Май

Месяца мая во 2-й день

Блаженнаго Василия Кадомскаго

На велицей вечерни

На Господи, воззвах: стихиры, глас 5:

Миру чужд быв,/ сущих в мире не чуждался еси,/ юродив наречен,/ мудрости наставлял еси,/ страдания терпяй,/ страждущих исцелял еси,/ темже в житии твоем привременнем/ милость Божию улучил еси,/ блаженне Василие.

Образ терпения и незлобия являя,/ многострадальному Иову подражал еси,/ сердце в жилище Духу Святому утотовляя,/ по вся дни и нощи в молитве пребывал еси,/ странствию Христову ревнуя,/ Царствия Божия достигл еси,/ блаженне Василие.

Возлюби́в усе́рдно Го́спода/ и трудолюбне подвиза́яся,/ Боже́ственною благода́тию просвети́лся еси́/ и дары Духа Святаго стяжал еси./ Темже, дерзновение твое к Богу ведуще,/ к тебе с молитвою притекаем,/ блаженне Василие.

Слава, глас 6:

О, блаженне Василие,/ града Рязани похвало,/ мира чуждаяся,/ смирен, целомудр, праведен/ и заповедей Божественных хранитель явился еси,/ молися за ны ко Господу,/ да спасет души наша.

И ныне, Богородичен, глас тойже: Кто Тебе не ублажит, Пресвятая Дево:

Вход. Прокимен дне. И чтения три преподобническая.

На литии стихира храма и святаго, глас 3:

Блаженне Василие чудне,/ человече Божий,/ яко юрод, на земли пожил еси/ и, яко злато в горниле, душу свою очистил еси./ Грехов прощение нам испроси/ и недугов избавление,/ да Царствия Небеснаго сподобимся.

Слава, глас 2:

Все упование на Бога возложив,/ пучину жития земнаго преплыл еси/ и, брега Горняго Отечества достигнув,/ со ангелы на Небесех ныне радостне ликуеши,/ угодниче Христов Василие./ Темже помози нам, на земли живущим,/ печали горькия избавитися.

И ныне, глас тойже: О, чудесе новаго, всех древних чудес:

На стиховне стихиры, глас 8:

Ангельски пожив, святе,/ подвиги на всяк день подъял еси,/ молитву, яко щит, воздержание, яко лук,/ и смирение, яко шлем, имея,/ темже верныя люди назидал еси/ заповеди Божия усердно исполняти/ и страх Божий имети./ Помози и нам, блаженне Василие,/ веру добре соблюсти/ и Царствия Небеснаго достигнути.

Стих: Господь хранит пришельцы,/ сира и вдову приимет.

Мира красоту и всяческая, яже в мире, оставив,/ Единому Христу последовал еси/ и сетей вражиих избежал еси,/ премудре Василие,/ ныне же, на Небесех с лики святых Престолу славы предстоя,/ молися грехов прощение нам даровати/ и Царствия Небеснаго достигнути.

Стих: Господь возводит низверженныя,/ Господь любит праведники.

Безумен в мире наречен,/ жителей града Рязани мудрости Христовой наставлял еси,/ нищету духовную стяжав,/ милостыню бедным щедро раздавал еси,/ скорби же и нужды претерпевая,/ в печали сущих утешал еси./ Помози и нам, святче Божий,/ крест жития земнаго безропотне понести/ и Царствия Небеснаго достигнути.

Слава, глас 7:

Лик святых земли Рязанския житием праведным украсив,/ новый предстатель о Отечестве нашем явился еси,/ угодниче Христов Василие,/ темже ныне со святителем Василием и новомученики Церкве нашея/ предстательствуй о всех нас,/ любовию тя почитающих.

И ныне, глас тойже:

Под кров Твой, Владычице, вси земнороднии, прибегающе, вопием Ти:/ Богородице, упование наше,/ избави ны от безмерных прегрешений/ и спаси души наша.

Тропарь, глас 4:

Молитва усердная пища и питие тебе бысть,/ блаженне Василие,/ в несении креста жития странническаго/ любовь Христову познал еси./ Оком чистым будущая, яко настоящая, прозревая,/ радость и от бед избавление требующим твоея помощи даровал еси./ Темже и нас, яко Божий избранник,/ не забуди твоими ходатайствы,/ Христа Бога о нас умоляя.

На утрени

По 1-м стихословии седален, глас 1:

Безумием мнимым безумие мира обличив, блаженне Василие, образ терпения и незлобия явил еси. Мы же, предстательство твое к Богу ведуще, просим тя: молися за ны ко Господу, да спасет души наша.

Слава, и ныне, Богородичен, глас тойже:

Владычице Пречистая, архангельский глас приносим Ти: радуйся, Благодатная, Господь с Тобою.

По 2-м стихословии седален, глас 2:

Дадеся ти благодать от Бога, блаженне Василие, пещися о людех, недужныя целити и скорбныя утешати. Темже мы, ныне память твою совершающе, тепле зовем: помяни и нас в твоих святых молитвах.

Слава, и ныне, Богородичен, глас тойже:

Печали отложше, возведем очи наша горе, да узрим в Небесех Царицу Богородицу, покровом Своим светоносным нас покрывающую.

Величание:

Ублажаем тя,/ святый праведный Василие,/ и чтим святую память твою,/ ты бо молиши о нас/ Христа Бога нашего.

Псалом избранный: Терпя потерпех Господа, и внят ми и услыша молитву мою.

По полиелеи седален, глас 5:

Просвещен ум имея, богомудре Василие, будущая, яко настоящая зрел еси. Мы же, угодника Христова тя ведуще, от любве сердечныя взываем: не остави нас заступлением твоим, святче Божий.

Слава, и ныне, Богородичен, глас тойже:

Просвети, Чистая, души моея очи, Свет рождшая, да не покрыет тьма греховная мя, окаяннаго.

Степенна, 1-й антифон 4-го гласа. Прокимен, глас 4: Возвеселится праведник о Господе/ и уповает на Него. Стих: Услыши, Боже, глас мой, внегда молити ми ся к Тебе. Евангелие от Луки, зачало 78.

По 50-м псалме стихира, глас 6:

Омраче́ние грехо́вное возненави́дев, святе Василие,/ и пла́менем чистоты́ пла́мень страстей пресе́к,/ терпе́нием и мудре́йшим юро́дством,/ я́ко златы́ми крила́ми, на Небеса́ возлете́л еси́/ и степе́нь равноа́нгельную дости́гл еси́.

Канон, глас 4.

Песнь 1.

Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Царствие вечное улучити желая, душу твою от многомятежных страстей воистинну очистил еси, Василие блаженне, града Рязани дивное украшение.

Память твою пречестную почитает ныне вся земля Рязанская, в нейже усердно подвизался еси, преславне Василие. Темже, плоти твоея страсти с похотьми подвижнически умертвив, богатство нетленное стяжал еси.

Всякаго мирскаго пристрастия отрекся и ум твой к нетленным благам возвед, яже уготóва Господь всем любящим Его, на земли чисто пожил еси, Василие мудре.

Богородичен: Гору святую, превышшую Ангельских Сил, Матерь Божию и Деву истинную по рождестве, едиными усты воспоим.

Песнь 3.

Ирмос: Твоя́ песносло́вцы, Богоро́дице,/ живы́й и незави́стный Исто́чниче,/ лик Себе́ совоку́пльшия духо́вно, утверди́,/ в Боже́ственней Твое́й сла́ве/ венце́в сла́вы сподо́би.

В молитве усердней по вся дни и нощи пребывая, блаженне, ругания и наветы терпеливне подъял еси, Христа ради, от Негоже и Вышняго причастия сподобился еси.

Юрода себе волею сотворив, богомудре, премирнаго разумения исполнился еси. Темже и Духа Святаго сосуд избранный явился еси, житием твоим страннолепным украшен.

Молитвы твоя обнощь к Небесем возсылая, дневною же милостынею больным и страждущим благотворя, сердца их любовию согревал еси, Василие небомудренне, чадо верное Отца Небеснаго.

Богородичен: Неискусобрачная Дево, Бога плотию рождшая, утверди мя, страстными прилоги приклонена, несть бо разве Тебе иныя Помощницы.

Седален, глас 5:

Плотское мудрование отринув издетска, нищету и странство Христа ради, стяжав, венценосец Божий на земли явился еси, Василие блаженне. Ныне, молим тя: буди нам, омраченным страстьми землеретными, светлый путевождь ко Христу, Солнцу правды.

Слава, и ныне, Богородичен, глас тойже:

Милосердия Твоего ради, Богородительнице Пречистая,/ избави ны, Тя смиренно умоляющих,/ от всех козней вражиих и скорбных обстояний.

Песнь 4.

Ирмос: Седя́й в сла́ве на Престо́ле Божества́,/ во облаце ле́гце,/ прии́де Иису́с Пребоже́ственный,/ нетле́нною Дла́нию, и спасе́ зову́щия:/ сла́ва, Христе́, си́ле Твое́й.

Милостыню с благодарением от простецов приемля и нищей братии ю предавая, снег и дух бурен, мраз, и вар дневный благодушно претерпел еси, святе, силою Божиею укрепляемь.

Молим тя ныне, блаженне Василие, услыши прошение наше и, помощь молитв твоих подавая во благовремении, усмири вся брани житейския, да, предстательство твое обретше, прославим Милостиваго Бога.

Молим тя паки, славне Василие: юныя вразуми путем заповедей ходити, старцы и в немощи сущия укрепи, подвизающияся же на дела благая направи.

Богородичен: Госпоже, Всепетая Богородице, Мати всех Творца, помышления моя молитвами Твоими очисти и благоплодна покажи.

Песнь 5.

Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

В светлосиянный день праздника твоего, преблаженне, услыши умиленныя мольбы наша; не лиши помощи твоея всех, почитающих память твою в храме сем, во граде нашем и в пределех земли Рязанския.

Исполнися воистинну Господне обетование на тебе, чудотворче: блажени нищии духом, яко тех есть Царствие Небесное. И ныне во славе лучезарней Престолу всех Царя предстоиши, понеже верный раб в час испытаний явился еси.

Усердно взываем к тебе, богоблаженне: не остави нас, сродник твоих, яже на земли, ты бо алчущих выну питал еси, жаждущих напаял еси, нищих же одарял еси преизобильно.

Богородичен: Воплотися неизреченно Бог из Тебе, Чистая, и, плоти соединяемь, по Божественному существу неизменен пребысть.

Песнь 6.

Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Вознеси, милостиве, твое моление о нас, грешных, да исправятся стопы наша к деланию заповедей Господних и да не обладает нами всякое беззаконие.

Приведи нас ко пристанищу благоотишному, посреде моря житейскаго бедствующих, Василие святе, и укажи путь верен ко Творцу всяческих, Богу нашему.

Заповеди жизни вечныя запечатлены во умех имуще, во окаменении греховнем многажды преступаем и согрешаем на всяк день умом и сердцем. Темже на помощь прииди к нам, святе Василие.

Богородичен: Воплощенное Слово Божие нашего ради спасения на земли родила еси, Дево Чистая. Тем Тя, Богородицу истинную, сердцем и усты в песнех величаем.

Кондак, глас 2:

Всякое мирское попечение волею отринув,/ чистоту же душевную юродством утаив,/ Богу и ближним усердне послужил еси,/ темже, благодати Духа Святаго исполнився,/ ангельски на земли пожил еси./ Ныне милостию твоею нас посети,/ исцеляя немощи душ и телес,/ Василие блаженне, теплый наш ходатаю.

Икос:

Теплотою Божественною согреваемь и благодатию, яко одеждею боготканною, оболчен, глад, мраз и вар дневный мужественне претерпел еси и люди верныя земли Рязанския обильне словом напитал еси. Ныне милостию твоею нас посети, исцеляя немощи душ и телес, Василие блаженне, теплый наш ходатаю.

Песнь 7.

Ирмос: Не послужи́ша тва́ри Богому́дрии,/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог благослове́н еси.

Христовою любовию всем сердцем уязвився, мудре Василие, дом твой и сродники благодушне оставил еси. В дому же Божием на всяк день ангельски пребывая, душею воспевал еси: препетый отцев Господь и Бог благословен еси.

Никакоже о плоти твоей попечение имея и о славе Божией присно радея, святе Василие, на подвиги паче естества устремился еси, воспевая: препетый отцев Господь и Бог благословен еси.

Восхвалим, вернии, Василия блаженнаго, подвижника славнаго! Той бо ныне со Ангелы и лики святых в чертозех Небесных воспевает: препетый отцев Господь и Бог благословен еси.

Богородичен: Радуйся, красная Царева Палато; радуйся, Дево Чистая, Помощнице христианом, с любовию поющим: препетый отцев Господь и Бог благословен еси.

Песнь 8.

Ирмос: Отроки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Возлюбил еси Христа всею крепостию твоею, достоблаженне Василие, темже смирен и кроток сердцем явился еси и, яко ревнитель заповедей Божиих, верныя научал еси взывати: Господа пойте, дела, и превозносите Его во вся веки.

Воистину смерть твоя честна пред Господем явися, ты бо, венценосче святый, от земли плотию преставився, ныне с нами духом пребываеши и подвизаеши взывати радостне: Господа пойте, дела, и превозносите Его во вся веки.

Ум наш озари, мудре Василие, да светом Трисиянным просвещаеми, прославим Пресвятую Троицу во дворех Бога нашего и вкупе с тобою вопием: Господа пойте, дела, и превозносите Его во вся веки.

Богородичен: Всесвятая Дево, Бога Слова рождшая плотию, мрак душ наших молитвами Твоими просвети, да взываем выну: Господа пойте, дела, и превозносите Его во вся веки.

Песнь 9.

Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная,/ Богоро́дице Чи́стая Присноде́во.

О, преблаженне Василие, угодниче Христов, юроде на земли и ангелоподобниче на Небесех! Ты, ныне мзду трудов велиих прием, у Престола Горния Славы поминай нас, почитающих тя сыновне.

О, молитвенниче теплый Василие! Ты, посреде пределов земли Рязанския богоугодне пожив и душу многими подвиги очистив, от Владыки Христа награду небесную восприял еси. И нам грехов прощение испроси и в добродетелех преспеяние.

О, дивне Василие, предстателю крепкий за град наш и землю Рязанскую! Моли ныне Всещедраго Владыку избавитися нам от всякаго лукавства вражия, страстей и каменносердечия окаяннаго, да восприимем от десницы Господа с тобою богатство некрадомое.

Богородичен: Под кров Твой, Владычице, вси земнороднии, прибегаем и вопием: Богородице, Упование наше, избави ны от безмерных прегрешений и спаси души наша.

Светилен:

Да возрадуется днесь земля Рязанская, в той бо явися светильник светлый и угодник Божий чудоточный Василий, болящих исцеляяй, теснимых защищаяй, бесов тьму отгоняяй и о чтущих его пред Богом предстательствуяй.

Слава, и ныне, Богородичен:

Богородительнице Дево, Свет душ наших, Христа, рождшая! Во свете присносущнем водворитися всем нам испроси, воспевающим Твое милосердие.

На хвалитех стихиры, глас 8:

Земное богатство презрел еси, святе Василие,/ и дóма родительскаго кров отвергл еси,/ милостию Божиею покрываяся./ Странствию же Христову ревнуя,/ достигл еси Царствия Небеснаго. (Дважды)

Миру юродив явился еси,/ премудрость Божию людем града Рязани возвещая,/ молися, блаженне Василие,/ да просветит Господь и наша сердца/ молитвами твоими.

День празднственный совершаем усердно/ от земли преставления твоего, святе Василие,/ пролей ныне теплую молитву ко Господу,/ да утвердит Отечество наше в мире и благоденствии/ и спасет души наша.

Слава, глас тойже:

Подвиг велий на земли подъял еси/ и, мирская мудрования отверг,/ юродив миру явился еси,/ благодатию же Христовою просвещен,/ суеты житейския избегати люди поучал еси./ Не забуди и нас, праведниче Василие, ходатайствы твоими,/ Христа прилежно о нас умоляя.

И ныне, Богородичен, глас тойже:

Владычице, приими молитвы раб Твоих/ и избави нас/ от всякия нужды и печали.

На Литургии

Блаженны от канона песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя Его. Евангелие от Луки, зачало 24. Причастен: В память вечную будет праведник, от слуха зла не убоится.

Молитва

О, преславный угодниче Святыя и Единосущныя Троицы, святе блаженне Василие, преславнаго града Рязани теплый заступниче, в бедах, скорбех и печалех скорый помощниче!

Воззри милостивне на нас, припадающих к раце честных мощей твоих и слезно взывающих к твоему предстательству: не презри смиренная прошения наша и моли Всемилостиваго Бога, да дарует нам прощение согрешений вольных и невольных, да пробавит милость Свою и подаст вся нужная к житию сему временному и к вечному спасению благопотребная. Аще и многогрешни и зело недостойни есмы, обаче не хощем в беззакониих наших погибнути, но еже обратитися ко Господу и сподобитися истиннаго покаяния и непорочными в Царствие Небесное внити.

О, святе блаженне Василие! Ты ныне, аки солнце, сияеши во Царствии Небеснем: научи нас волю Божию исполняти и безропотне испытания претерпевати, просвети помраченныя души наша и на стезю заповедей Божиих настави нас, да понесем благое иго Христово во смирении и долготерпении до конца дний, чающе будущаго живота безконечнаго, да сподобимся мы, недостойнии, вкупе с тобою и всеми святыми славити и воспевати Единаго в Троице Бога, Отца и Сына и Святаго Духа, во веки веков. Аминь.

Источник: Текст службы утвержден на заседании Священного Синода 8 декабря 2020 года (журнал № 99)

Ме́сяца ма́я в 3-й день

Пра́знование Пресвяте́й Влады́чице на́шей Богоро́дице и Присноде́ве Мари́и ра́ди ико́ны Ея́, имену́емыя «Све́нская-Пече́рская»

На вели́цей вече́рни

На Го́споди, воззва́х: поста́вим cтихо́в 8

и пое́м стихи́ры Трио́ди 3 и Богоро́дицы 5.

Стихи́ры Богоро́дицы, глас 8.

Подо́бен: О пресла́внаго чудесе́:

Дне́сь све́тло блиста́ет/ Воскресе́ние Спа́са Христа́,/ и Пресвята́я Богоро́дица правосла́вных собира́ет/ к Све́нстей ико́не Свое́й,/ я́ко Ма́ти о ча́дех веселя́щися,/ просвеще́ние душа́м и телесе́м да́рует,/ освяща́ющи и спаса́ющи притека́ющия к Ней,/ избра́ бо Ю́ Госпо́дь стро́ити и покрыва́ти// Христоимени́тое ста́до, рабы́ Своя́.

Ка́ко не диви́мся/ Твоему́ о нac прοмышле́нию, Богома́ти,/ я́ко от Пече́рскаго уде́ла Твоего́/ в зе́млю Бря́нскую ико́ною Твое́ю изшла́ еси́,/ я́коже Сын Твой рече́ ученико́м Свои́м:/и во ины́х страна́х до́лжен есмь пропове́дати./ Те́мже глас целова́ния Твоего́ та́инственно слы́шаще,/ игра́им ра́достно,// Ду́хом просвеща́еми.

Дарова́ла еси́ гра́ду Бря́нску/ Све́нский-Пече́рский о́браз Твой, Влады́чице,/ я́ко сте́ну необори́му/ и исто́чник чуде́с,/ и́мже сове́ты злосла́вных разоря́ются/ и полки́ супоста́т дале́че отгоня́ются,/ вся же земля́ Ру́сская ико́ну сию́ почита́ет,/ ми́лости Твоя́, от нея́ явля́емыя,// прославля́ющи, Присноде́во.

О, пресла́внаго чудесе́!/ О́чи благочести́ваго кня́зя Рома́на помрачи́стеся,/ да вся земля́ Бря́нская просвети́тся/ благода́тию ико́ны Цари́цы Небе́сныя,/ очи́стим у́бо чу́вствия/ и у́зрим свет ве́ры правосла́вныя,/ зна́мениями от ико́ны сея́ явля́емый,/ да тьмы́ ве́чныя избе́гнем,// Богоро́дицею спаса́еми.

Ра́достная пе́ния и благода́рная/ Тебе́, Ма́ти Де́во,/ Све́нская оби́тель по достоя́нию прино́сит,/ я́ко ме́сто сие́ избрала́ ecи́/ и о́бразом Твои́м чудотво́рным/ обита́ти зде изво́лила еси́,/ не отврати́ у́бо Лица́ Твоего́ от нас, Пречи́стая,/ ве́рою и любо́вию Тя воспева́ющих,// я́ко Благоутро́бну.

Сла́ва, глас 6:

Днесь во гла́се хвале́бнаго пе́ния/ духо́вное торжество́ соста́вим,/ досто́йно почита́юще Све́нскую ико́ну Цари́цы Богоро́дицы,/ то́ю бо о́чи благове́рнаго кня́зя Рома́на просвети́ла есть,/ до ны́не же бе́сы изгоня́ет, неду́ги исцеля́ет,/ напа́стей избавля́ет и мона́хов в по́двизех укрепля́ет,/ враго́в устраша́ет и правосла́вие утвержда́ет,/ те́пле моля́щися ко Го́споду// о спасе́нии душ на́ших.

И ны́не, Трио́ди.

Вход. Проки́мен дне. Чте́ния три Богоро́дицы.

На лити́и стихи́ра Трио́ди лити́йная мимоше́дшей неде́ли

и Богоро́дицы стихи́ра, глас 1:

Прииди́те, ве́рнии,/ пра́здник Све́нския ико́ны/ Пресвяты́я Богоро́дицы соста́вим,/ е́йже со стра́хом слу́жат си́лы Небе́сныя,/ припа́дают архиере́и и свяще́нницы,/ мона́си и вси правосла́внии, умиле́нно взыва́юще:/ о, Ма́ти Бо́жия, спаси́ зе́млю Ру́сскую,/ исцели́ сокруше́ние ея́// и ве́рныя лю́ди уте́ши Твоя́.

Сла́ва, и ны́не, глас 5:

Воспо́йте, лю́дие,/ Ма́тери Бо́га на́шего воспо́йте,/ се бо, на Небеси́ ца́рствующи,/ су́щих на земли́ посеща́ет/ и благода́ть Свою́ ико́нам Свои́м да́рует,/ те́мже о́браз Ея́ любе́зно лобыза́юще,/ приле́жно мо́лим/ дарова́ти Правосла́вней Це́ркви утвержде́ние// и душа́м на́шим ве́лию ми́лость.

На стихо́вне стихи́ры, глас 2.

Подо́бен: До́ме Евфра́фов:

Земле́ Бря́нская,/ красу́йся и лику́й,/ се бо Све́нский о́браз/ Пречи́стыя Богома́тере// преде́лы твоя́ осеня́ет.

Стих: Помяну́ и́мя Твое́/ во вся́ком ро́де и ро́де.

Благода́тию ико́ны Твоея́,/ Цари́це Небе́сная,/ Правосла́вие утвержда́еши,/ исцеле́ния источа́еши// и напа́стей избавля́еши.

Стих: Лицу́ Твоему́/ помо́лятся бога́тии лю́дстии.

Лицу́ Твоему́, Де́во,/ архиере́и и свяще́нницы,/ мона́си и вси правосла́внии/ благогове́йно покланя́ются// и со А́нгелы слу́жат.

Сла́ва, глас и подо́бен то́йже:

Взбра́нная Воево́до/ правосла́вно чту́щих Тя,/ Влады́чице Богоро́дице,/ Све́нскою ико́ною Твое́ю// от ви́димых и неви́димых враг нас огради́.

И ны́не, Трио́ди.

На благослове́нии хле́бов тропа́рь, глас 5:

Пресвята́я Де́во Богоро́дице,/ земли́ Бря́нстей благослове́ние и покро́в/ Све́нский-Пече́рский о́браз Твой дарова́ла еси́,/ и́мже Правосла́вие утвержда́еши,/ е́реси и раско́лы побежда́еши,/ исцеле́ния источа́еши,/ наше́ствия иноплеме́нных отража́еши/ и междоусо́бныя бра́ни умиря́еши,/ те́мже благода́рно воспева́ем Тя,// Оте́чества на́шего похвалу́ и заступле́ние.

На у́трени

На Бог Госпо́дь: тропа́рь Трио́ди два́жды. Сла́ва, и ны́не, Богоро́дицы.

По 1-м стихосло́вии седа́лен Трио́ди.

Сла́ва, и ны́не, Богоро́дицы, глас 4:

Явле́нием ми́лостей Твои́х, Ма́ти Бо́жия,/ да веселя́тся правосла́вных собо́ри,/ чту́щия чудотво́рный Све́нский о́браз Твой,// ерети́ческое же со́нмище да посрами́тся/ и, я́ко прах, да возмете́тся от лица́ Бря́нския земли́.

По 2-м стихосло́вии седа́лен Трио́ди.

Сла́ва, и ны́не, Богоро́дицы, глас 4:

Наста́вница еси́ мона́хов, Присноде́во,/ те́мже при́зри на оби́тель Све́нскую,/ ю́же благове́рный князь Рома́н на ме́сте, Тобо́ю избра́ннем, созда́,/ я́ко киво́т чудотво́рныя ико́ны Твоея́,// и при́сно сию́ соблюда́й, подвиза́ющихся же в ней спаса́й.

Велича́ние:

Досто́йно есть/ велича́ти Тя,/ Богоро́дице,/ земли́ Ру́сския Цари́цу Небе́сную,// Све́нский о́браз Твой в ней просла́вльшую.

Псало́м избра́нный:

1 лик: Освяти́л есть селе́ние Свое́ Вы́шний.

2 лик: Вся сла́ва Дще́ре Царе́вы внутрь.

1 лик: Посли́ свет Твой и и́стину Твою́, та мя наста́виста и введо́ста мя в го́ру святу́ю Твою́.

2 лик: Предста́ Цари́ца одесну́ю Тебе́.

1 лик: В ри́зах позлаще́нных оде́яна, и преиспещре́на.

2 лик: Пресла́вная глаго́лашася о Тебе́, гра́де Бо́жий.

1 лик: Слы́ши, Дщи, и виждь, и приклони́ у́хо Твое́.

2 лик: И возжела́ет Царь добро́ты Твоея́, зане́ Той есть Госпо́дь Твой.

1 лик: Лицу́ Твоему́ помо́лятся бога́тии лю́дстии.

2 лик: Не удали́ по́мощь Твою́ от Мене́, на заступле́ние мое́ вонми́.

1 лик: Во́ньже а́ще день призову́ Тя, ско́ро услы́ши мя.

2 лик: Спаси́ мя ми́лостию Твое́ю.

1 лик: Возвеселя́тся вси упова́ющии на Тя, и похва́лятся о Тебе́ лю́бящии и́мя Твое́.

2 лик: Помяну́ и́мя Твое́ во вся́ком ро́де и ро́де.

По полиеле́и седа́лен, глас 4:

Благослове́нная Влады́чице,/ cвяты́й о́браз Твой зря́ще,/ приле́жно мо́лим Тя:/ на ка́мени пра́выя ве́ры рабы́ Твоя́ утверди́.

Сла́ва, и ны́не, глас то́йже:

Лику́й и красу́йся, Бря́нская земле́,/ иму́щи в себе́ неоску́дный исто́чник благода́ти,/ Све́нскую ико́ну Пречи́стыя Де́вы,/ Ея́же ра́ди ви́димыя и неви́димыя враги́ прогоня́ются,/ еретицы́ посрамля́ются,/ ве́рнии же любо́вию неизче́тныя Ея́ ми́лости велича́ют.

По 50-м псалме́ стихи́ра, глас 6:

По грехо́м на́шим/ умно́жишася в нас безу́мнии,/ и́же глаго́лют в сердца́х свои́х, я́ко Бо́га несть/ и пропове́дуют уче́ния па́губная и развраще́нная,/ малоду́шныя от Святы́я Це́ркве отторга́юще,/ но, о, Пречи́стая Богоро́дице,/ я́коже дре́вле о́чи благове́рнаго кня́зя Рома́на просвети́ла еси́/ и иноплеме́нных от гра́да Бря́нска отгна́ла еси́,/ си́це заблу́ждшия просвети́ и злосла́вныя устраши́,// и спаси́ ду́ши на́ша.

Кано́н Трио́ди и Богоро́дицы кано́н. Глас 1.

Песнь 1.

Ирмо́с: Воскресе́ния день,/ просвети́мся, лю́дие,/ Па́сха, Госпо́дня Па́сха:/ от сме́рти бо к Жи́зни/ и от земли́ к Небеси́/ Христо́с Бог на́с преведе́,// побе́дную пою́щия.

Воскресе́ния день Христа́ Бо́га на́шего/ и благода́ть Пречи́стыя Его́ Ма́тере/ прииди́те, правосла́вных собо́ри, согла́сно воспои́м,/ благода́рственная пою́ще.

Очи́стим чу́вствия и у́зрим очи́ма ве́ры/ Пресвяту́ю Богоро́дицу,/ гряду́щую от Пече́рскаго уде́ла Своего́/ посети́ти Бря́нскую зе́млю/ и Све́нскую ико́ну Свою́ в ней просла́вити.

Небеса́ у́бо досто́йно да веселя́тся,/ земля́ же Ру́сская да ра́дуется,/ да пра́зднует же град Брянск/ и Све́нская оби́тель да торжеству́ет,/ почита́юще ико́ну Богома́тере.

О́чи благове́рнаго кня́зя Рома́на просвети́ла еси́,/ те́пле моля́щагося Тебе́, Де́во Всенепоро́чная,/ благода́тию Сы́на Твоего́,/ из гро́ба днесь возсия́вшаго.

Катава́сия Трио́ди.

Песнь 3.

Ирмо́с: Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник,/ из гро́ба одожди́вша Христа́,// в Нем же утвержда́емся.

Прииди́те, песнь воспои́м но́вую/ Пречи́стей Де́ве Богоро́дице,/ честны́й о́браз Ея́ обстоя́ще любо́вию,/ на горе́ Све́нстей Го́ру одушевле́нную правосла́вно велича́юще.

Прииди́те, благода́ть исцеле́ний душ и теле́с почерпе́м/ от исто́чника неистощи́маго,/ Све́нския ико́ны Богома́тере,/ Е́юже во и́стинней ве́ре утвержда́емся и душетле́нная уче́ния низлага́ем.

Ны́не вси исполня́ются ра́дости,/ архиере́и и свяще́нницы, мона́си и мирсти́и,/ пра́зднующе све́тло торжество́ ми́лостей Твои́х, Богоневе́сто,/ Све́нским о́бразом нам явле́нных.

Вчера́ зре́ния лиши́ся благове́рный князь Рома́н,/ да явя́тся на нем дела́ Цари́цы Богоотрокови́цы,/ ны́не же я́сно зрит ико́ну Ея́,/ зе́млю Бря́нскую чудесы́ облиста́ющую.

Конда́к и и́кос Трио́ди.

Седа́лен Трио́ди.

Сла́ва, и ны́не, Богоро́дицы, глас 4:

Предвари́вшии у́тро свяще́нницы, провожда́вшии от оби́тели Ки́ево-Пече́рския/ в преде́лы Бря́нския ико́ну Твою́, Всепе́тая Влады́чице,/ не в ладии́, но на ду́бе близ Све́ны реки́ обрето́ша ю́,/ слы́шав же сия́, князь Рома́н со слеза́ми вопия́ше:/ О Пресвята́я Де́во! да́руй ми зре́ти чу́дный о́браз Твой/ и свет Сы́на Твоего́, спаса́ющаго род челове́ческий.

Песнь 4.

Ирмо́с: На Боже́ственней стра́жи/ Богоглаго́ливый Авваку́м/ да ста́нет с на́ми и пока́жeт/ светоно́сна А́нгела,/ я́сно глаго́люща:/ днесь спасе́ние ми́ру,/ я́ко воскре́се Христо́с,// я́ко Всеси́лен.

На Боже́ственней стра́жи/ в моли́твеннем бде́нии пред Све́нскою ико́ною ста́нем,/ ку́пно с преподо́бными Анто́нием и Феодо́сием моля́ще Пречи́стую/ спасти́ зе́млю Ру́сскую.

Богооте́ц у́бо Дави́д/ пред се́нным ковче́гом скака́ше, игра́я,/ ча́да же Твоя́, Богома́ти,/ пред о́бразом Твои́м лику́юще,/ чудеса́ его́ прославля́ют,/ и́миже спаса́еши нас от бед и зол.

Теле́сныя о́чи смотре́нием Бо́жиим помраче́ны име́я,/ благочести́вый князь Рома́н серде́чныма очи́ма прови́де во́лю Твою́, Богоро́дице Де́во,/ о созда́нии оби́тели и́ноком на ме́сте, Тобо́ю избра́ннем.

Я́коже дре́вле супоста́т, оби́тель Твою́ окра́дших, ослепи́ла еси́, Влады́чице,/ и достоя́ние бра́тии возврати́ла еси́,/ та́ко ны́не злове́рныя помрачи́,/ заблу́ждшия же Ма́тери-Це́ркви возврати́.

Песнь 5.

Ирмо́с: У́тренюем у́треннюю глубоку́,/ и вме́сто ми́ра песнь принесе́м Влады́це,/ и Христа́ у́зрим/ Пра́вды Со́лнце,// всем жизнь возсия́юща.

У́тренюем у́треннюю глубоку́,/ и с пе́нием доброде́тели принесе́м Влады́чице, глаго́люще:/ сподо́би рабы́ Твоя́ свет узре́ти присносия́ющий.

Безме́рное Твое́ благоутро́бие, Де́во,/ игу́мен Све́нския оби́тели с бра́тиею зря́ше,/ и́хже от напра́сныя сме́рти при разруше́нии хра́ма сохрани́ла еси.

Присту́пим, свещено́снии, любопра́зднственными чи́нми/ к Све́нскому о́бразу Богома́тере днесь,/ и́мже тьма страсте́й на́ших отгоня́ется.

Просвеща́еши Боже́ственными луча́ми благода́ти ико́ны Твоея́, Всепе́тая,/ духо́вною и теле́сною слепото́ю неду́гующих.

Песнь 6.

Ирмо́с: Снизше́л ecú в преиспо́дняя земли́,/ и сокруши́л ecи́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,// воскре́сл ecи́ от гро́ба.

Пришла́ еси́ ми́лостивно, Ма́ти Бо́жия,/ честны́м Твои́м о́бразом к благове́рному кня́зю Рома́ну,/ я́коже Сын Твой посла́ о́браз Свой кня́зю А́вгарю,/ и просвети́ла еси́ о́чи его́.

Возво́диши держи́мых скорбьми́ и боле́зньми, Богоневе́сто,/ к терпе́нию, смире́нию и упова́нию спасе́ния,/ пред Све́нскою ико́ною Твое́ю те́пле по́мощь Твою́ призыва́ющих.

Спа́се наш Преблаги́й,/ Пречи́стыя Ма́тере Твоея́ мольба́ми/ Це́рковь Твою́ Святу́ю от ересе́й и раско́лов непоколеби́му сохрани́/ и заблу́ждшия на путь пра́вый обрати́. Сохраня́й во и́стинней ве́ре чту́щия Тя, Влады́чице,/ зна́мении и чудесы́ от Све́нския ико́ны Твоея́/ явля́ющи благода́ть Бо́жию, Правосла́вней Це́ркви прису́щую.

Конда́к, глас 3:

Я́ко цвет неувяда́емый/ Ла́вры Ки́ево-Пече́рския/ чу́дная ико́на Твоя́, Влады́чице Богоро́дице,/ на дре́ве близ Све́ны реки́ обре́теся,/ явля́ющи ме́сто но́ваго вертогра́да духо́внаго/ и благоуха́нием чуде́с исполня́ющи притека́ющих к ней,/ те́мже и на пре́дняя проба́ви ми́лости Твоя́, Пречи́стая,// правосла́вно Тя велича́ющим.

И́кос:

Земна́я на земли́ оста́вльше,/ и мы́сли от страсте́й очи́стивше,/ впери́м зре́ние вку́пе и чу́вства к Пречи́стей Богома́тери,/ Све́нскаго о́браза Ея́ ди́вное вознесе́ние на дре́во/ и чудеса́ его́ благода́рно прославля́юще,/ и умиле́нно возопии́м:/ не оста́ви рабы́ Твоя́, Влады́чице,/ и́ноков, подвиза́ющихся на ме́сте, Тобо́ю избра́ннем, укрепи́,/ град Брянск и всю ру́сскую зе́млю благода́тию Твое́ю покры́й,/ уте́ши нас, я́ко Ма́ти, наста́ви, я́ко сыно́в,/ правосла́вно Тя велича́ющих.

Песнь 7.

Ирмо́с: О́троки от пе́щи изба́вивый,/ быв Челове́к, стра́ждет я́ко сме́ртен,/ и стра́стию сме́ртное/ в нетле́ния облачи́т благоле́пие,/ еди́н Благослове́н// отце́в Бог, и Препросла́влен.

О́троки от пе́щи изба́вивый, Влады́чице, Сын Твой и Бог,/ мно́гажды избавля́ше град Брянск и оби́тель Све́нскую от супоста́т,/ мольба́ми Твои́ми, еди́на Благослове́нная.

В воню́ ми́ра благода́ти Све́нския ико́ны Твоея́ притека́юще. Пречи́стая,/ Небе́сное Ми́ро ро́ждшая,/ благоуха́нием позна́ния Христо́ва исполня́емся/ и злосмра́дия злове́рия избавля́емся.

Сме́рти пра́зднуем умерщвле́ние воскресе́нием Христа́,/ злочести́вых же посрамле́ние и бе́гство милосе́рдием Присноде́вы,/ те́мже пред ико́ною Ея́ лику́юще,/ Засту́пницу на́шу воспева́ем.

Я́ко вои́стинну свяще́нный/ и спаси́тельный, и светоно́сный, Богома́ти, Све́нский о́браз Твой,/ ве́рою бо покланя́ющимся ему́, да́руеши исцеле́ние/ и от напа́стей избавле́ние.

Песнь 8.

Ирмо́с: Сей нарече́нный и Святы́й День/ еди́н суббо́т царь и госпо́дь,/ пра́здников пра́здник,/ и торжество́ есть торже́ств:// во́ньже благослови́м Христа́ во ве́ки.

Сей нарече́нный и святы́й день/ всех правосла́вных земли́ Бря́нския созыва́ет к прославле́нию Бо́жия Ма́тере,/ ра́ди чудотво́рныя Све́нския Ея́ ико́ны.

При́зри, Пресвята́я Де́во, на лю́ди Твоя́,/ пред ико́ною Све́нскою моля́щияся Тебе́,/ и проше́ния испо́лни/ о Тебе́ благословя́щия Христа́ во ве́ки.

О́тче Вседержи́телю, и Сло́ве, и Ду́ше,/ моли́твами Богоро́дицы Це́рковь Правосла́вную утверди́,/ Оте́чество на́ше в ми́ре сохрани́/ и спаси́ благословя́щия Тя во ве́ки.

Прииди́те, и́ноков собо́ри,/ ра́достно благодаре́ние Присноде́ве принесе́м,/ Све́нским о́бразом Свои́м/ благослове́ние Пече́рския Ла́вры земли́ Бря́нстей дарова́вшей.

Песнь 9.

Ирмос: Свети́ся, свети́ся,/ Но́вый Иерусали́ме,/ сла́ва бо Госпо́дня/ на тебе́ возсия́:/ лику́й ны́не/ и весели́ся, Сио́не,/ Ты же Чи́стая, красу́йся, Богоро́дице,// о воста́нии Рождества́ Твоего́.

Свети́ся, свети́ся, сла́вный гра́де Бря́нск сла́вою Све́нскаго о́браза Богома́тере,/ лику́й ны́не и весели́ся вся Ру́сская земле́,/ покро́вом Влады́чицы храни́мая.

О Боже́ственнаго, о любе́знаго, о сладча́йшаго Твоего́ Ли́ка, Богоневе́сто,/ и́мже пребыва́ти с на́ми изво́лила еси́,/ его́же ве́рнии утвержде́ние наде́жды спасе́ния иму́ще ра́дуемся.

О Ма́ти Бо́жия, в моли́тву Тебе́ приво́дим Анто́ния, Феодо́сия и всех Пече́рских и Бря́нских святы́х,/ и́хже предста́тельством сподо́би нас невече́рняго дне Ца́рствия Сы́на Твоего́.

Согла́сно, Де́во, Тебе́ блажи́м ве́рнии,/ зна́мения и чудеса́ Све́нския ико́ны Твоея́ благода́рно воспомина́юще/ и воста́ние рождества́ Твоего́ воспева́юще.

Свети́лен:

Я́коже дре́вле просвети́ла еси́ теле́сныя о́чи благове́рнаго кня́зя Рома́на/ благода́тию Све́нския ико́ны Твоея́, Всепе́тая Богоро́дице,/ та́ко и ны́не омраче́нныя злове́рием, Боже́ственною луче́ю Сы́на Твоего́ просвети́,// правосла́вныя же во све́те Лица́ Его́ ходи́ти утверди́.

Сла́ва, и ны́не, Трио́ди.

На хвали́тех стихи́ры Трио́ди 3 и Богоро́дицы 3.

Стихи́ры Богоро́дицы, глас 1.

Подо́бен: Небе́сных чино́в:

Небе́сныя си́лы ра́дуются/ и стра́хом слу́жат чу́дней Бо́жия Ма́тере ико́не,/ на дре́ве близ Све́ны реки́ ю́ поставля́юще,/ и к весе́лию град Брянск и всю зе́млю Ру́сскую созыва́ют./ Прииди́те, почерпе́м благода́ть, о́бразом сим явля́емую/ во спасе́ние душ на́ших.

Твоего́ предста́тельства увере́ние/ и милосе́рдия Твоего́ явле́ние/ Све́нская-Пече́рская ико́на Твоя́, Влады́чице, показа́ся нам,/ е́юже разли́чных обстоя́ний избавля́емся/ и благослове́ние на до́брая дела́ прие́млем,// я́ко на Тя упова́ние возложи́хом.

