Акафист Пресвятой Богородице в честь иконы Ее Табынской

Празднование в 9-ю пятницу по Пасхе

Кондак 1

Взбра́нной Воеводе рода христианскаго и страны нашея известней Изба́вительнице хвалебныя песни принесе́м, ве́рнии, Деве Владычице Богородице. Ты же, яко иму́щая милосердие неизрече́нное, от всяких нас скорбных обстоя́ний свободи́, да с любовию зовем Ти: Радуйся, похвало́ Табы́нская и всего мира надеждо и утешение.

Икос 1

Архангели и ангели дивя́тся Твоему неизрече́нному милосердию к роду человеческому, Дево Богородице, яко благоволи́ла еси яви́ти святую икону Свою близ града Казани, егда нечести́вии воздвиго́ша брань на мирныя люди, разоря́юще гра́ды и ве́си их. Ты же, Блага́я, хотя́щи уте́шити рабов Твоих пришествием Своим, скорбь их на радость преложи́ла еси́, сего ра́ди вопием Ти таковая: Радуйся, Благословенная в жена́х; радуйся, обретшая благодать у Бога. Радуйся, десни́цею Создателя Благословенная; радуйся, Духом Святым освященная. Радуйся, Мати Христа Бога нашего; радуйся в Рождестве и по Рождестве Дево. Радуйся, ангельских чинов удивление; радуйся, святых немо́лчное прославле́ние. Радуйся, похвало́ Табы́нская и всего мира надеждо и утешение.

Кондак 2

Прови́дящи, Мати Дево, беды́ и смятения о́крест града Казани, яви́ла еси святую икону Свою, наипаче же милость Свою, Владычие, людем, да не оскуде́ет вера, да не угаснет надежда, но да прославляется имя святое Отца и Сына и Святаго Духа вопиющими: Аллилуиа.

Икос 2

По времени образ Твой честны́й Казанский во мнозех граде́х и ве́сех страны нашея, на дсках изображенный, прояви́ силу благодатную истекающими, чудотворе́ньми, та́ко и у ве́си Табы́нския, близ Вознесенския обители святы́я, яви́ся новый образ Твой. Некогда диа́кон черне́ц, грядущий с се́ла во святую обитель, услыша Твой глас: «Да потщи́тся правоверующая братия богоспасаемыя обители прия́ти Мя во храм Господа Моего». Убоя́вся прельщения, не внят неземному гласу сему, паки же возвращающуся ему путем тем, слыша глас Твой, да прии́дет и видит. Уразуме́в, яко глаголы си́и свыше суть, прии́де на место, откуду слышен бысть глас сей и, узре́в святую икону Матере Божия на ка́мени ве́лием близ горы́ Табы́нския у источника воднаго, возрадовася духом. Мы же, дивя́щеся сему, вопием Ти си́це: Радуйся, явле́нием святы́я иконы Твоея́ милость Божию нам возвести́вшая; радуйся, чистым сердцем глас Твой святы́й яви́вшая. Радуйся, Мати щедрот и милосердия; радуйся, милости сокровище многоценное. Радуйся, с небесных высот на рабы́ Твоя призирающая; радуйся, покровом Твоим нас осеня́ющая. Радуйся, яко милость Твоя посещает христианския ве́си и гра́ды; радуйся, яко милосердие Твое сердец наших отрада. Радуйся, похвало́ Табы́нская и всего мира надеждо и утешение.

Кондак 3

Сила благодати Твоея́ осени́ сердце диа́кона благочести́ваго, узре́вшу ему святую икону Твою, Владычице, и, объят быв страхом величия Твоего, возрадовася зело́, со тщанием востече́ во обитель и возвести́ братии о дивнем обре́тении своем, радостно вопия Богу: Аллилуиа.

Икос 3

Иму́щи, Пресвятая Дево, икона Твоя силу благодатную, яви́ся иноком радостию ве́лиею, егда позна́ша милости Твоя, чрез икону Твою Табы́нскую людем явля́емыя, со страхом несо́ша святыню сию́ во обитель свою и пове́даша о сем воеводе Уфимскому и архиерею града Казани. Мы же благодарне вопием Пресвятей Деве таковая: Радуйся, помощь Свою всем притекающим к Тебе подающая; радуйся, слез наших не отвергающая. Радуйся, к Сыну Твоему моления о верных вы́ну принося́щая; радуйся, проше́ния наша во благо исполняющая. Радуйся, монашествующих покро́ве; радуйся, девствующих ограждение. Радуйся, телес наших укрепление; радуйся, душ наших спасение. Радуйся, похвало́ Табы́нская и всего мира надеждо и утешение.

