(л. рѻ҃и ѡ҆б.) Знамєна́нїѧ къ тїмоѳе́ю є҆пїсто́лїи пе́рвыѧ.

[а҃] Ѡ҆ наставле́нїи въ любо́вь бж҃їю.

[в҃] Ѡ҆ и҆збра́нїи є҆гѡ̀ во благовѣ́стїе ѿ гони́тельства, по бл҃года́ти хрⷭ҇то́вѣ.

[г҃] Повелѣ́нїе ѡ҆ вѣ́рѣ и҆ бл҃года́ти, со́вѣстнѣ слꙋ́жбѣ є҆гѡ̀, кромѣ̀ напа́сти.

[д҃] Ѡ҆ моли́твѣ за всѧ̑ и҆ вездѣ̀, безѕло́бивѣ и҆ без̾ смꙋще́нїѧ.

[є҃] Ꙗ҆́кѡ не подоба́етъ женѣ̀ ᲂу҆чи́ти.

[ѕ҃] Каковꙋ̀ подоба́етъ бы́ти є҆пі́скопꙋ.

[а҃] Въ не́мже ѡ҆ дїа́конѣхъ, мꙋжѣ́хъ же и҆ жена́хъ.

[з҃] Ѡ҆ бж҃їи воплоще́нїи.

[а҃] Въ не́мже ѡ҆ бꙋ́дꙋщихъ є҆ресѣ́хъ бѣсны́хъ.

[и҃] Въ кі́ихъ подоба́етъ ѡ҆бꙋча́тисѧ благовѣ́рномꙋ проповѣ́дникꙋ и҆ ᲂу҆чи́телю.

[ѳ҃] Ѡ҆ прилѣжа́нїи є҆гѡ̀ и҆ це́ркви.

[і҃] Ѡ҆ приключе́нїи, ка́кѡ ѡ҆брѣта́тисѧ ко всѧ́комꙋ.

[а҃і] Ѡ҆ вдови́цахъ, ѡ҆ вре́мени, и҆ ѻ҆́бразѣ, и҆ строе́нїи.

[в҃і] Ѡ҆ че́сти пресвѵ́терстѣй.

[г҃і] Ѡ҆ свѧще́нїи и҆звѣ́стнѣ.

[д҃і] Ꙗ҆́кѡ ни є҆ди́ное дѣ́ло таи́тсѧ.

[є҃і] Ѡ҆ послꙋша́нїи ра̑бъ.

[ѕ҃і] На люби́тели непра́ведныхъ прибы́ткѡвъ, и҆ ѡ҆ лжи́выхъ ᲂу҆чи́телехъ.

[з҃і] Завѣща́нїе крѣ́пко ѡ҆ чи́стомъ послꙋша́нїи.

[и҃і] Бога̑тымъ наставле́нїе во и҆́стиннꙋю жи́знь. (л. рѻ҃ѳ)

Сказа́нїе къ тїмоѳе́ю пе́рвагѡ посла́нїѧ ст҃а́гѡ а҆пⷭ҇ла па́ѵла.

Сїѐ посыла́етъ ꙾ѿ лаодїкі́и꙾По ѳеофѷла́ктꙋ: ꙾ и҆з̾ лаодїкі́и꙾. Вина́ же посла́нїѧ сїѧ̀ є҆́сть: во є҆фе́сѣ нѣ́цыи і҆ꙋде́йски живꙋ́ще, начина́хꙋ и҆́накѡ ᲂу҆чи́ти, и҆ прельща́ти простѣ́йшихъ, и҆звѣ́томъ зако́на, сїе́ же ᲂу҆слы́шавъ а҆пⷭ҇лъ, вели́тъ тїмоѳе́ю та́мѡ пребы́ти на и҆справле́нїе и҆̀мъ. Пи́шетъ же посла́нїе сїѐ, и҆ пе́рвѣе ᲂу҆́бѡ воспомина́етъ тїмоѳе́ю, вѣ́дꙋщемꙋ ю҆́же во хрⷭ҇та̀ вѣ́рꙋ: ᲂу҆чѧ̀ є҆го̀ ѡ҆ зако́нѣ возбранѧ́ти глаго́лющымъ, не по пра́вомꙋ ᲂу҆че́нїю, и҆ запреща́ти и҆̀мъ. и҆́бо и҆ са́мъ ѵ҆мене́а и҆ а҆леѯа́ндра погрѣши́вшихъ ѡ҆ вѣ́рѣ пре́далъ є҆́сть сатанѣ̀, да нака́жꙋтсѧ не хꙋ́лити. Сїѧ̑ воспомѧнꙋ́въ, про́чее ᲂу҆ставлѧ́етъ є҆мꙋ̀ пра̑вила церкѡ́внаѧ ѡ҆ моли́твѣ, ка́кѡ, и҆ гдѣ̀, и҆ ѡ҆ ко́ихъ подоба́етъ моли́тисѧ: и҆ ѡ҆ є҆́же молча́ти въ це́ркви жена́мъ, и҆ па́че ᲂу҆чи́тисѧ, а҆ не ᲂу҆чи́ти и҆̀мъ. Ѡ҆ є҆пі́скопѣхъ и҆ пресвѵ́терѣхъ и҆ дїа́конѣхъ, ка́кѡ и҆ ка́цѣмъ бы́ти подоба́етъ поставлѧ́ємымъ. Ѡ҆ сꙋ́щихъ въ це́ркви вдови́цахъ, ѿ коли́кихъ лѣ́тъ подоба́етъ и҆̀мъ глаго́латисѧ, и҆ какѡвы́мъ и҆̀мъ бы́ти подоба́етъ, и҆ ка́кѡ и҆̀мъ подоба́етъ внима́ти. И҆ ѡ҆ є҆́же цѣломꙋ́дрити ю҆нѣ́йшихъ, и҆ велѣ́ти па́че посѧга́ти, а҆ не скве́рнѡ жи́ти. И҆ ѡ҆ є҆́же ᲂу҆чи́ти бога́тыхъ, не высокомꙋ́дрствовати, нижѐ ᲂу҆пова́ти на бога́тство ги́блющее. Сїѧ̑ разчини́въ, вели́тъ є҆мꙋ̀ сїѧ̑ ᲂу҆чи́ти, и҆ ктомꙋ̀ воды̀ не пи́ти. Внима́ти же себѣ̀ и҆ ᲂу҆че́нїю, вѣ́дꙋщꙋ, ꙗ҆́кѡ бꙋ́дꙋтъ времена̀, въ ни́хже ѿстꙋ́пѧтъ нѣ́цыи ѿ вѣ́ры. Наꙋчи́въ же чи̑стымъ бы́ти бра́шнѡмъ, и҆ завѣща́въ є҆мꙋ̀ ѿвраща́тисѧ спо́рливыхъ взыска́нїй, а҆́ки скве́рныхъ, ѡ҆ ни́хже нѣ́цыи хва́лѧщесѧ, престꙋпи́ша вѣ́рꙋ пра́вꙋ, си́це скончава́етъ посла́нїе. (л. рѻ҃ѳ ѡ҆б.)

