́ний.

Ра́дуйся, Са́вве Освяще́нному во мно́жественном числе́ ученико́в счи́сленный.

Ра́дуйся, Арсе́нию му́жества и́мя нося́щему, в духо́вном му́жестве сравне́нный.

Ра́дуйся, со Иоа́нном Ле́ствичником восхожде́ние в се́рдце свое́м к Небеси́ положи́вый.

Ра́дуйся, с Мака́рием блаже́нство в нетле́нном твое́м телеси́ получи́вый.

Ра́дуйся, Ону́фрию Вели́кому подража́вый житие́м в пусты́ни.

Ра́дуйся, Паи́сию Вели́кому после́довавый во вся́кой святы́ни.

Ра́дуйся, Симео́на Сто́лпника приме́ром высо́кий столп доброде́телей созда́вый.

Ра́дуйся, Па́вла Препро́стаго се́рдца незло́бие во всем житии́ свое́м показа́вый.

Ра́дуйся, Афана́сию безсме́ртия уча́стниче, не и́менем, но дела́ми.

Ра́дуйся, с Евфи́мием благоду́шным в бесконе́чныя весе́лия возше́дый его́же стопа́ми.

Ра́дуйся, преподо́бне чудотво́рче Се́ргие, о́тче наш.

Конда́к 6

Пропове́дует Росси́йский род пресла́вная и неисче́тная твоя́ чудеса́, изрядносла́вне чудотво́рче Се́ргие: коль мно́зи от духо́в нечи́стых избавлени тобо́ю бы́ша, коль мно́зи от разли́чных неду́гов, бед и напа́стей твои́ми спасо́шася моли́твами. Ты бо еси́ кре́пкий во бра́нех су́щим помо́щник, боля́щим врачь, оби́димым засту́пник: ты всем вся моги́й о чудоде́йствующем тобо́ю Христе́, да всех научи́ши пе́ти: Аллилу́иа.

И́кос 6

Воссия́ па́че со́лнца воздержа́ние твое́, преподо́бный: егда́ не пеки́йся о бра́шне, е́же не поста́вит нас пред Бо́гом, ску́дости ра́ди в монастыре́ твое́м, без пи́щи три дни пребы́вшу бра́тию и во мра́це ско́рби су́щую, озари́л еси́ луча́ми благода́рственнаго терпе́ния, и́стиннаго воздержа́ния и несомне́ннаго упова́ния на Бо́га: от Него́же а́бие оби́льство всех благ твои́ми моли́твами получи́вше, воспе́ша тебе́ си́це:

Ра́дуйся, преподо́бнейший а́лчущих пита́телю.

Ра́дуйся, и духо́внаго насыще́ния тре́бующим пода́телю.

Ра́дуйся, алка́вый и жа́ждавый пра́вды, насыща́яйся же ны́не.

Ра́дуйся, посажде́нный на трапе́зе небе́сней в по́стническом чи́не.

Ра́дуйся, отложи́вый о тле́нной пи́щи попече́ние безме́стно.

Ра́дуйся, испо́лнивый оби́тель свою́ бра́шны принесе́нными безве́стно.

Ра́дуйся, бла́гостию Бо́жиею, а не то́кмо бра́шны, сердца́ на́ша утвержда́яй.

Ра́дуйся, глаго́лом, исходя́щим из уст Бо́жиих па́че, не́же хле́бом, насыща́яй.

Ра́дуйся, бра́шно де́лавый пребыва́ющее в живо́т ве́чный, а не бра́шно теле́сно.

Ра́дуйся, в кре́пости я́ди тоя́ ше́ствовавый да́же до Горы́ Небе́сныя.

Ра́дуйся, побежда́яй враги́ на́ша моли́твами твои́ми, я́ко хле́бом ви́денным у Гедео́на.

Ра́дуйся, вкуша́яй хле́ба а́нгельскаго во дво́рех вы́шняго Сио́на.

Ра́дуйся, преподо́бне чудотво́рче Се́ргие, о́тче наш.

Конда́к 7

Хотя́щу преблаже́нному Алекси́ю, Всеросси́йскому па́стырю, от ны́нешняго ве́ка преле́стнаго преста́витися, призва́н был еси́ богоно́сне Се́ргие, да прии́меши по нем сан святи́тельства, обруче́ннаго тебе́ от него́ возложе́нием креста́ архиере́йскаго, зла́том и ка́мением украше́ннаго: ты же смиренному́дрия люби́теля, не златоно́сца себе́ явля́я, и толи́каго са́на недосто́йна бы́ти вмени́в, смиренному́дренно при кресте́ и́ноческаго терпе́ния твоего́, судьбы́ Госпо́дни вожделе́нныя па́че зла́та и ка́мене че́стна храни́ти восхоте́л еси́, зовы́й Бо́гу: Аллилу́иа.

И́кос 7

Но́вое не́бо от высоты́ жития́ твоего́ разумева́ем тя, о́тче, дея́нием и виде́нием, а́ки двема́ заве́сома утвержде́на, неисче́тными же чудесы́ я́ко зве́здами блиста́юща. Тебе́ кра́сная я́ко луна́ Богоро́дица, со святы́ми апо́столы Петро́м и Иоа́нном, а́ки со заре́ю вече́рнею и денни́цею у́треннею, посеща́ше. Чрез зна́мения у́бо доброде́телей твои́х, пра́вды со́лнце мы́сленное Христо́с Госпо́дь, тече́ние Свое́ творя́, просвеща́ет всех зову́щих ти си́це:

Ра́дуйся, во ю́ности посвяти́вый в же́ртву прия́тну Бо́гови, я́ко юнца́, себе́ самаго́.

Ра́дуйся, сохрани́вый невре́дно целому́дрие де́вства драга́го.

Ра́дуйся, прехожде́нием свои́м в пусты́нях мно́гия оби́тели насади́вый.

Ра́дуйся, чудото́чных вод, от Бо́га умоле́нием, че́рплющих всех наслади́вый.

Ра́дуйся, возмоги́й рыка́ющаго диа́вола, я́ко льва му́жественно победи́ти.

Ра́дуйся, с се́ю побе́дою удосто́ивыйся во врата́ сла́вы торже́ственно вни́ти.

Ра́дуйся, навы́кнувый кро́тости от А́гнца, взе́млющаго вся зла́я.

Ра́дуйся, я́ко за соблюде́ние пра́вды получи́л еси́ ве́чная блага́я.

Ра́дуйся, щито́м ве́ры угаси́вый вся разжже́нная лука́ваго стре́лы.

Ра́дуйся, сокруши́вый седмь глав зло́бы а́дскаго зми́я, седмь грехо́в сме́ртных проти́вными благи́ми де́лы.

Ра́дуйся, совоку́плену име́яй любо́вь к Бо́гу и бли́жним.

Ра́дуйся, источа́яй от ра́ки своея́ цельбы́ в по́льзу нам ни́жним.

Ра́дуйся, преподо́бне чудотво́рче Се́ргие, о́тче наш.

Конда́к 8

Стра́нное и ужа́сное виде́ние ви́де Моисе́й Богови́дец, я́ко купина́ горя́щи, и не сгара́ше: ужа́снаго сподо́бися виде́ния и учени́к твой Си́мон, егда́ служа́щу ти Боже́ственную Литурги́ю, ви́де невеще́ственный огнь, осеня́ющь алта́рь и окружа́ющь свяще́нную трапе́зу: тебе́ же, преподо́бне Се́ргие, от главы́ до ногу́ во огни́ стоя́щу, и тем соше́дшим, а́ки плащани́ца, во Святу́ю Ча́шу, небе́сным прича́щшагося огне́м, Бог бо наш огнь есть пояда́яй: оба́че тя не опали́, но па́че просвети́, во е́же пе́ти: Аллилу́иа.

И́кос 8

Весь род Росси́йский, воеди́но совоку́пленный, не возмо́жет благода́рственнаго возда́ти похвале́ния предста́тельству твоему́, достохва́льне Се́ргие: не то́чию бо близ притека́ющих к цельбоно́сному твоему́ гро́бу, но и дале́че отстоя́щих, и призыва́ющих всечестно́е твое́ и́мя, те́плым твои́м предста́тельством защища́еши и храни́ши от вся́каго зла. Ели́ко у́бо возмо́жно благода́рствующе похваля́ем тя таковы́ми гла́сы:

Ра́дуйся, служи́телю Бо́жий о ве́рных умоля́яй.

Ра́дуйся, наста́вниче гре́шных к Небеси́ направля́яй.

Ра́дуйся, души́ бе́дствующия и те́ла многомо́щный храни́телю.

Ра́дуйся, оскорбля́емым те́плый покрови́телю.

Ра́дуйся, предводи́телю до́брый в путь спасе́ния теку́щим.

Ра́дуйся, защи́тителю до́брый во бра́ни ми́ра су́щим.

Ра́дуйся, цели́телю изя́щный боле́зни душе́вной и теле́сной.

Ра́дуйся, просвети́телю чу́дный обою́ тмы очесно́й.

Ра́дуйся, посети́телю ско́рый в не́мощи лежа́щим.

Ра́дуйся, уте́шителю му́дрый в беда́х слезя́щим.

Ра́дуйся, пособи́телю кре́пкий во́ем христиа́нским.

