Крещение и миропомазание

47-е святы́х апо́стол пра́вило глаго́лет: А́ще кто Епи́скоп или́ Пресви́тер, иму́щаго пои́стине креще́ние па́ки крести́т, или́ не иму́щаго и́стинное креще́ние, не крести́т, да изве́ржется; я́ко руга́яся Кресту́ и сме́рти Госпо́дни, не разсужда́яй Свяще́нники от лжесвяще́нников.

Та́яжде и е́же в Карфаге́не собо́ре 8, повелева́ет 44-е, святы́х апо́столов пра́вило, во Отца́, и Сы́на, и Свята́го Ду́ха креща́ти, по Госпо́дни словеси́, повелева́ет, но не в три безнача́льны, или́ три Сы́ны, или́ три Уте́шители; Еди́н бо безнача́льный Оте́ц, за безвино́вное, и Еди́н Сын, за неизрече́нное рожде́ние, и Еди́н Уте́шитель Дух Святы́й, за е́же от нерожде́ннаго исхожде́ние. А и́же не та́ко творя́ше, Епи́скопи или́ Пресви́тери изверже́нию подлежа́т.

8-е пра́вило: А́ще кто епи́скоп, или́ пресви́тер, не три погруже́ния еди́наго глаше́ния соверши́т, но еди́но погруже́ние в сме́рть госпо́дню дае́мое, да изве́ржется. Не бо рече́ Госпо́дь в сме́рть Мою́ крести́те; но ше́дше научи́те вся язы́ки, креща́юще их во и́мя Отца́, и Сы́на, и Свята́го Ду́ха.

7-е пра́вило Втора́го Вселе́нскаго Собо́ра: Приступа́ющих к Правосла́вию и ча́сти спаса́емых от еретико́в, прие́млем по учине́нному после́дованию и обы́чаю. Ариа́нов у́бо, и македониа́нов, и саватиа́нов, и наватиа́нов, глаго́лющих себе́ чи́стых и ле́вых, и четыредеся́тников, си́речь сре́дников, и аполлинаристов прие́млем даю́щих писа́ния, и проклинающих вся́кую е́ресь, не му́дрствующу, я́ко му́дрствует Свята́я Бо́жия Собо́рная и Апо́стольская це́рковь, и помазу́емых пе́рвее святы́м ми́ром, на челе́ же, и очесе́х, и но́здрех, и уста́х, и ушеса́х, и зна́менующе их, глаго́лем: Печа́ть да́ра Ду́ха Свята́го. Евномианов же во еди́но погруже́ние креща́емых, и монтани́стов, зде глаго́лемых фри́гов, и савеллианов сыноотечеству уча́щих, и ина́я не́кая лю́тая творя́щих, и други́я вся е́реси, поне́же мно́зи су́ть зде, наипа́че от страны́ гала́тския приходя́щих, всех хотя́щих от них приступа́ти ко правосла́вию, я́ко е́ллинов прие́млем. И в пе́рвый де́нь твори́м их христиа́нов, во второ́й же оглаше́нныя, та́же в тре́тий заклинаемыя, со е́же дунути три́жды, на лице́ и на ушеса́ их, и та́ко оглашаемыя твори́м их пребыва́ти в це́ркви, и слы́шати писа́ние, и тогда́ их креща́ем.

48-е е́же в Лаодики́и пра́вило, и небе́сным помазоватися ми́ром просвеще́нным повелева́ет; сие́ бо моли́твами и названием Свята́го Ду́ха освяща́емое, помазуемыя освяща́ет, и прича́стники Небесного Ца́рства Христо́ва устроя́ет; а́ще не житие́ небреженное, и дел лю́тость нас сего́ отчуждит.

6-е же пра́вило, е́же в Неокесари́и Собо́ра, жена́м непра́здным не возбраня́ет хотя́щим крести́тися; не бо приобща́ется сим просвеще́ния и младе́нец, не у от естества́ прие́мший е́же блага́го произволе́ния, и ху́ждшаго, ниже́ мо́жет любоиспытывати жела́тельнаго. Младе́нцы же восприемниками устрояеми, и де́лы те́ми просвеща́еми, боже́ственнаго причаща́ются сия́ния.

6-е же пра́вило Тимофе́я Александри́йскаго: оглаше́нная жена́, глаго́лет, а́ще в де́нь, в о́ньже крести́тися восхоте́, я́же по обы́чаю ей случа́тся месячия, на гряду́щий да преложи́тся просвеще́ние.

1-е же его́ пра́вило: а́ще отроча́ оглаше́нное, или́ муж, свяще́нней соверша́емей же́ртве, присту́пль нелука́во, боже́ственных причасти́тися даро́в, не зна́ющу свяще́ннику бы́ти сему́ оглаше́нному, а́бие да крести́тся, от Го́спода бо призва́ся.

4-е же пра́вило свята́го Кири́лла глаго́лет: а́ще и разлуче́ние претерпя́т не́цыи грехо́в ра́ди запрещени бы́вше, и и́мут сконча́тися, да крестятся, а не прича́стницы благода́ти боже́ственныя отхо́дят.

2-е же Тимофе́я Александрийского: оглашенна беснующа, пре́жде да́же от нечи́стаго де́мона не очи́стится, возбраня́ет крести́тися; беззако́нно бо е́сть, преда́вшаго себе́ лука́вому де́мону в жили́ще тече́нием к злым, и свет Свята́го Ду́ха прия́ти, несоверше́нно свобожденна от те́мнаго и лука́ваго ду́ха. А́ще же сме́рть сему́ наста́нет, повелева́ет крести́тися, да не тощ изы́дет от жития́, и неприча́стен боже́ственной благода́ти.

4-е же пра́вило глаго́лет: а́ще же не от де́мона оглаше́нный стужается, но от неду́га ума́ сражается, я́ко ниже́ отвеща́ти мо́жет, отемлем и веща́ния, но поне́же показа́ от произволе́ния ве́ру лобыза́ти, той бо оглаше́нныя сведе́н несумне́нно креща́ется.

111 пра́вило е́же в Карфаге́не Собо́ра, глаго́лет: я́же креще́нием подава́ема благода́ть нам, не то́кмо грехо́в оставле́ние, но и си́лу подае́т, е́же не ктому́ согреша́ти нам, ра́зве ле́ности ра́ди во́льне грехо́вная облобызахом; а и́же не та́ко му́дрствующих, прокля́тию отсыла́ет.

Ве́дати подоба́ет, я́ко во свято́м креще́нии еди́н довле́ет восприе́мник, а́ще му́жеский пол е́сть креща́емый; а́ще же же́нский, то́кмо восприимница, в ну́жде же сме́ртней мо́жет креще́ние бы́ть и без восприе́мника.

Разреша́ет свяще́нник по́яс хотя́щаго просвети́тися, и совлача́ет и отреша́ет его́, и поставля́ет его́ к восто́ку во еди́ной ри́зе непрепоя́сана, непокрове́на, и необуве́на, иму́щаго ру́це до́ле, и ду́ет на лице́ его́ три́жды, и зна́менует чело́ его́ и пе́рси три́жды, и налага́ет ру́ку на главу́ его́, глаго́ля: Го́споду помо́лимся.

