Обручение и венчание

По Боже́ственной литурги́и свяще́ннику стоя́щу в святи́лищи, предстоя́т хотя́щии спрящися, пред святы́ми две́рьми: муж у́бо одесну́ю, жена́ же ошу́юю. Лежа́т же на десне́й стране́ святы́я трапе́зы пе́рстни их два, златы́й и сре́бряный, сре́бряный у́бо уклоня́яся к десны́м, златы́й же к ле́вым, близ друг дру́га. Свяще́нник же назна́менует главы́ новоневе́стных три́жды, и дае́т им свещы́ возже́нны, и введ я̀ вну́трь хра́ма, кади́т крестови́дно, и глаго́лется от диа́кона: Благослови́ влады́ко.

И свяще́нник возглаша́ет: Благослове́н Бог наш, всегда́, ны́не и при́сно, и во ве́ки веко́в. Лик: Ами́нь.

Диа́кон: Ми́ром Го́споду помо́лимся. О свы́шнем ми́ре: О ми́ре всего́ ми́ра; О святе́м хра́ме сем; О Святе́йшем Прави́тельствующем Сино́де; О благочести́вейшем; О ра́бе Бо́жии, и́мярек, и рабы́не Бо́жией, и́мярек, ны́не обруча́ющихся друг дру́гу, и о спасе́нии их, Го́споду помо́лимся.

О е́же пода́тися им ча́дом в прия́тие ро́да, и всем я́же ко спасе́нию проше́нием, Го́споду помо́лимся.

О е́же низпосла́тися им любви́ соверше́нней, ми́рней, и по́мощи, Го́споду помо́лимся.

О е́же сохрани́тися им в единомы́слии и тве́рдей ве́ре, Го́споду помо́лимся.

О е́же благослови́тися им в непоро́чном жи́тельстве, Го́споду помо́лимся.

Я́ко да Госпо́дь Бог наш да́рует им брак че́стен, и ло́же нескве́рное, Го́споду помо́лимся.

О изба́витися нам от вся́кия ско́рби, гне́ва и ну́жды, Го́споду помо́лимся. Заступи́, спаси́: Пресвяту́ю, Пречи́стую, преблагослове́нную, сла́вную Влады́чицу на́шу Богоро́дицу, и Присноде́ву Мари́ю, со все́ми святы́ми помяну́вше, са́ми себе́ и друг дру́га, и ве́сь живо́т наш Христу́ Бо́гу предади́м.

Свяще́нник: Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Лик: Ами́нь.

Та́же глаго́лет моли́тву велегла́сно:

Бо́же ве́чный, разстоя́щаяся собра́вый в соедине́ние, и сою́з любве́ положи́вый им неразруши́мый; благослови́вый Исаа́ка и Реве́кку, и насле́дники я̀ Твоего́ обетова́ния показа́вый; Сам благослови́ и рабы́ Твоя́ сия́, и́мярек, и́мярек, наставля́я я̀ на вся́кое де́ло благо́е.

Я́ко ми́лостивый и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Лик: Ами́нь.

Свяще́нник: Мир всем. Лик: И ду́хови твоему́. Диа́кон: Главы́ ва́шя Го́сподеви приклони́те. Лик: Тебе́ Го́споди.

Го́споди Бо́же наш, от язы́к предобручи́вый Це́рковь де́ву чи́стую, благослови́ обруче́ние сие́, и соедини́, и сохрани́ рабы́ Твоя́ сия́ в ми́ре и единомы́слии.

Тебе́ бо подоба́ет вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Лик: Ами́нь.

Та́же взем свяще́нник пе́рстни, дае́т пе́рвее му́жу златы́й, та́же сре́бряный жене́. И глаго́лет му́жу:

Обруча́ется раб Бо́жий, и́мярек, рабе́ Бо́жией, и́мярек, во и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Та́же и жене́ глаго́лет: Обруча́ется раба́ Бо́жия, и́мярек, рабу́ Бо́жию, и́мярек, во и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

И егда́ рече́т на еди́ном ко́емждо три́жды, твори́т крест пе́рстнем на глава́х их: и налага́ет я̀ на десны́х их пе́рстех. Та́же изменя́ет пе́рстни новоневе́стных восприе́мник.

Свяще́нник же глаго́лет моли́тву: Го́споду помо́лимся.

Го́споди Бо́же наш, о́троку патриа́рха Авраа́ма сше́ствовавый в средоре́чии, посыла́я уневе́стити господи́ну его́ Исаа́ку жену́, и хода́тайством водоноше́ния обручи́ти Реве́кку откры́вый, Сам благослови́ обруче́ние рабо́в Твои́х, сего́ и́мярек, и сея́ и́мярек, и утверди́ е́же у них глаго́ланное сло́во: утверди́ я е́же от Тебе́ святы́м соедине́нием; Ты бо из нача́ла созда́л еси́ му́жеский пол и же́нский, и от Тебе́ сочетава́ется му́жу жена́, в по́мощь и в восприя́тие ро́да челове́ча. Сам у́бо Го́споди Бо́же наш, посла́вый и́стину в насле́дие Твое́, и обетова́ние Твое́ на рабы́ Твоя́ отцы́ на́шя, в ко́емждо ро́де и ро́де избра́нныя Твоя́; при́зри на раба́ Твоего́ и́мярек, и на рабу́ Твою́ и́мярек, и утверди́ обруче́ние их в ве́ре и единомы́слии, и и́стине, и любви́; Ты бо Го́споди показа́л еси́ да́тися обруче́нию и утвержда́тися во всем. Пе́рстнем даде́ся вла́сть Ио́сифу во Еги́пте; пе́рстнем просла́вися Дании́л во стране́ вавило́нстей; пе́рстнем яви́ся и́стина Фама́ры; пе́рстнем Оте́ц наш небе́сный щедр бы́сть на Сы́на своего́; дади́те бо, глаго́лет, пе́рстень на десни́цу Его́, и закла́вше тельца́ упита́ннаго, я́дше возвесели́мся. Сама́ десни́ца Твоя́ Го́споди, Моисе́а вооружи́ в Чермне́м мо́ри: сло́вом бо Твои́м и́стинным небеса́ утверди́шася, и земля́ основа́ся, и десни́ца раб Твои́х благослови́тся Сло́вом Твои́м держа́вным, и мы́шцею Твое́ю высо́кою. Сам у́бо и ны́не Влады́ко, благослови́ пе́рстней положе́ние сие́ благослове́нием небе́сным: и а́нгел Твой да предъи́дет пред ни́ми вся дни живота́ их.

Я́ко Ты еси́ благословля́яй и освяща́яй вся́ческая: и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

А́бие диа́кон ектению́ сию́:

Поми́луй нас Бо́же, по вели́цей ми́лости Твое́й, мо́лимтися услы́ши и поми́луй.

Лик: Го́споди поми́луй, три́жды.

Еще́ мо́лимся о Благочести́вейшем, Самодержа́внейшем, Вели́ком Госуда́ре на́шем ИМПЕРА́ТОРЕ АЛЕКСА́НДРЕ АЛЕКСА́НДРОВИЧЕ всея́ Росси́и, о держа́ве, побе́де, пребыва́нии, ми́ре, здра́вии, спасе́нии Его́, и Го́споду Бо́гу на́шему, наипа́че поспеши́ти и пособи́ти Ему́ во всех, и покори́ти под но́зе Его́ вся́каго врага́ и супоста́та.

