Акафист Пресвятой Богородице в честь иконы Ее «Споручница грешных»

Празднование 7/20 марта и 29 мая/11 июня и в четверг по Пятидесятнице

Кондак 1

Избра́нней от Всевышняго, грешных Спору́чнице, преклоняющей на милосердие Сына Своего, да спасе́т я́же созда́ рукою Свое́ю, благодарственное пение приносим Ти, Мати Дево и Владычице, о я́влении дивныя Твоея́ и чудотворныя иконы, Ты же, яко предста́тельство ко Господу иму́щи, потщи́ся от обстоя́ний многообра́зных избавити ны и вечное спасение нам соде́лати, да, воспевающе, вопием Ти: Радуйся, грешным Спору́чнице, всегда о нас ру́це Свои в поруче́ние Богу принося́щая.

Икос 1

Ангелов лики благоговейно Тебе служат и святи́и вси немо́лчными гла́сы Тя ублажают, Богородице Дево, яко рождшую ангелов Царя, Христа Бога нашего, мы же, грешнии, подража́ти им дерза́юще и благохвали́ти Тя недоуме́юще, смиренному́дренно архангельский глас вопием Ти, Чистая: Радуйся, Благодатная, Господь с Тобою; радуйся, Преблагослове́нная в жена́х, Дево Всенепорочная. Радуйся, Дщи Отца Небеснаго; радуйся, Мати Сына Превечнаго. Радуйся, Духа Святаго селе́ние; радуйся, ангелов и человек непрестанное удивление. Радуйся, Честне́йшая херувим; радуйся, Сла́внейшая без сравнения серафим. Радуйся, грешным Спору́чнице, всегда о нас ру́це Свои в поруче́ние Богу принося́щая.

Кондак 2

Видящи Премилосердная Матерь Божия земное скорбное житие наше, не́мощи и болезни, благоизво́ли дати нам в благословение и утешение, в радость и спасение и от всяких бед и напастей ограждение икону Свою святую, Спору́чницею грешных в ней наре́кшися, да радостная пред се́ю иконою Ей принося́ще, радостно всегда пою́т Богу: Аллилуиа.

Икос 2

Разум небесный открывающи, Богородице Дево, благоизво́лила еси многими чудесы́ прославити икону Твою святую, Спору́чница грешных именуемую, да вси, ве́дуще таковое Твое о ней благоволе́ние, пе́сненно Тебе зовут: Радуйся, Милосердная всех нас о Христе Мати; радуйся, неистощи́мая сокровищнице Божественныя благодати. Радуйся, Тобою бо нисхо́дит к нам Божие благоволе́ние; радуйся, Тобою бо и́мамы вя́щее к Богу дерзнове́ние. Радуйся, молитвы всех христиан приемлющая; радуйся, и самых отчаянных грешников моления не отвергающая. Радуйся, предста́тельством бо Твоим спасти́ся уповаем; радуйся, молитвами бо Твоими Царство Небесное получи́ти ча́ем. Радуйся, грешным Спору́чнице, всегда о нас ру́це Свои в поруче́ние Богу принося́щая.

Кондак 3

Сила благодатная осеня́ет всех, Преблагослове́нная Мати Божия, с верою к Тебе, яко Спору́чнице грешных, притека́ющих и святе́й иконе Твоей покланя́ющихся: единей бо то́кмо Тебе даде́ся дар всякое благо́е проше́ние скоро исполня́ти и грешных миловати и спасати, и едина то́кмо Ты можеши воистину всем помощи́ ели́ка хо́щеши, Богу пою́щим: Аллилуиа.

