Водоосвящение

Поставля́ется четвероножный столе́ц, на сие́ угото́вленный посреде́ це́ркве, па́волокою покрове́нный, на обы́чном ме́сте, и вода́ в сосу́де. Свяще́нник же взем епитрахи́ль и фело́нь на ся, держа́ в ру́це честны́й крест с василки́, предыдущу ему́ Диа́кону с кади́льницею, и двема́ свещено́сцема со свеща́ми. Прише́д же пред столе́ц, полага́ет на нем крест, и взем кади́льницу, кади́т во́ду крестообра́зно, и начина́ет обы́чно.

Благослови́вшу свяще́ннику, начина́ем псало́м 142:

Го́споди, услы́ши моли́тву мою́: Та́же, Бог Госпо́дь, и яви́ся нам: три́жды, во глас 4. И настоя́щыя тропари́, глас 4: К Богоро́дице приле́жно ны́не притеце́м гре́шнии и смире́ннии, и припаде́м, в покая́нии зову́ще из глубины́ души́: Влады́чице, помози́ на ны милосе́рдовавши; потщи́ся, погиба́ем от мно́жества прегреше́ний, не отврати́ Твоя́ рабы́ тщы: Тя бо и еди́ну наде́жду и́мамы. Два́жды.

Сла́ва, И ны́не: Не умолчи́м никогда́ Богоро́дице, си́лы Твоя́ глаго́лати недосто́йнии; а́ще бо Ты не бы предстоя́ла моля́щи, кто бы нас изба́вил от толи́ких бед; Кто́же бы сохрани́л до ны́не свобо́дны; Не отсту́пим Влады́чице от Тебе́, Твоя́ бо рабы́ спаса́еши при́сно от вся́ких лю́тых.

Та́же, псало́м 50: Поми́луй мя Бо́же:

Та́же, пое́м тропари́ сия́, глас 6:

Е́же ра́дуйся а́нгелом прии́мшая, и ро́ждшая зижди́теля твоего́, Де́во, спаса́й тя велича́ющыя.

Глаго́ли пе́рвый тропа́рь два́жды.

Воспева́ем Сы́на твоего́ Богоро́дице, и вопие́м: Пречи́стая Влады́чице, вся́кия беды́ изба́ви рабы́ Твоя́.

Царе́м, проро́ком и апо́столом, и му́чеником ты еси́ похвала́, и предста́тельница ми́ру, всенепоро́чная.

Язы́к всяк правосла́вных похваля́ет, и блажи́т, и сла́вит пречи́стое рождество́ твое́, Мари́е богоневе́стная.

Да́ждь Христе́ мой, и мне недосто́йному долго́в оставле́ние, молю́ся, Тя ро́ждшия моли́твами, я́ко благоутро́бен.

На Тя моя́ упова́ния возложи́х Богоро́дице, спаси́ мя моли́твами Твои́ми, и да́руй ми прегреше́ний оставле́ние.

Оживи́ мя, ро́ждшая жизнода́вца и Спа́са, спаси́ моли́твами твои́ми, благослове́нная наде́ждо душ на́ших.

Зижди́теля всех во утро́бе твое́й заче́ншая Де́во всенепоро́чная, моли́твами твои́ми спаси́ ду́шы на́шя.

Богоро́дице ро́ждшая сло́вом па́че сло́ва, сло́во всепе́тая, Того́ моли́ спасти́ ду́шы на́шя.

Ми́лостива мне судию́ же и Сы́на твоего́, прегреши́вшему па́че вся́каго челове́ка, твои́ми моли́твами соде́лай Влады́чице.

По до́лгу вопие́м Ти: ра́дуйся Богоро́дице чи́стая Присноде́во, моля́щеся моли́твами Твои́ми спасти́ся.

Изба́ви мя огня́ ве́чнаго, и мук предлежа́щих мне Богороди́тельнице, я́ко да ублажа́ю Тя.

Не пре́зри моле́ния твои́х рабо́в, мо́лимся Влады́чице всепе́тая, я́ко да изба́вимся вся́каго обстоя́ния.

Неду́гов, и вся́ких боле́зней, и бед нас свободи́, к свяще́нному твоему́ покро́ву прибега́ющих.

Стра́нное чу́до, е́же в Тебе́ Богороди́тельнице: нас бо ра́ди по нам роди́ся всех зижди́тель из Тебе́, и Бог наш.

Храм твой Богоро́дице показа́ся врачевство́ неду́гов безме́здное, и оскорбля́емых душ утеше́ние.

Пресвята́я Богоро́дице, ро́ждшая Спа́са, от бед спаси́, и вся́кия ины́я ну́жды рабы́ Твоя́.

Изба́ви от вся́каго преще́ния находя́щаго рабы́ Твоя́, пресвята́я Влады́чице, и вся́каго вре́да душе́внаго же и теле́снаго.

Спаси́ всех моли́твами твои́ми, Де́во Богоро́дице, к Тебе́ притека́ющих, и изба́ви вся́кия ну́жды и ско́рби.

Кто притека́яй в храм Твой Богоро́дице, не прие́млет ско́ро исцеле́ния, душе́внаго вку́пе и теле́снаго, Пречи́стая;

От всех умоля́емь Ще́дре, святы́х и го́рних чино́в, очи́сти мя ро́ждшею Тя.

Пощади́ Спа́се, ду́шы уме́рших бра́тий на́ших, в наде́жди жи́зни: и осла́би, оста́ви им согреше́ния.

Ра́дуйся ми́ра очисти́лище Де́во, ра́дуйся ру́чко и све́щниче всезлаты́й, Боже́ственныя ма́нны и све́та, богоневе́сто.

Пое́м Тя Бо́га еди́наго в Тро́ице, вопию́ще глас трисвяты́й, моля́щеся спасе́ние получи́ти.

Сла́ва: О Де́во, ро́ждшая Спа́са и Влады́ку ми́ра и Го́спода, Того́ моли́ спасти́ ду́шы на́шя.

И ны́не: Ра́дуйся горо́, ра́дуйся купино́, ра́дуйся врата́, ра́дуйся Ле́ствице, ра́дуйся Боже́ственная Трапе́зо, ра́дуйся всех По́моще Влады́чице.

Моли́твами, ми́лостиве, Ма́тере Твоея́ Пречи́стыя, и всех святы́х Твои́х, Твоя́ ми́лости лю́дем Твои́м да́руй.

Моли́твами сла́вных арха́нгел, и а́нгел, и го́рних чино́в, рабы́ Твоя́ Спа́се до́бре сохрани́.

