В 30-й день
И́же во святы́х оте́ц на́ших Патриа́рхов Константи́ня гра́да Алекса́ндра, Иоа́нна и Па́вла Но́ваго
Свята́го благове́рнаго вели́каго кня́зя Дании́ла Алекса́ндровича, Моско́вскаго чудотво́рца
Преподо́бнаго Алекса́ндра Сви́рскаго
Собо́р святы́х Сербских просвети́телей и учи́телей
И́же во святы́х оте́ц на́ших Патриа́рхов Константи́ня гра́да Алекса́ндра, Иоа́нна и Па́вла Но́ваго
ВЕ́ЧЕР
На Го́споди, воззва́х: стихи́ры Предте́чи 3 и святы́х 3.
Стихи́ры Предте́чи, глас 4.
Подо́бен: Зва́нный свы́ше:
И́же Ве́тхаго и Но́ваго Боже́ственный хода́тай,/ проро́к и Предте́ча,/ А́нгел во пло́ти, беззако́ния обличи́тель,/ непло́дныя прозябе́ние утро́бы,/ уста́ огнедохнове́нная,/ И́рода обличи́л еси́, беззако́нная де́юща./ И́же не терпя́ обличе́ния,/ отсещи́ главу́ твою́ повелева́ет,/ и принесе́ся, я́коже сне́дь воздержа́ния,/ Боже́ственное наслажде́ние на блю́де,/ мно́жае облича́я прелюбы́ де́ющаго.
От беззако́нныя ма́тере нава́ждена,/ дщи беззако́нная/ твою́ пресла́вную и А́нгелом гове́йную про́сит главу́,/ обличе́ния бо сея́ не терпя́ше./ Те́мже на блю́де сию́ прине́сши/ и нога́ми вку́пе игра́ющи,/ яду́щих весе́лие в плач обрати́,/ но мно́жае облича́еши блу́дную ме́рзость, блаже́нне./ Христа́ моли́ спасти́ся душа́м на́шим.
Объюро́ден пия́нством, И́род/ любодея́нием украда́ется,/ пляса́нными гла́сы,/ и к кля́тве непра́ведней содева́ет уби́йство твое́,/ пра́ведна проро́ка, сла́вне./ Но твоя́ сме́рть пре́жде уме́ршим/ я́ве безсме́ртие возвести́,/ и́бо бы́сть и су́щим во а́де пропове́дник и предве́стник,/ прише́ствие спаси́тельное провозвеща́я/ Христа́ Бо́га на́шего./ Его́же моли́ спасти́ и просвети́ти ду́ши на́ша.
И́ны стихи́ры святы́х, глас 1.
Подо́бен: Всехва́льнии му́ченицы:
Всеблаже́нне Алекса́ндре,/ па́стырь Це́ркве был еси́,/ Правосла́вия побо́рник,/ А́риеву е́ресь низложи́в му́дре,/ моли́твами твои́ми, прему́дре,/ и сего́ ду́шу отме́тнути зле помоли́лся еси́/ в ме́рзких ме́стех, сла́вне./ сего́ ра́ди согла́сно тя почита́ем.
Иоа́нне че́стне,/ пло́ти тле́ние возненави́дел еси́,/ воздержа́нием и ве́рою, бде́нием же и испове́данием,/ А́нгел земны́й обре́лся еси́ и Небе́сный челове́к./ Христа́ моли́ дарова́ти душа́м на́шим/ ве́лию ми́лость.
Па́вла Боже́ственным уче́нием,/ му́дре, вои́стинну повину́лся еси́,/ и я́ко на тре́тие восте́кл еси́ Не́бо, сла́вне,/ доброде́телей на высоту́,/ и услы́шал еси́ глаго́лы неизрече́нны/ и Боже́ственны Ду́ха, Па́вле блаже́нне,/ правосла́вных степе́нь недви́жима./ Спа́са нам моли́твами твои́ми ми́лостива сотвори́.
Сла́ва, глас 6:
Па́ки Ироди́я бе́сится,/ па́ки смуща́ется./ О, пляса́ния льсти́вна и пи́ра с ле́стию!/ Крести́тель усека́шеся,/ и И́род смуща́шеся./ Моли́твами, Го́споди, Твоего́ Предте́чи/ мир пода́ждь душа́м на́шим.
И ны́не, Богоро́дичен или́ Крестобогоро́дичен.
Подо́бен: Тридне́вен:
Ви́дящи Тя распина́ема, Христе́,/ Тебе́ Ро́ждшая вопия́ше:/ что стра́нное е́же ви́жу та́инство, Сы́не Мой?/ Ка́ко на Дре́ве умира́еши,/ пло́тию пове́шен, жи́зни Пода́телю?
На стихо́вне стихи́ры Окто́иха.
Сла́ва, глас 4:
Рожде́ние неподо́бно/ и пир безсту́днейший И́род соверши́л е́сть./ Любоде́йством бо же́нским услажда́емь/ и нечести́вым женонеи́стовством подстрека́емь,/ отсече́ главу́ Предте́чеву,/ но не отсече́ язы́ка проро́ческа,/ облича́ющаго безу́мие его́./ Пролия́ кро́вь непови́нну,/ покры́ти хотя́ грех беззако́нен,/ но ни о сем скры гла́са,/ вопию́щаго всем покая́ние./ Он у́бо свеселя́шеся уби́йством,/ мы же спра́зднуем любо́вию/ Крести́теля Иоа́нна Блаже́нное заколе́ние./ Предвари́ бо во а́де,/ жи́знь пропове́дати су́щим во тьме́ и се́ни сме́ртней седя́щим,/ свы́ше восто́к Христа́ Бо́га на́шего,/ еди́наго Многоми́лостиваго.
И ны́не, Богоро́дичен или́ Крестобогоро́дичен.
Подо́бен: Я́ко до́бля:
А́гнца и Па́стыря Тя на Дре́ве я́ко ви́де/ А́гница ро́ждшая, рыда́ше/ и ма́терски Ти веща́ше:/ Сы́не возжеле́нне,/ ка́ко на дре́ве Кре́стнем пове́шен еси́, Долготерпели́ве?/ Ка́ко ру́це и но́зе Твои́, Сло́ве,/ пригвозди́шася от беззако́нных/ и кро́вь Твою́ излия́л еси́, Влады́ко?
Тропа́рь, глас 4:
Па́мять пра́веднаго с похвала́ми,/ тебе́ же довле́ет свиде́тельство Госпо́дне, Предте́че:/ показа́л бо ся еси́ вои́стинну и проро́ков честне́йший,/ я́ко и в струя́х крести́ти сподо́бился еси́ Пропове́даннаго./ Те́мже за и́стину пострада́в, ра́дуяся,/ благовести́л еси́ и су́щим во а́де Бо́га, я́вльшагося пло́тию,/ взе́млющаго грех ми́ра/ и подаю́щаго нам ве́лию ми́лость.
Сла́ва, святы́х, глас то́йже:
Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их/ в ми́ре упра́ви живо́т наш.
НА У́ТРЕНИ
Кано́н Окто́иха еди́н, и Предте́чи на 4, вчера́шний, и святы́х на 4, глас 8.
Пе́снь 1
Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.
Трисве́тлая оте́ц дне́сь возсия́ заря́, всесла́вная па́мять,/ ея́же ве́рно наслади́вшеся, лику́ем.
Разори́л еси́, святи́телю, еретико́в утвержде́ния благочести́вым дерзнове́нием,/ пропове́дав Тро́ицу, Алекса́ндре.
Тро́сть – твой язы́к, богопи́санно соверши́в Ду́ха благода́ть,/ о́тче Иоа́нне, ве́ру уясни́.
Па́вла чу́днаго причасти́вся зва́нию, блаже́нне,/ о́наго яви́лся еси́ о́браз доброде́телей неизме́нен.
Богоро́дичен: Пое́м Го́сподеви,/ из Де́вы благоизво́лившему воплоти́тися без се́мене/ за на́ше спасе́ние и избавле́ние.
Пе́снь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Изря́дно упа́сл еси́ Влады́ки твоего́ ста́до,/ те́мже я́ко святи́теля ве́чно тя сла́вит, Алекса́ндре.
Во́ды спаси́тельныя язы́ком твои́м источи́л еси́,/ благоче́стна уче́ния ста́ду, Иоа́нне блаже́нне.
Па́вле всеблаже́нне, избра́ния Христо́ва был еси́ сосу́д све́тел,/ зва́нием же и житие́м я́ве подо́бие.
Богоро́дичен: Тя вси и́мамы прибе́жище и сте́ну на́шу, христиа́не,/ Тя славосло́вим немо́лчно, Безневе́стная.
Конда́к, святы́х, глас 8:
Христо́вою любо́вию распала́еми, сла́внии,/ и яре́м его́ прие́мшии – Крест Честны́й,/ подража́тели Того́ жития́ яви́стеся/ и Боже́ственныя сла́вы его́ прича́стницы бы́сте,/ Алекса́ндре Богому́дре со Иоа́нном чу́дным и Па́влом сла́вным./ Те́мже, Престо́лу его́ предстоя́ще,/ приле́жно моли́теся за ду́ши на́ша.
И седа́лен Предте́чи.
Сла́ва, святы́х, глас 4.
Подо́бен: Ско́ро предвари́:
Отце́в трисве́тлая свеща́ возсия́,/ ве́рных составле́ния просвеща́ющая при́сно к Боже́ственному позна́нию,/ разоря́ющи безбо́жных нече́стие все,/ уче́нием прему́дрости посрамля́юще вку́пе,/ Алекса́ндр и Иоа́нн, с ни́миже и Па́вел сла́вный.
И ны́не, Богоро́дичен:
Де́во Всенепоро́чная, Я́же пресу́щнаго Бо́га ро́ждшая,/ со Безпло́тными Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.
Крестобогоро́дичен:
Де́во Пренепоро́чная, Ма́ти Христа́ Бо́га,/ ору́жие про́йде Твою́ пресвяту́ю ду́шу,/ егда́ распина́ема ви́дела еси́ во́лею Сы́на и Бо́га Твоего́./ Его́же, Благослове́нная, моля́щи не преста́й/ проще́ние прегреше́ний нам дарова́ти.
Пе́снь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Во смрадне ме́сте отве́ргл еси́ по подо́бию Иу́ды преда́теля Христо́ва/ с язы́чным вку́пе тече́нием, по достоя́нию, о блаже́нне Алекса́ндре.
Я́ко ма́слина плодови́та, в дому́ Бо́жии стоя́,/ ве́рующия вонь приве́л еси́, Иоа́нне, плод зрел.
Смире́ния крыло́ма вра́жия се́ти избе́гл еси́,/ те́мже, преподо́бне, возвыша́емь,/ Небе́сный граждани́н, Па́вле, был еси́.
Богоро́дичен: Де́ву воспое́м, по Рождестве́ Де́ву пребы́вшую,/ я́ко ро́ждшую Христа́ Бо́га, от ле́сти мир изба́вльшаго.
Пе́снь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.
Митрофа́нов престо́л, Алекса́ндре, украша́я,/ и пре́жде престо́ла просия́л еси́ во уче́ниих святи́тельских.
А́ще и во смире́нии, о́тче, пожи́л еси́,/ чу́ден яви́лся еси́ в Нике́и богослове́сными уче́нии.
Слове́с твои́х благода́ть утвержда́ет Це́рковь,/ столп тя, Иоа́нне, Правосла́вия позна́вши.
Богоро́дичен: Де́ву по рождестве́ пое́м Тя, Богоро́дице:/ Ты бо Бо́га Сло́ва пло́тию ми́рови родила́ еси́.
Пе́снь 6
Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.
Му́жески по Христо́ве побора́я Це́ркви,/ прострелил еси́ моли́твенными, о́тче, стрела́ми/ преда́теля Христо́ва А́рия, сла́вне.
Я́ко лоза́ виногра́да жи́зни, Иоа́нне сла́вне,/ мног возраста́л еси́ Влады́це твоему́ плод, всеблаже́нне.
Бежа́ти изво́лил еси́ благоче́стно от Ца́рскаго гра́да,/ ико́ннаго поклоне́ния отмета́ющася беззако́нно, Па́вле всече́стне.
Богоро́дичен: Я́же еди́на сло́вом пло́тию Сло́ва ро́ждши,/ изба́ви, мо́лимся, от се́ти вра́жия ду́ши на́ша.
Конда́к, глас 4.
Подо́бен: Яви́лся еси́ дне́сь:
И́род, Предте́че, беззако́нновав,/ жене́ подаде́ главу́ твою́ честну́ю,/ е́йже покланя́ющеся, весели́мся;/ Ироди́я же пла́чет и рыда́ет,/ и И́род, и пляса́вшая.
И́кос:
Угото́вимся, бра́тие, к Боже́ственному пиру́:/ се бо Предте́чева богоно́сная глава́, я́коже бра́шно чи́сто, в Це́ркви предлага́ется нам,/ я́же кро́ви пролива́ющи, исцеле́ния же па́че испуща́ющи/ и и́же от пия́нства грехо́внаго боля́щия исцеля́ющи лечба́ми по́стными./ Никто́же у́бо пи́щею тле́нною да удержи́тся/ и лиши́тся Предте́чи ны́не Боже́ственныя пи́щи./ Мир у́бо весели́тся, Ироди́я же пла́чет,/ и И́род, и пляса́вшая.
Пе́снь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Таи́нник и́стинно Пребоже́ственныя Тро́ицы яви́лся еси́, пребога́те,/ чи́сто Нетле́нней служи́л еси́, поя́ от се́рдца, Алекса́ндре:/ оте́ц на́ших Бо́же, благослове́н еси́.
Сокро́вище тя уче́ний и исто́чника чуде́с Христо́с показа́,/ источа́юща бога́тство богоразу́мия, Иоа́нне, зову́щим:/ оте́ц на́ших Бо́же, благослове́н еси́.
Равноа́нгельное житие́ Па́влу Боже́ственному и тебе́, тезоимени́тому,/ в широте́ же се́рдца излия́ния прему́дрости и в разуме́ неизглаго́ланнем,/ тя подсо́лнечней всей просла́ви, Богому́дре.
Богоро́дичен: От деви́ческаго чре́ва вопло́щся, яви́лся еси́ на спасе́ние на́ше./ Те́мже, Твою́ Ма́терь ве́дуще Богоро́дицу, благода́рственно зове́м:/ оте́ц на́ших Бо́же, благослове́н еси́.
Пе́снь 8
Ирмо́с: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.
Злочести́ваго моли́твою приле́жною твое́ю А́рия уби́в, Алекса́ндре Богому́дре,/ в ме́рзких ме́стех удави́л еси́, я́коже друга́го Иу́ду,/ подо́бными о́бразы отсту́пльша зле.
Богобо́рец, Христо́ву ри́зу раздра́вый, я́ко преда́тель, ниц просе́деся посреде́./ И ны́не в гее́нне муче́нию подлежи́т,/ я́коже други́й Иу́да, А́рий безу́мный, Алекса́ндре треблаже́нне.
Воздержа́нием, я́ко безпло́тен, яви́лся еси́,/ бде́ньми я́ко премно́го во уче́ниих вы́ну был еси́/ и исто́чник ра́йский бога́т, Иоа́нне, во вся ве́ки.
Богоро́дичен: Стра́шное Твое́ рождество́, Богоро́дице,/ ка́ко воспое́т челове́ческое ликостоя́ние?/ Я́ко Де́ва пребыва́еши и ро́ждши, вои́стинну па́че сло́ва,/ и вы́ше вины́ Твоя́ та́йны, Богороди́тельнице.
Пе́снь 9
Ирмо́с: Тя, Неискусобра́чную Ма́терь Бо́га Вы́шняго,/ Тя, па́че ума́ ро́ждшую сло́вом вои́стинну Бо́га,/ вы́шшую пречи́стых Сил,/ немо́лчными славословле́нии велича́ем.
Зако́нен быв преподо́бен учени́к твой,/ и живоно́сным твои́м словесе́м повину́яся Алекса́ндр,/ святи́тель быв, о Митрофа́не, кро́ток и целому́др,/ ны́не по достоя́нию ублажа́ется.
Таи́нник изве́стен был еси́, о́тче, неизрече́нных, о Богоблаже́нне, Иоа́нне всебога́те,/ и тайнови́дец неизглаго́ланных устро́ился еси́./ Те́мже, о́тче, Тро́ицу Боже́ственную пропове́дал еси́.
Тя, незло́бива и преподо́бна, о́тче, па́стыря, непоро́чна, чи́ста и нескве́рна,/ целому́дренна же и сла́вна, и́стины сло́ва испра́вльша,/ по достоя́нию, Па́вле, почита́ем.
О Богоблаже́нная тро́ице оте́ц чу́дных!/ Ны́не на Небесе́х безсме́ртным обоже́на Божество́м,/ Ему́же на земли́ благоче́стно послужи́сте, моли́ти о ста́де не преста́йте.
Богоро́дичен: Свята́я Всенепоро́чная, сосу́де благово́ния,/ моли́ Христа́, Его́же родила́ еси́,/ во́инству у́бо побе́дная и рабо́тнаго и́га да́ти осла́бу лю́дем Твои́м,/ Тя бо непреста́нно велича́ем.
Свети́лен Предте́чи.
На стихо́вне стихи́ры Окто́иха.
Сла́ва, глас 8:
Предте́че Спа́сов,/ ты царя́ изобличи́л еси́ беззако́ния не де́лати./ Те́мже игра́ние беззако́нныя жены́/ повину́ И́рода отсещи́ твою́ главу́,/ и сего́ ра́ди от восто́к со́лнца да́же до за́пад/ хва́льно и́мя твое́./ Дерзнове́ние име́я ко Го́споду,/ приле́жно моли́ спасти́ся душа́м на́шим.
И ны́не, Богоро́дичен или́ Крестобогоро́дичен.
Подо́бен: О, пресла́внаго чудесе́:
А́гница А́гнца я́ко ви́де,/ на Дре́ве просте́рта во́лею Кре́стнем,/ вопия́ше ма́терски, боле́знующи с пла́чем:/ Сы́не Мой, что стра́нное сие́ виде́ние?/ Всем живо́т дая́й я́ко Госпо́дь,/ ка́ко умерщвля́ешися, Долготерпели́ве,/ земны́м подая́ воскресе́ние?/ Сла́влю Твое́ мно́гое, Бо́же Мой, снизхожде́ние.
Святитель Александр, Иоанн и Павел, Патриархи Константинопольские жили в разное время, но всем им пришлось столкнуться с действием еретиков, искажавших учение Церкви. Святой Александр (325–340) был хорепископом (викарием) при первом Патриархе Константинопольском, святителе Митрофане (315–325), и ввиду старости замещал его на Первом Вселенском Соборе в Никее против ариан (325). Перед смертью святитель Митрофан завещал избрать на Константинопольский престол своего викария. В то время Святейшему Патриарху Александру приходилось бороться с арианами и с язычниками. Однажды в споре с языческим философом святитель сказал ему́: «Именем Господа нашего Иисуса Христа повелеваю тебе замолчать!» – и язычник внезапно сделался немым. Когда же он выразил знаками признание в заблуждении и убеждение в правоте христианского учения, то речь вернулась к нему, и он уверовал во Христа со многими другими философами-язычниками. По молитве святителя Александра был наказан еретик Арий. Он притворно согласился вступить в общение с православными и император, святой Константин Великий, назначил день принятия Ария.
Всю ночь молился святитель Александр, прося Господа не допустить, чтобы еретик вступил в общение с Церковью. Утром, когда Арий торжественно шел в Церковь, окруженный царскими советниками и оруженосцами, на Константиновой площади он был поражен болезнью – чрево его разорвалось и внутренности выпали.
Святейший Патриарх Александр, много потрудившись, скончался 98 лет в 340 году. О нем впоследствии упоминал в похвальном слове к жителям Константинополя святитель Григорий Богослов (Назианзин) (память 25 января).
Слу́жба благода́рственная Бо́гу, в Тро́ице Святе́й сла́вимому, на воспомина́ние заключе́ннаго ми́ра между держа́вою Росси́йскою и коро́ною Све́йскою и пренесе́ние моще́й свята́го благове́рнаго вели́каго кня́зя Алекса́ндра Не́вскаго
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 1.
Подо́бен: Всехва́льнии му́ченицы:
От благочести́ваго ко́рене святопома́занная розга́ произше́д,/ плод принесе́ себе́ преподо́бия и пра́вды,/ преми́рно благоуха́я ве́рно от души́ чту́щия тя,/ о н и́хже со А́нгелы Христу́ моли́ся, блаже́нне,/ дарова́ти мир и ве́лию ми́лость.
Моисе́я и Па́вла ре́вности подража́в,/ изво́лил еси́ па́че страда́ти за лю́ди Бо́жия,/ те́мже и к злочести́вым ва́рваром шед,/ невре́дно возврати́лся еси́,/ тишину́ оте́честву твоему́ принося́./ Ны́не у́бо со святы́ми пребыва́я,/ ми́рное житие́ у Го́спода испроси́ насле́дию твоему́.
Благоче́стием и ве́рою пресве́тло укра́шен,/ я́ко благочести́в скипетроно́сец, и преизря́ден, и преимени́т,/ Пресвяты́я Тро́ицы побо́рник был еси́,/ от нея́же просвети́вся,/ чуде́с свет ми́ру провозсия́л еси́/ и моли́твенник яви́лся еси́ о душа́х на́ших.
Сла́ва, глас 6:
Благове́рне кня́же Алекса́ндре,/ измла́да возлюби́в Христа́,/ богоимени́т венцено́сец был еси́,/ преподо́бием и пра́вдою све́тло укра́шен,/ ми́лостынями же и чистото́ю,/ простра́нное селе́ние был еси́ Ду́ха Свята́го./ Ему́же непреста́нно моли́ся,/ е́же сохрани́тися оте́честву твоему́,/ от пога́ных необори́му бы́ти/ и сыново́м Росси́йским спасти́ся.
И ны́не, пра́здника, глас 1: Ве́лия и пресла́вная, Го́споди, ми́лость Твоя́: (зри день сей ниже).
На стихо́вне стихи́ры, глас 2.
Подо́бен: До́ме Евфра́фов:
Дом Свята́го Ду́ха/ поспеше́нием благода́ти/ Алекса́ндр яви́ся./ Те́мже, ны́не соше́дшеся,/ тому́ воспои́м пе́снь.
Стих: Честна́ пред Го́сподем/ сме́рть преподо́бных его́.
Ра́дуйся, царе́й Росси́йских похвало́/ и во́инов соблюде́ние,/ ва́рваров побежде́ние,/ сиро́т и вдов засту́пниче/ и оте́чества на́шего утвержде́ние.
Стих: Блаже́н муж, боя́йся Го́спода,/ в за́поведех его́ восхо́щет зело́.
Приими́ ны́не пе́ние/ люде́й твои́х, блаже́нне,/ и моля́щимся ти у Христа́ испроси́/ грехо́в избавле́ние,/ да ублажа́ем тя при́сно.
Сла́ва, глас 8:
Богому́дре Алекса́ндре, вели́кий кня́же,/ блаже́н еси́, я́ко блаже́нство насле́дивый,/ его́же ра́ди жития́ сего́ небре́гл еси́,/ неотло́жно того́ взыску́я,/ ни́щия удовли́л еси́,/ сиро́т пита́тель, пле́нных свободи́тель быв,/ тем в нестаре́емую ра́дость вшел еси́ Го́спода твоего́./ Ему́же со А́нгелы предстоя́,/ моли́ ве́рою пою́щим тя/ гобзова́ние щедро́т пода́ти и грехо́в оставле́ние.
И ны́не: пра́здника, глас 7: Прииди́те, возра́дуемся Го́сподеви:
Тропа́рь свята́го Алекса́ндра, глас 4. Сла́ва, и ны́не, тропа́рь благода́рственный, глас 8 (зри день сей ниже).
На ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры благода́рственный на 4, глас 1:
О́тче Преблаги́й, Триипоста́сный Влады́ко,/ Еди́не, во всех чудоде́йствуяй,/ приими́ от нас благода́рственныя сия́ моли́твы,/ я́ко вдовы́ кодра́нт, Твоему́ благоутро́бию приноси́мыя./ Что бо возда́мы Тебе́/ о всеще́дрых собы́вшихся на нас смотре́ниих?/ Твое́ю всеси́льною десни́цею/ пресла́вными увенча́л еси́ нас побе́дами:/ неиску́сных в во́инском правле́нии/ препоя́сал еси́ си́лою на прему́дрыя/ и по толи́ких неча́янных вели́ких побе́дах/ пресла́вным ми́ром огради́л еси́ преде́лы на́ша./ Тебе́ у́бо Еди́ному вся сия́ воспису́юще/ и победи́тельныя пе́сни воспева́юще, зове́м:/ Сла́ва Тебе́, всех благи́х Пода́телю.
Ве́лия и пресла́вная, Го́споди, ми́лость Твоя́/ в ро́де Росси́йстем яви́ся,/ я́ко и́хже предуста́вил, сих и оправда́л еси́/ сообра́зным бы́ти вели́чествию смотре́ний Твои́х./ Иску́сства нико́его иму́ще,/ в бра́нь жесто́кую со всеиску́сными внидо́хом,/ безси́льнии, не испыта́вше на́шея си́лы,/ ору́жие восприя́хом на всеору́жныя,/ но, пособи́вый, Го́споди, кро́ткому Дави́ду,/ Ты и на́ши ру́це научи́л еси́ на ополче́ние./ Те́мже ны́не в ми́ре торжеству́юще, пое́м:/ ве́лий еси́, Го́споди, и чу́дна дела́ Твоя́, Сла́ва Тебе́.
Назира́ху пре́жде окре́стнии наро́ди,/ укло́ньше на Росси́ю очеса́ своя́/ и ея́ си́лы в себе́ разсмотрева́юще,/ со опасе́нием мно́гим разсужда́ху:/ ка́ко свет уче́ния отврати́ти,/ иску́сства во́инскаго и морепла́вания не допусти́ти,/ бра́ни наче́ншияся не протяза́ти?/ Да не с и́ми дви́жемии иску́с уче́ния позна́ют./ Но ны́не уви́деша,/ е́же никогда́же ча́яху ви́дети:/ непоколеби́мое всему́ полжи́ша ро́ди Росси́йстии основа́ние/ на тве́рдем ка́мени наде́жды в Бо́зе,/ Его́же и благодари́м, дарова́вшаго нам сицевы́я Своя́ ми́лости.
Та́же стихи́ры свято́му на 4, глас 6:
По и́мени твоему́ та́ко и житие́ твое́,/ благове́рный кня́же Алекса́ндре:/ му́жеством бо на земли́ и до́брым правле́нием,/ ны́не же на Небеси́ моли́твами помоществу́еши лю́дем твои́м./ Те́мже тя и в тебе́ сла́вимаго/ во святы́х Свои́х Бо́га почита́ем.
Добр строи́тель и до́бль во́ин,/ ски́петром на престо́ле пра́во пра́вя/ и во бра́ни ору́жием защища́я лю́ди твоя́,/ сугу́быя че́сти сподо́бился еси́/ от Вы́шняго Прави́теля и Го́спода Савао́фа.
Бо́льшия любве́ никто́же и́мать от сея́,/ а́ще кто поло́жит ду́шу свою́ за дру́ги своя́;/ сицево́ лю́ди твоя́ возлюби́л еси́,/ на ору́жие вра́жие за ня му́жественно исходя́,/ Бо́гу осеня́ющу над главо́ю твое́ю в де́нь бра́ни.
Моисе́я и Дави́да/ и про́чиих люде́й Бо́жиих вождо́в подража́я,/ му́жественно во бране́х за лю́ди твоя́ подвиза́лся еси́,/ те́мже и на Небеси́ с ни́ми, победи́тель, торжеству́еши,/ моля́ся о во́инствующих ко Го́споду.
Сла́ва, глас то́йже:
Весели́ся, И́жерская земле́/ и вся Росси́йская страно́,/ Варя́жское мо́ре, восплещи́ рука́ми,/ Нево́ реко́, распространи́ своя́ струи́:/ се бо кня́зь твой и влады́ка,/ от и́га све́йскаго тя свободи́вый,/ торжеству́ет во гра́де Бо́жии,/ его́же веселя́т ре́чная устремле́ния.
И ны́не, глас 8:
Ве́лие чу́до бы́сть во Изра́или/ просвеще́нием от Го́спода еди́наго челове́ка, глаго́лаху бо:/ кто когда́ отве́рзе о́чи слепорожде́нну?/ Но ны́не То́йже несравни́тельное чу́до нам соде́ла,/ егда́ не еди́ному, но всему́ наро́ду о́чи к ра́зуму отве́рзе/ и сим уничиже́ние на́ше отъя́т./ Зри́те окре́стныя страны́,/ во еди́но вся согласи́вшияся,/ да возмо́гут во тьме́ пе́рваго неве́жества Росси́ю удержа́ти,/ но са́ми, наме́рение свое́ забы́вше,/ в протяже́ние долговре́менныя бра́ни вступи́ша/ и, е́же все́ми о́бразы отвраща́ху,/ к сему́ са́ми да́ша поощре́ние./ Сицевы́я су́ть судьбы́ Бо́жия:/ сове́ти его́ не су́ть я́ко сове́ти челове́честии,/ возвыша́ет и низверга́ет, и́хже благоволи́т./ Ны́не сбы́шася рече́ния апо́стольская:/ бу́ее Бо́жие прему́дрее челове́к е́сть,/ немощно́е Бо́жие крепча́е челове́к е́сть,/ и́бо немощны́я и уничиже́нныя избра́ Бог,/ да посрами́т кре́пкая,/ и не су́щая, да су́щая упраздни́т,/ я́ко да не похва́лится вся́кая пло́ть пред Бо́гом.
Та́же вход. Проки́мен дне. И чте́ния.
Проро́чества Иса́иина чте́ние (глава́ 66):
Весели́ся, Иерусали́ме,/ и торжеству́йте в нем, вси лю́бящии его́, ра́дуйтеся вку́пе,/ ра́дуйтеся вси, ели́цы пла́касте по нем,/ да, сса́вше, насы́титеся от сосе́ц утеше́ния его́,/ да, сса́вше, насы́титеся от вхо́да сла́вы его́./ Я́ко се глаго́лет Госпо́дь:/ се Аз совращу́ в ня, я́ко реку́ ми́ра,/ и я́ко пото́к, потопля́ющ сла́ву язы́ков./ Де́ти их на ра́му воздви́гнутся и на коле́ну уте́шатся;/ я́коже кого́ ма́ти его́ утеша́ет, та́коже и Аз уте́шу вы,/ и во Иерусали́ме утешите́ся, и у́зрите, и возра́дуется се́рдце ва́ше./ И ко́сти ва́ша, я́ко трава́, прозя́бнут,/ и позна́ется рука́ Госпо́дня чту́щим И́, и воспрети́т непокаря́ющимся./ Та́ко глаго́лет Госпо́дь,/ избавле́й тя, Бог Изра́илев.
Проро́чества Иса́иина чте́ние (главы́ 61 и 62):
Да возра́дуется душа́ моя́ о Го́споде,/ облече́ бо мя в ри́зу спасе́ния/ и оде́ждею весе́лия оде́я мя:/ я́ко жениху́, возложи́ мне вене́ц/ и, я́ко неве́сту, украси́ мя красото́ю./ И я́ко земля́, растя́щая цвет свой,/ и я́ко вертогра́д се́мена своя́ прозяба́ет,/ та́ко возсия́ет Госпо́дь пра́вду и ра́дость пред все́ми язы́ки./ Сио́на ра́ди не умо́лкну и Иерусали́ма ра́ди не попущу́,/ до́ндеже у́бо изы́дет, я́ко свет, пра́вда моя́,/ спасе́ние же мое́, я́ко свеща́, разжже́тся./ И у́зрят язы́цы пра́вду твою́, и вси ца́рие зе́мстии сла́ву твою́,/ и нареку́тся и́менем твои́м но́вым, е́же Госпо́дь имену́ет е́./ И бу́деши вене́ц добро́ты в руце́ Госпо́дни/ и диади́ма ца́рствия в руце́ Бо́га твоего́./ И ктому́ не нарече́шися оста́влен,/ и земля́ твоя́ ктому́ не нарече́тся пуста́./ Тебе́ бо нарече́тся во́ля моя́,/ и земля́ твоя́ вселе́нная,/ я́ко благоволи́т Госпо́дь в тебе́, и земля́ твоя́ насели́тся./ И я́ко живы́й ю́ноша с де́вою, та́ко поживу́т сы́нове твой с тобо́ю./ И бу́дет, и́мже о́бразом возвесели́тся жени́х о неве́сте,/ та́ко возвесели́тся Госпо́дь о тебе́.