Ра́дуйся, прогони́телю стра́шный по́лчищем пога́нским.

Ра́дуйся, преподо́бне чудотво́рче Се́ргие, о́тче наш.

Конда́к 9

Вся́кую стяжа́л еси́ чудоде́йствия си́лу, благода́тию ди́внаго во святы́х Свои́х Бо́га, всебога́те Се́ргие: не то́кмо бе́сы от челове́к ды́мом моли́тв твои́х прогна́л еси́, я́ко Рафаи́л; прокаже́нныя очи́стил еси́, в пролия́нии пред Бо́гом слез, я́ко во Иорда́не Елисе́й; плене́нныя от ва́рвар, ско́ро предвари́в освободи́л еси́, я́ко Никола́й Чу́дный; уме́ршаго же о́трока воскреси́в, животворя́щему ме́ртвыя, и зову́щему не су́щая, я́ко су́щая, Бо́гу, о всех пресла́вных твои́х чудотворе́ниих созыва́л еси́ всех воспе́ти: Аллилу́иа.

И́кос 9

Вити́я суему́дренныя отсту́пническия обличи́л еси́, предста́в во сне пресви́теру Симео́ну, не ниспа́дшему в злоче́стие тщесо́вестное и по преставле́нии твое́м отве́рженное от тебе́: те́мже вси и́стинная Восто́чныя Святы́я Це́ркве ча́да иму́ще тя столпа́ церко́внаго в ве́ре непоколеби́ма, ублажа́ют си́це:

Ра́дуйся, злосла́вное отсту́пническое любому́дрие укори́вый.

Ра́дуйся, правове́рных благоче́стие уясни́вый.

Ра́дуйся, и́стинныя прему́дрости содержа́вый догма́ты.

Ра́дуйся, научи́вый не пре́нием, но ве́рою возмога́ти.

Ра́дуйся, обличи́вый отступле́ние ве́ры, я́ко всем злым вино́вно.

Ра́дуйся, правове́рных в преда́нии святы́х оте́ц утверди́вый богосло́вно.

Ра́дуйся, не благоволи́вый в злове́рных многоглаго́ланию вре́дному.

Ра́дуйся, упраздни́вый тех великому́дрствие о благоре́чии тще́тном.

Ра́дуйся, не вне́шними словесы́, но Бо́жиим свиде́тельством вооруже́нный.

Ра́дуйся, на ка́мени краеуго́льном Христе́, неподви́жимою ве́рою утвержде́нный.

Ра́дуйся, благоче́стно тече́ние сконча́вый, и ве́ру соблюды́й нескве́рну.

Ра́дуйся, в венце́ пра́вды предста́вый Све́ту невече́рню.

Ра́дуйся, преподо́бне чудотво́рче Се́ргие, о́тче наш.

Конда́к 10

Спасе́ния ра́ди хотя́щему ученику́ твоему́ Исаа́кию молчали́вое храни́ти житие́, и прося́щему на се у тебе́ благослове́ния, повеле́л еси́ приити́ во вре́мя Боже́ственныя Литурги́и ко алтарю́, иде́же егда́ благословля́л еси́ его́, ви́де он а́ки не́кий вели́к пла́мень изше́д от руку́ твое́ю, чудотво́рче, и прикосну́вшийся ему́, я́ко клеще́ю огнь от алтаря́ взе́мшею, благословя́щею твое́ю руко́ю: се же бысть ему́ к потребле́нию неключи́маго праздносло́вия, к утвержде́нию же в бесстра́стном молча́нии с Серафи́мы пе́ти Бо́гу: Аллилу́иа.

И́кос 10

Стена́ вели́ка и высо́ка, иму́щая основа́ний двана́десять неподви́жимых догма́т Правосла́вныя на́шея ве́ры, ты еси́, адамантоду́шне Се́ргие, остеня́я велеле́потне пречестну́ю свою́ оби́тель, а́ки град вели́кий святой Иерусали́м, низше́дый ро́ссом с Небесе́, от Бо́га иму́щь сла́ву Бо́жию в чудесе́х твои́х, и украше́ние вся́ким драги́м ка́мением многоце́нных твои́х моли́тв, и́миже остеня́еши всех зову́щих ти си́це:

Ра́дуйся, преподо́бне, я́ко иа́спис пресве́тлейший, во всей подсо́лнечной сия́яй чуде́сно.

Ра́дуйся, я́ко сапфи́р невообра́зный, блиста́яй нам житие́ поднебе́сно.

Ра́дуйся, я́ко халкидо́н углеви́дный, огне́м любве́ Бо́жия разжже́нный.

Ра́дуйся, я́ко смара́гд зелене́ющий, присновесе́нним венце́м увя́зенный.

Ра́дуйся, я́ко сардо́никс, но́гтя нечу́вственнаго цвет имы́й, умерщвле́ние страсте́й подава́яй.

Ра́дуйся, я́ко са́рдий, я́звы от желе́за целя́щий уя́звленных на бра́ни, ве́рных чудотво́рне исцеля́яй.

Ра́дуйся, я́ко хрисоли́ф златосветя́щий, многоце́нными доброде́тельми блиста́яй.

Ра́дуйся, я́ко вири́лл, нося́й морски́й вид, пла́вающих в мо́ри безбе́дно управля́яй.

Ра́дуйся, я́ко топа́зий цельбоно́сный, исцеля́яй слепоту́ душе́вную и теле́сную.

Ра́дуйся, я́ко хрисопра́с надзлатоя́снейший, получи́вый добро́ту небе́сну.

Ра́дуйся, я́ко яки́нф воздухови́дный, на возду́се восхище́н бы́ти гото́в во сре́тение Госпо́дне.

Ра́дуйся, я́ко амефи́ст огнесве́тлый, пожига́яй бесо́в мно́жество преиспо́дне.

Ра́дуйся, преподо́бне чудотво́рче Се́ргие, о́тче наш.

Конда́к 11

Пе́ние вся́кое побежда́ется, звездочи́сленными твои́ми труды́, всеблаже́нне Се́ргие: кто бо от земноро́дных просла́вит жесто́кое твое́ житие́; кто возвели́чит свяще́нныя по́двиги твоя́; безмо́лвие соверше́нное, смире́ние нелицеме́рное, пост протяже́нный, моли́тву непреста́нную, чистоту́ по вну́треннему и вне́шнему челове́ку; за ня́же сподо́бился еси́ со все́ми без поро́ка после́дующими А́гнцу, и благоуго́дне подвиза́вшимися, пе́ти: Аллилу́иа.

И́кос 11

Светоза́рным све́том блиста́ет оби́тель твоя́, всесве́тлый чудотво́рче, изне́сши от зема́го покрове́ния сия́ющия чудеса́ми нетле́нныя мо́щи твоя́, и поста́вльши их я́ко свети́льник на ме́сте досто́йне, да испо́лнится рече́ние Госпо́дне: «Не вжига́ют свети́лника, и под спу́дом не полага́ют, но на све́щник поставля́ют, да входя́щии ви́дят». Темже вси в хра́ме твое́м, и везде́ тобо́ю просвеща́еми, дерза́ем глаго́лати тебе́:

Ра́дуйся, све́щниче трича́стный, треми́ светле́йшими богосло́вскими доброде́тельми светя́щий.

Ра́дуйся, свети́лниче дво́йственный, любо́вию ко Бо́гу и бли́жнему горя́щий.

Ра́дуйся, его́же сугубоесте́ственный Архиере́й, проше́дый небеса́, в служе́ние Свое́ небе́сное поста́ви.

Ра́дуйся, его́же стоя́й посреде́ седми́ свети́лник, я́ко еди́наго от тех Себе́ предста́ви.

Ра́дуйся, свети́лниче, дара́ми Ду́ха Свята́го седмоосвяще́нный, я́ко ви́денный Заха́риею проро́ком.

Ра́дуйся, во свете́ние чуде́сное поста́вленный в Росси́и на ме́сте высо́ком.

Ра́дуйся, свети́лниче превознесе́ннейший, па́че све́та освеща́ющий пла́вающих в мо́ри.

Ра́дуйся, свете́нием твои́м наставля́яй препла́вати от ми́ра к Небеси́ вско́ре.

Ра́дуйся, свети́лниче мы́сленный, светя́щий святы́нею, па́че поста́вленнаго Соломо́ном, во Святы́х Свята́я.

Ра́дуйся, блиста́нием чуде́с твои́х во вся концы́ земли́ сия́я.

Ра́дуйся, уме́рый ми́ру, жив же Бо́гови, ме́ртвому о́троку дарова́вый жи́ти.

Ра́дуйся, живы́й во ве́ки со Христо́м, с Ни́мже и нам моли́ бы́ти.

Ра́дуйся, преподо́бне чудотво́рче Се́ргие, о́тче наш.

Конда́к 12

Благода́ть Бо́жию исповедав дре́вле Маккаве́й, егда́ гряду́щу ему́ с во́инством на супоста́ты, яви́ся предводя́й их ко́нник в оде́жде бе́ле, укрепля́я тех и му́жественны творя́. Ра́вное воссыла́ет благода́рствие пресла́вная оби́тель чудотво́рца Се́ргиа, от облежа́щих ю враго́в изба́вленная, явле́нием преподо́бнаго ста́рца е́здяща, и иму́ща в ру́це свое́й мечь обнаже́н: его́же по́мощию хра́брственно изше́дше су́щии во обстоя́нии, победи́ша сопроти́вныя, ублажа́юще спобо́рствующаго им чудотво́рца, и вопию́ще Бо́гу: Аллилу́иа.

