17-й день

Свята́го апо́стола Андрони́ка и и́же с ним

Святой апостол от 70-ти Андроник и святая Юния

Свята́го му́ченика Никола́я Бо́лгарскаго

Святой великомученик Николай Софийский

Святы́я благове́рный вели́кия княги́ни Евдоки́и, во и́нокинях Евфроси́нии

Святая благоверная великая княгиня Евдокия, в иночестве Евфросиния

НА ВЕЧЕ́РНИ

Стихи́ры святы́х, глас 8.

Подо́бен: О, пресла́внаго чудесе́:

Сло́вом безслове́сную/ уста́вил еси́ безбо́жия тлю,/ я́ко Сло́ва послу́шник,/ и сла́вен служи́тель,/ и свети́льник пресве́тел/ вселе́нныя, Богоблаже́нне./ Те́мже тя словесы́ Боже́ственными сла́вим/ и святу́ю твою́ па́мять пра́зднуем ра́достно,/ хвалу́ принося́ще Вседержи́телю.

Па́вел, Боже́ственный апо́стол,/ Боже́ственными похвала́ми/ вас восхваля́я све́тло,/ ве́рным представля́ет ва́шу до́блесть,/ пре́жде сего́ глаго́ля/ показа́ти вас Бо́жия Сло́ва ученики́ всему́дрии/ и сро́дницы его́, Иуни́е сла́вная,/ я́ко вои́стинну, и блаже́нный Андрони́че,/ Бо́жий уго́дницы.

Всю свяще́нным пропове́данием/ просвети́вше зе́млю,/ мглу отгна́сте су́етства/ и к све́ту наста́висте Богоразу́мия,/ су́щия во тьме дре́вле безбо́жия,/ Боже́ственнии апо́столи,/ наста́вницы спасе́ния/ и моли́твенницы всех,/ ве́рно вас почита́ющих всегда́.

Сла́ва, и ны́не, пра́здника.

Тропа́рь, глас 3:

Апо́столи святи́и,/ моли́те Ми́лостиваго Бо́га,/ да прегреше́ний оставле́ние/ пода́ст душа́м на́шим.

Кано́н, творе́ние Ио́сифово, его́же краегране́сие: Хвалу́ приношу́ му́дрому Андрони́ку. Глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко еди́н сла́вно просла́вися.

Хвалу́ Бо́гу прино́сит в пресвяте́й, блаже́нне, па́мяти твое́й честна́я Це́рковь,/ по́двиги твоя́ ве́рою сла́вящи.

Напра́вил еси́ ума́ твоего́ вся движе́ния, свяще́нне,/ к Бо́жиих хоте́ний исполне́нию,/ ра́дуяся, Андрони́че.

Неду́ги очища́ти, ду́хи отгоня́ти лука́выя/ от Бо́га Боже́ственную благода́ть прия́л еси́,/ Богому́дре Андрони́че.

Богоро́дичен: Одожди́ ми, Де́во, всех согреше́ний избавле́ние и исправле́ние жития́/ Твои́м хода́тайством и благода́тию.

Песнь 3

Ирмо́с: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.

Умертви́в у́ды твоя́ по́двиги,/ жизнь сподо́бился еси́ живу́щих зре́ти/ на земли́ плоть нося́ща Христа́ Бо́га на́шего, Андрони́че апо́столе.

Огнедохнове́нен был еси́,/ Боже́ственнаго Ду́ха чи́стою мы́слию твое́ю теплоту́, апо́столе, обнося́/ и попаля́я пре́лести те́рние, Андрони́че всехва́льне.

Глаго́л твои́х веща́ние и си́ла чуде́с/ обтече́ ми́ра концы́, учениче́ Госпо́день,/ Боже́ственныя Ду́ха благода́ти ве́рныя науча́ющи.

Богоро́дичен: Несть пречи́сты, па́че Тебе́, Влады́чице,/ и несть непоро́чны, ра́зве Тебе́, Всенепоро́чная,/ Бо́га бо всех вмести́лище простра́нное еди́на была́ еси́.

Конда́к, глас 2

Подо́бен: Вы́шних ища́:

Звезду́ пресве́тлую,/ Богоразу́мия све́том просве́щшаго язы́ки/ апо́стола Христо́ва Андрони́ка восхва́лим/ и с ним во благове́стии потруди́вшуюся Иуни́ю прему́друю, вопию́ще:/ моли́те Христа́ Бо́га непреста́нно о всех нас.

Седа́лен, глас 4

Подо́бен: Ско́ро предвари́:

Боже́ственный Андрони́к, светови́ден быв,/ сердца́ просвети́ Богоразу́мия све́том ко Го́споду приходи́ти./ Те́мже и по кончи́не источа́ет исцеле́ния ве́рою приступа́ющим честно́му его́ хра́му/ и всем испроша́ет ве́рным ве́лию ми́лость.

Сла́ва, и ны́не пра́здника или́ Богоро́дичен:

Обнови́ла еси́, Чи́стая, Боже́ственным рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

Крестобогоро́дичен:

На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что́ но́вое и стра́нное сие́ чу́до, Сы́не Мой?/ Ка́ко, Жизнь всех, вкуша́еши сме́рти,/ оживи́ти ме́ртвыя хотя́, я́ко Милосе́рд?

Песнь 4

Ирмо́с: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́хом славосло́вяше си́лу Твою́.

Тя, я́ко сро́дника, целу́ет Па́вел, пред ве́рными/ Боже́ственныя твоя́ похвалы́ пропове́дая, Андрони́че Богоглаго́ливе,/ световоди́телю восхваля́ющим тя.

Дом быв Трои́цы Пресвяты́я, хра́мы и тре́бища разори́л еси́ бла́зненныя/ и созда́л еси́, прехва́льне, це́ркви во спасе́ние душ на́ших.

Возмо́гл еси́, Бо́жиею мо́щию укрепи́вся,/ си́льнаго восхи́тити сосу́ды, блаже́нне,/ и соверши́ти Ду́ха Свята́го жили́ще, Андрони́че.

Богоро́дичен: Тя всегда́, Де́во Богоро́дице, вси ве́рнии, согла́сно воспева́ем,/ я́ко тве́рдое и побо́рное предста́тельство и спасе́ние душ на́ших.

Песнь 5

Ирмо́с: От но́щи неве́дения,/ Богове́дением просвети́вый концы́,/ просвети́ мя у́тром человеколю́бия Твоего́, Го́споди.

Я́ко сро́дника тя Па́влу и пре́жде его́ ученика́ бы́вша,/ с ни́мже тя почита́ем, ве́рою соше́дшеся, Андрони́че.

Светоза́рныя зве́зды, свяще́нныя апо́столы почти́м,/ Иуни́ю Боже́ственную и Богоно́снаго Андрони́ка.

Я́ко наро́читы су́ще во апо́столех,/ вас блаже́нный Па́вел пропове́дает в Це́ркви, блаже́ннии.

Богоро́дичен: Тя, Пресвята́я Отрокови́це, проро́ческий лик проначерта́ свяще́нными о́бразы/ бы́ти Госпо́дню Роди́тельницу.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Дом твой исцеле́ний исто́чники любо́вию притека́ющим источа́ет, апо́столе,/ омыва́я душе́вныя не́мощи.

Истле́вшее безбо́жием мно́жество язы́к обнови́л еси́ но́выми твои́ми уче́нии,/ нетле́ннаго Иису́са дру́же и́скренний.

Я́ко со́лнце, обте́кл еси́ зе́млю, Андрони́че прему́дре,/ трисо́лнечный и несозда́нный возвеща́я ве́рным свет Божества́.

Богоро́дичен: Боже́ственная ше́ствия на Тебе́ Влады́ки позна́шася,/ пло́тию обнища́вшаго и обогати́вша ве́рныя, Неискусобра́чная.

Конда́к и и́кос пра́здника.

Песнь 7

Ирмо́с: В нача́ле зе́млю основа́вый/ и небеса́ сло́вом утверди́вый/ благослове́н еси́ во ве́ки,/ Го́споди, Бо́же оте́ц на́ших.

