Пострижение в монашество

Твори́т свяще́нник: Благослове́н Бог наш всегда́, ны́не и при́сно, и во ве́ки веко́в, ами́нь. Трисвято́е. Пресвята́я Тро́ице: По О́тче наш: Я́ко Твое́ е́сть Ца́рство:

Тропа́рь, глас 6: Поми́луй нас Го́споди, поми́луй нас, вся́каго бо отве́та недоуме́юще, сию́ Ти моли́тву я́ко Влады́це гре́шнии прино́сим: поми́луй нас.

Сла́ва: Го́споди поми́луй нас, на Тя бо упова́хом, не прогне́вайся на ны зело́, ниже́ помяни́ беззако́ний на́ших, но при́зри и ны́не я́ко благоутро́бен, и изба́ви ны от враго́в на́ших; Ты бо еси́ Бог наш, и мы лю́дие твои́, вси дела́ ру́ку Твое́ю, и и́мя Твое́ призыва́ем.

И ны́не: Милосе́рдия две́ри отве́рзи нам благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед: Ты бо еси́ спасе́ние ро́да Христиа́нскаго.

Го́споду помо́лимся. Го́споди поми́луй.

Благодари́м Тя, Го́споди Бо́же наш, И́же по мно́зей ми́лости Твое́й изба́вил еси́ раба́ Твоего́ (или́ рабу́ Твою́), и́мярек, от су́етныя мирски́я жи́зни, и призва́л еси́ его́ (или́ ю̀) на честно́е сие́ обеща́ние; сподо́би у́бо его́ (или́ ю̀) пожи́ти досто́йно во а́нгельском сем жи́тельстве; и сохрани́ его́ (или́ ю̀) от сете́й диа́вольских, и чи́сту его́ (или́ ея́) ду́шу и те́ло соблюди́ да́же до сме́рти, и храм свят Твой бы́ти сподо́би; вразуми́ его́ (или́ ю̀) помина́ти Тя всегда́ и Твоя́ повеле́ния; Смире́ние же и любо́вь и кро́тость да́руй ему́ (или́ ей), моли́твами Пречи́стыя Влады́чицы на́шея Богоро́дицы и Присноде́вы Мари́и, и всех святы́х Твои́х, ами́нь.

Го́споду помо́лимся. Го́споди поми́луй.

Во и́го Твое́, Влады́ко, спаси́тельное приими́ раба́ Твоего́ (или́ рабу́ Твою́), и́мярек, и сподо́би его́ (или́ ю̀) в па́стве сочета́тися избра́нных Твои́х; облецы́ его́ (или́ ю̀) освяще́ния ри́зою, целому́дрием препоя́ши чре́сла его́ (или́ ея́), вся́каго воздержа́ния яви́ его́ (или́ ю̀) подви́жника, в нем (или́ в ней) и в нас духо́вных Твои́х благода́тей соверша́я дарова́ние, моли́твами Пресвяты́я Влады́чицы на́шея Богоро́дицы и Присноде́вы Мари́и, и всех святы́х Твои́х, ами́нь.

Та́же пострига́ет его́ крестови́дно, глаго́ля:

Во И́мя Отца́, ами́нь, и Сы́на, ами́нь, и Свята́го Ду́ха, ами́нь; ны́не и при́сно, и во ве́ки веко́в.

И облачи́т его́ игу́мен в ря́су, и камилавху, ничто́же глаго́ля, и отпу́ст.

По е́же ударити в ма́лое, и нача́ти бра́тии часы́, приво́дит екклисиа́рх хотя́щаго постригатися, и твори́т коленоприклоне́ние пред Святы́ми две́рьми, и к лико́м по еди́ному, та́же игу́мену. И тогда́ изше́д в па́перть отлага́ет обы́чныя ри́зы, и наче́ншейся Боже́ственней литурги́и, стои́т в пред Ца́рскими враты́ неопоясан, необуве́н, и откровенен. Пева́емым же антифоном, по вхо́де глаго́лется конда́к дне, на Сла́ве; на И ны́не же пое́тся тропа́рь сей, глас 1. Подо́бен: Гроб Твой, Спа́се:

Объятия О́тча отве́рсти ми потшщися, блу́дно мое́ ижди́х житие́, на бога́тство неиждива́емое взира́яй щедро́т Твои́х, Спа́се, ны́не обнища́вшее мое́ не пре́зри се́рдце. Тебе́ бо, Го́споди, умиле́нием зову́: согреши́х, О́тче, на Не́бо и пред Тобо́ю.

Сему́ же пева́ему три́жды, вво́дится от екклисиа́рха брат, творя́ в трех места́х коленоприклоне́ния три, да́же до Святы́х двере́й, и возста́вша оглаша́ет его́ игу́мен си́це:

Отве́рзи твоего́ се́рдца ушеса́, бра́те (или́ сестро́), и услы́ши глас Госпо́день глаго́лющий: Прииди́те ко Мне, вси тружда́ющиися, и обремене́ннии грехми́, и Аз упоко́ю вы; возми́те и́го Мое́ на вы, и научи́теся от Мене́, я́ко кро́ток е́смь и смире́н се́рдцем, и обря́щете поко́й душа́м ва́шым. Ны́не у́бо, прили́чный отве́т к коему́ждо вопроше́нию, со стра́хом и ра́достию отда́ждь Бо́гу. Изве́стно у́бо ве́ждь, я́ко Сам Спаси́тель наш, со Всепетою Свое́ю Ма́терию, и святы́ми а́нгелы, и все́ми святы́ми Свои́ми зде предстои́т, внуша́я исходя́щая от Тебе́ словеса́; да егда́ прии́дет суди́ти живы́м и ме́ртвым, возда́ст тебе́, не по ему́же и́маши сочета́тися и испове́дати, но по ему́же а́ще сохрани́ши, я́же испове́си. Ны́не у́бо, а́ще вои́стинну приступа́еши к Бо́гу, со внима́нием отвеща́й нам, проти́ву и́хже на́ми вопроше́н бы́ти и́маши.

Вопро́с: Что прише́л еси́, бра́те (или́ пришла́ еси́ сестро́), припа́дая ко свято́му же́ртвеннику, и ко святе́й дружи́не сей;

Отве́т: Жела́я жития́ по́стническаго, честны́й о́тче.

Вопро́с: Жела́еши ли сподо́битися а́нгельскаго о́браза, и вчинену (или́ вчинене) бы́ти ли́ку мона́шествующих;

Отве́т: Ей, Бо́гу соде́йствующу, честны́й о́тче.

Игу́мен: Вои́стинну добро́ де́ло и блаже́нно избра́л еси́ (или́ избра́ла еси́), но а́ще и соверши́ши ѐ: до́брая бо дела́ трудо́м стяжаваются, и боле́знию исправля́ются.

Вопро́с: Во́льною ли твое́ю мы́слию приступа́еши ко Го́споду;

Отве́т: Ей, Бо́гу соде́йствующу, честны́й о́тче.

Вопро́с: Не от не́кия ли ну́жды, или́ наси́лия;

Отве́т: Ни, честны́й о́тче.

Вопро́с: Пребу́деши ли в монастыре́ и в по́стничестве, да́же до после́дняго твоего́ издыха́ния;

Отве́т: Ей, Бо́гу соде́йствующу, честны́й о́тче.

Вопро́с: Храни́ши ли себе́ самого́ (или́ са́му) в де́встве и целому́дрии, и благогове́нии;

Отве́т: Ей, Бо́гу соде́йствующу, честны́й о́тче.

Вопро́с: Храни́ши ли да́же до сме́рти послуша́ние к настоя́телю, и ко всей во Христе́ бра́тии;

Отве́т: Ей, Бо́гу соде́йствующу, честны́й о́тче.

Вопро́с: Терпи́ши ли вся́кую ско́рбь и тесноту́ мона́шескаго жития́, Ца́рствия ра́ди Небе́снаго;

Отве́т: Ей, Бо́гу соде́йствующу, честны́й о́тче.

Та́же игу́мен глаго́лет к нему́ оглаше́ние.