Моли́твами честна́го и сла́внаго крести́теля Твоего́, проро́ка, Предте́чи, Христе́ Спа́се мой, рабы́ Твоя́ сохрани́.

Моли́твами сла́вных апо́столов и му́чеников, и всех святы́х Твои́х, Твоя́ ми́лости лю́дем Твои́м да́руй.

Моли́твами сла́вных безсре́бренник, Богоро́дице рабы́ твоя́ сохрани́, я́ко предста́тельство ми́ра и утвержде́ние.

Сла́ва: Отца́ и Сы́на славосло́вим, и Ду́ха Свята́го, глаго́люще: Тро́ице свята́я, спаси́ ду́шы на́шя.

И ны́не: Неизрече́нно в после́дняя заче́ншая, и ро́ждшая созда́теля твоего́, Де́во, спаса́й Тя велича́ющыя.

Та́же:

Милосе́рдия две́ри отве́рзи нам благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед; Ты бо еси́ спасе́ние ро́да Христиа́нскаго.

Та́же: Го́споду помо́лимся.

Свяще́нник: Я́ко свят еси́ Бо́же наш, и Тебе́ сла́ву возсыла́ем Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Лик: Ами́нь.

Та́же настоя́щыя тропари́, глас 6:

Ны́не наста́ вре́мя всех освяща́ющее, и пра́ведный нас ждет судия́, но обрати́ся душе́ к покая́нию, я́ко блудни́ца зову́щи со слеза́ми: Го́споди, поми́луй мя.

Вода́ми одожди́вый Христе́ исто́чник исцеле́ний, во всечестне́м хра́ме Де́вы дне́сь, Твоего́ благослове́ния окропле́нием, отгоня́еши неду́ги немощству́ющих, Врачу́ душ и теле́с на́ших.

Де́ва родила́ еси́ неискусобра́чная и Де́во пребыла́ еси́ ма́ти безневе́стная, Богоро́дице Мари́е, Христа́ Бо́га на́шего моли́ спасти́ся нам.

Пресвята́я Богоро́дице Де́во, рук на́ших дела́ испра́ви, и проще́ние прегреше́ний на́ших испроси́, внегда́ пе́ти нам а́нгельское пе́ние:

Святы́й Бо́же, святы́й Кре́пкий, святы́й Безсме́ртный, поми́луй нас.

Отпе́вше же по обы́чаю, и по трисвято́м Диа́кон глаго́лет: Во́нмем. Свяще́нник: Мир всем. Лик: И ду́хови твоему́.

Чтец, проки́мен, глас 3:

Госпо́дь просвеще́ние мое́, и спаси́тель мой, кого́ убою́ся;

Стих: Госпо́дь защи́титель живота́ моего́, от кого́ устрашу́ся;

Чтец, надписа́ние апо́стола:

Ко Евре́ем свята́го апо́стола Па́вла чте́ние.

Диа́кон: Во́нмем. Зача́ло 306:

Бра́тие, святя́й и освяща́емии, от Еди́наго вси: ея́же ра́ди вины́ не стыди́тся бра́тию нарица́ти их, глаго́ля: Возвещу́ и́мя Твое́ бра́тии мое́й, посреде́ це́ркве воспою́ Тя. И па́ки: аз бу́ду наде́яся на́нь; и па́ки, се аз и де́ти, я́же ми дал е́сть Бог. Поне́же у́бо де́ти приобщи́шася пло́ти и кро́ви, и той прии́скренне приобщи́ся те́хже, да сме́ртию упраздни́т иму́щаго держа́ву сме́рти, си́речь диа́вола; И изба́вит сих ели́цы стра́хом сме́рти чрез все житие́ пови́нни бе́ша рабо́те. Не от а́нгел у́бо когда́ прие́млет, но от се́мене Авраа́мова прие́млет. Отню́дуже до́лжен бе по ВСЕМу́ подо́битися бра́тии, да ми́лостив бу́дет и ве́рен первосвяще́нник я́же к Бо́гу, во е́же очи́стити грехи́ людски́я. В не́мже бо пострада́, сам искуше́н быв, мо́жет и искуша́емым по́мощи.

Свяще́нник: Мир ти. Чтец: И ду́хови твоему́. Диа́кон: Прему́дрость, во́нмем. Чтец: Псало́м Дави́дов. Аллилу́иа. Глас 6. Стих 1: Отры́гну се́рдце мое́ сло́во бла́го. Стих 2: Глаго́лю аз дела́ моя́ Царе́ви.

Диа́кон: Прему́дрость, про́сти . Услы́шим Свята́го Ева́нгелиа.

Свяще́нник: От От Иоа́нна Свята́го Ева́нгелиа чтение.

Диа́кон: Во́нмем.

Свяще́нник, зача́ло 14:

Во вре́мя о́но, взы́де Иису́с во Иерусали́м. Е́сть же во Иерусали́мех на о́вчей купе́ли, я́же глаго́лется евре́йски Вифесда́, пя́ть притво́р иму́щи. В тех слежа́ше мно́жество боля́щих, слепы́х, хромы́х, сухи́х, ча́ющих движе́ния во́ды. А́нгел бо Госпо́день на вся́ко ле́то схожда́ше в купе́ль, и возмуща́ше во́ду: и и́же пе́рвее вла́зяше по возмуще́нии во́ды, здрав быва́ше, яце́мже неду́гом одержи́мь быва́ше.

Та́же, диа́кон ектению́: Ми́ром Го́споду помо́лимся.

О свы́шнем ми́ре и спасе́нии душ на́ших Го́споду помо́лимся.

О ми́ре всего́ ми́ра, благостоя́нии святы́х Бо́жиих церкве́й, и соедине́нии всех, Го́споду помо́лимся.

О святе́м хра́ме сем, и с ве́рою, благогове́нием, и стра́хом Бо́жиим входя́щих в о́нь, Го́споду помо́лимся.

О Святе́йшем Прави́тельствующем Сино́де (и о митрополи́те на́шем, и́мярек, его́же о́бласть), честне́м пресви́терстве, во Христе́ диа́констве, о всем при́тче, и лю́дех, Го́споду помо́лимся.

О Благочести́вейшем, Самодержа́внейшем, вели́ком ГОСУДА́РЕ ИМПЕРА́ТОРЕ АЛЕКСА́НДРЕ АЛЕКСА́НДРОВИЧЕ всея́ Росси́и, и о Супру́ге Его́, Благочести́вейшей Госуда́рыне ИМПЕРАТРИ́ЦЕ МАРИ́И ФЕО́ДОРОВНЕ, Го́споду помо́лимся.