Мона́хов ру́сских первонача́льники,/ преподо́бных Анто́ния и Феодо́сия,/ преподо́бный Али́пий предстоя́щими Тебе́ изобрази́/ и ро́ждшемуся от Тебе́ Бо́жию Сло́ву,/ Де́во и Ма́ти Чи́стая,// мона́шескаго чи́на основа́ние непоколеби́мое.

Сла́ва, Трио́ди. И ны́не, глас 8.

Подо́бен: О пресла́внаго чудесе́:

О пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и Ли́ка Своего́ изображе́нии ми́лостивно обогаща́ет./ О Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ правосла́вия// ми́лости и чудеса́ излива́ти до ве́ка. Ами́нь.

На Литурги́и

Блаже́нна от кано́на Трио́ди, рядова́я песнь, на 4, и Богоро́дицы, Песнь 6-я, на 4.

По вхо́де тропари́ Трио́ди и Богоро́дицы. Сла́ва, конда́к Трио́ди. И ны́не, конда́к Богоро́дицы.

Проки́мен, Апо́стол, Аллилу́ия, Ева́нгелие и прича́стен пре́жде ря́да Трио́ди, пото́м Богоро́дицы.

Моли́тва

О Всеми́лостивая Ма́ти, Пречи́стая Де́во Богоро́дице, Возбра́нная Воево́до правосла́вных! Благода́рным се́рдцем и усты́ славосло́вим Тя при́сно пред Све́нскою ико́ною Твое́ю, ю́же я́ко Боже́ственное украше́ние Це́ркве Ру́сския и зало́г ми́лости Твоея́ ве́рным лю́дем дарова́ла еси́. Сею́ бо ико́ною благода́ть Бо́жию, Правосла́вней Це́ркви прису́щую, явля́еши, егда́ то́чиши исцеле́ния, напа́стей избавля́еши, бесо́в прогоня́еши, наше́ствия иноплеме́нных отража́еши. Те́мже приле́жно мо́лим Ти ся, Богома́ти, проба́ви и на пре́дняя вели́кия ми́лости Твоя́ любо́вию чту́щим Тя, Правосла́вие утверди́, отпа́дшия от пра́выя ве́ры к позна́нию и́стины напра́ви и уста́ нечести́вых, ху́лящих Святу́ю Це́рковь, загради́. Отече́ству на́шему мир и на враги́ побе́ды да́руй, огради́ нас от нахожде́ния супоста́т, междоусо́бныя бра́ни и вся́каго зла, па́че же от душегуби́тельных страсте́й свободи́, во е́же умре́ти ми́ру и жи́ти Сы́ну и Бо́гу Твоему́ в соблюде́нии за́поведей Его́. И сподо́би нас, Предста́тельнице на́ша непосты́дная, на Стра́шнем Суде́ одесну́ю Престо́ла Бо́жия ста́ти и с ли́ки А́нгелов и святы́х та́мо восхваля́ти пречестно́е и́мя Сы́на Твоего́, со Безнача́льным Его́ Отце́м и Пресвяты́м Ду́хом во ве́ки. Ами́нь.

Источник: Текст утвержден Священным Синодом Русской Православной Церкви 15 июля 2016 года (журнал № 70)

Месяца мая в 5-й день

Преподобномученика Ефрема Новаго, Неамакрийскаго

На малей вечерни

На Господи, воззвах: поставим стихов 4 и поем стихиры, глас 2.

Подобен: Егда от Древа:

Приидите, Аттики все множество,/ к горе Непорочных¹ с теплою верою притецем,/ память всесвященную богоноснаго Ефрема велегласно славяще./ Той бо, зде пожив добродетельно,/ мученическия подвиги пройде/ и сугубых венцев по достоянию/ от Спаса сподобися.

Егда отверглся еси себе,/ рачением святым от юности уязвився,/ тогда крест твой восприял еси, преподобне,/ и Спасу последовал еси преусердным сердцем,/ труды постническими ум очистив./ Сего ради агарян неистовство великодушно претерпел еси, Ефреме,/ и мученическим венцем украсился еси.

Показался еси, яко звезда новосветлая,/ явився изволением Божиим/ в обретении, отче, святых твоих мощей./ И во Святем Духе,/ Ефреме блаженне,/ чудес сияньми нас озаряеши,/ недуги целиши многоразличныя/ и скоро предваряеши щедротами твоими/ всех, верно поющих тя.

Гора Амомон, преподобне,/ постническими твоими поты напоися воистину/ и потоки кровей твоих освятися,/ в ней бо прошел еси твердо подвиги/ и врагов всю силу разрушил еси./ Сего ради святую твою обитель,/ всегда тобою хвалящуюся,/ сохрани, Ефреме,/ от всякия скорби.

Слава, глас тойже:

Постническими труды укрепленный/ и ревностию о славе Божией исполненный,/ кровь твою за Христа излиял еси,/ Ефреме богопрославленне./ На камени бо веры утвердився,/ посреде ухищрений вражиих непоколебимь пребыл еси/ и, многоразлично мучимь,/ течение подвига законно скончал еси./ Темже, преподобномучениче блаженне,/ приими от нас пение/ и исполни, яже ко спасению, прошения.

И ныне, Богородичен.

На стиховне стихиры, глас 2.

Подобен: Доме Евфрафов:

Новый в постницех и мученицех/ явился еси, Ефреме,/ преподобномучениче Христов,/ темже действуеши чудеса/ верою чтущим тя.

Стих: Честна пред Господем/ смерть преподобных Его.

Претерпел еси крепце/ агарян ухищрения,/ Ефреме преподобномучениче,/ и потоки кровными/ ризы твоя обагрил еси.

Стих: Дивен Бог во святых Своих,/ Бог Израилев.

Безвестно прежде скончався,/ ныне нам познался еси,/ Ефреме богоблаженне,/ и мощи твоя честныя,/ яко богатство, нам даровал еси.

Слава, глас и подобен тойже:

Едине Вседетелю, Боже наш,/ Троице Приснопокланяемая,/ Отче и Сыне и Душе Святый,/ Ефрема молитвами/ помилуй рабы Твоя.

И ныне, Богородичен:

Горнии Тя лицы,/ Богородице Дево,/ поют с дольними,/ славяще непрестанно/ Рождество Твое, Пречистая.

По Ныне отпущаеши: Трисвятое и тропарь зри на велицей вечерни.

На велицей вечерни

Блажен муж: 1-й антифон. На Господи, воззвах: стихиры, глас 1.

Подобен: Всехвальнии мученицы:

Отче Ефреме,/ издетска стопам Христовым/ в подвизе последовал еси,/ житие равноангельное/ в горе Амомстей проходя, преподобне,/ в нейже злодейство агарянское/ твердо претерпел еси/ и мучеником равностоятелен явился еси,/ пострадав даже до крове.

Отче Ефреме,/ многовидно уязвлен быв телом,/ непреклонен, яко столп,/ предстал еси в мучениих/ и, подвизався, яко безплотный,/ в руце Господни душу предал еси./ Темже почитаем тя,/ яко Христова мученика,/ прославльшагося в безмерных чудесех.

Отче Ефреме,/ прежде незнаемь, явился еси/ и, радости нас исполнив,/ раку святых мощей твоих,/ нас освящающих,/ яко божественное сокровище дал еси,/ от нихже происходит/ исцелений благодать изобильная/ совершающим всечестную память твою.

Отче Ефреме,/ яко Христов служитель теплейший,/ славы многия сподобился еси./ Темже, призываемь,/ всюду предваряеши/ и всем помощь скоро подаеши,/ яве и во сне являяся,/ и даруеши нам/ благодать спасительную.

Отче Ефреме,/ дерзость мучителей низложив,/ благоволением Божиим/ на лета многа прежде сокровен,/ ныне нам явился еси,/ славу жизни вечныя/ и блистание благодати Духа показуя,/ ихже яве сподобятся/ Господеви непорочно поработавшии.

Отче Ефреме,/ многоразличными чудесы и видении/ во обители твоей являяся,/ зрящия тя веселиши/ и изумляеши славою твоею./ Темже, ко святым мощем твоим/ верно притекающих,/ избави всякаго обстояния,/ недугов угашая зной.

Слава, глас 6:

Ангельское жительство восприим от юности, мудре,/ в горе Непорочных вселился еси/ и, постнически подвизаяся,/ непорочен и чист во оправданиих Господних явился еси,/ очистив себе от всякаго вещественнаго пристрастия./ Руками же скверных убиен быв,/ страдальчески житие скончал еси/ и, яко жертва благоприятная/ и всеплодие божественное,/ Троице Святей принеслся еси./ Но, яко во страдальцех преподобен/ и в преподобных мученик сый,/ сугубых венцев сподобился еси/ и чудес благодать от Господа восприял еси,/ преподобномучениче Ефреме./ Темже совершающим память твою/ испроси очищение грехов и велию милость.

И ныне, Богородичен: Кто Тебе не ублажит, Пресвятая Дево:

Вход. Прокимен дне и чтения.

Пророчества Исаиина чтение (глава 43): Тако глаголет Господь:

Премудрости Соломоновы чтение (глава 3): Праведных души в руце Божией:

Премудрости Соломоновы чтение (главы 5 и 6): Праведницы во веки живут:

На литии стихиры, глас 1:

Глаголы Давидовы на тебе исполнишася,/ яко неповинен рукама и чист сердцем явился еси,/ преподобномучениче Ефреме./ Ты бо, на горе Непорочных всякую добродетель исправив/ и безстрастия цветы мученическою кровию напоив,/ плод красный израстил еси./ И ныне светло тя почитающим/ чудес сладость источаеши,/ имиже горечь страстей изсушается/ и ко спасению приводятся вопиющия:/ Господи, слава Тебе.

Глас 2:

Добродетелей стезею усердно шествуя,/ Ефреме всеблаженне,/ плоти мудрование умертвил еси,/ душу же чистейшее жилище Всесвятыя Троицы соделал еси,/ света божественнаго исполненное./ И князя тьмы, неистовно нападающа на тя,/ препобедил еси о укрепляющем тя Иисусе Христе/ и, яко злато в горниле,/ многовидными муками искусився,/ вечныя жизни и славы мученическия сподобился еси,/ всем прося мир и велию милость.

Глас 3:

Преподобием сияя/ и Богу непорочно священнодействуя,/ житие постническое и твердость во страдании/ в жертву чисту Христу принесл еси, блаженне./ Ты бо, лютыми агаряны терзаемь,/ смерти не убоялся еси,/ к жизни вечней устремляяся./ И, мученическою украсився светлостию,/ в чертог Вышния славы востекл еси,/ преподобномучениче Ефреме./ Темже совершающим память твою/ испроси у Бога прощение грехов и велию милость.

Глас 4:

Преподобным и мучеником поревновав,/ дарований Духа Утешителя исполнился еси/ и, подвигов тех приобщився,/ равныя благодати сподобился еси,/ Ефреме всеблаженне,/ истинный Божий служителю./ Темже и в нуждах обретающимся,/ во сне и яве дивно являяся,/ многообразно чудодееши/ и спасительную помощь подаеши./ Моли, святе, обители твоей в мире и тишине сохранитися/ и любовию тя чтущим/ подати грехов прощение.

Слава, глас 2:

Постническое житие твое Бог славы восприемь,/ мученическаго благохваления тя сподоби,/ Ефреме, отче преподобне,/ ангельским бо жительством и добрым деланием/ к первому достоянию возводимь,/ неистовства агарян не убоялся еси/ и, яко агнец незлобивый волками лютыми, растерзаемь,/ Христови конечне соединился еси./ Темже, обрет любве исполнение,/ не престай молити о нас прославльшаго тя Господа.

И ныне, Богородичен.

На стиховне стихиры, глас 5.

Подобен: Радуйся:

Радуйся, преподобномучениче Ефреме,/ от юности бо мирския лести возгнушався,/ всем сердцем Всевидца Бога возлюбил еси/ и, равноангельному житию поревновав,/ зельным воздержанием и теплою молитвою/ совершенства в добродетели достигл еси./ Темже и, от агарян беззаконных заклан быв немилостивно,/ мученическая страдания, яко безплотен, прешел еси./ И ныне моли чтущим тя даровати велию милость.

Стих: Честна пред Господем/ смерть преподобных Его.

Радуйся, преподобномучениче Ефреме,/ преподобным сопричастниче и мучеником украшение,/ доблести тех славный ревнителю,/ звездо многосветлая добродетелей постнических,/ ты бо, от горы Амомския/ благодатию чудес всем возблистая,/ омрачение страстей и скорбей нахождение разрешаеши/ и скорым предстательством недуги врачуеши./ И ныне моли чтущим тя даровати велию милость.

Стих: Дивен Бог во святых Своих,/ Бог Израилев.

Радуйся, преподобномучениче Ефреме,/ в Дусе Святе нас возвеселивый,/ паче же обретением мощей твоих обрадовавый,/ имиже источается благодать обильно./ Сего ради, иже в недузех и страстех сущии,/ отовсюду ко ограде твоей притекают/ и, удобь исцеления приемлюще,/ яве проповедают, славне, твое теплое предстательство./ Темже доброт твоих насладившеся,/ Христа Бога воспевают,/ многими чудодеянии тя возвеличившаго.

Слава, глас 8:

Светом благодати, отче, озаряемь,/ мужественне препобедил еси нахождения служителей тьмы,/ иже нещадно тело твое раздираху./ Ты же, страдания тяжкая претерпевая,/ ко Христу взывал еси:/ приими дух мой, Спасе,/ Иже мене ради волею Пострадавый/ и Источивый ми живот вечный./ И ныне, Ефреме блаженне,/ непрестанно моли спастися тя ублажающим.

И ныне, Богородичен.

Тропарь, глас 1:

Яко солнце, возсиял еси в горе Амомстей,/ преподобномучениче Христов Ефреме,/ и, варварская нахождения претерпев,/ мученически к Богу отшел еси./ Сего ради благодать присно источаеши/ благочестно зовущим:/ слава Давшему ти крепость,/ слава Прославльшему тя,/ слава Действующему тобою всем исцеления.

На утрени

По 1-м стихословии седален, глас 1.

Подобен: Гроб Твой, Спасе:

Новосветлая звезда Христовы Церкве, воистину явился еси, Ефреме чудотворче, лучами чудес твоих озаряя концы. Темже днесь торжествуем, блаженне, твоего страдания праздник святый, Христа величающе.

Слава и ныне, праздника.

По 2-м стихословии седален, глас 4.

Подобен: Вознесыйся на Крест:

Нашедшии на святую обитель твою агаряне, якоже волцы дивии, тя, Христова агнца кротчайшаго растерзаша многообразными мучении. Темже отшел еси к Небесному граду, отче святый Ефреме, и мученичества венец приял еси.

Слава, и ныне, праздника.

По полиелеи седален, глас 4.

Подобен: Премудрость и Слово:

На гору Амомскую восшед, жития светлостию в горняя ум твой возвел еси и, мученичества течение мужески прошед, в жертву непорочную принеслся еси. Сего ради сугубую честь от Бога приял еси и ныне точиши исцеления, отче Ефреме, притекающим усердно ко святым мощем твоим, ихже в честней обители твоей, яко сокровище божественное, явил еси, блаженне, освящая всех с верою приходящих.

Слава, и ныне, праздника.

Степенна 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми. Всякое дыхание: Евангелие от Матфеа, зачало 43.

По 50-м псалме стихира, глас 6:

Винограда животнаго розга сый,/ Ефреме преславне,/ мученичества грозд зрелый Церкви возрастил еси,/ добре подвизався./ И ныне таинственный нектар благодати/ теплым твоим заступлением нам источаеши/ и молишися о душах наших.

Канон святаго, глас 1,

егоже краегранесие: Даждь, отче, божественную ми благодать. Герасимово.

Песнь 1.

Ирмос: Твоя победительная десница/ боголепно в крепости прославися:/ та бо, Безсмертне,/ яко всемогущая противныя сотре,/ израильтяном путь глубины новосоделавшая.

Славою божественною украшен и света неизреченнаго исполнен, Ефреме богоносе, слово ми подаждь и просвещение ми даруй молитвами твоими, яко да воспою страдания твоя.

Ум твой повеленьми Господними издетска к жизни лучшей направил еси и монах богоносный и непорочный в горе Непорочных соделался еси.

Силу от Бога приим и благочестия являя крепость, агарянская лютая мучения мужественне претерпел еси, Ефреме богоносе, егда простроша на древе тело твое.

Богородичен: Вся чистая и избранная, девства блистающая благодатьми, явилася еси, Всенепорочная, и Бога родила еси воплощаема всем земнородным во спасение.

Песнь 3.

Ирмос: Едине ведый человеческаго существа немощь/ и милостивно в не воображся,/ препояши мя с высоты силою,/ еже вопити Тебе, Святый,/ одушевленный храме неизреченныя славы Твоея, Человеколюбче.

Возвысив ум твой к Богу, плоти мудрование благодатию Святаго Духа умертвил еси и, болезньми постническими предподвизая себе ко страданию, безстрастия сосуд явился еси, Ефреме всеблаженне.

Егда видел еси полки агарянския, яко звери лютыя, на божественную ограду твою нападшия, стал еси неуклонно и небоязненно противу кознем их и муки велия, богоносе, претерпел еси.

Долговременная мучения претерпевая, яко безплотен, велиара льстиваго всякую силу твердым противлением твоим, отче Ефреме, победил еси и мучеников венец от Бога приял еси, блаженне.

Богородичен: Яко честнейший Храм и девства всесвятое Селение, Чистая, святых Святейшее Слово плотски нам родила еси. Темже тепле вопию Ти: очисти, Дево, сердце мое от всякия скверны.

Седален, глас 4.

Подобен: Скоро предвари:

Ангельски пожив в воздержании мнозем, кровей теченьми святыя ризы твоя обагрил еси, преподобне. Темже, во обоих подвизех светло блистая, подаждь нам свыше теплыми твоими молитвами во всем помощь, Ефреме скоропослушне.

Слава, и ныне, Богородичен:

Неизреченно Рождшая Творца всяческих избави тления нечистых страстей, всегда мя оскверняющих. Виждь слезы души моея, Богородице, и очисти ум мой от помышлений безместных и даждь сердцу моему умиление, молюся.

Песнь 4.

Ирмос: Гору Тя, благодатию Божиею приосененную,/ прозорливыма Аввакум усмотрив очима,/ из Тебе изыти Израилеву провозглашаше Святому/ во спасение наше и обновление.

Простерше варвары тело твое, преподобне, ураниша е нестерпимыми муками, ты же, ко Господу горе очима сердечныма взирая, доблественне вся претерпел еси.

Любве ради ко Христу биемый и сокрушаемый нечестивыми агаряны радовался еси, святе, и вся острия губителя крепостию твоею притупил еси, преподобномучениче Ефреме, священнейший.

Прежде неведомь, отче, явился еси игумении Макарии, яже, услышавши речения святых устен твоих, имя твое и житие, преподобномучениче Ефреме, в мире сущим возвестила есть.

Богородичен: Престол явилася еси Бога Вышняго, Тайны непостижимыя Вместилище, содержащи на руках Источника жизни. Сего ради молимся Тебе, Благая Одигитрие: изведи ны из пропасти погибели и буди нам спасительное Пристанище.

Песнь 5.

Ирмос: Просветивый сиянием/ пришествия Твоего, Христе,/ и осветивый Крестом Твоим мира концы,/ сердца просвети светом Твоего Богоразумия/ православно поющих Тя.

По чуднем обретении мощей твоих, Ефреме преподобномучениче, действом неизреченным имя твое честное и подвиг крепкий неведущим тя людем открыл еси.

Рака святых мощей твоих, богоносе, благодать Духа Пресвятаго источает и изливает исцелений божественныя струи, отгоняющи страсти лютыя и всякая искушения.

Всем, призывающим имя твое, святе Ефреме, многообразне являешися и подаеши благодать. Темже Аттическая страна, чудес твоих исполнившися, величает Господа.

Богородичен: Жизнодавца Бога плотию рождшая, Пречистая Владычице, оживи мя, умерщвлена лестию лютаго ратоборца, и к жизни лучшей возведи мя.

Песнь 6.

Ирмос: Обыде нас последняя бездна,/ несть избавляяй,/ вменихомся, яко овцы заколения,/ спаси люди Твоя, Боже наш,/ Ты бо крепость немощствующих и исправление.

Мучеников твердость явив, мученическия светлости показался еси причастник, богоносе отче Ефреме, противу ярости зверонравных агарян неустрашимо ополчився.

Новый в преподобных и мученицех Ефрем всеславный Божественным Духом вся верныя к веселию таинственному созывает. егоже честное страдание песньми восхвалим.

Крепостию богоданною яко мученик божественный облачився, разслабленныя воздвизаеши, Ефреме премудре, и одержимым многими недуги избавление подаеши.

Богородичен: В печалех и напастех и искушениих сущим радость непостижимым Рождеством Твоим источила еси, Богородице Приснодево. Темже и мене вечныя радости сподоби.

Кондак, глас 3.

Подобен: Дева днесь:

На горе Амомстей добре подвизался еси, богомудре,/ и тамо мученическое течение скончал еси./ Темже, преподобномучениче Ефреме,/ Жизнодавец сугубыми венцы достойно увенча тя,/ прилежно молящася о душах наших.

Икос:

От юности Христу последовав, отче, мирскаго мятежа и плотския сласти всеконечне отверглся еси и, божественною любовию распалаемь, в горе Амомон ангельски пожил еси, постническими же труды душу и тело очистив, божественныя благодати жилище явился еси. Таже и, скверноубийственными руками находящих иноплеменник ят быв, мученическую крепость показал еси и, многообразным мукам и терзанием противустав, за Христа нуждно умерщвлен был еси. Темже, преподобномучениче Ефреме, Жизнодавец сугубыми венцы увенча тя, прилежно молящася о душах наших.

Синаксарий.

Месяца мая в 5-й день, память совершаем страданий святаго славнаго преподобномученика Ефрема новоявленнаго и чудотворца, иже в стране Аттичестей, на горе Амомон подвизася и в пятомнадесять веце от Рождества Христова пострада.

Стихи:

Постничеству страдание, Ефреме, сочетав,

Достойно прославлен был еси от Господа.

В пятый день, Ефреме, руками убийственными

Мученическую обрет себе кончину.

Сей муж в четыренадесятое лето от рождества своего освятися Господеви, взем на рамо крест свой. И в горе Амомон именуемей, иже во Аттице, в сущей тамо обители, божественным желанием движимый, уединися и постническия подвиги соверши, крайним воздержанием и прочими Христа ради добродетельми очистив себе и явився боговиден.

Но завистию врага и доброненавистника диавола христоборцы агаряны, морем нашедшии, граблению и разорению и убиению вся бывшая в обители предаша. Таже, многим безумием одержимии, и блаженнаго Ефрема лютыми муками и ранами терзаша, дóндеже той нуждною смертию душу святую свою в руце Божии предаде в лето Господне 1426, маия в пятый день, во вторник, о часе девятом.

Сия вся совершишася без вести и неявленна пребыша на многая лета, сокровенна глубиною безмолвия и забвения. Обаче в лето тысяща девятьсот пятьдесятое (1950), божественным вразумлением подвизаемая, игумения обители, ейже имя Макария, раскопавши землю тамо во дворе (януария в 3-й день), обрете во мнозе изумлении и священнем страсе мощи преподобнаго сего мужа, небесное благоухание и благовоние источающа. Недоумеющей же и молящейся ей, во еже уведати, коего святаго мужа мощи сия суть, явися ей чуден и святолепен инок, иже вся поведа: имя свое, варварское нашествие сопостат и мученическую свою кончину, еще же и увери ю, яко обретенныя сия мощи его суть. Посему и празднуем обретение честных мощей преподобномучника месяца януария в третий день.

Божественный сей преподобномученик, прославленный от Господа, множество чудес действует призывающим его и многия недуги исцеляет притекающим к священным его мощем, почивающим во святей обители его близ Неа Макри, и во сне и яве множицею являяся, подает помощь и содействует содержимым в нуждах данною ему от Господа благодатию. Того молитвами, Христе Боже, помилуй и спаси нас. Аминь.

Песнь 7.

Ирмос: Тебе, умную, Богородице, пещь,/ разсмотряем, вернии,/ якоже бо отроки спасе три Превозносимый,/ мир обнови, во чреве Твоем всецел,/ хвальный отцев Бог и препрославлен.

Постнический подвиг божественною любовию совершая, преподобне Ефреме, кровьми страдания себе омочил еси и, яко жертва непорочная, Создавшему всяческая принеслся еси, величая Того, яко хвальнаго отцев Бога и препрославленнаго.

Рака мощей твоих, отче Ефреме, силою божественною недуги исцеляющи и демоны прогоняющи, здравие изливает и благовоние Небесное источает всем, благочестно к тебе притекающим.

Аттичестии собори и афиняне благоговейнии во обитель твою честную с верою притекают, просяще богатную благодать твою, Ефреме, ангелов сопричастниче. Юже подаждь и нам, преподобномучениче, услаждая души наша.

Богородичен: Яко неистощимый Источник щедрот божественных, Всенепорочная, жаждущей души моей воду жизни ныне источи и зной безмерных моих скорбей утоли, да пою, Богородице, славу Твою несказанную.

Песнь 8.

Ирмос: В пещи отроцы Израилевы,/ якоже в горниле,/ добротою благочестия чистее злата блещахуся, глаголюще:/ благословите, вся дела Господня, Господа,/ пойте и превозносите во вся веки.

Терпящу ти горькая досаждения от мучителей, отче Ефреме, божественным твоим смирением сломил еси врага гордыню превознесенную, взывая: благословите, вся дела Господня, Господа, пойте и превозносите во вся веки.

Воистину от Христа по достоянию прославлен был еси, отче, и по времени мнозе, яко сокровище, нам явился еси, Ефреме, научая взывати: благословите, вся дела Господня, Господа, пойте и превозносите во вся веки.

Крепость души твоея показуя, каплющею кровию твоею злобное неистовство агарян потопил еси. И, внегда умирати тебе, благодати Духа Святаго исполнився, молился еси, Ефреме: Владыко Христе, в руце Твои предаю дух мой.

Богородичен: Неискусомужно родила еси Христа и по Рождестве, яко прежде Рождества, пребываеши, Приснодева Чистая. Сего ради взываем Ти: радуйся, чистоты Сосуде всесвященный, едина Благодатная, во вся веки.

Песнь 9.

Ирмос: Образ чистаго рождества Твоего/ огнепалимая купина показа неопальная;/ и ныне на нас напастей свирепеющую угасити, молимся, пещь,/ да Тя, Богородице,/ непрестанно величаем.

Мученически запечатлев житие твое, венец небесный от Христа приял еси, отче, и Древу Жизни предстал еси, Ефреме преподобномучениче, вечныя радости сподобляемый и причастием божественным обожаемый.

Равный преподобным явился еси, отче, в посте и молитве жительствуя, и равночестен страстотерпцем соделался еси, терпя агарян нахождение, Ефреме преподобномучениче. Темже сугубыя почести улучил еси.

Память совершающе днесь твоего крепкаго страдания, вопием ти: всегда сохраняй от всякия нужды и скорби обитель твою, чтущую тя, Ефреме преподобномучениче, и нам подавай яже ко спасению полезная.

Нужднейшую смерть претерпел еси, преподобномучениче, и бурею нестерпимых мук тихаго пристанища вечныя славы и светлости достигл еси. Темже всегда молися о чтущих тя, отче Ефреме, блаженне.

Богородичен: Высоту несказаннаго Рождества Твоего, Дево, кто изглаголет? Ты бо плотию родила еси Безплотнаго, Бога же и Человека. Сего ради Тя, Богородице, непрестанно величаем.

Светилен.

Подобен: Жены услышите:

Постническими бореньми житие твое просветил еси и мученическими подвиги яко жертва благовоннейшая и приношение благоприятное Господеви принеслся еси, Ефреме. Темже всегда молися о верою почитающих священная страдания твоя.

Слава и ныне, праздника.

На хвалитех стихиры, глас 4.

Подобен: Яко добля в мученицех:

От юности, святе,/ Христови последовал еси/ и, мирския красоты отвергся,/ жительства светлостию/ и страдальческими подвиги/ в горе Амомон просиял еси./ Темже и Христа сугубо прославил еси/ и ликом ангельским,/ Ефреме, сочетался еси.

Яко звери дивии/ уязвляху тя нашедшии агаряне,/ ты же, яко овча незлобивое,/ вся претерпел еси,/ непреложным умом взирая ко Христу./ И в руце Его дух твой, радуяся, предал еси,/ прият быв лики ангельскими,/ яко твердый преподобномученик,/ Ефреме, радование наше.

В преподобных, яко преподобен,/ сияеши, блаженне,/ и в страстотерпцех, яко мученик божественный,/ во обоих бо трудех изрядствовал еси, святе,/ и Христа прославил еси./ Сего ради и Той, прием святыя твоя подвиги,/ чудес тебе благодать даде./ егоже моли непрестанно,/ Ефреме святе, о чтущих тя.

Благоволением лучшим/ светло тя Прославльшаго/ по мнозех летех честныя твоя мощи/ в земли сокровенныя, преподобне,/ ныне явишася, яко цвети мысленнии,/ благоухание Небесное источающе/ и чудодействующе обильно исцеления/ верою прибегающим к тебе,/ Ефреме богомудре.

Слава, глас 5:

Добродетели одежду кровию страдания обагрил еси,/ подвизався законно, преподобномучениче Ефреме,/ победив бо бесовския невидимыя полки,/ множества видимых враг стремлений не убоялся еси,/ вышних ища и вожделея./ И, яко воин Христов, во всем доблествовав,/ в чертог приносущныя жизни востекл еси./ Темже, причастник сый божественнаго света,/ тьмы страстей избави ны,/ благочестно празднующих память твою.

И ныне, праздника.

Славословие великое и отпуст.

На Литургии

Блаженны от канона праздника, Песнь 6.-я на 4 и святаго, Песнь 6.-я на 4. Прокимен, глас 7: Честна пред Господем смерть преподобных Его. Стих: Что воздам Господеви о всех, яже воздаде ми. Апостол к Римляном зачало 97. Аллилуиа, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его. Евангелие от Матфеа, зачала 21–23 (глава 7:12–21). Причастен: В память вечную будет праведник:

Молитва

О, святый отче Ефреме, преподобных единовсельниче и мучеников сопричастниче, возлюбивый Господа Бога всем сердцем и Тому даже до конца последовавый!

Ты первее постом и молитвою душу твою очистил еси и произволением твердым, якоже мечем, вся страстныя помыслы посекл еси. Таже, егда прииде время твоего страдания, не убоялся еси мучителей, но молитвою к Богу отразил еси нахождения диавола. И, якоже един от древних великих страстотерпцев, претерпел еси вся муки, елика безумнии врази измыслити возмогоша. Конечне же и смерть за веру Православную приял еси и силою Креста Христова агарянское нечестие посрамил еси.

Сего ради прославляем подвиги твоя, отче Ефреме, почитаем страдания и молимся: умилосердися о нас, грешных, и житие наше плодоносно покажи. Да падут обильныя слезы покаяния на изсохшую землю душ наших, и да обратится сия из пустыни неплодныя в сад божественных добродетелей, да утвердится оградою воздержания, да процветет цветом чистоты и целомудрия и принесет плод сторичный делы милосердия и любве к Богу и ближнему. Да услышим и мы сладкий глас Владыки Христа: приидите, благословеннии Отца Моего, наследуйте уготованное вам Царствие от сложения мира. Аминь.

Ина молитва

О, преподобномучениче Ефреме, дивный чудотворче и великий миру светильниче! Ты от юности Христа возлюбив, Тому Единому вседушно последовал еси. Жития же монашескаго взыскуя, на горе Амомон вселился еси и тамо, плоть распиная и непрестанную молитву в сердце твоем совершая, многими слезами душу твою от страстей очистил еси.

Сего ради уготовася тебе путь превосходнейший, не токмо в Сына Божия веровати, но и по Нем страдати. Темже муки горчайшия за Христа радостно приял еси и, никакоже агарян нечестивых устрашився, на долзе времени мучения телесная терпел еси, таже, дивное мужество показуя, кровь твою, яко многоценное миро, на землю пролиял еси. Егда же безумнии агаряне, желавшии тя от Христа отринути, узреша, яко ничтоже успевают, на древе стремглав простроша тя и палицею горящею святое тело твое прободоша. Ты же, претрудный путь свой совершив, кротко душу твою в руце Божии предал еси.

Темже, яко молния на небо возшел еси, достигнув возлюбленнаго тобою Господа. Иже прием тя, яко вернаго воина, увязе главу твою честную венцем нетленныя славы и отре всякую слезу твою, на веки с Собою сочетавая. Кто ныне возможет разлучити тя от любве Божия? Кто исхитит у тебе светлую диадиму, дарованную Небесным Царем? Кто лишит тя вечнаго жительства во граде Господнем? Воистину неотъемлемое наследие и причастие со святыми восприял еси на Небесех. Ныне же на земли просия слава твоя, святый отче Ефреме. Аще бо и безвестно в мире сем пострадал еси, обаче Творец всяческих, ведый тайная, в последок дний сих яви сокровенныя в земли твоя мощи, подвиги твоя явлены сотвори и дарова ти велию благодать исцелений в помощь и утешение роду христианскому. Сего ради потоки чудес источил еси, отче Ефреме, притекающим к святей твоей раце, расслабленныя укрепляя, слепым зрение подавая, хромыя возставляя и иными многими и неисцельными недугами содержимыя люди врачуя. И даже до днесь вся концы вселенныя просвещаеши многоразличными дивными чудесы и видении.

О, святче Божий, не остави и нас, убогих, оскудевших в вере, любви и добрых делех, возстави нас падших в страсти, даруй нам слезы покаяния, утверди твоею крепкою к Богу молитвою, исцели наша недугующия души и телеса. Просвети наш ум последовати евангельским заповедем, возжзи в сердцах наших неугасимую любовь ко Спасу и ближним нашим, даруй нам благими делы прославляти Отца нашего Небеснаго, Емуже подобает всякая слава, честь и поклонение со Единородным Его Сыном и с Пресвятым и Благим и Животворящим Его Духом, ныне и присно и во веки веков. Аминь.

Источник: Текст службы утвержден на заседании Священного Синода 25 августа 2022 года (журнал № 78).

Месяца мая в 5-й день

Преподобных Варлаама и Гедеона, Серпуховских

На велицей вечерни

На Господи, воззвах: стихиры, глас 1.

Подобен: О, дивное чудо:

О, дивное чудо!/ Пречистая Дева Богородица / святителю Алексию обитель создати повелевает,/ Варлаама преподобнаго видения сподобляет / и от слепоты того купно с Гедеоном исцеляет,/ икону же Свою страждущим от винопития являет,/ недугующих от болезней избавляет,/ страстей течение уставляет./ О, Всемилостивая Владычице,/ молитвами преподобных Варлаама и Гедеона / подавай душам нашим // мир и велию милость.

О, дивное чудо!/ Знамение Владычицы на земли явися / и чудным звоном место обители Ея указася,/ идеже иноки благочестивии вселишася / и подвиги своими просияша./ Веселися, граде Серпухов,/ имея в себе святыя молитвенники,/ предстоящия Престолу Всевышняго./ Вы же, преподобнии Варлааме и Гедеоне,/ яко имущии дерзновение ко Пресвятей Троице / испросите душам нашим // мир и велию милость.

О дивное чудо!/ В пустыннем месте обитель дивная явися / и яко сад прекрасен показася,/ в нем бо иноки благочестивии / плоды добродетелей принесоша./ Торжествуй днесь, обителе Владычня,/ имущи заступники непостыдныя / и ходатаи предивныя./ Вы же, Варлааме и Гедеоне боголюбивии,/ молите Владыку Вседержителя,/ мир всему миру даровати // и душам нашим велию милость.

Ины стихиры преподобному Варлааму, глас 6.

Подобен: Все отложше:

Преподобне отче Варлааме,/ послушания добрый рачителю!/ Ты, земную красоту и славу отринув,/ Христа всем сердцем возлюбил еси / и, святителем Алексием направляемь,/ обитель Пречистей Богородице устроил еси,/ в нейже равноангельно пожил еси./ Ныне же, во обителех Небесных пребывая,/ за ны усердно Господу молися // даровати душам нашим мир и велию милость.

Преподобне отче Варлааме,/ молитвенниче усердный ко Пресвятей Троице!/ Ты, избранник Пречистыя Девы явився,/ Тоя благословением в пустынном месте обитель создал еси,/ идеже множество иноков собравшеся / Христу Богу усердно послужиша / и Пречистую Его Матерь возвеличиша./ И ныне сохраняй обитель сию,/ нам же, творящим твою память,// теплый предстатель пред Господем буди.

Стихиры преподобному Гедеону,

глас и подобен тойже:

Все отложив житейское мудрование / и мирскую прелесть оставив,/ преподобне отче Гедеоне,/ во обитель Владычицы Девы пришел еси,/ идеже, в послушание старцу Варлааму предався,/ истинное смирение стяжал еси / и плоть потщался еси покорити духу,/ память же смертную пред очима своима имея,/ во бдении, пощении и молитве пребывал еси / и тако Богу угодил еси./ Темже молим тя:/ помози и нам, с любовию к тебе притекающим,// Царствие Небесное улучити.

Глас Господень услышав:/ аще кто хощет по Мне идти,/ да отвержется себе, и возмет крест свой,/ и по Мне грядет,/ крест свой на рамо взем,/ Христу усердно последовал еси,/ преподобне отче Гедеоне,/ и, в слове Божием день и нощь поучаяся,/ заповеди Господни на скрижалех сердца написал еси./ Темже молим тя:/ помози и нам, с любовию к тебе притекающим,// благое иго Христово смиренно носити.

Слава, глас 8:

Богомудрая двоице доброхвальных отец,/ благосердне Варлааме и добронравне Гедеоне,/ ревностию Христовою распалаемии,/ в преподобии и правде на земли просияли есте,/ ныне же на Небеси с лики всех святых / Престолу Пресвятыя Троицы предстоите./ Поминайте нас, священную память вашу совершающих,/ мы бо чада ваша и вас на помощь призываем,// просяще вами прияти мир и велию милость.

И ныне, Богородичен: Царь Небесный:

Вход. Прокимен дне. И чтения.

Премудрости Соломоновы чтение (глава 3):

Праведных души в руце Божией, и не прикоснется их мука./ Непщевани быша во очесех безумных умрети, и вменися озлобление исход их./ И еже от нас шествие сокрушение, они же суть в мире./ Ибо пред лицем человеческим аще и муку приимут, упование их безсмертия исполнено./ И вмале наказани бывше, великими благодетельствовани будут,/ яко Бог искуси я и обрете их достойны Себе./ Яко злато в горниле искуси их и яко всеплодие жертвенное прият я./ И во время посещения их возсияют и, яко искры по стеблию, потекут./ Судят языком и обладают людьми, и воцарится Господь в них во веки./ Надеющиися Нань разумеют истину и вернии в любви пребудут Ему/ Яко благодать и милость в преподобных Его, и посещение во избранных Его.

Премудрости Соломоновы чтение (главы 5 и 6):

Праведницы во веки живут, и в Господе мзда их, и попечение их у Вышняго./ Сего ради приимут Царствие благолепия и венец доброты от руки Господни,/ зане десницею покрыет я и мышцею защитит их./ Приимет всеоружие рвение свое и вооружит тварь в месть врагом./ Облечется в броня правды и возложит шлем, суд нелицемерен./ Приимет щит непобедимый преподобие,/ поострит же напрасный гнев во оружие;/ споборет же с ним мир на безумныя./ Пойдут праволучныя стрелы молниины/ и, яко от благокругла лука облаков, на намерение полетят./ И от каменометныя ярости исполнь падут грады,/ вознегодует на них вода морская, реки же потопят я нагло./ Сопротив станет им дух силы, и, яко вихор, развеет их/ и опустошит всю землю беззаконие, и злодейство превратит престолы сильных./ Слышите убо, царие, и разумейте, навыкните, судии концев земли./ Внушите, держащии множества и гордящиися о народех язык,/ яко дана есть от Господа держава вам и сила от Вышняго.

Премудрости Соломоновы чтение (глава 4):

Праведник аще постигнет скончатися, в покои будет./ Старость бо честна не многолетна, ниже в числе лет исчитается./ Седина же есть мудрость человеком, и возраст старости житие нескверное./ Благоугоден Богови быв, возлюблен бысть, и живый посреде грешник преставлен бысть./ Восхищен бысть, да не злоба изменит разума его, или лесть прельстит душу его./ Рачение бо злобы помрачает добрая, и парение похоти пременяет ум незлобив./ Скончався вмале, исполни лета долга./ Угодна бо бе Господеви душа его, сего ради потщася от среды лукавствия./ Людие же видевше и не разумевше, ниже положше в помышлении таковое./ Яко благодать и милость в преподобных Его, и посещение во избранных Его.

На литии стихиры, глас 3:

Приидите, вернии,/ возвеличим в песнех честныя отцы,/ Варлаама богосветлаго и Гедеона преявственнаго:/ светильники Неприступнаго Света Христова,/ сосуды честныя Духа Святаго,/ ангелом собеседники и преподобным сопричастники,/ веры Христовы истинныя исповедники,/ покаяния наставники и благочестия учители,// тии бо явишася соль земли и свет миру.

Сшествуим вси радостно во обитель Владычню / и восхвалим преподобныя отцы,/ телесы бо своими в ней почивше,/ чудеса преславная содевают верою приходящим:/ болящим подают исцеление,/ погибающим от страстей свобождение,/ маловерным благодатное укрепление,/ страждущим в бедах скорое поможение,/ ожесточенным сердцы примирение,// всем же христианом веры истинныя познание и утверждение.