Ви́ждь, ча́до, якова́ обетова́ния дае́ши Влады́це Христу́; а́нгели бо предстоя́т неви́димо, напису́юще испове́дание твое́ сие́, о не́мже и истя́зан (или́ истязана) бу́деши во Второ́е Прише́ствие Го́спода на́шего Иису́са Христа́. Сказу́ю у́бо ти соверше́ннейшее житие́, в не́мже по подража́нию Госпо́дне жи́тельство явля́ется, засвиде́тельствуя я́же подоба́ет ти приима́ти, и и́хже подоба́ет отбега́ти; се бо предложи́л (или́ предложила) еси́, ча́до, е́же приступи́ти и рабо́тати Го́сподеви. А́ще у́бо хо́щеши мона́х (или́ мона́хиня) бы́ти, пре́жде всех очи́сти себе́ от вся́кия скве́рны пло́ти и ду́ха, соверша́я (или́ соверша́ющи) святы́ню в стра́се Бо́жии; стяжи́ смиреному́дрие, и́мже насле́дник (или́ насле́дница) бу́деши ве́чных благ; отложи́ жите́йскаго обы́чая де́рзость; послуша́ние име́й ко всем, безроптив (или́ безроптива) бу́ди в запове́данных тебе́ слу́жбах, в моли́тве терпели́в (или́ терпели́ва), во бде́ниих неленостив (или́ неленостива); во искуше́ниих не печа́луй; в посте́ не разслабляйся; ве́ждь же, я́ко моли́твою и посто́м подоба́ет тебе́ умоли́ти Бо́га. В не́мощех не пренемогай, поразумевай же лука́выя по́мыслы: не и́мать бо преста́ти враг, предлага́я тебе́ па́мять пре́жняго жития́, и не́нависть к доброде́тельному жи́тельству. Подоба́ет у́бо тебе́, наче́ншу (или́ наченшей) пу́ть, веду́щий в Ца́рство Небе́сное, не возврати́тися вспя́ть, не бу́деши бо упра́влен (или́ упра́влена) в Ца́рство Небе́сное. Да не предпочте́ши у́бо чего́ па́че Бо́га, да не возлю́биши ниже́ отца́, ниже́ ма́терь, ниже́ бра́тию, ниже́ ко́его от свои́х; ниже́ самого́ (или́ са́мую) себе́ возлю́биши па́че Бо́га, ниже́ ца́рствия ми́ра, или́ упокое́ния коеголюбо бу́ди, или́ че́сти. Нищеты́ да не отвраща́ешися, ниже́ озлобле́ния, ниже́ уничиже́ния челове́ческаго, ниже́ ино́го чесого́, е́же непщева́ти бы́ти неудо́бно, и возбране́н (или́ возбранена́) бу́деши тещи́ за Христо́м, но при́сно взира́й на я́же во упованиих по Бо́гу живу́щих блага́я, и вся от ве́ка помышля́й му́ченики и преподо́бныя, и́же мно́гими по́ты и труды́, и безчи́сленными кровьми́ и сме́ртьми сия́ стяжа́ша. Трезви́ся во всех, злопостражди́ я́ко до́брый во́ин Христо́в: Сам бо Госпо́дь и Бог наш, бога́т сый в ми́лости, нас ра́ди обнища́, быв по нам, да мы обогати́мся Ца́рствием Его́. Подоба́ет у́бо и нам подража́телем Его́ бы́ти, и Его́ ра́ди вся претерпе́ти, преспевающым в за́поведех Его́ де́нь и но́щь. Сам бо Госпо́дь рече́: а́ще кто хо́щет в след Мене́ ити́, да отве́ржется себе́, и да во́змет крест свой, и да после́дует Мне; е́же е́сть гото́ву при́сно бы́ти, да́же до сме́рти, на вся́кое исполне́ние за́поведей Его́. И́бо алка́ти и́маши и жажда́ти, и нагствовати, досадитися же и укоритеся, уничижитися, и изгна́тися, и ины́ми мно́гими отяготи́тися ско́рбными, и́миже су́щий по Бо́гу живо́т начертава́ется. И егда́ сия́ вся постра́ждеши, ра́дуйся, глаго́лет Госпо́дь, я́ко мзда твоя́ мно́га на Небесе́х, во Христе́ Иису́се Го́споде на́шем, Ему́же сла́ва во ве́ки. Ами́нь.

Вопро́с: Сия́ вся та́ко ли исповедуеши в наде́жди си́лы Бо́жия, и в сих обетех пребыва́ти обещаешилися да́же до кончи́ны живота́, благода́тию Христо́вою;

Отве́т: Ей, Бо́гу соде́йствующу, честны́й о́тче.

И а́бие мо́лится игу́мен:

Всеще́дрый у́бо Бог, и Многоми́лостивый, пречи́стыя утро́бы Своея́ неизсле́димыя бла́гости отверза́яй вся́кому приходя́щему к Нему́ с жела́нием и любо́вию те́плою, реки́й: а́ще бы и жена́ забы́ла исча́дие свое́, Аз же не забу́ду тебе́; и твое́ ве́дый жела́ние, и к предложе́нию твоему́ прилага́я су́щую от Него́ си́лу ко исполне́нию Свои́х за́поведий, да восприи́мет, и обы́мет, и защити́т, и да бу́дет ти стена́ тве́рда от лица́ вра́жия, ка́мень терпе́ния, утеше́ния вина́, кре́пости пода́тель, благоду́шия сниска́ние, му́жества сподви́жник, совозлегая и совостая с Тобо́ю; услажда́я и веселя́ се́рдце твое́ утеше́нием Свята́го Своего́ Ду́ха, сподобля́я тя и ча́сти святы́х и преподо́бных оте́ц на́ших Анто́ниа, Евфи́миа, Са́ввы, и су́щих с ни́ми.

О жена́х же:

Святы́я первому́ченицы Фе́клы, Евпракси́и, Олимпиа́ды, и су́щих с ни́ми. С ни́миже и насле́диши Ца́рство Небе́сное, о Христе́ Иису́се Го́споде на́шем; Ему́же сла́ва и держа́ва, Ца́рство и си́ла, со Отце́м и Святы́м Ду́хом, ны́не и при́сно, и во ве́ки веко́в, ами́нь.

Та́же прекло́ншу ему́ главу́, и диа́кону ре́кшу:

Го́споду помо́лимся. И бра́тиям: Го́споди, поми́луй.

Полага́ет настоя́тель верху́ главы́ его́ кни́гу, чтет моли́тву сию́ во слух всех:

Го́споди Бо́же наш, досто́йных бы́ти законоположи́вый жите́йская вся оста́вльших, и сро́дство и дру́ги, и после́довавших Тебе́: приими́ и раба́ Твоего́ (или́ рабу́ Твою́), и́мярек, отве́ргшагося (или́ отвергшуюся) всех сих, по святы́м Твои́м за́поведем, и наста́ви его́ (или́ ю̀) на и́стину Твою́, припа́дающаго (или́ припа́дающую) Тебе́ неукло́нно; огради́ его́ (или́ ю̀) си́лою Свята́го Твоего́ Ду́ха, во е́же не́мощи де́йствовати над ним (или́ над не́ю) вся́кой сопроти́вной ко́зни, терпе́ние ему́ (или́ ей) да́руя во е́же благоугоди́ти Тебе́ вы́ну, моли́твами Пречи́стыя Влады́чицы на́шея Богоро́дицы и всех святы́х, от ве́ка Тебе́ благоугоди́вших.

Я́ко благослови́ся и просла́вися пречестно́е и великоле́пое и́мя Твое́, Отца́ и Сы́на и Свята́го Ду́ха, ны́не и при́сно, и во ве́ки веко́в, ами́нь. Игу́мен глаго́лет: Мир всем. Диа́кон: Главы́ ва́ша Го́сподеви приклони́те. Бра́тия: Тебе́ Го́споди.

Свяще́нник же чтет моли́тву сию́:

Го́споди Бо́же наш, упова́ние и прибе́жище всех упова́ющих на Тя, разли́чныя пути́ спасе́ния нам показа́вый вочелове́чением Христа́ Твоего́, приими́ раба́ Твоего́ (или́ рабу́ Твою́), и́мярек, оста́вльшаго (или́ оставльшую) мирски́я по́хоти, и себе́ прине́сшаго (или́ прине́сшую) Тебе́ Влады́це же́ртву жи́ву, благоуго́дну, отими́ от него́ (или́ от нея́) вся́кую плотску́ю по́хоть, и безслове́сная прия́тия, да отъя́тием нечу́вственных власо́в, соотложит и безслове́сныя мы́сли же и дея́ния, и сподо́бится восприя́ти и́го Твое́ благо́е и ле́гкое Твое́ бре́мя, и взя́ти крест, и после́довати Тебе́ Влады́це. Соблюди́ его́ ( или ю) во Твое́й святы́ни, и да́руй ему́ (или́ ей) предложе́ние благо́е в соблюде́нии святы́х Твои́х за́поведей, спричитывая его́ (или́ ю̀) во вре́мя благопотре́бно ли́ку избра́нных Твои́х; благода́тию и человеколю́бием Единоро́днаго Сы́на Твоего́; с Ни́мже благослове́н еси́, с Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в. Ами́нь.

Та́же просте́р ру́ку свою́ игу́мен ко свято́му Ева́нгелию, глаго́лет:

Се Христо́с неви́димо зде предстои́т: ви́ждь, я́ко никто́же тя принужда́ет приити́ к сему́ о́бразу, ви́ждь, я́ко ты от предложе́ния хо́щеши обруче́ния вели́каго и а́нгельскаго о́браза.

Отве́т: Ей, честны́й о́тче, от предложе́ния.

По обеща́нии же глаго́лет к нему́ игу́мен, три́жды: Возми́ ножницы и пода́ждь ми я̀.

По ко́емждо же изрече́нии, три́жды новонача́льный, взем ножницы, подае́т я настоятелеви, лобза́я десни́цу его́. Взе́мшу же ему́ ножницы, глаго́лет па́ки к нему́ игу́мен:

Се от руки́ Христо́вы прие́млеши я̀: ви́ждь, Кому́ обещава́ешися, и к Кому́ приступа́еши, и кого́ отрица́ешися.

И взем же настоя́тель ножницы от свята́го Ева́нгелиа, глаго́лет:

Благослове́н Бог, хотя́й всем челове́ком спасти́ся и в позна́ние и́стины приити́; Сый благослове́н во ве́ки веко́в. Ами́нь.

Та́же пострига́ет его́ игу́мен крестови́дно, глаго́ля:

Брат наш (или́ сестра́ на́ша), и́мярек, пострига́ет власы́ главы́ своея́, во и́мя Отца́ и Сы́на и Свята́го Ду́ха; рцем о нем (или́ о ней): Го́споди, поми́луй.

Бра́тия же пою́т три́жды: Го́споди, поми́луй.

Та́же облачи́т его́ в ри́зу, глаго́ля:

Брат наш (или́ сестра́ на́ша), и́мярек, облачи́тся в ри́зу ра́дования, во и́мя Отца́ и Сы́на и Свята́го Ду́ха; рцем о нем (или́ о ней): Го́споди, поми́луй.

Бра́тия же пою́т три́жды: Го́споди, поми́луй.

Брат наш (или́ сестра́ на́ша), и́мярек, препоясует чре́сла своя́ си́лою и́стины, во умерщвле́ние те́ла, и обновле́ние ду́ха, во и́мя Отца́ и Сы́на и Свята́го Ду́ха; рцем о нем (или́ о ней): Го́споди, поми́луй.

Пою́щим бра́тиям три́жды: Го́споди, поми́луй.

Брат наш (или́ сестра́ на́ша), и́мярек, покрыва́ется шле́мом наде́жди спасе́ния, во и́мя Отца́ и Сы́на и Свята́го Ду́ха; рцем о нем (или́ о ней): Го́споди, поми́луй.