И́кос 12

Пою́ще твое́ успе́ние, преподо́бне о́тче, Росси́йстии твоя́ ча́да, прославляем Пода́теля всех благи́х Бо́га, дарова́вшаго нам тебе́, такова́го отца́, и́же и по преставле́нии твое́м не оставля́еши нас, но благода́тными чуде́с дарова́нии всегда́ призира́еши, посеща́еши, и заступа́еши: Ему́же надгро́бное соверша́юще пе́ние, ублажа́ем достопа́мятное твое́ житие́ любе́зным воспомина́нием, и па́ки совоку́пне сим:

Ра́дуйся, в честь Святы́я Тро́ицы трикра́ты во утро́бе ма́терней стра́нно возгласи́вый.

Ра́дуйся, в па́мять Христо́вых страсте́й, сре́ду и пято́к пости́выйся.

Ра́дуйся, име́ние свое́ к Небеси́ рука́ми ни́щих предпосла́вый.

Ра́дуйся, в нищете́ душе́вной и теле́сной безпеча́лно в пусты́ни обита́вый.

Ра́дуйся, претерпе́вый бесо́вская наважде́ния преизли́шше.

Ра́дуйся, созда́вый оби́тель Святе́й Тро́ице тро́ическою по́мощию свы́ше.

Ра́дуйся, чуде́сных вод от Бо́га умоле́нием напо́лнивый оби́тели твоея́ огра́ду.

Ра́дуйся, бра́шны неви́димо принесе́нными а́лчной бра́тии сотвори́вый отра́ду.

Ра́дуйся, невосхоте́вый прия́ти святи́тельския вла́сти, одея́ния и украше́ния теле́сна.

Ра́дуйся, во вре́мя литургиса́ния твоего́, оде́янный пла́менем огня́ Небеси́.

Ра́дуйся, свети́лниче, еле́ем ми́лости кипя́й.

Ра́дуйся, на све́щнице сла́вы небе́сныя горя́й.

Ра́дуйся, преподо́бне чудотво́рче Се́ргие, о́тче наш.

Конда́к 13

О вели́кий чудотво́рче Се́ргие всеблаже́нне, преизря́днейший Росси́йския страны́ храни́телю! Приими́ смире́нно приноси́мое тебе́ моле́ние, и твои́м у Небе́снаго Царя́ предста́тельством сохрани́ и поми́луй Оте́чество на́ше от враг ви́димых и неви́димых, и от вся́ких скорбе́й, бед и напа́стей, и исхода́тайствуй в Небе́сном Ца́рствии всем приле́жно моля́щимся, с тобо́ю пе́ти: Аллилу́иа.

[Этот конда́к читается трижды. Затем читается и́кос 1-й: А́нгелов Творе́ц в Тро́ице: И конда́к 1-й: Возбра́нный воево́до].

Акафист вторый: Кондаки и икосы похвальныя преподобному и Богоносному отцу нашему Сергию, игумену Радонежскому чудотворцу, творения второго.

Конда́к 1

Возбра́нный от Царя́ сил, Го́спода Иису́са, да́нный Росси́и воево́до и чудотво́рче преди́вный, преподо́бне о́тче Се́ргие! Прославля́юще мы просла́вльшаго тя сла́вы Го́спода, благода́рственное пе́ние воспева́ем ти, и́бо моли́твами твои́ми от наше́ствия иноплеме́нник и ско́рбных обстоя́ний нас при́сно избавля́еши, я́ко име́я дерзнове́ние ко Го́споду, от вся́ких нас бед свободи́, да зове́м ти:

Ра́дуйся, Се́ргие, ско́рый помо́щниче и пресла́вный чудотво́рче.

И́кос 1

А́нгелов Творе́ц, предуве́девый, по самовла́стному чи́стаго се́рдца твоего́ изволе́нию, всеусе́рдствующее Его́ во́ли исполне́ние, еще́ во чре́ве ма́терни трикра́тным возглаше́нием, показа́ тя ми́ру и́стиннаго служи́теля бы́ти Святы́я Тро́ицы и научи́ всех вопи́ти тебе́ си́це:

Ра́дуйся, пре́жде век, я́ко и́маши ве́рный раб Христо́в бы́ти, предусмо́тренный; ра́дуйся, во о́ноже вре́мя во блаже́нное и небе́сное жили́ще предуста́вленный.

Ра́дуйся, от чре́ва ма́терня на слу́жбу Небе́снаго Царя́, я́ко во́ин, хотя́щий ве́рен Ему́ бы́ти, призва́нный; ра́дуйся, я́ко благода́тию Бо́жиею оправда́нный.

Ра́дуйся, не то́чию Росси́и, но и всей вселе́нней просла́вленный; ра́дуйся, трикра́тным твои́м во чре́ве возглаше́нием роди́телей и всех слы́шащих удиви́вый.

Ра́дуйся, по рожде́нии свое́м по́стное и́ноческое житие́ показа́вый; ра́дуйся, от сосца́ ма́терня воздержа́ние чу́дное яви́вый.

Ра́дуйся, я́ко в сре́ду и пято́к млека́ ника́коже вкуси́вый; ра́дуйся, роди́телей благи́х до́брый и избра́нный пло́де.

Ра́дуйся, ра́дости скорбя́щим и ми́лости с ве́рою у тебе́ прося́щим пода́телю; ра́дуйся, печа́лей злых во вся́ких приключе́ниих отгони́телю.

Ра́дуйся, Се́ргие, ско́рый помо́щниче и пресла́вный чудотво́рче.

Конда́к 2

Ви́дящи вся Росси́я и ины́я страны́ да́нною тебе́, преподо́бне о́тче Се́ргие, благода́тию Бо́жиею, с ве́рою к святы́м твои́м моще́м приходя́щим, и ско́рое вспоможе́ние, и при́сное пресла́вное чуде́с творе́ние, удивля́ются. И мы вси, веселя́щеся, я́ко име́ем такова́го ми́лостиваго помо́щника, Просла́вльшаго тя прославля́юще и тя, блага́го раба́ и ве́рнаго слугу́ Госпо́дня, восхваля́юще, вопие́м Ему́: Аллилу́иа.

И́кос 2

Ра́зум, еще́ су́щу ти во чре́ве ма́терни, Святу́ю Тро́ицу просла́вити Иису́с Христо́с дарова́вый, и ве́ру кре́пкую, наде́жду несумне́нную, любо́вь и́стинную к Нему́ име́ти утверди́вый, сподо́би тя во и́мя Святы́я Тро́ицы пресла́вный храм и оби́тель чу́дную устро́ити, и во о́ну мно́жество и́нок собра́ти. Сего́ ра́ди ве́рнии научи́шася воспева́ти тебе́ та́ко:

Ра́дуйся, честно́е Пресвяты́я Тро́ицы носи́ло и похвале́ние; ра́дуйся, до́бре ста́до, тобо́ю собра́нное, во спасе́ние наставля́яй.

Ра́дуйся, честны́й о́бразе а́гнцем и па́стырем; ра́дуйся, пра́вило ве́ры и о́бразе кро́тости духо́вныя.

Ра́дуйся, святы́ням чи́стое и непоро́чное жили́ще; ра́дуйся, еще́ при жи́зни сподо́бивыйся ви́дети Пресвяту́ю Богоро́дицу со двема́ апо́столома.

Ра́дуйся, удосто́ивыйся во вре́мя соверше́ния литурги́и сослуже́ния а́нгельскаго; ра́дуйся, во святу́ю литурги́ю в благода́ти Бо́жией ве́сь, а́ки во огни́, стоя́щий.

Ра́дуйся, о́ным Боже́ственным огне́м, в поти́р вше́дшим, причасти́выйся; ра́дуйся, досто́ин бы́вый а́нгельскаго собесе́дования.

Ра́дуйся, преиспо́лненный вся́кия благосты́ни; ра́дуйся, чистоты́ душе́вныя и теле́сныя усе́рдный храни́телю.

Ра́дуйся, Се́ргие, ско́рый помо́щниче и пресла́вный чудотво́рче.

Конда́к 3

Си́лою, да́нною ти свы́ше, бу́дущая, я́ко настоя́щая, созерца́я, возвеща́л еси́ и вели́кому кня́зю Дими́трию о побе́де многочи́сленных прего́рдых ага́рян, хотя́щих Росси́ю огне́м и мече́м опустоши́ти, проре́кл еси́, и от своего́ и́ноческаго ли́ка двух мона́хов на проти́вных в по́мощь дал еси́, и моли́твою твое́ю свято́ю к Бо́гу вопия́, на ага́ряны побе́ду сотвори́л еси́. За е́же тя прославля́юще и о таково́й же твое́й на сопроти́вных правосла́вному во́инству по́мощи прося́ще, Бо́гу вопие́м: Аллилу́иа.