Слава, глас 8:

Рождия доброплодная суще,/ преподобнии Варлааме и Гедеоне,/ на лозе Христовой произрасли есте,/ уставов же отеческих истиннии ревнителие явльшеся,/ заповеди Господни усердно исполнили есте / и, труды ко трудом прилагавше,/ молитву непрестанно совершали есте:// Иисусе, Сыне Божий, помилуй нас.

И ныне, Богородичен, глас тойже:

К Тебе Госпоже, Пречистая, прибегаем,/ яко Источнику спасения нашего,/ вшедши бо во святое святилище храма,/ воспиталася еси во Святилище Бога Вышняго/ и, вместивши Избавителя во утробе Своей,/ Престол Царя славы явилася еси./ Темже с верою и любовию вопием Ти:/ Милостивое Пристанище, Покров и Заступление нам буди.

На стиховне стихиры, глас 5.

Подобен: Радуйся, Живоносный Кресте:

Радуйтеся, непобедимии воини Христови,/ преподобнии Варлааме и Гедеоне,/ заповеди бо евангельстии усердно соблюдше,/ истиннии подобницы Господни явистеся,/ кротость и смирение стяжавше,/ врагу мужественне противостасте./ Ныне же, во Царствии Небеснем ликовствующе,/ молите Пресвятую Троицу // низпослати нам дух любве и смиренномудрия.

Стих: Восхвалятся преподобнии во славе / и возрадуются на ложах своих.

Радуйся, всеблаженне отче Варлааме,/ небесный человече и земный ангеле,/ верный таинниче святителя Алексия / и добрый его послушниче!/ Ты, в пустыннем месте усердно подвизаяся,/ обитель Владычицы Девы воздвигл еси./ Ныне же, в Небесных обителех водворяяся,/ моли Пречистую Богородицу // низпослати нам дух кротости и целомудрия.

Стих: Блажени вси боящиися Господа,/ ходящии в путех Его.

Радуйся, обитель Владычня,/ града Серпухова похвало и украшение,/ ты бо благотишное пристанище спасения / верным людем явилася еси./ Мы же, ублажающе святую память отец твоих,/ преподобных Варлаама и Гедеона,/ исцеления дары приемлем / и венчавшаго их Христа прославляем,// яко Спаса душ и телес наших.

Слава, глас 4:

Преподобне отче Варлааме,/ подвиг пустыннаго жития являя,/ монахов множество собрал еси / и, словом Божиим непрестанно тех наставляя,/ по лествице добродетелей к Небесным селением возвел еси./ Таже и ученик твой, предивный Гедеон,/ блаженства праведных взыскуя,/ тебе, яко мудрому наставнику,/ всего себе в послушание предаде / и житию твоему добре поревнова./ Ныне же молим вас, отцы преподобнии,/ научите нас право шествовати,// да Царствия Небеснаго сподобимся.

И ныне, Богородичен, глас тойже:

Днесь Боговместимый храм, Богородица,/ в храм Господень приводится,/ и Захария Сию приемлет:/ днесь святая святых радуются,/ и лик ангельский таинственно торжествует./ С нимиже и мы, празднующе днесь, с Гавриилом возопиим:/ радуйся, Благодатная, Господь с Тобою,// имеяй велию милость.

Тропарь святых, глас 4:

Божественною ревностию распалаеми,/ вся мирская пристрастия отринули есте,/ благое иго Христово усердно понесше,/ образ спасения верным показали есте,/ обитель Владычицы Девы воздвигше,/ град Серпухов радостию исполнили есте./ И ныне, Престолу Божию предстояще,/ молитеся, преподобнии Варлааме и Гедеоне,/ спастися душам нашим.

На утрени

На Бог Господь: тропарь преподобных дважды. Слава, и ныне, Богородичен: Еже от века утаеное:

По 1-м стихословии седален, глас 3:

Божественныя любве взыскуя,/ в пустынное место вселился еси, блаженне Варлааме,/ и обитель во имя Пречистыя Девы воздвигл еси,/ идеже, сеяй доброе семя слова Божия в сердца приходящих,/ дивный плод от древа добродетелей,/ духоноснаго Гедеона, израстил еси./ С нимже молися Сладчайшему Господу Иисусу,/ да спасет души наша.

Слава, и ныне, Богородичен:

Дивному вхождению Твоему во святая святых, Дево Всепетая,/ вся силы Небесныя удивишася,/ Серафими же воспеша песнь хвалебную,/ ибо явися всему миру Боговместимый Храм,/ источающий спасение всем с верою и любовию к Тебе притекающим.

По 2-м стихословии седален, глас 2:

Земную красоту и славу временную презрев,/ Христа единаго возлюбил еси, преподобне Гедеоне,/ и, крест свой взем,/ Божественней воли всеусердно покорился еси/ и лествицею добродетелей Небеснаго отечества достигл еси./ О, предивне отче,/ истинный учениче и послушания рачителю,/ молися Христу Богу низпослати нам дух кротости и смиренномудрия.

Слава, и ныне, Богородичен:

Яко Лоза истинная, Дево Пречистая,/ прекрасный Грозд, Христа, возрастила еси,/ источающий верным вино спасительное, веселящее души и телеса./ Темже со умилением к Тебе припадаем и тепле вопием:/ напои нас потоком Божественныя сладости, Всенепорочная Владычице.

Величание:

Ублажаем вас,/ преподобнии отцы наши Варлааме и Гедеоне,/ и чтим святую память вашу,/ наставницы монахов/ и собеседницы ангелов.

Псалом избранный: Терпя, потерпех Господа:

По полиелеи седален, глас 5:

Егда, блаженнии, к Божественному желанию ум свой вперисте,/ тогда оставили есте вся долу влекущая мудрования/ и, в пустыню всельшеся,/ терние страстей искоренили есте и добродетельми процвели есте./ Темже, стяжавше богатство неотъемлемое на Небесех,/ отцы преподобнии Варлааме и Гедеоне,/ молите Христа Бога согрешений оставление даровати/ чтущим святую память вашу.

Слава, и ныне, Богородичен:

Престол Небесный и Храм одушевленный явилася еси, Пренепорочная Владычице,/ Хлеб вечныя жизни верным подавающая/ и избавляющая достояние Твое от всех наветов вражиих./ Сподоби нас в страшный час испытания прощение улучити/ и Царствия Небеснаго достигнути.

Таже степенна, 1-й антифон 4-го гласа.

Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфея, зачало 43.

По 50-м псалме стихира, глас 6:

Иже на земли ангелов / и на Небеси человеков Божиих,/ мира благое украшение,/ монахов и постников похвалу,/ славных отцев почтим,/ насаждени бо в дому Господни,/ процветоша, яко кедри в пустыни,/ умноживше стадо Христово словесных овец // в преподобстве и правде.

Канон преподобных отец Варлаама и Гедеона, глас 1.

Песнь 1.

Ирмос: Песнь победную поим вси Богу,/ сотворшему дивная чудеса мышцею высокою // и спасшему Израиля, яко прославися.

Припев: Слава Тебе, Боже наш, слава Тебе.

Господи, Боже, подаждь ми силу и разум,/ да достойно прославлю преславныя подвиги угодник Твоих, преподобных Варлаама и Гедеона,/ Светом бо невечерним озаряемии,/ Престолу Твоему предстоят/ и молятся о спасении верою творящих память их.

Припев: Преподобнии отцы Варлааме и Гедеоне, молите Бога о нас.

Доброплодная лоза винограда Христова,/ рукою святителя Алексия насажденная,/ явился еси, преподобне Варлааме./ Темже основание обители Владычния в пределех града Серпухова положил еси,/ да вси приходящии спасение улучают.

Добродетельному житию святых отцев поучаяся,/ кротость, смирение и послушание возлюбил еси, пречудне Гедеоне,/ и, всю надежду на Бога возлагая,/ мужественно взыграния страстей препобедил еси.

Богородичен: Милостивым предстательством, Пренепорочная Владычице,/ покрый от всяких напастей и вражиих ухищрений рабы Твоя,/ Тя бо имамы Избавительницу и Спасение душам нашим.

Песнь 3.

Ирмос: Да утвердится сердце мое в воли Твоей, Христе Боже,/ Иже над водами Небо утверждей второе // и основавый на водах землю, Всесильне.

Слово Божие, яко семя, в сердце своем приемше/ и сторичный клас добродетелей возрастивше,/ плод духовный любве, мира и долготерпения принесли есте./ Темже и нас, отцы богосветлии,/ соделайте причастники подвига вашего.

Господнею любовию озаряемь, преподобне отче Варлааме,/ в послушание Царице Небесней вдался еси/ и в пустыннем месте, близ града Серпухова, обитель во имя Ея воздвигл еси,/ идеже, многия ученики собрав,/ путь спасения им указал еси.

Очищая душу свою от тлетворных страстей,/ блаженный плач стяжал еси,/ избранниче Христов отче Варлааме./ Сего ради мир душевный обрел еси/ и смиренному Гедеону с прочими ученики путь спасения показал еси.

Богородичен: Вереи адовы сломишася и заклепи вечнии сокрушишася преславным Рождеством Твоим,/ явися бо Избавление всем человеком./ Сего ради зовем:/ радуйся, Пречистая Дево, верных Спасение.

Седален, глас 4:

Вся временная в мире сем оставивше, богомудрии Варлааме и Гедеоне,/ Крест Христов на рамена подъяли есте/ и, Тому Единому смиренно последовавше,/ блаженства вечнаго достигли есте./ И ныне молим вас,/ прощение грехов у Господа испросите нам,/ любовию творящим святую память вашу.

Слава, и ныне, Богородичен:

Богородице, всех Царице,/ Ты еси Престол Царя Небеснаго,/ Неупиваемая Чаша нашего спасения,/ Клас, израстивший нам Хлеб живота,/ от Негоже ядше, живи будем/ и не взалчем во веки.

Песнь 4.

Ирмос: Духом провидя, пророче Аввакуме, Словесе воплощение,/ проповедал еси, вопия:/ внегда приближитися летом, познаешися,/ внегда приити времени, покажешися.// Слава силе Твоей, Господи.

Храм Духа Святаго явилися есте, преподобнии отцы наши Варлааме и Гедеоне,/ егда всякое нечестие от сердца своего отгнавше,/ невозвратным помыслом Христу последовали есте, вопиюще:/ слава силе Твоей, Господи.

Тихостию нрава и кроткими словесы/ многия во обитель привлекл еси, преподобне Варлааме,/ братолюбием и незлобием добродетельному пути научая, да с радостию воспевают:/ слава силе Твоей, Господи.

Престолу Божию предстоя и райския сладости наслаждаяся,/ помяни нас во святых твоих молитвах, отче Гедеоне,/ да, слезами покаяния души очистивше,/ купно с тобою Христу воспоим:/ слава силе Твоей, Господи.

Богородичен: Всем, притекающим к Тебе,/ Предстательница и Помощница явилася еси, Пренепорочная Владычице,/ избавляющи от работы вражия/ и на путь спасения наставляющи.

Песнь 5.

Ирмос: Твой мир даждь нам, Сыне Божий,/ иного бо, разве Тебе, Бога не знаем,/ Имя Твое именуем,// яко Бог живых и мертвых еси.

В слове Божием ревностно поучающеся, преподобнии Варлааме и Гедеоне,/ познали есте како подобает волю Господню творити./ Темже почесть трудов своих прияли есте/ и светоносную благодать Святаго Духа улучили есте.

Добро есть жити в заповедех Господних,/ сице поучал еси ученики твоя, богомудре Варлааме./ Мы же, внемлюще гласу твоему, ныне молим тя:/ настави нас на стези спасения/ и в Царствие Небесное пути наша управи.

Утешение во Христе ища/ и слезы покаяния о гресех проливая, преблаженне отче Гедеоне,/ мудрому учителю твоему во всем последовал еси./ Темже и возмогл еси шатание лукаваго низложити/ и пристанища Небеснаго достигнути.

Богородичен: В недузех и всех обстояниих к Тебе, Владычице, припадаем/ и, яко Надежде нашего спасения, тепле вопием:/ даруй нам дух сокрушения и смирение сердца,/ да благодарне воспеваем величия Твоя.

Песнь 6.

Ирмос: Пророка Иону подражая, вопию:/ живот мой, Блаже, свободи из тли/ и спаси мя, Спасе мира, зовуща: слава Тебе.

Непрестанную молитву в сердце имуще, досточуднии отцы,/ собеседницы Небесных Сил явилися есте./ С нимиже помозите и нам чистоту сердечную стяжати, да зовем:/ Спасе мира, слава Тебе.

Пламенною любовию ко Христу возгоревся,/ все упование свое на Господа возложил еси, отче Варлааме,/ и непрестанно во псалмех и пениих и песнех духовных Ему взывал еси:/ Спасе мира, слава Тебе.

Мудрому учителю твоему вседушно в послушание вдався/ и во всем волю свою отсекая, премудре Гедеоне,/ всем сердцем волю Божию исполнил еси, воспевая:/ Спасе мира, слава Тебе.

Богородичен: Со архангелы и ангелы песнь хвалебную воспоим Царице Богородице,/ Та бо молит Сына Своего, Христа Бога нашего,/ даровати нам прежде конца покаяние и велию милость.

Кондак, глас 8:

Избраннии угодницы Христовы,/ служителие усерднии Владычицы Богородицы,/ истиннии послушницы святителя Алексия,/ Варлааме и Гедеоне богоблаженнии,/ души своя кротостию, смирением и чистотою украсившии,/ сосуди предивнии Святаго Духа явилися есте./ Мы же, прославляюще подвиги ваша,/ с верою и любовию взываем:// радуйтеся, преподобнии отцы, усерднии о нас пред Богом молитвенницы.

Икос:

Вся земная оставльше,/ обрели есте бесценный бисер, Христа Бога,/ любомудрии Варлааме и Гедеоне,/ и, крест свой на рамо вземше,/ последовали есте Ему невозвратным помыслом,/ тщание о спасении непрестанно имуще./ Темже вопием вам:

Радуйтеся, Ангелов подражателие преславнии;

радуйтеся, храмы Духа Святаго пречестнии.

Радуйтеся, тесною евангельскою стезею шествовавшии;

радуйтеся, звезды, на тверди Небесней сияющии.

Радуйтеся, от страстей скорое свобождение;

радуйтеся, Владычния обители похвало и украшение.

Радуйтеся, преподобнии отцы, усерднии о нас пред Богом молитвенницы.

Песнь 7.

Ирмос: Сущим в пещи отроком Твоим, Спасе,/ не прикоснуся, ниже стужи огнь./ Тогда трие, яко единеми усты пояху/ и благословляху, глаголюще:/ благословен Бог отец наших.

Христови сраспеншеся, богомудрии отцы,/ Тому единому всеусердно пожили есте./ Темже и Возлюбившему вас ныне с ликом преподобных поете и глаголете:/ благословен Бог отец наших.

Руку спасения человеку некоему простерл еси, блаженне Варлааме,/ егда в сонном видении тому явлься,/ исцеление от недуга пианства обещал еси,/ да пред образом Пречистыя и Предвечнаго Младенца Ея воспоет:/ благословен Бог отец наших.

Исцеление от слепоты телесныя блаженному Гедеону даровавый,/ исцели слепоту душ наших, боголюбезне Варлааме,/ да просвещенными очесы узрим Господа и воспоем Ему:/ благословен Бог отец наших.

Богородичен: Принесем песнь согласно Царице Небесней,/ яко Небесную Чашу Своего милосердия нам источила еси/ и Скорая Помощница в скорбех явилася еси./ Темже вси возопиим:/ радуйся, Заступнице Усердная рода христианскаго.

Песнь 8.

Ирмос: Егоже ужасаются Ангели и вся воинства,/ яко Творца и Господа,/ пойте, священницы, прославите, отроцы,/ благословите, людие,/ и превозносите во вся веки.

О, пустыннолюбнии отцы Варлааме и Гедеоне!/ Вы, зельным воздержанием плотския похоти от себе отгнавше,/ добродетелию целомудрия себе украсили есте./ Темже со ангелы превозносите Господа во вся веки.

Недугующим скорый целитель явился еси, отче Варлааме./ Не презри убо и нас с верою к мощем твоим притекающих,/ но скоро услыши молитвы наша и подаждь помощь свыше, да вопием:/ отроцы, благословите, священницы, воспойте,/ людие, превозносите Господа во вся веки.

Во обители Владычней усердно подвизаяся, преподобне Гедеоне,/ добродетельми, яко солнце, просиял еси./ Темже и возшел еси в Небесный чертог,/ идеже сподобился еси прославляти Творца и Господа во вся веки.

Богородичен: Странно явление образа Неупиваемая Чаша и несказанно есть,/ чудотворная бо икона сия во обители обретается/ и грешным людем Владычица исцеления подает./ Темже благодарне вопием:/ благословенна Ты, Пречистая, во вся веки.

Песнь 9.

Ирмос: Живоприемный Источник приснотекущий,/ светоносный Светильник благодати,/ Храм одушевленный, Сень пречистую,/ Небесе и земли пространнейшую,/ Богородицу, вернии, величаем.

Честна воистинну смерть ваша, достославнии отцы,/ преставилися бо есте от земли к Небесным./ Обаче, предстояще Престолу Вседержителя,/ и от нас духом не отступаете./ Темже непрестанно молите Троицу Единосущную,/ спастися душам нашим.

Райския пищи причастницы явистеся, преблаженнии отцы наши,/ и от Христа Бога венцы славы приясте./ И ныне молитеся прилежно о нас,/ верою и любовию творящих честную память вашу.

Днесь творяще память вашу,/ преподобнии отцы Варлааме и Гедеоне,/ похвальное пение приносим вам и молим:/ веру Православную во Отечестве нашем утвердите,/ обитель Владычню сохраните/ и предстателие явитеся всем, с любовию к вам притекающим.

Богородичен: Воспеваем Тя, Всемилостивая Заступнице рода христианскаго,/ Ты бо всегда прилежно молишися о нас./ Темже, со умилением сердечным припадающе, тепле вопием:/ сохрани нас от всякия напасти и беды/ и спаси души наша.

Светилен, глас 5:

Свети святии, богоизбраннии Варлааме и Гедеоне!/ Вы есте преподобным похвала, священником украшение,/ христианом поможение/ и граду нашему Серпухову великое утверждение.

Слава, и ныне, Богородичен:

Радуйся, Боголюбивая Царице,/ радуйся, Мати Христа Бога нашего,/ радуйся, обители нашея крепкое Заступление,/ радуйся, Отечеству нашему Похвало и Утверждение.

На хвалитех стихиры, глас 1.

Подобен: Небесных чинов:

Днесь обитель Владычня торжествует,/ прославляющи угодники своя,/ богосветлаго Варлаама и добронравнаго Гедеона./ Тии бо, светом Христовых заповедей сияюще,/ добродетельному житию нас научают / и, прошения наша приемлюще,// прилежно молятся Богу о спасении душ наших.

Усердно Христу последовал еси,/ боголюбезне Варлааме,/ воздержания правило и целомудрия образе,/ добродетели рачителю и благосердия источниче./ Ныне же, яко ангелов собеседник,/ райскую доброту богатно зриши // и молишися о спасении душ наших.

Вышния доброты взыскуя,/ преподобне отче Гедеоне,/ мира и сущих в нем житейских отреклся еси / и, послушания добрый рачитель быв,/ терпением и смирением ангельския лики удивил еси./ Темже молим тя:// в послушании Церкви Христовой утверди нас.

Днесь духовный лик составльше,/ торжествуем и радуемся,/ прославляюще богомудрых Варлаама и Гедеона,/ преподобно в заповедех Господних поживших./ Помяните нас, отцы преблаженнии,/ у Престола Святыя Троицы // и испросите душам нашим мир и велию милость.

Слава, глас 8:

Светильницы присносветлии / явистеся мирови,/ преподобнии отцы Варлааме и Гедеоне,/ монашескаго жительства истинное правило,/ земли нашея пресветлое украшение,/ целомудрия и чистоты образи. / Тех молитвами, Благоутробне Господи,/ подаждь людем Твоим оставление грехов // и велию милость.

И ныне, Богородичен, глас тойже:

Владычице, приими молитвы раб Твоих / и избави нас // от всякия нужды и печали.

На Литургии

Блаженны от канона, песни 3-я и 6-я.

Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол, к Галатом, зачало 213. Аллилуия, глас 6: Блажен муж, бояйся Господа,/ в заповедех Его восхощет зело. Стих: Сильно на земли будет семя Его.

Евангелие от Луки зачало 24. Причастен: В память вечную будет праведник:

Источник: Служба составлена в 2013 году. В 2014 году одобрена Высокопреосвященнейшим Ювеналием, митрополитом Крутицким и Коломенским, к употреблению в пределах Московской областной епархии.

Ме́сяца ма́я в 9-й день

Преподо́бнаго Ио́сифа О́птинскаго

Обре́тение же честны́х моще́й его́ ме́сяца октября́ в 3-й день

На ма́лой вече́рни

На Го́споди, воззва́х: стихи́ры, глас 2:

Днесь, ве́рнии, соше́дшеся/ в па́мять преподо́бнаго Ио́сифа О́птинскаго,/ духо́вно пра́зднуим, того́ велича́юще,/ и возсла́вим Христа́ Бо́га на́шего,/ о́трасль послуша́ния зде возрасти́вшаго,/ ке́дра высо́каго преблагу́ю ветвь,/ вертогра́ду сему́ во утеше́ние,// источа́ет бо арома́т Небе́сный.

Свет Невече́рний, почи́вый на тебе́,/ всего́ тя светови́дна соде́ла,/ о́тче досточу́дне Ио́сифе,/ просвеща́еши бо ка́ющияся те́пле/ доброде́телей твои́х све́тлыми сия́нии/ и напая́еши чи́стым вино́м нетле́ния,/ те́мже припа́даем ти любо́вию и мо́лимся:// моли́ спасти́ся душа́м на́шим.

Ста́рцы О́птинстии,/ зако́на Бо́жия и благода́ти храни́телие,/ Амвро́сие боже́ственный и Ио́сифе, любве́ сосу́де,/ доны́не вопию́т с Предте́чею:/ пока́йтеся, Госпо́дь бо гряде́т,/ хотя́й угото́вати Себе́ лю́ди соверше́нны,// и благода́тию всели́тися в ве́рных сердца́х.

Сла́ва, глас 6:

Егда́ Отрокови́ца, Де́ва Чи́стая,/ све́тлый лик Свой тебе́ явля́ше/ и тя, преподо́бне Ио́сифе,/ Своего́ люби́мича именова́ше,/ тогда́ любо́вию к Ней распаля́емь,/ да́же до сме́рти во всем повину́лся еси́,/ благогове́йне взыва́я:/ ра́дуйся, Ма́ти христиа́н;/ ра́дуйся, све́тлое благода́ти позна́ние;// ра́дуйся, Неве́сто Неневе́стная.

И ны́не, пра́здника, или́ Богоро́дичен, глас то́йже.

На стихо́вне сти́хиры свята́го, глас 8.

Подо́бен: О, пресла́внаго чудесе́:

Приснопа́мятне о́тче Ио́сифе,/ душа́ твоя́ во град Небе́сный всели́ся,/ те́ло же твое́ многотру́дное/ приобре́те сей вертогра́д на земли́,/ иде́же притека́юще, цельбы́ почерпа́ем,/ соблюди́ у́бо, о́тче всехва́льне,/ тя велича́ющий оби́тельный град,/ дерзнове́ние име́я ко Христу́,// ны́не тя просла́вльшему.

Стих: Блаже́н муж, боя́йся Го́спода,// в за́поведех Его́ восхо́щет зело́.

По и́мени твоему́ и житие́ твое́,/ о́тче достоблаже́нне Ио́сифе,/ благода́ти дар боже́ственный/ му́жеством и терпе́нием преумно́жил еси́,/ смире́нием умиря́я бу́рная сердца́,/ посреде́ отце́в и бра́тий ти́хостию сия́я./ Сего́ ра́ди чудеса́ и дарова́ния/ ны́не в пе́рвых зде преумножа́еши// и мо́лишися о душа́х на́ших.

Стих: Честна́ пред Го́сподем/ смерть преподо́бных Его́.

В но́вом гро́бе се́рдца твоего́,/ я́коже дре́вле Ио́сиф Аримафе́йский со стра́хом мно́гим,/ упоко́ил еси́ Христа́ Бо́га,/ обетова́ние воскресе́ния от Него́ прии́м,/ и Того́ ро́ждшия бесе́ды/ светоле́пно сподо́бился еси́./ Мы же мо́лим тя, всеприснопа́мятне,/ исцеле́ньми и ми́ра дарова́ньми,// посеща́й оби́тель твою́.

Сла́ва, глас то́йже:

Благода́тию Ду́ха Свята́го просвеща́емь,/ смире́нием и терпе́нием себе́ украси́л еси́,/ кро́тостию же и нището́ю духо́вною/ безпло́тныя враги́ победи́л еси́,/ сего́ ра́ди А́нгели Бо́жии на высо́ких тя восприя́ша,/ венча́юще главу́ твою́ венцы́ побе́дными,/ ве́рнии же утверди́шася благода́тию,/ в тебе́ обита́ющею./ Моли́ся о нас ко Го́споду,/ преподо́бне о́тче Ио́сифе,// да спасе́т ду́ши на́ша, я́ко Благоутро́бен.

И ны́не, пра́здника, или́ Богоро́дичен, глас то́йже.

Тропа́рь зри на вели́цей вече́рни.

На вели́цей вече́рни

На Го́споди, воззва́х: стихи́ры пра́здника. И свята́го стихи́ры, глас 2.

Подо́бен: Егда́ от Дре́ва:

Стецы́теся, боголю́бцы,/ ликовству́юще, торже́ственне почти́м/ препросла́вленную па́мять ди́внаго Ио́сифа,/ О́птины похвалу́, мона́хов наста́вника,/ и́же, до́бре на земли́ подвиза́вся,/ на Небесе́х мзду трудо́в свои́х/ от Христа́ Бо́га восприя́л еси́,/ ны́не же Того́ приле́жно умоля́ет// о спасе́нии душ на́ших.

Смире́н, незло́бив, кро́ток и прост быв,/ чи́сто житие́ твое́ провожда́л еси́,/ преподо́бне Ио́сифе богодухнове́нне,/ и, во́ли своея́ отверже́нием тала́нт усугу́бив,/ тяготы́ немощны́х поне́сл еси́,/ зако́н же Христо́в соверше́нне исполня́я,/ с преподо́бными ны́не всели́лся еси́,/ иде́же, блаже́нныя добро́ты наслажда́яся,// моли́ся о спасе́нии душ на́ших.

Тече́нием слез зе́млю души́ твоея́ ороси́в,/ досточу́дне о́тче Ио́сифе,/ к восприя́тию Бо́жия благода́ти/ благопотре́бну ю́ соде́лал еси́/ и, я́ко до́брый де́латель,/ плоды́ доброде́телей возрасти́в,/ в жи́тницу Го́спода твоего́ ра́достно прине́сл еси́,/ Ему́же моли́ся, преподо́бне,// о спасе́нии душ на́ших.

И́ны стихи́ры свята́го (на обре́тение моще́й), глас 2:

Стецы́теся, вси смиреннолю́бцы,/ у́зрите О́птины благослове́нный плод,/ Ио́сифа приснопа́мятнаго, послуша́ния рачи́теля,/ и́же во сла́ве Небе́сней ны́не возстае́т,/ равноче́стен быв житие́м отцу́ своему́,/ преподо́бному ста́рцу Амвро́сию,/ та́ко равноче́стен и по сме́рти явля́ется,/ во обре́тении моще́й свои́х,// я́ко благопло́дная ветвь виногра́да О́птинскаго.

Се явле́ние достосла́вное:/ насажде́ние ста́рца Амвро́сия,/ ши́пок смиренному́дрия,/ процвете́ние мы́сленное,/ ди́вный плод послуша́ния,/ Ио́сифа приснопа́мятнаго прославля́ем,/ его́же мо́щи ны́не обрета́ются/ и исцеле́ний то́ки преизлива́ют// на ра́дость всем ве́рным.

Твои́х моще́й обре́тение, преблаже́нне,/ ве́рных привлече́ к доброде́тели послуша́ния/ и боже́ственную благода́ть подаде́,/ се бо, я́ко мы́сленная звезда́,/ на небосво́д О́птинский восте́кл еси́,/ озаря́я приходя́щих к ра́це моще́й твои́х/ и утеше́ние подая́ бога́тно// ве́рою и любо́вию тя почита́ющим.

Сла́ва, глас то́йже:

Мона́хов мно́жества припа́дают днесь,/ к ра́це моще́й преподо́бнаго Ио́сифа,/ воспева́юще в пе́снех по́двиги воздержа́ния/ и подража́юще того́ доброде́телем./ Та́кожде и всех ве́рных собра́ния/ благода́рне возвыша́ют гла́сы своя́ к Бо́гу,/ милосе́рдие ве́лие прославля́юще,/ дарова́ бо нам вели́каго засту́пника и хода́тая,/ его́же моли́твами прие́млем не́мощей исцеле́ние// и благовре́менную по́мощь.

И ны́не, пра́здника, или́ Богоро́дичен догма́тик, глас то́йже.

Вход. Проки́мен дне. И чте́ния преподо́бническая 3.

На лити́и стихи́ра хра́ма, и свята́го, глас 3:

Торжеству́йте, христиа́не правосла́внии,/ ра́дуйтеся, лю́дие земли́ Ру́сския,/ я́ко преподо́бнии отцы́ О́птинстии/ дале́че сия́ют на небосво́де Христо́вы Це́ркве,/ све́тлому созве́здию подо́бни,/ посреде́ и́муще чу́днаго Ио́сифа,/ звезду́, горя́щую преди́вно,/ па́че луче́й со́лнечных,/ и си́и путево́дствуют доны́не/ к ти́хому приста́нищу Ца́рствия Христо́ва// обурева́емых в бе́зднах мо́ря жите́йскаго.

И́на стихи́ра свята́го (на обре́тение моще́й), глас 5:

Не восхоте́л еси́, о́тче преподо́бне,/ возыме́ти гра́да зде пребыва́ющаго,/ но гряду́щаго усе́рдно взыска́л еси́,/ те́мже, от ю́ности Бо́жиею Ма́терию наставля́емь,/ в О́птинский скит, Небесе́м на земли́ подо́бный, прише́л еси́,/ иде́же посто́м и моли́твою воскриля́емь,/ Бо́га, спаса́ющаго тя, обре́л еси́,/ Его́же моли́, преди́вне Ио́сифе,// да спасе́т ду́ши на́ша.

Сла́ва, глас 4:

Не во дни дре́вния,/ но в сия́ дни после́дния,/ со стра́хом Бо́жиим соверша́л еси́ жи́тельство твое́,/ преподо́бне о́тче наш Ио́сифе,/ во благоче́стии и пра́вде Бо́жией/ ду́ши ве́рных пла́менно и ре́вностно утвержда́я,/ духо́вными сове́ты обогаща́я/ и чудесы́ преди́вными удивля́я./ Ны́не же, в Небе́сных оби́телех водворя́яся,/ моли́ся Христу́ Бо́гу,/ я́ко да низпо́слет душа́м на́шим// мир и ве́лию ми́лость.

И ны́не, пра́здника, или́ Богоро́дичен, глас то́йже:

Гла́сом благодаре́ния в боле́зни к Бо́гу воззва́в,/ глас Твой сла́дкий, Влады́чице, услы́ша Ио́сиф,/ и ны́не с Тобо́ю глас возвыша́ет ко Спа́су,// е́же улучи́ти нам дар всыновле́ния.

На стихо́вне стихи́ры, глас 4.

Подо́бен: Я́ко до́бля в му́ченицех:

Богоно́сне о́тче Ио́сифе,/ сосу́д благода́ти Ду́ха Свята́го/ от младе́нчества показа́лся еси́,/ па́че же по успе́нии твое́м то́чиши то́ки целе́бныя,/ власть бо и́маши на ду́хи нечи́стыя,/ от челове́ков тех отгоня́я./ Изба́ви и нас сих мучи́тельства,/ умоля́я Го́спода,// да благоутро́бием Свои́м спасе́т ду́ши на́ша.

Стих: Честна́ пред Го́сподем// смерть преподо́бных Его́.

Свя́те ста́рче Ио́сифе,/ от ю́ности твоея́ на ра́мо крест воспри́им,/ Амвро́сием святы́м направля́емь,/ Христу́ после́довал еси́,/ вся́кия же доброде́тели испо́лнь,/ до́брый о́браз и́ноком яви́лся еси́./ Те́мже по исхо́де твое́м от сего́ жития́/ низво́диши от Го́спода то́ки чуде́с ве́рою прося́щим,/ Тому́ моли́ся, усе́рдно мо́лим тя,// да благоутро́бием Свои́м спасе́т ду́ши на́ша.

Стих: Блаже́н муж, боя́йся Го́спода,// в за́поведех Его́ восхо́щет зело́.

Преподо́бне о́тче Ио́сифе,/ изде́тска вожделе́л еси́ прилепи́тися Бо́гови,/ вмени́в же во уме́ты вся кра́сная ми́ра сего́,/ вседу́шне пресели́лся еси́ в пу́стынь О́птинскую,/ иде́же надо́лзе в терпе́нии потруди́вся,/ ра́йскаго приста́нища дости́гл еси́./ Сего́ ра́ди мо́лим тя:/ умоли́ Христа́ Бо́га,// да благоутро́бием Свои́м спасе́т ду́ши на́ша.

Сла́ва, глас 8:

О́трасль благопло́дная виногра́да О́птинскаго,/ Ио́сифе приснопа́мятне,/ вино́ духо́вное от а́ввы Амвро́сия прия́л еси́/ и, сердца́ ве́рных напои́в,/ омраче́нная печа́льми жите́йскими,/ боже́ственное ра́дование дарова́л еси́./ Ны́не же в па́мяти твое́й/ весе́лие че́рплюще, мо́лим тя:/ помози́ нам го́рькия страсте́й рабо́ты изба́витися// и вкуси́ти сла́дости Небе́сныя.

И ны́не, пра́здника, или́ Богоро́дичен, глас то́йже.

Тропа́рь, глас 2:

Послужи́в ста́рцу твоему́ преусе́рдно,/ дарова́нии духо́вными оби́льно испо́лнился еси́/ и, я́ко свети́льник верху́ горы́ укры́тися не могу́щий,/ благообра́зне Ио́сифе преподо́бне,/ мона́шествующим и мирски́м наста́вник до́брый и предста́тель те́плый яви́лся еси́,/ те́мже моли́ Человеколю́бца Христа́ и Засту́пницу Усе́рдную,// спасти́ся душа́м на́шим.

Ин тропа́рь (на обре́тение), глас 3:

Я́ко к боже́ственней ча́ши утеше́ния,/ к ра́це моще́й твои́х притека́ем, о́тче Ио́сифе,/ ты бо, насле́довав благода́ть вели́каго ста́рца,/ напои́л еси́ то́ю оби́льно сосло́вия и́ноческая,/ избра́нниче возлю́бленный Бо́жия Ма́тере,/ те́мже с Не́ю моли́ся Христу́/ оби́тели твое́й дарова́ти утвержде́ние// и душа́м на́шим ве́лию ми́лость.

На у́трени

По 1-м стихосло́вии седа́лен, глас 3:

Послушли́ваго Ио́сифа, ве́рнии, в пе́снех почти́м, благопокорли́ва отцу́ своему́ Амвро́сию да́же до сме́рти, сей бо, благода́ть ста́рчества улучи́в и ку́плю духо́вную сотвори́в, тала́нт преумно́жи, ны́не же в раи́ сла́дости вку́пе с ним водворя́ется. Сего́ ра́ди с ра́достию вопие́м: моли́теся, всечестни́и отцы́, грехо́в оставле́ние дарова́ти любо́вию пра́зднующим святу́ю па́мять ва́шу.

Сла́ва, и ны́не, пра́здника, или́ Богоро́дичен:

К Тебе́, Богоро́дице, прибега́ем с любо́вию и мо́лимся: Твои́м хода́тайством, Влады́чице, и моли́твами Твоего́ уго́дника, Ио́сифа преподо́бнаго, ми́лостива сотвори́ нам Сы́на Твоего́ и Бо́га на́шего, да безпреткнове́нно пре́йдем путь жития́ на́шего, вы́ну сла́вяще Твое́ благоутро́бие, Всепе́тая.

По 2-м стихосло́вии седа́лен, глас 2:

Ве́ры грозд боже́ственным де́ланием возрасти́ преподо́бный Ио́сиф и, в точи́лех послуша́ния положи́в, изгнете́ боле́зньми поще́ния, и, ча́шу испо́лнив духо́внаго умиле́ния, ны́не весели́т сердца́ ве́рных, притека́ющих к ра́це моще́й его́, исцеле́ния подая́ незави́стно.

Сла́ва, и ны́не, пра́здника, или́ Богоро́дичен:

Я́ко невозде́ланная, Де́во, Лоза́, красне́йший Гро́зд прозябла́ еси́, источа́ющий нам вино́ спасе́ния, всех веселя́щее ду́ши и телеса́. Те́мже, я́ко до́брых Глави́зну, блажа́ще Тя при́сно, со А́нгелом вопие́м Ти: ра́дуйся, Благода́тная.

По полиеле́и седа́лен, глас 3:

Я́ко дар освяще́н, от недр земны́х восприе́млем честны́я мо́щи твоя́, свя́те Ио́сифе, су́щею бо на тебе́ благода́тию, я́ко ми́лотию Илии́ Елиссе́й, от страсте́й подае́ши избавле́ние всем, приходя́щим к ра́це моще́й твои́х, и душа́м на́шим ве́лию ми́лость.

Сла́ва, и ны́не, пра́здника или́ Богоро́дичен:

Умоле́на бу́ди, Богоро́дице Цари́це, мольба́ми Твоего́ уго́дника Ио́сифа, Тя всегда́ моля́ща, я́ко Засту́пницу ми́ра Усе́рдную, ста́до Твое́ сохрани́ти от вся́каго наве́та вра́жия.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Благода́ть излия́ся/ во благочести́вых устна́х твои́х,/ преподо́бне о́тче Ио́сифе,/ е́юже бога́тно напои́л еси́/ обурева́емых и недоумева́ющихся,/ и́же за по́мощию к тебе́ притека́ху,/ си́лою же Бо́жиею, та́йны серде́ц их прозрева́я,/ пра́ведности пу́ти им открыва́л еси́,/ во е́же те́ми пра́во ше́ствовати,/ Милосе́рдый бо Христо́с Госпо́дь/ власть тебе́ дарова́,/ слове́сныя о́вцы ста́да Своего́ путеводи́ти// в Ца́рство Небе́сное.

Или́ сия́ стихи́ра (на обре́тение моще́й), глас 6:

Днесь пра́зднество вели́кое в О́птиной пу́стыни,/ я́ко обрето́шася святы́я мо́щи/ Ио́сифа послушли́ваго,/ и́же, упра́вив житие́ богоуго́дне,/ сия́ я́ко ча́шу злату́ю показа́,/ источа́ющу нам дарова́ний многоразли́чных мно́жества/ и благоуха́ние испуща́ющу неизрече́нное./ Те́мже вси, ра́достно лику́юще,/ Христа́ возвели́чим,/ просла́вльшаго Своего́ уго́дника,// есть бо таи́нник Бо́жия благода́ти.

Кано́н пра́здника, и свята́го кано́н, глас 5, его́же краегране́сие: Ча́шу нерастворенносла́дкаго вина́ пою́.

Песнь 1.

Ирмо́с: Пешеше́ствуяй Изра́иль непроходи́мую стезю́/ повеле́нием Влады́чним,/ ра́дуяся поя́ше:// Го́сподеви пои́м, сла́вно бо просла́вися.

Чисти́тельный, Сло́ве, смысл пода́ждь песнопою́щим му́драго ста́рца О́птинскаго, и́же сло́вом наста́ви ру́сския лю́ди, немо́кренно проходи́ти мо́ре жите́йское.

Амвро́сиев сын да похва́лится днесь, О́птинскаго ста́рчества вели́кий прее́мник, и́же послуша́ния по́двигом главу́ дре́вняго зми́я отсече́, те́мже и просла́вися.

Ше́ствуя стезе́ю дре́вних отце́в, воспита́вся млеко́м святооте́ческаго мудрова́ния и сла́дкий послуша́ния хлеб вкуси́в, в ме́ру отца́ твоего́ дости́гл еси́, преподо́бне, те́мже и просла́вися.

Богоро́дичен: Утро́ба Твоя́, Де́во, роди́ Высоча́йший Свет, вся́каго челове́ка просвеща́ющий и облиста́вший ад и го́рний яви́вший рай, Бо́га же и Челове́ка.

Песнь 3.

Ирмо́с: На ка́мени за́поведей Твои́х коле́блющагося мя утверди́,/ вознеси́ рог мой в ра́зуме повеле́ний Твои́х,/ да хваля́ся вопию́ Тебе́:// несть свят па́че Тебе́, Го́споди Сил.

Нра́вом ти́хий и послушли́вый, благообра́зен же лице́м и ду́хом мудр, в пе́снех да воспое́тся ста́рец О́птинский Ио́сиф, от си́лы возше́дый в си́лу и кра́йняго дости́гнувый соверше́ния.

Ева́нгельское любому́дрие твою́ всечестну́ю украси́ главу́, послушли́вая же душа́ твоя́ удиви́ чинонача́лия А́нгельская: я́ко скор был еси́ на слы́шание, ко́сен же на гнев, и светосия́нен, о́тче, в моли́тве.

Раче́ние к раче́нию прилага́я, преподо́бне, своея́ отве́рглся еси́ во́ли коне́чне и, води́мый ста́рцем твои́м, восте́кл еси́ на ле́ствицу доброде́телей, вопия́: сла́ва Тебе́, Всеблага́я Влады́чице, Госпоже́ всея́ тва́ри!