О и́мени Твое́м, Го́споди Бо́же и́стины, и единоро́днаго Твоего́ Сы́на, и Свята́го Твоего́ Ду́ха, возлага́ю ру́ку мою́ на раба́ Твоего́ (или́ на рабу́ Твою́), и́мярек, сподо́бльшагося (или́ сподо́бльшуюся) прибе́гнути ко Свято́му и́мени Твоему́, и под кро́вом крил Твои́х сохрани́тися; отста́ви от него́ (или́ от нея́) ве́тхую о́ную пре́лесть и испо́лни его́ (или́ ю̀) е́же в Тя ве́ры, и наде́жды, и любве́: да разуме́ет, я́ко Ты еси́ еди́н Бог и́стинный, и единоро́дный твой Сын, Госпо́дь наш Иису́с Христо́с, и Святы́й Твой Дух. Да́ждь ему́ (или́ ей) во всех за́поведех Твои́х ходи́ти, и уго́дная Тебе́ сохрани́ти; я́ко а́ще сотвори́т сия́ челове́к, жив бу́дет в них. Напиши́ его́ (или́ ю̀) в кни́зе жи́зни Твоея́, соедини́ его́ (или́ ю̀) ста́ду насле́дия Твоего́, да просла́вится и́мя Твое́ Свято́е в нем (или́ в ней), и возлю́бленнаго Твоего́ Сы́на, Го́спода же на́шего Иису́са Христа́ и животворя́щаго Твоего́ Ду́ха. Да бу́дут о́чи Твои́ взира́юще на него́ (или́ на ню) ми́лостию вы́ну, и у́ши Твои́, е́же услы́шати глас моле́ния его́ (или́ ея́). Возвесели́ его́ (или́ ю̀) в де́лех ру́ку его́ (или́ ея́), и во вся́ком ро́де его́ (или́ ея́), да испове́стся Тебе́ покланя́яся (или́ покланя́ющися), и сла́вяй (или́ сла́вящи) и́мя Твое́ вели́кое и вы́шнее, и восхва́лит Тя вы́ну вся дни живота́ своего́. Возгла́с:

Тя бо пою́т вся си́лы небе́сныя, и Твоя́ е́сть сла́ва Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Запреще́ние 1. Го́споду помо́лимся.

Запреща́ет тебе́ Госпо́дь, диа́воле, прише́дый в мир, и всели́выйся в челове́цех, да разруши́т твое́ мучи́тельство, и челове́ки и́змет, И́же на дре́ве сопроти́вныя си́лы победи́, со́лнцу поме́ркшу, и земли́ поколеба́вшейся, и гро́бом отверзающымся, и телесе́м святы́х востаю́щым, И́же разруши́ сме́ртию сме́рть, и упраздни́ держа́ву иму́щаго сме́рти, си́есть, тебе́ диа́вола. Запреща́ю тебе́ Бо́гом, показа́вшим дре́во живота́, и уста́вившим херуви́мы, и пла́менное ору́жие обраща́ющееся стрещи́ то, запреще́н бу́ди. О́ным у́бо тебе́ запреща́ю, ходи́вшим я́ко по су́ху на плещу́ морску́ю, и запрети́вшим бу́ри ве́тров; Его́же зре́ние суши́т бе́здны, и преще́ние растаява́ет го́ры. Той бо и ны́не запреща́ет тебе́ на́ми: убо́йся, изы́ди, и отступи́ от созда́ния сего́, и да не возврати́шися, ниже́ утаи́шися в нем, ниже́ да сря́щеши его́ или́ де́йствуеши, ни в но́щи, ни во дни, или́ в часе́, или́ в полу́дни, но отиди́ во свой та́ртар, да́же до угото́ваннаго вели́каго дне су́днаго. Убо́йся Бо́га, седя́щаго на херуви́мех и призира́ющаго в бе́здны, Его́же трепе́щут а́нгели, арха́нгели, престо́ли, госпо́дьства, нача́ла, вла́сти, си́лы, многоочи́тии херуви́ми, и шестокрила́тии серафи́ми, Его́же трепе́щут Не́бо и земля́, мо́ре, и вся я́же в них, изы́ди, и отступи́ от запеча́таннаго новоизбра́ннаго во́ина Христа́ Бо́га на́шего; о́нем бо тебе́ запреща́ю, ходя́щим на крилу́ ве́тренню, творя́щим а́нгелы своя́ о́гнь паля́щ, изы́ди, и отступи́ от созда́ния сего́ со все́ю си́лою и а́ггелы твои́ми.

Возгла́с: Я́ко просла́вися и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Запреще́ние 2. Го́споду помо́лимся.

Бог Святы́й стра́шный и сла́вный во всех де́лех и кре́пости свое́й непостижи́мый, и неизсле́димый сый, Той предопредели́вый тебе́, диа́воле, ве́чныя му́ки томле́ние, на́ми недосто́йными Его́ рабы́ повелева́ет тебе́, и всей споспе́шней твое́й си́ле отступи́ти от новозапеча́таннаго (или́ от новозапечатанныя) и́менем Го́спода на́шего Иису́са Христа́ и́стиннаго Бо́га на́шего. Запреща́ю тебе́ у́бо вселука́вому, и нечи́стому, и скве́рному, и омерзе́нному, и чужде́му ду́ху, си́лою Иису́са Христа́, вся́кую вла́сть иму́щаго на небеси́ и на земли́, ре́кшаго глухо́му и немо́му де́мону: изы́ди от челове́ка, и да не ктому́ вни́деши в него́. Отступи́, позна́й твою́ су́етную си́лу, ниже́ на свиния́х вла́сть иму́щую, помяни́ повеле́вшаго тебе́ по твоему́ проше́нию в ста́до свино́е вни́ти. Убо́йся Бо́га, его́же повеле́нием земля́ на вода́х утверди́ся, созда́вшаго Не́бо, и поста́вльшаго го́ры ста́вилом, и удо́лия ме́рилом, и поло́жшаго песо́к мо́рю преде́л, и в воде́ зе́льней стезю́ тве́рдую; прикаса́ющагося гора́м, и дымя́тся, одева́ющагося све́том я́ко ри́зою; просте́ршаго не́бо я́ко ко́жу; покрыва́ющаго вода́ми превы́спренняя своя́, основающаго зе́млю на утвержде́нии ея́, не преклони́тся во век ве́ка: призыва́ющаго во́ду морску́ю, и пролива́ющаго ю̀ на лице́ всея́ земли́. Изы́ди и отступи́ от и́же ко свято́му просвеще́нию гото́вящагося (или́ готовящияся), запреща́ю тебе́ спаси́тельным страда́нием Го́спода на́шего Иису́са Христа́, и честны́м Его́ Те́лом и Кро́вию, и прише́ствием Его́ стра́шным; прии́дет бо и не закосни́т, судя́й всей земли́, и тебе́, и споспе́шную твою́ си́лу уму́чит в гее́нне о́гненней, преда́вый во тьму́ кроме́шную, иде́же че́рвь неусыпа́емый, и о́гнь неугаси́мый.

Я́ко держа́ва Христа́ Бо́га на́шего, со Отце́м, и Святы́м Ду́хом, ны́не и при́сно, и во ве́ки веко́в, ами́нь.

Запреще́ние 3. Го́споду помо́лимся.

Го́споди Савао́ф, Бо́же Изра́илев, исцеля́яй вся́кий неду́г, и вся́кую я́зю, при́зри на раба́ Твоего́ (или́ на рабу́ Твою́), взыщи́, испыту́й, и отжени́ от него́ (или́ от нея́) вся де́йства диа́воля. Запрети́ нечи́стым ду́хом, и изжени́ я̀, и очи́сти дела́ ру́ку Твое́ю, и о́строе Твое́ употреби́вый де́йство, сокруши́ сатану́ под но́зе его́ (или́ ея́) вско́ре, и да́ждь ему́ (или́ ей) побе́ды на него́, и на нечи́стыя его́ ду́хи: я́ко да от Тебе́ ми́лость получи́в, сподо́бится безсме́ртных Твои́х и небе́сных Твои́х та́ин, и сла́ву Тебе́ возсле́т, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Моли́тва 4. Го́споду помо́лимся.