Кондак 4

Буря крамо́лы, воздвигнутыя от мятежников, наважде́нных Айда́ром и Кусю́мою, разори́ обитель Вознесенскую, братию же, изби́вши, разсеятися пону́ди. Ты же, Всеблага́я, хотя́щи по времени яви́тися во славе ве́лией, сокрыла еси икону Свою чудотворную Табы́нскую. Мы же, дивя́щеся таковому промышле́нию Твоему, Владычице, вопием Богу: Аллилуиа

Икос 4

Слышащи, Богомати, стенания рабов Твоих ве́си Табы́нския и ве́дящи скорбь их, зане́ вера Христова поруга́ема быва́ше от неверных, в познание истины Христовой и изобличение неверных благоволи́ла еси паки второе яви́ти на камени том же образ Твой честны́й, светом божественным озаре́нный. Мы же, дивя́щеся таковому Твоему попечению о нас, вопием Ти таковая: Радуйся, явле́нием иконы Твоея́ Табы́нския свет истинныя веры земле Уфимстей дарова́вшая; радуйся, суеверием и зловерием омраче́нных просветившая. Радуйся, грешных исправление; радуйся, кающихся с Богом примирение. Радуйся, милость согрешившим явля́ющая; радуйся, раны греховныя истребляющая. Радуйся, скорбная сердца́ надеждою возрождающая; радуйся, любовию их согревающая. Радуйся, похвало́ Табы́нская и всего мира надеждо и утешение.

Кондак 5

Боготечную звезду, святую икону Твою, уви́деша нечести́вии башкиры, светящую на ка́мени, но не уразуме́ша Твоего, Владычице, пришествия, ко́сни бо сердцем бе́ша, ненавистию ко христианом распали́вшеся, надруга́шася над святынею. За таковое хуле́ние святыни Твоея́ слепотою наказани бывше, блужда́ху по лесу, не ве́дуще пети: Аллилуиа.

Икос 5

Видеша хули́телие святыни, яко зело́ нака́зани быша от Бога, не хотя́ху раскаятися, зане́ ожесточе́ни сердцем быша, то́кмо един от них, луче́ю благодати Божия просвеще́нный, раска́яся и, а́бие прозрев, возвратися со единоплеме́нники своими ко святе́й иконе и слезно моля́шеся пред нею, по молитве же его Мати Божия всех исцели. Сего ра́ди вопием Пречистей: Радуйся, торжество веры в стране нашей явля́ющая; радуйся, святою иконою Твое́ю окамене́нная сердца́ умягчающая. Радуйся, зловерия явное обличение; радуйся, истинныя веры утверждение. Радуйся, рода христианскаго возвышение; радуйся, святыни при́сное ограждение. Радуйся, яко Тобою беззаконие наказуется; радуйся, яко Тобою хула́ на Бога истребляется. Радуйся, похвало́ Табы́нская и всего мира надеждо и утешение.

Кондак 6

Проповедницы Твоея́ благодати яви́шася прозревшии магомета́не, возвести́ша христианом ве́си Табы́нския о Твоем, Богомати, явле́нии, но не прия́ша Крещения, то́кмо первый прозре́вый, и́же, прия́в веру православную, возрадовася зело́ и рече́ всем притекавшим ко источнику целебному: «Се ныне позна́х, яко ве́лий есть Бог земли́ Российския», со умилением вопия Ему: Аллилуиа.

Икос 6

Возсия́ свет Божественный, Владычице, егда святая икона Твоя с честию ве́лиею принесе́на бысть от ме́ста явле́ния своего в весь Табы́нскую, изливающи верным да́ры целебныя и всем подающи помощь и утешение с верою к Тебе во всякой скорби притекающим и вопиющим таковая: Радуйся, отчаявшихся прибежище; радуйся, скорбя́щих слы́шание. Радуйся, печальных утешение; радуйся, христианом отра́до и ограждение. Радуйся, в беда́х и печалех теплое заступление; радуйся, яко немо́щным да́руеши укрепление. Радуйся, скорбь нашу на радость претворяющая; радуйся, наветы вражия от нас отгоняющая. Радуйся, похвало́ Табы́нская и всего мира надеждо и утешение.