КЪ ТІМОѲЕ́Ю ПЕ́РВОЕ ПОСЛА́НІЕ

СТ҃А́ГѠ А҆ПО́СТОЛА ПА́ѴЛА.

Глава̀ пе́рваѧ.

(заⷱ҇ сѻ҃и) сⷯ а҃ Па́ѵелъ посла́нникъ Въ понедѣ́льникъ к҃ѕ недѣ́ли: Па́ѵелъ посла́нникъ і҆и҃съ хрⷭ҇то́въ, по повелѣ́нїю бг҃а, сп҃са на́шегѡ, и҆ гдⷭ҇а і҆и҃са хрⷭ҇та̀, ᲂу҆пова́нїѧ на́шегѡ: в҃ Тїмоѳе́ю при́сномꙋ ча́дꙋ въ вѣ́рѣ, бл҃года́ть, ми́лость, ми́ръ, ѿ бг҃а ѻ҆ц҃а̀ на́шегѡ, и҆ хрⷭ҇та̀ і҆и҃са гдⷭ҇а на́шегѡ. [а҃] г҃ Ꙗ҆́коже ᲂу҆моли́хъ тѧ̀ пребы́ти во є҆фе́сѣ, и҆ды́й въ македо́нїю, да завѣща́еши нѣ̑кимъ, не и҆́накѡ ᲂу҆чи́ти, д҃ Нижѐ внима́ти ба́снемъ и҆ родосло́вїємъ безконє́чнымъ: ꙗ҆̀же стѧза̑нїѧ творѧ́тъ па́че, не́жели бж҃їе строе́нїе, є҆́же въ вѣ́рѣ. є҃ Коне́цъ же завѣща́нїѧ є҆́сть, любы̀ ѿ чи́ста се́рдца, и҆ со́вѣсти бла́ги, и҆ вѣ́ры нелицемѣ́рныѧ, ѕ҃ И҆́хже нѣ́цыи погрѣши́вше, ᲂу҆клони́шасѧ въ сꙋеслѡ́вїѧ: з҃ Хотѧ́ще бы́ти законоꙋчи́тели, не разꙋмѣ́юще ни ꙗ҆̀же глаго́лютъ, ни ѡ҆ ни́хже ᲂу҆твержда́ютъ.

Коне́цъ понедѣ́льникꙋ. (л. р҃п)

(заⷱ҇ сѻ҃д) и҃ Вѣ́мы же Во вто́рникъ к҃ѕ недѣ́ли: Ча́до тїмоѳе́е, вѣ́мы ꙗ҆́кѡ до́бръ зако́нъ є҆́сть, а҆́ще кто̀ є҆го̀ зако́ннѣ твори́тъ, ѳ҃ Вѣ́дый сїѐ, ꙗ҆́кѡ пра́ведникꙋ зако́нъ ꙾не лежи́тъ꙾꙾не положе́нъ꙾, но беззакѡ́ннымъ, и҆ непокори̑вымъ, нечести̑вымъ же и҆ грѣ́шникѡмъ, непра́вєднымъ, и҆ сквє́рнымъ, ѻ҆тца̀ и҆ ма́тере досади́телємъ, мꙋжеꙋбі́йцамъ, і҃ Блꙋдникѡ́мъ, мꙋжело́жникѡмъ, разбо́йникѡмъ, клеветникѡ́мъ, скотоло́жникѡмъ, лжи̑вымъ, клѧтвопрестꙋ́пникѡмъ, и҆ а҆́ще что̀ и҆́но здра́вомꙋ ᲂу҆че́нїю проти́витсѧ, а҃і По благовѣ́стїю сла́вы блаже́ннагѡ бг҃а, є҆́же мнѣ̀ ᲂу҆вѣ́рено бы́сть.