Неду́ги лю́тыя и вся́ку боле́знь от душ вку́пе же и теле́с отго́ниши/ притека́ющих в дом твой, му́дре учениче́ Христо́в.

Де́монская наи́тия отгоня́еши и стра́сти лю́тыя очища́еши челове́ком,/ спострада́льчеством Христо́в самови́дче,/ сего́ ра́ди тя ве́рно ублажа́ем.

Ри́торское, му́дре, глумле́ние низложи́в простото́ю уче́ний,/ Бо́га пропове́дуеши в виде́нии пло́тсте пожи́вша со земны́ми бла́гости ра́ди.

Богоро́дичен: Во утро́бу Де́вы всели́выйся и в ней Ада́ма назда́вый,/ благослове́н еси́, Го́споди, Бо́же оте́ц на́ших.

Песнь 8

Ирмо́с: На горе́ святе́й просла́вльшася/ и в купине́ огне́м Присноде́вы/ Моисе́ови та́йну я́вльшаго,/ Го́спода по́йте и превозноси́те во вся ве́ки.

Объюроде́вшая злым гно́ем челове́ческая, Андрони́че, сердца́/ со́лию Боже́ственною стягну́в, уче́нии твои́ми,/ излия́вшемуся Сло́ву спаса́емы предста́вил еси́, треблаже́нне.

Свяще́нник же, и жрец, и же́ртва поже́ршемуся за милосе́рдие позна́лся еси́/ и к Нему́ восте́кл еси́, Андрони́че,/ вене́ц нетле́ния и пра́вды от Него́ прие́м.

Пропове́дник Боже́ственный и апо́стол Богови́дец,/ разори́тель истука́нных ги́бельных и богати́тель ни́щих яви́лся еси́, сла́вне,/ и Сио́на вы́шняго вели́кий жи́тель, Андрони́че Богому́дре.

Богоро́дичен: Я́ко клеща́ми, рука́ми угль но́сиши,/ ро́су Боже́ственную источа́ющаго, Де́во, пла́менем ле́сти бе́дствующим,/ попаля́юща же стра́сти песносло́вящих Того́ ца́рствие.

Песнь 9

Ирмо́с: Проявле́нное на горе́ законополо́жнику во огни́ и купине́/ рождество́ Присноде́вы/ в на́ше ве́рных спасе́ние/ пе́сньми немо́лчными велича́ем.

Да о́ныя жи́зни яви́шися насле́дник,/ умерщвле́нныя пре́жде де́монскими прило́ги оживи́л еси́/ живоно́сным твои́м сло́вом, достоблаже́нне Андрони́че.

Я́ко и́стиннаго быв виногра́да, преблаже́нне, лоза́ благора́сленна,/ вино́ безсме́ртия иска́пал еси́ и челове́ков сердца́ возвесели́л еси́,/ прехва́льне Андрони́че.

Ты, я́ко мо́лния, попали́в вещь многобо́жия,/ я́ве показа́л еси́ свет Богоразу́мия су́щим во тьме жития́,/ тем тя прославля́ем вси, Андрони́че.

Свяще́нная твоя́ па́мять, простира́ема в концы́,/ днесь просвеща́ет сердца́ в ней тя свяще́нно восхваля́ющих,/ достоблаже́нне Андрони́че.

Богоро́дичен: Просвеще́ние нам испроси́, Я́же Свет ро́ждшая,/ и согреше́ний оставле́ние и душа́м спасе́ние, ве́дущим Тя, и́стинную Богоро́дицу,/ Чи́стая Де́во Всенепоро́чная.

Святой апостол от 70-ти Андроник и его помощница в апостольских трудах святая Юния были родственниками апостола Павла. Они уверовали во Христа раньше апостола Павла и много потрудились, проповедуя Евангелие язычникам, о чем упоминает апостол Павел в Послании к римлянам: «Приветствуйте Андроника и Юнию, сродников моих и узников со мною, прославившихся между апостолами и прежде меня еще уверовавших во Христа» (Рим. 16, 7). Святой Андроник был рукоположен во епископа Паннонии, но его проповедь и проповедь святой Юнии распространилась и в другие страны, далеко за пределы его епархии. Апостол Андроник и святая Юния умерли для мира ради Христа, чтобы многих привести к познанию Бога Истинного. Их трудами утверждалась Церковь Христова, язычники обращались ко Христу, идольские капища разрушались и вместо них созидались христианские храмы. Всюду проходя с проповедью, они врачевали немощных и больных и изгоняли из людей нечистых духов.

Пострадав за Христа, святые Андроник и Юния приняли мученические венцы. В V веке, при императорах Аркадии и Гонории, их святые мощи были обретены в предместье Константинополя вместе с мощами других мучеников «иже во Евгениевых» (память 22 февраля).

В ХII веке близ Евгениевых ворот в Царьграде императором Андроником I был построен великолепный храм, предположительно, на месте обретения святых мощей его Небесного покровителя – святого апостола Андроника. Память святого апостола Андроника совершается также 30 июля, вместе с четырьмя другими апостолами от 70-ти: Силою, Силуаном, Крискентом и Епенетом.

Служба святому апостолу Андронику написана святым Иосифом Песнопевцем. В одном из 15-ти канонов, написанных святым Иосифом в честь 70-ти апостолов, восхваляются чудеса от мощей святого апостола Андроника в его храме.

Литература:

1. Святитель Димитрий, митрополит Ростовский. Жития святых. Кн. 9. М., 1908.

2. Полное собрание житий святых Православной Греко-Российской Церкви. Под ред. Е. Поселянина. СПб., 1908.

3. Дестунис С. Жития святых. Месяц Май. Спб., 1886.

4. Настольная книга священнослужителя. Т. 3. М., изд. Московской Патриархии, 1979.

На ма́лой вече́рни хотя́й бде́ние сотвори́ти предстоя́тель да пое́т стихи́ры свята́го апо́стола Андрони́ка, еди́наго от седми́десяти.

НА ВЕЛИ́ЦЕЙ ВЕЧЕ́РНИ

Бла́жен муж: 1-й антифо́н. На Го́споди, воззва́х: поста́вим стихо́в 8 и пое́м стихи́ры глас 4.

Подо́бен: Зва́нный свы́ше:

Вы́шнее получи́в зва́ние осия́нием,/ егда́ пло́ти твоея томле́ние удруча́ше мы́сли,/ тогда́ па́че на наде́жду Христо́ву неукло́нно воззре́л еси́/ и отту́ду кре́пкия си́лы прито́ргл еси́;/ суеты́ жела́ние у́мному покори́в ду́ху,/ я́коже магни́т, привле́кл еси́/ тве́рдаго по́двига терпе́ние./ Те́мже и вене́чник показа́лся еси́, Нико́лае,/ живода́тельною десни́цею увенчава́емь Бо́жия Сло́ва,/ Его́же моли́ спасти́ и просвети́ти ду́ши на́ша.

Вы́шняго ликостоя́ния раче́нием уязвле́н,/ егда́ тя сопроти́вных наве́т в темни́це затвори́,/ тогда́ па́че жела́нием бу́дущих ду́шу распали́в,/ я́коже адама́нт, нетоми́мо свое́ утверди́л еси́ се́рдце/ и к страда́нию поте́кл еси́,/ я́коже к исто́чнику жа́ждавый,/ отону́дуже ка́менным мета́нием посы́пан, Нико́лае,/ красе́н вои́стинну Краеуго́льному предста́л еси́,/ Его́же моли́ спасти́ и просвети́ти ду́ши на́ша.

Свы́ше тя зва́нна коне́ц веще́й показа́,/ егда́ низувлеку́щая мудрова́ния повину́л еси́ лу́чшему,/ тогда́, во мно́зей ме́ртвости свою́ прозре́в ду́шу,/ устреми́лся еси́ в безсме́ртие преложи́ти ю страда́нием,/ мук терпе́нием угнета́емь,/ топта́вшей души́ твое́й/ точи́ло соде́лался еси́,/ весе́лия вино́, кровь твою́, точа́щее, Нико́лае,/ вся́кую му́ку пренебре́г о укрепля́ющем тя Христе́,/ Его́же моли́ спасти́ и просвети́ти ду́ши на́ша.