О Насле́днике Его́, Благове́рном Госуда́ре Цесаре́виче и Вели́ком Кня́зе НИКО́ЛАЕ АЛЕКСА́НДРОВИЧЕ, и о всем Ца́рствующем До́ме; о всей Пала́те и во́инстве Их Го́споду помо́лимся.

О пособи́ти и покори́ти под но́зе Их вся́каго врага́ и супоста́та, Го́споду помо́лимся.

О гра́де сем:

А́ще в монастыре́:

О святе́й оби́тели сей, вся́ком гра́де, стране́ и ве́рою живу́щих в них, Го́споду помо́лимся.

О благорастворе́нии возду́хов, о изоби́лии плодо́в земны́х, и времене́х ми́рных, Го́споду помо́лимся.

О пла́вающих, путеше́ствующих, неду́гующих, стра́ждущих, плене́нных, и о спасе́нии их, Го́споду помо́лимся.

О е́же освяти́тися вода́м сим, си́лою и де́йствием, и наи́тием Свята́го Ду́ха, Го́споду помо́лимся.

О е́же снизходи́ти на во́ды сия́ очисти́тельному пресу́щныя Тро́ицы де́йству, Го́споду помо́лимся.

О е́же бы́ти воде́ сей цели́тельной душ и теле́с, и вся́кия сопроти́вныя си́лы отгна́тельней, Го́споду помо́лимся.

О е́же низпосла́ти Го́споду Бо́гу благослове́ние Иорда́ново, и освяти́ти во́ды сия́, Го́споду помо́лимся.

О всех тре́бующих от Бо́га по́мощи и заступле́ния, Го́споду помо́лимся.

О е́же просвети́тися нам просвеще́нием ра́зума, единосу́щною Тро́ицею, Го́споду помо́лимся.

Я́ко да Госпо́дь Бог наш пока́жет ны сы́ны, и насле́дники Ца́рствия своего́, во́ды сея́ причаще́нием же и кропле́нием, Го́споду помо́лимся.

О изба́витися нам от вся́кия ско́рби, гне́ва и ну́жды, Го́споду помо́лимся.

Заступи́, спаси́, поми́луй и сохрани́ нас Бо́же, Твое́ю благода́тию.

Пресвяту́ю, Пречи́стую, преблагослове́нную, сла́вную Влады́чицу на́шу Богоро́дицу, и Присноде́ву Мари́ю, со все́ми святы́ми помяну́вше, са́ми себе́, и другъдру́га, и ве́сь живо́т наш Христу́ Бо́гу предади́м.

Лик: Тебе́ Го́споди.

Свяще́нник возгла́с:

Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Та́же глаголет моли́тву сию́:

Го́споди Бо́же наш, вели́кий в сове́те, и ди́вный в де́лех, всея́ тва́ри соде́телю, храня́й заве́т Твой, и ми́лость Твою́ лю́бящым Тя, и соблюда́ющым повеле́ния Твоя́, всех в ну́ждах умиле́нныя прие́мляй сле́зы; сего́ бо ра́ди прише́л еси́ в ра́бии зра́це, не привиде́нии нас устраша́я, но здра́вие те́лу и́стинное подава́яй, и глаго́ляй: се здрав был еси́, ктому́ не согреша́й. Но и от бре́ния здра́вы о́чи соде́лал еси́, и умы́тися повеле́в, све́ту всели́тися сотвори́л еси́ сло́вом, супроти́вных страсте́й во́лны смуща́яй, и жития́ сего́ сла́ное мо́ре изсуша́яй, и тяжелоно́сныя сласте́й укроща́яй во́лны; Сам Человеколю́бче Царю́, да́вый нам снегосве́тлою оде́ятися оде́ждею, от во́ды же и ду́ха, и прича́стием же во́ды сея́ и окропле́нием Твое́ благослове́ние нам низпосли́, скве́рну страсте́й омыва́ющее. Ей, мо́лимся, посети́ на́шу Бла́же не́мощь, и исцели́ на́шя неду́ги душе́вныя же и теле́сныя ми́лостию Твое́ю; моли́твами Всепречи́стыя, Преблагослове́нныя Влады́чицы на́шея Богоро́дицы и Присноде́вы Мари́и; Си́лою Честна́го и Животворя́щаго Креста́; предста́тельствы честны́х небе́сных сил безпло́тных; честна́го, сла́внаго Проро́ка, Предте́чи и Крести́теля Иоа́нна; святы́х сла́вных и всехва́льных апо́стол; преподо́бных и богоно́сных оте́ц на́ших; и́же во святы́х оте́ц на́ших, вели́ких иера́рхов, и вселе́нских учи́телей, Васи́лиа Вели́каго, Григо́риа Богосло́ва и Иоа́нна Златоу́стаго. И́же во святы́х оте́ц на́ших, Афана́сиа и Кири́лла, патриа́рхов Александри́йских. И́же во святы́х отца́ на́шего Спиридо́на, Тримифу́нтскаго чудотво́рца. И́же во святы́х отца́ на́шего Никола́а, архиепи́скопа Мирлики́йскаго чудотво́рца. И́же во святы́х оте́ц на́ших всея́ Росси́и чудотво́рцов, Петра́, Алекси́а, Ио́ны и Фили́ппа. Свята́го и сла́внаго великому́ченика Гео́ргиа Победоно́сца; свята́го и сла́внаго великому́ченика Дими́триа мироточи́ваго; святы́х и добропобе́дных му́ченик. Святы́х и пра́ведных богооте́ц Иоаки́ма и А́нны. Святы́х сла́вных и чудотво́рцов безсре́бреников, Космы́ и Дамиа́на, Ки́ра и Иоа́нна, Пантелеи́мона и Ермола́а, Сампсо́на и Диоми́да, Моки́а и Аники́ты, Фалале́а и Три́фона; и свята́го, и́мярек, его́же и па́мять соверша́ем, и всех святы́х Твои́х.

И сохрани́ Го́споди Раба́ Твоего́ Благочести́вейшаго, Самодержа́внейшаго, Вели́каго Госуда́ря на́шего ИМПЕРА́ТОРА АЛЕКСА́НДРА АЛЕКСА́НДРОВИЧА всея́ Росси́и, три́жды.

И Супру́гу Его́, Благочести́вейшую Госуда́рыню ИМПЕРАТРИ́ЦУ МАРИ́Ю ФЕО́ДОРОВНУ.

Насле́дника Его́, Благове́рнаго Госуда́ря Цесаре́вича и Вели́каго Кня́зя НИКОЛА́Я АЛЕКСА́НДРОВИЧА, и ве́сь Ца́рствующий Дом.