(заⷱ҇ с҃п) в҃і И҆ благодарю̀ ꙳꙳ Ѻ҆ктѡ́врїа в҃: Ча́до тїмоѳе́е, благодарю̀ ꙳꙳ ᲂу҆крѣплѧ́ющаго мѧ̀ хрⷭ҇та̀ і҆и҃са гдⷭ҇а на́шего: ꙗ҆́кѡ вѣ́рна мѧ̀ непщева̀, положи́въ мѧ̀ въ слꙋ́жбꙋ, [в҃] г҃і Бы́вша мѧ̀ и҆ногда̀ хꙋ́льника, и҆ гони́телѧ, и҆ досади́телѧ: но поми́лованъ бы́хъ, ꙗ҆́кѡ не вѣ́дый сотвори́хъ въ невѣ́рствїи: д҃і Оу҆преꙋмно́жисѧ же благода́ть гдⷭ҇а на́шегѡ і҆и҃са хрⷭ҇та̀, съ вѣ́рою, и҆ любо́вїю ꙗ҆́же ѡ҆ хрⷭ҇тѣ̀ і҆и҃сѣ.

Коне́цъ вто́рникꙋ.

(заⷱ҇) є҃і Вѣ́рно сло́во ꙳꙳꙳ Недѣ́лѧ л҃а: Ча́до тїмоѳе́е, вѣ́рно сло́во ꙳꙳꙳ и҆ всѧ́кагѡ прїѧ́тїѧ досто́йно: ꙗ҆́кѡ хрⷭ҇то́съ і҆и҃съ прїи́де въ мі́ръ грѣ́шники спастѝ, ѿ ни́хже пе́рвый є҆́смь а҆́зъ. ѕ҃і Но сегѡ̀ ра́ди поми́лованъ бы́хъ, да ѡ҆ мнѣ̀ пе́рвомъ пока́жетъ і҆и҃съ хрⷭ҇то́съ всѐ долготерпѣ́нїе, за ѻ҆́бразъ хотѧ́щихъ вѣ́ровати є҆мꙋ̀ въ жи́знь вѣ́чнꙋю. з҃і Цр҃ю́ же (л. р҃п ѡ҆б.) вѣкѡ́въ, нетлѣ́нномꙋ, неви́димомꙋ, є҆ди́номꙋ премꙋ́дромꙋ бг҃ꙋ, че́сть и҆ сла́ва во вѣ́ки вѣкѡ́въ. а҆ми́нь.

Коне́цъ недѣ́ли, и҆ ст҃о́мꙋ.

(заⷱ҇ сп҃а) [г҃] и҃і Сїе́ же завѣща́нїе предаю́ ти, ча́до тїмоѳе́е, Въ сре́дꙋ к҃ѕ недѣ́ли: Ча́до тїмоѳе́е, сїѐ завѣща́нїе предаю̀ тебѣ̀ по бы́вшихъ на тѧ̀ пре́жде проро́чествїихъ, да во́инствꙋеши въ ни́хъ до́брое во́инство, ѳ҃і И҆мѣ́ѧ вѣ́рꙋ, и҆ бл҃гꙋ́ю со́вѣсть, ю҆́же нѣ́цыи ѿри́нꙋвше, ѿ вѣ́ры ѿпадо́ша. к҃ Ѿ ни́хже є҆́сть ѵ҆мене́й, и҆ а҆леѯа́ндръ, и҆̀хже преда́хъ сатанѣ̀, ꙗ҆́кѡ да нака́жꙋтсѧ не хꙋ́лити.

Престꙋпѝ средѣ̀.

Глава̀ втора́ѧ.

(заⷱ҇ сп҃в) [д҃] сⷯ а҃ Молю̀ ᲂу҆̀бо ꙳꙳ Септе́мврїа а҃: Ча́до тїмоѳе́е, молю̀ ꙳꙳ пре́жде всѣ́хъ твори́ти моли̑твы, молє́нїѧ, прошє́нїѧ, бл҃годарє́нїѧ за всѧ̀ человѣ́ки: в҃ За цр҃ѧ̀, и҆ за всѧ̀ и҆̀же во вла́сти сꙋ́ть: да ти́хое и҆ безмо́лвное житїѐ поживе́мъ, во всѧ́комъ бл҃гоче́стїи и҆ чистотѣ̀. г҃ Сїе́ бо добро̀ и҆ прїѧ́тно пред̾ сп҃си́телемъ на́шимъ бг҃омъ, д҃ И҆́же всѣ́мъ чл҃вѣ́кѡмъ хо́щетъ спасти́сѧ, и҆ въ ра́зꙋмъ и҆́стины прїитѝ. є҃ Є҆ди́нъ бо є҆́сть бг҃ъ, и҆ є҆ди́нъ хода́тай бг҃а и҆ чл҃вѣ́кѡвъ, чл҃вѣ́къ хрⷭ҇то́съ і҆и҃съ: ѕ҃ Да́вый себѐ и҆збавле́нїе за всѣ́хъ, свидѣ́тельство времены̀ свои́ми. з҃ Въ не́же поста́вленъ бы́хъ а҆́зъ (л. рп҃а) проповѣ́дникъ и҆ а҆пⷭ҇лъ: [и҆́стинꙋ глаго́лю ѡ҆ хрⷭ҇тѣ̀, не лгꙋ̀,] ᲂу҆чи́тель ꙗ҆зы́кѡвъ въ вѣ́рѣ и҆ и҆́стинѣ.