И́кос 3

Иму́ще помышле́ние роди́телие твои́ и лю́дие о трикра́тном твое́м во чре́ве ма́тернем в це́ркви глаше́нии и уди́вльшеся, разуме́ша не́что пресла́вное и чу́дное бы́ти: и по сих уве́девше твое́ ра́достное рожде́ние, ра́довахуся и ра́достная тебе́ приноша́ху, глаго́люще:

Ра́дуйся, отроча́ добродуше́вное и благонаде́жное; ра́дуйся, де́тище, вся́кия благода́ти Бо́жия испо́лненное.

Ра́дуйся, пречу́дное в младе́нчестве по́стничество нам явля́яй; ра́дуйся, о́ным мно́гих приводя́й во удивле́ние и увеселя́яй.

Ра́дуйся, я́ко с тобо́ю всегда́ бе благода́ть Госпо́дня; ра́дуйся, от ю́ности твоея́ всем се́рдцем и мы́слию Бо́га возлюби́вый.

Ра́дуйся, кро́тость, смире́ние и бде́ние име́вый; ра́дуйся, вся ми́ра сего́ кра́сная, я́ко ско́ро исчеза́ющая, презре́вый.

Ра́дуйся, вся плотски́я по́хоти Бо́га ра́ди умертви́вый; ра́дуйся, многообра́зныя ко́зни лука́ваго си́лою Бо́жиею победи́вый.

Ра́дуйся, мно́гия лю́ди от грехо́внаго пути́ ко Го́споду обрати́вый и спасы́й; ра́дуйся, я́ко тобо́ю сла́достей духо́вных исполня́емся.

Ра́дуйся, Се́ргие, ско́рый помо́щниче и пресла́вный чудотво́рче.

Конда́к 4

Бу́ри жития́ ми́ра сего́, при́сно вну́тренними и вне́шними злострада́нии волну́ющагося, преподо́бне о́тче Се́ргие, изба́вився, прише́л еси́ во приста́нище немяте́жное Небе́сное, на ме́ста зла́чна и прохла́дна, иде́же пото́цы сла́дости неисповеди́мыя, пи́ща сла́вы Бо́жия нетле́нная, пе́ния и гла́сы пра́зднующих. Та́мо почива́еши и весели́шися, со все́ми а́нгельскими си́лами поя́ Бо́гу: Аллилу́иа.

И́кос 4

Слы́шаша, преподо́бне о́тче Се́ргие, бли́жнии и да́льнии ангелоподо́бное твое́ житие́ и благода́ти чуде́с струю́ вы́ну теку́щую, я́ко моли́твою твое́ю прокаже́ннии очища́ются, слепи́и прозира́ют, хро́мии хо́дят и разнообра́зных неду́г с ве́рою притека́ющии здра́вие улуча́ют, сих изба́вльшеся, вопия́ху к тебе́ такова́я:

Ра́дуйся, мирова́рнице, на вся неду́ги врачева́ние подава́ющая; ра́дуйся, безме́здно па́че естества́ врачу́ скороми́лостивый.

Ра́дуйся, ми́лости превели́кия и ско́рбным сострада́ния сокро́вище; ра́дуйся, всеусе́рднаго о лю́дех промышле́ния прия́телище.

Ра́дуйся, ду́шу свою́ за челове́ки положи́ти гото́вый; ра́дуйся, увеселе́ние и отра́да к тебе́ прибега́ющим.

Ра́дуйся, мертвеца́ пресла́вно моли́твою твое́ю оживи́вый; ра́дуйся, оскуде́ние монасты́рское в пи́щи испо́лнивый.

Ра́дуйся, в су́се ме́сте пото́к водны́й тещи́ у Бо́га испроси́вый; ра́дуйся, я́ко та́яжде вода́, моли́твою твое́ю исцеля́ющи неду́ги, чудоде́йствует.

Ра́дуйся, чуде́с пучи́но, Бо́гом излия́нная; ра́дуйся, жела́емых благ прише́дшим к тебе́ пода́телю.

Ра́дуйся, Се́ргие, ско́рый помо́щниче и пресла́вный чудотво́рче.

Конда́к 5

Боготе́чная пресве́тлая звезда́ яви́лся еси́, преподо́бне о́тче Се́ргие, не́бо церко́вное украша́яй и всех блудя́щих по мо́рю стра́стнаго жития́ сего́ да́нною тебе́ от Со́лнца Пра́вды Христа́ Иису́са, и́стиннаго Бо́га, благода́тию озаря́яй, мрак печа́лей и мглу вся́ких неду́г и скорбе́й прогоня́яй, наставля́еши всех к тебе́ с ве́рою притека́ющих на пу́ть спасе́нный, к ве́чному Небе́сному Оте́честву веду́щий, пою́щих Бо́гу: Аллилу́иа.

И́кос 5

Ви́дев преподо́бный Се́ргий, я́ко в ми́ре сем вся́ческая суета́ и тле́нию прича́стна, потща́ся вседу́шно Преве́чному Бо́гу благоугоди́ти, и вои́стину не вотще́ потруди́ся: премени́ бо тле́нная на нетле́нная, наипа́че же предстоя́ния сподо́бися у стра́шнаго Престо́ла Влады́чня в сла́ве ве́чней. Те́мже вопие́м ему́:

Ра́дуйся, я́ко иде́же Христо́с в телеси́, та́можде и ты пребыва́еши; ра́дуйся, та́мо, я́ко в зерца́ле, в Бо́зе вся Ему́ любе́зная созерца́еши.

Ра́дуйся, я́ко созерца́я в Нем моля́щихся ти о по́мощи, моли́твою твое́ю им поле́зная хода́тайствуеши; ра́дуйся, ско́рый помо́щниче призыва́ющим тя во бране́х правосла́вным.

Ра́дуйся, моли́твою твое́ю Росси́йстей стране́ побе́ды на проти́вныя подава́яй; ра́дуйся, скорбя́щим скоропредста́тельный уте́шителю.

Ра́дуйся, не́мощей теле́сных и душе́вных немздоприе́мный исцели́телю; ра́дуйся, мно́гая чудеса́ благода́тию Ду́ха Свята́го содева́яй.

Ра́дуйся, хромы́м хожде́ние и слепы́м прозре́ние подава́яй; ра́дуйся, грозд ви́нный, пита́ющий нас и веселя́щий.

Ра́дуйся, розго́ Христа́ лозы́ и́стинныя, мног плод в посо́бие правосла́вным творя́щая; ра́дуйся, благи́й ра́бе и ве́рный, и до́брый де́лателю виногра́да Христо́ва.

Ра́дуйся, Се́ргие, ско́рый помо́щниче и пресла́вный чудотво́рче.

Конда́к 6

Пропове́дует держа́ва Росси́йская, богому́дре Се́ргие, труды́ твоя́ и боле́зни, бде́ние же и сухояде́ние, ра́ди душе́внаго твоего́ спасе́ния подъя́тыя, его́же ра́ди просла́ви тя Госпо́дь сла́вою Свое́ю Боже́ственною. Те́мже, я́ко рай насажде́нный, в Це́ркви яви́лся еси́, иму́щи дре́во жи́зни Сама́го Го́спода, от Него́же вкуси́вшии вся ско́ро ги́бнущая в ми́ре сем презира́ют и ра́достно в прекра́сный виногра́д вы́шний вхо́дят, иде́же ты, предстоя́ Ему́, вопие́ши: Аллилу́иа.

И́кос 6

Возсия́ Це́ркви и стране́ на́шей Росси́йстей просвеще́ние соверше́нных твои́х доброде́телей, преподо́бне о́тче Се́ргие, о ни́хже благодаря́ще Отца́ Небе́снаго, да́вшаго тебе́ толи́кую благода́ть вели́чия Своего́, к тебе́, я́ко к те́плому о нас моли́твеннику, ра́достная воспева́ем та́ко:

Ра́дуйся, а́нгельское житие́ нам явля́яй; ра́дуйся, стра́сти грехо́вныя уставля́яй.

Ра́дуйся, о́бразе и́стиннаго смире́ния; ра́дуйся, зерца́ло соверше́ннаго терпе́ния.

Ра́дуйся, наста́вниче вели́кий спасе́нию; ра́дуйся, приводя́й гре́шных ко исправле́нию.

Ра́дуйся, изве́стный исполни́телю за́поведей Христо́вых; ра́дуйся, душ немощны́х исцеле́ние.

Ра́дуйся, ми́лостыню твори́ти науча́яй; ра́дуйся, ри́зы и бра́шна немощны́м подава́ти повелева́яй.

Ра́дуйся, пусты́нниче, мирску́ю че́сть и бога́тство возненави́девый; ра́дуйся, по́стниче, от ю́ности Бо́гу послужи́вый.

Ра́дуйся, Се́ргие, ско́рый помо́щниче и пресла́вный чудотво́рче.

Конда́к 7

Хотя́ избра́н дом Ду́ху Свято́му себе́ сотвори́ти, потща́лся еси́ те́сным и приско́рбным путе́м, веду́щим в жи́знь ве́чную, взем на ра́мо свое́ Крест Христо́в, ше́ствовати, е́же благода́тию Бо́жиею от ю́ности твоея́ непоро́чно в творе́ниих за́поведей Госпо́дних соверши́в, дости́гл еси́ угото́ваннаго тебе́ в небе́сном всевесе́лом пребыва́нии воздая́ния, и та́мо благода́рственно пое́ши Бо́гу: Аллилу́иа.