Спаси́ Го́споди и поми́луй Святе́йший Прави́тельствующий Сино́д, да́руй им душе́вное и теле́сное здра́вие, и рабо́тному Тебе́ сему́ христиа́нскому жи́тельству во всем ми́лостив бу́ди. Помяни́ Го́споди вся́кое епи́скопство правосла́вных, пра́во пра́вящих сло́во Твое́ и́стины, и ве́сь свяще́ннический и мона́шеский чин, и спасе́ние их. Помяни́ Го́споди ненави́дящих и лю́бящих нас, служа́щих бра́тий на́ших предстоя́щих, и благосло́вною вино́ю отше́дших, и запове́давших нам недосто́йным моли́тися о них. Помяни́ Го́споди в плене́нии и ско́рбех су́щих бра́тий на́ших, и поми́луй их по вели́цей ми́лости Твое́й, вся́кия ну́жды избавля́яй; Я́ко Ты еси́ исто́чник исцеле́ний, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в. Лик: Ами́нь.

Свяще́нник: Мир всем.

Лик: И ду́хови твоему́.

Диа́кон: Главы́ ва́шя Го́сподеви приклони́те.

Лик: Тебе́ Го́споди.

Свяще́нник же глаго́лет моли́тву та́йно:

Приклони́ Го́споди у́хо Твое́, и услы́ши ны, И́же во Иорда́не крести́тися изво́ливый, и освяти́вый во́ды; и благослови́ всех нас, и́же преклоне́нием своея́ вы́и, назна́менающих рабо́тное воображе́ние; и сподо́би нас испо́лнитися освяще́ния Твоего́, во́ды сея́ причаще́нием: и да бу́дет нам Го́споди, во здра́вие души́ и те́ла.

Возгла́с:

Ты бо еси́ освяще́ние на́ше, и Тебе́ сла́ву и благодаре́ние и поклоне́ние возсыла́ем, со безнача́льным Твои́м Отце́м, и всесвяты́м, благи́м, и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Та́же взем честны́й крест, благословля́ет во́ды, три́жды, крестообра́зно низводя́ и возводя́ и пра́во, ѝ пра́во, и поя настоя́щий

тропа́рь, глас 1, три́жды:

Спаси́ Го́споди лю́ди Твоя́, и благослови́ достоя́ние Твое́, побе́ды Благове́рному ИМПЕРА́ТОРУ на́шему, и́мярек, на сопроти́вныя да́руя, и Твое́ сохраня́я Кресто́м Твои́м жи́тельство.

И посе́м пою́т тропа́рь сей, глас 2:

Твои́х даро́в досто́йны нас сотвори́ Богоро́дице Де́во, презира́ющи согреше́ния на́шя, и подаю́щи исцеле́ния ве́рою прие́млющым благослове́ние Твое́ Пречи́стая.

Та́же лобза́ет иере́й честны́й крест, та́кожде и вси лю́дие, и кропи́т всех свяще́нною водо́ю, олта́рь и це́рковь всю:

лю́дие же пою́т настоя́щий тропа́рь, глас 4:

Исто́чник исцеле́ний, иму́ще святи́и безсре́бреницы, исцеле́ния подава́ете всем тре́бующым, я́ко преве́лиих дарова́ний сподо́бльшиися от приснотеку́щаго исто́чника Спа́са на́шего. Глаго́лет бо к вам Госпо́дь, я́ко единоревни́телем апо́стольским: се дах вам вла́сть на ду́хи нечи́стыя, я́коже тех изгони́ти, и цели́ти вся́кий неду́г, и вся́кую я́зю: те́мже в повеле́ниих Его́ до́бре жи́тельствовавше, ту́не прия́сте, ту́не подава́ете, исцеля́юще стра́сти душ и теле́с на́ших.

При́зри на моле́ния твои́х раб всенепоро́чная, утоля́ющи лю́тая на ны воста́ния, вся́кия ско́рби нас изменя́ющи; Тя бо еди́ну тве́рдое и изве́стное утвержде́ние и́мамы, и твое́ предста́тельство стяжа́хом, да не постыди́мся Влады́чице, тя призыва́ющии. Потщи́ся на умоле́ние, тебе́ ве́рно вопию́щих: ра́дуйся Влады́чице, всех по́моще, ра́досте и покро́ве, и спасе́ние душ на́ших.

Влады́чице, приими́ моли́твы рабо́в твои́х, и изба́ви нас от вся́кия ну́жды и ско́рби.

По соверше́нии же кропле́ния ектениа́ сия́:

Поми́луй нас Бо́же, по вели́цей ми́лости Твое́й, мо́лимтися услы́ши и поми́луй.

Лик: Го́споди поми́луй, три́жды.

Еще́ мо́лимся, о е́же сохрани́тися святе́й оби́тели сей, и вся́кому гра́ду и стране́ от гла́да, губи́тельства, тру́са, пото́па, огня́, меча́, наше́ствия иноплеме́нников, и междоусо́бныя бра́ни; о е́же ми́лостиву и благоуве́тливу бы́ти благо́му и человеколюби́вому Бо́гу на́шему, отврати́ти вся́кий гнев на ны дви́жимый, и изба́вити ны от належа́щаго и пра́веднаго своего́ преще́ния, и поми́ловати ны.

Го́споди поми́луй, 40.

Свяще́нник же возглаша́ет:

Услы́ши ны Бо́же Спаси́телю наш, упова́ние всех конце́в земли́, и су́щих в мо́ри дале́че, и ми́лостив, ми́лостив бу́ди Влады́ко о гресе́х на́ших, и поми́луй ны; ми́лостив бо и Человеколю́бец Бог еси́, и Тебе́ сла́ву возсыла́ем Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Свяще́нник: Мир всем.

Лик: И ду́хови твоему́.

Диа́кон: Главы́ на́шя Го́сподеви прикло́ним:

Лик: Тебе́ Го́споди.