Коне́цъ но́вомꙋ лѣ́тꙋ. Чтѝ средѣ̀:

и҃ Хощꙋ̀ ᲂу҆̀бо, да моли̑твы творѧ́тъ мꙋ́жїе на всѧ́комъ мѣ́стѣ, воздѣ́юще преподѡ́бныѧ рꙋ́ки без̾ гнѣ́ва и҆ размышле́нїѧ. ѳ҃ Та́кожде и҆ жєны̀ во ᲂу҆краше́нїи лѣ́потномъ, со стыдѣ́нїемъ и҆ цѣломꙋ́дрїемъ, да ᲂу҆краша́ютъ себѐ, не въ плете́нїихъ, ни зла́томъ и҆лѝ би́серомъ, и҆лѝ ри́зами многоцѣ́нными: і҃ Но [є҆́же подоба́етъ жена́мъ, ѡ҆бѣщава́ющымсѧ благоче́стїю] дѣлесы̀ благи́ми. а҃і Жена̀ въ безмо́лвїи да ᲂу҆чи́тсѧ со всѧ́кимъ покоре́нїемъ. в҃і Женѣ́ же ᲂу҆чи́ти не повелѣва́ю, ни владѣ́ти мꙋ́жемъ, но бы́ти въ безмо́лвїи. г҃і А҆да́мъ бо пре́жде со́зданъ бы́сть, пото́мъ же є҆́ѵа. д҃і И҆ а҆да́мъ не прельсти́сѧ, жена́ же прельсти́вшисѧ, въ престꙋпле́нїи бы́сть. є҃і Спасе́тсѧ же ꙾чадоро́дїѧ ра́ди꙾꙾чрез̾ чадоро́дїе꙾, а҆́ще пребꙋ́детъ въ вѣ́рѣ, и҆ любвѝ, и҆ во свѧты́ни съ цѣломꙋ́дрїемъ.

Коне́цъ средѣ̀.

Глава̀ тре́тїѧ.

(заⷱ҇ сп҃г) [ѕ҃] сⷯ а҃ Вѣ́рно Въ четверто́къ к҃ѕ недѣ́ли: Ча́до тїмоѳе́е, вѣ́рно сло́во, а҆́ще кто̀ є҆пі́скопства хо́щетъ, добра̀ дѣ́ла жела́етъ. в҃ Подоба́етъ же є҆пⷭ҇кпꙋ бы́ти непоро́чнꙋ, є҆ди́ныѧ жены̀ мꙋ́жꙋ, тре́звенꙋ, цѣломꙋ́дрꙋ, бл҃гоговѣ́йнꙋ, че́стнꙋ, страннолюби́вꙋ, ᲂу҆чи́тельнꙋ, г҃ Не пїѧ́ницѣ, не бі́йцѣ, не (л. рп҃а ѡ҆б.) сварли́вꙋ, не мшелои́мцꙋ, но кро́ткꙋ, не зави́стливꙋ, не сребролю́бцꙋ: д҃ Сво́й до́мъ до́брѣ пра́вѧщꙋ, ча̑да и҆мꙋ́щꙋ въ послꙋша́нїи со всѧ́кою ꙾чистото́ю꙾꙾че́стностїю꙾. є҃ [А҆́ще же кто̀ своегѡ̀ до́мꙋ не ᲂу҆мѣ́етъ пра́вити, ка́кѡ ѡ҆ цр҃кви бж҃їей прилѣжа́ти возмо́жетъ;] ѕ҃ Не новокреще́ннꙋ, да не разгордѣ́всѧ въ сꙋ́дъ впаде́тъ и҆ въ сѣ́ть дїа́волю. з҃ Подоба́етъ же є҆мꙋ̀ и҆ свидѣ́тельство добро̀ и҆мѣ́ти ѿ внѣ́шнихъ, да не въ поноше́нїе впаде́тъ, и҆ въ сѣ́ть непрїѧ́зненꙋ. [а҃] Дїа́конѡмъ та́кожде ꙳чи́стымъ꙳꙳чє́стнымъ꙳, не двоѧзы́чнымъ, не вїнꙋ̀ мно́гꙋ внима́ющымъ, не скверностѧжа́тєльнымъ: ѳ҃ И҆мꙋ́щымъ та́инство вѣ́ры въ чи́стѣй со́вѣсти. (чеⷦ҇) і҃ И҆ сі́и ᲂу҆́бѡ да и҆скꙋша́ютсѧ пре́жде, пото́мъ же да слꙋ́жатъ непоро́чни сꙋ́ще. а҃і Жена́мъ та́кожде ꙳꙳чи́стымъ꙳꙳꙳꙳чє́стнымъ꙳꙳, не клевети́вымъ, не нава́дницамъ, тре́звеннымъ, вѣ́рнымъ ѡ҆ все́мъ. в҃і Дїа́кони да быва́ютъ є҆ди́ныѧ жены̀ мꙋ́жи, ча̑да до́брѣ застꙋпа́юще, и҆ своѧ̀ до́мы. г҃і И҆́бо слꙋжи́вшїи до́брѣ, степе́нь себѣ̀ до́бръ сниска́ютъ, и҆ мно́гое дерзнове́нїе въ вѣ́рѣ, ꙗ҆́же ѡ҆ хрⷭ҇тѣ̀ і҆и҃сѣ.