И́кос 7

Но́вую благода́ть показа́ всех Творе́ц и Влады́ка тебе́, богому́дре Се́ргие: а́ще бо и у́мерл еси́ на земли́ пло́тию, но душе́ю в вы́шнем селе́нии всегда́ жив сый, мно́гая и пресла́вная чудеса́ в ми́ре живу́щим лю́дем де́йствуеши, и те́плым твои́м хода́тайством посо́бствуеши, вопию́щим к тебе́ такова́я:

Ра́дуйся, де́вственниче душе́ю и те́лом; ра́дуйся, и́ноком наста́вниче преди́вный.

Ра́дуйся, душ на́ших ра́дование; ра́дуйся, бы́строе ни́щим услы́шание.

Ра́дуйся, скорбя́щим прия́тное попече́ние; ра́дуйся, чистоты́ усе́рдный храни́телю.

Ра́дуйся, ненаде́жным наде́яние; ра́дуйся, всея́ Росси́и увеселе́ние.

Ра́дуйся, дре́во чудото́чное рая́ Иису́сова; ра́дуйся, кри́не ра́йскаго прозябе́ния.

Ра́дуйся, ми́ро Христо́ва благоуха́ния; ра́дуйся, я́ко тобо́ю прино́сится ра́дование.

Ра́дуйся, Се́ргие, ско́рый помо́щниче и пресла́вный чудотво́рче.

Конда́к 8

Стра́нное и пресла́вное чу́до явля́ется притека́ющим к тебе́, богому́дре Се́ргие: и́бо да́нною тебе́ Бо́жиею благода́тию с ве́рою прося́щим неме́дленно от вся́ких многообра́зных теле́сных и душе́вных скорбе́й исцеля́еши, от бед избавля́еши, от напа́стей охраня́еши, и всем вся́ко благополе́зное проше́ние исполня́еши, и вопие́ши Бо́гу: Аллилу́иа.

И́кос 8

Ве́сь еси́, преподо́бне о́тче Се́ргие, в вы́шних, но и ни́жних не оставля́еши: при́сно со Христо́м Царе́м Ве́чным ца́рствуеши и нас, гре́шных и недосто́йных, пред Ним воспомина́еши, моля́ся о спасе́нии на́шем. Те́мже от усе́рдия на́шего вопие́м к тебе́ си́це:

Ра́дуйся, оста́вльший име́ние и возлюби́вый нищету́ Христо́ву; ра́дуйся, дости́гший к неистощи́мому бога́тству.

Ра́дуйся, Ду́ху Свято́му подклони́выйся со вся́ким смире́нием; ра́дуйся, во́ине Христо́в непобеди́мый я́вльшийся.

Ра́дуйся, крило́ма богомы́слия се́ти вра́жия сокруши́вый; ра́дуйся, смире́нием возвыша́емый, в ве́чныя кро́вы возлете́вый.

Ра́дуйся, просвеще́нный вну́трь благода́тию; ра́дуйся, истреби́вый страсте́й мглу душевре́дную.

Ра́дуйся, в по́двизех дневны́х и нощны́х тече́ние соверши́вый; ра́дуйся, в невече́рнем дни Ца́рствия Бо́жия при́сно почива́яй.

Ра́дуйся, та́мо снеде́ния пи́щи разу́мныя сподо́бльшийся; ра́дуйся, я́ко того́ блаже́нства от Бо́га ве́чно удосто́ивыйся.

Ра́дуйся, Се́ргие, ско́рый помо́щниче и пресла́вный чудотво́рче.

Конда́к 9

Вся́кое естество́ а́нгельское удиви́ся вели́кому свы́ше тебе́ дарова́нию, я́ко на земли́ невеще́ственное житие́ показа́л еси́, и во пло́ти, а́ки безпло́тен, яви́лся еси́. Сего́ ра́ди мно́гих чуде́с творе́ния от Го́спода прие́м, чи́стою и боголюбе́зною душе́ю твое́ю Того́ бла́гостию к Небе́сным причте́н еси́ си́лам, в Небесе́х ны́не пое́ши всеси́льному Бо́гу: Аллилу́иа.

И́кос 9

Вити́я многовеща́нныя недоуме́ют досто́йно сла́вити тя, досто́йный вся́кия сла́вы, сла́вне преподо́бне о́тче Се́ргие, и́бо пачеесте́ственная мно́гая пресла́вная чудоде́йствия, еще́ жив су́щь, показа́л еси́, но и по сме́рти та́я благода́тию Бо́жиею твори́ти не престае́ши. Мы же, любо́вию понужда́еми, дерза́ем пе́ти тебе́ си́це:

Ра́дуйся, земны́й а́нгеле и небе́сный челове́че; ра́дуйся, во пло́ти живы́й духо́вно, на земли́ небе́сно.

Ра́дуйся, в челове́честве пребыва́яй а́нгельски, в ми́ре преми́рно; ра́дуйся, душе́вныма твои́ма очи́ма вы́ну Го́спода созерца́вый.

Ра́дуйся, пред лице́м Бо́жиим, я́ко раб пред Го́сподем, ходи́вый; ра́дуйся, пред О́ным, я́ко сын пред Отце́м, я́ко учени́к пред Учи́телем, ше́ствовавый.

Ра́дуйся, я́ко во́ин пред Воево́дою гото́в сый вся повеле́нная Им твори́ти; ра́дуйся, до́брый ста́да своего́ и́ночествующих наста́вниче и прави́телю.

Ра́дуйся, ше́ствовавый от си́лы в си́лу, до́ндеже яви́ся тебе́ Бог бого́в в Сио́не; ра́дуйся, Еди́наго Го́спода возлюби́вый и к Нему́ очеса́ своя́ вы́ну име́вый.

Ра́дуйся, во вся дни живота́ своего́ Его́ иска́вый и в Нем наме́рение полага́вый; ра́дуйся, ничесого́ на Небеси́ и на земли́, ра́зве Христа́ Иису́са, ви́дети жела́вый.

Ра́дуйся, Се́ргие, ско́рый помо́щниче и пресла́вный чудотво́рче.

Конда́к 10

Спасти́ хотя́ ду́шу твою́, в ю́ности во́зраста своего́ отре́клся еси́ во́ли своея́ и во зна́мение отсече́ния ея́ постри́гл еси́ власы́ главы́ своея́, и был еси́ мона́х, покори́вый себе́ во́ли Бо́жией и нача́льником, от Него́ поста́вленным, и́хже веле́ния та́ко слу́шал еси́, я́ко Сама́го Го́спода, никогда́ же прекосло́вя, но сло́ву веле́ния исполне́нием де́ла отвещава́я. Вся́ческая же приключе́ния благода́рно, я́ко ве́рный раб, от Го́спода приима́л еси́, Ему́же на Небесе́х предстоя́, ны́не вопие́ши: Аллилу́иа.

И́кос 10

Стена́ еси́ всем челове́ком, к заступле́нию твоему́ прибега́ющим, преподо́бне богому́дре Се́ргие. Те́мже и нам, к тебе́ приходя́щим и ми́лостиваго твоего́ во вся́ких ну́ждах заступле́ния у Царя́ Небе́снаго прося́щим, бу́ди стена́ кре́пкая и огражде́ние непреобори́мое, от вся́ких нас бед и напа́стей застеня́я и огражда́я, за е́же мы вопие́м тебе́ такова́я:

Ра́дуйся, во́ине Царя́ Небе́снаго, не обяза́выйся ку́плями жите́йскими, да Ему́ уго́ден бу́деши; ра́дуйся, не восхоте́вый двема́ господи́нома, Бо́гу и ми́ру, рабо́тати, но Еди́ному Бо́гу то́чию.

Ра́дуйся, от ю́ности на те́ло свое́, на мир сей и диа́вола вооружи́выйся; ра́дуйся, посто́м, покло́ны, стоя́нием на моли́тве, бде́нием умертви́вый пло́ть свою́.

Ра́дуйся, умертви́вый о́ную пре́жде, не́жели она́ жи́ва страсте́м бя́ше; ра́дуйся, ме́ртву соде́явый горта́нь проти́ву приима́ния сласте́й.

Ра́дуйся, мертв сотвори́вый язы́к проти́ву глаго́лания скве́рных, клеветны́х и ло́жных; ра́дуйся, ме́ртвы устро́ивый ушеса́ проти́ву слы́шания душевре́дных.

Ра́дуйся, ме́ртвы соде́явый ру́це проти́ву грабле́ния и вся́ких зол творе́ния; ра́дуйся, ме́ртво сотвори́вый чре́во проти́ву объяде́ния и пия́нства.

Ра́дуйся, ме́ртва соде́лавый труда́ми чре́сла своя́ проти́ву нечистоты́; ра́дуйся, ме́ртвы сотвори́вый но́зе проти́ву тече́ния в пу́ть гре́шников и на сове́т нечести́вых.

Ра́дуйся, Се́ргие, ско́рый помо́щниче и пресла́вный чудотво́рче.