Свы́ше соше́дшее безме́рныя ра́ди любве́ Бо́жие Сло́во,/ егда́ твоея́ души́ нра́ва незы́блемую предузре́ си́лу,/ тогда́ лию́щий грозу́ исто́чник мы́слей затвори́,/ отверза́я ти дея́ние к виде́ния восхо́ду,/ я́коже льва стра́шна к звере́м боя́зненным, укрепи́ тя/ и, я́коже иаки́нф⁴⁷ зла́чному по́лю,/ украси́ тя страда́нием, Нико́лае,/ и ны́не, дерзнове́нный му́ченик, предстои́ши Ему́,/ Его́же моли́ спасти́ и просвети́ти ду́ши на́ша.

Сла́ва, глас 3:

Прииди́те, ве́рнии,/ све́тлый по́двиг му́ченика Никола́я торжеству́им/ и пресла́вному Бо́га на́шего смотре́нию удиви́мся:/ ка́ко обновля́ет естество́, обложе́нное страстьми́!/ Ка́ко персть Небе́сным сопричте́ си́лам!/ Ка́ко насле́дники Своего́ Ца́рствия земны́х устро́и,/ я́коже до́блесть явля́ет но́ваго страда́льца,/ смерть животу́ предпоче́тшаго Христа́ ра́ди/ и в чи́не му́ченик Престо́лу Бо́жия сла́вы ны́не предстоя́щаго!/ К нему́ у́бо с ра́достию возопии́м, глаго́люще:/ о му́чеников украше́ние и ве́ры неруши́мый сто́лпе,/ пе́рваго в му́ченицех подо́бниче всехва́льный,/ многострада́льне побе́дниче Нико́лае,/ я́ко име́я дерзнове́ние ко Христу́ Бо́гу,/ моли́ изба́витися нам ви́димых и неви́димых враг/ и всех спасти́ся душа́м,/ и́же при́сно почита́ющих честну́ю па́мять твою́.

И ны́не, пра́здника или́ Богоро́дичен: Ка́ко не диви́мся:

Вход. Проки́мен дне. И чте́ния 3 му́ченическая

(зри 15 мая)

На литии стихиры самогласны, глас 1:

Смире́нием души́ па́мять му́чеников пра́зднуим, ве́рнии,/ вме́сто о́ных до́блестей к лу́чших жела́нию всегда́ простира́еми,/ презира́юще печа́льная па́мятию ве́чных благ;/ вме́сто крове́й свое́ излива́юще к Бо́гу се́рдце/ и не и́мать его́ уничижи́ти сокруше́нна и смире́нна,/ благоволи́т же па́че вся́кия же́ртвы приноше́ния./ Си́це обновля́ется обетша́вшее грехо́м естество́,/ я́ко да, доброде́тельми возводи́ми,/ в чи́не му́ченик со дерзнове́нием предста́нем,/ иде́же Свет незаходи́мый и жизнь присносу́щная./ И́хже моли́твами, Христе́ Бо́же наш,/ всех нас Ца́рствия Твоего́ сподо́би,/ я́ко Благ и Человеколю́бец.

Глас 2:

Мудрова́ния плотска́я и вети́йства,/ я́ко дым, ве́тром прогоня́емь, обличи́шася днесь:/ безкни́жный превзы́де си́лою ду́ха/ возмо́жных кре́постию сло́ва и де́лы/ победи́ ди́вный в му́ченицех вои́стинну Никола́й./ Сей бо, на суди́щи стоя́,/ Христа́ испове́да, Бо́га и Творца́ вся́кия тва́ри,/ и нему́дрых мудреце́в терпе́нием посрами́,/ да в сро́дных нас труды́ свои́ми/ соверше́ние ве́ры укрепи́т./ Преоби́дев плоть, преступле́ние пра́деднее в свое́м те́ле испра́ви/ и рай восприя́т,/ отону́дуже Ада́м ниспаде́;/ разреши́в же соу́з естества́ страда́нием,/ вы́сшею связа́ себе́ я́же с Бо́гом жи́знию/ и мо́лится непреста́нно о душа́х на́ших.

Глас 3:

Собо́р сво́дит благочести́вых до́бляго му́ченика па́мять,/ и́же вчера́ на́ми зри́мый виде́нием/ преложи́ся днесь ди́вно страда́нием./ Сей бо, муче́нием угнета́емь,/ лу́чших бога́тство и вы́сших сла́ву/ простото́ю победи́ и ра́вный ученико́м Госпо́дним чин получи́,/ свою́ ду́шу земна́го бога́тства лу́чшую непщева́в/ и по Христе́ усе́рдие кровь свою́ пролия́в./ Да постыдя́тся ны́не высокому́дреннии, неве́рием одержи́мии,/ несть бо си́льнейше па́че благоче́стия,/ ниже́ крепча́йше па́че я́же к Бо́гу наде́жды./ Моли́твами Твоего́ му́ченика, Христе́ Бо́же наш,/ Це́рковь Твою́ утверди́ и спаси́ ду́ши на́ша, я́ко Человеколю́бец.

Глас 4:

Ра́дуйся о Го́споде, гра́де Софи́е,/ блаже́нна бо земля́ твоя́,/ напи́вшися крове́й му́ченик,/ и́же из тебе́ на Не́бо пресе́льшеся,/ а́нгельския ли́ки сведо́ша,/ к страда́нию их подвиза́ющия,/ и Царя́ сла́вы Христа́ недомы́сленне с высоты́ призре́ти сотвори́ша,/ побе́дныя тем венцы́ простира́юща./ О, та́инства вели́каго:/ земна́я Не́бо бы́ша и челове́к в А́нгела преложи́ся!/ О, глубины́ бога́тства и прему́дрости и ра́зума Бо́жия,/ я́ко иде́же умно́жися грех преступле́нием,/ преизоби́лова благода́ть послуша́нием./ Тля сме́рти жи́знию попра́на бысть/ и свет благоче́стия ве́рным возсия́./ Го́споди, му́ченик Твои́х моли́твами/ мир гра́ду Твоему́ низпосли́/ и вселе́нней да́руй ве́лию ми́лость.

Сла́ва, глас 5:

Воспои́м пра́зднественная,/ торжество́ смотря́юще разу́мныя си́лы,/ я́же, сво́йство до́льних муче́нием претвори́вши,/ превзы́де всяк ум./ Простото́ю бо уче́ния и нра́вы ра́зума в мо́ри бу́рнем плову́ще,/ ры́барския мре́жи Христо́вых лове́ц/ му́ченицы собо́ю испо́лниша/ и чу́дныя бы́ша же́ртвы за ны поже́ршагося Сло́ва Бо́жия./ Прииди́те у́бо, стеце́мся вси,/ и любо́вию се́рдца воззове́м к ним, глаго́люще:/ о победи́телие пресла́внии,/ и́же ве́ры соблюде́нием чин земноро́дных превозше́дшии,/ Гео́ргии прозва́нием единоиме́ннии/ и страда́ний произволе́нием ра́внии,/ Нико́лае же многострада́льне и крепкоду́шне,/ дерзнове́ние я́ко иму́ще ко Христу́ Бо́гу,/ ми́ра ми́рови испроси́те/ и певце́м ва́шим ве́лия ми́лости.

И ны́не, пра́здника или́ Богоро́дичен:

Храм и дверь еси́,/ пала́та и престо́л Царе́в,/ Де́во Всечестна́я,/ Е́юже Изба́витель мой, Христо́с Госпо́дь,/ во тьме спя́щим яви́ся,/ Со́лнце Сый Пра́вды, просвети́ти хотя́,/ я́же созда́ по о́бразу Своему́ рукою Свое́ю./ Те́мже, Всепе́тая,/ я́ко Ма́терне дерзнове́ние к Нему́ стяжа́вшая,/ непреста́нно моли́ спасти́ся душа́м на́шим.

