(л. ѻ҃ѳ) Знамєна́нїѧ і҆ѡа́нновы є҆пїсто́лїи вторы́ѧ.

[а҃] Ѡ҆ проглаше́нїи, ѡ҆ пе́рвѣмъ житїѝ въ любвѝ бж҃їей, вѣ́рою благоче́стною, и҆ неприло́жнꙋ грѣсѣ̀.

[а҃] Въ не́мже, ꙗ҆́кѡ не подоба́етъ є҆ретїка̀ въ до́мъ прїима́ти, и҆лѝ цѣлова́ти ѡ҆ грѣсѣ̀.

[в҃] Ѡ҆ ѡ҆бѣща́нїи прише́ствїѧ є҆гѡ̀, и҆ ѡ҆ ᲂу҆пова́нїи на по́льзꙋ.

Сказа́нїе втора́гѡ собо́рнагѡ посла́нїѧ ст҃а́гѡ і҆ѡа́нна бг҃осло́ва.

(сꙋⷠ҇) Сїѐ ꙗ҆́кѡ ста́рецъ пи́шетъ господы́ни и҆ ча́дѡмъ є҆ѧ̀. непщева́нїе же посла́нїю сїѐ є҆́сть: Ви́дѧ ча̑да є҆ѧ̀ до́брѣ ходѧ́ща въ вѣ́рѣ, и҆ мно́ги лестцы̀ ѡ҆бходѧ́щихъ, и҆ глаго́лющихъ не бы́ти прише́ствїю хрⷭ҇то́вꙋ во пло́ти: пи́шетъ посла́нїе сїѐ, и҆ пе́рвѣе ᲂу҆́бѡ хва́литъ ча̑да є҆ѧ̀. Та́же ᲂу҆чѧ̀ не но́вꙋ бы́ти є҆́же по на́мъ та́инствꙋ, па́ки пи́шетъ ѡ҆ любвѝ, и҆ да пребыва́ютъ во ᲂу҆че́нїи пре́даннѣмъ и҆̀мъ ѿ негѡ̀. И҆ про́чее ᲂу҆чи́тъ а҆нті́хрїстꙋ бы́ти, глаго́лющемꙋ, не прише́дша хрⷭ҇та̀ во пло́ти. Завѣщава́етъ же, ꙗ҆́кѡ таковы́хъ ни є҆ди́нагѡ прїима́ти въ до́мъ, нижѐ глаго́лати таковы̑мъ, ра́доватисѧ. И҆ си́це скончава́етъ посла́нїе. (л. ѻ҃ѳ ѡ҆б.)

СОБО́РНОЕ ПОСЛА́НІЕ ВТОРО́Е

СТ҃А́ГѠ А҆ПО́СТОЛА І҆ѠА́ННА БГ҃ОСЛО́ВА.

Глава̀ пе́рваѧ.

(заⷱ҇ ѻ҃є) [а҃] сⷯ а҃ Ста́рецъ ꙳ Пѧто́къ л҃є-ѧ недѣ́ли: Ста́рецъ ꙳ и҆збра́ннѣй господы́нѣ, и҆ ча́дѡмъ є҆ѧ̀, и҆̀хже а҆́зъ люблю̀ вои́стиннꙋ: и҆ не а҆́зъ то́чїю, но и҆ всѝ разꙋмѣ́вшїи и҆́стинꙋ: в҃ За и҆́стинꙋ пребыва́ющꙋю въ на́съ, и҆ съ на́ми бꙋ́детъ во вѣ́ки. г҃ Да бꙋ́детъ съ ва́ми бл҃года́ть, ми́лость, ми́ръ ѿ бг҃а ѻ҆ц҃а̀, и҆ ѿ гдⷭ҇а і҆и҃са хрⷭ҇та̀ сн҃а ѻ҆́ч҃а, во и҆́стинѣ и҆ любвѝ. д҃ Возра́довахсѧ ѕѣлѡ̀, ꙗ҆́кѡ ѡ҆брѣто́хъ ѿ ча̑дъ твои́хъ ходѧ́щѧ во и҆́стинѣ, ꙗ҆́коже за́повѣдь прїѧ́хомъ ѿ ѻ҆ц҃а̀. є҃ И҆ ны́нѣ молю́ тѧ, госпожѐ, не ꙗ҆́кѡ за́повѣдь пишꙋ̀ тебѣ̀ но́вꙋ, но ю҆́же и҆́мамы и҆спе́рва, да лю́бимъ дрꙋгъдрꙋ́га. ѕ҃ И҆ сїѧ̀ є҆́сть любы̀, да хо́димъ по за́повѣдемъ є҆гѡ̀. сїѧ̀ є҆́сть за́повѣдь, ꙗ҆́коже слы́шасте и҆спе́рва, да въ не́й хо́дите. з҃ Занѐ мно́зи лестцы̀ внидо́ша въ мі́ръ, не и҆сповѣ́дающе і҆и҃са хрⷭ҇та̀ прише́дша во пло́ти: се́й є҆́сть льсте́цъ и҆ а҆нті́хрїстъ. и҃ Блюди́те себѐ, да не (л. п҃) погꙋбитѐ ꙗ҆̀же дѣ́ласте дѡ́браѧ, но да мздꙋ̀ соверше́ннꙋ воспрїи́мете. ѳ҃ Всѧ́къ престꙋпа́ѧй, и҆ не пребыва́ѧй во ᲂу҆че́нїи хрⷭ҇то́вѣ, бг҃а не и҆́мать: пребыва́ѧй же во ᲂу҆че́нїи хрⷭ҇то́вѣ, се́й и҆ ѻ҆ц҃а̀ и҆ сн҃а и҆́мать. [а҃] і҃ А҆́ще кто̀ прихо́дитъ къ ва́мъ, и҆ сегѡ̀ ᲂу҆че́нїѧ не прино́ситъ, не прїе́млите є҆го̀ въ до́мъ, и҆ ра́доватисѧ є҆мꙋ̀ не глаго́лите. а҃і Глаго́лѧй бо є҆мꙋ̀ ра́доватисѧ, соѡбща́етсѧ дѣлѡ́мъ є҆гѡ̀ ѕлы́мъ. [в҃] в҃і Мнѡ́га и҆мѣ́хъ писа́ти ва́мъ, и҆ не восхотѣ́хъ хартїе́ю и҆ черни́ломъ: но надѣ́юсѧ прїитѝ къ ва́мъ, и҆ ᲂу҆сты̀ ко ᲂу҆стѡ́мъ глаго́лати, да ра́дость ва́ша бꙋ́детъ и҆спо́лнена. г҃і Цѣлꙋ́ютъ тѧ̀ ча́да сестры̀ твоеѧ̀ и҆збра́нныѧ. а҆ми́нь.

Коне́цъ пѧткꙋ̀.

Коне́цъ собо́рнагѡ посла́нїѧ і҆ѡа́ннова втора́гѡ, и҆мꙋ́щагѡ въ себѣ̀ главꙋ̀ а҃: зача́ло цр҃ко́вное а҃: стїхѡ́въ г҃і: знамена́нїй че́рныхъ в҃: послѣ́дꙋющее и҆̀мъ червле́ное а҃.