Лик: Го́споди поми́луй, три́жды.

Еще́ мо́лимся о супру́ге Его́, Благочести́вейшей Госуда́рыне, ИМПЕРАТРИ́ЦЕ МАРИ́И ФЕО́ДОРОВНЕ, Го́споду помо́лимся.

Лик: Го́споди поми́луй, три́жды.

Еще́ мо́лимся о Насле́днике Его́, Благове́рном Госуда́ре, Цесаре́виче и Вели́ком Кня́зе НИКОЛА́Е АЛЕКСА́НДРОВИЧЕ и о всем Ца́рствующем До́ме.

Лик: Го́споди поми́луй, три́жды.

Еще́ мо́лимся о Святе́йшем Прави́тельствующем Сино́де, и всей во Христе́ бра́тии на́шей.

Лик: Го́споди поми́луй, три́жды.

Еще́ мо́лимся о всем Их христолюби́вом во́инстве.

Лик: Го́споди поми́луй, три́жды.

Еще́ мо́лимся о раба́х Бо́жиих, и́мярек, и и́мярек, обруча́ющихся друг дру́гу.

Лик: Го́споди поми́луй, три́жды.

Еще́ мо́лимся за всю бра́тию, и за вся христиа́ны.

Лик: Го́споди поми́луй, три́жды.

Возгла́с: Я́ко ми́лостив, и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Та́же отпу́ст.

А́ще у́бо хотя́т в то́жде вре́мя венча́тися, вхо́дят во храм со свеща́ми возжже́нными, предиду́щу свяще́ннику с кади́льницею, и пою́щу псало́м 127, си́це. Лю́дие же на ки́йждо стих глаго́лют: Сла́ва Тебе́ Бо́же наш, сла́ва Тебе́.

Блаже́ни вси боя́щиися Го́спода.

Сла́ва Тебе́ Бо́же наш, сла́ва Тебе́.

Ходя́щии в путе́х Его́.

Сла́ва Тебе́ Бо́же наш, сла́ва Тебе́.

Труды́ плодо́в твои́х сне́си.

Сла́ва Тебе́ Бо́же наш, сла́ва Тебе́.

Блаже́н еси́, и добро́ тебе́ бу́дет.

Сла́ва Тебе́ Бо́же наш, сла́ва Тебе́.

Жена́ твоя́ я́ко лоза́ плодови́та во страна́х до́му твоего́.

Сла́ва Тебе́ Бо́же наш, сла́ва Тебе́.

Сы́нове твои́ я́ко новосажде́ния ма́сличная, о́крест трапе́зы твоея́.

Сла́ва Тебе́ Бо́же наш, сла́ва Тебе́.

Се та́ко благослови́тся челове́к боя́йся Го́спода.

Сла́ва Тебе́ Бо́же наш, сла́ва Тебе́.

Благослови́т тя Госпо́дь от Сио́на, и у́зриши блага́я Иерусали́ма вся дни живота́ твоего́.

Сла́ва Тебе́ Бо́же наш, сла́ва Тебе́.

И у́зриши сы́ны сыно́в твои́х: мир на Изра́иля.

Сла́ва Тебе́ Бо́же наш, сла́ва Тебе́.

Посе́м глаго́лет иере́й поучи́тельное сло́во, сказу́я им, что е́сть супру́жества та́йна, и ка́ко в супру́жестве богоуго́дно и че́стно жи́тельствовати и́мут.

По сконча́нии же сло́ва, вопроша́ет иере́й жениха́, глаго́ля:

И́маши ли, и́мярек произволе́ние благо́е и непринужде́нное, и кре́пкую мы́сль, поя́ти себе́ в жену́ сию́, и́мярек, ю́же зде пред тобо́ю ви́диши; И обеща́ет жени́х, глаго́ля: И́мам, честны́й о́тче. Иере́й па́ки: Не обеща́лся ли еси́ ино́й неве́сте; Жени́х: Не обеща́хся, честны́й о́тче.

И а́бие иере́й, зря к неве́сте, вопроша́ет ю̀, глаго́ля:

И́маши ли произволе́ние благо́е и непринужде́нное, и тве́рдую мы́сль, поя́ти себе́ в му́жа сего́ и́мярек, его́же пред тобо́ю зде ви́диши; И отвеща́ет неве́ста, глаго́лющи: И́мам, честны́й о́тче. Иере́й па́ки: Не обеща́лася ли еси́ ино́му му́жу; И отвеща́ет неве́ста: Не обеща́хся, честны́й о́тче.

Та́же глаго́лет диа́кон: Благослови́ влады́ко. Свяще́нник: Благослове́но Ца́рство Отца́, и Сы́на, и Свята́го Ду́ха ны́не и при́сно, и во ве́ки веко́в. Лик: Ами́нь. Диа́кон ектению́:

Ми́ром Го́споду помо́лимся. О свы́шнем ми́ре: О ми́ре всего́ ми́ра: О святе́м хра́ме сем: О Святе́йшем Прави́тельствующем Сино́де: О благочести́вейшем: О рабе́х Бо́жиих, и́мярек, и и́мярек, ны́не сочетава́ющихся друг дру́гу в бра́ка обще́ние, и о спасе́нии их, Го́споду помо́лимся.

О е́же благослови́тися бра́ку сему́, я́коже в Ка́не галиле́йстей, Го́споду помо́лимся.

О е́же пода́тися им целому́дрию, и плоду́ чре́ва на по́льзу, Го́споду помо́лимся.

О е́же возвесели́тися им виде́нием сыно́в и дще́рей, Го́споду помо́лимся.

О е́же дарова́тися им благоча́дия восприя́тию, и незазо́рному пребыва́нию, Го́споду помо́лимся.

О е́же дарова́ти и́мже и нам вся ко спасе́нию проше́ния, Го́споду помо́лимся.

О е́же изба́витися и́мже и нам от вся́кия ско́рби, гне́ва и ну́жды, Го́споду помо́лимся.

Заступи́, спаси́, поми́луй и сохрани́ нас Бо́же, Твое́ю благода́тию.

Пресвяту́ю, Пречи́стую, Преблагослове́нную, сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га и ве́сь живо́т наш Христу́ Бо́гу предади́м.

Свяще́нник возгла́сно: Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Лик: Ами́нь.

Диа́кон: Го́споду помо́лимся. Лик: Го́споди поми́луй.