Сый Влады́ко Го́споди, сотвори́вый челове́ка по о́бразу Твоему́ и по подо́бию, и да́вый ему́ вла́сть жи́зни ве́чныя, та́же отпа́дша грехо́м не презре́вый, но устро́ивый вочелове́чением Христа́ Твоего́ спасе́ние ми́ра: Сам и созда́ние Твое́ сие́ изба́вль от рабо́ты вра́жия, приими́ в Ца́рство Твое́ Пренебе́сное: отве́рзи его́ (или́ ея́) о́чи мы́сленныя, во е́же озаря́ти в нем (или́ в ней) просвеще́нию Ева́нгелиа Твоего́: сопрязи́ животу́ его́ (или́ ея́) а́нгела све́тла, избавля́юща его́ (или́ ю̀) от вся́каго наве́та сопротиволежа́щаго, от сре́тения лука́ваго, от де́мона полу́деннаго, и от мечта́ний лука́вых.

И ду́ет свяще́нник на уста́ его́, на чело́, и на пе́рси, глаго́ля:

Изжени́ из него́ (или́ из нея́) вся́каго лука́ваго и нечи́стаго ду́ха, сокры́таго и гнездя́щагося в се́рдце его́ (или́ ея́).

И глаго́лет сие́ три́жды.

Ду́ха пре́лести, ду́ха лука́вства, ду́ха идолослуже́ния, и вся́каго лихои́мства, ду́ха лжи и вся́кия нечистоты́, де́йствуемыя по науче́нию диа́волю, и сотвори́ его́ (или́ ю̀) овча́ слове́сное свята́го ста́да Христа́ Твоего́, уд че́стен Це́ркве Твоея́, сы́на и насле́дника (или́ дще́рь и насле́дницу) ца́рствия Твоего́; да по за́поведем Твои́м жи́тельствовав, и сохрани́в (или́ жи́тельствовавши и сохрани́вши) печа́ть неруши́мую, и соблю́д (или́ соблю́дши) ри́зу нескве́рную, полу́чит блаже́нства святы́х во ца́рствии Твое́м.

Возгла́сно: Благода́тию и щедро́тами, и человеколю́бием единоро́днаго Сы́на Твоего́, с ни́мже благослове́н еси́ с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

И совлече́ну и отреше́ну креща́емому, обраща́ет его́ свяще́нник на за́пад, горе́ ру́це иму́ща, и глаго́лет:

Отрица́еши ли ся сатаны́, и всех дел его́, и всех а́нгел его́, и всего́ служе́ния его́, и всея́ горды́ни его́;

И отвеща́ет оглаше́нный, или́ восприе́мник его́, а́ще е́сть креща́емый ва́рвар, или́ отроча́, и глаго́лет: Отрица́юся.

Па́ки свяще́нник глаго́лет второ́е:

Отрица́еши ли ся сатаны́, и всех дел его́, и всех а́нгел его́, и всего́ служе́ния его́, и всея́ горды́ни его́;

И отвеща́ет: Отрица́юся. Па́ки глаго́лет свяще́нник тре́тие:

Отрица́еши ли ся сатаны́, и всех дел его́, и всех а́нгел его́, и всего́ служе́ния его́, и всея́ горды́ни его́;

И отвеща́ет: Отрица́юся. Вопроша́ет па́ки свяще́нник креща́емаго: Отре́клся ли (или́ отрекла́ся ли) еси́ сатаны́;

И отвеща́ет оглаше́нный, или́ восприе́мник его́: Отреко́хся. Па́ки вопроша́ет свяще́нник:

Отре́клся ли (или́ отрекла́ся ли) еси́ сатаны́;

И отвеща́ет: Отреко́хся. Па́ки вопроша́ет свяще́нник тре́тие: Отре́клся ли (или́ отрекла́ся ли) еси́ сатаны́;

И отвеща́ет: Отреко́хся. Та́же глаго́лет свяще́нник:

И ду́ни, и плю́ни на него́. И сие́ сотво́ршу, обраща́ет его́ свяще́нник к восто́ку, до́ле ру́це иму́ща, и глаго́лет ему́ свяще́нник: Сочетава́ешилися Христу́; И отвеща́ет оглаше́нный, или́ восприе́мник, глаго́ля: Сочетава́юся. Па́ки свяще́нник глаго́лет второ́е: Сочетава́ешилися Христу́; Отвеща́ет второ́е: Сочетава́юся. Па́ки свяще́нник глаго́лет тре́тие: Сочетава́ешилися Христу́; Отвеща́ет тре́тие: Сочетава́юся.

Та́же па́ки глаго́лет ему́ свяще́нник: Сочета́лся ли (или́ сочета́лася ли) еси́ Христу́; И отвеща́ет: Сочета́хся. И па́ки глаго́лет: И ве́руеши ли Ему́; И глаго́лет: Ве́рую Ему́, я́ко Царю́ и Бо́гу.

И глаго́лет:

Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым.

И во Еди́наго Го́спода Иису́са Христа́ Сы́на Бо́жия, единоро́днаго И́же от Отца́ рожде́ннаго пре́жде всех век.

Све́та от све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, и́мже вся бы́ша.

Нас ра́ди челове́к, и на́шего ра́ди спасе́ния сше́дшаго с небе́с, и воплоти́вшагося от Ду́ха Свя́та и Мари́и Де́вы, и вочелове́чшася.

Распя́таго же за ны при понти́йстем Пила́те, и страда́вша и погребе́нна, и воскре́сшаго в тре́тий де́нь по писа́нием.

И возше́дшаго на небеса́ и седя́ща одесну́ю Отца́.

И па́ки гряду́щаго со сла́вою суди́ти живы́м и ме́ртвым, Его́же ца́рствию не бу́дет конца́.

И в Ду́ха Свята́го, Го́спода, животворя́щаго, И́же от Отца́ исходя́щаго, И́же со Отце́м и Сыно́м спокланя́ема и ссла́вима глаго́лавшаго проро́ки.

Во еди́ну Святу́ю Собо́рную и Апо́стольскую це́рковь.

Испове́дую еди́но креще́ние, во оставле́ние грехо́в.

Ча́ю воскресе́ния ме́ртвых;

И жи́зни бу́дущаго ве́ка, ами́нь.

И егда́ испо́лнит святы́й симво́л и глаго́лет па́ки к нему́: Сочета́лся ли (или́ сочета́лася ли) еси́ Христу́; И отвеща́ет: Сочета́хся. И па́ки глаго́лет: И ве́руеши ли Ему́; И глаго́лет: Ве́рую ему́, я́ко Царю́ и Бо́гу. И глаго́лет: Ве́рую во еди́наго Бо́га: все до конца́. И егда́ испо́лнит второ́е святы́й симво́л, глаго́лет па́ки к нему́ тре́тие: Сочета́лся ли (или́ сочета́лася ли) еси́ Христу́; И отвеща́ет: Сочета́хся. И па́ки глаго́лет: И ве́руеши ли Ему́; И глаго́лет: Ве́рую ему́, я́ко Царю́ и Бо́гу. И глаго́лет: Ве́рую во еди́наго Бо́га: все до конца́. И егда́ испо́лнит тре́тие святы́й симво́л, вопроша́ет его́ па́ки свяще́нник, глаго́ля: Сочета́лся ли (или́ сочета́лася ли) еси́ Христу́; Отвеща́ет: Сочета́хся. Па́ки вопроша́ет свяще́нник второ́е: Сочета́лся ли (или́ сочета́лася ли) еси́ Христу́; И отвеща́ет второ́е: Сочета́хся. Па́ки вопроша́ет свяще́нник тре́тие: Сочета́лся ли (или́ сочета́лася ли) еси́ Христу́; И отвеща́ет тре́тие: Сочета́хся. И глаго́лет свяще́нник: И поклони́ся Ему́. И покланя́ется, глаго́ля: Покланя́юся Отцу́, и Сы́ну, и Свято́му Ду́ху, Тро́ице единосу́щней и неразде́льней.