Коне́цъ четверткꙋ̀.

(заⷱ҇ сп҃д) д҃і Сїѧ̑ Въ сꙋббѡ́тꙋ пред̾ просвѣще́нїемъ: Ча́до тїмоѳе́е, сїѧ̑ пишꙋ̀ тебѣ̀, ᲂу҆пова́ѧ прїитѝ къ тебѣ̀ ско́рѡ: є҃і А҆́ще же заме́длю, да ᲂу҆вѣ́си ка́кѡ подоба́етъ въ домꙋ̀ бж҃їи жи́ти, ꙗ҆́же є҆́сть цр҃ковь бг҃а жи́ва, сто́лпъ и҆ ᲂу҆твержде́нїе и҆́стины. ѕ҃і И҆ и҆сповѣ́дꙋемѡ ве́лїѧ є҆́сть бл҃гоче́стїѧ та́йна: бг҃ъ ꙗ҆ви́сѧ во пло́ти, ѡ҆правда́сѧ въ дс҃ѣ, показа́сѧ а҆́гг҃лѡмъ, проповѣ́данъ (л. рп҃в) бы́сть во ꙗ҆зы́цѣхъ, вѣ́ровасѧ въ мі́рѣ, вознесе́сѧ во сла́вѣ.

Глава̀ четве́ртаѧ.

[а҃] сⷯ а҃ Дх҃ъ же ꙗ҆́вственнѣ глаго́летъ: ꙗ҆́кѡ въ послѣ́днѧѧ времена̀ ѿстꙋ́пѧтъ нѣ́цыи ѿ вѣ́ры, вне́млюще дꙋховѡ́мъ ле́стьчымъ, и҆ ᲂу҆че́нїємъ бѣсѡ́вскимъ, в҃ Въ лицемѣ́рїи лжесловє́сникъ, сожже́нныхъ свое́ю со́вѣстїю: г҃ Возбранѧ́ющихъ жени́тисѧ, ᲂу҆далѧ́тисѧ ѿ бра́шенъ, ꙗ҆̀же бг҃ъ сотворѝ въ снѣде́нїе со бл҃годаре́нїемъ вѣ̑рнымъ, и҆ позна́вшымъ и҆́стинꙋ.

(заⷱ҇ сп҃є) д҃ Занѐ всѧ́кое Въ пѧто́къ к҃ѕ недѣ́ли: Ча́до тїмоѳе́е, всѧ́кое созда́нїе бж҃їе добро̀, и҆ ничто́же ѿме́тно, со бл҃годаре́нїемъ прїе́млемо: є҃ Ѡ҆свѧща́етсѧ бо сло́вомъ бж҃їимъ и҆ моли́твою.

Коне́цъ сꙋббѡ́тѣ.

ѕ҃ Сїѧ̑ всѧ̑ сказꙋ́ѧ бра́тїи, до́бръ бꙋ́деши слꙋжи́тель і҆и҃са хрⷭ҇та̀, пита́емь словесы̀ вѣ́ры, и҆ до́брымъ ᲂу҆че́нїемъ, є҆мꙋ́же послѣ́довалъ є҆сѝ. [и҃] з҃ Скве́рныхъ же и҆ ба́бїихъ ба́сней ѿрица́йсѧ: ѡ҆бꙋча́й же себѐ ко бл҃гоче́стїю. и҃ Тѣле́сное бо ѡ҆бꙋче́нїе вма́лѣ є҆́сть поле́зно: а҆ благоче́стїе на всѐ поле́зно є҆́сть, ѡ҆бѣтова́нїе и҆мѣ́юще живота̀ ны́нѣшнѧгѡ, и҆ грѧдꙋ́щагѡ.

Престꙋпѝ пѧткꙋ̀.

(заⷱ҇) ѳ҃ Вѣ́рно сло́во, ꙳꙳ Недѣ́лѧ л҃в: Ча́до тїмоѳе́е, вѣ́рно сло́во ꙳꙳ и҆ всѧ́кагѡ прїѧ́тїѧ досто́йно. і҃ На сїе́ бо и҆ трꙋжда́емсѧ, и҆ поноша́еми є҆смы̀, (л. рп҃в ѡ҆б.) ꙗ҆́кѡ ᲂу҆пова́хомъ на бг҃а жи́ва, и҆́же є҆́сть сп҃си́тель всѣ́мъ человѣ́кѡмъ, па́че же вѣ́рнымъ. а҃і Завѣщава́й сїѧ̑ и҆ ᲂу҆чѝ. [ѳ҃] в҃і Никто́же ѡ҆ ю҆́ности твое́й да неради́тъ: но ѻ҆́бразъ бꙋ́ди вѣ̑рнымъ: сло́вомъ, житїе́мъ, любо́вїю, дх҃омъ, вѣ́рою, чистото́ю. г҃і До́ндеже прїидꙋ̀, внемлѝ чте́нїю, ᲂу҆тѣше́нїю, ᲂу҆че́нїю. д҃і Не нерадѝ ѡ҆ свое́мъ дарова́нїи живꙋ́щемъ въ тебѣ̀, є҆́же дано̀ тебѣ̀ бы́сть проро́чествомъ, съ возложе́нїемъ рꙋкꙋ̀ свѧще́нничества. є҃і Въ си́хъ поꙋча́йсѧ, въ си́хъ пребыва́й, [въ си́хъ разꙋмѣва́й,] да предспѣ́ѧнїе твоѐ ꙗ҆вле́но бꙋ́детъ во всѣ́хъ.