Икос 3

Иму́щи ма́тернее о всех всеблаго́е промышле́ние, Ты, Всеблага́я Мати Божия, и самых отчаянных грешников ко спасению призыва́еши, глаголющи: «Аз есмь Спору́чница грешных к Сыну Моему и Богу, И́же и обеща́ Мне слышати Мя всегда, да радостная Мне принося́щии вечно ра́доватися будут чрез Мене́». Сего ра́ди мы, грешнии, Тебе, яко Спору́чнице нашей, радостно зовем: Радуйся, Заступнице усердная, от Бога нам дарова́нная; радуйся, к Небесному Отечеству Путеводи́тельнице наша Благодатная. Радуйся, от ро́ва погибели исхищающая; радуйся, безпомощных на Свои всемо́щныя ру́це приемлющая. Радуйся, непреста́нно уныние отгоняющая; радуйся, па́дших ко благодати возставля́ющая. Радуйся, слово премудрости прося́щим да́рующая; радуйся, и неразумных разумными соде́лывающая. Радуйся, грешным Спору́чнице, всегда о нас ру́це Свои в поруче́ние Богу принося́щая.

Кондак 4

Бурею сомнений искушаемая некая жена́ не хотя́ше веровати чудесе́м, от иконы Твоея́ Спору́чницы бываемым, но внеза́пу язвою смертоносною пораже́нная, позна́ силу Твою всемо́щную, Владычице, и чудотворныя иконы Твоей благодать и, раскаявшися, слезно моля́ше Тя о прощении неверия ея́, милосердием же Твоим исцеле́нная, благодарственно Богу о Тебе всегда вопия́ше: Аллилуиа.

Икос 4

Слышит Господь Твоя о нас на небеси́ ходата́йства, Царице Небесная, и исполня́ет Твоя проше́ния, мы же, грешнии, яко Всеблагу́ю Скоропослушницу и Спору́чницу нашу, просим и молим Тя: Владычице, скоро услыши моления наша и вся наша печали на радость преложи́ и проше́ния всех зде моля́щихся скоро испо́лни, да радостно всегда пое́м Ти: Радуйся, принося́щая к Сыну Твоему и Богу моления верных; радуйся, и Сама у Престола Сына Твоего всегда о нас моля́щаяся. Радуйся, Спору́чнице грешных; радуйся, Взыскание поги́бших Радуйся, неча́янную радость верным да́рующая; радуйся, и наша проше́ния скоро исполня́ющая. Радуйся, Милостивая, всегда нас ми́лующая; радуйся, житие наше доброе устроя́ющая. Радуйся, грешным Спору́чнице, всегда о нас ру́це Свои в поруче́ние Богу принося́щая.

Кондак 5

Яко лучезарную звезду, весь мир озаряющую, показала еси нам, Владычице Мира, честну́ю Твою икону, Спору́чницею грешных именуемую, на нюже взирающе, Самой Тебе, истинней Божией Матери и Деве, покланяемся, глаголюще: Владычице, приими́ молитвы Раб Твоих и изба́ви ны от всякия нужды и печали, восхваляющих Тя и Богу воспевающих: Аллилуиа.

Икос 5

Некий благоговейный муж страхом ве́лиим преиспо́лнися, егда в нощь Светлаго Христова Воскресения ви́де икону Твою, Спору́чнице Всеблага́я, светом небесным блистающую и, яко дождевыя капли, ми́ро источа́ющую; познав в сем зна́мение милости Твоея́ к людем, со слеза́ми умиления и благодарения радостно воспе́ Тебе, Преблагослове́нней Матери Божией: Радуйся, огнь Божественный неопа́льно державшая, имже грехи наша попаля́ются; радуйся, Свет неприкосновенный носи́вшая, имже ду́ши наша просвещаются. Радуйся, ру́це Свои в поруче́ние о нас Богу принося́щая; радуйся, вход в Царство Небесное и нам, грешным, отверза́ющая. Радуйся, яко молния, тьму грехов наших разсека́ющая; радуйся, яко ми́ро благовонное, сердца́ наша умягчающая. Радуйся, источники чудес всюду источающая; радуйся, иконою Твое́ю вся люди возвеселя́ющая. Радуйся, грешным Спору́чнице, всегда о нас ру́це Свои в поруче́ние Богу принося́щая.

Кондак 6

Весь мир христианский проповедует милости и чудеса Твоя, Препросла́вленная Мати Господа, и све́тло красуется многими чудотворными Твоими иконами, среди ко́их икона Твоя, Спору́чница грешных именуемая, яко луна полная, лучами милости Твоея́ и чудес немерцаемо сияет, просвещающи и освещающи ду́ши наша светом Божия благодати, подвиза́ющи нас хвалебно Богу взывати: Аллилуиа.