Та́же глаго́лет свяще́нник:

Благослове́н Бог, всем челове́ком хотя́й спасти́ся, и в позна́ние и́стины приити́, ны́не и при́сно, и во ве́ки веко́в, ами́нь.

Та́же глаго́лет моли́тву сию́: Го́споду помо́лимся.

Влады́ко Го́споди Бо́же наш, призови́ раба́ Твоего́ (или́ рабу́ Твою́), и́мярек, ко свято́му Твоему́ просвеще́нию, и сподо́би его́ (или́ ю̀) вели́кия сея́ благода́ти, Свята́го Твоего́ Креще́ния: отреши́ его́ (или́ ея́) ве́тхость, и обнови́ его́ (или́ ю̀) в живо́т ве́чный, и испо́лни его́ (или́ ю̀) Свята́го Твоего́ Ду́ха си́лы, в соедине́ние Христа́ Твоего́, да не ктому́ ча́до те́ла бу́дет, но ча́до Твоего́ ца́рствия, благоволе́нием и благода́тию единоро́днаго Твоего́ Сы́на: с Ни́мже благослове́н еси́ со Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Вхо́дит свяще́нник, и облача́ется в свяще́нническую оде́жду бе́лую и нарука́вницы; и вжига́емым всем свеща́м, взем кади́льницу, отхо́дит к купе́ли, и кади́т о́крест, и отда́в кади́льницу, покланя́ется.

Та́же глаго́лет диа́кон: Благослови́ влады́ко. Свяще́нник же возгла́сно: Благослове́но ца́рство Отца́, и Сы́на, и Свята́го Ду́ха ны́не и при́сно, и во ве́ки веко́в.

Лик: Ами́нь.

Диа́кон же а́бие глаго́лет ектению́:

Ми́ром Го́споду помо́лимся.

О свы́шнем ми́ре и спасе́нии душ на́ших Го́споду помо́лимся.

О ми́ре всего́ ми́ра, благостоя́нии святы́х Бо́жиих церкве́й и соедине́нии всех, Го́споду помо́лимся.

О святе́м хра́ме сем, и с ве́рою, благогове́нием, и стра́хом Бо́жиим входя́щих в о́нь, Го́споду помо́лимся.

О Святе́йшем Прави́тельствующем Сино́де (и о митрополи́те на́шем, и́мярек, его́же о́бласть), честне́м пресви́терстве, во Христе́ диа́констве, о всем при́тче, и лю́дех, Го́споду помо́лимся.

О Благочести́вейшем, Самодержа́внейшем, вели́ком Госуда́ре ИМПЕРА́ТОРЕ АЛЕКСА́НДРЕ АЛЕКСА́НДРОВИЧЕ всея́ Росси́и, и о Супру́ге Его́, Благочести́вейшей Госуда́рыне ИМПЕРАТРИ́ЦЕ МАРИ́И ФЕО́ДОРОВНЕ, Го́споду помо́лимся.

О Насле́днике Его́, Благове́рном Госуда́ре Цесаре́виче и Вели́ком Кня́зе НИКО́ЛАЕ АЛЕКСА́НДРОВИЧЕ, и о всем Ца́рствующем До́ме; о всей Пала́те и во́инстве Их Го́споду помо́лимся.

О е́же освяти́тися воде́ сей, си́лою и де́йством, и наи́тием Свята́го Ду́ха, Го́споду помо́лимся.

О е́же низпосла́тися ей благода́ти избавле́ния, благослове́нию иорда́нову, Го́споду помо́лимся.

О е́же приити́ на во́ду сию́ чисти́тельному пресу́щественныя Тро́ицы де́йству, Го́споду помо́лимся.

О е́же просвети́тися нам просвеще́нием ра́зума и благоче́стия, наи́тием Свята́го Ду́ха, Го́споду помо́лимся.

О е́же показа́тися ей отгна́нию вся́каго наве́та ви́димых и неви́димых враго́в, Го́споду помо́лимся.

О е́же досто́йну бы́ти нетле́ннаго ца́рствия в ней креща́емому (или́ крещаемой), Го́споду помо́лимся.

О е́же ны́не приходя́щем (или́ приходя́щей) ко свято́му просвеще́нию, и о спасе́нии его́ (или́ ея́), Го́споду помо́лимся.

О е́же показа́тися ему́ сы́ну (или́ ей дще́ри) све́та, и насле́днику (или́ насле́днице) ве́чных благ, Го́споду помо́лимся.

О е́же бы́ти ему́ (или́ ей) сра́слену и прича́стнику (или́ сраслене и прича́стнице) сме́рти и воскресе́ния Христа́ Бо́га на́шего, Го́споду помо́лимся.

О е́же сохрани́ти ему́ (или́ ей) оде́жду креще́ния, и обруче́ние ду́ха нескве́рно и непоро́чно, в де́нь стра́шный Христа́ Бо́га на́шего, Го́споду помо́лимся.

О е́же бы́ти ему́ (или́ ей) воде́ сей ба́нею пакибытия́, оставле́нию грехо́в и оде́жди нетле́ния, Го́споду помо́лимся.

О е́же услы́шати Го́споду Бо́гу глас моле́ния на́шего, Го́споду помо́лимся.

О е́же изба́витися ему́же (или́ е́йже) и нам от вся́кия ско́рби, гне́ва и ну́жды, Го́споду помо́лимся.

Заступи́, спаси́, поми́луй и сохрани́ нас, Бо́же, Твое́ю благода́тию.

Пресвяту́ю, Пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га и ве́сь живо́т наш Христу́ Бо́гу предади́м.

И диа́кону глаго́лющу сия́, свяще́нник глаго́лет в себе́ моли́тву сию́, та́йно:

Благоутро́бный и ми́лостивый Бо́же, истязу́яй се́рдца и утро́бы, и та́йная челове́ческая ве́дый Еди́н, не бо е́сть ве́щь неявле́нна пред Тобо́ю, но вся на́га и обнаже́нна пред очи́ма Твои́ма: ве́дый я́же о мне, да не омерзиши мя, ниже́ Лица́ Твоего́ отврати́ши от Мене́: но пре́зри моя́ прегреше́ния в час сей, презира́яй челове́ков грехи́ в покая́ние, и омы́й мою́ скве́рну теле́сную и скве́рну душе́вную, и всего́ мя освяти́, всесоверше́нною си́лою Твое́ю неви́димою, и десни́цею духо́вною, да не свобо́ду ины́м возвеща́яй, и сию́ подава́яй ве́рою соверше́нною, Твоего́ неизрече́ннаго человеколю́бия, сам, я́ко раб греха́, неиску́сен бу́ду. Ни, Влады́ко, Еди́не благи́й и человеколюби́вый, да не возвращу́ся смире́н: но низпосли́ мне си́лу с высоты́, и укрепи́ мя к слу́жбе предлежа́щаго Твоего́ та́инства, вели́каго и пренебе́снаго; и вообрази́ Христа́ Твоего́ в хотя́щем (или́ в хотя́щей) па́ки роди́тися, мои́м окая́нством; и назида́й его́ (или́ ю̀) на основа́нии апо́стол и проро́к Твои́х, и да не низложи́ши: но насади́ его́ (или́ ю̀) насажде́ние и́стины, во святе́й Твое́й Собо́рней и Апо́стольстей Це́ркви, и да не восто́ргнеши; я́ко да преуспева́ющу ему́ (или́ ей) во благоче́стии, сла́вится и тем (или́ и то́ю) всесвято́е и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Подоба́ет ве́дати, я́ко не возглаша́ет, но ами́нь, в себе́ глаго́лет. Та́же глаго́лет моли́тву сию́ велегла́сно:

Ве́лий еси́ Го́споди, и чу́дна дела́ Твоя́, и ни еди́но же сло́во дово́льно бу́дет к пе́нию чуде́с Твои́х. Три́жды.