Проро́чества Иса́иина чте́ние (глава́ 60):
Свети́ся, свети́ся, Иерусали́ме,/ прии́де бо твой свет и Сла́ва Госпо́дня на тебе́ возсия́./ Я́ко се тьма́ покры́ет зе́млю и мрак на язы́ки,/ на тебе́ бо яви́тся Госпо́дь, и Сла́ва его́ на тебе́ у́зрится./ И по́йдут ца́рие све́том твои́м, и язы́цы све́тлостию восто́ка твоего́./ Возведи́ о́крест о́чи твои́ и ви́ждь со́бранная ча́да твоя́./ Прии́дут вси сы́нове твои́ издале́ча,/ и дще́ри твои́ на ра́мех во́зьмутся./ Тогда́ у́зриши, и возра́дуешися, и убои́шися, и ужа́снешися се́рдцем,/ егда́ преложи́т на тя бога́тство мо́ря, и язы́к, и люде́й./ И прии́дут ти стада́ велблу́д, и покры́ют тя велблу́ды мадиа́мстии и гефа́рстии,/ вси от Савы́ прии́дут, нося́ще тебе́ зла́то и лива́н,/ принесу́т тебе́ и ка́мень че́стен и спасе́ние от Го́спода благовестя́т./ И вся о́вцы кида́рския соберу́тся тебе́,/ и овни́ навео́фстии прии́дут тебе́,/ и вознесу́тся прия́тная на же́ртвенник Мой,/ и дом моли́твы Мое́й просла́вится./ Ки́и су́ть, и́же, я́ко о́блацы, лета́ют,/ и я́ко го́лубие со птенцы́ свои́ми?/ Со Мно́ю е́сть Сио́н,/ Мене́ о́строви ожида́ша и корабли́ фарси́йстии в пе́рвых,/ е́же привести́ ча́да твоя́ издале́ча,/ и сребро́ и зла́то их с ни́ми,/ за и́мя Госпо́дне свято́е и за е́же Свято́му Изра́илеву сла́вну бы́ти./ И сози́ждут сы́нове иноро́дни сте́ны твоя́,/ и ца́рие их предста́нут тебе́,/ за гнев бо Мой порази́х тя и за ми́лость мою́ возлюби́х тя./ И отве́рзутся врата́ твоя́, Иерусали́ме,/ вы́ну де́нь и но́щь, и не затворя́тся,/ е́же ввести́ к тебе́ си́лу язы́ков и цари́ их ведо́мыя./ Язы́цы бо и ца́рие, и́же тебе́ не порабо́тают, поги́бнут,/ и язы́цы запусте́нием запусте́ют./ И Сла́ва Лива́нова к тебе́ прии́дет в кипари́се, и пе́вке, и ке́дре вку́пе,/ просла́вит и ме́сто свято́е Мое́, и ме́сто ног Мои́х просла́влю./ И по́йдут к тебе́, боя́щеся, сы́нове смири́вших тя и прогне́вавших тя,/ и покло́нятся следа́м ног твои́х вси, прогневавший тя,/ и нарече́шися град Госпо́день, Сио́н Свята́го Изра́илева./ За е́же бы́ти тебе́ оста́влену и возненави́дену, и не бе помога́яй тебе́,/ и положу́ тя в ра́дость ве́чную, весе́лие ро́дом родо́в./ И иссе́ши млеко́ язы́ков, и бога́тство царе́й сне́си,/ и разуме́вши, я́ко Аз Госпо́дь, спаса́яй тя/ и избавля́яй тя, Бог Изра́илев.
На лити́и стихи́ры, глас 1:
Го́спода сил, да́вшаго нам кре́пость,/ дне́сь, лю́дие, просла́вим:/ Сей бо Бог наш,/ и не вмени́тся ин к нему́,/ Сей подъя́т нас и не возвели́чи укори́вшия ны./ Бог сый ми́ра, Оте́ц щедро́т,/ благослови́ достоя́ние Свое́ ми́ром./ Сей Ца́рь ца́рствующих,/ Моисе́ем сохрани́вый лю́ди изра́ильтеския/ и ны́не всеси́льною десни́цею изба́вивый от бед Росси́ю,/ Тому́ всегда́ сла́ву и че́сть принесе́м.
Та́же свято́му, глас 4:
Да весели́тся дне́сь но́вый Изра́иль о сотво́ршем его́,/ и сы́нове Росси́йстии да возра́дуются/ о кня́зе свое́м, благове́рном Алекса́ндре Не́вском:/ се бо ца́рскою диади́мою/ венча́ его́ Ца́рь ца́рствующим.
А́ще на́ми и влады́чествуеши,/ благове́рный кня́же Алекса́ндре,/ оба́че раба́ Бо́жия тя имену́ем,/ Его́же, влады́чествуя, нам Го́спода своего́ испове́дал еси́,/ Ему́же послужи́л, от Него́же и услы́шал еси́:/ благи́й ра́бе, до́брый и ве́рный,/ вни́ди в ра́дость Го́спода твоего́.
Прельсти́шася фарисе́е, глаго́люще:/ кто от кня́зь ве́рова в О́нь?/ Се бо благове́рный кня́зь Алекса́ндр Не́вский/ ве́рова во Иису́са распя́таго,/ и благоче́стием угоди́ ему́,/ и восприя́т спасе́ние ве́чное.
Вои́стинну ве́рный и му́дрый строи́тель/ был еси́, Алекса́ндре,/ его́же поста́ви Госпо́дь/ над рабы́ Свои́ми, Росси́йскими наро́ды;/ блаже́н еси́, и́бо, во вре́мя кончи́ны твоея́/ прише́д к тебе́, Госпо́дь/ обре́те тя до́бре творя́ща/ и над всем име́нием на Небеси́ поста́ви тя.
Сла́ва, глас 1:
Возвесели́теся дне́сь, Росси́йстии наро́ди,/ ликовству́йте, Нача́ла и Вла́сти:/ се бо пло́ть от пло́ти/ и вла́сть от вла́сти ва́шея,/ благове́рный кня́зь Алекса́ндр Не́вский,/ лику́ет со А́нгелы на Небеси́/ и всех свои́х сро́дников и власте́й и под вла́стию су́щих/ на духо́вное созыва́ет торжество́,/ о всех мо́лится ко Го́споду.
И ны́не, глас 5:
Ви́дехом, Бо́же, сла́ву Твою́,/ ви́дехом чудеса́ Твоя́, яви́вшаяся в нас:/ ужаса́ется ум воспомяну́ти бе́дствия,/ я́же всеси́льною Твое́ю десни́цею отврати́л еси́./ Не то́чию бо си́льнии отвне́ сопроти́внии,/ торжеству́юще мно́гим свои́м обуче́нием/ и пред прича́стники того́жде иску́сства/ непобеди́мыя себе́ вменя́юще,/ но и вну́трь мно́гая зла́я обыдо́ша нас,/ смяте́ния от всезло́бных мяте́жников,/ мно́гое кровопроли́тие простира́ющих./ Подви́жеся всему́ сопроти́вное се́рдце Авессало́мле,/ не то́кмо дела́ оте́ческая тща́щееся опроверга́ти,/ но и здра́вия его́ и́щущее./ Но не зде преде́л обстоя́щих ны лю́тых:/ возмути́ша проти́вник/ еще́ христоненави́стный язы́к исма́ильтеский./ О, коли́ких злых изба́вил еси́ нас,/ непостижи́мый в де́лех Твои́х Влады́ко!/ Сла́ва у́бо Тебе́ да бу́дет,/ вся прему́дре стро́ящему.
На стихо́вне стихи́ры свято́му, глас 6:
Испове́давшаго И́мя Иису́сово пред челове́ки,/ испове́дует тя Иису́с пред Отце́м Свои́м на Небеси́;/ и мы на земли́ воспева́ем тя,/ благове́рне Алекса́ндре,/ я́ко моля́щагося о душа́х на́ших.
Стих: Честна́ пред Го́сподем/ сме́рть преподо́бных его́.
Се́рдцем ве́ровал еси́ в пра́вду,/ усты́ же пред мучи́телем испове́довал еси́ во спасе́ние;/ у́бо я́ко и́стинный испове́дник и насле́дник,/ моли́ся о спасе́нии душ на́ших.
Стих: Блаже́н муж, боя́йся Го́спода,/ в за́поведех его́ восхо́щет зело́.
Му́чеников подража́тель,/ не убоя́лся еси́ пострада́ти,/ я́ко добр во́ин Иису́с Христо́в,/ изволе́нием быв му́ченик./ Те́мже и с му́ченики венча́лся еси́/ от Подвигополо́жника Иису́са.
Сла́ва, глас 2:
Прииди́те, вси Росси́йстии чи́ни,/ восхвали́те до́браго чинонача́льника:/ вла́сти – му́драго строи́теля,/ во́ини–прехра́браго во́ина,/ Правосла́вия люби́тели – тве́рдаго испове́дника, изволе́нием му́ченика./ Повину́йтеся наста́внику ва́шему, и покаря́йтеся,/ и, ви́девше кончи́ну его́,/ подража́йте ве́ре его́.
И ны́не, глас 7:
Прииди́те, возра́дуемся Го́сподеви,/ дади́м вели́чие Бо́гу на́шему,/ научи́вшему ру́це/ на́ши на ополче́ние/ и пе́рсты на́ша вооружи́вшему на бра́нь,/ венча́вшему же нас всежела́емым ми́ром,/ испо́лнившему во благо́е наме́рение на́ше/ и сим многовре́менное вражды́ средосте́ние разори́вшему,/ и велегла́сно возопие́м к Нему́:/ кто Бог ве́лий, я́ко Бог наш?/ Вои́стинну Еди́н еси́, творя́й чудеса́.
По Ны́не отпуща́еши: тропа́рь благода́рственный, два́жды, и свята́го Алекса́ндра Не́вскаго, еди́ножды.
Тропа́рь благода́рственный, глас 8:
Благослове́н еси́, Христе́ Бо́же наш,/ И́же неве́дущия ны во бра́ни прему́дрыя явле́й,/ дарова́в нам кре́пость и си́лу благода́ти Твоея́,/ избра́вый уде́л по се́рдцу Твоему́,/ Правосла́вную Це́рковь Ру́сскую,/ и укрепи́вый му́жеством подвизающее во́инство;/ ея́же ра́ди си́ми Росси́и мир Твой дарова́вый,/ Человеколю́бче, Сла́ва Тебе́.
Тропа́рь свята́го Алекса́ндра, глас 4:
Позна́й свою́ бра́тию, Росси́йский Ио́сифе,/ не в Еги́пте, но на Небеси́ ца́рствующий,/ благове́рный кня́же Алекса́ндре,/ и приими́ моле́ния их,/ умножа́я жи́та лю́дем плодоно́сием земли́ твоея́,/ гра́ды влады́чествия твоего́ огражда́я моле́нием/ и правосла́вным христиа́ном на сопроти́вныя спобо́рствуя.
Тропа́рь о́бщий святы́м благове́рным князе́м Алекса́ндру Не́вскому и Дании́лу Моско́вскому (зри день сей выше).
НА У́ТРЕНИ
По 1-м стихосло́вии седа́лен свято́му, глас 4.
Подо́бен: Яви́лся еси́:
Да весели́тся дне́сь но́вый Изра́иль о сотво́ршем его́,/ и сы́нове Росси́йстии да возра́дуются о кня́зе свое́м, благове́рном Алекса́ндре Не́вском:/ се бо ца́рскою диади́мою венча́ его́ Ца́рь ца́рствующим.
Сла́ва, и ны́не:
Подо́бен: Удиви́ся Ио́сиф:
Воспо́йте, Росси́йстии наро́ди, воспо́йте пе́снь но́ву ди́вная сотво́ршему Бо́гу на́шему:/ И́же мы́шцею высо́кою возведе́ лю́ди Своя́ в поко́й,/ и по неизрече́нных и жесто́ких бра́нех ми́ром огради́ преде́лы на́ша,/ и проти́вныя си́лы воеди́но совокупи́./ Ему́же дади́м вели́чие, яви́вшему нам бога́тую ми́лость.
По 2-м стихосло́вии седа́лен, глас 4.
Подо́бен: Красоте́ де́вства:
Благода́рно зове́м вси Христо́ву уго́днику, приле́жно моля́щеся:/ разруши́ бра́нь страсте́й на́ших, и отжени́ де́монская мечта́ния, блаже́нне,/ и моли́ Христа́ Бо́га дарова́ти нам ве́лию ми́лость.
Сла́ва, И ны́не, глас и подо́бен то́йже:
Тебе́ подоба́ет пе́снь, Бо́же, в Росси́и,/ Тебе́ да возда́стся моли́тва по всей земли́ благода́рственная,/ И́же наче́н с на́ми и соверши́ де́ло, удивле́ния и благода́рствия досто́йное:/ пред окре́стными наро́ды сла́вою и че́стию венча́л еси́ нас/ и вну́тренния пресла́вно посрами́ мяте́жники,/ да ви́дят и разуме́ют вси, я́ко е́сть Защи́тник наш, по нам побо́рствуяй.
Велича́ние пое́т пе́рвый лик:
Велича́ем Тя,/ Триипоста́сне Влады́ко,/ всеми́лостивно на нас, рабо́в Твои́х, призре́вшаго/ и ми́ром вожделе́нным/ преде́лы на́ша огради́вшаго.
Вторы́й лик, свято́му:
Велича́ем тя,/ благове́рный кня́же Алекса́ндре,/ и чтим святу́ю па́мять твою́,/ ты бо мо́лиши о нас/ Христа́ Бо́га на́шего.
Псало́м избра́нный:
Лик 1: Воскли́кните Го́сподеви, вся земля́, по́йте же И́мени Его́, дади́те сла́ву хвале́ Его́. Лик 2: Услы́шите сия́, вси язы́цы, внуши́те вси живу́щии по вселе́нней. Лик 1: Кро́тцыи насле́дят зе́млю и насладя́тся о мно́жестве ми́ра. Лик 2: Го́споди, возлюби́х благоле́пие до́му Твоего́ и ме́сто селе́ния сла́вы Твоея́. Лик 1: Возсия́ет во днех его́ пра́вда и мно́жество ми́ра, до́ндеже оты́мется луна́. Лик 2: Уста́ пра́веднаго поуча́тся прему́дрости, и язы́к его́ возглаго́лет суд. Лик 1: Госпо́дь кре́пость лю́дем Свои́м даст, Госпо́дь благослови́т лю́ди Своя́ ми́ром. Лик 2: Блаже́ни живу́щии в дому́ Твое́м, во ве́ки веко́в восхва́лят Тя.
По полиеле́и седа́лен, глас 4.
Подо́бен: Удиви́ся Ио́сиф:
Дух Святы́й тя, блаже́нне, наста́ви оте́чество твое́ па́ствити на па́житех спаси́тельных,/ и Христо́с свети́льника тя показа́ я́ве./ сего́ ра́ди лику́й и весели́ся со дерзнове́нием,/ я́ко сугу́быя венцы́ от Венцеда́вца прии́м.
Сла́ва, И ны́не, глас и подо́бен то́йже:
Воспо́йте, Росси́йстии наро́ди: (зри день сей выше).
Степе́нна, 1-й антифо́н 4-го гла́са. Проки́мен, глас 4: Вознесо́х избра́ннаго/ от люде́й Мои́х. Стих: Сего́ ра́ди пома́за Тя, Бо́же, Бог Твой, еле́ем ра́дости па́че прича́стник Твои́х. Вся́кое дыха́ние: Ева́нгелие от Иоа́нна, зача́ло 36.
По 50-м псалме́ стихи́ра, глас 6:
Прииди́те, вси лю́дие,/ хвалу́ принесе́м Блаже́нному,/ вопию́ще си́це:/ ра́дуйся, пресве́тлый сто́лпе,/ просвеща́яй нас чуде́с све́тлостьми;/ ра́дуйся, ро́сный о́блаче,/ пла́мень погаша́яй страсте́й/ и ороша́яй ве́рных мы́сли,/ Боже́ственный Алекса́ндре.
Кано́н, глас 2.
Пе́снь 1
Ирмо́с: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.
Пе́снь по достоя́нию принести́ Тебе́, Влады́ко, недоумева́ем./ Кто бо изрече́т ми́лости Твоя́, я́же яви́л еси́ нам?/ Ты на́ше неве́жество от сокро́вища прему́дрости Твое́й просвети́л еси́,/ Ты и научи́ со стра́хом и любо́вию благода́рственная Тебе́ воспе́ти.
Утвержде́ннии в Бо́зе Вара́к и Дево́ра,/ сопроти́вных во́инство изби́вше, пе́снь но́вую Бо́гу Победи́телю воспе́ша;/ сих, Росси́е, побе́дными украше́нная венца́ми, подража́ющая,/ пе́снь побе́дную Бо́гу воскли́кни,/ прославля́ющи сла́ву и си́лу его́.
Ага́рь иногда́, изнемо́гши от зно́я, возопи́ ко Го́споду,/ е́йже А́нгел исто́чник показа́ во́ды теку́щия,/ да, пию́щи, с ча́дом жи́ва бу́дет./ И Росси́я, изнемо́гши многоле́тным трудо́м, возопи́ ко Го́споду:/ да́ждь ми исто́чник ми́ра, от него́же напою́ ча́да моя́,/ и воспою́ Тя, Го́спода, во ве́ки.
Други́й кано́н свято́му, глас 8.
Пе́снь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Досто́йными похвала́ми воспе́ти пресла́внаго чудотво́рца,/ ум и смысл да́руй ми, Христе́ Бо́же,/ я́ко да воспою́, ра́дуяся, па́мять его́.
Свети́льниче многосве́тлый Росси́йския земли́,/ я́коже второ́е со́лнце, чудесы́ сия́я,/ всех нас помина́й, соверша́ющих па́мять твою́, Алекса́ндре блаже́нне.
Богому́дре Алекса́ндре,/ а́ще тя и напосле́док лет богопросвеще́нная Росси́йская страна́ возрасти́,/ но дре́вних че́сти сподо́бился еси́,/ дарова́ние чуде́с досто́йно прие́м.
Богоро́дичен: Зако́нов кроме́ есте́ственных, Де́во, родила́ еси́ Законода́вца Бо́га, Челове́ка бы́вша./ Того́, я́ко Бла́га, моли́, Всенепоро́чная,/ на́ша беззако́ния презре́ти.
Пе́снь 3
Ирмо́с: Лук сокруши́ся си́льных/ держа́вою Твое́ю, Христе́,/ и си́лою немощству́ющии/ препоя́сашася.
Обнови́ся ны́не, но́вый Изра́илю, благода́тию от всех благ Пода́теля,/ И́же мы́шцею высо́кою проведе́ тя чрез мо́ре долголе́тныя бра́ни/ и введе́ тя в зе́млю благослове́нную ми́ра сего́. Ви́дите, язы́цы, и разуме́йте, я́ко с на́ми Бог,/ И́же в бра́ни бы́сть и побора́ше по нас,/ смири́ ны пре́жде, да пресла́внее возвели́чит./ Сей у́бо Бог наш, о Не́мже в ми́ре и бра́ни, ве́рнии, утвержда́емся.
Возведи́ о́крест о́чи твои́, Росси́е, и ви́ждь,/ се бо распространи́шася преде́лы твоя́,/ приусугу́бишася от за́пада, се́вера и ю́га ча́да твоя́,/ и про́мыслу Вы́шняго по бране́х в ми́ре воспо́й пе́сни твоя́.
Ин
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Свети́льник све́та яви́лся еси́, Алекса́ндре всеблаже́нне,/ неду́гов глубо́кую тьму́ разруша́я всегда́ заре́ю све́тлою чуде́с, прему́дре.
Престо́лу предстои́ши благода́ти,/ со все́ми А́нгелы ра́дуяся дне́сь и ми́ру исцеле́ния раздава́я бога́тство,/ спаси́ всех нас моли́твами твои́ми, блаже́нне.
Благочести́ваго и венцено́снаго Алекса́ндра, соше́дшеся, по достоя́нию восхва́лим,/ я́ко чуде́с пода́теля оби́льнаго/ и Го́споду моля́щася о всех нас.
Богоро́дичен: Я́ко вои́стинну Госпо́дь воцари́ся в Ца́рствие не отпа́дающее/ и облече́ся псало́мски из Тебе́, Богома́ти, в кра́сное благоле́пие, пло́ть святу́ю,/ е́юже сме́рть прия́т и разруши́ ея́ ца́рство.
Конда́к свята́го, глас 4:
Я́коже сро́дницы твои́ Бори́с и Глеб/ яви́шася тебе́ с Небесе́ в по́мощь,/ подвиза́ющемуся на Ве́лгера Све́йскаго и во́ев его́,/ та́ко и ты ны́не,/ блаже́нне Алекса́ндре,/ прииди́ в по́мощь твои́м сро́дником/ и побори́ борющия ны.
И́кос:
И́же дре́вле наве́ты вра́жиими расточе́нныя,/ я́ко оре́л птенцы́ под криле́, собира́ше лю́ди своя́,/ сей и ны́не на духо́вное торжество́ собира́ет нас;/ прииди́те у́бо, возра́дуемся Го́сподеви,/ и просла́вим просла́вльшаго сро́дника на́шего и влады́ку, и возопии́м:/ ра́дуйся, Росси́йская сла́во, ски́петров держа́во,/ во́ев храбросте, ору́жия кре́посте,/ помина́й ста́до твое́, над ни́мже Госпо́дь поста́ви тя,/ и побори́ борю́щия ны.
Седа́лен, глас 8:
Я́ко звезда́ многосве́тлая яви́лся еси́,/ све́тлаго ра́ди жития́ твоего́ сосу́д Свята́го Ду́ха быв./ Сего́ ра́ди по мно́гих ле́тех во гро́бе нетле́нны обрето́шася святы́я твоя́ мо́щи,/ от ни́хже источа́еши ре́ки чуде́с и исцеле́ний ве́рно зову́щим ти:/ ра́дуйся, благове́рный вели́кий кня́же Алекса́ндре.
Сла́ва, И ны́не, глас то́йже:
Тро́ицу славосло́вим, ве́рнии, Единосу́щную,/ призре́ бо на смире́ние на́ше, отъя́т поноше́ние во челове́цех,/ утверди́ ми́лость свою́ на нас, во е́же соблюсти́ нас и невре́дных сохрани́ти./ Те́мже благослови́м Бо́га на́шего.
Пе́снь 4
Ирмо́с: Внегда́ прибли́житися ле́том, позна́ешися,/ положи́л бо еси́ любо́вь тве́рду/ кре́пости Твое́й, Го́споди.
Неизрече́нное и неисповеди́мое смотре́ние испове́дуем, раби́ Твои́, Влады́ко,/ благода́рными си́ми словесы́:/ ничто́же бо бо́лее за бла́гость Твою́ возда́ти мо́жем,/ я́ко от тьмы́ ко све́ту произве́л еси́,/ то́чию ма́лое сие́ приими́ от нас благодаре́ние.
Где ны́не умышле́ния и сове́ти ва́ши, окре́стнии наро́ди,/ от дре́вних веко́в во еди́но согласу́ющиися,/ а́ки предви́дяще и зави́дяще бу́дущему Росси́и благополу́чию,/ позна́ние уче́ний и худо́жеств отвраща́ющии?/ Получи́ ны́не, е́же не хоте́сте,/ и славосло́вит Бо́га, сие́ ей дарова́вшаго.
Вся тва́рь да ра́дуется с на́ми, да пое́т И́мени Го́спода Вы́шняго:/ соде́ла бо чу́до в нас, всяк ум преиму́щее,/ хи́трая преврати́ наме́рения сопроти́вных,/ и, и́миже хотя́ху нас улови́ти, си́ми уловле́ни су́ть сетьми́./ Мы же, изба́вльшеся, всера́достно Его́ велича́ем.
Ин
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Заре́ю Трисо́лнечныя благода́ти сия́я,/ све́тле твой пра́здник творя́щих озари́/ и стра́стнаго омраче́ния де́монскаго изба́ви, Алекса́ндре пресла́вне.
Святи́телие и мона́си, свяще́нницы и прости́и,/ ста́рцы со ю́нотами и ве́сь во́зраст,/ све́тло предыгра́йте и па́мять блаже́ннаго в пе́снех возвели́чите.
К Боже́ственному Све́ту ны́не преста́вился еси́,/ Све́та сын возлю́блен быв,/ в ра́дости и красоте́ с ли́ки а́нгельскими ны́не ра́достно лику́еши.
Богоро́дичен: Име́ю Тя Помо́щницу и не постыжду́ся, Пречи́стая Ма́ти Бо́жия,/ име́ю Тя Предста́тельницу и враг мои́х не убою́ся.
Пе́снь 5
Ирмо́с: Но́щи преше́дшей, прибли́жися де́нь,/ и Свет ми́ру возсия́,/ сего́ ра́ди хва́лят Тя а́нгельстии чи́ни/ и славосло́вят Тя вся́ческая.
Созида́й гра́ды твоя́ но́выя, Росси́е, утвержда́й ми́ром преде́лы твоя́:/ Госпо́дь с тобо́ю, Госпо́дь Помо́щник./ Да́ждь у́бо сла́ву И́мени Его́, пресла́вно ны́не просла́вившаго тя.
Не тужи́ ны́не, Росси́е, дни пре́жния и ле́та преше́дшая скоро́ная помина́ющи,/ егда́ бе́дствии а́ки потрясе́ся,/ от восто́ка, ю́га и се́вера смуща́емая,/ вну́трь же мяте́жными несогла́сии раздира́емая./ Прогна́ Бог о́блак печа́ли твоея́/ и све́том безсме́ртныя сла́вы озари́ тя.
Я́ко взыска́ла еси́, Росси́е, Го́спода Бо́га твоего́ в де́нь ско́рби твоея́,/ сего́ ра́ди яви́ся тебе́ в чу́дных де́лех Свои́х,/ И́же изба́ви тя от кре́пких рук супоста́т твои́х/ и вене́ц ми́ра и благоволе́ния возложи́ на главу́ твою́.
Возвесели́теся с на́ми, вели́цыи кня́зи Росси́йстии,/ ви́девше виногра́д сей, ва́ми насажде́нный,/ ка́ко Бог Вы́шний, Ца́рь Ве́чный, его́ возрасти́/ и опло́том ми́ра ве́чнаго огради́,/ и с на́ми благода́рственная ему́ воспо́йте.
Ин
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.
Я́ко звезда́ све́тла яви́ся непреле́стна,/ плене́нных свободи́тель, и ни́щих богати́тель, и боля́щих врач,/ Це́ркве побо́рник и оте́чества на́шего утвержде́ние.
Яви́ся в Росси́йстей земли́ чудотво́рец пресла́вен, Алекса́ндр Блаже́нный,/ я́ко всесве́тел свети́льник, сия́я во всем ми́ре/ и во мра́це страсте́й озаря́я вся.
Досточу́дная и пресла́вная па́мять твоя́/ возсия́ в Росси́йстей земли́, блаже́нне,/ и ра́достно ве́рных весели́т собо́ры.
Отверзо́шася тебе́ две́ри еде́мския,/ и несказа́нен свет и трисия́нен возсия́, блаже́нне, в неподви́жимем Ца́рствии Небе́снем,/ и пра́ведных весе́лие прия́л еси́, ра́дуяся.
Богоро́дичен: Ме́ртвости и тли изба́вила еси́ челове́чество,/ естество́м бо Жизнода́вца и Бо́га без се́мене родила́ еси́, Де́во Всенепоро́чная,/ на благодея́ние восхваля́ющих Тя ве́рно.
Пе́снь 6
Ирмо́с: Глас глаго́л моле́бных/ от боле́зненныя, Влады́ко, души́ услы́шав,/ от лю́тых мя изба́ви:/ Еди́н бо еси́ на́шего спасе́ния вино́вен.
Блаже́ни вси, упова́ющии на Го́спода, я́ко гора́ Сио́н, не подви́жатся во век:/ Госпо́дь бо прибе́жище им, Госпо́дь спасе́ние,/ в де́нь, во́ньже призову́т, посети́т их.
В де́нь печа́ли сы́ном гони́мый Дави́д возопи́ ко Го́споду, и от бед изба́вил е́сть его́,/ и в Сио́не па́ки, от него́же изгна́н бы́сть, просла́ви Бо́га спаса́ющаго./ Прогна́ сицеву́ю находя́щую ско́рбь от своего́ достоя́ния Всевы́шний Госпо́дь,/ отврати́вый отцегони́тельное кровопроли́тие,/ те́мже и мы ны́не его́ в Росси́йстем Сио́не просла́вим.
Даде́ мир преде́лом твои́м, Росси́е, Госпо́дь,/ да не бу́дет стужа́яй тебе́, меч чу́ждый да не устраша́ет тя:/ Вы́шний бо огради́ кре́пкою руко́ю концы́ земли́ твое́й.
Ин
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
От пречестна́го ко́рене изра́сл еси́ ве́твь, пресла́вне,/ и благоче́стно на земли́ пожи́л еси́,/ и прия́телище чи́сто Ду́ха яви́лся еси́,/ освяща́я ве́рою притека́ющия ти, блаже́нне.
Весе́лия дне́сь испо́лнися вся Росси́йская земля́/ в наро́читый де́нь пра́здника пресла́внаго чудотво́рца, Алекса́ндра блаже́ннаго:/ соблюда́ет бо оте́чество свое́ вы́ну ненаве́тно.
Сиро́т и вдов засту́пника и в беда́х непобори́маго помо́щника,/ пе́сньми Алекса́ндра ублажи́м, сла́вяще:/ пра́зднующих бо па́мять его́ ве́село от бед избавля́ет и скорбе́й.
Богоро́дичен: Су́щи пресвяты́й храм, Богоро́дице,/ Исто́чник родила́ еси́, Всенепоро́чная, неисчерпа́емый, Влады́чице.
Конда́к, глас 8.
Подо́бен: А́ще и во Гроб:
Укрепи́вый Дави́да на Голиа́фа,/ укрепи́л еси́ и во́инство Росси́йское,/ в простоте́ се́рдца служа́щее Ти/ и о и́мени Твое́м подвиза́ющееся,/ благодея́ния Твоя́ прославля́ющее,/ щедро́ты Твоя́ сим дарова́л еси́, Христе́ Бо́же;/ Ты бо наде́жда на́ша, и спасе́ние, и непобеди́мая побе́да.
И́кос:
Сам, Го́споди, созда́л еси́ прему́дрость, и ви́дел еси́, и исче́л ю,/ и изли́л еси́ ю́ на вся дела́ Твоя́ со вся́кою пло́тию по щедро́там Твои́м,/ по дая́нию Твоему́ дарова́л еси́./ Ты, и ве́рныя лю́ди Твоя́ от сокро́вищ Свои́х умудри́вый,/ и́ми Росси́йское во́инство во бра́нех прему́дро наста́вил еси́./ Те́мже ны́не торже́ственными пе́сньми Твою́ прему́дрость воспева́ем/ и благодари́м Тя, премно́гия нам дарова́вшаго побе́ды.
Пе́снь 7
Ирмо́с: Вети́и яви́шася о́троцы любому́дрейшии дре́вле,/ от богоприя́тныя бо ду́ши, богосло́вяще устна́ми, поя́ху:/ Пребоже́ственный отце́в и наш Бо́же,/ благослове́н еси́.
Я́коже амаза́и ре́ша: о Дави́де, мир тебе́ и помо́щником твои́м;/ та́ко и ны́не бра́вшиися с на́ми глаго́лют:/ мир тебе́, держа́во Росси́йская, Бог твой Помо́щник тебе́; Ему́же зове́м:/ Бо́же, благослове́н еси́.
Упоко́й преде́лы на́ша Госпо́дь сил, да́вый мир достоя́нию Своему́;/ входя́щим и исходя́щим на мо́ре, без стра́ха и печа́ли коры́сти своя́ собира́йте,/ Бог бо наш отъя́т ско́рбь ра́тную, Ему́же зове́м:/ Бо́же, благослове́н еси́.
Прииди́те, возвели́чим чу́дная дела́ Бо́жия:/ ка́ко смире́нных нас вознесе́, ка́ко уничиже́нных просла́ви,/ ка́ко победи́тельным венце́м увенча́ и ми́ром огради́,/ и радостотво́рно возопии́м:/ Бо́же оте́ц на́ших, благослове́н еси́.
Ин
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Дне́сь Це́рковь Христо́ва, пра́зднующи Алекса́ндрово торжество́,/ соше́дшимся вои́стинну источа́ет благода́ть,/ приле́жно моля́щимся и любо́вию пою́щим его́.
Во всех страна́х Росси́йских произы́де веща́ние,/ я́ко яви́ся в них чудотво́рец пресла́вен,/ источа́я исцеле́ний мно́жество всем пою́щим те́пле.
Чудесы́ у́бо твои́ми, я́ко цвет, процве́л еси́, блаже́нне,/ и исцеле́ния подава́еши притека́ющим в кров твой, му́дре и досточу́дне.
Богоро́дичен: От де́вственных ложе́сн Твои́х вопло́щся,/ Бог яви́ся на спасе́ние на́ше./ Те́мже Тя Ма́терь ве́дуще, Богоро́дице, правове́рно вопие́м ему́:/ оте́ц на́ших Бо́же, благослове́н еси́.
Пе́снь 8
Ирмо́с: Неизрече́нною му́дростию соста́вльшаго вся́ческая Бо́га Сло́ва/ и от не су́щих во е́же бы́ти приве́дшаго,/ благослови́те, дела́, я́ко Го́спода,/ и превозноси́те во вся ве́ки.
Госпо́дь кре́пость лю́дем Свои́м даде́,/ Госпо́дь научи́ пе́рсты на́ша на бра́нь и ру́це на ополче́ние,/ торже́ственными нас украси́в побе́дами,/ и благословля́ет ны́не лю́ди Своя́ ми́ром./ Его́же благослови́м и превозно́сим во вся ве́ки.
О, непостижи́маго ума́ Твоего́, Влады́ко!/ Не́сть, и́же сопротивоста́нет во́ли Твое́й:/ и́хже бо предуста́вил еси́ просла́вити,/ вся ухищре́ния, на них соплета́емая, отвраща́еши./ Чудоде́йствие Твое́ сие́, на нас собы́вшееся, ви́дим/ и, славосло́вяще, превозно́сим Тя во ве́ки.
Хоте́сте, окре́стнии наро́ди, от нас утаи́ти иску́сство во́инское,/ мно́го о сем труди́стеся, но не возмого́сте,/ Творя́й держа́ву мы́шцею Свое́ю Госпо́дь,/ низлага́яй си́льныя со престо́л и вознося́й смире́нныя,/ откры́ пред на́ми пра́вду свою́, изъяви́ и научи́ ва́ми сокрыва́емая./ Ему́же благода́рственная ны́не прино́сим и просла́вим во вся ве́ки.