Икос 6

Возсия́ в одну из ноще́й свет небесный в храме Нико́ло-Хамо́вническом, егда прия́т образ Твой чудотворный «Спору́чница грешных». Светильники тогда и лампады невидимою силою в храме сем возжига́хуся, свеща́ горящая аки в служении незримо кем о́крест престола ноша́шеся. Лю́дие же, вне храма стоя́вшии и сия́ вся видевшии, дивля́хуся, сла́вяще Тя, Мати Божия, и Сына Твоего; мы же, воспомина́юще дивное сие́ виде́ние, с умилением Тебе глаголем: Радуйся, скорби наша в радость претворяющая; радуйся, ненадеющихся несумненною надеждою возвеселяющая. Радуйся, свеще́, у Престола Божия при́сно горящая; радуйся, лампа́до, еле́ем Божественным светя́щая. Радуйся, све́те лучезарный, путь жизни нам указу́ющий; радуйся, храме одушевле́нный, всех нас освящающий. Радуйся, уповающим на Тя не постыдну жизнь да́рующая; радуйся, и по смерти неотсту́пно о них пред Богом хода́тайствующая. Радуйся, грешным Спору́чнице, всегда о нас ру́це Свои в поруче́ние Богу принося́щая.

Кондак 7

Хотя долготерпеливый Господь яви́ти бездну Своего человеколюбия и щедрот, избра́ Тебе, Пресвятая Дево, в Матерь Себе и яви́ Тя неисчерпа́емым источником милостей Своих, да аще кто праведным судом Божиим осуждения достоин, Твоим хода́тайством, яко грешным Спору́чницы, сохране́н будет, велегла́сно зовы́й: Аллилуиа.

Икос 7

Дивна дела́ Твоя показал еси нам, Господи, в Пречистей Твоей Матери и дивну дарова́л еси нам Ея икону, паче лучей солнечных просвещающую людей, яко Самую зря́щих Богородицу и верою сердечною, от души́ любовию, яко Божией Матери и Деве, Ей вопиющих: Радуйся, купе́ле, в нейже вся скорби наша погружаются; радуйся, ча́ше, е́юже радость и спасение вси восприе́млем. Радуйся, Живоносный Источниче, всех нас оживотворя́ющий; радуйся, Цве́те Неувяда́емый, всех нас облагоуха́ющий. Радуйся, скорбе́й наших услаждение; радуйся, печалей наших утоление. Радуйся, болезней наших врачевание; радуйся, от бед скорое наше избавление. Радуйся, грешным Спору́чнице, всегда о нас ру́це Свои в поруче́ние Богу принося́щая.

Кондак 8

Странники и пришельцы есмы́ на земли́ и, по глаголу апостола, не и́мамы зде пребывающаго града. Но к кому прибе́гнем, Владычице, в ско́рбех жития нашего, аще не к Тебе, Всеблагая Спору́чнице о нас грешных! Не отве́ржи нас, Мати Божия, и не рцы нам: «Не вем вас, грехов ра́ди ваших», но помилуй нас, си́рых и безпомощных, и приими́ нас в вечныя кро́вы, Покровительнице наша, да радостно вопием во славе небесней Царю Славы Христу: Аллилуиа.

Икос 8

Всем верным уте́шительно есть взира́ти на святую икону Твою, Владычице, Спору́чнице грешным, на нейже зрим Тя, на руку́ Твое́ю держа́щую Превечнаго Младенца, Господа нашего Иисуса Христа, Емуже покланя́ющеся боголепно, яко Творцу и Богу нашему, Тебе, истинней Богородице, умильно глаголем: «Владычице, помози́, на ны милосе́рдовавши, потщи́ся, погибаем от множества прегреше́ний, не отврати́ Твоя рабы́ тщи, Тебе вопию́щия: Радуйся, алчущих Питательнице; радуйся, нагих одеяние. Радуйся, вдов Защитительнице; радуйся, сиро́т Покровительнице. Радуйся, гонимых и оби́димых Заступнице; радуйся, стра́ждущих и плене́нных скорая Освободительнице. Радуйся, грешным Спору́чнице, всегда о нас ру́це Свои в поруче́ние Богу принося́щая.