На стихо́вне стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́,/ и́же существо́, потемне́вшее преступле́нием/ и тле́нию подпа́дшее Бо́жия руки́ созда́ние/ злым наве́том с небесе́ све́рженнаго денни́цы,/ па́ки исправля́ет Бог Сло́во обновле́нием,/ я́же по нас восприя́тыя пло́ти/ и, прибы́в к естеству́ на́шему, де́йство претвори́,/ отону́дуже отбеже́ тьма гоня́щая/ и нощь просвеще́ния нам возсия́,/ в лу́чшую и соверше́нную нас возводя́ жизнь./ О, каково́ дарова́ние земны́м даде́ся,/ и́мже, Христе́, спаси́ ду́ши на́ша,/ я́ко Милосе́рд.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

О, пресла́внаго чудесе́,/ и́же пре́жде нрав сла́бости явля́ше,/ ны́не страда́ния ра́ди/ му́ченическим лико́м совокупля́ется;/ и́же настоя́щая презира́яй,/ а́нгельскими си́лами ужа́сно смотря́ется;/ терпе́нием бо вся́кую скве́рну души́ умы́в,/ ба́нею пакибытия́ кро́ве своея́ оде́явся,/ свы́ше восприя́т чистоты́ осия́ние,/ к нему́же про́чее не каса́ется поро́к страсте́й,/ немощно́е бо естества́ па́че вся́кия си́лы яви́ся,/ и́мже, Христе́, спаси́ ду́ши на́ша,/ я́ко Милосе́рд.

Стих: Насажде́ни в дому́ Госпо́дни/ во дво́рех Бо́га на́шего процвету́т.

О, пресла́внаго чудесе́,/ и́же пре́жде сном до́льних упражня́яйся/ ны́не с Небе́сными си́лами Го́рняя пра́зднует;/ к земны́м влеку́щаго стремле́ния отто́ргся,/ Вы́шняго Ца́рствия насле́дник яви́ся;/ после́дний в му́ченицех бы́вый,/ пе́рвых страда́льцев ра́вным увязе́ся венце́м/ и ра́вную мзду пе́рвых де́лателей бога́тне восприя́,/ вседо́блий страда́лец Христо́в Никола́й,/ тече́ние бо соверши́ ве́ры соблюде́нием./ О, ка́ко подвиза́ся и ка́ко пострада́,/ и́мже, Христе́, спаси́ ду́ши на́ша,/ я́ко Милосе́рд.

Сла́ва, глас 6:

Тезоиме́нное стяжа́вшаго побе́ды и́мя/ страда́нием ве́ры ра́ди, я́же во Христа́ Бо́га,/ ве́село пра́зднественная торжеству́им, ве́рнии,/ и во гла́се хвале́ния воспои́м его́, глаго́люще:/ ра́дуйся, обновле́ние страда́льцев Христо́вых и похвало́,/ и́же собо́ю дерзнове́ние к терпе́нию вдохну́вый всем;/ ра́дуйся, я́ко пе́рвому в му́ченицех Стефа́ну/ ка́меннаго ра́ди побие́ния/ подо́бник све́тел яви́выйся./ Ра́дуйся, я́ко мы́сленным осия́нием Небеса́ отверзо́шася тебе́/ и Сы́на Бо́жия, вене́ц побе́ды тебе́ простира́юща,/ у́мныма све́тло усмотре́л еси́ очи́ма./ Того́ приле́жно моли́, многострада́льне Нико́лае,/ умири́ти язы́ческая, я́же на ны, возноше́ния/ и спасти́ ду́ши на́ша.

И ны́не, пра́здника или́ Богоро́дичен: Творе́ц и Изба́витель мой, Пречи́стая:

На благослове́нии хле́бов тропа́рь свята́го, два́жды и Богоро́дице Де́во: еди́ножды.

Тропа́рь свята́го, глас 3:

Заре́ю Ду́ха обогати́вся, сла́вне,/ и отту́ду восприи́м дерзнове́ние,/ испове́дал еси́ на суди́щи му́жески Тро́ицу Единосу́щную,/ те́мже и ка́мением побива́емь,/ не покори́лся еси́./ Огне́м же сожига́емь,/ обличи́л еси́ пре́лесть безбо́жных,/ многострада́льне свя́те Нико́лае./ Сего́ ра́ди мо́лим тя:/ испроси́ душа́м на́шим/ ве́лию ми́лость.

НА У́ТРЕНИ

На Бог Госпо́дь: тропа́рь пра́здника, два́жды. Сла́ва, свята́го. И ны́не, пра́здника.

По 1-м стихосло́вии седа́лен, глас 1.

Подо́бен: Ка́мени запеча́тану:

Ка́мением по Христе́ побие́н, му́чениче сла́вне,/ Ка́мени краеуго́льному приложи́лся еси́, досточу́дне./ И, земна́я пренебре́г, в Небе́сных вита́еши селе́ниих,/ и́хже ра́ди земноро́дных удиви́л еси́ терпе́нием,/ а́нгельския же чи́ны ра́дости испо́лнил еси́,/ и́же, о́бщее с на́ми соста́вльше весе́лие, взыва́ют:/ сла́ва Да́вшему ти кре́пость,/ сла́ва Венча́вшему тя,/ сла́ва Явльшему тобо́ю всем до́блесть терпе́ния твоего́.

Сла́ва, и ны́не, пра́здника или Богоро́дичен:

Гаврии́лу веща́вшу Тебе́, Де́во, ра́дуйся,/ со гла́сом воплоща́шеся всех Влады́ка в Тебе́, Святе́м Киво́те,/ я́коже рече́ пра́ведный Дави́д:/ яви́лася еси́ ши́ршая Небе́с, поноси́вши Зижди́теля Твоего́./ Сла́ва Все́льшемуся в Тя,/ сла́ва Проше́дшему из Тебе́,/ сла́ва Свободи́вшему нас рождество́м Твои́м.

По 2-м стихосло́вии седа́лен, глас 4.

Подо́бен: Удиви́ся Ио́сиф:

Удиви́шася вси мы́сленных сил чи́нове,/ па́че естества́ в тебе́ до́блесть смотря́юще,/ я́ко ра́вным произволе́нием пе́рвых после́довавша/ и кре́пкую ка́мением ле́ствицу к Небеси́ себе́ испра́вльша,/ схожде́ньми и восхожде́ньми А́нгелов окруже́нную,/ на не́йже Бо́га утвержде́нна обре́л еси́, тебе́ вене́ц подаю́ща./ Си́лы Небе́сныя возвесели́л еси́, Нико́лае, и бе́сы посрами́л еси́,/ мы же, покланя́ющеся, сла́вим Христа́, тебе́ укре́пльшаго.

Сла́ва, и ны́не, пра́здника или́ Богоро́дичен:

Удиви́ся Ио́сиф, е́же па́че естества́ зря, и внима́ше мы́слию,/ и́же на руно́ дождь, в безсе́меннем зача́тии Твое́м, Богоро́дице,/ купину́, огне́м неопали́мую,/ жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет и по рождестве́ па́ки Де́вою пребыва́ет.

По полиеле́и седа́лен, глас 8.

Подо́бен: Прему́дрость и Сло́во:

До́блий по́двиг твой, му́чениче чу́дне, украси́ восто́к сия́нием,/ за́пад же озари́ луче́ю позна́ния,/ я́коже бо от све́та чу́вственнаго у́мными восхожде́ньми твои́ми подсо́лнечная вся преизоби́лова./ Кто бо, слы́шав по́двиг твоего́ терпе́ния, не удиви́тся:/ ка́ко, смире́нный, тесноту́ приско́рбнаго пути́ проше́л еси́,/ и креще́ние пакибытия́ обнови́л еси́ свое́ю кро́вию,/ и, па́че све́та блиста́яся, своему́ предста́л еси́ Царю́?/ Те́мже, я́ко хра́брый во́ин, дерзнове́ние к Нему́ име́я,/ помина́й пою́щия тя, страстоте́рпче Нико́лае,/ моля́ Его́ непреста́нно грехо́в оставле́ние дарова́ти/ чту́щим любо́вию честны́я по́двиги твоя́.