Богоро́дичен: А́ще и пове́ржен бысть на одре́ боле́зненнем и к сме́рти прибли́жися, о́тче, твоя́ душа́, моли́твы не оста́вил еси́ к Богоро́дице, Я́же яви́ся тебе́ и возста́ви со одра́. Ты же вопия́л еси́: несть свя́т па́че Тебе́, Госпоже́ всея́ тва́ри.

Конда́к и и́кос пра́здника.

Седа́лен свята́го, глас 4.

Подо́бен: Удиви́ся Ио́сиф:

На вода́х воздержа́ния воспита́вся, преподо́бне,/ в ладии́ же послуша́ния к приста́нищу безстра́стия дости́гл еси́,/ я́ко мудр купе́ц, вся оста́вив,/ би́сер ева́нгельский обре́л еси́,/ те́мже и венце́м неувяда́емым увяза́ет тя Христо́с/ и прие́млет моли́твы твоя́,/ в ни́хже помина́й любо́вию тя сла́вящих и зову́щих:/ ра́дуйся, Ио́сифе, богому́дрый ста́рче.

Сла́ва, и ны́не, пра́здника, или́ Богоро́дичен:

Удиви́ся Ио́сиф, е́же па́че естества́ зря,/ и внима́ше мы́слию и́же на руно́ дождь,/ в безсе́менном зача́тии Твое́м, Богоро́дице,/ купину́ огне́м неопали́мую,/ жезл Ааро́нов прозя́бший;/ и свиде́тельствуя обру́чник Твой и храни́тель,/ свяще́нником взыва́ше:/ Де́ва ражда́ет,/ и по рождестве́ па́ки Де́ва пребыва́ет.

Песнь 4.

Ирмо́с: Услы́шах, Го́споди,/ слух Твой, и убоя́хся,/ разуме́х смотре́ние Твое́,// и просла́вих Тя, Еди́не Человеколю́бче.

Смире́нием оде́явся, богоно́се, и све́тлыя стези́ послуша́ния избра́в, страсте́й треволне́ния уклони́лся еси́ и тишины́ а́нгельския сподо́бился еси́.

Тве́рдый по́мысл стяжа́в, о́тче, и небоя́знен, непрекло́нен быв взыгра́нию страсте́й, духово́м нечи́стым повелева́ти возмо́гл еси́.

Ве́рен во всем ста́рцу Амвро́сию быв, того́ оте́ческия любве́ наслади́тися сподо́бился еси́, е́юже преиспо́лнився, богоблаже́нне, гре́еши ны́не и пита́еши ча́да твоя́.

Богоро́дичен: О́трок еще́ сый, присноблаже́нне Ио́сифе, младе́нческих уклони́лся еси́ игра́ний и, Цари́цы Небе́сныя посеще́ния сподо́бився, избра́нник яви́лся еси́ Тоя́ и служи́тель.

Песнь 5.

Ирмо́с: Одея́йся све́том я́ко ри́зою,/ к Тебе́ у́тренюю, и Тебе́ зову́:/ ду́шу мою́ просвети́ омраче́нную, Христе́,// я́ко Еди́н Благоутро́бен.

Радостотво́рный твой лик и богому́драя словеса́ твоя́ нощь потреби́ша мно́гих скорбе́й, и благожела́тельное твое́, преподо́бне, обхожде́ние заблу́ждшия возведе́ ко стезя́м доброде́тели.

Ева́нгельская лоза́, вино́ умиле́ния иска́пающая, богора́дованное житие́ твое́ яви́ся, о́тче, потребля́ющее те́рпкое страсте́й и ду́ши веселя́щее благода́тию.

Но́вое вино́ влив в сосу́д души́ твоея́, е́же поче́рпл еси́ от исто́чника прему́дрости ста́рческия, богому́дре о́тче Ио́сифе, тем и церко́вная составле́ния напои́л еси́.

Богоро́дичен: На одре́ боле́зни по́двиг показу́ет Ио́сиф богоблаже́нный, песнь хвале́бную Ма́тери Све́та при́сно вознося́, те́мже и посеще́ния от Нея́ сподо́блен быва́ет и свиде́тельствуется, я́ко избра́нник Пречи́стыя.

Песнь 6.

Ирмо́с: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́,/ и от тли возведи́ мя,// я́ко Благоутро́бен.

О́птинский кла́дязь отве́рзеся, вода́ благода́ти быстрообра́зно потече́, и весели́т собра́ния пра́зднующих, подая́ исцеле́ния да́ры.

Стори́чный плод принесе́ твоя́, Ио́сифе, ни́ва, богому́дро тебе́ возде́лавшу зе́млю души́ своея́, те́мже, над страстьми́ воцари́вся, хле́бом богове́дения пита́еши чад твои́х.

Лука́вый змий умертви́ся твои́ми моли́твами, нощь же разсе́яся мно́гих скорбе́й, и, я́ко со́лнце, тече́т, о́тче Ио́сифе, твоя́ изрядноско́рая по́мощь.

Богоро́дичен: Амвро́сию богому́дрому я́ко хле́бов Спори́тельница, Ио́сифу же я́ко Цели́тельница яви́лася еси́, Богоро́дице, те́мже, обою́ хода́тайству вне́млющи, сугу́бую благода́ть нам пода́ждь.

Конда́к свята́го, глас 3.

Подо́бен: Красоте́ де́вства:

Кро́тостию и незло́бием украси́вся/ и целому́дрием в ле́поту оде́явся,/ тьму страсте́й прогна́л еси́,/ светолу́чныя же испуща́я, о́тче, моли́твы,/ яви́лся еси́ ста́рчества О́птинскаго похвала́ и изря́ден наста́вник мона́хов,/ те́мже вси зове́м ти:// ра́дуйся, богоно́се ста́рче Ио́сифе.

И́кос:

Со́лнцу заше́дшу, быва́ет нощь и тьма по всей земли́, оба́че не та́ко бысть, егда́ за́йде во гроб богому́дрый ста́рец Амвро́сий: сей бо вои́стину яви́ся со́лнце богосве́тлое О́птины пу́стыни и сы́на своего́ оста́ви на тве́рди церко́вней, я́ко преди́вное свети́ло, и́же моли́твенными блиста́ет луча́ми и изсуша́ет страсте́й му́тныя ре́ки, утвержда́ет Ша́мординскую оби́тель и О́птину озаря́ет пу́стынь. Те́мже с ра́достию вси, приходя́ще к ра́це моще́й его́, воззове́м: ра́дуйся, богоно́се ста́рче Ио́сифе.

Песнь 7.

Ирмо́с: Огня́ гаси́лище отроко́в моли́тва,/ ороша́ющая пещь пропове́дница чудесе́,/ не опаля́ющи, ниже́ сожига́ющи// песносло́вцы Бо́га оте́ц на́ших.

Досто́йный учени́к был еси́ твоего́ ста́рца, о́тче Ио́сифе, бога́тство дарова́ний, я́коже ми́лоть Илиину́, насле́довав, те́мже мно́гая твоя́ чудеса́, блаже́нне, просла́виша Бо́га оте́ц на́ших.

К ра́це моще́й твои́х приходя́щим источи́, о́тче Ио́сифе, духо́вное питие́, остужа́я пла́мень страсте́й, ду́ши же напая́я благода́тию, е́же сла́вити Бо́га оте́ц на́ших.

Амвро́сия ста́рца ве́рный учениче́ и после́дователю, пе́рвый во обре́тении моще́й показа́лся еси́, Ио́сифе, вседарови́тую благода́ть ча́дом твои́м пода́в, е́же песносло́вити Бо́га оте́ц на́ших.

Богоро́дичен: Глаго́л Твой сла́дкий, Де́во, ста́рца Ио́сифа укрепи́ на одре́ боле́зненнем, я́ко рекла́ еси́, Богороди́тельнице: потерпи́, люби́миче Мой, еще́ венцы́ соплету́ тебе́ во Ца́рствии Сы́на Моего́ и Бо́га.

Песнь 8.

Ирмо́с: От Отца́ рожде́ннаго пре́жде век/ Бо́га Сло́ва,/ по́йте, свяще́нницы,// лю́дие, превозноси́те во вся ве́ки.

От ста́рца рожде́нием духо́вным произше́дшаго, сы́на послушли́ваго, Ио́сифа боголюби́ваго, лю́дие, превозноси́те во вся ве́ки.

Вообрази́ся в тебе́ дух ста́рца твоего́, и чудесы́ украси́лся еси́, о́тче Ио́сифе, те́мже сугу́бое почита́ние воздаю́т тебе́ лю́дие во вся ве́ки.

Иде́же почива́ет многоцеле́бное те́ло твое́, ту благода́ть струя́ми то́чится и почерпа́ют исцеле́ния лю́дие, с ве́рою к тебе́ приступа́юще.

Богоро́дичен: На Ма́терь Бо́жию вознаде́явся, преподо́бне, во упова́нии твое́м неколеби́мь пребы́л еси́, я́ко гора́, преподо́бне, и я́ве предста́ тебе́ Всенепоро́чная и уте́ши тя.

Песнь 9.

Ирмо́с: Я́ко сотвори́ Тебе́ вели́чия Си́льный,/ Де́ву явль Тя чи́сту по рождестве́,/ я́ко ро́ждшую без се́мене Своего́ Творца́,// тем Тя, Богоро́дице, велича́ем.

Амвро́сиеву сла́ву стяжа́в, богоно́се, в ме́ру своего́ учи́теля, по сло́ву Госпо́дню, дости́гл еси́, те́мже и чудоде́йствуеши пресла́вная зна́мения и исцеля́еши ко гро́бу твоему́ притека́ющих.

Пшеницода́вец нов яви́лся еси́, Ио́сифе, богоглаго́ливыми уче́нии твои́ми и́нокини Ша́мординския пита́я и ма́нною слове́с твои́х ве́рных сердца́ оживля́я, те́мже тя вси велича́ем.

О́птину пу́стынь украси́л еси́ ра́кою моще́й твои́х, пе́рвым возсия́в из-под спу́да, ны́не же при́сно све́тиши, преподо́бне, на Небеси́ церко́внем, све́тлость подая́ душа́м, тя велича́ющим.

Богоро́дичен: Ю́же возлюби́л еси́, преподо́бне, Де́ву Богоро́дицу и твои́ма очи́ма зрел еси́, еще́ сый на земли́, Тоя́ ны́не сладча́йшаго насыща́ешися лицезре́ния. Моли́ Сию́, богоблаже́нне, спасти́ тя велича́ющия.

Свети́лен.

Подо́бен: Жены́, услы́шите:

О преподо́бне о́тче Ио́сифе, ты еси́ вои́стину звезда́, све́тло сия́ющая, освеща́еши бо зе́млю Ру́сскую све́том чуде́с и Боже́ственныя по́мощи. Сего́ ра́ди, честну́ю па́мять твою́ ны́не ве́рою пра́зднующе и ра́достию серде́чною веселя́щеся, велича́ем Христа́ Бо́га на́шего.

Сла́ва, и ны́не, пра́здника, или́ Богоро́дичен, глас то́йже:

О Де́во Пречи́стая, Всепе́тая Ма́ти! Моли́ся о нас Сы́ну Твоему́, Христу́ Бо́гу на́шему с преподо́бным Ио́сифом, ста́рцем О́птинским, его́же от ма́лых лет избра́ла еси́, ему́же мно́гажды явля́лася еси́ и, в боле́зни су́щу, исцеле́ние подала́ еси́.

На хвали́тех стихи́ры пра́здника, и свята́го, глас 1:

Ио́сифе прехва́льне,/ днесь наста́ светоно́сная па́мять твоя́,/ озаря́ющи всех приходя́щих,/ сердца́ облагоуха́ющи ми́ром смире́ния и послуша́ния,/ сие́ бо испра́вил еси́ со вся́ким раче́нием/ и яви́лся еси́ Го́рняго Ца́рствия все́льник/ и моли́твенник непреста́нный// о ве́рою и любо́вию чту́щих тя.

Ио́сифе преблаже́нне,/ Ма́тере Све́та люби́миче изря́дный,/ во́лю Сы́на Ея́ со вся́ким раче́нием испо́лнивый,/ ны́не в со́нме святы́х всели́лся еси́/ и О́тчаго благоволе́ния сподо́бился еси́,/ те́мже и благода́ть Свята́го Ду́ха// почи́ла есть на моще́х твои́х.

Ио́сифе богому́дре,/ О́тчим хоте́нием из-под спу́да пе́рвее возсия́л еси́,/ николи́же бо ста́рца своего́ преслу́шався,/ и по сме́рти послуша́ние тому́ показа́л еси́,/ да уве́дят вси, я́ко учени́к прихо́дит в ме́ру учи́теля./ Те́мже, припада́юще к ра́це моще́й твои́х,/ сугу́бую благода́ть у тебе́ про́сим,/ е́же вся благопотре́бная дарова́ти нам// и ве́лию ми́лость.

Сла́ва, глас 5:

Возлю́бленное ча́до Бо́жия Ма́тере,/ блаже́нне о́тче наш Ио́сифе,/ я́ко учени́к благопослу́шный,/ преподо́бнаго Амвро́сия равноче́стно сла́ву раздели́в,/ му́дрость ста́рческую в полноте́ восприя́л еси́/ и, вино́м богове́дения ве́рных напои́в,/ цвет неувяда́емый вертогра́да О́птинскаго яви́лся еси́./ Христа́ Бо́га моли́ о нас, мо́лимся,// дарова́ти душа́м на́шим мир и ве́лию ми́лость.

И ны́не, пра́здника, или́ Богоро́дичен, глас то́йже:

Благослове́нная Влады́чице,/ дарова́вшая не́когда ми́лость Твою́/ преподо́бному Ио́сифу,/ преди́вному ста́рцу О́птинскому,/ просвети́ све́том Сы́на Твоего́/ живу́щия во оби́тели Твое́й/ и не лиши́ Своего́ милосе́рдия// при́сно Тя блажа́щия.

На Литурги́и слу́жба пра́здника, и свята́го.

Кано́н моле́бный, глас 2.

Песнь 1.

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре, и наста́вльшему лю́ди,/ я́же изведе́ из рабо́ты еги́петския,// я́ко просла́вися.

Тебе́ о твои́х даре́х долг принося́ще, преблаже́нне Ио́сифе, и твоему́ житию́ плету́ще похва́льный вене́ц, благода́тная воздая́ния улучи́ти жела́ем, твои́ми, пребога́те, святы́ми моли́твами.

Ста́рца вели́каго Амвро́сия ча́до люби́мое яви́лся еси́, той бо на тя с наде́ждею взира́ше, не посрами́ и на́ша ча́яния, о́тче Ио́сифе, с любо́вию притека́ющих к тебе́ и прося́щих ми́лости.

Повину́лся еси́ вседу́шно духо́вному отцу́ твоему́, и Боже́ственный почи́ на тебе́ Святы́й Дух, блаже́нне Ио́сифе, Его́же де́йствием пресве́тло украси́лся еси́, кра́йняго ра́ди твоего́ послуша́ния.

Богоро́дичен: Исто́чник безстра́стия ро́ждшая, уя́звленнаго мя страстьми́ исцели́, Отрокови́це, и ве́чнаго огня́ исхити́, Еди́на Богоблагода́тная.

Песнь 3.

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́// в сердца́ нас пою́щих Тя.

От де́тства к Бо́гу любо́вию взят, Ма́терию Бо́жиею наставля́емь я́ве и та́йно, ангелоподо́бно житие́ на земли́ показа́л еси́ и лику́еши ны́не с Небе́сными Си́лами.

Тьмы лука́вых духо́в мимоте́кл еси́, любо́вию наставля́емь, о́тче Ио́сифе, да Све́та Непристу́пнаго яви́шися прича́стник, те́мже у тебе́ по́мощи про́сим.

Наказу́яй сы́на своего́ наслади́тся о нем и посреде́ зна́емых о нем похва́лится, те́мже посреде́ святы́х весели́теся ны́не, от Бо́га познава́еми и от всех восхваля́еми, Амвро́сие му́дре и Ио́сифе сла́вне.

Богоро́дичен: Мари́е, злата́я Кади́льнице, страсте́й мои́х смрад отжени́ и утверди́ мя, Чи́стая, коле́блемаго прило́ги вра́жии.

Песнь 4.

Ирмо́с: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́ заблу́ждшаго./ Тем мно́гое Твое́ снизхожде́ние, е́же на мя,// прославля́ю, Многоми́лостиве.

Тя мо́лим и к тебе́ усе́рдно прибега́ем, о́тче Ио́сифе, я́ко подража́телю Па́стыря овца́м Превели́каго, от высо́т свяще́нных ны́не призира́я, упаси́ ча́да твоя́.

От младе́нства позна́лся еси́ Бо́гу и к мона́шескому де́ланию приступи́л еси́, я́ко отроча́, те́мже и вшел еси́, блаже́нне Ио́сифе, в Ца́рство Небе́сное, ра́дуяся.

У́мре оте́ц его́, и а́ки не у́мре, глаго́лет прему́дрый, подо́бна бо себе́ оста́ви по себе́, те́мже благодаря́т о тебе́ Бо́га мона́хов мно́жества и оби́тель Ша́мординская.

Богоро́дичен: Ра́дость Тебе́, Де́во, пра́отцев се́тование разреша́ющую, Гаврии́л, свяще́нный Арха́нгел, благовествова́ше, с Небесе́ слете́в, Чи́стая Богоневе́сто.

Песнь 5.

Ирмо́с: Све́та Пода́телю, и веко́в Тво́рче, Го́споди,/ во све́те Твои́х повеле́ний наста́ви нас,// ра́зве бо Тебе́ ино́го бо́га не зна́ем.

Добротолю́бия стяжа́телю и добро́ты и́стинныя таи́нниче, Боже́ственное и́мя, е́же па́че вся́каго и́мене, призыва́л еси́ непреста́нно, о́тче, наказу́я, наставля́я и уча́ терпе́нию Госпо́дню.

Не от челове́к прия́л еси́ хвалу́, но и́стинную сла́ву избра́л еси́, о́тче, Крест Царя́ Христа́ при́сно нося́, почита́я в челове́цех о́браз Госпо́день, даю́щаго смире́нным Свои́м благода́ть.

Зело́ ми́лостива и нищелюби́ва показа́ тя Спас наш ми́ру, о́тче, и врача́ боля́щим, Ио́сифе, и засту́пника оби́димым, в ми́лости бо никому́же когда́ отказа́л еси́.

Богоро́дичен: Разуме́в Тя издале́ча, Де́во, Бо́га нося́щую на руку́ Твое́ю, Иса́иа нам предвозвести́: ра́зве бо Сы́на Твоего́ ино́го бо́га не ве́мы.

Песнь 6.

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:// от тли, Бо́же, мя возведи́.

Я́ко крин благово́нный, та́инственно от недр земны́х, изда́шася честны́я мо́щи твоя́, преблаже́нне Ио́сифе, благослове́ние вели́каго а́ввы и твое́ подава́юще и веселя́ще чуде́с заре́ю духо́вная ча́да.

Не ну́ждею, но любо́вию, свы́ше насажде́нною в се́рдце твое́, после́довал еси́ вели́кому Амвро́сию, и тобо́ю напая́еми есмы́ вино́м любве́ Боже́ственныя.

Обоня́ют ны́не несумне́нно притека́ющии к тебе́ благоуха́ние тишины́ Небе́сныя, ю́же источа́ет ра́ка моще́й твои́х, и оби́тель О́птинская ублажа́ет тя, Ио́сифе приснопа́мятне.

Богоро́дичен: От всех родо́в Творе́ц избра́ Тебе́, Всенепоро́чная, добро́ту Иа́ковлю, Ю́же возлюби́ и, из Тебе́ возсия́в, яви́ся.

Конда́к, глас 3:

Мир сия́нием озаря́еши,/ о́тче наш Ио́сифе блаже́нне,/ не́мощь бо естества́ препобеди́в,/ Ду́ха Свята́го сосу́д соде́лался еси́/ и, по́двиг ста́рчества восприи́м,/ му́дрый наста́вник ве́рным был еси́./ Ны́не, пребыва́я при́сно со святы́ми,// испроси́ нам ве́лию ми́лость.

И́кос:

Испо́лньшимся времено́м, призва́ тя Госпо́дь чреду́ ста́рчества возгла́вити и поста́ви, я́ко свещу́ на све́щнице, да озаря́еши богоразу́мия све́том вся недоуме́нныя, притека́ющия к тебе́, преподо́бне о́тче наш Ио́сифе, избра́нный собесе́дниче Пренепоро́чныя, насе́льниче черто́гов го́рних, иде́же ли́цы святы́х непреста́нно славосло́вят Творца́ вся́ческих, Того́ моли́, да пода́ст нам ве́лию ми́лость.

Песнь 7.

Ирмо́с: О́бразу злато́му на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния:/ посреде́ же огня́ вве́ржени, ороша́еми поя́ху:// благослове́н еси́, Бо́же оте́ц на́ших.

Целому́дрием и смире́нием, о́тче преподо́бне, возвыша́емь, плотски́я прило́ги мужему́дренно отгоня́л еси́, те́мже и дара́ми духо́вными Христо́с Бог тя обогати́, сего́ ра́ди и вене́ц неувяда́емый прия́л еси́, Ио́сифе преди́вне.

Благоче́стие и преподо́бие, и любы́ и́стинная к Бо́гу и бли́жнему, из твоея́ души́ излива́хуся, о́тче Ио́сифе, явля́юще в тебе́ чу́дное де́йство Ду́ха Свята́го.

Дух разсужде́ния отца́ твоего́ в тебе́ показа́ Госпо́дь, преподо́бне Ио́сифе, ре́ки бо воды́ живы́я истеко́ша от чре́ва твоего́, си́лою но́вою напая́юще жа́ждущия жи́зни ве́чныя.

Богоро́дичен: Зако́на и проро́ков исполне́ние, Отрокови́це, Гаврии́л Тя показу́я, вопия́ше: се ражда́еши, Еди́на Всепе́тая, Пребоже́ственнаго Творца́ тва́ри и Го́спода Сла́вы.

Песнь 8.

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:// благослови́те, вся дела́ Госпо́дня, Го́спода.

Смире́нием укроща́л еси́ бу́йная сердца́ и отча́янныя сло́вом укрепля́л еси́, о́тче, ско́рби, не́мощи и боле́зни чад твои́х се́рдцем восприи́м, сего́ ра́ди, любо́вию привлача́еми, мо́лимся: поми́луй, утверди́ и просвети́ ду́ши на́ша.

Нра́вом твои́м благи́м после́дствующе, нему́дрии, о́тче, умудри́шася и гре́шнии прилепи́шася пра́вде Бо́жией, те́мже ко гро́бу твоему́ прибега́юще, я́ко к целе́бному исто́чнику припа́даем.

Ми́лованием мно́гим ни́щим быв бога́тство и врач, исцеля́яй я́звы и неду́ги вся́ческия, сего́ ра́ди ве́рою к тебе́, Ио́сифе, влече́мся, гла́дом ги́блющии духо́вным и немощьми́ плотски́ми обдержи́ми.

Крест тя́жкий поне́сл еси́ на ра́ме твое́м устрое́ния ю́ныя оби́тели Ша́мординския, но вся препобеди́л еси́ терпе́нием и любо́вию, и́стинный оте́ц сирота́м нарече́нный, Ма́тере Бо́жия ве́рный послу́шниче.

Богоро́дичен: Рай жи́зни су́щи, Богоро́дице, изба́ви мя вско́ре, Ма́ти Де́во, скорбе́й многообра́зных и сме́рти грехо́вныя моли́твами уго́дника Твоего́ Ио́сифа.

Песнь 9.

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,// ве́рнии единому́дренно пе́сньми велича́ем.

Па́мять пра́ведных с похвала́ми почти́м, сим бо венцы́ благоле́пны Христо́с возложи́, Льву богому́дрому, Мака́рию блаже́нному, Амвро́сию препросла́вленному, Ио́сифу благопослу́шному и преподо́бным ины́м, дея́нии просия́вшим и виде́ния сподо́бльшимся.

Возвели́чил еси́, Го́споди, уго́дника Твоего́ Ио́сифа, я́ко столп огнетворя́щий, и наста́вника любоче́стна яви́л еси́ нам. Мы же со стра́хом мо́лим того́: о́тче преподо́бне, сподо́би ны до́бре преити́ лет на́ших обхожде́ние.

Ве́яние тишины́ Небе́сныя, духо́вное прохлажде́ние и мир бога́тый подае́т от Бо́га, я́ко уго́дник Его́ и наш оте́ц, и напая́ет нас вино́м боже́ственнаго смы́сла преподо́бный Ио́сиф приснопа́мятный.

Богоро́дичен: Его́же родила́ еси́, Сло́во па́че сло́ва, Богороди́тельнице Чи́стая, Того́ моли́ при́сно о чту́щих Тя и Богоро́дицу вои́стину Тя имену́ющих.

Моли́тва

О преподо́бне о́тче Ио́сифе, ста́рче О́птинский, ча́до возлю́бленное вели́каго ста́рца Амвро́сия! Ты, от ю́ности Христа́ возлюби́в, да́же до сме́рти ве́рен Тому́ пребы́л еси́ и избра́нник возлю́блен Пречи́стыя Богоро́дицы яви́лся еси́. Ели́цы же не́когда лик твой благода́тный ви́деша, весе́лия Небе́снаго вы́ну исполня́хуся, та́ко и мы, о́тче, днесь к честны́м твои́м моще́м (или́: к твоему́ свято́му о́бразу) припа́дающе, мо́лим тя: изба́ви нас от го́речи грехо́вныя, е́юже нас сопроти́вник напои́, помози́ нам немощны́м, до́лу пони́кшим, не земна́я то́кмо и тле́нная зре́ти, но душе́ю живо́ю к житию́ ве́чному устремля́тися, грехо́в осужде́ния и злопомне́ния изба́витися, за́висти и гне́ву не предава́тися, да тиша́йшее дыха́ние благода́ти серде́ц на́ших ко́снется. Ей, о́тче, ты дар сове́та и блага́го разсужде́ния стяжа́л еси́, наста́ви и нас жизнь свою́ по во́ли Бо́жией устроя́ти. И та́ко, тобо́ю окормля́еми, пра́во по́йдем путе́м спаси́тельным и дости́гнем Ца́рствия Небе́снаго, иде́же вку́пе со все́ми святы́ми сподо́бимся прославля́ти Пресвяту́ю Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.

Источник: Текст утвержден Священным Синодом Русской Православной Церкви 17 июля 2020 года (журнал № 34)

13 мая. Служба святому мученику Александру Римскому

Творение митрополита Никодима

Вечер

Стихословим Блажен муж: 1-й антифон.

На Господи воззвах: стихиры святаго на 6, глас 2.

Подобен: Киими похвальными:

Приидите вси боголюбивии людие, / от востока и запада, севера и юга, / любовию Христовою совокупльшеся, / вернаго воина Христова Александра песньми духовными достохвальне воспоим, / егоже страданиями Церковь Христова, / яко багряницею Царскою, кровию его украсися, / Агнца Божия, смерти и ада Низложителя, / всему роду человечу возвещает, / да познаем животворящую силу любве Его, / еюже во единомыслии веры утвердимся, / основание Церкве Христовы благочестно созидающе.

Ангеле земный и человече небесный, / боголюбивый воине Александре, / сподвижниче Христов и святыя Церкве Его предивный состроителю, / како воспоем подвиги честных страданий твоих: / четверочастно бо на колех растерзаем / и ногтьми железными по телу стружен, / яко адамант твердейший / силою веры всяку лесть идольскую попрал еси; / благочестие веры евангельския кровию своею орошая, / в сердцах верных насадил, / и тако мнозех ко Господу привел еси, / служение демонскаго нечестия в мире посрамив, / да царствует Христос в сердцах наших во веки.

Уязвляеми сердцами и воспаряеми любовию / видяще, како возлюби Господь души твоея доброту, / ангелом собеседниче Александре, / егда посла Ангела Своего да возвестит тебе, / яко Боголюбне избра тя на подвиг мученическаго исповедания / во утверждение Церкве Святыя Своея / и во спасение всех людей, / в нейже и мы Христа – Божию Силу и Божию Премудрость познахом, / дивно во святых Своих почивающего, / с нимиже молишися, всеблаженне, / да сынове Света Превечнаго будем / и внидем в радость Господа любви Божественныя.

Яко жених церковный, за Христа Сына Божия узами связан, / от Рима до Византии мучители влекомый, / грады и веси на пир веры Христовой призывал еси, / мучениче Александре непобедимый, / сице бо чад Церкве Вселенския, в единстве веры ослабленных, / силою любве Христовы связуеши, / да всепрощением друг друга обымем, / Церковь Святую, в язвех нестроений кровоточащую, / в тихое и безмятежное благостояние приведем, / и ко двухтысячелетию торжества Ея братолюбне освятим, / и сице Богу споспешствующу мира основание благочестно утвердим.

Слава, святому, глас 8:

Днесь страдания страстотерпца Христова / ко всем боголюбивым людем востока и запада вопиют: / приидите вси, любовию Христовою уязвленнии, / богоувенчанна воина Александра во псалмех и песнех прославим: / сей бо дивно в лицех мученик святых вкупе с материю своею Пимениею / у Престола Царя Славы, предстоит; / ейже Ангел Господень возвести, / да, якоже Пречистая Богоматерь во страданиих Сыну Своему на Голгофе, / состраждуще спутешествует и погребет тело его, / Христу любовию спогребшася, / во еже купно с ним молится ко Господу / о торжестве Церкве земныя, о братолюбии в народех мира / и о спасении душ наших.

И ныне, Богородичен:

Родившийся Соприсносущен Богу и Отцу, / Бог Слово, Богородице, / Бог Человек Тобою сниде к нашему смирению, / свобождая ны клятвы праотеческия: / Тебе бо виде Иаков Лествицу, / до небес досязующу, / благословя Бога, / Архангел же Гавриил, удивлься, вопияще Ти, Богородице: / Недоумеваю и ужасаюся, темже яко повелен бых, вопию Ти: / Радуйся, Благодатная, Господь с Тобою. / Мы же, недостойнии, велегласно вопием: / Ты же, Чистая, красуйся, Богородице, / о востании Рождества Твоего, / в Нем же Церковь Святая, адовыми враты непобедима, / в подвизе страстотерпцев Христовых ликовствует во веки.

Или догматик, того же гласа.

На стиховне стихиры, глас 4.

Подобен: Яко добля:

Огненным страданием твоим, богомудре мучениче Александре, / прелесть мучителеву пожегл еси, / каплями кровными верных сердца струями веры напаяя, / Церкве Святыя столп непоколеблемый показался еси, / безстрастием украшен, Христу Богу уверившийся. / егоже и обрел еси, всехвальне.

Стих: Праведник, яко финикс, процветет, / и яко кедр, иже в Ливане, умножится.

Любовию Христовою разжигаемь, еюже сильна тя Господь сотвори: / растерзаемь и стружен и мечем скончаваемь, / непреклонен пребыл еси, Александре мучениче, / на камени веры душу твою воздрузив. / И сего ради ликом святым причелся еси, / света незаходимаго сподобляем.

Стих: Насаждени в дому Господни, / во дворех Бога нашего процветут.

Почести воинства земнаго презрев, / воинству Небесному сопричтен был еси, / адаманте веры Александре, / узы железныя и темницу по граде Филиппове, / яко ометы царские прием, / терпением козни Тивериана злочестиваго победив, / веры сладкозвучная свирель явился еси, / Христу любовию сподвигшийся

Слава, глас тойже:

Едину зарю Триипостасну сущу, / Едино Божество и едино Господство возвещал еси, / страстотерпче Александре, / лжеименнии бози сокрушил / и идольское суемудрие низложил еси. / Не престай молитися о спасении мира, / Пребожественныя и Несозданныя Троицы исповедниче неустрашимый.

И ныне, Богородичен, глас тойже.

Тропарь, глас 4:

Мученик Твой, Господи, Александр, / во страдании своем венец прият нетленный от Тебе, Бога нашего: / имеяй бо крепость Твою, мучителей низложи,/ сокруши и демонов немощныя дерзости, / Того молитвами спаси души наша

Слава, и ныне, Богородичен, глас тойже.

На утрени

На Бог Господь: тропарь мученику.

Слава, и ныне, Богородичен, того же гласа.

По 1-м стихословии седален, глас 4:

Страстотерпца днесь Александра благочестно совершаем празднество, / уязвившагося любовию и пожершагося Христу верою, / во еже непрестанно молитися Господу / даровати мир и спасение душам нашим.

Слава, и ныне, Богородичен:

Лествица явилася еси небесная, Пречистая Дево, / Еюже сниде к нам Слово Божие, всем жизнь дарующе. / Тя бо имамы грешнии Заступницу усердную, / во мнозех напастех суще, Тобою присно избавляеми.

По 2-м стихословии седален, глас 1.

Подобен: Лик Ангельский:

Крепость даде тебе Господь на подвиги, / егда венцем мученическим возжелел еси украситися / и христианина быти себе исповедал, / во еже муки телеснии доблественне подъяти, / через Ангела Своего возвести матери твоей, Александре, / да утешает тя в сих, / во еже не посрамитися Церкве Святей в верности исповедник своих, / Христу любовию спогребшихся.

Слава, и ныне, Богородичен:

Облеклся из Тебе Царь и Господь в багряницу телесную, / пройде весь красен из утробы Твоея, Богородице, / и всю силу вражию сокруши и победу необоримую всем верным дарова, / в молитвах на помощь Тя призывающих.

По полиелеи седален, глас 4:

Воина Христова непобедима, воли Божией исполнителя усердна, / присно вси восхвалим верою Александра страстотерпца, / напаяет бо водою исцеления приходящих к нему с верою, / и утоляет страсти лютыя, / и сущия в скорбех от всех зол заступает неложно.

Слава, и ныне, Богородичен:

Избави иы от нужд наших, Мати Христа Бога нашего, / Рождшая всех Творца и Церкве Зиждителя, / да вси зовем Ти: Радуйся, едина Предстательнице и спасение душ наших, / от всех зол присно нас избавляющая.

Таже степенна, 1-й антифон 4-го гласа.

Прокимен, глас 4: Праведник, яко финикс, процветет, / яко кедр, иже в Ливане, умножится.

Стих: Насаждены в дому Господни, во дворех Бога нашего процветут.

Всякое дыхание: Евангелие от Луки, зачало 106.

По 50-м псалме стихира, глас 6:

Днесь Церковь Христова страстотерпца муками просвещается / и, яко цветы, страданьми его украшена, / в веселии вопиет: / таковы мои рождения, таковы моего чрева сынове. / ихже породих крещением, / воспитах же млеком благочестия / и мученики соделах Истины, / молящияся о спасении всея вселенныя.

Канон Богородице, со ирмосом на 6, и мученику Александру на 8, глас 4.

Песнь 1.

Ирмос: Во глубине постла иногда / фараонитское всевоинство преоруженная сила, / воплощшееся же Слово всезлобный грех потребило есть, / Препрославленный Господь, славно бо прославися.

Якоже Самуил иногда, от вышних повелений избран явился еси, мучениче Александре, со Христом воинствовати во утверждении Церкве Его святыя, в нейже порфира естества нашего в пакибытии обновляется, молитвами твоими.

Видяще, како возлюби Господь души твоея доброту, верный воине Христов Александре, егда славу мира сего презрев, венцем мученическим возжелел еси украситися. Молимтися, воспламени и сердца наша горением любве твоея ко Господу.

Силою Вышняго озаряемь, изшел еси, боголюбиве Александре, в сретение воинов по тебе грядущих, сихже, к ногам твоим падших, воздвигл и возвестил еси им тебе предреченнии страдания, в нихже от Рима до Византии всеусердно Христа проповедал еси, молитвенниче предивне.

Богородичен: Светом нас Твоего милосердия во тьме неразумия лежащих озари, Мати Божия, Едина, Царя Светодавца Рождшая, егоже, пресладкаго Сына Твоего и Бога нашего, моли спастися от бед и скорбей всем нам, на помощь Тя призывающих

Песнь 3.

Ирмос: Процвела есть пустыня, яко крин, Господи, / языческая неплодящая церковь, / пришествием Твоим, / в нейже утвердися мое сердце.

Облагодатствован суще крепостию Божественною, грядеши к подвигом мучения усердно, всеблаженне Александре и, яко агнец безгласен, терпиши ноготьми железными стружение, возжен любовию до конца за Христа страдати да Сего возлюбленна приобрящеши.

Мученми многими тщится злочестивый Тивериан разлучити тя от любви Христовы, но посрамлен бысть окаянный, обрете бо тя на камене веры силою Божественнаго Духа утвержденна, страстотерпче Христов доблественнейше.

Яко жених церковный, узами железными связуемь, в посте и молитве шествовал еси от Рима до Византии венцем мученическим венчатися, да вернии востока и запада, узами любве Христовы связуеши, в союзе любви изнемогающих.

Богородичен: Глаголом Твоим последующе, роды родов присно Тя ублажают, Мати Божия, Бога бо истинно родила еси, Дево Чистая, егоже, яко Мати Света, усердно моли даровати Церквам единомыслие, в союзе мира Божественна.

Седален, глас 4.

Подобен: Удивися Иосиф:

Днесь Церковь Христова веселится, / Рим же да радуется, Византия ликовствует, / видяще тя, мучениче Александре, / за Истину Христову страждуща, / яко ангел светлый, в сорокадневном посте молитвою насыщаемый, / козни вражия верою победив, / славу Церкве Христовы утверждающе. / Воини же сему дивляхуся, глаголаху: / Велик Бог Христианский, за егоже мучения сия подъял еси, воине Христов предивный. / Мы же, память твою празднующе, взываем ти: / сопряжи ны узами любве твоея, / да не страждет Тело Христово в распрех наших, / якоже на колех растерзаемо.

Слава, и ныне, Богородичен:

Безневестная Чистая Дево, Богородице, / Едина верных Предстательнице и Покрове, / бед и скорбей и лютых обстояний вся избави, / на Тя надежду Отроковице, имущих: / Церкве в единомыслие веры утверди / и, якоже ведаеши человечестии скорби сердечнии, / чад Своих во едино собери, / и вся ны спаси Божественными молитвами Твоими.

Песнь 4.

Ирмос: Пришел еси от Девы, не ходатай, ни ангел, / но Сам, Господи, воплощся, / и спасл еси всего мя человека. / Тем зову Ти: слава силе Твоей, Господи

Благодатию Святаго Духа из млада в вере чисте воспитан, любовию Христу пожерлся еси, верный воине Христов, Александре, и, яко многими скорбьми обуреваемь был еси, предвари молитвою за ны ко Господу, в скорбех мнозех изнемогающих.

Проповедник велегласен веры Православныя, еще неделимой суще, явился еси, верный друже Христов Александре, умягчи каплями кровей твоих, за Церковь Христову пролиянных, сердца, распри и нестроения и вражду в ограде Ея сеющих.

Душу и помышление к тебе простираем, страстотерпче Христов Александре, согрей нашу веру и любовь к Богу, изнеможения наша подкрепи, да закону Его усердно последующе, поприще спасения нашего прейдем непосрамленно.

Богородичен: С Богом Тя Заступницу стяжахом, Пречистая Дево Марие, Ты бо Мати Божия явилася еси, Творца и Содетеля нашего во утробе приимше, Всенепорочная, всех от смерти и тления спасла еси, Надеждо наша и Утешение, и Покров теплоты сладчайшея.

Песнь 5.

Ирмос: Ходатай Богу и человеком был еси, Христе Боже: / Тобою бо, Владыко, к Светоначальнику, Отцу Твоему, / от нощи неведения приведение имамы.

Свеща светозарная, пламенем веры неугасимо пламенеюща, явился еси, Александре, верныя во градех и весех шествия твоего во ограду Церкве Святыя созывая, путь ко Христу осветил еси им, к Воскресению грядущему ведущий.

Воду живу, от ребр Христовых истекшу, молящеся источи память твою чтущим, якоже иногда во граде Карасурском источил еси воду из камене, еюже напоил еси жаждущих, к месту усекновения главы твоея поспешавших, всеблаженне.

Приидите, христолюбивые матери, со страстотерпца материю Пимениею возрадуемся, видяще сына ея славою и честию увенчана, егоже, яко крин неувядаемый, она, себе и Христу на радость благодатно возрасти, тления и смерти духовныя избави.

Богородичен: Нам любящим тя, и любовию чтущим святую память твою, верный друже Христов, с Пречистою Богоматерию исправления жития, клеветы и злобы человеческия избавления, и прегрешений прощения даровати испроси.

Песнь 6.

Ирмос: В бездне греховней валяяся, / неизследную милосердия Твоего призываю бездну: / от тли, Боже, мя возведи.

Неослабными язвами сокрушаемое тело твое, Александре, силою любви ко возлюбившему тя Господу, душевное благородие непоколеблемо соблюл еси во Христе радующеся, душею и телом освящен явился еси, скорбящим утешение ниспосылаеши.

Дивящеся богатству добродетелей твоих, Александре, молим тя якоже благословил еси древо, у негоже от мучителей истязуемь был еси, и сие от того часа плод исцеления верным приношаше. Исцели, боголюбиве, сердца наша, да принесем плод покаяния нелицемерна.

Терпением и душевным мужеством, и крепостию помысла превзошел еси всю гонителей горькую ярость, воине Христов Александре, да и мы, в испытаниих лютых, на твои страдания взирающе, не посрамим малодушне Возлюбившего нас до Крове.

Богородичен: Управи и освяти ум наш, Мати Божия, обуреваемый нашествием скорбей и тлетворных страстей, спаси к Тебе прибегающих, иныя бо помощи, Чистая, разве Тебе, не имамы, помози Владычице, да не погибнем в пучине отчаяния.

Кондак, глас 4:

Яко звезда многосветлая, возсиял еси от Рима, / мучениче Александре, / и, яко бисер многоценный, в земли Византийстей радостно под меч / за Христа главу твою преклонил еси и, / сию непорочное благоухание Богу принесл еси, / да красуется Церковь земная и Небесная / во славе исповедников Христовых.