Ин
Ирмо́с: Богоглаго́ливии о́троцы, в пещи́/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.
Тебе́ в чудесе́х сла́вна Росси́йским страна́м показа́ Бог, Алекса́ндре,/ и украси́ тя Небе́сными да́ры,/ Того́ моли́ поми́ловати всех нас.
Я́ко у́тро, я́ко де́нь све́тлый твой пра́здник яви́ся,/ просвеща́я на́ша се́рдца и всех с ве́рою восхваля́ющих тя, Алекса́ндре пресла́вне.
Де́нь торжества́ и пра́здник весе́лия наста́,/ стеце́мся, ве́рнии, очи́стивше вку́пе ду́ши и телеса́:/ се бо нас призыва́ет Алекса́ндр Боже́ственный.
Богоро́дичен: О́бразы нося́щи дре́вле Рождества́ Твоего́, Де́во Ма́ти,/ пе́щь у́бо ю́ношей не опали́,/ та́кожде и о́гнь Боже́ственный утро́бы Твое́й, Чи́стая.
Припе́вы на 9-й пе́сни:
Велича́й, душе́ моя́,/ Триипоста́снаго Влады́ку, научи́вшаго, и вразуми́вшаго, и сохраня́ющаго ны во бра́ни.
Велича́й, душе́ моя́,/ Превы́шняго Го́спода сил, даю́щаго кре́пость лю́дем Свои́м.
Удиви́теся с на́ми, окре́стныя страны́, и просла́вите Го́спода,/ смире́нныя сла́вою и че́стию венча́вшаго.
О Влады́ко непостижи́ме, Держа́во, Кре́посте и Си́ло на́ша!/ За вся, я́же сотвори́л еси́ с на́ми, благода́рно воспева́ем Тя.
Пе́снь 9
Ирмо́с: От земноро́дных кто слы́ша таково́е/ или́ кто ви́де когда́, я́ко Де́ва обре́теся, во чре́ве иму́щая/ и безболе́зненно Младе́нца поро́ждшая?/ Таково́е Твое́ чу́до, и Тя, Чи́стая Богоро́дице, велича́ем.
Возведе́м у́мнеи о́чи се́рдца на́шего ко Всеси́льному Бо́гу на́шему/ и принесе́м моли́твы вседу́шныя и моле́ния приле́жная,/ я́ко посети́ нас ми́лостию Свое́ю,/ яви́ нам, смире́нным, вели́кую и бога́тую ми́лость, Его́же велича́ем.
Благоутро́бия неизсле́димая пучи́но, Влады́ко,/ прославля́ем чуде́сная дела́ Твоя́, я́вльшаяся на нас и в ро́де на́шем:/ от ве́ка бо сокрове́нное Твое́ о нас смотре́ние во дни сия́ я́вственно показа́л еси́,/ всеси́льною десни́цею Твое́ю безси́льных нас совоздви́г,/ да благодари́м и велича́ем Тя, Бо́га на́шего.
Славосло́вим Тя, Бо́га, Безнача́льнаго Отца́,/ благоутро́бнаго в щедро́тах Твои́х,/ вся зла́я от нас отврати́вшаго,/ побе́ды и одоле́ния на проти́вящихся нам дарова́вшаго,/ торже́ственными венцы́ украси́вшаго, и во всежела́емый поко́й вве́дшаго,/ и от всех злых нас избавля́ющаго.
Ин
Ирмо́с: Ужасе́ся о сем Не́бо,/ и земли́ удиви́шася концы́,/я ́ко Бог яви́ся челове́ком пло́тски и чре́во Твое́ бы́сть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Твое́ свято́е преставле́ние дне́сь све́тло пра́зднуем,/ испо́лни ра́дости и весе́лия восхваля́ющия тя, Алекса́ндре великоимени́те.
Ве́лий щит и кре́пость в Росси́йстей земли́, Алекса́ндре, обре́лся еси́,/ правосла́вным же лю́дем на́шим похвале́ние,/ и ны́не мо́лимся ти:/ сохраня́й оте́чество твое́ от язы́ка чужда́го.
Незаходи́маго све́та луча́ми во тьме́ су́щим сия́я, сла́вне,/ к просвеще́нию весе́лия наста́ви ны, пою́щия тя.
Блаже́нне Алекса́ндре, ка́ко тя возмо́жем воспе́ти досто́йно?/ Не мо́жет бо язы́к изглаго́лати твоя́ разли́чная исцеле́ния, и мно́гая дарова́ния, и чудеса́,/ я́же подава́еши насле́дию твоему́.
Богоро́дичен: Я́ко у́тро, те́мным и блудя́щим, Де́во,/ возсия́ Пра́вды Со́лнце, Христо́с,/ Его́же на рука́х Твои́х носи́ла еси́, Чи́стая.
Свети́лен.
Подо́бен: Жены́, услы́шите:
Слы́шана бы́сть в све́йских страна́х превели́кая Сла́ва твоя́, Алекса́ндре,/ я́ко еди́нем му́жественным и́менем твои́м устраша́хуся сопроти́внии,/ и ны́не, блаже́нне, враги́ на́ша неви́димо устраша́й,/ ополча́ющияся на христолюби́вое твое́ во́инство.
Сла́ва, и ны́не:
Изба́вивый ны от вла́сти те́мныя/ и преста́вивый в Ца́рство любве́ Сы́на Твоего́, Бо́же наш,/ преведы́й от тьмы́ неве́дения ко све́ту благоразу́мия и сла́вы/ и имени́ты сотвори́вый по всей земли́,/ Тебе́ и ны́не про́сим:/ да я́коже сохрани́л и возвы́сил еси́ нас всеси́льною Твое́ю десни́цею,/ то́южде защища́й, избавля́й и содержи́.
На хвали́тех стихи́ры свята́го, глас 8.
Подо́бен: О, пресла́внаго чудесе́:
О, пресла́внаго чудесе́!/ Ми́ром облада́яй оставля́ет мир,/ скипетроно́сец Росси́йский отлага́ет ски́петр,/ совлача́ется порфи́ры/ и гро́бною покрыва́ется плащани́цею,/ венча́нная глава́ кня́жескую диади́му с себе́ низлага́ет,/ вре́менное ца́рство оставля́ет на земли́,/ о ве́чном изве́стен на Небеси́,/ иде́же венча́ся ца́рскою диади́мою.
О, ко́ль мно́гия враги́ победи́л еси́,/ прехра́брый во́ине Иису́с Христо́в!/ Ви́димыя – мече́м и благоче́стием,/ неви́димыя – моли́твою,/ пло́ть – воздержа́нием,/ мир – отверже́нием ми́ра,/ и та́ко, пресла́вный победи́тель, на Не́бо возше́л еси́.
Научи́л еси́ нас прему́дрым де́лом твои́м:/ ничто́же мо́жем изнести́ от ми́ра сего́,/ во́ньже ничто́же внесо́хом./ Того́ ра́ди оста́вив вре́менная,/ возжела́л еси́ Небе́сных,/ я́же насле́див,/ и нам о́нех не лиши́тися моли́, мо́лимся.
Сла́ва, глас то́йже:
По́двигом до́брым подвиза́лся еси́,/ тече́ние сконча́л, ве́ру соблю́л еси́,/ благове́рный кня́же Алекса́ндре,/ про́чее же соблюде́ся тебе́ вене́ц пра́вды,/ и́мже венча́ тя и́стинный Мздовоздая́тель./ Того́ моли́, преблаже́нне,/ вруче́нному тебе́ ста́ду,/ сы́ном Росси́йским, спасти́ся.
И ны́не, глас 3:
Тебе́, Бо́га, хва́лим,/ Твоя́ благода́ти испове́дуем, Бо́же наш,/ Твоя́ щедро́ты благода́рственным се́рдцем превозно́сим,/ прогна́вшаго мра́чный о́блак бра́ни/ и вве́дшаго ны во сла́дкий свет ве́чнаго ми́ра,/ во́инство Росси́йское во бране́х прему́дростию испо́лнившаго/ и росси́йскими корабли́ Балтийское мо́ре украси́вшаго,/ град сей в че́сть апо́стола Петра́ воздви́гшаго и просла́вившаго/ и пото́ком сла́дости Твое́й нас насыща́ющаго,/ и, благодаря́ще, вопие́м:/ о Влады́ко Всеще́дрый!/ Укрепи́ и утверди́ сия́, и́же дарова́л еси́ нам, в род и род,/ и спаси́ ду́ши на́ша.
НА ЛИТУРГИ́И
Блаже́нны от кано́на пра́здника, пе́снь 3-я, и свята́го, пе́снь 6-я, на 8. Проки́мен пра́здника, глас 7: Госпо́дь кре́пость лю́дем Свои́м даст,/ Госпо́дь благослови́т лю́ди Своя́ ми́ром. Стих: Принеси́те Го́сподеви, сы́нове Бо́жии, принеси́те Го́сподеви, сы́ны о́вни. Свята́го, глас 7: Честна́ пред Го́сподем/ сме́рть преподо́бных его́.
Апо́стол в благодаре́ние о ми́ре.
К Кори́нфяном Посла́ния свята́го апо́стола Па́вла чте́ние:
Бра́тие,/ благода́ть вам и мир от Бо́га, Отца́ на́шего и Го́спода Иису́са Христа́./ И́же е́сть мир наш, сотвори́вый обоя́ еди́но/ и средосте́ние огра́ды разори́вый вражду́./ И́же не́сть нестрое́ния Бог, но ми́ра, я́ко во всех Це́рквах святы́х./ Держи́теся у́бо любве́, ревну́йте же духо́вным./ Любы́ долготерпи́т, милосе́рдствует,/ любы́ не зави́дит,/ любы́ не превозно́сится, не горди́тся,/ не безчи́нствует, не и́щет своя́ си́, не раздража́ется,/ не мы́слит зла, не ра́дуется о непра́вде,/ ра́дуется же о и́стине./ Вся лю́бит, всему́ ве́ру е́млет, вся упова́ет, вся терпи́т./ Любы́ николи́же отпа́дает./ Про́чее же, бра́тие, ра́дуйтеся, соверша́йтеся, утеша́йтеся,/ то́жде му́дрствуйте, мир име́йте,/ и Бог любве́ и ми́ра бу́дет с ва́ми.
Други́й апо́стол свято́му, зача́ло 213.
Ева́нгелие в благодаре́ние о ми́ре, от Иоа́нна.
Рече́ Госпо́дь Свои́м ученико́м:/ мир оставля́ю вам, мир Мой даю́ вам,/ не я́коже мир дае́т, Аз даю́ вам./ За́поведь но́вую даю́ вам, да люби́те друг дру́га,/ я́коже возлюби́х вы, да и вы люби́те себе́./ О сем разуме́ют вси, я́ко Мои́ ученицы́ есте́,/ а́ще любо́вь и́мате между́ собо́ю./ Я́коже возлюби́ Мя Оте́ц, и Аз возлюби́х вас,/ бу́дите в любви́ Мое́й./ А́ще за́поведи моя́ соблюде́те, пребу́дете в любви́ Мое́й,/ я́коже Аз за́поведи Отца́ Моего́ соблюдо́х и пребыва́ю в любви́ его́./ Сия́ глаго́лах вам, да ра́дость моя́ в вас бу́дет,/ и ра́дость ва́ша испо́лнится./ Бо́льше сея́ любве́ никто́же и́мать,/ да кто ду́шу свою́ полжи́т за дру́ги своя́./ Вы дру́зи Мои́ есте́, а́ще твори́те, ели́ка Аз запове́даю вам./ Не вы Мене́ избра́сте, но Аз избра́х вас/ и полжи́х, да вы и́дете и плод принесе́те, и плод ваш пребу́дет,/ да, его́же а́ще проси́те от Отца́ во И́мя Мое́,/ даст вам.
Ева́нгелие свято́му, от Матфе́я, зача́ло 43. Прича́стен пра́здника: Похвали́, Иерусали́ме, Го́спода,/ хвали́ Бо́га твоего́, Сио́не. Свята́го: В па́мять ве́чную бу́дет пра́ведник: Аллилу́ия, три́жды.
Моли́тва
Ско́рый помо́щниче всех усе́рдно к тебе́ прибега́ющих и те́плый наш пред Го́сподем предста́телю, святы́й благове́рный кня́же Алекса́ндре! При́зри ми́лостивно на ны, недосто́йныя, мно́гими беззако́нии непотре́бны себе́ сотво́ршия, к ра́це моще́й твои́х48 ны́не притека́ющия и из глубины́ се́рдца к тебе́ взыва́ющия: ты в житии́ свое́м ревни́тель и защи́тник Правосла́вныя ве́ры был еси́, и нас в ней те́плыми твои́ми моли́твами непоколеби́мы утверди́. Ты вели́кое, возложе́нное на тя служе́ние тща́тельно проходи́л еси́, и нас твое́ю по́мощию пребыва́ти коего́ждо, в не́же при́зван е́сть, наста́ви. Ты, победи́в полки́ супоста́тов, от преде́лов Росси́йских отгна́л еси́, и на нас ополча́ющихся всех ви́димых и неви́димых враго́в низложи́. Ты, оста́вив тле́нный вене́ц ца́рства земна́го, избра́л еси́ безмо́лвное житие́, и ны́не, пра́ведно венце́м нетле́нным увенча́нный, на Небесе́х ца́рствуеши, исхода́тайствуй и нам, смире́нно мо́лим тя, житие́ ти́хое и безмяте́жное и к ве́чному Ца́рствию ше́ствие неукло́нное твои́м предста́тельством устро́й нам. Предстоя́ же со все́ми святы́ми Престо́лу Бо́жию, моли́ся о всех правосла́вных христиа́нех, да сохрани́т их Госпо́дь Бог Свое́ю благода́тию в ми́ре, здра́вии, долгоде́нствии и вся́ком благополу́чии в должа́йшая ле́та, да при́сно сла́вим и благослови́м Бо́га, в Тро́ице Святе́й сла́вимаго Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.
Перенесение мощей благоверного князя Александра Невского состоялось 30 августа́ 1724 года из Рождественского монастыря г. Владимира в Троицкий монастырь г. Санкт-Петербурга.
Край, где была основана новая столица Российской империи, г. Санкт-Петербург (1703), в XI веке находился под властью Новгорода Великого. Нева разделяла земли Карелии и Ингрии (Ижоры). С середины XII века за эту землю шла упорная борьба новгородцев со шведами и немецкими рыцарями. В 1323 году новгородцами в истоке Невы была основана крепость Орешек, ныне Шлиссельбург. В Смутное время Карелия и Ингрия временно отпали от России, но в начале XVIII века при Петре I были отвоеваны русскими.
В июле 1710 года, вскоре после взятия Выборга, Петр I осматривал окрестности города. По его указанию было выбрано место для будущего монастыря во Имя Живоначальной Троицы и святого благовернаго князя Александра Невского, на берегу Черной речки (впоследствии Монастырки). 20 февраля 1712 года Петр I приказал объявить архимандриту Феодосию (Яновскому), «дабы начинал на осмотренном месте строить монастырь». 25 марта 1713 года в деревянном храме, освященном в честь Благовещения Пресвятой Богородицы, была совершена Божественная Литургия. Монастырь связывала с городом дорога, устроенная в 1712 году по распоряжению архимандрита Феодосия (будущий Невский проспект).
Когда новая столица обстроилась и основанная в ней обитель во имя святого Александра Невского обзавелась приличным храмом и достаточным составом братии, возникла мысль о перенесении в нее святых мощей небесного ее покровителя.
В феврале 1722 г., исполняя указ Петра I, архиепископ Феодосий был во Владимире, в Рождественском монастыре, где находились мощи святого князя Александра Невского. Вместе с архимандритом монастыря Сергием он произвел освидетельствование мощей, хранившихся в серебряной гробнице, в которую были переложены «из старой» в 1697 году митрополитом Суздальским Иларионом. 4 июня 1723 года архиепископ Феодосий объявил в Святейшем Синоде, что Петр I, будучи 29 мая в Александро-Невском монастыре, велел обретающиеся в Владимирском Рождественском монастыре мощи святого благоверного князя Александра Невского перенести в Александро-Невский монастырь.
Святейший Синод 30 июня 1723 года постановил: «Святые мощи в Александро-Невский монастырь перенести, по примеру перенесения из Соловецкого монастыря в Москву святых мощей Филиппа митрополита в 7160-м году... При перенесении святых мощей от стороны Святейшего Синода быть настоятелю Рождествена монастыря, в котором мощи почивают, и иметь ему при себе духовных персон и светских служителей умеренное по потребе число, а от стороны правительствующего Сената быть достойной из знатного офицерства персоне, с надлежащим драгун или солдат числом, по усмотрению Сената. И как все оное к перенесению потребно определено и приготовлено будет, тогда-то перенесение без всякого умедления и действом производить...
После литургии и молебного пения, совершенного архимандритом с священнослужителями, поставив раку и распростерши балдахин и распорядив по приличным местам определенных к провожательству духовных и военных, чиновно восприяв показанный путь, в который из града... проводить с обыкновенным церковным пением и колокольным звоном, как мощи святого провожать долженствует, и по том провождении, ехать оным путем умеренно, со усмотрением мест, дабы в удобных никакого свыше потребы медления, а в неудобных вредительной скорости не употреблять. При мощах как духовные персоны, так и охранительный от воинской караул всегда должен быть неотлучно для наблюдения, чтобы при святых мощах никаких сквернословий и непотребных действ отнюдь ни от кого не происходило. Сохранять от случайных вредительств всякими мерами, сколько крайний смысл и конечная сила возможет. Всему пути вести обстоятельный журнал, из которого выписывая присылать в Святейший Синод от каждого места на всякой почте рапорт, дабы в Синоде о том было ведомо. Назначенному для сопровождения мощей архимандриту предписывалось, дабы он имел в пути такое поспешение, чтобы мог со святыми мощами к Санкт-Петербургу прибыть приближающегося августа к двадесятому, а по всеконечной мере к двадесять пятому числу неотложно».
Для сопровождения святых мощей был назначен окольничий Михаил Васильевич Собакин, для караула и посылок выделены из московского гарнизона обер-офицер с унтер-офицером и двадцать драгун.
Ковчег с балдахином для мощей с «носилом» (шириной 7 аршин, длиной 11 аршин, высотой более 5 аршин) был доставлен из Москвы во Владимир 10 августа. Несли его около 150 человек, а иногда и более. Перенесение святых мощей началось 11 августа 1723 года. После литургии и молебна с водосвятием святые мощи Александра Невского были подняты, вынесены в южные двери собора и поставлены в ковчег. Так как из ворот обители выйти было затруднительно, частично разобрали забор; при шествии через тесную торговую площадь города пришлось сломать несколько прилавков. Город Владимир провожал мощи колокольным звоном до полуночи. Жители ближайших сел встречали и провожали святые мощи «со многими народными людьми».
17 августа подошли к Москве, а 18 состоялась торжественная встреча святых мощей архимандритом и братией Симоновского монастыря, архиепископом Сарским и Подонским Леонидом, епископом Суздальским и Юрьевским Варлаамом, сонмом священнослужителей и множеством верующих. В Москву шли Мещанской улицей и по Сретенке, Введенской и Петровской улицами; не заходя в Кремль, по Тверской вынесли мощи за Ямскую Тверскую улицу и поставили в поле. При большом стечении верующих всю ночь совершались молебны святому Александру Невскому.
23 августа мощи были в Клину, 26 – в Твери, 28 – в Торжке, 31 – в Вышнем Волочке. 9 сентября через озеро Ильмень святые мощи перенесли в Новгород. У Софийского собора был совершен молебен. 10 сентября продолжили путь с мощами по Волхову с остановкой у Хутынского монастыря. 13 сентября их доставили в Старую Ладогу, 15 сентября – в Новую Ладогу. В Шлиссельбурге 19 сентября святые мощи встречали бригадир Шувалов и полковник Бухолц. Здесь мощи были поставлены в каменном храме и оставались до июля следующего, 1724 года. 24 июля Петр I повелел архиепископу Феодосию ехать «в Шлюшенбург ко гробу святого благоверного князя Александра Невского с мощами» и завершить их перенесение в Петербург до 30 августа.
К тому времени был издан указ Святейшего Синода от 15 июня 1724 года, в котором постановлялось: «Отныне святого благоверного князя Александра Невского в монашеской персоне никому отнюдь не писать, а писать тот святого образ во одеждах великокняжеских». В Шлиссельбурге с раки святого был снят его образ (в монашеском одеянии, поскольку он преставился в схиме) и вместо него был помещен новый, писанный живописцем столичной типографии Иваном Одольским. Тогда же была выполнена медная доска знаменитым гравером Пикаром с видом Александро-Невского монастыря, для печатания гравюр. В титул святого князя Александра Невского было добавлено слово «великий».
В самом монастыре для встречи мощей была изготовлена особая лестница для внесения мощей в верхний храм во имя святого Александра Невского, запасены пушки и порох для салюта. Утром в воскресение 30 августа 1724 года тремя выстрелами из Петропавловской крепости столица была оповещена о начале торжества. Невский флот в полном составе (был выведен даже ботик Петра I) пошел вверх по Неве навстречу галере со святыми мощами. Петр I перешел на галеру, где сам встал у руля, а бывшие с ним сановники сели за весла. При пушечном салюте и колокольном звоне честные мощи святого князя Александра Невского были встречены на берегу Невы, у речки Монастырки. С берега святые мощи были перенесены царем и сановниками в монастырь и поставлены в новом храме, который освятили в тот же день.
После окончания перенесения мощей святого князя Александра Невского Петр I велел «по новой службе, вместо прежде бывшей этому святому ноября 23 числа службе, отныне праздновать 30 августа». Составление новой службы Синод поручил обер-иеромонаху флота, советнику Синода, школ и типографий протектору, архимандриту Гавриилу (Бужинскому).
Сподвижник Петра I, знаменитый проповедник, писавший, по слову императора, «внятно и хорошим штилем», архимандрит Гавриил составил немало похвальных слов на победы Русского оружия, в похвалу императора Петра и основанного им города на берегах Невы.
Кроме новой службы на перенесение мощей святого князя Александра Невского архимандрит Гавриил должен был «сочинить из обретающегося в Прологе жития его, приложив к тому из бывшей с шведами и окончившейся миром войны краткую историю и перенесение его святых мощей по приличию, а также к сочиненным стихирам и синаксарию сочинить седальны и канон и всю ту службу по обыкновению напечатать и разослать во все государство».
В 1725 году в типографии при Александро-Невском монастыре служба с благодарением о заключении вечного мира между Российской империей и Швецией была напечатана пятью изданиями по 1200 экземпляров каждое. В следующем году последовало еще несколько изданий и общее количество экземпляров составило 11900; они были переданы Синоду для рассылки по епархиям.
Однако вскоре распространение новой службы прекратилось. В словах службы о внутрироссийских делах Петровых: «и внутрь многая злая обыдоша нас, смирения от всезлобных мятежников, многое кровопролитие простирающих. Подвижеся всему сопротивное сердце Авессаломле, не токмо дела отеческая тщащеся опровергати, но и здравия его ищущее» (стихиры на литии, глас 5), архимандритом Псково-Печерского монастыря Маркеллом (Радышевским) усмотрено поношение высокой чести Блаженной памяти царевича Алексея Петровича, замученного Петром I в Петропавловской крепости в 1717 году. Указом императрицы Екатерины I от 18 сентября 1727 года велено: «Святого благоверного великого князя Александра службы, которые разосланы по всей Российской империи к церкви, от тех церквей все собрать по-прежнему... и хранить те службы до указа в целости, впредь же празднество великого князя Александра Невского отправлять по-прежнему по месячной Минее. Служба перенесению мощей и житие, составленное архимандритом Гавриилом (Бужинским) и правленные самим Петром I, стали уделом рукописной традиции до тех пор, пока не были внесены в книгу «Житий Русских святых» в 60-е годы ХVIIІ века.
В дальнейшем, когда утихли внутридворцовые страсти начала XVIII века, служба заняла свое место во всех изданиях синодальных Миней.
В содержание этой службы, кроме церковного прославления святого, включен исторический материал о событиях начала XVIII века. В тексте службы приносится благодарение Богу за дарованную России победу над Швецией, за долгожданный мир, прославляется Россия как страна православной веры и ее новая столица, посвященная апостолу Петру. Вновь составленное житие святого Александра Невского тоже представляет собой краткую историческую справку по истории Северной войны и перенесению мощей святого князя из Владимира в Петербург.
К 30 августа 1750 года была изготовлена по повелению дочери Петра I Елизаветы серебряная гробница для мощей святого Александра Невского. На изготовление ее истрачено 90 пудов чистого серебра, первой продукции «Колыванских рудокопен». Работы производились мастерами петербургского Монетного двора.
По сторонам гробницы расположены тематические рельефы, изображающие деяния и события жизни святого Александра Невского. На переднем – прибытие его в Городецкий Богородицкий монастырь, где произошло преставление князя; на трех других барельефах – битва с ливонскими рыцарями, вступление во Псков, битва на Неве при устье Ижоры. Внизу изображено преставление и погребение святого; на противоположной стороне – эпитафия М. В. Ломоносова:
«Святой и храбрый князь здесь телом почивает;
Но духом от небес на град сей призирает
И на брега, где он противных побеждал,
И где невидимо Петру споспешествовал.
Являя его усердие святое,
Сему защитнику воздвигла раку в честь,
От первого серебра, что недро ей земное
Открыло, как на трон благоволила сесть».
Над гробницей – серебряный балдахин, увенчанный великокняжеской короной, впереди в нише – серебряная пирамида с чеканным изображением святого князя Александра Невского со знаменем в руке и его супруги с крестом в руке. Выше – литые ангелы, держащие щиты с надписями, сочиненными Ломоносовым. На северном щите: «Богу Всемогущему и его угоднику Благоверному и Великому князю Александру Невскому, Россов усердному защитнику, презревшему прещение мучителя, тварь боготворить повелевавшего, укротившему варварство на Востоке, низложившему зависть на Западе, по земном княжении в вечное царство переселенному в лето 1263.
Усердием Петра Великого, на место древних и новых побед перенесенному 1724 года».
На южном щите: «Державнейшая Елизавета, отеческаго ко святым почитания подражательница, к нему благочестием усердствуя, сию мужества и святости его делами украшенную раку из первообретеннаго при ея благословенной державе серебра сооружить благоволила в лето 1750».
После завершения торжеств перенесения мощей святого князя Александра Невского императором Петром I было задумано учреждение первого военного ордена в России в честь святого Александра Невского. Орден был учрежден Екатериной I в 1725 году.
В 1916 году в связи с тревожной обстановкой на фронте предполагали эвакуировать городскую святыню – мощи святого Александра Невского. Комиссия Синода провела вскрытие гробницы и освидетельствование мощей, но эвакуация не была осуществлена. Впоследствии, через несколько лет, гробница – одно из крупных мемориальных сооружений, в котором искусство русского барокко достигло своего апогея, была вывезена из монастыря и с 1922 года расположена в экспозиции Государственного Эрмитажа.
В настоящее время небольшая частица мощей благоверного князя Александра Невского хранится в ковчеге в Троицком соборе Александро-Невской Лавры, в этом соборе хранится также и одна из чтимых икон святого князя.
В перенесении мощей благоверного князя Александра Невского в Петербург Промысл Божий усматривал небесное покровительство городу и новой столице России. Традиционно русские города, а тем более столица хранили святые мощи угодников Божиих и другие святыни, которые были надеждой и духовным щитом от неприятелей и других бедствий. Господу Богу было угодно сохранить от немецких полчищ, по молитвам благоверного князя Александра, Петроград в годы первой мировой войны и город Ленинград во время Второй мировой войны от немецко-фашистских захватчиков. Так героизм русских людей, соединенный с молитвенным предстательством Небесного покровителя города на Неве, продолжают свидетельствовать о небесной помощи благоверного князя Александра Невского.
Литература:
1. Петров Н. П. История Санкт-Петербурга с основания города... СПб., 1885.
2. Рункевич С. Г. Александро-Невская Лавра. СПб., 1913.
Свята́го благове́рнаго вели́каго кня́зя Дании́ла Алекса́ндровича, Моско́вскаго чудотво́рца
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры на 8, глас 6.
Подо́бен: Все упова́ние:
Дню стра́шному/ и неизрече́нному Христо́ву прише́ствию/ ты, благове́рный кня́же Дании́ле,/ всегда́ в животе́ свое́м гото́в был еси́,/ чистото́ю и любо́вию, многотру́дным терпе́нием,/ и преста́вися во и́ночестве с ми́ром к ве́чным оби́телем./ И предстои́ши пред Бо́гом во ве́ки/ со А́нгелы и со святы́ми, Бо́гу угоди́вшими,/ Его́же со дерзнове́нием моли́ о душа́х на́ших.
Был еси́ на земли́ добро́тою и чистото́ю я́ко свет,/ и по сме́рти яви́лся еси́ нам,/ и излия́л еси́ на нас свои́ми чудесы́ мно́гое милосе́рдие:/ тобо́ю, благове́рный и преподо́бный кня́же Дании́ле,/ прокаже́ннии очища́ются, и неду́зи отгоня́ются,/ и от разли́чных боле́зней исцеля́ются,/ но моли́ся Христу́ Бо́гу о чту́щих святу́ю па́мять твою́.
Кто не почуди́тся/ или́ кто не похва́лится,/ слы́ша в вели́кую сла́ву,/ во всех страна́х пресла́вную,/ Бо́гом спаса́емаго гра́да Москвы́,/ вели́чащася и вы́сящася па́че всех гра́дов,/ име́ющаго в себе́ бога́тство неоскуде́ваемо,/ сокро́вище неги́блемое – но́ваго чудотво́рца,/ благочести́ваго кня́зя Дании́ла,/ к нему́же моля́щеся, ве́рно вопие́м:/ Христо́ви моли́ся/ спасти́ и просвети́ти ду́ши на́ша.
И́ны стихи́ры, глас то́йже.
Подо́бен: Тридне́вен:
Прииди́те, христоно́снии лю́дие,/ ви́дим чу́до, вся́кий ра́зум превосходя́щее,/ и, благоче́стно вопию́ще,/ благове́рнаго кня́зя Дании́ла восхва́лим,/ честны́м его́ моще́м покланя́ющеся/ и моля́щеся спасти́ и просвети́ти ду́ши на́ша.
Я́ко со́лнце незаходи́мое,/ на земли́ лучи́ простре́/ и озари́л еси́ ве́рных се́рдца,/ соверша́ющих ве́рно па́мять твою́,/ всеблаже́нне кня́же Дании́ле,/ моли́ся Христу́ Бо́гу спасти́ся душа́м на́шим.
Благоуха́ет честна́я ра́ка святы́х моще́й твои́х,/ благове́рный преподо́бный кня́же Дании́ле,/ всем ве́рным исцеле́ние душа́м же и телесе́м да́рующи,/ те́мже мо́лим в ми́ре соблюсти́ страну́ на́шу и все Правосла́вие,/ да вси тебе́ я́ко и́стиннаго засту́пника/ и моли́твенника к Бо́гу и́мамы,/ прося́ще тобо́ю прия́ти мир и ве́лию ми́лость.
Сла́ва, глас 6:
Хотя́й Госпо́дь Бог наш Иису́с Христо́с/ милосе́рдие Свое́ неизрече́нное показа́ти всем челове́ком,/ благове́рный кня́же Дании́ле,/ ца́рствующему гра́ду Москве́ даде́ тебе́,/ такова́ кня́зя свя́та/ и ди́вна де́лы благи́ми в животе́ твое́м,/ по сме́рти же твое́й даде́ нам неизрече́нную ра́дость обрести́:/ от моще́й бо твои́х прие́млют всегда́/ боля́щии здра́вие, печа́льнии утеше́ние,/ гла́днии насыще́ние и нази́и одея́ние,/ гре́шнии спасе́ние,/ сего́ ра́ди моли́ся Христу́ Бо́гу о душа́х на́ших.
И ны́не, Богоро́дичен: Кто Тебе́ не ублажи́т:
Вход. Проки́мен дне. Чте́ния преподо́бническая (зри день 28-й).
На лити́и стихи́ры, глас 5:
Посрами́л еси́ диа́вола,/ благове́рный кня́же Дании́ле,/ богоуго́дным свои́м житие́м/ и бога́тство Небе́снаго Ца́рства в животе́ свое́м/ напо́лнив, неприкоснове́нно соблю́л еси́./ Ны́не моли́ся Христу́, Бо́гу на́шему,/ о спасе́нии душ на́ших.
О вселюдсти́и наро́ди,/ возопие́м любо́вию:/ о благове́рный и преподо́бный кня́же Дании́ле,/ непреста́нно воздви́гни ру́це к Бо́гу/ и моли́ся за святи́тели, мона́хи и за вся Росси́йския лю́ди,/ изба́вити град наш и вся стра́ны Росси́йския/ от гла́да и пото́па,/ и от наше́ствия иноплеме́нник, и от междоусо́бныя бра́ни/ и дарова́ти стране́ на враги́ побе́ды и одоле́ние,/ и Це́рквам соедине́ние ми́рно устро́й,/ и моли́ о душа́х на́ших.
Благочести́вый кня́же Дании́ле,/ яви́лся еси́ гра́ду своему́ Москве́ и оби́тели/ засту́пник кре́пок и столп непревра́тен,/ благоче́стия степе́нь непоколеби́мый,/ и правосла́вным на враги́ посо́бник,/ и всем родо́м Росси́йским забра́ло неруши́мо./ Сей у́бо ди́вный наш врач и спаси́тель/ Небе́снаго врачевства́ лечбы́ предлага́ет/ де́йствием Свята́го Ду́ха,/ Его́же прие́млет ве́сь род и во́зраст./ Но моли́ся Христу́, Бо́гу на́шему,/ о чту́щих святу́ю па́мять твою́.