Кондак 9

Все естество́ ангельское похвальная песнопе́ния приносит Тебе, Божией Матери и Спору́чнице всех припа́дающих Тебе и прося́щих Твоея́ помощи и Твоего утешения, яко твердым и крепким Твоим предста́тельством праведных весели́ши, грешных заступаеши и от бед избавляеши и печали утоляеши и мо́лишися о всех, верою зовущих о Тебе Богу: Аллилуиа.

Икос 9

Вити́йствующий всяк язык недоуме́ет благохвали́ти Тя по достоя́нию, изумева́ет же ум и премирный пети Тя, Богородице; оба́че Блага́я су́щи, веру приими́, ибо любовь ве́си божественную нашу, Ты бо христиан еси Предста́тельница, Тебе зовущих: Радуйся, сиянием пречистыя души́ Твоея́ всю землю просветившая; радуйся, чистотою телесе́ Твоего вся небеса возвесели́вшая. Радуйся, всех нас при Кресте Сына Твоего усыновившая; радуйся, всегда ма́тернюю любовь Твою к нам явля́ющая. Радуйся, всех даро́в духовных и телесных всемо́щная Пода́тельнице; радуйся, благ вре́менных и вечных усердная нам Хода́таице. Радуйся, двери Царствия Христова верным отверза́ющая; радуйся, и на земли́ радостию и веселием сердца́ наша исполняющая. Радуйся, грешным Спору́чнице, всегда о нас ру́це Свои в поруче́ние Богу принося́щая.

Кондак 10

Спасти хотя род человеческий от вечныя му́ки и непрестающия ско́рби, Человеколюбец Господь Тебе, Матерь Свою, дарова́ земным на помощь, глаголя: «Сы́нове человечестии, се Мати Моя покровом и прибежищем вам да будет: печальным – утешением, скорбя́щим – радованием, оби́димым – Заступницею, бедствующим – по́мощию, больным – Целительницею, грешным – Спору́чницею, да всех из глубины греховныя воздвигнет, вопиющих: Аллилуиа».

Икос 10

«Царю Небесный, Сыне и Боже Мой, – та́ко молит о нас всегда Небесная Царица, – приими́ всякаго человека, сла́вящаго Тя и призывающаго имя Твое святое, и прославляющих Мя имене Твоего ра́ди, и не отри́ни их от лица Твоего, но благоволи́ в них и приими́ от них всякое благо́е моление и всех от бед изба́ви». Мы же, грешнии, наде́ющиися на Твоя Ма́терния молитвы, зовем Ти: Радуйся, яко Ты еси Молитвенница наша к Богу те́плая; радуйся, яко Твоя молитва всегда пред Богом многомо́щна. Радуйся, Твоими молитвами и наша убогая моления богоприя́тными соде́лывающая; радуйся, и наше недостоинство Твоим предста́тельством восполня́ющая. Радуйся, кающихся грешников непостыдная Спору́чнице; радуйся, всех христиан православных Заступнице. Радуйся, вся наша болезни исцеляю́щая; радуйся, о́блак страстей и искушений разгоняющая. Радуйся, грешным Спору́чнице, всегда о нас ру́це Свои в поруче́ние Богу принося́щая.

Кондак 11

Пение всеумиле́нное приими́ от нас, Небесная Спору́чнице наша, и молитву, приноси́мую Тебе, Деве Богородице, скоро услыши; к Тебе бо в напастех, ско́рбех и печалях прибегаем и пред Тобою в беда́х наших сле́зы проливаем и молим: Владычице, утоли́ наша печали и приими́ молитвы раб Твоих, о Тебе пою́щих: Аллилуиа.