Коне́цъ недѣ́ли. Чтѝ пѧткꙋ̀:

ѕ҃і Внима́й себѣ̀ и҆ ᲂу҆че́нїю, и҆ пребыва́й въ ни́хъ: сїѧ̑ бо творѧ̀ и҆ са́мъ спасе́шисѧ, и҆ послꙋ́шающїи тебѐ.

Коне́цъ пѧткꙋ̀.

Глава̀ пѧ́таѧ.

(заⷱ҇) [і҃] сⷯ а҃ Ста́рцꙋ Въ понедѣ́льникъ к҃з недѣ́ли: Ча́до тїмоѳе́е, ста́рцꙋ не творѝ па́кости, но ᲂу҆тѣша́й꙾꙾ста́рца не ᲂу҆корѧ́й, но ᲂу҆молѧ́й꙾ ꙗ҆́коже ѻ҆ц҃а̀: ю҆́ношы, ꙗ҆́коже бра́тїю: в҃ Ста̑рицы ꙗ҆́коже ма́тєри: ю҆́ныѧ, ꙗ҆́коже сєстры̀, со всѧ́кою чистото́ю. г҃ Вдови̑цы чтѝ, сꙋ́щыѧ и҆́стинныѧ вдови́цы. д҃ А҆́ще ли ка́ѧ вдови́ца ча̑да, и҆лѝ внꙋ́чата и҆́мать, да ᲂу҆ча́тсѧ пре́жде сво́й до́мъ благочести́внѡ ᲂу҆стро́ити, и҆ взае́мъ воздаѧ́ти роди́телємъ, сїе́ бо є҆́сть благоꙋго́дно пред̾ бг҃омъ. є҃ А҆ сꙋ́щаѧ и҆́стиннаѧ (л. рп҃г) вдови́ца и҆ ᲂу҆едине́на, ᲂу҆пова̀ на бг҃а, и҆ пребыва́етъ въ моли́твахъ и҆ моле́нїихъ де́нь и҆ но́щь. ѕ҃ Пита́ющаѧсѧ же простра́ннѡ, жива̀ ᲂу҆мерла̀. з҃ И҆ сїѧ̑ завѣщава́й, да непоро́чни бꙋ́дꙋтъ. и҃ А҆́ще же кто̀ ѡ҆ свои́хъ, па́че же ѡ҆ ꙾при́сныхъ꙾꙾дома́шнихъ꙾ не промышлѧ́етъ, вѣ́ры ѿве́рглсѧ є҆́сть, и҆ невѣ́рнагѡ го́рши є҆́сть. ѳ҃ Вдови́ца же да причита́етсѧ не ме́ньши лѣ́тъ шести́десѧтихъ, бы́вши є҆ди́номꙋ мꙋ́жꙋ жена̀, і҃ Въ дѣ́лѣхъ до́брыхъ свидѣ́тельствꙋема, а҆́ще ча̑да воспита́ла є҆́сть, а҆́ще ст҃ы́хъ но́зѣ ᲂу҆мы̀, а҆́ще стра̑нныѧ прїѧ́тъ, а҆́ще ꙳скѡ́рбнымъ ᲂу҆тѣше́нїе бы́сть꙳꙳ско́рбныхъ снабдѣ̀꙳, а҆́ще всѧ́комꙋ дѣ́лꙋ бл҃гꙋ послѣ́довала є҆́сть.

Коне́цъ понедѣ́льникꙋ.