Сла́ва, глас 8:
Прииди́те, святи́телие, и мона́си,/ и вси лю́дстии собо́ри христиа́нстии,/ притеце́м к ра́це многочуде́сных моще́й/ благове́рнаго кня́зя Дании́ла, Моско́вскаго чудотво́рца,/ зря от него́ всегда́ мно́гим боля́щим ско́рое исцеле́ние,/ печа́льным, и бе́дным, и си́рым заступле́ние и утеше́ние, и си́це рцем:/ о благове́рный кня́же Дании́ле,/ моли́ Христа́ Бо́га о душа́х на́ших.
И ны́не, Богоро́дичен: Безневе́стная Де́во:
На стихо́вне стихи́ры, глас 1.
Подо́бен: Небе́сных чино́в:
Я́ко вели́кое со́лнце яви́ся вселе́нней,/ Блаже́нный кня́же Дании́ле,/ чудесы́ просвеща́еши ве́сь мир,/ вси у́бо, соше́дшеся, Христа́ воспои́м,/ спаса́ющаго нас от бед моли́твами твои́ми.
Стих: Честна́ пред Го́сподем/ сме́рть преподо́бных его́.
Све́том сия́еши Боже́ственный благода́ти,/ благове́рный кня́же Дании́ле,/ пресве́тлый твой пра́здник ра́достен всем,/ его́же, ра́дующеся,/ и́скренно вси восхва́лим.
Стих: Что возда́м Го́сподеви о всех,/ я́же воздаде́ ми?
Прииди́те, моско́встии наро́ди, в честну́ю оби́тель,/ вели́цыи и ма́лии,/ восхва́лим и́же в вас пре́жде кня́жившаго,/ те́плаго предста́теля, но́ваго чудотво́рца,/ блаже́ннаго кня́зя Дании́ла.
Сла́ва, глас то́йже. Самогла́сен:
Ра́дуйся и весели́ся о Го́споде,/ ца́рствующий гра́де Москва́,/ и све́тло торжеству́й и лику́й, Христо́ва Це́рковь,/ со священнои́ноки и и́ноки,/ иму́щи честно́е сокро́вище – святы́я мо́щи/ пресла́внаго но́ваго чудотво́рца, блаже́ннаго кня́зя Дании́ла,/ чудеса́ бо точа́щия всем, приходя́щим с ве́рою./ Прииди́те, ве́рнии, тецы́те, собра́вшеся,/ и, лику́юще, ра́дуйтеся и весели́теся, си́це глаго́люще:/ ра́дуйся, пресла́вный но́вый чудотво́рче,/ блаже́нне кня́же Дании́ле,/ гра́ду на́шему и оби́тели утвержде́ние/ и нам, ве́рным, спасе́ние./ И ны́не, в па́мяти свое́й, испроси́ у Христа́ Бо́га/ дарова́ти душа́м на́шим ве́лию ми́лость.
И ны́не, Богоро́дичен: Се испо́лнися:
Тропа́рь, глас 4:
Яви́ся, я́ко звезда́ пресве́тлая,/ благове́рный и преподо́бный кня́же Дании́ле,/ в богопоруче́ннем твое́м гра́де Москве́ в жи́зни вре́менней/ и просвети́ся воздержа́нием, и всено́щным стоя́нием, и посто́м,/ и моли́твою, и слеза́ми ко Всеми́лостивому Спа́су/ за град свой Москву́ и за вся страны́ Росси́йския земли́./ И по преставле́нии твое́м честны́я твоя́ мо́щи/ источа́ют исцеле́ния неоску́дно приходя́щим с ве́рою,/ те́мже вопие́м ти:/ моли́ Христа́ Бо́га/ спасти́ся душа́м на́шим.
Ин Тропа́рь, глас 3:
Яви́лся еси́ в стране́ на́шей,/ я́ко звезда́ пресве́тлая,/ благове́рный кня́же Дании́ле,/ луча́ми све́та твоего́ озаря́я град твой и оби́тель твою́,/ лю́дем правосла́вным побо́рник еси́,/ пле́нным свободи́тель и ни́щим защи́титель./ Моли́ Христа́ Бо́га/ держа́ве Росси́йстей дарова́ти мир/ и спасти́ ду́ши на́ша.
Иде́же пое́тся Слу́жба вку́пе обои́м преподо́бным и благове́рным князе́м Алекса́ндру Не́вскому и сы́ну его́ Дании́лу Моско́вскому, тропа́рь, глас 3:
Преподо́бнии и благове́рнии кня́зие Алекса́ндре и Дании́ле,/ моли́те Ми́лостиваго Бо́га/ оте́честву ва́шему земно́му/ всегда́ в Правосла́вии и благоче́стии пребыва́ти/ и всем Ру́сским лю́дем в ми́ре спасти́ся.
Сла́ва, и ны́не, Богоро́дичен.
НА У́ТРЕНИ
По 1-м стихосло́вии седа́лен, глас 4:
Дости́гл еси́ Христа́, Бо́га на́шего, благове́рный кня́же Дании́ле, в житии́ сем су́етнем,/ у́зким, и прискорбным, и трудолю́бным путе́м Небе́сное Ца́рство стяжа́л еси́/ и во о́ном неизрече́ннем и безконе́чнем ве́це наслажда́ешися,/ те́мже моли́ся Христу́ Бо́гу о душа́х на́ших.
Сла́ва, и ны́не, Богоро́дичен:
Стена́ непобеди́мая нам, христиа́ном, еси́, Богоро́дице Де́во,/ к Тебе́ бо прибега́юще, невреди́ми пребыва́ем/ и, па́ки согреша́юще, и́мамы Тя Моли́твенницу,/ тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.
По 2-м стихосло́вии седа́лен, глас 5:
О, уже́ при две́рех Де́нь стра́шный и Суд Госпо́день гро́зный,/ помози́ нам, благове́рный и преподо́бный кня́же Дании́ле,/ наста́ви нас на пу́ть пра́вый,/ и не лиши́ нас на Страншем Суде́ десна́го стоя́ния,/ и моли́ся о душа́х на́ших.
Сла́ва, и ны́не, Богоро́дичен:
От Де́вы возсия́вый ми́ру, Христе́ Бо́же,/ сы́ны све́та то́ю показа́вый, поми́луй нас.
По полиеле́и седа́лен, глас 8:
Духо́вно торжеству́ем, священнои́ноцы,/ в па́мяти вели́каго и чу́днаго благове́рнаго кня́зя Дании́ла,/ А́нгели на Небесе́х ра́достно лику́ют,/ сего́ ра́ди моли́ся Христу́ Бо́гу о душа́х на́ших.
Сла́ва, и ны́не, Богоро́дичен:
О Тебе́ ра́дуется, Благода́тная, вся́кая тва́рь,/ А́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́,/ из нея́же Бог воплоти́ся/ и Младе́нец бы́сть, пре́жде век сый Бог наш;/ ложесна́ бо Твоя́ престо́л сотвори́/ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тва́рь, Сла́ва Тебе́.
Степе́нна, 1-й антифо́н 4-го гла́са. Проки́мен: Честна́ пред Го́сподем/ сме́рть преподо́бных его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 11.
По 50-м псалме́ стихи́ра, глас 6:
Прииди́те, вси лю́дие,/ хвалу́ принесе́м Блаже́нному кня́зю Дании́лу,/ вопию́ще си́це:/ ра́дуйся, благоче́стия и́стиннаго пропове́дниче/ и Це́ркви Христо́ве пресве́тлая звездо́,/ ра́дуйся, пресве́тлый сто́лпе,/ просвеща́я нас чуде́с све́тлостьми,/ ра́дуйся, ца́рствующему гра́ду Москве́ све́тлый свети́льниче,/ ра́дуйся, ро́сный о́блаче,/ пла́мень погаша́яй страсте́й/ и ороша́яй ве́рных мы́сли,/ благочести́вый кня́же Дании́ле,/ и́ноческое удобре́ние,/ моли́твенниче о душа́х на́ших.
Кано́н преподо́бному кня́зю Дании́лу, глас 6.
Пе́снь 1
Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/Бо́гу побе́дную пе́снь пои́м, вопия́ше.
Я́ко ско́ро всем послу́шный, преподо́бный кня́же Дании́ле,/ призыва́ющим свято́е и́мя твое́ в беда́х, и ско́рбех, и в боле́знех разли́чных,/ всем прося́щим подае́ши ско́рое здра́вие и ра́достное утеше́ние,/ ми́лостивно нас посеща́й.
Взы́де я́ко светолу́чное со́лнце на высоту́ небе́сную и осия́юще вселе́нную,/ та́ко ты, благове́рный кня́же Дании́ле, в богопоруче́ннем ти гра́де Москве́,/ освяти́ и просвети́ ве́сь град и оби́тель свою́,/ и вся лю́ди, живу́щия в них,/ и вся стра́ны Росси́йския земли́ свои́ми чудесы́.
Ви́димых и неви́димых враг вся́каго наведе́ния изба́ви нас,/ мо́лимся тебе́, благове́рный кня́же Дании́ле,/ и от нестерпи́мых бед свободи́.
Богоро́дичен: О Всеми́лостивая Госпоже́ Богоро́дице,/ к Ро́ждшемуся из Тебе́ о нас моли́ся,/ ско́рби на́ша на ра́дость претвори́.
Ин кано́н, глас 1.
Пе́снь 1
Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном пу́ть глубины́ новосоде́лавшая.
Благочести́ваго и венцено́снаго кня́зя Дании́ла по достоя́нию восхва́лим,/ чуде́с пода́теля оби́льнаго,/ спаса́ющаго ду́ши на́ша.
Престо́лу у́бо предстоя́ благода́ти и со все́ми А́нгелы ра́дуяся,/ дне́сь ми́рови раздае́т бога́тство, те́мже согла́сно зове́м ему́:/ спаси́ нас моли́твами твои́ми, блаже́нне.
Пе́сньми и пе́нии восхва́лим блаже́ннаго кня́зя Дании́ла/ и, честны́я его́ и многоцеле́бныя мо́щи любе́зно облобыза́юще, си́це вопие́м:/ ра́дуйся, гра́ду своему́ Москве́ многосве́тлый свети́льниче и тве́рдый засту́пниче.
Богоро́дичен: Ума́ моего́, Всенепоро́чная, омраче́ние све́том Твои́м отжени́/ и тьмы́ изба́ви мя ве́чнующия,/ я́ко да пою́ вели́чия Твоя́.
Пе́снь 3
Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
Благове́рный кня́же Дании́ле,/ вси лю́дие пра́зднуют и мно́жество и́ночествующих по́стник покланя́ются тебе́,/ ви́девше от Бо́га да́нная тебе́ пресла́вная чудеса́/ ко всем, прося́щим у тебе́ ми́лости.
Мо́лим тя, благове́рный кня́же Дании́ле,/ и облобыза́ем честны́я мо́щи твоя́:/ к покая́нию упра́ви нас/ и не лиши́ нас душеспаси́тельнаго исполне́ния.
Терпя́, потерпе́л еси́ Го́спода, и услы́ша тя,/ и внят гла́су непреста́ннаго моле́ния твоего́,/ и воззва́ тя к ве́чному весе́лию, ра́йскаго сотвори́в насле́дника.
Богоро́дичен: Влады́чице Блага́я,/ всех Творца́ во утро́бе Твое́й заче́ншая и ро́ждшая ми́ру Спа́са и Го́спода,/ Его́же моли́, да изба́вит нас от вся́ких искуше́ний/ и в чи́стем житии́ соблюде́т нас.
Ин
Ирмо́с: Еди́не, ве́дый челове́ческаго существа́ не́мощь/ и ми́лостивно в не воображе́н,/ препои́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя сла́вы Твоея́, Человеколю́бче.
Свети́льник све́та яви́ся благочести́вый кня́зь Дании́л,/ неду́г глубо́кую тьму́ разреша́яй всегда́/ и заре́ю све́тлою чуде́с озаря́яй, прему́дрый.
Дне́сь весе́лием ра́дуется Христо́ва Це́рковь/ в па́мять присноблаже́ннаго кня́зя Дании́ла/ и ве́рою взыва́ет:/ Ты ми, Христе́, держа́ва, прибе́жище и утвержде́ние.
Я́ко честны́й би́сер, твоя́ мо́щи, блаже́нне кня́же Дании́ле,/ всем ви́димы предлежа́т,/ разли́чная исцеле́ния неоску́дно подава́юще.
Богоро́дичен: А́нгельстии чи́нове и во́инства Небе́сных сил Твоего́ Сы́на ужаса́ются./ Мо́лим Тя, Милосе́рдая,/ в стра́шный гро́зный де́нь прише́ствия Его́ помози́ нам, Влады́чице.
Ин конда́к, глас 6:
Е́же по о́бразу соблю́д непрело́жно/ и я́же в ми́ре тле́нная оста́вив,/ со а́нгельскими ли́ки предстои́ши Христу́,/ преподо́бне кня́же Дании́ле,/ ника́коже забыва́я чад твои́х,/ но ми́лостивно посеща́я и глаго́ля им:/ аз е́смь с ва́ми и никто́же на вы.
Ин И́кос:
Земна́я дарова́ния и вла́сть прие́м,/ поревнова́л еси́ па́че о Небе́сных пещи́ся,/ сего́ ра́ди и Госпо́дь благослови́ тя, кня́же Дании́ле,/ и возме́здие трудо́м твои́м дарова́ оби́льно:/ еще́ бо на земли́ яви́ тя засту́пника оби́димым и влады́ку че́стна в бра́тии твое́й./ И ны́не с ли́ки пресвяты́х Престо́лу предстоя́ Небе́снаго Царя́,/ моли́ Его́ пода́ти нам грехо́в проще́ние, Святе́й Це́ркви утвержде́ние,/ да во умире́нии жи́зни услы́шим Блаже́нный глас Христа́ Бо́га:/ Аз е́смь с ва́ми и никто́же на вы.
Иде́же пое́тся Слу́жба вку́пе обои́м преподо́бным и благове́рным князе́м Алекса́ндру Не́вскому и сы́ну его́ Дании́лу Моско́вскому, конда́к, глас 3:
Возсия́ дне́сь пресве́тлая па́мять ва́ша,/ преподо́бнии и благове́рнии кня́зие Алекса́ндре и Дании́ле,/ и, сию́ соверша́юще с любо́вию,/ ва́шея по́мощи и предста́тельства пред Го́сподем про́сим,/ вас бо Ру́сстей земли́ и всем нам/ я́ко предста́тели и засту́пники дарова́ Бог.
Седа́лен, глас 8:
Ско́рый в беда́х уте́шителю, в боле́знех исцели́телю,/ во гра́дех и во страна́х вся лю́ди неисче́тною ми́лостию покрыва́я,/ благове́рный кня́же Дании́ле,/ моли́ся Христу́ Бо́гу о чту́щих святу́ю па́мять твою́.
Сла́ва, и ны́не, Богоро́дичен:
Ра́дуйся, Я́же от А́нгела ми́ру ра́дость прие́мши,/ ра́дуйся, ро́ждшая Творца́ тва́ри,/ ра́дуйся, сподо́бльшаяся бы́ти Ма́ти Христа́ Бо́га.
Пе́снь 4
Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.
Укроти́, благове́рный кня́же Дании́ле, нахо́ды злотво́рных челове́к/ и из рук их исхити́, гоня́щих и расхища́ющих неми́лостивно.
Смири́ враго́м вознесе́нную вы́ю,/ велере́чующим сове́т злый на нас по вся дни,/ на тя бо не́сть их упова́ния,/ но упова́ют на свой язы́к велере́чив и на язы́к челове́ч./ Ты же, благове́рный кня́же Дании́ле, от таковы́х злотво́рных бед изба́ви нас.
Вооружи́вся на нас лука́вно враг,/ мечта́нием злым, я́коже мече́м, погуби́ти хотя́./ Но ты, милосе́рдый благове́рный кня́же Дании́ле,/ защити́ нас от тех злых и ми́рны их сотвори́.
Богоро́дичен: Кто изочте́т си́лы Твоя́, Чи́стая,/ но пощади́ нас, изми́ из глубины́ грехо́вныя/ и наста́ви на благо́е покая́ние безвозвра́тно.
Ин
Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаше́ние Свято́му/ во спасе́ние на́ше и обновле́ние.
Заре́ю трисо́лнечныя благода́ти сия́ет све́тлый твой пра́здник, блаже́нне кня́же Дании́ле,/ стра́стнаго омраче́ния бесо́вскаго избавля́я/ творя́щих ве́рою па́мять твою́.
Простре́ ум к еди́ному Влады́це, блаже́нне,/ и во и́ночестем о́бразе порабо́тав ему́,/ и вене́ц нетле́ния от Него́ прии́м,/ сия́я све́тлыми све́тлостьми и бога́тными дарова́нии,/ иде́же перворо́дных жили́ще.
Источи́л еси́ ре́ки чуде́с, благове́рный кня́же Дании́ле,/ напая́я ве́рных се́рдца,/ и му́тныя во́ды неве́рия изсуши́л еси́.
Богоро́дичен: Влады́чице ми́ру, Богоро́дице, помози́ нам,/ прелука́вый бо враг поглоща́ет нас зе́льне лю́тыми воспомина́нии и помышле́нии,/ я́же от Бо́га разлуча́ют,/ не оста́ви у́бо нас, ниже́ пре́зри.
Пе́снь 5
Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.
Ускори́, благове́рный и преподо́бный кня́же Дании́ле,/ отъя́ти нас от зла неми́лостивых челове́к,/ пленящих и расхища́ющих безвозвра́тно,/ и печа́ль на́шу ра́довании раствори́.
Покажи́ ско́рое заступле́ние, благове́рный кня́же Дании́ле, прося́щим у тебе́ ми́лости,/ я́ко да у́зрят врази́ сопроти́в их борю́щую твою́ си́лу по нас и постыдя́тся.
Благове́рный кня́же Дании́ле,/ бу́ди нам стена́ тве́рдая,/ бу́ди нам засту́пник непреста́нный,/ бу́ди нам я́ко оте́ц чадолюби́в,/ бу́ди нам прибе́жище и утвержде́ние.
Богоро́дичен: Богоро́дице, блага́я Помо́щнице,/ из Тебе́ бо нам возсия́ Свет пра́ведный,/ те́мже Тя, Цари́цу и Влады́чицу всех, Ма́терь Зижди́теля, пропове́даем.
Ин
Ирмо́с: Твой мир да́ждь нам,/ Сы́не Бо́жий:/ ино́го бо, ра́зве Тебе́, Бо́га не зна́ем,/ И́мя Твое́ имену́ем,/ я́ко Бог живы́х и ме́ртвых еси́.
Яви́лся еси́, я́ко звезда́ све́тлая непреле́стная, блаже́нне кня́же Дании́ле,/ благове́рным лю́дем побо́рник, пле́нным свободи́тель и ни́щим защи́титель,/ боля́щим врач и гра́ду на́шему и всей земли́ Росси́йстей засту́пник.
Я́ко вели́кое бога́тство щедро́т, блаже́нне кня́же Дании́ле,/ яви́ся сла́вному гра́ду Москве́ безчи́сленное проли́тие ми́лости твое́й,/ ты бо прося́щим ве́рою су́щия цельбы́ подава́еши/ и тех просвеща́еши свои́м милосе́рдием, блаже́нне.
Пресве́тлый свети́льник, сия́я во всем ми́ре, Блаже́нный кня́же Дании́ле,/ и во мра́це стра́стне озаря́я всех,/ и в Росси́йстей земли́ чудотво́рец яви́лся еси́ пресла́вен,/ я́ко имы́й благода́ть исцеле́ний и прося́щим подава́я цельбу́, блаже́нне.
Богоро́дичен: Светообра́зный Христо́в хра́ме, Отрокови́це,/ моли́твами Свои́ми Отцу́, и Сы́ну, и Свято́му Ду́ху/ и нас хра́мы сотвори́ пра́ведный, Пречи́стая.
Пе́снь 6
Ирмо́с: Жите́йское мо́ре,/воздвиза́емое зря напа́стей бу́рею,/к ти́хому приста́нищу Твоему́ прите́к, вопию́ Ти:/возведи́ от тли живо́т мой,/ Многоми́лостиве.
Ца́рствующий свой град Москву́ и стра́ны Росси́йския земли́/ благомилосе́рдо пощади́, и ми́лостивно утверди́,/ и мир, и любо́вь, и здра́вие оби́льно во всем и во всех до́мех сотвори́,/ и всегда́ ра́достно нас посеща́й.
Еди́н аз, гре́шный, ны́не в ле́ности предлежу́,/ и ум мой во грехи́ глубо́кия впаде́,/ но ты, благове́рный кня́же Дании́ле,/ наста́ви мя на стезю́ пра́вую и не оста́ви мя, погиба́ющаго.
Процве́л еси́, я́ко цвет ра́йский, посреде́ Росси́йския земли́,/ уго́дниче Бо́жий, благове́рный кня́же Дании́ле,/ жив к Бо́гу свои́ми труды́, посто́м, и моли́твою,/ и нищелю́бием, и и́ночеством, и нощны́м стоя́нием,/ а по сме́рти боля́щим разли́чными неду́ги – здра́вие, печа́льным и бе́дным – заступле́ние/ и ра́дость всем подае́ши безпреста́нно.
Богоро́дичен: На Небеси́ Арха́нгели и А́нгели, Херуви́ми и Серафи́мы сла́вят,/ на земли́ же вси лю́дие раболе́пно поклоня́ются Рождеству́ Твоему́,/ сего́ ра́ди мо́лим Тя, Влады́чице:/ спаси́ ду́ши на́ша.
Ин
Ирмо́с: Обы́де нас после́дняя бе́здна,/ не́сть избавля́яй,/ вмени́хомся я́ко о́вцы заколе́ния,/ спаси́ лю́ди Твой, Бо́же наш,/ Ты бо кре́пость немощству́ющих и исправле́ние.
От пречестна́го ко́рене израсте́ ве́твь пресла́вная,/ благочести́вый кня́же Дании́ле,/ благоче́стно на земли́ пожи́в, и прия́телище чи́сто Свято́му Ду́ху был еси́,/ просвеща́я пою́щих па́мять твою́.
Сохрани́ град свой Москву́ и вся страны́ Росси́йския земли́,/ благочести́вый кня́же Дании́ле,/ от безбо́жных инове́рных нахо́да и от междоусо́бныя ра́ти/ и вся́каго стра́ха и му́ки изба́ви.
Сирота́м и вдови́цам засту́пник, и в беда́х необори́мый помо́щник,/ и всем, притека́ющим к тебе́, приста́нище необори́мое/ и неле́стное оти́шие су́щим во гресе́х.
Богоро́дичен: Вели́чия Тебе́, Чи́стая, сотвори́ Госпо́дь Бог наш,/ Его́же моли́ при́сно возвели́чити и в нас бога́тую его́ ми́лость,/ Пренепоро́чная Влады́чице.
Конда́к, глас 8:
Красоту́ ми́ра сего́, княже́ние и сла́ву я́ко вре́менная помышля́я,/ и сего́ ра́ди благоче́стно в ми́ре пожи́л еси́, блаже́нне кня́же Дании́ле,/ ми́лостию, и моли́твами, и и́ночеством Бо́гу угоди́в,/ и по преставле́нии свое́м чуде́с дар прии́м от Христа́ Бо́га,/ и свети́льник яви́ся пресве́тлый, просвеща́я свои́ми чудесы́,/ приходя́щим с ве́рою подае́ши ско́рое здра́вие и от бед избавля́еши./ Те́мже Христо́ва Це́рковь пе́сньми сла́вит тя, благочести́вый кня́же Дании́ле,/ ца́рствующему твоему́ гра́ду Москве́ вели́кое утвержде́ние.
И́кос:
Го́споди, Го́споди, отве́рзи ми устне́,/ уясни́ язы́к мой, и умили́ се́рдце мое́,/ и напо́лни ду́ха смиренному́дрия, да возглаго́лю и воспою́ Твоего́ уго́дника,/ но́ваго чудотво́рца, благове́рнаго кня́зя Дании́ла:/ ра́дуйся, благочести́ваго ко́рене пречестна́я о́трасле;/ ра́дуйся, ма́тере благогове́йныя ве́тве прекра́сна и пресла́вна;/ ра́дуйся, честны́й сосу́де Свято́му Ду́ху;/ ра́дуйся, яко на Небеси́ со А́нгелы живе́ши;/ ра́дуйся, целому́дрия сто́лпе, и́мже бесо́вская шата́ния искорени́шася;/ ра́дуйся, свети́льниче многосве́тлый, яко чуде́с сия́нии вселе́нную просвеща́еши;/ ра́дуйся, пра́ведным Боже́ственное наслажде́ние;/ ра́дуйся, гре́шным спасе́ние и леня́щимся к Бо́гу дерзнове́ние;/ ра́дуйся, я́ко ца́рствующий град свой Москву́ и живу́щия в нем лю́ди спаса́еши от бед и злых скорбе́й;/ ра́дуйся, крестоно́сным лю́дем на́шим похвало́ и утвержде́ние;/ ра́дуйся, пречестне́й оби́тели свое́й красото́;/ ра́дуйся, земли́ Росси́йския засту́пниче и забра́ло неруши́мое;/ ра́дуйся, гра́ду своему́ Москве́ вели́кий побо́рниче и утвержде́ние.
Пе́снь 7
Ирмо́с: Росода́тельну у́бо пе́щь/ соде́ла А́нгел/ преподо́бным о́троком,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.
Мо́лим тя, благове́рный кня́же Дании́ле,/ ви́ждь на́шу нестерпи́мую печа́ль, и боле́зни, и ско́рби, и стра́сти,/ но умилосе́рдися и от всех бед свободи́ пою́щих:/ благослове́н Бог оте́ц на́ших.
Показа́ся гра́ду Москве́ я́ко свети́ло негаси́мое, благове́рный кня́же Дании́ле,/ доброде́тельми твои́ми просвети́л еси́ всех нас,/ и трудолю́бным житие́м на земли́ поживе́,/ и сего́ ра́ди всели́ся в оби́тель Небе́снаго Ца́рствия, вопия́:/ благослове́н Бог оте́ц на́ших.
Ра́дуйся, просвети́вый свои́ми чудесы́ во́тчину свою́, град Москву́, и стра́ны Росси́йския земли́,/ ра́дуйся, победи́вый диа́вола, и посрами́вый житие́ ны́нешняго ве́ка,/ и обреты́й неизрече́нную благода́ть от Бо́га в безконе́чнем о́ном ве́це,/ со А́нгелы и со святы́ми вопия́:/ благослове́н Бог оте́ц на́ших.
Богоро́дичен: Наде́ждо всем, Госпоже́ Богоро́дице,/ разгони́, Влады́чице, враги́ ду́ши моея́ и напра́ви на стезю́ пра́ву./ Пощади́, Помо́щнице и наде́ждо христиа́нская, Сы́ну Своему́ зову́щи:/ благослове́н Бог оте́ц на́ших.
Ин
Ирмо́с: Тебе́ у́мную, Богоро́дице, пе́щь/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.
Во всех страна́х про́йде веща́ние,/ я́ко гра́ду Москве́ яви́ся чудотво́рец пресла́вен,/ да́руяй мно́жество исцеле́ний всем, приходя́щим к нему́/ и ве́рою пою́щим Го́сподеви:/ отце́в Бо́же, благослове́н еси́.
Чудесы́ у́бо твои́ми, я́ко цвет, процве́л еси́, блаже́нне,/ исцеле́ния подава́еши притека́ющим к тебе́, Богому́дре и досточу́дне кня́же Дании́ле,/ и Бо́гови зову́щим:/ отце́в Бо́же, благослове́н еси́.
Се ны́не стеко́шася от всех стран святи́тели, свяще́нницы и и́ноцы, бога́тии и убо́зии,/ вси, ра́дующеся вку́пе, хвалу́ возда́ти тебе́, Богоблаже́нне кня́же Дании́ле, зову́ще Го́сподеви:/ отце́в Бо́же, благослове́н еси́.
Богоро́дичен: Святе́йшая святы́х всех сил,/ честне́йшая всея́ тва́ри, Богоро́дице, Влады́чице ми́ра,/ спаси́ ны, Спа́са ро́ждшая, от прегреше́ний тьмори́чных49 и бед,/ я́ко Блага́я, моли́твами Твои́ми.
Пе́снь 8
Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.
Ра́достный наш вели́кий све́тлый пра́здник дне́сь возсия́/ в богоспаса́емем гра́де Москве́ и оби́тели:/ в де́нь пра́здника Пресвяты́я Богоро́дицы обрето́шася и прояви́шася чуде́сная явле́ния/ от многочуде́сных моще́й твои́х о́троку кня́жеску,/ о забве́нии честна́го телесе́ твоего́,/ его́же ра́ди превозно́сим Го́спода во ве́ки.
Де́нь Госпо́день всегда́ пред очи́ма зря,/ и всегда́ во уме́ свое́м держа́, кто в ны́нешнем житии́ не у́зрит сме́рти,/ и богоуго́дно и смиренному́дренно пожи́в, с ми́ром к Бо́гу оты́де,/ Его́же превозно́сим, Го́спода, во ве́ки.
В де́нь вше́ствия твоего́ на Небеса́ ко Го́споду Бо́гу, благове́рный кня́же Дании́ле,/ Арха́нгели и А́нгели, Херуви́ми и Серафи́ми/ и вси святи́и, от ве́ка Бо́гу угоди́вшии, неизрече́нною ра́достию тебе́ срето́ша,/ и мы, гре́шнии, про́сим у тебе́ ми́лости:/ изба́ви нас от всех скорбе́й/ и не лиши́ нас душеспасе́ннаго исполне́ния.
Богоро́дичен: О Влады́чице, немо́лчно Тебе́, Ма́терь Бо́жию,/ пою́т велегла́сно Арха́нгели и А́нгели, и вси ро́ди челове́честии покланя́ются,/ пода́й, Де́во, избы́ти Тобо́ю тле́нное существо́./ Ра́дуйся, Обра́дованная, Госпо́дь с Тобо́ю,/ Его́же превозно́сим, Го́спода, во ве́ки.
Ин
Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.
Струи́ происхо́дят от ра́ки твое́й, блаже́нне кня́же Дании́ле, исцеле́ний вся́ких,/ и омыва́ют скве́рну страсте́й, и гное́ний лю́тых очища́ют всех ве́рных сердца́,/ любо́вию чту́щих па́мять твою́, пресла́вне, и вопию́щих:/ Го́спода по́йте и превозноси́те Его́ во ве́ки.
Хвала́ми досто́йны ми воспое́м пресла́внаго чудотво́рца,/ ум и смысл да́руй ми, Христе́ Бо́же,/ я́ко да пою́, ра́дуяся, па́мять его́, вопия́:/ Го́спода по́йте и превозноси́те Его́ во ве́ки.
Де́нь спасе́нию, пра́здник весе́лия наста́,/ стеце́мся, ве́рнии, очи́стивше вку́пе ду́ши и телеса́./ Се бо нас призыва́ет кня́зь Дании́л Боже́ственный, вопия́:/ Го́спода по́йте и превозноси́те Его́ во ве́ки.
Богоро́дичен: Уврачу́й, Пречи́стая, стра́сти се́рдца моего́,/ ро́ждшая всех Царя́,/ и пра́ведных ча́сти яви́ мя прича́стника, Богоро́дице Де́во,/ Христа́, Сы́на Своего́, умоли́, глаго́лющи:/ Го́спода по́йте и превозноси́те Его́ во ве́ки.
Пе́снь 9
Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.
Сохрани́ от бед, благове́рный и преподо́бный кня́же Дании́ле,/ принося́щаго ти сию́ ма́лую мольбу́,/ и от пото́па страсте́й, и вся́каго наве́та злотво́рных челове́к.
Просвети́лся еси́, благове́рный кня́же Дании́ле, я́ко со́лнце, свои́ми чудесы́,/ подава́я всем исцеле́ния, благи́м и гре́шным, невозвра́тно.
Дерзну́х многогре́шный аз и недосто́йный/ сие́ написа́ние написа́ти тебе́, благове́рный кня́же Дании́ле,/ приими́ с ми́лостию и покры́й мя неистощи́мыми свои́ми щедро́тами.
Богоро́дичен: Безнача́льнаго Роди́теля Собезнача́льну Сы́ну Ма́ти всекра́сная и избра́нная, Пречи́стая Отрокови́це Мари́е,/ пою́щих Тя возвесели́, и ма́лое сие́ моле́ние Сы́ну Своему́ и Бо́гу на́шему пропове́ждь,/ и от вся́ких бед свободи́, и не лиши́ мене́ зре́ния Сы́на Твоего́ и Бо́га на́шего,/ на Стра́шнем же Суде́ ста́ти одесну́ю страну́ сподо́би/ и не отве́ржи мене́ от Престо́ла Его́ Бо́жия.
Ин
Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная;/ и ны́не на нас напа́стей свире́пеющую угаси́ти мо́лимся пе́щь,/ да Тя, Богоро́дице,/ непреста́нно велича́ем.
Яви́ся вели́к щит и вели́кая кре́пость земли́ Росси́йстей Блаже́нный кня́зь Дании́л,/ правосла́вным лю́дем похвале́ние во всех язы́цех,/ ны́не мо́лим тя сохрани́ти страну́ Росси́йскую от ва́рварскаго нахожде́ния,/ и от плене́ния иноплеме́нных, и от междоусо́бныя бра́ни, и от вся́каго зла.