Сла́ва, и ны́не, пра́здника или́ Богоро́дичен:

В напа́сти многоплете́нныя впадо́х,/ воста́ бо на мя бу́ря мы́сленнаго движе́ния/ и потопи́ша мя сла́стныя греха́ во́лны;/ весь обнажи́хся духо́вныя кре́пости, окая́нный,/ и прибли́жихся а́ду злых дел закосне́нием;/ и кончи́ны моея́ пости́же мя печа́ль,/ боя́знь бо грози́т мя зде́шних разлуче́ния,/ бесо́вскаго нападе́ния и возду́шных князе́й стра́шнаго истяза́ния./ Те́мже потщи́ся в ну́ждный час исхо́да моего́/ и бесо́вскаго мя кова́рства вы́сша покажи́,/ я́ко да во гла́се ра́дования воспою́ ти:/ Богоро́дице, помози́ ми, согреше́ний проще́ние да́рующи,/ Тебе́ бо стяжа́х наде́жду, раб Твой.

Та́же степе́нна, 1-й антифо́н 4-го гла́са. Проки́мен, глас 4: Пра́ведник, я́ко фи́никc, процвете́т/ я́ко кедр, и́же в Лива́не, умножи́тся. Стих: Насажде́ни в дому́ Госпо́дни во дво́рех Бо́га на́шего процвету́т. Вся́кое дыха́ние: Ева́нгелие от Матфе́я, зача́ло 36.

По 50-м псалме́ стихи́ра, глас 6:

Днесь му́ченичестии ли́цы, в ра́дости пра́зднующее к торжеству́ нас созыва́ют/ ди́внаго в му́ченицех страстоте́рпца Никола́я,/ и́же обновле́ние бысть пресла́вныя па́мяти их,/ не ле́тными кру́ги сие́ соверша́я,/ но свое́ю кро́вию Христа́ просла́вив/ и Правосла́вную ве́ру собо́ю уясни́в./ Укрепи́вый того́, Го́споди, сла́ва Тебе́.

Кано́н свята́го, глас 2, его́же краегране́сие: Но́ваго му́ченика побе́ду воспева́ю, Сло́ве. А в Богоро́дичных сло́зех: Андре́ова.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Припе́в: Святы́й му́чениче Нико́лае, моли́ Бо́га о нас.

Несозда́ннаго всех Соде́теля, И́же дре́вле в мо́ри чудоде́йствовавшаго/ и всю си́лу фарао́ню пото́пльшаго,/ му́чеников же в страда́ниих благода́тию укре́пльшаго, совоку́пно воспои́м, я́ко просла́вися.

Огненным твои́м по Христе́ искуше́нием чи́ны преми́рных А́нгел удиви́л еси;/ мы же, восхваля́юще кре́пкое твое́ страда́ние, мо́лим тя:/ испроси́ нам соверше́нное избавле́ние у Го́спода, я́ко просла́вися.

Ве́лия прему́дрость Бо́га на́шего:/ ве́дый созда́ний существо́ пре́жде быти́я/ и ви́дев твоея́ души́ бо́дренное к Нему́ стремле́ние,/ многострада́льным иску́сом изъяви́ жития́ твоего́ исправле́ние, и́мже просла́вися.

Припе́в: Святи́и трие́ му́ченицы, моли́те Бо́га о нас.

А́ще и многомяте́жно жития́ мо́ре,/ но долувлеку́щая страсте́й мечта́ния, до́блии страда́льцы, терпе́нием попра́ша,/ и ти́хому приста́нищу себе́ возложи́ша,/ и произволе́нием муче́ния град Софи́йский просла́виша.

Богоро́дичен: Ада́мский род, к Твоему́ притека́яй покро́ву, Пречи́стая Де́во,/ я́ко си́льна, в кре́пости предвари́ и вся́ких душевою́ющих напа́стей изба́ви,/ ми́лостива су́щи, я́ко Ма́ти Взе́млющаго грехи́ ми́ра.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Мученику: Го́рькаго муче́ния многоте́сную проше́д стезю́,/ широ́каго же и па́губнаго уклони́вся пути́,/ ны́не Ца́рствия Небе́снаго селе́ние, я́ко труда́ возме́здие,восприя́л еси́/ и со а́нгельскими си́лами ликова́ние.

Очеса́ устреми́в души́ твоея́ к жела́нию бу́дущих,/ несмуще́нне к страда́нию поте́кл еси́,/ его́же ра́ди безсме́ртия венце́м от Христа́ увяза́лся еси́, Нико́лае,/ и я́ко красе́н победи́тель Ему́ предста́л еси́.

Маловре́менную сла́ву земна́го жития́, я́ко мно́гаго су́етства испо́лненную, презре́л еси́,/ страда́ти же па́че по Христе́ изволя́я, и, ка́мением за Него́ побие́н быв,/ сын и насле́дник Ца́рствия яви́лся еси́.

Мучеником: Умре́ти по Христе́ восхоте́вше, присносла́внии,/ мирска́я пристра́стия и боя́знь жесто́каго муче́ния не поколеба́ша ва́шея ве́ры основа́ния,/ те́мже ны́не, в де́лех жела́ния ва́шего все́льшеся, при́сно ра́дуетеся.

Богоро́дичен: Ни песка́ морска́го исчести́ кто мо́жет,/ ни глубины́ изсле́дити бе́зднам,/ ни Твои́м косну́тися та́инством, Богоро́дице,/ вся бо преми́рныя си́лы превосхо́диши че́стностию./ Те́мже по вели́чию мы́шцы Своея́ снабди́ рабо́в умерщвле́нных,/ ве́рою Сы́ну Твоему́ при́сно покланя́ющихся.

Седа́лен, глас 8

Подо́бен: Прему́дрость и Сло́во:

Прему́дростию па́че слове́с,/ от не́мощи в си́лу по Бо́зе дерзнове́нием к дея́нию себе́ возве́л еси́;/ к виде́нию же восте́к Боже́ственных позна́ний/ и высоту́ дости́г соверше́ннаго богосло́вия тве́рдаго ка́мене ве́ры,/ мглы грехо́вныя а́бие от души́ прогна́л еси́ и дерзну́л еси́ к супоста́том,/ и́же ка́мением ри́зу души́ твоея́ испра́ша/ и подо́бника тя Влады́це твоему́ показа́ша,/ от Едо́ма восходя́щу оброщвле́нну⁴⁸ оде́ждею и червле́ну от Восо́ра./ Те́мже кро́вию восхо́д получи́л еси́ Ца́рствия Бо́жия/ и неизрече́нная восприя́л еси́ блага́я,/ страстоте́рпче Нико́лае, моли́ Христа́ Бо́га грехо́в оставле́ние дарова́ти/ чту́щим любо́вию честну́ю па́мять твою́.

Сла́ва, и ны́не, пра́здника или́ Богоро́дичен:

Прему́дрость и О́тчее Сло́во в Тебе́ непреме́нно воплоти́ся во обои́х существа́х кра́йним смотре́нием/ и воста́ви естество́, па́дшее преступле́нием,/ многосмра́дныя скве́рны мир свободи́в./ Того́ моли́ со дерзнове́нием, Ма́ти Чи́стая,/ дарова́ти безме́стным дея́нием исправле́ние/ и ту́нею⁴⁹ бла́гостию грехо́м оставле́ние./ Ми́лостива бо еси́ Тя пою́щим/ и вско́ре отвраща́еши сугу́бых враго́в наве́ты./ Те́мже потщи́ся от всего́ се́рдца Тебе́ вопию́щим,/ согреше́ний проще́ние да́рующи,/ Тя бо и́мамы наде́жду, раби́ Твои́.

Песнь 4

Ирмо́с: Услы́шах, Го́спода,/ сла́вное Твое́ смотре́ние/ и просла́вих, Человеколю́бче,/ непостижи́мую Твою́ си́лу.

Мученику: Челове́к сый, сверхчелове́ческая дости́гл еси́, сла́вне Нико́лае,/ исто́чник бо кро́ве и струи́ страда́ния по Христе́ излия́в/ и непостижи́мыя высоты́ косну́вся,/ неизрече́нных ны́не наслажда́ешися благи́х,/ с му́ченическими ли́ки ра́дуяся.