Икос:

Светозарный светильник явился еси, богомудре Александре, благодати Божественныя исполнен сый в телеси твоем, егоже спекулаторы ввергоша в реку по многострадальней кончине твоей. Смотрением же Божиим, двоица псов извлекоша честнии мощи твоя, приседяху стрегуще я от птиц и зверей дивиих, доколе же блаженная мати твоя Пимения, пришедше, со слезами, псаломски. помазаша сии миром, погребше тя при оной реце Ергине, идеже исцеления многа совершишася болящим, с верою ко гробу страстотерпца Божия приходящих, да красуется Церковь земная и Небесная во славе исповедников Христовых.

Песнь 7.

Ирмос: Богопротивное веление беззаконнующаго мучителя / высок пламень вознесло есть. / Христос же простре Богочестивым отроком росу духовную, Сый благословен и препрославлен.

Яко красное и священнейшее заколение сам себе принесл еси Пастыреначальнику Христу, за всех Божественне заклавшагося, и огнем мучений всесожеглся еси, славне Александре, в сладости Ангельской победно вопиюще: отец наших Боже, благословен еси.

Мольбы наша услыши, всеблаженне, и приити нам на помощь потщися, люте обуреваемых скорбьми, и нуждами житейскими, и бесовскими озлоблении, яко да спасаеми тобою, и мы вопием: отец наших Боже, благословен еси.

Молитвы твоя пролей за ны ко Господу, боголюбиве Александре, и скверну студных дел наших каплями честных кровей твоих омый, надежду же укрепи, во еже чистым сердцем и сокрушенною душею воззовем: отец наших Боже, благословен еси.

Богородичен: Надежда ненадеждных Ты еси, Богородице, веси бо, Царице, яко неизлечимыми раны страстей греховных изнуряеми, ко вратом погибели доспехом. Не отрини вопль душ наших, Всеблагая, да спасаеми, утешне зовем: отец наших Боже, благословен еси.

Песнь 8.

Ирмос: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия: / благословите, вся дела Господня, Господа.

Украшение мучеников показался еси и в жилищех нерукотворных Церкве Небесныя вечный покой обрел еси, любвеобильне Александре, нас же, во многих обуреваниих испытуемых, в тихое пристанище приведи, во еже во Христе радующеся, взывати: благословите, вся дела Господня, Господа.

Ума красотою увенча тя Господь, Александре, и сердце любви преисполненное дарова ти, во еже подъяти образ страданий Его непостыдно, имиже возвел еси человеческое немощное естество к чину Ангельскому, да и мы в надежде спасения вопием: благословите, вся дела Господня, Господа.

Огнь молитвы непорочныя пролей за ны ко Господу, верный мучениче Христов, да не пожрет нас злоба греховная, враждою снедающая, но, яко предстатель верный, вся ны к братолюбию приведи и утверждению Церкви Христовы верно служити уцеломудри, во еже любовию связуемым, взывати: благословите, вся дела Господня, Господа.

Богородичен: Яко Матерь Света, трапезу Хлеба Животнаго и руно, прохладой Святаго Духа орошенное, и сладость райскую, верных надеждою спасения услаждающую, почитаем Тя, Чистая Дево Мати, и веселящеся о Тебе, вопием: благословите вся дела Господня, Господа.

Песнь 9.

Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная. Тем Всепетую Богородицу величаем.

Поюще многоразличная страдания твоя, Христа ради распеншагося, восхваляем тя, яко одушевленный сосуд, исцеления изобильно изливающий Ублажаем матерь твою Пимению, яже плод чрева своего Богу в дар благоприятен принесе, с нею же, достохвальне, молися мир ниспослати душам нашим.

Храм Святаго Духа воистину был еси, Александре, Сего преисполнен не боятися убивающих тело верных научаеши, но в животе и смерти прославляти смотрение Божие о нас, страданми воспеваеши преславно. Подвигни и нас сих не устрашатися, люте нападающих на нас.

О предивне мучениче Александре, приими от нас сие убогое славословие, яко дань молитвы, далеких по времени чтителей страданий твоих, и прииди нам на помощь, егда изнемогает дух наш, духом злобы поднебесныя томим, да не падше погибнем пред Лицем Божиим.

Богородичен: Крепкое Твое предстательство, Богоукрашенная Марие, и светлая Твоя слава по всей земли показася, о Тебе ныне хвалимся, имуще Тя к Сыну и Богу Твоему Ходатаицу неусыпную, в скорбех и печалех, и в час смертный упование непостыдное.

Светилен.

Подобен: Духом во святилищи:

Светятся лучи светло страданий твоих, / якоже солнце, / и всю жития твоего являют светлость, / преславне мучениче Александре, / и сияющую в тебе веру Божественную, / Церкве Святыя немеркнущее украшение, / в немже нашего упования надежда светлая, / Венцедатель Христос.

Слава, и ныне, Богородичен:

Видети, Богородице, славу Твою неизреченную / древле возжелаша Божественнии пророцы вси, / но на последок нам явилася еси, любящим Тя, / Херувимов Честнейша и Серафимов Славнейша суща, / Божественныя славы преисполненная.

Стихиры на хвалитех, глас 8:

Блажен еси, мучениче Александре, / увоинствевшийся ко Христу любовию, / дивно процветший в вертограде Его, иже есть Церковь Божия, / в нейже, яко грозд винный, изобильно верою уплодоносил еси, / язвы Господа на теле своем усердно запечатлев, / сладце путем крестным за Христом последовавше, / от земных к небесным преселился еси. / Молим тя прилежно, боголюбиве, / укрепи нас и увесели подражанием тебе в добрых делах, / во еже, верностию Наперсника Христова, / прилепитися нам к Нему неотлучно.

Лукавое и неверное зловестие языческое проразумевши, / разлучити тя со Христом всячески стремившееся, / веления мучителя Тивериана до конца презрел еси, / славне воине Александре, / главу твою под меч спекулятора Келестина доблестне преклонил еси, / сице бо верность свою Христу ангельски засвидетельствовал. / Мы же в добродетелех оскудевшии, / молитвы твоя ко Всещедрому Богу просим, / да спасет и помилует мир, / в распрех житейских гибельне зломудрствующи.

За всех Бога и Царя вселенныя / многочисленнии страстотерпцев лики уразумев, / божественною ревностию разжеглся еси, Александре, / и сице возопил еси: / Христов раб искренний есмь всегда, / разумейте пребеззаконнии мучителие, / яко бо агнец незлобив за Христа заклатися волею ныне приидох. / Незлобием облекохся, злобы обретателя посрамити тщуся, да прославится сила Христова в немощней плоти естества человеческаго.

Яко звезду немеркнущую на тверди Небесней, / яко доблественнейшаго в мученицех и поборника верных, / багряницею кровми своими сотканной одеяна, / присно со Христом царствующаго вемы тя, мучениче Александре. / Сотвори убо да утешится у ног твоих всяк, / в недузех телесных и душевных страждущий, / и от клеветы человеческия напаствуемый, / наипаче же да не отвратит Господь Лица Своего от нас, / воспевающих память твою, / во еже не постыдитися нам в день Судный.

Слава, глас тойже:

Преславный подвиг твой, мучениче Александре, / украси восток сиянием веры, / запад же озари лучею познания, / огненным твоим по Христе очищением Ангельския чины удивишася: / како, смирение прискорбнаго пути тесноту прешел еси / и крещение пакибытия обновил еси своею кровию, / и паче света блистаяся, / Царю своему предстал еси, идеже ныне достойно ублажаешися. / Темже, припади ко Господу, всеблаженне, / да избавит Церковь Святую от расколов и нестроений, / и оградит стадо Свое от волков, губящих Ее.

И ныне, Богородичен, глас тойже.

Славословие великое.

На литургии

Блаженны от канона, Песнь 3.-я и 6-я.

Прокимен, глас 7: Возвеселится праведник о Господе и уповает на Него. Стих: Услыши, Боже, глас мой, внегда молитимися к Тебе.

Апостол к Тимофею, зачало 292.

Аллилуиа, глас 4: Праведник, яко финикс, процветет, яко кедр, иже в Ливане, умножится. Стих: Насаждени в дому Господни, во дворех Бога нашего процветут.

Евангелие от Иоанна, зачало 52.

Причастен: В память вечную:

Молитва

О преславный угодниче и мучениче Христов, доблий воине Царя Небеснаго, Александре блаженне, милостиваго Бога подражателю, иже Христа на земли дерзновенно исповедав и многообразныя муки Его ради претерпев, неувядаемый приял еси венец на небеси: ныне же вкупе с материею твоею Пимениею, предстоя у Престола Славы Божия, моли о нас человеколюбное благоутробие Божие, да сотворит с нами по неизреченней Своей благости, во еже не погибнути нам во гресех наших. Ей, мучениче святый, вемы бо, яко имаши многое дерзновение ко Господу еже молитися о всех притекающих к Тебе с верою.

Вознеси молитву теплую Церкве Зиждителю о мире всего мира, благостоянии Святых Божиих Церквей и соединении всех верных чад Церкви Христовы, в чистоте и честнем жительстве пребывающих, и о еже избавити паству православную от тяжких бурь житейских и всех наветов духа злобы поднебесныя. Дыханием же Всесвятаго Духа да умягчатся сердца сынов противления, раздирающих хитон единства Церкви Христовой, силою Божественнаго мира и любви во исцеление кровоточащей раны Его во вселенней, и во спасение всех живущих на земле.

Нам же, верный друже Христов, буди убо Заступник и Покровитель во вся дни жития нашего, избавляя нас от врагов видимых и невидимых, паче же по исходе нашем защити от лукавых духов, и на Страшнем Суде Христове не забуди нас убогих теплым ходатайством твоим, да спасаемых часть улучивше, прославим Отца и Сына и Святаго Духа во веки. Аминь.

Источник: Текст полиелейной службы святому мученику Александру, написанной митрополитом Харьковским Никодимом в июне 1989 года по поручению Священного Синода РПЦ МП в ответ на прошение православных христиан из Италии, чей приходской храм был освящен в честь этого святого, воспроизводится по изданию: Никодим (Руснак), митр. Сборник служб и акафистов. Харьков: Прапор, 1996. Стр. 211–222.

Стихиры на Господи воззвах: Празднику 3,

и сии 5: м.Вукашину, гл.2, подобен: Егда от древа:

Егда со иными страдальцы Ясеноваца-лагеря,/

Яко овча на заколение,/

Приведеся Вукашин-старец из Клепца,-/

Не скрыся безмятежна тишина взора его/

И от звероподобна мучителя,-/

Тогда всеярый вооружися на всекроткаго,/

Некасаему отнюд духу мученика,/

Воздыхающу о видимем с великим Силуаном мысленно://

Еда сие есть путь Христов./

Яко агнец безгласен прямо стригущаго его,/

Предста Вукашин ясный всемрачному Жиле,/

Иже свирепством всесвирепых превозшел есть,/

Разуме же окаянный яве немощь свою,/

Аще духа не одолеет сего кроткаго старца,/

Обаче не внят воплю того неистову претихий,/

Во еже хвалу возгласити тирану всезлобному,/

Воздыхающу святому сердцу о лютейших всея земли://

Еда сие есть путь Христов./

Ни вопиет, ни противоглаголет,/

Ни отверзает уст своих Вукашин,/

Егда начинает зверонравный сие заколение долгое/

Урезанием ушес, соблазну не внявших,/

Паки и жалости о безумнем/

Всенезлобиво сердце исполняется,/

Преисполнено без меры благодатию,/

Токмо во глубине молчанием плачущее://

Еда сие есть путь Христов./

Во смирении христоподражательнем/

Суд святаго над миром взимается,/

Се бо удержанным от Бога копиям ангельским,/

Богопротивников поразити хотящим,/

До конца покаряется Вукашин чудный/

Непостижному о себе Промыслу,/

И страждет за Господа приснопамятный,/

Единый суд износя вселютости://

Еда сие есть путь Христов./

Кто небесный не воспоет сего земнаго ангела,/

Кто земный не удивится мужу сему,/

Кто же род Вукашина крестославный исповесть,/

Явльшаго мирови человека истинна/

Небесною дышуща любовию,/

Яже вопиет сокрушающу сосуд ея:/

Не косни преломити сие брение,/

Но делай убо, чадо, дело свое -/

Сие бо ми есть путь Христов/

Слава, глас и подобен тойже:

Яко овча на заколение ведеся/

И яко агнец безгласен прямо стригущаго его,/

Тако не отверзает Вукашин уст своих,/

Се бо во премирнем смирении/

Суд его миру расхристанну взятся/

Кто же род его крестославный исповесть/

Сего ради вземлется от земли токмо небес достойный живот его -/

Агнца Божественна подобия -/

Во веки вселяяся, идеже всяческая и во всех Христос/

И ныне: Празднику

Лития муч.Вукашину, гл.7

Прозябения чудныя земли Сербския,/

Крестославнии единовременницы:/

Велий словом кто – кто молчанием,/

Един пастырь изряден – яве агнец ин,/

Исповедник той – сей же мученик,/

Тем любовию первых горя христиан,/

Яко в Дусе един – Тем же Духом зовет/

С Велемирным Вукашин Николаем./

Не моя важна нива пахаря,

Но Господь, на труд мой взирающий,/

Да стяжу желаемый мир души во Христе,/

Иже дух укоренит смирением./

Среди слез и горя творений Твоих,/

Утружденнаго мя, сих насыщеннаго,/

Да покрыеши платом, яко вдову,/

О, Господи, краснейший Убрусе мой./

Егда Истина и Живот в душе ми раждаются -/

Се и Путь является во Христе -/

Се предел ми чаяний Иисус Господь -/

Се евангельским обетованием/

Станет Сам Он Путем ми к чертогам Своим, -/

Яко в Дусе един – Тем же Духом зовет/

С Велемирным Вукашин Николаем./

Слава, глас тойже:

Благослови враги моя, Господи,/

Се и аз благословляю их,/

Се бо паче другов сии толкают мя/

В плен любве Твоея, во объятия Твои,/

Благослови их, ожесточи на мя,/

Се не властен мучитель горчайший сей/

И над Жизнию моей, Яже Ты еси:/

Се приблизившуся часу исхода ми,-/

Делай, чадо, шепчу тому, дело свое,-/

Николая Владыки слово в Дусе Святем/

Исполняет Вукашин страданием./

И ныне, глас тойже:

Егда пастырь бе аз бессловесных овец,/

Имя зрел Твое огнем писанное/

На юдолях земных, Вышний Боже мой,/

И тогда о елицем ангце закланнем/

Слезы теплыя лил Иисусе, памятуя Тя,/

Се сподоби мя убо пожретися Тебе,/

О, Божественный Агнче, о Небесный Огню,/

Купину сохрань Неопальну. /

Стихиры на стиховне гл.2, подобен 'Доме Евфрафов'

Земле Сербская -/

Славное в веках отечество/

Саввы пастыря великаго/

Возхвали Христу подобие//

Агнца чистаго Вукашина. /

Воззваша праведнии:

Церковь Сербская -/

Златословием прославленная/

Николая – чуда велемирнаго -/

Ныне пой молчание//

Христоноснаго Вукашина. /

Многи скорби праведным:

Соборе святых Сербских -/

Воинство совенечник Лазаревых, /

Знаменосное Креста Честнаго -/

Славь в терпении изряднаго – //

Златосвободнаго Вукашина. /

Слава:

Новое о дусе Косово -/

Ясеновац – юдоль плачевная, /

Окропленна кровию безвинною -/

Утоли боль неутешную//

Воздыханьми тишайшаго Вукашина. /

И ныне: Праздника

Тропарь, гл.4:

Агнец Твой, Иисусе, Вукашин/

Мучителю зовет зверонравному, /

Еже: Делай убо, чадо, дело свое, /

И свирепство онаго умерщвляет, /

Умирая за Тя, Агнца Божия, /

Темже ныне на земли кротких /

Молит о душах наших. /

Седален по 1-й кафизме

Телесныя исцели страсти, тугу душевную утеши, восполни духа оскудение,

умири помышления, не остави ны сиры, о, премирне Вукашине.

Слава и ныне: Празднику

Седален по 2-й кафизме

Веси немощь нашу, малодушием разслабленных, веси и озлобление, миром укрепи на борющия ны, о, премирне Вукашине.

Слава и ныне: Празднику

Седален по полиелее, гл.2:

Огорчися ад древле, доле Христа узрев, паче же поруган бысть силою Того Воскресшаго, ныне же посрамляется диаволов сосуд и смертоносныя лишается дерзости силою всесмирения Христу подражателя мученика Вукашина.

Слава и ныне: О Иисусе воскресшем проповедуют апостоли, мученицы свидетельствуют, преподобнии дерзновение приемлют, паки же и паки молит о нас Того Богородица.

Стихира по Евангелии, гл.6

Святым иже суть в крестославней Сербии, новомучеником доблественным, удиви Господь хотение Свое, еже Церковь Сербскую возродити, дерзновенным сих ходатайством, – темже Вукашину добропобедному, о всем роде своем умоляющу, возопиим: радуйся, новый наш небесный заступниче.

Канон празднику и сей:

Канон муч.Вукашину, глас 6

Краегранесие Вукашина молчанию плачевному вонми душе

Песнь 1.

Ирмос: Сеченое сечется море Чермное, волнопитаемая же изсушается глубина, таяжде бо бысть безоружным проходима и всеоружным гроб, песнь же богокрасная воспевашеся – славно прославися Христос Бог наш.

Святый мучениче Вукашине, моли Бога о нас:

Веру ми укрепи, волнение душевное утиши, пению твоему настави, мучениче, мира приятелище Христова.

Святый мучениче Вукашине, моли Бога о нас:

Урезаемей от мучителей пастве Спасовей, ураняешися, страстотерпче, сердцем, Агнцу Божию вопия молчанием, еже не вменити тем греха сего.

Слава

Кому возопить, кия небу принести воздыхания земли, се бо вси изгибнем, аще не разсеется пленивший ны мрак тихостию света Иисусова.

И ныне:

Агнице Пречистая, терпения Ходатаице, Мир породившая мирови, глубину обуревающих ны страстей изсуши.

Песнь 3.

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Святый мучениче Вукашине, моли Бога о нас:

Шуия части безчеловечия избави мя, одесную Отца Седяй, и человеколюбием вочеловечивыйся мене ради.

Святый мучениче Вукашине, моли Бога о нас:

Исповедую Тя, лобызаю ураняющую мя – мукою Отечества, сродников лишением – десницу Твою, Недоведоме

Слава:

Незлобие сохрани ми паки и правоты видение, яко миру непостижный останок стяжу Тя – Мира, преимуща ум всяк.

И ныне:

Анна древле Самуила-сына молчанием си изходатаи, и Ты, Дево-Мати, воплю и суду ми молчаливому вонми.

Кондак и икос празднику

Седален:

Иовлю терпению подражая,

мирность духа Стефанову

притяжав, совершенным, святе,

незлобием до конца последовал еси

Человеколюбцу Господу.

Слава и ныне: Празднику

Песнь 4.

Ирмос: Провидев пророк тайну Твою незреченную, провозгласи: положил еси твердую любовь крепости, Отче щедрый, Единороднаго бо Сына, Благий, очищение в мир послал еси

Святый мучениче Вукашине, моли Бога о нас:

Молчание тех велегласием вменяется, вопиет Богослов тишайший о древних страдальцех, ихже части не лиши мене, о, Начальниче тишины.

Святый мучениче Вукашине, моли Бога о нас:

Очищение в мир Тя посылает Отец, что убо Ти воздам противодостойное, не бо довлеет сему и на пречистом Ти жертвеннице всесожжение.

Святый мучениче Вукашине, моли Бога о нас:

Лютонеистовство вотще именуемых человеками являеши ми, Человеколюбче, да и аз избегу части человеконенавидения демонов вечнаго.

Слава:

Чрево адово Ты Крестом расторгнул еси, да и мя, изторгнув ада Ясеновацкаго, даже до рая возведеши небеснаго.

И ныне:

Аввакум зрит облаком Тя легким, уповаю и аз капли милости Твоея, Дево, не лишитися.

Песнь 5.

Ирмос: К Тебе утреннюю, милосердия ради Себе истощившему непреложно, и до страстей преклоншемуся, Слове Божий, мир подаждь ми падшему, Человеколюбче

Святый мучениче Вукашине, моли Бога о нас:

Не помяни прежних зол ныне за Тя страждущих, сего бо ради вочеловечился еси, Боже мой, паки и пострадал еси за ны.

Святый мучениче Вукашине, моли Бога о нас:

Исаия зрит безгласным Тя агнцем, и аз умолкаю пред мучителем, се бо тишайшему Твоему Промыслу не противлюся, ни противоглаголю.

Слава:

Юже Кровию Честною стяжал еси, Иисусе, Духом мужества, Духом крепости утверди Церковь, и враты адовы неодолеваему.

И ныне:

Плач на плач приими от нас Дево-Мати, чистоты сосуде и любве образе.

Песнь 6.

Ирмос: Бездна последняя грехов обыде мя и волнения не ктому терпя, яко Иона Владыце, вопию Ти: от тли мя возведи.

Святый мучениче Вукашине, моли Бога о нас:

Любы долготерпит – со апостолом исповедаю сие – ныне же вижу, яко и не мыслит зла воистину.

Святый мучениче Вукашине, моли Бога о нас:

Аминь, аминь возгласил еси, Спасе, яко смерти не узрим во веки верующии в Тя, темже любовию ми конечне веру сию утверди.

Слава:

Чрево разверзается на пророка китово, и на ны смерти всеядныя уста, обаче крестною силою жало тоя притупляется.

И ныне:

Еже жити Христос ми есть и еже умрети благоприобретение, – алчуща исполни мя сего, Мати Христова.

Кондак, гл.2:

Вукашине, прозябение Сараевско, Вукашине, Клепцова славо, Вукашине, диво Ясеновацкое, паче же всея Сербии похвало, смирения силу являеши и кротости пачеестественныя, ныне же молитвенно любовию нас призираеши, мучениче.

Икос: Кто твоя изречет болезни, кто изъяснит тугу сердечную, кто по достоянию возхвалит, Вукашине, молчаливый твой подвиг, но приими сия малые воздыхания, се бо любовию к тебе движими, паче дивимся твоей любви, яже ко Господу Человеколюбцу, в нейже и нас призираеши, мучениче.

Песнь 7.

Ирмос: Отроцы в Вавилоне пещнаго пламене не убояшася, но посреде пламене ввержени, орошаеми пояху: благословен еси Господи, Боже отец наших.

Святый мучениче Вукашине, моли Бога о нас:

Вавилон всезлобный чести отроков не одоле, и всеярый Ясеновац да не окрадет мя смирения.

Святый мучениче Вукашине, моли Бога о нас:

Не неведеши вопля людей Твоих, о, Кротчайше, – вем, яко и молчанию моему внемлеши.

Святый мучениче Вукашине, моли Бога о нас:

О, Каинова семене предивиих сих! О, горькия тем пагубы! О, Твоих, Сердцеведче, судеб!

О, долготерпения!

Слава:

Меры злобы дивия сего не ведает мир, паче же победительныя Твоея десницы, яже в мире ныне пред лютостию того да соблюдет мя.

И ныне:

Устрашается дивий мученика мироноснаго, паче же Мира нашего – Сына Твоего, Пречистая.

Песнь 8.

Ирмос: Столп злобы богопротивныя, божественнии отроцы обличиша: на Христа же шатающееся беззаконных соборище советует тщетная, убити поучается живот держащаго дланию: егоже вся тварь благословит, славящи во веки.

Святый мучениче Вукашине, моли Бога о нас:

Вотще богопротивною злобою вооружается кнутоименный на тя, шепчуща тому евангельски, еже: делай, чадо, дело свое.

Святый мучениче Вукашине, моли Бога о нас:

О, ушес урезания! О, очес премирных! О, языка молчалива мученика, и по усечении зовуща обуявшу конечне, еже: делай, чадо, дело свое.

Благословим:

Новою пожираешися жертвою, обаче последнею от сего, не возможе бо всеярый гласу твоему противостати, еже – делай, чадо, дело свое.

И ныне:

Мати Света, Богородице, приими ходатая о нас Вукашина-мученика, убивающему его тихостию возопившу, еже – делай, чадо, дело свое.

Песнь 9.

Ирмос: Странствия Владычня / и безсмертныя трапезы на Горнем месте / высокими умы, / вернии, приидите, насладимся / возшедша Слова, /от Слова научившеся, / егоже величаем.

Святый мучениче Вукашине, моли Бога о нас:

И нраву причастник быв, и слову богоноснаго Игнатия следуя, мучениче, до конца заповедь соблюл еси Небеснаго Отца, еже: даждь ми, сыне, сердце твое.

Святый мучениче Вукашине, моли Бога о нас:

Да печальником о нас явишися, кровь твою, о, Вукашине, лиеши, Духа исполняешися, в дусе, дерзновенне, Стефанове.

Святый мучениче Вукашине, моли Бога о нас:

У престола, святе, Троицы Пресвятыя обрел еси, еже ухо не слыша, и не виде око, и во веки живеши, яко жизнь о Живоначальней положил еси.

Слава:

Шуия части безчеловечия избави ны, Богочеловече, одесную Отца Седяй, и явивый нам подвиг Вукашина-мученика – подражателя Твоего.

И ныне:

Егда славнии новомученицы воздохнут о нас Богородице, уповаем Тою спасение улучити и возопити Благословенней: Яже о всех благая Мати, слава Тебе.

Светилен, гл.6: Светоносне Вукашине, очеса всесветлы и светоисполненна душа, – помрачения нас избави сердечнаго.

Слава и ныне: Света от Света рожденна Матерь земную почтим и в псаломских пениих возвеличим.

Хвалитны муч.Вукашину, гл.5, подобен Радуйся:

Радуйся Вукашине пребогате,/

Богоданныя таланты умноживый/

Труды многими неусыпными,/

Заповедей хранением тщательным,/

Паки в лишениих долготерпением,/

Ныне же воздаянием наслаждаешися:/

Мерою Божиею преутрясенною,/

Прославляя на лоне праведничи//

Троицу Единосущную и Нераздельную./

Радуйся преблаженне Вукашине,/

Подражавый в доблестех великомучеником:/

Георгию – твердостию неколеблемою,/

Долгостраданием – похвале солунян,/

Преизрядных скорбей терпением – Плакиде,/

Тирону же – дерзновенною ревностию,/

Паки нрава тихостию – Пантелеимону,/

Паче же Стефановей любви ко врагом,/

Со апостолом в дусе вопия любящим тя://

Подражайте ми, якоже и аз Христу./

Радуйся сыне Крестославней Сербии Вукашине,/

Добродетели святых соотчичей унаследивый:/

Симеона мироточнаго любовь деятельную,/

Саввы великаго смирение чудное,/

Лазаря благородную жертвенность,/

Пастыря же Острожскаго упование благодушное,/

Братом явлься по страданию крайнему/

Велемирному Златослову,/

Подобяся, яко Иустин печальник рече,//

Еленю Божию в утерянном раю./

Радуйся Вукашине прехвальне,/

Чудный жития образ на земли оставивый,/

Мирность духа соблюдый премирную,/

Темже и подвиг твой запечатлевый/

Славною кончиною мученика,/

Да солнцеобразно на небесех возсияеши,/

Да воспоеши Троицу Единосущную//

В раю обретенном/

Слава, гл.6:

Безвестно, Вукашине, твое житие/

Но страдание равнославно древним/

И жребий со святыми твой/

Таже с патриархом христообразным память твоя/

Тем приими сие малое пение/

И жатву умножи церковную/

О, сыне вселюбезнейший//

Многострадальныя Сербии/

Месяца мая в 21-й день

Всех святых, в земли Карельстей просиявших

На велицей вечерни

Блажен муж: 1-й антифон. На Господи, воззвах: стихиры на 8: праздника 3, и святых 5. Стихиры святых, глас 6.

Подобен: Все отложше:

Земля веселится и Небо радуется,/ святии отцы в земли Карельстей просиявшии,/ восхваляюще подвиги и труды ваша,/ душевное благомощие и ума чистоту,/ законом бо естества не победистеся./ О, соборе святый и полче Божественный,/ земли нашей утверждение вы есте воистину.

Восхвалим Андрея Первозваннаго/ и святаго равноапостольнаго Владимира,/ яко тех трудами в земли Русстей вера насадися,/ и доныне благодатию Божиею напаяется/ и плод сторичный приносит.

Благоверный княже Александре,/ князей русских похвало,/ воинов соблюдение,/ врагов побеждение,/ сирот и вдов заступниче!/ Приими ныне похвальное пение,/ еже во храмех Божиих совершают людие твои,/ почитающе память твою.

Евангельски Христа возлюбивше,/ преподобнии Зосимо, Савватие и Германе,/ мира отвратистеся,/ в непроходимыя же и пустынныя острова Соловецкия зашедше,/ всякия добродетели образу навыкосте,/ мудрой пчеле подобящеся,/ и приятелище изрядно Духу Святому бысте, премудрии.

Радуйся, пустыне, прежде безплодна и необитаема,/ послежде яко крин цветущая,/ взыграйте, горы Валаама и вся древа дубравная,/ хваляще с нами Сергия и Германа,/ вкупе же Арсения и Германа,/ отцы всехвальныя.

Приидите, празднолюбцы,/ воспоим дивнаго подвижника Церкве Русския,/ Александра Свирскаго,/ с праведными ученики его/ Афанасием, Игнатием, Дионисием и Корнилием,/ Леонидом, Макарием, Ферапонтом и Феодором,/ яко звезды бо возсияша на тверди церковней./ Тех молитвами, Христе Боже наш,/ православных веру утверди,/ яко Человеколюбец.

Преподобнии отцы Никифоре и Геннадие,/ Пахомие и Кирилле,/ Корнилие и Авраамие,/ вы слепым даете свет, болящим исцеление,/ милостиво приклоняющеся к приходящим с верою/ и просящим помощи вашея./ Мы же, заступники и предстатели вас обретше,/ с теплою молитвою к вам прибегаем.

Идеже бе хлад и мраз,/ идеже леса и дебри,/ тамо жизнь райская процвете/ от святых твоих, Господи,/ Авраамия и Антония, Афанасия и Варлаама,/ Геннадия и Германа,/ иже, оледеневшая сердца людская теплотою веры растопивше,/ плодоносна сия соделаша/ и ныне молятся о душах наших.

Слава, глас 8:

Ликуй, Фиваидо русская,/ красуйтеся пустыни и дебри Олонецкия,/ возрастившия святых и славных отцев множество,/ чудным житием всех наставляющих/ миру не прилеплятися,/ крест свой на рамена взяти/ и во след Христу шествовати.

И ныне, Богородичен, глас 6: Кто Тебе не ублажит, Пресвятая Дево:

Вход. Прокимен дне. И чтения три.

Пророчества Исаиина чтение (глава 60, ст. 1–5, 11–13):

Светися, светися, Иерусалиме,/ прииде бо твой свет, и слава Господня на тебе возсия./ Се, тма покрыет землю, и мрак на языки,/ на тебе же явится Господь, и слава Его на тебе узрится./ И пойдут царие светом твоим, и язы́цы светлостию твоею./ Возведи окрест очи твои и виждь собраная чада твоя:/ се, приидоша вси сынове твои издалеча, и дщери твоя на рамех возмутся./ Тогда узриши и возрадуешися,/ и убоишися и ужаснешися сердцем,/ яко приложится к тебе богатство морское и языков и людий./ И отверзутся врата твоя присно,/ день и нощь не затворятся,/ ввести к тебе силу язык и цари их ведомыя./ язы́цы бо и царие, иже не поработают ти, погибнут,/ и язы́цы запустением запустеют./ И слава Ливанова к тебе приидет,/ кипарисом и певгом и кедром вкупе, прославити место святое Мое,/ и место ногу Моею прославлю.

Премудрости Иисуса, сына Сирахова, чтение (гл. 44, ст. 1–14):

Восхвалим убо мужи славны и отцы наша в бытии./ Многу славу созда Господь в них величием Своим от века./ Господствующе во царствиих своих/ и мужи, именити силою, советующе разумом своим,/ провещавшии во пророчествах;/ старейшины людий в советех/ и в разуме писания людий./ Премудрая словеса в наказании их,/ ищуще гласа мусикийска и поведающе повести во писаниих,/ мужи богатии, обдаровани крепостию,/ мирно живуще в жилищих своих./ Вси сии в родех прославлени быша,/ и во днех их похвала./ Суть от них иже оставиша имя, еже поведати хвалы./ И суть, ихже несть памяти, и погибоша, яко не сущии,/ и быша яко не бывша, и чада их по них./ Но сии мужие милостивии,/ ихже правды не забвены быша,/ с семенем их пребудет доброе наследие,/ изчадия их в заветех./ Остася семя их и чада их по них,/ до века пребудет семя их,/ и слава их не потребится./ Телеса их в мире погребена быша,/ а имена их живут в роды./ Премудрость их поведят людие,/ и похвалу их исповесть Церковь.

Премудрости Соломоновы чтение (гл. 3, ст. 1–9):

Праведных душы в руце Божией,/ и не прикоснется их мука./ Непщевани быша во очесех безумных умрети./ И вменися озлобление исход их./ И еже от нас шествие – сокрушение, они же суть в мире./ Ибо пред лицем человеческим аще и муку приимут,/ упование их безсмертия исполнено./ И вмале наказани бывше,/ великими благодетельствованы будут,/ яко Бог искуси я и обрете их достойны Себе./ Яко злато в горниле, искуси их/ и, яко всеплодие жертвенное, прият я,/ и во время посещения их возсияют/ и, яко искры по стеблию, потекут./ Судят языком и обладают людьми,/ и воцарится Господь в них во веки./ Надеющиися Нань уразумеют истину,/ и вернии в любви пребудут Ему./ Яко благодать и милость в преподобных Его/ и посещение во избранных Его.

На литии стихира храма и святых, глас 2:

Радуйся, карельская похвало,/ священномучениче Николае,/ усердно Церкви Христовой послуживый/ и, угрозы безбожник нивочтоже вменив,/ за веру Христову смерть приемый./ О, новомучениче всеблаженнейший,/ моли милостиваго Бога/ спастися душам нашим.

Радуйся, светильниче северныя страны нашея,/ праведный отроче Артемие,/ ты, ангельский нрав и душу непорочную имея,/ благодетельными чудотворении утешал еси/ всех, молящихся с любовию и благодарственно восписующих тебе:/ радуйся, предстателю наш праведный.

Радуйтеся, архипастырие достославнии,/ Филиппе и Феофане, угодницы Христови,/ чистоты Церкве блюстителие вернии,/ богословы изряднейшии./ О, архипастырие достославнии,/ Божества Триипостаснаго вернии служителие,/ молите спастися душам нашим.

Слава, глас тойже:

О, Всесильне Христе Царю!/ Явивый земли нашей сонм святых:/ преподобных и праведных,/ святителей и чудотворцев,/ пастырей и архипастырей,/ мучеников и новомучеников./ Тех молитвами помилуй и спаси душы наша.

И ныне, Богородичен, глас тойже: О, чудесе новаго, всех древних чудес:

Молитвы на литии:

Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя: молитвами Всепречистыя Владычицы нашея Богородицы и Приснодевы Марии: силою Честнаго и Животворящаго Креста: предстательствы честных Небесных Сил безплотных: честнаго славнаго Пророка, Предтечи и Крестителя Иоанна: святых славных и всехвальных апостол Петра и Павла, святаго апостола Андрея Первозваннаго и прочих всех святых апостол: иже во святых отец наших и вселенских великих учителей и святителей, Василия Великаго, Григория Богослова и Иоанна Златоустаго: иже во святых отец наших святителей Николая, Мир Ликийских, Чудотворца и Спиридона Тримифунтскаго Чудотворца: святых равноапостольных Мефодия и Кирилла, учителей Словенских, святых равноапостольных великаго князя Владимира и великия княгини Ольги: иже во святых отец наших, святителя Михаила, перваго митрополита Киевскаго, первосвятителей Московских и всея Руси, Петра, Алексия, Ионы, Макария, Филиппа, Иова, Ермогена и Тихона, святых, в земли Карельстей просиявших: святаго благовернаго великаго князя Александра Невскаго, святителя Феофана, Затворника Вышенскаго, Геннадия, архиепископа Новгородскаго; святых чудотворцев Авраамия Ростовскаго и Артемия Веркольскаго; священномучеников Вениамина, митрополита Петроградскаго, Дамиана архиепископа Курскаго и Никодима епископа Белгородскаго, священномучеников Николая и Василия пресвитеров; преподобных и богоносных отец наших: Авраамия Кенскаго и Елеазара Анзерскаго, Антония Римлянина и Евфросина Синозерскаго, Адриана Ондрусовскаго и Кассиана Комельскаго, Александра Свирскаго и Александра Ошевенскаго, Арсения Коневскаго и Никодима Кожеезерскаго, Вассиана и Ионы Пертоминских, Афанасия Сяндемскаго и Афанасия Наволоцкаго, Варлаама Керетскаго и Варлаама Пинежскаго, Геннадия и Никифора Важеозерских, Германа Белоезерскаго и Диодора Юрьегорскаго, Сергия и Германа Валаамских, Евфимия и Антония Карельских, Зосимы, Савватия, Германа Соловецких, Ионы Яшезерскаго и Лонгина Яренгскаго, Сергия и Варвары Островских, Макария Высокоезерскаго и Лазаря Муромскаго, Корнилия Палеостровскаго, Трифона Печенгскаго и Феодорита Кольскаго, Пахомия Кенскаго и Кассиана Соломенскаго, Корнилия и Ферапонта Островских, святаго блаженнаго Фаддея Петрозаводскаго, святаго праведнаго отца нашего Иоанна Кронштадтскаго и всех святых, в земли Карельстей просиявших, ихже и память ныне совершаем, святых праведных Богоотец Иоакима и Анны и всех святых, молим Тя, Многомилостиве Господи, услыши нас, грешных, молящихся Тебе, и помилуй нас.

Владыко Многомилостиве, Господи, Иисусе Христе Боже наш, молитвами Всепречистыя Владычицы нашея Богородицы и Приснодевы Марии, силою Честнаго и Животворящаго Креста, предстательствы честных Небесных Сил безплотных, честнаго славнаго Пророка, Предтечи и Крестителя Иоанна, святых славных и всехвальных апостол, святых славных и добропобедных мучеников, преподобных и богоносных отец наших и всех святых, в земли Карельстей просиявших, ихже и память ныне совершаем, святых праведных Богоотец Иоакима и Анны и всех святых Твоих, благоприятну сотвори молитву нашу, даруй нам оставление прегрешений наших, покрый нас кровом крилу Твоею, отжени от нас всякаго врага и супостата, умири нашу жизнь, Господи, помилуй нас и мир Твой, и спаси души наша, яко Благ и Человеколюбец.

На стиховне стихиры, глас 2:

Святых память велие торжество явися земли нашея:/ сии бо воистину делы и словесы и многовидным житием/ и от Бога дарованием соделашася святи./ И ныне, прославльшему их Христу предстояще,/ молятся о нас прилежно,/ любовию совершающих светлое их торжество.

Стих: Честна пред Господем/ смерть преподобных Его.

Преподобнии отцы всечестнии,/ Лазарю и Афанасие,/ Ионо и Вассиане,/ вы, на колесницу добродетелей возшедше,/ к Богу востекосте,/ победныя почести приемлюще./ Темже блажим вас, прехвальнии.

Стих: Блажен муж, бояйся Господа,/ в заповедех Его восхощет зело.

Ликом постническим сочетавшеся,/ преподобнии Макарие и Лонгине,/ ныне во обителех Небесных живете,/ веселящеся, идеже ликуют Ангели./ Темже поминайте любовию блажащих вас на земли/ и святое ваше творящих празднество.

Слава, глас 3:

Преподобнии отцы, мира красоту и сладость временную возненавидевше/ и иноческое житие возлюбивше,/ Ангелом собеседницы бысте/ и светильницы многосветлии земли нашей,/ чудесами, яко звезды сияете,/ всех нас поминайте, совершающих священную память вашу,/ мы бо чада ваша/ и вас на помощь призываем,/ просяще даровати нам мир и велию милость.

И ныне, Богородичен, глас тойже: Творец и Избавитель мой, Пречистая:

Тропарь, глас 8:

Якоже плод красный Твоего спасительнаго сеяния,/ земля Карельская приносит Ти, Господи,/ вся святыя в той просиявшия./ Тех молитвами в мире глубоце,/ Церковь и страну нашу Богородицею соблюди Многомилостиве.

На утрени

Величание:

Величаем вас,/ вси святии, в земли Карельстей просиявшии,/ и чтим святую память вашу,/ вы бо молите за нас/ Христа Бога нашего.

Таже седален, глас 3:

Днесь просия ваша память, святии, якоже пресветлая заря над землею нашею тьму безбожия и нечестия отгоняющи и сердца верных просвещающи, во еже пети Христу: Иисусе, Спасе наш, слава Тебе.

Слава, глас тойже:

Воспоим, вернии, во благознаменитый день святых наших, предварим лице Христа во исповедании и во псалмех воскликнем Ему: призри, Господи, с небесе и виждь, и посети виноград сей, и утверди и, егоже насади десница Твоя.

И ныне, Богородичен:

Ты еси Похвала верных, Безневестная, Ты Предстательница и Прибежище христиан, Стена и Пристанище: к Сыну бо Твоему мольбы прилежныя возносиши, Всенепорочная, и спасаеши от бед верою и любовию Богородицу Чистую Тебе славящия.

По 50-м псалме стихира, глас 6:

Иже на земли Ангели/ и на Небеси человецы Божии,/ мира благое украшение/ и Отечества нашего похвалу,/ всех святых земли Карельския почтим,/ насаждени бо в дому Господни,/ процветоша праведно/ и, яко кедри в пустыни, умножиша стадо Христово словесных овец/ в преподобии и правде.