Красе́н душе́ю и те́лом и благоче́стием сия́я,/ сла́вне блаже́нне кня́же Дании́ле,/ Боже́ственнаго испо́лнь ра́зума и прему́дрости,/ орга́н Свята́го Ду́ха был еси́,/ по сме́рти к безсме́ртней жи́зни и неконча́емому Блаже́нству прише́л еси́, ра́дуяся.
Моско́встии наро́ди, прииди́те, собери́теся вси в пречестну́ю оби́тель/ ко многоцеле́бней ра́це святы́х моще́й пресла́внаго но́ваго чудотво́рца, благове́рнаго кня́зя Дании́ла,/ со слеза́ми велегла́сно воззови́те:/ о уго́дниче Бо́жий, преподо́бне кня́же Дании́ле,/ изба́ви гра́ды, оби́тель и лю́ди своя́,/ не дай же достоя́ния твоего́ ро́ду исма́ильтескому/ и от междоусо́бныя бра́ни и от вся́каго зла сохрани́,/ да до́лжно воспое́м ми́лость твою́, святы́й.
Богоро́дичен: Неизрече́нно та́инство:/ Та бо престо́л Херуви́мский и светоно́сный черто́г показа́ся Вседержи́теля Христа́ Бо́га,/ сего́ ра́ди возопие́м к Ней умиле́нным гла́сом:/ о Пресвята́я Госпоже́ Богоро́дице,/ от вся́ких бед и скорбе́й нас сохрани́ и ве́чныя изба́ви му́ки,/ Ю́же благоче́стно, я́ко Богоро́дицу, велича́ем.
Свети́лен.
Подо́бен: Посети́л ны:
Посети́ ны свы́ше дне́сь, преподо́бне кня́же,/ и пребоже́ственным све́том озари́ се́рдца пою́щих тя,/ и́бо твое́ есмы́ при́сное ста́до.
Сла́ва: Всели́ся в се́рдце твое́, благове́рный кня́же Дании́ле, ко́рень благ/ и расплоди́ в тебе́ неоску́дныя к Бо́гу многоподви́жныя труды́ и добро́ту ко всем челове́ком,/ моли́ о душа́х на́ших.
И ны́не, Богоро́дичен:
Просла́вим Ма́терь Бо́га на́шего:/ пре́жде бо рождества́ пребы́сть Де́ва Ма́ти Сы́на Бо́жия/ и по рождестве́ па́ки Де́ва яви́ся./ Ра́дуйся, Обра́дованная, Госпо́дь с Тобо́ю.
На хвали́тех стихи́ры, глас 6. Самогла́сен:
Кре́пко во уме́ свое́м держа́,/ благове́рный кня́же Дании́ле,/ Бо́жие сло́во, в Ева́нгелии глаго́лющее:/ кто хо́щет бы́ти ста́рей, да бу́дет всем слуга́, –/ и по сему́ словеси́ житие́ соверши́л еси́,/ при животе́ свое́м неукло́нно к Бо́гу труды́/ и доброде́тели ко всем челове́ком име́л еси́,/ те́мже и по сме́рти во Ца́рствии Небе́снем со А́нгелы лику́еши,/ моли́ся Христу́ Бо́гу о душа́х на́ших.
Ра́дуйся, благове́рный кня́же Дании́ле,/ я́ко со́лнце, сия́еши свои́ми чудесы́ во всей Росси́и,/ ра́дуйся, я́ко цвет прекра́сный, процве́л еси́/ в ца́рствующем гра́де Москве́ свои́ми щедро́тами,/ моли́ся Христу́ Бо́гу о душа́х на́ших.
Ра́дуйся, Бо́гом избра́нный благочести́вый кня́же Дании́ле,/ правосла́вным христиа́ном похвало́,/ и во́ином соблюде́ние, и ва́рваром побежде́ние,/ и в беда́х необори́мый помо́щниче,/ и гра́ду Москве́ утвержде́ние.
Бога́тство неизрече́нное обре́л еси́,/ ца́рствующий гра́де Москва́:/ вои́стинну еси́ бога́т,/ таковы́й бо свети́льник в тебе́ возсия́,/ благове́рный кня́зь Дании́л,/ засту́пник тве́рдый яви́ся гра́ду своему́/ и мо́лится Христу́ Бо́гу о чту́щих святу́ю па́мять его́.
Сла́ва, глас 8:
Прииди́те, Росси́йстии вси правосла́внии лю́дие,/ бога́тии и ни́щии,/ в пречестну́ю оби́тель благове́рнаго и преподо́бнаго кня́зя Дании́ла,/ той нас свободи́т от рук неве́рных язы́к и злотво́рных челове́к,/ и из рук ненави́дящих нас моли́твами его́ свободи́мся.
И ны́не, глас то́йже:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
Вели́кое славосло́вие. Ектении́. И отпу́ст.
НА ЛИТУРГИ́И
Блаже́нны обои́х кано́нов, пе́сни 3-я и 6-я. Проки́мен, глас 7: Честна́ пред Го́сподем/ сме́рть преподо́бных его́. Стих: Что возда́м Го́сподеви о всех, я́же воздаде́ ми? Апо́стол к Кори́нфяном, зача́ло 181. Аллилу́ия, глас 6: Блаже́н муж, боя́йся Го́спода, в за́поведех его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:
На трапе́зе бра́тии утеше́ние ве́лие.
Стихи́ры и кано́ны благове́рному и вели́кому кня́зю Дании́лу сотворе́ны по благослове́нию Святе́йшаго И́ова, Патриа́рха Моско́вскаго и всея́ Росси́и, тща́нием и труды́ Симео́на Рома́новича Олфе́рьева да и́нока Се́ргия, честны́я оби́тели Пресвяты́я Тро́ицы Дании́лова монастыря́ Переясла́вля Зале́сскаго.
Моли́тва
Це́ркве Христо́вы похвало́ высо́кая, гра́да Москвы́ стено́ необори́мая, держа́вы Росси́йския Боже́ственное утвержде́ние, преподо́бне кня́же Дании́ле! К ра́це моще́й твои́х притека́юще, усе́рдно мо́лим тя: при́зри на нас, па́мять твою́ воспева́ющих и с ве́рою под кров моли́тв твои́х прибега́ющих. Проле́й те́плое твое́ хода́тайство ко Спа́су всех, я́ко да утверди́т ми́ром страну́ на́шу, гра́ды и ве́си ея́ и оби́тель сию́ до́бре да сохрани́т, благоче́стие и любо́вь в лю́дех твои́х насажда́я, зло́бу же, междоусобие и нра́вов развраще́ние искореня́я; всем же нам вся блага́я ко вре́менному животу́ и ве́чному спасе́нию да́руй моли́твами твои́ми, я́ко да прославля́ем ди́внаго во святы́х Свои́х Христа́ Бо́га на́шего во ве́ки веко́в. Ами́нь.
И́на моли́тва
О уго́дниче Бо́жий, святы́й благове́рный кня́же Дании́ле, са́да Христо́ва благово́нный цве́те, не́ба церко́внаго кро́ткая звездо́, земли́ на́шея небе́сный уме́, гра́да Москвы́ и держа́вы на́шея му́дрый зда́телю! Те́плый к Бо́гу моли́твенниче, ско́рый в по́мощи, ми́лостивый в ну́ждах, к тебе́ припа́даем и тебе́ мо́лимся: бу́ди предста́тель наш пред Престо́лом Бо́жия сла́вы неусы́пный. Собери́ нас друг ко дру́гу, да печа́ли бли́жняго своего́ ки́йждо любо́вию нелицеме́рною приобща́ется. Онебеси́ ум наш, да, и́го тя́жкое земны́х попече́ний отве́ргше, бре́мя ле́гкое Христо́ва Ева́нгелия возлю́бим. Откры́й о́чи на́ши, да у́зрим нетле́нную красоту́ Госпо́дню и да не отчужде́ни бу́дем жи́зни Бо́жия. Ти́хость Ду́ха Бо́жия да соблюде́т се́рдце на́ше. Весна́ покая́ния да украси́т дела́ на́ша.
Кня́же ми́лостивый и ще́дрый, сохрани́ страну́ на́шу, град твой и зде моля́щихся тебе́ от вся́кия напа́сти, от враг ви́димых и неви́димых, от губи́тельства и гла́да, от междоусо́бныя ра́спри и внеза́пныя сме́рти. Отве́рзи нам две́ри милосе́рдия Бо́жия и изба́ви нас от вся́каго зла. Под кре́пкий покро́в благосты́ни твоея́ прибега́юще, мо́лим: бу́ди нам ти́хое приста́нище в ско́рбех. Остени́ нас моли́твами твои́ми. Соблюди́ нас от паде́ний грехо́вных и заблужде́ний, да се́рдцем сокруше́нным, ду́хом смире́нным в печа́ли и ра́дости вы́ну зове́м: Го́споди, предста́тельством преподо́бнаго Твоего́ поми́луй нас. Ами́нь.
Святой благоверный князь Даниил Московский, младший сын благоверного князя Александра Невского, скончался 4 марта 1303 года. Перед кончиной, следуя благочестивому примеру отца, принял иноческий чин и схиму и по глубокому смирению завещал совершить погребение на братском кладбище основанной им обители в честь преподобного Даниила Столпника, впоследствии получившей название Московского Данилова монастыря. Честные мощи святого князя Даниила находились под спудом почти 350 лет. В течение этого времени благоверный князь неоднократно напоминал о себе и о месте своего погребения. Так, во времена великого князя Иоанна III (1462–1505), святой Даниил явился придворному юноше и повелел сказать великому князю следующее: «Рцы великому князю Иоанну: се убо сам всячески себе утешаеши, мене же почто забвению предал еси, но обаче аще он забвена мя имать, Бог же мой несть мене забыл никогдаже». Узнав об этом, Иоанн III повелел служить соборные панихиды, раздавать милостыню и устраивать трапезы на помин своих усопших.
При сыне Иоанна III великом князе Московском Василии Иоанновиче (1505–1533) произошло событие, описанное в Степенной книге. Однажды великий князь с многочисленной свитой, в которой находился князь Иоанн Михайлович Шуйский, был в Даниловом монастыре и проезжал недалеко от места захоронения благоверного князя Даниила. Шуйскому нужно было сесть на коня, и он решил сделать это с надгробного камня на могиле святого Даниила. Оказавшийся поблизости некий благочестивый христианин сказал Шуйскому: «Господине княже! Не дерзай с камени сего всести на конь свой. Ведый буди, яко лежит ту великий князь Даниил». Гордый же князь не послушал совета и, встав на камень, хотел сесть на коня. Неожиданно конь вздыбился и упал мертвым на землю, подмяв седока, едва оставшегося в живых после падения.
В царствование Иоанна Васильевича Грозного (1533–1584) на могиле князя Даниила получил исцеление умирающий сын коломенского купца. Иоанн Грозный установил ежегодно совершать крестный ход к могиле благоверного князя Даниила и служить о нем панихиды. Он же издал указ о построении в запустевшем к тому времени монастыре двухэтажной каменной церкви, братских келлий, пополнении обители иноками и устройстве монашеского общежития.
В 1652 году царь Алексей Михайлович (1645–1676), по повелению явившегося ему благоверного князя Даниила, совершил торжественное открытие мощей святого. 30 августа Патриарх Никон с собором епископов и царь Алексей Михайлович с придворными открыли могилу благоверного князя и обрели честные мощи нетленными. В то же время среди многочисленного народа произошло немало чудесных исцелений. Святые мощи были торжественно перенесены в монастырский храм в честь святых отцов Семи Вселенских Соборов и положены в специально приготовленной деревянной гробнице напротив правого клироса. Тогда же благоверный князь Даниил был причислен к лику святых и ему было установлено общецерковное празднование: 4 марта – в день Блаженной кончины и 30 августа – в день обретения нетленных мощей. В 1763 году святые мощи были переставлены в арку у левого клироса. В 1812 году серебряный оклад гробницы, устроенный на пожертвования князя Феодора Ивановича Голицына, был похищен французами. В 1817 году святые мощи благоверного князя Даниила были переложены́ в новую серебряную гробницу. У святых мощей, на восточной стене арки, была установлена икона благоверного князя Даниила, который был написан в полный рост в иноческом одеянии на доске, бывшей прежде верхней крышкой деревянной гробницы. В изголовье было устроено в стене арки углубление для иеромонаха, служившего заказной молебен благоверному князю.
На протяжении своей многовековой истории Даниловский монастырь претерпел немало испытаний. Так, еще в XIV веке братия монастыря, страдая от набегов татар, переселилась вместе с игуменом вначале в Спасский монастырь в Кремле, затем в Новоспасский. В Смутное время (начало XVII в.) обитель разорили поляки, а в 1812 году – французы, унесшие с собой многие ее реликвии.
В конце XVII века Даниловский монастырь был сильно укреплен и обнесен кирпичной стеной с семью башнями. Расцвет обители относится ко второй половине XVIII – первой трети XIX века. В то время были построены новые храмы, воздвигнута колокольня, расширена территория монастыря. Митрополит Московский Платон (Левшин) в 1801 году составил житие и службу святому князю Даниилу. Ранее, в 1761 году, была составлена первая служба святому князю Даниилу настоятелем монастыря архимандритом Константином. В 1765 году митрополит Крутицкий Амвросий издал распоряжение: на богослужебных отпустах в храмах Москвы поминать и имя святого благоверного князя Даниила.
Самой значительной постройкой в Даниловском монастыре стал храм во Имя Пресвятой Троицы (1833, архитектор Е. Д. Тюрин). Над святыми вратами обители был воздвигнут храм во имя преподобного Симеона Столпника со звонницей, колокола которой славились особым тональным подбором (самый большой колокол весил 720 пудов). Наименование этого храма в сочетании с другим, первым храмом обители во имя преподобного Даниила Столпника, дает основание заключить об особом почитании подвига столпничества на Руси еще с древних времен. Не случайно этот вид подвижничества получил распространение на Руси в XV и XVI веках. Даниловский монастырь с самого начала своего существования стал одним из средоточий Русской духовности. Он славился строгостью иноческого жития, уставностью богослужения и церковного пения, особым благолепием храмов. Святая обитель хранила древние традиции монастыря, напоминавшие ей о многочисленных благодеяниях, какие являл угодник Божий благоверный князь Даниил братии, граду Москве и всему Отечеству. Так, в день памяти святого Даниила из соборов Кремля совершался крестный ход в Даниловский монастырь в ознаменование исторической связи и преемственности между святыми местами столицы. Чтимыми иконами в Даниловском монастыре были икона Божией Матери, именуемая «Троеручица», и образ преподобного Иоанна Кассиана Римлянина, пред которыми совершались торжественные молебные пения. Особую честь и прославление воздавали в обители самому ее основателю – благоверному князю Даниилу, перед мощами которого совершался акафист каждое воскресение.
Даниловский монастырь славился замечательной библиотекой и богатой ризницей, изданием духовной литературы. При монастыре существовало церковно-приходское училище, которое с 1892 года пользовалось особой известностью. В 20-е годы текущего столетия в обители совершали священнослужение архимандриты Георгий (Лавров), Иоаким, наместник монастыря Поликарп. Светлую память оставил в обители ее настоятель епископ Волоколамский Феодор (Поздеевский), бывший ректор Московской Духовной Академии (незадолго до кончины он принял схиму с именем Даниил – в честь святого Даниила Московского). 30 августа 1917 года, в день памяти святого князя Даниила, мощи его были перенесены в храм Святой Троицы. Чин перенесения совершили митрополит Московский Тихон (впоследствии Святейший Патриарх) и настоятель монастыря епископ Феодор.
Даниловский монастырь с давнего времени был усыпальницей не только для монашеской братии. Здесь были похоронены Н. В. Гоголь, Н. М. Языков, Ю. Н. Венелин, А. С. Хомяков, Н. Г. Рубинштейн, Ю. Ф. Самарин и другие. (В 30-х годах нашего века останки Н. В. Гоголя, А. С. Хомякова, Н. М. Языкова и Н. Г. Рубинштейна были перенесены на Новодевичье кладбище.)
Церковное и историческое наследие Даниловского монастыря неоспоримо велико, свято и назидательно для православных людей. Оно связано с именем святого ктитора монастыря – благоверного великого князя Московского Даниила, деятельность которого составила в истории замечательную эпоху.
17 мая 1983 года решением правительства комплекс Даниловского монастыря и прилегающая к нему территория с храмом Воскресения словущего переданы Русской Православной Церкви. Святейший Патриарх Московский и всея Руси Пимен и Священный Синод Русской Православной Церкви постановили создать в древней обители духовный и административный центр Московского Патриархата. Одновременно была создана комиссия по восстановлению и реставрации Даниловской обители. На территории монастыря в течение нескольких лет были построены и реконструированы здания резиденции Святейшего Патриарха, настоятельские покои, братские келлии, бывшая епархиальная больница и другие сооружения. С особой тщательностью восстанавливались Троицкий собор, храм святых отцов Семи Вселенских Соборов, надвратная колокольня. В росписи иконостасов участвовал известный современный иконописец, насельник Троице-Сергиевой Лавры (ныне – Успенского Псково-Печерского монастыря) игумен Зинон. Обновленная святая обитель, стоящая у истоков единого Русского государства, стала достойны м памятником юбилея 1000-летия Крещения Руси, празднование которого отметила Русская Православная Церковь в 1988 году.
Литература:
1. Амфилохий, архимандрит. Летописи и другие сказания о святом благоверном великом князе Данииле Александровиче. М., 1873.
2. Благоверный князь Даниил Московский (К 600-летию со времени его Блаженной кончины). – Церковные ведомости, 1903, № 3.
3. Вольгин А. Святой благоверный Даниил, великий князь Московский. – ЖМП, 1977, № 10, с. 71–73.
4. Дионисий, архимандрит. Даниловский мужской монастырь. Краткий очерк. М., 1898.
5. Дионисий, архимандрит. О святом благоверном Данииле – великом князе Московском. М., 1898.
6. О передаче Московскому Патриархату Даниловского монастыря в Москве. – Журнал Московской Патриархии, 1983, № 8, с. 2.
Преподо́бнаго Алекса́ндра Сви́рскаго
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 4.
Подо́бен: Я́ко до́бля:
Воздержа́нием стра́сть плотску́ю умертви́л еси́/ и ду́шу оживи́л еси́ посто́м/ и доброде́телей свяще́нием./ Отсю́ду же яви́лся еси́, я́ко жив,/ и по кончи́не вои́стинну:/ я́коже бо сон, вмени́ся тебе́ сме́рть,/ к Бо́гу преста́вльшуся/ и в ру́це ду́шу прело́жшу ему́,/ Алекса́ндре всесла́вне.
Страсте́й успи́л еси́ жела́ния, Алекса́ндре,/ бде́ние всено́щное стяжа́в,/ вели́кое послуша́ние, смире́ние,/ поуче́ние же Боже́ственных писа́ний,/ и се́рдце чи́сто, и ум несмуще́н./ Те́мже был еси́ прия́телище Ду́ха Свята́го,/ заря́ми чуде́с облиста́ющаго тя всегда́.
Мирско́е пристра́стие до конца́ возненави́дел еси́/ и безстра́стия сосу́д был еси́,/ любому́дрия же, сла́вне, де́тельным восхожде́нием/ возвы́сился еси́ к самому́ жела́нию коне́чному,/ узре́л еси́ та́йны ви́дением неви́димых,/ недомы́сленныя Боже́ственныя добро́ты,/ Алекса́ндре всему́дре.
Сла́ва, глас то́йже:
Духо́вною благода́тию отъе́млеши неду́ги страсте́й/ и отго́ниши ду́хи лука́выя,/ исцеля́еши стра́сти неисце́льныя,/ Алекса́ндре всесла́вне,/ и просвеща́еши ве́рныя блиста́нии чуде́с твои́х./ Те́мже дне́сь гла́сы немо́лчными воспева́ем/ пресве́тлую и светоно́сную па́мять твою́.
И ны́не, Богоро́дичен: Изба́ви нас от нужд на́ших:
На стихо́вне стихи́ры, глас 4.
Подо́бен: Дал еси́ зна́мение:
Све́тло возсия́, я́ко со́лнце, преподо́бне,/ всепра́зднственная па́мять твоя́,/ заря́ми облиста́ющи/ твои́х доброде́тельных дея́ний, всеблаже́нне,/ и озаря́ющи ве́рных мы́сли/ сия́нием чуде́с твои́х./ сию́ у́бо пра́зднующе, ра́достно тя почита́ем,/ мона́шествующих похвало́ и ве́рных утвержде́ние.
Стих: Честна́ пред Го́сподем/ сме́рть преподо́бных его́.
До́лу лега́нием и воста́нием,/ и слез тече́нии оскорбля́емь,/ и всено́щными стоя́нии изнуря́емь,/ мона́хов был еси́ о́браз ве́лий,/ и о́бщее пра́вило, и похвалы́ вене́ц:/ всяк бо вид доброде́телей испра́вив,/ Вы́шняго Ца́рствия насле́дник яви́лся еси́,/ прему́дре, воздержа́нием.
Стих: Блаже́н муж, боя́йся Го́спода,/ в за́поведех его́ восхо́щет зело́.
Чу́до па́че ума́/ во успе́нии твое́м бы́сть,/ богоукраше́нно чуде́сне,/ внегда́ ти собо́р мона́шествующих, о́тче, предста́/ и внеза́пу, я́ко со́лнце, му́дре, лице́ твое́ облиста́,/ па́че со́лнечных луч возсия́вши,/ явля́я блиста́ющую твоея́ ду́ши чистоту́/ и уверя́я всех, какову́ кончи́ну,/ блаже́нне, получи́л еси́.
Сла́ва, глас 6:
Я́ко Боже́ственнаго па́стыря и учи́теля/ тя вси восхва́лим дне́сь:/ но́во бо нам, я́ко многосве́тлая звезда́,/ в Росси́йстей стране́ просия́в,/ чудесы́ твои́ми ве́сь мир удиви́л еси́,/ в пусты́нях же непроходи́мых му́жески подвиза́вся,/ и, кре́пко терпя́, врага́ победи́л еси́ до конца́./ Те́мже христоимени́тое твое́ ста́до упа́сл еси́/ и храм Го́сподеви воздви́гл еси́ любо́вию,/ Алекса́ндре прему́дре,/ и я́ко вои́стинну Боже́ственныя благода́ти сподо́бився/ и в Небеса́ всели́вся, зри́ши Святу́ю Тро́ицу,/ Ю́же моли́ спасти́ся душа́м на́шим.
И ны́не, Богоро́дичен: Богоро́дице, Ты еси́ лоза́ и́стинная:
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
Блаже́н, муж: 1-й антифо́н. На Го́споди, воззва́х: стихи́ры на 8, глас 6.
Подо́бен: Всю отложи́вше:
Вседержи́тельно́ю десни́цею укрепля́емь,/ вся отве́рг страсте́й безслове́сия,/ пло́ть ду́ху покори́л еси́/ и был еси́ доброде́телей пра́вило,/ мона́хов утвержде́ние,/ по́стников о́браз, преподо́бных удобре́ние./ И ны́не неизрече́нныя добро́ты зри́ши Нераздели́мыя Тро́ицы,/ Алекса́ндре прему́дре,/ пита́лся при́сно Боже́ственными добро́тами на Небесе́х ду́хом./ Тем, соше́дшеся,/ пе́нии духо́вными,/ в пе́снех твою́ честну́ю и всепра́зднственную па́мять пра́зднуем.
Стра́стная взыгра́ния/ воздержа́нием вся отве́ргл еси́/ и, многомяте́жное пло́ти волне́ние укроти́в,/ дыха́ния стра́стнаго пребы́л еси́ непрекло́нен,/ я́ко столп, укрепля́емь/ духо́вными броня́ми, умо́м до́блественным,/ Алекса́ндре прему́дре./ И ны́не, Боже́ственнаго получи́л еси́ вои́стинну/ виде́ния све́тлости Святы́я Тро́ицы,/ к Не́йже жела́я, блаже́нне, преста́вился еси́,/ наслажда́лся несконча́емый добро́ты,/ дарова́нием обожа́емь.
Подо́бяся Илии́ и Иоа́нну, свети́льнику Све́та,/ возлюби́в молча́ти в ме́стех те́мных/ и в пусты́нях непрохо́дных,/ восхожде́нию всегда́ поуча́лся Боже́ственному/ и преспева́я доброде́телей путе́м./ Те́мже дости́гл еси́ жела́ние кра́йнее,/ Алекса́ндре прему́дре,/ и, ра́дуяся, предстои́ши Трисия́нному Святы́я Тро́ицы Све́ту,/ от него́же нехода́тайственне Боже́ственныя прие́мля зари́./ Те́мже со дерзнове́нием моли́ся о душа́х на́ших.
Преподо́бне и Богоно́се о́тче наш Алекса́ндре,/ любве́ ра́ди Христо́вы вся оста́вил еси́/ и, в пусты́ню всели́вся,/ ника́коже устраши́лся еси́ неви́димых враг боре́ния,/ а́ще бо и мно́гажды прише́дше на тя,/ мечта́нии привиде́ния ти показу́юще,/ ты же моли́твами твои́ми,/ я́ко прах, тех без ве́сти твори́л еси́./ О, непоро́чныя твоея ́души́/ и кре́пкаго терпе́ния твоего́!/ Христа́ непреста́нно моли́/ спасти́ся душа́м на́шим.
Сла́ва, глас то́йже:
Я́ко боже́ственна жи́знь твоя́,/ та́кожде и всеосвяще́нный твой исхо́д,/ преблаже́нне о́тче наш Алекса́ндре./ Дне́сь бо лику́юще/ в па́мять преставле́ния твоего́,/ всея́ страны́ мно́жества наро́да сте́кшеся,/ я́ко ви́деша тя, без дыха́ния на одре́ лежа́ща,/ гла́сы велегла́сными вопия́ху:/ да́ждь нам коне́чное сло́во утеше́ния,/ рабо́м твои́м, свя́те,/ и научи́ ны, ча́да твоя́, о́тче,/ я́же уще́дрил еси́, я́ко оте́ц,/ ка́ко тя по достоя́нию похвали́ти возмо́жем?/ Пои́стинне я́ко ми́лостив и щедр быв, преподо́бне./ Оба́че а́ще и зде тя гроб покрыва́ет,/ но страна́ тя Росси́йская вся бога́тна и́мать предста́теля/ и моли́твенника к Святе́й Тро́ице,/ Ю́же непреста́нно моли́ о душа́х на́ших.
И ны́не, Богоро́дичен: Кто Тебе́ не ублажи́т:
Вход. Проки́мен дне. И чте́ния три преподо́бническая (зри день 28-й).
На лити́и стихи́ры, глас 1. Самогла́сны:
Прииди́те, вси концы́ земли́,/ псалмы́ и пе́сньми незаходи́маго све́та,/ вели́каго свети́льника вселе́нней,/ воспое́м вси Алекса́ндра,/ па́че бо со́лнца возсия́ в тверды́ни ве́ры/ и ве́рных собра́ние к доброде́тели наста́ви:/ о́во у́бо Богодохнове́нными уче́нии/ и спаси́тельными глаго́лы в вожделе́нии,/ я́же незави́стно и оби́льно устны́ источа́ше,/ о́во же де́телию чу́дною, равноа́нгельным житие́м/ к ре́вности привлача́я,/ и обоя́ – житие́ и сло́во пресла́вно,/ я́коже во́ждь изря́ден, богоподо́бно показу́я./ Того́ моли́твами, Христе́ Бо́же наш,/ Твое́ ста́до соблюди́/ и правосла́вных ве́ру утверди́, я́ко Человеколю́бец.
Прииди́те, мона́хов мно́жества, дне́сь,/ Христо́ва рачи́теля благоче́стно восхва́лим,/ и́стиннаго ученика́ Спа́сова/ и красоту́ и хвалу́ единообра́зных всех и наста́вников,/ освяще́ннаго от младе́нства Го́сподеви,/ ли́цы оте́ц, соше́дшеся, ублажи́м./ Сей бо жела́ние Боже́ственное в себе́ прии́м,/ мирску́ю у́бо оста́ви пре́лесть,/ взят же яре́м Христо́в на ра́мо/ и полки́ бесо́в победи́ му́жески,/ показа́в нам де́тельно Боже́ственныя любве́ изря́дный пу́ть,/ и́бо и сия́ прете́к во тща́нии,/ пости́же свет и́стинный Тро́ицы Вседе́тельныя./ О, чудесе́ ужа́снаго и ве́щи богоподо́бныя!/ Я́ко земны́й естество́м ра́вен бы́сть мы́сленным существо́м,/ сла́ву и че́сть Бо́жию восприе́мля,/ и моли́твенник нам быва́ет,/ я́ко да улучи́м ве́чных благ в Де́нь Су́дный.
Я́ко Боже́ственная и светоно́сная/ наста́ па́мять преставле́ния твоего́, о́тче,/ я́ко удиви́ мы́сленных/ и ужаси́ челове́ки, пречу́дне,/ труды́ воздержа́ния твоего́ жития́,/ я́ко безпло́тен отню́д,/ во пло́ти стра́стне враги́ неви́димыя посрами́л еси́./ Вся у́бо страна́ оте́чества твоего́ пое́т тебе́ благоче́стно,/ изря́днее же – твое́ честно́е ста́до,/ све́тлость твои́х боле́зней и трудо́в, е́же показа́л еси́,/ я́ко град в пусты́ни прекра́сен,/ и́же приста́нище собо́ром мона́шеским богоподо́бно,/ и́же, я́ко оде́ждами многоме́стными твои́ми, красу́ется чудесы́,/ и до́блественными страда́нии по́двиг твои́х, Алекса́ндре,/ и моли́твами твои́ми, притека́юще ко Христу́,/ иму́щему ве́лию и бога́тую ми́лость.
Сла́ва, глас 5:
Ра́дуется дне́сь вся Росси́йская страна́,/ Вели́кий же Но́вград да весели́тся, торжеству́я,/ я́ко име́я в преде́лех о́бласти свое́й неистощи́мое сокро́вище./ Ве́рных же мно́жества Росси́йския земли́, сте́кшеся дне́сь,/ востру́бим трубо́ю пе́сней:/ благода́ть бо Ду́ха, вся́кия тру́бы боголе́пнейши,/ всех созыва́ет к пе́нию Богоно́снаго отца́./ Мона́си и прости́и да чудя́тся/ всех Царя́ и́скреннему рабу́,/ и́же мироде́ржца нача́ла и вла́сти тьмы́/ Ду́ха Боже́ственнаго все́ми ору́жии победи́./ Па́стыри и учи́тели/ изря́днаго вои́стинну пра́вила же и о́браза па́стве да восхва́лят,/ и́же в доброде́телей повеле́нии све́тлаго,/ и в ве́ре благоразу́мнаго,/ и в виде́нии высо́каго, в дея́ниих Богому́драго,/ во уче́ниих же пи́щи пото́ка,/ наста́вника заблу́ждшим,/ изба́вителя плене́нным/ и всех боля́щих исцеле́ние,/ оте́честву своему́ вели́кое украше́ние,/ похваля́юще, вси рцем:/ о́тче преподо́бне Алекса́ндре,/ предста́ни твои́м рабо́м всегда́/ и спаси́ ста́до твое́ моли́твами твои́ми.
И ны́не, Богоро́дичен, глас то́йже:
Ду́ха Боже́ственнаго благода́тию, ве́рнии,/ дне́сь востру́бим трубо́ю пе́сней:/ прини́кнувши бо свы́ше, Всецари́ца Ма́ти Де́ва/ благослове́нием венчава́ет воспева́ющих Ю./ Мона́си и прости́и да стеку́тся/ и Цари́це воспле́щут в пе́снех,/ Царя́ ро́ждшей,/ И́же сме́ртию одержи́мы пре́жде отпусти́ти благоизво́ливша./ Па́стырие и учи́телие,/ до́браго Па́стыря Пречи́стую Ма́терь, соше́дшеся, восхва́лим,/ свети́льника светоза́рнаго,/ светоно́снаго о́блака,/ небе́с ши́ршую, одушевле́нный ковче́г/ и огнеобра́зный Влады́чень престо́л,/ манноприе́мную злату́ю ста́мну,/ затворе́нную Сло́ва две́рь,/ всем христиа́ном прибе́жище,/ пе́сньми богогла́сными похваля́юще, си́це рцем:/ Пала́то Сло́ва,/ сподо́би смире́нных нас Небе́снаго Ца́рствия,/ вся бо возмо́жна су́ть хода́тайству Твоему́.
На стихо́вне стихи́ры, глас 5.
Подо́бен: Ра́дуйся:
Ра́дуйся, а́нгельским бесе́дуя ликостоя́нием,/ Алекса́ндре преподо́бне:/ житие́ бо твое́, о́тче,/ на земли́ доброде́тельно стяжа́в, пожи́л еси́./ Показа́лся еси́ чистоты́ нескве́рное зерца́ло вои́стинну,/ лучеза́рный восприе́мля мо́лнии Ду́ха Свята́го всесла́вно./ Отону́дуже озаря́емь,/ зрел еси́ бу́дущая, вся предглаго́ля,/ от Боже́ственнаго светоявле́ния науча́емь Христа́,/ Его́же моли́ душа́м на́шим пода́ти ве́лию ми́лость.
Стих: Честна́ пред Го́сподем/ сме́рть преподо́бных его́.
Ра́дуйся, по́стником споспе́шник быв/ и непобеди́м побо́рник:/ страсте́й бо отсека́я ко́рень и бесо́в стремле́ния,/ предста́в му́жески, Алекса́ндре,/ тех посрами́л еси́ душепа́губную пре́лесть,/ Креста́ же Спа́сова де́йство и непобеди́мую яви́л еси́ си́лу,/ е́юже и препоя́сався,/ победи́л еси́ вся, отметающия плотско́е явле́ние Христо́во./ Его́же моли́ душа́м на́шим пода́ти ве́лию ми́лость.