Свяще́нник чтет моли́тву сию́ велегла́сно:

Влады́ко многоми́лостиве Го́споди Иису́се Христе́ Бо́же наш, моли́твами Всепречи́стыя Влады́чицы на́шея Богоро́дицы и Присноде́вы Мари́и; си́лою Честна́го и Животворя́щаго Креста́; предста́тельствы честны́х небе́сных сил безпло́тных; честна́го сла́внаго Проро́ка, Предте́чи и Крести́теля Иоа́нна; святы́х сла́вных и всехва́льных апо́стол; святы́х сла́вных и добропобе́дных му́ченик; преподо́бных и богоно́сных оте́ц на́ших; и́же во святы́х оте́ц на́ших, и вселе́нских вели́ких учи́телей и святи́телей, Васи́лиа Вели́каго, Григо́риа Богосло́ва и Иоа́нна Златоу́стаго; и́же во святы́х отца́ на́шего Никола́а архиепи́скопа, Мирлики́йскаго чудотво́рца; и́же во святы́х оте́ц на́ших всея́ Росси́и чудотво́рцов, Петра́, Алекси́а, Ио́ны и Фили́ппа; святы́х и пра́ведных богооте́ц Иоаки́ма и А́нны:

И свята́го, и́мярек, его́же е́сть храм:

И всех святы́х Твои́х, благоприя́тну сотвори́ моли́тву на́шу; да́руй нам оставле́ние прегреше́ний на́ших; покры́й нас кро́вом крилу́ Твое́ю; отжени́ от нас вся́каго врага́ и супоста́та; умири́ на́шу жи́знь; Го́споди поми́луй нас, и мир Твой, и спаси́ ду́шы на́шя, я́ко Благ и Человеколю́бец. Лик: Ами́нь.

И отпу́ст.

По е́же рещи́ свяще́ннику заамво́нную моли́тву, исхо́дим вси ко крести́льнице, предыдущим свещено́сцем, по них же диа́коном и свяще́нником, со Ева́нгелием и кади́лом, бра́тии пою́щым настоя́щыя тропари́. Глас 8:

Глас Госпо́день на вода́х вопие́т, глаго́ля: прииди́те, приими́те вси ду́ха прему́дрости, ду́ха ра́зума, ду́ха стра́ха Бо́жия, я́вльшагося Христа́, три́жды.

Дне́сь вод освяща́ется естество́, и разделя́ется Иорда́н, и свои́х вод возвраща́ет струи́, Влады́ку зря креща́ема, два́жды.

Я́ко челове́к на реку́ прише́л еси́ Христе́ Царю́, и ра́бское креще́ние прия́ти тщи́шися бла́же, от предте́чеву ру́ку, грех ра́ди на́ших, Человеколю́бче. Два́жды.

Сла́ва, и ны́не, то́йже:

Ко гла́су вопию́щаго в пусты́ни, угото́вайте пу́ть Госпо́день, прише́л еси́ Го́споди, зрак ра́бий прии́м, креще́ния прося́, не ве́дый греха́; ви́деша Тя во́ды, и убоя́шася. Тре́петен бы́сть Предте́ча, и возопи́ глаго́ля: ка́ко просвети́т свети́льник све́та; Ка́ко ру́ку положи́т раб на Влады́ку; Освяти́ мене́ и во́ды спа́се, взе́мляй ми́ра грех.

И а́бие став у крести́льницы, глаго́лет диа́кон: Прему́дрость.

И чтец: Проро́чества Иса́иина чте́ние (Ис.35:1–10):

1. Та́ко глаго́лет Госпо́дь: да возвесели́тся пусты́ня жа́ждущая, да возра́дуется пусты́ня, и процвете́т я́ко крин. 2. И да прозя́бнет, и вся возвеселя́тся и возра́дуются пусты́нная иорда́нова, и сла́ва лива́нова дана́ бы́сть ей, и че́сть карми́лова; и лю́дие мои́ у́зрят сла́ву Госпо́дню, и высоту́ Бо́жию. 3. Укрепи́теся руки́ осла́бленыя, и коле́на разсла́бленая уте́шитеся. 4. И рцы́те малоду́шным мы́слию, укрепи́теся, и не бо́йтеся: се Бог наш суд воздае́т, Той прии́дет и спасе́т нас. 5. Тогда́ отве́рзутся очеса́ слепы́х и ушеса́ глухи́х услы́шат. 6. Тогда́ ско́чит хромы́й я́ко еле́нь, и я́сен бу́дет язы́к гугни́вых, я́ко прорази́ся в пусты́ни вода́, и де́брь в земли́ жа́ждущей. 7. И бу́дет безво́дная в бла́та, и в жа́ждущей земли́ исто́чник во́ды бу́дет. Та́мо бу́дет весе́лие птиц, водворе́ние си́ринов, и тро́стий и бла́та. 8. Та́мо бу́дет пу́ть чист, и пу́ть свят нарече́тся; и не мимои́дет та́мо нечи́ст, ниже́ бу́дет та́мо пу́ть нечи́стый, разсе́яннии же по́йдут по нему́, и не заблу́дят. 9. И не бу́дет та́мо льва́, ниже́ звере́й лю́тых взы́дет на́нь, ниже́ обря́щется та́мо; но по́йдут по нему́ изба́вленнии, 10. И со́браннии от Го́спода. И обратя́тся, и прии́дут в Сио́н с весе́лием и ра́достию, и весе́лие ве́чное над главо́ю их, хвала́ и ра́дование и весе́лие пости́гнет их, отбеже́ боле́знь, печа́ль и воздыха́ние.

Проро́чества Иса́иина чте́ние (Ис. 55:1–13):

1. Та́ко глаго́лет Госпо́дь: жа́ждущии на во́ду иди́те, и ели́цы не и́мате сребра́, ше́дше купи́те, и яди́те и пи́йте, без сребра́ и цены́, вино́ и тук. 2. Вску́ю цените́ сребро́ не в хле́бы, и труд ваш не в сы́тость; Послу́шайте Мене́, и сне́сте блага́я, и наслади́тся во благи́х душа́ ва́ша. 3. Внима́йте уши́ма ва́шима, и после́дуйте путе́м Мои́м, услы́шите Мене́, и жи́ва бу́дет во благи́х душа́ ва́ша. И завеща́ю вам заве́т ве́чен, преподо́бная Дави́дова ве́рная. 4. Се свиде́тельство во язы́цех дах его́ кня́зя и повели́теля во язы́цех. 5. Се язы́цы, и́же не ве́дяху Тя, призову́т Тя; и лю́дие, и́же не позна́ша Тя, к Тебе́ прибе́гнут, ра́ди Го́спода Бо́га Твоего́, и свята́го, Изра́илева я́ко просла́вих Тя. 6. Взыщи́те Бо́га, и внегда́ вам обрести́ Его́, призови́те: егда́ же а́ще прибли́жится вам. 7. Да оста́вит нечести́вый пути́ своя́, и муж беззако́нный сове́ты своя́, и обрати́теся ко Го́споду Бо́гу ва́шему, и поми́ловани бу́дете, я́ко по мно́гу оста́вит грехи́ ва́шя. 8. Не су́ть бо сове́ти Мои́, я́коже сове́ти ва́ши; ниже́ я́коже путие́ ва́ши, путие́ Мои́, глаго́лет Госпо́дь. 9. Но я́коже отстои́т Не́бо от земли́, та́ко отстои́т пу́ть Мой от путе́й ва́ших, и размышле́ния ва́ша от мы́сли Моея́. 10. Я́коже бо а́ще сни́дет до́ждь или́ снег с Небесе́, и не возврати́тся отту́ду, до́ндеже упои́т зе́млю, и роди́т и прозя́бнет, и даст се́мя се́ющему, и хлеб в сне́дь. 11. Та́ко бу́дет глаго́л Мой, и́же а́ще изы́дет из уст Мои́х, и не обрати́тся ко Мне тощ, до́ндеже а́ще сконча́ет вся ели́ка восхоте́х, и поспешу́ пути́ Моя́, и повеле́ния моя́. 12. Весе́лием бо изы́дете, и ра́достию научи́теся, го́ры бо и хо́лми ско́чат, жду́ще вас в ра́дости, и вся древеса́ се́льная воспле́щут ве́твьми. 13. И вме́сто дра́чия, взы́дет кипари́с, вме́сто же кропи́вы, взы́дет мирси́на: и бу́дет Госпо́дь во и́мя и в зна́мение ве́чное, и не оскуде́ет.