Канон, глас 2.

Песнь 1.

Ирмос: Грядите, людие,/ поим песнь Христу Богу,/ раздельшему море и наставльшему люди,/ яже изведе из работы египетская,/ яко прославися.

Припев: Вси святии земли Карельския, молите Бога о нас.

Светильников светлых множество на свещнице церковней яви Господь: святителей, мучеников, преподобных и праведных, иже житием своим землю Олонецкую украсиша.

Огнь Божественный возсия и оживотвори зде пустыню, прежде безплодну и необитаему, последи же подвиги преподобных Сергия и Германа, аки крин, процветшую и инок множество взрастившую.

Благодаряще, поим песнь Христу, пославшему нам Зосиму, Савватия, Германа Соловецких чудотворцев, иже, мира отвратившеся, в непроходимыя и пустыя острови Соловецкия вселишася и подвиги своими Превечному Богу угодиша.

Добропобеднии Антоние Сийский, Афанасие Наволоцкий, Варлааме Пинежский! Вы, стрел разжженных лукаваго и огня, в лице вам дышущаго, не убоявшеся, Христа проповедасте и на страдание мужественно потекосте. Темже ныне со святыми водворяетеся.

Богородичен: Воспоим песнь Пречистей Богородице Деве, славяще рождество Христа Бога непостижимое и вопиюще: помилуй стадо Твое, едина Всепетая.

Песнь 3.

Ирмос: На камени мя веры утвердив,/ разширил еси уста моя на враги моя;/ возвесели бо ся дух мой, внегда пети:/ несть свят, якоже Бог наш,/ и несть праведен паче Тебе, Господи.

Многомилостиве Господи, сохрани землю Олонецкую и даждь ей быти ненаветней от врагов молитвами святых Твоих, в ней подвизавшихся.

Утверди нас в Тебе, Господи, молитвами собеседник Твоих Александра Свирскаго и Елисея Сумскаго, ихже искуси, обрете достойны Себе и чудесы прослави.

Киими песньми восхвалим угодников Божиих, Лазаря и Афанасия Муромских, обителию святою пустыню украсивших и светом веры Христовы лопарей просветивших?

Смирением, яко ризою, облеклся еси, священномучениче Николае, егда клеветницы без вины на смерть тя осудиша. Темже величаем страдания твоя и славословим кончину твою.

Богородичен: Ангел Святейшая, Богородице Дево, под Твой кров притекаем, Владычице, людие Твои, Помощница буди нам, рабом Твоим, и спасения Подательница.

Песнь 4.

Ирмос: Пришел еси от Девы, не ходатай, ни ангел,/ но Сам, Господи, воплощся,/ и спасл еси всего мя человека:/ тем зову Ти:/ слава силе Твоей, Господи.

Радостно едиными усты и сердцем величаем вас, святии земли Олонецкия, и чтим святую память вашу, вы бо молите о нас Христа Бога нашего.

Единонравно на земли поживше и земная мудрования презревше, ум в горняя вперили есте, богомудрии Геннадие и Никифоре Важеозерстии, отцы всехвальнии.

Духом провидя славу земли Северныя, Антоние Римлянине достославне, от ветхаго Рима на камени в тую преплыл еси и веру правую в ней утвердил еси.

Незлобив, праведен и милостив быв, Артемие Веркольский, блаженства Небеснаго в земли кротких сподобился еси, идеже вкушаеши вечнаго утешения.

Богородичен: Свет Божественный рождши, явилася еси, Богородице Дево, Заступница усердная рода христианскаго.

Песнь 5.

Ирмос: Света Подателю и веков Творче, Господи,/ во свете Твоих повелений настави нас:/ разве бо Тебе иного Бога не знаем.

Тихое и доброе пристанище яви нам Господь, в земли Олонецтей Божественный Свой виноград насадив, из коего вино чудное источи, спасительным и духовным питием нас напояя.

Явил еси, Христе Боже, угодники Твоя, Авраамия и Корнилия Палеостровских, ихже терпеливно на добрых пажитех веры возрастил еси.

Преподобнии отцы наши, Ионо Яшезерский и Ионо Клименецкий, вы слезными потоки души напоили есте и непорочнаго жития духовное благомощие явили есте, богомудрии.

Радуйся, преподобне отче Макарие Высокоезерский, ты, яко мудрая пчела, мед духовный собирая, сосуд избранный явился еси. Темже достойно тя ублажаем.

Богородичен: Богородице Дево, Ты еси нам святое ограждение, источник исцелений и совершенное спасение душ наших.

Песнь 6.

Ирмос: В бездне греховней валяяся,/ неизследую милосердия Твоего призываю бездну:/ от тли, Боже, мя возведи.

Воспеваем вас, вси святии земли Олонецкия, яко противу начал и властей злобы поднебесныя дерзновенно ополчистеся и тех коварства любовию и смирением победисте.

Звезды пресветлыя явистеся, вернии раби Господни: Пахомие Кенский, Александре Ошевенский, Кириаче Каргопольский. Вы бо, узким путем шествовавше, яко постницы, в алчбе и жажде временное житие проводисте; яко послушницы, Христово смирение стяжасте; и яко молитвенницы, блаженство плача о гресех познасте.

Трудницы Господни бысте, преподобнии отцы наши, Афанасие Сяндемский, Елеазаре Анзерский, образ злострадания и терпения показавшии, страстей прилоги и козни вражия попалившии и поругания яко врачество чистительное испившии.

Врага рода человеческаго именем Христовым отгнав, преподобне Трифоне Печенгский, языческая жертвы упразднил еси и жертву хвалы на месте сем Богу принесл еси.

Богородичен: Исцелений неоскудное Сокровище еси нам, Богородице Дево, молим Тя, Владычице, даруй нам душ очищение и от бед свобождение.

Кондак, глас 3:

Днесь лик святых, в земли Карельстей Богу угодивших,/ предстоит в церкви и невидимо за ны молится Богу./ Ангели с ним славословят/ и вси святии Церкве Русския ему спразднуют,/ о нас моляще купно Превечнаго Бога.

Песнь 7.

Ирмос: Божия снизхождения/ огнь устыдеся, в Вавилоне иногда,/ сего ради отроцы в пещи, радованною ногою,/ яко в цветнице, ликующе, пояху:/ благословен еси, Боже отец наших.

Храм Бога жива суще, святии отцы наши, любве Его ради живота своего не пощадили есте, темже, миродержателя тьмы века сего победивше, вся сети его, яко паучину, разорили есте, поюще: благословен еси, Боже отец наших.

Возсияли есте в мире, яко светильницы светлии, преподобнии отцы наши, Адриане Ондрусовский и Киприане Сторожевский, неусыпающую скорбь о гресех стяжавшии и слезы многия о них пролившии. Темже, послушанию и смирению навыкше, Христу Спасителю взывали есте: благословен еси, Боже отец наших.

Обители Духа Пресвятаго явилися есте, преподобнии отцы наши, Авраамие и Никодиме Кожеозерстии, Евфимие и Феликсе Карельстии, многими скорбьми в Царство Небесное вшедшии, идеже ныне воспеваете: благословен еси, Боже отец наших.

Чудотворче Кронштадтский Иоанне! Ты молитвою твоею падшия возставлял еси, недужныя исцелял еси. Ныне же, во славе Небесней пребывая, не остави нас, почитающих память твою и верою зовущих: благословен еси, Боже отец наших.

Богородичен: Заре Светоносная и Сене Небесная, Богородице Дево, Свет неизреченно рождшая, просвети, Владычице, и наша души, грехи омраченныя.

Песнь 8.

Ирмос: Победители мучителя и пламене/ благодатию Твоею бывше,/ заповедем Твоим зело прилежаще,/ отроцы вопияху:/ благословите, вся дела Господня, Господа.

Премирныя жизни образ миру явившии, избрание свое подвиги благочестия оправдавшии и правый путь к Небеси нам показавшии, преподобнии отцы наши, молите Бога о нас.

Основание непоколебимое Церкве нашея явилися есте, отцы преподобнии Кирилле Челмогорский, Арсение Коневский, Диодоре Юрьегорский, благое иго Христово люботрудно понесшии, Христа ради всеконечно себе отвергшиися и в терпении души ваша стяжавшии.

Широкий путь греха презревше, путем тесным и прискорбным до конца дний шествовали есте, преподобнии отцы наши Варлааме Керетский, Евфросине Курженский, Кассиане Соломенский, и, смирением плоть духу поработивше, Небесных Обителей достигли есте.

О, пастырю блаженне Феофане! Ты, в тайных подвизех течение совершая, яко светильник пресветлый людем явился еси и чада духовная добре воспитал еси, лучами словес твоих путь ко спасению указуя.

Богородичен: Угаси в нас пламень греховный, Богородице Дево, и волю Сына Твоего научи творити нас, Едина Чистая и Благословенная.

Песнь 9.

Ирмос: От Бога Бога Слова,/ неизреченною мудростию, пришедшаго обновити Адама,/ ядию в тление падшаго люте,/ от Святыя Девы неизреченно воплотившагося нас ради,/ вернии, единомудренно песньми величаем.

Песньми духовными прославляем вас, преподобнии! Вы бо, вся хотения Господня исполнивше и многия скорби в мире претерпевше, на Небеса со славою возшли есте, и тамо ныне с лики ангельскими Бога величаете.

Преподобнии отцы наши Елеазаре и Назарие Олонецтии! Вы, единомудренни бывше и всякое плотское пристрастие вседушно отвергше, едино на потребу подвиги велиими взыскали есте.

Святаго блаженнаго Фаддея Петрозаводскаго да ублажим, той бо отвержением себе Богу последова и подвигом юродства разум Христов стяжа. Сего ради, многая страдания претерпев, в покой Царствия Небеснаго вниде.

О, велицыи сродницы наши, именованнии и безыменнии, явленнии и неявленнии, Небеснаго Сиона достигшии и славу многу от Бога приимшии! Утешение нам, в скорби сущим, испросите, веру правую в нас укрепите и люди расточенныя соберите, песнь благодарения, яко дар любве, от нас приемлюще.

Богородичен: Богородице Дево, Надеждо ненадежных и нечаянная Радосте наша! Величаем Тя, Ты бо еси верных Заступление и душ наших Спасение.

Светилен, глас 1:

Радуйся, славная земле Карельская, слава бо святых твоих в тебе возсия. Ликуйте ныне и веселитеся, благочестивии людие, яко сонм велий ходатаев Небесных имате пред Богом нашим.

На хвалитех стихиры, глас 4:

Преподобнии отцы наши,/ вы, яко цвети духовнии земли Карельския/ и сокровище неистощимое, нам явилися есте./ Сего ради прославляем прославльшаго вас Господа,/ егоже молим даровати душам нашим/ мир и велию милость.

Взыграйте днесь, горы и холми,/ восплещите, море и езера водная,/ срадуйтеся и сликовствуйте нам, вернии людие,/ в светоносный день памяти преподобных Сергия и Германа,/ на горах Валаамских,/ яко финиксы, процветших.

Приидите, празнолюбцы и постников сословие,/ верою и любовию сошедшеся,/ постники дивныя, Зосиму и Савватия, почтим./ О, всеблаженнии, преподобным сожителие и ангелом собеседницы,/ о нас молитеся ко Господу,/ помиловатися душам нашим.

Слава, глас 6:

Преподобнии отцы земли нашея,/ вы, в законе Господни день и ночь поучавшеся,/ яко древеса, насажденнии при исходищих вод бысте/ и плод страданий в терпении Христу принесосте./ Темже, дерзновение к Нему имуще,/ испросите нам очищение грехов/ и велию милость.

И ныне, глас тойже: Богородице, Ты еси Лоза истинная:

Молитва

О, преславнии и всехвальнии угодницы Божии, вси святии в земли Карельстей просиявшии! К вам, яко теплым ходатаем и предстателем нашим с молитвою смиренно прибегаем: умолите Милостиваго Бога, да дарует нам тихое и безмятежное житие в веце сем, да избавит нас от враг видимых и невидимых, от искушений и напастей, от соблазнов лукаваго и всякаго зла. На Страшнем же Суде Своем сподобит нас деснаго стояния и наследники Царствия Небеснаго сотворит, идеже купно с вами прославим Пречестное и Великолепое имя Отца и Сына и Святаго Духа, ныне и присно и во веки веков. Аминь.

Источник: Текст службы утвержден на заседании Священного Синода 8 декабря 2020 года (журнал № 99).

Ме́сяца а́вгуста в 5-й день и ме́сяца ма́я в 23-й день

Новому́чениц Евдоки́и, Да́рии, Да́рии и Мари́и Пу́зинских

На ма́лей вече́рни

На Го́споди, воззва́х: стихи́ры, глас 1:

Ди́вен Бог во святы́х Свои́х,/ в ро́дех христиа́нских чудоде́йствуяй/ и но́выя избра́нники Своя́ явля́яй./ Зрим бо уго́дниц Бо́жиих:/ новому́чениц Евдоки́ю, Да́рию, ину́ю Да́рию и Мари́ю,/ за Христа́ пострада́вших/ и дерзнове́ние к Нему́ иму́щих// испроси́ти душа́м на́шим ве́лию ми́лость.

Венча́лися есте́ неувяда́емыми венцы́/ от руки́ Вседержи́теля Бо́га,/ му́ченицы всехва́льныя,/ зло́бу врага́ терпе́нием и моли́твою победи́вшия./ Сего́ ра́ди усе́рдно вас мо́лим:/ помози́те нам по́двигом до́брым подвиза́тися// и ве́ру правосла́вную соблюсти́.

Живу́щия по сме́рти, му́ченицы прехва́льныя,/ посеща́ете всех, притека́ющих к моще́м ва́шим,/ от лю́тых страсте́й и бед избавля́ете,/ исцеле́ния же моли́твами ва́шими подае́те/ и спаса́ете от де́монскаго нахожде́ния,/ прося́ща Бо́га дарова́ти прегреше́ний проще́ние// чту́щим святу́ю па́мять ва́шу.

А́гницы слове́сныя/ лю́тым му́кам пре́даны, Боже́ственною благода́тию укрепи́стеся;/ те́мже, мучи́телей преще́ния му́жественне посрами́вша,// в Черто́г Жениха́ Христа́ внидо́сте, всесла́вныя.

Сла́ва, глас 6:

Днесь наста́ ве́лие торжество́/ в земли́ Нижегоро́дстей/ и во всей Це́ркви Ру́сстей,/ прославля́ются бо му́ченицы добропобе́дныя,/ житие́м чи́стым Бо́гу угоди́вшия./ Ны́не же, Христу́ предстоя́ща,/ мо́лятся о нас приле́жно,// любо́вию соверша́ющих све́тлое их торжество́.

И ны́не, предпра́зднства, или́ Богоро́дичен.

На стихо́вне стихи́ры, глас 7:

Лик новособра́нный:/ добропобе́дных Евдоки́ю, Да́рию, Да́рию и Мари́ю,/ му́чениц Госпо́дних,/ любо́вию Христо́вою связу́емых,/ пе́сньми восхва́лим, мучениколю́бцев собра́ние,/ с ве́рою к ним взыва́юще:/ от вся́кия изба́вите нас беды́ и ну́жды,/ всечестны́я страда́лицы,// и моли́теся о спасе́нии душ на́ших.

Стих: Ди́вен Бог во святы́х Свои́х,// Бог Изра́илев.

Всехва́льныя му́ченицы,/ Це́ркве но́вое утвержде́ние,/ ве́рных похвало́, безбо́жных посрамле́ние,/ словеса́ Спа́сова де́лом соверши́вшия/ и многоразли́чными страда́нии Ца́рство Бо́жие восхи́тившия,// моли́теся о спасе́нии душ на́ших.

Стих: Святы́м, и́же суть на земли́ Его́,// удиви́ Госпо́дь вся хоте́ния Своя́ в них.

По́двигу дре́вних отце́в поревнова́вша/ и преподо́бным ма́терем в ве́ре подража́вша,/ Христа́ ра́ди подвиза́стеся тве́рдо,/ И́же, укрепи́ немощно́е ва́ше естество́/ и обогати́в дарова́нии Ду́ха,/ призва́ к му́ченическому по́двигу// во спасе́ние душ ва́ших.

Сла́ва, глас 8:

Всевы́шний Влады́ко,/ в Тро́ице сла́вимый и покланя́емый,/ уще́дри ны мольба́ми му́чениц,/ обагре́нии кро́вными украси́вшихся,/ пред мучи́тели дерзнове́нно Тя испове́давших,/ Еди́наго И́стиннаго Бо́га всех,// И́же вчера́ и днесь То́йже, и во ве́ки.

И ны́не, предпра́зднства, или́ Богоро́дичен.

Тропа́рь пи́сан на вели́цей вече́рни.

На вели́цей вече́рни

Блаже́н муж: 1-й антифо́н. На Го́споди, воззва́х: стихи́ры на 8, глас 8:

О, пресла́внаго чудесе́!/ Днесь новому́ченицы прославля́ются/ и пре́лести мрак разгоня́ется,/ ве́ра христиа́нская возвыша́ется/ и коле́блется нече́стие,/ ра́дуются ве́рнии и пра́здник составля́ют,/ вопию́ще Христу́ Бо́гу:// му́чеников похвала́ и побе́да Ты еси́, Всеси́льне.

Ве́лий еси́, Го́споди, и чу́дна дела́ Твоя́!/ Род ве́рных ны́не торжеству́ет:/ новоявле́нныя страстоте́рпицы Евдоки́я, Да́рия, Да́рия и Мари́я,/ я́же немощны́ми телесы́,/ си́лою же Всемогу́щаго Бо́га укрепля́емы,/ кре́пце му́ки претерпе́ша./ Те́мже о них Тебе́ вопие́м:// страда́льцев похвала́ и побе́да Ты еси́, Всеси́льне.

Глас 6:

От ю́ности за́поведем Бо́жиим внима́ла еси́,/ чистоту́ духо́вную усе́рдно храня́щи,/ и путь юро́дства избра́ла еси́, блаже́нная ма́ти Евдоки́е,/ в годи́ну же лю́тую, я́ко наста́вница му́драя, мно́гия ду́ши к Бо́гу обрати́ла еси́./ Ны́не, на Небесе́х в ра́дости непреста́нной пребыва́ющи,// воспева́еши воскре́сшаго Христа́.

Просла́вим днесь други́нь ве́рных,/ приснопа́мятную Да́рию,/ ве́лию подви́жницу, ду́хом ко Го́споду пламене́вшую,/ и другу́ю Да́рию,/ моли́тву Иису́сову непреста́нно твори́вшую/ и псалмы́ по вся дни воспева́вшую,/ и Мари́ю смире́нную,/ смерть безстра́шно прие́мшую./ Сия́ четы́ри, же́нским немощны́м естество́м/ полки́ де́монския му́жески на земли́ победи́вша,/ то́чат исцеле́ний струи́// и укрепля́ют сердца́ ве́рных.

Сла́ва, глас 5:

Все мирско́е отложи́вша пристра́стие,/ благу́ю же часть избра́вша,/ ма́тери на́ша Евдоки́е, Да́рие, Да́рие и Мари́е,/ в воздержа́нии и моли́твах,/ бде́нии и поще́нии усе́рдно подвиза́лися есте́/ и сосу́ди чи́стии Свята́го Ду́ха яви́лися есте́./ Те́мже, неизрече́нных чуде́с дар от Бо́га прие́мша,/ моли́теся неосла́бно ко Го́споду/ мир дарова́ти земли́ Ру́сстей// и душа́м на́шим ве́лию ми́лость.

И ны́не, предпра́зднства, или́ Догма́тик.

Вход. Проки́мен дне. И чте́ния три преподобному́ченическая.

На лити́и стихи́ра хра́ма, и святы́х, глас 6:

Все отложи́вша жите́йское томле́ние/ и сла́дость теку́щую презре́вша,/ Крест взя́сте, я́ко и́го Боже́ственное,/ и Христу́ после́довасте,/ и к Небе́сному поко́ю чу́дно всели́стеся./ О подви́жницы и страда́лицы блаже́нныя,/ за Христа́ тридне́вная избие́ния и смерть претерпе́вшия,/ прииди́те посреде́ нас неви́димо,/ предначина́юща торжество́ и пе́ние,/ и сподобля́юща даро́в невеще́ственных// ваш пра́здник соверша́ющих святоле́пно.

Сла́ва, глас 4:

Кто изглаго́лет по́двиги и страда́ния ва́ша,/ ма́тери блаже́нныя Евдоки́е, Да́рие, Да́рие и Мари́е?/ Кто по достоя́нию восхва́лит по́стничество ва́ше и ску́дное житие́:/ моли́твы непреста́нныя и удруче́ние те́ла,/ страсте́м противле́ние и всено́щное стоя́ние,/ и́миже себе́ ко испове́данию ве́ры Христо́вы предугото́вили есте́?/ Сего́ ра́ди венцы́ побе́дныя от Спа́са восприе́мша,/ моли́теся приле́жно// о ве́рою чту́щих святу́ю па́мять ва́шу.

И ны́не, предпра́зднства, или́ Богоро́дичен.

На стихо́вне стихи́ры, глас 4:

Днесь, ве́рнии, стецы́теся/ и о́бщее торжество́ соста́вите:/ но́выя бо яви́шася му́ченицы,/ дще́ри преподо́бнаго Серафи́ма нарече́нныя,/ оби́тель Диве́евскую и доны́не незри́мо посеща́ющия// и моля́щияся о спасе́нии душ на́ших.

Стих: Ди́вен Бог во святы́х Свои́х,// Бог Изра́илев.

Ве́ры правосла́вныя и́стинныя храни́тельницы/ и уста́ва церко́внаго усе́рдныя блюсти́тельницы,/ ве́лий глад послуша́ния ра́ди терпя́ща,/ в телесе́х ва́ших Христа́ просла́вили есте́,/ му́ченицы Евдоки́е, Да́рие, Да́рие и Мари́е,/ же́стоко бо мучи́тели у́ды ва́ша сокруши́ша,/ вы же избие́ния до́блественно претерпе́вша,/ Бо́га да́же до сме́рти испове́дали есте́.// Того́ моли́те о спасе́нии душ на́ших.

Стих: В це́рквах благослови́те Бо́га,// Го́спода от исто́чник Изра́илевых.

С пострада́вшими Христа́ ра́ди,/ на Небесе́х предстоя́щи,/ му́ченице Евдоки́е сла́вная,/ в со́нном виде́нии скорбя́щей деви́це глаго́лала еси́:/ плач свой преложи́ на ра́дость,/ моли́тву Иису́сову в молча́нии твори́ непреста́нно,/ аз бо посреде́ Иерусали́ма Го́рняго// молю́ся о спасе́нии душ ва́ших.

Сла́ва, глас 1:

Живу́ща по сме́рти, прехва́льныя,/ посеща́ете вся, притека́ющия к моще́м ва́шим,/ и от лю́тых страсте́й всегда́ покрыва́ете,/ и от бед избавля́ете,/ источа́ете же исцеле́ния/ и спаса́ете от де́монскаго нахожде́ния,/ прося́ща Бо́га дарова́ти прегреше́ний проще́ние// чту́щим святу́ю па́мять ва́шу.

И ны́не, предпра́зднства, или́ Богоро́дичен.

Тропа́рь, глас 4:

Ца́рствия ра́ди Небе́снаго/ мир и вся я́же в ми́ре оста́вили есте́,/ тесноту́ соверше́ннаго послуша́ния возлюби́вша,/ ди́вныя подви́жницы и Христа́ ра́ди му́ченицы/ в годи́ну лю́тых испыта́ний в земли́ Нижегоро́дстей процве́тшия,/ блаже́нныя ма́тери на́ша Евдоки́е, Да́рие, Да́рие и Мари́е,// моли́теся о спасе́нии душ на́ших.

На у́трени

По 1-м стихосло́вии седа́лен, глас 4:

От младе́нства Христу́ себе́ обручи́вши, му́ченице Евдоки́е,/ посто́м, бде́нием и непреста́нною моли́твою/ дар прозре́ния и разсужде́ния духо́внаго стяжа́ла еси́,/ те́мже и по кончи́не твое́й по́мощь и утеше́ние подае́ши// всем, чту́щим честна́я страда́ния твоя́.

Сла́ва, и ны́не, предпра́зднства, или́ Богоро́дичен, глас то́йже:

Благода́рственно воспева́ти от се́рдца/ и приле́жно проси́ти Твоя́ ми́лости, Влады́чице,/ раби́ Твои́ собра́шася, зову́ще и глаго́люще:/ Пресвята́я Де́во,/ предвари́ и изба́ви нас от враг ви́димых и неви́димых и вся́каго преще́ния,// Ты бо еси́ на́ше заступле́ние.

По 2-м стихосло́вии седа́лен, глас 4:

По́двигом жития́ своего́ му́ченицы Евдоки́я, Да́рия, Да́рия и Мари́я/ на лю́тую смерть себе́ предугото́виша/ и, тридне́вная избие́ния Христа́ ра́ди претерпе́вша,/ на пого́сте убие́ны бы́ша./ На ме́сте же их погребе́ния мно́гая зна́мения яви́шася,// да утвердя́тся сердца́ в ве́ре Правосла́вней.

Сла́ва, и ны́не, предпра́зднства, или́ Богоро́дичен, глас то́йже:

Прииди́те, лю́дие,/ ублажи́м Засту́пницу Усе́рдную ро́да христиа́нскаго,/ се бо предстои́т Престо́лу Царя́ Сла́вы/ и со слеза́ми мо́лит о земне́м уде́ле Свое́м./ С Не́юже вку́пе и собо́ри святы́х новому́ченников вопию́т немо́лчно:// Влады́ко Христе́, спаси́ зе́млю Ру́сскую.

Велича́ние:

Велича́ем вас,/ святы́я му́ченицы Евдоки́е, Да́рие, Да́рие и Мари́е,/ и чтим честна́я страда́ния ва́ша,/ я́же за Христа́// претерпе́ли есте́.

Псало́м избра́нный:

Бог нам прибе́жище и си́ла:

По полиеле́и седа́лен, глас 8:

Удиви́шася му́жеству ва́шему, страда́лицы,/ ли́цы а́нгельстии и правосла́вных собо́ри:/ ка́ко в телеси́ немощне́м же́нстем стра́ждущия,/ безпло́тныя враги́ си́лою Ду́ха победи́сте?/ Те́мже благода́рственно о вас воспева́ют вси Пресвяту́ю Тро́ицу,// яви́вшую в после́дняя ле́та му́ченицы, дре́вним равноче́стныя.

Сла́ва, и ны́не, Богоро́дичен:

Живу́щим, Госпоже́, рабо́м Твои́м в земно́й юдо́ли сей бу́ди Уте́шительница,/ отходя́щим от ми́ра сего́ – Покрови́тельница/ и стоя́щим на Суди́щи стра́шнем Засту́пница яви́ся,// избавля́ющи осужде́ния Твои́м всемо́щным предста́тельством.

Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Ма́рка, зача́ло 21.

По 50-м псалме́ стихи́ра, глас 6:

Днесь па́мять му́чениц/ Евдоки́и, Да́рии, ины́я Да́рии и Мари́и соверша́юще,/ досто́йно сих да ублажи́м./ Ты́я бо вои́стину, обнища́вша ду́хом, обогати́шася,/ кро́тки бы́вша, зе́млю кро́тких насле́доваша,/ пла́кавша, уте́шишася,/ алка́вша пра́вды, насы́тишася,/ ми́ловавша, поми́лованы бы́ша,/ чи́сты бы́вша се́рдцем, Бо́га, я́коже мо́щно, узре́ша,/ миротвори́вша, Боже́ственнаго сподо́бишася сыноположе́ния,/ гони́мы же и му́чимы пра́вды ра́ди,/ на Небесе́х ны́не веселя́тся и ра́дуются,/ и приле́жно мо́лятся Го́сподеви// поми́ловатися ду́шам на́шим.

Кано́н, глас 8.

Песнь 1.

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,// песнь Бо́гови воспева́юща.

Духо́вный лик соста́вльше, ве́рнии,/ сла́вныя страстоте́рпицы, я́ко свети́льники Це́ркве, озаря́ющия сердца́, пе́сньми почти́м,/ ве́рою и любо́вию па́мять их соверша́юще.

Восхва́лим днесь четвери́цу сла́вную:/ блаже́нную Евдоки́ю, Да́рию, ину́ю Да́рию и Мари́ю,/ подо́бниц дре́вним му́чеником по́двиги и страда́нии.

В ле́та, в ня́же огнь любве́ ко Христу́ уга́сл есть,/ яви́стеся, му́ченицы до́блия./ Моли́теся, да огнь Боже́ственныя любве́/ согре́ет охладева́ющая сердца́ на́ша.

Богоро́дичен: Пресвята́я Богоро́дице Де́во,/ Ты да́ры духо́вными от Пресвяты́я Тро́ицы па́че всех челове́к преиспо́лнена еси́;/ те́мже, благода́тию Твое́ю укрепля́еми,/ умиле́нным се́рдцем ми́лости Твоя́ прославля́ем.

Песнь 3.

Ирмо́с: Небе́снаго кру́га, Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.

Ди́вна есть, Христе́, держа́ва кре́пости Твоея́!/ Се бо ны́нешний немощству́яй род Кресто́м Твои́м вооружи́ся/ и си́лою Твое́ю си́льнаго зло́бою дре́вняго врага́ победи́.

Воспои́м вси Евдоки́ю ве́рную,/ от младе́нства крест взе́мшую, подви́г юро́дства подъе́мшую, му́дрость же духо́вную стяжа́вшую/ и путе́м а́нгельскаго жития́ еди́ному Жениху́ Небе́сному уневе́стившуюся.

Кро́тки и незло́бивы бы́вша во всем житии́ ва́шем,/ послуша́нию во́льно навы́кли есте́, му́ченицы Да́рие, ина́я Да́рие и Мари́е,/ сего́ ра́ди на Небесе́х обрели́ есте́ поко́й./ Моли́те Бо́га о душа́х на́ших.

Богоро́дичен: Жизнь ро́ждшая, Де́во Всенепоро́чная,/ се́рдца моего́ стру́пы исцели́,/ хода́тайствы Твои́ми, я́же к Сы́ну Твоему́, Богоблаже́нная.

Конда́к и и́кос предпра́зднства.

Седа́лен святы́м, глас 8:

От трудо́в земны́х и страда́ний многови́дных/ крыла́ми ве́ры во оби́тели Небе́сныя возлете́ли есте́, ма́тери богоблаже́нныя,/ иде́же Престо́лу Вседержи́теля предстои́те./ Того́ о нас моли́те/ прегреше́ний оставле́ние дарова́ти и душа́м на́шим ве́лию ми́лость.

Сла́ва, и ны́не, предпра́зднства, или́ Богоро́дичен, глас то́йже:

Милосе́рдия су́щи исто́чник,/ не лиши́ нас ми́лости Твоея́, Богоро́дице,/ но с му́ченицами, в земли́ на́шей просия́вшими, Го́спода моли́/ свободи́ти нас от рабо́ты вра́жия/ и утверди́ти во благоче́стии и чистоте́.

Песнь 4.

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Во дни и нощи́ моли́твы творя́ща,/ ни сна очи́ма, ни ве́ждома свои́ма дрема́ния не дава́ли есте́ отню́д,/ хлад и глад во́льно претерпева́юща, му́ченицы сла́вныя./ Научи́те нас моли́тися приле́жно.

Ра́дующася, терпе́ли есте́ клеветы́ и поноше́ния от челове́к/ и разли́чная стреля́ния вра́жия Христа́ ра́ди, Жениха́ Своего́,/ да любы́ Бо́жия в ми́ре сем гре́шнем возсия́ет.

Помы́сливши немощну́ю Евдоки́ю оста́вити,/ деви́ца ю́ная в со́нном виде́нии сподо́бися зре́ти преподо́бнаго Серафи́ма,/ и́же Евдоки́ю и служа́щих ей нарече́ дще́рьми свои́ми.

Богоро́дичен: Ико́ною И́верскою не то́чию Афо́н просвеща́ется,/ но и ини́и гра́ди и ве́си освяща́ются/ и, чуде́сную по́мощь прие́млюще,/ исто́чник утеше́ния в ней обрета́ют и вопию́т:/ ра́дуйся, Блага́я Врата́рнице, две́ри ра́йския ве́рным отверза́ющая.

Песнь 5.

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х// пути́ моя́ напра́ви, молю́ся.

Му́ченице Евдоки́е пресла́вная,/ доны́не просвеща́еши ду́ши челове́ческия Све́том благода́ти, тебе́ да́нныя,/ те́мже и нас, любо́вию соверша́ющих всепра́зднственную па́мять твою́,/ от бед и напа́стей изба́ви.

Жениха́ вре́меннаго не восхоте́вши зре́ти, му́ченице Да́рие,/ избие́ние от сро́дник претерпе́ла еси́/ и да́же до сме́рти еди́ному Го́споду дух горя́щий возноси́ла еси́.

В се́рдце свое́м хра́мину благоуха́нну сотво́рши,/ и ты, му́ченице Да́рие,/ о́браз и́стиннаго смире́ния и соверше́ннаго терпе́ния нам яви́ла еси́.

С вяти́тель Никола́й трикра́ты яви́ся ти, му́ченице Мари́е сла́вная,/ на по́двиг стра́нничества пе́рвее благословля́я,/ по́слежде блаже́нней Евдоки́и послужи́ти повелева́я.

Богоро́дичен: Ра́дуйся, Присноде́во, злата́я кади́льнице,/ в ню́же вложи́ся Небе́сный фимиа́м – Христо́с,/ облагоуха́яй притека́ющих к Тебе́, Богоро́дице.

Песнь 6.

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.

Четверочи́сленный страстоте́рпиц лик/ нам возсия́ от земли́ Нижегоро́дския,/ я́ко зве́зды на тве́рди церко́вней,/ ве́рныя просвеща́яй и пре́лести тьму разгоня́яй.

Боле́зней неисце́льных терпе́нием тве́рдым/ пе́рвее победи́ла еси́ страсте́й воста́ния,/ последи́, пострада́вши крепча́йше,/ низложи́ла еси́ злочести́вых держа́ву, Евдоки́е му́ченице.

Да восхва́лятся ны́не с Евдоки́ею Да́рия, ина́я Да́рия и Мари́я сла́вныя,/ послуша́нием и терпе́нием тве́рдым просия́вшия,/ Христо́ва виногра́да ро́зги добропло́дныя.

Богоро́дичен: Помо́щницу си́льну ве́дуще Тя, Всеблага́я,/ моле́ние Тебе́ прино́сим от всея́ души́:/ вонми́ и услы́ши ны, Влады́чице,/ и изба́ви вся́каго гне́ва и преще́ния Бо́жия рабы́ Твоя́.

Конда́к, глас 6:

Житие́м пра́ведным/ к досто́йному прия́тию му́ченичества себе́ угото́виша,/ тридне́вная избие́ния и смерть претерпе́ли есте́,/ неве́сты Христо́вы преди́вныя,/ блаже́нныя Евдоки́е, Да́рие, ина́я Да́рие и Мари́е./ Ны́не, мно́гими чудесы́ и исцеле́нии просия́вша,/ моли́теся приле́жно,// да спасе́т Госпо́дь ду́ши на́ша.

И́кос:

Прииди́те, мона́шествующих сосло́вие,/ прииди́те, ве́ры правосла́вныя рачи́телие,/ прииди́те, празднолю́бцы, всяк во́зраст,/ пе́сньми духо́вными похва́лим моли́твенницы на́ша:/ по́стников похвалу́, печа́льных утеше́ние,/ неду́гующих посеще́ние/ и су́щим в беда́х ско́рое вспоможе́ние,/ точа́щих всем исцеле́ния оби́льно/ и вся́кое проше́ние исполня́ющих./ И́мже ве́рно возопие́м:/ моли́теся приле́жно,// да спасе́т Госпо́дь ду́ши на́ша.

Песнь 7.

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Вои́стину побежде́н бысть ва́ми враг,/ зе́млю и мо́ре хваля́йся низпрове́ргнути,/ тверде́йшим адама́нта терпе́нием попра́сте того́,/ Христа́ в себе́ иму́ща, непобеди́мыя,/ Его́же воспева́ли есте́:/ отце́в Бо́же, благослове́н еси́.

Беззако́ния лю́тая творя́ще,/ подви́жниц Христо́вых безбо́жницы тща́хуся уби́ти,/ ико́ны же святы́я нога́ми попира́ху,/ оба́че от И́верския ико́ны Бо́жия Ма́тере свет возсия́ неизрече́нный всем ве́рным, пою́щим:/ отце́в Бо́же, благослове́н еси́.

Тридне́вная избие́ния, поруга́ния, и злохуле́ния/ претерпе́ли есте́ му́жественне, страстоте́рпицы,/ си́ми бо, я́ко зла́то, искуси́ вас Госпо́дь/ и, я́ко всесожже́ние ту́чно, прия́т./ Ему́же и воспева́ли есте́:/ отце́в Бо́же, благослове́н еси́.

Богоро́дичен: Бо́га Отца́ Дщи яви́лася еси́, Мари́е,/ Сы́на же Ма́ти, Присноде́во,/ Неве́ста же Ду́ха Свята́го, Пречи́стая,/ селе́ние Светонача́льныя Тро́ицы,/ всего́ Божества́ храм одушевле́н.

Песнь 8.

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

Согла́сно, ве́рнии, му́чениц Мари́ю, Да́рию, ину́ю Да́рию с блаже́нною Евдоки́ею воспои́м,/ я́ко низложи́тельниц врага́ и неве́ст Христо́вых, пою́щих:/ вся дела́ Госпо́дня, Го́спода по́йте и превозноси́те во вся ве́ки.

Святы́я Та́йны Христо́вы в день кончи́ны сподо́билися есте́ прия́ти от руку́ иере́я Васи́лия/ и та́ко, от Го́спода укрепля́емы, му́жески на смерть потекли́ есте́, пою́ща:/ вся дела́ Госпо́дня, Го́спода по́йте и превозноси́те во вся ве́ки.

Свы́ше назира́юща на соверша́ющих па́мять ва́шу, венцено́сицы сла́вныя,/ хода́тайствуйте у Всевы́шняго Даропода́теля/ вре́менная и ве́чная блага́я нам, зову́щим:/ вся дела́ Госпо́дня, Го́спода по́йте и превозноси́те во вся ве́ки.

Богоро́дичен: Я́же Еди́на Невмести́маго прие́мши/ и ро́ждши Бо́га Сло́ва воплоще́на,/ моли́ спасти́ся душа́м на́шим.

Песнь 9.

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют.

Влеко́мы на заколе́ние, мучи́телей вопроша́ху страстоте́рпицы:/ Христа́ испове́дахом Бо́га и тем лжу ва́шу обличи́хом,/ за ко́е беззако́ние без суда́ хо́щете нас уби́ти?/ Оба́че ны́не сла́вныя му́ченицы во сла́ве Небе́сней сия́ют.

Днесь земля́ Нижегоро́дская ва́шу па́мять пра́зднует:/ вы бо яви́стеся столпи́ и боже́ственная забра́ла, и утвержде́ние,/ моли́твенницы и засту́пницы на́ша, богоблаже́нныя.

Триипоста́сный Бо́же наш,/ но́вых му́чениц Твои́х прие́мый по́двиги и пресла́вно увенча́вый их,/ тех предста́тельством спаси́ ра́бы Твоя́/ и сподо́би ны ве́чно Твою́ держа́ву сла́вити.

Богоро́дичен: Приведи́, Де́во, к Сы́ну Твоему́ но́вых му́чениц лик четверочи́сленный/ и с ни́ми помоли́ся,/ я́ко да, несвети́маго огня́ изба́вльшеся,/ сподо́бимся Ца́рствия Небе́снаго.

Свети́лен:

Приими́, Го́споди, но́выя му́ченицы,/ Евдоки́ю блаже́нную, Да́рию, ину́ю Да́рию и Мари́ю,/ я́ко же́ртву соверше́нную, я́ко благово́нный фимиа́м, я́ко ми́ро многоце́нное,/ освяща́ющее и просвеща́ющее ду́ши на́ша.

Сла́ва, и ны́не, предпра́зднства, или́ Богоро́дичен:

Воспои́м днесь хвалы́ Пресвяте́й Мари́и Де́ве,/ плоть взаимода́вшей Еди́ному от Святы́я Тро́ицы, от Нея́ челове́ком ро́ждшемуся./ Сего́ ра́ди велича́ем Ю́, я́ко Ма́терь Све́та и Богоро́дицу.

На хвали́тех стихи́ры, глас 6:

Прииди́те, мучениколю́бцы вси,/ воспои́м новому́чениц Христо́вых,/ Евдоки́ю, Да́рию, ину́ю Да́рию и Мари́ю,/ сия́ бо яви́шася в после́дняя времена́,/ сла́ва и похвала́ Це́ркве Ру́сския,/ те́плыя предста́тельницы на́ша,/ немощству́ющих вра́чеве изря́дныя,/ скорбя́щих утеше́ние,// я́же мо́лятся, о е́же спасти́ся нам.

Прииди́те, безпло́тных ли́цы,/ во пло́ти су́щим, спра́зднуйте нам/ в честне́й па́мяти страстоте́рпиц:/ сия́ бо, телеса́ нося́ща,/ я́ко безпло́тныя, Христа́ ра́ди подвиза́шася/ и лю́тых мук не убоя́шася./ С ними́же моли́теся,// о е́же спасти́ся нам.

Прииди́те, ве́рных мно́жества,/ восхва́лим но́выя му́ченицы и а́гницы слове́сныя,/ я́же от богобо́рных власте́й му́жески му́ки претерпе́вша,/ те́плыя моли́твенницы пред Го́сподем яви́шася./ Ны́не нас подвиза́ют к сла́ве и хвале́нию Бо́га,/ укре́пльшаго их немощно́е естество́/ и обогати́вшаго дарова́нии Ду́ха,// во спасе́ние душ на́ших.