Стих: Блаже́н муж, боя́йся Го́спода,/ в за́поведех его́ восхо́щет зело́.
Столп светови́ден, доброде́телию утвержде́н,/ о́блак све́тел, и́же во оте́честве твое́м яви́лся еси́, о́тче,/ к Небеси́ от земли́ Бо́га зря́щих предводя́;/ кре́стною па́лицею страсте́й пресе́к мо́ре/ и, мы́сленнаго Амали́ка отри́нув,/ непреткнове́нный Небе́сный восхо́д обре́л еси́,/ Богоблаже́нне Алекса́ндре,/ и жре́бий непремину́ющ,/ со Безпло́тными предстоя́ Престо́лу Христо́ву, ра́дуяся,/ Его́же моли́ душа́м на́шим пода́ти ве́лию ми́лость.
Сла́ва, глас 6:
Прииди́те, вси концы́ земли́,/ псалмы́ и пе́сньми свяще́нное и честно́е преподо́бнаго торжество́ Алекса́ндра/ дне́сь благоче́стно восхва́лим,/ преподо́бных оте́ц единожи́теля/ и пусты́нолюбную добро́ту воспое́м,/ по́стников украше́ние, исто́чника чуде́с,/ к Бо́гу моли́твенника непосты́дна,/ сте́кшеся, о празднолю́бцы,/ пе́сньми похва́льными воспое́м, глаго́люще:/ ра́дуйся, мона́шескаго жития́ пра́вило,/ о́браз и печа́ть изве́стная./ Ра́дуйся, свети́льниче пресве́тлый,/ озаря́я вся́ку доброде́тель све́тлостьми твоего́ жития́./ Ра́дуйся, в беда́х вели́кое утеше́ние/ и те́плый предста́телю предстоя́щим./ Не преста́й моля́ Христа́ Бо́га о ста́де твое́м и всех ве́рных,/ почита́ющих всечестно́е твое́ успе́ние.
И ны́не, Богоро́дичен: Творе́ц и Изба́витель мой, Пречи́стая:
Тропа́рь, глас 4:
От ю́ности, Богому́дре, жела́нием духо́вным в пусты́ню всели́вся,/ еди́наго Христа́ возжела́л еси́ усе́рдно стопа́м в след ходи́ти./ Те́мже и а́нгельстии чи́ни, зря́ще тя, удиви́шася:/ ка́ко, с пло́тию к неви́димым ко́знем подвиза́вся, прему́дре,/ победи́л еси́ полки́ страсте́й воздержа́нием/ и яви́лся еси́ равноа́нгелен на земли́./ Алекса́ндре преподо́бне,/ моли́ Христа́ Бо́га,/ да спасе́т ду́ши на́ша.
Сла́ва, и ны́не, Богоро́дичен: Е́же от ве́ка утае́нное:
НА У́ТРЕНИ
По 1-й стихоло́гии седа́лен, глас 1.
Подо́бен: Гроб Твой:
Многосве́тлая звезда́ мона́шествующим показа́лся еси́/ и степе́нь изве́стен, воздержа́ния же преде́л,/ пресве́тлое зерца́ло разсужде́ния, преподо́бне, па́мять твою́ ра́достно соверша́ющим./ Разреше́ния проси́ согреше́ний, преблаже́нне, Бо́гу предстоя́.
Сла́ва, и ны́не, Богоро́дичен:
Наста́ви ны на пу́ть покая́ния,/ укло́ншияся при́сно к безпу́тием зол и Преблага́го прогне́вавшия Го́спода,/ Неискусобра́чная Благослове́нная Мари́е, прибе́жище отча́янных челове́ков,/ Бо́жие жили́ще.
По 2-й стихоло́гии седа́лен, глас 3.
Подо́бен: Боже́ственныя ве́ры:
Боже́ственным жела́нием безсме́ртия, Алекса́ндре, одержи́м/ и крест на ра́мо взем, в пусты́ню жела́нием всели́лся еси́,/ иде́же, преподо́бне, Го́сподеви собра́л еси́ ста́до./ Те́мже и моли́твенника тя те́пла стяжа́хом ко Го́споду.
Сла́ва, и ны́не, Богоро́дичен:
Боже́ственная ски́ния была́ еси́ Сло́ва,/ еди́на Пречи́стая Ма́ти Де́во, чистото́ю А́нгелы превозше́дшая,/ па́че всех мене́, пе́рсть бы́вша, оскве́рнена плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.
По полиеле́и седа́лен, глас 8.
Подо́бен: Прему́дрости:
Виде́ние и дея́ние восприи́м, чу́вствия, преподо́бне, украша́я,/ житие́ упра́вил еси́ к Боже́ственным повеле́нием,/ мона́хом бо яви́лся еси́ свети́льник пресве́тел, наставля́я нас к позна́нию./ Те́мже, восхваля́юще тя, велича́ем любо́вию исхо́дную па́мять твою́, Богоно́се Алекса́ндре./ сего́ ра́ди вопие́м ти:/ моли́ Христа́ Бо́га прегреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Небе́сную две́рь и киво́т, пресвяту́ю го́ру,/ све́тлый о́блак воспои́м, неопали́мую купину́, слове́сный рай,/ Е́вы воззва́ние, вселе́нныя всея́ вели́кое сокро́вище,/ я́ко спасе́ние в Ней соде́лася ми́рови и оставле́ние дре́вних согреше́ний./ сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му рождеству́ Твоему́.
Та́же степе́нна, 1-й антифо́н 4-го гла́са. Проки́мен: Честна́ пред Го́сподем/ сме́рть преподо́бных его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.
По 50-м псалме́ стихи́ра, глас 6:
Возсия́ дне́сь пресве́тлая и всепра́зднственная па́мять твоя́, Богоблаже́нне,/ созыва́ющи многочи́сленное по́стник сосло́вие/ и преподо́бных всех ликостоя́ния, глаго́лющи:/ а́ще бо и теле́сне язы́к умолче́,/ но са́ми чудеса́ свиде́тельствуют от гро́ба твоего́,/ и вся же страна́ оте́чества твоего́, пропове́дуя, хва́лится:/ име́ю бо в себе́, рече́, неистощи́мое сокро́вище,/ пречестну́ю и всебога́тую ра́ку моще́й твои́х,/ облагоуха́ющу душе́вная на́ша чу́вствия,/ Алекса́ндре, о́тче наш,/ моли́ Христа́ Бо́га спасти́ся душа́м на́шим.
Кано́н Богоро́дицы со ирмосо́м на 6 и преподо́бнаго Алекса́ндра на 4, глас 4.
Пе́снь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.
Боже́ственнаго и Пресвята́го Ду́ха блиста́яся благода́тию,/ светоно́сное, Алекса́ндре, и честно́е соверша́ющих твое́ успе́ние,/ све́тлою моли́твою твое́ю страсте́й мглу очи́сти.
От ю́ности, преподо́бне, яре́м Госпо́день восприе́м,/ в бразда́х твоего́ се́рдца пшени́цу се́ял еси́ духо́вну/ и клас пожа́л еси́, утвержда́ющ ду́ши, Богоблаже́нне.
Светоно́сная па́мять твоя́ нам дне́сь возсия́,/ я́ко со́лнечная луча́, Алекса́ндре, исправле́ний твои́х, страсте́й на́ших отъе́млющи о́блак,/ ю́же сотворя́юще, ве́рою тя и любо́вию ублажа́ем.
Богоро́дичен: Зача́ла еси́, Пречи́стая,/ неизрече́нным сло́вом содержа́щаго земны́я концы́ и сего́ родила́ еси́,/ Его́же моли́ приле́жно поми́ловати нас.
Ин кано́н на 4, глас 2.
Пе́снь 1
Ирмо́с: Во глубине́ постла́ иногда́/ фараони́тское всево́инство преоруже́нная си́ла;/ вопло́щшееся же Сло́во всезло́бный грех потреби́ло е́сть,/ препросла́вленный Госпо́дь, сла́вно бо просла́вися.
Боже́ственную па́мять твою́, Богому́дре о́тче, ве́рно пра́зднующе,/ вся́ческих Го́спода при́сно сла́вим,/ тя просла́вльшаго мно́гими чудесы́.
Безстра́стия жела́нием те́плым, о́тче, одержи́м,/ ве́щныя увяди́л еси́ страсте́й во́лны, Алекса́ндре,/ и дости́гл еси́, любо́вию вперя́емь, присносу́щнаго сия́ния, преблаже́нне, Божества́.
Доброде́тельно изнача́ла прие́м житие́, пребога́те,/ ба́нею, о́тче, пакибытия́, дар духо́вный от младе́нства боже́ственне,/ твоея́ души́ благоле́пие, Алекса́ндре, показа́л еси́, со́лнца светле́йше.
Богоро́дичен: Мла́до Отроча́ па́че сло́ва родила́ еси́, Ве́тхаго Де́ньми,/ но́ву на земли́ стезю́ доброде́телей показа́вша./ Тем уго́дник Твой при́сный Алекса́ндр, Отрокови́це, любо́вию снеда́емь,/ сий храм Тебе́ созда́.
Катава́сия: Крест начерта́в:
Пе́снь 3
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Жезло́м воздержа́ния стра́стное мо́ре, о́тче, раздели́в, преше́л еси́ неистопле́н,/ и преде́л дости́гл еси́ и́стиннаго безстра́стия,/ и, Бо́гу предстоя́, бесе́довал еси́ ума́ чистото́ю.
Кто твоя́ по́двиги, Алекса́ндре, по достоя́нию изрещи́ возмо́жет?/ Ты бо, пути́ жесто́кия в пусты́ни ше́ствуя, су́рово бы́лие ял еси́,/ вкуше́ние же отлага́л еси́ пи́щи боле́зньми воздержа́ния.
Я́ко ма́слина плодови́та в дому́ Госпо́дни, прозя́бл еси́,/ ма́слом трудо́в твои́х, Алекса́ндре, умаща́я на́ша ли́ца;/ пою́щия тя, преподо́бне и Богоблаже́нне, вся ны посети́, моля́ся Человеколю́бцу.
Богоро́дичен: Из Тебе́, Чи́стая, Цвет неувяда́емый,/ благоуха́я все челове́чество Боже́ственным ми́ром естества́ Своего́,/ И́же Отцу́ Собезнача́льный, из Тебе́ быв под ле́том, Де́во Всенепоро́чная.
Ин
Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ не́сть свят, я́коже Бог наш,/ и не́сть пра́веден, па́че Тебе́, Го́споди.
Пото́м воздержа́ния твоего́ пла́мень страсте́й погаси́л еси́/ и одожде́нием моли́тв струи́ чуде́с источи́л еси́,/ боле́зньми разжже́ния погаша́я я́ве, преблаже́нне Алекса́ндре.
И́же к честне́й ра́це твое́й притека́юще, прему́дре,/ от сея́ почерпа́ем исцеле́ния сокро́вище, и чуде́с пучи́ну, и дар незави́стный, Алекса́ндре./ Те́мже, пою́ще, тя восхваля́ем.
Душе́вная чу́вства от ужа́снаго, преподо́бне о́тче, просве́щ виде́ния,/ я́ко чу́ден ра́зум благи́х стяжа́л еси́,/ и́ночества житие́ иму́щим, Алекса́ндре, небла́знено житие́ показа́л еси́.
Богоро́дичен: И́же пре́жде век ро́ждься от Отца́ неизрече́нно,/ напосле́док из утро́бы Твое́й про́йде и обожи́ на́ше естество́, Ма́ти Де́во,/ И́же преподо́бных ли́ки я́ве изводя́й.
Седа́лен, глас 8.
Подо́бен: Прему́дрости:
От ю́ности вся оста́вль жите́йская, кра́сная же и ле́потная,/ и в пусты́ню всели́вся, усе́рдно после́довал еси́ Зва́вшему тебе́, преподо́бне,/ в труде́х же и посте́х, о́тче, те́ло твое́ изнури́л еси́./ Отону́дуже тя па́стыря свои́м овца́м до́бре устроя́ет всебога́тый Госпо́дь, Алекса́ндре блаже́нне./ Моли́ Христа́ Бо́га прегреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ о́гнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Пе́снь 4
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ Сла́ва си́ле Твое́й, Го́споди.
Ве́трилом, о́тче, Креста́, душе́вный твой кора́бль окорми́в,/ благоути́шно же и легко́ жите́йскаго лю́таго потопле́ния избе́гл еси́/ и к тишине́ Боже́ственных извле́кл еси́ приста́нищ, ра́дуяся.
Обрета́я, о́тче, сам себе́, всеблаже́нне,/ всю но́щь стоя́л еси́, я́ко безпло́тен,/ недрема́нно о́ко име́л еси́ и чи́сто, я́коже зерца́ло, духо́вною заре́ю/ и Боже́ственная явле́ния чи́стым по́мыслом прие́мля.
Я́ко Боже́ственный зри́тся рай, прему́дре, храм, име́я в себе́ твои́х моще́й ра́ку,/ цве́ты принося́ чуде́сныя, и́миже се́рдца наслажда́ются/ ве́рою, Алекса́ндре, при́сно хва́лящих тя.
Богоро́дичен: Свята́я Богоро́дице, освяти́ нас,/ Я́же Пресвята́го Бо́га ро́ждши пло́тию,/ уподо́битися восхоте́вша челове́ком,/ и Небе́снаго жития́ вся покажи́, Пречи́стая, прича́стники моли́твами Твои́ми.
Ин
Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: Сла́ва си́ле Твое́й, Го́споди.
Житие́ твое́, Богоно́се преблаже́нне Алекса́ндре, пра́вило изве́стно мона́шествующих бы́сть,/ ему́же ны́не ревну́юще, спаса́емся,/ и́же твои́м после́дующе, о́тче, Боже́ственным уче́нием.
Ду́ха Свята́го зарю́ прие́м,/ звезда́ пресве́тлая, о́тче Алекса́ндре, сия́я благода́тию, был еси́ всем,/ и́хже наста́вил еси́ к спасе́ния приста́нищу твои́ми уче́нии.
Пребы́ти вну́трь ника́коже ми́ра восхоте́л еси́, прему́дре о́тче Алекса́ндре,/ име́я наставля́ющаго тя Бо́жия Ду́ха си́лу,/ в непроходи́мых пусты́нях живы́й и со зверьми́ ходя́ без боя́зни, ю́ноша сый,/ и боле́зньми пита́лся еси́ теле́сными.
Богоро́дичен: Плещьми́ Херуви́мски стра́шными носи́м, Влады́ко, я́ко на престо́ле о́гненне,/ в Твою́, Чи́стая, всели́ся утро́бу и пло́ти прия́тием челове́ческое обожи́ существо́,/ я́ко учи́т изря́дный в преподо́бных Алекса́ндр, еди́на Всепе́тая.
Пе́снь 5
Ирмо́с: Ты, Го́споди, мой Свет,/ в мир прише́л еси́,/ Свет святы́й, обраща́ли из мра́чна неве́дения/ ве́рою воспева́ющия Тя.
Просвеща́емь заре́ю, о́тче, невече́рнею и Боже́ственным облиста́нием,/ бесо́вский мрак и стра́стную мглу отгна́л еси́,/ и яви́лся еси́ столп светоза́рен,/ ле́ствица вои́стинну, к Бо́гу ве́рныя возводя́щи.
Бодр ум всегда́ име́я, о́тче Богому́дре Алекса́ндре,/ стра́сти успи́л еси́ душетле́нныя,/ к Боже́ственному светозаре́нию хотя́ дости́гнути, к незаходи́маго Све́та све́тлости,/ иде́же е́сть веселя́щихся жили́ще.
Я́ко очи́стившу помышле́ния, преподо́бне,/ благода́ть тебе́ даде́ся, я́ко проро́ку:/ я́ко настоя́щая, глаго́леши бу́дущая,/ зри́ши же да́льняя, я́ко бли́жняя, Алекса́ндре, Бо́жие оби́телище.
Богоро́дичен: Ро́ждши, Пренепоро́чная, Бо́га Емману́ила,/ и Челове́ка я́ве за милосе́рдие бы́вша,/ Его́же моли́, я́ко Человеколю́бца, Чи́стая, уще́дрити лю́ди согре́шшия.
Ин
Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы.
Возжеле́в ум твой храни́ти соблюде́ньми за́поведей, Алекса́ндре,/ и плотско́е взыгра́ние твои́м воздержа́нием увяди́л еси́,/ и па́стырь показа́лся еси́ боголюбе́зному твоему́ совокупле́нию.
Зако́ном Боже́ственным после́дуя, прему́дре Алекса́ндре,/ и повеле́нием повину́яся Сотво́ршаго,/ законополо́жник яви́лся еси́ мона́хов и пра́вило изве́стнейшее,/ наказа́тель безу́мных, и наста́вник заблу́ждших,/ и свети́льник во тьме́ неве́дения, пресла́вне.
О́гнь искуше́ний и страсте́й пе́щь слеза́ми твои́х, о́тче, тече́ний/ и духо́вною росо́ю бога́тно угаси́л еси́, соблюде́н неопали́м:/ опаля́емь бо любо́вию всех Царя́,/ ве́щная увяди́л еси́ жела́ния.
Богоро́дичен: Жите́йская не мо́гут уста́ по достоя́нию Тя пе́ти, Всепе́тая,/ вы́шшу су́шу Херуви́м и вся́кия тва́ри./ Те́мже с Боже́ственным Алекса́ндром Влады́ку о всех нас умоли́.
Пе́снь 6
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Неболе́зненную жи́знь в боле́знех восприя́л еси́/ и боле́зней лю́тых уставля́еши озлобле́ния/ ве́рою прося́щим приити́ исцеле́ние, Алекса́ндре всече́стне./ Те́мже разреши́ боле́зни на́ша душе́вныя и теле́сныя.
К ра́це твое́й свяще́нней приступа́юще,/ благоуха́ния Боже́ственнаго ра́зума исполня́емся, преблаже́нне Алекса́ндре,/ смра́да избавля́ющеся страсте́й, любо́вию тя чту́щии, о́тче преподо́бне.
Исправля́еши, о́тче, хромы́х и о́чи просвеща́еши слепы́х,/ ходи́ти же твори́ши разсла́бленных о Христе́/ и отго́ниши ду́хи лука́выя, Алекса́ндре преподо́бне.
Богоро́дичен: На Тя, я́ко до́ждь на руно́, сшед, Богоро́дице, Спас/ изсуши́ я́ве пото́ки безбо́жия,/ ду́ши же на́ша напая́я всегда́, при́сно чту́щия Тя.
Ин
Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
С мы́сленно ты вре́менная проразсуди́в, Алекса́ндре блаже́нне,/ ве́чнующая боле́зньми воздержа́ния дости́гл еси́, о́тче,/ душа́м строи́тель быв, преподо́бне.
Я́ко терпя́щу ти вельми́ по́ты трудо́в твои́х, преподо́бне Алекса́ндре,/ удо́бь воздержа́нием, чу́дный о́тче,/ я́влься, Влады́ка тебе́ Христо́с вруча́ет си́лу боже́ственну/ и сим ти неду́ги повелева́ет цели́ти.
Мона́шествующих наста́вник быв, прему́дре Алекса́ндре,/ су́щих ти единообра́зных ла́вры,/ и о́браз и начерта́ние доброде́тельных дея́ний сый,/ украси́л еси́ вся, я́же во оби́тели супру́жных пребыва́ния.
Богоро́дичен: Нов, я́коже Моисе́й, я́влься,/ устро́ил еси́, я́ко ски́нию, огра́ду, всече́стне,/ ю́же и превозрасти́л еси́ боле́зньми и по́ты твои́ми,/ ве́сь возложи́вся Пречи́стей Ма́тери Бо́жии.
Конда́к, глас 8:
Я́ко многосве́тлая звезда́,/ дне́сь в страна́х Росси́йских возсия́л еси́, о́тче,/ всели́вся в пусты́ню,/ Христо́вым стопа́м после́довати усе́рдно возжеле́л еси́/ и, Того́ свято́е и́го на ра́мо твое́ взем – Честны́й Крест,/ умертви́л еси́ труды́ по́двиг твои́х теле́сная взыгра́ния./ Те́мже вопие́м ти:/ спаси́ ста́до твое́, е́же собра́л еси́, му́дре, да зове́м ти:/ ра́дуйся, преподо́бне Алекса́ндре, о́тче наш.
И́кос:
Ка́ко восхвалю́ твоя́ по́двиги и боре́ния, преподо́бне Алекса́ндре?/ Я́ко невеще́ствен ра́зум стяжа́в смире́нием,/ житие́ твое́ препроводи́л еси́ зе́льным воздержа́нием трудо́в твои́х./ А́ще у́бо и челове́к был еси́ естество́м,/ но Вы́шняго Иерусали́ма яви́лся еси́ граждани́н:/ с пло́тию бо на земли́ пожи́л еси́,/ но а́нгельское пребыва́ние проше́д и был еси́ столп, страстьми́ непотрясо́м./ Тем вся Росси́йская земля́, тобо́ю обога́щшися, хва́лит тя/ и ве́рою велича́ет, взыва́ющи тебе́ такова́я:/ ра́дуйся, оте́честву твоему́ похвала́,/ Вели́кому же Новугра́ду и всей стране́ Росси́йстей пресве́тлый свети́льниче./ Ра́дуйся, и́же благочести́ва отца́ пресла́вная о́трасль/ и благогове́йны ма́тере ве́твь многопло́дна./ Ра́дуйся, целому́дрия непрекло́нный сто́лпе и мона́хов пресве́тлая Сла́ва./ Ра́дуйся, па́стырю Христо́вы огра́ды слове́сных ове́ц,/ и́хже к Бо́жию приводя́ ра́зуму./ Ра́дуйся, ты бо многоча́дну пусты́ню возде́лал еси́ высото́ю смире́ния твоего́./ Ра́дуйся, мона́шествующих всех о́браз доброде́тели и единообра́зных ла́вры спасе́ние./ Ра́дуйся, кра́сное доброде́телей храни́лище и всем, в печа́ли уныва́ющим, утеше́ние./ Ра́дуйся, я́ко, вся ми́ра сего́ мудрова́ния презре́в, стра́сти плотски́я умертви́л еси́./ Ра́дуйся, я́ко А́нгелом собесе́дник бы́ти сподо́бился еси́/ и вся бесо́вския полки́ посрами́л еси́./ Ра́дуйся, ты бо во всех страна́х просла́влен был еси́,/ о Христе́ бо мно́га чудеса́ сотвори́л еси́./ Ра́дуйся, я́ко вои́стинну обре́л еси́ Бо́жию благода́ть/ и со А́нгелы при́сно зре́ти сподо́бился еси́ лице́м к лицу́ Святу́ю Тро́ицу./ Ра́дуйся, я́ко второ́е со́лнце, сия́я чудесы́, всем да́руеши благода́ть исцеле́ний./ Ра́дуйся, преподо́бне Алекса́ндре, о́тче наш.
Пе́снь 7
Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твое́й, Го́споди.
Освя́щься от младе́нства доброгла́сною трубо́ю моли́твы твое́й,/ и непло́дныя утро́бы многопло́дны сотвори́л еси́,/ слепы́м подае́ши прозре́ние и хромы́м благотече́ние, Алекса́ндре преблаже́нне.
Сле́зными излия́нии погаси́л еси́ страсте́й разжже́ния, Алекса́ндре блаже́нне,/ чуде́с источи́л еси́ струи́ присноживо́тны,/ и́миже омыва́ются душ же и теле́с неду́зи, пресла́вне.
Терпе́ние стяжа́в мно́гое, прему́дре, воздержа́ние, ве́ру и любо́вь и́стинну,/ яви́лся еси́ оте́ц си́рым,/ вдови́цам – засту́пник ми́лостив и смире́н, Алекса́ндре,/ мона́хом – Сла́ва и похвала́.
Богоро́дичен: Ка́ко дои́ши млеко́м Сы́на, Чи́стая, без отца́,/ пита́ющаго вся́кое дыха́ние, Ма́ти Пречи́стая?/ Ка́ко на ру́ку но́сиши вся содержа́щаго?/ Па́че ума́ чу́до Твое́./ Тем пое́м вели́чия Твоя́.
Ин
Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ е́сть./ Христо́с же простре́ Богочести́вым о́троком ро́су духо́вную,/ Сый благослове́н и препросла́влен.
Кре́постию оде́явся, Алекса́ндре, Влады́чнею/ и, я́ко прах, сладостра́стие жития́ попра́л еси́, любо́вию побежда́емь нетле́нныя жи́зни,/ е́йже ны́не и прича́стился еси́, с ли́ки А́нгел, о́тче, сочета́вся.
Крестообра́зно простира́я дла́ни твоя́, Алекса́ндре прему́дре,/ и моли́твы твоя́ возсыла́я Вы́шнему,/ я́ко Христа́, Царя́ сла́вы, со А́нгелы, очи́ма явле́нно, Богоно́се, узре́л еси́,/ и, в пусты́нях непрохо́дных водворя́лся, ища́й Го́спода,/ Боже́ственною тя благода́тию соблюда́юща.
Я́ко звезду́ тя, Алекса́ндре, всеми́рну,/ мона́хов свети́ло незаходи́мое,/ помо́щника в беда́х и гре́шником вели́кое прибе́жище ве́дый,/ хода́тая и моли́твенника тя предлага́ю Влады́це Христу́, всече́стне.
Богоро́дичен: Ви́дети жела́я Твой уго́дник/ Твоего́ Сы́на и Бо́га неизрече́нную сла́ву, Богороди́тельнице,/ сего́ Честны́й Крест на ра́мо взем,/ после́дова живоно́сным его́ стопа́м.
Пе́снь 8
Ирмо́с: Ру́це распросте́р, Дании́л/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Умо́м безстра́стия очище́н, бесе́довал еси́ Го́сподеви Вседержи́телю,/ от Него́же неизглаго́ланно, преподо́бне, науча́емь, проро́чески предглаго́лал еси́,/ просвеща́я ду́ши, я́ко вели́к, всеблаже́нне, проро́к./ Тем тя согла́сно, Алекса́ндре прему́дре, ве́рнии, похваля́ем, пою́ще:/ благослови́те, вся дела́ Госпо́дня, Го́спода.
Подава́я тебе́, я́же проти́ву любве́, Зижди́тель и от ю́ности соблюда́я тя десни́цею,/ ма́лым бы́лием, самовозра́стшим от земли́, пита́ет тя боголе́пно,/ я́ко от младе́нства вся́ко похоте́ние попра́вша и пою́ща:/ благослови́те, вся дела́ Госпо́дня, Го́спода.
Я́ко струя́ боже́ственна исцеле́ний, происходя́щи от ра́ки твое́й, вся исцеля́ет,/ и омыва́ет скве́рны страсте́й, и гное́ние лю́тых очища́ет,/ и ве́рных напая́ет всех се́рдца, Алекса́ндре прему́дре, любо́вию пою́щих:/ благослови́те, вся дела́ Госпо́дня, Го́спода.
Богоро́дичен: Вопло́щся Безпло́тный из Тебе́ боголе́пно,/ Его́же моли́, Пречи́стая, стра́сти пло́ти мое́й умертви́ти/ и оживи́ти мою́ умерщвле́нную ду́шу грехми́.
Ин
Ирмо́с: Пе́щь иногда́ о́гненная в Вавило́не де́йства раздели́те,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.
Я́коже мо́лния вели́кими блиста́нии,/ житие́ сия́ющее всем возсия́ воздержа́ния твоего́, Алекса́ндре прему́дре,/ благоче́стно Зижди́телю зову́щим:/ благослови́те, вся дела́ Госпо́дня, Го́спода.
На земли́ я́ко челове́к ходя́, о́тче Алекса́ндре,/ житие́ себе́ на Небесе́х я́ко вои́стинну стяжа́л еси́,/ А́нгелом собесе́дник я́влься, житие́ же и жи́знь соверша́я о́нех./ С ни́миже воспева́еши ны́не:/ благослови́те, вся дела́ Госпо́дня, Го́спода.
Тя, па́че ума́ из Нерожде́нна Отца́, пре́жде век рожде́нна Сы́на,/ сла́вный пропове́да Алекса́ндр,/ и Ду́ха Пресвята́го, Еди́ну Тро́ицу естество́м ве́дый Божества́.
Богоро́дичен: Я́коже Илия́ пе́рвее в Карми́ле всели́ся,/ та́ко и ты, в пусты́нях непрохо́дных упражня́лся,/ возжела́л еси́ осо́бь с Бо́гом жи́ти/ и, богонача́льными озари́вся виде́нии,/ уго́дник яви́лся еси́ Богоро́дице, вопия́ Ей:/ ра́дуйся, Обра́дованная.
Пе́снь 9
Ирмо́с: Ка́мень нерукосе́чный/ от несеко́мыя го́ры, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.
Твоя́ свяще́нныя и святы́я мо́щи, во гро́бе лежа́ща,/ многоразли́чныя неду́ги исцеля́ют и попаля́ют полки́ бесо́вския всегда́, му́дре Алекса́ндре:/ Бо́жиею бо благода́тию то́чиши всем исцеле́ния, ве́рно тя при́сно блажа́щим.
Струи́ нам исцеле́ний всегда́ честна́я твоя́ ра́ка яви́ся, о́тче,/ страсте́й излия́ние вся́ческих изсуша́ющи/ и вся напоя́ющи ду́ши ко благопло́дию Боже́ственному, прему́дре Алекса́ндре, Христо́в уго́дниче.
Па́мять твоя́ дне́сь, я́ко со́лнце, возсия́, Алекса́ндре преблаже́нне,/ благочести́вых сердца́ озаря́ющи боле́зней твои́х и чуде́с сия́нием,/ я́ко вои́стинну просвеща́ющи, о́тче,/ в то́же вся ны помяни́, ве́рно чту́щия тя.
Богоро́дичен: Глас прино́сим Ти Гаврии́лов, ра́дующеся:/ ра́дуйся, глаго́люще, ме́сто свяще́ния,/ ра́дуйся, преподо́бных сла́во и всех ве́рных спасе́ние,/ ея́же ра́ди обожи́хомся, Богоро́дице Присноде́во.
Ин
Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.
Стопа́м после́дуя, преподо́бне и Богоно́се, Влады́ки Христа́,/ благоче́стно пожи́в на земли́, кро́ток, незло́бив яви́лся еси́,/ ми́лостив и смире́н, Алекса́ндре, и любве́ испо́лнен Боже́ственныя,/ сего́ ра́ди тя ве́рно восхваля́ем.
Исплете́ся тебе́ вене́ц, я́ко победи́телю, Алекса́ндре,/ живоно́сною и вседержи́тельною десни́цею, о́тче,/ и ны́не пою́щия па́мять твою́ сподо́би, блаже́нне,/ улучи́ти оставле́ние согреше́ний, пресла́вне.
Совокупи́лся еси́ со Безпло́тными во́инствы,/ и преподо́бным ли́ком сочта́лся еси́,/ и со избра́нными все́ми лику́еши,/ претво́рся и́стинным обоже́нием и безсме́ртною, о́тче, жи́знию,/ с ни́миже непреста́нно о нас твоего́ Влады́ку умоли́.
Богоро́дичен: Хра́ме освяще́нный, вме́стен Еди́ному от Тро́ицы сый,/ храм Твой, Влады́чице, уго́дник Твой Алекса́ндр че́стен воздви́же в сла́ву Твою́ и че́сть,/ в не́мже не преста́й моля́ся, да́тися нам по́мощи моли́твами Твои́ми.
Свети́лен.
Подо́бен: Ду́хом во святи́лищи:
Благода́ть преизбы́сть Бо́жия в ду́ши твое́й, прему́дре Алекса́ндре,/ и, я́ко безпло́тен, на земли́ пожи́л еси́./ Тем почита́ющих тя страсте́й изба́ви те́мных о́блак, к ти́хому приста́нищу приводя́/ и отгоня́я ополче́ния бесо́вская Боже́ственною си́лою.
Сла́ва, и ны́не,
Богоро́дичен:
Сотвори́ вои́стинну с Тобо́ю вели́чия Сын Преве́чный О́тчим сове́том:/ Жи́знь бо нетле́нную без стра́сти родила́ еси́/ и пребыла́ еси́, я́коже пре́жде рождества́, Де́ва, ма́терских избе́гши боле́зней/ и по рождестве́ Де́вою пребы́вши.
На хвали́тех стихи́ры на 4, глас 4.
Подо́бен: Дал еси́ зна́мение:
Преподо́бне и Богоно́се,/ житие́ твое́ проше́д нескве́рно,/ терпе́ние же, и кро́тость, и любо́вь нелицеме́рну,/ воздержа́ние безме́рно,/ всено́щное стоя́ние,/ умиле́ние боже́ственно,/ ве́ру и наде́жду и́стинну с ми́лованием, о́тче, стяжа́в,/ я́ко А́нгел, пожи́л еси́ на земли́ с те́лом,/ Алекса́ндре блаже́нне,/ моли́твенниче о душа́х на́ших.
Я́ко земны́й А́нгел и Небе́сный челове́к,/ был еси́, прему́дре,/ исто́чник умиле́ния/ и щедро́т струя́ незави́стна яви́лся еси́,/ пучи́на чуде́с, гре́шником испору́чник,/ ма́слина вои́стинну Бо́жия плодови́та,/ ма́слом трудо́в твои́х,/ Алекса́ндре чу́дне, умаща́я се́рдца/ ве́рно восхваля́ющих тя.