Ты бо хоте́нием от не су́щих во е́же бы́ти приведы́й вся́ческая, Твое́ю держа́вою содержи́ши тва́рь, и Твои́м про́мыслом стро́иши мир; Ты от четы́рех стихи́й тва́рь сочини́вый, четы́рми времены́ круг ле́та венча́л еси́. Тебе́ трепе́щут у́мныя вся си́лы, Тебе́ пое́т со́лнце, Тебе́ сла́вит луна́, Тебе́ прису́тствуют зве́зды, Тебе́ слу́шает свет, Тебе́ трепе́щут бе́здны, Тебе́ рабо́тают исто́чницы. Ты просте́рл еси́ Не́бо я́ко ко́жу; Ты утверди́л еси́ зе́млю на вода́х; Ты огради́л еси́ мо́ре песко́м; Ты ко отдыха́нием возду́х пролия́л еси́. А́нгельския си́лы Тебе́ слу́жат: арха́нгельстии ли́цы Тебе́ кла́няются; многоочи́тии херуви́ми, и шестокрила́тии серафи́ми, о́крест стоя́ще, и облета́юще, стра́хом непристу́пныя сла́вы Твоея́ покрыва́ются. Ты бо Бог сый неопи́санный, безнача́льный же и неизглаго́ланный, прише́л еси́ на зе́млю, зрак раба́ прии́м, в подо́бии челове́честем быв: не бо терпе́л еси́ Влады́ко, милосе́рдия ра́ди ми́лости Твоея́, зре́ти от диа́вола му́чима ро́да челове́ча, но прише́л еси́ и спасл еси́ нас. Испове́дуем благода́ть, пропове́дуем ми́лость, не таи́м благодея́ния; естества́ на́шего ро́ды свободи́л еси́, де́вственную освяти́л еси́ утро́бу рождество́м Твои́м. Вся тва́рь воспева́ет Тя я́вльшагося; Ты бо Бог наш на земли́ яви́лся еси́, и с челове́ки пожи́л еси́. Ты иорда́нския струи́ освяти́л еси́, с Небесе́ низпосла́вый Свята́го Твоего́ Ду́ха, и главы́ та́мо гнездя́щихся сокруши́л еси́ змие́в.

Ты у́бо Человеколю́бче Царю́, прииди́ и ны́не наи́тием Свята́го Твоего́ Ду́ха, и освяти́ во́ду сию́. Три́жды.

И да́ждь ей благода́ть избавле́ния, благослове́ние иорда́ново: сотвори́ ю̀ нетле́ния исто́чник, освяще́ния дар, грехо́в разреше́ние, неду́гов исцеле́ние; де́монов всегуби́тельство, сопроти́вным си́лам непристу́пну, а́нгельския кре́пости испо́лнену. Да бежа́т от нея́ наве́тующии созда́нию Твоему́: я́ко и́мя Твое́ Го́споди призва́х, ди́вное и сла́вное, и стра́шное сопроти́вным.

И зна́менует во́ду три́жды, погружа́я пе́рсты в воде́, и ду́нув на ню глаго́лет:

Да сокруша́тся под зна́мением о́браза Креста́ Твоего́ вся сопроти́вныя си́лы, три́жды.

Мо́лимся Тебе́, Го́споди, да отсту́пят от нас вся возду́шная и неявле́нная привиде́ния: и да не утаи́тся в воде́ сей де́мон те́мный: ниже́ да сни́дет с креща́ющимся (или́ с крещающейся) дух лука́вый, помраче́ние по́мыслов, и мяте́ж мы́сли наводя́й; но Ты, Влады́ко всех, покажи́ во́ду сию́, во́ду избавле́ния, во́ду освяще́ния, очище́ние пло́ти и ду́ха, осла́бу уз, оставле́ние прегреше́ний, просвеще́ние душ, ба́ню пакибытия́, обновле́ние ду́ха, сыноположе́ния дарова́ние, одея́ние нетле́ния, исто́чник жи́зни. Ты бо рекл еси́, Го́споди: измы́йтеся, и чи́сти бу́дете, отими́те лука́вства от душ ва́ших. Ты дарова́л еси́ нам свы́ше па́ки рожде́ние водо́ю и ду́хом. Яви́ся, Го́споди, на воде́ сей, и да́ждь претвори́тися в ней креща́емому (или́ крещаемой), во е́же отложи́ти у́бо ве́тхаго челове́ка, тле́емаго по по́хотем пре́лести, облещи́ся же в но́ваго, обновля́емаго по о́бразу Созда́вшаго его́: да быв сра́слен (или́ бы́вши сраслена) подо́бию сме́рти твоея́ креще́нием, о́бщник (или́ о́бщница) и воскресе́ния бу́дет: и сохрани́в (или́ и сохрани́вши) дар Свята́го Твоего́ Ду́ха, и возрасти́в (или́ возрасти́вши) зало́г благода́ти, прии́мет по́честь го́рняго зва́ния, и сопричте́тся перворожде́нным напи́санным на небеси́, в Тебе́, Бо́зе и Го́споде на́шем Иису́се Христе́, вку́пе со безнача́льным Твои́м Отце́м, сла́ва, держа́ва, с Пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в. Ами́нь.

Мир всем. Главы́ ва́шя Го́сподеви приклони́те.

И вду́нет три́жды в сосу́д еле́а, и зна́менает три́жды сей, си́есть еле́й держи́мый от диа́кона, и ре́кшу ему́:

Го́споду помо́лимся. Свяще́нник же глаго́лет моли́тву:

Влады́ко Го́споди Бо́же оте́ц на́ших, су́щым в ковче́зе но́еве голуби́цу посла́вый, суче́ц ма́сличный иму́щую во усте́х, примире́ния зна́мение, спасе́ния же от пото́па, и благода́ти та́инство о́ными предобрази́вый, и ма́сличный плод, во исполне́ние святы́х Твои́х та́ин пода́вый: тем и бы́вших в зако́не Ду́ха Свята́го испо́лнивый, и су́щих в благода́ти соверша́яй; Сам благослови́ и сей еле́й, си́лою и де́йством и наи́тием Свята́го Твоего́ Ду́ха, я́коже бы́ти тому́ пома́занию нетле́ния, ору́жию пра́вды, обновле́нию души́ и те́ла, вся́каго диа́вольскаго де́йства отгна́нию, во измене́ние всех зол, помазу́ющымся ве́рою, или́ вкуша́ющым от него́ в сла́ву Твою́, и единоро́днаго Твоего́ Сы́на, и Пресвята́го, и блага́го, и животворя́щаго Твоего́ Ду́ха, ны́не и при́сно, и во ве́ки веко́в. Лик: Ами́нь. Диа́кон: Во́нмем. Свяще́нник, поя́ Аллилу́иа три́жды с людьми́, твори́т кресты́ три еле́ем в воде́.