Сла́ва, глас 8:

Ра́дуйся, пресла́вная Нижегоро́дская земле́,/ лику́й, о Бо́зе торжеству́ющи,/ тебе́ бо даде́ся многоце́нное сокро́вище,/ лик четверочи́сленный новому́чениц, обогати́вших тя,/ Евдоки́и, Да́рии, ины́я Да́рии и Мари́и,/ я́же, предстоя́ща Престо́лу Влады́чню,/ мо́лятся дарова́ти ми́рови мир// и душа́м на́шим ве́лию ми́лость.

И ны́не, предпра́зднства, или́ Богоро́дичен:

Влады́чице, приими́ моли́твы раб Твои́х/ и изба́ви нас// от вся́кия ну́жды и печа́ли.

На Литурги́и

Блаже́нны от кано́на предпра́зднства, Песнь 3-я, и святы́х, Песнь 6-я. Проки́мен, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Кори́нфяном, зача́ло 181. Аллилу́ия, глас 4: Терпя́ потерпе́х Го́спода, и внят ми и услы́ша моли́тву мою́. Ева́нгелие от Ма́рка, зача́ло 21. Прича́стен: Ра́дуйтеся, пра́веднии, о Го́споде:

Моли́тва

О, ди́вныя подви́жницы и засту́пницы на́ша, му́ченицы Евдоки́е, Да́рие, Да́рие и Мари́е, дре́вних му́ченик подража́тельницы и́стинныя, в тесноте́ послуша́ния без разсужде́ния, бде́ниих многотру́дных и посте́ изнури́тельнем пожи́вшия! Ны́не к вам прибега́ем и, к моще́м ва́шим припа́дающе, мо́лимся: о страстоте́рпицы святы́я, незло́бивыя а́гницы, свое́ю кро́вию Христа́ ра́ди обагре́нныя и жесто́кими преда́тели ве́ры тридне́вно му́чимыя и закла́нныя! О прозорли́вицы, мно́гия ду́ши от поги́бели ве́чныя исхи́тившия и о страда́ниих пре́жде кончи́ны от Го́спода извеще́нныя! О цели́тельницы и чудотво́рицы не то́кмо в земли́ Нижегоро́дстей, но и по всей земли́ Ру́сстей прославля́емыя! Не оста́вите нас во гресе́х и беззако́ниих поги́бнути, но помози́те в покая́нии и́стиннем житие́ на́ше сконча́ти и досто́йными яви́тися сла́вити Святу́ю Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.

Источник: Текст утвержден Священным Синодом Русской Православной Церкви 28 декабря 2017 года (журнал № 131)

Месяца мая в 28-й день

Преподобныя Елены Дивеевския

На малей вечерни

На Господи, воззвах: стихиры на 4, глас 2:

Киими похвальными песньми/ воспоим преподобную Елену,/ от юности Бога возлюбившую,/ кроток нрав имевшую,/ имже кроткому Господу Иисусу благоугодившую,/ егоже молит о спасении душ наших?

Киими похвалами/ согласно прославим Елену богомудрую,/ ангельскому житию подражавшую/ и паче сияния солнечнаго/ благодатию Святаго Духа блистающую/ и молящуюся о спасении душ наших?

Киими словесными венцы/ украсим Елену досточудную,/ добродетели цвет неувядаемый,/ ангельския чистоты ревнительницу,/ непорочную невесту Христа Бога нашего,/ егоже молит о спасении душ наших?

Кое сплетем ти славословие,/ преподобная мати Елено?/ Посещаеши бо вся, притекающия к раце мощей твоих,/ от страстей покрываеши,/ от бед избавляеши/ и молишися прилежно Богу/ о спасении душ наших.

Слава, глас 3:

Украшена добротами красоты Божественныя,/ ангелов доброты зриши, мати преподобная,/ и богатно чудеса источаеши,/ всем, с верою приходящим к честным мощем твоим,/ и молишися прегрешений оставление даровати/ празднующим святую память твою.

И ныне, праздника, или Богородичен.

На стиховне стихиры, глас 1:

Преподобнаго Серафима чадо возлюбленное,/ егоже молитвами окормляема,/ море житейское безбедно преплыла еси/ и, пристанища спасительнаго достигши,/ райскаго веселия наслаждаешися, богоблаженная.

Стих: Дивен Бог во святых Своих,/ Бог Израилев.

Исполньшися даров духовных,/ недуги неисцельныя целиши/ и огненное опаление уставляеши,/ духи лукавыя отгоняеши/ и всем в печалех помогаеши, досточудная.

Стих: Честна пред Господем/ смерть преподобных Его.

Преподобная мати Елено,/ ты, всем сердцем Бога возлюбивши,/ Вышняго Царствия достигла еси,/ помози и нам дух кротости и смирения стяжати/ и в покаянии житие провождати.

Слава, глас 3:

На земли в послушании подвизавшися/ и временную смерть претерпевши,/ яко голубица младая, на Небеса возлетела еси,/ позлащенне же криле добродетели стяжавши,/ в райстей обители вогнездилася еси,/ преподобная мати Елено.

И ныне, праздника, или Богородичен.

Тропарь писан на велицей вечерни

На велицей вечерни

На Господи, воззвах: стихиры на 8, глас 1.

Подобен: Небесных чинов:

Небесных чинов Радование,/ Пресвятая Богородица Дева,/ яви удел Свой во вселенней/ и сподоби тя, преподобная Елено,/ избранницею Ея быти и начальницею обители пречудныя./ Молися, блаженная мати, о любовию чтущих тя.

Небесную Помощницу имущи,/ вражиих наветов не устрашилася еси/ и из глубины души к Ней тепле воззвала еси:/ Владычице, спаси и приими обет мой./ И тако силою Заступницы Державныя/ козни лукаваго посрамила еси, всеблаженная.

Память твою, Елено, светло празднуем,/ ты бо, вольным стремлением тесную стезю избравши,/ светом покаяния сердце свое озарила еси/ и, к ревности жития монашескаго себе подвигши,/ Жениха Небеснаго всею душею возлюбила еси,/ волею нас ради Пострадавшаго и Искупившаго вся./ С Нимже ныне в радости воскресения пребываеши.

Глас 4:

Любовию Христовою уязвившися, мати Елено,/ преподобнаго Серафима смиренно просила еси,/ еже во иночестем чине Богу послужити./ Старец же три лета со тщанием тя испытоваше,/ послежде на жительство во обитель Дивеевскую посла,/ идеже ты, в молитве и молчании пребывающи,/ образ благонравнаго жития показала еси,/ темже и достойная наследница райския обители явилася еси.

Мироносицы жены утру глубоку/ ароматы вземше,/ ко гробу Господню приидоша,/ ты же, богомудрая мати Елено,/ мятежа мирскаго избегши,/ тихаго пристанища обители достигла еси/ и, тепле слезы проливающи,/ благоухание молитвы чистейшия,/ яко миро, Спасу принесла еси./ Божественныя же благодати световидными лучами просвещаема,/ светом богоразумия и наша сердца озари,/ верою славящих тя.

Преподобным Серафимом благословенная,/ таинственная начальнице Мельничныя обители,/ преподобная мати Елено,/ послушание того усердно исполняющи,/ чистоту в храме Божии тщательно хранила еси,/ в немже, яко в чертозе украшеннем, всегда пребывала еси./ Помози и нам, богоблаженная мати,/ чистоту сердца соблюдати/ и храм Божий со усердием посещати.

Глас 5.

Подобен: Радуйся, Живоносный Кресте:

Радуйся, невесто Христова, Елено всеславная!/ Ты, Невесту Неневестную непрестанно песнословящи,/ смирением к высоте добродетелей вознеслася еси/ и к подвигом неослабным потекла еси, зовущи:/ сердце мое да возвысится к Тебе, Слове!/ Емуже и обручилася еси, чин ангельский приимши./ Моли, богоблаженная, мир мирови даровати/ и душам нашим велию милость.

Радуйся, преподобная мати наша Елено,/ ангельския чистоты ревнительнице!/ Ты, оружие воздержания и щит молитвы присно держащи,/ правило благочестия и образ иноческаго жития явила еси./ Темже заступлением твоим плодоносны Господеви нас соделай,/ и моли мир мирови даровати/ и душам нашим велию милость.

Слава, глас 6:

Преподобная мати Елено,/ сердце твое обитель Святаго Духа соделала еси,/ из негоже благость любве Христовы источашеся,/ понеже милостыню тайно творила еси/ и сестер, в скорби сущих,/ словом добрым утешала еси./ Темже предвари на помощь тя призывающим,/ и испроси у Бога нам мудрости духовныя/ и прегрешений оставление.

И ныне, праздника, или Богородичен.

Вход. Прокимен дне. И чтения три преподобническая.

На литии стихира, глас 4:

Днесь инокинь множество сошедшеся,/ любовию воспевают тя,/ преподобная мати Елено,/ ты бо, светло украсивши светильник елеем любве и милости,/ в сретение Жениха Христа радостно притекла еси/ и в Чертог украшенный невестолепно возшла еси./ Темже, яко дерзновение имущи,/ моли милостиваго Бога/ от бед Отечеству нашему избавитися,/ мирови мир даровати/ и душам нашим велию милость.

Слава, и ныне, праздника или Богородичен.

На стиховне стихиры, глас 5:

Преподобная мати наша Елено,/ ты, в посте, молитве и богомыслии пребывающи/ и красотою нрава красящися,/ совершенным смирением, кротостию и милосердием Владыце Христу послужила еси./ Мы же, ублажающе тя, во умилении зовем:/ не отметайся от нас, чад твоих,/ и подаждь скорбящим утешение,/ в бедах всем поможение/ и моли спастися душам нашим.

Стих: Дивен Бог во святых Своих,/ Бог Израилев.

Преподобная мати наша Елено,/ ты, чисте и богоугодне на земли поживши,/ верная служительница Чистыя Девы явилася еси/ и над устроением святыя Ея Канавки усердно потрудилася еси./ Мы же, ведуще твое дерзновение к Пречистей Богородице, сице вопием:/ моли обитель Дивеевскую во благолепии сохранити/ и спастися душам нашим.

Стих: Честна пред Господем/ смерть преподобных Его.

Преподобная мати наша Елено,/ красный цвете целомудрия,/ благости и любве исполнение,/ веры неугасимая свеще,/ монашествующих путеводительнице/ и неусыпная о всех предстательнице!/ Испроси нам благодать Пресвятаго Духа,/ радости блаженныя Того приятия/ и спасение душам нашим.

Слава, глас 2:

Преподобная мати Елено,/ ты, послушанию преподобнаго Серафима навыкши/ и словеса того в сердце слагающи,/ откровений о обители Дивеевстей сподобилася еси/ и, свято хранящи вся тебе заповеданная,/ наставлением того верно последовала еси./ В храме же Божии, псалмы неустанно возносящи/ и на Крест Христов со умилением взирающи,/ о мире всего мира молилася еси,/ взывающи к Заступнице Усердной:/ Пресвятая Богородице, спаси нас.

И ныне, праздника, или Богородичен.

Тропарь, глас 1:

Добродетельми кротости, смирения и воздержания просиявши,/ таинственная начальница Мельничныя общины в Дивееве явилася еси,/ преподобная мати наша Елено,/ даже до смерти в совершеннем послушании/ старцу Серафиму пребыла еси/ и Господа лицезрети сподобилася еси./ Испроси нам дерзновение Ему Единому служити/ во спасение душ наших.

На утрени

По 1-м стихословии, седален, глас 7:

Яко звезда утренняя и солнце светлое, возсия днесь память твоя, преподобная мати Елено. Темже молим тя: ум наш, нерадением омраченный, просвети и подвигни сердца монашествующих постническому твоему житию подражати.

Слава, и ныне, Богородичен:

Удивишася, Чистая, лицы Ангельстии, како Причастница суща богатейшия радости Небесныя, во юдоли скорбей человеческих присно пребываеши, и ко всякому воплю молитвы матерски тщишися, и благодать раздаеши неиждиваемую, больных исцеляющи и печальных утешающи, Дево Мати Господня, сокровище пространнейшее милости Божественныя.

По 2-м стихословии седален, глас 1:

Осияема ныне непрестанною славою Пресвятыя Троицы, мати наша Елено, и Божественнаго веселия и радости исполнена, тепле о нас молися на Небесех, во еже избавитися нам муки вечныя.

Слава, и ныне, Богородичен:

О Тебе радуемся и Тя прославляем, Дево Пречистая, яко Невместимаго вместила еси, егоже присно моли о спасении душ наших.

Величание:

Ублажаем тя,/ преподобная мати наша Елено,/ и чтим святую память твою,/ ты бо молиши о нас/ Христа Бога нашего.

Псалом избранный: Терпя, потерпех Господа:

По полиелеи седален, глас 2:

Како воспоим терпение и послушание твое, преподобная мати? Ты бо, наставленьми преподобнаго Серафима укрепляема, благословение того на иноческий подвиг кротце ожидала еси, последи же, воли Божии повинующися, временную кончину во смирении прияла еси. Моли спастися душам нашим.

Слава, и ныне, Богородичен:

Радуйся, Ангелом радость мира приемшая; радуйся, рождшая Творца Твоего и Господа. Радуйся, сподобльшаяся быти Мати Божия.

Степенна, 1-й антифон 4 гласа. Прокимен, глас 4: Дивен Бог во святых Своих,/ Бог Израилев. Стих: В церквах благословите Бога, Господа от источник Израилевых. Всякое дыхание: Евангелие от Матфеа, зачало 104.

По 50-м псалме стихира, глас 6:

Радуйся и веселися обителе Божия Матере,/ обогатившаяся многоцелебными мощами/ преподобныя Елены досточудныя!/ Днесь бо воистину священный/ и радостный праздник наста,/ непорочная невеста Христова/ песньми духовными ублажается,/ небеса убо достойно веселятся,/ земля же радуется,/ инокини, молитвами тоя хранимии, ликуют,/ вернии благодать исцелений обретают,/ совершающе светлое торжество.

Канон, глас 8.

Песнь 1.

Ирмос: Колесницегонителя фараоня погрузи/ чудотворяй иногда/ Моисейский жезл, крестообразно поразив/ и разделив море,/ Израиля же беглеца, пешеходца спасе,/ песнь Богови воспевающа.

Чистоту помышлений даждь ми, Спасе мой, еже воспети чистотою Ангелом подобную, богоблаженную Елену, славную угодницу Христову.

Киими похвалами восхвалим преподобнаго Серафима, возрастившаго во уделе Божия Матере дивную подвижницу и теплую о нас молитвенницу?

Наставлениям духовнаго отца твоего, великаго старца Серафима, усердно последовавши, мати Елено, истинное послушание стяжала еси.

Богородичен: Радуйся, Пресвятая Госпоже, освятившая Дивеево Твоим пришествием; радуйся, насадившая веру истинную. Радуйся, собравшая монашествующих множество.

Песнь 3.

Ирмос: Небеснаго круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче.

Во обитель Дивеевскую притекла еси, идеже, усердно подвизавшися, узким путем послушания даже до смерти шествовала еси. Помози и нам, преподобная мати, добродетель послушания стяжати.

Девственными добротами просвещена, богоблаженная Елено, Чистому Слову уневестилася еси и, плотския страсти умертвивши, Того живоносным стопам последовала еси.

Позлащенне криле добродетели стяжавши, на высоту небесную возлетела еси, блаженная Елено, яко голубица нетленная.

Богородичен: Радуйся, во удел Себе Дивеево избравшая; радуйся, Заступницею места сего быти изволившая. Радуйся, Споручнице вечнаго спасения.

Седален, глас 4:

Красотою девственною преукрашена, невесто непорочная, преподобная мати Елено, в чертог Христов, радующися, возшла еси, идеже лицы Ангельстии и святых собори любовно тя сретоша и Сам Царь славы, возлюбленный твой Жених, призре на тя милостиво и увенча тя венцем безсмертия. егоже моли, всеблаженная, не лишити и нас, земных и перстных, наследия Небеснаго.

Слава, и ныне, Богородичен, глас тойже:

Чистая Всенепорочная, и Неискусобрачная,/ Едина безлетнаго Сына и Слово Божие в лете рождшая,/ Того со всеми святыми моли,/ даровати нам очищение и велию милость.

Песнь 4.

Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество.

Кротостию и смирением Христу подобящися, источник избранный любве явилася еси, преподобная Елено. Помолися Господу, блаженная мати, да огнь Божественныя любве и в нас не угаснет.

Дары Христу принесла еси, чистое умерщвление удов, и труды воздержания, темже и прияла еси Небесное Царство и вечнующее наслаждение.

В Небесный чертог вселилася еси, преподобная Елено, невеста избранна бывши Вседержителю. Темже и благодать от Него прияла еси исцеления струи источати и страстная течения изсушати.

Богородичен: Радуйся, теплая Ходатаице о обители Твоей; радуйся, милость Сына Твоего до скончания века месту сему обещавшая. Радуйся, Радосте душ и телес наших.

Песнь 5.

Ирмос: Утренююще, вопием Ти:/ Господи, спаси ны,/ Ты бо еси Бог наш,/ разве Тебе, иного не вемы.

Стезю тесную прошедши в пощении, к широте приспела еси райстей, Елено всечестная.

Монашескаго чина украшение и обители Дивеевския слава ты явилася еси, Елено преподобная.

Ангельскому житию подражающи, псалмопение Богу непрестанно возносила еси, богоблаженная мати. Помози и нам чистым сердцем песнь Ему воспевати.

Богородичен: Радуйся, Дево, яко благословением Твоим осени Дивеево сила Вышняго; радуйся, яко обитель Твоя наполнися подвизающимися. Радуйся, яко просия зде множество преподобных, молящихся о спасении душ наших.

Песнь 6.

Ирмос: Ризу мне подаждь светлу,/ одеяйся светом, яко ризою,/ Многомилостиве Христе Боже наш.

Добрыми делы и словесы евангельския заповеди хранящи, образу Спасову навыкла еси благоговейне покланятися, блаженная мати Елено.

Любве Господни подражающи, богатно ближним послужила еси, заповедь Христову совершенне исполнивши.

Облак тя Христос показа, мати Елено, дождь живоносный источаяй, верою просящим у тебе помощи и заступления.

Богородичен: Радуйся, яко наследие Твое присно призираеши; радуйся, яко благодати и милости Своея нас сподобляеши. Радуйся, благословение Сына Твоего на нас Низводящая.

Кондак, глас 5:

В монашестве благочестно поживши/ и в юных летех путь свой скончавши,/ послушанием, постом и молитвою непрестанною/ к сретению Жениха себе предуготовившая,/ богомудрая Елено, молим тя:/ от бед избави нас/ твоими молитвами, блаженная.

Икос:

Струи мне слова даждь, Боже мой,/ и источник благочиния сотвори мой ум,/ и благослови язык мой, да воспою Твою агницу, юже венчал еси благостию Твоею;/ аще бо Сам не даси ми слова достойнаго, како принесу дар нищий, богатней в словесех и деяниих!/ Темже подаждь ми силу, исповедати ея подвиги,/ безплотнаго врага победившую и Царствия Небеснаго достигшую.

Песнь 7.

Ирмос: Отроцы еврейстии в пещи/ попраша пламень дерзновенно/ и на росу огнь преложиша, вопиюще:/ благословен еси, Господи Боже, во веки.

О доброте тлеющей, преподобная, небрегла еси, смотряющи тамо сущая воздаяния и свет, и славу Божию нестареющуюся и красоту, и божественное селение.

Мир тлеющий пременила еси премирным нестареющим животом и временную пищу пребывающим существом, плотскаго же обручника Небесным Женихом.

Разум боголюбив стяжала еси, Елено славная, во плоти сущи, ангелом уподобилася еси, любовию взывающи: благословен еси, Господи Боже, во веки.

Богородичен: Радуйся, всяких даров рабом Твоим Всещедрая Подательнице; радуйся, во брани и болезнех, и трудех их премилосердая Утешительнице. Радуйся, надеждо и спасение душ наших.

Песнь 8.

Ирмос: Богоглаголивии отроцы, в пещи/ со огнем пламень попирающе, пояху:/ благословите, дела Господня, Господа.

Украшена сиянием чистоты и чистым житием просвещена, мати Елено, предстоиши Жениху твоему, Христу Богу нашему, поющи: благословите Господа во веки.

Господа лицезрети сподобилася еси, преподобная Елено, видевши Его яко Огнь Неизреченный, и во Обители Небесныя прежде кончины Пречистою Девою введена была еси, зовущи: благословите Господа во веки.

Яко священная жертва и светлое приношение и кадило благоуханное принеслася еси, преподобная мати Елено, всех Владыце Христу Богу нашему, егоже благословим во веки.

Богородичен: Радуйся, Хранительнице наша в настоящем веце; радуйся, Предстательнице и непостыдное упование в будущем. Радуйся, прилог всякаго зла от жребия Своего отражающая.

Песнь 9.

Ирмос: Устрашися всяк слух/ неизреченна Божия снизхождения,/ яко Вышний волею сниде даже и до плоти,/ от девическаго чрева быв Человек./ Темже Пречистую Богородицу, вернии, величаем.

Возжелела еси доброту мысленную Жениха и чисто Того возлюбила еси, тепле вопиющи: да почию у тебе и в Твоих светлостех наслаждуся, величающи Твою благость.

Разум просвещен, смирение и божественную кротость, веру несумненну, надежду и любовь, юже к Богу, стяжала еси, имиже Тому угодила еси, блаженная Елено.

Днесь людие собрашася хвалами возвеличити Господа, возвеличившаго твое святое торжество; в немже поминай нас, поминающих тя, предстоящи Христу Жениху твоему, преподобная Елено всечестная.

Богородичен: Песни благодарственныя приносим Ти, Мати Божия, яко спасаеши нас присно от всякаго обстояния, и питаеши, и о нас промышляеши, и молим Тя: Обителей Небесных по кончине нас сподоби.

Светилен:

Радуйся, обителе Дивеевская, заступницу имущи, просиявшую в тебе, Елену славную, еяже молитвами озари омраченная сердца наша, да во свете невечернем узрим Христа Бога нашего.

Слава, и ныне, праздника, или Богородичен:

Свет истинный рождшая, Богородице,/ помраченных нас тьмою греховною просвети/ и причастниками вечных благ соделай.

На хвалитех стихиры, глас 8.

Подобен: О, преславнаго чудесе:

О, преславнаго чудесе!/ Житие твое, преподобная мати Елено, чудно явися,/ воистину и кончина твоя чудесна,/ юже за повеление от старца Серафима прияла еси,/ познание истинныя любве показующи/ и исполнение совершеннаго послушания,/ понеже благодарение смиренно воздавала еси/ и упование на милосердие Бога возлагала еси./ егоже моли даровати нам велию милость.

О, преславнаго чудесе!/ Егда Пречистая Всецарица Богородица/ показа ти Обители Небесныя/ и Царствия свет несказанный осия тя, всеблаженная,/ тогда молилася еси прилежно:/ Святая Игумение, обитель нашу не остави!/ Ныне же, в Чертозех Небесных пребывающи,/ моли Бога, преподобная Елено,/ даровати нам велию милость.

Дивных откровений славная причастница/ воистину явилася еси, преподобная Елено,/ внегда Господа, яко Огнь Неизреченный, узрела еси/ и Царицу Небесную и святых ангелов./ Ныне же с лики преподобных и праведных/ Престолу Божию предстоиши/ и славословие Святей Троице возносиши,/ Юже моли, блаженная мати,/ даровати нам велию милость.

Днесь украшается светло обитель Дивеевская,/ сокровище многоценное имущи,/ раку святых мощей твоих,/ яже неоскудную благодать исцелений источает,/ темже песненными похвалами венчаем тя, зовущи:/ мати наша Елено, с преподобными Александрою и Марфою,/ вкупе же и с Серафимом богоблаженным/ молитеся Господу за обитель вашу земную,/ во спасение душ наших.

Слава, глас тойже:

Тихостию нрава украшена,/ тихаго пристанища достигла еси,/ преподобная мати Елено,/ ты бо, смиренномудрием сопротивных сетей избежавши,/ яко голубица чистая,/ святою душею на Небеса возлетела еси,/ идеже Христу предстоиши,/ егоже моли спастися нам,/ почитающим святую память твою.

И ныне, праздника, или Богородичен, глас тойже:

Владычице, приими молитвы раб Твоих,/ и избави нас/ от всякия нужды и печали.

На Литургии

Блаженны от канона, песни 3-я и 6-я, на 4. Прокимен, глас 4: Дивен Бог во святых Своих,/ Бог Израилев. Стих: В церквах благословите Бога, Господа от источник Израилевых. Апостол к Галатом, зачало 208. Аллилуиа, глас 1: Терпя, потерпех Господа, и внят ми и услыша молитву мою. Евангелие от Луки, зачало 33. Причастен: В память вечную будет праведник:

Молитва

О, преславная мати, скорая наша помощнице и заступнице и неусыпная о нас молитвеннице! Предстояще раце мощей твоих и на сия со умилением, яко живей ти сущей, взирающе, молимся усердно: приими прошения наша и принеси я ко Престолу Милосердаго Отца Небеснаго, яко дерзновение многое к Нему имущая; испроси притекающим к тебе и всем православным христианом вечное спасение и временное благоденствие, на вся же благая дела и начинания щедрое благословение, и от всяких бед и скорбей скорое избавление.

Ей, чадолюбивая мати наша! Тебе, предстоящей Престолу Божию, ведомы суть нужды наша духовныя и житейския; призри на нас матерним оком и твоими молитвами вся злая от нас отврати, паче же злых и богопротивных обычаев избави; утверди же во всех веры согласное ведение, взаимную любовь и единомыслие, да во всем житии нашем, словесы же и писании и делы, славится Всесвятое Имя Отца и Сына и Святаго Духа во веки веков. Аминь.

Источник: Текст службы утвержден на заседании Священного Синода 8 декабря 2020 года (журнал № 99).

Месяца мая в 29-й день

На велицей вечерни

На Господи, воззвах: стихиры на 8, глас 4:

Святителю Христов Луко,/ жертва Богу священная,/ исповедников честное украшение,/ Церкве Православныя удобрение,/ Крымския земли похвало,/ врачу благий и милостивый,/ моли от болезней и бед избавитися/ верою и любовию творящим всечестную память твою.

Исповедник священен/ и архипастырь благоприятен,/ благочестия образ/ и источник исцелений,/ святителю Луко, явился еси,/ ты бо, посреде гонений служение Церкви и подвиг врачевания не оставив,/ добре людем послужил еси./ Темже, священное совершающе торжество,/ песньми духовными тя ублажаем.

Егда услышал еси божественный глас, блаженне Луко,/ тогда, крест твой взем,/ Христу невозвратно последовал еси/ и, любовию к Нему распалаемь,/ посреде скорбей, болезней и бед/ исповедание добре сохранил еси./ Темже, священное совершающе торжество,/ песньми духовными тя ублажаем.

Ины стихиры, глас 8:

Память твою, святителю Луко,/ с похвалами совершающе,/ радости духовныя исполняются чада Церкве Православныя/ и приемлют, яко от источника неоскуднаго,/ болезнем и недугом благодатное исцеление,/ егоже и нам подавай, врачу богоблаженне,/ молитвами твоими.

Богомудре святителю,/ яко живописатель изряден и врачеватель искусен,/ апостолу Луке уподобился еси,/ наипаче же, душею милостивою/ и сердцем люботрудным тому последуя,/ во мраце безбожия веру непорочную утверждал еси./ Сего ради молим тя:/ исцели и просвети души наша молитвами твоими.

Святителю Луко богоблаженне,/ в темницах и изгнаниих/ на всяк день болезнем и напастем приобщаяся,/ страдания Христа ради возлюбил еси/ и, прелести зиму теплотою божественныя благодати растопив,/ ко Христу, Незаходимому Сиянию,/ со славою вселился еси./ Сего ради молим тя:/ исцели и просвети души наша молитвами твоими.

Слава, глас тойже:

Святителю отче Луко пречудне,/ служителю Таин Божественных,/ делателю винограда Христова,/ веры утверждение,/ Церкве Православныя столпе непоколебимый,/ источниче исцелений обильный,/ Крымстей пастве теплый предстателю,/ молися Пресвятей Троице/ спастися душам нашим.

И ныне, Богородичен: Царь Небесный:

Вход. Прокимен дне. И чтения святительская.

На литии стихиры, глас 6:

Днесь благодатию Божественнаго Духа собрани,/ лик составим и песнь хвалебную воспоим,/ память творяще святителя и исповедника Луки/ и, дивнаго во святых Своих Бога благодаряще,/ торжества виновнику молебне рцем:/ яко имый дерзновение у Царя Славы,/ врачевателю премудре,/ моли всяких бед избавитися/ любовию чтущим тя.

Просветився многими добродетельми,/ веры правыя светильник явился еси,/ святителю преблаженне Луко,/ и, тьму нечестия разгнав,/ верным путь спасения уяснил еси./ Темже и в Чертог Небесный вселился еси,/ идеже молиши Христа Бога о душах наших.

Ины стихиры, глас 1.

Подобен: Небесных чинов:

Святителю Луко, исповедниче Христов,/ ты еси земли Крымстей похвала/ и граду Симферополю в вере утверждение,/ щит и победа на сопротивныя,/ безмездный целитель страждущих,/ всем нам помощник и заступник,/ и молитвенник о душах наших.

Божественными просвещеньми облистаемь,/ множеством добродетелей, отче Луко, обогатился еси./ Темже богогласными словесы твоими,/ яко водою животворною Духа,/ напаяеши сердца верных, чтущих тя,/ Божие милосердие сим возвещая.

Днесь радуется Небо и земля/ и Церковь Русская торжествует/ в честный день прославления/ великаго угодника Божия, святителя Луки,/ целителя прехвальнаго и врача добраго,/ и молитвенника теплаго о душах наших.

Слава, глас 8:

Святителю отче Луко,/ прослави тя Господь жития ради многотруднаго/ даром врачевания недугов,/ сего ради празднующих светло память твою/ и любовию припадающих к тебе/ соблюди от всяких болезней душевных и телесных/ и подай от Христа Бога нашего/ мир и велию милость.

И ныне, Богородичен: Безневестная Дево:

На стиховне стихиры, глас 2.

Подобен: Егда от Древа:

Егда беззаконнии людие,/ злобою неверия ослепленнии,/ гонения лютая на Церковь Русскую воздвигоша/ и многия пастыри в темницы всадиша,/ тогда, святе Луко преславне,/ любовию ко Христу распалаемь,/ в земле Самаркандстей небоязненно святительства сан приял еси/ и, паству ти от Бога врученную,/ добре упасл еси.

Стих: Священницы Твои облекутся в правду/ и преподобнии Твои возрадуются.

Егда безбожнии мучителие,/ беззаконное веление исполняюще,/ руки своя на тя возложиша/ и, яко злодея, изгнанию предаша,/ тогда, святе исповедниче Христов,/ верою в Сына Божия укрепляемь,/ грады и веси земли Сибирския обходил еси/ и люди ея, апостольскими труды просвещая,/ от недугов душевных и телесных врачевал еси.

Стих: Блажен муж, бояйся Господа,/ в заповедех Его восхощет зело.

Егда нечестивии убийцы,/ лютою злобою дышуще,/ неправедно тя оболгаша/ и темничному заключению предаша,/ тогда, священноисповедниче Луко преславне,/ страдания тяжкая претерпевая,/ мучителей безбожных не убоялся еси/ и, все упование на Бога возлагая,/ образ мужества верным людем явил еси.

Слава, глас 6:

Приидите, вси людие,/ прославим дивнаго святителя,/ в божественней славе пребывающа/ и молитвами своими милость нам низпосылающа,/ на земли же мощами своими исцеления щедро источающа;/ и велегласно Господа Бога нашего возблагодарим,/ яко дарова нам благодатнаго врачевателя/ и священноисповедника достохвальнаго.

И ныне, Богородичен: Богородице, Ты еси лоза истинная:

Тропарь, глас 1:

Возвестителю пути спасительнаго,/ исповедниче непоколебимый,/ истинный хранителю отеческих преданий,/ Православия наставниче,/ Крымския земли архипастырю,/ врачу богомудрый, святителю Луко,/ Христа Спаса непрестанно моли,/ даровати душам нашим велию милость.

На утрени

На Бог Господь: тропарь святителя дважды. Слава, и ныне, Богородичен, глас 1: Гавриилу вещавшу Тебе, Дево:

По 1-м стихословии седален, глас 3:

Новый светильник Церкве Русския/ и молитвенник теплый за мир явился еси, святителю Луко./ Темже и мы, припадающе к тебе, взываем:/ избави нас от всякия беды и напасти/ и ко спасению настави молитвами твоими.

Слава, и ныне, Богородичен:

Богорадованная Владычице,/ святителем похвало, праведным утверждение и всем верным утешение!/ Спаси ны от насильства диаволя и лютых прегрешений/ предстательством и молитвами Твоими.

По 2-м стихословии седален, глас 6:

Яко маслина плодовита и лампада, елея благовоннаго исполнена,/ пред Богом явился еси, святителю отче Луко./ Сего ради молим тя:/ благоуханием святыни твоея отжени от нас смрад греховный/ и елеем молитв твоих исцели струпы душ и телес наших.

Слава, и ныне, Богородичен, глас тойже:

Не презри моления Твоих рабов, молимся, Владычице Всепетая,/ яко да избавимся всякаго обстояния.

Псалом избранный: Услышите сия, вси язы́цы:

По полиелеи седален, глас 4:

Всечестная и светоносная память твоя, святителю Луко,/ исполни всех радости и веселия духовнаго./ Темже и мы, восхваляюще во святительстве труды твоя/ и терпение в исповедничестве,/ славим прославльшаго тя Господа./ егоже моли спастися нам, любовию тя почитающим.

Слава, и ныне, Богородичен:

Спаси всех, к Тебе притекающих,/ молитвами Твоими, Дево Богородице,/ и избави всякия нужды и скорби.

Степенна, 1 антифон 4-го гласа. Прокимен, глас 1: Уста моя возглаголют премудрость/ и поучение сердца моего разум. Стих: Услышите сия, вси язы́цы,/ внушите, вси живущии по вселенней. Евангелие от Иоанна, зачало 35, от полу.

По 50-м псалме стихира, глас 6:

Пастыря добра,/ исповедника тверда,/ служителя таин Христовых верна/ и целителя недугов безмездна/ вемы тя, святителю Луко./ Сего ради молим тя:/ избави ны от наветов вражиих,/ болезней душевных/ и недугов телесных.

Канон Пресвятей Богородице со ирмосом на 6 и святителю на 8. Глас 8.

Песнь 1.

Ирмос: Дивному Богу величия принесем/ и великолепно с нами,/ да воспоет земля и небо/ ясно славу Его.

Во дни гонений тяжких на Церковь Русскую/ священный сан во граде Ташкенте небоязненно приял еси, блаженне Луко,/ и отступники, нововведения льстивая вводящия, мужественне обличал еси,/ принося величие Богу и воспевая славу Его.

Явился еси пастве твоей, исповедниче Христов,/ столп непоколебимый и защитник крепкий,/ болящим исцеление, скорбящим утешение,/ Бога величая и воспевая славу Его.

Вседержителя и Господа о нас моли, святителю Луко,/ даровати нам оставление прегрешений,/ да с тобою дивнаго Бога возвеличим и воспоем славу Его.

Богородичен: Тя призывающим, Богородительнице Пречистая,/ явилася еси спасительное пристанище и покров./ Темже любовию зовем Ти:/ Владычице, спаси ны/ и научи дивному Богу величия приносити и воспевати славу Его.

Песнь 3.

Ирмос: Уподоби мя, Христе, умно горе Сионстей,/ возвысивый и утвердивый в надежди о Тебе/ и искапавый росу благодати,/ Человеколюбче.

Егда в Сибирскую землю изгнан был еси, святителю,/ тогда многия грады ея апостольскими труды просветил еси/ и, телесныя недуги врачуя,/ о людех Богу молился еси,/ да источит на них росу благодати Своея, яко Человеколюбец.

Рукою твоею святительскою очи слепым исцелил еси, врачу предивный,/ таже и души их Светом Христовым просветил еси, моляся,/ да источит на них Господь росу благодати Своея, яко Человеколюбец.

Твоими поучении, святителю Луко,/ яко добрый пастырь, указал еси людем путь в Царство Небесное./ Сего ради славою от Бога увенчался еси,/ егоже моли, да низпослет и нам росу благодати Своея, яко Человеколюбец.

Богородичен: Любити убо Тя, Пречистая Богомати, и песньми прославляти/ научает нас великий Архангел,/ сего ради вопием Ти, Богоневесто:/ радуйся, Благодатная, Господь с Тобою;/ радуйся, Радосте Ангелов и всех человеков.

Седален, глас 8:

Очи сердечная ко Господу выну имея,/ исповедник дерзновенный веры Христовы явился еси, отче Луко,/ и, силою словес божественных полки безбожных отгоняя,/ Крымскую паству мудре упасл еси./ Темже по кончине в Небесныя обители со славою водворился еси, святителю блаженне./ Моли Христа Бога грехов оставление даровати/ чтущим всечестную память твою.

Слава, и ныне, Богородичен:

Тя Пристанище и Стену,/ Прибежище и Надежду,/ Покров и Заступление теплое имамы,/ к Тебе притекаем и вопием прилежно:/ спаси, Богородице, уповающия на Тя/ и от прегрешений избави.

Песнь 4.

Ирмос: Всел еси на кони, апостоли Твоя, Господи,/ и приял еси рукама Твоима узды их,/ и спасение бысть еждение Твое/ верно поющим:/ слава силе Твоей, Господи.

Юже стяжал еси честною Твоею Кровию,/ Церковь Твою, Христе, утверди и направи на путь мира,/ тако воздыхал еси, святителю отче Луко,/ преподобныя твоя руце горе воздевая.

Любовь Христову в деннонощных трудех твоих явил еси, святителю:/ недужных безмездно врачуя,/ вдов и сирых милостивно питая,/ согрешающих кротко вразумляя,/ унывающих и отчаяваемых отечески утешая,/ о нихже и Жертву безкровную благоговейно Богу принося.

Ни глад, ни мраз, ни темничная заключения,/ ни безчестия, ни муки, ни самая смерть/ возмогоша разлучити тя, святителю, от любве Христовы,/ ты бо, во изгнании сый и пределы земли Русския обходя,/ людем ея образ пастыря добраго явил еси/ и, яко столп непоколебимый пребывая,/ исповедник верен нареклся еси.

Богородичен: Крепость наша Ты еси, Пречистая Богомати,/ Твоими бо мольбами избавихомся вси от страстей и бед,/ обстояний и недугов многообразных, Спасу Христу зовуще:/ слава силе Твоей, Господи.

Песнь 5.

Ирмос: Повеления Твоя просвещением, Христе Боже,/ яко Благ, показал еси,/ зане, Светодавче,/ от нощи утренююще, славу возсылаем.

Единицу в Троице, Триипостасное Божество,/ богословил еси, Луко блаженне,/ и триединый состав человеческаго естества/ писании твоими изъяснил еси.

Егда испытание ратное прииде на землю нашу,/ тогда ты, святителю, во врачебнице града Красноярска, врачебное искусство прилагая,/ многия воины от неисцельных ран исцелил еси и к жизни возвратил еси.

Словеса похвальная приими ныне от нас, недостойных чад твоих, святителю Луко,/ и моли Христа Бога,/ да избавит нас шуияго стояния/ и сподобит Небеснаго Царствия Своего.

Богородичен: Едина Чистая, Богородительнице,/ не презри молений раб Твоих,/ но угодника Твоего ради/ принеси сия ко престолу Сына Твоего,/ да спасет души наша.

Песнь 6.

Ирмос: Отвергл мя еси/ во глубины сердца морскаго,/ и видех чудеса Твоя, Господи.

Раздавая последняя твоя и попечение о неимущих имея,/ сироты и вдовыя с любовию питал еси,/ Милостивому Спасу подражая.

Духом веры пламенея,/ истинное благочестие верным являл еси, святителю Луко,/ и, иереи добре назирая,/ к деланию пастырскому тех наставлял еси.

Не отреклся еси креста Господня/ во многотруднем житии твоем, архиерею Божий,/ и ныне архипастырем нашим молитвами твоими помози,/ да право правят слово Божественныя Истины.

Богородичен: Отроковице Богоизбранная, Дево Марие,/ восхваляем Тя вси и верно взываем:/ моление наше приими и прошения скоро исполни.

Кондак, глас 1:

Яко звезда всесветлая,/ в нощи безбожия добродетельми просиял еси/ и, от гонителей много пострадав,/ непоколебим верою пребыл еси,/ врачебною же мудростию украшен,/ многия люди исцелил еси./ Сего ради с любовию вопием ти:/ радуйся, добропобедный исповедниче,/ радуйся, отче святителю Луко,/ радуйся, земли Русския похвало и утверждение.

Икос:

Исповеданием твердым Бога прославив,/ сеятель духовных добродетелей явился еси, Луко прехвальне,/ и, яко архипастырь и учитель благочестия,/ нечестия ревностный искоренитель показался еси,/ жизнь же в подвизех и трудех многих совершив,/ венец неувядаемый от Господа приял еси./ Сего ради с любовию вопием ти:/ радуйся, добропобедный исповедниче,/ радуйся, отче святителю Луко,/ радуйся, земли Русския похвало и утверждение.

Песнь 7.

Ирмос: В начале землю основавый/ и Небеса словом утвердивый,/ благословен еси во веки, Господи, Боже отец наших.

Евангельски Христу последовав, отче Луко,/ елеем любве врачевал еси люди страждущия и болящия/ и, слово Божие возвещая, святительски потрудился еси,/ да прославляют верная чада Сотворшаго вся Господа, воспевающе:/ благословен еси во веки, Боже отец наших.