Преподо́бне и Богоблаже́нне,/ умертви́л еси́ пло́ти мудрова́ние Боже́ственными разуме́нии,/ теле́сных превы́ше страсте́й был еси́,/ и смеше́н до́льними нося́ начерта́ние,/ изобража́я в себе́ Боже́ственную добро́ту,/ и показа́лся еси́ ве́сь светови́ден/ де́йством Свята́го Ду́ха,/ Алекса́ндре, о́тче наш,/ и́нокующим украше́ние.
Исто́чник чуде́с показа́ и реку́ дарова́ний/ ра́ку моще́й твои́х челове́ком Госпо́дь,/ Алекса́ндре прему́дре:/ слепы́м е́же ви́дети сия́ дарова́ся,/ прокаже́нным – очище́ние,/ одержи́мыя нечи́стыми ду́хи/ от тех вла́сти избавля́еши/ и целому́дрие тем твори́ши,/ исцеле́ние неоску́дно.
Сла́ва, глас 6:
Ра́дуйся, по́стником свети́ло многосве́тлое,/ и́ноком звезда́ незаходи́мая,/ па́стырем похвала́, о́тче Алекса́ндре,/ преподо́бным совсе́льниче./ Ра́дуйся, Тро́ицы пресве́тлое жили́ще./ Ра́дуйся, любве́ и ми́лования исто́чниче./ Ра́дуйся, пресве́тлый свети́льниче разсужде́ния./ Ра́дуйся, пра́вило доброде́телей и́стинное./ Ра́дуйся, сто́лпе одушевле́нный./ Ра́дуйся, Вели́кому Нову́гра́ду похвала́ и утвержде́ние.
И ны́не, Богоро́дичен:
Богоро́дице, Ты еси́ лоза́ и́стинная,/ возраста́вшая нам Плод живота́,/ Тебе́ мо́лимся, моли́ся, Влады́чице, со святы́ми апо́столы/ поми́ловати ду́ши на́ша.
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ сме́рть преподо́бных его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную:
Моли́тва
О свяще́нная главо́, А́нгеле земны́й и челове́че Небе́сный, преподо́бне и Богоно́сне о́тче наш Алекса́ндре, изря́дный уго́дниче Пресвяты́я и Единосу́щныя Тро́ицы, явля́яй мно́гия ми́лости живу́щим во святе́й оби́тели твое́й и всем с ве́рою и любо́вию притека́ющим к тебе́! Испроси́ нам вся благопотре́бная к житию́ сему́ вре́менному и ну́жная к ве́чному спасе́нию на́шему. Посо́бствуй и предста́тельством твои́м, уго́дниче Бо́жий, на враги́ ви́димыя и неви́димыя, да в ми́ре глубо́це пребу́дет Свята́я Правосла́вная Це́рковь Христо́ва и благострое́нии зи́ждется, во вся́ком благоче́стии неруши́мо. Бу́ди всем нам, чудотво́рче святы́й, помо́щник ско́рый во вся́кой ско́рби и обстоя́нии. Наипа́че же в час кончи́ны на́шея яви́ся нам засту́пник благосе́рдый, да не пре́дани бу́дем на мыта́рствех возду́шных вла́сти зло́бнаго мироде́ржца, но да сподо́бимся непреткнове́ннаго восхо́да в Ца́рствие Небе́сное. Ей, о́тче, моли́твенниче наш при́сный! Не посрами́ упова́ния на́шего, не пре́зри смире́нная моле́ния на́ша и предста́тельствуй за нас пред Престо́лом Живонача́льныя Тро́ицы, да сподо́бимся вку́пе с тобо́ю и со все́ми святы́ми мы, недосто́йнии, в селе́ниих ра́йских сла́вити вели́чие, благода́ть и ми́лость Еди́наго в Тро́ице Бо́га, Отца́, и Сы́на, и Свята́го Ду́ха, во ве́ки веко́в. Ами́нь.
Моли́тва преподо́бнаго Алекса́ндра Сви́рскаго Го́споду Бо́гу и Пресвяте́й Богоро́дице
Бо́же, очи́сти мя, гре́шнаго, и поми́луй мя, и прости́ ми, Го́споди Бо́же, Спа́се Ми́лостивый! Да́ждь ми, Го́споди, христиа́нский коне́ц с Пречи́стым Те́лом и с Честно́ю Кро́вию, со слеза́ми и покая́нием. Изба́ви, Го́споди, му́ки ве́чныя, огня́ негаси́маго, и че́рвия неусыпа́ющаго, и смолы́ кипя́щия. Го́споди, Ты созда́л мя еси́, Го́споди, Ты поми́луй. Го́споди, Твое́ е́смь созда́ние.
Пречи́стая Госпоже́ Ми́лостивая, Цари́це Небе́сная, помоли́ся Го́споду Бо́гу и Спа́су на́шему Иису́су Христу́, Сы́ну Твоему́, за мене́, гре́шнаго раба́ Твоего́ (имя́ рек). Да́ждь ми, Госпоже́, христиа́нский коне́ц с Пречи́стым Те́лом и с Честно́ю Кро́вию и со слеза́ми и покая́нием. Изба́ви, Госпоже́, му́ки ве́чныя, огня́ неугаси́маго, и че́рвия неусыпа́ющаго, и смолы́ кипя́щия. Пречи́стая Госпоже́, Ми́лостивая Цари́це Небе́сная, Ты еси́ Моле́бница ко Го́споду Бо́гу и Спа́су на́шему Иису́су Христу́ за мене́, гре́шнаго и окая́ннаго раба́ Твоего́ (и́мя рек), Ты еси́ Помо́щница, Ты Засту́пница от вся́каго зла и сопоста́та, не забу́ди, Пречи́стая Госпоже́, ни́щаго Твоего́ до конца́.
Посе́м: Засту́пнице Усе́рдная, Благоутро́бная Го́спода Ма́ти, к Тебе́ прибега́ю аз, окая́нный и па́че всех челове́к грешне́йший. Вонми́ гла́су моле́ния моего́ и во́пль мой и стена́ние услы́ши. Я́ко беззако́ния моя́ превзыдо́ша главу́ мою́ и аз, я́коже кора́бль в пучи́не, погружа́юся в мо́ре грехо́в мои́х. Но Ты, Всеблага́я и Милосе́рдая Влады́чице, не пре́зри мене́, отча́яннаго и во гресе́х погиба́ющаго. Поми́луй мя, ка́ющагося в злых де́лех мои́х, и обрати́ на пу́ть пра́вый заблу́ждшую окая́нную ду́шу мою́. На Тебе́, Влады́чице моя́ Богоро́дице, возлага́ю все упова́ние мое́. Ты, Ма́ти Бо́жия, сохрани́ и соблюди́ мя под кро́вом Твои́м ны́не, и при́сно, и во ве́ки веко́в. Ами́нь.
Та́же моли́тва по вся дни:
Душе́, душе́ моя́, почто́ жа́луешися на Го́спода? Я́ко ле́ность твоя́ ве́чней му́це хода́тай е́сть. А́ще бы ве́дала дар Бо́жий, пла́кала бы ся горя́щими слеза́ми, стена́ющи со воздыха́нием, скорбя́щи о вся́ком гресе́, о ма́лем и о вели́цем. Возопи́й ко Своему́ Влады́це, да не предвари́т тебе́ я́рость одержа́щаго всеси́льною руко́ю пра́ведною. Аз же, гре́шный и лени́вый и льсти́вый язы́к име́яй, ка́ко помолю́ся Влады́це моему́, да изба́вит мя Госпо́дь от Стра́шнаго Суда́? Всегда́ бо трепе́щу по́мыслом в се́рдцы мое́м о Стра́шнем Суде́, да изба́вит мя от му́ки ве́чныя, и че́рвия неусыпа́ющаго, и тьмы́ кроме́шныя, и от грозы́ несогре́емыя. Поми́луй мя, гре́шнаго раба́ Твоего́ (и́мя рек), я́ко Па́вла апо́стола, его́же любля́ше па́че всех, и от нас, убо́гих, не отврати́ лица́ Твоего́ во он Де́нь Стра́шный, его́же трепе́щет душа́ моя́ и соста́вы те́ла моего́ ужаса́ются. Го́споди, изба́ви мя стра́шнаго часа́, да не отпаду́ от ми́лости Твое́й. Но молю́ святы́я А́нгелы и Арха́нгелы, и проро́ки, и му́ченики, и вся святы́я, да мо́лят Бо́га за мою́ ду́шу. Ва́шего ра́ди моле́ния да возврати́т Влады́ка тре́бы Своя́ от мене́, гре́шнаго. И ты, Пречи́стая Госпоже́ Де́во, иму́щи дерзнове́ние к Сы́ну о рабе́х Твои́х, не забу́ди трудо́в раба́ Твоего́ (и́мя рек). Влады́ко Спа́се, от убо́гия души́ Тебе́ молю́ся, изба́ви мя от печа́ли грехо́в мои́х и введи́ в ра́дость безконе́чнаго жития́, иде́же прославля́ется всесвято́е И́мя Твое́, Отца́ и Сы́на и Свята́го Ду́ха, всегда́, ны́не, и при́сно, и во ве́ки веко́в. Ами́нь.
Преподобный Александр Свирский родился 15 июня 1448 года в семье крестьян приладожского села Мандеры на реке Оять (притоке реки Свирь) Стефана и Василисы (Вассы). Стефан и Василиса имели двух взрослых детей, но им очень хотелось иметь еще сына, и они молили об этом Бога. Однажды во время молитвы благочестивые супруги услышали голос свыше: «Радуйтеся, доброе супружество... имате родити сына ... в рождестве его утешение Церквам Своим подати имать Бог». День рождения святого совпал с днем памяти пророка Амоса, имя которого и нарекли мальчику при крещении.
Когда Амос подрос, родители отдали его учиться грамоте, но учение давалось отроку с трудом. Тяжело переживая это, Амос часто молил Бога о помощи. Однажды он отправился в близлежащий Острожий Введенский монастырь и стал горячо молиться перед иконой Божией Матери. Во время молитвы отрок услышал голос: «Востани, не бойся: а еже просил еси, имаши восприяти». С тех пор Амос стал преуспевать в учении и вскоре опередил своих сверстников.
Он был всегда послушен и кроток, избегал игр и смеха, носил самую простую одежду и рано начал укреплять свою душу постом, чем вызвал беспокойство матери. Когда Амос вырос, родители хотели женить его, но он пожелал посвятить свою жизнь служению Богу. После знакомства с валаамскими монахами юношей овладело неодолимое желание уйти на Валаам. В девятнадцать лет он тайно покинул родительский дом и отправился в дальний путь. Дойдя до реки Свири, Амос переправился на другой берег и прошел еще 6 верст. Ночь застала его на берегу тихого лесного озера. Долго пребывая в ночной молитве, юноша услышал голос, который повелел ему идти на Валаам в обитель Всемилостивого Спаса, через некоторое время вернуться на это место и основать здесь обитель. На избранное Богом место сошел Небесный свет. Утром Амос продолжил свой путь. Долго пробирался он по лесным дебрям, без дороги, и очень утомился. Вдруг он увидел путника, который сказал, что идет на Валаам и знает туда дорогу. Они пошли вместе и через некоторое время достигли Валаамского Спасо-Преображенского монастыря. Воздав хвалу Богу у ворот обители, Амос хотел выразить благодарность своему спутнику, но тот внезапно исчез. Тогда Амос понял, что это был Ангел Божий.
Семь лет пребывал Амос послушником в Спасо-Преображенском монастыре, дни проводя в трудах, а ночи в молитвах. Иногда он обнажался до пояса и молился всю ночь в лесу, весь покрытый комарами и мошками. Когда родители узнали о местонахождении сына, Стефан приехал в обитель. Амос не хотел выйти к нему, сказав, что умер для мира. И только по просьбе игумена побеседовал с отцом, который хотел уговорить сына вернуться домой, однако после отказа сына покинул обитель в гневе. Уединившись в своей келлии, Амос стал усердно молиться о родителях, и по его молитве благодать Божия сошла на Стефана. Вернувшись домой, он принял постриг во Введенском монастыре с именем Сергий. Также и мать Амоса постриглась с именем Варвара.
26 августа 1474 года Амос принял иноческий постриг с именем Александр и удалился на уединенный остров, впоследствии названный Святым. Там он обнаружил пещеру и подвизался в ней еще семь лет. Далеко разнеслась Слава о его подвигах. Желая избегнуть людской молвы, преподобный Александр решил удалиться в неведомые леса, но по просьбе иіумена остался. В 1485 году во время ночной молитвы перед иконой Пресвятой Богородицы в келлии святого воссиял свет, и он услышал голос, повелевший ему возвратиться на прежде указанное место. В окно преподобный увидел как бы перст, указующий в сторону Святого озера. Узнав о видении, игумен благословил преподобного Александра в путь.
На берегу Святого озера в 36 верстах от нынешнего г. Олонца и в 6 верстах от реки Свирь преподобный Александр построил малую келлию, в которой прожил семь лет, не видя человеческого лица, не вкушая хлеба и питаясь лишь плодами леса. За это время святой отшельник претерпел немало лишений от холода, голода, болезней и диавольских искушений. Но Господь не оставлял подвижника Своими неизреченными милостями. Однажды, когда преподобный был тяжело болен и не мог даже приподнять голову с земли, он, лежа, напевал псалмы. Вдруг предстал пред ним «преславный муж», положил руку на больное место, осенил его крестным знамением и исцелил праведника. В другой раз, когда преподобный шел за водой и громко пел молитвы, он услышал голос, предрекавший приход к нему множества людей, которых надлежало принять и наставить.
В 1493 году на жилище отшельника во время охоты набрел боярин Андрей Завалишин. Он очень обрадовался этой встрече, так как давно хотел посетить место, над которым неоднократно видел «овогда яко столп стоящ, овогда же яко лучу Божественную сияющую, а иногда дым светел от земли к высоте восходящ». С того времени Андрей Завалишин стал часто посещать святого отшельника, а затем по его совету принял постриг на Валааме с именем Адриан. Впоследствии он основал на восточном берегу Ладожского озера Ондрусовский монастырь и прославился обращением на путь покаяния многих разбойников. От разбойников же преподобный Адриан Ондрусовский принял мученическую кончину (1549; память 26 августа).
Известие о духовных подвигах преподобного Александра широко распространилось, к нему стали стекаться иноки. Пришел к святому подвижнику и его брат Иоанн, который через некоторое время скончался. Иноки расчищали лес, благоустраивали пашню, сеяли хлеб, которым кормились сами и подавали просящим. Преподобный Александр из любви к безмолвию уединился от братии и устроил себе «отходную пустынь» в 130 саженях от прежнего места, у озера Рощинского. Там на него вооружились бесы: они являлись ему в образе зверей, змей, пытались запугать святого, понуждали бежать. Но молитва праведника, «яко пламень огненный от уст его исхождаху и вся бесовская немощнейшая ополчения попали и к тому невидими быша». В пустыни преподобному явился Ангел, напомнил прежние Божественные видения и предсказал основание на этом месте обители с храмом во имя Святой Троицы.
В 1508 году, на 23-м году пребывания преподобного Александра в заповедном месте, ему было явление Живоначальной Троицы. Преподобный молился ночью в пустыни. Вдруг воссиял сильный свет, и святой увидел вошедших к нему Трех Мужей, облаченных в светлые белые одежды. Освященные Небесной славой, они сияли чистотой ярче солнца. Каждый из Них держал в Своей руке жезл. Преподобный получил повеление возвести храм и устроить обитель во Имя Святой Троицы. «Я оставляю тебе мир и мир Мой подам тебе», – сказал Господь преподобному. И тотчас святой подвижник увидел Господа Иисуса Христа с простертыми крылами, словно по земле ходящего, и Он стал невидим.
После этого видения преподобный Александр стал размышлять, на каком месте соорудить храм. Ангел Божий указал ему место. В том же году была построена деревянная церковь во имя Живоначальной Троицы, а в 1526 году на ее месте был воздвигнут каменный храм. Сразу после построения деревянной церкви братия стали уговаривать преподобного принять священство. Смиренный старец отказывался, но братия обратились за помощью к архиепископу Новгородскому святителю Серапиону (1516; память 16 марта). В том же году преподобный Александр посетил Новгород, где получил посвящение от святителя Серапиона. Вскоре братия умолили преподобного принять игуменство.
Став игуменом, преподобный Александр стяжал еще большее смирение и кротость. Он спал на полу, одежду носил в заплатах, сам готовил пищу и замешивал тесто, испекал хлеб. Однажды не хватило дров, и эконом просил игумена послать в лес тех иноков, кто в то время был празден. «Я празден», – сказал преподобный и пошел рубить дрова. Ночами, когда братия спали, святой игумен приходил в помещение, где мололи хлеб жерновами, и молол за других. Обходя келлии и слыша суетные разговоры, он тихонько стучал в дверь и уходил, а утром наставлял братию. Вскоре Свирская обитель прославилась строгостью жизни иноков. Несколько учеников преподобного Александра стали основателями новых монастырей.
В конце жизни преподобный пожелал построить каменный храм в честь Покрова Пресвятой Богородицы. Из Москвы были приглашены мастера. Когда заложили основание храма, преподобному явилась Божия Матерь с Младенцем на месте алтаря в окружении множества Ангелов. Царица Небесная обещала исполнить молитвы праведника об учениках и обители. «И не только при животе твоем, – сказала Она, – но и по отшествии твоем неотступно буду от обители твоея, потребная неоскудне и снабдевающи и покрывающи». При этом преподобный узрел множество иноков, которые впоследствии подвизались в его обители.
Целый сонм учеников наставил и воспитал преподобный Александр Свирский, как и завещала ему Матерь Божия. Это – преподобные: Игнатий Островский (XVI), Леонид Островский (XVI), Корнилий Островский (XVI), Дионисий Островский (XVI), Афанасий Островский (XVI), Феодор Островский (XVI), Ферапонт Островский (XVI). Кроме этих святых известны ученики и собеседники преподобного Александра Свирского, имеющие отдельные дни памятей: преподобный Афанасий Сяндемский (XVI; память 18 января), преподобный Геннадий Важеозерский (8 января 1516 года; память 9 февраля), преподобный Макарий Оредежский (І1532; память 9 августа), преподобный Адриан Ондрусовский (26 августа 1549; память 17 мая), преподобный Никифор Важеозерский (1557; память 9 февраля), преподобный Геннадий Костромской и Любимоградский (1565; память 23 января).
Перед кончиной преподобный Александр Свирский изволил завещать братии предать его тело погребению в болотистом месте. Но братия не согласились. Тогда он просил, чтобы его тело погребли не в обители, а в «отходной пустыни». Преставился преподобный Александр 30 августа 1533 года, 85 летним старцем.
В житии преподобного Александра рассказывается о множестве чудес, совершенных по его молитвам. Он имел дар исцелять больных и возвещать будущее. В 1545 году ученик и преемник преподобного Александра Иродион, по повелению архиепископа Новгородского Феодосия, составил житие святого. Через два года началось местное празднование памяти преподобного и была составлена ему служба. 17 апреля 1641 года честные мощи подвижника чудесным образом были обретены нетленными и положены в Преображенском храме, с приделом во имя преподобного Александра Свирского. В том же году началось общецерковное почитание святого: 30 августа – день преставления и 17 апреля – день прославления. В благочестивом народном сознании преподобный Александр Свирский почитается «новозаветным Авраамом», ибо удостоился явления Святой Троицы в виде Трех Ангелов.
В «Иконописном подлиннике» о преподобном Александре сказано: «Подобием стар и сед, власы просты, брада бела, редка, широка, длиною с Сергиеву, ризы преподобнические, рука благословенная, в другой свиток, а в нем написано: «Терпите, братия, скорби и беды, да избавитеся муки вечныя», одежда его бе свита толста вельми и искрашена, яко рубищем на ризе его многим изошвенным быти; поживе 85 лет».
Александро-Свирский монастырь стал одной из наиболее значительных обителей на севере Руси, духовно-просветительным центром для всего Олонецкого края. Сам г. Олонец был основан в 1647 году на средства Александро-Свирского монастыря, при непосредственном участии его братии. Большую помощь оказал монастырь и при основании Санкт-Петербурга в 1703 году. Обитель, основанная преподобным Александром Свирским, имела исключительно важное значение для сохранения целостности Русской Державы и неприкосновенности ее границ на севере. Во время нашествия Литвы, в период Северной войны со шведами, во время Отечественной войны 1812 года обитель вносила огромные денежные средства и продовольственные припасы «на ратных людей» и вообще «на государево дело». В обители хранились списки с грамот царей: Михаила Федоровича, Иоанна Грозного, Феодора Иоанновича, Василия Иоанновича Шуйского, Алексея Михайловича, Петра Великого, а также множество присланных ими для нужд монастырской братии церковных облачений и священных сосудов.
Духовным залогом процветания и благополучия Русского Севера являлись тесные молитвенные связи между Александро-Свирским монастырем и другими православными обителями Русского Севера, такими, например, как Валаамский и Соловецкий монастыри.
Литература:
1. Житие, чудеса и служба преподобного и Богоносного отца нашего Александра Свирского, чудотворца. Изд. 3. М., 1888.
2. Свято-Троицкий Александро-Свирский монастырь. СПб., 1901.
3. Олонецкий патерик. Сост. архим. Никодим. Петрозаводск, 1910.
Собо́р святы́х Сербских просвети́телей и учи́телей
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 1.
Подо́бен: Небе́сных чино́в:
Взя́сте на ра́мо Крест Христо́в/ и распя́стеся ми́ру,/ преподо́бнии отцы́, святи́телие всеблаже́ннии,/ и после́довасте стопа́м созда́вшаго от несу́щих вся Бо́жия Сло́ва,/ Его́же моли́те, да прии́мем грехо́в проще́ние/ и насле́дницы бу́дем жи́зни ве́чныя.
Яви́стеся сокро́вище доброде́телей/ и вся в уме́ты вмени́сте, я́же в ми́ре кра́сная,/ Христо́вою любо́вию распаля́емии,/ иска́сте я́же Бо́гу уго́дная, до́блии па́стырие,/ сего́ ра́ди бы́сте жи́телие Ца́рствия Небе́снаго,/ всегда́ о нас моля́щеся,/ да бу́дем и мы того́ соприча́стницы.
Безстра́стия бы́вше кра́снии сосу́ди,/ отцы́ преблаже́ннии,/ чуде́с исто́чницы,/ кре́пцыи столпи́ мона́шествующих,/ де́монов прогони́телие/ и страсте́й душепа́губных цели́телие,/ сего́ ра́ди пе́сньми почита́ем вы, наста́вницы на́ши прему́дрии,/ моли́теся Христу́ Бо́гу, да спасе́т ду́ши на́ша.
Сла́ва, глас 5:
Кто дово́лен похвали́ти таковы́я служи́тели,/ возсия́вшия в се́рбстей земли́ напосле́док лет,/ благода́тию бо Ду́ха Свята́го/ чуде́с исцеле́ний дар прие́мше от Бо́га/ и свои́х теле́с нетле́ние,/ нам же у Христа́ про́сят грехо́в проще́ния/ и ве́лия ми́лости.
И ны́не, Богоро́дичен:
Под кров Твой, Де́во Госпоже́, прибега́ем,/ вси ро́ди челове́честии,/ просвети́ нас све́том рождества́ Твоего́,/ гре́шныя рабы́ Твоя́,/ моля́щияся Ти приле́жно,/ и, кла́няющеся пречи́стому о́бразу Твоему́,/ про́сим ве́лия ми́лости.
На стихо́вне стихи́ры, глас 2.
Подо́бен: До́ме Евфра́фов:
Дом и жили́ще/ Ду́ха Пресвята́го,/ преподо́бнии отцы́, есте́,/ те́мже и нас до́мы Того́ соде́лайте,/ святу́ю ва́шу па́мять почита́ющих.
Стих: Честна́ пред Го́сподем/ сме́рть преподо́бных его́.
Преподо́бнии отцы́ и святи́телие всеблаже́ннии,/ не преста́йте моля́щеся о при́сных ва́ших ча́дех,/ и́хже нетле́нием теле́с ва́ших возвесели́сте,./ я́ко да вси честну́ю па́мять ва́шу/ ра́достно почита́ем.
Стих: Восхва́лятся преподо́бнии во сла́ве/ и возра́дуются на ло́жах свои́х.
Моли́теся приле́жно за ны, наста́вницы на́ши,/ я́ко да изба́вимся от бед и скорбе́й,/ я́же на ны нахо́дят,/ ускори́те, святи́и, на по́мощь нам,/ и́же по до́лгу вас ублажа́ем.
Сла́ва, глас 3:
Мног труд, ходя́ще те́сным путе́м в житии́ свое́м,/ претерпе́ли есте́, отцы́ преподо́бнии,/ те́мже пришли́ есте́ в ти́хое приста́нище/ и ра́дость неизрече́нную,/ иде́же ли́цы пра́ведных веселя́тся,/ явля́ющеся нам, ча́дом свои́м,/ я́ко мздоприя́телие трудо́в свои́х.
И ны́не, Богоро́дичен, глас то́йже:
Пренепоро́чная Ма́ти,/ покланя́ющеся Преве́чному Младе́нцу,/ незаходи́мому све́ту Христу́,/ мо́лимся, моли́ Сы́на Твоего́ и Бо́га на́шего/ спасти́ ны от лю́тых зол и тле́ния сме́ртнаго,/ я́ко да зове́м Ти:/ ра́дуйся, Пресвята́я Ма́ти Христа́ Бо́га на́шего.
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 4:
Со́лнца светле́йши, свяще́нная па́мять ва́ша,/ святи́телие всеблаже́ннии,/ ве́рным лю́дем ва́шим возсия́ дне́сь,/ Боже́ственными блиста́нии сих просвеща́ющи,/ Са́вво, предо́блий первопресто́льниче се́рбския земли́,/ Арсе́ние преосвяще́нне,/ архипа́стырие и учи́телие се́рбскаго ро́да,/ всех ве́рных ева́нгельски наставля́ете, отгоня́юще де́монов тьму́ от приходя́щих к вам,/ те́мже ублажа́ем вас и, моля́щеся умиле́нно, воспева́ем:/ отечестволюбцы и чудотво́рцы,/ предста́телие и моли́твенницы,/ моли́теся ко Го́споду, да спасе́т ду́ши на́ша.
Вои́стинну свяще́ннейший и Богоно́снии/ я́вльшеся, Боже́ственнии отцы́,/ пома́занием Свята́го Ду́ха обложе́ннии,/ и све́тло всегда́ входя́ще, сла́внии, во свята́я святы́х,/ све́тлостьми богонача́льными облиста́еми благода́тию,/ поуча́юще ны спаси́тельным та́йнам,/ я́ко священнота́йнии су́ще се́рбстии первопресто́льницы,/ со дерзнове́нием моли́теся о душа́х на́ших.
Се́рбстии святи́телие Богому́дрии,/ прославля́ем вас, я́ко святы́х Бо́жиих,/ зане́ земля́ вас не потаи́ла е́сть,/ но Бог откры́ сла́вная чудеса́ ва́ша,/ нетле́нием теле́с ва́ших, ми́ро исцеле́ния источа́ющих,/ Тому́, святи́и, помоли́теся/ дарова́ти душа́м на́шим мир и ве́лию ми́лость.
Житие́ ва́ше просия́ доброде́телей блиста́нии,/ и́миже ве́рныя просвеща́ете,/ отгоня́юще бу́рю пре́лести лука́ваго,/ те́мже во и́стине яви́стеся светоза́рное со́лнце,/ священнонача́льницы блаже́ннии,/ всели́вшеся та́мо, иде́же сия́ет свет невече́рний,/ сы́нове дне благода́тию Свята́го Ду́ха есте́;/ сего́ ра́ди, чту́ще ва́шу святоле́пную па́мять,/ соверша́ем пра́здник и, веселя́щеся, вас ублажа́ем.
Я́ко зве́зды многосве́тлыя,/ утверди́стеся в сердца́х своего́ наро́да,/ прехва́льнии святи́телие,/ мир украша́юще, всечестни́и отцы́,/ и сей луча́ми догма́тов благове́рия просвети́вше,/ отгоня́ете ересе́й тьму́;/ сего́ ра́ди и мы, ча́да ва́ша, Са́вво вторы́й со Иоанни́кием прему́дрым, мо́лимся:/ изба́вите от тли и бед/ творя́щих с ве́рою всечестну́ю па́мять ва́шу.
Сия́нии духо́вными просвети́сте род се́рбский,/ лучеза́рная со́лнца яви́стеся,/ Никоди́ме, Дании́ле, Ефре́ме, Спиридо́не, со Иоанни́кием Богодухнове́нным,/ я́ко лучи́, во вся концы́ земли́ проходя́ще,/ ве́рных се́рдца просвеща́ете, треблаже́ннии отцы́ на́ши;/ сего́ ра́ди, припа́дающе, мо́лимся:/ прогоняйте, Богоно́сцы, па́губу неве́рия и злы́я е́реси от достоя́ния своего́/ си́лою от Де́вы Возсия́вшаго.
Апо́столом равнопропове́дателие,/ святи́телем единому́дреннии,/ по́стником сподви́жницы,/ па́стырие су́ще Богоизбра́ннии,/ ми́лости благоутро́бия пода́телие,/ се́рбстии первопресто́льницы,/ досто́йно восхваля́юще, ублажа́ем вас, отце́в на́ших,/ Арсе́ние, Евста́фие, Иа́кове,/ Дании́ле, Са́вво, Ни́коне,/ Мака́рие, Кири́лле с Макси́мом преосвяще́нным,/ я́ко А́нгелом собесе́дницы/ и моли́твенницы о душа́х на́ших.
Духо́вною благода́тию, отцы́ преподо́бнии,/ отыми́те неду́ги и стра́сти,/ отгоня́юще от нас ду́хи лука́выя,/ и, просвеща́юще ве́рныя,/ обраща́йте неве́рныя в ве́ру святу́ю Правосла́вную/ блиста́нии чуде́с ва́ших,/ мы же, дне́сь немо́лчными гла́сы/ воспева́юще пресве́тлую ва́шу па́мять, мо́лимся:/ моли́те Христа́ Бо́га, да спасе́т ду́ши на́ша.
Сла́ва, глас 1:
Ра́дуйся, ту́чнейшая Бо́жия горо́,/ славяносе́рбская Свята́я,/ усыре́нная Ду́хом, Патриархи́е,/ ра́дуйся, раю́, насажде́нный безсме́ртными святы́ми,/ в тебе́ бо благоволи́ всегда́ водворя́тися Бог наш/ с Пречи́стою Ма́терию Свое́ю,/ обогаща́я тя чуде́с излия́нии от преподо́бных Свои́х.
И ны́не, Богоро́дичен, глас то́йже:
Егда́ просвеща́шася лю́дие Твой, Го́споди,/ тогда́ изво́лил еси́ да́ти Патриархи́и Се́рбстей о́браз Пресвяты́я Ма́тере Свое́й,/ Ю́же воспева́юще, мо́лим,/ да спасе́т от злых враго́в язы́к се́рбский,/ и́же благоче́стно велича́ет от Нея́ ро́ждшагося.
Вход. Проки́мен дне. И чте́ния 3.
При́тчей чте́ние (главы́ 3 и 8):
Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же е́сть ка́мений многоце́нных,/ все же честно́е недосто́йно ея́ е́сть./ Долгота́ бо дней и ле́та живота́ в десни́це ея́,/ в шу́ице же ея́ бога́тство и сла́ва,/ от уст ея́ исхо́дит пра́вда,/зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́, исхо́ди живота́,/ и уготовля́ется хоте́ние от Го́спода./ сего́ ра́ди молю́ вас/ и предлага́ю мой глас сыново́м челове́ческим:/ я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́занный же, прилага́йте сердца́./ Послу́шайте мене́ и па́ки:/ честна́я бо реку́ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва су́ть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.
При́тчей чте́ние (главы́ 10 и 11):
Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нечести́вых развраща́ются./ Ме́рила льсти́вая ме́рзость пред Го́сподем,/ вес же пра́ведный прия́тен ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их,/ и поползнове́ние отрица́ющихся упасе́т их./ Не по́льзуют име́ния в де́нь я́рости,/ пра́вда же изба́вит от сме́рти./ У́мер пра́ведный, оста́ви раска́яние,/ нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́,/ в нече́стие же па́дает непра́вда./ Пра́вда муже́й пра́вых изба́вит их,/ безсове́тием же пленя́ются беззако́ннии./ Сконча́вшуся му́жу пра́ведну, не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет,/ вме́сто же его́ предае́тся нечести́вый./ Во усте́х нечести́вых се́ть гра́жданом,/ чу́вство же пра́ведных благоспе́шное./ Во благи́х пра́ведных испра́вится град,/ и в поги́бели нечести́вых ра́дование./ Во благослове́нии пра́вых возвы́сится град,/ усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.
Прему́дрости Соломо́ни чте́ние
(глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется,/ седи́на же е́сть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник, преста́влен бы́сть./ Восхище́н бы́сть, да не зло́ба измени́т ра́зума его́/ или́ ле́сть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных его́/ и посеще́ние во избра́нных его́.
На лити́и стихи́ры, глас 4:
Христоимени́тый гра́де, в Бо́зе лику́й,/ весели́ся, Патриархи́е Пе́кская, Митропо́лие се́рбская,/ содержа́нии, я́ко многоце́нное сокро́вище,/ в не́дрех свои́х святи́тели вели́кия,/ и́хже моли́твами, Христе́ Бо́же,/ поми́луй и спаси́ нас.
Ра́дуйтеся, честна́я пребыва́ния святи́телей преподо́бных,/ испо́лненная Ду́ха Боже́ственнаго,/ облагоуха́ющая чу́вствия душ и теле́с на́ших,/ и́миже восхо́дим на Не́бо,/ земны́я сла́сти отчужда́ющеся/ и ви́дяще Христа́, святы́м венцы́ подава́юща.