Конда́к 11

Пе́ние благода́рственное благотвори́телю Христу́ Иису́су, тя, преподо́бне о́тче, прославля́юще, вси правосла́внии взыва́ют, я́ко дарова́л ти мно́гих чуде́с си́лу творе́ния: слепы́я просвеща́ти, прокаже́нныя очища́ти, больны́я врачева́ти, бесны́я от де́монскаго друче́ния свобожда́ти, толи́ко си́льне, я́коже и не у приведе́нным к тебе́ бы́вшим бесны́м, еще́ на пути́ де́мони от них отбега́ху и ктому́ не возвраща́хуся, боя́щеся в тебе́ си́лы Бо́жия, ю́же вы́ну в Небесе́х прославля́я, вопие́ши Бо́гу: Аллилу́иа.

И́кос 11

Светоза́рное свети́ло в правосла́вной Росси́йстей держа́ве и во всей вселе́нней благода́тию немерца́ющаго Со́лнца, Христа́ Иису́са, просвеща́ющею возсия́вшее, зрим тя, богому́дре о́тче: с невеще́ственными бо в вы́шних предстоя́ Престо́лу Тро́ицы Пресвяты́я, ра́дости превели́кия испо́лнен еси́ и Боже́ственными луча́ми Трисо́лнечнаго Све́та осиява́емь, облиста́еши ве́рныя, вопию́щия к тебе́ такова́я:

Ра́дуйся, возше́дый на го́ру превысоку́ доброде́телей Боже́ственных; ра́дуйся, я́ко от тоя́ удо́бь возше́л еси́ на го́ру небе́сную.

Ра́дуйся, я́ко от оби́тели земны́я во оби́тель небе́сную водвори́лся еси́; ра́дуйся, я́ко восходя́ та́мо душе́ю, нам мо́щи твоя́ святы́я оста́вил еси́.

Ра́дуйся, я́ко мо́щи твоя́ исцелева́ют вся́кия ско́рби и боле́зни; ра́дуйся, я́ко моще́й твои́х де́мони трепе́щут.

Ра́дуйся, я́ко твоя́ мо́щи кому́ждо в приклю́чшихся печа́лех быва́ют увеселе́ние; ра́дуйся, душе́ю востеки́й в Сио́н Го́рний к Царю́ Небе́сному.

Ра́дуйся, я́ко та́мо предстоя́, о всех к Нему́ те́пле хода́тайствуеши; ра́дуйся, я́ко благоутро́бие Его́ о всех чту́щих па́мять твою́ умилостивля́еши.

Ра́дуйся, стране́ на́шей на проти́вных побе́ду моли́твою твое́ю содева́еши; ра́дуйся, всем ве́рным вся́кое проше́ние во их по́льзу исполня́еши.

Ра́дуйся, Се́ргие, ско́рый помо́щниче и пресла́вный чудотво́рче.

Конда́к 12

Благода́ть, да́нную ти от Бо́га, све́дуще, тебе́, при́снаго на́шего ми́лостиваго отца́, приле́жно про́сим: проле́й ны́не те́плую твою́ моли́тву о нас, гре́шных, ко Го́споду, я́ко да презре́в вся на́ша согреше́ния, да́рует побе́ды на враги́, я́ко царю́ Константи́ну на Максе́нтиа, я́ко Дави́ду на Голиа́фа; держа́ву Росси́йскую да укрепи́т, Це́рковь Свою́ Святу́ю от ра́спрей и раско́лов непозы́блему да сохрани́т, оби́лие вся́ких плодо́в земли́ да да́рует и вся правосла́вныя христиа́ны да спасе́т и поми́лует, чесого́ от Него́ твои́ми моли́твами улучи́ти ожида́юще, вопие́м Ему́: Аллилу́иа.

И́кос 12

Пою́ще ди́внаго во святы́х Свои́х Царя́ Небе́снаго, просла́вльшаго тя, ве́рнаго Своего́ раба́, преподо́бнаго отца́ Се́ргия, ми́лостивое твое́, ско́рое нам во вся́ких ну́ждах и печа́лех поможе́ние прославля́ем, и́бо в тебе́ в Тро́ице прославля́емый Бог наш пресла́вным мно́гим чудоде́йствием ди́вно просла́вися, о чесо́м удивля́ющеся вопие́м к тебе́ си́це:

Ра́дуйся, великосла́вный Росси́йский наш засту́пниче, о́тче Се́ргие; ра́дуйся, соверше́нный в доброде́телех челове́че.

Ра́дуйся, ди́вный подража́телю соверше́нства Отца́ на́шего Небе́снаго; ра́дуйся, преблаги́й и до́брый наста́вниче и́ноков.

Ра́дуйся, о́бразе пустынножи́телей и устрои́телю о́бщаго жития́; ра́дуйся, всех правосла́вных ско́рый помо́щниче и засту́пниче.

Ра́дуйся, Царя́ Небе́снаго и Бо́га изве́стный умилостиви́телю; ра́дуйся, мно́гажды заступле́нием твои́м проше́ния предваря́яй.

Ра́дуйся, покро́ве, Бо́гом зда́нный, и́мже покрыва́ются мно́зи; ра́дуйся, лени́вых подви́гнувый твои́ми христоподража́тельными нра́вы.

Ра́дуйся, доброзра́чное све́та ева́нгельскаго всесве́тлое сия́ние; ра́дуйся, Трисо́лнечнаго Святы́я Тро́ицы све́та вы́ну просвеща́ющее озаре́ние.

Ра́дуйся, Се́ргие, ско́рый помо́щниче и пресла́вный чудотво́рче.

Конда́к 13

О чудотво́рче пресла́вный и засту́пниче всем нам во вся́ких беда́х и ско́рбех ско́рый и пречу́дный, богому́дре о́тче Се́ргие! Ны́нешнее на́ше приими́ приноше́ние и богоприя́тным твои́м хода́тайством умоли́ Го́спода сил си́лу свы́ше правосла́вному на́шему во́инству на сопроти́вныя пода́ти, и нам всем, Того́ благода́тию очи́стившимся, от гее́нны изба́витися, и гряду́щая в Небесе́х блага́я улучи́ти, вопию́щим Ему́: Аллилу́иа.

[Этот конда́к читается трижды. Затем читается и́кос 1-й: А́нгелов Творе́ц: И конда́к 1-й: Возбра́нный от Царя́ сил].

Моли́тва пе́рвая

О свяще́нная главо́, преподо́бне о́тче, преблаже́нне а́вво Се́ргие вели́кий! Не забу́ди убо́гих свои́х до конца́, но помина́й нас во святы́х свои́х и благоприя́тных моли́твах к Бо́гу. Помяни́ ста́до свое́, е́же сам упа́сл еси́, и не забу́ди посеща́ти чад свои́х. Моли́ за ны, о́тче свяще́нный, за де́ти своя́ духо́вныя, я́ко име́я дерзнове́ние к Небе́сному Царю́, не премолчи́ за ны ко Го́споду и не пре́зри нас, ве́рою и любо́вию чту́щих тя. Помина́й нас, недосто́йных, у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бы́сть благода́ть за ны моли́тися. Не мним бо тя су́ща ме́ртва: а́ще бо и те́лом преста́вился еси́ от нас, но и по сме́рти жив сый пребыва́еши. Не отступа́й от нас ду́хом, сохраня́я нас от стрел вра́жиих, и вся́кия пре́лести бесо́вския, и ко́зней диа́вольских, па́стырю наш до́брый; а́ще бо и моще́й твои́х ра́ка пред очи́ма на́шима ви́дима е́сть всегда́, но свята́я твоя́ душа́ со а́нгельскими во́инствы, со безпло́тными ли́ки, с Небе́сными си́лами, у Престо́ла Вседержи́теля предстоя́щи, досто́йно весели́тся. Ве́дуще бо тя вои́стину и по сме́рти жи́ва су́ща, тебе́ припа́даем и тебе́ мо́лимся, е́же моли́тися о нас Всеси́льному Бо́гу о по́льзе душ на́ших, и испроси́ти вре́мя на покая́ние, и о невозбра́нном преи́тии от земли́ на Не́бо, мыта́рств же го́рьких, бесо́в, возду́шных князе́й и ве́чныя му́ки изба́витися, и Небе́сному Ца́рствию насле́дником бы́ти со все́ми пра́ведными, от ве́ка угоди́вшими Го́споду на́шему Иису́су Христу́, Ему́же подоба́ет вся́кая сла́ва, че́сть и поклоне́ние со Безнача́льным Его́ Отце́м и с Пресвяты́м, и Благи́м, и Животворя́щим Его́ Ду́хом ны́не, и при́сно, и во ве́ки веко́в. Ами́нь.