Проро́чества Иса́иина чте́ние (Ис. 12:1–6):

Та́ко глаго́лет Госпо́дь: почерпи́те во́ду с весе́лием, от исто́чник спасе́ния. И рече́ши в де́нь он: испове́дайтеся Го́сподеви, и призови́те и́мя Его́, возвести́те во язы́цех сла́ву Его́; помяни́те, я́ко вознесе́ся и́мя Его́. По́йте и́мя Госпо́дне, я́ко высо́кая сотвори́: возвести́те сия́ по всей земли́. Ра́дуйтеся и весели́теся живу́щии в Сио́не, я́ко вознесе́ся Святы́й Изра́илев посреде́ его́.

Диа́кон: Прему́дрость.Чтец: Проки́мен, глас 3:

Госпо́дь просвеще́ние мое́, и спаси́тель мой, кого́ убою́ся;

Стих: Госпо́дь защи́титель живота́ моего́, от кого́ устрашу́ся;

Апостол: К Кори́нфяном посла́ния свята́го апо́стола Па́вла чте́ние.

Зача́ло 143, от полу́:

Бра́тие, не хощу́ вас не ве́дети, я́ко отцы́ на́ши вси под о́блаком бы́ша, и вси сквозе́ мо́ре проидо́ша. И вси в Моисе́а крести́шася, во о́блаце и в мо́ри. И вси то́жде бра́шно духо́вное ядо́ша. И вси то́жде пи́во духо́вное пи́ша; пия́ху бо от духо́внаго после́дующаго ка́мене, ка́мень же бе Христо́с.

Аллилу́иа, глас 4. Глас Госпо́день на вода́х, Бог сла́вы возгреме́, Госпо́дь на вода́х мно́гих.

Диа́кон глаго́лет: Прему́дрость, про́сти. Услы́шим Свята́го Ева́нгелиа.

Свяще́нник: От Ма́рка Свята́го Ева́нгелиа чте́ние. Зача́ло 2:

Во вре́мя о́но, прии́де Иису́с от Назаре́та Галиле́йскаго, и крести́ся от Иоа́нна во Иорда́не. И а́бие восходя́ от воды́, ви́де разводя́щася небеса́, и Дух я́ко го́лубь сходя́щь на́нь. И глас бы́сть с Небесе́: Ты еси́ Сын мой возлю́бленный, о не́мже благоволи́х.

Диа́кон же глаго́лет ектению́:

Ми́ром Го́споду помо́лимся.

О свы́шнем ми́ре и спасе́нии душ на́ших Го́споду помо́лимся.

О ми́ре всего́ ми́ра, благостоя́нии святы́х Бо́жиих церкве́й, и соедине́нии всех, Го́споду помо́лимся.

О святе́м хра́ме сем, и с ве́рою, благогове́нием, и стра́хом Бо́жиим входя́щих в о́нь, Го́споду помо́лимся.

О Святе́йшем Прави́тельствующем Сино́де (и о митрополи́те на́шем, и́мярек, его́же о́бласть), честне́м пресви́терстве, во Христе́ диа́констве, о всем при́тче, и лю́дех, Го́споду помо́лимся.

О Благочести́вейшем, Самодержа́внейшем, вели́ком Госуда́ре ИМПЕРА́ТОРЕ АЛЕКСА́НДРЕ АЛЕКСА́НДРОВИЧЕ всея́ Росси́и, и о Супру́ге Его́, Благочести́вейшей Госуда́рыне ИМПЕРАТРИ́ЦЕ МАРИ́И ФЕО́ДОРОВНЕ, Го́споду помо́лимся.

О Насле́днике Его́, Благове́рном Госуда́ре Цесаре́виче и Вели́ком Кня́зе НИКО́ЛАЕ АЛЕКСА́НДРОВИЧЕ, и о всем Ца́рствующем До́ме; о всей Пала́те и во́инстве Их Го́споду помо́лимся.

О пособи́ти и покори́ти под но́зе Их вся́каго врага́ и супоста́та, Го́споду помо́лимся.

О гра́де сем, (а́ще в монастыре́, о святе́й оби́тели сей), вся́ком гра́де, стране́ и ве́рою живу́щих в них, Го́споду помо́лимся.

О благорастворе́нии возду́хов, о изоби́лии плодо́в земны́х, и временах ми́рных, Го́споду помо́лимся.

О пла́вающих, путеше́ствующих, неду́гующих, стра́ждущих, плене́нных, и о спасе́нии их, Го́споду помо́лимся.

О е́же освяти́тися вода́м сим, си́лою и де́йствием и наи́тием Свята́го Ду́ха, Го́споду помо́лимся.

О е́же снизходи́ти на во́ды сия́ очисти́тельному пресу́щныя Тро́ицы де́йству, Го́споду помо́лимся.

О е́же дарова́тися им благода́ти избавле́ния, благослове́нию Иорда́нову, си́лою и де́йством и наи́тием Свята́го Ду́ха, Го́споду помо́лимся.

О е́же сокруши́тися сатане́ под нога́ма на́шима вско́ре, и разори́тися вся́кому сове́ту лука́вому дви́жимому на ны, Го́споду помо́лимся.

Я́ко да Госпо́дь Бог и́змет нас от вся́каго наве́та, и искуше́ния сопроти́вника, и досто́йны соде́лает обеща́нных благ, Го́споду помо́лимся.