Кондак 7

Хотя́ще ве́рнии ве́си Табы́нския вы́ну па́мятовати о чудеснем явле́нии иконы Твоея́, Владычице, сотвори́ша в пято́к девятый по Пасце празднование втора́го явле́ния ея, благодаря́ще Заступницу усердную, Богу же воспевающе: Аллилуиа.

Икос 7

Новое чудо яви́ла еси Богородице, егда за беззакония людей праведный гнев Божий пости́же град Стерлитама́к, поразив их болезнию холерною. Ве́рнии с благословения архиерея Иоанни́кия, взе́мше святую икону Твою, Богомати, Табы́нскую, принесо́ша ю во свой град и сле́зно пред нею молишася. Егда совершено́ бысть молебное пение, болезнь смертная оста́ви град. Видяще же лю́дие милость Твою, Богородице, возопиша Тебе таковая: Радуйся, за люди согрешившия при́сно пред Сыном Твоим и Богом хода́тайствующая; радуйся, праведный гнев Божий, на них дви́жимый, на милость преклоняющая. Радуйся, прекращением холеры благодатную силу иконы Твоея́ нам возвести́вшая; радуйся, милость Божию к согрешившим яви́вшая. Радуйся, надеждо ненадежных; радуйся, опора немощны́х. Радуйся, заблудших на путь покая́ния наставляющая; радуйся, веру в жизнь будущаго века в них пробуждающая. Радуйся, похвало́ Табы́нская и всего мира надеждо и утешение.

Кондак 8

Странное чудо зрим о Тебе, Богомати, егда икона Твоя Табы́нская принесе́на бысть во град Оренбург во время мора смертнаго и, то́кмо яви́ся во граде сем святая икона Твоя, а́бие мор преста́; сего ра́ди ве́рнии града сего на ко́еждо ле́то ко дню Рождества Твоего с радостию ве́лиею срета́ху святую икону Твою Табы́нскую, со умилением вопиюще Богу: Аллилуиа.

Икос 8

Весь аз недостойный грехи исполнися, мирско́му разсе́янию вда́ся и о душе́ своей вознераде́в, оба́че, на святую икону Твою, Владычице, взирая и просвещение от нея́ безчисленным людем зде приходя́щии ви́дя, паки на путь спасения устремляюся и в радости се́рдца воспеваю Ти си́це: Радуйся, шествовати путе́м Господним нас научающая; радуйся, на пути ко Господу нас укрепляющая. Радуйся, жестокосердия искоренение; радуйся, милосердия в сердцах насаждение. Радуйся, обидящим прощати нас научающая; радуйся, к подвигу целомудрия нас призывающая. Радуйся, от земнаго богатства ду́ши верных отвращающая; радуйся, духовными дарова́ньми моля́щихся обогащающая. Радуйся, похвало́ Табы́нская и всего мира надеждо и утешение.

Кондак 9

Вси лю́дие земли́ Уфимския, егда праведный гнев Божий наказа́ их бездождием, со слеза́ми моли́ша Заступницу христианскую испроси́ти у Сына Своего и Бога, да оросит землю их дожде́м, и, егда ве́рнии ве́си Архангельския, взе́мше святую икону Табы́нскую, несо́ша ю на се́ла своя, бысть дождь ве́лий, на радость скорбя́щим и во утешение плачущим, да воспоют Господу благодарным сердцем: Аллилуиа.

Икос 9

Вити́й глаголы и любомудров смыслы не довлеют ко изглаго́ланию чудес Твоих, Владычице неба, яко во утешение жителем Стерлитама́ка, низпославши свыше дождь ве́лий на землю, сим избавила еси град их от глада и запале́ния огненнаго, яко да потреби́тся от лица скорбя́щих всяка печаль и всяка болезнь, сего ра́ди вопием Ти: Радуйся, обуреваемых тихое пристанище; радуйся, источниче милостей Господних. Радуйся, унылых ободряющая; радуйся, моления скорбя́щих ко Господу вознося́щая. Радуйся, хода́тайством Твоим от зноя и жажды нас спасающая; радуйся, молитвами Твоими от запале́ния огненнаго избавляющая. Радуйся, яко алчущих питаеши; радуйся, яко во мра́зе сущих согреваеши. Радуйся, похвало́ Табы́нская и всего мира надеждо и утешение.