Его́же трепе́щут бе́здны и преиспо́дняя,/ не стерпе́л еси́ ага́ряны злочести́выми в тварь своди́тися,/ де́лом па́че, не́жели сло́вом, кре́пость мудрова́ния своего́ уверя́я,/ го́рькия бо сме́рти не убоя́вся,/ всех ужаси́л еси́ терпе́нием свои́м и Бо́гови присво́ился еси́.

Напа́дшия тя ме́рзости злоче́стия совле́кся/ и вся преоби́дев маловре́менная,/ Христа́ по существу́ Бо́га бы́ти на суди́щи злочести́вых испове́дал еси́/ и добро́ту прекра́сныя твоея́ души́ в терпе́нии твое́м стяжа́ти потща́лся еси́.

Мучеником: Изве́стнаго раче́ния вожделе́вше, присносла́внии му́ченицы,/ ве́чнующаго весе́лия и николи́же ско́рбными прило́ги та́емаго,/ вконе́ц горя́щею любо́вию му́ки усво́исте/ и, ны́не в преми́рная жили́ща все́льшеся,/ с Небе́сными ли́ки при́сно весели́теся.

Богоро́дичен: Де́во Ма́ти Бо́жия,/ Его́же во пло́ти Христа́ породила́ еси́,/ непрело́жна пребы́вша си́лою Божества́ и де́йством,/ Того́ приле́жно со все́ми святы́ми моли́ грехо́м на́шим да́ти соверше́нное разреше́ние/ и пре́жде конца́ жития́ на́шего исправле́ние.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Му́ченику: Коль неизсле́дованная насле́дия получи́л еси́ терпе́нием, Нико́лае,/ я́же земны́х ни о́ко ви́де, ни у́хо слы́ша,/ ниже́ на се́рдце челове́ку взыдо́ша когда́,/ но, муче́нием измени́вся, широту́ неизглаго́ланную дости́гл еси́ весе́лия и незаходи́маго све́та.

А́нгельскою любо́вию вои́стинну ко Христу́ распала́емь/ и жела́ние к подо́бию простира́я,/ о́браз честна́го первообра́зия, я́коже сокро́вище, в не́дрех скрыл еси́/ и написа́ние ца́рския печа́ти,/ во́инство же своея́ ве́ры Царю́ своему́ возложи́в, кровь свою́ по Нем пролия́л еси́.

По́двига твоего́ терпе́ние изве́стно всем показа́/ и наде́жду твою́ несолга́нну яви́ Христо́с,/ на Него́же упова́л еси́, Нико́лае;/ сего́ ра́ди ве́рнии ужаса́ются, малоду́шнии:/ отку́ду кре́пость ра́зуму подаде́ся ти,/ а́ще не Призва́вшим тя к страда́нию, присносла́вне.

Мучеником: Оте́ческаго до́ма возвраще́ния/ и, я́же на три́знищи, побе́дных по́честей жела́юще,/ ели́цы до́брыя па́мяти су́ще незабы́тливи,/ ва́ия взе́мше, цве́ты доброде́телей, му́чеников усря́щим, хвалу́ Бо́гови возсыла́юще,/ их ра́ди всем нам да́рующему ве́лию ми́лость.

Богоро́дичен: Раб Твой аз и сын рабы́ни Твоея́, держа́вная всех Цари́це,/ за неусыпа́ющую мольбу́ я́же к Сы́ну Твоему́ и Бо́гу/ приими́ моего́ се́рдца сокруше́ние и оче́с сле́зы,/ моля́щи рожде́ннаго от Тебе́ Судию́,/ я́ко да десны́я ча́сти сподо́бит мя в день Суда́.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Му́ченику: Быв умерщвле́н, неве́рие зде́шних непщева́ше тя погреши́ти благонаде́ждия путь/ и в мо́ри погруже́нна волна́ми отчая́ния,/ но ты, я́коже Ио́на из чре́ва ки́това, малоденству́я, воззва́в,/ от Го́спода Бо́га твоего́ услы́шан был еси́.

Его́ призыва́ющим Ско́рый Послу́шатель Бог тебе́ в волне́нии жре́бий возложи́,/ в пучи́ну страда́ний самоизво́льне вве́ргнутися,/ но, я́коже по Бо́зе жив от них изше́д,/ градово́м пропове́дуеши спасе́ния покая́ние му́ченическим терпе́нием твои́м.

Де́лом по́двига твоего́ леня́щимся/ проре́кл еси́ не отчаява́ти своего́ спасе́ния,/ но от пре́жних злых отступа́ти и смире́ние лобза́ти:/ страда́нием бо твои́м чу́дный яви́лся еси́ пропове́дник благода́ти позна́ния,/ кровь твою́ неща́дно за Христа́ пролия́в, Нико́лае.

Мучеником: У́бо тве́рдость терпе́ния ва́шего, Гео́ргие,/ земны́ми вещми́ изобрази́ти немо́щно кому́ николи́же:/ в безду́шных адама́нта, в одушевле́нных же се́рдца ва́шего ничто́же крепча́йше,/ вели́ким бо упова́нием с Гео́ргием други́м и Никола́ем сла́вным преидо́сте отсю́ду, ра́дующеся.

Богоро́дичен: Еда́ ли когда́ не вско́ре явля́ешися взира́ющим на си́льный Твой покро́в, Влады́чице ми́ра?/ Ины́я бо наде́жды несть спасе́ния рабо́м Твои́м по Бо́зе,/ зане́ вы́сшую Тебе́ дарова́ сла́ву Рожде́йся из Тебе́/ и прекланя́ется проше́нию Твоему́, Тебе́ то́кмо хотя́щей.

Конда́к, глас 2.

Подо́бен: Вы́шних ища́:

Благоче́стия и́стиннаго побо́рника/ и в беда́х непобеди́маго помо́щника,/ Боже́ственнаго Никола́я в пе́снех восхва́лим:/ сей бо яви́ся в после́дняя ле́та звезда́ пресве́тлая,/ просвеща́ющая ве́рных сердца́,/ и, со А́нгелы ны́не Тро́ице предстоя́,/ непреста́нно мо́лится о всех нас.

И́кос:

Свяще́нный соверша́ет Це́рковь днесь пра́здник,/ све́тло пропове́дающи до́блественныя боле́зни но́ваго му́ченика Никола́я/ и я́же па́че естества́ боре́ния,/ и́миже низложи́в многоко́зненнаго врага́,/ бысть сла́ва страда́льцев и похвала́,/ му́жества же столп и свети́льник всем, благоче́стив того́ чту́щим./ Но я́ко пропове́дник и́стины и вене́чник,/ со А́нгелы ны́не Тро́ице предстоя́,/ непреста́нно мо́лится о всех нас.

Песнь 7

Ирмо́с: Вети́и яви́шася о́троцы любому́дрейшии дре́вле,/ от богоприя́тныя бо души́, богосло́вяще устна́ми, поя́ху:/ Пребоже́ственный отце́в и наш Бо́же,/ благослове́н еси́.

Му́ченику: Всели́в в ду́шу твою́ трие́х, и́же в Вавило́не, отроко́в терпе́ние, присносла́вне,/ превозше́л еси́ я:/ ти́и бо позна́вше, прореко́ша себе́ избавле́ние,/ ты же проста́го страда́ния и сме́рти произво́лил еси́, зовы́й:/ оте́ц на́ших Бо́же, благослове́н еси́.

Отда́в Бо́гу плоть свою́,/ дар соверше́н себе́ вручи́л еси́, многострада́льне;/ по сме́рти же те́ло твое́ огню́ преда́вше злочести́вии,/ я́ко зла́то в горни́ле, очи́стиша/ и нам всесожже́ние Боже́ственное оста́виша, пою́щим:/ оте́ц на́ших Бо́же, благослове́н еси́.

Сокруше́н ка́мением исхо́д твой неве́рным вмени́ся/ и безу́мие им смерть твоя́ возмне́ся,/ но упова́ние твое́, безсме́ртия испо́лнено, яви́л еси́/ и страда́ния о́браз всем показа́лся еси́, пою́щим:/ оте́ц на́ших Бо́же, благослове́н еси́.