О е́же просвети́тися нам просвеще́нием ра́зума, и благоче́стия, наи́тием Свята́го Ду́ха, Го́споду помо́лимся.

О е́же низпосла́ти Го́споду Бо́гу благослове́ние Иорда́ново, и освяти́ти во́ды сия́, Го́споду помо́лимся.

О е́же бы́ти воде́ сей, освяще́ния да́ру, грехо́в избавле́нию, во исцеле́ние души́ и те́ла, и на вся́кую по́льзу изря́дную, Го́споду помо́лимся.

О е́же бы́ти воде́ сей приводя́щей в жи́знь ве́чную, Го́споду помо́лимся.

О е́же яви́тися сей отгна́нию вся́каго наве́та ви́димых и неви́димых враг, Го́споду помо́лимся.

О че́рплющих и е́млющих ю̀ во освяще́ние домо́в, Го́споду помо́лимся.

О е́же бы́ти сей, во очище́ние душ и теле́с, всем ве́рою че́рплющым же и причаща́ющымся от нея́, Го́споду помо́лимся.

О е́же сподо́битися нам испо́лнитися освяще́ния, вод сих причаще́нием, неви́димым явле́нием Свята́го Ду́ха, Го́споду помо́лимся.

О е́же услы́шати Го́споду Бо́гу глас моле́ния нас гре́шных, и поми́ловати нас, Го́споду помо́лимся.

О изба́витися нам от вся́кия ско́рби, гне́ва и ну́жды, Го́споду помо́лимся.

Заступи́, спаси́, поми́луй и сохрани́ нас Бо́же, Твое́ю благода́тию.

Пресвяту́ю, Пречи́стую, преблагослове́нную, сла́вную Влады́чицу на́шу Богоро́дицу, и Присноде́ву Мари́ю, со все́ми святы́ми помяну́вше, са́ми себе́, и другъдру́га, и ве́сь живо́т наш Христу́ Бо́гу предади́м.

Сим глаго́лемым, свяще́нник та́йно моли́тву сию́ глаго́лет:

Го́споди Иису́се Христе́, единоро́дный Сы́не, сый в не́дре О́тчи, и́стинный Бо́же, исто́чниче жи́зни и безсме́ртия, све́те от све́та, прише́дый в мир, е́же просвети́ти его́, озари́ на́шу мы́сль святы́м Твои́м ду́хом, и приими́ нас, вели́чество и благодаре́ние Тебе́ принося́щих, о я́же от ве́ка ди́вных Твои́х великоде́йствиих, и е́же в после́дняя ве́ки спаси́тельном Твое́м смотре́нии, в не́мже в на́ше немощно́е и ни́щее оде́явся смеше́ние, и рабо́тным ме́рам снизше́дый, И́же всех Царю́, еще́ и ра́бскою руко́ю во Иорда́не крести́тися претерпе́л еси́: да водно́е естество́ освяти́в безгре́шне, путесотвори́ши нам, е́же водо́ю и ду́хом па́ки рожде́ние, и к пе́рвому нас устро́иши свобожде́нию; его́же Боже́ственнаго та́инства воспомина́ние пра́зднующе, мо́лимся Тебе́ Влады́ко Человеколю́бче, воскропи́ и на ны недосто́йныя рабы́ Твоя́, по Боже́ственному Твоему́ обеща́нию, во́ду чи́сту, Твоего́ благоутро́бия дар, во е́же над водо́ю се́ю проше́нию нас гре́шных благоприя́тну бы́ти Твое́ю бла́гостию, и благослове́нию Твоему́ е́ю, нам же и всем ве́рным лю́дем Твои́м дарова́тися, в сла́ву свята́го и покланя́емаго Твоего́ и́мене. Я́ко подоба́ет Тебе́ вся́кая сла́ва, че́сть и поклоне́ние, со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не, и при́сно, и во ве́ки веко́в.

И рек в себе́: Ами́нь. Диа́кону же испо́лншу ектению́, начина́ет свяще́нник велегла́сно моли́тву сию́:

Ве́лий еси́ Го́споди, и чу́дна дела́ Твоя́, и ни еди́но же сло́во дово́льно бу́дет к пе́нию чуде́с Твои́х, три́жды.

Твое́ю бо во́лею от небытия́ в бытие́ приве́л еси́ вся́ческая; Твое́ю держа́вою содержи́ши тва́рь, и Твои́м про́мыслом стро́иши мир. Ты от четы́рех стихи́й соста́вивый тва́рь, четы́рьми времены́ круг ле́та венча́л еси́. Тебе́ трепе́щут у́мныя си́лы вся; Тебе́ пое́т со́лнце; Тебе́ сла́вит луна́; Тебе́ прису́тствуют зве́зды; Тебе́ слу́шает свет; Тебе́ трепе́щут бе́здны; Тебе́ рабо́тают исто́чницы. Ты просте́рл еси́ Не́бо я́ко ко́жу; Ты утверди́л еси́ зе́млю на вода́х; Ты огради́л еси́ мо́ре песко́м; Ты к дыха́нием возду́х излия́л еси́. А́нгельския си́лы Тебе́ слу́жат; арха́нгельстии ли́цы Тебе́ кла́няются; многоочи́тии херуви́ми, и шестокрила́тии серафи́ми, о́крест стоя́ще и облета́юще, стра́хом непристу́пныя Твоея́ сла́вы покрыва́ются. Ты бо Бог сый неопи́санный, безнача́льный же и несказа́нный, прише́л еси́ на зе́млю, зрак раба́ прии́м, в подо́бии челове́честем быв; не бо терпе́л еси́ Влады́ко, благоутро́бия ра́ди ми́лости Твоея́, зре́ти от диа́вола му́чима ро́да челове́ча, но прише́л еси́, и спасл еси́ нас. Испове́дуем благода́ть, пропове́дуем ми́лость, не таи́м благодея́ния; естество́ на́шего ро́ды свободи́л еси́; деви́ческую освяти́л еси́ утро́бу рождество́м Твои́м; вся тва́рь воспева́ет Тя я́вльшагося. Ты бо Бог наш, на земли́ яви́лся еси́, и с челове́ки пожи́л еси́; Ты и Иорда́нския струи́ освяти́л еси́, с Небесе́ низпосла́вый свята́го Твоего́ Ду́ха, и главы́ та́мо гнездя́щихся сокруши́л еси́ змие́в.

И сие́ у́бо свяще́нник глаго́ля три́жды, и во́ду руко́ю благословля́ет на ки́йждо стих:

Сам у́бо Человеколю́бче Царю́, прииди́ и ны́не наи́тием Свята́го Твоего́ Ду́ха, и освяти́ во́ду сию́.