Свяще́нник моли́тву сию́ велегла́сно:

Бо́же Пречи́стый, и всея́ тва́ри Соде́телю, ребро́ пра́отца Ада́ма за Твое́ человеколю́бие в жену́ преобрази́вый, и благослови́вый я̀, и реки́й: расти́теся и мно́житеся, и облада́йте земле́ю, и обою́ е́ю еди́н уд показа́вый сопряже́нием: сего́ бо ра́ди оста́вит челове́к отца́ своего́ и ма́терь, и прилепи́тся жене́ свое́й, и бу́дета два в пло́ть еди́ну; и я́же Бог спряже́, челове́к да не разлуча́ет. И́же раба́ Твоего́ Авраа́ма благослови́вый, и разве́рзый ложесна́ Са́ррина, и отца́ мно́жества язы́ков сотвори́вый; И́же Исаа́ка Реве́кце дарова́вый, и рождество́ ея́ благослови́вый; И́же Иа́кова Рахи́ле сочета́вый, и из него́ двана́десять патриа́рхов показа́вый; И́же Ио́сифа и Асене́фу спряги́й, плод детотворе́ния им, Ефре́ма и Манасси́ю дарова́вый; И́же Заха́рию и Елисаве́т прие́мый, и Предте́чу рожде́ние им показа́вый; И́же от ко́рене Иессе́ова по пло́ти израсти́вый Присноде́ву, и из Нея́ воплоти́выйся, и роди́выйся во спасе́ние ро́да челове́ческаго; И́же за неизрече́нный Твой дар и мно́гую бла́гость, прише́дый в Ка́ну Галиле́йскую, и та́мошний брак благослови́вый; да яви́ши, я́ко Твоя́ во́ля е́сть зако́нное супру́жество, и е́же из него́ чадотворе́ние. Сам Влады́ко Пресвяты́й, приими́ моле́ние нас рабо́в Твои́х, я́коже та́мо, и зде прише́д неви́димым Твои́м предста́тельством, благослови́ брак сей, и пода́ждь рабо́м Твои́м сим, и́мярек, и и́мярек, живо́т ми́рен, долгоде́нствие, целому́дрие, друг ко дру́гу любо́вь в сою́зе ми́ра, се́мя долгожи́зненное, о ча́дех благода́ть, неувяда́емый сла́вы вене́ц. Сподо́би я̀ ви́дети ча́да ча́дов, ло́же е́ю ненаве́тно соблюди́, и да́ждь и́ма от росы́ небе́сныя свы́ше, и от ту́ка земна́го: испо́лни до́мы их пшени́цы, вина́ и еле́а и вся́кия благосты́ни, да преподаю́т и тре́бующым, да́руя ку́пно и су́щым с ни́ма вся я́же ко спасе́нию проше́ния.

Я́ко Бог ми́лости, щедро́т и человеколю́бия еси́, и Тебе́ сла́ву возсыла́ем, со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в. Лик: Ами́нь.

Диа́кон: Го́споду помо́лимся. Лик: Го́споди поми́луй.

Свяще́нник же моли́тву сию́ велегла́сно глаго́лет:

Благослове́н еси́ Го́споди Бо́же наш, И́же та́йнаго и чи́стаго бра́ка священнодействи́телю, и теле́снаго законоположи́телю, нетле́ния храни́телю, жите́йских благи́й строи́телю: сам и ны́не Влады́ко, в нача́ле созда́вый челове́ка, и положи́вый его́ я́ко царя́ тва́ри, и реки́й: не добро́ бы́ти челове́ку еди́ному на земли́, сотвори́м ему́ помо́щника по нему́. И взем еди́но от ребр его́, созда́л еси́ жену́, ю́же ви́дев Ада́м, рече́: сия́ ны́не ко́сть от косте́й мои́х, и пло́ть от пло́ти моея́: сия́ нарече́тся жена́, я́ко от му́жа своего́ взята́ бы́сть сия́. Сего́ ра́ди оста́вит челове́к отца́ своего́ и ма́терь, и прилепи́тся жене́ свое́й, и бу́дета два в пло́ть еди́ну: и я́же Бог сопряже́, челове́к да не разлуча́ет. Сам и ны́не Влады́ко Го́споди Бо́же наш, низпосли́ благода́ть Твою́ небе́сную на рабы́ Твоя́ сия́, и́мярек, и и́мярек: и да́ждь ра́бе сей во всем повинова́тися му́жу, и рабу́ Твоему́ сему́ бы́ти во главу́ жены́, я́ко да поживу́т по во́ли Твое́й. Благослови́ я̀ Го́споди Бо́же наш, я́коже благослови́л еси́ Авраа́ма и Са́рру; благослови́ я̀ Го́споди Бо́же наш, я́коже благослови́л еси́ Исаа́ка и Реве́кку; благослови́ я̀ Го́споди Бо́же наш, я́коже благослови́л еси́ Иа́кова, и вся патриа́рхи; благослови́ я̀ Го́споди Бо́же наш, я́коже благослови́л еси́ Ио́сифа и Асене́фу; благослови́ я̀ Го́споди Бо́же наш, я́коже благослови́л еси́ Моисе́а и Сепфо́ру; благослови́ я̀ Го́споди Бо́же наш, я́коже благослови́л еси́ Иоаки́ма и А́нну; благослови́ я Го́споди Бо́же наш, я́коже благослови́л еси́ Заха́рию и Елисаве́т. Сохрани́ я Го́споди Бо́же наш, я́коже сохрани́л еси́ Но́я в ковче́зе; сохрани́ я̀ Го́споди Бо́же наш, я́коже сохрани́л еси́ Ио́ну во чре́ве ки́тове; сохрани́ я̀ Го́споди Бо́же наш, я́коже сохрани́л еси́ святы́я три о́троки от огня́, низпосла́вый им ро́су с Небесе́; и да прии́дет на ня ра́дость о́ная, ю́же имя́ше блаже́нная Еле́на, егда́ обре́те честны́й крест. Помяни́ я Го́споди Бо́же наш, я́коже помяну́л еси́ Ено́ха, Си́ма, Илию́; помяни́ я̀ Го́споди Бо́же наш, я́коже помяну́л еси́ святы́я Твоя́ четы́редесять му́ченики, низпосла́вый им с Небесе́ венцы́; помяни́ Бо́же и воспита́вшыя их роди́тели; зане́ моли́твы роди́телей утвержда́ют основа́ния домо́в. Помяни́ Го́споди Бо́же наш, рабы́ Твоя́ уневе́стившыяся, сше́дшыяся в ра́дость сию́. Помяни́ Го́споди Бо́же наш раба́ Твоего́, и́мярек, и рабу́ Твою́, и́мярек, и благослови́ я̀; да́ждь им плод чре́ва, доброча́дие, единомы́слие душ и теле́с: возвы́си я̀ я́ко ке́дры лива́нския, я́ко ло́зу благоро́згную. Да́руй им се́мя кла́сяно, да вся́кое самодово́льство иму́ще, изоби́луют на вся́кое де́ло благо́е, и Тебе́ благоуго́дное; и да у́зрят сы́ны сыно́в свои́х, я́ко новосажде́ния ма́сличная о́крест трапе́зы их; и благоугоди́вше пред Тобо́ю, возсия́ют я́ко свети́ла на небеси́, в Тебе́ Го́споде на́шем. С Тобо́ю же сла́ва, держа́ва, че́сть и поклоне́ние, безнача́льному Твоему́ Отцу́, и животворя́щему Твоему́ Ду́ху, ны́не и при́сно, и во ве́ки веко́в.

Лик: Ами́нь. Диа́кон: Го́споду помо́лимся. Лик: Го́споди поми́луй.

И па́ки свяще́нник моли́тву сию́ глаго́лет велегла́сно:

Бо́же святы́й, созда́вый от пе́рсти челове́ка, и от ре́бра его́ возсозда́вый жену́, и спряги́й ему́ помо́щника по нему́; за е́же та́ко го́дно бы́сть Твоему́ вели́честву, не еди́ному бы́ти челове́ку на земли́. Сам и ны́не Влады́ко, низпосли́ ру́ку Твою́ от свята́го жили́ща Твоего́, и сочета́й раба́ Твоего́ сего́, и́мярек, и рабу́ Твою́ сию́, и́мярек, зане́ от Тебе́ сочетава́ется му́жу жена́; сопрязи́ я̀ в единому́дрии, венча́й я̀ в пло́ть еди́ну, да́руй и́ма плод чре́ва, благоча́дия восприя́тие.