Му́чеником: Пою́щих вас и ве́рою покланя́ющихся честны́м ва́шим страда́нием/ ду́ши спасти́ и мир умири́ти моли́теся, святи́и му́ченицы,/ я́коже бо све́та ко тьме ра́знствие,/ си́це выспрь от нас возлете́сте, зову́ще:/ оте́ц на́ших Бо́же, благослове́н еси́.

Богоро́дичен: Обрела́ся еси́ в ро́дех челове́ческих, Богома́ти Присноде́во,/ еди́на До́брая и Преблаже́нная,/ пло́тски объя́вшая и воздои́вшая Его́же трепе́щет вся тварь;/ Того́ приле́жно моли́ упова́ющим на Тя ве́чных благ не погреши́ти.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Му́ченику: Е́же к тебе́ на́шего любле́ния не забу́ди, присносла́вне Нико́лае,/ та́мо ны́не водворя́яся, иде́же шум пра́зднующих му́ченик и А́нгел,/ но, я́коже сам измени́лся еси́ лу́чшею жи́знию,/ моли́ся преме́ншимся нам недале́че тебе́ яви́тися, пою́щим:/ благослови́те, вся дела́ Госпо́дня, Го́спода.

Вели́ким страда́нием и кро́ве излия́нием о́гненный столп целому́дрия яви́лся еси́,/ разреши́ша бо ся земна́го естества́ омраче́ния/ и све́тел храм себе́ очи́стил еси́ Пресвято́му Ду́ху,/ Его́же ны́не соверше́ние в себе́ позна́в, зове́ши:/ благослови́те, вся дела́ Госпо́дня, Го́спода.

Адама́нтски кровь свою источи́л еси́, не посрами́в упова́ния своего́,/ но восте́кл еси́ в соверше́нную к Царю́ всех высоту́,/ Его́же приле́жно моли́ ка́плей слез на́ших не отврати́тися,/ с пла́чем и се́тованием Ему́ зову́щих:/ благослови́те, вся дела́ Госпо́дня, Го́спода.

Мучеником: Ю́же ны́не пра́зднуем,/ честна́я па́мять ва́ша у́тро яви́ся духо́внаго и при́снаго весе́лия гра́ду ва́шему,/ в не́мже пострада́вшие, вели́ких и ди́вных сподо́бистеся,/ но и вся подсо́лнечная ва́ше му́дрое терпе́ние ублажа́ет, воспева́ющи:/ благослови́те, вся дела́ Госпо́дня, Го́спода.

Богоро́дичен: Весе́лие ве́чное и ра́дость ми́ру ро́ждшая, возвесели́ ду́ши на́ша,/ я́ко да в тишине́ се́рдца богоуго́дни всегда́ яви́мся,/ за́поведь Сы́на Твоего́ соверша́юще,/ И́же в не́мощь на́шу нас ра́ди обо́лкся,/ си́льных нас в кре́пости Боже́ственней соде́ла.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Му́ченику: Си́льных в сло́ве и кре́пких держа́вою прови́дев злове́рие, Нико́лае,/ и ме́рзость вмени́в с ни́ми вселе́ние,/ сла́дце па́че восприя́л еси́ сме́ртию ско́рою избежа́ти тех злово́ния/ и, ка́мением побие́н, ко Христу́ восте́кл еси́, ра́дуяся.

Лжу тще́тну вмени́в ага́рян пре́ния,/ не уве́девших смотре́ния Бо́жия, ни та́йны позна́вших,/ но усты́ ху́льными глаго́лавших на Бо́га непра́вду,/ Христа́, Бо́жию си́лу и Прему́дрость, пред ни́ми испове́дал еси́/ и Его́ ра́ди стра́шныя всем сме́рти не ужа́снулся еси́.

О́ком мы́сленным разсмотре́в привре́менная,/ я́ко вся се́ни и сну подо́бна,/ сме́рти же не убоя́вся, но па́че бла́го вмени́в, е́же по Христе́ во́лею умре́ти,/ с Ним просла́вился еси́ и стра́шен сме́рти показа́лся еси́,/ сию́ попра́в во́льным терпе́нием, подо́бяся Влады́це своему́.

Ве́ру не на́гу показа́л еси́ Бо́гу твоему́, Нико́лае,/ па́че же сопря́гл еси́ ей дела́ пра́вды терпе́нием:/ что бо си́льнейше твои́х муче́ний и что приболе́зненно па́че сме́рти,/ на ню́же ты укрепи́вся во́льным произволе́нием,/ Го́сподеви обе́ты своя́ в де́лех ве́ры прине́сл еси́.

Му́чеником: Е́же о́ко не ви́де, ни у́хо слы́ша,/ ни на се́рдце челове́ка взы́де угото́ванное вам возме́здие,/ его́же ра́ди до́брыми преложе́ньми во́льную по Христе́ смерть восприя́сте,/ и ны́не, со А́нгелы водворя́ющеся, при́сно мо́лите Христа́ Бо́га на́шего,/ да сопричте́мся ва́шему ликостоя́нию.

Богоро́дичен: А́ще и согреша́ем, раби́ Твои́, Ма́ти Жива́го Бо́га,/ но оба́че, Твои́ми хода́тайствы объе́мши,/ моли́ Сы́на Твоего́, да не вконе́ц разгори́тся на нас я́рость Его́,/ ино́го бо Бо́га не ве́мы, ра́зве Того́, смире́ннии,/ ниже́ крепча́йшия по́мощи и́мамы, ра́зве Тебе́, Влады́чице ми́ра.

Свети́лен, глас 3

Подо́бен: Посети́л ны есть:

Посеще́ния от преми́рныя сподо́блься сла́вы, великому́чениче Нико́лае,/ и муче́ние терпе́нием победи́в,/ А́нгелы удиви́л еси́ и бе́сы посрами́л еси́/ простото́ю нра́ва Христа́ Бо́га на́шего.

Сла́ва, и ны́не, пра́здника или́ Богоро́дичен:

Покажи́ ско́ро си́лу Твою́, Ма́ти Жива́го Бо́га,/ и кре́пость дел Твои́х на нас, под кров Твой прибега́ющих,/ ничто́же бо сопротивля́ется вла́сти Твое́й, Влады́чице Всемогу́щая.

На хвали́тех поста́вим стихо́в 4 и пое́м стихи́ры, глас 4.

Подо́бен: Я́ко до́бля:

Сла́вных по́двиг твои́х терпе́нием, страстоте́рпче Нико́лае,/ А́нгелы с челове́ки удиви́л еси́:/ ка́ко, пло́ти сопряже́нный,/ боле́зни попра́л еси́/ любве́ ра́ди Христо́вы/ и, я́коже и́скра о́гненная,/ на Не́бо вскочи́л еси́ си́лою ду́ха,/ иде́же ны́не досто́йно ублажа́ешися,/ я́ко учени́к и́стинный/ во́лею по нас пострада́вшаго Христа́ Бо́га на́шего,/ Его́же моли́ от тли и бед изба́витися/ ве́рою соверша́ющим всечестну́ю па́мять твою́.

Твои́м Христа́ раче́нием, страстоте́рпче Нико́лае,/ кре́пкою любо́вию и си́лою ду́ха,/ по́двигом терпе́ния и ра́нами муче́ний/ торжествова́ти с Небе́сными земны́х устро́ил еси́,/ и во еди́но обои́х собра́/ ди́вное твоего́ испове́дания вели́чество,/ е́же си́льных чу́вства потрясе́,/ твое́й дивя́щихся непоколеби́мей ве́ре/ в Христа́ Бо́га на́шего,/ Его́же моли́ от тли и бед изба́витися/ ве́рою соверша́ющим всечестну́ю па́мять твою́.

Яко преизя́щнаго любому́дрия,/ страстоте́рпче Нико́лае,/ и си́лы духо́внаго ра́зума испо́лнен,/ про́стаго же и нехи́тростнаго нра́ва,/ вети́йная плете́ния посрами́л еси́/ твоего́ смы́сла крепкоду́шием/ и я́ко река́, наводне́на и́стинныя прему́дрости/ и орга́н изря́ден показа́лся еси́ Боже́ственнаго Ду́ха,/ и дом красе́н Святы́я Тро́ицы, Бо́га на́шего,/ Его́же моли́ от тли и бед изба́вится/ ве́рою соверша́ющим всечестну́ю па́мять твою́.