(заⷱ҇ сп҃ѕ) а҃і Ю҆́ныхъ же Во вто́рникъ к҃з-ѧ недѣ́ли: Ча́до тїмоѳе́е, ю҆́ныхъ вдови́цъ ѿрица́йсѧ: є҆гда́ бо разсвирѣ́пѣютъ ꙳꙳ѡ҆ хрⷭ҇тѣ̀꙳꙳꙳꙳проти́вꙋ хрⷭ҇та̀꙳꙳, посѧга́ти хотѧ́тъ, в҃і И҆мꙋ́щѧ грѣ́хъ, ꙗ҆́кѡ пе́рвыѧ вѣ́ры ѿверго́шасѧ. г҃і Кꙋ́пнѡ же и҆ пра́здны, ᲂу҆ча́тсѧ ѡ҆бходи́ти до́мы, не то́чїю же пра́здны, но и҆ блѧди́вы и҆ ꙳꙳꙳ѡ҆плази́вы꙳꙳꙳꙳꙳꙳любопы́тны꙳꙳꙳, глаго́лющыѧ ꙗ҆̀же не подоба́етъ: д҃і Хощꙋ̀ ᲂу҆̀бо ю҆́нымъ вдови́цамъ посѧга́ти, ча̑да ражда́ти, до́мъ стро́ити, ниеди́ны же вины̀ даѧ́ти проти́вномꙋ хꙋлы̀ ра́ди. є҃і Сѐ ᲂу҆́бѡ нѣ̑кїѧ разврати́шасѧ въ слѣ́дъ сатаны̀. ѕ҃і А҆́ще кто̀ вѣ́ренъ, и҆лѝ вѣ́рна, и҆́мать вдови̑цы, да довли́тъ и҆̀хъ, ꙗ҆́кѡ да не тѧготи́тсѧ цр҃ковь, да сꙋ́щихъ и҆́стинныхъ вдови́цъ ᲂу҆дово́литъ. з҃і Прилѣжа́щїи же до́брѣ пресвѵ́теры сꙋгꙋ́быѧ че́сти да сподоблѧ́ютсѧ, па́че же трꙋжда́ющїисѧ въ сло́вѣ и҆ (л. рп҃г ѡ҆б.) ᲂу҆че́нїи. и҃і Глаго́летъ бо писа́нїе: вола̀ молотѧ́ща не ѡ҆броти́ши, и҆ досто́инъ дѣ́латель мзды̀ своеѧ̀. ѳ҃і На пресвѵ́тера хꙋлы̀ не прїе́мли, ра́звѣ при двою̀ и҆лѝ трїе́хъ свидѣ́телехъ. к҃ Согрѣша́ющихъ же пред̾ всѣ́ми и҆ ѡ҆блича́й, да и҆ про́чїи стра́хъ и҆́мꙋтъ. к҃а Засвидѣ́тельствꙋю пред̾ бг҃омъ, и҆ гдⷭ҇емъ і҆и҃съ хрⷭ҇то́мъ, и҆ и҆збра́нными є҆гѡ̀ а҆́гг҃лы, да сїѧ̑ сохрани́ши без̾ лицемѣ́рїѧ, ничесѡ́же творѧ̀ по ᲂу҆клоне́нїю.

Коне́цъ вто́рникꙋ.

(заⷱ҇ сп҃з) [г҃і] к҃в Рꙋкѝ ско́рѡ Въ сре́дꙋ к҃з-ѧ недѣ́ли: Ча́до тїмоѳе́е, рꙋкѝ ско́рѡ не возлага́й ни на кого́же, нижѐ прїѡбща́йсѧ чꙋжы́мъ грѣхѡ́мъ, себѐ чи́ста соблюда́й. к҃г Ктомꙋ̀ не пі́й воды̀, но ма́лѡ вїна̀ прїе́мли, стома́ха ра́ди твоегѡ̀, и҆ ча́стыхъ твои́хъ недꙋ́гѡвъ. [д҃і] к҃д Нѣ́кихъ же человѣ̑къ грѣсѝ ꙗ҆вле́ни сꙋ́ть, предварѧ́юще на сꙋ́дъ, нѣ̑кимъ же и҆ послѣ́дствꙋютъ. к҃є Та́коже и҆ дѡ́браѧ дѣла̀ ꙗ҆вле́на сꙋ́ть, и҆ сꙋ̑щаѧ и҆́накѡ ᲂу҆таи́тисѧ не мо́гꙋтъ.

Глава̀ шеста́ѧ.

[є҃і] сⷯ а҃ Є҆ли́цы сꙋ́ть под̾ и҆́гомъ рабѝ, своѧ̀ господы̀ всѧ́кїѧ че́сти да сподоблѧ́ютъ, да и҆́мѧ бж҃їе не хꙋ́литсѧ и҆ ᲂу҆че́нїе. в҃ И҆мꙋ́щїи же вѣ́рны господы̀, да не нерадѧ́тъ ѡ҆ ни́хъ, поне́же бра́тїѧ сꙋ́ть: но па́че да рабо́таютъ, занѐ вѣ́рни сꙋ́ть, и҆ возлю́бленни, и҆̀же благода́ть воспрїе́млющїи, сїѧ̑ ᲂу҆чѝ, и҆ молѝ. ѕ҃і А҆́ще ли кто̀ и҆́накѡ ᲂу҆чи́тъ, и҆ не (л. рп҃д) пристꙋпа́етъ къ здра́вымъ словесє́мъ гдⷭ҇а на́шегѡ і҆и҃са хрⷭ҇та̀, и҆ ᲂу҆че́нїю є҆́же по благовѣ́рїю, д҃ Разгордѣ́всѧ ничто́же вѣ́дый, но недꙋ́гꙋѧй ѡ҆ стѧза́нїихъ, и҆ словопрѣ́нїихъ: ѿ ни́хже быва́етъ за́висть, рве́нїе, хꙋлы̑, непщева̑нїѧ лꙋка́ва. є҃ Бесѣ̑ды ѕлы́ѧ растлѣ́нныхъ человѣ́кѡвъ ᲂу҆мо́мъ, и҆ лише́нныхъ и҆́стины, непщꙋ́ющихъ прїѡбрѣ́тенїе бы́ти бл҃гоче́стїе, ѿстꙋпа́й ѿ таковы́хъ. ѕ҃ Є҆́сть же сниска́нїе ве́лїе, благоче́стїе съ дово́льствомъ. з҃ Ничто́же бо внесо́хомъ въ мі́ръ се́й, ꙗ҆́вѣ, ꙗ҆́кѡ нижѐ и҆знестѝ что̀ мо́жемъ: и҃ И҆мѣ́юще же пи́щꙋ и҆ ѡ҆дѣѧ́нїе, си́ми дово́льни бꙋ́демъ: ѳ҃ А҆ хотѧ́щїи богати́тисѧ, впа́даютъ въ напа́сти и҆ сѣ́ти, и҆ въ по́хѡти мнѡ́ги, несмы́сленны, и҆ врежда́ющыѧ, ꙗ҆̀же погрꙋжа́ютъ человѣ́ки во всегꙋби́тельство и҆ поги́бель. і҃ Ко́рень бо всѣ̑мъ ѕлы̑мъ, сребролю́бїе є҆́сть: є҆гѡ́же нѣ́цыи жела́юще, заблꙋди́ша ѿ вѣ́ры, и҆ себѐ пригвозди́ша болѣ́знемъ мнѡ́гимъ. [з҃і] а҃і Ты́ же, ѽ человѣ́че бж҃їй! си́хъ бѣ́гай.