Я́ко Твоя́ держа́ва, и Твое́ е́сть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Лик: Ами́нь.

И по ами́не, прие́м свяще́нник венцы́, венча́ет пе́рвее жениха́, глаго́ля: Венча́ется раб Бо́жий, и́мярек ра́бе Бо́жией, и́мярек, во и́мя Отца́, и Сы́на, и Свята́го Ду́ха.

Та́же венча́ет и неве́сту, глаго́ля: Венча́ется раба́ Бо́жия, и́мярек, рабу́ Бо́жию, и́мярек, во и́мя Отца́, и Сы́на, и Свята́го Ду́ха.

Та́же благословля́ет я̀ три́жды, глаго́ля три́жды:

Го́споди Бо́же наш, сла́вою и че́стию венча́й я̀.

Та́же проки́мен апо́стола, глас 8:

Положи́л еси́ на глава́х их венцы́, от ка́меней честны́х, живота́ проси́ша у тебе́, и дал еси́ им.

Стих: Я́ко да́си им благослове́ние в век ве́ка, возвесели́ши я̀ ра́достию с лице́м Твои́м.

Диа́кону ре́кшу: Прему́дрость.

Чтец надписа́ние апо́стола глаго́лет:

Ко Ефесе́ем, посла́ние Свята́го апо́стола Па́вла чте́ние.

Диа́кон глаго́лет: Во́нмем.

Чтец же чтет:

Апо́стол ко Ефесеом, зача́ло 230:

Бра́тие благодаря́ще всегда́ о всех, о и́мени Го́спода на́шего Иису́са Христа́, Бо́гу и Отцу́; Повину́ющеся друг дру́гу в стра́се Бо́жии. Жены́ свои́м муже́м повину́йтеся, я́коже Го́споду: зане́ муж глава́ е́сть жены́, я́коже и Христо́с глава́ Це́ркве, и той е́сть спаси́тель те́ла. Но я́коже Це́рковь повину́ется Христу́, та́кожде и жены́ свои́м муже́м во всем. Му́жие, лю́бите своя́ жены́, я́коже и Христо́с возлюби́ Це́рковь, и себе́ предаде́ за ню; Да освяти́т ю̀, очи́стив ба́нею водно́ю в глаго́ле. Да предста́вит ю̀ себе́ сла́вну Це́рковь, не иму́щу скве́рны, или́ поро́ка, или́ не́что от таковы́х; но да е́сть свя́та и непоро́чна. Та́ко до́лжни су́ть му́жие люби́ти своя́ жены́, я́ко своя́ телеса́: любя́й бо свою́ жену́, себе́ сама́го лю́бит. Никто́же бо когда́ свою́ пло́ть возненави́де, но пита́ет и гре́ет ю̀, я́коже и Госпо́дь Це́рковь; зане́ у́ди есмы́ те́ла Его́, от пло́ти Его́, и от косте́й Его́. Сего́ ра́ди оста́вит челове́к отца́ своего́ и ма́терь, и прилепи́тся к жене́ свое́й, и бу́дета два в пло́ть еди́ну. Та́йна сия́ вели́ка е́сть: аз же глаго́лю во Христа́, и во Це́рковь. Оба́че и вы по еди́ному, ки́йждо свою́ жену́ си́це да лю́бит, я́коже и себе́: а жена́ да бои́тся своего́ му́жа.

Свяще́нник глаго́лет: Мир ти. Диа́кон: Прему́дрость, во́нмем. Чтец: Псало́м Дави́дов. Аллилу́иа, глас 5.

Стих: Ты Го́споди сохрани́ши ны и соблюде́ши ны от ро́да сего́, и во век. Диа́кон: Прему́дрость, про́сти услы́шим свята́го Ева́нгелиа. Свяще́нник: От Иоа́нна свята́го Ева́нгелиа чте́ние. Диа́кон: Во́нмем.

Свяще́нник чтет Ева́нгелие от Иоа́нна, зача́ло 6:

Во вре́мя о́но, брак бы́сть в Ка́не галиле́йстей, и бе ма́ти Иису́сова ту. Зван же бы́сть Иису́с и ученицы́ его́ на брак. И не доста́вшу вину́, глаго́ла ма́ти Иису́сова к Нему́: вина́ не и́мут. Глаго́ла ей Иису́с: что е́сть Мне и тебе́, же́но; Не у прии́де час мой. Глаго́ла ма́ти его́ слуга́м: е́же а́ще глаго́лет вам, сотвори́те. Бе́ху же ту водоно́сы ка́менни ше́сть, лежа́ще по очище́нию иуде́йску, вместя́щыя по двема́ или́ трие́м ме́рам. Глаго́ла им Иису́с: напо́лните водоно́сы во́ды; и напо́лниша их до верха́. И глаго́ла им: почерпи́те ны́не, и принеси́те архитрикли́нови, и принесо́ша. Я́коже вкуси́ архитрикли́н вина́ бы́вшаго от во́ды, (и не ве́дяше отку́ду е́сть; слуги́ же ве́дяху поче́рпшии во́ду), пригласи́ жениха́ архитрикли́н, и глаго́ла ему́: всяк челове́к пре́жде до́брое вино́ полага́ет, и егда́ упию́тся, тогда́ ху́ждшее; ты же соблю́л еси́ до́брое вино́ досе́ле. Се сотвори́ нача́ток зна́мением Иису́с в Ка́не галиле́йстей, и яви́ сла́ву Свою́, и ве́роваша в него́ ученицы́ его́.

Диа́кон: Рцем вси от всея́ души́ и от всего́ помышле́ния на́шего рцем. Го́споди Вседержи́телю Бо́же оте́ц на́ших, мо́лимтися, услы́ши и поми́луй. Поми́луй нас Бо́же, по вели́цей ми́лости Твое́й, мо́лимтися, услы́ши и поми́луй.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии рабо́в Бо́жиих, и́мярек, и помина́ет и́хже хо́щет.

Возгла́с: Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Лик: Ами́нь.

Та́же диа́кон: Го́споду помо́лимся. Лик: Го́споди поми́луй.

Свяще́нник глаго́лет моли́тву сию́:

Го́споди Бо́же наш, во спаси́тельном Твое́м смотре́нии, сподо́бивый в Ка́не галиле́йстей, честны́й показа́ти брак Твои́м прише́ствием, Сам ны́не рабы́ Твоя́, и́мярек, и и́мярек, я́же благоволи́л еси́ сочетава́тися друг дру́гу, в ми́ре и единомы́слии сохрани́; честны́й их брак покажи́; нескве́рное их ло́же соблюди́; непоро́чное их сожи́тельство пребыва́ти благоволи́, и сподо́би я̀ в ста́рости масти́тей дости́гнути чи́стым се́рдцем де́лающя за́поведи Твоя́.

Ты бо еси́ Бог наш, Бог е́же ми́ловати и спаса́ти, и Тебе́ сла́ву возсыла́ем со безнача́льным Твои́м Отце́м, и всесвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в. Лик: Ами́нь. Диа́кон: Заступи́, спаси́, поми́луй и сохрани́ нас Бо́же, Твое́ю благода́тию. Лик: Го́споди поми́луй.