И́стины позна́ние и правосла́вия путь/ не си́лою сло́ва яви́ша нам, до́блии страда́льцы,/ но дея́нием потща́шася на себе́ показа́ти,/ терпе́нием и ра́нами свое́ обложи́вше те́ло:/ ов у́бо, огню́ зе́льному совоку́плься, всесожже́ние Бо́гу яви́ся,/ ов же, в высоту́ пове́шен, к животу́ Небе́сному пре́йде,/ сей же, ка́мением посыпа́н, Краеуго́льному присво́ися./ Те́мже получи́ша Ца́рство безсме́ртное, ра́дующеся,/ и мо́лятся Бо́гу о душа́х на́ших.

Сла́ва, глас 8:

И́стинный и́же по о́бразу соблю́дше, му́ченицы, ум-влады́ку/ и не просте́рше мы́сленных рук к отрече́нному ра́зума дре́ву,/ кра́сному виде́нием и сме́ртному дея́нием,/ пра́деднее обнаже́ние покры́та кре́постию страда́ния/ и, я́ко лучи́ но́выя луны́, источи́ша осия́ние,/ к ни́мже воззове́м, глаго́люще:/ о сердики́йская похвало́/ и вселе́нныя в ве́ре утвержде́ние,/ я́ко иму́ще дерзнове́ние ко Христу́ Бо́гу на́шему,/ ми́ра ми́рови проси́те/ и душа́м на́шим ве́лия ми́лости.

И ны́не, пра́здника или́ Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на свята́го пе́сни 3-я и 6-я. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́ти ми ся к Тебе́. Апо́стол к Тимофе́ю, зача́ло 292. Аллилу́ия, глас 4: Святы́м, и́же суть на земли́ Его́, удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Ева́нгелие от Иоа́нна, зача́ло 52. Прича́стен: В па́мять ве́чную:

Святой великомученик Николай Софийский родился в болгарском местечке Янино в семье благочестивых родителей Мартина и Евфросинии. Едва научившись читать, Николай дни и ночи проводил в чтении душеспасительных книг. Особенно любил он читать жития святых, подражать подвигам которых стремился и сам. Повзрослев, он обучился сапожному ремеслу и своим трудом кормил не только родителей, но и подавал обильную милостыню нуждавшимся.

Святой Николай был благоразумен, добр, красив и строен. Но турки, под властью которых были в то время болгары, не любили таких христиан. По настоянию своих родственников Николай был вынужден бежать. Местом прибежища он избрал город Софию. Жители города, полюбив трудолюбивого, кроткого юношу, решили оставить его у себя навсегда и женили Николая на благочестивой девицехристианке.

Недолго пришлось Николаю жить в безопасности. И здесь, в Софии, турки обратили внимание на его прекрасные качества и решили обратить его в мусульманство. Однажды они пригласили Николая на обед к одному знатному вельможе. На обеде турки предложили испить ему чашу турецкого шербета, в который они подсыпали снотворного. Когда Николай уснул крепким сном, турки совершили над ним мусульманский обряд обрезания. Проснувшись, святой долго оплакивал такое поругание над ним. Тогда же он твердо решил пострадать за Христову веру. На требование муллы, чтобы Николай посещал мусульманскую мечеть, святой проклял лжепророка Магомета вместе с его ложной верой.

Озлобленные турки со страшными ругательствами и побоями повлекли святого Николая на суд, во время которого один из них ударил мученика по голове с такой силой, что раздробил ему челюсть и повредил глаза. Ночью, во время горячей молитвы святого мученика к Богу, Господь совершенно исцелил его, к удивлению всех, кто его видел.

Судебное заседание, состоявшееся на следующий день, признало святого Николая невиновным. И все же, несмотря на решение суда, фанатичная толпа вывела святого мученика за город и убила камнями. Это произошло 17 мая 1555 года. Тело мученика было предано огню, а пепел развеян на четыре стороны света, согласно указанию Корана.

От мощей мученика осталась частица теменной кости, которая сохранилась во время убийства святого страдальца, а также несколько обгоревших костей, которые были бережно собраны христианами и положены в храме, воздвигнутом в его честь. Житие святого великомученика Николая написано современником и очевидцем его невинных страданий диаконом Матфеем Грамматиком.

Литература:

Жития на светите. Синодално издателство. София, 1974.

(Слу ́жбу зри 7 июля)

Тропа́рь, глас 8:

По земне́м вдовстве́ Небе́сному Жениху́ себе́ уневе́стивши/ и в кня́жестем черто́зе подви́жнически пожи́вши,/ по́слежде и черто́г, и чад твои́х Бо́га ра́ди оста́вила еси́,/ преподо́бная Евфроси́ние,/ и, вше́дши во оби́тель, тобо́ю созда́нную,/ во и́ноческом о́бразе мно́ги по́двиги показа́ла еси́,/ и свято́е житие́ по благода́ти Бо́жией блаже́нною кончи́ною увенча́ла еси́./ И ны́не, предстоя́щи Христу́ Бо́гу,/ моли́ спасти́ся душа́м на́шим.

Конда́к, глас 2:

Вся кра́сная ми́ра сего́ я́ко су́етная презре́вши/ и те́ло твое́ посто́м и бде́нием изнури́вши,/ непреста́нными моли́твами Бо́гу угоди́ла еси́,/ преподо́бная Евфроси́ние,/ и, дар исцеле́ний от Него́ прия́ти сподо́бльшися,/ слепо́му прозре́ние/ и мно́гим неду́жным исцеле́ние дарова́ла еси́./ Те́мже ра́достно взыва́ем, глаго́люще:/ сла́ва Бо́гу, прославля́ющему святы́я Своя́.

Святая благоверная великая княгиня Евдокия, в иночестве Евфросиния, родилась в 1353 году. Она была дочерью Суздальского князя Димитрия Константиновича († 1383) и его супруги княгини Анны. С младенческих лет воспитанная в духе христианского благочестия, Евдокия отличалась тихим, кротким нравом, нищелюбием и благотворительностью. В 1367 году она стала супругой благоверного великого князя Московского Димитрия Донского († 1389). Их счастливый союз был залогом союза и мира между Московским и Суздальским княжествами.

Благочестивая христианская жизнь Евдокии содействовала постоянному возрастанию ее в духовном совершенствовании, в котором она руководилась такими великими святыми земли Русской, как святитель Алексий, Митрополит Московский и Преподобный Сергий Радонежский. Преподобный Сергий крестил одного из сыновей князя Димитрия и Евдокии. Восприемником других детей благочестивого семейства был преподобный Димитрий Прилуцкий (память 11 февраля). Большой любовью к Богу и Святой Церкви горела душа княгини. На ее средства было построено много храмов, а в 1387 году Евдокия основала в Московском Кремле Вознесенский женский монастырь, который стал усыпальницей великих княгинь. В 1396 году, при нашествии Тамерлана на южные границы Руси, по ее совету была принесена в Москву Владимирская икона Божией Матери, чудесно защитившая Русскую землю.

Воспитав пятерых сыновей (шестой умер в младенчестве), княгиня приняла монашеский постриг с именем Евфросиния. Еще будучи в миру, святая носила под пышными княжескими одеждами суровую власяницу. Такие тайные для людей, но ведомые Богу подвиги, преподобная Евфросиния продолжала и в монастыре. В молитве и подвиге совершив свой земной путь, она мирно почила 7 июля 1407 года и погребена была в основанном ею Вознесенском монастыре. Память ее празднуется 17 мая и 7 июля. Известен литературный памятник древнерусской церковной поэзии, излагающий оплакивание княгиней Евдокией своего мужа благоверного князя Димитрия Донского, скончавшегося в возрасте 39 лет.

Литература:

1. Бахметева А. Н. Избранные жития святых. Май. М., 1899.

2. Дмитриев Д. Святая княгиня Евфросиния (к 500-летнему юбилею). Сергиев Посад, 1907.

3. Поселянин Е. Московский Патерик. М., 1912.