Икос 11

Светлыми лучами зна́мений и чудес немерца́емо сияет святая икона Твоя, Богородице Дево, и всех благодатно озаряет, с верою пред нею Тебе моля́щихся, прогоня́ющи всякое вражие де́йство силою Божиею, от нея́ исходя́щею. Темже радуемся мы, грешнии, иму́ще таковую чу́дную икону Твою в храме своем, яко залог Твоего к нам и ко храму нашему благоволе́ния, и Тебе, Спору́чнице нашей и Скоропослушнице молений наших, благодарственно взываем: Радуйся, радость благодатную нам изливающая; радуйся, утешение духовное скоро нам подающая. Радуйся, желания богоугодныя исполня́ющая; радуйся, во всяких скорбных обстоя́ниих на помощь нам поспешающая. Радуйся, в вере и благочестии живущих зело́ лю́бящая; радуйся, сердца́ их любовию к Богу и людем воспламеняющая. Радуйся, в час недоуме́ния мысль бла́гу на сердце полагающая; радуйся, во всем упование на Бога име́ти нас научающая. Радуйся, грешным Спору́чнице, всегда о нас ру́це Свои в поруче́ние Богу принося́щая.

Кондак 12

Благодать Божия, присущая святе́й Твоей иконе, «Спору́чницею грешных» именуемой, Богомати Владычице, влече́т к ней всех скорбя́щих и грехми́ многими и напастьми обремене́нных, и не тщи отходят они от сего источника многообра́зных Твоих милостей и щедрот, но в ско́рбех – отраду, в напастех – защиту, в болезнех – цельбу́ и вся для душ и телес благопотребная неоску́дно получают от чудотворнаго образа Твоего, Всеблага́я, аще по Бозе все упование на Тя возлагают, пою́ще: Аллилуиа.

Икос 12

Пою́ще неизрече́нное Твое Ма́тернее к нам грешным милосердие, хвалим Тя, яко Всемо́щную Спору́чницу нашу, благословляем Тя, яко Всеблагу́ю Скоропослушницу молений наших, и со умилением покланя́емся Тебе в честне́й Твоей иконе, веруем бо и уповаем, яко и ныне испро́сиши нам у Сына Твоего и Бога, да в жизни сей и по смерти нашей милосердие Его неотступно будет от всех, с любовию пою́щих Ти: Радуйся, Твоими молитвами весь мир спасающая; радуйся, Твоими хода́тайствы всю вселенную заступающая. Радуйся, всем с верою притекающим скоро помогающая; радуйся, и Небеснаго Царствия им верно испроша́ющая. Радуйся, на икону бо Твою взирающе, Самой Тебе, истинней Богородице, покланя́емся; радуйся, Твоим предста́тельством вся блага́я желания наша скоро исполняющая. Радуйся, и в час смертный верных Своих не оставляющая; радуйся, и по смерти о вечно блаже́ннем их упокоении хода́тайствующая. Радуйся, грешным Спору́чнице, всегда о нас ру́це Свои в поруче́ние Богу принося́щая.

Кондак 13

О Всепетая Мати, Всеблага́я Спору́чнице спасения грешных, Богородице Дево! Приими́ милостиво и нынешнее наше моление, е́же от усердия нашего во благодаре́ние Ти принесо́хом, и испроси́ нам у Всещедраго Бога в вере православней непоколеби́мость, в любви христианстей преуспе́яние и грехов наших прощение, да предста́тельством Твоим унасле́дим Царство Небесное и сподо́бимся со всеми святыми пети Богу: Аллилуиа.

Этот кондак читается трижды, затем 1-й икос «Ангелов лики...» и 1-й кондак «Избранней от Всевышняго...».

Молитва

К кому возопию́, Владычице, к кому прибе́гну в горести моей, аще не к Тебе, Царице Небесная? Кто плач мой и воздыхание прии́мет и молениям нашим скоропослушливо вне́млет, аще не Ты, Всеблага́я Спору́чнице, всех наших радостей Радость? Услыши же и нынешняя песнопения и моления, о мне, грешнем, Тебе приноси́мая, и бу́ди мне Мати и Покровительница и радости Твоей всем нам Пода́тельница. Устрой жизнь мою, якоже хо́щеши и якоже ве́си. Вруча́ю бо себе Твоему покрову и промышле́нию, да радостно всегда пою́ Тебе со всеми: Радуйся, Благодатная; радуйся, Обра́дованная; радуйся, Преблагословенная; радуйся, Препросла́вленная, во веки. Аминь.