Пою́щим бра́тиям три́жды: Го́споди, поми́луй.

Брат наш (или́ сестра́ на́ша), и́мярек, прие́млет палий, обруче́ние вели́каго и а́нгельскаго о́браза, во оде́жду нетле́ния и чистоты́, во и́мя Отца́ и Сы́на и Свята́го Ду́ха; рцем о нем (или́ о ней): Го́споди, поми́луй.

Пою́щим бра́тиям три́жды: Го́споди, поми́луй.

Брат наш (или́ сестра́ на́ша), и́мярек, обувается в сандалиа, во уготовле́ние благовествова́ния ми́ра, во и́мя Отца́ и Сы́на и Свята́го Ду́ха; рцем о нем (или́ о ней): Го́споди, поми́луй.

Бра́тиям пою́щим три́жды: Го́споди, поми́луй.

Брат наш (или́ сестра́ на́ша), и́мярек, прия́т обруче́ние вели́каго и а́нгельскаго о́браза, во и́мя Отца́ и Сы́на и Свята́го Ду́ха; рцем о нем (или́ о ней): Го́споди, поми́луй.

Бра́тия же вси пою́т, три́жды: Го́споди, поми́луй.

Та́же, Го́споду помо́лимся. Го́споди поми́луй.

Го́споди Бо́же наш, введи́ (или́ рабу́ Твою́), и́мярек, в духо́вный Твой двор и сопричти́ его́ (или́ ю̀) слове́сному Твоему́ ста́ду; очи́сти его́ (или́ ея́) мудрова́ние от плотски́х похоте́й и тще́тныя пре́лести жития́ сего́, и да́ждь ему́ (или́ ей) непреста́нно помина́ти предлежа́щия блага́я лю́бящым Тя, и распе́ншым себе́ житию́ сему́, Ца́рствия ра́ди Твоего́. Ты бо еси́ Па́стырь и Посети́тель душ на́ших, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

И а́ще у́бо е́сть литурги́я, глаго́лются ми́рная сия́, и апо́стол, и ева́нгелие. А́ще же ни, дае́тся постриженному свеща́, и свято́е Ева́нгелие и крест, быва́ет целова́ние.

Ми́ром Го́споду помо́лимся.

Бра́тия: Го́споди поми́луй.

О свы́шнем ми́ре и спасе́нии душ на́ших Го́споду помо́лимся.

О ми́ре всего́ ми́ра, благостоя́нии святы́х Бо́жиих церкве́й, и соедине́нии всех, Го́споду помо́лимся.

О бра́те на́шем (или́ о сестре́ на́шей), и́мярек, и е́же от Бо́га покро́ва и по́мощи его́ (или́ ея́), Го́споду помо́лимся.

О е́же непоро́чно, неосужде́нно и непреткнове́нно, соверши́ти ему́ (или́ ей) наме́рение мона́шескаго о́браза, Го́споду помо́лимся.

О е́же пребы́ти ему́ (или́ ей) во вся́ком благоче́стии и благогове́нии и чистоте́, Го́споду помо́лимся.

О е́же отложи́ти ему́ (или́ ей) ве́тхаго челове́ка, и облещи́ся в но́ваго по Бо́гу созда́ннаго, Го́споду помо́лимся.

О оставле́нии и проще́нии грехо́в его́ (или́ ея́), Го́споду помо́лимся.

О е́же изба́витися ему́ (или́ ей) и нам от вся́кия ско́рби, гне́ва и ну́жды, Го́споду помо́лимся.

Заступи́, спаси́, поми́луй и сохрани́ нас, Бо́же, Твое́ю благода́тию.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и другъдру́га, и ве́сь живо́т наш Христу́ Бо́гу предади́м.

Бра́тия: Тебе́, Го́споди. Свяще́нник:

Я́ко свят еси́, Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Бра́тия: Ами́нь. И пою́т:

Ели́цы во Христа́ крести́стеся, во Христа́ облеко́стеся. Аллилу́иа.

Диа́кон: Во́нмем. Настоя́тель: Мир всем. Чтец: И ду́хови твоему́. Диа́кон: Прему́дрость, во́нмем. Чтец: Проки́мен, глас 3: Госпо́дь просвеще́ние мое́ и Спаси́тель мой, кого́ убою́ся;

Стих: Госпо́дь Защи́титель живота́ моего́, от кого́ устрашу́ся;

Диа́кон: Прему́дрость. Чтец: Ко Ефесе́ем посла́ния свята́го апо́стола Па́вла чте́ние. Диа́кон: Во́нмем. Зача́ло 233:

Бра́тие, возмога́йте о Го́споде и в держа́ве кре́пости Его́. Облецы́теся во вся ору́жия Бо́жия, я́ко возмощи́ вам ста́ти проти́ву ко́знем диа́вольским. Я́ко не́сть на́ша бра́нь к кро́ви и пло́ти, но к нача́лом и ко власте́м и к миродержи́телем тмы ве́ка сего́, к духово́м зло́бы поднебе́сным. Сего́ ра́ди приими́те вся ору́жия Бо́жия, да возмо́жете проти́витися в де́нь лют и вся соде́явше ста́ти. Ста́ните у́бо препоя́сани чре́сла ва́ша и́стиною, и обо́лкшеся в броня́ пра́вды, и обу́вше но́зе во угото́вание благовествова́ния ми́ра; Над все́ми же восприи́мше щит ве́ры, в не́мже возмо́жете вся стре́лы лука́ваго разжже́нныя угаси́ти; И шлем спасе́ния восприими́те, и ме́чь духо́вный, и́же е́сть глаго́л Бо́жий.

Настоя́тель глаго́лет: Мир ти. Чтец: И ду́хови твоему́. Диа́кон: Прему́дрость, во́нмем. Чтец: Псало́м Дави́дов. Аллилу́иа. Стих: Сей ни́щий воззва́, и Госпо́дь услы́ша его́, и от всех скорбе́й его́ спа́се его́.

Диа́кон: Прему́дрость, про́сти, услы́шим свята́го Ева́нгелиа.

Настоя́тель: Мир всем. Бра́тия: И ду́хови твоему́.

Настоя́тель: От Матфе́а свята́го Ева́нгелиа чте́ние.

Диа́кон: Во́нмем.

Настоя́тель же чтет Ева́нгелие, зачала́ 39 и 43.

Рече́ Госпо́дь: и́же лю́бит отца́, или́ ма́терь па́че Мене́, не́сть Мене́ досто́ин; и и́же лю́бит сы́на, или́ дще́рь па́че Мене́, не́сть Мене́ досто́ин. И и́же не прии́мет креста́ своего́, и в след Мене́ гряде́т, не́сть Мене́ досто́ин. Прииди́те ко Мне, вси тружда́ющиися и обремене́ннии, и Аз упоко́ю вы. Возми́те и́го Мое́ на себе́ и научи́теся от Мене́, я́ко кро́ток е́смь и смире́н се́рдцем, и обря́щете поко́й душа́м ва́шым. И́го бо Мое́ бла́го, и бре́мя Мое́ легко́ е́сть.

Диа́кон глаго́лет ектению́ сию́:

Поми́луй нас, Бо́же, по вели́цей ми́лости Твое́й, мо́лимтися, услы́ши и поми́луй.

Го́споди, поми́луй, три́жды.

Еще́ мо́лимся о оставле́нии и проще́нии грехо́в раба́ Бо́жия (или́ рабы́ Бо́жией), и́мярек.

Го́споди, поми́луй, три́жды.

Настоя́тель же возглаша́ет:

Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Бра́тия: Ами́нь. И дае́т ему́ крест, глаго́ля:

Рече́ Госпо́дь: а́ще кто хо́щет после́довати Мне, да отве́ржется себе́, и да во́змет крест свой, и да после́дует Мне.

И дае́т свещу́ возжже́нную, глаго́ля:

Рече́ Госпо́дь: та́ко да возсия́ет свет ваш пред челове́ки, я́ко да ви́дят ва́ша до́брая дела́, и просла́вят Отца́ ва́шего, И́же на Небесе́х.

И быва́ет целова́ние, пою́ще самогла́сен. Глас 1:

Позна́им, бра́тие, та́инства си́лу, от греха́ бо ко оте́ческому до́му восте́кшаго блу́днаго сы́на, Преблаги́й Оте́ц предъусрет лобза́ет; и па́ки Своея́ сла́вы да́рует позна́ние, и та́йное Го́рним соверша́ет весе́лие, закала́я тельца́ упита́ннаго, да и мы досто́йно сожи́тельствуем закла́вшему Человеколю́бному Отцу́, и сла́вному Заколе́нию, Спа́су душ на́ших.

И про́чее литурги́и, и быва́ет отпу́ст. Ве́домо бу́ди, я́ко сицевы́й мона́х до́лженствует пребыва́ти в це́ркви дней пя́ть, упражня́яся от вся́каго дела́, кроме́ чте́ния, а́ще ве́сть. Ве́домо бу́ди и о сем, я́ко имена́ зде мона́хов на ряду́ не положи́шася, сея́ ра́ди вины́, поне́же их в гре́ческих не́сть, ве́дения же ра́ди вся́кому, зде положи́шася в конце́ кни́ги сея́.

С ве́чера вносятся ри́зы, хотя́щаго прия́ти святы́й о́браз, во святы́й же́ртвенник, и полага́ются на подно́жии святы́я трапе́зы.

На у́трени же пое́тся кано́н, его́же краестро́чие:

Благоиску́сный коне́ц благоискусному мне Христе́, пода́ждь.

Глас 2. Пе́снь 1. Ирмо́с:

Гряди́те, лю́дие, пои́м пе́снь Христу́ Бо́гу:

Ко Твоему́ человеколю́бию прите́кшаго (или́ прите́кшую), Христе́, во святы́й о́браз ны́не приходя́щаго (или́ приходя́щую), душе́вною любо́вию и мы́слию любодобродетельною, Спа́се, приими́.