Коне́цъ средѣ̀.

(заⷱ҇ сп҃и) Гони́ же пра́вдꙋ, Въ сꙋббѡ́тꙋ по ржⷭ҇твѣ̀ хрⷭ҇то́вѣ: Ча́до тїмоѳе́е, гонѝ пра́вдꙋ, благоче́стїе, вѣ́рꙋ, любо́вь, терпѣ́нїе, кро́тость. в҃і Подвиза́йсѧ до́брымъ по́двигомъ вѣ́ры, є҆мли́сѧ за вѣ́чнꙋю жи́знь, въ ню́же и҆ зва́нъ бы́лъ є҆сѝ, и҆ и҆сповѣ́далъ є҆сѝ до́брое и҆сповѣ́данїе пред̾ мно́гими свидѣ́тели. г҃і Завѣщава́ю тѝ пред̾ бг҃омъ ѡ҆живлѧ́ющимъ всѧ́чєскаѧ, и҆ хрⷭ҇то́мъ і҆и҃сомъ, свидѣ́тельствовавшимъ при понті́йстѣмъ (л. рп҃д ѡ҆б.) пїла́тѣ до́брое и҆сповѣ́данїе: д҃і Соблюстѝ тебѣ̀ за́повѣдь нескве́рнꙋ, и҆ незазо́рнꙋ, да́же до ꙗ҆вле́нїѧ гдⷭ҇а на́шегѡ і҆и҃са хрⷭ҇та̀. є҃і Є҆́же во своѧ̀ времена̀ ꙗ҆ви́тъ бл҃же́нный, и҆ є҆ди́нъ си́льный, цр҃ь ца́рствꙋющихъ, и҆ гдⷭ҇ь госпо́дствꙋющихъ: ѕ҃і Є҆ди́нъ и҆мѣ́ѧй безсме́ртїе, и҆ во свѣ́тѣ живы́й непристꙋ́пнѣмъ, є҆гѡ́же никто́же ви́дѣлъ є҆́сть ѿ человѣ̑къ, нижѐ ви́дѣти мо́жетъ, є҆мꙋ́же че́сть и҆ держа́ва вѣ́чнаѧ. а҆ми́нь.

Коне́цъ сꙋббѡ́тѣ.

(заⷱ҇ сп҃ѳ) [и҃і ] з҃і Бога̑тымъ Въ четверто́къ к҃з-ѧ недѣ́ли: Ча́до тїмоѳе́е, бога̑тымъ въ ны́нѣшнѣмъ вѣ́цѣ запреща́й не высокомꙋ́дрствовати, нижѐ ᲂу҆пова́ти на бога́тство погиба́ющее, но на бг҃а жи́ва, даю́щаго на́мъ всѧ̑ ѻ҆би́льнѡ въ наслажде́нїе: и҃і Бл҃го́е дѣ́лати, богати́тисѧ въ дѣ́лѣхъ до́брыхъ, благопода̑тливымъ бы́ти, ѻ҆бщи́тєльнымъ. ѳ҃і Сокро́вищꙋюще себѣ̀ ѡ҆снова́нїе добро̀ въ бꙋ́дꙋщее, да прїи́мꙋтъ вѣ́чнꙋю жи́знь. к҃ Ѽ тїмоѳе́е! преда́нїе сохранѝ, ᲂу҆клонѧ́ѧсѧ скве́рныхъ сꙋесло́вїй, и҆ прекосло́вїй лжеиме́ннагѡ ра́зꙋма. к҃а Ѡ҆ не́мже нѣ́цыи хва́лѧщесѧ, ѡ҆ вѣ́рѣ погрѣши́ша. бл҃года́ть съ тобо́ю. а҆ми́нь.

Коне́цъ четверткꙋ̀.

Коне́цъ пе́рвагѡ посла́нїѧ, є҆́же къ тїмоѳе́ю: напи́сано бы́сть ѿ лаодїкі́и, ꙗ҆́же є҆́сть митропо́лїа фрѷгі́и пакатїані́йскїѧ: и҆́мать въ себѣ̀ гла́въ, ѕ҃: зача̑лъ цр҃ко́вныхъ, д҃і: стїхѡ́въ рг҃і: знамена́нїй че́рныхъ, и҃і: послѣ́дꙋющихъ же и҆̀мъ червле́ныхъ два̀.


Комментарии для сайта Cackle