Диа́кон: Дне всего́ соверше́нна, свя́та, ми́рна и безгре́шна у Го́спода про́сим. Лик: Пода́й Го́споди. Диа́кон: А́нгела ми́рна, ве́рна наста́вника, храни́теля душ и теле́с на́ших, у Го́спода про́сим. Лик: Пода́й Го́споди. Диа́кон: Проще́ния и оставле́ния грехо́в и прегреше́ний на́ших, у Го́спода про́сим. Лик: Пода́й Го́споди. Диа́кон: До́брых и поле́зных душа́м на́шим и ми́ра ми́рови, у Го́спода про́сим. Лик: Пода́й Го́споди. Диа́кон: Про́чее вре́мя живота́ на́шего, в ми́ре и покая́нии сконча́ти, у Го́спода про́сим. Лик: Пода́й Го́споди. Диа́кон: Христиа́нския кончи́ны живота́ на́шего, безболе́зненны, непосты́дны, ми́рны, и до́браго отве́та на стра́шнем суди́щи Христо́ве про́сим. Лик: Пода́й Го́споди. Диа́кон: Соедине́ние ве́ры и прича́стие Свята́го Ду́ха испроси́вше, са́ми себе́ и друг дру́га, и ве́сь живо́т наш Христу́ Бо́гу предади́м. Лик: Тебе́ Го́споди.

Свяще́нник возглаша́ет: И сподо́би нас Влады́ко, со дерзнове́нием неосужде́нно сме́ти призыва́ти Тебе́ небе́снаго Бо́га отца́, и глаго́лати. И лю́дие: О́тче наш: ве́сь до конца́.

Свяще́нник возглаша́ет:

Я́ко Твое́ е́сть Ца́рство, и си́ла, и сла́ва Отца́, и Сы́на, и Свята́го Ду́ха, ны́не и при́сно, и во ве́ки веко́в. Лик: Ами́нь. Свяще́нник: Мир всем. Лик: И ду́хови твоему́. Диа́кон: Главы́ ва́шя Го́сподеви приклони́те. Лик: Тебе́, Го́споди.

Та́же прино́сится о́бщая ча́ша, и благословля́ет ю̀ свяще́нник, и глаго́лет моли́тву сию́. Диа́кон: Го́споду помо́лимся.

Бо́же, вся сотвори́вый кре́постию Твое́ю, и утверди́вый вселе́нную, и украси́вый вене́ц всех сотворе́нных от Тебе́, и ча́шу о́бщую сию́ подава́яй сочетава́ющымся ко обще́нию бра́ка, благослови́ благослове́нием духо́вным.

Возгла́сно: Я́ко благослови́ся Твое́ и́мя, и просла́вися Твое́ Ца́рство: Отца́, и Сы́на, и Свята́го Ду́ха, ны́не и при́сно, и во ве́ки веко́в. Лик: Ами́нь.

Та́же взем свяще́нник в ру́ку о́бщую ча́шу, преподае́т им три́жды: пе́рвее му́жу, и пото́м жене́: И а́бие прие́м я̀ свяще́нник, ку́му держа́щу созади́ венцы́, обраща́ет я́ко о́бразом кру́га; и пое́т свяще́нник, или́ лю́дие настоя́щыя тропари́, во глас 5:

Иса́ие лику́й, Де́ва, име́ во чре́ве, и ро́ди Сы́на Емману́ила, Бо́га же и челове́ка, Восто́к и́мя ему́; Его́же велича́юще, Де́ву ублажа́ем.

Ини́и, глас 7: Святи́и му́ченицы, до́бре страда́льчествовавшии, и венча́вшиися, моли́теся ко Го́споду поми́ловатися душа́м на́шым.

Сла́ва Тебе́ Христе́ Бо́же, апо́столов похвало́, му́чеников ра́дование, и́хже про́поведь, Тро́ица единосу́щная.

Та́же взем вене́ц жениха́, глаго́лет:

Возвели́чися женише́, я́коже Авраа́м, и благослови́ся я́коже Исаа́к, и умно́жися я́коже Иа́ков, ходя́й в ми́ре, и де́лаяй в пра́вде за́поведи Бо́жия.

И внегда́ взя́ти вене́ц неве́сты, глаго́лет:

И ты неве́сто, возвели́чися я́коже Са́рра, и возвесели́ся я́коже Реве́кка, и умно́жися я́коже Рахи́ль, веселя́щися о свое́м му́же, храня́щи преде́лы зако́на; зане́ та́ко благоволи́ Бог.

Та́же глаго́лет диа́кон: Го́споду помо́лимся. Лик: Го́споди поми́луй.

Свяще́нник глаго́лет моли́тву:

Бо́же, Бо́же наш, прише́дый в Ка́ну Галиле́йскую, и та́мошний брак благослови́вый, благослови́ и рабы́ Твоя́ сия́, Твои́м про́мыслом ко обще́нию бра́ка сочета́вшыяся; благослови́ их вхо́ды и исхо́ды; умно́жи во благи́х живо́т их, восприими́ венцы́ их в Ца́рствии Твое́м, нескве́рны, и непоро́чны, и ненаве́тны соблюда́яй, во ве́ки веко́в. Лик: Ами́нь. Свяще́нник: Мир всем. Лик: И ду́хови твоему́. Диа́кон: Главы́ ва́шя Го́сподеви приклони́те. Лик: Тебе́ Го́споди. И мо́лится свяще́нник:

Оте́ц, Сын, и Святы́й Дух, всесвята́я, и единосу́щная, и Живонача́льная Тро́ица, еди́но Божество́ и Ца́рство, да благослови́т вас, и да пода́ст вам долгожи́тие, благоча́дие, преспе́яние живота́ и ве́ры, и да испо́лнит вас всех су́щих на земли́ благи́х: да сподо́бит вас и обеща́нных благ восприя́тия, моли́твами святы́я Богоро́дицы, и всех святы́х, ами́нь.

Та́же вхо́дят, и поздравля́ют их, и целова́вше друг дру́га, и быва́ет от свяще́нника соверше́нный отпу́ст. Ре́кшу диа́кону: Прему́дрость. Лик: Честне́йшую Херуви́м: Свяще́нник: Сла́ва Тебе́, Христе́ Бо́же, упова́ние на́ше, сла́ва Тебе́. Лик: Сла́ва, И ны́не: Го́споди поми́луй, три́жды. Благослови́. Свяще́нник: И́же в Ка́не галиле́йстей прише́ствием свои́м че́стен брак показа́вый, Христо́с и́стинный Бог наш, моли́твами Пречи́стыя Своея́ ма́тере; святы́х сла́вных и всехва́льных апо́стол; святы́х боговенча́нных царе́й и равноапо́столов, Константи́на и Еле́ны, свята́го великому́ченика Проко́пиа, и всех святы́х, поми́лует и спасе́т нас, я́ко Благ и Человеколю́бец.