Подъя́ти ми Твое́ благо́е и́го Бла́же, и бре́мя, Влады́ко, взя́ти сподо́би, мно́гих мои́х прегреше́ний бре́мя потребля́я, я́ко Многоми́лостив.

О убе́гнути ми грехо́в поползнове́ния, от ны́не благоволи́, соде́янных мно́ю безме́рных прегреше́ний, я́звы очища́я росо́ю благода́ти.

Сла́ва: Нас ра́ди в пло́ть оболки́йся, и сме́рть о нас я́ко благоутро́бен восприи́мый, плотски́х оскверне́ний очи́сти, Ще́дре, приступа́ющаго (или́ приступающую) к Тебе́.

И ны́не, Богоро́дичен: Прибе́жище, и предста́тельство, и покро́в Тя све́тел стяжа́хом, Богоро́дицу Тя, Пресвята́я, му́дрствующии, и боже́ственнаго зре́ния сподобля́емся.

Пе́снь 3. Ирмо́с: Утверди́ нас в Тебе́, Го́споди, дре́вом умерщве́й:

Очи́сти, Христе́, к Тебе́ притека́ющаго раба́ (или́ притека́ющую рабу́), и сего́ (или́ и сию́) жи́тельству преподо́бных сподо́би, благоче́стно и пра́ведно жи́тельствовати.

Преложе́ние живота́ и претворе́ние, о́браз боже́ственный сей пода́ждь, и согреше́ний очище́ние бы́ти, к Тебе́ приходя́щему ве́рному рабу́ Твоему́ (или́ приходя́щей ве́рной ра́бе Твое́й).

Еди́не Бла́же, не хотя́й сме́рти челове́ком, Ми́лостиве, Твоего́ раба́ (или́ Твою́ рабу́), Тебе́ припа́дающаго (или́ припа́дающую), ли́ку святы́х сопричти́.

Сла́ва: Ны́не хотя́щаго (или́ хотя́щую) Твои́м путе́м ше́ствовати, и житие́ избра́ти кре́стное, прии́м, очи́сти мя от пе́рвых согреше́ний, Человеколю́бче.

И ны́не, Богоро́дичен: Е́вину кля́тву, Чи́стая, разреши́ла еси́, ро́ждши всем благослове́ние неиждива́емое источи́вшаго, Спа́са ми́ру, Ма́ти Де́во.

Седа́лен, глас 4. Подо́бен: Ско́ро предвари́:

Хотя́щии, глаго́лет Госпо́дь, ити́ в след Мене́, отвержитеся мирски́х пристра́стий, роди́телей родивших; чад же и жен; бра́тий же и друго́в; име́ний и домо́в; сро́дник же и рабо́в; и приими́те досто́инство апо́столов Мои́х.

Пе́снь 4. Ирмо́с: Услы́шах, Го́споди, слух Твоего́ смотре́ния:

Обраща́ющагося (или́ обраща́ющуюся) приими́ мя, Сло́ве Бо́жий, я́ко блу́днаго дре́вле, и я́ко мытаря́, Еди́не Человеколю́бче.

Изба́витель нам был еси́, Кресто́м мир искупи́вый, те́мже Ти припа́даю, изба́ви мя, Влады́ко.

Знаменаннаго (или́ знаменанную) благода́тию и просвеще́нием Твоего́ богоразу́мия, слове́снаго Твоего́ ста́да яви́ мя овча́.

Сла́ва: Воздви́гнувый Ла́заря из ме́ртвых, и мене́ умерщвле́ннаго (или́ умерщвле́нную) грехо́вным жа́лом, Влады́ко, оживи́.

И ны́не, Богоро́дичен: Благослове́нная Пречи́стая Ма́ти Бо́жия, Твои́м мя предста́тельством, и боже́ственным покро́вом соблюди́ Влады́чице.

Пе́снь 5. Ирмо́с: Све́та Пода́телю:

Послуша́нием Твои́м, Христе́, на́ше я́ко Бог разреши́л еси́ преслуша́ние, и Ца́рствия нам вход покая́нием и ве́рою показа́л еси́.

Сконча́вшаго (или́ скончавшую) в небреже́нии житие́ зря мене́, внима́ние прилежа́ния приста́ви, Христе́, пра́вды оболк мя броне́ю.

Ве́рою, па́ки порожде́ния же ба́нею, омы́вый мя от прароди́тельныя кля́твы, ны́не же омы́й слез исто́чниками, оскверне́ннаго (или́ оскверне́нную) лю́тыми грехопаде́нии.

Сла́ва: Прекло́ншагося ни́зу, и сляче́ннаго мя (или́ сляченую ми) к земли́, Влады́ко, стра́стным и смертоно́сным грехо́вным бре́менем, Твое́ю живоно́сною руко́ю испра́ви.

И ны́не, Богоро́дичен: Ра́вен сый Отцу́ по безнача́льному зра́ку, был еси́ нам ра́вен, от неискусобра́чныя роди́вся Ма́тере, Ея́же моли́твами, Богочелове́че, спаси́ мя.

Пе́снь 6. Ирмо́с: В бе́здне грехо́вней:

Не пре́зри созда́ние Свое́, Влады́ко, но креста́ Твоего́ благода́тию спаси́ мя, и Честно́ю Кро́вию, ю́же от боже́ственнаго Твоего́ ре́бра источи́л еси́.

Я́ко не су́ща пе́рвее созда́л еси́, та́ко погубляема мя грехи́ взыска́в спаси́, я́ко Па́стырь Благи́й же и Благоутро́бный.

Сла́ва: Блаже́нных наде́жд причасти́тися мя, угото́ванных всем досто́йным Твои́м, и́хже житие́ подража́ти сподо́би, Еди́не Человеколю́бче.

И ны́не, Богоро́дичен: Рука́ма нетленныма вообрази́вый мя, па́ки возъобрази́ непотре́бнаго зело́, из чре́ва Твоего́, Влады́чице, прии́м мя соверше́нне, я́ко благоутро́бный.

Конда́к, глас 1: Объя́тия О́тча отве́рсти ми потщи́ся, блу́дно мое́ ижди́х житие́, на бога́тство неиждива́емое взира́яй щедро́т Твои́х, Спа́се, ны́не обнища́вшее не пре́зри се́рдце. Тебе́ бо, Го́споди, умиле́нием зову́: согреши́х, О́тче, на Не́бо и пред Тобо́ю.

Пе́снь 7. Ирмо́с: Те́лу злато́му прему́дрыя де́ти:

Напра́вив к Тебе́ пути́ моя́, Бла́же, и се́рдце мое́ обновле́нием боже́ственнаго Ду́ха, обетша́вшаго (или́ обетша́вшую), назида́й, святы́ни добро́тою украси́в вопию́щаго (или́ вопию́щую) Ти: благослове́н Бог оте́ц на́ших.

За ру́ку десну́ю мою́, я́ко Благ, взем, к жи́тельству Тебе́ благоуго́дному, пра́во ступающа (или́ ступающую) покажи́, и к соверше́нству жития́ восходи́ти, вопию́щаго (или́ вопию́щую) к Тебе́: благослове́н Бог оте́ц на́ших.

Ле́ностно пре́жде препровожда́я мое́ житие́ окая́нный (или́ окая́нная), к Тебе́ Влады́це ны́не прихожду́, на Твою́ наде́явся бла́гость и благоутро́бие Твое́ еди́не, и припа́даю, зовы́й Ти: благослове́н Бог оте́ц на́ших.

Сла́ва: Ядрилом креста́ и ве́тром Честна́го и Боже́ственнаго Ду́ха к приста́нищу наста́ви Твоего́ сла́внаго хоте́ния, и к небе́сному насле́дию, и сподо́би пе́ти Тебе́: благослове́н Бог оте́ц на́ших.

И ны́не, Богоро́дичен: Спа́са Бо́га, и ми́ру Изба́вителя, Всечи́стая, родила́ еси́; Его́же ны́не моли́, благоле́пием доброде́телей, и све́тлостию, и по́стническою благода́тию облещи́ пою́щыя: благослове́нна еси́, Бо́га пло́тию ро́ждшая.

Пе́снь 8. Ирмо́с: Пе́щь иногда́ о́гненная в Вавило́не:

Побе́ду нам на диа́вола, креста́ Твоего́ о́браз дал еси́, в не́мже низлага́ем о́наго ко́зни и лука́вая шата́ния, зову́ще: благослови́те, вся дела́ Госпо́дня, Го́спода.

Дал еси́ нам, е́же мо́щи обнови́ти благода́ть креще́ния, испове́данием, жития́ чистото́ю, слез пролия́нием, и покая́нием преисекренним, Человеколю́бче.

Стра́сти плотски́я уму́ покори́ти, воздержа́нием и по́стничеством, пода́ждь рабо́м Твои́м, о́бразы лучшества, удале́нием го́ршаго и непреста́нным за́поведей Твои́х соблюде́нием.

Сла́ва: Свы́ше нам Твоего́ сыноположе́ния о́браз обнови́ Боже́ственнаго Твоего́ Ду́ха де́йством же и благода́тию; я́ко Еди́н Благопремени́тель, худо́жеством человеколю́бия, и премно́гия Твоея́ бла́гости.

И ны́не, Богоро́дичен: Расто́ргни плени́цы прегреше́ний, и грехо́вное рукописа́ние, к боже́ственному о́бразу приходя́щаго (или́ приходя́щия) ти́хостию, и благогове́нием Пречи́стая, ве́рою правосла́вною утвержде́на (или́ утвержде́ну), соблюда́ющи.

Пе́снь 9. Ирмо́с: Безнача́льна Роди́теля:

Досто́йно зва́нию и свято́му о́бразу пожи́ти, Сло́ве Бо́жий, пода́ждь ми; греха́ моего́ скве́рну и стру́пы прегреше́ний боже́ственною Твое́ю благода́тию очи́стив Многоми́лостиве.

Спа́се, я́ко нарица́емый, спаси́ мя, молю́ся чи́стым се́рдцем к Тебе́ приходя́щаго (или́ приходя́щую), и зло́бы моея́ тяготу́ отъе́мля, я́ко Еди́н щедр, ми́лостивне упоко́й, я́коже обеща́лся еси́, Всеси́льне.

Христо́с мне да́рует, Благ же сый и Милосе́рд, к Нему́ приходя́щым, боже́ственная дарова́ния, приступа́ющым к боже́ственному благогове́йно благода́ти престо́лу, дар бла́гости нетле́нныя подава́я.

Сла́ва: Име́яй сопутствующую Твоему́ хоте́нию си́лу, служи́тели досто́йны нас покажи́ Ева́нгелиа Твоего́, Сло́ве, и я́же к Тебе́ обе́ты испо́лнити, моли́твами святы́х Твои́х, Живода́вче, сподо́би.

И ны́не, Богоро́дичен: Сы́на Твоего́ благоутро́бнаго, Пренепоро́чная, умоли́, ве́рно приходя́щаго (или́ приходя́щую) к боже́ственному о́бразу, по́стническаго доспе́ти, всеблагогове́йно, многомолебнаго конца́; Тебе́ бо Пречи́стую Засту́пницу стяжа́хом.

Стихи́ры, глас 2. Подо́бен: Егда́ от дре́ва Тя:

Ве́рою приходя́щаго (или́ приходя́щую) к Тебе́ Влады́ко, на стезю́ пра́вды Твоея́ поста́вив, наста́ви мя, я́ко Еди́н Благоутро́бен, и лю́те па́дшаго мя (или́ па́дшую мя), и низве́рженнаго (или́ низверженную) мно́жеством согреше́ний мои́х, Спа́се, испра́ви; на Твое́ бо наде́явся поспеше́ние, ко а́нгельскому жи́тельству сему́ прихожду́, Человеколю́бче.

Име́яй исто́чник благи́х, гре́шных не хотя́й Христе́ сме́рти, за неизрече́нную ми́лость; но покая́ние ве́рным дарова́вый, позна́вшым пренепостижное смотре́ние Твое́, приими́ приходя́щаго (или́ приходя́щую) усе́рдно к боже́ственному Твоему́ о́бразу и спаси́ человеколю́бию Твоему́ припа́дающаго (или́ припа́дающую).

Сте́ну прейду́ Тобо́ю греха́ моего́, Спа́се, и изба́влюся; Ты бо возда́л еси́ мой долг, и цено́ю искупи́л мя еси́ плене́ннаго (или́ плене́нную), бла́гости показу́я бога́тство, и благоутро́бия бе́здну источи́ти хотя́й всем пою́щым Тя, Человеколю́бче.

Сла́ва, И ны́не, Богоро́дичен: Всем предста́тельствуеши, Блага́я, прибега́ющым с ве́рою в держа́вный Твой покро́в, ино́го бо не и́мамы гре́шнии к Бо́гу в беда́х и ско́рбех при́сно хода́тайства, сля́чени грехи́ мно́гими, Ма́ти Бо́га Вы́шняго; те́мже Тебе́ припа́даем, изба́ви от вся́каго обстоя́ния рабы́ Твоя́.

На святе́й же Литурги́и, вхо́ду бы́вшу со Ева́нгелием, хотя́й прия́ти святы́й о́браз, отлага́ет главы́ своея́ покро́в, и су́щыя на нога́х каллиги, и сотвори́в покло́ны три, стои́т, по вхо́де же глаго́лет отпусти́тельный тропа́рь дне, та́же антифо́ны глас 4.

Антифо́н 1:

Хоте́х слеза́ми очи́стити мои́х грехо́в, Го́споди рукописа́ние, и про́чее живота́ моего́ покая́нием благоугоди́ти Тебе́, но враг льсти́т мя и бо́рет ду́шу мою́; Го́споди, пре́жде да́же не поги́бну, спаси́ мя.

Кто обурева́емь и притека́я к приста́нищу сему́ не спасе́тся; или́ кто боле́знуя и припа́дая ко врачевству́ сему́ не исцеле́ет; Соде́телю всех и Врачу́ неду́жных, Го́споди, пре́жде да́же не поги́бну, спаси́ мя.

Овча́ е́смь слове́снаго Твоего́ ста́да, и к Тебе́ прибега́ю Па́стырю до́брому: взыщи́ мя заблу́ждшаго, Бо́же, и поми́луй мя.

Сла́ва, И ны́не, Богоро́дичен: От вся́ких бед изба́ви нас, Благослове́нная Богоро́дице, да вси вопие́м Ти: ра́дуйся, Еди́на Засту́пница душ на́ших.

Антифо́н 2:

Во исто́чнице та́йном па́ки рожде́ния сыноположе́ние прии́м и избавле́ние, в ле́ности житие́ и грехопаде́ниих изнури́в, Бла́же, ны́не зову́ Тебе́: слез покая́ния исто́чник ми да́руй, и омы́й скве́рну мои́х согреше́ний, Всеси́льне Спа́се и Многоми́лостиве.

Сла́ва: Бу́ря грехо́вная обдержи́т мя, Спа́се, и ктому́ не терпя́ волне́ния, к Тебе́ припа́даю Еди́ному Прави́телю: я́ко Петро́ви ру́ку ми простри́ человеколю́бия Твоего́ и спаси́ мя.

И ны́не, Богоро́дичен: Изба́ви нас от бед на́ших, Ма́ти Христа́ Бо́га, ро́ждшая всех Творца́, да вси зове́м Ти: ра́дуйся, Еди́на Предста́тельнице душа́м на́шым.

Антифо́н 3:

Где е́сть мирско́е пристра́стие; Где е́сть привре́менных мечта́ние; Не се ли сия́ зрим зе́млю и пе́пел; Что у́бо тружда́емся всу́е; Почто́ не отве́ржемся ми́ра и не после́дуем Зову́щему: хотя́й ити́ в след Мене́, да во́змет крест свой, и живо́т ве́чный насле́дит;

Стих: Прииди́те, ча́да, послу́шайте Мене́, стра́ху Госпо́дню научу́ вы.

Прииди́те вси тружда́ющиися и обремене́ннии, и Аз упоко́ю вы; возми́те и́го Мое́ на себе́, и научи́теся от Мене́, я́ко кро́ток е́смь и смире́н се́рдцем, и обря́щете поко́й душа́м ва́шым.

Стих: Заблуди́х я́ко овча́ поги́бшее.

Овча́ е́смь слове́снаго Твоего́ ста́да, и к Тебе́ прибега́ю Па́стырю До́брому: взыщи́ мя заблу́ждшаго, Бо́же, и поми́луй мя.

Та́же: Прииди́те, поклони́мся и припаде́м, и воспла́чемся пред Го́сподем сотво́ршим нас.

Го́споди, Го́споди, при́зри с Небесе́ и ви́ждь, и посети́ виногра́д сей, и соверши́ его́, его́же насади́ десни́ца Твоя́.

Сла́ва, И ны́не, Богоро́дичен:

Еди́на Чи́стая и Непоро́чная Де́во, ро́ждшая Бо́га без се́мене пло́тию, Того́ моли́ о спасе́нии душ на́ших.

Посе́м: Объя́тия О́тча отве́рсти ми потщи́ся, блу́дно мое́ ижди́х житие́, на бога́тство неиждива́емое взира́яй щедро́т Твои́х Спа́се, ны́не обнища́вшее не пре́зри се́рдце. Тебе́ бо, Го́споди, во умиле́нии зову́: согреши́х, О́тче, на Не́бо и пред Тобо́ю.

Та́же вопроша́ет его́ (или́ ю̀) игу́мен, глаго́ля:

Что прише́л еси́, бра́те (или́ пришла́ еси́, сестре́), припа́дая (или́ припа́дающи) ко свято́му же́ртвеннику, и ко святе́й дружи́не сей;

Отве́т: Жела́я (или́ жела́ющи) жития́ по́стническаго, честны́й о́тче.

Вопро́с: Жела́еши ли сподо́битися а́нгельскому о́бразу, и сочета́тися в лик мона́шествующих;

Отве́т: Ей, честны́й о́тче.

Настоя́тель : Вои́стинну добро́ де́ло и блаже́нно избра́л (или́ избра́ла) еси́, но а́ще и соверши́ши ѐ; до́брая бо дела́ трудо́м стяжаваются, и боле́знию исправля́ются.

Вопро́с: Во́льною ли твое́ю мы́слию приступа́еши ко Го́споду;

Отве́т: Ей, честны́й о́тче.

Вопро́с: Не от не́кия ли ну́жды или́ наси́льства;

Отве́т: Ни, честны́й о́тче.

Вопро́с: Отрица́еши ли ся ми́ра, и я́же в ми́ре, по за́поведи Госпо́дней;

Отве́т: Ей, Бо́гу соде́йствующу, честны́й о́тче.

Вопро́с: Пребу́деши ли в монастыре́ и в по́стничестве, да́же до после́дняго издыха́ния твоего́;

Отве́т: Ей, честны́й о́тче.

Вопро́с: Сохрани́ши ли послуша́ние да́же до сме́рти к предстоя́телю, и ко всему́ о Христе́ бра́тству;

Отве́т: Ей, Бо́гу соде́йствующу, честны́й о́тче.

Вопро́с: Претерпи́ши ли вся́кую ско́рбь и тесноту́ мона́шескаго жития́, Ца́рствия ра́ди Небе́снаго;

Отве́т: Ей, Бо́гу соде́йствующу, честны́й о́тче.

Вопро́с: Сохрани́ши ли себе́ в де́встве и целому́дрии, и благогове́нии;

Отве́т: Ей, Бо́гу соде́йствующу, честны́й о́тче.

И а́бие оглаше́ние:

Ви́ждь, ча́до, какова́я обетова́ния дае́ши Влады́це Христу́: А́нгели бо предстоя́т неви́димо, напису́юще испове́дание твое́ сие́, о не́мже и́маши истя́зан (или́ истязана) бы́ти во второ́е прише́ствие Го́спода на́шего Иису́са Христа́. Сказу́ю у́бо тебе́ всесовершеннейшее житие́, в не́мже по подража́нию Госпо́дне жи́тельство явля́ется, засвиде́тельствуя я́же подоба́ет тебе́ приима́ти и и́хже подоба́ет бе́гати; Отрече́ние у́бо ничто́же и́но е́сть, по ре́кшему, ра́зве креста́ и сме́рти обеща́ние. Ве́ждь у́бо от дне́шняго дне ра́спят (или́ ра́спята) и умерщвле́н (или́ умерщвле́на) бы́ти ми́рови, соверше́ннейшим отрече́нием; отрица́ешися бо роди́телей, бра́тий, жены́, чад, о́тча сро́дства, сдружества друго́в обы́чных, су́щих в ми́ре мяте́жей, попече́ний, стяжа́ний, име́ний, тще́тныя и су́етныя сла́сти же и сла́вы, и отврещи́ся и́маши не то́чию предрече́нных, но и своея́ души́ по глаго́лу Госпо́дню, глаго́лющу: И́же хо́щет по Мне ити́, да отве́ржется себе́, и во́змет крест свой, и да после́дует Мне. А́ще у́бо вои́стинну после́довати Тому́ изво́лил (или́ изво́лила) еси́, и а́ще нело́жно нарещи́ся Того́ учени́к (или́ учени́ца) жела́еши, угото́вися от ны́нешняго вре́мене, не ко осла́бе, ни к безпечалию, ни к пищам, ниже́ ко ино́му чесому́ от су́щих на земли́ кра́сных же и сла́дких, но к по́двигом духо́вным, к воздержа́нию пло́ти, к очище́нию души́, к нищете́ коне́чней, к пла́чу благо́му, ко всем ско́рбным и боле́зненным, радостотво́рнаго по Бо́гу жития́; и́бо алка́ти и́маши, и жажда́ти, и наготствовати, досадитися же и укоритися, уничижитися же и изгна́тися, и ины́ми мно́гими отяготи́тися ско́рбными, и́миже су́щий по Бо́гу живо́т начертава́ется; и егда́ сия́ вся постра́ждеши, ра́дуйся, глаго́лет Госпо́дь, я́ко мзда твоя́ мно́га на Небесе́х е́сть. Ра́достию у́бо ра́дуйся, и весе́лием весели́ся, я́ко дне́сь избра́ тя, и разлучи́ Госпо́дь Бог от мирска́го жития́, и поста́ви тя я́ко пред Лице́м Свои́м, в предстоя́нии мона́шескаго чи́на, в во́инстве ангеловиднаго жития́, в высоте́ небоподражательнаго жи́тельства, Тому́ а́нгельски служи́ти, Тому́ всеце́ло рабо́тати, го́рняя му́дрствовати, го́рних иска́ти, на́ше бо жи́тельство, по апо́столу, на Небесе́х е́сть. От но́ваго зва́ния! От да́ра та́йны! Второ́е креще́ние прие́млеши дне́сь, бра́те, бога́тством Человеколю́бца Бо́га дарова́в, и от грехо́в твои́х очища́ешися, и сын све́та быва́еши, и Сам Христо́с Бог наш сра́дуется со святы́ми Свои́ми а́нгелы о покая́нии твое́м, закала́я тебе́ тельца́ упита́ннаго. Досто́йно про́чее зва́нию ходи́, устрани́ся от су́етных пристра́стий, возненави́ди в до́льная влеку́щую тя по́хоть, все твое́ жела́ние преложи́ к небе́сным, отню́д не возвраща́йся вспя́ть, да не бу́деши столп сла́ный, я́ко жена́ Ло́това, или́ я́коже пес на своя́ блево́тины возвраща́яйся, и испо́лнится на тебе́ сло́во Госпо́дне, глаго́люще, я́ко никто́же, возложи́в ру́ку свою́ на ра́ло, и обра́щся вспя́ть, упра́влен е́сть в Ца́рствии Небе́сном. Не́сть бо тебе́ ма́ла беда́ обещавшемуся ны́не вся предрече́нная храни́ти, пото́мже неради́ти, о обетова́нии, или́ на пе́рвое житие́ возврати́тися, или́ отца́ твоего́ духо́внаго разлучи́тися, и сопостящихся бра́тий, или́ пребыва́ющу неради́во дни твоя́; поне́же тяжча́йшее обря́щеши осужде́ние, па́че пе́рвых на Стра́шном и неумытном суди́щи Христо́ве, ели́ко мно́жайшия благода́ти наслади́шися ны́не; и до́бре ти бе, по рече́нному, не обещатися, не́жели обещатися и не отда́ти. Ниже́ па́ки мни, я́ко в мимоше́дшем вре́мени зде́шняго пребыва́ния дово́льно подвиза́лся еси́ к неви́димым си́лам вра́жиим, но ве́ждь, я́ко наипа́че от ны́не прии́мут тя мно́жайшии по́двизи к бра́ни на него́, ника́коже бо на тя возмо́жет победи́ти огражде́нна тя обрета́яй, к наставля́ющему тя ве́рою кре́пкою, и любо́вию, и ко вся́кому послуша́нию и смире́нию правото́ю. Сего́ ра́ди да оти́дет от Тебе́ вся́кое непослуша́ние, прекосло́вие, горды́ня, рве́ние, ре́вность, за́висть, я́рость, кли́чь, хула́, тайнояде́ние, дерзнове́ние, особное дру́жество, ласка́ние, любопре́ние, ропта́ние, шептание, притяжание особное, окая́нныя ве́щи, и други́я вся зло́бныя ви́ды, и́хже ра́ди прихо́дит гнев Бо́жий на такова́я де́ющих, и вкореня́тися начина́ет в них душа́м тли́тель. Па́че же вме́сто сих стяжи́ подоба́ющая святы́м: братолю́бие, безмо́лвие, кро́тость, благогове́ние, поуче́ние боже́ственных слове́с, чте́ние, соблюде́ние се́рдца от лука́вых по́мыслов, де́лание по си́ле, воздержа́ние, терпе́ние, да́же до сме́рти; на него́же отца́ обетова́ния твоя́ возложи́л еси́, и пе́рвое и после́днее испове́дание, серде́чных та́ин твои́х, я́коже Боже́ственная писа́ния глаго́лют: креща́хуся, глаго́лет, испове́дающе грехи́ своя́.

Сия́ вся та́ко ли испове́даеши о упова́нии си́лы Бо́жия, и в сих обетова́ниих претерпе́ти обещаваешилися да́же до кончи́ны живота́ твоего́, благода́тию Христо́вою;

Отве́т: Ей, Бо́гу соде́йствующу, честны́й о́тче.

Та́же глаго́лет игу́мен моли́тву сию́:

Всеще́дрый у́бо Бог и Многоми́лостивый, пречи́стыя утро́бы неизсле́димыя бла́гости Своея́ отверза́яй вся́кому приходя́щему к Нему́, жела́нием и любо́вию те́плою, реки́й: а́ще бы и жена́ забы́ла изчадие свое́, Аз же не забу́ду тебе́, и твое́ ве́дый жела́ние, и к предложе́нию твоему́ прилага́я я́же от Себе́ си́лу, ко исполне́нию за́поведий Свои́х, да восприи́мет, и объи́мет, и защити́т тя, и бу́дет ти стена́ тве́рда от лица́ вра́жия, ка́мень терпе́ния, утеше́ния вина́, благомо́щия пода́тель, благоду́шия снискатель, му́жества сподви́жник, свозлегая, свостая, услажда́я, и веселя́ се́рдце твое́ утеше́нием Свята́го Своего́ Ду́ха, сподобля́я тя и ча́сти святы́х и преподо́бных оте́ц на́ших, Анто́ниа, Евфи́миа, Са́ввы и и́же с ни́ми, и всех святы́х, с ни́миже и насле́диши Ца́рство Небе́сное во Христе́ Иису́се Го́споде на́шем; Ему́же сла́ва и держа́ва, и Ца́рство и си́ла, со Отце́м и Святы́м Ду́хом, ны́не и при́сно, и во ве́ки веко́в, ами́нь.

Та́же Настоя́тель зна́менует главу́ оглаше́ннаго, три́жды, и по е́же зна́менати глаго́лет: Го́споду помо́лимся.

И обра́щся к восто́ком, глаго́лет моли́тву сию́:

Сый Влады́ко Вседержи́телю, Вы́шний Царю́ Сла́вы, И́же с Живы́м и Ипоста́сным Свои́м Сло́вом, и от Тебе́ исходя́щим Ду́хом И́стины, госпо́дствуяй вся́кою тва́рию ви́димою же и неви́димою; Бо́же, седя́й на херуви́мех и трисвяты́м гла́сом от серафи́мов воспева́емый непреста́нно, Ему́же предстоя́т ты́сящы ты́сящ, и тмы тем святы́х а́нгел и арха́нгел во́инства. Ты еси́ Свет, просвеща́яй вся́каго челове́ка гряду́щаго в мир, умоля́емь от Святы́я Богоро́дицы и Присноде́вы Мари́и, и всея́ Небе́сныя Твоея́ Це́ркве пе́рвенец во Иерусали́ме, при́зри ми́лостивным о́ком на смире́ние раба́ Твоего́ (или́ рабы́ Твое́й), и́мярек, и́же (или́ я́же) возложи́ и испове́да пред мно́гими свиде́тели; совокупи́ дарова́нному ему́ (или́ ей) от прароди́телей да́ру сыноположе́ния, и Ца́рствия Твоего́ святы́м креще́нием; мона́шеское сие́ и ангелови́дное обеща́ние непоклебимое соверше́нное на краесекомем и духо́вном ка́мени, е́же в Тя ве́ры; укрепи́ его́ (или́ ю̀) в держа́ве си́лы Твоея́, и облецы́ его́ (или́ ю̀) во всеору́жие Свята́го Твоего́ Ду́ха, я́ко не́сть ему́ (или́ ей) бра́нь к кро́ви и пло́ти; но к нача́лом, ко власте́м, к миродержи́телем тмы ве́ка сего́, к духово́м лука́вства; препоя́ши чре́сла его́ (или́ ея́) си́лою и́стины, и облецы́ его́ (или́ ю̀) в броня́ пра́вды и ра́дования, и обу́й но́зе его́ (или́ ея́) во угото́вание благовествова́ния ми́ра. Умудри́ его́ (или́ ю̀) восприя́ти щит ве́ры, в не́мже возмо́жет вся стре́лы лука́ваго разжже́нныя угаси́ти, и шлем спасе́ния прия́ти, и ме́чь духо́вный, е́же е́сть глаго́л Твой. Заступа́яй неизглаго́ланная се́рдца его́ воздыха́ния, сопричти́ его́ (или́ ю̀) избра́нным Твои́м; да бу́дет Твой сосу́д избра́нный, сын и насле́дник (или́ дще́рь и насле́дница) Ца́рствия Твоего́, сын (или́ дще́рь) све́та и дне, му́дрость, пра́вда, освяще́ние, избавле́ние. Сотвори́ его́ (или́ ю̀) орга́н доброгласен, псалти́рь красе́н Свята́го Ду́ха, я́ко да отсю́ду по преспе́янию совле́кся ве́тхаго челове́ка, тле́ющаго по сластолю́бию преле́стника многообра́знаго зми́я, облече́тся в Но́ваго Ада́ма, по Бо́гу созда́ннаго, в преподо́бии и пра́вде. Утверди́ его́ (или́ ю̀) всегда́ я́звы и крест Иису́сов носи́ти на те́ле свое́м, и́миже ему́ (или́ ей) мир распя́тся, и той (или́ та́я) ми́рови. Вообрази́ в нем (или́ в ней) доброде́тель и́стинную води́ти, а не на угожде́ние челове́ков, или́ на самоуго́дие, в терпе́нии благоче́стие, во благоче́стии же братолю́бие и послуша́ние. Облагодати́ его́ (или́ ю̀) бодрствующа (или́ бодрствующу), де́лающа (или́ де́лающу), спя́ща (Или́ спя́щу), востаю́ща (или́ востаю́щу), во псалме́х и пе́ниих и пе́снех духо́вных, а́нгельски зре́ти Тебе́ чи́стым се́рдцем, и покланя́тися Тебе́ Еди́ному Живо́му и И́стинному Бо́гу, в ра́дость Его́ неизглаго́ланную.

Я́ко Твое́ е́сть Ца́рство и держа́ва и вла́сть, и Тебе́ подоба́ет вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Моли́тва 2. Го́споду помо́лимся. Го́споди поми́луй.

Святы́й Го́споди сил, О́тче Го́спода на́шего Иису́са Христа́, благослови́ раба́ Твоего́ (или́ рабу́ Твое́ю), его́же (или́ ю́же) призва́л еси́ в духо́вный Твой неве́стник; и сподо́би его́ (или́ ю̀) бы́ти Твоего́ преподо́бнаго раба́ (или́ Твою́ преподо́бную рабу́), умудри́ его́ (или́ ю̀), и изли́й на него́ (или́ на ню) от Влады́чняго Твоего́ Ду́ха благода́ть и ра́зум, укрепи́ его́ (или́ ю̀) на неви́димаго врага́ бра́нь, плотска́я воста́ния держа́вною Твое́ю си́лою низложи́. Да́ждь ему́ (или́ ей) благоугожда́ти Тебе́ в хвале́, и славосло́вии непреста́нном, в пе́снех благовре́менных, в моли́твах благоприя́тных; в сове́те пра́ве, в се́рдце смире́нне, в дея́нии жи́зни, и кро́тости и и́стины. И сподо́би его́ (или́ ю̀) благоугожда́ти Тебе́ в кро́тости, в любви́, в соверше́нстве, в ра́зуме, в му́жестве, и приноси́ти Тебе́ пе́сни и славосло́вия и моли́твы в воню́ благоуха́ния. Соверши́ его́ (или́ ея́) житие́ в преподо́бии и пра́вде, да непреста́нно и нескве́рно име́яй к Тебе́ соедине́ние, сподо́бится Небе́снаго Твоего́ Ца́рствия, благода́тию и щедро́тами Единоро́днаго Сы́на Твоего́, с Ни́мже благослове́н еси́, с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

Та́же Настоя́тель просте́р ру́ку к свято́му Ева́нгелию, глаго́лет:

Се Христо́с неви́димо предстои́т, ви́ждь, я́ко никто́же тя принужда́ет приити́ к сему́ о́бразу; ви́ждь, я́ко ты от предложе́ния своего́ хо́щеши а́нгельский сей о́браз.

Отве́т: Ей, честны́й о́тче, от предложе́ния.

И по обеща́нии же, настоя́тель глаго́лет к нему́:

Возми́ ножницы и пода́ждь ми я̀.

Пода́вшему же ему́ ножницы игу́мену, глаго́лет к нему́ па́ки игу́мен:

Се от руки́ Христо́вы прие́млеши я̀: ви́ждь, к Кому́ прихо́диши, Кому́ обещава́ешися, и кого́ отрица́ешися.

И взем же свяще́нник ножницы от руки́ игуменовы, глаго́лет:

Благослове́н Бог, хотя́й всем челове́ком спасти́ся и в позна́ние и́стины приити́; Сый благослове́н во ве́ки веко́в.

Та́же постризает его́ крестови́дно, глаго́ля си́це:

Брат наш (или́ сестра́ на́ша), и́мярек, пострига́ет власы́ главы́ своея́; во и́мя Отца́ и Сы́на и Свята́го Ду́ха; рцем о нем (или́ о ней): Го́споди, поми́луй. Брат наш (или́ сестра́ на́ша), и́мярек, облачи́тся в ри́зу пра́вды и ра́дования, вели́каго и а́нгельскаго о́браза; во и́мя Отца́ и Сы́на и Свята́го Ду́ха; рцем о нем (или́ о ней): Го́споди, поми́луй. Брат наш (или́ сестра́ на́ша), и́мярек, прие́млет мандию вели́каго а́нгельскаго о́браза, во оде́жду нетле́ния и чистоты́; во и́мя Отца́ и Сы́на и Свята́го Ду́ха; рцем о нем (или́ о ней): Го́споди, поми́луй. Брат наш (или́ сестра́ на́ша), и́мярек, облачи́тся в кукуль беззло́бия, в шлем спаси́тельнаго упова́ния; во и́мя Отца́ и Сы́на и Свята́го Ду́ха; рцем о нем (или́ о ней): Го́споди, поми́луй. Брат наш (или́ сестра́ на́ша), и́мярек, прие́млет аналав, во и́мя Отца́ и Сы́на и Свята́го Ду́ха, восприе́мляй крест свой на ра́мех, и после́дуяй Влады́це Христу́. Рцем о нем (или́ о ней): Го́споди, поми́луй. Брат наш (или́ сестра́ на́ша), и́мярек, препоясует чре́сла своя́ си́лой и́стины, во и́мя Отца́ и Сы́на и Свята́го Ду́ха. Рцем о нем (или́ о ней): Го́споди, поми́луй. Брат наш (или́ сестра́ на́ша), и́мярек, обувается в сандалия, во угото́вания благовествова́ния ми́ра, во и́мя Отца́ и Сы́на и Свята́го Ду́ха. Рцем о нем (или́ о ней): Го́споди, поми́луй. Брат наш (или́ сестра́ на́ша), и́мярек, прия́т вели́кий а́нгельский о́браз, во и́мя Отца́ и Сы́на и Свята́го Ду́ха. Рцем о нем (или́ о ней): Го́споди, поми́луй.

Облачающужеся ему́, пою́тся тропари́ си́и, глас 4:

Облецы́теся в ри́зу спасе́ния, препоя́шитеся по́ясом целому́дрия, приими́те зна́мение креста́, но́ги у́мныя вооружите воздержа́ния ору́жии, и обря́щете поко́й душа́м ва́шым.

Да возра́дуется душа́ моя́ о Го́споде, облече́ бо мя в ри́зу спасе́ния и оде́ждею весе́лия оде́я мя, я́ко на жениха́ возложи́ на мя вене́ц, и я́ко неве́сту украси́ мя красото́ю. Го́споду помо́лимся. Го́споди, поми́луй.

Моли́твы же, я́же глаго́лет свяще́нник, су́ть сия́:

Го́споди Бо́же наш, ве́рный во обетова́ниих Твои́х, и нераска́янный в дарова́ниих Твои́х, и неизрече́нный в человеколю́бии Твое́м, призва́вый созда́ние Твое́ зва́нием святы́м, и приведы́й раба́ Твоего́ (или́ рабу́ Твою́), и́мярек, в духо́вное Твое́ житие́, да́ждь ему́ (или́ ей) живо́т благообра́зный, жи́тельство доброде́тельное и незазо́рное, я́ко да во освяще́нии жи́тельствовав (или́ жи́тельствовавши), нескве́рнен соблюде́т в о́ньже си́лою Твое́ю обле́кся (или́ облекла́ся) о́браз, и у́бо ри́зою в пра́вду одева́яся, по́ясом же умерщвле́ние те́ла, и целому́дрие в себе́ обнося́; кукуль же шлем спасе́ния возложи́в (или́ возложи́вши), аналавом же кресто́м и ве́рою украшаем (или́ украша́ема), одея́нием в ри́зу нетле́ния вооружаем (или́ вооружаема), сандалиями же да наступит на пу́ть ми́ра и спасе́ния, я́ко да бу́дет стра́шный (или́ стра́шная) сопроти́вным, не е́млем (или́ е́млема) ра́тными, вся́кия сла́сти и сра́мныя по́хоти чужд (или́ чу́жда), послуша́нием наказу́емь (или́ наказуема), воздержа́ние проходя́ (или́ проходя́щи), по́стничества содержа́ (или́ содержа́щи) пра́вило, да во псалме́х и пе́ниих и пе́снех духо́вных хва́лит пречестно́е и великоле́пое и́мя Твое́, стопа́м после́дуя (или́ после́дующи) вели́каго проро́ка Илии́ и свята́го Проро́ка, Предте́чи и Крести́теля Иоа́нна; я́ко да дости́г (или́ дости́гши) ме́ру соверше́нства, тече́ние сконча́ет, ве́ру соблюде́т, и облече́тся нетле́нием а́нгельским, и сопричте́тся свято́му Твоему́ ста́ду, и полу́чит десна́го Твоего́ предстоя́ния, и услы́шит блаже́нный глас: прииди́те, благослове́ннии Отца́ Моего́, насле́дуйте угото́ванное вам Ца́рство от сложе́ния ми́ра, его́же и нас насле́дники сподо́би бы́ти Бо́же, Твое́ю благода́тию.

Я́ко Бог ми́лости, щедро́т и человеколю́бия еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Бра́тия глаго́лют: Ами́нь. Настоя́тель : Мир всем. Диа́кон: Главы́ ва́ша Го́сподеви приклони́те.

Го́споди Бо́же наш, введи́ раба́ Твоего́ (или́ рабу́ Твою́), и́мярек, в духо́вный Твой двор и сопричти́ его́ (или́ ю̀) слове́сному Твоему́ ста́ду, очи́сти его́ (или́ ея́) мудрова́ние от плотски́х похоте́й, и тще́тныя пре́лести жития́ сего́, и да́ждь ему́ (или́ ей) непреста́нно помина́ти предлежа́щих благ, лю́бящым Тя и распе́ншым себе́ житию́ сему́ Ца́рствия ра́ди Твоего́. Ты бо еси́ Па́стырь и посети́тель душ на́ших, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, аминь.

А́ще же не соверша́ется Боже́ственная литурги́я, глаго́лются от диа́кона диа́конства сия́, и чте́тся Апо́стол, и Ева́нгелие.

Ми́ром Го́споду помо́лимся. О свы́шнем ми́ре и спасе́нии душ: О ми́ре всего́ ми́ра, благостоя́нии: О святе́м хра́ме сем, и с ве́рою: О Святе́йшем Прави́тельствующем Сино́де (и о митрополи́те на́шем, и́мярек, а́ще е́сть о́бласть его́), честне́м: О бра́те на́шем, и́мярек, и е́же от Бо́га покро́ва и по́мощи его́, Го́споду помо́лимся. О е́же непоро́чно, неосужде́нно и непреткнове́нно соверши́ти ему́ наме́рение мона́шескаго о́браза, Го́споду помо́лимся. О е́же просвети́тися души́ его́ в воздержа́нии и по́стничестве, Го́споду помо́лимся. О е́же измени́тися ему́ от вся́кия мирски́я по́хоти, и е́же по пло́ти сро́дников пристра́стия, Го́споду помо́лимся. О оставле́нии грехо́в и проще́нии согреше́ний его́, и е́же бы́ти ему́ вы́шше всех мирски́х мудрова́ний, Го́споду помо́лимся. О е́же пребы́ти ему́ во вся́ком благоче́стии, и благогове́нии, и чистоте́, Го́споду помо́лимся. О е́же отложи́ти ему́ ве́тхаго челове́ка, и облещи́ся в но́ваго по Бо́гу созда́ннаго, Го́споду помо́лимся. О е́же изба́витися ему́ и нам от вся́кия ско́рби, гне́ва и ну́жды, Го́споду помо́лимся. Заступи́, спаси́, поми́луй и сохрани́ нас Бо́же Твое́ю благода́тию.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и другъдру́га, и ве́сь живо́т наш Христу́ Бо́гу предади́м.

Настоя́тель же возглаша́ет:

Я́ко свят еси́, Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Та́же: Ели́цы во Христа́ крести́стеся, во Христа́ облеко́стеся, аллилу́иа.

Та́же проки́мен, глас 3:

Госпо́дь просвеще́ние мое́ и Спаси́тель мой, кого́ убою́ся;

Стих: Госпо́дь Защи́титель живота́ моего́, от кого́ устрашу́ся;

Апо́стол ко Ефесеом: Зача́ло 233:

Бра́тие, возмога́йте о Го́споде и в держа́ве кре́пости Его́. Облецы́теся во вся ору́жия Бо́жия, я́ко возмощи́ вам ста́ти проти́ву ко́знем диа́вольским. Я́ко не́сть на́ша бра́нь к кро́ви и пло́ти, но к нача́лом и ко власте́м и к миродержи́телем тмы ве́ка сего́, к духово́м зло́бы поднебе́сным. Сего́ ра́ди приими́те вся ору́жия Бо́жия, да возмо́жете проти́витися в де́нь лют и вся соде́явше ста́ти. Ста́ните у́бо препоя́сани чре́сла ва́ша и́стиною, и обо́лкшеся в броня́ пра́вды, и обу́вше но́зе во угото́вание благовествова́ния ми́ра; Над все́ми же восприи́мше щит ве́ры, в не́мже возмо́жете вся стре́лы лука́ваго разжже́нныя угаси́ти; И шлем спасе́ния восприими́те, и ме́чь духо́вный, и́же е́сть глаго́л Бо́жий.

Аллилу́иа, три́жды. Стих: Сей ни́щий воззва́, и Госпо́дь услы́ша и, и от всех скорбе́й его́ спа́се его́.

Диа́кон: Прему́дрость, про́сти , услы́шим свята́го Ева́нгелиа. Настоя́тель: Мир всем. Бра́тия: И ду́хови твоему́. Настоя́тель: От Матфе́а свята́го Ева́нгелиа чте́ние. Бра́тия: Сла́ва Тебе́, Го́споди. Диа́кон: Во́нмем.

Настоя́тель же чтет Ева́нгелие от Матфе́а зачала́ 39 и 43.

Рече́ Госпо́дь: и́же лю́бит отца́, или́ ма́терь па́че Мене́, не́сть Мене́ досто́ин; и и́же лю́бит сы́на, или́ дще́рь па́че Мене́, не́сть Мене́ досто́ин. И и́же не прии́мет креста́ своего́, и в след Мене́ гряде́т, не́сть Мене́ досто́ин. Прииди́те ко Мне, вси тружда́ющиися и обремене́ннии, и Аз упоко́ю вы. Возми́те и́го Мое́ на себе́ и научи́теся от Мене́, я́ко кро́ток е́смь и смире́н се́рдцем, и обря́щете поко́й душа́м ва́шым. И́го бо Мое́ бла́го, и бре́мя Мое́ легко́ е́сть.

Диа́кон глаго́лет ектению́ сию́:

Поми́луй нас, Бо́же, по вели́цей ми́лости Твое́й, мо́лимтися, услы́ши и поми́луй.

Го́споди, поми́луй, три́жды.

Еще́ мо́лимся о оставле́нии и проще́нии грехо́в раба́ Бо́жия (или́ рабы́ Бо́жией), и́мярек.

Го́споди, поми́луй, три́жды.

Возгла́с: Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Бра́тия: Ами́нь.

И дае́т ему́ крест, глаго́ля: Рече́ Госпо́дь: а́ще кто хо́щет после́довати Мне, да отве́ржется себе́, и да во́змет крест свой, и да после́дует Мне.

Та́же дае́т ему́ свещу́ возжже́нную, глаго́ля:

Рече́ Госпо́дь: та́ко да возсия́ет свет ваш пред челове́ки, я́ко да ви́дят ва́ша до́брая дела́, и просла́вят Отца́ ва́шего, И́же на Небесе́х.

И а́бие целу́ет постригийся крест. Бра́тия же пою́т самогла́сен, глас 1:

Позна́им, бра́тие, та́инства си́лу, от греха́ бо ко оте́ческому до́му восте́кшаго блу́днаго сы́на, Преблаги́й Оте́ц предъусрет лобза́ет; и па́ки Своея́ сла́вы да́рует позна́ние, и та́йное Го́рним соверша́ет весе́лие, закала́я тельца́ упита́ннаго, да и мы досто́йно сожи́тельствуем закла́вшему Человеколю́бному Отцу́, и сла́вному Заколе́нию, Спа́су душ на́ших.

И а́бие быва́ет целова́ние и отпу́ст.

Моли́тва во е́же сня́ти кукуль

Многоми́лостиве Го́споди, дарова́вый рабу́ Твоему́ (или́ ра́бе Твое́й) (и́мярек), с восприя́тием а́нгельскаго о́браза, кукуль, и шлем спаси́тельнаго упова́ния, неоте́млему у́бо от главы́ его́ (или́ ея́) такову́ю благода́ть Твою́ соблюди́, содержа́я и согрева́я мы́сли его́ (или́ ея́), влады́чественное, от проти́вных прило́гов неподви́жимо; я́ко да вселука́ваго зми́я, е́же блюсти́ пя́ту его́ (или́ ея́), попу́щеннаго, попира́я главу́, к Тебе́, стра́шней и Еди́ной Главе́ всех, у́мныя о́чи свои́ возведе́т. Я́ко Ты еси́ просвеще́ние и освяще́ние душ на́ших, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Настоя́тель : Мир всем. Бра́тия: И ду́хови твоему́. Диа́кон: Главы́ ва́ша Го́сподеви приклони́те. Бра́тия: Тебе́, Го́споди.

Настоя́тель же чтет сию́ моли́тву над приклоншим главу́:

О́гненной Главе́, свою́ главу́ Тебе́ неви́димому и Еди́ному Прему́дрому Бо́гу подклонивша (или́ подклонившую), Влады́ко, благослови́, освяти́, от вся́каго вре́днаго искуше́ния, ви́димаго же и неви́димаго.

Возгла́с: Я́ко Твое́ е́сть Ца́рство, и вла́сть, и си́ла, и Тебе́ подоба́ет вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

И по обы́чаю отпу́ст.