Прииди́те, правосла́внии се́рбстии собо́ри,/ прииди́те, ве́рнии, ве́сь язы́к се́рбский,/ прииди́те, се́рбская совокупле́ния,/ я́ко да всечестны́й пра́здник святи́телей се́рбских восхва́лим,/ и́же благоугоди́ша Творцу́ своему́,/ и с Дави́дом воспои́м:/ нам же зело́ че́стни бы́ша дру́зи Твои́, Го́споди,/ зело́ утверди́шася нача́льствия их/ Тобо́ю, Христе́ и Спаси́телю душ на́ших.
Ра́ки ва́ша вопию́т к Бо́гу,/ моли́тве ва́шей вспомоществу́ют доброде́тели ва́ша, Богоно́снии отцы́,/ свята́я же телеса́ ва́ша, я́ко хра́ми богоуго́дных душ,/ укрепля́ют благочести́выя лю́ди,/ и́же усе́рдно к вам вопию́т,/ да моли́те Христа́ Го́спода,/ я́ко спасти́ и просвети́ти ду́ши на́ша.
Сла́ва, глас 5:
Святи́и се́рбстии, просвети́телие и учи́телие,/ Симео́не мироточи́ве, Са́вво равноапо́стольне,/ Арсе́ние чудотво́рче, Са́вво вторы́й с Иоанни́кием,/ Евста́фием и Иа́ковом прему́дрым,/ прехва́льный Никоди́ме, Дании́ле, Ефре́ме,/ Иоанни́кие со пречу́дным Спиридо́ном,/ пресла́вный Са́вво тре́тий со Григо́рием Богоно́сным,/ преди́вный Кири́лле, Иоа́нне, Ни́коне,/ Мака́рие со пра́ведным Макси́мом,/ вси бо, раби́ бла́зи и ве́рни,/ добри́ же де́лателие виногра́да Христо́ва,/ тяготу́ дневну́ю сего́ жития́ му́дре претерпе́ли есте́,/ возраща́юще да́нный вам тала́нт и незави́девше по вас прише́дшим,/ те́мже и две́рь Небе́сная вам отве́рзеся,/ е́юже внидо́сте в ра́дость Влады́ки Христа́,/ моля́щеся о нас, ча́дех свои́х.
И ны́не, Богоро́дичен Одиги́трии, глас 8:
Богоро́дицу Мари́ю вси воспое́м:/ ра́дуйся, Ма́ти Бо́жия;/ ра́дуйся, ле́ствице одушевле́нная;/ ра́дуйся, купино́ неопали́мая;/ ра́дуйся, ста́мно всезлата́я;/ ра́дуйся, цве́те ве́ры;/ ра́дуйся, же́зле прозябы́й;/ ра́дуйся, злата́я кади́льнице;/ ра́дуйся, горо́ Бо́жия, Присе́нная, Де́во;/ ра́дуйся, разреше́ние кля́твы пе́рвыя Е́вы;/ ра́дуйся, престо́ле Госпо́день;/ ра́дуйся, многомоли́твенная красото́;/ ра́дуйся, Влады́чице.
На стихо́вне стихи́ры, глас 3.
Подо́бен: Ве́лия Креста́:
Христо́ву ве́ру, я́ко свет на све́щнице,/ поста́висте, наста́вницы,/ просвеща́юще род наш и град сей,/ и мно́гих от неве́рия ко Христу́ приведо́сте,/ отцы́ преподо́бнии.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Красу́йся и лику́й, Се́рбская Патриархи́е,/ име́ющи в себе́ мо́щи преподо́бных святи́телей,/ отгна́вших от Тебе́ тьму́ неве́рия/ и просвети́вших тя све́том богоразу́мия,/ и́же мо́лятся Христу́ за вся лю́ди твоя́.
Стих: Восхва́лятся преподо́бнии во сла́ве/ и возра́дуются на ло́жах свои́х.
Ве́лие чу́до о вас зри́тся/ и у́жаса испо́лнено, отцы́ святи́и,/ ка́ко, погребе́ннии мно́гая ле́та,/ неруши́ма соблюдо́шася Блаже́нная телеса́ ва́ша,/ судьба́ми, и́миже ве́сть Сам Прославля́яй вас.
Сла́ва, глас 4:
А́нгельски пожи́вшия на земли́/ и А́нгелом равностоя́тели я́вльшияся на Небеси́,/ с ни́ми же наслажда́ющияся неизрече́нныя о́ныя добро́ты,/ достоблаже́нныя отцы́ на́ша, помо́щники и засту́пники те́плыя,/ прииди́те, ве́рнии, восхва́лим, си́це вопию́ще:/ ра́дуйся, Са́вво, со́лнцу подо́бный свети́льниче;/ ра́дуйся, Арсе́ние, зерца́ло и о́бразе всем се́рбским святи́телем;/ ра́дуйся, Са́вво вторы́й, подо́бный Моисе́ю во кро́тости;/ ра́дуйся, Никоди́ме, подо́бный проро́ку Илии́, до́блественный ревни́телю;/ ра́дуйся, Ефре́ме, ангелови́дный челове́че;/ ра́дуйся, Дании́ле, звездо́ у́тренняя, тьму́ неве́дения прогоня́ющая;/ ра́дуйся, Евста́фие, забра́ло необори́мое от враг ви́димых и неви́димых;/ ра́дуйся, Спиридо́не, цевни́це духо́вная;/ ра́дуйся, Григо́рие Богодухнове́нне;/ ра́дуйся, Мака́рие преблаже́нне;/ ра́дуйся, Макси́ме преосвяще́нне;/ ра́дуйтеся, вси первопресто́льницы се́рбския земли́;/ ра́дуйтеся, земни́и а́нгели и Небе́снии челове́цы;/ ра́дуйтеся, благоуха́ннии цве́ти ра́йстии;/ра́дуйтеся, пребога́тая сокро́вища, сокрове́нная в земли́;/ ра́дуйтеся, би́серие многоце́ннии;/ ра́дуйся, похвало́ всея́ се́рбския земли́;/ ра́дуйтеся, покрови́телие всем притека́ющим к вам с ве́рою и любо́вию;/ ра́дуйся, красото́ патриа́ршеския Ла́вры;/ ра́дуйся, всем Це́рквам добро́то,/ до́брыми и богоуго́дными де́лы ва́шими украси́хомся;/ ра́дуйтеся, за всех христиа́н моли́твенницы;/ ра́дуйтеся, всему́ ми́ру свети́льницы.
И ны́не, Богоро́дичен, глас то́йже:
Дави́д, Боже́ственный и чу́дный проро́к,/ издале́ча прови́дя, глаго́лет:/ лицу́ Твоему́ помо́лятся бога́тии лю́дстии,/ мы же, ве́рнии, покланя́ющеся, лобыза́ем честну́ю ико́ну Твою́, Пречи́стая,/ и освящаем ду́ши и телеса́ своя́.
На благослове́нии хле́бов тропа́рь святы́х два́жды. И тропа́рь Одиги́трии: К Богоро́дице приле́жно: или́ Богоро́дице, Де́во: еди́ножды.
Тропа́рь святы́х, глас 4:
Первосвяти́телие Богоно́снии, отцы́ на́ши,/ я́ко просвети́телие се́рбстии,/ святи́и первопа́стырие и патриа́рси,/ и́стиннии храни́телие апо́стольских преда́ний,/ столпи́ непоколеби́мии,/ Правосла́вия наста́вницы,/ Влады́ку всех Христа́ моли́те/ мир вселе́нней дарова́ти/ и душа́м на́шим ве́лию ми́лость.
НА У́ТРЕНИ
На Бог Госпо́дь: тропа́рь святы́х, два́жды. Сла́ва, и ны́не: Одиги́трии или́ Богоро́дичен.
По 1-м стихосло́вии седа́лен, глас 3:
Столпи́ бы́сте Це́ркве Се́рбския непоколеби́мии, учи́телие Правосла́вия,/ бога́тство некра́домое благоче́стия яви́стеся, святи́телие всеблаже́ннии,/ безстра́стием просия́ ва́ше житие́,/ в ко́ем изъясня́ются уче́ния повеле́ний Христа́ Бо́га,/ Ему́же, преподо́бнии отцы́, моли́теся о спасе́нии душ на́ших.
Сла́ва, и ны́не, Богоро́дичен:
Лю́дие благочести́вии, правове́рнии собо́ри христоимени́тии,/ приступи́те ве́рно вси, Боже́ственному припа́дающе Бо́жия Ма́тере о́бразу,/ и́мже исцеле́ния боля́щим ра́достно подава́ет,/ уязвля́ет же злосла́вныя, я́ко стрела́ от лука́,/ нас всех веселя́щи светови́дно/ и благода́тию озаря́ющи моли́твами Свои́ми.
По 2-м стихосло́вии седа́лен, глас 4:
Нам, я́ко при́сным свои́м, напосле́док яви́стеся, вели́цыи святи́телие,/ те́лом нетле́нии, утвержда́юще в нас наде́жду,/ я́ко и по сме́рти неотсту́пно ду́хом посеща́ете нас,/ те́мже, припа́дающе, мо́лимся:/ моли́теся о нас, почита́ющих любе́зно па́мять ва́шу,/ да изба́вимся от вся́ких зол моли́твами ва́шими.
Сла́ва, и ны́не, Богоро́дичен:
Да ликовству́ет све́тло ве́рных все мно́жество,/ рыда́ет же де́монское во́инство, ви́дяще многоиме́нно сия́ющия пра́здники Бо́жия Ма́тере,/ Ю́же ублажа́ем, я́ко Богома́терь, Боже́ственными пе́сньми,/ иде́же бо богоприя́тно сла́вит ся Преблагослове́нная Богоро́дица Влады́чица, Богоизбра́нная Отрокови́ца,/ неприя́зни паде́ние, христиа́н же кре́пкое утвержде́ние.
По полиеле́и седа́лен, глас 4:
Прему́дрии учи́телие, се́рбскаго же ро́да покрови́телие,/ и́же сла́вяще Бо́га словесы́ и де́лы на земли́,/ да возвели́чатся дне́сь,/ я́ко спасе́ния всем нам споспе́шницы.
Сла́ва, и ны́не, Богоро́дичен:
Пречи́стая Твоя́ ико́на, Богоро́дице Де́во,/ врачевство́ всего́ ми́ра духо́вное,/ к не́йже прибега́ем, Тебе́ покланя́ющеся, почита́ем и лобыза́ем ю́,/ исцеле́ний благода́ть почерпа́юще от нея́,/ и неду́гов теле́сных и душе́вных страсте́й Твои́ми моли́твами свобожда́емся.
Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Иоа́нна, зача́ло 36.
По 50-м псалме́ стихи́ра, глас 6:
Боже́ственная благода́ть осеня́ет/ всечестны́я ра́ки моще́й ва́ших,/ преблаже́ннии архиере́и и учи́телие се́рбстии,/ те́мже и в воню́ ми́ра чуде́с ва́ших притека́юще,/ неду́гом исцеле́ния почерпа́ем,/ вопию́ще Христу́, просла́вльшему вы:/ Многоми́лостиве, поми́луй и спаси́ ду́ши на́ша.
Кано́н Богоро́дице со ирмосо́м на 6 и святы́м два кано́на на 8.
Кано́н святы́м, глас 8.
Пе́снь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Мно́гими содержи́мии напа́стьми,/ к вам прибега́ем, спасе́ние получи́ти,/ о вели́цыи святи́телие и патриа́рси,/ от лю́тыя ну́жды и бед спаси́те нас.
Страсте́й прило́зи и мно́гия печа́ли погубля́ют мою́ ду́шу,/ умири́те ю́, святи́телие, к Бо́гу ва́шими моли́твами/ преложи́в ея́ печа́ли на весе́лие.
Спа́са Христа́ моли́те, избра́ннии чудотво́рцы,/ Са́вво, Арсе́ние, Са́вво вторы́й с Никоди́мом прехва́льным,/ изба́витися нам от бед, скорбе́й и ва́рварскаго нахожде́ния ва́шими моли́твами.
Богоро́дичен: Су́ще в ско́рбех и боле́знех,/ умиле́нно про́сим посеще́ния и промышле́ния Боже́ственнаго,/ его́же сподо́би нас, Богома́ти Влады́чице.
Ин кано́н святы́м, глас и ирмо́с то́йже.
Пе́снь 1
Вели́кия патриа́ршеския Ла́вры созда́теля в пе́снех почита́ю,/ я́ко нача́ток Боже́ственнаго смотре́ния в Се́рбии, святи́теля Са́вву со Арсе́нием,/ и́же о́браз и начерта́ние бы́ша святи́телем в се́рбстей земли́,/ во виде́ниих вку́пе же и дея́ниих.
Ко́е благодаре́ние, ко́е ли воздая́ние принесе́м святи́телем на́шим,/ и́же облагоде́тельствова́ша нас, о лю́дие се́рбстии?/ Воззри́м на до́брое сконча́ние их жития́,/ и́мже до́бре наставля́емся.
Сво́йственнаго у́бо им возноше́ния горе́,/ прилепля́ху сердца́ своя́ к Бо́гу,/ отчужда́ющеся любостяжа́ния сокро́вищ земли́,/ сего́ ра́ди Богому́дрении яви́шася храни́телие о́бщества и предста́телие,/ о́бщих у́бо и похва́л да сподо́бятся.
Богоро́дичен: Тя, о́бщее любоче́стие на́шего естества́, сла́вим вси, Всенепоро́чная,/ я́ко еди́ными усты́ принося́ще Ти хвале́бную пе́снь велича́ния.
Катава́сия по уста́ву.
Пе́снь 3
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Засту́пницы се́рбскому ро́ду есте́, Бо́жии уго́дницы,/ сего́ ра́ди упра́вите стопы́ на́ша ко приста́нищу спасе́ния,/ зане́ вы есте́ ве́рным огражде́ние.
Мо́лим вас, святи́и чудотво́рцы, Ефре́ме, Иоанни́кие и Дании́ле,/ душе́вное смуще́ние и бу́рю печа́ли разори́ти,/ мир и безмяте́жие пода́ти нам моли́твами ва́шими.
Благи́м подража́телие, от Бо́га чудесы́ обогати́вшеся,/ всем нам помога́йте, моля́щеся Христу́ Го́споду,/ прославля́ющему Своя́ уго́дники.
Богоро́дичен: Лю́тыми неду́ги и боле́зненными, тя́жкими нахо́ды ва́рваров и супоста́тов истяза́еми,/ припа́дающе, мо́лимся Ти, Де́во Богоро́дице:/ Ты нам помози́,/ преложи́вши печа́ль и лю́тую ско́рбь на ра́дость и весе́лие.
Ин. Ирмо́с то́йже
Зако́ну Ду́ха повину́лися есте́, о святи́телие,/ всех нас науча́юще не покоря́тися зако́ну грехо́внаго изволе́ния.
Растерза́вше у́зы естества́ преесте́ственным чи́стым житие́м свои́м,/ Богоно́снии Евста́фие, Спиридо́не и Иа́кове,/ прия́сте вышеесте́ственных де́йство.
От молвы́ ми́ра сего́ удаля́ющеся, о́тче Григо́рие и Са́вво,/ я́ко да в пусты́ннем безмо́лвии всегда́ бесе́дуете к Бо́гу,/ Его́же моли́те и о всех нас,/ да безмяте́жно поживе́м в ны́нешнем ве́це,/ благоугожда́юще ему́ до́брыми де́лы.
Богоро́дичен: Спасти́ восхоте́в челове́ка, я́ко Благоде́тель и Человеколю́бец,/ во Твою́ утро́бу неопи́санно, Богома́ти, всели́ся Преве́чное Сло́во.
Седа́лен, глас 4:
Простри́те ва́ша дла́ни, святи́и отцы́, ко всех Влады́це,/ и́миже потруди́стеся до́бре, благоугожда́юще ему́,/ тре́бующим неоску́дно подава́йте,/ отве́рзающе на моли́тву уста́ своя́,/ и́миже Бо́га славосло́висте и лю́ди благоразу́мию науча́ете,/ ускори́те у́бо на по́мощь призыва́ющим вас/ и изба́вите нас моли́твами свои́ми от обдержа́щих ны бед, зол и вели́кия ско́рби.
Сла́ва, и ны́не, Богоро́дичен:
Моле́ние те́плое и стена́ необори́мая,/ ми́лости Исто́чниче, ми́рови прибе́жище,/ приле́жно вопие́м Ти:/ Богоро́дице Влады́чице, предвари́/ и от бед изба́ви нас,/ Еди́на вско́ре предста́тельствующая.
Пе́снь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Страсте́й мои́х смуще́ние и мно́гих бед нахожде́ния бу́рю/ ути́шити моли́теся, святи́и отцы́ и архипа́стырие,/ к Бо́гу ва́шими моли́твами.
Милосе́рдия бе́здну открыйте нам, святи́и Иоанни́кие и Евста́фие со про́чими,/ моля́щеся Милосе́рдому Бо́гу,/ И́же послу́шает ва́ших моли́тв те́плая проше́ния о призыва́ющих вы усе́рдно.
Наде́жду иму́ще вас, святи́и архипа́стырие и патриа́рси со про́чими седмиюна́десяте, я́ко сте́ну недви́жиму,/ те́мже упова́ем изба́витися от всех зол/ и находя́щих на ны скорбе́й моли́твами ва́шими.
Богоро́дичен: Исцели́, Чи́стая, не́мощи на́ша и стра́сти теле́сныя,/ поспеши́, Госпоже́, здра́вие пода́ти воспева́ющим Тя.
Ин. Ирмо́с то́йже
Трубо́ вели́кая, Це́ркве свети́льницы,/ просвеща́юще вселе́нную пропове́дным веща́нием,/ устроя́ете неподви́жно Святу́ю Це́рковь Правосла́вную во оте́чествии свое́м,/ великоимени́те Са́вво и Арсе́ние со про́чими,/ мо́лимся: подвиза́йте сие́ собра́ние.
Благословя́ще ва́ша труды́ и боле́зни,/ я́же подъя́сте о устрое́нии и просвеще́нии своего́ наро́да,/ велича́ем, отцы́, ва́шу Блаже́нную па́мять.
Богоро́дичен: Егда́ просвеща́шеся язы́к се́рбский, Пренепоро́чная Богома́ти,/ прия́ла еси́ достоя́ние Вседе́теля Сы́на Твоего́ в благо́е покрови́тельство,/ и́мже спаса́й и в сия́ дни храня́щияся оста́нки благоче́стия.
Пе́снь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.
Испо́лните, отцы́, весе́лия живо́т наш/, избавля́юще нас ва́рварскаго нахожде́ния и междоусо́бныя бра́ни.
Изба́вите нас от бед и лю́тых скорбе́й, святи́и чудотво́рцы,/ я́ко предста́телие и те́плии моли́твенницы о душа́х на́ших.
Разреши́те мглу́ прегреше́ний мои́х и безме́стных дея́ний/ ва́шими к Бо́гу моли́твами.
Богоро́дичен: Я́ко сте́ну неруши́му и приста́нище Тя стяжа́хом,/ душа́м же на́шим соверше́нное спасе́ние и осла́бу в ско́рбех, о Влады́чице,/ те́мже спаси́ нас, призыва́ющих Тя, Де́во Мари́е.
Ин. Ирмо́с то́йже
Ше́ствие ва́ше до́бре сконча́сте,/ на Небеса́ всели́стеся, Влады́чню Престо́лу предстоя́ще со А́нгелы,/ Того́ воспева́йте, я́ко просла́вися.
Житие́м доброде́тельным Бо́гу угоди́сте,/ велиа́ра посрами́сте и Христу́ возопи́сте:/ не́сть свят и не́сть пра́веден па́че Тебе́, Го́споди.
Богоро́дичен: Зача́ла еси́ О́тчее Сло́во Ипоста́сное,/ Его́же моли́, Богоро́дице, изба́вити от бед рабы́ Твоя́,/ вои́стинну призыва́ющия Тя.
Пе́снь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Сме́рти, тли и ва́рварскаго плене́ния изба́вите,/ от о́гненнаго запале́ния град свой сохрани́те/ ва́шими к Бо́гу моли́твами.
Засту́пники и тве́рдыя храни́тели ро́ду на́шему ве́мы вас, всеблаже́ннии отцы́,/ те́мже к вам прибега́юще, ми́лость прие́млем и бед избавля́емся.
Я́ко сте́ну и приста́нище стяжа́хом вас, чудотво́рцы,/ в ско́рбех утеше́ние и спасе́ние душ на́ших.
Богоро́дичен: Засту́пницу Тя и Храни́тельницу тве́рду живота́ вем, Деви́це,/ напа́стей реша́щу молвы́ и нало́ги бесо́в отгоня́ющу,/ молю́ся Ти всегда́ страсте́й мя изба́вити, Всенепоро́чная.
Ин. Ирмо́с то́йже
Храм Свята́го Ду́ха от ю́ности бы́сте, отцы́ святи́и,/ сего́ ра́ди и по сме́рти соблюде́ся те́ло ва́ше нетле́нно,/ его́же ра́достно лобыза́юще, вопие́м Христу́:/ Свят еси́, Го́споди, спаса́яй ду́ши на́ша.
Измла́да Христа́ возлюби́сте,/ сего́ ра́ди, я́ко рачи́телей Свои́х, возлюби́ вас Христо́с,/ к Нему́же с ва́ми возопии́м:/ Сла́ва си́ле Твое́й, Го́споди.
Исполня́юще зако́ны Боже́ственныя,/ преиспо́лнистеся дарова́ний Бо́жиих, Христо́вы уго́дницы,/ Ему́же с ва́ми ве́рно воспое́м:/ Сла́ва си́ле Твое́й, Го́споди.
Богоро́дичен: Пресвята́я Влады́чице Мари́е,/ моли́, Его́же родила́ еси́, Бо́га и Царя́ на́шего,/ я́ко да ми́лостив бу́дет нам в де́нь Су́дный.
Конда́к, глас 3.
Подо́бен: Де́ва дне́сь:
На престо́лех святи́тельских благоче́стно пожи́сте/ и лю́ди своя́ к богоразу́мию наста́висте,/ до́бре Бо́гу угожда́юще,/ сего́ ра́ди от Него́ нетле́нием и чудесы́ просла́влены бы́сте,/ я́ко ученицы́ Бо́жия благода́ти.
И́кос:
Первозва́ннаго наме́стницы, се́рбстии первопресто́льницы, Са́вво, Арсе́ние с про́чими,/ о вели́цыи свети́льницы, Тро́ице побо́рницы, Правосла́вию наста́вницы,/ в ми́ре благоче́стно пожи́вше, уче́нием свои́м род се́рбский в правове́рии утверди́сте,/ сего́ ра́ди Ца́рствия Небе́снаго насле́дницы показа́стеся,/ нетле́нием и чудесы́ просла́влени яви́стеся, я́ко ученицы́ Христа́ Бо́га на́шего.
Пе́снь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
На́ше спасе́ние восхоте́л еси́, Спа́се, устро́ити,/ сего́ ра́ди прославля́еши Твоя́ уго́дники чудесы́,/ с ни́миже вопие́м Ти:/ оте́ц на́ших Бо́же, благослове́н еси́.
Воли́теля ми́лости, Его́же роди́ Ма́ти,/ просия́вшии в се́рбстем наро́де святи́телие, укрепля́юще свои́х люде́й,/ моли́те Го́спода, да изба́вит от прегреше́ний и всех зол зову́щих:/ оте́ц на́ших Бо́же, благослове́н еси́.
Сокро́вище спасе́ния и исто́чник исцеле́ния,/ наста́вницы покая́ния бу́дите, Бо́жии уго́дницы, вопию́щим:/ оте́ц на́ших Бо́же, благослове́н еси́.
Богоро́дичен: Рожде́нный Тобо́ю, Де́во Пречи́стая,/ я́ко сокро́вище на́шего спасе́ния, исто́чник нетле́ния,/ столп утвержде́ния и две́рь покая́ния вопию́щим ему́ показа́ся:/ оте́ц на́ших Бо́же, благослове́н еси́.
Ин. Ирмо́с то́йже
Лук врага́ сокруши́сте, бра́нь его́ до конца́ разори́сте/ и соверше́ния доброде́телей, святи́и, достиго́сте,/ просла́вльше Вседе́теля, всех Творца́.
Моли́твою взыдо́сте, святи́телие, в Небе́сная оби́телища,/ иде́же, веселя́щеся с ли́ки безпло́тных,/ помина́йте па́мять ва́шу све́тло пра́зднующия.
Неизрече́нных та́ин Христо́вых служи́телие бы́ти сподо́бистеся,/ те́мже, отцы́, припа́дайте Бо́гу,/ о нас приле́жно моля́щеся.
Богоро́дичен: Правосла́вною ве́рою и любо́вию притека́ющих Ти/ и со стра́хом пою́щих Тя/ моле́бный глас услы́ши, Влады́чице.
Пе́снь 8
Ирмо́с: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки.
По́мощи ва́шея тре́бующих не пре́зрите,/ всехва́льнии архипа́стырие и наста́вницы Правосла́вия,/ пою́ще и превознося́ще Христа́ во ве́ки.
Неможе́ния душ на́ших исцеля́йте,/ от теле́сных боле́зней возставля́юще пою́щих и превознося́щих Христа́ во ве́ки.
Бога́тство исцеле́ний подае́те притека́ющим к вам, Бо́жиим уго́дником,/ и ве́рно пою́щим и превознося́щим Христа́ во ве́ки.
Богоро́дичен: Прило́ги напа́стей и нахо́ды страсте́й отгоня́еши, Де́во,/ я́ко да Тя пое́м и превозно́сим, Чи́стую Богоро́дицу, во ве́ки.
Ин. Ирмо́с то́йже
И нам, пою́щим и сла́вящим ва́шу па́мять, святи́телие,/ испроси́те разреше́ние грехо́в, избавле́ние суда́ и му́ки/ и Ца́рствия Небе́снаго сподобле́ние.
Изба́витися ста́ду ва́шему вся́каго озлобле́ния и ско́рби/ мо́лимся вам, се́рбстии святи́телие,/ вы бо есте́ нам непосты́дная наде́жда, изве́стное упова́ние и стена́ необори́мая.
Уясня́ют, воспева́юще, а́нгельстии чи́ни па́мять ва́шу, Богоно́снии отцы́ патриа́рси;/ и мы же, земни́и, умиле́нно к вам вопие́м:/ испроси́те нам согреше́ний на́ших оставле́ние и благи́х наслажде́ние.
Богоро́дичен: Земноро́дных естество́ на Не́бо Тобо́ю взы́де,/ пала́та бо Царе́ва обрела́ся еси́, Богоро́дице:/ те́мже согла́сно воспева́ем Тя.
Пе́снь 9
Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/с Безпло́тными ли́ки Тя велича́юще.
То́ки слез на́ших не пре́зрите, мо́лим вас, всех святы́х се́рбских,/ подава́йте утеше́ние всем блажа́щим вы.
Ра́дости се́рдца на́ша испо́лните ва́шими к Бо́гу моли́твами,/ о отцы́ и засту́пницы ро́да се́рбскаго крестоно́снаго.
Свети́льницы пресве́тлии, Тро́ицы побо́рницы, Са́вво, Арсе́ние и вси про́чии,/ труды́ и по́двиги ва́шими мрак неве́дения отгоня́ете,/ те́мже благове́рно вас ублажа́ем.
Богоро́дичен: Све́та Твоего́ заря́ми просвети́ ны,/ мрак неве́дения отгоня́ющи и от лю́тых бед спаса́ющи,/ и́же благове́рно Богоро́дицу Тя испове́дающих.
Ин. Ирмо́с то́йже
А́нгелом уподо́бистеся, на высоту́ возлете́сте,/ со Безпло́тными ны́не водворя́ющеся, Христу́ воспо́йте:/ благослове́н Бог Изра́илев.
Мо́ре жите́йское преплы́сте воздержа́нием/ и тем достиго́сте широты́ ра́йския,/ иде́же со А́нгелы при́сно весели́теся.
Ра́ка моще́й ва́ших, о святи́телие, дража́йши сапфи́ра показа́ся,/ чудотворе́нии исцеле́ния источа́ет облобыза́ющим я всем,/ и́же ра́достно от души́ вопию́т:/ сон че́стен пред Го́сподем сме́рть преподо́бных его́.
Богоро́дичен: Тя пе́сньми ублажа́ем, Де́во,/ Бо́га бо роди́вши, на руку́ носи́ла еси́,/ Того́ моли́ за ду́ши на́ша.
Свети́лен:
Светоза́рныя свети́льники, па́че со́лнечных луч,/ от Светоза́рныя и Светонача́льныя Тро́ицы и Трисо́лнечныя Еди́ницы,/ па́че естества́ возвели́ченныя, восхва́лим вси.
Ин свети́лен:
Егда́ у́бо честны́я ва́ша и святы́я мо́щи нетле́нны яви́шася,/ тогда́ благоуха́ние от гробо́в ва́ших изноша́шеся,/ исцеля́ющее неду́ги и отгоня́ющее ду́хи лука́выя.
Сла́ва, и ны́не, Богоро́дичен:
Да почти́тся Всепе́тая Ма́ти Бо́жия,/ Жи́знь су́щую ро́ждшая, Христа́ Бо́га на́шего,/ ра́йских двере́й отверзе́ние, всего́ ми́ра очище́ние, к животу́ возведе́ние./ Сей е́сть проро́ки глаго́ланный:/ Тому́ поклони́мся, Бо́гу и Спа́су душ на́ших.
На хвали́тех стихи́ры на 4, глас 8:
О пречестни́и досточу́днии отцы́,/ святи́телие и патриа́рси,/ полу́ченный тала́нт умно́живше,/ ра́дости Го́спода своего́ сподо́бистеся,/ и ны́не предстои́те с ли́ки святи́телей,/ я́ко украше́ннии благода́тию Боже́ственнаго сия́ния,/ те́мже ве́рою и любо́вию пресве́тлую ва́шу па́мять восхваля́ем,/ Христа́ велича́юще, просла́вльшаго Своя́ уго́дники.
До́брии раби́, бла́зи и ве́рнии де́лателие виногра́да Христо́ва,/ тяготу́ дневну́ю поне́сше,/ да́нный вам тала́нт возрасти́ли есте́,/ те́мже и две́рь Небе́сная отве́рзеся вам,/ и, введе́ни бы́вше в ра́дость Влады́ки Христа́,/ Его́же моли́те о нас, святи́и учи́телие.
По достоя́нию у́бо не мо́жем вас похвали́ти, отцы́ преподо́бнии,/ и по сме́рти у́бо я́ве стра́ждущему от бесо́в явля́етеся,/ и мно́жество духо́в злых от обурева́емаго отго́ните,/ и глаго́лати подае́те язы́ку, свя́занному от злых,/ те́мже мо́лимся,/ моли́те Христа́ и о чту́щих святу́ю ва́шу па́мять,/ да спасе́т ду́ши на́ша.
Дне́сь ду́ши земноро́дных возно́сятся от земны́х,/ дне́сь Небе́сная быва́ют в па́мяти святы́х,/ врата́ бо Небе́сная взе́млются/ и нам сказу́ема быва́ют Влады́чняя./ Сло́ва словеса́ пропове́дуют,/ язы́цы чудеса́ пою́т,/ мы же ко Спа́су возопие́м:/ Сла́ва Тебе́, Христе́ Бо́же,/ ве́рным бо мир и спасе́ние еси́.
Сла́ва, глас то́йже:
Я́ко зве́зды пресве́тлыя во страна́х се́рбских яви́стеся,/ поне́же от ю́ности своея́ плотска́я мудрова́ния победи́сте вся,/ впери́вше ум свой к жела́емому Христу́ Бо́гу,/ сконча́сте до́брое тече́ние посто́м,/ моли́твою, ми́лостынею, бде́нием и чистото́ю теле́сною;/ те́мже отве́рзеся вам Ца́рствие Небе́сное,/ и в сем ви́дите, я́же ви́дят А́нгели,/ прие́млюще воздая́ние трудо́м свои́м,/ Бог бо ве́сть прославля́ти Своя́ уго́дники/ и подава́ти им венцы́ нетле́нныя./ Мы же мо́лим вас:/ моли́теся, святи́и чудотво́рцы, о нас непреста́нно Христу́ Бо́гу,/ да спасе́т ду́ши на́ша.
И ны́не, Богоро́дичен.
Славосло́вие вели́кое. Ектении́. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ сме́рть преподо́бных его́. Стих: Что возда́м Го́сподеви о всех, я́же воздаде́ ми? Апо́стол ко Евре́ем, зача́ло 335. Аллилу́ия, глас 2: Свяще́нницы Твой облеку́тся в пра́вду, и преподо́бнии Твой возра́дуются. Стих: Вни́дем в селе́ния его́. Ева́нгелие от Матфе́я, зача́ло 11. Прича́стен: Ра́дуйтеся, пра́веднии:
Собор сербских святителей празднует пастыреначальников Церкви Сербской ХIIІ-ХVII веков. Большинство из них имеет, помимо общей памяти Собора, отдельные дни празднования: святитель Савва I, архиепископ, – 12 января; святитель Арсений I, архиепископ, – 28 октября; святитель Савва II, архиепископ, – 8 февраля; святитель Евстафий I, архиепископ, – 4 января; святитель Никодим, архиепископ,– 11 мая; святитель Даниил, архиепископ,– 20 декабря; святитель Иоанникий II, Патриарх,– 3 сентября; святитель Ефрем II, Патриарх, – 15 июня.
* * *
или: ико́не твое́й
тьмори́чных – бесчисленных