Та́же возглаша́ет:

Благослове́н Бог, просвеща́яй и освяща́яй вся́каго челове́ка, гряду́щаго в мир, ны́не и при́сно, и во ве́ки веко́в. Лик: Ами́нь. И прино́сится креща́емый; свяще́нник же взе́млет от еле́а двема́ пе́рсты, и твори́т креста́ о́браз, на челе́ и пе́рсех, и на междора́мии, глаго́ля: Помазу́ется раб Бо́жий (или́ раба́ Бо́жия), и́мярек, еле́ем ра́дования, во и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь. И назна́менует его́ пе́рси, и междора́мия, на пе́рсех у́бо глаго́ля: Во исцеле́ние души́ и те́ла. На ушесе́х же: В слы́шание ве́ры. На рука́х: Ру́це Твои́ сотвори́сте мя, и созда́сте мя. На нога́х: Во е́же ходи́ти ему́ (или́ ей) по стопа́м за́поведей Твои́х. И егда́ пома́жется все те́ло, креща́ет его́ свяще́нник, про́ста его́ держа́, и зря́ща на восто́к, глаго́ля: Креща́ется раб Бо́жий (или́ раба́ Бо́жия), и́мярек, во и́мя Отца́, ами́нь. И Сы́на, ами́нь. И Свята́го Ду́ха, ами́нь. Ны́не и при́сно, и во ве́ки веко́в, ами́нь.

На ко́емждо приглаше́нии низводя́ его́, и возводя́. По креще́нии же умыва́ет свяще́нник ру́це, поя́ с людьми́:

Блаже́ни, и́хже оста́вишася беззако́ния, и и́хже прикры́шася греси́. Блаже́н муж, ему́же не вмени́т Госпо́дь греха́, ниже́ е́сть во усте́х его́ ле́сть. Я́ко умолча́х, обетша́ша ко́сти моя́, от е́же зва́ти ми ве́сь де́нь. Я́ко де́нь и но́щь отяготе́ на мне рука́ Твоя́, возврати́хся на стра́сть, егда́ унзе́ ми терн. Беззако́ние мое́ позна́х, и греха́ моего́ не покры́х; рех, испове́м на мя беззако́ние мое́ Го́сподеви, и Ты оста́вил еси́ нече́стие се́рдца моего́. За то помо́лится к Тебе́ всяк преподо́бный во вре́мя благопотре́бно: оба́че в пото́пе вод мно́гих к нему́ не прибли́жатся. Ты еси́ прибе́жище мое́ от ско́рби обдержа́щия мя; ра́досте моя́, изба́ви мя от обыше́дших мя. Вразумлю́ тя, и наста́влю тя на пу́ть сей, в о́ньже по́йдеши, утвержу́ на тя о́чи мои́. Не бу́дите я́ко ко́нь и меск, и́мже не́сть ра́зума; брозда́ми и уздо́ю че́люсти их востя́гнеши, не приближа́ющихся к тебе́. Мно́ги ра́ны гре́шному, упова́ющаго же на Го́спода ми́лость обы́дет. Весели́теся о Го́споде, и ра́дуйтеся пра́веднии, и хвали́теся вси пра́вии се́рдцем.

Сей же псало́м глаго́лется ве́сь, три́жды, и облача́я его́ во одея́ния, глаго́лет:

Облача́ется раб Бо́жий (или́ раба́ Бо́жия), и́мярек, в ри́зу пра́вды, во и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь. И пое́тся тропа́рь, во глас 8: Ри́зу мне пода́ждь све́тлу, одея́йся све́том я́ко ри́зою, многоми́лостиве Христе́ Бо́же наш.

И по е́же облещи́ его́ мо́лится свяще́нник, глаго́ля моли́тву сию́:

Благослове́н еси́ Го́споди Бо́же Вседержи́телю, исто́чниче благи́х, со́лнце пра́вды, возсия́вый су́щым во тьме́ свет спасе́ния, явле́нием единоро́днаго Твоего́ Сы́на, и Бо́га на́шего; и дарова́вый нам недосто́йным блаже́нное очище́ние во святе́й воде́, и Боже́ственное освяще́ние в животворя́щем пома́зании; и́же и ны́не благоволи́вый па́ки роди́ти раба́ Твоего́ новопросвеще́ннаго (или́ рабу́ Твою́ новопросвеще́нную) водо́ю и ду́хом, и во́льных и нево́льных грехо́в оставле́ние тому́ (или́ той) дарова́вый. Сам Влады́ко, Всецарю́ благоутро́бне, да́руй тому́ (или́ той) и печа́ть да́ра, Свята́го и всеси́льнаго, и покланя́емаго Твоего́ Ду́ха, и причаще́ние Свята́го Те́ла, и честны́я Кро́ве Христа́ Твоего́. Сохрани́ его́ (или́ ю̀) в Твое́м освяще́нии, утверди́ в правосла́вной ве́ре, изба́ви от лука́ваго и всех начина́ний его́; и спаси́тельным Твои́м стра́хом в чистоте́ и пра́вде ду́шу его́ (или́ ея́) соблюди́; да во вся́ком де́ле и сло́ве благоугожда́яй Тебе́, сын и насле́дник (или́ дще́рь и насле́дница) бу́дет небе́снаго Твоего́ Ца́рствия.

Возгла́сно: Я́ко Ты еси́ Бог наш, Бог е́же ми́ловати и спаса́ти; и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

творя́ креста́ о́браз, На челе́, И очесе́х, И но́здрех, И усте́х, И обои́х ушесе́х, И пе́рсех, И рука́х, И нога́х, глаго́ля: Печа́ть да́ра Ду́ха Свята́го, ами́нь.

Та́же твори́т свяще́нник с восприе́мником и младе́нцем кру́га о́браз, и пое́м: Ели́цы во Христа́ крести́стеся, во Христа́ облеко́стеся, аллилу́иа. Три́жды.

Та́же проки́мен, глас 3: Госпо́дь просвеще́ние мое́, и Спаси́тель мой, кого́ убою́ся; Стих: Госпо́дь защи́титель живота́ моего́, от кого́ устрашу́ся;

Апо́стол. К Ри́мляном, посла́ния свята́го апо́стола Па́вла чте́ние. Зача́ло 91:

Бра́тие, ели́цы во Христа́ Иису́са крести́хомся, в сме́рть его́ крести́хомся. Спогребо́хомся у́бо Ему́ креще́нием в сме́рть: да я́коже воста́ Христо́с от ме́ртвых сла́вою о́тчею, та́ко и мы во обновле́нии жи́зни ходи́ти начне́м. А́ще бо сообра́зни бы́хом подо́бию сме́рти Его́, то и воскресе́нию бу́дем; Сие́ ве́дяще, я́ко ве́тхий наш челове́к с Ним распя́тся, да упраздни́тся те́ло грехо́вное, я́ко ктому́ не рабо́тати нам греху́. Уме́рый бо оправди́ся от греха́. А́ще ли умро́хом со Христо́м, ве́руем, я́ко и жи́ви бу́дем с Ним; Ве́дяще, я́ко Христо́с воста́ от ме́ртвых, ктому́ уже́ не умира́ет, сме́рть ему́ ктому́ не облада́ет. Е́же бо у́мре, греху́ у́мре еди́ною: а е́же живе́т, бо́гови живе́т. Та́коже и вы помышля́йте себе́ ме́ртвым у́бо бы́ти греху́, живы́м же бо́гови, о Христе́ Иису́се Го́споде на́шем.

Иере́й: Мир ти. Диа́кон: Прему́дрость, во́нмем.

Чтец: Псало́м Дави́дов, аллилу́иа. Посе́м диа́кон:

Прему́дрость, про́сти услы́шим свята́го Ева́нгелиа.