Пастырь добрый словесному стаду твоему был еси, святителю Луко,/ душу твою за него присно положити готовый./ Темже явился еси обидимым заступник непреоборимый,/ правды Божия ревнитель неустрашимый,/ сильных мира сего кроткий обличитель, Господу воспевая:/ благословен еси во веки, Боже отец наших.

Радовахуся людие града Симферополя,/ зряще тя, отче Луко, светлостию сана святительскаго облечена/ и престолу благодати Божия в молитве предстояща./ Ты же, по апостолу, вся всем быв,/ многия ко Христу привел еси,/ иже ныне Господа прославляют:/ благословен еси во веки, Боже отец наших.

Богородичен: Радости Подательнице, Богородительнице Пречистая,/ верою славящия и от души поющия Тя радости неизреченныя исполни/ и Света Невечерняго сподоби, Дево Богоблагодатная.

Песнь 8.

Ирмос: Покрываяй водами превыспренняя Своя,/ полагаяй морю предел песок/ и содержай вся,/ Тя поет солнце, Тя хвалит луна,/ Тебе приносит песнь вся тварь,/ яко Содетелю всех во веки.

Имя твое, святителю Луко,/ якоже благоухание рая Божия по всей земли прославляется,/ услаждая сердца верующих/ и призывая благодарне воспевати Содетеля всех во веки.

Ныне Престолу Божию предстоя,/ молишися о людех, тя призывающих,/ на молитву же твою с верою уповающих/ и благодарящих Содетеля всех во веки.

О, иерарше богомудре,/ ты, течение жизни добре совершив,/ веру Христову в гонениих и страданиих добре сохранил еси,/ сего ради ныне венец небесный от Подателя жизни обрел еси,/ радуяся и воспевая освящающаго Содетеля всех во веки.

Богородичен: Шед путем заповедей Сына Твоего, Богомати,/ весь род человеческий Твоим Рождеством от праотеческаго падения воста/ и клятвы праматерния избавися,/ воспевая Содетеля всех во веки.

Песнь 9.

Ирмос: Благословен Господь, Бог Израилев,/ воздвигнувый рог спасения нам/ в дому Давидове, отрока Своего,/ в нихже посети нас Восток с высоты/ и направил ны есть на путь мира.

Евангелие Христово проповедав, богомудре святителю,/ служение Божие на земли страдальчески совершил еси/ и, приятия Святых Таин Христовых сподоблься,/ о Бозе мирно почил еси.

Ныне с Вышними воинствы моли, угодниче Христов, Человеколюбца Бога,/ даровати притекающим к тебе/ оставление грехов и жития исправление.

И по смерти, яко жив сый,/ благодатию Божиею с нами пребываеши, святителю Луко, исповедниче добрый,/ укрепляя нас твердо стояти в Православней вере/ и в добродетельней жизни наставляя.

Богородичен: Еже радуйся, со архангелом зовем Ти, Чистая,/ яко Царя Небеснаго родила еси, Дево Богородице, и молим Тя:/ избави ны, рабы Твоя, от вечныя смерти.

Светилен:

Светильник веры и исповедник твердый явился еси, Луко преславне./ Плотию, аще и почил еси,/ но духом в Царствии невечернем со Христом пребываеши/ и присно молишися Ему о всех,/ верою и любовию тя почитающих.

Слава, и ныне, Богородичен:

Вышних чиноначалий Превышшая сущи,/ нас, нижних, не остави, Пречистая Владычице,/ но присно с нами буди/ и от всяких наветов вражиих свободи.

На хвалитех стихиры, глас 4:

Красуйся и ликуй, граде Симферополю,/ торжествуйте, вси православнии,/ зряще честныя мощи врачевателя безмезднаго,/ источающия исцеления чудная/ всем, притекающим к ним с верою/ и воспевающим Христа Жизнодавца,/ подающаго нам мир и велию милость.

Во храме Святыя Троицы,/ идеже лежат ныне мощи твоя,/ преблаженне Луко святителю,/ исцеления подаются всем человеком,/ верою притекающим к раце твоей./ Темже и мы усердно молим тя:/ моли Триипостаснаго Бога/ даровати нам мир и велию милость.

Веселися и торжествуй земле Русская,/ имущи пред Богом молитвенника тепла,/ иже, яко истинный пастырь Христов,/ подвиг страдания и исповедничества в пределех твоих соверши./ Ныне же в Небесней славе Христу предстоит/ и, взирая на неизреченную Его доброту,/ просящим подает телесное здравие/ и молит даровати душам нашим/ мир и велию милость.

Слава, глас 8:

Святителю отче Луко,/ ты, евангельски Христа возлюбив,/ Его Божественное иго и крест исповедничества на рамена подъял еси/ и, яко легкое бремя, понесл еси,/ архипастырский же подвиг добре совершив,/ Царствия Небеснаго достигл еси./ Темже Господа славы моли,/ даровати нам мир и велию милость.

И ныне, Богородичен, глас тойже:

Владычице, приими молитвы раб Твоих/ и избави нас/ от всякия нужды и печали.

Славословие великое. И отпуст.

На Литургии

Блаженны от канона, песни 3-я и 6-я. Прокимен, глас 1: Уста моя возглаголют премудрость/ и поучение сердца моего разум. Стих: Услышите сия, вси язы́цы, внушите вси, живущии по вселенней. Апостол ко Евреем, зачало 318. Евангелие от Матфея, зачало 11. Причастен: В память вечную будет праведник, от слуха зла не убоится.

Молитва

О, святителю Луко, исповедниче и угодниче Христов! Услыши нас, грешных, со умилением припадающих к раце честных и многоцелебных мощей твоих, и принеси молитву нашу к Милостивому Человеколюбцу Богу, Емуже ты ныне со всеми святыми предстоиши. Испроси у Христа Бога нашего, коемуждо дар благопотребен и вся, яже ко спасению полезная, да утвердит ны в вере Православней и благочестии, яко избавльшеся от козней лукаваго, избегнем всякия вражды, нестроений, ересей и расколов.

О, целителю предивный и врачу безмездный! Уврачуй благодатию, данной тебе от Бога, язвы душ и телес наших, да не неисцелени отыдем из сей жизни временней, но да чисти и непорочни предстанем Престолу Божию, прославляюще Отца и Сына и Святаго Духа во веки веков. Аминь.

Источник: Текст службы утвержден решением Священного Синода от 5 мая 2015 года (журнал № 28).

В 9-ю пя́тницу по Па́сце

Пра́зднование Пресвяте́й Влады́чице Богоро́дице ра́ди ико́ны Ея́,

имену́емыя «Табы́нская»

На вели́цей вече́рни

Блаже́н муж: 1-й антифо́н. На Го́споди, воззва́х: стихи́ры на 8, глас 4:

Днесь, ве́рнии, собери́теся,/ просла́вим в пе́снех Цари́цу Богоро́дицу,/ вы́сшую небе́с и всех све́тлостей со́лнечных/ и, в храм Бо́жий вше́дше,/ у́зрим о́браз дре́вле явле́нныя ико́ны Ея́,/ и от исто́чника спасе́ния окропле́ние прии́мем,/ и чудотво́рней ико́не поклони́мся,/ проще́ние прегреше́ний на́ших прося́ще,/ ми́ра ми́рови и ве́лия ми́лости.

Воззри́, Влады́чице,/ побори́ борю́щия ны,/ грехи́ на́ша презира́ющи/ и го́рькаго неве́рия рабы́ Твоя́ свобожда́ющи,/ да восста́нем в сре́тение/ и честну́ю Твою́ Табы́нскую ико́ну преднесе́м,/ всяк бо град и вся́кая весь торжеству́ет/ и обрета́ет Тобо́ю, Влады́чице, спасе́ние,/ и мы во умиле́нии покланя́емся и вопие́м:/ спаси́ ны, Пречи́стая.

Ны́не печа́ль преста́,/ ны́не ра́дость процвете́,/ лечбо́ю бо милосе́рдия Твоего́, Чи́стая, неду́ги исцеля́еши,/ лю́тыя боле́зни свобожда́еши,/ зной и вар ороша́еши,/ разсла́бленныя укрепля́еши, хромы́я возставля́еши,/ слепы́я исцеля́еши,/ те́мже хва́лим Тя:/ ра́дуйся, Влады́чице, Госпо́дь с Тобо́ю.

Я́ко крин благоуха́яй,/ яви́ся ико́на Твоя́ и́ноком честны́м,/ да́рующи Вознесе́нстей оби́тели покро́в и заступле́ние,/ и на врате́х, я́ко Врата́рница, возсия́,/ чудесы́ Свои́ми осия́вши гра́ды Уфу́ и Каза́нь,/ те́мже па́ки прииди́ к нам, Госпоже́,/ весе́лием сердца́ на́ша исполня́ющи.

Глас 5:

Я́же от ага́рян поруга́ние прия́ла еси́/ и слепото́ю оче́с на покая́ние тех подви́гла еси́,/ дарова́вши прозре́ние./ По́слежде еди́н от них в по́двизех просия́,/ хожде́нием во след ико́ны Твоея́ честны́я,/ непреста́нно славосло́вие творя́ Тебе́, Пречи́стая.

Не преста́нем велича́ти Тя, о Ма́ти!/ Я́ве бо избира́еши Ура́льский преде́л,/ имену́ющися Табы́нская,/ иде́же, хотя́щи просвети́ти заблу́ждшия,/ ше́ствием Свои́м на по́двиг ве́ры нас подвиза́еши/ и тем ве́село спаса́еши,/ честву́ющих Тя, Влады́чице.

Егда́ беззако́ннии лю́дие наводни́ша враждо́ю зе́млю на́шу/ и оскверни́ша святы́ни христиа́нския,/ тогда́, Пречи́стая Влады́чице,/ ико́на Твоя́ Табы́нская/ ну́ждею изы́де от преде́лов страны́ Ру́сския/ и по́слежде ди́вный Свой о́браз сокры́,/ благода́ть же Свою́ на исто́чники преложи́.

Сла́ва, и ны́не, глас 6:

Я́ко непроходи́мая Врата́ и Животво́рная Вода́,/ Заря́ Присносия́тельная и во тьме Негаси́мая Лампа́да,/ Боже́ственная Гора́ доброде́телей,/ Богоро́дица в ми́ре просия́./ Те́мже со умиле́нием вопие́м Ти, Пречи́стая:/ му́тныя ре́ки грехо́в на́ших изсуши́,/ озное́ныя ны струя́ми умиле́ния осени́,/ приими́ на́ша моле́ния/ и принеси́ Сы́ну Твоему́ и Бо́гу,/ да спасе́т Тобо́ю ду́ши на́ша.

Вход. Проки́мен дне. Чте́ния три Богоро́дицы.

На лити́и стихи́ры, глас 5:

Наста́ день пра́здника Твоего́, Пречи́стая,/ наста́ на́шея ра́дости пресве́тлый день,/ прииди́те, моля́щихся ли́цы,/ прииди́те, вси ве́рнии лю́дие,/ воспои́м от чи́стаго се́рдца Ма́терь Бо́жию/ и явле́нная чудеса́ Ея́ у горы́ Табы́нския/ благоче́стно и благогове́йно просла́вим.

Ве́лия чуде́с сла́ва/ от исто́чника Твоего́, Богоро́дице,/ Живоно́сный Исто́чник Тя показу́ет,/ вся блага́я излива́ющий,/ оби́лие же исцеле́ний источа́ет всем незави́стно,/ тре́бующим кре́пости душа́м и здра́вия телесе́м,/ сла́ною водо́ю сла́дкия благода́ти.

Сла́ва, и ны́не, глас 2:

Небе́сная врата́ и Спору́чница спасе́ния на́шего/ и ве́ры Правосла́вныя Утвержде́ние/ Ты еси́, Богоро́дице, Пречи́стая,/ Твоего́ у́бо предста́тельства ча́юще,/ во еди́н моли́твенный лик снидо́хомся, раби́ Твои́,/ и подно́жию ног Твои́х покланя́емся,/ прося́ще проще́ния и спасе́ния душа́м на́шим.

На стихо́вне стихи́ры, глас 1:

Умиле́ние серде́ц и о гресе́х покая́ние/ днесь возно́сится ко Пресвяте́й Влады́чице,/ Та бо ны́не мо́лит Христа́ Бо́га/ о спасе́нии душ на́ших.

Стих: Слы́ши, Дщи, и ви́ждь/ и приклони́ у́хо Твое́.

Вси ро́ди Тя ра́достно ублажа́ют/ и, я́ко Исто́чник Боже́ственный, велича́ют,/ те́мже, веселя́щеся, христоимени́тии вопию́т:/ благослове́нна Ты в жена́х/ и благослове́н Плод чре́ва Твоего́.

Стих: Лицу́ Твоему́ помо́лятся/ бога́тии лю́дстии.

Вои́стину блаже́нно чре́во носи́вшее Тя, Го́споди,/ и сосца́ я́же еси́ ссал./ Нам же, соверша́ющим пра́зднество Твоея́ Пречи́стыя Ма́тере,/ младе́нцем су́щим в ве́ре,/ вмести́ти благода́ть Твою́ помози́.

Сла́ва, и ны́не, глас 5:

Ра́дуйся, Влады́чице,/ Ма́ти Христа́ Бо́га на́шего,/ Исто́чниче неисчерпа́емый благода́ти,/ при́сно источа́яй сла́дость исцеле́ний/ всем, притека́ющим к Тебе́ ве́рою/ и все упова́ние на Тя возлага́ющим.

Тропа́рь, глас 4:

Наста́ днесь пресве́тлый пра́здник,/ Пречи́стая Де́во, Влады́чице,/ честны́я Твоея́ Табы́нския ико́ны,/ я́же па́че луч со́лнечных возсия́,/ источа́ющи целе́бныя да́ры/ с ве́рою к Тебе́ притека́ющим./ Тя бо Христо́с Помо́щницу лю́дем Свои́м дарова́/ покрыва́ти и спаса́ти от вся́кия беды́ рабы́ Своя́,/ Еди́ну Благослове́нную.

На у́трени

На Бог Госпо́дь: тропа́рь Богоро́дицы, три́жды.

По 1-м стихосло́вии седа́лен, глас 3:

Лю́дие благочести́вии,/ правове́рнии собо́ри христоимени́тии,/ приступи́те ве́рно вси, боже́ственному припа́дающе Бо́жия Ма́тере о́бразу,/ Та бо исцеле́ние боля́щим ра́достно подае́т,/ уязвля́ет злосло́вныя, я́ко стрела́ от лу́ка,/ нас же всех весели́т светови́дно/ и озаря́ет моли́твами Свои́ми.

Сла́ва, и ны́не, глас то́йже:

Всю Тя Бог освяти́, Де́ву До́брую и Непоро́чную в жена́х,/ проро́ки прообрази́в че́стно, иере́и благослови́в,/ во свята́я святы́х всели́,/ А́нгелом воспита́, с Небесе́ пи́щу хлеб подая́./ Сам же Преблаги́й, Единоро́дный Бог Сло́во, всели́ся в Тя/ и пло́тию про́йде из Тебе́./ Те́мже Ти покланя́емся и чтим, я́ко вои́стину су́щую Богоро́дицу.

По 2-м стихосло́вии седа́лен, глас 4:

Го́ру мы́сленную, доброде́телей Сень/ ду́хом дре́вле Авваку́м, богови́дно Тя усмотри́в очи́ма, пропове́даше, Пречи́стая,/ Тобо́ю бо Бог в мир прии́де во спасе́ние на́ше и обновле́ние.

Сла́ва, и ны́не, глас то́йже:

Го́ру Тя ве́лию несеко́мую Дании́л ду́хом ви́де,/ явля́я чистоту́ де́вства Твоего́, Влады́чице,/ от нея́же Ка́мень отсече́ся, Бог Сло́во,/ ле́сти низлага́я и́дольския.

По полиеле́и седа́лен, глас 1:

Правове́рно чту́щих Тя/ и к Табы́нстей ико́не прибега́ющих/ и сему́ чудоде́йственному о́бразу любе́зно покланя́ющихся, о Бо́жия Ма́ти, спаси́/ и не даждь в расхище́ние супоста́том,/ ниже́ на́йдут на ны вся зла́я, я́же грехи́ на́ша угото́ваша нам,/ ниже́ беззако́ния на́ша превзы́дут на главы́ на́ша,/ но да Твоя́ ма́терняя к Бо́гу преодоле́ет за ны богоприя́тная моли́тва.

Сла́ва, и ны́не, глас то́йже:

Явле́нная Твоя́ ико́на, Богоро́дице Де́во,/ врачевство́ есть всему́ ми́ру духо́вное,/ к не́йже прибега́юще, Тебе́ покланя́емся и почита́ем,/ и лобыза́ем, и чтим, исцеле́ний благода́ть почерпа́юще от нея́,/ и неду́г теле́сных, и душе́вных страсте́й Твои́ми моли́твами свобожда́емся.

Степе́нна, 1-й антифо́н 4-го гласа. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и виждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6: Я́ко непроходи́мая Врата́: пи́сана на вели́цей вече́рни.

Кано́н Богоро́дицы, глас 4.

Песнь 1.

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Ра́дости испо́лнишася вси концы́ Ура́льския земли́, Пресвята́я Де́во,/ во спасе́ние бо на́ше ико́ну Твою́ яви́ла еси́ и рекла́ еси́:/ да потщи́тся бра́тия богоспаса́емыя оби́тели сея́ прия́ти Мя во храм Го́спода Моего́./ Нас же не оста́ви убо́гих,/ и да прии́мем о́браз Твой святы́й в хра́мы серде́ц на́ших, вопию́ще:/ ра́дуйся, Благода́тная.

Во он день и́нок Амвро́сий, мимоходя́ исто́чника,/ услы́ша под се́нию древе́с глаго́лы Твоя́, Богоро́дице,/ и а́бие обре́т на ве́лием ка́мени ико́ну Твою́./ Нас же сподо́би сея́ ра́дости прича́стники бы́ти,/ иму́щих Тя пред Бо́гом Хода́таицу.

Удиви́шася бра́тия Вознесе́нския оби́тели явле́нию Твоему́, Пресвята́я Де́во,/ и, со тща́нием вку́пе собра́вшеся,/ после́доваху Амвро́сию,/ и, узре́вше дре́вле пи́санную ико́ну Твою́, Богоро́дице,/ с ра́достию воспе́ша ко Го́споду, ублажа́юще Тя, я́ко Ма́терь Бо́жию./ Мы же, то́жде творя́ще во бде́нии сем,/ да улучи́м от Бо́га ми́лость и по́мощь Твою́, Влады́чице.

Ве́лие чу́до бысть во оби́тели,/ егда́ зау́тра ико́на обре́теся во врате́х./ И́ноцы же позна́вше о сем во́лю Твою́, Пречи́стая,/ я́ко Врата́рницу просла́виша Тя и храм зде созда́ша./ Нас же, я́ко юро́дивых дев, не отри́ни,/ да обря́щемся во врате́х рая́ вожделе́ннаго,/ вы́ну пою́ще Го́сподеви: Аллилу́ия.

Сла́ва: Вку́пе собра́шася бра́тия, песнь Ти воспе́ша/ и пове́даша вся бы́вшая воево́де Уфи́мскому и архиере́ю гра́да Каза́ни./ Той же, позна́в чудеса́ Твоя́, Влады́чице, повеле́ чти́ти Тя собо́рне./ Та́ко и мы ны́не весели́мся боже́ственне и в ра́дости воспева́ем Тя.

И ны́не: Па́че зла́та вся́каго блиста́ющая/ и у́тра со́лнечнаго светле́йшая,/ ра́дуйся, Врата́рнице, Жили́ще Христо́во,/ ра́дуйся, Одиги́трие, ра́дуйся, Де́во,/ ра́дуйся, Неве́сто Неневе́стная.

Песнь 3.

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Бу́ря крамо́лы разори́ пу́стынь Твою́, Богороди́тельнице,/ но Ты, Чи́стая, сподви́гла еси́ честна́го игу́мена Евфи́мия,/ да укрепи́т бра́тию на му́ки сме́ртныя./ Нам же стоя́ние пу́стыни сея́ о́браз бысть ду́ха кре́пости и терпе́ния,/ да воздви́гнем гла́сы своя́,/ пою́ще чи́стую ве́ру Правосла́вную.

Егда́ ста́рец Ио́на возжела́ па́ки созда́ти оби́тель Твою́, Богоро́дице,/ испроси́ у царя́ Моско́вскаго повеле́ние на сие́/ и, к трудо́м труды́ приложи́в,/ воздви́же Тебе́, Пречи́стая, пу́стынь,/ да во ве́ки просла́вится и́мя Твое́ в заблу́ждших язы́цех/ и да почту́т Бо́га и́стиннаго./ Нас же в любви́ Твое́й утверди́, Ма́ти И́стины.

Гора́ разве́рзе утро́бу свою́ моли́твами Твои́ми, Чи́стая,/ и а́бие струи́ исто́чник сла́ных вод лю́дем Твои́м источи́,/ а́ки ма́нну дре́вле в пусты́ни Сина́йстей./ Нам же, Пречи́стая, низпосли́ ма́нну чуде́с Твои́х,/ да не вза́лчем во ве́ки.

Лю́дие остро́га солова́рнаго зря́ще такову́ю ми́лость Твою́,/ воздвиго́ша ико́не Твое́й це́рковь Бо́жию,/ да святы́х чи́ни че́стно Ти послу́жат/ и мирсти́и концы́ покло́нятся./ Нас же сподо́би досто́йно ублажи́ти Тя, я́ко Небе́сную Хода́таицу/ и воспева́ти песнь Твоея́ святы́ни явле́нию.

Сла́ва: Ве́дущи, Блага́я Ма́ти,/ я́ко оби́тель разоре́на и́мать бы́ти вконе́ц,/ извести́ бра́тии о се́м,/ ти́и же, любо́вию Бо́жиею окриля́еми,/ восхоте́ша венцы́ му́ченическия прия́ти./ И нас сподо́би, Пречи́стая, венцы́ небе́сныя улучи́ти.

И ны́не: Днесь торжеству́ет Небе́сное во́инство и́ноков пу́стыни/ и похваля́ет злату́ю Тя Ста́мну, и Жезл, и Трапе́зу, Пречи́стая Де́во./ Да глас их, Одиги́трие, е́же ра́дуйся,/ Тебе́ со а́нгелы вку́пе вопие́т.

Седа́лен, глас 8:

Иде́же прославля́ется свято́е и́мя Обра́дованныя Богоро́дицы,/ та́мо вся́ческих благи́х исто́чницы пролива́ются./ Почти́м же, лю́дие, в чистоте́ ико́ну Де́вы Богоро́дицы/ и Тоя́ Боже́ственнаго Сы́на, Христа́ Бо́га на́шего,/ и лобыза́им и прославля́ем Ю́ со стра́хом и тре́петом, зову́ще:/ ра́дуйся, ми́лости Сокро́вище многоце́нное.

Сла́ва, и ны́не:

Ты еси́ Похвала́ страстоте́рпцев,/ Ты еси́ Наде́жда преподо́бных,/ Ты еси́ Утеше́ние всего́ ми́ра,/ и на Тя спасе́ние на́ше возложи́хом вси./ Одожди́ гре́шным рабо́м Твои́м душеспаси́тельныя Твоя́ ми́лости.

Песнь 4.

Ирмо́с: Седя́й в сла́ве, на Престо́ле Бо́жества,/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

По вре́мени о́браз Твой Табы́нский па́ки во тьме возсия́,/ ве́чер во у́тро восхо́да зари́ претвори́./ Ны́не же на́ша моли́твы приими́, Честне́йшая,/ и святу́ю ико́ну Твою́ нам па́ки яви́, Присноблаже́нная.

Си́лою вра́жиею ожесточе́ни ага́ряне бы́вше,/ воста́ша на сла́ву Госпо́дню и Де́вы боже́ственный лик уязви́ша./ Ты же, Влады́чице, о́чный мрак наложи́вши,/ сим просвети́ла еси́ нечести́вых люде́й./ Те́мже, грехо́вную мглу потребля́ющи,/ сподо́би и нас пе́ти сла́ву Пречи́стаго о́браза Твоего́ второ́му явле́нию.

Хва́лим, благослови́м ми́лости Твоя́, Богоро́дице,/ я́ко прозре́ние да́руеши нечести́вому о́троку./ Сей, покая́нием и́стовым я́ко Савл прозре́в,/ и́де во след ико́ны Твоея́./ Нас же, гре́шных, во сре́тение Твое́ приими́/ и к Бо́гу благоутро́бному моле́ния принеси́,/ пою́щих Тя во вся ве́ки.

Вои́стину испове́дуем,/ я́ко Ты, ели́ка хо́щеши, вся у Сы́на Своего́ испроси́ти мо́жеши,/ Ма́ти бо еси́ Его́,/ те́мже моли́твами Твои́ми и проще́ние ага́ряном у Бо́га испроси́ла еси́./ Нас же, в горды́ни и за́висти су́щих, в покая́нии приими́/ и в ра́зум и́стины призови́.

Сла́ва: Лю́дие Бо́жии вельми́ чудя́хуся явле́нней ико́не Твое́й, Влады́чице,/ и, я́ко богооте́ц Дави́д, скака́ше игра́я,/ та́кожде и ти́и, в ра́дости лику́юще,/ о́браз Засту́пницы с че́стию и пе́нием в весь Богоявле́нскую принесо́ша./ Нас же, собра́вшихся в пра́здник сей, Де́во Пречи́стая, благослови́.

И ны́не: Недове́домая Глубино́, Высото́ Неизсле́димая,/ Реко́ Неисчерпа́емая, целе́бную во́ду точа́щая,/ слепы́м бо зре́ние дае́ши, глухи́м слы́шание,/ хромы́м и рассла́бленным хожде́ние/ и всем, су́щим в неду́зех, безме́рное исцеле́ние.

Песнь 5.

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Весь Табы́нская ве́лиим ликова́нием испо́лнися, егда́ ико́ну Обра́дованныя обре́те/ и напо́лнися храм Госпо́день сла́вы Ея́,/ прише́дшии же язы́цы возда́ша хвалу́ Го́споду и Пречи́стей Роди́тельнице./ Нас же обра́дуй, Блага́я, благоче́стно воспева́ющих Тя.

Ага́ряне восклица́ху и вельми́ поя́ху:/ вели́к Бог христиа́нский,/ и и́стины позна́ние сни́де на еди́наго от них,/ и́же, прие́м ве́ру Правосла́вную,/ мно́жицею потруди́ся во спасе́ние свое́./ Нас же сподо́би по́двигом до́брым тече́ние соверши́ти/ и ве́чнаго живота́ дости́гнути.

Басурма́н вели́кое мно́жество ополчи́шася на Табы́нскую весь./ Лю́дие же Бо́жии, наде́жду на по́мощь Твою́ возложи́вше,/ проти́ву супоста́тов идо́ша/ и на ме́сте явле́ния о́браза Твоего́ си́лу вра́жию одоле́ша,/ те́мже и в па́мять заступле́ния Твоего́, Богоро́дице,/ сотвори́ша крестохожде́ние и ико́ны чудотво́рныя водруже́ние.

Егда́ Усо́льстии лю́дие ико́ну Твою́ в храм свой принесо́ша,/ Ты, Пречи́стая Ма́ти, хоте́нию их воспрети́ла еси́/ и па́ки в Табы́нстем хра́ме обрела́ся еси́./ Возврати́ и нас, вла́ющихся по распу́тием ми́ра сего́, на путь и́стины, Свята́я Одиги́трие,/ и Ца́рствия Небе́снаго дости́гнути сподо́би.

Сла́ва: Сия́ние благода́ти чу́дное бысть по всей Табы́нстей земли́,/ я́ко созда́ша христолюби́вии лю́дие из ка́мене це́рковь Твою́/ и воззва́ша вся окре́стныя ве́си на восхвале́ние чуде́с Твои́х./ Нас же, прише́дших на торжество́ сие́, приими́/ и пра́здника ра́ди ду́ши возвесели́.

И ны́не: Ка́я Ти есть досто́йная похвала́,/ сию́ ли на́ше принесе́т коне́чное неможе́ние?/ Я́ко явле́нием Пречи́стыя Твоея́ ико́ны, светоза́рное нам возсия́ со́лнце,/ пресла́вных чуде́с лучи́ испуска́я и тьмы лю́тых обстояний отгоня́я/ свяще́нными Твои́ми, Влады́чице, предста́тельствы.

Песнь 6.

Ирмо́с: Боже́ственное сие́ и всечестно́е/ соверша́юще пра́зднество,/ богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Зной и бездо́ждие бысть Уфи́мстей земли́,/ но тще́тно моля́хуся ве́рнии,/ излия́ся бо гнев Госпо́день за беззако́ния,/ оба́че ико́на Твоя́, Преблага́я, принесе́ одожде́ние ги́бнущим зла́ком./ На́ша же изсо́хшия ду́ши одожди́ росо́ю благода́ти Твоея́,/ да произрасти́м кла́сы доброде́телей и спасе́ние у́зрим.

Егда́ бысть мор сме́ртный во всех уде́лех на́ших,/ лю́дие гра́да Стерлитама́ка наде́жду на Тя, Влады́чице, возложи́ша/ и, по́мощь от Тебе́ улучи́вше,/ в па́мять о сем на вся́ко ле́то хожде́ние с ико́ною Твое́ю устро́иша,/ восхваля́юще Тя, Преблагослове́нная.

Та́же Оренбу́рг град одержи́мь бе лю́таго мо́ра наше́ствием/ и ве́лия скорбь обы́де та́мо живу́щих./ Ты же, Пречи́стая, повеле́ла еси́ святи́телю Анто́нию прия́ти ико́ну Твою́,/ и, егда́ сие́ сотвори́, боле́зни сме́ртныя отступи́ша./ Мы же, чудя́щеся чудеси́ сему́, вопие́м Ти:/ покры́й и нас честны́м Твои́м омофо́ром.

Егда́ сла́ва Пречи́стыя умно́жися,/ бысть повеле́ние царе́во, во е́же почти́ти Богома́терь ле́тным крестохожде́нием/ во вся концы́ Ура́льския земли́./ Та́ко и мы творя́ще, при́сно помина́ем Твоя́ чудеса́, Всеблага́я.

Сла́ва: Ми́ра Засту́пнице, Ма́ти Всепе́тая, ве́рных Твои́х похвало́!/ Не оста́ви нас си́рых и убо́гих рабо́в Твои́х,/ но присно пребу́ди с на́ми.

И ны́не: Ра́дуйся, Цари́це,/ люде́й правосла́вных и во́инств христолюби́вых Сла́во, Покро́ве и Прибе́жище./ Ра́дуйся, Чу́до чуде́с, Одиги́трие на́ша,/ ве́сей и градо́в Утвержде́ние.

Конда́к, глас 8:

Взбра́нной Воево́де ро́да христиа́нскаго/ и страны́ на́шея изве́стней Изба́вительнице,/ хвале́бныя пе́сни принесе́м, ве́рнии, Де́ве, Влады́чице Богоро́дице./ Ты же, я́ко иму́щая милосе́рдие неизрече́нное,/ от вся́ких нас ско́рбных обстоя́ний свободи́, да с любо́вию зове́м Ти:/ ра́дуйся, всего́ ми́ра Наде́ждо и Утеше́ние, Похвало́ Табы́нская.

И́кос:

Смысл очи́стивше и ум, притеце́м к Богоро́дице,/ све́тло пе́сньми ублажа́юще Ю́,/ и пречестну́ю ико́ну Ея́ Табы́нскую просла́вим и почти́м,/ припа́дающе, поклони́мся Ей,/ посрамля́ет бо не чту́щия Ю́,/ избавля́ет же от вели́ких бед и зол благонра́вныя и богобоя́щияся рабы́ Своя́, зову́щия:/ ра́дуйся, Похвало́ Табы́нская.

Песнь 7.

Ирмо́с: Не послужи́ша тва́ри богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, поюще:/ препе́тый отце́в Госпо́дь и Бог, благослове́н еси́.

Сла́ва Табы́нския ико́ны Твоея́, Пречи́стая, возсия́ в Верхнеура́льстем гра́де,/ те́мже мно́жество люди́й, срета́юще ико́ну Твою́,/ преложи́ша неве́рие в позна́ние и́стиннаго Бо́га/ и в па́мять о сем утверди́ша ка́мень ве́лий на высо́цей горе́./ Научи́ и нас, Богоневе́сто, па́мятовати чудеса́ Твоя́/ и воспева́ти препе́таго отце́в Го́спода и Бо́га.

Ны́не ра́дуется Сиби́рская земля́,/ достиго́ша бо ю́ вели́чия Твоя́, Богома́ти,/ лику́ет Челя́бинск град, с ни́мже гра́ды Тюме́нь и Кустана́й,/ прие́млюще Табы́нскую ико́ну Твою́, Пречи́стая,/ неоску́дно бо де́йство благода́ти Твоея́,/ е́юже соверша́еши вели́кая и пресла́вная чудеса́/ во спасе́ние всех и просвеще́ние.

Град Ура́льск ерети́ческим злове́рием одержи́мь бе,/ егда́ же сре́те о́браз Твой, Пречи́стая,/ ко́зни вра́жия а́бие разруши́шася,/ лю́дие же, ви́девше ми́лости быва́емыя, во след Тебе́ теча́ху/ и ве́ру Правосла́вную, ра́дующеся, прославля́ху.

Егда́ христолюби́вии во́ини земли́ Оренбу́ргския имя́ху ико́ну Твою́ в полце́ свое́м,/ тогда́ ве́лию кре́пость и си́лу обрета́ху на враги́ своя́,/ орды́ бо неве́рныя покори́ша/ и де́рзости их низложи́ша.

Сла́ва: Пово́лжстей земли́ то́чиши благода́ть незави́стную, Влады́чице,/ прише́ствием Твои́м в Сара́тов град,/ ико́на бо Твоя́ Табы́нская де́монов по́лчища отгоня́ет/ и ду́ши заблу́ждших просвеща́ет./ Мы же любе́зно покланя́емся и лобыза́ем ю́/ и Тя, Богоро́дице, велича́ем.

И ны́не: Всяк, прибега́яй к покро́ву Твоему́, Чи́стая,/ не отхо́дит тощь и не услы́шан,/ Ты бо, я́ко Ма́ти и́стиннаго Живота́,/ отча́янных ве́лие Прибе́жище и обурева́емых ти́хое Приста́нище./ Приими́ и нас, призыва́ющих Тя на по́мощь, Всепе́тая Влады́чице.

Песнь 8.

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ то́гда у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся́ ве́ки.

Егда́ лю́тая годи́на пости́же зе́млю Ру́сскую и яви́шася безбо́жнии лю́дие,/ тогда́ бысть всему́ Ура́льскому кра́ю ве́лие возмуще́ние:/ Бо́жия бо хра́мы разори́ша,/ святы́ни оскверни́ша и крестохожде́ния с ико́ною упраздни́ша./ Мы же мо́лим Тя, Влады́чице:/ испроси́ у Сы́на Твоего́ грехо́в оте́ц на́ших оставле́ние.

Печа́лующися о стране́ на́шей Ру́сстей, Влады́чице,/ и не хотя́щи ико́ною Твое́ю оста́вити ну́ждею преде́лы земли́ ея́,/ ста́ла еси́ недви́жно у Аму́ра реки́, несо́мая гони́мыми христолюби́выми во́ины./ Ве́рнии же лю́дие со святи́тели Мефо́дием и Не́стором сле́зно моля́хуся,/ да не оста́виши их си́рых во стране́ Кита́йстей,/ но да и́деши с ни́ми, по́мощь Свою́ подаю́щи.

Удиви́шася кита́йстии наро́ди, зря́ще чудеса́ от ико́ны Твоея́ быва́емая,/ те́мже, во храм Твой притека́юще, креще́ние приима́ху./ Мы же, ве́дуще сие́, прославля́ем Тя и Сы́на Твоего́, зову́ще:/ Го́спода по́йте, дела́,/ и превозноси́те Его́ во вся ве́ки.

Австрали́йская земля́ велича́ет Тя, Пречи́стая,/ слы́шащи о ди́вных чудесе́х Твои́х,/ Ты бо, любо́вию Свое́ю всех объе́млющи и благода́тию исполня́ющи, науча́еши пе́ти:/ Го́спода по́йте, дела́,/ и превозноси́те Его́ во вся ве́ки.

Сла́ва: Всяк язы́к, творя́й беззако́ние, лиша́емь святы́нь свои́х быва́ет,/ та́ко сокры́та есть от нас и Табы́нская ико́на Твоя́, Богома́ти, тайноде́йствием Бо́жиим,/ мы же, гре́шнии, в покая́нии те́пле мо́лим Тя:/ прииди́ к нам си́рым и уте́ши ны.

И ны́не: Ум а́нгельский и челове́ческий ужаса́ется, Влады́чице,/ ка́ко Младе́нца Безле́тна ражда́еши,/ ка́ко Сы́на Бо́жия на руку́ Твое́ю но́сиши,/ Его́же трепе́щут Го́рния си́лы, вопию́ще:/ Свят, Свят, Свят еси́, Бо́же,/ Богоро́дицею поми́луй нас.

Песнь 9.

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная, Богоро́дице,/ Чи́стая Присноде́во.

Ме́рзость запусте́ния на ме́сте святе́м быва́ше,/ егда́ исто́чницы сла́нии во враче́бницу преложе́ни бы́ша,/ оба́че Ты, Богоро́дице, неве́рствующих чуде́сным Твои́м страхова́нием изгнала́ еси́,/ да позна́ют вели́чия Твоя́, Богоневе́сто.

Возскорбе́ша христолюби́вии лю́дие,/ егда́ беззако́нницы храм, стоя́й на исто́чницех сла́ных, разори́ша/ и ме́сто свято́е в запусте́ние приведо́ша,/ оба́че до конца́ ми́лость от рабо́в Твою́ не отврати́ла еси́, Влады́чице, / и еди́ножды в ле́то струи́ водны́я в пеще́ре подае́ши, а́ки сле́зы точа́щи.

Се вре́мя благоприя́тное, се ны́не день спасе́ния наста́ в Ру́сстей земли́!/ Хра́мы Бо́жии открыва́хуся, оби́тели святы́я возражда́хуся/ и на горе́ Табы́нстей храм чу́дный Пречи́стей Богоро́дице воздви́гнут бысть,/ и́ноцы же, зде собра́вшеся, моли́тву о ми́ре возсыла́ют/ и сла́ву Бо́гу воспева́ют, та́ко изво́лившему.

Па́ки Благослове́нная Влады́чица излива́ет чудеса́ на рабы́ Своя́, я́коже пре́жде,/ та́ко и ны́не ми́лостию исполня́ет,/ мироточе́ние творя́щи от о́браза Своего́,/ к нему́же притека́ют вси, чту́щии Ю́,/ улуча́юще поле́зная ко спасе́нию.

Сла́ва: Ве́лия сла́ва Твоя́, Богома́ти, на исто́чницех сла́ных яви́ся,/ егда́ стека́хуся лю́дие возда́ти благодаре́ние Ти:/ тя́жко неду́гующих бо исцеля́еши,/ ма́терем детородя́щим ско́рое разреше́ние да́руеши,/ ожесточе́нно вражду́ющим неча́янное примире́ние подае́ши,/ сопру́жных в единомы́слии и любви́ сохраня́еши,/ Ра́дость бо Ты еси́ и́стинная.

И ны́не: Прииди́те, ве́рнии,/ чи́стым се́рдцем возвели́чим Пречи́стыя Ма́тере Бо́га на́шего чу́дную ико́ну Табы́нскую/ и Боже́ственнаго Младе́нца, Спа́са Христа́,/ Его́же, яко Ро́ждшая, на руку́ носи́вши/ и ма́тернее дерзнове́ние к Нему́ иму́щи,/ непреста́нно мо́лит за ны/ и подае́т рабо́м Свои́м бога́тыя ми́лости.

Свети́лен:

Да почти́тся Всепе́тая Ма́терь Бо́жия,/ ра́йских двере́й Отверзе́ние,/ всего́ ми́ра Очище́ние/ и к жи́зни нетле́нней Возведе́ние,/ я́ко Жизнь Су́щую ро́ждшая, Христа́ Бо́га на́шего,/ Сей бо есть проро́ком глаго́лавый, Тому́ поклони́мся,/ я́ко Бо́гу и Спа́су душ на́ших.

Сла́ва, и ны́не, то́йже.

На хвали́тех стихи́ры, глас 4:

Целому́дрия су́щи Хода́таица,/ призыва́ющим Тя ны́не яви́ся/ и от вся́ких изба́ви напа́стей и бед,/ Богоневе́сто Пречи́стая.

Неискусому́жно ро́ждши Го́спода,/ яви́ся по Рождестве́ па́ки де́вствующи:/ о, пресла́внаго чудесе́,/ в Тебе́ соде́ланнаго, Богоневе́сто!

Приими́, Отрокови́це Пречи́стая, Боже́ственную песнь,/ даю́щая благода́ть на Тя наде́ющимся,/ и мир испроси́ земли́ Ру́сстей при́сно посла́ти,/ да христиа́нский всяк язы́к Тя велича́ет.

Мно́гая Твоя́ щедро́ты ми́лостивно нас спаса́ют,/ еди́на Богома́ти,/ от грехо́внаго суда́ и разли́чных напа́стей,/ Ты бо, ро́ждши Бо́га, ми́луеши мир Его́.

Сла́ва, и ны́не, глас 2:

Ти́хое приста́нище/ оби́тель Твоя́ Табы́нская, Богоневе́сто,/ яви́ся всем притека́ющим,/ иму́щи в себе́ пречестну́ю Твою́ ико́ну,/ всем неоску́дно благода́ть подаю́щую.

Славосло́вие вели́кое. И отпу́ст.

На Литурги́и

Слу́жба Богоро́дицы.

Источник: Текст утвержден Священным Синодом Русской Православной Церкви 27 декабря 2016 года (журнал № 127)