Кондак 10

Спасти хотя́щи, Пресвятая Богородице, стра́ждущаго трясави́цею Василия воина от града Оренбурга, исцеление подала еси ему чрез икону Свою Табы́нскую. Сей воин во сне двукра́ты в весь Табы́нскую идя́ше и тамо Матерь Божию об исцелении моля́ше. Уразуме́в в со́ниих волю Владычицы, по́йде немощны́й двесте три́десять по́прищ, тружда́яся и мно́жицею на земли́ падая. Прише́дшу же ему в Табы́нскую весь, егда погрузи́ся во источник святы́й, иде́же икона Твоя яви́ся, а́бие исцеле́н бысть и, радуяся, благодаря́ще Матерь Божию, вопия́ Господу: Аллилуиа.

Икос 10

Стена неруши́мыя веры яви́лася еси, Богородице, боголюби́вому о́троку, имевшему части некия от ка́мене, на немже яви́ся икона Твоя; егда бо боля́щии, омывше частицы ка́мене водою, пия́ху ю и омываху ею раны своя, а́бие исцеление приима́ху. Мы же, благодать Твою видяще, зане́ и ка́мени силу чудотвори́ти дарова́ла еси, вопием Ти си́це: Радуйся, святы́я ключи́ целебною водою прославившая; радуйся, камню, на немже яви́ся святая икона Твоя Табы́нская, благодатную силу дарова́вшая. Радуйся, всем с верою притекающим к цельбоно́сней иконе Твоей исцеление подающая; радуйся, благодарения их ко Господу вознося́щая. Радуйся, яко к помощи Твоей и маловернии притекают; радуйся, яко по повелению Твоему и разсла́бленнии со одра́ болезни возстают. Радуйся, бесо́в изгнание; радуйся, помраче́нных умов просветление. Радуйся, похвало́ Табы́нская и всего мира надеждо и утешение.

Кондак 11

Пение хвалебное возсыла́ху Тебе, Матери Божией, вси лю́дие, стоя́щии в храме Твоем, видевше покая́ние согрешившаго и милосердие Твое к нему; некий бо воин Гавриил за нарушение обета, даннаго Тебе, в разслабле́ннии сущий, исцелен бысть, егда, святаго та́инства Елеосвяще́ния сподо́блься, к чудотворному образу Твоему припаде́. Мы же, грешнии, многажды Господа грехи́ Своими прогневляющии, молим Тя и нам прощение грехов испроси́ти, со упованием вопиющим Богу: Аллилуиа.

Икос 11

Свет зрению дарова́ла еси, Владычице, ста́рице некоей, осмь лет во граде Оренбурге слепотою страдавшей. Егда бо в сре́тение иконы Твоея́ и́де, сро́дницею свое́ю оставлена бысть, стеснения ра́ди народа, внеза́пу же прозре́ и, видящи икону Твою святую, возрадовася зело́. Мы же со трепетом вопием Ти си́це: Радуйся, благодатная врачевания обильно источающая; радуйся, исцелением неду́гов притекающих к Тебе веселящая. Радуйся, слепых прозрение; радуйся, глухих слы́шание, немых глаголание. Радуйся, хромых хождение; радуйся, вдов и сиро́т заступление. Радуйся, душ наших освящение; радуйся, земнородных упование. Радуйся, похвало́ Табы́нская и всего мира надеждо и утешение.

Кондак 12

Благодать Твою яви́ нам, Пресвятая Мати Дево, молящимся Тебе пред честно́ю иконою Твое́ю Табы́нскою. Излей щедроты Твоя на гра́ды и ве́си не то́кмо края Приуральскаго, но и во всем мире честны́й образ Твой почитающим и пою́щим Богу: Аллилуиа.