Иере́й: От Матфе́а свята́го Ева́нгелиа чтение.

Диа́кон: Во́нмем.

Иере́й чтет, зача́ло 116.

Во вре́мя о́но, единиина́десять ученицы́ идо́ша в Галиле́ю в го́ру, а́може повеле́ им Иису́с. И ви́девше Его́, поклони́шася Ему́: о́вии же усумне́шася. И присту́пль Иису́с рече́ им, глаго́ля: даде́ся Ми вся́ка вла́сть на небеси́ и на земли́. Ше́дше научи́те вся язы́ки, крестя́ще их во и́мя Отца́, и Сы́на, и Свята́го Ду́ха; уча́ще их блюсти́ вся, ели́ка запове́дах вам, и се Аз с ва́ми е́смь во вся дни, до сконча́ния ве́ка, ами́нь.

Та́же ектению́ глаго́лет а́бие:

Поми́луй нас Бо́же, по вели́цей ми́лости Твое́й:

Еще́ мо́лимся о Благочести́вейшем, Самодержа́внейшем, Вели́ком Госуда́ре на́шем ИМПЕРА́ТОРЕ АЛЕКСА́НДРЕ АЛЕКСА́НДРОВИЧЕ всея́ Росси́и.

Еще́ мо́лимся о супру́ге Его́, Благочести́вейшей Госуда́рыне, ИМПЕРАТРИ́ЦЕ МАРИ́И ФЕО́ДОРОВНЕ.

Еще́ мо́лимся о Насле́днике Его́, Благове́рном Госуда́ре, Цесаре́виче и Вели́ком Кня́зе НИКО́ЛАЕ АЛЕКСА́НДРОВИЧЕ и о всем Ца́рствующем До́ме.

Еще́ мо́лимся о Святе́йшем Прави́тельствующем Сино́де.

Еще́ мо́лимся о ми́лости жи́зни, ми́ре, здра́вии, спасе́нии и оставле́нии грехо́в раба́ Бо́жия, и́мярек, восприе́мника.

Еще́ мо́лимся о новопросвеще́нном ра́бе Бо́жии (или́ о новопросвеще́нной ра́бе Бо́жией), и́мярек, о е́же сохране́ну бы́ти ему́ (или́ сохранене бы́ти ей) в ве́ре чи́стаго испове́дания, во вся́ком благоче́стии же, и исполне́нии за́поведей Христо́вых, во вся дни живота́ его́ (или́ ея́).

Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Свяще́нник:

Сла́ва Тебе́ Христе́ Бо́же, упова́ние на́ше, сла́ва Тебе́.

Сла́ва, И ны́не: Го́споди поми́луй, три́жды. Благослови́.

И свяще́нник твори́т отпу́ст.

Благочести́вый и Христоимени́тый восприе́мниче, господи́не, и́мярек, Благода́тию и щедро́тами человеколю́бца Бо́га, хотя́щаго всем человекам спасти́ся, духо́вное дне́сь соверши́ся во хра́ме Бо́жии рожде́ние водо́ю и Ду́хом. О Не́мже Сам Христо́с Госпо́дь, да́вый нам того́ рожде́ния (на поле: Ин.3) зако́н, глаго́лаше к Никоди́му си́це: Ами́нь ами́нь глаго́лю тебе́, а́ще кто не роди́тся водо́ю и Ду́хом, не мо́жет вни́ти во ца́рствие Бо́жие. И по воскресе́нии Сын завеща́л о Нем ученико́м свои́м, глаго́ля: дадемися вся́ка вла́сть на небеси́ и на земли́; ше́дше у́бо научи́те вся язы́ки, крестя́ще их во и́мя Отца́, и Сы́на, и Свята́го Ду́ха, уча́ше из блюсти́ вся, ели́ка запове́дах вам. О сем всесвятом пребоже́ственныя Тро́ицы и́мени, крести́ся дне́сь новопросвеще́нный раб Бо́жий, и́мярек, и роди́ся духо́вне. И́бо бы́сть из сы́на тьмы́ сын све́та, из сы́на гне́ва, сын благода́ти Бо́жия; и пресели́ся от страны́ се́ни сме́ртный, во страну́ жре́бия святы́х во све́те, и во кни́зе написа́ся живо́тней. Чесо́ ра́ди веселя́тся в Це́ркви торжеству́ющей а́нгели, ра́дость ве́лию обыкшие име́ти о еди́нем гре́шнице ка́ющемся, я́ко во исполне́ние паде́ния, в лик си́ вчини́ся хотя́щаго созерцают челове́ка. Ра́дуемся и мы во Це́ркви подвиза́ющейся, я́ко ко и́стинной лозе́, И́же е́сть Христо́с Госпо́дь, присадися но́вая розга́, е́же ту́ком благода́ти его́ оживлятися, и гро́зды доброде́телей приноси́ти. Изря́дныя же твоему́ благоче́стию весели́тися досто́ит, я́ко ту ро́згу духо́вную, того́ сы́на благода́ти и све́та, восприя́л еси́ от боже́ственныя купе́ли, и сотвори́лся еси́ тому́ оте́ц духо́вный с поруче́нием и восприя́тием на земли́; ему́же Оте́ц бы́сть ны́не благода́тию живы́й на небеси́ Госпо́дь. Су́щу же ти отцу́ духо́вному, ве́дети досто́ит я́ко долг и́маши оте́ческую любо́вь храни́ти ко Бо́гом да́нному тебе́ сы́ну, по вся дни живота́ твоего́. И егда́ даст Госпо́дь ума́ ему́ благо́е стяжа́ти употребле́ние; тогда́ наставля́ти ѝ, е́же ве́ры православнокафолическия, вся соста́вы, и вся ну́жная благочести́вым ко спасе́нию зна́ти и храни́ти непоро́чно; житие́ же досто́йно зва́нию христиа́нскому провожда́ти, да я́ко ны́не провещен ны́не благода́ти заря́ми чрез рожде́ние духо́вное, в ру́це твои́ предаде́ся мно́ю гре́шным; та́ко немрачен по отрожде́нии во ин век предста́нет Отцу́ небе́сному, и я́ко дне́сь чист, и па́че сне́га убеле́н на душе́, из ба́ни пакибытия́; та́ко непоро́чен и неочернен злы́ми делесы́ изше́д из пло́ти, предста́нет судии́ нелицеме́рному, хотя́щему возда́ти кому́ждо по де́лом его́. И я́ко све́тло дне́сь усты́ твои́ми отрече́ся сатаны́ проклятаго и всех дел его́: всыновися же Творцу́ всех и Бо́гу, благода́тию духо́вным стяжаною рожде́нием, и член це́ркве Христо́вы соде́яся со испове́данием и́стинныя ве́ры христиа́нския; та́ко во вся дни живота́ своего́ да пребу́дет во еди́нстве ве́ры нераскольно от Це́ркве, и во благода́ти всыновле́ния Бо́гу неизме́нный. Не обрати́тся же на дела́ сатаны́ лука́ваго никогда́же, и самому́ я́ко врагу́ душегубному, вы́ну ста́нет сопроти́вно. Госпо́дним же посо́бием всех его́ ко́зней кре́пкий яви́тся разруши́тель, я́ко во́ин Христо́в, печатью да́ра Ду́ха Свята́го на бра́нь проти́ву ему́ утвержде́нный. По сицево́му же богоуго́дных по́двизех, да восприи́мет от подвигополо́жника, жи́зни ве́чныя натрижне́ние во Ца́рствии небе́снем толи́каго блаже́нства. А́ще твои́м наставле́нием новопросвеще́ннаго младе́нца прия́тия сподо́битися потщи́шася удостояти, и твое́ благоче́стие досто́йнаго воздая́ния не и́мать бы́ти лишенно у Го́спода Бо́га. Но за любо́вь твою́, к сы́ну твоему́ духо́вному явля́емую, возлю́блен бу́деши от Отца́ небе́снаго, И́же е́сть любы́, по о́ному: Бог любы́ е́сть. За наставле́ние душеполе́зное, наста́влен бу́деши прямы́м путе́м за́поведей Госпо́дних ше́ствовати во страну́ жи́зни ве́чныя. Ея́же по многолетном благоде́нствии насле́дия, аз та́ко тебе́ самому́, я́коже и Бо́гом да́нному ти сы́ну, те́плый е́смь моли́твенник и усе́рдно и́стинный жела́тель.