Благочести́вая и правове́рная о Христе́ сочетанная дво́ице, пречестны́й женише́, и́мярек, и Бо́гом дарова́нная ему́ неве́сто, и́мярек, вели́кая ни́ва Це́ркве вели́каго обладателя Бо́га, трегу́бо тяжемая, трегубою украша́ется жа́твою и плодо́м. Пе́рвая ча́сть ни́вы сея́ тяжаема е́сть де́вство возлюбившими, и то до кончи́ны жития́ си́ храня́щими нетле́нно, и прино́сит сия́ в жи́тницу Госпо́дню во сто крат доброде́телей плоды́. Втора́я ча́сть твоя́ е́сть, делаемая воздержа́нием вдовства́, и прино́сит плоды́ в шестьдеся́т крат. Тре́тия, бра́ком сочетанных сожи́тием, и́же а́ще благоче́стно во стра́се Бо́жии жи́тельствуют, плодотворит ни́ва в три́десять. На еди́ной у́бо ни́ве разли́чныя и различноплодныя су́ть ча́сти, но вся блаже́нны и похва́льны по достоя́нию своему́. Та́ко бо глаго́лет Амвро́сий богому́дрый: де́вство пропове́дуем, дабы́ и вдов не отмета́ти. Та́ко вдовы́ почита́ем, во е́же бы и супру́жеству в свое́й че́сти сохрани́тися. Че́стно у́бо е́сть супру́жество, его́же зако́ном вы ны́не сочетатеся, да ку́пно живу́ще восприи́мете от Го́спода плод чревный, в насле́дие ро́да ва́шего, во умноже́ние пле́мени челове́ческаго, во сла́ву Творца́ всех и Го́спода, в неразрешимый сою́з любве́ и дру́жества, и взаи́мную по́мощь, и е́же отгребатися греха́ любодея́ния. Че́стно е́сть супру́жество, я́ко то Сам Госпо́дь Бог в раи́ уста́вил е́сть, егда́ из ре́бра Ада́мля сотво́рь Е́ву, в помо́щницу ему́ дал е́сть. И в но́вой благода́ти Сам Христо́с Госпо́дь изво́ли то вели́кия че́сти сподо́бити, елма́ не то́чию присущием си́ украси́л е́сть брак в Ка́не галиле́йстей, но и пе́рвым чудоде́йствием во́ды в вино́ претворе́ния возвели́чил е́сть. Ублажи́ всеблагослове́нный Госпо́дь де́вство, изво́лив из чи́стыя де́вы рожде́н бы́ти пло́тию. Че́сть воздаде́ вдовству, егда́ во вре́мя принесе́ния си́ во це́рковь, от А́нны вдовы́ я́ко лет о́смьдесят четы́ре бы́вшая, прия́т испове́дание и прорчение, егда́ та испове́дашеся Го́сподеви, и глаго́лаша о Нем всем ча́ющим избавле́ния во Иерусали́ме. Возвели́чи и супру́жество присущим на бра́це, и пре́жде рождество́м си́ от спряжения му́жеви обруче́нием де́вы. Блаже́нный у́бо честны́й и святы́й сан избра́сте житию́ ва́шему, то́чию зри́те, да в нем свя́то и че́стно житие́ провождаете. Бу́дет же сицево́, а́ще в стра́се Бо́жии живу́ще уклони́тися от вся́каго зла, и потщи́теся твори́ти бла́го; бу́дет и блаже́нно, а́ще взаи́м до́лжная возда́ти восхо́щет. Ты у́бо, честны́й женише́, до́лжен еси́ супрузе твое́й ве́рность сожи́тия, любо́вь пра́вую, и не́мощем снисхожде́ние же́нским. Ты па́ки честна́я неве́сто, должна́ бу́деши му́жеви твоему́, та́кожде ве́рность при́сную в сожи́тии, любо́вь неле́стную, и послуша́ние веле́ний его́ я́ко главы́ твоея́; и́бо я́коже Христо́с е́сть Глава́ Це́ркве, та́ко муж жены́ глава́ е́сть. О́ба же ку́пно должна́ еста́ про́мысл де́яти о до́ме ва́шем, и труда́ми при́сными, и снабдением дома́шних. О́ба же да прилежита непреста́нно другъдру́гу непритворную, неократную ко ины́м любо́вь явля́ти, да спряже́ние ва́ше, е́же е́сть та́йна ве́лия по о́ному словеси́ язы́ков учи́теля: та́йна сия́ ве́лия е́сть, аз же глаго́лю во Христа́ и це́рковь, соверше́нно зна́менует соедине́ние Христа́ и це́ркви уже́ сотворе́нное. Чи́стая же и те́плая любо́вь ва́ша, чи́стую и те́плую любо́вь Христо́ву явля́ет и це́ркве. Ты, муж, я́ко глава́, да лю́биши жену́ я́ко те́ло свое́, я́ко Христо́с лю́бит духо́вное те́ло Свое́ це́рковь. Ты, же́но, я́ко те́ло, да лю́биши главу́ твою́ му́жа, я́коже Христа́ це́рковь. И та́ко с ва́ми и в вас бу́дет Христо́с Бог, ца́рь ми́ра; и́бо Бог любо́вь е́сть, и пребыва́яй в любви́, в Бо́зе пребыва́ет, и Бог в нем. А пребыва́я в вас, даст вам ми́рное сожи́тие, благоде́нственное пребыва́ние, оби́льное себе́ саме́х и домоча́дец препита́ние. Да́рует благослове́ние Свое́ свято́е на вся труды́ ва́ша, и на се́ла же и по́ля, и на до́мы и скоты́ ва́шя, всем умноже́ние долгопребывание име́ти. Над все́ми же си́ми даст вам плод чре́ва ва́шего, я́ко ле́торасли, ма́сличная согля́дати о́крест трапе́зы ва́шея, и узре́ти сы́ны сыно́в ва́ших. И́хже всех благ и про́чих тем точных, аз вам усе́рдно жела́я, заключаю сло́во мое́, глаго́ля: бу́ди на вас благослове́ние Госпо́дне всегда́, ны́не и при́сно, и во ве́ки веко́в, ами́нь.

Го́споди Бо́же наш, вене́ц ле́та благослови́вый, и сия́ венцы́ возложи́ти преда́вый зако́ном бра́ка, сочетава́ющымся другъдру́гу, и мзду а́ки отдая́ им целому́дрия; зане́ чи́сти ко и́же от Тебе́ узаконоположе́нному бра́ку сочета́шася; Сам и в разреше́нии сих венце́в, сочета́вшихся другъдру́гу благослови́, и сочета́ние их нерастерза́емо соблюди́; да благодаря́т вы́ну всесвято́е и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Свяще́нник: Мир всем. Лик: И ду́хови твоему́. Диа́кон: Главы́ ва́шя Го́сподеви приклони́те. Лик: Тебе́ Го́споди.

Согла́сная дости́гше раби́ Твои́ Го́споди, и после́дование соверши́вше в Ка́не галиле́йстей бра́ка, и спря́тавше я́же в нем зна́мения, сла́ву Тебе́ возсыла́ют, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

И быва́ет отпу́ст.

Двобрачный не венча́ется, но и запреща́ется причасти́тися святы́х та́инств, ле́та два, трибрачный же пя́ть лет.

От ответов блаже́ннаго Ники́ты Митрополи́та Ираклийскаго, о ни́хже вопрошет бы́сть от Константи́на епи́скопа. Суда́ у́бо зако́н двобрачия не обы́че венча́ти, вели́кия же Це́ркве обы́чай сицева́я не сохраня́ет, но и двобрачным неве́стныя венцы́ налага́ет, и никто́же когда́ за сие́ оглаголан бы́сть, оба́че еди́но или́ два ле́та боже́ственнаго возбраня́ются обще́ния; но и священнословившу сия́ свяще́ннику, вечеря́ти с ни́ми не узако́нися, по седмо́му пра́вилу Неокесари́йскаго Собо́ра.

Свяще́нник начина́ет по обы́чаю: Благослове́н Бог наш. Та́же, Трисвято́е. По О́тче наш. Тропа́рь дневны́й. Та́же, ектениа́:

Ми́ром Го́споду помо́лимся. О свы́шнем ми́ре и спасе́нии душ на́ших Го́споду помо́лимся.