Икос 12

Пою́ще Твоя чудеса, от иконы Твоея́ Табы́нския явле́нная, молим Тя, Владычице, лика Твоего от страны нашея не отврати́ и всем приходя́щим к чудотворному образу Твоему и милости от Тебе ожидающим во благо́е вся проше́ния исполни, да вси воспоем Ти си́це: Радуйся, иконою Твое́ю благословение Божие краю нашему принося́щая; радуйся, источник Твой, яко проповедника спасения, ве́си Табы́нстей оставившая. Радуйся, смиренных сердцем богове́дением просвещающая; радуйся, славу Божию воспевати нас научающая. Радуйся, к Тебе бо падшии в покая́нии притекают; радуйся, яко призывающии имя святое Твое от падения греховнаго возстают. Радуйся, в час смертный чту щих Тя не оставляющая; радуйся, и по смерти во обители небесныя ду́ши их сопровождающая. Радуйся, похвало́ Табы́нская и всего мира надеждо и утешение.

Кондак 13

О Всепетая Мати Христа Бога нашего, приими́ молитвы раб Твоих и мир испроси́ всем с верою и любовию притекающим к иконе Твоей Табы́нской, и живот вечный да́руй им, во умилении поющим: Аллилуиа.

Этот кондак читается трижды, затем 1-й икос «Архангели и ангели...» и 1-й кондак «Взбранной Воеводе...».

Молитвы

О Пресвятая Владычице Дево Богородице! Приими́ мольбы от нас, прилежно призывающих и моля́щихся Тебе, покажи скорое Твое заступление, покажи, яко можеши. Яко Матерь Бога, призываем Тя от сердца, со слеза́ми припа́дающе пред пречистым Твоим образом. О Божия Мати! Спаси нас и не даждь в расхищение супоста́том, ниже́ да на́йдут на ны вся злая, я́же грехи́ наша угото́ваша нам; ниже́ беззакония наша да взы́дут на главы́ наша. Виждь наша нестерпимыя печали, скорби, ну́жды, болезни, страсти; вооружися на ны лукавно враг, язы́ком, якоже мече́м, хотя нас погуби́ти, но Ты, Богороди́тельнице, Твое́ю крепостию предвари́. Уста человеков, яко львов лютых, гроба тягчайша, отверзо́шася горько поглоти́ти ны; но Ты, Богороди́тельнице, яви́ся надежда ненадеющимся и низложи́ крепость их, да у́зрят врази́ и постыдятся, да разумеют и видят Твою е́же по нам борю́щую силу, и в пропасть преисподнюю низложи́ их. Да заградится всяк язык, лукавым поуча́яйся; да молчат уста́ льстивая и уста́ неправедно глаголющая на праведнаго беззаконие, гордынею и завистию враждебною вку́пе. Призывающих Тя, Богородице, от ду́ши нело́жно во всякой скорби и в болезнех различных, и в беда́х лютых, скоро услыши, Владычице, сих избавляющи при́сно молитвами Своими; душ спасение, веры сохранение, от греховных навыков избавление, мирную христианскую кончину и Царствия Небеснаго наследие да́руй нам, да славословится имя Твое, Богородице, на земли́, Тя бо Иже из Тебе возсия́вый Христос Бог наш грешником державную надежду и сте́ну неруши́мую дарова́ во веки веков. Аминь.

О Пресвятая Владычице Богородице, Мати Господа нашего Иисуса Христа, непрестанная о нас пред Богом Молитвеннице и Хода́таице. О Мати наша Преблага́я, всех нас при Кресте Сына Твоего усыновившая! Благодарим Тя, безчисленная блага́я молитвою Свое́ю нам испроси́вшая! Благодарим Тя, множество икон Твоих чудотворных стране нашей дарова́вшая! Благодарим Тя, дивную икону Табы́нскую в годину скорбе́й краю Уральскому пославшая! На ка́мени ве́лием икону Свою сию́ нам яви́вшая, молим Тя: Окамене́нная сердца́ наша росою молитв Твоих умягчи́. Милость Свою нам показавшая у источника водна́го, иде́же болезни наша телесныя исцеляются, да́руй нам потоки скорбных слез и очисти ими тину грехов наших. У источника славнаго иконою Твое́ю благоволе́ние месту сему́ показавшая, помози́ нам слово Господа, Сына Твоего, исполнити и соль земли́ быти. Лик Свой темный нам грешным, омраче́нным грехом, яви́вшая, просвети тьму нашу душевную, освяти пути жизни нашея и приведи нас к тихому пристанищу в вечныя обители, угото́ванныя Господом любящим Его. Аминь.