Моли́тва втора́я

О Небе́снаго граждани́не Иерусали́ма, преподо́бне о́тче Се́ргие! Воззри́ на нас ми́лостиво и к земли́ приве́рженных возведи́ к высоте́ Небе́сней. Ты горе́ на Небеси́; мы, на земли́ ни́зу, удалены́ от тебе́ не толи́ко ме́стом, ели́ко греха́ми свои́ми и беззако́ниями; но к тебе́, я́ко нам сро́дному, прибега́ем и взыва́ем: наста́ви нас ходи́ти путе́м твои́м, вразуми́ и руково́дствуй. Сво́йственно е́сть тебе́, о́тче наш, благоутро́бие и человеколю́бие: на земли́ живу́щу, не о свое́м то́кмо спасе́нии бы́сть тебе́ попече́ние, но и о всех к тебе́ притека́ющих. Наставле́ния твоя́ бы́ша тро́стию кни́жника скоропи́сца, на се́рдце ка́ждаго глаго́лы жи́зни начертава́ющаго. Не теле́сныя то́кмо врачева́л еси́ боле́зни, но па́че душе́вных врач изя́щный яви́лся еси́; и вся твоя́ свята́я жи́знь бы́сть зерца́лом вся́кия доброде́тели. А́ще толи́к был еси́, свя́тче Бо́жий, на земли́, коли́к ны́не еси́, на Небеси́! Ты дне́сь предстои́ши Престо́лу Све́та Непристу́пнаго и в нем, я́ко в зерца́ле, зри́ши вся на́ша ну́жды и проше́ния; ты водворя́ешися вку́пе со А́нгелы, о еди́ном гре́шнице ка́ющемся ра́дующимися. И человеколю́бие Бо́жие е́сть неистощи́мо, и твое́ к Нему́ дерзнове́ние мно́го, не преста́ни о нас вопия́ ко Го́споду. Испроси́ предста́тельством свои́м у Всеми́лостиваго Бо́га на́шего мир Це́ркви Его́, под зна́мением креста́ во́инствующей, согла́сие в ве́ре и единому́дрие, суему́дрия же и раско́лов истребле́ние, утвержде́ние во благи́х де́лех, больны́м исцеле́ние, печа́льным утеше́ние, оби́женным заступле́ние, бе́дствующим по́мощь. Не посрами́ нас, к тебе́ с ве́рою притека́ющих. А́ще бо и недосто́йни есмы́ толи́каго отца́ и хода́тая, но ты, быв подража́тель человеколю́бия Бо́жия, сотвори́ нас досто́йны чрез обраще́ние от злых дел к благо́му житию́. Вся богопросвеще́нная Росси́я, твои́ми чудесы́ испо́лненная и ми́лостьми облагоде́тельствованная, испове́дует тя бы́ти своего́ покрови́теля и засту́пника. Яви́ дре́вния ми́лости твоя́ и и́хже отце́м спомоществова́л еси́, не отри́ни и нас, чад их, стопа́ми их к тебе́ ше́ствующих. Ве́руем, я́ко ду́хом нам сопрису́тствуеши. Иде́же бо е́сть Госпо́дь, я́коже сло́во Его́ учи́т нас, та́мо и слуга́ Его́ бу́дет. Ты ве́рный еси́ раб Госпо́день, и Бо́гу везде́ су́щу, ты в Нем еси́, и Он в тебе́ е́сть, па́че же и те́лом с на́ми еси́. Се нетле́нныя и живоно́сныя твоя́ мо́щи, я́ко сокро́вище безце́нное, вручи́ нам чуде́с Бог. Предстоя́ще им, я́ко тебе́ жи́ву су́шу, припа́даем и мо́лимся: приими́ моле́ния на́ша и вознеси́ их на же́ртвенник благоутро́бия Бо́жия, да прии́мем тобо́ю благода́ть и благовре́менну в ну́ждах на́ших по́мощь. Укрепи́ на́ше малоду́шие и утверди́ нас в ве́ре, да несомне́нно упова́ем получи́ти вся блага́я от благосе́рдия Влады́ки моли́твами твои́ми. Па́ству же твою́ духо́вную, тобо́ю со́бранную, не преста́ни управля́ти жезло́м духо́вныя му́дрости: подвиза́ющимся помози́, разсла́бленных возста́ви, споспеши́ и́го Христо́во нести́ во благоду́шии и терпе́нии и всех нас упра́ви в ми́ре и покая́нии сконча́ти живо́т наш и пресели́тися со упова́нием в блаже́нная не́дра Авраа́мова, иде́же ты ра́достно по труде́х и по́двизех ны́не почива́еши, прославля́я со все́ми святы́ми Бо́га, в Тро́ице сла́вимаго, Отца́ и Сы́на и Свята́го Ду́ха. Ами́нь.

Песнь 7

Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее веле́ние Бо́жие, мучи́теля увеща́ вопи́ти:// благослове́н еси́, Бо́же оте́ц на́ших.

Ю́нош трие́х пе́щь не опали́, рождество́ прообразу́ющих Твое́:/ Боже́ственный бо о́гнь Тебе́ не опали́в, всели́ся в Тя,/ и вся научи́ вопи́ти: благослове́н еси́, Бо́же оте́ц на́ших.

Блажа́т концы́ Тя, Всенепоро́чная Ма́ти, я́ко прорекла́ еси́,/ просвеща́еми светолу́чными сия́нии Твои́ми,/ и благода́тию пою́щии, вопию́т: благослове́н еси́, Бо́же оте́ц на́ших.

Па́губныя у́бо зу́бы в мя вонзе́ змий лука́внейший:/ но тыя Твой, Богома́ти, Сын сокруши́,/ кре́пость же мне даде́ вопи́ти: благослове́н еси́, Бо́же оте́ц на́ших.

Очисти́лище естества́ Ты еси́, Еди́на Богоблаже́нная:/ на ра́мех бо херуви́мских седя́щаго Бо́га во объя́тиих носи́вши, вопие́ши:/ благослове́н еси́, Бо́же оте́ц на́ших.

Ин

Ирмо́с: Бо́жия снизхожде́ния/ о́гнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще поя́ху:// благослове́н еси́, Бо́же оте́ц на́ших.

В пещи́ искуше́ний разжже́ния/ Боже́ственная благода́ть ороси́ тя, преподо́бне,/ и многосве́тла Тро́ическим жела́нием показа́, зову́ща:/ Благослове́н Бог оте́ц на́ших.

Мир преоби́дев, сла́вне Се́ргие,/ на земли́ я́ко беспло́тен пожи́л еси́,/ и а́нгельским ликостоя́нием сподо́бился еси́./ Тем тя ве́рою почита́ем, досточу́дне.

В приста́нище ти́хое вшед, богому́дре,/ жите́йских пла́ваний отбе́гл еси́,/ и волну́ющимся жите́йскими спаси́тельное окормле́ние был еси́, воспева́ющим:/ благослове́н Бог оте́ц на́ших.

Богоро́дичен: Жезл прорасте́ Де́во из ко́рене Иессе́ева/ всеблаже́нный Плод, Цвет нося́щи спаси́тельный,/ ве́рою Сы́ну Твоему́ вопию́щим:/ отце́в на́ших Бо́же, благослове́н еси́.

Ин

Ирмо́с: Тебе́ у́мную, Богоро́дице, пе́щь/ разсмотряем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,// хва́льный отце́в Бог, и препросла́влен.

Друго́е не́бо на земли́/ Боже́ственным манове́нием, преблаже́нне, показа́лся еси́,/ воспита́л еси́ слове́сное ста́до,/ я́ко А́нгел живы́й с пло́тию, богому́дре.

Иму́ща тя к Бо́гу, ча́да твоя́, кре́пка моли́твенника, блаже́нне,/ и уте́шителя печа́льных, побо́рника же и предста́теля, и хода́тая благоче́стия,/ от вся́ких бед спаса́емся, преподо́бне Се́ргие.

Богоро́дичен: Ра́дуйся, чи́стая Ада́мова Дщи:/ из Тебе́ бо произы́де Па́стырь, обле́кся и́стинно во всего́ мя челове́ка,/ превозноси́мый за милосе́рдие непости́жное, отце́в Бог благослове́нный.

Песнь 8

Ирмо́с: Из пла́мене преподо́бным ро́су источи́л еси́,/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.

Позлаще́нною ри́зою, я́коже Цари́цу,/ Сын Твой, просвети́в заре́ю Ду́ха,/ Тебе́ одесну́ю Себе́ поста́ви, Всечи́стая:/ Его́же превозно́сим во вся ве́ки.

И́же хоте́нием еди́ным мир водрузи́вый,/ из пречи́стыя утро́бы Твоея́ Плоть зае́млет,/ свы́ше ту́ю назда́ти хотя́:/ Его́же превозно́сим во вся ве́ки.

Сочета́нием Сло́ва ко мне челове́ку,/ Боже́ственное жили́ще была́ еси́, Пречи́стая,/ просия́вши я́ве де́вства све́тлостию:/ тем Тя пое́м во вся ве́ки.

Златоза́рный Тя све́щник предвообрази́,/ прие́мшую несказа́нно Свет Непристу́пный,/ зна́нием Свои́м озаря́ющ вся́ческая./ Тем Тя пое́м, Чи́стая, во вся ве́ки.

Ин

Ирмо́с: Седмери́цею пе́щь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы благослови́те, свяще́нницы воспо́йте,// лю́дие превозноси́те во вся ве́ки.

Светоно́сный твой пра́здник, преблаже́нне Се́ргие,/ испо́лни ра́дости и весе́лия духо́внаго, благоуха́ния же и просвеще́ния,/ тя иму́щим засту́пника и пра́вило мона́шествующим.

Моли́твою непреста́нною к Бо́гу восте́кл еси́,/ и отту́ду Трисо́лнечными сия́нии озари́лся еси́,/ на враги́ боре́ния поста́вив, приводя́ по́стников собо́ры но́вым житие́м, Христу́ вопию́щим:/ де́ти благослови́те, свяще́нницы воспо́йте, лю́дие превозноси́те Его́ во ве́ки.