И да́ждь ей благода́ть избавле́ния, благослове́ние Иорда́ново; сотвори́ ю̀ нетле́ния исто́чник, освяще́ния дар, грехо́в разреше́ние, неду́гов исцеле́ние, бесо́м губи́тельну, сопроти́вным си́лам непристу́пну, а́нгельския кре́пости испо́лнену; да вси почерпа́ющии и причаща́ющиися име́ют ю̀ ко очище́нию душ и теле́с, ко исцеле́нию страсте́й, ко освяще́нию домо́в, и ко вся́кой по́льзе изря́дну. Ты бо еси́ Бог наш, И́же водо́ю и ду́хом обнови́вый обетша́вшее грехо́м естество́ на́ше. Ты еси́ Бог наш, водо́ю потопи́вый при Но́и грех. Ты еси́ Бог наш, И́же мо́рем свободи́вый от рабо́ты фарао́ни Моисе́ом род евре́йский. Ты бо еси́ Бог наш, разрази́вый ка́мень в пусты́ни, и потеко́ша во́ды, и пото́цы наводни́шася, и жа́ждущыя лю́ди Твоя́ насы́тивый. Ты еси́ Бог наш, И́же водо́ю и огне́м премени́вый Илие́ю Изра́иля от пре́лести ваа́ловы.

Сам и ны́не Влады́ко, освяти́ во́ду сию́ ду́хом Твои́м святы́м. Три́жды.

Да́ждь же всем прикаса́ющымся ей и причаща́ющымся, и ма́жущымся е́ю, освяще́ние, здра́вие, очище́ние и благослове́ние.

И спаси́ Го́споди раба́ Твоего́ Благочести́вейшаго, Самодержа́внейшаго, Вели́каго Госуда́ря на́шего ИМПЕРА́ТОРА АЛЕКСА́НДРА АЛЕКСА́НДРОВИЧА всея́ Росси́и. Три́жды.

И Супру́гу Его́, Благочести́вейшую Госуда́рыню ИМПЕРАТРИ́ЦУ МАРИ́Ю ФЕО́ДОРОВНУ.

Насле́дника Его́, Благове́рнаго Госуда́ря Цесаре́вича и Вели́каго Кня́зя НИКОЛА́Я АЛЕКСА́НДРОВИЧА, и ве́сь Ца́рствующий Дом.

Спаси́ Го́споди и поми́луй Святе́йший Прави́тельствующий Сино́д, и сохрани́ их под кро́вом Твои́м в ми́ре, покори́ им вся́каго врага́ и супоста́та; да́руй им вся я́же ко спасе́нию проше́ния и жи́знь ве́чную, да и стихи́ами, и челове́ки, и а́нгелы, и ви́димыми и неви́димыми сла́вится Твое́ пресвято́е и́мя, со Отце́м и Святы́м Ду́хом, ны́не и при́сно, и во ве́ки веко́в, ами́нь.

Свяще́нник: Мир всем.

Диа́кон: Главы́ ва́шя Го́сподеви приклони́те.

Свяще́нник прикло́нься мо́лится:

Приклони́ Го́споди у́хо Твое́, и услы́ши ны, И́же во Иорда́не крести́тися изво́ливый, и освяти́вый во́ды, благослови́ всех нас, и́же преклоне́нием своея́ вы́и назна́менающих рабо́тное воображе́ние; и сподо́би нас испо́лнитися освяще́ния Твоего́, причаще́нием во́ды сея́, и да бу́дет нам Го́споди, во здра́вие души́ и те́ла.

Возглаше́ние:

Ты бо еси́ освяще́ние на́ше, и Тебе́ сла́ву и благодаре́ние и поклоне́ние возсыла́ем, со безнача́льным Твои́м Отце́м и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

И а́бие благословля́я во́ду крестови́дно честны́м кресто́м, погружа́ет ѝ пра́во, низводя́ в во́ду, и возводя́, держа́ его́ обе́ма рука́ма, поя́ настоя́щий тропа́рь, во глас 1:

Во Иорда́не креща́ющуся Тебе́ Го́споди, тро́ическое яви́ся поклоне́ние; роди́телев бо глас свиде́тельствоваше Тебе́, возлю́бленнаго Тя Сы́на имену́я; и Дух в ви́де голуби́не изве́ствоваше словесе́ утвержде́ние. Явле́йся Христе́ Бо́же, и мир просвеще́й, сла́ва Тебе́.

Певце́м то́же пою́щым: Па́ки второ́е, та́коже кресто́м зна́менует во́ды. И тропа́рь пое́т то́йже; и певце́м то́же пою́щим. И тре́тие та́кожде. И взем свяще́нник свяще́нную во́ду на блю́до, и обрати́тся на за́пад лице́м, в ле́вой ру́це держа́ крест, в пра́вой же василки́. И прихо́дит пре́жде настоя́тель, и целу́ет честны́й крест, и зна́менует его́ свяще́нник по лицу́ василко́м со свяще́нною водо́ю. Та́же свяще́нницы прихо́дят по чи́ну своему́. По тому́же чи́ну и вся бра́тия. Пое́тся же тогда́ тропа́рь: Во Иорда́не креща́ющуся Тебе́ Го́споди: Мно́гащи. До́ндеже освятя́тся вся бра́тия водны́м кропле́нием.

И а́бие вхо́дим во храм, пою́ще самогла́сен, глас 6:

Воспои́м ве́рнии, е́же о нас Бо́жия благодея́ния вели́чество; о на́шем бо прегреше́нии быв челове́к, на́шим очище́нием очища́ется во Иорда́не, еди́н чи́стый и нетле́нный, освяща́яй мене́ и во́ды, и главы́ змие́в сокруша́яй в воде́. Почерпе́м у́бо во́ду с весе́лием, бра́тие; благода́ть бо Ду́ха ве́рно почерпа́ющым неви́димо подава́ется от Христа́ Бо́га, и Спа́са душ на́ших.

Та́же, Бу́ди и́мя Госпо́дне; три́жды, и псало́м 33: Благословлю́ Го́спода на вся́кое вре́мя: И пре́жде пи́вше освяще́нную во́ду, взе́млем от свяще́нника анти́дор.

И быва́ет соверше́нный отпу́ст.

И́же во Иорда́не крести́тися изво́ливый от Иоа́нна, на́шего ра́ди спасе́ния, Христо́с и́стинный Бог наш, моли́твами Пречи́стыя Своея́ ма́тере, и всех святы́х, поми́лует и спасе́т нас, я́ко Благ и Человеколю́бец.