Лик: Го́споди поми́луй.

Избавле́ние грехо́в, святы́м креще́нием рабу́ Твоему́ (или́ ра́бе Твое́й) дарова́вый, и жи́знь па́ки рожде́ния ему́ (или́ ей) пода́вый, сам Влады́ко Го́споди, просвеще́ние Лица́ Твоего́ в се́рдце его́ (или́ ея́) озаря́ти вы́ну благоволи́; щит ве́ры его́ (или́ ея́) ненаветован от враго́в соблюди́; нетле́ния оде́жду, е́юже оде́яся, нескве́рну в нем (или́ в ней) и небла́знену сохрани́, неруши́му в нем (или́ в ней) духо́вную печа́ть благода́тию Твое́ю соблюда́я, ми́лостив ему́же (или́ е́йже) и нам быва́я, по мно́жеству щедро́т Твои́х.

Я́ко благослови́ся, и просла́вися, пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Моли́тва втора́я:

Го́споду помо́лимся. Лик: Го́споди поми́луй.

Влады́ко Го́споди Бо́же наш, купе́лию небе́сное осия́ние креща́емым подава́яй, па́ки роди́вый раба́ Твоего́ новопросвеще́ннаго (или́ рабу́ Твою́ новопросвеще́нную) водо́ю и ду́хом, и во́льных и нево́льных грехо́в оставле́ние тому́ (или́ той) дарова́вый, возложи́ на него́ (или́ на ню) ру́ку Твою́ держа́вную, и сохрани́ его́ (или́ ю̀) в си́ле Твоея́ бла́гости, некра́домо обруче́ние сохрани́, и сподо́би его́ (или́ ю̀) в жи́знь ве́чную, и в Твое́ благоугожде́ние.

Я́ко Ты еси́ освяще́ние на́ше, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь. Иере́й: Мир всем. Лик: И ду́хови твоему́.

Диа́кон: Главы́ ва́шя Го́сподеви приклони́те.

Лик: Тебе́ Го́споди.

Оде́явыйся (или́ одеявшяся) в Тя Христа́ и Бо́га на́шего, Тебе́ подклони́ с на́ми свою́ главу́, его́же (или́ ю́же) сохрани́ непобеди́ма подви́жника (или́ непобеди́му подви́жницу) пребы́ти на всу́е вражду́ нося́щих на него́ (или́ на ню) и на ны, Твои́м же нетле́нным венце́м да́же до конца́ победи́тели вся покажи́.

Я́ко Твое́ е́сть, е́же ми́ловати и спаса́ти, и Тебе́ сла́ву возсыла́ем со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

И разреша́ет по́яс отроча́те, и пелены́, и соедини́в кра́я их, омоча́ет водо́ю чи́стою я̀, и кропи́т отроча́, глаго́ля (на полях: 1Кор.глава 6): Оправда́лся еси́. Просвети́лся еси́. Освяти́лся еси́. Омы́лся еси́ (или́ Оправдалася еси́. Просвети́лася еси́. Освяти́лася еси́. Омы́лася еси́) и́менем Го́спода: и прочая.

И взем гу́бу но́вую напое́нную водо́ю, отира́ет лице́ его́ со главо́ю, и пе́рси, и про́чая, глаго́ля: Крести́лся еси́. Просвети́лся еси́. Миропома́зался еси́. Освяти́лся еси́. Омы́лся еси́. Во и́мя Отца́, и Сы́на, и Свята́го Ду́ха, ныне и пристно, и во веки веков, ами́нь, или Миропомазалася еси. Омылася еси, Во и́мя Отца́: И прочая.

Диа́кон: Го́споду помо́лимся. Лик: Го́споди поми́луй.

Влады́ко Го́споди Бо́же наш, И́же о́бразом Твои́м почти́вый челове́ка, от души́ слове́сныя, и те́ла благоле́пнаго устро́ивый его́, я́ко да те́ло слу́жит слове́сной души́; главу́ у́бо на высоча́йших положи́вый, и в ней мно́жайшыя чувств водрузи́вый, незапина́ющыя друг дру́гу: власы́ же главу́ покры́л еси́, во е́же не врежда́тися преложе́ньми возду́шными, и вся у́ды его́ потре́бно насади́вый, да все́ми благодари́т Тя изря́днохудо́жника. Сам Влады́ко сосу́дом избра́ния Твоего́ Па́влом апо́столом запове́давый нам, вся в сла́ву Твою́ твори́ти, прише́дшаго раба́ Твоего́ (или́ прише́дшия рабы́ Твоея́) и́мярек и́мярек, нача́ток сотвори́ти стрищи́ власы́ главы́ своея́, благослови́ вку́пе с его́ (или́ с ея́) восприе́мником: и да́ждь им всем поуча́тися в зако́не Твое́м, и благоуго́дная Тебе́ де́яти.

Я́ко ми́лостив и человеколю́бец Бог еси́, и Тебе́ сла́ву возсыла́ем Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Лик: Ами́нь.

Мир всем. Лик: И ду́хови твоему́. Диа́кон: Главы́ ва́шя Го́сподеви приклони́те.

Лик: Тебе́ Го́споди.

Свяще́нник же глаго́лет моли́тву сию́:

Го́споди Бо́же наш, от исполне́ния купе́льнаго, Твое́ю бла́гостию освяти́вый в Тя ве́рующыя, благослови́ настоя́щаго младе́нца, и на главу́ его́ благослове́ние Твое́ да сни́дет. И я́коже благослови́л еси́ проро́ком Саму́илом Дави́да царя́, благослови́ и главу́ раба́ Твоего́ (или́ рабы́ Твоея́), и́мярек, руко́ю мене́ гре́шнаго, приходя́ ему́ Ду́хом Твои́м святы́м; я́ко да преспева́яй во́зрастом, и седи́нами ста́рости, сла́ву Тебе́ возсле́т, и уви́дит блага́я иерусали́мова вся дни живота́ своего́.

Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Лик: Ами́нь.

И пострига́ет его́ крестови́дно, глаго́ля: Пострига́ется раб Бо́жий (или́ Раба́ Бо́жия), и́мярек, во и́мя Отца́, и Сы́на, и Свята́го Ду́ха.

Лик: Ами́нь.

Та́же ектениа́, в не́йже помина́ет по ИМПЕРА́ТОРЕ восприе́мника с новопросвеще́нным.

Поми́луй нас Бо́же, по вели́цей ми́лости Твое́й:

Еще́ мо́лимся о ми́лости, жи́зни, ми́ре, здра́вии, и спасе́нии раба́ Бо́жия, и́мярек, восприе́мника, и новопросвеще́ннаго (или́ новопросвеще́нныя), и́мярек.

Иере́й возглаша́ет: Я́ко ми́лостив и человеколю́бец Бог еси́, и Тебе́ сла́ву возсыла́ем Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

И быва́ет обы́чный отпу́ст.