О святе́м хра́ме сем, и с ве́рою:

О рабе́х Бо́жиих, и́мярек и и́мярек, и е́же о Бо́зе покро́ве, и сожи́тии их, Го́споду помо́лимся.

О е́же спожи́ти им до́бре во единомы́слии, Го́споду помо́лимся.

Заступи́, спаси́, поми́луй и сохрани́ нас Бо́же, Твое́ю благода́тию.

Пресвяту́ю, Пречи́стую, преблагослове́нную, сла́вную Влады́чицу на́шу:

Я́ко подоба́ет Тебе́ вся́кая сла́ва, че́сть:

Та́же глаго́лет диа́кон: Го́споду помо́лимся. Го́споди поми́луй.

Свяще́нник моли́тву:

Бо́же ве́чный, разстоя́щаяся собра́вый в соедине́ние, и сою́з любве́ положи́вый им неразруши́мый; благослови́вый Исаа́ка и Реве́кку, и насле́дники я̀ Твоего́ обетова́ния показа́вый; Сам благослови́ и рабы́ Твоя́ сия́, и́мярек и и́мярек, наставля́я я̀ на вся́кое де́ло благо́е.

Я́ко ми́лостивый и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Свяще́нник: Мир всем. Лик: И ду́хови твоему́. Диа́кон: Главы́ ва́шя Го́сподеви приклони́те. Лю́дие: Тебе́ Го́споди.

Свяще́нник моли́тву:

Го́споди Бо́же наш, от язы́к предобручи́вый Це́рковь, де́ву чи́сту, благослови́ обруче́ние сие́, и соедини́, и сохрани́ рабы́ Твоя́ сия́ в ми́ре и единомы́слии. Тебе́ бо подоба́ет вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Лик: Ами́нь. Та́же взем свяще́нник пе́рстни, дае́т пе́рвее му́жу златы́й, жене́ же сре́бряный, и глаго́лет му́жу: Обруча́ется раб Бо́жий, и́мярек, ра́бе Бо́жией и́мярек, во и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь. Подо́бне и жене́: Обруча́ется раба́ Бо́жия, и́мярек, рабу́ Бо́жию, и́мярек, во и́мя Отца́ и Сы́на, и Свята́го Ду́ха, ны́не и при́сно, и во ве́ки веко́в, ами́нь.

И твори́т крест пе́рстнем на глава́х их, и налага́ет я̀ на десны́я пе́рсты, та́же изменя́ет кум пе́рстни.

Посе́м диа́кон глаго́лет: Го́споду помо́лимся.

Го́споди поми́луй. Свяще́нник глаголет моли́тву:

Влады́ко Го́споди Бо́же наш, всех щадя́й, о всех промышля́яй; та́йная ве́дый челове́ческая, и всех ве́дение име́яй, очи́сти грехи́ на́шя, и беззако́ние про́сти Твои́х рабо́в, призыва́яй я̀ в покая́ние, подая́ им проще́ние прегреше́ний, грехо́в очище́ние, проще́ние беззако́ний во́льных же и нево́льных, ве́дый немощно́е челове́ческаго естества́, созда́телю, и соде́телю, И́же Раа́ву блудни́цу про́сти вый, и мытаре́во покая́ние прие́мый, не помяни́ грехо́в на́ших неве́дения от ю́ности. А́ще бо беззако́ния на́зриши Го́споди, Го́споди, кто постои́т Тебе́; Или́ ка́я пло́ть оправди́тся пред Тобо́ю, Ты бо еди́н еси́ пра́веден, безгре́шен, свят, многоми́лостив, многоблагоутро́бен, и ка́яйся о зло́бах челове́ческих. Ты Влады́ко, присво́ивый рабы́ Твоя́, и́мярек, и и́мярек, соедини́ к друг дру́гу любо́вию: да́руй им мытаре́во обраще́ние, блудни́цы сле́зы, разбо́йниче испове́дание: да покая́нием от всего́ се́рдца своего́, во единомы́слии и ми́ре за́поведи Твоя́ де́лающе, сподо́бятся и небе́снаго Твоего́ Ца́рствия.

Я́ко Ты еси́ Строи́тель всех, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Свяще́нник: Мир всем. Лю́дие: И ду́хови твоему́.

Диа́кон: Главы́ ва́шя Го́сподеви приклони́те. Лик: Тебе́ Го́споди.

Свяще́нник моли́тву сию́:

Го́споди Иису́се Христе́, сло́ве Бо́жий, вознесы́йся на честне́м и животворя́щем кресте́, и е́же на ны рукописа́ние растерза́вый, и наси́лия диа́воля избавле́й нас, очи́сти беззако́ния рабо́в Твои́х: зане́ зно́я и тяготы́ дневны́я, и плотска́го разжже́ния не могу́ще понести́, во второ́е бра́ка обще́ние схо́дятся: я́коже законоположи́л еси́ сосу́дом избра́ния Твоего́ Па́влом апо́столом, реки́й нас ра́ди смире́нных: лу́чше е́сть о Го́споде посяга́ти, не́жели разжиза́тися. Сам я́ко Благ и Человеколю́бец, поми́луй и про́сти , очи́сти, осла́би, оста́ви до́лги на́шя: я́ко Ты еси́ неду́ги на́шя на ра́мена взе́мый: никто́же бо бы́сть безгре́шен, а́ще и еди́н де́нь живота́ его́ е́сть, или́ кроме́ поро́ка, то́кмо Ты еди́н еси́ пло́ть нося́й безгре́шно, и ве́чное нам дарова́вый безстра́стие.

Я́ко Ты еси́ Бог, Бог ка́ющихся, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Лю́дие: Ами́нь.

Диа́кон: Го́споду помо́лимся. Лю́дие: Го́споди поми́луй.

Свяще́нник моли́тву:

Бо́же святы́й, созда́вый от пе́рсти челове́ка, и от ре́бра его́ возсозда́вый жену́, и спряги́й ему́ помо́щника по нему́, за е́же та́ко уго́дно бы́сть Твоему́ вели́честву, не еди́ному бы́ти челове́ку на земли́: Сам и ны́не Влады́ко, низпосли́ ру́ку Твою́ от свята́го жили́ща Твоего́, и сочета́й раба́ Твоего́ сего́, и́мярек, и рабу́ Твою́ сию́, и́мярек, зане́ от Тебе́ сочетава́ется му́жеви жена́; сопрязи́ я̀ во единому́дрии, венча́й я̀ в пло́ть еди́ну, да́руй им плод чре́ва, благоча́дия восприя́тие.

Я́ко Твоя́ держа́ва, и Твое́ е́сть Ца́рство и си́ла, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

И взем венцы́, венча́ет жениха́, глаго́ля:

Венча́ется раб Бо́жий и́мярек, ра́бе Бо́жией, и́мярек, во и́мя Отца́, и Сы́на, и Свята́го Ду́ха.

Подо́бне венча́ет и неве́сту, глаго́ля: Венча́ется раба́ Бо́жия, и́мярек, рабу́ Бо́жию, и́мярек, во и́мя Отца́, и Сы́на, и Свята́го Ду́ха.