В поще́ниих кре́пкое, в моли́твах неле́ностное/ терпе́ние в искуше́ниях, Се́ргие, на земли́ показа́л еси́, зовы́й:/ де́ти благослови́те, свяще́нницы воспо́йте, лю́дие превозноси́те Его́ во ве́ки.

Богоро́дичен: Богороди́тельнице Чи́стая, души́ моея́ я́звы грехо́вныя и собла́зны очи́сти,/ ко исто́чником примеша́ющи, я́же из ребр Рождества́ Твоего́, и́же от них поте́кшим струя́м:/ к Тебе́ бо взыва́ю, и к Тебе́ прибега́ю, и Тя призыва́ю, Богоблагода́тную.

Ин

Ирмо́с: Чу́да преесте́ственнаго,/ росода́тельная изобрази пе́щь о́браз:/ не бо, я́же прия́т пали́т ю́ныя,/ я́ко ниже́ о́гнь Божества́ Де́вы,/ в Ню́же вни́де утро́бу./ Тем воспева́юще воспое́м:/ да благослови́т тва́рь вся Го́спода,// и превозно́сит во вся ве́ки.

Приле́жно пою́щи мо́лим тя:/ моли́ся, преподо́бне, побе́ды дарова́ти на враги́ во́инству на́шему,/ и Це́ркви благоле́пие, и ми́ру мир.

Ду́ха Свята́го благода́ть в тя всели́ся,/ лука́вых духо́в прогони́теля соде́ла,/ мона́шествующих же наста́вника показа́, зову́щих:/ благослови́те, вся тва́рь, Го́спода и превозно́сите Его́ во ве́ки.

Трисо́лнечным све́том издале́ча сия́я,/ твои́м певце́м свет да́руй и спасе́ние, и ми́ру мир,/ в твое́й па́мяти, преподо́бне о́тче, зову́щим:/ да благослови́т вся тва́рь Го́спода, и превозно́сит Его́ во ве́ки.

Богоро́дичен: И́же а́нгельскими пе́сньми Прославля́емый,/ бога́тное Сло́во нас ра́ди обнища́,/ Тя Ма́терь, добро́ту Иа́ковлю, Благослове́нная, избра́в./ Те́мже воспева́юще пое́м:/ да благослови́т тва́рь вся Го́спода и превозно́сит Его́ во ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно, Его́же велича́юще,// с Небе́сными во́и Тя ублажа́ем.

Звезда́, сия́ющи заря́ми Божества́ от Иа́кова,/ от мра́ка содержи́мым возсия́: Тобо́ю бо, Всечи́стая,/ Христо́с Бог Сло́во воплоще́нно:/ И́мже просвеща́еми, с Небе́сными во́и Тя ублажа́ем.

Укрепи́вся си́лою Твое́ю и благода́тию,/ Тебе́ пе́снь усе́рдно от се́рдца возложи́х;/ но сию́ приими́, Де́во Чи́стая,/ благода́ть воздаю́щи Твою́ многосве́тлую,/ от нетле́нных сокро́вищ, Богоблаже́нная.

Поста́в показа́лася еси́ я́ве Божества́,/ в не́мже ри́зу телесе́ Сло́во истка́,/ богосоде́лав, Де́во, мой зрак;/ в него́же обле́кся, вся спасе́, от смы́сла чи́ста Тебе́ велича́ющия.

Ме́ртвым воскресе́ние ны́не дарова́ся Твои́м несказа́нным и неизрече́нным Рождество́м,/ Богоро́дице Всечи́стая:/ Жизнь бо, из Тебе́ Пло́тию обложи́ся, всем возсия́,/ и сме́ртную дря́хлость я́ве разруши́.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бы́сть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют.

Светоявле́ния духо́внаго испо́лнен быв, преподо́бне Се́ргие,/ свети́льник, сия́я издале́ча, яви́лся еси́,/ слове́сныя зари́ нам облиста́я,/ и Пребоже́ственныя Тро́ицы жили́ще показа́лся еси́.

Вои́стинну тя вели́ка учи́теля, му́дре Се́ргие, Росси́йским страна́м Христо́с дарова́,/ нело́жным правле́нием пра́вяща Оте́чество свое́,/ и уче́ния сладча́йша ме́да излива́юща:/ и́хже, я́ко от окри́на, и мы, ве́рнии, почерпа́ем незави́стно.

Душетле́нныя стра́сти победи́в,/ я́ко па́стырь и́стинный, упа́сл еси́ слове́сное Христо́во ста́до,/ е́же вы́ну благода́тию Ду́ха, я́ко цве́ты ра́йския, пита́я, преподо́бне.

Богоро́дичен: Псалмы́ Тя воспева́ем, Обра́дованная,/ и немо́лчно Ти, е́же ра́дуйся, вопие́м:/ Ты бо источи́ла еси́ всем ра́дование.

Ин

Ирмо́с: О́браз чи́стаго Рождества́ Твоего́,/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́лимся, пе́щь,/ да Тя, Богоро́дице,// непреста́нно велича́ем.

Любо́вию Христо́вою, му́дре, просвеща́емь, и доброде́тельми облистаемь,/ не оскверни́л еси́ души́ твоея́ добро́ту,/ ко отце́м преста́вился еси́ в до́брей ста́рости,/ и Бо́гу со А́нгелы, Се́ргие, предстои́ши.

Очи́сти на́ша согреше́ния, Сло́ве, и просвети́ о́чи серде́чныя,/ е́же чи́сто зре́ти Твою́ све́тлость Боже́ственнаго светоли́тия,/ моли́твами твоего́ уго́дника Се́ргия,/ да Тя вси велича́ем.

Богоро́дичен: О, стра́ннаго Твоего́ чудесе́!/ Ты бо, Де́во Богоро́дице, та́инство, пре́жде веко́в и родо́в сокрове́нное в Бо́зе, вся созда́вшем,/ ро́ждши Бо́га Сло́ва несказа́нно, яви́лася еси́.

Свети́лен:

Процве́л еси́, я́ко фи́никс, Дави́дски, о́тче,/ и оби́тель яви́лся еси́ Ду́ха Всесвята́го,/ И́же сла́вна тя вселе́нней показа́,/ о нас непреста́нно Христа́ моли́,/ почита́ющих ве́рою пречестну́ю па́мять Твою́,/ преподо́бне Се́ргие. [Два́жды].

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши на Боже́ственных объя́тиих/ Пребога́тое Сло́во, Невра́щное и Неизме́нное.

На хвали́тех стихи́ры на 4, глас 4.

Подо́бен: Зва́нный свы́ше:

Егда́ Боже́ственное зва́ние/ на́йде на тя, пребога́те,/ тогда́ все плотско́е мудрова́ние/ Ду́ху повину́л еси́,/ поще́ния страда́ньми утверди́вся,/ и я́ко зла́то в горни́ле искуше́но сия́я, яви́лся еси́./ Прия́телище был еси́ Ду́ха Пресвята́го,/ собра́в мона́шествующих мно́жества,/ и уче́нии твои́ми, я́ко не́коею небовосхо́дною ле́ствицею,/ на высоту́ доброде́телей возводя́./ Помина́й нас, Се́ргие, чту́щих па́мять твою́,/ спасти́ и просвети́ти душа́ на́ша. [Два́жды].

Возсия́ дне́сь пресве́тлая/ и всепразднественная па́мять твоя́, пресла́вне Се́ргие,/ созыва́ющи многочи́сленное по́стников сосло́вие,/ и преподо́бных ликостоя́ния,/ в не́йже А́нгелы сла́вят/ в Тро́ице покланя́емаго Бо́га на́шего,/ челове́цы же, притека́ющии/ к свяще́нней ра́це моще́й твои́х,/ исцеле́ния да́ры прие́млют./ И Тя венча́вшаго/ Христа́ прославля́ем,/ Спа́са душ на́ших.

Богоно́се и преблаже́нне/ о́тче Се́ргие,/ ты проро́чески/ посте́лю слеза́ми измыва́л еси́;/ не дал еси́ сна твои́м очесе́м,/ ни ве́ждом дрема́ния,/ серде́чное жела́ние е́же ко Христу́ явля́я,/ Его́же измла́да возлюби́в,/ вся́кия доброде́тели вид испра́вил еси́./ Те́мже тя ублажа́ем,/ Христа́ велича́юще,/ Тя просла́вльшаго.

Сла́ва, глас 2:

Преподо́бне о́тче,/ измла́да воздержа́нию прилежа́в, пости́вся,/ орга́н был еси́ Свята́го Ду́ха./ Тем и чуде́с дарова́ния прие́м,/ челове́ки научи́л еси́ преоби́дети маловре́менная./ Ны́не же неизрече́нным све́том све́тле сия́еши,/ просвети́ на́ша мы́сли хода́тайством твои́м,/ му́дре Се́ргие.

И ны́не, Богоро́дичен:

Все упова́ние мое́ на Тя возлага́ю,/ Ма́ти Бо́жия,// сохрани́ мя под кро́вом Твои́м.

Славосло́вие вели́кое. И отпу́ст.

На литурги́и

Блаже́нна пе́рваго кано́на песнь 3-я, и втора́го песнь 6-я. Проки́мен: Честна́ пред Го́сподем// сме́рть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́иа: Блаже́н муж, боя́йся Го́спода: Ева́нгелие: Луки́, зача́ло 24. Прича́стен: В па́мять ве́чную бу́дет пра́ведник: