21-й день

Свята́го священному́ченика Ианнуа́рия и дружи́ны его́ и свята́го священному́ченика Фео́дора, и́же в Перги́и

Священномученик Ианнуарий епископ, мученики Прокул, Соссий и Фавст диаконы, Дисидерий чтец, Евтихий и Акутион

Святые мученики Феодор, мать его Филиппия, Диоскор, Сократ и Дионисий

На Го́споди, воззва́х: стихи́ры Ианнуа́рия, глас 4.

Подо́бен: Я́ко до́бля:

Свяще́нник свяще́ннейший,/ страда́лец зако́нен,/ о Ианнуа́рие, ты был еси́,/ не чужди́ми кровьми́,/ но твои́ми па́че/ в са́мое то Не́бо вшед,/ иде́же Предте́ча всех е́сть Иису́с,/ при́сно Сего́, о́тче, зря и ви́дя,/ Его́же А́нгели ви́дят.

И мече́м усека́емь,/ и на о́гнь помета́емь,/ и звере́м дае́мь, досточу́дне,/ и в темни́це затворя́емь на дни мно́ги, непрекло́нен умо́м/ си́лою Боже́ственною пребы́л еси́/ и сконча́л еси́ по́двиг, зако́нно пострада́в,/ свяще́нне чудоно́сне,/ Безпло́тных собесе́дниче.

Дисиде́рия, и Проку́ла,/ Со́сса, Фа́вста, Евтихи́я,/ Ианнуа́рия сла́внаго/ и му́драго Акути́она/ согла́сно почти́м,/ я́ко му́дрыя священноде́йственники,/ я́ко венцено́сцы му́ченики,/ я́ко гра́да свята́го гра́жданы,/ моли́твенники же тех, блажа́щих и́стинны су́ща.

И́ны стихи́ры свята́го Фео́дора, глас 4.

Подо́бен: Дал еси́ зна́мение:

Пред непра́ведным суди́щем, великому́чениче Фео́доре, предстоя́,/ обличи́л еси́ и́дольское безбо́жие,/ и бие́н быв непра́ведно,/ простре́н, преблаже́нне, на сковраде́ разжже́нне,/ лю́те пеко́м,/ и полива́емь росо́ю Ду́ха,/ И́же тя тве́рдо укре́пльшаго/ разори́ти свере́пство лю́таго борца́.

Колесни́ца Бо́га на́шего я́вственна был еси́,/ чи́стым се́рдцем твои́м Сего́ носи́ма име́я, блаже́нне,/ колесни́це же привя́зан,/ реши́ши от уз/ и Христо́ве привяза́я любви́/ и́же тя связа́вшия;/ с ни́миже вве́ржен быв в пе́щь,/ не опали́лся еси́, Фео́доре,/ возвелича́я Го́спода с те́ми, досточу́дне.

На Кресте́ Просте́ршему ру́це подо́бяся, блаже́нне,/ распя́тся, Фео́доре,/ пребы́л же еси́, ви́ся на три дни,/ до́ндеже в ру́це Бо́гу пре́дал еси́ ду́шу,/ тече́ние сконча́л еси́ страда́ния,/ му́чеников верх,/ Це́ркве пре́дний сто́лпе,/ ве́рных удобре́ние,/ А́нгелов собесе́дниче.

Сла́ва, и ны́не, Богоро́дичен:

Одожди́ ми, Влады́чице,/ Твоея́ ми́лости бе́здну/ и опа́льшееся зно́ем страсте́й се́рдце мое́,/ я́ко Ми́лостива, напо́й, Отрокови́це,/ и умиле́ния ка́пли точи́ти/ непреста́нно сотвори́, молю́ся,/ и́миже утеше́ния сподо́блюся, Чи́стая,/ е́же получи́ти и́мут/ и́же и́скренно пла́кавшиися.

Крестобогоро́дичен:

Распина́ема Христа́ Человеколю́бца/ ви́дящи, Пречи́стая,/ и ре́бра ископава́ема копие́м,/ пла́чущи, вопия́ше:/ что сие́, Сы́не Мой?/ Что Ти безблагода́тнии лю́дие возда́ша,/ за я́же сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивля́юся, Благоутро́бне,/ Твоему́ во́льному распя́тию.

Кано́н свята́го Ианнуа́рия, глас 4.

Песнь 1

Ирмо́с: Триста́ты кре́пкия,/ рожде́йся от Де́вы,/ безстра́стия во глубине́, души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́ побе́дное воспою́ пе́ние.

Сый с во́инствы невеще́ственных А́нгел,/ и прича́стием све́та незаходи́маго ду́шу свяще́нно просвеща́я,/ просвети́ ми се́рдце,/ светоно́сный твой дне́сь пра́здник восхваля́ющу, блаже́нне.

Во́инство светови́дно, свяще́нный собо́р пострада́ с тобо́ю терпели́вно,/ му́дре священноде́йственне,/ с ни́миже вся́ко разори́л еси́ зми́ево кова́рство,/ претерпе́в многоплете́нныя смы́слом му́ки.

Стопа́м Христа́, вели́каго и пе́рваго Па́стыря, му́дре, после́дуя,/ обагре́нии муче́ния уясни́л еси́ твоего́ святи́тельства оде́жду,/ сего́ ра́ди тя почита́ем ума́ пра́востию.

Богоро́дичен: Блаже́ни су́ть лю́дие, Богоро́дице, сла́вящии Тя, Ма́терь Бо́жию нело́жную,/ и при́сно блажа́щии Тя, Чи́стая,/ я́коже прорекла́ еси́, свяще́нно прорица́ющи,/ егда́ Христа́ вну́трь носи́ла еси́.

Ин кано́н свята́го Фео́дора, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Дар благоприя́тен и Влады́це возлю́блен,/ му́чеником украше́ние яви́лся еси́, Фео́доре,/ сего́ ра́ди тебе́, я́ко дар, приношу́ пе́ние,/ пода́ждь ми твою́ по́мощь.

Красе́н те́лом, удобре́н же Ду́хом сый,/ отлучи́лся еси́ к боре́нием льсти́ваго/ и, сего́ разрази́в, побе́ды вене́ц прия́л еси́.

Глаго́лы преоби́дел еси́ злочести́ваго, Фео́доре,/ себе́ же уго́дника Госпо́дня и́скрення, и во́ина Христа́ Царя́,/ и соверше́нна му́ченика я́ве показа́л еси́.

Богоро́дичен: Всели́ся во чре́во Твое́ естество́м Непристу́пный,/ жи́тели показа́ нас, Пренепоро́чная, рая́ неизрече́нным милосе́рдием,/ от Него́же изгна́ни бы́хом за́вистию змии́ною.

Песнь 3

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Заре́ю Свята́го Ду́ха огражде́н,/ посреде́ пе́щи ликова́л еси́,/ ю́ношам и́же пе́рвее преподо́бным, преблаже́нне, подо́бяся.

Чи́ни свяще́нных сил посреде́ пе́щи/ с тобо́ю, Богому́дре, ликова́ху,/ с ни́миже пое́ши Благоде́теля, пребыва́я неопали́м.

Река́, ме́двена уче́ний медото́чных твои́х, Ианнуа́рие прему́дре,/ вои́стинну язы́к твой бы́сть,/ мы́сли зря́щих тя наслажда́ющи.

Богоро́дичен: Расто́ргни плени́цы, Богоневе́сто, грехо́в мои́х,/ я́же у́зы расто́ргши а́довы рождество́м Твои́м/ и ра́дости вся испо́лньши.

Ин

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Храм быв Ду́ха Боже́ственнаго,/ хра́мы же истука́нныя, му́дре, па́губныя потреби́л еси́/ и словесы́ обличи́л еси́ ме́рзкая приноше́ния беззако́ннующих, Фео́доре.

Я́ростию и гне́вным произволе́нием бия́ше тя беззако́нный судия́,/ зако́ны Бо́га на́шего утвержда́юща, Фео́доре,/ Его́же зря пред собо́ю, непоколеби́м пребы́л еси́.

Положи́лся еси́ усе́рдно на сковраде́ разжже́нне, страда́льче,/ ре́вностию разгара́емь Бо́га Вседержи́теля/ и Того́ распаля́емь Боже́ственною любо́вию, Фео́доре.

Богоро́дичен: Безле́тный естество́м под ле́том из Тебе́ ви́ден бы́сть,/ роди́ся подо́бием пло́ти,/ ле́тняя моя́ прегреше́ния за милосе́рдие неизрече́нное презря́, Всенепоро́чная.

Седа́лен, глас 4.

Подо́бен: Вознесы́йся:

Свяще́ния оде́жду обагри́в крове́й твои́х омоче́нии,/ светле́йшу я́ве показа́л еси́, уго́дниче Христо́в./ Те́мже вшел еси́ во оби́тели ве́чныя,/ источа́я чту́щим тя исцеле́ний пучи́ну/ и моля́ всегда́ Бо́га всем да́ти прегреше́ний проще́ние.

Сла́ва, глас то́йже. Му́ченичен:

Спаси́тельных даро́в тезоимени́таго и насле́дника того́ блаже́нства,/ я́ко подо́бника и му́ченика Христа́ Бо́га, прииди́те, восхва́лим,/ честну́ю его́ па́мять ны́не торжеству́юще и к нему́ вопию́ще:/ великому́чениче, моли́ся, согреше́ний дарова́ти нам оставле́ние.

И ны́не, Богоро́дичен:

По Бо́зе во Твой, Богоро́дице,/ прибега́ю смире́нный покро́в Боже́ственный, припа́дая, молю́ся:/ поми́луй, Пречи́стая, я́ко превзыдо́ша главу́ мою́ греси́,/ и бою́ся, Влады́чице, му́ки, и трепе́щу./ Моле́ние сотвори́, Чи́стая, к Сы́ну Твоему́ от сих изба́вити мя.

Крестобогоро́дичен:

И́же от Безнача́льнаго Отца́ рожде́ннаго напосле́док Тя пло́тию ро́ждшая,/ на Кресте́ ви́сяща, зря́щи, Христе́,/ увы́ Мне, любе́знейший Иису́се,– вопия́ше,–/ ка́ко сла́вимый я́ко Бог от А́нгел,/ от беззако́нных ны́не челове́к, Сы́не, хотя́, распина́ешися?/ Пою́ Тя, Долготерпели́ве.

Песнь 4

Ирмо́с: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы,/ Ты бо еси́, Человеколю́бче,/ кре́пость моя́ и хвале́ние.

Вси Со́сса диа́кона и страда́льца и свяще́ннаго Фа́вста,/ Проку́ла же вели́каго и Дисиде́рия же согла́сно почти́м.

Дрема́нием нече́стия, Проку́ле му́чениче,/ ты ника́коже воздрема́лся еси́,/ бодростьми́ Боже́ственными все успи́л еси́ безбо́жных зломы́слие.

Но́ва я́ко Дании́ла тя, звере́й посреде́ сострада́льцы спаса́ет,/ невре́дна изводи́ма, о Ианнуа́рие,/ Христо́с Бог наш.

Богоро́дичен: Возвели́чим еди́ну Благослове́нную,/ Ея́же ра́ди вельми́ всех благослови́ вои́стинну Всепреблаги́й,/ от Сея́ воплоща́емь.

Ин

Ирмо́с: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Возле́зша на сковраду́, небе́сный А́нгел, предста́в, ороша́ет,/ неопа́льно соблюда́я тя, Фео́доре, ре́чных вод потече́нии,/ и тру́сом, и шу́мом, стра́шными показа́нии.

Тебе́, ве́рно чудоде́йствующу, пре́лести прилежа́й,/ к ве́ре внеза́пу, му́чениче, я́коже ка́мень, валя́ется,/ и к ли́ку му́ченик устроя́ется Диоско́р, огне́м скончава́емь.

Во блюсти́тельнице поло́жься я́ко храни́тель Зижди́теля повеле́нием,/ ю́же от младе́нства име́л еси́ ве́ру, Бо́гу сохрани́л еси́/ и сию́ неблюду́щих я́ко безу́мных гнуша́лся еси́/ соверше́нным ра́зумом, пресла́вне.

Многоболе́зненных мук искуше́ния претерпе́л еси́/ и мно́гих боле́зней, му́чениче, цели́ти сподо́бился еси́,/ неболе́зненных жили́щ насле́дник быв/ и безпеча́льныя вои́стинну жи́зни и наслажде́ния.

Богоро́дичен: Без боле́зни родила́ еси́ Бо́га Безпло́тнаго,/ боле́зни, Отрокови́це, Е́вы прама́тере реша́ща и боле́зни а́довы избавля́юща/ боле́знену иму́щих жи́знь согреша́ющих.

Песнь 5

Ирмо́с: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Кро́вию свяще́нною оде́жду твою́, пребога́те, соверши́л еси́ светле́йшу/ и к Це́ркви Вы́шней я́ко свяще́нник прише́л еси́.

Исте́кши на земли́ многочестне́й кро́ви твое́й,/ был еси́ исцеле́ний река́,/ страсте́й изсуша́я пото́ки.

Непра́веднаго судию́ ослепле́на моли́твою твое́ю просвети́л еси́,/ милосе́рдию Влады́ки всех подо́бяся, пребога́те.

Богоро́дичен: Пое́м Тя, Ея́же ра́ди су́щим во тьме́/ Свет незаходи́мый возсия́, Богоро́дице, всех Влады́ка,/ и любо́вию ублажа́ем.

Ин

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Вельми́ безбо́жную пре́лесть обличи́л еси́,/ те́мже к колесни́це привяза́лся еси́, пребыва́еши же цел,/ ко́нем о́гненным, тя подъе́мшим, пла́менныя колесни́цы, Фео́доре,/ я́коже Илию́ сла́внаго.

Разгне́вався беззако́нный, в пе́щь горя́щую тя вку́пе с Сокра́том и Боже́ственным Диони́сием вве́рже;/ с ни́миже проро́ческую свяще́нную пел еси́ пе́снь,/ доблему́дренне Фео́доре.

Да похва́лится в пе́снех Боже́ственный Диони́сий вку́пе с Сокра́том до́блим,/ посреде́ пе́щи копие́м уя́звени бы́вше;/ му́ченицы бы́ша кре́пцы, Боже́ственным наказа́нием Фео́дора повину́вшеся.

Богоро́дичен: Вои́стинну су́щи и вресноту́, Пренепоро́чная еди́на Богоро́дице,/ облада́ти мне порабо́щшими мя страстьми́ укрепи́,/ я́ко да свобо́дным по́мыслом, ра́дуяся, ублажа́ю Тя, ве́рных спасе́ние.

Песнь 6

Ирмо́с: Приидо́х во глубины́ морски́я,/ и потопи́ла мя е́сть бу́ря мно́гих грехо́в,/ но, я́ко Бог, из глубины́ возведи́ живо́т мой,/ Многоми́лостиве.

Глаго́лы зна́мения ви́дя тя, собо́р беззако́нных, де́юща, священнотаи́нниче,/ ко Творцу́ от души́ прихо́дит, пресла́вно просвеща́емь.

Яви́лся еси́ пре́жде конца́, святи́телю,/ и по Боже́ственней кончи́не, творя́ мно́жество чуде́с,/ дар Свята́го Ду́ха от младе́нства прие́м.

Ны́не свяще́нным согла́сием Фа́вста и Со́сса вси,/ Дисиде́рия с Евти́хием и му́драго Акути́она воспое́м,/ и с Проку́лом Богоно́сным.

Богоро́дичен: Во благодея́ние челове́ком от Твои́х Чи́стых крове́й воплоща́ется Бог Сло́во./ Его́же приле́жно, Богома́ти, моли́/ спасти́ся душа́м на́шим.

Ин

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

А́нгела Боже́ственным прише́ствием о́гнь у́бо пе́щи угаса́ше;/ се́рдце же твое́, преблаже́нне, дерзнове́ния исполня́шеся,/ е́же к Зижди́телю, манове́нием прохлажда́ющееся.

Глаго́лы святы́я я́ко услы́ша тебе́ ро́ждшия мучи́тель,/ му́чениче Фео́доре, сию́ мечу́ предаде́,/ му́ченически боже́ственне тече́ние сконча́вшу.

Вожделе́вши, я́ко ю́ница, Фили́ппа с сы́ном умре́ти,/ с спе́хом прии́де, посреде́ суди́лища самозва́нна,/ му́ченик сла́ву прие́млющи.

Богоро́дичен: Се гора́ свята́я, се мирополо́жница Ду́ха,/ мост, к Бо́гу всех преводя́й, Богоро́дица Де́ва,/ Ю́же ублажа́ем.

Конда́к, глас 3:

Свяще́ния пома́занием и муче́ния кро́вию украси́стеся,/ сла́вне Ианнуа́рие и Фео́доре,/ и сия́ете всю́ду, в Вы́шних лику́юще,/ и нас назира́йте, в храм ваш прише́дшия/ и в нем непреста́нно зову́щия:/ всех нас соблюди́те, моля́ще Человеколю́бца Бо́га.

Песнь 7

Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди, Бо́же оте́ц на́ших.

Отроко́м Боже́ственным уподо́бился еси́ посреде́ пла́мене, о Ианнуа́рие!/ Соше́ствием А́нгела, лику́я о́крест и пе́сньми та́йными Спа́са поя́:/ благослове́н еси́, Го́споди, Бо́же оте́ц на́ших.

Безболе́знен по́мысл твой благода́тию Боже́ственною соблюда́я,/ и пре́жде страда́ния неду́ги исцели́л еси́ вся́кия,/ па́стырь, и му́ченик, и вели́к чудотво́рец познава́емь.

Стоя́л еси́ пред суди́щем, му́чениче, мучи́телей,/ стражда́ терпели́вно, и злочести́выя посрамля́я,/ и прельще́нным всем показу́я и́стину.

Богоро́дичен: Умертви́ моя́ движе́ния, Пречи́стая, плотска́я,/ я́же Живо́т ро́ждшая,/ оживи́, Чи́стая, ду́шу мою́, умерщвле́нную страстьми́ и мно́гими грехи́.

Ин

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся пою́ще:/ препе́тый отце́в Госпо́дь и Бог, благослове́н еси́.

Соблюда́емь росо́ю Ду́ха, я́коже о́троцы трие́,/ неопали́м посреди́ огня́, Богому́дре Фео́доре, с си́ми пел еси́:/ препе́тый оте́ц на́ших Бо́же, благослове́н еси́.

Е́ллинскую пре́лесть обличи́л еси́, му́чениче Фео́доре, сло́вом благода́ти,/ бога́тно истека́ющим от усте́н твои́х, и взыва́л еси́:/ оте́ц на́ших Бо́же, благослове́н еси́.

Уве́да твое́ прозва́ние и страда́ние тебе́ ро́ждшая,/ и пре́жде зача́тия, Фео́доре вели́кий, му́чениче многострада́льне, вопию́щи:/ оте́ц на́ших Бо́же, благослове́н еси́.

Богоро́дичен: Очище́ние ми бу́ди, Всенепоро́чная, к ро́ждшемуся из Тебе́/ отсече́ния лю́тых долго́в хода́тайствующи ми,/ и Ца́рствия Бо́жия Боже́ственный вход,/ и пи́щи наслажде́ние, и све́та прича́стие.

Песнь 8

Ирмо́с: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Да восхва́лится вели́кий Проку́л со Аку́тием, и Евтихи́й,/ и Боже́ственный Дисиде́рий,/ Фавст же и Сосс доблему́дреннии,/ Спа́са сла́внии му́ченицы.

Тя лик страда́лец блаже́нный верхо́вника притяжа́,/ попра́, священнотаи́нниче сла́вне, верх де́монов,/ и безбо́жия вознесе́нную горды́ню потреби́.

Я́коже о́троцы, о́гнь попра́л еси́ и звере́й стремле́ния обузда́л еси́,/ я́коже Дании́л, всеизря́дне, и я́ко Па́вел, во главу́ усе́клся еси́,/ благоче́стно сконча́в тече́ние твое́.

Богоро́дичен: Всели́выйся несказа́нно во чре́во Твое́,/ Себе́ жили́ще показа́ Тя, Пречи́стая Богоневе́сто,/ Ему́же непреста́нно вопие́м:/ вся дела́, благослови́те Госпо́дня Го́спода.

Ин

Ирмо́с: О́троки благочести́выя в пещи́/ Рождество́ Богоро́дичо спасло́ е́сть./ Тогда́ у́бо образу́емое,/ ны́не же де́йствуемое/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

На крест вознесе́н быв,/ три дни сотвори́л еси́, на сем пове́шен быв, Фео́доре,/ стра́сть Влады́ки твоего́, при́сно по́мнимую,/ треми́ часы́ бы́вшую, изобража́я я́ве:/ Го́спода по́йте, дела́, и превозноси́те Его́ во ве́ки.

Положе́н был еси́ на дре́во,/ боле́знены прие́мля я́звы, уязви́л еси́ зми́я борца́,/ вкуше́нием дре́ва сме́рть боле́зненну, Фео́доре, соде́лавша Ада́му и того́ вну́ком./ Те́мже тя чтим во вся ве́ки.

Вопие́т Перги́я твоя́ по́двиги, боле́зни, страда́ние,/ ра́ны, стра́сть блаже́нную, сме́рть честну́ю,/ ея́же ра́ди к безсме́ртней жи́зни, Фео́доре, преше́л еси́:/ благослови́те,– зовы́й,– вся дела́, Го́спода и превозноси́те Его́ во ве́ки.

Богоро́дичен: О, глубина́ неизрече́ннаго та́инства!/ Созда́вый руко́ю дре́вле челове́ка/ зи́ждется, воплоща́емь, во утро́бу Присноде́вы вшед,/ и спаса́ет мя, со стра́хом зову́ща:/ Го́спода по́йте, дела́, и превозноси́те Его́ во ве́ки.

Песнь 9

Ирмо́с: Е́ва у́бо неду́гом преслуша́ния кля́тву всели́ла е́сть:/ Ты же, Де́во Богоро́дице,/ прозябе́нием чревоноше́ния/ ми́рови благослове́ние процвела́ еси́./ Тем Тя вси велича́ем.

Ианнуа́рия честна́я боре́ния, по́двиги и бие́ния,/ е́же до кро́ве, му́жество, боле́зни и ну́ждную сме́рть,/ чуде́с же неизме́рную пучи́ну с весе́лием возвели́чим.

Ви́ден был еси́ на высоте́ честна́го, сла́вне, муче́ния, я́коже незаходи́мое со́лнце;/ я́ко Боже́ственныя зве́зды, му́ченик мно́жество веды́й/ и ны́не просвеща́ет концы́ страда́ний вели́ких све́тлостию.

Па́мять твоя́ светоно́сная возсия́,/ лучи́ Бо́жественного Ду́ха ве́сь мир озаря́ющи,/ омраче́ние зол отгоня́щи,/ в не́йже тя мо́лим, Богодухнове́нне, просвети́ вся, пою́щия тя.

Богоро́дичен: Све́та, и́же в тебе́, сия́нии, ослепле́нную ду́шу мою́ просвети́,/ и руко́ю наста́ви, Отрокови́це, в пути́ спасе́нных ходи́ти,/ и преле́стна отбе́гнути преткнове́ния,/ я́ко да ве́рою ублажа́ю тя.

Ин

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Стопа́м Христо́вым после́дуя, прему́дре,/ пе́рваго му́ченика распя́тие претерпе́л еси́,/ у́зы и я́звы гвозди́нныя прие́м,/ и от земли́ восте́кл еси́ к Небе́сным, венцено́сец по́честь прие́м,/ Ца́рство Бо́жие непрее́мное.

Яви́лся еси́, я́ко зла́то, Фео́доре, светосия́нно,/ посреде́ стоя́ огня́, соше́ствием честна́го А́нгела,/ распала́емь Влады́ки жела́нием, неопалим, пребы́л еси́,/ с ни́мже пе́снь спасе́нную поя́, свяще́нно ра́дуяся.

Ста́нем благоче́стно в дому́ Бо́га на́шего,/ страда́льца Его́ ве́рою блажа́ще, му́жеским умо́м подви́гшагося,/ и вра́жие шата́ние победи́вша,/ и побе́ды свы́ше вене́ц из руки́ Христо́вы прие́мшаго.

Взя́тся ко оби́телем Вы́шним, ра́дуяся, му́чениче Фео́доре,/ дости́гл еси́ Безпло́тных чи́ны,/ с те́лом безпло́тныя де́моны кре́пко побе́ждь,/ и мо́лишися ве́рою о чту́щих тя/ долго́в прия́ти избавле́ние.

Богоро́дичен: Просвети́, Чи́стая, души́ моея́ о́чи, Богороди́тельнице,/ да не пости́гнет мене́ грехо́вная тьма́ тя́жкая,/ ниже́ глубина́ покры́ет мя отча́яния,/ но Сама́ мя спаси́ и упра́ви, Предста́тельнице ве́рных непосты́дная.

Священномученик Ианнуарий был епископом в г. Путеолы (на юге Италии в области Кампания; ныне г. Поццуоли). В то время Италия по разделу Римской империи принадлежала императору-соправителю Максимиану Геркулию (285–305), начавшему гонение на христиан. Наместником области Кампания был Тимофей, слепо выполнявший повеления императора. Когда к Тимофею доставили епископа Ианнуария, он предложил отречься от веры, а, получив твердый отказ, приказал бросить исповедника в раскаленную печь. Подобно тому как в древности три еврейских отрока, святой Ианнуарий остался невредимым в огненной печи, ибо Ангел Господень охладил жар пламени. Тимофей же решил, что это – следствие особого чародейства и велел жестоко пытать мученика. Вся земля под ним покрылась кровью. Рядом стояли два клирика, диакон Фавст (Фауст) и чтец Дисидерий; они не могли удержать слез при виде мучений святого Ианнуария. Узнав, что они христиане, их немедленно связали и вместе со святым Ианнуарием отправили в Путеолы и заключили в темнице. Там уже томились в узах несколько христиан: Прокул и Соссий, диаконы из города Путеолы, и два мирянина, Евтихий и Акутион; все они были осуждены на съедение зверям. На следующий день их вывели на всеобщее обозрение и бросили зверям на растерзание. Но Бог прославил Имя Свое во святых Своих: Он сомкнул звериные пасти (как в ветхозаветные времена, когда святой пророк Даниил был брошен в ров ко львам. – Дан. 6:16), и ни один из зверей не прикоснулся к мученикам. Наместник Тимофей, объясняя это чудо каким-то особым христианским искусством, метался в ярости; внезапно он ослеп и стал звать на помощь. Святитель Ианнуарий отличался добротой и кротостью, он пожалел этого несчастного и помолился о своем враге. Тимофей прозрел телесно, но не душевно. Около пяти тысяч, собравшихся смотреть на казнь мучеников, уверовали во Христа. Наместник же, только что исцеленный от слепоты, не только не воздал хвалы Истинному Богу Иисусу Христу и Его верным служителям, но приказал немедленно казнить их. Священномученик епископ Ианнуарий, диаконы Фавст, Прокул и Соссий, чтец Дисидерий и миряне Евтихий и Акутион были выведены из города и обезглавлены. Тела святых мучеников были взяты христианами в различные города Кампании, каждый город хотел иметь у себя предстателя и ходатая пред Богом. Мощи епископа Ианнуария были перевезены в Неаполь и положены в храме, где они покоятся и в настоящее время. Молитвами святого Ианнуария в Неаполе совершались многочисленные чудеса. Так, при извержении вулкана Везувия в конце XV века, когда городу угрожала опасность, народ в страхе собрался у гроба святого Ианнуария, моля святого о помощи. По молитвам святого Ианнуария извержение Везувия внезапно прекратилось. Известны многие другие чудеса, ниспосланные по молитвам святого.

Святые мученики Феодор, мать его Филиппия, Диоскор, Сократ и Дионисий пострадали в царствование императора Антонина Пия (138–161) в Пергии Памфилийской. Когда для военной службы набирали красивых и здоровых юношей, то вместе с другими к военачальнику Феодоту был приведен и юноша Феодор. Военачальник стал принуждать юношу принести жертву идолам. Мученик не подчинился ни уговорам, ни угрозам, и военачальник приказал положить его на раскаленную сковороду и поливать расплавленной смолой. Тотчас совершилось чудо: началось землетрясение, из трещины в земле хлынул поток воды и погасил огонь. Оставшийся невредимым мученик Феодор воздал хвалу Богу и предложил военачальнику попытаться с помощию идолов повторить такое чудо. Военачальник предложил языческому жрецу Диоскору лечь на раскаленную сковороду, призвав на помощь Зевса. Но святой Диоскор ответил, что он уверовал во Христа и готов бросить идола Зевса в огонь. Тогда военачальник приказал ему взойти на сковороду. Мученик Диоскор припал к ногам святого Феодора и просил помолиться о нем. Затем он взошел на сковороду, громко взывая ко Господу: «Благодарю Тебя, Господи Иисусе Христе, что Ты сопричислил меня к числу рабов Твоих. Приими с миром мою душу»,– и скончался, избавившись от тяжелых мук. Святого Феодора продолжали мучить. Его привязали к диким лошадям, которых стали гнать. Но у городской стены лошади упали и разбились, а мученик Феодор остался невредимым. Два воина, Сократ и Дионисий, увидели, как к святому Феодору сошла с небес огненная колесница, на которую был поднят влачимый мученик. Воины с изумлением воскликнули «Велик Бог христианский!» За это их тут же схватили и на другой день вместе с мучеником Феодором бросили в раскаленную печь. Но Небесная роса охладила печь, и святые остались живы. Наутро военачальник приказал воинам пойти посмотреть кости сгоревших мучеников. Воины вернулись и с удивлением рассказали, что три юноши невредимы, а к мученику Феодору пришла его мать, Филиппия, которая теперь укрепляет мучеников в их подвиге. Военачальник предложил святой Филиппии спасти сына, уговорив его принести жертву идолам. Но святая Филиппия ответила, что еще до рождения сына ей было открыто, что ее сын будет распят за Христа. Услышав это, военачальник приказал распять святого Феодора на кресте, а остальным мученикам отсечь головы. В течение 3-х дней святой мученик Феодор висел на кресте, вознося молитвы Богу, до своего преставления.