Та́же благословля́ет я̀, глаго́ля три́жды: Го́споди Бо́же наш, сла́вою и че́стию венча́й я̀. Та́же глаго́лет проки́мен, Апо́стол и Ева́нгелие, и про́чая, я́коже написа́ся в пе́рвом венча́нии. Та́же диа́кон: Рцем вси от всея́ души́ и от всего́ помышле́ния на́шего рцем. Го́споди Вседержи́телю Бо́же оте́ц на́ших, мо́лимтися, услы́ши и поми́луй. Поми́луй нас Бо́же, по вели́цей ми́лости Твое́й:

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии раба́ Бо́жия, и́мярек, и помина́ет и́хже хо́щет.

Возгла́с: Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Диа́кону же ре́кшу: Го́споду помо́лимся. Го́споди поми́луй.

Свяще́нник глаголет моли́тву сию́:

Го́споди Бо́же наш, во спаси́тельном Твое́м смотре́нии, сподо́бивый в Ка́не галиле́йстей честны́й показа́ти брак, Твои́м прише́ствием; Сам и ны́не рабы́ Твоя́, и́мярек, и и́мярек, я́же благоволи́л еси́ сочетава́тися друг дру́гу, в ми́ре и единомы́слии сохрани́; честны́й их брак покажи́, нескве́рное их ло́же соблюди́, непоро́чное их сожи́тельство пребыва́ти благоволи́, и сподо́би я̀ в ста́рости масти́тей дости́гнути, чи́стым се́рдцем де́лающя за́поведи Твоя́.

Ты бо еси́ Бог наш, Бог е́же ми́ловати и спаса́ти, и Тебе́ сла́ву возсыла́ем, со безнача́льным Твои́м Отце́м, и всесвяты́м, и благи́м и животворя́щим Твои́м Ду́хом, ны́не и при́сно, и во ве́ки веко́в. Ами́нь.

Диа́кон: Заступи́, спаси́, поми́луй, и сохрани́ нас Бо́же, Твое́ю благода́тию. Дне всего́ соверше́нна, свя́та: А́нгела ми́рна, ве́рна наста́вника: Проще́ния и оставле́ния грехо́в: До́брых и поле́зных душа́м на́шим: Про́чее вре́мя живота́ на́шего: Христиа́нския кончи́ны живота́ на́шего: Соедине́ние ве́ры, и прича́стие Свята́го Ду́ха:

Лик: Тебе́ Го́споди.

Свяще́нник возглаша́ет:

И сподо́би нас Влады́ко, со дерзнове́нием неосужде́нно сме́ти призыва́ти Тебе́ небе́снаго Бо́га отца́, и глаго́лати. Лю́дие же глаго́лют: О́тче наш: ве́сь до конца́. Свяще́нник возглаша́ет: Я́ко Твое́ е́сть Ца́рство, и си́ла, и сла́ва Отца́, и Сы́на, и Свята́го Ду́ха, ны́не и при́сно, и во ве́ки веко́в. Лик: Ами́нь. Свяще́нник: Мир всем. Лик: И ду́хови твоему́. Диа́кон: Главы́ ва́шя Го́сподеви приклони́те. Лик: Тебе́ Го́споди.

Та́же прино́сится о́бщая ча́ша, и благословля́ет ю̀ свяще́нник, и глаго́лет моли́тву сию́:

Диа́кон: Го́споду помо́лимся. Го́споди поми́луй.

Бо́же, вся сотвори́вый кре́постию Твое́ю, и утверди́вый вселе́нную, и украси́вый вене́ц всех сотворе́нных от Тебе́: и ча́шу о́бщую сию́ подава́яй сочетава́ющымся ко обще́нию бра́ка, благослови́ благослове́нием духо́вным.

Возгла́сно: Я́ко благослови́ся Твое́ и́мя, и просла́вися Твое́ Ца́рство, Отца́ и Сы́на, и Свята́го Ду́ха, ны́не и при́сно, и во ве́ки веко́в. Лик: Ами́нь.

Та́же взем свяще́нник в руки́ о́бщую ча́шу, преподае́т им три́жды, пе́рвее му́жу, и пото́м жене́. И а́бие прие́м я̀ свяще́нник, ку́му держа́щу созади́ венцы́, обраща́ет я́ко о́бразом кру́га; и пое́т свяще́нник и лю́дие настояшия тропари́, во глас 5:

Иса́ие лику́й, Де́ва име́ во чре́ве, и ро́ди Сы́на Емману́ила, Бо́га же и челове́ка, Восто́к и́мя Ему́: Его́же велича́юще, Де́ву ублажа́ем.

Ини́и тропари́, глас 7: Святи́и му́ченицы, до́бре страда́льчествовавшии, и венча́вшиися, моли́теся ко Го́споду поми́ловатися душа́м на́шым.

Вторы́й тропа́рь, глас то́йже:

Сла́ва Тебе́ Христе́ Бо́же, апо́столов похвало́, и му́чеников ра́дование, и́хже про́поведь, Тро́ица единосу́щная.

Та́же взем вене́ц жениха́, глаго́лет:

Возвели́чися женише́, я́коже Авраа́м, и благослови́ся я́коже Исаа́к, и умно́жися я́коже Иа́ков, ходя́й в ми́ре, и де́лаяй в пра́вде за́поведи Бо́жия.

И взем вене́ц неве́сты, глаго́лет:

И ты неве́сто, возвели́чися я́коже Са́рра, и возвесели́ся я́коже Реве́кка, и умно́жися я́коже Рахи́ль, веселя́щися о свое́м му́же, храня́щи преде́лы зако́на, зане́ та́ко благоволи́ Бог.

Та́же глаго́лет диа́кон: Го́споду помо́лимся.

Лик: Го́споди поми́луй.

Свяще́нник глаго́лет моли́тву:

Бо́же, Бо́же наш прише́дый в Ка́ну Галиле́йскую, и та́мошний брак благослови́вый, благослови́ и рабы́ Твоя́ сия́, Твои́м про́мыслом ко обще́нию бра́ка сочета́вшыяся; благослови́ их вхо́ды и исхо́ды; умно́жи во благи́х живо́т их, восприими́ венцы́ их в Ца́рствии Твое́м, нескве́рны, и непоро́чны, и ненаве́тны соблюда́яй во ве́ки веко́в.

Лик: Ами́нь.

Свяще́нник: Мир всем.

Лик: И ду́хови твоему́.

Диа́кон: Главы́ ва́шя Го́сподеви приклони́те.

Лик: Тебе́ Го́споди.

И мо́лится свяще́нник:

Оте́ц, Сын, и Святы́й Дух, всесвята́я, и единосу́щная, и Живонача́льная Тро́ица, еди́но Божество́ и Ца́рство, да благослови́т вас, и да пода́ст вам долгожи́тие, благоча́дие, преспе́яние живота́ и ве́ры, и да испо́лнит вас всех су́щих на земли́ благи́х; да сподо́бит вас и обеща́нных благ восприя́тия, моли́твами святы́я Богоро́дицы, и всех святы́х, ами́нь.

Та́же вхо́дят, и поздравля́ют их, и целова́вше друг дру́га, и быва́ет от свяще́нника соверше́нный отпу́ст:

И́же в Ка́не галиле́йстей прише́ствием свои́м че́стен брак показа́вый, Христо́с и́стинный Бог наш, моли́твами Пречи́стыя своея́ Ма́тере; святы́х сла́вных и всехва́льных апо́стол; святы́х боговенча́нных царе́й и равноапо́столов, Константи́на и Еле́ны, свята́го великому́ченика Проко́пиа, и всех святы́х, поми́лует и спасе́т нас, я́ко Благ и Человеколю́бец.